زواج مبارك الجزء العاشر

واقفا وسط لكوزينة كتصوب في لفطور لابسا فراشة في الأزرق مع حلاقات في الأبيض مرصعين بالألماس....جامعا شعرها لفوق على شكل ديل حصان... مخليا وجها طبيعي ما حطا فيهم حتى نقطة ديال لمكياح وخا صابحين عينيها حمرين ومنفوخين بكترة لبكاء....

حيدات لمسيمنات من فوق لمقلة لي كانت حطاهم يسخنوا فوقها ونقصات على لحليب باش يطلع على خاطروا وما يفيضش على لفورنوا

دخلات نجلاء لابسا حويج ديال رياضة وحطا إيديها على بطنها لي بدات كتبان شويا تقدمات بخطوات بطيئة ناحية تلاجة فتحتها وصبات لنفسها كاس عصير برتقال رتشفات منوا وكسرات داك لهدوء لي مخيم على لمطبخ بقولها:

_نعستي لبارح في لبيت بوحدك ؟!!

إسلام دارت ناحيتها مصدومة شافت فيها ورجعات تكمل شغلها بلا ما تنطق بحتى كلمة

نجلاء صغرات عينيها وقالت :أكيد كتفكري كيفاش عرفت هههه ساهلا سمعت لحاجة صباح كتهضر معا أركان و قال ليها بلي عندوا لخدمة امم او يمكن يكون شي سبب اخرى لي كيخليه يهرب من هنا متلااا نتوما ما مفاهمينش

إسلام تنهدات من الأعماق وقالت:لا علاقتنا مزيانة الحمد لله ومكينش لاش دخلي

نجلاء عضات فمها من لداخل وقالت بفرحة: باينا مخاصمين "زادت صغرات عينيها كتر "اييي ما عمري ما سمعت شي راجل مزال عريس جديد كيخلي مراتوا بوحدها ويمشي كون غير داك معاه بقيتي فيا صراحة

إسلام زيرات على إيديها طفات على لحليب وخدات لكيسان ستفاتهم في لبلاطوا وهزاتوا بين يديها وهيا توقفها نجلاء ودارت وقفات مقابلا معها وضحكا واصلا لودنيها

إسلام ساطت بجهد و قالت:حيدي من قدامي حسن ليك أ نجلاء

نجلاء خنزرات و بغيض نطقات :علاقتكم كتبان ليا ما غطولش أحبيبة حنت نتي ماشي من سهم هاد لعائلة "زيرات على مخارج لحروف "وبزاف عليك تكوني وحدة منا

بعدات من قدام إسلام لي ولات كتغلي بالعصاب وشربات لكاس لعصير دفعة وحدة وحطاتوا وطوات يديها عندها وبسعادة نطقات:

_إلى ما خرجتكش من هاد رياض ما تكونش سميتي نجلاء غير تسناي

°° •• تنهدات براحة وطلعات تجري لبيت ختها فتحات نوافد أو وقفات لعند رجليها كتفيق فيها

نجلاء بصوت مرتفع نطقات من تحت سنانها :مروى مروىىىى نوضي تهزي خاصك ديري شي حاجة واش أنا عيطت ليك باش تجي تنعسي

مروى تفوهات بنعاس وقالت بصوت مبحوح : جاتك لحالة عوتاني سيري خليني نعس

نجلاء هزات كاس ديال الماء من فوق طابلة خواتوا على وجه ختها خلاتها تنوض قافزا بعصبية نطقات :

_اييي كلي فزكت مالك تسطيتي على صباح اش هاد لحالة درتي فيا دابا غنمرض بسبابك

نجلاء حمرات فيها بعينين تيلمعوا بشر قالت:الى بقيتي هكا ما كديري والوا راه أنا لي غنمرض ماشي نتي توكْضي معايا

مروى وقفات على طولتها تمشات ناحية لبلاكار بدات تجبد منوا لحويج وهيا توقفها نجلاء دورتها لعندها وبعصبية نطقات:

_خاصك تلقاي شي طريق منين دوزي ل إسلام ودمريها

مروى حركات راصها وقالت بصوت هادئ :

علاش أنا بنت ليك شرطية مرور باش غنلقا طريق

نجلاء زفرات بجهد ونطقات :شوفي كيفاش ديري لمهم بغيتها تخرج من هاد دار خاصك تعرفي لماضي ديالها

مروى سدات عينيها وعود حلاتهم بالعصاب وبستهزاء نطقات : بنت ليك أنا شوافة باش غنعرف الماضي ديالها

نجلاء وجها حمار خبطات رجليها مع الأرض وبالفقصة قالت :عصبتيني واش الحاجة لي قلتها ليك ترجعيها عليا جوابك على نابك لله يستر

مروى صغرات عينيها و ببرود نطقات :إيوا هاد شي كلوا تعلمتوا منك لفضل كلوا كيرجع ليك

نجلاء بصوت مكسور ردات :عيييت ومليييت منها بغيييت نرتاح منها اختي عفااااك ديري شي حاجة

مروى عنقات ختها وقالت :نجلاء تهدني عفاك نتي حاملا ما مزيانش لصحتك هاد توتر كامل

بعدات من ختها عطاتها بضهر ورسمت إبتسامة ماكرة على وجها ونطقات:

_شنوا كتسحبيني أختي انا جالسا هنا غير هكاك نوو ابب أنا من نهار لي حطيت فيه رجلي في هاد رياض بديك خدمتي على لحاجة لي بغيت أنا رميت صنارة وكنتسنا فيها تشد في لوقت لمناسب غتشوفي نتيجة بعينيك مبقاش بزاف أنجلاء غير صبري

نجلاء بفرحة تشع من عينيها طارت على ختها عنقتها كارزا عليها قالت:

_شكرا بزااف الحبيبة ديالي

مروى تبسمات بشر وقال داخلها :سمحي ليا أختي حنت درتك نتي هيا طعم باش نصطاد داك شي لي بغيت "بعدمات منها وقالت" هانيا ما بيناتناش نخليك دابا غندخل ندوش

° ° بعد مرور أسبوع

جالس وسط صالون فرحان مع عائلتوا بخبر نجاحوا في إمتحان الشرطة حاطين لحلوة ولمسمن ولبغرير...و...الخ

رحمة بوجه بشوش قالت: الله يكمل ليك بالخير اولدي

عمر رتاشف من كأس أتاي وقال:أمين الواليدة

توبة بتسأل نطقات:في إينا مدينة غتخدم أخويا

عمر هز راصوا وجوبها: سمعت بلي غنتعين في رباط يمكن

توبة مسدقاش بفرحة نطقات:واو حتى أنا غيوليوا ناس يقولوا عليا خت بوليسي

عمر طلع حاجبوا وقال بفتخار:ايوا علاه خوك شويا في لبلاد

توبة عوجات فمها وقالت :ما تندمنيش حنت شكرتك ما تعيقش

عمر عض خدوا من لداخل وقال: هاهيا بدات تاني غير حنت ناشط ليوم ما غنديرش فيك راصي

توبة بفرحة هزات تيلفونها وقالت:أنتاصل بي إسلام نقولها ليها

رحمة حركات راصها وقالت بصوت هادئ:ايه أبنتي فرحيها

تصلات بي إسلام وحطات تيليفون على ودنها كتسناها تجوب بعد دقائق قبلات لخط

إسلام:ألوا ختي صافا ؟

توبة ببتسامة مزيناها قالت:لباس الحمد لله ونتي صفا؟

إسلام:صفا الحمد لله ماما وعمر وأمير لباس عليكم

توبة :كلشي لباس ها هوما حدايا تيسلموا عليك "بجدية قالت "معيطتش ليك على هاد شي جبت ليك واحد لخبار زوينة

إسلام بفرحة نطقات:قولي فرحيني هانا كنسمع

توبة بحماس هضرات:عمر تقبل في لبوليس نجح دابا خوك غيولي بوليسي أختي

إسلام عينيها لمعوا بالفرحة:قولي والله أتوبة فرحت ليه بزااف عطيني عمر نبارك ليه

توبة خرجات عينيها وبعصبية نطقات : كيفاش عطيني نهضر مع عمر أختي مالك برانية خاصك تجي لهنا وتباري ليه

إسلام بقلة حيلة قالت :ما نقدرش نجي ،خليها حتى لغدا ليوما غيجي أركان من كازا سيمانا هادي ما شفتوا ما جاتش نجي ونخليه وزيدن خاصني نتشاور معاه قبل

توبة بتنهيدة طويلة ردات :صافي ماشي مشكل غدا وجي عندنا انتسناوك لغدا

إسلام تبسمات جنب وقالت:أوك وعطيني نهضر مع عمر

توبة بإصرار قالت:عنداك ما تجيش

إسلام:إنشاء الله غنجي ودوزي ليا عمر

توبة ببتسامة مدات تيلفون لخوها وقالت بصوت هادئ:

_هضر مع ختك

عمر حط تيلي على ودنوا وقال:لخوادرية صفا؟!

إسلام بصوت باكي بالفرحة : لباس اخويا الحمد لله فرحت ليك بزاف الى حتاجيتي فلوس ولا أي حاجة عيط ليا

عمر ببتسامة مزينة ملامحوا رد عليها :كوني غير بيخير محتاج غير سلامتك

إسلام بإلحاح:عمر راه تنهضر معاك بغيتي شي حاجة تاصل بيا ختك أنا ما كينش لاش تحشم

عمر عينيه دمعوا قال:غير داك شي لي كترسلي ليا كافيني ،نخليك الخوادرية انمشي ندوش

إسلام:بصحتك البوكوص نتلقوا غدا بسلامة

عمر عطا تيلفون لتوبة وطلع لبيتوا توجه لبلاكار خدا منوا سروال جينز مع تيشرت وشورط ديال دار حط لحويج ديال لخروج فوق سرير وخدا تيلفونوا تاصل بنرجس لي قبلات لخط فور ما شفات إسموا على شاشة

نرجس ببتسامة قالت :الوا

عمر:صفا أ نرجس

نرجس صفا الحمد لله ونتا لباس؟

عمر حرك راصوا وقال:أنا بيخير فيك ما تخرجي ليوم

نرجس بتسأل نطقات:علاش؟

عمر كمش حجبانوا لوسط وقال:إلى ما بغيتيش هانيا بغيت غير نخرجوا نبدلوا لجوا راك غتجري مع بوليسي ماشي شي واحد عادي

نرجس ضحكات من نيتها وقالت:نخرج معك وخا تكون واحد عادي نتا عزيز عليا بزاف أعمر

عمر من كلامها ترسمات إبتسامة على محياها :صافي تافقا انصيفط ليك لعنوان فين غنتلاقوا

نرجس بصوت أنثوي رقيق قالت: اوك باي

° °••في المساء

لبسا شورط قصير مع تيشرت في الأبيض خرجات منوا من دارهم بتخبية ومخليا شعرها مطلوق كتبان كيوت واقفا قدام ملهى الألعاب في لبحر جنب عمر لي مرتادي قميجة في لغوز بارد مفتوحا وتحت منها تيشرت ديال تجين

عمر شار بيديه لالعاب وقال :إينا وحدة تبغي تجربي ؟

نرجس بعينين تيلمعوا سرطات ريقها وقالت: عفاك شري ليا غزل البنات"الصوفة" بللليز هوا لول

عمر شدها من نيفها وقال:هاد شي لي بغيتي

نرجس بإلحاح : اه دابا هاد شي لي بغيت

عمر خدا ليها غزل لبنات لي كل دغمة حطتها في فمها كتبا تلدد فيها وهوا تيرمقها بنضرات كلهم إعجاب

مني سالات جلسوا في لقطار لي تيدور في لهواء بسرعة غير بدات تدور بيهم لعبة نرجس قبطات في إيد عمر وتخشات في سدروا خيفة وكتغوت وهوا تيضحك عليها

ملي نزلوا هبطات ديخة شدات من راصها وقالت:

_دختت بزااف ولكن هاد شي زوين صراحة

عمرتبسم جنب وقال:طلعتي خوافا مع راصك

نرجس بعدم رضا ردات:لا غير شويا وصافي

عمر حرك راصوا وقال بصوت رجولي:يالله نمشيوا نتعشاو

نرجس رجعات شعرها لور وبتسأل نطقات:شنوا هيا لمناسبة باش خرجنا ؟

عمر صغر عينيه وقال:مناسبة إلتحاقي بشرطة وتاني حاجا ممكن ما نبقاش نشوفك حنت واقيلا غنخدم في رباط خلي هاد لحضات دكرة في بالك

نرجس زيرات على يديها وبحزن قالت: ما متشيش عفاك

عمر سرط ريقوا حتى تفاحة أدم تحركات في حلقوا :ضروري ما نسافر يبقا بينا تيلفون ولا ما فهمتيش شي حاجة تاصلي بيا نشرح ليك "شد ليها من إيديها" ودابا يالله نتعشاو الشنيولة

نرجس هزات راصها بعدم فهم قالت:شنيولة !! أنا

عمر تفكر نهار لي باستوا وكدب على إسلام وأمينة قال عليها شنيولة تبسم جنب وقال :امم قصة طويلة من بعد ونعودها ليك

لبسا بيجامة بسروال طويلة و جالسا قدام لمراية كتمشط في شعرها الأسود الطويل.. ماقبلا نعكاس صورتها في لمراية وتيها وسط تفكير عميق كتفكر كيفاش تقابل أركان لي مابقا ليه والوا يوصل ...

فيقها من سهوتها صوت تيليفونها كيصوني

وقفات على طولتها وشعرها مورها مطلوق واصل حد خصرها كيتحرك مع تحركاتها عاطيها جمال خاص...

تحنات ناحية سريرها هزات تيلفون فور ما قرات الإسلام شهقات بجهد بسرعة جوبات وهيا مرعبا :

_ألوا كريم يكما كين باس واقعا شي حاجة ل امينة

كريم تبسم جنب ورد عليها :تهدني إسلام صحبتك لباس عليها

إسلام تنهدات براحة وقالت:الحمد لله نتوما لباس ؟

كريم ببتسامة مزينة ملامحوا رد عليها :لباس الحمد لله اختي عيطت ليك على قبل واحد سيد صاحبي شاف ديال لبوليس كان حاضر في عرسي وعجبوا تنضيم ديالك وبغاك باش تنضمي ليه عرس ختوا ،غيعطيك مبلغ كبير

إسلام عينيها لمعوا بالفرحة ولكن ملي تفكرات أنها خاصها تقولها ل أركان خافتوا ما يقبلش زفرات بجهد وعضات خدها من لداخل كتفكر دوزات إيديها على شعرها وسكتات

قاطع تفكريها كريم بقوله: خاصك تقبلي إسلام هوما راه عائلة لباس عليها والى نضمتي ليهم لعرس شركة زواج مبارك غتشهر كتر

إسلام كمشات حجبانها بقلق وقالت :

_هوا في صراحة ما كرهتش ولكن خاصني نتشاور مع أركان هوا لول عاد نشوف الى بغا نتوكل على الله

كريم حرك راصوا برضا وقال:حتى هادا نضار خودي راحتك فكري وتناقشي مع سي اركان وردي عليا من بعد

إسلام ببتسامة ردات : شكرا بزاف أخويا تهلى في راصك وتهلى في أمينة حتى هيا...

قطعات معاه الإتصال وحطات تيلي فوق سرير جلسات كتفكر كيفاش ترضي أركان وهيا طيح عليها فكرة بسرعة هزات هاتفها بين يديها وعينيها مركزين على رقم لي اول ما طلع ليها تبسمات جنب وتصلات بيه

أمينة ببتسامة ردات: ألوا لخوادرية

إسلام حركات راصها وقالت بصوت هادئ: أمونة صافا ؟!

أمينة :لباس الحمد لله ونتي؟!

إسلام بتسأل نطقات بتردد: بغيت نسولك ؟! دابا أنا "عضات لسانها وما قدرات تهضر

أمينة خرجات عينيها وقالت:سولي مالك متردا

إسلام سرطات ريقها وقالت بخجل: أختي دابا أركان مقلق مني وبغيت نراضيه كيفاش ندير

أمينة: هادا ما كان ساهلا رجال كيحماقوا على لمرا لي كتهتم بيهم ساهلا أصحبتي باش ترضيه

إسلام بعدم فهم ردات:كيفاش ما فهمتش ؟!

أمينة زفرات بجهد وقالت : ساهلا أصحبتي لبسي شي حاجة قصيرة وتأنقي وتعطري ليه ديري شويا ديال لمكياج وتقربي منوا وهانتي غتشوفي دغيا غينسا علاش مقلق منك، رجال راه هاد شي لي كيبغيوا

إسلام حركات راصها بإجاب :نتي خطيرة أمينة والله فكرة زوينة غاندير بيها"كمشات حجبانها بقلق"ما تقولي لتوبة والوا غتشطن على والوا الى سمعت أركان مقلق مني

أمينة بتأكيد نطقات :نوو كوني هانيا ما نقول والوا نخليك انا راه طالعا فوق واحد لكرسي بتخبية تنقلب فوق لبلاكار على سباغة خباها عليها كريم الله يسمح ليه

إسلام كمشات حجبانها بخوف و قالت : ناري رضي لبال لراصك عندك طيحي

أمينة بخفوت ردات وهيا حاضيا لباب لا تحصل :ولا ما تخافيش عليا انا موالفا سيري خليني نقدي شغلي

قطعات مع أمينة وتوجهات لبلاكار جبدات منوا شوميز دونوي في الأسود....وخدات فوطتها دخلات لدوش نيشان

غسلات شعرها مزيان ودوشات بي فاندوش ديال لفاني طرفات حالتها وخرجات كتشعل نشفات جسمها بفوطة مزيان ودهنات لحمها بكريم ديال دراري صغار رطب ليها داتها وزادت بياضت كتر لبسات شوميز دوني منوا لحمها مع سليب ومن لفوق زادت عليها بينوار في الأسود طويل وسندالة عالية في الأسود

سيشورات شعرها وحطات ميكاب خفيف مع حلاقات دائرية ورشات من لبرفان ديالها تقبلات مع لمراية وحشمات من راصها دورات عليها لبينوار تكمدات بيه وفور ما سمعت صوت وقوف سيارة أركان قدام لباب قلبها بدا تيضرب بقوة غيخرج من بلاصتوا ووجها تصبغ بالأحمر ....

دخل لرياض مرتدي بدلة رسمية عبارة عن كوستيم أسود مع صباط أسود ومرجع شعروا لور ،وريحة لبرفان ديالوا سبقاه خاشي إيد في جيبوا والأيد الأخرى هاز بيها ساشيات توجه نيشان لغرفة جداتوا دق في لباب بعد تواني فتحات ليه بوجه بشوش قالت:

_ولدي

أركان تحنى قبل إيديها بحب وقال:لباس عليك الحاجة

الحاجة عنقاتوا بحنان وعلى وجها راسمة إبتسامة كبيرة ردات عليه:

_أنا بيخير الحمد لله أحبيبي

بعدات منوا وقالت :

_ولدي دخل بغيت نهضر معاك

أركان حرك راصوا وبتسأل نطق: لحاج ما كينش

الحاجة خديجة بعدات ليه يدخل و قالت:مشا لغرفة الصلاة اولدي يقرا لحزب

أركان دخل هوا وياها لغرفة حط زوج صاشيات فوق سرير وقال:

_هادوا شي حويج جبتهم ليكم معايا من كازا

الحاجة خديجة جلسات في طرف ناموسيتها ببتسامة مزيناها ردات:

_الله يرضي عليك أولدي "شارت ليه باش يجلس وقالت"أجي جلس حدايا أركان بغيت نقول ليك شي حاجة

أركان جلس حداها بهدوء مفرق رجليه ويديه حاطهم فوق فخضوا متكي عليهم بتسأل نطق: تفضلي يسمعنا خير

الحاجة خديجة كمشات حجبانها وقالت: ولدي حشومة تخلي مرتك بوحدها وتمشي حتى من شعر لعسل ما خططتوا ليه لبنت مزال عروسة جديدة خاصك تكون في جنبها وحداها

أركان زير على يديه وساط بجهد تبسم فوق خاطروا وقال: كانت عندي خدمة ضرورية الحاجة ما كانش عندي وقت باش نديها معايا

الحاجة خديجة بعدم رضا قالت :ولوا اولدي مرتك هيا لولة ماشي حنت لقيتي لبنات ساكتا ليك وحانيا راص لي قلتيها ليها كتقول بيك بسم الله تمشي وتخليها عيب اش بغيتي ناس تقول عليكم

أركان شابك يديه مع بعض عض خدوا من لداخل وبقا كيستامع ليها بإصغاء بملامح ممحية قال:

_عندك الصح الحاجة

الحاجة خديجة تبسمات جنب ونطقات: ايوا الى عندي صح فرحنا اولدي بشي وليد ولا بنيتة يعمر علينا هاد رياض هاهوا خوك قريب يولي أب ومكرهناكش حتى نتا دير بحالوا

أركان سرط ريقوا حتى تفاحة أدم تحركات في حلقوا جمع لوقفا وقال بصوت رجولي خشن:

_نخليك ترتاحي غنمشي ندوش تصبحي على خير

الحاجة خديجة بتنهدة طويلة وقفات طاوية يديها عندها بقات متبعا ليه لعين حتى ختفى من أمامها...

توجه نيشان لجناح ديالوا دق في لباب وخا كان مفتوح سمع كلمة "دخل "بصوت أنثوي رقيق خفق قلبوا بشكل عجيب داخل صدروا..

دفع لباب ودخل لقاها واقفا أمام نافدة وخصلات شعرها الناعم تتطاير بسبب الهواء

وريحتة لبرفان ديالها ماليا لمكان كامل

درات لعندوا راسمة إبتسامة جدابة على محياها لتقاوا نضرتهم ببعض سهاوو للحضات طويلة بقا كيتأمل فيها وعينيه تيبريوا طلعها من لتحت لفوق و ملي شاف لبسها الجريء تصدم وعينيه خرجوا عض فموا من لداخل وزير على يديه كابح نفسوا باش ما يقربش منها الأقصى حد وهيا بهاد لحويج لي لابسا زادت على ما بيه بقا حاضيها وتلف ما عرف واش يتقدم خطوة للأمام ولا يرجع لور دوخاتوا

إسلام رجعات شعرها لور وفيقاتوا من سهوتوا بقولها:

_سلام توحشتك

أركان تبهض ما عرف ما يقول زير على يديه وملامحوا تحولوا لصرامة :

_بيخير

إسلام قربات منوا من بعدما حركات راصها بإجاب وقالت:

_وليت بيخير ملي شفتك

هزا راصوا مصدوم من جرئتها في الكلام شاف فيها بمعنى من نيتك و بتسأل نطق:

_أش هاد لبس ؟!!

إسلام تبسمات جنب وقالت:مالهم كيف جاوك زوينين وزيدن حال سخون بزاف اش بغيتيني ندير نموت صهد

أركان ببتسامة مزينة ملامحوا رد عليها:نهار لول لي جيتي كنتي كل نهار مغلفدة كيف لبصلة "بغمزة قال"وليوم اش وقع ؟!

إسلام حنيكتها ولاوا حمرين سرطات ريقها وقالت:ما واقع والوا عجبوني ولبستهم وزيدن مالي انا شريتهم باش نخليهم في لبلاكار حتى نشرف عاد نلبسهم ماشي معقول دايا غير شوفني مزيان "بدات كتحرك يمين ويسار بحال شي عارضة ازياء وقالت "كيف جيتك زعما ما جاوش معايا غير شوف مزيان

بقا متبعا ليها لعين وفي كل مرة كتحرك قلبوا كيتهز ببتسامتها ساحرة وشعرها ناعم لي ما كرهش يشدوا بين يديه ويستنشقوا من الأعماق وجدها ناصع لبياض كيلمع جابت ليه تمام قشر فموا من لداخل وتجهلاها بزز منوا..

خلاها كتعيوج و جلس فوق سرير منزل راصوا الأرض ما بغاش يشوف فيها بقا مدارب مع ساعتوا تيحيد فيها متوتر

إسلام ما عجبها حال سرطات ريقها والخوف غيقتلها مع داك بغات ديرها في يد الله يا ربحة ولا دبحة ولي ليها ليها كاع داك شي لي شافت في الأفلام الهندية بغات تطبقوا حيدات لبينوار بقات غير بشوميز دونوي والحشمة قتلها وجها ولا حمر بلا قياس

قربات منوا وقالت بدلع في صوتها:خليني نعونك

ما خلاتش ليه مجال فين يتكلم ولا يهز راصوا بسرعة جلسات فوق رجليه وشدات ليه من معصموا بدات تحيد ليه في ساعة من يدوا وقالت بصوت رقيق:

_كيف داز نهارك

أركان صوتوا ختفى غير شكلها لمغري قداموا ملمس إيديها ناعم سالاوا معاه

إسلام حيدات ليه ساعة من يدوا حطاتها جنبوا فوق سرير ولافيست عوناتوا يحيدها وهيا جالسة فوق رجليه بدات كتحل ليه في سدايف لقاميجة وعينيها في عينيه وقالبها كيضرب بجهد بالخلعة راص تيقول ليها اش كديري وراص اخر تيقول ليها ديري اي حاجة لمهم راجلك ما تخليهش يطلقك

أركان كمش حجبانوا بزوج وبصوت مبحوح نطق : اش كديري "هوا ما كرهاش تبقا لاصقا فيه طول لعمر لكن الإهانة لي قاست رجولتوا خلاتوا بزز منوا يقول" نوضي تكعدي..

إسلام معرفات ديك لجرائة منين جاتها بسرعة دورات إيديها على مأخرة عنقوا قرباتوا ليها وقطعاتوا بقبلة جريئة على شفايفوا خلات دقات قلبوا تسارع بشكل غريب صدماتوا ...

قبل ما يبعد منها زادت قربات منوا حتى تخشات في سدروا لعريض دورات إيديها على عنقوا عنقاتوا بجهد بحلا خيفاه يخونوه ليها من بين يديها...

أركان بين أحضانها دافئة حس بواحد راحة لا مثيل لها بدون شعور حط شفايفوا على عنقها طبع قبلة حنينة جابت ليها تبوريشا

دون أي كلمة فقط يديه وإحساسوا لي تيحرك فيه بعدها منوا ودور درعوا على خصرها جرها ليه كتر والإيد الأخر هز بيها خصلات شعرها الأسود ستنشق ريحتوا بشوق خشا صبعانوا دفنهم في راصها

قرب ليها حتى أنفاسوا تخلطات مع أنفاسها هبط بشوي لشفيفها يتدوق لدة طعهم لي تحرم منهم طول هاد لمدة ناسي لعالم وناسي نفسوا قبل ما يحط شفاه ديالوا فوق ديولها قطعاتواا

إسلام خشات يديها في سدروا و بتراجي نطقات:

_سمح ليا

أركان فور ما سمع كلامها قلبوا خفق بشدة وعقلوا حبس ما عرف راصوا حتى كيفاش سمح لنفسوا أنه يمسها وهيا قلبها و عقلها مع وحد أخر بسرعة جسدوا تصلب حيديها من فوق منوا او وقف ساخط تحنى جيهة لبنوار ديالها لاحوا عليها وقال:

_أخر مرة تلبسي هاد شي إسلام

إسلام تبعاتوا عنقاتوا من ضهروا ودورات يديها على خصروا ونطقات بصوت مكسور:

_ما تخلاش عليا عفاك

أركان زير على يديه حتى عروقوا برزوا أكتر كمش حجبانوا بعصبية قال:

_بعدي مني

إسلام طاحت دمعة جنب عينيها بحرقة قالت: لا ما غنخليكش تمشي

أركان دار لعندها معصب كيفور شدها من درعها كرز عليها ومن تحت سنانوا نطق بعينين حمرين :

_نتي مرأة كدابة داك شي علاش أنا ما بقيتش كنبغيك كرهت ديك لكلمة ديال زبل لي عتارفت ليك بيها نهار لول "زاد ورك على درعها حتى تألمات" أخرى مرة دوري بساحتي ، بعد عام من دابا كل واحد غيمشي في طريقوا أبنت الناس"دفعها ودخل لدوش سد عليه"

إسلام توقعات منوا أنه غيعامها بهد شكل خصوصا ملي مشات لسجن عند سفيان عرفات راصها هيا لي غالطا ودارت في بالها بلي غتسمع من عندوا كلام ممكن يجرحها ولكن هيا حبها ليه فاق كل الإهانات ولا عندها هوا لمضاد من لمعيور...

جلسات في الأرض شادا من دراعها لي قصحها دلات شفتها لتحتانية و قالت بجهد باش يسمعها :

_وانا مزال بنت أشمن مرأة كتقول عليها كون بعدا غير قديتي لغراض ليوم ما عليش ديك ساع أ نسمح ليك في هاد لكلمة...واه كتهضر بلا عقل"كمشات حجبانها بألم" بغيت غير نفهم واش عندك يدين ولا حديدات ديما تتزوق ليها دراعي من جناب حشومة عليك دابا غيوليوا زرقين بسبابك ...

جلسات فوق سرير من بعد ما لبسات عليها بيناور لي رما عليها أركان بدات كتعض في صبعانها من توتر حشمات من لهضرة لي قالت ليه ما عرفات فين تخبي وجها تكمشات في بلاصتها جالسا وحاضيا باب لحمام عقل تيقول ليها راه غيكون سمع وعقل أخر تيقول لعكس ...

فيقها من سهوتها خروج أركان من دوش لاوي فوطة على نصوا لتحتاني ولفوق عريان عضلاتوا بارزة وملامح وجهوا جامدة سرطات ريقها بخجل بقات متبعها ليه لعين بطرف عينيها بإعجاب ما بيناش وقلبها تيضرب بجهد

أركان دار ناحيتها رمقها بنضرات حادة وهيا تنزل عينيها بسرعة، تم توجه لبلاكار ديالوا، خدا منوا بوكسور و شورط أسود قصير مع تيشرت في الأبيض ،ودار عاطيها بضهروا لعريض ،دخل لغرفة تبديل يلبس فيها حويجوا خلاها مصدومة كتسرط في ريقها ما متيقاش أن هاد راجل كلوا بطولتوا وتجريدتوا وسامتوا ، راجلها لي كانت ديما هربانة منوا فينما كتلقى فرصة ...الحصول بنادم ما كيحس بنعمة حتى كيخسرها....

بعد لحضات خرج مرتدي تيابه و بعض الخصلات الفازكِين من شعروا نازلين على عينيه وحجبانوا لمعقودين وملامحوا لحرشة عاطياه جادبية خاصة...

قرب من ناحية إسلام حتى دارت ليه بلاصة تحنا لعندها حتى قرب وجهوا من وجها وهيا تغمض عينيها كتسناه يبوسها وهوا يصدمها خدا مخدتوا لي مورها وتوجه لبلاكار خدا منوا ليزار وتوجه لفوتاي تكا فيها خلاها غير كتشوف ما ممسدقاش...

إسلام بقات كترمش بعينيها غمضات عينيها وعود حلتهم عاد نطقات:

_علاش غتنعس تما ؟ هاهيا بلاصتك

أركان دور وجهوا ناحيتها وقال بصوت رجولي خشن: بغيت

إسلام كمشات حجبانها وقالت :ولكن غيدرك ضهرك فوق لفوتاي

أركان غمض عينيه و رد ببرود: تصبحي على خير

إسلام زيرات على يديها ودمعة تحجرات ليها جنب عينها بتسأل قالت:

_علاش ما بغيتيش تنعس حدايا

أركان دار لجيهة الاخرى عاطيها بهضروا بنفس نبرة رد عليها :قلت تصبحي على خير

إسلام وقفات على طولتها قربات ناحيتوا ونطقات بتأكيد:

_بغيت نهضر معاك

أركان من تحت سنانوا نطق :حتى لغدا

إسلام جمعات يديها عندها وبإصرار قالت: لا دبا بغيت نهضر معاك عفاك..

أركان زفر بجهد و ناض جلس مفرق رجليه بتسأل قال:

_شنوا بغيتي؟!

إسلام جلسات فوق طبلة أماموا بقات كدور في عويناتها كتشوف فيه تسرط ليها لسان ما عرفات ما تقول دوخها غير ريحتوا كتسالي معها

أركان هز حاجبوا : هاد شي علاش منوضاني !! غتبقاي تأملي فيا

إسلام سرطات ريقها وتلعثمت الكلمات على لسانها من شدة الخجل والحرج...

أركان حرك راصوا وقال :انا كنسمع هضري اش عندك ؟!

إسلام قفزات و بعينين تيلمعوا قالت:

_تاصل بيا كريم ليوم

قاطعها أركان مغدد سدروا ولا يطلع وينزل بالعصاب غير سمع إسم كريم تسمكوا ليه لودنين وعينيه حماروا زير على يديه وتكلم وهوا ضاغط على مخارج لحروف:

_ شكون هاد ولد لق**** تاني هضري ديك نهار سفيان وليوم كريم وغدا شكون هاه

إسلام نزلات دمعة سخونة من عينها على شكل خط على حناكها هضرتوا حرقاتها في قلبها جمعات لوقفة و بنبرة صوت منخفضة نطقات:

_كريم راجل أمينة صحبتي

أركان ما تحملش يشوفها كتبكي بسبابوا،

زفر بجهد معصب من نفسوا شافها غاديا عاطياه بضهرها وهوا يشدها من يديها بصوت مكسور قال:

_سمحي ليا إسلام ما قصدتش

إسلام بسرعة ترسمات إبتسامة على محياها وختفات لمهم عندها من هاد شي لي وقع أنها تأكدات بلي هوا مزال كيغير عليها وكيبغيها بقات واقفا كتشوف في فراغ...

أركان ببتسامة مزينة ملامحوا نطق بتسأل:

_ شنوا بغا؟

إسلام دارت لعندوا بعينين تيلمعوا قالت بحماس:

_خويا كريم قال ليا راه شي صاحبوا كوميسر بغاني نضم عرس ختوا حنت كان حاضر في عرس أمينة وعجبوا تنضيم ديالي وأنا قلت ليه حتى نتشاور معاك بعدا الى بغيتي ديك ساع نضموا

أركان برضا نطق:مزيان مبروك عليك

إسلام صغرات عينيها وقالت بتردد: نفهم من كلامك أنك موافق

أركان جابت ليه ضحكة بملامح الخوف لي على وجها حرك راصوا بإجاب وقال :معلوم علاه أنا ديك لقاعة لمن شريتها

إسلام تلاحت عليه عنقاتوا بجهد ونطقات بفرحة:

_شكراااا بزاااف

أركان تصدم و بعدها عليه تبسم جنب وقال :

_ هادا واجب بقا شي حاجة أخرى ؟

إسلام حركات راصها بإجاب ونطقات بتوتر وحبات العرق متكونا في جبهتها: قبيلا فاش دخلتي لدوش واش سمعتيني شنوا قلت

أركان هز حاجبوا ونطق بتسأل:علاش واش كنتي كتسبي فيا؟

إسلام تنهدات براحة وببتسامة قالت:لا أنا أصلا ما قلت والوا أشنوا غنقول كاع ههه ما قلت والوا غير نسا

أركان رمقها بنضرات شك و رجع تمدد فوق لفوتاي من بعد ما قال:طفي ضوء

إسلام عينيها غرغروا من تجاهلوا سرطات ريقها ودورات عينيها لجهة لأخرى وهوا يجي نضرها في صاشيات لي جاب أركان بسرعة وقفات تمشات نحيتهم مدات إيدها باش تفتحهم او وقفات خافتوا لا ينوض ليها سرطات ريقها ولفضول قالتها باغا تعرف شنوا فيهم دورات راصها لعندوا ونطقات بتسأل:

_أركان هاد شي ديال من؟

أركان جوبها مغمض عينوا :

_شنوا هوا؟

إسلام بإصرار قالت: وحل عينيك باش تعرف كنهضر على هاد ساشيات لي فوق طبلة ديول من؟

أركان فتح عينبه ورجع سدهم بتأكيد قال:ديولك ألالة غير هنيني

إسلام عينيها وساعوا هزاتهم بالخف حطاتهم فوق ناموسة خواتهم كلهم وغير بان ليها شكلاط فتحاتوا وبدات كتاكل بشهية وكتبنن وتصدر أصوات أركان فتح عينيه بقا متبعها خلسة وبتسامتوا غاديا وكتوساع فرح من قلبوا من شافها كتضحك فرحانة

إسلام سالات لباكية لولة و قالت:هاد شكلاك لديد امم شكرا بزاف

وقفات على طولتها كتلحس في صبعانها بدلع قالت :

_ أركان وااا أركان تاخد شويا

أركان مغمض عينيه بصوت هادئ نطق:

_ مابغيتش غير خليني نعس

إسلام حركات راصها ونطقات:وأجي تنعس في بلاصتك

أركان على نفس لوضع قال:رجعنا لنفس لموضوع تاني

إسلام بلعات ريقها وببتسامة نطقات: حشومة مول لجناح ينعس معنكش اجي لبلاصتك

أركان قتلوا نعاس بصوت مبحوح رد عليها:نعسي فيها غير نتي خليتها ليك

إسلام بإصرار:وااا أركان عفاااك

أركان قاطعها بجنوون: باركاااا خليني نعس ولا غنوض نمشي لصالون "ساط بجهد " ما كتسكتيش سارطا كاسيطا

إسلام نزلات راصها الأرض بخجل ،تمشات بكتاف طيحين لبلاصتها بعدما قالت :سمح ليا تصبح على خير

تكات في بلاصتها ما عجبها حال عوجات فمها وبدات تغني ضد فيه ما ديرا حساب لكلمات الأغنية لغريبة:

_لا تكبر شان لي ما عندوا قيمة يسحاب راصوا فلان وبغا يولفها ديما ....الخ

أركان صبر حتى عيا وساط بجهد و بصوت رجولي خشن نطق:جمعي فمك حسن ما نوض نهرسوا ليك

إسلام تخشات تحت لمانطة بخوف و تنهدات من الأعماق :هاهيا ساكتة مابقا حد يهضر معاك

واقفا في لكوزينة لبسا فراشة في الأخضر غامق وجنابها في الأزرق جامعا شعرها على شكل ديل حصان وحاطا حلاقات دائرية في ودنيها ولبسا ساعة جديدة لي جاب ليها أركان لبارح...

خدات حوتة كبيرة قشراتها وغسلاتها ودارتها في لاطا بعدما درات فيها التوابل ولحامض دخلتها لفران لوصفة كلها تبعتها من الإنترنيت ساعة وهيا واقفا حتى حويجها لصقوا عليها بالعرق بسبب حرارة لمطبخ خلات لحوتة كطيب وخدات روز سلقاتوا هوا لجزر وبطاطس من بعدما قطعاتهم ،وبدات كتصوب في صلاد ساهية كتصوب في لغدا حتى تفكرات ماطيشة خاصاها توجهات نيشان لتلاجة...

غير حطات إيدها غتفتحها وهيا تحس بإيدوا تحطات فوق إيديها وفتحات تلاجة فور ما حسات بيه قلبها خفق بشدة

درات لعندوا مصدومة لقاتوا أركان لابس سرفيط وعضلاتوا بارزة من شكلوا باين كان تيمارس رياضة...جبد قنينة ديال لماء بارد فتحها وكب منها شويا على شعروا وحرك راصوا يمين ويسار حتى داك لماء كامل ترش عليها سرطات ريقها بخفة وبقات متبعاه بعينيها لي كلهم كيشعوا بالحب من جيهتوا

أركان تبسم جنب وحرك راصوا بمعنى مالك

إسلام بقات ساهية حتى شمات ريحة لحراق عينيها خرجوا، بسرعة خنزرات فيه و من تحت سنانها نطقات:

_أخر مرة دخل عندي لكوزينة "كمشات حجبانها بخوف" دبا لحوتة غتكون تحرقات بسبابك

أركان طلع حاجبوا وقال بستهزاء: وأنا قلت ليك بقاي مقبلاني اش كتسناي جري عتقي غداك

إسلام مشات تجري لبسات في يديها لي كون و حلات لفران لي ولات خارجا من عجاجة ديال دخان ،خشات يدها وجبدات لاطا حطتها فوق لبوطاجي لقاتها كلها تشوطات دموعها نزلوا بسرعة عضات فمها من لداخل وقالت بصوت باكي:

_هننن كلشي تحرق صافي كلشي ضاع باش غنغديهم ليوم بطون ولحرور هئ هئ هئ ليوما تشفا فيك نجلاء أ إسلام وجدي راصك غيضحكوا عليك بالعلالي

أركان جابت ليه ضحكة مع حنيكتها مزنكين ودموعها ولات تبان كيوت ما كرهش ياكلها شرب لماء وقال: تهدني انا عندي لحل

خشا إيدوا في جيبوا جبد منوا تيليفون دوز رقم من بعد ما جوبوه قال:

_سلام عليكم مطعم**** بغيت بسطيلة ديال لحوت كبيرة او وحدة ديال دجاج او.....الخ

إسلام عينيها وساعوا بلعات ريقها ونطقات بعدم رضا : لا ما نقدرش نحط ليهم داك شي ماشي انا لي مصوباه ما غنكدبش عليهم

أركان ضربها لنيفها بحركة خفيفة وقال:عادي هاد شي كيوقع لغدا تحركْ، لا سولوك قولي ليهم أركان لي طلب هاد شي

تبسم ليها و خرج من لكوزينة وهيا بقات متبعاه بعينيها حتى ختفى من قدامها تبسمات بدون شعور وخا حرقات لغدا ما بقاش فيها لحال...

° °•• دخل لغرفتوا توجه لبلاكار نيشان خدا لباس رسمي عبارة عن كوستيم أزرق لبسوا وحط لكرفاطا على عنقوا بقا مضارب معها شحال دور راصوا ناحية لباب كيتسنى فيها تجي تعونوا حتى دخلات لعندوا مزروبة كتبحت على شي حاجة مضيعاها

يوسف بتراجي نطق:حبيبة أجي عونيني نتي لي كتعرفي تصوبيها ليا

نجلاء لقات علاش كانت كتبحت هزات صاكها وقالت:سمح ليا لقيتيني مزربة ما نقدرش نعونك باي عمري

خرجات وخلاتوا مضارب وهوا عندوا إجتماع مهم حتى جا على مسامعوا صوت أنثوي رقيق :

_يويوا خليني نعونك

يوسف هز راصوا فيها رمقها بنضرات حادة :

_ لا غير شكرا أمروى

مروى قربات منوا حطات إيدها على إيدوا فوق لكرافاطا وهوا يجر إيديه بزربة من تحت يديها بدات كتقاد فيها وبعينين تيلمعوا نطقات:

_أنا غنصوبها ليك حسن من نجلاء" حركات راصها وقالت بصوت هادئ "شفتي كيفاش ما كتهتمش بيك همها لوحيد هوا راصها ختي أنانية ما كتبغي حتى واحد من غير راصها

يوسف رفع حاجبوا وقال بسخرية: هيا انانية ونتي شنوا أمروى "من تحت سنانوا نطق معصب"نتي أسوء منها كون كنتي محترمة ما غتهدريش على ختك بهاد طريقة

مروى وقفات على سباع رجليها حتى قربات منوا وقالت:

_أنا كنبغيك أيوسف حس بيا عفاك هيا ما كستاهلكش هيا وحدة مسخة سرقاتك من بين يدي

يوسف عينيه خرجوا بصدمة دفعها عليه ونطق بعصبية:

_اخر مرة تجبدي هاد لهضرة على فمك بقيت ساكت وما قلت لنجلاء والوا على قبل صحتها خفت عليها وهيا حاملا اما نشوفهك قدامها"ضغط ليها على درعها وقال "على قبل ختك لي كتهضري عليها بسوء أنا ساكت ليك

مروى دموعها بداو تينزلوا شلال من عينيها

رفعات صبعها وقالت بتحدير :

_غتندم الى تخليتي عليا ايويوا غتندم غير صبر عطيني غير شويا ديال لوقت وغنتبت ليك بلي نجلاء وحدة طماعة وانانية ما كتبغيكش كيهمها غير لفلوس ونضرة ناس ليها وديك لمجلة لي كل نهار كينشروا ليها صورتها في لغلاف ديالها باش تبان قدام ناس

يوسف دفعها من قداموا وخرج بعدما قال:

_مامساليش لهاد تافهات ديولك أمروى

مروى مسحات دموعها وقالت بحرقة:.

_كيفما خداتك ليا أنا غنرجعك أيوسف غنرجعك، كنبغيك بزاف

واقفا قدام نافدة في بيتها وخصالات شعرها تتطاير بفعل نسمات لهواء دافئة ، ملامح وجها خالية من أي تعبير لابسا فستان أحمر قصير وساهية كتفكر قربات من لمراية جلسات قدامها كتشوف في نعاكس صورتها ولكسوة لي لابسا فكرتها في حدث قديم و رجعات بيها لماضي قبل سنة ونصف

"فلاش باك"

داخل غرفة نوم راقية فراشها تركي كلوا في لون الزهري واضح من خلال شكلها أنها غرفة فتاة....

كانت هيا واقفة قدام بلاكارها حيرة مابين عدة فساتين تائهة ما عرفا ما تلبس حتي دخلات لعندها ختها لابسا فستان أسود طويل بلا أكمام رافعة شعرها لفوق وحاطا حلاقات طويلة تماشيا مع الموضة وكعب عالي ومكياج خفيف عاطيها جمال خاص كتبان كتملة لأنثوتة بمعنى الكلمة...

نجلاء كمشات حجبانها :مزال مالبستي هاكدا غنتعطلوا بزاف

مروى قبطات في دراعها وقالت بحيرة:ما عرفتش شنوا نلبس "شارت لفساتين لملقات على سريرها" قولي ليا إنا واحد غيجي معايا "عينيها لمعوا" بغيت نبان زوينة قدام يوسف

نجلاء تبسمات جنب وردات عليها :اي حاجة لبستها حبيبتي غتجي معها صبري نشوف اممم لبسي هادا غيجيك زوين

مروى هزات لفستان بين يديها و صغرات عينيها بعدم رضا ردات: هادا حمر لونوا مجهد اختي مال ليوم عيد لحب

نجلاء حطات إيديها على كتف ختها وقالت بإصرار:

_غيجيك واعر واش ما كتيقيش في دوقي

مروى عنقتها فرحانة:لا ختي بالعكس نتي عارفاني اي حاجة عجباتك كتعجبني حتى أنا مي أنا عجبتني هاد لكسوة لي لابسا

نجلاء رفعات حجبها : من نيتك ،أخر مرة تحطي عينيك على شي حاجة ديالي لبسي لي هادا دغيا

مروى خدات لفستان لبساتوا بعدم ريضا ومن بعد جلسات قدام لمراية كتقاد في شعرها وتوتر لاعب عليها تبسمات جنب وقالت:

_أنا خيفا بزاف لا ما يعجبكش يوسف أختي هوا راه زوين بزاف وعندوا عضلات بحال أبطال الأفلام وشخص محترم وداخل سوق راصوا ،تصوري عينوا ما عمروا مهزها فيا ديري اعز صديقة كيتيق فيا في الأمور لي كتخص لخدمة

نجلاء قطعاتها وبتأكيد نطقات:الى ما عجبنيش أحبيبة غاديا تبعدي منوا بزز منك "قدات حلقها وقالت بتنهدة قصيرة" سربي راه شوقتيني نشوف هاد لمدير ديالك كيف داير

مروى خدات لعكر بدات تحط منوا وقالت وهيا كتشوف في ختها من لمراية:

_والى عجبك يوسف غتقبلي باش نتزوج بيه

نجلاء عوجات فمها وقلبات عينيها بنبرة صوت حادة نطقات: إلى كان على دوقي، حنت أدوقنا حنا بزوج متشابهة غنقدر ناخدوا ليك

مروى حلات فمها وعينيها وساعوا بصدمة بخوف نطقات:

_أش كتقولي ؟!!

نجلاء بتسمات بخفة ونطقات :غير كنضحك نتي عرفاني كيفاش ديرا ولا لا أختيتوا

مروى من بعد ما دارت لمسات الأخيرة على مضهرها ورشات من لبرفان ديالها وقفات مقابلا مع ختها ونطقات:

_أنا متوترة بزاف شنوا رائيك أختي نصارحوا بمشاعري تجاهوا

نجلاء خنزرات فيها وبعدم رضا نطقات :أش كتخربقي ديري قيمة لراصك حنا دبا غادين لحفلة لي منضما شريكة ماشي في لحب دابا وزيدن خليني نتعرف عليه ونعرف اش تحت راصوا ومن بعدها نقول ليك أش ديري

° °بعد عدة أيام جالسا في جردة لفيلا كترتاشف في كاس قهوة وراسمة إبتسامة كبيرة على محياها حاطا مجلة قدامها كتقلب فيها من صفحة لصفحة حتى وقفات عليها كتنهج باين من مضهرها أنها كانت كتجري

نجلاء قفزات وبعصبية نطقات:غير بشويا عليك مالك قفزتيني

مروى بحماس نطقات:مدرا أختي ما قلتيش ليا كيف جاك يوسف هضرتي معاه عطيني رائيك أنا كنتيق فيك غير نتي "بحزن "أما بابا نهار ومطال وهوا تابع مرتوا ما عمروا ما سول فيا

نجلاء رتشفات من كاسها ونطقات ببرود: بعدي منوا ما يصلاحش ليك

مروى تسمكوا ليها لودنين طاحت دمعة جنب عينيها وبإلحاح قالت:

_علاش أختي كتهضري على يوسف بهاد طريقة هوا راجل كامل ما فيه ما يتعاب

نجلاء بتسمات بمكر وبتنهيدة طويلة وقفات:عقليتوا قديمة وكبير في سن ما يصلاحش ليك أمروى نسايه نتي تستاهلي شي واحد لي يكون مرح و قريب ليك في سن ماشي واحد لي نهار وماطل وهوا خاشي راسوا وسط ملفات

قالت هضرتها وطلعات لبيتها خلات ختها كتبكي ما متيقاش...هيا ديما كتشوف يوسف شخص مثالي علاش نجلاء هضرات عليه بهاد سوء ما فهماتش...

_"الحاضر"

مروى زيرات على يديها حتى ضفرانها ترسموا في راحة يدها لداخل أجهشت في لبكاء وبحرقة في قلبها نطقات: عرفتك عليه بنيتي أختي وعطيتك نمرتوا باش تعرفي اش تحت راصوا ،ونتي أشنوا درتي دغيا لويتي عليه وخديتيه ليا ما عمري ما غنسمح ليك أنجلاء ما عمري .

مروى وقفات على طولتها لاحت كلشي في الأرض من لي بغفان ولمكياج ديالها وبدات تبكي وضحك :هاه هههههه قالتي كبير في سن وعقليتوا قديمة وعلاش تزوجتيه علاااااش ....أنا لي حمارة تقت فيك ولكن دابا"مسحات دموعها " انا رجعت باش ناخد حقي "غوتات بجهد"رجاااعت

تحنات كتهز في زاج من الأرض تجرحات في يدها وبقات مكملا و ببرود نطقات:مروى نية لبريئة لي أي حاجة كتيقها قتلتيها أنجلاء قتليتها بعملتك الله ياخد فيك الحق.."مسحات باقي دموعها ودم من صبعها لوت ليها وجهها جمعات لوقفة وقالت "وجدي راصك غتندي أبنت ميمتي غندمك على نهار لي تزاديتي فيه غير تسناي

جالسا وسط صالون في دارهم والفرحة غمراها لابسا سروال جينز مع قميجة طويلة في الأسود وحاطا ميكاب خفيف وشعرها جمعاه جنب مبينها صغر من سنها ،و جنبها جالس أركان لابس سروال جينز أزرق مع قميجة كلاص في الأبيض وحاط ساعة في يدوا ،مرجع شعروا لور ،تيبانوا كوبل مثالي

رحمة ببتسامة نطقات:مرحبا بيك أولدي"مدات ليه طبسيل لحلوة"تفضل أولدي ما كلتي والوا

أركان خدا حلوة كعب غزال حترام ليها وقال:

شكرا ألالة رحمة

أمير جلس في حضن إسلام تيدور في عويناتوا يشوف في أركان ويعود يشوف إسلام وحجبانوا معقودين لوسط

إسلام قشعاتوا بتسأل نطقات : أمير مالك ؟

أمير زاد كمش حجبانوا كتر وبتردد قال: نتوما كدابين "شار ل أركان "وبالاخص نتا

أركان بعدم فهم نطق: أنا مالي آسي أمير

أمير جمع يديه عندوا ونفخ شفايفوا عاد نطق بتأكيد:

_نتا كداب ما تبقاش تهضر معايا

توبة حمرات فيه ومن تحت سنانها نطقات بعصبية:كون تحشم أش هاد دسارة ديال والوا هضر مزيان مع عمك

أركان ببتسامة مزينة ملامحوا رد عليها:

_لا غير خليه ماعليش

قرب من أمير قبط ليه في يديه وقال بتسأل:

_سي أمير مالك غضبان مني شنوا لي خلاك ما تبغيش تهضر معايا

أمير دموعوا داروا خط على حنيكاتوا لمنفوخين بصوت باكي قال:

_نتا كداب ديتي ليا خالتي وما جبتيش ليا بنت علاش كدبتي عليا علاش

أركان سرط ريقوا حتى تفاحة أدم تحركات في حلقوا دور وجهوا عند إسلام و زير على يديه ،هز كاس اتاي رتاشف منوا وزفر بجهد

إسلام مسحات ليه دموعوا بغات تلفوا

بهضرتها ببتسامة قالت :

_عرفتي شنوا امم نزلت فيرفاير في تيلي عندي تبغي تلعب

أمير مسح دموعوا بالخف ونطق ببتسامة: ياي شكرا بزاف عطيني نلعب عفاك

إسلام باستوا في حنيكاتوا و مدات ليه تيلي وبصوت هادئ قالت : هاك ديه لبيت لاخر ولعب اوك.

توبة بحرج نطقات: سمح لينا أنسيبي ما عرفتش مالوا راه لي سمعها كيشدها

إسلام من بعد ما شافت في أركان لي ساكت حركات راصها وقالت: معليش أختي هانيا هما هادوا دراري صغار وزيدن أمير ما قال حتى كلمة لعيب

تسمع صوت دقان في لباب وقفات توبة على طولتها كمشات حجبانها وقالت:

_غنمشي نشوف شكون في لباب

أركان دور وجهوا ناحية عمر وبصوت رجولي خشن نطق :ايوا هيا قريب غادي تسافر

عمر حرك راصوا بإجاب وقال :بعد يومين غنمشي لرباط

أركان بجدية نطق :الله يسر ليك لخدمة كتبغي الإنضباط جمع راصك

° °توبة حلات لباب وغير شافتها واقفا قدامها كحلات بالعماء ،عوجات فمها وقالت :

_صبحنا على الله وملائكة الرحمان أش بغيتي أ هناء

هناء حركات راصها ونطقات منزل راصها الأرض :كيف ديرا لباس أختي؟

توبة عينيها وساعوا من صدمة من كلمة "ختي "رسمات ضحكة صفراء على وجها وردات:

_ لباس الحمد لله

هناء بتسمات جنب وقالت بفضول :عندكم نسيبكم ليوم ،شفتوا مني دخل زوين بزاف ماشاء الله

توبة قلبات عينيها ودربات إيد على إيد:ايه أختي كين الله يحفضوا من لعين "بغمزة نطقات"إيوا اش حب لخاطر ؟

هناء بتراجي قالت :أختي جيت نطلب منكم سماحة على وديت داك نهار في صراحة غلطت بزاف ماكانش عليا نعيرك بديك لهضرة

توبة زادوا وساعوا عينيها كتر بشك قالت:الله يجعلني نتيق، أشريفة إلى كنتي كتبوحطي أنا راه ديزين عليا أمثالك ما كنتيقش فيهم

هناء بتمسكن :اللسان مافيه عضم وبنادم كيغلط ولا لا ما تعرفي من هنا لغدا واش نفيقوا ولا لا بغيت غير نصفيوا لخواطر وندفنوا لي فات حنا بنات ليوم نساو لبارح اختي

توبة بتنهيدة طويلة ردات :إيوا على سلامتك ملي خرجتي من لحبس...الله يسامح

هناء صغرات عينيها:كنعتابر دابا من هضرتك انك سامحتيني حنا مصالحين دابا

توبة بتأكيد نطقات وهيا ضاغطا على مخارج الحروف:اييه مصالحين

هناء بتردد نطقات:الى ممكن نطلب منك واحد طلب عفاك

توبة بتسأل قالت:شنوا كين قولي؟!!

هناء بتراجي نطقات :تسالا ليا صولد أو بغيت ندير واحد لمكالمة ضرورية إلى ممكن

توبة دورات راصها ناحية لحانوت بان ليها حال كانت غتقول ليها سيري ديري صولد وهيا تصمت وستنتجات أن هناء ما عندهاش فلوس بتنهيدة قصيرة قالت:

_تسناي ندخل نيجبوا ليك

بعض لحضات قليلة خرجات لعندها فتحات تيلفونها لكود وحطاتوا في إيد هناء...

هناء فور ما خدات تيلي بين يديها بقات كتسنى في توبة تمشي ساعا هيا ما تحركاتس ليها من تم شافت حتى عيات ودوزات نمرة ديال باها وعينيها مرة مرة كتهزهم في توبة لي وقفا مسمرا ليها عند لباب ...

توبة جامعا يديها عندها عندها كتسناها تهضر بينما هيا واقفة جا على مسامعها صوت صريخ ولدها كينادي عليها تكلم لمها ما قدرتش تبقى واقفة شافت في هناء وقالت:

_يمكن باغيني على شي حاجة ضرورية أنا غندخل ملي تسالي عيطي ل أمير ياخد من عندك تيليفون

هناء داك شي لي بغات ، فرحات من قلبها حركات راصها بإجاب وفور ما لمحات توبة ختفات من قدامها جاتها فرصة دخلات لكونطا بحتات فيه على نمرة لي في بالها وغير ضهرت ليها جبدات تيلفونها كتباتها فيه وبتسمات بشر...

من بعد ما تعشات توجهات لغرفتها نيشان خدات دوش خفيف تحيد بيه تعب اليوم من بعدها توجهات لبلاكار ديالها خدات منوا بيجامة في لغوز نص كم بسروال فضفاض ترتاح فيها....

نشفات شعرها بسيشوار وخلاتوا مطلوق على راحتوا...من بعدها هزات كتوبتها حطاتهم فوق سرير جبدات رياضيات وجلسات كتحل في لمعادلات بينما هيا ساهية كتفكر في لحل قفزتها رنة تيليفونها هزاتوا بين يديها وفور ما قرات الإسم خدودها توردوا بخجل جمعات كتوبتها بزربة ومشات قدام مرايتها خدات كلوص في لغوز بارد حطاتوا ومشطات شعرها..عاد قبلات الإتصال لي كان عبارة عن أبيل فيديوا...

مراد بعصبية نطق: ساعة وأنا كنصوني عليك علاش ما جوبتيش

نرجس بتوتر جوبات:أنا كنت في لحمام سمح ليا

مراد ساط بجهد وقال :هانيا غير هوا أخر مرة تعطلي باش تجوبيني، نتي صافا الحب

نرجس رجعات شعرها مورا ودنيها ونطقات بصوت أنثوي رقيق:لباس الحمد لله ونتا بيخير

مراد عض خدوا من لداخل وبصوت مبحوح قال:اححح على صويتك وأشنوا تيدير فيا ، تمنيتك كون كنتي بين يديا دابا أعمري

نرجس ترسمات إبتسامة على محياها بسرعة نزلات راصها الأرض غتموت من لحشمة

مراد بتراجي قال : بغيت نطلب منك واحد طلب أحبيبة

نرجس حنيكاتها ولا مزنكين بخجل ردات عليه: طلب لي بغيتي

مراد بتمسكن قال:بغيتك تصيفطي ليا تصاورك يبقاوا عندي

نرجس كمشات حجبانها بستغراب: تصاوري !! ياك نتا شايفني، أصلا أنا عندي تصاور في الإنستغرام سير خودهم

مراد تفركَع عليها بضحك بعد تواني هز حاجبوا بمعنى من نيتك داويا وتكلم بنبرة صوت مقززة :أش هاد لكلاخ أنرجس أنا بغيتك تصيفطي ليا تصاورك بلا حويج "بغمزة نطق" بغيت نشوف منين غيرضعوا ولادي

نرجس تسمكوا ليها لودنين وعينيها وساعوا من صدمة ،بعدم فهم قالت: أشنوا كيفاش "رجعات نزلات راصها الأرض "أمم عيييب أمراد ويلي

مراد ضحك بستهزاء حك لحيتوا وقال بصوت هادئ :عادي أنرجس بلييز قبلي أصلا أنا قريب نجي نخطبك أش فيها إلى شفتك

نرجس حركات راصها بنفي بقات مصدومة كتشوف ما متيقاش أشنوا كتسمع

مراد هز إيدوا وراعها صبعانوا بخمسة وقال: عندك خمسة دقيق ما نفوتهمش...من بعدها الى ما صيفطتيش ليا تصاور غنعيط الأي بنت غتجي عندي كاملا ماشي غير تصاورها ونتي عرفاني أنرجس لبنات كلهم تيحماقوا عليا وغير كلمة مني يجيوا راكعين حتى لعند رجليا ويديروا أي حاجة باش يرضيوني...

مراد كمل كلاموا وقطع عليها خلاها كترمش ما ستوعباتش اش كتسمع قلبها خفق بشدة من خوفها عليه لا تخسروا... و فاش كتفكر أن مراد ممكن يكون مع غيرها كتبغي تحماق خصوصا انه شاب زوين بزاف وأي بنت تحلم تكون مع بحالوا...بالحق الجمال بلا أخلاق ما كيسوا والوا

وقفات على طولتها كتفكر قلبها تيقول ليها تصوري وعقلها تيرفض لبسات بانطوفتها ديال ميكي ماوس فيها ودينات هيا كتمشى وهما تيتحركوا ...

خرجات من بيتها توجهات لغرفة نجلاء حطات إيدها غتدقا في لباب وهيا تلقاه محلول دفاعتوا لقات نجلاء لبسا بيناو شفاف، جالسا فوق سريرها مغمضا عينيها وحاطا راصها على كادر ناموسية وإيدها حاطاها على جبهتها

نرجس ببتسامة قالت:ختي نجلاء بغيت نهضر معاك

نجلاء حلات عينيها وبنبرة صوت حادة نطقات:

_ مابنتش ليك جالسا نرتاح دارني راصي بزاف أنرجس شنوا بغيتي

نرجس جمعات بتسامتها وبلعات ريقها: اوك انخليك ترتاحي

نجلاء قدات جلستها و قالت: هضري أنا كنسمع

نرجس حلات فمها غتهضر وعود سداتوا

نجلاء قولي شنوا كين غنبقاو هنا حتى لصباح خوك مابقا ليه والوا ويجي

نرجس خدات شهيق وزفير سدات عينيها وقالت بزربة: في صراحة مراد قال ليا نصيفط ليه تصاوري

نجلاء رجعات سدات عينيها وقالت:هادا ماكان سيري صيفطيهم ليه وهنيني

نرجس صغرات عينيها: ولكن اختي هوا قال ليا نصيفط ليه تصوري"سرطات ريقها وبصوت ضعيف قالت "عريانا

نجلاء وساعوا عينيها بصدمة تكلمات مع نفسها :وهاد مراد طلع كَعما ساهل "حركات راصها وبتأكيد قالت"ساهلا سيري رسليهم ليه عادي ياك قلتي واعدك بزواج هانيا بب

نرجس تبسمات إبتسامة صفرة ونطقات بعدم رضا:ما غيوقع ليا حتى مشكل

نجلاء بتسمات بشر:نوو بب غير طمني وزيدن لبنات كلهم تيدروا هاكا مع لي تيبغيوا اوك وسيري خليني نعس...

خرجات من غرفة نجلاء كتفكر ومن خلال هضرت نجلاء جاها لموضوع عادي وخا قلبها ما ممرتاحش للموضوع دخلات لبيتها حيدات حويجها و تصورات صور لي قال ليها وهزات تيليفونها بيدين تيرجفوا رسلات ليه صورها عارية

في لمساء حوالي الساعة الخامسة مساءا جالسا جنب نافورة لي كتوسط رياض فوق لي فوتاي مع لبنات تيهضروا... ومن لجهة الأخرى جالس أركان بعيد عليهم لابس تيشرت في الأبيض مكروز عليه عضلاتوا بارزة مع سروال توب رمادي مقابل لبيسي لي فوق طابلة قداموا وكاس ديال لقهوة جنبوا ...حاط نضارات طبية على عينيه وملفات بين يديه و حاط سماعة لبلوتوت في ودنوا تيهضر بيها مع لبنى لي كتعطيه أخبار وأحوال شريكة ....

إسلام بتسأل قالت:لبنات كيف جاتكم بيتزا ديال لبارح في صراحة أول مرة انصوبها

نرجس حركات راصها ونطقات :امم لذيذة بزاف أختي عودي صوبيها لينا بليز إلى ممكن

مروى عينيها وساعوا حطات إيديها على فمها وقالت بفتخار :أول مرة تصوبيها واوا تنحييك نني طباخة ماهرة تبارك الله عليك ديك لبيتزا عجبات يوسف كال منها بزاف "كمشات حجبانها" إلى ممكن تعلميني نصوبها غنكون ممنونة ليك

إسلام سمعات إسم يوسف دخلها شك خصوصا ملي شافتهم لمرة لي فيتا ديزين من حداها بليل حركت راصها بإجاب وبتسأل نطقات:

_مروى ممكن نسولك ؟!!

مروى تبسمات جنب وقالت :مرحبا سولي

إسلام كمشات حجبانها بستغراب:في صراحة بغيت نسولك على ديك نهار شفت يوسف هازك بين يدوا كنتوا في لمكتب ديال أركان لفوق "سرطات ريقها" ما تخديهاش مني قلة صواب مي أنا غير بغيت نسولك

مروى تصدمات سرطات ريقها بصعوبة وحطات إيديها على ركبة إسلام وببتسامة صفراء ردات:

_اه ديك نهار ما جانيش نعاس مشيت جلست مع يويوا في لمكتب وملي بغيت نرجع لبيتي تلاوات ليا رجلي ما قدرتش نتمشى ويوسف عوني حتى وصلت لبيتي

إسلام كمشات حجبانها بقلق :ما يكون عندك باس ،مزال كضرك تبغي ندير ليك مساج بزيت

مروى حركات راصها بنفي:لا أختي شكرا بزاف أنا وليت بيخير دابا الحمد لله "شافت في لمجلة لي قدامها و قالت " شوفوا البنات خارجين موضيلات ديال لبيسات زوينين هاد صيف

إسلام نزلات عينيها لمجلة كتشوف هيا و مروى ويتحدتوا على لموديلات ويتناقشوا بينهم ، بينما نرجس ساهية كتفكر، لمحتها إسلام تبسمات جنب و بستغراب نطقات:

_نرجس مالكي واش عندك شي مشكل علاش ما كتشاركيناش

نرجس بلعات ريقها بصعوبة و قالت:لا والوا أختي ماكين والوا

مروى شارت لمجلة بعدما وجهات كلامها لنرجس:شوفي هاد لبيسة غتجيك فنة أنرجس

إسلام حركات راصها وبشك نطقات : ما عجبتينينش أنرجس، ما كتكونيش في لعادة هاكدا مالكي شنوا عندك

نرجس سرطات ريقها وبتنهيدة طويلة ردات: كنفكر في واحد صحبتي عندها مشكل

مروى بتسأل قالت:مالها مسكينة قولي لينا مشكلتها ممكن نعونوها

نرجس عضات شفتها لتحتانية وبشفايف تيترعدوا نطقات: في صراحة هيا كتبغي واحد لولد بزاف وهوا قال ليها تصيفط ليه تصاورها عريانة هيا رسلاهم ليه هيا كتيق فيه بزاف ولكن خافت من عائلتها لا تصيق لخبار

مروى وإسلام شافوا في بعضياتهم مبهوضين

إسلام شهقات بجهد وحطات إيديها على فمها ونطقات بعصبية :

_حمارة هادي كون كان تيبغيها ما غيقولش ليها تصور ليا لي تيبغي شي بنت من قلبوا غيحتارمها ويمشي يطلب إيدها لزواج ماشي يضحك عليها هاكا حشومة

قاطعتها نرجس:ولكن هوا تيبغيها ومواعدها بزواج

إسلام دورات راصها:كلهم تيدخلوا هكا نهار لول وملي تياخدوا لي بغاوا من لبنت كايكركبوها "قبطات في إيد نرجس" نرجس حبيبة نتي مزال صغيرة ما فاهما والوا بعض رجال شمايت تيتقربوا من لبنات على أساس كيبغيوهم من بعدها تياخدوا حاجتهم ولبنت كتبقى ضحية تيخرج ليها على مستقلبها كامل كنصحك تقولي لصحبتك تشوف كيفاش دير تمسح تصاورها من عندوا وتبعد منوا حسن ليها

مروى حركات راصها بإجاب :إسلام عندها لحق وما أكترهم أنرجس بحال والوا غدا ولا بعدوا يولي يهددها بيهم قولي ليها تبعد منوا

نرجس زيرات على يديها ودقات قلبها تسرعات بلخوف بشكل رهيب وجها ولا حمر بقات كدور وجها ما بين مروى وإسلام لي ملامح وجوهم جديين

مروى تبسمات جنب وقالت:لبنات شنوا بان ليكم نخرجوا نديروا شوبينج ليوم

إسلام هزات راصها عفويا وهيا تلقا نضراتها مع أركان بقاو تتيتبادلوا نضرات غافلين على الأشخاص المحيطين بيهم

مروى شافتهم حبسات ضحكة وغمزات نرجس نحنحات بشوي وقالت:

_احم احم الحب في الأجواء

إسلام حنيكاتها توردوا سرطات ريقها بخجل :

_شنوا على من كتهضري ؟

مروى تبسمات جنب ودورات راصها: الهضرة عليك ألي حادر عينيك هههه لمهم شنوا بان ليكم نخرجوا في لعشية

إسلام عينيها لمعوا بنبرة صوت هادئ ردات:

_أنتشاور مع أركان هوا لول الى بغا انمشي معاك

مروى رجعات شعرها مورا ودنيها و برضا نطقات:

_اوك على الله يخليك

توجهات نيشان ناحية أركان وقفات ليه عند راصوا جامعا يديها عندها وعويناتها لبنيتين تيلمعوا وهيا كتشوف فيه تربط ليها لسان

أركان بلا ما يهز عينوا فيها بتسأل قال:شنوا كين

إسلام بلعات ريقها وبتوتر نطقات:أركان بغيت نخرج

أركان حك لحيتوا لخفيفة من لتحت وقال بصوت رجولي خشن:

_ما مساليش دابا

إسلام دورات راصها عند لبنات مكمشا حجبانها وعود دوراتهم لعند أركان خدات شهيق وزفير وجلسات جلسة القرفساء قدموا وبإصرار نطقات بعدما حطات إيدها على إيدوا لي منزلها فوق فخضوا:

_وأنا بغيت نخرج عفاااااك خليني نخرج بلييز

أركان فور ما حس بلمسة إيدها دافئة هز عينوا فيها وهما يلتاقيوا نضراتهم مع بعض وكأن الوقت والزمن وقف عند هاد لحضة إسلام عياوو ليها رجليها من لجلسة لي ممرتحاش فيها كمشات حجبانها وقالت بصوت أنثوي رقيق:

_وعفااااك خليني نخرج لميمة والواليدة بغيت ربي يسهل عليك

أركان هز حاجبوا:كتعرفي طلبي

إسلام خرجات عينيها وبتنهيدة طويلة وقفات : مشكلة هادي معاك وشنوا بغيتيني ندير باش توافق

أركان رتاشف من كاس ديال لقهوة حتى تفاحة أدم تحركات في حلقوا بجدية قال:

_خليني نفكر

إسلام نفخات شفيفها وبعدم رضا قالت :أويلي على تفكر مالي قلت ليك يالله نسرقوا بنك

أركان جمع لميلفات ديالوا وسد لبسي حيد نضرات ديالوا زفر بجهد او قف دار لعندها وقال:

_تبعيني

إسلام دورات راصها عند لبنات و نطقات بعدما وجهات كلامها نرجس : نرجس خوك واش ديما دير هاكا ولا غير مرة مرة اويلي بقا ليا غير يديه ما بستهومش ...بزااف هاد شي اووو

بتنهدة قصيرة تمشات ناحية دورج غاديا وتخبط في رجليها ما عجبها الحال طلعات لجناح ديالها لقات أركان تيجبد في حويجوا قربات منوا وبعدم فهم قالت:

_شنوا كدير ؟!

أركان ساط بجهد :ياك باغا تخرجي تنجبد في حويجي باش نمشي معاك

إسلام عينيها وساعوا بصدمة حلات شفايفها وقالت:

_ ولكن أنا راه ما بغيتش نخرج معاك أنا ديرا مع لبنات مروى ونرجس بغينا نديروا شوبينج ليوم

أركان دار عندها بلعرض البطيئ خنزر فيها وبعدم رضا رد عليها:

_ياك قلت ليك بعدي من مروى راها متصلاحش ليك ، شحال قدي نبقا نعود ليك في لهضرة، نرجس حتى هيا خاصني نتحاسب معاها مروى بقاوو بعاد عليها

إسلام حركات راصها يمين ويسار :

لبنت داخلا سوق راصها ما فيهاش لفضول باغا غير ضحك اما نجلاء عارفاها مكتحملنيش... مروى أ أركان بنت طيبة و حاجتها ماشي ديالها نهار لي جات من فرنسا ما كنتش كتعرفني وجابت ليا معها كادوا

أركان سد بلكار ديالوا ونطق بنبرة صوت حادة:

_بركي الأرض مابقا خروج

إسلام شدات من ودنيها ودمات إيديها عندها وبترجي قالت: لبنت ضريفة كنقسم ليك، غير خليني نمشي معاها كنترجاك

أركان جمع حجبانوا بجوج وبعدم فهم نطق :أش كاديري

إسلام شافت في يديها وقالت: اه قصدك على طريقة طلبة امم شفتها في الأفلام هاكدا تيديروا لهنود مني تيبغيوا يطلبوا شي حاجة "كمشات حجبانها"وعفاك الله يرضي عليك ما غتوقع حتى حاجة

طريقة ديال طلب ديال إسلام كيفاش بقات شادا من ودنيها وكتزل حتى الأرض وتعود توقف بحالا كدير في رياضة جابت ليه ضحكة زفر بجهد وقال:

_باركا وقفي غتعياي امم صافي سيري ومتعطلوش

إسلام وقفات تجري تلاحت على عنقوا عنقاتوا مزيرة عليه بينما هوا بقا جامد عاجز عن الحراك غير يديها الدافيين وقربها ليه تيخليه يولي شخص اخر غمض عينيه مستمتع بلعناق حتى هز يديه بشوي غيحطهم على ضهرها وتفكر الأحداث لي وقعوا ماخرا بعدم منها وقال:

_صلي لعاصر عاد خرجي

إسلام ببتسامة نطقات:وخا" صغرات عينيها" ممكن نطلب منك واحد طلب عفاك

أركان خشا يديه في جيبوا ،وكمش حجبانوا:شنوا كين؟

إسلام بجدية نطقات :بغيت 200 درهم غير غنتسلفها من عندك ملي نخدم غنرجعها ليك وهاد لورقة كتشهد على كلامي هانتا شوف شنوا كتبت

_أنا إسلام أركان راضي لا لا غلطت "هزات ستيلوا بين يديها ودربات على سميتوا وكنيتوا" دابا مزيان أنا إسلام بن محمد كنشهد على نفسي أن سي أركان راضي سلفني 200 درهم وغنرجعها ليه مني تكون عندي أنا لموقع أسفله إسلام هاد لورقة كتضمن ليك حقك وزيدن هاكا كيتعاملوا رجال الأعمال ياك

أركان حبس ضحكة بين سنانوا و بتسأل رد: علاش هاد شي كامل ياك عندك كرط ديال لبنك سيري خودي ما بغيتي منها

إسلام:لا أسيدي داك شي ديالك وغيرجع ليك مني نطلقوا "هزات عينيها بتأكيد جابت ليه لفقصة" ياك نتا باغي طلقني وما عمرك ما مسيتيني يعني داك شي كولوا ماشي من حقي مني أنخدم غنرجع ليك رزقك كامل

أركان رمقها بنضرات حادة وبعصبية جر لورقة من بين يديها سينا فيها وقال من تحت سنانوا:

_اه عندك الحق حنا قريب نطلقواا

إسلام مدات يدها:حط لفلوس

أركان هز بزطاموا لي كان محطوط فوق طبلة حداه جبد منوا لفلوس و حطهم في يديها وهيا فرحات من قلبها وعبنيها لمعواا ببتسامة قالت :

_في خبارك أنا اول مرة غنتسلف من عند شي حد شعور فشكل كتحس براصك هاز مسؤلية وتفكر إيمتا تجمع لفلوس وترد دين لي عليك الى مت وما رجعتش ليك فلوسك سمح ليا

أركان فور ما سمعها دكرات لموت لعافية شعلات في قلبوا بسرعة حط إيدوا على فمها ما نعها من دكر الكلمة مرة أخرى بعصبية قال:

_أخر مرة تجبدي هاد لكلمة على فمك إسلام

إسلام بقات كترمش وكتشوف في عينيه لي كيشعوا بالخوف عليها بغات تحل شفيفها تهضر وهيا تسمع دقان في لباب توجهات ليه فتحاتوا وهيا لقاتها مروى لبسا كسوة طويلة في الاسود شبكا جاتها فنة مع مكياج خفيف

مروى طلعتها ونزلتها وقالت بخفوت:

_اويلي أصحبتي واش ما خلاكش تخرجي

إسلام حركات راصها بنفي:لا أنا غنخرج معاكم تسناي نمشي لبس

مروى تبسمات جنب :وزربي أنا غنهبط نتسناك في لوطوا

دخلات إسلام بسرعة هزات حويجها عبارة عن سروال جينز مع جاكيط جينز وتيشرت أبيض توجهات لغرفة تبديل لبساتهم و مشطات شعرها جنب وحطات حلاقات دائرية في صفر وجسات كتقاد في لميكاب وحطات عكر حمر غامق...

خرج أركان من دوش حتى كيتصدم تعصب بالمعقول قرب منها شدها من كتافها وقفها ومن تحت سنانوا نطق:

_مسحي هاد شي ولا مغتخرجيش

إسلام حركات راصها ب لا : لا عجبني جيت زوينة ياك

أركان عض خدوا من لداخل ودار شرع يدوا حط صبعوا على شيفيفها جرهم حتى تمسح ليها لعكر في حنكها ولكحل حتى هوا حيدوا ليها بشوي وهوا متبع ليها لعين حتى ولات كتخلع حرك راصوا وقال بصوت رجولي خشن:

_أخر مرة تحطي هاد لعجب في وجهك

إسلام شافت في لمرية بدات تخبط في رجليها مع الأرض وتغوت : ويلي ويلي حرام عليك وليت بحال موكا لاااا

أركان ببتسامة مزينة ملامحوا رد عليها:

_هاكدا جيتي حسن

إسلام زيرات على يديها معصبة :حشومة وحرام وعيب عليك ساعة وأنا كنصوب في هاد شي

أركان رفع حاجبوا ونطق ببرود: لحرام هوا لي كنتي ديرا لوجهك غتخرجي بيه

جالسين وسط صالون مع باقي العائلة كيتسرحوا من مشاور طويل ديال ليوم تيضحكوا ويتعاودوا بيناتهم ناشطين ...

بينما نرجس تالفا ساهية كتفكر في عملتها و نجلاء حاطا رجع على رجل وإيدها على بطنها وهازا كاس عصير برتقال كترتاشف منوا.. كتنهد وتسوط ما عاجبها حال...

مروى بتنهيدة طويلة قالت : عرفتي يا خالتي جديدة كلها درناها سخفنا بالمعقول رجليا دروني بزاف

إسلام قاطعتها :إيوا أختي نتي لي جبتيها في راصك لابسا طالون وتابعا توبة وتسولي فين كتباع هادي وفين كتباع هاديك ما خليتي حتى محال ما مشيتي ليه وباش كملتيها حطتي طموبيل بعيدة علينا

فريدة بتسأل نطقات:مشات معاكم توبة حتى هيا ؟!

مروى حركات راصها بإجاب:اه طركَناها ديناها معانا حنت هيا كتعرف لمحلات كاملين ومسكينة ما ردتهاش في وجهي مشات معانا وملي بغينا نرجعوا وصلناها لدار عاد جينا "بتنهيدة قصيرة قالت"ماشي بحال إسلام ساكنا هنا وما كتعرفش جميع لمحلات

الحاجة خديجة برضا نطقات :مزيان نيت ملي مشات معاكم توبة حتى هيا كضل سادا على راصها في دار أحسن ما درتوا ملي خرجتوا شويا

لالة فريدة وجهات كلامها لنجلاء:كون غير مشيتي معاهم حتى نتي أبنتي حاملا راه مزيان ليك لمشي باش تسهال عليك لولادة

نجلاء عوجات فمها وقالت:سمحي ليا مي أنا ما كنمشيش لدوك لمحلات رخاص

إسلام تبسمات بخفة و تكلمات متفاديا هضرة نجلاء :كانت خرجا زوينة خصوصا ملي "شافت في مروى وهيا تجيها ضحكة تفكرات شي حاجة وقعات ليهم زيرات على سنانها وحبسات ضحكة داخلها حتى ولات حمرا

لالة فريدة كمشات حجبانها وبتسأل قالت:ملي أشنوا أ إسلام كملي كلامك شنوا وقع؟!!

مروى رجعات شعرها مورا ودنيها وبتوتر قالت :ماوقع والوا أخالتي متديش عليها

الحاجة خديجة بفضول نطقات :كينا شي حاجة مخبينها علينا ،قولوا شنوا كين ؟

إسلام حلات فمها غتهضر وهيا تخنزر فيها مروى وحركات راصها بترجي باش تبقا ساكتة وهيا تدرب طم

مروى بلعات ريقها:ما كين والوا حتى حاجة الحاجة غير نساي

إسلام تفركعات بضحك بسبب ملامح وجه مروى ما قدرتش تصبر ،بزربة فرشاتها بقولها : في صراحة مروى عضات مول سبابط في ودنيه حنت تبسل عليها هههه "رجعات نفس ونطقات بترجي" سمحي ليا ما قدرتش نسكت ههههه

لالة فريدة عينيها وساعوا بصدمة حطات إيدها على فمها وقالت:ويلي أبنتي كون حيدتي لراجل ودنيه

مروى بي شمإزاز نطقات: حتى يكون راجل بعدا تفوو على كمارة عندوا كيعيف ولكن ولد لحرام عندوا سبيبطات فنين " بتنهيدة طويلة قالت "بقا فيا سباط لبيض كان غيجيني زوين مع لكسوا لبيضاء

الحاجة خديجة شادا تسبيح بين يديها كملات ستغفارها وقالت : ديك ساع شريه أبنتي ،علاش ما خديتيهش ؟

إسلام دورات راصها: اودي حتى خداتوا وجبدات لفلوس غتخلص مولاه ومني تبسل عليها ضرباتوا بيه لراص وتلاحت ليه على ودنوا عضاتوا فكاتهم غير توبة أما أنا ما قدرتش نشد راصي من ضحك

مروى دورات راصها عند إسلام:ناري حرام عليك علاش فرشتيني

إسلام عينيها دمعوا من ضحك :هههه تابعك ويقول ليك حلوتي طلبي لي بغيتي ههه

فريدة حتى هيا حطات إيدها على فمها وضحكات من نيتها: ههههه وليني حمق هاذا

الحاجة خديجة صبات ليهم قهوة في لي طاس وقالت:

_عبرتي عليه أبنتي مروى يستاهل أي واحد كيتبسل على بنات ناس سروا كتر من هكاك

مروى ملي تفكرات لبلان حتى هيا حلات فمها حتى لودنيها كضحك:

_ناري أخالتي عرفتي شنوا في لول شاف في إسلام وملي لقا لخاتم ديال زواج في يديها سكت أما نرجس جاتوا صغيرة مورها بنت ليه أنا في لبلان تابعني ويقو ليا خودي كلشي فابور حتى أنا ديني فابور صبرات حتى عييت من بعدها ما شعرتش براصي حتى تلاحيت ليه على ودنيه ولا يقول انا مزاوك لميمة ودني لاااا هههههه

إسلام حركات راصها بإجاب:أنا بعدا كنت ساهيا تنشوف في سبابط حتى كتبان ليا لبنت مكرشا لراجل على ودنوا بحال شي جروا جاهل هههههه

نجلاء بعصبية وقفات رمقات ختها بنضرات حادة ونطقات :كان خاصك تقبلي إيدوا حسن ليك اش هاد لمستوى لي وصلتي ليه أمروى "تم خرجات من صالون خالاتهم كيشوفوا "

الحاجة خديجة دربات إيد على إيد و قالت: هاد لبنت ما كتبغي تشوف حتى واحد فرحان اش فيها الى كانوا لبنات كيضحكوا

لالة فريدة بغات تلطف الجوو :غتكون غير غارت حنت ختها ولات قريبة من إسلام ولا يمكن من لحبلى لي دارت ليها هاكا

يتبع...