السيدة الأولى الجزء التاسع

- شريهان (بدلات سيفتها) :

وا ماما ، خليني انرتاح بعدا ... مكاين لا كيف داز نهارك لا والو ..

- أحمد : ماديش عليها ابنتي ، راه مشوشة من جيهت خوك ..

- سعيد : كيداز نهار أبنتي ؟

- شريهان : بيخير أعمي ، لهلا يخطيك عليا ..

- زهرة : راني سولتك ..

- شيريهان :

اه عندي خبارو أماما ، ولدك خلانا حتى جينا لهنا وصربها بتزويجة وراه جابها لدار كتبورض فدارنا ... وشفتي فعايل ولدك ..

- زهرة (خرجات عينيها قلبها كيضرب) :

كتفلاي عليا ياك ؟ كطنزي عليا ، ولدي مايديرهاش كتفلاي ؟؟

- شريهان (بجدية ) :

واش أنا مالفة كنتفلا عليك ، سونيت لمروان وعاود ليا كولشي ، وعرفتي شكون دا ... يامنة بنت خالتي يزة ، لي مكنتيش كتحاملي انت وياها ... خلاتك حتى خويتي طريق ، ولصقات ليه بنتها ... علم الله اش وكلاتو حتى تلفاتو علينا ونسانا ، وݣاليا مروان فاش مشا عندو باش ينهيه ، ݣاليه ماشغل حتى واحد فيا ... انا حر ندير مابغيت ، وفاش ݣاليه ماحضرتيش مك وختك ... ݣاليه يلالة انا حر ديال راسي ، هوما مشاو للفرنسا يشوفو حياتهم وانا انشوف حياتي ... انا بعدا مابقا عندي خو صافي سالينا ...

- زهرة (سكتات غير كترمش مانطقاتش ... كاع ديك القوة ولسانها طويل مابقاش ، أصعب حاجة تربي وتكبر وتسهر الليالي ، ومتزوجش وتشوف حياتك اعلى قبل وليداتك ، وفالأخير ينوض ولدك يتزوج بلاما يحضرك ولا يعبرك ، تمناي الموت ولا هاد الحالة ، دموعها هبطو سخان ... دموع لي تحولو لشهقات ... ماقداتش تهضر ، نزهة ناضت عندها كتسكت فيها ، شريهان صدماتها عند بالها اتبقا تعاير فيه ماشي تبكي ، تلفات وندمات على تفلية لي تفلات مع مها ، هي بغات اضحك معاها وديرها ليها مفاجأة ، بالخف ناضت عندها ) ..

شريهان (كتعنق فيها ) :

ماما ماما سكتي راه اكنضحك معاك ، قسما بالله اكنضحك معاك ... واش انت حمقة خويا يتزوج بلا بيك ...(زهرة حلفات لا سكتات) ماما والله العظيم الى اكنضحك ، لهلا يصبحني لغدا غير كنضحك ..(بدات تعيط) مصطفى مصطفى اجي اخويا ندمتيني ، انت مول هادشي اجي ، خرج مصطفى من الكونطوار ... جاي عندها كيجري ، كولشي ماعرف باش تبلا ... تلاح لزهرة عند رجليها ..

- حبيبة ولدها ، ششش صافي سكتي ... ميمتي انا هنا حداك ، واش انا نتزوج بلا بيك ... شافتو زهرة وها مازادت كتبكي وتنحط الفرحة وصدمة كولشي تخلط عليها ، معنقاه وهو مخشي فيها بحال شي ولد صغير ..

- أحمد (بعصبية) :

شريهان ، أش هاد البسالة وضحك الباسل ... عجبك حالتك ماماك دابا ... الضحك فيه وفيه ..

- شريهان :

وحق الله العظيم الى هو مول الفكرة ، هو لي كاليا شنو ندير هاد المرة ماشي انا مولاتها هو ..

- نزهة (كتمسح دموعها بقات فيها زهرة ) :

حشومة عليكم وحق الله ... نهار اديرو الولاد عاد اتحسو بهادشي ، باسلين بزوج ..

- مصطفى (كيسكتها ) :

وصافي الواليدة الله يهديك ، واش اندوزوها بكا هاد الليلة ..

- زهرة (بدات كتبرد شوية ، مزال معنقاه ) :

ايمتا جيتي وكيفاش جيتي ؟ ماݣلتي ليا والو ..

- مصطفى :

الخدمة الواليدة ، وصلت اهاد الصباح ... بلاتي نسلم بعدا .. وقف سلم على خالو لي مشافو سينين هادي ..

- سعيد (بكل فخر) :

تبارك الله ، كبرتي أولدي ..

- مصطفى : سينين هادي أخالي ... ولكن انت هو انت هههه ..

- أحمد (عنقو) :

مرحبا بيك اولدي ، وعلى سلامتك ، نهار كبير هذا منين شفناك تبارك الله ..

- مصطفى :

ربي يخليك اعمي ، لهلا يخطيك ..

- نزهة : تبارك الله وراه وليتي عريس ههه

- مصطفى (كيضحك) :

اشوية وصافي اخالتي ، انت لي تبارك الله مزال كتباني صغيرة ..

- نزهة (عجبها الحال) :

سمعتوه ، سمعتو حلاوة اللسان ماشي بحالكم ..

- وهوما ضاحكين ماحسو بغوات شريهان حتى تقب ليهم الودنين ، كولشي تخلع ضارو عندها لقاوها هاربة وزهرة وراها ..

- زهرة : أجي أبنت الهم انت انت بلاصتك فتمثيل ابنت الهم اجي ..

- شريهان (كتغوت ) :

وا والله ما انا اماما ، ناري اماما عضيتيني من نيتك ، دراكولا وماعندو هاد السنان ..

- زهرة :

ومزال زايدة فيه اجي اجي ، انا ضحكي عليا أجي ..

- مصطفى (شدها ) :

الواليدة صافي ، راه مدارت والو هي ، انا لي قتارحت عليها هاد الفكرة ... بغبنا انضحكو معاك حتى صدقتي باكية لينا ..

- زهرة (بقات كتشوف وسكتات ݣلسات شادة فيدين ولدها ) ..

- شريهان :

سكتك بجوج كلمات ، ومالك ماتعضيه هو ... شفتو الفرزيات اصلا انا شاكة فيكم ، والله بحال والو تكونو لقيتوني قدام الخيرية , ولا قدام الجامع ... ولا فشي كارطونة فالبركاصة ، وربيتوني ... بحال والو تكون عائلتي لاباس عليها وكيقلبو عليا ، وانا معاكم هنا محݣورة ..

- زهرة (بغات تنوض ليها أكلسها ولدها) :

شفتو هاد اللفعة الزلمومية انا لي كنعرف ليها ..

- نزهة (كضحك) :

الله يهديكم وصافي .. خليو ادري يرتاح بعدا باينة فيه جوع ..

- مصطفى : بزاااف ..

- نزهة : انا انعلم حليمة ، ونݣوليهم يوجدو ليك بيتك ..

- مصطفى : واخا خالتي شكرا ..

- على الطبلة ديال العشا مجموعين كاملين من غير مالك ..

- عمر (فرحان ) :

هادي أحسن حاجة وقعات ... انك جيتي لهنا ، الحمد لله بعدا انتعرفو على ولد عمنا ويتعرف علينا ..

- سعد :

وي والله ، أحسن حاجة أنا بعدا ، فرحان بزاف والله ..

- مصطفى :

حتى انا فرحان حيت انا معاكم ..

- أحمد (كيشوف فسعد ) :

شفتك تسرح ليك اللسان ..

- سعد : وي شريهان سباب الله يخليها ليا ..

- مصطفى :

أممم ، شريهان كتسرح اللسان ، وكدير كولشي هي كتعرف لكولشي هي كاخبي حتى الأسرار ، بير غارق هي ولالا اختي الحبيبة ..

- شريهان (كتخنزر فيه ) :

الحمد لله وشكر لله ..

- السلام عليكم ..

- أحمد : ولدي جيتي ، ݣلتي مغاديش دجي ..

- مالك (كيشوف فمصطفى معرفوش) :

شفت عندكم الضياف ..

- نزهة : مصطفى ولد عمك ..

- مالك (تبدلو ملامحو لملامح مبتسمة ، مد ليه يديه معنقو مسلم عليه بالوجه ) ...

اهلا وسهلا صاڤا امورك هانية ، نهار كبير هذا ..

- مصطفى :

ربي يخليك أخويا انت هاني أمورك مزيانة ؟

- مالك :

والله الى صاڤا مزيان الحمد لله ، على سلامتك ومرحبا بيك ..

- مصطفى :

ربي يخليك أخويا ... كمل العشا بضحك والهضرة صوتهم خارج على برة ... هادي هي الدار لي كتكون العائلة فيها مجموعة بلا نفاق بلا غل بلا حقد ولا بغض ..

__________________

تدق الباب ، ودخلات كطل على بنتها ... جايبة ليها كاس ديال الحليب بالويزة بحال ديما ..

- جوديا (بإبتسامة حطات الكتاب من يديها ) :

ماما مزال منعستيش ؟

- لا مزال اماما مانعست ، هاك خود شربو قبل ماتنعس ..

- خدات عندها جوديا كاس ديال الحليب ، خدات منو رشفة وحطاتو .. :

باينة بغيتي تݣولي ليا شي حاجة شنو واقع امدام سارة ..

- سارة (بإبتسامة ) :

بنتي مابغيتش نقلقك ولكن ..(سكتات مترددة)

- جوديا (بجدية ) :

ماما الى كنتي اتهضري على توماس بلاش ، راه نفس الهضرة انعاودها انا مابغيتش نتزوج لا بيه لا بغيرو .. غير ݣوليه ينسا هاد القضية ، وزايدون انا مغاناخدش واحد من غير ديانتي ، وانت عارفة هادشي ... الى انت قبلتي اماما تبدلي دينك وتسلمي ماشي كلشي ..

- سارة :

ولكن توماس كيبغيك ابنتي ، وتربيتو بزوج ، وهو ولد بنت خالتك ، ايبغيك ويصونك ..

- جوديا (بصرامة ) :

ماما الحب حاجة ، والاحترام وتضحية حاجة ... توماس ممكن يكون كيبغيني انا معاك ، ولكن مكيحتارمش الحرية ديالي ... مكايحتارمش شنو انا باغية لا ، وبعض المرات راه كيعيق عليا بزاف ، وانا ماعنديش مع هاد تخربيق ... وزايدون هو رطب بزاف كيجيني فشكل ، اي حاجة اه اه اه .. وعاجبو راسو كثر من القياس ..

- سارة (بصرامة ) :

جوديااااا ...

- جوديا :

واخا هاني ساكتة ، ولكن حتى انت عافاك ماتبقايش تجبدي ليا هاد الموضوع ... انا وزواج مكنتلاقاوش هاد ساعة ، بغيت غير نقابل خدمتي والقضية لي انا خدامة عليها ، سيري اماما ترتاحي تصبحي على خير ..

- سارة (تنهدات تنهيدة طويلة ) :

واخا بنتي ، كيفما بغيتي ... تصبحي على خير .

- واقف فجردة على برا كيشم الهوا ... كيفكر فشنو جاي وشنو ممكن يوقع ولا يكون ..

- مـالـك (مد ليه كاس ديال القهوة ) :

هاك ، اتكون محتاج ليها ..

- مصطفى (شد من عندو كاس ديال القهوة ) :

شكرا والله الى كنت محتاج ليها ..

- مالك : العفو ، ايوا امورك مزيانة ،، كيغادي مع الخدمة بعدا ؟

- مصطفى :

راك عارف خدمتنا كيدايرة ، غير تمارة وصافي .. بحالكم انتوما حتى انتوما الوزارة واعرة وفيها مخاطر بزاف ..

- مالك : بالعكس مافيها حتى خطر ..

- مصطفى (رشف من قهوتو وضار عندو ) :

وعلاش تيراو فيك فاش كنتي فإسپانيا ؟

- مالك (تصدم ، ماعرف شنو غادي يݣول ) :

باش عرفتيها ؟ ياكما ݣلتيها لدار ؟

- مصطفى :

لا غير رتاح ، حتى واحد مافخبارو ... وكيفاش عرفت هو من بين الأسباب لي أنا هنا ..

- مالك (بفضول ) :

بحالاش ، وضح ليا كثر ..

- مصطفى :

فخباري بلي شريهان شهدات على الجريمة لي وقعات فالمغرب ، فخباري بلي حتى انت فخبارك ..

- مالك :

شريهان كانت خايفة تݣولها ليك ، كتبغيك بزاف وخافت عليك كثر مخافت على راسها ..

- مصطفى :

عرفت ، بصح تقلقت فالاول منها .. حيت مكنخبيو والو على بعضياتنا ولكن نسيت ، المهم هو لي واقع دابا ..

- مالك : شنو واقع ، لي جابك لهنا باين بلي كبير ... بغيت نعرف شنو علاقة لي وقع ليا بهادشي لي جابك لهنا ..

- مصطفى : كارلو كابوني ..

- مالك (صغر عينيه) :

كوزا نوسترا ، رجل الأعمال مالو ؟

- مصطفى :

هاديك الواجهة ديال رجل الأعمال ، وراها زعيم مافيا خطير ..

- مالك :

كضحك ، لا مايمكنش ، واش عارف علامن كدوي ... كوزا نوسترا راه معروف ، رجل أعمال من طراز الرفيع ..

- مصطفى :

كندوي معاك (عاود ليه كولشي من الأول للأخير ) ..

- مالك (ݣلس كيخمم) :

دابا بغيتي تݣول بلي ، شيري فخطر ياك ؟

- مصطفى (واقف مقابل معاه ) :

ماشي غير هي ، انت وهي ... وحتى العائلة معاكم ، والسبب هو المركز ..

- مالك (كيخمم) :

فهمت ، وانا مخايفش لي فجهدو يديرو ... المركز مغاديش نتراجع عليه واخا يوقع لي يوقع ، وعائلتي لي بغا يأديها غير يحفر قبرو بيديه ... الى كان هو واعر حسن ليه مايعرفش معامن كيتعامل ..

- مصطفى :

ماشي هكا كيتحلو الأمور أ مالك ، خاص شي بلان لي يكون مخطط ليه مزيان ، بحال هاد خونا راه واعر بزاف ، عند بالك ساهل نقدو عليه ، الى مكانت شي خطة دكية نيت لا طاح ..

- مالك : وشنو البلان ؟

- مصطفى :

دابا نشوفو ، غادي نشوفو ..

- مصطفى :

شريهان خاصها تمشي معايا غدا للكوميسارية ..

- مالك (غوبش ) :

وعلاش ؟

- مصطفى :

ضروري تعطي الأقوال ديالها ، واخا عاودات ليا كولشي ، ولكن خاص الامور دوز بطريقة قانونية ..

- مالك :

بقا غير تݣول بلي غادي تخلص الحق ياك ؟

- مصطفى :

وشنو بان ليك ، مالك القانون هو القانون ... وشريهان كتعتابر ختارقات القانون بسكوت ديالها على جريمة شافتها ... عندها يا غرامة مالية ولا عقوبة حبسية ..

- مالك (ضحك ) :

متكولش ليا ادخل ختك للحبس كتفلا ؟؟

- مصطفى :

بطبيعة الحال لا ،، الغرامة غادي نخلصها ولكن حتى نرجعو للمغرب ... مزال الحال على هادشي .

- مالك :

داكوغ ، الى هكا مزيان ... حتى انابغيت نمشي معاها ..

- مصطفى (كيشوف فيه لعدم تصديق) :

مالك حنا غاديي لكوميسارية مغاديينش للحفلة ..

- مالك :

وي عرفت ، وحتى انا بغيت نمشي ... حيت كيبان ليا هادشي كيخصني حتى انا ، وقيلة راه تعرضت لمحاولة قتل ولالا ، من حقي نعرف شكون اي بغا يأديني ... غدا انمشي معاكم تصبح على خير أولد عمي .. خلاه ودخل .

- مصطفى :

قصوحية الراس وراثة عندنا فهاد العائلة العفو ..

_______________

‏" لم أحب في إنسان صفة أكثر من اللين ..

ف سلامٌ على كل ابن آدم ليّن إذا صادق ..

هين إذا خاصم .. رفيق في الشدة ..

رقيق في النصيحة ..

ولا يشقى في صحبته أحد ... "

- فصباح وفطريقهم للكوميسارية ..

- شريهان :

تجرجيرة على صبيحي .. كون اخديتو اقوالي لبارح لاش هاد طوطيحة الحارة

- مصطفى :

مغانبقاوش نعاودو فالهضرة اختي ، الله يهديك صافي ... سكتات شريهان كتشوف فمالك لي ساكت وكيشوف قدامو .. وقف طوموبيل قدام الكوميسارية ..

- مالك : وصلنا .. نزلو كاملين من طوموبيل ، دخلو للكوميسارية .. لقا مصطفى باقي العناصر لي معاه تم ..

- جوديا : جون كيتسنانا لداخل ..

- مصطفى : شريهان أجي .. باقي العناصر كيشوفو فمالك بفضول ، دقات جوديا الباب ، خدات الاذن ودخلات ، تبعوها لوخرين تابعهم مصطفى وشريهان ..

- جون (بإبتسامة ) :

صباح الخير ..

- الكل صباح الخير ..

- مصطفى : سيدي ، شريهان ختي ..

- جون (مد ليها يدو كيحقق فيها وكيشوف فيها ) ..

- شريهان (كتشوف فيه بإستغراب مافهماتش علاش كيشوف فيها ) :

مشرفين ..

- جون (غوبش كيردد ) :

مايمكنش ، مقادش نتيق نسخة طبق الأصل ، مايمكنش ..

شريهان (بإستغراب) :

كيفاش ؟

- جون (بإبتسامة ) :

واحد السيدة كانت خدامة معانا ، شحال هادي نسخة طبق الاصل ليك كتشابهو ماعليناش تفضلي ... هز عينو فمالك بإبتسامة سلم عليه ..

- جون :

معالي الوزير ، شرف لينا شنو سر المجية ديالك عندنا ؟

- مالك :

يمكن كيبان ليا بلي الامر لي ستدعيتو ليه شريهان كيخصني حتى انا ولالا ..

- جون (بحزم ) :

علاش شكون ݣاليك بلي عندك علاقة بمجية بنت عمك لهنا ؟ (شاف فمصطفى كيخنزر فيه)

- مالك (لاحظ نظراتو للمصطفى) :

حتى انا عندي مصادر خاصة لي يعطيوني معلومات ..

- جون :

لا ، مكاين لاش تبقى هنا ولاش تجي ... سمحليا ولكن أسرار الخدمة مكتݣالش للبراني ..

- مالك :

ولي وقع ليا فإسپانيا باش كتفسرو ؟

- جون :

هاديك بوحدها ... وكنظن بلي تدفعات الشكاية وبلي تكتفات الحماية ليك ، والأمر تحت السيطرة ... وهتدشي أيكونو بلغوه ليك مصادرك الخاصة كيف كتݣول ، اما بخصوص مدموزيل شيري ، هادشي كيخصنا وأسرار الخدمة كتبقى بين العملاء فقط ... الى كان ممكن تفضل على برا ..

- مالك بقا ساكت شاف حتى عيا وخرج ، حيت فعلا عندو الحق ..

- جون :

جوديا دي مدموزيل تعطي أقوالها ..

- جوديا : واخا سيدي ، خدات جوديا شريهان تعطي أقوالها ..

- جون (بأمر ) :

خليوني مع مصطفى بوحدنا الله يخليكم ... خرج جاكسون والبقية بقا غير مصطفى ..

- جون (كيخنزر فمصطفى ) :

شنو ݣلتي لولد عمك بضبط ؟

- مصطفى (عرف بلي خالف قانون مهم فخدمتو وهو يخرج سر من أسرار الخدمة )

انا ماݣلت ليه والو ، هضرنا على ختي وعلى الجريمة لي شهدات عليها .. وهادشي ديجا هو فخبارو حيت ختي لي عاودات ليه ماشي أنا ..

- جون :

زعمة هادشي لي كاين ، زعمة معاودتيش ليه كثر من هكا ؟

- مصطفى (بتصميم ونفي) :

لا هادشي فاش هضرنا ..

- جون :

داكوغ ، حاجة وحدة لي خاصك تعرفها ... مخاص حتى معلومة تخرج من هنا ... أسرار الخدمة كيبقاو هنا ونعار حنا كنبغيو ندخلو شي واحد فشيحاجة كتخص الخدمة ، كيكون أهل للثقة واهل للثقة بمراحل وتجارب كثيرة مفهوم ؟

- مصطفى :

مفهوم ..

- جون :

خرج ݣول لوخرين يدخلو ، بغيت نعرف ختك شنو شافت واشمن معلومات عندها ..

- مصطفى :

واخا سيدي ... غير خرج مصطفى هز جون التيليفون :

بغيتك فغضون 24 ساعة تجيب ليا رابور كامل على شريهان العراقي ... وي رابور من نهار تزادت فيه حتى لدابا طفولتها ، كيفاش كبرات واش عليها شي مخالفة كولشي يكون عندي مفهوم ..

_____________________

من بعد ساعة خرج مصطفى ومعاه شريهان ، كان مالك على برا ..

شريهان :

انا تعطلت بزاف على الخدمة ، مالك واش اتوصلني ولا ناخود طاكسي ؟

- مالك : سيري سبقيني لطوموبيل انا جاي ..

- شريهان : واخا ، خويا أنا مشيت ... خلاتهم ومشات الطوموبيل .

- مالك :

ياكما نكون سببت شي مشكل ؟

- مصطفى (تنهد) :

لا خرجات سالكة الحمد لله ، مكانش خاصني نعاود شيحاجة كتخص الخدمة ، وانا عارف بلي ممنوع درت غلط كبير ..

مالك :

حتى انا أصريت عليك ، وهضرة كتجبد هضرة حتى ݣلتي ليا على كوزا نوسترا ، متخليش ضميرك يأنبك زايدون انت معاودتي ليا حتى حاجة ، كولشي فراسي وفخباري بلي المافيا هي سبب الطلق لي جاني ، متنساش بلي انا وزير وعندي مصادر خاصة يجيبو ليا معلومات ، ماتبقاش تفكر بزاف ... المهم انا مشيت والى حتاجيتي شيحاجة ݣولها ليا ..

- مصطفى : واخا ..

- خلاه مصطفى ودخل ، اما مالك طلع لطوموبيل ديمارا وشد طريق القهوة ..

- مالك :

ياكما قجرو عليك فالأسئلة ؟

- شريهان (مبسمة كتلعب بشعرها ) :

لا ماقجروش عليا ، ماسخيتش نخرج ݣاع هاااح كون اسدو ليا واحد جوج ليالي تم ..

- مالك (هز حواجبو بجوج بإستغراب) :

اهاه وعلاش ، ياكما عجبك الشاف راه نيت كان كيشوف فيك شي شوفات فشكل ..

- شريهان (مزال غارقة فالأحلام وشخص واحد لي بين عينيها ) :

لا اشمن شاف ولا زعتر ... عقلي فقد عقله وقلبي فقد قلبه اهين أهين إني أغرق راق راق راق راق ، إيني ازليق ليق ليق ليق ... إيني اطفو فو فو فو ..

- ضار كيشوف فيها بإستغراب ، اول مرة يشوفها فهاد الحالة مافهم والو ..

- مالك (بجدية ) :

الالة غضيفة ااااه ، واااا بنادم انت مالك واش شوية لاباس لا ؟

- شريهان (تنهدات تنهيدة طويلة كتشوف فيه وحناكها حومر ) :

مالك واقيلة حبيت من اول نظرة يمكن .. أصلا هو عجبني شوية فالاول فاش شفتو ولكن اليوم كملت لي خاص ... ويلي ويلي شعر رطب ، والوشام فالعنق ... وديك سمورية لي جاية مع زعورية ، من نهار جيت اخويا لهاد البلاد ماشفت شي زين بحالو ..

- مالك (هز حاجب ونزل الثاني ) :

ياك الالة ، اهاه جديدة هادي ثاني اياااه كملي اختي ..

- شريهان :

الفيم ݣاع غوزي ياخويا ، من داك نوع لي فمهم ماشي بحال سوسيطة لا ، شواربهم رقاق بحال جوج بغريرات منين ندهنوهم بالعسل ، دغية سرط وووو ...

- مالك (خبط الفولون ) :

وا لالا وا شريفة وااااا وااااا فراني ، راه راجل هدا لي قدامك ماشي پوكيمون ، كيفاش شوارب بغريرة مافهمتش ، وعلاش كديري فففففففف وتلددي بحال الى كتاكلي شكلاط مالنا مانخافوش ..

- شريهان :

مالك ياك لاباس ، اخليني نعبر على مكنوناتي القلبية ، فرانسيسكو خدا ليا قلبي وعقلي ، امالك والله منكدب عليك والحليب لي مشاركين ..

- وقفها مالك قدام القهوة :

هبطي قبل مندير فيك شرع يدي ..

- شريهان (كضحك) :

يااااه دغية وصلنا سبحان الله ، والله ماحسيت بطريق ..

- مالك :

علاش انت سكتي باش تحسي بطريق ..

- شريهان(نزلات ) :

ياريت كاع رجال بحال فرانسيسكو ، عرفتي كون ازعرتي شعرك شوية وديك اللحية خففتيها ، وسماريتي شوية والله حتى تزيان ...

- مالك مداهاش فيها سد الباب بجهد ديمارا وزاد ..

- شريهان (بإستغراب) :

الله يستر بنادم محسوس غير بوحدو ..

الــمـغرب

- هازة الكراطة وكتجفف طالقة عينيها او ودنيها ... تحل الباب ودخلات منو وحدة زعرة وزوينة ، مقادة الحالة ... سلمات على غيثة البنت لي فالاستقبال :

صاڤا غيثة كولشي مزيان ؟

- غيثة :

وي مدام نعيمة كولشي مزيان ، غبرتي علينا ..

- نعيمة :

غير مع الخدمة ، (شافت فخولة) جبتو بنت جديدة ؟

- غيثة (قلبات عينيها ) :

وي ، مدام نادية الله يهديها ، كتخدم لي يسوى ولي مايسواش فهاد الصالون ..

- نعيمة :

ماعليش ، انت عارفة نادية .. كتبغي دير الخير ، المهم كيبان ليا بلي هي مكايناش ، طوموبيلتها مكايناش

- غيثة :

وي مكايناش ، مغاتجيش اليوم ... غدا غادي تكون هنا ..

- نعيمة :

داكوغ ، فاش تجي علميها داكوغ ... انا مشيت .

لبسات نظارتها الشمسية وخرجات ..

- غيثة كتخنزر فخولة ... طلعاتها ونزلاتها ، خرجات من الكونطوار وطلعات للبيرو الفوق ..

فوكالة خاصة بالإشهارات ... ورا البيرو ديالو ݣالس ، لابس شوميز فالبلو سييل ، مع سالوپيط فالبلو مارين ، داير حلقة فودنو ، شعرو ماشطو على جنب .. داير موسطاج ، وخدام على شي وراق قدامو ... حتى قفزو صوت الشخص لي غير كيسمعو كيبقى غير يترعد ..

أنوااااااااااااغ(أنور) ..

- أنور (وقف كيترعد كيبقلل فيه عينيه ) :

وي وي موسيو م ميشيل ..

- ميشيل :

انا شنو طلبت انا ، شنو ݣلت ليك فالاجتماع لي فات ، ݣلت ليك بغيت الپاپيي يكون بلبو سيييل ، ماشي بالبلو غوا ... فين كيكون عقلك فييييين انت وصاحبك بقا ليكم غلط واحد ، وعتابرو راسكم مطرودين ..

- انور (كيحرك راسو بنفي) :

موسيو ميشيل ، انا انا مدرت والو انت لي كلفتي .. ماخلاهش يكمل كلامو ..

- ميشيل (خرج فيه عينيه وبصرامة) :

اخر إنذار أنوغ اخر إنذار ، نلقى غلط واحد انت وهو اتعتابرو راسكم مطرودين أنا علمتك ..

- خلاه ومشا ..

- أنور كيشوف فالموظفين لي معاه كيشوفو فيه ، تلف ماعرف فين يمشي ولا يجي ... دفع كورسيه ، مشا بزربة هبط مع الدروج .. كيقلب عليه حتى لقاه فالكافيتيريا ..

- أنور (بعتاب) :

انت هنا وانا كنتعاير من تحت راسك ..

- واقف شخص لابس شوميز فالخضيضر مع سروال توب وسمطة داير طانݣة ، مامسوقش كاع ..

- مالني شنو درت ؟

- أنور :

ميشيل وصاك دير الپاپيي فلبلو سييل ماشي لبلو غوا ..

- هو ماعندوش نظرة فنية ، غير كيخربق ..

- أنور :

هشام ، لي كالينا الباطرون هو لي خاصنا نديروه اصاحبي ، والله حتى غادي يجري علينا ... وديك ساع نشوفو فين نمشيو ، ديك ساعات رجع للبلاد ..

- هشام :

ترجل ترجل ، ماعندو مايدير لينا هو محتاج لينا ..

- أنور :

راه حنا لي محتاجين للخدمة ماشي هو ، هو من غدا يجيب وحدين اخرين وانا وياك (بدا كيتغبن) مابغيتش نرجع للبلاد ... مابغيتش نرجع نكابل البهايم مايمكنش ..

- هشام (بفخر) :

دابا تشوف ميشيل ايزيدنا فصالير مغايجريش علينا ..

- أنور :

الى تبعتك فحماقك مغانطفروش ..

- هشام (كيفرنس) :

غادي طفرو غادي طفرو ..

_______________

فالكوميسارية ، فالبيرو فين خدامين ... ݣالس مصطفى هو وجوديا ، طالق الصوت وكيسمع للخولة لي كانت خدامة كتجفف الدروج ديال الصالون ..

- جوديا :

بغيتي تكول هاد نعيمة هي نفسها ليلى لي نصبات على ختك ياك ، هي وداك الخطيب المزيف ونفسها لي كتعطي وعود لبنات تسفرهم على برا ..

- مصطفى :

وي هي ، اليد اليمنى للنادية وصاحبتها ... كانت غبرات فاش كنت فالمغرب ، ودابا رجعات وهادي حاجة مزيانة ، منعم سيفط واحد يعس عند الصالون ، الى رجعات مرة أخرى ايتبعها ..

- جوديا : مزيان ..

- مصطفى (وقفها بيدو ) :

ششش شي حس .. خولة كانت كتجفف حتى سمعات حس ديال الضحك للتحت ، وصوت رجولي ... حطات الجفاف وتمات نازلة بشوية ، الكاميرا كانت خدامة لا فالمغرب عند منعم ولا عند مصطفى فتيليفون ديالو ، البروݣرام لي مخليه يشوف كولشي ويسمع كولشي ... طلات خولة بشوية مزال مبان والو كيتسمع غير ..

- موسيو لا عفاك ، ايجي شي واحد ..

(باغي يبوسها) :

مغايجي حتى واحد انت اطلقي راسك معايا ، الباب سديتو ..

- غيثة : مولات الميناج الفوق .. اتشوفنا ..

متخافيش مغاتشوفناش ، وغير وحدة احبيبة ... طلات خولة بشوية ، مصطفى عينيه على التيليفون ... خرجو عينيه بصدمة مامتيقش ، وقف :

ناااري مايمكنش (تبسم بإستهزاء) ولد الحرا////م ...

- سكينة (بإستفهام ) :

علي مال هاي ، حالتها ماعجباتنيش ..

- علي (مقابل شريهان ) :

شفتيها ، يحسابلي غير انا لي لاحظتها ... السيدة منين دخلات وهي كتضحك وغير ساهية ..

- سكينة (شافت فيه) :

مافهمت والو ، اول مرة نشوفها بحال هكا ..

- علي (تقاد فالݣلسة ) :

هاهي جايا ، شوفي ضحكة لي على وجها ..

- شريهان :

الحباب ديالي ، توحشتكم والله من لبارح لليوم .. احم علي واش تقدر تعطيني النص ديال الخلصة ديالي ؟

- علي (هز حجبانو بإستغراب) :

ااا علاش زعمة ؟

- شريهان (بإبتسامة ) :

والو ، خاصني حوايج جداد بغيت ناخود كساوي ... او ناخود سبيبطاط دابا ، بغيت نبدل الستيل ديالي .

- علي (مغوبش) :

وعلاش زعمة ، مالو الستيل ديالك ... زوين اش وقع حتى بغيتي تبدليه ؟

- شريهان :

والو ، غير رشقات ليا وصافي ، اه نسيت انتسناكم غدا إن شاء الله ماتنساوش العراضة .. خلاتهم ومشات تكمل خدمتها ..

- سكينة (قربات لعلي ومتبعة شريهان بالعين ) :

شفتيها ؟

- علي :

شفت كولشي ، هادشي بزاف هادي باينة طاحت فشي واحد مافيهاش ..

- سكينة : تماما ..

_______________

- مصطفى (هاز تيليفون ديالو ) :

وي منعم ، السيد لي كلفتيه يراقب الصابون ، بغيتو يتبع هاداك خونا لي خرج من ثالون دابا ، بغيت تجيب ليا كاع المعلومات عليه ، صغيرة والكبيرة ..

- منعم : واخا كون هاني ..

- مصطفى (قطع التيليفون) :

ولد الحر///++ااام ..

- جوديا :

شكون هذا مافهمتش ؟

- مصطفى :

هذا هو حسام ، لي نصب علينا وكان غادي يتعدا على ختي ..

- جوديا (مغوبشة ) :

كيفاش يتعدا عليها مافهمتش؟

- مصطفى : عاود ليها كولشي من الأول وشنو وقع مع شريهان )

- جوديا (بقات غير ساهية ) :

مصطفى ، هادو عصابة عصابة كبيرة ..

- مصطفى :

هادشي ، دايرين بحال رتيلات فاي قنت معششين ..

- جوديا (تبسمات) :

ولكن ختك ماعندي مانسالها ، خطيرة ... كيفاش نقزات من البالكو ومافكراتش ، فضلات تعرض حياتها للخطر ... وماتخليهمش يقربو منها ، براڤو عليها قوية تبارك الله ..

- مصطفى :

وي شريهان هكا دايرة من صغرها ، مكتخافش ولي فقلبها على لسانها ، مكتعرفش تنافق ... ومكتبغيش تشوف الظلم وتسكت ..

- جوديا :

لي ضرني فراسي ، كيفاش حتى شافت دجيكو وظلام ، حيت صعيب الحال ، هي دققات فالملامح ديالو .. وهاد الحاجة صعيبة وبليل ..

- مصطفى (كلس ، تنهد تنهيدة طويلة ) :

هادي ميزة عندها تزادت بيها ، شريهان فاش تزادت كانت عادية بحالها بحال أي بيبي ، كتعاود ليا الواليدة بلي فاش دارت عام .. فواحد الليلة كان مشا ليها شوف ، كانت كتبكي وكتكول لماما بلي راه مكتشوف والو .. الواليد الله يرحمو جاب ليها الفقيه ، وبقا كيقرا عليها ويرقيها قالينا بلي العين لي دارت ليها هكا ، انت مغاتعرفيش هادشي حيت تزداي ففرنسا ..

- جوديا (هزات حاجب ونزلات الثاني) :

انا واخا تزاديت ففرنسا ، ولكن بابا مغربي ، وعندنا العائلة فالمغرب وكنزلو فالعطلة للمغرب ، ماشي نازلة من جبل المهم كمل ..

- مصطفى :

المهم شريهان فاش كانت صغيرة ، عينيها كانو زوينين راه اتلاحظي بلي مكتشبهش ليا ، غير لون البشرة شوية ... هي كانت كتشبه للواليد الله يرحمو ، ومع صغيرة كظل يهزوها الجيران ، كال الفقيه انو العين ... فاش بدات كتكبر شوية ، كانت وقعات واحد السرقة ديال واحد السيد ، سرقو ليه بهايمو (عاود ليها كولشي) هنا عرفنا بلي شريهان عندها قوة فنظر ، يعني كتشوف فوق المزيان فهمتي ..

- جوديا :

وي فهمت ، الصراحة دوماج كان خاصها تكون فالبوليس ..

- مصطفى :

شريهان ماعندهاش مع البوليس ، ومكايعجبهاش هاد الضومين اتكوني لاحظتيها ... هي مشروع لي بغات دير بوحدو ..

- جوديا :

مزيان الله يوفقها .. تدق الباب وتحل طل عليهم فرانسيسكو :

جون بغاكم ..

جوديا ومصطفى :

واخا ها حنا جايين ..

________________

- خارجين من الخدمة بزوج ..

- سكينة :

شريهان ، مالك اختي هاد نهار ياك لاباس ؟

- شريهان (كتفرنس) :

ناري ياختي حمقني هداك فرانسيسكو ، على مزيناتو وحق الله العظيم ..

- سكينة (خرجات فيها عينيها ) :

اوياي اشريهان من نيتك ، السيد ماشي من ديانتك ما والو ... وخدام مع خوك اويلي وحدي ..

- شريهان :

انا قلت ليك عجبني ماشي باغية نتزوج بيه ، من هنا للقدام ماتعرفي شنو كاين هههه ...

- سكينة :

لالا انت ماهياش ، عمري شفتك بحال هكا يا ختي .. داكشي باش باغية تبدلي الستيل وتدوري بالحالة ؟

- شريهان :

اه ههه حيت كيݣولو الطاليانين كيعجبهم زين والأنوثة ، ماتعرفي يحبني ويطيح على قفاه ، ويسلم كاع ..

- سكينة :

لالا انت مشيتي بعيد ، وليتي كتحلمي بزاف ..

- شريهان :

اه اختي اخليني نحلم ، انا باغية نبقى نحلم ..

- سكينة :

تمشي معايا لدار ؟

- شريهان :

لا انمشي لدار نيشان عييت ، اندوش ونضربها بنعسة وعنداكم تعطلو غدا راه انتغداو مجموعين عنداك تنساي ..

- سكينة :

لا كوني هانية مغاديش نسى .. خدات طاكسي سكينة هي الاولى مشات وبقات شريهان كتسنى فطاكسي حتى بان ليها جاي ، شيرات ليه وقف ليها ركبات وشدات طريق للدار ..

_________________

- فالعشية ݣالسين فجردة قدام الپيسين ، عمر شاد كرسي حاط رجل على رجل ، شاد كتاب وداير نظارات كيقرا ... فجهة الأخرى اونفاص معاه ، فوق الفوتوي ݣالسة شريهان لابسة تيشورت وسروال كيطما وجامعة شعرها سفنجة ، طاوية رجليها ... وحداها كالس سعد قدامهم طبسيل فيه زريعة وزريعة الكرعة ..

- سعد :

كملي ليا ..

- شريهان (كتقشر زريعة وتجمعها ففمها ) :

دابا تشوفو ناري كيف داير ياخويا فن فن ... انا بعدا عجبنييي ..

- شوية هاهو دخل مصطفى ... لقاهم كالسين سبق عندهم وݣلس ..

- شريهان :

خويا على سلامتك ..

- مصطفى :

الله يسلمك ..

- عمر : كيداز نهارك مزيان بعدا ..

- مصطفى : لا الحمد لله داز مزيان ... هاهو مالك طا حتى هو ... دخل مالك حتى هو ، تلاح حداهم ݣلس كيشوف فيهم ..

- شريهان :

خويا كوليا ، غدا انا عارضة على صاحبتي وختها وأيجي حتى علي ، علاش لي ماتعيطش على فرانسيسكو او هاد جاكسون ولوخرين ، مساكن اتلقاهم قنطانين ..

- مالك (خنزر فيها ) :

سبحان الله واش جاك حتى وليتي كتعرضي على الناس ؟؟

- شريهان :

والو غير بقاو فيا ..

- مصطفى :

ختي حنا جايين نخدمو مجايينش نتعرضو ، ابصحة وراحة ..

- شريهان :

سعد حتى دير وتمشي معايا بغيت نشري حوايج جداد ، بغيت نبدل الستيل ..

- كولشي شافو فيها ..

مالك :

وعلاش زعمة ؟ ياك كلتي ستيلك عاجبك ومغاديش تبدليه اش تبدل ..

- شريهان (ضحكات) :

والانسان كيفكر وكيبدل رأيو ... وانا بدلت رأيي ..

- مالك (كيحرك الفك ديالو ، حيت عارف سر هاد التغير ديالها ) :

زعمة مكاينة حتى حاجة ؟

- شريهان (كتنقي زريعة ) :

لا مكاين والو ، خويا كوليا كيدايرة إيطاليا ؟ واش زوينة ؟

- مصطفى (بإستغراب) :

عمري شفتها ، ولكن كيكولو زوينة ..

- شريهان :

الى سهل الله ، انمشي ليها إن شاء الله ...

- مالك (فهم البلان مزيان) :

اهوما راه الإيطاليين ، رجالهم كيكونو مزوجين الأغلبية ، وكاين لي كيكونو خاطبين ، ولا مرتابطين وهوما مكايخونوش ..

- شريهان :

لي سمعك يقول عارفهم مزيان ..

- مالك :

انا اكنعطيك معلومات ، باش تكون فبالك وصافي ..

- مصطفى :

تيليفونو بدا كيسوني كان منعم ..

- سمحوليا نجاوب ..

- مصطفى مشا بعد عليهم :

وي منعم شي جديد ..

منعم (بجدية ) :

وجد ليا راسك لأكبر صدمة ..

- مصطفى : شنو هضر دغية أصاحبي ..

- منعم :

حسام هو راجل نادية الصويرية ...

_______________

مصطفى : أش كتخرف ؟ كيفاش راجلها ؟

- منعم :

حسام رجع للمغرب من ورا 6 سنين وهو على برا ، ورجع وهو مزوج بنادية ..

- مصطفى :

كيفاش تلاقاو هاد الزوج ؟

- منعم :

نادية كانت مسافرة لليونان ، دوز العطلة وهو كان تم كيتمتع بالفلوس لي جمع من النصب والاحتيال على الناس ، والبيع فالبنات للخليجيين ، شاف السيدة لاباس عليها خانزة فلوس ، ايوا هنا لعب لعبتو ومع هو زوين وعاطي العين مثل عليه دور العاشق الولهان ، وهي طاحت واقفة ... وتزوجات بيه ، ونزيدك منين رجعو للمغرب وهو عاطيها لالة ومالي ، وهادشي من ورا ظهرها حيت الى مشات حتى ساقت ليه الخبار ، غادي تغبر ليه الشقف ... السيدة كتموت على تراب ديال رجليه ، وكتغير عليه وحاكمة فيه ، وهادشي بلا خبار دارهم طبعا ..

- مصطفى (كيصفر) :

پشااااخ ... السلطان سليمان القانوني ، شكون بحالو ولكن لي لقا الضحك وماضحك كتلزمو العقوبة كيف كيݣولو ..

- منعم :

دابا شنو المعمول ؟

- مصطفى :

خليك متبعهم هو وديك نعيمة ، حيت كيبان ليا نادية معارفاش بلي نعيمة كانت شريكة حسام ، ومعارفاش بلي حسام مخلوض حيت هي ماشي مكلخة ، ترتابط بواحد نصاب عارفاه ايدي ليها فلوسها ، ويلعب ورا ظهرها ... هاد الزوج الى تلقاو بغيت انعرف ، ردة فعل نادية كيفاش اتكون مع سيهم حسام ، المهم خلي عينيك عليهم بزوج البق مايزهق أمنعم ، بزاف ديال الخيوط بداو كيبانو ..

- منعم :

كون هاني ، ولا عليك انا مشيت تصبح على خير

- مصطفى : تصبح على خير ..

- رجع عندهم ..

شريهان :

نهار الإثنين إن شاء الله انخرج انا وسعد يوريني المحالات ، وناخود رأيو فالحوايج حيت هو دواقو..

- عمر :

هو داكشي لي بغا نيت ، غير يزهق من الخدمة ..

- مالك :

وعلاش ماتديش معاك صاحبتك ؟

شريهان :

- بعد المرات كنتخالفو انا وياها ... الاثنين اتخدم هي فصباح وانا لا ..

- سعد : انا غادي نديك كوني هانية ..

- مالك ( وقف) :

خليت ليكم راحة ، انشوف ياسمين ونعس ..

- عمر :

مغاديش تعشا معانا ؟

- مالك : لا اتعشاو انتوما بصحة وراحة ... بغيت غير نعس نرتاح ..

- عمر : واخا تصبح على خير ..

- مصطفى : حتى انا غادي نمشي تصبحو على خير ..

- شريهان :

حتى انت مغاديش تعشا ؟

- مصطفى : لا كليت شيحاجة خفيفة ، عييت بغيت غير نعس ..

- شريهان :

واخا تصبح على خير ... طلع مالك لبيتو ومصطفى حتى هو ..

- جميلة (جات عندهم ) :

مزال مابغيتوش دخلو ؟

- شريهان : انا مزال مساليتش زريعتي ..

- عمر (وقف ) : أنا جاي عييت ..

- سعد : انا حتى نكمل زريعتي مع شيري ونجي ..

- جميلة : واخا حتى تساليو .. انا مشيت .

___________

"مهما صادفك في حياتك تحديات أغلق عينيك عن أي مشاعر سيئة تسبب لك الحزن وأدر ظهرك للذين خلقوا فيك الألم وعِش حياتك بنفس مطمئنة واثقة بالله وتأكد أن الله سيعوضك خيراً وأن الحياة لا تقف على أحد " ..

_______

الغد ليه كان الأحد ، نهار ديال العراضة ... من بعدما فطرو مجموعين بحال ديما .. مالك كان عندو مايدار فالوزارة ، عمر خدام غير فصباح والعشية لا ، أحمد كان خدام فجردة على النكهة الجديدة ، بقات شريهان هي ونزهة وزهور ايتكلفو يقادو الجردة ويوجدو ، حيتاش تماك فين غادي يتغداو اليوم ... شريهان زيدات حتى ياسمين باش تطلق ، وتحس براسها مع عائلتها واخا هاد الشهرين لي هي هنا ، ولات كتبغي الكل والكل كيبغيها ، بحال الى منهم ... سعيد خرج مع عمر باش يوريه الخدمة ديالو الجديدة ... غير العيالات لي بقاو فدار ... اما مصطفى مشا للخدمة .. ، خرجات شريهان وجميلة كيوجدو فجردة وديكور ديالها ، حليمة مع الخدامات فالكوزينة كيوجدو فالغدا ، وفݣاع الأكلات لي ايتحطو فهاد النهار .. اما زهرة ونزهة ݣالسين فواحد الفوتوي ومقابلين ياسمين لا تمشي لپيسين وطيح ..

____________

- ݣالس فالبيرو ديالو كيقرا فتقرير لي قدامو ، الراپور مهم بزاف وملفت للنظر ... يخلي داك الانسان يفكر مزيان فقرارو واش فمحلو ولالا .. كيحك فراسو وكيفكر فهاد الخطوة لي ناوي يدير ، واش غادي تفيدهم ولالا ، ولكن تقرير لي قدامو زعمو ... خدا تيليفون ديالو ، من بعد عدة دقائق جاوبو صوت غليض شوية وثقيل ..

وي

- جون :

بغيت نهضر مع سيدي الرئيس .. أنا ..(قاطعو)

- عرفتك ، سيدي الرئيس على الخط ..

(بعد عدة دقائق ، صوت ثابت وبارد ) :

جون ..

- جون (بكل إحترام وتقدير ) :

سيدي ، داكشي لي هضرت معاك فيه لبارح ... الراپور قدامي ... البنت فيها جميع المواصفات لي محتاجين ، قوية مكتخافش كتعرف كيفاش تسلك راسها ... وكيفاش دافع على راسها .. وهادشي بضبط لي بغينا ، ومن هادشي عفوية بزاف يعني مغاديش تير الشبهات ، وحتى واحد من العصابة مشافها فديك الليلة ..

- وي شفت وصلني رابور يلاه كملتو ... بالقراية الخطة لي هضرنا فيها لبارح فكرت فيها مزيان ... جون الى خدمتو على هاد الخطة ، غادي تنجح وغادي تكونو قضيتو على عصابة لي خطيرة بزاف ... حاجة وحدة ، متݣولش بلي هاد ناس كبار ومايقد عليهم حد ، مدام كاين ناس مزيانين فضومين ديالكم ، وكيخدمو من اعماق قلبهم ، بحال هاد الأشكال مغاديش تكون .. الخوف هو عدو الإنسان .

- جون ( تبسم ) :

عارف سيدي رئيس ، كنتمنى نكونو عند حسن ظنك ... الحاجة لي انا خايف منها ، هو مصطفى الولد لي عاودت ليك عليه ، خايف مايقبلش حتى واحد مغادي يخاطر بختو ، ويحطها فوكر الذئاب ..

- غادي نتسنى الزيارة ديالك مع 4 ، انت وضابط .. من الأحسن متفاتحوش فالموضوع دابا ..

- جون :

واخا سيدي ، كون هاني غادي نكونو عندك ..

- بسلامة ..

- جون :

بسلامة سيدي .. قطع جون الإتصال مع الرئيس ، هز تيليفون الخدمة وسونا المصطفى باش يجي عندو ..

- شوية كان مصطفى قدام الباب ، دق الباب ... غير سمع الإذن بدخول وهو يدخل ..

- مصطفى :

سيدي بغيتيني ؟

- جون :

مصطفى تفضل ݣلس ، بغيت نهضر معاك ..

- ݣلس مصطفى ، كيتسنى بفضول شنو غادي يݣوليه ..

- جون :

وجد راسك مع 4 عندنا واحد الموعد مهم ..

- مصطفى (بإستغراب ) :

موعد مهم !! لفين أسيدي ؟

جون (كيشوف قدامو ، رجع هز عينيه فمصطفى ) :

Palais Élysées (قصر الإيليزي)

- مصطفى (كيرمش مامتيقش شنو كيسمع ) :

قصر الإيليزي ، بغيتي تكول عند عند الرئيس ؟

- جون :

تماما ، هاد القضية متبعها الرئيس من أولها ... وجميع المعطيات والمعلومات كيتوصل بيهم اول بأول .. وجد راسك مع 4 خصنا نكونو تم مفهوم ..

- مصطفى (واخا مافهم علاش ومابغاش يسول علاش طلب الرئيس يشوفهم أشر براسو بالإيجاب) :

واخا سيدي ..

- جون (بإبتسامة) :

مزيان ، دابا تقدر تمشي .. ستأذن منو مصطفى وخرج ..

________________

ربما تضطر إلى الإنسحاب في كثير من الأحيان، هذا لا يعني أنك خسرت التحدي، بل يعني أن عليك أن تعود أقوى فلا تتوقف عن التمرين بالنهاية فإن من ينجح هو الذي كان أكثر جلدًا وقدرة على التحمل، وليس من كان أكثر ذكاء أو جمال ، لذا عليك أن لا تتوقف عن المحاولة أبدًا .

- فالڤيلا ..

سلاو الترتيبات كلهم ، كولشي كان مقاد او واجد ... شريهان طلعات للبيتها لبسات سروال ديال الثوب مفضفض فشيبي .. مع شوميز فالبيض خشاتها وسط السروال ... ورجليها لبسات كلاكيطة ، مع رجيلاتها البيضين المصبوغين بالبيج .. شعرها خلاتو مطلوق مع رضة من ريحتها لي ولات معتادة عندها " أميرة العرب" .. ، هزات تيليفونها او نزلات للتحت .. تيليفونها بدا كيوسني ، كانت سكينة ..

شريهان :

- ألو فينك ؟

- سكينة :

حنا راه قربنا ، خرجي عندنا ...

- شريهان : واخا صافي انا جايا .. خرجات عندهم ..

هاهوما قربو لدار ، انا غادي نخرج عندهم ..

- نزهة : واخا أبنتي سيري ... خرجات شريهان على برا كدور راسها يمين وشمال حتى بانت ليها الطاكسي جايا ... وقفات حداها ، نزلات إشراق لابسة كسوة فتيركواز طويلة على شكل سالوپيط ، مع تيشورت بيضة وساعة نقرية رقيقة .. شعرها طالقاه دايرة مقيبط خفيف فجنب شعرها ، نزلات بنيتها شمس لي كانت بحال شميسة .. بإبتسامة سلمات على شريهان ... حتى خلصات سكينة الطاكسي ، عاد سلمات بدورها على شيري ..

- سكينة :

الطريق طويلة بزاف ..

- شريهان (كضحك) : ماشيش بزااف اشوية فوق من بزاف هههه .. مرحبا بيكم دخلو ..

- سكينة (كتشوف فالڤيلا ) :

تبارك الله الفيلا كتحمق ماشاء الله ..

- شريهان :

زيدي مازال ماشفتي والو ، مرحبا بيكم وألف مرحبا ، نهار كبير هدا والله ... وزاد كبر منين جات شموسة معاكم ..

- شمس (بإبتسامة ) :

تاتي كتهضري عليا ياك ، أنا شميسة شموسة ..

- شريهان ( مشات حداها هزاتها كتبوس فيها) :

وشكون كاين من غيرك اشميسة المضوية الفنة .. وصلو لعند زهرة ونزهة ، وقفات نزهة هي الاولى سلمات عليهم ..

- مرحبا بيكم أبنتي ..

- سكينة : ربي يخليك اخالتي ..

- زهرة : مرحبا بيكم ..

- شريهان : هادي ماما ، وهادي خالتي نزهة مرات عمي ، سكينة صاحبتي وختها إشراق وهاد الفنة شمس بنتها ..

- زهرة (شافت فنزهة بإستغراب ) ..

الله يخليها ليك أبنتي ، وتشوفيها كيف بغيتي ..

- إشراق :

أمييين أخالتي لهلا يخطيك

شريهان :

فين هي ياسمـين ؟ جاوباتها ياسمين من اللور :

ها أنـاااا ... ضارت سكينة وإشراق دقة وحدة ، ملامحهم تبدلات من إبتسامة للذهول وصدمة .. وحدة ضارت عند لوخرا كيشوفو فبعضياتهم بإستفهام وإستغراب ..

__________________

- مالك (وقف بإستغراب ماعرفش علاش هاد الطلب المفاجئ) :

واخا أنا 4 غادي نكون تما أسيدي .. قطع معاه وهو فراسو شحال من سؤال ، علاش الرئيس بغا يشوفو ... ولأول مرة بوحدو ؟ ..

- شريهان (بإبتسامة ) :

شفتو شنو ݣلت ليكم ... سبحان الله ياسمين كتشبه لشمس ..

- إشراق (هزات كاسها ديال العصير شربات منو ، عينيها على ياسمين وشمس لي كيلعبو ) :

بصح عندك الصح ، كيتشابهو بزاف سبحان الله ..

- زهرة :

وراه ابنتي كل واحد فينا عندو شبيه ديالو ، شحال من واحد كتلقايه مكايشبهش لوالديه ... وكيجي شي واحد غريب وتلقايه كيشبه ليه بزاف ..

- نزهة :

عندك الصح ... بحال دابا انا ولادي سعد كيشبه ليا ، عندك هو وعمر فزعورية وباهم لا ومالك مكايشبه لا ليا لا للباه حتى واحد فينا ، او كايشبه لخويا محسن لي ففاس ازهرة عقلتي عليه ؟

- زهرة :

أه عقلت عليه ، تبارك الله وصلاة على نبي على مزيناتو ... وحتى مالك خرج غير ليه ، ماشاء الله زينو فشكل زينو حرش ..

- نزهة (كتضحك) :

شحال هدا فاش كانت شريهان صغيورة عقلتي ، وظل تعطر فجلايلو تابعاه وهو مكايعجبوش الحال ، من صغرو راجل هههه وكنا كنݣولو انا وياك الى كبرو نزوجوهم عقلتي هههه ..

- شريهان (مصدومة ) :

اويلي انا ومالك ، منقدش نتخايلها حتى الخيال خلي تكون بصح اتجيني غيبوبة ..(شافت فيها مها ومرات عمها دقة وحدة) ..

- نزهة (بحال الى تقرصات) :

وعلاش ابنتي ، ياكما ولدي ناقصاها شيحاجة ؟

- شريهان (شافت فيها حسات براسها شنو قالت) :

خالتي مايمشيش بالك لبعيد .. بالعكس مالك ألف وحدة تمناه تبارك الله عليه ماشاء الله ، ولكن انا وهو مايمكنش هو عزيز عليا راه ربي شاهد ... واخا انا وسعد مقاربين ، ولكن مالك كيسمع ليا وشحال من مرة نصحني يعني كنلقاه جنبي ، أهو انا مكايعجبنيش لي يتحكم فيا ... ويكوليا هاليديري وهالي مديريش ، ويغوت عليا ويبغي ارأيو لي يكون ... هادشي باش انا ومالك دايرين بحال زيت والعافية ، الى تلاقينا انفاجرو ..

- قاطعاتها إشراق من بعد سكاتها :

بالعكس أشيري ، شفتي الإنسان لي كيبغيك بصح هو لي يخاف عليك ويقابل ليك خروجك ودخولك ... ويتناقش معاك ويتشاور معاك ، مزيان تحسي براجل كاين حداك ماشي بحال ، شي واحد لي مامديها فيك ماعندو سوق ، طالق ليك اللعب ديري لي بغيتي ، هداك أختي عمرك تفرحي ليه ..

- زهرة :

سمعتي سمعي الناس لي كيفكرو ، انت بغيتي راجل انت تسوݣيه وهادشي مكاين لا فتقاليدنا ولا فدينا ... انت مالك باغية تلبسي المحزق ويقوليك مرحبا شوية لاباس لا ؟

- شريهان (كتشوف فيهم ) :

ناري دغية طرتو فيا ، أنا مكنهضرش على الحكام .. العلاقة الزوجية خاص يكون فيها التفاهم ، ماعجباتكش شي حاجة انا باغياها ، قنعني علاش مابغيتيهاش وماعجباتك لقيت عندك الصح وانا كنت غالطة راه اندير بيها بطبيعة الحال ... انا بغيت راجلي والانسان لي انشاركو حياتي ... يوقف معايا فالمشروع لي باغية ندير ، منين نكون معاه نحس براسي مرتاحة ونحس بأمان ، شيحاجة كتخصنا نتحاورو فيها بزوج ، نستاشرو ويستاشرني ... ماشي لا ديري هادي ماديريهاش بزز مني ، وانا معارفاش أصلا علاش ماعجباتوش ... ولا يفرض عليا لبس لي بغا هو ... انلبس لي مرتاحة فيه انا مدام مكيخدش بالحياء ومحترم ..

- نزهة (من بعد سكاتها نطقات) :

شريهان بنتي ، مالك ولدي حتى واحد مكايعرفو قدي انت يلاه ابنتي جيتي لهنا ، أنا لي عايشة معاه لي كيعرفو هو انا باه خوتو وصاحبو ... ولي قراب منو هوما لي كيعرفوه كيف داير ، مالك عمرو مايتحكم فمرتو فلباسها ، ودليل هو ديك كارولين لي كان خاطبها ، بالعكس عمرو دوا على حوايجها ، ومكانش عندو مانع انها تخدم ولكن خدمة لي مزيانة ، ماشي خدمة بحال خدمتها ... بالعكس دار معاها جميع الحلول ، بغا يدير ليها مشروع خاص بيها كيما بغاتو يكون ، ولكن هي مابغاتش ... شفتي مالك كيسبق عائلتو على راسو ، كيعطي ومايخدش واخا انا كنحماق على ولادي كاملين ، ولكن مالك مكانتو خاصة ، حيت عمرو خرج وسهر ولا دوز الزهو ونشاط مع صحابو ، أبدا من بكري دار القراية تخرج وتوظف ولا الخدمة الدار ... فهمتي ابنتي وهادي لي غادي تديه أتدي كنز ، ماشي غير حيت ولدي (حطات كاس ديال العصير او وقفات) انمشي نشوف حليمة فالكوزينة ..

- زهرة (خلاتها حتى مشات) :

بقاي عرفي أش كتخرجي من داك الفم ، راه عيقتي انت وشبعتي لبابة ديال الخبز ... بلا حشمة ݣالسة تݣولي ديك الهضرة قدام ولدها ، شتي والله ويطلبني ولدها يتزوج بيك ، والله لا ترددت نعطيك ليه بلاما نفكر ..

- شريهان :

واش انا ݣلت شيحاجة ديال العيب ، هي فهمات غلط ... انا ݣلت ليها غير مكنتفاهموش ..

- سكينة :

كان ممكن توصليها بطريقة مزيانة أشريهان ، انا وتݣولي هكاك على ولدي مايعجبنيش الحال .. الإنسان هو لي يعرف شنو كيݣول ويوصل الفكرة بلاما يجرح ..

- شريهان (بقا فيها الحال حيت تفهمات غلط ) :

قسما بالله مانويت فيها شيحاجة خايبة وربي شاهد عليا ، أنا زعمة ݣلت راه مكنتفاهموش ..

- زهرة : والله يابيتي وربي يكتب عليك المكتوب ، لا هربتي منو (ناضت وخلاتهم ) ..

- سكينة : مادرتي فيها مايصلاح أصاحبتي ..

- شريهان (حلقها ضرها حابسة البكية ، أصعب حاجة تهضر بعفوية ويفهموك غلط ) :

والله مانويت شيحاجة ، بالعكس مالك مافيه مايتعيب كيحمق ماشاء الله ، ولكن انا وياه كراكتيرنا فشكل ، وحنا بحال الخوت راه غير كانو كيقولوها فصغر بضحك وصافي ..

- سكينة :

زعمة عمرك شفتي فيه سي شوفة فشكل ، زعمة ماعمرو عجبك ولا قلتي الله شحال زوين ولا شيحاجة والو ؟

- شريهان :

اويلي لا عمري صراحة ، أصلا ماعمري حققت فيه مزيان ، ولا نحقق فملامحو لالا ... هو حاجة وحدة فيه عجباتني ياربي تسمح ليا هههه ، عندو واحد الوشام خطيييير ... جهة صدرو واحد نهار كانت قميجتو محلولة وشفتها فيه ، صافي راه ولد عمي أصاحبتي بحال خويا ، الى عجبك نزوجك بيه ..

- سكينة (كضحك) :

زعمة زعمة ، إيوا دابا نشوفو أصلا عندك 3 نعزل ونتخير مع رساتي هههه ..

- قلبوها ضحك مع بعضياتهم ، تحل الباب ودخلات طوموبيلت سعد ... بلاصاها ونزل ، لابس تيشورت فالبيض مع سبرديلة بيضة ، سروال ديال دجين نظارات رياضية وساعة رياضية .. غير شافتو ياسمين مشات كتجري عندو ، ولا عزيز عليها بزاف كثر من مالك ..

- سعد (هزها ) :

أووووه حبيبة عمها ..

- ياسمين :

سعدوس انا توحستك بوكو بوكو ..

- سعد (كلاها بوسان ) :

بوكو بوكو ، حتى انا توحشتك بوكو بوكو ..

- شريهان (مقابلة معاه والبنات عاطيينو بظهر ) :

على سلامتك .. فين هو عمر ؟

- سعد (جاي جهتهم ) :

عمر مزال معطل واحد نص ساعة هكاك ولا ساعة ، عاد يجي ..

- شريهان :

أويلي وا راه 2:30 هادي معاش غادي نتغداو ..

- سعد (وقف عليهم ) :

سلام عليكم

- سكينة وإشراق دقة وحدة : وعليكم السلام ..

- شريهان (كتعرفهم) :

سعد ولد عمي ، سكينة صاحبتي وإشراق ختها وبنتها شمس ..

- سعد (مد يدو لسكينة ، كيسكانيها من راسها لرجليها ) :

مشرفين مرحبا بيكم ..

- سكينة (مدات ليه يديها معلية فيه عينيها مع إبتسامة ، لي مع شمس لونهم كايبان مميز بزاف ) :

شكرا ..

- سعد كيحس بواحد الإحساس لأول مرة فحياتو غادي يحسو ، بحال الى خويتي عليه الما البارد ، يديه كيرجفو بوحدهم قلبو كيضرب ، هو لي كيموتو عليه البنات ... وبنسبة ليه العلاقات شيء عادي ، كيسلم على البنات بلوجه وعادي ودابا غير سلام باليد وشنو دار فيه ، أو بالأحرى عينيها وشنو دارو فيه .. بإبتسامة مد يدو لإشراق :

مشرفين اختي ..

- إشراق : شرف ليا شكرا ..

- سعد (كيهضر مع شريهان وعينيه مفارقاتش سكينة ، الكلام بزز باش باغي يخرج من فمو ) :

انا أنا ، انا غادي نخليكم وغادي نطلع ناخود دوش ونزل ، صافي انا مشيت ..

- شربهان (مدازوش عليها حركاتو ونظراتو ) :

واخ سير سير ، شوف مدوش بالما سخون ، دوش بالما البارد راه مزيان كيحيد العيا وكيفيق ويݣلع الشقيقة والدوخة ..

- سعد مداهاش فيها غادي وكيدوز يديه فشعرو بتوتر ..

- شريهان (كتشوف فسكينة ) :

كيبان ليا انت اول وحدة انفتاتح بيها مشروعي ..

- سكينة (كتاكل فالحلوة ) :

كيفاش ؟

- شريهان :

ماشتيش الدري كيفاش كيشوف فيك ، خطفتي ليه العقل مسكين ..

- إشراق (ضحكات ) :

اه حتى انا لاحظتها ، كيهضر معاك انت وعينيه على سكينة ..

- سكينة :

من نيتكم ، يلاه شافني وزايدون كيبان صغير أصاحبتي ..

- شريهان :

عندو 24 عام مال حسك تݣدي ؟

- سكينة :

وانا راه عندي 25 عام احنينتي ، من نيتك انا كبر منو بعام ..

- شريهان :

واش انت هبيلة ، فايتك غير بعام ... راه كيتزوجو بالعيالات كبر منهم ب 13 عام ݣاع ... وعايشين بيخير معاهم ، ومرتاحين مخاصهم خير عكس وحدة واخدة واحد كبر منها ، راه مابقاتش فلاج أصاحبتي ..

- سكينة :

وانت دابا دغية درتيه بغاني وبغا يتزوج بيا ، يلاه ݣاليا غير سلام نعلي شيطان ..

- شريهان :

انا ماݣلت والو دابا ، المهم مالك بعدا احيديه من ليستا ... سعدك هو سعد سعد السعود وهانتي وهانا ، والى مازوجتكم اجي وشمي ليا بالحرݣوز ..

- سكينة (كضحك ) :

واخا واخا ، وحلوة العرس تكون فيها حلوة الريشبوند صافي ..

- شريهان :

الى ماضرب الملك على فمك مانتسماش شريهان ..

- سكينة (كتقلي ليها السم بغات تفقصها بالعاني ) :

وانت الى مكان مكتابك وزمانك هو مالك ، اجي وشمي ليا بالحموم ..

______________________

- مالك غادي جاي فالبيرو ديالو .. كيشوف فساعة مزال وصلات 4 وداير مع دار يتغداو مجموعين ... عقلو خدام بشنو ايكون بغا الرئيس منو ، بزاف ديال علامات الإستفهام فراسو مغايلقا ليه الإجابة حتى يشوف الرئيس ويعرفو شنو بغا ..

|||||||||_____________

نزهة لي كانت خارجة من الكوزينة ، جايا قبالتها شريهان .. حتى وقفات قدامها :

- خالتي سمحيليا على ود ݣبيلة ، انا والله ماقصدت فيها شيحاجة بالعكس مالك عزيز عليا وغالي بزاف ، وكنبغيه بحال خويا واخا مدة قصيرة باش تعارفنا ، انا اقلت ليكم بلي مكنتفاهموش بحال المش مع الفار ، خلي اخالتي نتزوجو انولي نتناتفو من الريوس ههههه ..

- نزهة (كضحك) :

عارفة ابنتي لي كاين متقلقتش منك ، بالعكس كتعجبني صراحتك وانت ومالك الى بغا الله تكونو لبعضياتكم واخا طيري أبنتي وتنزلي اتاخديه اتاخديه حيت مكاتبين فسما ، وانا منكذبش عليك مكرهتش ... ولكن داكشي كيبقا امكتاب حتا غير كنضحكو ، المهم ماعليناش عمر ومالك تعطلو بزاف والبنات تعطل عليهم الغدا ..

- شريهان(تنهدات) :

شفتي اخالتي عادشي غير وصيناهم مايتعطلوش زعمة ... ماعندنا منديرو اخالتي غير نتسناو ، زعمة كنا ناويين نتغداو مجموعين ، المهم البنات راه شبعو بالحلوة وشلايض ، الى مجاوش مع 4 صافي نحطو حنا نتغداو ... ونخليو ليهم هوما ..

- نزهة :

داكشي لي غادي نديرو ، يلاه زيدي منخليوش لبنات بوحدهم ..

- شريهان : واخا يلاه .. خرجو على برا ، مع يلاه ݣلسو دخلات طوموبيلت عمر ..

- نزهة :

ها عمر جا الحمد لله بقا غير مالك ، على الله يجي حتى مصطفى ..

- زهرة : موحال اختي ، مصطفى مع الخدمة مايجيش ..

- بلاصة عمر طوموبيلتو .. خرج هو وسعيد ..

- نزهة : وتعطلتو بزاف اولدي ..

- عمر :

والخدمة الواليدة شنو غادي نديرو ، داتنا الوقت انا وسي سعيد .. السلام عليكم بعدا ..

- شريهان :

وعليكم السلام ، صاحبتي سكينة وإشراق ختها ، وهادي شميسة بنتها شمس ..

- عمر (بإبتسامة وهدوء سلم على كل وحدة فيهم ) :

مشرفين .. أشرو ليه البنات براسهم وبإبتسامة ..

- شريهان : وهادا خالي سعيد ..

- البنات (بخجل ) مشرفين ..

- زهرة (بدون سابق إنذار ) :

كون اجبتي معاك ابنتي راجلك ، حشومة مسكين كوراه بقا بوحدو ..

شريهان (غمزاتها مخرجة فيها عينيها ) ..

- إشراق حدرات راسها .. سكينة بلعات ريقها وبإبتسامة :

خالتي راجل ختي الله يرحمو ،توفى هادي سينين ..

- زهرة (حشمات ) :

سمحيليا ابنتي ، مكنتش عارفة .. ݣلس عمر وسعيد ، والبنيتات كانو كيلعبو ويضحكو ، شمس لي جايا كتجري بزربة هربانة من ياسمين كتضحك ، حتى تلاحت لعمر بين يديه .. كتلهت ..

- إشراق (غوتات عليها ) :

شمس ، شنو ݣلنا فدار ؟

- نزهة : خليها أبنتي كتلعب ، الدراري الصغار هكاك دايرين ..

- هزها عمر فوق رجليه باسها .. :

شنو سميتك ؟

- شمس : سمس وماما وطاتي كيقولو ليا سميسة ولا سموسة ، وانت شنو سميتك ..

- عمر (بإبتسامة ) :

عمر ..

- شمس (هزات يدها كتلعب ليه فشعرو ) :

سعرك زوين ، بحال سعري ..

- إشراق : أجي أماما أجي .. نقزات شمس من فوق رجليه ومشات عند ماماها ..

- إشراق (بهمس) :

حشومة اماما نيرو ليبيتيز ، حنا عند الناس خاص نكونو زوينين داكوغ ؟

- شمس (حركات راسها بالإيجاب) :

داكوغ .. وقف عمر :

سمحوليا ، انا جاي ..

- نزهة : متعطلش ..

- عمر : لا كوني هانية مغادي نتعطل ... مع دار خرج فجميلة ..

- عمر (كيضحك) : بقاي ديري نظاظرك ، شحال من مرة كنݣوليك متبقايش دوري فدار بلا بيهم ..

- جميلة (ضحكات ) :

غير كنسا ، فين غادي اجي راه قربنا نحطو الغدا ..

- عمر : أنا جاي ..

- جميلة : واخااا ..

_________________

فقصر الإيليزي ، دخلو بزوج بيهم للمكتب الرئيس ، .. كان ݣالس بإبتسامة ، ستقبلهم برحابة صدر ... مصطفى حاس بالرهبة ، لأول مرة ليه يوقف قدام شخص مهم لهاد الدرجة .. يلاه أمرهم بالجلوس ، تدق الباب ودخل مالك .. لي غير شافهم وشافوه تصدمو ..

- مالك (بإستغراب) : مصطفى ..

- مصطفى (بإستغراب حتى هو ) :

مالك ..

- الرئيس : تفضلو .. ، ݣلس مالك حتى هو شي كيشوف فشي وكيتسناو يعرفو الموضوع لي بسبابو هوما هنا ..

- الرئيس : جون ، تقدر تبدا ..

- جون : شكرا سيدي .. ولكن ..

-الرئيس : غير هضر ، موسيو مالك حضورو مهم فهاد القضية .. جون أشر بالإيجاب وشاف فمصطفى ..

- مصطفى القضية لي حنا خدامين عليها حاليا ، ولي متبعها الرئيس بنفسو ، كيف سبق لينا وهضرنا قبلنا وناقشنا الخطة وتوصلنا للحل اخير ، بلي ايخصنا شخص لي يجيب لينا معلومات على كارلو كابوني ، شخص لي يكون قريب ليه ، علاش لا شخص لي يأدي دور ديال شريك جديد ليه .. وفعلا من بعد بحث طويل توصلنا للشخص المناسب ، وهاد الشخص هو الأخت ديال شريهان ..

- مصطفى (فهاد اللحظة كيحس بطنين فراسو وفودنيه ، مامتيقش شنو كيسمع جاتو الضحكة ، لكن لا المكان ولا السيد لي مقابل معاه مناسبين باش يضحك ويعبر على رأيو ويغوت بأعلى صوتو بلي كيضحكو عليه ولا كيلعبو معاه ) ..

مالك (بعدم تصديق وصدمة ) :

موسيو جون ، واش عارف شنو كتݣول سمحليا سعادة الرئيس ، ولكن هادشي مكايتݣلش ..

- مصطفى (كارز على سنانو) :

نفضل نموت انا ، ومندخلش ختي فحاجة تقدر ماتخرجش منها حية مستحيل أسيدي مستحيل ..

- الرئيس (كان ساكت كيدرس ملامحهم وردة فعلهم بكل رزانة وتباث شاف فمصطفى ) :

غير تهدن عارف بلي الأمر صعيب ، ولكن ختك مغاديش تكون بوحدها (شاف فمالك ) مالك غادي يكون معاها ..

- مالك (بلع ريقو مافهمش شنو ضاير حداه ) :

مافهمتش أسيدي شنو باغي تقصد ؟ كيفاش ؟

- الرئيس (بنفس الإبتسامة ) :

أنا غادي نفهمك ..

يتبع...