السيدة الأولى الجزء الثاني

- فدار ، ݣالسة زهرة على أعصابها غادية جاية ... المغرب أذن وشريهان مزال مدخلات ، تيليفونها طافي ، تيليفون حسام طافي ، وحتى نمرة ختو ماعندهاش ، يلاه بغات طلع تهز جلالتها تخرج ، حتى كتسمع الباب تحل وصوت شريهان ..

- شريهان : دخل دخل راني معطوبة ، خاص حتى دخلني لدار عاد تمشي ، جات مها كتجري .. وقفات فبلاصتها مصدومة فاش شافتها فديك الحالة ، ضرباتها فخاضها ..

- زهرة (مخلوعة) : أويلي ، أش واقع ؟

- مروان : بلاما تخلعي أخالتي ، غير دخلي بعدا وبشوية وأتعرفي كولشي ، سبقاتهم شريهان ومها تابعاها كتشوف فيها ..

- زهرة : اش وقع ݣولو ليا ، مالك فيدك شنو كاين ؟

- شريهان (ݣلسات كتستارح شافت فمها) : تهرست ..

- زهرة : اميمتي ياربي كيفاش وقع ليك ، ياك مشيتي مع حسام شنو وقع؟ وعلاش هو لي مجاش معاك ؟ وحتى واحد فيكم مكايجاوب فتيليفون ..

- مروان : مالو هو حمق يخلي تيليفونو محلول من بعد فعلتو ..

- زهرة : وفهموني أعباد الله راه غادي نحماقو..

- شريهان (شافت فمها) : الخطيب سيهم حسام ، لي بغيتي تزوجيني ليه وكنتي ميتة عليه ، وݣاليك بلي غادي بيا عارضانة ختو ، داني لدار صحابو جايب ليا 3 رجال جوج مغاربة او واحد خليجي ، باعني ليهم بفلوس صحيح باش يتعداو عليا ، سمح فيا تم ومشا بحالو ..

- زهرة (ندبات) : أويلي ، كيفاش؟

_____________

- مروان وشريهان ساكتين ، وغير تنخصيص ديال زهرة هو لي كيتسمع ..

- أنا سباب ، انا لي مكنسواش انا لي كنت غادي نلوح بنتي العافية ، أُمية مكلخة مانسوا ريال ، بزاف عليا نكون أم انا ، ماسولت عليه غير جيت وبغيت نلوح بنتي ..

- مروان : خالتي بنت باقي صغيرة على زواج ، خاصها تعيش حياتها وهي تاخود قراراتها راسها ، اه ضروري من رضاتك ولكن زواج ماشي هو كولشي ، والواحد قبل مايعطي بنتو يسول على هذا لي باغي يتزوج بيها ، راه دنيا تخلطات بدياب .

- زهرة (هزات راسها فبنتها وعينيها عامرين بدموع ) :

- كون غير مت ولا سمعت هادشي ، سمحيليا أبنتي سمحيليا هالعار ، وحتى إلى مابغيتيش تسمحيليا مكاين باس من حقك شكون يرضى بشي أم بحالي جاهلة معارفة فين كتحط رجلها ، كون غير مت نهار ولدتك ولا ه(مخلاتهاش شريهان تكمل كلمها لاحت راصها على صدرها ، كتبكي) ..

- متݣوليش هكاك ، الله ينجيك ياربي الله يخليك ومايحرمنيش منك ، انا مسامحاك شكون عندي من غيرك ، واخا ديري فيا لي درتي راه انت مي لي ولاتني وتكرفصات على ودي ، واخا غلطتي معايا ولكن تربيتك ليا واي حاجة درتيها على قبلي تشفع ليك ، اهو اماما الله يرحم با فهاد النهار واعديني عمرك دكري ليا حس الزواج على فمك ..

- زهرة (زادت زيرات عليها كتبكي وتنخصص) :

- عمري أبنتي ، عمر حس زواج تسمعيه مني حتى نهار لي انت تݣوليها بفمك اما أنا حرمت ، وحتى ديك نجاة انفرقها من اليوم هي من طريق وأنا من طريق ..

- مروان : وحنا اخالتي زهرة ماتسالينا اندخلوك لمحو الأمية ، ونعلموك تكتبي وتقراي ، راه القراية ماعندهاش سن محدد ... مزيان الواااحد يقرا ، ويوعي راسو ويتقف راسو باش يعرف ..

- زهرة : عندك الصح أولدي ، حتى انا والله منݣوليكم لا .

- مروان : اش غاديري على داك الش....ماتة ؟

- زهرة : غدا نمشيو نديكلاريو بيه ، اما ديك بنت الحرام ديال مريم ابلاتي ونشوفها حسابها معايا هو الأخر ..

- خرجات زهرة هي وشريهان من الكوميسارية ، من وراما قدمو شكاية بحسام ، ولكن للأسف لا الكنية ولا السمية ماخرجات ليهم فسجيلات ، هنا عرفو بلي زور سميتو وكنيتو ، ولكن بقات شكاية مسجلة ممكن مع الوقت تعرض شي وحدة للنصب وتجي تشكي حتى هي ، من الكوميسارية ، دازو نيشان لدار ديال مريم كيدقو لا من مجيب حتى خرات ليهم واحد جارة ، قالت ليهم بلي مريم ، مشات لرباط باش تقرا تما ، ومها وباها مشاو لعند بنتهم حيت قربات تولد ..

- ݣلسو فواحد الجردة ..

- شريهان (كتحس بواحد الراحة وفرحة ، واخا لي وقع ليها البارح او واخا مريم هربات ، ولكن شحال قدها ماتهرب اتلاقيها بيها الأيام أتلاقيها بيها وديك الساع اتفدي فيها دقتها ) :

- عرفتي اماما ، كنحس بواحد الراحة او واحد الفرحة ، عرفتي علاش ؟

- زهرة : علاش؟؟

- شريهان : حيت مابقيتش أنخاف منك ، وأنعاود ليك كولشي لي ضارني بلا خوف ، وبلاما ندير حساب ... حسيت بهادسي لي وقع بحال الى قربني ليك .

- زهرة (تبسمات) : وحتى انا أبنيتي ... فيا موك وختك وصاحبتك وكولشي فيا ، لي تقالت عليك خفافت عليا ... ولي ضرك عاوديه ليا ، وإن شاء لله غدا انتسجل فديك الجمعية لي فيها مرات سليمان النجار ، حيت كتقرا انتسجل ونولي نقرا حتى يانا .

- شريهان (عنقاتها) : وحتى أنا متساليني ، غير تجي لدار نراجع مع بنتي العزيزة . ختماتها ليها ببوسة على راسها ، وناضو من جردة متوجهين للدار .

________________

بعــد مـرور 8 سنــوات فرنسا

- وقفات طوموبيل كحلة وراها جوج طوموبيلات اخرين فنفس اللون من نوع رونج ... هبط الشيفور بجرا حل الباب ، بكل ثقة فنفس ورجولة نزل شخص فكامل الأناقة ديالو ، بسباط كحل إيطالي الصنع ... كوستار فنفس اللون مع ساعة فليد من نوع الغالي ، قسمات وجهو جدية مع مزيج من الوسامة الطاغية والرجولة المفرطة ، من ملامح وجهو كيبان بلي أصلو عربي فثلاثينات من عمرو ، نزل كيسد فلاڤيست ديالو متاجه للباب بكل ثقة فنفس وشموخ ، تلقات ليه بنت هازة مجموعة من الملفات ومدكرة ..

- موسيو مالك الرئيس بقات ليه 5 دقائق ويوصل ..

- مالك (بصوت رجولي) : باقي الوزراء وصلو ؟

- اه موسيو وصلو وكيتسناو فقاعة الإجتماع ..

- مالك : مزيان ..

________________

- فإحدى الڤيلات الراقية لي بعيدة على مدينة كان بشوية ، بلاصة كلها خضورية مجموعين فيها غير الڤيلات ... تصميم الڤيلا كان راقي بلون الأبيض ، كتوسطها جردة كبيرة بݣلسة عصرية ، من جهة اللورانية للفيلا كاين پيسين كبير ، وكوخ خشبي صغير ..

- فواحد من بيوتها ، فراش شبابي صور شبابية لشاب فالعشرينات من عمرو .. فوق النموسية العريضة ناعس على كرشو ، شعرو مغطي وجهو .. ناااعس من ورا ما كان سهران الليل كامل مجا حتى لصباح ..

- تحل الباب ودخلات ، مرأة راقية لابسة ݣندورة مغربية ، طالقة شعرها لي كيتخللوه خصلات ذهبية ، مشات نيشان لسراجم كطلع فريدو وتعيط ..

- سعد سعد ، يلاه فيق أولدي براكة من النعاس .. واش انت كل نهار تبقى تجي حتى لصباح هاد السهير راه أيخرج عليك ..

- تحرك من بلاصتو كيحاول يغطي ودنيه ..

- سعد(صوتو غالب عليه النعاس) :

- مامو أغيت سيلتوپلي ، خليني نعوس ، راه مجيتش باكرو ..

- واش انت هاد العربية زينة عندك مابغاتش مزال تقاد ، سميتها بكري ماشي باكرو ... اليوم زعمة لانيڤيغسيغ ديال خوك ... حيد سعد الغطا عليه وݣلس مقابل معاها بعينيه لي معسلين لي كانو رموشهم طوال وشعرو رطب لي مغطي جبهتو كان كيشبه لمو ..

- سعد (بعربية معلكة بحكم عمرو نزل المغرب ولكن باه كان مانع عليهم يهضرو بالفرنسية فدار ومع دلك دارجتو مكرفصة) :

- هاهي فاقت مزيانة دابا؟

- شكون هادي؟

- سعد (نقز وجرها معنقها من اللور وصدرو عريان) :

- انا أنا انزيهو ..

- نزهة (ضرباتو ليدو) : شحال من مرا كنݣوليك ماتبقاش ترض راجل مرا والمرا راجل ، ݣول هاهو ناض ..

- سعد (طلقها من بعدما شبع فيها بوسان) : هو هو .

- نزهة : يلاه هبط دغية ، نمشي نشوف جميلة شنو دارت فالكوزينة ، متعطلش ..

- سعد : داااااكوووغ ..

__________

- لابسة شورط طويل فزرق مع تيشورت واسع وكاسكيطة وسبريلة، تقاشر واصلين ليها عند الركابي ..

-

- شريهان : وصاحبي وصاحبي وشعب وزفت ، ومكتوشيش مزيان ، واش هكا ناس كيلعبو ، هذا راه مالعب ما والو ..

-

- سفيان : فينما كتكوني لاعبة معانا كنخسرو يلاطيف لوطف ، ماعرفنا بازقة عليك موكة ولا بايل عليك بلارج ..

-

- شريهان : بزااااف عليك ولهلا يحييك ولا يطول الزمان عليك ، ماعرفتش شكون لي رجليه قصار ورقاق بحال عواد السبسي وكيهضر .. حال فمك فديك المسندرة ديال لطيفة ، بحال الى ساحرة ليك بطوبة هجالة وكتهضر ، يخ من شي لعب معاك ، نهار يكون معاكم هاد عويدات لابانضة لا تبقاوش تعيطو ليا نلعب معاكم ، وحنزز يحسابليك انحشم منك تريكة قوبع ييخ ..

- أشرف : واش اتكملو اللعب دابا ولالا ؟

- مروان : واش خلاو فيها هاد الجوج شي لعب والو ..

- شريهان : أصلا اش بقى دابا ؟ صافي خسرنا ولي عطا الله عطاه ، وصݣع جا على عين ݣفاه ...

- مروان (قرب لشريهان) : ماشي مريم هاديك ؟ مع ݣالها ضارت شريهان كاتبان ليها مريم جايا هي او واحد خينا شادة فيه ، خلاتهم وتمات غادية عندها متجاهلة مروان ودراري لي كيعيطو ليها .

- ماحسات بيها مريم حتى وقفات عليها ، لون وجها تبدل كتفتف ..

- مريم : أهلا شريهان لاباس عليك امورك مزيانة ، غبور هادي ، سمحيليا لقيتينا زربانين اما نوقف معاك ..

- شريهان (كضحك) : مالك مخلوعة وكتفتفتي غير بوحدك ياك لاباس ، اه ولا خفتي حبيبك ولا ماعرفت خطيبك يعرف شنو درتي ، وقيلة انا وياك مزال مساليناش واحد الحساب .

- نطق السيد لي معاها : شنو كاين ؟

- شريهان (شافت فيه) : لا والو غير خطيبتك لي كانت صاحبتي الروح بروح ، باعتني لواحد النصاب عطاها الفلوس باش تجيب ليه خباري ، ودارت يدها فيدو وباعتني ليه باش يتعدا عليا ..(شافت فيها) داخلت عليك بوجه الله باش اديتك ، ياك حاويجي هوما حوايجك والمخيرة ديالك ، مكتخرجيش من دارنا ، ولا درتي هادشي حيت فيك السم ، مسمومة عند بالك مروان كيبغيني ، داكشي باش درتي هك حيت كان عينيك فيه ..

- جاوبها مروان من اللور :

- واخا تبقاي انت هي الاخرة فوق هاد الكوكب ، لا شفت فيك ، السم والبغض لي فيك ايخرج عليك (دفل عليها) انت موحال تكوني بشار ..

- مريم (بدات كتغوت) : اه اه انا بعتك ، بغيت مالك اش كتكوني فملك الله ، عاجبك راسك انت لي كاينة ، ݣاع العينين عليك منين كنا صغار ، وانت لا فورمة لا زين ، انا حسن منك كولشي كان كيشكر فيك ، شريهان دارت شريهان فعلات ، توطاي شوية ، تمنيت كون غتاصبك وتبقاي ضحكة وشفتية لي يسوى ولي مايسواش ، هكا شوية تواطاي وماتبقاش مك تعنا بيك ...

- شريهان (هزات يديها حتى لسما ونزلات عليها لوجه ) :

- هادشي لي فيك كافيك والله منزيد حاجة أخرى ، خلاتها شادة حنكها وهداك لي معاها خلاها ومشا من ورا ماسمع لداكشي ، شريهان هزات سكادو ديالو ومشات نيسان لدار ماتلفتاتش وراها .

______________

- زهرة : شفتي ختك ، واش الناس كيكبرو يديرو عقلهم ، وهي كل حد خارجة تلعب مع دوك الحتارف ..

- مصطفى : الواليدة خرجي سوقها عندك تمشي دكري ليها شي زواج تاني شفتي اخر مرة شنو وقع ليها ، جاب الله كتفكر وبعقلها أما علم الله فأشمن سبيطار ديال الحمقين كندورو بيها .. كنتفكر شنو كان ايوقع كنبغي نحماق الكيدار مزال مبانس ، قسما برب وتجيني خبارو حتى نقبر بوه ندفنو بيدي ومنبردش .

- زهرة : ياربي سلامة اولدي الله ياخود فيه الحق ، الله يسهل عليها ويفرحني بيها كيما فرحتيني حتى انت .. هاهي كملات قرايتها ومزال مجابش الله شي خديمة ، وحتى المشروع لي بغات دير راه مايتمشاش ليها هنا

- مصطفى: مزال غادي تفرحي بيها وتهزي راسك وانت مفتاخرة بيها ، ومتعرفي تولي تباني فالمجلات معاها ..

- زهرة : انجلينا جولي هي سير الله يمسخك ..

- مصطفى : دابا تشوفي وتكولي ولدي ݣال ، يلاه الواليدة تعطلت على الخدمة الله يهنيك .. تحل الباب ودخلات شريهان ، بلاما تقوليهم السلام طلعات مغوبشة نيشان لبيتها ، خلاتهم مستغربين معارفينش مالها !!!..

- مصطفى : مالها ؟

- زهرة : والله ماعرفت اولدي ، ربي لاما طلع شوف مالها ... طلع مصطفى لعندها ، دق الباب ودخل لقاها ݣالسة ، مشا نيشان ݣلس حداها ..

- مصطفى المرأة العنكبوت مالك ياك لاباس ، داخلة لا سلام لا كلام مانخافوش ؟؟

- شريهان (كتشوف قدامها) :

- وبنادم شحال خايب أخويا ، واوووو انت تحلب عليه الحليب وهو يحلب عليك القطران ، تلاقيت مع مريم ... وعرفتي كاع داكشي لي كنت ناوية ندير ليها مدرتوش ، السيدة كتعتارف بلي مكتحمل فيا الشعرة ، شي هضرة ݣالتها راه بزاف .

- مصطفى : صافي هادشي لي ضارك ، نوضي براكة من البسالة دوشي عليك ، وتكوني ناضية شفتي الى شفتي بزاف ديال الناس كارهينك ، عرفي راسك غادية مزيان هاديك واحد المريضة مكتسواش ... نسايها عليك متخليهاش تخسر ليك نهار واش نسيتي شنو اليوم ؟

- شريهان (هزات عينيها فيه بإبتسامة ) : اه عيد ميلادي ..

- مصطفى : الناس شرفو ، يلاه دوشي وختاري شنو تلبسي ، والكادو ديالي أتلقايه عند مروان ودراري ..

- شريهان (عنقاتو) : لهلا يخطيك عليا .

- مصطفى : وكادو زهرة غير ترجعي من برا اتلقايها هي وكادوها كايتسناوك ، يلاه سيري متعطليش على دراري ، راه ايجي مروان يديك ، كنت بغيت نكون معاكم ولكن نداء الوطن ينادي ، انا مشيت .

- شريهان : الله يعاونك .

- خرج مصطفى للخدمتو ، دخلات هي دوشات او وجدات شنو غادي تلبس ، اليوم اتكون قفلات 25 سنة ، حيدات مريم من بالها ودفناتها ، هي دفناتها شحال هءا ولكن النار ديالها مابرداتش ولكن اليوم بردات ، شافت الساعة لقاتها 6 ، لبسات سروال دجين كحل مع ، ليبوط كحلين حيت الجو كان بارد وقت الشتا والبرد ، من الفوق لبسات تريكو طالع بالكول ديال الصوف فالحمر ودجاكيطة دالكوير ، شعرها خلاتو مطلوق ودار عليه بيرية فالحمر ، اما وجها فكتفات غير بعكر حمر .

- هبطات التحت ، باست زهرة وخطفات ليها حلوة من قدامها .

- انا مشيت اماما

- زهرة : واخا أبنتي سيري ، وعندك تعطلي ..

- شريهان : لا متخافيش ، يلاه أنا مشيت .

__________

01/12/2021

- ف (fireplace)café restaurant ، فجهة الداخل فالقنت ، مجموعة ديال الطبالي محطوطين حدا بعضياتهم ، الفوتويات فوق منهم النفاخات ، فالحيط معلقة happy birthday shery ، كاين سفيان وأشرف ، جوج البنات معاهم صحاباتهم ، كلهم مجموعين كيتسناو فمروان وشريهان ، ماشي بزاف باش دخلو ... بداو كيصفرو وكيغنيو ، شريهان متفاجئة وعاجبها الحال بزاف ، شنو كاين حسن من تكوني مع صحابك لي كيبغيوك وفرحانين بيك ، مع وقفات جاي سبراي بطارطة ، بدا كولشي كيغني ليها عيد ميلاد سعيد ... حتى للأخير وطفات الشمع ..

- شريهان : ناري أنتوما أحسن صحاب فالعالم ..

- أشرف (مد ليها كادوه) : عيد ميلاد سعيد بطولت العمر ، حلاتها ديك الساع كان فيها كادر فيه تصويرة فيهم هوما كاملين ..

- شريهان: هادي نهار ندير الوكالة ديالي انعلقها فيها ..

- سفيان : عيد ميلاد سعيد ، عطاها كادوه ... كان عبارة على سلسلة وطوينݣات ديالها .. بقات نوبة مروان ، عطاها جوج بواطات ..

- مروان : انا كنت مع مصطفى فاش خدا ليك الكادو ، وحتى انا خديت ليك الكمالة ديال كادوه ..

- عطاها جوج ديال البواطات ، فتحات الأولى لقات فيها سنسلة ديال الذهب ، علاقة ديالها على شكل تاج ، ومن اللور محفور سميتها وسميت خوها وسميت مها وباها الله يرحمو ... كادو لي خلا الدموع يتحجرو فعينيها ... هزاتها وعطاتها لمروان ..

- شريهان : ديرها ليا دير (علات شعرها ركب ليها السلسلة ) ، ضارت عندو ، هزات البواطة لي جاب ليها ، فتحاتها ... لقات سنيسلة ديال اليد ديال الذهب ، حتى هي فيها علاقات صغار على شكل تاج ..

- شريهان (عنقاتو) : ربي مايحرمني منكم ..

- مدات ليه يدها ، ركبها ليها ..

- مروان : عمرك تحيديها طول حياتك تبقى فيدك ..

- شريهان : كون هاني عمرها تحيد من يدي ، لهلا يخطيكم عليا ويخلينا ديما مجموعين ، الصراحة هادا أحسن نهار فحياتي عمري مغادي نساه .

_____________

- مديرية الأمن ..

- قدام باب العميد ، تحل الباب ودخل عاطيه التحية ..

- العميد : أهلا بضابط ديالنا ..

- مصطفى : سيدي ..

- العميد : ݣلس ، ݣلس مصطفى كيتسناه يهضر .. هز العميد واحد الملف وعطاه لمصطفى ..

- العميد : هادي واحد 8 سنين وقعات واحد الحادثة فمدينة بني ملال ، 3 ديال دراري ماتو بتلاتة بنفس الطريق برصاص .. كانو صحاب ب 3 وهاجرو لديار الإيطالية ، من بعد ولاو كيسيفطو لوالديهم مبالغ طائلة .

- مصطفى : بإستغراب) أشمن خدمة هادي لي كتربح هادشي كامل من الشهر الثاني ؟ باينة فالممنوعات ..

- العميد : تماما ، المخدرات وبصريح العبارة الغبرة ... وأنت عارف أي واحد دخل لهاد البحر مايخرجش عايش ، جاتنا معلومات ، بلي شي واحد كيروج للغبرة فالمدينة ، وكيختار الضحايا ديالو غير المراهقين ولاد الناس لي لاباس عليهم ، ختار الفرقة ديالك انا عاطيك حرية الاختيار ، بغيتك تلقاه فأسرع وقت ممكن مابغيناش نضيعو بزااف ديال الوقت ..

- مصطفى : سيدي واخا ناخود الملف ديال دوك دراري ؟

- العميد : تلقى ليا مول هاد نواعر ، تاخود الملف العد التازلي بدا عندك .. عطاه مصطفى التحية وخرج .

______________

- شريهان هزات راسها فساعة ، لقاتها 21:30 ..

- ويلي ويلي مشا الحال اليوم خالتكم زهرة تخرجني من عين البرا خاصني نمشي ، مروان تعطل اويلي هدا كلو تيليفون ، جا مروان كيخشي تيليفون فجيبو ..

- شريهان : فين كنتي؟

- مروان : خويا جا دا طوموبيل ومشا مالك ؟

- شريهان : وتعطلت على دار ، عند بالي اتوصلني انمشي نشد طاكسي ..

- مروان : نخرج نشدو ليك

- شريهان : غير ݣلس ، دراري لبنات انا مشيت شكرا بزااف على هاد نهار ... هزات تيليفونها وخرجات كتجري ، بانت ليها طاكسي أشرات ليها وركبات ..

_________

- وقفات مول طاكسي حدا واحد الحانوت باش تاخود روشارج ، خلصاتو هو مشا دخلات خدات الروشارج غادية حادرة راسها كدخل فالأرقام باش دخل الكونيكسيو ، حتى جا لودنيها صوت ديال الغوات ، وقفات هزات راسها الدنيا كانت خاوية وظلام ، أونفاص معاها كانت واقفة طوموبيل كبيرة كحلة نوع فورد ، واقفين زوج رجال لابسين الكحل شادين راجل لابس البيض ، مݣلسينو على ركابيه ، كيبكي ومن كلامو باين بلي كيطلب فيهم ، خشات الروشارج فجيبها وبقات واقفة ورا الشجرة كطلع عليهم ، كيبان ليها الباب تحل ونزلو شخص لابس الكحل ، ملامح وجهو أوروبية ، جبد شيحاجة من ورا ظهرو موجهو للشخص لي كيبكي ، تسمع صوت رصاص والصرخة ديال داك الشخص ، معبرة على الوفاة ديالو .

- دارت يديها على فمها شهقات شهقة كتومة ، عينيها كيبريو ، راجعة بلور غافلة على ذيل القط لي وراها لي غير عسفات عليه نقز خلعها خلاها تغوت معاه بالخلعة ، صرخة خلات أنظار ݣاع دو الرجال يتاجهو جيهتها .......

- كَّانْ

- حل الباب ، كايبان ليه الظلام ... مافهم وااالو ، مع ضار يسد الباب ، وهو يتشعل الضو وتسمع " جوايزاني ڤيغسيغ مالك جوايوزانيڤيغسيغ مالك ..

- تبسم إبتسامة ساحرة مبين على سنانو المستفين البيضين وحدر راسو ..

- نزهة(عنقاتو) : عيد ميلاد سعيد أولدي ..

- مالك (بصوت رجولي) : ربي يخليك الواليدة ..

- نزهة (بعتاب) : عاوتاني الواليدة ؟؟

- مالك (ضحك) : ماما ..

- أحمد (فتح ليه يديه عنقو) : عيد ميلاد سعيد أولدي ..

- مالك (بادلو العناق) : لهلا يخطك ابابا ..

- نزهة : هو بابا وانا الواليدة ..

- أحمد : الله يستر عمري شفت شي وحدة كتغير من راجلها على ولادها ..

- عمر (خوه الكبير) : السبع ديالنا عيد ميلاد سعيد .

- مالك : شكرا أخويا ..

- سعد : انا بغيت نفهم حاجة ووحدة ، واش سي ڤغي كتكونو ناسين عيدات ميلاداتكم ولا بولعاني تبغيو ديرو روسكم متفاجئات ..

- مالك (شافيهم) : هاد ولدكم مزال لسانو مابغاش يتسرح ؟

- أحمد : هداك خاصو شي مشية للمغرب ، باش يلاه يتسرح ليه اللسان مزيان ، ومع المشكل لي كان عندو فصغر ديال النطق كمل لي خاص ..

- سعد (عنق خوه ) : مبروك عليك أخويا ، الله يكمل بالخير ..

- عمر (تكرشخ بضحك) : هادي كنݣولوها إلى تزوج شي حد ، خوك مزال متزوج ... هذاا راه غييرر عيد ميلاد ههه..

- مالك : ماشي مشكيل ، وصلات عرفتك شنو باغي تݣول ..

- بدا تيليفون مالك كيسوني ، جبد تيليفون من جيب طلعات ليه نمرتها

- نزهة (خسرات سيفتها) : كارولين .

- مالك : خاصني نخرج دايرين نتعشاو ..

- نزهة : وطارطة لي موجدة أنا ؟

- مالك (باسها) : كنواعدك نرجع اندوق منها ، شكرا على المفاجأة ، انطلع نبدل حوايجي ونخرج .

- طلع لبيتو باش يوجد راسو يخرج يشوف حبيبتو وخطيبتو .

- نزهة (مغوبشة) : ماعرفتش شنو عجبو فديك السفريطة تفو ، ديما مخصرة عليا فرحتي الله ياخود فيها الحق ... مدايرة حتى بحال البنات .

- عمر : ماما نعلي شيطان ، ولدك راه كيبغيها واش نسيتي ... وراها خطيبتو رسمي ، خاصك تقبلي الأمر الواقع .

- نزهة : مدام مزال ماضرب بيها الكاغط ، مغاديش نتقبل الأمر الواقع ، وديك سفريطة مكنحملهاش ومكنحملش تجي لداري أحمد شوف ليا شي حل ..

- أحمد : ولدك كبير انزهة وعارف شنو كيدير ، لا انا لا انت ربينا ولادنا يديرو ليهوما كيرتاحو فيه ، سمحيليا ولكن منقدش ندخل (خلاهم ومشا للبيرو ديالو) ..

- نزهة (كتقلب بعينيها) : فين سعد ؟

- عمر (ݣالس داير رجل على رجل شعرو نازل على وجهو بملامح بريئة) : باينة فين هو زهق وخرج بحال ديما .

- نزهة (كتعيط) : جميلة دوا ديال الراس الله يرضي عليك أبنتي ..

______________

- بالخف تخبعات ، دقات قلبها كيتصارعو بالخلعة ، طلات براسها بانو ليها كيشوفو فجهة لي واقفة ، مع طلات مع بانت ليهم منعتين جيهتها ، طلقات رجليها لريح كتحري بأقصى ماعندها من سرعة ، هوما وراها وهي كتجري ... كدخل مع كل زنقة باش تحاول تلفهم ، قطعات الشانطي نيشان لجهة الجامع ، دخلات مع زنقة لي فوق منو كانت محطوطة كروصة تما مغطية بواحد الخنشة ، تلاحت وسط منها وغطات راسها ... قطعات النفس وطالقة ودنيها ، كتسمع خطواتهم وأصواتهم الغربية الإيطالية ... هزات راسها شوية كطل بانو ليها كيقلبو بعينيهم ، رجعات نزلات راسها وبقات جامدة ... حتى الحس غادي وكيبعد حتى تقطع ، هزات راسها بشوية مكايبان ليها حتى واحد ... حطات راسها كتنفس الصعداء ..

- شريهان : أشهد أن لا إله إلا الله وأشهد ان محمد رسول الله ، ناضت بشوية من ديك الكروصة ، دارهم كانت قريبة محتاجتس بزاف ديال الوقت باش توصل ، كتحل فالباب ويديها كيترعدو ماشي من البرد ولكن بالخلعة لي فيها ، دخلات حطات البوت ديالها وحيدات تجاكيط ...

- زهرة (جات عندها ) : أش هاد تعطيلة الحارة ؟

- شريهان (بتوتر كتسكت فيها) : ششش ماشي دابا اماما ... خلاتها ومسات كترد فالخوامي وطفات ضو وكطل بنص عين ، كيبان ليها واحد لابس نفس اللبسة ديالهم كيجري ويقلب بعينيه ..

- زهرة : امالكي طافية علينا الضو ، وجايا كتجري واش شي حد كان تابعك ولا مالك ، صفرة وحالتك حالة ..

- شريهان (مجاوباتش حتى بان ليها مشا ... ناضت شعلات الضو ورجعات ݣلسات حالة رجليها ، هزات راسها فمها لي كتسنا منها كلمة) :

- قفرتها اماما قفرتها ، أنا مشيييييييت فيها ..

- زهرة (غادية وجاية فبلاصتها وضرب ففخاصها وتولول ) :

- وناري على المسخوطة ، وناري على المنحوسة ... أويلي على أخر يامي ايوليو تابعيني العصابات اويلي واش ندير ، وناري مي وهي خواتاتي واهي صحاباتي أجيو طلو عليا ، وهاد البنت اتخرج عليا (شافت فيها ساهية وهي تنقز عليها كضرب وتعض) ..

- شريهان (كتغوت) : اماما رجوع لله اماما ، اويلي أييييي ، ماما قصحتيني ، اااااييييييي ..

- زهرة(كتقرص) : ها سر لي يدخول لشبوقات ويݣلس يبرݣݣ ، ها لي مايدخلش سوق جواه وخارج عليه الفضول (زݣات حيت عيات وبدات تبكي) ..

- شريهان : دابا واش انا لي خاص نبكي ، لي شايفة راجل مدار لا بيديه لا برجليه مقتول ولا انت ..

- زهرة : انا أنا لي نبكي على يامي انا ، واش دابا عند بالك أيخليوك مشيتي فيها اش غادي نديرو ، كيبان ليا نديك لدكتور تازي يدير ليك عملية ، يبدليك الوجه باش هكا مايتعرف عليك حتى واحد ..

- شريهان : ماما واش شوية لاباس ؟ من نيتك كتهضري لا؟

- زهرة (شافت فيها) : خاصنا نݣولوها لخوك ..

- شريهان (قاطعاتها) : لا لا ، متݣولي ليه والو اماما انت عارفة مصطفى ، بلاما دخليه فهادشي لا نصدقو واحلين تمشي توقع ليه شيحاجة لا ..

- زهرة : أياه امو العريف اياااه وشنو غادي نديرو دابا ، كيبان ليا نبيعو دار ونرحلو لشي مدينة ياخرى ، هدا هو الحل لي بقا لينا ..

- (تيليفونها بدا كيسوني) ..

- زهرة (بتساؤل) : شكون ؟

- شريهان : غير مروان اماما ..

- ألو مروان ، ويلي ويلي نسيييت ، ماعرفت عقلي فين كان وحق الله وصافي حتى لغدا ودوزهم ليا ، أنت حدا دار ، واخا بلاتي ..

- زهرة : مالو ؟

- شريهان : نسيت الكاديوات لي جابو ليا دراري ، مع الزربة وحيت تعطلت خليتهم فوق طبلة ووشديت طاكسي وجيت ، مروان كايتسناني انشدهم من عندو ونجي ...

- وقفاتها زهرة :

- ݣلسي لأرض لا يكونو لخرين مزال على برا ، انا انحل ليه ... مشات زهرة حلات لباب للمروان ودخل ..

- مروان (كيشوف فيها باستغراب حيت ماشي هي لي حلات ليه وخرجات عندو ) ..

- ياك لاباس مالك ، لونك مخطوف ..

- شريهان (بدات تغبن ) : قفرتها أمروان شفتي انا مشيييت فيها صافي ..

- مروان (حط دوك الكادوات وݣلس) : مالك أش واقع ؟

- شريهان عاودات ليه كولشي من الأول للأخر ..

- مروان (شاد فراسو وكيخمم ، هز راسو فيها ونطق ) :

- مݣاليكش راسك دخلي سوق راسك وتكملي طريقك ؟

- شريهان (خرجات فيه عينيها على مها)

- زهرة : بلاما تبقاي تخرجي فعينيك ، عندو الصح حيت انت واحد الݣنسة متسواي الريال ، هاهي جابتها فراسها ... بنتي مشاااات اوليدي امروان صافي ، غير نترحم عليها من دابا ، شفتي هادو منين عندهم السلاح صافي ، هادو من دوك المافيات ديال الأفلام ..

- شريهان : متزيديش فيه اماما ..

- مروان (وقف) : وراه عندها الصح ، راه ماخشاوش فيه جنوي ، راه تيراو فيه ، وانت كتكولي ليا نصارة لغتهم طاليانية ، هادو باينة مافيا مافيهاش ..

- شريهان : زيد حرݣ نوادر انت زيد .. الله ياربي(كتغبن) فين غادي نمشي ونعطي راس ، اندير نقاب انا مافيهاش ..

- مروان (كيفكر وساكت شوية بحال الى تفكر شيحاجة) :

- عندي واحد الفكرة ..

- شريهان : فاش كتفكر ؟

- مروان : فاش كانت عندك 18 سنة شنو كنتي بغيتي ديري ؟

- شريهان : نكمل قرايتي ..

- مروان : راكي كملتي قرايتك ، كنهضر على شيحاجة أخرى نسيتي ولا نفكرك ؟

- شريهان (بقات كتفكر) : نمشي للعند خالي للفرنسا ..

- مروان : هذا هو الحل ، تخوي هنا ، وسيري عند خالك للفرنسا ، منها نيت تبدا حياتك وديري مشروعك لي كتفكري فيه ، الى بقيتي هنا اشريهان مغادي ديري والو ، خصوصا انت مابغياش تخدمي عند الناس ، وأمنيتك ديري الوكالة ديالك ، اوروبا مزال راه ينجح فيه مشروعك ، ولكن هنا لا ... ومع هادشي لي وقع أحسن حاجة تمشي ، حيت الى كانو شافوك راه والله مايخليوك تزهقي ..

- زهرة : اويلي على فرنسا ، واش انت لاباس لا ؟ بقا ليا انسيفطها عند داك المصرفق ديال خالها ، ياك شحال هذا ماجا فين عمرو مزال سونا ولا هضر ، تلقاوه لاحوه لزنقة ماعندو حتى مياكل ، نمشي انا نسيفط بنتي عندو لا اوليدي اخليها هنا حسن ..

- مروان : وخالتي شنو ادير هنا ، تݣلس فدار راه فعمرها 25عام اتبقى هكا ، لا خدمة لا والو تبقى فدار مايمكنش ، وهي مابغاتش دير شي مشروع من غير مشروعها ... وهادشي لي وقع دابا اللهم تمشي لتم ، حنا دابا ماعرفناش واش شافوها ولالا ..

- شريهان : انا ݣلت موحال واش شافوني ، حيت هربت يمكن شافو نصي ويمكن لا والله مابقيت عارفة شيحاجة ..

- مروان : انا كيبان ليا هدا هو الحل ، سيري على أساس توريس وفاش توصلي تم ݣلسي ... وقلبي أول حاجة على خدمة والى لقيتي خالك يوقف معاك ، وتصايبي الورقة باش تقدري تݣلسي تم ، وهكا تبداي حياتك براكة اداكشي لي داز عليك ... ولالا اخالتي زهرة ؟

- سكتات زهرة وهزات راسها فصندوق ديال الفرمسيان لي كان حدا الكوزينة ، كتشوف فدوايات لي كانت كتشرب بنتها ، ودوك الأيام لي دازو منهم صعاب ، مشا تفكيرها مع اول سيمانة من بعد حادثة محاولة الاغتصاب لس كانت اتوقع لشريهان ..

_______________

- كانت ناعسة فغرق النعاس ، كتسمع فالغوات ... ناضت قافزة من بلاصتها محيدة عليها الغطا ، خرجات من بيتها كتسمع الغوات جاي من بيت شريهان ، مسات كتجري مخلوعة حلات عليها شاعلة الضو ، كتسمع فيها كتݣول :

- بعدو مني هاهوما هاهوما جايين هاهوما واقفين عند راسي ، بعدو مني بعدو مني حيدو عليا لا لا ، اتقطع ليا حوايجي لا ..

- زهرة (كتفيقها ) : شريهان شريهان بنتي ، بسم الله عليك ابنتي انت فحمى الله ونبي رسول الله .. فاقت سريهان كلها كترعد وقلبها كيضرب فمها ناشف ... هزات زهرة كاس دالما كان حداها عطاتها تشرب ..

- شربات ، وقلبها مزال كيضرب ، ساهية فنقطة معينة ، شوية بدات كتبكي ، معنقاها مها ..

- شريهان :

- كنحاول اماما نسا ، كنحاول ندير راسي فرحانة وماوقع والو ، كنحاول ندير راسي قوية ، مقاداش اماما ، غير كنحط راسي على المخدة كتجيني تصويرتو وتصويرتهم بين عينيا ، والله مقادة معارفة مندير ، كنقرا القرآن كنطلب الله ، او والو

- زهرة : صافي أبنتي (كتسكتها وتبوس فيها) غدا إن شاء الله نشوفو شي طبيبة ، ابنتي بزاف هادشي خاصك طبيبة ضروري ، نعسي دابا وغدا إن شاء الله يحن الله ، كحزات حداها ونعسات معاها باش متخليهاش بوحدها ، شوية بشوية حتى داها نعاس ..

- زهرة باتت سهرانة ، الغد فاقت سونات لمروان وأشرف وسفيان علماتهم ، مكاملاش نص ساعة كانو عندها ، حاب مروان طوموبيلتو باش يديو شريهان للطبيبة ، داكشي لي كاين من بعد بحث ، لقاو طبيبة مزيانة ... بقاو يتسناو حتى وصلات نوبـتها ، دخلات عندها بوحدها ... وكأي طبيبة نفسية ، كتهيئ الجو المناسب للمريض ، عاودات ليها شريهان كولشي من الاول للأخير ، حيت نفسيتها كانت صعيبة ... كتعاود بحال الى داكشي وقع غير لبارح ، حتى سلات معاها أول حصة ... وهكا كانت شريهان كتمشي عندها الإثنين والخميس ، خرجات ليها دوا كتاخدو واخر حصودة ،كانت معاها مها ..

- طبيبة : مكرهتش تسافرو شوية تبدلو الجو ، وبنسبة للدوا اتكمليه مدة 15 يوم وصافي اتحيديه فمرة تافقنا ، شريهان خاصنا ديما نشوفو نص الكاس العامر ، اما الخاوي ماعندنا منديرو بيه ، خاصك تكوني فرحانة حيت كنتي قوية ، وقدرتي تنقزي من داك البالكو وعتقتي راسك من 3 دالوحوش ، كاينة لي واحد ومقداتش عليه ، وأهم حاجة عندك أم وصحاب كيبغيوك ، وكل مرة كتجي كيكونو معاك ، وهادي بحد داتها حاجة زوينة بزاف ، خاصك تحمدي الله عليها ، ماشي غير صاحبة خايبة كولشي هكاك ، بنت وحدة مصدقاتش ولكن 3 ديال صحاب صدقو ، من هاد ساعة بغيت نشوف شريهان وحدة اخرى ، القديمة نساوها تافقنا ؟

- شريهان (بإبتسامة ) : تافقنا ... خؤجو من عند الطبيبة ، مقاترحة عليهم زهرة يتغداو عندها كاملين وداكشي لي كان فعلا ...

- أشرف : خالتي أش بان ليك نديو شريهان للشمال ، عندي جداتي تماك نمشيو كاملين ، ندوزو واحد الشهر تما بينما بدات القراية فلافاك ؟؟

- مروان : انا نديكم بطوموبيل .

- سفيان : وراه انت لي غادي تدينا شكون من غيرك ..

- زهرة : حتى انا عمري مشيت لشمال ، اش بان ليك أبنتي ؟

- شريهان : مكرهتش والله العظيم ..

- أشرف : اش بان ليكم بعد غدا نشدو طريق ..

- شريهان : اياااه يلاه نيت نمشيو للحمام ونجمعو حوايجنا ..

- داكشي لي كان نيت ، سافرات شريهان وزهرة مع دراري للشمال ، كان احسن شهر ادوزو شريهان مع عائلتها اه عائلتها هادو ماشي صحاب هادو عائلة ، كيفاش تعانلو معاهم عائلة أشرف ورحبو بيهم ، ناس ديال الجود والكرم ، ماخلاو ماحطو ، اما شريهان ودراري ماخلاو جبل ماخلاو بهايم سرحوهم ... اما مسكين واحد الحم-\-\-\-\ار غير سايݣاه شريهان وكدور بيه مدلدلة رجليها ... سلات دوا ديالها ولا نقولو ودعاتو ولات تنعس مزيان مرتاحة ، داك نهار نساتو وكلام طبيبة والخاطر لي عطاتها زاد قواها ، شافت نعم لي عندها مها وصحابها ، اما مصطفى بحكم السطاج كانت هضرتهم قليلة مرة مرة ، ومكانوش باغيين يعاودو ليه حتى يسالي سطاج ديالو بعدا ، ايكون حداهم ومعاهم ماشي بحال البعد ..

- رجعات شريهان للدار بنفسية جديدة وشخصية جديدة ، بدات القرايا فلافاك ، كتمشي مع دراري وكتجي معاهم ، ماتعرفات على حتى بنت ، واخا كانو كيبغيو يتعرفو عليها ولكن كتخلي علاقتها معاهم محدودة ، هكا احسن ليها براكة عليها غير صحابها ..

______________

الحاضر

- زهرة : عندك الحق اولدي ، ولكن انا مغاديش نسيفط بنتي لعند خويا انا لي عارفاه ..

- شريهان : إوا وشنو الحل اماما فنظرك ، نبقى هنا ؟

- زهرة : لا مكلتش انا هادشي ، غادي تمشي ونمشي حتى انا معاك منخليكش بوحدك ..

- شريهان : اويلي اماما من نيتك ، ومصطفى ؟

- زهرة : راه راجل ، قاد براسو بخدمتو بكولشي ليه ، امت لي بنت والله لا خليتك تمشي بوحدك ..

- شريهان : وكيفاش انديرو ليها يهديك الله ..

- زهرة : ساهلة انعيط على عمك احمد ونگولها ليه ..

- شريهان : الا الا ، أيقوليك طامعين فيه لا احنينتي ، أوهوي اختي انا ماباغاش نمشي عند عمي ..

- زهرة : ومكاين غير هو ، وانا مكنديرش شيحاجة بلاما نتشاور معاه ، هداك بمتابة خويا ، وعمكم بغيتي تمشي لفرنسا انمشي معاك وانهضر مع عمك ، مابغيتيش غادي نبقاو هنا وسالينا ، ونݣولها لخوك ...

- شريهان : ماما كديري ليا شونطاج ، هادشي راه عيب لي كديري فيه ..

- زهرة : لك واسع النظر

- مروان (بهمس) : خالتي زهرة اقرات او ولا تهضر بحال مداولة ..

- شريهان (ضارت فيه) : سكت حتى انت هنينا ، ماما نعلي شيطان ..

- زهرة : الله ينعلو ويخزيه ، ختاري ياهادي ياهادي ..

- شريهان (بإستسلام) : اووووف ، شوفي بشرط راه مغانطولوش عندو ، نضبر على خدمة انخرج نكري ، زاخا نسكنو انا وياك فكاراڤان ..

- زهرة : واه واه ، انا انسوني ليه فالواتساب نݣولها ليه ..

- مروان : مك دارت الواتساب مي مي ، خالتي زهرة تمجهدات ..

- شريهان (شافت فيه) : الناس فناس والقرع فمشيط الراس (شافت فمها) شنو اتكولي ليه ، علاش جايين ؟

- زهرة (تبسمات) : ويلي ويلي مالي انا هبيلة ، انݣوليه بغيتي تبداي مستقبالك وتخدمي ، وبغيتي تمشي للفرنسا ، ومع انا منقدش نفرقك غادي نمشي معاك ، ونݣوليه راه مغانتقاوش عليكم ، راه غير تلقا خدمة انخرجو نكريو ، صافي رتاحيتي بردتي دابا ؟

- شريهان : اه رتاحيت ..

- مروان : وخوك شنو اتݣولو ليه ؟

- شريهان : نفس الشي ..

- مروان ( وقف) : انا غادي نمشي ، تصبحو على خير ، شريهان علميني بلي كاين فتيليفون ، أجي علاش منمشيو نديكلاريو ..

- شريهان (كضحك) : ربي ربي ، ونݣولوها لخويا نيت ، هاحنا ديكلارينا ، ايسيفطو معايا الڤيدورات باش يحميوني ، من نيتك أمروان ..

- مروان (هز يديه) : صافي هاهو ساكت ، المهم تيليفون بيناتنا ..

- خرج مروان مخلي شريهان كتخمم وتفكر فداك اللقطة لي قتلوه فيها ..

- شريهان : ماما انطلع ندوش ونتوضى نقدر نسا اشوية ، واخا انا هاد الليلة مغانعسش باينة ..

- زهرة : سيري ابنتي ، مايكون الخير ياربي ... هادشي كامل ربي اينور طريقك سيري ..

- طلعات شريهان ، مخلية مها تهضر مع عمها ، واخا ماعجبهاش الحال ،ولكن ماعندها مادير هادي فرصة تبدا حياتها تم وفرصة تهرب من هاد الليلة لي بنسبة ليها غادي تبقى بحال الهاجس فحياتها ، كابوس وباش تهنا منا تهرب وشوف وشوف واش تهنى منو ولالا ؟؟..

_______________

- أحمد : الله اودي هادا احسن خبار سمعتو ، شوفي متݣوليش ليا هادشي عمري نسمعو منك مزال بالفرحات عليا تكون معايا مرات خويا وبنت خويا ، راه انت معارفاش شنو كتݣولي ، الالة ماعندكم فين تمشيو هاديك داركم ، شوفي انت غير قادي الامور تم وخلي عليا الباقي ، يلاه اختي زهرة خليت ليك الراحة ..

- نزهة (كتسولو بعينيها) : شنو واقع ؟

- أحمد : زهرة وشريهان غادي يجيو للفرنسا هنا ..

- نزهة (بصدمة وفرحة ودهشة) : لا متݣولهاش واش بصح ، مكتفلاش عليا ..

- أحمد : والله مكنتفلا ، شريهان قرات وبغات تقلب على خدمة هنا ففرنسا ، وانت عارفة زهرة متخليهاش بوحدها ، وحمقة كالت ليك اتلقى خدمة نخرجو نكريو ..

- نزهة : من نيتها ، والله لا خليتهم يخرجو من هنا بالله ..

- مالك (وراهم) :

- شكون هادو لي مغاديش تخليوهم يخرجو من هنا ؟

- نزهة : مرات عمك علي وبنتها ..

- مالك (ݣلس على الفوتوي داير رجل على رجل) :

- ديك بنتها زريݣة ..

- نزهة (كضحك) : هاديك ، كنتي كتݣوليها زربݣة فاش كانت عندك 7 سنين ، حيت كانت غير تابعاك وخنونتها نازلة ..

- مالك (ضحك) : اه وكانت زرݣة ضل تكركب فتراب وشموشات ... ولاش غادي تجي ؟

- أحمد : كملات قرايتها وبغات تخدم هنا ..

- مالك : مزيان مرحبا بيهم ، حنا نيت ماعندنا عائلة هنا ، ومكايجي عندنا حد (وقف) كنتمنى غير مايكونش فيها المشاكل وصداع بحال الصغر ، حيت بكل سهولة انهز حوايجي ونمشي لداري ... تصبحو على خير .

- أحمد (بصرامة) : كنتمنى منشوفش منك شي تصرف لي يسيء ليها ، ماتنساش بلي هي بنت عمك لي بسبابو انا هنا ... وانت فالمنصب ديالك .

- مالك (وقف وضار عندو) : كون هاني .. خلاهم وطلع لبيتو ..

- نزهة (فرحانة) : كنتسنى بفارغ الصبر إيمتا يكونو هنا ، نلقى غير معامن نتوانس ... اجي واش شريهان مزال بحال كيف كانت ولا تبدلات ؟

- أحمد : وصراحة عمري فكرت نكول لزهرة تسيفط ليا تصويرتها ..

- نزهة : هزات تيليفون) ضروري يكون عندها فيسبوك ، اطط ندخل نقلب ... دخلات كتقلب لقات فيس واحد ولكن مافيهش صورة شخصية ..

- نزهة : ماعندها حتى تصويرة ..

- أحمد (وقف) : دابا تجي وتشوفيها أتكون تبدلات ، انا ماشفتها منين كان عندها 10 سنين ، دابا تبارك الله راه عندها 25 عام ، هي او مالك تزادو سبحان الله فنفس النهار وشهر من غير الأعوام لي مختالفين ..

- نزهة : اه اليوم حتى هي كان عيد ميلادها ، كاعما باركنا ليها ، دايرين فالطة كبيرة والله ، البنت ماعندهاش باها نورمال أنت خاص تكون فمقامو ، تسول فيها ومرة مرة تزورهم ... ولكن حتى حنا داتها دنيا والمشاغل ..

- أحمد (تنهد) : عندك الحق ، إن شاء الله الى جات هنا نحاول نعوضها ، واخا غير شوية ، يلاه انا غادي نمشي نعس ..

- نزهة (تنهدات تنهيدة طويلة او وقفات) : ديني معاك .. شدات ليه فدراعو ومشاو ينعسو ..

_____________

- كيشوف فيهم ، وكيحاول يستوعب كلامهم ..

- مصطفى : مافهمتش انا ، كيفاش حتى جاتكم فكرة فرنسا فهاد الوقت ؟ عمرها جاتكم على البال ..

- زهرة : أولدي ختك راه عندها 25 دابا ، تبارك الله ها ديبلوم المعلوميات ، ها ديبلوم الفندقة ، وفينما كين شي ديبلوم دوزات مكركراهم ليا تما فوق البيرو ، القراية وسلاتها لافاك ودارتو ، وحالفة حتى تكل بوها ديك الويكالة ديال الخطابة ...

- شريهان (قاطعاتها) : ماشي خطابة اماما ، المهم ماعليناش ، خويا هنا مايصلاحش ليا ندير فيه مشروع ، ماشي بحال برا ، ندير مشروعي تم وغادي نجح .

- زهرة : اولدي والله مابغيت نخليك ، ولكن انت راجل ماشي بحال ختك ..

- مصطفى : انا مكنهضرش على هادشي ، ماعنديش مشكيل تمشيو ... أهو جاتني فشكل عمركم فكرتو فيها وصافي ، خصوصا انت الواليدة ، العروبية وقليل فين كتمشي تشوفي جدي ..

- زهرة : جدك راه مرح مع راسو مع مرتو ، كيت مي لي وسدات تراب اما هو عايش الحب ، بحال الى يلاه فالعشرين ، راه كنهضر معاه فتيليفون ، سوا بقيت سوا لا ماعندو سوق ، العروبية قطعتها ابمسبت مرتو لي خرجات فيا نيابها ..

- مصطفى : إيوا شنو انݣوليك انتوما تعرفو ، انا غادي نتكلف ليكم بالوراق والباسبور ، انتوما اخرجو هاد السوق ، وإلى كان عندي كونجي راه نزوركم إن شاء الله ..

- زهرة : عندك تبلا بماكلة الزنقة اودني منك .

- مصطفى : لي عندو زهرة فدار ومايعرف يطيب ، وايلي حتى لهادي لا الواليدة ..

- شريهان : انا غادي نطلع نعس ، عييت (قبل مطلع ضارت عند خوها كتشوف فيه ، بدون سابق إنذار طاحت عليه عنقاتو) شكرا بزاف أخويا على الكادو ... لهلا يخطيك عليا ومايحرمنيش منك يارب ، أنت أحسن اخ فهاد الدنيا ، نهار لي غادي نبني مستقبالي ونحقق لي بغيت ونفكر انو نتزوج ، بغيتو يكون نسخة طبق الأصل منك ، واخا انت مامنكش زوج ..

- مصطفى (مزير عليها) : وسيري بحالك ، تبكينا تفوووو ... وصاحبتي البريستيج ايخسر ضابط وكايبكي حشومة فحقي ..

- شريهان (ضحكها) : باااز ومالك ، راه رجال وكيبكيو ..

- مصطفى : كيف جاك الكادو ديال الواليدة ؟

- شريهان (نسات بلي ماخدات حتى كادو من مها ) ..

- زهرة : راه فماريوها ، مزال كاعما شافتو ..(غمزاتها مداركة الموقف) ..

- شريهان (عطاتهم بظهر) : انا غادي نمشي نشوفو ..

___________

- فبيت شريهان ، دخلات ، قبل ماتشوف الكادو دماماها حلات المجر باش تحط فيه البواطات ديال لي كادو لي عطاها خوها ولي عطاوها الدراري ، حتى كتبان ليها واحد البواطة ، البواطة لي 8 سنين ماهزاتهاش ولا قربات جيهتها ، البواطة لي فيها خاتم لي جاب ليها داك بوزبال فالخطوبة ، هزاتوو حلاتو كتشوف فيه ، كرزات عليه بيديها ، غادية فتجاه السرجم ، يلاه اتحلو تلوحو وهي توقف ..

- رجعات حلات البواطة ، جبدات الخاتم منها كدورو فيديها وتبسمات ..

- شريهان : هههه واللهيلة دهب ، خسر شوية ديال الفلوس حيت عارف ايربح من ورايا .. انحتاجك انت غدا .. رجعاتو للمجر ، مشات حلات الماريو وجبدات منو بواطة كبيييرة محطوطة ، هزاتها حطاتها فوق نموسية وحلاتها ، لقات ريحة فالحمر مغلفة مكتوب فيها أميرة العرب ، وجوج قريعات ديال الزاج صغار مكتوب عليهم مخمرية شعر ، وريحة مكتوب فيها أنا الأبيض خاصة للشعر ، بدات كتحل ريحة بريحة وكتشم فيها ، حمقوها بزااف ريحتهم كتهبل ... رجعاتهم للبواطة فرحانة بيهم ، حطاتهم فالماريو ديالها ورجعات للنموسيتها تكات وطفات الضو ، يلاه اتسد عينيها جاتها صورة الراجل لي تضرب بين عينيها ، لقطة خلات قلبها يرجع يضرب المنضر ديالهم وهوما كيتيريو فيه ماخلاهاش تنعس ، الليلة كلها كتفيق وكتنعس بالخلعة ، ماقدرات تنعس مزيان حتى أدن الفجر عاد نعسات ..

_______________

- على الطبلة ديال الفطور مجموعين كيفطرو ، سونا تيليفون ديال مصطفى ..

- ألو وي مراد (غوبش) واخا واخا انا جاي دابا ..

- زهرة : مالك اولدي ، كمل فطورك ..

- مصطفى (هز سوارت طوموبيل وتيليفون) : لا الواليدة ابصحة ، عيطو عليا خاصني نمشي .. باس ليها راسها وخرج ..

- شريهان : ماما نخرجو ورا العصر للمسيرة ؟؟

- زهرة (بإستغراب) : واش دانا للمسيرة ؟

- شريهان : غير يلاه وصافي دابا تعرفي ..

- زهرة : وصافي نصلي العصر ونمشيو ..

___________

- خرجات شريهان هي وزهرة ، غير دخلو للقسارية ، غادية بيها فتجاه الذهيبية ، دخلو عند واحد الذهيبي وزهرة مفاهمة والو ، حتى جبدات شريهان البواطة دالخاتم من سكادو مداتو ليه ..

- شريهان : عفاك بغيت نبيع هاد الخاتم ..

- واخا لالة ، هز الخاتم وزنو قلبو مزيان ..

- هدا يجب ليك 1500 درهم ..

- شريهان : متزيدش شوية ؟

- هذا هو الثمن ، راه واحد خور يعطيك غير 1000 درهم ، خصوصا فهاد الوقت ، وتقدري تسولي ..

- شريهان : بلاش اسيدي غير الله يربح ، مافيا لي يبقا يدور ..

- واخا الله ،، جبد المجر وجبد منو الفلوس كيحسب حتى حسب 1500 مدها ليها ..

- شريهان : الله يعاونك شكرا ..

- العفو الالة هذا واجب مرحبا ..

- خرجو من عند الذهيبي ..

- زهرة : وسيد لنصاب جايب خاتم ديال ذهب ..

- شريهان : حيتاش عارف ايربح من ورايا بزاف ، ݣال مافيها بتس نجيب ليها خاتم ديال الذهب ، باش يبان لاباس عليه ودغية نطيحو فشبكة ..

- زهرة : وشنو اديري بديك 30 ألف ريال ؟

- شريهان : نشري الحوايج ، شحال من حاجة خصاني نديها معايا .. ناخدو ترونسبور للخبازة ناخود من تم ..

- خداو ترونسبور للخبازة ، تقدات لي بغات العصري وجوج بيجامات ، وحتى مها مانسات خدات ليها شيحاجة ، خدات شومبوان وديميلور لشعرها ... دخلو تعشاو فواحد القهوة ، من بعدا مشاو لدار مع وصلو للحومة ، كيبانو ليهم زوج ديال الرجال لابسين لباس رسمي ، وكيسولو فواحد مول الحانوت . . . شريهان تخطف اللون من وجها ، دارت قب القبية فوق راسها دغية وجرات مها لي مفاهمة والو ... بالخف حلو الدار ودخلو ..

- زهرة : اويلي ابنتي غير بشوية ، اش هاد الجرا هادي دايرة ليا ، واش قدي قدك شوية متلوحيني ..

- شريهان (غادية جاية قلبها ايسكت) : ماما خاص مصطفى يصايب لينا الوراق دغية نخويو ، شفتي دوك الرجال واقيلة كيقلبو عليا ..

- زهرة : واش انت غير لي شفتيه لابس الكوستيم كيقلب عليك ، سيري طلعي داكشي لبيت وتوضاي صلي ونعلي شيطان ، نمشي نوجد العشا ..

- بقات شريهان كتخمم ، هزات دوك الحوايج لي خدات وطلعات لبيت لاحتهم على نموسية ، مشات لسرجم كطل مبان ليها حتى واحد ، تنهدات بأريحية ودارت داكشي لي ݣالت ليها مها ..

______________

- إيطاليا

- تحلات بوابة للڤيلا بحال القصر ، دخلات طوموبيل فالحمر من نوع لامبرغيني ، وقفات قدام بزاف ديال الحراس ضايرين بالڤيلا من الداخل وبرا ، نزل من طوموبيل ... لابس لابسة كلها كحلة ، ملامح وجهو زعرة ، باب الڤيلا من الداخل كان محلول ... مع دخل تلقات ليه الخدامة ..

- سينيور دجيكو ..

- دجيكو : فين هو ؟

- الخدامة : فالمرسم ..

- دجيكو : واخا القهوة ديالي كيف ديما ..

- الخدامة : واخا سينيور ..

- مشا لجهة المرسم بخطوات بطيئة ، كيبان ليه الباب محلول ، وهو ݣالس عاطيه بظهر منعازل على الضو ، من غير ضو ديال السرجم الصغير لي مضوي الرسمة لي كيرسم فيها ...

- بلاما يشوف فيه نطق) : شنو كاين ؟

- دجيكو : بغيت غير نعلمك بلي الأمور غادية كيفما بغينا ..

- .... : مزيان وشنو خور ..

- المبنى خديناه ، وبتمن لي بغينا حنا .. وحتى السلعة راها تفرقات كيف بغينا حنا ، امورنا غادية مزيان ، شنو بان ليك نسهرو هاد الليلة ؟

- .... : سهر غير انت اما انا غير خليني ترونكيل ، منين تخرج سد الباب معاك ، واخر مرة توقف عليا بلاما دق ... تقدر تشرب قهوتك فجردة .

- بكلامو نهى الهضرة معاه ، دجيكو بلع ريقو حدر راسو خارج ساد الباب من وراه ..

_______________

- بدا مصطفى كيقاد لمور وشريهان فالوراق ، الخدمة وجري ورا الوراق مكايساليش ، وفاش كيكون هو مشغول كيكلف واحد من دراري يتكلف ليه ..

- مع أذن الظهر دخل لدار عيان ، حط الپاسبورات ديالهم ولي بيي ديال الطيارة ، فوق الطبلة ... حط راسو على الحيط كيتأوه بالعيا ..

- زهرة (طلات عليه من الكوزينة ) : جيتي اولدي .. ݣاعما سمعتك فاش دخلتي ..

- مصطفى : اوووف عييت الواليدة وحق الله ، هاد 12 يوم دازت كلها تمارة وجرا ... نزلات شريهان من الفوق سلمات عليه وݣلسات ..

- زهرة : تمارة ديال الخدمة اولدي وزدناك حنا ..

- مصطفى : لا الواليدة ، غير خدام على واحد لونكيت صعيبة شوية ، واش فخباركم لقاو واحد خونا فشارع التحت مقتول ..

- شريهان (شافت فمها مخرجة عينيها وبلعات ريقها) :

- فين مقتول ياربي سلامة ، شكون قتلو ؟

- مصطفى (كيحك عينيه حيت مناعسش) :

- مزال ماعرفناش ، مزال كنقلبو ... المهم انا انوض ندوش ونعس الواليدة خلي ليا غداية حتى نفيق ، نسيت الطيارة عندكم غدا مع 6 دصباح ، جامعين حوايجكم بعدا ؟

- زهرة : اه اوليدي جمعناهم ..

- مصطفى : يلاه انا طلعت ... غير تفاوت مصطفى وشافت شريهان فمها ..

- ناري ناري ضوسي فيد خويا ناري ، حمدت الله لي غادي نمشيو ..

- زهرة (تنهدات) : انا كنفكر غير فوالدين داك دري مسكين ، حسن عوان ميمتو ... تكوني ماعليك مابيك حتى تسمعي خبار ولدك لهلا يطيح شي أم فهادشي ..

- شريهان : ولاد الحرام ، كيفاش قتلوه بدم بارد مارحموهش اعباد الله ، عرفتي كنحس بتأنيب الضمير ... حيت كنت شاهدة على جريمة وسكت ..

- زهرة (وقفات) : هانتي ݣلتيها قتلوه بدم بارد ، خلي انت لي شهدتي وشفتيهم ، لا انت لا طاسيلتك غادي يصفيوها ليهم ، خوك انت انت صحابك عائلتك كلها ... انتستفو فمقبرة وحدة ، هادي الى لقاو الكسدات ديالنا ... سيري الى عندك شي شغل قضيه والى عندك شي حوايج جمعيهم ..

- فكان الأجواء كانت غير ، جميلة باوامر من نزهة عطات أوامر للخدامات لي مسؤولة عليهم ، باش يوجدو جوج ديال البيوت للشريهان وزهرة ، جوج ديال البيوت بحالهم بحال بيت نزهة بالجمالية ديالو والكبورية ديالهم بالحمام بدريسينݣ بكولشي ليه ... هادشي تكلفو بيه الخدامات اما جميلة وزهرة دخلو للكوزينة ، وجدو كل مالذ وطاب من مأكولات مغربية ، حلويات ومملحات كولشي وجدوه بحال الى عندهم عيد ..

- سعد شنو كييين واش مالك اتزوج ؟

- أحمد (دور راسو هاز تسبيح) : ياربي الحبيب صبرني ، (موجه كلامو لنزهة) هاد البعر جيبي ليه شي أستاذ يعلمو دارجة ..

- نزهة : اتجي زهرة توالاه (كضحك) ..

- أحمد : هي نيت لي تعرف ليه ..

- سعد : يوك يوك بدينا عاوتاني ... عادي سولت جوبوني ..

- نزهة : مرات عمك الله يرحمو هي وبنتها جايين عندنا ..

- سعد : عْلُشْ عندنا مرات عمنا وبنت عمنا ؟

- أحمد : الدري عايش معانا ومعارفش واش عندنا شي عائلة ، بسيف السهير حتى لصباح ، (شاف فيه وبصرامة هضر) سمع السهير ممنوع ، دخول لدار 8:39 تكون هنا ... ولا لاكارت ݣيشي انحيدها ليك وطوموبيل حتى هي اتحيد ليك ، واتولي تمشي مع خوك عمر للمحال، يشوف ليك واحد من المحالات تخدم فيه ، براكة عليا من تسلݣيط الخاوي ..

- سعد (بعدم تصديق) : كي فااااش ، بابا اما منبغيش نخدم معاك فحوليات وفداكشي تاعك ، بابا انت دوز حياتو مع بنات ضحك تقشاب انو لا ، انو خاص يدوز حياتو يخروج يضحك يلعب يشطح داكوغ ..

- أحمد (كيقلب باش يضربو) : انا كنت مع البنات يابلحم...ار ديال بوك ، عرفتي شنو ... انشوفو شكون لي والد لاخور انا ولا انت ، (هز ليه السوارت من قدامو) هادو باااااح ... وديك لاكارط لي فرحان بيها انبلوكي حسابها ، وهاد دار والله لا وليتي خرجتي منها فنصاصات ليل ، والمحال اتمشي ليه ، ونشوفو شكون لي ايحكم انا ولا أنت ...

- نزهة : أحمد ..

- أحمد (بصرامة ) : بيني وبين ولدي ، مكاين لي مفششو قدك ، راه قدو بخدمتهم ومزوجين تخربيق الخاوي ، وبقا هضر مقاد وانت كتهضر بحال دوك البراهش ديال تحضيري ..

- سعد (وقف ) : هادسي اسمو أنانية وديكتاتورية ، بزاااف ابابا بزاف ... دفع الكرسي ديالو وطلع لبيتو طالع ليه دم ..

- عمر (هابط ضرب فيه وداز ، ضار كيشوف فيه مافهم والو) :

- مال هذا ..

- نزهة : باباك الله يهديه ، حيد ليه سوارت طوموبيل ومنع عليه السهير ، وبزز عليه يمشي معاك للمحل ..

- عمر : بابا عندو الصح ، براكة راه عيق كلم مرة صحاب جداد وسهرات جداد ، وكترت صحاب خايبين وبحال هاد يهرات كيكون فيهم ممنوعات ، وكيوقعو فيهم كوارث ... شوف غير داك دري لي كان تعرض للعيد ميلاد فالمغرب ، وقتلوه وحرقو الجثة ديالو خلاو مو اتحماق 15 سنة وهي مزال كاتعاني ..

- نزهة (تخلعات) : ياربي سلامة ، متخلعنيش اولدي ..

- عمر ( كياكل) : كنهضر معاك اماما ، مزيان الانسان يزير مرة مرة اللهم يتقلق دابا ، ولا نتقلقو حنا على دوام ..

- أحمد (أشر ليها براسو ) : سمعتي ، كلامي ليه راه مجاش من فراغ ، راه ولدي هداك وانا لي عارف مصلاحتو ..

- عمر : بابا غدا انت لي غادي تمشي للمطار ولا غادي تسيفط الشيفور ؟

- نزهة : لا انا وياه انمشيو ياكَ أحمد ؟

- أحمد : اه إن شاء الله ..

- عمر : داكوغ ، مالك مكاينش؟

- نزهة : لا بايت فدارو هاد الليلة ..

- عمر :مزيان

- أحمد : وأنت ؟

- فوحدة من القهاوي الراقيين لي موجودين فكان ، حطات الطلبات على واحد الطبلة ورجعات باش تجيب الباقي ، شعرها طويل لي فلون العسل كيتخللوه خصلات خفاف زعرين ، عيونها لي خضرين ولونها العسلي ، كان عاطيها واحد الجمالية ... عيط عليها السرباي لي معاها وݣال :

- سوكِينة (سكينة) : تكلمي لجاك ..

- سكينة : ماعرفتيهش شنو بغاني ؟

- نو ماعرفتش ... حطات لي فيديها ، ومشات عند جاك للبيرو .. دقات غير سمعات الإذن ودخلات ..

- سكينة : جاك طلبتيني ؟

- جاك (هز راسو فيها) : اه بلات ... ضار هز جوا عطاه ليها ... هاكي عارف بلي اليوم مامشيتيش لكلوپ ، وطريتي تبقاي هنا ، هدا خلاصك ديال الشهر ومعاه زيادة ديال هاد الليلة ..

- سكينة (بإبتسامة) : شكرا بزاف ..

- جاك (بأبتسامة) : هذا أقل واجب ، تقدري تمشي لدار سلات خدمتك ..

- سكينة (ضحكات) : واخا ... خرجات معنقة الجوا وإبتسامة عريضة مزينة وجها .

________________

- واقفة غير يزز مݣلوبة بنعاس ، حتى حوايجها ماعرفاتش كيفاش حتى لبساتهم ، نعسات غير ساعتين مفيقاها زهرة مع 2:30 باش يلبسو ويوصلهم مروان حتى للكازا للمطار ، حيت مصطفى خدام مع 8 مايمكنش يديهم ويرجع ... داكشي باش مروان هو لي ايديهم ..

- مصطفى (كيعنق فمو ) : تهلاي فراسك الواليدة ، تيليفون راه بيناتنا دابا راه أپيل ڤيديو كتوصل البعيد ..

- زهرة (غلبوها دموعها) : عارفة اولدي ، تهلا فراسك وديها فصحتك وفماكلتك الله يرضي عليك ..

- مصطفى : كوني هانية الواليدة (شاف فشيريهان جرها معنقها) تهلاي فراسك وتهلاي فالواليدة ، وسمعي ليها ... واي حاجة ضراتك تيليفون كاين ، تلقايني عندك ..

- شريهان (هزات راسها فيه والبكية حابساها بزز) : بصح؟

- مصطفى : علاش انا شحال عندي من شريهان غير وحدة ، علاش مي مزال اتولد ليا اخت وحدة اخرى ، راه اوحيدة لي عندي ..

- شريهان (عنقاتو بجهد) : لهلا يخطيك عليا أخويا ، ماتخافش عليا ختك راه راجل كون هاني متهني ..

- مصطفى : عارف لي كاين مانخافش عليك ... مروان خويا رض البال معاهم الله يحفظك وسمحلنا عدبناك ..

- مروان : الله اخويا توصيني على مي وختي ، راهم فعينيا كون هاني ..

- مصطفى : عارف اخويا الله يحفظك .. فتح مروان الباب مخرج البالز دارهم فالكوفر ... ركبات زهرة حداه وشربهان اللور ...

- مصطفى (كيشير ليهم ) : طريق السلامة ، غير توصلو علموني إن شاء الله .

- شريهان : واخا ... شيرو ليه من السرجم ... ديمارا مروان وشد الطريق ...

_______________

- ماخرجش من المرسم ديالو ، كيرسم ... نفس الوجه كيرسم فيه مئات المرات ، ديما فوقت الفراغ ... كرسم وهو ساهي وسارح بخيالو ، راجع بيه الزمان اللور منين كان عندو 20 سنة ، منين هربوه من الحبس ، وتبناه الأب ... وكرس ليه وقتو ، واحد فعمرو 18 عام دخل اللحبس بتهمة القتل العمد وتشويه جثة ... تبسم إبتسامة جانبية إبتسامة رائعة فوسط وجه وسييييييم وجداااب ، رموش طووووال بشرة بيضاء شفايف مرسومين وموردين ، عضلات مفتولة ... طولو الواضح باين واخا كان ݣالس ... المنظر ديالها قدام عينيه ، واخا دازو اعوام ماقدرش ينساه ماقدرش ينسا الجسد ديالها لي كان معلق ورجليها لي كانو مدليييين ... فلحظة بدا فمو كيترعد ، ويديه كيترعدو الغضب سيطر عليه ... خلاه يهرس الشيتا لي كان كيرسم بيها ويلوحها ، وقف كيغوووووووت وكيلوح فجميع الالواح ويهرس ..

- دجيكو لي كان على برا سمع غواتو نقز من بلاصتو كيردد :

- جاتو الحالة تاني جاتو الحالة

- فمنطقة لاكروازيت وبضبط فشقف الفاخرة لي كطل على الكورنيش ... شقة كاملة فاخرة مجهزة بأروع تجهيزات ، صال دسبور ... لاپيسين جا فسطح مقابل مع منظر البحر الرائع ... أما بنسبة للفراش كان رجولي وراقي وبسيط ... فالبيت الرئيسي للشقة ، كان ناعس حتى سونات الساعة ، حل عينيه بشوية تماطا للتيليفون بانت ليه 7:30 هذا هو الوقت لي كينوض فيه فكل نهار ، واخا متكونش عندو شيحاجة لي هي ضرورية ... ناض من بلاصتو متوجه للحمام ، غسل وجهو رجع للدريسينغ جبد منو سروال ديال الكيطما وقبية .. لبسهم لبس سبرديلتو وساعتو الرياضية ، هز القرعة ديالو ديال الما وتيليفون وخرج ... قطع الشانطي للكورنيش.، داير القب ديالو وكيجري ، ساعة ديال المݣانة ورجع لدار خدا دوش ديالو ... فطر ولبس لباسو الرسمي ، يلاه ناوي يخرج وهو يسوني ليه التيليفون ..

- مالك : عاد تفكرتيني ؟

- وهو كنتي فبالي من شحال هادي ، اهو ݣلت نخليو سيداتكم ترتاحو من صداعنا ...

- مالك : حجة جديدة هادي ، شوفليك شيحاجة اخرى اسي نبيل ...

- نبيل (كيضحك) : والو غير خديت كونجي انا والمدام ، رتاحيت فيه شوية وصافي ... هادشي مغاديش تحس بيه حتى تزوج ( كيضحك) ...

- مالك ( بجدية) : عندي واحد المشكل ، خاصنا نتلاقاو باش نهضرو ..

- نبيل (بجدية) : شنو واقع ؟

- مالك (هز السوارت ديالو) : انا خارج دابا ، نتلاقاو مع 7 فالبلاصتنا صافي ؟

- نبيل : واخا ، اجي غادي بوحدك ثاني ؟

- مالك : عارفني مكنحملش يكون معايا شيفور غير الى كان عندي إجتماع مع الرئيس ، من غير هادشي كنبغي نكون مرتاح ... يلاه انا مشيت ..

- نبيل : داكوغ بسلامة ..

_______________

- واقف أحمد ونزهة قدام باب المطار كيتسناو ، كل مرة أحمد كيشوف فساعة ... حتى كتبان ليه زهرة خارجة ... ومعاها شريهان من عينيها عرفها بلي هي ... عينيها مايخفاوش عليه ، عينيها كانو فوطوكوپي مو الله يرحمها ، لون البشرة ديالها والابتسامة ديالها غير مو ، مجابتش لا فباها الله يرحمو لا فمها لي لونهم بيض ..

- نزهة (شافتها مشات نيشان عندها خداتها بين يديها معنقاها) :

- ختي زهرة ، كيدايرة أختي لاباس عليك مرحبا بيك أختي وعلى سلامتك ..

- زهرة (كتعنقها وكضحك) : الحمد لله أختي كيدايرة انت والوليدات ، الله يسلمك وينجيك ..

- شريهان (بحدر واقفة قدام عمها، يلاه اتحنا تبوس ليه يدو ... جرها من يدها وخشاها فالحضن ديالو ، منطق بكلمة وحدة حدو معنقها وكيدوز على شعرها ، ودموعو هابطة ... ماحسش حتى دموعو نزلات كيبكي ، تفكر خوه تفكرها كيفاش كظل تابعة باها وتجري ، كانت متعلقة بباها بزاف ... وخلاها عندها 4 سنين ومات ، وعمها حتى هو مكانش جا فاش كان عندها 10 سنين من تم مابقا شافها ، شريهان تبلوكات مافهمت والو ... ماعرفات مدير ، نزهة وزهرة بقاو واقفين وكيشوفو فيه متأترين .... بعد بشوية عليها كيشوف فيها ، تبسم ونطق :

- ماشاء الله بنتي فنة تبارك الله (كيحاول يمسح دموعو) ..

- نزهة (كتشوف فيه) : وطلقها خليني غير نسلم عليها ، اويلي شد البنت مابغاش يطلقها ..

- زهرة (كضحك) : غير المحبة هاديك ..

- نزهة (سلمات على شريهان) : تبارك الله ازهرة ، تݣولي ماشي هي لي كانت صغيرة ، ولكن الابتسامة مزال هي هي ...

- شريهان (بحدر) : ربي يخليك اخالتي ..

- أحمد من ورا ماسلم على زهرة ، شد فيد شريهان تصرف خلاها تشوكا ، مامالفاش هي بهادشي ... جرها من يدها وسبقهم للطوموبيل ركبها حداه .. الشيفور تكلف بلي ڤاليز ...

- نزهة : أحمد زعمة انت خاص تݣلس حدا الشيفور ، وحنا لور ... بغيتي مرتك تركب حدا شيفور ولا شنو ؟

- زهرة غير كتفرنس ..

- أحمد (بتدمر) : واخا الالة هاهو نازل ، خلاهم حدا شريهان وطلع هو حدا شيفور ، من بعدما ركبو ..

- أحمد : سير اولدي ...

- وصلو للڤيلا ... شريهان حدرات راسها كتشوف كيف دايرة من برا ، مكانش يحسابليها بلي دار عمها دايرة بحال هكا ... بحال هادشي كانت كتشوفو غير فالأفلام ، عمر يحسابليها غادي تعيشو فالواقع ... نزل الشيفور حل ليهم ... نزل الشوانط ودخلهم لدار لي كان بابها محلول ..

- نزهة : دخلو مرحبا بيكم ، دار راه داركم ماشي برانيين ازهرة ...

- زهرة (فرحانة وكتشوف فجنابها ، هادشي كانت كتشوفو غير فالمسلسلات التركية لي متبعاهم ) :

- تبارك الله وصلاة على النبي ، اللهم زد وبارك ... عارفة اختي نزهة الله يكبر بيك .. طلعو مع دروج داخلين ، كانت واقفة جميلة مستقبلاهم بإبتسامتها ..

- جميلة : مرحبا بيكم ... على سلامتكم .

- زهرة : الله يسلمك أبنتي ... شريهان كتشوف ف ديكورات والأثاث ، لي فدخلة كان عصري ... وصالة لي مقابلة معاها كان فراشها مغربي تقليدي ، عاد صالة مونجي كبيرة ، الثريا لي كانت نازلة قدها قداش ... الحيوط لي لونهم مصبوغ كلو بالبيض ، كتخليك تحس بواحد الراحة او واحد البهجة عجيبة ، الدروج لي كانو مغلفين بزاج وعاد لاسانسور لي كان حداهم ..

- تسمع صوت خطوات فالدروج نازلين ، هزات شريهان راسها كيبان ليها شاب فثلاتينات من عمرو ... واشم يدو بيض كيشبه للباه فالبيوضة ... شعرو رطب جاي على جبهتو ..

- أحمد (كيضحك) : زهرة قلعي شكون هذا ؟

- زهرة (كتشوف فيه ، وضحكات ) : عمر هذا ياك ؟

- عمر (عنقها) : هو هذا امرات عمي ، على سلامتكم ..

- زهرة : الله يسلمك اولدي ..

- عمر (ضار عند شريهان وبإبتسامة ) : شريهان ياك ؟

- شريهان (تكولي جاتها اللقوة ساهية فيه ، حركات راسها بالإيجاب) ..

- عمر ( جرها من يدها وسلم عليها بلابيز) : مرحبا بيك ..

- شريهان : ربي يخليك ... (ضورات وجها ونطقات) اش هاد الزين ياسيدي ياربي ..

- جميلة (سمعاتها وضحكات قربات ليها وبالهمس ) :

- ولاد سي احمد كلهم زينين ، مزال ماشفتي والو ..

- شريهان (تصدمات حيت جميلة سمعاتها) :

- اه بصح ، ماشي بزااف حتى خويا فين يبانو هوما ..

- جميلة (كضحك) : اااام بصح مزيان ..

- نزهة : جميلة ݣولي لبنات يوجدو الطبلة ديال الغدا ...

- جميلة : واخا ختي نزهة دابا ..

- أحمد : زيدو لداخل ، البالز ايتكلفو بيهم الخدامات ... كلما زادو دخلو لدار كيحلو فمهم كثر وكثر ، هوما مامالفينش بهاد الأجواء هادي ...

- أحمد : زهرة علاش مجاش معاكم مصطفى ؟

- زهرة : اويلي نسييت ماݣلتش ليك ، مصطفى راه تعين ظابط الشرطة القضائية ..

- نزهة (هزات حجبانها) : تبارك الله ،، الله يعاونو ..

- أحمد : مكانش فخباري هادشي ..

- شريهان (بلاما تحس نطقات) :

- شحال من حاجة مافخباركش أعمي ..

- أحمد (شاف فيها ) :

- بحالاش أبنتي ؟

- زهرة (غمزاتها تسكت) ...

- أحمد : ماتغمزيهاش ازهرة خلي البنت تهضر ...

- شريهان(ببرودة) : شحال هذا ماشفتيني أعمي ؟

- أحمد : 15 عام دابا ...

- شريهان (كتشوف ليه فوجهو) : 15 عام أعمي وعمرك فكرتي تجي تزورنا مرة وحدة ، 15 عام راه عمر يموت لي يموت ويحيا لي يحيا ... واخا كنتي كتسيفط لينا ، ولكن الانسان كيحتاج عائلتو معاه ... مكايحتاجش الفلوس ، حنان العائلة راه مكاينش بحالو ... حنا أعمي كنا محتاجين لراجل يكون معانا عمنا لي يزورنا ، ونعرفو بلي راه واقف معانا ، خالي سعيد واخا فنيان وماعندو دراع وكذاب ، ولكن على الأقل كان كيسول فينا وفاش يهبط المغرب يجي عندنا ...

- زهرة (بصرامة) : شريهاااان ...

- أحمد (وقف زهرة بيديه ) : خليها تهضر ازهرة كملي أبنتي دوي ...

- شريهان : حنا أعمي كنا كنشوفوك غير الى بنتي فتيليفون صافي ، وكنسمعو ماما كتعاود عليك ، شيحاجة أخرى مكايناش ... وباش منكدبش عليك ، انا صريحة وهكا رباتني ماما ومشكيلتي مكنافقش ... ماما لي ݣالت ليا نمشيو عند عمك ، وإن شاء الله غير نلقى خدمة غادي نخرجو نكريو ...

- فجهة أخرى ، وبضبط حدا الباب كان واقف كيسمع كلامها ، ملامح وجهو مكايتفسروش ، عاطياه بظهر وكلهم غافلين عليه ...

- زهرة (غوتات عليها) : الى بغيتي تمشي انت سيري ، اما انا مغادية نمشي حتى بلاصة ... وهدا عمك حتارمي شوية وبراكة من ضسارة ...

- شريهان (بحال الى كانت على سبة ، بحال الى ݣاع داكشي لي كانت كتحسو سينين هذا تجمع عليها ، وزادت بهرموناتها لي لاعبين عليها ، كان خاصها اشيحاجة وتنفاجر إنفجار واحد ، ماحسات لا لي حداها ولا لي معاها ولا والو ، بدات كتسرسب بلا موجب الشرع من ديپار ... ماتسناتش حتى تسخن بلاصتها) ....

يتبع...