محتوى القصة
- هشام : اخويا انا خويت المزيودة ... عاودت لسناء كولشي ، نبقى نتسنى صافي عييت براكة ، هدا هو الجهد ... طلبت منها الزواج ..
- انور :
اهاه ، وباش جاوباتك ؟
- هشام :
بقات غير ساكتة ، مكالت والو ... كالت ليا نعكيها مهلة تفكر .. شوية جاه ميساج من عندها ، ميساج لي غير قراه تبسم وفرح وعجبو الحال ..
- أنور (كيشوف فيه ) :
شنو كاين هههه ، ياك لاباس مالك كتفرنس؟
- هشام (شاف فيه وعنقو بدون سابق إنذار) :
وافقات اصاحبي وافقات على زواج ..
- أنور (كيخبط ليه على ظهرو ) :
وعلى سلامتك اصاحبي ، مبارك ومسعود الله يكمل عليكم بالخير ..
- هشام : آمـــــــــــــــــيـن ..
- ففرنسا
- سكينة (ساهية كتخمم)
- سعد :
مال الحبيبة ديالي أنا ؟ شنو كاين مالك ساهية ؟
- سكينة :
توحشت شريهان بزااف ، ماعرفت شنو دارو مزال ؟
- سعد :
الجديد ايخبرونا بيه ، الحمد لله لي لقاوها على هير وبيخير ، هداك هو المهم ... خاصك تكوني فرحانة اتكوني خالة ..
- سكينة (تبسمات ) :
أه بصح ... العقبة لينا إن شاء الله ..
- سعد : إن شاء الله .. مغاديش تمشي للقهوة اليوم ؟
- سكينة :
لا حتى لغدا إن شاء الله ... علي كاليا نرتاح اليوم ، ونجي غدا باش يعطيني السوارت ديال القهوة ..
- سعد : علاش هو إمتا غادي ينزل للمغرب ؟
- سكينة :
عندو الطيارة بعد غدا إن شاء الله ..
- سعد :
شفتي الحب شنو كيدير ، كان خاصو يتبع فرح نهار مشات ولكن مع داكشي لي وقع ، هو لي حبسو ..
- سكينة :
اااه ... اما هو كان باغي ينزل وراها فداك الوقت ، ولكن مع لي وقع ل شريهان مابقا دار والو ... ودابا دارها حجة وزيارة ، ينزل يشوفها ويدير لازم ... ويشوف حتى شريهان إن شاء الله ..
- سعد :
خاص غير ترجع ليها ذاكرة إن شاء الله ... ونزلو كاملين ياش نديرو ليهم سي عراسية مطرطقة ..
- سكينة (كضحك حيت دارجتو ولات قحة ) :
إن شاء الله ..
__________________________
- دقان فالباب ، ناضت سناء حلات ... كان مالك وسعيد ومصطفى ، حيدات ليهم من طريق دخلو ، يلاه اترض الباب هاهو انور وهشام ... خلات ليهم الباب محلول ، دخلو وسدوه وراهم ..
- ثورية (عند بالها ايكون غير مالك ... تفاجأت منين سافت سعيد ومصطفى ) :
مرحبا بيكم ، دخلو ݣلسو .. سلمو عليها وكلسو كاملين ..
- سناء :
غادي نوض نعمر أتاي ..
- مالك :
لالا غير ݣلسي ، ماشي وقت أتاي دابا من بعد غير رتاحي ..
- رجعات ݣلسات ..
- ثورية (بتوتر ) :
هههه ياك لاباس ، فاش بغيتينا نهضرو ..
- مالك :
على قبل العملية ... والهضرة ديال الطبيب ، المهم غادي تسمعينا مزيااان ، متوتري ماوالو ... أتسمعينا واخا ..
- ثورية : ياكما الطبيب كاليك شيحاجة اخرى ؟
- مالك :
ياك انا كنت معاك ، كيفاش غادي يكوليا ، لا ماشي داكشي على قبل عائلتك .. وحيت الدكتور كال ضروري يكونو معاك ..
- ثورية : فكرتي فقضية مختفون ؟
- مالك : مكاين لا مختفون لا عائدون ، مكاين لاش ... خيت اصلا عائلتك كاينة ومعروفة شكون ..
- ثورية (غوبشات) :
مالك دخل عفاك فالموضوع نيشان ، كيفاش وننين كتعرف عائلتي ؟
- مصطفى :
حنا هوما عائلتك ..
- ثورية (جاتها الصدمة وضحكة ) :
كتفلاو عليا ياك ؟
- مصطفى :
مكنتفلاوش عليك ، مجاتكش غريبة كيفاش تفكرتي سميتي ؟ ماسولتيش راسك ؟
- ثورية ( بحال الى تخوا عليها سطل ديال الما بارد ، غير كتفتف فالهضرة ) :
ا انت ش شنو ك كتجيني ؟
- مصطفى (واقفة ليه البكية فحلقو ) :
خوك ... أنا خوك الكبير ..
- ثورية (دموعها نزلو دقة وحدة ) :
خويا ؟؟!!! داك نهار جاتني لقطة فيها وجهك كتركب ليا سلسلة فعنقي ..
- مصطفى (ماقدش يتحمل ، دموعو نزلو ، ناض من بلاصتو راكع على رجليه شد ليها فيديها ) :
هاديك السلسلة عطيتها ليك فعيد ميلادك .. (جرها عندو وعنقها كيبكي ، هو يبكي وهي كتبكي ... بعدها عليه بشوية ... هزات عينيه فيه وأشرات ليه براسها لمالك :
وهو ؟ شنو كيجيني ؟
- مصطفى :
مالك ، ولد عمك اوو خطيبك ..
- ثورية (هزات راسها فيه مصدومة ) :
أنت خطيبي أنا ؟ داكشي باش طلبتي مني الزواج بديك الزربة ؟
- مالك (تنهد تنهيدة طويلة) :
اه حنا مخطوبين ، وكنا قريب نتزوجو فسيمانة لي وقع ليك فيها داكشي ..
- ثورية (هزات راسها فسعيد لي غير ساكت منين دخلو) :
وأنت ؟
- سعيد : أنا خالك سعيد ... كنا قرااب بزاااف كتعتابريني بحال باباك ..
- ثورية (هزات راسها فسقف ، كتحس بضغط مافهمات والو بين ليلة ونهار عائلتها بانت ... وسيد لي عجبها هو خطيبها فالأصل .. شافت فمصطفى) :
شنو هي سميتي الحقيقية ؟
- مصطفي :
شريهان ، وعندها 26 سنة دابا ..
- سناء (ضحكات) :
سميتك بحال ديك الممثلة المصرية أصاحبتي ..
- ثورية (تبسمات وسط دموعها) :
شفتي ... (رجعات شافت فخوها) :
شنو وقع ليا بضبط ؟ وكيفاش حتى وصلت لهاد الحالة هادي ، بغيت نعرف كلشي عفاااك ..
- مصطفى :
متنسايش الطبيب كاليك متجهديش راسك ..
- ثورية :
غير بشوية عاود ليك ، ماتخافش ... هادشي لي كلتو ليا هو صعيب اما لي جاي كيبان ليا قليل ..
- مصطفى :
خاصك تعرفي بلي مدينتك الأصلية لي كنتي ساكنة فيها ، هي القنيطرة ... الواليدة ديالنا خدامة (بدا كيعاود ليها من الخطبة ديال حسام ونصب والاحتيال ، ونهار دارت 25 سنة وعيد ميلاد لي داروه ليها دراري ... والجريمة لي وقعات حتى حبس فاش جات للفرنسا ) ..
- شريهان :
دابا ديك الحلمة لي كنت كنحلم ، هي داكشي لي وقع ليا نيت بصح ... وفين مشات السلسلة لي عطيتيني ياك واعدتك عمري نحيدها ، علاش مكايناش فعنقي وفين هي ماما ، وهاد الناس لي كتعاود عليهم ؟
- مصطفى :
سكينة صاحبتك تزوجات بسعد ولد عمنا ، وختها حتى هي خدات عمر ولد عمنا ، هوما ففرنسا العداب لي دوزوه مايعلم بيه الله ، العرس مداروش عمر حيت كنتي مفقودة ... ماقديناش نفرحو اما عرس سعد كنتي حاضرة فيه ... وعلي كان ناوي يخطب البنت لي بغا .. لي عاودت ليك عليها دابا فرح ، ولكن كنتي صديقتو القريبة ماقدش يدير والو وأنت غايبة ..
- شريهان :
مزال ماݣلتيش ليا شنو وقع ؟ ، وكيفاش لقاوني هشام وأنور فالبحر مليوحة ..
- مالك :
نهار العرس ديالنا وقع هادشي ... المركز لي عاود ليك عليه مصطفى ... انت ختاريتي عرسنا يكون تم ، والعقد والعرس الكبير يكون فالمغرب ، انت وستيڤن ، السيد لي دربك تافقتو توجدو ليا كادو باش داك نهار تعتارفي لي بلي كتبغيني فعرسنا ، وانت لي ختاريتي يكون فالمركز مع دراري ... فاش دخلتي للمكتب تم جا دييغو السيد لي وصل المعلومات للبلويس وخطفك ... حست كنتي كتشبهي لسيدة لي كلنا ليك عليها ، جاب الله مصطفى كان داير ليك جهاز تتبع فسلسلة ديالك وتبعنا الاشارة ، وصلنا لمارينا فينا كان اليخت ديالو ... تما كان كارلو ، طلع لليخت وكانو كيدابزو ... وعلى حسب المعلومات انو كارلو كان ديال قنبلة مفخخة فاليخت ، وفاش شافك معاه كان طالع ينزلك من تم ، ولكن وقع خصام بيناتهم وانت تنقيزة لي اتنقزي من اليخت ، نفاجر اليخت ... قبل حاولنا نقدوك ولكن كان موجه سلاحو ليك ، ومع ذلك تدخلات الشرطة وتدخلنا حنا ، ولكن فات الفوت حيت نفاجر اليخت كلشي وقع فرمشة عين ... قلبنا عليك 3 يام فالبحر او والو ... هوما لقينا الجثث ديالهم ولكن انت والو .. وبقينا عام كامل وحنا كنقلبو او والو ..
- سناء :
ناري كنحس براسي كنسمع لفيلم ميريكاني وحق الله ... ناري يا صحبتي فضولك خرج عليك ومزال فضولية ..
- شريهان (خنزرات فيها ) :
واش بغيتيني ندير ، كنبغي نعرف كولشي .. (شافت فمالك) داكشي علاش سمحتي فالوزارة ونزلتي للمغرب ؟ باش تقلب عليا .. لهاد درجة ؟
- مالك (كيشوف ليها فعينيها) :
لهاد الدرجة وكثر ..
- شريهان (تنهدات تنهيدة طويلة) :
شفتكم دكرتو غير عمي ومراتو وماما ، مادكرتوش بابا ؟
- مصطفى :
الواليد توفى الله يرحمو فاش كانت عندك 4 سنين ..
- شريهان (حدرات راسها ورجعات شافت فيهم) :
دابا انا قارية ، وكنت كنحلم ندير مشروعي ؟
- مصطفى :
وي وكنتي كتحلمي تصاورك يخرجو فليجورنو ، وراه العجب لي عمركم ماطحتو فمقالة ولا مجلة فيهم تصاوركم ... ولكن قليل فين كيوصلو المجلات الفرنسية والجرائد للمغرب ..
- أنور :
حتى حنا فاش كنا تما عمرنا طحنا فشيحاجة بحال هكا ... كون كنا شايفينها قبل مغايوقعش هكا ..
- سعيد :
كولشي من الخير اولدي.، أي حاجة دازت علينا من الخير ..
- شريهان (ضرها راسها وجاتها الدوخة تاني) :
انا خاصني نعس نرتاح ... كنحس براسي ماشي حتى لتما ..
- مصطفى :
نوضي رتاحي ، حنا غادي نمشيو خاص نهضر مع الواليدة باش تجي ..
- شريهان (هزات راسها فيه ) :
واخا ... سمحوليا ، خلاتهم ودخلات للبيتها سدات عليها وتكات فبلاصتها ، مع غمضات عينيها مع نعسات ..
________________
- بليل ݣالسة متكية على سداري شاعلة تلفازة وعقلها ݣاعما كاين ... غايب بداكشي لي كالو ليها ، جات سناء من الكرسي خاشية وجها فتيليفون ... تݣات حداها ..
- شريهان (هزات راسها فيها ) :
اجي سناء دخلي كاع قلبي فݣوݣل ، ولا الفيسبوك على سمية مالك العراقي ، شوفي شنو غادي يطلع ليك ..
- سناء : واخا بلات ... دخلات سناء لݣوݣل ، كتبات سميتو وهو يطلع ليها الحادث لي وقع ، وتصويرة شريهان لابسة البيض ..
- سناء (شهقات) :
ياختي عندو الصح , شوفي لحسك كيف كنتي هاكي ... عطاتها التيليفون ، كتدوز فتصاور وكتشوف مصدومة من راسها ومن تصاور لي خرجو ليها ..
- شريهان (مخرجة عينيها ) :
شوفي لحسك الحوايج لي كنت كنلبس ؟ تصدمت فراسي وشعري كيف داير ... واخا هكاك هاد ليميش مجاش معايا ... بلات بلات شكون هادي ؟
- سناء (دخلات راسها فتيليفون ) :
مالك العراقي ، ينفصل عن خطيبته عارضة الأزياء الفرنسية كارولين ... بعد إنفصاله ب أشهر عن خطيبته وزير الشباب والرياضة يرتبط بإبنت عمه شريهان العراقي ..
- شريهان :
دابا هو خلا هادي ورتابط بيا أنا شفتيها ..
- سناء : شفتها بحال عود السبسي .. السيد كيبغيك ياختي بزاااف والله ، سمح فالوزارة وجا كيقلب عليك عمرك تلقاي بحالو ..
- شريهان :
راسي مزال مخربق وحق الله معارفاش نفكر ، ݣاليا مصطفى بلي غدا اتجي ماما ، ماعرفتش كيفاش ايكون اللقاء بيناتنا ... واش الى شفتها انحس بشيحاجة ولالا ؟ وكيفاش انتصرف بزاف ديال الحوايج كيدورو ليا فبالي والله ..
- سناء : كولشي غادي يدوز مزيان إن شاء دابا تشوفي ..
- اتعرفون ماهو الغريب في مشاعرنا ،أننا نبتعد ... ونحن في أمس الحاجة للقرب ، نتماسك ... ونحن في أمس الحاجة للانهيار ، نصمت ... ونحن في أمس الحاجة للعتاب ،نبتسم ... ونحن في أمس الحاجة للبكاء ،نعم قد نبدوا بخير ،ولكن لن يبوح احدنا بما يؤلمه ، فبعض الكذب كرامه .. " يأتي البعض لحياتك كنعمة ويأتي البعض لحياتك كدرس فحافظ على النعمة وتعلم من الدرس. لا يُقاس المرء بالمال أو بالعمر إنما يقاس بطيبة قلبه وبجمال أخلاقه ..."
______________________
- سناء (كتشوف فيها بنص عين ) :
وبراكة أصاحبني واااااه درتي ليا دوخة ... غادية جايا غادية جايا ، ياك لاباس واكواك الحق ..
- شريهان :
متغوتيش عليا ، راه فيا الخلعة أصاحبتي ... شنو بغيتيني ندير ؟
- سناء :
تبتي شوية تبتي ... راه جاتني الشقيقة لي خليتيه لبارح كمليه ليا اليوم ، غير لبارح منعستي ماخليتيني نعس ودابا كملي على مابيا الله ياربي حبيبي ..
- شريهان (قفزات من بلاصتها فاش سمعات الدقان) :
ناري هوما هوما ، جاو اميمتي حلي انت حلي الباب ..
- سناء (حركات راسها بنفاد صبر او وقفات ) :
الله يستر ياربي تسترنا .. مشات سناء حلات الباب لقات مالك ومصطفى ، معاهم راجل كبير ومرا أنيقة او واحد السيدة لابسة جلابة ، لون وجها مخطوفة ..
- سناء (بإبتسامة ) :
دخلو مرحبا بيكم ..
- أحمد : ربي يخليك أبنتي .. دخل أحمد هو الأول ، مع دخل جات عينو فعينيها نيشان ، غرغرو عينيه بدموع ... مشا عندها نيشان عنقها بدون سابق إنذار ، معنقها وكيتنخصص ... نزهة لي مكانتش أقل منو ، أما العمود وساس وروح والحياة ودنيا كلها ، لي بلا بيها حتى واحد مايسوى شيحاجة الصدر الحنين ، لي فينما تخنقنا كنلجأو ليه ... وقفات جامعة يديها على شكل قبضات ودايراهم على فمها وكتبكي ، كتنخصص وتردد :
- كبيدتي كبيدتي ... شريهان ماعرفاتوش شكون هو .. بعد عليها ، وعنقاتها نزهة كتبكي حتى هي ، شريهان كتبكي وفنفس الوقت معارفاهمش شكون وشكون فيهم مها ..
- شريهان :
سمحوليا ، ماعرفتكمش ، واش انت عمي ياك ݣاليا مصطفى أنت عمي ... فين هي ماما (زهرة اسمعات كلمة ماما طاحت على صداري وكتبكي كتنحط ماقداتش تصبر ، بسباب لي وقع لبنتها ضعافت ، ويدها يلاه رجعات شوية تحركها بحال الأول ..
- أحمد (أشر لزهرة) :
راه هي أبنتي .. شريهان شافت فيها ، هبطو دموعها سخااااان ... وجها مدور وحمر حيت بيضة ، قربات عندها بشوية نزلات على ركابيها ..
- شريهان (فمها كيترعد ) : ماما ... مع هاد الكلمة تخطفات وخشات فوسط صدرها ، كتعنق فيها وتبكي ، وكلمة وحدة فمها كبتي كبيدتي رجعات ليا نوارة ديالي رجعات ... شريهان كتنحط ... واخا فاقدة الداكرة ولكن كتحس بإحساس زوين بزاف ، إحساس بالأمان وراحة وطمأنينة ... عمرها حسات بيه عام دابا حتى لهاد النهار ..
- زهرة (بعداتها عليها كتشوف فيها ) :
ضعافيتي ابنتي ، مابقيتيش كتاكلي مزيان ... الله ياربي الله ..
- شريهان :
ودابا توكليني من شهيواتك ... مصطفى خويا ݣاليا طيابك زوين وبنين ..
- زهرة :
نطيب ليك لي تشهات خاطرك ابنتي ، انا مباركة لي رجعتي ليا ما واقع ليك والو ... (كدوز ليها على وجها وشعرها ) ... رجعات عنقاتها وسناء كتشوف فيهم وتبكي ... فرحات لصاحبتها وفنفس الوقت بقا فيها الحال حيت هي بوحدها ماعندها حد ..
______________________
- حطات سناء بلاطو فيه تيرموسات ديال القهوة ، حطات الحلوة المسمن بغرير ..
- نزهة :
عدبتي راسك أبنتي ..
- سناء :
مكاين لا عداب لا والو ، بالعكس أنا فرحانة حيتاش ثو شريهان بغيت نݣول ، مزال متعودش ..
- نزهة :
مكاين باس ابنتي ... دابا تعودي ..
- زهرة :
عاودي ليا كلشي أبنتي ..
- مالك : ياك عاودت ليك أخالتي ..
- زهرة :
لا بغيت نسمع من فم بنتي ، بغيت نعرف كولشي من داك نهار لي مشات فيه لدابا ..
- بليل مجموعين غير شريهان سناء زهرة ونزهة ، أما البقية كانو فشقة لي كرا مالك ..
- شريهان (غير حاضية سناء ... منين مشاو الرجال ݣبيلة وجمعات الماعن غسلاتهم ونصبات العشا ، ماهضرات ماتسمع حسها ، غير ساهية وساكتة ) :
ياك لاباس ، مالكي ماسمعتش حسك مامالفاش ليك ؟
- سناء (هزات فيها راسها ) :.
لا مكاين والو ، غير كنفكر وصافي ..
- شريهان :
علم الله داك العقل اش ݣاليك تاني ، غير جيني لطريق وݣري شنو كاين ؟
- سناء :
دابا إن شاء الله الى درتي العملية ، غادي ترجعي مع عائلتك وانا غادي نبقى بوحدي ..
- شريهان :
هادشي فاش كتفكري ، وبااااز لوجهك ياختي ... من نيتك انا غادي نسمح فيك هنا ، ابدا غادي تمشي معايا ..
- زهرة :
غادي تمشي معانا أبنتي ، بحالك بحال شريهان ... عمري نسا ليك الخير لي وقفتي معاها ، راه عاودات ليا كولشي ، كيفاش الى مرضات كتسهري حداها ، وطيبي وتجيبي ليها .. ماينسى الخير اولد الحرام أبنتي ..
- سناء :
لهلا يخطيك اخالتي ، شريهان راه ختي ... انا ماعندي عائلة ، وهي لقيت فيها عائلتي ..
- نزهة :
وحنا أي واحد من طرف شريهان ، كيولي واحد من العائلة ... حنا عائلتك أبنتي ..
- سناء :
لهلا يخطيك أخالتي ، الله يكبر بيك .. غادي نوض نحط العشا ..
- زهرة :
ياكما بغيتي لي يعاونك ؟
- سناء : لا أخالتي ارتاحي ..
- زهرة (من ورا مامشات سناء ) :
مصطفى ݣاعما شفتو ؟
- نزهة : وانت قاطعة عليه الهضرة وبغيتي تشوفيه ..
- شريهان :
علاش قاطعة عليه الهضرة واش مخاصمين ؟
- نزهة :
من نهار غبر ليك الأثر ، مابقاتش بغات تهضر معاه وقطعات معاه الهضرة عام ، ومسكين خرج من خدمتو حيت ماقدرش يكمل ، وتݣول واش قلبها بغا يرطاب ..
- زهرة :
هو السبب وهو لي دخلها فهادشي ، كونما دخلها كاعما نتحرم من بنتي عام ..
- شريهان :
ماما ، مالك عاود ليا كولشي ، راه انا لي دخلت راسي ماشي خويا ... وانا راه واخا فاقدة الداكرة عارفة راسي قاصح ... وكندير لي ݣاليا راسي ، مالك كاليا بلي مصطفى مابغاش ولكن انا وافقت ، حيت كنت زعمة باغية نحمي راسي وعائلتي ، وشفتي واخا كاع ماوافقتش وحتى مصطفى ماوافقش ، الخطر كان علينا كان ... وكولشي من الخير ، وأي حاجة راه مكتوب علينا نعيشوها ... حشومة أماما تصالحي معاه ، براكة عليه اخدمتو لي خسرها ..
- زهرة (تنهدات تنهيدة طويلة) :
يكون خير ... دخلات سناء حطات الطاجين ديال دجاج بزيتون والبطاطا فريت ، مع شلايض والمونادا ..
- سناء : زيدو مرحبا بيكم ..
- نزهة : ترحب بيك الجنة أبنتي ..
- شريهان (فيها الجوع) :
شحال هادي مادرتي لينا بحال هاد الطاجين ..
- زهرة : بنين أبنتي الله يعطيك الصحة ..
- سناء : بصحتكم وراحتكم ..
_________________________
- يوم الاثنين ، فكلينيك الشيخ الزايد ... من ورا ماخداو ليها التحاليل وقامو بݣاع الإجرائات ، دوزوها فوق الكرسي ، ملبسينها لبسة فالخضر ، واحد البلاصة فراسها حسنوها ليها ... تبسمات ليهم وشيرات ليهم بيديها ودخلوها للغرفة العمليات ، الكل كان حاضر هشام وانور وسناء ... زهرة ونزهة وأحمد ، مصطفى ومالك وسعيد ، الكل كان على أعصابو ، شوية تم جاي علي زربان ... مع وصل للمغرب سونا على مالك ، خبرو بالاخبار الجديدة جا لكلينيك نيشان ..
- علي (من ورا ماسلم عليهم ) :
جيت معطل ، معاش دخلوها ؟
- مالك : يلاه واحد 20 دقيقة ..
- علي : إن شاء الله يكون خير ، انا من الاوطيل لهنا نيشان ..
- مالك :
أمضرا قاديتي الأمور علاش وصيتك ؟
- علي : كون هاني ، ماجيت حتى جبتهم فيدي ..
- مالك (بإبتسامة نصر) :
العز ، نرضها ليك فساعة الخير ..
- علي : مابيناتناش ..
- سناء (على أعصابها ) :
اوووف ، ماتعطلوش ؟
- هشام :
واش من نيتك ، مالهم ايتقبو ليها اودنيها ويخرجوها ، راه عملية ديال الراس هادي ... خاصهم وقت راه مزال ... انا انزل للقهوة للتحت تجي معايا ؟
- سناء : واخا ... مشات مع هشام وبقا انور ..
- زهرة (كتسبح وتستغفر وطلب الله ) :
ياربي ياربي يدوز كولشي على خير ، ياربي تخرج ليا بنتي على خير وبيخير ياربي ..
- جا لعندها مصطفى تحنا على قفازي وعطاها قرعة ديال الما .. :
هاكي شربي ..
- زهرة (شداتها عندو شربات كتشوف فيه ) :
شوف كي ولات حالتك ، ضعافيتي ... كاعما كنتي هكا ..
- مصطفى (بحال الى شيحاجة كانت زامتاه وتحيدات ) :
حيتاش مابقيتش كناكل شهيوات ديالك ..
- زهرة :
حتى يفوت هادشي ونرجعو إن شاء الله ، وندير ليك تقاوت تبقى تاكلهم باش يرجع فيك اللون ..
- مصطفى (عنقها وباس ليها يديها ) :
إن شاء الله ياربي ، لهلا يخطيك عليا ..
- زهرة : أمين ياربي ، الله يرضي عليك ..
_________________________
- زهرة (وقفات) :
دازت ساعتين ديال المݣانة .. . ومزال ماخرجاتش بزااف هادشي ..
- أحمد :
شوية ديال الصبر ، راه عملية على الراس اختي زهرة ماشي حاجة ساهلة ..
- زهرة (كطلب الله) :
ياربي ياربي ..
- تحل الباب وخرج الطبيب ، كولشي قفز ناضو عندو ..
- زهرة :
امضرا ادكتور بنتي كيف بقات ؟
- مالك : أمضرا كيدازت العملية ؟
- الدكتور (بإبتسامة) :
غير بشوية غير بشوية عليكم ... العملية نجحات الحمد لله ، ماوقعو ختى مضاعفات ... دابا غادي نطلعوها لبيتها ترتاح فيه ، وغدا إن شاء الله تقدرو تشوفوها ..
- زهرة :
منقدوش نشوفوها دابا ؟
- الدكتور :
دابا لا مايمكنش ، خاصها الراحة التامة ... مخاصها تشوف حتى واحد ، غدا إن شاء الله وتشوفوها الى بغيتو ، الله يشافيها (حدر راسو ومشا) ..
- مالك :
ماعندنا منديرو هنا دابا ، من الأحسن نمشيو ..
- زهرة (بنفي) :.
لالا منخليش انا بنتي ونمشي ، انبقى هنا ..
- مالك :
خالتي ، مايمكنش تبقاي هنا ، ممنوع ... اول حاجة مغايخليوكش دخلي تباتي معاها ، وممنوع تبقاي هنا فالكونطوار ... غدا إن شاء الله انجيو مع صباح غير كوني هانية صافي ..
- زهرة : صباح بكري تجيبني ؟
- مالك (ضحك) :
وانا من إيمتا واعدتك بشيحاجة وماوفيتش بيها ؟
- زهرة : واخا أولدي ..
كانت جالسة ڪعادتها حتى أتاها و قال لها :
- تفضلي القهوة آنستي.
ردت عليه : شڪرا جزيلا لك.
ثم قال : لڪن هذا ثالث فنجان قهوة أحضره لك آنستي و لا تشربينه!
قالت : لأنني لا اشرب القهوة.
- لماذا تطلبينها إذا؟
- لأنني ..... و ما شأنك أنت؟
-قال : أنا أعمل هنا في هذا المقهى ، لڪن أنا أدرس أيضا معك في نفس الجامعة ... أظن أنك لم تلاحظي هذا لڪن أنا أتابعك بشدة ڪبيرة و أراقبك دائما!
- قالت : لماذا ؟؟!!
-أنا أشعر انك غريبة الأطوار و متقلبة المزاج دائما ، أراك تضحكين فجأة و تحزنين أخرى ...... أنا آتي إلى العمل كل يوم و قد أحببته بسببك .... أنت لا تعلمين أنني افتعل المشاڪل لاي شخص يحاول الاستهزاء بك و السخرية منك.
- ماذا ؟؟!!
- قال : نعم ، أنا لا أشعر بالاطمئنان إلا عندما أراك و أتبعك ڪل يوم ...... سامحيني آنستي أنا حقا آسف.!
- قالت : آسف ... على ماذا ؟؟!!
- قال : لأنني أراقبك دائما و أتبعك ڪل ليلة .
- فقالت هي : حسنا ... لنعد إلى موضوعنا!
- قال : لم يڪن هناك موضوع !
- قالت : بلى ڪان ، ألم تسألني لماذا أطلب القهوة و لا أشربها ؟؟!!
- قال : أجل، قلت ذلك.!
- فقالت : أنا فعلا لا أحب القهوة، لڪن أطلبها كي اراك ..
- ضرباتو الفيقة ... حل عينيه كيحس بالعضلات ديال ظهرو وعنقو تشنجو من النعسة فطوموبيل ، من بعدما وصل العيالات لبارح للدار سناء ... رجع مع دراري لشقة كلا لي قسم الله ... خلاهم حتى نعسو هز سوارتو وتيليفون ديالو ، ركب فطوموبيل وديمارا للكلينيك ... بلاصة الطوموبيل ، طلع الزاج ... جبد التيليفون كيشوف فتصاور ومبسم ، داه النعاس وهو كيشوف فتصاورها ... هز راسو للسما الحال صبح ، شاف فساعتو كانت 7 ديال صباح ... حل باب الطوموبيل كيقاد فحوايجو ، بايت كحلم بيها وكيحلم يݣوليها الشعر ، حلم زوين بزاف وهي حداااه ... دوز يديه فشعرو قادو قطع الشانطي ومشا للكلينيك ..
- دخل سول على رقم الشومبر ديالها ݣالو ليه الرقم .. وصاوه يشوف طبيب هو الأول .. مشا نيشان للبيرو ديالو دق ودخل ..
- مالك : صباح الخير دكتور ..
- الدكتور ( بإبتسامة ) :
صباح النور ، موسيو مالك جيتيني بحال الى بايت حدا الكلينيك هههه
- مالك ( ضحك) :
بحال هكاك ، امضرا كيصبحات ؟
- الدكتور :
لالا الحمد لله بيخير ، الامور كلها هي هاديك ... إن شاء الله واحد 3 يام وغادي تخرج ، تبع الأدوية ديالها ومايكون غير الخير ..
- مالك : وبنسبة لداكرة ديالها ؟
- الدكتور :
هادشي حنا مكنتحكموش فيه ، داك الوسخ حيدناه ليها ... دابا الامور كلها مزيانة ، وممكن الذاكرة ترجع ليها فأي لحظة ... غير تبع الادوية ديالها ..
- مالك :
واخا شكرا دكتور ، الله يجازيك بيخير .. واش ممكن نشوفها ؟
- الدكتور : وي ممكن واخا راه مزال مافاقتش من نعاس ..
- مالك :
ماشي مشكيل ، نشوفها ومغاديش نفيقها ..
- الدكتور : داكوغ مرحبا ..
- خرج مالك مشا لبيتها نيشان ، عطاه الفرملي اللبسة لبسها ودخل عندها ، ناعسة لاويين ليها الفاصمة على نص فراسها ... قرب منها وباسها فجبهتها وبعد ، مراقب ملامحها وكيفكر أيامو معاها الغوات والخصومة ، والعناد والعافية لي كانت شاعلة بيناتهم ... هبالها والعفوية ديالها لي سرقات قلبو منو ، شكون كال بلي هاد البنت لي ناعسة هنا اتخطف قلبو وعقلو منو ، تسكنو وتسكن روحو ... ماعمرو تصور يبغي شي وحدة قدما بغاها ، نزلات دمعة من عينو مسحها بالخف ، جات عندو الفرملية بإبتسامة :
- الى ممكن تفضل ، خاصها تاخود دوا ديالها ..
- مالك :
واخا شكرا ، خرج من البيت ديالها ... ومن الكلينيك ، ركب فطوموبيلتو داز لواحد المحلبة فطر ، عاد ركب فتجاه الدار ..
_____________________
- من بعد ساعتين كانو فالكلينيك ضايرين بيها ، وهي حالة عينيهم لي نصهم مغمضين ... دورات وجها عند علي ، كتحقق فيه (غمضات عينيها جاتها صورتو معنقها ، هازها ولايحها فالبحر ، كيجيوها لقطات والغريب أنو ماحساتش بضرورة ديال راسها فاش حلات عينيها بصوت تقيل نطقات) :
مكنحملش ، لي يلوحني فالما على غفلة ... خاص غير نوض ونرجعها ليك ، ولكن شكون انت ؟
- علي (ماقداتو فرحة) :
عقلتي على اللوحة لي لحتك وماعقلتيش عليا أنا ... وصحبو كتبقا محفورة فدماغ ولالا ؟
- شريهان :
انا دماغي تضرب فين مزال عاقلة ،انت علي ياك .. عاود ليا مالك وخويا ..
- علي : هو هدا ، على سلامتك ... توحشتاك بزاااف رجعي لينا خلاص ... باش نفرحو بيك انت وهاد العزري ..
- شريهان (تبسمات) :
إن شاء الله .. غير نرجع نتفكر كولشي ويكون خير
- زهرة :
انا غير منين بنتي خرجات ليا بيخير وعلى خير هاديك هي الدنيا ومافيها ..
- مالك (موجه كلامو ليها ، وعينيه لي مفارقوهاش منين دخلو عندها وطمنو عليها كاملين ..) :
نهار ترجع لشريهان الذاكرة ، نديرو العقد شنو بان ليك ..
- شريهان (تبسمات ) : زربتي عليا تاني اولد عمي ..
- مالك :
داز عاااام ، عااام على قدو وانا كنقلب عليك وانا كنعاني فيه ... الصبر تقادو ابنت عمي ، الله يجعل البركة .. أش ݣلتي ؟
- شريهان :
وانا نقد نفلت عريس بحالك ، إن شاء الله انا موافقة ..
- من بعد مرور شهر على خروج شريهان من الكلينيك ... فترة نقاهة دوزاتها فدار مع سناء ومها نزهة ، مابغاتش ترجع لقنيطرة حتى ترجع ليها داكرتها ، فهاد الفترة كانت متبعة الدوا ديالها ولكن مزال مكاين حتى تغيير ، مزال مارجعاتش داكرتها ... شيء لي خلاهم يرجعو لطبيب ولكن الجواب ديالو كان :
- هادي مسألة عادية ، شحال من مريضة مكترجعش ليه الداكرة على شحال ، غير شوية ديال الصبر وغايكون كولشي مزيان ..
- فهاد الوقت ... كانو جمعو ݣاع الوريقات لي أيخصوهم على قبل العقد ، مالك قاد امورو او وراقو .. وشريهان حتى هي جمعات ݣاع لي خاصها ... الليلة لي قبل العقد خرجات زهرة ونزهة وشريهان معاهم سناء ... ضارو على القيساريات ، خداو جليليبة فالبيج مع بليغة وشال فنفس اللون ، ختارو يسبقو العقد هو الاول ومنين ترجع للشريهان الذاكرة ، ديك ساع يوجدو كولشي من الخاتم زدهاز وݣاع لي كيخص العروسة ..
________________________
- نهار العقد ... كولشي فايق بكري ، مالك وشريهان خرجو مع 9 ديال الصباح وخلاوهم هوما كيوجدو ، زهرة كانت فالكوزينة كتوجد الغدا ، أما سناء وجدات الطبلة بالتمر والحليب والحلويات والعواصر ، الدار كانت مقادة على حقها وطريقها ، ريحة البخور زوينة كتعطي ، الرجال كولهم كانو مجموعين فدار لوخرا ...
- خرجات هي وياه مشادين اليدين ، كانت فرحانة اه ولكن شعروها جيهتو مزال مامفهوم مازال معارفاش واش كتبغيه ولالا ، حيتاش داكرتها مزال مارجعاتش ليها ... أما هو مكانت قاداه فرحة ... بنسبة ليه ملك الدنيا ومافيها ...
- مالك (بفرحة شاد ليها يدها بكل إمتلاك ) :
مبروك علينا ، الحمد لله من بعد ݣاع لي داز علينا ... ربي جمعنا فالحلال ، او وليتي مراتي على سنة الله ورسوله ..
- شريهان (بدهشة وخوف وتوتر ) :
الحمد لله الله يبارك لينا فهاد الزواج ياربي ، ونكون زوجة صالحة ليك وتكون زوج صالح ليا ..
- مالك (تنهد تنهيدة طويلة) :
آمــيــــن ياربي ... يلاه ايكونو كيتسناونا .. ، طلعات حداه فطوموبيل ... ديمارا وشد الطريق للدار ، وقف قريب من دار بشوية ... نزل ونزلات معاه ، غاديين فتجاه الدار ،، حتى سمعات سميتها ..
- ثورية ، هادو هوما فعايلك ... وعلى الأقل غير ݣوليها لينا ولا حنا كنلحسو الطباسل ..
- شريهان :
كنعرفك اختي ، كتعرفيني ... ياكما بيناتنا شيحاجة وانا مافخباريش ، اش كتكوني باش نعرض عليك ؟
- ليلى (ضحكات بميوعة حاطة عينيها على مالك ) :
بيناتنا بزاااف أحبيبة (قربات ليها) ولا نسيتي ياماتنا ... داكشي باش مكنتيش كتبغي تقصري معانا ، ݣولي طحتي على ڤيكتيم مريش ..
- شريهان (هزات راسها فيه ) :
دخل انت انا تابعاك ..
- مالك :
شريهان ، مابغينا صداع ... اليوم زواجنا زعمة ..
- ليلى (ضحكات) :
هاي هاي على شريهان ، تي كيفاش شريهان كادبة على السيد ... تاعنداك اخويا راه سميتها ثورية ، غير سرباية لا ضحك عليك ..
- شريهان (خنزرات فيها ) :
حتى انت تحل ليك الفم ، أدوي يا دلالة بلا رزمة ... يادواحة بلا حزمة ، يا صباحة بلا عيد ، وخلاوها ماليها وجه الشارفة مايحفا واخا تحكو بالحلفة ... حتى انت محكة وتحك الݣدام حتى انت توب يتفصل ونخيطوه ، دابا دور دورة وتلبسي الݣندورة وترجعي مقهورة يا وجه موكة ... ودابا غادي تخطوي جوج خطوات ولا نخصر ليك كمارتك ..
- ليلى (تعصبات حتات على شريهان من فولارتها ) :
انا انوريك شارفة يا شارفة ... شريهان رضات عليها جراتها من شعرها ... ناضت المانتفة والغوات ، خرجو من دار سناء وزهرة ونزهة ، مالك يفك مالقا مايفك ... سناء تفك وتنتف فليلى تحمات عليها هي وشريهان ..
- شريهان (كتركل فيدين مالك لي هزها ) :
طلقني (كتغوت) طلقني نوري مها ك* لبة طلقني ... الضبابة جاتها على عينيها وهي كتغوت ، لقطات جاوها لعينيها وهي كتغوت مع وحدة رقيقة وطويلة وزعرة ... وصوتها كيتردد (متغوتيش قدام البنت حتارمتك غير حيت انت خطيبة ولد عمي ، اما راه والله مايعجبك حال .. مالك كارولين قدامنا ، كنت عارفاها اتخرج لينا من جنب ، أما موافقة نتزوج بيك ... منقدش نكوليك واش كنبغيك ، عفاااك عفاااك خليني نمشي عفاااك ، سكتي انت اتكوني ديالي انا وياك انمشيو بعيد ... ايجي نهار وهاد المحال ايولي ديالي دابا تشوفي ، وغادي نولي مشهورة ونبان فالمجلات ) كولشي لقطات تفكراتهم كولشي ... كاع لي وقع تفكراتو نهار الحادث وفاش تخطفات كولشي .. ليلى بعدوها الناس وشريهان لي سقلات ... شعرها طالع لسما ، حطها مالك :
- بغيت انفهم مالك ومال هاد المشاكل ؟
- سناء :
ناري يا صاحبتي كنݣوليك عطيها بتيساع ... هاديك راه جلاخة ، واشتي دابا كنا بغينا نتلقاو ليكم بالحليب وتمر تلاقينا مع المدابزة ...
- زهرة :
وناااري يابنتي ، واش انت كتقلبي على المشاكل ؟
- شريهان (هزات فيها راسها ) :
انا مكنجبد حتى واحد اماما ، هي لي جبداتني ... اللفعة ديال اللفعات ، (شافت فمالك ) بحالها بحال ديك سبسبو ديال كارولين لي كنتي خاطبها ..
- مالك (مصدوم ) :
كارولين ، كيفاش ؟ انا ݣاعما عاودت ليك عليها .. كيفاش كارولين واش واش تفكرتيها ؟
- شريهان (كتفرنس) :
ماشي غير ، تفكرت كولشي ..
- مالك (تحلو عينيه بصدمة ) :
حلفي بالله ؟
- شريهان (قربات من ودنيه بهمس ولوخرين كيشوفو فيهم مصدومين ماحيلتهم ليها هي لي رجعات ليها الداكرة ، ولا هبالها ) :
ياكما بغيتي نوصف ليك الوشام لي عندك فصدرك ، ولا الوشام لي عندك فرجلك ختار ..
- مالك (بالفرحة جرها عنقها قدام كولشي ، الناس كولشي ... سناء مالقات مدير وهي تبدا كتزغرت وتصلي على النبي ) ..
- زهرة (عنقاتها ) :
على سلامتك ابنتي على سلامتك ... عنقاتها نزهة فرحانة ، خرج مصطفى والبقية ... جاو عندهم ... باركو ليهم عند بالهم غير حيت عقدو تلقاو ليهم بالزغاريت ..
- شريهان :
خويا مصطفى ، فين هي جوديا علاش ماجاتش معاكم ،ياك كانت باغية تحضر لعرسي ؟
- مصطفى (تبدل لونو ) :
قصة طو (شافيها مصدوم ) بلاتي واش واش رجعات ليك داكرة وااااااا هاهاهاها (جرها عنقها كيدور بيها فرحان ) ... علي مكانش قل منهم بالفرحة ، احمد حتى هو سعيد ... حتى هشام وانور كانو فرحانين بزاااف .. دخلات سناء وخرجات الحليب وتمر ، وعاودو تلاقاو ليهم ... خداو الحليب وتمر ودخلو تحت الزغاريت والصلاة على النبي .. الفرحة وأخيرا رجعات للدار ، ݣلسو فالصالة مالك حدا شريهان ، والكل مجموع وفرحان ...
شريهان (قربات من ودن مالك وهمسات ) :
عام داااز ، عام وانت كتسناني ... وقبل عام كنت بغيت نݣوليك واحد الحاجة وماكتابش ، ودابا غادي نݣولها ليك ... كنبغيك بزااف كنبغيك كثر ماتخايل امالك ... انت حياتي وحبيبي وروحي وكل مكنملك ، وأنا فرحانة حيت ربي رزقني بزوج بحالك .. كنتمنى من الله ايامنا كلها تكون أفراح والمسرات ... وعمر الحزن يطرق بابنا يارب ..
_________________________
- شريهان (بتدمر) :
وعييييييييت أعباد الله عييييت وحق الله المعبود ، وبزاااف قنيطرة كلها شريناها ... لي خلاه مالك كملوه انتوما ..
- سكينة (كضحك) :
سكتي ... سكتي لي درناه سكتي عليه ، انت عروسة مخاصكش تهضري ..
- سناء :
عندها الصح ... لي قلنا ليك قولي واخا ، راه زواج هدا خاص توجدي كولشي على حقو وطريقو ..
- شريهان (كتخنزر فيهم ) :
واش انتوما متافقين عليا ، سسسسسسسعد اجي اخويا اجي عتقني انت لي ليا ، انت لي مضوي عليا وناصرني ..
- سعد :
اختي غير عدريني الى مشيت حتى نصفتك غير غادي ناكلها فعضامي ..
- شريهان (كتخنزر فيه) :
ماصدقتيش ، وليتي راجل المرا تررررر ..
- إشراق (كضحك ) :
غير صبري ماعندك مديري ، هادشي ضروري منو ... أجي شريهان ، شنو نويتو واش اترجعو للفرنسا ولا اتبقاو هنا ؟
- شريهان (تنهدات تنهيدة كويلة ، شافت فسناء لي حدرات راسها ... عينيها غرغرو بدموع ) :
الصراحة ، أنبقاو هنا .. (سناء هزات فيها راسها مصدومة ) فرنسا اختي مابقيتش بغيت نرجع ليها ... ماشفناش فيها حوايح زوينة ، مالك ايكمل على المشروع لي ناوي يديرو تريتور ، وانا غادي ندير المشروع ديالي هنا فالمغرب ، هي اه اتكون الفكرة غريبة بنسبة لناس ... ولكن مالك كاليا مايهمني حتى واحد ... مدام مأمنة بالفكرة ديالي فراه غادي تنجح ..
- سناء (فرحانة ) : أحسن خبر سمعتو فحياتي ..
- سكينة : هي انرجعو نبعدو تاني ؟
- شريهان :
حتى حاجة مابعيدة دابا ، التيليفون كيوصل لماعرفت فين ... وفينما توحشتونا اتجيو ، وحتى حنا بحال هكاك ..
- فرح (طلات عليهم من الباب ) :
شريهان تكلمي اختي راجلك بغاك ..
- شريهان (كتفرنس ) :
ناري هاد راجلك فشكل جاتني .. واخا اختي هاني جايا (مشات فرح ) شوفي شكون كال علي يولي يبغي فرح ويخطبها ، ومايمشي من هنا حتى يعقدها ..
- إشراق :
كولشي بالأرزاق ، وماشتيش انت جميلة لي خدات ليمين هو ... ههههه فاش غبرتي كانت تلاقات معاه ، حيت كان شافها جوج مرات فاش كان هنا ، وتعارفو وتقربو من بعضياتهم ، وخطبها ... وراه قريب عندها العقد ..
- شريهان :
وخالتي حليمة قبلات ليها ؟
- سكينة :
فالاول مابغاتش ، ولكن منين ݣالت ليها حميلة بلي راه غادي يسلم ، عاد رتاحت ... راه كانت بغات تجي ولكن مازال ماعطاوهاش كونجي ..
- شريهان :
ماعليش ، الله يكمل عليها بالخير ياربي ، انا نشوف مالك ونرجع ..
- طلعات عندو لسطح كان كيتسناها تماك ..
- شريهان :
علاش مانزلتيش لتحت ؟ لاش ݣالس هنا ؟ .. جرها من يدها وݣلس على واحد الياجورة جرها او وقفها قدامو كيلعب ليها بصباعها :
- بغيت نعطيك واحد الحاجة ..
- شريهان (بإستغراب ) :
شنو هي هاد الحاجة لي بغيتي تعطيني ؟
- مالك (خشا يدو ورا ظهرو وجبد ملف فيه شي وراق ) :
هاكي ..
- شريهان (خدات الملف ) :
شنو هادا ؟
- مالك :
العقد ديال المحال لي ففرنسا ، لي شفتيه وݣلتي لسكينة بلي غادي يكون ليك ، هاهو دابا ولا ملكك .. وبسميتك ، انا عارف بلي مشروعك اديريه هنا .. ولكن اتحتاجي لفرع ففرنسا ، والمحال ايكون موقع ديالو زوين بنسبة لوكالة زواج .. انا مابفيت نسمع حتى إعتراض ، بغيت نشوف خدمت حبيبتي كيفاش اتكون ، ياك واعدتي كولشي بلي اتنزلي فاشهر مجلة وبيني ليا ..
- شريهان (مالقات متݣول صدمها ، وفنفس الوقت فرحات وحمدات الله ألف مرة على هاد الإنسان لي هداه ليها الله ) :
(عنقاتو) لهلا يخطيك عليا ياربي ... وياربي مايحرمنيش منك ..
- مالك (بعد منها كيشوف فوجها وشفايفها ) :
منستاهل والو من عندك زعمة ، والو ݣاع ..
- شريييييييييهاااااان فينك ..
- مالك (بسخط ) :
وهاااا الباكور دوالو ، واش مابقا حد يكلس مع مراتو بخاطرو العفو ..
- شريهان (هربات منو كتضحك ) :
مزال ماشفتي والو أحبيبي ... خلاتو معصب وهبطات كضحك فدروج ..
_____________________________
حين أقول أحبك ، أعني بها أن العمر أنتِ ♥
والوطن أنتِ والفرح أنتِ والروح أنتِ
فأنا إكتفيت بكِ و رأيت فيك الناس أجمعين
و لك في القلبِ ما لا يجوز لغيرك
و في النبضِ نَبضٌ على سواك محرم .
****
نهار الحنة ... الدراري كانو خدامين كينصبو فالقاعة ، شريهان لي حلفات بحلوفها دير أكبر عرس فالخومة ، ويحضرو كاع الحباب والصحاب لي كانو معاهم من نهار سكنو فهاد الحومة ، بغاتو عرس أسطوري شعبي ... خرج عمر ركب فطوموبيل ، هو وسعد ... ركب النص فالبنات معاه ونص لاخور مع عمر ... يلاه بغات تركب فطوموبيل حتى سمعات سميتها ، حبسات وضارت لعند مصدر الصوت ... حسات بقلبها تقبط عليها واحد البرود كتاسح الجسد ديالها من الصدمة ، مكانتش متوقعة تشوفها نهائيا ..
- شريهان : مــــريـــم !!!! ..
- مريم (واقفة قدامها ) :
سقت الخبار بلي تزوجتي ، مبروك عليك ..
- شريهان (ببرودة ) :
الله يبارك فيك ، لاش جيتي لهنا ... لي كان بيناتنا فرقناه كنعقل ، لاش تابعاني ماقدش الفيسبوك وفعايلك ديال البراهش ..
- مريم (كتقاد الفولارة لي دايرة على راسها ) :
انا ، انا جبت غير باش نطلب منك السماحة على داكشي لي وقع ، كاع لي درتو فيك خلصتو بضوبلة ... والديا نابقاوش كيحملو فيا الشعرة ، حتى واحد مابقى كيحملني .. وليت منبودة ، انا كاينة غير عند حدة فالعروبية .. كنت مدوزة عند طبيب نفساني ، والحمد لله وليت كنحس براسي تبدلت مابقيتش كيف كنت ..
- شريهان :
كل واحد كيتخلص على قد فعالو وعمالو ، انا كنت معاك بنت الناس ... عمري اديتك ولا وصلت ليك ، لي كنبغيه لراسي كنبغيه ليك أنت ، كنحيد من راسي وكنعطيك ، فالاخير تبيعيني للشماتة ، على قبل جوج فرانكات وعلاش ... بسباب الوسواس ديالك وشيطان ، لي كان كيݣوليك بلي بيني وبين مروان شيحاجة ... ودابا يمكن راك صقتي لخبار بلي مروان خدا اوكرانية وراه عايش هو وياها فسويد ياك ... دابا يمكن تأكدتي بلي انا وياه كنا غير صحاب وخوت ... انا مكايهمنيش حياتك ، انت حرة فيها لي مهم عندي غير تعطيني شبر ديال تيساع براكة ، حيت منبغيش وحدة بشر لي فيك والحقد والحسد يكون فحياتي ... ونزيدك واحد الحاجة ، كنت معتابراك حتي ولكن ربي جزاني وعطاني فبلاصتك جوج خواتات ... وقفو معايا فالحارة والحلوة ، وبينو ليا الصحبة الحقيقية ماشي بحالك ، سيري امريم الله يعاونك ..
- مريم (دموعها نازلين ) :
انا مابغيت منك والو ، وانا عارفة لي درت فيك مكايتغفرش ... ومنحقك ديري فيا مابغيتي وكثر ݣاع ... لي بغيت منك غير المسامحة ، بغيت انرتاح مكنعس مكنشوفو ، انا تقربت من ربي وتحجبت وكنطلب الله يسمح ليا ، بغيتك اتسمحي ليا والله وجهي لا شفتيه ... الله يرحم ليك الوالدين سمحيليا ..
- شريهان ( تنهدات تنهيدة طويلة) :
إلى سمح ليك الله ، انا مسامحاك ... المسامحة امريم ، انا مسامحاك حيت مابقيتي كتعني ليا والو سمحت ليك ، سيري الله يسهل عليك .. عطاتها بظهر وركبات فطوموبيل ، ديمارا عمر ومشاو .. حدرات راسها مريم ومشات بحالها ..
_______________________________
- شاد تيليفون كيشوف فيه ، مغوبش من الصورة لي مليوحة فستوري الأنستغرام ديال جوديا ، كانت كدوز العطلة فسانتوريني فاليونان ، كان معاها شخص كيشبه ليه ... مصورين بزاف ديال التصاور كيضحكو ، باينة مستمتعة وفرحانة عاجبها الحال ... مشا للواتساب باغي يسيفط ليها ميساج ، كيتفاجئ بصورتها تحيدات هادشي كيبين بلي بلوكاتو ، تبسم ضاحك على راسو ... كانت غصة واحلة ليه فحلقو ..
- مال صاحبي كاعي ياك لاباس ؟
- هز راسو فمصدر الصوت وتبسم .. :
منعم توحشناك اصاحبي (عنقو )
- منعم : جيتي وماعلمتيناش ، كون مكالها ليا العميد مغاديش نعرف ..
- مصطفى :
فخبارك لافير لي وقعات ... داكشي باش ماقديتش نهضر مع حتى واحد حتى نلقى ختي ..
- منعم :
على سلامتها ، ومبروك عليها ... واخا ماعرضتيناش ..
- مصطفى :
وحق الله العظيم الى كنت باغي نسوني ليك انت وخولة ، باش تحضرو ..
- منعم :
تهنى انجيو انا وياها ..
- مصطفى (كيضحك) :.
انت وياها هههه اممم القضية فيها إن ، أش كاين العود عاود ليا ..
- منعم : لا انت لي اتعاود ليا الاول ، اش كاين شتك ماشي حتى لهيه ، وقعات ليك شيحاجة مع جوديا ؟
- مصطفى (تنهد ) :
جوديا بلوكاتني ، ومشات لسانتوريني كدوز العطلة مع ولد خالتها ... ولد خالتها لي كان باغيها لزواج ..
- منعم (مصدوم ) :
وايلي ، وياك مكانتش قابلة بيه ݣلتي ليا ، وبلي خاصو يسلم ..
- مصطفى :
هادي ماشي حاجة لي واعرة بنسبة ليهم هوما ، هو كان مستعد يسلم على قبلها ... ودابا راه مدوزة هيا وياه العطلة وبلوكاتني ، جوديا بغاتني نبقا معاها ففرنسا ، نبقى تحت عينيها ... وزايدون ماعندها مادير بواحد خلا خدمتو ودابا شمور ..
- منعم :
مديرش فبالك ، شفتي هادي لي اتكون معاك وتبغيك كيفما انت أصاحبي ، مزال مبانت وممكن تبان فأي وقت ..
- مصطفى (دار تيليفون فجيبو) :
ماعليش .. يلاه دخل دخل ، جابك الله تعاون نيت الشعب ..
- منعم (ضحك) : هي لي متعاود ..
_________________________
- دخلو شريهان بصلاة على النبي العدنان للحمام ، تلقاو ليها الكسالات بالحليب وتمر ، ودخلوها للحمام لي كان محجوز غير على قبلهم ، فدار جات النݣافة قدات لبلاصة فين غادي تحني شريهان ... الطبيلة والحنة ورق والورد والبيض والسكر ، تقادات البلاصة على حقها وطريقها ... زهرة فالكوزينة مشمرة على قفطانها محنية يديها ورجليها ، نزهة وݣذلك محنية يديها ورجليها هي وحليمة ... الدار عامرة ، الرجال سعيد وأحمد ومالك كاينين فالڤيلا ... هشام وأنور وعلي وسعد كانو خدامين ، سلات شريهان الحمام خرجات ، لبسات كولشي بيض وجديد من حوايج الداخل للبرا ، خرجوها بصلاة على النبي طلعوها فطوموبيلة عمر ... ركبو معاها ونص جا سعد داهم ..
_______________________
- ݣالسة فالبرزة الخضرا ، بقفطان ديال الموبرا ديال زهرة ، فالخضر مطروز بصم شعرها كان مطروق على راحتو بلا سيشوار بلا والو ... رجليها فوق المخاد ويديها كذلك .. النقاشة بدات ليها فرجليها ، العاونيات بداو يغنيو فنفس البيت ... إشراق لابسة قفطان فالموڤ بارد ، ناقشة صبع واحد ... سكينة لابسة قفطان فالبيج ، وحتى هي صبع واحد ... سناء لابسة قفطان فالبلوا غوا ناقشة صبع حتى هي ، فرح كانت لابسة سروال بيج قندريسي مع قفيكين قصير ديالو ... وحتى هي ناقشة صبع واحد ، البنات كولشي نايضين كيشطحو ، بداو يغنيو على أم العروس ، دخلات زهرة كتشطح ... فرحانة مقاداها فرحة ، داكشي لي كانت بغات هاهو تحقق ... وهاهي بنتها سهل عليها الله وتزوجات ..
- فالڤيلا ديال أحمد .. الباب كان محلول ، قدامو طوموبيلات مزينة بالورد ... ريحة البخور والعود كتعطي ، وصوت الأمداح ، الرجال تجمعو كاملين هنا مخليين العيالات بوحدهم ... مالك كان ݣالس لابس جلابة فالبيض مخيطة بالݣرونة ... كان كيبان كامل الرجولة والوسامة فهاد اللبسة تقليدية لي زادتو نور على نور ... مصطفى وعلي انور وهشام وأحمد وسعيد حتى هوما كانو لابسين جليلبات ، حتى من منعم كان والعميد وكاع الأصدقاء القدام لي مصطفى وسعيد كانو ... حتى من العائلة ديال مرات احمد كانو ، خوها او ولادو ، ختها وبناتها كانو مع العيالات من بعد سينين تجمعو ..
- داز داك النهار على خير وبيخير وزوين بزاااف ، حطات راسها على نموسيتها ... الحنة حمرة تبارك الله فيديها ورجليها ، وصلوها تصاور من عندو وحتى هي بدورها سيفطات ليه تصاورها ...
- مالك : جيتي فنة ماشاء الله عليك .. توحشتك بزاف ماقدرتش نشوفك اليوم ..
- شريهان (جاوباتو) :
حتى انا توحشتك ، وحتى انت جيتي زوين بزاف ...
- مالك : نسوني عليك أبيل ڤيديو ؟ بغيت نشوفك ..
- شريهان (كضحك بشر ) :
تصبح على خير ابب ، خاص نفيق بكري غدا نهارنا كنبغيك ..(قطعات الويفي حطات تيليفونها ونعسات ) ..
- مالك (كيتحلف عليها ) :
واخا واخا ، نردها ليك فساعة الخير ..
________________________
- نهار العرس ... اكبر نهار لي كتحلم بيه أي وحدة ، الصباح كلو داز غير فتوجاد ، لي باغي يدوش ولي زربان يلحق الكوافورة كل واحد وشنو كيدير ، أهل العريس فالفيلا كيقادو فدهاز فطيافر ... ، اما شريهان خرجات مع مصطفى والبنات للصالون لي كاين فلاڤيلوت باش تقاد ظفارها وتصايب شعرها سامبل باش منين تجي عندها الميكاپ ارتيست لدار تقاد ليها المشطة ويجيها ساهل ، البنات سبقو قادو شعرها بينما سالات ليها الكوافورة لوجيل ... غير سلاتو ليها قدات ليها شعرها سامبل ، مع سلات ليها رجع ليهم مصطفى داهم هو وعمر ... طلعات نيشان لبيتها فين اتبدل ليها النݣافة وتقاد ليها ، جات الميكاپ أرتيست ، كانت هي او وحدة وشريهان بوحدهم فالبيت ، اول حاجة قدات ليها وجها ، جات كتحمق برموش والمكياج ، برزات ليها لون عينيها وشفايفها لي كانو بلون الخوخ ... عاد جات نوبة المشطة ، وصلات النݣافة بلباسي ، كانت الساعة كتشير ل 7:30 ديال العشية ، الناس بدات كتجي والقاعة بدات كتعمر بناس ، بالحباب والصحاب ، وصلات خولة لابسة قفطان فتيركواز عصري ، طالقة شعرها هي ومنعم مشادين اليدين .. شافهم مصطفى لي كان واقف على برا بكامل اناقتو ..
- اتبارك الله على العرسان ديالنا الجداد ..
- خولة(كضحك) :
ناري وصل ليك الخبار ، مزال يلاه تخطبها مزال ماولينا عرسان ..
- منعم : ولكن قريييب ..
- مصطفى :
دخلو دخلو مرحبا بيكم اجيو نوريكم الطبلة لي اتكلسو فيها ، دخل معاهم للقاعة وراهم الطبلة ، أوركسترا طهور كانت كتأنسطالي الماتريال ديالها ... العمارية كانو موقفينها على برا باش دخل بيها ..
- لبسو شريهان اول لبسة لي كانت فالبيض منبتة كلها بالحجر مع التاج ، تسمع صوت ديال عيساوة وهدا دليل على الوصول العريس وعائلتو ... التحت كانو زهرة بتكشيطة الخضرة مع شمار وفولار فدهبي ، اما سناء بتكشيطة فالموڤ كتحمق ، شعرها كانت شداه على شكل ديل حصان ... اما فرح كانت لابسة تكشيطة فالبلو مارين حتى هي كاتبان كتحمق ، سكينة لي ختارت تكشيطة فلورونج والخضر ، اما إشراق كانت لابساها فالݣرونة ... سعد لي كان على برا لابس كومبلي فزرق ، لا هو لا عمر متوسطهم العريس مالك ، لي كان لابس كوستار فالكحل واقف بكل وسامة حداه أحمد باه ، بكومبلي فالكحل وشوميز بيضة ، وحداه مو زهرة بتكشيطة خليط بيه الفوشيا ودهبي وصفيفر بتوب ديال التليجة ، لور كانو دراري لي خاصين بالطيافر لابسين جلالب كيدورو بدهاز لي كان كيحمر الوجه ، الدقة المركشية بدات منين سلاو عيساوة ، كولشي خرج كيصور ، نزلو شريهان بصلاة على نبي ، طلبو من الريس يجي يستقبلها ، وقف قدامها والفوال على وجها ، خدا يدها بين يديه ، وخرج هو وياها بصلاة وسلام على النبي العدنان ، كولشي كان فرحان كاع لي حاضر باينة ليه الفرحة فعينيه ، غير الحباب هوما لي كانو مجموعين ... والجيران الحقيقيين لي مافقلبهم لا سم لا غيرة ، طلعو شريهان للعمارية ، وهزوها دخلوها ، ويدا طاهور كيغني دورة ديال العمارية ، كولشي كان كيصور هبطوها حتى هز ليها مالك الڤوال ، عينيها كانو كيبريو بالفرحة وبالانبهار بالجمال ديالها ، فرحتو بدنيا ومافيها ، المرة لي بغا هاهي حلالو دابا ..
- كولشي كان فرحان وكيشطح ويغني ... طلعو شريهان باش تلبس اللبسة الثانية لي كانت ديال التليجة بالخزي ، جاتها كتحمق ... بدلات ليها الميكاب ارتيست غير العكر لي كان فالفوشيا ..
- مصطفى كان خارج على برا يتكلم لواحد السيد ، جا يبارك ليهم عيا معاه يدخل مابغاش ... سلم عليه ومشا تم راجع حتى دخل فكتف شي وحدة ..
- سمحيليا بزاااف والله ماشفتك ..
- (بإبتسامة بريئة ، لابسة فولار باين اشوية من شعرها ، لابسة تكشيطة فالبلو غوا ومكياج خفيف كيبين ملامحها الزوينة ، زين ديالها كيبان فاسي ) :
لا ماعليش ، حتى انا كنت ساهية سمحليا ..
- مصطفى :
لا ماشي مشكيل ، انا لي دخلت فيك سمحيليا بزاف مارضيتش البال ..
- فاطمة الزهراء (خرجات مرا كتعيط ) جبتيلي تيليفوني ؟
- فاطمة الزهراء : هاني جايا ..
- مصطفى (سلم على المرا لي كانت مرات خو نزهة ) :
سلام لالة فوزية ، بغيتي شيحاجة نجيبها ليك ؟
- فوزية :
لا أولدي الله يرضي عليك ، صافي بنتي راه اتكلف .. حدر راسو مصطفى ورجع للقاعة .. جا وقت يتحط العشا ، ولهاد الݣلسة لبسات شريهان الخضر فونسي ، جاها فن ... تجمعات العائلة فطبلة وحدة والموسيقى خدامة ، سلاو العشا وجات اللبسة ديال تركاب الخاتم ، فلون الفوشيا ... لبس ليها مالك الخاتم والبراسلي والكوليي ... وكلها التمر وشربها الحليب .. من وراها جات الكسوة البيضة ، ختارتها بسيطة بالكمايم طويلة من التحت مستورة ، مع تاج والاكسسوارات لي كانو بساط وخفاف ... قطعات هي وياه الطارت ، تحت تصوير الحباب والكاميرا مان ... خرجو على برا تحت تصفيقات العائلة ، ودموع زهرة ... ركبات مع مالك فطوموبيل ، وديمارا شادين طريق أصيلة ، المدينة الجميلة الهادئة الرائعة ... كان ديجا مالك كاري بتيت ڤيلا على البحر ، غير ليه وليها هي يدوزو فيها سيمانة من تم ايدوزو شهر العسل فالعديد من المدن المغربية ، مالك كانت متعطش للمغرب يدورو كامل ، وأحسن رفقة بنسبة ليه هي حبيبتو وروحو ..
_______________________
- لابسة پينوار ديال ستان فالݣرونة ، طالقة شعرها ريحتها الطبيعية زوينة ، وجها طبيعي خالي من مساحيق التجميل ، خاتمها ديال الزواج كيلمع فيديها ... واقفة فالبالكو مقابلة مع البحر والإبتسامة على وجها ، كتفكر كيفاش داز لبارح ... كيفاش مالك عاملها بحال أميرة على عرش المملكة ديالو ، كيفاش دللها ودلعها وخلاها تعشقو كثر كثر ، كيفاش خلاها توهبو قلبها روحها والجسد ديالها وتكون ليه جسدا وروحا ، تنهدات تننيدة طويلة ، على إثر اللمسات ديال يديه على كتافها ..
- مالك (بهمس حدا ودنيها ) :
مجاكش البرد ؟
- شريهان (ضارت عندو ، كان لابس سروال ديال التوب فالبيج ، وتيشورت ..) :
لا الجو زوين بالعكس .. سكتات ، حطات يديها عىى وجهو كتشوف ليه فعينيه :
كنبغيك بزاااف أمالك ، كنبغيك كتر متصور ... أنت روحي وحياتي ونور عينيا ، كنبغيك لواحد الظرجة متخايلهاش ..
- مالك (مسح دمعة نزلات من عينيها ) :
علاش الدموع ؟
- شريهان :
دموع الفرحة ، ربي جزاني على كاع داكشي لي عانيت بيك ... الحمد لله ، أحسن حاجة وقعات ليا ومغاديش ندم عليها نهائيا ، مندمتش لي شهدت على ديك الجريمة ... حيت كونماشي هي مكنتش انمشي للفرنسا ، ومكنتش غادي نشوفك ونتجمعو بزوج ..
- مالك (جرها ودخلها فصدرو معنقها ) :
مزال مزال غادي نعوضك ... وغانكون معاك حتى تحققي داتك وتولي انت هي السيدة الأولى ..
- شريهان (شافت فيه وضحكات ) :
زوين هاد اللقب عجبني ..
- مالك (خطف بوسة جنب فمها ونطق) :
السيدة الأولى واجدة تدور المغرب ؟
- شريهان (ضحكات ) :
وااااجدة وعلى اتم الإستعداد ..
- كانت واقفة فجردة ، هازة واحد المدكرة فيديها ... لابسة لبسة رسمية فالخضر ، سروال مع ڤيست ديالو ، صباط ميني طالون ، مع فولار فالموڤ .. ساعة دهبية فيديها مع خاتم الزواج ... كتقيد فالمدكرة وتشوف شنو لي مزال خاصها ..
- هشام :
شريهان بنسبة للݣلسة ديال العرسان فين اتكون ... جاتني فديك البلاصة مغايكونوش مقابلين مع ݣاع الناس ..
- شريهان (كتخمم ) :
فعلا عندك الصح ، عرفتي شنو خليها فهاد الجهة ، هكا كاع الناس ايكونو مقابلين معاه ..
- هشام :
داكوغ ، اااه هضر معايا انور ، على قبل موضوع التجديد ... ديال طوابل وديال الماعن ، السلعة الجديدة زوينة بزااف خاص ضروري تشوفيها ..
- شريهان :
السيمانة الجايا إن شاء الله غادي نطلع انا ومالك للكان ، وديك الساع نشوف كولشي مباشرة ... اجي ماتوحشتيش أنور ؟
- هشام ( ضحك ) :
وصراحة توحشتو ، ولكن هو ختار يشد المحال ديال كان ، وانا ختاريت نبقى معاك فالمغرب ومع سناء او بنتي ... منقدش نخليهم وسناء مابغاتش تخوي البلاد ماعنيد مندير ..
- شريهان :
بصح ، يلاه خاصنا نكملو دغية ، مابقا والو ويوصل وقت العرس ... يلاه خاصني نقاد راسي ونوجد ، ولا خالتك زهرة متنسا فيا غير لي نسات ..
- دازت اربع سنوات على زواج شريهان ومالك ، اربع سنوات وفكل مرة كيزيد حبها لهاد الإنسان هدا ، إنسان زقف معاها حتى وقفات على مشروعها المشروع لي كانت خايفة ماينجحش ، هاهو دابا ناجح وعليه إقبال كبير ، ولاو كيهضرو عليها فالأنترنت ... الفيسبوك والأنستغرام ، وحتى فالقنوات ، إسمها تدرج فالجرائد المغربية وفالمجلات ، لقبت بلقب السيدة الأولى ، حيت هي اول وحدة ادخل هاد المشروع المغرب ، مشروع لي نجح نجاح باهر ... هاهي دابا ولات سيدة أعمال ، بالمكتب ديالها ، واليوم هي بنفسها لي مسؤولة على عرس خوها مصطفى على بنت أخ نزهة فاطمة الزهراء ، البنت لي تعرف عليها من ورا عرس ختو ... البنت لي حفزاتو ، وخلاتو يرجع للخدمة ديالو لي كان كيبغيها ومقادرش يدير شي خدمة من غيرها ، وبخدمتو النقية وبلاصتو قدر بمساعدة العميد انو يرجع يمارس المهنة ديالو ، بنت نقية صافية بغاتو من قلبها او وقفات معاه ، سناء لي تزوجات بهشام وتزادت عندهم بنية سماوها شامة ، عندها عامين دابا ، إشراق لي تزاد عندها ولد عندو 3 سنين و3 شهور ... سماوه عمران ، اما سكينة وسعد لي رزقهم الله ببنية ، يلاه عندها عام سماوها الاء ... فرح لي عقدات هي وعلي ، مابغاتش دير العرس ، غير عقدات هي وعلي ومشاو للفرنسا ، مها ديما معمرة مع زهرة كتفوج عليها ... كيخرجو بزوج ويدخلو بزوج ...سعيد لي واخيرا دخل للقفص الذهبي ، مع حليمة ... هي لي تعرف ليه جمعاتو وطواتو ... العائلة كلها تجمعات ، إشراق وعمر سعد وسكينة لي بقاو مستقرين ففرنسا ، اما مالك فولا من بين أحسن واكبر ممولين الحفلات ، كانو كيجيوه طلبات من كاع المدن .. كل عام كيدوز كيزيدو هبة او وقر وروجولة ...
- داز عرس مصطفى كيفما كانت متوقعة شريهان ، كانت واقفة كتشوف فخوها فرحان كتشوف فعائلتها مجموعة وضاحكة ، تنهدات تنهيدة طويلة وحطات يديها على كرشها ..
- مالك ( من وراها ) :
مال الحبيبة ديالي ؟ فاش كتفكري ..؟
- شريهان (تنهدات تنهيدة طويلة) :
4 سنين دابا باش مزوجين ، ومزال ربي ماسهل علينا بشي وليد ولا بنية ..
- مالك (دورها عندو ) :
هادشي ديال الله سبحانه ، درنا كاع تحاليل وكولشي عندنا مزيان ، أي حاجة كتجي فوقتها مزيانة ... ماتبقايش تفكري فهادشي ، واش نسيتي غدا عندك رونديڤو مع شهرزاد عكرود فشدى فم ..
- شريهان (ضحكات ) :
اه بصح عندك الحق ، خاص نكون مرتاحة باش نكون مركزة ..
- مالك ( باس ليها راسها ) :
وهكاك نبغيك ..
______________________
- فاقت الصباح .. لبسات حوايجها بحال ديما ، نزلات التحت لعندهم ، عمها ومراتو كانو كيفطرو ، سلمات عليهم بحال العادة ، عاد خلط عليهم مالك ... فطرو مجموعين ، من بعد ناضو باش يوصلها للراديو ..
- نزهة : الله يوفقك ابنتي ..
- شريهان : امين اخالتي لهلا يخطيك .. انا مشيت ..
______________________
- فراديو ستقبلاتها شهرزاد عكرود بترحاب كبييير .. ݣلسات على الكرسي .. ومالك من ورا زاجة كيشوفيها بكل حب ..
- شهرزاد :
شريهان ، شريهان العراقي سيدة الاعمال ... لي جابت فكرة صعيبة وطبقاتها على ارض الواقع فالمغرب ، ونجحاتها ، بغيت نعرف منين جاتك هاد الفكرة ، وكيفاش حتى حصلتي على لقب السيدة الأولى ؟ عاودي لينا ..
- شريهان :
انا فرحانة حيت كاينة معاكم اليوم ، خصوصا معاك شهرزاد ... قبل من هادشي بغيت ندير إستثناء ونهدي بضع كلمات ، للاروع إنسان هداه ليا الله هو الزوج ديالي ، شافت فيه بكل حب ... ونطقات :
- أنـــا الــــتي أهـــداها الـــقدر فـــي يـــوم مـــيلادهـــا ، هـــديـــة غيــــــرت مـــــجرى حــــياتـهـــا ... أنا التي اهداها القدر اروع هدية ، حب حولها من سيدة عادية الى سيدة أولى ..
- تبسم وجاها منو الـــرد :
- و أنـــا الـــذي أتــته الــــرياح ، بحــــب تـــملَّــك قــلبه إلــــى حــدود الــهـــــوس ..فــإن قلـــتُ أنــي متيـــم بـــحبـــك فأنا كــــاذب أنــــا أكثــــر مـــن مُــتــيَّــم ، وإن قلـــتُ أنــي هائــــمُُ فــي عــينيكـــي فــأنـــا كــــاذب ، أنـــا أكــــثر من هـــائــم ، وإن قــــلتُ أنــــي مغــــرم بـــعشقـك فـــأنـــا كــــاذب ، أنــا أكــــثر مـــن مغــرم ، فـــي صــــدري عـــاطفة أكـــبر مــن عـــواطــف الـــعشـــاق فــي عشقهــم ، وفــي عـــقلي خـــمر الــغـــرام لا يـــــفهمه السكــــارى في سكرهــم ، وفـــي قلـبــــي حــــبُُ لو قـــسمـنــــاه عــلـــى أهـــل الأرض لمــــا كـــفــــاهــم ، فيــــا ويــــل حــــبيبتــي مـــن هـــيجـــان عـــــاطفـــة حــبــي الـــمجـنــــون ..
___________________
هادي هي قصة حياتي ، قصة شريهان البنت لي ضحات وحاربات او وجهات شحال من حاجة خايبة ، واخيرا نلت واخيرا حققت ݣاع لي حلمت بيه ، انا دابا وانا كنكتب ليكم هاد الكلمات ، بغيت نخبركم ونفرحكم معايا ، واخيرا ربي ستاجب لدعائي ، ولقيت راسي حاملة بأسبوعين .. قبل منسد المدكرة ديالي ... بغيت نكول لجميع البنات انتوما كلكم سيدة اولى ، بقرايتكم وخدمتكم واحلامكم وبالجهد ديالكم والمتابرة ديالكم ، كلكم بدون إستثناء ... حتى وحدة ماحسن من وحدة لي خدمة سيدة أولى ، ولي ربت بيت سيدة أولى ، نصيحة اخرى قبل منمشي ... نهار تختاري تقسمي حياتك مع شريك حياة ... ختاري سند لي يتقاسم معاك احلامك ، ويفرح لنجاحك ويشد بيديك ... متختاريش لي يديرك تحت رجليه ، ويبغيك ديما تكوني التحت ، ختاري الصديق قبل الزوج والحبيب .. ختاري الزوج الصالح.
تمت الحمد لله ❤️
قصة رائعة ومميزة ومعبرة شكر لكي احسن كاتبة شكر