السيدة الأولى الجزء 19

- علي :

لبارح جا عندي مصطفى بليل للقهوة ، وجاب معاه فرح ..

- شريهان (مصدومة ) :

اويلي على فرح ؟!! كيفاش فرح وفين لقاها انا راه مافهمت والو ..

- علي :

حتى انا مافهمت والو ، ݣاليا خلي معاك فرح حتى نقادو ليها امورها وترجع للمغرب ، وفاش سولت فرح ݣالت بلي البوليس داو جورجيت ، وݣاع البنات لي كانو معاها خداوهم البوليس لواحد لوطيل ، باش كل وحدة فيهم يرجعوها لبلادها ..

- شريهان :

علي قطع قطع ، انا انشوف هادشي ... قطعات التيليفون لقات مالك وراها وعلامات الإستفهام على وجهو ..

- شنو واقع ؟ شكون لي سونا ليك ؟

- شريهان :

سونا ليا علي ، ݣاليا بلي مصطفى جا عندو لبارح بليل وجاب معاه فرح ، وݣاليه يخليها عندو حتى يقادو ليها امورها ويسيفطوها للمغرب ... وݣال بلي البوليس شدو جورجيت ولبنات حطوهم فأوطيل حتى يسيفطو كل وحدة فيهم لبلادها ..

- مالك (دخلو الشك والعجب) :

مصطفى مݣالينا والو !! مافهمتش ..

- شريهان :

أنا انعيط ليه دابا ..(خدات تيليفون وسونات ليه ، جاوبها ، ݣالت ليه يجي عندها لجردة وقطعات ) ..

- (من بعد ثواني جا عندهم كيشوف فيهم بإستغراب) :

مالكم شنو كاين ؟

- مالك : انت لي غادي تکول لينا ، ماشي حنا ..

- مصطفى ( بلع ريقو وتنهد تنهيدة طويلة ، قبل لا يهضر دوات شريهان ) :

كيفاش بلان البنات لي تطلقو وديك جورجيت لي تشدات ؟!!

- مصطفى ( كيحك راسو ) :

دجيكو مات ..

- شريهان ومالك دقة وحدة :

شنو وو !!؟؟؟

- مالك : كيفاش مات وضح لينا شكون قتلو ..

- مصطفى :

لي قتلو هو كارلو ، ودابا كارلو هارب مالقيناهش ، لبارح وصلونا جميع المعلومات والوثائق لي كدين كارلو ، وكدين ݣاع رجال الاعمال لي مشاركينو فأعمالو ، هاد الصبح تم القبض عليهم كاملين واحد بواحد ..

- شريهان ( غوبشات) :

كيفاش دابا ؟ وشكون هدا لي وصليكم هاد المعلومات هادو ؟

- مصطفى :

مزال ماعرفناش ، ولكن لي دار هادشي كيعرف مزيان كارلو ... وباغي ليه يغرق ، وعارف الخطة لي درنا بحال الى ݣلتو قصر علينا الطريق ..

- مالك :

ودابا شنو غادي يوقع ، غادي نحبسو التمثيلية حيت مابقا لاش انكملو فيها الوثائق لي كنا بغينا هاهوما عندكم ، ولكن كارلو لي مهم هاهو هارب ..

- مصطفى :

وي ، هادشي غادي يحبس ... كارلو الى حبستو التمتيلية ضاروري يسيق الخبار ، والى ساق الخبار غادي يبان .. دابا خاصنا نعرفو شكون لي وصل هاد المعلومات واخا صعيب وبزاف ..

- شريهان ( فرحانة ) :

واخيرا تهنينا من هاد الصداع الراس ، ونقدو نكملو حياتنا عادي ..

- مصطفى :

ماتفرحيش بزاف اختي ، الخطر مزال كيدور حدانا ... خاصنا نزلو المغرب فالقريب العاجل ، الى نزلنا للمغرب الخطر مغاديش يبقى ، حيت كارلو مستحيل يقدر يعتب برات فرنسا ، ݣاع المطارات مراقبين وجميع الطائرات الخاصة ديالو تم الحجز عليهم ، وزيد عليها مضروب ... يعني مايقدش يخطوي برات فرنسا ..

- شريهان (تنهدات تنهيدة طويلة) :

سبحان الله ، فالاول خلينا المغرب حيت الخطر كان قريب ... هربنا لفرنسا على هاد الأساس ، ودابا أيخصنا نهربو من فرنسا للمغرب ، عݣوبتنا لبلادنا ..

- مالك :

غادي نسرع الإجراءات ديال زواجنا ، غادي نوجد كولشي ، وحتى المشية ديالنا للمغرب ..

- مصطفى :

احسن مغادي دير ، حتى انا غادي نزل للمغرب من ورا عرسكم بضبط ، انزل مع الواليدة والبقية ..

- شريهان : وجوديا اتخليها ؟

- مصطفى (شاف فيها وسكت ) :

بعد المرات كنتلاقاو مع الشخص الصح ، فالمكان الغلط أختي .. (تبسم ليها ورجع للداخل ) ..

- شريهان :

خويا ولا كيبغي جوديا ، باينة أمن كلامو وفاش دكرتها ليه كيفاش تصرف ..

- مالك (عنقها ) :

خلي كولشي للوقت ، المهم هو تهنينا من هاد اللعبة ، وادغادي نتجمعو عما قريب ..

- شريهان : الحمد لله الحمد لله ..

- التحضيرات للعرس مالك وشريهان بدات ، ختارت كسوة بسيطة بزاف فاللون البيج ، طويلة ويديها طوال مستورة ، مع ڤوال فنفس اللون مشبكة ... ومع ءلك وجها كان كيبان دابل بحال الى ناقصاها شيحاجة ..

يوم خطوبة عمر

- فطوموبيل هي وياه شادين الطريق لدار إشراق ... ݣالسة وساكتة بحال الى مكايناش فهاد العالم ، وهادشي لاحظو هو هاد اليوماين لي دازت ، وقرر يفاتحها فالموضوع ..

- مالك :

شيري ، مالك شنو واقع ماعجبتينيش ؟!!

- شريهان (تنهدات تنهيدة طويلة ، وهزات راسها شفت فيه بإبتسامة باردة ) :

علاش مالي ، غير كنخمم راك عارف نهارنا بقات ليه سيمانة وحدة داكشي باش ..

- مالك :

ماشي هادشي لي شاغلك ، كنعرفك مزيااان ... وعارف بلي اخر حاجة تشغلك هو نهارنا ... جيني نيشان زعمة مكنخبيو والو على بعضياتنا ..

- شريهان (سكتات وسهات فطريق ، بلاما تشوف فيه نطقات) :

نهار جيت لهنا ، فعلا جيت حيت كنت هربانة ... ولكن كنت بغيت نحقق الحلم ديالي ، كنت بغيت نخدم ونجمع الفلوس ، وندير المشروع ديالي وحتى أنا تولي عندي وكالة ديالي ، وحتى انا علاش لا يبانو تصاوري فالمجلات ... ويهضرو علي الصحف ، شوية خرجات لي هاد القضية من الجنب ، وفاش الموضوع تسد وقلت الحمد لله ممكن نرجع نكمل على مابديت ، خويا ݣاليك عليكم خطر ففرنسا وخاصكم ترجعو للمغرب ... ولثاني مرة حلمي كيتوقف .. شفتي على زهر كيف داير ..

- مالك :

ولكن الحمد الله انت كاينة ، ومدام انت كاينة راه قادرة تحققي هاد الحلم فأي بلاد كنتي فيها ، علاش مالو المغرب ؟؟

- شريهان (ضحكات) :

من نيتك امالك ؟ المغرب نفتح فيه وكالة وندير فيه هاد المشروع ، والله حتى يخرجوني فجورنال ويضربو بيا طر ..

- مالك (ببرودة) :

وعلاش ؟ زعمة حيت بغيتي ديري حاجة جديدة ، ومن بعد ياك انت مأمنة بالفكرة ديالك ... مخاصش يهموك الناس ، خاص تجتاهدي على الفكرة ديالك ... الناس داويين داويين ، شحال قدهم أيجي نهار ايتقبلو ديك الفكرة ، خاص ديما منين تبغي تبداي شي حاجة ديالك ، تسدي ودنيك وتحلي عينيك ، ودوك الناس منين ايشوفوك نجحتي ، هوما براسهم ايصفقو ليك فهمتي ..

- شريهان :

يفوت هادشي ويفوت عرسنا إن شاء الله ويكون خير ..

- مالك :

وهكاك نبغيك مغادي يكون غير الخير من هنا لقدام ..

- شريهان (شافت فيه وتنهدات تنهيدة طويلة) :

إن شاء الله ..

_________________________

- دازت خطوبة إشراق وعمر زوينة ، بحالها بحال خطوبة سكينة ويمكن كثر ݣاع ، نزهة ماخلات ماجابت لإشراق من حوايج ، هادي غير خطوبة وكبرات بيها تكبيرة دايزها الكلام ، من ورا الخطوبة ... مالك جاب لعمر ورقة فيها بلي ممكن ينزلو ياسمين معاهم للمغرب ... حيت عمر وإشراق دافعين لتبني خاص غير يتزوجو ، باش يشوفو واش فعلا ايوفيو الشروط ولالا ..

- إشراق (مقابلة مع شمس) :

فهمتي دابا أبنتي ياك ؟

- شمس (كتستوعب الكلام لي قالت ليها ) :

مامي دابا ياسمين ختي أنا ، وفين كانت شحال هادي ؟

- إشراق :

كانت فواحد البلاصة زوينة , حتى كبرات وجات لعندنا ..

- شمس :

ودابا اماما مغاتسكنش معانا ، خاصها تسكن معانا ونلعبو انا وياها ..

- إشراق (عنقات بنتها ) :

غادي تسكن معانا أحبيبة ديالي ، قريب إن شاء الله وتوليو تلعبو بزوج ..

- شمس : وعمو عمر ؟

- إشراق (ضحكات) :

حتى هو غادي يسكن معانا هههه ، يلاه نعاس دابا بيتك بيتك ... مشات شمس كتجري سبقاتها ، حكات سنيناتها وتخشات ففراشها ... تسناتها حتى جات لعندها تعاود ليها القصة ديال قبل النعاس ، عاد نعسات ..

- المركز كان غير هاد النهار مختلف تماما ، الشباب لي كانو كيتعالجو من الإدمان ولي نهار دخلو للمركز كانو ملامح وجهم فشكل ، دابا هاهوما كلهم نشاط وحيوية ... النور باين على وجهم والكحولة لي كانت تحت عينيهم مابقاتش ، كانو فرحانين بزاف حيت دايرين يديهم مع صحاب تنظيم الحفلة ديال عرس مالك وشريهان ، ستيڤن كان واقف وحاضي كولشي ، الجردة كلها تزينات واخا مالك مكانش طالب شيحاجة كثيرة ، ولكن دراري قامو بالواجب ... مكانش باغي يتباها ويبان بلي وزير .. داكشي باش بغا العرس يدوز عادي ، خصوصا ايكون عرس بلا عقد حتى ينزلو المغرب عاد يكون عرس على حقو وطريقو وبقوامو ...

____________________

- ماثيو (حاضيه شنو كيدير وساكت خايف عليه بزاف وخايف من هادشي لي ناوي عليه ) :

دييغو ، واش أنت متأكد من هاد الخطوة لي باغي دير ؟ واش متيقن منها 100/100 ؟

- دييغو (كيضحك) :

عمري مكنت متيقن بحال هاد النهار، شنو غادي يخليني مزال نتسنى ، لي كان شادني مات وأخيرا وأخيرا أماثيو ..

- ماثيو (سكت وحدر راسو قرر يسكت ) :

انا غادي نرجع للبرازيل ، بغيت نرتاح شوية ... أصلا طيارتي غادي تكون من هنا لساعة ..

- دييغو (بإستغراب) :

وعلاش هادشي مافخباريش ؟

- ماثيو :

كتتي مشغول بهادشي لي ناوي عليه ، مابغيتش نبرزطك معايا ، وأنت اصلا اتبدا حياة جديدة ... خاصك تكون بوحدك باش تستمتع بوقتك ..

- دييغو (ولا بحال شي حمق ، مابقا مسوق لحتى واحد) :

- فعلا فعلا ، خود راحتك ... رتاح وتيليفون بيناتنا ، فاش غادي نبغيك غادي نݣولها ليك ..

- ماثيو (بقا كيشوف فيه مدة طويلة ، كيشوف فهاد الإنسان لي ولا مضطرب نفسيا ، ولا خطر عليه يبقى معاه عيا معاه بجميع طرق يصلح منو ، ولكن ماعندو مايدير لإنسان مكايتهدنش غير بجرعة حقنة من المخدر) :

يلاه خليت ليك راحة بسلامة ، نتلاقاو من بعد وحظ سعيد ..

- دييغو (كيضحك ) :

أكييييد غادي يكون سعيد أكيد ..

______________

- شريهان (طالقة شعرها سامپل ، المكياج ديالها خفيف بزاف لي شافها يݣول غير معروضة ماشي عروسة ) :

سكينة :

- بغيت غير نفهم ، اشمن عرس هدا لي لابسة هاد الكسوة سامپل لا مكياج لا مشطة لا والو ..

- شريهان :

باش منين نزل للمغرب يطيح عليا السر ، راه خاصك تفهمي أصاحبتي ، هاد الحفلة درناها اعلى وجه دوك دراري لي فالمركز مساكن ، بغيناهم يفرحو وبمناسبة الإفتتاح ديال المركز ونجاح ديالو فهمتيني ، العرس ديال بصح هو لي ايكون فالمغرب ، العقد ونهار الحنة يلالة كولشي بقوامو فهمتي دابا ؟

- سكينة (كتقاد ليها فالڤوال ) :

إيمتا غادي نزلو للمغرب بعدا ؟

- شريهان :

السيمانة جايا إن شاء الله ، راكي عارفة بعد غدا كاين المهرجان خاص عمر يوجد ليه عندو فيه يوماين ، وديك ساعات نقادو أمورنا ونزلو ، ماما ودار ومصطفى أيهبطو قبل منا ..

- سكينة : صافي مزيان ، دابا جيتي فنة هاحنا سالينا ..

- تدق الباب وتحل ، دخلات زهرة :

ساليتو ، مالك راه كيتسنى لتحت كولشي واجد ..

- سكينة : سالينا أخالتي ..

- زهرة (كتشوف بإعجاب فشريهان ) :

تبارك الله وصلاة على النبي ، الله يحجبك ياربي والله ينجيك من شر الخلق .. (نزلو دموعها ماعرفاتش علاش حاسة بشيحاجة واحلة ليها فحلقها وداتها مبورشة عليها ، وشي برودة غريبة طالعة مع داتها ) ..

- شريهان (مشات عندها وعنقاتها ) :

ماما ومتبكيش عفاك ، اويلي صافي مسحي دموعك ازين الصافي والݣد الوافي الحب ديالي أنا ..

- زهرة (ضحكات) :

بااااز ، يلاه أبنتي زيدو هبطو غادي نتعطلو عليهم ..

- شريهان (تنهدات تنهيدة طويلة وشافت قدامها) :

بسم الله ..

- كان واقف لتحت لابس كوستار فزرق ، مع پاپيون فالكحل وشوميز فالكحل ، ساعة رجالية فنقري شعرو على عينيه ... كايبان زوين بواحد الشكل خطير بزاااف كيضر فالقلب ، واقفة نزهة وأحمد كيتسناو العروسة بنسبة ليهم هدا أحسن نهار ، واخا غير عرس ومزال ولدهم متزوجش رسمي ولكن فرحانين بزااف ..

- عمر (بهمس لإشراق ) :

شنو بان ليك حتى حنا نديرو عرسنا فالمغرب ؟

- إشراق ( تبسمات) :

وهو الصراحة مكرهتش هههه الأعراس ديال برا ماعنديش معاهم ..

- عمر (ضحك) :

صافي إن شاء الله ، يكون خير ... هكا أحسن نرجعو من المغرب مزوجين ، باش إجراءات التبني دوز دغية ..

- إشراق (عاجبها الحال) :

صافي إن شاء الله ..

- هبطات شريهان ومعاها سكينة وزهرة ، وخا كانت بسيطة كانت كتبان أنيقة ، عينين مالك لي منزلوش عليها نهائيا .. مد ليها يديه وأنظار خوتو عليه ، خالها وعمها والعائلة كولشي فرحان ..

- زهرة : فين هو مصطفى ؟

- عمر :

راه سبقنا للمركز ، ݣال بغا يكون تما باش يستقبل العروسة ..

- شريهان (سمعاتهم) :

علاش سبقنا زعمة واش كاينة شيحاجة ؟

- مالك (بإطمئنان) :

مكاين والو ، غير بغا يستقبلنا ... لي كاين هو اليوم كنتسالك شيحاجة تݣوليها ليا واليوم جا وقتها ..

- شريهان (ضحكات قبل لا تطلع حداه فطوموبيل ) :

عارفة هادشي غير كون هاني ، وغادي نݣولها ليك على حقها وطريقها وكيف خاصها تكون ..

- مالك (بإستغراب) :

كيفاش زعمة هههه ، لاش كتخططي ؟

- شريهان (غمزاتو) :

ماشي شغلك ... طلعات لطوموبيل ، مخلياه كيتبسم بوحدو ..

______________________

- فبلاصة أخرى ، وبضبط مارينا ... واقف باطو فالبيض ، فيه حرف (D) ... واقف بعيد شوية على لي باطو لوخرين ، ضار ونقز بلاما يشوفو حتى واحد ... المظهر ديالو مكايبانش عليه بلي سراق ، بالعكس كيبان شي واحد لاباس عليه ... مغطي راسو بكاسكيطة وإبتسامة على وجهو ، غادي بخطوات سريعة حتى وصل لواحد طوموبيل كحلة ، زاجها فيمي ، تحل الباب ديالها وطلع ، تسد الباب وراه وبقات الطوموبيل واقفة بلاصتها مقابلة مع الباطو لي كان فيه ..

______________________

- جوديا (كتشوف فيه ، كتحس بحلقها نشف ودموعها بغاو ينزلو ) :

هي صافي جا الوقت تمشي ، ولكن كارلو مزال ماتشد ... ومزال ماعرفناش شكون لي وصل لينا الوثائق ؟

- مصطفى :

المهمة ديالي كانت هو ناخود جميع الوثائق لي عندو ، وحنا خديناهم ، كارلو هرب ومايمكنش ليه يخطوي برات فرنسا ، وختي خاصها تنزل للمغرب وخاصني نكون تم ... كارلو مستحيل يبان دابا ، حيت أيعرض راسو للخطر ، هادشي لي خلاني نجي لهنا باش نراقب لي داخل ولي خارج ... بقات ليا سيمانة هنا ونمشي ، بالمناسبة راكي معروضة للعرس شريهان فالمغرب ... الى بغيتي تنزلي تبدلي الجو شوية ..

- جوديا (تنهدات تنهيدة طويلة) :

وانت باغيني ننزل للمغرب ولالا ؟

- مصطفى (هز راسو فيها كيشوف ليها فعينيها ) :

كون مابغيتكش تنزلي ، مغاديش نكولها ليك أجوديا (جر ليها راسها وباس ليها جبهتها معنقها عندو ) ...

- فرح (كتشوف فعلي) :

واش ماعرفتيش إمتا نقد نزل للمغرب ؟ توحشت ماما بزاااف ..

- علي (كيوجد راسو باس يمشي للعرس ) :

كاليا مصطفى بلي سيمانة جايا إن شاء الله غادي تنزلي للمغرب ..

- فرح (بصدمة) :

حلف بالله ، وعلاش ماݣلتي ليا والو ؟

- علي (سكت وقرب كيشوف ليها فعينيها) :

ݣلت يقدر يعجبك الحال هنا ، ولكن كيبان ليا زربانة باش ترجعي للمغرب ..

- فرح (شدات ليه يدو) :

انا ماسخيتش نمشي ، وعمري مغادي نسا خيرك وهادشي لي درتي معايا هاد الأيام .. ولكن توحشت ماما بغيت غير نشوفها ، واخا شفتها فتيليفون ولكن ماشي بحال ..

- علي :

غير رتاحي ، مابقا قدما فات وغادي تمشي ، انا خاصني نمشي تعطلت ، المهم راه كولشي عندك بلاما نوصيك ، هز التيليفون وسوارتو وخرج ..

__________________________

- بدات الفرقة الموسيقية العزف ديالها ، كان واقف ستيڤن مصطفى دراري ديال المركز ، كولشي كان كيتسنى فطوموبيلة مالك وشريهان توصل ... واخيرا وقفات طوموبيلتهم ، نزل هو الأول ضار لجهتها حل الباب ، خدا يدها ونزلات بشوية عليها تحت تصفيقات وأنظار الكل ... كولشي كان حاضر دراري كاين لي من فرنسا ولي من إيطاليا ولي من إسپانيا أمريكا و، الصحافة حتى هي كانت لتغطية ديال العرس والمركز بجوج ، شدات فيه ودخلو للمركز .. غاديين والعائلة وراهم وقفو وسط الجردة لي كانت مزينة باجمل الورورد لي كان لونهم فالموڤ بارد ، الݣلسة لي كانت مخصصة ليهم ، كولشي كان فرحان من غير مصطفى لي عينيه كانو على العرس ... كان غير حاضي جنابو وكيشوف ..

- بعد مرور ساعة ..

- جا الوقت باش ياخدو الصحافة كلمة من مالك ، ناض من حداها وقف معاهم ... هدا سبق صحفي بنسبة ليهم ، شيحاجة لي كانو كيتسناوها من شحال هادي ..

- وقفات شريهان وغمزات ستيڤن لي عطاها الإشارة براسو ... نزلات من بلاصتها شافها مالك عتادر لصحافة وجا عندها :

فين غادية ؟

- شريهان (ضحكات) :

داكشي لي واعدتك ليه ، هو لي غادية ليه ... بلاما تبعني ولا مغادي نݣول والو هههه

- مالك (ضحك) :

سيري انا كنتسناك ، وعلى ناااااااار هههه ..

- خلاتو وكملات طريقها ..

- مصطفى (وقف ليها قدام وجها ) :

فين غادية ؟

- شريهان : انا غير اندخل نجيب شيحاجة ونجي ..

- مصطفى : نمشي معاك ..

- شريهان :

واش منيتك ، دايرة مفاجأة لمالك ، ماتبعنيش امصطفى وتخسر عليا سورپريز ..

- مصطفى :

صافي واخا واخا ، انا انتسناك هنا ..

- شريهان : واخا ..

- دخلات شريهان لداخل ، ومشات نيشان للبيرو ديال ستيڤن ، فين كانت مخبية واحد طابلو كادو لمالك ، هزاتو بين يديها مغلف ، عنقاتو وتبسمات ... تنهدات تنهيدة طويلة ، حدران راسها هزات الكسوة يلاه اتكمل طريقها حتى جات عينيها فعينين عمرها شافتهم ، كتحقق فيها مزيان ...

- شريهان :

انت من دراري ديال هنا ، عمري شفتك واش جديد ؟

- قرب منها بشوية ساكت حتى قرب لعندها ..

- غادي تمشي معايا ..

- شريهان (بإستفهام ) :

كيفاش نمشي معاك ما (حسات بشيحاجة تحطات ليها على كرشها ... نزلات راسها بشوية كيبان ليها فردي فنقري ، بلعات ريقها قلبها كيضرب بجهد ) ش شكون انت وشنو بغيتي مني ، راه البوليس مطرقين البلاصة .. نقدر نعطيك لي بغيتي ..

- (تبسم ) :

نقد نشريك انت والبوليس ... غادي تخرجي معايا بلا صداع ، وغادي ديري لي ݣلت ليك ... ولا هاد العرس غادي يتحول لݣنازة ، غير بصبعي (هز واحد الجهاز فيدو فيه شارة خضرا ) الى هاد الشارة تحولات لحمر ... هاد المركز كامل اينفاجر بلي فيه ، لا حنا ولا انت ولا ماماك وخوك وخطيبك المصون وعائلتك كلها ، ايخرجو فالجرائد ... ويديرو ليكم مقبرة جماعية ، غادي ديري لي ݣلت ليك اه ولالا ؟

- شريهان (نزلات دمعة سخونة من عينها ، مافهمات والو شكون هدا وشنو بغا منها ) :

واخا واخا ، غادي نمشي معاك واخا ..

- حطات الطابلو من يديها ، مد ليها يدو بقات مدة كتشوف فيه ... وشدات فيه خرجات معاه من البيرو ، ضار بيها من باب أخور كيأدي للبلاصة فين موقفين الطوموبيلات ... فتح ليها باب رونج كحلة طلعات ، دموعها نازلين ، ضار بزربة لباب لاخور وطلع ديمارا مكسيري مخلي غير العجاجة وراه وصوت علي لي كان كيغوت بأعلى جهدو كيعيط بسمية شريهان ..

- دخل علي كيبان ليه مصطفى ومالك واقفين ، مشا عندهم نيشان وعلامة الإستغراب باينين على وجهو :

واش ماشي انت لي كنتي مع شريهان دابا ؟

- مالك (بإستفهام ) :

كيفاش مافهمتش ، مالها شريهان علاش فين هي ؟

- علي (مافهم والو ) :

عاد شتها ركبات فطوموبيل كحلة ، او واحد معاها انا عند بالي انت ...

- مالك (ماخلاهش يكمل كلامو مشا كيجري للفين موقفين طوموبيلات .. مصطفى دخل كيجري لداخل كيقلب عليها ، بان ليه طابلو محطوط ، خلاه وخرج قلب فݣاع لي شومبر والو ... جات عندو جوديا كتجري ..

- شنو واقع ياك لاباس ؟

- مصطفى (عقلو ايخرج ) :

شريهان مكايناش ، شافها علي راكبة فطوموبيل مع شي واحد ومشات ..

- جوديا :

كيفاش مشات ، دراري ديالنا كلهم لى برا حاضيين لي داخل ولي خارج ..

- مصطفى (بجهالة) :

كولي لكاع دراري يقلبو المركز كلو سفاه على علاه ...

- خرج على برا تلاقا مع مالك ، صدرو كيطلع وينزل .. :

مكايناش ، مكاينش الحس ديالها ، العساس ݣال بلي طلعات مع شي واحد داير كاسكيط كحلة ، وبلي ملامح وجها كتبان خايفة ..

- مصطفى (غادي جاي باغي ينتف راسو ) :

هادشي مايمكنش ، مايمكنش يكون كارلو مايمكنش ، خاصنا نشوفو الكاميرات بلاما يرض شي حد البال ... مخاصش مالين دار يرضو البال غير دابا ... أما راه كيبان ليا كولشي ايعرف .. جات عندو جوديا كتجري ..

- دراري كيقلبو ، خاصنا نشوفو الكاميرات ..

- مصطفى :

هادشي لي كنت ناوي ندير ، مالك فين بلاصة الكاميرات .. مالك مجاوبوش سبقو وهو تبعو كيجري ، شافهم ستيفن تبعهم ، دخلو للبلاصة الكاميرات .. كان واحد خدام تم غير شاف مالك او وقف ... مشا مالك للكاميرات رجع تصوير من الأول ، كتبان ليه شريهان ... جايا بشوية ، دخلات للمكتب ديال ستيڤن وهزات طابلو مغلف ، كانت كتبان فرحانة ، شوية بدا الطشاش فشاشة رجع التصوير ... كيبان ليهم واحد الشخص طويل داير كاسكيط وغير وشم لي كيبان فعنقو ملامح وجهو مخفية ، وكتبان ليهم شريهان شادة ليه فيدو وغادية معاه بكامل الإرادة ديالها ..

- ستيڤن (بإستفهام ) :

مالك شنو واقع ؟ فين هي شريهان ... كانت موحدة ليك مفاجأة وانا لي شرفت عليها بيدي ..

- مالك (رجليه فشلو ݣلس فوق الكرسي لي كان وراه ) :

ماعرفتش ماعرفتش ..

- مصطفى (غادي جاي باغي يحماق ) :

ماشي كارلو هدا لي خطفها ، مايمكنش يكون كارلو ... ومايمكنش ختي تمشي معاه بالإرادة ديالها ... قاطعهم دخول ديال جاكسون لي كيلهت ..

- لقينا 3 ديال القنابل فالمركز ، كنتسناو العناصر الخاص توصل ..

- مصطفى (بقا كيشوف فيه ) :

هددها هددها بينا ، باينة هددها بينا ... شكون هدا وكيفاش وقع هادشي ... كيفاش قدو يدخلو للمركز ويزرعو 3 ديال القنابل ... والكاميرات مامسجلين والو ، باينة ايكون واحد من دراري لي هنا مايمكنش ..

- ستيڤن :

هادي 3 يام ، باش واحد من دراري لي كانو تسجلو عندنا ، مابقاش رجع للمركز ..

- مصطفى : أيكون هو ايكون هو ..

- مالك (ناض بزربة) انا مغاديش نبقى كالس ، انمشي نقلب عليها ..

- مصطفى (بصوت مرتفع) :

فين فين اتقلب عليها خ (سكت كيفكر) بلاتي بلاتي ، واش شريهان كانت دايرة سلسلة مدهبة فعنقها ؟

- مالك (بإستغراب) :

علاش ؟ انا مارضيتش لبال ؟

- مصطفى (بترجي) :

حاول تفكر عفاك ، السلسلة لي كدير ديما فعنقها ... هاديك السلسة انا لي عطيتها ليها كادو فعيد ميلادها ، هي مافراسهاش بلي فيها جهاز جيپي إس ، ركبتو فسلسلة بلاما تعرف ، نهار كانت الحفلة اللولة فاش تلاقيتو بكارلو ... ونسيتو

- مالك : وشنو كتسنى سربي شوف فين هي ... جبد مصطفى التيليفون ، دخل للتطبيق خدمة ، بقا شوية عاد عطاه الإشارة ..

- مصطفى (مغوبش) :

طريق مارينا ..

- مالك : شنو كنتسناو ؟

- مصطفى (شاف فجوديا ) :

غادي تجي معايا ، جاكسون علم باقي العناصر باش يتبعونا ... لي مين هو يتكلف بالعناصر باش يفككو القنابل لي هنا ... علي انت تكلف بمالين دار واخا ..

- علي (معارف مايدير ) :

شنو غادي نݣوليهم ؟

- مصطفى :

كوليهم شريهان جاها ستريس ديال قبل الزواج ، هلات العرس ومشات للبحر يضربها البرد وبلي مشينا نرجعوها صافي ، مالك يلاه ، خرجو كيجريو من الباب لي خرجات منو شريهان ... طلعو فطوموبيلة مالك وشدو الطريق ..

_________________________

- شريهان (كتبلع فريقها) :

شكون أنت ؟ وسنو بغيتي مني واش كتعرفني ؟

- دييغو (زول الكاسكيط ) :

انا راجلك أحبيبة ديالي ، انا القدر ديالك لي اتكملي معاه حياتك ..

- شريهان : أش كتخربق ؟

- دييغو :

انا لي هنيتكم من كارلو ، انا لي خليت دجيكو يبيعو ... وخليتو يوصل كاع الوثائق للبوليس ، وهنيتكم من ديك الخطة لي كانت غادي تفشل ، كونما دخلت انا ... وجا الوقت باش ناخود الكادو ديالي ... والكادو هو أنت ، كارلو مسكين كان باغي يفوز بيك باغي يرجع الحب ديالو القديم ، حيت كتشبهي لإيمان انت هادشي عارفاه ، ولكن لي معارفاش هو حتى انا كنت كنبغي إيمان ، لي خداها مني كارلو وخدا كاع لي كنبغي ، ولكن انا غادي ناخود ليه ݣاع داكشي لي كيبغي ، أيام وانا كنخطط لهاد النهار ، مكانش يحسابلي ايجي وبهاد السهولة ، ولكن منكدبش لقيت صعوبة باش نجيبك ... وفالاخر هانتي معايا ..

- شريهان (بخوف كتشوف فيه ، نظراتو ليها ماشي طبيعيين ، كيبان بحال شي حمق ... غمضات عينيها وحلاتهم الدموع محبوسين ليها فحلقها ، واش هي صݣعة لهاد الدرجة ، باش يتسلطو عليها غير المرضى النفسيين ... كتفكر فمها خوها وفمالك وفرحتها لي ماكملاتش ، نزلو دموعها سخان ، حيت حاسة بلي هدا فايت كارلو بدرجات) ..

- دييغو (شاف فيها ) :

كتبكي من الفرحة ياك ابب ، واحد 20 دقيقة غادي نكونو فمارينا ، أنكونو فاليخت ديالنا ... لي غادي نمشيو فيه فرحلة طويلة ... غير انا وأنت ..

- شريهان :

شوووف ، خلينا غير نتفاهمو راه هادشي لي كدير فيه ماهواش ، أصلا انا مسلمة ومخاصنيش نتزوج واحد ماشي مسلم ، فهمتيني ..

- دييغو (كيضحك) :

غير هادشي ساهل حالو ، على قبلك ممكن ندير اي حاجة ، ممكن نبدل ديانتي على قبلك ، انت غير رتاحي حتى حاجة مغاتوقف بيناتنا ..

- شريهان (شدات على راسها ، كتحاول تلقى شي حل ولكن هدا مامعاه حتى حل) ..

واش نمشي هكا بهاد الكسوة ، خلينا انتفاهمو ..

- دييغو (خبط يدو مع الڤولون حتى نقزات) :

سدي عليا فمك ، مابغيتش نسمع حسك .. قربنا نوصلو وبلاما تحاولي معايا ، ولا مغادي يعجبك حال ..

- شريهان (بلعات ريقها وحدرات راسها كطلب الله يدير ليها تاويل ، كانت عايشة مرتاحة وفرحانة على قدها ، حتى ولات فعالم الجريمة عالم مكانت ضاربة ليه حساب نهائيا

_________________________

- جون ساق الخبر ، سيفط جميع العناصر او هو وراهم ... زهرة لي مافهمات والو من كلام علي لا هي لا العائلة ، الموسيقى حبسات كولشي حبس ..

- عمر : انا هادشي مداخلش ليا لراسي ، علي شنو واقع ؟ بلاما تحاول تكدب عليا واخا ..

- علي (كيحك راسو ) :

ماعندي منخبي عليك ، شريهان تخطفات ... ماعرفناش شكون ، مالك مشا هو ومصطفى وجميع العناصر ، لقاو 3 ديال القنابل مزروعين هنا و (تسمعات شهقة وراهم دارو بزوج كتبان ليهم زعرة واقفة وراهم سمعات كولشي ، مع شهقتها مع طاحت ) .. كولشي ناض كيجري عندها ..

- عمر (شدها هزها وݣلسها على الكرسي كيحاول يفيقها ) :

خالتي زهرة خالتي ، الله يرحم بيها الوالدين فيقي ..

- نزهة (بخوف) : شنو وقع مالها ، اش هاد النهار ياربي واش شي حد داعي فينا شنو واقع ؟

- بدات زهرة كتفيق شوية بشوية ... غير حلات عينيها وهي تبدا كتبكي وتغوت :

فين هي بنتي ؟ جيبو ليا بنتي علاش كديتو عليا علاش شكون خطفها هالعار شكون خطف ليا بنتي ..

- سكينة (بخوف) : كيفاش ؟

- أحمد : اشمن خطيف ؟

- سعيد : كيفاش خطفوها ، أش كتخربقو ..

- علي (شاف حتى عيا وعاود ليهم كولشي ) :

مالك هو ومصطفى تبعوها ، ماعندنا منديرو من غير كلنا نمشي لدار ونتسناو شي خبار ..

- أحمد (مغوبش) :

شيحاجة كاينة مابغيتوش تعاودوها لينا ياك ..؟

- زهرة (كتبكي وتنوح ) :

هادشي لي وقع لبنتي عندو علاقة بداكشي لي وقع ليها فالمغرب ياك ياك ؟

- سعيد : أش وقع فالمغرب ؟ فهمونا الله يرحم بيها الوالدين ، راه دخنا مابقينا فاهمين والو ..

- عمر :

نديو خالتي زهرة لدار ، وديك الساع نهضرو خاصنا نكونو مجموعين دابا ، من هنا الفوق ماعرفنا شنو غادي يوقع ..

_________________________

- مراقب اليخت ، مكايبانش ليه الشارع ، ولا طوموبيلت دييغو لي وصلات ، نزل من طوموبيل ، ضار من جهة الباب حلو ، مهبطها كتعطر فجلايلها ، مامسوقش نهائيا لبكا ديالها ولا طليب ديالها ، هز يدو حتى لسما ونزل بيها على وجهو ، بطرشة خلات جنب فمها يتجرح ... حسات بالحݣرة وحسات بالوحدانية ، عطاتها غير البكا ... بنسبة ليها صافي هادي هي الأخرة ليها ، غادي بيها لجهة اليخت ... طلعها ، منظر لي شافو لي مراقبو من بعيد خلاه يتشوكا ..

- كارلو (مغوبش) :

لا مايمكنش لا لا مايمكنش ... صفارات البوليس تسمعات فأنحاء مارينا ، دييغو لي ماعرف باش تبلى كيفاش عرفو بلاصتهم وكيفاش تبعوهم ؟ شاف فشريهان عينيه خارجين حمرين ، مشات عينيه لسلسة لي فعنقها ، بدون سابق إنذار جرها من عنقها حتى جرحها ... درها فيدو كتبان ليه نقطة كحلة كتسني ، عرف فيها جهاز تتبع ...

- دييغو (بغضب) : تفو ، بجهالة رماها فالبحر ..

- شريهان (كتبكي حيد ليها اعز حاجة عندها ، سمعات صوت البوليس ، كيبانو ليها الضواو ... كتغوت على حر جهدها خصوصا فاش بانت ليها طوموبيلة مالك ، وبان ليها خارج كيجري هو وخوها ..

- مااااااااااالك ماااااااااااالك ، مصطفىىىىىىىى مصطفىىىىىىى ، خويااااااااااا انا هنا أخويااااا هناااااا ... كتأشر ليهم بيديها ، لي تجرات من دييغو ، والفردي لي تصوب جهة راسها ..

- دييغو (بأعلى صوتو ) :

يقرب ليا شي واحد نقتلها ، يقرب ليا شي واحد نقتلها ..

- مالك (هاز يديه) :

عفاااك عفاااك ، غير حط السلاح مايكون غير خاطرك شحال بغيتي نعطيوك؟ ... جوديا هازة الفردي ديالها مصوباه جيهتو ، العناصر كلها كانت على أتم الاستعداد ، جون لي وصل حتى هو ..

- دييغو :

واش انتوما مراض عند بالكم باغي الفلوس ، هههههه انتوما معارفينش شكون دييغو ، انا هو السباب باش شديتو كاع الوثائق على كارلو ، انا بسبابي قديتو تهناو منو ... انا انا ، وجا الوقت ناخود الحبيبة ديالي ، إيمان ماتت خداها مني كارلو ، ولكن القدر رجعها ليا انمشيو انا وياها ونبداو حياة جديدة ، غير حنا بزوج بينا فقط ..

- فهاد الوقت كان كارلو ، كيحاول ما أمكن يوصل لليخت ..

- كارلو : مايمكنش مايمكنش نخليك ضيعي من يدي بحال قبل مايمكنش ، خاصني نزلك خاص نزلك قبل الوقت ..

- جرها دييغو للمقصورة ، فهاد الوقت طلع كارلو لليخت ، وفنفس الوقت خدم الموطور لليخت وبدا كيتحرك ، وهو موجه سلاحو لشريهان ..

- مالك (كيغوت ربي لي خلقو ) :

ديرو شيحاجة ، كيبعدك ديرو شيحاجة راه غادي يديها ..

- جون :

منقدوش نغامرو بحياتها ، راه موجه ليها سلاح ، اي خطوة منا ممكن يتيري فيها .. (امر واحد من العناصر باش يجيب ليه معلومات على دييغو) ... تسمع صوت الما كولشي دار كيبان ليهم مالك نقز فالما ، فهاد اللحظة بضبط كيتحركو فيك جميع الأحاسيس مكتعرف شنو دير ..

- دييغو (كيضحك) :

حبيبك كيحاول يتبعنا مسكين ، ولكن غير تهناي غادي نهنيك منو ... دفعها طاحت على واحد الفوتوي ، غادي لجهة لوخرا ناوي يتيري فمالك ..

- كارلو (بضحك مستفزة ) :

شحال هادي ماتلاقينا ، كيجاتك المفاجأة ؟

- دييغو (مامتيقش عند بالو بلي مات صافي ) :

مايمكنش ، مايمكنش ..

- كارلو :

عند بالك بلي مت ، معارفش شكون هو كارلو كابوني ... انا الأصل والأصل مكايموتش ، عطاه بالبونية تلاح من يدو الفردي ، ناض دييغو بالخف ، رجعها ليه بالبونية لوجهة حتى طاح ، وتلاح من جيبو جهاز تحكم فالقنابل ، كان كيعطي إشارة بلي بقات 4 دقايق ... لا دييغو ولا شريهان لي ناضت كتجري بغات دير شيحاجة باش تنقد راسها ، مكانو عارفين بلي اليخت كانت فيه قنبلة مفخخة مبرمجة انها تنفاجر من بعد 4 ديال الدقايق ...

- ضربة فدييغو وضربة فكارلو حتى رجعو كلهم دمايات ، شريهان كتشوف اليخت غادي وكيبعد وكيزيد السرعة ديالو ، دخلات كتجري للمقصورة ولكن معارفاش كيفاش تحكم فيها كيفاش توقفو ولا ترجعو لمارينا ، ولات حالتها ، عرقانة داك شوية ديال المكياج لي دارت كلو خسر ، الفوار تحيد ... رجعات لعندهم كتحاول تشير للبوليس لي كانو ركبو فوق سكوتر وخوها معاهم ... كان كيبان ليها حل واحد هو تنقز ، واخا كان غارق ولكن هدا هو الحل لي عندها ، سكوترات ديال الما تحركو بالبوليس ، ومالك لي كان هدف واحد عندو هو يوصل لليخت وينقدها ماحس بالسكوتر حتى وقف حداه ويد مصطفى شدات ليدو وركبو وراه ...

- ستغلات الفرصة ديال المادبزة لي نايضة بين كارلو ، او وقفات على الحافة ديال اليخت ، باش تنقز فرمشة عين تسمع صوت إنفجار فودنيها ، حسات بالجسد ديالها تهز وطار ... مغمضة عينيها مستسلمة للألم لي حسات بيه فراسها وظلام لي غشا عينيها ...

________________________

- فرمشة عين كولشي وقف ، بحال دنيا وقفات ... اليخت لي كان قدامهم تهز ونفاجر ، السكوتر ديال مصطفى وقف كان باقي ليهم غير شوية ويوصلو لعندها ... الدنيا ضارت بيهم ، او قلوبهم حتى هي وقفات ، مالك لي صدمة شللات ليه رجليه ويديه شوميز لاصق عليه ، وسعرو لاصق على جبهتو ... كانت حالو ، مصطفى مكانش قل منو ... كولشي وقع فرمشة عين ... مالك كلمة وحدة كتردد ففمو ، مايمكنش مايمكنش ..

___________________

لومبيلونص كانت واقفة ، ومصطفى لي عينيه كيترعدو وفيكسيين على نقطة وحدة اليخت لي نصو طار ونصو هازو الما ، فرق الإنقاد الصحافة كولشي كان ... دموع مصطفى لي نازلين سخان بحال الشتا بسكات ، هادي ساعة ساعة دازت ومزال مالقاو والو ، لا شريهان ولا كارلو ودييغو .. هز راسو بدون وعي كيشوف فشخص واحد .. وقف مخلي جوديا لي كانت حداه كتشوف فيه ، ومشا قاصد داك الشخص حتى وقف قدامو ونطق :

- رتاحيتي ياك ، حسيتي براحة دابا عجبك الحال ، ݣلتي ليا ختي اتخرج سالمة من هادشي ، وانا دابا ختي مالقيتهاش ، ختي مشات ، شنو غادي نݣول لمها لي كتسناها ، شنو انكول لعائلتها ، ختي اليوم كان عرسها ... وفبلاصة مانعطيها لراجلها ، داها البحر .. ختي مشات فرحان دابا عجبك الحال ياك ..

- جون ( بأسف) :

مصطفى سمع (مجا فين يكمل كلامو حتى نزل عليه مصطفى بالبونية لوجه طيحو ، نزل عليه محاسش براسو ، غير كيضرب كيخزي الغضب لي كيحس بيه ، كيضرب ويݣول ماضربت ، تجمعو عناصر من البوليس هزوه من فوقو ، كيتركل ويغوت ربي لي خلقو ) ...

- جبدو ليا ختي ، بغيتي ختي رجعووليا ختي رجعو ليا ختي ، مايمكنش اعباد الله مايمكنش ختي تموت ... راه اهي لي عندي الواليد خلاها ليا أمانة ، راه واخا تبان ليكم قوية راها خوافة ... ختي هي لي عندو بغيت ختي اعباد الله بغيت ختي ...

- مالك كان ݣالس وساهي ، مصدوم كيشوف فيه وساكت ، دموعو بوحدهم كيترجمو باش كيحس ، جوديا لي دموعها نازلين تفكرات خوها وموتو ، كولشي رجع عليها ... الصحافة كانت كتصور كولشي ..

- مصطفى (طاح على ركابيه) :

ختي مايمكنش تخليني ، مايمكنش تموت مزال مدارت مشروعها ماحققات أحلامها ، ماتزوجات ، ومامشاتش تخطب ليا ... مايمكنش تموت ختي واش فهمتو وراه مايمكنش (كيغوت ربي لي خلقو غواتو لي خلاه يتصاب بإنهيار عصبي خلا الإسعاف تتدخل باش تسعفو) ..

- الفيلا لي كانت كلها نشاط ، وكلها حب وكلها فرحة ... رجعات كلها حزن ، رجعات اجساد بلا أرواح ، أم لي كانت ضحكتها كتزعزع الدار ، الأم لي يدها كانت كتخرج الشهد ولات مكتحركش ، ... هاد الام لي كانت هادي 3 يام فرحانة اليوم يلاه خرجات من سبيطار ، مكتهضرش نهائيا غير ساهية وكتشوف ... الحبيب لي كان فرحان وغادي يوحد للعرسو ، غير ساد عليه مكايدوي مع حتى واحد ... الأخ لي جرحاتو مو بشتى الكلمات ، هز حوايجو وهاهو ݣالس فدار مالك وساد عليه ، العائلة كلها ترونات ... علي لي كايجي للقهوة ايطل ويرجع ، دموعو لحد الساعة مانشفوش ... سكينة لي مابقات قادة لا تاكل ولا تشرب ، حاضية غير البكا وهازة تصويرتها وتصويرة صاحبتها لي إبتسامتها بحال الشمس وكتبكي .. كولشي ضاع حتى حاجة مابقات بحال كيف كانت ، العائلة لي كانت فرحانة اليوم تشتتات ..

_____________________

- كان واقف فجردة ، مقادش يدخل ولا وجهو يشوف وجه مو لي جرات عليه ، بسبابو وصلو لهادشي ، بسبابو مو عواجت ليها يدها ومقاداش تحركها وخاصها ترويض باس ممكن ترجع كيف كانت ، هو السباب فهادشي وحالف مايوىي وجهو لمو حتى نهار يلقا ختو ..

- مالك (خرج عندو ، وعلامات تأمل على وجهو ) :

أمضرا ، كاين شي خبار جديدة ؟

- مصطفى (وجهو صفر ،تنهد تنهيدة طويلة) :

هاد الصباح

هشام (كيفكر ) :

- انا حاجة وحدة مابغات تحيد ليا من بالي ، غير هاد البنت والحالة لي لقيناها فيها ، على سوية كانت تقد تموت ..

- أنور : بصح عندك الحق ..

_____________فلاش باك

- أنور (بتدمر) :

فيا الجوع أصاحبي ، مالقيتي فين تجيبنا غير لهنا .. خلينا نݣليو خلاص ناكلو هادشي لي عطاونا الناس ..

- هشام :

صبر شوية ، وحمد الله وشكرو ، جاب الله خدينا هاد البريكول من عند السيد كنعرفو ، واخا ماعطاناش شيحاجة كثيرة ، ولكن المهم بعدا نقدو ندوزو بهادشي واحد يوماين ، الحمد لله لي خدينا مناكلو ... احي هنا كيبان ليا خاوي ... ݣلسو فبلاصة كانت خاوية وبعيدة على ضيور ، فوق الرملة ... يلاه بداو كياكلو ..

- هشام (بشك ) :

كتسمع شيحاجة ؟

- أنور (زݣا من الماكلة كيحاول يسمع) :

بحال شي صوت ... بحال شي بكا لا ؟

- هشام (رجع داكشي لي كان كياكل للميكة ، او وقف كدور عينيه ، وقف جامد فبلاصتو من داكشي لي كيبان ليه ، بلاما يهضر غادي جهة شيحاجة بانت ليه مليوحة ، مغطيها الرملة وربيع .. صوت انين ، منين وصل وقف متراجع خطوة اللور شاد على فمو ..

- انور (لحق عليه) :

ياك لاباس ؟ اش واقع شنو شفتي ؟

- هشام (بلاما يجاوب نعت ليه) :

أنور (شهق وخاف ) :

زيد فحالنا اخويا مقادين على مشاكل زيد ..

- هشام مداهاش فيه ، قرب من الجثة لي قدامو ... وجه مغطيه الشعر ، وصوت انين ... بشوية ݣلس قفازي ... حط يدو على بلاصة النبض ، لقاها حية مزال ... زول الشعر على وجها ، كيبان ليه وجه كلو جراحي ، جراحي غاديين بالما من الملوحة ديال البحر لي شربو ، كسوة كلها مقطعة ..

- هشام (ضار عند انور ) :

البنت مزال عايشة ، خاص لي يعاونها ... مايمكنش نخليوها هنا ..

- انور : عيط للبوليس اخويا ، ويلاه نمشيو ..

- هشام (تعصب) :

اتزيد كلمة وحدة انضربك حتى نوضرك ، ترجع اصاحبي شوية وانت خايف غير من ضلك ..

- هشام رجع شاف فيها ... نزل براسو كيحاول يسمع واش كتݣول شيحاجة .. ، بصعوبة قد يميز جوج كلمات :

ف ف في ا ، ل لع طش ..

- هشام (بصدمة) :

مغربية أصاحبي ، كتهضر بالمغربية ... عطيني قرعة ديال الما سربي ، مد ليه انور القرعة ديال الما ، بصعوبة قدؤ يشربها ... بلل ليها غير فمها صافي ..

- هشام :

اجي أجي عاوني زيد سربي ، خاصنا نوصلوها لجهة الشارع دغية ..

- انور :

متݣولياش اندويها معانا ، متكوليش اتركيها فطوموبيلت جاز راه شديتها من عندها غير بزز واش من نيتك ؟

- هشام :

عندك جوج خيارات ، يا اتزيد تعاوني يا انخلي دار عشتك شنو بان ليك ..

- أنور (بخوف) :

نعاونك نعاوك ... علاش لا

_____________________

- نهاية الفلاش باك

- انور :

دابا كنسولك شنو المعمول ؟ قاطعو صوت جاي من الداخل ... ناض هشام بجري تابعو انور .. دخلو عليها ، كتبان ليهم حالة عينيها شافت فيهم بعياء ..

- هشام (بإبتسامة) :

على سلامتك كيف بقيتي ، شوية ؟

- (لسانها تقيل) :

شوية ، را راسي كيضرني بزاااف ... وداتي حتى هي ، وجهي كيضرني ، شنو شنو وقع ليا ؟

- أنور : وصراحة حنا خاص نسولوك شنو وقع ليك ؟

- هشام (غمزو باش يسكت) :

انت غير ولي لاباس ويكون خير ..

- شكون انتوما ؟ واش واش كتعرفوني ... ؟

- هشام :

لا صراحة مكنعرفوكش ، واش عارفة شنو وقع ليك ... شنو سميتك ؟

- (سكتات وغوبشات حيت ضرها راسها) :

لا معاقلة على والو ، ومعارفة والو ... معرفتش شكون انا ، شنو سميتي ؟ ماعرفة حتى حاجة ؟ شكون انتوما منين معارفينش شكون انا ؟ وانا فين أش جابني لهنا ، اشمن مدينة هادي ، علاش انا معاقلة على والو ؟ بدات الضبابة كتبان ليه من جديد ، حتى مابقاتش حاسة بشنو كيدور حداها ...

- أنور (شاف فهشام ) :

السيدة فاقدة الذاكرة ، معاقلة والو .. وحلة هادي واشمن وحلة ، دابا أشنو المعمول ... ضروري خاصنا نلقاو شي حل ..؟؟!!!

- شاد راسو مقابل مع البحر ... اللحية طوالت ليه ، ضعاف الماكلة مابقاش كياكل ..

- جوديا : أتبقى بحال هكا ؟

- مصطفى (تنهد تنهيدة طويلة) :

وشنو بان ليك ؟ شنو غادي ندير ، سيمانة هادي ... سيمانة دازت ومكاين حتى جديد نهائيا ، كولشي سالة دراري رجعو لبلادهم ... القضية لي كانو خدامين عليها تحلات وتهناو ، وانا لي ضحيت بختي انا عايشة فالعذاب ، شفتي شفتي على زهر كيف داير ..

- جوديا :

انا عارفة بلي هادشي لي غادي نكوليك ، يقدر مايعجبكش ... ولكن راه لي غرق راه(خنزر فيه وناض)

- مصطفى :

انا حاس بلي ختي مزال عايشة ، وغادي نبقى نقلب عليها حياتي كاملة ، واخا نعرف نفني عمري كلو وانا كنقلب عليها ، الخدمة ديميسيونيت منها ..

- جوديا ( بصدمة ) :

اويلي وعلاش ، اش كتخربق ؟

- مصطفى :

الخدمة لي خرجات على ختي ، ماعندي مندير بيها ... جوديا حنا تلاقينا فظروف خايبة بزااف ... ماشي وقتو ولكن نقدر نكوليك بلي بغيتك اه بغيتك فهاد الفترة ، كنتي قريبة ليا وعمرك خليتيني ، ولكن منقدش نواعدك بوالو ... صعيب صعيب نبدا حياتي ونكون أسرة ، وانا مالقيتش ختي ... مايمكنش نكمل بحال الى ماوقع والو ، مايمكنش نكمل والواليدة مكتهضر معايا ... انت تستاهلي كل خير ، كنتمنى ليك السعادة فحياتك ، ومن الأحسن مانبقاوش نهضرو ، حسن ليا وليك تهلاي فراسك بسلامة .

- خلاها واقفة مصدومة ، عينيها غاديين بدموع ... شير لطاكسي ركب ومشا ..

_____________________

- أنور(غادي جاي) :

دابا شنو غادي نديرو فهاد الوحلة هادي ، علاش ماعلمناش البوليس ؟

- هشام : منيتك ، نمشيو عند البوليس برجلينا ... حنا لا وراق لا والو ، بغيتي يشدونا ..

- أنور : وشنو المعمول دابا ، كنا جوج صدقنا 3 ، هاد البنت لي ناعسة لداخل شنو غادي نديرو معاها يلاه ..

- هشام : بغيتينا نخليوها ، وحدة لقيناها مسكينة مرمية جنب البحر ، مضروبة كلها مجروحة ، نخليوها ... وݣاع منين من بلادي والله منخليها ..

- أنور : وشنو المعمول ، مابقات لينا لا خدمة لا والو ، بقات لينا 3 يام هنا ، الفلوس باااح مشاو .. السيدة معاقلة على والو سيمانة هادي وهي معانا ، لحد ساعة كتاكل وتنعس معارفة والو ، حتى الماكلة غير جاز لي كضيپانيني ..

- هشام : عندي فكرة واعرة ..

- أنور : أتينا بيها يا أبو الأفكار ..

- هشام :

نمشيو لسفارة المغربية ، ينزلونا للمغرب هدا هو الحل .. واحد السيد تم مغربي كنعرفو نهار جا عندنا الوكالة قضيت ليه غراض حسي مسي ، هو كان عطاني ورقة باش نقد نݣلس هنا ، ضريف بزاااف مغانوحلش معاه بالفرحات عليه يوقف معايا

- أنور (خنزر فيه) :

شوف انا راه منزلش لبلاد والله لا مشيت ..

- هشام :

لا مغنزلوش لبلاد ، عندي واحد خالتي فكازا نمشيو لعندها ، بينما لقينا شي خدمة ..

- أنور (أشر ليه لبيت) :

وهادي انديوها معانا ، معارفين حتى سميتها ، وبأشمن صفة ؟

- هشام :

انت غير سكت وانا غادي نتكلف ، انديرو راسنا تسرقنا ومشاو لينا وراقنا ، وهادي ختنا ، جينا حاركين للفرنسا ، وتقطع بينا الحبل .. انت غير سكت أصلا هوما بالفرحات عليهم ينزلونا للمغرب ... باغيين غير يخويو البلاد من المسلمين .. وكيف قلت ليك السيد أيوقف معانا ..

- أنور : واخا واخا أهشام انا انتبعك فهاد الهبال ، حتى نشوفو فين غادي توصلنا .. والى سولوك سنو سمية ختك ؟؟

- هشام (كيفكر) :

أنݣوليهم سميتها ثورية ثورية نادر ..

________________________

الحياةُ رحلةٌ قصيره ، نحنُ نعبُرُها .. نبكي أحيانًا .. و نضحكُ أحيانًا .. ونحزنُ أحيانًا ، نلتقي فيها أحبابًا .. و نودعُ أخرين ، وقد تتجمدُ مشاعِرُنا ، فلا يكون لصوتُ مشاعِرُنا أي صدى ، بل هُنالكِ أوقاتُ نشعرُ فيها، أنها النهاية ، ثمَ نكتشِفُ أنها البداية ، و هنالكِ أبوابٌ نشعرُ أنها مُغلقة ، ثُم نكتشفُ أنها المدخل لحياة جديدة ، وأمل آخر نتمناه .

_____________بعـد مرور عام

- إشراق :

يلاه أبنتي ، سربي باش يوصلك باباك عمر للمدرسة ..

- عمر (كيقاد حوايجو) :

غادي ندوز لدار ، خالتي زهرة اليوم غادي تنزل للمغرب هي ومصطفى ..

- إشراق : صافي غادي يمشيو ؟

- عمر :

اه صافي ، مابقاتش قادة تݣلس ، بغات ترجع لدارها ... عيا فيها الواليد هو وعمي سعيد ولكن والو ، الواليدة حتى هي او والو حلفات واش تݣلس ..

- إشراق :

والله يحسن عوانهم الصراحة راه صعيبة ، واش مكاين حتى خبار ؟

- عمر :

كون بغات تبان شيحاجة ، كون بانت شحال هادي ... عام داز او والو ، بغيتك تشوفي حالة مالك ... ماتبغيهاش لعدوك ، مابقاش كيعمر معانا نهائيا ... غير ساد عليه فدارو كولنا حالتنا حالة ، حتى واحد فينا مامرتاح ..

- إشراق :

بغيتك تشوف سكينة مسكينة ، بالكشايف باش كيخرجها سعد ويفوج عليها ، هو براسو مابقاش كيف كان داك الضحك مابقاش ، من نهار مشات شريهان تقلبات حياتنا ..

- عمر :

راه هي لي دخلات الفرحة لدار ، كانت السبب باش تعارفنا وباش ءكينة تزوجات بسعد ، من نهار دخلات وحنا ضاحكين وحياتنا زوينة ، ودابا رجعات حياتنا رمادية غير غاديين مع دنيا هكاك وصافي ... سمحيليا بزاف كنت بغيت ندير ليك عرس ولكن ..

- إشراق (حطات يدها على فمو ) :

متݣولش هكاك ، شرؤهان راها بحال ختي ... المهم زواج راه تزوجنا ، شيحاجة أخرى ماعندي مندير بيها ، وحضامة ياسمين خديناها هدا هو الأهم ..

- عمر (عنقها وباس ليها راسها ) :

اندي ياسمين وشمس لقراية ، وندوز عندك باش نمشيو نتسيفطو مع خالتي زهرة ومصطفى ..

- إشراق : واخا صافي ، يلاه حتى لمن بعد إن شاء الله ..

- دا عمر ياسمين وشمس لقراية ، وبقات إشراق فدار ، حتى يسالي عمر ويخلط عليها ..

________________________

- جوديا (عينيها مغرغرين ) :

صافي غادي تخليني ، غادي تسمح فيا ؟ انا صبرت هادشي كامل غير على قبلك أمصطفى ، كنتي باغي تبعد عليا وماخليتكش وانت باغي تخليني ..

- مصطفى (كيشوف ليها فعينيها) :

جوديا ، الواليدة اتنزل للمغرب ... منقدش نخليها حتى انا خاصني نزل ، انا مغادي نفرض عليك والو ... انت عارفة كولشي عارفة بلي كنبغيك كثر من راسي ، وعارف بلي وقفتي معايا وعمرك خليتيني ... كنقلب على ختي وقلبتي معايا ، انا مغاديش نكوليك خلي عائلتك واجي معايا ، مغانكوليكش سمحي فخدمتك واجي معايا وبني حياة اخرى فالمغرب ، أما باغيك اه وكنبغيك أه وباغي نكمل معاك حياتي ... ولكن مانقدش نݣلس هنا ..

- جوديا ( دموعها نازلين) :

وشنو المعمول شنو هو الحل ؟

- مصطفى :

الى كنا مكتابين لبعضياتنا ، غادي نتجمعو واخا طوال الزمان ولا قصار ، تهلاي فراسك بزاااف ... وديري فبالك يلي كنبغيك بزاف ، وغادي نبقى كنبغيك حياتي كلها ... ولكن خاص نهبط المغرب ، خاص نكمل تقلاب على ختي ..ضروري .

- جوديا (مسحات دموعها) :

واخا واخا أمصطفى ، انا مابقيش انجري وراك ... الله يسهل عليك ، دير لي بغيتي ... طريق السلامة ، خليت ليك الراحة بسلامة ... خلاتو واقف ومسات كتجري ركبات فطوموبيلتها ، ديمارات ومشات ..

______________________

- دفع الباب ودخل للمكتب ديالو ، كان ݣالس غير شافو وقف ... جا عند وعنقو ..

- ستيفن : ݣلس .. تشرب شيحاجة ؟

- مالك ( لابس تريكو ݣري مع سروال دجين كحل وسبرديلة )

لا مابغيت والو ، ماعنديش الݣانة لوالو .. جيت عندك كنت محتاج نهضر معاك ..

- ستيڤن : ياك لاباس ، شنو واقع ؟

- مالك (هز راسو فيه تنهد تنهيدة طويلة) :

حطيت الأستقالة ديالي فالوزارة ..

- ستيڤن :

لا مايمكنش ، من بعد هاد السنين وطموح وتمارة ، كتخلى على الوزارة ؟

- مالك :

اه ، تخليت عليها ، بسباب هاداك المنصب ... وبسباب هاد المركز عرضت حياة عائلتي للخطر ، وفقدت البنت لي بغيتها من كل قلبي ، مابقاش ليا جهد للهاد المنصب ... كاين من غيري لي مؤهل ليه وحسن مني ، بغيت نسالي باش نقلب مزيان على شريهان ..

- ستيڤن :

مزال مايأستيش ، عام راه بزاااف ... كون بغات تبان كون بانت ..

- مالك (غوبش) :

عام ولا عامين ولا 10 سنين مكايهمنيش ، مغاديش نيأس ... مكايناش جثة إذا كاين امل ، البلاصة لي نفاجر فيها اليخت مكانش بداك العمق ومكاينش فديك البلاصة لحوت ، باش نكولو الجثة يكون كلاها الحوت ، إذا كاين امل أستيڤن ، وانا كلفت واحد المحقق خطيير ، باش يقلب عليها ... يقلب ففرنسا إيطاليا إسپانيا المغرب فينما كان المهم نلقاها ...

- ستيڤن :

المغرب موحال ، من غير الى تم الترحيل ديالها ، ولكن كون كانت عايشة امالك ، ولقاوها السلطات ولا لقاوها سي ناس مثلا ، راه اتسوني من بعد ، اتجي تقلب عليكم ... مايمكنش شي حد يختافي هاد العام كاملو من غير الى كان معاقل لا على راسو لا على غيرو ..

- مالك (شاف فستيڤن ، بحال الى نبهو لشيحاجة ) :

عندك الصح ، هادي مافكرتش فيها نهائيا .. قاطعهم سونيت ديال تيليفون مالك ، جبد التيليفون وساف فستيڤن ..

- هدا علي ..

- ستيڤن (باللهفة) : جاوب خلاص .. يقد يكون عرف شيحاجة

- مالك : وي علي ؟؟

- علي (كلامو مزروب مكايطمنش) :

أجي عندي دابا ، خاصك تشوف شيحاجة ، دابا تكون عندي ..(قطع عليه)

- مالك (ناض مزروب) :

ماعرفتش شنو بغاني ، كاليا جي دغية ..

- ستيڤن :

سير دغية ، وباشما كان علمني ..

______________________

- وصل مالك للقهوة عند علي لقاه كيتسناه ..

- مالك (بقلق) :

شنو كاين ياك لاباس ؟

- علي :

فرح البنت لي كانت مشدودة مع البنات ، مزال لدابا انا وياها على تواصل ، المهم بلاما ندخلو فتفاصيل ، سيفطات ليا واحد الڤيديو ، وخاصك ضروري تشوفو (جبد التيليفون ... كيقلب على الفيديو) ..

- مالك (بتوتر) : سربي ..

- علي (مد ليه تيليفون) :

هاك شوف وحقق مزيان ... خدا مالك تيليفون ، الڤيديو كان ديال واحد العرس ، كيبانو ليه طوابل فيهم الناس ، الكيسان وطباسل ، وموسيقى مغربية ... شوية وقف صف ديال السرباية بنات ودراري هازين الطباسل كبار ديال الماكلة ، وبداو كيحطو ... مالك كان مفيكسي عينيه مع الفيديو ، حتى تهز قلبو من بلاصتو ... حس بدنيا ضارت بيه ، غير علي لي شد فيه وجر ليه الكرسي ݣلس ، بلع ريقو ... هز عينيه فعلي ورجعهم لتيليفون ، مايمكنش مايمكنس هادشي لي كيشوف ..

- مالك (قلبو كيضرب البرودة طالعة ليه مع رجليه ، شاف فعلي ) :

مايمكنش ، هي مايمكنش تكون كتشبه ليها ... هي يااااك هي شريهان ياك ..؟؟

- فحي شعبي بمدينة الدار البيضاء ... فدار كتكون من زوج بيوت كوزينة وطواليط ، المراح فيه 3 ديال السدادر بطلامط ديال الموبرة فصفر والكحل ، طبلة الوسط محطوط عليها بلاطو ، فيه قرعة ديال الما وكاس ... الدار كامت مصبوغة بالبيج ، صباغة ديال الزيت ... التلفازة كانت شاعلة ، فوق من السدادر مجبدة رجليها ، لابسة كولون كخل وتيشورت بيضة ، شعرها جامعاه بزيف حياتي ، وكتفرج ... تحل باب الدار ودخلات بنت طويلة ، شعرها أسود مزرق ، لابسة جلابة هازة تقدية فيديها ..

- ناري ياختي الخضرة غالية بزااف ، جبت اشوية شوية من الحاجة حتى لنهار الأحد ونمشيو للمارشي ..

- انا راه مافيا لي يوقف فالكوزينة ولا يطيب ، اغير نصبي الغدا انت وانا نصب العشا ..

- صافي واخا ، انجيب الخضرة نقيها هنا ، دخلات للكوزينة جابت بانيو خاوي ، وبانيو فيه الما او واحد الشبكة ... حطاتهم فوق الطبلة حيدات جلابتها وݣلسات ..

- شفتي الڤيديو لي ضاير ؟

- (هزات فيها عينيها بإستغراب) :

أشمن ڤيديو تاني ؟

- ياويليييي يا ثورية واش انت عايشة معانا ولا مع غانا ؟ الفيديو لي كيدو ديال العرس الاخر لي كنا فيه فقنيطرة ..

- ثورية :

سناء راكي عارفاني ماعندييييش مع داك تخربيق ديال الكروبات ، ماشفت حتى فيديو انا ، حتى هداك عرس يدويو عليه الناس ، ماخلصونا حتى خلاصنا مزيان ..

- سناء :

شكون سبابنا ياختي شكون ؟ ياك غير أنور ... حݣا والواد العريس ولد عمت مو ، ريحة الشحمة فشاقور ، غادي بينا باش يبان ...

- ثورية :

وعرفتي ويسيق ليه الخبار فؤاد قفرها .. يݣوليه دا ليكيپ بلا خبارو ..

- سناء :

وهو دانا غير حنا ، وصحابو لي كيعرف صافي .. المهم ماعليناش ، الالة واحد الڤيديو ضاير مصورينا فيه ، وأنا شاكة غير فديك ليلى ، حيت هي لي خلاتنا كنحطو فالماملة وهي مقابلة الݣروپ ..

- ثورية (تقادات فالݣلسة مغوبشة) :

هاديك خيتي راه كتقلب عليا نخسر ليها لافيشور ديال كمارتها ، انا راه مزيانة ولكن فعايل بنت الحرام ماعنديش معاهم .. باش تصورني وتحطني فالأنترنت راه انضرب ليها أكبر طر فكازا ، خبارها يجيبوها الأخرييين ..

- سناء :

صافي خليها عليك مقادين على صداع أختي ، هالعار نتكفاو غير مع طرف ديال الخبز ... وزايدون مالها صوراتنا عريانيين ، خدامين تمشي تعاودها لجهة ضاراها .. دازك انت راسك شوية بعدا ، خاصك تشوفي الطبيب أصاحبتي ..

- ثورية :

حيدي عليا أشمن طبيب ، ياك مشينا لسبيطار مدارو ليا والو ، ݣاليك حݣا راه غير طونسيو هداك يمكن ..

- سناء :

ولا راه خاصك إختصاصي ، وديري راديو ..

- ثورية :

إختصاصي راه ب 400 درهم يالالة ، وحنا تابعنا الكرا والما وضو .. صافي نساي عليا ..

- سناء :

الأموبل لي حدانا كملوه ، من هنا لسيمانة تلقايه تكرا ..

- ثورية :

بحال والو يكريوه غير البالسية ، يجيهم قريب لمارشي ولكولشي ... شوفي الأحد الجاي إن شاء الله انخبز واحد طرح ديال المسمن ، ونمشيو انا وياك وهشام وأنور لعند خالتي مينة ، شحال هادي مازرناها مسيكينة ..

- سناء :

وياااه توحشتها الصراحة وتوحشت معيورها ، امع الخدمة هي لي شداتنا وصافي .. يلاه انا نوض نرض طاجين وندوز دوك الماعن ونجي ..

- ثورية :

منين تكوني جايا جيبي ليا معاك تيليفوني ، راه فوق الكوافوز كيتشارجا .

- سناء : وااخاااا ..

________________________

- كولشي تجمع فالڤيلا ، باش يتسيفطو مع زهرة او مصطفى ، نزهة دموعها هابطين بحال الشتا ، مساخياش بزهرة حاسة بروحها اتزهق ... كولشي مساخيش بزهرة المرأة لي كانت ضاحكة ناشطة ، ولات جسد بلا روح ..

- نزهة :

حرام عليك اختي ، اش اديري فالمغرب .. اتبقاي بوحدك تما ، حنا هنا مزال مجموعين ..

- زهرة (تنهدات تنهيدة طويلة) :

مابقيتش اختي حملت هاد البلاد ، بغيت نرجع لداري حتى الى مت اختي نموت فداري ..

- أحمد : الله ينجيك ويطول عمرك ..

- زهرة :

يطوال حتى يطوال اخويا أحمد ، من ورا بنتي مابقى هامني شاي صافي ..

- حليمة :

دار اتخوى بلا بيك اختي زهرة ، معزتك ربي لي عالم بيها ..

- زهرة :

حتى انت اختي ، سلمي على جميلة بزااف ... كنت بغيت نشوفها باش نبارك ليها الخطبة ..

- حليمة :

هاديك كيتها بوحدها أختي ، غادية واخداه ليا شينوي ... حتى كتصدمني ، وتكوليا راه خطبها فبلادهم ، الى ماسمحت ليها ماعندها فين تروح ..

- زهرة (تنهدات) :

حليمة ، حمدي الله بنتك حداك وباقي عايشة ، وغادي تشوفيها ... وهاديك اخطبة شكلية ، الخطبة الكبيرة حتى تجي إن شاء الله وتفرحي بيها ، ماعرفت فين هو مصطفى ..

- دخل مصطفى .. لقاهم كاملين مجموعين ..

- الواليدة واجدة ؟ فين هو مالك ؟

- عمر :

غير صبرو دابا يجي .. سكينة دموعها نازلين مقاداش تصبر ، سعيد غير ساكت وكيشوف بعينيه ..

- وقفات طوموبيل مالك بالعجاجة ديالها قدام باب الڤيلا ، نزل زربان ، الباب كان محلول ... كولشي ضار عندو بطريق لي داخل ..

- مالك (بدون مقدمات) :

لقيت شريهان ..

- الكل شهق او وقفو ، كولشي مصدوم ..

- زهرة (الدمعة تحبسات ليها فالحلق) :

مكضحكش عليا أوليدي ياك ؟ كدوي بصح ياك ..؟

- مصطفى :

كيفاش فين هي فين لقيتيها ؟

- مالك : كاينة فالمغرب ..

- أحمد (بإستغراب) :

كيفاش المغرب ؟ أش داها للمغرب ؟ وعلاش ماسولات فينا وماهضرات مع حد معانا ؟ وكيفاش حتى اتوصل للمغرب بلا وراق بلا والو ..

- مصطفى : وشكون ݣالها ليك أنت ؟

- مالك : سونا عليا علي ، مشيت لعندو او وراني واحد الڤيديو (جبد تيليفون خدم الڤيديو وعطاها لمصطفى) ..

- مصطفى (مصدوم ) :

مايمكنش ؟ لا مايمكنش وقيلة اتكون كتشبه ليها ، ولكن لا نسخة طبق الأصل ولكن سرباية كيفاش ؟ الڤيديو شافو كولشي ..

- زهرة (كتبكي) :

بنتي هادي ، والله حتى بنتي ، كنعرفها مزيان هي مكاين لا شبه لا والو ، ديوني عند بنتي نوض ديني عند ختك نوووض ، كنت حاسة وعارفة بنتي ماميتاش ݣلتها ليكم ..

- أحمد :

دابا راه ماشي غير أنت لي اتهبطي للمغرب ، حتى انا نازل للمغرب ..

- سعيد :

وكلنا نازلين ..

- سكينة(دموعها نازلين) :

بغيت نفهم كيفاش وقع ؟ كيفاش وصلات للمغرب ؟

- مالك :

لي كيدور فبالي ، ومتأكد منو حيت من غير هاد الاحتمال مكاينش ، 100/100 شريهان اتكون فقدات الذاكرة ، وفهاد الحالة السفارة فالمغربية لي هنا كتكفل وكتهبط الشخص لي ماعندو لا وراق لا والو ، للمغرب ... ولكن فحالة وحدة الى كان واقع ليه شي حادث ..

- عمر :

الانفجار لي وقع ايكون سبب ليها فقدان فداكرة ، هادشي لي بغيتي تكول ، وحنا مجاتناش للبال نسولو السفارة ..

- مصطفى :

حيتاش كلنا مستحيل توصل للسفارة ، ولكن كيفاش حتى وقع هادشي ، وشكون عاونها ولقاها ، واش عارف المدينة لي كاينة فيها ؟

- مالك :

لا ، مزال معارف والو ... علي كاليا بلي فرح سيفطات ليه الڤيديو ، وݣالت ليه بلي ضاير بين الناس ، شي وحدة صوراتو وهاد العرس مان فقنيطرة ، ولكن واش شريهان فالقنيطرة نيت ماعرفتش .. انا غادي نزل للمغرب ..

- عمر :

والوزارة ؟

- مالك :

من هاد النهار مابقيتش وزير ، قدمت الاستقالة ديالي ، انا انوجد راسي للسفر ..

القنيطرة

- حدا جامع بدر ، فإحدى الڤيلات ، لي شحال هادي وهي مسدودة من نهار شراها أحمد ... مكانش مكتاب ليه يجي ليها حتى لهاد النهار ، باين عليها أثار التخمال وتسياق ، قبل مايجي علم الناس لي مكلفين باش يقادوها ويوجدوها ، كانو ݣالسين فصالة الكبيرة ... زهرة ونزهة أحمد ، اما عمر وسعد ماقدوش يجيو ... خاص لي يبقا فالمحالات ... وحليمة بقات فدار مقابلاها .

- زهرة (متوترة وغير كتشوف فالباب) :

يااااربي ياربي يلقاو شيحاجة ياربي ، قلبي غادي يسكت أختي وحق الله ، 3 يام هادي ومزال مكاين خبار..

- نزهة :

شوية ديال الصبر اختي ، راه يلاه لقاو السيد لي دار العرس ايمشيو يسولوه ..

- أحمد :

يكون خير ، انا حاس بلي ايكون خير ..

- زهرة : ياربي ياربي

________________________

- ݣالسين ب 3 بيهم فالقهوة كيتسناو ، مالك سينين مجاش للمغرب ... نهار كان ناوي يجي يتزوج ، دابا حاي يقلب على حبيبتو ..

- مصطفى :

تعطل علينا ، واش أخالي متأكد بلي جاي ؟

- سعيد :

مصطفى راه هضرنا صافي ، هاهو جاي راه .. وقف عليهم واحد السيد قصير شوية داير نظارات ديال الشوف :

السلام عليكم .. سمحوليا تعطلت عليكم ..

- مالك : لا مكاين باس ، تشرب شيحاجة ؟

- لا والله الى مزال تابعاني الخدمة ، ݣاليا دريس سمسار بغيتو نمرة ديال التريتور لي كان عندنا فالعرس ؟

- مصطفى :

أياااه الله يجازيك بيخير ، خالي باغي يتزوج وشفنا داك الڤيديو لي تلاح فالأنترنت ، وتبارك الله باين بلي خدمتهم متقونة ، وبغينا نمرة ديال تريتور ..

- واش غادي نݣوليك ، انا ماجبتش تريتور ... انا غير صحابي هوما لي تكلفو راك عارف الظروف ، المعيشة غلات دراري صحابي كل واحد وباش تكلف ، ودوك السرباية اواحد الدري معرفة من العائلة هو لي جابهم معاه ، هو خدام مع واحد تريتور ، وجاب صحابو خدمو ليا ..

- مالك :

ماشي مشكيل ، الى عندك نمرة ديال التيليفون ولا لادريس ، نمشيو نهضرو معاه ..

- أودي هو مكاينش هنا فقنيطرة ، هو فكازا وسرباية لي معاه حتى هوما فكازا ... مالك شاف فمصطفى وهو شاف فيه ..

- دري أسمو أنور ، من عائلتي وراه شحال هدا ماشفتو قبل مايمشي لفرنسا ، حتى نهار العرس ..

- مالك (بتساؤل) :

علاش هو كان ففرنسا ؟

- إيه كان هو واحد صاحبو ففرنسا المساخيط ، ولكن مافوتوش بزاف ورجعو بحالهم للمغرب ، ودابا راه شي عام وهوما هنا فالمغرب ، كنا كاملين ساكنين فدار وحدة فدوار ... (ضحك) اسمحوليا حنا المغاربة كنكونو نهضرو فجهة ونصدقو فجهة ..

- مالك :

مكاين باس ، انت اعطينا نمرة ديال تيليفون وحنا غادي نتكلفو ..

- إييييه واخا ، قيد 0658426060 ، هادي نمرتو كوليه راه سيفطني حميد ولد بنت عمت مك سعدية ..

- مالك :

واخا الله يجازيك بيخير ، سمح لينا عدبناك معانا .. مد ليهم يدو بإبتسامة ..

- لالا مكاين حتى عذاب ، خليت ليكم الراحة ..

يتبع...