السيدة الأولى الجزء 17

- جورجيت (تنهدات تنهيدة طويلة ، مدات يدها للبكية ديال الݣارو حدا راسها ، خدات منها واحد شعلاتو ، من بعد مدة قليلة عاد هضرات ) :

انا مابغيتش نشعل الفتنة بيناتكم ، ولكن انت اولى بديك البلاصة لي هو فيها ، أنت كنتي اليد اليمنى للأب ، أنت كنتي الكل فالكل ، جا هو لي صغر منك وماعندوش الخبرة ديالك ، وخدا بلاصتك ... شكون لي كبر أنت ولا هو وشكون لي فدا الأب بحياتو من غيرك انت ، كان ظلم ليك منين خلاوه فبلاصة الأب ..

- دجيكو (ناض من حداها خدا ݣارو شعلو مغوبش) :

ومزال عايش فظلم ديالو ، ݣاع الخدمة ديال سينين باغي يضربها فزيرو ... من نهار شاف الشبيهة ديال حبيبتو القديمة ، عقلو تلحس ، ولا كيتصرف شي تصرفات مانفهومينش ، وأي غلط منو غادي يدينا ورا الشمس ..

- جورجيت :

انتوما الإيطاليين هكا دايرين ، فالحب العقل كيغيب عندكم مكاتبقاوش تفكرو نهائيا ..

- دجيكو (معصب) :

هاد الهضرة ماعندي ماندير بيها ، الى هو قلبو كيدق انا قلبي ميت وماعندي منخسر ..

- جورجيت (كدوز يدها على كتفو) :

خاصك دير شيحاجة ، مايمكنش تبقى بحال هكا ... حياتك كلها وانت حاني راس وخدام ، جا الوقت لي تكون فالبلاصة لي كتستاهلها ..

- دجيكو شاف فيها شوفة كويلة ، تنهد ورجع ضور راسو للبالكو ساهي فكلامها ...

_____________________

- فصباح ختارت من بين أحسن الكساوي لي شرات ، كسوة ديال الجلد فالكحل بسميطات ، مع صندالة عالية فنفس اللون وساك فنفس اللون ، مع إكسسوارات فذهبي وساعة ذهبية ... المكياج بسيط اما شعرها طلقاتو ودارت الفرقة فالوسط ... رشات من ريحتها وخرجات ، كان كيتسناها ، لابس شوميز كحلة حال ليها الصدايف الاولين ديال صدرو ... لابس نظارات فالكحل وساعة رياضية فنفس اللون .. طلعها ونزلها نظراتو مكانوش ديال شيحد عاجبو الحال ، مكانش باغيها تلبس بهاد الشكل ... وخصوصا غاديين يشوفو كارلو ، ولكن المهمة كتستدعي تلبس بحال هكا ماعندو مايدير ..

- مالك (مد ليها يدو) :

واجدة ؟

- شريهان (عطاتو يدها بإبتسامة ) :

اه واجدة ... شد فيها ونزلو بزوج وبحال كل مرة ، حتى واحد مشافهم حيت عارفة ماماها شنو غادي تݣول ... اش هاد اللباس مكتحتارميش راسك حشومة وزيد وزيد .. ركبو فطوموبيلة مالك وشدو الطريق ..

- على الطبلة ديال الفطور ..

- زهرة :

شفتهم مابقاوش كيفطرو معانا ، ولاو يفطرو على برا يتعشاو على برا ، تݣولي مابقاوش راضيين بينا ..

- أحمد :

وختي راه يلاه مخطوبين ، وهاد الفترة كتكون زوينة فحياتهم بزوج ، خليهم يزيدو يتعرفو على بعضياتهم ، شحال وهوما كيفطرو وياكلو معانا ... ضروري هادشي راه فاش كيجي زواج والأولاد كيقلال داك الخريج ..

- زهرة :

وهو ياااه بصح ، ولكن أيفطرو معانا ونݣلسو معاهم شوية ولالا ؟

- نزهة :

خليهم اختي ، ماعندهم مايزيدونا انا وياك موانسيين ، دابا نسجلك معايا فلاصال ، تولي حتى انت ديري سبور وتبدلي الجو ..

- زهرة(كضحك) :

ياااا ويلي داكشي لي بقا خاصني نيت غير لاصال ، مدخلت ليه وانا فالمغرب ندخل ليه هنا ..

- نزهة (كضحك) :

غادي يعجبك الحال ، انت ادخلي سوق راسك انا الالة أنتكلف بكولشي ..

- زهرة :

واش انݣوليك ، ديري لي بغيتي ... راني عارفاك مغاتفاكيش معايا ..

- نزهة : إيوا مزيان منين عرفتيها ..

- وصلات طوموبيلت مالك للڤيلا كارلو ... تحلات البوابة ودخلات طوموبيلتو بلاصاها ، نزل الشيفور حل ليهم الباب ... خرج كارلو من باب الڤيلا مستقبلهم بكل أناقة والإبتسامة على وجهو ..

- كارلو :

سينيور مالك شرف ليا تزوروني فداري ..

- مالك (مد ليه يدو والداخل ديالو ماكرهش يخسر ليه وجهو ، من نظراتو لشريهان ) :

شرف لينا حنا سينيور كارلو ..

- كارلو (خدا يد شريهان وباسها ) :

سينيورة شيري ... مرحبا بيك كنتمنى تكوني حسن دابا ..

- شريهان (بثقالة ) :

شكرا سينيور كارلو ، انا دابا مزيانة ..

- كارلو (مد يدو كيوريهم الطريق) :

تفضلو ، الفطور واجد ... تبعوه من اللور حتى وصلهم لجردة ، لي كانت كبيرة كتوسطها طبلة على قدها ، موجدة بݣاع لي تشهاه الخاطر ... بلاما يحس جر الكرسي لشريهان تحت انظار مالك لي كيشوفيه غير بنص عين وساكت ..

- شريهان :

الجردة ديالك زوينة سينيور كارلو ، عندك الدوق من نحية الديكور ..

- كارلو (بإبتسامة) :

كنشكرك ، هدا شرف ليا تعجبك الجردة ... الى بغيتي ومن يعد إذن سينيور مالك ، نساليو الفطور ونوريك دار كلها ... ماتعرفي تعجبك نقد نعطيك إسم المهندس يخدم ليكم داركم المستقبيلة ..

- شريهان (بأبتسامة مغرية شافت فمالك ) :

علاش لا ، فكرة زوينة هادي ياك احبيبي ؟

- مالك :

وي علاش لا ، انا وشيري كنا حايرين من هاد النحية ... ومزال معطلين زواجنا غير على قبل هاد الموضوع ..

- كارلو :

وي أڤيك پليزيغ ... نبداو فطورنا .. ، بداو كيفطرو فجو عادي وزوين ..

- كارلو (شاف فشريهان ) :

شنو بان ليك سينيورة فكلامي ، الصراحة قلبت شوية هههه كنعتادر على هاد القضية ، ولقيت بلي كتقلبي ديري شي مشروع هنا فكان ، وبما انو انا كنقلب على شريك فالكلوب ، شنو بان ليك دخلي معايا شريكة ؟

شريهان :

مع كامل إحترامي ليك سينيور كارلو ، ولكن جاني الكلوپ ديالك مافيهش واحد الإنتعاشة ، منكدبش عليك هههه حتى انا قلبت شوية ولقيت بلي الفقرات لي كتقدموهم باردين مافيهمش متعة ..

- مالك (سونا ليه تيليفون) :

سمحوليا انجاوب ، غير كملو كلامكم .. خلاهم وبعد شوية مراقبهم ..

- كارلو (كيشوف فيها ) :

بحالاش مافهمتش شنو كتقصدي ... ممكن تهضري بدون حدود ولا قيود معايا ، غير خودي راحتك ..

- شريهان (بإبتسامة مغرية شافت فيه) :

الصراحة كانت عندي فكرة فاش كنت فالبرازيل ، كنت بغيت ندير كلوپ فيه بزاف ديال الفقرات ... منهم فقرات رقص ومتعة ..

- كارلو (صغر عينيه) :

بحالاش هاد المتعة مافهمتش ؟

- شريهان (ضحكات) :

سنيور كارلو ، انت رجل أعمال وعارفني علاياش كنهضر .. كارلو وكنعتادى حيت حيدت رسميات ،ولكن انا هكا كتعجبني الصراحة ونجي فاص ، هاد الحياة غادية بالمتعة وبالمظاهر ، والى بغينا الفلوس خاصنا ندخلو المتعة ، رجال الاعمال ولا اي واحد من بعد تعب دسال النهار ، كيبغي يوضل الليل ويستمتع ، رفقة زوينة وحلوة فقرة ممتعة فهمتيني ، خاصنا نهيئو جو زوين لزبون من جميع النواحي فهمتيني دابا ؟

- كارلو (تبسم إبتسامة طويلة عاجبو الحال ) :

والكلوپ ديالي كيبان ليك هادشي مافيهش وانت مزال ماشفتيهش ..

- شريهان :

وصراحة قلبت على الكلوپ ، وهادشي لي لقيت داكشي باش انا متهربة من هاد الموضوع ديال الشراكة ، حاجة لي خاص تعرف هو الى فتحت الكلوب ديالي انا هنا ، غادي ينافس ديالك 1000 فالمية ..

- كارلو (كيشوف فيها بإعجاب) :

تايقة فراسك بزاف شيري ..

- شريهان (قربات ليه حتى تلاقات عينيها مع عينيه ) :

مليار فالمية سينيور ، انت مكتعرفش شريهان شنو كتسوى ، وشنو ممكن دير بنسبة ليا أنا السيدة الأولى عند راسي ...

- كارلو (حط يدو على يدها كيشوف فيها ، ماحولاتش نهائيا تحيد يدها من يدو مبينة على قوتها ..) :

والى ݣلت ليك غادي نضمن ليك هاد الأجواء ؟

- جوديا (بإبتسامة نصر ) :

الأمور غادية كيف بغينا ..

- مصطفى (معصب) :

مكرهتش نشد هاد كارلو ، نقسمو على زوج شاد راسي غير بزز ..

- جوديا (حطات يدها على يدو) :

مصطفى تهدن عفاك ، انا حاسة بيك ولكن ماعندك مادير تفاهمنا ... بقا كيشوف فيها ويشوف ليها فيديها ، فلحظة بدا كيقرب منها نازل بشفايفو جهة شفايفها ... بقات سنتيمترات قليلة وقاطعهم صوت التيليفون ..

- جوديا (بعدات عليه بالزربة متوترة وحشمانة ، كتقاد فشعرها جبدات التيليفون ، شافت فمصطفى لي حتى هو كان متوتر ) :

سمحليا بابا كيسوني ، انا نجاوبو ونرجع .. خرجات من طوموبيل هاربة من مصطفى ومن هاد الإحساس الجديد ، لي سيطر على مشاعرها ..

________________________

كوني قوية ..

فالحياة لا تحترم إلا المرأة القوية

التي لا تكسرها التجارب الفاشلة وإنما تبنيها المرأة القوية..

تبتسم وكأنها لم تتذوق الألم يوماً ..

وتضحك وكأنها لم تجرب البكاء أبداً

كوني قوية بذاتك ولأجلك

كوني أنتِ حتى لو لم تعجبي احد

فأنتِ اجمل حين تملكين الثقة بنفسك ..

كوني جميلة ، أنيقة، متفائلة ، ذكية ، سعيدة، ومميزة ..

انهضي ولاتتعثري

أحبي نفسك دلليها

كوني لأجلك أنتِ

كوني صعبة الكسر رائعة ومختلفة

كوني قوية ودوسي وَجـعَـك تـحَتْ قَـدمـكِ

وَ تَـمشِـي مبتُـسِـمة وَاثِـقـة مـِنْ نِفـسِـك

أمَـام کـُل مـنْ ينِتْـظُـر سِـقُـوطك !!!

كوني أنتِ حافظي عَلَى قلبك

وتفهمي ذاتك أدركي حواسك

استمتعي فأنتِ الدنيا وفيكِ الحياة

فأنتِ من يستحق الحب والأمل

اصنعي نفسك بنفسك

كوني‬ هادئةً فالضجيجُ مؤلم

كوني عاليةً ، فالقاعُ ممتلئ..

كوني صابرةً فالضجر محبِط .

كوني مشرقةً فالظلام مهلكٌ..

كوني أنتِ‬

كوني أنتِ النجمة المالكة فالتكرار ممل .

__________________

- شريهان (حيدات يديها بسهولة من تحت يدو وتبسمات) :

وبحالاش ؟

- كارلو :

انا عارضكم للكلوپ نهار السبت ، وفنفس الوقت انوجد العقود ديال الشراكة ، الى عجبك داكشي لي غادي تشوفي ، غادي نسنيو على الشراكة ، والى ماعجبكش داكشي لي غتدي تشفي ، كنواعدك اخر مرة انجبد ليك حس الشراكة ، شنو بان ليك ؟

- شريهان (هزات كاسها ديال العصير بشوية ، خدات منو رشفة بالمهل وحطاتو ، هزات عينيها فيه بميوعة وتبسمات) :

كنتمنى نهار السبت نشوف داكشي لي بغيت ، انا جريئة فخدمتي سينيور كارلو ، وكيعجبني شريكي يكون جريء ، ومايكونش داير حدود فخدمتو ... وأي حاجة يزعم عليها بلا خوف ..

- كارلو :

كايبان ليا غادي نتفاهمو مزيان انا وياك ..

- عـلاياش غادي تفاهمو بضبط ؟

- شريهان (هزات عينيها فمالك لي رجع) :

حبيبي جيتي ، انا وسينيور كارلو كنا كنهضرو على الخدمة ، من بعد ونعاود ليك ... اما دابا كيبان ليا خاصنا نمشيو ..

- كارلو :

ولكن مزال ماشفتيش الدار ، بغيت نكول مزال ماشفتوش الديكور ديال الدار ..

- شريهان (وقفات) :

مزال الأيام بيناتنا سينيور ، مغاديش تكون هادي اخر زيارة ... خلينا ليك الراحة .

- مالك (سلم عليه) :

شكرا على العراضة ، نعاودوها من بعد .. وهاد المرة عندنا ..

- كارلو :

وأنا انتسنى داك نهار بفارغ الصبر ، انجي معاكم لباب ..

- وصلهم حتى لحدا الطوموبيل ، فتح ليهم الشيفور الباب حتى طلعو ، وطلع ... ديمارا الطوموبيل وخرج من الباب ديال الفيلا ، تحت أنظار كارلو لي كان متبعهم بالعين ..

________________

- فطريق لدار ..

مالك (ببرودة معصب ) :

دينا لجنب البحر عفاك ..

- الشيفور : واخا سيدي ..

- شريهان (بإستفهام ) :

علاش ايدينا للبحر ؟ شنو واقع شكون سونا عليك بعدا ؟

- مالك (شاف فشريهان ببرودة ) :

ممكن منهضروش دابا ؟ حيت الصراحة انا ماشي فالمود لي ندوي فيه ممكن ؟

- شريهان (مافهمات مالو) :

واخا لي بغيتي ، مابغيتيناش ندويو مندويوش .. سكتات وضورات وجها عليه منخلاه ..

________________________

- وصلات طوموبيلتو قدام واحد من أكبر المحالات ديالهم وأقدم واحد ، هو لي شادو اما الباقي لي مسؤول عليهم سعد ، ولي مسؤول عليهم أحمد والخدامة ... تحل الباب الثاني ونزلات منو إشراق ..

- عمر :

مرحبا بيك مرة أخرى ...

- إشراق (بإبتسامة) :

شكرا ربي يخليك ..

- عمر : يلاه ندخلو ، باش نوريك الخدمة كيف غاتكون ..

- إشراق : وانا موجودة ..

- دخلو بجوح بيهم للمحال ... تحت أنظار البنات لي خدامين تم ..

- عمر : بونجوغ ..

- الكل : بــونجـوغ .. دخل من واحد الباب وراه إشراق ، غادي بيها حتى دخلها لبلاصة الخدمة ..

- عمر :

إشراق ، هنا فين كنخدم وهنا منين كيخرج كاع داكشي لي شفتي على برا ... انت اتكوني يدي اليمنى ، أي حاجة حتاجيتها اتعطيها ليا ، هادشي فالأول انبداو هك وباش نيت تعلمي الحرفة ... ومن بعد انعطيك شيحاجة تصايبيها ، باش نشوفك واش تعلمتي ولالا ، هادشي مؤقتا بينما حلينا الريسطو لي اتخدمي فيه تافقنا ..

- إشراق : صافي مرحبا ..

- عمر :

اما بنسبة لتوقيت ، اتخرجي قبل ماتخرج شمس بساعة ... هكا باش تقدي تجيبيها ، وفصباح كنبداو مع 9 تخرجي من دار مع 8:30 و 9 تكوني هنا ... انا أصلا مكندخل حتى ل 9 وخدمتك اتكون معايا ، يعني توقيتي من توقيتك صافي ؟

- إشراق (متحمسة ) :

صافي

- عمر :

نهار الأحد وسبت بليل مكتكونيش خدامة ، وعندك ساعة ديال الغدا ..

- إشراق : صافي واخا ..

- عمر : واجدة نبداو من دابا ؟

- إشراق (حركات راسها بحماس) :

اه انا واجدة ..

- عمر (تبسم ) :

داكوغ ، اتاخدي طبلية لي حداك اتلبسيها وأجي معايا ..

- إشراق دارت داكشي لي ݣاليها لبسات الطبلية وتبعاتو للكوزينة الخاص بيه وفين كيوجد كاع لي كوموند ظيال الحلوة للمحالات والحفلات ..

________________

- فالقهوة la mandala ، ݣالس فوق الكرسي ديالو ، داير رجل على رجل ، وكيدور بالكرسي ديالو ... هاز تيليفونو فيدو مزومي على صورة لي سيفطات ليه شريهان .. ، حس بشي واحد زايد معاه ... هز راسو بشوية كيلقى سكينة مدخلة راسها معاه وكتحقق ، بالخف حمع تيليفون دارو فجيبو. .

ياك لاباس؟ كاين شيحاجة ؟

- سكينة :

نسولك انت واش كاينة شيحاجة ؟ من ݣبيلة عيط ماديتيهاش فيا ، شيرت ليك بيدي او والو مكاينش فهاد العالم ... كنجي نطل كنلقاك خاشي راسك فديك تيليفون ... شكون هاديك لي ساهي فتصويرتها ومخلية راسك مرفوع مكاينش فهاد العالم ؟

- علي :

حتى وحدة ، مالكي فضولية بغيت انفهم أخاشية نيفك فكولشي ..

- سكينة :

اهاه ، انا أي حاجة كنݣولها ليكم لا انت لا شريهان ، فالأخر انتوما كتخبيو عليا ، شريهان تخطبات من مالك وانا معارفاش السبب ، تصاورها فليجورنو والمجلات وتخربيق الخاوي مكتوب ، دغية ݣلسات من الخدمة ولات وحكة أخرى وسكينة مافاهمة والو ، وانت دابا نوبتك ... غير سكينة الحمارة لي كتعاود ولي كاين كتݣولو ، ماݣلتو عيب وحتى دابا سمحليا حيت تجاوزت حدودي ..

- حات عاطياه بظهر وهو يجرها من يدها ودورها عندو ..

- علي :

واو واو واو ، وغير على سبة ... جوج كلمات بغيتي تبكي وتقلقتي ، ݣلسي ݣلسي .. ݣلسها بزز منها ورض الباب وراه ..

- علي (ݣلس وتقابل معاها ) :

سمعيني مزيان ، شريهان راه ماشي غير جات وخبات عليك حيتاش هي بغات فهمتي ... راه بزز منها حيت البوليس طلب منها هادشي ..

- سكينة (خرجات عينيها بصدمة) :

كيفاش البوليس وعلاش ؟ مافهمتش أش دخل البوليس ؟

- علي :

انا غادي نعاود ليك كولشي ، ولكن ماتݣولي والو لشريهان ومتعاودي ليها والو ، حيت ممكن يكونو البوليس مراقبين مكالمات ديالها ولا العصابة ..

- سكينة : اويلي على العصابة ..

- علي (كيسكت فيها ) :

ششششش سكتي ، انا انعاود ليك كولشي (عاود ليها علي كاع داكشي لي واقع من الأول للأخر حتى من القضية لي عطاوه عاودها ليها ، هي صديقة ليهم ودابا ولات من العائلة من حقها تعرف كاع داكشي لي واقع ..

- علي :

فهمتي دابا شنو واقع ؟ عرفتي علاش شريهان ماقدرات تخبي عليك والو ؟ وعرفتي السر ديال الخطوبة ديالها هي ومالك ، ايوا راه هادشي لي واقع هاهو عرفتيه دابا ..

- سكينة :

ناري شريهان مسكينة ، مزال حتى مارتاحت فخدمتها وتبلاصات ، كاع المشاكل تحطو عليها ، من نهارها تابعينها الكوارث ، صاحبتها لي غدراتها والجريمة لي شافتها وقعات قدامها ، ودابا هادشي باااز ليها وحق الله ... وعند بالي بلي انا قوية وكاپابل ، صدقت مكنبان والو قدامها هي والله ..

- علي :

هادشي لي كاين ، حنا كلنا كنتسناو وساكتين ..

- سكينة :

وشكون عارف من العائلة ؟

- علي :

عمر وسعد وأنا وخوها بطبيعة الحال ، ودابا انت ... اما والديها ولا عمها ومراتو والبقية لا ، غير حنا حيت نهار ختابروها البوليس وخطفوها ، كلنا جينا باش نسولو فيها ... وكنا انبلغو البوليس ، وكون البوليس مݣالينا والو وتسترو على الموضوع ، غادي نشكو وكنا انحولوها لرأي عام وغادي تنوض البلبالة ، هادشي علاش حطونا قدام الأمر الواقع ..

- سكينة :

دابا عاد عرفت علاش شريهان كانت كتصرف بغرابة ، وفينما نسولها كتݣوليا من بعد حتى نكون بوحدي ...

- علي :

إيوا هادشي لي كاين ... بدا تيليفون سكينة كيسوني ، خرجاتو من حيب الطبلية ..

- سعد كيسوني بلاني نجاوب ..

- وي سعد انا فالخدمة ، اهاه معاش أشمن وقت ؟ ولكن الخاتم ياك خديتيه اشمن خاتم أخر ؟ ايوا واخا واخا صافي و صافي واخا فهمت ... مع ديك الخمسة هكاك غادي نسالي ... صافي يلاه بسلامة ..

- سكينة (رجعات تيليفون لجيبها ) :

سعد غادي يدوز عندي مع الخمسة ، غادي ندوزو نشوفو شي حوايج .. وباغي يشوف خاتم زواج كاليك هدا غير خاتم الخطوبة ..

- علي :

مزيان ، خليه انت تستاهلي كل خير وتستاهلي تعيشي عيشة زوينة ، وسعد ولد الناس أيعوضك على ݣاع داكشي لي داز ..

- سكينة :

إن شاء الله كنتمنى ، يلاه انا انمشي نكمل خدمتي ، اه نسيت زراه هادشي كامل لي عاودتي ليا ، ومغادخلش ليا لراسي بلي البنت لي فصورة ماعجباتكش .. انا مشيت ، هربات منو كتضحك على الشوفات لي دار فيها ..

‏نحنُ نتكئ دائماً على من نثق بقلوبهم لا بأيديهم

لأن قوة البدن تخون صاحبها أحياناً

أما قوة المشاعر فلا تخون أبداً .

_______________________

- واقف مقابل مع البحر ساهي ، اما هي كانت فوسط الطوموبيل نقابلاه مفاهمة فيه والو ... عيات بالݣلاس حطات ساكها وحلات الباب غادية جيهتو حتى وقفات عليه ..

- شريهان :

مالك ياك لاباس شنو واقع ؟ منين رجعنا وانت ماشي على برجك ماباغيش تهضر معايا .. شنو كاين ؟

- مالك (بقا مدة مجاوبهاش ... ضار بشوية لعندها مغوبش كيشوف فيها ) :

لا والو ماماليش ، غير منين نشوف واحد الكيدار حاط يدو على يد خطيبتي ، مخاصني نحس بوالو ... ومنين نشوف شوفات واحد لخطيبتي مخاص نديرو والو ، حمدي الله وشكري لي مخلطش ليه الألي مع روتور ... وخسرت ليه كمارتو ..

- شريهان (جاتها الضحكة ) :

ولكن انت عارف مزيان علاش خليتو ، هادشي كولشي على قبل المهمة ..

- مالك (قاطعها معصب ) :

الله يغرق الشقف لنهار لي خليتك دخلي لهاد المعماعة ، اللهم الف خطر ولا قلبي يتحرق ..

- شريهان :

مالك يهديك الله ، واش انا عاجبني الحال بحال هكا ، عاحبني الحال نشوف كمارتو ولا كمارة لي معاه .. انا مكرهت من غدا يتشد ونتهناو منو ولكن ماعندي ماندير راه خاصك تفهم ..

- مالك :

ماعندي كيفاش ندير نتفهم اشريهان ، راه خاصك تفهميني ... راه مقادش انا هكا راه قلبي كيتحرق من الداخل .. منين كنشوف واحد مايسواش عينيه عليك .. مقادش نصبر راسي راه خاصك تفهميني ..

- شريهان (شدات ليه فيديه) :

مالك انا راه فاهمة هادشي ، وعادراك ... ولكن راه شوية ديال صبر راه أي حاجة كدوز علينا كنتعلمو منها ، راه غلط بسيط منا انفرتكو كولشي ، ماشي حتى يدينا فالطريق الصحيح ... وخلينا كارلو يعرض علينا نهار السبت ، ونحيو حتى الاخر ونريبو كولشي مجاتش حضر عقلك ..

- مالك (خدا وجها بين يديه ) :

اي حاجة كتكون كتخصك مكايبقاش فيها العقل ، ديريها فبالك ، مكانبقاش نتحكم فراسي ... مكنبغيش شي واحد يشوفك بشي لبسة ماهياش ، باغيك ليا انا بوحدي انا لي نشوفك انا اشيري ، ماشي بيدي كنبغيك وكنموت عليك وكنغير عليك كثر ماتصوري ..

- شريهان (عجبها الحال ) :

حبيبي ، وانا راه مكايبان ليا حتى واحد من غيرك ... خلي هادي فبالك ، مابقا قدما فات ... غير شوية ديال صبر وغادي نتعناو من هادشي كامل تافقنا ..

- مالك (تنهد تنهيدة طويلة باس ليها راسها وعنقها ) :

انحاول كنواعدك بلي غادي نحاول نتحكم فراسي ، سمحيليا ݣبيلة قلقتك مكنتش قاصد ..

- شريهان (بعدات عليه كتشوف ليه فعينيه) :

اجي ماݣلتيش ليا شكون سونا ليك فاش كنا عند كارولو ؟

- مالك : سونا لي ستيڤن ..

- شريهان :

شنو بغا ؟ عاودتي ليه بلي تخطبنا ؟

- مالك :

اه عاودت ليه كولشي ، اما بخصوص شنو بغا منقدش نݣوليك ..

- شريهان (حيدات ليه يديه وغوبشات ) :

وعلاش ؟ شنو كاين بسلامة ؟

- مالك ( عجبو الحال حيت هادشي كيبين بلي كيهمها بزاف ، ومع الحملة لي قالت ليه ديال عينيا مكايشوفو غيرك ، عارف بلي مابقا ليه والو ويسكن قلبها ، شد ليها فيديها ) :

انا مغادي نݣوليك والو ، حيت غادي نخليك تشوفي بعينيك ..( جرها لجهة طوموبيل )

- شريهان (بتساؤل) :

فين غادي بيا ، مالك وغير كوليا شنو ماين ؟

- مالك (كيضحك) :

لا مغانݣولش ، اتشوفي كولشي قدام عينيك ..

- قدام المركز وقف طوموبيلتو .. نزل ونزلات حتى هي هازة راسها كتشوف هاد المبنى لي قدامها ... كان كبير بزاااف فوسط واحد الساحة كبيرة ، ضايرين بيه الجرايد من كل جهة والخضورية من كل جهة ... البلاصة لي كانت مهجورة بحال شي خربة ... هاهي دابا ولات مركز قدو قداش ، مصبوغ ومصايب ... العمال كانو داخلين خارجين كيدخلو فنوامس والبيروات ... فالماعن ديال الكوزينة ..

- شريهان (شافت فمالك مصدومة ) :

هدا هو المركز ياك ؟

- مالك (بإبتسامة فخر) :

هو هدا ، كيف جاك ؟

- شريهان : وااااااااااعـــر ... بزاااف والله

- مالك (شد فيديها) :

أجي تشوفيه ستيڤن راه كاين لداخل ..

- دخلات معاه للمركز ، من الداخل كان عالم ثاني ، جردة كتوسطها واحد النافورة ... سبقو ساحة ديال الباسكيت .. كانت كبيرة بزاف ومجهزة ، قاعة الرياضة حتى هي هكاك ... قاعة الماكلة مجهزة حتى هي بجميع المستلزمات ، أما لي شومبر كانو يلاه كيتقادو وكيأنسطاليو نوامس ، المكتبودة حتى هي تجهزات بجميع أنواع الكتب ... كاع لي غادي يحتاجوه واجد ، ستيڤن كان واقف فالقاعة لي مخصصة للبوكس ، غير شافتو شريهان طلقات من مالك ومشات عندو بجرا عنقاتو ..

- ستيڤن (بإبتسامة كيطبطب على ظهرها) :

وأخيراااا تجمعتو ، وانا كنݣول علاش صوت مالك مبدل ..

- شريهان (بإبتسامة) :

عمو ستيڤن توحشتك بزاف ، واش كنتي عارف ؟ من إيمتى ؟؟ (بعدات عليه كتشوف فيه بشك)

- ستيڤن :

قبل مايعتارف هاد الكامبو لراسو بلي كيبغيك ..

- مالك :

هاهو بدا عاوتاني .. كيبان ليا كولشي واجد

- ستيڤن :

درت مع ليكوتش ، من أحسن لي كوتش لي كنعرف .. دابا خاصك تحدد نهار لإفتتاح المركز ..

- مالك :

شنو بان ليك فشهر جاي ؟ من ورا مهرجان كان للفيلم ..

- ستيڤن :

فكرة مزيانة ، هكا باش الصحافة تكتب عليه ويكون إعلان للناس ..

- مالك :

صافي مزيان .. المهم انت تكلف بلي كوتش وعلمني بأي جديد ..

- ستيفن : صافي كون هاني ، تهلاو فبعضياتكم ..

- مالك (شد لشريهان فيديها) :

ضروري متحتاج توصيني ..

- شريهان (شيرات ليه بيديها ) :

بسلامة عمي ستيڤن ، نتشاوفو من بعد ... شير ليها بيديه ، خرجات هي ومالك مشادين ليدين ، طلعو فطوموبيل وفطريق ..

شريهان :

- مالك عرفتي فاش كنفكر ، علاش لي منديروش عرسنا فالمركز .. مالك تبسم ..

- شريهان (بإستفهام ) :

علاش كتبسم شنو كاين هههه

- مالك : حيت ݣلتي عرسنا ..

- شريهان :

علاش مناويش دير ليا العرس ؟

- مالك (ضحك) :

لا الالة ناوي ندير ليك عرس ، وأحسن عرس فيك يا فرنسا كلها ..

- شريهان (تبسمات) :

وهـكـــاك ..

- واقفة قدام القهوة كتسنى فيه ، حتى بانت ليها طوموبيلتو ... نزل منها وجا عندها عنقها وباسها من وجها ..

- سعد :

ياكما تعطلت عليك ؟

- سكينة :

لا الوقت هو الوقت ، فين غادي نمشيو بعدا ؟

- سعد (فتح ليها الباب ) :

دوينا وݣلنا اندوزو ناخدو الخاتم ديال المرياح هو الأول ، وعاد ناخدو الحوايج لي مهمين ، واش نسيتي بلي عرسنا من هنا ل 15 يوم لا كيبان ليا وليتي كتنساي ..

- سكينة :

ناري ماتفكرنيش ، الخلعة شداني وحق الله ..

- سعد (سايݣ وكيضحك) :

مكاين مناش تخافي ، ضروري ايشدك ستريس ولكن كولشي ايدوز زوين اتهناي ..

- سكينة :

عارفة هادشي مزيان ، غير راه ضروري من هادشي ..

- سعد :

منين نساليو انمشيو نتعشاو ، بغيت نفاتحك فواحد الموضوع ..

- سكينة : واخا الله يسمعنا خير ..

__________________

- عمر (حادر راسو على واحد لاطارط قدامو ) :

إشراق لا سپاتيل ..

- إشراق بزربة خداتها وعطاتها ليه .. بقا واقفة حداه كتشوف فيه شنو كيدير متبعة معاه حتى سالاها ..

- عمر (وقف كيحرك كتافو وظهرو ) :

وأخيرا ... (شاف فيها ) كيجاتك ؟

- إشراق (كتشوف فيها بإعجاب) :

واعرة بزااف ، والله تبارك الله عليك .. عجباتني ..

- عمر (هز معلقة ، وخدا شوية من الكريمة وقابلها مع فمها) :

هاكي دوقي ورضي عليا ..

- إشراق (دغية الحمورية طلعات مع وجها ، قربات للمعلقة بمفمها وخدات منها لاكريم ) :

بنينة بزاف الله يعطيك الصحة ، عمري دقت بحال هاد لاكريم ..

- عمر (سكت كيشوف فجهة فمها) :

شيحاجة لاصقة فيك ..

- إشراق (بإرتباك ) :

فين هنا (كتأشر ليه جهة وجها ) ..

- عمر (قرب منها) :

بلات بلات صبري ، (قرب لبها حاط صباعو جنب شفايفها ... ماسح ليه شوية ديال لاكريم لي لصق فيها) .. دابا مزيان ..

- إشراق (قلبها كيضرب باغي يخرج من بلاصتو ) :

شكرا .. الى كاينة شيحاجة أخرى نديرها ..

- عمر (شاف فساعتو ) :

لا صافي دابا خاصك تمشي ، باش يلاه تجيبي شمس ..

- إشراق :

اه عندك الحق .. خاص نمشي يلاه يلاه ..

- عمر : صبري انا غادي نوصلك ..

- إشراق (بتسرع) :

لالا غير خليك انا اناخود طاكسي ، انت مزال خاصك تكمل خدمتك ..

- عمر (لاحظ الإرتباك ديالها ) :

انا ساليت خدمتي ، وكاين لي غادي يتكلف الالة ، غير الى مابغيتيش تمشي معايا هادي هضرة أخرى ..

- إشراق :

لا لا ماشي هكاك ، انا غير حشومة زعمة وصافي ... جايبني وتمشي بيا حشومة ..

- عمر (بأمر قاطع) :

إشراق ، سبقيني لطوموبيل انا جاي ..

- إشراق (حدرات راسها ) :

واخا ..

__________________

- على العشا وفطبلة معزولة فواحد المطعم .. ݣالس هو وياها ، من ورا ماخداو الخاتم ، وماشي غير الخاتم خداو كوليي كامل ... بزز من سكينة لي مابغاتش نهائيا ..

- سكينة (كتاكل) :

ماكنتش كنعرف بلي راسك قاصح ..

- سعد (كيضحك عاجبو الحال ) :

انا الحاجة الى بغيتها راه كنوصل ليها نوصل ليها ... وزايدون مادرت والو هادشي عادي ومن حقك ..

- سكينة :

واخا هكاك انا كنبغي الحاجة تكون سامپل ، مكاين لاش داك كترت الإسراف ..

- سعد (مداهاش فيها ) :

الماكلة عندهم بنينة صراحة ، انوليو نجيو نتعشاو هنا ..

- سكينة :

اممم غير بقا تبدل ليا فالهضرة ، ماݣلتيش ليا فاش بغيتينا نهضرو ؟؟

- سعد (حط الفرشيط من يدو ، مسح فمو وشاف فيها ) :

خاصك تعرفي واحد الحاجة مهمة ، بابا فاش وصل كل واحد فولادو ل 18 سنة ، خدا لكل واحد فيهم دار ، مكتوبة فسميتهم ... مالك باعها وزاد غليها وخدا دارو لي فيها دابا ، وعمر حتى هو باعها وخدا دار على دوقو .. وأنا خليتها كيما هي .. بغيت نتشاور معاك تشوفيها بعدا وانت اتقرري واش ، نبيعوها وناخدو وحدة على دوقنا ولا نخليوها ..

- سكينة (زݣات من الماكلة) :

علاش مغانسكنوش مع داركم ؟

- سعد (كيشوف فيها بعدم تصديق ) :

علاش انتي بغيتينا نسكنو مع دارنا ؟

- سكينة : انا هادشي فاش فكرت ..

- سعد :

من نيتك ؟ حنا يلاه انتزوجو ونسكنو مع دارنا ، لا احبيبة ديالي ... كاينة داري هي فاش غادي نسكنو إن شاء الله ، وغادي نقادوها بزوج على دوقنا تفاهمنا ..

- سكينة (تبسمات) :

صافي واخا ..

__________________

- ݣالسين فجردة ، مصطفى وشريهان ومالك ومعاهم عمر ... حاطين بلاطو فيه القهوة وبلاطو فيه الكيكة ..

- عمر :

أمضرا فين وصلتو فأموركم ؟

- شريهان (كتنشوى وكتشوف فيهم ) ..

- مصطفى (بنفاد صبر ) :

نسولو هاد الأنسة لي من صباح وهي كتخشي فوجها ، مزال مابغات تݣولينا والو ..

- مالك :

انت عارف شريهان وهي والماكلة ، خاصها حتى تسالي على خاطر خاطرها عااااد تجاوبك ..

- شريهان (بحال الى مكايهضروش معاها ، سلات الكيكة ديالها مسحات فمها ، دارت رجل على رجل وشافت فيهم ) :

نهار السبت انا ومالك معروضين للكلوپ ..

- مصطفى (تقاد فالݣلسة بإهتمام ) :

كملي كنسمعك ..

- شريهان :

قتارح عليا الشراكة ، ولكن انا ماوافقتش ..

- مصطفى (بصدمة ) :

علاش ؟ واش انت حمقة ياك ݣلنا ليك خاصك توافقي ، شريهان اش كتخربقي ؟

- شريهان (ببرود) :

راه انت اخويا لي كتخربق وسمحليا ، الى جيت وقبلت دغية دغية ، ايݣول بلي انا طالبة عليها ، وحنا مابغيناش هادشي ، خاصنا نبينو ليه بلي انا مامسوقاش للشراكة ديالو ، وبلي ممكن ندير حسن من داك المشروع ديالو ، فهمتي دابا وهادشي لي درت انا ..

- عمر :

عجبني تفكير ديال شريهان ، خاصها تخليه مشوق كثر من القياس للشراكة معاها ، بغات تخليه يخضع لجميع المتطلبات ديالها

- شريهان :

تماما ، كارلو كان ايدخل البنات للكلوب ، ولكن حتى ل12 دليل حيت مايمكنش يلفت الانتباه قدامنا ، ولكن انا انخليه يدخل البنات قدامنا .. ݣلت ليه بلي الكلوب ديالو ممل ومعاجبنيش ، وبلي سولت وراه وماعندوش شي عرض لي يناسبني ، وبلي انا باغية نفتح كلوب يكونو فيه فقرات وتكون فيه متعة لزبون ... وبلي الى درت هاد المشروع ، الكلوب ديالو ايفشل قدامي ..

- عمر :

وبطبيعة الحال هو خاف ، داكشي باش عرض عليكم ..

- شريهان(ضحكات) :

تماما ، كاليا بلي الى لقيت داكشي لي بغيت ، غادي نسنيو العقد فنفس النهار والى مالقيتش لي بغيت ، عمرو مزال مغايطلب مني نكون شريكتو ، ايوا اخويا دابا كيجيتك مزال كنخربق ؟

- مصطفى (بإبتسامة ) :

وخوك فالبوليس ، ضروري تكوني دكية كتشبهي ليا ..

- شريهان (كضحك) :

وهدا هو البلان ..

- جا نهار السبت ... النهار لي كان كولشي موجد ليه ، حطات شريهان كسوة لي اتلبس فوق النموسية ... كانت فلون كحل كتلاون لدوغي مع صندالة عالية فضوغي ، الپارفان لي ادير فهاد الليلة ... وساك لي اتهز ، حتى من المكياج لي ادير وتسريحة ديال الشعر ختارتهم فبالها ، تقابلات مع المرايا ، ولأول مرة من نهار حطات السلسلة الكادو ديال خوها فعنقها ، وعمرها حيدات جا اليوم وحيدات ... حطاتها فكارطونتها ودارت فبلاصة سلسلة مدهبة ، فيها علاقة على شمس ، فيها من الداخل كلمة كنبغيك بجميع اللغات ، وهي فالحقيقة عبارة على كاميرا وميكرو فنفس الوقت .. بدات بالمكياج ديالها لي كان سموكي ، اما شفايفها خلات لونهم خفيف ، شعرها خلاتو مطلوق مع تموجات خفاف ، هزات ديك الكسوة لبساتها ، جات على قدها .. مع صندالة ولات كتبان بحال شي عارضة أزياء .. رشات من ريحتها هزات ساكها وخرجات ، .. تلاقات مع مها فطريق طلعاتها ونزلاتها كتشوف فيها مصدومة .. :

أش هاد اللبسة ابنتي ، وليتي بحال ديك عوراجة ديال ديك روبي ..

- شريهان :

ماما الله يهديك ، راه معروضين للعشا شنو انلبس ؟ نلبس سروال ولا كسوة ديال النهار ... هادو هوما حوايج ديال السهرات ..

- زهرة :

هاي هاي على سهرات ، شفتك اختي رجليك خرجو شواري ، ݣالت ليك السهرات أيااه اخيتي ..

- شريهان :

ماما راه فخبار خويا ، وهاد الكسوة راه شراها ليا مالك ... وحتى راه معايا ..

- جاها صوتو من اللور .. :

شريهان واجدة ؟

- زهرة : أولدي بغات تخرج بهاد الحالة ..

- مالك :

خالتي راني معاها ماعندك مناش تخافي ، والبلاصة لي غاديين ليها خاصها ضروري تلبس بحال هكا ، انت انعسي على جنب الراحة ..

- زهرة ( شافت حتى عيات وسلمات أمرها لله ) :

واخا أولدي لي بان ليك ... باستها شريهان ونزلات مع مالك ، ركبو فطوموبيل وشدو الطريق ..

___________________

- قدام كلوپ القبلة السوداء وقفو طوموبيلات الكليان ، غير الناس لي هوما هوما ... كل واحد جاي بهدف معين ، كاين لي جاي يدوز وقت يشرب ويسمع لموسيقى ويمشي ، وكاين لي جاي بهدف أخر .. كارلو كان فالبيرو ديالو الفوق ، كيراقب شنو كيوقع للتحت ، وعينيه على الباب كيتسنى شخص واحد " شريهان " ... تدق الباب ودخل دجيكو لي ماعجبوش الحال نهائيا للهادشي لي واقع ..

فلاش باك

- جورجيت (بصدمة) :

واش البوص حماق ولا مالو ، واش معارفش بلي هادشي فيه مخاطرة كبيرة لينا كاملين ، واش باغي يدينا لورا الشمس ، أصلا الوضع مابقاش كيف كان وهو باغي يزيد يكمل علينا ..

- دجيكو (معصب) :

متزيديش عليا حتى انت ، لي فيا كافيني ، منقدش نݣوليه لا بغا البنات يدخلو مع الافتتاح ... شنو بغيتيني نكوليه لا ، مافهمتش مالو ولكن كولشي من ديك خيتي لي بانت ..

- جورجيت :

والمشكل الكبير هو مانعني نكون ، خاصني نكون مع البنات ، راه فأي فرصة ممكن يهربو واش هو مشافش هادشي ولا صتفي تعماو ليه العينين ..

- دجيكو :

ماعندي مندير اجورجيت ، لي ݣالها هي لي خاصها تكون ... ولكن انا عارف شنو غادي ندير من بعد .. هاد الحالة مغاديش طول غير بلاتي ..

الــحاضــر

كارلو : كولشي واجد وهو هداك ؟

- دجيكو : سي سينيور كون هاني ..

- كارلو :

بغيت هاد.الليلة ماتنساش ، ماتنسى لحتى واحد ... هاد الليلة اتكون ليلة العمر ، الليلة غادي نحتافلو بشراكة ..

- دجيكو :

وباش عرفتيها غادي تواقف ؟

- كارلو (بإبتسامة شر) :

من صالحك انو توافق ادجيكو ، هاد الليلة واقفة عليك انت واش طبقتي الأوامر بالحرف ولالا ، الى مشات حتى ماسناتش العقد (سكت كيشوف فيه) غيييير عتابر راسك ميت ..

- دجيكو (بلع ريقو) :

بهاد السهولة ممكن تخلا عليا سينيور ، من بعد هاد المدة كلها ؟

- كارلو (ضحك حتى تغمضو عينيه ، ورجع جمع الضحكة ) :

مستعد نتخلا على راسي ماشي غير عليك انت ، غلط واحد بسييييط ، انودعو روحك البريئة دجيكو ، أأأ نسيييت روحك الشريرة (رجع كيضحك ) .. دجيكو سكت كيشوف فيه ، كيفاش على قبل وحدة عاد عرفها وغير حيتاش كتشبه لحبيبتو القديمة قادر يقتلو ، ويغبرو ورا الشمس ... مابقا عندو أدنى شك من جهة القرار لي كيدور فبالو ، صافي بنسبة ليه مابقاتش شيحاجة سميتها البوص ..

- جوج طومبيلات واقفييين بعيد زاج فيمي ، جوديا والبقية حاطين عينيهم على الشاشة لي قدامهم ، معاهم مصطفى لي كان متخفي بتجاكيط كحلة وطݣية .. هاد الليلة مهمة بزاف ، حيت ݣاع الريوس الكبار غادي يكونو فالكلوپ ..

- لي مين هو :

عند إحساس بلي قربنا نسدو هاد القضية ..

- مصطفى (هز عينيه فيه ) :

وي وي انتوما ناس أسيا عندكم حاسة سادسة ، سبحان الله ..

- جوديا (جاتها الضحكة ) :

بصح مصطفى عندو الصح ..

- فرانسيسكو (كيشوف فيهم ) :

انتوما بحال الى ، بيناتكم شيحاجة ولا ، بدات كتزرع بيناتكم شيحاجة ..

- جوديا (خنزرات فيه ) :

ديها فخدمتك ، راه بديتي دخل وتخرج فالهضرة ..

- فرانسيسكو : نبصم عليها ، وانا عارف شنو كنݣول ..

- مصطفى (سكتهم ) :

ششششش ، مالك وشريهان وصلو ..

____________________

- نزلات من الطوموبيل بكل رقي ، وتبعها هو بكل رجولة خدا يدها ودخلو ..

- كان واقف مقابل الناس حتى بانت ليه داخلة بكل غرور ، كتسوف فجنابها ومعاها مالك ، قلبو ضرب سلبات ليه عقلو كانت كتبان كتحمق ... شيحاجة فقلبو ضراتو من جهتها ، باغيها ليه غير هو ... ضار وفتح باب البيرو ونزل ..

- كارلو (مخاطبهم) :

سينيور مالك سينيورة شيري ، شرفتوني ..

- شريهان (بعيون ساحرة مدات ليه يدها باسها ) :

سينيور كارلو ، مكانش خاصنا نرفضو هاد الدعوة ..

- مالك : سينيور كارلو ، كنهنأك على هاد المشروع ..

- كارلو (ضحك) :

واتزيد تهنأني الى قبلات سينيورة شيري تشاركني

- مالك (ضحك) :

منضمنش ليك ، شريهان دوقها صعيب بزاااف ، الى مالقات داكشي لي بغات ... مستحيل تقبل انت وشطارتك ، واش اتخليها تقبل شراكة ولالا ..

- كارلو (تبسم ) :

غادي تقبل وانا متأكد من هادشي لي كنݣول ، تفضلو معايا ..

- تبعوه لطبلة لي كانت مخصصة ليهم ، كانت طبلة vip ݣلسو ... وهو معاهم عينيه على شريهان ، لي كانو عينيها كيسكانيو الكلوپ ، جا السرباي خدا طلاباتهم ومشا ، رجع من بعد جايب معاه شنو بغاو ... دجيكو كان واقف بعيد عينيه عليهم ، ماعجبوش الحال نهائيا ..

- شريهان :

سينيور كارلو ، واش هكا كتعامل الزبائن ديالك ، مزال ماشفتس داكشي لي بغيت ..

- كارلو (تبسم ) :

قـريـب مابقى والو .. دورات راسها وتقابلات مع المدخل ومع ݣاع الكلوپ ..

___________________

- على برا ..

- جوديا (بإبتسامة) :

مغاديش تيقو راسكم الى قلت ليكم شنو لي حاضر ، غير رجال الاعمال وصحاب الأعمال الخيرية ، لي مكايفلتوش حتى عمل خيري باش يبانو بلي هوما تحت خدمة الشعب ، وتخت خدمة الناس لي محتاجة ... ناري شياطين فصفة إنسان ..

- مصطفى :

جاكسون الڤيديو كيتسجل ياك ؟

- جاكسون (خدام ) :

وي كيتسجل ، كولشي غادي هو هداك ..

- مصطفى : اوك مزيان ..

- فرانسيسكو (غوبش ) :

شووف شوف ، علاش طفى الضو ؟

- مصطفى : بلاتي نشوفو صبر ...

- طفا الضو وعم السكون ، تسمع صوت أنغام موسيقية شرقية ... شوية شعل الضو فوق الكونطوار ديال البار ، كانو واقفين 6 ديال البنات ملتمات ، خرجو 5 من ورا الكونطوار ، و5 أخرين من جهة لوخرا ، المجموع كان 16 بنت بتحديد .. بدات أنغام الموسيقى على أغنية :

- يلاى بينا يلاى يا حبيبي يلاى ، نفرح ونقوووول ماشاء الله ...

- كانو البنات كيتمايلو على الأنغام الموسيقية ... وشريهان عينيها عليهم ، هزات عينيها لساعتها وكان هدا هو الوقت لي خاص يدخل فيه علي ، مع الظلام ماشافتس لا لي دخل أو خرج ... سلات الموسيقى وهزو البنات النݣاب لي مغطيين بيه وجاهم ... كل وحدة وشكلها لي زعرة ولي سمرة ، دورات شريهان راسها او وقفات عند بنت وحدة ، لي عينيها كان كيطير منهم الشر والأعصاب ديال دنيا كلها ... " فرح " دورات راسها لجهة لوخرا تحطات عينيها عليه ، ݣالس بكل أناقة ، رتاحت نسبيا من الداخل فاش شافتو ...

- كل وحدة فالبنات خدات بلاصة ، كتسنى من واحد من زبائن يجي عندها ، بطريقة راقية ماتبعتش ل الشك ..

- (بالفرنسية ) :

سلام .. هزات راسها فيه محاملاه ماقبلاه ، كون صابت تنتفو حيت عارفة غراضو شنو هو .. دورات راسها كيبان ليها دجيكو كيخنزر فيها .. رجعات وشافت فيه تبسمات وجاوباتو :

سلام ..

- ممكن نݣلس معاك ؟

- فرح : وي تفضل .. كحز الطبلة وݣلس حداها ، جا عندهم السرباي خدا طلابتهم ومشا ..

- كارلو لي كيشوف فشريهان وعاجبو الحال .. :

شنو نوقعو العقد ..

- شريهان (شافت فيه وتبسمات ) :

نخليوها لنهاية السهرة حنا يلاه بدينا .. عيط كارلو لدجيكو وشوش ليه فودنيه ، خلاه وطلع للبيرو ...

_____________

- شنو سميتك ؟

- فرح (عليها زبل زبل ) : فرح سميتي فرح ..

- علي (بدارجة وتحت سنانو ) :

لالة فرح ، الى بقيتي معصبة بحال هكا راه فير أيشكو فيك طلقي راسك شوية وديري راسك بلي راك مستمتعة ..

- فرح (دقات قلبها كان ممكن تسمعهم ماعرفت منين ، كتشوف فيه ماماتيقاش راسها ) :

واش واش انت ..

- علي (قاطعها ) :

وي مغربي ، غير هو مديريش راسك مصدومة ، راه الكلوب كلو كاميرات وغادي يعيقو بينا ، لي خاصك تعرفي هو راه حنا عارفين بلي انتوما مخطوفات وتحت التهديد ، البنت لي مقابلة معاك لابسة كسوة ، سميتها شريهان خوها فالبوليس مسيفطينها للهنا باش طيح بدوك لي شادينكم ، ولي معاها خطيبها وزير مالك حتى داخل فهاد الخطة ، وراه البلاصة كلها مراقبة من طرف البوليس ، ماعندك مناش تخافي حاجة وحدة ديري راسك م (قاطعاتو منين تلاحت عليه وعنقاتو بجهد ) ..

- فرح (لاول مرة من نهار تعرضات للخطف كتحس براسها مرتاحة ، كتحس براسها كانت ميتة ورجعات للحياة ..) :

مكتكدبش عليا مكنحلمش ياك ؟

- علي (كيدوز على راسها بإبتسامة ، كيشوف فدجيكو لي مراقبهم من الفوق وكيبان عاجبو الحال ) :

لا مكنكدبش عليك ، حنا هنا باش نحميوك ونحميو لي معاك انت غير سايرينا وديري لي ݣلنا ليك واخا ، باش الخطة ماتفشل وباش هاد الناس ياخدو جزائهم تافقنا ، وبالمناسبة ماماك راه توحشاتك بزاااف وكتسناك .. حس بيها زيرات عليه وكتبكي من وراه ..

- علي :

شششش شنو ݣلنا ، متخليهمش يشكو فينا واخا ، ديري راسك فرحانة وعاجبك الحال .. كولشي ايكون بيخير ماتخافيش حنا معاك ..

_____________________

- شريهان (داكشي لي بغات شافتو وكثر ، ودابا رتاحت وجا الوقت ديال الصح ، شافت فكارلو وبإبتسامة نطقات ) :

دابا ممكن نݣوليك مبروك علينا الشراكة سينيور كارلو ..

- فالشقة ديالو ، شاد كاس ديال المشروب ومبسم ...

- ماثيو (كيشوف فيه ، فبلاصة مايتشوش عاجبو الحال ) :

شفتك مادرتي حتى رد فعل على هادشي لي ݣلت ليك ؟

- دييݣو (شاف فيه ) :

علاش غادي ندير رد فعل ، بالعكس انا هادشي عاجبني بزاااف ..

- ماثيو (بإستغراب) :

عاجبك الحال البوليس داخلين على الخط ؟

- دييݣو :

ماثيو ماثيو ، كان كيحسابلي بلي انت دكي بزااف ، بالعكس انا فرحان بزاااف حيتاش المهمة ديالي اتكون ساهلة وماهلة ... انا كنت حاس بلي القضية فيها إن ، مايمكنش واحد بحال مالك العراقي ، يقبل يدخل فعلاقة مع واحد بحال كارلو ، واخا هو مغطي على خدمتو الحقيقية ، ولكن واحد بسمعة ديال مالك مايمكنش يقبل الدعوة ديال كارلو لكلوپ ديالو ، هادشي ايبهدل بالوزارة .. فهمتيني ، وانا كنت حاس بلي هادشي ماشي عادي ، باش كنكوليك انا فايت كارلو بأشواط ، عندي ناس لي يجيبو ليا الحاجة من قاع الخابية ... من نهار دار كارلو الحفلة وانا تابعو ولاحظت الطوموبيلات لي غير كتحل شريهان ومالك كيتحركو وراهم ..

- ماثيو :

انا لي ستغربت منو هو كارلو ، بكثرت ماهو دكي رجع مكلخ ..

- دييغو :

وهادشي لصالح ديالي بطبيعة الحال ..

- ماثيو (بإستغراب) :

فاش كتفكر ؟

- دييغو (ضحك ، حط كاسو وݣلس على الفوتوي دايررجل على رجل ) :

كنفكر نسهل المأمورية على البوليس ، هوما باغيين كارلو ... وباغيين ݣاع الريوس لي خدامين معاه ، وباغيين البنات لي محتاجزهم كارلو ، حنا انعطيوهم هادشي ..

- ماثيو (داخ ) :

مافهمتش وضح ليا كثر ..

- دييغو :

ماثيو ، حنا واخا كنتعتابرو مكاريب بنسبة لناس ، وخدمتها كلها كحلة ، ولكن عمرنا تاجرنا بالبنات ، واخا كاع الخدمة ديالنا مشبوهة ، واخا كنتاجرو فشحال من حاجة ممنوعة ، ولكن عمرنا دخلنا البنات فهادشي ، كارلو طول حياتو موسخ عرفتي علاش ، حيت أصلا دماغو معامرش سطل ، جا الوقت لي يرتاح فيه والإمبراطورية ترجع ليا ، مخاصش يبقا كارلو رقم واحد فالعالم ديالنا ، يا انا يا هو ، وبطبيعة الحال انبقى أنا ، كارلو خاصو يحيد من طريقي ... أول حاجة انعطيو البوليس لي بغاو ، وتاني حاجة انخليو كارلو يقتل دجيكو ... حيت أيعرف بلي هو لي بيع بيه ههههههه ..

- ماثيو (ݣلس حيت مافهم والو ) :

وشنو دخل دجيكو ؟

- دييغو :

دجيكو فاق وعاق ، وعرف بلي غير زايد ناقص عند كارلو ، ماتنساش بلي كان خدام مع الأب هو الأول ، يعني كيشوف بلي بلاصة كارلو من حقو هو ، حنا انخليو دجيكو يلعب لصالحنا ، وهو لي يقدم جميع الوثائق للبوليس ، وحنا بدورنا انبيعو بدجيكو بكارلو ، وهكا كارلو ايحيد دجيكو من طريقو ، والبوليس ايشدو كاع الريوس لي ماليهم لزمة ، ومعاهم كارلو ... وانا اناخود إمبراطورية كابوني ومعاهم شريهان ..

- ماثيو : ولكن شريهان فاش كتهمك ؟

- دييغو (تبدلو ملامحو لشر ) :

كتهمني ، يكفي ضاعت مني هدا شحال ، مغاديش نخليها ضيع مني للمرة الثانية ، غادي نديها ونمشي من هنا وتولي تحت حمايتي ، ونخليها تولي مراتي ، دير هادشي لي غانݣوليك ، بغيت دجيكو يكون عندي من غدا ..

- ماثيو : دييغو واش متأكد ؟ ماتخاطرش ..

- دييغو : دير لي ݣلت ليك ..

- ماثيو : واخا لي بغيتي ..

_____________________

- حطات الستيلو وشافت فيه بإبتسامة .. :

دابا نقدو نݣولو مبروك ..

- كارلو : باس ليها يدها ) مبروك علينا بزوج .. حيدات يدها من يدو وضارت عند مالك عنقاتو ، تحت انظار كارلو لي كانو غادي ياكلوها ..

- مالك : مبروك عليك أحبيبة ديالي ..

- شريهان : الله يبارك فيك أحبيبي .. (ضارت عند كارلو) :

غدا غادي ندوز عندك لدار ، بغيت نتفاهم معاك فبزاف ديال الحوايج ، دابا الكلوپ ولا ديالي حتى أنا ، وبخصوص الفلوس غدا ايدوزو للحساب ديالك ، عندي شي حوايج بغيت نبدلهم داكشي باش نتلاقاو غدا ونتفاهمو داكوغ ؟

- كارلو (فرحان) :

بكل فرح ، غادي نتسناك ..

- شريهان (شافت فمالك ) :

نمشيو احبيبي ؟

- مالك : يلاه .. ستأدنو منهم خرجو تحت انظار علي ..

- علي (بهمس) :

انا خاصني نمشي ، غدا غادي نرجع لهنا صافي ..

- فرح (بترجي ) :

غادي ترجع ياك ، مكتكدبش عليا غادي تديونا من هنا ؟

- علي (شد ليها يديها) :

كلمة وحدة ݣلتها ليك ، غادي نكون هنا وغادي تخرجي من هنا انت وݣاع البنات تافقنا ؟

- فرح (حركات راسها بالإيجاب) :

صافي واخا ..

- ݣالسة كتفرج وساهية ، كتهضر معاها سكينة ولكن عقلها غايب مكاينش معاها نهائيا ..

- سكينة :

إشراق كنهضر معاك اويلي فاش ساهية؟

- إشراق (عاد فاقت من سهوتها ) :

شنو ݣلتي ، متديش عليا سهيت ..

- سكينة :

أحيانة عليك كتفكري فعمر ياك ؟ بلاما تخبي عليا أختي راه باينة من عينيك ..

- إشراق (تنهدات تنهيدة طويلة ) :

هاني ݣاع كنفكر فيه ومن بعد ، نوصل ليه ؟ فين هو وفين أنا ، واش شفتي الڤيلا ديالهم قداش ، باه أصاحبتي راه خانز فلوس ، وحتى هو شوفي غير طوموبيلتو ، شوفي غير ماماه كيف دايرة ، عاااد يفكر فيا انا لي أرملة وعندي بنت من الفوق ، بحال عمر أختي نهار يفكر يبغي ولا يتزوج ، أيشوف وحدة من طبقة ديالو ، باها شكون وشكون ومها شكون وشكون ، حتى الى بغاو يجيو عندهم ضياف ، اتكون دارهم بعدا لوكس ... ماشي المراح قدو قداش والبيوت صغار ..

- سكينة (كتخنزر فيها ) :

واش من نيتك ، ومالو سعد خوه خطبني ، وشفتيهم جاو لعندنا وكيفاش تعاملو معانا ، وماماه حلوة الله يعمر ليها دار ، ماخلات مسكينة ماجابت ليا وكبرات بيا ، وباباه غزااال وتبارك الله خوتو واخا كل واحد عندو بوسط واعر شفتي تواضع كيداير ، انت راه غالطة قضية إختلاف الطبقات راه مابقاتش ، راه شحال من وحدة والديها شكون وشكون وخارج منها العجب ، ومغايلقاش معاها راحتو ، والى كان هو باغيك وباغي يكمل حياتو معاك ، وكيرتاح فاش كيكون معاك ، إشراق الراحة مع الانسان راه هي كولشي تافقنا اختي ، أما لاباس عليك ولا والديك شكون مغايفيدو فوالو لي ايبغيك ايبغيك كيما انت ، مغايبدل فيك والو وايبغيك سوا دايرة لاباس ولا ماعندك والو ، راه هو ايتزوج بيك انت ماشي بداركم شكون ، المهم هو قلبك بيض وزوين ، وكتبغي للخير لكولشي وقلبك كبير وحنينة ، ومايمكنش شي واحد مايبغيكش ، عطي راسك فرصة اختي ... وعطي ليه حتى هو فرصة ..

- أشراق :

وحنا راه مابيناتنا والو أختي ، ماشي غير خدمني عندو صافي راه كيبغيني ..

- سكينة :

قسما بالله ، ونبصم عليها الى كيحس بشيحاجة من جيهتك ، حيت كون مكان كيحس بوالو مغايوصلكش حتى لدار ، ومغاديش يعرضك للفطور ، ونهار الخطوبة ديالي مغايبقاش كيشوف فيك بديك الطريقة ، من غير انت الى كنتي مزال كتفكري فالمرحوم الله أعلم ..

- إشراق :

كنت كنبغيه اسكينة ، كان كيبان ليا غير هو ، راه هو لي حليت فيه عيني ، ماتنسايش بلي هو اول واخر واحد عرفت وأصعب حاجة هو تكوني كتبغي شي حد وكيبان ليك هو محور الكون ومكاينش غيرو ..

- سكينة (وقفات كتغوت ) :

هداك محور الكون لي كتهضري عليه ، كان كيلعب وراك وكان ݣالس على لالة ومالي وتقرقيب السطالي ، خلاك حاملة وخانك مع اللولة والثانية ، على ود الوراق وعلى ود الفلوس ، حيت انت كنتي حازقة ومدلولة ، لقا وحدة ملعقة بدارها بطوموبيلتها بفلوسها سمح فيك ، وخلاك حاملة عمرو ماسول حتى فداكشي لي فكرشك ، عمرو مشاف حتى بنتو كيف دايرة ، هداك أصلا مايستحقش تفكري فيه ولا يبقى فبالك ، وربي نتاقم منو وداه بأبشع طريقة الله يستر لي ماتمنايها لحتى واحد ، وا فييييييقي من الݣلبة ، بقاي سادة على راسك حتى ضيعي راسك وتخسري راسك ، نساي الماضي وعيشي وخلي الحب يدخل لحياتك ، شفتي الى فلتي عمر من يديك اسيري موتي ، عمرك اتلقاي راجل بحالو تقيل ورزين ومتبت ورجل بكل معنى الكلمة ، وحنين او ولد الناس ، شفتي الى فلتيه مانتي ختي مانا ختك ، تصبحي على خير ..

- دخلات سكينة وخلات إشراق غارقة فأفكارها ، فعلا سكينة عندها الحق ... حتى لإيمتا اتبقى سادة على راسها وعايشة مع الماضي ، الماضي لي كتبين لناس انها نساتو وهي مانساتوش ، واحد الانسان بغاتو وعطاتو قلبها وتزوجات بيه ، فأول فرصة خانها وشاف وحدة اخرى من غيرها ، غير حيت اتصايب ليه الوراق وحيت لاباس عليها وأتصرف عليه ، خلاها هي لي عطاتو قلبها ، واحد لي عاش حياتو ضاحك لاعب ناشط عايش الحب ، ولكن ربي نتاقم ليها منو واخا هي موتو ماتمناها لحد ، ولكن هو لي قلب عليها ، صافي جا الوقت لي تعطي الفرصة لراسها ولقلبها يبغي من جديد ، ولكن هاد المرة يبغي الشخص الصح .. ماشي الشخص الغلط ..

_____________________

‏أنا و أنتِ .. نشبه الحرب و السلام لا نلتقي و لا نفترق كلانا يبحث عن الاخر والهدنه بيننا حفنة احلام وموسيقى وقصائد لاتنام واختصارها لا القدر يجمعنا .. ولا البعد يفرقنا .. يقال (إمرأة بألف رجل) والحقيقة أنها لا شيء يمكن أن ينصفها وإن كان الذي يقاس عليه جيش من الرجال ، بإمكانها أن تكون جيشك الوحيد ، وآخر حائط صد ، وملجأك القابع بين ضلعين فقط ، يأويك من غارات الدنيا وبطشها ، كتف الصديق وصدر الأم وظهر الأب ، وغصن الزيتون الذي يمتد نحو السماء ، ليوقد فيها الشمس .. ‏كل الحُب لأولئك الذين يمنحونا أيديهم ،

في الوقت الذي نكونُ فيه أفلتنا كل شيء ..

- من بعدما حيدات حوايج السهرة ، جمعات شعرها ولبسات بيجامة ديالها ، خشات رجليها فالبانطوفة ديالها ونزلات للكوزينة ، مشات للفريݣو حلاتو ، جبدات بواطة ديال لاݣلاص ديال شكلاط ، هزات منو ورجعاتو ، هزات بواطة أخرى ديال الكراميل ونوݣا هزات منو خير الله ورجعاتو ، عمرات الزلافة على قدها ... هزات معلقة وخرجات من باب الكوزينة لوراني للجردة ، ݣلسات فوق الفوتوي وحطات رجليها على الطبلة وبدات كتاكل ، ساهية فسما ونجوم ... كتلدد وتنهد براحة ..

- وغير عرضي علينا حشومة ݣاع ..(هزات راسها فيه .. بعدات وخلات ليه البلاصة فين يݣلس ، سرح يدو وتكات ليه على كتفو ، هزات معلقة او وكلاتها ليه ..

- مصطفى : بنييين ، كيبان ليا نجيب حتى انا شي زلافة ..

- شريهان (بقات ساكتة عاد نطقات ) :

ماعرفت أخويا إيمتا غادي يسالي هاد الكابوس ؟ واحد الجو عمري شفت بحالو ، كنت كنشوف هادشي غير فالأفلام ... حتى حياني الله وعشتو ، رجال كبااار تشوفهم تختارهم من بين رجال ، غير شافو البنات ريوݣهم ساحو .. بقيت ݣالسة غير بزز ..

- مصطفى :

وي شفتك وحسيت بيك .. والمشكل كاع دوك الرجال لي شفتي ، غير رجال الأعمال لي معروفين ، واي حفل خيري كايكونو هوما السباقين ، شفتي حياتنا أختي واخا بسيطة وعلى قدنا ولكن زوينة بزاااف ، عالم الطبقة الأرستقراطية وناس الهاي كلاص ، غابة مايدخل ليها غير ديب وسبع ، كنتي غزال ياكلوك وأنت حي ..

- شريهان :

وي شفت كولشي بعينيا ، بغيتك تشوف دوك البنات ، انت راه شفتي كولشي بعينيك ، والله حتى يبقاو فيك ... باقيين صغاار بزااف ، بلاصتهم حدا والديهم ماشي هنا ..

- مصطفى :

مابقى والو ، دوزنا السطاج الأول ونجحنا فيه ، والثاني ونجحنا فيه ، دابا بقا السطاج الاخر وحتى هو غادي نجحو فيه إن شاء الله ..

- شريهان :

غدا إن شاء الله فصباح ، غادي نمشي عند كارلو لدار ، كيف تافقنا ، والشرط لي غادي يكون بيناتنا هو ممنوع تكون متعة فوق الحدود فالكلوپ ، باش هكا البنات نضمنو بلي مغايتقاسش شرفهم ، كارلو درتو غجيبي ، وأي حاجة انݣولها ليه غادي يديرها ، أهم حاجة راحتي ويكون فرحان معايا ..

- مصطفى :

منحتاجش نوصيك ، غدا غادي تكوني بوحدك ... رضي لبال لراسك مانخافش عليك ، ديجا غادي يكونو تابعينك غير فالمجية ، ولكن فرجعة لا حيت ممكن يسيفط شي حد يتبعك تفاهمنا ؟

- شريهان : واخا أخويا كون هاني ، ماتخافش عليا ..

- مصطفى (شاف فيها ) :

من نيتك ، ولش كاين شي واحد مايخافش على روحو ، انت راه ختي ونصي الثاني ، مايمكنش ليا مانخافش عليك ... على شحال عندي من أخت راه غير وحدة ..

- شريهان (سافت فيه وتبسمات ، حطات الزلافة وعنقاتو) :

لهلا يخطيك عليا أخويا ، الله يخليك ليا ولا يحرمني منك ياربي ..

- مصطفى : امين ياربي ..

- هاي هاي هاي الناس كيتاحبو من ورانا ، شوف أخويا على عينيك ..

- مالك (بإبتسامة باردة ) :

لينا الله أخويا ..

- شريهان (كتخنزر فيه ) :

مالك أخويا ياك لاباس ، لي ماعجبناه يدير بحالنا ، راه هو خوك حداك راه عنقو ..

- سعد :

لالا انا مابقا ليا والو ونعنق مراتي ، 14 يوم بتحديد ..

- مصطفى (كيضحك) : السيد مابقاش كيحشم ݣاع ..

- مالك (دار رجل على رجل) :

علاش هو إيمتا كان عندو الوجه لي يحشم عليه ..

- سعد : علاش أنحشم مالي شنو ݣلت .. حرام ولا عيب ياك انتزوج ..

- شريهان (كضحك) :

خليوه يفرح براسو ، فين واحد عمر ؟

يتبع...