السيدة الأولى الجزء الرابع

- تجمعو كاملين على الطبلة .. قدام كارولين تحط ستيك ديال اللحم صوطي مع كريمة الزبدة والأعشاب المنسمة ، مع صلاد وخيز ݣغيي ... أما وسط الطبلة تحطو طبيسلات صغار ديال زعلوك ... طبيسلات الهريسة ، وجوج طباسل كبار فكل طبسيل فيه جوج دجاجات محمرين ، وعاد طباسل ديال الفريت ...

- أحمد ( بإعجاب وشهية ) : الله على طياب لا يعلى عليه ..

- زهرة : بصحة وراحة أخويا ..

- نزهة : عرفتي شحال هادي مادقنا طياب يديها ، بنتها مكاينش بحالها ...

- زهرة : حتى شريهان يديها طلعو بنان بحال ديالي ..

- مالك (هز حجبانو بإستغراب) :

علاش كتعرفي طيبي ؟

- شريهان : لا كنعرف المختار وبوشعيب الݣزار ، الكيبي مكنعرفوش ... دابا دابا من نيتك هذا سؤال ؟

- مالك ( جمع يديه عندو وشاف فيها) :

مايمكنش تجاوبي بلاما طنزي ؟

- شريهان : لا نجاوب علاش لا ، أه أسيدي كنعرف نطيب وكنعرف ندير كولشي بغيتي الحلاوي ، بغيتي العواصر بغيتي البلدي ولا رومي ، انت اتشها اخويا وݣوليا لي بغيتي نوجدو ليك على عيني وراسي ..

- مالك (تبسم) : اهاه هي غادي نتبرع شهيوات ، على هاد الحساب خاصني تبقا نتريني بزاف ..

- شريهان : حتى انت كول وتهلا فراسك ومولاها ربي ..

- كارولين : مالك واش اتاكلو داكشي فالعشا؟

- مالك (ضار عندها) :

هادي أكلة مغربية كتكون لأغلبية الاوقات فالأعراس والمناسبات ، بنينة بزاف خاصك دوقيها ...

- كارولين :

ولكن دابا مكاينة حتى مناسبة ، (خسرات وجها) : نووو منقدش ناكل داكشي ، وزايدون هاد السيمانة عندي مشية لإسپانيا ... خاصني نحتافظ برشاقة ديالي أحبيبي ..

- مالك (حط لي فيديه ، مستغل فرصة لوخرين كيهضرو) :

- علاش شنو عندك ؟ وعلاش هادشي مافخباريش ؟

- كارولين : حبيبي ... مجابتهاش الفرصة نݣولها ليك ، تشغلت .. عندي عرض وغادي نݣلس سيمانة تما ...

- مالك (بلع ريقو حيت كان ناوي فهاد سيمانة باغي يحدد معاها نهار زواجهم ) ..

كنت باغي نخرجو انا وياك لشي بلاصة ، على أساس نحددو نهار للزواج ديالنا ..

- كارولين (فرحات وفنفس الوقت ماعجبهاش الحال) :

مالك حبيبي ، انت عارف بلي خدمتي مهمة بزاف بنسبة ليا ، وهاد 3 شهور الجدول ديالي عامر احبيبي ، نأجلوها من بعد ..

- مالك : (قرب ليها)

لهاد الدرجة خدمتك مهمة عليا أنا ، طلعي فوق لاسين وتمشاي بدوپياس مهم على زواجنا ..

- كارولين (ماعجبهاش الحال) :

ماتبقاش تهضر معايا بحال هكا ... انت عارف خدمتي مهمة بنسبة ليا ... متكونش اناني وعقليتك رجعية .. لاحت المشوار من يديها وطلعات مع دروج للحمام ..

- نزهة (نتابهات ليهم) : ولدي شنو واقع ؟؟

- مالك (رجع الكرسي لور) : والو الواليدة تعشاو انتوما انا جاي ... خلاهم وتبع كارولين ..

- نزهة (ماعجبهاش الحال) :

وكتݣولو ليا سكتي ، خصرات علينا العشا الله ياخود فيها الحق ..

- أحمد : ششش بيناتهم تعشاي أنت ..

- شريهان (كتشوف فسعد ماعرف ياكول بالفرشيط ولا شنو يدير ) ..

الدجاج مكايتكالش بالفرشيط ، كيتكال بالخبز ... وها كيفاش كياكلوه الناس ، شدات الدجاج فرتكات ليها الشمل مسكينة ، فرقاتها وكل واحد كتحط ليهم قدامو ..

- كول الكبدة ديال دجاج كول ، وكول دغميرة وزعلوك ... وانت داير بحال بوفرطوطو ..

- سعد (مافهمهاش) :

شنو هيا بورفطوطو ..؟

- شريهان : بوفرطوطو ، ماشي بورفطوطو ... هي الفراشة كول ..

- عمر (مداها لا فخوه لا فحتى واحد خدام كياكل) :

تبارك الله عليك اخالتي زهرة ، هادشي بنيييين ... خالتي زهرة ولي انت طيبي لينا ..

- نزهة (بعتاب) :

ياك لحسك .. مابقاش ماما ماكلتك زوينة مكاينش بحالها ...

- عمر :

وهو ماكلتك زوينة الواليدة ، ولكن ماكلت خالتي زهرة عالم اخور ... انا كيبان ليا خاصها تولي دوز عندنا للمعمل دوز على الخدامة ، ودوق وتعطي رأيها ، بنت يديها خطيرة ..

- أحمد : فكرة خطيرة هادي عجباتني ..

- زهرة : بلاما دوروني ... خليوني عليكم انا مغادية لمعمل لا معملات ...

- نزهة : خليو عليكم زهرة فتيقار ، براكة انتوما فالكافية ..

- أحمد (موجه الكلام لعمر) : ماماك هضرات صافي سكات ..

- نزهة : شريهان بنتي ، عفاك لامي طلعي شوفي دوك جوج ... العشا راه غايبرد ، مابقاش عشا هدا منين غادي يظيرو هاد الفعايل ديال والو ..

- شريهان (فمها عامر رجعات الكرسي لور ) :

واخا ... خلاتهم وطلعات الفوق ...

- شريهان : فين ايكونو مشاو بعدا انا ݣاعما سولتهم ؟ جردة ؟ لا ولكن هي طلعات ؟ ...

- تمات الخدامة جايا وقفات شريهان سولاتها :

- مالك وكارولين ماشفتيهمش؟

- دخلو لبيت سي مالك ..

- شريهان : فين هو بيتو؟

- اتمشي على طول ودوري على يدك ليسر هو اخر واحد ..

- شريهان (بإبتسامة) :

شكرا ..

- المغرب ..

- مصطفى : غير دوي الالة ماتخافي من والو ..

- المرا : ديك الليلة أوليدي كنت بوحدي ... الخدامة مكانتش وحتى ولدي كان خدام ديك ليلة ، ومنين مكايبات معايا حد فدار كنبقى سهرانة ، مالفة كنعس مع 9 ولكن داك نهار مانعستش ... بغيت فسرجم ݣالسة وكنطل ومع دار ، جات اونفاص مع شانطي .. كايبان ليا واحد طوموبيل كحلة ، فيها شي رجال ..

- مصطفى :

كيدايرين هاد الرجال ؟

- المرا : أوليدي انا كبيرة ، وشوف على قد الحال المهم لابسين الكحل ... ولكن وجهم ماقدرتش نميزو ، كنت بغيت نرجع ، ولكن اولدي ماقديتش حنا العيالات فينا الفضول ... نزل واحد اولدي وتيرا فشي واحد بالقرطاس ، صوت القرطاس سمعتو بودنيا .. شوية وانا نشوفهم كايجريو ..

- مصطفى (بإستفهام) :

- ماعرفتيش علاش كيجريو ؟

- حيت أولدي ، ماشي غير انا لي شفت داكشي ، واحد البنت كانت ورا شجرة ، انا مع طليت فالأول كانت واقفة تما ، وفاش شفتهم كيجريو ... بانت ليا بنت كتجري ..

- مصطفى : ماشفتيش وجها ؟

- لا اولدي ، ماشفتوش .. وجها مبانش ليا مزيان كانت لابسة الكحل حتى هي باقي صغيرة ماكبيراش ... انا اوليدي تخبعت ، خفتهم يشوفوني يصفيوها ليا ، بقيت مخبعة ... جامدة فبلاصتي حتى بانو ليا رجعو وركبو فديك طوموبيل ومشاو ، وداك الولد مسكين بقا ملاوح تم ، حتى جات طوموبيل وقفات وبلغات البوليس وجاو ..

- مصطفى : مكانتش معاهم ديك البنت فاش رجعو ؟

- لا أوليدي مكانتش معاهم ، وقيلة هربات ليهم ..

- مصطفى (وقف كيفكر) : واخا اميمتي براك الله فيك ، ايجي واحد من دراري ياخود الشهادة ديالك ... تسني عليها ويوصلك حتى لدارك ..

- المرا : الله يرضي عليك اولدي ، والله يبين حق داك السيد مسكين ..

- مصطفى : أمين .. جا واحد من دراري داها باش ياخود أقوالها وتسني عليهم ..

- تدق الباب ، ودخل شاب قد مصطفى فالعمر .. ضار عندو مصطفى ..

يلاه كنت باغي نعيط عليك ..

- منعم (مفتش شرطة خدام على القضية مع مصطفى) :

كاين شي جديدة ، ݣالو ليا كاينة شاهدة وجات شهدات ..

- مصطفى : هي شافت غير حاجة قليلة ، ماميزاتش وجهم .. ولكن لي متأكد منو هو ماشي غير هي لي شهدات على الجريمة لي وقعات ... كاينة بنت أخرى شاهدة على لي وقع ..

- منعم (بتساؤل) :

عرفتيها شكون ؟

- مصطفى (تنهد تنهيدة طويلة ) :

مزال ولكن غادي نعرفها شكون ، مسولتوش مول الحانوت لي كان تم ... واش سمع بشيحاجة ولا بانت ليه شيحاجة ؟

- منعم : لا صراحة ماسولناش

- مصطفى (بنرفزة ) : علاش أصاحبي ، بحال هادشي مخاصوش يمشي ليكم من البال ... اي واحد فديك المنطقة خاصو يتسول ... جمع دراري وبغيتكم تمشيو عند مول الحانوت وتسولوه ، أي معلومة ممكن نفيدنا تفاهمنا ؟

- منعم (وقف) كون هاني أسيدي .. عطاه التحية وخرج .. مخلي دماغو خدام فشكون اتكون هاد البنت ، لي شهدات على الجريمة ... وقدرات تهرب من هاد الناس لي أخطر منهم مكاينش ..

مشات شريهان للجهة لي نعتات ليها الخدمة حتى وصلات للبيت لي ݣالت ليها ... وقفات قدام الباب مع دقات دورات الپوانيي وحلات ، بقات واقفة فبلاصتها مشوكية ماعرفات تحدر راسها وترجع ، ولا ضحك ولا شنو ندير ، أما هو بقا واقف كيشوف فيها محاملش هاد التصرف ) ..

- شريهان :

شوفو هانتوما ديروني مادخلتش وݣاعما شفتكم ، واخا هو فالحقيقة أنا راه شفتكم ..

- مالك (كيشوف فيها بإستغراب )

- شريهان :

ومتبقاش تشوف فيا هكاك راه انا ، رباتني مي على الحقيقة ولاشيء غير الحقيقة ، واش نكدب ونݣول ماشفتكش كيفاش كتبوس فيها ، غير هو هاد كرولين مكتعرفش تبوس قنانفها رقاق مامنفوخينش ..(التوتر والموقف لي تحطات فيه خلاها ادخل وتخرج فالهضرة ، معارفة متݣول) ..

- (نطق من تحت سنانو) : غادي تحسبي الخطوات وتمشي فحالك ، واخر مرة دخلي عليا لبيتي بلاما دقي ..

- كارولين (كتشوف فيها وأثر قبولاتو على فمها) :

حبيبي شنو كتݣوليك ؟

- شريهان :

(بالفرنسية) : هانتي حبيبة ، عرفتي فالمغرب كنعرف واحد الكوافورة كتصرع نفيخ القنانف ، ولا عرفتي حكي لدوك القنانف الفلفلة ايوليو قد سوسيطة ديال بوجمعة مول الكروصة ...

- مالك :

(بصوت رجولي ثابت وجدي) : خـــــرجييييييييييييي ...

مع نطق أخر كلمة لقاها سدات الباب وهربات ... مالك بعد على كارولين كيدوز يديه على شعرو ..

- كارولين (بغات تحط يديها عليه) : حبيبي ..

- مالك (قاطعها معلي صوتو) :

100 مرة كنݣوليك بحال هاد التصرفات ، مكنحملهمش يكونو فدارنا ... خليهم حتى نكون فداري ، فدارنا لا إحتراما لناس لي كاينين فهاد الدار ..

- كارولين (ماعجبهاس الحال كيفاش غوت عليها) :

(بدات كتغوت) انا وياك مخطوبين ، فهمها مخطوبين من حقي ندير معاك مابغيت ماشغل حتى واحد ..

- مالك : لا الالة ... مخطوبين ماشي هي مزوجين ديريها فبالك ، ولا عجبك هاد الموقف لي تحطينا فيه ، لوكان كانت الواليدة ولا واحد فخوتي ولا الواليد لي حل علينا الباب ، فين غادي نكونو ...

- كارولين (مامسوقاش) :

تخربيق هذا تخربيق ... منبوسكش فداركم حتى تكون فدارك ، ومامنحقيش نمارس معاك الحب ونشرك معاك فراش واحد ، وتكون ليا جسدا وروحا ... هادشي بزاف عليا بزاف ... حلات الباب مشات كتجري ..

- مالك كيحس بدم ديالو سخن ، مكايبغيش يوصل معاها لشي حوايج يقدرو يأترو على علاقتهم ، هي عارفاها الغضب ديالو مكايبغيش يبينو ... مالك من النوع لي الى تعصب وماعجباتوش شيحاجة يقتلك ويخلعك غير بشوفة منو ، لانو الغضب ديالو خايب بزااف ... مايبردش الى مشافش الدم ، يا يضرب هداك لي حداه الى كان رجل ، ولا يصرب راسو الى كانت لي قدامو مرا ... مكايبغيش يوصل لهاد الدرجة حيت دمو حامي بزاف ... حاول يتنفس ما امكن ويتهدن ، حدر راسو وخرج من البيت خابط الباب وراه ..

- رجعات شريهان ، وݣلسات فبلاصتها حادرة عينيها وجها حمر ..

- نزهة : فينهوما أبنتي ؟

- شريهان :

غير يساليو ويجيو ..

- سعد : يساليو شنو يديرو ؟

- شريهان (خنزرات فيه) : كيهضرو على كيفية صناعة الصواريخ ودابابات ، هنينا كل وسكت ... كيهضرو مع بعضياتهم دابا يجيو ..

- قاطعهم صوت خطوات كارولين ، لي هابطة بحال شي إعصار ... هزات الساك ديالها وشافت ف عمر ..

- عمر واخا توصلني عفاك ، ماجبتش طوموبيلتي معايا ..

- عمر (مافهم والو) :

ماتعشيتيش ، كملي عشاك بعدا ..

- كارولين : لا بلاش غير بصحة وراحة ... أصلا مكانش علا نجي والعائلة مجموعة ... هاد نهار مخصص ليكم ..

- مالك (جاوبها من اللور ) :

أنا غادي نوصلك ..

- كارولين : لا بلاش اخليك ، غادي يوصلني عمر

- مالك (جر ليها صاك من يديها ، حاط يدو على ظهرها غادي بيها) ..

غير كملو عشاكم بصحة وراحة ... خلا كولشي يزݣا من الماكلة متبعو بالعين من غير سعد ، لي كياكول لا إحساس ولا ضمير ...

- نـزهة : شفتو هاد عيبها بدا يبان ، باغية غير تجبد الصداع ... شافتنا مجموعين ضاحكين ݣالت ارا نجبد الصداع ..

- زهرة : نعلي شيطان اختي نزهة ، مديش عليها راه تقافتهم غيرنا حنا ، وتصرفاتهم مع بعضياتهم ماشي بحالنا حنا ... داكشي باش راه صعيب شوية تأقلم ... راه غير بشوية بشوية إن شاء الله وتوالف ... مع الزواج ݣاع اتعرف بزاف ديال الحوايج ..

- نـزهة (بصوت مغنغن ومأثر) :

انا بغيت ياربي ، ياربي الى مافيهاش خير لولدي تبعدها عليه ... وتحيدها من قلبو ماتعدبو مايعدبها ، هي سبابو حتى خرج من هاد الدار وعزل ... الدار كيلبحر ، هو بيتو بوحدو بحمامو بكولشي ليه ، يقدر يطلع لبيتو من الجردة ... يعني الى تزوجو ايكونو مرتاحين ، بقات عليه حتى خدا ديك الدار وبعد علينا ، وأنا بغيت وليداتي يكونو حدايا ومعايا ..

- شريهان (كتحاول تفكر بيتو كيف داير ولكن فاش دخلات عليهم ماقدراتش تحقق مزيان ) :

خالتي أي واحد فهاد الدنيا كيبغي يستقل براسو ، الحمد لله لي هو معاك فبلاصة وحدة ، من حقو تكون عندو دارو ... انا فاهماك بلي كتحسي بلي خداتو ليك ، ولكن ممكن حتى هي مكترتاحش فاش كتكون هنا ، وكتحس براسها غريبة عليكم ... ولا ممكن انتوما بلا قصد كتحسسوها انها غريبة عليكم ..

- نزهة :

تصرفاتها أبنتي ، مكتحتارمش تقافتنا ولا دينا ، عندها كولشي عادي حنا راه واخا عشنا فأوروبا ، ولكن كاين سي حوايج مزال مزروعين فدمنا مانقدوش نبدلوهم ..

- شريهان : أهم حاجة أخالتي ، انها كتبغي ولدك هءا هو الأهم ، والى لقيتي شي واحد لي يبغي شي إنسان بلا طمع ... خاصك تكوني مرتاحة ..

- نزهة : انا بغيت اولدي يكون بيخير وعلى خير ، ومرتاح وفرحان ... ولكن الى كانت اتعدبو ولا ايخرج فيها سي عجب ، كنتمى من الله سبحانه يبعدها عليه ، هادشي لي كنتمنى ..

- عمر (وقف) :

خالتي زهرة الله يعطيك الصحة على العشا ..

- زهرة : بصحتك وراحتك أولدي ..

- عمر (شاف فشريهان) :

غدا إن شاء الله انمشيو لعند السيد للقهوة ، راه هضرت معاه ... مع ديك 1 هكاك غادي نجي باش نديك صافي ؟؟

- شريهان (بإستغراب) :

دويتي معاه صافي ؟

- عمر :

غير خرجتو من عندي وانا نتاصل بيه ، المهم وجدي راسك .. أنا مشيت تصبحو على خير ..

- أحمد : أتنعس بكري ؟

- عمر : عيييت هاد النهار وكانت عندي خدمة بزااف .. تصبحو على خير ..

- الكل : تصبح على خير ..

- شريهان : عمي عمر فاش خدام ، بغيت نݣول زعمة البوسط ديالو فالخدمة ؟

- أحمد (ضحك) :

يلاه طفات عليك الشمعة هههه ، عمر خدام شاف .. مختص فالحلويات الجديدة ..

- شريهان (بإهتمام) :

تبارك الله عليه ، خرج ليك أعمي ..

- أحمد : إيوا كيݣوليك أبنتي ، تبع حرفت بوك لا يغلبوك ..

- نزهة (عيطات على جميلة باش تݣول للخدمات يجمعو الطبلة )

- سعد (بحماس) : شيغيهان ، نغسلو يدينا ونواريييك لڤيلا ... لدابا ماشفتيهاش ..

- شريهان (كضحك) : من نهار جيت سمعت جوج سميات ليا ، شيري وشيغيهان .. زيدي أحنيني زيد ، باين انسمع بزاف دسميات مزال ..

- من ورا العشا خرج سعد مع شريهان كيوريها فالڤيلا ... الپاركينݣ كانو فيهم 6 ديال طوموبيلات .. وحدة رونج كحلة اخر موديل ديال أحمد ، وتانية رونج فالݣرونة اخر موديل ديال نزهة ، وثالثة رونج فالݣري اخر موديل ديال عمر ... حداهم كانت ب م دابليو اخر مكاين فالكحل .. ديال سعد وعاد اودي صغيرة فالبيض ديال جميلة ..

- شريهان بقات غير كتشوف ... كل مرة كتصدم فحاجة فعائلة عمها ، لاپيسين كان كبير وحداه كان واحد المدخل دخلو ليه ، هبطو مع دروج وهنا كتفاجئ بصالة رياضية كبيرة ... مجهزة بكل الألات الرياضية لي ممكن يحتاج الواحد ، وعاد پيسين فيه مياه حرارية للتدليك .. من جهة لوخرا لصالة كانو دروج ضايرين بزاج ..

- شريهان :

لفين كيديو هاد الدروج ؟

- سعد : لبيت مالك ، مرات كيجي معطل وكيدخل من هنا نيشان لبيتو ، ومرات كيكون زربان وكيخرج من هنا نيشان لطوموبيلتو .. أجي نوريك احسن بلاصة عندي ، جرها وداها لواحد الكوخ خشبي ، حل ليه الباب كان مفرش بݣلسة بسيطة وزوينة ..

- سعد : هاد بلاصة زوين عندي ... عندنا كولنا ... كنرتاح كلنا فيه ..

- شريهان (كدور عينيها ) :

واااعر بزااف خطير ..

- سعد :

الجردة كل 3 جوغ كايجي الجاردييني يقادها ، وي يناقيها ...

- شريهان : أجي نسولك ، علاش دوك جوج حراس كاينين على الباب ، بلا العساس ..؟

- سعد :

مالك لي جابهم .. كيقول بلي مزيان يبقاو على برا ، وبلي الصحافة اتبغي تجي لهنا وتصور ... وهوما ايبعدو صحافة ، انا ماعرفت علاش هوما هنا صراحة ، عادي صحافة تصور شنو هو الموشكيل جوسي پا .. يلاه نكملو ... خرجات معاه من الكوخ وطلعو من الدروج ديال مالك لي فلاصال ، خرجو فبيتو .. فعلا كيما قالت نزهة ، البيت كان كبييير بزاف ... النموسية كبيرة او واسعة مغطية بغطا بلو مارين ... البيت لونو فالبيج والبلو مارين ، الترية هابطة ضايرة مدهبة ، الزرابي فالبلو مارين ضايرين بنموسية ... اما دريسينغ هاداك بوحدو بيت ، واحد المنظر من بيتو للطبيعة خطير بزاااف ، تصاورو كانو فوق الكوافوزات روايحو وساعة ذهبية حاطها فوق الكوافوز الكبير ..

- سعد : هذا بيت مالك ... اجي نشوفو باقي البيوت ... خرجو من بيتو وداها لݣاع لبيتو لي فالڤيلا ، كلهم قد قد ، بيت جميلة وبيت مها كاينين فجهة لوخرا من الڤيلا ، عبارة على دار صغيرة ليهم فيها جوج بيوت صالون صعيرة كوزينة والحمام ... أما الجهة الخلفية للجردة خطييير مسقف بالخشب وفيه طبلة وكراسة ديال الخشب ..

- سعد : بابا الى بغا يخترع ، شي نكهة ... كايجييي هنا ، هنا فين كيطيح عليه الالمام ..

- شريهان (كضحك) :

الإلهام اسميتو ماشي الإلمام ..

- سعد (كيضحك) :

وي ڤوالا ..

- اخر بلاصة وراها ليها هي الفوق ، بلاصة بحال السطح ... فيها جوج كراسة طوال وپراسول او ݣليسة خفيفة ..

- سعد :

ڤوالا ، هادي هي الڤيلا ديالنا ..

- شريهان : فخبارك بحال الى خرجت وضرت ، عيييييت وجاني نعاس ، ولكن الڤيلا واعرة بزااف ... مزيان منين وريتيها ليا باش من بعد مانتلفش ... ويلاه أخويا نعسو يلاه راه ختك عيات ..

- سعد (مد ليها يديه بطريقة درامية ، شدات فيه وهبطو للطابق لي فيه البيوت ديالهم ، وقف عند بيتها ، تمنى ليها ليلة سعيدة وهي كذلك .. وكل واحد فيهم دخل للبيتو .. )

- دخلات لبيتها من وراما غسلات سنانها ، هزات الپيسي وحلاتو ... طلع ليها ميساج من خالها ..

- سعيد :

وفين احبيبة خالها اش كتعاودو لاباس عليكم ، واحد ماماك ومصطفى كلكم بيخير ... إن شاء الله راه هاد السيمانة انزل للمغرب ... بغيت انݣوليك واش بغيتي شيحاجة نجيبها ليك معايا من هنا ؟

- شريهان (ضحكات) :

- الحمد لله أخالي الله يحفظك ليا ، بلاما تعدب راسك .. حنا هنا ففرنسا ، وبضبط فكان قراب ليك أخالي الحبيب ... حنا عند عمي ، سيفط ليا نيت لادريس ديالك نجيو نشوفوك ...

- وصلها بلي قراه ، ولكن بقات شحال مجاوبها ... رجعات سيفطات ليه وتصبح على خير أخالي مع قلب ... سدات الپيسي ومشات لبلاصتها ميتة بضحك .. عارفة بلي الصدمة لي صدمات خالها هاد الليلة اتخليه بلا نعاس ..

- إيـطالـيا

ڤيلا البوص

- ݣالس ساهي فالكرسي الهزاز ديالو ، فيدو هاز كاس من المشروب ... كيهضر مع راسو كيسول ويجاوب راسو بحال شي مريض نفسي ... هو فعلا مريض نفسي علاش غادي يكدب على راسو ، تبسم بحال الى ماشي هو لي كان يلاه شوية كيعطي الأوامر .. حوار ضاير ليه فراسو كيعبر بيه على شنو كيحس ... وقف وحط المشروب على الطبلة لي حداه ... نزل تريكو ديالو وتاجه للمكتب ، حل الباب دخل وسدو توجه لطبلة ديالو وݣلس ، فتح المجر وخرج المدكرة ديالو الخاصة ... فتحها على اخر صفحة كان كتب فيها ، خدا الستيلو ديالو وبدا كيكتب :

- (بلغة إيطالية ) :

- كيف حالك ؟

- كحال قلبي .. بخير لكنه شارد .. متعافي إلا من الحنين ..غارق فيما يحب وما يحبه بعيد المنال ..

- أين أنت الآن ؟

- في منتصف جسر لا أعلم إلى أين يذهب ..

تملئني الحماسة .. يغمرني سحر العبور للضفة الأخرى ..

ماذا تقرأ ؟

- اقرأ نفسي .. لا يمكنني أن أقرأ سوى نفسي .. العنوان يحمل إسمي غير أن من كتبته أخر .. تنكشف فيغيب الوجود من حولي .. تحتجب فيعود ما حولي محكما قبضته كالكمين ..

- ماذا تفعل ؟

أحدق ..في اللحظة العابرة وهي تتسرب من بين أصابعي دونما مقاومة ..

- ماذا تكتب ؟

- أكتب كل الصخب الذي بداخلي وهذا لا يكلفني سوى الانفعال ..

أقاوم فقري اللغوي بحساسيتي العالية ..

- حط الستيلو وسد المدكرة ، رجعها للمجر ... تنهد تنهيدة طويلة وقف قدام السرجم ، بانت ليه طوموبيلت دجيكو داخلة ... غوبش وخرج من المكتب ..

- دخل دجيكو بالمونطو ديالو ،، بان ليه واقف كيشوف فيه كيتسناه شنو جاي يݣول ...

- شنو كاين ؟(بصوت رجولي خطير)

- دجيكو (بإبتسامة إنتصار) :

السلعة وصلات ، مزال طرية ...

- (بدون إبتسامة) :

إذا غادي توالم البلاصة الجديدة ..؟

- دجيكو :

تماما ، السلعة لي كترسلها جورجيت ديما كتكون فالمستوى المطلوب ..

- (بصرامة) :

بغيت العمال يبداو الخدمة ديالهم ، بغيت البلاصة تكون واجدة من هنا ل 6 أشهر ، خاص البلاصة تكون من أحسن البلايص ... يهضر عليها الكبير وصغير ، غلط صغير أجيكو ... غلط صغير(كيورك على سنانو) مغاديش يلقاو الجثة ديالك ..

- دجيكو (خاف) :

بحالاش أسينيور هاد الغلط ؟ أنت عارف مزيان الحاجة لي حطيت فيها يدي كتنجح ..

- رجع بلور وݣلس داير رجل على رجل :

كتنجح ... ولكن بلاصة الخدمة كتبقى ديال الخدمة ، وانا وأنت عارفين مزيان علاياش كنهضر ..

- دجيكو (مرضاش) :

داكشي كان شحال هادي ... دابا مابقاش ..

- كنتمنى كنتمنى ..

- دجيكو (حس بالإحراج) :

سمحليا خاصني نمشي ..

- أشر ليه بيدو بلاما يهضر ... خرج دجيكو على برا وقف ... معصب ، محاملش علاش يدوي معاه بهاد الطريقة .. تنهد تنهيدة طويلة ركب فطوموبيلتو وزاد ..

- ضرباتها الفيقة مع الوحدة ديال الليل ، حسات بمصارنها كيتقطعو بجوع ... حيدات عليها الغطا لبسات پانطوفتها ، هزات تيليفون شعلات الفلاش وخرجات من البيت ... هابطة بشوية عليها وصلات التحت ، كيبان ليها الضو جاي من جهة الكوزينة ... والڤيوز ديال الصالون شاعل ، طلات براسها الصالون خاوي ... مشات للكوزينة ، كيبان ليها مالك ݣالس وعاطيها بظهر محيد لاڤيست حاطها ..

- حس بشي حد وراه ودار ... ورجع كيكمل ماكلتو ..

- شريهان :

أش مفيقك فهاد الوقت ؟ كيبان ليا أصلا انت عاد داخل ، ضارت لجهة الطبلة ، كان لابس شوميز بيضة فاتح ليها الصدايف ، ولأول مرة غادي تشوف الوشام لي فصدرو ... القميجة كانت كتبين تفاصيل صدرو ، يديه لي كانو مزغبين ، محيد الساعة حاطها حداه ... قدامو حاط طبسيل ديال دجاج محمر وكياكل ..

- مـالك :

لي فيقك هو لي جابني للكوزينة ، بنسبة للواش عاد يلاه دخلت ، اه الالة يلاه دخلت ..

- عطاتو بظهر جبدات البواطة لي فيها دجاج لي شاط حطاتها ... شعلات البوطة سخنات الدغميرة نزلاتها على داك الدجاج ... حطاتها على الطبلة .. جابت الخبز والهريسة حطاتهم ، حلات الثلاجة وجبدات الموناضة وݣلسات مقابلة معاه ..

- هز فيها راسو كيشوف فيها :

واش فيك البلية ديال ماكلة الليل ؟

- شريهان (كتاكل ) :

لا مافياش ، ولكن شدني الجوع حيت داك العشا ماعرفتو منين داز ..

- مالك (بهدوء) :

وعلاش؟

- شريهان (كتشوف فيه بعدم تصديق) :

لا والو ، غير سعادتكم انت والخطيبة حرمتوها علينا ، انا أصلا أش داني نطلع نعيك عليكم ، حتى لقيلدت لقيت داكشي لي مكايتݣالش ..

- مالك (تبسم مكمل الماكلة) :

هذا جزاء لي كيدخل بلاما يدق ..

- شريهان : دقيت راه انتوما لي كنتو غايبين على الوعي ، محاسينش بلي ضاير بيكم ... عيب والله حتى عيب ، ربي دابا كون عمي لي طلع ودق وحل عليكم ..

- مالك (كيدور لسانو ففمو) :

شيري ، مافيا لي يهضر فهاد الموضوع ... هاد الليلة راسي غادي ينفاجر عليا ...

- شريهان (سكتات كتشوف فيه ، غمزاتو) :

شنو واقع واش تخاصمتو ، سمحليا حيت كندخل ولكن شنو غادي ندير فضولية ، الفضول كيجري فدمنا سبحان الله ...

- مالك (هز حاجبو كيشوف فيها) :

- الدقان فالخوامي مكايسمعش ، بلا حشيان الهضرة بغيتي تݣولي أنا فضولي ؟

- شريهان (كتاكل) :

لا مابغيت نݣول والو ، عرفتي شنو اه كنمعني عليك انت ... ݣبيلة لقيتك ورايا كتسمع ، وماشي معاود لكارولين بلي جايا نقلب على خدمة ..

- مالك (مسح يديه وفمو ، ربع يديه وشاف فيها بهدوء ) :

مكانش خاص نعاود ليها ، عارف كنعتادر على هادشي ... مكانتش نيتي خيبة ، هي لي برزطاتني بالأسئلة ، علاش وكيفاش وشحال فعمرها وكيفاش دايرة ... الغيرة ديال العيالات ..

- شريهان : انا بنسبة ليا لي كتبقى تسول هاد الأسئلة متايقاش فراسها ..

- مالك (قاطعها) :

لي كيسول هاد الأسئلة ، كيكون كيغير على الطرف الثاني ... يقدر هادشي مغاتعرفيهش انت ..

- شريهان (وقفات الماكلة) :

علاش زعمة ؟ شنو بغيتي تقصد ؟

- وقف مـالك ، هز داكشي حطو فوق البوطاجي ، ورجع لعندها ... وقف قريب منها داير رجل على رجل مربع يديه ، مركز نظراتو مع عينيها بحال شي واحد باغي يحصل داك الإنسان واش مخبي شيحاجة من عينيه ولالا ، قربو ليها خلاها شمات ريحة لي داير ، لدرجة الوشام لي عندو فصدرو زاد وضاح الشكل ديالو ... كتاكول وكتشوف فيه من عينيه لنيفو لفمو ، نزولا لصدرو ... قاطع نظراتها سؤالو لي فاجئها :

- عمــرك بغـيتي ؟

- شريهان فاجأها السؤال ديالو ...

أنا والحب بعاااد بزاف ، قدما بعدات السما على الأرض ... ولكن هادشي مكايعنيش بلي ماعنديش الحب فحياتي ..

- مالك (بنظرات ثاقبة ... كيخلي الإنسان لي قدامو واخا مايكون داير والو يݣر ليه بشادة والفادة .. بصوت رحولي ثقيل) :

بحال مروان مثلا ..

- شريهان (هزات حجباتها كتشوف فيه بإستغراب) :

لا من نيتك ... انا ومروان أصدقاء وبحال الخوت ، كنلقاه معايا فأي وقت حتاجيتو ... بحالو بحال مصطفى تماما .. حياتي عامرة بالحب كاين خويا ماما ، صحابي عمي وأنتوما واخا هادي مدة قصيرة باش تعرفنا ..

- مالك (ضار وراها هز لاڤيست ديالو حتى وقفاتو بسال ديالها ) :

علاش ضربتي يديك ؟

- وقف مالك .. منظنش بلي غادي تشوف الضربة لي فيدو ، ولا ترد ليها البال ... منين تفكر شنو وقع بدات تفاحة آدم كطلع وتنزل ليه ، الفك ديالو كيتحرك بالعصاب ..

- مالك (ببرودة غريبة) :

حاولي تنقصي من الفضول ديالك ، يقدر مع المدة يطيحك فحوايج خايبة بزاف ... خلاها مصدومة من طريقتو فالهضرة معاها ومشا ، كيفاش كان كيهضر معاها مزيان وزوين بحال أصدقاء ، غير جبدات ليه الضربة الحمرا لي على يدو ، تقلب قلبة وحدة ... رجع كلامو بارد بحال الثلج .. بزاف ديال تساؤلات جاوها لراسها زعمة يكون تخاصم مع كارولين وضربها ، لا مبايناش عليه ... ضرها راسها ولكن النعاس وصل بيها للحد ، رجعات كولشي للبلاصتو ... طفات الضواو وطلعات لبيتها تكمل نعاسها .

_______________

- خدا دوش سخون ، ساااكت ناول عليه برود غريييب كيشوف فيديو لي حمرا ، الأعصاب لي كان كيحس بيه فرغو فالحيط ديال الشقة ديالها ... مكرهش كون كان شي حد أخور قدامو شي راجل ، كان ممكن يفرغ فيه ... ݣاع داك الغضب لي كيحس بيه من جهة كارولين ، حل البالكو كيحاول يشم الهوا ... كارولين لي تعرف عليها فواحد الحفلة ، بغاها من أول مرة شافها ... ولا ممكن بغا حماسها وجرأتها فالكلام ... من داك نهار وهو عينيه معميين على أي وحدة ... وصلات بيه الأمور تحدا الأم ديالو لي مابغاتهاش ، وخطبها ودابا هاهو ناوي يتزوج بيها ... مشكل واحد لي معقد الامور بيناتهم هي خدمتها ، لي من سابع المستحيلات انها باغية تخلا عليها ... وهو كرجل مغربي مسلم مايمكنش ليه ، يبقى يتفرج فمراتو بلباس ختصو يشوفو غير هو يشوفوه ݣاع الناس ، مباشرة وعلى صفحات المجلات ...

- بقا مدة كيفكر ويتقلب فبلاصتو ، لي وقع هاد البيلة خلاه مايفاتحش دارهم فأمر لبنت لي باغي يجيب لدار ... كيحس بلي هاد الأمر مغادي يدوز بساهل نهائيا ..

___________________

- مع 9 ديال الصباح ... وقفات طوموبيل ميرسيديس كحلة قدام كافي la mandala ... خرج منها شاب فتلاتينات من عمرو ... لابس تيشورت كحلة سروال دجين كحل ... مع ڤيست كحلة هازة ليها الكمايم ديالها ... هاز حاجب ومهبط الثاني ، عندو واحد المشية خاصة بيه ... دخل للكافي ، مشا نيشان كيدور فالكوزينة وعلى الخدامة كيشوفهم واش بداو واش شيحاجة ناقصة ولالا ..

- جا عندو واحد من السرباية :

موسيو علـي كنت بغيت نطلبك ، واش ممكن نغيب هاد العشية ... مراتي غادي تولد وخاصني نكون معاها ..

- علي (كيدور ففمو) :

واخا سير ، وبلغ ليها سلامي ، والى ولدات علمني واخا ؟

- واخا كون هاني شكرا ..

- علـي (أشر ليه براسو ) ... ناض محيد لاڤيست ، دار الطبلية ... خدا بلاصة ورا الكونطوار ، وبدا كيصايب العصير الخاص لي معروفة بيه القهوة ، ولي هو مول الفكرة ديالو ومن صنع يديه ..

- فالڤيلا وعلى طبلة الفطور ... الكل كان مجموع حتى نطق مالـك ..(بصوت جدي)

الوزارة كلفاتني باش نستاظف عندي بنت من الميتم ... خاصها تبقى عندي مدة 6 شهور ..

- أحمد (بإستغراب) :

وعلاش زعمة ؟

- مالك :

باش يعرفو واش نقدر نتحمل مسؤولية المراهقين لي غادي نستاظفهم فالمركز لي بغيت ندير. هذا في حالة الى غادي يعطيوني الأوكي على ودو ..

- عمر :

علاش هوما مزال ماعطاوكش الأوكي ؟

- مـالك (مسح فمو ، هاز حاجب ومنزل الثاني ، ݣالس بكل رجولة ) :

كان هذا هو الشرط ديالهم الوحيد ، الى كانت بغيت ندير المركز ، خاص نصتادف بنت من الميت ، وفكل سيمانة ... غادي تجي لجنة باش تشوف هاد البنت واش مزيانة ، فرحانة مرتاحة ... بصريح العبارة واش قدرت نرد ليها البال ونبدل نفسيتها وشخصيتها ولالا ..

- أحمد : علاش مالها ؟ شحال فعمرها ؟

- مـالـك :

عندها 3 سنين والنص ... البنت منعازة ومنغالقة على راسها بزااف ، كتخاف بزاف خصوصا من الناس الغراب ... حطوني فتحدي كيبان ليا صعيب نتعامل معاه ..

- عمـر :

أنا كايبان ليا ، لي قادر بتعامل مع مراهقين مدمنين على المخدرات ، بإمكانو يتعامل مع بنت صغيرة ... وهدا تحدي بنسبة ليك وتكوين ، باش تعرف كيفاش تعامل مع بنتك ولا ولدك ..

- مـالك :

مغاديش نقد نديها لعندي لدار ، خاصها بلاصة فيها العائلة ... باش تحس بدفئ الأسري ، هادا الى كنتو قابلين بطبيعة الحال ..

- نـزهة :

هادي دارك أولدي ، تجيب ليها شكونما بغيتي ... وزايدون الى ديتيها لدارك مكاين لي غادي يقابلها ، وبطبيعة الحال مغاديش تقابلها ليك كارولين ..

- مـالـك (غير دكرات مو كارولين وقف) :

أنا غادي نمشي ، غدا فصباح إن شاء الله غادي نجيبها لهنا ..

- نزهة : واخا أولدي الله يعاونك ... خرج مالك وبقاو هوما مجموعين ..

- عمر (بعتاب) : تبارك الله عليك اماما ، ماعندي مانسالك براڤو ..

- نزهة (بإستفهام) :

علاش مالي شنو درت ؟

- عمر : لا والو ، غير جاتك الفرصة دكرتي ليه كارولين ، ديريها فبالك وتقبليها ، ولدك قريب يتزوج بديك البنت غير تهناي ..

- نزهة (وقفات ليها الدغمة فحلقها) :

كيفاش قريب يتزوج بيها مافهمتش ، شيحاجة فراسك ومابغيتيش تݣولها ياك ؟

- عمر (وقف) :

ولدك حدد موعد زواجو مع كارولين ، بقا خاص غير الموافقة ديالها على النهار ... وغادي يبدا يوجد ، يعني تقبلي الموضوع حيت قريب اتولي عروستك (شاف فشريهان لي كتاكول وكتشوف فيهم) شريهان مع الوحدة كوني واجدة ، غادي ندوز من وراك باش نمشيو صافي ؟

شريهان : صافي واخا كون هاني ..

- خرج عمر لخدمتو مخلي بركان ديال نزهة قرب ينفاجر ..

- نـزهة (عينيها غرغرو بدموع ) :

ولا كياخود قراراتو بلاما يتشاور ... دابا انا هاديك اتولي عروستي ، (شافت فراجلها ) أحمد دير شيحاجة ..

- أحمد (شاد فحناكو كيشوف فيها) :

واش ولدك عندو 10 سنين ، راه كبير وبعقلو وعارف شنو كيدير ... نزهة ديري عقلك وبراكة من الحماق ، مغاديش نبقاو نعاودو نفس الهضرة ..

- زهرة (شدات ليها فيدها) :

- ختي نزهة مزال ݣاعما خرجنا انا وياك ، ولا ناوية تخليني فدار ..

- نزهة (شافت فيها) : لا حاشا أختي ..

- زهرة :

ويلاه نوجدو راسنا وساريني حتى انا نوبتي ... شريهان غادية مع عمر ... وحنا نخرجو ..

- شريهان (بتساؤل) :

فين هو سعد ؟

- نزهة (شافت فيها) :

ناض صباح بكري ، مشا مع صحابو لباريس ... واحد يوماين ويرجع ..

- أحمد :

داكشي باش سلت بكري ، عارفني غادي نݣوليه لا ..

- نزهة : خليه عليك ... بلاما تقجر عليه بزاف ..

- أحمد (وقف) :

حتا انت بلاما تقجري على ولدك بزاف ، خليه مرتاح وفرحان فداكشي لي باغي يدير ، بصحة وراحة ..

- نزهة (كتشوف فيهم من ورا مامشا) :

واش أنا غالطة ؟

- زهرة : مغالطاش ، راه حنا الأمهات هكا دايرين أختي ... ولكن مايمكنش تمشي ولادك بداكشي لي بغيتي انت ، دعي معاه يتبت ليه الغرس ويفرحو ..

- نزهة : كون غير جات حليمة هي لي كتعرف ليهم ... مكتخليهمش يحݣرو عليا ...

- جاها صوت من حدا الباب ..

شكون هدا لي يحݣر ليا لالة عوينتي ، ندوز عليه من الودن لودن ..

- نزهة (هزات راسها وتبسمات ، كانت واقفة مرا ف 60 من عمرها ... شعرها قصير نصو بيض .. لابسة سروال ديال توب مع لاڤيست وتريكو ... عينيها كحلين وزوينين واخا كبيرة فالعمر ) :

حليمة ، على سلامتك ..

- حليمة (تقدمات لعندهم كتشوف فضيوف الجداد ) :

الله يسلمك وينجيك ، مالك مغبونة تاني ياك لاباس ؟ سلام عليكم لاباس عليكم ..

- نزهة (فرحانة ) :

حليمة ، هادي مرت لوسي زهرة لي كنت عاودت ليك عليها ، هي تشريهان ..

- حليمة (بفرحة كتسلم عليهم) :

مرحبا بيكم وألف مرحبا ... عرفتو ختي نزهة شحال كانت تعاود ليا عليكم ... نورتونا وحق الله العظيم ، وكون اعلمتيني اختي نزهة كون رجعت بكر من هكا ..

- زهرة : براك الله فيك أختي ، على خاطرك حنا ماشي برانيين ..

- شريهان كانت غير مقابلة حليمة وكتشوف فيها ... بدون سابق إنذار نقزات :

سبحان الله كتشبهي لواحد الممثلة مغربية ، غير انت ماخليتي فيها والو .. بقاو كيشوفو فيها وحليمة تحرجات ... اما نزهة جاتها الضحكة ..

- زهرة (كتشوف فبنتها ) :

والو انت زعمة مكتعلميش ، انت والفضول وتبرݣيݣ مكتفارقوش ياك ؟

- شريهان :

- مالي شنو درت؟ ...

- زهرة :

لا مدرتي والو انا لي درت ، ختي حليمة مديش عليها ، راه غير هبيلة وݣالو ليها زغرتي ... وشدات التزغريتة مابغاتش طلقها ..

- حليمة (كضحك) :

لاواه اختي زهرة لاواه ، غير خليها ... ومالها كدبات بلابيها هي ، فينما هبطت للمغرب كيݣولوها ليا ..

- نزهة (موجها كلامها للزهرة ) :

وها حليمة جات .. تخرج نيت معانا ..

- حليمة :

لاواه أختي ، يلاه وصلت عييت بغيت غير نعس ، فين هي جميلة ؟

- نزهة :

خرجات هي وشيفور يتقداو ..

- حليمة :

ايوا نخليكم ، نمشي نقاد حوايجي ... وأنتوما يلاه تنوضو الى بغيتو تخرجو ..

- نزهة : انا نطلع نبدل عليا حوايجي ..

- شريهان :

خليتوني بوحدي ، سعد مشا وخلاني كان مونسني ..

- زهرة : وياك عمر غادي يجي يديك تشوفي السيد ؟

- شريهان (وقفات) :

وراه مايجي حتى ل 1 ... انا غادي نمشي عند عمي للجردة ، نݣلس معاه بينما وصل الوقت ..

- نزهة : سيري راه اتلقايه كالس فالخلوة ديالو كيوجد فشي وصفة جديدة ..

- شريهان : واخا ... مشات شريهان عند عمها ... اما نزهة او زهرة طلعو يوجدو ريوسهم باش يخرجو ..

________________

- الـمـغرب

سيدي سليمان

- وقف طوموبيل بعيد شوية على الشانطي ، كان واحد الحانوت تم صغير ... مشا عندو نيشان ، وقف عندو جبد 20 درهم من جيبو مدها ليه ..

- مصطفى :

واحد عصيري وجوج ميريندنات ...

- اهاه ... مد ليه ميريندينات وعصيري ..

- مصطفى : بغيت نسولك الى جات على خاطرك ..

- اياه أسيدي سول مرحبا ..

- مصطفى : واش كاين شي سوق اليوم ؟

- أياه أسيدي كاين ، راه قريب من هنا اتزيد اواحد الشوية أيبان ليك ..

- مصطفى : واخا أسيدي الله يرحم الوالدين ..

والدينا او والديك أسيدي مرحبا ... رجع مصطفى لطوموبيل ديالو حط داكشي ، ديمارا وزاد ... كيما ݣاليه السيد السوق مكانش بعيد بزاف ، بلاصة الطوموبيل ونزل ، الناس غادية جايا مقديين ... كل واحد وشنو مقدي ، قطع الشانطي ودخل لوسط السوق ... الدنيا كانت عامرة مالين البال ، مالين الخضرة مالين الماعن مالفين المانط والحصاير ... كولشي كاين ، خاصو شحال الى بغا يلقا بات نعيمة ... خاصو يدور على سوق كامل عاد يقدر يلقى ...

- بدا من حدا خضارة وهو غادي وكيدور ، حتى لباسو كان لابس حاجة بسيطة ... مخاصش يبان عليه بلي أنيق ... باش مايلفتش ليه الإنتباه ...

- مدة وهو كيدور ، حتى وصل لعند مالين البال ، وصحاب برا لي كيبيعو المقالي وداكشي ديال برا ... وقف كايشوف فواحد السيد ݣالس ، لابس طبلية زرقا مع ترازة ... راجل باينة عليه تمارة ... كبير فالعمر مسكين كلو مكمش ... ولكن واخا هكاك مزال شاد فراسو واحد الشوية .. الكروسة لي كانت قدامو كانت عامرة غير بالبيدوات ديال الميكا ... مصطفى رتاح وفرح حيت عرف بلي داك لي كيقلب عليه ،، وأخيرا لقاه ...

- فكافي la mandala ... دخل جاك ... غير شافو علي جا عندو ... الإبتسامة على وجهو ..

- علي (بحس فكاهي) :

سعادة المدير ، وانا كنݣول مال الدنيا نورات وزهرات ..

- جاك (كيضحك) :

علي مغاديش تسالي من هاد الضحك ديالك ... ݣلس بغيت نهضر معاك ..

- علي (بإستغراب) :

اهاه واخا ، نبقاو هنا ولا ندخلو لداخل ؟

- جاك : الداخل حسن ... دخلو الداخل بعيد على الخدامة وعلى الناس ..

- علي :

هضر كنسمعك ..

- جاك (بإبتسامة حزينة) :

فكرت فالعرض لي عطيتيني مزيان ، وأنا موافق عليه ..

- علي (بعدم تصديق كيشوف فيه) :

كتهضر بصح ؟

- جاك :

اه كنهضر بصح ، واخا انت درتي معايا الفالطة ... وماقبلتيش بالعرض ديالي ..

- علي (كيحك راسو) :

سمحليا ، ولكن انت طلبتي مني حاجة لي مستحيل نديرها ولا تكون ...

- جاك (بإبتسامة) :

علي انا صريح ، وجيت وصارحتك بإعجابي ليك ولكن انت ...

- علي(قاطعو بإنفعال ) :

أنا راجل اموسيو جاك ، راااااجل ونهار نفكر نربط علاقة انربطها مع مرأة مرأة ، وغانتزوج او نولد وليدات ، سمحليا ولكن لي كتݣولو مكايتقبلوش العقل ... كون كان شي واحد أخور منقدرش نݣوليك شنو كنت اندير ليه ... حمد الله حيت جيتيني انت هو الپاطرون وكنقدرك ..(وقف صدرو كيطلع وينزل باللأعصاب ..

- جاك (تحرج) :

علي تهدن ... سمحليا ماقصدتش ، المهم انا مجايش على هادشي ، جيت باش نݣوليك انا قابل نبيع ليك القهوة ..

- علي (شاف فيه بإستغراب) :

قابل .. تبيع .. ليا القهوة !!! وشنو خلاك تبدل رأيك ؟

- جاك :

انا عمري ݣلت ليك لا ، ݣلت ليك خليني نفكر ... مسألة ديال السفر هي لي خلاتني نقرر بهاد السرعة ... وقبل منمشي خاص نقاد ݣاع أموري ... داكشي باش قررت نبيع ليك القهوة وبثمن لي بغيتي أنت ..

- علي (بقا غير كيتعجب) :

علاش زعمة ؟

- جاك :

أنا عندي ثروة مابيهاش ، لي تقدر تعيشني لاخر حياتي ، وعندي ممتلكات بلا هاد القهاوي لي هنا ... داكشي باش ماعنديش سوق نبيعها بقل ولا بكثر ، المهم انا غادي نوجد الوراق ... باش نفضيو هاد البيعة ونقدر نمشي ..(وقف) علي سمحليا بزاااف ... ماقصدتش نقلقك غير انا صريح كثر من القياس ... بتوفيق ليك .

- علي (مجاوبوش حرك ليه غير راسو بالإيجاب ) ..

- المغرب

- توجه مصطفى عند السيد وقف قدامو ..

- مصطفى :

السلام عليكم ..

- وعليكم السلام ..

- مصطفى : واخا نݣلس معاك واحد الشوية ، الشمس هرسات ليا راسي ..

- السيد :

اهاه اسيدي مرحبا ، عطاه واحد الصندوق ݣلس حداه ..

- مصطفى :

وا شمس قاصحة اليوم ... واش كيعمر هاد السوق ديما بحال هكا ..؟؟

- السيد : واه ديما هوكا .. انت ماشي من هنا ؟

- مصطفى : لا ماشي من هنا ، انا من القنيطرة ... غير كنقلب على واحد السيد ݣالو ليا كيكون هنا وجيت نقلب عليه ..

- السيد : واه حيت اللهجة ديالك ماشي ديال هنا ، وعمري شفتك هنا ... شكون هاد السيد نقدر نعرفو ..؟

- مصطفى :

صراحة انا مكنعرفوش ، غير نعتو ليا الناس ، كنيتو مخلوف ..

- السيد (شاف فيه بشك) :

هو أنا أسيدي ، أش حب الخاطر ؟

- مصطفى (ضار عندو) :

بغيت نعرف منك شي معلومات ، على بنتك نعيمة ...

- السيد (بإستغراب) :

بنتي نعيمة !! وانت منين كتعرف بنتي نعيمة ؟

- مصطفى : غير بشوية أسي أش سماك الله بعدا ؟

- السيد : العربي ..

- مصطفى : غير بشوية أسي العربي .. بلاما تخلع انسولك غير شي أسئلة وجاوبني عليهم ..

- العربي : وشكون انت لي نجاوبك بعدا ؟ ونزيدك هاديك البنت انا وا نسيتها ، مابقاو عندي بنات ...

- مصطفى (عرف القضية حامضة وبلي هاد نعيمة وراها شلا حوايج ) :

معاك الضابط مصطفى أسيدي ... غير بشوية عليك ، انسولك ونزيد بحالي ..

- العربي : أشمن مصيبة دارت عاوتاني حتى جايبة ليا البوليس لهنا ... تمشي تحل مشاكلها بهاد علينا ، انا ماباها ماهي بنتي ..

- مصطفى : علاش هادشي ؟

- العربي (تنهد تنهيدة طويلة ، ومن عينيه باين مسكين بلي عندو هم الدنيا ) :

شوف أسيدي ، البنت لي تعاير مها ومتسمعش ليها ، وترض عليها الهضرة ومتحتارم باها .. هاديك ماشي بنت ... ماخرجات من دار حتى زدات لينا السلوكة ، خاصمات عمامها وخاصمات خوالاتها ... تجي مها تبغي غير تنصحها ، ضور فيها ... وانا مكتعيط ليا حتى بكلمة با ، مسمياني شيباني شوف يديا أسيدي شوف (ورا ليه يديه قاصحين وكحلين وفيهم ضرابي) ... نظل هاز الفاس والبالة ... على قبل الوليدات (صوتو تغنغن) فالأخر تنوض بنتك الكبيرة تعايرك ... مابغيت نسمع عليها خبار ... انا ساخط عليها دنيا وأخرة ، بغيتها عمرها طفرو على مدارت فينا خرجات علينا الله ياخود فيها الحق ..

- مصطفى (بقا فيه العربي مسكين) :

سي العربي ، واش فخبارك بلي كانت خدامة فالقنيطرة ؟

- العربي :

لا مافخباريش ... كانت خدامة هنا فالمدينة ، وكانت كتخلص وتجيب الحوايج زينة ، وفاش مها تسولها واش تخلصات ... تݣلس تحط ليها ماشي شغلك نتخلص ولا منتخلص ، دخلي سوق راسك ... وفاش انا منصور والو ، كنت نطلبها تعاوني غير فضو ... كتسمعني لي عمري ماسمعتو ، لهلا يرضها ...

- مصطفى :

سي العربي ... الله يخليك حنا دابا ماشي فهادشي ، بغيت نعرف منك حاجة وحدة ، واش نعيمة كانت عندها شي صاحبة كانت كتعرف شي وحدة ؟ لي كتحط عليها الراس ؟..

- سي العربي (سكت كيفكر ) :

- اه كانت ، وهي سبابها حتى مشات للمدينة ...

- مصطفى (حس بلي قرب يشد راس الخيط ) :

شكون هادي ؟

- فواحد الساحة كبيرة واقفة طيارة خاصة ... باش نعرف اشمن سمية جديدة انعطيكم ..

- بدات كدوز بنت ببنت ، واي بنت ماعجباتش سميتها جورجيت كتبظل ليها السمية ... حتى بقات بنت وحدة ، قصيرة شوية بشرتها بيضة وشعرها عسلي ورطب ..

- جورجيت (بقات شحال كطلعها وتهبطها ) :

دوري أنت ..

- شافت فيها بكره وضارت كيف قالت ليها ..

- جورجيت( تبسمات بإستهزاء) :

- أمممم مابيكش فكريني فسميتك ؟

- شافت فيها ... محاملاهاش مكرهات تشدها تريشها :

فـرح سميتي فـرح ..

- شريهان (ݣالسة حداه مكتهضرش حاضياه شنو كيدير) ...

- أحمد (كيفكر) :

ليماكاغو لي درت الشهر لي فات ، كنت ضفت ليهم العسل الحر ... وزدت عليهم زيت أساس الخزامة ، عطا مزيج خطيير ..

- شريهان :

وديال هاد الشهر شنو ادخل عليهم ؟

- أحمد (كيحك راسو) :

صراحة أبنتي مزال ماعرفتش ..

- شريهان :

أجي عمي ، علاش مدخل عليهم أملو وزيت أرݣان ؟

- أحمد (شاف فيها ) :

زعمة ، الصراحة كنت كنفكر فهاد القضية غير مزال مازعمتش ..

- شريهان (بحماس) :

والله اعمي حتى أيكونو واعرين ، أيجي مداق خطييير ، والمرة جايا دخل عليهم نكهة كعب الغزال ، المسكة الحرة نعام أسيدي ... وزهر حتى هو ، عرفتي ويلي ويلي داكشي أيكون خطييير ..

- أحمد (كيشوف فيها بإندهاش) :

ماعندي مانسالك ، زهرة دݣات فيك الڤيس ديال الحلويات ..

- شريهان (كضحك) :

ضروري اعمي ... يلاه نخليك تكمل شغالك انطلع نوجد راسي ، عمر مابقا ليه والو ويجي يديني ..

- أحمد : واخا أبنتي سيري ...

- طلعات لبيتها ، جبدات سروال دجين كحل سليم .. مع تجيكيط كزيرة كحلة ، سبرديلة بيضة مع تقيشرات قسار بيضين ... طلقات شعرها ، دارت غير ليكغو ديال الشمس ورشات من ريحتها لي خدات ليها ماماها " أنا الأبيض الحمراء " رشات شعرها حتى هو رشة خفيفة من أنا الأبيض لخاصة بشعر .. درت غير بلسم لفمها ونزلات لتحت كتسناه ..

- تسمع حس طوموبيلتو وقفات ... خرجات لبرا عندو حتى كتفاجى بلي مالك لي جا ماشي عمر ... نزل من طوموبيل كيطلعها ويهبطها ..

- مالك (وقف قدامها ، اول حاجة وقعات هي ريحتها لي تغلغلات لي نيفو ، قرب منها بلاما تحت انظارها لي كلهم إستغراب ... كتشوف فيه مافهمات فيه والو ... تحنا بشوية حدا شعرها كيشم ) ...

- شنو سمية هاد الريحة ؟

- شريهان (مافهمت والو) :

أنا الأبيض علاش ؟ الى ناوي تاخدها لكارولين منضمنش ليك تبغيها ، حيت العارضات كيفضلو كوكو شانيل ، سكوندال وزيد وزيد ..

- مالك (بصوت رجولي وبارد ) :

بقاي ديريها ديما جات معاك .. خلاها واقفة كتشوف فيه ودخل ..

- شريهان : لي شاف شيحاجة يݣول الله يستر ..

وصل عمر أشر ليها بيديه ، ركبات حداه ديمارا طوموبيل وزاد ..

- عمر (كيشمشم) :

ريحة خطيرة دايرة العفريتة ... هادي ريحة عربية ياك ؟

- شريهان (كتقاد السمطة) :

أه ريحة عربية ، انتوما مالكم اليوم مع ريحتي واش خايبة ؟

- عمر (كيضحك) :

علاش شكون لاحظها من غيري ، بالعكس ريحة واعرة بزاااف الصراحة ، عمري شميت بحالها ..

- شريهان : مالك دخل دابا ، قرب كيشمشمني ، وݣاليا بقاي ديريها جات معاك ..

- عمر (كيضحاااك ) :

وايلي مالك ݣاليك هادشي العجب !!

- شريهان : علاش زعمة ؟

- عمر :

حيث مالك كيمدح غير خطيبتو بوحدها ، ريحتها تصرفاتها لباسها ... عمر مدح شي مرا من غيرها هي والواليدة ، جاتني عجب .. باش تعرفي بلي ريحتك خطيرة وكدوخ ..

- شريهان : جابتها ليا ماما كادو فعيد ميلادي ، ماشي غير هي كاينين روايح أخريين عربيين ... كل مرة انبقى ندير وحدة ..

- عمر (كيضحك) :

انت اتخلي الرجال يجريو وراك مافيهاش ..

- شريهان (كتعوج فيه) :

سوݣ سوݣ براكة من الطنز ، انا هي الاميرة ديانا ولا أنجلينا جولي ..

- عمر : ومالك انت حسن منهم ..

- شريهان (كتشوف فيه بنص عين) :

سوݣ سخونية الفران أترات عليك ..

- عمر (ميت بضحك) :

والله مكدبتي ، واخا الالة هاهو ساكت ...

______________

- مصطفى كان راكب فطوموبيلتو راجع للقنيطرة ... كيدور كلام العربي فدماغو ..

العربي : أسمها نادية ... وكان عندها صالون فرباط ، صالون كبير كانت ظل تعاود عليها ... لدرجة ݣالت لينا هاديك هي ختها ومها وباها ، شي جوج مرات كانت جات عندها للدار ، أش غادي نݣوليك أولدي ... ديك السيدة مرتاحيتش ليها ، وحدة طوموبيلتها ݣدها ݣداش وباينة لاباس عليها ، أش ادير بوحدة باها غير على قد الحال ... ايوا نهار بغات تخوي ، على مقالت بلي هاد نادية هي لي لقات ليها خدمة فالمدينة والله أعلم ..

- مصطفى :

هاد نادية ، ماعندهاش شي كنية ؟

- العربي (كيحك راسو وكيحاول يفكر) :

الكنية الله أعلم ، ولكن واحد النهار جات ومابغاتش دخل ... وسيفطات اولد جيران قالت ليه سير ݣول لنعيمة ، بلي نادية الصويرية كتسناك ..

- مصطفى :

- واخا أسي العربي ، الله يجازيك بيخير وسمحليا عذبتك معايا ..

- العربي : لا أولدي هانية مكاين حتى مشكيل ..

- مصطفى (وقف جبد فلوس من جيبو لوراني ) :

سي العربي هاك هاد البركة ، فرح الوليدات وعاون بيها واحد شوية ..

- العربي (مابغاش يشدها) :

لا لا حشومة اولدي ..

- مصطفى (خشاها ليه فيدو بزز) :

والله حتى تشدها ، ماشي شيحاجة وهادي نمرتي ، الوقت لي بغيتي شيحاجة ولا محتاج شي مساعدة سوني ليا نجي حتى لعندك ..

- العربي (مسكين عينيه غرغرو بدموع ) :

سير الله يعلي شانك ، ويعلي مرتابتك وينور طريقك ويبعد عليك ولاد الحرام عليك وعلى تريكة ياربي ..

- مصطفى (باس ليه راسو حيت بصح بقا فيه بزااف ... مكايعرف بحق الوالدين غير لي ماعندوش ، ومصطفى كون بقى باه بالحياة علم الله شنو كان ايدير على قبلو ... وهادي عندها باها بالحياة وشنو دايرا ليه ، فعلا مايعرف بالحاجة الي مشات ليه) :

الله يعاونك أسي العربي ..

- العربي (شير ليه) :

طريق السلامة أولدي ، الله يديك على خير ... مشا مصطفى ، والعربي مسكين حل يديه لقا فيه 3 ديال 200 درهم فرح بزاف ماقداتو فرحة ... يلاه يرتاح مسكين هاد الأيام ، بقا كيداعا معاه خشا النمرة فجيبو جمع كروصتو ورجع فحالو لدارو ...

- طريق كلها ومصطفى كيفكر ، راسو كيدي وكيجيب ... شكون هاد نادية الصويرية ، وكيفاش حتى تعرفات على نعيمة ... وكيفاش وحدة لاباس عليها من الوصف لي عطاه العربي ، تصاحب مع وحدة بحال نعيمة ، ماعندها ماتكساب من غير الى كانو مجموعين على البلا ... ولا كتستغلها واحد من زوج ...

- وقفات طوموبيلت عمر قدام قهوة la mandala .. نزل وتبعاتو شريهان ، كدور راسها فالبلاصة لي هوما فيها ، بقات غير حالة فمها بلاصة لي مايمكنش خطيرة بزااف ...

- عمر (حاضيها) :

عجباتك البلاصة ؟

- شريهان :

(بإنبهار) عجباتني وسكتي واعرة بزاااف ..

- عمر (كيشرح ليها ) :

هاد المنطقة سميتها لاكروازيت ، والى شفتي يك البلاصة (شافت فين كيأشر ليها) دوك الشقق تما فين ساكن مالك ..

- شريهان (متفاجئة) :

وايلي بصح ؟ ولكن بلاتي اعمر انت ݣلتي ليا غادي نخدم فقهوة عادية ياك ؟ شفتك جايبني لبلاصة هاي كلاص ، كيفاش هاشي مافهمتش؟ وفين هي القهوة لي غانخدم فيها؟؟

- عمر (أشر ليها بصبعو على القهوة لي قدامهم) :

هادي ..

- شريهان (حالة فمها) :

كتفلى عليا ياك؟ واش من نيتك ؟ (تمات راجعة لطوموبيل سبقها سد الباب قبل لا تحلو ..

- عمر (بصرامة) :

شريهان وقفي براكة من البسالة ..

- شريهان :

أشمن بسالة أنت قلتي ليا بلي قهوة عادية ، ماشي أفخم وأحسن قهوة فيك يا كَّــان ..

- عمـر :

راه ماعندك حتى حل أخور ، راه مايمكنش تخدمي هنا بلا وراق فهمتي ، الى مكنتي كتعرفي شي واحد راه مغايخدموكش ، مغربية جايا لهنا باش تخدم من نيتك كتفلاي .. ديري عقلك شوية وبراكة من العناد ونفاخة والݣمل الزرݣ ..

- شريهان (كتشوف فيه بنص عين) :

علاش كاين شي ݣمل زرݣ ، فين شفتيه كان فيك ؟

- عمـر (كيضحك) :

كنسمع الواليدة كتݣولها ... دابا براكة قصوحية الراس وزيدي نمشيو ...

- عمــر ..

ضارو بزوج منين سمعو صوت عيط بإسم عمر ..

- عمر (بإبتسامة ) :

علـي ..

- علي (كيضحك) :

من ݣبيلة كنشوفكم واقفين ومزال مادخلتو ، قررت انا لي نجي عندكم ياك لاباس؟ مناويينش تدخلو ؟

- عمر :

لا علاش لا ناويين ندخلو ، علي امورك مزيانة انت بيخير ؟

- علي (مد ليه يديو) :

انا بيخير ... غبور هادي أصاحبي مابقيتيش بنتي ، فين غبورك نسيتينا صافي ..؟؟

- شريهان (هزات حجبانها بصدمة ، عمر كدب عليها كاليها امعرفة وهو صاحبو )..

- عمر (كيحنحن) :

والو غير للخدمة وصافي راك عارف ..

- علي (شاف فشريهان ) :

هاد البنت هي لي عاودتيلي عليها ؟ أنا علي مول القهوة .. بغيت نݣول قريب نولي مول القهوة ..

- شريهان :

انا شريهان (جرات عمر) .. واش كتفلا عليا ، السيد صاحبك وكتريݣل عليا ، وزايدها هو مول القهوة انا غادية بحالي ...

- عمر (جرها قدام علي) :

علي نقدرو ندخلو لداخل ، كاينة شي طبلة بعيدة على الناس ؟

- علي (تابعو من اللور مفاهم والو) :

اه اه اخويا كاينة دخل ، أنت أصلا دخلتي ..

- شريهان :

عمر طلقني واش هبلتي ؟

- عمر (تحت سنانو) :

زيدي ݣدامي ، انت راه ماينفعش معاك الخاطر ..

- شريهان : واخا غير حتى نمشيو لدار ونتفاهمو عقل عقل مزيان ابلاتي عليك ...

- المـغرب

- فالبيرو ديال مصطفى .. تدق الباب ودخل منعم ..

- منعم (عطاه التحية) :

على سلامتك ..

- مصطفى : الله يسلمك ..

- منعم :

واحد السيدة على برا بغات تشوفك ..

- مصطفى (بإستفهام) :

شــكون ؟

- منـعـم :

مابغات تدلي بحتى شي تصريح ، بغات تهضر معاك أنت شخصيا ..

- مصطفى (أشر ليه بيدو ) :

خليها تدخل ... خرج منعم ودخلات مرا فأواخر الخمسين من عمرها ، لابسة جلابة وصباط وهازة ساك زدايرة شال على راسها وكشكول ... ومن يديها كتبان مسكينة بلي كتخدم وكتدمر ..

- سد منعم الباب وراهم وخلاهم بزوج ..

- مصطفى (عطاها إشارة باش تݣلس) :

ݣلسي الالة ، أش حب الخاطر ؟ فاش ممكن نعاونك ؟

- سميتي سعدية أوسيدي ، جيت نديكلاري ببنتي أولدي ... هادي 10 يام وهي مكايناش غابر ليها الأثر ..

- مصطفى (بإستغراب) :

10 يام ويلاه جايا ديكلاري ؟

- السعدية : مشيت للكوميسارية الصغيرة لي حدانا ، بقاو كيديو ويجيبو فيا ... مدارو معايا والو أسيدي ، ومشيت حتى لجدارمية ... ومدارو معايا اسيدي والو ، بقا ليا حل واحد هو نجي لهنا ..

- مصطفى (خدا ورقة وستيلو وبدا كيكتب ) :

شحال فعمر بنتك ؟

- السعدية : عندها 23 عام أسيدي ..

- مصطفى :

كتقرا خدامة ولا شنو كدير بضبط ؟

- السعدية :

أولدي قرات وخدات الباك ديالها .. وكانت دايرة لافاك ، ولكن من بعد ݣالت بلي مابغاتش تكمل قرايتها ، وبقات شحال وهي فدار ، حتى خدمات فواحد الصالون ..

- مصطفى (هز راسو فيها بإستفهام) :

صالون ديال الحلاقة ؟

السعدية : أه أسيدي ... كون غير ماخدماتش فيه ..

- مصطفى (حدر راسو كيقيد) :

علاش شنو وقع ؟

- السعدية :

أسيدي من نهار خدمات فيه ، تبدلات بزاف ... مع انا كنجي من الخدمة عيانة ، قليل فاش كتݣلس معايا ، باها طلقني ومشا لبرا ... وانا لي ربيتها وكبرتها ، ولات غير كدكر ليا برا ، وبلي الناس عايشين فبرا ... وبلي لي قطع لبحر كيغنيه الله ، ويدير لاباس ... كتݣوليا أمي مزال انمشي لأوروبا وندير الفلوس ، ونبرعك ونحيدك من تمارة لي انت فيها ، وديك اوروبا لي مشا ليها با وخلانا مزال نديك ليها

- مصطفى :

بغيتي تݣولي بلي شي واحد عمر ليها راسها ، او هو لي داها للبرا ؟

- السعدية (تنهدات تنهيدة طويلة) :

الله أعلم أسيدي ... ماعرفتش

- مصطفى :

عندك شي تصويرة ديالها ؟

- السعدية (حلات الساك ديالها) :

اه أسيدي هاهي تصويرتها ... شدها من عندها مصطفى كيشوف فيها ، كانت زوينة بملامح بريئ بشرة بحال الحليب شعرها عسلي ورطب ... وعينيها زوينين ..

- مصطفى (كيحقق فصورة مزيااان مدة عاد نطق) :

شنو سميتها ؟

- السعدية :

سميتها فرح أسيدي ، فرح رمسيس ..

- مصطفى (حرك راسو ونطق بهمس) :

فرح رمسيس .. مزيان ، شنو سمية الصالون فاش كانت خدامة ؟

- السعدية :

مقيداه فواحد المدكرة فدار ، ماجبتهاش معايا ... ولكن عاقلة على سميت مولاتو ..

- مصطفى (بتساؤل) :

شنو سميتها ؟

- السعدية : سميتها نادية ، وكيݣولو ليها نادية الصويرية ...

- كان

علـي رجع باللور كيشوفيها وكيضحك ، وجها كان حمر حيت ݣاع لي واعدها بيه عمر مداروش ، حطها بوجها قدام علي ...

- شريهان (معصبة) :

ياك ݣلتي ليا حتى واحد مغايعرف بلي انا وياك فاميلة وحدة ؟ ي (قاطعها علي)

- شريهان واحد دقيقة عفاك ، خاصك تعرفي واحد الحاجة فاش هضر معايا عمر ... وݣاليا بلي بنت عمرو بغات تخدم ، ستغربت منكدبش عليك ، حيت بنت أحمد العراقي وبغات تخدم سرباية فقهوة جاتني فشكل ، ولكن عمر شرح ليا وݣاليا بلي بغيتي تعتامدي على راسك ... وهادشي مزيان وعجبني هادشي ، وحاجة خاصك تعرفيها ... ماشي غير خيت انت بنت عم صاحبي انعاملك معاملة خاصة ، بحالك بحال ݣاع لي خدامين هنا ... ممنوع التعطال الوقت هو الوقت ، روپو كيكون نهار الأحد فقط ونهار السبت كتخدمي فصبح والعشية لا ، إذا عندك نهار ونص ديال الخدمة ... كنبغي الخدمة تكون مضبوطة ديري هكا ولا هكا ، نقد ندوزها مرة الاولى والثانية ، الثالثة اتحطي طبلية وتخرجي ، وهادشي ݣلتو للعمر الخدمة خدمة والمسائل الشخصية بوحدها تفاهمنا ..

- شريهان (رتاحت مبدئيا ) :

مفهوم ..

- علي (بجدية) :

تفاهمنا دابا ، بنسبة لصالير راه بحالك بحال لي هنا ، مغانزيدوش عليك شيحاجة ... الثمن لي مخوفك بزاف انو يكون طالع ، راه ݣاع لي خدام هنا كياخود نفس الثمن ، وبنسبة لمدينة بحال كان ، راه يلاه يقدك ... والى كانت عندك شيحاجة ݣوليها دابا ، سي نو نتوكلو على الله ونبداو ...

- شريهان (بتحدي) :

واخا نبداو ..

- عمر ( وقف) :

نخليكم ، يلاه توريها شنو دير ... شريهان 8 غادي ندوز وراك ..

- علي : تسناني انوري لشريهان شي حوايج ونجي ..

- عمر :

داكوغ انا انتسناك ..

__________________

من بعدما رجعات زهرة هي ونزهة من برا ، ݣالسين فصالون مع أحمد حتى نطق :

بغيت ندير واحد الصدقة على والديا وخويا علي ...

- نزهة : صدقة فكرة مزيانة ..

- أحمد :

غادي ندبح 3 ديال الحوالة ، جوج اندبحوهم وانوهبوم للخيرية لي كنتعاملو معاهم ... لدوك الوليدات مساكن ، ودوك لاجئين مساكن في سبيل الله ... وحولي اندبحوه فالفيرما وندوزو نهار زوين نتجمعو فيه كاملين ..

- نزهة ( بفرحة ) :

والله الى ماعندي مانسالك ، عرفتي شحال مدوزنا الأغياد مجموعين ، نمشيو وندبحو تم وندوزو شي يامات زوينين نمشيو فالويكاند ، السبت الصباح نمشيو ... والإثنين نرجعو بحالنا ..

- أحمد :

صافي إن شاء الله سيمانة الماجية نديرو هاد القضية ...

- زهرة (تنهدات تنهيدة طويلة ) :

الله يجعلها ليك فالميزان المقبول ياربي ، والله يوصلها للمرحومين ياربي ...

- نزهة وأحمد : أمين ياربي ..

- زهرة :

شحال هادي ماتجمعنا على الشوا ، ومتجمعنا على الݣصعة ديال الطعام ، وعلى الݣديد والكرداس والمجبنة عقلتي؟

- نزهة (كضحك) :

عمرها تنسا ليا ياختي ، ناري على يامات ... كنا كنتجمعو فوق سطح ونغسلو الراس والكرعين ، ونغسلو الكرشة ... ومنساليو حتى العشية ونضربوها لسطح بتسييقة بتيو ... وفاش نساليو كنديرو الكرشة للعشا ، وعاد ندخلو وندوشو ونبدلو علينا ، ونعمرو بريريد اتاي مع حليوات ، تقويتات ، وفاش طيب الكرشة كنتجمعو عليها كاملين ، والغد ليه عاد يݣرض لينا خويا علي الله يرحمو الحولي ، وكنديرو الكتف للغدا (تنهدات تنهيدة طويلة) انت كنتي تكلفي بالݣديد والكرداس ... توحشت دوك الأيام وحق الله ، شفتي الغربة خايبة بزااف كتحرمنا من حبابنا ومن الاوقات الزينة ..

- زهرة (سهات كتفكر دوك الايام تفكرات راجلها وايامها معاه ، غرغرو عينيها بدموع ) ...

- احمد : هانتي بكيتيها داكشي لي بغيتي ؟

- زهرة (هبطو دموعها ) :

توحشتو ياخويا وحق الله ، فكراتني فالأيام زينة لي عمرها تنسى ليا ... ݣاع دوك الأيام مشاو ..

- أحمد : والله يرحمو ... ماتفكريش فلي فات ، فكري فهادشي لي جاي ... الله يطولينا العمر وإن شاء الله نبقاو مجموعين ، حتى يدي مول الأمانة أمانتو ..

- زهرة : أمـــين ياربـي ..

- الـمغــرب

- تدق الباب ديال البيرو ودخل منعم ..

وي طلبتيني؟؟

-ق مصطفى (أشر ليه بيدو ) :

ݣـلس .. ݣلس منعم بكل إهتمام كيشوف فيه ..

- مصطفى : نقدرو نݣولو بلي شدينا راس الخيط ..

- منعم (بإستفهام) :

كيبان ليا عندك الجديد ..

- مصطفى (وقف داير يديه فجيابو ، ضار على البيرو مقابل مع منعم ) :

نادية صويرية ...

- منعم : ماشي هادي لي ݣاليك عليها ، بات نعيمة ؟

- مصطفى :

ماشي غير بات نعيمة لي هضر عليها ، حتى لمرا لي كانت هنا عاودات عليها ، بنتها مشات مارجعات وتخايل الصالون ديالمن ، ديال لالاهم نادية ... السيدة دايرة فروع ليها فالمغرب ، وفكل مدينة صالون ، وسبحان الله كتستقبط غير الشريحة لي مضرورة ، بنات صغارات باغيين ينقدو ريوسهم من الفقر ... كتلعب ليهم بالعقل وتوهمهم بلي اتديهم لبرا ، ولكن فينهوما هاد البنات الله أعلم ...

- منعم (بإستغراب) :

وحدة لاباس عليها بحال هاد الشكل ، كيفاش حتى تصاحبات مع وحدة بحال نعيمة ؟!!

- مصطفى (ݣلس مقابل معاه) :

هنا فين كاين البلان ، حيت نعيمة فريفرة وحتى هي خطار ... شنو غادي تبغيها فنظرك غير تجيب ليها البنات ، فهمتي البلان كيداير دابا ..

- منعم (كيفكر) :

وعلى هاد الحساب راه مايمكنش نمشيو ونجيبوها بلا أدلة ملموسة فيدينا ، ولالا ؟

- مصطفى (ضحك) :

هاباش كيعجبني تفكيرك ، خطييير كتفهمها طايرة ... فنظرك أنت شنو المعمول؟

- منعم (كيفكر) :

لي خاصنا نديروه ، هو ندخلو بنت من عندنا لواحد من صالونات ديال هاد نادية ، تشكي وتبكي ودير بلاصتها ... وتجيب لينا الخبار حاجة بحاجة ..

- مصطفى ( مد ليه إيدو كيضحك) :

بصحتك ، ولكن قبل بغيت أي معلومة تجيني على هاد نادية ، من نهار طاحت فكرشها مها حتى لدابا ..

- منعم :

كون هاني من هاد الناحية .. ولكن ݣوليا شكون هادي لي غادي تحطها وسط الصالون ، باينة اتكون فكرتي فيها ولا أنا غالط ..؟

- مصطفى (وقف) :

من نحية شكون ، مكاين ماحسن من كوثر ...

- منعم (ضحك) :

والله حتى كنت عارفك غادي تݣولها ، وصراحة هي لي غادي تجي لهاد المهمة هادي ، دكية وفأي بلاصة حطيتيها كتحمر الوجه ، وزيد عليها زوينة ..

- مصطفى (كيشوف فيه مصغر عينيه كيضحك) :

أممم زوينة ، خرج من رونضتك وݣوليا شنو البلان ؟

- منعم (كيضحك) :

هاد الساعة مكاين والو ، ساعة أخرى ممكن ماتعرف ... المهم خليتي نشوف خدمتي ، راني عارفك خاص كاع المعلومات يكونو غدا عندك ..

- مصطفى : الرضـا ..

- شريهان من بعدما وراها علي الخدمة ... وشنو دير وشنو لي لا ، تطلقات ليها الخدمة فيديها ... شوية بشوية بدات كترتاح ..

- كانت عندها واحد الطبلة على برا ، هازة الپلاطو يلاه اتخرج حتى خرجات فيها واحد البنت جاب الله مطاحش لي فيديها ...

- سكينة (رجعات بلور هازة يديها ، كتهصر بالفرنسية) :

سمحيليا ماشفتكش ، كنت ساهية ...

- شريهان (هزات فيها راسها مخنزرة ) :

ماشفتينيش ، قدي قداش وماشفتينيش سبحان الله .. ضربات فيها ومشات ...

- جاك (لي كان سابق سكينة) :

سكينة مالك وقفتي ؟

- سكينة (مزال مشوكية من لي وقع ) :

لا والو ..

- جاك : ويلاه باش نهضرو مع علي ، خاصني نمشي خلاص ..

- سكينة : واخا ... تبعات جاك حتى دخلو عند علي ..

- جاك :

علي ، سكينة كانت خدامة عندي ، بغيتك تخدمها هنا عندك ، القهوة لهيه عندها إشكال فيها ... التوقيت وحتى بنسبة المشروب فهمتيني ..

- علي :

وي فهمتك ، كون هاني وصالير راه نفسو مغايتبدلش ..

سكينة (بإبتسامة ) :

اه ماعنديش مشكيل فهادشي ..

- جاك (وقف) :

انا غادي نمشي ...نخليكم باش تفاهمو ... علي ماتنساش غدا نتلاقاو على قبل الاوراق ..

- علي (أسر ليه براسو بمعنى واخا ) ..

علي (موجه كلامو لسكينة ) :

سكينة الخدمة هنا راه بحالها بحال الهيه ، يعني مغاديش يكون سي تغيير ، من غير هنا مكايتسرباش المشروب ، تفاهمنا وتوقيت غادي يكون توقيت كانديان تفاهمنا؟؟

سكينة (بإبتسامة فرحانة) :

اه صافي داكشي لي بغيت ، باش تجي ليا مع خدمتي الثانية ..

- علي : داكوغ إذا حنا مفاهمين ..

- سكينة : اه مفاهمين ... قاطعهم صوت شريهان ..

- موسيو علي ، جا عمر نقد نمشي دابا ؟

- سكينة (بقات كتشوف فيها فالأول عند بالها فرنسية ، حتى هضرات دابا بدارجة) ..

علي (ساف فساعتو) :

لا دابا خاصك تمشي ، أصلا راه تعطلتي على دار ب 10 دقايق ... اه نسيت حيدي عفاك ديك موسيو ، انا مزال شباب وكتعيطي عليا موسيو ، كيجيني راسي بحال شي شارف ... وحتى انت (موجه كلامو لسكينة) انا سميتي علي علي ، تفهمنا ..

- شريهان ( بإبتسامة) : واخا ..

علي (وقفها) : شيري ..

- شريهان (ضارت عندو كتهضر مع راسها وعلى هاد إسم الدلع لي لصقوه فيها ) :

نعام ..

- علي : نقدم ليك سكينة ، أتخدم معانا هنا ..

- شريهان (بإبتسامة خفيفة ) :

مشرفين اختي ..

- سكينة (بإبتسامة كبيرة) :

سمحيليا على ݣبيلة دخلت فيك ماقصدتش ..

- شريهان (ببرود) :

- ماشي مشكيل اختي هانية ... سمحوليا ..

- خرجات لقات عمر كيتسناها ، ضارت ركبات حداه ... ديما رشد الطريق للدار ..

يتبع...