محتوى القصة
- الله يعطيك الصحة .. الماكلة وااعرة ماعندي مانسالك ، سعدات هذا لي غادي يديك ..
- شريهان (كضحك عاجبها الحال) :
مزال ماشفتي والو ، ݣوليا عمري سولتك شنو هي الماكلة المفضلة ديالك ؟
- مالك : اي ماكلة تكون صحية ، ومايكونش فيها ليدام بزاف .. ماعنديش مشكل فهادشي انا ناكول لي كاين غير ماتكون كترت الشحمة ، وحتى الحلو شي حاجة حلوة ولكن بعتدال .. وأنت ؟
- شريهان :
انا كنموت على شيحاجة فيها فرماج كيتجبد ههه ، الݣراتان بصوص بيشاميل ، طاكوس بيتزا مرة مرة ، وكنموت على صوصيص او لوبيا هههه ، اللحم بالبرقوق ودجاج يكون مشوي فوق الفاخر ... مكناكلش شعرية تكون سخونة خاصها حتى تبرد وتعلك .. شنو هو اللون المفضل ديالك ؟
- مالك : الكحل الخضر ، البيج فالقهوي .. الزرق حتى هو البيض وأنت ؟
- شريهان :
البلو غوا ، الكحل الأحمر الاخضر حتى أنا ، البوردو حتى هو والموڤ هو سيدهم كاملين .. شحال كتلبس فرجليك ؟
- مالك (تكرشح بضحك ) :
زوينة هادي ، ياكما ناوية دهزيني ؟
- شريهان : وجاوب براكة من البسالة ..
- مالك : كلبس يلالة 42 وانت ؟
- شريهان (كضحك) :
تبارك الله هههه الواحد الى بغا يحرݣ كاعما يحتاج للفلوكة ، غير صباطك قاضي الغراض ..
- مالك (كيضحك وكيشوف فيها ) :
ودابا جاوبي ، شحال كتلبسي فرجليك وسميت الپارفان لي كديري ؟
- شريهان :
كنلبس 38 ، ولكن علاش بغيتي تعرف الريحة لي كندير بضبط ؟
- مالك (كيشوف ليها فعينيها مركز معاهم ) :
بغيت نعرف كيهمني ..
- شريهان (بلعات ريقها ) :
كندير أميرة العرب ..
- مالك (زاد قرب مركز مع نظراتها وعينيها) :
وشعرك ، أشمن ريحة كديري ليه .. ريحت شعرك وريحة ديال العطر ديالك مختالفين ..
- شريهان (كتشوف ليه فعينيه مركزة معاهم ، ماعرفاتش علاش حسات بالخلعة فقلبها ، واخا هو بعيد من جهة لوخرا ولكن كتحسو بحال الى حداها قريب ) :
أنا الأبيض ، دايرة لشعري انا الأبيض .. جابتهم ليا ماما كادو فعيد ميلادي .. وأنت ؟
- خليط بين بوص / سوڤاج / لاكوست .. ممكن نسولك سؤال شخصي شوية ؟
- شريهان (بحال الى منومها مغناطيسيا ) :
سول ..
- مالك : عمرك حبيتي ؟ فعمرك 24 سنة دابا عمرك بغيتي ؟
- شريهان : لا بكل صراحة لا ..
- مالك (مزال مركز مع عينيها) :
وعلاش ؟ واخا عندك أصدقاء بحال مروان مثلا ؟!!
- شريهان : انا ومروان بحال الخوت ، صحاب قراب ولكن الحب عمري حبيت ... بغيت ندير مشروعي ونحقق حلمي ونوصل ليه ..
- مالك :
هدا ماشي سبب يخليك ماتحبيش ، علاش زعمة هادشي ماتقديش تحققيه ويكون فحياتك راجل ؟
- شريهان :
خايفة خايفة نفتح قلبي لشي واحد ونبغيه ، ومايخلينيش نحقق أحلامي وطموحي ونتبت داتي ، مايشدش بيديا ويهرسني ...
- مالك :
خاصك تعطي فرصة هو الاول عاد تحكمي ، انت ماعطيتيش فرصة لحتى واحد وحكمتي قبل ..
- شريهان :
الراجل لي غادي نفتح ليه قلبي ونبغيه ، خاصو يكون معايا فالحارة والحلوة ويشد بيا ... ويساندني فداكشي لي بغيت ندير ..
- مالك (زاد قرب وجهو من وجها مركز مزيان مع عينيها ) :
الى لقيتي هاد الراجل ، لي غادي يبغيك ويحميك ، ويشد بيديك ويساندك ويوقف معاك ويكون معاك فكل خطوة غادي ديريها حتى تحققي داتك وتوصلي لداكشي لي بغيتي وتحققي حلمك وديري مشروعك ، غادي تقبلي بحبو ليك ؟ تفتحي ليه قلبك وتخلي قلبك يبغيه ؟ ...
شريهان (من بعد عدة دقائق ديال السكات ) :
ديك ساعات غادي نسد عليه فقلبي ونعطيه الساروت .. (بغات تبدل الهضرة) علم الله إيمتا غادي يجيبو ليا الحوايج ؟
- مالك (فهم بلي بغات تبدل الهضرة ) :
هداكشي هو اخر حاجة ، نحيدو علينا المهم هو الاول ونشوفو الحوايج .. انا غادي نوض نجمع الطبلة ، خلاها ݣالسة وهز الماعن داهم للماكينة ديال الماعن ... ناضت هي ومشات للصالون ، هزات تيليفون ديالها كدردش مع مروان تسولو على الجديد ديالو ..
________________
قدام برج إيڤل واقفة ، شعرها كيديه البرد وعينيها كيلمعو .. ضربات قلبها متسارعين ، حسات بلمساتو على ظهرها العالي ، شي لي خلى لحمها يتبورش ... كتبلع ريقها بزز ، شحال هذا ماحسات بهاد الإحساس ، ولا يمكن عمرها حسات بيه ، حساتو بشفايفو على عنقها ، يديه لي تمدو من زهرها لتحت صدرها بشوية معنقينها وخاشيينها فيه .. كلمة وحدة منو خلاها طير بالفرحة ..
- سعد (بدون تفكير قلبو هو لي كيهضر اما العقل مابقاش عندو من نهار شافها وعرفها) :
كنبغيك وعمري بغيت ولا غادي نبغي شي حد من غيرك ، أنت حياتي أنت نور لي نور قلبي ، وخلاني نعيش حياة غير لي عشتها .
- سكينة (صدمها وفنفس الوقت حسات بالفرحة) :
بهاد الزربة أسعد ماشي بزاف باش تعارفنا مافهمت والو !!
- سعد :
مكايهمش شحال وحنا معارفين ، كاينين ناس كنكونو كنعرفوهم سينين ، ومكنحسو من جيهتهم بوالو ... وكاين ناس كنشوفوهم مرة وحدة ، كنحسو بحال الى كنا كنعرفوهم مدة طويلة ، كيستوطمو قلبنا وعقلنا ... وهادشي لي واقع ليا ، منكدبش ونكول مكنتش كنعرف بنات ، عرفت بزاف ولكن عمري بغيت شي وحدة فيهم ... حتى نهار عرفتك أسكينة ، سكنتيني وليت كنتصرف شي تصرفات ، عمري تصرفتهم فحياتي .. وأي حاجة ݣلتها ليك فراه فعلا بصح وحسيتها ونابعة من قلبي ديريها فبالك ..
دورها عندو ، كيشوف فعينيها لي لونهم بحال لون سماء ..
- وأنت أسكينة باش كتحسي من جيهتي ؟
- سكينة (تنهدات تنهيدة طويلة) :
أنا عمري فحياتي حسيت بحال هكا ، ولا عاملني شي واحد كيما كتعاملني ، كنحس براسي فرحانة بزاف ومرتاحة ، ومكنقدش نتفرق عليك وفاش كنمشي لظار دغية كنتوحشك ..
- سـعـد ودنيه كانو كيسمعوها و عينيه كينتاقلو من عينيها لشفايفها ، شفايفها لي حركو شهوتو وحركو رجولتو ، عمر وقع ليه بحال هكا ، ولا فقد السيطرة على المشاعر ديالو بحال هكا ، ماحس براسو حتى حط شفايفو على شفايفها مقاطع كلامها ، كيعبر وكيوزن فمها وقبلاتها وتجاوب ديالها معاه كيتلدد بكل حركة كديرها بلاما ترض البال بلي كانت مخلياه طاير لسما ، قبلة خلاتو يعبر على شنو كيحس ... مشاعر خلاتهم يترفعو لعالم فيه غير هي وهو .
__________________
ليت لحظاتنا الجميلة تدوم لساعات ... لأيام ... لسنين ...
لنسرق أنفسنا من كل ضحكةٍ تعنينا ولنطمئن في تمسّكنا باليد التي تمتد إلينا دائمًا ، ولنمضي مع الأرواح التي تستلطفها أرواحنا ، نحن حقاً في حاجة شديدة لأن نشعر بديمومة الأشياء الجميلة ، تلك التي لا نطيق فكرة أنها كانت يومًا من الماضي لا يلتقي بعض الرائعون في بداية العمر .. لا يلتقي الرائعون إلاّ بعد رحلة طويلة من التعب، ولا يحدث الحب الحقيقي إلا متأخرًا .. يحدث بين قلبين عاشا في حياة مختلفة وكان مستحيلًا أن يلتقيا .. لهذا لا شيء يصف فرحة كل شخص عثر على نصفه الآخر ..
- ماذا يفعلُ الحب بنا ؟!
-إنه يجعلك مخلصاً دون أن تدري أنك مخلص..!!
يجعلك وفياً .. تسعد بعطائك دون أن تنتظر مقابل
تتفانى .. تتعاطف .. ترحم .. تودّ ..
تتواضع .. تتسامح ..
إنه ببساطة يجعلك تكتشف أعظم ما في نفسك .
- بحال كل نهار كان ستيڤن كيجي يدرب شريهان ويمشي ... أما ݣوستاڤو علم شريهان ݣاع فنون الإيتيكيت ، من الماكلة والمشية والكلام ... كيفاش تصرف مع الناس وكيفاش تعامل وكيفاش تجاوب الى كانت معصبة ، هي فالداخل ديالها كتحس بلي بدات كتبدل شوية بشوية ... أما مالك كان بحال الدرع الحامي ليها ، كل نهار كانت كتكتاشف فيه حاجة جديدة ... ولكن هادشي كان بينها وبين راسها ، الأيام كانت غادية وكتجري .. والشهر قرب يسالي ويدخل الشهر الثاني ..
________________
- عمر (كيشوف فإشراق ) :
مستعدة ؟
- إشراق : أه مستعدة .. خرجو من الطوموبيل ودخلو للخيرية ..
- من بعدما كانو كيتسناو فمكتب المساعدة ... سونات ليها المديرة باش دخلهم ..
- المديرة : سلام موسيو عمر (سلمات عليه وعلى إشراق طلبات منهم يݣلسو ) ..
- موسيو عمر ... من بعد المكالمة ديالك ليا ، وهضرتك ومن بعد إجتماع مع المسؤول قررنا نعطيوكم تصريح باش ديرو تحليلة ديال لا دي إين ..
- عمر : شكرا بزااف ... كنت عارف بلي غادي تعاوني معانا ، خاصنا ضروري نتأكدو واش بنت مدام إشراق أخت ياسمين ..
- المديرة :
الصراحة ، فاش تاصلتي بيا وعاودتي ليا صدمتيني ، خيت بنسبة لينا ياسمين تعتبر يتيمة من نهار حطااها جداها عندنا عمرها مابانت نهائيا ..
- إشراق : عفاك ممكن نسولك ، إيمتا ياسمين جابتها جداها لهنا ..؟
- المديرة :
للأسف منين كان عندها عام ، جابتها وحطاتها هنا ، ݣالت لينا بلي الأب والأم ديال ياسمين توفاو فكسيدة ... وبلي الاب ديالها كان مغربي ، وبلي هي ماتقدرش تربيها ولا تحمل مسؤوليتها .. ومن داك الوقت وهي هنا ..
- إشراق (دموع وقفو ليها فحلقها ، ماحساتش بيهم حتى هبطو سخان على وجها ، حسات بيدو على يدها ) ..
عمر (بقلق ) :
إشراق انت بيخير ؟
- إشراق (هزات عينيها فيه ) :
أتكون ختها ، اتكون خت بنتي ... فاش خلاني كنت حاملة ، وفاش مات كانت عند شمس عامين ... وشمس كبر من ياسمين بعام واحد ، ماااات وخلا جوج بنات ... مكانش عندو حس المسؤولية نهائيا ، انا خلاني حاملة وسمح فيا ... وعمرو هز تيليفون وسول على بنتو ، تزادت شمس وسونات ليه سكينة وضار فيها وݣاليها ، الى ختك مكانتش قادة على تربية تمشي تلوحها ، ولا تعطيها ومتعرفوني منعرفكم ... وياسمين خلاها تربية ، دابا داخلت عليك بالله أشنو دنب هاد جوج بنات ..(كتشهق بالبكا) ..
- عمر (وعنقها كيسكت فيها ) :
شششش صافي صافي .. المديرة سونات للمساعدة ديالها تجيب كاس ديال الما ..
- ممكن تكون غير صدفة أمدام إشراق ..
- إشراق (من بين دموعها) :
انا متأكدة بلي ياسمين خت بنتي ، الشامة والشبه بزوجهم كيشبهو لباهم ماخلاو فيه والو ، الزعورية ديالهم ورتوها منو هو وحتى شامة منو هو ... شبهو للاب مايستاهلش كلمة بابا نهائيا ..
- المديرة (بتساؤل) :
والى فرضنا كانت فعلا خت بنتك ، شنو اديري أمدام ؟
- إشراق (بدون تفكير) :
مغاديش نخلي اخت بنتي تربا فالخيرية ، ولا تجي شي عائلة تبناها وماتعاملهاش مزيان ، الخواتات خاصهم يترباو مع بعضياتهم ، ماشي غير ماماها ماتت وباها مات تبقى بلا حنان ... انا مزال بنتي عندها أنا ، وياسمين مسكينة شكون عندها ؟
- المديرة :
ولكن أمدام ، الى بغيتي تكلفي بياسمين ... خاص تكون عندك دار وخدمة فالمستوى لي تقدر تعيشي بيها البنات بزوج بيهم ، خاص يتوفرو فيك الشروط لي تخلي المسؤولين يعطيوك ياسمين تربيها ..
- إشراق (مسحات دموعها وشافت فعمر ، حسات بواحد القوة غريبة فقلبها تجاه هاد البنت ، مايمكنش تخليها فالخيرية بعيدة على ختها ، الراجل لي دمرهم مات وهي مايمكنش تخلي هادشي يمشي بحال هكا ) :
عندي خدمة ، وعندي حتى دار الحمد لله انا وختي عندنا دار زوينة ومزيانة ..
- عمر (قاطعهم) :
نشوفو بعدا التحاليل ، وديك الساع نهضرو فموضوع التبني واخا .. مدام سارة شكرا بزاف ..
(من بعد الخروج ديالهم )
- إشراق (وقفات وشافت فيه) :
أنا قابلة نخدم عندك ..
- هبطات من بيتها جارة باليزتها ... وقفات كتشوف فديك الدار بقا فيها الحال بزاف حيت اتخلي هاد البلاصة .. خرجات من الدار كان واقف ستيفن مع مالك كيهضرو ، غير شافو وسكتو ضارو عندها ... وقفات شريهان كتشوف فستيفن ، بدون سابق إنذار خلات باليزتها ومشات كتجري عند ستيفن ترمات ليه بين يديه عنقاتو كتبكي ..
- ستيفن (كيطبطب ليها على ظهرها ويسكتها ) :
دابا علاش كتبكي بغيت غير نفهم ؟
- شريهان (من بين دموعها ) :
أنتوحشك بزاف اعمو ستيفن ، شكرا بزااف هاد المدة لي دازت علماتني بزاف ديال الحوايج ، وصلحات فيا بزاف ديال الحوايج ... وعطيتيني واحد القوة او واحد الشجاعة واخا كانت فيا ولكن ماشي بحال هاد الشكل ، عمري مغادي نسا هادشي لي علمتيني ..
- ستيڤن (تبسم ) :
حتى أنت كنتي تلميذة مجتهدة ، نوصيك عمر هاد اللمعة لي فعينيك تخليها الطفا ، (شد ليها فوجها) انت بنت مزيانة بزاف ونقية من الداخل بزاف ، خليك ديما بحال هكا ، عمرك تبدلي ... وفتحي قلبك لناس لي ضايرين بيك .. ماتسديش على راسك وعلى قلبك ، راه كاينين ناس قراب ليك وكايبغيوك ، خاصهم غير إشارة منك تافقنا ... وفأي وقت بغيتي النصيحة ولا بغيتي تشوفيني ، راه مالك يجيبك حتى لعندي (باس ليها راسها) يلاه سيرو ..
- شريهان سبقات مالك لطوموبيل ..
- مالك (عنق ستيڤن) :
تهلا فراسك نتلاقاو عما قريب فالمركز ..
- ستيڤن : واخا وماتنساش كلامي ، تشجع ومتخليهاش ضيع من يديك .. وبلاما تحاول تاني تنكر يلاه سير .. مالك مجاوبوش شاف فيه وأشر ليه بيدو ، هز البالز دارهم فالكوفر ، ركب حدا شريهان وشدو الطريق ..
_______________
- (فطريق) شريهان : علاش خاصنا نمشيو لإسبانيا ومنين خرجات لينا هاد المشية ؟
- مالك (عينيه على الطريق ) :
حوايجك الجداد اناخدوهم من تم ، وفرصة باش الصحافة تاخود لينا تصاور بزوج ، خاصنا نبانو كوپل كيموتو على بعضياتهم ، بقا لينا شهر واحد للإفتتاح ديال الكلوپ ، مابقا والو فهمتي دابا علاش خاصنا نمشيو لإسپانيا ؟
- شريهان (تنهدات تنهيدة طويلة ، عينيها على الطريق وكتهضر ساهية ) :
فخبارك امالك .. واخا كنبان قوية وجبهة ، ولكن خايفة خايفة من هادشي لي جاي ، واش غادي نزطط راسي ولالا ... واش غادي نتفرش ولالا ، وهاد البوص لي كان كيموت على هاد إيمان لي كانشبه ليها ، كيفاش اتكون ؤدة الفعل ديالو فاش غادي يشوفني ، زعيم عصابة شنو توقع منو ، خايفة لا يتأدى شي واحد فعائلتي ماما خويا ، عمي ولا انتوما ، وانا واش غادي نخرج من هادشي حية ولا انخرج ميتة ، واش غادي يطول ليا ربي فعمري ونحقق احلامي وندير مشروعي ، ونتزوج ونولد وليدات لي كانت كتحلم بيهم ماما ، (ماحسات بدمعة سخونة حتى نزلات من عينيها) هادشي كولشي خايفة منو ومخبياه الداخل ... ماعرفتش واش هادشي ضعف ولا غير الهرمونات لاعبين عليا .. تخلعات من الوقفة لي وقف مالك بطوموبيل ..
- مالك (عاقد غوباشتو وكيشوف فيها ، عينيه وملامحو مكايتفسروش ) :
متفأليش بالحوايج الخايبة ، ديما نوي الخير وفكري فالحوايج الزوينة ... هادي مجرد اوهام حيت قربنا بزاف ، وحيت مابقا لينا والو داكشي باش انت مخلوعة ، بحال شي واحد غادي يدوز شي إمتحان ، انت مغادي يوقع ليك والو وعائلتنا مغادي يوقع ليها والو ، وغادي نجحو بزوج فهادشي ، ونخرجو منو بزوج .. وغادي تحققي احلامك وديري مشروعك ، وغادي تزوجي وتولدي وليداتك وتفرحي ميمتك ، حتى الى مالقيتي لي يتزوج بيك ... ديك الساعات غادي نتنازل واحد شوية ونقبل نتزوج بيك ..
- شريهان (ضحكها) : بااااز ، على أساس أتلقى بحالي ..
- مالك (شد يديها بين يديه) :
هكاك نبغيك ديما ضاحكة ، مابغيتش هاد الإبتسامة تحيد من وجهك تفاهمنا ، ماعندك مناش تخافي وݣلتها وغادي نعاودها ، أنا ديما معاك وغادي نبقى معاك وفجنبك ... خليها ديما فبالك تفاهمنا ؟
- شريهان (حسات براحة ) : تفاهمنا ..
وقفات بطوموبيلتها قدام المطار كتسنى فيه ، كل شوية كتشوف فساعتها ... حتى بان لي خارج هاز سكادو على ظهرو داير نظارات شمسية ... اشر ليها بيديها وهي بدورها شيرات ليه ..
- جوديا (سلمات عليه بالوجه ) :
على سلامتك ..
- مصطفى : الله يسلمك ياكما تسنيتي بزاف ؟
- جوديا (ركبات ) : لا يلاه وقفت نيت .. كيداز سفر مزيان ؟
- مصطفى : الحمد لله كولشي داز بيخير وعلى خير ..
- جوديا (شدات الطريق) :
ايوا عاود ليا شنو وقع ؟ شنو سر ديال هاد المشية للمغرب ؟
- مصطفى : زربانة تعرفي ؟ زعمة متسنايش نرتاحو شوية ؟
- جوديا : لا غير سمحليا ، صبري قليل ... وهاد المشية ديالك دخلني فيها الشك ..
- مصطفى : علاش زعمة ؟
- جوديا : ايوا بين ليلة ونهار وبضبط نهار لي كانت فيه الحفلة عند نادية ، ختاريتي تنزل للمغرب ، كيفاش زعمة ؟
- مصطفى : مكانش خاصني نفلت هاد الفرصة ، الفرصة ديال نشوف الناس لي كانو غادي يخرجو على ختي ..
- جوديا : ايوا هي نكولو على سلامة منين تشدو ؟
- مصطفى (شاف فيها ) :
باش عرفتيها ؟
- جوديا (أشرات ليه ليدو لي مضروبة) :
من يديك راه باين العربون .. يلاه عاود ليا شنو وقع بديطاي ماتخلي والو ..
- مصطفى (ضحك) : ناري انتوما البنات كلكم بحال بحال ، الفضول فيكم ڤيس .. نكلسو فشي قهوة بعدا راه فيا جوع ، ونكوليك شنو كاين ..
- من بعد مرور 20 دقيقة ، دخلو لواحد القهوة ... طلب مصطفى لراسو الفطور حيت مافاطرش .. أما جوديا كتفات غير بقهوة ..
- جوديا : يلاه عاود ليا شنو وقع بديطاي ماتنسا والو ..
- مصطفى (تنهد تنهيدة طويلة ، ورجعات بيه الداكرة لنهار الجمعة ليلة قبل السبت ، سونا ليه العميد وطلب منو يشد طيارة وينزل للمغرب حيث ضروري يكون حاضر فتحقيقات الى شدو نادية والعصابة لي معاها ) ..
⏭️ فـــلاش بـــاك⏭️
الـــمــغرب
وقفات خولة قدام المرايا ... كانت كتبان مختالفة بزاف ، شعرها طلقاتو من ديما كان مبوكلي ولكن اليوم ختارت تخليه مسرح ... مع عينيها زرقين ختارت مكياج سموكي وعكر فالأحمر ، بحال لون السباط لي غادي تلبس ... أما الكسوة لي ختارت لونها الأسود جا مع البشرة ديالها لي بحال لون الحليب ، قصيرة فوق من الركبة ولاصقة عليها مبينة ݣاع تفاصيل الجسد ديالها ... سباطها العالي جا مع رجليها وبينها راقية وجدابة ... ساعة دهبية فيدها مع حلقات فدهبي صغار ، كانت كتبان واعرة بزاف وممكن دور ݣاع الريوس ديال الناس لي فالحفلة .. رشات من العطر ديالها وهزات ساكها لي شراتو مع الكسوة ، كانت الساعة كتشير ل 6 ديال العشية ... مافهماتش علاش نادية بدلات التوقيت من بعما كانت 3 طلبات منها تحضر مع 6 ... تنهدات تنهيدة طويلة ، وأخر حاجة دارت هو بروش فدهبي على صدرها كان عبارة على كاميرا وميمرو فنفس الوقت ... باش هكا تبقا على تواصل مع العناصر ديال الشرطة ، ويعرفو بضبط التوقيت لي ممكن يدخلو فيه ..
- خرجات من الدار ... غادية بشوية عليها ، وقفات فشانطي كتسنى فطاكسي ... هزات عينيها بان ليها راس منعم من طوموبيلتو ، أشر ليها براسو بمعنى راه كولشي هو هداك ... وقفات الطاكسي ليها ، طلعات سدات الباب وراها ... عطاتو العنوان وشدات الطريق ، قلبها كان كيضرب بجهد ... هادي أول مهمة بنسبة ليها من بعدا تعيين ديالها ، وإلى نجحات فيها ، أتكون نقطة تحول فمسارها العملي .. مدة نصف ساعة عاد وصلات ، الطريق كانت طويلة من البلاصة لي ساكنة فيه للڤيلا ديال نادية .. نزلات وخلاصات مول الطاكسي ، هزات راسها مدة وهي كتشوف فالڤيلا لي قدامها ، بلاصة خاوية وراقية فنفس الوقت ... ڤيلا كبيرة لونها مصبوغ بالبيض ، جوج ديال ليݣارد واقفين عند الباب قدهم قداش .. طوموبيلات مستفين أشكال أنواع ، ومن المظهر ديالهم باين ماليهم لاباس عليه بالمعنى خانزين فلوس .. دورات راسها يمين وشمال مبان ليها والو ... تنفسات مزيان وتمات داخلة مع الباب ، ماوقفوهاش لي ݣارد صورتها كانت ديجا عندهم ... كاع تصاور المدعويين عندهم ، خدات نفس عميق ودخلات مع الباب الكبير للڤيلا .. وهي كتمنى ربي يوقف معاها ..
- دخلات بشوية مبهورة من منظر الجردة ... ماشي مبهورة مصدومة ، حيت عند بالها هادشي لي كتشوف قدامها كاين غير فأوروبا ، فحفلات المشاهير ... عمرها مكانت متوقعة اتشهد عينيها على هادشي لي كتشوف ، لابيسين عامر بنفخات .. الجردة كانت مزينة بأخر مكاين من ليطابل والكراسة ، البوفي طوييييل رجال من مختلف الأعمار ... كولشي لابس أخر مكاين فصيحات الموضة ، وكل واحد فيهم لبسة ديالو اتكون طالعة عليه ب 10 ديال المليون لفوق ... أما البنات فلبسة لي كانت لابسة خولة مستورة وفوق مستورة مقارنة مع لي لابسين هوما .. كاين لي بقا ليها شوي شوي ويبانو ملابسها الداخلية ، وكاينة لي حتى الحملات الصدرية مدايراهمش ، كولشي كيتبارا وݣاع لي تم شادين كيسان ديال المشروب فيديهم ، العصير مكايضورش نهائيا ... حتى من الشوا///د كاينين وباينين غير من لباسهم ، وكيفاش كيتصرفو بمويوعة ، واخدين تيليفوناتهم وكيتسيلفاو ويتعوجو تصرفاتهم كتشكك أنت لي بنت واش فعلا انت بنت ولا يمكن رجل ... فالجهة الاخرى كان حائط المشاهير ، فيه سميات لعناوين المجلات ... كيتصورو فيه المدعويين بحال الى حاضرين للحفلة ديال ريد كارپيت ، ݣاع لي حاضر فديك الحفلة من مختلف الديانات ، شيحاجة لي كتشوكي بزااف ... كتطرح سؤال على راسك واش هادو فعلا مغاربة ولا انا كنحلم ... واش هادو عايشين معاهم وعايشين معانا ولا حنا لي جينا من شي كوكب ومضيقين عليهم ... خولة حسات بيد باردة على كتفها خلاتها تݣمز ... ضارت كتبان ليها نادية واقفة بكامل اناقتها ، لابسة شوميز كحلة كتبين ، مع سروال ديال الموبرا فالكرونة جنابو شفافين .. طالقة شهرها وكتبان انيقة ..
- نادية (بأبتسامة رضى) :
ربيعة واخيرا جيتي ، كنت خايفة لا تلفي على الطريق ..
- خولة : الصراحة فالأول مول طاكسي تلف داكشي باش يمكن تعطلت ..
- نادية : نو حبيبتي ماتعطلتي والو ، هدا هو الوقت .. كيف جاتك الحفلة ؟
- خولة (تبسمات) :
الصراحة عمري شفت بحالها فحياتي ، كنت كنشوف هادشي غير فالتيليفون ولا تلفازة ..
- نادية (ضحكات بميوعة) :
من هنا للقدام اتحضري لبزاف بحالهم وحسن منهم ݣاع ، انت غير خلي ليا راسك ..
- خولة : نبدا الخدمة دابا ؟
- نادية : لا ازين اليوم انت ضيفة ، الخدم عندي بزاااف احبيبة ... ستمتعي بالوقت ديالك داكوغ (غمزاتها) ... خلاتها ومشات عند شي رجال كانو ݣالسين .. تكات على واحد فيهم هاز سيݣار .. داير واحد الطربوش على راسو بحال طرابش ديال كوبوي ... ماعرفتش شنو كالت ليه فودنو وشاف حهة خولة مطول فيها الشوفة ..
- شوية تبدلات الموسيقى وخدم الشعبي ، طلعات واحد خيتي فوق القعدة لابسة كسوة طويلة فالكحل .. وكلها عريانة من الصدر ... كتحير ودردک ، خولة بان ليها واحد الكرسي مشات فوق منو وݣلسات .. حاضية هاد الدوامة وهاد الدنيا لي عمرها شافت بحالها ، كتشوف فرجال كينعنقو فالبنات ويبوسو فيهم عادي ، وكاينين حتى رجال مزوجين جايين مع عيالاتهم ... هوما فجهة مع البنات وعيالاتهم فجهة مع رجال ، مكاينش حدود نهائيا مكاينش كلمة حرام ، ولا كلمة حشومة ولا والو ... واحد العالم تاني عالم لي كيشدك فيه الخوف ... عالم الليل هزات خولة راسها كيبان ليها حسام واقف ومعاه نعيمة ، لي تبدل اللوك ديالها كليا .. لابسة شورط قصير فيه الهدوب مع شوميز ديالو ضدرها كلو خارج ... شادة كاس فيه المشروب ، طالقة شعرها كدور فعينيها وكضحك .. هز حسام راسو بانت ليه خولة تصدم تشوكا من المظهر ديالها ، كانت كتفتن بزين .. أشر ليها براسو لواحد جهة خاوية فجردة ... وقفات شافت فنادية لي كانت مشغولة وتسلتات لعندو ..
حسام (معصب) :
ياكما تبسل عليك شي واحد ولا هضر معاك شي حد ؟
- خولة :
لا متخافش ماهضر معايا حتى واحد .. وانت شفتك واخك راحتك مع ديك خيتي ..
- حسام (ضحك ) : كتغيري عليا الحبيبة ديالي ؟
- خولة (بميوعة) :
وعلاش مامنحقيش نغير ، وانت فكامل اناقتك هاد النهار ... خفت ادور بيك شي وحدة ؟
- حسام :
يدور بيا حتى يعياو ، انا كنشوف بنت وحدة ، وقلبي فيه بنت وحدة ، انت الحبيبة ديالي ..
- هزات خولة عينيها على غفلة ، كيبانو ليها شي رجال كل واحد ، شاد وحدة وكيدور من واحد الباب اخر للڤيلا ..
- خولة (بإستغراب) :
فين غاديين هادوك ؟
- حسام : ديجا ݣلت ليك الحفلة فيها النشاط ، وفيها الفساد ... وهدا جزء من السهرة ، كوني على بال وخليك تحت عيني ، ولي هضر معاك ولا حاول يتقرب منك حاولي تهربي تفاهمنا ... والى جات عندك نادية وسولاتك علاش ولا كيفاش ، ݣولي ليها عيانة ومافيك لي يهضر مع شي واحد وفيك ليغيݣل اوك ؟
- خولة : واخا احبيبي كون هاني ، انت غير أمر وانا غادي نفد ..
___________________
على برا ... بعيد على الأنظار ، واقفة طوموبيل فالكحل زاج فيمي ، فيها منعم وفيها مصطفى كيشوفو كاع داكشي لي كيدور فالحفلة كولشي من الاول حتى للأخر ..
- منعم : ولاد لك//*لاب .. دايرين مابغاو ماخصهم خير .. شوف اصاحبي شوف قلبي كيحرقني ... شوف أصاحبي البنات شوف مكاينين فهاد العالم ݣاع ..
- مصطفى :
الإشكال هو هاد الحفلة ، فيها كولشي فيها الناس الهاي كلاص ... وفيها البنات لي باغيين يوليو هاي كلاص بأي طريقة كانت ... غافلين على النهاية كيفاش غادي تكون ..
- منعم :
معاش خاصنا ندخلو ؟
- مصطفى (تبسم) :
حتى تزهى القضية لا زربة على صلاح ..
__________________
- الموسيقى خدامة مجهدة ... كولشي شارب حتى واحد ماواعيش بشنو كيدير ، البوسان وتعناق غير كيتشاير حتى واحد ماهمو شي واحد نهائيا ، لي عجباتو شي وحدة جرها وطلعها للفيلا الفوق ، طابق الليالي الحمراء ... خولة غير ݣالسة وكتسكاني بعينيها وكتهندز ..
- حشومة هاد الجمال كلو ، يبقا ݣالس بوحدو .. هزات عينيها فصاحب الصوت .. كان نفس الشخص لي كانت معاه نادية ..
- خولة (شافت وراه كانت نادية واقفة كتشوف فيهم ، غمزاتها وأشرات ليها براسها ، بمعنى عطيه وقت ) :
لا ماشي هكاك غير اول مرة غادي نهضر للحفلة ، مامالفاش بصداع والموسيقى داكشي باش .. حيد الطربوش ديالو ، شعرو رطب وطويل شوية ... لاحظات الحلقات لي داير فودنيه ، والوشام لي فيديه وكترت الخواتم فصباعو .. عينيه بحال الى مكحلين ..
- نقدم ليك راسي ، الزرق ..
_________ (على برا منعم ومصطفى مصدومين )
- منعم (عينيه خارجين مامتيقش ) :
متݣولش ليا هدا صاحب دعوتنا ، ماتكولش ليا بلي اليوم نهار ديال الحظ ديالنا وطالع عندنا الجوكير ؟
- مصطفى (مغوبش وكيشوف ) :
ششششش بلاتي ، بلاتي ..
- خولة (ضحكات) :
انت الزرق وأنا الكحل ..
- موسيو لزرق ضحك عجباتو وجاتو على الݣانة ديالو ..
كيعجبوني البنات بحالك ، دمهم خفيف وفيهم الضحك ..
- خولة :ستيل ديالك فشكل ، ماشي بحال لي حاضرين ..
- الزرق : حيت انا واحد مامنيش زوج هدا هو البلان ، مݣلتيش ليا شنو سميتك ..
- خولة (تبسمات) :
زعمة مدام نادبة كاعما ݣالت ليك سميتي ؟ العجب ولكن ماعليش انا نكولها ليك ... سميتي ربيعة ..
- الزرق (تبسم) :
ممممم إسم بلدي .. كيعجبوني بحال هاد السميات الصراحة ... وكيعجبوني البنات لي كيكونو دكيات بحالك ..
- خولة (قربات لحدا ودنيه) :
وانا كيعجبوني الرجال لي بحالك ، ماشي بحال هاد البراهش لي كاينين هنا ..
- الزرق : هي غادي نتفاهمو مزيان ؟
- خولة : حتى انا هادشي لي بان ليا .. سمحليا انا جايا .. مشات جهة نادية لي بدلات اللبسة بكسوة كحلة قصيرة عريانة من الصدر ..
- نادية : زين عجباتك الحفلة ؟
- خولة : كتحمق بزاف ..
- نادية : كيف جاك موسيو الزرق ، راه عزيز وغالي ..
- خولة : الصراحة ظريف ومن النوع لي كيعجبني (ضحكات)
- نادية (عجبها الحال) :
ايااااه الالة ، ايوا مزيان هادشي لي بغيت ازين ..
- خولة : مدام نادية ، بغيت نمشي لطواليط ، بغيت نبدل حيت راكي عارفة ..
- نادية (بحال الى ماعجبها الحال ولكن مابيناتش ليها ) :
وي زين مرحبا ، أشرات بيديها لوحدة من الخدمات ..
- وري الحمام لمدموزيل .. مشات خولة مع الخدامة فطريقها ، رمات عينها لواحد القنت .. بانو ليها دراري مع بنات ، حاطين الغبرة وكيشمو ... منظر كيبورش .. حدرات راسها ودخلات الحمام .. سدات عليها وتنهدات تنهيدة طويلة ..
- خولة : كاين دراري وبنات كيتعاطاو هنا ، الفوق عبارة على وكر للدعارة .. الجو هنا كيخنق كيبان ليا جا الوقت لي دخلو فيه ..
على برا ... وصلات فرقة التدخل السريع ، البوليس طوقو الڤيلا كلها من اللور ، بالحس طلعو لسطح ديال الڤيلا ... فربوع ساعة الڤيلا كلها طوقات بالبوليس ... جوج ديال البوليس متخفيين فلباس ديال ليݣارد ، جاو من ورا الحراس .. شمموهم مادة مخدرة خلاتهم يغيبو على الوعي وجروهم للطوموبيل .. ورجعو خداو بلاصتهم .. الڤيلا كلها طوقات مكايناش بلاصة فين ممكن لشي واحد يهرب ..
- منعم : كايبان ليا جا الوقت ..
- مصطفى (خدا التيليفون) :
ألو سعادة العميد ... وي سيدي واخا سيدي .. شاف فمنعم ..
- منعم : شنو ؟
- مصطفى : بالي قبل لا يسالي .. تحلات الطوموبيل ، وخرج منها منعم ومصطفى ... مسلحين بزوج .. مصطفى عطا الاشارة براسو للتدخل السريع ... نقزو الصور ديال الڤيلا ، خداو المواقع ديالهم بين الشجر حاضيين جميع المداخل ...
- مصطفى ومنعم بخطى سريعة دخلو مع المدخل ديال الڤيلا ...
- مصطفى (بصوت عالي) :
البوووولييييس ، ممنوع شي واحد يتحرك .. الموسيقى وقفات ... الزرق يلاه ايحط يدو فجيب لافيست يجبد السلاح ، جاه منعم من اللور شد ليه يديه :
سير لزرق ، زارتنا البراكة ، وخويا دوختينا وحمقتينا نهار كبير هدا أصاحبي ..
- الزرق (كيتنطر ويعاير ، ماخلاش ليه الفرصة زول ليه سلاح دار ليه المينوط ) ... البوليس طوقو كاع المدعوين ، غير ناس شكون وشكون ... كولشي مهبط راسو وكيعاير ويعرعر ... حسام راجع خطوات اللور بغا يهرب ... ماحس بيد حتى تحطات عليه وجراتو ..
- مصطفى (كيضحك) : وفييين اخطيب ختي وعاش من شافك الله اخويا غبووور ، توحشناك ..
- حسام (وجهو ولا صفر مخلوع عارف بلي نهارو وصل صافي) :
خويا مصطفى سمعني ، خليني غير نشرح ليك (كيتفتف)
- مصطفى نزل عليه بونية لوجهو رعفو من نيفو ... هز وقارلو مع وجهو .. :
دوي اشماتة انا ضحك لي على ختي ، عند يالك ختي ساهلة دير فيها مابغيتي دوي ، ماخليتي علامن تفليتي عند بالك بنات الناس لعبة بين يديك دير بيهم مابغيتي ... نزل عليه بلبونية تانية خلا ليه نيفو كلو دمايات ...
- مصطفى : ديو عليا الحما///ر ... جاو البوليس دارو ليه المينوط وداوه ... نادية ستغلات الفرصة تسلتات ... غادة طالعة لبيتها تهز سامسونيط لي فيها الوراق ولفلوس والباسبور .. دخلات لبيتها ، هزات سامسونيط حطاتها ، يلاه حلات الخزنة لي دايرة فيها كاع الوراق حتى سمعات صوت وراها ..
- فين غادية امدام نادية ..
- ضارت نادية شافت فخولة ... :
حبيبة مامسالياش دابا خرجي من بيتي .. جات ضايرة حسات بيد جراتها وحاجة باردة تحطات عليها ... دورات راسها كيبان ليها المينوط فيديها ..
- خولة : وحشومة وعيييب تخلي ضيوفك وتمشي ، واللعب يلاه غادي يبدا الالة نادية ..
- نادية (كتفركل ) :
طلقي طلقي اش هاد اللعب الباسل ، شكون انت ؟ اش كيدير هاد المينوط عندك ربيعة ..
- قاطعاتها خولة :
الضابطة خولة ماشي ربيعة (جراتها دايرة ليها يديها ورا ظهرها ومهبطاها كتغوت وتركل وتعاير) :
والله حتى نربيك ، غير بلاتي معارفانيش شكون أنا وشنو نقدر ندير غير بلاتي ضحكتي عليا غدرتيني ابنت الحرام (كتغوووووت بشمتة والحر ، بينها وبين راسها عرفات وقتها جا صافي) ... خرجاتها على برا وطلعاتها لسطافيط ... هزات راسها جات عينيها نيشان فحسام كيشوف فيها مصدوم ، شفارو كيترعدو حجبانو مهزوزين ... شافت فيه ودورات وجها مشات عند مصطفى ومنعم .. من بعدما خرجو كاع لي كانو فالحفلة وهزوهم ، شدو الطريق للكوميسارية ، بقاو غير مصطفى منعم وخولة ... دخلو للڤيلا وطلعو للشومبرات كيقلبو فيهم ... خاصهم ضروري يلقاو اي ورقة ولا ملف لي ينفعهم فالقضية ...
- خولة مشات نيشان للبيت نادية لي محلول والخزنة كانت محلولة ، سامسونيط محطوطة والباسبور ... طلات فالخزنة كان فيها العرارم ديال الفلوس ، لحق عليها مصطفى ومنعم ... خرجو كاع لي كان فالخزنة من وراق وفلوس ودهب ... هز مصطفى واحد الملف حمر ، حلو وتبسم هز راسو فيهم ونطق ..
وقيلة لقينا علاياش كنقلبو ..
فقاعة مغلقة .. كتوسطها طبلة كبيرة وكراسة ، ݣالسة نادية ولزرق ونعيمة وحسام ، حادرين راسهم وكيشوفو قدامهم .. دخل مصطفى ومنعم وخولة ، لي كانت لابسة سروال دجين سبرديلة تيشورت تجاكيط وكاسكيطة فالكحل .. دخلو ب 3 بيهم ، هز حسام راسو كيشوف فخولة ... تفاحة ادم كتنزل وطلع فعنقو ، كيحس بالبكية لأول مرة فحياتو ايدوق العذاب لي دوقو لعشرات البنات لي دمر ليهم حياتهم .. كاينة لي هربات من دارهم وكاينة لي خوات البلاد ، وكاينة لي مرضات نفسيا ومزال لحد الساعة كتعالج ... وكاينة لي حملات مسكينة يا عطات لي كان فكرشها ولا سمحات فيه ... دمر عائلات غير حيت ضحك على بناتهم ، ودابا منين فتح قلبو بغا بصح صدقات البنت لي بغاها ، بوليسية ودارت هادشي كامل باش يتشدو ..
- مصطفى (جر واحد الكرسي وݣلس ، كان لابس تيشورت سروال دجين كحل وݣاط فالقهوي ) :
مرحبا مرحبا مرحبا ، وعرفتي والله الى دوختونا ... وخصوصا أنت الزرق وعاش من شافك أصاحبي ، وتبدلتي زيانيتي وشرفتي ومزال ماحشمتي (ضحك) ..
- لزرق (هز راسو فيه كيخنزر) :
مزال ماعرفش معامن أنت ، غادي تندم مزال .. معارفش بلي الى انا تشديت راه كاينين ناس على برا ..
- مصطفى (ضحك) :
واش كتهضر على هادو (عطاه واحد الورقة) الى كنتي كدوي على هادو تشدو لبارح مزال بليل ، وفخبارك كولهم غرقوك وݣالو بلي أنت لي كنتي كتعطيهم الأوامر ، يعني انت غارق غارق أكون هاني هههه ... لورق شاف ديك الورقة تعصب كلو كيترعد مارضاش يعتارف لراسو بلي حصل ..
- مصطفى (هز راسو فنادية لي كانت حادرة راسها ، عينيها عامرين بالكحل وجها حالتو) :
مدام نادية هادي غير 3 يام وانت هنا وشنو وقع ليك ، خلي الى ݣلستي العمر كامل (ضرب جبهتو) سمحيليا بزاااف بغيت نݣول مدام مليكة .. دابا انا بغيت انعرف مغرقاها نصب وإحتيال ، وتهريب وتجارة فالبنات ، وزايداها مزورة حتى سميتك ... دابا انا بغيت انعرف سمية مليكة مالها والله حتى زوينة ... اه بصح عندك الصح مغاديش تناسب الپريستيج ديالك ..
- نادية (هزات راسها فيه كترعد كلها ودموعها نازلين ) :
غير ضحك ، غادي نخرج من هنا ... كاينين ناس ورايا غادي يسيقو الخبار ، وغادي يخرجوني وداك الساع انا لي غانضحك ... انت وديك الغدارة لي حداك ..
- مصطفى (كيضحك) :
دابا انتوما كتكونو مطورين بزاااااف ، ولكن كتجي واحد الوقت وكتكلخو سبحان الله .. فنظرك حنا مكلخين بحالكم ، باش نفرشو بلي راه تشديتو ... نونونونو غير كوني هانية وحتى انت اموسيو الزرق ... حتى واحد فناسكم مافخبارهمش بلي تشديتو ، ونزيدكم (شاف فلزرق) ديك صاحبتك اللبنانية وصلها إيميل بلي الدفعة الثانية ديال البنات ، سيمانة جايا أيوصلو ... ومدام جوجيت عجبها الحال بزاف ، وݣالت ليك تبارك الله عليك وفلوسك أيوصلو ، أه وكلت ليها بلي اتسافر ليونان باش تغبر شوية ... ايوا دابا حتى واحد فناسكم لي على برا مافخبارو بلي كاينين فالحبيبيس ، يعني ياتعتقو راسكم (تبدلو ملامحو لجدية وصرامة) ولا تعاودو كولشي واحد فزوج .. اه حاجة أخرى شفتكم مصدومين ، حيت عرفنا الريوس الصغار لي كيمولوكم ، المكلخة ديال نادية خلات الخزنة محلولة وسامسونيط كاع دلائل خلاتهم وراها ... شفتو الكلاخ ...(وقف وتقابل معاهم) صياد النعامة يلقاها يلقاها وانتوما سينين هادي ، وانتوما خدامين تبيعو وتشريو فالبشر ، عند بالكم مغاتحصلوش ، ايوا دابا لي حصل يودي ..
- منعم : مصطفى نسيتي ماكلتيش لمدام نادية ، بلي الانسة لي كانت كتوصل ليها الخبار ، حتى هي غادي تعاقب .. وبلي عتارفات على كاع داكشي لي كانت كدير من الاول لأخير ، وشفتي اتلقاي معامن تعاشري فالحبس ..
- نادية (فمها نشف عليها ، صدرها كيطلع وينزل ... هزات عينيه فمصطفى ) :
عفاااك بغيت شريبة ديال الما ..
- مصطفى : اهاه مرحبا .. نجيبو ليك سيتيرنا حنا ݣاع .. مشات خولة ورجعات فيديها قرعة ديال الما حطاتها ليها ورجعات لور ..
- مصطفى (بجدية) :
انتوما حاصلين حاصلين ، كاع الخدمة لي كنتو كديرو عندنا ، الملفات والپاسبورات ديال البنات لي كتديو على برا ، وجميع المعلومات فيهم مطابقين ، مع البنات لي علمونا والديهم بالإختفاء ديالهم ، لي كارط ناسيونال ديالهم كولشي ، لقيناه فالكوفر فور ديال نادية ... هادشي بلا الناس لي كنتو عارضين عليهم ، ولي عتارفو عليكم بلي كل مرة كديرو حفلة فشكل ... وبلا البنات ورجال لي نزلناهم من دارك فحالة بلاما نݣوليك ، الفساد وتحريض على الدعارة تجارة فالبنات ، التزوير وحتى تجارة فالكوكايين پاااااخ ... بالقليلة واحد 30 عام ديال الحبس ... ولا المؤبد ݣاع ، حيت القضية داخلة فيها حتى جريمة القتل لي وقعات فالقنيطرة ..
- حسام (بخوف) :
أشمن جريمة انا مادرت والو ، هوما لي دارو ..
- نادية (بصرامة) : حساااااام ..
- حسام : أشمن حسام ولا نبݣ ، خويا مصطفى ..
- مصطفى (قاطعو) :
أشريف نسيتي راسك ولا ، الضابط مصطفى .. ياكما يحسابليك راسك ݣالسين فقهوة ..
- حسام (بلع ريقو) :
انا عارف درت حوايج خايبين بزاف ، ولكن القتيلة لا ... انا انعاود ليكم كولشي ، طلع ليا هادشي فراسي عيييت ... حتى ليمتا وانا فهاد الحالة انا انعاود ليكم كولشي من الأول للأخر ..
حسام (تنهد تنهيدة طويلة) :
فاش سافرت على برا ... كانت معايا حتى نعيمة ، حتى هي هربات حيت سقنا الأخبار بلي شريها(قاطعو مصطفى) .. :
مدكرش سمية ختي على فمك ، وياااااك ..
- حسام :
المهم .. تما ݣالت ليا نعيمة بلي كتعرف واحد السيدة لاباس عليها ، وبلي هي صاحبتها روح بروح ... فداك الوقت كانت نادية فنفس المدينة لي كنا فيها ، درنا وا نهار وتعشينا مجموعين ، الصراحة عحباتني وحدة لاباس عليها ، وباقي كتبان صغيرة وزوينة ... منكدبش الى ݣلت غرني الطمع ... دخلت معاها فعلاقة وتزوجنا ، تما عرفت بلي نادية ماشي غير لاباس عليها خانزة فلوس ، عندها صالونات ديالها ... وكتبزنز فالبنات هي كضبر فيهم وتخدمهم وتيستيهم ، ودخل ليهم فكرة الهجرة لبرا وبلي ايوليو خانزات مال بحال وكثر ، المهم هو يعرفو كيفاش يتصرفو ... كاينات بنات كيبغيو وكاين لي كيهربو من عندها مكايبقاوش خدامين معاها ، وكاينة لي كتجيها على الݣانة ... منين كتوجد الكمية المطلوبة من البنات ، كدير حفلة كتلبسهم وتقادهم وتزوقهم ... وهنا كيجي موسيو الزرق ، هو لي كيكون خيط وصل بين نادية وجورجيت ، ديك السيدة اللبنانية ... نادية كتحيد لبنات الباسبورات والوراق وتيليفونات ديالهم ، وسي لزرق كيوصلهم بيدو حتى لعند جورجيت ... وهنا كتكون المهمة ديالو سلات ..
- مصطفى : والكوكايين منين كيجيكم ؟
- نادية (كتشوف فحسام ) :
غادي تندم ..
- خولة (بالغوات) : أتسدي فمك ولا مغاديش يعجبك حال ..
- حسام (شاف فنادية ولزرق ) :
وحنا داخلين لحبس داخلينو ، أرا متهدي حتى لصباح ... وكاااانت كنخاف منك وشتي الى بغات الموت تجي وغاتجي ، خلي البشرية ترتاح شوية منا ... رخفو فيكم نفس راه طغيتو بغيت نكول طغينا ، جا وقت الحساب ..
- مصطفى (بصرامة) : كمــل ..
- حسام :
الكوكايين كنا كنتوصلو بيه من عند لزرق ، هوما لي كيسيفط لينا الناس ديالو ... كنتلقاو فواحد الديبو فالخرجة ديال القنيطرة ، تم كناخدو السلعة ديالنا وكنخلصوه .. وانا لي كنت كنكون مع دراري .. والبيع ؤاك عارف ، الناس الهاي كلاص وشباب ... وحتى تلاميذ لي فالمدارس خاصة ... ولي بواط ولبيران .. وفاش كتكون شي حفلة خلاص ..
- مصطفى (ساكت وكيشوف فيه ، هز واحد الصورة كان حاطها على الطبلة ، او ولها لحسام ) :
كتعرفو ؟
- حسام (شدها كيشوف فيها ) :
لا الصراحة اول مرة غادي نشوفو ... لي كنتعاملو معاه هو لزرق ... وهو كيتعامل مع ديك خيتي اللبنانية .. الشاف انا ماخليت بنت علامن ضحكت ، لا انا لا هاد خيتي (اشر لنعيمة لي منين دخلو وهي ساكتة مابقا ليها متݣول كولشي تفضح وكولشي تعرف ) ماخلينا بنت مانصبناش عليها ، وانا ماخليت لمن بعت الغبرة هادشي قبل منتعرف على لزرق ... ومستعد نعطيك كاع سميات ديال دراري لي كنتعاملو معاهم ، مابقا عندي منخسر (شاف فخولة) القلب لي كنت كنكساب والبنت لي قلت لقيتها حتى هي خسرتها ومشا معاها كولشي ..
- مصطفى (تنهد تنهيدة طويلة ، شاف فمنعم ) :
ديه وخليه يسني على أقوالو ، ويعطيكم ليزادريس ديال كاع دراري لي كيتعامل معاهم ولي تعامل معاهم قبل ودي معاك حتى هادي (أشر لنعيمة) ..
- منعم : واخا ، خدا حسام من يدو او وقفو غادي بيه هو ونعيمة ، وقف ليه حسام عند خولة .. ونطق :
اصلا واحد بحالي ، مايستاهلش وحدة بحالك ، ومايستاهلش أصلا تعطاه فرصة وحدة اخرى ، ولا يبغي ولا يتبغى .. حدر راسو وخرج مع منعم ...
- شاف مصطفى فلزرق لي حادر راسو .. قرب ليه وحط الصورة قدامو (مقلوبة حاط عليها يدو) ..
- لزرق يالزرق ... سعيد بن لحسن ، ماݣدكش الحشيش لي كنتي تبيع فيه سينين هادي ، وتوكل لناس السم ... زدتيها بماء الحياة ، وزدتيها بسرق ونصب والإحتيال على الناس ، وتكوين عصابة السماوي ... وخويا مكتقاضاش ماخليتي عائلة ماكشطيها ... ماخليتي شباب ماسممتيهم ، ومكتهدش أصاحبي وبزاااف وبزاااف ... ولكن دور دور وترجع لبليدة ياك (غمزو) ..
- لزرق (هز فيه راسو ورجع نزلو ) ..
- مصطفى :
أنت بعدا المؤبد داخل ليه بعينيك مغمضين ، مافيها لا إن لا حتى مكاينش ، وختى ولادك ومراتك ومك ايدخلو يونسوك ..
- لزرق (هز فيه راسو مخلوع) :
لا والله هوما مدارو شيحاجة ، مافخبارهم ݣاع هاد الكوارث لي كندير ..
- مصطفى (ݣلس ودار رجل على رجل) :
أياااه ، ايوا أشمن كدبة ألفتي وضحكتي عليهم بيه ، باش تكوليهم منين جاك هاد الخير ؟
- لزرق :
كلت ليهم ورث واحد الأرض وبعتها ... ودرت محالات او وليت كنتوشي مزيان ، ولادي مافخبارهم والو ... الواليدة خاجة الى ساقت الخبار اتسخط عليا وتقد تموت فيها ، راه واخا كندير هادشي ولادي هوما عينيا ...
- مصطفى :
ياك المرضي ، ولاد الناس وبنات الناس ، تجارو فيهم بحال الزبل ... بحال الى كتبدلو تقاشركم ، او ولادكم عزاز عليكم ، ودوك العائلات لي خرجتو ليهم على حياتهم ، ولادهم لقاوهم نابتين فالمحابق قدام الباب ... اش بقا منين وليتو تبيعو لحم بنادم شنو بقا وبيعو ولادكم نيت ، عطيوهم السم ... ولادكم تقريوهم فأحسن المدارس ، وتسيفطوهم على برا ... او ولاد وبنات الناس تديوهم للموت وهوما حالين عينيهم ياااك ، بنات بعتوهم .. ودراري مساكن ديوهم للأوروبا وخليوهم يتاجرو فالغبرة ... بيعوهم العجل ولي بغا يرجع ياكل دوا العصى ، تيريو فيهم بدم بارد وتهناو ... (وقف مصطفى جاعر قاج لزرق) واش كضحك عليا ولا كضحك على راسك ...
- خولة (كتحول تفرقو عليه) :
سيدي عفاااك ، طلقو عفاااك مديرش فيه يديك ..
- مصطفى (دفعو) :
شوف هدا شوووف (هز صورة فيها شاب فأواسط الثلاتينات زوين ومبسم ، حاط راسو على راس مو) :
هاد الولد لي ضحكتو عليه ، بيعتو ليه العجل ، فرشتو ليه الدنيا ورد ... ديتوه لطاليان ،، خليتوه يخدم فالكوك الحرام ، فالحرام لي باه قراه ورباه وكبرو باش يبعد على الخرام ، جيتو فساعة لحستو ليه المخ ... وضربتو تربية بااااه فزيرو ... ونهار نوا يرجع بحالو ، هدا هو مصيرو (وراه صورتو طايح غارق فدماياتو) داخلت عليك بوجه الله واش كتنغسو وانتوما مرتاحين (هز يدو وخبطها مع الطبلة حتى تجرحات بلاما يحس بشوية ديال الخشب لي دخل ليه فجلدو ) عندكم عادي ياااك ...
- لزرق (كيترعد خايف) :
انا ماقتلتوش ، انا قاديت ليهم الوراق فداك الوقت ... وكنت وسيط باش يهاجرو لطاليان ... ولكن ماشي انا لي قتلتو ، هوما هارفين لي دخل لديك الغابة .. مايمكنش يخرج منها عايش ،، يا يكمل ولا يموت واحد فزوج .. ماشي غير هو شحال من واحد ... هوما كانو عارفين هادشي واعر ولكن هوما لي ختارو يرجعو لور، غير دارو شوية ديال الفلوس بغاو يرجعو ... وهادشي ممنوع عند دوك الناس ..
- مصطفى (قرب ليه وجهو مخنزر ) :
شكون هادو ؟
- لزرق :
والله العظيم مكنعرف سمياتهم ... ولكن راه ماشي مغاربة ... دوك الناس مكاييبغيوش حد يعرف سمياتهم ... تلاقيت مرة وحدة بواحد فيهم ، وغير صدفة اما انا كنعرف غير دوك الخدام الصغار ... قسما بالله مكنعرفهم بالله ، الله يرزيني فولادي مكنعرفهمش ..
- مصطفى : اهاه وجورجيت ديك اللبنانية ؟
- لزرق :
هاديك عرفني عليها نفس الشخص لي ݣلت ليك عليه ، ولكن غير فتيليفون ... كان ديما كيهضر معايا غير فتيليفون فالوقت لي بغا هو ... كانت كطلبني بنات يكون من 18 حتى لسن 25 سنة ... والخلصة ديالي اتولي توصلني كل الشهر ، وفعلا كلفت نادية بهادشي وهي لي كانت كضبر ليا فالبنات ..
- مصطفى : اهاه كمل كنسمعك ..
- لزرق :
عمري تلاقيت بيه .. حتى لمؤخرا فاش كنت فطاليان ... وكنت غادي نتسلم الشحنة ديال المخدرات ، وغير بضدفة رميت عيني كان كالسة فطوموبيل وداير نظارت ... بزربة تسد الباب ومشاو هادشي لي كاين ، والباقي راه انت عارفو ..
- مصطفى (هز الصورة لي كان حاط عليها يدو وقفها قدام عينين لزرق) :
واش هو هدا ؟ ... لزرق خدا الصورة كيشوف فيها وكيباع ريقو .. مرة يشوف فمصطفى مرة فصورة ..
- مصطفى (خبط الطبلة حتى قفزو بزوج نادية ولزرق ) :
سولتك واش هو هدا ؟ أه لا ..
- لزرق (أسر براسو ) :
أه هو هدا ، هدا هو لي شفت ... وهو لي كان كيهضر معايا غير فتيليفون ... وهو لي كان مسؤول على دراري لي كنت كنحرݣ من هنا .. وهو لي عرفني على جورجيت اللبنانية ..
- مصطفى : مزيان مزيااان ، حصلتو يارباعة النصابة وشلاهبية ... اتخلصو اشوية بشوية ..
- لزرق (بترجي ) :
الله يخلي ليك ميمتك وماعز عليك ... مابغيتش ولادي يسيقو الخبار ولا مرتي ولا مي عفاااك ... الى فرضنا مثلا سولو عليا كولو ليهم سافر ولا مات ، حسن حسن ݣولو ليهم مات ، كولو ليهم مات غارق فالبحر ... اللهم يديرو ليا ݣنازة ، ويترحمو عليا ... ولا يبقاو يدعيو عليا حياتهم كاملة ..
- مصطفى (أشر لخولة ) :
خولة تكلفي بهاد الزوج ..
- خولة : واخا سيدي ... خدا مصطفى الملفات وكاع التصاور لي كانو قدامو وخرج من القاعة فتجاه مكتب العميد .. دق غير سمع الإذن بدخول وهو يدخل ..
- العميد : مصطفى امضرا ..
- مصطفى :
عتارفو بݣاع الجرائم لي دارو اسيدي ، وعرفنا من الاعتراف ديال الزرق .. بلي دجيكو هو لي كان كيهضر معاه فتيليفون ، وهو لي عرفو بديك اللبنانية جورجيت ، وهو ليكان كيمول ليه شحنان من الكوك ... وهادشي كلو كيدينا لحاجة وحدة ، وهي فعلا كارلو كابوني هو المسؤول وهو البوص وراس الكبيرة ..
- العميد :
انت وقتك سالة هنا دابا ، خاصك ترجع للفرنسا باش تكمل لي عليك ... كملتي النص فطريق دابا بقا ليك النص ..
________________
الـــحــاضـر
نهاية الفلاش باك
مصطفى : وهادشي لي كاين هانتي الالة عرفتي كولشي .. تهنيتي رضيتي فضولك ..
- جوديا :
هادي حاجة مزيانة ، الحمد لله دابا بقات لينا غير شريهان ومالك يديرو لي عليهم ... ونحطو يدينا على الملفات لي بقاو ، ونطويو هاد الملف ..
- مصطفى :
ماعرفتش واش غادي يكون بهاد السهولة ولالا ، واش ايكون ساهل كيما شدينا نادية ولي معاها يتشد البوص ولالا ... كاين فرق كبير بين العقول وبين المهارة فهمتيني ؟
- جوديا (أشرات براسها ) :
فهمتك ولكن ماتنساش امصطفى ... بلي الواحد ممكن يوصل فحدود الدكاء لأبعد الحدود ، ولكن قدام الحب كيكون ضعيف بزاف ... وهادشي علاش ختارينا شريهان لشبه ديالها بإيمان ...
- مصطفى (شاف فيها ) :
وهادشي لي خالعني أجوديا ... هادشي لي مخليني مامرتاحش .. خايف بزاف يتقلب كولشي علينا ..
- جوديا (شدات ليه فيدو) :
ماتخافش ، قدما ݣلس الانسان كيجي وقت ويخلص ... وهدا هو الوقت ..
- فشوارع مدريد ... غادية هي وياه دايرين اليد فاليد ، كيشوف فيها بكل حب ، اما هي عاجبها الحال .. فكل بلاصة كيصورها لابسة شورط وݣاط مع تيشورت ... طالقة شعرها ، وقفات كتشوف فيه بكل حب ..
- شريهان :
صافي أنا عييت وجاني الجوع ..
- مالك :
واخا يلالة نديوك تاكلي .. جرها عندو وعنقها غاديين حتى لواحد المطعم ودخلو ليه ، خداو طبلة حدا السرجم وݣلسو ..
- شريهان (تنهدات) :
وأخيرااا ، الصحفي أيكون مشا بحالو ولالا ؟
- مالك (بإبتسامة) :
مزال احبيبة ديالي ، ياخود جوج تصاور لينا وغادي يمشي ..
- شريهان (بإبتسامة حب ) :
واش حنا انبقاو كنضحكو بزاف ، بحال الخرفان لي مشويين ليهم راسهم ..
- مالك : علاش قنطي ؟
- شريهان : لا ماشي هكاك ولكن كانبان مكلخة بزاف ، وانا كنمثل دور جولييت ..
- مالك (در وجهو لجهة السرجم بان ليه الصحفي مشا ) :
تقدري دابا ترتاحي صافي مشا ..
- شريهان (حيدات يدها من يدو) :
اوف واخيرااا ، ناري بزاف حناكي ضروني وانا ضاحكة .. بحال الى محكوم عليا واو واو واو ..
- جا عندهم السرباي مقاطعهم .. عطاهم المينو ، ختارو داكشي لي بغاو ياكلو عطاوه ليه ومشا ..
- شريهان : دابا شنو عندنا من بعد ؟
- مالك :
عندنا سهرة بليل ... باش ياخدو لينا تصاور ، وعندنا غدا حفلة بنهار فواحد اليخت اما دابا يلالة انتغداو وغادي نمشيو ناخدو ليك حوايج جداد ..
- شريهان (الفرحة بانت ليها فعينيها ) :
زوج حوايج لي زوينين فهادشي ، هي الماكلة ولباس .. صافي ..
- مالك :
وجدي راسك تمشي لصالون باش تبدلي نيولوك ..
- شريهان :
إيوا هدا بلان مزيان أرا برع ... قلبوها ضحك بيناتهم .. جاب ليهم السرباي الغدا ، تغداو كيتحتو مع بعضياتهم غير سلاو خلص مالك وخرجو .. خداو طاكسي للواحد الشراع معروف بلبوتيكات ... الطوموبيل خلاوها عند لوطيل ، دخلو لاول محال .. كدور هي ومالك ، كتختار هي من جهة او هو من جهة ، لي خداوها كدخل تقيسها وتخرج عندو باش يشوفها ، كاين الحاجة لي عجباتو ولي ماعجباتوش كيبدلوها ، خداو بزاااف ديال الحوايج ديال السهرات وديال العشا عادي ديال برا وديال دار ... كل بلاصة خداو ليها حوايجها ... مايمكنش يهزو كولشي ، خلاو لمول البوايك عنوان لوطيل ، باش يوصلو ليهم الحوايج ... دازو لبوتيك الصنادل وسبابط ، خدات عاوتاني بزاف ديال الحوايج ... تكسات من ساسها لراسها، حتى من الحوايج داخلية خداتهم ... ختاتمو الشوبينغ بالكسوة لي كان وحدة مامنها زوج ... فالحمر عريانة من حهة الصدر منبتة بالحجر من عند الحزام ... من اللور طويلة والقدام قصيرة ..
- شريهان : ناري والله العظيم الى عيييت ..
- مالك : لي بغا زين (قاطعاتو) :
يصبر لتخراݣ لودنين عرفتها ههههه غير هنينا ، دابا بصا صالون ..
- مالك : وي غادي نوصلك ، ومن بعد انمشي نقضي واحد الغرض اتكوني ساليتي ونجي نديك داكوغ؟
- شريهان : صافي واخا ..
- فالڤيلا كلهم مجموعين .. جامعهم سعد ، كاين سعيد وأحمد نزهة زهرة عمر حتى هو جميلة وحليمة .. الكل كان مجموع ...
- أحمد (كيشوف فيه بفضول) :
مالك ياك لاباس ؟ لاش أولدي جامعنا ياكما درتي شيحاجة تاني ؟
- سعد : بابا نوي الخير حشومة عليك والله ..
- نزهة : سي أحمد خلي الولد يهضر واااه ..
- أحمد : واخا هاهو ساكت ، زيد اولدي هضر الله يسمعنا خبار الخير ..
- سعد (بإبتسامة ) :
إن شاء الله انا باغي نتزوج ..
- نزهة (مصدومة ) :
اشناهو ؟ ولدي واش عارف شنو كتݣول ؟ زواج واش عارف شنو هو الزواج ولالا ؟
- أحمد : براكة من التفليات أولدي ، براكة علينا من البسالة اشمن زواج ..
- سعيد : انتوما مالكم هجمتو على الولد ، علاش مالو الزواج عيب ولا حرام ..
- نزهة : ماشي عيب ولكن سعد باقي صغير ... ومزال طايش
- سعد :
فعمري 24 عام وقربت 10 شهور يعني بقا ليا شهرين وندير 25 عام داكوغ ... اون بليس دو صا بابا نهار تزوجك كانت عندو 24 عام داكوغ ... وفاش ولدتي عمر كانت عندو 25 عام ، علاش جيتو حتى لعندي انا ودرتو العصا فرويضة ..
- أحمد :
وليتي تعرف حتى العصا فرويضة ، حتى هادي علماتها ليك شريهان ..
- سعد : بابا كنهضرو فالمعقول دابا ..
- أحمد شاف فنزهة بإستغراب ، مافهم فولدو والو أول مرة كيهضر بهاد الجدية ..
- زهرة :
والى دري باغي يتزوج الله يكمل عليه بالخير ،، راه كاع الناس كيتبدلو ..
- عمر :
وي بصح ... سعد راه تبدل حتى الخدمة كيخدم من نيتو ، ولا مسؤول مابقاش كيف كان ..
- سعد : سمعتو صافي تيقتو ؟
- نزهة : وشكون هاد البنت ؟
- عمر : شكون من غير سكينة صاحبت شريهان ..
- زهرة : ديك البنت ضريفة وزوينة ومصوابة ، ومقبولة كدخل للخاطر ..
- نزهة :
حتى أنا دخلات ليا لخاطري لا هي لاختها ، ضريفات ومنين كاع عاودات ليا عليهم شريهان عزو عليا بزاف ..
- عمر :
وي بصح ظريفات ، حتى إشراق ختها ظريفة بزاف باش تكون فخباركم نيت غادي تخدم معانا فريسكو لي غادي نحلو ..
- أحمد (بإستغراب) :
وايلي ، كيفاش درتي ليها ؟
- عمر :
داك نهار ديت بنتها وياسمين يشوفو الماكن ديال شوكولا ... ودينا حتى إشراق تغدينا بزوج وعرضت عليها الخدمة ..
- جميلة (بدون سابق إنذار) :
ولكن واش ثقة تخدموها معاكم ؟ (شافو فيها) زعمة بغيت نݣول لي كيخدم معاكم كيخص يكون عندو خبرة ولالا ؟
- عمر :
إشراق بنت لي مسؤولة ، وديجا كانت خدامة فداكشي لي حنا محتاجينو ... الريسطو أيكون مغربي ، وهي عندها مع شهيوات البلدية ، حاجة أخرى بغيت نعلمكم بيها ..
- أحمد : الله يسمعنا خبار الخير ، ياكما أولدي حتى انت باغي تزوج بإشراق هههه غير كولوها لينا نديرو ليكم عرس جماعي ..
- جميلة (تقرصات) : الله يحفظ أعمي برات الباس ..
- عمر (ضار شاف فيها ، هز حاجب ومنزل الثاني) :
وعلاش زعمة ؟ علاش برات الباس علاه إشراق ماشي بنادم ؟
- جميلة (حسات بشنو ݣالت ) :
لا ماشيش هكاك ... غير حيتاش زعمة ارملة وعندها بنية مسؤولية صعيبة ..
- عمر (تقاد فالݣلسة وتقابل معاها ) :
من إمتى الأرملة ولا المطلقة عيب ، علاش غير لي مات ليها الراجل خاصها ماتعاودش تزوج وتحب وتتحب ، صافي مخاصهاش تعيش الحياة تموت حسن ... مكاينش فرق لا بين البنت ولا المكلقة ولا الأرملة ... المطلقة واخا طلق ميات مرة من حقها تزوج والارملة من حقها حتى هي تعاود حياتها ، وشنو فيها الى عندها بنت واخا يكونو عندو 4 دراري عادي جدا ... هادشي مكايهمش من إيمتا أصلا عائلتنا كيهمها هادشي ... وشفتي الى لقيت فإشراق داكشي لي بغيت وبغاها قلبي ، وكانت مكتابة ليا علاش لا ... ولكن انا حاليا هاد الفكرة مزال مكدورش فبالي ..
- نزهة : علاش اولدي نهار الكبير نشوفك بدارك ..
- عمر : الواليدة لي مكتابة علينا هي لي غادي نشوفو ، الى مكتاب ليا زواج راه غادي نتزوج ، تقدر هاد الفكرة تبدل بين ليلة ونهار الله أعلم ..
- زهرة : الله يسهل عليك اولدي ..
- عمر : أمين ياربي ، المهم لي بغيت نكوليكم .. ياسمين تقدر تكون بنت راجل إشراق ..
- نزهة (ولاخرين مصدومين ) :
أشنو باش عرفتوها كيفاش زعمة ؟
- عمر (عاود ليهم كولشي من الأول ) :
خدينا لوتوغيزاسيو باش نديرو لياسمين لادي إن ... وفعلا درناها ودابا كنتسناو نتيجة
- زهرة : ناري شوف سبحان الله ... مسيكينة وماعندك ماتسال إشراق ، تبارك الله عليها بنت الأصل وحنينة وقلبها كبير .. كون شي وحدة أخرى ماتبغيش تربي بنت وحدة راجلها خانها معاها ..
- نزهة : هادشي باش عزات عليا ، كدخل للخاطر كبارت فعيني والله .. الله يرضي عليك أولدي وقف معاها ..
- عمر :
داكشي لي ناوي ندير إن شاء الله ، غير تهناي غادي نوقف معاها ..
- جميلة (وقفات) :
سمحوليا نشوف شنو ناقص فالكوزينة باش نخرج نتقدا ليهم .. حدرات راسها ومشات .. ناضت حليمة وتبعاتها ..
- سعد : ودابا شنو مارضيتوش عليا ..
- أحمد :
مرحبا اولدي ، يرجع خوك إن شاء الله وبنت عمك ونمشيو نخطبوها ليك ..
- سعد (وقف فرحان باس باه) :
الله يخليك ليا ابابا ، لهلا يخطيك عليا ..
- سعيد (كيضحك) : مبروك عليك ..
- سعد : الله يبارك فيك اعمو سعيد (باسهم كاملين ضار عليهم فرحان ) ..
- عمر : ايوا زيد لخدمتك ، راك داخل على زواج ..
- سعد : هي لولة يلاه مشينا ههه
- زهرة (كضحك) :
ولا باغي غير يمتا يمشي للخدمة ..
- نزهة (كضحك) : هانتي تشوفي ...
_______________
- فالكوزينة واقفة جميلة حابسة دمعها بزز منها ... كتقلب فدروج منيرڤية وكتقسد فطابليط شنو خاص ..
- حليمة : أجي انت لهنا ، اش ديك الهضرة لي كنتي كتݣولي ݣبيل ؟
- جميلة (عاطياها بظهر ) :
ماما مافيا لي يهضر دابا زربانة حتى نرجع ونهضرو واخا وزايدون ، انا ماݣلت والو .. وحدة ماشي من مستواه عندها بنت ، بغيت انفيقو ..
- حليمة (دراتها بجهد لعندها) :
وأنت شغلك أش دخلك ؟ ياكما والداه ولا تكوني باغياااه ..
- جميلة (حابسة البكية ) :
واش فيها الى بغيتو اماما ماعلياش الله ..
- حليمة : شوفي هاديك هاه ، خلينا هانيين تجبدي علينا نحل ، سي احمد رباك وقراك بحالك بحال ولادو ، وتربيتي معاهم بحال ختهم تبتي الأرض ، متسديش علينا باب رزقنا فهمتي ولالا ..
- جميلة : ولكن اماما انا كنبغيه ، كنبغيه من صغر شنو ندير واش نحيد قلبي من بلاصتو انا كنبغيه ..
- شكون هدا لي كتبغي ؟ دارو بزوج بيهم على صوتو ... الدهشو وصدمة بانت على وجهم وحدة كتشوف فوحدة ورجعو شافو فيه ..
يتبع...
التعليقات
لا توجد تعليقات بعد، كن أول من يعلق.