محتوى القصة
قاطعهم لحاج راضي بدخولوا لابس جلباب أبيض وحاط فوق راصوا طربوش حمر رغم شيب لي غزا راصوا ولحيتوا كيبان باقي شاد في راصوا وخا لمرض قدا عليه..
تبعوا يوسف وسي عدنان كيتناقشوا فيما بينهم على أمور الخدمة جلسوا حدا بعضياتهم جنب نرجس والحاج راضي جلس حدا إسلام
الحاجة خديجة ببتسامة مزينة ملامحها قالت: نكب ليكم أتاي ولا لقهوة ؟!
الحاج راضي نحنح بشوي وقال:الى كانت لويزة خير ليا من أتاي
إسلام جمعات لوقفة وببتسامة ردات: غنمشي نصوبها ليك دابا نيت
الحاج راضي برضا نطق :الله يرضي عليك أبنتي
لالة فريدة حركات راصها وقالت :ولدي باركا عليكم من لخدمة بزاف نتوما دابا وسط لعائلة جمعوا معانا والحاجة راها سولاتكم زعما شنوا تشربوا
سي عدنان حك لحيتوا وقال :سمحوا لينا غير مع عندنا لخدمة كتيرة هاد الأيام "حرك راصوا "كبي ليا كاس أتاي
الحاجة خديجة تبسمات جنب :هيا لولة أولدي
يوسف هز راصوا في تلفاز شاف الأخبار كتبدا ركز معاها وقال:
_الحاجة زيدي شويا في صوت
ضهرات مقدمة الأخبار مرتدية بدلة رسمية في الأزرق وشعرها مطلوق مورا ضهرها بملامح جدية نطقات:
_مشاهدينا الكرام إليكم أبرز العناونين الأخبار اليوم
لالة فريدة قاطعتهم بقولها: هادي غير الإعادة شفت هاد شي صباح
الحاجة فريدة قاطعها :سكتي أبنتي خلينا نسمعوا حنا ما شفناش الأخبار ليوم
مقدمة الأخبار:
_شهدت سواحل اليابان الشرقية اليوم زلزال بقوة 5,5 على سلم ريشتر دون تسجيل ضحايا أو تحديرات من تسونامي ...
وأوضحت وكالة الأرصاد الجوية اليابانية أن مركز الزلزال وقع بعمق 50 كلم في عمق البحر بمقاطعة إيباركي شمالي العاصمة طوكيوا...
كما أفادات ذات الوكالة أن شدة زلزال شعر به عدد من المقاطعات الشمالية الشرقية بما فيها العاصمة...
الحاجة خديجة بخوف قالت :ياربي سلامة حفضهم الله مساكن
يوسف حرك راصوا وبصوت رجولي خشن قال : هاد شي ديما تيوقع في ليابان الحاجة
قاطعهم دخول إسلام هازا بلاطوا بين يديها فيه إبريق لويزة مع كيسان في نفس شكل الابريق
حطاتوا قدام لحاجة لي كبات لحاج وقالت:
مزيان ملي صوبتي هاد الأبريق كامل حتى أنا نيت محتاجة غنشرب منها كتهدئ الأعصاب
إسلام بصوت هادئ نطقات ببتسامة: بصحتكم
مديعة الأخبار :
_بعدما إنتهت علاقتهم الغرامية التي دامت لسنوات إبتزها وهددها بنشر صور وفيديوهات لها عبر مواقع التواصل الإجتماعي إن لم تعمل معه علاقة جنسية فما كان من فتاة إلى أن تقبل وتخضع له..
أقامت الفتاة علاقة محرمة معه دامت لسنة خوفا على سمعتها الى أن أصبحت حامل بطفله وعندما علم بالأمر إختفى عن الأنضار وتركها...خوفنا من أهلها هربت الفتاة من بيتها
وبنتيجة التحقيقات والمتابعة الفورية التي قام بيها عناصر مكتب مكافحة الجريمة الإلكترونية ،تمكنوا من توقيف المدعى عليه واتناء تحقيق معه إعترف بما أنسب إليه
نرجس زيرات على يديها وقلبها بدا يضرب، بقات كدور في عينيها كتشوف في وجه عائلتها لي مصدومين من لخبر وهيا قلبها ربي لي عالم بيه حسات بيهم بحالا تيهضروا عليها هيا نيت
فريدة حطات إيدها على راصها وقالت :طفي عليا اولدي هاد شي ما كنقدرش نتفرج فيه
مروى بتنهيدة طويلة قالت:الحق كلوا على ولايديها كون ما عطوهاش هاد لحرية زيدا ما غاديرش هاد شي
الحاجة خديجة رتشفات من كاس لويزة ونطقات بعدم رضا : بالعكس أبنتي راه داك الأغلاق بزاف على لبنت هوا لي تيخليها دير هاد شي.. لبنت خاصهم يعطيوها حريتها ويبينوا ليها أنهم تيقين فيها وأكيد هيا ما غدياش تخون تقتهم على الأكيد
إسلام زفرات بجهد:اودي هاد شي تيضر في لخاطر لبنت دابا هيا ضحية خسرات راصها وسمعتها
يوسف عنق ختوا ونطق بتحدير:نرجس رضي بالك من بحال هاد الأشكال
نرجس بلعات ريقها بصعوبة و حركات راصها بإجاب
قطعاتوا لالة فريدة:هاديك بنتي وتربية يدي تبارك الله عليها متبعا غير قرايتها وداخلا صوق راصها الله يرضي عليها
نرجس حسات بسطل ديال لماء بارد تكب عليها وجها ولا حمر بلا قياس مكرهاتش ترجع زمن لور باش ما ترسل حتى صورا..بتوتر وقفات كترعد قالت:
_تصبحوا على خير
لالة فريدة بتنهدة قصيرة ردات :بقاي حتى تعشاي أبنتي
نرجس رسمات إبتسامة صفراء على محياها :
_ما فياش جوع وزيدن غدا عندي إمتحان خاصني نعس مزيان
فريدة برضا نطقات:وخا أبنتي سيري الله يعونك
مروى دارت ليها جيم بصبعها وقالت :بون كوغاج زين
تسمع صوت رنة هاتف إسلام جبداتوا بفضول من صاكها وفور ما قرات إسم لمتصل تبسمات، بسرعة قبلات لخط :
_ألوا خويا كريم ...
كريم بتسأل قال:لباس عليك ؟
إسلام ببتسامة:لباس الحمد لله ونتا لباس ؟
كريم رد عليها :صافا أختي سمحي ليا ما كنتش باغي نبرزطك في هاد لوقت ولكن سيد لي قلت ليك عليه باغي منك لجواب باش حتى لا ما كنتيش غتنضمي ليه عرس ختوا ونقولها ليه يشوف شي حد أخر ...
إسلام تبسمات جنب وقالت :لا أخويا أنا غنضموا ليهم كيف بغاوا غدا غنرسل ليك عنوان قاعة الأعراس رسلوا ليهم، غنقابلهم في لمكتب تما نهضروا على تفاصيل ...
كريم بفرحة نطق:أحسن ما درتي سيد غيفرح لا عرفك قبلتي الله يسر ليك الأمور بون كوغاج
إسلام قلبها بدا يخفق بالسعادة :شكراا أخويا كريم سلم على أمينة بزااف ...
إسلام قطعات الإتصال و بعينين تيلمعوا شافت في لعائلة:
_قريب غنبدا خدمتي ...
الحاجة خديجة تبسمات جنب وقالت: الله يسهل عليك أبنتي ...
مروى بفرحة ناضت كتعرجع حنت ضبرها سباط عنقات إسلام وقالت بفرحة :مبروك عليك ،حتى أنا بغيت مني نتزوج تنضمي ليا عرسي نتي ...
إسلام مبدلاها العناق:وخا كوني هانيا ...
مروى بعدات من أسلام وبقات كتشوف في يوسف بحب وعشق ...
يوسف مد إيدوا صافح إسلام:مبروك أختي
إسلام بدلاتوا المصافحة:الله يبارك فيك شكرا
الحاج راضي بفتخار نطق: تبارك الله عليك أبنتي الله يوفقك ويبارك ليك في عملك ...
لالة فريدة تبسمات جنب وقالت:أنا غنمشي نحط لعشاء سيري عيطي أبنتي لراجلك ينزل يتعشى
إسلام حركات راصها بإجاب وطلعات تجري لجناح فرحانة لقات لباب محلول دخلات لقات أركان واقف عاطيها بضهر تبسمات جنب وبعينين تيشعوا من لفرحة قالت:
_أركان وأخيرا غبدا نحقق أحلامي ونوصل لداك شي لي بغيت عيط ليا كريم باش نضم عرس خت صاحبوا لي قلت ليك عليه وغدا ولا بعدوا غتلاقا بيهم ونبدا خدمتي ...
"كمشات حجبانها "سمح ليا طريت ناخد فلوس من لبنك حنت حشمت قدام لبنات ما مبغيتهمش يخلصوا عليا نتا متخافش غير نبدا ندخل لفلوس من خدمتي نرجع ليك فلوسك كاملين ...
بينما هيا كتهضر فرحانة ما سكتاتش قاطعها أركان بنبرة صوت حادة قفزها:
_سكتييييي ...
إسلام كمشات حجبانها بخوف دارت لعندوا بالعرض لبطيئ حتى كتصدم لقاتوا هاز تيلفونوا بين يدين تيرجفوا وعينيه حمرين وسدروا كيطلع وينزل بالعصاب....
أركان ساط بجهد و بقا تيشوف فيها بغضب وينزل عينيه الأيفون ما متيقش ....
أركان تصدم بقا تيشوف في تيليفونوا وفي إسلام ما مسدقش داك شي لي وصلوا، زير على يديه وسدروا بقا تيطلع وينزل بالعصاب تبسم بسخرية من أفكار لي نزلوا ليه قبل ما يشوف تيلفونوا رما الأيفون ديالوا فوق سرير ...
رمقها بنضرات حادة و زفر بجهد وخطا خطوا مبعد منها حتى كيسمع في رسائل تيوصلوا إسلام في تيلفونها كمش حجبانوا و دار لعندها بحال ثور خطفوا من وسط يديها شعلوا لقا فيه كود زير على فكوا وقال من تحت سنانوا بعدما مد ليها تيلي:
_فتحيه
إسلام خدات تيلفونها بيدين كيترعدوا وهيا ما فاهمة والوا فتحات لكود وعطاتوا تيليفون
أركان زاد تأكد من داك شي شاف في تيلفونوا لقا رسائل من عند سفيان مسيفطين لإسلام كلهم حب وغرام ولي زاد على بيه هيا رسالة لي مكتوب فيها:
_إسلام عمري عارفك كتمسحي كَاع رسائل لي كنصيفطهم ليك لا يشوفهم داك خينا ولكن هاد رسالة خليها عندك باش تعرفيني شحال كنبغيك كل نهار قراي هاد شي شكرا بزاف حنت كتبغيني وما نسيتينيش طلقي دغيا وحتى أنا قريب غنطلق من هناء ونرجعوا لبعضياتنا كنحماق عليك أحياتي
أركان دوز بيديه على شعروا بالعصاب حتى تعرات جبهتوا حط ليها تيلفونها وسط يديها وقال بصوت رجولي خشن:
_مزروبة باش طلقي وترجعي ليه ياك هاكي جوبيه
إسلام نزلات راصها لتيلفونها غير قرات لي مساج عينيها وساعوا من صدمة تسمرات في بلاصتها ولسانها تسرط ما عارفات ما تقول وكون كانت هيا في بلاصة أركان أكيد غتيق من خلال طريقة لي مكتوب بيها لمساجات لي جاوو...
أركان خبط إيدوا مع لحيط باعصاب وقشر فموا من لداخل كابح نفسوا بلا قياس باش ما يحطش عليها الإيد
بستهزاء من نفسوا نطق:كتاشفت ليوم بلي أنا أكبر مكلخ على وجه الأرض حمااااار
تقابل معها وبحرقة في قلبوا نطق:
_بغيتك كتر من روحي إسلام واش هاد شي لي كنستاهل منك..ليوم كنت ناوي نجلس أنا وياك كنت باغي نتراجع على مسألة طلاق "إسلام فور ما سمعات كلاموا قربات منوا قبطات في يديه وليني لفم لي تحلوا تهضر بيه ما عندهاش هيا براصها مصدومة من سفيان "كنت باغي نساا انك مشيتي شفيتيه في لحبس ونسا بلي كتبغي واحد غيري ونبدا معاك من لول
أركان سحب يديه من وسط يديها ودار لعندها بغضب و نار الغيرة شاعلة في عينيه تيخلغ بلا قياس حتى حسات براصها غطلقها في سروالها من شدة الخوف تبسم جنب:
_قلت مع نفسي أن أكبر غلط خديتوا في حياتوا هوا أنني فكرت نطلقك ولكن ليووم تبتي ليا لعكس أبنت الناس كان هادا هوا أحسن قرار خديت "قلبوا خفق بشدة قبل ما ينطق "إسلام الله يسهل عليك كنتمنى ليكم سعادة من كل قلبي
إسلام من خلال كلام أركان لي واضح من خلالوا أنه كيبغيها بلاقياس وكيفضل سعادتها عليه خلا دموعها تحرر من قيودها وتشق طريقها بإصرار وشموخ على خديها الورديتين شهقات بجهد وهيا كتشوف فيه بترجي
أركان توتر ولتافت يمين ويسار تم قال بعدما شدها من درعها :
_علاش كتبكي ؟!!
إسلام غمضات عينيها وحلاتهم حركات راصها وبقات كتشوف فيه تم نطقات بشافيف كيترعدوا مع إبتسامة واضح من وخلالها كمية الإحترام لي كتكنوا ليه :
_شكرا حنت كتبغيني
الهلع و الرعب والذعر أمور أثارتها نضراته الحادة المخيفة لي رمقها بيها بقسوة قبل ما يغادر الجناح، نزل لتحت وخلاها كتبكي بجهد..
خارت قواها وطاحت في الأرض وتيلفون بين يديها بصوت باكي صاحت بصوت عالي:
_علااااش أسفيان علااااش حراام عليك على شوية ما حياتي كانت غتقاد ورجعتي دمرتي ليا كلشي....كرهتيني في نهار لي تلقيت بيك فيه..الله ياخد فيك الحق بغيت ربي عمروا يسمح ليك كنت كنحتارمك وكنتي نتا كلشي في حياتي، وليوم وليتي نتا هوا كابوس حياتي وليتي لعنة صعيب نتهنى منها تخليتي عليا ودابا"مسحات دموعها"و دابا علاش باقي تابعني بغيتي تشوفني كنتعدب كتر عاد غترتاح
دورات عينيها وهيا تشوف تيلفون ديال أركان وقفات بزربة هزاتوا بين يديها دخلات فتحاتوا لقاتوا ما فيهش كلمة سر تنهدات براحة ودخلات كتتاشف شنوا لي وصلوا حتى كتلقا جميع الأوديوا لي كانت بيها وبين سفيان قبل ما يتزوج وبعدها فاش قالت ليه ما عمري ما غنبغي غيرك وصلوه وتصاورها هيا وسفيان عينيها وساعواا بصدمة من اخر مساج قرات :
_شد مرتك عندك قول ليها تبعد ليا من راجلي حسن ليها راها مزال كتعيط لراجلي سفيان في نصاصات ليل تشكي ليه عليك
إسلام زيرات على يديها ومن تحت سنانها نطقات بعصبية: الله ياخد فيك الحق أهناء أنا كنصوب ليك بلاصتك مع راجلك وطلبتوا باش ما يطلقش ونتي أشنوا درتي حسبي الله ونعم الوكيل بغيت ربي يجبها ليك مع غيري باش تحسي بهاد شي لي درتي ما غتدوزهاش ليك غير تسناي...
مجموعين على طبلة لعشا كياكلوا في صمت حتى نزلات لعندهم إسلام جلسات بهدوء في لكرسي لي مقابل مع أركان..
الحاجة خديجة بتسأل قالت:تعطلتي أبنتي صيفطناك تعيطي ل أركان بقيتي تما
إسلام عينيها حمرين بالبكاء ما قدرتش تشوف في الحاجة نزلات راصها لطبسيل بصوت باكي مخنوق نطقات:
_سمحوا ليا تعطلت عليكم بقيت حتى صليت وبدلت حويجي
الحاجة برضا قالت : يوا أبنتي لا كنتي تعطلتي على قبل الصلاة ما عليش الله يتقبل
تمشات ناحيتهم لالة فريدة لابسا فراشة مزيناها مناسبة سنها حطات طبق ديال ديسير وبتسأل نطقات:
_واش شعيبية "الخادمة" مشات معامن تشاورت وما مزال كينين لماعن بزاف ديول لعشا خاصها تغسلهم وشي طناجر كبار ما يدخلوش في لاماشين
إسلام بغصة في حلقها قالت:ماشي مشكل أخالتي أنا نغسلهم ممكن يكون عندها شي حاجة ضرورية داك شي علاش
نجلاء هزات راصها صغرات عينيها في إسلام وقالت:
_اه شعيبية مسكينة ولدها مريض راها طلبات مني الإدن عاد مشات
الحاجة خديجة رمقاتها بنضرات كلها شك وقالت : الله يشافيه مسكين غير هوا علاش ما جاتش خدات مني عندي الإدن أنا ومشات لعندك نتي ما ملفاش ليها
نجلاء سرطات ريقها وقالت:يمكن حنت كانت مزربة ولقاتني قدامها قالتها ليا ومشات وزيدن أنا باش غنعرف...
إسلام بقات كتختالس نضر ل أركان لي جالس قدامها ومرة مرة فاش تيهز عينيه كيتصادموا نضراتهم ببعض قشعاتهم نجلاء شافت في إسلام وتبسمات بمكر
"فلاش باك"
خرجات من صالون وتمشات لبيتها خدات منوا شي حاجة في دارتها في صاك صغير ونزلات نيشان للمطبخ دخلات كتمايل حتى بانت ليها واقفا كتقدي في شغلها مشات قصداها بسرعة، تبسمات جنب وقالت:
_خلي داك شي من يدك وسيري لدارك ليوم عندك عطلة
شعبية منزلا راصها الأرض بعدم فهم نطقات:
_علاش الالة نجلاء أنا مزال ما كملت شغلي وزدين ما طلبتش عطلة
نجلاء ساطت بجهد وجرات إيدها حطات ليها فلوس ونطقات بتحدير: باركا من لفهامات زيدة وشدي هادوا خبري كمارتك ليوم ما نشوفكش ولا غنجري عليك من لخدمة وما عمرك ما غتحلمي تحطي رجلك في هاد رياض
شعبية طاحت دمعة جنب عينيها بتراجي نطقات: الله يرحم ليك الواليدين ما تجريش عليا هاد لخدمة هيا لي تندخل بيها طرف ديال لخبز لوالادي
نجلاء تبسمات بسخرية:باركا ما دمعي عليا هنا وسري لداك "عطاتها بضهر ودارت" اه وقبل ما نسا الى سولوك غدا قولي ولدك مريض ومشيتي لعندوا اوك باي
غير خرجات شعيبية من لكوزينة جبدات نجلاء قنيتة صغيرة فيها الأسيد"الماء القاطع"
"الحاضر"
نجلاء حطات إيدها مورا ودنها وقالت بفرحة داخلها:إسلام ليومااا غتبكي بقيتي فيا الصراحة ما كنحملش نشوفك فرحانة
مروى بتسأل نطقات:إسلام مالكي واش مريضة كتباني مهمومة
إسلام حركات راصها بلا وقالت: لا اختي أنا بيخير الحمد لله
الحاجة خديجة: إيوا كولي أبنتي راه كتباني ليا غير كتلعبي بداك طبسيل بين يديك
°•بعد دقائق سالاوا العشاء وكل واحد طلع لبيتوا من غير إسلام أو مروى لي جمعوا طبلة وقفات إسلام قدام صنبور غتغسل لماعن وهيا توقفها مروى
مروى كمشات حجبانها : كتباني ليا عيانا خليني أنا نغسلهم
إسلام تبسمات جنب وقالت :لا أمروى غير سيري تنعسي نتي ضيفة عندنا حشومة نشقيك وزيدن رجليك دارينك بطريق سيري ترتاحي
مروى : تسارحات وليت بيخير "بإلحاح" عرفتي شنوا نتي دوزي على لماعن بلمنضف او أنا نشلل باش نساليوا دغيا
إسلام رفعات حاجبها: راصك قاصح يالله زيدي "بسمات بخفة"و خشات إيدها في بواطا صغيرة مصنوا من بلاستيك ما كيدوبش بحال لقرعة ديال الأسيد حطاتها نجلاء تم فيها إسفنجة بدات كدوب ومنضف غمست إيدها لداخل وهيا تحس بلحمها بدا يدوب عينيها وساعوا وجها حمار بلا قياس خشات إيدها تانية باش تأكد وهيا تحرق فيهم بزواج بدون شعور غوتات بجهد ربي لي خلقها ودموعها بداو تينزلوا شلال من عينيها :
_وااااااععععع أي ايييي
مروى تهز قلبها بالخوف ملي شافت يدين إسلام مسلوخين بزوج ودم تينزل منهم حلات صنبور وجرات إيدين إسلام تحت لماء حطاتهم
_واش عندك حساسية لا جافيل ما يمكنش يدير هاد شي
وطلعات تجري لجناح عند أركان تقولها ليه وفي طريقها لقات بعض من أفراد لعائلة نازلين سمعوا لغوتة وهبطوا عودات ليهم كلشي ومشات...
دقات بجهد في غرفة أركان غير فتح ليها مكمش حجبانوا ما عاجبوا حال من تحت سنانوا نطق:
_شنوا بغيتي امروى
مروى رجعات نفس طاحت دمعة من عينيها بقات فيها إسلام ، بحروف متقطعة نطقات:
_إس ل ا م د م ع ت ق ه ا عفاك
أركان فور ما تشكلات الجملة في راصوا حس بالعرق نازل مع داتوا بلا ما يحس دفع مروى من قداموا ونزل طاير لمطبخ وعقلوا كامل مع بنت قلبوا لقا العائلة ديرين بيها كيتسائلوا وهيا كتبكي وسط منهم كل دمعة كطيح من عينيها كيحس بيها حرقاتوا في قلبوا جسدوا تصلب مني شافها بديك لحالة تصدم...
لالة فريدة دورات راصها : لا هاد شي ما يديوش جافيل ما يمكنش
الحاجة خديجة هزات لبوطا بيديها وقالت: هادا لماء لقاطع شكون لي داروا هنا حنا ما عندناش في رياض كنجيبوه غير نهار لي كيجيبوا لبنات يعونوا شعيبة في تخمال عاد كنستعملوه
يوسف ساط بجهد :إسلام خاصها تمشي لسبيطار واش غنبقاو نتفرجوا فيها وناقشوا على شكون دار هاد شي
أركان بسرعة هزاها بين يديه خلاهم موراه كل واحد وشنوا تيقول ...ركبها في لوطوا حداه وكسيرا لمستشفى طول طريق هيا كتبكي وهوا تيغوت بحالا هوا لي مجروح خبط لفولون بجهد وقال :
_أش قربك لشي ماعن ما كيناش غير نتي لي تغسلي زمر ،أنا ما جيبكش خدامة علااااش كطيري
إسلام كتنفخ على يديها و بصوات باكي نطقات وتنخصيصة كتحبس ليها لهضرة:
_تيحرقوني بزاااف أييي هئ هئ هئ
أركان زاد ضغط على لكسيارتور وقال بغضب:
_مدي يديك لهنا أريهم
إسلام قفزات من صوتوا مدات إيديها بدا يتنفخ فيهم وهما يبانوا ليه فقعات صغار عامرين بالماء عينيه وساعوا وعرقوا ضهروا خبط لفلون على جهدوا وصل لمستشفى هزها بين يديه دخلها نيشان حتى لغرفة دكتورة لي كتعالج عندها عائلة راضي حاطها فوق لبياص
دكتورة بتسأل: سي أركان شنوا واقع ؟!
أركان سدروا بدا يطلع وينزل بالعصاب بدون شعور بدا يغوت : ما كيبانش لك شنوا كين شوفي يديها ديري شي حاجة وباركا من كترة الأسئلة الخاوية
الدكتوة شهقات بجهد وقالت: غنمشي نعيط لدكتور مختص في هاد شي حالتها صعيبة
أركان بنبرة صوت حادة: زربي أش كتسناي
خرجات دكتورة كتجري من لغرفة ...
أركان عنق إسلام من ضهرها زير عليها خيف لا يخسره طاحت دمعة جنب عينيه حرقتوا ما تحملش يشوفها بهاد شكل بقات تينفخ ليها على يديها ويهدئ فيها:
_شششش حبيبة غتولي لباس ما تخافيش أنا معاك
دخل دكتور تعاون هوا ودكتوة عطاوها شي مهدئات وحيدوا ليها ديك جلدة لفوقانية كاملا من بعد ما نتهاوو، عطوها رشاشة وبوماضات تبقى دهنهم في كل مرة وداروا ليها فاصما بعدما نقاوو ليها جرح
إسلام من الألم وتعب ديال ليوم نعسات في لوطوا ، راجعين لدار وعقلوا كلوا مع مول لفعلة دور راصوا ناحية إسلام كتبان ليه ناعسا وتنخصيصية كتخرج ليها زير على يديه ما عاجبوا حال راصوا تنفخ عليه دور راصوا لزاج وهوا يشوف محل لمتلاجات وقف ونزل خدا منوا بواطة أيسكريم ديال شكلاط ورجع مكمل طريقوا لدار...
مجموعين حدا نافورة وسط رياض ومعالم الخوف وتوتر كاسيا ملامحهم من غير شيطانة
الحاجة خديجة كمشات حجبانها وبعدم رضا نطقات:
_كون غير خليتوني نتبعهم لبنت علم الله شنوا وقع ليها.
نرجس بتنهيدة قصيرة قالت : مدام خويا أركان معاها ماتخافيش حتى حنا ما كرهناش كون مشينا وليني نصبروا حتى يجيوا
لالة فريدة حاطا سبعها على دقنها:أنا بغيت غير نعرف لماء لقاطع كيفاش حتى جا لدار
نجلاء ساطت بجهد وقالت: أنا غنمشي نعس صهير ما مزيانش لصحتي
كلهم حركوا راصهم بلا حولة ولاقوة بالله لحاج لي مريض وخاطروا ما مهنياهش خارج هوا ويوسف وعدنان قدام لباب كيتسناوا وهيا باغا تمشي تنعس ما مصوقاش ....
فور ما ختفات من قدامهم تبعتها مروى كتجري جرتها لصالون
نحلاء بعصبية قالت :مالك علاش جريتني قصحتيني في دراعي
مروى بتسأل : ملي كانت إسلام كتبكي وكلشي خايف عليها نتي كنتي كضحكي علاش أختي
نجلاء تبسمات جنب : نتي عرفاني ما كنحملهاش وأكيد غنفرح الى شفتها كتألم بغيت ليها لعداب كتر من هاكا
مروى :علاش كتكريها لهاد دراجة ما عندها فاش أداتك "رمقتها بنضرات شك "نتي هيا مولات لفعلة ياك ؟!!
نجلاء قلبات عينيها وبفتخار نطقات: اه او ما كرهتش كون كبيت ليها الأسيد في كاس ديال لماء تشربوا
مروى عينيها وساعوا بصدمة حسات بدنيا دارت بيها بعصبية قالت من تحت سنانها: حرام عليك والله لبنت ما عندها ما دارت
نجلاء صغرات عينيها بشك: شتك وليتي كتميلي ليها وكتجي عليها من لفوق مزال ما تحاسبت معاك حنت وليتي مقربا ليها واش هاد شي علاش أنا جبتك لهنا
مروى سرطات ريقها: ما كندافعش عليها انا قلت هاد شي حنت انا لي كنت غنكون كنتألم في بلاصتها في خبارك بلي على شويا ما كنت غنقيس داك شي "دلات شفتها لتحتانية" وزيدن انا كنتقرب من إسلام باش نعرف اش تحت راصها وناخد ليها أركان ياك داك شي لي بغيتي
نجلاء حركات راصها:داك شي لي بغيت واخا تيبان ليا لعكس دابا حيدي من قدامي غنمشي نرتاح
مروى بحزن:علم الله كيف بقات إسلام تفوو على خت كديرا نحشم نقول لناس أنك ختي الله ياخد فيك الحق ما غندوزهاش ليك، وهاد شي لي درتي ليوم ما كيبغيه لا ربي ولا عبدوا
دخل هازها ناعسة بين يديه والعائلة كلهم تجمعوا عليه خايفين عليها والرجال تابعينوا من لباب...
الحاجة خديجة بخفوت قالت :امدار اولدي كيف بقات إسلام شنوا قال ليكم طبيب
أركان تنهد براحة ومن تحت سنانوا نطق معصب: الحمد لله الماء لي دارت ليها مروى في يديها هوا لي نقدها أما كون وصل ليها لماء لقاطع لعروق "زير على سنانوا مابغيتش يتوقع أشنوا ممكن يطرا" عطاتها دكتورة راحة ومتقربش لماء نهائيا "زفر بجهد " بربي ونعرف مول لفعلى حتي نشربوا ليه
نرجس حركات راصها بخوف:الله يشفيها
لالة فريدة بتنهيدة طويلة قالت: غير ربي جا من جيتها وصافي الحمد لله على سلامتها سير اولدي حطها ترتاح وسير حتى نتا تنعس
مروى درها قلبها مني شافت لفاصمة ملوية على يدين إسلام بزوج وختها هيا مولات لفعلة بتنهيدة قصيرة قالت:
_الى حتاجت إسلام شي حاجة عيط ليا عفاك أنا نعتاني بيها
أركان حرك راصوا وقال بصوت رجولي خشن:
_شكرا بزاف أمروى
الحاج راضي قاطعهم بصوت تقيل نطق: الحمد لله ربي كبير لبنت مزيانة وقلبها بيض ربي ديما غيجي من جهتها غير يكون لإنسان قلبوا عامر بالأيمان ما يخافش
الحاجة خديجة برضا نطقات:كلامك كلوا صحيح الحاج وحق من تعدا حتى يجيب ليه ربي من يتعدى عليه
طلع لبيت حطاها فوق سرير وحيد ليها سندالة من رجلها كان غيبدل ليها وهيا تبان ليه لابسا بيجامة بيها داها لمستشفى سد لباب عليها ونزل لطموبيل جاب ليها الأيس كريم وطلع نيشان عندها لقاها حالة عينيها كتشوف ،طلع حاجبوا وبتسأل قال:
_فاقتي واش مزال كتحسي بالحريق
إسلام حركات راصها بلا ونطقات بتنهيدة طويلة:
_بغيت ندوش
أركان ببتسامة مزينة ملامحوا رد عليها:حتى لصباح يديك ما خاصهمش يقيسوا لماء
إسلام دلات شفتها لتحتانية وبتراجي نطقات: بغيت ندوش ما نقدرش نعس غير لما دوشت تنحس براصي موسخة
أركان رفع حاجبوا: ندوش ليك أنا كلشي مشا ينعس كين غير أنا لا بغيتي
إسلام بلعات ريقها وبتوتر نطقات: لا غير شكرا
أركان بدون ما ياخد رائيها هازها بين يديه وقال بجدية وهوا حابس ضحكة من ملامح وجها الخجولة:انا ندوش ليك ما فيها باس
إسلام عينيها خرجوا و وجها تسحق منوا دم بخجل قالت:
_لا لا بلاش حتى لغدا ونقولها لختي توبة تجي دوش ليا
أركان ما تصوقش ليها دخلها لدوش جلسها حدا لمرية لفوق ونزل بسرعة لمطبخ خدا زوج بلاستيكات ورجع لجناح سدوا وفتح لبلاكار ديالها خدا منوا لفوطة ودخل لعندها لقا وجها ولا حمر كيف لمطيشة حشمانة بلا قياس تبسم جنب وقرب ليها ،فكل إيد خشا ليها ميكة حزمها مزيان باش ما يدخلش لماء إسلام نسات همها وشكلها بلميكات خلاها ضحك من قلبها:
_وليت بحال شي ملاكم بميكة ههههههه
أركان فرح من قلبوا مني شافها ضحكات تبسم بخفة وقرب منها خشا يدوا تحت تريكوا لفوقاني ديال لبيجامة حيدوا ليها وهيا غتموت من لحشمة..... وحيد ليها سليب سمطة وسروال بقات غير بدوبياس... داتها بيضاء كتشعل غير شافها عض غدوا من لداخل وهزها بين يديه .... وقفها تحت رشاشة فتحها وخلااا لماء نازل على داتها وشعرها فزاك ولصق ليها على ضهرها ووالبعض الخصالات في خصرها ولكصة نزلات على وجها غطات ليها عينيها ما بقات تشوف والوا..... حسات براصها غطيح وهيا دور يديها مورا عنقوا وجراتوا عندها متشبتة بيه دخلاتوا وسط لماء هوا فور ما حس بيها بغا تشد منوا واحلا ما يديها دور إيدوا على خصرها النحيل جرها منوا وحيد ليها شعرها على عينيها حتى تقابلوا نضراتهم مع بعض تحت لماء دافئ...
ساد صمت طويل بيناتهم بقا كيتسمع غير صوت أنفاسهم ودوك لقطيرات يدل لماء لي نازلين على فمها خلوه يبان متير أركان بقا كيشوف في عينيها ومرة مرة تينزل نضروا لشفيفها...
رجولتوا وحرشيتوا وعضلاتوا لي زادوا برزا مع لماء هاد شي كلوا ما قداتش تقاوموا إسلام.... وتقربات منوا خطفات قبلة حنينة من فموا.... غير حس بيها عينيه وساعوا .....ما قدرش حتى هوا يقاوم لذة شفيفها حط إيدوا تانية مورا راصها مقربها ليه ونزل على شفايفها كيلتاهم فيهم ويمصهم بشوق وبعنف وحتى هيا مستاجبة معاه... وحرارة أجسادهم غاديا وكتزيد وسدروا ولا يطلع وينزل لصقها مع لحيط..... وحيد تيشرت لي لابس بقا عريان من لفوق، هيا غير شافت عضلاتوا لبارزة عجبوها لدرجة حلات فمها رمقها بنضرات كلهم حب وهزها دور رجليها على خصروا ويديها مدوراهم على عنقوا .....رجع لشفتيها كيتلدد بمداقهم ويديه كيتسراوا في جسدها كامل دور إيدوا مورا ضهرها غيفتح لي ستيان وهيا تحل عينيها مخلوعة بصوت رقيق قالت:
_أركاااان
أركان فور ما سمعها حل عينيه مصدوم من اشنوا كان ناوي يدير ديك ساع جا في بالوا المساجات ولا واحد أخر سرط ريقوا حتى تفاحة أدم تحركات في حلقوا ....و نزلها خلاها غير كترمش وخدا شامبوا ديالها غسل ليها شعرها فركوا وخا طويل بقا داير معاه لخاطر حتى سالااا ودار ليها صابون و بصوت هادئ نطق:
_خاصني نحيد ليك هاد شي باش تشلي
إسلام قشرات فمها للداخل بلخوف والخجل وقالت بتمتيمة: غمض عينيك هوا لول
أركان رفع حاجبوا وببتسامة مزينة ملامحوا رد عليها: ولا ما بغيتش
إسلام دلات شفتها لتحتانية بحال شي طفلة صغيرة نطقات بترجي:
_عفااااك
أركان تبسم بخفة وغمض عينيه عاد حيد ليها ثياب داخلية وشللها عاد لتفت للجهة الأخرى هز لفوطة دوارها عليها وهوا مغمض عينيه هزاها بين يدوا حطها فوق سرير وهز فوطتوا وكالصوا وشورط دخلهم معاه بعدما قال:
_غنمشي نبدل ونجي عندك
خرج من دوش لابس حويجوا ومن لفوق عاري عضلاتوا البارزة وشخصيتوا الرجولية يتساليوا معها توجه نيشان لبلاكار ديالها جبد ليها دوبياس في الأزرق وتقدم ناحيتها باغي يلبسها وهيا توقفوا ...
إسلام نفخات شفايفها وبتراجي قالت:غمض عينيك هوا لول
أركان حرك راصوا إستاجبة لأوامرها وغمض عينيه عاد لبسها وقف تينشف ليها شعرها من لماء تبسم جنب وقال بعدما نشف حتى هوا شعروا :
_تاخدي أيس كريم
إسلام عينيها لمعواا تبسمات بخفة :ما كرهتوش لحال سخون بزاف.
أركان هزها قادها في بلاصتها وجاب لبواطة حلها قدامها مع معيلقة ديال لبلاستيك كتكون معاها وجلس تيوكل فيها وهيا فرحانة وكتلدد:
_امممم بنييين شكراا
طاح شويا جنب فمها مسحوا ليها بيدوا وكلها حتى ما بقاتش باغا بدل ليها لفاصمة ودار ليها دواء ليديها وناض غيمشي لبلاصتوا وهيا توقفوا هزات عويناها لي تيبريوا وحنيكتاها لمنفوخين ولات تبان كيوت بتراجي قالت:
_نعس حدايا عفاك
أركان حنت مريضة ما بغاش يخسر ليها حرك راصوا وقال بصوت رجولي خشن:
_اوك
تخشا حدها وهيا تقرب منوا وحطات راصها على سدروا تبسم بحنية وجر ليزار تغطاوا بيه دور يدوا جرها من خصرها عندوا وخشاها فيه كتر بصوت مبحوح نطق:
_نعسي رتاحي الى بغيتي شي حاجة فيقيتي
إسلام عجبها لحال ورتاحت فوق سدروا حسات برصها اول مرة غتنعس مرتاحة بقات مرة مرة كتهز راصها تشوف فيه حتى نعسات بين يدوا بينما هوا بقا فايق تيفكر في شكون لي غيكون دار لماء لقاطع ل إسلام...
بعدما توضات ولبسات عابيتها وحطات شال على راصها سرحات زربية الصلاة لونها وردي جابها ليها خوها أركان تحت طلبها حسات براصها بعدات على لي خلقها بزاااف من نهار جات نجلاء وبدات تعمر ليها راصها بالخوا الخاوي
جلسات كتصلي ودموعها تينزلوا من عينيها ماقبلا مع لي خلقها وحشمانة حسات بدنب حنت رسلات صورها فكل سجدة كطلب سماحة وكتمنى ربي يغفر ليها وعائلتها ما يعرفوا والوا ...
سالات صلاتها و هزات يديها كدعي حتى سمعات صوت تيلفونها تيصوني وقفات بعدما جمعات صلاية تمشات ناحيتوا هزاتوا بيدين تيرجفوا جوبات الأبيل فيدوا...
_مراد تبسم جنب وقال: زين صافا
نرجس حركات راصها بزز والخوف قاتلها كتسناه يهددها بتصاور تبسمات جنب وقالت:
_ لباس الحمد لله
مراد كمش حجبانوا :حيدي لفولار ما جاش معاك
نرجس بقات كتشوف فيه عاد بداو كيبانوا ليها عيوبوا الأنه كون كان تيبغيها كيف قال ما كانش غيطلب منها تصور عارية وتصيفك ليه ولا تحيد الحجاب ...
مراد رفع حاجبوا ونطق: هيهواا مالك فين سرحتي اححح كلك زوينة صراحة ما شفت حتى بنت في جمالك زين من لداخل ومن برا
نرجس سرطات وبخوف قالت:مراد بغيت نطلب منك واحد لحاجة
مراد بغمزة نطق: طلبي ازين
نرجس فتحات شفايفها غتهضر وطلبوا باش يمسح صورها ،وهوا يقاطعها بكلاموا :
_ اووبس نخليك دابا عندي تصال أخر باي بيبي تهلاي ،اه قبل ما نسا الى ما تاصلتش بيك في هاد تلاتة ايام لي جايا عرفتي انني غنكون خارج لبلاد عندي شي حاجة مع مهمة ...
قطع معاها الإتصال وخلا قلبها كينزف دم من شدة ندم عاد بدات كتفتح عينيها وكتوعا على نفسها رجعات فرشات زربية الصلاة وجلسات كتدعي وتبكي من قلبها باش ربي يسمح ليها...
° °•• شرقات شمس الصباح معلنة عن يوم جديد
جالس في لمكتب ديالوا داخل لجناح لابس تيشرات في الأبيض مكروز على عضلاتوا مع سروال توب رمادي ديال سبور
رتاشف من لقهوة صباحية ديالوا وملامح وجهوا هادئة حاط قادموا لبيسي وبعض لملفات كيتفحص فيهم وعقلوا كلوا مع مدير شركة لي في أوروبا تيفكر أنه كيفاش تقتل وشنوا سبب ونفس لوقت تيفكر في شكون لي حرق يدين إسلام جاتوا نجلاء في لبال ولكن ما بغاش يصدق أنها ممكن توصل بيها لحقارة لديك دراجة...
ليل كولوا ما شاف نعاس ما داقوا عقلوا مشغول تيحلل ويناقش غير بوحدوا سمع لباب ديال لمكتب ديالوا كيتفتح هز راصوا بفضول يعرف شكون جا حتى كتبان ليه مروى داخلا تبسمات ليه وسدات لباب موراها من لداخل كمش حجبانوا بتسأل وقال:
_أش جايا ديري هنا ؟!!
مروى قربات منوا خيفا ومتوترا حولات تبان عادية خدات شاهيق وزفير ونطقات :
_صباح لخير عارفا أخرى مرة هضرنا فيها قبل شي تسعة أشهر فاش جريتي عليا من شريكة صراحة جيت نطلب منك سماحة أنا غلطت حنت بعت تصاميم ديولك لمنافس ديالك سمح ليا وخا ماشي هادا هوا لموضوع لي جيت على قبلوا
أركان نزل ركز مع لبيسي قداموا وبنبرة صوت حادة رد عليها:
_سدينا لموضوع شحال هادي خرجي عندي لخدمة داك شي فات
مروى بملامح جدية نطقات: في صراحة أنا عرفت شكون لي دار لماء لقاطع في لكوزينة هيا كانت متقصدا إسلام وما كتحملهاش
أركان بفضول هز راصوا رمقها بنضرات مخيفة وقال من تحت سنانوا مصعب:شكون هضري
مروى بلعات ريقها وقالت:ختي نجلاء هيا لي كبات ل إسلام لأسيد حنت ما كتحملهاش و بغات تأديها بأي طريقة
أركان فور ما سمع كلامها جن جنونوا ناض معصب قاصد لباب غيمشي لنجلاء ساط بجهد و زير على يديه او وقف دار لعندها بتسأل نطق :
_باش عرفتي ؟؟
مروى بحزن:هيا لي عترفات ليا بكلشي عرفاك غتصدم وتقول مع راصك كيفاش انا ختي دارت داك شي وبغيت نشوها ،في صراحة أنا لي خلاني نهضر هوا إسلام بقات فيا هيا إنسانة طيبة أنا ما بغيتهاش تأدى غير قول ليها ترد لبال منها "بتراجي" وعفاك ما تقول لنجلاء والوا خليها حتى تولد وخود شي قرار مناسب
أركان زفر بجهد دار لعندها بملامح ممحية نطق بجدية : بغيتك نتي لي تردي لبال ل إسلام من ليوم، "رمقها بنضرات شك"حنت أنا نقدر نسافر نعول عليك أمروى ولا وقعات أي حاجة ل إسلام نتي لي مسؤولة عليها
مروى تبسمات جنب وقالت بتأكيد: كنواعدك أنني نحميها من جميع مخطاطات ختي
أركان مني سمع إعترافات مروى شك فيها لا أنها تكون مصيفطاها نجلاء باش تقرب منوا ويولي يتيق فيها لدالك هوا قرر أنه يخليها هيا لي ترد لبال ل إسلام حنت لا بغات تكسب تيقتوا غتدير لي قال ليها عليه ومنها يتأكد من نواياها،أما نجلاء عرفها مولات لفعلة ودابا غير زاد تأكد بغا يحل لموضوع بلعقل على قبل العائلة وخوه لي محتارموا...
نازل في دروج غادي كيتمشى بجسد متصلب حتى جا على مسامعوا بعض الأصوات ما غرابش عليه جايين من طبلة لفطور لي حدا النافورة لي مزينا رياض ،كمش حجبانوا أو وقف بعيد عليهم حس بالقشعريرة سرات في جسموا كامل وعينيه لمعوا من لمنضر لي قداموا...
جالسا إسلام فوق كرسي وعلى يامينها جالس سي عدنان هاز ملعقة بين يديه وكيطعميها بيديه وعلى يسارها جالسا لالة فريدة كتمسح ليها جنب فمها لا طاحت ليها شي حاجة من باقايا الأكل...
فور ما شاف كيفاش باه وموا كيهتموا بمراتوا خالج داتوا إحساس غريب ...ما عمروا ما توقع أنه غيشوفوا هاد شي نهار.....فرح من قلبوا من هتمامهم بيها...
أركان قرب منهم مبتاسم جنب حرك راصوا وقال:
_ صباح لخير
الحاجة خديجة هزات راصها جوباتوا" بينما سي عدنان وفريدة مداربين فيما بينهم علاش شكون يوكل إسلام ":
_صباح نور اولدي حبيبي كيف صبحتي نعستي مزيان
أركان حرك راصوا بإجاب و جر كرسي جلس فيه مقابل مع إسلام
لالة فريدة ساطت بجهد وبعصبية نطقات: اسي عدنان وااه واش لبنت غتبقا توكلها شويا وشي لا خر كلوا كيتكب فوق حويجها خليني أنا نوكلها ونتا فطر خاصك تمشي لشريكة
سي عدنان بصوت غليض جوبها : خليني نوكل بنتي بيدي ألالة مالك حسدتيني أنا ليوم ما غاديش لخدمة واه شحال فيك افريدة
لالة فريدة بعدم رضا ردات :وغير قاد يديك بعدا شوف لمعلقة غادي بيها ميلا ويلي لعصير كلوا كبيتيه عليها
إسلام تأثرات بعينين تيلمعوا بدموع قالت :
_ خالتي شكراا بزاف معليش غير خليه توحشت بابا صراحة وخا ماعمري ما شفتوا "وجهات كلامها لعدنان "عمي الله يخليك لينا
سي عدنان دوز بإيدوا تانية على راص إسلام برضا ونطق:أنا هوا باك أبنتي عيطي ليا بابا
إسلام تبسمات جنب :غير خلوني انحاول نفطر بوحدي فطروا نتوما
لالة فريدة ببتسامة نطقات: خلينا ابنتي لقينا لفرصة نرجعوا ليك والوا غير شويا من افضالك ،لي كديري معانا ماشي قليل نتي كتهتمي بالعائلة كلها بلا ما يطلبوا
إسلام عينيها دمعوا ببتسامة بريئة قالت :هدا واجب أخالتي "وجهات كلامها لحاجة " فين هوا لحاج واش عيان ؟ شفتوا ما نزلش يفطر معانا
أركان زير على يديه حنت بقات فيه إسلام بزاف، ما كيبغيش يشوف دموعها نهائيا تبسم ليها ورتاشف من فنجان ديال لقهوة
الحاجة خديجة جوباتها:الحاج أبنتي صلى وقرا الحزب وخرج يتمشى شويا ، عاد غيجي يفطر ليوم لجوو زوين
نجلاء تمات جايا ناحيتهم نازلا من دروج فرحانة غير سمعات كلامهم كمشات حجبانها بغضب ونطقات بعصبية :
_تبارك الله على عائلة راضي عندهم عادة حتى يمرض شي واحد عاد كيهتموا بيه"رمقتهم بنضرات مستفزة و قالت " هيا خاصني حتى أنا نتحرق باش تديوها فيا شويا
الحاجة خديجة خنزرات فيها ومن فوق خاطرها ردات: الله ينجيك أبنتي أش بغيتي بشي مرض حمدي الله حنت بصحتك
أركان ركز نضر في عينين نجلاء وقال بصوت رجولي خشن:
_عندك الحق أنجلاء خاصني نعيط لداك لي حرق يدين إسلام هوا لي يحرقك نيت ولا عرفتي شنوا حرقي راصك وتكلفي نتي نيت
نجلاء شافت في مروى بشك و بلعات ريقها بصعوبة عاد نطقات بتوتر:
_لاواه أخويا الله يحفضني وينجيني
تمشات ناحيتهم لابسة كسيوة صيفية في الأحمر وفيها نقيطات بالأبيض وشعرها مطلوق على راحتوا ولابسا سبيبيط أبيض في رجليها ...
نرجس ببتسامة جرات كرسي جلسات فيه و قالت :صباح الورد ختي إسلام كيف بقيتي ؟ يديك مزال تيحرقوك
إسلام تبسمات جنب وردات:مزال تيحرقوني شويا ولكن الحمد الله حسن من لبارح
نرجس رتاشفات من كاس عصير برتقال، وهوا يصوني تيلفونها قفزها هزاتوا بخوف ومني قرات الإسم دقات قلبها تسرعات بشكل رهيب هزات وجها لي ولا حمر وبتوتر نطقات:
_هادي صحبتي غنمشي نجوبها
لالة فريدة بشك شافت فيهاو نطقات بتسأل:من إيمتا ولاوا عندك صحابات أنرجس ؟!!
نرجس وجها تسحق منوا دم :ماشي صحبتي قريبة ليا غير هوا الأستاد دار لينا جروب في لوتساب تيعطينا فيه تمارين على قبل الأمتحان الموحد أو واحد لبنت خدات نمرتي بغاتني نصيفط ليها دروس ما كتباهمش مسكينة
لالة فريدة خرجات عينيها:وهاد صاحبتك ما تعرفش تكتب اش كانت كدير ملي الأستاد كان تيعطيكم دروس
الحاجة خديجة حمرات فيها: نتي خلي لبنت تمشي تهضر مع صحبتها اش فيها، وااه درتي ليها ستنطاق على صباح "وجهات كلامها لنرجس" سيري أبنتي هضري مع صحبتك
نرجس وقفات بزربة طارت من قدامهم و فور ما ختفات من امامهم قبلات لخط و بتوتر قالت:
_مراد ياك قلتي ليا ما غتعيطش ليا هاد ليومين وغتسافر
مراد تبسم جنب وقال:اوو بيبي ما كين لا صباح لخير ولا صباح نور، نيشان بدتي طرحي في الأسئلة ،نوو ما مشيتش
نرجس كمشات حجبانها :آخر مرة تعيط ليا حتى نقولها ليك كنت جالسا كنفطر مع لعائلة بزز باش خلوني نجوب
مراد بعصبية رفع صوتوا: إييه اخر مرة تهضري فيها معايا بهاد طريقة ،غنعيط ليك لوقت لي بغيت ازين ونتي خاصك تجوبي ،اه وقبل ما نسا بغيت نشوفك ليلة في لبرطما ديالي
نرجس عينيها خرجوا بصدمة ،زيرات على يديها ونطقات بشفايف كيترعدوا : لا مراد ما نقدرش نجي
مراد بتهديد :اسمعيني مزيان أديك لق**** بربي وما تكوني عندي هاد ليلة حتى غدا غنصيفط تصيوراتك لعائلتك كلها
نرجس نزلوا دموعها بسرعة بتوسل قالت: عفاك الله يرحم ليك لواليدن تصاوري لاا انا كنبغيك امراد حرام عليك
مراد ضحك من قلبوا :صدعتيني في راصي اشمن حب ولا زمر كتهضري عليه هههه "ضحك بقهقهة" هيهوا فكري مزيان مزال عندك لوقت من هنا لعشرة ديال ليل الى ما جيتيش غنشهرك ابب
نرجس بتوسل :الله يخلي ليك ما عزيز عليك ما تشوهنيش أنا ما نقدرش نجي عندك الى عرفوا خوتي غيقتلوني هئ هئ هئ عفاااك
مراد ساط بجهد :غنرسل ليك لعنوان فين تجي الى ما جيتيش أنرجس ما تلومي غير راصك أبنت العبد
كمل كلاموا وقطع عليها تيلي خلاها كلها كترعد
داز نهار كيجري وطلع القمر بعدما غربات شمس ....
دخل غرفتها جالسا على ركابيها في الأرض معنقا طرف ديال سريرها من جناب ، و حاضيا ساعة قدامها...كتبكي من قلبها بحرقة وتحسر، ما عرفات شكون تمشي تواجه ولا لمن تقول هاد لمشكلة لي هيا فيها وعائلتها عائلة محافضة رغم أنهم مخلينها على حريتها مرتاحة وعاطينها تيقة كبيرا... تيقين فيها بلا قياس...حطات إيديها بدات تسرفق في وجها وتقول بصوت باكي..
نرجس: باشمن وجه غنواجهك أخويا أركان باش وبابا ويوسف ماما والحاج هئ هئ هئ ياربي تشوف من حالي ياربي عتقني من هاد لموصيبة أنا ما نقدرش نمشي عندوا ونطيح في مشكلة كبر من هادي منقدرش لاااا ما غنمشيش لااااا
قلبها تسارعات داقتوا كتر من لول فور ماشافت في ساعة أنها العاشرة ليلا وصلات هزات تيليفوها بيدين تيرجفوا تاصلات بعمر باش يعتقها صونات عدة مرات لكن هاتفه خارج تغطية ...
الخوف تمكن منها وطفاتوا ولاحتوو في الأرض خافت لا يتاصل بيها مراد وقرات انها ماتمشيش عندوا وتخليها في يد الله ...
وقفات برجلين تيرجفوا غاديا مكابرا توجهات للحمام ... دخلات توضات و جلسات كتصلي ودعي ربي ينقدها من لي هيا فيه....
° °•• لبسات بيناور طويل على لبيجامة لقصيرة لي لابسا، سترها وتمشات بخصرها نحيل حتى لجناح إسلام دقات جوج مرات وهوا يفتح ليها لباب وفور ما شافها كمش حجبانوا بتسأل:
_مروى !! شنوا بغيتي في هاد ليل ؟!
مروى تبسمات جنب وقالت:خويا أركان عفاك كلم ليا إسلام بغيتيها غنهضر معها دغيا ما نتعطلش كنواعدك ...
أركان حرك راصوا بإجاب ودخل لجناح ديالوا طلب من إسلام تخرج تقابل مروى ...
إسلام ببتسامة نطقات:مروى مالك يكما مريضة
مروى كمشات حجبانها وقالت:لا أختي ما كين والوا في صراحة محتاجاك غدا
إسلام بتسأل ردات:فاش ؟
مروى بعينين تيلمعوا :بغيت غدا نصوب لفطور ونتي تنزلي معايا لكوزينة قولي ليا شنوا تيبغيوا لعائلة وأنا نصوب نتي مديري والوا أنا بغيت نصوب لفطور غدا بوحدي ...
إسلام ضحكات من قلبها :هادا ماكان وخا لالة غدا فيقي بكري ودوزي عندي نزل أنا وياك ونوريك شنوا تصوبي ...
مروى عنقتها زيرات عليها :شكراا بزاف ما عمرني ما غنسا هاد شي ...
إسلام بعدات منها:أنا ما درت والوا وزيدن نتي لي عونتيني بفضلك يديا غيرجعوا يباروا
مروى شافت في يدين إسلام وقالت بتسأل: مزال تيضروك باش كتحسي ؟
إسلام تبسمات جنب:مزال كنحس بشوية لحريق مي الحمد لله لباس دبا ...
مروى :الله يشافيك تصبحي على خير
إسلام حركات راصها وقالت:أمين ،وأنتي من أهل لخير تباتي في راحة الله ...
سدات لباب بدراعها مبتاسمة و دخلات لداخل توجهات لسريرها جلسات فوق منوا وشافت في أركان لي واقف جنب نافدة كيستنشق في لهواء
إسلام ببتسامة بريئة:شكرا بزاف على لبارح حنت عونتيني ...
أركان بقا واقف بنفس طريقة جامع يديه عندوا تيشوف في لقمر، نطق بصوت رجولي خشن:
_هادا واجب ما كينش لاش تشكريني ...
إسلام ما عجبها حال ساطت بجهد وبدات تقلدوا:
_هادا واجب ما كينش لاش تشكريني ما عندك حتى كلمة اخرى ...
أركان ببتسامة مزينة ملامحوا رد عليها :سمعتك ما عندي حتى كلمة اخرى اه ...
إسلام بدات تشوف في جنابها بلعات ريقها وقالت ببتسامة:
_كنتي خيف عليا لبارح ياك ..
أركان دار لعندها رافع حاجبوا:لا ما خفتش عليك وزيدن علاش غنخاف نتي ما كتهمينيش
إسلام كمشات حجبانها :ما تنكرش أركان ...
أركان بنبرة صوت حادة : مستحيل نخاف عليك
إسلام نفخات شفايفها ما عاجبها حال نزلات عينيها كتشوف في يديها وهيا طيح عليها فكرة ...
نزلات دموعها بزز منها وغوتات بحر جهدها:
_اييييييي هئ هئ هئ إيدي
أركان فور ما سمع صريخاها طار لعندها كيف لمجنون قبط في يديها وبخوف نطق :
_شنوا تيضرك ؟!! هضري واش نديك عندك طبيب ...
إسلام تفرشخات بضحك: هههه هانتا خفتي عليا كلاك الكداب لاخر نتا كتخاف عليا ...
أركان بعد منها ساخط مرداش من تحت سنانوا نطق معصب بعدما تخشا في بلاصتوا عاطيها بضهر:
_حيدي منك هاد تبرهيش وسيري تنعسي
إسلام تخشات في بلاصتها هيا لأخرة وقالت: إيوا تصبح على الخير الخويويف ديالي ...
أركان زفر بجهد و بنبرة صوت حادة نطق: إسلاااام نعسي حسن لك ...
الساعة تشير إلى السادسة ونصف صباحا رغم الحرارة لي صابحا هاد ليوم إلى أن السماء عامرة كلها غيوم ما كتريحش نفس...
داخل لجناح ،جالسا فوق لفوتاي لابسا كسوة طويلة باردة بالكميم وشعرها سارد بالماء من دوش لي خدات ولي عونها فيه أركان طبعا
وهوا جالسا فوق طبلة قدامها كيبدل ليها لبنصمون فور ما حيد ليها لفاصمة عضات على شفاه السفلية ديالها من حر الألم لقا لحرقة ديزا بدم نفخ ليها في يديها وجلس تيحط ليها في دواء بقا مركز مع يديها و بصوت حنين نطق:
_تهدني مابقا والوا ونساليوا
إسلام بقات كتأمل فيه مكمشا حجبانها من لحريق لي كيعصف بيديها تبسمات جنب وقالت :
_شكرا بزاف
أركان تبسم جنب وقال: علاش فيقا بكري مزال لحال كون بقيتي ناعسا ترتاحي حسن ليك
إسلام تبسمات جنب :طلبتني مروى نزل نوريها شنوا تصوب في لفطور ليوم قبل لا تفيق خالتي
أركان بتحدير نطق: رضي لبال لراصك نتي ما ديري والوا ولا ما غنخلكش دخلي لكوزينة
إسلام ترسمات إبتسامة على محياها:كون هاني الخويويف ديالي حاضر سيدي
أركان شد ل إسلام من معصمها ونطق بملامح جدية: ليوم غنسافر طيارتي مع لعشرة بغيت غير نعلمك تهلاي في راصك "حرك راصوا" راه وصيت الوليدة والحاجة وكلهم غيهتموا بيك
إسلام تسمكوا ليها لودنين بسرعة ختافات بتسامتها ... عينيها دمعوا وبشفايف تيرجفوا نطقات بتسأل:
_علاش غتمشي ؟!! كلشي عارف وأنا أخر من يعلم ياك أركان علاااش ياك أنا مراتك !! وحتى بغيتي تمشي عاد جيتي تقولها ليا
أركان جمع علبة الإسعافات الأولية و زفر بجهد بصوت رجولي خشن قال: مالقيتش لوقت باش نقولها ليك ، أنا عندي لخدمة وزيدن حنا مابقا لينا والوا ونتفارقوا ،خاصك تعودي على غيابي من دابا غيكون حسن ليك
إسلام بشفايف كيترعدوا :ولكن أنا
أركان كمل ليها وجمع لوقفة بنبرة صوت حادة قاطعها:لي عندي قلتوا
إسلام وقفات على طولتها مصدومة ،طولات شوفة فيه و بلعات ريقها بصعوبة عاد نطقات بغصة خانقاها: وخا طريق سلامة الله يعونك
أركان زير على يديه عاطاها بضهر ، توجه لبلاكار ديالوا خدا فوطة و جبد لفاليزا حطها فوق سرير فتحها ....وتوجه لدواش هوا ما باغيش يخلي إسلام ولكن كلما كانت قريبا منوا غيزيد يتعلق بيها كتر وغيجيه لفراق صعيب لدالك هوا حاول يبعد منها و يمشي يركز على خدمتوا...
رجعات جلسات في بلاصتها مصدومة ما عمرها ما توقعات أن قول لحقيقة صعيب لهاد دراجة وغيدمر زواجها...
دائما طريق صراحة ولحق تيكون صعيب عكس طريق لكدوب ونفاق... دموعها بداو تينزلوا من عينيها وحدة مورا الأخرى سهات وهيا كتفكر في حياتها.... مكرهاتش تربطوا حداها باش مايمشيش ويخليها وهيا ساهية كتفكر فيقها من سهوتها صوت رسائل جايين من تيليفونها...
مسحات دموعها بكتفها وتمشات ناحية سريرها ما قدرتش تهز تيلي بيديها..حاولت بصبعها صغير تفتح لوتساب وهاتفها محطوط فوق سرير تحنات لعندوا ودخلات لوتساب بفضول تعرف رسائل لي وصلوها
فور ما فتحات لمساج عينيها وساعوا بصدمة شافت صور نرجس عريانا قشرات فمها من لداخل ودنيا دارت بيها ما تيقاتش داك شي لي قدامها...تسمكات وجلسات على ركابيها فيقها من سهوتها صوت رشاشة الماء جاي من دوش وهيا تفكر أركان بسرعة مسحات داك شي و فورصات على يديها حتى عطوها لحريق...
سمعات صوت دقان في لباب وهيا تقفز في بلاصتها.... بلعات ريقها بصعوبة او وقفات تمشات برجلين تيرجفوا لباب فتحاتوا وجها مخطوف...لقااتها واقفا هازا تيلفونها بين يديها ولابسا كسيوة في الاحمر صيفية....
مروى ببتسامة نطقات:صباح الخير زين صافا "كمشات حجبانها"مالك واقعة شي حاجة ؟
إسلام حركات راصها بلا وهيا تسمع صوت لمساجات في تيليفون أركان ..بسرعة دقات قلبها تسرعات بشكل رهيب شافت في تيلي ورجعات شافت في مروى و بزاف ديال لحويج طاحوا في بالها بخوف هضرات موجها كلامها لمروى:
_مروى دخلي دغيا هزي تيلفون ديال أركان
مروى رفعات حجباها وببتسامة قالت:يكما كتشكي في خويا أركان يخونك نوو بيبي غير طمني أركان ما يديرهاش
إسلام حركات راصها :ولاااا ماشي داك شي عتقي دغيا الى كان داك شي لي في بالي هوا لي وصل أركان، نرجس غتمشي فيها عتقي الله يرحم ليك الواليدين
مروى فور ما سمعات كلامها شكات فشي حاجة ماشي حتى لهيه.. بسرعة دخلات هزات تيلي بين يديها دخلات لوتساب وهيا تصدم حطات إيديها على فمها وقالت بعصبية:اويلي واش هادي نرجس لا مكنضنش !! نرجس مديرش هاكا... هاد شي غيكون مفبرك ..شي حد باغي يشوه ليها سمعتها..
إسلام ساطت بجهد وقالت بتراجي: سربي قبل لا يخرج أركان مسحي كلشي عفاك زربي أمروى وبلوكي هاد نمرة لي وصل منها هاد شي ومسحيها عفاك
مروى حركات راصها وبدات خدمتها...و في لوقت لي هيا كتمسح وصلها مساج في تيلفونها وهيا تشوف في إسلام لي بادلتها نفس نضرات القلق والشك...
إسلام خبطات رجليها مع الأرض وبخووف قالت:
_ناري مروى الى كان هاد شي وصلنا حنا العائلة كلهم غيكون وصلهم ولحاج مريض الى شاف هاد شي غتجيه شي كريز
مروى بحالا كبيتي عليها سطل ديال لماء بارد...جمدات في مكانها بسرعة حطات تيلي ديال أركان فوق سرير وبخوف نطقات:
_شنوا نديروا دابا نرجس ما كتستاهلش هاد شي
إسلام نفاخات على يديها لي عطاوها لحريق وقالت بتأكيد:خلينا نزلوا بزربة لتحت... لحاج غيكون في غرفة الصلاة سمعتوا تيقرا لحزب أنا غنمشي نتلفوا بلهضرة ونتي ديري أي حاجة وخوني تيليفون مسحي منوا كلشي وبلوكي نمرة
مروى حركات راصها برضا:هادي فكرة زوينة يالله نزلوا بزربة
نزلوا لبنات كيتجاروا في دروج توجهوا نيشان لغرفة الصلاة كان لحاج لابس جلابة في الأزرق ..جالس في لقنت مربع رجليه
حدا نافدة وبين يديه حاط كتاب الله القرأن الكريم وتيلفونوا حاطوا في شارج على يمينوا
دخلوا لبنات كيشوفوا في بعضياتهم إسلام دورات عينيها في لغرفة وفور ما شافت تيلفون شارت بعينيها لمروى ومشات هيا جلسات على يسار لحاج باش يدور عندها
الحاج غير شافها جلسات حداه ختم ترتيل بعد الأيات من القرأن بصدق الله العضيم وسدوا...
ببتسامة مزينة ملامحوا قال بتعب ضاهر في صوتوا:
_صباح الخير أبنتي شنوا لي مفيقكم دابا
إسلام بلعات ريقها كتشوف في مروى لي كتحاول تهز تيلي وفي نفس لوقت كتهضر :فقنا باش نصوبوا لفطور وملي سمعناك كتقرا لقرأن رتاحينا وبغينا نجلسوا حداك
الحاج نحنح بصوتوا ونطق برضا:الله يرضي عليكم "حس بشي حاجة وهوا يدور وجهوا ناحية مروى لي غير حسات بيه بعدات يديها من تيلي "بشك قال"بنتي
إسلام دخلات حولات تبتاسم بزز منها ونطقات: لحاج بغيت نهضر معاك في واحد لموضوع ضروري
الحاج بجدية نطق:هضري أبنتي
إسلام بحرج نطقات بتسأل: دابا أنا مع يديا محروقين ما كنقدرش نتوضا ولا نمس لماء واش الى ما صليتش ماغيعدبنيش الله
الحاج تبسم جنب:لا أبنتي نتي عندك عذر محروقة وأصلا تقدري تصلي غير جالسا وخا بلا وضوء وقد قال رسول الله صلى الله عليه وسلم....
بينما هيا كتهضر مع لحاج متلفاه وهوا تيعطيها في الأيات والأحاذيث نبوية مروى حطات تيلي و تنهدات براحة ..دارت إشارة الإسلام بيديها من مورا لحاج...
إسلام غير شافتها وقفات:شكرا بزاف الحاج لجلسة معاك ما يسخا منها حد..أنخليوك انمشوا نصيبوا لفطور
الحاج كمش حجبنوا :مزال ما ساليت أبنتي شرح الآية الكريمة لي قلت ليك
إسلام سرطات ريقها: مرة اخرى ،أركان باغي يسافر خاصني نوجد ليه لفطور قبل ما يمشي
الحاج راضي:وخا أبنتي سيري الله يرضي عليك
إسلام خرجات هيا مورى وبتسأل قالت:
_مدرا شنوا لقيتي واش مسيفط شي حاجة لحاج
مروى بتنهيدة طويلة ردات:اه ولاد لحرام نفس نمرة راه مسحت تصاور كاملين وبلوكيتوا
إسلام ساطت بجهد :أحسن ما درتي دابا باقي لينا عمي حتى هوا الى مشا حتى عرف علم الله كيفاش ممكن يتصرف مع نرجس على الله يكون مزال ما شاف والوا زيدي بزربة نشوفوا كيف نديروا...
توجهوا نيشان لغرفة سي عدنان دقوا في لباب لاقوا لالة فريدة ما كيناش تعجبوا وسي عدنان واقف تيقاد في لكرفاطا وتيلفونوا محطوط حدا لكونطاك ديال لوطوا دار لعندهم مبتاسم بعدما قال:
_دخلوا أبناتي علاش واقفين عند لباب
إسلام وجها ولا صفر تبسمات جنب ونطقات بتوتر:عمي صباح لخير
عدنان بوجه بشوش:صباح نور أبنتي قولي ليا بابا شحال قدي نبقا نفكرك فيها
إسلام عينيها لمعوا :سمح ليا أبابا لباس عليك
سي عدنان جمع حجبانوا وقال بتسأل:انا بيخير الحمد لله وملي شفتك وليت لباس نتي لي كتباني ليا عيانا أبنتي يكما مريضة؟
إسلام حركات راصها بي لا و شافت في مروى لقاتها مخسرا ملامحها وكتقول ليها راه تيلي فيه لكود "كلمة سر"غير فهمات تعصبات بلمعقول وهوا يلمحها عدنان و ودار بزربة ناحية مروى لقاها شادا تيلي بين يديها رفع حاجبوا ونطق:
_تيليفوني شنوا كيدير في يدك أمروى ؟
مرورى عينيها خرجوا بلعات ريقها وحاولت تبتاسم....بنبرة صوت متلعتمة نطقات:
_والوا أعمي غير بغيت نشوف لماركة زوين صراحة منين شريتيه"حركات راصها" انا تيلفوني ما بقاش تيخدم مزيان وبغيت نشري بحالوا "مدات ليه تيلي" واش تقدر تفتح ليا لكود بغيت نشوف خدمتوا كيف ديرا
إسلام وجها تسحق منوا دم ولات كتويل داخلها
سي عدنان فتح ليها لكود ومد ليها تيلي بعدما قال بصوت رجولي خشن:
_هاكي شوفيه بزربة راه جاني شي مساج هاد صباح غالبا غيكون متعلق بالخدمة خاصني نشوفوا حاولي تسربي.
مروى حركات راصها بإجاب وخدات تيلي بسرعة دخلات لوتساب مسحات تصاور وعملت حضر لنمرة عاد رتاحت
سي عدنان خدا ساعتوا كيلبس فيها وبتسأل قال:
_ماقلتوش ليا شنوا لي جابكم عندي على صباح ؟!! ما ملفاش ليكم
إسلام بتردد قالت:بغينا نسولوك أشنوا تبغي تغدا ليوم حنت قررت أنا و مروى نصيبوا لغدا
سي عدنان جمع لوقفة:غير سمحي ليا أبنتي أنا ويوسف ما غنتغداوش هنا وحتى لفطور محالش غنمشيوا لشريكة عندنا جتماع مهم دابا
مروى بسرعة عطاتوا تيلي وقالت بعدما جرات إسلام من دراعها وخرجات خلاتوا غير تيشوف ما فاهم والوا :
_هاك أعمي صراحة تليفونك واعر غنشري بحالوا إنشاء الله
مروى وقفات هيا وإسلام في لقنت بعاد على لغرفة و قالت:
_إسلام سيري نتي شوفي نرجس وسوليها على هاد شي لي وقع وأنا غنمشي عند يوسف ندير براصي غنهضر بتيلفونوا ونمسح كلشي على الله يكون مزال ما شاف حتى حاجة
إسلام بتنهيدة طويلة نطقات:وخا سيري دغيا الله يخرج هاد نهار على خير
وقفا كتبكي بحرقة وهوما واقفين قدامها مصدومين تيسولوا وهيا منزلا راصها الأرض ما قدرات تحط عينها في عينهم
الحاجة خديجة بتسأل نطقات:شنوا هاد شي أنرجس على صباح فقت كنتوضا حتى كوصلني هاد لعحب أستغفر الله
إسلام وصلات لغرفة نرجس لقات لباب مسدود دقات فيه بمرفقها ونطقات :نرجس حلي ليا لباب عفاك بغيت نهضر معاك
الحاجة خديجة ساطت بجهد ونطقات:كلشي عرف دابا الله يربي وأشنوا غنقول للحاج
مسحات دموعها وحلات لباب ل إسلام لي غير شافتهم تسلل شك لعقلها تبسمات فوق خاطرها وقالت:
_صباح لخير ..خالتي..لحاجة شنوا كديروا هنا عفاكم بغيت نهضر مع نرجس بوحدنا إلى ممكن
فريدة بقات واقفا شدا تيلي بين يديها مصدومة عاجزة عن الكلام و الحاجة لي هضرات:واش بغيتي تهضري معها على قبل تصاور ياك هانتي عرفتي وشويا كلشي غيعرف
إسلام حركات راصها وبإطمئنان نطقات: لا حتى واحد ما غيعرف راه تكلفت أنا مروى مسحنا تصاور من تيليفون أركان والحاج وبابا ..بقا غير يوسف خليت مروى تكلف
الحاجة خديجة وجها ولا صفر وفمها بياض:الله يرضي عليك أبنتي
لالة فريدة نزلات دمعة من عينيها حرقتها تصدمات و هزات يدها حتى لفوق ،سرفقات بنتها حتى كانت غطيح وبحرقة نطقات :
_خسارة خسارة تربيتي فيك مشات غير هكاك كنت حسباك صحبتي ماشي بنتي كنتيق فيك كتر من راصي ونتي شنوا درتي هادا هوا جزائي أنرجس تشوهيني وتشوهي العائلة كلها"شدات من دراع بنتها بقوة وبدات تحرك فيها ودموعها على خدها شلال" فاش قصرت معاك فاااش هضريي
نرجس بصوت مخنوق باكي نطقات: سمحي ليا أماما نتي ما درتي والوا أنا لي غلطت أنا
لالة فريدة زيرات على سنانها ورفعات سبعها في وجه بنتها:انا ماعنديش لبنات سمعتي معنديش كون غير ما ولدتكش نتي أكبر غلطة في حياتي
نرجس طاحت على ركبيها معنقها سيقان مها من لتحت وتبكي ...بتوسل قالت:
_عفاااك أماما سمحي ليا عارفا راصي غلطت او بزاف والله ما كنت قاصداا
الحاجة خديجة بسخط نطقات :أنا ساخطا عليك دنيا وأخرة كيفما طيحتي بشرف ديال هاد العائلة الأرض بغيت ربي ما عمروا ما يسمح ليك
لالة فريدة نزلات الأرض عند بنتها وبشفايف كيترعدوا نطقات :فاش غلطنا معاك هضري فاش "بصوت عالي بقات كتردد وتسرفق في بنتها"فااااش فاااش الكلبة فااااش لعنة الله عليك.خوتك تاقواا فيك والحاجة لمخيرة تيجيبوها ليك ونتي أشنوا درتي حراام عليك هاكدااا باش كتجازينااا ياااااك
إسلام شدات فريدة لي نهارت ولات كتضرب في بنتها وتسرفق في راصها ما بقات عارفة شنوا دير زيرات عليها ما نعاها حتى يديها بداو تيدوزوا بدم ولفاصمة ولات حمراء...
نزلوا دموعها على خدها تيجيروا بحزن قالت :تهدنواا عفاااكم خالتي تهدني راه كلشي كيتحل بالعقل عفااااكم سمعواا ليا نرجس مزال صغيرة عقلها مزال ما وعا ما عرفاش لحاجة لخيبة من زوينة داك شي علاش غلطات وكلنا كنغلطوا حنا مجرد بشر ماشي ملائكة...
هزوا راصهم بفضول مني سمعواا لباب تيدق تقدمات لحاجة حلات لباب وهيا تلقى مروى دخلتها وسدات لباب
مروى شافت فيهم بان ليها من حالتهم انهم فهموا كلشي بتنهيدة قصيرة قالت:
_الحمد لله يوسف ما شاف والوا قدرت نحدف كلشي من تيليفونوا وختي نجلاء شافت داك شي ولكن وصيتها باش تمسحهم وما تقولها لحتى واحد
الحاجة خديجة ضحكات بعصبية: شفتي أشنوا درتي كلشي ولا تيشوف فيك عريانا... راصك ما قدرتي تحافضي عليه مستور الله يلكيها ليك
إسلام بعدات من فريدة لي أمرت مروى تعطيها لماء وتكلف بيها وهيا قربات من نرجس لي ولات حالتها بالعصا لي خدات من عند مها قبطات في يديها وقالت:
_نرجس حبيبة عودي ليا واش كتعرفي شي ولد ياك... شكون هوا ؟ وعلاش دار ليك هاد شي ما تخبي عليا والوا أنا غنعونك
نرجس جمعات رجليها عندها وعينيها ما قدرت تهزهم بدات تبكي وتعود ليهم ليهم وهوما تيسمعوا معصبين ..
إسلام حركات راصها:اهاه كملي وملي رسلتي ليه تصاور شنوا قال ليك من بعد
نرجس تنخصيصة كتحبس ليها لهضرة بصوت باكي قالت:
_هوا قال ليا الى ما مشيتش عندوا غيصيفط تساوري لعائلة كلها هئ هئ هئ
إسلام عنقات نرجس مزيرة عليها وبتنهيدة طويلة نطقات:
_دابا مسحوا وجهكم أركان مابقا ليه والوا ويمشي نزلوا نقادوا لفطور نفطروا ونحاولوا ما نبينوا حتى حاجة حتى يخرجوا رجال نشوفوا شنوا نديروا "ساطت بجهد "الحمد لله ملي أركان غيسافر مزيان نيت باش يبعد وما يعرف والوا حنت هوا أنا لي عرفاه إلى مشا حتى لا عرف غتوقع شي مصيبة في دار
لالة فريدة مسحات دموعها وقالت:عندك الحق أبنتي يالله نزلوا"شافت في نرجس"ونتي ما غتخرجيش من لبيت فطورك غيوصلك هنا حتى نشوفوا شنوا غنديروا في هاد لكاريتة"وجهات كلامها للباقين" خرجوا خلوني نسد عليها بساروت
مروى بعدم رضا نطقات:لا أخالتي ما تسديش عليها
لالة فريدة ببرود نطقات: هيا لي فضلات تعطي حريتها فابور وتشريه حبسها بثمن غالي خاصها تولف من ليووم هادا هوا مصيرها...
على طبلة لفطور مجموعين كيتناولوا وجبة الإفطار بصمت، وصوت لماء ينبعث من نافورة جنبهم هوا لي كيتسمع ...
الحاجة خديجة ولالة فريدة حالتهم حالة ريوصهم عاطينهم لحريق وقلوبهم مكسورة، دمهم تايغلي من لمصيبة لي دارت نرجس بزز باش مكابرين وجالسين تيفطروا باش يبانوا عاديين..
الحاج راضي نحنح بصوتوا ونطق بتسأل:
_ فين هيا نرجس ؟!! علاش ما نزلتش تفطر
الحاجة خديجة وفريدة هضروا دقة وحدة، وكل وحدة وشنوا ، الحاجة نطقات بي:
_مريضة وبغات تبقى ناعسا ترتاح
لالة فريدة بصوت مكسور ردات: مشات لمدرسة الحاج
سي عدنان والحاج شافوا في بعضياتهم والباقين عينيهم خرجوا لحاجة وحلات ولات تكحب وتشرب في لماء لي مداتوا ليها مروى أما فريدة سرطات ريقها ونطقات:
_هيا كانت مريضة لبارح ورتاحت ...وليوم مشات تقرا عندها متحان
سي عدنان برضا نطق: الله يعونها قولي ليها ترخف على راصها شويا من دراسة خاصها ترتاح
يوسف بتسأل نطق :واقعة شي حاجة الواليدة كتبانوي ليا ماشي على طبيعتكم
الحاجة خديجة دخلات ببتسامة صفراء نطقات:
_ لا أوليدي ما واقعا حتى حاجة وفطر وكول مزيان بنتي ليا ضعافيتي
يوسف شاف في راصوا بشك لقا رصوا ما ضعيفش رفع حاجبوا في فريدة :ولكن الواليدة
الحاجة خديجة:فريدة غير مقلقة شويا حنت خوك غيسافر نتا ما عرفاهاش
أركان رتاشف من فنجان لقهوة وشاف في إسلام بقا حاضيها ما حيدش عليها لعين.....
وكأنه بهاد طريقة كيحاول يحفض ملامحها لي ديجا حافضهم عن ضهر قلب ...بقا تيدقق شوفة في تفاصيل وجها وكيتمتع بنضروا لعينيها لبنيتين لي ضاهر فيهم نوع من الخجل
وهيا بسرعة وجها ولاحمر ودقات قلبها تسرعات... عقلها تيقول ليها راه عرف شي حاجة ودخلها كتطلب في لي خلقها باش ما يكون عرف والوا،
أول مرة نضراتوا ليها لي كلهم حب يخلعوها....
سمع بعض لمساجات في تيليفونوا هزوا ودخل تيقرا فيهم بفضول...
مروى وإسلام شافوا في بعضياتهم بخوف والحاجة شدات من راصها بينما أركان فور ما قرا لي مساج كمش حجبانوا ماعاجبوا حال،
زفر بجهد وحط تيلفونوا حك لحيتوا من لتحت وهز راصوا في إسلام لي غير شافتوا تيشوف فيها ولات كلها كترعد بقا ليها غير شوية وطلقها في حويجها من لخوف...
أركان كمش حجبانوا وبتسأل قال :إسلام أ أش هاد لحالة لي درتي ؟
الكل فور ما سمعوا كلاموا هزوا راصهم مصدومين تيشوفوا في بعضايتهم من غير سي عدنان ويوسف والحاج لي ما عرفين والوا
إسلام بلعات ريقها وحبسات دموعها لي علاين ينزلوا بحروف مخربقة ردات:
_و ا ل وا مادرت والوا كنقسم ليك
أركان بعصبية نطق :ما درتي والوا ويديك لي تيدوزوا بدم شوفي لبنصمون كيف ولات علاش ما جيتيش عندي نبدلها ليك ...ولفطور على الأقل قولي لمروى ولا شي حد يعونك تفطري غتبقاي جالسا تشوفي فينا هاكدا
إسلام تنهدات من الأعماق بحال هازا شي جبل وتفكات منوا وحركات راصها بشوي مع إبتسامة مسطنعة:
_اه كتهضر على يدي ما شي مشكل، غير تساليوا لفطور، غتعوني مروى نفطر وموراها نمشي ندير دواء وأصلا أنا ما فياش جوع صابحا شهيتي مسدودة ليوم
نجلاء ساطت بجهد كيف لفعة لي باغا طلق سمها وقالت بنبرة صوت مستفزة:
_مروى جات تقابلني أنا ماشي نتي ألالة وزيدن ختي ماشي خدامة عندك شوفي ليك شي فرملية تهتم بيك
يوسف قشر فموا من لداخل حشم من عائلتوا قاطعها بغضب واضح من نبرة صوتوا:
_نجلااااااء دخلي سووق راصك
مروى تبسمات جنب وبتنهيدة طويلة وقفات جرات لكرسي لي حدا إسلام جلسات فيه حداها ..خلات نجلاء كتغلي من لعصاب شافت فيها وقالت :
_تسمحي ليا نوكلك بيدي على الله تقبلي عليا
إسلام حركات راصها بإجاب فرحانة ببتسامة ردات:شربيني غير لعصير صافي"بخفوت قالت" أركان جاه شي مساج ناري عندك يكون فيه شي حاجة كتخص نرجس
مروى هزات كاس برتقال حطاتوا على شفايف إسلام كتشربها وردات بخفوت هيا الأخرى:
_ ما كنضنش كون كانت شي حاجة أركان ما غيبقاش ساكت "شافت فيها بنضرة شك" ولكن ما فيها باس إلى تأكدنا بنفسنا
سي عدنان قاد لافيست ديالوا وجمع لوقفة :
_يوسف خاصنا نمشيوا مابقا والوا الإجتماع
يوسف حركا راصوا بإجاب او وقف تم وجه كلاموا لمروى : مروى تيليفون ديالي بقا عندك
مروى خشات إيدها في جيبها جبداتوا وهوا يشك فيها عدنان رفع حاجبوا وقال بصوت غليض كيهد جبل:
_كيفاش قديتك مع تيليفونات ليوم ؟!!
مروى بلعات ريقها وببتسامة مصطنعة نطقات :
_ اييه فكرتيني أعمي كيفما كتعرف أنا خاسر ليا تيليفون وبغيت نشري واحد جديد وشفت لماركة ديال تيلفون يوسف حتى هوا داك شي علاش "شافت في أركان " عفاك ممكن تعطيني تيليفون ديالك نشوفوا الى عجبني غنشري بحالوا
سي عدنان ويوسف تحناوا قبلوا إيد الحاجة والحاج لي رضاوو عليهم أو ودعوا أركان لي غيسافر عاد خرجوا
أركان مد ليها تيلي أو وقف ، ببتسامة مزينة ملامحوا رد :
_غنمشي نهبط لفاليزا ولوراق باش نشد طريق
الحاجة خديجة:تمشي في نجا وتجي في نجا أولدي الله يرضي عليك"وجهات كلامها ل إسلام " سيري عوني راجلك أبنتي
إسلام وقفات تبعاتوا لجناح بقات غير ساكتة كتشوف فيه ، بغاتوا يمشي باش تفك لقاضية ديال نرجس على خاطرها ما حولاتش تمنعوا ولكن دموعها لي فضحوها بداو تينزلوا من عينيها شلال حولات تحبسهم وما قدراتش
أركان فور ما شافها كتبكي زير على يديه حتى عروق يديه برزوا ما تحملش يشوف دموعها قرب منها وبدا يمسح ليها فيهم... تبسم ليها إبتسامة حنينة وقال:
_شششش علاش كتبكي
إسلام ساطت بجهد ما عاجبها حال ،ما رداتش وبديك نفس ليها فيها نفخات شفابفها وردات بصوت باكي:
_مالك كتسحابني كنبكي عليك "رفعات حاجبها"راك غير كتحلم أنا كنبكي حنت يديا تيحرقوني
أركان رفع حاجبوا:ياك ألالة
إسلام قلبات عينيها وقالت :آييه وجمع قشك وسير دغيا ما فيا لي بقا واقفا ما عزيزش عليا داك شي ديال لوداع
أركان عرفها مقلقة حنت غيمشي.. ببتسامة مزينة ملامحوا رد عليها: وخا و تهلاي في راصك
رمقها بنضرات كلهم حب وجر باليزتوا بي إيد والإيد تانية هاز بيها لكونطاك ديال لوطوا نزل لتحت وإسلام موراه تابعاه وصلات حتى لجنب نافورة أو وقفات ما قدراتش تمشي تودعوا بقات متبعة ليه لعين حتى ختفى من قدامها بداو دموعها تينزلوا من جديد و قلبها كيتعصر من لداخل بالحزن ما بغاتوش يمشي ويبعد عليها...
تقدمات خطوة للإمام ورجعات وقفات بقات كتهضر مع راصها:
_علاش غنمشي عندوا حشومة ما جاتش لا ما غنمشيش يقول هادي ماعندها كرامة لا مستحيل نمشي .... وأصلا هوا ما قال ليا بلي غيمشي حتى لوقت لي بدا يجمع فيه حويجوا ...
فيقتها من سهوتها مروى لي مدات ليها تيلي وقالت :إسلام هاكي دي هادا ل أركان قبل لا ينساه ...
إسلام حركات راصها بلا :غير ديه نتي أنا ما نقدرش نشدوا تيحرقوني يديا وزيدن ما شي أنا لي خديتوا من عندوا...
مروى تفاجئت :أ سبحان الله ،وتي دي تيليفون لراجلك او ودعيه، واه قبل لا نسا داك لمساج لي وصلوا غير ديال لخدمة سكرتيرة لبنى لي رسلاتوا ليه...
إسلام فور ما سمعات إسم" لبنى"حسات بصهدة طالعا معها بالغيرة رغم يديها لي دارينها خطفات تيلي من يد مروى خلاتها غير تشوف أو وخرجات كتجري ...
وقفات عند لباب كترجع نفس شافت فيه بقات حاضيا ضهروا لعريض وشعروا الأسود لي مرجعوا لور قربات منوا بخطوات بطيئة ونطقات سميتوا بهدوئ:
_أركان ...
دار لعندها بعدما سد لكوفر لي حط فيه فاليزتوا ...وقف مستقيم وخشا يديه في جيبوا ،ورفع حاجبوا بتسأل نطق:
_وي إسلام ؟!!
إسلام مدات ليه تيلي وعينيها في عينيه ونسمات لهواء بداو تيلعبوا في خصالات شعرها الأسود وبسبب عينيها لمدمعين ولات تبان بحال شي لوحة فنية جدابة...
أركان حط إيدوا على لهاتف و وفور ما لمس إيديها شاد ليها منها ما قدر يطلق وعينيه ما حيدهمش عليها وحتى هيا نفس شي توقف زمن عند هاد لحضة وعم الصمت... بقاو كيسمعوا لدقات قلوبهم وأنفاسهم لي قراب من بعض سهاوو في بعضياتهم وبقا تيهضروا داخلهم ...
إسلام كمشات حجبانها وميلات راصها بتراجي ،قالت داخلها:عفاك ما تمشيش بقا معايا أنا ما بغيتكش تمشي ...
أركان بقا كيشوف في عينيها بعيونوا السوداء لي عاطينوا جادبية كبيرة:صعيب نبقا حداك ونتي قلبك فيه واحد أخر خاصني نمشي باش منتعلقش بيك كتر و يسهال عليا نبعد عليك من بعد ...
إسلام :أنا كنبغيك بزاف حاول تقرا وتشوف كلشي في عيني ..معرفتش علاش كيصعاب عليا نعتارف ليك بمشاعري ... يمكن هادا هوا لحب لحقيقي قبل كانت ساهلا نقول لسفيان انني كنبغيك ولكن نتا لا ما كنقدرش غير شوفة فيك كتخليني مرتابكة ولكلمات كلهم كيهربوا ...
أركان بعينين معسلين:بغيتك من قلبي وما عمري ما غنبغي شي وحدة ،نتي بحدك لي دخلتي لحياتي وقلبي وملكتيه بلاصتك ما غنعطيها لحتى وحدة كنواعدك...
إسلام طاحت دمعة جنب عينيها:كنواعدك أنني غنتسناك وغنبقا ندعي معاك حتى تجي بسلامة ...
رن لهاتف ديالوا فيقهم من سهوتهم بزوج خدا تيلي ديالوا بعدما نزل راصوا الأرض برتباك وعود هزوا ،نحنح بصوتوا وقال:
_خاصني نجوب ...
إسلام قلبها خفق بشدة جرات إيدها عندها وتلفات عند بالها كانت كتقول ليه كلشي نزلات راصها الأرض بخجل ، هزات راصها وبقات متبعة ليه لعين خلسة حتى نها مكالمتوا وقال بصوت رجولي خشن:
_خاصني نمشي تهلاي في راصك ...
إسلام ما قدراتش تهضر حركات راصها بإجاب ودرات عاطياه بضهرها خطات خطوة الأمام ورجعت دارت لعندوا بسرعة مشات كتجري وقفات على صباع رجليها وطارت على عنقوا عنقاتوا بجهد مزيرة عليه، حتى هوا كان محتاج لحضنها دور دراعوا على خصرها خاشيها فيه لداخل وصوت أنفاسهم ودقات قلوبهم هما لي بقاو كيتسمعوا..غمضات عينيها مستمتعة بدفئ حضنوا حتى جا على مسامعها صوت مروى كتنادي عليها من لداخل حلات عينيها متفاجئة من جرئتها و بعدات منوا شافت فيه برتباك وخدودها توردوا هزات صبعها في وجهوا و بتحدير نطقات:
_سير ولكن وياك... ويااك أركان تشوف فشي بنت"صغرات عينيها بخوف" كيقولوا في أمريكا كينين بنات زوينات بزاف
أركان تحنى قرب عندها وهضر وهوا حابس ضحكة :حنا قريب نطلقوا الالة يعني عندي لحق ندير ما بغيت ...
إسلام خرجات عينيها وبعصبية نطقات:جرب " رفعات صوتها"جرب وشوف والله حتى ندخلك للحبس حنا دابا مزال مزوجين يعني اسيدي ما عندك لحق دير والوا مورا ضهري
أركان رفع حاجبوا :كتهديني ؟!!
إسلام هزات كتفها وبعدم هتمام نطقات : إيوا فهمها كيف بغيتي "تبسمات جنب " الله يعونك ...
دخلات تجري خلاتوا مسمر في بلاصتوا كيضحك من نيتوا على تفكيرها ... ركب في سيارتوا وشد طريق ...
يتبع...
التعليقات
لا توجد تعليقات بعد، كن أول من يعلق.