السيدة الأولى الجزء السادس

- منعم : واخا ... خرج منعم ودخل راجل فنهاية الأربعينات ، عطاه مصطفى الإشارة باش يݣلس ... خدا لاكارط ديالو قراها حطها قدامو ... هز راسو فيه ..

- مصطفى : على سلامتك اسي عبد الله ..

- عبد الله :

الله يسلمك أسيدي ، انا كنت مسافر سونا ليا دري ، ݣاليا بلي سولتو فيا وبغيتوني ، شديت الطريق وجيت نيشان ..

- مصطفى :

شكرا اسي عبد الله عدبناك معانا ، سي عبد الله سمعتي بالجريمة لي وقعات نهار 01/12 ياك ؟

- عبد الله : ايااه أسيدي سمعت بيها .. مابعيدش بزاف على المحال ..

- مصطفى : هاااا وانا بغيتك تعاود ليا ، شنو وقع بضبط فديك الليلة ، شنو لي شفتي وشنو لاحظتي بتفصيل الممل ...

- زهرة (كتشوف فبنتها داخلة معصبة ) :

ياك لاباس ؟ مالك تاني؟

- شريهان (شافت فمها) :

ماماليش ..

- سعد (يلاه بغا يهضر يݣول لي كاين وهي تغمزو ) ..

ياسمينة ، حبيبة ديالي نمشيو انا وأنت وعمو سعد لواحد الكوخ زوين بزاف ..

- ياسمين (مقابلة ليها عينيها ، بدون سابق إنذار هزات يدها حطاتها على عينين شريهان ، وبخجل جاوباتها) :

واس بحال تاع رسوم ؟

- شريهان (شدات ليها يدها وباستها) :

اه بحال ديال رسوم ، وغادي نجيبو الألعاب بزاااف ونلعبو صافي ؟

- ياسمين (أشرات ليها براسها بواخا) ..

- شريهان (شافت فسعد) :

سعدوش انسبقوك انا وياسمين ، جيب ليها الألعاب ديالها عفاك ، ودفتر والألوان ديالها ..

- سعد (وقف) :

وي شاف ..(عطاها التحية وطلع) ..

خدات شريهان يد ياسمين وخرجو مخليين نزهة وزهرة ݣالسين كيتسامرو هوما وحليمة ...

________________

- كـارولين (كتهضر بجهد) :

كيفاش حتى تاخدتي قرار بحال هذا وماعلمتينيش ، وماخديتيش رأي ديالي ..

- مالـك (بتحدير وشوفات ديال الخطر) :

أخر مرة تعلي صوتك فهاد الدار ، مامحتاجش ناخود قرار بحال هدا ونتشاور معاك فيه ... وزايدون مزيان تعلمي تعاملي مع الوليدات الصغار ، هكا غادي تعرفي تعاملي مع ولادك ..

- كـارولين (بعدم تصديق) :

لا لا انت كتفلى كضحك عليا ياك ، انا والولاد مايمكنش ... انا مكنقدش على صداعهم ولبلاصة لي يكونو فيها مكنرتاحش فيها ، إيه هوما زوينين ولكن وهوما كباااار ... ماشي وهوما صغار ، بغيتيني نبقى ندور فدار ببيجامة وبانطوفة ، خاص نبدل الكوش ونرضع لالا ابدا مجرد التفكير فهادشي جاتني الدوخة .. حبيبي تقدر تجيب مربية لهاد البنت ولا خليها مع شريهان بانت ليا اتفاهم معاها ، توحشتك ابب شنو بان ليك نتعشاو على برا (قربات منو حاطة يديها على عنقو ... دازت من حداهم شريهان مشافتش فيهم ... كان كيشوف فيها بنظرات باردة ، حط يديه على يديها ونزلهم ليها ) ..

- مـالـك (بهدوء) :

بغيتي تݣولي بلي إلى تزوجنا ، مكتفكريش تولدي ياك ؟

- كـارولين (بدلع) :

مالك براكة ماتزيدش فيه ، الدراري ماشي هوما محور الكون ، وانا وانت تفاهمنا على هادشي من الاول ، وݣلتي ليا بلي كتبغيني انا ماشي باغيني على قبل الاولاد ولالا ؟

- مالك :

تماما ، ولكن مع الوقت ضروري انبغي نكون اب لا ماشي من حقي ؟

- كارولين :

وي حبيبي ، ولكن عطا الله الحلول باش تكون اب ونكون انا ام من غير انو نحمل ونتعدب ، ونخسر وجهي وداتي لي تعدبت باش وصلت لهادشي لي انا عليه دابا ، مثلا كاينة الام البديلة ..(قبل لا تكمل قاكطعها بصوت صارم ) ...

غادي تهزي طوموبيلتك وغادي تمشي فحالك ..

- كارولين (بعدم تصديق) :

كتجري عليا ؟؟

- سيري فحالك قبل لا نغلط ونتصرف تصرف مغاديش يعجبك ..(كيغزز سنانو وجهو ولا حمر يديه كيترعدو ماباغيش يفوت فيها شي ضربة ) سييي رييس ب حااا لك ..

- كارولين مارضاتش وبقا فيها الحال بزاف ... عطاتو بظهر ، ركبات فطوموبيلتها ودموع فعينيها .. ديمارات ومشات ..

- بقا واقف كيتنفس بصعوبة كيحس براسو مخنوق ... دقات قلبو عليا ، وجهو سخون بالأعصاب .. كيدوز يديه فشعرو بعصبية ... دور راسو بزربة كيبانو ليه من وسط الكوخ كيلعبو ... تنهد تنهيدة طويلة ورجع للڤيلا .

- عبد الله ( رجل فأواسط الخمسينات ... كيحاول يتفكر شنو وقع فداك النهار ) :

انا من عوايدي أسيدي مكنسد حتى ل 10 دليل عاد كنسد ، وبعد المرات كنبقى حتى ل 10 ونص ، مع دار عندي قريبة للمحال ... مكنلقاش مشكل ، أنا داك النهار الصراحة ماشفتش شي حاجة لي هي غريبة ... الكليان داخل خارج ، زعمة مكانتش شي حاجة لي هي غريبة أسيدي ..

مصطفى (ناض وجا ݣلس قدامو) :

سي عبد الله ، تفكر مزيان ... ضروري تكون شفتي شيحاجة ماهياش ، القضية راه فيها راجل ميت مدار لا بيديه لا برجليه ... وعائلتو محروقين عليه الله يرحم بيها الوالدين ..

- عبد الله (بقا ساكت وكيخمم) ..

- مصطفى (قرب ليه كيشوف ليه فعينيه) :

انا عارف بلي شحال من واحد غرق راسو بسباب شهادتو ... ولكن ماتخاف من والو ، راه مكايناش السيبة فالبلاد ... وفينما حتاجيتيني اتلقاني ولا عليك ، غير هو الله يعطيك الستر حاول تفكر ..

- عبد الله (تنهد تنهيدة طويلة ) :

الصراحة أسيدي ، ماشي انا لي شفت ولكن ولدي لي معايا فالحانوت ..

- مصطفى (قلبو ضرب ... ݣاع الحواس ديالو خدمو ) :

شنو شاف بضبط ؟

- عبد الله :

فديك الليلة ، بضبط مع شي 9:30 هكا ... دخلات واحد البنت زربانة خدات الروشارج وخرجات مشات ، أنا طلعت الفوق نجيب واحد الكارطونة ديال بيمو حيت كان سالة وخليت ولدي فبلاصتي لا يجي شي كليا ... ومع الفوق مكايسمعش وكنت بين السلعة مسمعت والو .. فاش هبطت ݣاليا ، بلي شي بنت بحال لي كانت فالمحال كانت كتجري جهة العمارات لي مقابلين معانا ، وشي جوج درجال كانو تابعينها كيجريو ..

- مصطفى (غوبش) :

كيف دايرة هاد البنت عاقل على ملامح ديال وجها ؟ شحال يكون عندها ؟

- عبد الله :

الصراحة أسيدي ماعاقلش بزاف ، كانو كليان اخرين بلا بيها ... لي عاقل عليه هو كانت لابسة الكحل وتكون فالعشرينات هكاك ديك 23 ديك 24 يمكن ..

- مصطفى :

سي عبد الله ، غير حاول تفكر مزيان ..

- عبد الله :

أسيدي لي كنعرف راني ݣلتو ... كون عقلت عليها راه انكولها ليك ..

- مصطفى (رجع باللور ) :

واخا ، ولدك يعقل عليها ؟

- عبد الله :

ماعرفتش اسيدي واش عاقل عليها ولالا ، وحتى الى بغيتو تسولوه هو مكاينش دابا ..

- مصطفى (تعصب كيحلها من جهة وتسد من جهة) :

فين كاين ؟

- عبد الله :

خدام مع واحد السيد كيديو السلعة لموريتاني ، بعد المرات كيفوت شهر ومرات شهرين عاد كيرجع ..

- مصطفى (وقف كيدوز يديه بعصبية فشعرو ) :

واخا اسي عبد الله ... الله يخليك فاش يجي ولدك ݣوليه يدوز عندنا ... وشكرا بزااف سمحلينا عدبناك معانا ..

- عبد الله (وقف) :

لا اسيدي عذابكم راحة ... الله يعاونكم انا غير يجي ولدي أنكوليه يدوز عندكم ، الله يعاون أسيدي ..

- خرج عبد الله وبقا مصطفى كيخمم ويسول راسو ... شكون هاد البنت لي كانت شاهدة على الجريمة لي وقعات ؟

دازت العشية زوينة مع ياسمين ... كانت كتلعب مع سعد وشريهان بكل طلاقة ، كتحس بيها مرتاحة بزاااف .. بكترت اللعب عيات ، غير وصلات 8 ديال الليل كلات غسلات سنيناتها وتخشات فبلاصتها نعسات ، بلاما تقرا ليها جميلة القصة ديال قبل النعاس ...

- على الطبلة ديال العشا

مجموعين ..

- أحمد :

غدا إن شاء الله خاصنا نفيقو بكري شوية ، عاوتاني أنت ماتفيق حتى لظهر ... غدا راه 6 دصباح تلقاك فايق ( موجه كلامو لسعد) ..

- سعد (كيضحك ݣاعما مسوق) :

لالا كون هاني ... أصلا انا ايولي ينوض بكري ديما ..

- عمر (كيشوف فيه بنص عين) :

علاش زعمة ؟

- سعد :

حيتاش هو ايولي ينوض بكري ، ويعجن(صرب جبهتو) بغيت نݣول يمشي يخدم ..

- أحمد (بإستغراب) :

أياااه ياكما فورمطاوك فباريس ؟ كيفاش حتى ولا فيك هاد الحماس كامل ؟

- سعد :

نو نو ، ولكن شريهان قاتلي الرجل هو لي يعول على راسو ... ومايبقيش يعوول على والديه ..

- أحمد (بإبتسامة) :

الله يرضي على بنتي هي لي تصلح ليك ...

- مالك (حاضيها كيفاش ساهية كتفكر ، ملامحها باردين ... مامعاهمش نهائيا ) ..

- زهرة (كتعيط ليها) :

ولالة غنو افين مشيتي ابنتي ؟ وشريهان ...

- شريهان (قفزات كتشوف فيهم ) :

سمحوليا ، كتهضرو معايا ؟

- أحمد : فين ساهية أبنتي ؟

- شريهان :

فوالو ، غير سهيت وصافي ... سمحوليا راسي ضرني بزاف ... انمشي نعس باش نفيق بكري غدا ، (دفعات الكرسي ونطقات) تصبحو على خير .

- الكل (تصبحي على خير ) ..

- أحمد (من ورا مامشات) :

مالك ولدي ، واخا نهضر معاك شوية ؟

- مالك (حرك راسو بالإيجاب ) .. ناض أحمد وتبعو مالك للمكتب ..

________________

- فبيت شريهان حالة الپيسي حطاه قدامها ... جاها ميساج فالواتساب فتيليفونها ... كان مروان .. سوية سونا ليها أپيل ..

- وي مروان ، صاڤا عليك هاني مهني هو هداك ؟

- مروان : خاصنا غير النظر في وجهك العزيز ... وفين شفتك غابرة الناس اخدمو نساونا ..

- شريهان : باااز شحال فيك ديال الهضور ، انت بيخير مزيان هو هداك شي جديد ؟

- مروان : هاد الساعة غير القديم .. مالك انت مال صوتك ماشي هو هداك ياك لاباس ؟

- شريهان (رجعات راسها لور ... وتنهدات تنهيدة طويلة) :

مابغاتش تنسى ليا أمروان ديك الليلة ، كنحس بيها بحال شي هاجس تابعني فحياتي قسما بالله ... كنضحك ونحاول نسي ، ولكن مامرة مازوج كتجيني لبين عينيا ... عرفتي على منظر كيف داير ، عرفتي ويكونو شافوني شنو غادي يوقع ...

- مروان :

ماعندو مايوقع ... انت مشيتي وبعدتي ، فينكم وفينهوم هوما دابا الله يهديك ..

- شريهان :

عرفتي ويسيق مصطفى الخبار ، مشيت فيها ... راه تستر على جريمة فيها عقوبة فخبارك ؟

- مروان (سكت شحال ودوا ) :

هانتي انݣوليك شيحاجة ، وبلاما تخلعي ؟

- شريهان (تقادات فالݣلسة قلبها كيضرب) :

أشنو كاين غير هضر ؟

- مروان :

بغيت نݣوليك ، بلي خوك هو لي شاد القضية ديال ديك الجريمة ..

- شريهان بحال الى تكب عليها سطل ديال الما بارد ...

ماتݣولهاش العااار ....

- فڤيلا جورجيت ... فواحد من بيوتها الكبار ، ݣالسة على نموسية وساهية ، كتفكر مها لي توحشاتها بزاااف ، قلت عقلها دارتها ليها حلمها ، لي ولا بنسبة ليها دابا كابوس عايشاه ... هو السبب حتى وصلات لهنا ، درس عمرها غادي تنساه طول ماهي عايشة ، هادي في حالة الى بقات عايشة .. نزلات دمعة سخونة من عينها مسحاتها بزربة ، كتحس بواحد الحرقة فقلبها واحد العافية شاعلة صعيب تطفا ... فيقاتها من سهوتها صوت البنت لي حداها ..

فـرح أنا خايفة بزاف أختي ..

- فرح (ضارت عندها كتشوف فيها ، بنت صغيرة فالعشرين من عمرها ، حتى هي مغربية ) :

مناش خايفة ؟

- خايفة لا منشوفش والديا مزال ، توحشتهم بزاف أختي وحق الله ... علم الله كيدايرة حالتهم مساكن ، الصراحة حتى كنديروها قد راسنا ، عاااد كضربنا الفيقة وكندمو ، كون يحسابلي أيوقع ليا بحال هكا ، واخا اختي نبيع النعناع حدا والديا وميمتي ، ولا هاد الحالة وحق الله (بدات كتبكي ) ..

- ناضت فرح من بلاصتها ... ݣلسات حداها جراتها وعنقاتها ..

- فرح (كتسكتها) :

شششش مغادي يوقع والو ، بجهد الله وبرضاة واليدينا ماغادي توقع لينا حتى حاجة خايبة ، ربي شاهد علينا بلي هلينا والدينا ، وخلينا بلادنا باش نخدمو بالحلال ماشي الحرام ... واخا تسرعنا ولكن راه ربي معانا ، رجاء سمعيني(شافت فيها) لي بغاوها غادي تكون بغاو غير يوجدونا ويقادونا ونكونو واجدين من هنا ل 6 شهور داكشي لي غادي يكون ... وحنا لي فراسنا راه فراسنا فهمتي ..

- رجاء (كتمسح دموعها) :

كيـفاش ؟

- فرح :

انت غير تبعيني ومايكون الخير دابا تشوفي ..

- رجاء (عنقاتها محمية فيها) :

إن شاء الله ياربي ..

____________

- مالك (معصب كيحرك الفك ديالو بعصبية) :

مكانش عليك تعرض عليها ..

- أحمد :

البنت سونات ليا كتبكي ، كتشكي عليا منك شنو غادي نݣوليها ... ݣلت ليها بيناتكم أبنتي انا مانقدرش ندخل ، لي قدرت ندير هو نعرض عليها تجي معانا غدا ... تقدر تنساجم معانا وتحلو مشاكلكم ، انا مابـغيتش نسولك ومابغيتش نعرف شنو واقع ... حيت داكشي كيبقى بينك وبينها ، انت لي تلاقيتيها وانت لي بغيتيها ، وانت لي خطبتيها ... داكشي باش عيط ليك هنا باش نهضرو بزوج ... راك عارف ماماك الى سمعاتكم مخاصمين أيعجبها الحال ..

- مالك (كيحرك رجلو بعصبية ، كلما كيتفكر كلامها كيحس بدمو كيغلي ) ...

- أحمد :

شفت نبيل اليوم عيط ليه حتى هو ، ݣلت ليه يجيب المدام ويجي ..

- مالك (هز راسو فيه ) :

أحسن مدرتي ... بابا بغيت نطلبك ..

- أحمد (وقفو بيدو) :

وي عارف عارف ، منجبدش هادشي قدام ماماك ، راه داكشي باش جبتك لهنا ... كنتمنى تحل مشاكلك معاها أولظي ، الى بغيتو تستمرو بزوج ... اما الى كانت شي حاجة أخرى أنت تعرف أولدي (ضرب ليه على كتفو وخرج) ... بقا مالك ݣالس على الكرسي كيفكر ، وقف بعصبية واقف قدام السرجم ، داير يديه فجيابو وكيسول راسو سؤال واحد ... واش ختيارو لشريكة حياتو صحيح ولا غالط ؟؟؟ ...

- شريهان (غادية جايا فبيتها باغية تبول فحوايجها كتولول) :

قفرتها أمروان قفرتها ، شفتي منين مصطفى شد هاد القضية قفرتها مشيت فيها ..

- مروان :

علاش مال مصطفى بسلامة أشنو غادي يدير؟ وباش غادي يعرفك شفتي الجريمة ؟

- شريهان (وقفات) :

واش من نيتك راه خويا هداك وأجرك على الله ، واش غير جا وتقبل فالبوليس ... راه مطور مطور عليا انا لي كتقولو عليا دكية ، يطيرها فسما ... كيبقى يقلب على الحاجة حتى كيلقاها ... وعرفتي ويعرفني شفت الجريمة وسكت ، قسما بالله حتى يدير ليا المينوط ويديني لسيلون ..

- مروان (قاطعها بجدية وصرامة ) :

وتي نوضي واش هبلتي راه خوك هداك ، مالو حماق باش يدخلك للحبس ..

- شريهان (بإنفعال) :

وراه خويا هداك ، واش اتعرف خويا كثر مني أنا ، راه فالقانون مايعرف لا مو لا ختو ... عرفتي شنو راه كايتيق فيا يعرفني خبيت عليه مشيت فيها ، ختو شافت واحد تضرب برصاص مقتول طايح فدماياتو وشافت لي قتلوه وهربات ... واش هادي عندك ساهلة جاوبني ؟؟

- تحل الباب بجهد ديال بيتها ، هزات راسها فيه كتسوف فيه وفعينيه كيفاش كيشوفو فيها ، عاقد حجبانو عينيه بحال ديال خوها فاش كيحصلها دارت سي زبلة ..

- شريهان (هبطات تيليفون من يديها بلاما تجاوب مروان قطعات عليه وحطات التيليفون كتشوف فيه كيفاش ساكت ومراقبها ) ...

ما مالك ، واش بغيتي شيحاجة ... وناس كيدقو مكايدخلوش مدرمين كون كنت كنبدل ، ولا عريانة يلاه ؟؟

- مالك (مجاوبهاش ، سد الباب برجلو وجاي جهتها حتى وقف مقابل معاها كيشوف فيها بشك ، ببرودة نطق ) :

شكون هدا لي شفتيه مقتول ؟ ولي شهدتي على الجريمة ديالو ..؟

- شريهان (تلفات ولات غير كتفتف ماعرفة متݣول ) :

أويلي كيفاش اش كتخربق ... انت كتبان ليا المخاصمة ديالك مع كارولين خربقات ليك عقلك ... وزايدون شكون انت لي كتسول فيا اولد عمي ، مراجلي ما با ما خويا ..

- مالك (هز حجبانو بإستهزاء مدامها كدخل وتخرج فالهضرة وكتهرب ، فراه وراها قصة كبيييرة) ..

بصح انا غير ولد عمك ، مامنحقيش ندخل ، اهو أبنت عمي مدامك تحت دارنا ومعانا فلي يخصك يخصني وبزاااف (غمزها) ولكن الى مابغيتيش تجاوبي ... هانية مت هانية نسونيو على مصطفى ، ونشوفو هو واش غادي تجاوبيه ولالا شنو بان ليك؟ (غمزها) ...

__________________

- إيطاليا ..

- هز تيليفون ديالو ... دوز النمرة ، بقا مدة كيسوني عاد جاوبو ..(بصوت رجولي تقيل) :

فين وصلات الأمور ؟

- دجيكو :

غادية مزيانة ، كولشي هو هداك ، السلعة راها وكتدريسا من داكشي رفيع ، وبنسبة للمشروعنا (تنحنح) بغيت نݣول المشروع ديالك أسيدي راه قرب يسالي مابقا ليه والو ...

- مزيان مزيان ، السيمانة جايا مغاديش نكون ، ايخصني نكون فإسپانيا ..

- دجيكو :

واخا أسيدي ، واش على قبل الشركة لي تم ؟

- سي يلاه سير كمل شغالك ..

- دجيكو : واخا سينيور ..

قطع معاه دجيكو الإتصال ، ركب طوموبيلتو شاد الطريق فتجاه الفيلا دجورجيت ...

- طارت ليه على يدو لي كان غادي يحل بيها الباب شداتها ليه وضوراتو بجهد عندها ..

مالك هالعار هنينا اش كتخربق ؟

- مالك (ضار عندها بملامح جامدة ) :

غير خرجي من رونضتك وعاودي ليا شنو واقع ، بغيت نعرف ݣاع لي كاين طرتي يا شريهان نزلتي اتعاودي ليا شنو كاين ، وشكون هدا لي شفتيه مقتول ؟

- شريهان (كتفكر ) :

دابا اواحد ولد جيرانا مسكين ، قرا وتعدب مسكين وشحال وهو كيقلب على خدمة ...

- مالك (بإستهزاء) :

مسكين بقا فيا ، اهاه كملي ومن بعد ...

- شريهان :

وكيف شتي انا مع فضولية ... كنت كنكل من سرجم ومع هوما مقابلين معانا ، وانا نشوفو حتى طاح من السطح ومات مسكين غارق فدماياتو ... ايوا وخفت خويا مصطفى يسيق الخبار فهمنتيني ، ايوا هو هداك هادشي لي كاين ...

- مالك بقا ساكت كيشوف فيها ... قرب عندها شوية بشوية حتى تقابل معاها ، نزل براسو عند مستوى راسها كيشوف ليها فعينيها ..

من صغرك مكتعرفيش تكدبي ، منين كنتي كديري شي منتيف ، وكتخافي من عمي علي يضربك ... وكتوقفي قدامو وتعاودي ليه كدوبك ، بلاما تحسي يد كتهضري بيها ويد كتجري بيها اللحمة ديال ودنك ..

- شريهان تفاجات هي براسها عمرها لاحظاتها حتى ݣالها ليها دابا ...

- مالك :

ݣلت ليك خرجي من رونضتك ، وجيني لطريق ... راه طرتي نزلتي اشريهان غادي دوي ... عندك حل واحد يا دوي يا ...

- شريهان (عرفات راسها ماعندها هروب منو ، هي مجورة ولكن طاحت مع واحد مطور عليها أضعاف ، كدوبها ومامشاش عليه ، حركتها وحافضها منين كانت صغيرة ، بحال مالك صعيب ديرها بيه وصعييب بزاف تكدب عليه ... بلعات ريقها وتنفسات بهدوء رجعات خطوة اللور وݣلسات على طرف النموسية ... بقا واقف كيشوف فيها ، خطى خطوة للقدام ووقف متكي على الكوافوز ... جامع يديه كيشوف فيها وكيتسناها تهضر ..

- شريهان (هزات عينيها فيه ) :

قبل بغيت تحلف هاد الهضرة مايعرفها حد ..

- مالك (بجدية حرك راسو) :

ڤازي كنسمع ...

____________________

دخل منعم .. هاز فيدو ملف حطو قدام مصطفى وݣلس ..

كيف كنا متوقعين ، وعلى حسب المعلومات الهالك كان بديال الإيطالية ، هادي مدة باش هاجر شي 3 سنين دابا .. مامزوجش عندو جوج ديال خوتو دراري وجوج بنات ..

- مصطفى (هز الملف كيقراه) :

وبطبيعة الحال ناس على قد الحال ، وعيا يقلب على خدمة ومالقاش وقرر يهاجر (خبط داك الملف مع طبلة بجهد صاعر ) ...

هادشي طلع فراس وكتر بزاف ، وماوصلاتش حتى لدراري ولاو حتى البنات دابا ... كتشوف صاحبتها لابسة ليمارك والفلوس وطوموبيل اخر مكاين كتقول شنو ندير ، حتى انا نقطع البحر كانو كيقولو الخارج دابا ولا الخليج ، وكيدفعو تمن أفكار وتصرفاتهم ، وشكون لي كيوحل فيها الوالدين مساكن ... بعد المرات امنعم كنفكر منزوج مانولد حسن باش مايتحرقش قلبي وكبدتي ، والغلط كيطيحو فيه غير الطبقة الفقيرة لي ماعندهمش ، أما لي بعقلها وقارية او واعية كتقرا وتحط طموح بين عينيها حتى كتوصل ليه ... تقرا وتخدم وهي كدير طوموبيل ودير دار والفلوس ، ولكن حدا والديها ... الناس مكايفكروش مكايخدموش دماغهم ... وخير مثال هو أنا ، قريت وخديت الإجازة فالقانون وبقيت شحال وانا مشومر ، حتى انا نݣول راه عندي عمي ففرنسا وخالي ارا نمشي ، لا ماشي انا لي نسمح فمي وختي .. تخربيق أصاحبي تخربيق ..

- منعم (تنهد ) :

راه ݣلتيها ، الفقر كيعمي العينين ... اللهم كروسة نبيع نعناع وحدا ميمتي ، ولا تكون أخرتي بحال هك مقتول ... ونخلي والديا محروقين ، وشحال من واحد مكايصبرش على ولادو كيصدق تابعهم ... الله يهديهم ويسمح ليهم يا أخي ..

- مصطفى (وقف هز سوارت طوموبيل تيليفون ديالو) :

غدا خولة اتبدا الخدمة فالقهوة ، الذباة ماتزهق امنعم ..

- منعم :

تهنى من هاد النحية ، التسجيلات خدامين من هاد الليلة ..

- مصطفى :

يلاه نتشاوفو غدا الله يعاون ..

- منعم : امين ..

- مالك ݣالس وشاد على راسو ... هاد النهار لي داز عندو أكفس نهار ، كيحس بضغط كبير ... ممكن شي حد يجسه غريب كيفاش مالك كيهتم بشريهان وهي يلاه سيمانة باش هي عندهم فدار ... ولكن صغرو داز مع شريهان ، فينما كان مالك كانت هي لاصقاه ... واخا يضربها ويعايرها والو لاصقة فيه ، لدرجة الدار الى مالقاوهاش عارفينها معاه كتلعب ... واخا تفرقو فصغرهم وماتلقاو حتى لدابا وهوما كبار ، او واخا هي ماعقلاتش على داكشي لي داز ، ولكن هو عاقل عليه حيت كانت فريفرة كطير ، وكاع السليخ لي كان كيسلخها ، كانت كتستاهلو على فعايلها ... مالك واخا هو الولد الوسطاني ، ولكن كبر كيبغي عائلتو وكيرض ليهم البال ، عمر الى كان مضيوم ولا واقعة ليه شيحاجة ... كيتوجه للمالك هو يفكها ليه ، سعد وكذلك باه كيعتامد عليه فكولشي الصغيرة والكبيرة ، الى ماعطاش مالك الاوكي على شيحاجة مدارش ومتكونش ... هو بحال داك الدرع الحامي يال عائلتو ... قيسو فعينيه فراسو ومتقيسوش فيهم ... إهتمامو بشريهان مجاش غير هكاك او وراه شي حاجة ولكن مدامها كتحمل كنية العراقي ، فراها ولات من ممتلكاتو لي مايمكنش ليه يسمح لشي حد يأديها يكون شكون مابغا يكون ..

هز راسو كيشوف فيها ، ماعرف مايݣول .. (ببرود وصرامة ، عينيها كيطلق منهم القرطاس) :

غادي نسولك سؤال واحد وجاوبيني بصراحة .. واش شفتي ليه وجهو ؟

- شريهان (بلاما تجاوبو) حركات راسها بالإيجاب ..

- وقف بزربة غادي جاي فالبيت (صوتو على من كترت الاعصاب ) :

انا بغيت نفهم كيفاش شفتيه خفاشة انت ، ولا مشة انا عاهدي ابلمشاش لي كيشوفو فظلام ماشي بنادم ، موكا انت ... كتݣولي ليا كان الظلام وبان ليك ، واش باغية تحمقي ملتي ولا كيفاش ؟

- شريهان (وقفات مخرجة فيه عينيها) :

وماتبقاش تخرج فيا عينيك وتغوت عليا ، انا عمر شي حد غوت عليا ...

- مالك (هز كمايم التريكو لي لابس ، بانو يديه المزغبين .. والوشام لي نازل ليه مع دراعو) :

غادي نغوت ونفوت الغوات لهيه ، انت انت (كيدوز يديه فشعرو بعصبية الهضرة وحلات ليه ) انت مناش مصنوعة بغيت غير نعرف مناش مصنوعة ..

- شريهان (كتشوف ليه فيديه ... هزات راسها فيه) :

واش معارفش بلي الوشام حرام علاش واشم ؟

- مالك (كيحس براسو بلي الصبر لي كانو عندو صافي مشا ، كاع داك الهدوء لي كان عندو مابقاش ... منين هاد الخلقة لي قدامو حطات رجليها فهاد الدار وعارف راسو ، بلي كاع المشاكل ايجيو فوق راسو وبلي ايودع شي حاجة اسمها الصبر ) :

واش واش انت حمقااااااااا نديوك لبويا عمر داواي فيه ، واش فايتة طايحة على راسك ندوزو ليك ... انت ابنادمة مناش مصنوعة باغي نعرف ، واش انا كنهضر فجهة وانت كتدوي فجهة ... وحدة شايفة جريمة ݣدها ݣداش ، وكنطنز وراه خرجان العقل اعباد الله ، واش باغية تحمقيني ولا كيفاش بغيت نفهم انا انا بغيييييت نفهم ...

- شريهان :

بغيت غير نݣوليك ، بلي بويا عومار سدوه شحال هذا ، يمكن انت مافخباركش مع زمان ماجيتي ، ولكن انت كيفاش عرفتي بلي كاين بويا عمر وانت جيتي صغير للفرنسا ..!!!

- يلاه أيجاوبها ، قاطعهم صوت الدقان فالباب ..

- شريهان (كتشوف فيه ... مشات الباب حلاتو) :

عمر سلام ..

- عمر (كيشوف فيهم بزوج مافاهم والو ) :

ياك لاباس ، غواتكم جاي من لخر ديال الكولوار شنو واقع ؟

- مالك (صدرو كيطلع وينزل بالأعصاب ) :

والو ماواقع والو ... غير كنتناقشو على المشكل لي طيحات راسها فيه ..

- عمر :

شريهان مالك عندو الحق .. حاولي تبعدي على المشاكل ، هنا راه ماشي هو المغرب ..

- مالك (ضحك طانز عطاهم بظهر ) ..

- شريهان :

وصافي واش محرشينكم عليا ... انا مغلطتش .. وأي وحدة فبلاصتي كانت ادير بحالي ، صافي اعمر سير سير اخويا نعس غدا اتفيق بكري ، راه عمي ݣاليا انت لي ادبح ... حتا راه فالعيد خويا مصطفى كان كينعس مع 8 باش يفيق هو هداك سير أخويا سير ... خرجاتو بزز مفاهم والو ... وسدات الباب وراه ..

- شريهان (موجهة كلامها لمالك ) :

واش انا عاودت ليك باش تبقى تغوت عليا ... لي عطا الله عطاه ، راه أي واحد ايشوف مخاصمة فزنقة غادي يوقف يبغي يعرف شنو كاين ، أنا ماضنيتهمش ايشوفونو ... راه كونماشي ديك المشة لي بجغت ليها على قزيبتها ، مكانوش ايشوفوني ..

- مالك (ضار عندها ) :

ياك ݣلتي مشافوكش ؟

شريهان : زعمة مبانش ليهم وجهي ، بان ليهم غير الجسم ديالي ، انا ماعرفتش الصراحة (ݣلسات كتحاول تهدن كولشي رجع عليها ) انا معرفتش واش شافو وجهي ولا بان ليهم غير نصو ولا مابانش ليهم ... معارفاش امالك انا مامتأكداش ..

- بقا واقف كيشوف فيها ... تقدم خطوات وݣلس حداها ..

- مالك (بجدية ) :

أنت عارفة مزيان ، بلي داكشي لي شفتيه كبيير عليك ... لي يدخل السلاح للمغرب ، ويقتل شي حد بديك الطريقة فشارع ... مخايف من مخزن مخايف من حد ، عرفيه يدو طويلة ... هادشي كيوقع غير فأوروبا ، اما فالمغرب لا من غير الى كانو من المافيا ..

- شريهان (ضارت كتشوف فيه) :

ماتخلعنيش الله يرحم بيها الوالدين ..

- مالك (بجدية ) :

كنهضر معاك ، المافيا لي كتاجر فالكوكايين كيقتلو أي واحد كان معاهم ، وقرر يتراجع ... وشحال من واحد فالمغرب كتجيه أقرب طريقة لي تخليه يولي لاباس عليه ، هو يهاجر ويخدم فالممنوعات ، وهاد الناس كيختارو هاد الفئة بضبط حيت عارفين بلي ساهل يتلعب بيهم ...

- شريهان (كتبلع ريقها زاد معاها الزايد ، ها مزاد كمل على لي بيها ) :

صافي انا الله يرحمني ، شفتي دوك الحوالة ديال غدا اخليوهم فورو بيهم كسكسو عليا ، انا اصليو عليا من دابا مشيييييييت فيها صافي قفرتها ..

- مالك ( طبطب عليها بيدو ) :

مغايوقعو والو ، الواحد خاصو غير يخدم عقلو ومغادي يوقع والو ... عاقلة عليه ؟

- شريهان (شافت فيه ) :

اه عاقلة عليه مزيااان ..

- مالك :

مزال مجاوبتينيش كيفاش حتى شفتيه وفظلام ..

- شريهان (سكتات ورجعات شافت فيه ) :

هادشي لي غادي نݣوليك ، انا وماما وخويا لي عارفينو وانت دابا ...

- مالك (وقف كيشوف فيها بعدم تصديق) :

كتريݣلي عليا ؟؟ بغيتي تݣولي ليا بلي انت وليتي مشة تشوفي بليل ؟

- شريهان (شدات على راسها) :

واش انت مسطي وفهم فهم ،انا ماݣلتش ليك كنشوف بحال المشاش ، انا شوف عندي فوق المزيان ... يعني نقدر اي حاجة نشوفها واخا تكون بعيدة عليا ، مثلا دوز شي طوموبيل حدايا بزربة ... نعطيك لي راكب واش مرا ولا راجل وشنو لابس وكيف داير فهمتي ، وهاد القضية شكلات ليا مشكيل فصغري وبسبابها ، هزينا رحيلنا وجينا للمدينة ..

- مالك (عاقد غوباشتو ، بإستفهام ) :

علاش ؟

- شريهان :

فاش كنت صغيرة ، جارنا كانو تسرقو ليه البهايم بليل ... وانا كنت فالحوش ديالنا ، وشفت هداك لي سرق ليه بهايمو ... واخا كان الليل ولكن كان البوطو ديال ضو شاعل ... واخا بعيد ولكن قدرت نشوفو ونعقل عليه .. ايوا (قاطعها)

مع انت مكتسكتيش وكدافعي على حقوق الناس من صغرك ، مشيتي حطيتي الراجل بوجهو ... ايوا وشدوه او ولادو حلفوها فيك ياك ؟

- شريهان (كتشوف فيه بنص عين ) :

ايوا اشنو بغيتيني ندير مثلا ، الساكت عن الحق شيطان أخرس ..

- مالك (مقرب كيشوف فيها ) :

بغيت غير نفهم واش انت لي كتقلبي على المشاكل ؟ ولا المشاكل لي كيقلبو عليك ؟ مجاوبتينيش واش عاقلة على خونا ولالا؟

- شريهان (سكتات كتحاول تسترجع الداكرة ) :

أه عاقلة عليه ... كان قلدة ، ماطويلش بزاف طولو هو هداك ، ولحية زعرة مايلة لحمورية وحتى شعرو هكاك ، ونيفو طويل ..

- مالك (فعز أعصابو جاتو الضحكة ) :

انت دوزتي سكانير حتى على نيفو ... ماعندي مانسالك اهاه كملي ..

- شريهان (ݣلسات ) :

مالك براكة من الطنز ..

- مالك : غراضك من هاد المجية ماشيش الخدمة ، حايا باش تهربي ياك ؟

- شريهان (علات راسها كتشوف فيه ) :

لا ماشي غير الهروب ، فعلا انا جايا باش نخدم وباش نحقق الحلم ديالي ، ونوصل لداكشي لي بغيت .. ولكن هاد الكابوس كنحس بيه تابعني ومغاديش يخليني ، ماعرفتش علاش كيوقع ليا هكا ، واش قلبي البيض ولا نيتي لي كديرها ليا والله ماعرفت ... (بدات تعاود راسها) صاحبتي لي كنت دايراها ختي غدراتني وباعتني ، لسيد لي كان خاطبني بجوج دريال ، وخلاتو كان باغي يغتاصبني ..

- مالك (تشوكا كيحس بدمو بدا كيفور ) :

شنو ؟ كيفاش ؟ إيمتا هادشي وقع ؟

- شريهان (تنهدات تنهيدة طويلة وعاودات ليه من الاول للأخير ، شنو خلاها تعاود ليه الله أعلم ... زعمة متكونش تعالجات من ماضيها ولا يمكن القات فيه حجرة دافية كتفرغ فيها همها ولي داز عليها ) ..

- مالك (كيبلع ريقو كيحس براسو باغي يق.../ت//ل شي واحد ولا يخنقو ... ولا كلو حمر وكيترعد ) ..

- شريهان : وهادشي لي وقع ليا دابا (هزات راسها فيه ) بغيت نعرف واش انا منحوسة ولا انا مصيبة وطاحت على مي ... بعد المرات كنكول با رتاح حيت كون كان عايش كون جبت ليه الجلطة ..

- مالك (خلى أعصابو على جنب وتقدم تجاها ... ݣلس قفازي وشد ليها يديها ، حركة خلاتها تهز عينيها فيه ) :

سمعيني مزيان وحلي معايا ودنيك ..

- كتشوف فيه بإهتمام وكتسمع ليه ..

- مالك :

حنا عمرنا مكنا منحوسين ولا غادي نكونو منحوسين ، هذا مفهوم غالط ومخاصناش أصلا نهضرو بهاد طريقة على ريوسنا ، حنا عرضة للظروف خاطئة كيوقعو لينا ... وماشي غير تلاقينا ناس خايبين فحياتنا راه ݣاع الناس خايبين ... الحياة راه كتݣلع ليك وترجع تعطيك غير هو خاص تستغلي ديك الفرصة لي عطاتك ... الى وحدة غدراتك وطعناتك ماشي معنيتو جميع البنات خايبات ، حاجة وحدة الانسان يعرف يختار صحاب ديال بصح ، وهادشي ايبينو ليك المواقف لي اتحطي فيهم ، بحال مثلا مروان ولالا ... اما بنسبة لداك الكيدار ، ايجي نهار وغادي يخلص واخا صراحة مكرهتوش يخلص من عندي ... ولكن متعرفي الوقت شنو غادي تجيب ، الجريمة لي وقعات وشفتيها القدر لي خلاك تشوفيها ، يمكن ورا هادشي رسالة ويمكن ربي حطك فديك الطريق ، ومتعرفي يكون بيديك انت انو عصابة كبيرة تشد ... وناس كثيرة تعتق ، اي حاجة وقعات لينا عندها سبب وحكمة ، وأي حاجة وقعات خايبة راه فيها خير لينا فهمتي ولالا ... عمرك تخافي أي حاجة واجهيها بقوة ، هادشي لي دوينا فيه دابا غادي يبقى هنا ، ماتعاوديه لحتى واحد والى خوك ساق الخبار ، راه غادي تلقايه هنا وديك الساع ، غادي تواجهيه وتعاودي ليه علاش خبيتي عليه ، وماهما كانت العواقب غادي تواجهيهم ... ومتنسايش بلي اي حاجة عندها الحل غير انت ماتبقايش تفكري بزاف ... (طلق يديها او وقف) ومتنسايش بلي عندك عائلة كتبغيك واخا يلاه تجمعتي معاها ولكن عندك مكانة كبيرة عندها ، وإلى خوك كاين فالمغرب أنا راه كاين هنا ، أي حاجة ممكن تأديك راه عمرها غادي تكون وأنا معاك تافقنا (تحنا على راسها باسو وخرج ) ...

- شريهان (بقات مدة وهي فبلاصتها كتفكر فكلامو ... حسات بواحد الراحة غريييبة ، راحة خلاتها طفي ضو لي حداها وتخشا فبلاصتها وتنعس ، منين كتحس بشي حد مساندك وكاين معاك ، كاع الخوف والافكار السلبية كيمشيو ودماغ لي كيكون عامر وهو سبب الاول للانسان لي مكاينعسش كيخوا كترتاح ودغية كتغمض عينيك وتنعس ..

- فجهة اخرى وبضبط فبيت مالك ، غير دخل وتبدلو ملامح وجهو ، منين كيفكر بلي بنت واجهات هادشي كامل ، وبلي العائلة لي خاصها توقف معاها وتكون معاها بعيدة ... كيبغي ينفاجر ، كيحس بلحمو كيوفور ، لاح تريكوه ، حل باب الدروج لي كيديو لصال دسبور ... نزل بزربة ، واول حاجة دار بلاما يلبس ليݣات ... تاجه لصالة ديال البوكس ... بكل جهدو كينزل على المانكا لي قدامو ، كيفرغ فيه كاع طاقة السلبية وداك الغضب لي عندو الداخل ، كان غادي يݣلعو من بلاصتو ... حبس كيتنفس بجهد ... خرج من تم حيد الشورط وتلاح فالبيسين ، ديك البرودة ديال الما بدات كطفي النار لي شاعلة فيه ، بقا مدة وهو تم ... طلع من الپيسين لبس الپينوار وطلع لبيتو ... تاجه نيشان للحمام خدا دوش ، وتلاح فبلاصتو ... بقوة التفكير ماعقلش على إيمتا داه النعاس ..

_______________

كلنـا متعبون .. نتألم بطريقه او بأخرى ..

جميعنا عشنا ظروفاً ظناً منا اننا انتهينا ..

نبكي اوقات عجزنا وضعفنا ..

نودع اشخاصاً ما كانت تطيب الحياه إلا بهم ..

نبتسم رغم كل الإنكسارات ..

نبحث عن الأمان في مكانٍ ما وربما لا نجده ..

جميعنا عشنا ذلك الإحساس ..

فقد .. الم .. حب .. خذلان ..

لم تطب الحياه لأحد ..

جميعنا نعانى ولا احد يهتم ..

فهونوا الحياه على بعضكم لعلنا نحيا بسلام .

و إلى الأيام القادمة ..

مري علينا بسلام ..

فقلوبنا جداً متعبة ومرهقة ..

ارهقتها الحظوظ .. واتعبتها تراكمات الأيام ..

_________________

- فصباح بكري فاقو الرجال هوما الأولين سبقو للفيرما ... بقاو غير العيالات كيوجدو شنو ايديو معاهم ، العطرية جابتها زهرة معاها ، التقدية كلها داروها فطوموبيل ... ركبات شريهان مع مها وياسمين ونزهة فطوموبيل مع الشيفور و حليمة ركبات مع بنتها جميلة فطوموبيل وشدو الطريق للفيرما ..

_______________

الــمغـرب

فقهوة إيت أند ميت .. بدات الخدمة ديالها ، كتوصل الطلبات لطوابل ، كانت واقفة حتى بانو ليها جوج عيالات دخلو خداو طبلة لي كطل على الواد .. وحدة فيهم كانت فاواسط الأربعينات ولكن كتبان بحال الى عندها 30 زوبنة وانيقة ولوخرا لي معاها حتى هي بحالها ..

- خولة فيقها صوت الدري لي معاها ..

ربيعة وربيعة ، سيري شوفي لالة نادية شنو بغات ..

- خولة (بإستفهام) :

شكون هاد نادية ؟

- سيري بعدا شوفيها شنو بغات ، واجي نعاود ليك حتى انت فضولية مع راسك ..

- خولة :

ايوا راك عارف حنا العيالات فينا التبرݣيݣ فدم .. تقادات فالوقفة ومشات للطبلة لي ݣلسات فيها نادية ..

- صباح النور .. شنو تاخدو ؟

- نادية حاطة قدامها بكية ديال الݣارو ، كطلعها وتهبطها ..

انت باينة فيك جديدة ؟؟

- خولة (مع إبتسامة ) :

اه الالة جديدة ، يلاه بديت الخدمة ..

- نادية (كتشوف فيها إبتداءا من شعرها لي زعر .. مرورا لعينيها لي فلون اسما ، ونمش لي فوجها ، زينها اوروبي تݣول غير نصرانية ..

شنو سميتك ؟

- خولة : سميتي ربيعة ..

- نادية (كتحقق فيها مزيان ) :

مجاتش معاك هاد السمية ، المهم سيري لعند دراري وݣولي ليهم ، مدام نادية بغات بحال الفطور ديال ديما ..

- خولة (بإبتسامة) :

واخا مدام .. حنات راسها ورجعات لعند دراري علماتهم

- شفتي الالة هاديك ، راها مدام نادية الصويرية ومن لا يعرفها ، لاباس عليها تبارك الله ... كتجي من الرباط باش تفطر فهاد القهوة هادي ... عرفتي ياربيعة وتكسبيها مكاين غير تضويرات المݣمحين ..

- خولة :

أياااه ، وكتجي من رباط حتى لهنا غير باش تفطر ، فاش خدامة ؟

- الالة عندها صالونات داكشي ديال المكياج وداك التخربيق ، فيلا ديالها كيدايرة ... ومامزوجاش الالة دجاجة بكامونها ، عرفتي شحال من بنت عاوناتها وسيفطاتها للخليج ، عرفتي هاديك لي تصاحب معاها تصاحب مع منجم ديال الذهب ، خاص غير يكون عقلك خفيف ولسانك حلو ...

- خولة (تنهدات ) :

إيوا لهلا يحاشمنا معاها وخلاص ..

- وسيري دي ليها الفطور سيري ... هزات خولة الصينية وداتها لطبلة ديال نادية ... فالداخل ديالها فرحانة حيت طاحت وأخيرا على صاحبة دعوتها ..

_________________

- وصلو للفيرما ... مع نزلو من الطوموبيل بانت ليهم طوموبيلة كرولين واقفة ..

- نزهة :

هادي شنو جابها لهنا ؟

- زهرة :

وراها خطيبة ولدك ، بطبيعة الحال تكون هنا ... دوزي دوزي

- حليمة (عقدات غوباشتها) :

هاد عود السبسي مكنحملاش ، وكتسرطش ليا يييخ ..

- نزهة (كضحك) :

هالي كتفهمني ، مكاينش بحال حليمة كتحس بيا ..

- شريهان (غمزاتهم) :

هنيونا البنت معانا حشومة .. ياسمين كبيدة اجي معايا احبيبة ديالي (عطاتها ياسمين يدها ودخللو للڤيلا لداخل ) ... الفيلا ديال الفيرما كانت عالم اخور ماشي عصرية بحال ديال المدينة ... كانت فيلا بلدية كتوحي بالجو ديال الفيرما ... الشوميني وديكورات بلديين ، دورات شريهان راسها مبان ليها حتى واحد ... ستغربات فين غادي تكون كارولين ..

دخلو العيالات للداخل ، كانو جوج ديال الخدامات لي مكلفات بدار ديال الفيرما ..

- نزهة : فين دراري وفين احمد ؟

- جاوباتها وحدة من الخدامات لي كانو كبارات فالعمر وفرنسيات ..

سي مالك وعمر مشاو للخيرية يديو الحوالة ، وسي احمد وسي سعد فالكوري ...

- نزهة (بإستفسار) :

وكارولين ؟

- نزهة (ماتسوقاتش ) :

ضبر راسها شغلها هداك ... يلاه يلاه نوجدو راسنا ..

شريهان (موجهة كلامها لجميلة) :

جميلة اختي انت مخالطة هنا ، دي ياسمين وعطيها دفتر رسم والألوان بينما دبحنا وسالينا ... لا تخلع مسكينة ..

- جميلة (مدات يدها لياسمين) :

نمشيو نرسمو ؟

- ياسمين هزات راسها بالايجاب وعطاتها يديها خرجو على برا ... هزات شريهان الحوايج لي أتلبس ..

- خالتي فين غادي نبدل حوايجي ؟

- حليمة (بصوت باح) :

اجي معايا ابنيتي نوريك البيت ، طلعات معاها شريهان للفوق .. وراتها واحد البيت دخلات فيه حطات فيه حوايجها ، حيدات دوك الحوايج لي لابسة .. لبسات سروال كيطما ديال مصطفى كانت خوناتو ليه ، كيعجبها حيت مريح فاللبسة ... والفوق لبسات واحد بيجامة قصيرة كاشفة ديال 30 درهم فيها نونوس ... نص كم ، كتلبسها غير الى بغات دير شي تخليطة لشعرها ، ماسمحاتش فيها ... شعرها جمعاتو سفنجة وعكفاتو بزيف ديال حياتي اما رجليها جبدات سباط دالميكة ، حتى هو جابتو معاها تݣول غادة تخدم فالمرسا ... ولات بحال دوك الخدامات ديال من دار لدار ، حوايجها لي حيدات طواتهم وحطاتهم ونزلات عندهم ، كانت كارولين ݣالسة غير شافتها نازلة شهقات كطلعها وتهبطها جاتها الضحكة ... شريهان مداتهاش فيها خرجات على برا ، كتقلب عليهم لقاتهم حطو الطبلة ديال الخشب طويلة مع الكراسة ... الشوايات القتبات حتى هوما تحطو الخبز ... الشلايض لي وجدو فدار زعلوك ، المناضة البرارد ديال اتاي حتى هو ... البطبوط لي وجدات زهرة لبارح ، كولشي كان واجد بحال البوفي ... هزو فيها راسهم كاملين حليمة ونزهة وزهرة ..

- زهرة (بغات تندب ) :

اويلي انت ايمتا جيبتي ديك الكسوة وداك السباط ؟

- شريهان :

فاش كنت كنجمع حوايجي ، ومالي غادي نسمح فيهم ..

- زهرة :

اويلي وليتي بحال دوك الخدامات ديال من دار لدار ..

- حليمة (كضحك) :

يا والله العظيم هي لي عبرات ، الله يعطيك الصحة ابنيتي وخلاص ..

- نزهة :

لا شفتي شريهان مانخافش عليها مرا وݣادة ..

- شريهان :

واشنو اخالتي حنا عسكر ولا زمر ، فاشما حطيتينا تلقاينا مكاينش تخرشيش ..

تم خارج سعد ، هاز جنو/__ية وكلو د//م ..فرحان عاجبو الحال :

عرفتو وانحرتو نحير جمال

- حليمة (كتشوف فيه بنص عين) :

ونحلف عليها الى تمرغتي افدم وجاي تبورض علينا ، سير سير راه انا لي كيبان ليا انعلقك من ݣفاك سير اولدي سير ... تم جاي احمد كيضحك :

ݣلنا ليه غير نفخ شوية ويسخف ، لي شاف حوايجو عامرين يݣول غير هو لي دبح .. وسيادي تبارك الله عليكم ، جيتو ناضيين خلاص على بنتي شريهان الرضى ..

تمو شي رجال جايبين سݣيطة ديال الحولي علقوها ... كارولين ݣالسة فكرسي ، وكتشوف فداكشي بإشمئزاز ماعجبهاش ... شوية دخلات طوموبيل رونج بيضة ..

- أحمد : ها نبيل جا ..

- شريهان (كتبرݣݣ) :

شكون هدا ؟

- نزهة : نبيل صاحب مالك الروح بروح .. نزل نبيل ونزلات مرتو ، مرا زوينة تبارك الله وجها مبشور ..

- نبيل (كيضحك) :

جينا مع الوليمة قد قد ..

- سعد حناتك بتحبك ..

- احمد (شاف فسعد بترجي ) :

هالعار هالعار انت غير بقا تسكت ، راه شي نهار اتخرج شي كلمة ماهياش ..

- زهرة :

هداك انا لي غادي نتوالاه غير بلاتي ..

- حليمة : وحتى انا جيت دابا ، انا وياك اختي زهرة نتحماو عليه حتى يهضر مقاد مكاين العصا ..

- نزهة (كتسلم على نبيل ومراتو) :

مرحبا بيك اولدي ، خلود لاباس عليك ؟ الى محاش نبيل انت متجيش ياك ؟

- خلود (كضحك حشمانة) :

لا والله العظيم ما هكاك ، غير الوقت وصافي اخالتي ..

- نزهة (كتعرفهم) :

هادي خلود مرات نبيل صاحب مالك وݣولي خوه ، هادي زهرة مرات لوسي الله يرحمو ..

- خلود : إيييييه لي كنتي عاودتي لينا عليهم لي فالمغرب ياك ؟

- نزهة : أياااه ، وهادي شريهان بنتها ..

- خلود سلمات عليهم :

مشرفين ..

- زهرة : ربي يخليك ابنتي ..

- شريهان (بإبتسامة ) :

شرف ليا ..

- خلود (بهمس) :

حتى كارولين هنا ياربي سلامة ..

- شريهان : حتى انت مكتحمليهاش ، مافهمتش علاش مالكم معاها هههه ..

- خلود :

اختي ماشيش مكنحملوهاش ، ولكن مكنقدش عليها مامقبولاش ومكدخلش الخاطر ، وشي تصرفات كديرهم مكايعجبونيش ..

- نزهة : وشفتو ماشي غير انا ..

- نبيل وقف ورا مرتو ، مد يديه لشريهان ولزهرة ..

مرحبا بيكم عندنا ففرنسا هههه

- شريهان : ربي يخليك أخويا ..

- نبيل :

خالتي نزهة فين هو مالك وعمر ؟

- أحمد :

مشاو صباح داو سݣايط للخيرية ، شوية ويكونو هنا ..

- خلود : كاين فاش نعاونكم ..

- حليمة :

أجي أبنتي اجي عاونيني ، بحال شي ناس مسرحين رجليهم تݣولي كاينين فميامي ..

- نزهة : صافي خليها شغلها هداك ..

- تحطاك الکصعة فيها الدوارة ، شريهان دارت بانيو كبير بدات كتغسل فالكرشة والمصارن ... كارولين هزات ساكها وجيدات الريحة ديالها رشات منها ، حيت قهراتها ريحة ... الاجواء كانو عائلية ، بحال هاد الأجواء مكايتباعو مكايتشراو بمال ومكايتعوضوش ..

- وقفات طوموبيل ديال عمر قدام الفيرما ... نزل منها هو او مالك ... لابسين بزوج كيطمات دخلو لقاو العيالات مجموعين كل وحدة وشنو كدير ، من غير كارولـين لي دايرة رجل على رجل ...وهازة مجلة فيديها وكتفرج فيها ..

- عمر نغز مالك ) سير هضر معاها الصباح فاش لقيناها هنا ماهضرتوش بزاف ..

- مالك (كينفخ) :

طلع ليا اعمر هاد الفشوش فراسي ، طلع ليا فراسي ديما انا لي نحزر ... الجبل الى كنتي كل مرة كتخبطو راه كيتهد ..

- عمر :

غير سير وجرب ، حاول تفاتح معاها الموضوع ... انا انمشي نشوفهم ..

دور مالك راسو كتبان ليه شريهان جابت ليه الضحكة ، حدر راسو ومشا عند كارولين ݣلس حداها

- مالك (ݣلس حدا كارولين ) :

سلام

- كارولين (بدلع وهدوء) :

سلام تعطلتي عليا ..

- مالك (ببرودة) :

كانت الطريق عامرة داكشي باش ، مرتاحة ؟

- كارولين :

وي ولكن ريحة قهراتني ، واش انتوما اتاكلو كولشي هادشي مافهمتش ؟ وحتى ريحة كتقهر بزاف ، شريهان عيفاتني بداكشي لي كدير (قاطعها او وقف)

- مالك (بصرامة) :

انت كيبان ليا حتى حاجة مكاتعجبك ، ضروري تنتاقدي خاصك غير تهضري باش ترتاحي ، لي خاصك ديري فبالك بلي حنا هكا ، ومنسمحش لشي واحد يغلط فعائلتي ديري هادشي فراسك ، و براكة هادشي راه طلع ليا فراسي ... خلاها كتشوف فيه مصدومة كتبلع فريقها..

- المــغرب

محسن (سرباي مع خولة) :

ربيعة ، الفطور للطبلة ديال مدام نادية ..

- خولة : واخا ... وجدات الصينية فيها ݣاع داكشي لي كتبغي نادية .. هزاتها وداتها ليها للطبلة ، كانت عاطية وجها للواد ويد هازة فيها الݣارو ..

- مدام نادية ، الفطور ديالك ... حطات لي طاس ديال القهوة قدامها وقدام صاحبتها ، يلاه اتدور وهي توقفها نادية :

ݣلسي ..

- خولة (ضارت عندها بإستغراب) :.

بغيتي شيحاجة اخرى امدام ..

- نادية (أشرات ليها بحجبانها للكرسي) :.

ݣلسي بغيت ندوي معاك ، غير ݣلسي مغايݣولو ليك والو ..

- ݣلسات خولة (فجهة اخرى ادوات التسجيل خدامين ، منعم هو ومصطفى ݣالسين وكيسمعو وشاشة صغيرة قدامهم كيشوفو ... بانت ليهم نادية وشافوها مزيان ، وفعلا كتبان مساهلاش ومستحيل شي حد يشك فيها ) :

نعام امدام ..

- نادية (خدات نطرة من الكارو ، وطفاتو فطفاية ) :

أنت ماشيش من هنا ، زينك ماشي من هنا ..

- خولة : لا انا من تازة ..

- نادية (تبسمات) :

داكشي باش عندك زين تازي ... وشنو جابك للقنيطرة ؟

- خولة (حدرات راسها وتنهدات) :

انا امدام حليت عيني فجدة ، والديا طلقو وكل واحد عاش حياتو ، فين الله اعلم ومكايهمنيش ... توفات جدة وعمامي بغاو يبيعو دار ومن حقهم ... جراو عليا ومارحمونيش ، واحد البنت صاحبتي ݣالت ليا بلي قنيطرة فيها الخدمة ... ومسكينة هي توسطات ليا باش خدمت هنايا ..

- نادية (كتشوف فيها عزات عليها او كتحاول تبين انو عزات عليها ) :

وفين ساكنة ؟

- خولة : حدا سوق بن عباد فواحد دويرة تم على قد الحال وصافي ، كارية واحد البيت فين بنادم يستر راسو من زنقة ..

- نادية : قارية ؟

- خولة : وصلت حتى للباك وانا نخرج ماكملتش ..

- نادية (كتفكر ) :

واخا تقدري تمشي (جبدات 100 درهم ودارتها ليها فجيب) هادي ديالك ..

- خولة (بفرحة) :

ربي يخليك امدام الله يكبر بيك شكرا ... حدرات خولة راسها ومشات ..

- نادية شفتك كدوري بيها ، بانت ليك فيها ولا كيفاش ؟

- نادية (تبسمات) :

بحال هكاك ..

_______________

- منعم ناري على هاد خولة وصدقات ماسهلاش اصاحبي ..

- مصطفى (كيضحك) :

وانا شنو ݣلت ليك ، هاد نادية خطيرة وحاضية سواريها ... داكشي باش كتاكل للبنات دماغهم ، غير بهاد تحريميات ديالها ..

- منعم : انا حاس بلي قريب نشدو راس الخيط ..

- مصطفى :

هو مزال الحال شوية ، ولكن شحال من حاجة بدات كتبان ... الى مشينا بحال هكا ، غادي طيح غادي طيح ..

- شريهان (حاطة قدامها مجمر كبير فيها العواد شاعلين ، حاطة عليه الشواية فيها الكبدة ورية وكتشوي ) :

أودي مكاينش ماحسن من الفاخر ..

- أحمد :

إيوا دوماج ابنتي ، نعديو بلي كاين اهم حاجة شواية كاينة .. كون كنا فالمدينة راه ممنوع الشوا وطلع ريحة الدخان ... الحمد لله منين كاينة الفيرما بعدا واخدين راحتنا ... ومكاين لي يهضر معاك ..

- شريهان :

وهذا هو البلان .. حيدات ديك دوارة عطاتها لزهرة كتقطع ودير فشحمة وتزلݣ القتبان .. شدات شريهان مسران الشحم غسلاتو مزيان ... وستفاتو فشواية وبدات تشوي فيه تحت انظار مالك ، لي غير مقابلها ومستغرب عمرو شاف فالعفوية حتى شافها فبنت عمو ، بحكم المنصب ديال ومكانتو الإجتماعية ، عاشر بنات لي كن كبقة الغنية عارضات وسيدات أعمال ... الهضرة بالعبار الماكلة بتاويل كولشي فحدود ، حات هي وراتو وجه أخور غير الوجوه لي مالف يشوف ..

من ورا ماتشوا ليها مسمار الشحم .. دارتو فوق القطاعة قطعاتو دارتو فواحد الطبسيل ودارت عليه الكامون والملح وحطاتو ..

- لي بغا مسمار الشحم يزيد ياكول ... ماما مدي ليا طرف دالبطبوط .. مداتو ليها زهرة دارت فالخبز وݣلسات تاكل ودوز بأتاي .. نبيل ولا خلود كيشوفو فيها معحبين بها بزاف ..

- خلود (بهمس) :

ياريت كون كانت شريهان هي خطيبة مالك ، والله حتى تجي معاه ..

- نبيل :

ايوا القلب ومايريد ..

- شريهان (بللهمس) :

خالتي حليمة ، كيفاش حتى تلاقات خلود بنبيل ، كيبانو كيبغيو بعضياتهم ..

- حليمة (قربات ليها) :

اويلي داز عليهم الويل ، كانو فالمغرب ... ايوا نبيل كيعرف خلود من الصغر كان صاحب خوها ... او ولا كيبغيها ومو مابغاتهاش ، ݣاتليها انا لي غادي نزوجك ،وتخاصم مع مو ومشا لمدينة اخرى ، وكانت تقطعات العلاقة مع خلود ... وناضت واحد الخانزة واحد البرهوشة تلوات عليه ... مزال قاصر ومامخلية حتى راجل مامشات معاه ... ايوا منين بان ليها نبيل دري زوين ونقي ... تلوات عليه وطيحاتو ...

شريهان (مغوبشة ) :

وياك كيبغي خلود ، كيفاش حتى طاح معاها ؟

- حليمة :

وياه هو كيبغيها ، ولكن ݣال هاديك غير يقضي عراضو معاها ، راكي عارفة رجال ابنتي ... وحيت عارفها مامزياناش ... ايوا الخانزة طيحات عليه الباطل وقالت ليهم غتاصبني ، ومسكين تزوجها بينما بانت براىتو فالمحكمة وباش تنازل على دعوة .

- شريهان (مغزفة) :

ناري على بنت لح...ارم ، وخلود مسكينة ؟

- حليمة :

خلود صدقات بنت الاصل ، وقفات معاه وقفة ديال رجال ، كانت هي لي تمشي عند المحامي ، وهي لي قايمة بكلشي ، ولوخرا واخا تزوجات بيه بقات تلعب ورا ظهرو ومعامن مع صاحبو ..

- شريهان (كتندغ فالخبز ومخرجة عينيها ) :

أويلي ، صاحبو صاحبو ..

- حليمة :

وياااه صاحبو ونزيدك ، كان كيجيب ليها كاع المعلومات على نبيل ، وبلي تزوجها اباش يسايس معاها تنازل على دعوة وغادي يطلقها ، لي كيعاودو نبيل ليه كيعاودو ليها حيتاش كتعطيه لي بغا ، ولكن ربي وقف معاه وتفضح ... وديكلارا بيه سيفطوه فين يتربا .. ونبيل جرا على هاديك خيتي ودفع لطلاق ، بتهمة الخيانة الزوجية ، وحط الدلاىل كامل لي كان جامع عليها ، ايوا وطلقو واخا بنت الهم عطاتها المحكمة شي بركة .. ولكن المهم تهنا من وراها ، غير طلقها كتب على خلود واخا مو مابغاتش ... صافي دفع للفرنسا ، جا لهنا فوت شوية وجاب خلود وبعدو على ديك المدينة بلي فيها ..

- شريهان :

وزعمة هاد خلود ماعندك ماتسالها ، كون شي وحدة والله لا سمحات ليه ، كون واخلاتو وسمحات فيها على لي دارت ... صدقات بنت الناس وكتبغيه من قلبها .. شافت فمالك هاز جنوية غادي لجهة سقيطة ..

- مالك ..(عيطات ليه)

دار عندها محرك ليها راسو بشنو ) ..

- ناضت عندو حتى قربات ليه )

قطع معاك هاد الفلوات ..

- مالك (تشوكا ... هز حجبانو بإستغراب الصدمة بانت على وجهو) :

شنو ؟؟!!!

شريهان : راه سمعتيني قطع ليا دوك الفلوات ..

- مالك (بإستفسار ) :

وعلاش بسلامة ؟

- شريهان : هاء كيفاش علاش ، لا والو غير بغيت نعلقهم معايا على العين ... وراه باين علاش بغيت نشويهم ونݣرضهم ونديرهم مع ثومة والعطرية وربيع ونديرهم فطاجين ، كيجيو(باست صباعها) يا سلام عليييك ..

- مالك (كيدور راسو بعدم تصديق كيحس براسو ايحماق) :

واش من نيتك راه غير رجال لي كياكلوهم ..

- شريهان : واش كاين شي قانون كيݣول بلي فلوات الحولي ياكلوهم غير رجال ، زوينة هادي ... قطع قطع لينا خليني نشوي ماحد المجمر مزوهر ، ودوز تاكول ..

- خلاتو كيشوف فيها ورجعات لبلاصتها ...

- عمر (رجع بلور كيتبنن) :

ناري شريهان وخالتي زهرة ، الله يعطيكم الصحة هادشي واعر بزاف ..

- سعد (كيضحك) :

فمي ولا بحال الى داير ليه بوم أليڤغ ..

- حليمة : يلاه تغلاض شوية وانت بحال سفود ..

- سعد (بإستفهام ) :

شنو هو سفود ؟

- أحمد : يلاه جاوبيه جاوبيه .. (شوية رد البال لعمر )

أجي انت شنو داكشي فظهرك ؟؟

- عمر بإستفهام ) : شنو كاين ..

- سعد غمز شريهان ودارو كراخ بضحك ..

- زهرة : شفتي اولدي امنين هاد زوج كيضحكو ... عرف هاد شنيولة قرات ليه حروبها ودارو ليك سي قالب ..

- حيد عمر (تيشورت ديالو كيقراه مصدوم مامتيقش ) :

أنا خدام العيالات ، لي بغات تنخدم ليها بساعة ولي بغاتني نخدم ليها لنهار ، ماعليكم غير تاصلو على هاد الرقم *************** ... هز عينو فشريهان وسعد بشر ..

- شريهان : بلاما تخنزر فيا ، قلت ليك انرضها ليك باش تعلم تقولبني انا ..

- عمر : مايمكنش ، داكشي باش طريق كاملة تيليفوني ماسكتش ونوامر غراب عليا ... ناري انت لي عطيتيها نمرة ..

- مالك : صافي راه تلاقاو ..

- كلهم قلبوها ضحك ... من غير كارولين لي حاسة براسها ماشي فبلاصتها وماعجبهاش الحال .. شريهان كانت حاطة الفلوات قدامها كتقاد فيهم نبيل مجمع مع الرجال .. حتى وقفات عليه خلود لونها مخطوف هازة تيليفون فيديها ..

- نبيل (بإستفهام) :

مالك ؟ ... مدات ليه التيليفون ، حس بدمو جمد والما بارد نزل عليه .. كيشوف فصاحبو لي ضاحك ومعلى بالوش ، ماعرفش كيفاش غادي يتصرف ولا كيفاش غادي يوريه أو يخبي عليه هاد الكارثة لي واقعة ...

- جميلة وياسمين لي وكلاتها ورجعات كتلعب ... نزهة وزهرة وحليمة لي مجموعين ناشطين .. احمد ضاير بيه ولادو فجو عائلي كسراتو الخدامة لي دخلات عليهم وفيديها جوا كبير فالبيض ..

موسيو مالك هاد الجوا جابو الفاكتور ... فيه سميتك ..

- نبيل (بإبتسامة وقف قدام مالك ) :

دابا واش وقت الجوا ، خلينا ضاحكين وناشطين ... اتكون الخدمة ..

- مالك (مافهم فيه والو ) :

وخاصني نشوف ديالاش اصاحبي ، من نيتك والى كانت الخدمة راه ضروري نشوفها .. ماسمعش ليه خدا الجوا الكبير من عندها ... كيدور فيه بين يديه ، مكتوب الى مالك العراقي ... الوزير ديالنا ، كنتمنى تعجبك الهدية واخا جات معطلة .. بدا كيحل فالجوا ، اول حاجة طاحت يدو عليها هي مجلة ، عينو نيشان مشات للصورة لي فيها .. واحد الإحساس خايب بزاف ، إحساس ماتبغيهش للعدوك ، صورتها وهي بدوبياس على غلاف مجلة إسبانيا ... وفجنب الصورة ، كاينة صورة اخرى ليها فثوب سهرة بين احضان راجل اخور ... شفارو بوحدهم لي كيتحركوو... يديه بردو عليه ، قلبو كيضرب بواحد السرعة كبيرة ، الكل كان ساكت حيت وجهو مكانش كيبشر بالخير ، كولشي باغي يعرف شنو واقع ...

نبيل (حداه ) : مالك ماتهورش .. يقدر كاين شي غلط ..

- مداهاش فيه ، جبد الصور لوخرين نفس الشخص معاها داخلين لوطيل ، صور مكللة بقبلات رمنسية .. كيحس بواحد العالم نهار ، أصعب حاجة هو تكون كتبغي واحد الإنسان ، وكتخطط تبني معاه حياتك ، فجأة يهدم داك الحلم لي كنتي عايش فيه ، إنسان كنتي كتحتارمو وكتخاف عليه يدير معاك هكا كتحس بشمتة ، كتحس بموس حافي تغرس فيك ... هي كانت حاضياه ماعرفاش شنو واقع ... حتى طاحت المجلة وتصاور من يديه ، جا عمر بجرا هزهم تصدم من داكشي لي فيهم .. شاف فجميلة وامرها دخل ياسمين وديها لبيت ومتخرجش من عندها ... شريهان وقفات نزهة كولشي تخلع ..

- نبيل : مالك (قاطعو بيدو ) ...

- كارولين غير شافت المجلة ولمحاتها ، ولات كلها كترعد ... غير بان ليها ضار عندها ، دموعها نزلو دايرة يديها قدامها كلها كترعد ...

- خ خليني غ غير نشرح ليك ع عفاك ، وقف قدامها عينيه حمرين نزلات منهم دمعة سخونة ، دمعة حسرة وخدلان ... الراجل الى بكا عرف بلي جبل تهز من بلاصتو ، هز يدو حتى لسما ونزل بيها على حنكها حتى ترمات للأرض ..

- كولشي شهق .. أحمد جاي حبسو عمر بمعنى مادخلش خليه ، حيت لي شافو فعلا تستاهل ماكثر ...

- مالك (شدها من شعرها جرها هزها وهي كتغوت وكتألم وطلب فيه يطلقها ويخليها تشرح ليه ... جابها حتى لحدا ودنيه ونطق بحال شي فحيح دالعافية بالإسپانية باش مايفهمو حتى واحد من غير خوتو ) :

انا ***** بحالك تمشتني ، درت ليك قيمة كبيرة وانت متستاهليهاش ، (ضحك) غادي تندمي على نهار فاش عرفتيني ، عرفتي شنو من هاد الساعة وليت كابوس ديالك ... (هز يدو لوخرا نزل عليها لحنك تاني ) شريهان واقفة مافهمات والو ومابغاتش دخل ، حيت الحالة لي كان فيها ... ممكن يخلطها حتى هي معاها ، عمرهم شافوه فديك الحالة ... بحال شي ثور هايج ، نزر على شعرها من جديد وجرها وهي كتفركل برجليها وكتغوت وتبكي ... الدم خرج من جنب فمها ، كسوتها تقطعات ، وتوسخات رجلها تجرحات ولات فواحد الحالة يرثى لها ، موقف حتى لعند طوموبيلتها ، حلها ولاحها فيها ... دموعها هابطة شعرها مشعكك ..

- قرب ليها ونطق ) حمدي الله لي موت مكانتش على يدي ، حمدي الله ... قسما بالله لي خلقني ونشوف وجهك قدامي ، حفري قبرك بيديك ... من اليوم اكارولين انولي كابوس كابوس بنسبة ليك ... حيد الخاتم دالخطوبة من يدو ولاحو ليها على وجها ، تبعو نبيل وخوتو ، حيد لنبيل ساكها وتيليفونها لاحهم عليها ..

- غبري .. بقات كتشوف فيه..

بصوت عالي ) قلت ليك غبري .. ديمارات طوموبيلتها ومشات ..

نبيل : م ..(قاطعو)

- مابغيتش نسمع حتى واحد ، مابغيتش نسمع ݣلناها ليك وماكنتش مناسبة ليك ، مابغيتش نسمع ولا نشوف حتى واحد .. مشا لجهة طوموبيلتو ماشفش فحتى واحد فيهم ، ركب ديمارا وكسيرا للوجهة معارفها غير هو ..

___________________

من بعد يوماين ورا لي وقع فالفيرما .. فقهوة la mandala فوقت الغدا .. ݣالسة شريهان كتغدا ، وساهية ... هزات راسها لطبلة لي قدامها ، كانت سكينة ݣالسة كتغدا مرة مرة كتشوف فيها وتحدر راسها ... بقات شريهان كتشوف فيها تنهدات تنهيدة طويلة ، هزات طبسيلها ومشات لعندها وقفات عليها ..

واخا نݣلس معاك ؟

- سكينة (تصدمات) :

اه واخا مرحبا ݣلسي ... حطات طبسيل ديالها وݣلسات معاها ..

- شريهان : كيف بقيتي ؟

- سكينة :

الحمد لله وأنت ؟ سمحيليا بزاف والله ..

- شريهان :

لالا عادي ، ما وقع والو .. انا لي بغيت نݣوليك سمحيليا على داك نهار ، حيتاش قمعتك وسمعتك الهضرة ومتعاملتش معاك مزيان ..

- سكينة (بإبتسامة) :

لا هانية ما وقع والو ... انا غير حيت مغربية وحسيت بحال الى شفت شيحد من عائلتي ... واخا انا ماعندي عائلة (ضحكات) ..

- شريهان :

فهمتك ، غير انا فقدت تقة فالبنات ... جاتني دقة من عند صاحبتي ، داكشي باش وليت كندير حدود مع البنات ... نسيت بلي ناس ناشي كيف كيف ، داكشي باش ..

- سكينة (حركات ليها راسها) :

فهمتك (تبسمات حتى بانت ليها حفرة الزين ومدات ليها يدها ...

المهم انا سكينة .. نتعارفو من الاول ..

- شريهان (رضات ليها الإبتسامة وهاد المرة من قلبها ) :

أنا شريهان ..

- سكينة :سميتك زوينة بزاف ..

- شريهان :

حتى انت زوينة وعويناتك زوينين .. بحال ديالي (ضحكات) ..

- سكينة :

كتݣولها ليا شمس بنت ختي ، وحتى هي شبهات ليا فالعينين ، عكس ماماها سبحان الله ..

- قاطعهم علي :

- تبارك الله تبارك ، ياكما بغيتو شي عصير ديال پناشي بارد مثلا (هزهم من كول القميجة غادي بيهم للداخل) :

يلاه يلاه الخدمة الخدمة ، انتوما باينة غادي تخرجوني على السيطرة مافيهاش .. جاه صوت من اللور ، سلام ..

ضار كتبان ليه بنت سمرة ، عينيها كبار وزوينة ... شعرها عسلي (بإبتسامة) سلام .. مرحبا بيك ..

- عفاك بغيت نشوف ندموزيل شريهان .. شريهان سمعات سميتها ضارت كاتبان ليها جميلة ..

جميلة ياك لاباس ؟

- جميلة (فتحات ساكها وجبدات تيليفون) :

هاكي راه نسيتيه (عطاتها كارط) وهادي سيفطها ليك عمي احمد ݣاليك خدميها نمرتك جديدة ..

- شريهان : شكرا بزااف اختي ..

- جميلة : يلاه خليت ليكم الراحة بسلامة ... مشات جميلة ، وعلي مزال متبعها بالعين ، ضار عند شريهان لي كانت كتشوف فيه ..

- شكون هادي ؟

- شريهان (بإبتسامة) : ماشي وقت الهضرة هادي اسي علي ، وقت الخدمة ... انا مشيت نشوف شغالي (ضارت غادية وعلى وجها إبتسامة إنتصار ) ..

________________

المـغرب

- كان ݣالس فالمكتب ديالو ، حتى دخل منعم .. ومعاه واحد الشاب فأواسط العشرينات ..

منعم : هدا ولد سي عبد الله مول الحانوت ..

- مصطفى (تفاجئ) : الاب ديالك ݣالينا بلي اتكون هنا من ورا شهرين !!

- السيد لي خدام معاه ، عندو مشكل فالعائلة وجينا بزربة ..

- مصطفى (حرك راسو ) :

ݣلس منعم ݣول لرسام يجي ..

- منعم : واخا ..

- مصطفى : عارف راسك علاش انت هنا ؟ متيقن بلي شفتي ديك البنت ديك الليلة ؟

- اه عارف ، عاود ليا الواليد ... وجيت نيشان عندكم ، فاش دخلات للمحال شفتها حيت انا اول واحد سولاتني على روشارج ... ويدي كانت عامرة قلت ليها ، بلي الواليد ايسالي مع الكليانة ويعطيها روشارج .. وفاش شفتها كتجري عقلت عليها مزيان ... دخل منعم ومعاه الرسام هاز روجيستر بيض وقلم الرصاص ، ݣلس اونفاص مع الدري ..

- مصطفى : واخا بغيتك تعطيه موصفاتها بتدقيق ، متنسا ولو وصف بسيط ..

- واخا ... كانت لابسة الكحل ، طولها 1.63 بحال هكاك ... وجها مدور وسموريتها زوينة وصافية ، شعرها عسلي ومموج .. عينيها بحال لون زيت العود لونهم مميز بزاف ، وعندها حفرة الزين فدقن ديالها (كمل فالوصف ديالها بتدقيق وبتفصيل الممل .. ورساك كيرسم ݣاع تفاصي لي كيعطيه ..

- منعم وراه كيشوف فرسم هز حجبانو بصدمة ) مايمكنش ... وقف مصطفى بزربة ، ا ورا الرسام كيطل على الرسمة ، يديه بردو قلبو كيضرب بجهد ... فمو نشف ، وكلمة وحدة لي كيردد ، لا لا لا مايمكنش لا مايمكنش ...

يتبع...