السيدة الأولى الجزء 16

دخلو مشادين اليدين وݣاع العينين عليهم ، الحفلة كانت كبيرة ... وغير من الشخصيات ولباسهم باين من أشمن طبقة هوما ..

- شريهان (بهمس ) :

فين هو راس الحربة ؟

- مالك :

متعيقيش غير بشوية ... راه هو قدامك .. هزات راسها فالبلاصة فين نعت ليها وشافتو قبل مايشوفها هو ..

- هزاتو من رجليه لراسو وتبسمات :

اش هاد زين ، اش هاد الطولة وتجريدة اش هاد القلدة اعباد الله ، واحݣلهم كيݣولو طاليان فيها الزين (شافت فيه كتفرنس) متأكدين هدا رئيس المافيا الى كان هاد زين مافيوزي الله يطليني بيه .

- مالك (من تحت سنانو) :

غادي ديري شيحركة ماهياش والله مايعجبك الحال ، شفتك نسيتي راسك أشريفة ..

- شريهان (شافت فيه وعنقاتو من يدو) :

غير كنضحك معاك أحبيبي .. انا كاع هاد الزين حدايا ونشوف فشي حد اخور حشومة ݣاع ..

- مالك (شاف فيها بنص عين حابس عصبيتو ومدوزها بجغمة ديال الما ) ..

- فجهة أخرى ... كان واقف بكامل أناقتو مع الضياف ، مجمع معاهم ... حتى اشر واحد فيهم لجهة فين واقف مالك وشريهان ، دور راسو بشوية كتبان ليه شادة فمالك بكل حب ... عينيه فضحوه وشدة لي زير بيها على الكاس فضحاتو كونماشي دجيكو لي حيدو ليه من يدو ، كون وا تهرس ... همس ليه بصوت خاف :

كاع العينين علينا وصحافة كاينة تبت عفاك ..

- هز عينيه فدجيكو ، ومد ليه الكاس تخطاه ومشا لعندهم ..

- كارلو ( بهدوء ) :

سينيور مالك ، فرصة سعيدة هادي شكرا حيت لبيتي دعوة (مد ليه يدو) ..

- مالك (ببرودة وتوازن ) :

شرف ليا سينيور كارلو ... مكانش خاصني نفوت هاد الفرصة ونتعرف على رجل اعمال بحالك ..

- كارلو (بإبتسامة) :

ليا الشرف ..

- مالك :

كنقدم ليك شريهان خطيبتي ..

- كارلو (خد يدها هبط بشفايفو وباسها ) :

سيدة الأعمال شريهان العراقي ، الصراحة عمري سمعت بالإسم ديالك .. ولكن منين قلبت الصفحة ديالك عامرة بالأعمال ..

- شريهان (بإبتسامة وغرور) :

خليتيني نحس بالفخر سينيور كارلو ، منين رجل بحالك ياخود من وقتو الغالي ويدخل ويقلب فصفحة ديالي ، فهذا شرف ليا ..

- كارلو :

ممكن نحيدو الألقاب الى سمحتي ، خليها غير كارلو أحسن ..

- شريهان (ضحكات) :

اه علاش لا ، حتى انا الألقاب كيخنقوني ... ومكايخليوش الإنسان يتصرف بحرية ويزيد يقرب من الثاني ، ولالا احبيبي (شافت فمالك ) ..

- مالك : طبعا وأنا من رأيك ..

- كارلو : شفتكم ماشربتو والو ، انا براسي انضايفكم ..

- شريهان :

الى مسموح شراب بدون كحول ، حيت مكايجيش معايا ..

- كارلو (بإبتسامة ساحرة ) :

أهاه مرحبا ..

- غير هو مشا شاف فيها مالك :

سبحان الله ، ماعرفتكش ... بعدا الدروس ديال داك الخفاش جابت نتيجة ..

- شريهان (ضحكات ) :

حرام عليك ، كاع داك الجمال تݣول عليه خفاش ..

- مالك :

شريهان بلاما تستفزيني واخا ، وبراكة من ديك الضحكة الصفرة ..

- شريهان (قربات ليه كتشوف ليه فعينيه ) :

علاش كنحس بنار الغيرة كتاكل فيك ... واش إحساسي فمحلو ولا غير كيبان ليا ..

- كارلو (قاطعهم ) :

سمحوليا الى قاطعتكم .. تفضلو ..

- شريهان :

ݣراسياس ..

- كارلو : كتدوي بالإيطالية سينيورة ولا الإسبانية؟

- شريهان :

اول حاجة ݣلنا ممنوع الألقاب ، ثاني حاجة لا انا كندوي بالفرنسية والإنجليزية كيف كتشوف ..

- كارلو (بإستغراب) :

العجب واخا كنتي عايشة فإسپانيا ؟ ومن وراها مشيتي لبرازيل .!!

- شريهان (تبسمات) :

الى قلبتي مزيان ، اتلقى بلي ݣلست فإسپانيا مدة شهرين وكنت خدامة عند ناس عرب ، ومن وراها تعرفت على زوج ديالي ومشيت معاه للبرازيل ، ومكلفتش راسي نتعلم للغة ديالهم ، انا مكنكلفش راسي نتعلم لشي حاجة مغاتنفعنيش ومكتعجبنيش ..

- كارلو (خدا من كاسو رشفة وشاف فيها ) :

كتݣولي بلي اللغة الإيطالية مكتعجبكش ، إذا حتى إيطاليا والإطاليين مكايعجبوكش ؟

- شريهان :

لالا بالعكس كتعجبني إيطاليا ، وكنتمنى نزورها ... وكونما قلبي خداه مالك (شافت فيه بحب ) كنت اناخد رجل إيطالي ..

- كارلو (تبسم) :

مالك عندو الزهر لي رتابط بإنسانة بحالك ، كنتمنى ليكم السعادة ..

- مالك (ببرود) : شكرا ..

- كارلو : سمحوليا ..

- مالك : تفضل ..

- فجهة أخرى ..

جوديا : براڤو عليها الصراحة ماعندي مايتسالها ..

- مصطفى (ماعجبوش الحال ) :

ايمتا تسالي هاد الحفلة خلاص ... شفتيه كيف كان كيشوف فيها ... بحال شي ديب ماواكلش سينين هادي ..

- جوديا :

ضروري مايشوف فيها بحال هكاك ، حيتاش كتشبه لإيمان ..

- لي مين هو :

كاع لي كاينين فالحفلة من رجال الأعمال لي معروفين .. وكلهم باغيين حاجة وحدة يدخلو مع كارلو شركاء فالمشروع الجديد .. حيت ايدر عليهم ارباح كثيرة ..

- جاكسون :

وهو بطبيعة الحال انسانة وحدة لي حط عليها عينيه هي شريهان ، وهي لي ايبغيها تكون شريكة ليه ..

- جوديا (غمزات جاكسون ) :

جاكسون ..

- مصطفى :

علاش غمرزتيه ، راه عندو الصح .. زيدو كملو على لي بيا كان نيت ناقصني هاد الكلام ..

- جوديا :

مصطفى ، صافي تكالمة حتى أنت .. كال لي خططنا ليه غادي يمشي كيف بغينا ، ماتبقاش متشائم صافي ..

- مصطفى (مجاوبهاش و حرك راسو وسكت ) ...

_____________

دازت نص السهرة ... وجا وقت العشا ، الطبلة لي جا فيها كارلو كانت حداه شريهان ومالك ... وهادشي كان بطلب من كارلو لدجيكو ..

- مالك (لاحظ بلي شريهان ساهية او لون وجها مخطوف ) :

شيري مالك واش بيك شي حاجة ؟

- شريهان (بهمس) :

واخا تمشي معايا للحمام ؟

- مالك (رجع بالكرسي اللور ونوضها ) ..

- كارلو (بإستغراب ) :

شنو واقع ياك لاباس ؟

- شريهان : لا والو غير جاتني دوخة بسيطة، وبغيت نمشي للحمام

- مالك : سمح لينا احنا راجعين .. شد مالك فيديها وداها لجهة الحمام ، طلقات من يدو ودخلات كتحاول تسترجع الأنفاس ديالها .. ماقداتش تحمل مزال ، تخنقات كانت اترض .. شربات ومسحات على وجها .. هزات بوشيط ديالها وخرجات لعندو ..

- مالك (بقلق) :

مالك ياك لاباس ؟

- شريهان :

ماقديتش نتحمل ، بزز باش بقيت صابرة ... كنشوف داك دجيكو ولا ماعرفت ليه واقف وكيشوف فيا ، واش شفتيه كيفاش كيحنزز ... تفكرت لي وقع ديك الليلة ، تفكرت فاش هز الفردي وتيرا فداك السيد مسكين ، وهو كيطلب ويزاوݣ فيه .. مقاداش نرجع لتم امالك ، عفاك ديني من هنا ، صافي مقاداش وحق الله العظيم ..

- مالك (جرها عندو وعنقها ) :

صافي صافي ، غير تهدني ... انديرو العذر بشيحاجة وغادي نمشيو صافي غير تهدني ..

- رجعو بشوية عليهم للقاعة .. وقف كارلو فاش شافهم ..

- مالك :

حنا خاصنا نمشيو ، تشرفنا بالمعرفة ديالك سينيور كارلو ... ولكن شيري عيات ، وخاصها ترتاح ..

- كارلو (بقلق) :

ياك لاباس ؟

- مالك :

لا مكاين باس ، غير هو يمكن تبدل عليها الجو ، يلاه مدة قليلة باش رجعات للفرنسا ... خاصها ترتاح ..

- كارلو : الى مسموح ناخود الأرقام ديالكم ، وهكا نطمن عليها ، بغيت نكول عليكم الى ممكن ..

- مالك :

اهاه مرحبا ممكن المساعد ديالك ياخود الأرقام ديالنا ، فرصة سعيدة سينيور ..

- كارلو :

كنتمنى تولي بيخير وعلى خير شيري ..

- شريهان :

ݣراسياس كارلو ، امسية سعيدة ... شدات لمالك فيدو وخرجو بزوج تحت أنظار كارلو لي مغابتش عليهم حتى تسد الباب وراهم ..

حل ليهم الشيفور الباب طلعو ، طلع هو ديمارا وشدو الطريق ... كانت تابعاهم من اللور طوبيل فيها الصحافة كتصور فيهم ..

- شريهان (بإستفهام) :

هادو لاش تابعينا ، ياك خداو التصاور لي بغاو ؟

- مالك (ضار شافهم ) :

هادو مية فالمية موصيهم كارلو ، (سكت مدة وجر شريهان من يدها بالخف هزها وحطها فوق رجليه ، نطر البروش لي فالكوستيم ... و لاحو من السرجم ..

- شريهان :

اويلي مالك اش كدير ، اويلي نزلني واش هبلتي ..

- مالك :

هوما تابعينا تابعينا ، اللهم نعطيوهم علاش يتبعونا ويصورونا ... مكندير حتى حاجة عيب ، خطيبتي لي كنموت عليها هازها فيها شي عيب ؟

- شريهان (كتحاول تملص منو وهو مزير عليها ) :

مالك راه هاد الخطوبة غير تمتيل ، ماتنساش راسك اويلي وطلقني ..

- مالك (بإبتسامة زاد قربها ليه وزير عليها ) :

حبيبة ديالي ، وفري هاد العصبية ديالك لحوايج أهم ، ودابا ستمتعي بوقتك ... خلينا نعطيهم علاش يدويو ..

- شريهان :

واش نسيتي الى خرجو هاد التصاور، وشافتهم ماما وعي أش ايوقع ولالا ؟

- مالك (كيشمشم ليها فعنقها ) :

متخافيش ، مغايخرجوش ... هو غرضو غير يعرف واش بيناتنا حب ، ولا بيناتنا صفقة .. وحنا انوريوه بلي بيناتنا بركان ديال الحب ..(دفن نيفو فعنقها كيشمشم فيها ) ريحتك كتحمق ، فكريني اخبيبة ناخود ليك واحد الپاك ديال هاد الريخة كتحمقني ..

- شريهان : مااالك ماااللك ، الطوموييل مابقاتش تابعانا صافي نزلني ..

- مالك (بتدمر ) :

دومااااج ، كنا عايييشين اللحظة ..

- شريهان (نزلات من فوق رجليه كتقاد فراسها ) :

شتي انت والله الى باسل وممسوخ ... بخبيزتك زيغ اكتبان ظريف ..

- مالك :

غير فاش كنكون معاك وصافي (شافت فيه) بلانا تشوفي فيا ..

- شريهان :

شنو كتقصد ، اجي هاد طريق ماشي للڤيلا ..

- مالك :

انباتو هاد الليلة فداري ، يقدرو يرجعو يتبعونا ... خليهم مزيان ياخدو مايعاودو للكارلو ..

- شريهان (بتوتر) :

كون غير كلنا لمصطفى حتى هو يبات معانا ..

- مالك (جاتو الضحكة ) :

علاش ايبات معانا ، نسيتي بلي مخاصوش يبان الأيام باش منتفرشوش ، وزايدون البوليس مابقاوش ورانا منين خرجنا من الحفلة ... يعني غير انا وياك لي كاينين دابا ..

- شريهان (بتوتر) :

همممم ، واخا ... سكتات وهي فالداخل ديالها شداها الخلعة ... يديها باردين وعرقانين معارفة مدير ، وقفات طوموبيل فلاكاڤ ... ونزلات شريهان ومالك ، طلعو فلاسنيور وشريهان الى حليتي فمها يخرج قلبها منو بالخلعة ، علاش مخلوعة الله أعلم ... كتحس بلي هاد الليلة ممكن تبدل بزاف ديال الحوايج ولا هاد الليلة ، ايطراو فيها شي حوايج لي ايقلبو الموازين ..

- حل مالك باب الدار ، دخلات شريهان بزربة لاحت صندالتها ومشات للبيت لي باتت فيه المرة لي فاتت فاش كانت هنا ... يلاه بغات تسد عليها الباب ، وهو يرجعو كيف كان بيديه ..

- شريهان (كتهرب منو) :

اشنو بغيتي ، فيا نعاس والله بغيت انرتاح ياك لاباس ؟ ،، مجاوبهاش جاي قبالتها وهي راجعة باللور .. كتشوف ليه فعينيه لي كيشوفو فيها ، إبتسامة شقية على شفايفو ..

- مالك (بإستفهام وإبتسامة) :

شنو واقع اممم مالك هاربة ؟ علاش كنشوف فعينيك الخوف ؟ (شد يدها بدون سابق إنذار) يديك باردين وعرقانين ، فايت ليا سمعت بلي اليدين منين كيكونو باردين وعرقانين ، كيكون عندهم جوج ديال أسباب ، يا الخوف (سكت ثواني قليلة ورجع هضر) ولا الحـــب ..

لا شَگ أنَّنا جميعًا نبحثُ عن الحُبِّ وعن ذلِگ الشَّخص الذي يحمِلنَا بِـ قلبِه علىٰ أجنِحة مِن الأمَان ..، ويفِيضُ علىٰ أرواحِنا مِن المَحبَّةِ عطاءً يبعثُ بِـ قلوبِنا نبضَ الحيَاة..!!

ولکن في رِحلةِ بحثِگ تِلگ هل سَألتَ نفسَگ أنت إذا كنتَ تملِکُ مِن هذه المُقوِّمَات مَا تستطِيع أن تمنَحه لِـ الآخرِين..؟!! أمَّابعد إذا أردتَ أن تتعثَّر بينَ دروبِ الحيَاة بِـ الحُبِّ..؛ فَـ عليگ أن تتعلَّم أولاً گيفَ تُحِبُّ..؟!! وعلىٰ الحُبِّ دائمًا وأبدًا نلتــقي ..

_________________

- رجعات اللور ناطرة يدها من يدو ، كتحرك راسها بتوتر .. رجعات شعرها اللور وعطاتو بظهر :

انا بغيت انفهم منين كتجيب هاد الهضرة ، والله العظيم الى غير كتخربق ... (ضارت على غفلة لقاتو مقابل معاها وقريب ليها لدرجة كبيرة ) ..

- شريهان : واش واش واخا تخرج ، راه بغيت نبدل عليا وبغيت (ختم المسافة لي بيناتها جرها وعنقها) ..

- مالك :

شششششش واخا تسكتي دقيقة وحدة ، دقيقة وحدة مادويش فيها ومتݣولي والو ، غير سمعي قلبك وسمعي قلبي وسكتي .. بقا معنقها مدة رجليهم غادية جايا بحال الى كيشطحو على شي موسيقى ، شريهان نسات راسها بين يديه كتحس براسها مرتاحة وفرحانة ... واحد الاحساس غريب عليها ، عاجبها الحال بزاف ماعرفاش شنو هاد الإحساس ولكن لي عارفة ، هو انها فرحانة بزاف معاه وهادشي ماتقدرش تنكرو نهائيا ..

أما هو عمرو فحياتو جرب بحال هاد الإحساس ، إحساس أنك متقدش تحكم فأحاسيسك ودير شي حوايج لي كنتي ضدهم من شحال هادي ، مشاعرك بوحدهم لي مسيطرين عليك ... بحال الى مخك تلحس ، يديها كانو محطوطين على صدرو .. جبهتو محطوطة على جبهتها ، يدو طلعات بشوية رجعات خصلة من شعرها لورا ودنيها ... دوز نيفو على عنقها كيستنشق ريحتها المتميزة عندو ، لي كتخلي عقلو غايب ... قلبو كان كيضرب ، اما هي كانت بحال شي ورقة بين يديه صدرها كيطلع وكينزل ... شفايفو كيرددو كلمة وحدة .. الكلمة لي مان ناكرها وكان مخبيها ، وماباغيش يعتارف بيها حتى لراسو ... ولكن صافي جا الوقت لي يخرجها ويبوح بيها ولي بغا يوقع ، يوقع مابقاش هامو صافي :

كنبغيك كنبغيك بزاف ، كنبغيك وعمري بغيت شي وحدة قدما بغيتك ..

- مجاوباتوش من غير يديها لي كانو معنقين عنقو من اللور ، كتستنشق ريحتو الرجولية ... شد وجها بين يديه كيشوف فعينيها لي كيسحروه وكيخدروه ... ختم المسافة لي كانت بيناتهم بقبلة طويلة تجمعو فيها ݣاع أحاسيسهم لي كانو مدفونين هادي شحال ومخبيينهم قبلة ترجمات الشوق لي كيحسو بيه من جهة بعضياتهم ... بعد عليها بشوية كينهج ، جمع شعرها بيديه ورجعو لور شدو بقبضة يدو وليد لوخرا كيدوز بيها على وجها ، حاط راسو على راسها ، صدرو كيطلع وينزل ماقادش يكبت الشعور لي كيحس بيه كان كيتصرف بحال شي واحد حمق ماعندوش العقل ، مابقاش كيفكر نهائيا بعقلو قلبو بوحدو لي متحكم فيه ..

- هادشي مخاصوش يبقا هكا منقدش نصبر ومنقدش ندير شيحاجة لي تاديك وتأدي العائلة ..

- فاش كتفكر شنو كتقصد ؟

- خطوبتنا خاصها تكون حقيقية ، منقدش نفوت الحدود معاك خاص نحافظ عليك وتكوني ديالي فالحلال ، صافي عييت مابقيتش قاد نصبر صافي براكة ..

_________________

- كانو ݣالسين بجوج فوق الفوتوي ، هي مزال بكسوتها وحتى هو مزال بالباس السهرة ، كان معنقها كيدوز يديه على شعرها ... ساكتين حتى نطقات :

من إيمتا وانت كتبغيني ، زعمة من إيمتا حسيتي بهاد الإحساس ؟

- مالك (تنهد تنهيدة طويلة ) :

يقد يكون حب الطفولة وتدفن من شحال هادي ، ولكن فاش كنا صغار مكنتش كنحملك ... كنتي ديما تابعاني ولاصقة فيا وانا مكايعجبنيش الحال ، كنتي كتݣولي ليا انكبرو وغادي نتزوجو ، وانا مكنحملش راسي ... وفاش تلاقينا جيتيني فشكل ماتبدلتيش ، كاع داك الأعصاب مزال كتركبيه فيا ... من هادشي كامل والله معارف كيفاش حتى بغيتك معارفش ، ومابغيتش نعرف لي عارفو هو كنبغيك بزاف كثر متصوري ... هادشي عمري حسيت بيه نهائيا .. بقاات ساكتة مدة حتى فيقها بسؤال ديالو :

وأنــت ؟

- شريهان (ناضت وتقادات فالݣلسة وتقابلات معاه ) :

مالي انا ؟

- مــالـك (كيشوف ليها فعينيها) :

لحد الآن ماݣلتيش ليا واش كتبغيني ؟ انا عتارفت ليك ولكن انت ماݣلتي والو !! واش كتبغيني ؟

- واقف مقابل مع القمر هاز كاس ديال المشروب فيدو ، والإبتسامة على وجهو عاجبو الحال وكيفكر فيها ... وجها وعينيها مابغاوش يتنساو ليه .. حس بيه واقف وراه :

لاش واقف تم بحال شي شفار ، ياك لاباس ؟

- دجيكو :

بغيت غير نݣوليك ، بلي جاونا بزاف ديال العروض ، شحال من واحد باغي يدخل معاك شريك ، وانا كنشوف بلي فرصة واعرة ومخاصناش نفلتوهاو ...

- كارلو (ضار عندو بالعرض البطيء ) :

أنت كتشوفهم عروض مزيانة ، ولكن انا لا ... انا عرض واحد لي كنشوفو مناسبني ، هو شريهان دخل شريكة معايا ... خاصك هادشي تخليه همك الوحيد ، شيحاجة من غيرو لا سمعتي ولا ماسمعتيش ..

- دجيكو ( محاملش هاد البلان ) :

سينيور كارلو ، انا سينين وانا خدام معاك ... من عادتك التأني مكتكونش متهور بهاد الشكل ، الله يخليك حاول تفكر مزيان فهاد الشي ( مع كمل اخر كلمة تسمع صوت كاس تهرس ... كيشوف قدامو كارلو لي ملامحو مكانوش كيبانو بظلام ، ويدو لي كانت مجروحة فيها دم ديال الزاج لي تهرس فيدو ) ..

- كارلو ( ببرودة) :

غادي ندير راسي ماسمعت والو ، غادي ندير بوجه السينين لي خدمتي فيها عندي ، سمع مزيان انا لي كنصدر الاوامر هنا ، وانت ماعليك غير تنفد سمعتي ولا لا ؟

- دجيكو ( بخوف) :

سي سينيور ..

- كارلو :

مزيان ، تاصل بجورجيت ، وݣوليها توجد البنات ... غدا خاصهم يكونو بليل فالكلوپ ..

- دجيكو :

واخا سينيور ، كون هاني سمحليا .. حدر راسو ومشا ..

_________________

- مالك :

سولتك ومزال مجاوبتينيش .. واش كتبغيني ولالا ؟

- شريهان (وقفات متوترة ) :

انا معارفاش أمالك ماعارفاش ، ماعرفاش شنو حقيقة إحساسي ، نكدب الى قلت ليك مكنحسش بالامان وانا معاك ، وبالفرحة وانا معاك ، وكنكون على كبيعتي مكنتصنع ما والو .. داك نهار ماعجبنيش الحال فاش شافت فيك ديك الكوتش ديال الايتيكيت ، وماعحبنيش الحال كيفاش كنتي كتشوف فيها ، وحتى فاش ضرت فيك ماعرفت علاش يمكن كنت خايفة ، والله ماعرفت انا تالفة بزاف ..

- مالك (وقف ومشا عندها شد ليها فيديها ) :

ماعنديش مشكيل نهائيا ، هادشي انا مفرحني وبزاف ... المهم كتحسي بشيحاجة ، الحب غادي يجي من بعد ... المهم دابا هو خطوبتنا تحول لحقيقة ماشي غير تمثيلية ... واش موافقة ؟

- شريهان :

انا خايفة امالك ، خايفة بزاف من المستقبل ... انا بغيت نحقق داتي وبغيت (حط يدو على فمها وسكتها ) .. :

- شششش سمعيني مزيان وخليني نهضر ممكن ..

- شريهان (هزات راسها فيه كتشوف فيه بعينيها لي كيبريو كتسناه شنو غادي يݣوليها ) :

كــنسـمعـك ..

فالڤيلا ..

- واقفة نزهة كتشوف داكشي لي قدامها .. :

زهرة ختي شوفي واش مزال ناقصانا شيحاجة ؟

- زهرة :

وتبارك الله كولشي خديناه ، خدينا الورد وشكلاط وخديتي ليها تفاصل ديال الثوب ، حمقوني تبارك الله ..

- نزهة :

جاب الله واحد السيدة كنعرفها ، جابتهم معاها من سعودية ، وخديتهم عندها ..

- زهرة :

كولشي غزال تبارك الله ، حمقوني حتى داكشي لي خديتي لشريهان كيهبل ، زعمة سعدات عرايساتك بيك والله العظيم ..

- نزهة :

وياختي والله العظيم ، كون صبت ماعرفت شنو ناخود مزال ، الخاتم راه عند سعد خداه ... صنيدلات وسيكان حتى هوما خديناهم ..

- قاطعهم عمر :

هادشي غير خطوبة ، اما نهار العرس علم الله شنو غادي تاخدو ليها ..

- نزهة :

هادوك راه بناتي ، لي حلو عليها فمهم نشريها ليهم ، علاش انا شحال عندي منكم ، غير 3 الوليدات ... ودابا ربي ايرزقني بجوج بنات ، خاصك غير انت تنعل الشيطان وتزيدني شي بنت اخرى ، تزوج ودير دارك حتى انت ..

- عمر (كيضحك) :

ناري الواليدة ، بديتي عاوتاني ... واش هاد الموضوع انبقاو ندويو فيه بزاف .. نهار ايكتاب ، انشدك من يديك وغادي نديك تخطبي ليا اكوني هانية ..

- زهرة :

انا غادي نطلع نعس ، عيييت رجليا طابو عليا بدوران ... وسيري حتى انت رتاحي غدا خاصنا نفيقو بكري شوية ، باش يلاه نوجدو راسنا ونقادو هادشي ونمشيو لعند الناس ..

- عمر : تصبحي على خير أخالتي ، الواليدة تصبحي على خير ..

- زهرة ونزهة : تلقى الخير اولدي ..

____________________

فشقة سكينة .. واقفة كتشوف فالمسوة لي ختارت تلبس غدا ، فالبيج ومنبتة بحجيرات خفاف جهة الصظر ، يديها كلوش مطلوقين ..

- سكينة : واش زوينة غادي تجي معايا زعمة ؟

- إشراق (من الموزينة كدير أخر لمسات للحلويات لي وجدات ) :

والله العظيم الى زوينة ، وفاش لبستيها ݣبيلة جاتك كتحمق أصاحبتي ، نعلي شيطان وسيري توضاي وصلي جوج ركعات ، باش ربي يسر ليك الأمور ..

- سكينة :

ناري الخلعة شداني ، واش انا غدا انتخطب ؟ والله العظيم مامتيقة مكانت ݣاع على البال ولا على الخاطر ، سبحان الله ..

- إشراق :

الحمد لله ربي كبير ، وإن مع العسر يسرا ... راه ربي جازاك على قد نيتك وغادي يعوضك غير إن شاء الله، لا انا لا انت انت اتخطبي وانا انخدم مع عمر ..

- سكينة :

عوووووماااااار ، وليتي تعيطي عليه حرفية ، وخارجة من فمك بحال العسل هاي هاي هاي ..

- إشراق (وقفات قبالتها) :

انا غادي نمشي نرتاح نعس ، حيت خاص نفيق بكري ، الوقت لي اتمشي فيه انت لصالون ، انا غادي نكلس نوجد فيه ، مغاديش نديها فحماقك تاني تصبحي على خير ..

- سكينة (كضحك عليها) :

وغييير بقاي تخبي ، مزال غادي تبعيني وغادي تݣولي سكينة ݣالت ..

واقفة مقابلة مع شميسة لي داخلة من السرجم ، كتفكر وساهية ... ساهية فكلامو وداكشي لي ݣاليها لبارح ..

فــلاش بــاك

- مــالــك (كيشوف ليها فعينيها ) :

أنا معاك فأي حاجة بغيتي ديريها ، مايمكنش ليا نخليك بالعكس ، نجاحك من نجاحي انا ... أهم حاجة هو تكوني معايا ، وكوني اكيدة راه عمري نغادي نخليك ... شريهان لي كيبغي كيدير أي حاجة ، فسبيل يشوف حبيبو فرحان ، هادي خاصك ديريها فبالك ... لي كيبغي كيعطي ومكايتسناش ياخود ، حتى يجي واحد نهار وشخص الثاني كيݣوليه حبس ، صافي انا مابقيتش باغيك ولا محتاجك ... حيدي داك التخوف لي كتحسي بيه فقلبك ، راه الى ماشفتيش القداام عمرك مغادي تقدمي فحياتك ، وعمرك مغادي ديري حتى حاجة فحياتك ، الحياة فرص والفرصة المزيانة كتجي مرة مرة وحدة مكتعاودش ، أنا مكنݣوليكش بحال هكا باش تبغيني بزز ، انا هادشي لي كتحسي بيه دابا كافيني ماعنديش فيه إشكال ، حيت مدام كنبغيك انصبر عليك ، ولكن هادشي كنݣولو ليك باش ماتبقايش شادة على راسك ، تيقي فراسك وعطي الفرصة لراسك ، حيت أيجي واحد الوقت اتݣولي علاش ماخليتش قلبي يبغي ، وعلاش ماعطيتش فرصة لراسي ... أنا دابا مابغيتش منك إجابة ، سيري رتاحي وفكري مزيااان ... وغدا فصباح قبل مانمشيو لدار ، بغيتك تقرري وتعطيني جواب أخير (باس ليها راسها) تصبحي على خير ، خلاها ودخل لبيتو سد عليه ...

نـــهــايــة الـــفـــلاش بــاك

- تنهدات تنهيدة طويلة ، الليل كلو وهي كتفكر فكلامو ... كتذكر جميع تصرفاتو معاها ، نهار يديها ضروها وداواها ... كيفاش وقف معاها ، ونصائحو ليها وخوفو عليها ، حتى من نظراتو ليها ، وكيفاش سمع ليها وحافظ على سرها وخباه ، بزاااف ديال المواقف وقعو بيناتهم ، وبينات ليها بلي مالك فعلا تعول عليه بعينيها مغمضين ، رجولتو وصرامتو وقوتو وكلامو ، أي بنت ممكن تمناه علاش أتخبي هادشي ، علاش اتخبي بلي فعلا منين كتكون معاه كتحس بالأمان ، فاش كتكون معاه كتحس براسها فرحانة ، مكتبغيش الوقت الدوز دغية ... ريحتو كتعجبها الإبتسامة ديالو وعينيه اي حاجة فيه زوينة ، هو أه عصبي واحد شوية لا ماشي واحد شوية بزاااف (تفكرات عصبيتو وضحكات) مرات كيبغي يعصبها بلعاني ، ولكن حنين وبحال قلبو مكاينش (فيقها الدقان فالباب) ... قفزات من بلاصتها حيت كانت ساهية ، شافت فساعة لقاتها العشرة ... هادي هي الوقت ، خدات نفس عمييييق ... هزات الساك ديالها وتيليفونها وتوجها لباب حلاتو .. كان واقف بكامل أناقتو والإبتسامة على وجهو :

- صباح النور ..

- شريهان (رضات ليه الإبتسامة) :

صباح الخير ، كيف صبحتي مزيان ؟

- مالك :

الحمد لله بيخير ، الواليدة سونات لينا خاصنا نخرجو دابا .. ندوزو نفطرو فشي قهوة دغية ونكملو الطريق صافي ؟

- شريهان : اهاه صافي مزيانة .. عطاها بظهر هز سوارت طوموبيل وتيليفونو حتى وقفاتو :

مالك .. ضار عندها :

وي ..

- شريهان : انا فكرت فداكشي لي ݣلتي ليا لبارح ..

- مالك :

مكاين لاش تقرري ، دابا لبارح ݣلت ليك بغيت جوابك هاد الصباح ، ولكن هاد المسألة خاصها تفكير كثر ، داكشي باش مكاين لاش تزربي ..

- شريهان : مالك خليني نهضر الله يخليك ..

- مالك :

داكوغ ڤازي ، كنسمعك ..

- شريهان :

فعلا الموضوع خاصو تفكير كثييير كيف ݣلتي ، ومكايتخادش بهاد السهولة ... ولكن الى كان داك الشخص مكنعرفوهش ، ومكنعرفوش تصرفاتو ماعشرناهش ... ولكن الى كان داك الإنسان كنعرفوه مزيان ، وحنا عارفين بينا وبين راسنا بلي راه مزيان ومغانلقاوش بحالو ، وبحالو وبحال المعدن ديالو قليل وبزااف ، وبلي الى ضيعنا هاد الفرصة راه انكونو أكبر مكلخين على وجه الكرة الأرضية ، اه انا خايفة من الحب ، خايفة نفتح قلبي خايفة نتيق ... ولكن معاك انت لا ، معاك الخوف مابقاش ... معاك وليت كنضحك وكنفرح وكنحس براسي مرتاحة بزاف ، معاك مكنݣولش شنو ممكن يوقع غدا ، حيت مكنفكرش فغدا عارفاه ايكون زوين بحال الأيام لي دازو ، إيه انت عصبي شوية منكروش ههههه ، ولكن الحياة هي هادي والعلاقة كيكونو فيها تنازلات ، مرة انت طالع مرة انا وهي غادية واحد يصبر على الثاني ، وانا متأكدة مليون فالمية ، بلي الحب انعرفو معاك فمدة شهر لالا شهر بزااف ، فظرف أيام معدودة ، حيت حسيت معاك حوايج عمري فحياتي ماحسيت بيهم نهائيا ، وأنا فرحانة بيهم ، داكشي باش أه انا موافقة نتزوج بيك ونكمل معاك حياتي ..

- مالك عينيه كانو كيبريو ، مامتيقش شنو كيسمع ... كيحس براسو كيحلم ، كيحس بحال شي حجرة كانت فوق كتافو وطاحت .. قرب ليها وخدا يديها بين يديه كيشوف ليها فعينيها :

بكلامك خليتيني أسعد رجل على وجه الكرة الأرضية ، وكنواعدك انكون معاك فشدة والحلوة ، انكون معاك فنجاحاتك ، انكون معاك فالصغر حتى لكبر ، حتى نشيخو انا وياك ، وتولي تنساي ويكثر فيك النݣير هههه (عينيه غرغرو بدموع) ..

- شريهان (ماحساتش بدموعها حتى هبطو ، هزات يدها ومسحات دموعو) :

وهادو لاش دابا ؟

- مالك : ماعرفتش ، مافخباريش بلي الحب كيخليك تحس بحال هكا ..

- شريهان (ضحكات ومسحات دموعها) :

نسينا راسنا ، خاصنا نمشيو ولا خالتي نزهة اديرنا فجريدة الصباح هههه ..

- مالك (باس ليها يديها ، وشد يدها شابك صباعها مع صباع يديه ) :

واخا يلاه مشينا ؟

- شريهان (حركات ليه راسها) : مــشينا ..

_______________

فالڤيلا ... نازل سعد بكل أناقتو ، لابس سروال ديال الثوب فالكحل مع سباط فنفس اللون ، شوميز فالبيض ... مع ڤيست كحلة مزينة بسليسلات من الجيب ، كان كيبان أنيق وزوين بزاف ..

- نزهة (لابسة لبسة غزالة فالتركواز مع الإكسيسوارات وطالقة شعرها ) :

تبارك الله على ولدي ، جيتي فن ماشاء الله عليك ..

- سعد (عنقها) :

الله يحفظك ليا الواليدة ، ديما رافعة ليا المعنويات حتى انت جيتي قرطاسة ..

- نزهة (بإستغراب) :

أويلي على الولد تبدل ، فين مشات ماما ؟ ومنين تعلمتي هاد القرطاسة ؟

- زهرة (لابسة جلابة فالكرونة وفولارة ديالها وصباط ميني طالون) :

شكون من غيرها ، شريهان هنا ومابغيتيهش يتعلم أختي ..

- نزهة :

شفتهم تعطلو ، 10 ونص هادي ... وإيمتا يلبسو حتى هوما ..

- عمر (نازل من الدروج) :

الواليدة الله يهديك ، حنا غاديين غانتغداو عند الناس ، ماشي نفطرو عندهم ..

- نزهة (طلعاتو ونزلاتو بإعجاب ، حتى هو كان أنيق بسوميز ديالو لي فالݣري ، وسروال ثوب فنفس اللون ، وخصلات من شعرو لي على عينيه ) :

تبارك الله على وليداتي ماشاء الله عليك ، ويلاه يلاه يوجدو راسهم ونشدو طريق ، مجاتش نجيو مع الغدا نيشان ولاواه ... فين هو أحمد ؟

- احمد (من جهة باب الجردة ) :

هاني هنا الالة نزهة ، انا وسي سعيد كنتسناو فيكم ... حتى وكان توجدو راسكم ..

- زهرة :

انمشي نشوف حليمة واش سلات ولالا ؟

- تسمع صوت طوموبيل وقفات قدام الباب ..

- نزهة :

وأخيرا هاهوما جاو ... انت ما بزوج تبعوني نقادو الحوايج فطوموبيل يلاه زيدو ..

- تحل الباب ودخلو بزوج ..

- نزهة :

على سلامتكم ، يلاه طلعو وجدو راسكم دغية باش نمشيو راه تعطلنا ..

- مالك :

الواليدة وغير بشوية عليك ، كولشي أيدوز هو هداك مالك مخلوعة (خدا وجها بين يده وباس ليها راسها ويديها خلاها غير كتشوف فيه ) ..

- نزهة (من بعدما طلع) :

شفتو فرحان اليوم العجب ..

- شريهان (جاتها الضحكة حدرات راسها وطلعات تبدل حوايجها وتوجد راسها) ..

- فشقة سكينة ..

- خرجات سكينة من البيت ، لابسة كسيوة فالبيج باردة ، يديها نازلين كلوش وطويلة ، طالقة شعرها مصايباه بخصلات كورلي خفاف ، اما المكياج برزات غير عينيها ولونها ، اما شفايفها كتافات بعكر نيود ... رجليها لابسة صندالة شفافة ، دومي طالون .. كتبان بريئة وزوينة بزاف ، واقفة شمس كتشوف فيها وكضحك :

حتى أنا عروسة بحالكي شوفي لاغوب ديالي ..

- سكينة (كضحك هزاتها ) :

أنت راه أحسن عروسة ، حسن مني أنا ݣاع ..

- خرجات إشراق من الكوزينة ، لابسة كسوة تحت الركبة فالأزرق ملكي ، نزلة من الخصر كلوش ... الكمايم مع صباط طالون فالكحل ، شعرها جامعاه كلو على شكل ديل حصان ، ومزيناه بمقبط منبت بحجيرات ، اما المكياج دايراه خفيف ، والإكسيسوارات ، سليسلة خفيفة مع الحلقات ديالها وخاتمها وكورميط ديال اليد ديالها ..

- نزلي أبنتي ماتخسريش لخالتك شعرها ..

- سكينة (كتصفر فاش شافتها) :

هاي هاي هاي ، وزيانيتي العفريتة ، على سلامة عاد كتاب تلبسي هاد الكسوة لي خديت ليك ..

- إشراق كتحط الحلوة فوق الطبلة ... :

باااز ليك والى مالبستها فخطوبة ختي إيمتا غادي نلبسها ، مكانش وقتها ودابا جا وقتها ..

- سكينة :

جات معاك فنة اختي .. جيتي زوينة بزاااف والله العظيم، هكا نبغيك خليك ديما بحال هكا ، فرحتيني ..

- إشراق (بإبتسامة) :

الله يخليك ديما فرحانة .. المهم انمشي نطل على الغدا راه مابقا والو ويوصلو ، وانت حطي البلاطو ديال العصير صافي ..

- سكينة : صافي أختي تهناي ..

____________________

- شريهان فبيتها ، لبسات كسوة فالموڤ بارد فيها وريدات فالخزي ، شعرها طلقاتو على راحتو ... لبسات صندالة عالية وهزات ساك فالخزي ، هزات تيليفون ديالها يلاه اتخرج حتى سونا ..

- شريهان (كتشوف فنمرة غريبة ، فتحات الخط وجاوبات) :

وي ألو .. (تدق الباب وتحل دخل مصطفى اشرات ليه بيدها باش يسكت) ..

- سينيورة شيري ، كنتمنى منكونش كنبرزطك ..

- شريهان :

لا لا بالعكس ، ولكن شكون معايا ؟

- كارلو ، كارلو كابوني ..

- شريهان :

سينيور كارلو ، فرصة سعيدة ..

- كارلو :

خديت نمرة ديالك ونمرة سينيور مالك ، باش نكمن عليك بالي بقا مشغور معاك لبارح .. كيف بقيتي شوية ؟

- شريهان :

كنشكرك للإهتمام ديالك ، ولكن انا دابا مزيانة غير العيا ومع الجو تبدل عليا داكشي باش ..

- كارلو :

ياكما كاين شي ديرونجمو ، حيت كيبان ليا صوتك ماشي هو هداك ؟

- شريهان :

لا لا بالعكس ، غير هو تاصلتي فوقت غير مناسب ، عندنا مناسبة عائلية داكشي باش ..

- كارلو :

اه ديزولي ، خليت ليك الراحة ، نتاصل بيك من بعد مزال عندنا فاش نهضرو

- شريهان :

اهاه ، وأنا مستعدة فأي وقت شرف ليا ، سينيور كارلو ، بسلامة ..

- مصطفى (بقلق) :

شنو ݣاليك ؟ علاش تاصل بيك ومنين جاب نمرتك ؟

- شريهان (عاد رتاحت) :

وباش أنعرف أخويا ، كاليك شد نمرتي انا ومالك ومالو مايتاصل بيه هو ، تاحريميات .. كاليك بغيت نعرفك كيف بقيتي ، راه شفتي لي وقع ليا لبارح ..

- مصطفى :

عارف اختي هادشي فوق طاقتك غير صبري عفاك ، حاولي هاد المرة ماديريش شي ردة فعل من جهة هاداك خونا ، مخاصناش نتيرو شكوك فهمتيني ... عارفها ماسهلاش وكتفكري فلي وقع ولكن غير حاولي الله يخليك ، المهم اش ݣاليك فالأخر ..؟

- شريهان :

ݣاليا ، بلي مزال ايهضر معايا ، وبلي كاين فاش خاصنا نهضرو ... وحتى ݣلت ليه مرحبا ..

- مصطفى : اوك مزيان ، ختي بلاما نوصيك الله يخليك ..

- شريهان (تنهدات تنهيدة طويلة) :

غير كون هاني أخويا ، عارفة شنو كندير انت غير رتاح من جهتي .. مايكون غير الخير دابا تشوف ...

- شريهان : فكرتيني خاصني نهضر معاك فواحد الموضوع ..

- مصطفى :

ياك لاباس ؟ ياكما واقعة شي حاجة ؟

- شريهان :

متخافش ماشي شيحاجة خايبة ، منقدش نعاود ليك دابا زربانين ، حتى نرجع شيحاجة مهمة ..

- مصطفى :

صافي سيري حتى ترجعي ، مغاديش نقد نمشي معاكم ... مخاصش نبان معاكم واحد سيمانة على الأقل ، حتى نهار نبان بلي زعمة عاد جيت من المغرب فهمتيني .. والى شفتي علي هضري ليه فالموضوع لي تفاهمنا عليه صافي ، ماتنسايش ..

- شريهان :

اه فهمتك لا صافي كون هاني ، المهم حتى نرجع أنا مشيت ..

_____________________

- سونا الباب ..

- سكينة : هدا أيكون غير علي .. مشات للباب حلاتو ، فعلا كان علي هاز معاه واحد لاطارط .. سلم عليها ودخل .. :

عروستنا فين نحط هادي ؟

- سكينة : عطيها لإشراق ختي راها فالكوزينة ..

- إشراق (سمعات حسو وخرجات عندهم) :

علي مرحبا بيك أخويا .. عدبتي راسك

- علي :

متبقايش تكولي بحال هكا ، سكينة راه ختي ماشي ختك غير انت ، كولشي هو هداك كاين شي خلعة شي ستريس ؟؟

- سكينة :

نااااري بزاااف غير خليها على الله وصافي ، مابقى والو ويجيو كنحس بݣلبي بغا يسكت ..

- علي (كيضحك) :

عادي عادي كتوقع فأحسن العائلات ... كاين فاش نعاونكم راني خطير فلاكويزين ..

- إشراق (كضحك) :

هي كتقن الشلايظ ؟

- علي (كيقاد كمايمو) :

ناااري دكرتي المجال ديالي ، هي ندخلو للكوزينة ..

- إشراق : زيد تبعني ..

- دخل علي للكوزينة مع إشراق ، إيدها بيدو ... عاوناتو فشلايظ كولشي وجدوه ، أي حاجة مازال ماكملاتها وجدها معاها .. مع سلاو وݣلسو يرتاحو مع سونا الباب ..

- سكينة (وقفات تالفة ماعرفات دخل للكوزينة ولا لبيت ولا طواليط ، داخت ) :

ناري فين انمشي ؟

- إشراق : سيري لبيت سيري علي انت خل الباب ... مشات سكينة للبيت كتجري ، وعلي مشا يحل الباب ..

- علي(الإبتسامة على وجهو ) :

مرحبا مرحبا بيكم ..

- نزهة (بكل أناقة والضحكة على وجها) :

ولدي علي لاباس عليك (سلمات عليه ودخلات .. تبعها أحمد وزهرة وسعيد وحليمة ، عاد سعد هاز مشموم ديال الورد وشوكولا ، اما الحوايج كان هازهم عمر ومالك وشريهان ، لصقوهوم فيهم وسلتو هوما) ..

- شريهان (متقلة) :

هاك شد من عندي ، واحد باغي يتزوج وملصق فينا حنا الثقل وجهك مصندل ..

إشراق (تلقات ليهم سلمات عليهم بدات كتشد عندهم وتحط عجبها الحال بتكبيرة لي كبرو بختها ، جات غينيها على ياسمين لي واقفة كتلعب بكسوتها) :

شمس ، أجي ابنتي خودي ياسمين او وريها الألعاب ديالك ..

- شمس : واخا مامي (شدات شمس لياسمين فيدها وداتها معاها

- إشراق : مرحبا بيكم وألف مرحبا نورتونا ..

- زهرة : بنورك أبنتي تبارك الله عليك ..

- عمر (كان ساكت وكيشوف فإشراق ، أول مرة أيشوفها بهاد الشكل ) ..

- نزهة :

فين هي عروستنا ؟ حشمانة كاعما شفتها ..

- شريهان (كتفرنس) :

هاديك انا لي غادي نمشي نجيبها (ناضت من حداهم وقصدات بيت سكينة ، دقات ودخلات ) ..

- شريهان (كتفرنس داخلة عندها سادة وراها البااب) :

ياختي ياختي على زيونات والفنون ، جيتي كتحمقي ياختي ... والحشمة يلالة أش هدا أش كنشوف أنا

سكينة:(التوتر باين عليها) جيييتو زعمااا علاش جيييتو

شريهان:(كطنز عليها) والو يا ختي غير جيت نزوركم وغنمشي تي توكضي مالكي تفاتفتي.. رااك غتخطبي زعمااا

سكينة: اااه ااه انا دباا غنتخطب ياااك..

شريهان:سكينة تبتي اويلي بزااااف على توتر هههههه نتي راه فتي ديك المرحلة يكما وكلوك شي حاجة

سكينة:صاف متزيديش عليا رااه كنحس بكرشي كتزغرت والفراشاات كيلعبو فقلبي خلاص ودني كيصفرو..

شريهان:هدا غير الخطوبة وواقع ليك هكاا اما كون وصل لعرس كون عواجيتي لينا هنااا...

سكينة:وصاف عااارفاني دغياا كيلعب عليا ستريس(شافت فيها) كجيييت

شريهان:قول أعود برب الفلق كتحمقي مشاء الله.... الله يحفضكم ويحجبكم من العين ويواتيكم يا رب..

سكينة :(هزات يديها لسما)يا ربي أمين

هزات عينييها كطلعها وتهبطهاا بشي شووفات غراااب بحالا باغا تسولها

ولكن مترردة وكتسرط شبغات تقول وحتى شريهان فهماتها طايرة مغرابش عليها هاد شوفات لي كدير فيييها..

شريهان:غيير هضري وقولي اش كيدور لييك فدااك الرااس

سكينة:(كدور فعينيها) يا ربي سلامة بااش عرفتي

شريهان:غاادي توريني فييك بحالا مكنعرفكش هضري اش تماا

سكينة:(شافت فيها)لفضول قتلني كي درتي لخطووبتك مع ماالك

شريهان:قصة طويييلة خاصها شي كاس ديال أتاي منعنع وجلسة هيااا هااديك باش نعاااود لك.... القصة طويييلة بزااف وفيها بزااف ميتقاال

سكينة:(ناضت واقفة) هي دبااا انووض نصاايبو لك وعااودي ليااا..

شريهان:(ضرباتها راسها) ههههههههههه شفتي نتي والله حتى ضربو ليك الفيزيبلات ديال راسك

راااه نااس كيتسنااو برااااا جيت نخرج صدقت باايتة معاك فهااد البيييت ايصدقو جامعيني معااااك

سكينة:والله حتى كنسا راه انتخطب

جلساات كتقااد فحااالتها وكتأكد من راسها واش كلشي فيها هوا هدااك....

وكتعاود فلعكر ديالها اللي كلاتو بستريس اللي غلبها وهي جالسة كتسمع فيهم داخلين قبيلا..

شريهان:وزويييينة غا زييييديي قداااامي اتشحفيهم متخلي ليهم جهد فين يقراو حتى الفااتحة..

جرااااتها شاداها من كتاافها وزاادت خااارجة بييها لصاالون فين كانو مجموعين كاملين كيتحتوو وضحكااتهم مااالية لمكان....

علاش لا واليوم نهار كبير ومضخم عندهم مخليين سعد جالس على أعصابو حاضي الدخلة ديال الصالون غير فوقاش تبان ليه دااخلة كيدعي على شريهان فخااطرو صيفطووها تعيط عليها صدقاات جالسة حتى هيا كتر منها....

ماهيا إلا ثواني حتى سمعوو شريهان كتصلي على نبي وتزغرت غا بوحدها عارفينها حمقة وحتى واحد ميقدر يوقفها

جاارة جنبهاا سكينة اللي منزلة راسها طاحت عليها واحد الحشمة مقدات حتى تهز رااسها فيهم ولا حتى تشوف فيهم..

جروها وجلسووها حتى سعد اللي ملي دخلات وهوا هاز فيها عينيه االي كيبرييو بالفرحة كيحس بهاد نهار بحال شي حلم ومباغيش يفييق منو حتى نغزو عمر اللي كان جالس حدااه..

عمر:مشيتي خلاا اودي يا ولد نزهة

سعد:(عاد عاق براسو وسد فمو لي كان حاالو حس براسو بحالا كان فشي متاهة وشي حد خرجو..

سعد:(شاف فيه) واش نت خارج ليا فعوودي حيد اصحبي من حدااياا خليني نخضر عيني حلالا طيباا..

عمر:نت اللي جات معااك اسيدي شكون بحاالك

جلساات سكينة حدا سعد وراسها باقي نازل للأرض كتحك يديها مع بعضياتهم وطرطق فصباعها

مخلية شريهان اتموت بالضحك عليها وفالحشمة لي نازلة عليها حيت عارفاها سطل بلا تقرقيب الكلبة تحشم وهيا ما تحشم...

سعد كون ما حشم منهم كون شد فيديها يزيد على ماابيها فالحشمة اللي غارقة فييها...

احمد: اوا سياادنا ما حد عروستنا جاات وكملات اللمة ندخلو فالموضوع ديريكت بلا كترة لغا بلا فاايدة..

إشراق:مقلتي عييب أعمي احمد

احمد: اوا سيادناا كيف كتعرفو اليوم متجمعنااش غير هكااك لمتنا ما هيا الى لفرحة وسعاادة داايمة لولاادنا اللي قررو يدخلو البيوت من أبوابها..

اليوم ان شاء الله جيينا ومجييناش غا هكاااك .. جينا طاالبين رااغبين فيد لالة لبنااات بنتي سكينة الولدنا لغالي ولد الغالية سعد على سنة الله ورسووله لقبلتو علينا بالطبع..

سعد:(هز عينو فيه بصدمة) تا كفاش لقبلتو علينا يااك هووما قاابلين (شااف فسكينة) هادو مفخبارهمش راه غاجينا نديرو صواب اما حنااا رااه مخطوبين رسمياا..

خرجااات فييه عينيها بصدمة ورجعات نزلاتهم مقدراتش تعاود تهز راسها بالفرطة لي دار ليها قدامهم مخلي كلشي كيخرا عليه بالضحك..

عمر:(ضربو لضهرو)ههههههههههههه فرطتيها اولد ميمتي مخليتي لينا ميتقال سير جلس نت بلاصة بااااك وطلبها منهم بلااصتو

سعد:ومالها صعيييبة عليا

غمز بااه زعماا بلا مقدمااات زربي لا يسخن طرح

احمد: اوا سياادنا أش قلتو..

إشراق: اوا عمي احمد انا متسالوني غير ندعي معاااهم بالخير والبنين والبناات ها لعروسة قداامكم

وموافقتها بحال موافقتي متزيدوني غير بالمباركة..

نزهة:اش قلتي ابنتي سكينة هزي راسك وهضري معانا..

سعد: موافقة الواليدة موااافقة غا هزو يدييكم نقراو فاتحة راكم طولتو....

جلسو كيضحكو علييه عارفينو مصطي فهااد الاموور..

احمد :(كيضحك) نهزو يدينا أسيادنا نقرااو الفاااتحة..

كلشي هز يديه كيقراو الفاتحة وصوت همساتهم او هوما كيقرااو هوا لي مسمووع غير سلااو وضرباااتها نزهة بوااحد تزغرييتة فاعلة تااركة مخلية

شريهان كتزغرت وراها واخا مكتعرفش..

اشراق : مبرووك عليكم

سعد : الله يبارك فييك انسيبتي

جبد لخواتم من جيبو غير شافو علي هوا يتزلع بالضحك

علي : (كيهمس لشريهان اللي كانت جالسة حدااه) هدا مكرهش يديها من دبااا معااااه وميخليهاش لييهم ضارب حسابو موجد لخوااتم

شريهان : ههههه علاش هي كرهاااات (شافت فسعد موجهة كلامها ليه) معندي ميتسااالك رااك موجد لخواااتم...

سعد : كنلعبو هناااا الحاجة فاش كطوال كتحمااض وانا مقادر على حموضة باغي لحلاوة..

هناا علي صاف مبقاش قاادر يصبر طلقهاا ليهم بضحكة هياا هاديك رغم انو عارف هضرتو معانيهاش كيييف فهمها هواا...

علي : هههههههههههههههههههههههههههههه

كلشي كيشوف فيه وكيضحك على ضحك لي كيدير واخا معارفينش علاش من غير مالك وعمر وشريهان اللي عرفوه علاياش كيضحك..

علي : ههههههه سمحو ليا ههههههههه ولكن جاتني فووغييغ هههههههه مقدييييتش فيين خليناها ههههههههه

جبد لخواتم وحطهم فوق الطبلة مخلي شريهان ناضت هازاهم غادة لكوزينة حتى قادات الصينية بلحليب وتمر وقادات لخواتم عااد جابتها حاطاه قدامهم....

هز خاااتم وركبو لييها مخليين زغااريت مسموعين وعلي كيصور فيهم كيرسخ اللحضة عندو حتى يصيفط ليهم تصاور...

حتى هياا ركباات لييه الخاتم وشربو لبعضيااتهم تمر ولحلييب تحت أجواء زغااريت اللي طاغية فالمكان...

بايس ليها يديها كون ما حشم من باه وخاف يزبلها حتى يبوسها قداامهم..

ناضت شريهان باش تمشي لكوزينة توجد الطبلة ويحطو وغمزات علي يتبعها خلات كلشي حااضيها..

شريهان : (عرفات راسها زبلاتها وهضراات باش تعتق موقف) علي نوض اصحبي عاونني فالكوزينة لفيك ميدير شي حاجة

علي : اييه هي اللولة هااني نايض دبااا نييت سيري هاني ورااك

مشاات دااخلة لكووزينة وخلاتو وراها حتى دخلو..

علي : اش تما لاش معيطة عليا..

شريهان : عارفني مغنعيطش غا هكااك ..

علي : غتوريني فييك اش تمااا ؟

- شريهان (قربات كتهمس ليه لا يسمعهم شي حد) :

السبت الجاي انكونو انا ومالك فالملوپ ديال كارلو ، وخاصك حتى انت تكون معانا ..

- علي (بإستغراب) :

وعلاش انكون معاكم مافهمتش ؟ شريهان شنو واقع دخلي نيشان فالموضوع ..

- شريهان :

مصطفى دار خطة هو وباقي العناصر ، ݣاليا بالحرف بلي البنات لي مهرب كارلو ايدخلو للكلوپ فهاد السيمانة ، وحنا هاد السبت انسهرو تم ، بغيناك حتى انت تكون ولكن ماشي معانا بحال الى جاي لتم تسهر ... البنات ايكونو فيهم مغربيات وعربيات وحتى اوروبيات ، بغيتك تختار هادي الى لقيتيها بيناتهم(خدات تيليفون ديالها او وراتو واحد الصورة ) ..

- علي (خدا تيليفون منها كيشوف فصورة لي فتيليفون ، دخل مالك عليهم للكوزينة وقف ورا شريهان ، هز علي راسو فيهم بزوج ) :

شكون هادي ؟

- مالك :

هادي واحد البنت مغربية ، فاش كان مصطفى فالمغرب مها قدمات بلاغ بلي ختافات ، وحنا شاكين اتكون مع البنات لي ايجيب كارلو للكلوپ ، حيت لقاو الباسبور ديالهم فالڤيلا ديال نادية ..

- شريهان :

الكلوپ ضروري مغادي تكون فيه حتى ديك جورجيت ، بغيناك منين تمشي الى شفتي هاد البنت تختارها هي ، سميتها فرح ... ويقدرو يبدلو ليها سمية ، بغيناك تختارها بوحدها واخا ماتبغيش جورجيت ، انت خليك مُصر على الإختيار ديالك ، وميزي ليها بزاف ديال الفلوس تفاهمنا ..

- علي :

وعلاش هوما حمقين يدخلو البنات وانتوما كاينين ؟

- شريهان :

مغاديش يدخلوهم نهار الاول حتى نمشيو ، ولكن من بعد غادي يدخلوهم وحنا كاينين ، انت ماتجيش لكلوپ حتى لديك ل 11 هكاك عاد اجي ، الى لقيتي منين تجيب شي طوموبيل اخر مكاين أحسن ، هكا ايعرفوك بلي ملعق نيت ، وأصلا منين يسمعو بلي انت مالك قهوة la mandala ايݣولو كليان صحيح طاحو عليه ..

- علي :

صافي كوني هانية ، سيفطي ليا هاد تصويرة فالواتساب باش تبقى عندي ..

- شريهان :

مزال ماجيناش للمهم ، الى لقيتي البنت كاينة فعلا ، علي خاصك تحسسها بالامان ، وخاص تفهم بالإشارات ياكما دايرين ليها جهاز الإستماع فهمتي ، الى لقيتي كيفاش تفاهم معاها ، اهم حاجة خاص توصل معاها لطابق الفوق فين كاينين لي شومبر ، ويكون معاك ورقة وستيلو ... باش تكتب ليها شنو انكوليك ، اتعرفها براسك وشكون انت ومنين ... وشنو الهدف ديالك اتحسسها بالامان ، وطلب منها باش دير راسها مكاين والو ، وغادي تكوليها بلي ديما اتجي باش تشوفها ، بينما حفظت انا الكلوپ مزيان ، خاصنا نلقاو طريقة باش نخرجوها من الكلوپ ، هكا انعرفو منها بزاف ديال الحوايج ... خاص نعرفو البنات فين كاينين ، وبينما انا عرفت فين مخبع كارلو الوراق ، ونطيح على جميع الوثائق لي كيهمونا فهمتيني ؟

- علي :

كوني هانية ، علاش حنا قبل منجيو لهنا كنا عايشين فنعيم ، واش غير حينا او وصلنا ، دوزنا التسلݣيط لي على بالي وبالك ، والى كان هو نمر حنا راه سبوعة .. سيفطي ليا تصويرة ماتنسايش .. خلاهم ومشا خرج من الكوزينة ..

- شريهان (ضارت عند مالك ) :

فنظرك هادشي غادي ينجح ؟ فخبارك سونا ليا كارلو ..

- مالك (جمع غوبشاتو) :

اهاه وشنو بغا ؟ وعلاش ماسوناش ليا انا زعمة ؟

- شريهان :

باش تعرف الهدف ديالو انا ، ماشي انت واخا خدا نوامرنا بزوج .. كاليك باغي يسول فيا ، وݣال بلي عندو بزاف ديال الهضرة معانا ..

- مالك :

خلينا نخرجو من هنا ، مافيا لي يتعصب ونبدل المود ديالي ... أجي ياك كنا ناويين مغانمشيو لكلوب حتى يعيط علينا هو ؟

- شريهان :

وأنا متأكدة بلي غادي يعيط لينا ، ولكن هادي في حالة ماعيطش حنا انمشيو ..

فطريق لدار ، وفطوموبيلت مالك وصلو إيمايل فتيليفونو ، جبد تيليفون دخل لابوات ديالو قرا الميساج وتبسم ..

- شريهان (كتشوف فيه) :

شكون ؟

- مالك :

كارلو شكون من غيرو ، باغي يتلاقا معانا غدا فصباح ݣاليك عارض علينا للفطور ، شنو بان ليك ؟

- شريهان :

شفتي ݣلتها ليك ولالا ؟ ݣلت ليك راه باغي يشوفنا بأي طريقة ..

- مالك (شاف فيها ) :

وحشومة مانلبيوش ليه الدعوة ياك أحبيبة ديالي ؟

- شريهان (عجباتها الكلمة لي قال ليها ) :

تماما ، شافت قدامها صغرات عينيها والإبتسامة تمحات من وجها ..

- مالك شوف شكون واقف تم ..

- مالك (جمع غوباشتو ، كيحس بسطل ديال الما تكب عليه ، ماضنش يرجع يشوفها ولا يشوف كمارتها ..) :

أش بغات هادي ولاش جايا ؟

- شريهان :

قسما بالله حتى كنت عارفاها ، كنت عارفة بلي غير اتشوف تصاورنا اتخرج لينا من جنب ..

- مالك (وقف طوموبيل ) :

متحركيش من هنا ، انا جاي حنا انفضيو هاد المشكيل غير تهناي واخا .. خلاها فطوموبيل وخرج لعندها ..

- مالك (صاعر) :

أش كديري هنا ؟ ياك لاباس أش جايبك جايا بوجهك حمر من ورا داكشي لي درتي ؟ ياك ݣلت ليك منرجعش نشوف كمارتك مزال ، ݣلتها ولا ماݣلتهاش ؟

- كارولين (تحت عينيها زرق ، دايرة نص فولار شادة بيه شعرها ونظارات كحلين ) :

واش بصح داكشي لي شفت ؟ من إيمتا رجعتي انت وشريهان ؟ ومن ايمتا شريهان رجعات سيدة اعمال ، ياك انت بفمك ݣلتي ليا ماعندهم والو وعاد جاو من المغرب ، كيفاش رجعات مطلقة ولاباس عليها ؟ هادي شي خطة باش نغير ياك؟

- مالك (ضحااااك) :

واش فنظرك انا انݣوليك الصراحة ونعاود ليك على عائلتي ، فنظرك انت انعاود ليك عليهم ݣاع داكشي لي كاين ، هههههههه لا بلاتي نزيد نضحك هههههههه ، شكون انت بسلامة لي نعاود ليك على بنت عمي ولا على خويا ولا على حتى جدي ؟ انت شكووووووون مرتي كنعرفك كتعرفيني ، انت والو ومكتسواي والو ... وحدة تافهة ماعندها مايدار ماعندهاش من غير فورمتها او وجها لي كيوكلها ويشربها ، وهانتي دابا عرفتي الحقيقة ، انا وشريهان كنا كنبغيو بعضياتنا قبل ماتزوج ، وفاش جات لهنا كان راجلها مات ، ولكن حيت كنت مرتابط بيك مكانش عندي شي حل من غير نبعد عليها ، ولكن فاش جا العيب منك انت وخنتيني ، رجعنا علاقتنا انا وياها ، وإيه الالة شريهان لاباس عليها ، تشريك انت و10 بحالك ، ويلا بغيتي تقلبي من وراها مرحبا ديري لي بغيتي ، واخر مرة أكارولين مزال نشوفك قدامي ... وليت كنعيفك وليت كنشمئز منك ومن شوفة فيك ..

- كارولين (مامتيقاش شنو كتسمع ، مامتيقاش بلي بصح هدا هو مالك ) :

انا انا اه عارفة راسي غلطت ، وعارفة راسي خنتك ولكن انت السبب ، انت لي مابغيتيش تسلمني راسك ... مابغيتيناش نكونو بزوج جسد واحد ، انت لي بززتي عليا بلي الى بغيت نقبل بداك العرض ، مخاصش نلبس المايو ، وانا عطيتو شنو بغا باش مايتحطوش تصاوري بالمايو ..

- مالك (كيضحك وكيصفق عليها ) :

عند بالك دابا هدا مبرر لخيانة ديالك ، غير حيتاش انا رفضت تباني بحوايج البحر صافي تعطي راسك لواحد ، الالة انت خارجة معاه وعايشين ليا الحب والغرام ، واش كضحكي عليا ولا على راسك ... ولكن عرفتي شنو أحسن حاجة وقعات ليا هي هادي ، حيت بسبابك عرفت معنى الحب الحقيقي ، بسبابك لقيت لي كنبغيها وكنموت عليها وروحي نعطيها ليها ، ماشي بحالك ... كتجري ورا الماركات والمجلات وكتبيع راسها رخيص ، عرفتي شنو اكارولين ... فالأول كنت حاااقد عليك وكون كنتي قدامي كون دفنتك حية ، ولكن دابا أقسم لكي يمينا الى بقيتي فيا ، حالتك كتشفي نصيحة مني ، سيري شوفي ليك طبيب نفساني يداويك ، أما انا والله مابقيتي كتحركي فيا شعرة وحدة نهائيا ، الإحساس الوحيد لي كنحس من جهتك هو الشفقة ، ودابا سيري فحالك حيت الوجود ديالك كيقلق خطيبتي ، وانا منبغيهاش تقلق ، وأقسم لكي يمينا وترجعي تباني قدامي ، هاد المرة غادي نديرها وندفنك حية ..

- خلاها مصدومة من كلامو ، الراجل لي كانت كتݣول بلي كيموت عليها وكيبغيها اليوم سمعها أبشع كلام ، الراجل لي كانت كتقول مستحيل يعيش بلا بيها وبلي كيبغيها ، هاهو اليوم لقا حب حياتو وخطب ، ݣاع لي شافتو فالجرائد والمجلات طلع بصح ، وفعلا مالك خطب شريهان ، دازت طوموبيلتو قدامها بلاما يشوف فيها ، تنهدات تنهيدة طويلة ، وركبات فطوموبيلتها ، جارة وراها خيبة امل حيت هي لي دارتها لراسها بالأنانية ديالها ، وبغرورها وطمعها باش تكون نجمة وتوصل لأهدافها بأخيب الطرق ، فقدات راجل كان كايبغيها ولا يمكن عمرو بغاها ، ودابا هاهو لقا فعلا لي تستحقو ، ديمارات طوموبيلتها ويديها فاشلين ، شافت فدارو لي كتبان ليها من بعيد أخر شوفة وكسيرات ..

__________________

- شريهان (حاطة يدها على يدو) :

كتحس براسك مزيان ، الى مابغيتيناش نمشيو لدار ممكن نمشيو جنب البحر ؟

- مالك (شاف فيها بإبتسامة ، هز يدها وباسها ) :

عمري ماكنت مزيان بحال اليوم ، كنحس براسي مرتاح كنحس بواحد النار كانت عندي الداخل طفات ..

- شريهان :

هادشي لي بغيت ، غير تكون مزيان وبيخير وعلى خير ..

- مالك (تقاد فالݣلسة وشاف فيها ) :

كيفاش مابغيتينيش نكون مزيان وانت معايا ، من نهار عرفتك وانا مزيان ... ومن نهار عرفتك تبدلو فيا بزاف ديال الحوايج ، وليت كنضحك بزاف وكنتعصب بزاف هههه ، والسبب انت لي كتحمقيني بتصرفاتك وكتخرجيني على طوري ... انت دايرة بحال داك الضو لي كايبان لينا فاخر نفق ، دخلتي كتسلتي كتسلتي حتى ديتي قلبي وسكنتي عقلي ، ومابغيتينيش نكون بيخير انا راه مكنتش بيخير قبل منعرفك ، دابا عاااد وليت بيخير ، الله يخليك ليا ومايحرمنيش منك وكنتمنى يقدرني الله ونخليك اسعد وحكة فهاد الدنيا ..

- قاطعهم صوت الدقان فزاجة ديال السرجم .. دور مالك راسو كيبان ليه سعد ..

- مالك (هبط الزاجة معصب) :

أش كاين ياك لاباس مالنا ؟ واش اخويا انت خارج ليا فعودي ولا كيفاش مافهمتش انا ؟

- سعد (كيضحك) :

اهاه ، انا ݣالسين تمرݣنو عليا فخطوبتي ، وانت هنا عايش ليا الرومانسية ، نزل اولد ميمتي نزل ، شيري اجي اختي بغيتك ..

- مالك (خرج ليه) : كيفاش اجي اشيري بغيتك اسي وااا شريف ، راه خطيبتي هادي ، سييير عند خطيبتك وݣوليها شنو بغيتي وقيل عليك شريهان ..

- سعد (زكارة فيه) :

إلى كانت شيري خطيبتك ، راها بنت عمي تفاهمنا ، حر شريهان تحت أنظار مالك لي معصب داخل بيها لدار ، اما هي الضحكة ديالها كتسمع حتى لعندو ..

- مالك : واخا يالالة ضحكي ضحكي عاجبك الحال ، انت ضحكي وانا تحرار عليا ولكن هانية غادي تخلصي تخلصي ..

__________________________

بليل وفالڤيلا ديال كارلو ... ݣالس عند الطبلة كيتعشى ، فرحان وعاجبو الحال ... سمع خطواتو ، هز فيه عينيه بان ليه واقف قبالتو :

دجيكو جيتي على سلامة ، اجي تعشا معايا ..

- دجيكو :

لا غير بصحة سينيور ، انا تعشيت قبل ..

- كارلو (كيتبنن بالماكلة لي قدامو ، ويتنشوا بالمشروب ) :

علمتي جورجيت بخصوص البنات ؟

- دجيكو :

سي سينيور ، علمتها غدا غادي يكونو واجدين بليل ..

- كارلو (مكايشوفش فيه) :

غير رجع هضر معاها ، وݣوليها تخليهم حتى لسيمانة جايا حسن ..

- دجيكو (بصدمة) :

ولكن ݣلتي ليا لبارح ..

- كارلو (قاطعو) :

المورال ديال البارح ، ماشي هو المورال ديال اليوم ... وانا ݣلت ليك تخليهم حتى لسيمانة الماجية ، تفاهمنا دجيكو ...

- دجيكو (تعصب واخا مابينش ليه) :

واخا سينيور انا غادي نعلمها ، تأمرني بشيحاجة أخرى ؟

- كارلو :

لا ماتنساش تقاد ليا الامور بخصوص الفطور ديال غدا ، ومن وراها سير رتاح شوية ... حيت بنتي ليا بديتي كتكبر وغادي يخصك الراحة دجيكو ، حيت مابقيتيش كتسمع مزيان ...

- دجيكو (وحلات ليه فحلقو ماحملش راسو) :

واخا سينيور ، تصبح على خير ... حدر راسو وخرج صاعر ، ديمارا طوموبيل وكسيرا نيشان شاد الطريق عند جورجيت ..

______________________

- كيتعشاو بجوج بيهم ..

ماثيو : شنو الخطة شنو ناوي دير ؟ شفتك عجبك الحال من ورا هادشي لي سمعتي ؟

- دييݣو (كيضحك) :

انا مغادي ندير دجيكو لي غادي يدير ، دجيكو من زمان وهو مراضيش على هاد الوضع لي هو فيه ، وتحكم ديال كارلو فيه ، ومع هو كان اليد اليمنى للأب ... كيوشف راسو بلي هو أولى بالمنصب ديال كارلو .. ودابا غادي تزهى مزيااان وغادي نتفرجو مزيان ... حنا مغادي نديرو والو دجيكو هو لي غادي يدير ..

- ماثيو :

خايف غير لا يعيقو بكاثلين ، وبلي كتجسس وتجيب لينا الأخبار ديالهم ..

- دييݣو :

كاثلين مجابت لينا حتى اخبار ، هي غير دارت واحد لاپراي صغيرة قد نملة فدار كارلو ، باش هكا نعرفو ݣاع الأخبار .. الله شحال زوين يكونو اخبار العدو ديالك عندك وانت كاتستمتع ..

- ماثيو :

غادي يتلاقى مع الوزير غدا ومع خطيبتو ..

- دييݣو :

وي وي سمعت ، وحتى حنا خاص نخرجو نفطرو ونبدلو الجو ولا شنو بان ليك اماثيو ؟

- ماثيو (ضحك) :

فكرة ممتازة ، وانا رأي ديالي من الرأي ديالك ..

- دييݣو (هز الكاس ديالو ضربو مع كاس ماثيو ) :

بصحتك ...

- سدات الباب وݣلسات فوق النموسية مقابلة معاه ...

- مصطفى (كيشوف فيها بإستغراب) :

ياك لاباس ؟ سادة الباب وراك وكتشوفي فيا بحال الى دايرة جريمة شنو واقع ؟

- شريهان (بإرتباك) :

هانتا أخويا ، سمعني مزيان وحل معايا ودنيك واخا ؟

- مصطفى :

شريهان طلقينا خلاص ، انا راه صافي مابقيتش قاد نسمع شي حاجة ماهياش طلقينا ..

- شريهان (ضحكها ) :

ههههه واغير سمع ، ماشي حاجة خايبة ، المهم انت عارف بلي انا ومالك تخطبنا ... خطوبة مزورة على قبل المهمة لي دخلنا ليها ..

- مصطفى :

أياااااه الالة ، هادشي راه عارفو زيدي كملي ..

- شريهان :

دابا انا ومالك ، بغينا نرجعو هاد الخطوبة حقيقية ..

- مصطفى (بقا ساكت كيستوعب شنو ݣالت ) :

مافهمتش ، كيفاش ترجعوها حقيقية ههههه زيدي وضحي ليا كثر ..

- شريهان :

مالك ، عتارف لي بلي هو كيبغيني ، وعرض عليا الزواج ... وانا فكرت مزيان فكلامو او وافقت ..

- مصطفى :

واش مالك كيبغيك ، ݣالها ليك بصح ؟ ههههه واااايلي ..

- شريهان (جاتها الضحكة ) :

اه ݣالها ليا ، ݣال بلي هاد الخطوبة بغاها تكون بصح ..

فجهة أخرى

- عمر (عاجبو الحال) :

وايلي بصح ، هي دابا هاد الخطوبة أترجع بصح ..

- سعد (مصدوم) :

وانا كنݣول مالك ݣبيلة ݣلتي ليا انا وخطيبتي ، بقيت كنقول مع راسي هدا مالو هههههه ، دابا انا وياك صافي انتزوجو ..

- مالك : اياااه أسيدي كيف كتسمع ..

- عمر (فرحان) :

والله الى فرحتيني ، ماتلقاش بحال شريهان وجيتو مع بعضياتكم ، مبروك عليك أخويا (عنقو)

- سعد (عنقو ) :

مبروك عليك أخويا والله العظيم الى فرحتينا بزااف أحسن مادرتي ..

- عمر :

بقيت غير أنا ههههه ..

- مالك (كيشوف فيه بنص عين) :

وحتى انت كتبان ليا قربتي ، غير من دوك شوفات لي كنتي كدير فخت سكينة فالخطوبة باين العربون ..

- سعد (كيفرنس) : وياااه شفتيه ههههه

- عمر (كيحاول يتهرب) :

اشمن غير كيبان ليكم وصافي ، بغيتو غير دوروني بيناتكم دابا وصافي ، بنت ليكم فالبلان ..

- مالك :

واخا أسيدي ، شحال قدك تهرب اطيح اطيح وتݣول مالك ݣال ..

يتبع...