السيدة الأولى الجزء العاشر

- شريهان ( بفرحة ) :

ها علي جا ، على السلامة اخويا كون أبقيتي ..

- علي (داخل وعينيه على جميلة لي ماتسوقاتش ليه نهائيا) :

مساليتش بكري يلاه يلاه ، السلام عليكم ... سلم علي على مامات شريهان وعلى نزهة لي ديجا كيعرفها .. سلم على سكينة وختها والباقي وݣلس ..

- عمر ( جاي من بعدما دوش او بدل ) :

هاني حيت ، غير حطو لينا نتغداو راه هلكني الجوع علي على سلامة أصاحبي ..

- علي (كيضحك) :

الله يسلمك ، كيفاش انت من نهار دفنوه مزاروه مابقيتيش كتبان ݣاع ..

- عمر :

غير الخدمة راك عارف ، يلاه أسيادنا فين هو سعد ؟؟

- شريهان (كتفرنس ) :

هاهو جاي .. ݣلس سعد بلاما ينطق بحرف واحد ، بحال الى جاتو اللقوة ..

- بدات حليمة وجميلة والخدامات كيحطو الغدا ، سلاو الخدامات مشاو للكوزينة وحليمة وجميلة نضمو ليهم للطبلة .. كيتغداو فواحد الجو لي عائلي وهادشي لي حسات بيه إشراق ، كان ناقصهم غير أحمد ومصطفى ومالك ..

- عمر :

الواليد فين مشا ؟ خليتو خدام على النكهة الجديدة ..

- نزهة :

جا صاحبو ومشاو يتغداو على برا ، على قبل داك المحال الجديد ..

- عمر :

أاااه مزيااان ..

- إشراق (كتقاد لبنتها ) :

لا أماما أنوسخو حويجاتنا ، ماشي هكا كنديرو ..

- نزهة :

الله يخليها ليك ، وتشوفيها كيف بغيتي .. شحال فعمرها ؟

- إشراق (بإبتسامة ) :

امين ياربي ، عندها خمس سنين ..

- نزهة :

ماشاء الله الله يخليها ليك ياربي ..

- إشراق : أمين ربي يخليك ..

- جميلة :

عمر خود خبز ديال القمح انت مكتاكل ديال الفورص ، راه حداك ..

- عمر : كاعما رضيت ليه البال ، شكرا ..

- شريهان (كتشوف فجميلة رادة ليها البال )

- عمر كياكل حتى كيحس بنغزة فجنبو ، دار بشوية لقا يدها صغيورة مدة ليها طريف ديال اللحم ..

- شمس :

مامي كتقوليا ، بلي هاد البلاصة فاللحم زوينة وبنينة ، وبلي كتعجب ݣاع الناس ، هاك خودها حتى انت أتعجبك ..

- نزهة (بإبتسامة عزات عليها ) :

الحبيبة ديالي أنا ..

- عمر (هبط بشوية وخدا من عندها طريف داللحم بفمو ، بدورو خدا شوية من اللحم لي قدامو ومدو ليها ) :

وحتى انا بغيتك تاكلي من عندي هادي .. مدات ليه فمها خداتها من عندو وبتاسمات ليه فوجهو ..

- علي (بهمس) :

أش درنا فبلان جميلة ؟

- شريهان (مقربة ليه كتفرنس وبهمس دوات ) :

هههه غير نساها عليك احنيني ، السيدة قلبها عامر وبيمن بداك لي قبالتك ، ماشتيش كيفاش كتراري بيه منين ݣلس ؟

- علي (بإستغراب) :

زعمة عمر ؟ لا من نيتك موحال ... عمر كون عينو فيها كون خداها شحال هذا ..

- شريهان :

انا ماݣلتش ليك عينو فيها ، هي لي عينيها فيه ... نقدو نݣولو حب من طرف واحد ، هي ديجا معنات ليا بلي لي ساكن قلبها ، هي ماعلابالوش ... ولكن انا عرفتو شكون امن تصرفاتها ..

- علي (حرك راسو ) :

لالا منظنش ، انا نݣوليك انا كنعرف فالبنات مزيان ..

- شريهان :

واخا اسيدي ، شغلك هذاك دير لي عجبك انا مغانݣول والو ..

- علي : دابا تفرجي فخوك اش غايدير ..

- شريهان : امممم واخا دابا نشوفو ..

- مالك :

سمحليا أسيدي ، مع كامل إحترماتي ليك ولكن هادشي لي كطلب مني غير مقبول نهائيا ..

- الرئيس :

واخا هادشي أيكون فمصلحة البلاد ، وفمصلحتكم أنتوما لولين ..

- مالك :

انا مصلحتي مكتهمش أسيدي ، قدما كتهمني مصلحة عائلتي ... ومصلحة عائلتي هي نحميها ونبعدها على أي حاجة كتأديها ..

- الرئيس :

تماما وهذا هو المطلوب ، تبعد عائلتك على الخطر وتحميها ..

- مصطفى (بلع ريقو ) :

سمحليا سعادة الرئيس ، فنظرك باش نبعدو العائلة على الخطر ندخل ختي فهاد اللعبة .. سمحليا ولكن هنا انتوما كتهمكم مصلحتكم ماشي مصلحتنا ، وهادشي الى وصل للسلطات ديالنا وحكومة بلادنا مغاديش يعجبهم الحال ولالا ؟

- الرئيس ( تبسم ) :

سي مصطفى هادشي مكايهمناش غير حنا كيهم بلادنا وبلادكم وجميع البلدان ، وهادشي مافيهش خطر اه ممكن نݣول فيه خطر ولكن حنا غادي نامنو الحماية الكاملة ليكم ..

- مصطفى :

سمحليا واخا تݣوليا لي ݣلتي انا مقابلش ، ومغاديش نقبل واخا نعرف نديميسيوني من خدمتي ونبقى بلا خدمة طول حياتي ومنعرضش ختي للخطر ..

- مالك :

وأنا مستعد نتخلى على المنصب ديالي ومنعرضش عائلتي للخطر ..

- الرئيس :

وإلى قلت ليكم بلي أنتوما مجبورين على هادشي ؟

- مالك :

حتى حاجة مكتجي بزز ، وكل مواطن عندو حق من الحقوق خاصها تحتارم ، وهي حرية الرأي ..

- مصطفى :

كيف ݣال مالك ، حتى حاجة مابزز وانا من دابا كنقدم الإستقالة ديالي شفويا ، غادي نرجع لبلادي وغادي نحطها خطيا وغادي نديميسيوني ، الخدمة لي تخليني نعرض ختي للخطر ماعندي مندير بيها ..

- جون :

مصطفى ، مكاين لاش تسرع .. الخطر راه تابعكم تابعكم سوا وافقتو ولا رفضتوو ..

- مصطفى :

وعلاش زعمة ، علاش الخطر تابعنا علاش شنو درنا ؟

- جون :

الهجوم لي وقع فإسپانيا على مالك ... ماسولتوش راسكم منين جا وشكون مولاه وعلاش ؟ الإجابة كارلو كابوني ... هو لي سيفط رجالو باش يخلعو مالك باش يتراجع على المركز لي باغي يدير ... والى مشا حتى كمل فيه كون متأكد عائلتكم فخطر ..

- مالك : باغي تخوفنا ياك ، باش نقبلو ..

- جون :

لا مباغيش نخوفكم ، كنهضر وتحت يدي دلائل عديدة ... مالك المركز لي كتوجد فيه راه ضربة كبيرة للكارلو كابوني ، بطبيعة الحال هو مغاديش يبغي الشباب توقف على تعاطي المخدرات ... واي واحد ايوقف ضدو ولا يكون كيهدد التجارة ديالو ايحيدو من طريقو ، واولهم انت هو مغاديش يجيك نيشان، ولا يستهدفك أنت بدات .. لا هو غادي يستهدف عائلتك ، غادي يبغي يأديك بعائلتك ،، باش تراجع .. عرفتي دابا علاش بغيناكم تعاونونا حيت اتعاونو راسكم انتوما لولين عاد البلاد ..

- مالك سكت غير كيشوف ، ناقوس الخطر دق عندو حيت فعلا هاد الامر خطير بزاف ، وممكن تمشي فيها العائلة كلها ..

- جون :

المركز ديالك أمالك ، ايسبب باش عائلتك كلها يدور بيها الخطر ، ومن هاد الساعة لي نتوما ݣالسين فيها يكون الخطر ضاير بعائلتكم كلها .. منهم شريهان والأم ديالك أ مصطفى ..

- مصطفى ومالك هزو عينيهم فيه دقة وحدة ، شيحاجة فيهم تحركات إحساس خايب بزاف ... أحاسيس ترجماتها نظراتهم والبرودة لي فيديهم ..

- جون :

وثاني حاجة ولي انتوما معارفينهاش ... هو شريهان عليها خطر بحالها بحالكم سوا بغيتو دخلوها ولالا ..

- سـلاو الغدا بضحك واللعب مع سلاو بديك ساعة ، جابت حليمة الحلوى حطاتها هي والقهوة ..

- سكينة :

خاصنا نمشيو ، تعطانا هدا هو الوقت ..

- شريهان : خليكم مزال الحال ..

- إشراق :

هذا هو الوقت ، شمس كتمشي للروض يلاه تنعس بكري باش تفيق بكري ..

- شريهان (موجهة كلامها لعلي) :

توصلهم انت ؟..

(قاطعو سعد ) :

غير خليه انا غادي نوصلهم .. ضار شاف فيه عمر بإستغراب ..

- شريهان (تبسمات) : ايااه وصلهم انت صافي مزيان ..

- سكينة :

سمحولينا بزاف ، وشكرا على الغدا دوزنا نهار زوين ..

- نزهة : متكوليش هكاك أبنتي ، مرحبا بيكم فأي وقت ... دابا تشاركنا الطعام ..

- سكينة : ربي يخليك اخالتي ... سلمو عليهم كاملين ..

- شمس (عنقات عمر وباستو فحناكو ) :

عمو انشوفك تاني ياك ؟

- عمر : معلوم غادي نتشاوفو ، شنو بان ليك تجي شي نهار عندي للخدمة ، وتشوفي الآلات الشوكولا .. وتشوفي الحلوة ؟

- شمس (بحماس) :

بصااااح (ضارت عند ماماها) ماما تخليني نشوف شوكولا ؟؟

- إشراق :

إن شاء الله ابنتي ، ديري باي باي لعمو ويلاه نمشيو ..

- شمس :

كتواعدني ياك اعمو واعدني قبل منمشي ..

- عمر : كنواعدك نجي ونديك تشوفي شوكولا ..

- شمس (باستو) : ميغسي .. شدات لمها فيديها ومشاو .. ركبات سكينة لقدام حدا سعد وإشراق هي وبنتها لور .. مخلييين الكل كيدير ليهم باي باي واولهم ياسمين ، من غير عمر لي دخل .. دبمارا سعد ومشا ..

- شريهان :

شافت فعلي لي ساهي وعاقد غوباشتو :

مالك انت ياك لاباس ؟

- علي (أشر ليها بحجبانو ) :

كلامك كيبان ليا صحيح ..

- شريهان (بإستفهام) :

علاياش كتهضر بضبط مافهمتش ؟ هبطات راسها لعندو باش حد مايسمعهم ..

- علي :

ݣبيلة فاش بغيت نمشي للحمام ... تلاقيت مع جميلة فطريق .. زعمت وهضرت معاها ، جاوباتني ببرود .. وانا نݣول علاش منطلبهاش نمرة ديال تيليفون ..

- شريهان (توقعات شنو ايݣول) :

بطبيعة الحال رفضات تعطيك النمرة ، راه باينة اعلي ݣلتها ليك ونبهتك ولكن انت راسك قاصح ..

- علي (ماعجبوش الحال ، حيت فعلا كانت عاجباه بزاف ومعشة فدماغو بحال الى بدا كيبغيها واخا عمرو هضرها ) :

صافي اشيري مافيا لي يسمع هاد الهضرة ، لي فيا كافيني والله ..

- شريهان (طبطبات على كتفو) :

ماتقلقش ... علي مزال غادي يجيب ليك ربي لي تستاهلك ، أما جميلة متستاهلكش .. جميلة قلبها مايل لشخص غلط ، إنسان ݣاعما حاس من جيهتها بوالو ..

- علي (شاف فيها) :

باش عرفتيه محاس بوالو من جهتها ؟

- شريهان :

علي ، عمر سينين وهي حداه كبرات معاه وقدام عينو ، كون بغاها راه ايطلبها من مها كوراه مزوجين .. انا خايفة عليها غير لا تصدم ، تبقى تسنا فيه حتى ضيع لي كيبغيها بصح ..

- علي : انا مكايهمنيش ، خرجت سوقها (وقف) خاصني نمشي .. (شاف فيهم) خليت ليكم الراحة تصبحو على خير خاصني نمشي ..

- نزهة : ها احمد جا .. سلم علي على أحمد ومشا ..

- أحمد (بإستفهام ) :

مالو ؟

- شريهان : لا والو مامالوش .. انا غادي نطلع لبيتي .. خلاتهم شريهان وطلعات للبيتها ..

___________________

- مصطفى ( بإستفهام ) :

بحالاش مافهمتش ؟؟ واخا تزيد تشرح ليا حيت بكل صراحة .. دمي وليت كنحس بيه كيفور مع إحترماتي ليكم ..

- جون خرج تيليفون ديالو من جيب لاڤيست .. ثواني قليلة وعطا لمصطفى التيليفون .. :

دوز تصاور ..

- مصطفى لأول مرة فحياتو كتشدو البكية ، معارف شنو يدير كيحس براسو غااارق بزاااف ... تمنى لوكان رجع 18 سنة لور ، ويبقاو فالعروبية ومايسكنوش فالمدينة ... مغايكونش فهاد الموقف .. كلو كيترعد متوتر هز عينيه فجون وبتردد :

ش شكون هادي ؟ مايمكنش تكون ختي ؟

- جون : لا ماشيش ختك .. مالك قبل لا يكمل جون كلامو خطف التيليفون لمصطفى ، كيدور فتصاور مامتيقش شنو كيشوفو عينيه ... هادي واش صدفة ولا شنو بضبط ، ماقدرش يتيق الشبه الكبير بين هادي لي فصورة وشريهان .. غير هادي لي فصورة شعرها قصير حد عنقها وكحل وشريهان شعرها طويل وعسلي .. هادي لابسة كسيوات وباقي صغيرة فسن وشريهان العكس ... ولكن الشبه بزاف بحال التوام ..

- جون (مكمل كلامو) :

إيمان طه صبري ، من أم إيطالية وأب تونسي .. توفات منتاحرة هادي 7 سنوات ، كانت عندها 17 سنة ... الام ديالها كانت خدامة عند واحد السيد لاباس عليه رجل أعمال ، وباها كان عساس .. رجل الاعمال لي كانو خدامين عندو ، كان خدام عندو كارلو مارتينيز جاردينيي ، كارلو تغرم بإيمان ولا كيبغيها بزاف لدرجة متصورش وكان ناوي يتزوج بيها وصلات الامور بيناتهم للخطوبة ، ولكن مول دار كان حاط عينو عليها ... كان معروف بسمعة ديالو الخايبة ،، واخا هي كانت كترفض التلميحات ديالو ماوقفش هنا ، خلا حتى مها وباها مكانوش وتهجم عليها ، وغتاصبها للأسف ... إيمان ماتحملاتش هادشي تبدلات حتى من جهة كارلو ... ، هادشي لي كان ݣالو كارلو للطبيب النفسي لي زارو فالحبس ، إيمان ختارت تنهي حياتها وتنتاحر ، وقبل ماتنتاحر كتبات رسالة لكارلو وعودات ليه كولشي ، اوهووقرر يقتل الشخص لي حرمو من حب حياتو .. وهدا هو السبب لي خلاه يتشد فالحبس ، تشد وهو عندو 19 سنة ، بليل كان كينوض ويغوت ... كل ليلة كان كيعيش كوابيس ، داكشي باش إدارة السجن ، قررات تجيب ليه طبيب نفسي ... داز عام فاش تعرف على الأب وضبر ليه خطة للهروب ، وكمالة القصة انتوما عارفينها بطبيعة الحال ..

- مصطفى ( ݣاع أحاسيسو ترجمعهم لضحك ، مابقاس حاس براسو هو فين واش حداه الرئيس ولا جون ولا حتى واحد ) :

هادشي علاش بغيتو ختي دخل فهاد المعماعة ، على قبل الشبه ديالها بخطيبة كوزا نوسترا ، واقيلة غلطتو فالعنوان علاش متݣولوش ليا ، ندي ختي لعندو ونݣوليه هاك ختي قتلها ودير فيها لي بغيتي مزيانة ياك ..

- الرئيس :

انا حاس بيك ، وعارف هادشي صعيب عليك ... ولكن ختك الخطر ضاير بيها ضاير ، يكفي انها خدامة فأشهر قهوة فكان ، وكيف كتعرفو إفتتاح الكلوب مابقا ليه والو ، يعني لا كارلو ولا المساعد ديالو بزوج بيهم أيكونو هنا ، وضروري مغادي يتلاقاو بالأخت ديالك ، فنظرك شكون حسن يتلاقاو بيها وهي محمية من طرفنا ومن طرفكم ومراقبة والخطر ضاير بيها 30 فالمية ، ولا يتلاقاو بيها وهي بوحدها والخطر ضاير بيها 80 فالمية ..

- مصطفى (ساكت وعينيه كيترعدو شيحاجة واقفة ليه فحلقو) :

غادي نرجعو للمغرب ، غادي نديها للمغرب وغادي نبعدو ..

- جون :

على أساس مغايوصلوس المغرب ، الخطر عليكم عليكم واخا ݣلستو ولا مشيتو ... يكفي أنو كنيتكم العراقي ، ويكفي انو مالك ولد عمك عليكم خطر ، القرار بين يديك دابا ... يا تقبل ولا ترفض كولشي بين يديك ..

- الصمت كان هو سيد الموقف ، شي كيشوف فشي .. واش فعلا الحل والقرار الصائب هي مالك ومصطفى يوافقو ولالا ؟؟..

فجردة ديال الڤيلا ... ݣاع البنات مجموعين ݣالسين ، النص فيهم رضخ للأمر الواقع ... ومابقا عندو حتى حل أخور من غير يتقبل حياتو الجديدة ... والنص لاخور ، مزال كيقلب على حل ، باش يخرج من هاد المصيبة لي طايحين فيها ... ومنهم فرح ، ݣالسة مع صحاباتها مجمعين ، حتى كيبان ليها كولشي سكت وكيشوفو فالباب ، دورات راسها كاتبان ليها جورجيت واقفة فالباب وكتشوف فيهم بإبتسامة ... خدات نفس من السيجارة لي فيديها وتقدمات عندهم ، وقفات كتشوفيهم كل وحدة بوحدها ..

مابقاش ليكم بزاف ، شهرين وغادي تبداو الخدمة ... عندنا عناوين العائلات ديالكم ، الشهر الجاي ايبدا يوصلهم مبلغ شهري .. واخا هكاك حنا قلبنا ماشي حجر لديك الدرجة (ضحكات) اه بغيت غير نعلمكم ... لأي وحدة خالفات القوانين ديال هاد الدار ، ولا خالفات قانوني انا شخصيا ، مصيرها بطبيعة الحال (سكتات) الموووت (ضحكات بصوت عالي ) متكونوش غالطين ويحسابليكم ناعسة على ودنيا ... الحيوط حتى هوما عندهم الودنين ، يلاه خليت ليكم الراحة ستمتعو علاشما قديتو ... عطاتهم بظهر ومشات ..

- فرح (مغزفة) :

الشارفة الهارفة العقريشة ، دايرو بحال الكرشة لي ضربات عام فثلاجة ، تفو على كمارة كيدايرة ... ناري ويسدو علينا فشي بيت ، عظامك نهرسهم ليك وندير بيهم عواد ديال سنان ..

- أمال :

شنو كتݣولي ؟

- فرح :

والو ، ماݣلت والو مديريش فبالك ... سكتات كتغزف وتحلف غير بينها وبين راسها ..

_____________________

ݣالسة زهرة هي ونزهة فصالون ..

زهرة : مصطفى ماعرفت مالو ياختي ، شفتيه منين دخل مابغا لا ياكل لا يݣلس ... غير سلم علينا وطلع لبيتو ..

- نزهة (تنهدات تنهيدة طويلة) :

علاش غير هو ، ماشفتيش مالك ؟

- زهرة : لا كنت فالكوزينة ..

- نزهة :

غير دخل مصطفى بشوية دخل مالك لقانا مجمعين ، انا وأحمد وعمر وسعد كتعاود لينا شريهان على خت صاحبتها مسكينة وشنو وقع ليها مع راجلها حتى دخل مالك مالف يلقانا مجموعين كنهضرو ويݣلس وحتى هو مابغاش ياكل ومامالفاش ليه ، سلم علينا وطلع لبيتو مافهمت والو ياختي .. ماعرفت مالهم ..

- زهرة :

اختي شنو غادي نݣوليك ، الله يدير شي تاويل ديال الخير وصافي ..

- نزهة : أميييييين ياربي ..

_________________

فبيتها ݣالسة فاتحة الپيسي ... شوية وهو يجيها ميساج من نفس الكونط لي كان جاها فيه ميساج .. " سلام لاباس عليك ، شحال هادي ماهضرت معاك توحشتك "

- شريهان (كانت هازة طاس ديال الكابوتشينو مصايباه بيديها وبطريقة المعروفة ولي كتعجبها) :

" شكون معايا ، وبراكة من هاد البسالات الخاوية "

- تقرا الميساج وجاها الرد فالحين " انت هي انت مكتبدليش ، النخوة والتكبر عاحبك راسك بزاف ، انا بغيت نبدا صفحة جديدة معاك وانت كديري هاد الفعايل "

- شريهان (تعصبات ، هدا لي كيسيفط ليها كيعرفها ، ولا كيتريݣل عليها ) :

وشكون انتَ ؟

- جاها الرد " علاش متݣوليش شكون انتي ؟ " ... شريهان طلع ليها هاد تبرهيش فراسها ، مشات نيشان للبروفيل وهي تبلوكي الكونط وسدات البيسي .. دخلات للحمام حكات سنانها ، خرجات وهزات تيليفون وتخشات تحت فراشها .. يلاه اتدخل للواتساب تهضر مع مروان حتى تدق الباب ..

- شريهان : دخل .. ، تحل الباب ودخل مصطفى ..

- واخا نهضرو شوية ..؟

- شريهان (بإستغراب ) :

واخا ݣبيلة داخل قالب وجهك ، ولكن هانياتون دخل ..

سد مصطفى الباب ، وقرب منها ..

- مصطفى :

واخا نتكى حداك ، شحال هادي ماتكينا حدا بعضياتنا ( ضحك) عقلتي فاش كنا كنتخالفو الرجلين ؟

- شريهان (كضحك دارت ليه برلاصة حداها ) :

ههههه اه عقلت ... بعد المرات بلعاني كنتي كتحط رجليك فنيوفي خانزين ..

- مصطفى (ݣلس حداها معنقها بيدو جارها لعندو ) :

كنت بلعاني كنبغي نفقصك ههه ، (سكت شوية ورجع كمل) فخبارك بلي انا كنبغيك بزاف ياك ؟

- شريهان (حسات بشيحاجة كاينة تم ) :

خويا ، ياك لاباس ، شوف قسما بالله لا تزوجت بيه (تنطرات منو) ..

- مصطفى (بإستفهام) :

اش كتخربقي علامن كتهضري ؟

- شريهان :

على داك الشارف الهارف ديال الشاف ديالك ، راه داك نهار كيشوف فيا شوفات فشيشكل .. باينة طلبني لزواج وهددك ، وانت جاي تبلحس عليا باش نقبل والله لا كانت ليه ، كون كان بعدا غير فرانسيسكو مرحبا ، ولكن يسلم هو الأول ..

- مصطفى : هااا ياك القردة ، عينيك على فرانسيسكو حصلتي دابا ..

- شريهان (كتهرب) :

لا هو زوين الصراحة ، انا غير قلت ليك وصافي ..

- مصطفى :

متخافيش الالة ، حتى واحد ماطلبك لزواج غير رتاحي .. انا ݣلت ليك كنبغيك حيت ختي ، وحيت فعلا كنبغيك وكنت محتاج نݣولها ليك ، وماشي غير هكاك انت عارفاني كنخاف عليك كثر من راسي ، وماعنديش مشكل نضحي بحياتي على قبلك .. الواليد الله يرحمو خلاك انت والواليدة امانة فرقبتي ، ومخاصنيش نفرط فالأمانة ..

- شريهان (قلبها تقبط ، حيت عمر خوها مݣاليها هادشي ، حسات بشيحاجة ماشي حتى لتم ، لاول مرة غادي تهضر بتبات وجدية، حيت هاد الوقت ماشي ديال الضحك وتفلية ) :

خويا ، شنو واقع غير جيني نيشان .. متكدبش عليا ، دخلتي ݣبيلة وحالتك مكاتعجبش ، ودابا هاد الهضرة بحال شي واحد لي كيودع ، شنو واقع أخويا ياك انا ختك وصاحبتك ... ياك كتعاود ليا كولشي وحتى انا واخا خبيت عليك داك نهار ، ولكن راه غير حيتاش كنت خايفة ..

- مصطفى (حابس البكية فحلقو ، متوتر بزاف وخايف ... خايف على ختو من داكشي لي جاي ) :

ندمت اختي لي دخلت للبوليس ، وندمت علاش خوينا البلاد وجينا للمدينة ، ندمت على بزاف ديال الحوايج مكانش خاصني نديرهم ، كيألمني ضميري بزااف ..

- شريهان (تزاد معاها الزايد ، خصوصا فاش شافت دمعة هابطة من عينين خوها ، لاول مرة اتشوفو كتبكي ... بلاما تحس نزلو دموعها ، راه خوها هدا خوها لي كتبغيه وكتموت عليه شكون عندها من غيرو ، سكون فاش كانت كتكون مريضة كيجيب ليها كاسكروط ، ويجيب ليها دوا قبل كاع مايخدم فاش كان غير كيبريكولي .. شكون كان يمسح دموعها ، وفاش كانت مها باغية تزوجها شكون كان كيحفزها باش تبع قرايتها ودير لي هي مرتاحة فيه من غيرو هو بدات كتهجهج بالبكا ) :

اتموت اخويا ياك ، لقاو فيك المرض الخايب ياك اخويا ، داكشي باش كتودع فيا ياك اخويا (كتبكي ودموعها هابطين بحال الى طلقتي شي روبيني ) ... تحل الباب ودخل مالك مخلوع ومغوبش ..

- ياك لاباس ؟ مالكم مالها علاياش كتبكي ؟

- شريهان (ها مزادت فالبكا ) :

خويا كيموت امالك خويا أيمشي ويخيليني ..

- مصطفى : نعلي شيطان واش انت شوية لاباس ..

- مالك :

راه لي غايسمعكم ايحسابليه ماعرفت شنو واقع ، نعلي شيطان اشمن كيموت ولا كيزمر ..

- شريهان (كتمسح دموعها) :

وعلاش ݣالس يعنق فيا ويبوس ، ويعبر الى مكانت شي حاجة متݣولوش ليا ، اجي وانت نيت لاش جاي ، انتوما أصلا النهار كامل وانتوما غابرين ... باين كاينة شيحاجة كنتي معاه فسبيطار فاش دار تحاليل ياك ؟ داكشي باش جاي عندي حنا انت ؟

- مالك (شاف فمصطفى) :

ختك مامنهاش الكاينة ، ديجا ݣلتها ليك نسا نسا .. فتح الباب وخرج ..

- شريهان :

كيفاش مامنيش الكاينة ، شنو كتخططو انتوما بزوج ، منين انت مامريض ما والو ، علاش كتبكي وعلاش جاي تعنق فيا بحال الى كتودع ؟ مصطفى جيني نيشان اش واقع ؟

- مصطفى ( ناض من حداها ) :

ما واقع والو ، واش عيب الاخ يجي يفضفض لختو ... غير حيت توحتشك جيت نخوي عليك قلبي ، ساعة انت كسبان ليا اترو عليك الافلام ، تصبحي على خير (باس ليها راسها وخرج ) ...

فبيت مالك مخلي الباب محلول .. او واقف كيدوز يديه فشعرو وللحيتو ، حتى دخل عليه مصطفى ، غير رض الباب وهو ينطق مالك :

هادشي مامسلكس ، شريهان متقدش ديرها ... شفتيها شنو دارت دابا ؟ واش هادي فنظرك تعول عليها ؟

- مصطفى (تنهد تنهيدة طويلة وݣلس على طرف النموسية ) :

تقد عليها تقد ، ختي وانا كنعرفها مزيان ، ومن طبيعة الحال اتصرف هكا حيت عمرها شافتني كنبكي ولا شافاني فهاد الموقف ، اول حاجة اتجي فبالها هي خوها مريض ، هادا تفسير منطقي للداكشي لي شافت ..

- مالك :

حتى انت ماشديتيش راسك اصاحبي ، بديتي تبكي وراه السيدة اتحس بشيحاجة انورمال ، نسيتي علاياش هضرنا ..

- مصطفى :

ماشي لخاطري امالك ، راه ختي هاديك راه مغاديش تحس بيا ..

- مالك :

كلنا داخلين لهاد المعماعة ماتنساش ، دخلنا ليها كاملين وغادي نخرجو منها كاملين ، دابا خاصنا نتسناو حتى يعطيونا هوما الاوكي باش نݣولوها ليها ..

- مصطفى :

راه سمعتيه ، ݣاليك سيمانة عاد نقدو نݣولوها ليها ، ويكون هو ... غير حشمت اما كنت غادي نوض نخلي دار بوه ..

- مالك (تبسم بإستهزاء) :

وشكون سمعك .. (غوبش) سينين هادي ماحسيت هاد الاحساس تفقد السيطرة على اعصابك ومايبقاش يبان ليك شكون قدامك ..

- مصطفى : زيدني عليك ، وكتحس بيديك مربوطين مقاد دير والو ..

- مالك : هذا هو البلان .. فنظرك انت شريهان توافق ؟

- مصطفى :

ختي وكنعرفها ، مغاديش تبغي ... هي خدمتنا مكتحملهاش ومكتعجبهاش ، مستحيل توافق ..

- مالك (ببرودة وعصبية ) :

المشكل الكبير هو العائلة ، كيفاش غادي نديرو مع دار ؟ انا راسي كيتبخ ما ماقدش حتى نفكر

- مصطفى :

مابغيت نفكر فوالو نكدب عليك ، ولكن راه ايكونو مبلانيين ليها ... لي خلاهم يبلانيو يدخلو شريهان لهاد المعماعة ، مغاديش تجيهم صعيبة يخططو فالكذبة لي غادي يخليونا نكذبوها على العائلة ..

- مالك :

انا مقادش نبقا فدار ، كنحس براسي غادي ينفاجر الى زدت دقيقة هنا ، قوة التفكير غادي تخليني نحماق ..

- مصطفى: فين غادي ؟

- مالك ( هز قبيتو لبسها ) :

خارج ..

- مصطفى : ديني معاك ، حتى انا الى بقيت بوحدي وكنفكر فهادشي انحماق ..

- مالك : واخا سير لبس عليك شيحاجة انكون لتحت كنتسناك ..

- مصطفى : واخا ..

______________________

- فصباح .. لبسات حوايجها هزات ساكادو وتيليفونها ، نزلات لتحت لقاتهم فايقين من غير مصطفى ومالك لي مكاينينش

- فين هوما مصطفى ومالك ؟

- زهرة :

علمي علمك ابنتي ، بزوج بيهم مكاينينش ..

- عمر :

بايتين فدار مالك .. ايمتا مشاو الله اعلم ، شنو كاين الله اعلم ، المهم انا مشيت عندي الخدمة بزاف ..

- شريهان :

كنت انكوليك وصلني ولكن انت فطرتي ، صافي انشد طاكسي ..

- سعد : واش نتسناك حتى نوصلك؟

- شريهان :

لا غير سير ، عندك تنسى 10 تكون عندي صافي ؟؟

- سعد : غير تهناي .. كمل سعد فطورو حتى هو وخرج للخدمة ..

فطرات شريهان وكملات ، هزات سكادوها وتيليفون فجيبها وخرجات خدات طاكسي للقهوة تاخود الفلوس وتسنى سعد يجي يديها للمول تقدا ... غير وصلها نزلات خلصاتو .. خدات من عندو الصرف ، حلات سكادو رجعات ليه الصرف ،، مع هزات راسها تكمل طريقها كتحس بيد تحطات على نيفها وشيحاجة مجهدة شماتها ... ماعقلات على راسها حتى غيبات ..

فواحد من ديپويات لي كاينين فالمرسا ... كانت ݣالسة فوق الكرسي ، يديها مربوطين شعرها مشعكك وجاي على وجها .. عرقانة وحالتها حالة ، مزال سخفانة .. لي فيقها هو سطل ديال الما لي تكب عليها ، شهقات مخلوعة .. كتحس براسها كيضرها .. كتشوف حداها ، كيبانو ليها اكترت الكراطن وشي ريحة خايبة بزاف ، شعا ديال الشمس لي داخل من واحد الشقا ، خلاها تشوف هادوك لي كانو قبالتها ، رجال مݣلضمين واشمين ، كل واحد فيهم قدو قد الباب ... واحد فيهم كان ݣالس كيشوف فيها ومبسم ..

- (بلغة فرنسية نطق ) :

صباح الخير أزين ، سمحيلينا بزاف حيت فيقناك ، ولكن جانا الملل ، بغينا ندردشو شوية ونجمعو مع هاد الجمال ..

- شريهان :

شكون انتوما وشنو بغيتو مني ، انا راه ماعندي مايتسرق راكم غالطين بزاف ..

- لالا الحبيبة ديالي حنا مغالطينش ، حنا عارفين مزيان شنو بغينا ... سمعيني نجيك نيشان ، خوك مصطفى غادي تݣولي ليه يبعد على هاد لافير ، ومايدخلش راسو فيها ، وبغينا منو شي وراق ..

- شريهان :

واش دابا من نيتكم ، كاديو على خويا ... خويا راه غير بوليسي ديال جوج دريال انا نݣوليك لي كاين ..

- (خبط الطبلة لي قدامو) :

شوفي هاديك هاه ، دوك تحريميات ديالك ماديريهمش علينا حنا ، هادشي كبير عليك وبزاف معارفاش راسك معامن طحتي ، عند بالك ماشفناكش نهار شفتي الجريمة لي وقعات ، بقيتي دوري حتى غرقتي راسك ..

- شريهان (تصدمات بلعات ريقها وبقات ساكتة كتفكر شنو غادي دير ، واش زعمة تكون هادي هي العصابة لي قتلو سيد ولي دوا عليها خوها ، مايمكنش هادشي ، فالداخل ديالها فعلا كانت خايفة بزاف كانت كتكول هادي هي الأخرة ليها ، ولكن شحال هدا كانت كتسمع جداها الله يرحمها كتݣوليها ، الى طحتي فشي موقف خايب وبغيتي تخرجي راسك بقاي تݣولي كلمة وحدة ماعرفتش ماعرفتش ، واخا يݣرضوك طراف وتشوفي الموت بين عينيك بقاي تݣولي لا ماعرفتش ) :

واش انت ما حمقين ، غير حلو ليا ونتفاهمو ... اشمن جريمة علاش كتدويو واش فخباركم هادشي لي كديرو فيه كيتعتابر جريمة كيعاقب عليها القانون ، انا مدرت والو خاطفيني وجايبيني لهنا ودايرين ليا هاد الحالة ، راه نتابعكم قضائيا ..

- وقف وتم جاي لعندها ، قرب منها كيشوف فيها ، هز راسو كيحركو بنفاد صبر وكيطرطق فصباع يديه ، ضار من وراها مترقبة حركاتو ، ماحسات بيه حتو لوا شعرها على يديه ورجعو ليها لور حتى غوتات ربي لي خلقها ..

- (قرب من ودنيها وهمس) :

دابا واش غادي تجيني لطريق ، ولا ندفنك حية ختاري انت اصلا مدفونة مدفونة ميتة ميتة هههه عند بالك غادي يخليوك حيا متحلمشي بيها ، واخا خسارة هاد الزين يتدفن وهو حي ، ولكن الفضول ديال الوحد كيخرج عليه بعد المرات ، وانت فضولك خرج عليك ... دابا ختاري جينا لطريق نقدرو نشوفو من جيهتك واحد الشوية ، لا انت لا خوك ... ولا ساخية بخوك حتى هو ..

- شريهان ( كتغزز سنانها) :

شفتي انت والله ماراجل ، كون كنتي راجل كون فكيتيني وتفرج .. شفتي واخا تݣرضني طراااف واخا تشويني وتقليني ، وا أنا مااااا عاااا رفة وا لوووووووو فهمتيها ، وا انا معارفة والوووو ، طرتي ولا نزلتي معارفة والوووو ... دفعها دار وجا قبالتها ، هز يدو حتى لسما ونزل عليها لحنكها طرشها ، حتى تجرحات من فمها .. هزات راسها فيه ، الداخل ديالها باغية تبكي وباغية تغوت حسات بالحݣرة ، ولكن راه اخيب حاجة هي ضعفك تبينو لعدوك كانت حاسة بلي هادي الاخرة ليها ، والاشكال رابطينها كون غير كانت مفكوكة ادير جهدها يا ربحة ولا دبحة ..

- ههههههه (بدات كضحك بهيستيرية) :

عرفتو ونسلط عليكم هادو لي لابسيني ، وتفرج فلعب ديال بصح (ولات كدخل وتخرج فالهضرة المهم غير تفك ) ..

- براكة من ضحك الباسل ، ودابا كولي لينا خوك فين دار الوراق ؟

- فالمركز كان وقف ساهي وكيشوف فالأصلاحات ، البلاصة غادية وكتبدل شوية بشوية ... العمال خدامين ودايرين ݣاع الجهد ديالهم ، الجسد ديالو كان حاضر ولكن عقلو كان غايب ، ساهي فالكلام لي ݣاليه الرئيس ، وطلب لي طلب منو ، مكانش عندو حل اخور من غير انو يقبل ، خصوصا منين قبل مصطفى ..

- موسيو مالك ، موسيو مالك ..

- مالك (عاد فاق من السهوة ديالو ) :

نعام سمحيليا كنت ساهي ..

- ماشي مشكيل ، هاد الورقة أسيدي فيها جميع الطلبات ..

- مالك (قراها) :

واخا العشية تكون عندكم .. عطاهم بظهر وركب فطوموبيلتو الطريق كلها وعقلو مكاينش ، وهادي هي حالتو من لبارح ، ومغاديش يرتاح حتى شريهان تعرف كولشي ، عاد يقدر يرتاح غير نسبيا ..

_________________

جنب فمها نازل بدم وهي مزال كضحك مستمرة فحماقها ، غوت بجهد حتى قفزها ونطق :

- مايمكنش تكوني أخت ضابط ومعارفاش هاد المعلومات ، جينا لطريق حسن ليك .. الصبر ديالي بدا كيتقادا ..

- شريهان (دفلات ) :

واخا تعواج قدامي ، واخا تقطعني طراف والله لا ݣلت ليك شيحاجة ، عرفتي علاش حيت انا أصلا معارفة والو ..

- أنت كيبان ليا غادي تعذبينا معاك .. (غوت بأعلى صوتو ) دخلوووه ... تحل باب الكراج ، الضو ديال برا عما ليها عينيها .. كتحقق فشكون جارين ، المنظر لي شافت قدامها خلات قلبها غادي يسكت ، ولات كلها كترعد وكتبكي وكتغوت ربي لي خلقها ...

- شريهان :

مصطفى مصطفى خويا (كتغوت) جاوبني مصطفى اش درتو ليه الله ياخود فيكم الحق الكلا///ب ، راه والله معارفين شيحاجة ... اصلا انا معارفاش على اشمن وراق كتدويو ..

- مصطفى (وجهو زرق وكلو دمايات سخفان وصوتو سخفان) :

ويااااك ويااااك أشريهان ، ويااااك تݣولي شيحاجة ، راه راه واخا تهضري ... غادي غادي يقتلونا غادي يقتلونا ، وياااك اختي ومعزتي عندك ..

- نزل عليه بطرشة ، خلاتو يفقد الوعي ... مابقاش كيجاوب ، بدات كتغوت لربي لي خلقها ، شنو ادير سكون هادو وشنو باغيين من خوها ..

- شريهان : هالعار هالعار شوف ، انا راه معارفة والو وخويا ، راه ابوليسي ديال جوج دريال ... شووف انت (تجننات ) انا راه مرياحة ، انتوما النصارة مكتعرفوش لهادشي انا راه مسكونة مسكونة ..

- عند بالك اتفلاي علينا ، والجريمة لي شهدتي عليها فالمغرب نسيتيها ؟

- شريهان :

بتحدي ) انا ماشهدت على جريمة ومعارفة والو ، عرفتي شنو دير قتلنا قتلنا أش كتسنى ، تفو عليك أبوزبال الحشرة ... خانز تكول غير شي فار ميت يخخخ (شوية بدات كتحول عينيها قلباتهم وبدات تصدر أصوات غريبة ، خلات الكل يستغرب )

- هادي مالها ؟

- ماعرفتش أسيدي .. دابا شنو بغيتينا نديرو مع هاد زوج ؟

- قتلهم ..

- شريهان سمعاتهم شنو ݣالو .. عرفات بلي وصلات للاخر ديالها صافي ، أحلامها دمرات كولشي مشا .. هنا مابقاش الوقت لا لضحك ولا لتحريميات ، ولا لدخول والخروج فالهضرة ، هبطو دموعها سخان ... سيناريو حياتها داز كلو قدام عينيها ، مها ودارهم وعائلتها وخوها وصحابها ، مشروعها لي كانت كتحلم بيه ، كولشي مشا ليها بسباب ليلة مكان عندها فيها حتى شي ذنب ، من غير انو شهدات على جريمة ، وهاهي دابا كتخلص فيها ... وجا الوثت لي تخلص ، جا الوقت لي تموت صغيرة ..

- ماما سمحيليا الى قلقتك شي نهار ، ولا غوت عليك سمحيليا ماعرفت بحقك حتى لدابا ، كنتي بغيتي تشوفيني فرحانة وفداري وبوليداتي ، عرفتي اميمتي وتجيني الفرصة امي والله حتى نتزوج ، انكون معاك ، سمحليا اعمر على الشدة لي درت ليك نهار شوينا ، اكنت كنضحك معاك ... سمحوليا بزااف كنت بغيت نخرج فجورنال والمجلات ، ونتشهر ونطلعو الفوق ... ياربي تسمح ليا على أي ذنب درتو عن قصد ولا بدون قصد ياربي .. وهي فعز بكاها كتنخصص ، دارو بيها هازين واحد الغطا كحل ، كتشوف فيهم مفاهمة والو ، حتى حسات بيد تحطات على نيفها نفس الريحة ، تواني قليلة وهي تغيب .. دارو الغطا على راسها ، فكو الحبل لي فيديها وهزوها جارينها ، هي ومصطفى ... خرجوهم من باب الديپو وركبوهم فطوموبيل كحلة رباعية الدفع ، مسافة طويلة حتى لواحد التيرا خاوية ، غير الكريق قدامهم وشجر وراهم .. نزلو ونزلوهم ، حطو شريهان هي الاولى ومصطفى حداها ، خلاوهم طلعو لطوموبيل ديماراو ومشاو ..

____________________

الـمـغرب

- خولة لي كانت خدامة ، جا وقت انها تخرج ... بدلات حوايجها ، هزات ساكها وخرجات تحت نظرات غيثة لي مكتحملهاش من نهار دخلات ، ولا يمكن حيت غايرة منها .. سداتوالباب وراها وتمات غادية ، كتبان ليها طوموبيل تابعاها من اللور .. مداتهاش فيها ، حدرات راسها وكملات طريقها ، حتى تحطات يد قوية على دراعها ودوراتها عندها ، فلحظة تاخدات وضعية الهجوم ، حتى شافت شكون دورها كتشوف فيه بشك وريبة ...

- ياك لاباس ؟

- حسام (بإبتسامة ) :

متخافيش متخافيش ... بغيت غير نهضر معاك مالك ..

- خولة (كطلعو وتهبطو ) :

فاش بغيتي تهضر معايا اسي حسام ؟ وزايدون خلعتيني واش ناس كيهضرو بحال هكا ؟

- حسام (ضحك) :

وي بصح ، ديزولي حيتاش خلعتك مكنتش قاصد ... بغيت غير نهضر معاك واحد شوية ، من ݣبيلة وانا كنتسنى فيك ..

- خولة :

فاش باغي تهضر معايا اسي حسام ؟ فاش غادي نفيدك انا غير كندير الميناج فالصالون ..

- حسام (كيشوف فيها بنظرات الإعجاب ) :

الصراحة مايليقش تكوني كديري الميناج ، بحالك خاص تكون هي مولات الصالون ..

- خولة (بإبتسامة ) :

ربي يخليك ..

- حسام :

نمشيو لشي قهوة نتقهواو ، ونهضرو شوية ممكن ؟

- خولة :

سمحليا ولكن منقدرش خاصني ضروري نمشي ، خليت ليك الراحة .. عطاتو بظعر ومشات زربانة ، مخلياه كيتغدد وراها ..

- حسام :

دازو قبلك كثااار الالة ربيعة ، دابا نشوفو شحال قدك تهربي ... ضروري غادي طيحي وقريييب ..

- وسط النهار الشمس حارة ، ضاربة ليها فعينيها .. بدات كتفيق شوية بشوية ، كتحس براسها كيضرها بزاف وحها سخووون ... كدور فعينيها باش تعرف فين هي ، كيبان ليها غير الخلا وشجر وطوموبيلا بعاد غاديين جايين ، سلاه بغات تحرك كتحس بشي حد موسد ظهرها ، دورات راسها بشوية كيبان ليها مصطفى ناعس ، بالخف ضارت كتفيق فيه .. كضرب ليه فوجهو وكتفيق فيه :

مصطفى مصطفى خويا ، خويا فيق عفاك فيق ... مصطفى فييق سربي .. ، بدا مصطفى كيحل فعينيه شوية بشوية راسو ضارو حتى هو ... كيشوف فيها ، عاد بدا كيستوعب شنو واقع ..

- انت بيخير انت مزيانة مافيك والو ياك ؟(كيقلب ليها فوجها وضربة لي على فمها) ..

- شريهان :

بيخير الحمد لله ، غير راسي كيضرني وفمي .. نوض نوض اخويا نمشيو هادو راه جابونا لهنا ولاحونا .. مصطفى خويا شكون هادو ؟ وعلى أشمن وراق كيهضرو وعارفين حتى قضية القتيلة لي وقعات فالمغرب ..

- مصطفى (كيتغدد غير بوحدو عارف شنو وقع ولكن غير بلاتي هادشي زاد على حدو بزاف ) :

ماعرفتش اختي ، منين غادي نعرف غادي نݣوليك ، يلاه نمشيو ..

- شريهان :

لفين امصطفى غادي نمشيو ، لدار يشوفونا بحال هكا ؟ علم الله علي كوراه كيسول عليا ... وسعد ناري حريرة وحق الله العظيم ..

- مصطفى (كيقلب فجيابو لقا تيليفون ديالو ) :

أنسوني على مالك ، نݣوليه يجي يدينا ، انا معرفش فين حنا ..

- شريهان : واخا عيط عليه ... سونا مصطفى لمالك ، ݣاليه يجس يدسهم وبلي هوما فبلاصة بعيدة معارفينش بضبط فين ، خدم جيبي إس ... وݣلسو يتسناو مالك ..

- شريهان : شنو ݣاليك ؟

- مصطفى : كيسول شنو واقع ، ݣلت ليه من بعد وتعرف غير يجي يدينا بعدا ..

- شريهان : الله ياخود فيهم الحق ، كنحس براسي كيضرني وعضامي وجهي حتى هو ..

- مصطفى (كيشوف فيها ، بلع ريقو وجرها عندو ) :

محنة وغادوز أختي محنة وغادوز ..

- شريهان : مصطفى شنو واقع اخويا ، انت ومالك لبارح مابتوش فدار .. تصرفاتكم غريبة ، وهادشي لي وقع دابا شنو كاين ؟

- مصطفى : غادي تفهمي كولشي ، فاش يوصل الوقت غادي تعرفي .. يلاه اتجاوبو حتى وقفات طوموبيلت مالك من بعيد ... كايبان ليهم كيقلب بعينيه ، وقف مصطفى كيعيط ويشير ليه ، غير شافهم جا عندهم كيجري ..

- مالك (مخلوع) :

شنو واقع شكون دار فيكم هاد الحالة ..؟

- مصطفى (غمزو) :

مالك ، غادي توصلني انا للخدمة ، ودي معاك شريهان لدارك ، خاصها ترتاح دوش وتبدل عليها ، وداوي جرحة ديال فمها ، وتاخود شي دوا راسها كيضرها ... من بعد ونهضرو واخا ..

- شريهان (ختل التوازن ديالها شوية وطيح كونما يد مالك لي شداتها ) ..

- مصطفى : بلاما نضيعو الوقت ، من بعد ونهضرو دينا عفاك راه كيبان ليا ضرباتها الشمس ...

- شدها مالك غادي بيها ، مفاهم والو صدرو كيطلع ويهبط بالاعصاب متوتر وزاد كمل لي خاص ، طلع مصطفى للقدام حدا الشيفور ، وشريهان اللور حدا مالك ... ديمارا الشيفور ، وصلو مصطفى هو الاول للخدمة عاد كملو الطريق لدار مالك ..

فواحد من المحالات ديال أحمد .. واقف سعد متوتر وخايف ، كل شوية كيسوني او والو ..

- عمر :

امضرا ؟ مزال مكاين حتى خبار ؟

- سعد : لا والو ، حتى صاحبتها سكينة يلاه قطعت معاها مكاين حتى شي خبار عليها ، علي كيسوني عليها او والو ... وهي صباح خرجات ودابا 4 ديال العشية هادي ... مكاين عليها حتى خبار كون غير علمنا البوليس ، لا تكون البنت تݣريسات ..

- عمر : حتى مصطفى مكايجاوبش على تيليفونو .. يدا تيليفون عمر كيسوني كان مالك ..

- عمر ( داير يدو على جنبو مغوبش) :

وي مالك امضرا ؟ كاينة معاك .. كيفاش ؟ واخا واخا صافي لا كون هاني ، انا انحاول نسالي بكري ونجي لعندك .. يلاه بسلامة ..

- سعد (بترقب ) :

اشمو لقاها هي معاه فين كانت ؟

- عمر : مالك ݣاليا بلي لقاها هي ومصطفى مليوحين فشي خلا ، وبلي مصطفى مشا للخدمتو ومزال ماشرح ليه والو ..

- سعد : انا اخويا انمشي عندهم دابا ..

- عمر : صبر بلاتي نكملو الخدمة ونمسيو انا وياك بزوج ..

- سعد (تنهد) : واخا ..

_________________

عينيه معميين ، مكايبان ليه والو غير الأعصاب لي متحكمين فيه ..

ماتفهمناش على هادشي اسيدي ، تخطفو ختي وتخطفوني معاها حتى لهنا وحبس .. انا عرفت القضية فيها إن منين تخطفت قريب للخدمة .. وحيت مكايعرفني حد هنا ... ومنين تجبدات قضية لي وقع فالمغرب عرفتكم انتوما ماليها ، خاطفين ختي وحايبيني انا ، باش تشوفوها واش غادي تݣر ولالا ياك ...

- جون (بجدية وصرامة ) :

مصطفى ، ماتنساش راسك ... ماتنساش بلي خدمتنا كتحتم علينا نديرو هادشي ، خاصنا نعرفو واش ختك مأهلة للهاد المهمة ولالا ... واش الى كانت بين يدين دوك الناس واش ساهل يأترو عليها ولالا ... وهادشي انت عارفو مانحتاج نوريه ليك انت راك رجل قانون ، وعارف بلي اي واحد غادي يدخل معانا فشي مهمة ، قبل منعولو عليه كنسولو عليه مزيان وحتى كيدوز من عدة إختبارات ، هو فعلا ختك كاپابل وهادشي عارفينو مزيان غير من المدابزة لي وقعات هادي شهرين ، ودفاع لي دافعات على صاحبتها ، ولكن هادشي مكافيش كان خصنا نزيدو نتأكدو وحنا دابا تأكدنا ..

- مصطفى (بأبتسامة ) :

اهاه وداك تكرفيص عادي لي تكرفصات ، ديك ضربة لي جنب فمها عادية ... أهاه بغيت نسولك هادشي لي درتوه ليه غادي يدوز غير هكاك ختي مكاين لي يعوضها ، ولا غادي تݣولو ليها هادشي اديريه على قبل عائلتك واتكوني بطلة فعينين الناس .. وعلاش علاش هادشي مافخباريش انا اعباد الله علاش ؟

- جون :

كون ݣلناها ليك ، كنت غادي تخسر لينا الخطة ، حيت هاديك ختك ... يوقع لي يوقع مغاتبغيهاش تأدى ، داكشي باش ماݣلنا ليك والو ... واخا كنا عارفينك غادي تعيق ، اما ضرب لي تضربات ماشي شي ضرب قاسح ماتزيدش فيه امصطفى ، غير ايزيد يقصحها ويقويها باش تلعب الدور كيفما هو مطلوب منها ..

- مصطفى (كلو كيترعد ) :

عرفتي اسيدي ، الحمد لله انو كاين فبلادك وخدام معاك ، ومن الواجب ديالي نحتارمك ومنزلش كلمتك ، (زاد قرب منو شوية ) كون كنت فبلادي غادي تشوف معاملة اخرى ، وكون متأكد نهار نسالي هاد لافير ومانبقاش تحت الاوامر ديالها ، الطرشة لي خدات ختي اترجع ليك غير كون هاني ..

- جون (تبسم ) :

غادي ندير راسي ماسمعتكش ، حيت عارف مشاعر الأخوة ... دابا تقدر تمشي ترتاح فالعشية غادي نكون عندكم ... حا الوقت لي نهضرو فيه مع ختك مكاين لاش نتسناو سيمانة كاملة ..

- فالكوزينة واقف كيوجد فالبلاطو ، دار فيه طاس ديال الحليب بالويزة مع البيسكوي .. كاس ديال الما وحداه أسپيرين .. هز البلاطو غادي بيه للصالون ، تحل باب بيتو خارجة منو شعرها فازݣ ... الضربة لي حدا فمها صغيرة ، لابسة قبية وسروال ديال كيطما ديال مالك .. بقا واقف كيشوف فيها جاتو الضحكة ، جات بحال شي عزري فحوايجو ..

- مالك (عقد غوباشتو فاس تفكر داكشي لي وقع ) :

كيف بقيتي شوية ؟

- شريهان (مخسرة سيفتها ) :

راسي راسي غادي ينفاجر عليا ..

- مالك : اجي ݣلسي ، وجدت ليك حليب بالويزة غادي يهدنك شوية ، ومنين تكمليه تاخدي أسبيرين وتكاي ترتاحي ..

- شريهان :

ماكرهتش غير نعس وحق الله ... اجي ماهضرتوش مع علي ؟ اتلقاوه مخلوع ..

- مالك (حط الپلاطو كيقاد ليها فبلاصة باش تكا ) :

تاصلت بيه ، وݣلت ليه ليكاين ... شوية ويجي لا هو لا عمر وسعد ..

- شريهان (ݣلسات مرجعة راسها للور) :

ماتݣولو لماما والو ولا عمي وخالتي نزهة ، واباكم غادي يتخلعو ونصدقو واحلين ..

- مالك (كيقيس ليها فراسها بيدو) :

مجانيش راسك سخون ، بلات .. قربي قربي ، هزات عينيها فيه مقربا ليه راسها ... هبط بشفايفو حتى نيفها دخل فعنقو .. ريحتو كانت زوينة بزاف واخا تحسي براسك مريضة كتفيقك وتخليك مرتاحة ..

- مالك (حاط شفايفو على جبهتها كيقيس حرارتها ، هادي هي طريقة الصحيحة باش تقيس حرارة الانسان ) :

لالا سخون راسك .. شربي كاس وكولي البيسكوي حتى هو .. باش نعطيك دوا ..

- شريهان : واخا ..( هزات طاس ديالها كتشرب منو ودوز بالبيسكوي ) ..

- مالك (ݣلس مقابل معاها ) :

بنسبة لدار غير كوني هانية ، مغاديش يسيقو الخبار .. يلاه شربي خلاص باش تنعسي شوية ترتاحي ..

- شريهان : واخا ، والى سوناو شنو انكولو ليهم ؟

- مالك :

هوما عند بالهم مشيتي ديري شوبينغ فصباح والعشية راكي خدامة ، ومنين اتخرجي من الخدمة .. غادي نسوني ليهم ونݣوليهم بلي خرجت انا وانت ومصطفى ندورو ، وانباتو عندي فدار غير تهناي وسربي باش تشربي دواك ..

- شريهان (كتاكل وتهضر ) :

مابقيتش فهمت والو وحق الله ، ماعرفتس شنو هادي واقع ... وشكون هادو ، وعلاش ماقتلوناش دغية دغية لاحونا ومشاو ..

- مالك : ماشيش وقت الهضرة دابا ، رتاحي والهضرة من بعد واخا ؟

- شريهان (شافت فيه ) : وعلاش انت يقدر شي واحد يݣوليك لا ..

- مالك (هاز حاجب ومنزل الثاني ، رجع ظهرو اللور جامع يديه ) :

مزيان منين عرفتيها ، يلاه سربي ..

- شريهان : صافي كملت .. ناض شد من عندها الكاس ، عطاها الأسبرين والما ، مشا للبيتو ورجع هاز واحد الغطا فيديه ، رجع لقاها خدات الدوا وتكات .. غطاها بداك الغطا ، هبط السرجم باش مايضرهاش الشعا ، ومشا رجع ݣلس فبلاصتو ..

- شريهان (حلات عينيها شافت فيه ) :

دارك زوينة بزاف ، وحتى بيتك زوين ... واخا الفيلا كبيرة ومفروجة ولكن دارك حسن ..

- مالك (بإبتسامة كيشوف فيها ) :

نعسي نعسي ..

____________________

كيفاش العشية اندوزو نهضرو مع ختك ، واقيلة ختي داز عليها نهار خايب ، وخاصها ترتاح ماشي يجيوها متابعين صدمة ورا ختها ..

- جون :

مصطفى مابقاش عندنا وقت مابقاش عندنا وقت ، شهرين شهرين خاص نوجدو فيهم شريهان مزيان ، خاصها بزاف ديال الحوايج باش تكون الشخصية لي بغيناها حنا تكون داكوغ ..

- مصطفى (داير يديه على حنابو ، كيدور فبلاصتو ... عمرو حس بهاد الكم الهائل من الاعصاب لي راكبينو فهاد الساعة ) :

اهاه واخا ، ممكن نسولك ... واحد زوج عمامي لي ممكن دابا يكونو ساقو للخبار لي وقع لينا ، وغادي يجيو يشوفو شريهان ... او صديق ختي لي هو مول القهوة لي حتى هو ايكون ساق الخبار ، حيت ختي مكتسدش فمها واتكون ݣالت ليهم ليكاين .. شنو ادير معاهم ، هادشي كيبقا أسرار المهنة ومخاصوش يتݣال شنو ادير معاهم ؟ اه نسيت علي مول القهوة لي خدامة فيها ختي فخبارو بلان الجريمة ديال المغرب اباش تعرف .. حيت ختي ݣالتها ليه ، اهاه كيفاش ادير معاهم ؟

- جون :

الجواب ساهل ، هنا ماعنديش حل أخور من غير نكوليهم داكشي لي أنا باغيه يعرفوه شي حاجة أخرى لا ..

- مصطفى : أسرار المهنة نسيتي ؟

- جون :

وي عارف ، وحتى انا ݣلت ليك انݣول داكشي لي باغيه انا يعرفوه ، أما لعائلتك غير تهنا عارف شنو غادي نݣوليهم ..

- مصطفى (كيشوف فيه ) :

براڤو عليك ، كتفكر لكولشي ... واخا اسيدي حنا أصلا علاش كاينين هنا ، غير تحت الامر ديالك (خنز فيه وخرج) غادي مكايشوفش قدامو .. دخل للبيرو لي كايكونو مجموعين فيه .. لقاهم كاينين تم ..

- فخباركم البلان ياك ؟ كان فخباركم ؟

- جاكسون : مكان عندنا منديرو تعليمات الشاف ..

- مصطفى :

اهاه معلوم ، وانتوما مخاصكم طيحو كلمة الشاف ... كلكم متافقين ، حيت ماشيش انتوما لي ختكم معرضة للخطر ، واخا واخا .. خرج جاعر من البيرو تبعاتو جوديا كتعيط ليه مداهاش فيها .. وقفاتو عند الباب على برا ..

- مصطفى (جاعر مخرج فيه عينيها ) :

شنو شنو بغيتي لاش تابعاني ، ياك تافقتو كديرو داكشي لي ݣاليكم صافي لاش تابعاني ؟

- جوديا (بنفس الصوت) :

متغوتش عليا ، مدرت ليك والو ... وزايدون هداك الشاف من الواجب ديالنا نديرو داكشي لي غادي يݣولينا ، واش بغيتينا نتعاقبو امصطفى ، القانون فوق منا كاملين ماعندنا منديرو ، كيما انت دابا ماعندك مدير ..

- مصطفى (كيضرب جهة صدرو ) :

قلبي واكلني قلبي كيحرقني اجوديا ، راه ختي هاديك ختي ..

- جوديا ( سكتات كتبلع فريقها ) :

حاسة بيك ، وحاسة بيك بزاف اصعب حاجة تشوف طرف منك حياتو فالخطر وأنت مقاد دير والو ، غير كل واحد كيفاش جاتو ودقة لي جاتو (تنهدات تنهيدة طويلة ) تمشي لحدا البحر ترتاح شوية ؟

- مصطفى : لا خاصني نشوف ختي ، انا مشيت .. خلاها واقفة شير لطاكسي وقف ليه ، ركب ومشا .. خلاها واقفة متبعاه بعينيها ..

- الــمــغرب :

- دخلات لدارها .. يلاه ݣلسات باش ترتاح ، مع هزات عينيها كيبان ليها واقف فباب الكوزينة ، على شوية ماتغوت ..

- خولة ( مخلوعة ) : واش بعقلك ، واقف بلاما دير الحس .. كيفاش دخلتي اخويا حرام عليك ..

- منعم ( ݣلس ) : شربي ليك كاس ديال الما ، حيدي بيه الخلعة .. دخلت كيف كيدخلو الناس ، رتاحي رتاحي شوية ..

- خولة : عندك يكون شي واحد شافك نصدقو واحلين ..

- منعم (داير رجل على رجل ) :

لا غير تهناي حتى واحد مشافني ، وانا اصلا مكنتش جاي ، ولكن هادشي لي غادي نكوليك خاصو يتݣال فاص ، مابغيناش نريسكيو ونهضرو اپيل ..

- خولة (بفضول ) :

ياك لاباس ؟ اش واقع كاينة شيحاجة جديدة ؟

- منعم :

داكشي لي وقع ݣبيلة ، مع حسام ...

- خولة : ماعرفتوش شنو بغا ولا فاش عينو ؟

- منعم :

ساهلة بغاك انت ، هو اي وحدة خدمات فصالون جديدة .. خاصو ضروري مايضور بيها ، وانت بنتي ليه فالبلان وهادشي خاصو يكون فصالح ديالنا ..

- خولة (بإستفهام ) :

بحالاش ؟

- منعم : الحل ساهل ، راس الخيط جا حتى لبين يدينا ، خاصك تخلي حسام يتقرب منك ويولي لعبة بين يديك ، هكا نقدو نجبدو منو كاع داكشي لي بغينا ..

- خولة : من نيتك ، هداك راه مطور صعيب يسرسب لينا كولشي ، بحال داك نوع دازو منو بزاف ..

- منعم :

وي دازو منو بزاف ، وكلهم دارهم لعبة بين بديه ، ولكن انت خاصك تكوني غير ... انت خاصك تقلي وتخليه هو يجري من وراك ، مخاصكش طيحي ليه فاليد دغية ، خليه هو يطيح ليك فاليد ، وشوية بشوية غاتبقاي تاخدي منو معلومات حتى نوصلو لكاع داكشي لي بغينا ، انت زوينة وزين ديالك قليل ، يعني انت بنسبة ليه تحدي وهمزة مكاين بحالها ..

- خولة ( دارت رجل على رجل كضحك ) :

سبحان الله يلاه وليت زوينة فعينيك ، قبل لا كنت موكا مكنتي كتحمل فيا شعرة ، اش وقع ؟

- منعم (غوبش وناض ) :

انا جيت علمتك ، بالجديد وانت خدمي دماغك ، وعرفي كيفاش تصرفي منخافس عليك انا مشيت ... خرج وسد الباب مخليها كضحك عليه ...

___________________

الشَّـجاعـة لا تعـني أبَـدًا أن نستَمِـر بِـ الـرَّکـض في الإتِّجـاه الخَـاطِيء..؛ لِـ مُجَـرد أنَّـه طـريقًـا مضَينَـا فيه فَـ حتمًـا لن نصِـلَ إلي وِجهتِنَـا.. ولا تعني أن نظلَّ قابضِيـن بِـ أيدِي مَن يُجـاهِـدُ گي يُفلِتَ قبضَتنا..؛ فَـ مَـن أراد الـرَّحيـل سَـ يَرحَـلُ ولو إمتَـلگ کُلَّ أسـبَابِ البَقـاء ،، ولا أن نتنَـازل عن هُويتِنَـا مِن أجـلِ سَـرابٍ لن تشفـعُ لنا فيـه تضحيَّـة ولن يُغـني عنَّـا شـيئًا مِن نَـدم ،، ليسَت الشَّجاعةأن نسـبحَ ضِـدَّ التَّيَّـار ونمضِي عکسَ إرَادتِنَـا ، إنَّمَـا الشَّـجاعـة أن نَقِـف في مُـواجهـةٍ حتميَّـة مَـع أنفُسِـنا..، وأن نمـلکُ مِن القُـدرة علي الإختيِّـار وإتِّخـاذ القَـرار ، ما يَجعلُنَـا نعرِفَ متي نُعـلِن الإنسـحِاب ليس إنهِـزامًـا..؛ ولکـن لِـ الحفـاظِ علي أجمـلِ مَا فينَـا وأغـلي مَا لدينَـا ..

- كانت ناعسة ... حتى كتسمع حس الزايد معاها ، بدات كتحل عينيها شوية بشوية ، كيبان ليها مالك كيأشر لخوتو باش ينقصو صوتهم شوية ..

- شريهان (بدات كتقاد فالݣلسة ) :

غير خليهم صافي وا فقت ..

- مالك : تهنيتو هانتوما فيقتوها يردتو ..

- سعد طار لحداها معنقها ، خاشها عندو .. :

انت مزيانة ، ماوقع ليك والو ... ناري شوف ولاد الحرام شنو دارو ليها لفمها ، واش ديكلاريتو ولا مزال ؟

- عمر ( ݣلس حداها ، شاد ليها فيديها ) :

المشعكة ، صافا مزيان كيف كتحسي شوية ..

- شريهان (تبسمات إبتسامة كبيرة ) :

كيفاش مغاديش نكون مزيانة ، وانا ضاير بيا غير زين ، ماشي واحد 3 شوف ݣاع ...

- مالك ( مجبد طالق يديه ورجليه ) :

منين ݣالت هكا عرفوها ولات بيخير وعلى خير .. سونا الباب ، ناض مالك يحل كان مصطفى داخل ، وجهو حمر بالأعصاب ..

- شريهان (ݣلسات ) :

خويا ، كيف بقيتي شوية ؟

- مصطفى : الحمد لله ..

- سعد وعمر :

أنت مزيان ؟ على سلامتكم ..

- مصطفى : الله يسلمكم ، اندخل ندوش واخا خويا مالك واخا تعطيني شيحاجة نلبسها ..

- مالك : واخا أجي معايا ... مشاو للبيت عند مالك ، غير سد الباب مالك وهو يشعل مصطفى ..

جون هو مولاها ، دارو فينا ها هاد الحالة ، باش يعرفو واش شريهان قادة تحمل المسؤولية ولالا ..

- مالك (جعر كان يلاه ايخصر الهضرة وتراجع ) :

كنت حاااس قسما بالله ، مايمكنش شي حد يخطف شي حد أخور ويطلقو بسهولة ، باينة فعايلهم ..

- مصطفى :

فالعشية غادي يجي ... باش يهضر مع شريهان ، كاليك جا الوقت أسيدي باش يهضرو معاها ، حيت مابقاش الوقت ... بقات شهرين ، مالك كنحس براسي كنغلي ، ولبت كنفكر غير تسالي هاد لافير غادي نديميسيوني ، مابغيتش نعرض حياتك ختي وعائلتي مرة اخرى للخطر ... وهاد المرة تقدر متكونش غير ختي ، تقد تكون مرتي ولا بنتي ولا ولدي ، صافي عطا الله الخدامي ..

- مالك :

تسمح فخدمتك وضومين لي كنتي ميت وتدخل ليه ؟ من نيتك ؟!!

- مصطفى :

كنهضر معاك أمالك ، صافي قررت ولي ليها ليها ، الحمد لله انا راجل وبدراعي ، الخدمة لي غاتخلي عائلتي ديما مخلوعين ومشطونين مكاين لاش ، ماعندي منݣجدر بيها ..

- مالك :

هاد الهضرة نخليوها لمن بعد ، دابا هادو لي على برا شنو غادي نديرو فيهم ، وأشمن كذبة غادي نكولو ليهم بغيت انفهم ، وحتى علي راه جاي وفكها فيمن وحلتيها دابا ..

- مصطفى :

هو ݣال غادي يحلها ... خليه يحلها ، انوض ندوش بالما بارد يلاه يبرد عليا راسي ..

- مالك : غادي نحط ليك ماتلبس ..

- مصطفى :

واخا خويا شكرا لهلا يخطيك .. دخل مصطفى للحمام ديال مالك ، مخليه كيجبد ليه شنو يلبس ..

________________________

- ݣالسين مجموعين كاملين معاهم حتى علي .. حتى نطق مصطفى :

- شريهان (ضارت عندو شريهان شافت فيه) واحد الشوية ايجي جون الشاف ديالي ... غادي يكوليك شي هضرة ، بغيتك متخلعي ماتدهشي صافي متافقين غادي تخدمي عقلك مزيااان واخا ؟

- شريهان (بشك ) : أشمن هضرة ، راه ݣلت ليكم انتوما مخبعين شيحاجة ؟ شنو واقع أخويا ؟

يتبع...