محتوى القصة
تتناول قصتي موضوع حساس جداً و متفشي في مجتمعنا من قديم الزمان الى يومنا هاد ...فهي الانثي التي ارتبط معها لقب "المنحوسة" طوال شبابها و مهما حاولت ان تنكر الأمر الا ان ما يجري حولها يوضح نحس حضها ....
وهو داك شاب المتعلم الدي لا يِؤمن بشيء اسمه "نحس"...بل يؤمن بالقدر "خيره و شره"....و ان لكل شيء نصيب و قدر ..فماذا سيحدت عندما يجتمعان معاً ...هل سيستطيع ان يتجاوز ما يحدت له مند ان تعرف عليها ام ان ايمانه اقوى من ان يصدق انها هي سبب....
القصة تحمل نكهة كوميدية مع بعض الدراما و الرومنسية مع الكتير من التقاليد و الأعراف و النحس الدي هو أساس هده القصة ....
« قـــدر الـمـنـحـوســة »
الكـاتبة : 👑 Fatima Z-F 👑
تــقــديــم...
" لا ذنب للعنب بما يفعله النبيذ "....
كبريائي يقول لي دائمآ.....
ما دام هناك في السماء من سيحميني فليس هنا في الارض من سيكسرني.....
تهت و أنا أبحث عن طريق نهاية أحزاني..!!
توقفت لوهلة ..
كي أقول لنفسي ..؟!
لابد من يومٍ ..
أن ينجلي هذا الظلآم..!!
و تشرق الشمس من جديد ..؟!!
لتـعـلن عن فجرٍ سـعـيد يمد لي يداه بأزهار الأمل ..!!
❦
قالو ناس زمان درناهم حباب و صحبة قلنا صافي الله يدوم لمحبة ...
ساعة هوما كانو غير على سبة كيستناو غير الفرصة باش يضربو ضربة ...
وهادي هي حالت دنيا غدارة و ولاد ناس فيها قلال والباقي غير الحكَارة...
ايلا كانت حاجتهم بيك يحطوك فوق راس ..
ومني يساليو منك تحت رجليهم تنداس...
في ارض واسعة وعريضة تسرح عينيك حتا تعيا وما تلقى ليها نهاية ..مليئة بالخير ديال سيدي ربي من جنان لكرموس و رمان و ليمون وزيد قور الهندية داير بلأرض..ما بين سرسوب ديال شجر واقفين عيالات حرات خدامين بدراعهم ولا عطاوك ضهرهم ما تفرق واش مرا و لا راجل حيت صحاحات و شدات و الخدمة ديال فلاحة زادت قصحاتهم ...كل وحدة هازة صندوق كيحطو فيه الفاكهة لي كيزولوها من شجر ..يديهم مزين بسوار الفضة و عنقهم دايرعليه عقيق بيض متوسطاه لويزة حرة وما بين حجبانهم واشمين وشم لي معروفين بيه شلوح ديال خميسات ...
وخا تمارة زينهم واضح و باين و لحمهم طري و بيض كيشعل وفضحكتهم باينة سنة نقرة زادت بهات وزينات لبسمة وعلى طرف لسانهم اغنية من ترات بلادهم..صوتهم رخيم و كيحببك تسمع ليهم...وحدة من بينهم هزات راسها لسما وحاطة يديها على ضهرها وشافت فالعيالات لي حداها ...
زهور : واحد لطوف كيف بقات مسكينة ....
جمعة : كيف غادي تكون مسكينة راها معدبة هاد لحمالة خرجاتها منها تقول بحالي عمرها حملات ولا ولدات ....
زهور : اييه مسكينة شحال بقات فيا ولكن تا هي ما دارت فيها ما يصلاح او تا كبرات و شرفات عاد ناضت تولد ....
فاتحة دخلات معاهم فالهضرة : قالو ناسنا لوالة الفم مابقات فيه حتى سنة وما بغا يتهنا سولوه آش خاصك أ الشارف الهارف قالهم بغيت الصغيرة مولات السوالف وهادي هي ديال لطوف تا كبرات و هترات عاد ناضت تحمل دارت ضحك فراسها و فولادها...
جمعة : اوا هدا هو المكتاب ما عندها ما دير ...
فاتحة :اختي لولادة ماشي عيب لعيب هو تا عروستها حاملة و حملو بجوج فنفس شهر وكاع ناس ناضو يهضرو و يقولو غارت من مرات ولدها وناضت حملات تا هي ..تا مبقات لا تخرج ولا درج ....
جمعة : اختي لسان ما فيه عضم وغير لي جا يلاوح لهضرة تا من حبابها ضحكو عليها ولكن ربي كبير دابا ترجع ليها صحتها و تنوض دردك عليهم كيف الخيل هاديك راه لطوف و اجرك على الله...
زهور : اييه على لطوف مسكينة وشمن نحس هدا تسلط عليها تا تولي ضحكة ما بين عيلات دوار.. الجميعة لي نوقف عليها لقى في فمهم غير "لطوف هبلات وفضد عروستها حملات " ....
فاتحة سرحات عنيها وهي تجمع الوقفة بزربة كتهضر مع العايلات لخرين : مول الفيرمة جاي لهنا ديوها فخدمتكم ما فينا لي نسمعو نهاقو مع هاد صباح....
جمعة : هاد شارف غير فين ما رشقات ليه يجي يبقى يتفرج فينا هنا لقى راحتو من مكينينش رجال معانا....
كل وحدة داتها فشعل لي فيديها كيتلفو نهارهم بلي كاين و موجود ....بعيد من لفيرما كترائة بنت صغيرة راكبة فوق لحمار تكون عندها ديك 10 سنين ...شادة طريقها لدارهم ومدورة زيف على راسها مغطية بيه من شمس لي حرقاتها وخلات حناكها يطرطقو بالحمورية ...تحت من فمها واشمة خط محاط بيه نقاطي لي زاد بين زينها لي وارتينه شلوح زمور ....
وقفات قدام لكشينة "كوزينة" ونزلات من فوق لحمار وبدات كتهز فنوريسات عامرين بالما ودخلهم تستفهم فالكشينة ...حيدات شواري من فوق لحمار وداتو لجنان ربطاتو و كلها كتقطر بالعرق ..حيدات زيف كتنش بيه على وجها هزات قرعة ديال زبدة بلدية مع كاس لبن وتوجهات لفران لي خارج منو دخان....هزات لمرا عنيها فبنتها و كرشها واصلة لفمها جالسة قدام لفران بلدي كتخبز....
لالة لطوف : عائشة جيتي ابنتي....
عائشة وقفات حداها : نوضي امي من صهد واش قدك مزال يخبزو ديك ساعة تسنايني ولا عيطي على مرت خويا ...
لالة لطوف : اوا لخبز خمر ونتي تعطلتي فسقاية مجاتش نخليه يخسر اما مرت خوك قالك شداها دوخة ومقدراش على صهد...
عائشة : مال الوحم كيبقى تمن شهور تنوض دير شغل باركة من لفشوش لخاوي ولا عارفة غير تاكل و تنعس كيف البقرة ...
لالة لطوف ضحكات بشوي و الوشام لي فجبهتها و تحت فمها مزين ملامحها : يا بنيتي لي لقا راحتو فالهبال ما عندو ما يدير بالعقل ...
عائشة جلسات حداها : ميمة عطيني خبيز سخون ناكل فيا موت جوع وما فيا لي يتسنا وقت لغدا...
لالة لطوف مدات خبيز لبنتها دهنات فيه زبيدة و قسمات هي وياها شادين لحديث مع بعض و عائشة عنيها فكرش مها ..
عائشة : ميمة شحال بقا ليك تولدي...
لالة لطوف : اوا هدا شهر تامن تال شهر جاي عاد يدخل شهري..
عائشة : اتولدي نتي ومرت خويا دقة وحدة ....
لالة لطوف : الله و اعلم معرفت شكون سابق فينا انا و لا هي ....
عائشة مسحات طرف فمها بكمها : و شنو غادي تسميه ...
لالة لطوف حطات يديها فوق كرشها : اوا لا خرج ولد انسميه مجيد ولا جات بنيتَ انسميها عفراء....
عائشة بتسمات و بانو سنانها لقدم لي خارجين : عفراء سمية زوينة امي و ما ديراش فدوار ...
لالة لطوف كتجبد فالخبز : نوضي ابنتي شوفي داك الغدا واش طاب قرب باك يجي هو وخوتك ...
ناضت كتنفض فحوايجها..توجهات لكوزينة كتقاد فطبلة و مقابلة طنجرة لي كطيب فوق العواد..دخلات عليها لالة لطوف هازة طبق ديال لخبز و وجها ايطرطق بالحرارة ....جلسات كتسوط و كتنش على وجها بزيف و كتعيط باسم مرت ولدها لي تمات داخلة عندهم وتاهي كرشها واصلة لفمها و منفوخة اطرطق...
بشرى : خالتي عيطتي عليا ....
لالة لطوف سرحات فيها عنيها :اوا ابنتي ما بقيتي كتباني غير فوقت الماكلة وديما مخبية فداك البيت انا حشمت و نتي مزال ياك لباس ...
بشرى : غير اخالتي الحمالة مدوزاها عليا وما كنقدر ندير والو ...
لالة لطوف دورات فراسها بشوفات حارة : قولي ابنتي لقيتي علامن طنزي و طلقي هبالك ساعة جابك ربي فليامات لي ماعندي ڭانة ليك ..."شيرات عليها بصندالة مفقوصة" ...دوزي عاوني عاويشة راها من لفجر وهي واقفة ونتي كترادي معايا هنا...
بشرى تمشات قدامها ورادة لبال لا تشحط معاها ..عارفين لالة لطوف حارة وكلامها مكيتنزلش وكون ماهاد الحمالة لي قضات على جهدها كون راها واقفة على شغلها بيديها ....
في فم لباب دخلو ثلاتة رجال لابسين حوايج ديال لحرت وعلى كثافهم حاطين جلباب فالقهوي و على رجلهم صباط ديال لميكة واصل لراكبيهم ..رجال صحاح و طوال وكتافهم عراض و لحمهم صلب ونضراتهم قاصحة باينين ولاد الفلاحة ....
جلسو على طرف لباب كيحيدو صباط و عائشة مشات عندهم هازة مقراش ديال لما ..
عائشة: با هكا غسل وجهك و يديك....
العربي بإبتسامة حنينة خدا ليها لمقراش : الله يرضي عليك ابنتي سيري دخلي لكشينة حيدي من شمش ...
علال جالس فليمن ديال باه : عييشة عتقي خوك راني كنموت بجوع ....
عائشة بنفخة : عيط ليا عااائشة ماشي عيييشة منين جبتو هاد سمية منين ...
علال كيضحك : وخا الالة غير عتقيني راه مزال لأرض لي فلواد تابعاني نحرتها انا وهاد لعجل لي حدايا ....
عبد القادر : حشاك اولد با وليت ليك عجل هنا...
العربي كيمسح يدو وكيشوف فولادو بإبتسامة حنينة وخا بعاد فسن ولكن واحد ما يفوت لأخر و معزتهم حاضرة وخا يضلو يدابزو ...
دخل جلس حدا مراتو لي كتسوط : لالة لطوف ياك لباس مالكي كتسوطي ....
لالة لطوف : اودي اسي لعربي ثلاتة لولاد لي دوزت ومكاينش لي خرجها مني قد هادا لي فكرشي قتلني يا سي لعربي قتلني ...
لعربي : غير راكي كبرتي وصافي وما بقى ليك جهد....
لالة لطوف خنزرات فيه وعنيها خارجين : اوااااا تجمع....
لعربي حط خمسة على فمو : هاني ساكت الالة ...
دخلو دراري تجمعو على طبلة و عائشة هي و بشرى مرات علال كيحطو لغدا وكلهم تجمعو عليه من غير لالة لطوف لي جلسات بعيدة حاطة يديها على حنكها وحادرة عنيها وغير كتفكر و تغزل بينها و بين راسها....
وصل ليل و دنيا ضلامت وناس نعسو من غير لالة لطوف لي جالسة حدا شرجم وشمعة شاعلة حداها لابسة قفطان بيض واسع و طالقة شعرها لي زعر كيف ذهب و طويل حطاه فوق كرشها ...ومدورة وجها لجهة شرجم كتشوف لارض و تسرح عنيها تا تعيا وترجع تهزهم لسما و تبقى تشوف مطولا عاد تنهد و تهبط عنيها لكرشها....
مكتاب و شمن كتاب هادا طاح عليك الطوف لي كان غير سميتك تخلي بنادم يهبط راس واليوم كلشي هاز بسميتك ضحكة وشفاية و فين مايتجمعو يقولو "لطوف هبلات وفضد عروستها حملات"...وشحال صعيبة حمالت لكبر وخلاتها تهبل و تحماق بحالي عمرها حملات وهي لي كانت فكل دوار يقول عليها زينت لعقل و لفعل ...شوف غير اش خرجات من مها وهي فكرشها اما نهار تولد كيف تولي لقبيلة و المنحوسة فيها ....
طلع صباح كيف كل ليام كل واحد مقابل شغلو وفين يتلاها وسي لعربي هاد المرة بقى كيوجد فرحيلو و فلباسو و مراتو حداه كتشوف فيه و قلبها ما مهنيها وهو كل مرة يضحك ليها ....
العربي : يا هاد لمرا مالكي هازة شوكتك تاني راني غادي غير الموسم مع الخيالة كيف كل لعام ...
لالة لطوف كمشات حجبانها: ما عرفتش قلبي ما مهنينيش و كان.... تا علال دا مراتو تشوف والديها و عبد لقادر مشا لمدينة بقيت غير انا وعويشة فدار هاد ليلة ....
العربيي حط سلهام على كتفو و لمكحلة على جنبو : عبد لقادر موحال يتعطل فلمدينة دابا تشوفيه شوي يتم راجع ....
تنهدات وجمعات لوقفة تودعات مع راجلها لي ركب فوق العود و شد طريقو وهي بقات متكية على سارية كتشوف طريق لي خوات من سي لعربي دارت من سمعات سميتها ....
زهور : ختي لطوف ياك لباس مالكي واقفة في فم لباب ...
لطوف : والو اختي غير ساهية وكان خاصك شي حاجة ....
زهور : مكاين والو اختي غير جيت نونسك شوي..."هبطات عنيها لكرشها"...شحال بقى ليك اختي ...
لطوف : مزال واحد شهر وخا شفتها باغية تخرج قبل لوقت ..زيدي نيت جابك الله رجال كلهم خرجو بقيت غير انا و عويشة ...
جلسو فلمرح كيتعاودو مجموعين على صينية اتاي ولطوف كل مرة تخسر وجها ممرتاحاش حاسة بشي حاجة اتخرج منها ...رجعات ضهرها لور و وجها حمر كتسوط و بدا لعرق كيتجمع عل جبهتها ....
زهور حطات لكاس فوق طبلة : ياكما اتولدي ...
لطوف مزيرة : اشمن ولادة راه مزال ليها شهر عاد تخرج ...
دخلات عليهم عويشة كتنهج و وجها حمر ولونها مخطوف : وااامي جرييي لبهايم ديالنا و ديال دوار طاحو كاملين فالجرف لي فلواد وكاين منهم لي مات ....
لطوف كيف سمعاتها جمعات الوقفة و بنوضة لي ناضت جاها لوجع كيقطع من لتحت مقدراتش تصبر ليه وهي تصرخ بأعلى ما فصوتها....قربات ليها زهور مخلوعة فلما لي كيهبط من رجلين لطوف....
زهور : اناري اتولدي المسخوطة ياك قلتي مزال ليك شهر ....
لطوف مزيرة على سنانها : اععععع زهووور عتقيييي عيطي على القابلة ديال دوار دغيا ...
زهور دارت عن عويشة لي وجها صفار : عويشة طيري عيطي على لكبيرا قولي ليها مي كتولد ...
جرات لطوف نعساتها وحيدات ليها سروال و فرقات ليها رجليها ...
-زحمي ا لطوف باش يخرج الراس ....
لطوف خشات ضفارها فلملاية كتزحم بجهد و لعروقات وصلو فين بغاو ...جاتها لولادة واعرة بحالي عمرها ولدات ولات كتشوف لموت بين عنيها و صخفة كتشدها كتسمع أصوات عيالات و ضرب فوجها ولما حلو في فمها و كتسمع غير فودنيها ....
"زحميي ما بقى والو زحميي"...
بالقوة لي بقات ليها زحمات بكل جهدها وفور ما تطلق صوت بكاء طفل طاحت فوق لفراش كتنهج ومعيقاش بدنيا ولي فيها ...
لقابلة كتشوف طفلة لي بين يديها مزيان و نطقات بصوت رخيم.....
"هادي ما تكون نشالله غير مرت ولدي جعفر "......دارت عند لطوف لي كتلتاقط أنفاسها ..."اش اتسميها "...
لطوف بصوت ضعيف و مجروح : انسميها عفراء ....
رجعات لقابلة عنيها لطفلة لي كتبكي وزادت وساعت لبسمة ونطقات قدام زهور و لطوف و جمعة لي حضرات...
"عفراء لجعفر ...وجعفر لعفراء...وليام دور وتوريكم لمحبة فين تكون ..شكون سابق حبو فيكم ..نتي ولا هو "....
ﻛﺎﻳﻦ ﺍﻟﺮﺍﺟﻞ ﻭﺍﻟﻤﺮﺟﻞ ﻭﺍﻟﺮﻭﻳﺠﻞ
ﻭﻛﺎﻳﻦ ﻟﻲ ﻣﺨﺸﻲ ﻭﺳﻂ ﺍﻟﺮﺟﺎﻝ ﺑﺎﺵ ﻳﺘﺮﺟﻞ
'
ﻭﻛﺎﻳﻦ ﻟﻲ ﻣﻌﺎﺷﺮ ﺍﻟﺮﺟﺎﻝ ﺑﺎﺵ ﻳﺘﺴﻤﻰ ﺭﺍﺟﻞ
ﻛﺎﻳﻦ ﺑﺰﺍﻑ ﻭ ﻛﺎﻳﻦ ﺷﻮﻳﺎ ...... ومع ﻟﻮﻗﺖ ﺗﻌﺮﻑ تفرق بين راجل و رويجل....
فلواد لي ناس فيه كتجرا من قنت لقنت وجهم مخطوف و لونهم صفر ...كل واحد كيقلب على بهيمتو واش مزال حية ولاتجيفات فجرف ديال الواد كيف حال كاع لبهايم ...
كلشي كيبكي و ينوح تقول مات ليه واحد من عائلتو وكيف مايبكي وهما كيشوفو لبهيمة لي كيكسابو تجيفات وماتت ما بقات صالحة لا لبيع ولا لخدمة...
وسط كل رجال و نسا كيتمشى بينهم طفل صغير فعمرو 6 سنين ملامحو بريئين وعنيه فلون اخضر فاتح وشعرو كحل كيف ظلام ليل و حناكو حومر و صدرو كيطلع و يهبط بتنفسو السريع وملامحو متأثرين وعلى طرف عينو دمعة مخلهاش تنزل حيت عارف راجل ما كيبكيش ...
تلاح فجرف تابع رجال و عينو كتقلب هنا و لهيه حتى سرح عينو بعيد وبانو ليه جوج بهيمات ومن وراهم ثلاتة خرفان سرديين...تم غادي كيجري وسط الواد و كينقز لبهايم لي تجيفو حتى وصل لعندهم و وقف مخرج عنيه و كيتحقق فيهم تا عرفهم ديالو عاد ترسمات ليه لبسمة على ملامحو صغيرة ..
حاطو رجال لقبيلة بيه وعنيهم ممتيقاش فلي كتشوف عنيه كاع بهايم ناس لقبيلة ماتو الا بهايم هاد دري لي متقاصت بتا حاجة وحية تُرزق ..نطق واحد منهم باين شمتة قاتلاه...
-وازهر عندك هدا اولد لقابلة ....
دار عندهم عينو كيلمعو مقدرش يخبي لفرحة لي حاس بيها وقال..
- ربي كتب ليهم عمر جديد اعمي وغير هما لي كنكساب انا ومي لا ماتو ما نلقاو ما ناكلو....
- وحنا اش دنبنا بهايمنا يموتو شهاد نحس تسلط علينا هاد ليلة ....
. جر دري بهايمو كيخرجهم من لجرف وشاف فرجال لقبيلة لي محصرين بلي واقع وقال ببرائتو المعهودة...
- مكتاب الله وقع و ربي ايعوضكم خير منها نشالله ...
نطق واحد من رجال بعصبية : سيير اجعفر بحالتك ما كيحس بالمزود غير لي مخبوط بيه ....
مزادش لهضرة وجر بهايمو وشد طريق لدارهم وكل مرة يدور عندهم فرحان ..طفل صغير معارفش باش حاسين ناس دوار لي عندهم لبهيمة حاجة مهمة فحياتهم ودايرين ليها شان حيت هي لي تجيب ليه لغلة نهار لحزة وليوم لقاو راسهم الله كريم ماعرفو هادشي منين تسلط عليهم كون ماتت وحدة ولا جوج يسرطوها و يسكتو لكن باش يموتو كاع البهيمات جاتهم قاصحة و صعيبة ما قدرو يستحملوها ...
اما جعفر فرحان و فرحتو ما قداه من ربي نجى رزق لي كيجيب ليه ما ياكل هو ومو اما باه مات من كان فكرش مو وما عندو عليه خبار من غير انه كان فقيه ديال دوار .....
دخل لبهايم لكوري ربطهم وحط ليهم تبن وخرج متوجه لدار وكيمسح لعرق من جبهتو وحوايجو مسخين و صباط لميكة لي لابس عامر غيس...دخل لكوزينة كيقلب على مو ...شافها جالسة كطيب لمسمن وهو يدخل جلس حداها وهي تبسمات ليه بحنية...
لكبيرة: جعفر جيتي اولدي...
جعفر بملامح متسائلة قال : مي علاش گاع ناس هبطو لواد ونتي بقيتي هنا وما تخلعتي ما والو ....
لكبيرة بنضرات حنينة : اولدي كلشي ديال الله ولا ماتو مكتاب عليهم وربي ايعوضنا حسن منهم...
جعفر بدون فهم : ولكن كاع دوار بقى فيهم الحال و كاين لي بكى و كيقولو شي واحد جاب لينا نحس لدوار ديالنا ...
لكبيرة هزات صبعها بتنبيه : عنداك اولدي تيق فهاد لخزعبلات كلشي مكتبو لينا الله وربي ايرزقنا من عندو الواحد هو يصبر لمكتاب و نقولو الحمدلله ....
جعفر هز شوي من لمسمن وقنت لحيط كياكل بهدوء عاد قال : ولكن دياولنا بوحدهم لي بقاو حيين ....
لكبيرة هزات فيه عنيها بصدمة : يعني دياولنا هما بوحدهم لي بقاو حيين ...
جعفر : اه راني دخلتهم لزريبة امي ....
لكبيرة بقات كتشوف و كتفات فقط انها نطقات بصوت ضعيف "حمدلله"..
وكملات شغلها بإبتسامتها المعهودة ..ربي عطاها صبر لي ما بقى عند ناس ليوم...انسانة مؤمنة و كترضي بلي كتب الله ليها و كتحمدلله ديما ....رجعات هزات عنيها لولدها لي كيكل بهدوء منزل راسو لبين رجليه..
-نوض اولدي دير لما يطيب نسالي هادشي و ندوش ليك باش نمشيو نشوفو لطوف كيف بقات هي و بنيتها...
جعفر بخجل جمع الوقفة و ودنيه ولاو حومر ..دار لما يطيب و رجع جلس حدا مو ومزال الحشمة على ملامحو خصوصاً قالت ليه مو من جات بعد ما ولدات لطوف قالت ليه زوجت ليك بنت لطوف ...
خشا يدو بين رجليه وميل راسو لجنب ...
جعفر : مي شنو سميتو بنت خالتي لطوف...
لكبيرة : سماوها اولدي عفراء ومن تولدات طبعتها ليك و نشالله جعفر لعفراء و عفراء لجعفر لكتاب.....
رغم انه معارفش معنى هاد لكلام مزيان ولكن غير ديك كلمة زواج خلاتو يحس بالخجل و ما يقدر يهضر ولا يتكلم ..بقى مهبط راس وكيتسنى مو تكمل شغلها ...
من وجهو باين عليه طيبوبة و الخصال الحميدة ومو مربياه على دين و الاحترام شي لي خلاه مايشبه لولاد دوار فالقباحة ولا لفعل و لا شخصية وما كيتجامع مع حد عارف غير مو و بهايمو لي يسرحم من صباح تال ليل ...
كملات لكبيرة شغلها و قدات كلشي فطبق و غطاتو و مشات هزات لما طايب دفاتو فصطل و دخلات لدوش صغير مبني بالعواد و داير عليه ميكة ..دخلات جعفر وبدات كتغسل و تحك ليه وعاد بدا كيبان و يوضاح زينو من تحيد منو لوسخ و زادو عنيه يبريو كيف لجوهر و شعرو بلما تسرح و وصل ليه حد عنقو ...نشفاتو ولبساتو حوايج جداد وخا بالين شوي ولكن مصبنين وما فيهم نقطة وسخ....
خرجات هي وياه دارت عليها لحاف وهو هزعليها طبق حطو فوق راسوو تمشى حداها وهي مغطية وجها ماكتبينو لحد من غير لعيالات وحيت مرا هجالة كيف قول ناس دوار حافضة حدودها وما تخلي ولد لمرا يشوف وجها ولا يدسر عليها .....
متكية فبيتها وحاطة بنتها حداها كتشوف فيها و تنهد و ترجع تشوف فراجلها لي ما عرف واش يفرح بزيادت بنتو ولا يحزن على لخير لي ضاع ليه وزاد لعود لي داه معاه يخيل بيه تهرس ليه من رجلو ومابقى ليه فايدة ...
حاط راسو بين يدو كيسوط ما عرف هاد دقة منين جاتو ....
لطوف: ياهاد راجل لعن شيطان واجي شوف بنتك ونسا عليك ما وقع مكتاب وكاع ناس لقبيلة بحالنا ....
العربي هز راسو كيسوط : شغادي نقولك الطوف بحال هادشي عمرو داز عليا ولا شافتو عيني وما عرفنا هاد نحس منين تسلط علينا.....
لطوف هزات بنتها لي ولات كتبكي حطاتها على صدرها كترضعها و نطقات بحزن...
-والبنت ها هي جات قبل وقتها وخاص نديرو ليها سبوع وندبحو دبيحة باش نسميوها ....
العربي : منيين الطوف منين وكاع غلتي مشات مع الواد ورزق لي عندي راكي شفتي ضيعتو فزريعة لي غرستها فالأرض....
لطوف : وشنو نخليو لبنت بلاش....
العربي دارت بيه دنيا ما عرف فين يعطي راس ..عطا ضهرو لمرتو و بقى غير كيخمم و يفكر
دخلو عليهم دراري وجهم ماكيبشر بالخير جلسو حدا مهم وباسو طفلة لي تزادت فعائلتهم فجبهتها وحطو زرورة فوسط لقماط و تكلم عبد القادر لي عينو على عفراء...
-كتشبه ليك الوليدة بزااف جات زعرة بحالك ....
علال بدا كيضحك وخا معندو خاطر : باين من اتكبر اترجعها شمس كحنيسة بحال عويشة ....
لطوف شافت فيه بشك : علال فين هي مراتك ما شفتهاش من رجعتي...
علال تزير : قالك بغات تبقى فدارهم تا تولد ودوز ربعين يوم عاد ترجع حيت ما كاين لي يحضيها هنا ....
لطوف قصحات شوفة: ايييه وهي لي ما كنت تهز طبسيل عندي هنا وحاضية غير راحة ومكاينش لي يدوي معاها رجعاتني قدام حبابها خايبة ....
علال زاد زير على يديه بجهد: بغات تبقى عند والديها خليها تبقى عندهم تا نشوف فين باغية توصل اما لكانت معولة نرجعها ولاتشدني فلي فكرشها هي لي ماتكون ...
العربي دار عندو مكمش حجبانو : شهاد لهضرة كنسمع اعلال راك كبرتي ما بقيتي ولد صغير لي نعلمك و نحفضك وماشي انجبدو لعيب مع ناس ولمرا ما بقى ليها والو تولد...
علال هبط راسو ما عاودش لهضرة مع باه..دخلات عليهم عويشة ونطقات بشوي ...
-مي خالتي لكبيرة و ولدها جاو عندك بغاو يشوفوك...
جمعو رجال الوقفة خرجو بحالتهم حادرين راس مهزوهش قدام لكبيرة من غير انهم بتاسمو لجعفر فقط و كملو طريقهم خارجين مم دار ..بينما لكبيرة دخلات جلسات حدا لطوف وجعفر بقا واقف فجنب لباب وبنص عنيه كيطل على طفلة لي فأحضان مها ....
لطوف بتسائل شافت فطبق : مالكي معدبة راسك اختي لكبيرة باركة غير تمارة لي درت ليك مع لولادة ....
كبيرة : الله اختي لطوف ما بينتناش هادشي وما درت والو غير شوي ديال لمسمن ولبلول ديال رفيسة باش يكتر ليك لحيب و تباني نافسة وماتشديش فقلبك من جيهت عيالات دوار راكي عاارفة لي واقع طير ليهم لعقل ....
لطوف : اختي ما شديت فحد ربي كبير و الله يعوضهم و يعوضنا نشالله ...
حطات عويشة كوكوط فيها لبلول معشب ولكبيرة كتسقي رفيسة و عمرات زلافة مداتها لطوف و نطقات وسط شغلها...
-اوا نهراش اتسبعو لبنت...
لطوف بحزن: لقيتيني اختي كنفكر فهادشي ما بقات عندنا زريبة باش ندبحوها و نسميو لبنت و نديرو زردة لناس دوار ..كنفكر تا يدوز هاد لعام عاد نسبع ليها ....
دخلو عليهم كل من زهور وجعمة لي سمعو كلام لطوف في فم لباب ..
جمعة: لواه الطوف ماهو كلام هذا البنت خاصها تسبع كيفها كيف خوتها ....
لطوف: ومنين اجمعة راكي عاارفة كلشي هاد لبنت مسكينة جات فهاد لكارثة غير ربي يحفضها و صافي ....
زهور: علاش نتي مسمعتيش ناس دوار اش سايرين يقولو ....
لطوف: الله يسمعنا خير ....
زهور : الالة قالو بنتك منحوسة وهي سباب هادشي وزادو تأكدو من سمعو لعود ديال راجلك تهرس وهو كان صحة سلام و ولدك لي تفارق هو ومراتو ..راه كلشي كيقول هاد لبنت ما جابت خير معاها....
لكبيرة بعصبية : شهاد لكلام كيتقال اش دنب بنت صغيرة فهادشي لي واقع واش هاد لجهل ما بغى يسالي من هاد دوار ....
جمعة: اوا اختي نتي قارية ماشي بحالنا حنى غير جاهلين وكنفهمو غير لي شافت عنينا ولي شفنا راه واضح و باين ...
لكبيرة : متعوجيش هضرتي اجمعة ولكانت لمرا القارية عندكم نتوما قليلة لحيا ما عندي ما نزيد نوضح ليكم ...بلاصت طلبو الله ينجيكم و يعافيكم و تحمدوه من جات غير فالبهايم ماشي فولادكم ولا حبابكم جالسين تنعتو بنت فقماطها بالنحس ماحشمتوش على وجوهكم ....
دورو وجهم لجهة لخرى ما قدرو ينطقو بعدها وما عاجبهم حال....تنهدات لطوف و حركات يديها بعصبية ....
-كولو بعدا الهضرة ماليها دوا دابا .....
تجمعو على لقصرية ومدو يديهم كياكلو و يتبننو من غير لكبيرة لي شاهية حبسات ليها اما لطوف كتاكل بزز منها باش يكتار ليها لحليب ...و فوسط لماكلة قالت جمعة...
-اوا الطوف شنو درتي فسبوع ....
لطوف هزات يديها بجوج: ماعندي باش نسبع هاد ساعة ربي كريم ....
طفل لي بقى قدام لباب وعينو منزلاتش من عفراء لي كتحل عنيها ببطئ و ترجع تسدهم شاد فيها نعاس ..كتبان زوينة بحال شي ملاك صغيير خلا عينو تنحاصر غير عليها فقط ما عمرو شاف طفل صغير بهاد الحجم شي لي خلاه مبهور....سمع كلام لطوف وهو يدور عينو ليها ببطئ و نطق من لباب بهدوء...
-نعطيك واحد اخالتي تسبعي ليها بيه .....
جمعة : اااه فكرتيني نتوما بوحدكم فدوار لي ما تقاصوش بهايمكم ...
لكبيرة: ربي حفضهم وعطاهم عمر جديد..."شافت فولدها بحنان"...اجي اولدي تاكل و دي معاك علال وعبدالقادر يختارو لحولي لي عجبهم ...
لطوف بصدمة: اوعدي الكبيرة شكتقولي نتي واش لبهيمة لي كتكسابي تعطيهالي نسبع بيها لبنتي ما يمكنش وما عندي تا لفلوس باش نشري منك ....
جعفر جلس حدا مو وعينو كيمشيو لعفراء : لا اخالتي انعطيها ديالي فابور....
لطوف رفضات بصرامة: هادشي اولدي رزقك و خلاه ليك باك ما تفرطش فيه و نشالله غير دوز هاد لكارثة و ندير ليها سبوع ....
جعفر حس بالخجل و بصوت ضعيف نطق : ولكن انا بغيت نعطيه ليها ...
لكبيرة بتسمات حتى بانو ليه سنة نقرة و حركات راسها لطوف : اوا هانتي لولد منو لراسو باغي يعطي و زيد لبنت رشمتها ليه وهو سبق ليك دفوع قبل الوقت وما تحشميناش الطوف وقبلي ما قدم جعفر ....
لطوف تبسمات من نيتها و عنيها فجعفر : على هاد لحساب لبنت ولات ديالكم وهي فقماطها ....
لكبيرة : ومنلقاش بحال بنتك لولدي مااعرفتش علاش من شفتها حسيت هي لي تناسب جعفر و تفهمو وما حسيت تا رشمتها ليه و نشالله يكون احساسي فمحلو ....
لطوف هزات عفراء بين دراعها و شارت لجعفر يجي حداها ...وقف كيمسح يدو فحوايجو بتوتر و جلس على ركابيه امام عفراء...حطاتها لطوف بين يديه وهو حاس بتوتر و الحشمة من شافها كتشوف فيه ..تبسم برقة من شافها كتفوه مخرجة لسانها ..بقى كيضحك فرحان....
خداتها منو لكبيرة ونطقات بشوي : سير اولدي عند دراري يجيبو لحولي ....
وقف وعينو فعفراء خطى خطوة وهو يفقد توازن وطاح على طبلة و فمو جا على طرف طبلة خلا دميات يسيلو من فمو و صرخة خرجات من فمو بألم خلا ديك طفلة اول وحدة تقفز فالحضور و تهز صوتها بالبكى بجهد ما بغات تسكت ليهم و وجهم ولا صفر من شافو دم هابط من فم جعفر لي تفرقات ليه شفاه ديال العلوية و دم مبغاش يحبس ليه....
بيدو لي ممقيوصاش بدم هزها بدون وعي وحطها على وجه طفلة وفور ما حطها سكتات من لبكى...
هزاتها لطوف تحطها فبلاصتها باش يشوفو جعفر وفور ما بعداتها منو رجعات كتبكي من جديد و جعفر مشا كيحبو عندها ومد صبعو صغير مسكاتو بيديها الصغيرة عاد سكتات من لبكى ...
بجوج خلاو كل الحضور مبهوض و ما فاهمين والو وجعفر بلاصت يحس بالالم لي كيعصف بضربة ليجات في فمو كانت عينو فقط لعفراء..كأنه مسخر فقط لراحتها هي ولا شيء اخر ....
الجرح يروح ويرجع ...وكل عين لازم تدمع...والزمان قسمة ونصيب....مرة يعطيك ومرة يوجع .... والدنيا فيها الشر والخير...كيما تاخد لازم تدفع ... والكلام كلمة والجواب القديم عمرو لا يرجع....
هاك كلمة ديرها في بالك ...ماشي كل ذهب تلقاه يلمع ...شوف للسما تلقى ربك ....و شوف تحتك تلقى التراب اللي ليه ترجع ....
فولدتها تسمات منحوسة وهي فقماطها..شي ما تيق وشي دار سبة بيها ولقى فين يفرغ سمو وهما ما رادين بال ولاعارفين اش كيخرج لسانهم لي اياكلو تراب و يتحاسبو عليه نهار يتجمعو لعباد ....
احسن خروف ولي يكساب فزريبتو وهبو لبنت لي ربطاتها مو بسميتو ..وخا ضربة لي فمو خلاتو فرحان بلا عقل ما فاهمش سر هاد لفرحة ولكن من شاف الخروف كيتدبح بين عينو وسماوها "عفراء" و سبعو ليها خلاه يفرح بلا خاطرو ...
دارو صدقة وجا ليها كل ناس دوار ...كاين لي سكت وكاين لي تشكى من زهر المنحوسة ....
ودازت سنين نساو فيها ناس ماجرى ليهم و لزريبتهم و رجعات نفوس لطبيعتها و عفراء كبرات و وصلات لست سنين ...بنت سنها واخر همها تلعب وتاكل و تنعس....
فأرض لي نابتة بزرع كتجري بنت بين لحقول وشعرها زعر كيتهز مع لبرد و حناكها حومر وزينها واضح و باين و صوت قهقهاتها ملئات كل جنان..
وقفات قدام باها لي غزا شيب راسو و مال ضهرو بتمارة ..هز عينو من لعودان و وجهم لبنتو لي وقفات عليه كضحك ....
العربي: بنتي عفراء ياك لباس وغير بشوي عليك غادي يسكت ليك لقلب بهاد جرا لي جريتي ....
عفراء بصوت صغير رخيم : با قالت ليك مي داابا طلع لدار بغاتك ضروري ....
لعربي صغر عينو : وماقالتش ليك شنو بغاتني ابنتي ...
عفراء كتقاد زيف لي زلق ليها من لقدام: لا ابا ماقالتش ليا هي غير سخراتني نقول ليك هادشي وقالت لي نعيط تا على خوتي ....
لعربي : الله يسمعنا خير سيري سبقيني ابنتي انا نعيط لخوتك و نورد "نشرب" لعود ونطلع ...
حركات راسها ورجعات من نفس طريق لي جات منها ومن وراها بقى باها واقف كيشوف فيها بحسرة ورجع لشغلو هز عتلة وهي تقسم ليه لعصى وهبطات لحديدة بين سيقانو خلات رعدة طلع من صبعو صغير وخرج عينو فلعصى لي من صباح وهوخدام بيها وكانت صحيحة فصيحة ودابا كيف هزها تهرسات ...رجع شاف فعفراء لي غادة كتنقز وهو يلعن شيطان ودار فبالو ما وقع والو ....
غادة كتنقي فسبول وتاكل وكل مرة تجر زيف من لقدام سمعات سميتها وهي دور لمرا لي كتغوت عليها من لبعيد ...
-وديك المنحوسة واش مغاديش تبعدي من زرع ونتي دزتي عليه كامل ....
عفراء هزات كتافها : انا خديت غير وحدة واصلا عمري دزت من هنا ....
- يا بنت لطوف حشمي شوي ولا غادي نمشي نتبرا عند داركم ...
عفراء حطات يدها بجوج على خسرها كتخسر سيفتها: اوا من حدك كاتعرفي باب دارنا سيري ليها علاش تقوليها ليا انا بسلامة...
-تجننات عليها لمرا وهي تحرش ولدها يخرج لعفراء يضربها وتاعفراء ماشي من لي كيسكتو ..جات قبيحة وقباحتها واعرة وحيت تولدات و والديها كبار مابقى ليهم جهد تربية وزادو فششوها بزااف وخلاو ليها لسان ماضي وخا صغيرة ...
هزات حجرة ديال صم قاصحة خباتها ورا ضهرها و دري جاي كيتحلف عليها ومو تبعاه كيف وصل قدامها ما عطتوش وقت تا فين يتنفس نزلات عليه بحجرة لراس دمغاتو وهزات صايتها وحيدات صندالة لميكة وعطات رجليها لريح ما كتشوفش وراها ما حبسات تا وصلات لدارهم كتنهج ..دخلات تكات فباب دار و لطوف واقفة عليها...
لطوف: اديك زغبية شدرتي.تاني ياك قلت ليك سيري عند باك نيشن ورجعي ماتهضري مع حد ....
عفراء كتغبن فصوتها: ما درت والو وبا ايورد لعود و يطلع ...
لطوف صغرات عنيها بشك: اوا على الله تكون هاد لخرجة بلا تبرية راني عيت من قوة صداع ديالك فين ماخرجتي جايبا معاك مصيبة ....
عفراء هبطات راسها : وراه هما لي كيجبدوني و يقولو عليا منحسوة كاملين..انا امي سميتي عفراء ماشي منحوسة ...
لالة لطوف من سمعات كلام بنتها سكتات و معودات دوات وخلاتها على راحتها ومشات تقضي شغلها ....
دخلات كتسلت لصالة فين جالسة ختها عائشة لي ملامحها جاو مختالفين عليها ... عائشة كان جمالها هادئ و ملامحها محببة و طيبة كتشع من عنيها و شعرها كحل كيف سواد الليل اما عفراء جات بيضة كثر من لقياس و شعرها زعر جات كتشبه لمها فكلشي ...
عفراء سرحات عنيها فلحوايج لي حاطة ختها قدامها :عويشة شنو هادشي اختي واش كاين شي عرس...
عويشة حركات راسها بإبتسامة : بنت خالتي جمعة اتزوج هاد سيمنة وكنشوف واش كاين شي قفطان ما نلبس ولانمشي مع با لسوق نشري شي فراشة لحضور ....
عفراء عنيها كيلمعو: شري ليا تاانا بحالك اختي ...
عويشة : لا اعفراء نتي مزال صغيرة لبسي غير كسوة لبيضة لي شرا ليك با من لموسم لعام لي فات كتباني فيها زوينة ....
عفراء حطات يديها على وجها مركزة فلحوايج تا قفزات من بلاصتها من سمعات مها كتعيط عليها بجهد....وحيت عارفة راسها اش دايرة ناضت بزربة نقزات من شرجم وهربات كتجري خلات لطوف تغوت من وراها بغات تاكل حوايجها و عويشة هي وعريساتها كيبردو فيها ...
عويشة: امي نتي غير بشوي عليك مالكي مع عفراء ...
لطوف حطات يديها على راسها كتسوط : لكافرة بالله دمغات ولد زهور خلاتو مليوح بدمياتو....
عويشة: وصافي امي بردي راه هما لي كيجبدوها وكيعيطو عليها منحوسة ....
بشرى "مرات علال": اختي راهم مكدبوش من نهار تزادت ونحس تابعنا الله يستر شوفي غير نتي اعويش شحال من واحد جا يطلب يديك وغير كدخل عليكم عفراء ناس كيتبدلو و ينوضو يمشيو بحالهم ....
كلثوم"مرات عبد لقادر" : اختي ماقلتي عيب هادشي راه بزااف عينا مانغمضو عينينا ديرو لبنت شوي رقية شرعية لا تكون سكناها شي حاجة الله يستر ...
لطوف حطات حنكها على يديها :ما خليت مادرت من نهار تزادت ونا ندور بيها عند الفقهة وهادشي مغادي غير يزيد ....
عويشة بحزن: صبر امي عفراء مزال صغيررة. ودابا تشوفي هادي غير هضرة وكلشي يدوز و يفوت ...
لطوف صاطت بجهد ماعرفات فين تعطي راس ..واش لبنت صغيرة لي نهار و مطال وهي منوضة صداع وجايبة من وراها قبيلة على قدها تبرا منها على نحسها و مصائبها ولاعلى لبنت لكبيرة لي ربي مكملها فعقلها و اخلاقها وكاع قرانها تزوجو و ولدو وهي لي جا يخطبها يرجع فكلامو و يمشي يخطب وحدة من بنات لقبيلة و يخليو عويشة مسكينة ساكتة وراضية بمكتوبها....
وبنات دورا معروف عليهم يتزوجو صغار اما لا وصلتي لـ 18 ونتي فدار باك صافي فاتك تران و بقيتي بايرة حدا مك و باك وهادشي ليخايفة منو لالة لطوف على بنتها عويس لي فعمرها 16لعام ....
كيف عادتها كل نهار من دير زبايل و تحصل وتخاف على جنابها من قرص مها كتوجه لدار لي ولفات تخبى فيها تا يبرد سوق...
دخلات عليها فالكشينة وهي محنية على لگسعة كتعجن ...هزات راسها بإبتسامة حنينة من شافت خيالها...
لكبيرة:اش درتي تاني ا عفراء....
عفراء نفخات شفايفها : والو اخالتي غير دابزت مع ولد خالتي زهور...
لكبيرة : وشنو وقع ليه...
عفراء قربات حداها جلسات فوق كرسي خشبي وهزات كتافها بجوج : والو غير دمغتو بحجرة و صافي ...
تهزات لكبيرة كضحك من نيتها : صاافي غير دمغتيه صاااااافي ..."دورات فراسها"..احياني عليك ازينت لبنات ما تكوني غير طيحتيه كومة
عفراء: اخالتي انا ما كندير ليهم والو ولكن فين ما ندوز يبقاو يعيطو عليا منحوسة ولادزت على شي ارض من ديال مالين دوار يخرج عندي يقول ليا ماتمشايش فأرضي غادي تنحسيها ليا ..
لكبيرة تنهدات بحسرة :ابنتي ما ديهاش فكلامهم هادو مالقاو علامن يحطو سبة وحطوها عليك نهار تزدتي ..."هزات صبعها"..ونوصيك ابنتي لي قال عليك منحوسة ما تحشميش منو وعطيه خو كلامو ما تسكتيش ليه راه هاد لقوم ما كيحشم غير من لي جبد عليهم نيابو ...
عفراء حركات راسها بزربة فرحانة كتلقى راحتها عند لكبيرة لي متقبلاها بكلشي ليها وعمرها عيراتها بالكلمة لي ولات عندها عقدة وهي فسن صغيرة بكثرة ما كل ساعة كتسمعها من ناس دوار ...
لكبيرة جالسة كدير شغلها و تهضر مع عفراء لي حطات ليها حمص و كوكاو كتدوز بيه لوقت قبل لغدا ...وخا بنات سنها كيعاونو فشقى وحرات فشغل كيف معروف على بنات شلوح زمور الحرات ..لكن عفراء عكس كل لبنات جات مفضية وعمر يديها تحطات فالما ولاهزات كاس لما ..لقات ختها عويشة هازة حمل دار و شقاها وما تخليها دير والو ....
تسمع صوت رجولي فأرجاء دار و خطوات بسيطة كتقرب لكوزينة وقف امام لباب بملابسو العادية و وابتسامتو الجميلة وعيونو الخضراء لي كتشع كيف نور و شعرها الاسود نازل على جبهتو حامل شكارة ورا ضهرو ونطق بصوت ضعيف....
-الوليدة ...
لكبيرة بحنية : ولدي جعفر رجعتي من المدرسة ...
جعفر تقدم بخطوات لعند مو حتى وقف فنصف طريق من شاف عفراء جالسة فالقنت ...وجهو ولا حمر ما عرف يتقدم ولا يتوخر وبقى فقط واقف فمكانو بحال صنم وعينو كيبريو فعفراء لي كتشوف فيه ...وبزز باش قدر يقاد كلماتو و يخرجهم...
جعفر: عفراء شكاديري هنا ....
عفراء بطفولية : معروضة نتغدا معاكم اخويا جعفر ...
جعفر تبسم وقدامها كتجيه الحشمة من عند الله ما كيعرف اش يقول ..هبط راسو ودار خارج هارب من قدامها وعينو متهزوش من الارض و مو كتعيط عليه يرجع...
لكبيرة: اجي اولدي تاكل راك من صباح ونتا فالمدرسة ....
جعفر بإحراج: غير تغداي امي نتي و عفراء انا مزال خاصني نصلي صلاتي...
لكبيرة ضحكات بحنية من احراج ولدها خلاتو فخاطرو وحطات ليها غير هي وعفراء الماكلة و تجمعو بجوج على طبسيل و لكبيرة كل مرة تهز عنيها فعفراء و ضحك من نيتها كتسنى ليام لي تكبر فيهم هاد عفراء و ينضج زينها و يطوال سالفها و يشتد عودها و يبرزو ملامحها ..
وتسائل نفسها كيف ولاد دوار يصبرو على زين لبنت لي يقولو عليها اليوم منحوسة و تشوف عفراء زينت لبنات تزف لولدها خير رجال خلقاً و نبلاً...
لكبيرة بصوت ضعيف : عفراء مخاصكش تعيطي لجعفر خويا ...
عفراء بدون فهم: علاش اخالتي ....
لكبيرة حطات يديها بحب قرصات ليها خدها :تكبري و تعرفي علاش باركة تعيطي عليه غير جعفر صافي ...
بعيد منهم واقف جعفر قدام لباب ومزال الاحراج مخيم عليه و بنص عين كيطل على عفراء لي ملهية فالماكلة ..هاز كتابو داير راسو كيقرا حيت مابقى ليه والو ويدوز لموحد ديال سادس ولكن عقلو وعينو بدون وعي كتمشي لجهة عفراء كيف ديما من نهار تزادت وهو كيراقبها غير من لبعيد تا ولات عادة عندو ما يقدر يستغنى عليها....
اللي أصلو تفاح عمرو ما يتلاح واللي اصلو دفلة عمرو ما يحلى....
ولوكان يديروه شهد للنحلة...
الزين ما يتخبى و العفن ديما باين و ذيب مايتربى معروف ديما خاين.... اللي يقولك نحبك ما تقولوش قداش قولو لوقتاش ..و الراجل راجل و لوكان يلبسوه شكارة و الرخيص رخيص ولوكان يركبوه فطيارة...
عمرو 12 سنة ومزال الخجل و الاحراج نابت فشخصيتو من صغرو ..ما قدر يتبدل ولا يخبي خجلو..سبحان الله كلشي باين فوجهو بحال صفحة لبيضة نقية و طاهرة وعلى تربية دين كابر و بالحشمة و رجلة تسقى....
بقى فلباب كيتسنى عفراء تخرج ما قادر يدخل وهي مزال مع مو..لكن عقل صغر ما يفهم ولا يعرف وما قدرات تفهم راسها وهي طفلة ..بقات حدا لكبيرة تعاود هي وياها و ضحك فرحانة بكلام الموزون لي كتخرجو لالة لكبيرة من لسانها لي معروف بحلاوتو عند کاع عيالات دوار ...
صبر مسكين تاعيا وهو يحدر راسو و دخل شاف فمو بجنب عنيه و نطق بإحراج واضح...
جعفر: مي حطي لي شي حاجة ناكلها جاني جوع ...
وقفات لكبيرة كضحك على ولدها : من قبيلة وانا كنتسناك دخل ونتا واقف لهيه ياك لباس ...
جعفر جلس فوق زربية مربع يدو وبصوتو الهادئ نطق : كنت غير كنراجع شوي...
دورات عفراء راسها عندو وعنيها جاو مع عنيه فور ماتلقاو عنيهم هبط راسو لارض مقادرش يهزهم و هي زادت قربات حداه جلسات قدامو مربعة وحدرات راسها بغات تشوف وجهو وهو تزنگ و وجهو ولاحمر ...و ببرأية نطقات ...
عفراء:جعفر كتمشي لمدرسة لي كيمشيو ليها کاع ولاد دوار...
من سمع سميتو خارجة من فمها حرفية بلا خويا هز راسو مبتاسم و بحنية فعنيه نطق ...
- امم ونتي وقتاش ادخلي لمدرسة ...
ربعات يديها لصدرها مخسرة سيفتها...
- لالا انا انبقى غير كندور ماعندي ماندير بشي قراية فيها غير قوة صداع وانا مكنتحاملش مع ولاد دوار نتا بوحدك لي كنهضر معاك و مكندابزش معاك ....
عيونو رجعو كيبريو و ابتسامتو توسعات وحرك راسو بشوي : اه ما تهضري تا مع واحد هضري معايا غير انا وصافي..انا بوحدي كاف ليك...
عفراء بدون فهم لكلماتو قالت....
-ولا وليتي تا نتا كتعيط عليا منحوسة وضربني بحال ولاد دوار ...
بسرعة حرك راسو بجهد مخلوع : لاا عمري نقولها ليك وغادي نبقى ديما نعيط ليك بسميتك صافي وعمري نضربك ولا نخليك تبكي ...
عفراء بشك:بصح !!..وخا يوقع لي وقع....
مااعرفش منين جاتو شجاعة اوربما كلماتها قاصوه لداخل..حط يدو فوق يديها صغيرة و ورك عليها مزيان و نطق بعزم وعيونو كيلمعو ببريق خاص ونادر...
- يوقع لي يوقع اتبقاي عندي عفراء و انبقى عندك جعفر وغير جعفر...
عفراء ميلات راسها: جعفر..!!!
بعد يدو و ودنيه حمارو ايطرطقو ونطق بإبتسامة مزينة ملامحو المراهقة
- غير جعفر بلا خويا ....
بقات لكبيرة كتشوف فيهم بنص عين حابسة ضحكة و كتمهل فحطان لماكلة باش يلقى ولدها راحتو فالهضرة عارفاه حشومي ومع عفراء زادت الحشمة ضوبلات اما عفراء ماكتحمش من حد ولي بغاتو تقولو مامسوقة لحد..من شافتهم سلاو لكلام حطات الاكل لولدها وجاسات حداهم كتشوف كيف كيمد لخبز لعفراء وحط طبسل قدامهاما مخليها تعدب تمد يديها و رغم انهاعاد كلات ماحشمات من ضيافة جعفر و دخلات معاه فطبسيل طول وعرض بحال لهيشة ...
دازو لأيام وعفراء كيف عادتها فين ما تخرج تجيب معاها تبرية سخونة وتاكلها غجنابها من لالة لطوف و تبردها و تنوض دير كفس منها ..
جا راسها قاصح و زاد قصاح مع ناس لي سماو عليها منحوسة ...وصل وقت لعرس ديال بنت زهور جارت لالة لطوف ..كلشي فرحان و ناشط ومع اهل دوار ساكنين حدا بعض كيعاملو نفسهم عائلة وحدة وكل واحد ضروري ما يعاون فحاجة باش يزيان لعرس و يكتار لخير ...
اما لكان لعريس براني ماهو من قبيلتهم كيديرو عرس مطرطق ما دايرش باش يعلمو لبراني راه قبيلة كاملة تابعة لبنت لي ديتيها عروسة ...
منها كيهزو براس عروستهم و بنت قبيلتها ومنها يحضرو لعريس لا خرج رجلو من شي جيه يقطعوها ليه و يرجعوه زحاف...
ناس واعرين وقلوبهم حجرة ولكن معقول ولا عطاو لكلمة ما يتراجعو عليها.... و كيف رجال كيف نسا..دراعهم ناضي وفمهم ماضي ...
كطل من جنب لباب على عيالات خوتها و ختها عويشة لي كيلبسو و يزوقو فوجهم وهي فجنب لباب نطقات...
عفراء: شداكشي كديرو لوجهكم...
كلتوم : هادشي ديال لكبار ا عفراء نتي صغيرة عليه..
عوجات فمها وهي كتشوف بنت خوها قدها فلعمر وجالسة مها كتقاد ليها : ما حدي صغيرة علاش كتزوقو لديك طعريجة لي معاكم ...
هزات بشرة خمسة صبعة : خمسة و خميس وقوسي عليها تاني طيح فشي قنت كيف ديري ليها ديما ...
عفراء قلبات عنيها كتعيبها: وبنتك لي جات بحال الهيشة غير فين ما جاب الله تحط رجلها بحال البقرة و نتوما تسميوها فيا شلا علاش انقوس لكان زين راني فايتها ولكان العقل راه متوصل ليا ...
كلهم شافو فيها بصدمة تا من ختها خرجات عنيها فيها...
عويشة: عفراء منين جبتي هاد لكلام و شكون علمو ليك...
بشرى معصبة هزات صندالتها كتحلف عليها : قولي شنو لي متعلماتش اما هي غار لحنش وعارفة اش فيه ولكن غير بلات على هاد لسان سليط لي عندك تا يجي خوك علال و نحرشو وديك ساعة تبقاي تزاوگي فيا ....
عفراء هزات كتافها :اوا صافي لا وصلتي لودنيك غير عضيها....
دخلات كتعوج بكسوتها البيضاء بحال لعرسة و تقيشرات بسباط مع صاك ودايرة طربوش و شعرها زعر مخلياه متحرر فضهرها عاجبها راسها ومكاين ما حسن منها لا فزين ولا فلبس ..وقفات على ختها و هضرات غير بشوي ميلة شفاها بطفولية...
- ختي ديري ليا تا انا شوي بحالك ...
عويشة : اش بغيتي هادشي راه غير ديال ناس لكبار...
ضربات رجليها مع الارض كتغبن : وغير ديريه ليا عافك حمري ليا حناكي بحالك و ديري لي هادشي لي درتي في فمك..
عويشة دورات راسها : احياني عليك ابنت ما جيتي شيخة كطيري ...وهاني انديرو ليك لكن منعقلش عليك من تحصلك مي والله لا فكيتك ....
عفراء: انتخبى و الله ما تشوفني تا نوصلو لعرس ....
دارت ليها كاع لي بغات وخا ملامحها زوينين و حناكها حومر بلاش و فمها غوز كيحمق ولكن لصقات عليهم دير تا هي مادرو هما ..طلات فالمراية كتعوج ففمها لي ولا حمر بالعكر عاجبها الحال و كدور بالكسوة بحال شي فراشة ...
صوت تطبال واصل فين بغى و لعروس جالسة فقنت حدا حبابها و لعريس جالس فقنت بعيد من عروستو كيشوف فيها غير من لبعيد باين فرحان وعارف اش كيتسناه ليوم ..غير يدور ويضحك حتى كتبان ليه درسة لعقل و دايرين بيه رجال من حبابو كلهم ولاد لبلاد من غير واحد لي لابس كلاس من قاميجة بيضة و سروال توب اسود مرجع شعرو لور و مخفف لحية زينو حرش وبلدي باين ولد لمدينة ..داير رجل فوق رجل كيبقشش فتليفونو و البنات جالسين قدامو حدا والديهم كيتهامسو و يشيرو بصبعهم ليه ....
جالسة لالة لطوف هي ولكبيرة و عريساتها وعويشة جالسة فجنب مها حادرة راسها و بإبتسامة جميلة مزينة ملامحها وخا لعروسة صغر منها بعام ولكن ما حسدات ما والو قلبها بيض كيف لحليب ردات بمكتوب الله و جلسات حدا مها مانضت ولا تكلمات ...
وخا كاع لي فعمرها تزوجو وكاين لي ولدات وكاين لي حاملة وكاين لي مزال عروسة جديدة ولكن هي ما كتابليها زواج كاع ولاد لقبيلة ما قدرو يطلبو يديها وهما عارفين نحس لي صاب لقبيلة بساب ختها ..اما ناس لي خارج لقبيلة وشافوها و عجباتهم كيسولو كيف ناس لكن لسان سليط ما كيتكتف ويعاودو ليه على ختها عفراء ليخرجاتها من لقبيلة من نهار زيادتها ....
زاد تطبال وناس غير فبلاصتهم يشطحو بكتافها و يصفقو بيديهم ومعروف على شلوح ما يشطحو قدام رجال ولا يتزينو قدام راجل لي ماشي راجلهم ...
اما لالة عفراء ليها رأي أخر و كلام اخر ...خطفات زيف من عند عويشة و تحزمات بيه ومها تغمز و تجر وهي ممفكاش رمات ليه صاك ديال لميكة ليهازة شراه ليها باها من سوق و توجهات عند طبالة بوجها مقزدر ماعندها علاش تحشم ولا تمرڭ....
شافها باها وخوتها نايضة محزمة وهما يتصدمو كلهم ما عرفو ينوضو ولا يبقا جالسين ...قربات لعند طبالة وفهماتهم تطبيلة لي بغات ولي تمشي مع شطيحها و كانتها وهما ما عليهم غير ينفدو ...وقفات وسط لقيطون محزمة وهاة يديها لجناب..كيف بدا تطبال مشات معاه دقة بدقة ما خلات لناس ما يقولو تا من مها حلات فمها فيها وهي معلية يديها لي مزينين بسوار لفضة تبسم و تشطح فرحانة براسهاوما همها حد فدنيا ..
ترقص من جيه لجيه و تهز كتافها متناغمة مع الموسيقة لي ولات منها ..وخا صغيرة خلات كلشي مبهوض وتا لي كانو خايفين من نحسها وغير هاربيه منها ..قربو بفمهم محلول كيشوفو لالة عفراء و شعرها الازعر كيف كيتطاير مه لهوا و زيف لي على خسرها كيف يتمايل فكل لقنات ...
دورات راسها وهي تجي نيشن فجعر لي عينو مخرجهم فيها و وجهو صفر ..نقطة دم ما فيه ..قربات ليه بغات تجرو يشطح معاها وهو يخطف يدو وهرب من قدامها وغير ودنيه لي كيبانو حومر ايطرطقو وهي بقات غير كترمش ونيت سخفات ما قدات تكمل هزات لفليسات لي علقو ليها لعيالات خباتهم ورجعات جلسات حدا عويش لي كضحك وتدور فراسها...
عويش : راني قلت ليك شيخة غير ما تيقتنيش ...
عفراء : علاه لي يشطح كيتسمى شيخة ...
عويش : وفين عمرك شفتيني انا ولا مي كنشطحو قدام شي حد ...
عفراء من نيتها : اوا نتوما ما كتعرفوش بغيوتو تحبسوها عليا تا انا ...
عويش هزات راسها كضحك ما عرفات اش تقول ولا ترد ...صوت ضحكتها رنان و ملامحها جميلة و متميزة و لقفطان لف تفاصيل جسدها وبين انوثتها الطاغية ..كتهضر مع ختها غير مدركة لعنين لي حاضينها من جلسات حداها عفراء ...
صغر عينو كيفكر غير مع راسو وما حيدش عينو منها ...باين عجباتو وزينها ما مولفش يشوفو تا فالمدينة لي ساكن فيها الحق يتقال ما عمرو شاف شي وحدة زوينة بحال هادي لي قدام عنيه....
حطو لغدا لناس وعلى بسم الله بداو وزهور غير كدور فراسها بحال دجاجة لي بغات تبيض ... وحاضية غير المنحوسة ديال عفراء خايفاها تنوض دير شي كارتة و يتخسر ليها عرس بنتها ..وحيت هي ولالة لطوف جورة قديمة ما قدرات تقول ليها ما تجيبوش عفراء لعرس....
اما عفراء ما مصوقة لحد وتا من يديها ما حطاتهمش فطبسيل وخلات لكبيرة هي لي توكلها حيت ما بغاتش توسخ يديها وبغات تبقى زوينة نهار كامل تا لعكر لي فمها مزال و حلفات لا مسحاتو وخا لطوف عيات ما تقرص فيها...دورات راسها وجات عنيها مع شاب لي كيشوف فختها بنص عين ...
وحيت كطيرها فسما بقات حضياه طول لعرس ..وهو مدا ما جاب وبقات عينو غير على عويشة ...خرجو رجال برا كيباركو لعريس ويعطيو لأب لعروسة لي قسم الله و تجامعو كيتسناو لعيالات يخرجو لعروسة راجلها ...خرجات عفراء كتمهل فمشيتها ...
شافت جعفر واقف مع اب لعروس دخل يدو فجيبو وجبد مبلغ مالي بسيط قدمو ليه ورجع لور خلا رجال غير كيشوفو وهو واقف معاهم كيف راجل بعقلو وهضرتو قليلة ومكيدخلش فلي ما يعنيه...ما حس الا وعفراء لسقات فيه و بعداتو من رجال وهو طرب ليه لسان بيديها لي تحطات على يديه ...سرط ريقو بصعوبة وبتمتمة نطق ...
-عفراء مالكي ....
شافت فيه بنص عين : والو غير بقى واقف معايا متخلينيش بوحدي ...
وقف حداها كيف طلبات ما تزحزحش وحميها من جميع جوايه وحيت قالت ليه وقف معايا خاف يكون شي حد من ولاد دوار دابز هو وياها ...
اما هي بقات عنيها على شاب وهو متكي على طونوبيل ومرة مرة كيهز عينو من تليفون ويقابلهم مع باب لخيمة كيتسنى عويشة تخرج باغي غير يهضر معاها ولا ياخد نمرتها و يتعرف عليها ناسي ان بنات لقبايل ما هما بنات لمدينة وتليفون والهضرة مع راجل عندهم عيب ولبنت طيح بوجه والديها لا وقفات مع شاب ما يقربها بقرابة دم ....
بان ليها باها واقف حدا شاب وخوتها حداه عاطين بضهرهم لدري وهي كيف شويطينة تحركات عند باها وجعفر تابعها من لور ...وقفات قدامهم وقبل ما ينطق باها سبقات هي لكلام وعنيها فدري ...
عفراء: شنو داكشي فيديك ...
شاب هبط عينو ليها وتبسم من عرفها خت عويشة ودار فبالو هادي هي لهمزة يرسل ختها تكلم ليه عويشة يهضر معاها ..تنى ركابيها مقابل معاها وقال بصوت غليض ...
-هدا تليفون ونتي ازوينة اش سماك الله ....
حعفر بغا يجرها لعندو وهي تخطف يديها وقالت
-وهاد تليفون كيصور ....
شاب : اه كيصور علاش...
دورات راسها لخوتها وباها لي طالقين ودنيهم وبحال شي ديب قالت
-وعلاش من دخلات ختي ونتا كتصور فيها وغير حاضيها وما هبطيش عنيك منها .....
كيف كملات كلامها كاع رجال لي كانو حداها و سمعو لكلام دورو راسهم ليه وعنيهم خارجين ..اما خوتها ولاو حمرين كتر من باهم ودري مسكين بقى غير كيرمش تبهض و تسرط ليه صوت باش ينطق ....
دري تصدم من شاف كاع رجال قبيلة دارو بيه ..بقى غير كيدور فراسو مخلوع و سي لعربي لي حداه نطق بهدوء...
-سماك الله اولدي...
سرط ريقو بصعوبة و نطق بتردد : خ خخ خالد...
العربي: بنتي لي اولدي ماشي من دوار منين نتا....
خالد بتوتر: انا من رباط....
العربي بإبتسامة: اهلا بناس العاصمة ولكن اولدي واش عارف اش درتي....
مد علال يدو مخنزر ومع ولد لعروبية صحيح و ملامحو حرشة كيخلعو : عطيني نشوف تليفون لي صورتي بيه ختي ...
خالد ورك على تليفون بين يدو و وجهو ولا حمر من شاف كلشي مخنزر فيه و معروف على ناس دوار يقتلو على بنت قبيلتهم لا تبسل عليها شي حد فكيف يصورها وهما دايرين فيه تيقة ...
خالد تلف و لكلام مابقاش باغي يخرج ليه و كيضغط على تليفون تمنى يتهرس ولايشوفو كمية تصاور و الفيديوهات ليخدا لعويشة وغير من نضراتهم عرف راسو محال يخرج بصحتو من دوار....
بقات غير عفراء لي كدور فعنيها و تفرنس وهي لبنت الوحيدة وسط قبيلة من رجال و بصوتها صغير و رقيقي نطقات ببرائة...
-ولكن ابا راه عجباتو عويشة و باغي يتزوج بيها...
خالد خرج عينو بجهد و صدمة بانت على ملامحو ..بينما نضرة الارتياجح بانت على اهل دوار ..نطق عبد لقادر ويدو كيضربو كتف خالد...
-مرحبا بيك اسي خالد ولكن هادشي مايتعاود وحمد لله من جيتي فينا حنى ناس مزيانين اما لو جيتي فواحد اخر من ناس دوار كان يقطع ليك راسك قبل ما يسولك ...
خالط حط يدو على عنقو ورعدة طلعات معاه وتبسم بتسامة صفرة شاف فناس دوار لي مزال مخنزرين ممرتاحينش ليه وهو ينطق بزربة مع تلعتم فصوتو ..
-اه بنتكم عجباتني و بغيتها لزواج ...
عفراء لي فرنسات من نطق الكلمة وهي دور عند باها..
-عرفتي ابا خدا تصاور لختي باش يوريهم لمو و يجيو يخطبو عويشة..."دارت عند خالد ببراءة "..ياك اعمو هادشي لي درتي...
خالد بغضب شاف فيها ما عرفها منين تسلطات عليه..زير على سنانو وحرك راسو بطاعة عرفها دارتها بيه المنحوسة ديال دوار ....
بان فيه تزيار غير من وجهو لي ولا حمر وسي لعربي كيسول باش يقرب لمعرفة بما انه باغي بنتو ..لكن خالد ممرتاحش حاس بحالي جالس على شوك وباغي غير وقتاش يمشي بحالاتو ..
طفا تيليفون و دخلو فجيبو ورغم انه كاره فهاد اللحضة الا انه كيرد على سي لعربي بكل احترام وكل مرة تمشي عينو لعفراءلي كضحك فبلاصتها عرفها شيطانة تقتل و تمشي فجنازتو ...
تقدم واحد من دراري من قراب لعريس وهو لي جاب معاه خالد يفوج شوي فلبلاد ساعة نسى موصاهش ان ناس لقبيلة ماشي بحال ناس لمدينة ..حاول يخفف الجو و نطق بأداب...
-سي لعربي يكما درونجيناك هدا خالد صاحبي وهو لمدير ديالنا فشركة وخا هكاك كيعاملنا بحال واحد من لعائلة...
سي لعربي بانت لفرحة فعنيه حك شواربو بفخر : هي اولدي نتا مدير ...
خالد بإبتسامة صفرة : حمدلله هادشي لي قدرت عليه ...
علال بصوت حرش ماشي حيت معصب ولكن هذا هو صوتو ما تعرفو مقلقل ولا كيضحك..
- مهم اولد ناس مرحبا بيك حنا ما كنشرطوش على خدايم ولاد ناس ..يكفي تكون ولد لحلال و راجل لي تهز بختنا و تعيشها كيف عايشة فدار باها ومن عندنا حنى غير الله يسهل يارب ....
عبد القادر لي حداه كمل كلام خوه...
- حنا مغاديش نحاسبوك على تصاور لي خديتي لختنا بما انك بغيتي توريها لمك وخا مكرهناش كون جيتي هضرتي معانا نيشن و تجي الحاجة تشوف بنتنا و ديك ساعة عاد تكون الهضرة ....
خالد ولا حمر ممولفش شي حد يهضر معاه بهاد شكل ..بان على ملامحو ديق و ندم نهار لي قبل فيه يجي لهاد لقبيلة ..هبط راسو مزير على سنانو وخا زين لكن كاع ولاد لقبيلة زينين و حرشين غير خالد مهلي فراسو و باين بخيرو و خميرو ..
بقى ساكت ما نطق بوالو وواقف فبلاصتو كيسمع لسي لعربي اش كيقول بلا ميقاطعو ....شافو نسا مخرجين لعروسة وهو يهز عينو و مشات نيشن لعند عويشة لي هازة لقفطان من لقدام و كيبانو رجليها لبويض وسط لبلغة و بتسامة خفيفة مزينة ملامحها و كضرب بيديها فرحان ببنت جيرانهم لي زفات لعريسهم ...
مشات عفراء كتجري جرات عويشة قرباتها تال حدا خالد و حبسات وهي كتشوف فخالد و تفرنس وهو غير هاز حجبانو فهاد شيطانة كتبان صغيرة لكن ماعرف منين جابت هاد تشيطين و لعقل لي عندها كطيرها فسما ....
وقفات عويشة عاطية ضهرها لخالد لي واقف بخطوات قليلة بعيد منها وهي مدات ما جابت اما رجال تفرتكو يوصلو لعروسة لطونوبيل و يصبرو خوتها وعمامها و والديها ....
حسات بالبرد كيضرب فزيفها و كيهزو ويبين شعرها الاسواد ..حاولات تجرو بيد و تقادو لكن كان من شعرها يتحل و ينزل كامل على ضهرها واصل لتحت مؤخرتها و رطب كيف لحرير.كيشع مع شمس...
دورات عنيها بخجل حشمات يكون شافها شي راجل وخصوصا بنات.لقبيبة ماكيبينوش شعرهم ...
دورات وجها لعند خالد بدون ان تدري انه قدامها لأن عنيها كانو نازلين لأرض ..جيدات زيف بخجل و وهزات شعرها وبان عنقها طويل و رقيق مع عقيق لجوهر لي مزين عنقها ...
خلاتو يسرط ريقو بصعوبة وعينو مقدراتش تنزل منها...قدات زيف و عدلاتو عاد هزات راسها و جات عنيها.مباشرة فعنين خالد باغين ياكلوها ..دهشات و دهشرات و وجها تصبغ بالحمر دغيا دارت و مضات بزربة دخلات لخيمة حدا مها لي كتصبر فأم لعروسة و مزال سخونية طالعة مع داتها بخجل ....
فعينو لي تبعات عويشة سمع صوت حداه ....
عفراء : نزل عينيك ايشوفك با وخوتي عوتاني يربطوك حدا لعجل ...
هبط خالد راسو لجسد صغير لي واصل حد فخدو ودار فيه گاع هاد لحالة ..خنزر فيها وهي زادت كضحك..مد يدو بغا غير ينبهها وهو يوقف بيناتهم جعفر لي كيشوف فخالد ما بين شفارو ..قرب عفرء ورا ضهرو و بقات عينو على خالد لي تدهش و نطق بزربة ...
-متفهمنيش غلاط مكنتش غادي نضربها ....
جعفر بصوت طفل مراهق قال..
-عارف ولكن ما مسمحوش ليك تقيصها ولو بضحك ....
خالد خرج عينو بدهشة بينما جعفر جر عفرء من يديها و جلسها حدا مو لكبيرة وخرج هو وقف حدا رجال و عينو بقات حاضية عفراء ....
ركب خالد فطونوبيلتو من شاف صاحبو شارليه غادي يخرجو بحالاتهم ...دور طونوبيل مع طريق ...شافو سي العربي وتم غادي عندو بإبتسامة باش يعلمو وقتاش يجي هو والديه لكن قبل ما يوصل سي لعربي ديمارة خالد طونوبيل طاير خلا غير لغبرة وراه ..
ختفات الابتسامة من ملامح سي لعربي و رجع يدو وراه و حرك راسو يمين و شمال وشد طريق لدارو بلا ما ينطق ولا يتكلم ...
خالد طل من المرأة لي مزال كيبان فيه خيال سي لعربي ...زير على يدو بجهد و شد طريق نيشن لمدينة ...
وصل ليل و كل واحد دخل لفراشو و باين فيهم لعيا ديال لعرس....لالة لطوف نعاس ما طاف بيها بقات جالسة فبلاصتها و راجلها حداها تا هو بحالها نعاس طار ليه من عينيه ...
تنهدات لالة لطوف و شافت فراجلها وقالت بصوت حزين ...
- شفتي اراجل اش وقع مع لعصر...
سي لعربي بصوت غليض و ساهي : ما شفتش ولكن سمعت..."تنهد بجهد بحالي هاز جبل فوق كتفو "...بان لي هاد لقبيلة ما بقات فيها عيشة الطوف ....
لطوف: وفين اسي لعربي غادي نرحلو وهنا تولدنا و كبرنا وكاع خيرنا لي خلاوه لينا جدودنا موجود فهاد لأرض ....
لعربي بأسي: ما كرهتش نبعع كلشي و نمشي شي بلاصة ما يعرفني فيها حد ..لبنت لكبيرة مزال بلا زواج وگاع لي فسنها و صغر منها تزوجو و عفراء نهار ومطال وهي منوضة صداع مع لقبيلة و قبيلة شعلات لعافية فلكشينة بعد ما تسالا لعوس. قالو المنوحسة مولاتها ..فيين بقات شي عيشة الالة لطوف فهاد لمكان....
لطوف بحزن : مع المدة ناس ينساوو عفراء بصح كانت فلكشينة لكن معرفناش لعافية كيف دلعات لكن حمدلله قبل ما تكبر طفاوها ولاد لقبيلة وانا من ليوم ما انبقى نخليها تخرج ولا درج انحبسها هنا تاينساو ناس كلمة المنحوسة لي لقبوها ليها ومن تكبر راه اتزوج بجعفر كيف قالت لكبيرة ....
لعربي ضحك بجنب وخا ماعندو خاطر : الله يهديك الطوف اتيقي داك لكلام لي داز فنهارو ..شوفي غير عويشة مسكينة بسباب ختها ما كاين لي جا خطبها مني اما عفراء موحالاش لي يدوي فيها ولو غير بضحك ...
لطوف بحسرة: ربي كبير العربي وعويشة مزال رزقها ايجي تال بين يديها ...
لعربي : امتا الطوف امتا و انا و ياك كبرنا و ولادنا تزوجو و ولدو اما عويشة ليوم واحد دوا ليا على زواج ...
لطوف بفرح قطعاتو : وشنو قلتي ليه ...
لعربي : شغادي نقول ليه سيد ركب فطونوبيلتو و زاد بحالاتو معاود سول ولا قال امتا يرجع باين شي واحد من لقبيلة عاود ليه لي كاين ....
تحل صمت بيناتهم بعد كلام سي لعرب ما عرفات لطوف باش تجاوب وهي كتشوف بنتها لي مجموع فيها كل ما يحب راجل ويطمع ولكن زهرها كثر.من نحس ختها...حطات راسها على يديها غير كتفكر...
قدام باب بيتهم واقفة انتى ببجامتها و شعرها نازل على خسرها هازة كاس لما وقبل ما دق سمعات گاع كلام والديها...تزيرات و دموع تشكلو على عنيها ..حطات لكاس.فوق طبلة و توجهات لبيت فين كتنعس هي و عفراء ..و دمعة على طرف عنيها كيبريو مع لقمر لي كيضوي فلبيت ...
حلات عفراء عنيها من نعاس وشافت فختها و نطقات بصوت مبحوح ....
-عويشة ختي واش كتبكي...
عويشة تخشات حداها كتمسح فدموعها : لا ماشي دموع غير غسلت وجهي ....
عفرء: ختي بصح انا منحوسة كيف كيقولو ناس دوار وبسبابي متزوجتيش ...
شافت فيها عويشة بحزن ..قربات عندها ودورات يديها عليها معنقاها و سط حضنها...
- شششش شهاد الهضرة كتقولي هادوك لي كيقولو عليك منحوسة غير حيت كيغيرو من زينك اما انا مزال ما بغيت نتزوج مزال بغيت نبقا حداك تا تزوجتي نتي عاد نتبعك انا ....
عفراء : وعلاش قبيلة سماو فيا انا لي شعلت لعافية وخا مادرت والو دخلت غير شربت و خرجت و ولد خالتي زهرة لي كان كيلعب بعود فيه لعافية ومن قلتها ليهم ما تيقني تا واحد و سماوها فيا غير انا ....
عويشة زيرات على ختها كتر: مديهاش فكلامهم وحاولي تنعسي دابا غدا خاصني نفيق بكري ....
نعسات عفراء بعد ماريحها كلام ختها بينما عويشة بقات فايقة وكلام والديها كيعاود يدورو فراسها ...
بعيد منهم وفي بيت متواضح جالسة لكبيرة فوق لكرسي و جعفر جالس قدامها على ركابيه حاط لما سخون فبانيو قدامو وحاط فيهم رجلين مو كيكمدهم ليها بكل لطف و حنان و لكبيرة براحة و ابتسامة محببة كتشوف فيه وقالت...
-باركة عليك اولدي يديك طابو غير خليني اندلكهم راسي ...
جعفر حرك راسو برفض : غير خليني امي انا ندلكهم بلا متعدبي راسك شفتك فلعرس كامل ونتي واقفة كتصخري وما قدرتش ندخل نعاونك حيت كانو غير لعيالات ....
لكبيرة: الله يرضي عليك اولدي هاد تمارة.ولفتها ديها نتا غير فقرايتك باش تمشي لمدينة دخل لكوليج راني هضرت مع جداك تجلس معاها فالمدينة ....
جعفر هز راسو مبهوض : ونتي امي ....
لكبيرة : انا اولدي خاص نرد لبال لزريبة و زيد ارض باك لي خلا لينا وخدامة مع عيالات دوار فجنان باش نرسل ليك لفلوس.و تكمل قرايتك تخرج ليا نشالله شي استاد كيف كنتمنى....
جعفر تزير و عينو كيدمعو ..قلبو نقي و مشاعرو دغيا كيضهرو : يالله معايا امي منقدرش نخليك بوحدك هنا وانا انقرا و نخدم فالمدينة و نعاونك وما تحتاجي والو ....
لكبيرة داعبات خدو بحب وحولات تبدل الجو: اوا لامشيت معاك شكون ايحضي ليك عفراء ولاكبرات وجا شي واحد تزوجها وداها ليك ونتا ماكاينش ....
جعفر بسرعة البرق تبدلو ملامحو و ولاو صفرين مخلوع و بتلعتم نطق : ولكن هي ديالي....
يتبع...
التعليقات
لا توجد تعليقات بعد، كن أول من يعلق.