السيدة الأولى الجزء الخامس

- عمر (سايݣ ) :

كيجاتك الخدمة ؟

- شريهان (ضارت شافت فيه بإبتسامة ساحرة) :

واعرة عجباتني ، لهلا يخطيك عليا أولد عمي ..

- عمر (فرح ) :

شفتي كنتي ݣاعما بغيتي تخدمي ، ومعاجبك حال ..

- شريهان (كتشوف فيه وكتبلاني ليه فواحد الخطة اديرها ليه ماينساهاش ، شحال هادي وشيطانها ناعس ، دابا يرجع يفيق من الغيبوبة ) ..

عندك الصح ، فعلا كنت هبيلة لهلا بخطيك عليا (مع راسها ابلات عليك اراس تيمومة ، انا تحشمني وضحك وتكدب عليا ابلاتي عليك اعوينات قوقو ) ههههه (كضحك ليه وتبنالي ليه فنفس الوقت) ..

__________________

فشقة ديالو ، وبضبط فصال دسبوغ ... داير ليݣات ديال البوكس ... لابس سليپ سماكي بيض مع شورط ، شعرو فازݣ طايح ليه على عينيه ، كيضرب ويعاود ... كيرجع دكريات المدابزة ديالو هو وكارولين ...

فلاش بــاك

مـالك (بصوت قوي أشبه بالغوات ، مخرج عينيه فيها ) :

- شنو كانبان ليك انا ، شنو كان بان ليك انا ، ياكما يحاسبليك انا هو داك .....ل ديال المدير ديالك ؟ واش عندك بالك انخلي مرتي ، طلع قدام الناس بداك اللباس ؟

- كارولين (خايفة منو ، عصبيتو خلعاتها ... عمرها شافتو هكا ، مالفة كتشوف حبو ليها حنانو ليها رجولتو تجاها ، ولكن عمرها فطول مدة تعارفهم وخطوبتهم ، شافت العصبية ديالو ) :

مالك فهمني ، فهمني ... راه خدمتي هادي ... قريت ودمرت غير باش نوصل لي انا عليه ، عرفتي سنو تصاورك يكونو فݣاع المجلات ، وجميع دور العرض يتهافتو عليك ، شيحاجة لي كبيرة بنسبة ليا ..

- مالك (بإستفهام ، صدرو كيطلع وينزل ... ) :

وزواجنا؟

كارولين :

حتى هو مهم ، انا ماقلتش شيحاجة ولكن ماشيش فهاد الشهورة لي جايين ..

مالك (كيضحك بعصبية ) :

لالا مهم ، شفتو نيت مهم ... منين بغيتي تأجليه هاد الوقت كامل ، راه مهم نيت ..

- كارولين (قربات ليه) :

مالك ، انت حبيبي وكتبغيني ، واجب عليك تساندي وتوقف معايا فلي بغيت ندير ..

- مالك (كيشوف فيها مصغر عينيه ) :

نوقف معاك فحاجة لي كتشرف ، نوقف معاك فمشروع لي غادي يوصلك للفوق ... لي غادي تمشي بيه للقدام ويفتاخرو بيك الناس ... ماشي بخدمة لي كتبيني بيها المفاتن ديالك لرجال ، العرا عمرو كان خدمة والپوزات الخاوية عمرهم كانو خدمة ، عرض الازياء شنو كيستافدو منو الناس من غير يبينو مفاتنهم للي يسوا ولي مايسواش .. سمعيني مزيان شنو غادي نݣوليك وحلي ودنيك ...

- كارولين كتشوف فيه بخوف ... عمرها شافت عينيه بحال هاد الشكل ..

- مالك (كيدور راسو يمين ويشمال ... كيحاول يطرد الأعصاب لي كيحس بيهم ) :

غادي تمشي للهاد العرض لي انت متشوقة ليه ، ولكن وديني وما أعبد ... نشوف صورة وحدة ليك بدوپياس ولا عريانة ، وديني وما أعبد وحبي الكبير ليك ... لي بيناتنا عتابريه سالة ... وانت عارفة مزيان الى تاخدت اي قرار مكنرجعش فيه ، سمعيني مزيان ، الى مشينا حتى تفارقنا واخا ترجعي عندي حفيانة أكارول عمرك مغاتكوني ليا مرة ، نفضل نحيد هاد القلب لي كيبغيك ... ومنفقدش ذرة وحدة من رجولتي ... (قرب منها حاط صباعو على دقن ديالها مقربها منو ضاغط بجهد ، كيضغط على كل حرف كيخرجو من فمو )

فكري فيها مزياااااان ، قبل لا تندمي(دفعها وخرج ) ... رجعات كارولين بلور ݣالسة على الكرسي ، صدرها كيطلع وينزل بالخوف .. كتقاد شعرها كلها كترعد يديها باردين ، ماعرفة ماتقدم ولا تأخر ..

نهـايـة الفـلاش بـاك

- ضرب اخر ضربة بيديه ، لاح الليݣات على جنب ... هز الفوطة لي كانت محطوطة ... لاح سبادري من رجليه ، حيد السليپ سماطي ، بقا غير بشورط ... دخل للحمام معلق الفوطة ، حيد الشورط حتى هو ... دخل تحت الرشاشة ... كيحس بالما دافي هابط عليه ، باغي يهرب يهرب من افكارو أحاسيسو ... عايش فشك ديما فشك معاها ... فكل مرة خايف من المقارنة ومن المساوات خصوصا هو من نوع لي كيبغي يكون هو الاول ، يكون هو أول الأولويات ، ولكن بسباب خدمتها لي بنسبة ليها هي الالى عاد هو خدمتها لي اتخرج عليهم بزوج ... وعليها هي بدات ، هذا هو إحساسو لي لاعب عليه ... ولي حاس انو هاد الخدمة اتخلق مشكيل كبير ...

_______________

- فبلاصة أخرى ... وبضبط فغرفة فأوطيل فاخر ... بشوية نزلات من حداه هزات الپيكيني ديالها من الأرض لبساتو ... واحد ديباردو حتى هو لبساتو ، وقفات قدام البابكون كتشوف بعيد ... هزات بكية ديال الݣارو حيدات منها واحد شعلاتوو ، كتكمي وساااااهيةة ... حسات بيديه كيتحسسو كرشها ، طبع قبلة على عنقها ضورها عندو ...

مال بيبي ؟

- هادشي لي درنا حسسني بدنب كبير ، وأنت السبب ..

جرها عندو معنقها هامس فودنيها بشوية :

أنت طلبتي مني حاجة .. لبيت ليك الطلب وخديت المقابل فيفتي فيفتي ..

- دخلو لدار ... كانو مجموعين كيهضرو شنو يديرو وشنو لي لا ..

- ݣلسات شريهان ناشرة رجليها عيانة ..

زهرة : كيداز نهارك أبنتي ؟ عجبك الحال بعدا ؟

- شريهان :

داز زوين الصراحة ، القهوة زوينة وكولشي فيها زوين ، مكتحسيش بالوقت ... وحتى الباطرون ظريف الصراحة ... واخا شي ناس كدبو عليا ، وݣالو ليا بلي بينهم غير معرفة .. وهوما صدقو صحابهم ..

- أحمد (بإستفهام) :

كيفاش مافهمتش؟

- شريهان(تقادات فالݣلسة ، كتشوف فعمر لي كيشوف فيها وساكت مبسم) :

فرنس أنت ، السيد ݣالينا داك النهار ، بلي لي فالقهوة غير معرفة من بعيد وماشي هو مول الشي , وبلي ايكوليه انا غير صديقة ... شنو مشا دار عاود ليه من طاق طاق لسلام عليكم ... وصدق علي صاحبو وكيعرفو وهو مول القهوة ..

- عمر (كيحلف) :

وحق الله العظيم حتى كان غير مسؤول ، راه فاش مشينا وعيط عليا نهضر معاها فاش مشيتي ، ݣاليا بلي القهوة اتولي ديالو ... وخداها من عند موسيو جاك ، المالك الأصلي ديالها ، يعني انا مكدبتش عليك فهاد القضية ..

- شريهان (كتشوف فيه بنص عين) :

سبحان الله ، المهم كذبتي عليا والسلام عليكم (هزات الساك ديالها) انطلع نبدل عليا ...

- خلاوها حتى طلعات ..

زهرة : عبرتي عليها ، كونما درتي هكا والله لا خدمات ولا قبلات تخدم ...

- أحمد (كيضحك) :

شفتي وجها ناري يا صݣع ، نبصم عليها حتى غادي ترجعها ليك ... كانت كتشوف فيك بنص عين ..

- نزهة (كضحك) :

ناري مابغيتيها لوالو ..

- زهرة (كتوصي فيه) :

وغير رض البال معاها ، ماتحس بدقة منين تجيك ... راه فيها الفعايل والله لا دوزاتها ليك ..

- عمر (وقف هاز سوارتو وتيليفون) :

مزيان منين علمتيني ... كوني هانية أخالتي انرد بابي مزيان ..

- نزهة : بدل عليك ونزل باش نتعشاو ..

- عمر (وقف وضار عندها) :

مالك مغايجيش ؟

- نزهة : لا أولدي مغاديش يجي ..

- عمر : داكوغ ..

- نزهة : ماعرفت علاش باغي يبقى بوحدو تما .. وحنا هنا مجموعين ..

- أحمد : خليه على خاطرو ... غدا إن شاء الله غادي يجي ويجيب معاه البنيته ، خاصك تݣولي لجميلة توجد ليها البيت لي لاصق على بيتو ..

- نزهة : علاش انتسناك حتى تݣولها ليا ، راه وجدوه البنات قبيلات ... وفاش خرجنا انا وزهرة ، جبنا ݣاع الألعاب وداكشي لي اتحتاج فبيتها ، إن شاء الله يعجبها وترتاح فيه ..

- أحمد : إن شاء الله ..

من ورا العشا طلعات شريهان لبيتها ... خاصها تولي تنعس بكري باش تفيق بكري ، يلاه أدخل لتحت فراشها جاها ميساج فالواتساب ، حلات لقاتو مروان ... بقاو مدة كيهضرو حتى فاجئها :

- مروان : فخبارك اخر الأخبار ؟✓✓

- شريهان : أشنو واقع تاني ݣول✓✓

- مروان : مريم دخلوها لكلينيك ✓✓

- شريهان (متحرك فيها والو) :

وعلاش مالها ✓✓

- مروان : جاتها إيموراجي بسباب الإجهاض✓✓

- شريهان (تصدمات) : أويلي علاش هي إمتا حملات ، وكيفاش حملات وهي مامزوجاش؟✓✓

- مروان : هداك لي كان واقف معاها داك نهار عقلتي ، فاش وقفتيها ، كان خاطبها ... ويمكن كانت وقعات بيناتهم شيحاجة قبل الزواج ، وفاش سمع داكشي عليها وشنو دارت ، سمح فيها جمع وراقيه ومشا للفرنسا ... ومنين شافت راسها وحلات ، خدا شي عشوب ودارو ليها إيموراجي ✓✓

- شريهان (تنهدات تنهيدة طويلة ، ماشي بقات فيها ولكن شفقات عليها ، واخا دارت فيها العيب ولكن هادشي ماتمناتوش ليها) :

الله يكون معاها ويوقف معاها ، اللهم لا شماتة ... الله يشافيها ويهديها هادشي لي غادي نݣول ✓✓

- مروان : الإنسان يدير الخير باش يلقاه فحياتو ، اما الى زرع الشر راه هو لي غادي يحصدو ✓✓

- شريهان : داكشي لي كاين ، يلاه انا انمشي نعس فايقة بكري غدا ، تهلا فراسك نهضرو من بعد ✓✓

- مروان : واخا تصبحي على خير✓✓

- شريهان : تصبح على خير✓✓

حطات تيليفون فوق الكوافوز وطفات الضو ، بقات شحال كتفكر فكلام مروان ، إن الله يمهل ولا يهمل ... الانسان يديرها غير زوينة يجي نهار ودور عليه ... غمضات عينيها وبالعيا دغية نعسات ..

- علمني أيها الجدار أكون مثلك بكل صفاتك، لا تشعر بغرس المسمار فيك ولا تتألم منه، لا تستمع من يتحاور معك، ولا تهتم لما يجري حولك، علمني أن أقف مثلك بصمت ، بكل شموخ رغم كل ما يجري بي ، علمني أن اكون صلب تحت مطر الكلام ، علمني أن أصمت ولا أبوح بما يحمل قلبي، أن أكتم مشاعري كما تكتم ما خلفك ، علمني أنأ اقف رغم ألمي وعذابي ، كما تقف سنيناً دون أن تبوح بألم أو عذاب ... أيها الجدار علمني كيف تعلمت كل ذلك ؟

________________

- فاقت شريهان بكري ، لبسات سروال كيطمة مقبوط من التحت ... مع تيشورت وقبية فالخضر ... لبسات سبرديلة كحلة تناسب اللبسة ديالها ، شعرها جمعاتو على شكل سفنجة ... هزات سكادو ديالها وتيليفونها ، رشات من ريحتها لي اتولي من بين روايحها المعتمدة ونزلات ..

- التحت

شريهان : صباح الخير (جرات الكرسي وݣلسات) ..

- الكل :

صباح النور أبنتي ..

- شريهان (هزات طرف كبير دالخبز طوست لطخاتو فرماج وكوفيتير ، خدات كاس دالقهوة وبدات تاكل) :

ناري فيا الجوع ، خالتي زهرة هاد توست راه ماخبز ماوالو اكيهر فالكرش، خاص نبقاو نعجنو الخبز ديال الدار ، حتى الى كليتي طرف ماتعاودي الثاني ...

- نزهة(كضحك) :

واخا ابنتي مايكون أخاطرك ..

- شريهان : عرفتي اماما توحشت الحلوة ديال كاوكاو ، لي مدردر عليها السكر ݣلاصي وكتكون فالقواعط بيضين ، لي كانو كايديرو فالعرسات توحشتها والله ..

- زهرة (كتشوف فيها بنص عين) :

وكون كنتي مزوجة نحلف عليك أكتوحمي ، انت هدا هو حالك فاش كيكون فيك الجوع ، عاد كيبان ليك الماكلة وتبداي تشهاي ..

- عمر : وكون اباين عليها ..

- شريهان (هزات عينيها فيه ، فمها عامر دارت ليه بيديها بالخمسة ) :

جخخخخ بسم الله عليا ، كيما شفتيني تخليني ..

- عمر (كيطنز عليها) :

أش فيك بعدا لي يعينوك عليه الناس ، والو ..

- شريهان (كتقليليه السم ) :

بزاااف عليك وحسن منك ، لوني متميز شعري حرير بلا خلطات بلا عجب ، عينيا مخلوضين ، كون عندك زيني ݣاعما تبقى باير ...

- عمر (شاد فيها) :

- اتبارك الله على مونيكا بيلوتشي ، الزين غير كيتكفح منك ... كيهزوه الناس ويطلسو لوجاهم ..

- شريهان (غمزاتو) :

نعدرك السم لي كيحرقك من الداخل ، هو لي مخليك تهضر ... وارا ماتهضر وماتحفر والله فيا شيحاجة لا دوات ... وهاكا ديما وموت يا لمسيميمة (كتحك صبيعاتها قدام عينيه ) ...

- زهرة (حاضياهم) :

عرفتو وحتى نضت لا انت لاهو انجمعكم بصابو واحد ، وخليونا نعرفو هاد الدغمة منين تدوز ، وانت سكتينا ... اويلي وبزاف على اللسان ماضي اربي سلامة ..

- أحمد (كيدير ليهم بيديه بلي قفروها) :

تهنيتو وها زهرة شعلتوها ، والى شعلات اجا ماطفاها ..

- شريهان (كتفرنس) :

وانا كنݣول فين فايتلي شفت ماما ، زيغ ماما هي الفاخر شخصيا ...

- حيدات زهرة صابو من رجليها كانت اتشيرو عليها غير هربات وتخبات تحت الطبلة ..

- قاطعهم صوت الباب لي سونا ... رجعات شريهان لبلاصتها ... مشات الخدمة حلات ، تم داخل مالك ، لابس سروال كحل مع تريكو كحل كول طالع ، صباط دان فالقهوي ، وراه جوج ديال الناس مرا وراجل نصارة ، هازين ميلفات فيديهم ، او وراهم كانت مرا فالخمسينات من عمرها ، شادة بيد فيد بنية صغيرة عندها ديك 3 سنين ونص ، يد جارة باليزة فالغوز ديال البنية ..

- وقف مالك ومعاه دوك جوج ديال الناس ، لي جايين من الخيرية ، باش يشوفو البلاصة فين غادي تكون البنت ..

- أحمد (وقف) : سلام أولدي ..

- مالك (بصور رجولي) :

صباح الخير أبابا ... هاد الناس من المصلحة الإجتماعية ، باغيين يعرفو ياسمين فين غادي تكون ..

- أحمد : مرحبا ..

- البنية ، لي كانت زوينة صغيرة وزعرة ، دايرة كارتابل فظهرها فيه نونوس بالبونج .. صبع خاشياه فمها ، شعرها قصير وزعر ورطب ... كتبان بحال الاميرة فالكسيوة ديالها البيضة .. واقفة وسكاتة ومن عويناتها كتبان بحال الى خايفة ..

- سلاو الإجراءات ... خرجو دوك الناس وبقات غير ياسمين وديك السيدة لي جات معاها من الخيرية .. تحنات على رجليها وقابلاتها معاها...

ياسمين غادي تبقاي هنا ، مع عمو مالك ومع عائلتو ... اياخود ليك ألعاب وأيكون عندك بيتك بوحدك ، ومديريش البسالة أبنتي تافقنا ، ماتعدبيش عمو مالك صافي ؟

- ياسمين (حركات راسها بأه) ..

- الى كان أي مشكل تاصل بيا ، التيليفون ديالي راه عندك ..

- مالك (حرك راسو بالإيجاب) :

انخلي شيفور يوصلك ..

- واخا (تبسمات ليهم ومشات ) ..

- شريهان (شافت فساعتها وهي توقف حبت هاد الوقت خاص تخرج) :

انا خاصني نمشي ، عمر اتمشي توصلني ؟

- عمر (جغم من كاسو اخر جغمة للقهوة او وقف) :

يـلاه ..

- مالك بقا واقف ، كيشوف فياسمين وهي واقفة مسيكينة ... معارفة شنو دير ولا كيفاش تصرف معارفة والو .. هزات راسها فاش بان ليها خيال واقف قدامها ... كتشوف فعينين شريهان لي جاوها زوينين ..

- شريهان (مدات ليها يدها) :

سلام مرحبا بيك ..

- ياسمين (مجاوبتهاش)

- شريهان :

الكسوة ديالك زوينة بزااف ، كتباني بحال الأميرة ، واخا نبوسك ؟

- ياسمين (جاوبتها براسها بالإيجاب) ..

تحنات شريهان وباستها فوجها لي كان بارد ، ريحتها كانت ريحة ديال نقاوة ...

- شريهان (بإبتسامة) :

ريحتك زوينة بزاف وحتى انت زوينة ، أنا شريهان وانت شنو سميتك ؟

- ياسمين (شافت فيها بعوينات كيبريو ، وبصوت بريئ ورقيق شبيه بالهمس نطقات) :

ييسمين ..

- شريهان : سميتك بحالك ، انا انمشي دابا حتى نرجع ونلعبو انا وياك .. وقفات شافت فمالك :

صباح الخير

- مالك (بهدوء) : صباح الخير ..

- خرجات وتبعها عمر ، ركبات معاه وشدو الطريق للخدمة ..

_______________

- فالكوزينة عند سكينة ... واقفة إشراق كتوجد فالفطور ، خرجات سكينة من الكوزينة ...

الله ريحة القهوة كتفيق ، خاصني نفطر دغية باش نكون فالخدمة فالوقت ..

- إشراق :

غير صبري ، بقات القهوة هاهي أنحطها ، بغيت انعرف علاش بدلتي لون شعرك ؟

- سكينة :

عجبني بحال هكا ، خفيف حسن من ديك الصفورية لي كانت فيه ..

- إشراق :

كانت جايا معاك مع شعرك رطب ، ولكن حتى هكا جاك الزوين الصراحة ، إيوا معاودتيش ليا ... كيجاتك القهوة والباطرون جديد ؟

- الـمغـرب

الكلينيك

فوحدة من الغرف ، ناعسة على البياص ... مدورة وجها لجهة السرجم ، دوع على قنت عينيها ... مع كترمش كتهبط سخونة ، فالكرسي لي حداها ݣالسة مها ، ساهية وكتشوف فيها ..

حتى درتيها عاد كتبكي ، اش غادي نݣوليك حسبي الله ونعم الوكيل فيك ، الله ياخود فيك الحق ... كنت مربية لفعة فداري وأنا محاساش ... بغيت انعرف داك السم كامل منين جبتيه ... مافينا مافعايلتنا ، البنت لي كنتي ظلي دوي بيها ، وتجي عندي وتاكل ماكلتي ديري فيها هادشي .. إدوي ماحشمتيش ، وهانتي دابا ابنتي لي زرعتيه كتحصديه ..

- مريم (بصوت باكي) :

صافي اماما الله يرحم ليك الوالدين ..

- صافي صافي مخوض هدا ماشي صافي ، داكشي لي كنتي ناوياه لصاحبتك درتيه ، كاع الناس كيتخطبو بالعز وشان ... الباب مايفوتوه ، وانت غير غادية طايا معاه ، حتى دا منك لي بغا ، وغير ساق خبارك اش كتسواي ساسك ... ومكملها ومجملها مسيفط لباك ، بنتك مايشرفنيش نتزوج بيها ، هوناض وحطك بوجهك ... مرمدتي وجهنا فالأرض الله ياخود فيك الحق ، سمعيني مزيان غير تخرجي من هنا اتهزي حوايجك وتمشي عند خالتك للعيون ..

- مريم (ضورات وجها عند مها مصدومة) :

ياك اماما باغيين تجريو عليا ، باغيين تلوحوني ... اللحم الى خنز كيهزوه ماليه ، ماشي تلوحوني ..

- تحل ليك الفم ... علاش انت درتي الزينة ، راجعي راسك مزيان وشوفي شنو درتي ... غير تخرجي من هنا اتمشي عند خالتك ، راه هضرت معاها وعاودت ليها ... أنمشي نشوف باك فدار خليتو حالتو حالة ، ما كلا ماخرج مسكين حشمان من الناس على فعايل ... انا الكرش لي تولد بحالك بغيت ليها العݣر ابنتي العݣر ... خلاتها غارقة فدموغها كاتنخصص ومشات ..

_________________

- مع العاشرة .. دخل مصطفى للدار عيان ، جايب معاه الغدا ديالو حطو فالكوزينة ، طللع لدار الفوق .. دخل للدوش دوش وحيد عليه العيا ، رجع نزل دار تيليفونو يتشارجا ، ودخل للكوزينة سخن غداه ..

- بدا تيليفون كيسوني ليه ، هزو بانت ليه نمرة مو فالواتساب ... حل الخط ..

- وي الواليدة ، لاباس عليك هانية ، الحمد لله بيخير هاد الساعة ... انت وعمي خالتي زهرة دراري مزيان ، ديك شنيولة لاباس عليها ؟ ... هاكاك الالة خدمات ، ايوا مزيان ماعندي مانسالها ، مع مشات مع خدمات ... ايوا مزيان الله يسهل عليها ... شكون ݣالها ليكم ... ناري على مروان وانا لي حم++ار نسيت ماعلمتوش ... أودي الواليدة الهضرة طويلة .. ودابا مغادي نقد نݣوليك والو ، من بعد إن شاء الله تقاد الامور وغادي نعاود ليك كولشي ، الواليدة الواليدة تيليفوني كيسوني ... من بعد وندويو سلمي على الجميع امين ياربي امين ، يلاه بسلامة ..

- قطع الواتساب وفتح الخط ديال التيليفون ..

واش أصاحبتي كتحلم بيا ولا كتبغيني بزاف ولا كيفاش البلان ؟

- منعم :

كاين فدار ؟

- مصطفى :

لا كاين فالديسكو مزيانة ، فنظرك فين انكون فدار ،شنو كاين ؟

- منعم :

حل حل انا حدا دار ، جايب ليك خبار جديدة ، وبلاما تخاف جايب معايا غدايا ..

- مصطفى (لاح تيليفون وخرج من الكوزينة مشا حل ليه الباب)

سد معاك الباب ، مزيان منين فهمتي راسك وجبتي متاكول ، داير غير بحاسبي .. شمن جديد عندك

- منعم (حيد تجاكيط وحط ماكلتو ݣلس) :

ناكلو بعدا ونهضرو ...

- فالـقهوة ... وقت الغدا ، خرجات شريهان هازة طبسيل فيه ماكلتها لعلى برا ... مبعدا من الناس ، ݣلسات وحطات قدامها طبسيلها كتاكل وضور فعينيها كتمنضر ، دورات راسها كتبان ليها سكينة جايا ... وقفات قبالتها بإبتسامة على وجها ..

- سكينة :

واخا نݣلس معاك ؟

- شريهان (هزات فيها راسها) :

ݣلسي .. ݣلسات وحطات ماكلتها قدامها ، كتاكل وتشوف فشريهان بتردد باغية تجبد معاها الهضرة ، ومترددة ..

سمحيليا بزاف على داك نهار ، كنت جايا مع جاك على الخدمة ، ومع الخلعة دخلت فيك سمحيليا بزاف ..

- شريهان : مكاين حتى مشكيل كتوقع ..

- سكينة (مدات ليها يدها) :

أنا سكينة وأنت ؟

- شريهان (ببرود مدات ليها يدها) :

أنا شريهان ..

- سكينة : مشرفين احسن حاجة تكوني خدامة مع بنت بلادك ..

- شريهان :

انا بنسبة ليا بحال خدمتي مع بنت بلادك ، بحال لا كيف كيف ... ومن الاحسن تخدمي مع البراني ..

- سكينة (تقرصات ) :

علاش كتݣولي هكا ، بالعكس كتلقاي مع تهضري وتحمعي ، وكيدوز وقت زوين فالخدمة ..

- شريهان (كملات ماكلتها او وقفات) :

الخدمة كيجيو ليها الناس باش يخدمو ، ويصورو طرف ديال الخبز ، مكايجيوش باش يجمعو ولا يربطو صداقات بين بعضياتهم ، بصحة وراحة ..

- تخطاتها ودخلات مخلياها مفاهمة والو ، كتبلع فريقها والحرقة فحلقها من الكلام لي ݣالت ليها ... بقا فيها الحال بزاف ... سكينة واخا بنت لي فوقت الشدة كتكون بمساع راجل ولكن حساسة بزااف وقلبها بيض لاقصى درجة ... كملات ماكلتها بشوية ، سلات هزات طبسيلها ورجعات للخدمتها كتحاول ما امكن ، تفادى تشوف فشريهان او تلاقى بيها ..

_________________

الـمـغرب

- مصطفى (كيشوف فمنعم) :

امعلم راه ساليتي ماكلتك ، اش كتسنةدى مزال يسير مثلا ، طلق راسك وݣوليا شنو كاين ..

- منعم (هز تجاكيط ديالو كان تحتها واحد الملف مدو ليه) :

هاك أسيدي ، هاد الملف فيه جميع المعلومات على نادية الصويرية ... من البارح وانا خدام عليه حتى لصباح ..

- مصطفى (شدو من عندو فتحو كيقلب فالوراق ويقرا ... هاز حاجب ومنزل الثاني) :

پشااااخ الحديد ، السيدة بين ليلة ونهار ولاعندها هادشي كامل ..

- منعم (رجع بلور) :

السيدة والديها ناس على قد الحال ، باها بحري كيخرج مع الفلايك ... وكيجيب ليهم لي قسم الله ، وعندها واحد خوها فنيااان حتى هو ... وهي قرات حتى لكطريام وخرجات ، فاش دارت 23 جات لرباط ... وفظرف 4 سنين فتحات صالون كبير ... ودارت طوموبيل ودار ، الحوايج لي مدرناهم حنا فهاد 8 سنين دالخدمة ... دارتهم هي فظرف 4 سنين .. وبدات شوية بشوية فكل مدينة كتحل صالون ، وهاهي دابا عندها 32 سنة لاباس عليها ، عندها مشاريع ديالها جوج طوموبيلات ، وڤيلا من نوع الرفيع ..

- مصطفى (كيصفر) :

باب باب باب باب ... هادشي كامل والسيدة مقارية ماعندها ديبلوم ما والو ؟

- منعم :

تماما ، فاش جات لهنا كانت خدمات فواحد الصالون عند شي مرا ، كدير الميناج ... من تما ضربات ضربة صاروخية حتى ولات على ماهي عليه ..

- مصطفى :

باها من ورا ماعيا ، عطا الفلوكة لودو باش هو يتكلف ... وهي مرة مرة كتمشي لعندهم ، مكتخلي متدي ليهم ... سكناتهم فدار حسن ، أه ونسيت فاش كتمشي عندهم مكتديش طوموبيل ، وكتمشي بلباس عادي .. هادشي لي مكتوب هنا ..

- منعم :

إيه أسيدي ، هنا باش تعرف بلي القضية فيها إن وأخواتها ..

- مصطفى :

هممممم فهمت فهمت ..اجي كيفاش حتى عرفتي هادشي كامل من لبارح اليوم ؟

- منعم (كيحك فراسو) :

شوية من واحد خونا كنعرفو ، وشوية من واحد السيدة كنعرفها ، راك عارفها العيالات مع تبرݣيݣ واوو ...

- مصطفى (كيشوف فيه بنص عين) :

أممم سيدة كنعرفها ، ونقص من كترت البنات نقص ... كوراه كدبتي عليها تاني ، وهمتيها بزواج وزيد وزيد ، تاقى الله فالوليات أمنعم ... راه والله لا خرجات ليك طريفة ..

- منعم (وقف هز تجاكيطو لبسها) :

الملف راهو عندك انا ، غادي نمشي بحالي قبل لا تبدا عاوتاني ..

- مصطفى (وقفو بهضرتو) :

كوثر مغادي تصلح للهاد المهمة هادي ..

- منعم (ضار عندو) :

وعلاش ، بالعكس زوينة وجاتني مناسبة ..

- مصطفى (كيحرك راسو برفض) :

لا واخا هكاك ، كتبان عليها قوية ... وحنا خاصنا شي وحدة لي تبان درويشة وضريفة ، باش تقدر تقن الدور كيما هو وأهم حاجة تكون زوينة ، وتكون هبيلة ..

- منعم (كيفكر) :

وشكون لي عندنا فيها هاد الموصفات هادو ؟

- مصطفى (وقف حاط الملف على طبلة ، دار يديه فجيابو كيفكر ... ضار عند منعم بحال الى وصل لشكون اتلعب الدور) ..

- فواحد من لي باتسري ديال احمد ، وبضبط لي شادو عمر ... كان خدام الداخل وضايرين بيه المساعدين ديالو ... كان عندو بزاف ديال الطلبات ، ماهزش راسو نهائيا ...

- جات عندو وحدة من البنات ..

موسيو عمر ، مع 8 خاصنا نوصو لي تارت للأوطيل ... وموسيو پاتغيك طالب يشوفك شخصيا ..

- عمر (تفكر شريهان لي خاص يجيبها مع 8 وهو باينة غادي يتعطل ديك نص ساعة عليها ) :

داكوغ ... حيد داكشي لي فيديه ، هز تيليفون باغي يسوني عليها ، حتى تفكر بلي مزال مخداتش كارطة ديال فرنسا ... والواتساب مغاتكونش فاتحة وهي خدامة ، تفكر علي وسونا ليه ..

- عمر :

وي علي صاڤا ، سمع ݣول لشريهان بلي غادي نتعطل عليها واحد الشوية ... تسناني حتى نجي ونديها واخا .. واخا يلاه بسلامة ، قطع مع علي الاتصال ورجع يكمل خدمتو ..

____________________

- فالڤيلا ... بضبط فبيت ماكبيرش بزاف ، لي دخل ليه أيعرف أنو مجهز لبنت صغيرة ... النموسية حدا السرجم مع الألعاب ، مونيكات فوق النموسية ... الفراش كان فلون صفيفر بارد .. محطوطة الباليزة ديالها صغيرة ، وهي واقفة ... قرب منها مـالك هزها وحطها على نمسية ݣالس حداها ..

عجبك البيت ؟

ياسمين (كترمش بعويناتها ، جاوباتو براسها بأه) ..

- مالـك (بصوت رجولي حنين) :

هدا أيكون بيتك ، ومزال كاينة جردة .. وغادي نحيب ليك بزاف ديال الألعاب ، والى بغيتي اي حاجة ݣوليها ليا صافي ..

- ياسمين (هزات راسها فيه بتردد باغية تݣول شيحاجة ومترددة خايفة وحشمانة) ..

- مالك (بحال الى حس بيها) :

بغيتي دب ولا منيكة كبيرة ، لي بغاتها الاميرة الزوينة انا نجيبها ليها ..

ياسمين (بخجل )

بغيت مسيسة ..

- مالك (عزات عليه بزاف وكدخل للخاطر بزاف ) :

واخا انا غادي نجيبها ليك فأشمن لون بيغيتيها ؟

ياسمين (كتلعب بطرف كسوتها) :

بحال هاد كسوة ..

- مالك (هزها حطها على رجليه ، كيبان بحال سي أب مع بنتو) :

واخا انا غادي نجيبها ليك ، لي بغيتيها ݣوليها ليا ... وإلى ماكنتش انا ، كاينة طاطا زهرة وطاطا نزهة وعمو أحمد ، وعمو عمر وعمو سعد ..

- ياسمين (هزات راسها فيه ببراءة) :

وعينين ماما ؟

- مالك (مافهمهاش ، ومدارش بالو مع كلامها) :

كاع لي هنا كيبغيوك ... وأي حاجة بغيتيها يعطيوها ليك صافي ؟

- ياسمين (حركات ليه راسها بالإيجاب) ..

- هزها بين يديه وخرج بيها من البيت ، غادي بيها لعندهم للتحت ، تݣلس معاهم وتعرف عليه كثر ..

- المغرب

منعم كيتسنى فمصطفى يهضر :

- خولة ..

- منعم (بدهشة ) :

لا من نيتك ، واش خولة البنت لي يلاه تخرجات ، لي غير كدور وتفرنس .. لالا كتفلى هاديك باينة غادي تفضحنا ..

- مصطفى :

واخا يلاه تخرجات ، ولكن راه هي الاولى فدفعة ديالها ، وبالعكس مناسبة تماما لهاد المهمة ، اول حاجة زوينة وزين بريئ وصعيب يشك فيها شي واحد ، وبداك الضحك ديالها ادير بلاصتها ، وهاديك هي احسن وحدة غادي تناسب الدور ... اما كوثر غير غادي تخسر لينا الامور حيث كتبان قويه بزاف داكشي باش خوله هي احسن اختيار ..

- منعم :

انت دير ليناسبك وانا معك واي حاجه احتاجتيها انا معاك فيها يلا خليت لك الراحه نتلاقاو من بعد ..

- خرج منعم وخلى مصطفى كيفكر ف هذا القضيه اللي شاغله بالو بزاف ... بزاف ديال المطارق كيدورز ليه فراسو ... وبزاف ديال الأسئلة لي مزال مالقاش ليهم إجابة .. ومنهم الجريمة لي وقعات ، ولي لحد الساعة مالقاو عليها حتى دليل حتى مول الحانوت ، لي كان خدام ديك الليلة ، مسافر وكاين غير ولدو هو لي شاد ...

___________________

فوحدة من الفيلات الفاخرة بباريس ... الحراس على برا ومن الداخل ... دايرين سماعات الادن لابسين لباس رسمي ، وملامح وجهم جامدة ..

الداخل وبضبط فوق واحد الفوتوي راقي ، ݣالسة دايرة رجل على رجل ... وحداها حاجة الشيشة كتشيش وتبخ ، قدامها محطوطة طبلة ... فيها طفاية وبكية ديال الݣارو ، وكاس ديال المشروب ، وطباسل فيهم كل من اللوز اكاجو بيسطاش .. جا عندها واحد من الخدام حاني راسو ، وقف قدامها ونطق :

موسيو دجيكو وصل ..

- تبسمات حتى بانو سنانها البيض المستفين :

جورجيت : خليه يدخل ..

- مشا الخدام كيجري ، غاب شوية وتم داخل دجيكو .. لابس تجاكيط دالكوير سروال دجين كحل ، سلسلة نقرية طويلة من عنقو وشام كيبان من جهة عنقو على شكل تينين ... غير شافتو جورجيت وقفات بإبتسامة حالة ليه يديها ..

- دجيكو (بالإيطالية ) :

الحب الحب الحب ...

جورجيت (مدات ليه شفايفها وباستو من فمو ) :

حبـــييي ، توحشتك الحب ديالي(كضحك معنقاه) ..

- دجيكو (بعد كيشوف فيها ) :

غبرتي حتى زيانيتي ، الناس كيكبرو وانت كتصغاري ..

- جورجيت (قرصاتو قرصة خفيفة من حنكو) :

دجيكو مون اموغ ، مزال مابغيتيش تحيد منك هاد حلازة اللسان لي كدوبني وتحمقني ، وتخليني طايرة فوق السحاب ..

- ݣلس حداها هاز الشيشة لي كانت كتشيش منها ، كيتنشوى على خاطرو ..

أش هاد البلاصة الوارعة تاني ، انت واعرة وكتختاري غير البلايص الواعرين بحال ديما ..

- جورجيت (ݣلسات حداه دايرة رجل على رجل حاطة يد على رجلها ويد كتلعب بيها فشعرو ) :

أش خبار الزعـيم ؟

- دجيكو (خدا نطرة من شيشة وشاف فيها) :

لابـاس عليه ، كيسول على السلعة ..

- جورجيت (تنهدات) :

السلعة الفوق ، كتدريسا باش تكون واجدة فالوقت المحدد ..

- دجيكو (تبسم) :

مكاينش شي كادو ليا ، فوق السلعة فابور ؟

- جورجيت (تقرصات وتقادات فالݣلسة) :

هاد الساعة كاينة غير انا ، شيحاجة اخرى مكايناش ، ماݣلتيش ليا ، مزال الزعيم ماحنش علينا ويخلينا نشوفوه ؟؟

- دجيكو (حط الشيشة ، وقف جارها من يديها غادي بيها للفوق) :

الزعـيم هو لي كيعطي الوقت المحدد ، لي يشوف الناس فيه ... هدا في حالة الى غادي تشوفيه ، اول بيت لقاه قدامو حلو مدخلها ... لاحها على نموسية وبدا كيحيد فحوايجو ..

- جورجيت (بمياعة ) :

شنو كدير ؟

- دجيكو (كيضحك) :

والو غير ݣالو ليا بلي واحد السيدة مسكينة محرومة وكتموت فالرجال الصغار ، وخاص لي يمتعها وانا كنموت فهاد النوع ديال العيالات ..

شريـهان (كتشوف فساعتها تعطل عليها عمر ) .. مشات عند علي ..

علي عمر تعطل عليا بزاف ... انا غادي نمشي ..

- علي : من نيتك وانت حافظة بعدا الطريق ؟

- شريهان :

انخرج ناخود طاكسي ونݣوليه يديني لدار عادي ..

- علي : صبري شوية الى مجاش انا نوصلك ..

- شريهان :

لالا والله بلاما تعدب ، انت غير وريني طريق لي انشد فيها الطاكسي ..

- سكينة (نباتها من اللور ) :

الى بغيتي انا نوريك منين تاخدي طاكسي ؟؟

- شريهان (ضارت عندها ) :

واخا ..

- علي : أجي لهنا عندك بعدا فلوس الطاكسي ؟

- شريهان :

لا عندي ، عطاني عمر شيحاجة باش نقضي ... يلاه بسلامة ، والى جا ݣوليه راه تسناتك حتى عيات ومشات ..

- علي : واخا ..

- خرجات شريهان هي وسكينة بزوج ... وحدة مكتهضر مع الثانية ، حتى وصلو لراس ديال الشارع ..

- سكينة : انا كناخود طاكسي من هنا ..

- شريهان :

واخا شكرا ... خلاتها سكينة واقفة تم وبعدات عليها واحد المسافة صغيرة شوية او وقفات ...

- شريهان (بقات واقفة كتسنى علا وعسى يدوز شي طاكسي ومزال مداز حتى طاكسي ) ... كتشوف يمين وشمال او والو ... رجعات بلور مسندة واحد الپوطو ، هازة تيليفون فيديها كتقلب فيه ... حتى كتسمع صوت بحال مدابزة ... هزات راسها للجهة لي جاي منها الصوت ... كتبان ليها كوموبيل كحلة واقفة ، وجوج ديال الرجال واقفين على سكينة ... كيحاولو يهضرو معاها ويتبسلو عليها ... بقات حاضياهم بنص عين ..

- شريهان (كتهضر مع راسها ) :

دخلي سوق راسك اشريهان ، دخلي سوق راسك ... براكة من الفضول ، خلي بغا يموت يموت انت مالك ، اش ربحتي من الفضول ودخول فشبوقات الناس .. درات راسها كتحاول تميك ... ولكن ماقدراتش منين سمعات صوت سكينة كتغوت معاهم ، ضورات راسها كيبانو ليها كيجرو فسكينة باغيين يدخلوها بزز لطوموبيل ... ماحساتش براسها حتى تمات غادية كتجري وتغوت ...

- شريهان :

- ايه ايه اش كاين أش كاين ... ضارت للوال من اللور نقزات ليه على ظهرو شداه من شعكاكتو كتدي فيه وتجيب ... نقزات ليه على ودنو عضاتها ليه ... سكينة كضارب مع لاخور ، وغواتهم واصل لفين ... شد لاخور شريهان جرها من يدها نزلها لاحها تحتو ، هز يدو نزل عليها لحنكها ، بطرشة خلات دم يخرج من فمها ، ضربها بالبونية لجهة عينيها ..

- هزات رجليها دفعاتو جهة كرشو وقفات ، جرات سكادو ديالها ، بداتو كضربو بيه ضربة فيها ضربة فيه ... سكينة كضرب فلاخور نتفاتو ... شريهان ضربة فلاخور ضربة فيها ... غواتهم كيتسمع ... جا واحد فسرباية لي معاهم كيجري عند علي ...

- كيلهت :

موسيو علي ، شيري وسوكي كي كيضرابو ..

- علي (وقف مغوبش) :

كيفاش ومعامن فين ؟

- فراس الشارع مع زوج درجال ..

- دفعو علي خارج من القهوة كيجري ... كتبان ليه المضاربة ...

- علي ( كيغوت ) :

إيه إيه ... غير شافوه دوك زوج دفعو البنات ، ركبو فطوموبيلتهم بزربة كسيراو وهربو ..

_______________

فالمديرية ديال الأمن ... فالبيرو ديال مصطفى تدق الباب وتحل ... دخلات بنت ف 24 من عمرها .. لابسة سيفيل عطات التحية لمصطفى وݣلسات :

شاف بغيتيني ..

- مصطفى : خولة لاباس ، والفتي شوية ؟

- خولة : الحمد لله بيخير أسيدي ..

- مصطفى :

مزيان ( حل المجر وجبد واحد الملف أحمر حطو ليها قدامها) :

- قرايه .. شافت فيه بإستفهام هزات الملف حلاتو ، وبدات كتبرا فكل حرف فيه ..

وقفات طوموبيلت عمر قدام القهوة ... نزل منها زربان ومغوبش ... دخل للقهوة وقف كيشوف فعلي ، لي ملامح وجهو حتى هو بحالو ، ضور وجهو لفين ݣالسة شريهان ، هز حجبانو من الصدمة ... شعرها كلو مشعكك السفنجة لي كانت دايرة لشعرها تفتحات ... عينها زرقة ، جنب فمها حتى هو مجروح وزرق ..

- عمر (تحت تأتير الصدمة ) :

شكون دار ليك هاد الحالة ؟ شنو واقع هنا ؟(كيشوف فسكينة لي شعرها حتى هي بحالو بحال شريهان ، طالع لسما كيطلب الشرع ..

علي :

والو اخويا واااالو ، ماݣلتيش ليا بلي عندكم بروسلي فدار ... بنت عمك أسيدي ترايشات مع جوج درجال ضربة فيه وحدة فيهم ...

- شريهان (كتشوف فيه بنص عين ) :

مالك على زعت المقلي ، اراجل واحد وتاني ريشاتو سكينة ..

- علي (كيشوف فيها مامتيقش ودنيه مزال مخرحة عينيها ) :

لا واش من نيتك ؟

عمر (كيشوف فيها ) :

كيفاش شرحوليا اش واقع ؟ علاش حتى دابزتي او وصلتي لهاد الحالة ..

- علي :

سخونية الراس هادي، عند بالها اتغلب زوج درجال ..

- شريهان (وقفات كتشوف فيه عينيها مكايبشروش بالخير ) :

اولا وقبل كل شيء مادابزناش عندك فالقهوة ، ها واحد ثانيا جوج كانو كيتبسلو على البنت فزنقة ، وباغيين يدخلوها لطوموبيل ... فنظرك شنو ندير نجبد تيليفوني ونصورهم ونبقى نتفرج ، ونحطهم فالانترنت ونكتب شاهد قبل الحدف ، حتى يوقع لي يوقع ... سمح ليا اخويا انا عندي شن طن ... ياربحة يا دبحة ، ندافع عليها ومولاها ربي ، ماشي غير حيت انا بنت نبقى ساكتة انا ماشي بحال داك رعواني لي وصل ليك الخبار ، طون كان سيدي ومولاي كون جا يدافع علينا ماشي وصلها ليك ...

- علي (بقا اكيشوف فيها ، شافت فعمر) :

سمع على ودنيك ..

- شريهان (شافت فعمر ) :

اه سمع على ودنيك ، نزيدك والله وكونما ركبو فطوموبيل ، يا كنت انطير ليه الودن الثانية ديك العضة لي عطيتو لقرفادة ولودن مارداتش ليا الغدايد كان خاص نطيرها ليه ..

- علي (كيخنزر فيها ) :

أنت هي دراكولا ... مصاصة الدماء انت زوينة هادي ، هوما هربو منكم كلاوها فعظامهم ومزال باغية طيري ليه الودن ..

- شريهان :

علي ماطلعش ليا جنية لسطح لا نطير ليك انت الودن لوخرا ، والى بغيتي تجري عليا اجري عليا هانياتون .. زوينة هادي واحدة كيتبسلو عليها ويجرو فيها باغيين يديوها معاهم بزز نتفرج فيها انا أي(خسرات سيفتها شدات على كرشها من ضربة لي تضربات) ..

- علي (قرب ليها مرجعها على الكرسي) :

هنينا وݣلسي للأرض ، عمري شفت شي وحدة بحالك ..

- تسمع صوت الضحك ، هز راسهم كيبان ليهم عمر كيضحك ..

- علي (خسر سيفتو) :

أخويا ضحك ضحك انت لي جات معاك .. واش بعقلك عرفتي ويقراوها فيهم حسيفة برب العالي الى قو...ها ...

- شريهان :

ماخلعونا حتى شخوصا بقى غير دحوشة ... كون كانو شي رج...ال والله مايهربو بحال الفيران ...

- علي (خنزر فيها داير صبعو على فمو) :

انت مانسمعش حسك ، شفتي انت خاص انا لي نتوالاك ..

- شريهان (شافن فعمر عيطات ليه بيديها جا عندها) :

هاد صاحبك واش سوية لباس ؟ عرفني البارح بغا يتحكم فيا ولا كيفاش ؟!!

- عمر :

هو هكاك اي مغربي ، خصوصا الى كانت بنت كيحس بنداء الوطن والواجب من جهتها ..

- شريهان (بعياء) :

أنا ديني الدار اخويا عييت ..(شافت فعلي) وقيلة صافي اتجري عليا ؟

- علي (كيشوف فيها بنص عين) :

انت ما بزوج ، لا انت لا هاد السيمانة بلاما تجيو حتى لثنين ، يلاه تبراو شوف وجهكم كيف داير ... منبغيش ترجعو ليا لخدمة وسيكاتريس على كمامركم ... يݣولو مخدم القطاطعيات عندو ..

- شريهان (تنهدات ) :

لاحول ولا قوة إلا بالله العلي العظيم ... وقفات كتمشى بشوية .. وقفات عند سكينة لي ساكتة دايرة يدها على حنكها لمضروب ..

يلاه نوصلوك ، الليل هدا ومشا الحال ..

- سكينة (حدرات راسها) :

اختي أنشد طاكسي ، براكة غير المشكل لي طيحتك فيه شوف كيف وليتي بسبابي ..

- شريهان (شافت قدامها ، بحال الى ماسمعاتهاش) :

أنتسناو فطوموبيل ، متعطليش علينا ... خرجات هي وعمر سابقينها ، شافت حتى عيات هزات ساكها وتبعاتهم ، راكبة اللور ... ديمارا عمر وشد طريق ديال دار سكينة ..

المغرب

- خولة (فرحانة ... حيت تعطاتها اول مهمة من بعد تعيين ديالها ) :

كون هاني اسيدي، مغاديش نخيبك وغادي نكون عند حسن ظنك ..

- مصطفى (بجدية ) :

منبغيش الغلط ... بغيت الخدمة تكون مضبوطة ، منعم غادي يزود بجميع المعلومات لي غادي تحتاجي ، (حل المجر جبد منو سامسونيط ) خودي ... خدات سامسونيط حلاتها ، كانو فيها حلاقات ديال النقرة ، فيهم حجرة كحلة ... وبانضة ديال الشعر ..

- مصطفى :

هادوك الحلقات غادي ديريهم ، فيهم كاميرة صغيرة مايمكنش تشاف بالعين المجردة ... هكا انقدو نشوفو ݣاع داكشي لي كيوقع ... اما ديك البانضة ديال الشعر ، فيها ميكرو صغييير لداخل ... وهكا مغاديش تحتاجي باش تهضري معانا فتيليفون ونعرفو لي واقع ، حيت انكونو كنريسكيو ... خاصك تعرفي بلي نادية الصويرية مرا لي دكية بزاف ، وضروري مغاتكون دايرة الإحتياط ديالها ..

- خولة (اشرات براسها بالإيجاب ) ..

- مصطفى :

خاصك تعرفي كيفاش تكسبيها ، وتربحيها لصفك ... خاص تخليها تيق فيك ، وهادشي ساهل ... هو ديري بلاصتك وتبقاي توصلي ليها الأخبار لي كيوقعو فصالون ..

- خولة (بإستفهام) :

ولكن كيفاش انوصل ليها الاخبار ، وهي أصلا كاينة فصالون ؟

- مصطفى (وقف ، ݣلس على طرف البيرو كيلعب بستيلو) :

اول حاجة خاص تعرفيها ، هو نادية عندها بزاف ديال الصالونات ، ومن سابع المستحيلات تخدمك فصالون ديالها الرسمي ، اتخدمك فواحد من صالوناتها ، وكاي خدمة كاين لي كيبغي الباطرون وكاين لي كيبغي يپروفيتي ويضرب هنا وهنا ... هادشي باش كنݣوليك خدمي عقلك ، المهم هادشي من بعد ونتفاهمو عليه ، المهم دابا هو اتمشي لهاد العنوان (عطاها ورقة فيها عنوان مقيد )

- خولة : ديالاش هاد العنوان(هزات عينيها فيه بتساؤل)

- مصطفى (رجع لبلاصتو) :

هاد القهوة اتمشي ليها ، وأتكولي ليهم انا من طرف حكيم ... وغادي يخدموك سرباية تم ..

- خولة (مافهمات والو) :

سرباية !! كيفاش سرباية اسيدي وعلاش ؟

- مصطفى : واخا أنا غادي نݣوليك علاش ..

__________________

- وصل عمر سكينة حتى لقدام باب العمارة ..

- سكينة (قبل لا تنزل) :

شريهان شكرا بزاف على كولشي ، عمري مغادي نسا ليك خيرك فحياتي ... عمر شي واحد مدافع عليا من نهار حطيت رجلي فالغربة ، شكرا بزااف ... ݣالت هاد جوج كلمات ونزلات ... ماتسناتش شريهان تجاوبها ..

- عمر (كيشوف فشريهان) :

شنو واقع طريق كاملها وانت مامسوقاش للبنت مكتهضريش معاها ..؟؟

- شريهان (حاضية طريق ... كتحس بألالام فكرشها) :

علاش شنو بيني وبينها باش نحمع معاها ، ولا نشد معاها الحتيت .. بيناتنا غير الخدمة صافي ..

- عمر :

غير خدمة وكليتي على قبلها العصا ..

- شريهان :

عادي كنت اندير نفس شي مع اي بنت تحطات فنفس الموقف ..

- عمر :

انا عند بالي تعارفتو فالخدمة وتصاحبتو ..

- شريهان (دورات راسها عندو كتشوف فيه ، عينيها فيهم واحد اللمعة ديال الحسرة ) :

انا ماعندي صحابات ومغاديش يكونو عندي ، الصاحبة لي كنت دايرة وكنت نعاود ليها أسراري ونأمنها عليهم ، ودخلتها لدارنا كلات ماكلتنا ... نعسات ففراشي لبسات حوايجي ، نهار الأخر باعتني بجوج دريال ... الصحبة مابقاتش ماتت صافي ... وفهاد الزمان خاصك تعرف معامن كتحط الراس ، البنت لي تشوف فراجل صاحبتها وتبغي دور بيه ، ولبنت لي تبيع صاحبتها وتحفر ليها ... هاديك للفعة والى ماسمح ليها الله ماعندها فين تروح ، اللهم 100 صاحب دري ... ولا صاحبة بنت ..

- عمر :

انا ماعارفش مناش دزتي ، ولا شنو وقع ليك مع صاحبتك لي كتݣولي ... ولكن راه الناس حجر وطوب ، وأبسط مثال انت واش تقدري تغدري ؟

- شريهان (ملامح وجها تبدلو للعدم تصديق) :

أنا بطبيعة الحال لا ، واخا ماعرفت شنو يوقع ..

- عمر :

ايوا الالة راه لي خلقك ماخلقش غيرك ، راه كاين بنات بحالك ... متجمعيش كولشي ، غير هو نعرف كيفاش نتعامل ومعامن نتعامل ... وماشي من الاول نعطي سري ... والمواقف هوما لي ايبينو ليك ، وانا نحلف عليها هاد خيتي لي دارتها بيك ... عمرها بينات ليك بلي كتبغيك وبلي انت صاحبتها ودارت على قبلك شيحاجة ..

- شريهان سكتات ، كتسترجع دوك الأيام وفعلا عمر عندو الحق ، مريم عمرها دارت عليها شيحاجة ... ولا بينات ليها بلي كتبغيها ، حوايجها مكانتش كتبغي تخليهم ليها ، وديما كتحشي ليها الهضرة على قبل مروان ، غير شريهان لي مكلخة معاقتش بيها ، اما كان عليها توقف الصحبة معاها شحال هادي ، قبل مايوقع لي يوقع ... تبسمات حيت فعلا طلعات هبيلة ماعندها العقل ، لي من زمان ماحبساتش مريم ونهات الصداقة بيناتهم ..

فالڤيلا ... كولشي مجموع حتى من مالك ..

- مـالك (موجه كلامو لجميلة) :

طلعيها لبيتها عفاك بدلي ليها ، وخشيها فبلاصتها ..

جميلة (بإبتسامة) :

كون هاني ، انخشيها فبلاصتها ... ونقرا ليها قصة ومنخرج من عندها حتى نعس ..

- مالك :

شكرا ..

- زهرة (بخوف) :

أويلي وبزااف ، وعمرها وقعات ... 9 ونص هادي مالفين 8:15 ولا 8:30 كيكونو هنا ... ولاواه هادشي بزااف ..

- أحمد (رجع تيليفون لي كان فيديه) :

عمر تيليفونو طافي ..

- نزهة (بخوف) :

مالك شوف خوك وبنت عمك فين كاينين ... ولا نمشيو حنا لهاد القهوة نشوفو شنو واقع ..

- مالك (بصرامة) :

ماعندك فين تمشي ، شوية الى مجاو غادي نمشي انا .. تحل الباب ودخل سعد هاز سكادو على ظهرو ..

- سعد (بمرح) :

هالوو ، هاهيا جات شكون توحشها ..

- أحمد (شد على راسو ، شاف فمرتو) :

فكريني نجيب شي أستاذ فدارجة لهدا ... راه شي نهار ايجلطني ..

- زهرة : انا اخويا انجبدو ليك اكون هاني ، نشوفو شنو واقع او ولا عاليك ..

- سعد (باستفهام) :

أش واقع؟ كيبان ليا حتى واحد ماتوحشني ..

- نزهة : توحشناك اولدي ، غير خوك عمر وشريهان تعطلو ومزال مدخلو (عاودات ليه) ..

- سعد : انا عندي نميرو ديال ألي لي فالكافي ، اطو انا نسونيليه ... يلاه جبد تيليفون تسمع صوت الباب تحل ..

- نزهة (وقفات) :

وقيلة هوما هادو لي جاو ... دخل عمر هو الأول ..

- أحمد (رتاح) : الله اولدي اش هاد تعطيلة ، كنسوني ليك تيليفون طافي ..

- عمر : دبزولي طفا ليا تيليفون ... ومارضيتش البال ..

- زهرة (كتقلب بعينيها) :

فين هي شريهان ؟

- عمر (كيحك راسو ) :

هاهي جايا ... مالك رض ليه البال ولتصرفاتو لي ماهوماش ...

- نزهة وزهرة لي شهقو منين شافو شريهان داخلة ... زهرة والخلعة قاتلاها ناضت بزربة عند بنتها ، أحمد وقف مالك مغوبش مافهم والو ..

- زهرة (كتقلب فيها) :

اويلي اويلي ، اش هادشي مالك أش واقع ؟

- شريهان (مع مها شدات على وجها تألمات ) :

احح بشوية اماما ضريتيني ..

- نزهة : اش واقع واش طحتي ولا شنو ؟

أحمد : هادي ماشي حالة شي حد طايح ، شنو واقع ابنتي شي واحد فيكم يشرح لينا خلاص ..

- عمر (وقفهم كاملين) :

دابزات ..

- ضارو عندو من بعدما ݣلسات شريهان كتستراح) :

كيفاش دابزات ومعامن ؟

- زهرة (شاف فيها باغية تغززها) :

واش انت باغية تحمقيني وتجيبي ليا النقطة ... واش مكتعرفيش تشدي تيقارك ودخلي سوق راسك ... واش مكتعلميش من داكشي لي وقع ليك ..

- شريهان (شافت فيها ) :

البنت واقفين عليها زوج بغاو يتعداو عليها وبغاو يركبوها بزز فطوموبيل ، نوقف مندير والو ونبقى نتفرج فيها ولاواه واخا يبقى فيا عرق واحد ..

- مالـك (بصرامة) :

وانت أصلا اش خرجك لشارع؟

- شريهان (كتخنزر فيه) :

زيد زيد حرق نوادر انت ، اصلا هي طافية زيد شعلها ، راه عمر تعطل عليا وانا عييت كنتسنى فيه ، خرجت نشد طاكسي ، سكينة البنت لي معايا حتى هي خرجات من الخدمة فداك الوقت ... وهي لي وراتني منين ناخود طاكسي ، هي بعدات وانا بقيت واقفة ، كنسمع خواتها وزوج محاميين بغاو يتعداو عليها ويركبوها بزز معاهم ، نݣلس نتفرج فيهم لا ...

- سعد (مد ليها يدو) :

بصحتك اشيري ... ماعندي مايسالك ..

- شريهان (كضحك) :

ياك بعدا ، اودي راه انت لي كتفهمتي فهاد الدار (تقصحاش فاش ضحكات) ..

- مـالـك :

ضربوك ؟

- شريهان :

لا غير دارو ليا شي رتوشوت لوجهي ، بغاو يرضوني بحال هيفاء ماجيك ... وراه باينة ولكن ماشي شيحاجة ، غير نزل عليا لكرشي بواحد الروشي ، وفمي وعيني صافي ..

- مـالـك (تنيرڤا) :

مامات غير خرجو مصارنو ، واش انت مريضة ولا مالك ؟

- شريهان :

لا مالك هو انت اما انا شيري ، شوف راه واخا هكاك نزل على بوه لودن عضيتها ليه ، ونزلت عليه لواحد القرفادة عندو ديال المروزية طيراتها ليه ...

- زهرة (شدات راسها) :

ياربي ياربي أش درت فحياتي ياربي ، وياربي مال هاد البنت مكدخلش سوق راسها ، وهي ربي مغاتمشي هاد البنت حتى شي نهار تلوح راسها فشي زوبية ... يلاه كنݣولو تهنينا من البلاوي حتى كتلوحنا فيهم ..

- شريهان :

دابا أنا اش درت ؟

- زهرة (وقفات من نواح كتشوف فيها وساكتة) :

أش درتي ، ودار لك ودار لك أبنت الهم من فعلك ، واش داك تخرجي من القهوة ... واش داك تخرجي لشي شارع ..

- شريهان (كطل على مالك من تحت يدين زهرة ) :

فرحان احراݣ نوادر ..

- زهرة :

أنت مزال زايدة فيه ... نزلات عليها كتقرصها من جنابها ...) ..

- شريهان (كتغوت ربي لي خلقها ماحيلتها لعصى لي واكلة ولا قريص زهرة ...

- عمر كيفك مالك جرها من تحت زهرة خشاها وراه ...

- أحمد :

زهرة نعلي شيطان هداي على البنت ، وزايدون مدارت حتى حاجة عيب ، دافعات على البنت واي واحد بلاصتها أيظير نفس الشي ..

- شريهان (كطل براسها ورا ظهر مالك شادة ليه فظهرو) :

سمعتيه (هزات راسها فمالك ) أجي أشمن ريحة دير واعرة ...

- مالك (مغوبش) :

واش انت متيقنة عمرك طحتي على راسك ؟

- شريهان :

على حد علمي لا عمرني ..

- مالك (بجدية ) :

ماعقلاش على هادو لي دارو فيك هاد الحالة ؟

- شريهان :

الى شفتهم نعرفهم ..

- مالك (حط يدو لي كانت باردة على وجها ، كيقلب فيه ) :

خاصك داوي هاد الجرح ... قبل سيري طلعي بدلي هاد الحالة ، باش نداويو ليك وجهك وكرشك ..

- شريهان (هازة حجبانها كتشوف فيه بإستغراب) :

انت داويني انا ؟ سبحان الله ..

- زهرة (نباتها ) :

ديري لي كيݣوليك ولد عمك ... راه بحالو بحال مصطفى كوني تسنطي ، براكة من قصوحية الراس والمصايب ..

- مالك (بإستفزاز) :

سمعتيها ياك ؟ وبلاما نعاود هضرتي جوج مرات ... عندك 10 دقايق نلقاك عندي ..

- شريهان (مامالفاش لي يتحكم فيها ويعطيها الأوامر) :

كـيفاش ؟

- مالك(ببرود مامسوقش) :

بقات 9 دقايق ..

- المغرب

- مصطفى :

القهوة لي عطيتك لادريس ديالها ، هي الكافي لي كتكون فيها نادية ... أغلبية الوقت كتكون تم ..

- خولة (تبسمات ) :

صافي فهمتك ..

- مصطفى (رجع بالكرسي لةر حاضيها) :

كنت عارف بلي غادي تفهمي ... دابا اتبيني ليا علاش قادة ، ماشي غير انا ݣاع لي هنا ... بينو ليهم حنة يديك وشنو ممكن ديري ..

- خولة (وقفات عطاتو التحية) :

كون هاني ، غادي ندي معايا الملف لدار ، باش هكا ندرسو مزيان ..

- مصطفى (عطاها إشارة بيدو) ؛:

خودي راحتك ، خرجات من عندو ... هز الطاس دالقعوة رشف منو داكشي لي بقى ورجع يكمل خدمتو ...

_____________

- شريهان (مغمضة عينيها كتعݣر) :

ناري بشوية عفاك ، ضريتيني وهاد ليد لاش حاجها على وجهي ، راه غيرما كتزيد تضرني ..

- مالك (يد ساد ليها بيها وجها ويدها كيداوي ليها جنب فمها ) :

مكتعرفيش تسدي داك الفم لي عندك لا ؟ ضروري تبقاي تبرولي ..

- شريهان :

واش أنت ضارني وبغيتيني نسكت ..

- مالك ( بعد عليها مغوبش) :

صافي سالينا ، غادي يجيبو ليك ماكلتك لهنا ، انت غير رتاحي ..

- شريهان (بغات تنزل من نموسيتها) :

لا اويلي مالي محنية(مزال كاعما سلات كلامها) ..

مالك ( بصرامة ) :

قسما برب العالي ، وتنزلي غادي تشوفي الأخر معايا ..

- شريهان (كتشوف فيه بعدم تصديق) :

شفتك بحال الى زعمتي عليا ..

- مالك (بإستفزاز) :

نزعم عليك وعلى عشرة غيرك ، فاش كنتي صغيرة كنتي كتاكلي قتلة مني ... كيبان ليا توحشتي العصا ؟؟

- شريهان (مخرجة فيه عينيها) :

وحموسك حموسك قرب ليا ..

- مالك (كيضحك) :

حموسي ، مزال مانسيتيش هاد حموسك ؟

- شريهان (بإستفهام ) :

- علاش انا كنت كنݣولها ؟ ماعقلتش !!

- مالك (مفيكسي عينيه عليها ، رموشو دايرين الظل على عينيه من الداخل) :

سي ، كنتي كتݣوليها غير داك الوقت كنتي محيدة ليها حرف الميم (رجع للجدية وصرامة) بقاي هنا ورتاحي ، وخلي الما السخون على كرشك ... أيجيبو ليك العشا لهنا ، تعشاي ونعسي ... ومنسمعش حسك براكة المصيبة لي درتي .

ماخلاش ليها الفرصة فين تجاوب ، خرج وسد الباب بجهد ..

- شريهان (كتهضر مع راسها) :

لالا بزاف هادشي ، وحكام بو ح/م/ا/ر/...ة هذا ... لا لا زعم عليا بزاف بقا ليه ايضربني زوينة هادي ...(تعݣرات) اييي ،، عيييت نيت مافيا لي ينزل ناكول ونضربها بنعسة (تقدات فبلاصتها) الله ياربي على راحة اممم ..

- فبلاصة أخرى ... وفنفس الشومبر والأوطيل ، لي شهدات على ليلة زوينة بنسبة ليها عمرها تنساها ... واقفة وشانطة حداها ، ضارت عندو كتشوف فيه ...

- غدا عندي الطيارة ، خاصنا نبعدو على بعضياتنا ... مابغيتش الانظار تاجه لينا ... وانا عارفة ومتيقنة من ورا هادشي لي وقع بيناتنا ، مغاديش نقد نتجاهلك ..

- (تبسم) :

شنو زعمة ، بغيتي يكون هدا هو اخر عمل بيناتنا ؟

- (بلعات ريقها وتنهدات) :

أه بحال هكاك ..

- (ضحك او وقف ، شعل سيجارة ، خدا نفس طويل منها ونفخ دخانها لي خطا ليه وجهو ، مابقاوش كيبانو ملامحو ولا نظراتو ليها ) :

داكوغ ، أنا موافق ... أنا غادي نبعد على طريقك بحال الى عمري عرفتك ، وبحال الى عمرنا دوزنا ديك الليلة بزوج ... واخا متأكد بلي انت لي عمرك اتنسايها ، (قرب منها حاط يدو على وجهو) كيما متأكد بلي عمرك مغادي تنساي لمساتي ليك ، (قرب من ودنها) ولا اهاتي وحتى قبلاتي(طبع قبلات خفاف على عنقها ، مخلي قلبها يضرب بجهد ... مخليها تفقد السيطرة من جديد على داتها ومشاعرها ) ... انا غادي نبعد ولكن انا متيقن بلي اترجعي تقلبي عليا ... وانا منين كنݣول الحاجة هي لي كتكون (حط شفايفو على شفايها ... وبحال اول ليلة ليهم سلمات راسها ليه من جديد ...

___________________

فصباح ديال الجمعة ، فاق أحمد بكري ... فطر هو الأول وخرج مع الشيفور فتجاه الفيرما ...

من بعد ساعة ديال المݣانة ، فاق كولشي وتجمعو على الطبلة ديال الفطور ، من غير سعد وشريهان لي مزال مانزلوش ..

- فبيت شريهان من وراما غسلات حالتها ، لبسات سروال ديال الكيطة مع قبية ... جمعات شعرها يلاه بغات تنزل حتى تحل الباب على غفلة ودخل منو سعد ..

- شريهان (تخلعات) :

واش مكتعرفش دق فالباب ؟

- سعد (خسر سيفتو) :

أوووه ديزولي ، بونجوغ يازيانت العالم ..

- شريهان (جراتو من دراعو) :

اسمها زين ديال العالم ... انت هاد اللسان مغاديش تصلحو ، خاصني نتولاك ..

- سعد (كيضحك) :

شويه قليه ديري فيه لي بيتي ...

- شريهان (ضحكتها وصلات للتحت) :

شكون هدا لي انشويه ونقليه ؟

- سعد (مطلع حجبانو) :

أنا بيان سيييغ .. وصلو لطبلة شادين فبعضياتهم وكيضحكو ..

- سعد : وجهك ولا زين ، وليتي سلعة مليحة ( كيضحك) ..

- شريهان (ضرباتو لكتفو وشافت فلوخرين ) :

صباح الخير ..

- الكل : صباح النور ..

- شريهان (تحنات على ياسمين لي كانت كتشوف فيها) :

بونجوغ الفنون ..

- ياسمين : بونزوغ ..

- شريهان (كتشوف فبلاصة عمها خاوية ) :

فين هو عمي ؟

- نزهة :

خرج للفيرما أبنتي ، غدا إن شاء الله كلنا انمشي للفيرما ..

- مالك (بإستفهام) :

وعلاش ؟

- نزهة :

باك باغي يدير واحد الصدقة على عمك وجدودك الله يرحمهم ... باغي يدبح 3 ديال الحوالة ... جوج ايوهبهم للخيرية ، او واحد اندبحوه حنا ونتجمعو عليه ..

- عمر :

صراحة أحسن حاجة غادي يديرها ، ونيت نتجمعو ... العيد مكايدوزش عندنا مزيان واخا هكاك ... منين كتكون فالغربة بوحدك مكايكونوش الأجواء هوما هادوك ..

- شريهان (شافت فيه وبإبتسامة ديال الشر على وجها) :

ايوا دابا واخا العيد مكاين ، ادوز واحد نهار عمرك تنساه فحياتك ...

- الـمغرب ..

- خرجات من الشقة لي ساكنة فيها ... هازة باليزة صغيرة فيها حوايجها ، شيرات لطاكسي ركبات ودارت باليزتها حداها ... شوية سونا تيليفونها فتحات الخط وجاوبات :

وي سيدي ؟

- مصطفى :

خرجتي من دارك ؟

- خولة :

وي سيدي ، خرجت وانا غادية للعنوان لي عطيتيني ..

- مصطفى :

مزيان ماعندي مانتسالك ، من دين تأنسطلاي ، اتاخدي طاكسي وتهبطي للقهوة لي عطيتك لادريس ديالها داكوغ ، وماتنسايش الحوايج لي خاصك تلبسي ..

- خولة :

لا كون هاني أسيدي ... بنسبة للحويج راه خديت لي غادي يخصني ..

- مصطفى :

مزيان ، أيكون هدا هو اخر إتصال بيناتنا ، التيليفون ديالك ايجي منعم ويديه ، ماتعرفي تبغي تقلب وراك ، وتخليك حتى تخرجي وتقد دخل للدار بسهولة ، تسيفط أي شمكار من شماكرية ديالها .. ينقز لدار يقلب ويلقى تيليفون عندك ... وانت عارفة من سابع المستحيلات وحدة ماعندها متاكل ، وساكنة فبراكة عندها أيفون ولالا ؟؟

- خولة (ضحكات ) :

اه عندك الحق أسيدي ..

- مصطفى :

السيد لي ايعطيك الساروت ... ايعطيك تيليفون صغير مع واحد الكارطة ، هادوك هوما لي غادي يوليو ديالك فهاد الأيام ..

- خولة : واخا صافي ..

- مصطفى :

يلاه الله يعاونك ...

- خولة : أمين ..

قطعات مع مصطفى التيليفون ، وصلها الطاكسي للادريس لي عطاتو ... وقفها غير حدا شي برارك .. نزلات واقفة كتشوف يمين وشمال ، حتى جا عندها واحد كيبان فيه بحال شي بزناز ...

- السلام عليكم اختي ،، انت هي ربيعة لي من طرف سي مصطفى ؟

- خولة (بحدر) :

اه أخويا انا هي ربيعة ..

- (مد ليها يدو) انا طارق وكيعيطو ليا بو ناب ... عرفتي والله العظيم الى سي مصطفى مقطر ليا من العين ... حصلني واحد نهار هاز طريفة ومتشدنيش مسكين ، مع عارف انا لي كنصرف على الوليدة ... من تم يطلب حياتي نعطيها ليه ..

- خولة :

الله يحسن العوان أخويا ..

- طارق :

- أجي معايا أختي نوريك دوريتك ، واخا ماشي شيحاجة ، ولكن اللهم بنادم يضرݣ على البرد ولا زنقة ...

- خولة : داكشي لي كاين أخويا (تابعاه ) ... حتى وصلو قدام واحد الدار غير السيما ، وسقفها ديال القزدير وقف قدام الباب ، جبد الساروت من جيبو مدو ليها ..

- هاكي اختي ها ساروت ... والى بغيتي أي حاجة أختي ربيعة خوك طارق فدمة ... هانتي عنداك لي خصك سولي على دار يجيبو حتا لعند الواليدة ، دخلي الى مكنتش حتى نجي ..

- خولة : ربي يـخليك أخويا ... مشا طارق وبقات خولة واقفة ، يلاه اتحل الباب .. وهو يخرج منعم من جنب البراكة ..

- خولة (شدات على قلبها) :

خلعتيني ، من إيمتا وانت هنا ؟

- منعم (كيطنز) :

منين كان كيݣوليك داك سپاكلاو ، ولي خصاتك اختي ربيعة خوك طارق فدمة ..

- خولة : باااز ..

- منعم (مد ليها يدو) :

تيليــفونك .. مدات ليه تيليفونها ، ومد ليها تيليفون عادي ..

- منعم :

راه فيه الكارطة ، ومشارجي من الفوق ، في حالة بغيتي تبقاي تقمري النوامر وتشدي جماعة بليل ، مع اتحرمي من الواتساب والأنستغرام الله يحسن عوانك ..

- خولة (مجاوباتوش غير كتخنزر فيه حتى مشا) ..

تفو على بنادم كيف داير ..

- ݣالسة فجردة مجبدة رجليها فوق الفوطوي .. حداها سعد شاد طابليت ديالو كيتكونكطا مع صحابو ..

- وقف عليهم عمر :

(بجدية ) :

شفتك بحال الى عجباتك الݣلسة ... واش مناويش تمشي معايا للخدمة ؟

- سعد (خسر سيفتو) :

والله مافيا ، صافي خليني عفاك مونس شيري ..

- شريهان :

بلاما دير العدر بيا أنا ... نوض سير لخدمتك راه هي لي غادي دوم ليك ... زوينة هادي مونس شيري ..

- عمر (بصرامة) :

يجي الواليد وغادي ندوي معاه ، هادشي لي كدير فيه راه ماهواش ... انا دابا غادي مغاديش نتعطل على الخدمة بمسبتك ، ولكن نجي عندنا هضرة أخرى ... مشا عمر معصب .. معاجبوش الحال ولا عاجبو الفشوش ديال سعد ..

- شريهان (بجدية ) :

مكتشوفش راسك معيق شوية ، ماشي غير طحتي فعائلة لاباس عليها تبقى فنيان ... وعاطيها غير لبسالة ولضحك وتضياع الوقت ، عمي راه دار فلوسو براسو معاونو حتى واحد ... راه غادي وكتكبر وانت هو انت ..

- سعد (حط طابليت كيشوف فشريهان ماعجبوش الحال) :

حتى انت اتكون بحالهم ، بييييزاغ خاصك تكوني كووول شيري انت مزال صغير ... تمتع بالحياة ضحك سهر نشط ..

- شريهان (تقادات فالݣلسة ) :

ونوووض جمع راسك ... براكة من ضحك ماشتيش الى شي نهار جا لعمي سيزي ، ماسولتيش راسك شنو ممكن دير ديك الساعات ... خاصك تخدم وتبني مستقبلك راسك ، ماتبقاش معول على والديك فيق شوية من الݣلبة ...

- سعد بقا ساكت كيفكر فهضرتها ... يلاه ايجاوبها قاطعهم مالك ... لي خارج ومعاه ياسمين .. طلقات من يدو ومشات ݣلسات حدا شريهان كتشوف ليها فعينيها ، مكتهضرش غير كتشوف ليها فعينيها ...

- مالك : كيبان بلي بلي عجبتيها ...

- شريهان (جراتها عندها عنقاتها) :

حتى هي عجباتني ... قاطعهم صوت أنثوي ماغريبش ..

- كارولين :

حبيبي ... ضار مالك عندها معنقها ..

- سعد (ماعجبوش الحال) :

سبحنا على الله تاني اوووف ...

- شريهان (خنزرات فيه) :

هنينا ..

- كارولين (بدلع) :

توحشتك بزاف احبيبي ، غير جيت من السفر اول واحد بغيت نشوفو هو أنت (طلات براسها على لوخرين) بونجوغ سعد صاڤا ، بونجوغ شيغي اوووه شكون هاد البنت... بب ماقلتيش ليا بلي شيري عندها بنت (شافت فشريهان)... شيري انت ديجا ماغيي ..

- شريهان (كضحك ليها ضحكة صفرة) :

لا ازين ماشي بنتي بنت خطيبك ..

- كارولين (بصدمة) :

كيـفاش ؟

شريهان :

كيف المشماش لي طاب وماحلاش ومشا لسوق وماتباعش وداوه لدار وماتكالش ، هدا هو البلان بنت خطيبك شرح ليها شكون هاد البنت ، وهي دغية لبسات ليا التهمة ... شي يديرها وشي يحصل فيها ..

- مالك (من تحت سنانو) :

مكاتعرفيش تسكتي شوية ...

- شريهان :

ومالي انا نسمع فحطان الباطر ونسكت ، زوينة هادي تاني ...

- كارولين (مصدومة كتشوف فمالك ) :

مالك ك ك كيفاش بنتك ، انت ديجا مزوج ؟ عمرك ݣلتيلي بلي عندك بنت ... شنو كنسمع ، واش هادشي لي كتݣول بصح ؟

- مالك :

لا حبيبي ماشي بصح ، هي بصح بحال بنتي ولكن ماشي بنتي ...

- كارولين (تنطرات منو) :

كيفاش ماشي بنتي وبحال بنتي ، وشكون هادي ..

- شريهان (دارت يديها على ودنين ياسمين باش ماتسمعش غواتهم ، بصرامة موجهة كلامها لكارولين) :

اولا وقبل كل شيء ، مكنغوتوش قدام دراري الصغار ، بغيتي تغوتي اختي راهي تيرا ݣدها ݣداش ، تاني حاجة هاد البنت اسمها ياسمين سمعتي ولالا (شافت فمالك) وانت يالي باغي تربي ياسمين وترد ليها البال ، كول لخطيبتك ماتغوتش على البنت والحماق هذا وخرجان العقل ...

- كارولين (طلعات صوتها) :

نهضر كيفما بغيت ، هادي دار راجلي داكوغ ، وانا مكايهمنيش سميتها قدما كايهمني شكون هي ...

- شريهان (موجها كلامها لسعد ) :

دي ياسمين لداخل اسعد .. خدا سعد ياسمين ودخلها .. وقفات شريهان قدام كارولين ..

- سمعيني مزيان وحلي ودنيك ... الى هادي دار راجلك فراها دار عمي ، واخر مرة تعلي صوتك على بنت صغيرة سمعتي ولالا ، تاني حاجة شوفي وجهي كيف داير شفتيه ، عرفتي علاش واقع ليا هكا حيت دابزت ومعامن مع زوج درجال ، يعني راه مغاتغلبنيش مونيكة بحالك ... حتارمتك على قبلو هو (أشرات بصبعها لمالك) حيت ولد عمي وكنحتارمو ... اما راه انعلمك الصواب وديريها فبالك .. ضربات فيهم ودخلات ..

- كارولين (كترعد شافت فمالك ) :

س سمعتيها ..

- مالك (مغوبش نظراتو باردة ، شد ليها يدها مزير عليها حتى وعتها) :

الى كنتي جايا غير باش تنوضي الصداع حسن ليك بلاش ماتجي ، واخر مرة تغوتي على بنت صغيرة اتبقى معانا 6 شهور هنا ، مفهوم ؟

- كارولين (عينيها كيترعدو) :

أنت شنو كتݣول ؟

___________________

المــغرب

مديرية الأمن

- منعم (دق ودخل) :

صباح النور ..

- مصطفى (شاف فيه ) :

صباح الخير ، أشمن خبار جايب معاك هاد المرة اكورومبو؟

- منعم :

مول الحانوت كاين على برا ..

- مصطفى (بإستغراب) :

ياك ݣلتي بلي كاليك ولدو مغايجيش دابا ؟

- منعم :

ماعرفتش ، المهم راهو على برا ، كاليك بلي ولدو كاليه بلي البوليس جاو وسولو عليه ... داكشي باش جا باش يدلي بأقوالوو ...

- مصطفى :

واخا خليه يدخل ، وممنوع يقاطعنا شي واحد واخا تكون انت ..

يتبع...