السيدة الأولى الجزء 11

- عمر (بفضول) :

شنو واقع هنا ؟

- مصطفى : مغادي نقد نݣول والو ، حتى يجي الشاف ..

- شريهان (هزات حاجب ونزلات الثاني) :

أشنو ياكما بغيتو تديوني للحبس ياك؟ بغيتو تحبسوني على داكشي لي كان وقع ؟ ياك ݣلتي غادي تعطي الغرامة ومغاديش نتحبس ... دابا كتهيئني ..

- مصطفى : هادشي مكاينش ؟ غير تهناي وداكشي كيتحل فالمغرب ماشي هنا ..

- عمر :

ا شرفة ، أشمن حبس وأشمن غرامة أش هاد تخربيق ، راه حنا ݣالسين معاكم زعمة أش واقع ..

- شريهان (تعصبات وبقا فيها الحال ، حسات بمصطفى بحال الى ضحك عليها وبغا يبيعها ) :

لا والو ، غير أنا فاش كنت فالمغرب ... شهدت على واحد الجريمة ديال القتل ... وخويا جا من المغرب لهنا على هاد القضية ، أصلا مابقا مايتخبا علي عارف مالك فخبارو انت فخبارك أخويا ، ومنين يجيو البوليس يديوني العائلة كلها اتعرف ، لاش مزال انخبيو (شافت فعمر وسعد) انا اخوتي شهدت على واحد الجريمة واحد خونا ، واحد طالياني قتل واحد السيد وجيت للفرنسا هاربة باش مايلقاونيش ، وخويا لي كاليا ايدفع على قبلي غرامة مالية ، دابا شفتو جايب ليا البوليس باش يديوني ..

- عمر (مصدوم معارف مايݣول) :

أش هاد تخربيق ، ك كيفاش ؟

- سعد : واش كتهضري بصح ؟ لا مايمكن ؟!!

- مصطفى (عصباتو) :

شريهان براكة من تخربيق ، ݣلت ليك سكتي ، كاينين شي حوايج مخاصهمش يتݣالو ... انت عارفة مزيان خدمتنا ..

- شريهان : خدمتنا خدمتنا خدمتنا ، فينما ضور خدمتنا ... هادو عائلتي من حقهم يعرفو شنو واقع ، ياكما هضرت فسياسة وانا مافخباريش ... شنو غادي تݣول لماما ، راه بنتك تشدات ؟

- مالك (بصرامة) :

مكاين لا حبس لا زمر ، القضية كبر من هادشي اشريهان ... شي حوايج كبااار غير صبري ، وغادي تعرفي كولشي ..

- شريهان (سكتات كتشوف فيهم ، الجو كان مكهرب بزاف ، بين سكوت علي وصدمة عمر وسعد وتوتر وأعصاب مصطفى ومالك وشريهان لي وسط منهم مفاهمة والو ) .. سونا الباب ..

- مصطفى :

غادي يكون جون عطيتو العنوان ديال دارك ، مايمكنش نعطيه عنوان الڤيلا راه عارف الواليدة ، وعمي والباقي مخاصهمش يعرفو ..

- مالك : ماعليش .. ، ناض مصطفى حل الباب ، كان جون بوحدو .. خلا ليه الطريق يدخل ، كيشوف فيه شوفة العما فالظلمة ..

- مالك :

موسيو جون تفضل .. أشر ليه جون براسو .. سلم على البقية ولى شريهان وݣلس ..

- جون :

كايحسابلي غادي تكونو بوحدكم ..

- عمر (ببرود) :

مكاين حتى واحد غريب ، حنا هنا عائلة ..

- جون (تبسم وأشر براسو بالإيجاب ) :

ولكن كاين واحد الموضوع ، بغيت نهضر فيه مع شريهان ... غير هي ومالك ومصطفى ..

- شريهان (كتحنزز فيه ، ماحملاتوش من نهار شافتو ) :

انا مكنخبي والو على عائلتي ، الى كنتي جاي باش تديني للحبس ، غير ديني راه فخبارهم البلان ديال المغرب ..

- جون (تبسم مسح على جبهتو بتوتر ، تنهد تنهيدة طويلة ) :

شي حوايج أبنتي فخدمتنا ، خاصهم يبقاو بيناتنا ... أسرار الخدمة الى مشاو حتى خرجو ، شحال من واحد أيكون معرض للخطر ..

- عمر : سمحليا نقاطعك .. انا وسعد وحتى علي كنتعتابرو خوت شريهان ، ولي مسها يمسنا ولي ضرها يضرنا ، والى وصلات الأمور نفديوها بحياتنا ماعندناش مشكل .. ايه ممكن نكونو تجمعنا بيها غير مؤخرا ، ولكن دابا راه ولات ختنا بحالنا بحال مصطفى ..

- علي (ببرودة) :

سمع اموسيو جون ، حنا ماشي رعاوين راه واخا عشنا فأوروبا سينين هادي ، ولكنا حنا مغاربة ودمنا حامي .. والى كان واحد منا حياتو فخطر ، كانوقفو كاملين معاه ، ونعميوه واخا الحامي هو الله ... ومايمكنش لينا نعرضو حياتو للخطر ، الحاجة لي تݣالت هنا غاتبقى هنا وغير كون هاني راه حتى واحد فينا ، مغادي ينوض من هنا حتى نعرفو شنو بغيتي من شريهان ، وبلاما نهضرو على الاختطاف لي تخطفات ... وماخديتوش ليها حقها ، هادشي الى عرفوه الصحافة ، غادي تولي قضية رأي عام .. وهنا دوركم كشرطة فين غادي يولي ؟ يقدر مصطفى سكت حيت انت شاف ديالو ، ولكن انا نقدر ندير بزاف ديال الحوايج ، حيت انا مخدامش معاكم وحقي كمواطن عندو الجنسية الفرنسية ممكن نهضر ، ودابا تقدر تفضل اموسيو جون ..

- جون توتر ، حيت كلام علي كلو عند الصح والى مشات حتى وصلات لصحافة مشاو فيها وكولشي أيتفضح ، اتبان شريهان فصحافة ويشوفها كارلو وها الخطة فشلات ، جون حساب واحد لي مافكرش فيه وماضربش ليه حسبة ، هو انو شريهان عندها عائلة ، والى تعطلات أساعة راه يقلبو دنيا عليها ، واخا هاد العائلة يلاه تعرفات عليها ... ولكن كيبغيوها ، عكس بعض العائلات لي سينين والمينين ، وبيناتهم الحرب العالمية الثانية ... جون مافكرش الى خطف شريهان راه علي وسعد وعمر ايقلبو عليها الدنيا ، هادشي مشات عليه ... عند بالو بلي شريهان بحال مواطنة فرنسية حرة ، واخا تغبر نها هادي أهم حاجة تفوت 18 عام دير مابغات ايقولو غير مع صحابها .. مكان عندو حتى خيار أخر ..

- جون (شاف فيهم) :

حتى واحد ماخطف مدموزيل شريهان ولا مصطفى .. حنا لي قمنا بالإختطاف ديالهم ..

- شريهان (بصدمة ) :

كيفاش ، لا واش من نيتك واش انت شوية لاباس ؟ واش هدا زان زان ولا بسيكوباط .. وعلاش اخويا خاطفنا واش هدا شوية لالا انت راه من نهار شفتك عرفتك شوية لاباس ..

- علي (بدا كيتعصب) :

ياربي تصبرني ياربي .. راسي بدا كيزند عليا ..

- جون (بصرامة) :

خليوني نكمل الله يخليكم .. كان خاصنا ضروري نتأكدو واش شريهان غادي تكون قد المهمة لي غادي دخل فيها ولالا ، داكشي باش جبنا مصطفى نقكة ضعفها بغينا نشوفو واش غادي تݣر بكولشي ولالا ، وظنا فيها مخابش الاختيار ديالنا كان فمحلو ..

- عمر (معصب) :

خاطف السيدة والسيد ، ضاربينها على وجها شوف الحالة لي هي فيها ، باش تجي تݣوليا حݣا المهمة ولا زعتر ... سي جون يمكن معارفش شكون هي عائلة العراقي ، سينين وحنا فهاد البلاد وعندنا مكانة خاصة ... نقدر نرفع عليك دعوة عارف هادشي ولالا ؟

- جون (غوبش) :

انا كندير لي مطلوب مني ، طبيعة خدمتنا اي واحد غادي يدخل معانا فشي مهمة باغيين نعطيوها ليه ، خاص نعرفو عليه كولشي ، ويدوز من أختبار واش يقد عليها ولالا ، الأمر مجايش من عندي من جهة عليا ..

- شريهان (بإستفهام ) :

على اشمن مهمة ولا ماعرفت كاع علاش كتدوي كيفاش ..

- مصطفى (قاطعها) :

انا اختي غادي نفهمك كولشي ، عقلتي على خونا لي شفتيه ..(عاود ليها كولشي ) ..

- شريهان ( بجدية) :

دابا انا هادشي كامل لي كتݣول فيه اخويا ، فهمتو ياك ولكن لي مافهمتش هو انا انا ماااالي ، اش دخلني انا فهادشي كامل بغيت نفهم ..

- مصطفى ( لأول مرة معرفش شنو غادي يݣول ) :

كارلو كابوني غادي يفتاتح واحد الكلوپ منهما لشهرين ، وغادي يخصنا شي حد لي يدخل معاه شريك ، باش يجيب لينا كاع المعلومات ونقدو نطيحو بهاد الناس ، القضية فيها بنات مختاطفين وكيتاجرو بيهم ، وداخل فيها حتى حسام لي كان باعك بدوك خوتنا ..

- شريهان (راسها ضارها وزاد ضرها ) :

كيفاش ؟؟

- عمر : شكون هادو تاني ، انتوما مالكم كلكم اسرار حاس براسي كنمثل ففيلم ميراكي ولاواه بزاف ..

- شريهان (شافت فعمر ) :

هاد حسام كان خطبني ، وناض نصب علينا وباعني لواحد السعودي وجوج صحابو وكنت نقزت من البالكو وتهرست ..

- عمر ( داخ ) : كي كيفاش اش هاد الروينة هادي ..

- شريهان :

من بعد الله يرحم باك ، دابا حنا ماشي فهادشي ، كيفاش اخويا زيد كمل زيد اصلا هاد النهار باين من اولو ..

- مصطفى :

هاد الناس ، داخلين معاهم ناس كبيرة بزاف ، والى طاحو غادي يطيحو معاهم بزاف ديال الريوس معروفة ، وحنا شاكين بلي لا حسام لا ديك نعيمة لي دارت الدور ديال ختو معاهم ، كنݣوليك بلي هادشي كبير بزاف ، وحنا باش نطيحو كارلو ولي معاه ، خاصنا ندخلو معاه شريك ..

- شريهان :

كمل وانا مالي فهادشي ..

- مصطفى سكت ماقدش يخرجها من فمو ..

- مالك (شاف فيها ) :

انت هي هاد شريك ..

- شريهان (شافت فيه ، بقااات ساكتة مدة وهي تكرشخ بضحك ) :

ههههههههههههههههههههههه ، وناري اميمتي ههههههههههههه واكواك أعباد الله بدموووووووع ، لالا واش كتهضرو بصح ولا كتريݣلو ههههههه وهيا العالي ... كاميرا خفية هادي هههههه .. زوينة هادي والله حتى واعرة ݣاع مزيان تبارك الله اهاه كملو (سكتات من ضحك ، شوية وهي ترجع تطرقات بضحك) ...

لالا أمپوسي أمپوسي ههههههه بدموع اوووف سخفت والله ، زعمة الله يفوج عليكم فوجتو عليا هههه اهاه كملو ..

- مالك :

شريهان حنا كنهضرو معاك بصح ، مكنضحكوش ... ختاروك انت دخلي شريكة للكارلو ، باش تعاونيهم وتعاوني راسك وتعاونينا كاملين ..

- شريهان(بجدية) :

لا واش كتفلاو عليا ، انا من دون الناس ... انا مانصلاحش لهادشي ، انا راه غادي نفرتك ليكم الشمل ، انا راه غير غادي نشوهمكم .. واش انا داك السراح ديالو وهربت منو ، ونهار شفتو فالقهوة سخفت .. ودابا بغيتوني نتعامل مع الباطرون ديالو داكشي لي بقا ، كولشي قامو قطيفة بقال ليه ايدور فوق القطيفة ..

- جون : كيفاش ؟

- شريهان : لا انت هادشي ديالنا ماتعرفش ليه ..

- عمر : واش من نيتكم ، باغيين دخلو شريهان لهاد المعماعة وعلاش زعمة هي بضبط ، وكيفاش تحمي راسها وتحمينا علاش حنا مالنا ، ياك هي نهار وقع داكشي مشافوهاش من بعد ؟

- مصطفى :

حيت الخطر راه علينا علينا ، سوا قبلنا سوا لا ... المركز لي ناوي يفتح مالك غادي يجبد علينا النحل كاملين ، حيت حتى هو حياتو معرضة للخطر ، المركز لي ايحل بحال الى ايجبد عليه النحل خصوصا انو كاع الشباب ايتعالحو فيه وأيتم إعادة التاهيل ليهم ، وهادسي مغاديش يعجب خوتنا ..

- مالك :

فاش كنت فسبانيا ، شي وحدين تيراو فيا ..

- عمر (قاطعو) : شنو كيفاش ، ايمتا ؟

- سعد : خويا ايمتا علاش مافخبارنا والو ؟

- مالك : مكاين لاش ، مابغيتش نبرزطكم معايا .. ماشي شيحاجة لي هي ݣراڤ .. حتى واحد فينا مكان قابل هادشي ومابغاش يدخل لينا العقل ، ولكن اللهم ندخلو ليه وحنا محميين من طرف الشرطة ، ولا مندخلوش ليه وتكون حياتنا كلنا فخطر ..

- شريهان :

ݣلتو شنو نديرو اراو ندخلو شريهان لدار السبع .. اهاه كملو ، كيفاش اديرو ليها بلاتي بلاتي وعلاش انا زعمة اممم ؟؟ بغيت غير نعرف ..

- علي :

هادشي راه كيتسمى الحماق حال عينيه او ودنيه ..

- شريهان (شافت فعلي مبسمة كتهضر تحت سنانها) :

انا لي قربت نتف راسي انت غير صبر ، نشوفو هاد كاميرا خفية ديال رامز ، غير هدا اسمو جون ، السيد فرحتن شفتيه كيف كيدير ، ياربي ياربي تصبرني غانوض نشتف عليه مافيهاش ..

- علي :

مغاديش نخليك ، انا نديرها فبلاصتك ..

- شريهان (شافت فجون ) :

ماݣلتيش ليا علاش انا بضبط ؟

- جون (جبد تيليفون ديالو ومدو ليها ) :

هاكي شوفي ، باش تعرفي علاش انت بضبط .. خدات التيليفون ، هزات حجبانها كتشوف الصورة لي فتيليفون مصدومة ..

- شريهان : نااااااري كتشبه ليا ، مايمكنش شكون هادي ، وتويمية ديالي .. خطف ليها علي تيليفون ، نفس ملامح الصدمة كانو على وجهو ، وعلى وجه عمر وسعد لي شافو الصورة ..

- جون : هادي إيمان طه صبري من أب تونسي وام إيطالية (عاود ليها كولشي على إيمان وعلاقتها بكارلو ) .

- شريهان :

هكاك داكشي باش بغيتو دخلوني لهاد المعماعة ، حيتاش كنشبه ليها ، اسااه وكيفاش ادخلوني بصفتي أش بسلامة ؟؟

- جون :

مدام شريهان العراقي بنت عم الوزير مالك العراقي وخطيبتو سيدة اعمال (قاطعاتو) ..

- شريهان (وقفات) :

أشناهو؟ خطيبة شكون ؟

- جون : مالك ولد عمك ..

- شريهان مابقاتش قادة تحبس الضحكة ، الستريس لي عاشتو ... وهاد كترت الصدمات ترجماتهم لضحك ..

هههههههه ، واي واي واي هههههههههه ناري بزاااف وحق الله ، مافخباريش انتوما الفرانسيس فيكم القجم هههههه لا بزاااف واكواك أنبووول والله حتى انطلقها مابقيتش قادة نحبسها هههههه استمسح بغيت نكول أستسمح والله اووف ياربي تخرج هاد الضحكة على خير ، أهاه كمل اشنو اتسميوني مدام العراقي ، هههههههه مالك العراقي وحماره ياك هكا كتقال لالا حرمه نسييت ايااه كمل الله يعطيك الخير (رجعات ملامح جدية ) واش كتفلا عليا ؟ ودوك لي فديك دار اش غادي تݣوليهم ؟ وعلاش ختاريتي نكون خطيبة مالك ؟

- جون (حل صدفة ديال القميجة دارت ليه الاجهاد ) :

حيت انت اتكوني فأمان معاه انت وعائلتك وهو ايكون فأمان معاك ، كارلو الى شافك غادي يبغيك هادي حاجة مفروغ منها ..

- شريهان (وقفات كتغوت ) :

ايوا ايوا كيفاش يبغيني ، شفتك اخويا باغي تبيع فيا وتشري ... ياكما يحسابليك انا من داك نوع لي كتحطوهم فدوك الڤيترينات ، ولي داز يختار (ضارت عند ولاد عمها وخوها ) سمحوليا ولكن راه عصبني ..

- علي (بإستفهام) :

علاش انت فين شفتي دوك لي كيكونو فالڤيترينات ؟(غمزها)

- شريهان :

لا انا راه عمري شفتهم ، اهو كنت شفتهم فداك الفيلم ديال محمد هنيدي همام ف أمستردام ..

- مالك (كيحس براسو اينفاجر ) :

ياربي صبر من عندك ، واش حنا فهمام ولا فهاد الحريرة المحرحرة ..

- شريهان (هزات عينيها فيه ) :

شتك انت ساكت ماݣلتي والو ؟ عاجباك هاد سليكة فوق عليكة ..؟

- مالك (بصرامة) :

عندك شي حل أخور؟ انت يمكن مزال ماستوعبتيش ولا يمكن الصدمة لاعبة ليك على راسك ، عائلتنا كلها والديا وخوتي وخوك وماماك وانت فخطر ، فهمتيها فهميها دخليها لراسك مزيان ، فنظرك شكون حسن نبقاو بعاد ونخرجو راسنا من هاد الروينة ، ويتخطف شي حد فينا ولا يتقتل ، ولا ندخلو لهاد المعماعة برجلينا وحنا تحت الحماية ديال البوليس ؟ ولك واسع النظر ..

- عمر (بجدية ) :

وعلاش لي مالبوليس يحميونا وحنا بعاد ، ياك هادي خدمتهم ولالا أموسيو جون ؟

- جون :

حتى البوليس كيحتاج مرة مرة لمساعدة ديال الناس ، يد وحدة مكتصفقش ، والى متعاونش الشعب والشرطة مغاديش نقيو بلادنا وبلدان اخرى من بحال هاد الناس ، واش عرفتو الشباب لي ولا كيتعاطا دابا قداش ، قدام الجامعات وثانويات ، واش عرفتو معدل تجارة الرقيق فين وصلات ، خصوصا فالبرازيل والمكسيك راه بزاف ... وهاد الناس طغاو وجا الوقت لي كل واحد فيهم يخلص ..

- شريهان :

اهاه ومالقيتو غير شريهان الزغبية ، مولات المصايب لا بغيت نكول المصايب مولات شريهان حيت هوما لي تابعيتي ماشي انا ، وانا عارفة راسي منحوسة نهار زين منشوفو ، منين بغيتو دخلوني وسط هاد الضبوعة راه سعدي زين نيت كيشقشق ..

- جون (بجدية) :

متخافي من والو ، حنا كلنا غادي نكونو معاك ومرافقينك ومقابلينك ، اتكوني تحت عينينا 24 ساعة على 24 ساعة ... وغادي تكوني مزودة بأجهزة تجسس ، لي أيخلينا نكونو قراب ليك بزاف ..

- شريهان :

المحقق كونان صافي ، ياكما اتعطيوني حتى ديك الپابيونة لي كيدير كونان كيبدل بيها الصوت ؟ ولا ادݣو ليا شي برا باش نرجع قزمة بحال كونان مافيهاش انتوما مافيكم ثقة ..

- علي (كاع داك الأعصاب لي كانو فيه غير سمعها تكرشخ بضحك ) سمحوليا سمحوليا ولكن راه مايمكنش ؟

- شريهان ( شافت فعلي ورجعات شافت فجون ) :

اهاه والعائلة شنو غادي نݣولو ليهم ؟

فالڤيلا ..

- زهرة :

واش دراري ناويين كاملين يباتو عند مالك ولا كيفاش ؟

- نزهة :

لاواه موحال ايكونو تعطلو غير فالخدمة ..

- أحمد : انا جاني جوع ، كون غير ݣلتو للحليمة توجد لينا العشا ..

- نزهة :

ويلي بلاتي شوية ، دابا يجيو مالك زربان ... من هنا لنص ساعة مجاوش انكوليها توجد الطبلة ..

- أحمد :

انا غادي ندخل للمكتب نشوف شي خدمة عندي ..

- نزهة : واخا سير بينما جاو نيت ..

- أحمد : واخا يا لالة هاهو غادي ..

___________________

- عمر (كيضحك) :

من سابع المستحيلات هاد الكذبة دوز على الواليد ، غير شوفو كذبة اخرى ..

- جون :

فنظري مالك يخطب شريهان بصح ، قدام العائلة ..

- مالك (هز حاجبو بإستهزاء ) :

ياااك اسيدي ، بغيتينا نفرحو مالين الدار ، ومنين تسالي هاد التمثيلية ، نݣولو ليهم راه متافهمناش غادي نتفارقو ، واش كيحسبليك كولشي لعب ... ولا انتوما مكتهمكمش العائلة بحالنا حنا ..

- جون :

هدا هو الحل الوحيد ليكاين ، انتوما غادي تكونو مع بعضياتكم بزاف ، سهرات وخرجات اتكونو فيها بزوج ... غادي تعرضو بزوج ، صور ديالكم ايخرجو فالمجلات وانتوما بزوج .. يعني من الاحسن الخطوبة ديالكن تكون رسمية ، وتكون حقيقية بين العائلة اما انت وهي عارفين بلي هادشي غير خطة ، تفاهمنا ..

- شريهان :

ولكن انا مزال ما وافقتش وقيلة ؟

- جون (بإبتسامة ) :

غادي توافقي اشريهان ، غادي توافقي على 3 ديال الحوايج ..

- شريهان (بتحدي ) :

ياااك اهاه وشنو هوما هاد 3 ديال الحوايج ، لي غادي يخليوني نوافق ؟

- جون :

أولهم الإقامة لي ماعندكش ( شريهان بلعات ريقها كتشوف فيهم ) وثانيا مشروعك لي ناوية عليه ، الى مكانوش عندك وراق وإقامة مغاديش تقدي ديري حتى مشروع ، خصوصا انو انت والواليدة ديالك ، بقات ليكم 10 أيام وتساليو المدة المحددة باش تؤجعو للبلادكم ، وصالث حاجة هي باش تحمي راسك وتحمي عائلتك أيخصك تقبلي ..

- شريهان (حسات براسها محصورة ، سكتات حيت مكايبان ليها حتى حل اخور ) :

اهاه ، والى وافقت ؟

- جون :

الإقامة ليك ولماماك عتابريهم فيديك ، جميع الوثائق المطلوبه ايكونو فيديك ، باش تصرفي كأي مواطنة فرنسية .. شنو ݣلنا ؟

- شريهان (تنهدات تنهيدة طويلة ) :

موافقة ..

- عمر : شريهان فكري مزيان ، واش قادة دخلي لهاد المعماعة ؟

- علي : شريهان ..

- سعد : هادشي راه صعيب بزاف ..

- شريهان (شافت فيهم) :

الى كان هداك خونا طالياني قح ، انا راه شريهان وأجرك على الله مغربية ، ودمي مغربي حرة غرة رباتني مؤة وكبراتني مرة ، انوريه العيالات الحرات الغرات الفحلات علاش قادين ..

- جون (بإبتسامة وقف ) :

مزيان ، دابا غادي نخليك ترتاحي ... غدا نتلاقاو فصباح باش نهضرو فتفاصيل اكثر ، اه قبل مانسا مخاصكش ترجعي للخدمتك ، ومتخرجيش نهائيا مفهوم؟

- شريهان :

وعلاش بسلامة ؟ والى ماخدمتش منين انجمع انا باش ندير مشروعي ؟

جون : فهاد الساعة ممنوع ، اما مسألة مشروعك نخليوها من بعد ، يلاه بسلامة عليكم ..

من ورا ماخرج جون ..

- علي ( وقف ) :

انا راسي غادي ينفاجر والله ، هادشي بزاف مابقيت فاهم والو ..

- عمر : انا كثر منك دخت ..

- مصطفى لي كان ݣالس وغير ساهي وساكت ..

- شريهان (كتشوف فيه ، ناضت من بلاصتها ومشات حداه ) :

مصطفى مالك اخويا ، شفتك ساكت ..

- مصطفى (تنهد وشاف فيها ) :

انا سباب ، بسباب خدمتي هانتي ادخلي لهاد المعماعة ..

- شريهان :

من نيتك ، بيك أخويا وبلا بيك غادي ندخل فهادشي ، هادشي مكتوب علينا نعيشوه ماعندنا منديرو ، بسباب فضولي هههه وبسباب هاد الشبه ، هدا هو المشكل ... وبسباب هاد راس طارو لي حداك ..

- مالك (خنزر فيها ) :

شفتك كتعايري ؟

- شريهان : ومالك تنكر ... كونما داك المشروع كاعما يكونو تابعينا هاد اللفاع .. ولكن كيبقى هادشي مقدر ..

- مصطفى (بإبتسامة باهتة ) :

بصح كيبقا مكتوب علينا ولكن ..

- شريهان :

وا خويا صافي حتى انت ماتبقاش مقلق ، اش كتعرف على ختك هههه راه انا نوحل نحميها للغوات ، ايندمو على نهار لي دارونا فريوسهم انت اكون هاني ..

- مالك (موجه كلامو لخوتو) :

عمر خاصكم تمشيو ، مالين دار غادي يتشوشو ... راكم عارفين مافخبارهم والو ..

- عمر (وقف ) :

واخا ، شريهان ماتخافي من والو حنا معاك ولي يمسك يمسنا ، رتاحي دابا واخا ..

- شريهان : واخا .. خرج عمر وسعد ... وحتى علي خرج خلاو شريهان باش ترتاح ..

- شريهان (رجعات بظهرها اللور ) :

فيا الموت ديال الجوع ، واش غادي نبقاو بلا ماكلة ولا كيفاش ؟

- مالك (بإستغراب) :

واش انت حتى فهاد الاوقات كيجيك الجوع ؟

- شريهان :

ومالك اخويا بغيتيني نصوم زوينة هادي ، انا هادشي خاص نفكر فيه فاش نكون بوحدي وفاش ناكول ونعمر كرشي ... انا فيا جوع وبغيتيني نفكر وزايدون راسي ايتهرس بغيت انرتاح ..

- مالك :

واخا شنو بغيتو تاكلو ، بيتزا ولا شيحاجة أخرى ؟

- مصطفى ( كيدوز يدو على وجهو ) :

انا والله مافيا لي ياكول مسدودة ليا الشهية ..

- شريهان (مداتهاش فيه ) :

شوف انا بغيت شي طاكوس يكون كبير مݣمح عامر بيبي ياك ، ومصطفى جيب ليه بيتزا ؤاه كتعجبو ، اه ومتنساش لينا المونادا ديال الحامض ..

- مالك (كيشوف ليها ) :

شيحاجة اخرى امدام ؟

- شريهان (كضحك) :

لالا صافي براكة عليك ..

- مالك : اهاه واخا مايكون غير خاطرك ..

- شريهان : الله يرضي عليك ..

_____________________

ولـو

سَألتَنِي عن الحُبِّ..؛

لـ أخبَرتَگ عن قَدرٍ خَارِجَ حُدودِ المَنطِق..!!

يتَحديٰ جُغرَافِيَّة المگان ويمنَحُگ تارِيخَ مِيلادٍ جَديدٍ بِـ عُمرِ الوجُود..

هو نبضٌ ثائرٌ يَغزو حنَايَا قلبِگ لِـ يُقِيمَ مُعاهَدة سَلامٍ تتَصالحُ بها

مع نفسِگ ومع كلِّ مَا في الگونِ..؛

فََـ يُعِيدُ لکُلِّ الأشيَّاءِ مُسَميَّاتِها لِـ تُزهرَ الأسماءُ بِـ أصدقِ معانِيها..!!

فإذا بِـ الشَّمسِ يُشرِقُ نبضُ فَجرِها العنيدِ بِـ قلبِگ..؛

لِـ تَبعثَ بِـ روحِگ شغفَ الحيَاة..!!

وتَغربُ معها أحزانُگ في تَصالُحٍ تامٍ

مع ما تفرضُه عليگ أبجديَّات الرَّحِيل..!!

- من ورا العشا ، دخلات شريهان للبيت لي عطاها مالك ... وخلات مصطفى هو ومالك ، تنهدات تنهيدة طويلة ، وخرجات للبالكو ... كتفكر فهادشي لي وقع ليها هاد النهار .. كولشي داز من قدام عينيها ، إبتداءا من ديك الليلة .. بلاما تحس حطات يدها على عنقها ، كتحسس السلسلة لي جاب ليها خوها ... فيها صورتو وصورة ماماها .. حسات بواحد النوع من الأمان ، سدات البالكو ومشات للبلاصتها تخشات فيها .. الأسپيرين لي عطاها مالك الثاني دار خدمتو ... وخلاها تنعس بلاما تحس ..

- فصالون على برا ، ݣالسين مالك ومصطفى ..

- مالك : هاد النهار داز طويل بزااف ..

- مصطفى :

عرفتي اخويا ، راسي غادي يتهرس عليا ، عمر شي نهر مداز عليا بحال هاد النهار ... بقات فيا غير شريهان ..

- مالك (ضحك) :

عرفتي شنو تفكرت دابا ، وجه جون ناري محملش راسو ... فاش كانت كطنز عليه شيري ، من كترت الصدمة لي تصدمات ولات غير كضحك ..

- مصطفى :

شريهان تضغطات بزاف .. وداكشي لي تابعها كثااار من هادشي لي سمعات ..

- مالك :

دابا شنو هي الخطوة الجايا ؟

- مصطفى (تنهد تنهيدة طويلة) :

اول حاجة شريهان خاصها تغبر ماتبقاش تبان ، لا انت ولا هي ... وخاصها شي مدرب ضروري ، خاصها تعلم دافع على راسها ..

- مالك :

وعلاش خاصنا نغبرو ؟ مافهمتش ..

- مصطفى :

غادي تعرف كولشي غدا ، دابا مغانقد نݣوليك والو عياااان اخويا بغيت غييير نعس والله القسام ..

- مالك :

نوووض دخل لبيتك ، نوض رتاح ..

- مصطفى (غمض عينيه ) :

لا مافياش ، والله العظيم غير خليني هنا مرتاح حسن ..

- مالك (وقف) :

واخا .. مشا مالك لبيت ورجع فيديه غطا ، غطا مصطفى ودخل للبيتو سد عليه ..

______________________

فصباح فقهوة la mandala ... كتشوف فعلي بإستغراب :

ولكن علاش مابقاتش غادي ترجع لخدمة مافهمت والو ؟؟

- علي :

منقد نكوليك والو أسكينة ، غير سمحيليا وحتى شريهان مغاديش تقد تݣوليك والو ، حيت هادشي صعيب بزاف سوني ليها وهضري معاها ..

- سكينة :

داكشي لي ناوية ندير أصلا .. هزات تيليفون ديالها ، وخرجات على برا ... سونا المرة اللولة شحال وماجوباتش ، قطعات ورجعات سونات ليها ..

_______________

على الطبلة ديال الفطور ، لابسة سورڤيت ديال مالك واخا جاتها كبيرة ولكن ماعندها مادير ، من غير انها تلبسها ...

- مصطفى : تيليفونك كيسوني ..

- شريهان (رجعات كرسي ديالها اللور ودخلات لبيتها ، هزات تيليفون كانت سكينة ) ..

الو سكينة ، ماسمعتش تيليفون ..

- سكينة : واش هادشي لي كاليا علي بصح ؟ كاليا مابقيتيش غادي تجي للخدمة علاش ؟

- شريهان (تنهدات تنهيدة طويلة) :

غير سمحيليا أسكينة مغاديش نقد نݣوليك أختي ، الامور صعيبة بزاف وزادت صعابت ..

- سكينة (تشوشات) :

شريهان ، ماتخلعينيش هالعار ... زعمة انا ݣلت ولينا صحابات ومابقينا كنخبيو والو على بعضياتنا ..

- شريهان (كتحك جبهتها حيت كتحس براسها واحلة ) :

حنا صحابات ، منين دخلت لدار عمي وعرفتك على دارنا ، فراه فعلا كنعتابرك صاحبتي ... ونقد نكوليك بلي رجعتي ليا الأمل فصداقة ، ولكن لي واقع أسكينة راه خطر بزاف والى عاودت ليك ، غادي نجبد عليك غير نحل ، انا منقدش ندخل معاك فتفاصيل ولكن لي ممكن نݣوليك بلي ، دخلت فواحد اللعبة كبيرة يانخرج منها رابحة يا مدبوحة ... والى بغيت ندخل لهاد اللعبة خاصني نحبس الخدمة ، ونهار لي ندخل للقهوة ندخل كا كليانة ..

- سكينة (غير مزادت تخلعات) :

شريهان ، واش دابا انا مابقيتش غادي نشوفك ؟ ومابقيتش غادي نهضر معاك ؟ شحال من حاجة كنت بغيت نعاودها ليك ، سعد هضر معايا وباغينا العشية نخؤجو انا وياه نتعشاو على برا ..

- شريهان :

واش انت حمقة ، ضروري غادي نهضرو ... وهادي حاجة زوينة ، شوفي غير عطيه فرصة سعد راه ظريف بزاف ... والله ماتلقاي بحالو ، وهادي فرصة تولي تجي لدار بحجة انك صديقتو وهكا نقد نشوفك ، غير هكا منقدش مشوفك باش مايكون حتى خطر عليك ، والى حيت للقهوة بغيتك ديري راسك مكتعرفينيش ، حيت ممكن نكون مراقبة اوك ..

- سكينة ( غوبشات وتخلعات ) :

واش لهاد الدرجة ؟ ناري شريهان متخلعينيش هالعار ..

- شريهان :

متخافيش البوليس غادي يكونو مقابلين كولشي ، انت غير ديري لي كنݣول ليك ... الى هادشي داز كيف بغينا انرجع لحياتي الطبيعية تفاهمنا ، الى بغينا نهضرو انهضرو فاش يكون سعد والى كانت شيحاجة ضرورية ݣوليها لسعد يݣولها ليا واخا ... يلاه ابب تهلاي فراسك خاصني نمشي دابا ..

- سكينة :

واخا تهلاي فراسك بزاف ..

- شريهان (جاتها البكية ، حيت عمر مريم مݣالت ليها تهلاي فراسك ولا لمسات حس الخوف فكلامها ، على عكس سكينة .. فعلا الصداقة افعال ماشي أقوال ، بإبتسامة ) :

واخا يلاه أنا مشيت .. قطعات معاها ، خشات تيليفونها فجيب سورڤيت وخرجات ..

- مصطفى : شكون ؟

- شريهان : غير سكينة صاحبتي ، صافي نمشيو ؟

- مصطفى : يلاه ..

- مالك : بلاتي انا جاي سبقوني ..

- نزل مصطفى وشريهان للتحت ، حتى خلط عليهم مالك ... ركبو فطوموبيل .. وشدو طريق للعند جون ..

- زهرة : شفت شريهان ومصطفى عجباتهم دار مالك ، واش مناويينش يجيو ؟

- عمر (كياكل ) :

هاد العشية غادي يجيو إن شاء الله ..

- أحمد : سعيد عجباتك الخدمة مع دراري ؟

- سعيد :

عجباتتي وسكتي أخويا أحمد ، والله العظيم الى شحال هادي ماحسيت بهاد الراحة ..

- أحمد :

ايوا الحمد لله داكشي لي بغينا .. ݣلسات جميلة هي وحليمة ..

- أحمد : جميلة بنتي ، ايوا مناوياش تفرحينا خلاص ؟

- جميلة (بإبتسامة ) :

بحالاش أعمي مافهمتش (شافت فعمر) ..

- عمر (ضحك) :

بغا يݣوليك ، واش مناوياش تزوجي خلاص ..

- حليمة :

الله اولدي ، هداك هو نهار الكبير ... عييت معاها بغاها ولد خالتها وهي مابغاتش ..

- أحمد :

وعلاش أبنتي ، واش كتعرفي شي واحد مواعدك بزواج ؟

- جميلة (تحرجات) :

لا أعمي مكنعرف حتى واحد هاد الساعة ..

- عمر (كيمسح فمو) :

جميلة خليوها عليا ، أنا لي غادي نلقا ليها الراجل ، لي يستاهلها كنعرف دوقها .. جميلة تقرصات وحدرات عينيها ..

- حليمة (كضحك) :

لهلا يخطيك أولدي ..

- عمر :

الله أودي أخالتي حليمة ، جميلة راه عزيزة وغالية ، راها ختي بحالها بحال سعد ومالك ... وتربينا كاملين مع بعضياتنا ، راها ختنا كاملين ..

- حليمة : داكشي لي كاين أولدي ..

- عمر : سعد انا سبقتك ..

- سعد(وقفو بيدو) :

صبر صبر ، طوموبيلتي راه خسرات ، وصلني معاك ..

- عمر : واخا انا كنتسناكم على برا انت وعمي سعيد ..

- سعيد (وقف) :

أنا جاي .. جميلة هزات كاس ديال الما شرباتو دقة وحدة ، بالعة معاه خيبت الأمل والقهرة لي حسات بيها ، فاش سمعات عمر كيكول عليها ختو ، ماسح مع هاد الكلمة اي أمل ليها معاه ، واخا هي كانت عارفاه مكايحس من حهتها بوالو ، وهاد الحب لي كتحس من جهتو من طرف واحد ، ولكن كان عندها بصيص أمل صغير ، حيت عمر عمرو رتابط ... ولا عرف الحب ، حياتو كلها فالخدمة .. هادشي كان عاطيها شوية ديال الأمل ، ولكن هاد الأمل تبخر اليوم ..

- حليمة (كتنغزها) :

جميلة ، جميلة أبنتي ..

- جميلة (شافت فيها) :

نعام اماما ..

- حليمة : فطري خلاص .. وانت غير ساهية أبنتي ..

- جميلة (حركات ليها راسها ) :

واخا واخا هاني ..

__________________

مجموعين على طبلة وحدة جنب البحر ..

- جون :

بقات شهرين ، شهرين لي عندنا بالحساب ... أول حاجة غادي نبداو بيها ، شريهان خاصها تدرب جسديا ... غادي شكون ضروري تعلم شوية دافع على راسها ..

- مالك :

هاد القضية خليوها عليا ، كنعرف واحد السيد مزيان ... وكنظن مكاينش شي واحد ففرنسا كلها بحالو .. ستيفن ..

- جون (بإبتسامة) :

عرفتو ، وهو لي كنت غادي نقتارح .. الحاجة الثانية هي المظهر الخارجي للشريهان خاصو يتبدل ..

- شريهان (دايرة القب على راسها ) :

وعلاش ؟

- جون :

حيتاش الدور لي غادي تلعبي ، ضروري خاص المنظر ديالك ... أسم وكنيتك غادي يبقاو هوما هوما ، ولكن شكون انت هو لي غادي يتبدل ..

- شريهان (شافت فيهم) :

مافهمتش ، زيد شرح ليا ..

- مصطفى (تنهد) :

الدور لي غادي تلعبي ديال ، شريهان العراقي بنت عم مالك العراقي ، هادي حاجة حقيقية مغاديش نكدبو فيها ، ولكن بنسبة للناس والصحافة انت مدام شريهان أرملة رجل الأعمال ألميريو پاتيني ..

- شريهان (كتحاول تحبس الضحكة ، ولكن ماقداتش) :

هههههههههه ، أرملة الله اخويا مزال كاعما تزوجنا رضيتوني ارملة هههههه شكون هاد اليميريو هههههه ها مالك ها الميريو ها كارلو هههههه زهرة وأزوجها الخمسة غير انا شريهان وخطابها لي عمرها شافت كمامرهم ههههه ناري ياربي ، غير سمحوليا اهاه شكون هاد ألميريو ؟

- مصطفى (بجدية وصرامة ) :

شريــــهــااان ..

- شريهان (تقادات فالݣلسة ) :

كيفاش شريهان ، مصطفى راه هادشي بزاف انا وليت حاسة براسي كنمثل ففيلم ميريكاني ... اويلي وبزاف ها مدام ولا ماعرفت ارملة ، ها خطيبة مالك وبزاف ... نقصو شوية راه الحماق هدا ..

- مالك (وقف مصطفى بيدو ، وقرب لشريهان ) :

شريهان ، شوفي فيا ..

- شريهان (دورات راسها ، كتشوف فيه ... نظارات عينيه كتخليك تسكت وتهدن ومتزيدش معاه الهضرة ) :

نعام ..

- مالك :

باش دخلي شريكة فالكلوب ديال كارلو ، خاص تكوني لاباس عليك فهمتي ، مايمكنش دخلي شريكة وانت ماعندك والو فهمتيني ..

- شريهان (بهدوء بحال الى خدرها) :

ولكن هاد كارلو مالو مكلخ مغاديش يقلب ورايا ، ويسول ؟

- مالك :

واخا غادي يقلب ويسول ، غادي يلقى داكشي لي حنا بغيناه يلقاه ... وخاجة أخرى هو لي غادي يطلبك تكوني شريكة ليه فالكلوپ ، فهاد الشهرين غادي يتنشئ حساب بسميتك باش حتى الى دخلو لأنترنت وقلبو عليك ، يلقاوك ..

- شريهان (حركات راسها بالإيجاب) :

فهمتك .. كمل

- مالك :

الى قلبو فالانترنت وحتى الى الى وصاو تحري خاص يقرب وراك ، غادي يلقا غير داكشي لي بغينا ... شريهان العراقي بنت عم الوزير مالك العراقي ، هاجرات هادي 5 سنوات للإسپانيا ، وتعرفات تم على رجل برازيلي لاباس عليه ، مقطوع من شجرة ماعندو عائلة ولا ولاد ... شافتو همزة ماتقدش تفلتها وتزوجات بيه ، مشات معاه للبرازيل .. ومع هو مسكين كبير بزاف فالعمر جاتو ازمة قلبية وتوفى ولكن قبل مايتوفى كتب ليها جميع ممتلكاتو بسميتها ، ودابا رجعات للفرنسا فين كاينة عائلتها ..

- شريهان (كتفكر فهادشي لي ݣاليها ) :

ناري انتوما بلاصتكم هوليود ، وناري على افكار عندكم ... بلاتي ومغاديش يعرفو بلي عندي خويا وهاد خويا فالبوليس ؟

- جون :

هادشي حتى هو غادي نتكلفو بيه ، بنسبة للمصطفى غادي يلقاو معلومات عليه ، بلي دوز فترة فالحبس بتهمة الرشوة ، وتجرد من المهمة ديالو ... ودابا خدام فيدور فواحد البار .. هادي هي المعلومة لي غادي يلقاو ..

- شريهان :

اهاه وانا ومالك كيفاش تلاقينا وبغينا بعضياتنا ؟ وكيفاش تخطبنا ؟ مايمكنش يتيقو بلي انا ومالك طرا هادشي بيناتنا فظرف شهرين ولالا ؟

- فطريق ..

- سعد شاد تيليفون ديالو كيسيفط ميساجات ، عينيه على الشاشة :

غادي نخرج شوية بكري من الخدمة ..

- عمر (عينيه على الطريق) :

وعلاش بسلامة ؟

- سعد (شاف فيه ) :

عارض على سكينة للعشا ..

- عمر (شاف فيه بإستغراب ورجع كيشوف فطريق ) :

سكينة صاحبت شريهان لي جات داك نهار ، بهاد الزربة اخويا متعطلتيش ، واش انت مغاديش تسالي من هاد البسالة ديالك ؟

- سعد (قاطعو بجدية ) :

انا مكنتفلاش هاد المرة ، سميها كيفما بغيتي تسميها ... ولكن عجباتني من نهار شفتها ، من نهار شفتها وهي لاصقة ليا فبالي ... وهاد المرة انا مكنتفلاش ومكنضحك على حد واخا ..

- عمر ( ستغرب حيت اول مرة سعد يهضر بهاد الطريقة وبهاد الانفعال والجدية) :

واش متأكد من هضرتك ، سعد البنت راه صاحبت شريهان ..

- سعد (مقاطعو) :

هادشي عارفو ، وحتى انا مابغيش نتفلا ... هادشي لي كنحس بيه عمري حسيتو غير كون هاني ..

- سعيد (من اللور) :

برافو عليك هكاك نبغيك ، ضرب الحديد ماحدو سخون ... وياك تفلتها دير بحالي ، عرفتي كون هصرت شحال هادي كون واااا تزوجت البنت لي كنت كنبغي ، ولكن انا جيبي وكدوبي لي داروها ليا ..

- عمر (شاف فيه من المرايا ) :

وايلي حتى انت كنتي كتبغي أسي سعيد ؟

- سعيد (كيضحك) :

واهلي اش دوزت انا ، خلي حتى لشي نهار ونعاود ليكم ..

- عمر (تبسم او وجه كلامو لسعد ) :

بما انو وليتي اسيدي كتهضر مع سكينة ، بغيتك غدا تجيب بنت ختها شمس ، واعدتها نوريها شوكولا ..

- سعد :

واخا دابا نݣولها ليها ...

_________________

حاطة راسها على زاجة ديال الطوموييل ، ساهية فطريق وكلام جون كيتردد فودنيها ..

فلاش باك

- غادي نكلفو ناس ديالنا باش يكتبو عليكم فالجرائد والمجلات انت هادشي متهزيش ليه الهم ، حنا قادين بيه ... الاهم عندنا انت ومالك تبانو بلي بصح كتبغيو بعضياتكم .. ممنوع تصدرو تصرف ماشي حتى لتم ، بغينا كولشي يشهد على الحب الكبير لي بيناتكم ، تخرجو بزوج ودخلو بزوج واي بلاصة فيها هو تكوني فيها انت ، بنسبة الإتيكيت من مشية وكلام وأكل ، غادي نتكلفو بيه حتى هو ... غدا خاصك تكوني واجدة انت ومالك باش تغبرو على الأنظار ، كاينة فيرما خاصة غادي تمشيو ليها بزوج ..

- شريهان (بإستفهام ) :

وعلاش بزوج ؟

- جون :

باش العلاقة لي بيناتكم تكون قوية ، تعرفو على الطباع ديال بعضياتكم يعني تفهميه ويفهمك هاد العملية خطيرة بزاف ، وأي خطأ غادي نمشيو فيها ، وهنا حنا انلعبوها مزياان الصحافة اتاخود ليكم تصيورات وهكا نكونو ضربنا عصفورين بحجر واحد ..

- شريهان :

اهاه وشنو خور ، انت غدا باغي تسيفطنا لهاد الفيرما ، وهداك لي ايعلمني تيكواندو وداكشي ديال جاكي شان وبروسلي كيفاش انديرو معاه ؟

- حتى هادي غادي نتكلفو بيها ، شيفور خاص غادي يجيبو حتى لعندك يدربك ويرجع ، وحتى بنسبة لسيدة لي غادي تعلمك الإيتيكيت ، اتجي لعندك كل نهار انت لي عليك هو تعلمي فقط هادشي لي مطلوب منك ، باقي المعلومات غادي تعرفيهم فاش تسالي مدة التدريبات ..

- شريهان :

ومالين دار شنو غادي نديرو معاهم ؟

- جون :

غادي تݣولو بلي مالك عندو سفرية لإيطاليا ، وضروري تكون خطيبتو معاه ، هادشي منخافش عليكم فيه ، المعلومات لي خاصك تعرفيها راه عرفتيها ، نخليكم تمشيو باش يلاه تطلب يد شريهان من ماماها ..

- شريهان (بالدارجة) :

غير حتى يسالي هادشي للى ماضربتها ليك بواحد النتفة اراس العزافة مانتسماش غير بلاتي ..

- جون (بإستفهام ) :

شنو ݣلتي ؟

- شريهان (بإبتسامة) :

ماݣلت ليك والو ، غير مرحبا انت تأمر وحنا نفدو ..

- جون :

اه نسيت غادي يجي معلم خاص يعلمك الاسپانية ، ماشي مشكيل تعلمي غير شيحاجة بسيطة .. حيت مغاديش نحتاجوها غير هو للإحتياط وصافي ..

- شريهان (ببرود على شوية اتنوض تخبطو) :

شيحاجة أخرى ؟

- جون (بأبتسامة ) :

لا انخليكم دابا ، نتلاقاو من بعد .. بقات متبعاه شريهان حتى ركب فطوموبيلتو ومشا ..

الواقع

مافاقت من سهوتها حتى وصلو للدار ...

- مالك (بهدوء) : وصلنا .. شافت فيه شريهان مدة ، فتحات الباب ونزلات ... نزل بدورو من طوموبيل او وقف حداها

- شريهان (تنهداتن تنهيدة طويلة وشافت فيه) :

فخبارك خايفة ، والله العظيم شنو غادي يݣولو ، اداك نهار كنا بحال المش مع الفار ، ودابا بغيتي تخطبني ، وهاد الحوايج لي لابسة عند ايفهمونا غلط ..

- مالك (كيشوف فيها كيتفحص ملامحها) :

شنو ݣلت ليك داك نهار ، منين تكوني معايا متخافيش ... ومدامني معاك حتى حاجة مغادي توقع ، غير تيقي فيا .. ولكن بهاد الوجه وهاد الملامح ، ايحساب ليهم غير كنت خاطفك ... خاص تبان عليك تزنيݣة والحشمة ولالا ؟

- شريهان (بإستفهام) :

بحالاش زعمة ؟

- مالك (دورها عندو كيشوف ليها فعينيها ، شد ليها وجها بين يديه وبإبتسامة نطق) :

بحال هكا ... نزل بشفايفو على شفايفها ، بقبلة حنينة بزاف خلاتها ترجف ودقات قلبها يتسارعو ، ماعرفات باش تبلات داخت ، ماتحركات ومدارت حتى رد فعل من غير سخونية وجها لي كتحس بيها ..

- مالك (بعد عليها مبسم كيشوف فيها ) :

ايوا دابا مزيان مشينا ؟

شريهان دقات قلبها كيضربو ... واحد العين بدات كترفرف ليها كتصغار كتصغار حتى تسدات بالأعصاب ، فمها جمعاتو جمعاتو حتى ولا بحال شي كموسة ديال الحنة ... كتنفس بجهد ناوية على خزيت ، شافت فيه مفقوصة ..

- شنووووو هاااااادشي ، اممممم اممممم اش هااااا دشيييييي ، شاااطو علييييك شلاقمك اممممم ، اااااا شنننوووووو هاااااادشي دووييي ، دويييي انيييف سلوݣي دويييي انتتتتتت تبوووووسني أناااااااا ، أنتتتتتتتتاااااا تبووووووو سنييييييي أنااااااااا .. مالك عاد ستوعب شنو دار مكانش قاصد مافكرش فيها جات غير هكاك ، جات بوحدها كيفاش وقع مافهم والو ... مكانش ناوي يدير هاد التصرف نهائيا ..

- مالك :

شريهان شريهان ، سمحيليا ماعرفتس كيفاش وقع ... مكنتش قاصد كنقسم ليك مكنتش قاصد ..

- شريهان (كتقرب ليه ناوية على خزيت ) :

سبحان الله كنتي مغيب ، دوخك سليسيون ، ولا كنتي مقرقب .. انا انا تبووووسني امالك أنااااا .. يلاه غادي تشنق عليه وهو يتحل الباب ديال الدار ..

- حليمة (كتشوف فيهم) :

هادو انتوما ، مالكم واقفين مدخلتوش ... ضارت عندها شريهان بالعرض البطيء بإبتسامة صفرة ، مخبية بيها العافية لي شاعلة فيها ..

- مالك :

حنا يلاه وصلنا ..

- حليمة (كتشوف فيهم بشك ) :

مالكم ياك لاباس ؟ واش هاد اللبسة لابسة وجهك حمر واش مريضة ؟

- شريهان (كتبسم بزز منها) :

لا غير لبارح فاش كنا خارجين ، مشينا نتقهواو وتكبات عليا القهوة رضاتني حالتي حالة ، داكشي باش .. ومسكين مالك عطاني حوايجو ..

- حليمة :

امممم هكاك ايوا مزيان ، دخلو دخلو راه كلهم مجموعين ..

- مالك (سمح فشريهان ودخل ، كيلوم فراسو ماعرفش علاش تصرف هكاك ، كسفاش جاتو لبالو يدير بحال هاد التصرف ، هو لي عمرو تجرأ يدير هاد الفعايل مع زحدة برانية خلي بنت عمو ) ..

- شريهان (تابعاه من اللور ) :

غادي زربان هربان ، غير بلاتي يا ولدي يامالك غير صبر حتى نكونو انا وياك وتشوف ، الى محطيت ليك سفود حامي على دوك القنانف ونخلي ليك علامة زائد عليهم منتسماش ..

- نزهة (هزات عينيها فولدها لي داخل وراه شريهان ) :

ولدي على سلامة ..

- مالك (سلم عليها وعلى زهرة ) :

الله يسلمك الواليدة .. شريهان سلمات على نزهة وعلى مها وݣلسات حادرة راسها وكتشوف فجنابها ..

- زهرة (كطلعها وتهبطها) :

شفتك سكنتي وعجباتك السكنة ، اش هاد اللبسة لي لابسة ؟

- شريهان :

غير كنا خارجين وطاحت عليا القهوة ، وعطاني مالك مسكين (وركات على هاد الكلمة) كيطمة ديالو لبستها ..

- زهرة : فين هو خوك مجاش معاكم ؟

- شريهان : لا مشا لخدمتو ؟

- مالك (موجه كلامو لمو) :

فين هو الواليد ؟

- نزهة : راه فالمكتب ديالو ، بغيتيه لشيحاجة ؟

- مالك (بلع ريقو كيشوف فشريهان وهي كتشوف فيه ، نظراتهم لبعضياتهم خلات نزهة وزهرة يشوفو فيهم بشك ) :

بغيت نهضر معاه فشيحاجة ، هو صراحة بغيت نهضر معاكم كاملين ..

- نزهة (تقادات فالݣلسة ) :

ياك لاباس أولدي ، منين دخلتو وأنت ماشي هو هداك ..؟

- شريهان(كطنز) :

كيفاش بغيتيه اخالتي يكون هو هداك هههه ، حنا كاملين ماشي هوما هادوك أودي ..

- زهرة (كتشوف فيها مطولة فيها شوفة ، بنتها وهي عارفاها هاد تزنيݣة ودخول والخروج فالهضرة ، وراه شي مونتيف مافيهاش ) :

أش درتي ؟

- شريهان (كتشوف فمها متصنعة لامبالاة ) :

كيفاش شنو درت ، علاش ضروري نكون انا لي دايرة ، ممكن يكون غيري هو لي داير ..

- زهرة :

حتى منكونش عارفاك أبنت كرشي ، راه دوك عينين تيقليلت لي كتبقاي ضوري فيهم يحال اللبويا ، كنعرفاك مقفراها اش كاين اخرجي ابنتي من رونضتك ..

- شريهان :

والله هاد المرة مدرت شيحاجة اماما ، نعلي شيطان ..

- مالك (شاف فزهرة ) :

مكاين والو اخالتي كل خير .. خرج أحمد من المكتب ديالو منين سمع صوتهم ..

- جيتو على سلامتكم ..

- مالك (سلم عليه هو وشريهان ) :

الله يسلمك ابابا ..

- أحمد (كيشوف فيهم ) :

مالكم صوتكم واصل حتى لعندي ، ياك لاباس ؟

- نزهة : ولدك باغي يهضر معانا ݣاليك ..

- أحمد (بإستفهام ) :

الله يسمعنا خبار الخير ، شنو كاين أولدي ؟

- مالك (تنهد تنهيدة طويلة ، وتبسم بتوتر ) :

المهم ، كلكم عارفين التجربة لي دزت منها شحال خايبة ، وبلي كنت كنبغي كارولين ... ولكن لي وقع راه وقع وشهدتو عليه كاملين ، بصراحة كنت حيدت فكرة الزواج من بالي ، ولكن مدة هادي وانا كنفكر فواحد السيدة ، تقدرو تݣولو هاد السيدة هي لي عندها دور ، حتى قدرت نرجع للحياتي الطبيعية ، داكشي باش بغيت نكمل معاها حياتي ..

- نزهة (تخلعات ) :

هالعار أولدي غير متݣولش ليا نصرانية ؟

- مالك :

لا ماشي نصرانية ، مغربية الواليدة وكتعرفوها حتى أنتوما ..

- أحمد (حرك راسو) :

شكون هادي لي كنعرفوها ، ولي بدلاتك ؟

- مالك (بإبتسامة ضار عند زهرة ) :

خالتي زهرة ، انا طالب راغب فيد بنتك شريهان الى قبلتي عليا .. زهرة تصدمات جاتها اللقوة ، نزهة كتااار منها ماعرفات تضحك تفرح ولا شنو غادي تݣول ، أحمد وكذلك ماعرفش شنو يدير هو خبر زوين بزاف بنسبة ليهم ، ولكن شريهان ومالك عمر مبانت عليهم بلي كيعجبو بعضياتهم ... بالعكس مناݣرين وكي لمش مع الفار ، خصوصا نزهة تفكرات كلام شريهان ليها داك نهار ..

- نزهة :

شريهان !! ولكن اولدي انت وياها عمر بانت عليكم بلي كتعجبو بعضياتكم ، وحتى انت أشريهان عقلتي اخر مرة شنو ݣلتي ليا ؟

- شريهان (خاصها تنقد الموقف) :

صراحة اخالتي ، حشمتوني هههه انا غير داك نهاراات الحشمة دارتها ليا ... وݣلت ليك بلي انا ومالك منصلاحوش لبعضياتنا ..(شاف فيها مالك مخنزر) وراه شفتي فاش قلت ليك بلي هو تبارك الله زوين ، وألف وحدة تمناه ، ديك ساعات خاصك تعيقي ..

- أحمد :

نفهم من هادشي بلي حتى انت موافقة ؟

- شريهان (تبسمات وحدرات راسها كتحس بوحها تزنݣ ، تݣول غير فعلا تخطبات بصح ) ..

- نزهة (كضحك) :

غير منين تزنݣات ، صافي راها موافقة ... والله ماعرفت منݣول أحسن نهار فحياتي هو هدا (بدات كتبكي) ..

- أحمد (موجه كلامو لزهرة) :

زهرة ، شنو بان ليك ... واش موافقة تعطينا شريهان للمالك ؟

- زهرة (بقات ساكتة كايشوفو فيها ، عينيها عمرو بدموع ونزلو سخان على وجها ) :

علاش انا نقد نݣول لا ، هذاك هو نهار الكبير عندي وهداك هو نهار سعدي او فرحي ، انا مباركة ومسعودة لي بنتي تزوج بولدي مالك ، هداك أحسن نهار أيكون فحياتي (بدات كتبكي ) ..

- شريهان بقات ساكتة وكتشوف فيهم ، كيفاش فرحانين ومها كيفاش كتبكي هي ونزهة ، حسات بتأنيب الضمير ... البكية وقفات ليها فحلقها ماقداتش تحبسها ، هبطو سخان من عينيها ..

- شريهان (ناضت بزربة ) :

سمحوليا .. خرجات كتجري للجردة ، يلاه ايوقف مالك يتبعها وقفو أحمد ..

غير خليها انا غادي نمشي عندها ..

- واقفين قدام البحر ، شاد فيدو كاس ديال القهوة ، كيشوف بعيد ساهي ، مرة مرة كيرشف من كاسو ... المرورة ديال القهوة ، كتخليه ينسى شوية من هادشي لي واقع ..

- جوديا (كتشوف فيه) :

نهار ݣلت ليك بلي أنا حاسة بيك ، وستهزئتي بيا ، مكنتش كنتفلى عليك ، ولا غير حيت بغيت نخفف عليك ، كنت كنهضر بصح ..

- مصطفى (تنهد تنهيدة طويلة ، مشافش فيها ونطق) :

كيفاش غادي تحسي بيا ، وانا ختي غادي نهزها ونحطها بين دياب ومافيدي مندير ..

- جوديا (بحسرة) :

انت بعدا ، ختك معاك عارفها فين غادي تحط رجليها ، وغادي تكون معاها وحنا كاملين غادي نحميوها ، واخا الحامي الوحيد هو الله سبحانه ، (شاف فيها مصطفى) ولكن انا خويا عطيتو لتراب ... خويا مشا ومابقيتش غادي نشوفو مزال ..

- مصطفى (غوبش وضار عندها على وجهو علامات إستفهام ) ..

- جوديا (شافت قدامها ساهية) :

آدم كانت عندو 22 سنة ، كولشي العائلة كتبغيه ... وكولشي كيدير ليه الخاطر خصوصا بابا وماما وانا ، نقدر نكوليك انا بزاف ... فالاول كان غادي فمسارو الدراسي مزيان ، ولكن من بعد ولا عاطيها غير لخريج ودوران مع صحابو ، مكايدخل حتى لنصاصات الليل ، ملامح وجهو تبدلو ... داك الوجه البريء مابقاش ، تحت عينيه كحالو ولا غير على سبة ، كان ضحوكي وفيه الفعايل ، رجع منغالق على راسو ... وغير تهضر معاه يضور فيك ، ولا كيطلب الفلوس بزاف ... وكيخسرهم فنهارو ، كل ليلة خارج سهران مع صحابو ... حتى من القراية مابقاش كيمشي ليها ، هادشي لي ݣالو لينا ، حتى لنهار لي مرجعش فيه للدار .. دازت ديك الليلة الغد مجاش ، تشوشنا عليه بزاف حتى كيعيطو ليا من السبيطار ، باش نتعرف على الجثة ديال خويا ... خويا لي مات بجرعة زايدة ديال الكوك ، شااام وداݣ البرة بزوج ، (دموعها هبطو) داك نهار العالم ديالي كلو نهار ، الضحكة مابقاتش كتعرف ليا الطريق ، مزال بابا وماما شوية تعايشو مع الأمر ، ولكن أنا ماقديتش ..

- مصطفى (كيشوف فيها ) :

داكشي باش شاركتي فهاد القضية ؟

- جوديا :

اه ، واخا جون مابغاش ، وكان باغي يبعدني باش منتأزمش ... ولكن بقيت كنطلبو باش يخليني ، حيت العافية لي شاعلة فقلبي ، مغادي تبرد حتى نشوف كاع لي كيدمر الشباب ويخرج عليهم وعلى والديهم وعلى الناس كامل ، كيتحاسبو واحد واحد ، حتى ناخود حق خويا ويتحاسبو لي كانو كيبيعو لدراري صغار داك السم ، خويا كان بقا ليه 6 شهور ويتخرج من الكلية ... كان داير الطب ، ولكن مسكين مشا وهو صغير (جبدات تيليفون من جيبها ، شعلاتو او وراتو ليه ، كانت صورتها وصورتو فالشاشة ديال تيليفون ) ..

- مصطفى (تنهد تنهيدة طويلة، ضراتو فقلبو وبقات فيه بزاف ، صدقات هي كثااار منو ) :

الله يرحمو ، زوين بزاف كيشبه ليك ...

- جوديا (تبسمات من بين دموعها ) ..

- كيشبه ليا ؟ زعمة ؟

- مصطفى (كيحاول يضحكها ) :

اه متحݣريش راسك ، واخا فالاول جيتيني باغية تفرضي عليا رأيك وديري فيها زعيمة ، زلكن هادشي مايمنعش نݣول الصراحة ، بلي أنت زوينة ..

- جوديا (غوبشات) :

انا باغية نفرض عليك رأيي وندير راسي زعيمة ؟

- مصطفى (عطاها بظهر ، جامع الكاس ديال القهوة لي سالة ولايحو فلپوبيل ) :

يلاه نمشيو خاصنا نرجعو عندنا بزاف مايدار ..

- جوديا بقات متبعاه بعينيها حتى ركب فطوموبيل ، كيدير ليها بيديه إشارة يلاه ، قدات شعرها بنخوة ، وتبعاتو ... ركبات فبلاصتها ديمارات وشدات الطريق للخدمة ..

___________________

وقفات قدام الپيسين ، دموعها نازلين سخونين على خدها ، كتحس براسها دايرة جريمة بحال الى كتغضر فعائلتها ، بقا فيها الحال بزاف من هادشي ، الفرحة لي كان فعينيهم ماقداتش تحملها ، كيفاش ايكون تصرف ديالهم الى عرفو بلي هادشي غير خطة ، وبلي مكاين والو من هادشي ... خايبة بزاف خايبة بزاف تغضر وضحك على عائلتك لي كتبغيك وكتبغي ليك الخير ، باش غادي يسالي هادشي ؟ هدا هو السؤال لي كيتردد فبالها دابا ، باش غادي يسالي هادشي ..

جاها صوتو من اللور ..

- أحمد (بإبتسامة ) :

بنتي ؟

- شريهان (مسحات دموعها وضارت عندو ) :

نعام أعمي ..

- أحمد ( وقف قدامها) :

مابقيناش غادي نݣولو عمي دابا ..

- شريهان (بإستفهام ) :

كيفاش ؟ والى ماݣلت عمي شنو غتدي نݣول ؟

- أحمد (كيشوف ليها فعينيها وإبتسامة جميلة ودافية على وجهو ) :

دابا غادي نوليو نݣولو بابا ..

شريهان (سكتات غير مزادو دموعها نزلو على هاد الكلمة لي ݣاليها ) :

بابا ..

- أحمد :

اياااه بابا ، علاش ماعجباتكش ؟ انت دابا مابقيتيش غير بنت خويا ، انت دابا غادي تولي مرات ولدي ..

- شريهان غير مكايزيد يكمل عليها بكلامو .. دموعها غير نازلين ..

- أحمد ( بشك ) :

شريهان بنتي ، مالك ياك لاباس ؟ كيبان ليا غير مالك لي متحمس لهاد الخطوبة وانت لا ، الى كنتي ماباغياش هاد الخطوبة وهاد زواج غير ݣوليها مكاينش لي غادي يبزز عليك شيحاجة ..

- شريهان (كتمسح فدموعها) :

لا أعمي ماشي هكاك ، غير هو مكنتش كنفكر فزواج دابا ... كنت بغيت نحقق احلامي هوما الأولين عاد نفكر فزواج ، وصراحة خايفة لا مالك مايبغينيش نخدم ..

- أحمد : علاش ماهضرتوش فهادشي ؟

- شريهان (تداركات الموقف) :

الصراحة مزال ماهضرناش على الخدمة ..

- أحمد ( حط يدو على كتفها غادي بيها كيتمشاو) :

مالك انا لي كنعرفو وانا لي ربيتو ، بالعكس هو من نوع لي وقف لجنب المرا لي كيبغي ، ماعندوش مشكيل فالخدمة ، كارولين كان ضد الخدمة ديالها غير حيتاش خدمتها ماهياش ، ضومين ديالها ضروري تلبس شي حوايج لي مايناسبوش واحد مغربي مسلم كيغير على مراتو ... أما انت حالة خاصة المشروع ديالك زوين ومافيه حتى حاجة لي خايبة ، بالعكس هو ايوقف معاك ويكون ليك خير سند ، غير رتاحي أبنتي من هاد النحية ..

- شريهان (كتسمع ليه وكتخمم فكلامو ، وقفات وضارت عندو) :

عمي ..

- أحمد (بعتاب) :

اشنو ݣلنا ؟

- شريهان(ضحكات) :

بابا ، فرضنا نثلا شي نهار كدبت عليك ودرت شي غلط واش تسمح ليا ؟

- أحمد :

بنتي ، ولادنا واخا يغلطو ويديروها ݣد ريوسهم، كنسمحو ليهم ، راه كيبقاو ولادنا ماعندنا منديرو ... وانت بحالك بحال ولادي ، واخا ديري أي حاجة غادي نسمح ليك ..

- شريهان (رتاحت نسبيا وعنقاتو) :

لهلا يخطيك عليا ياربي ، والله يطول لينا فعمرك ..

- أحمد (كيطبطب على ظهرها ) :

امين أبنتي أمين ..

__________

غالبًا

نحنُ لا نحتاجُ

لِئن يُحِيط بِنا الگثِيرون

أو أن يُعجَب بِنا الگثِيرون..؛

فقط..؛؛

نحنُ في حاجة لِـ شخصٍ واحِد

شخصٌ واحِد فقط نتعثَّر معه بِـ أنفُسِنا

کلَّما حَاولنا أمَامَه أن نتجمَّل..؛

رأينَا أنفسَنا بِـ عينَيه گما نَحنُ أجمَل..!!

ثُم..؛؛

لا تبتَعِد عن نفسِگ..؛

لِـ تُشبِه أحَد أو لگي ينبهِر بِگ أحَد..؛

کُن گما أنت فَـ أنتَ رائعٌ وجِدًّا گما تكُون

،،‏"العلاقات لا يجب أن نشعر فيها بالواجب بل بفكرة العطاء، أن تقول الكلمة اللّطيفة لأنك تحب شعورها الذي سينجلي في قلب غيرك، أن تساعد ليس لأنك فقط تلبي طلبًا بل لأنك تشعر بحاجتك لأن تكون جزءًا من تمكين شخص تحبّه، العلاقات الطيبة ليست بالمساومة إنما بجميل العشرة وطيب الأثر ولُطف الود."

- فالعشية واقفة قدام القهوة ، لابسة كسوة تحت الركبة فالبيض ، مع صندالة ميني طالو ... مع ساك فالحمر فنفس لون الصندالة ... طالقة شعرها ، وقفات طوموبيلتو قدامها ..نزل بزربة والفرحة باينة على عينيه ..

- سعد (بتوتر) :

كنتمنى منكونش تعطلت عليك ، دزت جبت طوموبيل من عند المعلم ، داكشي باش ..

- سكينة (بإبتسامة) :

لا متعطلتيش ، جيتي فالوقت هو هداك ..

- سعد : مشينا ؟

- سكينة : اهاه واخا .. حل ليها باب الطوموبيل ركبات ... عاد خدا بلاصتو ..

- سكينة (من ورا ما ديمارا ) :

فين غادي نمشيو ؟

- سعد (شاف فيها ورجع شاف قدامو) :

قبل منݣوليك فين غاديين ، بغيت نݣوليك جيتي زوينة بزاف ... اما فين غاديين ، تحلات واحد ريسطو جديدة غادي تعجبك ، كنكت كنݣول نمشي ليها ، وجا الوقت وانت معايا ..

- سكينة تحرجات ودورات وجها ماقدراتش تجاوبو كتفات بإبتسامة فقط ..

______________

فالفيلا ، دخل عمر لقاهم مجموعين .. اشر ليه مالك براسو بمعنى راه الخطة لي تافقو عليها راها بدات ..

- أحمد : عمر خاصك تبارك للخوك ..

- عمر (ضحك) :

وي فخباري ومن لبارح انا وسعد اول وحدين عرفنا ..

- نزهة :

ياااك ابوراص ، وماݣلتوهاش لينا ..

- مالك :

حنا الواليدة لي ݣلنا ليهم مايݣولو ليكم والو ، بغينا حتى نهضرو معاكم حنا الاولين بعدا ..

- سعيد :

ايوا وإيمتا ناويين ديرو الخطوبة ؟

- مالك ( وقف ، خشا يدو فجيبو وجبد واحد البواطة) :

بنسبة للخطوبة غادي تكون ورا منحي من إسبانيا ، داكشي علاش بغيت نستغل الفرصة ... وبغيت نركب الخاتم لشريهان دابا ... حيتاش ضروري خاصها تمشي معايا ..

- زهرة :

ولكن أولدي ماشي هكا العادات راك عارف ..

- مالك (بإبتسامة إطمئنان ) :

عارف هادشي أخالتي ، وكونماشي الخدمة راه مانديهاش معايا ، عندنا مؤتمر او ورا المؤتمر كاينة حفلة وخاص ضروري تكون معايا مرافقة ... يعني مراتي ولا خطيبتي ، منقدرش نكون بوحدي .. الى كان شي مشكل تقدري تمشي معانا اخالتي ..

- زهرة :

لا اولدي اويلي ، انا الحمد لله تايقة فيك وعارفة شنو كاين ... الله يكمل عليكم بالخير ياربي

- جبد مالك الخاتم لي كان زوين سامپل ولكن فنفس الوقت راقي وعاطي للعين .. شريهان لي كانت غير ݣالسة وكتفرج فهادشي ... ستغربات وتصدمات ايمتا خدا الخاتم ؟ دورات فبالها وتدكرات نهار جا هو ومصطفى وكانو مبدلين .. اذا تما فين عرف الخطة وتم فين خدا الخاتم او وجدو ..

- مالك (بإبتسامة) :

شريهان ممكن توقفي ؟

وقفات شريهان ، كتشوف فيه مكرهاتش تشدو تغززو بسنانها اعلى الفعلة لي دار ليها فصباح ، مانساتهاش واخا الغضب ديالها هبط ولكن مانساتش ليه هاد الفعلة ... خدا يديها وركب ليها الخاتم ..

- زهرة (طلقاتها بتزغريتة) :

روروروروروروروروروروييييييي ، الله يكمل عليكم بالخير ياربي ... كون غير تسنينا مصطفى حتى يجي ..

- شريهان :

مالك دوا معاه هو الاول اماما ، وخدا الموافقة ديالو ..

- نزهة (كضحك عاجبها الحال وفرحانة ) :

ولاد اليوم زربانين ازهرة ، ماشي بحالنا حنا ... واشفتي جاب لينا الله فاش نتلهاو بعدا ، يلاه يلاه نوجدو للخطبة وإن شاء الله يجي وراه العرس ..

- شريهان (خرجات عينيها بصدمة) :

اويلي أخالتي ، مزال الحال نديرو الخطوبة بعدا وشوية بشوية عاد العرس ياك امالك ؟

- مالك :

اه بصح ، شوية بشوية ، مزال خاص المركز يكمل ونشوف لي خاص .. ونوقف عليه حتى يطلع كيف بغيت وديك ساعات نشوفو العرس ..

- أحمد :

إن شاء الله أولدي .. وقف أحمد عنق شريهان وعنق ولدو ، وهوما بدورهم عنقو نزهة وزعرة لي كانو فرحانين ، مقاداهم فرحة ..

- مالك :

غدا إن شاء الله ايخصنا نوضو بكري ، باش يلاه نشدو الطريق ..

- أحمد :

شحال غادي تݣلسو أولدي ؟

- مالك :

الصراحة عندي واحد 15 يوم تم ، وفكرت منين نطونو تم شريهان تاخود داكشي لي بغات فدهاز ديالها ..

- نزهة :

اهاه فكرة زوينة ، الحوايج فإسبانيا غزالين ، خودي ابنتي اداكشي لي ااحتاجي ، اما الباقي خليه عليا انا ..

- شريهان (اتزيد شوية اطرطق ، عمرها كذلات ومامالفاش الكذوب ) :

واخا اخالتي كوني هانية ... سعد خارج انمشي نتسناه على برا بينما جا نسولو العشا كيف داز ..

- نزهة (بإستفهام) :

معامن خرج يتعشى ؟

- عمر (دار رجل على رجل) :

هو وسكينة صاحبة شريهان ..

- أحمد : أياااه أسيدي ، وا بحال والو نديرو جوج ديال العراسات كيبان ليا ..

- عمر (ضحك) :

وبحال والو ، خصوصا سعد هاد المرة نيتو مزيانة ... فاش كلت ليه عنداك تكون باغي تفلا على السيدة ، ضار فيا واحد الدورة شيطانية ، تما عرفتو بلي فعلا ناوي على شيحاجة معقولة ..

- نزهة (عاجبها الحال ) :

ايوا على الله ، يتربي ماتحرمنيش من الفرحة ديالكم اولدي ..

- عمر :

امـــيــــــــــن ..

يتبع...