محتوى القصة
مخطوطتي تحمل بركانا من المشاعر، جرأة في الأحداث، وجرعة زائدة من التشويق والقوة.
* * *
ابتسمت واضعة سماعات الرأس على أذنيها، متجهة بتمهل نحو الميكروفون قائلة:
"أنا التي أهداها القدر في يوم ميلادها هدية غيرت مجرى حياتها."
خلف الزجاج أتاها الرد:
"وأنا الذي أتته الرياح بحب تملك قلبه إلى حدود الهوس... فإن قلت إني متيم بحبك فأنا كاذب، أنا أكثر من متيم. وإن قلت إني هائم في عينيك فأنا كاذب، أنا أكثر من هائم. وإن قلت إني مغرم بعشقك فأنا كاذب، أنا أكثر من مغرم. في صدري عاطفة أكبر من عواطف العشاق في عشقهم، وفي عقلي خمر الغرام لا يفهمه السكارى في سكرهم، وفي قلبي حب لو قسمناه على أهل الأرض لما كفاهم. فيا ويل حبيبتي من هيجان عاطفة حبي المجنون."
* * *
✨THE FIRST LADY✨
الـسيــــــدة الأولــــــــى
▪️بــــقلم : سنــــــــاء الـصنـهــــــــاجـي▪️
***
فعمارة من العمارات الجداد لي متواجدين بالحوزية ، وبضبط بطابق الثاني ، كان سابقها وهي وراه ... واخا كانت مترددة ومتخوفة واحد الشوية ، ولكن كانت دايرة فيه ثقتها حيت مستحيل واحد بحالو وبأخلاقو يفكر بشيحاجة لي هي خايبة ، فتح الباب وسبقها بقات برهة واقفة وتبعاتو ... مع دخلات سد الباب ، الشقة كانت مرونة الماكلة محطوطة بحال الى شي حد ساكن تم ، هزات عينيها فيه النظرات لي كانو احترام ومحبة تقلبو لنظرات إستهزاء ..
- فين الفراش لي قلتي سيفطات ختك ؟ فين تواب وفين طلامط ؟
- قبل مايجاوبها ، كيبانو ليها جوج درجال خارجين من الكولوار ، نظراتهم مكانتش كتبشر بالخير ، واحد فيهم مد رزمة دالفلوس للخطيبها وݣال :
- - ماعندي مانسالك السلعة هاد المرة غير كل مرة (شاف فيها مطلعها ومهبطها بشهوة) الزين كاين وحتى لطاي كاينة (ضحكو بيناتهم كيشوفو فيها مستهزئين بنظرات الصدمة لي على وجها) ..
- خطيبها :
- - لي عليا درتو ، السلعة هاهي بين يديكم ديرو فيها مابغيتو ، وبلا صداع المرة لي فاتت الجيران تشكاو لمول الدار من غواتكم ، مابغيناش الامور تعقد وانا مشيت تهلاو ليا فالخطيبة ..
- الرجل 1 : الله أودي حنا غير غادي نسبقو ليها الدخلة ونسهلوها عليك ... ضحكو بيناتهم ، قرب منها خطيبها لي عند بالها مكاينش بحالو فالأخلاق صدق ديب فصفة إنسان ..
- وتهلاي ليا فصحابي ، راني شاد عليك فلوس كثيرة (ضحك بإستهزاء وخرج مخليها مع جوج ديال الوحوش ، مصيرها بين يديهم معارفة واش تخرج من هنا حية ولا ميتة ) .. كيفاش حتى ضحك عليهم كاملين ، وأولهم مها مها لي هي السبب فهادشي لي هيا فيه دابا .
_____________________________
- فلاش باك
- قبل 10 أيام
- مريم (مغوبشة) : واش ماماك مابغاتش دير عقلها خلاص ، كل مرة راجل فشكل وبزااف ... كنعقل منين كانت عندك 16 عام ، خاصك تفهميها بلي انت كتبغي واحد أخور ..
- هزات فيها عينيها بزربة ، بحال الى هضرتها صدماتها) :
- - أويلي أش كتخربقي أنت ؟ شكون هذا انا لي كنبغيه واش من نيتك لا ، تكون جايا تسمعك يحسابليها بصح ..
- مريم (هازة حاجب ومهبطة تاني كتأكد على هضرتها) :
- - وعلاش أنت مكتبغيش مروان ؟
- (بصوت مرتافع كيعبر على عصبيتها) :
- مريم ، متبقايش دوري وجيني نيشان ، 20 ألف مرة ابنت الناس ، ݣلت ليك انا ومروان صحاب خوت ، مابيني وبينو والو مكنبغيه مكيبغيني ، لي بيناتنا حب أخوة الله يرحم جدك ، والى كان كيعجبك قصديه نيشان ماتبقايش تحمقيني ، وتݣولي عليا حاجة مكايناش ..
- مريم (داركات الموقف) : ولكن هو كيشوفيك شوفات فشكل (سهات) شريهان ، سبحان الله كولشي كيشوف فيك شوفات فشكل ،(هزات عينيها فيها ضاحكة) عزيزة على كلشي .
- شريهان (كتشوف فيها بغات تفهمها أش كتعني) :
- - حيت قلبي بيضي ، وكنبغي لخير لغيري ... ومافياش الغدر وتحريميات ، ومروان كيشوفني بحال ختو لا أكثر ولا أقل حيت كنقراو مع بعضياتنا ، كيشوفيا كيف كيشوف فيا أشراف وكيف كتشوفي فيا أنت وكيف كيشوف فيا أمين ، قصدي العوينة تشربي أمريم ، وإلى كتبغيه سيري عندو نيشان ... أما انا هاد ساعة كنبغي مي وخويا وراسي ، باغية غير نتكافى مع قرايتي ومع هاد الهم لي جايباه ليا ماما .
- مريم (وقفات وعنقاتها كتحس بشوية ديال الراحة من كلام شريهان ليها ) :
- - غادي نحلوها ، متخافيش الباك لي عليه العمدة هاهو خديناه ، دابا خاصنا نشوفو غير شنو نديرو من بعد ..
- شريهان : خالتك زهرة هاد المرة راسها قاصح ، وݣاع منين العريس من طرف لالاهم نجاة خلاص ، قالت ليك بلي عاد رجع من برا ، وقاري ودياني وكيخاف الله ، ماعندو لا باه لا مو ، غير ختو ... وختو مزوجة وبدارها وبخيرها ، وأهم حاجة ايخليني نكمل قرايتي ، ولفم لي ينطق امريم ويݣول لا مكاينش ، مقاداش نهضر ونݣول لا مقاداش اعباد الله ، كون كان با بالحياة كاعما يوقع ليا بحال هكا .
- - صوت الزغاريت والصلاة على النبي خارجة لزنقة ، الجيران فرحانين علاش لا وبنت لالة زهرة اليوم خطبتها ، التوشويش من السراجم الكبير وصغير كيهضر عليها ، شحال وهي مشحفة مها لي جا كترضو ، الخطابة لي بان ليها شي راجل زين تجيبو ليها ، وهي رافضة ماشي رافضة بكلمة لا ، رافضة بحجة قرايتها بغات تقرا حتى هي بحال ݣرانتها ، ولكن فين هي الشجاعة لي تݣول لمها لي بقات ليها لا ... مها لي دمرات عليهم هي وخوها وكافحات وجات من العروبية للمدينة ، قراتهم وكبراتهم متقدش تݣوليها لا واخا فالداخل ديالها ، باغية تغوت وتݣول "انا مابغياش نتزوج واك واك أعباد الله قيلوني عليكم " .
- نزلات زهرة مع دروج لابسة ݣندورة مطرزة وجامعة شعرها ، التبسيمة على وجها ، كترحب بالعريس لي جاي هو وختو ..
- - مرحبا بيكم والف مرحبا نهار كبير هذا ..
- أخت العريس لي كانت سيدة راقية ، بقفطان على شكل كسوة عصري ، علاش لا وهوما ناس لاباس عليهم كيفما خبراتها نجاة ، نجاة الخطابة لي كتجيب الهوتات الصحاح ، وحيت نجاة خدامة طيابة فالعراسات وزهرة حلاوية ، كيعرفو بعضياتهم ... زهرة نهار جابت ليها نجاة هاد نقلة مقادتها فرحة ، وأخيرا بنتها اتزوج بحالها بحال البنات ودير دارها وكانونها ..
- ملاك (أخت العريس) :
- - لالة زهرة وفين هي عروستنا بغينا نشوفوها ؟
- زهرة (عينيها على الخطبة لي جايبين وعلى عريس بنتها لي كيفتن) :
- - راكي عارفة البنات ، كيتعطلو فتوجاد أنا غادي نشوفها ونرجع ، وهي طالعة تشوف بنتها تحل الباب ودخلات نجاة وتابعينها صحاباتها وصحابات زهرة ..
- نجاة (كتشوف يمين وشمال) : واش جاو؟
- زهرة (غوبشات) : وتعطلتي أصاحبتي ، دخلو ݣلسو مع ناس بينما جيت ..
- نجاة(اشرات ليها بيديها بمعنى سيري) :
- - سيري شوفي شغالك حنا هنا متخميش ..
- طلعات زهرة تشوف بنتها واش وجدات ولالا ..
- _______________
- - فبيت متكون من نموسية وزربية صغيرة ، بيرو صغير فوق منو الپيسي والكتوبة ، ݣالسة طالقة شعرها العسلي ... لابسة قفطان جوهرة فالخضيضر بارد ، مدايرة والو لوجها ... ساهية مكتهضرش ، على ليمن ديالها ݣالسة بنت قدها فالعمر ... يكون عنددها ديك 18 ، كتبان صغار من سنها ، مغوبشة وكتخنزر فشاب الطويل لي واقف داير رجل على رجل ومغوبش ..
- زعمة أنت والو ، مافيديك مدير واقف علينا بحال ولاد علي ، وتوݣض معانا زعمة راك خوها أبنادم ..
- نقزات هي :
- - مصطفى ماعندو مايدير ، عيا معاها مكتسمع لحتى واحد ... أخليه عليك دار لي فجهدو وكثر ..
- مصطفى (هز راسو مغوبش كيشوف فيها ) :
- بربي معرفتش علاش قبلتي بهاد الويل هذا ، انا مافهمتش ..!!
- على أساس كون ماقبلتش غادي دوزها ليا ، وراه منقدش نݣوليها لا ، راه مكاين حتى شي حل أخور راه غير كتخورو وصافي ، واش مكتعرفوش ماما كيدايرة ..
- مصطفى (تنهد وشاف فسقف كيدوز يديه على وجهو ، رجع شاف فيها بحال الى باغي يوصليها بلي فكر فشي حاجة) :
- - سمعيني مزيان ، منين تهبطي ويبغيو يزربو عليك بالعقد وكدا ، ݣوليهم بلي بغيتي تكملي قرايتك هو الاول ، ومنها تعرفو على بعضياتكم مزيان فهمتيني ، الى سولك شحال ݣوليهم واحد 4 سنين .
- مريم (صاحبتها) : وزعمة كاين شي راجل غادي يوافق على هاد الشرط ؟ يبقى هو يتسناها 4 سنين من نيتك ؟..
- مصطفى (خنزر فمريم ، مكيحملش لي يقاطعو وهو كيهضر) :
- - هاد المرة تقطعيني انعلقك مك من شفار عينيك (شاف فختو) شريهان سمعتيني ولالا ؟
- شريهان (كتشوف فيه وفعينيها نظرة إنكسار وهزيمة) :
- وإلى مابغاوش ؟
- مصطفى(صوتو فيه نوع من التحدي ) : غادي يوافقو ، أصلا داك نوع ديال هاد خونا امݣدم ، دابا البلان السيد عايش الحياة على برا ، اشنو دارت ختو بغات تزوجو ، وراه اتجيه من الجناتي والناس تعطلي عليه الزواج ..
- شريهان (تنهدات) : فخبارك بدات هضرت خالي كدور ليا فراسي ..
- مريم (كتشوف فيها بإستفهام) : أشمن هضرة !
- قبل متجاوبها ، قاطعهم صوت الباب لي تحل وطلات منو زهرة بضحكتها ..
- زهرة : يلاه أبنتي نوضي ناس راه وصلو وبغاو يشوفوك ، مريم جيبي صاحبتك واجي (طلعات راسها فولدها كتخنزر فيه) شفتك أوليدي مخشي هنا تكول انت لي جايين فيك الخطاب ، هبط التحت وانا واقفة بوحدي بلا راجل حشومة وناس .
- مصطفى (تنهد) : واخا هاهو نازل ، قبل لا يخرج شاف فشريهان وغمزها ، خلاها هي ومريم وهبط هو ومو ، وقفات شريهان كتقاد فقفطانها تنهدات تنهيدة طويلة ، حلات الباب ونزلات .
- - أحسن نهار بنسبة لأي بنت هو نهار خطوبتها ، كتكون موجدة ليه ، وفرحانة ليه بزااف ، خصوصا إلى كانت اترتابط بشخص لي كتبغيه ، ولكن شريهان غير ... شريهان أصلا مكتعرفش هاد السيد وعمرها شافتو ، جابتو خالتها نجاة صاحبت ماماها بحالو بحال غير من الخطاب لي دازو ، وفكل مرة كانت شريهان كترفض بحجة صغر سنها ، ولكن دابا لا بقات ليها 10 أيام ودير 18 سنة ، الباك لي عليه العمدة خداتو ، والقراية لي باغية تكمل أيخليها خطيبها المستقبلي تكملها كيف قالت ليها مها ، إذا مابقات عندها حتى حجة صافي ..
- نزلات شريهان ومريم ، على زغاريت العيالات وصلاة على النبي ، دخلات للبيت ونظرات العيالات عليها واخا مدايرة والو زينة مكتشبهش لمها ، زهرة بيضة وهي لونها خمري شعرها فايت كتافها لونو عسلي ، وجها بحال شكل دلوزة ، عينيها عكس ماماها ، خليط بين الخضورية والعسلي ، خاص تحقق فعينيها مزيان باش تعرف لونهم .
- زهرة (فرحانة) :
- - مرحبا بيكم نهار كبير هذا ..
- ملاك : تبارك الله تبارك الله على عروستنا ، الزين والحشمة ورزانة ،(شافت فخوها) خويا حسام ودابا غادي نتهنا عليك ..
- حسام (حادر عينيه مكايطلعهمش) : ولهلا يحاشمنا ..
- ݣلس مصطفى مقابل مع حسام (كيحقق فيه) ..
- - سي حسام شحال وانت فسپانيا ؟
- حسام (تفاجئ بسؤال) : ودابا هادي 10 سنين ..
- مصطفى : تبارك الله ، فاش خدام ؟
- - زهرة (كتنغز فيه باش يحشم) : مصطفى فيه كترت تسوال ، مع عزيز عليه خدمة البوليس ..
- مصطفى (شاف فمو) : الواليدة راه زواج هذا ماشي لعب ، اخت وحدة لي عندي خاص نكون هاني من جيهتها ، ولالا اسي حسام ؟
- ملاك (كضحك) : وعلاش لا ، الله يخليكم لبعضياتكم ، شوف اخويا مصطفى الى غير على ختك راه ولات ختي دابا ، لي تمسها تمسني انديرها فعينيا ، وخويا الحمد لله بدارو وبخدمتو وطوموبيلتو ، ودابا راه كيوجد باش يرجع لهنا للمغرب ويدير مشروع ديالو ، وايسكنو قراب ليكم عندو دار غير فالحوزية ، وزيد عليها قالت لينا لالة زهرة بلي بغيتي تكملي قرايتك ..
- شريهان (هزات راسها فيها كطلعها وتهبطها جاتها بحال شي وحدة مايعة) :
- - اه بغيت نكمل قرايتي ، داكشي باش شرطي الوحيد العقد من هنا ل 4 سنين ..
- زهرة وجرات حلو فمهم ..
- - زهرة : اويلي ابنتي 4 سنين وراه بزاف
- حسام : ماعليش اخالتي انا قابل ، منها نتعرفو مزيان على بعضياتنا ، ونيت بينما ساليت أموري فسبانيا ، وحولت خدمتي للمغرب ، اتجي هي هاديك مع تكمل شريهان قرايتها نديرو عقد وعرس دقة وحدة ، والى بغيت نشوفها ضروري يكون معاها المحرم ديالها لي هو انت اخالتي ، هكا يكون كولشي على الاصول ديالو ، حتى انا عندي أخت وحافظت عليها حتى عطيتها لراجلها ، انا داخل بنية صافية وربي شاهد عليا .
- زهرة ماقلتي عيب أولدي ..
- - ملاك (كضحك) : وهي نقراو الفاتحة ولبسو الخواتم ؟
- زهرة (كضحك هازة يديها) : اهاه ، بسم الله الرحمان الرحيم ....
- _______________
- - فبيتها ݣالسة وساهية ..
- مريــم (كتخمم وتهضر مع راسها) : هاد حسام ماعرفت فين شفتو وجهو ماغريبش عليا ..
- - شريهان (حيدات الخاتم من صبعها بسهولة حيت مكانش قدها ، دارتو فالبواطة وحطاتو فالمجر حداها وتكات ) :
- أيكون غير تشابه ليك ، حتى لخاتم ماخداوش رأيي فيه جايبينو كبير على صبعي ..
- مريـم : ماعرفتش والله ، ديجا شفتو فين الله أعلم ..
- شريهان : الناس فالناس والقرع فمشيط الراس ، انا كندعي بالعݣر وهو كيݣوليا أش خبار دراري ، سيري الله يرحم باك لداركم بغيت نعس ، بغيت نعس منوض انا بغيت ليا بوجنيبة يلاه نتنصص ويجييني الاحولال ، باش يلاه ماما تعطيني تيساع ونݣلس فركنة وتنساني عليها ..
- مريم : سيري نعلي شيطان سيري ، انت راه هترتي .. انا مشيت بسلامة عليك ومبروك عليك(كضحك) .. حلات الباب ومشات ...
- من ورا ماخرجات مريم بقات فبلاصتها كتفكر شحال ، بحال الى تفكرات شيحاجة ... وقفات بزربة مشات لپيسي ديالها هزاتو حلاتو ، دخلات لكونط خالها لقاتو خارج بساعتين ، تعصبات حيت مافتحاتش فالوقت لي كان فيه هو ، قررات تخلي ليه ميساج غير يحل يلقاه ..
- - سلام خالي لاباس عليك ، خالي ماما خطباتني لواحد السيد ، دارت لي فراسها وانا ماعرفت مندير وحق الله ... كنفكر نجي عندك كيف قلتــي ليا ، عفاك غير تحل خلي ليا ميساج .
- سيفطات الميساج ، وملامح وجها كلهم إحباط ... سدات البيسي حطاتو بلاصتو ، طفات الضو وتخشات فبلاصتها ، على أمل غدا يكون فيه خبار زوينة من عند خالها ، هذا هو القرار الصحيح انها تمشي وتهرب عند خالها ، واخا قرارها تقد ضر بيه مها ولكن ماخلاتش ليها حتى خيار ٱخر .
- _________________
- - فصباح فاقت على زغاريت ديال مها ، حلات عينيها كتسمع واش زغاريت لبارح وزغاريت اليوم كرهات العراسات والخطوبات والافراح بصفة عامة وزغاريت ..خرجات من نموسيتها هابطة لتحت كيبان ليها مصطفى واقف وملامح وجهو باين عليهم الفرحة ..
- زهرة (عينيها مدمعين) : حمدتك ياربي وشكراك لي خلاني عايشة حتى وصل هاد نهار ..
- هبطات شريهان وعلامات الاستفهام على وجها :
- - اش واقع ؟
- زهرة (عينيها كيبريو بالفرحة) :
- - خوك قبلوه فالبوليس ..
- شريهان (ضحكات ، من ورا مكانت مهمومة ومغمومة ، عنقات خوها وكتباىك ليك) :
- - على سلامتك اخويا ناري وأخيرا ، الحمد لله بعدا واحد فينا قدر يحقق داكشي لي كيبغي .
- مصطفى : حتى انت غادي تحققي ݣاع لي كتبغي .
- شريهان (ضحكات على كلامو ) : اودي مبان ليا بو أحلام ..
- زهرة : أش كتوشوشو مع بعضياتكم ؟
- شريهان (بعدات على خوها) : والو غير كنبارك ليه وصافي ..
- مصطفى : الواليدة خاصك تجمعي ليا حوايجي ، غدا إن شاء الله أيخصني نمشي لسطاج ...
- زهرة ( رخات شفايفها) : هادي هي لي مكنت ضناها .
- شريهان : واش يحسابليك الحلاوة ، ايبقى هنا وراه متشوفيه على عام ولا 6 شهور ..
- زهرة (خرجات فيها عينيها) :
-
-. فمك لاحسو سلوݣي ، داك الفم عندك اديال تهراس ..
- مصطفى : راه عندها الصح الواليدة ، انغبر عليكم واحد شوية إن شاء الله ..
- زهور (بدات دمع) :
- ياك أوليدي ولمن تخليني ؟
- مصطفى (قرب منها وعنقها) :
- ياك شحال هذا كنتي كتݣولي ليا ، مصاب غير تخدم ، وهاني جات الفرصة حتى ليديا الواليدة ، ماعندنا منديرو والأيام راه دغيا كتجري ..
- زهرة (تنهدات تنهيدة طويلة) :
- إيوا الله يسهل عليك أولدي والله يعلي شانك ياربي..فين عطاوك سطاج بعدا
- مصطفى : أمين ياربي .. فاس
- شريهان : ودابا شنو غادي نبقاو نعيطو ليك ؟ سي البوليسي ولا شاف ههههه؟
- مصطفى (جر ليها ودنيها ) :
- خوك أيولي ضابط ضابط الشرطة القضائية ، لا يحسابليك حنا شوية ولا ..
- شريهان : مزيانة لي دوا ياكل دوا
- مصطفى : كلشي بالقانون لا ظالم ولا مظلوم ، يلاه براكة من الهضرة ، وجدو ليا شي قصرية واعرة ديال الرفيسة، انتوحش ماكلة الدار ..
- زهرة : هي لولة أولدي ..
- مصطفى : انا خارج حتى لهنا وراجع ، مغانتعطلش ..
- شريهان : واخا سير ... خرج مصطفى زهرة دخلات للكوزينة وشريهان ݣلسات كتفكر وساهية ، الوقت لي محتاجة خوها يكون معاها هاهو غادي للفاس يدوز السطاج ، ولكن مستقبل خوها هو الأهم اما حريرتها أتفها بوحهدها بجهد الله ...
- سلات فطورها وهي عقلها سارح ، طلعات لبيتها جمعاتو ورجعات نزلات لتحت جمعاتو حتى هو ، سيقات وسلات رجعات لبيتها ، هزات تيليفون مابان ليها لا ميساج لا مكالمة لا والو ، طلعات نمرة مريم كتسوني ليها او والو ، ستغربات حيتاش ماشي من عوايدها ... فتحات الپيسي ديالها ، الميساج لي سيفطات لخالها مزال معلق ، مدخلش من لبارح ..
- شريهان (سدات الپيسي) : اووووف على زهر ، تݣول غير بلارج بايل عليا بولة ظهر يلاطيف اللوطف ..
__________________
- باريس
- وبضبط فأوطيل Majestic Barriére الأجواء كتعلن على حفلة كبيرة ، حاضرين ليها ابرز الشخصيات ... كولشي يصفق ... فوق المنصة واقف راجل فالخمسين من عمرو ، كيبانو على ملامح وجهو بلي عربي عكس الناس لي تم ، كيبانو بلي أوروپيين ... من وراه كانت صورة كبيرة ليه ، وهو ببدلة بيضاء وطبلية وإبتسامة عريضة على وجهو ، جنبها صورة ليه ولكن عكس الاولى الثانية شعرو كحل فتلاثينات من عمرو ، ضايرين بيه أطباق لحلويات مغربية ،، ومكتوبة بخط عريض بلغة الفرنسية " L'inventeur des saveurs et des nouvelles douceurs marocaines, Ahmed El-Iraqi " " مخترع النكهات ، والحلويات المغربية الجديدة ، أحمد العراقي " تقدمات للخشبة مرأة أنيقة هازة ميكروفون فيديها وبدات كتهضر بالفرنسية :
- اليوم حنا كلنا هنا مجموعين ، باش نشهدو على أعمال أعظم صانع النكهات والحلويات الجديدة المغربية في فرنسا كلها وخارج فرنسا ماشي غير فكان بوحدها ، الرجل لي من ديما وهو ممول للمهرجان كان السينمائي بحلوياتو الحاضرة وبقوة ، نكهاتوو وإختراعاتو منتاشرين فالعالم كامل ، وحنا أكيد فخورين بمنحه لقب رجل السنة ... كولشي ناض كيصفق ليه والصحافة كتصور من كل جانب ، تقدم بخطوات تقيلة وإبتسامة عريضة مزينة وجهو البشوس ، من ملامح وجهو كيبين انو كان فقمة الوسامة فصغرو ، خدا الجائزة المسلمة ليه ... وقبل ماينزل خدا الميكروفون باش يعطي كلمة للحظور ..
- أحمد : الصراحة أنا جد فخور اني متواجد معاكم هنا ، واخا الصراحة المدح لي عطات فحقي السيدة الرائعة وصحفية القديرة اوليڤيا ، جاني كثير بزااف ... أنا إنسان عادي وصراحة الفضل كلو باش أنا هنا وسطكم ، هو (سكت شوية متأتر) الأخ ديالي لي كبر مني ، بسبابو انا هنا وبسبابو وصلت لهنا ، وهاد الجائزة كنبغي نهديها لروحو ، كان أيكون فرحان بزااف كون بقى على قيد الحياة ، شكرا بزاف شكرا لحضوركم وتواجدكم معايا ... تحت تصفيقات الكل نزل ، متوجه للعند إمرأة فالأربعينات من عمرها ملامح الجمال ظاهرة على وجها ، مكايبانش عليها سنها نهائيا ، شعرها المتموج بخصلات ذهبية ، جسمها الممشوق فوسط كسوة حمرا ، خداتو بين يديها وعنقاتو وهو متأتر ، تجمعو عليه باقي الحضور كيباركو ليه على الجائزة لي خدا ، وعدسات الصحافة ماوقفاتش نهائيا من التصوير ...
__________________
- زهرة (كتعيط) : شريهان وا شريهان اجي تعالي بزربة سربي ...
- شريهان هابطة كتجري مخلوعة ) : ياك لاباس أش واقع ؟
- زهرة (كضحك وخدودها الموردين وسط وجها الضاير البيض زايدينها نور على نور بنتها ماطلعاتش كتشبه ليها فالبياض ) : ههههههه تي تعالي تشوفي عمك بان فليوتيوب ، تبارك الله على خويا عزيزي كيف لبلارة ..
- شريهان (عوجات سيفتها) :
- هدا وكان ، يحسابلي غير علم الله أش واقع ، وشكون بغا يبان أنا ، وراه هو ... انا مافهمتش هاد المعزة كاملة ليه علاش ، وخالي لي خوك مكديري معاه هكا ، باش حسن من خالي ياك حتى هو لاباس عليه ؟
- زهرة : خالك بغيت ليه ضربت جدي لي مشا فعز شبابو ، والله يعطيه الذل ، واش مزال كتيقي داك شلاهبي حنطويل ديال خالك سعيد ، وسيري الله يجيبك على خير لا أنت ولا هو خاصكم القريص من جدر بحال شحال هادي .. وبغيت انفهم مالك مع هاد عمك ؟
- شريهان : العم لي سامح فينا هادي سينين عم هذا ، ياك عمرو جا للمغرب منين كان عندي 10 سنين ، عايش فوق السلك وحنا كيلوح لينا تفاتف باش دار هادشي ابفلوس بابا ..
- زهرة (خنزرات فيها) :
- شكون لي عمر ليك راسك بهاد العضرة الخاوية ، باك الله يرحمو هو لي بغا يسيفط عمك لبرا ، حيت شاف مرتو تعادو لي كانت جداك الله يرحمها كتعدا عليها ، حتى واحد ماضربو على يدو ..
- شريهان : سبحان الله ، ومالو ماحيدك انت من ديك دار ، تمارة ليكانت دوز عليك انت مدازت على حتى واحد أخور ، وياك مراتو لاباس عليها ديك ساعات والديها يعطيوها ..
- زهرة : وراه بغاو ، وعمك وباك نفسهم حالة ... قاليهم باك مدام بنتكم دخلات هاد دار مسؤولة منا حنا ، ولي كان مخبيه عطاه ليه باش مشا هو ومرتو او ولادو ، والله يكثر خير مامخصصنا من خير ، عيا معايا نݣلس للأرض ومنخدمش ، ولكن انا عظامي وراحتي كنلقاها فالخدمة ..
- شريهان : ومال مصطفى مدار مشروع بدوك الفلوس لي عندو فالبنك ؟
- زهرة (كتكمل شغالها) : خوك كيموت على المخزن ، مابغاش شيحاجة يديرها غير المخزن ، سمعتي ولالا أما خالك راه اساير يضحك عليه راه اكيبريكولي فديك فرنسا ، وفاش كيبغي يجي كيلبس حوايح البال ويجي يتسپوپا علينا راه خويا وأنا عارفاه ، عمك راجل معقول مابحالو حد وهاد المرة تجبديه ، الفلفة نحكها ليك لداك الفم بسالة الخاوية ، كونما هو كاعما تكون عندك ديك 3 المليون فالبنكة ، بحال والو نيت ندير ليك بيها عرسك ..
- شريهان : وقفات )
- هادوك الفلوس مغاديش نمسهم ، وحتى واحد مغايعرف عليهم شي حاجة ، انخليهم لدواير زمان من هنا لغدا ماعرفنا شنو أيكون ..
- خلات مها كتشوف فيها وطلعات ..
- فوحدة من القهاوي ، ݣالسة كتشرب فالعصير لي قدامها مغوبشة ...
- حسام (مركز نظراتو عليها ) :
- كنت عارفك غادي تعرفيني وتعقلي عليا ، واخا أخر مرة شفتك كنتي غير برهوشة ...
- مريم (هزات راسها فيه) :
- وأنت تزادت عليك اللحيا ، واخا لحية العتروس وعندو ولكن شوفاتك هوما هوما ..
- حسام (تبسم بإستهزاء) :
- كيدايرة ختك لاباس عليها ؟
- مريم (ضحكات) :
- بغيتي تݣول واش قدرات تنسى شماتة بحالك ؟ لالا الحمد لله نساااات وتزوجات او ولدات ، لقات ولد الناس لي يستهالها ...
- حسام : أسية كنت كنبغيها .. اهي الله يهديها وصافي ، راسها صغير ماخفيفش كون سايراتني كون راه حنا دابا فوق سلك ..
- مريم (خبطات الكاس ) :
- واش من نيتك ، واش بعقلك كنتي باغيها تمشي مع داك سعودي الخانز على قبل الفلوس ، بغيتي تبيعها وجهك هداك ولا مسلفو ...
- حسام (مكنزز على سنانو) :
- الراجل شارف ، هالعار ايبوس ، كون دارت لي ݣلت ليها ومشات معاه كانت اتربح الذهب ، 3 المليون لي كان أيعطيها ، خلي تيليفون أخر موديل وذهب ، كون تزوجنا وعشنا طوب ، ولكن هي ماصدقاتش مكتخدمش دماغها ، فهاد الوقت الحب مكافيش أماما فهمتي ، بيزنيس إز بيزنيس ، كان فيك مايدار مرحبا مكانش ، لي مافيه نفع دفع ...
- مريم (ضحكات) :
- وشريهان هي الضحية رقم 100 ، مع انت ضرب طيح واااو مكاينش الزيݣ زاݣ ..
- حسام : وشريهان بنت زوينة ، كتجيني بحال دوك الممثلات المكسيكيات بحال هكاك ، ولي سافها يبغيها كولشي فيها زوين ، متعرفي نبغيها ...
- مريم (توترات وبانت على وجها ، شافت فيه وضحكات) :
- ويلى ݣلت ليها بلي لي خطبها نصاب ، وبلي مو كاينة فسيدي سليمان مخليها تم هي وخوتو ، وبلي نصاب وبلي هاديك لي جاب معاه ماشي ختو ، وشريهان أي حاجة كنݣولها ليها كتيق بيها ، والى شهدات ختي فيك خلاص ..
- حسام ( قرب منها مفيكسي عينيه فعينيه) :
- مغاديش تقدي ..
- مريم : وشكون أيمنعني أنت ؟
- حسام : شريهان انت مكتحمليهاش ، بلاما نضحكو على بعضياتنا أمريم ، شفتي امنين شكرتها ليك كيفاش تبدل لونك ، وفالخطوبة كيفاش كنتي كتخنزري فيها .. بحالك امريم دازو علي يديا بزااف ، ونبصم عليها بالعشرة بلي فأول فرصة تبيعيها ، وهاد الفرصة جات لبين يديك ...
- مريم (كتشوف فجنابها ) :
- بحالاش ، وكيفاش هاد الفرصة شنو كتخربق ؟
- حسام : 5000 درهم ، كاملة مكمولة فوق طبلة ديالك كاش ..
- مريم (شيطان بدا يلعب بيها منين سمعت داك المبلغ ) :
- وعلاش ؟ شنو المقابل وأنا اش بغيت ندير بهاد الفلوس أش كتخربق ؟؟
- حسام : إلى على الفلوس عطا الله مديري بيهم ، أبسط مثال ضربي حطات واعرين ، تخلي لي كتبغيه يديها فيك شوية ، أما علاش وكيفاش ، أنا غادي نݣوليك انت أكوني معايا على القرص او لي طلبتيها تجيك (غمزها) ...
- على طبلة الغدا ، لي بداوها بضحك ولعب وسلاوها بالبكا ، شريهان وزهرة مابغاوش يسكتو من البكا ..
- مصطفى : ولاواه ولاواه ، واش أنا معمري غادي نرجع الله يهديكم عام مدا مجاب ..
- شريهان (كتنخصص) : وخويا أنا محتاجاك راك عارف ، عام بزاف انا يحسابلي غير 6 شهور صافي دغية دوز ..
- مصطفى : اه خاصك تعرفي كل واحد والمدة ديال ستاج ديالو ، حل عينيك سدها هاني هنا ، ودابا فرصنا من ورا سطاج لاحوني فشي قنت شنو اديرو ..
- زهرة (كضرب فالطبلة) : ماحنا على فالك اولدي ، تمشي وتجي بسلامة ، الله يعاونك الله يعاونك ..
- شريهان (وقفات) : أنا انوض نجمع ليك حوايجك ، خلاتهم وهربات للفوق ..
- مصطفى (بجدية) : الواليدة ، وياك وياااك تزوجي شريهان بزز منها فاش نمشي ، زݣيتو مع الناس الهضرة ودرتو حتى دير 25 والسلام عليكم ، وعندك ايسيق حسام الخبار يبقى غادي جاي عليكم هنا ، راه اتبقاو العيالات فدار انا وصيتك ..
- زهرة (كتشوف فيه ) :. واخا أولدي مــايكون غير خاطرك ..
________________
- طلع الصــباح ، شريهان وزهرة تفارقو مع مصطفى بدمووع ... غير مشا ورجعو كملو نعاسهم ، حتى وصلا ل 10 عاد فاقو ..
- زهرة : شفت صاحبتك مريم مبانتش ؟
- شريهان (عاكفة راسها ولابسة بيجامة كل پياسة فشكل كتسوس فصالة) :
- الله أعلــم ، حتى تيليفونها طافي ..
- زهرة (جاوباتها من كوزينة) :
- شفتيها فالخطبة كيف كانت كتشوف فحسام ، بغات تاكلو الله يستر ، ماتحشم ماترمش ... سبحان الله مكدخلش ليا الخاطر ...
- شـريهان : انت أماما ݣاع البنات صحاباتي مكيدخلوش ليك للخاطر ، ودراري كيدخلو ليك ، مروان كتموتي عليه سفيان هكاك عماد هكاك أشرف هكاك ..
- وهاد الزمان ديري صحابك دراري ومديريهمش بنات ، راه غير لفعات ... بدا تيليفون ديال مها كيسوني ... خرجات من الكوزينة كتمسح يديها فطابلية ، عاد جاوبات ..
- زهرة (كتفرنس) : الو ولدي حسام ، لاباس عليك كيغادية أمورك وختك ، الحمد لله أولدي ،، أه كاينة هاهيا اولدي ... مدات لبنتها تيليفون ، شداتو من عندها وهي عليها غير زبل زبل ...
- شريـهان : ألو ، لاباس الحمد لله ، بيخير الحمد لله ، (شافت فمها) هضر مع ماما وݣولها ليها .. واخا هاهي ..
- زهرة : ا وليدي ، أهاه واخا واخا إن شاء الله غدا واخا صافي ، الله يرضي عليك بلغ سلامي لختك واخا ولدي الله يعاونك ..
- شريهان(وقفات عليها كتخنزر ) : ياك مصطفى كاليك مايجي عندنا مايوصلنا وهو مكاينش ..؟
- زهرة (كطلع فيها) : كنتي كتسنطي علينا ، ودنيك طالقاهم بحال رضار ، الدري عارض علينا للغدا يخرجنا نتغداو فمهدية نݣوليه لا ، ومن تم ندوزو للمول بغا يشري ليك شيحاجة ..
- شريهان (سكتات كتخبط فالمخاد وتبرد فيهم جنونها ، ماحملاهش ولا حاملة الشوفة فيه ) ..
- ماسلات الصالة وتجفاف حتى العشية ، ضرباتها بتدويشة وتكات فبيت الݣلاس كتفرج ، سمعات الدقان فالباب ، ناضت مشات حلات لقاتها مريم .. دخلات كطلعها وتهبطها مستغربة ...
- شريهان (تابعاها من لور مستغربة) :
- من نهار دفنوه مزاروه ، واش هاد الزاز وهاد الحالة كلها شي ورتة ولا كيفاش ؟ وتيليفون طافي كيفاش البلان ؟
- مريم (ݣلسات بتقالة مقادة ومصايبة والحوايج ) :
- خديت تيليفون جديد داكشي باش ..
- شريهان (ݣلسات كتشوف فيها كتهضر متقلة ومفشة) :
- أياااه الالة ، إيوا مبارك والمسعود شي ورث صحيح هذا ...
- مريم (دارت رجل على رجل) :
- لا مكاين حتى ورث غير بابا دور معايا وصافي ..
- شريهان (بإستغراب) : والعجب هذا ، عمر باك مدور معاك بشيحاجة ، ياك الفلوس لي اتولي تشدي من لابورس ادوري معاه بيهم ..
- مريم (خنزرات فيها) : شتك بحال الى ماعجبك حال ، وانا لي جايا نعطيك تيليفوني القديم ..
- شريهان : الله يكثر خيرك أختي ، براكة عليا أديالي .. أبصحة وراحة والهنا ..
- مريم : ماهضرش معاك حسام ؟
- شريهان (رجعات بلور كتشوف فيها) : هضر علاش ؟
- مريم : لا والو ، غير سولتك عرفتي اشريهان ، السيد الله يعمر ليه الدار والله ، غير كملي فهاد الخطبة ... متلقايش بحالو ، وبراكة من داك الفشوش الخاوي ديالك ، شحال قدك تقراي ݣاع ؟ والخدمة مكايناش فالمغرب بالكشايف تلقايها وغير بالواسطة ومشروع لي بغيتي راه والله لا نجح ليك هنا ، وحتى عمك سنين مشافكم بقا ليه ايدعمك لا هو لا خالك ، اللهم تولدي ولادك وتقابلي دارك ..
- شريهان (بدات كطلع ليها جنية ، مافهمات اش وقع فهاد خياي لي حداها ) :
- ياااك لاباس أختي ، شفتك جايا سخونة ؟ واش شي واحد شارجاك والبارح كتݣولي ليا اه عندك الصح ، وبلي ماعرفت فين شفتي كمارت حسام ودابا جايا لابسة لي جوج شراوط وكتبومباي عليا ، وكتوريني أش اندير ، الالة ماشي شغلك دخلي سوق راسك، حياتي هادي وندير فيها مابغيت نصحي راسك متنصحينيش أنا .. سمعاتهم زهرة جايا من كوزينة فيديها عجينة الحلوة .
- زهرة (كتشوف فمريم كيفاش مزوقة ) : ياك لاباس مالنا ..؟
- مريم (كتمسكن) : أنا أخالتي أكنصح فيها هاد بنتك مكتسمعش ، ݣلت ليها بلي دري لي خطبها ظريف وبلي تكمل فالخطبة ، حيت هي مكانتش باغية تكمل فيها ، بغات حتى تكمل قرايتها كلها وتكركبو وتمسي لعند خوك ، نصحتها فسبيل الله وشوف كيفاش كدير ليا ...
- شريهان (يبسات تصدمات بقات واقفة فبلاصتها ، ماتيقاتش بلي صاحبتها دير فيها هكا ، تفضحها وتحطها بوجها قدام مها ، وهي عارفاها مكتقدش تݣول شيحاجة قدامها ..
- زهرة (كتشوف فبنتها مخرجة عينيها مصدومة ) ..
- تي كيفاش تمشي لفرنسا ؟ وكيفاش تسوسي السيد ، انت زيغ كتبلاني من ورا ظهرنا ..
- مريم (وقفات) : سمحوليا دايرة مع مروان نتلاقاو ، أنا بغيت ليها الخير ، (شافت فشريهان) ديري عقلك راه مكاين لي يبغي ليك الخير قدنا ... لاحت سمها عليهم وخرجات ..
- زهرة (كتمشي وتجي وهي فبلاصتها ݣالسة) :
- تبارك الله على بنتي ، وعلى ترابي كضحك عليا ودايراني قرد .. كضحك على راجل بغات تشوهني يݣولو زهرة ماعرفاتش تربي ، دايرة عليا عصابة أدوي ..
- شريـهان : الصمت ..
- زهرة (هزات راسها فيها) : ودوي هضري ، سري لي باغياك تكوني بدارك ونشوف وليداتك ، بغيت ليك راجل زين يقوم بيك ، مابغيتكش ضيعي ويضربوك الحيوط سري أبنتي .
- شريهان (شافت فيها) : بزواج ، الزواج هو الحل الراجل هو الحل ، هاذ الراجل أش كيكون بسلامة مالي مقاداش على راسي بلا بيه ... من نهار درت 16 عام وليت بحال السلعة الدليلة ، بنتك كبرات زيانت زوجيها ، وكل مرة جايبة ليا راجل فشكل ... هاطويل هالقصير هاصلع هالغليض ، واش اميمتي عمرك سولتي راسك وݣلتي بنتي أش بغات ، واش هي راضية باش تزوج ، منكرش بلي كنتي باغياني نقرا حيت انت ماقريتيش وبغيتيني نوصل ، ولكن واش عمرك سولتيني ابنتي شنو بغيتي ديري فحياتك ولا اش كتحلمي تكوني ؟ ... لا اماما عمرك ، باغياني نقرا ونتزوج فنفس الوقت ، وانا راه مابغياش نتزوج اعباد الله ... وبغيت نقرا وبغيت ندير مشروعي ويهضر عليا الكبير وصغير .. مابغيتش نتزوج .
- زهرة (وقفات كتشير ليها بصبعها) :
- سمعي هاديك هاه ، الزواج اتزوجيه والقراية اتكمليها ، مغاديش ديريني ضحكة بين ناس ينعتو فيا يݣوليك ضحكو على راجل سمعتي ، وقضية داك تعطال حتى تكملي قرايتك مكاينش مابقاش ، راهم مزوجين وحاملات وكيقراو سالينا ، نشوفو شكون والد لاخور أنا ولا أنت ... خلاتها دموعها هابطين ومشات تكمل شغالها ..
- شريهان : واخا اميمتي غادي نشوفو واش غانتزوج ولالا ، الموت حسن ليا من هاد تزويجة الذل ..
________________
- أذن العشا ، فزنقة مظلمة واقف كايتسنى .. غير شاف الشخص لاخور جاي عندو تقاد فالوقفة مع وصل عندو جرو ودخلو للزنقة ..
- حسام (كيشوف فجنابو) : جبتي الفلوس ؟
- الشاب : اه هاهوما ، يلاه عطيني سربي راسي غادي يطرطق ..
- حسام (مد ليه خنشة صغيرة بيضة) : هاك يلاه رولي .. مداهاش ليه تم تم ، وقف كيقاد فسطر فوق يدو ، ستنشق من كل جهة ، كيحك فنيفو وكيتنشوى ...
- حسام ( دفعو) : وسيييير أصاحبتي ، هاباش البيع مع البراهش خسارة تفو ...
- مشا لاخور خاشي يديه فجيابو ، تابعو هو من اللور .. هز تيليفون دور النمرة ..
- حسام : ألو ، أمضرا شنو درتي (ضحك) وصدقتي خطيرة تستاهلي ديك 5000 درهم حلال عليك ، عرفتي يطرا لي فبالي ، اتجيك ختها .. يلاه تلاحي نهضرو من بعد .
- وقف مبسم) ودابا نتسناو شنو غادي تݣول النسيبة ..
________
- طلعات شريهان لبيتها ، هزات الپيسي حلاتو لقات ميساج من عند خالها ..
- هاديك مك راسها قاصح أبنتي ، والله أبنتي غير لقيتيني دابا مكاينش ، عندي واحد الخدمة فسپانيا مغانجي على واحد 6 شهور أما نݣوليك جي لعندي والله أبنتي ، شوفي غير صبري ربي غادي يحن ... قرات الميساج وخبطات الپيسي ..
- حتى أنت أخالي حتى أنت .. هزات تيليفونها مشات للواتساب لنمرة مريم ..
- عمرك مزال دوري بساحتي اضربي على جد ملتي ، كنت دايراك صاحبة وختي صدقتي بحالك بحال اللفعة ، اهو اللفعة ماشي بحالك ، اللفعة مكضرب غير الى كانت خايفة وأنت كتغدري وضربي من تحت الدف ، قسما بالله ومزال تباني قدامي انشتف عليك شتيف جمل .
- ختماتها ليها ببلوك فالواتساب وفالفيسبوك والأنستغرام ..
- مابغاتش تسرط ليها كيفاش باعتها ، وكيفاش تلوات عليها ، نهار واحد داز دارت فيه هادشي وتبدلات هاد تبديلة الحارة ، هزات راسها لصورة لي كانت فوق البيرو ، عندها عامين حاطها باها فوق رجليه مبسم .. هزات الصورة بين يديها وتنهدات تنهيدة طويلة ..
- توحشتك ، كون كنتي كاعما يوقع ليا بحال هكا ، كون كنتي كون دافعتي عليا ومتخليش شي حد يتحكم فيا ولا يملي عليا ريو ..
- ورا الباب كانت مها واقفة كتسمع وكتبكي ، مابغاتش بنتها تݣول هكا وهي لي كافحات وضربات تمارة ، صبرات على حر العدوزة وبقات معاها حتى ولدات وليداتها ، دارت بنتها عامين وتوفى سند ديالها لي كانت تبغيه وتحتارمو وتعيط ليه بسي علي ، عمرو جرحها ولا أداها وعلى قبلو صبرات مات وبقات صابرة ومقابلة عدوزتها ، حتى دا مول الأمانة امانتو وهزات ولادها وجابها خو راجلها للمدينة وهو لي خدا ليهم هاد دار لي هوما فيها ، هي بحال اي أم بغات غير طمن على بنتها وتشوفها بدارها ، مفاهماش بلي بنتها كبرات ونضجات ومن حقها حتى هي تاخود قراراتها لراسها .
________
- فجهة أخرى .. واقف حسام كيتسنى ، سونا تيليفون شاف نمرة ضحك ..
- أهلا أهلا وسهلا ، كنشوف نمرتك كنفرح ... وبحال الى علمك الله ، سويرتات دار راه شديتهم .. أنتوما واجدين بعدا ؟ اهاه وأبو سعود ؟ ههههه ماعليكش وحتى انا الأمانة بعد غدا تكون واجدة وداكشي لي كتبغي ولون خمري يا خويا ، وتكايسو عليها أخويا أنتوما 3 وهي وحدة تكايسو .. ويلاه تلاح نتشافو نلقى فلوسي طنان ، ماعليك بسلامة .
- الغد ليه ناضت شريهان وجدات راسها ، حيت اتغدا هي ومها على برا ... لبسات سروال كحل مع قبية كحلة وتيسورت من التحت وسبرديلة ، جمعات شعرها كوتشوڤال ، بلاما دير نقطة من المكياج ، هبطات التحت حتى هبطات عندها زهرة بجلابتها وشالها ، طلعاتها وعبطاتها بلباس لي دايرة ... مزادتش معاها هضرة خرجو وسدو الباب ، مع خرجو مع وقف حسام بطوموبيل ... بكامل أناقتو المعهودة ، خرج بزربة عنق زهرة وفتح ليها الباب القدام ، أما شريهان ماعبراتوش حلات الباب اللوراني وطلعات ...
- حسام (طلع لبلاصتو عينيه على شريهان وفمو مع زهرة) :
- خالتي زهرة لاباس عليك ، واحد مصطفى مجاش معاكم؟
- زهرة (كضحك) : اوليدي تقبل فالبوليس ومشا يدوز السطاج ..
- حسام (بان توتر على وجهو منين سمع البوليس) :
- هكاك مزيان الله يسهل عليه ، 6 شهور دغية تفوت ..
- زهرة (تنهدات) : أحيانة اولدي عاااام لي ايغيب فيها وليدي ..
- حسام (شاد طريق لمهدية عينيه على طريق او ودنيه معاها) :
- على أشمن تخصص دار ؟
- زهرة : ضابط الشرطة القضائية أولدي ..
- حسام (مكانش منتابه شوية ويخرج فواحد مول پيكالة) :
-(بالغوات) : شوف قدامك البشااار على بنادم (سكت وعاق براسو شاف فيهم وتبسم) سمحوليا ، ولكن هاد الناس ماعرفتش علاش كيوقفو ليك فوسط الطريق ..
- شريهان (ببرودة) : هو كان غادي فطريقو ، أنت لي سهيتي ومشيتي جيهتو ...
- حسام (شاف فيها فالمرايا) : يمكن سهيت شوية ..
- من ورا كلامو الأخر سكت ، حتى وصلو قدام قهوة مرزوݣة فمهدية .. بلاصة الطوموييل ونزل ، نزلو حتى هوما طلعو للقهوة لاطيراس خداو بلاصة ، شريهان ساهية فالبحر وساكتة ... غير مها وهو لي كيهضرو ... جا سرباي حط ليهم القائمة ديال الماكلة ، ختارو الحوت وهي ختارت پيتزا فغوي دميغ ..
- زهرة : ولدي كيبان ليا بلاما نعطلو تكاتيب ، ديرو العقد وديك ساعات سير كمل خدمتك ، ديك سير واجي شوية اولدي ماواكلاش ..
- شريهان (خنزرات فيها ، وقفات ليها الماكلة فحلقها) ..
- حسام (تبسم بإنتصار لي بغاه هاهو كيوصل ليه شوية بشوية) ...
- وخالتي زهرة لي درتوها انا معاكم ، ختي نيت راه عارضاكم غدا ، باش إن شاء الله نزيدو نتعرفو وجاب لشريهان شي تفاصل تشوفهم وخدات الطلامط جداد للدارنا إن شاء الله وفراش شديد بغاتها تشوفو ..
- زهرة : الله أولدي كون غير علمتيني قبل ، منصيبش غدا ، عندي واحد دوموند ديال الحلوة خاص نوصلها ، ونبقى نعاون نجاة ، جارتي لي جابتكم لينا ، خاص نكون مع 8 دصباح عند دار العريس ..
- حسام (كيخمم متصنع خيبة الأمل وهو راه هادشي كلو فخبارو من مريم) :
- إلى كان هكاك مأجلوها ؟
- زهرة : لا اولدي علاش ، تمشي شريهان فبلاصتي ، دابا انت راه واحد من العائلة ومابقى والو وتولي راجلها ، سيرو أولدي الله يكمل عليكم بالخير ..
- شريهان(شافت فمها وماحسات براسها حتى نطقات) :
- بحال الى اماما وليتي كتجاوبي فبلاصتي ، واش نسيتي خويا شنو ݣال ..
- زهرة (غمزاتها بعينيها) : هذا خطيبك دابا ، من حقك تشوفي ختو وتغداو مجموعين حشومة ابنتي الصواب .
- شريهان وقفات دافعة الكرسي :
- انمشي لطواليط سمحوليا .
- خلاتهم كيشوفو فيها ونزلات لطواليط مفقوصة وقريبة طرطق ..
بني ملال
- فزنقة كانو منصوبين 3 ديال الݣياطن ... البكا والغوات كيتسمع ، حتى عائلة مصابرة على موت واحد من ولادها .. الجيران كولشي مصدوم ، باش تجي خبار ل3 ديال العائلات بلي ولادهم ماتو ب3 صعيبة بزاف ، وقفات سطافيط ديال البوليس ... نزل منها واحد لابس سيفيل ، مشا نيشان للݣيطون الاول ، كانو الرجال واقفين ومعاهم أب الضحية ..
- سلامو عليكم أسيدي معاك الأنسپيكتور رشيد ، ممكن نهضر معاك شوية ..
- الأب (عينيه طابو بدموع ، راجل كبير مسكين لا حول له ولا قوة) :
- واخا أسيدي مرحبا ..
- بعدو شوية على الناس :
- بغيت غير نسولك ولدك أشمن عام مشا لطاليان ؟
- الاب : اسيدي هادي عامين ، لا هو لا هدوك ولاد جيران لي ماتو حتى هوما دقة وحدة مشاو ..
- رشيد : واش كانو صحاب ؟
- الأب : كانو صحااب ، ونهار بغاو يمشيو لطاليان مشاو بثلاثة بيهم مكانوش يتفارقو الصراحة تݣال ، راه فاش جاتنا بلي ماتو ب 3 راه ماعرفنا أسيدي باش تبلينا ..
- رشيد : واخا ، ملاحظتيش على ولدك والو فكلامو ، كان كيسيفط ليكم بعدا شيحاجة ولا والو ؟
- الأب : لا صراحة تݣال ، ومن نهار مشا فشهر تاني سيفط لينا ، وديما كيݣوليا دعيو معايا ربي يوقف معايا ..
- رشيد : شحال كان كيسيفط ليكم ، شيحاجة قليلة ياك مع يلاه مشا مايمكن يكون سيفط بزاف ، واخا جاني فشكل كيفاش خدم من شهر الثاني ..
- الأب : لواه لاواه ، سيفط براكة كثيرة نيت ، هي باش كملنا الدار بلبني ودرت انا واحد الحانوت دالبيع وشرا ، مع الصحة مابقاتش ، وكل شهر كيسيفط بحال داك الثمن وكثر .
- رشيد : عمرك سولتيه فاش خدام ؟
- الأب : سولتو ݣاليا فالكاميوات كيديو السلعة ، سيدي واش فخباركم شيحاجة ؟ واش عارفين باش مات ولدي ..؟
- رشيد (تنهد وشد ليه فدراعو) :
- سي علال ولدك وصحابو ماتو مقتولين برصاص ، وغالبا كانو خدامين فشيحاجة ممنوعة ..
- الاب(كيبكي) : اش كتݣول أسيدي ؟
- رشيد : صبر اسي علال صبر راسك ، ولاد اليوم لي شافو بنادم دارها كيبغي يديروها وكيخاطرو براسهم ، وكيعدبو والديهم معاهم ، حنا مزال كنقلبو والملف مغاديش يتسد حتى نعرفو شنو كاين البركة فراسك والله يصبركم (ضرب ليه على ظهرو ومشا) ..
- (هاد الأحداث أحداث حقيقية) .
- رجعات زهرة وشريهان لدار ، وهي محاملاش راسها كتحس براسها نفسها محبوسة باغية طرطق ..
- زهرة : علاش ماخليتيش دري يديك للمول مسكين ، هرستيها فيه بقا فيا ..
- شريهان : ضراتني كرشي بالپيتزا ، واش نمشي للمول وأنا الوجع ايهلكني دالمصارن ..
- زهرة (كتشوف فيها بنص عين) : فين عمر الپيتزا ضراتك ، ياك وحدة كضربيها كاملة وتكملي بديالي أنا ، ومزال كتبغي تزيدي طاكوس ، ودابا ضراتك وسبحان الله ..
- شريهان : ماما عندك كوموند ديال الحلوة مزال مكملتيه ، انمشي نشرب زعتر ، ونجي نكملو معاك باش نمشي نرݣد .. طلعات كتجري لايحة ساك وتيليفون ، بدلات حوايجها مكرهاتش كون كانت مريم قدامها ݣاع هاد العصاب تشدها تنتفها زغبة زغبة عاد ترتاح .. هزات واحد زيف دحياتي عكفات راسها وهبطات ، لقات مها بدات فالحلوة ، شمرات على دراعها وݣلسات كتعاون فيها ..
- تنهدات زهرة وبدات كتهضر بلاما تسولها شريهان ...
- كانت عندي 15 عام فاش جات جداك خطباتني لباك الله يرحمو ، مكانت قدامي فرحة حيت ݣاع بنات دوار كانو عينيهم عليه ، ولكن هو كان عينيه عليا أنا (ضحكات) با ومي دغية قبلو ، وحتى انا مݣلتش لا تزوجنا ، وداني لدارهم إيه تم كان عمك أحمد كيقرا أهو كان كابر فالمدينة قاري او واعي ومثقف وتلاقى بمراتو نزهة وبغاو بعضياتهم وتزوجو ، تزوجو وهوما كيقراو بزوج ... هي دارهم كانو لاباس عليهم ، إيوا منين كملو القراية جاو للعروبية سكنو معانا مع دار كانت كبيرة يجري فيها الخيل ، جدك الله يرحمو كان قايد ، ولكن مع نزهة بنت الفشوش ماقداتش على العيشة دالعروبية وعلى ظلم ديال العدوزة ، كنت انا لي نحامي عليها وانا لي نشقى وانا لي نحدر راس ونحيد ليها الحاجة من يدها ونديرها ، كنا كي الخواتات ، ظريفة والحاجة زينة تشريها ليا ، ربي انا مرزقنيش بالولاد ديك ساع ، ولكن نزهات كانت حملات بولدها الكبير عمر ، من وراها بعام زادت الولد الثاني ... مع حملات بيه مع حملت انا بخوك مصطفى ، وعاد لقيت سلاكة مع لسان جداك الله يرحمها ويدكرها بالخير ..
- شريهان (كتكور فالحلوة) :
- وعلاش مرات عمي مشاو للبرا وانت رضيتي بداك العذاب ؟
- زهرة (تبسمات) : حيت كنبغي باك ، ادخلتو عليا كانت بدنيا ومافيها إييييييييه أحيانة ، وجداك والفت على نݣيرها كانت نهار لي متنݣرش فيه ، كيدوز عليا خايب بحال الى ناقصاني شيحاجة ... ݣلست 4 سنين من وراه خوك وحملت بيك أنت ، جداك كانت تهدات شوية ، مع تزاديتي انت مع مرات عمك حملات بولدها سعد ولدها صغير ، فايتاه انت غير بعام ، نهار درتي 4 سنين توفى باك مسكين ، مكان مريض مكان بيه والو ... وبقيت مع جداك حتى دا مول الأمانة أمنتو ، إيوا نهار وقع داك المشكيل فالكوري ، هضر معانا عمك وعاودنا ليه فاش جابنا لمدينة وخدا لينا هاد دار ،(شافت فيها) أبنتي كنتي طيري كنتفمر ديك الليلة كنبغي نبوخ دم ..
- شريهان (هزات راسها فيها كتشوف فيها) :
- دابا ضرتيليا أنا ، واش غادي ندير داكشي ديال الله سبحانه عطاه ليا نݣول لا ..
- زهرة : حسام أبنتي ولد الناس وانا راه ماشي شريرة ولا بغيت نتهنى منك ، راه بغيت ليك الخير ..
- شريهان : ماما عفاك واخا نسدو قضية حسام دابا ، نكملو هاد الحلوة ونطلع نعس ، نوجد مغانلبس غدا باش نشوف لوستي(وهي فالداخل ديالها حالفة تفرتك هاد رمانة غدا) ..
_____________
- فجهة أخرى ..
- سمعني مزيان الله يرحم جدك ، اتعطيني فلوسي متعرفني منعرفك ، نهار دخلتيني لهاد البلان وݣلتي ليا تمتلي بلي راك ختي ... سولتك واش القضية فيها البوليس ، ݣلتي ليا لا .. باش تجي دابا تݣول ليا بلي خو ديك القوقة فالبوليس ولا ماعرفت ليه ، متعرفني منعرفك اتزيدني 1000 درهم ولا بربي انضرب ليك الطر بالبندير ..
- حسام (مكرهش يشنقها ، جبد 1000 درهم عطاهم ليها) .. شنو ناوية ديري ؟
- كاينة واحد عمتي فالعيون ، أنمشي نزورها الرجال تما سخيين وكيتهلاو فالمرا ... نضبر ليا على شي ڤيكتيم سخي ونغبر كمارتي من هاد القنت ..
- حسام (بإشمئزاز) : يلاه رولي من هنا ، معمري نشوف كمارتك وعمري تاصلي بيا نمرتي ضربي عليها ..
- (ضحكات) : على زينك ولا حبا فيك تهلا الله يعاون .. خرجات من طوموبيل كتعوج ، غير نزلات ديمارا وزاد .
- حلات شريهان الماريو كتشوف شنو اتلبس جبدات سروال توب مفضفض من تحت فللون الأخضر مع تجاكيطة كويرة كحلة تيشرت بيضة من التحت وسبرديلة بيضة وسكادو ، حطاتهم على جنب ، دخلات دوشات خرجات لبسات حوايجها وتخشات فبلاصتها ، كتفكر فلي جاي غدا من كترت العيا مافكراتش بزاف ونعسات ..
____________
- فصباح زهرة خرجات بكري ، خلات ليها الفطور واجد ومشات .. مافاقت حتى ل 10 جمعات بلاصتها غسلات وجها نزلات فطرات جمعات الدار وطلعات توجد راسها .. داير معاها حسام مع مع 12:30 تلقاه حدا دارهم .. لبسات حوايجها يلاه اتهز تيليفون ديرو فسكادو سونا هزات لقات نمرة مروان ..
- ألو مروان صاڤا ؟
- مروان : الناس من نهار تخطبو مابقاوش بانو كيفاش بلانك ..؟
- شريهان (شافت فساعتها) : شوف العشية نتشاوفو صافي ؟ ديك 4:30 هكاك 4 ونهضرو مزيان ..
- مروان : صافي نتلاقاو فإيت أند ميت ..
- شريهان : صافي واخا يلاه بسلامة .
- قطعات معاه دارت تيليفون فسكادو ديالها ، جمعات شعرها سفنجة وهبطات ، خرجات سادة الباب بساروت ... وقفات كتسنا بان ليها جاي بطوموبيل ، غير شافتو بحال الى شافت حفار قبرها ... نزل من طوموبيل باغي يمد ليها وجهو ، سبقات ليه يدها .. حل ليها الباب القدام طلعات ، مشا شد بلاصتو ديمارا وزاد .
________
- فعمارة من العمارات الجداد لي متواجدين بالحوزية ، وبضبط بطابق الثاني ، وقفات طوموبيلتو نزل منها ، نزلات حتى هي وقلبها كيضرب ، ماعرفت علاش مارتاحتش لهاد المجية ، كان سابقها وهي وراه ... واخا كانت مترددة ومتخوفة واحد الشوية ، ولكن نعلات شيطان ، حيت واخا هكاك مستحيل واحد بحالو وبأخلاقو يفكر بشيحاجة لي هي خايبة، وخصوصا ختو غادي تكون معاهم، فتح الباب وسبقها بقات برهة واقفة وتبعاتو ... مع دخلات سد الباب ، الشقة كانت مرونة الماكلة محطوطة بحال الى شي حد ساكن تم ، هزات عينيها فيه النظرات لي كانو احترام ومحبة تقلبو لنظرات إستهزاء ..
- شريهان : فين هي ختك وفين هو الفراش لي قلتي جابت ختك ؟ فين تواب وفين طلامط ؟ هادي ماشي دار ختك ، حيت مستحيل تكون دار ختك بحال هاد زريبة.
- قبل مايجاوبها ، كيبانو ليها جوج درجال خارجين من الكولوار ، نظراتهم مكانتش كتبشر بالخير ، واحد فيهم مد رزمة دالفلوس للخطيبها وݣال :
- ماعندي مانسالك السلعة هاد المرة غير كل مرة (شاف فيها مطلعها ومهبطها بشهوة) الزين كاين وحتى لطاي كاينة (ضحكو بيناتهم كيشوفو فيها مستهزئين بنظرات الصدمة لي على وجها) ..
- حسام :
- لي عليا درتو ، السلعة هاهي بين يديكم ديرو فيها مابغيتو ، وبلا صداع المرة لي فاتت الجيران تشكاو لمول الدار من غواتكم ، مابغيناش الامور تعقد فين هو أبو سعود؟
- لداخل كيدوش (مد لحسام ساك ) هاك 3 المليون هنا عطاها ليك شيخ سلات مهمتك ..
- حسام : وانا مشيت تهلاو ليا فالخطيبة ..
- الرجل 1 : الله أودي حنا غير غادي نسبقو ليها الدخلة ونسهلوها عليك ... ضحكو بيناتهم ، قرب منها حسام لي عند بالها متخلق صدق ديب فصفة إنسان ..
- وتهلاي ليا فصحابي ، راني شاد عليك فلوس كثيرة ، اه قبل مانسى صاحبتك صدقات واعرة جابت ليا كاع خبارك بسبابها عرفت بلي ماماك مغاتكونش فدار ، وحتى شدات نصيبها (ضحك بإستهزاء وخرج مخليها مع جوج ديال الوحوش وثالثهم فدوش ، مصيرها بين يديهم معارفة واش تخرج من هنا حية ولا ميتة ) .. كيفاش حتى ضحك عليهم كاملين ، وأولهم مها مها لي هي السبب فهادشي لي هيا فيه دابا .. ولبنت لي تاقت فيها ودارتها صاحبة حتى هي عندها يد فهادشي ، ماتيقاتش شنو سمعات حاسة براسها كتعيش أسوء كابوس فحياتها .
• الرجل الأول من ورا ماسد الباب ورا حسام ضار عندها كيشوف فيها ..
- تبارك الله على زين ، ݣلسي مالك حشمانة ، سمحيلينا لقيتي دنيا مرونة ، ماشي من مقامك أزين ..
• الرجل الثاني : خالد حشومة ماشي من عوايدك ، الطبلة خاوية ، فين ديسير والعصير ؟
- خالد : مزيان منين فكرتيني ، حشومة الأميرة منرحبوش بيها ، ولكن قبل خليوني ندير واحد الحاجة واعرة بزاف ... رجع للباب سورت بساروت ولاح ساروت فوق الماريو الفوق ..(شاف فيها كيضحك بحال شي وحش) ودابا نزهاو على خاطر خاطرنا ، نوجدو لزين ماياكل حشومة يكون كيجاهد فالحرب وموالكلش ... تكرشخو صحاب بضحك بيناتهم .. كل هاد الوقت وهي واقفة كتشوف فيهم وكتفكر كيفاش اتخرج من هاد المحنة ، كتهندز فدار الباب من المستحيل تخرج منو ، كيفاش غادي دير ..
- خالد : انا نوجد لزين مياكل ، وها رضوان يݣلس يونسك ، مع دخل خالد للكوزينة تحل الباب ديال البيت وخرج منو واحد الرجل ، لابس غير الپينوار داير ساعة مدهبة ، يكون فالستينات من عمرو ، غلييض .. وبيض داير موستاج كيتخللو شعر بيض ، جاي كيحنحن غير شافو داك رضوان وناض وقف ..
- رضوان (بلهجة خليجية) : أهلا أهلا بسمو الشيخ ، نورت بصحة وراحة ..
- شيخ (كيشوف فشريهان كيطلعها ويهبطها عجباتو بزاف ) :
- شو إسم الحلو (ݣلس وكيطلع فيها) ..
- شريهان (تحت سنانها) : عيشة مولات المرجة ، قباطت الرواح ..
- الشيخ (ضحك) : الظاهر إننا راح نستمتع .. خرج خالد هاز طبيسيل الديسير وكيفرنس بحال دوك لي كيفرقو الطباسل فلبيران ... لاحت عينيها لطبسيل بانت ليها جنوية صغيرة ، بلعات ريقها وكتشوف فيها .. مع حط خالد الطبسيل بزربة وبالخف دفعاتو وطارت على جنوية هزاتها ..
- شيخ (وقف) : إيش تسوين يا مجنونة ..
- شريهان (حطات جنوية على كرشها) : قسما بالله ويقرب شي كيدار فيكم ، حتى نخشي هاد جنوية فيا نسيفطكم ب 3 ريفولي ... والله وتقربو ليا حتى نقتل راسي ..
- رضوان (واقف مخلوع ) : شوفي بلا ضحك باسل ، راه حنا واخدين عليك فلوس ... ݣلسي ولي بغيتيه نعطيوه ليك ..
- خالد : اتحطي داك جنوي من يديك ولا مايعجبك حال ..
- شريهان (كتقرب ليه) : اش غادي دير ݣوليا شنو غادي دير ، والله ومترجع لون حتى نخشيها فيا ، ويغبر ليكم شقف كاملين ، 25 عام دالحبس للواحد ، حتى وا حد مايقرب ولا يتبعني (مخرجة عينيها ودموعها هابطين بالخلعة كولشي تخلط عليها ، بقات راجعة باللور حتى لقات راسها فالكوزينة , سدات الباب بزربة بساروت .. لاحت داك جنوي من يديها كدور فبلاصتها ، ماعرفة شنو كدير ولا شنو غادي دير ... نقزات منين سمعات صوت الدقان ، ودفيع ديال واحد فيهم للباب ، بلاما تفكر جوج مرات توجهات للبالكون ، حلاتو .. طلات بان ليها الارتفاع ماشي بزاف ، تقد الضربة تجيخا قاصحة ولكن اللهم تقصح شهر ، ولا تقصح مدى حياتها ... مع دفعتهم لباب مع تلاحت من البالكو للتحت جات على جنبها وبضبط يدها ليسرية .. طيحة خلاها تغوت بأعلى صوتها ، طلو من البالكو بانت ليهم طاحت والغوتة ديالها خلات الناس تبدا طل ، الوضع كان كيخوف مايقدوش ينزلو حيت اتفضحهم ودغية ايجيو البوليس ، تجمعو عليها شي ناس بالخف هوما رجعو باللور سادين البالكو ..
- واحد المرة كاتسول فيها ،، ياك لاباس ابنتي شنو واقع واش طحتي ؟
- شريهان (كتوجع من يديها) : واحد خينا داز بالمطور ، وضربني لاحني ..
- الرجل : اجي ابنتي أجي خاصك صبيطار ، وقفوها معايا ، وقفوها دوك الناس شادة يدها ، رجلها عمرات بتراب ... دخلو لطوموبيلة داك السيد ، ركبات معاه مرتو ، وديماراو شادين طريق السبيطار ..
__________
- فواحد الپارݣينغ حيد البلاكة ديال طوموبيلتو ، هز باسبور ديالو والباليزة .. خلا طومبيل تم وخرج للشارع .. أشر لطاكسي حتى وقف ليه ..
- حسام : مطار محمد الخامس عفاك ..
- فالعرس عند زهرة .. واقفة وساهية ..
- نجاة (نغزاتها) :
- وا زهرة وخييتي تي مالك غاساهية ياك لاباس ، ݣبيلة شوية ماتنسايش تومة اربي لطف كوراه دجاج جاما مزفر ، المشماش شوية ويتحرق ، ماشي من عوايدك ؟
- زهرة (تنهدات دايرة يديها على صدرها) :
- شي حاجة واقفة ليا هنا يا نجاة ، حاسة بشيحاجة واقعة لشي واحد فولادي ، ماعرفت كيفاش درت لي خليت شريهان تمشي مع حسام لعند ختو بوحدها ، ياختي بحال الى تلحس ليا العقل ..
- نجاة : حتى انت وراه خاطبها ، وزايدون هو متخلق او ولد الناس والديها راه كانو حاجين الله يرحمهم ، وختو حتى هي راجلها حجرتو وازنة ، وخاطبها رسمي الله يهديك ..
- زهرة (شافت فنجاة مغوبشة) :
- واخا هكاك ، مكانش خاصني نخليها تمشي وحدها ، أش يݣول علينا الراجل ها ؟ بنتي مارخيصاش عليا انجاة ، لا يحسابليك أبغيت نزوجها باغية نتهنا منها راني نهزها في سنية ، انا ابغيت نشوف ولادها قبل لا يدي مول الامانة أمانو ، الموت ماتفرق بين كبير وصغير ... حيدي عليا نصوني ليها .. ضربات فنجاة جابدة تيليفون من الطابلية ، دورات ليها .. حافظة فهاد التيليفون اكيفاس دوز نمرة ويوتيوب تفرج فالڤيديوات صافي ، شيحاجة اخرى لا وهي مقارياش غير شريهان لي كتشد ليها القنوات ..
- سونات لشريهان ولكن والو مكتجاوبش ..
- زهرة (قلبها زاد كيضرب ، مامهنيهاش بالها خايفة تكون شيحاجة ) .. ياربي دير سي تاويل دالخير ، ياربي لا توريني فولادي حاجة خايبة راني نموت ونتبعهم ياربي راه انت لي مطالع على لي فالقلوب ياربي .
______________
- السبيطار
- خرج الطبيب عند المرا وراجل لي جابو شريهان ..
- الحمد لله لي متهرساتش تهريسة هايبة كسر خفيف ، هاد دوا تاخدو يكالميها ومن هنا لشهر غادي نحيدو ليها الݣبص ، على سلامتها .
- الرجل : شكرا ادكتور .. دخلو عندها لقاوها متكية ..
- المرا : على سلامتك ابنتي ، ربي جا من جيهتك ، خاصنا نسونيو لوالديك ..
- شريهان : الله يسلمك أخالتي ، لا اخالتي ماما خدامة عطيوني اتيليفوني نسوني لواحد دري كيقرا معايا يجي يديني ..
- المرا (هزات سكادو حلاتو جبدات تيليفون عطاتو ليها ) :
- هاهو أبنتي.
- الراجل : انمشي نجيب دوا ونرجع
- شريهان: لا اعمي الله يكتر خيرك ، انمشي لدار وناخدو ..
- الراجل : خليك أبنتي ، انا انجيبو ونرجع .. هذا واجب .
- ماخلاش ليها الفرصة تهضر مشا وخلا مراتو معاها ، هزات تيليفون لقات مها مسونية ليها ، مابغاتش تعيط ليها حتى تمشي لدار ، عرفاتها اتسولها غير كيدايرين صافي ، وهي مامستعداش دابا تهضر ، سونات لمروان ، قالت ليها بلي راها فسبيطار .. مافهم والو ماعرف باش تبلا ، ݣاتليه حتى يجي وتعاود ليه .
_______________
- وقفو خارج البيت لي فالمستعجلات ..
- شريهان : الله يكثر خيركم شكرا بزاف أعمي الله يخلي ليك صحيحتك ، وحتى انت اخالتي ..
- الراجل والمرأة : على سلامتك أبنتي راه تيليفون عندك مرحبا بيك عندنا ..
- شريهان : إن شاء الله ، الله يجازيكم بالخير ..
- المرأة : بسلامة أبنتي خلينا ليك الراحة مايكون باس .. خلاوهم دوك الازواج .
- خرجها مروان من باب المستعجلات ، خاشية يدها فيدو ، وليد لوخرا هزاها مديور ليها الݣبص ..
- مروان : فين أيكون مشا داك ال*مار ؟
- شريهان : ماعرفتش ليه فين ، ولكن راه باينة غادي يكون هرب ... هداك خليه بوحدو حتى نشوف حسابي مع ديك الميكروبة ..
- مروان ( تعصب) :
- - هاديك حسابها معايا بوحدو قسما برب الكعبة ، حتى نخلي جدها تندم على نهار فاش تزادت الى ماخليت دار عشتها منتسماش مروان ..
- دار مروان كتبان ليه شريهان واقفة مغمضة عينيها وكتشمشم ..
- مروان : اديك نيف السلوݣي ، مالك كتشمشمي تاني ؟
- شريهان (تبسمات) : ريحة الدجاج محمر بدغميرة واللحم بالبرقوق ..
- مروان ( كيطلعها ويهبطها) : هادشي كامل شميتيه زيدي .. بقات واقفة كتشوف فيه وكتفرنس ..
- مروان (كيدور راسو بلا) : والله لا دخلت معاك واش انت شوية لاباس ، ندخلو لعرس وحنا مامعروضين وانت يدك مجبرة واش انت فو ؟
- شريهان (جراتو من يدو) : تكون عندك روح للمغامرة أصاحبي ، شحال انعيشو فيها ..
- مروان : وعمري فحياتي شفت شي بشار بحالك، كانت اتعرض للاغتصاب ثلاثي الأبعاد ، نقزات من البالكو مهرسة من يدها وباغية دخل العرس مامعروضاش ليه انت راه انورمال ..
- شريهان : زيد براكة من الهضرة ، انا حاسة براسي بسباب هادشي لي وقع انتحرر ، انا حياتي عاد غادي تبدا دبا ... حيدات البانضة لشعرها خلاتو مطلوق على راحتو ، جرات مروان وتاجهو نيشان للقاعة ديال العرس ..
- دخلو للعرس بزوج ، كاع الأنظار تسلطات عليهم ... الناس مقادين وهوما تݣول كانو يلعبو الكرة ، بانت ليهم طبلة فيها واحد 3 دراري مشاو ݣلسو حداهم من بعدما سلمو عليهم ...
- الدري لي فطبلة : انتوما ماشي من صحاب العرس ، كيبان ليا حتى انتوما اسالتين وداخلين فزحام ..
- مروان : علاش حتى انتوما ؟(أشر ليهم بصبعو) ..
- الدري (كيضحك) : أخويا جينا من سلا على قبل نقلبو على خدمة ، بقاو لينا أفلوس المركوب ... وجوع أخويا كيطحن المصارن ..
- شريهان : كضحك ) واعرة هادي عاوتاني .. بداو السرباية كيقادو فطبالي ..
- مروان : جينا مع الماكلة نيشان (كيضحك) ..
- شريهان : الله ياربي من بعد نهار طويل انعمرو كروشنا ، أجيو فين هي الموسيقى ݣاعما شفتها ، انركزو شوية نحيدو الطاقة السلبية ..
- مروان (كيخنزر فيها) : باغية تركزي بديك ليد ؟ اتاكلي وتخرجي ضربي الباب ..
- بدا الخبز كيتفرق على طبالي ، وتحط الطبسيل الأول ديال دجاج محمر فيه 3 دجاجات ، ولكن فطبلة ديال شريهان ، مابقاوش 3 دجاجات ولاو نصوصة وربوعة كيطايرو ، الكبادي ولاو فخبر كان ، الطبسيل تلحس تكولي ماكلاو عام ، حتى من السرباي لي هز الطبسيل تصدم حيت كانو أول طبلة يساليو ماكلتهم ..
- شريهان (فمها عامر وكتأشر لسرباي) : خويا الخبز الخبز اخويا عفاك
- جا سرباي فرق الخبز عليهم ، وهز الطبسيل الخاوي ، مشا ورجع بطبسيل اللحم ... شريهان هزات نص اللحم دارتو فالخبز وكملات معاهم ، حتى سلات وشبعات .
- شريهان : صافي شبعت(هزات اللحم ديالها دارتو فسكادو) ..
- مروان : تسناي مزال ايفرقو البساطل والحوالة مشويين ..
- شريهان : براكة من طنز يلاه نمشيو ..
- يلاه ايوقفو وهوما يوقفو عليهم راجل ومرا ..
- المرا : سمحوليا ولكن ماعقلتش بلي شفتكم شكون انتوما ؟ عمرنا شفناكم ..؟
- يلاه مروان ايجاوب ، وهي تنفخ شريهان كرشها وشدات فيه ..
- شريهان : غير سمحولينا دخلنا عليكم ، غير يلاه خرجت من سبيطار ماشكيت عليك تهرست من يدي ، وكنا دايزين من هنا ومع الحمالة شميت ريحة دجاج ماقديتش نصبر ، الوحم مايشاور اسمحولينا عفاكم ..
- المرا : الله الالة كون اݣلتيها ، انا نݣول لطيابة تقاد ليك بواطة ديها معاك تسناي هنا ..
- مروان (تحت سنانو) : غير بلاتي من بعد ونتفاهمو ، بقاو شحال عاد رجعات المرا هازة معاه خنيشة دالبلاستيك صغيرة مداتها ليها ..
- الله يفك وحايلك على خير ، ݣاع دزنا من هادشي ، حتى انا يلاه تفكيت هدا سبوع بنتي .. وتبارك الله مزوجين باقي صغار .
- شريهان : هكاك والله يكبرها فعزك ياربي إيوا كيݣولو الحب كيصنع العجب ههه داكشي باش زوجونا والينا ..و سمحولينا خلينا ليكم الراحة ومبروك عليك .
- شدات فيد مروان وهو هاز الخنشة بحال المزوجين ، دايرة راسها مقاداش تمشى وخرجو من القاعة .
________________
- شريهان (فوسط طوموبيل) : مروان ، دينا للبحر بغيت نشم ريحة الهوى ... مجاوبهاش خدا طريق البحر ، وقف نزلو بجوج .. سبقات وقفات على سور مقابلة مع الماج ، الهوى كيدي ليها شعرها ويلعب بيه وهي ساهية ..
- شريهان : فخبارك الظرافة والنية مابقاوش واكلين فهاد الزمان ..
- مروان (واقف حداها) : هادشي يلاه عرفتيه أنت ، الواحد ديما يكون على بال ..
- شريهان (مركزة قدامها) : مامتيقاش بلي مريم دارت فيا هادشي .
- مروان : كيݣوليك خاف من الغريب مرة ، وخاف من صديقك ألف مرة .
- شريهان (تنهدات تنهيدة طويلة ، بحال الى خرجات فيها كاع داكشي لي عاشتو) ..
- مروان : نمشيو؟
- شريهان : واخا ، ولكن دور بيا مابغيتش ندخل لدار دابا ..
- مروان : أشريفة ياكما يحسابليك شيفور عندك ..
- شريهان : كتعيب فيه) بـااااااسل ..
يتبع...
😍😍😍😍
واخيرا