السيدة الأولى الجزء 20

- سعيد (منين مشا) :

دابا شريهان كاينة فكازا ؟

- مصطفى :

باينة هاد الزوج لي عاونوها ، سمعتيه ، ݣاليك كانو بزوج ففرنسا ، وجاو هادي عام ... ودابا عام وشريهان غابر ليها الأثر ..

- مالك :

انا مغانقدش نصبر حتى للغد ، نشدو الطريق هاد الليلة ..

- مصطفى :

الواليدة تسيق الخبار ، والله لا تفكات معانا ..

- سعيد :

واش حنا غاديين نحوصو ، راه غاديين نقلبو على البنت ... عام وهي صابرة ، تزيد تصبر الحمد لله امنين درية بيخير وعلى خير هداك هو الربح ..

- مالك :

يلاه نمشيو ، بلاما نضيعو الوقت ..

_____________________

- واقفة كتسد فصدايف القاميجة ... شعرها دايرة ليه ليميش .. كتندغ فالمسكة ، ريحتها كضرب فباب البيت .. مكاينش شي عرس مامشات ليه وماسولوهاش على ريحتها ..

- سناء :

ثورية مالك أصاحبتي مع ليلى واش ناقصنا صداع ، عرفتيها هي خاصها اتهبش ..

- ثورية :

شوفي ا سناء عام هدا دابا وحنا معاشرين ، وعارفاني مزيان نشوطية وزهوانية ضحك ونشاط ، ولكن فعايل بنات الحراام ماعنديش معاهم ، يحسابليها انا كنمشي نخدم باش نزها واش عند بالها غير ماعندي لا حنين لا رحيم راني باب ساهل ولا ، عند بالها كنلݣط فنوامر بحالها ... لهلا يحييها المعمشة لوخرا .. والله وماتفوتني حتى نحش ليها ركابي ..

- سناء :

ثورية ، عارفاك اخيتي مكتبغيش تهضري فهادشي ، ولكن واش عمرك فكرتي تقلبي على عائلتك شكون هي ؟؟

- ثورية (بصرامة) :

انا ماعندي عائلة ، عائلتي هي انت وهشام وأنور ... كون بغاو كون قلبو عليا ، غير انور وهشام لقاوني مليوحة ودارو فيا خير جابوني للمغرب ، انا معارفاش أش وصلني لديك فرنسا ، صافي الله يرحم باك سدي عليا هاد الموضوع ، مافيا لي يمرض تاني ..

- سناء :

رخفي فيك النفس أصاحبتي ، دابا يضرك راسك عاوتاني ، راه فينما تعصبتي كينوض عليك داك الراس ..

- ثورية (غمزاتها كضحك ) :

متخميييش احبي ، راه واخا كطلع ليا النقشة دغية تهبط ..

- سناء (كضحك) :

وعداك اتسمعي العاونيات تاني وتݣلسي هاك بلاك ، مايعرفوك الناس سرباية مايعرفوك مع العونيات ... راه كنعرفك .. يصدقو هاد المرة منزلينا عند شوف تيڤي ..

- ثورية (ضحكات حتى تسمعات ضحكتها) :

بزوووج أحبي بزوج ، وحربوش نشوف ديك خيتي هازة تيليفون وتصورني ، ماشي غير شوڤ تيڤي لي غاتصور ، اتوصل خبارنا لدوك لي ميندكرو ، وأنا علمتك ..

- سعيد (بنفاد صبر) :

والله يهديك يا هاد المرة ، فين غادي تمشي معانا ... حنا غاديين غير نشدو لوطيل ، نشوفو البنت بعدا واش هية ولا ماشي هي ويحن الله ، وحتى الى لقيناها هي راه مغاديش تعقل علينا نهائيا ، وصعيييب الحال تجي وتكولي ليها حنا راه عائلتك ، انتوما اللهفة باش تشوفوها نسيتو ماتقلبو على الناس لي كيفقدو الداكرة ، راه مخاصش تجي وتكوليهم حنا عائلتك ... خاصهم إستشارة طبية بعدا ، وتقربو منهم ... شوية بشوية وتحاولو معاهم عاااد ممكن تكولو ليهم الحقيقة ، راه صعيب الحال ..

- مصطفى :

فعلا اماما خالي عندو الصح ، راه صعيب الحال نجيو من دقة نكولو ليها لي كاين ، كاين شحال من واحد كتجيه الصدمة ، وفبلاصة مايبرا دغية كيزيد يطول ... وممكن يصعاب ترجع ليه الذاكرة من الأول ..

- نزهة (موجهة كلامها لزهرة ) :

زهرة ، صبرنا بزاااف ... مابقا غير القليل ، الحمد لله لي راها عايشة بعدا وبيخير وعلى خير ، راه خاصنا نحمدو الله ونشكروه ... خاصنا نزيدو نصبرو ، خليهم هوما يمشيو وراه ايبقاو يعلمونا بالجديد ..

- زهرة (تنهدات تنهيدة طويلة وستسلمات للأمر الواقع) :

واخا ، ولكن خبارها يوصلوني كل ساعة ماشغليش ..

- مالك :

كوني هانية أخالتي ، شريهان أمانة فرقبتي ... وإن شاء الله اتولي بيخير وغادي نجيبها ليك حتى لهنا أتهناي ..

- زهرة : واخا أولدي ، الله يرضي عليك ..

__________________________

- دخلو لدار عيانين ، كل وحدة تلاحت على سداري ترتاح ...

- سناء :

ناري ياختي رجليا كنحس بيهم غادي يتقطعو عليا ..

- ثورية :

كون تشوفي أنا ، ناري مابقيتش قادة نوقف كنحس برجليا كيوزوزو ..

- سناء :

أنت راه ماخليتيش جهدك من الشطيح ، بسيف مايضروك رجليك ..

- ثورية :

والله ماكرهت شي دوش يكون دافي .. وناكول صافي ..

- سناء :

نوضي دوشي ، بينما ستارحت انا ندوش ... ونسخنو الماكلة لي جبنا معانا ..

- ثورية :

لا غير سبقيني دوشي انت بينما رتاحيت شوية ..

- سناء (ناضت) :

واخا ، انا نسبقك .. رتاحي انت بينما خرجت ..

- ثورية (مغمضة عينيها) : واخاااا ..

_______________________

- دخلو لدخلة ديال كازا ..

- سعيد : سونيتي ليه ؟

- مالك :

اه سونيت ليه ، لقيتو يلاه جا من شي عرس ... درت معاه نتلاقاو فوسط المدينة ..

- سعيد : إيوا على الله كنتمناو يكون خير ..

- مصطفى : امين ..

- ݣالس أنور وهشام بزوج فالقهوة كيتسناو ..

- أنور :

وعلى الله يكونو ناس ملاح ، ويكون شي عرس مزوهر ..

- هشام :

وعلاش ماسوناوش لفؤاد ، حنا اخدامين ، راه هو لي تريتور ..

- أنور :

سيفطهم حميد ولد عمت مي ، هو لي وصا عليهم ... وحميد عندو انمرتي انا فين كيعرف هو فؤاد ..

- هشام :

نسيييت عندك الصح .. وقفات طوموبيل كحلة بعيد نوع رونج ، نزل منها مالك ومصطفى وسعيد ..

- مالك (سونا لأنور) :

ألو سلام عليكم ، اه وصلنا فين أنتوما ؟ (ضور راسو بان ليه واحد كيشير ليه لابس تيشورت مزوق وسروال ݣاطيفة داير الفرقة من جنب) ..

- راهوما فين ݣالسين ..

- وصلو عندهم هشام كيشوف فيهم وفطوموبيل لي نزلو منها .. بينو وبين راسو فرح حيت باين لاباس عليهم ، والى كانو لاباس عليهم ايتخلصو مزيان ... سلمو على بعضياتهم وݣلسو ..

- مالك (من ورا مجاب ليهم السرباي شنو طلبو ) :

عاود لينا عليكم حميد ، والفيديو لي تنشر تبارك الله بين الخدمة ديالكم ..

- هشام (فرحان) :

الله يكبر بيكم ، ومرحبا بيكم ..

- مصطفى (كيحقق فيهم ، بحكم الخدمة لي كان خدام يقدر يميز اي واحد واش مزيان ولالا وهادو باين فيهم دراوش وغير نية ) :

ݣال لينا حميد يلاه رجعتو من فرنسا ؟؟

- أنور : اه كنا تما ولكن مكتابش ورجعنا ..

- مصطفى : شحال هدا باش رجعتو؟

- أنور : دابا عام باش رجعنا ..

- مصطفى :

والعجب ختاريتو ترحعو ، وفرنسا زعمة حلم أي واحد يمشي ليها ، ياكما مشيتو حارݣين ؟

- هشام (شرب جغمة من الما) :

انتوما جايين باش نهضرو على العرس ولا على فرنسا ؟

- مصطفى (قرر يدخل نيشان فالموضوع) :

خويا انور ، أنكوليك خويا حيت دغية كيرتاح ليك الواحد ... ودغية كدخلو الخاطر انتوما بزوج ، حنا مجايينش هنا على قبل العرس ، حنا بغيناكم فواحد الموضوع ، مسألة حياة ولا موت ... والى وقفتو معانا خيركم عمرنا نساوه وبحلاوتكم ..

- أنور (شاف فهشام ولاخر شاف فيه) :

أشمن موضوع ؟

- مصطفى :

هادي عام ، ختي تخطفات من العرس ديالها ، خطفها واحد المريض نفساني مافيوزي ، بزناز بالدارجة ديالنا ... ولكن بزناز ڤي أي پي ، يعني خطيييير بزااف ... خطفها وداها لواحد اليخت ديالو ، تما وقع خصام بينو وبين واحد خونا حتا هو من المافيا ، اليخت نفاجر والجثت ديال دوك خوتنا بزوجهم لقيناهم ميتين ، ولكن الجثة ديال ختي مالقيناهاش ، عام وحنا كنقلبو عليها ومالقيناهاش ..

- أنور (بتوتر) :

ولكن حنا شنو دخلنا اخويا فهادشي ، حنا غير درواش اش دخلنا فهادشي ديال المافيات أودي ..

- هشام :

حنا عمرنا وصلنا للبوليس ، حنا اعلى قد الحال أخويا ..

- مالك : حنا هادشي عارفينو ، ولكن مأخرا وصلنا الفيديو ديال العرس لي كنتو فيه ، ومن بين السربايات لي كانو وحدة نسخة طبق الأصل لشريهان خطيبتي ..

- هشام (كيحقق فيه) :

بلاتي بلاتي ، ماشي أنت هو مالك العراقي ... وزير الشباب والرياضة ؟

- مالك (بإبتسامة) :

وي هو انا ، ولكن مابقيتش دابا ... بسبب الظروف وكان خاص نزل للمغرب ، ستاقلت من الوزارة ، وهدا مصطفى خو شريهان ، وحتى هو بسبب لي وقع ديميسيونا من الشرطة ، وهدا خالها سعيد ... حنا محتاجينكم تعاونونا ، بغينا نعرفو واش فعلا البنت لي شفنا هي شريهان ولالا ، راه منعاودش ليك على العائلة حالتها كيف دايرة ، وخصوصا الام ديالها ، كنترجاكم مسألة حياة او موت ..

- أنور :

واش ممكن نشوف تصويرة ديالها ؟

- مالك (جبد تيليفون او وراه صورة شريهان) :

هي هادي ..

- خدا أنور التيليفون ، شاف الصورة وتصدم ... عكا تيليفون لهشام لي حتى هو شاف الصورة وتصدم ..

- أنور : ثورية ..

- خرجات من الدوش كتجر فرجليها ..

- ثورية :

الله على راحة ياختي ، دابا خاصني غير ناكول ونضربها بنعسة عالمية مفيكة ههههه

- سناء :

دوزي كلشي نحط العشا ، حطات العشا لي جابو من العرس الدجاج واللحم وديسير ، كلاو حتى شبعو ... جمعات ثورية الماعن غسلاتهم ، وكل وحدة دخلات لبيتها تنعس ... تكات فبلاصتها يلاه اتغمض عينيها وداتها الغمضة ، كيبان ليها راجل لابس شوميز بيضة شادينو شي رجال ، خرج واحد من طوموبيل وتيرا فيه ... مع تيرا مع غوتات وفاقت قلبها كيضرب ..

- سناء (جات كتجري خلات عليها الباب ) :

مالك ياك لاباس ؟ واش كنتي كتحلمي ؟

- ثورية (شربات) :

قلبي كان غادي يسكت ، هكا كيوقع ليا فاش كنعس بكري ..

- سناء :

ويلاه 9 أصاحبتي ويلاه كليتي ، انا دخلت باش نصايب شعري ونتكونيكطا شوية وعاد نعس ..

- ثورية :

وختي انا راه عييت ، وماعندي معامن نتكونيكطا ماشي بحالك أنت ، قلبي كان غادي يسكت ..

- سناء : نفس الحلمة ياك ؟

- ثورية :

بحال ديما ، نفس الحلمة ، ماعرفتش علاش ديما كتكرر معايا ، مرة نحلم بواحد تيراو فيه ... مرة كنحلم بحال العافية شاعلة فشيحاجة ... مرات كنحلم بشي واحد ولكن كنشوف الوشام فصدرو ، مرة كنحلم بمرة زوينة وبيضة والله مابقيت فاهمة والو ..

- سناء :

اجي كلسي معايا شوية ، وديك ساعات نعسي ... خرجات سناء من بيتها وتبعاتها شريهان ، تكات ليها فبلاصتها مقابلاها كتصايب شعرها ، ولكن ماعقلاتش حتى غلبها النعاس من كترت العيا ..

_____________________

- أنور :

هادشي لي كاين أخويا انا عاودتو ليك ..

- هشام :

حنا ماعندنا وراق ، ماقديناش نمشيو للبوليس ونبلغو ، وحنا معارفينش اش واقع ليها ، خفنا يتسب فينا الباطل داكشي باش جبناها معانا للمغرب ، واحد السيد هو لي وقف معانا كلت ليه راها ختي ، وداكشي لي كلنا ليها ماخبيناش عليها كلنا ليها غير لقيناك مليوحة وعاوناك ، وجينا لكازا خالتي هي لي ضبرات لينا مع هاد التريتور ، وهي دابا كارية هي او واحد البنت اسمها سناء ..

- مصطفى (كان كيحس بحال شي جبل تحيد عليه) :

واش هي مزيانة بيخير عليها ، واش معاقلة على والو ݣاع؟

- هشام :

لا والو أخويا ، معاقلة على حتى حاجة ... مرة مرة كيضرها راسها وكتجيها بحال دوخة ، ديناها لسبيطار الحومة ولكن طبيب كاليها اطونسيو ، وهي مابغاتش تمشي الإختصاصي والو ، ولكن راها بيخير وعلى خير الحمد لله ..

- سعيد :

دابا صعيب الحال نكولو ليها حنا عائلتك ، شنو غادي نديرو ؟

- أنور :

هو راه صعيييب تكولو ليها انتوما عائلتها ... خصوصا فاش كنسولوها زعمة علاش متسول شكون عائلتها ، كتكولينا كون عائلتها بغاوها كون هوما سولو فيها ، معارفاش بلي انتوما قلبتو عليها الدنيا ، والمشكل الصحف ديال فرنسا مكتوصلش هنا ، وحنا اصلا مكنقراو جورنالات ماكنشوفو مجلات ... تخافو اتكولو ليها شكون انتوما وقصتها وتأزم ولا يوقع ليها شي مشكل ..

- مالك (بتوتر) :

خاصها طبيب ضروري وفأقرب وقت ، مايمكنش تبقى هكا ، انا حرت ماعرفت شنو غادي ندير ؟؟!!

- أنور (هز يدو) :

الى بغيتو نصيحتي ، عندي واحد الفكرة زوينة وتقد تنفعكم ..

- مصطفى : دوي أخويا كنسمعوك ..

- أنور :

كاينة واحد العمارة فالحومة ، يلاه كملات ومولاها كنعرفو كاريين عندو انا وهشام واحد الظار نيت قريبة من دار لي فيها البنات ، انهضر معاه وتكريو عندو شقة وهكا تكونو قراب من ثورية ، بغيت نكول شريهان ... واتكونو جيران وتقربو من بعضياتكم شوية بشوية ..

- سعيد (بفرحة) :

والله الى فكرة واعرة .. غير هو خاص نحضيو راسنا مانعييقوش ..

- مالك : عطيني نمرة السيد نسوني ليه دابا ..

- أنور :

يلاه دابا نمشيو عندو ونهضرو معاه فاص ، مكاين لاش نعيطو ليه ..

- مصطفى (بإمتنان) :

شكرا بزاااف ليكم ، عمري مغادي نسا خيركم .. وقفتو مع ختي وماخليتوهاش ..

- هشام :

هدا واجب ، منقدوش نخليو بنت وبنت بلادنا مليوحة ومنديرو والو ، مارباوناش والدينا بحال هكا ..

- سعيد :

الله يكثر من مثلاكم ، ويلاه أسيادنا انبقاو نهضرو بزاف خليونا نطرقو هاد المسمار .. توحشت بنت خاي بغيت نشوفها ..

- مالك (تنهد تنهيدة طويلة وردد مع راسو ) :

وأنا كثر ، توحشتك أشريهان توحشتك بزااااف ..

- وقفو طموبيل بعيد ودخلو للحومة ، العينين غير كتشوف فيهم حيت باينين برانيين على الزنقة ..

- هشام :

هاديك الدار لي بابها ديال الحديد كحل ، هي دار لي ساكنة فيها ث شريهان ، سمحو ليا حيت لساني تعود على ثورية ، تما فين ساكنة هي او وسناء صاحبتها ..

- مصطفى :

ماعليش ، غير عيط ليها ثورية باش هكا متغلطش قدامها ..

- انور : هاهو سي رحال جاي ..

- وصل عندهم سي رحال سلم عليهم ... من بعد الأخد ورد داتهم يشوفو الشقة لي فالموبل ، كانت فطبقة الأول ، فيها 3 ديال البيوت وصالون كبير ، الحمام والكوزينة كبيرة بالبالكو ، البالكو لي كان كيطل على الحومة ومقابل مع باب الدار فين كاينة شريهان .. سي رحال مالقاش معاهم حتى مشكل بالعكس كان فرحان ، حيت الثمن لي بغا مانقصوش منو بلعكس وافقو بلا كلمة بلا زوج ..

- رحال :

غدا إن شاء الله نتلاقاو هنا ، باش نسنيو على الكونطرا ونقادو الوريقات ، باش تاخدو السوارت الى بغيتو تجيبو الفراش ..

- مالك :

إن شاء الله ، غدا 9 ديال الصباح نتلاقاو هنا ..

- رحال : أياااه إن شاء الله ، الله يكمل بالخير .

- الكل : امين ..

- خرجو من الشقة ، رحال مشا منين قاد معاهم الامور فرحان ... وهشام وانور حتى هوما مشاو والإتصال يبقى بينهم وبين مالك ومصطفى .

______________________

- فالمطعم ديال الاوطيل لي شدو ، مجموعين كيتعشاو ..

- مالك :

غدا إن شاء الله من ورا مناخدو سوارت ديال الدار ، نشوفو شي واحد كيبيع الاثاث ، ناخدو كاع لي خاصنا فوتويات خفاف وشي نوامس ، والماعن للكوزينة ... تلاجة ومكينة خاص فهاد يوماين نضيو امورنا ..

- سعيد :

والى بغينا نرجعو إن شاء الله ، هاد الفراش لمن ايبقى ؟

- مصطفى:

من تما لتما يحن الله ، حنا ماعرفناش قداش انبقاو مطولين هنا ، داكشي باش خاصنا ناخدو كاع لي غانحتاجو ..

- مالك (مراقب مصطفى) :

مالك انت شنو واقع ؟ منين رجعنا وانت ماهواش مغوبش شاد داك تيليفون ، ياك لاباس؟

- مصطفى (تنهد تنهيدة طويلة) :

مافيا لي يهضر وحق الله ، واصلة ليا لهنا ..(أشر لحلقو)

- مالك :

جوديا ياك ؟ هي السبب ... وخويا اش غادي نكوليك هانتا كتبغيها وحتى هي هكاك ، ولكن راه صعيب الحال بيناتكم ..

- مصطفى (مغوبش) :

هادشي هو لي مرضني ، انا منقدش نعيش ففرنسا ، وهي متقدش تجي لهنا ، مايمكنش تسمح فخدمتها على قبلي .. وانا مانبغيهاش ليها ..

- سعيد :

كون غير تزوجتو ، وطلبات الإلتحاق ببيت الزوجية ، وتجي تخدم هنا فالمغرب ..

- مالك : فمرة مزيانة ، علاش لي مافكرتيش فيها ؟

- مصطفى : فكااااارت فيها ، وطرحتها عليها ولكن مابغاتش ..

- مالك (بإستغراب) :

وايلي ؟ بصح ؟ واش غادي نكوليك أخويا ... خليها من بعد ورجع فاتحها فالموضوع ، مايمكنش هادشي لي بيناتكم يمشي غير هكاك ..

- مصطفى (هز الكارط ديال بيتو وتيليفون او وقف) :

خليت ليكم الراحة تصبحو على خير ..

- سعيد ومالك : تصبح على خير ..

________________________

بعد مرور يومين

- داخلة للكوزينة كتخبز فالمسمن ، تحل الباب ودخلات سناء حطات كرواصة جابتها من المخبزة ، ودخلات لعندها للكوزينة ..

- ثورية : على سلامة جيتي باش تعاونيني ، ماسوناش ليك هشام ؟

- سناء (باللهفة ) :

خلينا من هشام ولا حسام (ضارت عندها ثورية بإستغراب)

- ثورية (مغوبشة) :

عمرك تجبدي هاد سمية على فمك هالعار ، مكنحملهاش ..

- سناء (بإستفهام) :

علاش زعمة ، وانا من نهار كنعرفك عمري جبدتها ، وماعمرك كلتي ليا بلي داز فحياتك شي حد بهاد السمية ..

- ثورية :

مداز حتى واحد بهاد السمية ، ولكن ماعرفتش علاش دكرتيها تبورش عليا لحمي وماحملتهاش ..

- سناء :

المهم خلينا من هادشي ، لحسك العمارة لي تبنات جديدة شفت تم الكاميو درحيل ، مدخلين الفراش ... او واحد تيتيز لحسك واقف نااااري كيحمق بزين ، بحال ديك الماركة قليلة هنا ..

- ثورية :

مايكون غير شي بوليسي ، هوما لي كيكريو بزاف فهاد الجوايه ... المهم قادي داكشي لي صايبت فطبسيل ، والقهوة ديريها فتيرموسات ، وسوني لهشام وأنور يجيو خلاص ..

- سناء : واخا هي دابا .. قادو المسمن فطباسل وكرواصة ، التيرموسات داروهم فالبلاطو ، سمعو الدقان فالباب مشات سناء حلات كان هشام وأنور .. دخلو وݣلسو كيتسناو البنات يلبيو عليهم ..

- سناء :

البارطما لي تبنات تسكنات ..

- هشام : اه فخبارنا ، حنا لي جبناهم ..

- سناء (بإستغراب) :

كيفاش انتوما لي جبتوهم ؟ علاش شحال من واحد ومنين كتعرفوهم نتوما ؟

- أنور :

ولد عمت مي وصا عليهم ، عندهم شي خدمة هنا وخاصهم شي بلاصة نقية وتكون قريبة لمدينة ولكولشي ، وهضرنا مع سي رحال وكرا ليهم ..

- ثورية :

شكون هادو ؟ علامن كدويو ؟

- هشام :

الناس لي يكنو جداد فالعنارة لي تبنات ... العمارة ديال سي رحال ..

- ثورية :

ااااه دوك لي ݣلتي ليا عليهم ݣبيلة؟ منين كتعرفوهم انتوما ؟

- أنور :

سيفطهم حميد لي خدمنا ليه فالعرس ، ناس تبارك الله لاباس عليهم وظريفين بزااف ... عندهم شي خدمة هنا وغادي يطولو شوية ، وكانو كيقلبو على الكرا عطاهم نمرتي ديال تيليفون ..

- ثورية :

المهم يلاه نوضو هزو هادشي خليونا نمشيو ، سبقاتهم هي حلات الباب ، مع اتخطوي الخطوة اللوة كتلقى فم الباب كلو تراب ، وتراب فيه كاكا ديال المشاش ..

- ثورية (كتغوت) :

والله ينعل لي مايحشم ، وربيو ولادكم البشار ... والدين جنون ماشي بنادم يخليها قاعيدة تفو ... خرجات سناء ودراري ..

- سناء (بدهشة) :

اويلي وحدي ، شكون دار هاد الحالة هادي ؟

- ثورية :

شكون فنظرك الجنون ، بنادم مامربيش ولادو ، كابرين فالعفن ... علاش لي يهز تراب عامر بهرار المشاش ، هداك مربي هداك راه معفون ... راه كنكولها ليك رله منمشي حتى نعصي شي قندوح .. سيرو سبقوني انسيق هاد الزبل وغادي نخلط عليكم ..

- سناء : انبقى معاك نعاونك ..

- ثورية :

الله يهديك أش اتعاوني فيا ، سطل ديال الما انكبو ونضربو بشطابة ، سيرو سبقوني راه خالتي مينة كتسنانا .. مشاو هوما سبقوها ودخلات هي هزات سطل ديال الما دارت فيه سانيكروا هزات الشطابة والكراكة وخراج كتسيق وكتعاير ..

- (واحد المرا) : وا تورية راه الولاد صغار هوما هادوك ماعندك مديري ..

- ثورية :

جنون هادوك اختي نورة ، ماشي دراري بنادم يربي ولادو عاد يطلقهم فزنقة ، وعندهم زهر ماشتهم قسما بالله (كتغوت وتسمع لجيران لي ولادهم كيطيرو مع طيرو) ونلقى ولا نحصل شي برهوش ، حتى ندخلو لدار نقرصو مزيان الى مارباتو مو نربيه انا ، والى ماعجبها الحال نربيها حتى هي هانية ، حنا مساليين قبنا نيت ماعندنا مايدار .. حركات يديها السيدة ومشات بحالها ..

_________________

- نازل مع دروج ، خرج يجيب تيليفونو من طوموبيل ، هز عينيه وقف ، فشل ركابيه تحشو عليه ... قلبو كيضرب كيحس بشيحاجة واقفة ليه فحلقو ، باغي يجري لعندها باغي يغوت بأعلى صوتو ويقوليها شحال توحشها ولكن مقادش ، شكون هو بصفتو أش وهي معاقلة على والو ، ماحسش إيمتا داوه رجليه غادي عندها ، رجليه كيتمشاو وعينيه عليها ، جلابة لي عمرو شافها بيها ، شعرها لي زادت زعرات خصلاتو ، تغوبيشة لي على وجها ، مافيقو من سرحان ديالو غير الما لي ترش عليه ..

- ثورية (هزات عينيها فيه تبلوكات ، حسات بالما بارد تكب عليه ، عمرها شافت بحال هاد الزين ، هاد الوسامة كتخطف القلوب من أول نظرة ، قلبها حسات بيه كيضرب بحال الى ضاع منها ) :

- سمحليا اخويا ماشفتكش سبحان لي يسهى ... ومع انت تبارك الله وصلاة على نبي زين وطولة ، جاب الله مدوشت ليك من ساساك لراسك ..

-مالك (واقف كيشوف فيها عاد فاق من الݣلبة ، بتوتر ) :

لا مكاين باس ماشي مشكيل انا لي كان خاصني نوقف حتى تسالي

- ثورية (عجبها زينو حسات بقلبها ضاع منها) :

لا لا انا لي ماشفتكش سمحليا ، واخا نسولك ؟

- مالك (ماكرهش يعنقها شاد يديه بزز حبيبتو لي كيموت عليها قدامو ومقاد يدير والو ، بلع ريقو وجاوبها ) :

وي مرحبا سولي ..

- ثورية :

انت ماشي من هنا كاتبان ليا براني ، واش يلاه سكنتو هنا ؟ انتوما لي سكنتو فالعمارة الجديدة ؟

- مالك (تبسم) :

لا حنا ماشي من هنا ، يلاه ستقرينا فكازا ، اه حنا جيرانكم جداد ..

- ثورية (سهات فضحكتو وتبسمات) :

نسولك تاني ولا ديرهاش مني قلة الصواب ، القضول عندي زايد نغزة هههه

- مالك (مع راسو الفضول فيك واخا فاقدة الداكرة ) :

لالا غير سولي مرحبا ..

- ثورية :

أش سماك الله ؟

- مالك (سكت وتبسم ونطق ) :

سميتي مالك وكنيتي العراقي ..

- ثورية سكتات ، ماعرفاتش علاش كتحس بهاد سمية فايتة عليها ، غمضات عينيها فواحد اللحظة جاتها لقطة فبالها ، صورة وحدة نازلة من طوموبيل لابسة كسوة بيضة ، وشخص شاد ليها فيديها مباينش وجهو مزيان ... حلات عينيها حيت حسات براسها ضرها وجاتها دوخة ..

- مالك (بخوف شد ليها فيديها ) :

ياك لاباس ؟ باش كتحسي ؟ دخلي دخلي ... مجاوباتوش ، شدات راسها ودخلات معاه ، ݣلسها على سداري بان ليه الما كب فالكاس وعطاها تشرب .. خدات من عندو الكاس شرباتو بقات مدة عاد بدا كيفوتها راسها ...

- مالك :

واش مالف كيوقع ليك هكا ؟

- ثورية (هزات فيه راسها مصغرة عينيها ) :

مرة مرة ..

- مالك : شحال وانت كتحسي هكا ؟

- ثورية :

عام دابا وانا هكا ، مشيت لطبيب وݣاليا راه غير الخدمة وستريس كيوقع ليك هكا ..

- مالك :

الستريس مكيديرش هكا ، خاصك ضروري إختصاصي ... مخاصكش تبقاي هكا ، سمحيليا تكفلت ودخلت معاك ، ولكن ماقديتش نخليك بحال هكا ..

- ثورية :

لا لا أنت لي سمح ليا أخويا ، برزطك معايا خاصني نمشي خليتهم كيتسناوني ..

- مالك (وقف) :

الى ماعندكش شي مشكيل ، واش ممكن ناخود نمرتك ديال تيليفون ؟ غير باش نسول فيك كيف بقيتي وصافي ماشي شيحاجة ..

- ثورية (تبسمات نسات ضرورة ديال راسها ، ماقداتها فرحة هاد زين والاداب وصواب طلب نمرتها هاد نهار ايطلع ليها فيه جوكير ) :

اهاه واخا قيد نمرتي .. ( جبد تيليفون ديالو قيد نمرتها ) دير فيها ثورية ..

- مالك : واخا ... (كتب على نمرتها سيدة قلبي ) سونا عليها ..

- راه نمرتي اطلع عندك ... خليت ليك الراحة ..

- ثورية : بسلامة ومرحبا بيكم ..

- مالك : لهلا يخطيك ، تهلاي فراسك (حدر راسو ومشا) ... دخلات الشطابة وسطل حطاتهم فطواليط ، هزات سوارت وتيليفونها وخرجات من دار سادة الباب وراها ..

______________________

- فدار مينة ... جارت البنات ، ولادها كاينين فبرا ، راجلها مات وبقات بوحدها ... كتهلا فالبنات فينما جاو ولادها كتجيب لبنات حقهم من كولشي ، حوايج شكلاط روايح كريمات ، اي حاجة مكتنساهمش ...

- سناء : تعطلتي أصاحبتي ..

- ثورية (كضحك من ودنيها ) :

حتى لمن بعد ونعاود ليك شنو وقع ، نااااري هاد نهار طلع ليا جوكيييير ...

- سناء :

ناري يا جنية عارفاني فيا الفضول ، حرام عليك اجا مايصبرني حتى نرجعو لدار ..

- ثورية :

إيوا غير صبري أحبي ، حيت والله منݣوليك شيحاجة دابا ، حتى نمشيو لدار ونعاود ليك بضيطاي غير تهناي ..

________________________

- دخل لدار ، مبسم ... من بعد عام كيحس براحة وكيحس براسو فرحان ومرتاح ، من كترت الفرحة جاه الجوع ، تحلات ليه الشهية على الماكلة ..

- مصطفى (كيشير قدام عينيه ) :

واااا شريف ، شفتك مشيتي معاونتينا ما والو داخل وكتفرنس ياك لاباس ؟

- مالك (تنهد تنهيدة طويلة) :

شفتها ، شفتها وهضرت معاها وشديت فيديها ..

- مصطفى (بجدية ) :

كيفاش فين شفتيها؟ شنو ݣالت ليك عقلات عليك ولالا ؟ عاود ليا خلاص أصاحبي ..

- مالك (ݣلس ) :

كنت غادي للحانوت ... بانت ليا وبلعاني دزت من حداها وهي كتسيق ، مشافتنيش وكبات عليا الما ... طلبات مني السماحة وسولاتني ، ههههه الفضول ديالها هو هو عمرو ماتبدل ... كالت ليا شكون انت واش الجيران جداد ..

- مصطفى (تبسم بلاما يحس) :

باش جاوبتيها ؟

- مالك :

ݣلت ليها اه ، سولاتني على سميتي ههههه ... وجاوبتها ، ولكن غير كلت ليها على سميتي سهات ، وجاتها دوخة غير شديتها كانت غادي طيح ، دخلت معاها لدار عطيتها تشرب ، وفاش سولتها واش ديما كيوقع ليها هكا ... ݣالت ليا بلي عام وهي كيوقع ليها هكا ، نفس داكشي لي عاود لينا عليه هشام وأنور ..

- مصطفى :

داكشي لي وقع أثر ليها على راسها ، خاصها ضروري إختصاصي ... ولكن كيفاش انديوها ليه وحنا يلاه جداد فالحومة ؟

- مالك :

خديت من عندها النمرة ديال تيليفون ، باش نسول فيها ... كالت ليا قيد فيها ثورية هههه ..

- سعيد :

الحمد لله يلاه رتاحيت واحد شوية بعدا ، دابا خاصنا بلان باش تشوف الطبيب ضروري ..

- مصطفى :

انهضر مع دراري ، وندير معاهم شي بلان .. لي تكون فيه حتى هي حاضرة ، ونقتارحو عليها الطبيب ، بحال مثلا نكولو بلي كنعرفو واحد الطبيب معرفة وأيدوز ليها فابور ، ختي راه فيها نفاخة مكترضاش شي حد يخلص عليها ..

- مالك : فكرة واعرة ، انسوني لخالتي زهرة نعلمها بالجديد ..

____________________________

- زهرة (موعها نازلين وكضحك) :

مزال فيها الفضول واخا مشات ليها الداكرة ... اهاه فهمتك أولدي فهمتك ، واخا أوليدي الله يرضي عليك الله يعاونك ويسهل عليك ياربي .. واخا واخا صافي بسلامة اولدي بسلامة ..

- نزهة (بفضول ) : شنو ݣال ليك ؟

- زهرة (عاودات ليها ݣاع لي وقع ) ..

- أحمد : الحمد لله ياربي ، اللهم لك الحمد ولك الشكر ... خاصنا نديرو شي صدقة ..

- زهرة :

إن شاء الله منين ترجع لبنتي داكرتها وترجع ليا نديروها الحاج ..

- نزهة : إن شاء الله ياربي ، الله يفرحنا بيها ويفرحنا بيهم ..

- الكل : أمــــين ...

___________________________

- سناء (كتفرنس) :

هاي هاي هاي ، صافي ياختي طرتي بتيتيز ، طيحتيها يا صݣعة .. إينا واحد بعدا فيهم ݣاعما سولتك ؟؟

- ثورية ( كتفرنس) :

انا هدا طويل تبارك الله ، وعينيه كبار مشفرين حروفو كحلين ... شعرو رطب المهم كيحمق ياختي بزييين ..

- سناء :

لالا ماشي هو لي شفت الصباح ، هداك لي شفت سميمر وحروفو ماكحلين ماشهبين فشكل ، وحتى هو غزاااال ومعاه راجل كبير فالعمر شوية يكون ديك 50 عام هكاك ..

- ثورية :

قلبي كنحس بيه ضاع أصاحبتي ، على مزيناتو فن فن فن كيهبل ... وعلى عوينات عندو ونسيت ، واشم صباعو ياختي باين كان فبرا ..

- سناء : حتى أنا داكشي لي ݣلت ...

- ثورية (قفزها صوت تيليفون ، هزات تيليفونها طلعات ليها نمرتو ) :

ناري كيسوني ليا ..

- سناء (نقزات من بلاصتها ) :

وجاوبيه خلاص ، اش كتسناي أصاحبتي اويلي وحدي ، جاوبي ..

- ثورية : ششش ، (فتحات الخط) ألــو ...

- مالك : سلام ش ثورية ، سمحليا إلى برزطك ..

- ثورية : لالا بالعكس ، مكاين حتى تبرزيط ..

- مالك : كيف بقيتي شوية ؟

- ثورية : لالا الحمد لله بيخير ، لهلا يخطيك وانت ؟

- مالك : انا الحمد لله ، منين انت بيخير انا راه بيخير ..

- ثورية (شدات قلبها ، تبسيمتها كتبين ضرسة لعقل ) :

لهلا يخطيك ، إيوا رتاحيتو شوية ؟

- مالك : الحمد لله بيخير ، كانو عندنا نيت هشام او انور ... كالو لينا خدامين مع بعضياتكم .. انت والبنت لي معاك ..

- ثورية : اه خدامين معانا وراه حسب خوتنا .. ݣوليا ، واش جيتي انت وصحابك سكنتو هنا ولا عائلتكم ؟

- مالك ( تبسم فضولها ماخلاهاش) :

لا انا او ولد عمي ، وخالو ... مالين دار خليناهم فالقنيطرة ، وخوتي زوج كاينين ففرنسا .. حنا كلنا كنا ففرنسا وتحولنا دابا للمغرب ..

- ثورية : هكاك ، تبارك الله وشنو جابك لكازا ؟

- مالك (جبتيني أنت ) :

الصراحة ، ناوي إن شاء الله ندير واحد المشروع ، وجيت نشوف السوق كيف داير منين غادي نبدا ، وناخود سونة على السلعة ... وعلى بزاف ديال الحوايج ..

- ثورية : هكاك مزيان ، وشنو خلاك تخلي فرنسا وترجع للمغرب ؟

- مالك : الظروف وصافي ، خليت خدمتي وقررت نرجع للمغرب ..

- ثورية : شنو كنتي كدير فحياتك ؟ سمحليا كنسول بزاااف ..

- مالك (ضحكاتو حيت كتسول على أي حاجة ) :

لالا خودي راحتك ، كنت وزير الشباب والرياضة ..

- ثورية (خرجات عينيها مصدومة ، تقادات فالݣلسة ) :

ك كيفاش ، كتريݣل عليا ياك ؟ ربي ربي واش كنتي وزير ؟

- مالك (كيضحك) :

وحق الله العظيم الى كنت وزير ، ولكن حطيت الإستقالة ديالي وجيت للمغرب بغيت ندير مشروع ديال تريتور ، أصلا الوليد خدمتو هادشي ديال الحلويات ففرنسا ، عندو محالات تما ، خلا خوتي يقابلوهم وهو جا لهنا يرتاح ..

- ثورية :

والله الى صدمتيني ، جيتي للمغرب دير تريتور وخليتي فرنسا وخليتي الوزارة ..

- مالك :

عادي ماشي شيحاجة ، وانت عاودي ليا عليك شوية ، شحال فعمرك ، واش أصلك من كازا ؟

- ثورية (سكتات كتفكر ) :

انا لي عارفة هو سميتي ثورية ، نكدب عليك الى كلت ليك عارفة شحال فعمري ومنين انا ..

- مالك (ضرو خاطرو ) :

بحالاش مافهمتش ؟

- ثورية : قصة طويلة هادي ، من بعد الى كتاب ونكولها ليك ..

- مالك :

نسيت ماكلت ليك ، درنا بروݣرام حنا ودراري ... قتارحنا نخرجو غدا بالعشية لعين الذياب ، هادي 4 يام وحنا هنا عيينا وكلنا نرتاحو شوية ... الى بغيتو تجيو معانا ، ايكونو هشام وأنور .. شنو بان ليك ؟

- ثورية : الصراحة والله ماعرفت ، خاص حتى نسول صاحبتي ؟

- مالك :

صافي ، حتى تسوليها ... أيعجبني الحال الى وافقتو تجيو ... ندوزو العشية ونرجعوكم حتى لدار ، ماعندك مناش تخافي ، وزايدون ايكونو دراري حتى هوما انور وهشام ..

- ثورية :

صافي ، انا نشوف ... يكون خير .

- مالك :

تهلاي فراسك بزاااف ، تصبحي على خير .

- ثورية :

حتى انت تهلا فراسك بزاف ، تصبح على خير .

- سناء :

ناري ياختي ، وشديتو الجماعة هههه ، اشنو كاليك العار ؟؟

- ثورية (عاودات ليها كولشي ) دابا باغي يعرف واش نمشيو معاهم ولالا ..

- سناء :

اويلي على لا ، اه اه انمشيو كوليليه بلي غادي نمشيو ..

- ثورية : وايلي زعمة نكوليه اه ..؟

- سناء :

واش باغية تفلتي هاد الفرصة من نيتك ... كوليليه اه ، يلاه دخلي الواتساب وشوفي واش عندو فهاد نمرة وكولي ليه اه ، يلاه سربي أش كتسناي ..

- ثورية :

صافي صافي واخا ... دخلات للواتساب ، طلعات ليها نمرتو فيها تصويرتو ، دخلات لتصويرة كتحقق فيها شحال وهي مبسمة بحال شي وحدة حمقة .. سيفطات ليه ميساج فيه " صافي غادي نجيو معاكم " ..

- ثورية (كدور وتشوف راسها فالمرايا) :

شوفي كيف جيت ؟ مزيان جات معايا ؟

- سناء (كطلعها وتهبطها بإعجاب) :

خوخة ياختي وشداتني دوخة ، جيتي فنة فنة فنة ... سيهم مالك الى شافك اليوم يخطبك ههههه

- ثورية (تنهدات تنهيدة طويلة) :

أحيانة كاع هدا زهر عندي ، انا معارفة على راسي حتى حاجة ، يتزوج بيا شوفي هو كيف داير ولاباس عليه ..

- سناء :

متبقايش تگولي هكاك أصاحبتي من نيتك ، ماتعرفي ربي شنو مخبي ليك .. سونا الباب ، مشات سناء خلات دخل هشام كيطلعها وينزلها :

حيدي ديك تعكيرة مالك غادية لعرس ؟

- سناء (كتخنزر فيه صدمها) :

هاي هاي هاي ، ومالك انت شغلك ؟

- هشام (مغوبش) :

راه ݣات ليك ياغادي تحيدي ديك تعكيرة ، ولا ݣلسي فدار واحد فزوج .. بقات كتشوف فيه (بصرامة) ويلااااااه راه هضرت ... قفزها طارت لبيت مسحات العكر ..

- ثورية :

مال هشام داخل كيغوت ياك لاباس ؟

- سناء :

ماعرفتش مالو ؟ اشافني معكرة جعر وكاليا الى مامسحتيه كلسي فدار ..

- ثورية (جاتها الضحكة) :

ايوا كيكوليك الله يجيب لي يفهمنا ومايعطينا والو ..

- سناء (شافت فيها ) :

مافهمتش ؟ كيفاش زعمة ؟

- ثورية : مزااال غادي تفهمي ، يلاه انا سبقتك ... خلاتها مسحات العكر وخرجات عند هشام ..

- رخف شوية عليها ، واش هكا ناس كيتعاملو ؟

- هشام :

وشتي تعكيرة لي دايرة سيدة ؟

- ثورية :

صارح البنت خلاص ولا غادي تطير من يديك ، كون عرفاتك كاتبغيها ادير بحسابك ... انا علمتك .. فين هو أنور ؟

- هشام : راه على برا ..

- خرجات ثورية لبرا ، كيبان ليها أنور واقف مع مالك ... شافها شير ليها ، حدرات راسها وتمات جايا عندهم ..

- ثورية : سلام

- مالك : سلام ثورية لاباس عليك ؟

- ثورية : الحمد لله بيخير وأنت ؟

- مالك : حتى انا لاباس الحمد لله .. غادي نمشيو حنا فطوموبيل انا وياك وصاحبتك ، وغادي يتلحقو بينا البقية صافي ؟

- ثورية : صافي واخا ..

- أنور : هاهو هشام وسناء جايين .. تحل الباب ديال الموبل وخرج مصطفى تابعو سعيد .. هزات راسها جات عينيها فعينين خوها ، داز قدامها لقطة ديال هاد الوجه كيركب ليه سلسلة ، وإسم مصطفى كيتردد فودنيها (شكرا أخويا مصطفى لهلا يخطيك عليا) ..

- مصطفى (حس بحجرة فحلقو تمالك راسو غير بزز) :

ياكما تعطلنا عليكم ؟

- مالك : لالا ماتعطلتوش .. نعرفكم ثورية ..

- ثورية (مدات ليه يدها كترعد ) :

وانت (نطقاتها هي ومالك دقة وحدة) مصطفى ..

- مصطفى جمد فبلاصتو ، يدو بقات فيدها مافهم والو ...

- مالك (بإستفهام) :

باش عرفتي سميتو ، انا ماكلتهاش ليك قبل ؟

- ثورية (ضرها راسها تاني) :

ماعرفتش ، ماعرفتش والله ماعرفت ... جاتني واحد الصورة فبالي بحال الى فايتة شفتو ، وسمية ترددات فودنيا مافهمت والو (مشات بيها دنيا وجات ، غير يدين خوها لي شدوها ) ..

- مصطفى :

بشوية عليك غير بشوية عليك ... رتاحي ، فتح ليها مالك باب طوموبيل طلعات حداه ، وݣلسات ... عطاها تشرب شربات وغمضات عينيها ..

- سد عليها الباب وضار عند مالك .. :

عقلات على سميتي شفتيها (شد على راسو البكية غلباتو) ..

- مالك :

ضروري خاصها طبيب ، مايمكنش تبقى بحال هكا ...

- سعيد (ساهي) :

مافهمت والو انا وحق الله العظيم ..

- مالك (بانت ليه سناء وعلامات الاستفهام على وجها) :

يلاه نمشيو دابا من بعد ونهضرو ... تفضلي اختي سمحيلينا

- سناء :

لالا ، مكاين باس ... طلعات اللور هي او هشام ، وأنور وسعيد مشاو مع مصطفى فطوموبيل أخرى ..

____________________________

- ففرنسا ..

- عمر (بقلق) :

شوية دابا ؟ باش كتحسي ؟ واش أول مرة يوقع ليك بحال هكا ؟

- إشراق (سخفانة) :

هاد الأيام ، كتجيني واحد الدوخة وترويعة ... انا عند بالي غير شيحاجة كليتها مجاتش معايا ..

- عمر :

وكوليها ليا أصاحبتي كوليها ليا علميني ، نديك لطبيب ... نوضي نوضي نمشيو ..

- إشراق :

لا مكاين لاش ، هادشي عادي وغادي يبقى بحال هكا ..

- عمر (بإستفهام) :

كيفاش عادي وغادي يبقى هكا ؟ مافهمتش ..؟؟ ݣلسات وهزات واحد الغراف جبدات منو تيست ومداتو ليه ..

- عمر (خداه من عندها كان فيه جوج شرطات ، جاتو الصدمة تشوكا مافهم والو ، هز راسو فيها مزال مامتيقش) :

كتدوي بصح ياك ؟

- إشراق (جاتها الضحكة) :

ومنين انجيب تيست ديال بلعاني ، هدا درتو غير صباح ... مالك مصدوم هههه ..

- عمر (يلاه فاق من الݣلبة ، تخلط عليه كولشي فرحة ودهشة ماعرف يوقف .. ) :

دابا غادي يولي عندنا 3 البنيات ياك ؟

- إشراق (كضحك) :

وممكن يكونو عندنا جوج بنيات او ولد ، المهم تكون صورة مكمولة هدا الأهم ..

- عمر (جرها خاشيها فوسط صدرو) :

إن شاء الله ، إن شاء الله ايكون كامل الصورة ويدوز كولشي على خير وبيخير ، الله يخليك ليا ومايحرمنيش منك يارب ..

- أشراق (فرحانة) :

حتى انت لهلا يخطيك عليا ياربي ..

________________________

إفتَح

أبوابَ قلبِگ دائمًا لِـ الحُبِّ..؛

فَـ إنْ لم يَکُن هُناگ مَن يَستَحِقُّ..؛

فَـ أنتَ بِه أولىٰ وبِـ صُحبَتِه أنتَ أحَقُّ..!!

ثُم

إستَودِعُوا اللّٰـه

قُلوبَکُم ومَن تُحبُّون..،

إستَودِعُوه أخلصَ دعَواتِکُم وأصدقَ مَا تتمنُّون..؛

فَـ وَدائِع الرَّحمٰن في مَعيَّتِه لا يَمسَّها سُوءٌ ولا تُخالِطُها الظُّنون

وعلىٰ الحُبِّ دائمًا وأبدًا نلتــقي ..

_________________________

- ݣالسين فالقهوة ، باش يتغداو ... هي ساهية مكتهضرش كتفكر فلقطة لي شافت ... هزات عينيها فمصطفى لي كان كيشوف فيها ..

- مالك (موجه كلامو ليها ) :

ثورية ، كاين واحد دكتور كيعرفو سعيد ... مختص فالجهاز العصبي ، كيدوز نهار الخميس فابور ... الى بغيتي نمشيو لعندو نشوفو هادشي مناش شنو بان ليك ..

- ثورية (هزات عينيها فيه) :

ماعرفتش والله ... الى مكانش عندنا الخدمة نمشي ..

- هشام :

هاد السيمانة ماعندناش الخدمة ، خاصك ضروري تمشي باش تعرفي هادشي مناش ..

- ثورية (رجعات كتشوف فمصطفى) :

اه فعلا بصح ... خاص ضروري نعرف هادشي مناش ... تحط الغدا ، كولشي كياكل ومجمع من غيرها هي لي المود ديالها تبدل ، سلاو الماكلة ..

- سعيد :

دابا خاصنا غير شي براد ديال أتاي ..

- ثورية :

ويكون ديال النعناع ياك ؟

- سعيد (بإبتسامة ) :

هو لي كيعجبني ورا الماكلة ..

- ثورية :

حتى أنا .. شوية سكتات او وقفات ) سمحوليا انتمشي شوية يضربني البرد ..

- ناضت خلاتهم متبعينها بعينيهم ، ستأذن مالك وتبعها ..

- سناء :

مافهمتش مالها ، منين كلسنا وهي ماهياش ، وحتى انتوما كتشوفو فيها بخال الى جاتكم غريبة ، واش جايبينا هنا باش ضحكو علينا ولا كيفاش ؟

- مصطفى (شاف فيها ) :

مكاينش شي واحد كيجيب ختو ويضحك عليها ..

- سناء (بإستغراب) :

كيفاش ختو ؟ مافهمتش ؟

- هشام : سناء سمعي ...

__________________________

- مالك (غادي معاها فنفس الخط ) :

مالك ؟ ياك لاباس ؟ علاش نضتي منين كلسنا وانت ماشي هي هاديك ..

- ثورية (وقفات وشافت فيه) :

مالك ، خاصك تعرف بلي انا معارفاش واليديا شكون هوما هوما ، ولا شكون هي عائلتي ... معارفة على راسي والو ... وزادني هاد الراس لي كيضرني ... اليوم فاش شفت ولد عمك بحال الى شفتو فشي بلاصة ، وشيحاجة فودني همسات بلي سميتو مصطفى ... ماعرفتش شنو كيوقع ليا فهمتيني ... سميتك انت لبارح بحال الى فايتة على بالي ، ودابا أتاي بنعناع ... راه انا غادي نحماق راه مابقيت فاهمة والو ..

- مالك :

ولكن كيفاش انت معاقلة على والو ، واش عمرك سولتي راسك هاد السؤال ؟

- ثورية :

كنسول راسي هاد السؤال ولكن كيضرني راسي .. حياتي مخربقة بزاف .. حليت عينيا على هشام وأنور حتى سميتي معارفاهاش ، لقيت راسي ففرنسا زجهي مكان فيه مايتشاف ... هوما كالو لقاوني مليوحة جنب البحر ، وجابوني للمغرب ... عائلتي مكنعرفهاش ، ماسولو فيا ما والو ... معارفة راسي من رجلي لا كارط ناسيونال لا والو ..

- مالك :

ماقلتيش بلي ممكن تكون فقدتي داكرتك ؟

- ثورية (شافت فيه) :

كيفاش ؟

- مالك :

انت ماعقلتيش على راسك ، من غير انو حليتي عينيك على هشام وانور ، كون كنتي عاقلة اتعقلي على سميتك وعلى عائلتك شكون هوما ، وكيفاش وصلتي للفرنسا ... اتعقلي على هادشي كامل ، يمكن لوحة لي كنتي مليوحة فالبحر سببات ليك ضربة فراسك وهاد ضربة هي لي خلاتك تفقدي الءاكرة ، ومتعقلي على والو ، فالوقت لي انت كتقولي عائلتك ماقلبوش عليك ممكن يكونو قلبو عليك وانت هنا فالمغرب وهوما مسايقينش الخبار ..

- ثورية(سهات فكرات فكلامو ولقات عندو الصح) :

فعلا بصح ، انا هادشي مافكرتش فيه نهائيا ..

- مالك (شد ليها فيديها ) :

كولشي ايكون مزيان ، انت غير رتاحي وماتبقايش تفكري بزاف صافي ... انا معاك مغانخليكش ..

- ثورية (حيدات يديها من يديه) :

وبأشمن صفة ، حنا يلاه تعرفنا لبارح ولالا ؟

- مالك (تنهد تنهيدة طويلة ، مقدش يصبر ويتسنى ) :

واخا تلاقينا غير لبارح ، ولكن بحال الى تلاقينا شحال هادي وبحال الى كنعرفك شحال هادي ، انا ماعنديش مع اللف ودوران وكترت الخروج ودخول ، خاصك تعرفيها هادي ..

- ثورية :

كلكم كتݣولو نفس الكلام ، ومنين كتشبعو وتقنعو ومكتاخدوش لي بغيتو ، كتقلبو ستة تسعود ..

- مالك (بجدية ) :

ثورية ، الى طلبت منك زواج واش تزوجي بيا ؟

- ثورية (بصدمة ، مافهمات والو زرب عليها) :

ك كيفاش ؟

- مالك :

وااااش تزوجي بيا ؟

- ثورية :

واش عارف شنو كتݣول ولالا ؟ واش انت يلاه عرفتيني لبارح وباغي تزوج بيا ، واش يحسبليك انا طيحة من جبل ... سلم عليه زرب عليه ، عرفتيني البارح اجي واش تزوج بيا ... وفراني الفراري شتك دخلتيني دخلة سيك ، شور ابشوية .. ماشي غير هضرنا فتيليفون راه صافي غادي نتيق ، الناس دوزو معاهم الأعوام ومزال ماطلبوهم حتى للخطبة ، انت عرفتيني غير لبارح واش تقبلي تزوجي بيا ..

- مالك (صدماتو ، عرف راسو تسرع ولكن قلبو مطاوعوش شنو أيدير ) :

انا ماقصدتش شيحاجة خايبة ، ولكن صراحة عجبتيني وماعنديش مع داك تطوال فالعلاقات ..

- ثورية :

لا زربة على صلاح أولد الناس ، عرفتك غير لبارح مغانجيش ونوافق على زواج ، ودابا غادي نمشي بحالي أصلا حاسة براسي ماهياش ..

- مالك :

يلاه جينا ياك ݣلنا اندوزو نهار هنا ..

- ثورية :

كنا اندوزو نهار ، دابا ماعنديش الݣانة نهائيا وعيانة بغيت غير نعس ونرتاح ، وعفاك بلاما توصلنا أناخكو طاكسي .. خلاتو واقف ورجعات لعندهم .. مالك تعصب وغير بالكشايف شد فراسو ماعجبوش الحال ، لام راسو على هادشي لي وقع ... تبعها لقاها واقفة وسناء حتى هي واقفة مفاهمة والو ، علامات الاستفهام باينة على وجه دراري ومصطفى وسعيد ..

- مصطفى :

وأقل حاجة غير نوصلوكم ، جيتو معانا وراجعين بوحدكم مافهمتش ؟؟!!

- ثورية :

لا اخويا ، بلاما تعدب راسك .. انرجع انا وسناء فطاكسي ... غير خليونا على خاطرنا ، هشام الى بغيتو تبقاو أبقاو بلاما تجيو معانا ..

- هشام :

لا غادي نمشيو معاكم ، ماترجعوش بوحدكم ... سمحولينا وشكرا بزااف على الغدا ..

- مصطفى : العفو مرحبا ..

- ثورية : شكرا سمحولينا بسلامة عليكم ... شكراتهم سناء حتى هي ومشاو بلاما تشوف ثورية فمالك ..

- مصطفى (غير مشاو وجه كلاو لمالك ) :

شنو كاين ؟ شنو وقع ؟ علاش جات مقلوبة ودغية بغاو يمشيو واش ݣلتي ليها شيحاجة ؟؟

- مالك (ݣلس مخنزر ماعجبوش الحال ) :

طلبت منها الزواج ..

- مصطفى وسعيد دقة وحدة : كيفاش ؟؟؟!!!!

____________

- (فدار)

- سناء ( ساخطة ) :

تسرعتي بزااف أثورية ... حشومة عليك وعيب ، تصرف لي درتي ماشي هو هداك ، واش انت غير حيت جاتك لوخرا معصباك وبردتي فيه جنونك ...

- ثورية :

شنو بغيتيني ندير بسلامة ، نݣوليه موافقة ، واش هو تعرف عليا غير لبارح نكوليه مرحبا من نيتك ... عند بالو انا ضحكة ..

- سناء :

لا انا ماݣلتش ليك وافقي ، ولكن متعامليش هكاك ... كوليه خلينا نتعارفو بعدا ماشي دابا ، وحنا عاد تعارفنا ماشي تغوتي بحال الى باغي يغتاصبك ... ودري راه محتارم او ولد الناس ، وباين بلي كيبغيك ..

- ثورية (خنزرات فيها ) :

كيفاش كيبغيني ، انا عاد عرفتو لبارح مالي كنعرفو سينين هادي ..

- سناء (حدرات راسها وتفكرات هضرت مصطفى والقصة لي عاود ليها على ثورية وحقيقتها كلها ) :

الحب مكايجيش بعد أعوام ، راه ممكن يجي فنهار واحد ولا من أول نظرة .. ثورية تسرعتي بزاااف الدري لا أخلاقو ولا مستواه يستاهلو لي درتي ، حشمتينا معاهم بزاااف وحق الله العظيم ، وضيعتي علينا الخرجة ... نهار لي ربي وقف ليك الحلال فطريقك باش تحيدي من تمارة شوفي شنو درتي .. انا انخرج بغاني هشام فشيحاجة وانت ݣلسي مع راسك وفكري مزيان فهادشي لي درتي .. خليت ليك الراحة ..

- خلاتها ساهية وكتفكر فكلامها ومشات خرجات ..

- فدار عند مالك .. ݣالس مجبد رجليه ، كيفكر فالحوار لي دار بيناتهم .. مد ليه مصطفى كاس ديال القهوة وݣلس مقابل معاه .. :

الصراحة مادرتي فيها مايتلبق أصاحبي ... شد فراسك ديك ساع راه من حقها ، واحد عرفاتو غير يوماين تقبل تزوج بيه ، راه بطبيعة الحال مغاديش تيق بيك ... واخا ردة فعلها كانت قاصحة شوية ولكن راه من حقها أباش نكونو مفاهمين ..

- مالك (تنهد تنهيدة طويلة) :

عارف ، ولكن فهموني الله يرحم بيها الوالدين ... واش انا لغرضي ماشعرتش اعباد الله ، دابا فات الفوت صافي نسا هاد الموضوع عفاك ..

- مصطفى: واخا هاهو ساكت ..

________________________

- بليل ... ݣالسة هازة تيليفون ديالها ، ماعرفاتش واش تسيفط ليه ولالا ، ولكن حتى هي زادت فيه بزاااف ، فتحات تيليفونها ومشات للواتساب .. سيفطات ليه ميساج " سمحليا على لي وقع ، ماقصدتش نخسر النهار ونتصرف بحال هكاك ... مديش عليا مع كنت عيانة شوية ماشعرتش .. "

- جاها الجواب ديك الساعات " انا لي غلطت ماشي انت ... انا لي تسرعت مكانش عليا نتصرف بحال هكاك ، كنعتادر وغير كوني هانية مابقيتش انجبد معاك داك الموضوع " ..

- ثورية :

" حنا يلاه تعرفنا أمالك .. على الاقل غير حتى نزيدو نتعرفو ، وانا مزال معارفة حتى شكون أنا وهادشي لي كيشدني مناش ، خلي غير حتى نشوف طبيب ونعرف شنو عندي ويكون خير "

- مالك : " إن شاء الله مايكون غير الخير ، نهار الخميس انجي نديك لعند الطبيب فصباح صافي ؟ "

- ثورية : صافي واخا إن شاء الله تصبح على خير ..

- مالك : " تصبحي على خير" ..

________________________

- وصل نهار الخميس ... فاقت بكري باش توجد راسها ، الخلعة كانت شداها .. كانت خايفة بزااف من داكشي لي غادي يكوليها الطبيب ، لبسات سروال ديال الدجين مع سبرديلة ، وتيشورت فالبيض ، شعرها جمعاتو على شكل سفنجة ... هزات ساكها وتيليفون وخرجات ... خلات سناء مزال ناعسة ، مع سدات الباب كيبان ليها واقف بعيد ... داير رجل على رجل ومتكي على الطوموبيل ، كان لابس سروال ديال كيطمة سبرديلة وتيشورت مع قبية ، كيبان كيفتن ... جات فبالها غير ليلى كون شافتو كون حاولات ما أمكن طيرو بداك الشعر الصفر ديالها بحال الكبالة ،، تبسمات ومشات لعندو :

- صباح الخير ... عدبتك معايا كون عطيتيني غير لادر(ماخلاهاش تكمل) ..

- مالك :

صباح النور ، طلعني اثورية بلاما نضيعو الوقت ... ديك الهضرة ديال عدبتك مكنحملش نسمعها ، خلاها وطلع لبلاصتو ... بقات كتشوف فيه حتى عيات وطلعات حداه .. ديمارا الطوموبيل وزاد ..

- الطريق كلها وهوما ، ساكتين هو منطق بحرف واحد وحتى هي هكاك .. كتبغي تهضر وكترجع تسكت ، حتى وقف مالك قدام واحد الموبل فبورݣون ... بلاصة الطومبيل ، نزل ونزلات معاه ... دخلو للموبل وطلعو فلاسنسور ..

- مالك (كان حاضيها بعينيه ) :

مالك ؟ شفتك ماشي حتى لتم ؟

- ثورية (مستريسية) :

فيا الخلعة بزاااف ..

- مالك :

ماعندك مناش تخافي ، نغادي يكون غير الخير ... انا هضرت مع الطبيب والبارح .. وعاودت ليه على الحالة ديالك ... اديري الأشعة وانتسناوهم يخرجو ، وغادي يكولينا شنو كاين صافي ..

- ثورية (حطات يدها على قلبها ) :

إن شاء الله ..

- دخلو لعند الطبيب ، ݣلسو كيتسناو دخلهم المساعدة ديالو ... شوية وجات عندهم :

- دخلو الدكتور كيتسناكم .. ناضت هي وياه ، دخلو للبيرو ديالو كان ݣالس .. وقف سلم على مالك وعليها هي .. من بعد ݣلسو بزوج ..

- الدكتور :

موسيو مالك شرح ليا الحالة ديالك فتيليفون ، ممكن تعاودي ليا بتفصيل شنو كيوقع ليك ؟

- ثورية :

هادشي كنعاني منو عام دابا ، نهار حليت عيني ماعقلتش على راسي شكون انا ، سميتي ولا عائلتي والو عقلي صفحة بيضة ... من بعد ولا كيضرني راسي ..

- الدكتور : أشمن وقيتة بضبط كيضرك راسك ؟

- ثورية :

غير فالوقت لي كتجيني شي لقطة فدماغي ... بعد المرات كنكون عادية ، ولكن مرات كيجيوني لقطات فراسي ... كيبانو ليا شي ناس مكايبانش وجهم ولكن كنشوف راسي معاهم ، فاش كنحاول نركز باش نتفكر غير الوجوه ديالهم كتجيني الدوخة وراس كيضرني ..

- الدكتور (تنهد) :

داكوغ ، ݣولي ليا ، مكايجيوكش كوابيس بليل ؟

- ثورية :

اه اه ، ماشي أحلام حلم واحد كيتكرر معايا بزااف ... كنوض كنغوت ، ديما كنحلم بواحد زعر هاز فردي وكيقتل واحد السيد ، وكيبان ليا راسي كنشوف فيهم ... ديما كيتكرر معايا ، او داك النهار ولد عم مالك نطقت سميتو بلاما نعرفو ... وكيبان ليا لقطات لابسة كسوة بيضة ، وشي واحد غادي شاد ليا فيدي ..

- شاف فيها مالك وتنهد تنهيدة طويلة ... الكسوة البيضة لي لبسات وكانت فرحانة بيها وماكملاتش الفرحة ديالها ..

- دكتور :

مدموزيل ثورية ، خاصك تعرفي بلي مغاديش نݣولو 50 فالمية لا 100 فالمية هاد الاعراض لي فيك ، اعراض فقدان الذاكرة ... كاينة فقدان الذاكرة الجزئي كيفقدو فيه الناس الداكرة ديالهم ديال 6 شهور الأخيرة من حياتهم ... وكاين فقدان الذاكرة الكلي ، لي كيفقدو فيه الناس الذاكرة كليا ، مكايعقلوش شكون هوما ولا فين ... مكيعقلو على حتى حاجة من حياتهم .. كاين لي علاجو كياخود وقت طويل بزااف ، وكاين لي العلاج ديالو كيكون بسيط مكاياخودش وقت طويل ممكن شهر ترجع ليه ، بمساعدة العائلة ديالو ... وبمساعدة الأدوية ، من الحالة ديالك وخلال التشخيص ديالها مبدئيا ... الداكرة كتبغي ترجع ليك ولكن كاين خلل لي كيخليك تصابي بصداع كلما حاولتي تدكري ... غادي نديرو الأشعة ديالنا ونتأكدو كثر ويكون خير ، تفضلي معايا ..

- ثورية بخوف شافت فمالك ..

- مالك (بإطمئنان) :

انا هنا ، غير سيري ماتخافيش ... خلات الساك ديالها وتبعات الدكتور للداخل ..

___________________________

- ݣالسة على أعصابها حداه .. حتى نطقات :

ݣاليك خاص تكون معاك عائلتك باش تحاول تفكرك ... فين غادي نلقى أنا هاد عائلتي ؟ نمشي لدوزيم ندير نداء كيبان ليا ... ولكن ماعرفتهم واش كيتفرجو فدوزيم ولالا ... موخال يكونو كيتفرجو فمختفون ..

- مالك (جاتو الضحكة ) :

الله يهديك ، كتدوي من نيتك ؟

- ثورية :

لا كنهضر من ريتي ، كنهضر بصح وحق الله وهو الحل ، ولا الفيسبوك ندير إعلان ونزل فيه تصويرتي ..

- مالك :

نشوفو شنو غادي يكول الطبيب بعدا ، وديك الساعات يحن الله ..

- طل الطبيب من البيرو ديالو واشر ليهم يجيو ... دخلو وݣلسو مترقبين شنو غادي يكوليهم ..

- الدكتور :

من خلال الأشعة ، مدموزيل ثورية تعرضات للحادث ، هاد الحادث بكثرت ماهو خفيف ، فنفس الوقت خطير ..

- مالك (بخوف ) :

بحالاش ادكتور ، واش الوضع ديالها خطير ؟

- الدكتور :

تهدن اموسيو مالك ، انا غادي نشرح ليك ..

- الدكتور :

مدموزيل ثورية ، الحادث لي تعرضات ليه ماشي بديك الخطورة .. حيت ماخلاش ليها أضرار على دماغ ديالها كلو ... كنا خايفين لايكون عندها إرتجاج فالمخ ديالها ، ولكن الحمد لله هادشي مكاينش ، باش قلت ليك بلي حادث بسيط ولكن خطير ، حيت سبب ليها فنزيف صغير فراسها الداخل ... وهي ماتعالجاتش فديك الوقيتة ، الخبطة لي خدات ومية فالمية ايكون راسها تضرب مع شيحاجة لي قاصحة ، خلاتها تفقد الداكرة ... وكون تعالجات فداك الوقت كانت غادي ترجع ليها ذاكرتها ... لكن هي بقات وداك دم النشف ، ولا بحال شي وسخ ... داكشي باش ماقداتش ترجع داكرتها وضرورة ديال راسها جايا من داك الوسخ ، حيت داك الوسخ داير لينا على شعيرات عصبية ..

- ثورية :

وشنو الحل الدكتور ؟

- داك الدم كون كان جديد كنا غادي نحيدوه غير بدوا ، ولكن دابا خاصنا ضروري عملية ... متخافيش ماشي شيحاجة لي صعيبة بزاااف ، انزولو غير داك الوسخ وتبعي دوا ، وإن شاء الله اتولي بيخير ، وداكرتك غادي ترجع ... حيت ماعندكش فقدان داكرة لي صعيييب ، بالعكس الحمد لله الحادث لي وقع ليك ، عندك الزهر لي خرجتي منو بأقل الأضرار ، ودابا راه الطب طور ... عملية بسيطة بلايزر كولشي أيكون بيخير ..

- مالك :

إيمتا ممكن دير هاد العملية أدكتور ، من الأحسن عفاك فأقرب وقت ..

- الدكتور :

ممكن ديرها من غدا ، انا ماعنديش إشكال ، دابا غادي نكتب ليك ورقة باش تديها ليهم لكلينيك ... باش يوجدوها ، ومن الأحسن تكون معاها عائلتها ... باش هكا حتى الذاكرة ديالها ترجع دغية ..

- ثورية :

واش ممكن ادكتور نأجلو العملية لسيمانة جايا عفاك ؟

- الدكتور :

اهاه ماعنديش مشكيل ، المهم انا انكتب ليكم واحد الورقة ، (كتب ديك.الورقة وثورية غير ساهية وكتفكر ) ..

- الدكتور (مد لمالك الورقة ) :

نهار الإثنين إن شاء الله نتلاقاو فلاكلينيك ... غادي تديها باش يجهزوها للعملية إن شاء الله ، وأنا بنفسي لي انقوم بالعملية ، مكاين مناش تخافو كولشي أيدوز على خير ..

- مالك (خدا من عندو الورقة وسلم عليه) :

شكرا بزااف دكتور .. الله يجازيك بيخير ..

- الدكتور :

العفو هدا واجب ، مدموزيل بشفاء إن شاء الله مايكون غير الخير ..

- ثورية (هزات ساكها) :

شكرا دكتور ، إن شاء الله ... خرجات مع مالك كتجر فرحليها وساهية حتى وصلو للطوموبيل ..

- مالك :

شنو واقع ، سمعتي الطبيب ماعندك مناش تخافي ..

- ثورية (هزات راسها فيه ) :

واش سمعتيه ؟ عملية والعملية غالية بزااف ... منين انجيب انا هادوك الفلوس كامل ... وعاد كاليك خاص عائلتي تكون ، تلفت ..

- مالك :

العملية غادي ديريها ، الفلوس ماضربيش ليهم حسبة نسايهم انا غادي نتكلف بكولشي ، المهم هو تكوني بيخير وعلى خير ..

- ثورية (هزات عينيها فيه ) :

من نيتك ، علاش زعمة انت يلاه هادي يوماين باش عرفتيني وباغي دير ليا العملية ، علاش هادشي كامل ؟

- مالك (ديمارا ) :

غادي تعرفي كولشي ، وحتى عائلتك غادي يكونو معاك إن شاء الله ... حنا كلنا انكونو معاك ، كولشي ايرجع بحال اللول وحسن إن شاء الله ..

____________________________

- سناء كتشوف فيها بنص عين .. :

أجي شفتك غير ساهية ياك لاباس ؟ كيبان ليا جارنا العزيز خدا ليك العقل ؟

- ثورية(كتندغ فالمسكة وتلعب بشعرها ساهية فملامحو) :

نكدب عليك خطف غزااال والصواب والاداب وهاد التصرفات لي كيدير معايا مافهمت والو أصاحبتي ، باغي يدير لي العملية ... يلاه عرفني وباغي يدير ليا العملية ويخسر زبالة ديال الفلوس ، مابقيت فاهمة والو ..

- سناء :

ومتعرفي أصاحبتي يكون كيبغيك بصح ..

- مالك :

وفلعشية باغي يجي عندنا ، ݣاليك عندو مايكول ليا ... علم الله أشمو بغا ..

- سناء :

إيوا الغايب حجتو معاه متعرفي شنو كاين ، المهم سمعيني كنت بغيت نكوليك هادشي داك نهار ومع انت مبرزطة ... كلت نخليها حتى تشوفي طبيب ونعاود ليك لي وقع ..

- ثورية :

الله يسمعنا خبار الخير ، ݣولي ليا كنسمعك ..

- سناء (تقادات فالکلسة ) :

هشام عتارف ليا بلي كيبغيني ..

- ثورية (ضحكات) :

وعلى سلامتو منين هداه الله وعتارف ليك ، عرفتي شحال وهو مخبيها ..

- سناء (بإستغراب) :

منتي عارفة أجنبة وماعودتي ليا والو ، وبااااز ..

- ثورية :

وراه باينة للعمى غير انت لي مكتشوفيش الله يستر ، مابغيت نكوليك والو حتى يكولها ليك هو ، ايوا كملي ..

- سناء :

طلب مني الزواج ، انا صراحة ماعرفتش والله ... انا كنرتاح معاه الصراحة تقال وعزيز عليا بزاااف ... ومنساش ديما واقف معايا فينما طحت ولا وحلت كنلقاه ..

- ثورية :

وشنو بغيتي مزال ؟ الحب راه غادي من بعد مع العشرة .. وافقي والله ماتلقاي بحالو ..

- سناء (عبنيها غرغرو بدموع ) :

كنتفكر بلي ، الى لقيتي عائلتك وترجعي معاهم ... غادي نبقى بوحدي ، انا ماعندي حد من غيرك لا انت لهشام وأنور ... كونما خالت هشام لي كنت كالسة معاها ، وهشام لي خدمني معاكم ولقا ليا هاد الخديمة وسكنا بزوج ... علم الله بحالتي ..

- ثورية (جراتها وعنقاتها) :

والله حتى حمقة انت ... وهاني كاع لقيت عائلتي ورجعات ليا الذاكرة كاع ... مالي غادي نسمح فيك هبيلة أنت .. واش نسا خيرك كنت نمرض نلقاك غير انت فجنبي ... مكتبغيش تخليني ندير والو ، ختي ومتكونش بحالك ، متݣوليش هكاك عمري نخليك ... وهانتي دابا اتزوجي ، ماتعرفي الوقت شنو تجيب ..

- سناء :

إن شاء الله يكون خير ..

- ثورية :

و مسحي دموعك ، ونوضي جاوبي السيد ... وديري لينا بغرير راه توحشتو ..

- سناء (تبسمات كتمسح دموعها ) :

هي لي متعاود ، دابا نيت ..

_________________________

- أنور :

دابا الى رجعات الذاكرة لثورية ... غادي ترجع لمدينتها وغادي نتفرقو صافي ..

- هشام :

إيوا المكاتيب ، ماعندنا منديرو ... ولكن راه انبقاو على تواصل ... العشرة لي بيناتنا راه كبيرة واخا عام ، ولكن راه دزنا من الحلوة والمرة مع بعضياتنا ..

- أنور :

بصح ... ثورية مغاديش تنسانا ولا تݣلب علينا ياك ؟

- هشام :

لالا مديرهاش ، ثورية فشكل .. واخا حنا ماعرفناهاش كيفاش كانت دايرة قبل .. ولكن من كلامهم علينا كان ظريفة بزاااف كيبان ليا ..

- انور :

ايوا الله يشافيها وترجع لعائلتها ياربي ، وانت امضرا شنو درتي ؟

يتبع...