زواج مبارك الجزء الثامن

أنا أستحق حياةً تُشبهني ، تُشبه نقاء قلبي و عفوية روحي…

أمينة وتوبة دوشوا ليها وجلسوها فوق لفوتاي تيلبسوها حويجها وهيا مرفوعة

أمينة لمحات لماشين توجهات ليها عصرت كاس قهوة إ سبريسو و قالت : اويلي بغيت غير نفهم هاد الشي الي وقع ليها ما ملفاش تكون هك...

اسلام طلقاتها بضحكة وحركات راسها نطقات بلسان ثقيل : نجلاء ظريفة بزاف فرحاتني عطاتني حليب زوين عمري دقت بحالوا زوين بزاف

توبة كتلبسها في سليب صمطةو هيا ما هياش هنا كتتحرك راصها وكتهز بالضحك صغرات عينيها لحمرين وقالت : غنمشي لقمار نشوف نجوم خلوني نمشي وااه

توبة سرفقتها بشوي في وجها باش تفيق وقالت:رصاي أ إسلام خليني نلبسك بقا ليك غير لقمار مزيان "وجهات كلامها ل أمينة " و

سمعت آش قالت باين نجلاء هي مولات الفعلة بنت لحرام

أمينة ساطت بالجهد و قالت بغضب: باين هديك الشيطان اللفعة الكرطيطة هي اللي شربتها شي حاجة في لحليب بغات العائلة نهار لول ياخدوا على إسلام نضرة خيبة

توبة بعصبية ردات : بربي و تطيح بين يدي ديك نجلاء مايفكها مني حد "وجهات كلامها ل إسلام" حلي عينيك و متبقايش غير اللي عطاك شي حاجة تشربيها كيف لبغلة وزيدن من إيمتا ونتي كتشربي لحليب !!

قربات منها أمينة جابت الكاس ديال القهوة شرباتوا ليها بزز منها ، إسلام بدات كتفركل برجليها خرجات لسانها كارها و قالت : مارة مارة خيبة بزاف

أمينة تحنات لمستواها شدات ليها من دراعها موركة عليها خرجات عينيها و من تحت سنانها نطقات:ردي بالك من نجلاء متيقيش فيها هديك راها لفعة باغ تخرج ليك على حياتك أو تدمر ليك زواجك

توبة شدات ليها من كتفها و نطقات بإصرار : نجلاء باغ تاخد ليك راجلك تزوجو بختها مشفتيش فينما كتوقع ش حاجة كتبقا تجبد ختها تقولي غير هيا لي كينا بنت في دنيا،"جمعات حجبانها" هديك مكتحملكش و مكتبغيش ليك الخير و في أول فرصة غتجيها غتطعنك في ظهرك فيقي وبركا من ضحك ...

إسلام راصها بدا كيدور عليها وكلامهم سمم ليها العقل بقات كتستامع ليهم و هضرتهم كتدور ليها في راسها حتى دوختها نطقات بشفايف كيترعدوا :

_واش غتاخد ليا زوين ديالي؟

أمينة وتوبة شافوا في بعضياتهم بعدم فهم ضحكوا بفقصة وحركوا راصهم بإجاب بعدما كملوا ليها لباسها لي عبارة عن سروال توب مع قميحة أونصومبل في لغوز...

إسلام ولات بحال شي بنت صغيرة ولي قالوها ليها كتمشي معها وحنت اول مرة ليها لمهلوس بقا مأثر عليها وخا شربت لقهوة طاحت دمعة من عينيها وقالت بتسأل وهيا ضغطا على سنانها مغزفا:

_بغات تدي ليا راجلي أركان ؟

أمينة وتوبة قالوا دقة وحدة:أيه باغا تديه ليك وتخليك بلاش "توبة بتأكيد نطقات" توكَدي ما تبقايش منونخة ما تخليهاش تضحك عليك

إسلام مسحات عينيها أوقفات شادا في راصها ،ضغطات على سنانها وبشفايف كيترعدوا قالت بتأكيد:

_غنمشي نقتلها !!

لبنات قبل لا يستوعبوا هضرتها دفعاتهم وخرجات غاديا كتجر في رجليها ودور في عينيها:

اللفعة لمسمومة فينك أنصفيها ليك ليوم"غوتات بحر جهدها ولسانها غادي وكيتقال كتر من لول"لفعة لمسمومة خرجي عندي ...

نجلاء كانت خارجة من لمكتب مخصرا سفيتها ما عاجبها حال ماحسات غير بجوج يدين جروها بجهد من شعرها...

إسلام جابدا ليها شعرها من جلدة ،كتمشي وتجي ما شداش في راصها تبعوها أمينة وتوبة مصدومين...

نجلاء مقصحا في شعرها ضغطات على إيد إسلام و بغضب قالت : بعدي مني ل***** الله ينعل ز***** بوك

أمينة وتوبة غير سمعوا معيورها تلاحوا فيها داروها وسط منهم تيقرصوها من لفخاض ويضربوا فيها ونجلاء كتغوت لربي لي خلاقها نتروا ليها تيشرات لغالي لي لابسا حتى تقطع فوق منها وإسلام جلسات في الأرض راصها بدا يعطيها لحريق وعينيها بداو كيتسدوا ومع داك ما طلقاتش من شعر نجلاء بصوت غافت ولسان تقيل قالت...

إسلام : راجلي بعدي منوا ولا نقتلك نتي وختك بغيتي تاخديه ليا وشكون لي غيبوسني "عينيها تسدوا" ياه على حمارة كيف ديرا

أركان جالس في غرفة جداتوا كيهضر هوا وياها على هاد شي لواقع شرح ليها الموضوع باش ما تاخدش موقف من إسلام ، منغامسين في حديتهم حتى كيسمعوا لغوات خرجوا تيجريوا تيقلبوا على مصدر الصوت

توبة غير لمحتهم جايين غمزات أمينة وداروا براصهم تيفكوا وهما تيركلوا من لتحت....

نجلاء بدموع كتغوت:ولدي غتقتلوا ليا ولدي المجرمات هئ هئ هئ غندمكم

أمينة حابسا ضاحكا قالت: نعلي شيطان أختي نجلاء بعدي من إسلام اويلي

توبة شافتهم قربوا طارت على ختها لي نعسات جالسا خربقات ليها شعرها وحيدها ليها إيديها من شعر نجلاء وتكاتها جنب وبدات تغوت:

_ختى ختى حلي عينيك أويلي شنوا درتي ليها حرام عليك

أمينة حتى هيا ماشي من لعاكزين خرجات دموعها بزز وبدات تبكي وتقول:

_صحبتي هاويلي يكما قتلتها هئ هئ "هزات كفوفها لسماء بدات تدعي " بغيت ربي ما عمروا يسمح ليك أنجلاء الله ياخد فيك الحق

أركان غير لمح إسلام طيحا في الأرض عروق يديه ضهروا وجسموا تصلب قلبوا تهز من لداخل خنزر في نجلاء و طار على إسلام هزها بين يديه ما تسوقش الأخرين لي تيشوفوا فيه عقلوا كلوا ولا غير لي مع بين يديه....

نجلاء كتبكي بقات حضياهم حتى ختفاو من قدامها وقلت بصوت باكي :الحاجة تعداو عليها شوفي اش داروا ليا لحويجي"جرحا لي سبب ليها أركان حدا فمها بتسرفيقة لي عطاها سالت بدم من جديد مني تحماو عليها لبنات، شارت لفمها وقالت"ضربوني وجرحوني الحاجة حرام عليهم"وجهات كلامها ل امينة وتوبة" غندكلاري بيكم نصيفكم فين ترباو حاولتوا تقتلوا ليا ولدي

توبة حركات راصها وقالت بصوت حزين:الحاجة حنا ما درنا ليها والوا غير كتكدب علينا ،ختي إسلام مسكينة لي علم الله أشنوا وقع ليها الله ياخد الحق في لي كان حيلة وسباب

الحاجة قصحات شوفة :سيروا نزلوا لصالون وهاد شي لي وقع هنا غيبقا هنا حتى واحد ما يجبدوا من فموا...

نجلاء هزات راصها بصدمة:وحقي الحاجة؟

الحاجة خديجة شافت فيها مخنزرا حركات راصها وقالت: أجي معايا لمكتب نعطيك حقك...

دخلات هيا و لحاجة لمكتب أركان لي كان حداهم وسدوه من لداخل...

نجلاء مع هلكوها عصا ولات حاسا بسخفة بدات تبكي من قلبها وتشكي:تعداو عليا وضربوني الحاجة ما خلاوا فيا غير لي نساو تحماوا عليا بتلاتة بيهم هئ هئ هئ ما راعاوش ليا وانا حاملة بغيت حقي الحاجة بغيت حقي

الحاجة خديجة بتسمات بستهزاء :سدي عليا فمك وباركا من تبوحيط ،عرفتك أشنوا درتي لبنت وعلى قبل داك لولد لي حاملا بيه غنطر نسد فمي وما نقول والوا لراجلك "رفعات صبعها وقالت بتهديد" أخرى مرة دوري ب إسلام ما بغيتش نحط يدي عليك"شارت لجسد نجلاء كارها" ونتي لي فيك كافيك

نجلاء بصوت باكي نطقات :ولا كين أنا

الحاجة قاطعتها: داك شي لي درتي ليوم تقدري تمشي عليه لحبس لبنت كون نتحرات ولا وقعات ليها شي حاجة وداك شي لي شربتيها مجهد ،كون ماتت وهاد شي كامل علاش على قبل حنت رفضنا ختك ما زوجنهاش ل أركان "تنهدات من لداخل وقالت بهدوء" ختك ما صلحاش لزواج وما تليقش لحفيدي غير حيدي هاد لفكرة من راصك وقولي ليها ضبر فشي جهة أخرى

نجلاء مسحات دموعها و نطقات :عرفاك ما كتحملينيش وهيا عزيزة عليك انا من نهار لول لي دخلت فيه لهاد رياض كنت حاسا بيك ما كتبغينيش ...

الحاجة خديجة ساطت بجهد: هاد لهضرة ما عندها حتى لزوم دابا لي كيهمني هيا سمعة لعائلة ما بغيتش عباد الله يضحكوا علينا ويقولوا عيالات ولادهم مضاربين حنا كنا عائلة متالية من زمان وغنبقاو هاكا...

الحاجة هزات جلايل تكشيطتها من جناب وخرجات خلات نجلاء كتفور من لداخل بعصبية بدات كتلوح لملفات كلهم لفوق لمكتب في الأرض ونضراتها مضلمين

_لا لا لا علاش ديما كيطرا ليا هاد شي علاش

دورات عينيها في لمكتب كارهاه حنت دربها فيه أركان وحدرتها لحاجة حتى هيا ،سدرها ولا يطلع وينزل غوتات بحر جهدها:

_كنكرهك كنكرهك تفواا على بلاصة كيديرا يخ "دربات رجليها مع الأرض وخرجات "

*داخل صالون جالسة رحمة كتستامع لكلام توبة وأمينة تيعودوا ليها ما طرا أما فريدة غير نوضتها معاهم وخرجات قبل لا توقع لمطايفة ...

رحمة حطات سبعها على دقنها ونطقات بعدم رضا:حشومة هاد شي لي درتوا كون ماتت ليكم لبنت بين يديكم الله يحضر السلامة وهيا حاملة من لفوق ديما يديكم سابقا فمكم الله يستر "حمرات فيهم" تعلموا تشدوا يديكم عندكم

توبة بعصبية نطقات:نجلاء حريمية هيا لي جبداتنا حنا كنا غير غنفكوا ونبعدوا وليني هيا عيرات بابا الله يرحموا ،ناري كون كانت في درب عندنا والله القسام ما نطلق جد بوها

رحمة شافت فيها بتخنزيرا:زمي فمك حنا في دار ناس اش هاد لهضرة "حركات راصها بحسرة " ها علاش ما بغيتش ختك تزوج من عائلة لباس عليها

أمينة رفعات حجبانها بستغراب و قالت: هما ما عندهم ما داروا ،ديك بنت لهم هيا لي درات كلشي، ناري دبرات عليها معانا والله وطيح بين يدي حتى نغززها بسناني

دخلات لحاجة بملامح ممحية بخجل واضح من تعابيرها حشمانة منهم قالت:لالة رحمة سمحوا لينا بزاف هاد شي لي وقع ما غاديش يتكرر إنشاء الله وداك شي لي قالت فريدة راها غير كانت معصبة ما تديش عليها

لالة رحمة تنهدات من الأعماق بحال هازا شي جبل فوق كتافها : اودي الغلط كيوقع والمسامح كريم غير هوا بنتي أمانة عندك الحاجة الله يستر عليك ردي ليها لبال"جمعات نوضة" خاصنا نرجعوا لدار خلينا ليكم الراحة

الحاجة خديجة:لاواه جلسوا حتى تغداو معانا بعدا عاد يوصلكم شيفور حتى لدار

لالة رحمة: مرة خرا إنشاء الله خلينا أمير بوحدوا مع عمر وهوا خاصوا يمشي لافاك وأمينة حتى هيا كيتسنا فيها راجلها...غير بصحة وراحة بحال الى كلناه...

أنا معك في حزنك قبل سعادتك في تعبك قبل راحتك ويدي بيدك إلى الأبد

حطاها فوق سرير بشوي و بقا كيضرب في وجها بخفة و الخوف متملكوا، عقلوا كامل معها ....

أركان عينيه خارجين وملامحوا دم مخطوف منهم بصوت حزين قال : إسلام "غوت بخوف"حبيبة حلي عينيك

شافها ما فاقتش ولا سدروا كيطلع وينزل هز يدها بين يديه بدا يفرك في راحة إيديها من لداخل ...

سرط ريقوا بصعوبة و قلبوا ولا يخبط وسط صدروا بجهد ناض بزربة هاز كاس تيعمر فيه بالماء وضاغط على سناونوا كيتحلف على نجلاء داخلوا

إسلام حلات عينيها بشوي ورجعات سداتهم وراصها عاطيها لحريق جمعات فمها وقالت بلسان تقيل:

_لفعة لمسمومة ما نخليكش تاخدي ليا راجلي "بصوت ضعيف"أنقتلك بيدي شكون غيبوسني لا زوجتيه لختك؟ شكون ؟!!

صوتها دخل ليه لودنوا بحال مهدئ جلب راحة لجسموا المتصلب كامل لي كان تيغلي ويفور على شويا كان غيخرج يكمل على نجلاء

أركان بالفرحة ضحك من قلبوا و كلامها جاب ليه تمام ، طار لعندها والكاس بين يديوا خشا درعوا تحت ضهرها كَعدها بشوي وحط لكاس ديال لماء على شفايفها بدا تيشرب فيها وعينيه كيبريوا متبعين حركاتها...

بعد لكاس ومسح ليها قدرات لماء لي نازلين جنب فمها بيديه قادها في بلاصتها وهوا يلمح شي حاجة واسط يدها جامعها بقبضة لوسط ...

خدا إيديها وسط يديه وبدا يفتح فيها بشوي

بصدمة تبسم مبهوض من كمية زعب لي شداه عرفها نتفات نجلاء وعجبوا لحال حنت عبارات عليها...

غطاها أو وقف ماقبل معا نافدة خاشي يديه في جيبوا كيفكر في كلام حبيتوا لي خيفا عليه لا يطير بين يديها وسط تفكيروا رسم شبه إبتسامة على محياه ما عمروا ما كان كيتوقع بلي غيجي شي يوم غيبغي فيه شي بنت من كل قبلوا طول عمروا كان عاطي كل أولوياتوا لخدمتوا وعائلتوا ،تنفس براحة و دور راصوا ناحية إسلام نضراتوا بقاو كيتأملوا فيها للحضات وهيا ناعسة مكمشة ما جايبا لدنيا خبار...

تبسم و مشا جلس في فوق لفوتاي خدا لبيسي حطوا قداموا فتحوا و بقا مقابل خدمتوا ومرة مرة كيشوف في ساعة ويرجع يحقق في إسلام لي مزال ناعسا دازوا ساعات وهيا مزال على نفس لحال...

*سمع لباب كيدق كمش حجبانوا أو ناض فتح

نرجس ببتسامة قالت: سلام خويا قالت ليكم جدة نزلوا تغداوا

أركان حرك راصوا وقال:بصحتكم غير تغداو ما تسناوناش

نرجس كمشات حجبانها ونطقات : علاش واش ما فيكش جوع امم على الأقل خلي إسلام تنزل تغدا معانا

أركان ببتسامة مزينة ملامحوا رد عليها: إسلام مريضة شويا وأنا عندي شي تصاميم خدام عليهم "جمع حجبانوا وقال بتسأل " كيف غادا في قرايتك ؟

نرجس تبسمات جنب: كلشي مزيان تنجيب نطاق مزيانة غير اللغة لعربية لي ما جبتش فيها نقطة زوينة"بتعب" يالله جيت من ليكول كان عندي فرض

أركان قصح شوفة و بصرامة قال : ديها في قرايتك أ نرجس ركزي في دروس كلشي ساهل غير حلي عقلك، ما تهتاميش بالخوا لخاوي في أي خطوة بغيتي ديرها فكري في مستقبلك وسمعة العائلة

نرجس بلعات ريقها بخوف و بصوت ضعيف قالت: وخا أخويا كون هاني

أركان دور إيدوا على كتفها خشاها في حضنوا وقال برضا:الله يرضي عليك "حرك راصوا ونطق بتأكيد "إلى حتاجيتي أي حاجة جي لعندي

نرجس بعينين تيلمعوا : شكرا

خرجات من بيتوا وقلبها غيسكت بالخلعة حنت تيلفونها كيفيبري في جيبها تخبات في بيت ضيوف لي حدا بيت خوها ..قبلات الإتصال لي كان أبيل فيديوا قدات شعرها وجوبات بعدما قابلت تيليفون معها..

مراد كيكمي في سيكار بين يديه واقف في لبالكون قال بغضب:

_على سلامتك الالة نرجس ملي تنازلتي وجوبتي

نرجس نطقات بتراجي:سمح ليا كان حدايا خويا ما قدرتش نجاوب نتا صفا

مراد ساط دخان وقال:ما صافا ما والوا نتي بعيدة عليا كيفاش بغتيني نكون بيخير

نرجس كمشات حجبانها بحزن:سمح ليا ما نقدرش نشوفك عندي لمتحانات وعاد خويا مراقبني الى عرفني تنهدر معك بسر غيقتلني

مراد بتراجي: ولكن أنا توحشتك العمر ما بقيتش قادر نصبر

نرجس مالقات ما تقول بلعاات ريقها وبقات كتشوف ..سمعات صوت فريدة كتنادي عليها من توتر تيليفون زلق من بين يديها بلخوف ...

تحنات هزاتوا وخرجات تجري وقلبها غيسكت من لخلعة....

حلى لمساء و تأتير لمهلوس بافعل لقهوة بدا كيتلاشى حلات عينيها لي تنفخوا بنعاس، و جسمها كلوا حسات بيه مدكْدكْ وعروق راصها تنخفوا جلسات بعدم راحة مكمشة حجبانها صاحت بألم :

_أيييي راصي تيحرقني بزااف

أركان بسرعة مشا جاب ليها كينة ديال حريق راص عطاها ليها شربتها مع لماء...

إسلام حطات إيديها على راصها وقالت بصوت هادئ عند بالها كتهضر مع راصها:

_شنوا وقع ليا أوف نعست بزاف و من قبيلا وأنا تنحلم براصي مداربا مع نجلاء ،نتفتها مسكينة

أركان وقف مقابلها طاوي يديه عندوا وعضلاتوا بارزة ضحك من نيتوا وقال: نتي راه نتفتيها ديال بصح ماشي غير حلم

إسلام بصدمة خرجوا عينيها :أشنوا ويلي حشومة

أركان قرب منها حتى ولا وجهوا حدا وجها بتسأل نطق بصوت حنين:باش كتحسي باقي فيك لحريق نديك عند طبيب

إسلام حركات راصها بنفي وبخجل قالت:

_تيدرني شويا ،ما كينش لاش نمشي عند طبيب شويا ونولي بيخير"صغرات عينيها وبصوت ضعيف قالت" واش بصح درباتها وعلاش ؟؟ "بعدم رضا قالت"دابا كلشي غيتقلق مني غياخدوا عليا نضرة خيبة

أركان خشا وجهوا في عنقها كيستنشق ريحتها بشوق خلا وجها كلوا تسبغ بالأحمر هز عينيه لمعسلين فيها وقال بجدية: حتى واحد ما غيعاتبك ، نجلاء هاداك هوا جزائها "خطف إيدها وشدها بين يديه بجدية أكبر قال:إسلام خرجي نيابك ولي عضك مرة عضيه جوج مرات ما تسكتي لحد نتي وقع ليك هاد شي كلوا بسبب شي مخدر حطاتوا ليك نجلاء في لحليب ما تبقايش تاكلي حتى حاجة من عندها،من ليوم ما تخاليهاش تقرب من جيهتك ما عمرك ما تسكتي لبنادم هاكا غيسحابوك ضعيفة

إسلام بصوت رقيق قالت :عندك الحق ولكن هادشي ما عندوا فاش غينفع غير غتشتت العائلة وماما ديما كتقول ليا لي دار فيك شر ديري فيه الخير حتى خيرك يغلب على شروا وربي كبير سبحانه وتعالى ولا عاملتها كيف كتعاملني غنولي بحالها وما غيبقا حتى فرق بيناتنا

أركان ما لقا ما يقول في كلامها لي كوالوا صحيح تبسم جنب وقال بعينين تيلمعوا:

كلامك صحيح غير هوا ما تخليهاش تأديك عل الاقل دافعي على راصك اوك

إسلام حركات راصها بإجاب

هز إيديها قبلها بحب قرب منها كتر عنقها بخشاها في حضنوا لحنين وقال بصوت رجولي خشن:

_ شنوا تبغي تاكلي نخرج نجيب ليك؟

إسلام بحزن قالت: خاصني نعتادر من العائلة "بعدات منوا وقالت بجدية"أركان واش انا درت شي حاجة خرا من غير نتفة لي عطيت لنجلاء"

إسلام بدات كتدكر شي لاخر لي دارت بقات مراقبا ملامحوا وكتدعي في خاطرها باش يكون لباقي مجرد حلم

أركان همس حدا ودنها بصوت مبحوح قال: من صباح ونتي تبكي وتبعاني وتقولي بوسني أزوين بوسني ما كنتش عارف راصي كنعجبك لهاد دارجة

إسلام وجها تسحق منوا دم ما صابت الأرض تشق وتبلعها

أركان قرب منها وقال: ما نستاهلش شي بوسة أحبيبة اري شي وحدة

إسلام بخجل ردات بنفي : لا بغيت ناكل فيا جوع

أركان كمش حجبانوا ونطق بغمزة: كون غير بقيتي مقرقبا حسن

قاطعهم صوت تيليفونوا هزوا لمح في شاشة مكتوب إسم لبنى قبل الإتصال بسرعة

أركان بجدية قال:

_الوا وي لبنى

لبنى بصوت حزين نطقات بتنهيدة طويلة: مسيوا أركان واقعات واحد لمشكلة كبيرة في شاريكة جديدة لي في أوروبا

أركان جمع لوقفا مكمش عجبانوا بتسأل نطق: شنوا واقع ؟

لبنى بتردد ردات :لمدير تنفيدي لي عينتي في شركة AR لقاوه مقتول داخل لمكتب ديالوا هاد صباح وبما أنك نتا هوا صاحب شاركة ولاد بدا ما خاصك تسافر لندن لبوليس ديال تما طلبوك باش تحضر

أركان حس بجناوا تغرسوا في قلبوا سيد لي عاطيه مجلس الإدارة عندوا عزيز بزاف وهوا سيد محترم مقابل خدمتوا ما كيهزش راص حس بلي شي مأمرة مستهدفينوا فيها عض فموا من لداخل و سرط ريقوا حتى تفاحة أدم تحركات في حلقوا بعصبية خبط ايدوا مع لحيط :

_شكون هاد ولد ***** لي قتل سيد "زفر بجهد" حجزي ليا لأول طيارة غاديا لتما "من تحت سنانوا غوت "دابا أ لبني

لبنى حسات بيه غيخرج ليها من تيليفون بتوتر قالت : وخا أسيدي دابا غنحجز دابا

إسلام لبسات في رجليها وقربات ناحيتوا بخوف قالت: مالك شنوا قالت ليك لبنى

أركان تنفس بجهد وقال بهدوئ: كينا واحد لمشكلة في شاركة لي عندي في لندن وأنا داروري ما خاصني نمشي لتما

إسلام دموعها داروا خط على حنيكاتها و بسرعة بداو تينزلوا شلال بصوت مخنوق قالت:

_غتمشي وتخليني بوحدي

أركان مسح ليها دموعها وعنقها كارز عليها: ماتبكيش غنحاول ما نتعطلش ضروري خاصني نمشي كون كان لمشكل بسيط غنصيفط شي موضف يحلوا ولكن لمشكل كبير أحبيبة غنحاول ما نتعطلش...

كنت نديك معايا ولكن نتي مزال ما عندكش لا بسبور لا وراق...

حطا رجل على رجل فوق سريرها الدائري في بيتها كتهضر مع ختها مروى وتشكي عليها حتى لمحات دخول يوسف لبيت طفات عليها وجلسات مقادا بتسأل نطقات:

_صافا أحبيبي ؟!!

يوسف حرك راصوا بإجاب وتحنى لمستوها خطف قبلة من شفايفها ،كمش حجبانوا بقلق وقال: مالك في وجهك

نجلاء سرطات ريقها وقالت :والوا غير قبيلا طحت في دروج

يوسف بخوف حط إيدوا على كرشها:ولدي بيخير باش كتحسي

نجلاء بغضب قالت:بجوجنا بيخير بلا ما تخاف غير طيحا بسيطة هادي

يوسف دوز بإبهاموا جنب شفايفها وقال:باقي ترضي احبيبتي ما بغيتش هاد شي يتكرر

نجلاء جات في بالها اللحضة لي تحاموا عليها من تحت سنانها نطقات مغددة:

_اوك بيبي

واقفا في بيتها لكبير لي غالب عليه لون الأزرق جامعا يديها عندها كتستامع لكلام إسلام بإصغاء...

إسلام بتراجي نطقات:خالتي غير سمحي ليا ما عرفتش شنوا وقع ليا سمحي ليا بزاف

فريدة بملامح جدية قربات من إسلام و قالت:

بلا ما تعتاضري مني أبنتي لحاجة عودات ليا كلشي غير هوا هاد لمرة مانبغيش هاد شي يتكرر

إسلام ببتسامة:وخا أخالتي غير كوني هانيا

توجهات لجناح ديالها بعدما عتدرات من لكل تنفسات براحة وغير تفكرات راصها غتنعس بوحدها طاح عليها ضيم دورات عينيها في لغرفة جاتها باردة عكس ملي تيكون فيها أركان ...دخلات لحمام توضات ولبسات لباس الصلاة خدات زربية في الأزرق مرسوم فيها مكة وجلسات في الأرض كتصلى ..بعدما سالات و سلمات حسات بواحد راحة لا مثيل لها هزات كفوفها لسماء ودعات مع أركان في محنتوا حنت سمعات قضية قتل وما بغاتش تدخل في تفاصيل...

دورات إيديها على وجها بعدما قالت أمين بدلات حويجها وجمعات صلاية ....تخشات في بلاصتها ودخلات لوتساب بقات كتهضر شويا مع أمينةوتوبة ديرين جروب ما خااوا ما عودوا ليها على راصها مني سكرات قالوا ليها جات معاك تقرقيبا...

كتضحك من نيتها حتى جاها مساج من عند أركان تيسول فيها على حالها وخبرها من خلالوا أنه قريب يوصل لكازا...

تبسمات بفرحة مني قرات لمساج جوباتوا وطمناتوا على نفسها سولات عليه عاد رتاحت ونعسات...

《مرت خمسة عشر يوم بالمح البصر على غياب أركان》 ...في هاد لوقت مشات أمينة لدارها في الدارالبيضاء و بعد تلاتة عشر يوم طلبات راجلها رجعها لجديدة ما كتسخاش بعائلتها وحبابها ...

هناء وراجلها سفيان مزال في لحبس لليوم وحنت راجل أمينة كوميسر تواجه هوا بات هناء لي بغا يخرجها وحلف عليهم كريم لا خرجات حنت ضربت مراتوا بحجرة...

الشرطة في لندن مزال فاتحين تحقيق على قضية موت المدير تنفيدي لشركة السيارات الحذيثة AR...أركان في هاد لمدة طر يجلس يخدم تما على ما لقا مدير جديد يسلموا لمنصب ديال سيد لي مات وحلف لا رجع حتى يعرف شكون قتلوا طول لوقت ولا ضاغط على شرطة باش يعرفوا مول لفعلة والسبب رائيسي مورا قتلوا باغا ياخد ليه حقوا بأي طريقة...

وكل ليلة تيهضر مع إسلام يتطمن عليها...

أما نجلاء حولات حتى عيات أنها تستفز إسلام بكلام جارح ولكن إسلام طول هاد لمدة كانت عاطيها نخال كتستامع لكلامها حتى تسالي وكتبسم في وجها وتمشي كتخليها تغلي من لداخل...

وإسلام زادت تقربات من لحاج لي ولات كل نهار كتجلس معاه هوا وعدنان في الغرفة المخصصة لصالات تيعود ليهم على قصص الأنبياء ولحكايات لقديمة ديال لمعجزات لي وقعوا في عهد الرسول والأنبياء ..و بدات كتعلم شويا طبخ على إيد الحاجة خديجة لي ديما واقفا معها...وفريدة كتعامل معاملة باردة مع إسلام ما عندهاش معها..

أما نرجس كل نهار كتهضر مع مراد وشافتوا جوج مرات في مكان عام بعدما سافر خوها وعمر كتاصل بيه أحيانا تيشرح ليها رياضيات ولفزياءوعلاقتهم مأصدقاء زادت قوات ...

متكيا في بونجة وسط سطح وجها صفر ونقطة ديال دم ما فيهش في جنبها محطوطة سينية صغيرة ديال أتاي و طبيلة صغيرة دائرية محطوط فيها زرع جلسا تنقي فيه رحمة وتوبة واقفا جنبهم كتنشر في لحويج...أما أمير مشا لمدراسة وعمر في لافاك..

أمينة بعصبية نطقات: هاد لبرهش ما يخليوا حد يتسنط لعضاموا تفو بغيت غير نرتاح شويا داروا ليا لقوق في راصي

توبة نفضات تريكوا ونشراتوا قالت :هادوا هما الأحياء شعبية الحق على مواتهم على الأقل حتى يبرد الحال ويخرجوهم لزنقا غتدربهم شمس

رحمة بتسأل نطقات:كيف بقيتي أبنتي شويا من ردان

أمينة نطقات كارها:بقيت كنرض حتى حست بمصارني غيخرجوا غيكون درني داك سندويتش لي خديت من سناك عمي براهيم

توبة : ما يكمنش عمي براهيم ديما كنشريوا من عندوا طيابوا نقي وبنين

أمينة غمضات عينيها وقالت :ما نعرف يمكن حنت كترت شكلاط لي جاب ليا كريم تشهيتوا بلا قياس وتغلط داك شي غيلف ليا على قلبي

رحمة عينيها لمعوا ببتسامة قالت:يمكن أبنتي تكوني حاملا مبروك عليك

توبة بتأكيد نطقات بفرحة: لعوارض لي فيك ديول لحمل هيا نزغرت

أمينة تصدمات وبتعب قالت :لا أمي رحمة ما يمكنش مزال لحال "تبسمات جنب " امم ما نعرف انا ما كنفهمش في هاد شي حتى لغدا نمشي ندير تيست ونشوف واش كلامهم صحيح "غمضات عينيها بغا تنعس وعود حلاهم كارها"تفواا واش انا ما نعسش ياخ زوت على بعالك

وقفات على طولتها مخنزرا لبسات في رجليها ....

و نزلات كدردك في دروج ،توجهات لكوزينة نيشان هزات جنوية وتوبة تابعها خيفها لا تقتل شي حد حلات باب دار وخرجات لدرب غادا وكتشتف برجليها طارت على لكورة هزتها من وسط رجلين دراري يتلعبوا بيها قسمتها على نص وحطات ليه طرف فوق راصوا و قالت وهيا مخرجة عينيها:

_هاك وسير ديرها طربوش " حطات ليه نصف لخر في يدوا " وهادا بدل بيه

دري وجهوا حمر بشمس بدا يبكي ونيوفوا ديزين :مامااااااا واااعععععع كورتي

أمينة مخرجا عينيها بصوت مرتفع قالت: سير قولها حتى لجدك البرهوش لاخر مزيان تبارك الله أنا ما نعسش ياخ على بعلوك كيف دير

أمينة جرات توبة لي بقات واقفا مصدومة وسدات لباب خلاتوا يبكي

حطات جنوي في لكوزينة ورجعات لبلاصتها جلسات فيها بعدما كبات كاس ديال اتاي:

_دابا عاد غنشرب أتاي في راحتي الله على راحة الله ما بقاش البالي يخمم ...

توبة حركات راصها وقالت:اويلي خليتي دري يبكي مسكين حشومة عليك...

أمينة رفعات حجبانها :يستاهل لوالديه

توبة بعدم فهم :تي راجل يومين هادي ونتي هنا مخلياه بوحدوا غتبقاي هاكا حتى تديه ليك شي وحدة

أمينةرتشفات من كاس أتاي وقالت :ما كينش لي تحط عليه لعين وعرفاه راجل أمينة بنت لعربي وزيدن راه عندوا لخدمة كل مرة خارج ليهم مجرم ولا شفار من جنب خاصوا يشدوا"تقدات في كلستها" يختي واحد لواحد شدوه لقاوه شافر سليب ديكلارا بيه مول لمحال

توبة تفركْعات بضحك حتى أتاي خرج ليها من نيفاها :اويلي على لخانز لاخر،مسكين كون غير خلوه ليه يلبسوا

رحمة حركات راصها بعد رضا: سرقة حرام أبنتي خاصوا يتعاقب ولي خون إبرة يشفر ثور

سمعوا دقان في لباب مجهد وقفات توبة كطل لقاتها سميرة مرت مول لفاخر وقفا هيا وجوج ولادها واحد منهم قطعات ليه أمينة لكوراة

أمينة بتسأل قالت:شكون دق ؟!!

توبة تبسمات جنب وردان عليها:هادي سميرة ام دري لي قطعتي ليه لكورة

أمينة خرجات عينيها: يكما جات بغا شي قتلة من عندي صبري نكمل كاسي ونهبط ليها

رحمة حمرات فيها:كوني تحشمي سيدا درويشة داخلا سوق راصها وعزيزة عليا نتي لي كطيري اش قربك لكورة دري"وجهات كلامها لتوبة" سيري حلي ليها لباب قولي ليها طلع لهنا...

طلعات لعندهم سميرة او ولدها صغير لاصق فيها سير كيبكي هادا هوا حالوا ديما او لكبير لي قطعات ليه أمينة كورتوا كيعوج في أمينة من مورا موا....

رحمة بوجه بشوش:دخلي أبنتي سميرة مرحبا بيك أجي تبركي

سميرة :ترحب بيك جنة أمي رحمة

توبة وجهات كلامها لدري صغير:مالك غير تابع مك وتغرنك كيف لفلوس ليتيم

سميرة برضا قالت:هانتي تشوفي اختي نهار ومطال وهوا لاصق ليا في جلايلي ويبكي

طفل لكبير أيوب يتنغز في فموا لي خداها

لحديت مع رحمة كتسول على أمور إسلام

سميرة بعصبية نطقات:نتا رصا أداك جيفة لكحلة"وجهات كلامها ل أمينة" نسيت ما قلتش ليك علاش جيت بغيت غير نشكرك أختي مزيان مني هنينيه من ديك لكورة لكحلة ديما جابد ليا بيها صداع مع جيران لله يعطيك ريضا

أيوب بدا يبكي:هئ هئ ما كتحملينيش أسميرة

أمينة بعصبية خرجات عينيها :كون تحشم كلاك سميرة قول ماما بغيت ليك غبينة

سميرة: هكاك اختي عطيه لبرهوش ولا يطير ما بقيت نقد عليه وحتى من باه ولا يغلبوا

رحمة هزات عينيها من زرع ونطقات بفقصة: دسارة هادي قرصيه من فخاضوا بالملح باش يتعلم يسمع لكلام هادا يتقادوا لكتاف يولي يضربك ما فيهاش..

قاطعهم دخول عمر لي ضاهر عليه من ملامحوا فرحان وجايب خبر صار

عمر بفرحة قال: السلام عليكم،زغرتي الواليدة

رحمة بعينين كيبروا ردات عليه:و عليكم السلام شنوا وكين اولدي فرحني معاك

عمر حرك راصوا وقال:خرج لكونكور ديال لبوليس غندفع ليهم غدا إنشاء غير نتقبل ونخدم ما نبقاش نخليك تحطي يدك في لحلوة انا لي غنهز مصروف الدار

أمينة قطعاتوا:ويلي نسيت كنت بغا نقولها ليك راه كريم كان باغي يدوي معاك في هاد لمسألة نيت عيط ليه يمكن ينفعك

عمر تبسم جنب:وخا الخوادرية يتوب عليك

رحمة بعينين تيلمعوا بدمعوع ناضت لعندوا عنقاتوا قالت:

_الله يرضي عليك اولدي بغيت بيبان لخير كلهم يتفتحوا في وجهك

توبة طارت على خوها عنقاتوا بفرحة تشع من عينيها قالت: الله يسهل عليك الحبيب ديالي كبرتي

بقاو تيضحكوا فرحانين باركوا لعمر وعيطوا ل إسلام خبروها وهيا بدورها فرحات ليه من قلبها وقالت....

_إسلام جالسا في بيتها ببتسامة قالت:دابا حتى انا غيوليوا ناس يقولوا ليك خت كوميسر ياربي تسهل عليك ما صعاب في لتمحان اخويا لعزيز لفنان ديالنا

وقفات لوطوا في لبيض كتلمع قدام رياض عائلة راضي ،لمحها لعساس او وقف ناض تايجري فتح لباب حاني راص خرجات من سيارتها لبسا

كسوها سماطي مشبكة من جهة السدرو قصيرة لاصقا على جسدها معا كاب مدوراه على كتافها وحطا مكياج تقيل معكرا فمها بالأسود وريحة لبرفان ديالها مجهد كيتشم من بعيد هزات راصها بعينين كيبريوا كتأمل في شكل رياض بتسمات بمكر وتمشات بتأني

تمات دخلا كتمايل بخسرها النحيل والجمالها لباهي عاطي لعين شعرها قصير حد كتفها كطاير منوا بعض لخصلات كتحجب عليها رئيا رفعات جوج صبعان برقة دورات شعرها مورا ودنيها...

كان واقف حدا بركة الماء لي وسط رياض"شكلها بحال لابيسين" كيهضر في تيليفونوا حتى لمح إنعكاس صورتها في الماء قطع مع المتصل ودار عندها مبتاسم ...

يوسف متفاجئ نطق:مروى

مروى قربات منوا وقفات على صباع رجليها سلامت عليه بالوجه ودروات يديها على عنقوا خلاتوا مصدوم وهيا ضماه قالت بدلع:

_يويوا توحشتك بزاف

بدات شمس كتغرب مني جات مروى وهيا جالسا مع يوسف بقات كتهضر معاه لوقت طويل حتى تحجج بخدمتوا وخرج خلاها

لمحتها فريدة لي كانت لابسا قفطان خفيف في الأبيض وديرا شال على راصها تمشات ناحيتها وجراتها دخلات هيا وياها لصالون...

فريدة جالسا حدا مروى معنقاها فرحانة بجيتها بتسمات جنب و قالت : مرحبا بيك أبنتي أش هاد لغيبة كلها شحال هادي ما زرتينا..غبرتي حتى زيانيتي كتر من لول

مروى بدلع في صوتها ردات :عينيك لي زوينين أخالتوا فريدة

دخلات نجلاء كتجري لابسا سرفيط ديال رياضة كانت خارجا كتمشى قاصدات ختها نيشان عنقتها لي حتى هيا بدورها غير شافتها وقفات ستقبلتها بالأحضان...

نجلاء ما قاداها فرحة باين من عينيها لي كيبريوا شحال كتبغي ختها : توحشتك بزاااف الحب ديالي

مروى ببتسامة عريضة: كن تشوفي أنا شحال توحشتك أختي

نجلاء بعدات منها شدات في إيديها و بتسأل نطقات: كيف دير بابا لاباس؟

مروى بعدم إهتمام قالت :ما عرفتش جيت من فرانسا نيشان لعندك بابا شحال هادي ما هضرت معاه

جلسوا فوق سداري تيطمنوا على أحوال بعضياتهم ويتعاودوا حتى دخلات لعندهم إسلام هازا بلاطوا فيه ضيافة بين يديها ولابسا فراشة في الأزرق لاصقا من جهة الخصر جاتها فنة وشعرها جمعاه لفوق ببتسامة حطات لبلاطوا فوق طبلة وقالت:

_مرحبا بيك

مروى وقفات على طولتها ببتسامة عريضة ردات: بلا شك نتي هيا إسلام مرت أركان

إسلام حركات راصها بإجاب وهيا تعنقها مروى فراحانة خلات ختها مصدومة وقالت بصوت أنثوي رقيق:

_سواا كيوت زوينة بزاف "حركات راصها "أركام عرف يختار ما عندي ما نتسالوا

إسلام حركات راصها بإجاب بعينين تيلمعوا جوبات:شكرا حتى نتي زوينة أختي

مروى مدات إيديها:أنا مروى أخت نجلاء وناس لي تنبغيهم كيعطيوا ليا ميروا

إسلام بدلتها المصافحة بالإيد:مشرفين أختي

مروى دورات شعرها مورا ودنها و قالت:

_شرف ليا أزين

الحاجة دخلات من موراها هازا جلايل تكشيطتها من جناب والوشم لي تحت فمها

مزينها نزلات عينيها طلعات مروى من لتحت ما عجبها لباسها حركات راصها وقالت بزز منها:

_مرحبا بيك أبنتي

مروى تحنات قبلت إيد الحاجة لي خطفات إيديها ما بغاتها تقرب منها:

_ميغسي الحاجة توحشتكم كاملين الله مني شفتكم عاد رتاحيت وشميت ريحة لبلاد فين هوا لحاج ما كينش؟

الحاجة هزا تسبيح بين يديها بدات كتكبر قالت :الحاج مشا يصلي المغرب في الجامع لي حدانا شويا ويجي

فريدة شافت في إسلام وبتنهيدة طويلة وجهات كلامها لمروى :ليوم عاد نور رياض بجيتك شحال هادي ما فرحنا

مروى حركات راصها وقالت:أحسن خالة في العالم كامل تنبغيك بزاف

وقفات إسلام على طولتها ببتسامة بريئة قالت:

_نخليكم الحاجة غنمشي نصوب لعشاء

الحاجة بتسمات جنب :وخا أبنتي سيري الله يرضي عليك

مروى دورات عينيها وقالت: خالتوا بغيت نبدل حويجي

لالة فريدة:أجي معايا نديك لبيت ضياف أبنتي

دخلات إسلام لكوزينة قطعات لكرافص أو ربيع وجبدات لحمس فسخاتوا جالسا ملهية كتصوب في لحريرة لي تشهاها لحاج او وصاها تصوبها ليه لعشاء...وجبدات لحم رداتوا يطيح بعدما دارت ليه التوابل بغات دير لحم بالبرقوق لعشا على وديت ضيفة لي جات وخدات روز صلقاتوا هوا ولبطاطا وقطعات لخص كيف علمتها لحاجة بغات تصوب ليهم صلاد على وديت نرجس لي دايرا ريجيم...

حوالي ساعة ونصف وهيا وسط لكوزينة كدور من حاجة لحاجة ما جلساتش أو وجها ولا حمر بلا قياس بسبب حرارة المطبخ أما عقلها مشغول طول لوقت كتفكر في أركان لي ما هضرش معاها من لبارح كتحاول تصوني عليه ما جوبهاش...

قاطعها دخول مروى لابسا بيجاما قصيرة في الأبيض بالكميم وهازا تيليفونها بين يديها تمشات ناحيت إسلام مبتاسمة قالت:

_ريحة زوينة الله يعطيك الصحة

إسلام حركات راصها وقالت: تبغي نصوب

ليك شي حاجة تشهيتيها

مروى عصرات قهوة في طاس صفر رتشفات منها وقالت:

_بلا من نعبدك لي كان ناكل منوا ما عنديش مشكل"سكتات لتواني وقالت" كيفاش تعرفتي بأركان؟

إسلام تبسمات جنب وردات: نوا ما كنتش كنعرفوا غير العائلات لي كانوا تيعرفوا بعضياتهم وزوجنا المكتاب هوا لي كيتصرف

مروى كمشات حجبانها ونطقات :ااا وي مزيان جبت ليك معايا وحد لهدية صغيرة من باريس كنتمنى تعجبك

إسلام عاطيها بضهر قادت صلاد حطتها في تلاجة وقالت :شكرا بزاف ،بما انك جيباها نتي باين دوقك غيكون زوين

مروى شدات من إسلام :اجي معايا نعطياها ليك

إسلام ببتسامة: صبري عليا غير جوج دقايق ندور لحريرة ونتبعك

مروى وقفات جامعها يديها وقالت:وخا انا انتسناك حتى تسالي ونمشيوا ،رجلي على رجلك ههه

إسلام دورات لحريرة وطفات عليها وعسالات لبرقوق وكلشي قداتوا وخرجات هيا مروى غير هما خواو لكوزينة دخلات ليها نجلاء مفقوصة حلات لكوكوط كتقلب فيها وباقي الأطباق بتسمات بستهزاء وقالت:

مسيكينة ديرا فيها شيف موحا "خنزرات و بمكر عوجات فمها " سحارة حتى من ختي مني جات ولات تموت عليك ما عرفتك أش ديرا ليها ...

دورات عينيها في لمطبخ كتفكر لمحات لقريعات ديال توبل خدات منهم لملح وملعقة كبيرة كبات منها خمسات لمعلقات كبار في لحريرة وحركاتها و كبات في لحم حتى هوا جوج معالق كبار....

صغرات عينيها وبتسمات بشر:إيوا دابا نشوفوا شكون باقي غيبغيك هههههه....

فتحات لي فاليز ديولها جبدات منهم علبة مخملية في الاسود عطاتها ل إسلام حلاتها لقات فيها ساعة حذيثة دهبية بتسمات جنب وقالت:

_زوينة شكرا بزااف

مروى حطات إيديها على كتف إسلام: ديريها في يدك غتجي معاك...

إسلام شافت في إيديها لقات لكرميط لي شراه ليها أركان وقال ليها ما تحيدوش من إيديها غير لمحاتوا تزير عليها قلبها سهات وهيا كتشوف فيه حتى حركتها مروى ...

مروى:إسلام "شافت لكُرميط"واااو زوين بزاف،عطيه ليا عفاك

إسلام حركات راصها وقالت:سمحي ليا ما نقدرش نعطيه ليك حنت جاني كادوا...

مروى قشرات فمها من لداخل وجمعات يديها عندها بعدما ردات بنتهيدة طويلة:اوكي لي بان ليك..

إسلام بنبرة حزن قالت:ما تقلقيش مني غير نخرج نشري ليك واحد بحالوا ..

مروى بعينين تيبريوا:بصح والواا ميغسي حبيبة

إسلام ببتسامة جانبية ردات: العفو تستاهلي غنمشي نشوف لحاج الى جا نحط لعشاء..تشرفت بمعرفتك..

مروى تبسمات جنب:شراف ليا ازين...

غير خرجات إسلام وهيا تلاقا مع نجلاء لي خبطتها بكتفها وتبسمات بستهزاء في وجها ودخلات لبيت عند ختها سداتوا من لداخل...

نجلاء جمعات إيديها عندها معصبة نطقات:

_تبارك الله عليك الالة مروى انا عيطت ليك باش تجي تعونيني نخرج هاد لفعى من حياتي ونتي سيرا تكبري بيها قدام لعائلة ما عرفتك ختي ما عرفتك عدوتي...

مروى ميلا راصها جنب وقالت بستهزاء :انا عدوتك

نجلاء تصدمات ولا وجها حمر جمدات في بلاصتها:

أش كتقولي؟!!

مروى تبسمات جنب:اش بان ليك واش انا ضاربا طريق طويلة على قبل باش نجي نعونك ونتي سيرا تغوتي عليا وتقولي عليا عدوتك اش بغيتيني ندير..

نجلاء من تحت سنانها نطقات:ايوا علاش باركا تعاملي مزيان مع ديك ل**** ...

مروى :كيقول واحد لمثال أختي قرب عدوك بمصاحبته"دورات وجها ناحية نافدة وكملات كلامها"حنت الى ولا عدوك صديقك هاكدا غيعود ليك أسراروا كاملة وغتعرفي الإيد لي كدروا غتشديه منها ودمريه بشويا بشويا "بتسمات بشر" ما عمرك ما توري وجهك الحقيقي لبنادم ديما خاصوا يبقا مخبي تحت قناع البرائة "زيرات على فكها وقالت " وخا يكون خوك كتكرهوا ديما بين ليه بلي كتبغيه حنت في هاد لوقت أنجلاء ما كين غير راصي يا راصي وهاد شي تعلمتوا منك ولا نسيتي...

نجلاء بعينين تيلمعوا:ادن نتي كنتي غير كتمتلي على إسلام ياك ؟!!

مروى تمشات ناحية ختها رسمات إبتسامة ماكرة:معلوم الحب وهاد شي كلوا تعلمتوا منك أستادة...

نجلاء حطات إيديها على بطنها وقالت:حتى انا نهار لول هاكدا تعاملت مع إسلام مي في الأخير ما قدرتش "من تحت سنانها"حنت كنكرها بلا قياس ما كرهاتهاش تموت ونتهنى منها

مروى حطات إيديها على كتاف ختها:تهدني ما تنيسايش راكي حاملة ،هاد لموضوع خليه عليا أنا غنفرجك فيها مزيان ..

نجلاء عنقات ختها كارزة عليها:شكرا بزاف أحبيبة غير هنيني منها ومستاعدة نعطيك لي بغيتي ...

مروى مبدلاها لعناق دورات عينيها وسداتهم وعود حلاتهم عضات فمها من لداخل وقالت بنبرة صوت غريبة: لي بغيتوا جيت ناخدوا بيدي ما تصدعيش راصك صبرات هاد شهور كاملة وأنا كنتسنى الفرصة المناسبة باش ندخل لهاد رياض ومني جاتني ما غنديعهاش من بين يدي اختي كنواعدك ناخد لي بغيت بوحدي...

نجلاء بعدات منها وبعدم فهم قالت:شنوا كنقصدي؟

مروى تبسمات جنب ولعبات لختها في شعرها :والوا ما تصدعيش راصك ملي غيجي لوقت نتي أول وحدة غتعرفي اوك...

بدون ما تستوعب نجلاء كلام ختها لي بقات في حيرة من أمرها ما فهماتوش جاها كلوا ألغاز فيقها من سهوتها صوت دقان في لباب..

تمشات ناحيتوا فتحاتوا لاقتها فريدة...

فريدة ببتسامة :بنتي نزلوا تعشاو راه لحاج وصل وحتى عدنان ويوسف جاوو...

مروى نقزات بالفرحة بعينين تيلمعوا نطقات:يويوا جا !! انا غنمشي نزل نسبقكم ...

مجموعين على طبلة العشاء لي جات في جنب ديال لمراح قريبة لنافورة لي كتوسط رياض خرجات إسلام من لمطبخ هازا بلاطوا فيه زلايف ولمعالق وتابعها نرجس لي هزا بين يديها طبسيل طوس كيتوسطوا لحم بالبرقوق ريحتوا كتشم من بعيد..قادوا داك شي في طبلة..نزلات لعندهم مروى كتجري ببتسامة نطقات :

_ Bonsoir cv? "وجهات كلامها لنرجس" حبيبة" نرجس لباس عليك توحشتك نساليوا لعشا ونجمعوا جبت ليك معايا واحد لكادوا غيعجبك

نرجس ببتسامة:وخا ميروا شكرا

الحاج راضي شاف لباسها وهوا يتقج ولا يكحب بجهد تحرج وهيا ما تسوقات مشات جلسات في مكان نجلاء حدا يوسف، الحاج مدات ليه إسلام كاس ديال لماء بزربة شرب منوا عاد رتاح ولا يستغفر في الله دخلوا

الحاجة خديجة بخوف تسألات:كيف بقيتي شويا الحاج؟

الحاج راضي حنحن بصوتوا وقال :لباس الحمد لله "وجه كلاموا ل إسلام "صبي ليا لحريرة في زلافة أبنتي بغيت نتعشى باش نمشي نقرا لحزب

إسلام حركات راصها بإجاب وقالت:هيا لولة الحاج

دخلات نجلاء شافت بلاصتها عامرة جالسا فيها ختها مشات جرات لكرسي ديال إسلام جلسات فيه ،راسمة بتسامة رضا على داك شي لي دارت كتسنى إسلام تشوه..

إسلام صبات لاصوب في زلايف كاملين وكل واحد حطات حداه وحدة وقدات طبسيل ديال لحم في لوسط ودورات لخبز مقطع في جناب تم مدات ليهم لمعالق...

الحاج هز راصوا مصدوم بتسأل نطق:فين هيا لحريرة أ بنتي ؟!! هادي صوبا !!

إسلام دورات وجها ناحية نجلاء لي مصدومة وقالت ببتسامة إنتصار :

_الحاج لحريرة فيها لقطاني وسخونة غطلع ليك طونسيوا حنت غتكلها وتنعس داك شي علاش صوبت ليكم صوبة الخضر زوينة ودغيا كتهضم ،راه صوبت ليك لحريرة الحاج ولكن ما زال ما دورتها قالت حتى لصباح ونقادها ليك تفطر بيها ومن بعدها سير تمشى ما غدير ليك والوا ديك ساع

عدنان وجه كلاموا لباه :شفتي الواليد عندك لي يفكر في صحتك شكون بحالك

الحاج حرك راصوا وقال بصوت تعبان: الله يرضي عليك أبنتي ما خليتي ليا ما نقول

كل واحد هز ملعقة جابها لفموا غير حطوا جغمة ديال صوبا تصدموا في مداقها لديد والبنين

الحاجة ببتاسمة قالت :تبارك الله عليك أبنتي صوبا لديذة وحتى يدك بنيتة تبارك الله

إسلام بتسامة قالت :بصحتكم

نجلاء دورات وجها ناحية لحاج و قالت:لحاج كيبان ليا خاصك تبدا بالحم عاد كول صوبا تهضم ليك

فريدة قطعات دغمة ديال لخبز جيباها لطبسيل وهيا توقفها إسلام لي قالت:

_كان وقع ليا واحد لمشكل في لعشاء

أخالتي"صغرات عينيها وهيا كتشوف في نجلاء" نسيت وملحت لحم جوج مرات يمكن ، عاد قطعت بطاطا رميتها وسط طنجرة حيدات ليا ديك لملوحة كنتمنا يعجبكم لعشاء

الحاجة خديجة ببتسامة مزينة ملامحها ردات:ما عليش أبنتي الغلط كيوقع لمهم هيا صراحة ؛كل نهار كتزيدي تكبري في عيني الله يحميك من لعديان ايوا جلسي تعشاي غتبقاي واقفا

إسلام جرات كرسي جلسات فيه حدا نرجس بعدما حركات راصها وقالت:

_أمين الحاجة

وقفات نجلاء كتفور دفعات لكرسي بجهد وطلعات كدردك لبيتها معصبة ما رداتش تحت نضرات لكم خلاتهم كيتعجبوا كل نهار كتخرج ليهم بتصرف في شكل...

أما مروى مني جلسات وهيا تقطع في لحم وتحط قدام يوسف مهلايا فيه...

إسلام حدرات نجلاء:بشويا عليك راك حاملة خاصك تمشاي غير بشويا

الحاجة خديجة حركات راصها ما عاجبها حال بتنهيدة طويلة قالت:الله يهديها فيها قاعدة خيبا حتى كتنوض من لماكلة وتخليها...

بعدما حطات لماعن في لكوزينة لسيدة مولات لميناج لي كتنقي رياض وتغسل لماعن طلعات لجناح عيانا بتمارة هزات حويجها من لبلاكار و دخلات نيشان لحمام ...دوشات وغسلات شعرها مزيان وتوضات وخرجات لبسات لباس المخصص للصلاة وجلسات كتصلي بتخشع...

سالات وجمعات زربية الصلاة رجعتها لبلاصتها وبدلات حويجها شافت ناحية سرير لجيهة لي تينعس فيها أركان بانت خاوية تنهدات من الأعماق وتمشات ببطئ لجهة لي تينعس فيها تخشات في بلاصتوا وجرات لغطاء معنقه شتاقت ليه بلا قياس هزات تيلفونها دخلات لوتساب كتبات مساج كتشكر فيه ختها على الأفكار لي عطاتها باش تنقد لعشاء خرجات ودخلات لوتساب ديال أركان صونات عليه ما جوبهاش حسات بقلبها مزير عليها خايفا لا تكون واقعا ليه شي حاجة خيبة ولافات تهضر معاه كل ليلة حطات تيلي جنبها وتكات على لمخدة ديالوا وفي دخلها كتدعي معاه ساهيا كتفكر فيه حتى كيتهز قلبها من رنة لهاتف هزاتوا وتهز معاه قلبها ملي شافت إسموا متاصل بيها أبيل فيديوا تنفسات بجهد خدات شهيق وزفير عاد قابلت تيلفون معها و جوبات بتوتر...

إسلام بخجل جوبات منزلا راصها:سلام عليكم

أركان ببتسامة مزينة ملامحوا رد عليها:وعليكم السلام ورحمة الله وبركاته، ما توحشتينيش؟!

غير سمعات صوتوا رجولي لي كيجلب ليها راحة بسرعة خدودها توردوا هزات عينيها تيلمعوا فيه لاقاتوا ما لابس لفوق والوا او سدروا عاري وعضلاتوا بارزة وشعروا نازل على عينيه سرطات ريقها و تلفات ما بقات عارفة فين تشوف هربات عينيها منوا بسرعة وقالت :

_غيضربك لبرد لبس شي حاجة ما تبقاش هاكا

أركان عض فموا من لداخل وقال:الجوو سخون هنا ،نتي لباس توحشتك بلا قياس

إسلام بخجل جوبات :لباس الحمد لله ونتا صفا؟ إيمتا غترجع؟

أركان بتاسم جنب وقال بصوت حنين:أنا لباس و شوفي فيا أحبيبة "حرك راصوا ونطق"ما توحشتينيش صافي بلاش ما نجي غبقا هنا

إسلام هزات عينيها بسرعة ونطقات:لا توحشتك"شافت فيه كيشوف فيها وقالت" ولكن غير شويا

أركان جمع حجبانوا وقال بتسأل :غير شويا صافي؟

إسلام هزات جوج صبعان كتعبر بيهم قالت :امم زيد على ديك شويا شويا أخرى

أركان ضحك عليها من نيتوا: بغيت نقول ليك واحد لكلمة مهمة ولكن ماشي دابا حتى نجي بغيتك حتى تكوني بين يدي ومني تسمعيها تخباي في سدري حشمانة

إسلام حركات راصها وفي فمها عدة تسألات نطقات بصوت ضعيف :أركان بغيت نسولك؟

أركان ببتسامة مزينة ملامحوا رد عليها:عيون أركان ،سولي لالة أنا كلي ليك

إسلام بخجل واضح من تعابيرها سرطات ريقها بصعوبة وفتحات شفتيها بزز باش نطقات:أركان سمعت بلي لبنات عندكم تما في لندن زوينات بزاف وعينيهم زرقين واش بصح ولا غير كدوب "بتوتر قالت"او نتا كتلقى بيهم

أركان رفع حاجبوا وقال بجدية:اه عندك لحق زوينات بلا قياس "شاف ملامحها لي تبدلوا وقال ببتسامة "ولكن ما يكونوش بحالك نتي أجمل بنت في لكون،ايوا كيف داز نهارك ما عودتيش ليا ، امم صليتي ليوم؟؟

إسلام ردت بملامح طفلة صغيرة وصوت رقيق: اه صليت ونهاري داز مزيان ، تصبح على خير

حس بيها أركان ماشي بيخير مالفا كل ليلة كتعود ليه نهارها كامل أشنوا وقع فيه وليوم كتهرب ...

أركان بجدية تسأل:إسلام دارت ليك نجلاء شي حاجة ولا قربات لجيهتك ما تكدبيش عليا ؟!

إسلام حركات راصها بنفي مهربا نضراتها منوا عضات شفتها لتحتانية وقالت:

_كلشي مزيان

أركان رمقها بعينين تيلمعوا قال :عارفك كتكدبي قولي صراحة ولا غنتاصل بيها هيا نسولها ماتكدبيش عليا

إسلام حسات بالحكرة ملي خرجات ليها نجلاء على لعشاء كانت صابرا بحالا كانت غير كتسنى شي حد يسولها ما قدرتش تخبي دموعها لي داروا خط على خديها بشهقة قالت:

_صوبت لعشاء اوملي بغيت نسخنوا تفكرت كلام لحاجة لي فاش علمتني طبخ قالت ليا ديما مني نطيب ندوق لماكلة عاد نقدمها لضياف او ملي دقتها لقيت لحريرة مالحا بلا قياس تلفت او ما عرفت ما ندير عيطت لختي توبة عطاتني فكرة قالت ليا نسلق لخضرا بزربة ونصوب صوبا ولحم ندير معاه بطاطة باش تمص لملوحة والحمد لله نقدت لعشاء وعجبهم ولكن بقا فيا لحال بزاف"بغصة خنقاها كملات كلامها "عرفتها نجلاء حنت ملي كنت خارجا من بيت ختها شافت فيا ودارت واحد الضحكة فشكل كتعبر بيها بلي دارت شي حاجة تما فين عرفتها مولات لفعلة فاش دقت لعشاء ولي زاد أكد ليا هوا مني شكروا طيابي فوق طبلة ما رداتش وخبطات لكرسي وطلعات كتجري..

أركان تكونسا عند كلمة ختها تصدم وعينيه ولاوا حمرين ساط بجهد مقاطعها قال:

_على خت شكون كتهضري إسلام

إسلام مسحات دموعها وقالت ببرائة:كنهضر على مروى خت نجلاء جات ليوم هيا ضريفة بزاف ماشي بحال ختها

أركان بعصبية نطق:بعدي منها هاديك خيتي راها خبيتة كتر من ختها ،وباش توصل لي بغات كتقدر دير أي حاجة وخا تعرف ضحي بأقرب شخص ليها ما كيهمهاش ما تبقايش تيقي إسلام ردي بالك منهم بزواج انا ما بقا ليا والوا ونرجع وديك ساع غنخرجها من تما، أنا لي كنعرف مروى مزيان

إسلام دلات شفتها لتحتانية وقالت:وخا لي بغيتي غير ما تعطلش "هضرات بزربة وطفات عليه خلاتوا كيموت بضحك "راه توحشتك بزاف واش انا نبقا نعس بوحدي في هاد لبيت لكبير راه تنخاف....

قطعات عليه وحطات تيليفون على قلبها فرحانة حنت شافتوا بيخير وعلى خير....

جلس حداها بعدما بدل حويجوا حاط لبيسي قداموا متبع مأشر الصادرات ديال سمك لي رسلوه لخاريج..مشغول فخدمتوا حتى قاطعوا صوت تنهيدات طويلة من نجلاء لي جالسا كتصوط حداه معصبة...

يوسف هز راصوا بتسأل:مالك واش مريضة علاش خليتي لعشا محطوط وطلعتي

نجلاء بعصبية نطقات:من صباح وهوما يشكروا فديك ختنا تقول غير هيا لي كينا في هاد لعائلة ملي جات مابقا داها فيا هاد وفي عوض ما تبعني تجي تراضيني بقيتي جالس معاهم فرحان

يوسف هز عينوا من لبيسي وقال:حتى واحد ما جرا عليك وختي أسلام ما عندها ما دارت ليك طيبت مزيان وشكروها وكتستاهل عادي علاش نتي مكبرا لموضوع

نجلاء بتسمات بفقصة:مزيان كتجي عليها وانا ما كيديها فيا حد وليت بحال نكرة في هاد دار بغيت غير نعرف واش ديك إسلام ساحرا ليك

يوسف بعصبية قال:جمعي فمك أنجلاء إسلام كنعتبراها ختي بحالها بحال نرجس وبما ان خويا ما كينش هيا تحت مسؤوليتي دابا...

نجلاء صغرات عينيها :مسؤوليتك وانا

يوسف زفر بجهد اوقف:غنمشي لمكتب

ديال خويا ونخدم حسن ما نبقا ماقبل معاك لهضرة معاك ما عندها حتى معنى أنا فاش كنجي لدار كنبغي نرتاح ماشي تجي تي تخربقي ليا دماغي بالهضرة لخاوية..باركا عليا غير لمشاكيل ديال لخدمة

نجلاء غوتات في وجهوا بعصبية قالت:إيوا سير حتى لجهنم الحمراء

خرج من لبيت كيسوط دخل لمكتب أركان خلا لباب محلول حط لبيسي قداموا وخدا كاس ديال لماء شربوا بزربة معصب وجلس مقابل شغلوا

لمحاتوا من خرج من لبيت تمشات ناحيتوا ببجامة قصيرة تبسمات جنب وقالت بدلع:

_سلام يويوا باقي فيق لدابا؟

يوسف ما هزش فيها لعين قال وهوا مكمل خدمتوا: عندي لخدمة مزال ما كملتها غنصهر حتى نكمل شغلي ونعس "هز راصوا بتسأل " ونتي شنوا لي مفيقك لدابا؟

مروى تبسمات حنب وجلسات في لكرسي لي قداموا حاطا رجل على رجل ومطلعا لبيجاما كاشفا ساقيها وفخاضها هزات كورة زجاجية من فوق لمكتب بدات تلعب فيها بصبعنا وبصوت رقيق قالت:

_أنا مالفا نصهر ما كنعسش بكري ممكن نبقا معاك نونسك

يوسف تبسم جنب وقال:لي بان ليك امروى

مروى بعينين تيلمعوا قالت:مزال عاقل فاش كنت سكرتيرة لخاصة ديالك في شاركة قبل لا نخدم في شاركة ديال أركان ، ما خلينا حتى دولة ما مشينا ليها...

يوسف حرك راصوا بإجاب مكمل شغلوا

مروى جمعات حجبانها بتسأل نطقات: كون ما عرفتكش بختي ديك ليلة كنا نقدروا نكونوا دابا مزوجين ياك؟

يوسف هز راصوا فيها مصدوم ساط بجهد وقال:مروى سيري تنعسي خليني خدام

مروى وقفات على صبيعاتها كتمشى هيا عارفة يوسف ما عزيش عليه يعود لهضرة جوج مرات قربات حتى لباب وطاحت كتغوت شادا من رجلها شافها ناض يجري مخلوع

مروى شدات من رجلها و طيحات دمعة كتبوحط:اي رجلي هئ هئ هئ

يوسف قرب منها بتسأل نطق:شنوا وقع ليك امروى

مروى صغرات عينيها وقالت بصوت باكي: تلوات ليا رجلي هئ هئ "مدات إيديها "هزي عفاك ديني لبيتي

يوسف خشا إيد تحت ضهرها وإيد تحت رجليها وهزها وهيا دورات يديها على عنقوا فرحانة

كانت خارجا إسلام من لبيت هازا إبريق الماء وهيا تلمحهم تكونسات في بلاصتها بلعات ريقها وهربات من حداهم مصدومة...

يوسف مروى فوق سرير وهيا تخطفى قبلة من شفايفوا خلاتوا مكوانسي صغرات عينيها وقالت:

_سمح ليا ما قصدتش ..امم جوبتينيش دابا كون ما عرفتكش بختي كنا غتكونوا مزوجين

يوسف بغضب نطق:انا راجل ختك دابا الماضي نسياه الى بغيتي تعيشي هانيا مدا ليها مرهم وهز صبعوا بتحدير:

_اخرى مرة ديري هاد شي أمورى

خرج وخلاها كتشوف وتضحك عاجبها لحال

تمشى دخل لبيتوا نيشان تكا حدا نجلاء لي نعسات حس بدنب وعنقها من ضهرها ...

إسلام نزلات لتحت مصدومة ما مصدقاش لي شافت لقات فريدة جالسا وسط لمراح تمشات ناحيتها و بتسأل قالت:

_خالتي مزال فيقا ؟يكما كين باس؟

فريدة كمشات حجبانها بألم حطا إيديها على ركبتها ردات:

_ركبتي عطياني لحريق ودواء لي كيجيب ليا أركان من كنادا تقادا ليا ما بغيت نفيق عمك خرجت من عندوا ما بغيتش نصدعوا

إسلام حركات راصها وقالت بتسأل:تبغي ندير ليك مساج بزيت لعود وخا هوا ريحتوا خيبة كتبقا مي صباح دوشي هاد لمساج زوين ديما ماما فاش كتدرها ركبتها كديروا ليها ختى توبة

فريدة عاضا فمها من لداخل بالألم:عتقيني أبنتي وخا ديري لي بغيتي غير فكيني من هاد لحريق

إسلام دخلات لكوزينة بسرعة دارت زيت لعود في كاسرونا صغيرة رداتوا يدفى وحطات فيه حبات من لقرنفل

وخرجات لعند فريدة شدات منها طلعتها معاها لبيت بعد إصرار كبير من طرفها جلستها في طرف سريرها وجلسات هيا في الأرض عرات ليها ركبتها وبقات كتحرك إيديها بلطف على ركبة فريدة وكتقول الأدعية :

_بسم الله الدي لا يضر مع إسمه شياء في الأرض ولا في السماء وهوا السميع العليم

_ربي قد مسها الضر وأنت ارحم الراحمين

فريدة رتاحت بالمساج لي دارت ليها إسلام وعينيها عمروا بدموع قالت براحة:

_الله يرضي عليك أبنتي

إسلام هبطات ليا حويجها غطات ليها ركبة و قالت:

_هادا واجب أخالتي تكاي نغطيك

فريدة بخجل:لا حشومة أبنتي نخليك تاخدي راحتك في بيتك

إسلام بإصرار:لا غير باتي معايا عفاك الى دراتك شي حاجة تلاقيني حداك ومنها نيت تونسيني

فريدة ببتسامة مسحات دمعة لي طاحت جنب عينيها وقالت:

_الى مت غنعس مرتاحة في قبري حنت ولدي غيعيش بيخير وعلى خير ،سمحي ليا أبنتي سمحي ليا

إسلام مسحات إيديها من زيت وغطات فريدة:ما تقوليش هكاد أخالتي الله يطول في عمرك، عتابريني بحال نرجس الى بغيتي تعيرني ولا ضربيني كاع ما نهزش فيك لعين كنعتابرك في مقام ماما

فريدة تقدات في بلاصتها وببتسامة ردات: أجي تنعسي الله عاد رتاحيت في صداع ركبتي الله ينورك...

خرجوا من عند طبيبة ،غادين كيتمشاو في شارع وأمينة مصدومة وتوبة كضحك...

أمينة بصدمة قالت مبهوضة:حتى أنا غيوليوا عندي لبعالك تابعيني ويقولوا ماما

توبة ببتسامة ردات :اويلي ولادك رديتهم بعالك الله يتسر شفت حتى عيت في لبنات لي حملوا اول مرة تيكونوا غيطيروا من لفرحة ونتي ما عاجبك حال سيرا تعيري في دري ولابنت قبل لا يتزاد

أمينة بغضب قالت :ايوا اختي انا راه تنفكر ماشي بحالهم فاش غيبقا يزوك عليا باغي يرضع وانا فيا نعاس اش غندير ليه انا غير دراري ديول درب ملي كنسمعهم تيغوتوا جنوني تيخرجوا منصيب نهز جنوية ونصفيها ليهم كاملين باش نعس مرتاحة ودابا "حطات إيدها على بطنها"مني غيبدا يبكي الى ما سكتش غنشير بيه من شرجم ونتهنى من صداعوا انا قلت ليك ديك واع واع ما نحملها ما نقبلها

توبة تفرشخات بضحك جمعات ضحكة وبزز باش نطقات :ههههه ويلي حي راه ولدك هاداك أمينة، واش نتي حمقة دابا مع لوقت غيعز عليك وتولي داربي مع لعيالات في درب الى جاك باكي ناري فاش كنتخيلك أم عقلي كيبغي يطير من بلاصتوا..

أمينة مخنزرا هزات تليفونها معصبة تتقلب على نمرة بكريم....

توبة بتسأل نطقات: غتاصلي ب إسلام ياك قلتي نمشيوا لعندها رياض تقوليها ليها مباشرة

أمينة حطات تيليفون على ودنها كيصوني قالت: تنعيط لمول لفعلة" بعض دقائق جوبها"

كريم مشغول وسط لمكتب ديالوا تيبحت في ملفات على شي مجرم جوبها ب:ألوا أمونتي

أمينة من تحت سنانها نطقات معصبة:ما تقول ليا لا أمونة ولا زعتورة ،درتيها أكويريم ياك معامن تشاورتي بغيت غير نعرف معامن..

كريم بصدمة وقف :تهدني أمينة اشنوا درت ليك

أمينة بشفايف كيترعدوا نطقات: مشيت عند طبيبة ليوم قالت ليا راه انا حاملة كيفاش تجرئتي وزربتي عليها في هاد لحْبَالاَ

كريم بالفرحة وقف:اش كتقولي حاملة هاد احسن خبر سمعت في حياتي كنبغيك بزاف أعمري

أمينة عضات فمها من لداخل وقالت :هييااه بلا ما تعصب جد مي على صباح قلت ليك شحال هادي مابغياش لولاد دابا ونتا زربان

كريم من تحت سنانوا نطق بخفوت لا يسمعوه لبوليس برا:ياك نتي لي حيدتي لكينا وبإرادتك قلتي باغا لولاد

أمينة غوتات بجهد:أيه أخويا حيدتها باش ندير ليك لخاطر كون كنت كنسحابك غتزرب عليا هاد زربة كاملة كعما نطير ونقطعها "حطات أيدها على خصرها وبتنهيدة قالت"إيوا دابا حل معايا مخك أولد لخالة، شتي هاد لولد مني غيتزاد الى بكا وصدعني نتا لي غتهزوا وتبدل ليه ولدك هادا ايوا تحمل مسؤوليتوا..أنا بركا عليا غير هاد تسع شهر ديال لعداب لي غنهزوا فيها في كرشي

كريم ساط بجهد وهضر بعصبية تم طفا عليها تيلي: أنا دابا في لخدمة ما مساليش فاش نجي نتفاهموا

أمينة كمشات حجبانها بإزعاج:شوفي ليك كويريم حتى هوا كبر ليه شان ولا يطفي عليا تيليفون..

توبة بقات غير كترمش وبتنهيدة طويلة قالت: ناري اختي ديرا بحال لعافية كنت ناوية نتناسب معاك الا ولدتي بنت ساعا دابا غيرت رائيي رخفي شويا على راجل إنشاء الله مني غتشدي ولادك ولا بنتك بين يديك هاد شي كامل غيبقا غير تعاويد

أمينة زفرات بجهد وبصوت هادئ قالت:يالله نشدوا طاكسي يدينا لرياض ما فيا لي يمشي هاد طريق كلها...

___________

فاقت حتى قالها ليها راصها جالسا كتفطر ما مسوقاش حتى وقفات عليها إسلام كطلع فيها وتنزل ....

إسلام حركات راصها وقالت:نجلاء بغيت غير نعرف شنوا درت ليك علاش كتعاملي معايا بهاد طريقة خصرتي ليا لبارح لعشاء كلوا وانا سعيتين وانا وقفا كنصوب فيه اش هاد الأنانية كلها ما فهمتش علاش كتكرهيني واش انا درت ليك شي حاجة فينما كنتلقا بيك كتبقاي تسبيني وعينيك عامرين حقد وشر مالك مسمومة لهاد دراجة ما فيكش درة الإنسانية

نجلاء هزات راصها و ببرود نطقات:ما توقعتش غيجي شي واحد يقول فيا الشعر على الصباح وأنا كنفطر"حركات راصها" امم هاد شي كيفتح الشهية

إسلام هزات صبعها بتحدير نطقات:أخرى مرة دوري بساحتي أنجلاء ما بغيتش لبارح نفضحك على غير قبل هاد العائلة سكتت راه ساهل نحل فمي ونشوهك قدامهم ولكن أنا ماشي بحالك وما عمري غنكون بحالك

نجلاء هزات كاس عصير رتشفات منوا وقال بغيض بعدما هبطات ل إسلام صبعها الأرض:

_اخر مرة تهديني الفقيرة كتسمعي غير صبري عليا انا لي غنكتب اخر سطر في حياتك

إسلام الخوف متملكها من لداخل عضات فمها من جناب وقوات راصها قالت:

_ماشي نتي لي خلقتيني باش تنهي ليا حياتي ،بقاي تحفري لياو كلما كبرات ديك لحفرة لي حفرتي باش طيحيني فيها غاطيحي فيها غير نتي وربي كبير ...

نجلاء ضحكات بشر وتمشات غاديا كتمايل ضحكات و قالت:

_تحل ليك لفم أبنتي راك مزال ما عرفها شكون هيا نجلاء..

جالسين وسط الصالون كبير دا طابع مغربي بديكور غربي راقي فرحانين دخلات لعندهم فريدة هازا بلاطوا فيه ضيافة غير لمحتها إسلام وقفات على طولتها تجري لعندها ما عجبها حال خدات ليها لبلاطوا من بين يديها و كمشات حجبانها ،بعصبية نطقات:

_خالتي دراك ركبتك وهازا لبلاطوا من لفوق ديك ساع عيطي عليا وأصلا اش داك دخلي لكوزينة

فريدة حركات راصها وببتسامة قالت: لا أبنتي أنا وليت بيخير الحمد لله والفضل كلوا ليك"وجهت كلامها ل أمينة وتوبة"مرحبا بيكم دار داركم خودوا رحتكم ما تحشموش

أمينة وتوبة شافوا في بعضياتهم بعدم فهم جاتهم فريدة مبدلا على غير عادتها ما عرفوها كيف تغيرات بين ليلة ونهار

توبة حاطا رجل على رجل قدات الجلسة وردات:ترحب بيك الجنة ألالة فريدة

فريدة تبسمات جنب وبخجل جوبات:قولي ليا غير خالتي وحيدي ديك لالة راه حنا عائلة وحدة"ستدارت تمشات عاطيهم بضهرها بعدما قالت"نخليكم تاخدوا راحتكم أبنتي

إسلام بعدم رضا ردات :لا أخالتي بقاي معانا فين غادا غير جلسي معانا

فريدة دارت لعندهم و تبسمات جنب عاد نطقات:لا أبنتي غير خودوا راحتكم أنا غنمشي نجلس شويا مع لحاجة خليتها بوحدها

خرجات لالة فريدة وخلاتهم بوحدهم دورات إسلام راصها عند لبنات لقات أمينة كتشوف فيها معصبة هزات طبسيل ديال لوز قدامها وسرات تمدغ فيه بالفقصة...

إسلام بتسأل قالت : أ مالك طلعا ليك عيشة ليوم ؟

أمينة من تحت سنانها نطقات:لاش سيرا عليها بقاي معانا حنا بغينك نتي جينا نشوفك ما شي جينا عند هاد خيتي باغا تجلسيها معانا بزز

توبة بخفوت قالت:كوني تحشمي راه حنا في دارها أويلي "خاطبت إسلام لي بقات غير تشوف "أمينة كتوحم

إسلام حطات إيديها على فمها وعينيها دمعوا بصدمة ضحكات :ههههههههه وأخيرا غنشوف ولادك ايه على ليام كنتي نتي لي بغا تشوفي ولادي من سفيان سعا دابا أنا لي غنشوف ولادك لولة"تلاحت على عنق أمينة كارزا عليها "مبروك عليك فرحت ليك من قلبي،أحسن حاجة سمعت ليوم

أمينة بعدات منها و بعصبية نطقات:قجيتيني اويلي "بصوات حزين"ما بغيتوش أختي ، أنا مزال خاصني نتربا كيفاش غنربيه

إسلام طمنتها بعينها وقالت:اش هاد لهضرة لخاوية غاتقدري عليه وزيدن غنعونك أنا وتوبة نربيوه كاملين غير رتاحي ،شوفي غير توبة ولدات أمير على 17 عام حنت تزوجات في سن صغير وهاهيا مربياه احسن تربية ما يكون ولدك إنشاء الله بحالوا

أمينة بعينين تيلمعوا هزات راصها وبتنهيدة طويلة قالت :إنشاء الله "بتسأل نطقات" غيكون صغير بزاف قد لكمشة ياك؟

توبة كمشات حجبانها ودارت فيها شوفة زعما من نيتك داوية بعدما نطقت:معلوم غيكون صغير اش بغيتي تولدي راجل اش هاد سؤال لغبي

إسلام ببتسامة قالت:احسن حاجة درتوا مني جيتوا عندي توحشتكم بلا قياس

توبة بخفوت قالت:كيف درتي مع حماتك ؟!! جاتني مبدلة !!

إسلام حركات راصها وردات عليه بصوت شبيه للهمس:طلبات مني سماحة

أمينة كبات لقهوة رتشفات منها وقالت بعدم تصديق:كينا إنا في لموضوع أنا بانت ليا هاد لمرأة في كرشها لعجينة

إسلام ما مسدقاش عود ناضت عنقات أمينة وحتى هيا بادلتها لعناق فرحانة وقفات توبة حتى هيا دورات إيدها عليهم تيضحكوا فرحانين حتى قاطعهم دخول مروى لي لابسا كسوة في الأزرق سميطات قصيرة لاصقا عليها وفيها لفتحا من جنب ...

مروى بتسمات جنب وجمعات حجبانها بتسأل بعدما لقات عليهم تحية: سلام ،شكون هادوا إسلام ما تعرفينيش بيهم

إسلام تفكرت لبارح مني شافتها بين يدين يوسف عضات فمها من لداخل وقالت من فوق خاطرها :

_هادوا خوتاتي توبة وأمينة

مروى تمشات ناحيتهم مدات إيدها لتوبة بعدما قالت:اوو سوا كيوت متشرفين

توبة بادلتها لمصافحة مصدومة دورات راصها عند إسلام بمعنى شكون هادي

إسلام بتنهيدة طويلة جوبات:هادي مروى أخت نجلاء مرت يوسف

أمينة غير سمعتها أخت نجلاء جمعات لوقفة و دارت على مروى ،غمزتها وبسخرية نطقات : ما فيكش لبرد أزين

مرورى رجعات شعرها مورا ودنيها ونطقات بعدم إهتمام: نوو بيبي هاد شي عادي مولفا نلبس هاكا في فرنسا

أمينة ضحكات بجهد وردات:ايوا قلتيها "جبدات لجملة" هاد شي فييي فرنسا اما حنا في لمغريب الحب تستري شويا أبنتي راه سترا زينة"هزات صبعها لفوق وبتأكيد نطقات "حق لي ليه لحق ودوري هكا في دربنا حتى يشدوك دراري بالعلالي والله ما يزكْلوك راهم ولاد حومتي وتنعرفهم مزيان أش كيسواو

إسلام وتوبة حبسوا راصهم حتى عياوو وما قدروش تفرشخوا بضحك خلاوا مروى تلون ما رداتش خنزرات في أمينة وخرجات....

أمينة من مورها قالت:سيري أبنتي تلبسي حويجك كوني تسمعي لهضرة الله يرضي عليك "ساست يديها ودارت عند لبنات تكلمات بتأكيد بعدما رجعات شعرها لور"كيف جيتكم في دور الأم احم احم نصلاح نكون أم ياك

توبة ببتسامة قالت:عبرتي عليها"دارت عند إسلام"ناري أختي وليتي عايشة مع جوج لفعات رضي بالك منهم

أمينة دورات راصها:كتبان ليها هاد لفيعة صغيرة كتضرب غير من لتحت و ما كتبينش ماشي بحال ختها "بتسأل قالت "أركان مزال ما رجع؟

إسلام حركات راصها بإجاب وقالت:لا مزال علاش كتسولي

أمينة بغمزة نطقات:إيوا خاصك حتى نتي تحملي باش نتعادلوا اش بغيتيتي نولد غير بوحدي ما جاتش من صغرنا وحنا كلشي كنديروش بزوج

إسلام وجها ولا كيف لماطيشة بالخجل جمعات لوقفة و قالت:انمشي نشوف لغداء واش طاب

توبة وقفات:إيوا نخليوك خاصنا نمشيوا

إسلام دلات شفتها لتحتانية ودمعة تحجرات في عينيها ما سخياش بيهم بصوت حزين قالت :لا بقاو حتى تغدوا معايا يالله جيتوا

أمينة بمعارضة قالت:لا خاصنا نمشيوا باش نجمع لحويج غنشد طريق لكازا كريم كيتسناني "عنقات إسلام "غنتوحشك الحب اه قبل ما نسا عبرتي على نجلاء راه عودات ليا توبة كلشي...

إسلام ودعاتهم بحزن بعدما قالت:سلمي على ماما وعمر وخالتي سعاد وبوسي ليا امير بزاااف

خرجات من دوش لاويا عليها فوطة في لبيض وشعرها تيقطر بالماء حنيكاتها مزنكين تمشات ناحية لماريوا فتحاتوا بدات تدندن بصوتها لحنين كلمات اغنية رومنسية......

وساهيةكتشوف أشنوا تلبس ما حسات غير بجوج إيدين حاوطوها من ضهرها ومن ريحتوا رجولية لقوية لي ستنشقات ،عرفاتوا أركان بسرعة خدودها توردوا والخجل كسا ملامحها... بيدوا دور شعرها سارد لجهة الأخرى وحط شفايفوا على عنقها رطب طبع قبلة دافئة خلا جسدها كامل يرجف بين يديه بصوت مبحوح همس حدا ودنها :

_علاش مخليا لباب ديال لجناح محلول هاد لعادة فيك خيبة ما غتحيديهاش

إسلام سرطات ريقها بصعوبة وخرجات لهضرة بزز قالت:غير نسيت

تحنى لرجليها لعريانين هزها بلخف و جلس فوق سرير و حطها فوق رجليه بقا كيتأمل في ملامحها وجها البريئ ما مسدقش أنها بين يديه وهيا منزلا راصها الأرض حشمانة وخيفا لا طيح ليها لفوطة ما توقعاتوش غيجي بهاد سرعة...

دور إيدوا على خصرها وقال بصوت حنين:

_ما توحشتينيش

بدون ما تنطق بكلمة دموعها بداو تينزلوا شلال شتاقت ليه بلا قياس تلاحت عليه عنقاتوا بقوة بحالا كتقلب على الأمان داخل سدروا وخا كانت بين عائلتوا وحبابوا مع داك حتى كتحس براصها غريبة وكتضاهر بالقوة طول لوقت قدام نجلاء حتى هوا محتاج لدفئها زاد ضغط عليها كتر خشاها لداخل حتى حسات براحة ...

أركان نطق بصوت حنين:ششش ما تبقيش تبكي انا معاك

حاول يبعدها منوا وخا ما ساخيش بيها باش يشوف عينيها ويحسسها بالأمان لكنها زادت في وثيرة البكاء وتشبتات بيه بقوة أكبر بحالا باغا داخل داخلوا نطقات بشفايف كيترعدوا:

_متبقاش تمشي تخليني عفاك بقا معايا

أركان بقا تيطبط بيديه على ضهرها وببتسامة مزينة ملامحوا رد عليها:

_وخا كنوعدك ما غنبقاش نمشي ونخليك

طلقات منوا و بشوي بعدات عليه ودميعات نازلين من عينيها هزات عينيها بخجل تلاقوا أعينهم مع بعض تبسم بحنية وهبط عينيه لشفايفها المثيرين بدون سابق إنذار حط شفايفوا على شفتيها بدا كيلتاهم فيهم بحب وهيا مستجابة معاه غمضات عينيها ودورات إيديها على عنقوا زادت قربات منوا كتر ودقات قلبها تسارعات ولحرارة سرات جسدها كامل بقا كيتلدد في كل شفة من شفايفها مستمتع عاجبوا لحال حط إيدوا على لفوطة غينترها وهيا تحل عينيها بصدمة

دغيا تزنكات وحشمات...عينيها بقاو كيرمشوا بزربة حركات راصها بنفي و قالت بخوف وتوتر :

_مالابسا والوا أركان عفاك طلق مني

أركان قرب حدا ودنها وهمس بصوت مبحوح:

حنا دابا مزوجين أحبيبة سوا دابا ولا من بعد "عض فموا من لداخل قال بتأكيد"غنشوف كلشي

إسلام سرطات ريقها بصعوبة وقالت بشفايف كيرعدوا:طلق ليا من فوطتي"سدات عينيها وغوتات" و مااااااماااااا

أركان حبس ضحكة بين سنانوا ودربها لنيفها بحركة خفيفة:طلعتي بريهيشة مزال ما كبرتي اش دخل ماماك لموضوع مالي خاطفك

مسح ليا دمعة لي نزلات على خدها ورجع كيلتاهم في شفيفها بعنف قاطعوا صوت دقان في لباب بعد منها مخصر ملامحوا خلا فمها يوزوز وقال بصوت رجولي خشن:

_شكون؟؟

فريدة ببتسامة جوبات: هادي غير انا اولدي سيفط ليا إسلام بغيتها في لكوزينة ونزل تعشا

إسلام تنهدات براحة وقالت :ياك سمعيتيها بغاتني إيوا بعد مني خليني نمشي نبدل حويجي"وجهات كلامها لفريدة"انا جايا أخالتي

تنهد من لداخل معصب طلق منها غير بزز بعدما خطف قلبة أخرى من شفايفها وقال بغمزة:

_غير سيري دابا ليل مزال طويل ليوم ما غتفلتيش من بين يدي

مجموعين على طبلة لعشاء كيتبادلوا اطراف الحديث فيما بينهم خرجات إسلام من لكوزينة هازا لخبز بين يديها ولابسا كسوة طويلة بالكميم في لبيض مستورة وفيها وريدات بالأزرق لقات لكرسي ديالها لي حدا أركان جالسا فيه نجلاء لي خدات ليها ختها بلاصتها

تمشات ناحية نرجس جرات لكرسي لي مقابل مع أركان جلسات فيه وفينما كتهز عينيها كيتلاقوا نظراتهم عفويا كتحس بلعسة كهرباء وبسرعة خدودها كيوردوا بالخجل كبير بحالا أول مرة غتشوفوا ولكلام لي قال ليها خلا قلبها يضرب أضعاف من دي قبل ودقاتوا تسرعات أكتر

بينما العائلة كيسولوا على أركان وأحوالوا مروى عينيها ما حيدتهمش على يوسف وإسلام مرقباها بينما أركان فينما كتجي عينوا في مروى كيخنز فيها ودير فيها شوفات ديال لقتيلة...

إسلام بينما هيا ملهية كتاكل حسات بألم قوي أسفل بطنها كمشات حجبانها بألم ووجها صفار عضات فموا من لداخل مصبرة راصها

لمحها أركان كمش حجبانوا وحس بيها ماشي حتى لهيه حرك راصوا ودار إشارة بمعنى مالك؟

إسلام صبرات راصها وعينيها تيبريوا بدموع تبسمات ليه وسدات عينيها وعود حلاتهم كطمنوا بهاد لحركة بلي هيا بيخير

أركان بتسأل وجه كلاموا لختوا:نرجس كيف غاديا مع قرايتك؟

نرجس ببتسامة ردات:كلشي مزيان أخويا

قاطعهم يوسف بقوله:زرت لمؤوسسة لي كتقرا فيها ودخلت عند لمدير هضرت معاه والحارس العام جاب ليا نتائج ديولها كاملين مرضيين ما كينش لاش تخاف أخويا نرجس غاديا مزيان

أركان بتاسم برضا وقال بتأكيد : الى جيتي نتي لولة في لباك غنهديك أحدث لوطوا من شاركة غير قراي

نرجس بالفرحة ناضت تجري عنقات خوها وعينيها تيبريوا :شكراا بزاااف أخويا

عدنان برضا هز راصوا:الله يرضي عليكم

الحاج حنحن بصوتوا وبتسأل وجه كلاموا ل إسلام:بنتي باقي من ديك لاصوب ديال لبارح

إسلام حركات راصها بإجاب وقالت :اه مزال كين درتها في تلاجة تبغي نسخن ليك شي زلافة

الحاج بصوت تقيل قال : أيه أبنتي الله يرضي عليك ما كرهتش عجباتني لبارح وسمحي ليا

إسلام ببتسامة نطقات بزز منها والألم غادي وكيزيد :هيا لولة الحاج هاد واجب

وقفات على طولتها غاديا لكوزينة وأركان حاضيها غير دارت على طبلة وهوا يلمح نقيطات ديال دم في حويجها لور كمش حجبانوا بخوف وسرعان ما فهم وقف تابعها من لورها مدرقها خلى لكل مصدومين كيشوفوا فيه وإسلام علامات الخجل كسات ملامحها

وصلات لكوزينة حلات تلاجة وهوا يحط إيدوا على إيديها موقفها حيد تجايط ديالوا دورها ليها على خصرها وحزمها خلاها مصدومة وقال حدا ودنها بخفوت :

_طلعي بدلي حويجك

إسلام درات عندوا وبتسأل قالت: علاش يالله لبست هاد لحويج ولحاج قال ليا نجيب ليه صوبا

أركان دورها عندوا و بجدية نطق: طلعي بدلي حويجك وغتعرفي علاش غير حطي كلشي من يديك أنا لي غندي لحاج لي بغا

سخن صوبة ودارها في زلافة قادها في بلاطوا وحط حدها ملعقة كبيرة وكاس ديال لماء وداها لحاج...

الحاجة تصدمات وبتسأل نطقات:فين هيا إسلام أولدي

أركان حرك راصوا وقال:ما تشغليش راصك الحاجة رسلتها تشوف ليا واحد لملف بغيت نخدم فيه مورا لعشا

فريدة هزات راصها بعدم رضا:يالله جيتي من لخدمة وباغي تخدم في ليل رخف على راصك "بنتهيدة قالت"حشومة أولدي تنوض لبنت من طبلة مزال ما كملت عشاها

أركان ببتسامة مزينة ملامحوا رد عليها:غندي ليها عشاها الواليدة حتى لبيت غير كولوا بصحتكم...

طلعات لجناح مصدومة ما عرفاتواش علاش قال ليها تبدل حويجها حيدات تجاكيطتوا لي دور ليها على خصرها وتقابلت مع لمراية سرعان ما شافت نقيطات ديال دم في حويجها دقات قلبها تسرعات بلخوف و ألوان طيف كلهم دازوا في وجهوا حشمات بلا قياس خصوصا ان أركان شافها بهاد لحالة، تمشات ناحية لبلاكار كارها جبدات بيجامة دافية ديال نعاس وفوطة صحية ودخلات لحمام مزيرة على يديها و الألم غادي وكيتزاد...

يتبع...