السيدة الأولى الجزء 15

- وقف الطاكسي نزل منو كتبان ليه واقفة كتسناه ، وجها كان أكثر إشراقة على قبل .. شعرها متموج كيتغللوه خصلات خفيفة شقرية ... غير شافتو وتبسمات ليه .

وأخيرا على السلامة جيتي .. (جراتو من دراعو) يلاه نيت بغيت ناخود شي لعيبات ..

- مالك (بإستغراب كيشوف فيها) :

خلينا غير نݣولو ليك بصحة بعدا .. اش بغيتي تاخدي ؟

- شريهان : بغيت نصايب شي ماسكات .. كيشتي دابا غدا الحفلة وخاص نبان فنة كنشقشق ..

- مالك : وانت أصلا زوينة ، لاش دوك الماسكات وتخربيق ..

- شريهان :

التخربيق هو لي كتݣول فيه دابا ، وزايدون داكشي ديال العيالات متعرفش ليه أنت واخا .. المهم زيد مع انت كتعرف دوية بالإسبانية ، بغيت الباربا او الحامض .. وبغيت النشا وبغيت الحليب بودر حتى هو ... أممم شنو اخر اه بغيت طالك ديال ليبيبي ، وبغيت زيت الورد وزيت الكوك ..

- مالك : هادشي كامل اهاه زيدي لا تكوني نسيتي شيحاجة ..

- شريهان : اه نسيت بغيت واحد زوج بواطات حبدا لو يكونو من زاج الله يعزك ..

- مالك : أياااه مرحبا ، وهادشي فين ناوية ديريه عندك شي كوزينة ، ياك حنا كاينين غير فالاوطيل ..

- شريهان : انت اخطيبي العزيز ، انت اتهبط بجلالة قظرك وطلب من مدير الاوطيل يخليني ندخل للكوزينة ، نوجد ماسكاتي ودابا زيد باش منتعطلوش ...

- مالك :

ومنين انت اظيري هادشي ، كيفاش نديرو مع العشا ديال الليلة ؟

- شريهان :

فكااارت فيها فاش كنت فصالون ، مغانخرجوش ... باش يشكو يكولو كندوزو شي ليلة حمراء ..

- مالك (حبس المشي او وقف كيشوف فيها ) :

أشناهو ؟!! ليلة حمراء ݣلتي ؟

- شريهان (وقفات ورجعات جراتو ) :

وزيد راه غير بلعاني زعمة فهمتيني ؟

- مالك : فخبارك بعد المرات طتبقاي ساكتة ، حتى كتݣولي شي حوايج العفوووو ... زيدي قدامي قبل لا طلقي شيحاجة ماهياش ..

- داها للواحد سوپير مارشي ،، خدات داكشي كامل لي بغات وخرجو بزوج ... خداو طاكسي او ركبو للأوطيل .. وكيفما قالت لمالك دار على سعدو او وعدو ... طلب من مدير الاوطيل يخلي شريهان تستعمل الكوزينة ..

- نزلات للكوزينة بلا عݣز ، جامعة شعرها سفنجة عطات إبتسامة لدوك لي خدامين وبدات .. اول حاجة خدات الحامض غسلاتو مزيان حتى ولا كيضوي .. قطعاتو بقشورو حسدات ليه غير العظم ... ودارتو فكاسرونة وزادت عليه الما ، وخلاتو يتبخ ... غير طاب وبرد شوية دوراتو فالميكسور وصفاتو حتى ولا بحالش عصير الحامض خاتر ... زادت عليه جوج معالق نشا ، طرباتو مزيان ودارتو فوق البوطة كتحرك فيه حتى عقاد ... خلاتو شوية يرتاح من بعد زادت عليه معلقة كبيرة زيت الورد ومعلقة زيت الكوك .. ومعلقة كبيرة بودرة الاطفال ، غير يرد دارتو فبواطة وحطاتو على جنب ... خدات باربة غسلاتها مزيان وحكاتها فالحكاكة الرقيقة وهي خضرا ... صفاتها مزيان من الما ديالها ، خدات بواطة صغيرة دارت فيها حليب نيدو وزادت عليه معلقة ما الباربا ... وبواطة اخرا دارت فيها النشا معلقة كبيرة وزادت عليها معلقة بحالها ماء باربا ... ضافت فهادوك وتبسمات ليهم وخرجات من الكوزينة هازة ماسكاتها وغادية لبيتها ... كان واقف كيتسناها ..

- شريهان :

شد شد من عندي نحل البيت ... شد من عندها دوك البواطات ماهضرش اكايشوف وساكت ،، حلات البيت ودخلات وهو دخل وراها ... حط دوك البواطات وشاف فيها ..

- مالك :

بغيت غير نعرف ، لي بغودوي فاش قصرو معاك ... كون ݣلتيها نمشيو لاحس پارا وتاخدي لي بغيتي ... ونمشيو لأحسن پاغفيمغي وتاخدي شنو بغيتي ..

- شريهان (شافت فيه) :

نوو انا كيعجبني الطبيعي ..

- مالك (ݣلس هاز بواطة فيها كريم صفر ) :

ديالاش هدا دابا ؟

- شريهان (بإبتسامة عاجبها شنو دارت ) :

أسيدي هداك كريم للمناطق الحساسة ، مكتعرفوش نتوما داكشي ... فيه الحامض وزيت الورد لي واعر فتبيض .. وفيه زيت الكوك مرطب وبودرة الأطفال ونشا لي كيبيض حتى هو ..

- مالك : بحالاش هاد المناطق الحساسة ، زعمة ممكن نديروه حتى حنا ..

- شريهان (جاتها الضحكة ) :

واهو ممكن ديروه ، على حسب اهو ماعرفتش والله ماعرفت منݣوليك دابا هو على حساب داكشي لي فيك ..

- مالك : كيفاش لي فيا مافهمتش فهميني ... حيت كيبان ليا عندك دراية بهادشي طبيعي ممكن تمشي فيه بعيد ..

- شريهان (كتحك فراسها ماعرفات كيفاش تشرح ليه ) :

دابا هدا حنا كنديروه لبيطان ..

- مالك : بغيتي تكولي الإبط ياك ، حيت هاد البيطان عمري سمعتها ..

- شريهان : اه بيطان جمع إبط .. وكنديروها لركابي جمع ركبة ، ولمرافق جمع مرفق .. اووو

- مالك : اووو شنو ؟؟!!

- شريهان :

ولجدورة ديال الفخاض ..

- مالك (بإستغراب) :

علاش الفخاض ديالنا عندهم جدورة ؟ عاهدي بجدر كيكون فشجرة فشي عشبة ..

- شريهان : وراه حتى حنا عندنا الشجر ..

- مالك : كيفاش ؟

- شريهان : سير الله يرحم باك عطيني بتيساع ... سير لا نصدقو فشي طاب وشي مطاب سير عفاك .. خاصني معاك الخشيبات ..

- مالك : بالعكس خاص تشرحي ليا .. مثلا مككن ندير انا هاد العجب مايسبب ليا حتى مشكل .. نقد نديرو حتى انا لجدورة ديال فخاضي ..

- شريهان :

وهي عندك جدورة ديال فخاضك قوقيين ...؟؟

- مالك (مافهمهاش ) :

كيفاش قوقيين ؟

- شريهان :

قوقيين خوت المداديين ... لي مخضرين بالخنونييين .. ولاد عم بات بات الكحلين (نطرات ليه البواطة) سير اخويا هنينا سير بعد مني اشداك لهادشي انت ݣاع .. خليني هانية خليني عليك فتيقار نصدقو ݣايلين ليك شي حاجة ماهياش ، ومش طبة كحلة هادي تاني .. زوينة هادي شفتي انت براكة عليك اكريم الحلاقة صافي انت أصلا زوين بلا هادشي ..

- مالك (كيضحك عاجبو الحال ) :

وشنو فيها عادي نجربوه حتى حنا ، مالنا ماعليناش الله ؟

- شريهان :

لا هادشي مكايجيش مع الرجال ، كينوض بوشويكة وكيدير تالول ... وكيدير حتى بوفالج وكيخليك تالف ، وكيدير بوزلوم يخليك كل ليلة تولول وتلوم .. وكيدير بوقفقاف والصرع كيخليك تبورد بحال الى فيك المسلمين .. وهنينا الله يعطيك الستر ..

- مالك : اهاه وداكشي لي فالبواطة الحمر شنو هو؟

- شريهان (شدات فراسها ) :

لي فبواطة صغيرة باربا ونشا لشفايف وزروقية ... ولي فالبواطة لوخرا ، باربا وحليب غبرة للوجه للبيوضية ... ايوا تكايس عليا انور عيني وخليني نرتاح شوية ..

- مالك (ميت بضحك ) :

وشنو تاني ... شداتو من يدو جراتو وخرجاتو لبرا وسدات عليه ..

- مالك (من ورا الباب) :

وعقلي هادو هوما فعايلك نتحاسبو من بعد ..

- شريهان : واخا واخا نتحاسبو ..

_________________

- عمر (بإستفهام ) :

شكون هدا لي كتبغيه ؟

- حليمة : ولدي عمر عند بالي مشيتي ؟

- عمر : لا مشا غير سعد ... انا خاصني ندوز لابورطوار .. جميلة كيفاش بللانك شكون هدا لي كتبغيه ..

- جميلة (حدرات راسها توترات ) ..

- حليمة : والو اولدي راه غير كتخربق مديش عليها ..

- عمر : لالا ندي عليها علاش منديش ... اجي احي معايا عاودي ليا اجي (جرها من يدها مخرجها لجردة تحت انظار حليمة لي خايفة مسكينة ) ..

- عمر : ايوا عاودي ليا شكون هدا لي كتبغيه ؟

- جميلة (هزات راسها فيه متوترة وخايفة ) :

غير غير واحد دري كنعرفو شحال هادي هدا مكان ..

- عمر (بإبتسامة ) :

ايااه الالة مزيان مزيان ومخبية علينا ، ايوا وهو كيبغيك ولالا ؟

- جميلة (بلعات ريقها) :

الصراحة لا .. هو كيعتابرني بحال ختو .. وماما منين ݣلتها ليها ماعجبهاش الحال ..

- عمر : وباش عرفتيه كيبغيك بحال ختو؟ سولتيه ؟

- جميلة :

لا ماسولتوش ، ولكن مدة وانا كنعرفو سينين هادي ، كون كيبغيني راه ايلمح ليا .. ولكن هو لا بالعكس كيفكر علاش لا يتزوج ببنت اخرى .. ولدرجة كاليا واحد المرة نهار الكبير نشوفك بدارك ومزوجة وبلي حنا خوت ..

- عمر (سكت ورجع شاف فيها ) :

جميلة ... انا عارف الاحساس ديال انك تبغي إنسان مكايبغيكش خايب بزاف .. مغاديش نكوليك درتي غلط كبير حيت بغيتيه وانت عارفاه عمرو أيبغيك ... حيت الحب مكنتحكموش فيه هو لي كيدخل لقلبنا بلا شوار ، ولكن الى بقيتس على هاد الحب غير أتعدبي راسك .. هاد الإنسان راه عمرو نغادي يبغيك نهائيا ... كيف ݣلتي كون كان كيبغيك راه غادي يتقدم ليك ويعتارف ليك مدة هادي تفاهمنا ..

- جميلة (نزلات دمعة من عينها ... حسات بشيحاجة واحلة ليها فحلقها ) :

وشنو كتنصحني ندير ؟

- عمر :

شوفي حياتك ... ديها فراسك كتاشفي الحياة ، شحال هادي وانت حابسة راسك فدار انا بعدا عمري شفتك سافرتي ... حتى لوك ديالك هو هو عمرك بدلتيه ... دفنتي راسك فمشاعر لي كيأديوك لأنو الحب من طرف واحد راه غير كيأدي ... دفنتي راسك وهملتيه ونسيتيه ... بعدي على هاد الانسان من الأحسن ، سافري وكتاشفي راسك وخلي الناس يكتاشفوك واخا ..

- جميلة (بإبتسامة باهتة ) :

غادي نحاول كون هاني ، انحاول ندير بكلامك ..

- عمر : والى بغيتي أي حاجة أنا هنا تافقنا ..

- جميلة : إن شاء الله شكرا ... انا خاصني نمشي ..

- عمر : حتى أنا .. عطاتو بظهر ورجعات للكوزينة ... اما هو مشا لجهة طوموبيلتو ركب وديمارا شاد طريق لابوراطوار ..

- حلات البيت ... جاب الله الباب بالبصمة ، مسحات صبع وحلات بيه الباب وخرجات سروال البيجامة مهزوز .. مفرقة رجليها وهازة يديها ، لسما وجها طالياه كلو حمر ... وقفات قدام بيتو .. ماعرفاتش كيفاش ادير تدق جبهتها عامرة وجها كلو عامر ... ركابيها عامرين .. هزات راجليها وبدات دق بيهم او والو .. وقفات كتفكر فشي حل ، ضارت وعطات بظهرها للباب ... تحدرات شوية وبدات دق بوراها ، وهي على نفس الوضعية كتسمع شهقة ... كان واقف مالك او وراه رئيسة الخدم ديال لوطيل ... تبلوكاو كيشوفو فيها كيفاش كانت كدير ..

- شريهان (بدات كتقاد فالوقفة سوية بشوية ، مقاداش تهضر حيت الماسك نشف وفمها فيه الماسك .. هصرتها معكلة حيت مقاداش تدوي) :

هههه ماتفهمونيش غلط ... كنت غير بغيت ندق عليك ..

- ضار عند رئيسة الخدم حشمان .. :

سمحيليا ، من بعد ونحلو المشكل .. صافي شكرا .. حدرات راسها وهربات من داك المنظر مخلياه منو ليها .. جا لعندها بخطوات سريعة ، حل الباب وجرها من دراعها دخلها وسد الباب ..

- مالك (بصوت عالي ) :

واش من نيتك واش الناس كيدقو الباب بداك الشكل ، جاب الله كنت مع السيدة ، كون داز شي واحد ومسافش الباب مسدود ، ايكول اكنت كندير ليك شيحاجة .. يلربي صبر من عند واش هاد الحالة ... بحال الى دايرين ليك الݣبص ..

- شريهان (واقفة مفرقة رجليها ) :

وراه كلاوني كتافي ، ومالقيت لي يحكهم ليا ..

- مالك (بإستغراب) :

أشناهو ؟ يحك ليك اش كتافك ، جايا عندي بهاد الحالة باش نحك ليك كتافك ..؟؟

- شريهان :

اه كلاوني بزااف .. وكيشتي يديا مشغولين ، ومالقيت باش ندق عليك ... وانت ما جيتو ولقيتوني هكاك اش غادي ندير ليكم انا ... حك حك .. (عطاتو بظهرها ) ... بقا واقف مصدوم كيشوف فهاد السيدة هادي لي مرات تكون بعقلها ومرات تكول هاربة من شي سبيطار ..

- شريهان : وحك وانت واقف تم ..

- قرب منها مالك بخطوات بطيئة مزال تحت تأتير الصدمة ... بدا كيحك ليها ..

- شريهان : هاااح تم تم ، طلع طلع شوية تم تم ... زيد على ليسر تم لا لا هبط التحت وناري مكتعرفش تحك ، زيد على ليمن زيد طلع شوي شوي تماااااااااا ، الله على راحة ..

- مالك : هدا راه مابقاش حكان ، هدا راه ولا تعلم السياقة ..

- شريهان : أجي حل ليا الباب اندخل ندوش ..

- مالك :

على سلامتنا .. حل ليها الباب ، مشات لبيتها وسد عليها ..

من ورا الدوش ، دهنات داتها كلوها بواحد الحليب لبسات بيجامة ديالها وتكات فوق نموسية باش ترتاح .. سمعات الدقان فالباب ، مشات حلات لقات خدمة الغرف جابو ليها متاكل ..

-(كتدوي بالفرنسية) انت وموسيو مالك اتغداو بزوج سينيورة ..

- شريهان : واخا شكرا ... دخلات ليها الماكلة ، شوية ولحق عليها مالك .. حتى هو باينة فيها يلاه خرج من ادوش

- حطو ليهم الماكلة فالبالكو ومشاو ..

- مالك (كيطلعها وينزلها ) :

مممم زيانيتي ..

- شريهان (بعجرفة ) :

انا ديما زوينة وقنة الحجوبات عليا ، داكشي غير روتوشات وصافي ..

- ݣلسو كيتغداو .. فاللحظة كان الصمت ، هي كتاكل وهو كياكل ويشوف فيها ..

- مالك : ممكن نسولك ؟

- شريهان (هزات راسها فيه ) :

اهاه تفضل سول ؟

- مالك : علاش عمري عجبتك ؟ شنو السبب ؟

- ݣالس فوق الكرسي ... شاد ورقة ديال تحليلة فيديه ، عاقد غوباشتو وساهي .. ، هز راسو وتنهد تنهيدة طويلة ، خدا الورقة رجعها لجوا ديالها .. وقف وخرج من لابورطوار ، ركب فطوموبيلتو ومشا ..

_______________

- سكينة (فرحانة كتعاود لإشراق ) :

ناري يا إشراق ، قلبي كيضرب وحق الله العظيم ... عرفتي شنو صدمني كاليك بغاو يخطبوني ... ناري ماعرفنا شنو غادي نديرو ..

- إشراق (كتجمع الطبلة) :

غادي نديرو لي خاصو يدار ... انت متخميش فهادشي إن شاء الله كولشي غادي يدوز بيخير وعلى خير ..

- سكينة (كتشوف فإشراق ) :

وانت شنو جديدك ... هاد الأيام تشغلت عليك اختي ، نسيتك أسمحيليا ..

- إشراق (شافت فيها ) :

لا مكاين والو ، الجديد هو غادي نبدا الخدمة ..

- سكينة (مصدومة) :

كتفلاي عليا ياك ؟ وايلي بصح كيفاش مافهمتش .. عاودي ليا ..

- إشراق :

والو نهار لي جا فيه عمر ودا شمس ، مشيت معاهم وعرض عليا نخدم عندهم ، فواحد الريسطو مغربي قربو يحلوه ... هدا مكان .

- سكينة (بإستغراب) :

ولكن انت كنتي ضد فكرة الخدمة .. كيفاش حتى جيتي وقبلتي دابا ؟!

- إشراق :

دابا الوقت تبدلات ... شمس دخلات لروض تقرا دابا ، يعني عندي الوقت والمصاريف غادية وكتزاد وانت إن شاء الله قربتي تزوجي .. الخدمة زوينة بزاف وثمن لي وااعر يعيشني فوق السلك .. وزيد عليها كاينة شيحاجة أخرى ..

- سكينة (بإستفهام ) :

شنو هي هاد الحاجة ؟

- إشراق : ياسمين .. البنت لي فدار شريهان ، تقدر تكون اخت شمس ماشي يقد انا متأكدة ختها ..

- سكينة (خبطات فخاضها ) :

كتفلاي عليا ياك ، اويلي متكوليهاش باش عرفتيها كيفاش وقع عاودي ليا ؟

- إشراق (عاودات ليها كولشي من الاول للأخير ) ..

- سكينة (مصدومة ساهية وساكتة ... هزات عينيها فختها ونطقات ) :

داك النهار شفت الشبه لي بانتهم ... ولكن أنا مديت ماجبت ݣلت راه عادي ، ولكن دابا صدمتيني وحق الله العظيم .. قاطعهم صوت سونيت ديال الباب ..

- مشات إشراق للباب حلات .. كان عمر لي واقف وفيدو جوا بيض ...

- إشراق (كتشوف فيه وفجوا لي فيدو ) :

سلام دخل ... دخل عمر غير شافتو سكينة وقفات ... سلم عليها وݣلس .. وقفات إشراق كتشوف فيه وتشوف فجوا لي فيديه ..

- إشراق (بتوتر) :

التحليلة ياك ؟

- عمر : أه هي ... مد ليها الورقة ..

- إشراق : غير ݣوليا ، بلاما نشوف انا أصلا مكنعرفش نقرا تحاليل غير ݣول شنو كاين .. ختها ولا ماشي ختها ؟

- شريهان (حبسات اللقمة ففمها كتشوف فيه بإستغراب ) :

بغيت انعرف منين كيجيوك هاد الأسئلة ؟

- مالك (حط لي فيدو وقرب منها كيدوي بجدية ) :

سولتك جاوبي بكل صراحة بلا ماتبقاي دوري فالهضرة ، بغيت جواب ..

- شريهان (كتشوف فيه ... ماعرفاتش باش تجاوبو ) :

الصراحة : انا معارفاش باش غادي نجاوبك ولا كيفاش انجاوبك ... حيت أصلا عمري فكرت فهاد القضية فهمتيني ؟؟

- مالك (كيفكر) :

مممم واخا الالة ... انا وياك انلعبو واحد اللعبة خفيفة ، غادي تورينا واش عمري عجبتك ولالا ..

- شريهان (وحلات ليها بدات كتكح عطاها كاس ديال الما شربات ) :

لالا انت واقيلة أترات عليك الشمس ، كيفاش نلعبو لالا ولاواه عاوتاني ..

- مالك (تبسم) :

ماعرفتش علاش كنحس بلي كتهربي ... وبلي خايفة لا تحصلي ؟

- شريهان : غير كيبان ليك ، بغيتينا نلعبو نلعبو هانية ..

- مالك : اهاه واخا يلالة مرحبا .. اول سؤال .. شنو هو لون عينيا ..

- شريهان (بلاما تفكر ) :

كحل ..

- مالك : شعري لونو ؟

- شريهان (كتاكل ) : كحل وحجبانك كحلين وشفارك طوال وكحلين ..

- مالك (تبسم ) :

فين عندي الوشام ؟

- شريهان : عندك فصدرك ودراع يدك ليسرة ... وعندك فوق يدك او فرجلك ليمنية ..

- مالك : شنو الرسمة لي واشم ؟

- شريهان :

فصدرك واشم بوصلة وفدراعك واشم مرا ... كتشبع ليا لخالتي نزهة ، وفوق يدك كاتب شيحاجة ماحققتش بزاف ، وفرجلك راسم راجل او مرا ..

- مالك : شنو كنلبس بزاف الكاجوال ولا سبور ؟

- شريهان : لا كتلبس الكاجوال ... وفدار كتلبس الكيطمات ..

- مالك : إمتا عيد ميلادي ؟

- شريهان : نهار 1/12 بحالي بحالك عيد ميلادنا فنهار واحد ..

- مالك (بقا ساكت وفالداخل ديالو فرحان بزاف ... حيت عارفة عليه كولشي ، ورادة ليه لبال لكولشي واخا هي معايقاش براسها وعندها عادي ) :

بصحة وراحة ... انا شبعت صافي ، رتاحي ..

- شريهان (بإستغراب) :

صافي ؟! ماكليتي والو كاعما تغديتي ؟

- مالك (وقف) :

لا مافياش لي ياكول شبعاااان ... خلاها وخرج ..

_________________

إشراق : ݣوليا راه قلبي غادي يخرج ..

- عمر : كان عندك الحق ، ياسمين أخت شمس ... إشراق لي كان واقفة ݣلسات شادة راسها ... سكينة مكانتش قل منها ..

الله ياخود فيه الحق ، خلا جوج بنات ... دار قدها قد راسو ... انت خلاك حاملة ، وبلا حشمة حمل وحدة اخرا او ولد معاها ..

- إشراق (هزات راسها فيها ) :

سكينة ، مكاين لاش تجبدي واحد ميت ... واخا هو دار علاش ، ولكن يلاما تجبديه ..

- عمر : دابا لي وقع راه وقع ... البنت خت شمس ، وانتوقررتي تبنايها ..

- سكينة (بصدمة) : اشناهو من نيتك أ إشراق ؟

- إشراق (خرجات فيها عينيها ) :

لا من ريتي ، علاش شنو بغيتيني ندير ، نخليها تكبر فالخيرية ... تجي شي عائلة تديها تربيها ، تربيها على دين غير دينها ، تربيها بعيدة على ختها ... وعلم الله كيفاش تكبر ... انا انربيها مع ختها حتى تكبر وديك الساعات هي حرة دير لي بغات فهمتيني ..

- سكينة :

انا ماكلت ليك والو ، ولكن راها مسؤولية كبيرة ... مصاريف جوج بنات قرايتهم لباسهم وانت بوحدك مامعاك حتى راجل ..

- إشراق (ساخطة ) :

ماعندي ماندير بشي راجل ... غسر الى كان بحال سفيان الله يرحمو ... ماعندي مندير بيه ، انا قادة نربي البنات بوحدي ..

- عمر (غمز سكينة باش تسكت ) :

إشراق عندها الحق ، المهم دابا هو تخدم باش المصلحة تقد تعطيها البنت ، حيت مايمكنش يعطيوها البنت حتى يتحققو واش اتكون بيخير معاها ولالا .. داكشي باش قبل مانفتحو الريسطو اتخدمي معايا ..

- إشراق( شافت فيه ) :

ولكن انا شنو غادي نخدم معاك ؟

- عمر (بجدية ) : مساعدة ديــالـــــي ...

__________________

فالعشية ، كانو مجموعين فوق الطبلة ديال العشا .. عمر تافق مع إشراق باش تبدا معاه الخدمة إبتداءا من السيمانة الجايا .. باش هكا تقدر توفر وسط مزيان للبنات بزوج وخصوصا ياسمين ...

من بعدما طلعات الخدامة ياسمين للبيتها ... عاود ليهم عمر شنو وقع ..

نزهة : سبحان الله ... صدفة غريبة هادي والله ..

- أحمد : أحسن مادرتي اولدي والله ، هو خدمتيها معاك .. الله يرضي عليك ..

- جميلة (من بعد تردد) : حتى انا بغيت نݣوليكم بلي إن شاء الله ناوية نسافر ..

- حليمة (كتشوف فيها وساكتة ) ..

- نزهة : لفين أبنتي ؟

- جميلة (بإبتسامة باهتة) : الصراحة من شحال هادي كنت كنتمنى نزور سنغافورة ... وهادي فرصة ناخود كونجي ، شحال هادي ما سافرت ..

- احمد : مزيان ابنتي تبدلي الجو .. والى خصاتك اي حاجة ݣوليها ليا ..

- جميلة: لهلا يخطيك اعمي ... شافت فعمر تبسم ليها حيت دارت بنصيحتو رضات ليه الإبتسامة وكملات ماكلتها .. كملو الماكلة ديالهم .. من العشا كل واحد فيهم طلع لبيتو ... مصطفى جا معطل وجا معشي كان باغي غير ينعس يرتاح .. وداكشي لي دار دخل لبيتو نعس بحوايجو ..

___________________

" من قال أن الكلمات لا تفعل شيئآ الكلمة إن لمستك إحتضنتك وإن جرحتك أغرقتك فى بحر الألم بكلمة نهدم حلما وبكلمة نداوي جرحا بكلمة نخسر شخصا وبكلمة نكسب قلبا فتذكر قبل أن تنطق كلماتك أنها بصمة فى القلوب لا تتغير .

- ݣالس على راس الطبلة ... عضلاتو بارزة من تيشورت ... وشم سميتها كيبان واضح على عنقو من بياض بشرتو .. حطات ليه الخدامة الفطور ، رجعات لجهة الباب خدات جورنال والمجلات حطاتهم حداه فطبلة ... او وقفات .. أشر ليها براسو باش تخوي ليه القهوة وتقادها كيف كيشربها كل الصباح ..

خدا الجورنال ، مع فتح أول صفحة ... كيقرا بخط عريض ... خطوبة ثانية للوزير الشباب ورياض ، مع سيدة الأعمال وإبنة عمه شريهان العراقي .. هبطو عينيه نيشان ليها ... قلبو كان غادي يوقف يديه كيترعدو ، حلقو نشف قلبو كيضرب بجهد ... كلو كيترعد صدرو كيطلع ويهبط ، وقف بزربة مزعز الطبلة حتى تكبات القهوة ، رجع بلور مطيح الكرسي ... للخدامة مافهمات والو وقفات كتشوف فيه ... كيحرك راسو بلا ... تحجرو الدموع فعينيه ماقادش يتيق شنو كيشوف .. اخر كلمة نطق قبل ماضبابة تعمي ليه عينيه :

- إيـــــمــــان

- فإسپانيا ... طلقات شعرها من بعدما صايبتو .. لبسات كسوة فالأحمر لي خدات ، صباط عالي فالكحل .. مكياج سموكي .. وبوشيط فالكحل رشات من ريحتها او وقفات كتشوف راسها فالمرايا ... الصراحة اول مرة أتبان بهاد الشكل خطيرة ، واخا شوية الكسوة معيقة من جهة الصدر ، ولكن ماعندها مدير ... تدق الباب ، عرفاتو بلي هو لي غادي يكون دق عليها .. حلات كان واقف عاطيها بظهر ، مع الحلة مع ضار ... بقا ثواني معدودة وهو كيشوف فيها مصدوم ... مامتيقش بلي هي لي قدامو ، مكرهش كون غطاها ولا لبسها شي تريكو طالع للعنق ولا هاد اللبسة لي كلها إغراء ، هي بدورها كانت كتشوف فيه ... شعرو لي على عينيه نظارات الشمسية ، الڤيست لي منها للحمو فالبيج ... الوشام لي كيبان البعض منو .. سروال كحل وسباط فنفس اللون .. ريحتو مع حلات الباب ضربات فيها ، واش تكدب بلي شيحاجة حسات بيها ... تكدب بلي قلبها ضرب وجاتها الرجفة والخلعة وكولشي تجمع عليها ، مافهماتش شنو هادشي لي واقع ليها وعمرها فحياتها حسات بيه ..

- مالك (بدون وعي) :

جيتي زوينة بزااف ، زوينة لدرجة لي شافك كيضرو قلبو ..

- شريهان (تنهدات تنهيدة طويلة تحبس ليها الهوا فحلقها ) :

و و وقيلة خاصنا نمشيو ياك ؟

- مالك (تبسم ) : اهاه نمشيو (عطاها يدو ... بقات كتشوف فيه مدة وعطاتو يدها شد فيها ، سد الباب ... دخلو لاسانسور ، عينيه طامو عليها ، هي حاسة بيه وماقاداش تشوف فيه ، حاسة بقلبها غادي يخرج من بلاصتو ... يدو مافرقاتش يدها وهوما الداخل وهوما على برا ) ... جات الطوموبيل من نوع ليموزين ... خداتهم للبلاصة الحفلة .. مع نزلو مع تسلطات عليهم الكاميرات من كل جهة .. خداها من خصرها خشاها فيه ، أما هيا كانت حاطة يدها على عنقو وكتبسم ... دخلو للحفلة والكاميرات تابعاهم حتى غابو عن الأنظار ..

__________________

حلات ليه الباب دخل بخطوات سريعة الخوف على وجهو .. مشا نيشان لبيت نعاس ، كان تم فوق نموسية ناعس وطبيب حداه كيقيد فواحد الورقة ... وقف وضار عندو ..

- دجيكو (بقلق) :

شنو كاين ادكتور شنو عندو ؟

- الدكتور : قبل بغيت نسولك ... واش كان كيعاني من شي مرض ، واش ديجا واقعة ليه شي صدمة فحياتو ؟

- دجيكو :

اه شحال هادي شي 16 سنة دابا ، كان تعرض لصدمة وكان كيتعالج ومتبع الدوا ديالو وبرا ..

- الدكتور : كيبان ليا بلي مكانش متبع دواه بإنتظام ... اليوم وقعات ليه إنتكاسة ، شيحاجة خلاتو يعيش صدمة ... داكشي باش فقد الوعي ، خاصو ضروري ياخود هاد الدوا ... وتبعدوه على أي صدمات داكوغ ..

- دجيكو : كون هاني ادكتور .. شكرا (أشر للخدامة تمشي معاه للباب) ... وصلاتو الخدامة حتى لباب ورجعات ..

- دجيكو (وقفها) :

شنو وقع ؟

- الخدامة : حطيت ليه الفطور بحال ديما ... معاهم الجرائد والمجلات لي كيقرا ، يلاه كنخوي ليه القهوة كنسوفو وقف ، كيشوف فالجريدة بطريقة فشكل ، بحال الى شاف شيحاجة صدماتو ... ولا كلو كيترعد طيح الكرسي طيح كلشي وطاح ..

- خلاها دجيكو ومشا للطبلة فين كانو محطوطين الجرائد .. هز الجريدة الاولى لي محطوطة ، فصفحة الاولى كيبان ليه مالك ومعاه بنت نسخة طبق الأصل لإيمان ، البنت لي كان كيبغيها كارلو لي وشم إسمها فعنقو ، لي رسوماتها معمرين بيتو ... وتصاورها معمرين بيتو ، البنت لي بسبابها دخل لحبس ، وبسبابها بدل إسمو العائلي للإسم كابوني كوزا نوسترا ... دجيكو رجع خطوة لور وݣلس ، شاد راسو كيحس بكلشي تخربق ... كاع لي كانو مخططين ليه غادي يتضرب فزيرو .. هز راسو منين سمع صوتو ..

- علاش جيتي ؟ شكون جابك ؟

- دجيكو : كان خاصني ضروري نجي ..

- كارلو (كيجر فرجليه ) :

بغيتك تجيب ليا كاع المعلومات عليها كلشي ادجيكو كولشي ، دابا دابا ..(شد فالكرسي حاس بالغيا وݣلس) ..

- دجيكو : اول حاجة انجيب ليك دواك هو الأول ..

- كارلو (بالغوات ، شد فراسو ) :

ݣلت ليك بغيت كاع المعلومات عليها ، كولشي بغيت نعرف كولشي ... ودابا .

- دجيكو (ستسلم لطلبو) : واخا مايكون أخاطرك ..

__________________

- فبلاصة أخرى ... حلات الخدامة الباب ، دخل كلو عرقان ، هاز قرعة ديال الما فيدو حطها .. مسح وجهو بالفوكة لي كانت على عنقو لاحها حتى هزاتها الخدامة ، دخل لبيتو نيشان للحمام ... من بعدما خدا دوش بدل حوايجو ... وخرج لصالون الفطور كان واجد ، فطر على خاطرو وراحتوو ... من عادتو مكايقراش الجرائد حتى ياكل ، هكا اي خبر خايب مايسدش ليه الشهية ... سالة هز كاسو ديال القهوة ومشا للبالكو ... شوية وجات الخدامة ..

- سينيور دييݣو سينيور ماتيو وصل ..

- دييݣو (بلاما يشوف فيها ) : كنتسناه .. مشات الخدامة شوية وصل ماتيو .

- صباح الخير .. كي صبحتي رتاحيتي ؟

- دييݣو (شاف فيه وتبسم ) :

كنݣوليك ديما منين دخل ، بلاما تبقى تسنى جي عندي نيشان انت ماشي براني ، اما بخصوص الراحة انا مرتاح مزيان ... كنتسنى غير نهار لي غادي نشوف فيه وجه كارلو ... وندي ليه ݣاع داكشي لي عندو ونرجعو ليا ... ونشوفو كيتعدب قدام عيني ، كيفما تعدبت انا هادشي 16 سنة ..

- ماتيو (ݣلس ) : كيبان ليا مزال ماقريتيش الجرائد هاد الصباح ؟

- دييݣو : انت عارف مزيان مكنبغيش نقراهم على صباح ، كيخسرو ليا مجاجي ... علاش شنو كاين ؟

- ماتيو (بملامح مكتفسرش ) :

من الأحسن تشوفهم انت براسك (هز جورنال قدامو ومدو ليه ) ..

- دييݣو (خداه من عندو حط كاسو ديال القهوة ، الصفحة الاولى مافيها والو ... دور الصفحة جات عينو نيشان على الخبر ، حس بدنيا ضارت بيه رجليه فشلو عليه ... دقات قلبو فتزايد ، كيحس بالبرودة طالعة معاه ... عينيه كسبريو وهوما كيشوفو فديك الصورة ... شد الفوتوي وݣلس بجهد ، صدرو كيطلع وينزل ) :

مايمكنش مايمكنس ، الماضي كيتعاود من جديد ... مايمكنس هادشي لي كنشوف .. (شفارو كانو كيترعدو البؤبؤ ديال عينيه كيترعد ... كيحس بحلقو نشف .. هز كاس ديال الما محطوط نزل عليه دقة وحدة .. هز راسو فماتيو كيشوف فيه مصدوم ...

- عرفتي شكون هي ؟

- ماتيو :

شريهان العراقي ... بنت عم مالك العراقي وزير الشباب والرياضة .. وخطيبتو ، هاجرات لإسبانيا هادي 6 سنوات تعرفات على رجل أعمال برازيلي خانز فلوس ... شهر واحد رتابطات بيه ، داها للبرازيل عاشت معاه تم وبحكم ماعندوش ولاد كتب ليه كاع لي عندو بسميتها ، ومن تم ولات سيدة أعمال ... عندها بوتيكات ديال الحوايج فسپانيا وهنا ففرنسا ، وعندها نايت كلوپ فمصر ... ودابا هي على علاقة مع ولد عمها ، بغيت نكول مخطوبين ... ورجعات لفرنسا وناوية تستتمر فشي مشروع يكون مربح ..

- دييݣو (الغشاوة على عينيه كيشوف فنقطة وحدة راسو كيمشي ويجي ) :

غادي يكون شاف الخبر ، غادي يكون شافها اتكون شبهات ليه ليها باينة ، دابا باين بلي كيقلب وراها شكون هي ... وباين بلي أيبغيها جنبو (هز راسو فماتيو ) خدا قلب الاولى وماتت ... ودابا غادي يبغي ياخود قلب الثانية واخا ماشي ديالو او واخا قلبها مع واحد اخر ...

- ماتيو : فاش كتفكر ؟

- دييݣو :

هادي 16 عام قتل السيد لي رباني ... وخدا قلب البنت لي بغيتها من كل قلبي ... ودابا غادي ناخود كاع لي عندو وروحو ، وغادي ناخد حتى شريهان العراقي ، كاع الحوايج لي حاط عليهم كارلو كابوني عينيه ، اناخدهم ليه ...

____________________

- دجيكو :

هادو جميع المعلومات عليها ، وعندها سيت فالأنترنت .. هو هدا لي كتشوف قدامك ..

- كارلو (كيدور فسيت ديالها كيشوف تصاورها ، لي جن الكحل ماطيحش عليهم انهم مفبركين .. كيتمعن فتصاور ومبسم غير بوحدو بحال شي حمق ) :

كتبان زوينة بزاااف ... زوينة كثر من لازم الجمال ديالها بحال شي سم ..

- دجيكو (بلع ريقو ) :

سينيور ، الله يخليك ..

- كارلو (قاطعو) :

كلتي ليا بلي رجعات لفرنسا تستتمر ... سمعني مزياااان بغيت سميتها وسمية الوزير تكون من ضمن المدعوين للحفلة لي غادي نديرو ، وبغيت شريهان تكون هي الشريك فالكلوب سمعتي ولالا ...

- دجيكو : ولكن سينيور ، ياك (قاطعو :

راه سمعتيني شنو ݣلت ليك ... انت ما عليك غير تنفد تفاهمنا ؟

- دجيكو (تنهد) : واخا سينيور .. واخا .

- فالڤيلا ..

- أحمد (موجه كلامو لعمر ) :

شفتي تصاور خوك ... حشومة هوما مزال مدارو خطوبة رسمية ..

- عمر :

بابا مالك بعقلو .. مستحيل يدير شيحاجة لي خايبة ... هو كيبغي شريهان وخطبها منكم وركب ليها الخاتم قدامكم ... ومن دمو ولحمو ..

- أحمد :

عرفت غير هو ، مع شفت شريهان اول مرة تلبس بحال داك اللباس جاني فشكل ..

- عمر :

وعادي ابابا ، راه ضروري ... علاش شنو بغيتيها تلبس ، ضروري تبظل ستيل لبسها .. متكبرش الموضوع ابابا ..

- أحمد : واخا هاني ساكت ديرو لي بغيتو ..

- عمر :

ايمنتا غادي تمشيو تخطبو سكينة ؟

- أحمد : يرجع خوك بعدا وشريهان من سفر ، وغادي نمشيو نخطبوها إن شاء الله .. وانت شنو درتي مع إشراق ؟

- عمر : درت لي خاصو يدار ابابا ، خاصها تبدا الخدمة هو الاول ، قبل منفتخو الريسطو .. باش هكا تقدر تبنى ياسمين ..

- أحمد : ديك البنت ظريفة الله يعمر ليها دار ، بنت الأصل والله ..

- عمر (أشر ليه براسو ) :

بصح عندك الحق ... المهم انا مشيت حتى نرجع ..

- أحمد : مغاديش تفطر ؟

- عمر : لا منصيبش ، الخدمة كثيرة عندي .. والمهرجان قرب ابابا ... خاصنا نوحدو ليه ، انت كلستي فدار ورميتي عليا الحمل (كيضحك) ..

- أحمد :

وعلاش ولدناكم أولدي ، غير تسارحونا الى كبرنا ..

- عمر : انا مشيت ابابا ..

- خرج عمر من دار .. ركبو فطوموبيلتو (شاف فساعتو) كان فطريقو للخدمة حتى صدق قالب الطريق للبلاصة أخرى ..

_________________

- دخلات لشومبر ديالها كتحس برجليها كيضروها بكثرة الوقيف ..

بغيت غير ايمتا نرجعو بحالنا ..

- مالك :

غير وجدي راسك .. غدا إن شاء الله غادي نرجعو بحالنا .. حيت خاصنا نوجدو للخطوبة ديالنا ..

- شريهان (حبسات وشافت فيه ) :

واش ضروري من هادشي زعمة لابد ؟

- مالك :

هادشي لي تافقنا عليه .. المهم انخليك ترتاحي .. وتجمعي حوايجك توجديهم ، بليل انخرجو نتعشاو على برا صافي ، غدا خاص نفيقو بكري باش نرجعو بحالنا ..

- شريهان : واخا ... خرج مالك وخلاها ترتاح ساد الباب وراه ..

_________________

فالمكتب ... جامعهم جون كاملين ..

- دابا عاد غادي تبدا الخدمة .. إبتداءا من غدا بغيتكم تبعو شريهان 24/24 تفاهمنا .. الأخبار نتاشرات ، وكارلو غادي يكون ساق الخبار ، دابا غادي يبدا خدمتو وغادي يبغي يدخل شريهان معاه بأي ثمن ، وماشي بعيد يدرج سميتها وسمية مالك فقائمة المدعويين للحفلة لي غادي ينظم .. الحراسة تكون على دار والديه وعلى دارو تفاهمنا ...

- الكل : واخا سيدي ..

- جون :

مصطفى انت جا الوقت باش تغبر ، مخاصكش تبان دابا حتى نعلمك واخا ؟

- مصطفى (ببرود) : واخـــا ..

- مسرح رجليه لابس سروال ديال الثوب بالبيج ، الفوق عريان باين الوشام لي واشم .. كان عبارة عن رسمة لمرأة مامفرزش ملامحها مزيان ... هاز فيدو كاس ديال الشروب وساهي فالماضي ..

ماتيو :

فاش كتفكر ؟ رجعتي للماضي عاوتاني ؟

- دييݣو (خدا رشفة من كاسو وشاف فيه ) :

علاش انا فين عمري مارجعتش للماضي .. مقادش نساه كارلو خدا أغلى حاجة على قلبي ..

- ماتيو : مابغيتكش تعصب .. ولكن ماتنساش بلي داك الانسان لي كنتي كتحتارمو وكتبغيه .. تهجم على بنت عندها 18 سنة ، وهادي بحد داتها جريمة ..

- دييݣو :

عقلي مقادش يتقبل ، بلي داك السيد لي خداني من الشارع ، رباني وقراني او وفر ليا أي حاجة ممكن يتخايلها شي حد ، يدير بحال ديك الفعلة ... كارلو ماقتلش غير سيد لي رباني وكنت كنݣوليه بابا ، كارلو بغا البنت لي كنت كنبغيها قبل مايجي هو للفيلا ... انا كنت كنبغي إيمان بزاف أماتيو ، كنت كنموت عليها لوحدة الدرجة منخايلهاش ... كنت بغيتها ليا انا كنت كنحضيها من سرجم غير إيمتا دوز ، كنت كنعشش فالكوزينة غير على قبلها ... فالأخر يجي هو ياخودها ليا ، والمشكل هو انها بغاتو فبلاصة متبغيني انا ... انا لي كنت قاري وانا لي كان عندي الفلوس ، وكنت نعيشها ملكة بغات واحد جاردينيي ، وسلماتو راسها اماتيو هي عتارفات ليا براسها ... نهار لي عتارفت ليها بالحب ديالي من جهتها ، ݣالت ليا بلي قلبها وجسدها ولاو دابا ملك لكارلو ... داكشي باش ݣاع لي عند كارلو غادي نديه (تبسم) أنا عارفو دابا ايبغي يوصل بأي طريقة لشبيهة إيمان ... وأنا أنستغل هاد الفرصة ، القدر اماتيو القدر ايعجيني فرصة إيمان مابغاتنيش ، ودابا شريهان اتبغيني ، مغاتكون لا لكارلو ولا للوزير ... اتكون لشخص واحد هو أنا ..

____________________

- فمطعم الاوطيل .. ݣالسة لابسة اونصومبل فالكحل .. طالقة شعرها وكتاكل هي وياه ..

- مالك (كيشوف فيها وكياكل ) :

مالك علاش ساكتة ؟

- شريهان (تنهدات تنهيدة طويلة ) :

- ماشي شيحاجة .. غير كنفكر وصافي ، غدا إن شاء الله غادي نرحعو والخدمة ديال الصح عاد غادي تبدا ..

- مالك (حدر عينيه ونطق ) :

مابغيتش نزيد فتوتر ديالك .. ولكن وصلني إيميل فيه بطاقة دعوة بسميتي وسميتك ..

- شريهان (حبسات الماكلة وشافت فيه ) :

من عندمن ؟

- مالك (ثواني وهو ساكت عاد جاوبها ) :

كارلو كابوني ..

- شريهان (اللقمة تحبسات ليها فحلقها ، حسات بواحد البرودة طالعة معاها قلبها كيضرب والخلعة شداتها ) :

دغية بهاد الزربة .. هي صافي جا الوقت ؟ إيمتا عارضنا ؟

- مالك :

نهار 15/5 ... يعني من هنا ل 15 يوم .. مابقا والو ..

- شريهان (ساطت وحبسات الماكلة كدوز يدها على عنقها ) :

تسدات ليا الشهية وحق الله العظيم ... كون غير خلينيني حتى ساليت الماكلة عاد ݣلتيها ليا ..

- مالك (برزانة) :

مكاين لاش تخافي ... بالعكس خاصك تيقي فراسك ، الى بقيتي خايفة اتبيني لعدو ديالك نقطة ضعفك ، وانت ماشي بوحدك انا وياك فهادشي واخا ؟

- شريهان (تنهدات تنهيدة طويلة) :

إن شاء الله يكون خير ..

____________

فدار سكينة وإشراق ... ݣالسين بزوج الراس فراس ، شمس نعسات بكري ..

- سكينة (كتشوف فإشراق بنص عين ) :

فين مشيتي الصباح انت وعمر ؟

- إشراق :

غير لقهوة لي حدانا .. هضرنا على الخدمة ودار معايا النهار لي نبدا فيه ..

- سكينة : مممم العجب ..

- إشراق (شافت فيها ) :

علاش جاتك عجب ؟ علاش اشنو كاين ؟

- سكينة (تبسمات) :

لا والو ، غير هو كان ممكن يكولها ليك فتيليفون ... ولا يتفاهم معاك غير هنا ، ماشي يعرضك تفطرو ولالا ؟

- إشراق (كتشوف فيها بنص غين ) :

كاع داكشي لي كيدور فبالك اختي ، مامنو والو غير حيديه ونسايه ، سيد عيط عليا فطرنا تفاهمنا غلى الخدمة لا غير ، هادشي لي كاين ... المهم انا عييت تصبحي على خير ..

- سكينة (كضحك) : وانت من اهلو .. خلاتها تا مشات ورجعات تبسمات :

غير بلاتي ، كيبان ليا انا وياك ... غادي نديو الخوت ، دابا تݣولي سكينة ݣالت ..

_______________

- وصلات الطيارة ديالهم للمطار ، خرجو مشادين ليدين هكا يعطيو لصحافة شنو تكتب ... لقاو الشيفور كيتسناهم ... حليهم الباب طلعو ، طلع البالز لكوفر ركب ديمارا وشد الطريق ..

- فالفيلا ..

- نزهة : حليمة وجدتي كلشي ياك تمر والحليب ؟

- حليمة :

كوني هانية اختي نزهة وجدت كولشي ، وحتى زهرة ماخلاتنيش يدي بيدها ..

- زهرة (خارجة من جهة الكوزينة ، هازة بلاطو ديال التمر پريستيج مقاد ومصايب ) :

- وعلاش لا اختي راه نهار كبير هدا ..

- نزهة (كضحك) :

مغادي يعرفو باش تبلاو غادي نصدموهم ..

- حليمة : انت وزهرة راه ميقد عليكم حتى واحد ، من شحال وانتوما كتخجو بلاما يعرف حد ..

- زهرة :

الى تسنيناهم تما بقينا ... وفاش مشاو هاديك ماشي خطبة بقوامها ، مع يجسو يرتاحو يلبسو عليهم نديرو ليهم تركاب الخاتم ونقراو الفاتحة ، وداك الساع نحددو نهار ضريب الصداق والعرس ..

- نزهة :

هاد المرة مالك ماعندو فين يتفنفن ، هوما راه فسپانيا وحنا خططنا او وجدنا ، التكشيطة وصلات هي والجلابة ديال العريس ، الماكلة حتى هي خططنا ليها ..

- تحل الباب ودخل عمر وسعد وأحمد وسعيد ... وقفو مصدومين كيشوفو فصالون لي طبلو عامرة حلاوي وتمر والحليب تݣول عرس ، نزهة لابسة قفطان فالخزي ، وزهرة لابساه فلورونج ... مافهمو والو ..

- سعد : ماما ياك قلتي مانخطبو سكينة حتى يجي مالك ... شنو واقع ؟

- أحمد : نزهة اش واقع ؟

- نزهة : دايرين مفاجأة لمالك وشريهان ... بغينا نديرو ليهم خطوبة رسمية ..

- عمر (شاف فسعد وسعد شاف فيه) :

ولكن الواليدة ، ايمتا بلانيتو هادشي ... وبلا خبارهم خاصكم تشاورو معاهم ولالا ؟

- نزهة :

علاش غادي نتشاور معاهم ؟ اويلي الخطبة راه خطبناها ومشاو بلا خطوبة رسمية وماݣلنا والو زوينة هادي تاني ..

- أحمد :

ايوا هي نطلعو نوجدو راسنا ، انا بعدا ماعندي مانسالكم أحسن مادرتو ...

- نزهة :

وحتى انتوما طلعو وجدو راسكم ، وبقاو واقفين مصدومين تم ..

- عمر شاف فسعد وحرك راسو بإستسلام وطلع ... يلاه ايتبعو سعد وقفاتو نزهة :

ولدي الله يرضي عليك ، سوني على سكينة كوليها تجي هي وختها ... وسوني حتى لعمر باش يكونو مع شريهان فهاد النهار ..

- سعد :

واخا أماما انا انلبس ونمشي نجيبهم ... اصلا راه يلاه وصلو لباريس ... مزال ليهم ساعتين ونص يوصلو لهنا ..

- نزهة : واخا سير .. طلع أحمد لبيتو يوجد راسو ، وهكاك بنسبة لعمر وسعد ..

- نزهة (موجهة كلامها لحليمة) :

خسارة مكايناش معانا جميلة ..

- حليمة :

واياااه اختي بلاصتها بقات مع عمرها سافرات وبعدات عليا ، ولكن ماعندنا مانديرو الله يسهل عليها ، مزيان تسافر وتبدل الجو ، متعرفي تلاقا بشي ولد الناس ..

- نزهة : ايوا الله يسهل عليها ياربي ..

- حليمة : آمين اختي ياربي آمين ..

من بعد ساعتين ونص ديال الطريق وصلو لدار ، نزلو نزل ليهم الشيفور الشوانط ديالهم ، وقفو قدام الباب يلاه أيسونيو وهو يتحل الباب ..

- صلاة والسلام على رسول الله الى جاه الى حاه سيدنا محمد الله مع جاه العالي روروروروروروروروروروروروييييي ... مالك وشريهان تصدمو ماعرفو باش تبلاو ... كيشوفو زعرة ونزهة بالقفاطن مافهمو والو ..

- شريهان (كترمش بإستغراب) :

ماما خالتي ، ياك لاباس مالكم ..؟

- زهرة (عنقاتها) :

على سلامتكم ابنتي ، توحشناكم بزاف دخلو ..

- نزهة (عنقاتهم) :

على سلامتكم اولدي ، كيدرتو مع طريق مزيان؟

- مالك (أكيدور فعينيه مافهم والو ) :

الحمد لله اماما بيخير ، انتوما لي واش لاباس ؟

- نزهة (شادة فيه ) :

حنا الحمد لله اولدي بيخير .. دخلو لداخل كتبان ليهم الطبلة نقادة مصايرة تكول غير حفلة لي كاينة ... وصدمة الكبيرة هي سكينة وإشراق وبنتها كاينين وحتى عمر ..

- شريهان (عنقات سكينة وعمر حيت توحشاتهم بزاااف .. حسات بروح رجعات فيها ) ..

- سكينة (فرحانة دوات ليها فودنيها) :

واخا عليك ماعاودتي ليا والو كونماشي سعد ..

- شريهان (بنفس الهمس ) :

حتى لمن بعد ونعاود ليك اكوني هانية .. ولكن اش واقع هنا ؟ شفتكم كاملين مجموعين ياكما كاين باس خلعتوني كاع ههههه ناقصكم غير مصطفى ..

- زهرة (كضحك) : شوية ويكون هنا تعطل ..

- أحمد (عنقهم) : على سلامتكم ..

- مالك : الله يسلمك ابابا ، ولكن مالكم محموعين كاملين ومقادين ، واش اليوم عيد وحنا مافخبارناش ولا شنو ..

- سعيد (كيضحك) :

لا اليوم الخطوبة ديالكم ..

- شريهان ومالك دقة وحدة :

شنو ؟!!

- زهرة : ويااااه انا ونزهة وجدنا كولشي ، خاصكم اترتاحو وتلبسو حوايجكم باش نديرو تركاب الخواتم ونقراو الفاتحة ..

- شريهان (وحلات ليها كتشوف فمالك لي مصدوم حتى هو بحالها وكثر ) :

ماما واش من نيتك كدوي ؟ كيفاش خطوبة متشاورتو معانا ما والو ..

- نزهة : وعلاش أبنتي انتشاورو معاكم ؟ الخطوبة راه خطبك بقا ارسمي صافي ..

- مالك :

ولكن اماما حنا عاد جينا من السفر ، عيانين زخاصنا حنا نقررو النهار ..

- نزهة :

سمع خطبتيها دغية قلنا هانية ، ديتيها معاك مسافر بيها بلا موجب شرع واخا انا تايقة فيك وعارفاك اش ساوي ... ݣلنا هانية مكاين باس ، ولا تزيد فيه مالكم اتلبسو حوايجكم الخواتم فيديكم اتعاودو تلبسوهم من جديد ونبينا عليه السلام ..

- أحمد : ماماك عندها الحق ، خاصكم خطوبة رسمية ..

- دخل مصطفى ... حتى هو نفس الشي مصدوم من هادشي لي واقع ولي كيشوف قدامو ... وكيما سولو هوما شنو واقع سول هو ، وكيما جاوبوهم هوما جاوبوه هو .. حطوهم أمام الأمر الواقع مابقا عندهم مايديرو من غير ، يطلعو يبدلو عليهم ويتخطبو خطوبة رسمية وتقرا الفاتحة وهكا ايكونو مخطوبين رسميا ..

- دجيكو (واقف قدام كارلو ) :

سلاه وصلو غير هاد الصباح ... ومشاو نيشان لدار العائلة ..

- كارلو (كيفكر ) :

مزيان .. فين وصلات التحضيرات ديال الحفلة ؟ أمضرا جاك الرد من عند الوزير بلي غادي يحضر ولالا ؟

- دجيكو :

وي جاني الرد هاد الصباح ، بلي غايتشاور مع خطيبتو ويجاوبني من بعد .. وكيشكرنا على هاد البادرة ..

- كارلو :

خاصهم ضروري يجيو ... مايمكنش مايجيوش ، مخاصنيش نضيع هاد الفرصة من يدي ..

- دجيكو :

سينيور ، الى دخلات شريكة معاك ، هكا مغانقدوش ناديو الوزير .. ماتنساش المركز لي دار ..

- كارلو (خنزر فيه) :

انا دابا مكايهمني لا مركز ، لا وزير لا غيرو ... لي كيهمني ولي خاصو يهمك حتى انت وتخليه هدف لي خاصك تحققو ... هو شريهان دخل شريكة معايا فالكلوپ تفاهمنا ، ياااك ادجيكو تفاهمنا ؟

- دجيكو (بلع ريقو) :

اه تفاهمنا ..

- كارلو :

مــــــزيـــــااااان ، مزيان منين كتفهم .. (كيشوف فنقطة معينة ) شريهان خاصها تكون ليا تكون ليا مايمكنش نضبعها من ورا مالقيتهاش مايمكنش مايمكنش ..

- نزلات شريهان من الفوق ... جامعة شعرها على شكل كعكة ... لابسة تكشيطة فالأخضر ملاكي مخيطة بصم ، مع الاكسسورات ديالها ، أما المكياج فكان بسيط وراقي فنفس الوقت ، يد كانت هزة بيها تكشيطة ... ويشد شاكة فمالك ، لي حتى هو كان لابس جلابة فالبيج .. مع طولتو وملامحو جاتو زوينة بزاف ، لأول نرة غادي يلبس البلدي او وتاه بزاف ... كانت زهرة ونزهة واقفين عند دروج ، غير شافوهم بداو يصليو على النبي ويزغرتو ، أما سعيد دورو هو كور المصور ، منين نزلو وهو كياخود ليهم تصيورات ، وصلو للبلاصتهم وݣلسو ، شريهان مكانش عاجبها الحال نهائيا ... حيت هادشي كلو كذوب فكذوب ، كانت بغات تعيش هاد اللحظات ولكن يكونو بصح ، مكرهتش كون كان فعلا مالك باغيها وهاد الخطوبة حقيقية ، فللحظة غوبشات ولامت راسها كيفاش حتى كتفكر هكا ، كيفاش مالك كيبغيها ويخطبها أش هاد التخربيق .. فاقت فاش مدات ليها مها التمر باش توكلو لمالك ... خداتو من عندها ضارت بشوية عندو او وكلاتو ليه ، عطاتها مها الحليب وشرباتو ليه .. ونفس الشي بنسبة للمالك ، من وراها جا تركاب الخواتم ... الكل كان فرحان ، من غير مصطفى سعد وعمر وعلي ، حيت هوما لي عارفين حقيقة هادشي ، حتى من سكينة جاها هادشي فشكل ومافهمات فيه والو ..

- أحمد (عنق ولدو ) :

مبروك عليك اولدي ، الله يكمل عليك بالخير تهلا فيها ..

- مالك :

الله يبارك فيك ابابا ... كون هاني غادي نديرها فعينيا ..

- زهرة (دموعها على طرف عينيها) :

مبروك عليكم اولدي ، تهلاو فبعضياتكم ..

- مالك : إن شاء الله أخالتي لهلا يخطيك ..

- نزهة (عنقات شريهان ) :

تهلاي فمالك أبنتي ، ماشي غير حيت ولدي .. ولكن والله متلقاي بحالو ، عينيه يعطيهم ليك ..

- شريهان (نزلات ليها دمعة من عينيها بسبب هادشي لي ݣالت ليها ، حيت صعيب تكدب على أم وهي فرحانة ) :

كوني هانية أخالتي ، مالك فعينيا ... والى كان هو يعطيني عينيه ، انا نفديه يحياتي كلها ..

- مالك (ضار عندها وشاف فيها ، تمنى كون فعلا كان هدا إحساسها ، وكون كان كلامها نابع من القلب بصح ، بحالو هو بحال قلبو لي ولا مايل ليها ، واخا يعيا مايخبي ولا ينكر مايقدش ينكر هادشي لي كيحس بيه من جيهتها ، شي حوايج لي صعيب يفسرهم ، غراب عليه بحال الى كيحلم ولا عايش فدوامة من المشاعر ..

- نزهة :

والله أبنتي الى فرحتيني ، الحمد لله الله يتاويكم للخير ياربي ..

- أحمد : أتسالوني كادو ..

- شريهان : لا أعمي مايحتاجش ..

- أحمد :

ماشي شغلك يلالة ، انا باغي نفرح بولادي ... راه نهار كبير هدا راه فرحتي ماتباع ماتشرا ..

- دازت الخطوبة ديال شريهان ومالك زوينة ، بحال الى كانت خطوبة حقيقية وهي فعلا حقيقية بنسبة لوالديهم .. اما بنسبة لباقي عارفين شنو كاين ..

- نزهة :

بنتي سكينة ، نهار الجمعة الماجية إن شاء الله وجدو راسكم انجيو نزوروكم ، باش نخطبوك من ختك ... ونديرو خطوبة رسمية ليكم حتى انتوما ..

- سكينة (حشمات) :

إن شاء الله اخالتي ، ولكن سيمانة قليلة يلاه نوجدو راسنا ..

- نزهة :

ماترفدي هم لحتى حاجة ابنتي ، وحتى انتوما متكلفوش راسكم ... حنا انقومو بكولشي ، دابا راكم من العائلة الحمد لله ... ولي تقالت عليكم خفافت علينا ، الله يجيبنا فصواب ياربي ..

- زهرة : أمين ياربي روروروروروروروروروروروروييييي (ختماتها بتزغريتة من طراز الرفيع ) ..

- شريهان :

وهانتي على شنيولة ، هدا هو سعد لي مكانتش عيني فيه وشفتي ..

- سكينة (حشمانة وبهمس ) :

وصراحة ظريف عمري شفت بحالو والله ، مامخصصني من والو وحنين عليا ، وحار باغي يدير بزاف ديال الحوايج ... وأكبر دليل ها هو باغي يخطبني ، مݣلسش كيجرجر فيا فالعيمان ..

- شريهان : ايوا شتي العود لي تحݣريه يتقب ليك العين ..

- سكينة (كضحك) :

اه بصح ، مافخباركش اخر الاخبار ؟

- شريهان :

لا شنو واقع ؟ الله يسمعنا خبار الخير ... ياكما عمر حتى هو باغي يخطب إشراق ؟

- سكينة (كضحك) :

ناري انت بزاف والله ، لا ولكن شكون عرف هههه ماشي هكاك ... ياسمين البنية لي عندكم ، صدقات أخت شمس ..

- شريهان (شهقات) :

اويلي !!

- مالك (بفضول) :

مالك ياك لاباس ؟

- شريهان (شافت فيه) :

سكينة ، ݣالت ليك ياسمين اخت شمس بنت ختها ..

- مالك (بصدمة ) : كيفاش مافهمتش باش عرفتوها ؟

- عمر (لي سمع الحوار ديالهم بحكم كان قريب منهم) :

داك نهار ديت شمس وياسمين للمحالات ديالنا ، وحانت معاهم حتى إشراق ، فاش مشينا نتغداو شافت إشراق توحيمة فعنق ياسمين من اللور ، نفس هاد توحيمة كاينة عند شمس ورتاتها من عند باها ، وزائد الشبه الكبير لي بيناتهم ، شكينا ومشينا لعند المديرة خدينا تصريح من عندها باش نديرو تحليلة ، وفعلا طلعو خواتات من نفس الأب ، بابات شمس فاش تفارق مع إشراق وخلاها حاملة ... كان مع واحد السيدة فرنسية ، حملات منو وتزادت عندها بنت سماها ياسمين ، ولكن مات فأكسيدو هو وماماها ، وجداها ماقدات تحمل المسؤولية وعطاتها للخيرية ... شمس كبيرة من ياسمين بعام واحد ..

- مالك (مزال تحت تأتير الصدمة) :

ماصبت منݣول والله ، صدفة غريبة هادي الصراحة .

- شريهان :

والله حتى غريبة ، ودابا شنو غادي دير إشراق ؟

- سكينة :

باغية تبناها ، بغات الخواتات يكبرو مع بعضياتهم ... وغادي يخدمها عمر معاه ، هدا شرط أساسي حيت خاصها مسكن يليق بيها ، وتكون خدامة مزيانة باش تقوم بيها ..

- شريهان :

أحسن حاجة غادي دير وحق الله العظيم ، ماعندي مانسالها والله براڤو عليها ..

- مالك :

اللهم تربيها هي مع ختها ، ولا تجي شي عائلة تديها تربى تربية غربية ... اللهم تكبر مع ختها ..

- سكينة : بصح هادشي لي كاين ..

كانت واقفة فجردة ، ساهية فضو ديال القمرة لي منعاكس ضو ديال فلاپيسين ..

- فاش ساهية ؟

- شريهان (هزات راسها فيه) :

خلعتيني هههه ماعرفت ݣاع فاش كنت كنفكر ؟

- عمر :

كتفكري فهاد الخطوبة لي مامنها والو ، ولا كتفكري فهادشي لي جاي ؟

- شريهان :

والله العظيم الى كنفكر فيهم بزوج .. ماعرفت مندير تخربقت ..

- عمر :

ماعندك مديري ، دخلتو بزوج لهادشي خاصكم تكملو فيه ... ومتعرفي يوقعو شي حوايج لي مكاموش على البال ..

- شريهان (شتفت فيه بشك) :

بحالاش هاد الحوايج هههه فاش كتفكر ؟

- عمر :

مثلا بحال هاد الخطوبة تحول لبصح ، بحال مثلا توليو كتبغيو بعضياتكم بصح ماشي كذوب ..

- شريهان :

باش عرفتيها ؟ شنو خلاك تݣول هادشي ؟

- عمر (تقابل معاها ) :

بغيتي صراحة ، مالك مايمكنش يدير شي حاجة بزز منو ... وشتي هاد الخطوبة لي وقعات هاد النهار ، قسما بالله كونما بغاهاش مغاديش تكون ، أيدير الف حجة واخا يتحط السيف على عنقو ، متكوليش راه الواليدة حطاتو قدام أمر الواقع ، راه واخا ماعرفت شنو دير ... كونما بغاهاش مغاتكونش ، ولكن هو كان ألييييز وفرحان وعاجبو الحال بحال الى عريس بصح ... وهادشي كيدل انو شيحاجة كاينة فقلبو من جهتك ..

- شريهان (تنهدات تنهيدة طويلة) :

ماعرفتش اعمر ماعرفتش ، انا مخربقة معارفة راسي من ساسي ، فهاد الشهر لي دوزت معاه هدا بزاف ديال الحوايج وقعو ... وحق الله حوايج لي خربقوني ، مابغيتش نعطي قلبي لشي واحد ، ماشي وقتو بغيت نكمل هاشي بغيت ندير مشروعي ونجح فيه ، عاد نفكر فالحب وفغيرو وغيرو ..

- عمر :

الحب مغايبدل والو ، بالعكس الى لقيتي لي يشاركك احلامك وطموحك علاش لا ؟

- شريهان :

زعمة مالك غادي يشاركني فأحلامي ؟

- عمر :

شوفي انت مكتعرفيش مالك مزيان ، ماشي كنݣول هادشي حيت خويا لا ... راه واخا تشوفيني انا هو خوه لكبير ، ولكن بنسبة ليا انا راه لي كبير ، مالك تحمل المسؤولية ليا ديالنا من شحال هادي ، اي واحد فخوتو كيحتاجو كيلقاه فجنبو ، انا وسعد الواليد الواليدة ، اه وصل لهادشي لي هو فيه ماشي بسباب كنيتو لا ، وصل حيت دار جهدو قرا وعيا وماخلا بلاد مامشا ليها ، مالك قلبو كبير وراجل ومسؤول ، ويفدي عائلتو بحياتو خلي البنت لي يبغيها ، بالعكس مالك ايوقف معاك حتى توصلي لداكشي لي بغيتي ، ماضيعيهش اشيري ، حيت فعلا خويا كيبان ليا كيشوف فيك شوفة فشكل ، شوفة مكانش كيشوفها فكارولين ، انا راجل وعارف شنو كنݣول ..

- شريهان (تنهدات تنهيدة طويلة وتبسمات ) :

يكون خير ، يكون خير ... اجي فين هي جميلة ݣاعما شفتها ؟

- عمر : سافرات لسنغافورة ..

- شريهان (بإستغراب) :

وايلي العجب .. علاش سافرات ؟

- عمر :

انا لي نصحتها تسافر .. تبدل الجو وتعرف على ناس جداد ..

- شريهان : وتنساك ؟

- عمر (شاف فيها بإستغراب) :

باش عرفتيها ؟ علاش ݣالت ليك بلي انا هو السيد لي كتبغيه ؟

- شريهان : انا عارفة واخا متكولش .. هي كالت ليا كتبغي شي واحد ولكن هو لا ، ولكن من تصرفاتها معاك عرفت بلي داك الشخص هو انت ..

- عمر :

انا حصلتها كتهضر وسمعتها ، سمعت كولشي واخا هي ݣالت ليا بلي كتعرف واحد السيد وماقداتش تكول بلي انا ، سمعت هضرتها مع خالتي حليمة ، ونصحتها تسافر وتبدل الجو ... حيت الحب من طرف واحد غير ايعدبها ، مابغيتش نكوليها بلي داك الشخص هو انا ، باش منين نرجعو نشوفو فبعضياتنا مايكون حتى إحراج ..

- شريهان :

أحسن حاجة درتيها والله ، هي كتبغيك من شحال هادي ... يمكن من الصغر .

- عمر :

وانا عمري شفت فيها شي شوفة من غير انها ختي ، مايمكنس نتحكمو فقلبنا ، انا عمري شفت فجميلة نظرة تكون حبيبتي ولا مراتي ... كون واتزوجتها زمان هدا ولادنا كيجريو ، ولكن جميلة بنسبة ليا بحال ختي ... لا أكثر ولا أقل ، داكشي باش نصحتها تسافر تشوف وتشاف ... وتبدل الجو ..

- شريهان : مزيان والله هكا باش متزيدش تعلق بيك ..

- عمر :

داكشي لي كاين ، يلاه دخلي راه برد للجو شوية ، ومتبقايش تفكري بزاف صافي (حط يدو على كتفها وجرها داخل بيها للدار) ..

- شريهان (كضحك) :

انحاول منفكرش ، واخا صعيب ولكن غادي نحاول ..

_______________

فجهة أخرى بداو التحضيرات للحفلة إفتتاح كلوب ( العيون السوداء) ، لي غادي تكون فأحسن أوطيل فكان .. المدعوين تلقاو الدعوة ديالهم ، وكولشي باغي يحضر ويستغل هاد الحفلة ، علا وعسى يدخل شريك مع رجل الأعمال المعروف كارلو كابوني ..

دجيكو :

وضلني إميل هاد الصباح من عند الوزير ..

- كارلو (شاف فيه) :

شنو ؟

- دجيكو : غادي يجيو ..

- وصل كوستار مالك للي أيلبس للحفلة ، فالبلو مارين داكن مايل للكحل ، وسباط فالقهوي .. اما فبيت شريهان ، كانت محطوطة كسوة طويلة فالݣرونة بلا يدين ، من التحت فيها بحال الريش ، ومن جهت الصدر منبتة بحجيرات فنفس اللون وصغار ... مع حلقات فذهبي وحجيرات فالݣرونة ... وصباط فنفس اللون .

- مصطفى :

شريهان ، الحلقات راه فيهم كاميرا ... هكا انشوفو كاع لي واقع فالحفلة وكاع الناس لي حاضرين ، اهو رضي البال شعرك تخليه ورا ودنيك باش مايضرقش علينا اوك ... مالك خليت ليه إكسسوار يلبسو باش يوصل لينا الصوت صافي ، ماتنسايش هادشي لي تعلمتي فهاد المدة ، بغيت نشوف شريهان وحدة أخرى ... الدراري ايكونو وراكم داكشي لي تافقنا عليه يطبق بالحرف الواحد ... منخافش عليك اختي تايق فيك ..

- شريهان :

إن شاء الله أخويا كون هاني ، يكون خير ..

- مصطفى (باس ليها راسها وعنقها ) :

يلاه اختي رتاحي شوية ، مزال 3 سوايع ..

- شريهان :

واخا ..

_____________________

ليت لحظاتنا الجميلة تدوم

لساعات ... لأيام ... لسنين ...

لنسرق أنفسنا من كل ضحكةٍ تعنينا

ولنطمئن في تمسّكنا باليد التي تمتد إلينا دائمًا ،

ولنمضي مع الأرواح التي تستلطفها أرواحنا ،

نحن حقاً في حاجة شديدة لأن نشعر بديمومة

الأشياء الجميلة ،

تلك التي لا نطيق فكرة أنها كانت يومًا من الماضي ، ‏نحتاج أحيانا لبداية جديدة ،،،

لنقطة ... ومن أول السّطر ،،،

نحتاح لأن نتوقف عن كل ما فعلناه بقلوبنا ،،،

نريد ترتيب أوراقنا ،،،

نحلم بأن نحكم على الأشياء بعقولنا ،،،

نريد فتح صفحة لم يكتب فيها حرف ،،،

لم تتلوّث بخيبة .....

ولم تشهد على كسرة خاطر و وجع روح ...!!

نحتاج لبداية جديدة فقط .

______________

سلات من اخر اللمسات ، شافت راسها فالمرايا ... كانت كتبان مثيرة بشكل خطيييير ... عجبها راسها ماقداتش تنكر هادشي ، هزات بوشيط ديالها لي كان فنفس لون كسوتها ، رشات من العطر ديالها يلاه اتخطوي الخطوة الاولى باش تحل الباب ، حتى سمعات الدقان .. حطات يدها على الپوانيي وحلات الباب ... وقفات لحظات كتشوف فمالك لي كان فكاكل اناقتو ريحتو كدوخ كتخلي دقات القلب يدقو بقوة .. ورعشة تسري فجسد اي بنت كانت حداه .. حتى هو مكانش أقل منها ، كيطلعها ويهبطها باغي ياخودها فالحضن ديالو ويكوليها شحال هي زوينة ..

- شريهان :

جيتي زوين ..

- مالك (بإبتسامة) :

وأنت بزاف .. مشينا (عطاها يدو) ..

- شريهان (خشات يدها فيدو) :

يلاه ..

- دخلو لبيت مالك ونزلو مع دروج لي كيديو لبرا ، مبعدين على الأنزار بطلب من شريهان لي مقادتش تنزل بالكسوة قدام عمها وماماها حشمات ، فتح ليهم الشيفور الباب ... طلعات شريهان هي الاولى عاد مالك ..

- ديمارا الشيفور وشد الطريق ، من اللور كانو زوج طوموبيلات تابعينهم ، وحدة فيها فرانسيسكو وجاكسون ، وطوموبيل أخرى فيها لي مين هو ، وجوديا ومصطفى لي مخبع اللور ، مابغاش جون يعرف بلي حتى هو كاين ... ولكن مايمكنش يفلت هاد الفرصة ، خاصو ضروري يعرف شنو أيوقع راه ختو هاديك لي اتكون تما ..

- وصلات الطوموبيل ديال مالك لقدام للوطيل ، نزل شيفور فتح ليه الباب هو الاول نزل ، عاد فتح لباب لشريهان نزلات ، ضار مالك عندها وخدا يدها فيدو ... شاف فيها بكل حب ، حب لي بنسبة للناس اخرين غير تمثيل باش يعطي لصحافة لي كانت حاضرة وبقوة صور حصرية ، ويعطيهم فاش يهضرو ... وحب بنسبة ليه هو 100/100 حقيقي ونابع من قلبو هاد الشعور لي اخيرا عتارف بيه لراسو ..

- مالك (بمحبة وحنان ) :

واجدة ؟

- شريهان (تنهدات تنهيدة طويلة ) :

مدامك انت معايا ، انا واجدة مية فالمية ..

- مالك (باس ليها يدها ) :

وانا ديما معاك ، عمري غادي نخليك .. جا الوقت باش ندخلو ... حط يدو على الخصر ديالها ودخلو للأوطيل تحت انظار وعدسات الصحفيين ..

يتبع...