السيدة الأولى الجزء السابع

كــان

- نزهة (ساهية مابغاتش تغدا نهائيا )

زهرة : واش اختي اتبقاي بحال هكا ، واش شفتي حالتك كيف ولات ولالا ؟

- نزهة (تنهدات تنهيدة طويلة ) :

شهرين ازهرة شهرين اختي وهو مكاينش ، شهرين وهو غابر ... المركز بداو كيخدمو عليه ولكن هو حسو مكاينش ، خلا البنية ومن داك نهار مابقينا شفناه ... الله ياخود فيها الحق اختي ... خرجات ليا على ولدي وجرحات ليه قلبو ، جرحات ليه كرامتو ورجولتو ، بغيت ربي لهلا يسمح ليها والله ياخود فيها الحق على مدارت فيه

- زهرة :

راه لي داز منو ماشي قليل اختي ، خليه راه هز راسو باش ينسى ..

- نزهة :

داكشي لي ݣاليا عمر ، ݣاليا بلي هاد السفرية ديال الخدمة جات فوقتها ... منها يفوج ويبدل الوقت ، ويفكر فراسو وينسى ... ومنها خدمة ، ولكن انا ماعرفتش علاش ماتقت بكلامو ...

- زهرة :

يهديك الله أصاحبتي ، واش هو ايخلي المنصب ديالو ، ومشروع لي بدا فيه ، ويمشي يخوي المدينة مايمكنش ، دابا يرجع اختي ... والحمد لله غير لي ربي بينها على حقيقتها ، هداك هو المهم ..

- نزهة :

الحمد لله ياربي ، الحمد لله ...

__________________

- سكينة (موجهة كلامها لشريهان ) :

عندك تنساي العشية معروضة عندنا للعشا ..

- شريهان (هازة صينية حطاتها على الكنتوار ) :

لالا مغاديش نسا ، ݣلتها لعمر ولد عمي باش مايجيش ورايا ، حتى نبغي نرجع لدار ونݣولها ليه ..

- سكينة : صافي مزيان ... وداركم ؟

- شريهان : حتى هوما علمتهم اتهناي ..

- سكينة (فرحانة بزاف من الداخل ... دازت شهرين على نهار بداو صفحة جديدة هي وشريهان ، واخا شريهان مزال كتصرف بحدر واحد الشوية ... ولكن بعدا راهم ولاو نصف صحابات ، مزال ماولاو 100 فالمية ... سكينة حالفة حتى تبدل ليها الفكرة لي عندها ، واخا مزال ماعرفتش شنو بيها ولكن المهم هو تولي تعزها ، كيفما سكينة عزيزة عليها شريهان بزاف ) :

صافي مزيان ..

- علي وقف عليهم داير واحد الجيلي ، مع شابو ... يديه عامرين بتويشيات ..

شيري ..

- شريهان (وقفات وشافت فيه عارفاه شنو باغي ) :

علي علي راه وقت الخدمة هذا ، حشومة عليك تعطلني ..

- علي (عصباتو) :

وقيلة نسيتي انا هو الباطرون ديالك ، سولتك جاوبيني شكون هي جميلة يلاه ؟؟

- شريهان (شافت فيه بنص عين) :

طلبني ..

- علي (بإستغراب) :

شنووو؟؟!!

- شريهان : راه سمعتيني طلبني ونقوليك ..

- علي :

فخبارك نقدر نجري عليك ؟؟ ورقة الاقامة مزال ماخرجات ليك ولا نسيتي ؟

- شريهان (ببرودة) :

لا مانسيتش ، أصلا مابقاش ليها بزاف وتخرج ، بفضل عمي حبيبي ... أهو مغاديش تنكر بلي ملي خدمنا انا وسكينة ، والقهوة مابقاتش كتخوا نهائيا ، لدرجة طريتي تزيد الكراسة للجهة لوخرا وزايون مايمكنش تجري عليا حيت كتموت عليا تنكر؟ ... الله يرضي عليك أولدي زيد طلبني ...

- سكينة جاتها الضحكة حدرات راسها ومشات تكمل خدمتها ..

- علي (بقا ساكت سلم امرو لله ورضخ ليها ) :

شريهان عفاك عفاك ازين ديالي ، الفنون ديالي العمر والحب وروح ديالي ... واخا تݣولي ليا شكون هي جميلة ، شهرين وانا كنطلب فيك الفنون ، حني فيا الله يحن عليك ..

- شريهان (جبدات ليه حنكو ، بلعاني شدات فيه علي عزيز عليها بزاااف ، ولا بحالو بحال مروان بنسبة ليها ... فهاد شهرين ولاو قراب بزاف ، مامرة مازوج وصلها حتى لدار ... مرات كيدوز هو يجيبها معاه للخدمة ، مابقاش بيناتهم حدود نهائيا ... مكتحس بيه انو الباطرون ديالها نهائيا ) :

شفتي شحال كتكون ظريف فاش كتسمع الكلام .. واخا اسيدي ، جميلة هي بنت خالتي حليمة ، لي مقابلة الدار ومربية ولاد بنت عمي ... بنتها جميلة هي المسؤولة على الخدامة لي فدار ..

- علي (كيفكر ) :

امممم وشحال فعمرها (غمزها) ..

- شريهان : 26 عام صافي كملتي الأسئلة ديالك ؟

- علي (بترجي ) :

برجولة وقفي مع خوك بغيت نمرتها ، اصاحبتي من نهار شفتها تحفرات ليا فدماغي ..

- شريهان :

اويلي واش من نيتك ، الى عطيتك نمرتها شنو غادي تݣوليها ، واس هكا ناس كيتعرفو ؟

- علي :

وشنو المعمول ؟

- شريهان (كتفكر) :

نهار السبت ونݣوليك ..

- علي : وعلاش زعمة ؟

- شريهان :

صبر شوية على رزقك مالك زربان ، انت اصبر نهار السبت وغادي نݣوليك اخليها عليا ... ولا عليك انت خرجك السوق ..

- علي (كيشوف فيها بشك) :

واخا الالة ها هو ساكت دابا نشوفو ...

- شريهان : دابا تشوف

_________________

الــمغرب :

القــهوة :

- كريم(سرباي ثاني مع خولة ) :

ربيعة ، هاكي دي هادو لطبلة ديال مدام نادية ...

- خولة بإستغراب) :

مالفة كتجي تفطر ، العجب جايا مع وقت الغدا ..

- كريم : المهم غير تحركهم ... حنا ماشي شغلنا ..

- هزات خولة الغدا وداتو لطبلة ديال نادية كانت بوحدها ݣالسة ، وبحال ديما الݣارو فيديها ..

- نادية (بإبتسامة ) :

زين لاباس عليك هانية ؟

- خولة : الحمد لله امدام بيخير ..

- نادية : ݣلسي بغيت نهضر معاك .. جرات خولة الكرسي وݣلسات ..

- خولة : الله يسمعنا خير ..

- نادية (ضحكات ) :

كل خير حبيبتي (خدات نطرة من الݣارو ... طفاتو فالطفاية ورجعات كتشوف فخولة) :

ربيعة ، شنو بان ليك تخدمي عندي ؟

- خولة (فالداخل ديالها فرحات ، حيت واخيرا من بعد شهرين قدرات توصل لمبتغاها) :

نخدم عندك ولكن امدام فاش ؟ وانا خدامة هنا مزيان الحمد لله ..

- نادية (حركات راسها) :

الخدمة عندي ، ماشيش هي الخدمة هنا ... الصالير مضوبل ... وغادي بعجبك الحال ، منكدبش عليك كيعجبوني البنات لي بحالك ، داخلين سوق راسهم من الخدمة لدار ... ومن دار للخدمة ، صفحتهم بيضة بحالك .. (ضحكات فاش شافت ملامح خولة تبدلو للصدمة) مالك تصدمتي ، اه اربيعة سولت عليك مزياااان ، وعرفت بلي انت صفحة بيضة .. ايوا دابا شنو ݣلتي ؟ فكري مزيان حتى من ديك الدار لي انت فيها ، اتبظليها وتسكني فما حسن ..

- خولة (تنهدات) :

واخا تعطيني شوية ديال الوقت نفكر ؟

- نادية :

اهاه عندك من هنا حتى لوقت لي نسالي فيه الغدا ، وبغيت نعرف جوابك ... دابا تقدي تمشي .

- خولة وقفات حدرات راسها ورجعات للخدمتها ..

_________________

الكوميسارية

- حادر راسو على الملف لي قدامو وساهي وساكت ... من داك نهار لي شاف فيه الرسمة ، وهو غير ساهي ماكلتو قلالت وهضرتو حتى قلالت ... معارفش شنو يدير ، واش ختو بنت مو وباه شاهدة على جريمة ومافخباروش ، ماعلماتوش ماعودات ليه والو خبات عليه ... علاش بغا غير يفهم علاش ؟ شنو السبب لي خلاها دير بحال هكا ، وتخبي عليه ياك هو خوها وقريب ليها ، ماقداش يتيق بلي أيشدها وبلي ممكن دخل للحبس ، هادي في حالة الى مادفعات غرامة مالية على تستر ديالها ..

- منعم (حاضيه) :

اتبقى ساهي بحال هكا ، من نهار عرفتي بلي ختك هي شاهدة على الجريمة وانت ساكت وساد عليك ، شوف حالتك كيف ولات أصاحبي .. حتى الهضرة لي سمعتي دابا من كلام خولة ونادية مافحرك فيك والو ..

- مصطفى (هز راسو فيه) :

شنو باغيني ندير مثلا ، انت ماحسش بيا ... حيت مطايحش فنفس الموقف لي انا طايح فيه ، شهرين هادي والعميد كيسولني على شنو درت ، وعلى شنو ݣالينا ولد مول الحانوت ... وانا كنتخوى عليه ، شنو ممكن نݣوليه بلي ختي هي لي شاهدة ، بلي ختي طايحة فمشكل قد الجبل ... بلي ختي تقدر تكون عرضة للخطر من طرف مافيا كبيرة ... واش عارف انا فاش طايح ... كيفاش اندير نخليها ترجع ، وكيفاش انمشي انا عندها وزيد وزيد وزيد ، انا واحل ، حاس براسي كاين فبير غارق ومعارفش كيفاش نطلع منو ...

- منعم :

سمع (قاطعهم صوت التيليفون ديال المكتب) ..

- مصطفى (هز التيليفون ) :

ألو (كلامو تحول للجدية وإحترام) وي سعادة العميد ، اهاه واخا ... قطع التيليفون او وقف كيشوف فمنعم ..

- منعم (بتساؤل) :

شنو بغاك ؟

- مصطفى :

ماعرفتش ، ݣال بلي بغاني نكون دابا عندو فالمكتب ..

خلا منعم وخرج من المكتب فتجاه مكتب العميد ..

________________

دق الباب ودخل ... عطاه التحية وزاد خطوات واقف قدامو ..

العميد : ݣلس أمصطفى ..

- مصطفى ݣلس مترقب شنو غادي يݣوليه العميد ..

- العميد (هز راسو من على الملف كيشوف فمصطفى ) :

فين وصلتو ؟

- مصطفى : حنا غاديين اسيدي ..

- العميد (هز واحد الصورة حداه وحطها قدام مصطفى ) :

كنظن كتعرفو مزيان ياك ؟ .. هز مصطفى الصورة كيشوف فيها باستغراب :

ولد عمي مالك ... مالو ؟

- العميد : ولد عمك او وزير الشباب والرياضة ياك ؟

- مصطفى : اه تماما ، شنو واقع ؟ مالو ؟

- العميد (تنهد تنهيدة طويلة وركز نظراتو على مصطفى ) :

تعرض لمحاولة قتل ..

- مصطفى (خرج عينيه بصدمة) :

شنو ؟

- مصطفى :

كيفاش محاولة قتل مافهمتش ؟ شكون هذا لي باغي يقتلو وعلاش ؟

- العميد :

كاين عدة أسباب ، وهوما لي غادي ندكر ليك دابا ... وهوما علاش ستدعيتك لهنا .. ولد عمك مالك ، بدا بإنجاز مشروع كبير ... وهو مركز لإعادة التأهيل وإدماج المدمنين ، وغادي يكون اكبر مركز ايتقام ففرنسا ... والى نجح كيفما مخطط ليه ، السمعة ديالو اتخرج وتوصل للبلدان أخرى ، والى تحقق هادشي وبداو السباب كيوعاو بمخاطر المخدرات ، هنا أيوقع نزيف عند التجار والمافيا لي كتاجر بالمخدرات بصفة عامة ، وهادشي هو لي مابغيينوش هاد الناس ، وباش يوصلو لهدفهم خاصهم يحيدو مالك من طريقهم ، وهادشي لي وقع مجرد تخويف ... قرصة وذن كيف كنݣولو ..

- مصطفى (كيخمم) :

هاد الحركة داروها باش مالك يخاف ويتراجع ..

- العميد : تماما ..

- مصطفى :

على معاودات ليا ختي بلي مالك ، هو العنيد فخوتو ... يعني بحال هاد التصرف مغاديش يخلعو ..

- العميد (تبسم) :

هادشي انا عارفو ، بحث مزيان عليه الصراحة انت وياه نفس الكراكتير ... وهادشي ماشي غريب حيت انتوما دم واللحم ..

- مصطفى :

ولكن ماجبتينيش لهنا غير على قبل هادشي ولالا ؟

- العميد (تبسم) :

هادشي باش كتعجبني ، بدكاء ديالك ولكن بعد المرات ... كتحسب راسك دكي كتر من القياس اسعادة الضابط ... نهار اديتي القسم اديتيه على الصدق ، وانت عارف بلي خدمتنا مافيها لا هداك عائلتي ولا صاحبي، علاش خبيتي عليا موضوع الشاهدة أمصطفى ؟

- مصطفى (حس بالبرودة نازلة من ظهرو سكت ماقدش يجاوب) ...

- العميد (تنهد او وقف جا قدامو تقابل معاه) :

مصطفى ، انا عارف بلي هادشي صعيب عليك ، وعارف بلي صعيب على ختك تشوف جريمة بحال هاديك ، عارف مزيان بلي الخوف لي منعها وسيطر عليها ، وخلاها تسكت وتختار انها مدويش ، ولكن مع ذلك هادشي راه كيعاقب عليه القانون وانت عارف مزيان هادشي ..

- مصطفى (هز راسو شاف فيه) :

وشنو المعمول اسيدي ، نمشي ونجيبها ونقدمها للعدالة ولا شنو بضبط خاصني ندير ، لأول مرة كنحس بيديا مكتفين ..

- العميد (ݣلس مقابل معاه) :

مسألة شنو غادي دير ، خليها من بعد دابا كاينة مسألة أهم ..

- مصطفى (بإستفسار) :

شنو هي ؟

- العميد :

وجد الپاسپور ديالك او وراقك كلها ، غادي تسافر ..

- مصطفى :

فين غادي نسافر ، سيدي انت عارف مزيان بلي منقدش نسافر ... خولة يلاه اتخدم مع ديك نادية ..

- العميد :

منعم غادي يتولى المهمة ، وكلشي غادي يوصلك اول بأول ... ولكن خاصك ضروري تسافر ، عندك ديبلاسمو ... والمدة ديال هاد ديبلاسمو طويلة شوية ، على حسب التطورات ديال القضية ..

- مصطفى (مابقى فاهم والو) :

مافهمت والو أسيدي !! لفين غادي نسافر وعلاش لدابا مافهمت والو ..

- العميد :

وصلاتنا خبار جديدة هاد الصباح ، بزاف ديال البنات مفقودين فعدة بلدان ومن بين هاد البلدان المغرب بطبيعة الحال ... كاينين عدة شكوك كيدورو فالوسط (قرب من وجهو) ويقدر يكونو ريوس كبار داخلين فهاد القضية ..

- مصطفى (تشوكا حس بقلبو تقبط عليه واخا معارفش شنو السبب ) :

سيادة العميد مزال مافهمت والو ، كنحس براسي فوسط دوامة كبيرة ... ومن كلامك كيبان ليا عندك الجديد وجديد مهم بزاف ..

- العميد :

تماما ... سمع ..

- خارجة هي وياها من الخدمة ، غاديين على رجليهم ... ختارو يتمشاو حيت خرجو بكري من الخدمة ، سكينة غادية وكتعاود شافت جنابها كتبان ليها شريهان وقفات ..

- سكينة (رجعات عندها كتشوفها فاش كتشوف) :

علاش وقفتي ؟

- شريهان (هازة السكادو وكتشوف فواحد المحال كبير قبالتها ، مصبوغ بالبيض ... البلاكة ديالو بدهبي ، كتشوفو ساهية وكتنهد ) :

شوفي شحال زوين ..

- سكينة (بإبتسامة) :

اه زوين بزاف ، هاد الشارع معروف بالبوتيكات ، سميتو شارع أونتيب Rue Natives ... وفيه غير البوتيكات الواعرين ، لي بغا يدير شي مشروع هنا غادي يتمشى ليه ..

- شريهان (مزال مقابلة مع داك المحال) :

انا عيني غير على هاد البوتيك ، الى سهل عليا الله نشريه ..

- سكينة (كتضحك) :

غير اتجي وتسلمي عليهم ، تكولي ليهم بغيت ناخود عندكم هاد المحال من نيتك اصاحبتي ..

- شريهان (شافت فيها) :

هانتي وهانا ، هاد المحال ايولي ديالي إن شاء الله ، وغادي نديرو وكالة للزواج ..

- سكينة (جراتها) :

زيدي فهميني قضية هاد الوكالة كيفاش ؟!!

- شريهان :

دابا هانتي ، حنا اي واحد مقادش يعتارف بالحب ديالو لشي وحدة كيبغيها ، كنوجدو ليها مفاجأة بلاصة زوينة وكنخليوه يتعارف ليها بطريقة زوينة ياك ، ومن ورا تعارف كتجي الخطوبة وزواج ... وحنا تاني كنتكلفو بزواج من الاول للأخير ، من البلاصة من كولشي حتى الحلويات وطياب ، هوما مايعرفو العرس يدوز هو هداك ، ونزيدك هادشي مكايقتاصرش اعلى راجل ... حتى الى شي وحدة كتبغي شي واحد وبغات تعتارف ليه ، كنهيئوها نفسيا وحتى شكلها الى مكانش هو هداك كنقادوه ... ونخليوها تيق فراسها ..

- سكينة (بإعجاب) :

هادشي مجهد عندك عجبني ، منين جاتك هاد الفكرة ؟

- شريهان (سرحات بخيالها) :

كنت متبعة پلين جين ، كانت كتجي شحال هدا فواحد الاداعة م تيڤي ، من تم وانا عندي هاد الفكرة من الصغر كنت بريهيشة ... وهداك هو الحلم ديالي ندير مشروعي ، وزدت كملت فاش تفرجت فواحد الفلم هندي ، كيتكلفو بزواج زدت حبيت مشروعي كثر وكثر ، علاش اختي داكشي لي يديروه فالافلام والبرامج منديروه حنا فالواقع (غمزاتها) ..

- سكينة (كضحك) :

عندك الصح ، انا معاك فهادشي وكوني متأكدة هاد المشروع ديالك ، غادي يدير بوم ففكان وفرنسا كلها ... وسمعتك مزال اتلعلع خارج البلاد ݣاع ..

- شريهان (كضحك) :

ماشي حتى لهاد الدرجة ، انا غير الى نجح ليا داكشي لي بغيت ، نمشي ابشوية براكة عليا ..

- سكينة :

وانا بعدا بهادشي لي عاودتي ليا ، كنشوفك الفوق الفوق ݣاع ..

- شريهان (كضحك) :

واه الفوق فوق شجرة ونطيح على راسي ، انت غير زيدي ..

- كملو الطريق ديالهم ، حتى عيات سكينة وشدو طاكسي حطهم قدام باب العمارة فين ساكنة سكينة ...

____________________

مصطفى كان تابع العميد ، هبطو مع دروج ودخلو للقاعة الإجتماعات السرية ، دخلو تم سد مصطفى الباب كان حتى منعم ݣالس ... اشر ليه منعم براسو بمعنى شنو واقع ..

- العميد خدا تيليكوموند وشعل واحد التلفازة تم ، كتبان فيها وكالة سياحية معروفة فإيطاليا ..

كنظن كلكم كتعرفو 3l World تابعة لشركة rome tour ؟

- منعم :

كنسمع بيها وكالة مشهورة فروما ، وبرات روما ..

- العميد :

تماما ، عارفين شكون مولاها ولالا ؟

- مصطفى (حرك راسو بنفي ) :

الصراحة انا ماعنديش واخا هكاك مع السفر ، وهاد الوكالة اول مرة نسمعها ..

- العميد :

شركة روم تور تأسسات من زمان هدا ، قبل لا نخلق لا انا لا انتوما ، مولاها إيطالي ابدا عن جد ... ولكن هاد الشركة كان غير مضرݣ بيها الخدمة ديالو الحقيقية ، ولي هي التجارة فالمخدرات وتجارة الرقيق والأسلحة ، دوك زعماء الصغار كان بنسبة ليهم هو الاب روحي ديالهم .. للأسف توفى 16 سنة دابا ..

- مصطفى :

ومنين الشركة مزال واقفة على رجليها ، ومشهورة هاد الشهرة ... هي واحد فولادو خداها وتولى الرئاسة ديالها من وراه ؟

- العميد(حرك راسو بنفي) :

لا ، الأب كيف كيݣولو ليه هوما ، معمرو ماتزوج وماعندوش الولاد نهائيا ، ولكن فواحد الفترة كانت تشدوفيها فالحبس وخرج ، وراها بعام تبنى واحد الشاب يكون فالعشرين من عمرو ... ومن داك الوقت وهو معاه ، الإشكال هو داك الشاب، السلطات شاكين بلي كان مسجون ، وهرب حيت فديك الفترة بضبط كان هرب واحد المسجون، كان متهم بجريمة قتل ، هاد السجين كان الإسم ديالو كارلو مارتينيز ..

- مصطفى :

وعلاش ماتشدش ؟

- العميد :

حيت بكل بساطة مكاين حتى دليل بلي داك السجين هو نفسو ، الابن لي تبناه الاب ، البصمات ماشي هوما والملامح كاشي هوما ..

- مصطفى :

وعلى هاد الحساب هاد خونا هذا ، دار عملية تجميل ، وحرق البصمات ديال يديه ، هادشي لي كيبان ليا ..

- العميد (تبسم) :

وراه هادشي لي ايكون وقع ، ولي متاكدين منو عناصر الشرطة الإيطالية انو وقع ..

- منعم :

سمحليا سيدي على المقاطعة ، ولكن علاش شكيتو بمول هاد الشركة بلي هو نفس الشخص لي هرب من الحبس ؟

- العميد :

بجوج بيهم عندهم نفس الإسم الاول كارلو ، غير هداك كارلو مارتينيز ، وهذا (شاف فتلفازة بانت صورة شخص فاواسط الثلاتينات ، كامل الرجولة والوسامة ... شاد سيݣار فيدو ، طويل وعريض مميز ... ولي ميزو اكثر هو وشم باللغة العربية فعنقو ..)

العميد :

كارلو كابوني الملقب والمعروف بين رجال الأعمال بإسم (كوزا نوسترا) ..

- مصطفى (جمع غوباشتو) :

بلاتي بلاتي ، هاد اللقب فايت سمعتو ، هو وهاد الكنية ، بلاتي ماشي شحال هادي كان شي واحد فالمافيا ، أل كابوني ياك ... وكان حتى واحد الشخص ملقب بكوزا نوسترا صقلي ، حتى هو زعيم المافيا ياك ؟

- العميد :

تماما ، وهذا ثاني دليل عندنا بلي ممكن يكون كارلو هو نفس الشخص لي كان مشدود 16 عام ... ولكن خاصنا بزاف ديال دلائل ، حيت واحد بحال كوزا نوسترا صعيب تشدو ، وهو من بين كبار رجال الاعمال المعروفين ... يعني خاص تكتيك دقيق وخطة تكون ذكية باش يتشد ..

- منعم :

ولكن اسيدي ، حنا شنو علاقتنا بإيطاليا ، وبالمافيا الايطالية ... وبهاد رجال الاعمال لي دويتي عليهم ؟

- العميد (شاف فمصطفى شوفة مطولة ونطق ) :

عندنا علاقة كبيرة ، كثر ماتخايل ... حيت ممكن يكون كوزا نوسترا عندو علاقة كبيرة ، بالجريمة لي وقعات هنا ..

- مع نطق اخر جملة ، شاف فيه مصطفى مصدوم ... ودنيه كيتردد فيهم غير جملة وحدة ، ممكن هاد الانسان لي فتلفازة هو المسؤول على الجريمة لي شافت ختو ...

عند سكينة ، حطات إشراق ݣاع الشهيوات لي وجدات على الطبلة ، وتجمعو كاملين عليها ... شريهان كانت حاضية غير شمس بنت إشراق :

سبحان الله العظيم ، شموسة كتشبه لواحد البنية كنعرفها ..

- شمس ( ببراءة) :

مامي كتقولي كنشبه لبابا الله يرحمو ..

- إشراق (تبسمات ببراءة وحزن) :

الله يرحمو ..

- سكينة (من بين سنانها) :

هذا الى دار علاش يترحم ، في حالة ما كان دار داكشي لي ݣال ..

- إشراق (بعتاب) :

سكينة ، صافي لي مات كندكروه بالخير ، واخا يكون دار فينا العيب ...

- شريهان (ماقداتش تقاوم فضولها) :

مابغيتش ندخل ، ولكن شنو واقع ؟

- سكينة (حركات راسها جهة شمس ) :

من بعد ونهضرو ، بختصار الثقة مابقاتش فهاد الوقت اختي والله ..

- شريهان :

اودي الثقة ، مابقات فحتى واحد ، وصعيب ديرها فشي حد فهاد الوقت هذا ..

- سكينة : داكشي باش كرهتيني نهار الاول ياك ؟

- شريهان :

لا ماشيش هكاك ، ولكن تعرفي لي وقع معايا ... والله حتى تعدريني ، اصعب حاجة هي صاحبة لي بحال ختك طعنك فظهرك ...

- إشراق :

غير عاودي اختي كلنا بحال بحال ..

- شريهان (تنهدات تنهيدة طويلة ) :

فاش شديت الباك (بدات كتعاود ليهم كولشي ، مع كل جملة كتنطقها كتخليهم مصدومين فيها كثر وكثر ..

- سكينة (تعصبات) :

مابغيتش نعاير قدام البنت ، ولكن قسما بالله الى تعصبت ، ناري واش كاين شي ناس بحال هكا ، الله ينجيني نبيع صاحبتي على جوج دريال ، واخا يعطيوني مال قارون مانديرهاش ..

- شريهان (كتاكل) :

ايوا هي راه دارتها ..

- إشراق (وقفات) :

سمحوليا اندي شمس لبلاصتها ونرجع .. هزات إشراق شمس داتها للبيت سدات عليها وبقاو هوما بزوج ..

- سكينة (قربات من شريهان ) :

إشراق كانت تعرفات على واحد الفرنسي ، وكانت كتموت عليه بزاف ، هو كان عايش مدة طويلة فالمغرب مسلم ، الى ݣلستي معاه تكولي هدا غير مغربي ، ايوا بغاتو وحماقت عليه ، وفاش جات الفرصة وجينا للهنا للفرنسا ، بقات معاه على تواصل ، وجا للهنا بحكم أصولو فرنسية ، تزوجو اوا منݣولش ليك طلع مايسواش ، قمار ومفلس لي صورو يخسرو ، وكان كيخونها ، والاشكال حملات منو ... ايوا ماقداتش تحمل تصرفاتو ، الخيانة والقمر وزادها حتى بضرب ، صافي طلبات منو الطلاق ، ولكن مسا بلاما يطلقها غبر ... بات ماصبح ، خلاها حاملة مسكينة ... ايوا بقات هكاك سينين حتى قالو ليها بلي لقاوها ميت ، دار كسيدة الله يستر وكانت معاه شي وحدة ، نصرانية يمكن .. ايوا من تم ومن ديك المدة وهي عازلة راسها ، وعمرها عطات الفرصة لشي واحد يدخل حياتها ..

- شريهان (كتسمع بكل إهتمام) :

ناري مسكينة ، دازت عليها بقات فيا وحق الله العظيم ، (هزات راسها فساعة) ناري مشا الحال خاصني نمشي ، شوفي وجدو راسكم نهار الأحد إن شاء الله ..

- سكينة (بإستفهام) :

وعلاش ؟

- شريهان :

وحتى انا خاص نرجع ليكم العراضة ، نهار الأحد إن شاء الله اندوزوه كاملين فدار ديال عمي ، وبلاما تبقاي تحججي (وقفتت كتلبس تجاكيط ديالها وسبرديلتها ) يلاه انا مشيت ..

- سكينة :

اتاخدي طاكسي ولا ايجي شي حد يديك ؟

- شريهان :

لا غادي ناخود غير طاكسي ... سلمي على إشراق (وقفات) سكينة شكرا بزاف على العشا ، بينتي ليا فعلا بلي لي ماعرفك خسرك ..

- سكينة :

إن شاء الله تكون محبة دايمة بيناتنا يارب ..

- شريهان (عنقاتها) :

امين ، يلاه تصبحي على خير ..

- سكينة :

تصبحي على خير ..

________________

- مصطفى :

سيدي واش بغيتي تݣول بلي ، دابا شريهان ختي فخطر ياك ؟

- العميد :

الصراحة مزال ماعرفناش واش هي فخطر ولالا ، هادشي كيعتامد على شنو شافت ، مدام ماعرفناهاش شنو شافت ... او واش شافوها ولالا مانقدوش نحكمو ، وغالبا نفس الناس لي داويين عليهم هوما نفس الناس لي حاولو يقتلو ولد عمك ..

- مصطفى :

بغيت نعرف كيفاش وقع ليه ؟

- العميد :

هادي شهرين وهو متواجد بديار الإسبانية ، كان خارج من ريسطو بليل وحاولو يضربوه ، الحمد لله لي مجاتش فيه غير جرح بسيط فدراعو .. المهم دابا هو غدا إن شاء الله خاص تجمع الوراق ديالك ، وقبل من الويكاند تلقى ففرنسا .. تما ايستقبلك عميد الشرطة الفرنسية جون بييغ ، هو غادي يفهمك شنو المطلوب منك ، غادي يكونو معاك 4 من احسن ضباط الشرطة من أربع دول ، إيطاليا / كوريا/ أمريكا/فرنسا ... الى تعاونا بعضياتنا راه ضروري مغادي نوصلو لراس الحربة ، وضروري نوصلو لدليل بلي كارلو كابوني هو كارلو مارتينيز ، انا رشحتك انت لهاد المهمة حيت معروف بالكفائة ديالك ومغاديش نخاف عليك ، وعارفك غادي تحمر ليا وجهي ... حاجة وحدة لي غادي نݣوليك أمصطفى ... ختك ضروري ماتعطي الشهادة ديالها ، وعندها عقوبة يا عقوبة سجنية ولا ممكن تخلص الخطية ديال سكوت ديالها ، انت رجل القانون مغاديش نوريك ..

- مصطفى (تنهد تنهيدة طويلة ) :

عارف هادشي أسيدي ، ممكن نعرف اسماء الضباط لي ايكونو معايا ؟

- العميد (عطاه واحد الملف) :

حتى تمشي وغادي تعرف ݣاع المعلومات ، هاد الملف فيه جميع المعلومات الخاصة بكارلو ، درس امورك مزيان او وجد راسك ... وبخصوص هاديك نادية راه المعلومات ايوصلوك اول باول ، باش هكا تكون على إطلاع بجميع الامور ، وتقدر توصل لراس الخيط فأقرب وقت ..

- مصطفى (وقف) :

واخا سيدي كون هاني (عطاه التحية وخرج تابعو منعم) ..

________________

إسبانيا

كان ݣالس فالصالون ، حاط بيسي على رجليه ، حتى سونا الباب ... حط البيسي وناض متاجه جهة الباب ، ضور البوانيي وحل ... كانو واقفين جوج ديال لي ݣارد وسط منهم نبيل ... خلا ليه الباب ودخل ، تبعو نبيل ساد الباب وراه ...

- نبيل :

عمري شفت واحد تعرض لمحاولة قتل ، وكيحل الباب بوحدو ، علاش اصاحبي مدايرش الݣارد حتى لداخل..

- مالك (هز فيه راسو بإستهزاء) :

زدتي فيه لا ؟ اشمن محاولة قتل ولا ستة حمص ، حتى هاديك الناس يسميوها محاولة قتل تخربيق ...

- نبيل (مصدوم منو) :

لا من نيتك ، رصاصة شوية لا تجيك فدراع غير جاب الله ربي حفظك ، وغير تجرحتي وكطنز ..

- مالك(ببرودة) :

هانتا ݣلتيها ، جرحة ... مكاين لاش نكبرو الامور ، راه اي واحد فبلاصتي عندو اعداء ، ماتبقاش تكبر الامور ..

- نبيل (مامتيقش ودنيه) :

عندو أعداء من نيتك ، علاش ايكونو عندك اعداء بسلامة مافهمتش انا ؟

- مالك (سرح رجليه فوق طبلة كيتكسل) :

المركز نسيتي، مشروع كبير ديال إعادة التأهيل ، ضروري تجار المخدرات وصلهم الخبار وماعجبهمش الحال ، هادي غير قرصة ودن زعمة باش نخاف أنا (كيضحك طانز) ..

- نبيل (ساكت كيشوف فيه بإستغراب) :

بغيت انفهم منين جبتي هاد البرود ، واش شفتي راسك كيف وليتي طانز ومامسوقش كاع ، واش جاك هادشي عادي زعمة ؟؟

- مالك :

هادشي ماشي يلاه غادي يكون ، هادشي فيا من زمان وانت عارفو ... مكنخاف من والو ومكايهمني والو ، شفتي لي كيدير هاد تصرفات كنعتابرو انا خواف ... حيت لي مكايخاف وعندو جبهة ورا//جل هي يجي او يواجهني ، اما لي كيبقى مخبي ويسيفط فرجالو ، مكايخلعنيش (غمزو) ..

- نبيل (بقا غير ساكت من برودة صاحبو) :

ومخايفش على داركم ؟ مخايفش يسيقو الخبار وهوما ديجا خايفين عليك ..؟

- مالك (تبدلو ملامح وجهو ، رجع ݣلس مقاد كيشوف فصاحبو) :

حتى واحد فيهم مغادي يسيق الخبار ، غير تهنى من هاد النحية ... ولي يفكر مجرد تفكير يأدي واحد فيهم ، موحال واش يلقاوه (تبسم كيرحك فالخاتم لي شادو فيدو ) ..

- نبيل (نتابه للخاتم لي شاد فيدو ) :

مزال داك الخاتم عندك ؟

- مالك (كيقلب فالخاتم فيديه كان خاتم نقري ومنقوش ومكتوبة فيه واحد السمية الحاشيات ديالو مقلمين بحال شكل ريوس قلم الرصاص حادين ) :

عمري نفرط فيه .. (تبسم) ليمارة ديالو مزال هنا (هز على تيشورت لي لابس ، بانت واحد ليمارا ديال واحد الجرحة حدا الضلعة ديالو ..

- نبيل (كيضحك) :

ماعمرها تنسا ليا ، سيمانة وانت ناعس على ظهرك مكاتقدرش تنوض ..

- مالك (تبسم مغمض عينيه لي عندهم سحر خاص) :

ماتفكرنيش ولكن نفعاتني الصراحة ، وكان عندها دور فهادشي لي وصلت ليه ..

- نبيل (كيضحك) :

أياااه وكان عندها دور كبير ، فاش زرݣتي ليا وجهي ، وليتي بحال الوحش ..

- مالك (كيضحك) :

عادي اصاحبي تكبر وتنسى ،(سكت كيخمم) الصراحة توحشتو خاصني نزورو ..

- نبيل :

مزال كاين فنفس البلاصة ؟

- مالك :

سي مازال ، مابغاش يتحول ورفض اي مساعدة تجيه ، ݣاليك هو ماشي حنش باش يبدل الجلد ديالو ..

- نبيل :

عندو الحق ، المهم انت إيمتا ناوي ترجع ، راه طولتي الغيبة ، وكيبان ليا وليتي بيخير وعلى خير وتجاوزتيها ..

- مالك (صغر عينيه ) :

تجاوزتها تجاوزتها ، منين كنشوف اخر الاخبار كنزيد نتجاوزها ( تبسم بإستهزاء)

- نبيل :

إيمتا راجع ؟

- مالك : غدا ..

- نبيل (وقف) :

انا غادي ، يلاه تهلى فراسك ..

- مالك : فين غادي فهاد الوقت ؟ بات هنا ..

- نبيل (برفض) :

نونونونو ، اخويا انا مالف بوحدي ، يلاه انتعشا ونعس باش نشد طيارة صباح بكري ، يلاه نتلاقاو من بعد تصبح على خير ..

- مالك (مشا معاه حتى للباب) :

تصبح على خير ..

________________

خرجات من دوش كتنشف شعرها ، ولبنت لي مقاسمة معاها البيت كتشوف فيها .. مصدومة

- واش انت سميمرة ، ديما كنشوفك بيضا وكتشقشقي ، كيفاش هادشي ؟

- فرح (تبسمات) :

هاديك غير واحد البومادا كنديرها منين كنت فالمغرب ، مكايعجبنيش اللون ديالي ، بغيت نكون بيضا ... ايوا دابا سلات ليا ومابقاتش عندي ..

- وصاحبتي والله العظيم الى لونها كيحمق ، لونك بحال الميكسيكيات ، وجا مع كحولية شعرك وعينيك ..

- فرح :

اودي حتى انت ، مزيان منين سلات وبان لوني الاصلي ، باش نيت مانباتش لهاد الݣنوس فالبلان ، اشمن نهار نخرج من هنا عييت ، 3 شهور دابا اصاحبتي ...

- (تنهدات) دازت 3 شهور وبقات 3 شهور ، ونبداو الخدمة على ماسمعتهم كيعاودو ..

- فرح (كتحلف) :

غير بلاتي غير بلاتي ، خاص انحيد من هاد ظار دزفت ، ونلقى الغفلة وتشوفي ..

- ايوا على الله كنتمناو ..

_________________

- ݣالسين هلى نفس الفوتوي مع بعضياتهم حاطين رجليهم على البوفة لي قدامهم ، دايرين نفس الكيت وكيتموسقو ..

- زهرة (بقلق) :

خوك مكايجاوبش فتيليفون ، خفت غير لا يكون مريض ولا بيه شيحاجة ؟؟

- شريهان (عينيها على طابليط ولعبة لي كتلعب هي وسعد) :

راكي عارفة مصطفى مع الخدمة ، الى كان خدام راه مايجاوبكش فتيليفون ، ماتبقايش تقلقي على والو اماما ويشدك الوسواس ..

- زهرة (تنهدات تنهيدة طويلة) :

إيوا على الله كنتمناو ... هبط عمر لعندهم :

يلاه سونا ليا مالك ، غدا أيكون هنا إن شاء الله ..

- نزهة (تهزات من بلاصتها فرحانة) :

الحمد لله ياربي ، خاصني نوجد ليه ݣاع الشهيوات لي كيبغي ..

- أحمد :

عندك انزهة تجبدي ليه حس كارولين ، ولا قضية اولدي انا كنت حاسة ومارتاحيتش ليها وديك الهضرة ، صافي لي فات مات ، مابغيناش نحييو الجرح من جديد ..

- نزهة (بنفي) :

لالا غير كون هاني من ديك نحية ، انا غير الى رجع ليا ولدي سالم غانم داكسي لي بغيت ..

- شريهان (بحال الى تفكرات شيحاجة) :

فاش كنت معشية مع سكينة صاحبتي ، ختها عندها واحد البنيتة ، سبحان الله كتشبه لياسمين غير عينيها ..

- أحمد : كتوقع ابنتي ، عرفتي شحال من واحد كيشبه لينا ولا حنا كنشبهو ليه بزاف ..

- سعد كيحرك فيها باش تكمل اللعبة ، رجعات الكيت لودنها وكملات اللعب ، بقاو مدة وهوما هكاك حتى عياو ... تمناو للوخرين ليلة سعيدة وطلعو بزوج ينعسو ، وقفها سعد عند بيتها :

اجي لهنا عومريك وريت ليا هاد صاحبتك ..

- شريهان (كتشوف فيه بشك ) :

وعلاش بغيتي تشوفها اممم ؟

- سعد (كيجبد فموستاجو) :

ماشي شيحاجة غير فضول صاف ..

- شريهان (كتعيبو) :

غير فضول ، الحمد لله لي بدا داك اللسان عندك كيتسرح ... صاحبتي اتجي نهار الاحد وتشوفها ، وعنداك دير دوك البسالات ديالك ..

- سعد (كيضحك) :

نونو غير تهنا ، يلاه بون نوي ..

- شريهان : بون نوي ..

- دخلات شريهان لبيتها ، غسلات وجها وحكات سنانها ... دخلات لفراشها (تفكرات شيحاجة هزات تيليفون ديالها ، طلع ليها ميساج فالواتساب من نمرة مكتعرفهاش ) :

بغيت فاش نجي ، توجدي ليا شي طاجين يكون مغربي باللحم ، وزبيب والبصلة معسلين ..

- شريهان (ماعرفاتوش شكون ، دخلات للصورة كانت بعيدة فيها طوموبيل كحلة محلول بابها ، وشخص ݣالس داير نظارات شمسية ، بدات كتكبر فصورة حتى عرفاتو شكون) :

اودي غير جي ، نوجدو ليك حتى رفيسة ، منين جبتي نمرتي ؟ ݣالينا عمر بلي غدا غادي تجي بصح ؟

- بقا مدة حتى كانت اتنعس وجاوبها :

صباح الخير عاد طفات عليك الشمعة ومجاوبة ، كيفاش حيت نمرتك ساهلة بنسبة ليا ، ومعايا ماتبقايش تسولي بزاف داكوغ ابنت العم ، سي غدا جاي ياكما بغيتي نزيد نبقى واحد شوية ؟

- شريهان (كضحك) :

لالا جي وقتما بغيتي ، هادي داركم ..

- إيوا مزيان ، اه نسيت فكريني حتى فرفيسة تصايبيها ليا توحشت ماكلت دار ، قهراتني ماكلت الاوطيلات ..

- شريهان (غوبشات) :

ياكما اخويا ولدتك ونسيتك ، ولا يكما انت راجلي ونهار تزوجنا كنت فغيبوبة يمكن نعل شيطان ..

- قرا الميساج ديالها ، ميساج خلاه يضحك من بعد مدة هادي ماضحك (جاوبها بإستفزاز) :

كولشي ممكن ابنت العم ، ماتعرفي من هنا للعام جاي تولي مدام العراقي شكون عرف ..

- شريهان (غوبشات) :

لاواه النبݣ ماشي مدام العراقي ، براكة من هاد الضحك الباسل ، شاد نمرتي باش طنز عليا ... شوف اخويا راه كاينين الخدامات لي يوجدو ليك ، وزايدون مكاين لاش تشد نمرتي اصلا ، تصبح على خير ... طفات التيليفون وحطاتو حداها منيرڤية ، تصرف خلاه يضحاك حتى يشبع ..

- مالك (مع راسو ) :

صدقتي ساهل بنادم يعصبك ، كيبان ليا انرجع هاد الليلة ، مكاين لاش نتسناو حتى للغد ..

- الـمغــرب

- مع صباح بكري فاق مصطفى ، فطر هز شي وراق ديالو ، مع الباسبور ... هز تيليفون وسوارت ديال طوموبيل ، خرج من دار فتجاه مديرية الأمن ... خاص يعطي الوراق ديالو للعميد ويشوف شنو غادي يݣوليه ، وإيمتا عندو الطيارة بضبط ... دخل للبيرو ديالو ݣلس ، شوية وجا منعم ..

- با مصطفى صباح الخير ..

- مصطفى (بلاما يشوف فيه ) :

صباح الخير ، امضرا خولة بدات الخدمة مع ختنا ؟

- منعم (دار رجل على رجل) :

هاد العشية ..

- مصطفى :

منعم ، بغيت منك ݣاع المعلومات يوصلوني اول بأول ... لي فيديو ولي زاپيل وكلشي ، اي حاجة راه ممكن تنفعني ، ونادية راه هي لي غادي توصلنا لنعيمة ، وهي لي غادي توصلنا لبزاف ديال الحوايج حنا غافلين عليهم ..

- منعم :

كون هاني ، اي حاجة وقعات غادي نعلمك بيها ، انوقف على هاد الملف بحال الى انت هنا ..

- مصطفى (تنهد تنهيدة طويلة) :

عارف ومتأكد من هادشي ، منخافش عليك .. وقف مصطفى فيديه واحد الجوا ..

أنشوف العميد .. خرج مصطفى من البيرو ديالو بتحاه البيرو ديال العميد .. دق ودخل ..

- العميد :

أهلا مصطفى كيصبحتي مزيان واجد؟

- مصطفى : أه أسيدي ، الوراق ديالي واجدين والباسبور حتى هو ..

- العميد :

مزيان ، وجد راسك مع 6 ديال صباح تكون فالمطار 6:30 عندك الطيارة ..

- مصطفى :

واخا سيدي ..

- العميد : تقدر تمشي دابا ، يلاه توجد راسك وتجمع حوايج وترتاح شوية باش تشد طريق ..

- مصطفى (بإبتسامة) :

واخا سيدي .. عطاه التحية وتم خارج حتى وقفو العميد بكلامو :

نعول عليك أمصطفى ..

- مصطفى (حرك راسو) :

كون هاني أسيدي ... خرج مصطفى فتجاه البيرو ديالو هز السوارت وتيليفون ، داز عند منعم للبيرو سلم عليه وخرج ..

____________________

- على طبلة ديال الفطور مجموعين ...

- سعد :

انا انوصل شيري للخدمة ، انت اسبقني اخويا ..

- أحمد : سبحان الله شي ناس ولاو يفيقو بكري او ولاو يمشيو للخدمة فالوقت ومسؤولين ، العجب هذا ..

- سعد :

بابا أغيييت ، مشيت مزيان كيعجبو مامشيت كيعجبو ..

- شريهان (جراتو) :

اسمها كتعجبو ماسي كيعجبو ..

- سعد : سي سي هاديك ، وانا درت عقلي صافي ... هادي شهرين شفتو النتيجة ولالا ؟

- عمر :

لا بصراحة براڤو ماعندي منݣول ..

- ياسمين :

- شيغي بغيت بتي پا والحليب ..

- شريهان (باستها) :

من عويناتي ازين ديالي ..

- جاهم صوت من عند دروج :

صباح النور ...

- نزهة (غير شافت ولدها وقفات بزربة فرحانة ) :

ولدي حبيبي (تلقات ليه معنقاه ) توحشتك اولدي ، صاڤا انت مزيان ... بلاتي وريني نشوف(كتقلب فيه) ضعافيتي احبيبي ..

- مالك (كيضحك) :

الواليدة الله يهديك ، ماضعافيت والو انا هو انا .. (سلم على باه وعلى خوتو ومرات عمو بقات ليه غير شريهان ..

وزايدون انا رجعت لدار دابا اتهلاو فيا بشهيوات ولالا (غمزها وݣلس) ..

- زهرة :

اولدي انت اݣول شنو بغيتي حنا نوجدوه ..

- مالك (كيهضر مع زهرة وعينيه على شريهان) :

انت اخالتي ابقاي مرتاحة ليا ، ختي شريهان قالت ليا خاص انجي وتولي توجد ليا لي بغيت ، والله العظيم بسبتها جيت ...

- شريهان (خرجات فيه عينيها مصدومة) :

ناري انا ، انا فين فين عمري ݣلتها ليك (شافت فيهم) قسما بالله حتى كدوب هادشي ..

- مالك (كيتمسكن) :

وايلي ماشيش لبارح ، ݣلتي ليا غير جي نوجد ليك حتى رفيسة ، ولا غير كلام ..

- زهرة (قاطعاتها) :

الله اودي اولدي طلبتيها رخيصة ، شوف لي بغيتيها ݣولها ليا انا ولا ݣولها لشريهان ، راها بحال ختك والى مابغاتش اجي ݣولها ليا انا ، شحال عندنا من مالك اواحد ..

- مالك (كيتبسم عاجبو الحال ) :

لهلا يخطيك عليا اخالتي ... انت بلاما تشقي راسك ، لي بغيتها غادي نݣولها لشريهان ..

- سعد (نغز عمر) :

مال خوك ، واش إسبانيا فلاشاتو ... ولا فراقو على كارولين حمقو ... شتو تبدل ..

- عمر :

شششش هنينا ، شوف بعينيك وسكت ، وبلاما تبقى تحكر ولا تجبد كارولين ..

- شريهان (مكرهاتش تشد وجهو تخشيه ليه وسط طبسيل ) :

سعد زيد الى بغيتي توصلني اخويا ..

- سعد (وقف) :

يلاه ..

- مالك (هز عينيه فيها ببرود كيندغ فالخبز) :

شيري معاش اتخرجي ، شنو بان ليك نخرجو انا وياك ونديو ياسمين معانا للألعاب ، اتكون قنطات (شاف فياسمين) ياك أحبيبة ديالي ؟

- ياسمين (بإبتسامة) :

بغيت نمشي نلعب فطوموبيلات ، وبغيت ݣلاص ..

- مالك :

اهاه احبيبة ديالي ، نتسناو طاطاك شريهان تجي ..

- شريهان (مغوبشة فاقصها بتصروفاتو ... بحال الى تفلاشا ولا واحد اخور ، امبسم بحال الحولي لي مشوط ليه راسو) :

انا مامسالياش خدامة ..

- مالك (هز حجبانو بأستغراب) :

العجب علي صباح ݣاليا بلي خدامة افصباح والعشية عندك خاوي ..

- شريهان (صافي نسات لوخرين لي ݣالسين وحاضيينهم مافهمو والو فيهم ) :

وانت اخويا منين كتعرف علي باش تسوني ليه ؟

- مالك (هز كاسو ديال القهوة شرب منو ، وهز عينيه فيها متصنع البراءة) :

علي معرفة قديمة ، كيما كيعرفو عمر كنعرفو انا ، المهم ݣاليا بلي اتخرجي مع 3 ، انكون عندك انتسناك انا وياسمين ... سيري دابا اتعطلي وعندك ضسري شي واحد عليك ..

- شريهان (الهوا كدخلو وتخرجو من نيفها بحال شي تور ، ماكرهاتش تشدو تنتفو زغبة زغبة وتمسح الضحكة على وجهو ، مافهمات فيه والو هزيتي مالك وحطيتي بلاصتو واحد اخور هزات ساكها وخرجات بلاما تجاوبو تابعها سعد ..

- أحمد : ولدي خلي عليك البنت ..

- مالك (كيشوف فيه ببراءة) :

علاش شنو درت ؟

- قدام محال كبير ، فحي راقي ... وقفات طوموبيلتو الكحلة ، نزل منها لابس سروال دجين تيشورت بيضة مع جيلي ديال دان فالقهوي ، وڤيست فالقهوي ... داير نظاراتو الشمسية ... عطا السوارت للݣارد لي على برا ودخل ، المحال بقاو ليه بضع روتوشات ويسالي ... طلع للبيرو الفوق كيشوف بإعجاب للفين وصل المحال ، شوية سونا تيليفون ديالو ، غير طلعات ليه النمرة جاوب دغية ..

سينيور ، لا انا فالمحال علاش ؟ (هز حجبانو بإستغراب) اهاه واخا سينيور كون هاني ، صافي واخا انت غير رتاح ، واخا سينيور مايكون غير خاطرك ... بسلامة .

قطع التيليفون كيفكر فالكلام لي ݣاليه ، تنهد تنهيدة طويلة ... حل باب المكتب وخرج نزل مخلي بقية العمال كيكملو خدمتهم ، ديمارا طوموبيل ومشا ..

_________________

- إشراق : انت عارفة بلي كنحشم ومكنقدش نتخالط مع ناس جداد ، سيري غير انت وانا بلاشى..

- سكينة (بنرفزة حيت عصباتها) :

إشراق ، بلاما تعصبيني الله يرحم بيها الوالدين ، راه زدتي فيه بزاف ... اويلي سينين هادي وانت دافنة راسك بالحياة زدتي فيه لا ، واش يحسابك اناس كاملهم كيف كيف ... اعلى وجهك بنتك راه حشومة ، قسما بالله العظيم هاد البنت اتعقديها ..

- إشراق حدرات راسها وسكتات كتكمل غسيل الماعن ..

- سكينة (سكتات حيت غوتات على ختها بلاما تحس ، حدرات راسها ومشات عندها) :

سمحيليا اختي غوت عليك ، شوفي إشراق راه واخا انت اختي كبر مني ... ولكن كنحس براسي انا لي مسؤولة عليك ، عرفتي علاش حيتاش انت هشيشة ، وساهل تهرسي ... كاع الناس كيتبدلو اختي راه حتى انت خاص تبدلي ، باش تكبري بنتك وتربيها وتعيشيها مزيان ... وتكون فيك مها وختها ، انت متايقاش فراسك من نهار شفتي ديك خيتي لي بدلك بيها ، وانت دافنة راسك ، شحال هادي ماشفتي فالمرايا ... ديها فراسك اختي وخرجي وضحكي ونشطي ، البنت عرضات علينا كاملين ... ماشيش غير انا ، نمشيو حتى حنا نفوجو ونبدلو الجو ، نتعرفو على ناس جداد مانبقاوش محبوسين بين ربعة ديال الحيوط ، صافي بدلي هاد العقلية وبدلي راسك ، ضحكي ولعبي راك مزال صغيرة ، لي شافك مايݣولش عندك 28 عام ..

- إشراق (هزات راسها كتشوف فيها وتنهدات) :

لهلا يحاشمنا أختي غادي نحاول ، يكون خير إن شاء الله ... المهم سيري لخدمتك انت راه تعطلتي ..

- سكينة (عنقاتها او باستها) :

واخا اختي هاني مشيت ..

- إشراق : الله يعاونك اختي ..

- سكينة : أميييين ياربي ، بلاما توجدي العشا انجيبو معايا من برا ..

- إشراق : واخا ... هزات سكينة ساكها وتيليفونها وسوارت دار وخرجات للخدمة ..

غادية جايا فخدمتها كتحط الطلبات ومنيرڤية ...

- علي : مايهديكش الله تهداي شوية ؟ ... وقفات مقابلة معاه ..

اش داك تݣول للمالك ولد عمي ، بلي خارجة بكري وماخداماش فالعشية ؟

- علي : عادي جدا ، وراه ولد عمك نكدب عليه ..

- شريهان (كتشوف فيه مخنزرة ماعجبهاش الحال) :

ناري يا علي ع(قاطعهم دخول سكينة ) ..

صباح الخير

- شريهان : صباح الخير ... خلاتهم ومشات ..

- سكينة : بإستغراب) مالها ؟

- علي :

سيري بداي خدمتك ، هاديك راه حماقت وبغات تبرد فيا جنونها

- سكينة (كضحك) :

مديش عليها صافي ، دابا تبرد اجيتيها فطريق هههه انا مشيت نبدا خدمتي ..

- دازت الخدمة فصباح مزيانة ، حتى قرب وقت الغدا ..

- سكينة (موجهة كلامها لشريهان) :

شيري هاكي دي لطبلة لي على برا ..

- شريهان (شدات عندها الپلاطو ) :

باز انت محنية اري لهنا ... خدات من عندها البلاطو وخرجاتو للبرا ، غادي حادرة راسها حتى وصلات للطبلة :

شريهان (بإبتسامة) :

تف ...وحلات ليها الهضرة فحلقها ، قلبها كيضرب ف90 كتحس بحال شي حد هزها وخشاها فشي فريݣو جامد ، يديها كيترعدو كلها كترعد ، كتسمع غير صوت ديال توزويز وطنين فودنيها ، يديها عرقو او بردو رجليها مابقاوش هازينها ، فلحظة طاح ليها البلاطو من يديها ، اخر حاجة شفتها قبل لا تفقد الوعي ، هي ملامح الإستغراب لي على وجهو ...

- كتسمع غير كثرة الهضرة ، وشي صوت رجولي كيردد سميتها ... جامعة غوباشتها ، بدات كتحل عينيها شوية بشوية ، كيبان ليها وجهو قدام عينيها ، ملامح القلق بادية عليه ... بدات كتقاد فالݣلسة ..

- علـي (بقلق) :

شيري شوية ؟ انت مزيانة ؟

- مالك ( بقلق) :

شريهان باش كتحسي ؟ شنو وقع ليك ؟

- سكينة : خليوها تنفس شوية ، انا انجيب ليها تشرب .. مسات سكينة تجيب ليها تشرب ، اما هي مجاوباتهمش ... حدها كتقلب بعينيها (شافت فمالك ) ..

- فين هو ؟

- مالك (بإستفهام ) :

شكون هدا ؟ علامن كتدوي ؟

- شريهان (شافت فعلي) :

فين هو الكليان لي كان هنا ؟

- علي (بأستفهام) :

على اشمن كليان كدوي ؟ واش هداك لي سخفتي حداه ؟ مشا علاش ؟ مسكين السيد كان باغي يتغدا ... منين سخفتي جاه شي إتصال ومشا ، كان بغا يديك لسبيطار ولكن ݣلنا ليه مكاين لاش ، جاب الله ديك للساعة جا مالك .. كيف كتحسي مزيان ؟

- شريهان (شدات الكاس ديال الما من عند سكينة كتشرب ، يديها كترعد) ..

- مالك (لاحظ بلي مخلوعة وكلها كترجف ، هادشي ماشي عادي ... شاف فعلي) :

غادي تسمح لينا اعلي ، غادي نديها لدار واخا ؟

- علي : اه اه غير ديها ، اصلا سال وقت خدمتها ..

- سكينة : انا انجيب ساكها ..

رجعات سكينة معاها سكادو ديال شريهان عطاتو لمالك ، لي نوضها شاد فيها وخرجها ركبها فطوموبيل حداه ، ياسمين كانت لور مفاهمة مسكينة والو ... ركب مالك ديمارا ، وتاجه للمدينة الالعاب كيف واعد ياسمين ... الطريق كلها عينيه على شريهان لي مانطقات بكلمة وحدة ، عينيها خارجين وساهيين ، عقلها مامستوعبش مايمكنش تكون كتخايل ولا كتحلم ... شافتو هو هو واخا كان الظلام ، ولكن عاقلة على يدو لي واشمة ، ليد لي خرج وتيرا بيها ، شعرو ولحيتو ، وإبتسامة الاستهزاء لي على وجهو ، مايمكنش تكون كتخايل كتحس براسها فحلم .. مافيقها غير صوتو ...

- نزلي راه وصلنا ... خرج من طوموبيل ، نزل ياسمين هي الاولى ، حل الباب لشريهان لي مكدويش نهائيا ، غادية تابعاه بحال شي إنسان ألي ... ماعيقاش بلي ضاير بيها ولا فين هي والو ... مالك طلع ياسمين فاول لعبة ديال الأحصنة ، خلا سيد لي مكلف يتكلف بيها ، ورجع عند شريهان لي كانت واقفة وساهية ، جرها من يدها وداها لواحد الكرسي حدا شجرة وقفها ..

- مالك (بصرامة ) :

شنو واقع ؟

- شريهان (ساهية مجاوباتوش حتى قفزها) ..

(بصوت عالي وصارم ) :

شريهان جاوبي شنو واقع ؟

- شريهان (هزات راسها فيه ببرودة نطقات ) :

شفتو ، انا شفتو كان فالقهوة امالك كان ݣالسة، انا قفرتها صافي ..

- مالك (مافهم والو) :

شكون شفتي وشكون هذا ، فاش كنا فالقهوة كنتي كتسولي على شي واحد ... علامن كدوي ، وشكون هدا لي زارع فيك هاد الرعب كامل ؟

- شريهان (بحال الى فاقت) :

شفتو شفتو اويلي اويلي جا تابعني مشيت فيها ، اليوم فالقهوة شفت خونا لي قتل داك السيد فاش كنت فالمغرب ، ايدبحني باينة ..

- مالك (تصدم) :

متأكدة من هضرتك ؟ اتكوني غير تخايلتي وانت أصلا خرجتي من دار مصدومة ..

- شريهان (غادية جايا كدوز يدها فشعرها) :

مكنتش كنتخايل ، قسما بالله العظيم الى هو ... انا راه عاقلة عليه مزيان ، يديه واشمها وصباعو موشومين ، شعرو رطب وزعر مايل ليموني ، ملسو ومرجعو لور ولحية زعرة شوية انا راه مايمكنش نغلط فيه ..

- مالك :

انا راه سكانيتيه ، ماشي شفتيه هادشي كامل بان ليك من شوفة وحدة ، وݣولي بقيتي واقفة كتبحلقي فيه ..

- شريهان :

واش حنا فهادشي دابا ، المهم شفتو وسلام عليكم ، اميمتي ياربي ... انا هربت من المغرب على قبل هادشي ، نجي لهنا نلقاه ، واش انا منحوسة لهاد درجة مايمكنش (ݣلسات شدات راسها بين يديها) ..

- مالك (تنهد تنهيدة طويلة وݣلس حداها) :

غير بشوية ، بالعكس خاص تكوني فرحانة ..

- شريهان (هزات راسها فيه ، كتشوف فيه بعدم تصديق) :

اه بصح خاص نكون فرحانة ، كان خاصني نجيب ليه الورد ونݣوليه واش تزوج بيا مزيانة ، بغيت انفهم علاش انفرح مثلا ؟ نفرح حيت انحفر قبري بيدي ياك ؟

- مالك (كيشوف فيها) :

واخا تسكتي شوية ، كضريني فراسي فخبارك ..

- شريهان (دارت يديها على فمها) :

هاهي سكتات ..

- مالك :

كون كان خونا عرفك ولا عقل عليك ، مكنتيش اتكوني هنا ... ومغاديش يخلي القهوة ويمشي ، ونسيتي بلي كنتي دايرة هاد نظاظر ݣدهم ݣد الزلايف ، وهاد الكاسكيطة الزينة لي مغطية ليك نص وجهك ..

- شريهان (كتشوف فيه ، بحال الى بدات كتبرد ) :

زعمة ؟

- مالك :

واش انت حمقة ؟ عند بالك بلي غادي يعرفك فنص الليل ، ماشي كولشي كيشوف مزيان بحالك ... وحيدي عفاك دوك نظاظر لاش دايراهم وانت كتشوفي مزيان ..

- شريهان (مداتهاش فيه) :

جابهم ليا مروان كادو منقدش نحيدهم ، وفاش كتكون الشمس على برا كيضرني الشعا فعيني ، واخا هوما لونهم غوز ولكن المهم مزيانين ، دابا حنا ماشي فهادشي ... زعمة بصح ماشافنيش وماعرفنيش ..

- مالك (تنهد ، شاف فيها بجدية) :

بحال داك النوع ، الى مشا حتى عرفك عرفتي عليه حاجة بسيطة ، أيغبرك ... كوني متأكدة كون شافك مغاديش تكوني ݣالسة هنا .. وقف كيطلعها ويهبطها ونكق بإستفزاز وبرود :

صراحة خاصك تعيدي النظر فلوك ديالك ... حيت الى متبدلتيهش ممكن يعقلو عليك ..

- شريهان (هزات حاجب ونزلات الثاني ، وقفات كتخنزر فيه ) :

علاش اخويا كيف جاك اللوك ديالي ؟

- مالك (دار يديه فجيابو كيطلعها وكيهبطها) :

بحال سعد خويا ، تماما نفس سراول نفس تجاكيط ، نفس تيشورت ، حتى شعرك مسكين ديما مخنوق فديك الشدة ، ودوك النظاظر كبر من وجهك ، شوفي البنات (كينعت ليها بعينيه لجيهة البنات لي حداهم ) شوفي شوفي ، الكساوي شعر مطلوق شوية ديال الميكاپ ... أصاحبتي انت كتجيني بحال سعد تماما ..

- شريهان (قربات ليه حتى تقابلات عينيها مع عينيه) :

انا عاجبني راسي كيما انا ، مامستعداش نتبدل وزايدون ماشي شغلك ، انا حرة شكون انت أصلا لي دخل فيا ولا فلباسي ، الى كنت نبدل لباسي ونولي بحال هاد المونيكات ولا بحال المنيكة لي كنتي خاطبها بلاش ، الكاركاس عامر والعقل خاوي ماعندي مندير بيه ..

- مالك (سكت عضلات الفك ديالو بوحدهم لي كيتحركو معبرين على أعصابو والغضب ديالو من كلامها على كارولين) ..

- شريهان :

حاجة أخرى ، عفاك عفاك لاما فرقني ، فاش نبغي انا نخرج راه غادي نخرج ، ماتبززش عليا شيحاجة انا مباغياهاش هالعار ، والى بغيتي لي يطيب ليك شهيوات راه ماما ، ولا الخدامة ... اما انا ماملزومش عليا نطيب ليك ..

قرب منها مالك بشكل خطير ، عينيه مكايبشروش بالخير وقف مقابل مع وجها ، عينيه مع عينيها ..

- فاش كنا صغار ، كنتي لاصقة فيا بحال الݣرادة ، مكنتيش كتخليني نتحرك على خاطري ، فأي حاجة ملصقينك ليا ... لدرجة دراري كانو كيضحكو عليا ، حيت ديما كنتي معايا ، وبلعاني كنتي كتجبدي ليا الصداع ، غير باش تبقاي حدايا ... ألعابي كنتي كتاخديهم ، اي حاجة كتخصني كديها ضد فيا ... مكانش خاصني نتشكا ، وإلى تشكيت كنسمع بنت عمك بحال ختك ... مالك خلي معاك شريهان ، مالك دي معاك شريهان ، مالك رض البال لشريهان ، لدرجة مكنتش كناخود راحتي (زاد قرب لحداها بوحهو ، مقرب بشفايفو من ودنها ونطق بشوية) :

دابا جات نوبتك ابنت عمي ، كيما كنتي بحال خيالي فصغر ، انولي بحال خيالك فالكبر ... فينما ضرتي غادي تلقايني ، ولي بغيتها توجديها ليا ، ولا نݣولها لمرات عمي زهرة ... بعد مبتاسم إبتسامة شر .

- شريهان (بإستغراب وصدمة) :

لا واش من نيتك ، باغي تنتاقم مني على حوايج كنت كنديرهم فصغري معاقلاش عليهم ، واش عقلك صغير لهاد الدرجة ؟

- مالك (هز حجبانو بزوج ) :

نو عقلي ماصغيرش ، ولكن ممكن نݣولو إنتقام صغييير على مدرتي فيا فصغري ، ولا نقدرو نݣولو هوايشي جاو عليك وبنتي ليا فالبلان ، هذا هو البلان ... يكفي غير بالفضل ديالك تفتحو عينيا على بزاف ديال الحوايج ..

- شريهان (بإستفهام ) :

بحالاش هاد الحوايج ؟

- مالك (رجع قرب ليها ونزل بشفايفو لمستوى ودنيها ، حتى قربو شفايفو يمسوها) :

بدلتي ليا دوقي فالعيالات ، الصراحة وليت كنفكر نهار نبغي نتزوج ، ناخود شي وحدة بحالاك ، مغاديش تخليني نحس بالملل نهائيا ، هذا هو البلان ابنتي عمي (بعد عليها كيشوف فيها والإبتسامة على وجهو ، غمزها وضار عاطيها بظهر غادي فتجاه ياسمين ...

____________________

- كــوريـا

- الـمــطار

كان واقف كيتسنا الدور ديالو ، سلم الأوراق والپاسبور ، سلا من الإجراءات ... مشا لبلاصة الإنتظار ، حتى سمع صوت وصول وقت الرحلة ديالو ، وقف فصف حتى وصلات النوبة ديالو ، خرج من البوابة فتجاه الطائرة المتوجهة لي فرنسا (كان) ..

___________________

أمريـكا

الـمطار

- واقف فصف حتى وصلاتو نوبتو ... من بعد الاجراءات تسلم الپاس ديالو ، خرج من البوابة فتجاه الطائرة المتوجهة لي فرنسا (كان) ..

_________________

رومـــا

المـطار

- غادي جاي كيتسنى إعلان وقت الرحلة ، حتى سمعها عاد رتاح ... مكايحملش يبقى يتسنى بطبعو ديما زربان ، داز من جميع الإجراءات ، تفتحات البوابة ... هز واحد سكادو صغير ، وخرج من البوابة فتجاه الطائرة المتوجهة لي فرنسا (كان)

_________//

- فرنـسـا(كان)

وقفات طومبيل فالكحل صغيرة ، قدام الدار كبيرة وزوينة ، خرجات بنت ماطويلة ماقصيرة ، البشرة ديالها بيضة ، شعرها رطب وزعر حدا عنقها ، عينيها زرقين والإبتسامة على وجها ، باينة مقبولة ومرحة وكدخل للخاطر .. دورات الساروت فالباب ودخلات ..

- مع دخلات طلات مها من الكوزينة ، كتشبه ليها .. (بللغة فرنسية) :

جوديا ، بنتي على سلامة ..

- جوديا (عنقاتها) : الله يسلمك ، فين هو بابا ؟

- فجردة بحال ديما ، شفتك جيتي بكري ياك لاباس ؟

- جوديا (تنهدات تنهيدة طويلة) :

والو غير جيت باش نرتاح ، غدا نهار مهم بزااف اماما ..

- جاها جواب سؤال من وراها .. :

- علاش شنو كاين غـــدا ؟

- جوديا (تبسمات وضارت عندو معنقاه ، باستو من حناكو وبعدات كتشوف فيه ، وبدارجة ولكنة معكلة شوية بالفرنسية نطقات ) :

جاي واحد الضابط من المغرب ، وجون بغانا نحونو نكونو غدا فصباح كلنا مجموعين ، وماشي غير هو لي ايجي ... كاين عملاء أخرين جايين من كوريا أمريكا وإيطاليا ..

- الطيب(الأب) :

مزال خاشية راسك فهاد القضية أبنتي ؟

- جوديا (تنهدات تنهيدة طويلة ) :

غير سمح ليا بابا ، منقدش نخرج راسي من هاد القضية ، مايمكنش ليا ... وزايدون هادي راه خدمتي ، وجون لي كلفني بيها ..

- الطيب (بعدم تصديق) :

حتى منكونش انا لي والدك ، هضر معايا جون ... وݣاليا بلي انت طلبتيه ورغبتيه باش تكوني من شمن هاد العملاء ، جوديا بنتي الله يرضي عليك ، مشا ليا واحد مابغيتش تمشي ليا حتى انت ..

- جوديا (بلعات ريقها وحدرات راسها ) :

بابا انا مغاديش نتراجع ، أدم مات بجرعة زائدة ديال الكوك ، الطيش وقلت العقل ، وكترت الصحاب وسهرات ... خلاوه ينسا راسو بسبب غلط بسيط وبسبب طيش ، مات هاهو مابقاش معانا ، مايمكنش نشوف المنكر بعينيا ومندير والو ، الى كنت غير غادي نخاف ونتراجع ، حسن نديميسيوني من هاد الخدمة ، ونشوف شي خدمة اخرى حسن ، وانت ماشي هادشي لي ربيتينا عليه واقيلة ؟..

- جات مراتو وقفات حداه معنقاه بيديها ( وبدارجة معكلة بزاااف ) :

طييب ، فات الفوت دابا ، انت ربيتيها هكا ... مجاتش دابا وطلب منها حواييج انت مكتأمنش بيهم ، فهامتي ... خليها دير خدمتها كيف هي بغات ... والله راه واقف معاها وحاميها ..

- الطيب (تنهد تنهيدة طويلة ، مابغاش بنتو تشد هاد القضية كمسألة شخصية ، حيت عارفها اتعطي فيها كثر من جهدها ، ولاو على حساب راسها هادشي مناش خايف ) :

الله يسر ليك ابنتي ، واخا انا قلبي مامهنينيش ... ولكن ماعندي منݣوليك ..

- جوديا (بإبتسامة عنقاتو) :

ماعندك مناش تخاف ، بنتك راها سبع ...(كضحك)

- الطيب (ضحكاتو بزز منو) :

أمممم سبع سكتيني بضحكك الباسل ..

- جوديا (خطفات بوسة من حنكو وهربات طالعة وكتردد) :

المهم ضحكتك وهذا هو المهم ... وقفات قدام باب بيتها ، دورات البوانيي ودخلات ... سدات الباب عليها ومع سدة حيدات الإبتسامة لي على وجها ، وحل بلاصتها حزن غريب وكآبة ، لاحت ساكها وتلاحت فوق نموسية كتشوف فسقف ، دورات راسها جهة الكوافوز ... كانت محطوطة صورة وسط كادر مدهب زوين ، فيه شاب بيض وشعرو رطب وطوييل وزعر وعينيه كحلين بحال باها ، يكون عندو ديك 22 سنة ، ݣالس ضاحك وهي وراه معنقاه من عنقو وضاحكين ... حسات بغصة فحلقها ودموعها هبطو سخااان ... شريط حياتها معاه ، ولحظاتها زوينة معاه وذكرياتها ، كلهم دازو قدام عينيها ، خلاو دموعها يزيدو ينزلو بغزارة ... تنهدات تنهيدة طويلة ، كتحلف فقرارة نفسها ، دير مافجهدها ، باش ايو واحد كيبيع هاد السم لناس ولا عندو يد يتشد ويتحبس حياتو كاملة ..

_________________

‏لا يُـوجَـد شُـعورٌ أفضـلَ مِن أنَّگ لم تظلِمْ ولَم تَخذِلْ ولم تُؤلم أحـدًا ولم تتَخـلَّ عن مُحتـاجٍ ولم تُخيّبْ حُسنَ ظنِّ أحدٍ بگ ولم تكسَـر قَلبًـا ولم تُبـکِ عينًـا ولَم تَغـدُر وتَتـرُک أحـدًا في مُنتصِف الطَّريق تنامُ وأنتَ واثقٌ بِـ أنَّگ كنتَ خيرَ سَندٍ لِمَن لجَـأ إليگ تَجبُر گسرَ الآخرِين وتُطيِّب جِراحَهم وتُوقن أن جبرَ الخَواطِر عبَادة..!! وعلىٰ الحُبِّ دائمًا وأبدًا نلتــقي .

يتبع...