السيدة الأولى الجزء الثامن

فالعشية ، ومن ورا ما رجعات هي ومالك من مدينة الالعاب ، خدات دوش سخون ... وتكات فبلاصتها كتخمم فداكشي لي وقع فالقهوة ، ساهية كتخمم حتى دخلات عليها مها ...

- زهرة (مشوشة وباينة ماهياش ) :

سوني لخوك فالواتساب ، شوفيه واش غادي يجاوبك ... اويلي بزاف من صباح كنسوني ليه مكايجاوبنيش ..

- شريهان :

غادي يكون خدام ، انت عارفة خدمتو كتدي ليه وقت كامل اماما يهديك الله ، حتى انا راه شحال هادي ماهضر معايا ، داك نهار سيفط ليه جاوبني بواحد البرود فشكل ، فاش ݣلتها ليه ، كاليا ستريس الخدمة ..

- زهرة (ݣلسات مݣابلة معاها جامعة يديها عندها ) :

لالا تݣولي ليا حتى تعياي ، هاذا تسلطات عليه شي وحدة ... مافيهاش سي وحدة نساتو فينا ، مامالفاش ليه يݣلس نهار ومايسول فميمتو ..

- شريهان (هزات تيليفونها ) :

انا غادي نسوني نشوف ... دخلات للواتساب ، وسونات على مصطفى ، بقا مدة كيسوني والو حتى تقطع بوحدو ، عاودات مرة الثانية والثالثة او والو ..

- شريهان :

والو اماما مكايجاوبش ، وكان حال مع 8 ساعة باش ساد دابا ..

- زهرة (كتخمم ومخدة دماغها كتدي وتجيب وتفصل كيف بغات ) :

لقا لي بغا ، داكشي باش طاب عليه يمتا يسيفطنا للهنا ، باش يخلا ليه الجو ..

- شريهان (كتشوف فيها وساكتة ، عارفة بلي كلام مها مامنو والو ) :

الله يهديك أماما ، الغايب حجتو معاه ..

- زهرة (وقفات) :

هداك ولدي وانا لي عارفاه ، نوضي تعشاي ..

- شريهان (بنفي) :

لا مافياش والله ، اسيري اماما بصحتكم ..

- زهرة (بإستغراب) :

أتباتي بلا عشا ؟

- شريهان :

كليت واحد سوندويش قبل منجي ، وجبت واحد معايا يضرني جوع غادي ناكلو ، عييت اليوم وحق الله ... شوية وغادي نعس غدا خاص نفيق بكري ..

- زهرة (يلاه اتخرج ورجعات ) :

بنيتي واخا حلفة ماندخل فيك ، ونخليك ديري لي بغيتي ، انت تبارك الله شهرين وانت خدامة دابا ، وعرفناك باغية تجمعي باش ديري مشروعك ... ولكن دوري بحالتك شوية ، شري ابنيتي كسيوات صنيدلات ... سراول سراول سراول بزاف ابنتي ..

- شريهان (بإستغراب) :

علاش اماما مالو لباسي ، كنرتاح فيه وساهل وعملي ، بغيت نجري بغيت نخدم ... ماشي بحال الكساوي يكون ريح تهز كسوتي بحال الخوامي ..

- زهرة (هزات يديها) :

ضبر راسك ، اديري فبالك بدوك الحوايج مايشوف فيك حتى راجل ..

- شريهان (تبسمات) :

داكشي لي بغيت والله العظيم ، عقتي بيها أماماتي ... داكشي لي بغيت أنا نبان كي موكا فعينين رجال ، باش حتى واحد مايشوف فيا ، انا اهبقى معاك اميمتي حتى نحجو انا وياك إن شاء الله ..

- زهرة (خنزرات فيها) :

نحجو ابنتي إن شاء الله ، هداك هو نهار الكبير ، ولكن يكون معانا راجلك ويكونو عندك وليدات ... مالك ناوية تبقاي حدايا حتى تشيبي ، زوينة هادي تاني .. سيري نعلي شيطان ... خرجات من عندها سدات الباب وراها ، خلات شريهان كضحك غير بوحدها ..

‏من أبسط حقوقك كشخص يملك شعور، أن تعرف مكانك الحقيقيّ، أن لا تتذبذب في المنتصف ، و‏‎من أبسط حقوقك كشخص طبيعي على وجه هذه البسيطة، أن تعرف أين تقع، وأين يقع قلبك من بين كل هؤلاء، أنت لست ببقعة، أو بنقطة سوداء، أنت بحر بأكمله لك كامل الحق في أن تعرف مكانتك من بينهم، ومن الذي يستحق كونيتك، ومن هو الجدير بالدخول. الي عالمك ويسكن روحك انت أنت ، ‏حتى الأشياء التي كنت تخشى خسارتها، أصبحت أنت من تتنازل عنها ."

__________________

- فصباح وبحال ديما تجمعو على الطبلة ديال الفطور ، من غير شريهان ،، شي 5 ديال دقائق عاد نزلات ... شعرها جامعاه كوتشوڤال .. سروال كولون رياضي بالكحل مكتوب فيه اديداس ، سبرديلة كحلة اديداس ... وتيشور فالكحل فيه وريدات بالخضر وصفر والموڤ بارد ، هزاة سكادو فيديها وتيليفون ..

- شريهان (بإبتسامة ) :

صباح الخير ..

- الكل : صباح الخير ، هزات عينيها فمالك لي صابح لابس شوميز فشيبي ، فاتح ليها صدايف مبينة على الوشام لي فصدرو وسلسلة لي فعنقو ... ساعة رياضية فزرق بلو مارين ، مع سروال دجين فنفس اللون وصباط مريح فنفس اللون ... شافت فيه بتحدي بمعنى كلامك ديال البارح مغادي يغير فيا والو ، وانلبس لي كيعجبني ولي كنرتاح فيه ... من نظراتها فهم كتفى بإبتسامة فقط ..

- سونا الباب ، مشات الخدامة تشوف شكون ... شوية هاهي راجعة ..

- (بالفرنسية) :

موسيو احمد واحد السيد (مكملاتش هضرتها حتى تسمع صوت وراها ..

- صباح الخير ، سمحوليا جيتكم فهاد الوقت ... كلشي دار ، شريهان غير شافت شكون شهقات ماتيقاتش ... وقفات دافعة الكرسي للور بزربة ، غادية عندو كتجري تلاحت فالحضن ديالو معنقاه ... زهرة غير شافتو شدات على راسها من الصدمة ..

- شريهان (فرحانة معنقاه ) :

خالي سعيد توحشتك بزاااف ، ناري على مفاجأة ..

- سعيد (كيعنق فيها ) :

حتى انا ابنتي توحشتك بزااف ، كبرتي وزيانيتي بابابابابا ..

- شريهان (كضحك ) :

غير شوية وصافي ، إيمتا جيتي ؟ ݣلتي ليا بلي مسافر من نهار سيفط ليك ميساج خليتيني بلاكة ومابقيتي جاوبتي ..

- سعيد (جمع غوباشتو بحركات درامية ) :

أبنتي راكي عارفة مكانساليش ، مع ليزافير بزاف والله مكنحك راسي ..

- زهرة (بهمس) :

هاهو بدا فكذوبو عاوتاني ..

- أحمد : سي سعيد ، مرحبا بيك زارتنا البركة ..

- سعيد (سلم عليهم واحد واحد ) :

ربي يخليك أسي أحمد عارف لي كاين ..(وقف عند ختو)

- زهرة توحشتك اختي توحشتك بزاف ، شفتك بحال الى مافرحاناش بشوفتي ..؟

- نزهة :

لا اسي سعيد حشومة تݣول هكاك ، كاين شي واحد مايكونش بشوفة خوه ؟

- زهرة (قاطعاتها ) :

اه اختي انا انا ، شفتي قفارت علينا انا نݣوليك ،، انا لي عارفة هاد الحراقية الفلفلة الحارة أشنو كيدير ..

- سعيد (رخفا قنانفو ) :

ياك اختي ياااك ، وزعمة حنا خوت ... أش خليتي للبراني حرام وعيب ، راه الخاوا حدها دنيا سينين ماتشاوفنا ، فبلاصة متلݣاي ليا بضحك ونشاط ... نلقاك دايرة ليا هاد الحالة واخا نكون قاتل أختي ..

- أحمد (كيضحك ) :

متديش عليها أسعيد ، راك عارفة زهرة واش يلاه اتعرفها (رما عينيه للباليزة لي جايب سعيد معاه ) :

ياك لاباس اسي سعيد ، كيبان ليا عاد جاي من السفر ..

- سعيد (ݣالس داير رجل على رجل ) :

تبارك الله اسي أحمد ، الولاد كبرو صلاة على النبي ، كنعقل خليت سعد باقي صغير والله العظيم ، سبحان الله الأيام دغية كتجري ، شوف شحال هذا ماتلاقينا زمان والله العظيم ، انت هو انت سبحان الله مكتبدلش إييييه ياليام ، تبارك الله مالك ولا وزير شفتو فجورنال ، تبارك الله تبارك الله ..

- زهرة (كتشوف فيه بنص عين ) :

وراه سولك واش جاي من السفر ؟ ديالاش ديك الباليزة ؟

- سعيد (كيجبد موسطاجو ) :

اااه الباليزة ، دابا كيشتو الڤيلا ديالي ، كاينة احداكم اقريبة ليكم ، بغيت نبدل ليها الديكور وصباغة ، ايوا كان خاصني نخويها ، ݣلت نجي نݣلس معاكم شي يامات ... بينما سلاو الخدامة ونرجع ..

- زهرة (وقفات) :

هاباش كتݣوليا مالك معايا ، واش أخويا عمرك شفتي شي وحدة مكتحمل خوها وخصوصا مشافتو سينين هادي ، سمع اولد ميمتي وبا ، ربي شاهد معزتك فقلبي ... ولكن هاد كذوبك وزفوط ديالك كيضرني فراسي ، أنت واش ماعييتيش أخويا داخلت عليك بوجه الله مابغيتيش تبدل ݣاع الناس كيتبدلو حتى ليك انت ، واي واي نقص فيخرات ، ݣول غير جراو عليك حيت ماخلصتيش الكرا ، ومالقيتي فين تجي وجيتي لهنا ، والعفو لله والعفو لله ، باز ليك والله حتى باز ...

- رجعات الكرسي ديالها تخطاتهم وطلعات للفوق ..

- أحمد (كيحاول يلطف الجو ) :

سي سعيد متديش عليها ، أنت عارف زهرة قلبها بيض واخا فيها ديك النوضة ، ومرحبا بيك دار كبيرة واسعة وعريضة ، ݣلس الوقت لي بغيتي حتى تشبع ..

- سعيد (تنهد ) :

ربي يخليك أسي أحمد ، هذا هو المضمون فيك ..

- شريهان (وقفات ) :

أنا نسيت تيليفوني الفوق (بلعاني دارتها حجة حيت بغات تهضر مع مها) .. خلاتهم وطلعات لبيت مها دقات ودخلات ..

- زهرة هزات عينيها فيها :

بلاما دافعي عليه ..

- شريهان (بجدية ) :

ماما انت مربيانة باش نجيو مع الحق ، التصرف لي درتي التحت راه ماتصرف ما والو ، عاتبيه بينك وبينو ولكن باش تكولي ليه جراو عليك قدام كولشي راه حشومة ..

- زهرة :

وراه خويا هداك ، انا عارفاه وحافظاه ، واش يحسابليك مكنحملوش ، ولكن راه عيق ... غير ساق الخبار حنا هنا هز حوايجو وجا ، ويجينا لصراحة لاش الكذوب ، حياتو كاملة وهو الكذوب ، مابغاش يتبدل ݣرانو راه تزوجو ودارو وليداتهم ، وهو داير حقلو فدراري صغار كاري معاهم وݣالس ليا هنا ، غير باش يتسما راه كاين فبرا ... قاصح حسن من كذاب ، اه بصح غوت عليه ومكانش خاص ندير هكاك ݣدام الناس ، ولكن راه طلعات ليا النقشة ... عصبني اويلي على ضحكة ، سينين والمينين وهو هنا ، مدار دار ولا كانون ولا وليدات وراه بزاف ابنيتي بزاف سمحيليا بزربة ..

- شريهان (تنهدات تنهيدة طويلة) :

وراني عارفة ، واش عند بالك مزال كنتيق بالكذوب ديالو بحال شحال هذا ، وعمي داك نهارات ݣاليا بلي مرة يخدم ومرة لا ، هو ماراضيش حيت عند بالو حنا مزال متيقين بلي لاباس عليه ، معارفش بلي حنا عارفين البير وغطاه ... ولكن اماما متغوتيش عليه قدامهم وطيحي منو ، بينك وبينو شتفي عليه ݣاع ، ولكن قدام الناس لا أماما حشومة والله ...

- زهرة (كتشوف قدامها ) :

ساعتو لله ، راه عصبني ... يحسابلي هاد سينين تبدل ولكن هو هو ، سعيد خويا مكاين لي خرج عليه قد الكذوب ، راه كبر واش انا دايمة ليه ... يتزوج يدير اولادو ، حتى الى مرض بعدا يكونو بيه ..

- شريهان (عنقاتها ) :

يكون خير اماما يكون خير ، المهم هبطي وحاولي تهضري معاه الله يعطيك الستر ، انا خاصني نمشي راه تعطلت ..

- زهرة :

واخا ابنيتي سيري ، الله يرضي عليك والله يعاونك ..

- شريهان : أمييييين ياربي ... حلات شريهان الباب ونزلات ... هزات سكادو ديالها دارتو فظهرها ونطقات :

خالي نتلاقاو بالعشية ، خاصني نمشي لخدمة تعطلت ..

- نباتها جميلة :

يلاه نوصلك أنا نيت خارجة ..

- مالك (قاطعها ) :

غير سيري أجميلة انا غادي نوصلها ..

- شريهان (سبقاتو ) :

لا غادي نمشي مع جميلة ، بغيت نيت نتشاور معاها فشيحاجة كتخص البنات ، بسلامة عليكم (سيفطات لياسمين بوسة فالهوى وخرجات جارة جميلة معاها ..

_________________

قدام مديرية الأمن ب فرنسا وبضبط كان ... وقفات طاكسي ، تحل الباب نزل منها مصطفى داير سكادو على ظهرو ، هبط الباليزة ديالو ، خلص مول طاكسي مشا ، هز عينيه كيشوف فهاد البلد لي غريبة عليه ، ولي عمرو كان كيتصور ايجي شي نهار ويحط فيها رجليه ...

- فطريق ..

- شريهان (موجهة كلامها لجميلة بضحك) :

إيوا ، كاين شي حب ولا والو ؟

- جميلة (سايݣة ومبسمة ) :

هاد الساعة مكاينش ، ساعة اخرى الله أعلم ..

- شريهان (هزات حجبانها بإستغراب) :

وااايلي على مكاينش ، هاد زين وهاد الثقافة وطولة ومكاين حب ومايمكنش العجب ..

- جميلة (تنهدات تنهيدة طويلة ) ..

- شريهان :

واشفتي غير من هاد تنهيدة ، باين القلب عامررر ..

- جميلة (وعينيها مزال على الطريق ، عقلها مشا نيشااان للشخص لي معمر ليها قلبها وعقلها من زماااان ) الحب بعيد أشيري ... بعض المرات قلبنا كيبغي الشخص الغلط فالوقت الغلط ، وبعد المرات كنبغيو شخص وهو محاسش بينا ولا عارفنا واش كاينين أصلا ، فهمتيني اللهم نخيويو بالنا من هادشي ، حاليا مكنفكرش ندخل حتى واحد لحياتي ، بغيت نبقى ليبر ..

- شريهان (شافت فيها وتبسمات ) :

مدخلي حتى واحد ، حتى يدخل الشخص لي كتفكري فيه ، ومعمرة بيه عقلك وقلبك ياك ؟

- جميلة (شافت فيها وضحكات) :

ممكن اه وممكن لا ، على حساب ... هاحنا وصلنا ..

- شريهان (فكات السمطة ، هزات السكادو وحلات الباب) :

اهو أجمول مانبقاوش وقفين فبلاصتنا وكنتسناو فشخص الغلط ، حنى يضيعو من يدينا بزاف ديال الفرص ، يلاه ازين الله يعاونك نتلاقاو من بعد ... سدات الباب دارت سكادو فظهرها وتاجهات للقهوة ..

_________________

- من بعدما دخلو حارس الأمن لبيرو العميد ، جاب ليه قهوة خلاه ݣالس وخرج ... هز القهوة ديالو رشف منها كيشوف فالبيرو ... شوية تحل الباب ودخل واحد السيد طويل وعامر عينيه خضرين ، يكون فالخمسينات من عمرو ، الإبتسامة على وجهو ... غير شافو مصطفى وقف ..

- جون (مد ليه يدو ) :

موستافا ، مرحبا بيك ، هاد جوج كلمات تعلمت ليهم باش نرحب بيك ...

- مصطفى (بإبتسامة ) :

شكرا سيدي ..

- جون (ݣلس ورا البيرو ديالو ) :

السمعة ديالك سابقاك ، وحتى من العميد غاشيد شكرك ... الملف ديالك قريتو مزيان من أول مهمة دخلتي ليها حتى لاخر وحدة ..

- مصطفى (بجدية وإحترام ) :

شكرا سيدي ، كنتمنى نكون عند حسن الظن ..

- جون :

بلا شك طالعتي على الملف ، وعلى القضية وجميع المعلومات عندك ، وعارف بلي هاد المهمة اتكلف بيها انت وربعة ديال العملاء أخرين ..

- مصطفى :

وي فخباري ، ݣاليا ليا العميد رشيد وطالعت على جميع المعلومات ...

- جون ( وقف ) :

مزيان إلى كان هكا ، نقدرو نمشيو للقاعة الإجتماعات ، باش يلتاحقو بينا باقي العناصر ... ونهضرو مزيان ، وهكا تعرفو بيناتكم ..

- مصطفى (اشر براسو بالإيجاب ) :

واخا سيدي ... خلا الباليزة وسكادو بأوامر من جون ، وتبعو للقاعة الإجتماعات ... دخلو للقاعة لي كانت كبيرة ، كتوسطها طبلة كبيرة وكراسة ، كانو هوما أول الواصلين ، سد الباب جون الباب كيتسنى فبقية العملاء ... ݣلس هو ومصطفى كيديو ويجيبو فالهضرة ، حتى قاطعهم الدقان فالباب ..

- جون : تفضل ..

- تحل الباب ، ودخل شاب كوري فثلاثينات من عمرو ... تابعو شاب اخر داير نظارات ... الجدية باينة على ملامح وجهو ، عندو وشام فعنقو ... وراه شاب أخور طويل وعامر فنفس السن ، عينيه زرقين جامع غوباشتو ... واخر عنصر وصل هي جوديا ...

- جون (بإبتسامة ) :

واخيرا على سلامتكم ، وقف مصطفى مراقب كل واحد فيهم ..

- جون :

نقدم ليكم الضابط المغربي ، مصطفى العراقي ... مصطفى كنقدم ليك ، لي مين هو عميل كوري ، فرانسيسكو عميل إيطالي ، جاكسون عميل أمريكي ، وجوديا عميلة فرنسية مغربية ...

- جميع العملاء كيشوفو فيه :

مشرفين ..

- مصطفى (كيندسهم من النظرة الاولى ، واحد بواحد ... مد ليهم يديه ونطق ) :

مشرفين ..

الـقـهوة

علي كان حاضي شريهان ساهية ... وقف عليها ، هزات عينيها فيه بإستغراب ، اشرات ليه براسها بمعنى شنو ... حيد ليها البلاكو من يديها ، جرها وخرجها على يرا غادي بيها مفاهمة والو ، حتى لواحد الطبلة جات فوق رملة مقابلة مع البحر ... ݣلسها وݣلس حداها مقابل معاها ..

- شريهان (بإستغراب) :

مالك ياك لاباس ؟ علاش جايبني لهنا ؟

- عـلي (كيشوف فيها بشك ) :

انا لي خاصني نسولك مالك وشنو كاين ، لبارح غير وقفتي قدام السيد سخفتي ، فقتي كتسولي عليه ... واليوم ..

- شريهان (ظهر الخوف على ملامح وجها قاطعاتو ) :

كيفاش اليوم ، واش جا اليوم واش سول فيا ولا كيفاش ؟

- علي (كيشوف فيها بشك ، من هاد التصرف لي دارت وردة فعلها ، أكدات ليه شكوكو ) :

غير بشوية ، مجا حتى واحد خليني غير نكمل كلامي ، اليوم كتباني ماشي هي هاديك ، وغير ساهية شنو كاين ؟

- شريهان (دورات راسها كتحاول تنكر ، هي مكتعرفش تكدب ولا تخبي ، ودغية كتبان ليها على وجها ) :

مكاين حتى حاجة ، راه غير كيبان ليك ...

- عـلي(تبسم ) :

شهرين ونص وحنا خدامين مع بعضياتنا ... كنعرفك مزيان اشيري ، واخا مدة قصيرة باش تعرافنا ولكن كتربطنا علاقة قوية ، عرفتي عليا وكتعرفي عليا الكبيرة وصغيرة ، عقلتي فاش كنا فهاد البلاصة شهر دابا ، وعاودت ليك اي حاجة كتعلق بيا ، عقلتي نهار عاودتي ليا على ديك لي كانت صاحبتك ، وبلي العلاقة ديال تلصداقة لي بيناتنا بدلات فيك شحال من حاجة ؟

- شريهان (حدرات راسها وسكتات ، تنهدات تنهيدة طويلة ) :

علي ، ماعرفت شنو غادي نݣوليك ولكن راه صعيب فهمتيني ، هادشي صعيييب ... وانا متأكدة واخا حنا صحاب ، فاش تعرف ممكن متخلنيش فهاد البلاصة ..

- علي (بإستغراب ) :

ودابا زدتي طيحتي ليا الشك ، سمعي مكايناش شي حاجة فهاد الدنيا لي غادي تخليني نجري عليك من الخدمة ، واش انت مريضة ، اولا بنت بلادي ثانيا انا وياك بيناتنا علاقة لي مستحيل تمحى ولا تموت ، ومستحيل نخليك واخا يوقع لي بغا يوقع انت مريضة ، انت راه ختي نعاودها انا راه ماعنديش شي صديقة نهائيا حتى ليك انت وسكينة ، ديريها فبالك ..

- شريهان (هزات عينيها فيك ساكتة ، تقادات فالݣلسة وتقابلات معاه ) :

علي ... الكليان لي كان هنا لبارح ..

- علي (كيسمع ليها ) :

وي مالو ؟

- شريهان :

هو سبابي حتى جيت للفرنسا ..

- علي (هز حجبانو بإستغراب) :

واش كنتي معاه ولا كيفاش ، ولكن مايمكنش تكوني معاه السيد ماشي مغربي ..

- شريهان :

لا مكنتش معاه ، ومكنعرفوش ، ولكن فواحد الليلة ... شفتو حتى قتل واحد السيد ...

- علي (خرج فيها عينيه او وقف ) :

كيفاش ؟؟...

___________________

الـمــغرب

- فواحد من الصالونات الراقية ، وقفات طوموبيلتها الرونج فالبيض ، نزلات منها بكل أناقة ، دخلات لصالون بإبتسامة ستقبلاتها البنت لي فالاستقبال :

بونجوغ مدام نادية ..

- نادية : بونجوغ غيثة ، صاڤا الأمور مزيانة ؟

- غيثة :

صافا مزيان الامور هي هاديك ، مدام واحد البنت كاينة لداخل كتسناك ..

- نادية :

ربيعة ؟

- غيثة : وي قالت سميتها ربيعة ..

- نادية : داكوغ ، انا انطلع للبيرو ديالي ، بغيت القهيوة ديالي 5 دقايق ودخليها عندي ..

- غيثة : داكوغ مدام ..

- علي بقا ساكت وساهي فكلام شريهان ، ماعرف باش تبلا تصدم فهضرتها ..

شريهان :

مالك سكتي ، ݣلتها ليك شفتي ..

- علي :

غير كنفكر فهاد الحريرة ، شريهان فخبارك زبلتيها ولالا ؟

- شريهان :

عارفاك شنو غادي تݣوليا ، غادي تݣوليا بلي كان عليا نديكلاري ، وبلي كان خاصني نݣولها لخويا وزيد وزيد ، هادشي مغاينفع فوالو أعلي ... انا كنت خايفة بزاف ، واش عرفتي شنو هي تكون شاهد على جريمة ؟ واحد قتلوه بدم بارد وماشي مغاربة وراه باين العربون ، باين بلي ناس مكايرحموش ، وانا خويا كنموت عليه وكنخاف عليه ، وعارفاه دمو حار ... والله مدوز بساهل ، وبحال هادو القتيلة عندهم ساهلة ماهلة ... لا مقدش والله العظيم ، داكسي باش سكت وهربت وجيت لهنا ..

- علي (بقا ساكت ، تنهد وقرب منها شاد يديها بين يديه ) :

سمعيني ، خاصك تعرفي بلي هاد الحريرة مابقيتيش بوحدك فيها ، حتى انا معاك وديما انكون معاك ... جامي غادي نخليك ولا غادي نتخلا عليك ، وغير رتاحي حيت السيد ماشافكش مزيان نهائيا ، مع داك طربوش ونظارات ماقشعكش نهائيا ، حيت مع وقفتي سخفتي جينا دغية هزيناك ، يعني انا ضامن ليك بلي ماحققش فملامحك ، انت غير رتاحي ...

- شريهان (رتاحت شوية ) :

لهلا يخطيك عليا أعلي ، صراحة ربي حطك فطريقي والله العظيم .

- علي (كيطبطب لبها على يدها ) :

صافي صافي براكة ، يلاه نوصي كملي خدمتك ، وحيدي ديك تغوبيشة تخلعي لينا الكليان ..

- شريهان (ضحكات ) :

واخا هاهيا نايضة ، وقف وبدون سابق إنذار عنقاتو ...

- علي : وصافي هنينا يلاه الخدمة الخدمة ..

- شريهان (شيرات ليه ) :

هاني مشيت باي باي ... مشات شريهان خلاتو فبلاصتو ، تنهد كيفكر فهادشي لي عاوداتوليه سريهان لي فعلا خطير ..

- علي : الله بدير شي تاويل دالخير وصافي ...

_____________________

المديرية

- ݣلسو كاملين مقابلين مع جون لي كان واقف ..

كلكم طالعتو على الملفات لي عندكم ، مؤخرا ولات واحد الظاهرة غريبة هي إختفاء البنات فسن العشرينات ، بواحد الطريقة لي غريبة بزاف ، ومن مختلف دول العالم ، لا دول الأوروبية ولا العربية ، مؤخرا 5 ديال العائلات برازيلية قدمو شكوى المكسيك كذلك وإسپانيا ، بنات هنا ففرنسا ... بنسبة للبلدان العربية ، لبنان تونس مصر والمغرب ... جميع الشكاوي لي تقدمات كيݣولو نفس الحاجة ، بلي بناتهم كانو ناويين على الهجرة باش يبدلو مستوى العيش ، حتى كتقطع أخبارهم بصفة نهائية ، بين ليلة وضحاها البنت كتكون فدارهم الغد ليه مكتبقاش ... حنا شاكين فتجارة الرقيق ، وهاد تجارة عندهم ألعاب خاصة ، كيستقطبو البنات لي مزال صغارات ، زوينات ومستوى العيش ديالهم تحت المتوسط ، لي باغيين يعيشو مستوى جديد ، كيكونو ساهلين بنسبة ليهم باش يلعبو بالعقول ديالهم ... بحال تجارة المخدرات ... هنا كيستقطبو الرجال ، لي جايين عبر الهجرة السرية ... ونفس الشي اللعب بعقول هاد الشريحة ، وبحال هكا كتنتاشر تجارة المخدرات وبضبط الكوكايين .. هاد الناس عندهم تكتيك خاص ، وهاد الناس لي دخل معاهم صعيب يتهنا منهم حيت بكل بساطة كيصفيوها ليه ، هاد الناس كيلعبو بعيد وكيلعبو ورا واجهة مزيفة ، لي هي رجال الاعمال ... الزعيم ديال هاد العصابة كيكون متخفي ورا رجل الأعمال ، لي من المستحيل تشك فيه الشرطة ، وهادشي لي واقع دابا ..

خدا تيليكوموند وشعل تلفازة لي كانت قدامهم ...

- كوزا نوسترا ، كارلو كابوني ولا كارلو مارتينيز مزال ماعرفناش ومتأكدناش ... رجل اعمال معروف ، صاحب شركات سياحية عديدة ... عندو عدة أعمال خيرية ، وعدة صفقات مع مختلف الشركات .. الشكوك لي جاونا من جهتو كثيرة بزاف ، كنظن هادشي قريتوه فالملفات لي عندكم ، وطالعتو عليهم ... الجديد هو كوزا نوسترا ، غادي يفتاتح كلوب هنا فكان ... بغيت نݣول اكبر كلوب هنا فكان .. بقا ليه 3 شهور على الإفتتاح ، وبلاما نݣوليكم شنو غادي يكون فهاد الكلوپ ... وعندنا شك كبير ، بلي كاع البنات لي تم الاختفاء ديالهم ، هو السبب ... وهادشي غادي نتأكدو منو منين غادي يتفتح الكلوب ..

- مصطفى (هز يدو باش يهضر ) ..

- جون : مصطفى تفضل ..

- مصطفى :

بغيت نفهم شنو علاقة البنات بالكلوپ ؟

- جون :

بحال كوزا نوسترا ، مستحيل يحل كلوب غير هكاك ، حيت ممكن يحلو فإيطاليا ، ولكن علاش ختار فرنسا بضبط ..

- جوديا :

كيبان ليا الكلوب ، غادي يكون غالبا وكر للدعارة ، باش يجيب ليه رجال اعمال لي عندو معاهم صفقات ، يغريهم ببنات صغارات ... وبحال هكا ايولي يشد على كل واحد فيهم حجة ، حتى الى كان فالمستقبل باغي يفض مع كارلو الشركة ، مايقدش حيت شاد عليه دلائل خطيرة ولالا ؟

- جون :

تماما ، تحليل مزيان ..

- مصطفى :

كيبان ليا أيخصنا خطة محكمة ، خطة دكية يت من المعلومات لي عندنا ، هاد كارلو ماشي شي واحد لي ساهل ...

- جون :

داكشي باش جمعتكم ، كل واحد فيكم عميل مهم فبلادكم ... بغيت منكم تشكلو فريق ، وهاد الفريق غادي يكون تحت قيادة مصطفى العراقي ، الى مكنتوش قراب من بعضياتكم أو يالأحرا أصدقاء مغادي تفاهمو ، والى ماتفاهمتوش مكاين والو ... هاد القضية كولات يزااف ، ومشاو فيها ناس ابرياء مدارو والو مساكن ، خاص شي حد لي يوقفهم عند حدهم ..(شاف فمصطفى ) ...

مصطفى اول رحلة اتبدا من عندك انت ، فخباري بلي الاخت ديالك شهدات على الجريمة لي وقعات فالمغرب ... وبلي حاليا متواجدة هنا فكان ، وفخباري حتى محاولة القتل لي تعرض ليها ولد عمك الوزير مالك العراقي ، وهادشي لي وقع ليه ممكن بزاف يكون عندو علاقة بكوزا نوسترا ...

- مصطفى (تنهد ) :

اه فكرت فيها ، المركز لي باشر بيه ، كيهدد تجار المخدرات ، وبطبيعة الحال مغاديش يبغيو لهاد المشروع يكمل ..

- جون :

تماما ، عارف بلي صعيب عليك هادشي لي غادي نݣوليك ، ولكن ختك خاصها تجي وتدلي بالأقوال ديالها هنا ..

- مصطفى :

واخا سيدي ، كون هاني ... غادي نهضر معاها وغادي نحيبها لهنا وتعطي أقوالها ..

- جون :

سكوتها فيه عقوبة ، والعقوبة غادي تاديها فبلادها ماشي هنا ، غادي تكون عقوبة حبسية ولا غرامة مالية ... حيت سكوت عن جريمة كيعتابر إختراق للقانون ..

- مصطفى :

اه عرفت ... كون هاني أسيدي ..

- جون :

مزيان كنظن كولشي مفهوم وكولشي هو هداك ، غادي نخلي ليكم هاد النهار فين تعرفو فيه على بعضياتكم ، وتعرفو كل واحد فيكم كيفاش كيخدم ،، واخا راه كل واحد فيكم عندو ملف للعميل اخور ، وكيف سبقليا ݣلت انتوما فريق واحد ... حتى واحد فيكم ماحسن من الثاني ، كلكم شخص واحد ... مابغيت حتى واحد فيكم يبان على الثاني او يتقلق وياخود حساسية من الاخر ، بغيتو الخدمة تمشي مزيان ... هي تكونو يد وحدة وشخص واحد ... دابا تقدو تمشيو ، وغدا تكونو هنا ، مصطفى غدا تكون هنا وتكون معاك ختك باش ناخدو أقوالها وشهادتها ..

- مصطفى (وقف ) :

واخا سيدي ... عطاوه التحية وخرجوو ، مصطفى رجع حتى للبيرو ديال جون هز الباليزة ديالو وخلط عليهم ..

- لي مين هو (بإبتسامة) :

تشرفت بمعرفتكم انا لي مين هو ..

- مصطفى :

انا مصطفى ..

- فرانسيسكو : انا فرانسيسكو إيطاليا ..

- جاكسون : أنا جاكسون ..

- جوديا (مدات ليهم يدها ) :

وانا جوديا ..

- مصطفى (بإستفهام ) :

أنت من أصول مغربية لا ، ولا من أصول فرنسية ؟

- جوديا (شاف فيه ، جاوباتو بدارجة ) :

لا انا من أصول مغربية ، ماما فرنسية والاب ديالي مغربي ..

- مصطفى :

أمممم مزيان مشرفين ..

- فرانسيسكو : كيفاش قضية ختك شاهدة مافهمتش ؟

- مصطفى (كيفكر كيفاش غادي يواجه ختو ولا يشوفها ) :

القصة طويلة بزاف ، وانا فيا جوع ... مازال مفاطرش من غير كاس ديال القهوة ..

- جوديا :

حنا ملنا مفاطرينش ، ومدامكم كاملين غراب هنا ومعارفينش البلايص ، انا غادي نديكم لواحد القهوة واعرة هنا ... اتولي معتمدة عندكم تبعوني ... ، طلعات للطوموبيلتها ، لي مين هو ركب حداها ، مصطفى دار الباليزة ديالو بالكوفر ... وطلع حدا جاكسون وفرانسيسكو ، ديمارات جوديا الطوموبيل وشدات الطريق ..

__________________

- هبطات من بيتها كيبان ليها ݣالس هو وأحمد ..

- زهرة (ݣلسات كتشوف فيه ) :

سمحليا اولد ميمتي، ݣبيلة تعصبت وغلطت فحقك ملقصدتش ، اغير حيتاش عصبتيني وصافي ..

- أحمد (ناض) :

سمحوليا انا راجع ، مشا أحمد وخلاهم بزوج ..

- سعيد (من ملامح وجهو باينة مقلق ) :

مرضيتش اختي ، وحنا زعمة سينين ماتشاوفنا ديري ليا بحال هكاك ..

- زهرة :

وختى انت عصبتيني أسعيد ، اويلي واش انت هو انت مكتبدلش ݣاع وحشومة وعيب ..

- سعيد :

علاش أنا شنو درت ؟

- زهرة (كتشوف فيه بجدية ) :

معرفتيش شنو درتي ، سينين أخويا وانت عايش فالكذوب ، عندي الڤيلات عندي الأملاك ... داخلت عليك بالله واش وجهك وجه الاملاك ، كون كنتي بصح لاباس عليك ، كون جيتي سينين للمغرب ... كون درتي شي دار فالمغرب ، وكون تزوجتي ودرتي ولادك ... أخويا الكذوب راه حبالو قصيرة ، مداير ولادك لي نهار تݣلس فالركنة يقومو بيك ، مداير مرة مداير والو أخويا حتى ليمتا ؟

- سعيد (حدر راسو) :

وختي مانرضاشة، سنين هادي وانا فهاد البلاد ... ساكن فبارتما مع الدراري ، مرة نخدم مرة لا ... نرجع للمغرب يݣولو هاهو راجع ، من بعد سينين هادي وانا هنا ونتم راجع ..

- زهرة :

اللهم ترجع راجل ، ودير كانوك ودير وليداتك واخا كبرتي ، المهم دير دارك ، ماشي تبقى هنا مرة واكل مرة لا وزايدها بالكدوب ، نعل شيطان اخويا وتوضى وصلي وطلب سيدي ربي يغفر ليك ، وطلب ربي يسهل عليك ، بلاك الله ݣاع ومقديتي ترجع ... جي عند احمد كوليه يلقى ليك خدمة مزيانة ، ودير سكنتك بوحدك ، وهو فينكا تلاقى بيك كتبقى تقوليه انا مباغيش نخدم ، انت لاباس عليا وعندي فلوسي ..

- سعيد (تنهد تنهيدة طويلة ) :

الله يسمح لينا ياربي وخلاص ...

- زهرة :

وستغل الفرصة ماحدك هنا ، وݣوليه يلقا ليك شي خدمة مزيانة ، راك مزال تزوج ودير ولادك ..

- سعيد :

أحيانة حتى ولا عندي 50 عام ..

- زهرة :

راهم عندهم 60 عام ويلاه تزوجو ، 50 راه مزال صغير الحمد لله ... مزال تزوج وتولد وليداتك ، انت غير خدم والله ياخويا المرة زينة نجيبها ليك ، أشد معايا طريق ومايكون الخير ..

- سعيد (تبسم ) :

توحشتك أزهرة ، توحشتك اختي لهلا يخطيك عليا ..

- زهرة (تبسمات ) :

وعلاش اخويا حنا عندنا غير بعضياتنا ، راه الخاوة حدها دنيا ..

- سعيد : داكشي لي كاين أختي ، لهلا يحاشمنا وصافي ..

_________________

الـقهـوة

- سكينة جابا بزربة عند شريهان لي كانت واقفة عند الكونتوار ..

- ناري يا صاحبتي عرفتي على تيتيز دخل للقهوة ، كيحمقو كاملين ..

- شريهان (كضحك) :

وشوفي واخا هكاك ، هاد فرنسا مافيهاش شي زين ... كوميم المغرب بعدا فيها اختي زين ، ماشي هنا كثرث الصفرين بلا فائدة ..

- سكينة :

لالا أصاحبتي ، هادو واعرين والله ... ناري واحد سميمر ، وتاني بيبض وثالت كوري ، ورابع واشم كيهبل ..

- علي (وقف عليهم ) :

واش اتبقاو شادين الحتيت ، شيري سيري شوفي الناس ، أما هاد خيتي راه كتبان ليا تلفات على القبلة ..

- شريهان (كضحك ، هزات المذكرة ديالها ) :

واخا ... ، خرجات من الباب فتجاه الطبلة ، كانو فعلا كليكة مجموعة ومعاهم بنت ..

- (بالفرنسية) بونجوغ شنو حب الخاطر .. ضافو فيها ، واخر واحد شاف فيها كان هو ... حات عينيها فعينيه مامتيقاش شنو كتشوف ، رجعات خطوة لور ماعرفات تضحك ولا شنو دير ..

مــصـطـفى !!!

- الـمـغــرب

نادية (كطلع وتهبط فخولة) :

كنظن تفاهمنا دابا على الخدمة أ ربيعة، بغيتك تكوني انت عينيا ويديا و رجليا حتى هوما فهاد المحال ، وشادة والفادة نعرفها ... عندي بزاف صالونات ، وعندي بزاف ديال ذياب ضايرين بيا ، مانقدش نلحق على كاع صالونات ، وانت باينة فيك مطورة وقافزة ... وانا عجنتك وعرفتك شنو كتسواي ، داكشي باش حطيت فيك ثقتي ...البنات لي هنا مكنتيقش فيهم ، داكشي باش جبتك هنا ، وانا لي لقيتها كتغضرني منرحمهاش ..

- خولة :

كوني هانية امدام نادية ، حسبي راسك انت هنا ، خيرك مغرقني ... يكفي حيدتيني من ديك القهوة وخدمتيني هنا ، ودرتي ليا صالير عمري كنت نحلم بيه ..

- نادية (تبسمات ) :

انت غير كوني تسمعي ، والكلام ماتخرجيهش واخا تشوفي لي شفتي ، وتوصلي ليا لي كاين ... اتشوفي معايا الاخر أربيعة ، اتشوفي حوايج عمرك حلمتي بيهم ..

- خولة (ضحكات) :

لهلا يحاشمنا ، مايكون الخير اكوني هانية ..

- نادية (تبسمات ، جبدات ݣارو وشعلاتو) :

داكشي لي بغينا ..

__________________

كانو ساكتين كيشوفو فيهم ، وقف مصطفى كيشوف فيها مامتيقش بلي هي قدامو ..

- مصطفى :

شريهان .. حطات البلاطو من يديها وترمات بين يده معنقاه ، ماحسش براسو حتى عنقها بجهد كيدور بيها تحت أنظار الناس ... واخا خبات عليه حاجة كبيرة عليها ، ولكن توحشها بزاف راه ختو هادي ، واخا دير لي دارت راه ختو بنت مو وباه وأمانة فرقبتو ، يفديها بحياتو يعطيها روحو ݣاع ..

- شريهان (طلقها كتشوف فيه فرحانة ) :

شنو كدير هنا ؟ شنو جابك وݣاعما ݣلتيها لينا ، داكشي باش ماما كتسوني ليك مكتجاوبش ..

- مصطفى (كيشوف فيها بشبه إبتسامة ) :

جايباني الخدمة ، داكشي باش انا هنا ... يلاه وصلت غير هاد الصباح ، (شاد ليها فيدها ضار عندهم ) ..

- هادي شريهان ختي ..

- الكل : مشرفين ..

- وقف عليهم علي :

(مغوبش) شيري ، كاين شي مشكل ؟

- شريهان (كضحك) :

لا مكاين حتى مشكل ، علي هدا مصطفى خويا ..

- علي (بإستغراب ) :

وايلي واش خوك لي فالمغرب ؟ (شاف فمصطفى مد ليه يدو) مشرفين ، شيري كتدوي عليك بزاف ..

- شريهان : علي هو مول القهوة ، وصديق مقرب ليا ..

- مصطفى:

مشرفين ..

- شريهان : والله حتى أحسن مفاجأة ، عرفتي ماما الى عرفات اطير بالفرحة ..

- علي : شريهان ، غير ݣلسي مع خوك ... شنو بغيتو ؟

- عطاوه الطلبات ديالهم ، مشا علي وخلى شريهان معاهم ... جرات الكرسي وݣلسات ...

- شريهان (شادة فيدين خوها) :

صاڤا خويا أمورك مزيانة ، توحشتك وحق الله العظيم ..

- مصطفى (تنهد تنهيدة طويلة) :

حتى انا توحشتك ، واخا صراحة مكنتش غادي نهضر معاك ..

- شريهان (بإستغراب) :

وعلاش ؟ شنو واقع ومالك ضعافيتي بحال هكا ياك لاباس ؟؟ ..

- مصطفى :

ماشي وقت الهضرة دابا ..

- شريهان (بإصرار) :

لا وقت الهضرة ، تبدلتي مابقيتيش كيف كنتي ، مابقيتيش كتهضر معايا كيف الاول ... مكتجاوبش على ليزوديو ديالي ، ياك لاباس شنو كاين ؟

- الكل كانو ساكتين وقابلينهم ، جوديا بوحدها لي كانت عارفة شنو ضاير بيناتهم ..

سمحوليا الى انتدخل ، انا جوديا خدامة مع مصطفى ... كيبان ليا من الأحسن تمشيو لدار وتفاهمو ، حيتاش هنا ماشي مناسب للهضرة ..

- شريهان (شافت فيها ) :

كايبان ليا حتى الناس لي خدامين معاك عارفين مالك ، من غيري انا ... وليت كنحس براسي برانيا عليك منين وليتي كتخبي عليا .. جاي اخويا حتى لهنا وحنا اخر من يعلم ، مخلي ماما كتسوني عليك يوماين هادي مكتجاوبهاش ، وانا مامسوقش ليا ... كيفاش البلان مافهمتش مالك ..

- مصطفى (مغوبش وبصرامة) :.

انت اخر وحدة تجي تحاسب معايا ، شوفي راسك انت هي لولة شنو دايرة عاد اجي حاسبيني ...

- شريهان (تصدمات من معاملة مصطفى ليها ، عمرو دار ليها هكا ولا هضر معاها بهاد الطريقة ،الدمعة حسات بيها محبوسة فحلقها ) :

ياك اخويا ، عمرك هضرتي معايا بحال هكا ، لهاد الدرجة تبدلتي ؟ صدمتيني قسما بالله (نزلات دمعة سخونة من عينيها ) ..

- مصطفى (تنهد تنهيدة طويلة مكايبغيش يشوفها كتبكي ، ولكن راه جرحاتو بتصرف لي دارت معاه وخبات عليه ) :

الاخت لي كتحاسب خوها ، على تصرفاتو معاها ... هي نفسها الأخت لي خبات على خوها ، حاجة صعيبة عليها وكبيرة عليها ، دخلات راسها ليها بلاما تحس ..

- شريهان (جمعات غوباشتها ، مافهمات والو ... اول حاجة تيادرات للبالها هي واش يكون عرف وكيفاش ايكون عرف ) :

كيفاش ؟ شنو خبيت عليك انا ..؟

- مصطفى (ضحك بإستهزاء ) :

لا والو ، غير ختي شهدات على جريمة وسكتات ، ومݣالتهاش ليا ، وانا بحال المكلخ تيقتها فاش ݣالت بلي بغات تجي لهنا ، على وديت الخدمة ... كنتي كضحكي وانت كتكدبي عليا ياك اشريهان ، رضيتيني دمدومة اختي ياك ؟ عند بالك مغاديش نعرف ؟ الدنيا صغيرة ديريها ازوينة ، والبوليس راه مكايخفا عليهم والو ..

- شريهان (حسات بموس ترشݣ فيها ، دموعها زادو نزلو بكثرة ، مابغاتش طيح فهاد الموقف ، هي عمرها خبات شيحاجة على خوها ، حسات براسها جرحاتو غير من طريقة كلامو معاها ) :

مصطفى خويا ، قسما بالله مكنت باغية نخبي عليك ، وحق الله وغلاوتك عندي ، راه كنت خايفة اخويا (كتعاود وكتبكي ) خايفة بزاف ، انت انت راه ماشفتيش داك المنظر كيف داير ... انا ماخفتش على راسي ولا خويت البلاد على قبلي انا ، راه على قبلك أنت وماما ، خفت الى ݣلتها ليك وتبعهم ولا شيحاجة ، ويقتلوك اخويا ... راه توقع ليك شيحاجة نمشي فيها نموت وراك اخويا والله حتى نموت ، انا الدنيا لي مافيهاش انت ماعندي ماندير فيها مزال (دموعها تحلو لشهقات ، بحال الى كانت كتسنى هاد اللحظة لي تخوي قلبها على خوها توأم روحها ) ..

- جوديا ماقداتش تحمل داك الكلام ، فكراتها فخوها ماحساتش بدموعها حتى نزلو ، بلا شعور ناضت وجات ورا شريهان وعنقاتها كتسكتها ... كطبطب عليها وتسكتها ... الكل كان كيشوف علي ماعرف شنو يدير يجي ولا يبقا واقف سكينة وكذلك تلفات ... مابغاوش يتدخلو وهي مع خوها ..

- مصطفى (وقف خداها من بين يدين جوديا وعنقها كيسكت فيها ، بقات مدة عاد سكتات .. كلس وقرب الكرسي ليها شاد يديها بين يديه ) :

أنا تقلقت منك ، حيت مامالفاش ليك تخبي عليا ، انا خوك من حقي نعرف ... ومن حقي ندافع عليك ، وطول ما انا بالحياة ، راه عمري نخلي سي واحد يقرب ليك ولا يأديك ..

- شريهان (كتمسح دموعها) :

انا عارفة هادشي ، ولكن أخويا راه هادوك الناس واعرين ، راه كيفاش قتلو السيد راه مايمكنش ، راه داك المنظر عمرو مابغا بتنسى ليا ولا بحال الكابوس عندي ، عند بالك نسيتو راه منقدش نساه ، إنسان مسكين كيطلب فيهم ويرغب حتى حتى تيرا فيه راه بزاف ..

- مصطفى (حدر راسو ورجع هز فيها عينيه) :

كيبان ليا اختي بلي شفتيه مزيان ياك ، بحال المرة لي فاتت فاش كنتي صغيرة ياك اختي ، شفتيه مزيان ..

- شريهان (حدرات عينيها وبلعات ريقها ، سكتات ورجعات شافت فيه ) :

اه اخويا شفتو ، شفتو جوج مرات ..

- مصطفى (بإستفهام ) :

كيفاش ؟

خارج من الإجتماع مع الرئيس ، ركب فطوموبيلتو ... عطا الأوامر لشيفور باش يديه للمركز ، هاز طابليت ديالو كيطالع على جدول أعمالو ، حتى وصلو لواحد الساحة كبيرة بزاف ، وقفات طوموبيل ... فتح ليه الشيفور الباب ونزل ، هز عينيه فالمركز ... مبنى لي ضخم بزااف ، بحال سيفنة التايتانيك ، بحال المطار كبير بزاف ... تبسم إبتسامة رضى ونصر ... ورجعات داكرتو لهاد المركز كيف كان ، كان سبيطار قديم ، كولشي كان فيه طايح ... نوامس محروقين ، البيبان محيدين ، كان فيه 9000 نموسية ، وكلهم كيطلو على منظر زوين البحر ، منظر كيريح النفوس ، بفضل الله ومجهوداتو خدا الملكية ديالو ، بموافقة الرئيس والسلطات ، بشرط واحد يقوم بيه ويقوم بنزلاء ديالو ... ويكون عند حسن الظن .. المبنى هاهو بدات الخدمة عليه شهرين هذا ، بقات ليه 4 شهور ويكمل ..

- مـالـك (تنهد تنهيدة طويلة ) :

مابقى والو ، دابا خاصنا نشوفو ليكوتش لي ايوليو مسؤولين على دراري ..(مشا بالو لشخص واحد ، خاصو يزورو فالقريب العاجل ) ... هز عينو فالمبنى من الفوق للتحت ، دار النظارات ديالو ورجع ركب فطوموبيل ، ديمارا الشيفور وشد الطريق ..

__________________

- كولشي كانو كيشوفو فيها ، نطق جاكسون :

واخا تهضرو باللغة كنفهومها ، حيت لحد الساعة مافهمتكمس شنو كتݣولو ؟؟!

- جوديا (شافت فيه) :

انا غادي نشرح ليكم ..

- مصطفى (عينيه غير على ختو ) ..

هضري أشريهان ماتخافيش اختي ..

- قاطعهم علي لي وصليهم الطلب ديالهم هو بيدو ، باغي غير يكون مع شريهان ويعرف شنو واقع .. حط ليهم داكشي ، او وقف كيشوف فيهم ..

- مصطفى (هز راسو فيه) :

واخا تخلينا عفاك بوحدنا ، مسألة خاصة شوية ..

- شريهان (قاطعاتو) :

غير خليه ، علي عارف كولشي ..

- مصطفى (تبسم ) :

اهاه هو عارف وخوك لا ؟

- علي :

مكنتش عارف حتى للبارح ، سخفات فالقهوة فاش شافت داك خونا ، بانت ليا ماهياش وفاش سولتها وأصريت عليها عاودات ليا كولشي ..

- شريهان :

ل لبارح فاش كنت كنسربي ، الطبلة لي كانت انسربيها كان هو ݣالس فيها ، ماعقلتش على راسي حتى غيبت فاش شفتو ..

- مصطفى (غوبش ) :

وهو شافك ؟ عاوديليا اشريهان لي وقع راه اتحمقيني ، واخا ماشي وقتو وماشي بلاصتو هادشي ، ولكن جات جات بغيت نعرف كولشي ..

- علي :

بالعكس ، هادي أحسن بلاصة تݣلسو فيها على راحتكم ، عكس دار خصوصا حتى واحد فدار معارف الموضوع ، من غير خالتي زهرة او مالك ..

- مصطفى (صدمة على صدمة خلات راسو يتبخ ) :

حتى مالك عارف ؟ وحتى الواليدة تبارك الله اهاه وسكون عارف خور ، بلاتي نفكر (كيفكر ) مروان ياك ؟

- شريهان (هزات عينيها فيه ) :

اه حتى هو .. ماما منقدش نخبي عليها ، مالك سمعني بصدقة كنهضر مع مروان فتيليفون ... وبزز عليا نعاود ليه وعاودت ليه كولشي ..

- مصطفى (كيحك فراسو بتوتر) :

دابا عاودي ليا شنو وقف بضبط فديك الليلة ..

- علي :

نخليكم تهضرو على خاطركم ، ومن الأحسن تݣلسو كاي ناس كيتقهواو عادي ، هكا مغاتخليوش الأنظار تاجه ليكم .. خلاهم علي ، وفعلا ݣلسو مقاد بحال الى حتى حاجة مكاينة ..

- مصطفى :

كنسمعك دوي ..

- شريهان (بلعات ريقها) :

نهار عيد ميلادي ، تعطلت فالقهوة بزاف ... خرجت وشديت طاكسي ، ونسيت بلي مشارجيتش ... ݣلت صافي قربت للدار ، ناخود روشارج ونكملها على رجليا ... وفعلا نزلت خلصت الطاكسي ، ودخلت للحانوت خديت روشارج ، خرجت باش ندخلها لتيليفون ... كنت غادي وحادرة راسي ، حتى سمعت شي هضرة ... هزيت راسي فشارع لي كان اونفاص معايا ... كان تما الظلام والبولة بعيدة بزاف على داك الشارع ... وحتى البلاصة لي كنت واقفة فيها انا كانت مظلمة ، (فهاد الأثناء جوديا كانت كترجم لباقي العناصر) أنت عارفني فضولية أخويا معتارفة بيها (تبسم بإستهزاء) المهم كيبانو ليا جوج درجال مݣلضمين ... شادين واحد السيد من يديه لابس سوميز بيضة ، وهو كيبكي وكيترجاهم ... كان كيهضر بطاليانية ماشي بالمغربية ، ولكن كلامو باين بلي كيطلب فيهم ... حداهم كانت طوموبيل فورد كبيرة كحلة وطويلة ، شوية كيبان ليا بابها تحل وخرج منو واحد ..

- مصطفى (مركز معاها) :

كيفاش داير هاد الواحد ؟ وصفيه ليا ..

شريهان ( كتشوفيهم كاملين مركزين معاها ) :

ماطويلش بزاف وماقصير تكون فيه ديك 1.75 بحال هكاك ، عامر من الفوق ... ويديه فيهم الوشام ، شعرو رطب وزعر مايل للليموني ... ولحيتو زعرة كان لاباس سروال دجين كحل مع تجيكط كويرة طويلة كحلة ، جبد الفردي من جيبو وتيرا فسيد ، 4 ديال الرصاصات متابعين ، فداك الوقت بصدمة والخلعة ... تميت راجعة باللور ، ماشفتش المشة لي عفط ليها على قزيبتها .. هي غوتات وانا غوت فهاد الوقت هوما شافوني ، (شافت ملامح وجهو تبدلات) مشافوش وجهي بلاما تخلع سافو غير النص ... شافو يمكن غير شعر وظهري وشنو كنت لابسة اما ملامح وجهي مشافوهاش ، حيت الوقت لي شافو فيا ... بزرية ضرت وهربت وهوما تبعوني ، تخبيت فواحد الكروصة فواحد الزنقة ، حتى مشاو عاد مشيت لدار ، وعاودت لماما كولشي ، وفاش كنا ݣالسين سمعت حس على برا ... كليت من شق كيبانو ليا كيقلبو فزناقي ، جا عندنا مروان حيت نسيت الكراطن دالكادويات فالقهوة ، وكادو امين ودلوخرين ، مع دخل لقاني مخلوعة وعاودت ليه كولشي ، وهو لي قتارح عليا نجي للفرنسا ... اما ومروان بغاو يݣولوها ليك ولكن انا خفت عليك ، حيت باينة دوك الناس مساهلينش ، داكشي باش اخويا سكت ..

- قاطعهم (فرانسيسكو ، هاز تيليفون ديالو جامع غوباشتو ) :

واش هداك لي شفتيه هو هذا (عطاها تيليفون شداتو غير شافتو ملامحها تبدلو مخرجة عينيها ) :

اه هو ولكن هدا شعرو كحل ولحيتو كحلة ..

- فرانسيسكو (خدا من عندها تيليفون مبسم ) :

دجيكو ، اللقب ديالو بالانجليزية هو Gecko وبالفرنسية gecko يعني نفس المعنى ..

- شريهان :

بالمغربية عندنا هي بوبريص ..

- فرانسيسكو :

دجيكو هو اليد اليمنى لكوزا نوسترا ... شحال هادي وحنا مراقبين التحركات ديالو ، وعرفنا بلي دجيكو اليد اليمنى ديالو ، الاسم الحقيقي ديالو هو فلاڤيو ... الشادة والفادة كتدوز على يدو ، وكوزا نوسترا مايمكنش ليه يتحرك بلا بيه ..

- جوديا :

إذا الشكوك ديالنا طلعات فبلاصتها ..

- شريهان (مافهمات والو ) :

شكون هذا علامن كيهضرو ، شكون هاد كوزا نوسترا تاني ؟ وهاد دجيكو ؟

- مصطفى (ضار عندها بإبتسامة ) :

كوزا نوسترا ، هو رئيس العصابة لي بالفضول ديالك سفتي الحريمة لي هوما مسؤولين عليها ، وهداك الواشم لي كتدوي عليه ، هو اليد اليمنى ل هاد خونا فهمتي دابا ياك ، واش انت مابغيتيش تحشمي ... علاش مكدخليش سوق راسك ، الفضول داير ليك حالة ودوك العينين عندك بحال سكانير مافهمتش ..

- شريهان :

بسم الله عليا اخويا ، كيفما لقيتيني تخليني ، يالاطيف اللوطف ... وأصلا ايو واحد فبلاصتي ايسمع المدابزة ، راه ايوقف باش يبرݣݣ ماشي غير أنا ..

- جوديا ( بجدية ) :

خاصنا نلاقاو شي خطة ، الكلوپ راه بقات ليه 3 شهور ويتحل ... هاد الناس راه تعطلنا معاهم بزاف ..

- جاكسون :

خاصنا نعرفو كيفاش ندخلو للكلوپ ، وكيفاش نتقربو منو هاد خونا ... اي معلومة صغيرة غادي تنفعنا ..

- لي مين هو :

ديرو فبالكم ، بلي هاد الناس داخلين معاهم ناس أخرين ، رجال أعمال معروفين ، وضروري كارلو غادي يكون شاد عليهم وراق لي غادي يغرقوهم ، نهار لي يطيح ويخويو بيه ، ايطيحهم كاملين ..

- جوديا :

هذا في حالة الى كان كيفكر بلي غادي يطيح ..

- فرانسيسكو (بقا ساكت كيفكر) ..

- شريهان (وقفات ) :

سمحوليا ، هادشي ديال البوليس أنا ماعنديش معاه ... نمشي نكمل خدمتي ، خويا نمشيو بجوج لدار ..

- مصطفى :

سيري حتى نتفاهمو من بعد ، ديري فبالك بلي عندك يا عقوبة حبسية ولا غرامة مالية ..

- شريهان (تخلعات) :

وعلاش ؟ ياك أخويا بغيتي دخلني للحبس ..

- مصطفى :

شريهان القانون هو القانون ، وانت شهدتي على جريمة وسكتي ، ولكن غير رتاحي هتدشي مغايكون حتى نرجعو للمغرب ... وانا واخا هكاك ختي مغاديش نخليها دخل للحبس ، انخلص الغرامة قدما كانت .. على الله هادي دير ليك العقل ..

- شريهان (أشرات ليه براسها ومشات ..)

- فرانسيسكو (بحال الى جاتو شي حاجة لبالو ) :

حنا الإيطاليين ، نقطة ضعفنا هي قلبنا ... يعني الحب ، الى مشينا حتى بغينا كنبغيو من قلبها ، الى كون كوزا نوسترا بصح هو كارلو مارتينيز ، ايبقى لينا حل واحد باش ندخلو للحجر ديالو ..

- مصطفى (بشك) : فاش كتفكر ؟

- سكينة قربات من شريهان :

علاش كنتي كتبكي ݣبيلة ، بغيت نجي وخفت ݣاليا علي بلي هذاك خوك ..

- شريهان :

اغير حيتاش توحشتو ، داكشي باش ... اه هدا هو خويا مصطفى ، جا لهنا على قبل الخدمة ..

- سكينة (بإبتسامة ) :

بالعكس دابا خاصك تفرحي ، الحمد لله منين جا وشفتيه على خير وبيخير ..

- شريهان :

الحمد لله ... مشات سكينة تشوف شغالها ، حتى جا علي عندها .. غمزها بمعنى شنو وقع ..

- شريهان :

الحمد لله كولشي داز مزيان ، عندي غرامة حيتاش تسترت على جريمة ... جاب الله خويا ايخلصها ، كون ماعنديش كون دوزتها حبس ..

- علي :

واخا متكونش عندك ، نخلصها ومنخليكش تحبسي مالك مريضة ..

- شريهان :

لهلا يخطيك عليا ..

__________________

دازت العشية مزيانة حتى قربات شريهان تسالي خدمتها ... كان علي كيتسناها من ورا مامشاو باقي العملاء ، غير سلات وخرجات عندو ..

- مصطفى :

صافي ساليتي ؟

- شريهان :

اه صافي ساليت (شيرات لعلي وسكينة بيديها سدات فيد مصطفى ، داير سكادو فظهرو وجار الباليزة ، غادي كيتمساو حتى لشارع باش يشدو طاكسي ) ..

- مصطفى :

غدا ضروري خاصك تمشي معايا للمديرية ..

- شريهان (طلقات منو ) :

وعلاش ؟

- مصطفى :

خاص ضروري تعطي الأقوال ديالك تم ، باش كولشي يكون قانوني ، ونسخة من أقوالك غادي تمشي فإيمايل للمغرب ، باش نطرقو هاد المسمار ..

- شريهان :

وناري أحويا ، ياك عاودت ليك كولشي فالقهوة ، علاش غادي نمشيو حتى للكوميسارية باركة اهنا ولا فدار ..

- مصطفى :

واش من نيتك ، ياكما يحسابليك الكوميسارية ديالي ، زيري معانا واحد الشوية الله يرضي عليك ، اتمشي تعطي أقوالك تسني ورجعي بحالك صافي ..

- شريهان (حلات باب الطاكسي لي وقف ليهم ) :

واخا .. ، طلعو فطاكسي عطاتو شريهان العنوان وشدو الطريق ..

_________________

نزهة (غير حاضية زهرة ) :

وزهرة مالك اختي ، حالك ماعجبنيش ... غير ساهية وماشي معانا ؟

- زهرة (تنهدات تنهيدة طويلة ) :

أختي بالي مامهنينيش والله العظيم ، مصطفى هدا النهار الثالث لي مكايجاوبنيش فيه ، خايفة اختي اتحون واقعة ليه شيحاجة ..

- سعيد : يهديك الله ماتبقايش تفايلي على دري بالخايب ، الغايب حجتو معاه ..

- أحمد :

الى وصل غدا ومجاوبكش ، ديك ساعات نشوفو منديرو ..

- زهرة : شحال ساعة دابا ؟ شفت دراري مزال مجاو ..

- نزهة :

عمر مكايجي هو وسعد حتى ل 9 دابا يلاه 8 ... مالك مشا عندو شي غراض ، ݣالينا منتسناوهش للعشا ..

- زهرة (تنهدات ورجعات سهات ) :

ماشي مشكيل ماشي مشكيل ..

____________

- فبلاصة أخرى ، وقفات طوموبيلتو قدام واحد الݣراج كبير ، نزل لابس سپورتيف ، مشا نيشان للباب بجوج يدين جر باب الحديد على جنب ودخل ، كيتسمع غير صوت غليض كيعطي التعليمات ... بقا واقف مقابل حركاتو لي متبدلوش هو هو كيف ديك الساع ، كيف دابا ..

- مالك (بإبتسامة ) :

مزال مابغيتيش تشرف خلاص ؟

ضار عندو داير نظارات صغار ، ݣادومة كحلة كيتخللها شعيرات خفاف فالبيض ، شعرو جامعو على شكل ديل حصان قصير ... شعرو كحل لي شافو يستغرب كيفاش واحد كبير ومشايبش ، لابس لبسة كحلة بحال لباس صيني ، طوييل وقلدة ولكن مع كبر السن غلاض ... عكس كيف كان فصغرو ... هز حاجب ونزل الثاني بإبتسامة ، تم جاي عندو مالك حتى وقف قدامو ... ، رجع عطاه بظهر وبسرعة رجع ضاير عندو مسدد ليه ضربة لوجهو ، بالخف خوا بيها ، شد يدو وجرو لعندو من عنقو مزيرو ... نزل بشوية عند ودنيه وهمس :

كنݣوليك ديما ، واخا تكبر فالعمر الروح القتالية عندك ماعندهاش حد ، كتبقى هي هي وتقدر ݣاع تزيد ..

- مالك :

كنت باغي نتأكد واش مزال انت هو انت ، ودابا تأكدت ... صافي طلق ماعنديش الجهد لي يتقاتل معاك ، طلقو كيشوف فيه ، شوية بدات ملامحو كتلين والابتسامة رجعات ضحكة ، جر مالك عندو معنقو ..

- توحشتك اسبع ..

- مالك (معنقو ) :

انا غير شبل انت هو السبع ..

- ضار شاف لوخرين أشر ليهم باش يكملو ..

فين كنتي غايب ولا الوزارة نساتك فحبابك ؟

- مالك :

بالعكس ، انا ونبيل تفكرناك داك نهار ... مايمكنش ليا نساك انت ديما معايا (خشا يدو فجيبو وجبد منو الخاتم لي ديما محتافظ بيه ) ، شفتي مافرطتش فيه ... منقدش نفرط بيه وهو سبابي فضربة لي فكرشي ..

- (ضحك) :

ماشي شيحاجة لي كثيرة ، جرح خفيف ظريف ... جرح ستيڤن ...

- مالك (كيحامرو ) :

جرح ستيڤن ... انت هو انت الغرور وعزة النفس مكتحيدش ..

- ستيڤن :

وعمرها تحيد ، مهم ݣوليا لاش جيتي باين ورا المجية ديالك شيحاجة ..

- مالك (كيضحك ) :

المركز لي كانت الأمنية ديالنا بزوج نديروه ... بقات ليه 4 شهور ويكمل ..

- ستيڤن(ضحك بفخر وفرح ) :

فرحتيني ... شيحاجة من داكشي لي كنا باغيين بزوج تحققات ، ايوا وشنو المطلوب مني ..

- مالك :

بغيتك تخدم فالمركز تكون انت هو الكوتش ، لي ايتكلف بقسم الرياضة ... والفنون القتالية

- ستيڤن (كيضحك) :

واحد عندو 70 سنة بغيتيه يكون كوتش ، كتفلا عليا ؟

- مالك :

علاش ؟ واخا عندك 70 سنة ... انت عاد ݣلتي بلي العمر ، ماشي معيار ولالا ، كيبان ليا بلي مزال محتافظ بالقوة ديالك ..

- ستيڤن :

مايغركش هاد تمارين لي كنعطي لهادو ، أصلا هوما مدربين ، واخا هكاك مابقيتش كيف كنت فاش كنتي كدرب عندي ... داز بزاف ديال الوقت أ مالك ..

- مالك :

واخا ، ولكن انت تكلف بلي كوتش ، بغيتك تكون فالمركز داكشي لي تعلمتو منك ، بغيت حتى هاد الشباب يتعلموه ..

- ستيڤن :

ختار بعدا لي كوتش ويكون خير ..

- مالك (وقف كيشوف فيه بتحدي) :

لا مسألة لي كوتش انت لي غادي تكلف بيها ، ماشي أنا انت لي اتختار لي كوتش ديال كل قسم ... قسم الفنون القتالية ، وقسم الرياضة ... عندك 4 شهور اموسيو ستيڤن (غمزو) 4 شهور .. ضار غادي عاطيه بظهر ... ماحس غير بخبطة ديال صباعيات البوكس جاتو فظهرو .. ضار كيشوف فيه بإستغراب ..

- ستيڤن (بإبتسامة إستفزاز ) :

هادي غير باش ماتنساش بلي ، ستيڤن مكايخدش أوامر من حد ، هو كيصدر الأوامر ..

- مالك ، حرك راسو بإستسلام وخرج ..

___________________

- سونا الباب .. مشات الخدامة حلات ، دخلات شريهان كتجر فرجليها ..

- السلام عليكم (ݣلسات ترتاح) ..

- زهرة :

ماهضرش معاك خوك ؟

يتبع...