السيدة الأولى الجزء 18

- سعد (أشر ليهم لجهة البالكو) :

راهو فين شاد التيليفون وكيهضر ، متكون غير إشراق هادي نبصم عليها ..

- شريهان (كضحك) : العاااار ، والله حتى كنت عارفاها انا راه مايدوزهاش عليا نهائيا ..

- مالك :

كيبان ليا ولاد العائلة كلها غادي يتزوجو ، بقيتي غير انت اسي مصطفى ..

- مصطفى (كيشوف فيه ) :

شكون انا ؟ لالا مزال عليا الحال واحد الشوية ..

- شريهان (كتشوف فيه بنص عين ) :

ها ننك ها ننك ، ومعااااامن انت ... واش يحسابليك اديرها بيا اخويا اولد ميمتي وبا ، راه شريهان هادي وأجرك على الله ... وحتى منكون عايقة وفايقة وكنشوفك كيفاش كتشوف ، فشهبة مولات العوينات زورق ..

- مصطفى : شكون هادي ؟

- شريهان :

عيشة مولات المرجة ، بغلة القبور اخويا .. شكون اتكون جوديا .. وباااز بقا تفلا عليا تماكينات ..

- مصطفى : لالا مكاين والو .. انا و (قاطعو التيليفون ديال شريهان لي سونا ) ..

- شريهان (بإستغراب ) :

نمرة غريبة مامسجلاش عندي ..

- مصطفى : جاوبي وطلقي الصوت ..

- شريهان (طبقات لي قاليها بالحرف ) :

ألـــو !!

- شـريهان : ألو !! ... مكاين حتى صوت من غير لاپيل لي دايزة ..

- شريهان : ألو شكون معايا ؟

- مجاها حتى جواب ، ديك الساع تقطع الخط ..

- شريهان ( بإستغراب مافهمات والو ) :

غادي يكون غير شي واحد كيتفلا ، المهم انا غادي نوض نعس عييت بغيت نرتاح ..

- مالك ( وقف) : شريهان بلات بغيتك .. ناضت شريهان وتبعها مالك ..

- مالك ( مغوبش ) :

مامطاوعنيش خاطري نخليك تمشي بوحدك عند داك الشماتة ..

- شريهان :

حتى انا راه محاملاش نشوف كمارتو ، ولكن ضروري من الخطوة ديال غدا ... الى بغينا نخرجو من هادشي دغية ، حيت راه مابقاش عندي جهد والله ، راه بزز صابرة ..

- مالك ( شد ليها فيدها ) :

مابقا قد ما فات ، ويسالي هادشي ونتهناو ونعيشو حياتنا كيف بفينا ... قريب تحققي الحلم ديالك ، نهار عرسنا عندي ليك مفاجأة ..

- شريهان :

شنو هي العار ݣوليا ، منقدش نبقى صابرة حتى لداك الوقت ..

- مالك (بإبتسامة شريرة) :

لا مغاديش نݣوليك والو ، نهار عرسنا إن شاء الله غادي تشوفيها ، بلاما تحاولي باش يلاه تحيدي منك هاد الفضول ..

- شريهان : واخا ديرها فين تجيك ..

- مالك (باس ليها راسها ) :

يلاه أروح روحي ، سيري رتاحي تصبحي على خير ..

- شريهان (كتشوف فيه بكل حب ) :

- وانت من أهل الخير ... تفارق معاها عند العتبة ديال بيتها ، دخلات وشيرات ليه بيديها وسدات الباب وراها ..

______________________

- غادي جاي فالبيت كيفكر ، مابغاتش تحيد ليه من بالو نهائيا ... من نهار الخطوبة ديال خوه ، ودابا زادت فاش ولات خدامة معاه ... عمر ما وقع ليه بحال هكا فحياتو ، عمر شي بنت ماعشات ليه فعقلو بحال إشراق ، عاجباه كيفما هيا ، عجباتو بالحنان ديالها وقلبها الكبير وتصرفاتها ،تنهد تنهيدة طويلة حيت حاير معارفش شنو غادي بدير ، وهو من طبعو مكايبقاش يلف ويدور ... كيجي لبنادم فاص ، مكايتسناش الاعجاب حتى يتحول الحب لا ... من ديپار كيصارح الإنسان .. حط التيليفون ديالو فوق الكوافوز ... تخشا تحت فراسو وقرر ينعس ، حتى لغدا ويقرر شنو غادي يدير ، وداكشي لي غادي يدير مبني على حوايج كثيرة ..

_________________________

- فاق فصباح بكري ... فايق بحماس وفرحان عاحبو الحال .. لأول مرة من بعد شحال من عام غادي يدخل للكوزينة ويوجد هو الفطور ، قاد الطبلة على حقها وطريقها ، لبس قميجة شفافة فالبيض مع سروال فنفس اللون ... رش من الپارفان ديالو وزين عنقو بواحد العقيق فالكحل .. ، وكل مرة كيشوف فساعتو ، بقا على موعد الوصول ديالها 10 دقايق ، كانت شاداه واحد الرهبة او واحد الخوف بحال شي مراهق .. بحال الى أول مرة كيبغي فحياتو ... وصل الوقت لي اتوصل فيه وقف كيتسنى ، جات الخدامة علماتو بلي الضيفة ديالو وصلات ..

- كارلو (باللهفة ) : حلي ليها دغية ودخليها لهنا ، وسيري غبري ماتجيش نهائيا ..

- الخدامة : واخا سينيور ..

___________________

- وقفات طوموبيلتو قدام واحد الموبل ، نزل من طوموبيلتو حيد نظارات من علة عينيه ، علا راسو كيشوف ، كان متملكو توتر وعلامات إستفهام فراسو منين وصلو واحد الإيميل فلابواط ديالو ، قرر ياخود العنوان لي وصلو ويكتاشف شكون هدا لي باغي يشوفو .. رجع نظارات ديالو حدر راسو ودخل ... مكانو لا ليݣارد لا حتى واحد لي يتير الشك ، وقف قدام الشقة لي تعطاه رقمها وسونا ، من بعد مدة تحل الباب .. كيشوف رجل فالخمسينات من عمرو طويل ورقيق ، داير نظارات على عينيه وكيشوف فيه مبسم ..

- ماثيو : بونجوغ سينيور دجيكو تفضل ..

- دجيكو (بشك) :

لفين غادي نتفضل ، وشكون انت وشنو بغيتي مني وعلاش أصلا باغي تشوفني ؟

- ماثيو :

غير دخل سينيور ، ماعندك مناش تخاف .. حنا هنا غير باش نسهرو على راحتك دخل .. دخل دجيكو كيشوف فالشقة الداخل مافاهم والو ، لبارح كان فدارو كيفكر فخطة لي يرجع بيها حقو ، حتى وصلو إيميل غريب فيه ... " الى كنتي باغي تاخود بلاصتك وترجعها وترجع حقك اجي لهاد العنوان ، مايمكنش ليد اليمنى للأب يبقى على هاد الحال " جملة كفيلة تخلق الشك عندو وتخليه يجي لهنا ..

- ماثيو : تفضل معايا ... تبع دجيكو من لور للصالون ..

- ماثيو :

انا جاي تسناني .. شاف فيه دجيكو بشك ، خلاه ماثيو ومشا ... بقا واقف دجيكو كيشوف فشقة نرابانا تبان ليه شيحاجة لي تعطيه غير لمحة على شكون بغاه ولا شكون دعاه ولا فين هو .. حتى جاه صوت من وراه ..

- دجيكووووو نهااار كبير هدا ... ضار دجيكو بزربة كيشوف فشخص لي وراه ، كيشوف فيه بشك من بعد مدة توسعو عينيه على أخرهم بصدمة ..

- دجيكو (بعدم تصديق ) :

ددييييييغو ... لا مايمكنش كنحلم ..

- دييغو : علاش كتحلم ، ماتقتيش بلي ممكن يجي نهار ونتلاقاو ياك ..

- دجيكو :

سي تصدمت مكنتش ضان غادي نشوفك من بعد هاد السينين كلها ، شفتك مرة وحدة وعقلت عليك مزيان .. أحوالك تبدلات كيبان ليا ..

- دييغو (ݣلس وحط رجل على رجل مبسم ) :

وي تقدر تݣول الأوضاع ديالي ولات متساوية مع كارلو كابوني ..

- دجيكو (تبسم ) :

كتهضر من نيتك مايمكنش ..

- دييغو :

ممكن وكثر ، الى بغيتي نوريك طيارتي الخاصة ، والأملاك لي عندي أنا مستاعد ... مايغركش هاد الشقة الصغيرة لي بلا حرس ، غير باش منلفتش الإنتباه للوجود ديالي .. ݣلس لاش واقف ..

- دجيكو :

لاش بغيتيني ؟ كيفاش حتى تفكرتيني ؟

- دييغو :

عيب نبغي نتلاقى مع صديق قديم ، ممكن نبدلوها بمعرفة قديمة ..

- دجيكو : مكنحملش اللف ودوران ، كنبغي يجيني بنادم فاص ..

- دييغو (شاف ليه مباشرة فعينيه) :

وانا مكنبغيش نهضر فأمور مصيرية حتى نفطر ، نفطرو ونهضرو ..

_______________________

- دخلات من الباب ، لابسة سروال وڤيست ديالها فاللون البيض مع ساك حمر وصندالة حمرة ، جامعة شعرها سفنجة ... مكياجها خفيف جاي من اللبسة لي لابسة .. ستقبلها بإبتسامة وهي كذلك ، مدات ليه يدها باسها وسلم عليها بالوجه ..

- كارلو ( كيشوف فيها بكل حب ، مكرهش يشدها يعنقها يخشيها فوسط صدرو ) :

شيري كل مرة كنشوفك فيها كتبهريني بجمالك ، كنحس بقلبي غادي وكيضيع مني ..

- شريهان ( ضحكات بغرور) :

وغير رض بالك ، حيت كيݣولو عليا محطمة قلوب الرجال ، ومنبغيش ليك تبغي إنسانة مخطوبة ..

- كارلو : مخطوبة ، ولكن مزال مامزوجاش ولالا ؟

- شريهان :

وي عندك الحق ، ولكن الوعد وعد ... علاش انتوما الإيطاليين ماعندهم الوعد وعد ..

- كارلو (واخد يدها فيدو وغادي بيها لطبلة ) :

عندنا ، ولكن الحب عندنا فوق كولشي ، وحتى حاجة ماتقد توقف فوجهو ..

- شريهان (سحبات يدها من يدو وݣلسات ) :

الفلوس دازو فالحساب ديالك ..

- كارلو (نزل بشوية عند ودنيها ونطق ) :

نساي علينا الخدمة دابا ممكن ..

- شريهان : ولكن انا هنا على الخدمة ولالا كارلو ..

- كارلو (تبسم ) :

الإسم ديالي من فمك ، كفييييل يخليني نسى الخدمة ولي جاب الخدمة ههههه ..

- شريهان (بإبتسامة ) :

دمك خفيف ، ودابا ممكن نفطرو حيت فيا الجوع ...

- كارلو : اهاه واخا ناكلو .. علاش لا .

__________________

- نزلات من الشقة ديالهم ، مافاهمة والو ، وصلها ميساج من عندو بلي باغي يشوفها ضروري ...

- لقاتو واقف على طوبيلتو ... غير شافها وتم جاي عندها ..

- إشراق : صباح الخير ..

- عمر : صباح النور ..

- إشراق : خلعتيني ياك لاباس ؟

- عمر : واخا نفطرو بزوج ؟

- إشراق :

نفطرو ، ولكن سكينة وشمس خليتهم بوحدهم ... وانا ملابساش شيحاجة ديال الخروج ..

- عمر :

واخا تلبسي لي لبستيه كيجي معاك ، شمس معاها خالتها .. كنواعدك مغاديش نتعطلو ..

- إشراق : ماعرفتش والله ..

- عمر (هز راسو فسكينة لي كطل عليهم ) :

سكينة ، غير فطري انت وشمس ، انا وإشراق غادي نفطرو على برا .

- إشراق (مصدومة ضارت بزربة هزات راسها فختها لي كانت كتفرنس) ..

- سكينة : واخا سيرو بصحة ..

- عمر (فتح ليها باب طوموبيل ) :

مشينا ؟ ... بقات ساكتة وكتشوف مافهمات والو سلمات أمرها لله وطلعات ... سد الباب وركب حداها ، ديمارا الطوموبيل وكسيرا ..

- دييغو (مسح فمو بهدوء وشاف فدجيكو لي كيتسناه على نار ) ..

- دجيكو :

كيبان ليا دابا ساليتي الفطور ديالك ، ممكن تݣوليا علاش بغيتيني وعلاش عيطتي ليا ؟

- دييغو :

مصلحة ، عيطت ليك على مصلحة بيني وبينك ..

- دجيكو : و أشمن مصلحة غادي تجمع بيني وبينك ؟

- دييغو : كارلو كابوني ، هدا هو المصلحة ..

- دجيكو (غوبش ) :

مافهمتش واش جايبني لهنا ، باش تهضر ليا على رئيس ديالي فالخدمة ..؟

- دييغو (ضحك) :

على اشمن خدمة بضبط كتهضر ، على تهريب ولا تجارة فالبنات ، ولا تجارة فالمخدرات دجيكو ... ضوشي ديالكم كلو عندي وبدلائل ... دييغو هدا وأجرك على الله ..

- دجيكو (توتر ) :

كيبان ليا كتقلب على موتك ..

- دييغو (ضحك بجهد حتى تسمعات الضحكة ديالو فدار كلها ) :

كضحكني ادجيكو ، انت مزال مامستوعبش معامن كتهضر ، معرفش بلي بكلمة مني نقدر نغبرك انت وكارلو ... انا عارف زبايلكم كلها فخباري ، ومنساش ديك الحريمة صغييييرة لي درتي اخر مرة فالمغرب ، ولي بسبابها الامن ديال المغرب قالب عليك الدنيا (شاف الصدمة على وجهو ) كتبقى فيا ادجيكو ماتستاهلش هادشي لي كيوقع ليك ، والمشكل فاول فرصة كارلو يبيعك ومايعقلش عليك ..

- دجيكو :

دخل نيشان فالموضوع وݣوليا سنو بغيتي مني؟

- دييغو (بصرامة ) :

انا بغيت حاجة ، وانت باغي حاجة ... تخدمني نلبي طلبك ... انا باغي جميع الوثائق لي عند كارلو ولي تخليه يغرق ويعشش فالحبس ، وانت باغي الإمبراطورية ظيال الأب ترجع ليك ..

- دجيكو (كيضحك) :

كضحك عليا ، باغيني نغرق كارلو باش نحفر قبري بيدي ..

- دييغو :

قبرك اتحفرو الى بقيتي معاه ، حيت راه بديتي كطلع ليه فراسو ... وقريب أيحيدك من قدامو ، أنت خاسر خاسر ... أما أحسن تحفر ليه هو وتربح ولا تموت ، انا عارف مزيان بلي كارلو طلع ليك فراسك ... دجيكو انا عندي ݣاع خباركم وقبل منعيط ليك هنا ، ݣاع المعلومات عندي من نهار خدمتي مع الأب لدابا ، انا مغاديش نبزز عليك ... انا رابح رابح ، غادي نغرق كارلو وغادي نتهنى منو ... ولكن قبل هادشي ايكون وا قتلك وهكا اتمشي ورا شمس ، وحتى واحد مغادي يتفكرك ... ولكن انا كنشوف تضحية ديالك من جهة الاب وشنو درتي على قبلو ، مجانيش تخرج بيديك خاويين ..

- دجيكو :

علاش ؟ علاش كتكرهو لهاد الدرجة وباغي تغرقو ؟

- دييغو (بان الحقد فعينيه ) :

حساب قديم بيناتنا ، وجا الوقت لي خاصو يخلصو ... خدا ليا أعز مكانملك فهاد الدنيا ، ودابا خاصو يرجع لي خداه مني .. دابا انت قرر ، واش دير يدك فيدي ولا غادي نتحرك بوحدي ؟

- دجيكو (بقا ساكت مدة كيدورها فراسو) ..

- دييغو :

انت ماتقدش دير والو بوحدك ، كارلو ينسفك خاصك لي يوجهك ويعاونك ، القرار عندك سي نو ، تقدر تمشي ودير راسك بلي عمرك جيتي لهنا ..

- دجيكو (ببرود ) :

شنو المطلوب مني بضبط ؟

- دييغو (تبسم ) :

جميع الوثائق والمعلومات لي ممكن يديو كارلو لورا الشمس ، يكونو عندي هنا ... وجميع السميات ديال الشركاء ديالو فأعمالو الكحلة حتى هوما يكونو عندي هنا ، بجميع دلائل ، وحتى لبنات لي محتاجزينهم ... يتطلق السراح ديالهم ، مكايهمنيش يرجعهم لبلادهم ولالا ، المهم يتطلق السراح ديالهم ... وحتى من جورجيت ݣاع المعلومات عليها ، تكون عندي هنا ، وهادشي وياااك يعرف عليه شيواحد شيحاجة ، وخصوصا هي عارفها قريبة منك وممكن كتهمك ..

- دجيكو (قاطعو ) :

انا مكايهمني حتى واحد ، لي كيهمني هو نولي انا هو البوص جديد ، والى مشيتي حتى درتي ليا سي قالب ، كون اكيد غادي نقتلك بيدي ، واخا تكون مخبي ورا جيش على قدو ..

- دييغو :

من هنا ل 15 يوم يكون كولشي عندي هنا ، وديك الساع انا غانتكلف وغادي نحتافلو بنخب النصر ديالنا ..

- دجيكو (وقف لبس النظارات ديالو ) :

كون هاني .. انت ليك لي بغيتي ، وانا ليا لي بغيت ..

- شريهان :

بغيت نبدل شي حوايج فالكلوپ ، مثلا الإضاءة جاتني شوية مملة ، ومظلمة ... خاص تكون الحيوية فالكلوپ ، باش هكا تخلي الكليان يكون مرتاح ..

- كارلو (غير حاضيها بإعجاب ) :

ديري لي بغيتي ، دابا الكلوپ كيتعتابر ديالنا بزوج ..

- شريهان :

بنسبة للبنات لي فالكلوپ ، انا معارفاش منين جبتيهم ... ولكن بغيت الكلوپ ديالنا تكون عندو سمعة مزيانة ، والمتعة ماتعداش الخطوط الحمراء ..

- كارلو (بإستفهام ) :

بحالاش مثلا ؟ مافهمتكش شنو بغيتي تقصدي ؟

- شريهان :

كلامي مفهوم ، البنات ايكون دور ديالهم صحبة الزبائن فقط ، لا اكثر ولا أقل ... يعني علاقات مشبوهة لا ، فرضنا مثلا واحد من الكليان طلب وحدة من البنات ، انها تدوز معاه ليلة لا ..

- كارلو (حبس من الماكلة وشاف فيها ) :

انت طلبتي تكون المتعة ، وتكون الجرأة فالكلوپ ولالا ؟

- شريهان :

وي المتعة والجرأة ، ولكن ماتعداش خطوط حمراء ... حنا هدفنا هو نخليو الكليان مرتاح وسط الكلوپ ، اما بخصوص الى بغا يدوز ليلة حمراء ولا صفراء ، كاين فين يمشي وهادشي ماعندناش ، حنا الكلوپ ديالنا راقي وخاصو يبقى بسمعة مزيانة ، ويتضرب بيه المثل ... ويجيو ليه الناس من مختلف البلدان ، انا كنطمح لبعيد كارلو ... مكنشوفش عند رجليا داكوغ ..

- كارلو (بقا ساكت مدة كيفكر فكلامها ) ..

- شريهان (شافت فيه بتحدي ) :

إلى ماعجبكش كلامي ، ممكن نفسخو العقد لي بيناتنا ساهل ، وانا ماعنديش مشكل نخلص الشرط لي فالعقد ..

- كارلو (بنفي ) :

لا لا بطبيعة الحال لا ، بالعكس كلامك على صواب وعجبني ، انا تأكدت دابا بلي الكلوب غادي ينجح ، مدام عندو مالكة بحالك ..

- شريهان (ضحكات) :

مالكين بحالنا .. انا وانت كارلو انشكلو فريق واعر ..

- كارلو :

كون تلاقيت بيك فوق اخور ، انكونو شركاء فعدة حوايج ..

- شريهان (تنهدات ) :

حتى دابا ماتعرف شنو مخبي لينا الله ، يقدر كولشي يتبدل مع الوقت (غمزاتو) ..

- كارلو (ضحك ) :

عجبني تفكيرك ، والى ساليتي ممكن نوريك الڤيلا ..

- شريهان :

وي أڤيك پليزيغ .. خدات يدو ومشات معاه باش يوريه ارجاء الڤيلا ..

_________________________________

- إشراق (ساكتة منين دخلو ، كتاكل بشوية قلبها كيضرب ... كتحسب الدغامي لي كلات ، يديها كيترعدو لون وجها مخطوف ، وهادسي باين عليها ، ولاحظو عمر ) :

إشراق ..

- إشراق (شافت فيه ) :

نعام واش ݣلتي شيحاجة ؟ سمحليا كنت ساهية ؟

- عمر (ضحك ) :

لا مزال ماݣلت والو ، ولكن كتبان ليا متوترة ، وخايفة لون وجهك مخطوف ، مافطرتيش مزيان ..

- إشراق (بتوتر ) :

شكون انا لا ، غير كيبان ليك ..

- عمر (خطف ليها يدها وشدها ) :

يديك كيترعدو ، وعرقانين ، مناش خايفة ؟

- إشراق (حيدات يدها من يدو ، قلبها قرب يخرج من بلاصتو ، هي براسها معارفاش علاش مخلوعة ، ولكن هاد الفطور جاها فشكل ، حتى نظرات عمر ليها طيحو ليها الشك ) :

مزال ماݣلتيش ليا شنو بغيتيني ؟

- عمر (ضحك ) : داكشي باش مخلوعة ؟

- إشراق :

انا مامخلوعاش ، انا غير بغيت نعرف علاش جيتي على صباح زمصر تهضر معايا ، جاني الفضول وصافي ، وزايدون ياك عرضتيني لفطور باش تهضر معايا ، ومزال ماݣلتي ليا والو ؟

- عمر (بدون مقدمات ) :

إشراق واش كنعجبك ؟

- نزهة :

النص ديال الحوايج خديناه ، دابا بقا لينا تريتور ونݣافة حتى هي ، غادي توصل سيمانة جايا إن شاء الله من المغرب ، فكريني ازهرة واش نسيت شيحاجة ؟

- زهرة :

لا مانسيتي والو ، واخا انا كون سعفتيني درنا ماكلة مغربية وكولشي مغربي ..

- نزهة :

الماكلة راه اتكون مغربية ، غير هو ماشيش بحال المغرب ... حيت واخا هكاك مكاينش ناس بزاف ، العاىلة راه كاينين انتوما ... وغادي تجي ختي وراجلها وبنتهم وراجلها ، اما الباقي راه فالمغرب ... خاص نهار نزل إن شاء الله ندير ليهم شي حفلة باش مايبقاش فيهم الحال ..

- زهرة :

أس بان ليك عرس شريهان ومالك نديروه فالمغرب ، وهكا مغاتخلي حد يتقلق منك ..

- نزهة :

والله الى فكرة مزيانة ، شحال هادي نيت ماهبط نديروها حجة وزيارة ..

- زهرة :

إن شاء الله ياربي ، العݣوبة لولدي مصطفى وعمر حتى هو ..

- نزهة : أمين ياربي ..

___________________________

- مشا معاها حتى لباب طوموبيل ..

- شريهان :

شكرا على الفطور ، داز زوين ... وحتى الوقت معاك داز دغية ماسخيتش بيه ..

- كارلو (ماقداهش فرحة ) :

حتى انا ماسخيتش بيك ، وهاد المرة العزومة غادي تكون على العشا ..

- شريهان :

وانا بكل سرور غادي نقبل ... الدوق ديالك فالماكلة زوين وحتى فديكور ولبس ..

- كارلو (باس ليها يديها ) :

هادشي كيفرحني ... نتلاقاو من بعد ..

- شريهان : باي باي ..

- طلعات لطوموبيل وتبدلو ملامحها ، كتحس بالخنقة ... وصلها ميساج من عند مالك فيه عنوان واحد القهوة ، شدات الطريق عندو نيشان ، نزلها الشيفور ، دخلات كتقلب عليه حتى بان ليها ... بدون سابق إنذار مشات عندو كتجري ترمات بين يديه عنقاتو ..

- مالك (بقلق) :

ياك لاباس ؟ شنو واقع ؟ ياكما قرب ليك ولا مسك ياكما دار ليك شيحاجة ؟

- شريهان (بعدات عليه ) :

لا مدار ليا والو ، ولكن الوقت كلو وانا ݣالسة بحال الى ݣالسة على العافية ... ماحملتوش اعباد الله ، انا انمشي للحمام ونرجع ... مشات سولات على الحمام ، وجها السرباي ليه ، دخلات مشات نيشان طلقات الروبيني ، غسلات يديها فركاتهم ... مسحات على وجها ، عاد بدات كتحس براحة ، خدات كلينيكس مسحات بيه لاحتو فلپوبيل وخرجات ... غير شافها مالك جر ليها الكرسي وݣلسات ...

- مالك (كيشوف فيه بخوف ) :

ماقديتش نركز على الخدمة ، مافطرتش نهائيا ... عقلي كلو كان معاك ، شنو وقع كيف داز الفطور ..

- شريهان :

بزز باش الماكلة دازت ليا ، غير خود ليا معاك ... الفطور لي فطرت بحال الى كبيت الما على رملة .. وديك ساعات نعاود ليك ..

- مالك : واخا ، أشر للسرباي ... جا خدا طلاباتهم ومشا ..

- مالك :

عاودي ليا شنو وقع بالحرف الواحد ..

- عمر :

سولتك سؤال بسيط ، اه ولالا ... واش كنعجبك أه ولالا ؟؟

- إشراق (مصدومة من السؤال ديالو ) :

ولكن ولكن ، علاش كتسول هاد السؤال مافهمتش ؟

- عمر :

هاد السؤال ايتبناو عليه بزاف ديال الحوايج ، بغيت الصراحة فهمتيني ، غير الصراحة بلا كدوب ..

- إشراق ( توترات كدوز يدها فشعرها ) :

انت انت رجل لي تمناه أي وحدة ، ظريف ولد الناس .. او (قاطعها ) :

بغيت نعرف انت ، مابغيتش نسمع تمناه أي وحدة ..

- إشراق :

ماعرفتش ، ولكن لي عارفة هو كنكون فرحانة ومرتاحة فاش كنكون معاك ..

- عمر (حبسها بيدو ) :

صافي هادشي كافيني ، داكشي لي بغيت نعرفو عرفتو ... إشراق انا مغاديش نكدب عليك ، واصلا انا مامالفش بالكذوب ، لي ماين كنݣولو وكنجي للواحد نيشان ، انا منكرش بلي كنكون فرحان فاش كتكوني معايا ، ومن نهار الخطوبة مابغيتيش تحيدي من بالي ، وفاش خدمني معايا خلاص ، لدرجة وليت كنبغي نبقى معاك كثر ، انا كتعجبيني بزااف ..

- إشراق( بدات كتكح ، شوية توحل ليها ، هزات كاس ديال الما وشرباتو ) :

واش انا انا ؟ ولكن ..

- عمر (قاطعها ) :

اه انت ، مابغيتي لا ولكن لا ديك الهضرة القديمة ديال ، انا الباطرون ... ولا شكون انت وشكون انا وداك تخربيق الخاوي ... إشراق من طبعي مكنبغيش نضيع لا وقتي ، لا الوقت لي معايا ، انا عارف بلي مزال الحب مكاينش بيناتنا ، مجرد إعجاب ... ولكن الإعجاب غادي يتحول الحب مع الوقت ، وباش يكون لي بيناتنا قانوني ورسمي ، حيت عارف بلي انت أرملة وبلي العينين ايكونو علينا فالخدمة ، داكشي باش خاص تكون بيناتنا خطوبة رسمية ..

- إشراق (خرجو عينيها مصدومة ، عطاها على وجها حاجة تابعة حاجة ) :

هههههههههه سمحليا ههههههه ، كضحك معايا ياك ، خطوبة واش عارف شنو كتݣول ؟

- عمر :

اه عارف ، جاك هادشي كثير ... متفهمك حيت تصدمتي ، ولكن انا مكنبغيش نضيع وقتي ، الى كنا انتقربو من بعضياتنا ونبغيو بعضياتنا ، خاص تكون بيناتنا حاجة رسمية ، مايمكنش نبقى نخرج وندخل معاك بلاما يكون بيناتنا شيحاجة ، وانا الى مشيت حتى رتابطت بيك ماشي باش نتفلا ، ولكن باش تكوني شريكة حياتي ، ونربيو شمس وياسمين بزوج بينا ، ونسجلو ياسمين بسمياتنا بزوج ..

- إشراق (حسات بسطل ديال الما بارد خواه عليها ، مامتيقاش شنو كتسمع ، واش هي فايقة ولا كتحلم ) :

عمر واش واش كتفلا عليا ، دابا واش انت باغي تزوج بيا أنا ؟

- عمر (ضحكاتو ) :

اه الالة انا باغي نتزوج بيك انت ، حددي غير نهار باش تكون الخطوبة ديالنا شنو بان ليك ... ماتجاوبينيش دابا ، سيري لظار وفكري مزيان وبليل عطيني الجواب ..

- إشراق :

الليل الليل ؟

- عمر :

إيه الليل الليل ، مكنحملش نبقى نتسنى بزااف ، دابا الى بغيتينا نمشيو نمشيو ..

- إشراق وقفات بلاما تزيد كلمة وحدة ، عطاتو بظهر وتمات خارجة ، وصلات عند طوموبيل ، حتى خلص وجا حل ليها الباب ، طلعات بلاما تنطق بحرف واحد ساهية ومصدومة ... طلع حداها كيشوف فيها مبسم ، ديمارا الطوموبيل ، وصلها لباب الپارتما ، نزل حل ليها الباب ... عاد فاقت من صدمتها ، لقات راسها قدام الدار ..

- عمر :

غادي نتسنى الجواب ديالك بفارغ الصبر ، تهلاي فراسك بزاف (باس ليها جبهتها ، خلاها مرفوعة ، ركب طوموبيلتو ديمارا ومشا ) ..

_______________________

- شريهان :

هادشي لي وقع .. كنحس براسي مخنوقة بزاف وحق الله ..

- مالك (وقف وشد فيدها ) :

اجي معايا غادي نوريك واحد البلاصة زوينة غادي تعجبك ..

- شريهان :

وانا انمشي معاك بلاما نسولك فين غاديين ، خرجو بزوج ركبها فطوموبيلتو ، أما طوموبيل فاش جات سيفطها لدار ..

______________________

كانو واقفين بزوج قدام برج إيڤل ... أحسن حاجة دار هي جابها لهنا ، باش ترتاح نفسيتها كيدير معاها بزاف ديال الحوايج لي كتحمد الله انو كاين فحياتها ..

شافت ليه فعينيه لي لونهم بحال السما فليلها ورموشو طوال تنهدات تنهيدة طويلة وݣالت :

- شريهان ‏‎= للأبد؟

- مالك : ماذا؟

- شريهان :

= ستظل تحبنى للأبد؟

- مالك : إبتسم إبتسامةً ساحرة وقال :

- حتى تحترق النجوم وحتى تفنى العوالم ، حتى تتصادم الكواكب وتذبل الشمس وينطفئ القمر، حتى أشيخ فتتآكل ذكرياتي ، وحتى يعجز لساني عن لفظ أسمك ، حتى ينبض قلبي للمرة الأخيرة، فقط عند ذلك ربما أتوقف .. ربما ⁦..

- أخد وجهها بين يديه ، وقبلها قبلة طويلة بين عينيها ، إبتعد قليلا ينظر إلى ملامحها الساحرة وقال :

- كنت أنتظر رصاصة أو قذيفة ، لكن لم أتوقع أن تخترقني امرأة ..

- شريهان (ضحكات) :

هاي هاي على شاعر وراك خطير مع راسك ..

- مالك (ضحك حدر راسو ورجع شاف فيها بإبتسامة ) :

بغيت نسولك ، وبغيتك تجاوبيني بصراحة ..

- شريهان (كتشوف ليه فعينيه ) :

وي سولني وغادي نجاوبك بصراحة ..

- مالك ( كيشوف ليها فعينيها ) :

كتبغيني ؟

- شريهان ( تبسمات ) :

هاد السؤال مغاديش نجاوبك عليه ، حتى لنهار عرسنا عاد غادي تسمع جوابي ..

- مالك ( ضحك ) :

مسمومة مع راسك ، علاش زعمة مابغيتيش تݣوليها دابا ؟

- شريهان :

داك الوقت غادي تكون بحلاوتها ، دابا مغادي تسمع مني والو غير بلاما تحاول ..

- مالك : واخا يالالة ، ماݣلتي عيب ... نصبرو .

- شريهان : نمشيو ؟

- مالك ( تنهد تنهيدة طويلة ) :

واخا يلاه ..

____________________________

- غادية جايا فالفيلا ماعجبهاش الحال وهو قدامها ..

- جورجيت ( معصبة كتكمي وتصوت ) :

خاصك دير شي حل ، هادشي مابقاش كيعجب ، واش من نيتو واش لهاد الدرجة أترات فيه ديك خيتي ... البنات انا لي جبتهم وجبتهم لغرض واحد ، ماشي جيتهم يبقاو ديكور بحال المونيكات ..

- دجيكو (ساكت وكيسمع ليها وكيفكر فكلام دييغو لي ݣاليه ، كلما داز الوقت كيوصل على كلامو وبلي فعلا جا الوقت لي كارلو يحيد من الطريق ..

- جورجيت (كتشوف فيه ) :

شفتك كنهضر معاك وانت كاع مكاين فهاد العالم ، ولكن شنو كنت كنتوقع انت أصلا خايف منو ... هو لي كيسيرك كيفاش انتسنى شيحاجة منك ..

- ضار شاف فيها مخنزر ، وقف بزربة جاي قاصدها بشوية كيشوف فيها حتى وصل عندها ، دور راسو بشوية ونقز ليها على عنقها قجها :

أندير راسي ماسمعت منك والو ، وبلي غير معصبة داكشي باش ، أول واخر مرة ولا موتك غادي يكون على يدي ... طلقها بجهد حتى طاحت ..

- دجيكو :

نصيحة من عندي ، عمرك مزال دخلي فيا ... ولا تݣولي ليا شنو خاصني ندير ، ولا منديرش ... وداكشي لي امرنا بيه هو لي غادي يكون تافقنا ، ولا انت عارفة مزيان شنو كيتسنانا ، كارلو بغا البنات يحضرو للكلوپ محرد جليسات .. تافقنا شي حاجة اخرى ممنوعة ، وانت ماعليك غير تنفدي داكشي لي بغا وفلوسك راه كيوصلوك ..

- هز تجاكيط ديالو وخرج مخليها شاعلة فيها العافية وماحملاش راسها ... من ورا الباب كانت واقفة وسمعات ݣاع لي ضار بيناتهم ، تبسمات بإرتياح وتأكدات من الكلام لي ݣاليها علي فالكلوپ ..

- فرح (براحة وفرحة ) :

الحمد لله ياربي ، الحمد لله وقفتي معانا ..

- سكينة (واقفة ليها على راسها ) :

اويلي وحدي وباش جاوبتيه ؟ ناري وتكوني رفضتيه نااري غادي نتفك زغبة زغبة ..

- إشراق (هزات فيها راسها ) :

علاش هو عطاني الفرصة باش نهضر ولا نݣول شيحاجة ، زرب عليا زربة ديال الغدايد ... أصاحبتي صدمني اويلي مزال عاد زعمة ماشي بزاف باش تعارفنا ، خفا زربا دغية دغية ..

- سكينة :

حمدي الله طلب منك غير خطوبة ، اما كاين لي كيتعرف عليها فسيمانة وراها كيتزوجو ، راه كاين لي كتعرفيه سينين وكيبقى مجرجرك وفالأخر يقوليك سمحيليا ، تستاهلي ماحسن مني ، ولا يشوف غيرك ويخليك تشبعي بكاوات ... انت بعدا تلاقيتيه ولد الناس وشارب عقلو ماشي شي واحد لي برهوش باغي يتفلا ... هاهو سعد ، حتى انا ماشي بزاف باش تعرفت عليه ، وها عرسنا بقات ليه 14 يوم ..

- إشراق (تنهدات تنهيدة طويلة ) :

والله العظيم الى تلفت ، نكذب عليك ماعرفت شنو غادي ندير ، والمشكل باغيني نجاوبو فهاد الليلة ، دخت راه شتيني ماكليت ماوالو دخلت سديت عليا وكنفكر فهادشي ... وفاش بغا يمشي باسني فجبهتي جاب ليا شلل ..

- سكينة (كضحك) :

وزيدك على نسيبي حتى هو بخبيزتو ، شوفي والله وترفضي مانتي ختي مانا ختك ..

- إشراق (قفزها تيليفونها ، هزاتو طلعات ليها نمرتو ) :

ناري هو ، شنو غادي نݣوليه باش انجاوبو ؟؟

- سكينة (كتهدن فيها ) :

شششش ، ديري ݣاليك عقلك وقلبك صافي ، جاوبيه ماتخليه يتسنى ..

- إشراق (خدات نفس عميق وفتحات الخط ) :

ألو عمر ، الحمد لله بيخير وانت ... انا الحمد لله بيخير ، لا مزيانة مرتاحة اه .. لالا مكاين حتى حاجة (شافت فختها ) أه فكرت ..

- عمر (فجهة اخرى) :

شنو قررتي ، بغيت نسمع منك الجواب دابا الى ممكن ؟

- إشراق (شافت فختها وتنهدات تنهيدة طويلة ) :

أنا موافقة ..

- هناك قلوب جميلة كالورود

تضيف لحياتنا رائحة الودّ و الإحترام

اذا تشابهت ... تآلفت ... و تقاربت و ان أبعدتها المسافات وغيّبتها الظروف

تلك القلوب النقية تستحق البقاء في حيّز من القلب ،

و تستحق ان نهبها كل الإحتواء ...

فهي أوطان آمنة لأرواحنا

التي أعياها وجع العالم .

لا تجامل بمشاعرك من لا يستحق ذلك

و لا تتفوّه بكلمة لا تنبع من قلبك لترضي غيرك ...

و لا تستغفل قلباً أحبّك بصدق

و حارب العالم من أجلك ...

لأنّ هذه الأشياء تقع على النّفس كحدّ السيف ..

تيقّن أنّ حقيقة الإنسان ليس بما

يظهره لك من عواطف وأحاسيس فقط

بل ما يفعل من أجلك فالمواقف هي

التي تبيّن فعلا حقيقته .

________________________

- مهمة علي كانت سالات من داك نهار مابقاش رجع ، شريهان لي كانت كتمشي تبدل فالكلوپ وضيف اللمسة ديالها باش هكا مايعيقش بيها كارلو ، لي كان عاجبو الحال ... الوقت لي كاتكون هي كيكون هو ، واخا يبقى غير حاضيها من المكتب المهم هو يكون معاها ... جوج مرات لي حضرات بليل وداكشي باش واعدها هو لي كان .. البنات كان حدهم كيݣلسو مع الكليان ومن بعد كيمشيو بحالهم ، فرح من داك النهار مابقات شافت علي ،فمل وقت كتكون عينيها على الباب مرابانا يدخل ،ولكن والو عمرو مادخل حتى فقدات الأمل ... التحضيرات ديال عرس سعد وسكينة ماوقفوش ، قبل عرسها ب 7 أيام ، مجموعين على العشا حتى نطق عمر :

- ماحدنا مجموعين ، بغيت نݣوليكم واحد الخبر ..

- شريهان (فخبارها شنو كاين من سكينة ) :

إيوا على سلامتنا ، طلقنا خلاص هرمنا من أجل هذه اللحظة ..

- عمر (عرفها عرفات غمزها باش تسكت ) ..

- مالك (بهمس ) :

شنو واقع ، كيبان ليا الخبار فراسك وحنا اخر من يعلم ..

- شريهان :

هاهو غادي يݣوليكم ، غير ضبر على خبيزتك لا تحرق ..

- أحمد :

الله يسمعنا خبار الخير ، شنو كاين اولدي ؟

- عمر (تنهد تنهيدة طويلة) :

انا قررت نتزوج ..

- نزهة (شهقات وخرجو عينيها بصدمة ) :

كيفااااش ؟ إيمتا اولدي مافهمت والو ... هههههه

- سعد :

هاي هاي هاي ، على خويا وماعندي مانسالك ، شكون هاد سعيدة الحظ ؟ ياكما لي فبالي وبالك ؟

- شريهان : هاديك هاديك ..

- سعد (صفق بيديه ) :

العاااار متݣوليهاش ، ضربي ضربي (ضربات ليه فيديه مستين بضحك على عمر ) ..

- مصطفى :

كيفاش بلانكم انتوما ؟ فخباركم شي حاجة ولا انا غالط ؟

- شريهان : لي فخبارنا هاهو سمعتيه ..

- أحمد (مداهاش فيهم ) :

شكون هادي اولدي واش كنعرفوها ؟

- سعد : ويلي ويلي عز المعرفة الواليد ..

- أحمد (خنزر فيه) :

شتم انت تفورماطيتي حتى فتي القياس ..

- سعد (بفخر ) :

وكبرنا الواليد ، وايلي حتى انت انبقاو صغار ..

- نزهة : شكون اولدي ؟

- عمر (كيحك راسو ) :

الى خلاوني هاد الزوج نهضر ، غادي تعرفو شكون ..

- زهرة (غمزات بنتها ) :

اديك زريمقة سكتينا ..

- شريهان :

واش انا دابا هضرت ، اللهم إن هذا لا منكر ... الظلم عاين باين .. هضر هضر اخويا هاني ساكتة ..

- عمر : إشراق ..

- نزهة (مصدومة ) :

إشراق إشراق ، خت سكينة ياك ؟

- عمر (كيشوف فماماه ) :

إيه اماما هي ، علاش واش عندك شي مشكل ؟

- نزهة :

لا أولدي ماعندي حتى مشكيل ، غير جاتني فشكل وصدمتيني هههه ... حيت زعمة ماشي مدة قصيرة باش عرفتيها هادشي لي كاين ..

- عمر :

لا الواليدة ، عرفتها مزيان واخا مدة قصيرة ، عرفتها فيها وتأكدت مزيان بلي هي لي بغيت نكمل معاها حياتي ..

- شريهان :

احسن قرار خديتيه فحياتك ، إشراق ظريفة بزاف ومكاينش بحالها ومغاتلقاش بحالها أصلا ، حنينة وبنت الناس مبروك عليكم ..

- عمر : الله يبارك فيك (شاف فباه) .. الواليد مغادي تݣوليا والو ؟

- احمد :

اولدي انا عمري داخلت فقراراتكم ، أي قرار كنخلي ليكم انتوما الحرية تختارو ، وعارف بلي اي حاجة درتوها إلا وا مقتانعين بيها 100/100 ، مدام ختاريتي إشراق إلا وانت مقتانع وشفتي فيها حوايج زوينة ، الله يكمل عليك بالخير أولدي ، مبروك عليك ..

- كلشي ناض عنقو او بارك ليه فرحانين ليه ..

- نزهة :

إن شاء الله يدوز عرس خوك ، ونمشيو نخطبوها ليك ..

- عمر :

داكشي لي ݣلت حتى انا ، يلاه نتكفاو مع عرس سعد ، وديك الساع تجي نوبتي ..

- مالك (خلاهم كلهم يشوفو فيه) :

وديك الساعات تجي نوبتي انا ..

- أحمد : كيفاش نوبتك اولدي ؟

- مالك (كياكل ) :

عرسي انا وشريهان ، من ورا خطوبة عمر انا وشريهان غادي نديرو العرس .. وقررنا نديروه فالمركز نهار الإفتتاح ..

- نزهة (شافت فزهرة ) :

فالمركز فالمركز ، وانا زعمة كنت ناوية نديرو ليكم فالمغرب ..

- مالك :

ماشي مشكيل ، نديرو جوج ديال العراسات ، واحد هنا فالمركز وديك ساعات نزلو المغرب ونديرو عرس ثاني وشط العائلة ..

- نزهة : صافي مزيانة ..

- عمر (ضحك) :

زاهية عندنا عراسات ..

- زهرة :

الحمد لله اولدي ، الله يخلينا ديما فرحانين ، ويبعد علينا شر الخلق ياربي ، ويخلي ايامنا كلها أفراح ومسرات ..

- الكل : آمــــــــين ..

_________________________

- فجهة اخرى ، غاديين كيجرو فرجليهم ، واحد هاز تجاكيط ديالو على كتافو ومعبس ساهي ، وثاني هاز ملف فيديه وحتى هو باينة عليه واصلة بيه لعظم ..

- أنور :

شفتي شفتي شنو ݣلت ليك ، بقيتي عليا تيق فيا ... عمرو مغادي يفكر يجري علينا ، غادي نجحو وغادي يتزادنا فصالير ، وهاحنا دابا خارجين بنص صالير ، هادشي لي عطانا يلاه يكفينا واحد 20 يوم ، مشينا فيها كيبان ليا غادي نرجعو للمغرب مافيهاش شك ..

- هشام (بنفاد صبر) :

صااافي ، هنينا منين خرجنا وانت لوك لوك لوك ... أصلا هو لي خاسر معارف والو هداك ... كون تبع داكشي لي عطيناه كون نجح ونجحات الوكالة ، ولكن هو عاجبو راسو بزااف ومارضاش نكونو حسن منو ..

- أنور :

أشمن حسن منو أشمن ، ديك الخدمة مادخلنا ليها غير بالكشايف ، كونما السيد لي توسط لينا وتشوف ، دابا ضاع كولشي ، هشام كيبان ليا المغرب ينادي ..

- هشام :

أنخلي المغرب هو اخر حل عندي ، نقلبو بعدا هاد الأيام ... غادي نطلق الدار لي انا فيها وغادي نجي لي عندك نݣلس معاك ..

- أنور (مخلوع) :

أشنو أشنو ، لالا أخويا انت رجليك خانزين وكتشخر مانقدش نعس وانت كاين ..

- هشام (بتحدير ) :

شوف هداك هاه ، غادي نجي ونݣلس معاك بغيتي ولا كرهتي ، ماعندنا حتى حل أخور ... على أساس انت مكتشخر ورجليك فيهم العنبر ..

- أنور : واش بزز ؟

- هشام (جرو من الكول ديال القميجة) :

اه بزز ، ماعندكش شي حل أخور زيد قدامي زيد ..

___________________________

- فشقة دييغو ... هاز الپيسي ديالو كيتفرج ..

- ماثيو (وقف وراه) :

كتخطط لشي رحلة ؟

- دييغو (ضحك) :

وي رحلة طويلة بزاااف ، رحلة العمر وقريبة ..

- ماثيو :

ومعامن ؟

- دييغو (تبسم وشاف فيه ) :

مع زوجة المستقبل ، شريهان ...

- ماثيو (خايف من تصرفات دييغو المتهورة ) :

دييغو ، انا كنعرفك منين كنتي صغير ، كنت خدام مع باك قبل لا يموت ... انا عارف بلي باغي تنتاقم من كارلو حيت هو لي قتلو ، واخا مكانش الأب ديالك الحقيقي غير بتبني ، ولكن كنتي كتبغيه بزاف ... او واخا هو سباب حتى ماتت إيمان ، مع ذلك ماقدرتيش تقبل فكرة بلي ممكن داك الإنسان لي كان كيبان كبير فعينيك ، يقدر يغتاصب فتاة قاصر ..

- دييغو (حط الپيسي منيرڤي او وقف قدام البالكو ، كيحك فراسو بشكل متوتر بحال شي واحد مريض ) :

انا عمري بغات دخل ليا فكرة بلي بابا يغتاصب بنت صغيرة ، منقدش نتيق هادشي ... بابا كان كيعامل ݣاع الناس مزيان ، وهو لي كان مكلف بقراية إيمان ... مايمكنش يبغي بنت صغيرة ويكون بديك الدنائة ..

- ماثيو (تنهد تنهيدة طويلة) :

ولكن لي معارفوش أنت ، هو التحليلات ديال الما لي لقاو على حوايجها ، مطابق للأب ديالك .

- دييغو (ضار عندو كيخنزر فيه ، عينيه كون فيهم القرطاس كان غادي يتيري فيه ) :

أش هاد تخربيق كتݣول ؟

- ماثيو :

انا مكنكدبش عليك ، هادشي كنت كنبغي نݣولو ليك شحال من مرة ، ولكن فكل مرة كتحبسني ، التقريرات عطاو بلي فعلا الأب ديالك غتاصب إيمان .. وكارلو قتلو لهاد السبب ..

- دييغو (نفاجر بضحك ، كيضحك بواحد الطريقة هستيرية) :

كتفلا عليا ، بغيتي تݣول بلي الراجل لي كنت كنحتارمو سينين ، صدق مايسواش ياك ؟ هههههه بغيتي تݣول بلي مخاصنيش نتاقم من كارلو ، الراجل لي قتل بابا ، ودا ليه ݣاع أملاكو حتى من الڤيلا ديالو باعها وخدا فلوسها ، خدا مني البنت لي بغيت فحياتي كلها ياك ، انت معاه انت معاه ياك شحال عطاك شحال عطاك (ضرب بالپيسي للأرض ، أي حاجة كانت قدامو بدا كيخبط فيها وكيغوت على حر جهدو ، كيحك فيديه وفراسو وفنيفو بطريقة مكتبشرش بالخير ، ماثيو ناض بزربة مشا كيجري لبيتو ، هز برا او واحد القرعة صغيرة ، خدا منها شوية ، ورجع عندو كيتعافر معاه حتى خدا يدو ، و دݣها ليه ... شوية بشوية بشوية بدا كيتهدن وكيدوخ ، جرو ماثيو لبيتو حطو على نموسية ديالو وغطاه ، بقا عند راسو حتى نتاظمات أنفاسو ونعس ..

___________________________

- دخل لبيتو كيجر فرجليه ، وقف حدا الدوايات ديالو بقا واقف كيشوف فيهم ، هز ݣاع دوك دوايات ومشا للحمام ، خواهم كاملين فطاسة وكب عليهم الما ، شريهان دخلات لحياتو شنو بغا مزال بدوايات ..

- غادي فتجاه بيتو ديال النعاس ، دخل وهز راسو فتصاورها لي معلقين فبيتو ... تبسم ونطق :

قريب تولي ديالي ..

_______________________

- ٱبداً ما كانت العقاقير .. وحدها تكفي للشفاءِ

ٱو تنجح فى مداوات .. جروح الروح

كنت و مازالت على يقين تام ...

بٱن الحب الصادق يظهر فى وقت الإنهيار ..

الحب هو .. تلك الٱيادي التى تقبض ع ساعدك

بل و تعيدك .. للوقوف عندما تهدمكَ الحياة

الاحبه المخلصون هم .. الذين يرمرمون ما تلف

من ... إبتسامتك و قلبك ...

الذين ينحازون لصفك و لا يتنازلون عنك ٱبداً .

إن لم يكن حبگ شهيقاً .. لا تنتظر مني ٱن ٱزفر لك الوِد .

________________

- بداو تجهيزات للعرس سكينة ، كولشي قرب ... شريهان بدات كتقلل الزيارات للكلوپ .. بحجة انو عندهم مناسبة فالعائلة وخاصها تكون واجدة ، الكروت ديال الدعوة تفرقات ، من غير كارلو لي ماسيفطوش ليه الدعوة ديال الحضور ، الشيء لي خلاه مايعجبوش الحال ..

- شريهان :

كنعتاذر حيت مغاديش تكون حاضر ، ولكن العرس فيه غير العائلة داكشي باش ..

- كارلو :

الإعتذار ديالك كافي شيري ، ماتنسايش مزال كنتسناك عراضة للعشا ..

- شريهان : انا وياك عندنا ݣليسة ورا العرس ...

- كارلو : وعد منك ؟

- شريهان :

ضروري وعد مني ، كون هاني ورتاح ضروري غادي نتعشاو بزوج ... قطعات الإتصال وإبتسامة على وجها ..

- ليلة قبل العرس ... الجردة ديال الڤيلا كلها مزينة بالبيض وتركواز ، الپيسين حتى هو مزين بالورد ، بلاصة البوفي حتى هي مقادة ومصايبة ، غير هائلة العريس لي كانت أما شريهان ، وصلها الشيفور لعند سكينة لدار اتبات عندها ويمشيو غدا الكوافورة ومن تما يجيو ..

- فشقة ديال سكينة ..

- شريهان (مجبدة رجليها ويديها هي وسكينة ، طاليين يديهم ورجليهم او وجهم ) :

- إشراق (كضحك عليهم ) :

بغيت انعرف مالكم على هاد الحالة هادي ههههه انتوما بشرتكم زوينة لاش هادشي ..

- شريهان (من بين شفايفها كتحاول ماتحركش) :

شششش خلينا هانيين ، راه هادشي قاصح ..

- إشراق :

يلاه خلاص غسلو حالتكم باش نتعشاو نعسو بكري ..

- غير نشف ليهم الماسك ... ناضو غسلو حالتهم ، تعشاو إشراق دخلات لبيتها تنعس هي وبنتها ، وشريهان هي وسكينة فبيتها ، كيشوفو فسقف ..

- سكينة :

عاود ليا علي كولشي ، ݣاع داكشي لي واقع ..

- شريهان :

أحسن حاجة والله ، هكا رتاحيت منين فخبارك كولشي ، مكنقدش نخبي عليك ... ولكن علي مقاليكش بلي انا ومالك فعلا غادي نتزوجو ..

- سكينة (تقادات فالݣلسة وشافت فيها ) :

وايلي بصح كيفاش ؟ عاودي ليا ..

- شريهان (عاودات ليه كولشي من الأول الأخر ) .. هادشي لي كاين راه عاودتو ليك ..

- سكينة (فرحانة وعاجبها الحال ) :

فرحت ليك وحق الله العظيم ... ومالك ولد الناس وظريف والله ماتلقاي بحالو ، الله يخليكم ديما مجموعين ويتاويكم للخير ..

- شريهان :

امين ياربي ... فتحات عليهم إشراق الباب على غفلة :

دابا واش غادي تنعسو ولالا ، راه غدا خاصنا نفيقو بكري وبقاو على الحتيت ، باش غدا يصبحو ليصيغن مصبغين ليكم العينين ..

- شريهان (غطات راسها ) :

صافي هاحنا نعسنا .. بقات حاضياهم إشراق حتى طفاو الضو عاد خرجات سادة الباب وراها ..

_____________________

- الغد ليه ، فاقو البنات أول حاجة داروها مشاو للسپا خداو مساج باش يرتاحو ، ودازو نيشان لصالون ... الكسوة ديال العروسة وتكاشط موجداهم النݣافة فدار ... نزهة مقاداها فرحة ، مقادة ولابسة كسوة بحال فراشة فالبوردو .. شعرها جامعاه بمشيطة راقية ... كتبان فنة كتحمق ، أما أحمد لي حتى هو كان لا يقل أناقة على عليها ..

- عمر نفس الحاجة حتى هو كيبان فن فالكوستار فزرق ، سعد لي كان كيوجد راسو فبيتو حامية فيه البيضة ، باغي غير إيمتا يشوف سكينة ...

- زهرة كانت لابسة تكشيكة فالموڤ ، بشدة ديال الفولار كاتبان فنة ..

- كولشي كان زوين تبارك الله ... مالك بوحدو لي مكانش ، كان بايت فشقة ديالو ومزال ماوصلش ..

______________________

- خرج من الڤيلا ، طلع فطوموبيلتو تحت أنظار جورجيت لي مقابلاه من البالكو ، شد الطريق وهدف واحد لي فبالو خاصو يوصل ليه ، كان عارف مزيان فين حاط الوراق ، حيت هو براسو لي كيحطهم تم ، عندو سوارت عندو كولشي ، وهاد الوقت كيكون كارلو كيديرو الروتين ديالو ، كل صباح كيتمشى ومكايرجعش حتى كيسالي ... وصل للڤيلا ، حلات ليه الخدامة بلاما ينطق ، مشا نيشان لواحد الباب مكايدخل ليه حد ، فتح الباب ونزل مع الدروج غادي فجهة لاكاب ، لي كان قديم وفيه وراق كثااار ... مشا نيشان للواحد الكوفر ، ركب الرقم وتحل ... خرج جميع المستندات وݣاع الدلائل لي ممكن يغبرو كارلو ويديوه ورا الشمس ، هزهم وصورهم كاملين وكيسيفط ليميل ديال ماثيو ، سيفط ݣاع المستندات كلهم ، من بعد رجع اللور هز واحد البرميل كبير ، دار فيه كاع دوك المستندات والوثائق ، رجع هز بيدو وكب الما لي فيهم عليهم ، وشعل فيه العافية كيتفرج ومبسم ..

- (بصوت قوي) :

أش كدير هنا ؟

- خرجات سكينة هي وشريهان وإشراق من السپا ، وصلهم الشيفور نيشان للصالون ، واحد الإحساس زوين بزاف فرحة كبيرة كانو حاسين بيها لا هوما لا لي فدار ..

- العروسة تكلفو بيها جوج بنات ، وإشراق وشريهان بوحدهم ... وصل ميساج لشريهان من عند مالك كيعلمها بلي هو لي غادي يجي يديهم ..

- شريهان :

مالك هو لي غادي يجي يدينا لدار .. يلاه سيفط ليا ميساج ..

- إشراق (رتاحت مبدئبا كانت خايفة لا يجي عمر وهي مزال لحد الساعة حشمانة منو ، ومعارفاش كيفاش اتعامل معاه واخا الخدمة جامعاهم ، ولكن الحشمة مزال غالبة عليها بزاف معاه ) ..

_________________

- فبلاصة أخرى ، كتوضع اللمسات الأخيرة على وجها ، لابسة كسوة حمرة قصيرة شوية ... جات مع شعرها الذهبي .. المكياج لعينيها خلاتو خفيف ، من غير العكر لي دارتو احمر بحال لون كسوتها ..

- سارة (كتشوف فيها بإعجاب) :

جيتي زوينة بزاف أبنتي ، شحال هادي ماشفتك بحال هكا فرحتيني ..

- جوديا (ضحكات) :

حيتاش شحال هادي ماتعرضت لشي عرس ..

- سارة :

لالا أبنتي ، هاد الأيام كنشوفك مبدلة بزاااف ... ولكن مابغيتش نسولك شنو هو السر حتى تجي انت وتعاودي ليا ..

- جوديا (ضحكات ) :

منين تكون شيحاجة اماما ، غادي نعاودها ليك كوني هانية ... هزات ريحتها رشات منها ، لبسات سباطها وهزات الساك ..

- جوديا (باست ماماها فحنكها ) :

انا مشيت لماما ..

- سارة (تابعاها من اللور ) :

واخا ابنتي سيري ..

__________________________

- دار يدو على سلاح جبدو وضار بشوية ، لقاه واقف كيشوف فيه بشر موجه السلاح عليه ..

- كارلو (ضحك) :

كنت عارفك غادي ديرها ... كنت كنكدب إحساسي ، ولكن لي كلب كلب ، شنو غادي دير ضروري تعض يد سيدك ..

- دجيكو :

أشمن سيد كتهضر عليه ، شكون انت ومنين جيتي ، الى انت نسيتي أصلك وبدلتي شكلك ومحيتي بصماتك ، انا مانسيتش ... كنتي دري صغير مامعروف أصلو من فصلو ، جاردينيي صغير ، قتل الراجل لي كان خدام عندو حيت غتاصب ليه البنت لي كان كيبغي ، شنو كان عندك ... كونماسي الأب لي تبناك ودار منك بنادم ... انت أصلا نكرة منين جيتي ، انت ضعيف انت بلا بيا انا ماتسوى والو ، انا لي كنت كنفد انا لي كنت كنقتل وانا لي كنت كنهرب ، وأنا لي كنت مسؤول على كلشي ، انا كنتي كتصدر غير الأوامر ... انت بلا بيا انا مكاينش ، هادشي لي انت فيه ديالي انا ومن حقي أنا ، بغيت نعرف انت باش بوص ههههه باااااش جاوبتي ، بإسم الأب فقط وبفلوسو ومكانتو ، لي خاصك تعرف هو البوص كيكون عندو تاريخ عرييييق ، وانت ماعندك والو ههههه ، مابقاش ليك بزااف اكارلو ، جميع الوثائق دابا فيد دييغو عقلتي عليه ، دييغو لي قتلتي باااه وحرمتيه من فلوسو وحرمتيه من البنت لي كان كيبغي ، ديييغو رجع (شاف الصدمة على وجه كارلو ) ..

- دجيكو (كيضحك بكل قوتو ) :

ههههههه تصدمتي ياك ، اه دييغو رجع ورجع قوى منك ... وجميع الوثائق عندو ، وغادي يوصلو للبوليس ، الإمبراطورية لي عند بالك انت بنيتيها اطيح على راسك ، ولكن اتلقاني انا كنتسناها ... جا الوقت لي تودع فيه اسينيور كارلو ... (فنفس الوقت تطلقو جوج رصاصات من فرادة مختالفين ، وحدة مشات للقلب نيشان طيحات مولاحو ميت غارق فدمو ، او وحدة خلات مولاها ، يشد جهة كرشو كيتألم ، كيجر فرجليه طالع مع دروج ... غادي فتجاه طوموبيلتو ، طلع ركب فيها ديمارا بالكشايف وزاد ) ..

_______________________________

- وصل مالك للصالون لي عطاتو شريهان العنوان ديالو ... نزل من طوموبيلتو بكامل اناقتو ، لابس كوستار فالكحل ... شعرو راضو اللور ، العينين كانو عليه حيت معروف ... لي داز كيشوف فيه ويتبسم ليه ، شاف فساعتو ، هز تيليفون وسونا عليها مجاوباتوش ... تحل الباب وخرجات من الباب ، لابسة كسوة فالبيج منبتة بالحجيرات فالبيض ، مع صباط فنفس اللون وساك منبت بالحجيرات بحال الكسوة ، شعرها كانت جامعاه وتطلق من اللور مع خصلات على وجها خفاف ، المكياج كان خفيف وزوين بارز ليها عينيها ، وقف برهة كيشوف فيها مكرهش كون خطفها وتزوج بيها اليوم قبل غدا ، وقفات كتشوف فيه عاجبها الحال ، خوات الطريق لإشراق لي خارجة هي او سكينة ... لي ماشاء الله كانت بحال شي أميرة فوق الأرض ... فتح مالك الباب وهو عينو على شريهان ، طلعات سكينة اللور حداها إشراق ، أما شمس كانت فدار العريس ، طلعات شريهان حدا مالك بلاما تنطق بكلمة وحكة مخلياه يتحرق على نار مهيلة ..

- وصلو للڤيلا ، نزلو كانو واقفين بزاف ديال الطوموبيلات ، شريهان خدات سكينة ودخلوها من الباب اللوراني طلعوها نيشان لبيت شريهان ، كانت كتسناها نݣافة تم ، وأول لبسة لبساتها هي تكشيطة خفيفة فالبيض .. مع تاج بسيط ، كولشي كان بسيط ... إشراق لبسات كسوة طويلة بليدين فالخضيضر بارد ، شعرها دارت ليه مشيطة خفيفة ، كاتبان راقية وزوينة ، الكل كان كيتسنى التحت ... أما سعد كان كيتسناها غير إمتا تخرج من البيت ، تحل الباب وخرجات منو ... كتبان زوينة بزاف بعينيها لي لونهم خضر ، ومع المكياج كتبان زوينة بزااف ... سعد محيدش عينيه عليها ، حتى هو كان كيبان زوين بزااف ، باس ليها راسها ونزلو بجوج تحت أنغام الموسيقى ، وصلاة على النبي من زهرة ونزعة لي كانت فرحانة بزاف بعروستها ...

- جوديا ( وقفات على مصطفى) :

سلام كنتمنى منكونش تعطلت ..

- مصطفى ( كيشوف فيها بإعجاب ، دوخاتو كتبان زوينة بزاف عمرو شافها بهاد الشكل ) :

لا لا أبدا ، حتى الى ݣاع تعطلتي هانية ماعنديش إشكال ..

- جوديا (جاتها الضحكة وحشمات ) :

هاهوما وصلو .. دخلو العرسان ، الكل كان عينيه عليهم ... الأغلبية لي حاضر من الأجانب قليل لي كان مغربي ... حتى العرس مكانش عرس كبير بسيط وزوين ... الكل كان مترقب وعينيه على سعد وسكينة لي لحظات قليلة تعلن على زواجهم ، سناو بزوج وزغاريت زهرة وحليمة ونزهة لي بنسبة لناس لوخرين غريبة ، زلزلات الدار ..

- طلعو سكينة باش تلبس اللبسة الثانية والأخيرة لي اتكون مغربية ، تكشيطة فالخضر توبها بحال جوهارة ، نزلات بيها هي وسعد ... مالك لي فينما كيجي يهضر مع شريهان كتهرب ليه وتحجج بالناس وتخبع ، هي كثر من إشراق لي ماخدا منها عمر لا حق لا باطل ... داز العرس زوين بزاف ماطولش ..

- هبطات لابسة كسوة بيضة سامبل وراقية ، شعرها مجموع من القدام حتى للور وترخف ، كتبان زوينة بزاف وهو حداها ، لا نزهة ولا أحمد بجوج مقاداهم فرحة ... مكانتش على البال انو ولدهم الصغير لي كان كيطير ، اليوم عرسو واخيرا لقى حب حياتو ..

- إشراق (هزات عينيها فيه .. لقاتو كيشوف فيها والإبتسامة على وجهو ... نزل راسو لعندها وهمس ليها بشوية ) :

العقبة لينا إن شاء الله ..

- إشراق (ضحكات وحدرات راسها حشمانة ) ..

فالجهة أخرى ..

- مالك (كيشوف فشريهان ... لي كانت ݣالسة حداه) :

وجدي راسك مابقى والو لعرسنا ..

- شريهان (طلعاتو ونزلاتو) :

نعلمك من هنا ، دير ليا شي عرس بحال هذا ناشف ... لا شعبي لا قعدة ابلاش منو حسن ..

- مالك (ضحك وقرب شفايفو من ودنيها) :

فخبارك .. كنموووت عليك وانت ومعصبة ..

- مصطفى (غير حاضي جوديا ) :

منين يسالي العرس ، ونساليو هاد الزوبعة عارضك للعشا ..

- جوديا (تبسمات) :

اهاه بكل فرح ..

- جوديا (دورات راسها تخفي وجها من الإحراج جات عينها فعيني جون ) :

مصطفى جون هنا ، ومعاه دراري ..

- مصطفى (تزاد معاه الزايد ، ضار بالخف شافيه جون أشر ليه براسو باش يجي) :

شيحاجة وقعات 100/100 ..

___________________

نحن لا نتغيّر ، مشاعرنا تبقى ثابتة ..

ما يتغيّر مع الوقت هو طاقة التحمل لدَينا..

القدرة على المحاولة .. على الاستمرار .. عالكلام .. و حتى على الصمت ..

و هكذا تدور العلاقات الإنسانية وتتبدّل..

لتهدَأ و تجِد مكان استقرارها فتتوقف حيثُ وجدَت فيه الأمان .. الأمان قبل أي شي ..

هناك حب_العقل و هو أن ترتاح إلى إنسان ....

و تتفاهم معه و لكن قلبك لا ينبض له ....

و لا روحك تهفو اليه ! ......

و حب_العشره و هو أن تعتاد إنساناً في حياتك ...

و تأنس إليه و تجمعكما عشرات التفاصيل الصغيره ....

و حب_القلب و هو أن يخفق القلب لرؤيته و إسمه ...

و صورته و يتألم لقسوته و إبتعاده و هناك ايضاً .......

حب_الروح و هو أقوى و أشرس هذه الأنواع و اندرها

و أصعبها وهو ما يسمى بالعشق و هو يشمل أنواع .....

الحب جميعاً فيأسر عقلك و قلبك و جسدك و كل تفاصيلك

و يصهرها في إنسان واحد و هو فخ لمن وقع فيه .....

فلا_خلاص_منه و لا نهايه و لا ارتواء منه ! .....

عنيف_ظالم لا اسباب و لا مقاييس له .......

لا يعترف بالقوانين و لا يرضى بشريك .....

و هذا العشق ليس له عقل و لا منطق .....

و لا يقتله هجر و لا قسوه و لا تضعفه مسافات ...

- كيضحك كيضحك كيضحك ، عينيه ساحو بدموووع ... كيغوت بأعلى صوتو وعلى حر جهدو :

دييغو : ربحت ربحت وأخيرا ربحت وأخيرا ربحت ههههههههههههه ، ݣاع لي كان ليا رجعتو ݣاع لي كان ليا رجعتو ..

- ماثيو ( كيشوف فيه وساكت كان بحال شي وحش .. ماخلاهش حتى يهضر ولا يݣوليه شنو وقع ، مابغاش ݣاع يسمع ليه ) .. :

دييغو ولكن خاصك تعرف بلي ..

- دييغو ( قاطعو ) :

مابغيتش نعرف خليني فرحان ، خليني نستمتع بهاد اللحظات ، ااااه شحال وانا كنتسنى فهاد اللحظة ، انا وااااااعر انا واااااعر أنا دماااااااغ ، هههههههههههههه جيت فاللحظة وحدة وخربتها عليه ، رجل الأعمال المعروف البوص ، كارلو كابوني لي مكايقد حتى واحد عليه جيت انا فاللحظة وحدة ريبت ليه كولشي ، فرحتو ماكملاتش ههههههه انا واااااعر واااااعر ..

- ماثيو تخلع منو ، تسل بشوية رجع اللور وخرج ساد الباب من وراه ..

______________________________

- فجهة أخرى ، البنات كلهم كانو فالبيوت ديالهم ، جورجيت كانت فالجردة مسرحة رجليها كتفكر فهاد الحريرة هادي ، حتى قفزها صوت البوليس ... وقفات بالخف تالفة معارفة فين تمشي ولا تجي ، لي ݣارد جبدو الفرادة ديالهم ،، البوليس كامل ضارو بالڤيلا التدخل السريع كولشي ضار بالڤيلا ..

- أي حركة منكم غادي تزيد تعقد الأمور ، الڤيلا كلها محاصرة من ݣاع الجوايه ، ماعندكم حتى بلاصة باش تهربو ... أي حركة منكم غادي تزيدو تعقدو الأمور .

- جورجيت (ݣلسات للأرض كتردد) :

صافي هادي الأخرة لينا ، هادي هي نهاية سالينا ..

__________________________

- مصطفى : شنو واقع ؟

- جون :

سمحولينا قطعنا عليكم الفرحة ديالكم ، ولكن كون كنتو كتجاوبو على تيليفوناتكم مكناش غادي نجيو حتى لهنا ..

- جوديا : مع الموسيقى ماسمعنى والو ..

- جون :

وصلونا وثائق من إيميل مجهول ، فيه كاع الوثائق لي كنا محتاجين باش نشدو كارلو ... فيها ݣاع الدلائل عليه وعلى خدمتو ، وفيه حتى العنوان ديال الڤيلا لي شادين فيها البنات ، دابا راه ايكونو العناصر تما باش يخرجو البنات ويشدو جورجيت ..

- مصطفى (تشوكا تصدم مافهم والو ) :

شكون لي عندو مصلحة يغرقو كارلو ، ويقدم عليه هاد المستندات كلها ..

- جون :

أكيد كاين شي طرف ، وهاد الطرف هذا عرف بلي حنا دايرين خطة للكارلو وسهلها علينا ، ومدام واحد عرف هادشي الا ويديه طوال وبزاف .. قاطعهم واحد البوليس لي جا كيجيري عند جون ..

- سيدي ، جااتنا خبار بلي وقعات جريمة فهاد العنوان ( ...)

- مصطفى ( بصدمة ) :

الڤيلا ديال كارلو هادي ..

________________________

- وصلو البوليس للڤيلا ... لقاو ديجا طوموبيل ديال البوليس كاينة تما ، الضباط غير شافو جون عطاوه التحية ، دخلو بزربة كانت الخدامة واقفة وكتبكي .. واحد من للبوليس كيعاود لي جون شنو وقع ، دخلو من الباب لي دخل ليه دجيكو ، هبطو مع الدروج بزربة ، كانت الشرطة العلمية كتصور ، والجثة مغطية ... تحنى جون على ركابيه عرا الجثة .. شاف فمصطفى وفباقي العناصر ، شي كيشوف فشي ..

- خرجو على برا .. واقف جون كيفكر .. كان كولشي كيترقب شنو غادي يݣول والتحليلات لي وصلو ليها ..

- مصطفى :

القضية تعقداات بزااف ، هادشي مابقاش موكل ..

- جون :

فعلا عندك الحق ، دجيكو مااات ... وكيبان ليا بلي حتى كارلو أيكون مضروب ... من الأثار ديال الدم لي كان على الدروج كيبين بلي كارلو كان كينزف ، وغادي يكون فخبارو بلي الوثائق وصلو لينا ، واخا تحرقو ولكن عندنا صور عليهم .. وهدا هو الاهم ..

- مصطفى ( بخوف كيهضر وكيترعد كلو ) :

مدام كارلو هارب ، وعارف بلي مابقى ليه والو ... وبلي وصلنا لݣاع الوثائق لي غادي تغرقو ... دابا مابقى عندو مايخسر ، واول وحدة أيفكر فيها هي ختي ..

- على الطبلة ديال الفطور ݣالسة شريهان ، لابسة كسوة فزرق فيها وريدات بسومو .. بجنبها سكينة لابسة كسوة فالخزي بارد طويلة وطالقة شعرها ..

- نزهة :

الله يديكم على خير ويجيبكم على خير ياربي ..

- سكينة : أمين ياربي ..

- مالك :

وعنداكم لا تعطلو علينا ، راه مابقى لعرسنا والو ..

- عمر :

شفتي ازواجك ، وخطوبتي أنا لي كاينة فسيمانة جايا ماشتيهاش ..

- سكينة :

راه ݣلت لسعد كون أجلنا شهر العسل حتى تفوت الخطوبة ديال ختي ..

- سعد :

غادي نجيو يوماين قبل الخطوبة غير تهناي ..

- سكينة :

إيوا اشمن شهر عسل هدا لي فيه 5 يام ..

- شريهان :

وعندها الصح ، خليو حتى دوز خطوبة عمر وإشراق .. ويدوز عرسنا ، ونزلو للمغرب وتمشيو لشي مدينة فالمغرب الشمال ، ولا السعيدية والله حتى فكرة زوينة ..

- سعد (وقف) :

واخا الالة نأجلو شهر العسل ، ولكن دابا غادي تسمحو لينا ، اناخود مراتي وغادي نمشيو بحالنا واخا (جرها من حدا شريهان وخرجها تحت انظار الكل ) ..

- أحمد :

وانت أسي مالك ، راه خاصك توجد راسك 15 يوم دغية غادي دوز ..

- شريهان :

العرس ديال هنا مغانوجدو ليه حتى حاجة كبيرة ، غير كسوة عادية ... والماكلة ضافي لوليدات المركز ، تبارك الله المركز ولا عامر ݣاع دراري دخلو ونوامس كلهم عمرو .. داكشي باش انديرو إحتفال صغير مع دراري وانتوما ، والعرس الكبير هو لي أيكون فالمغرب ..

- نزهة :

ولي بغات العروسة هو لي غادي يكون ..

- شريهان :

عرفتو شنو ديرو ... علاش انت اعمي وماما وخالتي نزهة تسبقونا للمغرب ، باش توجدو على خاطركم من ورا العرس ديالنا هنا ... حنا أصلا أنعقدو فالمغرب منعقدوش هنا ، تهبطو قبل منا شنو بان ليكم ؟

- زهرة :

والله الى فكرة مزيانة ، باش هكا نوجدو على خاطر خاطرنا ..

- نزهة (فرحانة ) :

ناري عرفتو واحد الفرحة منقدش نعاود ليكم عليها ، وأخيرا من بعد سينين غادي نزلو للمغرب ..

- أحمد :

صافي مزيان ، انا غادي نقاد الإجراءات باش نزلو كاملين ..

- عمر :

- ومتعرفو انا وإشراق نتزوجو حتى حنا فالمغرب هههه كولشي ممكن ..

- نزهة :

إيه علاش لا ، هكا باش تقدو تدفعو لتبني ديال ياسمين ..

- مالك :

بصح الواليدة عندها الصح ، خاصكم تعجلو زواجكم .. باش تدفعو للتبني ياسمين ، مابقاش ليها بزاف واترجع الخيرية ..

- نزهة : ماعرفناش واش ممكن يخليوها تنزل معانا للمغرب فهاد المدة لي موال عندنا ولالا ؟

- مالك : انشوف بخصوص هادشي ..

- نزهة : واخا أولدي إن شاء الله ..

- شريهان (كانت ساكتة وعينيها على مصطفى لي منين ݣلسو وهو ساكت حتى الفطور مافطروش ݣاع ، شوفاتو فشكل ، خوها وكتعرفو باينة واقعة ليه شيحاجة ، الغبرة لي غبر لبارح ومرجعش حتى لنصاصات الليل ، سمح فالعرس ومشا باينة وقعات ليه شيحاجة ) ..

- سونا ليها التيليفون ، طلعات ليها نمرة علي ... خدات التيليفون وبعدات عليهم :

ألو علي ، صاڤا الحمد لله وأنت ؟

- علي :

فخبارك خوك جا عندي لبارح ؟

- شريهان : كيفاش ؟ وعلاش جا عندك ؟

يتبع...