السيدة الأولى الجزء 13

- شريهان طلقات منو ورجعات ݣلسات .. سلات الموسيقى ... حطات أمينة العشا ، تعشاو شي كيشوف فشي حتى سلاو ..

- شريهان :

الله يعطيك الصحة خالتي أمينة ... وربي يخليك على هاد العشيوة الزوينة ، سمحولينا عدبناكم خاصنا نمشيو ..

- محمد :

كلتو ليا بلي باب داركم تسد ، كريم ولدي نوض مشي معاهم ، شوف كيفاش دير وديك معاك المطرييل ديالك ..

- كريم : واخا ..

- دخل لواحد البيت جاب صندوق فيه كاع المطيرييل وخرج كيتسناهم ..

- مالك : شكرا بزاف وسمحولينا ..

- محمد : متكولش هكاك ... مرحبا بيكم فأي وقت الدار داركم ..

- شريهان : لهلا يخطيكم ومرحبا بيكم عندنا حتى انتوما ..

خرجو من عند الناس غاديين فطريق وحدة ، كل واحد كيشوف فجهة حد مكايهضر مع حد ... مالك غادي وراها كيشوف فيها بنص عين شاداه الضحكة ، دايراها ومزال مقلقة ... بقاو على داك الحال حتى وصلو ، بقا كريم مدابز مع الباب حتى حلو ..

- شريهان :

شكرا بزاف اخويا كريم لهلا يخطيك ..

- كريم :

العفو مرحبا تصبحو على خير ..

- مالك (داير يديه فجيابو) :

تلقى الخير .. مشا كريم ودخلات شريهان هي ومالك ..

- شريهان :

تصبح على خير ..

- مالك :

مامالفاش ليك تنعسي بكري ، اش طرا وجرا ؟

- شريهان (ضارت عندو) :

صباح غادي نفيق بكري مع 7 باش نكون واجدة .. انطلع ندوش ونرتاح رجليا ضاريني .. اه نسيت حتى داك التحدي لي بيناتنا تراجعت فيه ، لي بغا يطيب راه كوزينة قدامو ..

- مالك (قرب عندها) :

دابا مالك ياك لاباس ؟ شنو سر هاد التصرفات ؟ مافهمتش راه انت لي خليتي الباب محلول حتى تسد ولا نسيتي ؟

- شريهان :

مانسيتس ، ومكنهضرش انا على هادشي ... كنهضر على دوك تصرفات ديالك عند الناس ، معنقني بديك الطريق واش انت شوية لاباس؟ مالك راه ماشي غير داك نهار بسايني وسمحت ليك ادير مابغيتي ، دير غير على وجه الدم لي بيناتنا واخا ، وحتارمني انا ماشي من دوك المونيكات لي مالف بيهم واخا ، والله يرحم بيها الوالدين آخر مرة تجاوز حدك معايا ... حنا هنا على وديت الخدمة شيحاجة أخرى أحيدها من بالك ... تصبح على خير ..

- خلاتو واقف ملامحو باردة ، وطلعات لبيتها سادة عليها ... حدر راسو كيشوف قدامو تنهد تنهيدة طويلة ، هز السوارت ديال الدار وخرج على برا ..

________________

دخلات شريهان دوشات حيدات العرݣ وديك الشموشات لي مشات فيها ... من بعد دوش تخشات ففراسها ، حسات براحة ولكن رجليها كيوزوزو عليها ... عيات اليوم بزاف ، بقات ساهية فبلاصتها كتخمم فداكشي لي وقع ، كيفاش كانت بين يديه ريحتو ويدو لي كانت محطوطة على ظهرها ، سؤال واحد كيتبادر لدهن ديالها ... علاش فاش كتكون حداه وبوحدهم كتوتر ... وفاش كانت بين يديه ولات بحال شي ورقة فوق شجرة ايطيرها البرد ، غمضات عينيها وتفكرات نهار باسها ... عمرها فحياتها خلات شي حد يقيسها ولا يقرب منها ، وكانت كتݣول بلي هداك لي ايحط صبعو عليها أيكون راجلها ... كيفاش حتى دار هكاك وتقرب منها بديك الطريقة مافهماتش ، بقات مغمضة عينيها كتفكر حتى داها النعاس ..

- فصباح فالمغرب .. تقادات خولة ولسبات طلبات شعرها لي لونو كان بحال لون القمح عينيها الزرقين كيبريو .. لبسات صايا فالحمر مع سبريدة بيضة ... تيشورت فالبيض وتجاكيط دجين .. خرجات من دار بكري خدات طاكسي يوصلها لاݣار باش تشد التران للرباط .. يلاه نزلها الطاكسي خلصاتو ... رجعات الصرف لساكها مع هزات راسها كيبان ليها حسام واقف ..

- خولة : موسيو حسام شنو كدير هنا ؟

- حسام (بإبتسامة كيطلعها ويهبطها ، ماينكرش بلي هاد البنت من نهار شافها وهو شيحاجة فيه مبدلة ، مايمكنش مايمكنش حسام لي ضحك على شحال من بنت ، تجي وحدة خدامة كدير الميناج فصالون يطيح فيها ، مايمكنش ) :

جيت نشوفك ، وحيت معارفش العنوان ديالك ... ولي عارف هو ساكنة هنا وكتاخدي تران للرباط ، قررت نتسناك قدام لاݣار ..

- خولة : وشنو بغيتي اسي حسام ؟ وزايدون خاصني نمشي غادي نتعطل ويمشي عليا التران ..

- حسام (يلاه اتخطاه جرها من دراعها) :

ربيعة ، الله يخليك عطيني غير فرصة نهضر معاك عفاك ..

- خولة :

سي حسام ، أنا مايمكنش ليا نهضر مع راجل المرا لي انا خدامة عندها ، وانت اصلا باين بغيتي تفلا لي درتيه مع غيثة راه بلاما تحلم ديرو معايا ..

- حسام :

ربيعة ، كنترجاك ... غير زيدي طلعي للطوموبيل ونهضرو مزيان انا وياك ومايكون غير خاطرك ، غير جربي وتيقي فيا الله يخليك ..

- خولة (وقفات ساهية كتفكر .. هزات عينيها فيه ، كان كيترجاها بعينيه) :.

واخا واخا أسي حسام .. الفرحة بانت ليه فعينيه ، مشا كيجري حل ليها الباب .. غير طلعات مشا للبلاصتو دار سمطة وعينيه عليها ، ديمارا وشد الطريق ..

خولة : تقدر تهضر دابا وتݣول شنو بغيتي مني عفاك ؟

- حسام (سايݣ ومرة مرة كيشوف فيها ) :

كتعجبيني أربيعة كتعجبيني بزاف واش نكدب ..

- خولة :

لا واش من نيتك كضحك عليا ، شوف الله يرحم بيها الوالدين ... انا راه ماشي ديال تفلية انا راه ماشي هي غيثة ..

- حسام : انا عارف هادشي ، داكشي باش بغيتك .. ربيعة شوفي عندي ليك واحد العرض وفكري فيه مزيان ..

- خولة : شنو هو هاد العرض هدا ؟

- حسام (حبس فبلاصة فطريق وشاف فيها ) :

برطمة فبلاصة زوينة ، طوموبيل بسميتك حياة حسن من هادي بشرط واحد ..

- خولة : اهاه أماهو هاد الشرط هذا ؟

- حسام :

أول حاجة تخلي الخدمة ، وتاني حاجة تزوجي بيا ..

- خولة (مصدومة) :

أش نهاو واش من نيتك عرفتي شنو انا انزل هنا وندير اوتوستوب ... حات نازلة وهو يشد ليها فيدها ݣلسها بزز وسد البيبان ..

- حسام :

ربيعة قسما بالله عمري حسيت هكا ، يمكن هدا حب من أول مرة ... ممكن تݣولي عليا هدا هبيل ماعندوش العقل ، يلاه 5 المرات شافني ودار هاد الحالة ، قسما بالله فينما كنتي كتخرجي من الخدمة كنتبعك حتى لاݣار ونمشي بحالي ، الى لاحظتي حتى غيثة مابقيت كنجمع معاها ..

- خولة :

انت مزوج بمدام نادية مدام نادية ، واش من نيتك واش بغيتي تخرج عليا ، بغيتيها تقتلني .. لا سمحليا وانا ماعندي مع رجال المزوجين ..

- حسام :

انا نادية تزوجت بيها غير على قبل المصلحة ، وحدة كبر مني بشحال اش انبغي فيها غير داكشي لي عندها ..

- خولة : وعلاش مطلقهاش ؟

- حسام :

منقدش دابا أربيعة أفهميني ، انت معارفاش نادية أش كتسوى ... راها خطيرة وراها بلانات خايبين ، والله حتى تغبر ليا الشقف ..

- خولة :

سي حسام (قاطعها) .. حسام ݣوليا غير حسام ..

- خولة : حسام انا واحد البنت لي نيشان ، وماعندي لا مع تصاحيب لا تخربيق ... منقدش نكون مع راجل مزوج ، مالها شنو غادي دير ليك بسلامة ، كتهضر عليها بحال الى كتهضر على شي بزناز ..

- حسام : بحال هكاك نيت ..

- خولة : بحالاش ؟ شنو كتقصد ؟

- كتجري تابعاه .. عياها الجهد مابقاش عندها ، ݣاع داكشي لي وقع ليها لبارح وزادت كملات هاد الجرا دابا صافي كملات لي خاص ...

- ستيڤن (عاقد غوباشتو) :

براكة ، خودي إستراحة باش نبداو ..

- شريهان (كتحاول تلتاقط انفاسها ) :

ناري ناري صافي ساليت ...

- ستيڤن : حنا مزال كاعما بدينا ، هادو مجرد تسخينات دابا يلاه انبداو الخدمة ديال الصح

- شريهان (هزات عينيها فيه) :

بحالاش علاش مزال شي حاجة اخرى ؟

- ستيڤن (بإبتسامة) :

اه مزال .. مزال هادو ، هز قدامها ليݣات ديال البوكس ..

- ستيڤن :

سربي ماعندناش الوقت بزااف ..

- تسمع حس طوموبيل ، ضارت كتبان ليها طوموبيلة مونيا ... خسرات سيفتها ودورات راسها لعند ستيڤن ..

- عرفتي شنو أعمي ستيڤن ، غير زيد نبداو نيت دابا ، حيت كيبان ليا هاد البوكس غادي نحتاجو بزاف ..

- ستيڤن (جابت ليه الضحكة بديك عمي مد ليها ليݣو وبداو ) :

خلي الهدف ديما قدامك ، كيفما بغا يكون العدو ديالك مثلا تخايليه هو لي قادامك وبداي ، بقا معاها كضرب ويخوي ليها كضرب ويخوي ليها ... كسعلمها كيفاش تخوي للعدو ديالها وكيفاش ضربو ..

- ستيڤن مزيان .. ودابا حا وقت التطبيق (جبد واحد البونجة قاصحة بزاف مغلفة بجلد هزها بين يديه) :

هادشي وريتك طبقيه على هادي ... تخايليها عدوك تخايليها شي حد خايب فحياتك ، شي حد ظلمك ولا برزطك ... تفاهمنا يلاه بداي ..

- شريهان تفكرات كاع الناس لي اداوها واحد واحد وكضرب ...

- ستيڤن : اونكوغ اونكوغ ... فازي بجهد بجهد اشريهان بجهد هكاك بجهد ... شريهان فكل مرة كيحمسها كتزيد تضرب بكل قوتها مكرهات ديك البونجة تقطعها طراف طراف ..

- ستيفن : براكة براكة عليك لهاد النهار نكملو غدا فنفس الوقت .. تقدري ترتاحي ، وديري شي كريم ليديك حيت ايولي حالتهم ..

- شريهان (بإستفهام ) :

علاش ؟

- ستيڤن : ضحك ) واحد ساعتين وتعرفي علاش .. يلاه نتلاقاو غدا

- شريهان : دخل فطر معانا ..

- ستيڤن : لا غير بصحة ... وزايدون راه عندكم ضيوف نسيتي ، يلاه انا مشيت .. هز سكادو ديالو ومشا ..

الداخل

واقف فالكوزينة لابس ڤيستة مخطة مع تريكو بيج كول طالع ، رجولتو مسيطرة كتحس بحضورو القهوي وجد القهوة خدا كاس وعطاها كاس ... أي وحدة كيفما بغات تكون غادي تكون مسحورة بيه ، وهي منهم كتشوف فيه بإعجاب ، طالقة شعرها لي لونو كان بحال أشعة الشمس .. بإبتسامة نطقات :

- مونية :

عندي ليك واحد سؤال هو شخصي شوية ، كيفاش واحد بحالك فمكانتك الإجتماعية ، يرتابط بإنسانة بحال شيري ، كيبان ليا من ملامحها وتصرفها لبارح متهورة بزاف وحتى طريقة اللبس ديالها وكلامها ، بعيد كل البعد عليك وعلى محيطك ..

- مالك (رشف من القهوة ديالو بهدوء يلاه باغي يجاوبها حتى قاطعاتو ) ..

- ومالها شيري كيف جاتك ، زين زيني أنا ولون العسل مدهونة بيه من ساسي لراسي ، أما عينيا حتارو العلماء فيهم ومزال مالقاوش سمية لونهم وعاش الملك السلطان سيدنا وسيدكم فالبلدان ، سيدي محمد نصره الله سيدي ربي مݣود لي الحكام عاش الجادرمية والكوميسارية والمخازنية والعساكرية والبومبية لي ضاربين العسة عليا، تاواحد ميجيب الضسارة عليا ، ودابا يا اعينين تُكة ، يالي متشوفيك لا موحمة لا لي شادة فحبل ، مابقيناش محتاجين ليك الباب يالحباب ..

- مونية (طلعاتها ونزلاتها وتبسمات بإستهزاء) :

دابا عاد فهمت علاش كلفوني نعلم الإيتيكيت ..

- شريهان :

لا ازين انا لي انعلمك كيفاش تهضري مع لالياتك ... وعرفتي مايجيك مليح ..

- مالك (قاطعها) :

شريهان حشومة ..

- شريهان (معصبة) :

كولها ليها هي ، لي كتهضر عليا خايب وانت ساكت عاجبك الحال وعايش ليا الدور ، راه غير رهان لا تيق راسك ... انا وياك تراهنا بلي الى خدات نمرتك غادي نطيب ليك العشا ، مكاين لاش ديري فيها جنتلمان .. وانت اتخرجي مابقيتش بغيت شي وحدة بحالك تعلمني ، اه سيري علمي غير راسك بعدا الترابي وكيفاش تهضري مع الناس ونهضرو ..

- مونية (كتشوفيهم كتخنزر ... خصوصا شريهان ، حطات الطاس القهوة ، يلاه اتخرج ..

- شريهان : مدموزيل مونية واحد دقيقة ... وقفات وضارت عندها ) هاد لونسومبل ديالك بيض بزاف خاصاه شي زواقة ، بحال هادي مثلا ... هزات الطاس القهوة وكباتو عليها ولا لونسومبل بالقهوي ..

ودابا زيانيتي العفريتة ، ويلاه الباب الحباب .. مونية من كثرة الصدمة خرجات بلاما تنطق بكلمة وحدة ..

- شريهان : إوا دابا عاد نقدو نفطرو على راحت راحتنا الله على راحة ..

- مالك (كيخنزر فيها ) :

عحبك الحال فرحانة مرتاحة مخاصك خير ...

- شريهان (ݣلسات فوق الكرسي ومدات رجليها على الكرسي الاخر ) :

ويلي با ... علاش انا غير مرتاحة وسكتي ويلي ويلي ، فوق السلك فوق السحاب ، عرفتي منين كتاكل الهبز حافي وكيوحليك ... وكتشرب عليه جغيمة ديال الما ، كتحس بواحد الراحة يا سلام وهكاك أنا دابا .. ولدرجة المجاج دابا مشهي ، غير شي ݣريسون ولا شيفور ديال شي كار يكون زهواني ، و نكون راكبة شادة طريق ومخدمة الشعبي ، ونوصلو لشي سوق ويهبطنا ويشد ليا شي شواية ديال الكوطليط والله العظيم ..

- مالك (كيشوف فيها مصدوم مفاهم والو ، بعد المرات كيتبلوكا معاها) :

دابا اش جاب الشيفور والكوطليط الهضرة ؟

- شريهان (وقفات) :

جابو الجوع ، واش جا يدير جابو الهوا فنصاصات الليل .. ولي عزيز على ميمتو عمرو مايتخص ، تخطاتو ودخلات للكوزينة كدندن ..

- اليوم الجمعة اليوم الاثنين صليو على نبي كاملين اليوم الجمعة اليوم الثلاث خرجو البنات الحاجبات ، انطلبو من الله ونبي سلطان الله ينصرو ويدوم علينا سلامتو، المير كلمتو مسموعة بلارج رجليه فسما ، وتانا شريف حمداوي وانت شاغلة بالي .. (ضارت لقاتو واقف كيشوف فيها ) بغيتي البيض بالفرماج ولا البيض بزين البلدية ، انا مكرهتوش بالخليع ولكن دوماج مكاينش ..

- مالك : بلاش انا انوجد فطوري لراسي ..

- شريهان (مامسوقاش ليه ... كتحس براحة وفرحانة منين تهنات من ديك الزلمومية ) :

واخا دير لي بغيتي الدار دارك ... طيبات لراسها البيض مع الفرماج سخنات الخبز ، صايبات لراسها القهوة وݣلسات كتفطر مع راسها ، حتى كملات على خاطرها .. وناضت كان هو ݣالس فصالون ..

- شريهان : الى (قاطعهم تيليفون شريهان ، كانت نمرة مصطفى ) ..

- ألو خويا على سلامة نسيتوني ..

- مصطفى : علاش جريتي على مونية ..

- شريهان :

شكون ديكي كيلو لاروب ديال اللحم ، تمشي تعلم هي بعدا كيفاش تهضر وعاد تعلم الايتيكيت للناس ، لقيتها شادة فيا الحتيت مع ولد عمك ، كالسين بزوج على تقرقيب الناب بحال طيابات ديال الحمام ، الله يستر كنا واحلين مع العيالات صدقو حتى رجال ..

- مالك (صعر وقف مخرج فيها عينيه ) شريهااااان ..

- شريهان : خليتو فيها شي شريهان انتوما ، اطلعو عيشة لشريهان وخليو القردة كتلعب حابة فوق راسها حتى كتولي بحال طوبة المجرابة وݣولو شريهان ..

- مصطفى :

شريهان(قاطعاتو) :

بلاما تعدب راسك اخويا ، عرفتي سيفطو راجل حسن ... بلاما تسيفطو ليا شي مرا فبلاصة منتعلم الإتيكيت ، انتعلم كيفية نتف الشعاكك في 5 دقائق ، سلم على ماما انمشي نعس راني عييت ... ماخلاتوش يكمل قطعات عليه وطلعات لبيتها ...

_______________

- خولة : بحالاش مافهمتش ؟

- حسام (كيحك فراسو ) :

مغاديش نقد نݣوليك والو اربيعة ، منقدش نخاف تكرهيني وانا هادشي ماباغيهش ..

- خولة : حسام شوف .. حتى انا كنتمنى ربي يرزقني بولد الناس ... يكون مزيان ويكون كيبغيني ويدير على قبلي لي مايدار .. ولكن أساس أي علاقة هو الثقة ، الى مكنتيش غادي تيق بيا وكيف قلتي باغيني وبغيتي تبدا هاد العلاقة ، خاصها تبدا بالثقة والى مكان هادشي بلاش ... عفاك يا رجعني لاݣار ولا وصلني للخدمتي ..

- حسام (بقا ساكت كيفكر ) :

ربيعة ، انا قبل منتزوج بنادية كنت عايش على برا .. حياتي كلها كانت فتخلويض (با كيعاود ليها على حياتو كلها وعلى نصب لي كان كينصب على البنات ، وعلى نعيمة لي كانت كتعاونو بفتها ليلى ختو ، عاود ليها كاع على حياتو ) ..

- خولة : وشنو السبب لي خلاك دير بحال هاد الفعايل ؟

عند شريهان من بعدما كلات وشبعات طلعات للبيتها ... دوشات هزات الپيسي ديالها كطلع فالفيسبوك ، حتى كيطلع ليها ميساج من النفس الكونط ثاني ..

" سلام غيبة طويلة هادي ... كنت كنفكر ونݣول ياكما تزوجتي ، شكون هاد سعيد الحظ لي يكون خداك ، توحشتك بزاف ..

- شريهان 📩 : شكون معايا وبراكة من للعب الدراري الصغار ..

- جاها الجواب :

كنت شحال هادي باغي نعتارف ليك بلي كنبغيك وماقديتش ... انا مروان اشريهان مروان ..

- شريهان (بقات مدة وهي ساهية فالميساج .. مامتيقاش لي كتشوف قدامها .. هزات تيليفون ودخلات للواتساب وسيفطات ميساج للمروان ) :

فينك ؟

- مروان : انا فالخدمة ، لا سلام لا كلام ياك لاباس بايتة تحلمي بيا ؟

- شريهان : لا غير بغيت نسول فيك وصافي ، إيوا شي جديد كاين شي ولا غير الفرشي ؟

-مروان (ضحك) : كاين الخير ... واحد السيدة خدمات معانا جديدة ، خوك وقيلة بدا يطيح هههه ..

- شريهان (تأكدات من إحساسها مستحيل يكون هداك مروان ، بقات ساكتة كتفكر هاد نواعر مولاهم شخص واحد ) :

ايوا على سلامتنا .. يلاه تلاح خاصني نمشي حتى من بعد .. حطات تيليفون ورجعات للپيسي ..

- (جاوباتو) : انت عارف أمروان بلي كنعتابرك بحال خويا ، وزايدون انا تخطبت بولد عمي هادشي راه فخبارك ولا نسيتي ؟

- بقا مدة عاد جاوب :

سمحيليا ومديريهاش مني قلة الصواب ..

- شريهان (ضحكات حيت هاد الجملة الأخيرة مكاينش لي كيستعملها بزاف من غير شخص واحد) :

واش مناوياش توبي ، واش داكشي كامل لي داز عليك ماعلمك والو .. مزال واقفة ليك فالحلق وتابعاني ، وشتي انا والله لا تصورتي مني باش تنقي سنانك ، سيري شوفي ليك شي طبيب نفساني تعالجي عندو راه حالتك صعيبة ، ودازت عليك او وصلتي لصبيطار ومزال مروان معشش ليك فدماغ ، وبلا حشمة دايرة كونط ومسيفطة ليا بصفتك دري وݣالسة على الأشعار ، وفبلاصة ماضيعي وقتك فهادشي ضيعيه فحاجة لي تنفعك ... اما انا راه فايتاك ومتوصلينيش فهمتي ولالا ، عند بالي اتكوني تعلمتي ، ولكن قليل الأصل كيبقى ديما قليل الأصل ، سمعيني مزيان وحلي ودنيك ... تفوتيني وتعطيني تيساع وتخطي ساحتي ، ولا قسما بالله مايعجبك حال ، الى ماوقفناهاش على الصح ونوصلوها للبوليس حنا ݣاع الالاهم مريم راه منتسماش شريهان ، وانت عارفاني مزيان وفوتيني ، وسيري شوفي ليك شي شغل ديريه فحياتك ، انا راه والله منصلاح ليك ..

- سيفطات ليها هاد الميساج ، غير طلع ليها بلي قراتو وهي تبلوكيها ..

- شريهان :

ولايني مصرفقة ، غير باش تأكد بلي واش وليت مع مروان ولالا ، مألفة فيلم غير لراسها مريضة ..(خسرات سيفتها) احح ايدي (هزات يديها كتشوف فيهم ، كامو حمريين بزاف وكيحرقوها ..

- هادشي لي وصيتيني عليه اعمي ستيڤن .. ويلاه دابا حنا منين انجيبو شي حاجة نديروها لهاد العافية لي شاعلة لينا فيدينا ..

- سدات الپيسي خرجات من بيتها ونزلات للتحت ، لقاتو ݣالس هاز كتاب فيدو كيقراه ، وباين بلي يلاه فطر ..

- دخلات للكوزينة كتقلب على شيحاجة حلات الثلاجة حتى هي .. حتى وقفها كلامو ..

بغيتك تعرفي واحد الحاجة ، عمري فحياتي متجاوزت حدي مع شي وحدة كيفما بغات تكون ، مغربية ولا نصرانية اباش ديريها فبالك ، فما بالك ببنت عمي من لحمي ودمي ، كارولين كانت خطيبتي وعيات معايا باش انا نتجاوز حدي معاها ومابغيتش ، دارت المستحيل وغواتني بكاع الطرق او والو كنت رافض ، علاش حيت الى مشيت حتى فت معاها الحد ، حتى حاجة ماغادي يبقى ليها طعم ، وأي واحد خدا لي بغا من وحدة بنت ... كوني اكيدة راه مكتعني ليه والو ، وبلي مكايبغيهاش أصلا ... باغي غير يدوز بيها وقتو. وهادشي ماشي من اخلاقي ولا تربيتي ... نقدر نكون غلطت فاش بستك ، وهادي عمرها وقعات ليا ..

- ضارت عندو مقاطعاه :

وشنو السبب ؟

- هز عينو فيها من ورا مكان كيشوف فالكتاب :

يقدر يكون أعجاب (سكت كيدرس ردة فعلها) ممكن يكون إعجاب ممكن تكون شيحاجة جديدة كتولد هنا (أشر لقلبو) إحساس جديد وغريب عليا ، نقدر نݣوليك بلي عمري حسيتو .. حتى مع كارولين لي كنت كنݣول بلي كنبغيها ، حتى هي ماحسيتش معاها هاد الاحساس ديال تهور ... إحساس تبغي تحمي واحد الإنسان ، وتبغي تخوض معاه فمهمة بحال هادي .. هو احساس صعيب وجديد شوية ... ولكن عرفتي شنو اشيري عندك الصح فكل حاجة ݣلتيها ، مكانش خاص نتجاوز حدودي معاك ، كتبقاي بنت عمي وخاص نحط فمرتبة ديال العائلة ، كوني هانية هادي اخر مرة غادي يوقع لي وقع ، غادي نكملو فهادشي عادي بحال الى ما وقع والو ، وأي حاجة طرات قبل نسايها وحتى هضرتي دابا نسايها داكوغ ..

- شريهان (بقات واقفة كتشوف فيه وتسمع ليه ، بحال الى أنبها ضميرها على الكلام لي ݣالت ليه ، باغية تعتادر ولكن ماقداتش) :

ماشي مشكل ... عطاتو بظهر وكملات تقلاب على بومادا ..

- مالك : علاياش كتقلبي ؟

- شريهان :

على شي بومادا ، يديا كيحرقوني مع ليݣو ، كاليا (كتهضر ماحسات بيه حتى وقف حداها ) :

بلاتي غير خليك ، سيري ݣلسي .. دارت داكشي لي كاليها .. كشا للكوزينة خدا مكعبات ديال الثلج دارهم فواحد البانو ، ودار عليهم الما ... حط البانيو قدامها ..

- حطي يديك مقلوبين وسط البانيو ، قبل منديرو الكريم ليدينا خاص بعدا نديرو ليهم الثلج باش هكا الحريق يوقف ، وهاد الحمورية تحيد .. خلي إيديك بحال هكا ، انجيب بومادا ونجي .. مشا لجهة الصندوق لي معلق فيه الاسعافات الأولية ... كيقلب فيه وهي حاضياها من بلاصتها ، ضار لقاها كتشوف فيه ..

- لاباس كاينة بعدا بومادا لبحال هاد الحالات ..

جا ݣلس حداها ، بقات 5 دقايق هكاك ... حتى ݣاليها تحيد يديها من البانيو ، نشفهم ليهم بالپابيي ديال ليدين .. فتح البومادا خدا منها شوفيا ، خدا يدها الاولى دهنها ليها ، ومن بعد خدا يدها الثانية حتى هي دهنها ..

- مالك (بإبتسامة) :

ساعة هكاك واتولي مزيان إن شاء الله ، وبليل تاني انعاود ندهنو الكريم وهكا تصبحي مزيان ، سيري رتاحي فوق الفوطوي ... تفرجي شوية ولا نجيب ليك الپيسي ديالك تفرجي فشي فيلم ، بينما وجدت الغدا ..

- شريهان (غير ساهية فتصرفاتو) :

انت لي اتوجد الغدا ؟

- مالك : وي انا حيت انت رجعتي فالوعد ديالك ، مغاديش نبقاو بجوع ولالا ... انوض نجيب بيك پيسي ديالك .. سيري لفوق الفوتوي تكاي ..

- شريهان (بلاما تزيد كلمة معاه) :

واخا .. دارت بكلامو ، شوية رجع بالبيسي ديالها وغطا ، غطاها ... قرب واحد الطبيلة حداها وخدم ليها الپيسي .

- تقدي تخدمي الفيلم لي بغيتي ..

- شريهان : شكرا بزاف ..

- مالك :

العفو حنا ولاد العمام وبحال الخوت (تبسم ليها وطلع لبيتو يبدل عليه وينزل يوجد الغدا ) ..

_______________

- حسام :

الصراحة من الواليد ، مارباناش نكونو حاريين من الصغر ، كان اكبر مخلوض وقمار ... حتى المعاملة مكانش كيتعامل معانا مزيان ، عاطيها غير لزهو ونشاط ... تجي الواليدة تهضر تاكل ماكلة الطبل نهار العيد ، لا قرايا لا زينة لا والو ... نهار دارت ختي 17 عام زوجها لواحد خونا عندو 50 عام ، غير حيت عطاه فلوس صحيحة فصداق ، فاش بكات ومابغاتش هلكها عصا ، باعها باش يزها مع راسو ... مي مافاقت من الݣلبة حتى فات الفوت ، عاد هزاتنا وطلبات الطلاق منو ..

- خولة :

اهاه ومن بعد شنو وقع ؟

حسام (تنهد تنهيدة طويلة) :

طلبات الطلاق ، وفعلا طلقها ورحلنا من ديك المدينة ... مشنا لمدينة اخرى ولكن حتى فات الفوت ، انا واخا هكاك ماتبليتش واخا هاد المصايب كاملة ، عمري كميت ولا تحششت ولا شربت .. ولكن هادشي كامل كنت كنبيعو ، تعرفت على بزنازة وليت نبيع فالحشيش ، وشوية شوية وليت نضور مصيريف ، من الحشيش للقرقوبي او وصلات بيا وليت تبيع حتى الغبرة ..

- خولة (كتحاول تزيد تجبد ليه اللسانو) :

حسستيني بحال الى كنتفرج فشي فيلم ميريكاني ، كيفاش الغبرة ؟ علاش الغبرة كاينة فالمغرب ؟

- حسام (ضحك) :

كولشي كاين ، العجب المتعجب كاين ، غير تحت الدف ، عند بالك دوك الناس الهاي كلاص ، لي خانزين فلوس ولادهم ... كينسطو ليك بطريفة ، ولا بحبة ولا بكويس ... إلى مكانت الغبرة والله لا تنغمو ليك ، كتباع بفلوس صحيحة .. واحد العام كان شي باطو مهرب الكوك ماعرفتش بصبط وماعقلتش شنو وقع ليه ، كاع الكوك لي كان هاز تلاح فالبحر ، وهزوه الناس كاين لي ماعرفو دقيق ولا سكر كلاصي وسفو ومات ، اما لي عرف ليه خباه حتى نصمسات القصية ومن ورا سينين ، بدا يبيع فيه ... دارو منو الفيلات والشركات ... كتشوفي واحد رجل أعمال خانز فلوس ، مكتعرفي من اين له هذا ، وهو راه تجي تقلبي على أصلو ... تلقايه امݣرد كان يبيع ويشري فالخبز اليابس ولا بحري ، يبيع سريدينات فالمارشي .. حتى كيدير لاباس ويمشي يحج ولا يدير عمرة باش يكفر على ذنوبو ويوليو يعيطو ليه الحاج ، وهوما كون عرفوه سنو كان كيدير يضربوه بالحجر ..

- خولة (كانت كتسمع ليه ، وساهية فكلامو ... كل كلمة ݣالها بصح المظاهر خداعة وبزاف ) :

وهادشي كامل سبابو الفقر ياك ؟

- حسام :

تماما ، الفقر والجهل والحاجة ، تعرفت على نعيمة البنت لي ݣلت ليك وحتى هي كانت كتر مني ، ولينا كنصبو على البنات ... وكنبيعوهم لسواعدة ، كيفما دار با مع ختي وليت كندير انا مع بنات الناس ، كنت كنحس بعداب الضمير منكدبش عليك ... ولكن كنت كل نهار كنقتل هاد الضمير فيا ، واخر وحدة كانت هي واحد البنت شريهان ، لي باعتها صاحبتها ليا ، باش تعرفي بلي مكاين لا صحبتي لا زبل ... ولكن ربي جا من جهتها وهربات ، وحتى انا هربت ومشيت لبرا لسبانيا ݣلست تم ، وحتى نعيمة كانت معايا ، وهي لي عرفاتني على نادية ، وݣالت ليا خانزة فلوس وبلي خدمتها هي تدي البنات للاوروبا وللخليج .. وبلي نعيمة قبل متعرف عليا ، توسطات ليها عند الناس فدارهم ، ومع البنات تم نية كلهم بغاو يمشيو لبرا مساكن .. معارفينش شنو كيتسناهم ..

- خولة :

مافخباريش بلي نادية كتدي للبرا ، كون ݣلتها ليها تديني وحق الله العظيم ، بعدا تم نعاون دارنا ..

- حسام (غوبش وضار فيها ) :

من نيتك ، عند بالك نادية كريمة لهاد الدرجة دير فالبنات هاد الخير ، راه كتبيع دوك البنات لواحد السيد هانز فلوس ، وهو بدورو كيسيفطهم لواحد خيتي لبنانية ، مافقلبها لا رحمة لا شفقة ... يحيدو ليهم باسپوراتهم وليكارت ديالهم ، ويزيدوهم للفساد ولي دوات تاكلها فجلدها حتى ترفع الرايا البيضة .. نادية كتعرف ناس صحاح ، وهوما لي واقفين معاها ... دارة يديها مع كولشي .. فهمتي دابا علاش مابغيتش نطلق منها وخايف منها ؟ ودابا منين تقت فيك وعاودت ليك شنو ݣلتي ؟

- خولة (تنهدات تنهيدة طويلة) :

حسام منين عاودتي ليا هادشي كلو ، الصراحة لي ماعرفك خسرك ... مكنتش عارفاك هكا داير ، وكنواعدك بلي اندير كل جهدي باش نخليك مرتاح وفرحان ونعوضك على كلشي ..

- حسام (تبسم وعنقها ) :

خاصك ضروري تخلي الخدمة عند نادية ..

- خولة (بعدات عليه ) :

ماشي دابا ، نادية دايرة حفلة نهار السبت ... وݣالت ليا خاصني نكون حاضرة فيها .. باش نسربي مع البنات ..

- حسام (صاعر) : وطلبات منك تشري كسوة كحلة وسباط حمر ، ممنوع تمشي أربيعة ممنوع سمعتي دخليها لراسك ممنوع ..

- خولة (خلعها) : وعلاش ممنوع ؟

- حسام : حيت بغات تبيعك ، الحفلة لي باغياك تحضري فيها حفلة كلها فساد ، وفرصة باش تبيع كاع البنات لي جمعات فهاد الشهورة ، ممنوع تمشي سمعتي ولالا ممنوع ...

- داها نعاس وهي كتفرج ، حيد الپيسي وطفاه نزل الخوامي على الشعا ... وقف كيشوف فيها من بعيد ، تنهد تنهيدة طويلة وخرج على برا من بعدما طفا على الغدا ... خرج للبرا حل التيليفون ديالو وصلو ميساج فيه واحد الصورة من جورنال ، صورة ديالو من بعيد سايݣ طوموبيلتو ، وغير شعر شيري لي كيبان حداه ... ومكتوب بعنوان عريض " وزير الشباب ورياضة يرتبط من جديد بعد إنفصاله عن عارضة الأزياء الفرنسية كارولين جاكين فمن يا ترى تكون حبيبته ؟ "

- مالك ضحك عجبو العنوان جاب ليه الضحك ، خشا التيليفون بجيبو كيشوف قدامو .. مستمتع بالمنظر وبشميسة والطبيعة ، طاحت فبالو هي وشنو دارت هاد الصباح ... ضحك بلاما يحس ونطق " مسطية " ..

______________

- خولة : حسام مايمكنش مانمشيش ، راه غادي تشك .. وانت يلاه دابا ݣلتي بلي مخاصكش تخليها تشك نسيتي ؟

- حسام (معصب) :

اه ݣلتها ناشي ماݣلتهاش ، ولكن بنسبة ليا انا ماشي بنسبة ليك انت ، نادية كدير هاد الحفلة مرة فالعام كتكون جمعات حصيصة مزيانة ديال البنات ودريساتهم مزيان ، وطمعاتهم باش يمشيو لبرا نعيمة هي لي كتجمعهم ليها ، وكدير هاد الحفلة كيكون حاضر ليها غير شكون وشكون ، حتى من الأفارقة والشو//اد كيكونو ، والوسيط بينها وبين ديك اللبنانية جورجيت كايكون حاضر حتى هو ..

- خولة : كيفاش امناتك على هاد الاسرار ، زعمة مخافتش على راسها ؟

- حسام (تنهد تنهيدة طويلة) :

نو حيت 5 سنين ديال الزواج تيستاتني فيهم ، وليت حافض اللعب ديالها كيداير ، داكشي باش ݣلت ليك ماتمشيش ..

- خولة : شنو بان ليك فواحد الفكرة ، هكا نضربو عصفورين بحجر واحد ... انت تهنا من نادية ونعيشو انا وياك ، وأنا نجي راسي منها ومن هاد القالب لي كدير فالبنات وبغاتو ديرو بيا ، ونتهناو ويبردو ودنينا ..

- حسام (بشك) :

شنو هي هاد الفكرة ؟

- خولة : نعيطو على البوليس ، نعلمو بيها حنا عند البوليس ويحيو يهزو الجمل وماجمل ..

- حسام (ضحك) :

لا واش من نيتك ؟ عند بالك هي مكتعرفش الناس فالبوليس ..

- خولة (سكتات) :

شوف حنا أسيدي أنكولو ليهم مغانتحركوش حتى نهضرو مع العميد ، ولا عرفتي شنو نهضرو معاهم من نمرة بريڤي ونكولو بغينا العميد ونعلمو بيها ، وهكا واخا نحضر للحفلة مايكون حتى خطر عليا ..

- حسام (سكت كيخمم فكلامها) :

ماعرفتش ، ماشتيش الى تشدات ݣاع وسيفطات شي حد من برا يصفيها لينا ..

- خولة : شفتي بحال هاد النوع ، الى تشدات كاع لي معاها ايبغي ايعرب فين مزال ايعقل عليها ... انت غير سمع ليا ، وخلينا نبطرو براسنا ونتهناو منها ... وزيد عليها باش اتعرفنا حنا ، داكشي باش خاص منتيروش الشبهات فهمتيني ، وغير تبرد القضية ونخويو حنا ݣاع المدينة ونبداو حياة جديدة فشي مدينة بعيدة ، واخا نعرفو نمشيو لداخلة حنا ݣاع ..

- حسام (ضحك) :

مسخوطة انت ، المهم خليني نفكر فهادشي واحد الشوية ونعلمك ، ومتخافيش فالخدمة مغانشوفش جهتك ..

- خولة : ويلاه وصلني راه تعطلت بزاف ..

- حسام (بإبتسامة كيشوف فيها) :

هي لي متعاود ..

- سونا تيليفون ديالها ، بدات كتحل عينيها ... تماكات ليتيلفون هزاتو طلعات ليها نمرة خوها ..

- شريهان (صوتها تقيل ) :

ألو مصطفى ..

- مصطفى : جريتي عليها تهنيتي ؟ بغيت غير نعرف اش داك تصرف درتي ؟

- شريهان (تقادات فالݣلسة) :

تحمد الله وتشكرو لي مدرت فيها يديا ، بلا حشمة بلا حيا بغات ديرني قنطرة باش دوز للمالك ، محصلاها كتكوليه بلي انا ماجيتش معاه وماشي من مستواه وكتعايرني فظهري ، بغيتي نصفق ليها مثلا ؟

- مصطفى (سكت) :

المهم ماعليناش ، غدا ايجي أستاذ وحتى هو خرجي فيه العجب ..

- شريهان (تبسمات) :

لا الرجال واخا هكاك ، مافيهمش داك السم لي فالعيالات ... كون غير سيفطو فراسيسكو ..

- مصطفى (ضحك) :

فرانسيسكو فالبوليس ، ماشي أستاذ الايتيكيت ... برامة عليه مسكين اهاد القضية لي محمقاه مامخلياه حتى ياخود كونجي هو ومرتو وبنتو ..

- شريهان (خرجو عينيها الهضرة وحلات ليها ، ماعرفات متݣول بقا فيها الحال بزاف ... لأول مرة يعجبها شي واحد لهاد الدرجة وتصدم بلي مزوج ، مدارتش ليها حساب نهائيا ) ..

- مصطفى : مالك سكتي ياك لاباس ؟

- شريهان : علاش فرانسيسكو مزوج ؟

- مصطفى :

أه الالة مزوج وعندو بنت ، ݣالها ليا غير لبارح ، علاش كتسولي ؟

- شريهان :

لا غير حيـتاش مابينــاش عليه وصافي ..

- مصطفى :

المهم الصحافة راه بدات كتدوي عليكم ، غير باش تكون فبالك وصافي ..

- شريهان :

واخا صافي ، يلاه بسلامــة ... قطعات مع خوها تنهدات تنهيدة طويلة بقا فيها الحال بزاف ، اول نرة يعجبها شي واحد بحال فرانسيسكو ... تحل الباب ودخل مالك ، لاح عينيه عندها لقاها فاقت وساهية كتخمم ، لدرجة كاعما رضات ليه البال واش دخل ... حل السراجم ورجع شاف فيها ..

ياك لاباس ؟ مالك ؟

- شريهان (علات راسها فيه) :

كاعما شفتك فين كنتي ؟

- مالك : انت ساهية لدرجة كاعما رضيتي البال واش دخلت ولالا ..

- شريهان (حيدات عليها الغطا) :

سونا ليا مصطفى ، كاليا بلي غدا ايجي أستاذ بلاصة هاديك خيتي لي مشات .. وكاليا بلي صحافة بداو خدمتهم ..

- مالك : وي فخباري ... ولكن ماشي هادشي لي مخلي وجهك يتبدل لونو بهاد شكل شنو كاين ؟

- شريهان (يلاه اتكوليه وهي تراجع) :

لا مكاين والو مديرش فبالك ، انا غادي نغسل وجهي ونولي مزيان .. هزات الغطا فيديها وطلعات لبيتها ... بقا متبعها بالعين مافهمش مالها على هاد الحالة ..

__________________

دازت ديك الليلة عادية بحال الليلة لي قبلها ، الي مبدل فيها هو فجهة جوج ديال العشاق عايشين بداية علاقتهم بكل حب ، سكينة و سعد لي خرجو بزوج ... وشريهان لي مقابلة مع سرجم وساهية وقلبها مهرس ، كتحس براسها ماعندها زهر ، عارفة راسها زادت فيه وبلي كانت معلقة بحبال دايبة ... ولكن مشافتش الخاتم فصبعو عند بالها بلي نصارة بحال المغاربة ، الأغلبية ديال نصارة كيلبسو الخاتم غير نهار زواجهم من بعد مكايديروهش ... حسات براسها عيات ، ناضت من بلاصتها تمنات ليلة سعيدة لمالك لي غير حاضيها وطلعات ..

- هز مالك تيليفون وسونا للمصطفى ... من بعد السلام والأخد ورد سولو .. :

كوليا شنو كلتي لشريهان ، شفتها مقلقة هاد العشية ؟

- مصطفى :

ماكلت ليها والو ، دوينا على مونيا وعلى الاستاذ الجديد صافي ، وكلت ليها على الصحافة ... هادشي لي كاين كالت ليا علاش منسيفطوش فرانسيسكو كلت ليها بلي هو فالبوليس ماشي أستاذ ، وبراكة عليه اهم القضية السيد ماشد كونجي من نهار دخل هاد القضية ، حتى مرتو وبنتو شحال هادي ماخرجهم فشي عطلة ، صافي هادشي بقات ساكتة مدة صافي وقطعنا ..

- مالك (عاد فهم مالها ) :

اه واخا يمكن غير من ستريس والعيا ، داكشي باش ..

- مصطفى :

الصفحة الخاصة ديال شريهان راه تقادات ، يعني النص فالخدمة كملناه دابا بقا النص الاخر ..

- مالك (تنهد تنهيدة طويلة) :

داكوغ مزيان ، هي بدينا فالمعقول ؟

- مصطفى :

ماشي بدينا فالمعقول ، حنا وصلنا ليه ..

فصبــاح جا ستيڤن باش يكمل التدريمات مع شريهان ... فاق مالك حتى هو فنفس الوقت لي فاقت فيه شريهان ، خرج على برا مقابلهم هاز طاس ديال القهوة فيدو ، ونقابلها ومقابل حراكتها ... شاف فساعتو كانت 8:30 يعني قربو يساليو ، هز عينو كيسمع حس طوموبيل جايا ... كانت لامبرݣيني بالكحل فيها جوج خطوط دهبيين ، حبسات شريهان وحبس ستيڤن كيشوفو شكون جا ... وقفات طوموبيل ، ونزل من شخص طويل رقيق شوية شعرو رطب وطويل ... ملامحو سمرين او وسيم ، إبتسامة جدابة على وجهو ، وقف كيشوف فيهم وبلغة فرمسية معكلة شوية نطق :

مالك العراقي ومدموزيل العراقي ؟

- شريهان (بإبتسامة) :

هي انا .. جا عندها ومد ليها يدو ..

- ݣوستاڤو أستاذ الإيتيكيت ..

- شريهان (بنفس الإبتسامة ) :

مشرفين انا شريهان .. وهذا (نعتات ليه حيهت مالك) مالك .. سلم عليه مالك بجدية وبرودة ..

- ݣوستاڤو :

كنتمنى منكونش جيت بكري ؟

- شريهان : لا لقيتيني ساليت أصلا ... دخل تفضل .. (شافت فستيڤن) ستيڤن انا مشيت نتلاقاو غدا ..

- ستيڤن : داكوغ ... دخلات شريهان وتبعها الاستاذ بقا مالك واقف وساهي ..

منـين كتعجبك لهاد الدرجة ، علاش متصارحهاش ؟

- مالك (هز راسو فستيڤن ) :

أش كتخربق ؟ أشمن إعجاب منين جبتي هاد الهضرة ؟

- ستيڤن (ضحك) :

حتى منكونش كنعرفك مزيااان ، كنعرفك منين كانت عندك 16 عام ، انا لي دربتك وانا لي كنت معاك ... متقدرش تخبي عليا ، حتى فاش كنتي خاطب ديك خيتي ، وتصاوركم فالمجلات ، اللمعة لي فعينيك دابا ماشي هي لي كنت كنشوف شحال هدا ، داخل هلى حب حقيقي أمالك ..

- مالك (ضحك) :

ستيڤن كبرتي وبديتي كتخرف ، أنا يلاه 3 شهور هادي باش فسخت الخطوبة ديالي ، كيفاش بغيتيني نخل فحب وعلاقة جديدة ؟

- ستيڤن (تبسم) :

بكل سهولة ، حيت انت عمرك بغيتي خطيبتك الاولى نهائيا ، يمكن كنتي كتشوف فكارولين المرأة المناسبة ليك وللمركز ديالك ، إنسانة مثقفة كتبغيك تقدر تمشي معاك لأي مناسبة ، هي عارضة ازياء وانت وزير يعني جايا معاك نوعا ما ، ولكن ماشي هي المرأة لي بغاها قلبك ..

- مالك :

كون بصح مكانتش كنبغيها مغاديش نواجه عائلتي على قبلها ..

- ستيڤن :

حيت انت هكاك داير ، مايمكنش تعطي وعد وتخلف بيه ، خطبتيها ، مايمكنش تخلا عليها غير حيت والديك مابغاوهاش ، واخا هو راه غير ماماك لي مابغاتش ، اما حتى واحد معارض ، انت كنتي كتحس بالمسؤولية جهتها ... شفتي امالك كون كنتي كتبغيها ولو غير شوية ، كنتي خليتي شيطان يلعب بيناتكم ، وكون ستسلمتي للإغراء ديالها ، ماشي مسألة مبدأ ولا مسألة تربيتك مكتسمحش ولا العادات ولا ولا نووو ، حنا كلنا بشر ونقدو نغلطو ، كان ممكن تغلط معاها كون كنتي بصح كتبغيها ، ولكن انت كنتي رافض حيت الجسد ديالك وقلبك مكانش باغيها ، مجرد ولف وتعلق ... حيت كون كنتي كتبغيها 2 فالمية ، مغاتكونش واقف قدامي دابا ومرتاح ، كنتي غادي تكون فبلاصة أخرى كداوي الجروح ديالك ..

- مالك (بإنفعال) :

كنت غادي نتزوج بيها استيڤن ، مدام كنت باغيها تكون مراتي إلا وراه كنت كنبغيها ، ولكن هي لي خانتني ..

ستيـڤن (بجدية وصرامة ) :

مالك ماشي أي واحد فهاد دنيا مزوج بشي واحد ، ولا ناوي يتزوج بيه فراه كيبغيه ، شحال من واحد كيشوف فشخص الثاني إنسان مناسب ليه ، يقدر يدوز معاه حياتو ويناسب مكانتو الإجتماعية ، ولكن مكايبغيهش مابيناتهمش حب وعاطفة ... داكشي باش شحال من واحد ماشي كولشي ولكن شحال من واحد كتلقاه داير خليلة ، الزوجة المناسبة في المكان المناسب ، وحبيبة القلب السرية ... داكشي باش اكبر غلط هو تزوج بدون حب ، غير حيت طحتي تحت ضغط ولا كلام الناس ، ولا حيت شفتي فديك الانسانة انها اتناسب مكانتك ، انت عمرك بغيتي كارولين بغيتي ولا كرهتي ، واخا دير لي درتي واخا تواجه العالم كلو ، مغاتكدبش عليا وماتحاولش تخبي هادشي لي كتحس بيه ، عينيك فاضحينك ... مشاعرك فاضحين تصرفاتك ... ماتخليهاش ضيع من يديك ويااااك ، واخا تكون هي مكتحس من جيهتك بوالو ... بإمكانك تخلي راسك انت هو كولشي بنسبة ليها منخافش عليك (طبطب على كتفو ومشا ) خلاه غارق فدوامة من الأفكار ، مقادش يتقبل كلام ستيڤن يمكن حيت فعلا كلامو على صواب ، داكشي باش ماباغيش ولا مقادش يتقبل هاد الهضرة ، ولا يمكن كلام شريهان ليه لبارح هو لي مخليه مايتقبلش كلام ستيڤن ، ولا يمكن حيت عارف ومتأكد بلي شريهان عمرها تبغيه ولا تقبلو فحياتها ...

__________________

الــمغــرب

- قدام لاپيسين دايرة رجل على رجل ، دايرة نظارات شمسية على عينيها ، مرة مرة كتاخود نكرة من السيجارة ديالها ... حسات بيديه على كتافها كيدير ليها مساج ..

- نادية :

شفتك مابقيتيش كدوز لصالون ياك لاباس ؟

- حسام (باس ليها راسها وݣلس) :

داك صالون مابقيتش غادي نحط فيه رجلي ، مخدمة معاك لفعة تم مجايبة لدنيا خبار ..

- نادية (ضحكات) :

علامن كتدوي بضبط ؟ شكون هاد اللفعة ؟

- حسام :

ديك لالاهم غيثة ، لي غير كنحط رجليا فداك الصالون السيدة كدور بيا ، عند بالها اديرها بيا مافخبارهاش بلي دوزت منها عداد ...

- نادية :

فخباري ، هاديك الك//لبة اتهز رجليها من داك الصالون ، مابقاتش غادي تحط رجليها تم غير كون هاني ، أصلا مابقيتش أنخدم عندي البنات ... انولي نخدم غير رجال ، أصلا هاد الدومين ولاو الرجال حسن من العيالات ..

- حسام :

مزيان أحسن مغاديري ..أمضرا وجدتي للحفلة ولا مزال مابقى والو ، السيمانة جايا ..

- نادية :

وي كولشي غادي مزيان ، هاد الحفلة اتكون غير ... انربحو منها بزاااف ، كنفكر نمشيو انا وياك عطلة فاش دوز الحفلة ، تشهيت نمشي لتركيا الصراحة ..

- حسام :

كون مشينا لدبي أحسن ، نرتاحو شوية ونبدلو الجو .. خاصك ديري الاحتياط ديالك بحال كل مرة ، على قبل البوليس ..

- نادية (ضحكات) :

لالا متخافش ، لمياء بحال كل مرة جايبة ليا ݣاع التقارير ... مكاين حتى حاجة تخلينا نشكو بعااااد كل البعد على الشبهات ، ومكاين حتى حاجة تخلي البوليس يشكو فينا غير رتاح ..

- حسام : هادشي لي بغيت ، بغيت غير تسالي هاد الحفلة ونطيرو لدبي ، ندوزو تم واحد شهر نبدلو فيه الجو ... غير هو ماديريش ليا بحال المرة لي فاتت ، حتى حطينا رجلينا فلبنان ، لقيتك طرتي عندي خدمة ..

- نادية (ضحكات) :

لالا متخافش ، وكيبان ليا اناخود كونجي طويل ... بيني وبينك صافي براكة عليا ، عندي لي يكفيني مدا الحياة من الأحسن نحبسو هنا ، قبل لا الفاس توقع فراس ..

- حسام :

وباش أتزيدي تحليها ، هيا نحيدو من المغرب بصفة نهائية نشوفو شي بلاد أخرى نعيشو فيها ..

- نادية : لا مايمكنش نبعد على البلاد .. منقدش نبعد على والديا .. نقد نبدل المدينة البلاد لا ..

- حسام (بإبتسامة) :

المهم انا ديما معاك ، ديري هادي فبالك ..

- نادية (شافت فيه ساكتة ونطقات ) :

الى بغيتي نتيق فيك احسام ، هي تقبل نربيو شي بنت ولا ولد لي يعمر علينا ..

- حسام (وقف كيشوف فيها ونطق) :

منين تسالي الحفلة ، وتسالي من هاد الخدمة ... ديك الساع نقدرو نربيو .. ولكن مدام حنا مزال غارقين من الأحسن بلاش ..

- نادية : وانا ݣلت ليك بلي غادي نحبس ..

- حسام : داكوغ ، منين تحبسي انا مستاعد نتبناو ، انا مشيت ...

______________

- ݣوستاڤو (بنفس الإبتسامة ) :

اول درس أندرسوه اليوم هو فن المغازلة ، او بالأحرى كيفاش تبيني لواحد الشخص بلي عجبك .. عطيني مثال بسيط كيفاش تبيني لواحد انو عاجبك ..

- شريهان (كتفكر) :

الصراحة ماعرفتش، عمرها وقعات ليا ..

- كوستاڤو : مثلا انا عجبتك ، كيفاش تبيني ليا بلي أنا عاجبك ؟

- شريهان (ضحكات) :

نضحك ليك مثلا ، نبقى نشوف فيك ..

- كوستافو :

لا ماشي هكاك ، ماشي بحال هكا كتصرف سيدة المحتمع الراقي ، او سيدة اعمال ... أول حاجة كتصرفي بعدم إهتمتم خاص انت تلفتي الانتباه ليك ، مشيتك كلامك لبسك ... منين تكوني متواجدة مع داك الشخص فنفس البلاصة ، حاولي جوج مرات تجي عينك فعينو ومن بعد متشوفيش فيه ، تفاهمنا هكا اتخليه هو ياخود المبادرة الأولى ..

- ولكن بغيت غير نفهم ، شنو دخل فن المغازلة فهادشي لي جيتي عليه لهنا ، واقيلة نساو مݣالوش ليه بلي ، السيدة راها خطيبتي ... وانت حيتي لهنا غير باش تعلمها تكون سيدة مجتمع راقي ..

- هز كوستافو شريهان عينيهم فمالك لي كان واقف وحاضيهم ، عاقد غوباشتو ماعجبوش هاد التخربيق ..

- ويمكن يمكن الى ماخفت نكذب ، بلي فبلادنا حنا المغاربة ، حنا الرجال لي خاص نمشيو عند البنت ونكولو ليها راك عجبتيني ، اما قلت الحية والعفة كنخليوها للبنات ديال هنا مع إحتراماتي ..

- شريهان (غمزاتو) :

مالك حشومة ..

- مالك (شاف فيها ببرودة وصوت كيخلع) :

حشومة هو هادشي لي كيعلمو ليك ، كيفاش تصيدي الرجال بالعربية (شاف فيه) سمعني مزيان ، أاا موسيو كوستافو ، خطيبتي غادي تعلمها كيفاش تهضر وتاكل وتمشى وتصرف ، شيحاجة اخرى انا لي انعلمها ليها (غمزو) ودابا تقد تكمل ..

- كوستافو (بلعةريقو حدر راسو ورجع شاف فشريهان) :

أول حاجة سيدة اعمال او سيدة المجتمع الراقي ، مكدويش بالغوات كتدوي بصوت هادئ ، كلامها كيكون قليل ... (بقا معاها فدرس حتى فهمها القواعد الاولى كيفاش تهضر ، كيفاش الى كان طالع ليها دم تصرف ... كيفاش تهضر بكل رقي ، فهمها كاع القواعد الأولى ..

- كوستافو :

هادو هوما الدروس الأولى ، غدا اندوزو لدروس الثانية ... كيفاش تلبسي وكيفاش تمشي وتاكلي ، وايبقى عندنا دروس الرقص .. انمشي انا دابا ، كنت فرحان حيت تعرفت عليك سمحوليا .. شير لمالك براسو ، ومالك جاوبو بإبتسامة باردة .. خرج ركب فطوموبيلتو ومشا ..

- شريهان (سدات الباب وشفات فمالك ) :

واش من نيتك ؟ أش داك تصرف تصرفتي مع السيد مسكين ؟

- مالك (وقف حط التيليفون كيخنزر فيها ، حيت فعلا اعصابو وصلو للحد) :

انت وقيلة لي نسيتي راسك ، نسيتي علاش جينا هنا ... جينا باش نبقاو بزوج باش نتقربو من بعضياتنا ، باش تعرفي عليا كولشي ونعرف عليك كولشي ، باش هكا مانلفتوش الانتباه ، ماجيناش الالة باش فينما بان شي كيدار تحلي ليا فيه فمك وتنساي راسك ، دوك الشوفات لي كديري فيهم ، ودوك الإبتسامات كون وفرتيهم وطبقتيهم فهاد الحريرة لي حنا فيها حسن ليك ، حتى نساليو هاد الزبل وارا ماتحنزي فرجال تفاهمنا ..

- شريهان (كتشوف فيه مامتيقاش شنو كتسمع) :

زدتي فيه زدتي فيه بزاف ، خويا لي خويا وعمرو مادوا معايا بهاد الطريقة باش كتدوي معايا انت ، بأشمن حق دوي معايا هكا ؟

- مالك (قاطعها بصرامة ) :

بصفتي ولد عمك ، ومخلي خدمتي وسامح فمشروعي وداخل معاك فهاد المعماعة ، بصفتي خايف عليك وعلى عائلتي ، بصفتي كندير المستحيل باش نرض ليك البال ونحميك ، خوك الى سمع هادشي غادي يسمعك كثر من هادشي لي سمعتي دابا ، جينا لهنا باش نكونو بزوج باش منين نبانو لناس ولصحافة ... حتى واحد مايعيق بلي مابيناتنا والو دخليها لعقلك هادي وفكري فيها مزيان ، انا خارج وبلاما تسنايني للغدا ، الثلاجة راها عامرة ديري لراسك شيحاجة ..(هز سوارتو وتيليفون وخرج) ..

ݣـالسة فوق الكرسي ، مدلية رجليها كتلعب بيهم ... لابسة ليبة فالبيض ، مع كسيوة فالكحل ديال الدان بلا يدين ... شعرها طالقاه وشادة خصلة منو بفيليل فيه وردة الياسمين ... عينيها على الباب ، كتسنى بفارغ الصبر من لبارح بليل وهي كتسنى ، ماقداتش تنعس بالفرحة بحال الى عندها عيد ... سونا الباب نزلات بزربة من فوق الكرسي غادية كتجري بغات تحل الباب ..

- إشراق (كطل عليها وكضحك) :

واش انت وصلتي للساقتة باش تحلي الباب ؟

- شمس (دلات شفايفها) :

اوووف إيمتا نكبر حتى انا ونحل الباب .. سلبي اماما حلي الباب ..

- إشراق (كضحك مسحات يديها حطات الفوطة ) :

واخا زربانة .. حلات الباب بإبتسامة لي سرعان ماتحولات لدهول ..

- سلام .. يحسابلي سعد !!

- شمس (فرحانة) : عمو عمر (مدات ليه يديها .. هزها وباسها ..

- عمر :

سعد هو لي سونا ليا وݣاليا نجي ندي شمس ، هو مزال معطل هو وسكينة ، وكيبان ليا بلي ايدوزو لاجوغني كاملة مع بعضياتهم ..

- إشراق : اااه واخا ماعليش ، سمحليا تقدر تدخل ..

- عمر :

لا شكرا ، جبت حتى ياسمين ݣلت شمس تلقى الوناسة .. ويبدلو الجو شوية ..

- إشراق (بتردد) :

مغاديش يعدبوك زعمة ، كون غير ديتي ياسمين اليوم وهلي شمس حتى لمن بعد ..

- شمس (كتغبن) : لا أماما لا ..

- عمر (ضحك) :

لا متخافيش مغاديش يبرزطوني ، الى بغيتي تقدري تجي معانا ؟

- إشراق (بإبتسامة) :

لا شكرا ربي يخليك ، اغير سيرو انتوما انا نبقى فدار حتى ترجع شمس ..

- عمر :

واشنو نݣوليك لي بغيتي ، انا ݣلت اتبقاي بوحدك فدار اللهم تجي مع شمس ، وهكا مغاديش يعدبوني بزوج ههه ولكن انت تعرفي ..

- شمس (بترجي ) :

ماما يلاه معانا ، عفااك امامي باش نتصورو انا وياك مع شوكولا عفاك ..

- شمس (بتردد) :

بنتي حشومة (اشرات ليها بعينيها) ..

- عمر (حرجها) :

مكاين لاش تغمزيها راه شفتك ، وزايدون هاد النهار راه نهار ديال العطلة ماتخافيش ، مغاديش تبرزطوني ... المهم انا سبقتك انا وشمس ماتعطليش ، خلاها واقفة مصدومة ونزل ، مكان عندها حتى حل اخور من غير تمشي تبدل حوايجها وتمشي معاهم ..

________________

- سكينة :

ماݣلتش لختي بلي غادي نمشيو لباريس .. كون غير علمتيني قبل كون علمتها ..

- سعد (بإبتسامة عينيه على طريق) :

مكاين لاش ، وصيت عمر يدوز يدي شمس من دار فبلاصتي ، واش انا اجيت وطلبت منك نخرجو بكري ..

- سكينة :

قولبتيني كلتي ليا بلي بغيتينا نفطرو يزوج ونرجعو ، ناري انت زعمة خطييير وحق الله العظيم ..

- سعد (كيضحك عاجبو الحال) :

المهم غادي نضمن ليك نهار وااعر ، مغاديش تندمي عليه ..

- سكينة (كتشوف فيه ومبسمة) :

انا عارفة هادشي ، مافيهش شك .. ضار شاف فيها ، هز يدها وباسها وخلاها فيدو ..

_________________

- فشقة راقية ... ݣالس داير رجل على رجل كيشوف فالبيسي لي قدامو وكيتفرج .. لابس غير سروال بوحدو صدؤو كلو عريان ..

- تدق الباب ودخل الشخص لي تلݣا ليه فاش جا ، حط قدامو واحد الملف ..

- هاد الملف فيه ݣاع الشركاء ديالو ، وفيه حتى الناس لي ناوي يدخلهم شركاء معاه ... والخبر الثاني هو كيقلب على شريك لي يدخل معاه فالكلوپ الجديد ..

- (ضحك) :

امممم هادي حاجة زوينة بزااف ، ماعندي مانسالك جبتي معلومات لي مايقد حتى واحد يجيبهم (حل الملف كيقرا فيه وتبسم )

طايح طيحة كبيرة ، ولكن مزال كيقلب على شريك للكلوپ ..

- تماما شنو بان ليك دخل انت ؟

- (ضحك) لالا مايحتاجش ، انا أصلا داخل شريك معاه بلاما نبان فصورة ... كنتسنى غير إيمتا يفتح الكلوپ ونشوف وجهو ..

- غير تهنى مابقا قد مافات غير شوية ديال الوقت ..

شادة لياسمين فيديها وعمر شاد لشمس فيديها وكيدور بيه ، كيوريهم كاع الالات لي كيستعملو فالحلويات ، دار بيهم بين الخدامة كيعرفهم كل واحد فاش مختص ... وكل ألة وفاش كيستعملوها ... حتى وصلو للالات ديال شوكولا ، وقفو حداها مستمتعين .. البنيات كيمدو صباعهم لشكولا لي نازل وكياكلو عاجبهم الحال وجهم ولا ملطخ بشكلاط ، داز الصباح كلو غير فضوران حتى عياو وقررو يمشيو يتغداو ..

- عمر :

غادي يرجعو لدار غادي ينعسو نيشان ..

- إشراق (ضحكات) :

أه عياو بزاف وعمرو شكلاط ..

- شمس : ماما بغيت بيتزا ..

- ياسمين : اوسي بيت بيزا ..

- عمر : واخا غادي ناخدو ليكم بيتزا بيتزا .. إشراق شنو تاكلي ..

- إشراق (كتقرا فالموني) :

حتى انا وقيلة اناخود بحال البنات ..

- عمر : واخا هي كلنا ناخدو نفس الحاجة مع ليصالاد داكوغ ؟

- إشراق : اهاه صافي واخا ..

- دازت لحظة صمت البنات كيشربو فالعصير لي خدا ليهم عمر فالاول .. وإشراق ساهية وساكتة ..

- عمر (قرر يكسر هاد الصمت) :

ݣولي ليا إشراق وسمحيليا غادي ندخل شوية ..

- إشراق : لا مرحبا ماشي مشكيل ..

- عمر : دابا انت غير دار مكديري والو ، ماخدامة محاولتيش تقلبي على خدمة غير دوزي الوقت شوية ماتبقايش غير دار ..

- إشراق :

الصراحة فالاول كان صعيب عليا نخدم ، حيت شمس كيخص لي يقابلها ... ولكن دابا منين دخلات تقرا ماقلبتش ، وصعيب تقلب على خدمة فبلاد اجنبية بحال هكا خصوصا الى ماعندكش ديبلوم ..

- عمر :

قبل ماتولدي شمس ماكنتيش خدامة ؟

- إشراق (بإبتسامة باهتة) :

قبل منجي للفرنسا ، كنت خدامة كان عندي واحد الݣراج كنت كنظير الحلاوي المسمن بغرير وكنت كنشد ليكوموند ديال البسطيلة ، وديال الكيك هادشي ديال الكوزينة ..

- عمر (بإستغراب) :

وحاجة زوينة هادي زعمة ، غير ماقلبتيش الصراحة هو فعلا على قبل ديبلوم ... اجي شنو بان ليك تخدمي معانا ؟

- إشراق (بصمة وإستغراب) :

معاكم انتوما ؟ لا سمحليا ولكن مانقدش انت ما تبارك الله محالاتكم كبار ومعروفين ومشهورين ، اش غادي ندير فيهم مثلا وانا كنعرف غير لمسمن والبغرير ..

- عمر : سمعيني إن شاء الله ناويين نفتاتهو غيستوغو ماغوكين .. يعني فطور مغربي غدا مغربي كولشي مغربي ، انت تكوني فلاكويزين .. شنو بان ليك ؟

- إشراق (برعشة وخوف) :

الصراحة ماعرفتش والله ، فاجئتيني ولكن بنتي (قاطعها ) :

اتخدمي حسب توقيت ديال شمس ، فاش تخرج شمس من القراية كاين لي غادي يرومپلاصيك ماتخافيش ايكونو معاك ناس لي غادي يعاونوك .. يعني مغاديش تكوني بوحدك فهمتيني ..

- إشراق : ماعرفتش الصراحة والله ..

- عمر : المهم انت فكري مزيان ، من الأحسن الإنسان يعمر وقتو مايبقاش غير فدار فهمتيني (قاطعهم الرباي لي جاب ليهم الطلبات ديالهم ) ..

- شمس : مامي غير نساليو نمشيو ألعاب ..

- إشراق : غادي نساليو ونمشيو لدار ، شنو ݣلنا؟

- شمس (حدرات راسها ) : داكوغ ..

- عمر : علاش غير خليها .. اليوم الأحد خاصهم يدوزوه زوين ، باش يدخلو للقراية بطاقة جديدة ..

- أشراق : مابغيناش نصدعوك مرة أخرى إن شاء الله ..

- عمر :

مكاين حتى صداع ، هادوك مجرد تهيئات كيجيبهم ليك بالك ، وزايدون انا لي ݣلت لشمس بلي غادي دوز نهار على برا ، وأنا لي واعدتها حيت انا باغي نخرجها ... وانا وياها ولينا صحاب ياك اشموسة ؟

- شمس (أشرات ليه براسها بأه ) ..

- عمر : شفتي .. سمحوليا انا جاي ، خلاهم ومشا للحمام .. إشراق تحرجات وحشمات من راسها ، شحال من مرة كتبغي تبدل تصرف ديالها ... ولكن الحشمة ديالها وطبعها مكايخليهاش (هزات راسها فياسمين لي كانت معنكشة مع شعرها ) ..

- إشراق (بإبتسامة) :

بلاتي نجمعو ليك صبري ... ناضت من بلاصتها جات وراها ، هزات ليها شعرها كلو باش تجمعو ليها ، يديها حبسو على شعر ياسمين فاش شافت الشامة لي عند ياسمين فلور ديال عنقها ... يديها بردو عليها بكترت الصدمة مافهمات والو ، نفس الشامة لي فعنق شمس ، بقات واقفة مصدونة ، ماحساتش بعمر لي جا وكيهضر معاها ولا يدو لي كدوز قدام عينيها ، طلقات شعر ياسمين بزربة خلاتهم وخرجات على برا ديال المطعم ..

- عمر (تبعها) : إشراق مالك اش واقع شنو كاين ؟ خلعتي البنات ياك لاباس ؟

- إشراق (كتهضر بلا عقل ) :

نفس الشامة نفسها مايمكنش تكون صدفة لا بزاف مايمكنش ، الشبه دوزناه ولكن الشامة لا بزااف مايمكنش تكون هادي صدفة !!

- عمر (شد ليها فكتافها) :

دابا غير كولي ليا شنو واقع ؟ عرفتي شنو بلاتي انجيب البنات نديوهم للألعاب ونهضرو واخا ، مخاصناش نخليوهم بوحدهم ... خلاها ودخل جاب البنات وخلص الغدا وشدو طريق لمدينة الألعاب ..

_______________

- دخل للدار كيشم فريحة الطياب عاطية فدار ، رض الباب برجلو حط السوارت وتيليفون ... مشا جهة الكوزينة كتبان ليه واقفة دايرة طابلية وكطيب ..

- أتبقا واقف بزاف تما ؟

- مالك : باش عرفتيني أنا ؟

- شريهان :

على سؤال كيداير ، علاش شكون عندو السوارت (شافت فيه) وزايدون ريحتك معروفة ، نقدر نميز من بين بزاف دناس ..

- جملة لي خرجات عادية من فمها ... ولكن بنسبة لمالك شيحاجة لي هي كبيرة ..

- شريهان : سير ݣلس الغدا شوية وغادي يوجد ، 3 سوايع هادي وانت على برا ، ايكون فيك جوع ..

- مالك : واخا ... مشا لصالون ݣلس مسرح رجليه وكيتفكر ... دكرياتو مشاو بيه لشحال هادي فاش كان صغير ، كانت عندو 9 سنين وهي عندها 4 سنين ... بالغدايد والفقايص لي كانت مركبة فيه ، مكتخليهش يلعب مع دراري صحابو غير لاصقة فيه وتابعاه ..

________ فلاش باك

- مالك (كيغوت) : واش غادي تبقاي غير تابعاني سيري بعدي مني ..

- شريهان (لابسة صندالة ديال الميكة صباعها موسخين بتراب لي كاضل تمرمد فيه ، كولون فالموف وكسوة بالفرافر وجها موسخ بتراب .. شعرها بحال دري حست قطعاتو ليها مها كان فيها الݣمل وتابعاه) :

ناءح عمي أليا نمسي معاك ، مانيك تسناني متزريس أفاااك ..

- مالك : وبعدي مني واش انا ولدتك ونسيتك ، سيري يالمݣملة شوفي وجهك عامر تراب وخنونتك نازلة سيري ، راه ايضحكو عليك صحابي سيري واش انت دري ولا بنت سيري ..

- شريهان (وقفات كتشوف فيه جمعات غوباشتها ودارت باااع بالبكا) .. وقف مالك عارفها بوحاطية وبسبابها اياكل قتلة ديال العصا من عند باه .. رجع عندها وكلس على ركابيه باش يكون قدها فطول ..

- دابا علاش كتبكي ؟

- شريهان : حيتاس كتعوت عليا وانا ملاتك ..

- مالك :

كيفاش مراتي ، واش انت حمقة انت مزال بزقولة ، وانا نموت ومنتزوج بيك يالمݣملة ، سيري بحالك لدار (قبل لا يوقف) حط يدو على حناكها وجبدهم ليها حتى بدات كتبكي بدموع وكتغوت ، ناض كيضحك عليها وهارب ..

- شريهان (كتشهق) :

دابا تسوف أنأولها لعمي يضبك دابا تسوف ..

(نهار أيمشي أحمد ونزهة ومالك وعمر للفرنسا) ..

- مالك (كيضحك فرحان) :

أنتهنا منك المݣملة امو خنونة ..

- شريهان : عمي أليا ، غي نكبر وايزي يديني ونزوزو انا وياك ، بحال هاد مونيكة والمونيك ..

- مالك : انت حمقة سيري مسحي اخنونتك ، برهوشة ..

- أحمد (بصرامة) مااالك خلي عليك بنت عمك فتيقار حشومة ..

- من بعدما تسيفطو مع بعضياتهم ، ركبو فطوموبيل ... يلاه ديماراو غاديين ، وتبعاتو شريهان كتجري .. وتشير ليه بيديها كتبوس يديها وتسيفط ليه فالبوسات حتى غبر على الأنظار ..

__________ الـحــاضر

- مالك (سارح فأفكارو وكيضحك ) ..

- شريهان : واااا مالك فين ساهي من صباح وانا كنهضر معاك فين مشيتي ؟

- مالك (هز راسو فيها كيشوف فيها تنهد تنهيدة طويلة) :

والو غير مشا عقلي مع شيحاجة وصافي ..

- شريهان : نوض حط معايا الغدا ، ومنها نيت نسولك شي أسئلة ... نعرف عليك شي حوايج ..

- مالك : اهاه مرحبا يلاه .. تبعها للكوزينة ، حطو شلايض ، او المرقة دارت الدجاج بالفريت حتى من الخبز عجناتو وخبزاتو ، حطو كولشي فوق الطبلة وݣلسو يتغداو ..

______________

- عمر (هز عينيو بانو ليه البنات مستمتعين كيلعبو ) :

دابا شنو واقع ؟ الطريق كلها وانت ساكتة ولونك مخطوف شنو واقع ؟ مشيت للحمام خليتك فسكل رجعت لقيتك فشكل ، مخلوعة ياك لاباس ؟

- إشراق(كتشوف قدامها) :

جيت بغيت نقاد لياسمين شعرها ، نفس الشامة لي عندها فعنقها فنفس البلاصة عند شمس ، نفس نفس ..

- عمر : يقدر يكون غير صدفة ، شنو لي كيخلع فهادشي مافهمتش ؟

- إشراق (شافت فيه ) :

مايمكنش يكون صدفة ، نسخة طبق الأصل مايمكنش ... الشبه دوزناها ݣلنا عادي ، ولكن الشامة نفسها نفسها .. نفس الشامة لي كانت عند بابات شمس ، تزادت وهي فيها ودابا نفسها عند ياسمين راه مايمكنش ..

- عمر : شنو زعمة ؟ فاش كتفكري ؟

- إشراق : ماعرفتش ماعرفتش ... بحال والو تكون ياسمين خت شمس ماعرفتش وحق الله راسي اينفاجر عليا ..

- عمر (مامستوعبش) : كيفاش زعمة ؟ كيفاش غادي تكون ختها ؟

- إشراق (بلعات ريقها تنفسات مزيان وبدات كتعاود لعمر كولشي ، تعامل راجلها معاها والخيانة ديالو ، والسيدة لي لقاو معاه فطوموبيل ) ..

- عمر (مدة وهو ساكت كيسمع ليها ) :

ماعرفت منݣول وحق الله ، نكدب عليك تلفت .. وياسمين صغر من شمس بعام ..

- إشراق (دموعها نزلو ) :

خاصني نتأكد ، تقدر تكون هاد البنت خت شمس ، شكون عرف ..

- عمر : على هاد الحساب ، خاصنا نسولو مديرة الميتم لي كاينة فيه ياسمين .. هي لي غادي تعطينا الخبار ، شكون جاب ليهم ياسمين واش والديها ولا شي واحد أخور ..

- إشراق : اه عندك الصح ..

- عمر : صافي خلي هادشي عليا انا ، غدا إن شاء الله غادي ندوز عندك ونمشيو بزوج ونسولو صافي ... دابا تعاملي عادي ماتخلعيش البنات ..

- إشراق (تنهدات تنهيدة طويلة ) :

واخا ..

- عمر (طبطب على ظهرو وبإبتسامة ) :

مزيان ..

فباريس .. فوق من اليخت ، ومن ورا ماسلاو الغدا .. ݣالسة جنبو ومعنقها وساهييين فالمنظر الساحر لي قدامهم ، أشعة الشمس او واحد الهدوء وريحة البحر .. سكينة عمرها حسات بهاد الإحساس ، كتحس براسها كتحلم ... عمر شي إنسان معاملها بحال هكا ، حاسة براسها اميرة ... فنفسها كتكول الى كان هدا حلم كتمنى انها ماتفيقش منو نهائيا ..

- سعد (شاف فيها مبتاسم ) :

كنتمنى هاد النهار مايساليش ، كنحس براسي أسعد إنسان فهاد الكون ... عمري حسيت بهاد الإحساس لأول مرة ومعاك ..

- سكينة (بإبتسامة) :

حتى انا بحالك ، مابغيتش هاد النهار يدوز والله ..

- سعد : مزال مخبي ليك واحد المفاجأة ..

- سكينة : شنو هي هههه ؟؟

- سعد : ماشي دابا ، من بعد وغادي تعرفي ..

يتبع...