محتوى القصة
أمينة وقفات تتشبر وتتئب حاطا يديها على فمها:لبلاصة تتبان نقية وزوينة ...
إسلام تتدور راصها بعينين تيبريوا:مزال ما شفتي والوا ندخلوا وغتشوفي أشمنك يا خيل ..أش منك يا حليب والزبدة والبقر... انا تنرتاح بزاف فاش تنجي هنا...
أمينة ردات بي أييه المكان واعر مزال ما كملات كلامها حتى كتحس بشي حاجة تتجرها من رجها شهقات بجهد ملي شافت كلبة بدات تتنبح عليها وهيا تتخبى مورا إسلام خايفا...
أمينة من مورا إسلام تتهضر :تش تش سيري بحالك أبنت لحرام
إسلام تتضحك عليها تحنات تتقيس الكلبة وتتهضر:أييه حياني الله حتى شفت أمينة خيفا فين هيا وعريتك..وغواتك على لبنات
أمينة تترعد من تحت سنانها قالت:هاديك راها المدينة منطاقتي كلشي تيخاف مني تما ما شي هنا و(غوتات) و لكلبة جريها عليا
إسلام مقوصا حجبانها :ودابا عرفت نقطة ضعفك (خطبات الكلبة)لوكا سبقينا...
أمينة مخرجا عينيها:سميتها لوكا..تتسمع الهضرة ولا هيلا...
إسلام جرات باليزتها وسطل ديال الحلوة بالإيد الأخرى هزاه:مزال ما شفتي والوا كين حتى سيراج حتى نعرفك عليه ....
فيرما كبيرا وعصرية خرج خالها المختار تيستقبلهم بالأحضان لابس جلابة بيضاء وطربوش حمر... جلسوا في طبيلة تيتعاودوا...
المختار جالس متبت راجل كبير وعزيزة عليه
إسلام ديرها في مقام بنتوا:إيوا كيف طرا وجرا حتى تفكرتي خالك مسكين...
إسلام عقدات حجبانها:الله يسمح ليك على هاذ الهضرة أخالي راك ديما في لبال..
المختار كيبتاسم:كيف ديرا واحد ختي مع المرض والزمان..علاش ما جاتش معاكم؟
إسلام:لباس عليها الحمد الله وتتسلم عليك سلام عزيز..راك عارف مع الخدمة ما تتسليش أما كون جات ورها ما نساتكش سيفطات ليك معايا سطل ديال الحلوة الكوك من داك شي لي تيعجبك أرا ما تاكل...
المختار تيضحك:أو واحد عمار وتوبة لباس أو ولدي أمير كبر ولا مزال صغير..
إسلام تتدور في راصها:أييه أمير عقلوا ولا كبر من سنوا تبارك الله ..الى جلس حداك بحال شي راجل كبير وتيهضر هههههه
دخلات عليهم مليكة بسينية ديال اتاي بين يديها ..تسلمات مع إسلام..هيا ساكنا حدا سي المختار من زمان مرا ما فحالهاش تتجي تشقا ليه وتيخلصها وتتمشي في حالها...
لمختار تيبتاسم :أو واحد سفيان فين شدها شحال هاذي ما جا عندي؟
إسلام سرطات ريقها..وبغصة خانقها قالت:سفيان خطب وتيوجد لعرسوا الله يكمل عليه بالخير....
لمختار جمع الضحكة وتنهد من الأعماق مبدل الموضوع:شكون هاذ البنت ؟
إسلام:هادي أمينة بنت سي لعربي باها كزار شحال من مرة تقديتي من عندوا لحم وكنتي فاش تتجي عندنا لدار وحنا صغار تتلقانا تنلعبوا قدام الباب وتتدور معانا..
سي المختار حاط سبعوا على ضقنوا تيفكر:أييه أبنتي عرفتها سبحان لي ما يسها ولا ينسا (موجه كلاموا ل أمينة )مرحبا بيك أبنتي دار داركم خودي راحتك واحد سي لعربي لباس عليه؟
أمينة ما هياش هنا تتدور راصها في المكان وحاضيا نعمة سيدي ربي مع قاتلها جوع تتشوف في الخير تيتنزل قدمها في الطبلة أشمن يا عسل حر واش منك يا ملوي دكالي واش منك يا فاكيا وزبدة لبلدية والبيض البلدي....إلخ
فاقت من سهوتها على قرصة إسلام مخرجا فيها
عينيها:خالي تيسول فيك جوبي مالك مصدومة...
أمينة مخسرا ملامحها من حر القرصة لي جاتها:لباس أخالي لمختار يسول فيك الخير
لمختار كب أتاي عاق بيها تيضحك:غتكونوا مزال ما فطرتوا أبنتي...
إسلام بتنهيدة:علاه شكون خلاك تفطر ماما مسكينة فاقت بكري وجدات لينا لفطور ولالة امينة تتزرب فيا حنت هيا خافت تبووع في الطريق ما بغاتش تفطر حرمتها عليا أنا....
كملوا فطورهم في جوا من الضحك والمعاودة وملي سالوا هزوا لبنات بليزاتهم تيدخلوهم وسط الدار...
إسلام بتسائل:نعسوا في بيت نعاس لدخلاني ولا صالون أش قلتي؟
أمينة تتشوف في تيليفونها:لي فيه ريزوا هوا لي نباتوا فيه...ولكن دابا يالله نخرجوا بغيت نتسيلفا باش نرسل صور ل كريم...
إسلام تتضحك:وخا ونقادوا حويجنا في بلاكار هوا لول...
على ضهر حصان عربي أسود جالسا فوق منوا تتمشى وتتحسس فوق جلدوا بيديها بحب...
إسلام (تتنادي على أمينة )أجي طلعي أصحبتي..مالك على هاذ الخوف كامل سيراج ضريف والله ما يطيحك غير أجي على حسابي...
أمينة تتسيلفا عاجبها راصها:لا الخوادرية ما تتشوفيش فيه كحل كيف ضلمة تيخلع... غير خليني مرتاحة على رجيلاتي الله يخليهم ليا بيني وبين الحيونات غير الخير والإحسان...
تيضحكوا حتى تتسمع سميتها مورها...
ضاروا تيشوفوا شكون لقوه ولدو عندوا ديك 18 خدام عند سي لمختار مقابل ليه الخيل تتبان فيه ضرويش وخواف....
معاد تيرجع النفس حنت كان تيجري لعندهم: ختي إسلام قالك عمي المختار أجيوا تغدوا وتشوفي الحاج جا عندوا...
إسلام بتسائل:شكون هاذ الحاج ؟
معاد تيفكر:معرفتش أختي لمهم لي عارف تيقولوا ليه الحاج راضي صاحب سي لمختار من شحال هادي وديما تيجي لعندوا...
أمينة طلقتها بضحكة:بينا من سمية ديال الحاج غيكون لباس عليه..واقيلا إلا كان عقلي ينفعني غيزوجك بيه المسخوطة ههههههه
إسلام خنزرات فيها: غيجي معاك نتي نيت باش يقاد ليك الفم الخاسر
نزلات من فوق سراج وعطاتوا لمعاد يديه الإسطبل وشدوا طريق لعند سي لمختار
وأمينة تابعاها تتفقص فيها وتغني:ما بغيتش الشايب ما بغيتوش يا لالة تا يحك عليا شيباتوا يا لالة ....
دخلوا لصالون وهيا تتفرك يديها بتوتر من كلام أمينة لي دخل ليها الشك لراصها....
لمختار شافهم واقفين في الباب: دخلوا أبنتي أجيوا ما تحشموش...
دخلات أمينة هيا لولة تتضحك مشات نيشان تسلم على الحاج ببتسامة:الحاج لباس نورتينا
إسلام بخفوت قالت في ودنها أويلي اش تتديري سيد ما تتعرفيهش وسيرا عليه نورتينا...
أمينة حتى هيا جوبتها بخفوت:خليني نرحب بنسيبي أختي مالك مسمومة ...
إسلام قرصتها:هاويلي الزمرة..
الحاج راضي هضر بصوت تقيل غالب عليه لعيا:لباس الحمد لله أبنتي ...
لمختار شار لإسلام تجلس حداه:هادي هيا بنت ختي رحمة صغيرة إسلام ديرها في مقام بنتي وأعز (خاطب إسلام)بوسي يدين الحاج
إسلام تحنات قبلات ليه يدوا
الحاج راضي جار إيدوا:لا أبنتي معليش الله يرضي عليك تبارك الله
نقزات أمينة من لبلاصة وجات حدى إسلام بخفوت قالت في ودنها:هاي هاي ناس باغيين الرضا
لمختار خاطب إسلام:لحاج ابنتي كان ديما تيجي لعندي هنا تيدوز معنا العطلة مع ولادوا والحاجة
وكنتي تتلعبي مع حفايدوا فاش كنتي صغيرة...
إسلام ضارت خنزرات في أمينة ما كرهاتش تنتفها بينهم.....
بقات تتفكر و حركات راصها بمعنى ما عقلتش...
الحاج راضي (شاد تسبيح في يدوا):كانت صغيرة محالش تبقى عاقلة اسي لمختار
دخلات عليهم مليكة بين يديها الطاس ويديوا جايبا ليهم يغسلوا يديهم...
جلسوا تيتغدوا في جوا من الضحك دغيا نسجمات مع الحاج راضي ضريف وشخص عارف بينوا وبين لي خلقوا....
لمختار ميل راصوا وقال:كيف بقات صيحتك شويا
لحاج راضي:قلبي شويا عيان درت تحاليل مزال ما خرجوا
إسلام تتسرط دغمة:الله يسمعك خبار الخير الحاج....
الحاج راضي مبتاسم: أمين أبنتي ..قولي ليا غير جدي راك في مقام حفيدي وحيدي ديك الحاج من فمك...
أمينة جالسا غير تتخشي في فمها دجاج محمر ما مصوقاش لكلامهم....
غابت شميسة وطاح ضلام...
جالسين فوق جوج سدادر تحت شجرة ولبولات مضويين عليهم وريحة طبيعة زينة وكيسان ديول أتاي بين يديهم..
حتى وقفت سيارة سوداء ونزل منها بكل شموخ... تيتمشي وعضلاتوا تيتحركوا مع تحركات جسدوا الصلب
و متناسقين مع شكل جسموا الرياضي ... مرتدي طقم أزرق مميز...
حرك راصوا كا تحية ليهم و قرب لعندهم ...تحنى قبل إيد المختار....وجدوا
المختار مبتاسم :الله يرضي عليك أولدي
أركان ببتسامة مزينة ملامحوا:هاذا واجب اسي المختار
الحاج راضي شاف في الساعة لي في يديه وقال بفتخار :الوقت هوا الوقت ماعندي ما نتسالك أولدي...
أركان كتفى أنه يحرك ليه راصوا كرد...
لمختار نادى على أمينة:بنتي جيبي معاك شي كاس نقي لسي أركان
أمينة جات تتجري مدات الكاس لمختار وهيا تحل فمها في أركان مصدومة ومبهوضة..حطات لكاس من يديها ومدات ليه يدها بغا تسلم...
أمينة (مخرجا عينيها) :سلام سميتي أمينة
أركان مبتاسم حرك ليها راصوا كارد لتحية
وهوا يقاطعها لمختار:سيري كلمي ليا إسلام أبنتي...
أمينة دخلات تتجري حسات ب قلبها طاح بين رجليها اول مرة تشوف بحالوا عينيه وشكلوا ماحيدوش من بالها....
حتى رن تيليفونها مقفزها ...جلسات في صالون بعدما قبلات إتصالوا ببتسامة...
___
أركان ستأدن منهم ودخل لداخل باش يغسل يديه... دخل لمكان كبير فيه تلاتة ديال لحمامات او لفابوات ديال لغسيل...
حل صنبور تيغسل في يدوا....فجأتا عقد حجبانوا بزوج مني سمع صوت غنائها جاي من دوش...
صوتها حنين وفيه ألم زاد عقد حجبانوا أكثر وهوا كيستامع لهاذ الصوت الرنان لي دخل لودنوا بحال شي لحن موسيقى مميز... سرط ريقوا حتى تفاحة أدم تحركات في حلقواا...
يالله غيفرق شفيفوا باش يتكلم وينبها من الغناء داخل الحمام وهوا يسكت خاف عليها لا تخاف منوا.....
فكر مع راصوا في طريقة معينة وهوا يبان لي أحمر الشفاه محطوط في جنب هزوا وكتب فيه في المراية ....
_متبقيش تغني في الحمام...وإلى غتشوفي شي حويج ما غادينش يعجبوك...
إسلام تتغني غافلا على شخص لي بلا ما يحس بقا واقف تيستمتع بصوتها....
_هيدا الغرام المستحيل يالي ما بيكمل هايدا حلم ليلوا طويل حاجة تتأمل لملم جراحك عل هدا....
خلاتوا بلا جداه رجع شعروا لور وقال مع
نفسو :أش هاذ البنت الحمقة(بتاسم جنب)ولكن صوتها زوين...
ميل راصوا شاف في ساعتوا حط إيد في جيبوا وخرج ودعوا سي لمختار وشدوا طريق....
في هاذ الدنيا الغريبة كتقدر تلتاقي بأرواح ما كتابش ليك رؤية ملامحها من قبل ...ونقدروا
نبغيوا كلمات مسات قلوبنا بلا ما نعرفوا شكون كتبها.
جالسا في القنت ديال السداري... لبسا بيجامة بسروالها... شعرها مطلوق على ضهرها فازج بالماء.... مدورا عليها مانطة مخشيا فيها كلها كيبان فيها غير لوجه تترعد وتقفقف.... وقلبها تيدرب على الجهد من الخوف ....
جامدة في مكانها و عينيها بوحدهم لي تيدوروا في الصالون وسورة ياسين طالقها مجهدا في تيليفونها وتتقول الإذكار في خاطرها ....
إسلام فرقات شفايفها بعدما صرطات ريقها بصعوبة (بصوت تيرجف فيه نبرة خوف) قالت:
متضحكيش معايا أمينة قولي الحقيقة..هاذ لعب ما زوينش راه غنموت من الخلعة والله العضيم ما تختابرينيش (بتوسل)عافاك الله يخلي ليك ما عز عليك ...
أمينة متكيا فوق السداري ومغطيا شدا تيلي
نزلات تيليفونها من بين يديها و نفخات على جهد:أوووف أ إسلام شي ميات مرة ونتي تسولي وقلت ليك ماشي أنا لي كتبت في المراية..(هزات حجبانها معصبا )واش نغنيها ليك باش تفهمي؟
إسلام مسحات على وجها بإيد تترعد وبنبرة صوت غالب عليها لبكاء:متبقايش تجبدي ليا حس لغنا...دابا غيكونوا بسم الله الرحمان الرحيم...هوما لي كتبوها ياك(بدات تترمش بزربة وتتشوف في جنابها)غنكون صدعتهم داك شي علاش... هما كتبوا داك شي..
أمينة قدات جلستها:إيوا الساطة كين شي واحد تيغني في الدوش هاديك رها دارهم ونتي برزطتيهم ...بسيف...
إسلام بخوف :مايكونش زعما شي بنادم لي كتبها...
أمينة حطا صبعها على دقنها تتفكر:ما كنضنش حنت كينين غير أناونتي وخالك لمختار وخالتي مليكة مشات لدارها قبل لا دخلي لدوش...أما داك لولد راك شفتيه متيدخلش لهنا لداخل...إدن بقا حتمال واحد غيكونوا جنون...
إسلام شيرات عليها بمخدة ودموعها داروا خط على حناكها :متدكريش سميتهم الزمرة..حرام عليك هئ هئ هئ
أمينة بنضرة حادة ما فيهاش الضحك:حادكا فيا غير أنا ديجا سمعت ناس تيقولوا بلي
الجن العاشق كيعشق ربعة الأنواع من النساء ألي كترقص قدام لمرايا والي تبكي في الليل ولي تتبقى بوحدها ولي تغني في الحمام وللإسف نتي وحدة منهم...
إسلام حطا يديها على فمها شهقات بجهد:دابا غيكون داك بسم الله الرحمن الرحيم العاشق (كمشات حجبانها بتوتر) تيبغيني
أمينة بتأكيد:معلوم ..غيكون تيعجبوا صوتك وما كيبغي حتى حد يسمعوا من غيروا داك شي علاش نبهك باش ما تغنيش تما....
إسلام زادت في وتيرة البكاء بحال شي درية صغيرة والخوف تملكها....
ناضت قربات منها صحبتها حنت بقات فيها....
وهيا عرفها تتخاف من أفلام الرعب ...فما بالك شي حاجة مرعبة توقع ليها هيا نيت...
أمينةمعنقاها:صافي أصحبتي ما ديريش في بالك...ملي مغتبقيش تغني في دوش ما يبقوش يدوروا بيك...
إسلام تتبكي مزيرا على أمينة:أنا ديما مالفا نغني تما ...وماما ديما تتنبهني ..ما كنتش تنسمع ليها....
أمينة:وا ليني أصحبتي خطوا زوين تبارك الله غيكون قاري...وزين بين العربون من خط يدوا
إسلام بعدات منها تتمسح عينيها:سيري تزوجي بيه هوا لي يليق ليك ...أما كريم مسكين درويش ما يصلحش ليك .. أنا فين ونتي فين تفواا عليك...
أمينة (بجدية قالت):مزال خيفا..
إسلام جرات إيد أمينة حطتها على قلبها لقاتوا تيضرب بجهد: ما تتشوفيش فيا ما بقيتش قادرا نتحرك من بلاصتي محال نعس ليلة
أمينة جلسات تتفكر بغا تنسي إسلام ربعات
رجليها وقالت:إيوا أجي نعود ليك واحد لبلان وقع ليا في رمضان لي فات أنا ولمسخوطة ديال بنت خالتي سلمى إيوا يا لالة خرجنا نتسخروا ...غادين لسوق خشيت يدي في جيبي لقيت مسكة وحنا كنا فاطرين بزوج قسمناها وتمينا غاديين وتنمضغوا وناس تيشوفوا فينا بستغراب ما دينا ماجبنا كيف لبهيم بقينا حتى وصلنا لدار وما يلاقيني ربي غير مع مي سعاد تبعاتنا بشطبا تتغوت وتقول اش تتديروا يا لكفرات (ضورات راصها عند إسلام)عرفتي فاش عقت براصي فشلت طاح ليا لماء في ركابي تمنيت الأرض تشق وتبلعني ولا هاذ الموصيبة لي وقعات ليا.. ما بقيتش تنمشي لداك سوق إلى يومنا هاذا ومن بعد ديك الواقعة حبسات عليا سعاد في دار شهر تاع ليام مابقيت شفت الزنقة...
إسلام مهبطا راصها بخوف:ديجا عودتي ليا هاذ شي...
أمينة هزات حاجب ونزلات لاخر وبجدية
قالت :إيوا نعود ليك وحدة خرا ما غتكونيش عارفها أيوا يالالة في يامات الكوليج كنت كنبغي واحد لبرهوش تيقرا معايا إيوا ومشات وحدة من بنات قيسمي تصحبات معاه أو ملي تواجهت معاها صرفقتها ودفعتها مع الباب ومع كنت مدمنة على المسلسلات التركية جاتني المراهقة عليهم سرت عليها ياالخائنة ليش لا حتى تعملي هيك وليك أنا بي شوا أديتك لا حتى تقربي من حبيبي....
الله لا يسامحك.....
قبل لا تكمل كلامها قفزات على صوت ضحكات إسلام لي تمرغات في الأرض ما قدراتش تشد راصها....
إسلام تتحاول تهضر ونفس تتحبس ليها من كثرة
الضحك:ناري يالمسخوطة أنا لي كنت معا سفيان من طفولة عشرت سنين أو ما درتهاش ههههههههههههه
غير ذكرات سميتوا تقلبوا ملامحها لحزن ودمعة
تشكلات في عينيها من جنب:ليوم
عرسوا دابا عائلتوا وجيران كلشي فرحان تيشطح إلى هوا أكيد ما غيكونش عاجبوا الحال (تقبلات مع أمينة )ياك
أمينة بحزن:ما ديريش في بالك (طبطبات على كتف إسلام)الله يصوب دابا يجي لي ينسيك فيه
إسلام بغضب:سفيان هوا كلشي في حياتي وأنا ما غنتزوجش من بعدوا (حطات يديها على قلبها)أنا تنبغيه بلا قياس حاولي تفهميني
أمينة تنهدات بجهد و غيرات لموضوع:عرفتي قبيلا ما قلتش ليك جا واحد تيتيز منقولش ليك لحية والعضلات تيبان من رجال لحرشين ومن شكلوا تيبان ما عندوش مع الهضرة وحدودي بوكوص من داك شي وليني ما عرفتش سميتوا وخا قال ليا خالي لمختار سميتوا مي عقلتش عليها خسارا...
إسلام مقاطعها:أويلي نتي غتخطبي ومزال حاضيا رجال ... درستي سيد من جميع الجوانب تقولي جاي يطلب إيدك فلتات ليك غير سميتوا الله يستر....
امينة مكمشا حجبانها:أيه هيا لي فلتات للأسف ...اه خالي لمختار قاليا نكلمك ليه وانا ملي صونا عليا كريم نسيت كلشي وبقيت شادا معاه لحتيت...حب قلبي هاذاك
إسلام بملامح حزينة: هههه الله يخليكم لبعضياتكم ...ويالله نوضي تنعسي..جوج ديال ليل هادي
أمينة:تصبحي على خير واحلام سعيدة أزين ديالي
أمينة شدات سداري وإسلام سداري مابغاتش تمشي لبيت نعاس حنت ما لقاتش فيه الريزوا...
إسلام تكات شحال وهيا تتشوف في السقف عقلها مشغوول تيفكر في سفيان وعرسوا وعاد ديك لكتبة لي لقات بقات تتخلي دماغها يحلل شي حويج غريبة ترسخات في عقلها بقوة...بقات تتقراى في القرأن وتتسول في أمينة تشوفها واش مزال فيقا....
أمينة قتلها نعاس:وصافي هاحجر لعافية لما خليني نعس (بتأكيد)غدا غنلوحوا داك لعكر غير تهناي وخا شريتوا غالي ....
إسلام تنهدات راحة:وخا تصبحي على خير
بقات شحاب وبصعوبة باش غمضات عينيها ونعسات...
كمشات حجبانها بغضب من صوت تيليفونها مدات يديها لطابلة وعينيها تيتلصقوا بنعاس
هزاتوا وتهز قلبها من الإسلام لي طلع ليها "سفيان"شافت في ساعة لقاتها ربعة ونص ديال صباح طفات عليه مرة وجوج وتلاتة مي ما سكتش من الصونيت ...
من بعد جوبات ببحة غالب عليها نعاس:ألواا أش بغيتي؟
سفيان تيبكي: أنا خنتك أحبيبة خنتك كنت كنشوف غير صورتها فيك ونعست معها....
إسلام حسات بجناوا تغرسوا في قلبها جلسات في بلاصتها ودمعة طاحت من عينيها بلا ما تحس بغصة خانقها قالت :أش تتقول ؟
سفيان بنبرة صوت حزينة:أه ا حياتي أنا نعست مع هناء و خنتك واعديني أحبيبة باش ما عمرك تخونيني ؟
إسلام شهقات بجهد حاطا يدها على فمها:سفيان واش نتا سكران
سفيان بصوت تقيل:اه ولكن انا نعست معاها ليوم كان لعرس وشربت غير شويا داك شي لي كان خاصني نديروا معاك نتي درتوا معها هيا وغلطت
إسلام حولات تقصح قلبها:اه عادي وفين كين لمشكيل هناء مرتك وحلالك عادي هاذ شي اسفيان لاش مصدعني أنا
سفيان بتأكيد (تيغوت عليها):وعديني أحبيبة باش ما عمرك تخونيني حلفي ليا إسلام بليز
إسلام تنهضدات بجهد (مبعدا تيلي من ودنها):اوك تنوعدك تهنيتي اخر مرة تاصل بيا أسفيان
سفيان :تنبغيك بزاف أعمري...
قطعات عليه وطفات تيليفون بعصبية وخشاتوا تحت لمخدة ودموعها بدوا تينزاوا شلال .....
على صوت صياح ديك حلات عينيها.. دورات عينيها لبلاصة إسلام لقاتها خاوية وتيلفونها مرمي خداتوا بين يديها وحطاتوا فوق طبلة.....
وهزات فوطة ومسائل دوش ودخلات للحمام..
خرجات منوا أو لبسات سروال جينز في الأزرق وتيشرت في الأسود ...نشفات شعرها بسيشوار
وخرجات برا لطبيعة فين كينا جليسة مقادة لقات لفطور منوع ومشكل محطوط فوق الطبلة...
جلسات تتاكل بشهية حتى بان ليها معاد ديز من تما وهيا تنادي عليه ...
أمينة فمها عامر( بتسائل) قالت:لخوادري ما بانتش ليك لخوادرية؟
معاد بعدم فهم:أشنوا؟؟
أمينة تتمضغ في دغمة:إسلام ما شفتيهاش
معاد حرك راصوا :اه ختي اسلام شفتها مع لفجر في الإسطبل...
أمينة خرجات عينيها:مع لفجر وحنا ما نعسناش بكري...(حطات سبعها على دقنها )غتكون ما نعساتش ...الخلعة يمكن دارت ليها هاذ شي...
سرطات دغمتها :ديني عندها الله يحفضك
معاد :وخا أجي معايا
تمشات معا معاد وتتسول فيه على حياتوا حتى وصلوا لإسطبل دخلوا لداخل مي ما لقوهاش
أمينة بشك:تتفلى عليا وهاهيا ما كيناش هنا
معاد منزل راصوا وكتافوا الأرض:حاشا أختي واش نتفلى عليك هانتي شوفي حتى لعود ديالها ماكينش غتكون خرجات تضرب بيه شي دورة...
أمينة كمشات حجبانها:وخا وديني عندها فين تتكون..(تنهدات من الأعماق)..حتى تيليفونها خلاتوا اووف
معاد:خلينا نمشيوا فوق شي عود من هنا حنت طريق الغابة لي تتمشى فيها إسلام طويلة...
أمينة بخوف:لا أخويا هاهما عندنا رجلينا الحمد لله نمشيوا بيهم أش بغينا شي حيوانات....
معاد هز كتافوا:وأنا غير نبهتك راه غتعياي
أمينة مخرجا عينيها :غير زيد قدامي العشير هاذ لبنت لي قدامك دارت جديدة كلاها على رجليها
معاد:صبري نمشي نجيب لعود ديالي ما غنقدرش نمشي في هاذ طريق كاملة....
أمينة قلبات عينيها:بشاااخ بشاااخ رجال ديال لكارطون هوما هادواا(تتقلد فيه)ما غنقدرش نمشي على رجليا...
من بعد ساعة ديال طريق حتى سخفات مزيان ولعرق تيتصبب منها عالجهد عاد لقات إسلام جالسا مع سيراج حدا شجرة...
أمينة تلتاقط أنفاسها جلسات الأرض:ناري ياختي ما خليت فين قلبت عليك...(تتنهج )
دابا خاصني نعود دوش من لول ريحتي ولات غانزة الله ياخد الحق فلي كان حيلة وسباب
معاد مكمش حجبانوا:وقلتها ليك اختي راك تتسبي غير في راصك...
أمينة مخرجا عينيها فيه :وشكون لي غادي تيجري أنا ولا نتا حنت راكب مع مخك وأنا كي لحمارة تنجري موراك تفووو
إسلام قطعاتهم:خويا شكرا حنت وصلتي أمينة يمكن ليك تمشي.....
معاد:هاذا واجب أختي....
أمينة موجها كلامها لإسلام:مالك..مانعستيش لبارح أش طرا يكما خرج ليك داك الجن...
إسلام( تنهدات )مكمشا حجبانها بخوف: يعطيك دقة حتى قلت صافي نسيت وعودتي فكرتيني فيه حشومة عليك..عودي تقولي بسم الله الرحمان الرحيم متبقيش تذكريهم على لسانك.....
أمينة صغرات عينيها:وعلاش ما نعستيش؟
إسلام تتهرب عينيها منها:والوا غير طار مني نعاس...
أمينة تتدور في راصها:عليا أنا غير قولي أش كين الساطة...
إسلام بحزن:مع لفجر صونا عليا سفيان وقال ليا بلي تيبغيني أوو
أمينة بصدمة:كملي أشنوا لي أووو
إسلام دورات راصها ونطقات غير بزز حنت تتحشم بزااف:قال ليا أنه قدا لغراض مع هناء وبلي مخصنيش نخونوا كيف دار هوا...
أمينة من تحت سنانها قالت بعصبية: أويلي شتي داك سفيان دار بحال شي واحد خرا خرية وتيعلم عليها تفوو حيوان هاذا ماشي بشار ذاك شي بينوا وبين مرتوا خاصوا يبقا مستور...
إسلام بدمعة حابسها حركات راصها بحزن:هوا بقا فيه لحال حنت دار هكاك عند بالوا أنه خاني غير حنت تيبغيني مسكين..
أمينة مقاطعها:لي كيبغي مكيديريش هكا سمحي ليا لي تيبغي من قلبوا تيحرق العالم على وحد محبوبتوا...ونتي مصدعاني تيبغيني زعتر كلاك تيبغيك(وقفات على طولتها تاسوس في حويجها من تراب)فقصتيني كتر منوا يالله خلينا نمشيوا بغيت نعود ندوش.....
وسط بيت نعاس راقي داخل رياض عائلة راضي واقفا بنت زوينة عندها 28عام كلاص ومهليا في راصها...جالسات قدام مراية تتقاد في مكياجها..
حتى دخل عليها بشخصيتوا الرجولية أو ريحتوا لي ولات حافضاها..حاوطها بيديه من ضهرها ودافن راصوا في عنقها تيشم في ريحتها....
يوسف بصوت رجولي نطق:حبيبة متنسخاش بهاذ الريحة لي فيك....تنبغيك بزااف
نجلاء وقفاات وضارت مدورا درعا بزوج على عنقوا دلات شفتها لتحتانية وبصوت أنتوي رقيق قالت:بصح تتبغيني
يوسف عينوا في عينها:معلوم تنبغيك علاه شحال عندي من نجلاء أنا...
نجلاء صغرات عينيها:إلى تتبغيني تقدر دير أي حاجة على قبلي...
يوسف:معلوم الحبيبة ديالي نتي غير أمري
نجلاء:هاذ البيت تيخنقني صغير بزاف قول ل أركان تيحول هنا وحنا نعيشوا في بيتوا...
يوسف بعد منها تيلبس في ساعتوا:هضرنا في هاذ الموضوع أ نجلاء وزيدن أنا لي ختاريت هاد البيت اما هوا راضا بالبيت لي بقا ليه
نجلاء رجعات شعرها لور بطريقة كلاص: وهانتا قلتيها رضا بالبيت لي بقا ليه إدن حتى هاذا إلى خداه غيرضى بيه بليييز وزيدن خوك أركان معقد أو حدودي محالش يتزوج ياك جبنا ليه ختي مروى حتى لعندوا أو رفض يتزوج بيها....
يوسف ساط بجهد مخزر فيها :ما نسمحش ليا ا نجلاء صح نتي مراتي ولي حليتي عليها فمك تنجيبها ليك..خويا خليه في عليك في تيقار وأصلا حنا يالله شهرين دابا باش تزوجنا.. مزال حتى ما سخني بلاصتك وبديتي تحطي عينيك على غراض غيرك ما توقعتش منك تكوني هاكا أنجلاء...
في هاذ الدنيا لغريبة..تنبغيوا شي حويج وتنبقاو متمسكين بيهم بزاف لدرجة نسهروا ليل وحنا تندعيوا باش يتحقوا وكنوليوا ديرينهم هوما أولويتنا في الحياة.. وملي ما كنوصلوش لداك شي لي تنحلموا بيه تنحسوا بأن جميع لبيبان تسدوا في وجوهنا وحياتنا تنوليوا نشوفوها كحلة ....
غافلين على أن الله سبحانه وتعالى ما بعد علينا شي حاجة إلى وفيها مضرة لينا وأكيد سبحانه وتعالى هوا أكثر واحد عارف مصلحتنا فين كينا وغادي يعوضنا بحسن منها......
وهاذ شي نيت هوا لي غافلا عليه إسلام فقط الأنها كبرات حداه نهار على نهار كان تيتقرب منها كثر في الوقت لي كانت محتاجة أب لي يساندها..لقات سفيان هوا لي تيحميها في شارع أو في المدرسة...
في لوقت لي كانت رحمة مشغولة تتخدم باش تجيب ليهم قوتهم..كان منها راجل والمرأة تتخدم في دار وفي زنقة حتى كبراتهم....
هوا ستاغل ضعفها والوحدة لي كانت فيها وخلاها تعتامد عليه في كلشي وزرع في قلبها لخوف جيهة باقي رجال على أنهم إستغلالين وغيطمعوا في جسدها.......
واقفا حدا نافدة ديال المطبخ ومربعة يديها عندها تتشوف في نقطة وحدة في السماء ونسمات الهواء تتداعب خصلات شعرها الأسود ساهية تتفكر في حياتها....
أمينة تتقطع في شلادا (موجها كلامها لمليكة) بنبرة صوت حزينة قالت:صراحة ولفت هاذ لبلاصة بزاف ما ممتيقاش راصي غدا غنمشيوا طاروا يومين بزربة..الجوا زوين والكالم بزاف هنا ماشي بحال لمدينة
مليكة معكفا راصها بزيف حياتي وتتقاد في لحم
بالبرقوق في طنجرة:أبنتي ما بعيدة غير مراكش عندك نصف ساعة ديال طريق وتكوني هنا...والله حتى عزيتي عليا أو ولفتكم..تتضحكيني الله يعطيك الخير...
إسلام على نفس الوضعية قطعاتهم ببحة في صوتها نطقات بتنهيدة:البلاصة هنا ولافا ولي جا ليها ما تيسخاش يمشي سوليني أنا فاش كنت صغيرة كانت تديني ماما بالبكاء...
مليكة مكمشا حجبانها:بنتي إسلام علاش واقفا بوحدك تما أجي جلسي حدنا ونسينا ما مزيانش تبقاي بوحدك تخمي...كثرة التفكير يا تايدي لقبر يا تينقص من لعمر...
إسلام دارت عندها:الأعمار بيدي الله أخالتي
أمينة بتسائل:إسلام ما عمرك ما عودتي ليا على خالك المختار(هزات لموس لي في يدها عامر مطيشة تتهضر بيدها)هوا عيش في هاد الخير كامل تبارك الله وما عندوا لا مرأة ولا ولاد ماشي معقول...
إسلام جرات كرسي جلسات فيه .....
وزفرات بجهد:أودييييي خالي لمختار قصتوا قصااااا
أمينة تقدات معها بهتمام:اهاه عودي أنا كانسمع....
إسلام بتسمات جنب شبكات يديها مع بعض فوق الطبلة
وقالت بجدية :خالي لمختار قبل لا يتزوج كان تيبغي واحد البنت والعائلة كلها رفضات وكحلواا بلعماء حنت بغاو يعطيوه بنت خالوا...إيوا خالي ما خلى ما دار وبحكم كان الولد الوحيد في العائلة كان خاصوا
يقبل ببنت خالوا وينسا لبنت لأخرا إيوا تزوجها و ما كانش حملها ومكيشوفش جيهتا وبعد مدة حملات أو ولادت ليه بنت زوينة سميتها ماريا (دورت عينيها لعند أمينة)هيا دابا مزوجة وعيشا فرنسا...إيوا ملي شاف بنتوا نسا دنيا وما فيها وبغا مرتوا من كل قلبوا ولكن شاءت الأقدار لقوها مصابة بمرض السرطان وماتت صغيرة خلات ماريا عندها خمس سنين ماما لي رباتها ديك ساع قبل لا تزوج أو خالي من تما حلف لا تزوج من بعدها...هاذ شي كلوا عوداتوا ليا ماما..
أمينة حطا إيدها على فمها وشهقات بجهد:دابا تقريبا الى خدينا عمر توبة عندها 24 عام خالك عاش بوحدوا كتر من 24 عام.
قبل لا تزوج خالتي رحمة....
الله بحال هاذ الزواج التقليدي وهاذ قصة الحب مبقيتيش تلقيها حتى في المسلسلات...
إسلام حركات راصها بإيجاب:ونزيدك هاذ الخير كامل داروا بعرق كتافوا باش طلع وشتي ديك الدار لي حنا عيشين فيها جات في حق ماما وخالي بعدما توفاو وليديهم أو خالي لمختار الله يجازيه بالخير تنازل على حقوا وكتبوا لماما في سميتها وهاذ شي لي خلا لعداوة تنوض وسط العائلة وخالتي كريمة من داك نهار ما هضرات مع ماما وقطعات معها لكلام وخا هيا لباس عليها وما ناقصها حتى خير...
مليكة تتدور راصها بحسرة:سوليني أنا على الورث وأش تيدير في العائلات ...تيفرتك لمجامع ويخلي لحباب عديان الله يصوب أبنتي...
أمينة:في صراحة تنحيي خالك لمختار دابا زاد كبر في عيني والله...
مليكة :قدي شلاضة أبنتي أمينة و نوضوا تغسلوا يديكم باش نحط ليكم تعشوا...
إسلام ببتسامة:من ريحة بينا البنة الله يعطيك الصحة....
جلسوا تيتعشوا في جواا من الضحك والمعاودة...
حتى صونا عليها تيلفون فور ما شافت شكون خسرات ملامحها و جوبات بعصبية...
أمينة:وماما ولالة سعاد شحال من مرة غتبقاي تعيطي ليا أويلي واش حتى مكلتي ما نكلها في خاطري ....
سعاد تتغوت: كون كنتي حدايا أديك زرزومية ندرب لطاسيلتك واحد النتفة فاعلا تاركا وليني لبعد لي نقدك مني أبنت كرشي
أمينة عوجات فمها:أش بغيتي؟
سعاد بعصبية: سيري يا بنيتي بغيت ليك شي تلاتةويكونوا صحاح جوج منهم يشدوك أو واحد يخلي دار بوك يا لكلبة
أمينة ساطت بجهد:هاذ شي لاش معيطا....
سعاد مكمشا حجبانها:بغيت غير نسول فيك ينعل حسك...
أمينة قلبات عينيها :توحشتيني زعما!
سعاد ضحكات:أييييه وعلاه شحال عندي من بنت أنا؟
أمينة:عارفاك تتخافي عليا أنا بيخير الوليدة لباس عليا راه ما بقيتش بنت صغيرة كبرت ولات عندي 23عام...
سعاد:وخا تديري حتى50 عام غنبقا نسقسي عليك الى حياني الله حتى لداك الوقت!
أمينة :الله يطول في عمرك وتشوفي حفاد بنتك هههههه إنشاء الله....
سعاد:أمين ابنتي إيوا عيطي لباك ما تخليهش مشطون عليك من لبارح وهوا يسول فيا واش تاصلت بيك
أمينة:وخا كوني هانيا...
قطعات الأتصال و لقاات إسلام حطا يدها على ذقنها وتتشوف فيها بستغراب...
أمينة مطلعا حاجبها:مالك أش واقع؟
إسلام :ياختي ما فهمت فيك ولوا يالله كنتوا تتعيروا شويا رجعتوها محبة تتبدلوا كيف الجووا
أمينة قطعت من الخبز:أنا والوليدة ديما هكا مسكينة معا تتخاف عليا تتبقا مشطونة و أنا تنتنيرفا دغيا متنبغيهاش تبقى خيفا
إسلام :تتخاف عليك راك بنتها الوحيدة أش بغيتيها دير عدريها...
المختار تيقطع في لحم ويحط قدامهم كلوا أبناتي دار داركم
موجه كلاموا ل أمينة:تتأكلي لبرقوق أبنتي...
أمينة فمها عامر:لا عطيه ل إسلام وأنا خلي ليا غير لحم...
إسلام تتضحك :لي شافك أختي ميقولش بنت كزار..
أمينة سرطات دغمتها:و ما عرفاش ديك لمقولة ديال كزار ومعشي بالفت (غمزتها)وخليني ناكل ما لك جيباه من جيبك؟
إسلام عوجات فمها:اووف ما تتحديش جوبك على نابك الله يستر...
لمختار كيضحك:واش نتوما أبنتي متأكدين بلي صحابات ماشي عدوات....
إسلام تقلقات دغياو نزلات راصها تتاكل ساكتة...
أمينة هزات يديها بزوج:وهاد شي لي عطا الله أخالي لمختار إلى ما عيرتش إسلام ولوا معيورة في نهار وعودت طلبت منها سماحة تنحس بشي حاجة واحلا في حلقي...
لمختار تيضحك:ههههه ونستويني أبنتي ملي غتمشيوا غتبقا بلاصتكم كبيرة...
إسلام هزات راصها بعينين عامرين دموع: غنبقاو نجيوا عندك ديما لهنا حتى تزوج أمينة وغنبقا نجي بوحدي
أمينة مقطعاها:زعتر كلاك تجي بحدك غنجر كريم معايا ونجيوا كاملين لهنا...
لمختار بفرحة:مبروك عليك أبنتي تتستاهلي مني لكادوا لكبير (جبد من جيبوا ميات ألف ريال )شدي هاذ وفاش تبغي تمشي غدا دبيحة لمخيرة في لكوري ديها معاك...
أمينة بخجل:لا أخالي حشومة ناخدهم (دفعات ليه لفلوس)...مرحبا بيك لعرس إنشاء الله
هزات راصها لقات إسلام تتشير ليها بعينيها باش تاخد...
لمختار مقوص حجبانوا بصوت غليض نطق :تتقولي ليا خالي ورفضتي لهدية (طبطب على كتفها)نتي دابا بحالك بحال إسلام وشدي من عندي هاد البركة وخا قليلة...
أمينة ببتسامة:الله يكثر خيرك شكرا
لمختار(دفع ليهم ديسير)هاذا واجب أبنتي....
فى صباح يوم جديد مشمش وريحة طبيعة غزالة وصوت زقزقة العصافير مجهد.....
واقفين لبنات بي باليزاتهم وسط الفيرمة تيشوفوا في معاد تيحط قدامهم... (زبدة_لحليب_اللبن_البيض_الخضر_الفواكه_دجاج البلدي... العسل الحر....إلخ) تحت إذن لمختار لي غير تيتفكر ويأمرهم يجيبوا داك شي ...
أمينة حركات حجبانها بستغراب :أويلي خالي لمختار ما خلى ما جاب!وحتى دبيحة دارها بصح(حركات راصها)لا ميمكنش ليا ناخد هاذ لحولي كامل لدار!(حطا سبعهاعلى ضقنها)في العيد وما عمرنا ما عيدنا ببحالوا! سمين تبارك الله!
إسلام (تتدو ليه بجنابوا):بزاف هاذ شي أخالي ! لا ما غندي معايا والوا !
لمختار دور راصوا مكمش حجبانوا: هادشي مسيفطوا لختي !نتي غتوصلي غير الأمانة لماليها !(زاد جمع حجبانوا كثر وبصوت غليض قال) غنصيفط لي يوصلكم في الكاميوا ديالي ! ما غنخليكمش تسخسخوا في طاكسيات..
إسلام نزلات عينيها الأرض: سمح ليا وليني بهاد التصرف ! ماغنبقاش نجي لعندك!(سكتات للحضة مرقبا تصروفاتوا) حشومة أخالي والله حتى عييب!
لمختار(قاد طربوشوا لحمر بصوت غليض رد عليها) أخر مرة نسمع من فمك هاذ الهضرة!إسلام! كلامك جرحني!ورجعني غريب على أهلي وناسي!
إسلام نزلات راصها بخجل:سمح ليا(عنقاتوا)
أخر مرة تسمع من فمي هاذ لهضرة!راك عزيز وغالي
لمختار مبدلها العناق:الله يرضي عليك أبنتي(طلق حجبانوا وبتاسم)هاكدا نبغيك!لا تبقيش تكولي لي ديك الهضرة !ولا تنقلق منك!
قاطعهم صوت لكاميوا جاي داروا جيهتوا دقة وحدة..أمر لمختار دراري يطلعوا تقدية لكميوا...وجلس هوا تيودع في البنات...
المختار:بنتي أمينة !مبروك عليك! متنسيش تسلمي على سي لعربي!وتهلاي في راصك
أمينة( تلاحت عليه معنقاه خلاتوا مصدوم )
بعينين عامرين دموع قالت:أنا أخالي لمختار!هاذ شي لي درتي ليا!عمر خوالي ما هتموا بيا كيف درتي نتا!الله يعطيك ما نويتي في خاطرك!كيفما فرحتيني!
جرات إيدوا بغا تبوسها وهوا يجرها بلخف من وسط إيدها مانعها!
لمختار خنزر ما عجبوش الحال:لا!نتي بحالك بحال بنتي ماريا!وأنا تنبغي نشوف لبنيات!لي بحالكم فرحانين ! تتفرح خاطري من لداخل...
أمينة بتسامات وطلعات في الكميوا:تهلا في صحايحتك !بسلامة...
خشا يدوا في جيبوا وجبد لفلوس ل إسلام
لمختار:هاكي هاذ البركة !سيري قسميها مع خوتك! شريوا لي خاصكم !(رفع حاجبوا بتنبيه)متقوليش لا!
إسلام ببتسامة مزينة ملامحها البريئة:شكرا بزاااف!يا أحسن خال !في العالم...تهلااا في راصك!وجي عندنا عنداك!ماتجيش! بسلامة
ركبات حدا صحبتها في الكاميوا..وبقات تتلوح بيدها من بعيد حبسا دموعها...
أمينة دارت عند إسلام بانت ليها حزينة حولت تنسيها:نعستي لبارح مزيان؟!
إسلام قلبات عينيها بغضب:وشكون خلاك تنعسي؟!(شافت شيفور تيشوف فيهم وهيا تهضر بشويا)علاه نتي خليتيني نعس! أختي!ليل كلوا ونتي وش وش مع كريم!
أمينة بضحكا هضرات بجهد:واحب قلبي هاداك ههههههههههه(كمشات حجبانها بحر لقرصة لي جاتها)
إسلام بخفوت:ما حشمتيش! سيد بارك حداك!
ونتي سيرا حب قلبي!يعطيك لولة
أمينة مخسرا ملامحها:واانسيت!حرام عليك!قصحتيني
إسلام دارت جيهت زاج:هاكدا باش تعلمي
أمينة تتدور في عينيها:ما قلتيش ليا كفاش تعلمي تركبي على الخيل؟!
إسلام دارت لعندها:علمني خالي لمختار ملي كانت عندي ست سنين أو سيراج(الحصان) ملي تزاد عطاه ليا!حنت تعلمت! كا هدية...
أمينة عضا شفتها من لداخل:إيوا سعداتك الساطة! أنا عندي فوبيا منهم!منقدرش نقيصهم!
إسلام ببتسامة مزينة ملامحها بهتمام أكبر قالت:عرفتي سيراج! شارك تلاتة لمرات! في موسم تبوريدة! وربح..
أمينة حطات راصها على إسلام: أمم تبارك الله مزيان ! عرفتي شنوا جاتني دوخا!خليني نعس عفاك؟!
إسلام عضات شفتها بعصبية:بسيف ما دوخي! ونتي غير سيرا تخشي في فمك!غتولي كيف الغولة!والله وتبوعي عليا!حتى نقتلك...
وسط الصالون لي مفرش بطريقة بلدية تقليدية طليمطاتوا بالأزرق غامق...
جالسا سعاد لي من نضراتها تتبان قاصحة ومرأة ديال زمان بيضا كتشعل وعينيها عسلين لبسا جلابة في الأسود مطرزا بطرز الزموري..ومحنكا بزيف في نفس اللون...
رحمة تتكب في أتاي:مالك على هاذ لغبور ؟! ما بقيتي لا طلي لا تسولي ! درنا ليك شي حاجة! (تنهدات )الله يجعل الخير في بنتي أمينة !مسيكينة ! ديما تتجي عندي وتسول فيا...
سعاد قطعتها:حاشا أختي ! راك عزيزة ومعزتك
عالم بيها غير الله وحدوا !غير مع شقا وتمارة ديال دار! تنصبح واقفة ملي طلع شمس ! حتى تغرب ! مكنلقاش لوقت حتى باش نحك راصي..
رحمة (مدات ليها كاس اتاي):رخفي !رخفي على راصك شويا ! تمارة ما كتقداش ! ولي ديريه ليوم تعوديه غدا
سعاد بتنهيدة طويلة نطقت:عندك الحق!وليني خاطري ما كتهنينيش ! إيوا واحد عمر فين شادها هوا وتوبة؟! وأمير لباس عليه ؟!
رحمة بتسمات جنب:عمر يالله لقيتيه خرج أو أمير في المدرسة أو توبة دات واحد جوج كيلوا صابلي لواحد السيدة طلباتهم...(بتسائل )واحد مول الدار لباس ؟!كيف ديرا مع تمارة ديال الخدمة؟! سلمي عليه..
سعاد سرطات جغيمة ديال أتاي : لباس عليه الحمد لله و حتى هوا تيسلم عليك ! وملي سمعني جايا لعندك ! قال ليا نبلغ ليه سلاموا..
رحمة ببتسامة:يسلم عليه الخير والرباح (دفعات ليها طبسيل الحلوة)وادوزي ! دوزي كاسك..
سعاد شارت بصبعها :هاهوا لخير قدامي !نتي عرفاني ما تنحشمش من الماكلة..(حركات راصها )إيوا ليوم جيت قصداك والمقصود الله
رحمة نزلات الكاس من يدها:مرحبا !يسمعنا خير
سعاد هزات حلوة دوزات بيها:بغيتك تصيبي ليا شي شكيلات زوينين !ديال الحلوة !على ود الخطبة ديال أمينة(حركات راصها) من كريم ولد ختي عائشة !
رحمة غرغروا عينيها بدموع الفرحة وزغرتات:
لووووو لوووو !مبروك عليها !والله يكمل ليها بالخير ! معلوم بالفرحات عليا إلى ما صيبتش لبنتي أمينة لمن غنصيب أنا..
سعاد حركات راصها :غير صوبي ليا !داك شي لي يحمر ليا وجهي ! وما ضربي حسبا لفلوس..
رحمة دورات راصها بنزعاج:هادي هيا نتي ختي وعزيزة عندي ! وليوم ولا بينا لفلوس...لا ألالة لحلوة عتابريها كادوا من عندي لبنتي أمينة
سعاد حطات يديها على فخض رحمة وقالت
بتأكيد:اه ختي وعزيزة عليا !متفهمينش غلاط ! نتي هادي ! هيا خدمتك وبيها باش هزا ولادك وتتدخلي بيها طرف ديال لخبز لدار
(رفعات حاجبها تحت نضرات رحمة )وعلى الأقل غتاخدي مني غير فلوس المقادير بعدا (بتسمات جنب )ما تعاود غير صلاة على النبي...
رحمة منزلا راصها الأرض:واش غنقول ليك(حركات راصها )ما خليتي ليا ما نقول...
سعاد :إيوا خليني نمشي نصوب لغدا لسي لعربي لا يمشي يطليني هههه
سعاد وقفات على طولتها تتسالم مع رحمة وهوما يدوروا دقة وحدة ملي سمعوا صوت لبنات جاي من لباب تيهضروا مع عمر...
إسلام حمرة كي مطيشة مع شميسة لي كانت في طريق وقفا تترد نفس ويديها عامرين: عمر هاذ لقفات غا دخلهم لكوزينة ودوك جوج لي تم خليهم عند الباب حنت ديول أمينة غديهم لدار...
عمر إيديه عامرين حرك راصوا وقال:وخا الخودرية..(توجه لمطبخ)
دخلات أمينة من موراه تتجري عينيها خارجين تابعا لحولي غوتات بي:عمر شد شد راه هرب ليا لكافر بالله...
قبل لا تكمل كلامها جات طيحا على وقفتها من طابية لي قدام لباب...
رحمة وسعاد ملي شافوها هزوا يديهم فوق راصهم بجوج و قالوا دقة وحدة:أ راسول الله
عمر ربط لحولي في لمراح حداهم بعد صراع طويل معاه وجلس يتسراح...
أمينة شادا من رجلها ومقبلا مع لحولي:طحت بسبابك و باقي عندك لوجه لي تشوف فيا بيه ! تعت لي نوض يدير بيك شي شويا دابا نيت...
سعاد كمشات حجبانها :تي منين جبتي هاذ الحولي (حطات إيدها على خصرها أو وقفات مخرجا عينيها)عنداك لا تكوني خونتيه من شي عروبية في طريق ! ودعوة مولاه ها هيا خرجات فيك !
إسلام حابسا الضحكة:لا أخالتي !عطاه ليها خالي المختار !كادوا ديال زواج
سعاد زفرات بجهد وجلسات:الله يكثر خيروا ! علاش عدب راصوا مسكين
قاطعتها رحمة: نتي مولات الخير وأمينة ما رخيساش عندنا ! تستاهل(موجها كلامها ل أمينة )أمضرا ! رجلك شويا أبنتي؟!
أمينة مخسرا ملامحها وجهات كلامها لمها: شتي ناس لي تيعرفوا يهضروا ! بحالك تي بقا لك شويا وتصيفطيني لحبس(شدات من رجلها تتبوحط) أحياني على رجيلتي مسيكينة كانت على شويا وغتسبقني لقبر...
سعاد قربات منها بخوف :تتضرك ؟! نديك عند طبيب ؟
أمينة مكمشا حجبانها :لا لباس الحمد لله(موجها كلامها ل إسلام)شتي ها علاش قلت ليك ما كنحملش الحيوانات...
إسلام بستفزاز تتضحك:وعلاش تتاكليه ؟ أنا تنعرف لي ما كيحملش الحيونات كيكون نباتي ! ميقربش للحم
سعاد ضحكات:عطيها أبنتي الله يرضي عليك ! هيا قيسيها في ذاتها ما تاخدي ليها طرف ديال اللحم من قدامها هههههه
أمينة قلبات عينيها:تحاميتوا....
رحمة تتضحك:غير كيضحكوا معاك أبنتي
عمر وقف على طولتوا حط يدوا على عنقوا بصوت رجولي قال :ميكون عندك باس الخوادرية !المرة الجايا عرفي فين تحطي رجليك (حرك راصوا وخرج)
إسلام ناضت تتجري تبعاتوا مدات ليه لفلوس
إسلام:هادوا صيفطهم ليك خالي
عمر بتاسم جنب:يتووواب عليك الخوادرية العز... الله يحفض لخويل..
ورجعات لعندهم جلسات بينهم...
سعاد موجها كلامها لبنات: أمضرا ؟ فوجتوا تما..
أمينة تنهدات براحة :أييه تسرينا وكلينا وشبعنا فوجنا صراحة ما سخيتش نجي من تم..
سعاد كمشات حجبانها:أيوا ملي فوجتوا دابا جات وقيتة الخدمة !
خطبتك مبقا ليها غير يومين و دابا غتمشي معايا نتي وإسلام غتسوسوا دار وتحكوا لماعن...
إسلام وأمينة شافوا في بعضياتهم بصدمة مخسرين ملامحهم..
سعاد موجها كلامها لرحمة:في بحال هاذ المناسبات عائلة لعروسة ما تيدخلوش لبراني لدار لعرس داك شي علاش ما بغيتش نعيط لبنات ختي يعونوني(سكتات تواني مكملا كلامها) وأنا الصراحة ما كنتيقش فيهم هما كلهم حاطين العين على كريم..مزال بنتي إسلام مقامها من مقام أمينة (دارت عند إسلام) داك شي علاش أبنتي بغيتك نتي لي تعونينا وفي ساعة الخير نرضوها ليك...
رحمة قطعتها :أييه ما فيها باس إلى عوناتكم ديها من دابا ! ومنها نيت تعلم لي ينفعها
سعاد وقفات:الله يكثر خيرك (دارت عند إسلام )مزال حويجك مجموعين أريهم ويالله نوضي !(وجهات كلامها ل أمينة ) أنا غنهز دوك القفات ونتي جري معاك الحولي وأجي
أمينة ناضت ساخطا:هاويلي الحولي تاني..
جالسا بنيتا زوينة عندها 17 عام في مكتبها الصغير و خاشيا راصها وسط كتوبتها ساهية تتحل مسائل الرياضيات والفيزياء جامعا شعرها على شكل كعكة مهملة وبعض الخصالات نازلين على جبهتها.....
هزات وجها المنورفور ما سمعات إسمها ببرائة تتشوف فلي نادى عليها....
نجلاء واقفا في الباب مبتسما ومرتدية بينوار شفاف كيكشف على سيقانها وسدرها تيبان ....
نجلاء دخلات للمكتب: حبيبة أش تتدري؟
نرجس هزات عينيها ببراءة يكسوها بعض الخجل:تنخدم مسائل ديال الرياضيات
نجلاء قربات منها وحطات إيدها تتدوز على شعر
نرجس :تتحفضي بزااف أ نرجس ما عيتييش؟
نرجس حركات راصها بنفي وقالت ببتسامة: بغيت نجح ونجيب أحسن معدل في الباك
نجلاء جمعات فمها بتسمات بسخرية:نقول ليك واحد الحاجة وما تقلقيش مني الزين؟
_نرجس حركات راصها بإجاب...
نجلاء صغرات عينيها :في صراحة نتي كتباني تقيلة يعني ماشي بحال لبنات لي في سنك شكل حويج وشعرك ما كيدلش على أنك حفيدة عائلة راضي.. تتباني بحال شي متشردة ! معقدة وسمحي ليا عليها كلمة..
نجلاء طوات إديها عندها مقابلا ملامح نرجس لي كيتبدلوا في أي كلمة قالتها...
جرات كرسي جلسات فيه قبالتها:نتي زوينة وبنت خاصك تبيني معالمك الأنثوية وتلبسي كسيوات تصوبي شعرك تهلاي في راصك وتخرجي مع صحابك...
نرجس مقاطعها:ولكن ! أنا ما عنديش صحاب!
نجلاء:عا علاش قلت ليك تتباني معقدة..من شكل ديالك تتخلي كلشي ينفر هارب منك ...
نرجس بنفي:لا أنا ما معقداش غير ماكنبغيش داك شي..
نجلاء:سمعيني أحبيبة أنا مرات خوك وما غنبغي ليك غير الخير(شارت لنفسها )شتي أنا ملي كنت قدك ما خليت سهرات ما خليت حفالات !بختصار أنا عشت مرهقتي وشبابي كيف بغيت عاد تزوجت براجل لي بغاه قلبي وختاريتوا بنفسي....ومع بابا لباس عليه كيف باباك تنقوليك عيشي وتمتعي بفلوس عمي عدنان..شري لمركات الغالين في لباس والعطور هكا كلشي غيبغيك وغيتقربوا منك كاملين...
وانا نديك لواحد الصالون يرجعوك كيف لبلارة تخرجي منوا أميرة...
نرجس بتردد:ما عرفتش؟
نجلاء: شنوا لي ما عرفتيش كلشي واضح وبين سمعيني غنقول ليك واحد السر ومتقوليه الحد...أنا ملي كنت قدك حتى من تدخين جربتوا بجميع أنواعوا(هزات يديها بفتخار) وهانا قدامك واقعا ليا شي حاجة ؟! بالعكس تنبان لالة لبنات ياك...
نرجس بملامح مبدلا :خليني نفكر...
نجلاء وقفات من مكانها:خودي وقتك الزين غير هوا كل ما تعطلتي غتمشي ليك الفرصة تعرفي على صحاب مبوكصين....يالله نخليك نتلقاوا في طبلة لعشاء مع العائلة طبعا وهاذ شي يبقا سر بينتنا صافي..
نرجس حركات راصها بإجاب:وخا...
بعدما خرجات نجلاء من عندها خلاتها في حيرة من أمرها
تمشات جيهت لمراية بخطوات تقال خيفا أنها تكون كيفما وصفتها نجلاء تتشوف راصها بملامح قلق وخوف وحيرة كلشي تجمع عليى عقلها دقة وحدة...
خرجات من مكتب نرجس غاديا عاجبها زينها حتى حسات بإيد جرتها لبيت نعاس...
يوسف شاف فيها بعينين عامرين غضب:أش هاذ لبس تتدوري بيه أنجلاء !نبهتك على هاذ لحويج ما يخرجوش من بيت نعاس !كون شافك جدي ولا بابا فين غنوليواا
نجلاء دبلات عينيها : حبيبة سمح ليا كنت مزربة وما رضيتش البال..
يوسف كارز على سنانوا:وإيمتا غترضي لبال أه !حتى يشوفك جدي ولا خويا في هاذ الحالة عاد تحشمي..
نجلاء صغرات عينيها:ديزولي بب اخر مرة ندير هاكا...(قرصتوا في حنكوا وقالت )زينوا الحب ديالي تقلق مني...(خلاتوا يضحك بلا ما يحس)
داخل مطبخ كبير وسط رياض لبسا فراشة بالكميم مطرزة عريضة عليها ولوشام في الخضر تحت فمها مزين ملامحها كبيرة فسن وليني في شغل دار ماضية إلى قارنيتها مع بنت صغيرة تبان حسن منها في شغل والحداكة كبرات أو ولوا عندها حفايد ومزال واقفا على شغلها بيديها وتتصوب في العشاء ومعها مرت ولدها لي عكسها في الشخصية وخا هكاك عيشين مزيان تحت سقف واحد..
الجدة ( الحاجةخديجة)بعصبية:ديك لعروسة زينة لي ختار ولدك مزال ما ناوية تنازل و تحرك يديها معانا في الكوزينة...
فريدة تتصيب في تحلايا هزات راصها وقالت: مزال صغيرة أخالتي ! وزيدن راك عارفة بنات ليوم....
الحاجة عاقدات حجبانها وبتنهيدة من أعماقها قالت:ما بغيتهاش ليه نهار لول عكست فيها ! أنا بنادم من شوفة لولة تنعرفوا وليني تربية يديك هيا لي وصلاتنا لهاذ الشي وقلة عقلك..
فريدة:ولدي مربي ومخلق الحاجة ! ونجلاء أنا عجباتني لبنت زوينة وقارية ولولد بغاها وزوجناها ليه (دورات عينيها بخوف)أش فيها إلى ما كانتش تعرف لشغل لكوزينة...
الحاجة نهضات فيها:مبغيتش نبقا نسمع من فمك هاذ لكلام أفريدة أش بغيتيها تقتل ليا حفيدي بماكلة زنقة مزيان...
فريدة بقلة حيلة نطقات:وأنا غير قلت
الحاجة بتسمات جنب :هاذ المرة ما غنخليكمش طيحوا في نفس المشكل أنا لي غنختار لولدي أركان عروسة لي تكون زينة وحادكة ومتبتا متهزش الراص في لي كبر منها وتليق بمقاموا...
بدلات حويجها ولبسات بيجامة خفيفة ديال نعاس جلسات في طرف ديال نموسيتها حطا يدها تحت ضقنها و عقلها مخربق مع مكالمة كريم ولهضرة لي دازت بينهم صباح...بقات مدة وهيا جامدة في مكانها تتخمم ونار الغيرة تتحرق فيها من داخل ...
دخلات عليها إسلام لبيت جارا باليزتها تتهضر معها وتضحك وهيا غايبة ماهياش في هاذ العالم.....
إسلام (حطات إيدها على كتف أمينة ):مالكي ساهية؟! أش واقع؟
أمينة حركات راصها يمين وشمال: والوا(سكتات لثواني ورجعات تكلمات بتنهيدة طويلة) عرفتي شنوا ؟!قال ليا كريم إلى ولدنا بنت نسميوها على إسم جداتوا مت باه الله يرحمها...
إسلام بتسمات جنب:هاذ شي لي مقلقك؟! عادي ! أممم يكما ما عجبكش الإسم؟!
أمينة حركات راصها بنفي:ماشي هاكاك! لي صدمني أنا هوا إسم جداتوا !
إسلام جلسات حدها:هههه يكما سمية قديمة شويا (صغرات عينيها)ديال ناس زمان ؟!
أمينة :مصاب كون غير كانت قديمة !(درات عند إسلام)الموصيبة قال ليا سميت جدتوا ملاك (جمعات حجبنها بزوج كا تسائل )عمرك سمعتي شي جدة سميتها ملاك؟!
إسلام وقفات بدهشة مشات جيهت باليزتها تتجبد حويجها ما مسدقاش:ونتي ما عرفاش سميت جداتوا ما عمرها ما دكرات قدامك؟!
أمينة :لا حنت هيا ماتت وخلات باه مزال صغير رباتوا غير عمتوا ! ما عمرهم ما جبدوها ! (وقفات شادة من راصها) ناري عندك تكون سمية صاحبتوا ولد الهم !
(من تحت سنانها هضرات بعصبية)والله القسام الساطة ! ويكون يخوني يا حتى ندبحوا ونرجع والديه كفتة هوا وياها متكونش سميتي أمينة بنت العربي أو سعاد ما والدات فيا غير لخلا...
إسلام ضحكات :أشمن كفتة ولا سوسيط حتى نتي ؟! نعلي الشيطان ومتبقيش تنواي أ صحبتي !نوي لخير تلقايه..
أمينة بعصبيةصعرات في وجه إسلام ونطقات بسخرية:كيفما نويتي الخير حتى نتي في سفيان لي جابك حتى بقات لخطبتوا يومين عاد علمك !يكما تنبان ليك حمقة بحالك ؟! أنا راه مدوزش عليا الدكاكة..
إسلام حبسات البكية بين سنانها وعينيها حماروا بعدات وجها من أمينة تتشوف في فراااغ ساكتة...
أمينة عاد ستوعبات أش قالت شهقات بجهد تتندم في راصها:أيي أشنوا قلت سمحي ليا والله ما قصدت ! كنت معصبا معرفتش أشنوا خرجت من فمي...
إسلام ردات ببرود: الإنسان فاش كيكون معصب تيقول الحقيقة وأنا نيت غير حمقا متديش على هضرتي سيري ! سيري دابا دبحيه أش تتسناي ! وضلمي سيد مسكين !
أمينة معنقها من جنب:سمحي ليا عفاك على وديت طعام لي شركنا والبيموا لي تقاسمنا في الصغر واللعب لي لعبنا...
إسلام بصوت باكي: المسامح كريم
أمينة دورات ليها وجها بجوج صبعان:
إسلام واش تتبكي؟! تفواا عليا ياخ ! أنا حمارة !(بتأكيد) والله حتى حمارة
إسلام برنة صوت مخلطة مابين الضحك والبكا :أو بودنين طوال هههه
أمينة تنهدات براحة:عفاك أ إسلام ملي نكون معصبة متبقيش تهضري معايا ما تنبقا عارفة راصي أش تنخرج من فمي..
إسلام:فمك ديال تهراس نيت بالحق أنا سري خليت لبيت لعطاتني ماماك نعس فيه ! وجايا لعندك نونسك زعما
أمينة بتسمات جنب:أحسن ما درتي تنموت عليك الزمرة(شدات من ضهرها )أيي أ مي ضهري تقسم عليا من تخمال ديال اليوم سدادر ديول صالون من عام جدي وبقا لوليدة محتافضة بيهم..
إسلام بملامح حزينة تتجيب ضحكة جمعات فمها ونطقات:حمدي الله أو شكريه جاتك في السدادر ما شفتينيش أنا لي مني جينا وأنا نحك في لماعن والمصيبة جافيل عندي حساسية منوا (مدات إيدها ل أمينة)شوفي إيدي كيف ولوا(سكتات لتواني مكملة كلامها) ما قديتش نقول لا لخالتي سعاد ولوا خفتها تقلق مني !
أمينة حطا إيديها على فمها:ويلي ولاوا حالتهم ديك ساع قوليها الحمارة لاش بقيتي ساكتة...صبري حتى شويا ونهبط نقلب ليك على واحد المرهم مزيان...
إسلام بتسمات جنب:باش تعرفي راصك عزيزة !أنا في دارنا راه طريق لكوزينة ما تنعرفوش وأتاي هوا لخر ما تنعرفش نصوبوا الله يخلف على ختي مسكينة لي هزا شغل دار هيا وماما فوق ضهرهم..
أمينة ضحكات حتى ضرسة لعقل بانت وهزات كفوفها لسما: على هاذ شي لي درتي معايا أصحيبتي ! سيري أنا بغيت ليك شي راجل كامل مكمول ويكون بحال داك تيتيز نيت لي شفت عند خالي المختار لي شكلوا ما تمحاش من بالي ياربي وأخروا دعونا الحمد لله
إسلام ضربتها حتى تعكْرات من يديها:اي وكلت عليك الله وداك تيتيز ديالك ربحي بيه
بقاوو تيضحوا حتى كمشات إسلام حجبانها من الألم لي جاها أسفل بطنها...
إسلام عضات شفتها من لداخل بألم:فيا لوجع بزااف...
أمينة هزات حجابنها بتأكيد( تتضحك): ناري هاكا وقع لجدي مسكين قبل لا تجيه لموت..
إسلام حطات يديها أسفل بطنهاو مكمشا حجبانها تنفسها تيتقطع من حر الألم :جدك قتلاتوا لاغيغل أبنت لحرام كطنزي عليا (غوتات بصوت باكي) أييي أماما...
لو أن صوتك ....
يطرق باب قلبي الآن ..!!
لأحتضنته كما تحتضن....
الأرض قطرة المطر
وأخبرته كم تبدو...
الحياة جافة بدونه
شاد الطريق من كاز لجديدة راجع لرياض بعد يوم شاق و طويل في العمل العيا والتعب ضاهرين على ملامح وجهوا ومع ذاك مكابر جامع حجبانوا لوسط ومرة مرة تيمسد بإيدوا على عنقواا...
عقلوا مشغول تيفكر في خدمتوا لي هيا أولوياتوا تيحلل ويناقش مع نفسوا في الطريقة لي غادي يفتح فيها لمجموعة شاركات (سيارات) ديالوا فروع خارج المغرب....
دور وجهوا في ناحية الطريق شاف ولد صغير راكب حدا باه في سيارة...
مشا بالوا مع طفولتوا وديك اللحضات.....
تحولوا ملامحوا لجمود ما مفسرينش ما تعرفوا واش مقلق ولا فرحان ضرب الفولون ديال سيارتوا بقوةو سرط ريقوا حتى تفاحة أدم تحركات في حلقوا..ساط بجهد من لداخل...
ستغفر الله وطرد جميع ذكريات لي هجموا على مخيلتوا دقة وحدة....
شغل راديوا حداه باش ينسا...فائدا به تيسمع
أغنية وائل كفوري الغرام المستحيل 〰️
هيدا الغرام المستحيل يالي ما بيكمل*
هيدا حلم ليلوا طويل حاجة تتأمل*
لملم جراحك عل هدا*أنت مش أول حدا*
قبل ما يوصل فل فل*
من أول قصة غرام عنونها الفشل*
بلا ما يشعر زاد في الصوت وملامحوا تغيروا بتاسم جنب مستمتع مع الأغنية...تفكر صوتها لي دخل قلبوا من أول ما سمعوا بلا ما يعرف ملامحها فقط صوتها ! بغاه من كل قلبوا...
بعد مدة زمنية قصيرة وقف سيارتوا أمام الرياض لكبير...شاف الساعة لقاها التانية ليلا...دخل بلا ما يدير لحس عارف أنهم غيكونوا ناعسين والإبتسامة ما فرقاتوش ملي سمع الأغنية...
دخل لبيت ...حيد حويجوا ومشا نيشان لدوش فتح رشاشة خلا الماء نازل مع داتوا و عقلوا غايب يتفكر فيها....
لقا في صوتها نغمة خاصة ما تكررش في أصوات أخرا...أسراتوا بصوتها الرنان...حتى أصبح أسير لصوتها هيا فقط....
بعدما خدا دوش لبس حوايجوا وجلس يصلي في بيتوا رغم تعب لي حاس بيه.. ما ماتخلاش على صلاتوا....
واقفا على راص إسلام وكتمشي وتجي في البيت...
أمينة بقلق تتعض في ضفرنها:ناري الصكَعة ما أول مرة نشوفك هاكا ! أشنوا ندير؟!
إسلام سدا عينيها ودموعها ديرين خط على حناكها موركا بيديها بزوج أسفل بطنها وكتنين بألم بصوت كيقطع ليها نفس قالت:جيبي ليا لويزة عافاك...
أمينة بتسائل :لويزة مزيانة ! أنمشي نصوبها ليك دابا...
إسلام غوتات :لا جيبي لقرفة(زادت في وتيرة البكاء بحال شي بنت صغيرة )لا جيبي ليا الزعتر هئ هئ ما عرفتش لعشوب لي كتصوب ليا ماما شنوا فيهم هئ هئ هئ نسيتهم
أمينة بتوتر :أشنوا ندير دابا نعيط عليها نسولها؟!
إسلام مسحات دموعها : لا غتشطن عليا ! بلاش صافي طفي ضوء ونعسي !صباح ونمشي لسبيطار لحومة ندق جوج بروات للألام..
أمينة بحزن جمعات حجبانها:غبقا نشوفك هاكا(جلسات حداها)اووف زهري مكوز غدا عندي الخطبة زعما وصحبتي الوحيدة شوفي أش وقع ليها؟!
إسلام نيفها ولا حمر بالبكاء:متخافيش كلشي غيدوز مزيان صباح إنشاء الله غنولي بيخير متخافيش عليا ! وزيدن هادي ماشي أول مرة يوقع ليا هكاك (بحزن)كل شهر تندوز من هاذ شي (بقلة حيلة) ولفت...
أمينة تكات حداها: ما عمر هاذ شي ما وقع ليا لعجب ! خاصك تشوفي طبيب !
إسلام سدات عينيها هضرات غير بزز: حتى لصباح ويفتح..تصبحي على خير تبعنا غدا شلا حويج خاصنا نديروهم
أمينة تغطات :وخا ! و إيلا ما قدرتيش تصبري فيقيني نشوف أش ندير بونوي...
نهار جديدة ومغاير على العادة ..مع ستة ديال لعشية في دار سي لعربي الكزار الصالون العامر بناس ولخطبت بنتوا أمينة مجموعين ..ريحة السفة والدجاج عاطية من الباب....
جالس سي العربي وحداه حمد أب كريم وخوه مروان وقبالتهم جالسا عائشة وحداها سعاد ختها ورحمة جنبهم هيا وباقي عائلة أمينة....
دخلات عليهم إسلام بالبلاطوا ديال أتاي..لبسا قفطان خفيف براندة وشعرها مطلوق على راحتوا وجها منور حنيكاتها مزنكين من الحشمة حنت وسط ناس غريبة تتحشم وبنات خالت أمينة تيطلقوا السم من عينيهم حتى وحدة ما حملاها حنت هيا زين منهم...
عائشة حركات راصها :إيوا يمتا غتجي عروستنا؟
سعاد خطبات إسلام:بنتي جيبي أمينة...
إسلام بتسمات :هيا لولة أخالتي
جلسا أمينة في طرف ديال نموسيتها لبسا قفطان في لبيض معري من جهة لكتاف متوترة...
وحدها جالس كريم معصب:حلفت ليك بالله أحبيبة علاش ما بغيتيش تيقي
أمينة وقفات:تاريح من لكدوب جيتي حتى لرحبة فليوا اوليدي وبغيتي تعطس ما شي معقول (شارت لنفسها)أنا أمينة بنت العربي بغيتيني نتيق بالي جداتك سميتها ملاك نو نو نو(هزات صبعها) كينا إنا في الموضوع
كريم وقف جنبها حط يديه على كتافها العريانين بزوج حتى تبورشات بين يدوا:أمونة ديالي شوفي فيا
أمينة دورات وجها لعندوا مخسرا سيفتها:نعااااام
كريم ركز الشوفة في عينيها:ما كين لا إنا ولا ولوا أنا كنبغيك غير نتي..سميت جداتي في الحقيقة مليكة هيا كانت عزيزة على الوليد بزاف داك شي علاش بغيت نسمي بنتنا عليها أما بالنسبة علاش قلت ملاك غير بغيتها تكون حديتة وختاصرتها بملاك...
أمينة بتسمات جنب:زعمااا
كريم جرها لعندوا عنقها:معلوم أبنت الخالة على نتي يقدروا ناس يكدبوا عليك...بغيتي تشوهيني هههههه
يالله غتجوبوا وهوما يسمعوا دقان في الباب
حلات أمينة ودخلات إسلام معصبة ملي شافت كريم:أويلي نتا مزال هنا..من قبيلا قلتي ليهم غادي لحمام..سير دغيا لا يشوفك شي حد...(دفعاتوا برا)وزرااب
كريم مخسر سيفتوا:هاهوا غادي أ مخريبت اللحضات الرومانسية ! حبيبة تيبان ليا خاصك تبدلي هاذ الصحيبة ! قديمة شويا في عقليتها...
إسلام كمشات حجبانها: إيوا سري أنا لي ديما كنجي عليك !لي جا يحن كيتمحن...
كريم: غير تنضحكوا راك عزيزة الأخت...(مشا لصالون)
أمينة تتضحك عليهم قربات حدا إسلام وقالت:أمدرا شويا من لحريق؟
إسلام:لباس الحمد لله وزيدي قدامي تيسولوا عليك...
أمينة بتوتر:كيف كنبان؟!
إسلام:تتباني زوينة تتحمقي وزيدي قدامي دغيا...
نزلات أمينة بصلاة والسلام على رسول الله
دخلات لصالون تحت أنضار لكل بلا حشمة بلا حياء مشات نيشان جلسات حدا كريم وشدات ليه إيدوا....
وإسلام لقات بلاصة خاوية بين بنات خالت أمينة جلسات وسط منهم...داروها بيها كيف لفعات
سلمى بستفزاز:كيف بقا حال لقليب ههههههه
إسلام بتسائل:تتهضري معايا؟!
سناء غمزتها :دوات معاك الزين باز لوجهك! لاحك كيف لكلبة أو مزال عاد لوجه دوري بين ناس منك أنا نمشي نتاحر...
إسلام تزيرات وكلامهم داخل بحال سم لقلبها يالله غتنوض من وسطهم وهوا يهضر سي حمد...
حمد (أب كريم ):كنضن بلا ما نزيدوا نتعطلوا وندخلوا في الموضوع لي تجمعنا على قبلوا اليوم
سي العربي حرك راصوا مبتاسم: مرحبا
حمد:جيناكم من الباب طالبين وراغبين في يد أمينة لولدي كريم
سي العربي حرك راصوا بإجاب:البنت بنتكم من اليوم ما عندنا ما نخبيوا عليكم كلشي راكم عارفينوا
حمد بتاسم:نقاروا الفاتحة...
بعدما قراوا الفاتحة سعاد وعائشة حموها لزغاريت....
في جنب السداري جالسا مرا غليضة لون بشرتها سمرة حاضيا إسلام ملي دخلات وهيا طلع وتنزل فيها...
قربات من أمينة وتكلمات:بنتي أمينة شكون ديك البنت
أمينة بستغراب:إينا وحدة فيهم....
المراة(فوزية):ديك البنت الرزينة..(شارت بصبعها) الزوينة لي لبسا لقفطان برنادا
أمينة:اه ديك إسلام عشيرتي من الصغر أنا ويها بحال لفولة لي تقسمات على جوج...
فوزية حركات راصها:سميتها إسلام(بهتمام) أو مزوجة؟
أمينة بعصبية:لا وعلاش تتسولي من الصباح
فوزية بتسمات :والوا أبنتي غير عجباتني ومكرهتهاش لولدي فريد..
أمينة درات عندها بصدمة مطلعا حاجب ومنزلا لاخر :إيوا أش تيدير هاذ ولدك فريد بسلامة؟!
فوزية دورات راصها:لهضرة ماشي معاك فين هيا أم لبنت؟
أمينة تتلطف لجوو:وراها عشريتي أخالتي معلوم نسول عليها...
فوزية قفدات درعيها بزوج:وريني أم البنت ولا عليك؟!
أمينة بعصبية قالت داخلها:الله يستر..(شارت لرحمة) رها لهييه مي رحمة..
.
فوزينة ناضت تتكحز لعند رحمة(معا غليضة شويا)
فوزية ببتسامة:ختي سعاد كحزي شويا بغيت نجلس حدا لالة رحمة عندي ليها شي كلام.
.
سعاد شافت في رحمة أو في فوزية:وخا
فوزية تتدور في عينيها:ختي رحمة لباس؟
رحمة بصوت تقيل:لباس الحمد لله،كتعرفيني ألالة
فوزية :لي والد داك زين كامل شكون لي ميعرفوش؟!
عائشة(أم كريم) مقطعاهم : سيدنا تيبان ليا جا وقت تركيب لخواتم...
سعاد:بنتي إسلام مدي ليا لبلاطوا
إسلام بسعادة:هيا لولة أخالتي
مدوا ليهم لخواتم ركبوهم في جواا من السعادة والضحك وشربوا بعضياتهم لحليب و كالوا تمر...وخدموا الموسيقى ناشطين...
أمينة تتشطح هيا وكريم بانت ليها إسلام جالسا وهيا تجرها هضرات في ودنها بجهد مع صوت الموسيقى عالي:اجي تشطحي معايا
إسلام مكمشا حجبانها بزوج:ما كرهتش وليني بداني لحريق تاني...
أمينة قلبات عينيها:الله يشافيك ..اه قبل لا نسا تسناي
حيدات خاتم خطبتها من بين صبعها وركباتوا ل إسلام في يديها
إسلام بتسائل:أش تتديري؟!
أمينة ببتسامة:هاذا باش تزوجي مباشرة من مورايا (ودورات ليها قرصة)وهادي ديال لفال امم صبري مزال حاجة اخر
(جابت زلافة لحليب)شربي منها غتنفعك ! سمعت لبنات في الفيسبوك تيهضروا عليها
إسلام(تتغوت في ودن أمينة)أش تتخربقي...
أمينة بإلحاح:وغير شربي بلييز ليوم خطبتي خاصك ديري ليا لي بغيت
إسلام بتسمات جنب وشربات:ها حنا غنشوفوا هاذ الخزعبيلات ديولك فين غيوصلنا...
أمينة عنقات إسلام :الله يرضي عليك أبنتي هههههه
سعاد شارات بعينيها ل أمينة تجي لعندها...
أمينة(غمزتها)نعام الوليدة أش تم؟
سعاد مكفضا جليلها:طفي عليا ديك الموسيقى مكتحشميش فرحانة وحالة فمك تبتي شويا كيف لبنات ونتي طيري الله يستر...دابا غنحطوا العشاء
أمينة قلبات عينيها بغضب ؟عزيز عليك تنكديها عليا ديما أوووف
طفات لموسيقى وجلسات زاعفة خاصها غير فيمن تشد...
حطاو العشاء المكون من دجاج محمر زيتون والحامض...إلخ فوق الطبلات بعدما غسلوا ناس يديهم...
وهيا توقف فوزية حلفات عليهم ما يحطوا يدهم حتى تكمل هضرتها قدام المجمع كامل..
فوزية وقفا كتافها عراض وكرشها صابقها: إيوا أسيادنا هضراتي لي غنكول تتخص إسلام أوموجها بتحديد ألالة رحمة..
إسلام جلسا حطا يديها أسفل بطنها..كمشات فمها وعلامات الإستفهام ضهروا على ملامحها هيا ورحمة
رحمة حركات راصها:يسمعنا خير قولي أش عندك ألالة
فوزية ضحكات حتى ضرسة لعقل بانت: غنجيك نيشان أختي أنا عجباتني بنتك لالة إسلام أو ما كرهتهاش لولدي فريد على سنة الله ورسوله ولدي شهوة منوا عندوا 38 عام
إسلام بصدمة بقاات تترمش بزربة ما ستوعباتش هاذ شي...
رحمة فرحات من قلبها حمدات الله وشكراتوا
بعينين كيبريوا قالت:إلى بغيتوها لحلال مرحبا ما نزيدكم غير دعاوي الخير..
أمينة مقطعاهم:وخالتي سوليها بعدا فاش خدام ولدها عاد حكمي..
فوزية بتسمات جنب:ولدي أستاد في تانوية******
أمينة تنهدات براحة يالله غتجلس في بلاصتها وهيا دير ليها طرن ديك "أستاد في تانوية****) في راصها ورجعات وقفات:متقوليش ليا ولدك هوا
فريد أستاد الرياضة لي في تانوية*****
فوزية بفتخار:أيييه هوا نيت
_ (ضارت عند إسلام لقاتها كتبكي)عرفتيه أصحبتي؟؟
إسلام حركات راصها بإجاب..
أمينة هزات يديها بعصبية بدات تشالي بيهم وهضر:وتي ريحي لرض !كلاك ولدي شهوة! منوا فاش شهوة منوا ؟! في سكرة ديما جاي سكران للملعب ....
أمينة فاش تتنوض تتنسا لي معها..نسات باها لي تتحشم منوا هوا وحمد وكريم...وبدات تخصر لهضرة
هاذاك لي سيرا تفتاخري بيه راه تيتحرش بدريات في الملعب وكيتباعهم حتى لفيستيال فاش تيكونوا يبدلوا حويجهم
فوزية ألون طيف كلهم دازواا على وجها:أش تتخربقي نتي هاذاك ولدي ومربي
سعاد تتجر في أمينة وهيا عاد ما زادت صعرات كثر:أييه مربي على إيد كلبة بحالك ! (واجهتها)دخلنا عليك بالله ما مشاوش لبنات عندك جماعة كيتبروا منوا حتى لدار ونتي جريتي عليهم...
فوزية تتدور في عينيها تربط ليها لسان
أمينة:نتي عارفة وأنا عارفة ولدك سمعتوا خايبة !حتى واحد ما كيقولها فيه زينا ! حتى بنت ما ترضا يكون راجلها بحالواا (شارت ل إسلام )بانت ليك غير عشيرة أمينة قلتي نلصقوا فيها هانيااا أش تتسحبيها حيط قصير مزيان تبارك الله
خرجي في حالاتك درقي زلافتك من قدامي حسن ما نتلاح عليك بشي نتفا فاعلا تاركة
رحمة بقلة حيلة نطقات:حسبي الله ونعم الوكيل
عائشة(أم كريم)أش بقا ديري هنا راك سمعتي لبنت أش قالت خرجي علينا براا
فوزية عينيها في طبسيل:ما طرا باس طلبت لبنت أو ما بغيتوش تعطيوها ليا ! وخليوني نتعشا بعدا عاد نمشي بحالي...لا تخرجيش لعيب
أمينة مخرجا عينيها:هاذاك لعشا هوا لي ما غديش يطيح في حلقك( درات عند كريم لي حابسها من دراعها )طلقني أكريم عليها
فوزية:هاهيا غادا تريكة جوع الله يستر....
*صديقتي *
أمسكي بيدي إن أضعت الطريق
عانقيني إن لم أستطع جمع شتاتي مجددا
أنظري إلي عندما لا شيء يبحث عني
إبتسمي في وجهي عندما لا تجد المسرات سبيلا إلي
إبحثي عني عندما لا يفتقدني أحد
ضميني لصدرك عندما نكون معا
أكتبي لي عندما أهرب إلى عزلتي كل يوم
إمنحيني إياك عندما يتلاشى كل شيء من حولي*
بعدما تعشاوو الناس ومشاوو بحالهم ناشطين وفرحانين بخطوبة أمينة بنت سي العربي وخا بلبلتها ليهم في الحفلة......
بقات عائلة كريم لي حلفات عليهم أمينة يجلسوا حنت عندها ليهم شي كلام....
تجمعواا في الصالون على كاس ديال أتاي والفاكية تيقرقبوا الناب وكيهضروا على أجواء الخطبة كيف دازت بينما جات لعندهم أمينة ...
أما هيا مشات لبيتها تبدل في القفطان....
سمعات عند الباب إسلام هيا ورحمة تيهضروا بينهم....
دقات في الباب مع إبتسامة في وجها....
رحمة هزات راصها:دخلي أبنتي علاش تتدقي؟! بيتك هاذا !
أمينة دخلات لبيت ومشات نيشان للمريوا عاطيهم بضهرا تتجبد حويجها وهضرات:خالتي علاش ما جاتش معك توبة هيا وعمر ؟! تمنيتهم كون حضروا
رحمة حركات راصها:لعرس وإنشاء الله يحضروا(تنهضدات ) راك عارفة هضرة ناس ملي طلقات ما قالوها عليهم ! ديما تيجبدوها بالخيب..ذاك شي علاش تتفادا بحال هاذ التجمعات...
أمينة بعصبية:شتي لي تيهضروا في الناس خاص يتقطع لجد بوهم لسان من جدر...
رحمة بقلة حيلة:الله يهدي ما خلق
_إسلام بتنهدي طويلة قاطعتهم :هاذا هوا حال المطلقات في مجتمعنا كلهم كيعانيوا في صمت من بعض البشر لي عقولهم فارغة للأسف...
رحمة بعينين كيبريوا بدموع وقفات ولعند أمينة قربات:الله يرضي عليك أبنتي قلالين ناس فحالك ! ما فكرتيش في عائلة خطيبك والنضرة لي غياخدوا عليك !ودافعتي على إسلام !كون ما كنتيش معانا كنت غنرتاكب غلاط كبير في حق بنتي....
أمينة تزيرات من لداخل وحبسات البكية هيا من النوع لي ما كيبغيش يبكي قدام ناس:متقوليش هكاك امي رحمة نتي قلتيها بفمك إسلام ختي وعلى قبلها مستاعدة ندير أي حاجة غير باش تكون مرتاحة...
رحمة :ما خليتي ليا ما نقول أبنتي الله يرضي عليك ويوفقك في زواجك ياربي...
أمينة عنقاتها:أمين ياربي
رحمة بعدات وبدات تقاد في شالها:إيوا نخليك أبنتي غنمشي(خاطبت إسلام)بنتي غتمشي معايا دابا؟!
أمينة نفخات شفيفها وبتراجي قالت:عافاك غير خليها حتى لصباح ونجي لعندكم أنا وياها...
رحمة: وخا أبنتي الله يرضي عليكم تهلاواا في بعضياتكم(دارت عند إسلام )بنتي إلى تزاد عليك لحال شربي لعشوب راه عطيتهم لختي سعاد أو وريتها كيفاش تصوبهم ليك
إسلام قاتلها نعاس:لهلا يخطيك عليا أماما أنا بيخير الحمد لله سلمي على خوتي وبوسي ليا أمير توحشتوا !
رحمة مشات عاطيهم بضهرها :مبلغ خليت ليكم الراحة..
نزلات في الدروج وهيا تلاقى مع عائشة(أم كريم)
رحمة ببتسامة:الله يجعل كلشي مبارك ومسعود ! بسلامة أختي
عائشة وقفاتها: الله يبارك فيك لعقوبة لبنات بجوج إنشاء الله
رحمة حركات راصها:أمين
عائشة:ختي رحمة ما عندي ما نتسالك ديك الحلوة ديال الخطوبة حمقاتني إلى ممكن تصوبي ليا بحالها على ود سبوع ديال بنتي سليمة ولدات ولد هادي يومين
رحمة سلمات عليها :مبروك عليها لعزري ! يتربى في عزكم إنشاء الله..مرحبا(مدات ليها تيليفون عادي صغير)خودي منوا نمرة بنتي توبة ودخلي لوتساب عندها غتوريك جميع شكيلات وختاري لي عجبك نصيبوا ليك من غدا..
عائشة بفرحة كبيرة سجلات الرقم عندها:لهلا يخطيك أختي رحمة سلمي على دراري...
رحمة مبلغ دارت بحالها غاديا وهيا تنادي عليها سعاد عطاتها من العشاء باش تدي لتوبة وعمر حقهم ومن بعد ودعاتهم ومشات....
يتبع...
التعليقات
لا توجد تعليقات بعد، كن أول من يعلق.