زواج مبارك الجزء 18

ناعسن ما جيبين لدنيا خبار حتى كيسمعوا صوت دقان مجهد في لباب ...

نرجس حلات عينيها هيا لولة وبدات كتفيق في عمر وتويل ما قادا تحرك :فيق الشوهة فيق ويلي ليوما كلشي يصيق خبارنا ...

عمر حل عينيه بزز و بتتائب نطق :نعسي أشنيولة شنوا بغيتي عندي ...

نرجس كمشات حجبانها بألم ملي بغات تنوض ،حسات بضوء ضربها تحتها :ختك كدق الزمر نوض لبس حويجك دغيا ...

•• عند لباب ••

توبة بتسأل نطقات:هادواا مالهم ماتوا ؟!! شتهم ما كيجوبوش ...

أمينة حاطا إيد على بطنها والأيد الأخرا على على جنبها: وهانتي تشوفي الخوادرية كلشي على عينيك "بتفكيرة" عرفتي شنوا ديري عيطي ليوسف ولا أركان يهرس لباب ...

توبة رجعات دق في لباب و رفعات حاجبها : منيتك داويا ما شتيش إلا كانوا فشي وضع ما هواش كاريثة عضمى ديك ساع ...

أمينة تفكرات فاش شافتهم حدا شجرة وبدات كضحك حتى كيبان درسة لعقل :بينا علاش بقاوو ناعسين ههههه

عمر من لداخل جوبها بصوت مبحوح غالب عليه نعاس: نعام الخوادرية اش كين ؟!!

توبة بعصبية ردات :كيفاش أش كين منيتك داوي ،نوض تكعد ناس موجدين وكيتسناو فيكم غيبداو يدبحوا دابا ...

عمر مسح على شعروا وقال :غير سيري هانا جاي ...

توبة بإصرار ردات :وهيا لا خرجتي دابا راهم هازين جاناوة كيتسناوو فيكم غير نتوما سربيوا او فيق نرجس معاك ...

نرجس زيرات على سنانها ما عاجبها حال وبعصبية غوتات في وجهوا بعدما سمعات حسهم تقطع :دعيتك الله اولد لحرام ما بان ليك غير هنا هنن ليوما نتشوه ما خلتي ليا رجلين لي نوض بيهم ...

عمر حك ضقنوا وبتنهيدة نطق :تهدني الحب شويا تولي لباس غير ندبحوا ونمشي نجيب ليك شي دواء من لفرمسيان ...

نرجس ساطت بجهد وبأمر ردات:مد ليا حويجي وزيد نوضني الشوهة ...

بدات كتلبس بشوي ومع ناضت حسات بضوا ضربها زيرات على يديها أو وقفات بدات تحاول تقاد مشيتها وتجمع رجليها بزز منها ...

مع لبسات في رجلها ودورات راصها لجهة سرير وهيا يبان ليا ليزار ملطخ بدم عذريتها شقهت بجهد وبعصبية نطقات: ويلي ويلي كاريثة...

عمر دار لعندها مطلع حاجبوا بعدما سد اخر صدفة في قاميجتوا : مالك سيرا كتويلي اش كين ؟!!

نرجس سحقات سنانها بغيض:شوف ليزار شوهتنا شوهة ليوم ...

عمر بلا مبالاة رد عليها :صافي نحيدوه ونهنيوا لوقت، علاش مكبرا لموضوع ؟!!

نرجس هزات يديها بدات تهضر بيهم :وهاحنا حيدناه الفاهيم اش غنقولوا لخالك لمختار ليزار تسرق مثلااا ولا عجبنا وديناه ..

عمر ببرود نطق :هادي مزيانة نقولوا ليه عجبنا وخديناه منها نيت يبقا تدكار "غمزها"

نرجس هزات مشطة بدات كتقاد في شعرها وبفقصة قالت: شحال مبرد وعاجبك لحال الكنس ...

عمر ببتسامة مزينة ملامحوا رد عليها :حلالا طيبا أمراتي لعزيزة معلوم يعجبني الحال ...

خباوو ليزار في وحدة من ليفاليز ديالهم او خرجوا عند جماعة بعدما غسلوا وجهم وسنانهم بغاوو يدوشوا او ما خلاتهم توبة لي كل مرة كتصيفط عندهم امير يعيط عليهم ...

نرجس حولات تقاد مشيتها بزز منها مشات حدا مها ولبنات جلسات بينهم او عمر وقف بعيد من رجال حتى عيطوا عليه ...

سي لمختار:اجي اولدي تعونا في دبيحا راه كينا لبقرة وجوج لحوالة ...

عمر يالاه تقدم خطوة للأمام وهوا يتفكر لجنابة لي ما دوش منها او وقف في بلاصتوا بدون حراك بقا يدور في عينيه...

لالة رحمة ببتسامة نطقات :سير اولدي دير يديك معاهم ياك نتا لي مالف تدبح لينا مع سي لعربي نهار لعيد لكبير ...

عمر بلع ريقوا حتى تفاحة أدم تحركات في حلقوا وبتلعتم نطق :ءء الوليدة غير يسمحوا ليا ما غنقدرش نعاونهم دراعي مفدوع وكيعطني صداع بزاف هاد الأيام ...

لالة رحمة شقهت بجهد:الله يا ولدي مفدوع وما قلتيهاش ليا وما شفتي طبيب ...

عمر شاف في نرجس لقاها كضحك عليه: ماشي شي حاجة الوليدة كيدرني غير شويا ...

لالة رحمة خرجات عينيها: وياك يلاه قلتي كيعطيك صداع بزاف ...

جا عندهم أركان لابس شورط فايت ركبة مع تيشرت في الأبيض مكروز عليه ومبين عضلاتوا، قاطعهم بقوله: غير خليه يرتاح انا لي غندبح ليكم ليوم ...

كريم حرك راصوا بنفي :غير خليك أخويا هاهوا عمي لعربي كزار قاد بشغالوا انا غنعونوا ويوسف حتى هوا معانا ...

أركان بصرامة نطق :ما كينش لاش اكريم انا غندبح ...

الحاج راضي شاد كرسي جالس فيه تحت ضل، نحنح بشوي ونطق :غير خليوا ولدي اركان يدبح دبيحتوا زينة تبارك الله ...

أركان تحنى قبل ايد جدوا او توجه عند إسلام مد ليها تليفونوا او ساعتوا ...

إسلام ببتسامة نطقات مبهوضة: كتعرف تدبح ؟!!

أركان ببتسامة مزينة ملامحوا رد عليها: حكرتي حبيبك ...

إسلام حلات فمها نص حلة ورجعات سداتوا: لا ماشي هكاك غير تصدمت وصافي هههه ما بيناش فيك بتوفيق ...

لالة فريدة شافت في بنتها لي مسينا فيها شميسة ورفعات حاجبها و قالت :نرجس صابح طيح عليك سر أبنتي اش واقع ؟!!

نرجس تزنكات ،شافت في عمر لي كيضحك عليها وبلعات ريقها بصعوبة و برتباك نطقات:لا والوا ما واقع والوا أماما...

أمينة نطقات حابسا ضحكة بزز منها :هاديك غير كثرة لقريا كدير هكاك مع ليل كلوا وهيا كتحفض مسكينة ...

الحاجة خديجة بتسأل نطقات :ايمتا جاا راجلك أبنتي ؟!! ما شفناهش لبارح ...

أمينة دارت لعندها وقالت؛ جا غير هاد صباح، شي ساعتين دابا باش وصل ..

سعاد شافت في مروى وقالت:تحولي من ديك لبلاصة ولا اري ليا لبنت لهنا على شمس...

مروى حركات راصها بإجاب: وخا أخالتي ...

•• ريحة شواء ودخاخن مالية لفيرما كاملة ...

جالسين لعيالات مكفدات على دراعيهم شي كيصوب في شلايض وشي مقابل لخبز كيطيب على لعواد سخون و ريحتوا زينة ...

أركان و كريم مقابلين شواية ولحاجة لي طابت يحطوها لحاج وباقي رجال ياكلوااا ...

الحاجة خديجة بنفاد صبر خاطبت أركان وكريم: واش غتبقاو تعطيوا غير لحاج ودراري يكالوا وحنا تخلينا بجوووع، شوف رحمة مسكينة راه خاصها تاكل هيا لولة باش تدق برة الأنسولين ماشي معقول تبقا تسنا ...

أركان بصوت رجولي خشن نطق:ما ردتيش لبال الحاجة غير سمحي ليا "هز شواية عامرا قتبان خوها في طبسيل قدام مي رحمة وببتسامة مزينة ملامحوا قال " تفضلي أنسيبتي لعزيزة وسمحي لينا وما ديريهاش منا قلة صواب ...

مي رحمة قادت زيفها وببتسامة ردات: الله يا وليدي لخير هادا "هزات فيه عينيها" هاد شي كلوا ما نقدرش ناكلوا بوحدي ...

أركان بأمر نطق بصوت حاد:ما غتنوضي حتى تكمليها أمي رحمة ما تعود غير صلاة على نبي "حرك راصوا " كولي بصحتك...

مي رحمة ببتسامة جانبية:الله يعطيك الصحة اوليدي وليني ...

لالة فريدة قاطعتها :غير كولي وما تخفيش على صحة هداك بكْري ما يضركش اختي ...

كريم جاب شواية تانية خواها قدام لحاجة و لالة فريدة وسعاد وقال: بصحتكم ...

أمينة ساطت بجهد :ايوا هكاك ديرها من لول قتلتيني غير بجوع وشواية لي دازت من قدامي نقول غتحطها لينا حتى فقدت الأمل "شافت في مروى"عطيني لخبز أختي ...

مروى مدات ليها لخبز وبخفوت نطقات: تكيسي على راجل من صباح وهوا واقف ...

أمينة حطات طرف صغير من لحم مشوي في فمها وبدات تمضغ وتهضر معليا صوتها :حتى يتكايس هوا عليا ماشتيهش مخليني أنا او ولدوا بجوع وهوا ...كح كح كح "بقات تهضر حتى وحلات ليها وعينيها خرجوا " كح كح

نرجس بسرعة مدات ليها كاس ديال لماء ...

لالة سعاد بعصبية نطقات :غير بشويا عليك ابنتي مالك على حالتك تقولي عام ما دقتي نعمة ...

أمينة بلعات اخر قطرة ماء في جوفها ونطقات مخرجة عينيها :باش تعرفيه ما عطاهش ليا من قلبوا ما فهمتش الواليدة مال هاد ولد ختك معايا ...

سعاد دورات راصها :بسيف ونتي كتاكلي من لعينين "تنهدات بقلة حيلة "مكْوانوا مسكين...

أركان زاد حط ليهم شويات الأخرين بداو كياكلوا وفي جوا مليئ بضحك ،دور عينيه بينهم لقا إسلام واقفا بعيدة منهم او مخسرا ملامحها ما عاجبها حال ،مسح يديه ومشا قاصدها ...

أركان وقف عليها خاشي يديه في جيبوا ببتسامة جانبية نطق: حبيبة علاش واقفا بوحدك هنا ؟!!

إسلام حاطت إيدها على نيفها مديقاها ريحة ونفسها كتلعي :سير بعد مني فيك ريحة لحم مزفرة ...

أركان على نيتوا شم راصوا : ملي سالينا دبيحة دوشت هادي ما تكون غير ريحة شواء

إسلام ساطت بجهد وكتحاول تبعد منوا:نفس شيء لحم لحم طيب ولا خضر ما كيهمش، سير بعد مني وخلي مسافة الأمان بيني وبينك ...

أركان زير على يديه ما عاجبوا حال و قرب منها ونطق بصوت هادئ كيحاول يبرد معها سوق : اجي تغداي ما حدو سخون ...

إسلام لاحت ليه لهضرة مجنننة ومشات وخلاتوا كيشوف : ما بغيتوش عفاك جيب ليا غير ليمون نشموا وناكلوااا هوا لبغيت ونتا بقا بعيد عليا الله يرحم باك ولا عرفتي شنوا دير ،سير عاود دوش ...

أركان من بعيد غوت عليها :تسناي غير نهضر معاك ...

إسلام حلفات لا ضارت لعندوا، بعصبية تكلمات مع نفسها:اويلي هادا غيبقا لاصق فيا ما فهمتش فينما ندور نلقاه حدا نيفي اوووف تخنقت منوااا بلا قياس ....

لالة فريدة لمحتها ديزا عليهم نادت عليها:

_ بنتي إسلام اجي تغدااي ...

إسلام شافت في لحم بكره وقالت : وماااا بغيتووووش شحااال قدي نقولها ليكم ... أنا ما بغيتوش أو ما كناكلوووش ...

توبة كمشات حجبانها ونطقات:اش هاد لهضرة إسلام ياك كيعجبك لحم مشوي وكتاكلي فيه بزاف خصوصا نهار لعيد ...

إسلام قلبات عينيها وبعدم هتمام نطقات حابسا تقية:كنت ودابا ما بقيتش ...

كل من توبة ونرجس وأمينة بقا كيشوفوا في إسلام لي تصرفاتها تغيروا بنسبة فاقت سبعين في لمية ...

إسلام زيرات على سنانها و بعصبية نطقات :خالتي تقدري تقولي ليا ملي كنتي حاملة بأركان على شنوا كنتي كتوحمي ...

فريدة دورات راصها شافت في لبنات مصدومة وبعدم فهم ردات : هههه علاش ابنتي هاد سؤال ...

إسلام هزات يديها وبدات تهضر بيهم :لا والوا اخالتي ما كين والوا"رفعات حاجبها " اش غنقول ليك ولدك كيفقص شي نهار يطرطق ليا مرارتي ما فيهاش ...

لالة فريدة بتنهيدة طويلة نطقات : بيناتكم أبنتي أنا ما غندخلش خلوني بعيدة ...

أمينة قاطعتهم بقولها:مالك سيرا تعيري فيه ولبارح مشيتي تسلتي لعندوا لا تسحابيني ناعسا على ودنيا راه شفتك غادا ...

إسلام ردات معليا صوتها:لبارح بارح وليوم ليوم وزيدن ونتي سوقك اختي دخلي سوق راصك لا بغيتيني نبقا معاك بيخير ...

أمينة رفعت حاجبها :امالك معصبة وباغا غير في من تشدي اش واقع ليك ؟!!

إسلام خنزرات فيها ودخلات تجري لحمام تقياء فطورها كامل ...

مروى جاتها إسلام مبدلا ماشي على برجها ولي هضر معها كتشعل فيه جمعات لوقفة وقالت:غنمشي نشوفها ونجي كملوا ما كلتكم بصحة ...

•• من بعد ما تقيات وقفات مقابلة مع لمراية بدات تغسل في وجها وتشوف في نعكاس صورتها حتى دخلات لعندها متسألة ...

مروى بتسأل قالت :إسلام حبيبة مالك واش مريضة ولا عندك شي مشكل ...

إسلام على سبة بداات تبكي وتشهق دارت لعندها وبصوت باكي نطقات:ما عرفتش أختي أنا براصي ما بقيت فاهما والوا حتى تصرفاتي ما بقيتش نقدر نسيطر عليهم تلفت ...

مروى بدات كتفكر و بعينين تيلمعوا نطقات بفرحة:

_يمكن تكوني حاملة ...

إسلام حطات إيديها على فمها ما مسدقاش : حاملة ههههه باش عرفتيها ...

مروى حركات راصها وقالت :كنت خدامة سكريتيرا عند واحد طبيبة ديال نساء وكانوا كيجيوا شي بنات كيشكيوا من نفس الأعراض ديولك "تبسمات جنب"خاصك ختبار الحمل باش تأكدي وتقطعي شك ...

إسلام مسحات دموعها بالخف وحطات إيديها على بطنها:حتى أنا غنولي أم ههههه "قبطات في يدين مروى وبتوسل نطقات" عفاك تقدري تمشي تجيبي ليا واحد ...

مروى ببتسامة جانبية:معلوم مرحبا نجيبوا ليك علاش لا ...

إسلام بصوت هادئ ردات :اه ما تقولي والوا حتى نتأكدوا ونديرها ليهم مفاجئة كاملين ...

مروى تبسمات جنب وقالت: وخا كوني هانيا انا غنمشي دابا نجيبوا ليك دابا "بتسأل "خاصك شي حاجة أخرى ؟!!

إسلام حركات راصها وريوكها سيلين :اه جيبي ليا معاك شكلاط بجميع انواعوا لبيض والكحل وكلشي وشكرا بزاف سمحي ليا غنعدبك معايا ...

مروى ببتسامة مزينة ملامحها ردات :عدابك راحة أحبيبة ...

•• في لمساء ••

داخل دوش واقفا على طولتها تحت رشاشة والماء هابط نازل مع داتها ،شعرها طويل لاصق ليها في ضهرها ،مقصحة بلا قياس أو صابرة بزز منها ...

حطات شامبوا على راصها حتى كتسمع دقان في باب دوش ، سدات لماء و ردات مغمضة عينيها :

_وي شكون ؟!!

عمر بجدية نطق :نرجس حلي راك نسيتي فاندوش ...

نرجس مغمضا عينيها جوبات بنفي :لا دخلتوا

عمر بصوت رجولي خشن قال:وشنوا هادا لي في يدي بوعوا وتي حلي نعطيك شغلك ونمشي راه عندي ما نقدي ...

نرجس بقلة حيلة حلات لباب وهوا يدخل هاز فوطة ديالوا او سد لباب موراه بزربة ...

نرجس بصعبية نطقات :اويلي شنوا كدير خرج الكداب خرررررج ...

عمر طلعها من لتحت لفوق وبعينين تيلمعوا نطق:

__لحيلة حسن من لعار أحبي ...

نرجس حلات لماء غسلات شعرها بالخف ودارت لعندوا غير شافتوا كيشوف فيها بنضرات كلهم حب وشهوة وهيا تحط ايدها على سدرها والأخرا لتحت كتحاول تخفي تفاصيلها ،او وجها تسبغ بالأحمر ،زيرات على سنانها وبعصبية نطقات :

_اش جيتي دير هنا خرج عليا براااا ...

عمر حيد حويجوا بالخف وجرها لعندوا حتى تخبطات مع سدروا،دور يديه على خصرها لصقها معاه و بصوت رجولي مبحوح نطق حدا ودنها بهمس:

_جيت نشوف رزقي أشنيولة ديالي ...

نرجس درباتوا لسدروا او كتحاول دفعوا تحت لماء :واش تسطيتي لاااا ، تفوو على باسل ما كتحشمش ...

عمر لصقها مع لحيط وقال : حيدي من فمك تفوو ولا غادي نن ...

نرجس بلعات ريقها وبتوسل نطقات: عفاك أعمر سير لا يشوفنا شي حد ونتشوهوا سير ...

عمر بدا يقرب منها وقال:حتى ناخد حقي ونمشي ...

نرجس كمشات حجبانها و بترجي ردات بصوت أنثوي رقيق :لا لا غتدرني كيف لبارح وأنا مزال مقصحة بعد مني عفاااك بعدددد ....

عمر بقا مركز غير مع شفايفها لفازكين بالماء كيفاش كيتحركوا قداموا ، بلع ريقوا حتى تفاحة أدم تحركات في حلقوا وبتأكيد نطق :

_بزربة أحبي ما غنقصحكش ...

شاف في عينيها بطمئنان ونزل لعنقها بدا كيفرق قبلات دافئة فيه ...

نرجس بدات تبكي :هننن حشومة عليك والاه ..

عمر مسكين داب مسح ليها دموعها و بعينين معسلين وصوت ضعيف قال : شششش بب دغيا ما تخافيش ...

نرجس بقلة حيلة ساطت بجهد:هنن تفوو على كنس كيف دير كنكرهك ...

عمر بتنهيدة نطق :وأنا كنبغيك أمراتي لعزيزة ومسألة تفوو مزال عاد غنتفاهموا عليها من بعد ...

حلات فمها غتهضر وهوا يطلع لفمها حط شفايفوا على شفايفها سكتها بقبلة طويلة وعميقة رفعتها لسماء سابعة وبيديه بدا كيلامس جسدها بتملك شي لي خلاها دوب وتستسلم ليه بلهلا يطريه ليهاا ...

°°•• جالسين تحت لجليسة لي تحت شجر مجموعين على كاس ديال أتاي ولقهوة ولمسمن ولملاوي من يدين توبة من غير أركان وسي عدنان وسي لعربي و كريم وسي لمختار خرجوا يسرحوا رجليهم ويدوروا في لفيرماااا ...

أمينة كمشات حجبانها ونطقات: غنبقاو جالسين على سقيل وليلة سبوع ماشي معقول جيبوا لينا طعارج نضربوا ونشطوا

سعاد زفرات بنفاد صبر: سيدة يالاه ماتت أمينة حشومة حنا نطبلوا ونغنيوا ...

الحاجة خديجة بتنهيدة طويلة قالت:اودي راها ماتت قرابة جايا لشهرين ما كينش لاش نبقاو هازين في قلبونا خصنا نشطوا على وديت جنات ونفرحوا بيها...

إسلام جالسا وحاطا حادها جنات في لكونة ، هازا كاس ديال أتاي بين يديها كترتاشف منوا بشوي وكتبتاسم بوحدها فرحانة بتحليل لي طلع إجابي وحالفة ما تقول ليهم لخبر حتى لعيد ميلاد أركان لي ما بقاش لي بزاف ...

جنات بدات تبكي وتفركل برجليها :وينغ وينغ وينغ ...

إسلام حطات لكاس وتحنات هزاتها بين يديها :اوو مال حبيبة ماماها كتبكي أوغا أوغا مشيشتي "هبطات لودن جنات وتكلمات بخفوت" قريب يتزاد عندك اخ ولا اخت تونسك أبنتي ...

توبة رفعات حاجبها وبتسأل نطقات:اش سيرا تخبري للبنت ...

إسلام هزات راصها وقالت :بيني وبين بنتي "شافت في أمير كيشوف فيها "او ولدي "خاطبت أمير " أجي عندي البطال ديالي نقول ليك في وندك حتى نتا باش ما يسمعوناش ...

أمير جلس حداها عجبوا لحال وفرح من قبلوا ...

إسلام بخفوت قالت في ودنيه : ملي تكبر جنات غنديكم لمحل الألعاب تلعبواا بزوج بيكم ...

أمير تبسم بفرحة حتى طلعوا حنيكتوا لمنفوخين،بصوت طفولي نطق:خالتي عطيني نشد لحبيبة ...

أمينة تفرشخات بضحك:هاكيلي على لحبيبة وشوف اسي يوسف لبنت عندك من دابا ولاوا عندها معجبين خاصك ترد لبال، هانا فين قلتها ليك ...

يوسف ما قدرش يشد راصوا من ضحك حنت طريقة لي نطق بيها أمير طفولية، وسالات معاهم جابت ليهم تمام كاملين ...

مي رحمة ببتسامة جانبية نطقات:اي واقيلا لا غنتناسبوا معاكم للمرة تالثة الحاجة ...

الحاجة خديجة ببتسامة مزينة ملامحها ردات:داك شي لي ضهر ليا أبنتي رحمة مرحبا بيكم من دابا راه كيبان ليا طْفل عندكم مزروب ...

توبة حركات راصها وقالت:بغيتوا ترجعوني عدوزة من دابا ما شرفتونيش لاااا ...

أمير قاطعهم بعصبية نطق: ءء وعطيني نشدها أخالتي ...

أمينة بعفوية نطقات :وااااع بغاااا يشدهااااا ...

"بدات تفركل في الارض من كترة ضحك ما مديهاش في ناس لي كون لقاوو الأرض تشق وتبلعهم من كمية الإحراج لي سباتوا ليهم"..

أما سعاد بدات تقرس وتخبط برجليها في امينة تجمع ولا هيا بغات تسكت حتى لحاج ناض زاعف ومع تلفة قال ليهم غادي نصلي صبح وغبر ما بقا بان ...

الحاجة خديجة بتنهيدة نطقات حابسا ضحكة: ما قالوا مطبوزة في لهضرة أبنتي حتى مطبوزا نيت "حركات راصها " ولاه ما كدبوا عليك هههههههه

•• جالسا في كرسي بعيدة عليهم ،كتشوف فيهم كيفاش كيضحكوا مستمتعين بالجوو، هاد شي كامل عمرها ماعاشتوا مع عائلتها باها كان ديما بعيد عليهم هيا وختها دفئ لعائلة ما عمرها حساتوا حتى عاشت مع عائلة الراضي... ملي غتمشي لفرانسا غنتوحش بزاف بحال عاد لجلسات والأجواء ...

بلا ما تحس طاحت دمعة حارة من عينيها مسحتها وقالت بصوت مخنوق :يمكن مكتاب ليك أمروى تعيشي وحيدة في هاد دنيا "بغصةخانقاها " قبل بعدا كانت عندي ختي كتسول عليا اما دابا ما كين لي يسول فيا"هزات عينيها لسما" مشات لغالية على قلبي ماما وتبعاها ختي كون غير سبقتوني قدامكم عاد مشيتوا حتى حاجة ما زوينة بلا بيكم ...

مروى مع نفسها :مع بابا علاقتي عمرها كانت مقادة وفي لحب خسرت او ما كتابش ليه يكون من نصيبي ،ناس لي بحالي ما عندهمش لحق يحلموا يكونوا عائلة "تنهدات بضيق" لوحدة هيا مصيري ...

سمعات صوت إسلام كتنادي عليها ،خدات شهيق وزفير ودورات راصها لعندها مبتاسمة:

_وي إسلام ...

إسلام كمشات حجبانها وقالت :اجي تشربي اتاي علاش جالسا بعيدا علينا هكاك ...

مروى ببتسامة جانبية ردات:وخا أحبيبتي أنا جايا ...

ريحة سفة ولحم بالبرقوق كيطيبوا على لعواد كتفوح في كل لفريما ...

مجموعين كل من يوسف و كريم وسي عدنان مع بعضياتهم جالسين وشادين جنات بيناتهم فرحانيين بيها وحداهم أمير لي قابط ليها في إيدها وعاجبوا لحال حالف لا طلق منها ...

كريم تبسم جنب وقال:ما شاء الله زوينة الله يخليها ليك ...

يوسف حرك راصوا مبتاسم :أمين لعقبا ليك حتى نتا أخويا بشي بنية ...

كريم بعينين تيلمعوا :إنشاء الله

أمير بصوت طفولي :عمي يوسف عطيني نهز جنات ...

يوسف تبسم ليه وقال: حتى تكبر اولدي ما غتقدرش ، نخافك طيحها ...

أمير بإصرار كبير نطق :لا ولاه ما نطيحها غير عطيني ...

يوسف بتنهيدة طويلة قال:جلس فوق سداري بعدا عاد نعطيها ليك ...

أمير بفرحة طلع فوق سدراي جلس وقبط جنات قداموا شدها بجوج يدين كارز عليها لا طيح ليه وبعينين تيلمعوا نطق بفرحة:

_وااالواا راصها صغير وعينيها صغار كلها صغيرة هههه ...

سي عدنان بصوت رجولي خشن قال:كلنا كنا قد هكاك سبحان الله الإنسان قداش كيكون وقداش كيولي "حرك راصوا "حتى انتا اولدي كنتي قد جنات ملي كنتي صغير ...

دخل لعندهم أركان لصالون خاشي يديه في جيبوا، حرك راصوا لقا عليهم تحية ودار إشارة لخووه يجي عندوا يوسف فهم راصوا او وقف توجه لعندواا مكمش حجبانوا ...

أركان بجدية نطق : أجي معايا واحد دقيقة ...

يوسف لبس في رجليه وخاطب كريم :رد لبال لجنات اخويا انا شويا ونجي ...

كريم بطمئنان رد عليه: وخا كون هاني ...

يوسف كمش حجبانوا وبتسأل نطق:اش واقع ياك ما كين باس ؟!!

أركان بصوت حاد نطق :تبعني ...

••خرجوا كيتمشاوو والصمت طويل بينهم حتى كسروا أركان بقوله :

_عيطت عليك على قبل لغلطة لي درتي ،نتا خاصك تصلحها و في أقرب وقت ...

يوسف بلع ريقوا بصعوبة :كتقصد مروى ؟!!

أركان وقف ودار لعندوا :معلوم كنهضر على مروى "رفع صبعوا" لبنت كنعتابرها بحال ختي نرجس ما غنسمحش ليك تضحك عليها وتخليها ...

يوسف شاف فيه : انا ما ضحكتش عليها وعرفت راصي غلطت ومستعد نصلح لغلط ديالي ولكن أنا ما كنتش في لوعي ديالي ديك ليلة ...

أركان طوا يديه عندوا و بصرامة نطق: شرف لبنت ماشي لعبة وأنا ما كيهمنيش تكون كنتي ساحي ولا سكران لمهم لي كنعرف هوا مروى ما ضيعش ...

يوسف بتنهيدة رد عليه :شنوا لمعمول لي درتيه اخويا انا معاك حتى انا بغيت نريح ضمير ديالي"زير على يديه " من ديك ليلة ما بقيتش كنعس مرتاح وتأنيب ضمير معدبني...

أركان بجدية نطق بصوت رجولي خشن: خاصك تزوج بمروى بهاد طريقة غتصلح لغلط لي درتي ...

يوسف بصوت هادئ :وخا وليني بغيت ناخد رئيي ديالها قبل ...

أركان بأمر :سير هضر معاها وتفاهموا ومن بعد نمشيوا نهضروا مع لحاج او لواليد ، سير دابا راه لبنت غدا باغا تمشي بحالها ...

يوسف سمع انها غنمشي ما عحبوا حال تنهضد بضيق وببتسامة جانبية نطق :وخا هاهوا غادي غير ما تبقاش دير فيها بحال هاد شوفات ...

•• جالسا في صالون صغير حاطا حويجها كتطوي فيه وترتبهم في لباليزا ديالها،اول مرة كتحس بقلبها كيتشوا من لداخل حنت غتفارقهم، بفضلهم عرفات معنى "العائلة السعيدة " كيفاش كتكون، ملي تشوف غيرك فرحان وعايش بيخير تما فين كتحس نتا براحة والإطمئنان ماشي لعكس ...

تمنات كون كانت في بلاصة نرجس ويكون عدنان باها هيا على لمعاملة الحسنة لي كيتعامل معاها بيها ...

قرات باش من بعد ما يدوز سبوع جنات لي غيتقام مابين لعائلة ليلة غتمشي بحالها لغد ليه بدون رجعة وغتعوض نفسها على صبر ولوحدة ...

مروى بصوت مخنوق تكلمات مع نفسها : صافي سالاا وقتك هنا أمروى وبعد غدا غتبقاي عيشا بوحدك حتى تموتي بوحدك في بلاد ماشي حتى بلادك ...

"طاحت دمعة حارة من عينيها ومن بعدها بادوو كينزلوا دمعات طوال وحدة تلوى الأخرا على خدها بدون ما تحس كيعبروا على حرقة قلبها وعلى شعور سيء لي كتحس بيه "

وقفات على طولتها مسحات دموعها لي مزال كينزلوا وبدات تكمل جميع حويجها وتقول :

_تهدني امروى خاصك تكوني قوية هه اش فيها اي عشتي بوحدك بزاف ديال ناس عيشين بوحدهم وبيخير فرحانين وما واقع ليهم والوا، دابا علاش نتي كتبكي ؟!! صافي ماوقع والوا مسحي دموعك وتكلماي نشطي هاد ليلة وفرحي معاهم دي معاك دكريات زوينين تعيشي على ذكراهم من بعد ...

تمشات لطبلة خدات كاس مصنوع من طين ولقارورة ديالوا كدالك كبات ليها لماء وبدات كتشرب ...

حتى وقف عليها بدون ما يقول سلام تقابل معها وهيا كتشرب في لماء شاف فيها مطول حتى رتابكات ...

مروى حيدات لكاس من فمها وببتسامة مسطنعة نطقات :

_يوسف لباس ؟!!

يوسف بعينين تيلمعوا وبأمل كبير حامل في قلبوا نطق بتسأل :واش تقبلي تزوجي بيا ؟!! وغنحاول ندير لمستحيل باش نخليك سعيدة ونسيك في جميع الآلام لي عشتي ...

مروى بلعات ريقها بصعوبة وبتوتر ردات : ءء ما عرفتش أيوسف صدمتيني بهاد سؤال "زيرات على يديها ما عاجبها حال وبعصبية نطقات" صدمتيني حنت ما كنتش متوقعة منك أنك غتبغي تشفق عليا واش كنبان ليك أنا بنت ضعيفة وجالسا نبكي عليك و لا كنطلب فيك باش تزوج بيا ...

"تصدمات حنت ما كانتش متوقعة انا الله غيفتح ليها باب باش تبقا معاهم وبينهم وتكون عائلة مع راجل لي كتبغي "

يوسف حرك راصوا بنفي :لا انا ما قصدتش هاد شي أمروى أنا بغيت نتزوج بيك حنت انا باغي نت ...

مروى حطات لكاس من يديها وبتنهيدة طويلة نطقات مقطعاه :أنا ما بغيتكش تزوج بيا على وديت داك لغلط لي وقع اولا على قبل وصية ختي نجلاء"بغصة خانقاها" كنت بغاك تزوج بيا بإرادتك ولكن نتا ما كتبغينيش للأسف ...

يوسف قبط ليها في يديها وهيا تجرهم :صح انا ما كنحس بحتى حاجة من جيهتك ولكن لي عارف دابا إلى مشيتي ما غنقدرش نعيش بلا بيك انا ولفت لوجود ديالك في حياتي "شاف في عينيها "حاولي تفهميني عفاك ما بغيتش نضغط عليك فكري مزيان وكيفما بغا يكون لقرار ديالك أنا غنحتارموا ...

مروى بقات كتشوف ليه في عينيه و مع نفسها نطقات ساهية وعينيها تيبريوا :

_خاصك تكوني فرحانة امروى لحلم ديالك غيتحقق هوا قال ليك ما غيقدرش يعيش بلا بيك وافقي تزوجي بيه باش تبقاي في جنبوا او ما تبقيش وحيدة وافقي علاش ساكتة؟!! ما فهمتكش هضري وقولي ليه راك كتبغيه غوتي وخلي ناس كلهم يسمعوك "يوسف عطاها بضهر وتما غادي خارج " مالك سكتي ؟!! ولا خفتي ؟!! أن سعادة ديالك ما تكملش كيف ديما ،خفتي ؟!! لا تجي شي حاجة توقف في طريقكم ؟!! شنوا هوا لحل هوا لهروب ياك باغا تباقي تهربي من لمشاكل ديولك بلا ما تواجهيهم "شافتوا غبر من قدامها " إيوا هربي ألالة وعيشي بوحدك باقي بوحدك حتى تموتي بوحدك ما يسيق حد خبارك نتي لي ختاريتي إيوا تحملي ...

تحت ضوء لقمر واقف خاشي يديه في جيبوا ونسمات لهواء كتحرك ليه شعروا حك لحيتوا من لتحت كيفكر ...

حتى كتبان ليه جايا لعندوا راسمة إبتسامة بريئة على محياها وهازا باكية كبيرا ديال شكلاط كتاكل منها بإيد والأيد تانية كتلعب بيها في خصلة من خصالات شعرها بحال شي طفلة صغيرة ...

وقفات قداموا هازا راصها وكتاكل:لحبيب ديالي علاش واقف بوحديتك هنا ؟!!

أركان تصدم وببتسامة مزينة ملامحوا رد عليها: سبحان مبدل الأحوال كتصبحي في شكل او في ليل كترجعي مراتي لي كنعرفها "كمش حجبانوا " ممكن تقولي لديك سيدة لي كتبان بنهار ما تبقاش تجي ..

إسلام عضات من شكلاط وبدات كتبنن ما مسوقاش :ما غنتناقش معاك حنت راشقا ليا مع هاد شكلاط اممم ...

أركان جابت ليه تمام بالأصوات لي كدير وعاد لبرد لي كيلعب بشعرها وشكلها كتبان لوحة فنية رائعة،بلع ريقوا حتى تفاحة أدم تحركات في حلقوا وبجدية نطق:

_يوسف مشا يطلب زواج من مروى

إسلام بعينين تليمعوا وفرحة تشع من عينيها قالت : حلف بالله

أركان رفع حاجبوا:عمري كدبت عليك ؟!!

إسلام بصوت أنثوي رقيق : لا ما قصدت داك شي غير تصدمت وصافي "غوتات بفرحة وتلاحت عليه عنقاتوا " وااااااووو أحسن حاجة غيدير وأنا عرفاك نتا هوا مول لفكرة دابا مروى ما غتمشيش كنبغيك بزااااف أحبيبي ...

أركان ضمها ليه وبصوت رجولي خشن نطق:

_حتى أنا أميرتي كنبغيك ،كون كنت عارفك غتفرحي لهاد دراجة كون طلبتها من يوسف شحال هادي ...

إسلام بعدات منوا ونطقات بحماس: إنشاء الله أنا لي غنضم ليهم لعرس غندير شموع ولورد غيكون عرس رومانسي و أسطوري غنخدم عليه مزيان باش يعجبهم ...

أركان حك لحيتوا وقال:ما تصرعيش خلي بعدا حتى توافق مروى ...

إسلام بتأكيد نطقات:هيا غتوافق غير كون هاني أنا متأكدة فين غتلقا بحال يوسف زين ورجولة والأخلاق ولحترام كامل مكمول ماشاء الله عليه ...

أركان حس بنار لغيرة شعلات في قلبوا، زير على يديه ما عاجبوا حال : مازدتيش فيه

إسلام تبسمات جنب وقالت :وراه غير خوك ما كنشكرش في لبراني ...

أركان بصوت حاد نطق :ولاوا

إسلام عضات من شكلاط وقالت :هانا ساكتا "صغرات عينيها "وينوا على لمغيار ديالي لي عطاني سيدي ربي ...

أركان كمش حجبانوا وبتسأل نطق :صافا؟!! مسحي جنب فمك ...

إسلام ببتسامة مزيناها :ملي كنشوفك كنولي لباس "مسحات فمها "باقا شي حاجة ؟

أركان شار لجنب فمها مخنزر :لا لهيه

إسلام دلات شفتها لتحتانية وبعصبية نطقات: صافي مسحت الى بغا يبقا خلي بوه مالي على حالتي ...

أركان ساط بجهد وجرها من خصرها لصقها معاه وحط شفايفوا على جنب فمها لحس ليها شكلاط كامل حتى ما بقا والوا، ونزل الإيدها عض قطعة من شكلاط ورجع طلع لفمها خشا ليها طريف فيه وقال :

_ناس كياكلوا غير بشويا باش ما يعمروش حالتهم ...

إسلام دورات إيديها تانية جرتوا من عنقوا هبطاتوا لمستاواها وحطات شفيفها على شفيفوا خشات ليه قطعة شكلاط في فموا وقالت ببتسامة بريئة :

_دوقتك هههه "رفعات حاجبها "كيف جاك ؟!!

أركان بلع شكلاط و بصوت رجولي مبحوح نطق:زيديني شويا ونقول ليك ...

إسلام بعدات منوا وعضات من شكلاط وعطتوا لباقي :خود هادا كامل ملي تقاديه قولي ليا كيف جاك ...

أركان جرها من خصرها بالخف وخشا فموا في فمها بدا كيمص ليها في شكلاط لي داخل فمها وملي سالا داز لشفايفها بدا كيلتاهم فيهم بحنية وحب شي لي خلا لفراشات يلعبوا في معدتها ورجليها ما بقاوش هازينها هوا غير حس بيها ترخات بعد منها وقال:

_اي حاجة من فمك عسل أحبيبة ...

رجع غيحط شفايفوا على شفيفها وهوا يسمع صوت خطوات جايا ناحيتهم ،مسح فموا ودار يشوف شكون ...

يوسف بملامح ممحية نطق :خويا واقيلا مروى ما بقاتش كتبغيني كيف قبل ...

أركان رفع حاجبوا: باش عرفتيها ؟!!

إسلام كمشات حجبانها و بتسأل نطقات : علاش مالها شنوا قالت ليك يكما رفضاتك ...

يوسف بتنهيدة طويلة قال :ما عرفتش أنا، قالت ليا نعطيها وقت تفكر ...

إسلام بتفائل ردات :انا غنمشي نهضر معاها ويكون خير ...

• •خلاتهم واقفين كيهضروا او توجهات لصالون صغير عند مروى لقاتها جالسا كتشوف في نقطة وحدة ...

إسلام بجدية نطقات بنبرة صوت حزينة مني شافت لحويج:

_صافي قررتي تمشي ؟!!

مروى هزات راصها بإجاب ونطقات بضيق:اه اختي ...

إسلام بلعات ريقها حابسا لبكيا :سخيتي بينا وغتمشي بلا ما تشوفي موراك وتبداي حياة جديدة بوحدك "حركات راصها" غتقدري ؟!!

مروى مسحات عينيها وبصوت ضعيف ردات: لا ماشي هكاك ولكن خاصني نمشي ...

إسلام كمشات حجبانها :ويوسف وداك شي لي طلب منك غتجاهليه ...

مروى نزلات عينيها الأرض وسكتات ...

إسلام حركات راصها وبعصبية نطقات :إلى بغيتي جنات تحس براصها يتيمة تعيش مع عائلة باها وعائلة مها ما تعرف عليهم والوا ،وإلى بغيتيها تبقا بعيدة على خالتها لوحيدة يمكن ليك تمشي سيري عيشي حياتك بوحدك كيف بغيتي نتي، ويوسف خليه يتزوج بوحدة اخرا ونتي جلسي فشي ركنة وباقي تندبي حضك ...

مروى وقفات وبعينين تيبريوا بدموع نطقات: إسلام أنا كنبغي يوسف كتر ما تصوري ولكن حاسا بخوف دخالي من لمستقبل، ما عرفتش علاش ما قادراش نخطي هاد لخطوة ...

إسلام شدات ليها من دراعها :ديري كلشي فيد الله وتوكلي عليه وكلشي بإدن الله غيدوز بيخير تيقي فيا وسمعي لكلامي وافقي على هاد زواج "تنهدات من لداخل " حنت أصعب حاجة تعيشي بعيدة على لي كتبغي ...

مروى عنقات إسلام: عندك لحق اختي ما عرفتش بلا بيك شنوا كنت غندير ...

إسلام مبادلاها لعناق:وافقي على زواج ؟!!

مروى بعدات منها وقالت:أنا موافقة ...

إسلام بعينين تيلمعوا بسعادة نطقات :نتي مساعدتي في لخدمة وصحبتي وختي و غتولي مرات لوسي مرحبا بيك ما تخليش شحال دابا أنا فرحانة بلا قياس بحلا غنعود عرسي أنا وأركان من جديد هههههه ...

مروى كمشات حجبانها وبتسأل نطقات: باش عرفتي بلي يوسف طلب مني زواج ...

إسلام ببتسامة جانبية :لوسك لمستقبلي أحبيبة ما كيقدر يخبي "شارت لنفسها" على مرتوا حتى حاجة ...

مروى ببتسامة مزينة ملامحها قالت:الله يخليكم ديما مجموعين ويبعد عليك لحساد او ولاد لحرام ياربي ...

إسلام حطات إيديها على فمها :امين ناري أنا ما مسدقاش بلي نتي وافقتي كون كنت نعرف نزغرت كون زغرت اش كتسناي سيري عند يوسف قوليها ليه ...

مروى بخجل ردات :ما نقدرش ..

إسلام جبدات ليها حنكها:وينوا على لحشمة أنا غنقولها ليه ألالة وهوا ملي يبغي يطلبك لزوج غيطلب ايدك من عند ماما وخالي "شارت لنفسها" وأنا الأنني أخت العروس غنتشرط عليه شويا كيف بغيت ...

مروى بصوت هادئ:حشومة ، خليه عليك مسكين...

إسلام دورات راصها: هاي هاي على لالة لعروسة كتجي على راجلها لمستقبلي من دابا ،الله يكمل بالخير ...

جالسين تحت ضوء لقمر كيشربوا في قهوة ويهضربوا بيناتهم بينما وجد لعشاء ديال سبوع جنات ...

أركان حرك راصوا ونطق :أحسن حاجة درتي ملي طلبتي منها زواج ،بهاد طريقة غتريح ضمير ديالك وتصلح لغلاط لي وقع ...

يوسف رتاشف من قهوتوا وقال:وي دابا اهم حاجة عندي هيا تقبل وتريح ليا قلبي ...

أركان حط إيدوا على كتاف خوه :انشاء الله غادا تقبل بيك اخويا على هيا فين غتقدر تلقا بحالك ...

يوسف تبسم جنب : في صراحة أنا لي ما غنلقاش بحالها مروى بنت قوية أو واتقة من نفسها ملي كانت خدامة معايا في شريكة تبارك الله كانت غادا في خدمتها نيشان "كمش حجبانوا "على ذكر لخدمة، كيف غادي نتا مع شريكات؟ ومدير شركة ديالك لي تقتل عرفوا لبوليس شكون قتلوا ولقيتي نتا شكون يعوض بلاصتوا في لخدمة ...

أركان حك لحيتوا من لتحت وزفر بجهد : قضيتوا غامضة لحد ساعة ما عرفوش بقاو فيا غير ولادوا صح كيوصلهم راتب شهري واي حاجة بغاوها كنرسلها ليهم ولكن الأب ما كيتعوضش "شابك يديه مع بعض" واحد لموضف عندي خدمتوا متقونة هوا لي سلمتوا منصب نائب لمدير ديال سيد لي تقتل ...

يوسف بجدية :عنداك يكون شي واحد باغي ينتاقم منك هوا لي صيفط شي حد يقتلوا ...

أركان جا في بالواا داوود هوا لي كيعتبروا لحد ساعة لعدوا ديالوا لوحيد ،طرد لفكرة من عقلوا و حرك راصوا بنفي: لا ما كنضنش ...

وقفات عليهم لبسا كسيوة حد ركبة بالكميم ومخليا شعرها مطلوق على راحتوا، راسمات إبتسامة بريئة على محياها وبصوت أنثوي رقيق نطقات :

_خوتي لعزاز مجمعين بلا بيا ما حرامش عليكم زوجتوني أو خرجتوني من حياتكم ..

يوسف دار ليها بلاصة حداهم وقال :اش كتخربقي اجي لهنا ...

نرجس جلسات بيناتهم فرحانة وببتسامة قالت :كبوا ليا شي كاس ديال قهوة ...

أركان بصوت رجولي خشن نطق : إلى شربتيها غتخليك بلا نعاس ليلة ...

نرجس رفعات حاجبها:شكون لي قال ليكم أنا باغا نعس بغيت نسهر مع خوتي "حطات راصها على كتف أركان" توحشتكم بزاف ...

أركان ببتسامة مزينة ملامحوا رد عليها:حتى حنا الأميرة صغيرة ديالنا ...

يوسف بغا يعصبها :صافي راها شرفات الأميرة صغيرة دابا هيا جنات ههههه

نرجس دلات شفتها لتحتانية وخنزرات فيه : هننن أركان هضر معاه ...

أركان طبع قبلة في جبينها وقال :بعد ليا من ختي الشارفة هههه"شافتها خنزرات فيه " قصدت الصغيورة هههههه

يوسف رفع حاجبوا وبتسأل نطق: إيوا مزال ما غتفرحينا خوك راه باغي يولي خال زعما ..

نرجس نزلات راصها الأرض حشمانة منهم ...

•• كانوا غاديين كيتمشاوو حتى سمعوهم كيهضروا بيناتهم ،تبسمات ليهم ومن وراهم نطقات فرحانة ...

إسلام قابطا لخوها من دراعوا : اهاه يوسف عندوا لحق خاصك تجيبي لينا شي عمر صغير ،حتى أنا باغا نولي خالة ياك أخويا ...

عمر شاف في نرجس :معلوم الخوادرية شكون كره ولا لا أنرجس ،شنوا بان ليك ؟!!

نرجس بلعات ريقها حشمانة وببتسامة جانبية ردات: حتى تولي نتا بعدا خال وانا عمة عاد نشوف ...

إسلام حركات راصها بإجاب:وراه أنا أصلا "حطات إيديها على فمها قبل ما تفرش كلشي " ...

أركان رفع حاجبوا:شنوا نتي اصلااا ؟!!

إسلام ساطت بجهد:نتا بقا حاضي ليا فمي واي حاجة قلتها علق عليها اووف وليتي كتخنقني ...

يوسف وعمر ونرجس بقاو كيشوفوا في إسلام مصدومين من طريقة كلامها ...

أركان ناض قاصدها مخنزر وهيا غير شافت نضراتوا لي ما كيبشروش بالخير ولات تفيبري من لخوف ،جرها من دراعها على جنب من بعد ما ستأدن منهم ...

إسلام كمشات حجبانها: اي قصحتيني طلق مني اووف ...

أركان زير على سنانوا وبغضب نطق :بيني وبينك نصبر ليك ونهز ليك هبالك أبنت مي رحمة وليني قدام خويا ولا العائلة لا خاصك تحتارميني قبل لن ...

إسلام عينيها دمعوا :هنن بعد مني كنكرهك ما تبقاش تقيسني ...

أركان بعصبية نطق ساعر:ما بقيت فاهم فيك والوا علااااش كتصرفي بهاد طريقة ...

إسلام زيرات على يديها وبصوت عالي نطقات :

_حنت أنا حاملة

"غير عرفات راصها اش قالت حطات ايدها على فمها وخسرات ملامحها كانت ناوية تفرحوا نهار عيد ميلادوا او خصرات كلشي"

أركان تدهش و بعدم فهم نطق :كيفاااش حاملة ؟!!

إسلام بعينين تيلمعوا حركات راصها بإجاب وبفرحة تشع من عينيها نطقات :أه أنا حاملة و بعد تسعة شهر من دابا وإلى بغا الله غيجي ولا غتجي لي تونس جنات وتلعب معاها ...

أركان خفق قلبوا بفرحة ما سدقش وعينيه دمعوا ،تحنى عرا ليا كرشها وطبع قبلة دافئة فيه وبرجفة ضاهرة في صوتوا نطق من أعماق قلبوا :ولدددددي "رفع عينوا فيها" متأكدة أنك حاملة ...

إسلام حركات راصها بإجاب :اه متاكدة وعلاه تصرفاتي حاليا كيبانوا ليك معقولين راه ماشي لخاطري كتنصرف معاك بديك طريقة انا بنفسي ما فهمتش فكل مرة كتبان ليا في شكل ...

أركان دور يديه على ضهرها ودفن راصوا في خصرها:تاني أجمل حاجة غتوقع في حياتي بعدك هيا هادي شكرا أحبيبة "بدا كيبوس في خصرها ويردد "ولدي ولدي ...

إسلام تبسمات ليه وبخجل نطقات:اويلي نوض نوض لا يشوفك شي حد ويفهمنا غلاط ...

أركان وقف او هزها بين يديه صدمها:من ليوم اي حاجة بغيتيها نجيبها حتى لعندك نتي ما غتنوضيش من لفراش ،ما فهمتكش علاش واقفة على رجليك باش كتحسي واش بيخير،مشهيا شي حاجة نجيبها ليك ...

إسلام بدات كتفركل برجليها: لا غير نزلي لايشوفنا شي حد واه ندمتيني حتى قلتها ليك ...

أركان شاف فيها ونطق بحدة :علاش خبيتي عليا ؟!! من إيمتا ونتي عارفا بالموضوع ...

إسلام خسرات ملامحها:ماشي بزاف باش درت ختبار ديال لفرماسيان ،هنن كنت بغيت نديرها ليك مفاجئة في عيد ميلادك وخسرتي ليا كلشي بفف ...

أركان بصرامة نطق :من ليوم أنا لي غنهتم بيك ونتي ما غتنوضيش من لفراش حتى تولدي غدا نمشيوا عند شي طبيبة نشوفوا صحة لجنين وصحتك كيف ديرا ....

إسلام حلات فمها نصف حلة ورجعات سداتوا : أشنوا مالك تسطيتي زوينة هادي لحبس بعينيه "كمشات حجبانها"ونزلني

أركان بصوت رجولي خشن نطق :راصك قاصح وانا لي غنعرف كيفاش نتعامل معاك ،كلمة وحدة قلتها أ أم ولدي ...

إسلام بتنهيدة قالت :نسيتيني شنوا كنت باغا نقول ليوسف نزلني نمشي نقول ليه راه مروى وافقت تزوج بيه...

أركان حرك راصوا وبجدية نطق:أنا غنديك حتى لعندوا

إسلام عينيها خرجوا بصدمة:اويلي حشومة يشوفنا هاكا لا وقف ...

مجموعين على طبلة لعشاء على طبق ديال سفا بعدما تناولوا لحم بالبرقوق ...

الحاج الراضي نحنح بشوي ونطق:تبارك الله على طيابات هاد شي بنين الله يعطيكم صحة ...

أمينة مضغات دغمة وقالت :كلشي من يدين مي رحمة ...

مي رحمة ببتسامة جانبية نطقات:بصحتكم كلشي صيبوه لبنات أنا غير وريتهم ...

أركان بصوت رجولي خشن قال:إسلام عندها ليكم واحد لمفاجئة ...

إسلام مسكينة صدمها بلعات دغمتها وببتسامة مسطنعة نطقات مبهوضة: أشنوااا ؟!!

الحاجة خديجة:اش مخبيا علينا أبنتي قولي هاحنا كنسمعوا ...

إسلام تماطات لكاس ديال لماء شربات منوا وتحت أعين لكل نطقات حشمانة : جنات قريب يتزاد عندها أخت ولا أخ ...

الحاج الراضي بفرحة تشع من عينيه نطق بصوت تعبان :مبروك عليكم أبنتي فرحتوني بزاف دابا حتى إلى مت غنموت مرتاح ...

إسلام كمشات حجبانها ما عاجبها حال :الله يطول لينا في عمرك الحاج ما تقولش هاد لهضرة الله يخليك ...

مي رحمة ناضت باست راص بنتها وقالت : مبروك اكبيدتي تكبر في عزكم "خاطبت أركان " مبروك عليكم اولدي ...

أركان ببتسامة مزينة ملامحوا رد عليها:الله يبارك فيك انسيبتي لعزيزة ...

أمينة خنزرات في إسلام وبعصبية نطقات: صحبة زوينة هادي في عوض ما تقولي ليا لخبر من اول ما عرفتي يلاه جايا تهضري ما سدقتيش ...

إسلام بتنهيدة طويلة ردات:كنت باغا نجمعكم كاملين ونديرها ليكم مفاجئة نهار عيد ميلاد أركان وليني سدقت قيلاها قبل لوقت،صافي حتى نتي بلاش ما تقلقي مني ...

أمينة بسعادة غوتات :وااع غنولي خالة لمهم فرحت"شافتهم كيشوفوا فيها"سمحوا ليا غير مع لفرحة انا هكا ديرا اش غندير ...

سي عدنان بصوت رجولي:خودي راحتك أبنتي "خاطب ولدوا"غنولي جد للمرة تانية ههههه فرحتوني ...

الحاجة خديجة حيدات براصلي من يديها مداتوا ل إسلام: مبروك أبنتي الله يحفضوا ليكم ،هاكي ديري هادا في يدك ...

إسلام بخجل :لا الحاجة غير دعوتك كافيين ما بغيت والوا

الحاجة خديجة بإصرار :شدي أبنتي بصحتك مزال ملي تولدي وتوقفي على رجليك هديتك هيا لكبيرة ...

بعد إصرار كبير من طرف لكل خدات من عندها إسلام لبراصلي حطاتوا في يديها وقالت:شكرا الحاجة الله يخلف ليك ...

أركان شاف في باه : امم كين خبر اخر هاد ليلة كيتعلق بيوسف ...

مروى غير سمعات كلاموا وجها إحمر خجلاااا

يوسف بلع ريقوا حتى تفاحة أدم تحركات في حلقوا وجدية نطق حشمان: إلى بغيتوا نتوما نويت نتزوج إنشاء الله ...

لالة فريدة بغضب :حشومة ولدي مراتك مزال ما دار عليها لعام ونتا باغي تزوج عيب ...

مروى ستأدنات منهم او جمعات نوضة غبرات من بينهم ،خلاتوا يحل لمشكلة بوحدوا ...

الحاجة خديجة بتنهيدة :ما فيها باس إلى كان ناوي لحلال وزيدن نجلاء ماتت و ما عمرها ما بقات غترجع ...

لالة فريدة بعصبية :ما شفتيش مروى الحاجة تقلقات بسيف ختها يلاه شهرين باش ماتت وراجل ختها ينوض يتزوج حشومة ...

إسلام بجدية نطقات :مروى هيا لبنت لي بغا يتزوج بيها يوسف ...

لالة فريدة حطات إيديها على فمها ما مسدقاش : اشنووو مروى ؟!!

إسلام حركات راصها بإجاب:اه مروى و هادي هيا طريقة لوحيدة باش تبقا قريبا لبنت ختها فاش غتمشي لفرنسا غتعيش وحيدة تما حتى باها هوا لاخر ما كيحنش فيها هيا ما عندها حتى واحد من غيرنا ويوسف بوحدوا لي غيقدر يحميها وزيدن هادي كانت هيا وصية نجلاء قبل ما تموت حنا خاصنا نحقوا ليها اخر طلب باش ترتاح في قبرها ...

لالة فريدة تنهدات بضيق: سمح ليا اولدي ما كنتش عارفا راه لبنت لي باغي تزوج هيا مروى ...

الحاج الراضي بجدية:لي هرب لزواج هرب لطاعة ولبنت مزيانة ما عندنا ما نقولوا عليها...

سي عدنان بصوت غليض: عندك الحق الحاج "خاطب يوسف بتسأل" ايمتا بغيتينا نخطوبها ليك ...

إسلام دخلات:علاش لي ما نديروا لخطبة هنا ما حدنا مجموعين ونتوما طلبوا ايدها من عند ماما وخالي ...

عمر تبسم جنب:اه هادي فكرة مزيانة

الحاجة خديجة:صافي غدا وجدوا راصكم

توبة ببتسامة نطقات:مبروك عليكم في صراحة مروى كتستاهل كل خير ...

يوسف شاف فيها وقال :الله يبارك فيك

لالة فريدة ببتسامة :لعقبا ليك حتى نتي أبنتي بشي ولد ناس لي يبغيك ويصونك ويحطك فوق راص ...

توبة تنهدات بضيق ورسمات إبتسامة مسطنعة ودورات راصها عند ولدها مهربا عينيها من نضراتهم ،بغصة خانقاها قالت ليه :

_كول اولدي أمير ...

مي رحمة ببتسامة جانبية نطقات :ايوا عيطوا لبنتي مروى تجي تكمل عشاها ...

إسلام وقفات :أنا غنمشي نعيط ليها ...

أركان خنزر فيها وبصوت حاد نطق: لا غير بركي نتي "دار عند ختوا" سيري كلميها أنرجس ...

نرجس حركات راصها بإجاب او جمعات لوقفة توجهات لعند مروى لصالون صغير لقاتها جالسا حدا نافدة غير شافتها وقفات مرعوبة :

_ما بغاوش ياك صافي غدا غنرجع بحالي لفرانسا ياك هما كعما وافقوا ...

نرجس بعينين تيلمعوا قالت:تهدني شكون قال ليك هاد لهضرة "حركات راصها "غدا غنطلبوا ايدك من عند مي رحمة ...

مروى خفق قلبها بسعادة و بشفايف كيرجفوا ردات :اشنوا واش كتهضري بصح ما كضحكيش معايا ياك ...

نرجس شدات منها: لا اختي بصح غدا انشاء الله لخطبة ودابا زيدي تعشاي قبل ما يبرد ...

مروى تلاحت على نرجس عنقاتها فرحانة: ما فياش جوع غير سري تاكلي بصحتك ...

نرجس كمشات حجبانها:ولكن امم انقول ليهم يحطوا ليك بوحدك اكيد غتكوني حشمانة عليها ما بغا تجي، اه قبل ما نسا مبروك عليك ...

مروى ببتسامة :الله يبارك فيك أحبيبة ...

نرجس بدات كضحك :يويوا غيولي من نصيبك ههههه

••• من بعد ما كملوا عشاهم باركوا ل إسلام لحمالا وكل وحدة عطاتها نصائح لي تبعهم وباركوا لمروى لخطبة لي غتقام غدا ودخلوا ينعسوا بكري تابعهم نهار طويل غدا ...

داخل غرفتهم متكيا على سدروا وهوا خاشي إيدوا تحت بيجامتها حاطها فوق بطنها ويحرك فيها بحنية ورجليها خاشيهم وسط رجليه ،مع هزات راصها غتهضر معاه وهيا تشم ريحة حمقتها ...

إسلام بعينين تيلمعوا :ممم اشمن بغفان هادا داير أحبيبي ...

أركان نزل عينوا شاف فيها وقال:ريحة ديالي "رفع حاجبوا" لي مالف كندير ديما ...

إسلام حركات راصها بنفي :لا لا ماشي هيا هادي،هاد لي دير واعرااا ...

أركان بصوت رجولي خشن قال:قولي أعود بالله من شيطان رجيم راه هيا هادي نيت...

إسلام حلات ليها لقاميجا وطلعات لسدروا خشات راصها فيه وبدات كتشم عاجبها لحال...

أركان دور يديه على ضهرها طلعها لعندوا كتر وهز ليها راصها وحط فموا على شفايفها بدا كيلتاهم فيهم بحب وهيا تبعد منوا مخسرا ملامحها،شافها بعدات رفع حاجبوا وبتسأل نطق:

_مالك ؟!!

إسلام دلات شفتها لتحتانية و قالت :هنن خليني نشم حرام عليك ...

أركان ضحك عليها من نيتوا وبصوت خشن نطق : وزوينة هادي ...

رجعات خشات راصها في حضنوا بقات كتشم في سدروا بلهفة وهوا بقا كيلعب بشعرها طويل لي كيحمقوا ويسطيه حتى داها نعاس فوق منوا ،دور يديه على خصرها وتكاها جنبوا وغطاها

تحنى طبع قبلة فوق كل عين من عويناتها او في فمها او حنيكاتها و بقا كيتأمل فيها ويشكر ربي على نعمة لي عطاه ،حتى داه نعاس وهيا بين يديه ...

داخل صالون مجموعين كاملين من غير نرجس وعمر و يوسف، على طبلة محطوط فوقها طورطة كبيرة من شغل توبة مكتوب بيها "مروى_يوسف"وتحتهم مكتوبة " زواج مبارك "كلهم لابسين كلاص ومقادين على قبل لخطبة ديال مروى ويوسف ...

الحاجة خديجة وجهات كلامها ل إسلام: بنتي لخواتم وصلوا ولا مزال ...

إسلام لابسا قفطان خفيف براندة هوا لي جابت معاها مع حلاقات ديول الألماس من لي جاب ليها أركان ،شادا شعرها جنب مع مكياج خفيف كيبرز ملامحها ،حركات راصها وقالت :

_مشا يجيبهم يوسف ومزال ما جا الحاجة ...

لالة فريدة تنهدات بضيق :تعطل بزاف خاصنا نكونوا درنا هاد لخطبة ،باش نرجعوا لرياض دغيا ...

الحاجة خديجة شافت فيها :تمشي غير فين مشاك الله أبنتي وزيدن لا زربا على صلاح ...

•• داخل غرفة يوسف جالسا متوترة كتلعب بيديها وديرين بيها لبنات كيقادوا ليها لميكاب ،لابسا قفطان في الأبيض مع فورمتها لي مقادا برياضة لي كتمارس جا مع فصالتها واعر...

توبة بعينين تيلمعوا :غيشوفك يوسف ليوم يدوخ ما فيهاش جيتي كتحمقي بزين الله يحجبك ...

أمينة دورات راصها: هوا غير غيدوخ راه غينسا سميتوا هههه مسكين ...

مروى شاف في لمراية :جيت زوينة فوق لقياس ليوم همم يمكن حنت كترتوا ليا لمكياج ...

توبة ببتسامة جانبية نطقات :بالعكس أحبيبة نتي زوينة بلا بيه الله يخليك ديما فرحانة وناشطة ...

مروى حركات راصها وقالت :أمين أختي شكرا و الله يسعدك حتى نتي ...

امينة صغرات عينيها وبعفوية نطقات كضحك:ما كدبوش ملي قالوا لمكياج كيخلي لقردة تولي غزالة ...

توبة رفعات حاجبها :حتى نتي حاطا ميكاب اكبيرة لقردات ولا لا "حركات راصها "وزيدن بحال هاد لهضرة ما كتقالش خاصك تعرفي توزني كلامك ...

هزات لمشط وبواطة صغيرة ديال لفيالل صغار بغات تقاد مشيطة زوينة لمروى وهوا يطيحوا من يديها تخواو تحت طبلة،ساطت بجهد وتحنات تجمعهم ...

أمينة همسات لمروى في ودنها :عفسي على توبة وقرصيها الله يرحم ليك لوليدين ...

مروى شافت فيها مكمشا حجبانها وبخفوت تسألات : اويلي علاش ؟!!

أمينة بتوسل :وغير ديري لي قلت ليك لميمة الوليدة ولي عزيز عليك ...

وقفاات توبة من بعد ما جمعات كلشي من الأرض أو هيا تعفس عليها مروى برجلها كاملااا وقرصتها بجهد ...

توبة كمشات حجبانها بألم: اي حرام عليك أمروى من صباح وانا كنقاد ليك وهاكا باش كتجازيني اميمتي رجلي ...

أمينة تبسمات بأمل :دارت ليك هكا غير باش تزوجي بعدها ونفرحوا بيك حتى نتي ...

توبة زيرات على يديها وبعصبية غوتات في وجها :ميات مرة قلت ليك ما تبقيش تجبدي ليا حس زواج تزوجوا غير نتوما

"بغصة خانقاها " أنا دابا حياتي هيا ولدي غنقريه ونربيه أحسن تربية وملي يكبر ديك ساع لابغا مول الأمانة دي أمانتوا غير يديها لمهم نكون وصلت ولدي لداك شي لي بغا ...

أمينة حطات ايدها على دراع توبة :ما تقوليش هكاك غتحتاجي راجل يكون في جنبك تحطي راصك عليه مني تعياي يشد بيدك ويكون معاك ...

توبة طاحت دمعة حارة من عينيها مسحتها بزربة وبصوت مخنوق تكلمات:واش شكيت عليك دخلي سوق راصك أ أمينة حياتي هادي نتي شنوا دخلك فيا "دفعات ليها إيدها " ما عمري ما غنعود نتزوج باركاااا ...

"خنزرات فيهم او خرجات برا لغرفة "

مروى كمشات حجبانها بتسأل:مال توبة فينما كيجبدوا ليها مسألة زواج كتولي هاكا واش عندها حساسية من لموضوع ...

أمينة زيرات على سنانها وبتنهيدة طويلة نطقات:ملي تزوجات بي بابات امير كانت مزال صغيرة كان كل نهار كيضربها وكيغتاصبها بوحشية ما عمرها ما شافت معاه نهار لبيض كَرها في زواج ورجال وما يجي منهم الله ياخد فيه لحق كون شديتوا بربي حتى نقتلوا وما نحنش فيه ...

مروى تنهدات بضيق :بسيف مسكينة لي داز عليها ماشي قليل كنتمنى من ربي يجيب ليها شي ولد ناس لي يقدر يبدل ليها هاد نضرة الغالطة لي خدات على زواج ...

•• قاطعتهم إسلام بدخولها لعندهم خرجات عينيها بصدمة وبعصبية نطقات:

_اويلي مزال ما قاديتي حتى شعرك وكلشي كيتسنا فيك ...

مروى بتسأل :يوسف جا ؟!!

إسلام حركات راصها بإجاب أو هزات لمشطة في يديها بدات تقاد ليها:

_اه يلاه لقيتيه وصل ،سربي أمينة نقادوو ليها دغيا راهم كيتسناوو ...

امينة بتسال نطقات:كيف جاتني هاد لفراشة اول مرة نلبسها وخا شريتها عريضا عليا جاتني مكروزة بسباب كرشي...

إسلام هزات كتفها:ايوا معلوم غتجيك لاصقة راك حاملة حتى تولدي وترجعي كيف كنتي ،اري داك شال...

قادوو ليها مشيطة بسيطة جاتها فنة وغطاوو ليها راصها بشال بيض ،لبسات شربيل في رجليها وخرجوها بصلاة والسلام على رسول الله ...

لابسا كسوة طويلة في لغوز لونها لمفضل جامعا شعرها لفوق ومخليا لكَصة نازلا جنب مع ميكاب خفيف في وجها ، واقفا كتهضر هيا ومعاد لي كيحكي ليها على حياة البادية وكيضحكوا عاجبهم لحال مع قريب ليها فسن توالمت معاه ...

نرجس شدا من كرشها كتضحك بهستيرية : ولهيلا حتى شفار حمق هادا سالااا معايا ...

معاد تبسم بخجل :هادشي والوا مقارنة بلي مزال ما عودت ليك أختي ...

خارج كيهضر في تيليفونوا ،مرتدي كوستيم في الأزرق غير لمحهم مع بعض جنن جنونوا مشا قاصدهم صاعر وقف عليه كيف قابط عمرهم ...

عمر من تحت سنانوا نطق معصب: إلى ما بغيتينيش نخمج ليك ديك لكمارة البرهوش عطي شبر ديال تساع لمرتي ...

نرجس كمشات حجبانها:اويلي بعد من لولد ....

عمر طفا تيليفونوا و دار مخنزر فيها:حسابي معاك نتي من بعد ...

معاد بلع ريقوا بصعوبة وبخوف تكلم منزل راصوا الأرض :سمح ليا اخويا أنا غير ...

عمر قاطعوا مجنن :هضرتك ما عندي ما ندير بيها ق**** غبررر من قدامي ...

~معاد مسكين تنهد بقلة حيلة وغبر من قدامهم .~

عمر بجدية نطق :أخر مرة نلقاك واقفة مع شي حد ...

نرجس ساطت بجهد :حشومة تهضر مع لولد بديك طريقة،اش فيها لا وقفت معاه ،مالوا باسني راه غير كيهضر معايا ...

عمر زير على سنانوا وقال: بغيتيني نتسناه حتى يبوسك ألالة نرجس عاد ندوي ياك ...

أمير وقف عليهم لابس قميجة كلاص مع سروال جينز او شعروا مشطاه لي مو جنب جا تيحمق،قاطعهم بصوتوا طفولي:

_عمر تكلم كيتسناو فيكم ...

عمر نهض فيه :قول ليا خالي ماشي عمر حرفية شفتيني كنلعب معاك قشقاش ...

نرجس دخلات ببتسامة:سير قول ليهم هاحنا جيين البوكوص وخا "خنزرات في عمر " هضر مع دري صغير بحترام حشومة تغوت عليه ...

عمر شدها من دراعها كارز عليها: زيدي قدامي نهار لي نلقاك واقفا مع شي حد غنقطع ليك جنواح لي كطيري منهم أشنيولة ...

نرجس كمشات حجبانها بألم:اي ضريتيني ازمر طلق مني تفووو ...

عمر بصوت رجولي خشن قال :زمي فمك البرهوشة بلا ما تخليني ندير شوهة هنا ...

•• جالس مابين عائلتوا مأنق ومقاد على غير عادتوا غير سمع أصواتهم هز راصوا بلهفة حتى ضهرات أمام عيناه بلقفطان الأبيض والشبكة مغطا راصها ،جلسوها حداه فرحانة وحشمانة في نفس لوقت ...

دخل عمر قابط لنرجس في يديها امام لكل جرها وجلسوا جنب أركان وإسلام ...

سي عدنان نحنح بشوي وقال:بيما أن كلشي تجمع فا ندخلوا نيشان في لموضوع "وجه كلاموا لحاج"لكلمة ليك ...

الحاج راضي بصوت هادئ نطق: جينا عندكم ليوم طلبين وراغبين في يد بنتكم لالة مروى لولدنا يوسف إلى قبلتوا ...

سي لمختار ببتسامة رد عليه: من جيهتي أنا قابل نعطيكم لبنت وليني قبل ناخدوو رائيها ...

مي رحمة ببتسامة جانبية نطقات:بنتي مروى توافقي تزوجي بسي يوسف بخاطرك ...

~مروى حركات راصها بإجاب بدون ما تنطق بكلمة ...~

سي لعربي بفرحة نطق: السكوت من علامة رضا صلوا على نبي والله يكمل بالخير ...

الحاجة خديجة:عري ليها وجها اولدي وركبوا لخواتم ...

يوسف هز شبكة من لتحت عرا ليها وجها وببتسامة مزينة ملامحوا نطق بخفوت: جيتي زوينة ...

مروى نزلات عينيها الأرض بخجل:شكرا وحتى نتا ...

~ركبوا لخوتم لبعض تحت أعين لكل وشربوا بعضياتهم لحليب في جواا من المرح وسعادة والصلاة على الحبيب محمد" صلى الله عليه وسلم" من طرف توبة ولالة سعاد ...~

أمير جالس جنب امه جمع لوقفة فوق سداري وبخفوت نطق في ودنها:

_ماما بغيت لحلوى ...

توبة تبسمات ليه بحنان : وخا احبيبي غير يقطعوها نعطي لولدي طرف لكبير ...

أمير دور يديه على عنقها ،باسها في خدها وقال: كنبغيك بزاااف أماما زوينة ...

توبة جلساتوا قدامها وبستوا في خدودوا بزوج :الله على زين لي ولادنا أنا ولي عطاني سيدي ربي ،الله يطول ليا في لعمر حتى نشوفك محقق جميع أحلامك،كنمووت فيك أنا "ضماتوا بيديها بزوج لسدرها وبتنهيدة نطقات داخلها " نتا أجمل حاجة وقعات في حياتي اولدي لله يحفضك ليا من كل شر ...

مِن داخل دار لي مقابلة مع دار مي رحمة كيتسمع صوت غواتهم على جهد ،وسط لمراح واقف كيسب وكشاكشوا خارجين ...

_ما نسمحش ليك طلق بنتي"رفع صبعوا" مني كانت صحة سلام كنتي مزوج بيها ودابا فاش تشلات وما بقات كتكلم دغيا بغيتي تخلااا عليها ...

سفيان بصوت هادئ :عمي أنا ما قادرش على مصاريف علاجها وعاد زيد هيا ما كتحرك ما كتهضر، اشنوا بغيتيني نبقا مقابلها طوول حياتي مستحيييل ...

النائب عبد الله تنهد بضيق :حشومة عليك أولدي بنتي كتبغيك إلى تخليتي عليها ما غتصبرش شوف غير حالتها دابا كيف ديرا ولا ما درتيش بوجها هيا دير غير بوجه العائلة وعمتك لي ماتت ...

سفيان بعدم إهتمام:ما عندي ما ندير ليها وزيدن هيا لي دارتها بيديها كانت غاديا تسحر لسيدة حتى جابتها في راصها وتشوهات وشوهاتني معاها"حرك راصوا وزير على سنانوا "لا يعقل نضيع حياتي مع وحدة بحالها مشلولة ....

النائب عبد الله هز يدوا حتى لفوق وعطاه بطرشة لوجه :سكووووت سكووووت اخر مرة تقول على هناء مشلولة كتسمععععع"شدوو من كول قميجتوا كارز عليه "هاد شي كلوا دارتوا على قبلك ،كون كنتي شاد معاها طريق من لول ما كانتش غتبع شعودة ودير ديك لكسيدة لي خرجات ليها على حياتها ليوم "شار لنفسوا" الحمد لله انا مزال عايش وغنتكفل بيها ، غندي بنتي عند أحسن الأطباءو نعتاني بيها حتى ترجع حسن من قبل ...

سفيان دفع النائب عبد الله بعيد عليه وحاط إيدوا على حنكوا ما راديش ،بستهزاء نطق :هههه ترجع حسن من قبل راك غير كتحلم أعمي بنتك حالة ميؤوس منها وزيدن راك سمعتي طبيب قال بلي غتبقا هاكا حياتها كلها ...

~ داخل غرفة نوم بابها محلول وماقبل معاهم جالسا في كرسي متحرك فمها عوج ويديها كيترعدوو بوحدهم لا إراديا ،

شافت وسمعت كلشي ما قدراتش تهضر ولا تكلم بداوو كينزلوا دموعها شلال من عينيها حنت ندمات وهيا كتشوف في راجل لي بغات من كل قلبها في اول فرصة جاتوا باغا يطلقها ويتخلى عليها تمنات كون ما قصداتش طريق شعودة ولحرام باش تخلص من حبيبتوا لقديمة حنت هوا ما كيستاهل حتى وحدة تبغيه ولا ضحي على قبلوا كرهت راصها وتمنات لو أن لوقت يرجع بلور وما تخطيش ديك لخطوة لي دمرات ليها حياتها ليووم ...

النائب عبد الله خنزر فيه و ساط بجهد:ما عندي ما غنقول من غير حسبي الله ونعم الوكيل بالحق اشنوا غنتوقع من واحد تخلى على بنت كبر معاها وطمعها بزواج وفي الأخر تزوج ببنت عمتوا وخلاها نتا بحالك ما كيستاهلوش يعيشوا بحال ناس وزيدن"شار لسفيان" لي فيك كافيك شوف غير حالتك كيف ولات تشفي لعدااا ...

سفيان حرك راصوا بإجاب :عندك الحق في هاد شي لي قلتي ولكن إسلام كتبقا لالاها ما توصلهاش حتى في صبعها صغير أنا لي فرطت فيها وكنستاهل هاد شي لي جرا ليا ...

~ النائب عبد الله خنزر في سفيان وما كرهش يقتلوا ويتهنى منوا ولكن فكر إلى صفاها ليه غيخرج على خدمتوا وبنتوا محتاجة ليه،توجه لغرفة بنتوا جمع ليها حويجها كلهم وخرجها معاه لمراح ...

سفيان ببرود تكلم: هدا شي لي وقع لهناء اسي نائب غير عقاب من عند الله على فعيلها ،سير دي بنتك انا ما بقيتش حامل نشوف كماراتها كل صباح حياتي كاملاا،نتلاقاو في دار لقاضي غدا ...

عبد الله بعصبية دفل على سفيان في وجهوا: اخر مرة تجبد سميت بنتي على فمك لمعفون الحيواااان ...

•• وقفات لوطوا ديال يوسف قدام دار مي رحمة نزل منها عمر وبدا كينزل في ليفاليز ديولهم ....

أو من موراهم وقف بيكوب ديال سي لعربي وموراه سيارة كريم ...

أمير بفرحة نطق بصوتوا طفولي: وصلنااا لدار وصلناااا ...

توبة بتنهيدة نطقات:في صراحة ولفت خالي لمختار وما سخيتش بفراقوا ...

نرجس زفرات بجهد :حتى أنا ولاه ...

عمر طل عليهم:يكما عجباتكم لجلسة وناوين تسكنوا هنا نزلوا دغيا راه سيد باغي يتحرك ...

توبة خنزرات فيه،او وجهات كلامها ليوسف: خويا نزل تشرب معانا شي كاس ديال أتاي ...

يوسف دار لعندها:مرة اخرا انشاء الله عيان باغي غير نمشي نرتاح ...

توبة حركات راصها :وخا لي بغيتي وليني لمرة جايا ما غنخليكش تمشي حتى تشرب شي حاجة ...

يوسف تبسم ليها :وخا صافي ...

نرجس نزلات من لوطوا او قالت : بسلامة اخويا تهلى في مروى وجنات ...

يوسف تبسم ليها :كوني هانيا تهلي في راصك وفي عمر والعائلة كلهم ...

فور ما توادعوا مع يوسف ،فتح عمر لباب وقبل ما يدخل ليفاليز ديالهم شافوا النائب عبد الله مخرج هناء في كرسي متحرك أو هاز صاك فيه حويجها كاملين ...

توجهات لعندوا مي رحمة وبملامح أسى على وجها تسئلات :

_أمدرا كيف بقات هناء ؟

النائب عبد الله بتنهيدة طويلة نطق: نقولوا شويا الحمد لله...

مي رحمة ببتسامة جانبية نطقات :الله يجيب شيفاء ما يكون عندها باس غير صبر اسي عبد الله ...

النائب عبد الله بصوت رجولي خشن نطق بتوسل:طلبي من بنتك ألالة رحمة تسمح لبنتي على الله يخفاف عليها الألام شويا ...

مي رحمة حركات راصها بحزن بقات فيها هناء بزاف ،حطات ايدها على راص هناء وقالت :المسامح كريم بنتي إسلام قلبها مسامح وما كتشدش في خاطرها نخليكم الله يعونكم ...

بنهيدة دارت لعندهم لاقتهم كيشوفوا فيها مصدومين وأولهم أمينة لي ما عجبها حال زفرات بجهد وقالت:

_علاش باركا تسولي فيها ما شتيش اشنوا دارت في إسلام داك شي لي وقع ليها دابا قليل بغيتها تعدب كتر من هاد لعداب لي هيا فيه ...

مي رحمة بأمر :زيدي دخلي لدار لحقد ما عندوا فاش غيوصلنا وكيفما كنقول ل إسلام ديما ديري لخير وكوني زوينة مع ناس ولي دار فيك شر ديري فيه لخير حتى خيرك يغلب على شروا أبنتي ...

أمينة حركات راصها بنفي : ما نقدرش امي رحمة نكون بحالكم سمحي ليا شتي أنا في هاد لحضة ما كرهتش نريشها ونقتلها عصا حتى تولي تزاوك ...

قاطعهم كريم بقوله :أمينة أنا غنمشي عند الوليدة نشوفها ومن تما نشد طريق لكازا خاصك شي حاجة قبل ما نمشي ...

أمينة خسرات ملامحها :اووه دابا باغي تمشي بقا مالك زربان ...

كريم بصوت رجولي خشن قال :لخدمة امونتي ما نقدرش ...

مي رحمة تدخلات:الله يديك على خير اولدي سلم على لوليدة وقول ليها تجي تزورنا شحال هادي ما شفناها ...

كريم حرك راصوا بإجاب وقال:امين امي رحمة تهلاي في راصك وتهلاوو في أمينة راه غتبقا معاكم حتى تولد انشاء الله ...

مي رحمة تبسمات ليه: أمينة غنديروها في عويناتنا اوليدي ما تحتاج توصي ...

•• توادعوا مع كريم ودخلوا يتسراحوا من لعيا ديال طريق من غير سي لعربي و لالة سعاد لي مشاوو لدرهم نيشان وخا حاولت معاهم مي رحمة ما بغاوش يدخلوا ...

توبة ردات لماء يطيب وقالت لخوها: عمر سير جيب لمسمن او لبتيبان باش نديروا لكوتي راه ما كين والوا في تلاجة لي صوبناه ديناه معانا لفيرما...

عمر هز باليزوا وقال:ما فيا لي يخرج الخوادرية باغي نمشي ندوش ...

توبة ساطت بجهد :اووف ما عمري قتلت ليك دير شي حاجة ودرتيها ياربي سلامة ديما مشحفني ...

رجعات لبسات جلابتها لي حيدات او لبسات في رجليها او حلات لباب و نطقات معليا صوتها:

_أمينة بدلي معاك ل أمير انا نمشي نجيب شي سخرا ونجي ...

أمينة من لداخل جوبات معليا صوتها هيا الاخرا :وخا اختي كوني هانيا ...

خرجات من دار ،مشات جوج خطوات وهيا تسمع إسمها من صوت ما غريبش ،كينادي عليها:

_توبة واااا توبة ...

دارت تشوف شكون لقاتوا جاي كيجري ناحياها كل رجل كيلحها في جيه، مبتاسم قرب منها وقال:

_لخوادرية لباس عليك ؟!

توبة ببتسامة مزينة ملامحها ردات :نورالدين ؟ كيف دير بيخير "شافت كتفوا" اش هاد لوشام تاني...

نورالدين جوبها بصوتوا لغليض كيهد جبل :كيف جاك زوين عاد صوبتوا "رفع حاجبوا "ايوا حسكم كان مقطوع من درب فين كنتوا شادينها ؟!!

توبة طوات يديها عندها :كنا عند خالي لمختار درنا سبوع ديال جنات بنت لوس ختي ...

نورالدين تبسم ليها: مبروك كيف ديرا إسلام ولعراسات وداك شي "هز يديه لفوق وعلاا صوتوا" هااااه الى هضر معاها ولا معاك شي حاااد ولا شيي حاجة نخسر ليه لافيشوور ديال كمارتوا، نعوووقواا غير قولوهاا ما تحشموش بربي حتى نطيروااا لاخرااا ديريكت ...

توبة حركات راصها وتكلمات رافعا حاجبها : الاه ياودي ولي عرفنا راه حنا جيرانك ما يقدر يحادينا ولا يقرب أ نورالدين ...

نورالدين تنهد براحة: ايوااا مزيااان يثوووب عليك كيف داير لكويري ديال درب ومييي رحمة وعمر ومرتواا"حط إيدوا على ماخرة عنقوا" مبروك ما دار مزاال ما لقيت لوقت بااااش نباااارك ليه راااك عارفااا مع لخدمة ديالنااا فيهاااا كترة جرييي وداااك شييي ...

توبة تكلمات حابسا ضحكة: إيه عارفا خدمتكم أ لاه ياودي "حركات راصها" أمير لباس عليه ومك رحمة راه مقلقة منك كنتي كتجي طل مرة مرة حتى غبر ليك الاثر سير شوفها ومنها نيت بارك لعمر زواج بنفسك ...

نوالدين كمش حجبانوا:مي رحمة في دار ؟!!

توبة حركات راصها بإجاب:ايه غير في دار ما عندها فين غتمشييي ...

نورالدين : غنمشي نستيكي على الحالة ونتقاد عاد نمشي عندكم ...

توبة حلات فمها نصف حلة ورجعات سداتوا: دابا راك مقاد هوا هداك غير سير دخل ...

نوالدين حرك راصوا بنفي:لا لا نقاد راصي عاد نجي "بغمزة نطق"فين غاداااا ؟!!

توبة ببتسامة جانبية نطقات:لقيتيني خارجا نجيب شوية لبتيبان او لمسمن وشي حاجة لكسكروط ...

نوالدين بأمر : برجولة غير رجعي لدار انا غنجيب كلشي معايا دابا ...

توبة رفعات حاجبها: وياك باغي تستيكي على الحالة غير سير راه غتعطل علينا .وانا نمشي نجيب لمسمن ...

نورالدين بفتخار :دغيا نتقاد ونجي تسحابينا حنا رجال بحالكم نتوما لبنات تبقاوو نص نهار حدا لمراية ومحالش تخرجوا انا جوج دقايق نطركْ"نمشي" لدار نبدل عليا دغيا ونمشي نجيب شغل ديال لمعدة ونرجع ...

توبة كمشات حجبانها بتسأل:إينا شغل ديال لمعدة تاني ؟!!

نور الدين خبط بطنوا بجهد حتى تزعزعات توبة بخوف وبصوتوا لخشن نطق: لمازوط ديال بنادم، مواد لقيت ...

توبة حطات إيديها على فمها مبهوضة: تمجهدتي اعبيقا ديب ما بقيتي ساهل هاكيلي على مواد لقيت ههههه

نورالدين ما كيحملش شي حد يعيط ليه عْبَيْقَا ديب، خنزر فيها ونطق مخرج عينيه:

_ايوا شتي دابا تبرهيييش ...

توبة جمعات ضحكة وبتلعتم ردات :ءء سمح ليا نسيت ولاه ما نعود أنورالدين سير جيب مازوط لمصارن لا نموت ليك هنا راه فيا جوع بزااف ...

نورالدين عطاها بضهروا تما غادي ويهضر معلي صوتوا :هاهوا غادي، ولاه يعميها لشي قمقوم في هاد درب "هز يديه لفوق"بقاوو حاضينااا راه حنا كنصنعواا صوااارخ ...

توبة بقات حضياه غادي قدامها خبطات راصها على لغباء لي جاها وقالت:اش داك تجبدي ليه لقاب ديالوا وهوا يلاه كان كيهضر معايا طبيعي وضريف حتى تقلب سلامة ياربي ...

نوالدين دار لعندها قفزها :وتي دخلي لداركم ابنت العبد ...

توبة بلعات ريقها ومشات تجري لدرهم: ءء هانا غادا اخويا غير ما تعطلش الله يرحم ليك الوليدين ...

نوالدين بصوت رجولي غليض نطق: كوني هانيا الخوادرية ...

جالسا كل من مي رحمة وأمينة لابسين بيجامات بعدما بدلوا حويج زنقة وأمير كيلعب بالكورة ديالوا وسط لمراح ...

مي رحمة شدات تسبيح بين يديها وقالت:

_ سبوع ديال جنات داز واعر من داك شي رفيع وخا كان غير بيناتنا ...

أمينة حركات راصها بإجاب:ويه امي رحمة دوزنا وقيتة زوينة خصوصا ملي عرفت إسلام حاملة فرحت من قلبي ...

مي رحمة ببتسامة جانبية نطقات:حتى انا يا بنيتي كنت كنتسا بحال هاد لخبار من نهار زوجتها ،انشاء الله تفرح بولدها وتعيش فرحانة مع راجلها طلع ولد ناس مامنوا زوج الله يحفضوا من شر لخلق ...

أمينة بتأيدد :وي عندك الحق أركان راجل وسيد رجال بحالوا ما كينينش ...

__قاطعتهم نرجس بدخولها هازا سينية ديال اتاي وجايا من لكوزينة ...

مي رحمة هزات راصها ونطقات مكمشة حجبانها : عمرتي اتاي أبنتي علاش معدبة راصك ...

نرجس حطات سينية قدام مي رحمة في طبلة وقالت :ما درت والوا امي رحمة غير دخلت نشرب بان ليا لمقراج طاب وانا نعمر

أتاي ...

مي رحمة ببتسامة ردات:الله يرضي عليك ...

أمينة شافت لباس نرجس وقالت :سيري بدلي حويجك بينما جات توبة"حركان راصها" لبسي شي بيجامة رتاحي فيها حسن لك ...

نرجس ببتسامة حركات راصها: وخا أختي "تمات غاديا ورجعات دارت لعندهم " هضرت معايا إسلام في تيليفون قالت ليا توحشتنا وغير تبدل عليها وتجي عندنا تجمع معانا ..

امينة بفرحة: بصح واوو احسن حاجة غدير لخوادرية"هزات كفوفها لسماء" سيري اش بغيت ليك على هاد لخبيرة غير شي كنز ويكون كتير وتقسميه معايا واخر دعونا الحمد لله "شافت نرجس طالعا في دروج علات صوتها وقالت" نرجس قولي لعمر يهبط يتسخر ليا يجيب لينا زريعة ولوز نجمعوا عليهم فاش تجي إسلام ...

نرجس ملفوق جوبتها معايا صوتها: وخاااااا

•• بعدما دقات دفعات لباب وفور ما دخلات حسات بإيد سحبتها للداخل وسد لباب صدمها ...

عمر مدور على نصوا لتحتاني فوطة وشعروا فازك تيقطر بالماء لصقها مع لحيط وجرها من خصرها وبصوتوا رجولي نطق:

_اححح ما وصوريش شحاال توحشتك ...

نرجس شافت شكلوا لجداب بلعات ريقها وبتوتر ردات وهيا كتحاول تفادا نضر في عينيه :بعد مني بغيت نبدل حويجي

عمر دور ليها وجها لعندوا حتى تقابلت عينيهم مع بعض وقال: أنا نبدل لحب "بغمزة نطق" همم شنوا بغيتي تلبسي ؟!!

نرجس رفعات حاجبها :اويلي مالك تسطيتي يكما واكل شي حاجة من غير لماكلة ...

عمر بدا كيقرب منها وبصوت مبحوح قال: بيك وليت مريض و هبيل وحمق ومسطي"حط ايدوا على قبلوا "حني فيا وخليني نبدل ليك ...

نرجس دفعاتوا عليها وقالت: سير أخويا ما نبدل ليك ما تبدل ليا غير بعد مني ...

عمر رجع جرها لعندوا او لصقها مع لحيط مجنن :اخر مرة تقولي خويا انا ما خوو حد خوك هوا لي معاك في لحالة المدانية سمعتي ...

نرجس خرجات عينيها بصدمة :دغيا نكرتي خوتاتك "علات صوتها" اجي أ توبة تسمعي فينك إسلام وااااا أمينة طلعي "قبل ما تكمل كلامها حط ايدوا على فمها مسكتها"

عمر كمش حجبانوا بإزعاج:سكتي الشنيولة غتجبدي صدااع ...

نرجس كتحاول تهضر: اممم اممم ...

عمر حيد ايدوا على فمها وقال: هانا حيدت ايدي اش باغا تقولي ...

نرجس خسرات ملامحها: باغا نبدل طلق مني ولا هاد لمرة غنعيط لمي رحمة ونقول ليها ءء"حشمت وسكتت"

عمر رفع حاجبوا حابس ضحكة:اش غتقولي ليها راجلي بغا يبدل ليا وما خليتوش ياك ...

نرجس نزلات راصها الأرض حشمانة :حشومة عليك ...

عمر رجع طلع ليها وجها لعندوا وبدا كيقرب منها حتى ختالطت أنفاسهم مع بعض ...

نرجس حطات إيديها على فموا وقالت: قبل ما نسا أمينة قالت ليك سير جيب ليها زريعة ولوز ...

عمر خسر ملامحوا وحيد ليها إيدها:حنا دابا في زريعة اش هاد تبرهيش تاني ...

نرجس دلات شفتها لتحتانية و قالت :وانا غير قلت ليك لي قالت ليا أمينة لا نسا وصافي ...

عمر خطف قبلة من شفيفها بسرعة حتى خدودها توردوا و بغمزة نطق:امم شحال بنينة أشنيولة بنْ منك ما كينش هههه سيري تبدلي وغدا وجدي راصك غنرجعوا لرباط ...

نرجس حركات راصها بإجاب وبتنهيدة طويلة نطقات:غنلقا دروس تجمعوا عليا شحال هادي ما مشيت لافاك بحال والوا نعود لعام ...

عمر جلس تيلبس في حويجوا قدامها بدون خجل حتى حطات إيدها على عينيها وببتسامة نطق:

_صافي غير وقفي لقراية هاد لعام حتى لعام جاي وقراي نيت أنا محتاجك في دار ...

نرجس خلاتوو ومشات تجبد حويجها ما تلبس :من نيتك وليني مسطي ...

•• دخلت لدار وجها مخطووف ومخلوعة غير شافها مشا كيجري عنقها فرحان بيها ويردد بصوتوا طفولي ...

_ماما جاات ماما جااات ...

توبة بشفايف تيرجفوا قالت: امير سير جيب ليا كاس ديال الماء اوليدي لله يرضي عليك..

أمير تبسم ليها ببرائة حتى طلعوا حنيكاتوا:

_وخا "ومشا ينقز لكوزينة "

أمينة كمشات حجبانها وبتسأل نطقات:مالك داخلا ترعدي اش واقع ؟!!

توبة شدات من قلبها وقالت:اختي خرج ليا نوالدين ...

مي رحمة ببتسامة جانبية نطقات:الله يابنيتي مالوا جن هههه ياك غير نوالدين "رفعات حاجبها " يمكا معربط في درب ...

توبة حركات راصها بنفي :لا هضر معايا عادي غير انا لي غلطت مشيت قلت ليه عبيقا ديب وهوا يخنزر فيها وعينيه حماروا خلعني ولاه العضيم ...

أمينة شدات من كرشها كتضحك:مسخوطة صافي كون ضربك يوضرك الصكعة ...

توبة جلسات حداهم وقالت : خليتوا مشا يستيكي على حالتوا ويجيب مازوط لمعدة ولا ما عرفت لمصران ويجي يشوف ماما ...

أمينة كمشات حجبانها:مازوط لمعدة جديدة هادي هههههههه

توبة حركات راصها:اودي مواد لقيت كيف قال هوا لمسمن ولماكلا ...

امينة حلات فمها:واشوفي سيد بقا ليه غير لعلوم هههههه

مي رحمة بتنهيدة طويلة نطقات: داك لولد أبنتي راه قاري و عزيزة عليه قرايتوا ملي كان صغير كان كيخون لكتوبة ولفلوس باش يقرا وليني خرجات عليه لبليا لاه يعفوا عليه و ما عندوا زهر مسكين "تنهدات بضيق "قبحا الله الفقر ...

أمينة تبهضات :مابيناش فيه"كمشات فمها " ولاه ما كدبوا مني قالوا لمضاهر خداعة ...

توبة ساطت بجهد :ياختي انا كنموت منوا فاش كنكون واقفا قداموا كنبقا حاضيا فمي لا نخرج شي كلمة ماشي حتى لتم "دارت عند رحمة" عرفتي أماما قال ليا برهوشة ملي جبدت ليه لاقب ديالوا ...

أمينة حطات سبعها تحت ضقنها: ايوا سرك نيت اش داك تعيريه ويلي حي ...

مي رحمة ببتسامة جانبية نطقات:الله يصوب ليه مسكين تكرفس ...

•أمير خرج يجري من لمطبخ هاز كاس كبير عامر ماء بين يدوا و وغادي وكيتكب ليه في الأرض ما وصل عندها حتى لكاس بقا فيه نص~ ...

توبة غير شافتوا حطات إيديها فوق راصها وبعصبية نطقات : الاه يا وليدي غتخليني نوض نجفف وما فيا لي نوض اش داني نقول ليك جيب ليا لماء وكون درت مناقص حسن كاع ...

~امير عطاها لكاس ومشا جلس حدا مي رحمة لي كدافع عليه ..

مي رحمة بتنهيدة : غير صبر ابنتي وزيدن لولد باقي صغير ...

أمينة خرجات عينيها وقالت:اشمن باقي صغير هوا باغي يتزوج ونتي كتقولي عليه صغير "هزات ايدها" هادا خاصوا لعصا شوفي الارض كلها ولات ماء ...

توبة خنزرات فيها:غا سكتي اشعالة لعوافي انا غير نبدل عليا ونوض نجفف ...

أمير بدا يضحك على أمينة عاجبوا لحال ان ماماه دافع عليه....

يتبع...