قدر المنحوسة الجزء الخامس

تجمد جسدو اتر كلماتها و انفاسها الساخنة.. حاول يبعد وهي عاد زادت لسقات فيه...هز عينو كيشوف دراري لي وقفو عليهم كلهم عليهم اتر ديال الاجرام و التشرد ..

نطق واحد متوسط المجموعة هاز فيديه موس....

-خلي لبنت و سير بحالك عتق روحك...

جرها بدون ما يشوف فوجها رجعها وراه حاميها بيديها و هي مدورة يدو على خسرو كتقفقف مخلوعة...

جعفر: سيرو بحالكم...

قرب ليه دري كيضحج و عينو فعفراء لي مخشية فضهر جعفر مغمضة عنيها مكتشوف تا حد.. مد يدو يجرها وهو يشدو جعفر دفعو بجهد...

-قلت ليكم سيرو بحالكم…البنت مغاديش دوزو ليها...

- بطاال مع راسك..

هز موس و جهو مباشرة لوجهو ... ميل جعفر راسو شد ليد لي فيها لموس ضربها حتى ترمى الموس من اليد و بزربة عطاه بركلة لكرش زواه مخلاهش فين يزيد يتنفس عاود ليه ركلة لوجه ..

شافو صاحبهم طايح و هما يهجمو دقة وحدة و هو كيدافع على راسو.. يد حامي بها عفراء لي بقات غير كتغوت لاصقة فيه.. و يد كيرد بيها على راسو.. فين ما يشوف شي واحد غادي يقرب ليها كيجرو يقتلو بالعصا ..

تهز كامل كينهج ودم نازل ليه من نيفو وجرح فوق حاجبو كيسيل بدم على عنيه... تخطف ليه لون من شاف الموس متوجه لوجه البنت.. شد يديها جرها عندو بجهد خشاها وسط صدرو حاميه ومدور يدو مزير عليها وعطا ضهرو تجاه الموس ..

تأوه بصوت مكتوم مغمض عينو و ملامحو واضح عليهم الم من حس بي اختراق الموس فضهرو..

فور ما شافو دراري دم و صراخ ديال العساس لي كان تم هربو خلاو جعفر فدمو و عفراء شداه بين يديها كترجف و عنيها خارجين فيديها لي عمرو دم وجها ناشف مافيه قطرة دم ...

هبطو دموع مسرسبين على خدها و الخوف و الخلعة سلات معاها.. كتحركو بجهد..

-ماتموتش.. ماتمووتش عاافك...

زير على سنانو بجهد باغي ينوض و مقادرش يتحرك و دموع ديالها كينزلو على وجهو و انينها صمك ليه ودنيه.. بزز باش نطق..

-ت تيل تليفون ..

قربات ليه حطاا و دنها على فمو حتى سمعات لكلمة مزيان...

بدات كتقلب ليه فجيب ديالو لقات تليفون ومزال كلها كترعد..

-ها هو تليفون قولي شنو ندير بيه...

تلفة طيرات ليها العقل كتسناه هو شنو يقول ليها وحيت دم فوجهو معرفاتوش شكون ...

وقف عليهم العساس مخلوع.. خدا تليفون من بين يديها عيط على الاسعاف...

- نوضي ابنتي خلي نشوف واش دري كيتنفس...

كرمات فبلاصتها ودموع زادو...

-مااات...

-مزال ابنتي خلي غير نشوف متخافيش راجلك مغادي يوقع ليه والو...

لصقات فيه لصقة : لا متقصيووش.. فيين الاسعاف علااش مزال مجااااا...

اتر صراخها عمر المكان بالناس و هي بحال الحمقة شعرها مخربق طايح على وجها ومعنقاه حاطة ليه راسو فصدرها و حاطة يذيها فجرح لي خلاه سكين كتحاول تحبس الدم..

اما ناس لي يجيو يعاونو و يخفو عليها تاحد ما قرب لجيهتها كتفاو فقط يهزو تليفون كيصورو و ينشرو فمواقع التواصل مبقات رحمة فقلوبهم.. انسان ميت عايش بجيمات ديال المتابعين لي ايشوفو دوك صور ديال شخص مطعون و دمو نازل و بنت فحالة يرتى لها حضناه بكل قوتها ممخلياش لي يقرب ليه..

و كأنه كتحمي جسدو كما حماها هو امام دوك المجرمين لي لو مكانش هو علم الله اش اتكون نهايتها ...

وصلات سيارة الاسعاف عياو ما يحاولو يبعدوها عليه باش يهزوه فوق البياص و والو لا حياة لمن تنادي معرفو ما يديرو و هما يدخلوها معاه فالاسعاف و بداو كيداويو الجرح وهو فحضنها.. كل مرة تشوف فالممرض لي كينضف الجرح...

-ايعيش مغديش يموت....

الممرض: نتمناو ان الموس ميكونش وصل لقلبو...

تقطع ليها نفس و زادت زيرات عليه بدون ما تحس...

الممرض : غادي تخنقيه لزيرتي عليه كثر... تعاوني معانا نشالله راجلك مغادي يوقع ليه والو...

دخلوه المستشفى وهو نصف واعي حس بيدين كيتلمسو وجهو بلطف و صوت باكي كينطق بقهرة..

-عافك ما تموتش..

كلمة كتردد كثر من مرة و هو بين الوعي و الوهم لي خلاه يتخيل صوت عفراء الطفولي.. حل شفاه ديالو المجعدة ببطئ و ونطق بين انفاسو المتعبة..

-ع.. ف.. ر.. ا.. ء..

تشكلاو حروف اسمها و دخلات فأدنها ببطئ.. زادت فصوت بكاها و كتنطق بخوف...

-انا هنا عاافك بقا عااافك...

تحركات يدو بصعوبة وحطها فوق يديها لي محطوطين على خدو و بعد ذالك مباشرة فقد الوعي ديالو و لفو ظلام كأن داك صوت كان حلم فقط..

بينما هي فالحالة لي وصلات ليها مفكراتش كفاش عرف اسمها.. عقلها مرفوع فقط من سمعات اسمها جوبات بدون شعور..

لي شاف خوفها لكبير عليه كيضن انه زوجها لانه مستحيل شي حد يخاف لهاد درحة تجاه شخص و هما مكتربطهم تا علاقة... هي بنفسها معرفاش داك الخوف و الانتماء لي حسات بيه تحاهو وهو كيحميها و كيعرض نفسو لخطر باش يحميها..

رجعات ذاكرتها لوراء.. لسنوات قبل... ليوم كانت محصورة بين العافية و شخص واحد لي رما نفسو لعافية باش يعتقها.... رجع كلشي امام عنيها بحال شي مسلسل كتفرج فيه شقس لي خلا اعصابها على الحافة...

ضونا تليفون لي مزال فيديها هزاتو كتشوف اسم امين ضاهر..

جوبات بصوت مبحوح و ملامحها دابلين و حمرين بكثرة البكاء...

-الو..

امين لي سمع صوت انثى جمع الوقفة و حجبانو مكمشين..

-شكون معايا...

بصوت قريب لبكاء جوبات..

-مول تليفون فسبيطار...

امين بخوف: شمن سبيطار...

عطاتو لعنوان و قطعات عليه.. حطات تليفون على قلبها و تكات على الحيط سخفانة..

دخل امين كيسول تالف كيشف فكل جهة واي ممرض بان ليه كيوقف يسولو حتى و قف امامها شاف فيها مصدوم..

امين: عمت مينة؟؟؟....

هزات فيه عنيه بتعب فور ما شافتو جمعات الوقفة شدات ليه فدراعو بجهد.. كتهضر و تبكي فنفس الوقت ..

-امين.. ضربوه ضربوه كانو تابعيني وهو مخلاهمش يتكرفصو عليا والموس جات فيه...

كيشوف فحالتها ولكلام لي كيدخل و يخرج ممفهومش حاول يهدأها بشوي...

-ششش متخافيش تا حاجة ما واقعة.. "دور راسو كيقلب على شيحد يسولو على صاحبو حتى بان ليه تليفون فيديها.. بصدمة"..نتي لي جاوبتي...

حركات راسها بالايجاب.. رجع جلسها عيط على ممرضة تعالج جروح لي فيها وش حاجة تهدأ اعصابها بينما هي رفضات كلشي كتبعد يديها من الممرضة لي كتشد فيها بحهد..

-خلييني انبقى هنا تا يخرج..

امين: انا انبقى غير سيرس رتاحي شوي شوفي حالتك كيف دايرة...

رجعو دموعها كينزلو : لا بغيت نتسنا هنا...

شاف فيها تاعيا وهي مصممة تبقى فمكانها و عنيها على الباب لي دخل منو جسد شاب لي حماها بحياتو...

جلسات حداها الممرضة كتعالج جراحها وامين واقف حداها مافاهم اش واقع من غير ان صاحبو فخطر...

بعد مدة طويلة خرج طبيب .. وقفو بسرعة من شافوه وهو كيهدأ فيهم..

-الحمدلله ما واقع والو الجرح مغارقش بزاف وحاليا هو فراحة.. من هنا ساعتين ايفيق...

مخلاتوش يكمل كلامو فور ما قال الحمدلله توجهات لغرفة عندو.. وقفات حدا راسو و حيت كان مضروب فوجهو دايرين ليه عدة فاصمات شي لي خلا ملامحو متوضاحش ليها وتا تعب لي هي فيه محققاتش مزيان.. شدات ليه في يديه مزيرة كل مرة تمسح دموعها و يرجعو ينزلو بصمت و تعاود تمسحهم..

دخل امين شاف كيف شادة ليه في يديه و كتبكي دخل ليه شك ان بيناتهم شي حاجة...

نسات عائلتها كلشي بقات عنيها غير عليه ...اما هو بـ تعب ديال حادثة الاغتصاب و نعاس لي منعسوش وبدون اكل لمدة يومين و زيد ما وقع خلاتو بدون قوة ....

بعد تلات ساعات وهي واقفة بدون ما تحرك حل عينو ببطئ ورجع سدهم اتر ضوء ..حس بخيال امامو و صوت انثى كينطق بلهفة...

-فقتي..

حاول يفتح عينو مرة اخرى حتى تراءة ليه صورة كلها بين عنيه...ركز نضراتو عليها قبل ما يتحقق من ملامحها مد يدو جرها لعندو من شافها كتمايل فبلاصها...

طاحت فوق صدرو و تسمع تأوه ديالو بصوت مرتفع... هبط نضراتو ودور يدو عليها عرفها فقدات الوعي ولأن تعب و البنج مزال مخيم عليه مقدرش يجرها كثر وهي مايلة و الوزن ديالها تغلب عليه حتى تبعها طايح من فوق البياص.. ترطم جسدو مع الارض بقوة و لأن البنج مزال فداتو محسش بالالم...

هز عينو يشوف حالتها..حرك يدو ببطء هز شعر لي على جها ختى كيتصدم من عرفها ..

دخل امين لقاه فدديك الحالة.. مشا يهزو وهو يشير ليها..

جعفر: هزها هي الاولى...

امين :مالها..

جعفر:سخفات...

دخلات ممرضة عونات امين هزوها خرجوها لغرفة اخرى و ممرض اخرعاون جعفر يجلس...

تنفس بجهد.. حط راسو على المخدة ناعس على جنبو لأن ضربة كانت فضهرو... بدا كيحس بالحريق و طبيب حداه كيسولو باش كيحس و هو كيجاوب..

خرج طبيب و دخل امين كيشوف فصاحبو...

امين:كيفاش وقع ليك هاديشي...

غمض عينك و صوتو مبحوح : مكتاب و صافي...

امين صاط بجهد : كيف بقيتي دابا ...

جعفر: حمدلله.. "حل عينو وحجبانو معقودين لوسط"…كيف بقات ديك لبنت...

امين: غير لخلعة لي خلاتها تسخف ما وقع ليها والو.. اصلا هي لي عيطات عليا كانت مخلوعة بزااف و كتبكي شداها لموت هبطات ليا لما فركابي قلت صافي صاحبي مات....

جعفر : كتاب عمر جديد حمدلله...

امين بقا ساكت كيحك فراسو حتى مقدرش يجمع لسانو وخا عارف جعفر مكيعجبوش هادشي...

-كتعرف هاد لبنت...

جعفر : امم تلاقينا شي تلاتة لمرات....

امين : ما بيناتكم والو...

هز فيه عينو مخنزر : امين متعصبنيش هاد ساعة...

امين لي فيه ما هناه : اصاحبي كون تشوف حالتها كيف كانت والله ما تيق ان ما بيناتكم والو... عرفتي كلشي هنا كيضنوها مراتك وهي غير كتبكي من جلسات حداك ما بعدات بقات لاصقة فيك غير فقتي هي صخفات...

جعفر: لبنت ما بيني و بينها والو شفتها فديك الحالة و عونتها فسبيل لله ...

امين: عارف اصاحبي غير داكشي لي شافت عيني خلاني نشك...

جعفر هز مخدو ضربو بيها : خرج خليني نرتاح وسد عليا هاد الموضوع...

امين كيضحك: اسيدي من قدرتي ترمي عليا مخدة راك صحيح.. "تم خارج وهو يوقف "..واش عرفتي هاد لبنت هي عمت لبنت لي انا معاها...

جعفر هز حجبانو : ومن بعد...

امين: غير قلت و صافي ما عرفتي نديرو عرس واحد...

شافو ايرمي عليه لمخدة تانية و هو يهرب كيضحك.. سمعو من ورا لباب..

جعفر: عيط على والديها...

حلات عنيها و ملامحها دابلين كتسمع الهضرة بزاف حدا راسها.. نطقات بالم..

-ششش

لطوف قفزات شدات فيد بنتها : عفراء بنتي مالكي اكبيدتي شكون دار فيك هاد لحالة...

خالد : غير بضوي عليها الالة لطوف خلي طبيب يشوفها هو الاول...

بعدهم خاد من حداها و دخل طبيب كيفحصها...

-غير مصدومة شوي ولكن حمدلله يمكن ليكم تخرجوها...

نطقات بسرعة : فين الولد لي دخل معايا...

لطوف : شمن ولد ابنتي ..ليل كلو وحنا نقلبو عليك ما خلينا تا بلاصة شكوون دار فيك هاد الحالة ياك كنقول ليك لخروج فليل بلا خوتك مكاينش...

لعربي : باش كتحسي ابنتي دابا شوي.. "قرب حداها "..عاودي لي ابنتي شنو واقع...

عفراء سخفة شداها: بلاتي غير نشوف دري لي دخل معاي كيف دايرة حالتو و نشرح ليكم كلشي.. عاافك ابا غير صبر..

خوتها بقاو بعاد كل واحد كبر من لخر معروفين بجسمهم ضخم و ملامحهم الشرسة.. وخا مفششينها ولي بغاتها ديالها لكن فنفس الوقت مزيرين من جميع الجوايه وحاضينها مزيان لكن هاد ليلة لسي غبرات و الحالة لي هيا فيها دابا قهراتهم.. فور ما سمعوها كتسول على الولد نطقو كيف رعد بجوج فدقة وحدة...

-شكووون هاد لولد...

تجمدات فمكانها عاد شافت خوتها.. دم ختافا ليها من لوجه غير خالد لي كيلطف الجو...

-بشوي على البنت مزال ما رجعات تال راسها ..مكتشوفوش حالتها كيف دايرة...

عفراء دموع تشكلو فعنيها و رجعو كيهبطو من جديد : عمي خالد عافك سول على لولد لس دخل معايا كيف بقا عنداك يموت...

خالد: لا ابنتي تا حد ما مات ها هو لولد لي عيط علينا ايدخل دابا...

فور ما كمل كلامو دخل امين هاز بلاستيكات فيهم فطور.. عارفهم عائلة مينة وباغي يدير معاهم صواب و يزيان ليهم فالعين ونهار يخطب ما يرفضوه.. ستغل لفرصة ودخل بإبتسامة طيبة...

-على سلامت بنتكم...

خنزرو فيه دراري كيطلعو و يهبطو بالاخص علال لي شكلو كيخلع..

لعربي : الله يسلمك اولدي بغي...

قطعاتو عفراء وعنيها فأمين : كيف بقا...

امين: لاباس عليه ما واقع والو غير جرحة صغيرة فضهرو ما دارت ليه والو ...

علال : شمن جرحة...

امين: البارح كان شي حد باغي يتبسل على بنتكم وغير صاحبي لي عتقها ومن بغاو يضربوها بالموس تلقا ليه صاحبي وتضرب فضهرو...

لطوف: الله يا ربي الله شهاد المكتوب ولاد الحرام بغاو يرزيوني فبنتي....

لعربي جمع الوقفة: فين هو الولد اولدي نمشي نشوفو كون ما هو علم الله اش كان ايوقع...

امين: مكاين باس حمدلله من خرجات ساهلة.. وصاحبي عندو شي شغل خرج ضروري ما قدرش يتلاقى بيكم ...

حدرات راسها بحزن من سمعات انه خرج..حطات راسها على صدر مها و بقات كتبكي من تفكر ما دوزات لبارح و مها تعنق وتبوس و تبكي تا هي معاها...

نطق علال لي ملامحو ما كيبشروش بالخير : ديوها لدار و ردو ليها لبال انا و عبد القادر عندنا شي شغل...

خالد عرفهم علاش ناويين: تسنا انمشي معاكم..

علال: غير بقا وصلهم لدار...

جرو امين خرجوه معاهم وهو ما فاهم والو ...

علال: شمن بلاصة تعرضو ليها...

امين: حدا المحطة قريب لداركم...

عبد القادر مخنزر: ونتا فين كتعرف دارنا...

امين سرط ريقو بصعوبة و لصقها فعفراء..

-بنتكم لي قالت لي فين ساكنين باش نعيط عليكم...

علال بدا كيحك فلحيتو: قلتي فالمحطة.."مزير على فكو"..وخا انشوف هاد ولد ال*حبة لي طلعات ليه دنيا فكرو...

امين : علمنا البوليس هما ايتكلفو...

عبد القادر معصب:لي يقيس ختي نقتل ديلمو البوليس كون دارو خدمتهم كاع ما يوقع لختي داكشي...

امين كيحاول معاهم: راني محامي و عارف اش كنقول خليو القانون يدير خدمتو..

علال هز حجبانو: نتا محامي...

امين هز كتافو عارفو هو بات مينة: اييه محامي...

علال جرو: زيد معانا على الله هاد القانون يفيدك تخرجنا بعد ما نهرس زنطيط ديال هادو لي قاسو ليا ختي...

عبد القادر: مزال ما تولدش لي يقيس شعرة من ختي ..

امين حط يدو على المكان ديالو مقصح ومع راسو كيقول نهار يعرفني مع بنتو علم الله اش ايدير فيا...

علال: فين داك صاحبك لي عتق ختي..

امين : عندو واحد القضية مهمة و البنت لي كيدافع على قضيتها فاقت وكان عليهم يمشي يشوفها قبل كلشي..

علال هز حجبانو: تبارك الله هاد صاحبك كيدافع غير على البنات...

امين قطع الحس ما عرف ما يقول حمدلله ان جعفر مكاينش و مسمعش هاد الهضرة اما كانت اتنوض مصيبة...

بعد اسبوع...

متكية فصالون على كرشها و شعرها مطلوق مرمي فجنب و وجها المميز فيه بعض الخدوش لي بدات كتبرا.. قربات حداها لطوف بحنية كدور على شعرها..

-نوضي ابنتي كولي شوي شوفي شحال نقصتي...

عفراء : غير خليني امي مفياش جوع...

لطوف: مال بنتي مقلقلة نوضي دوري و ضحكي و ديري صداع كيف عوايدك و نتي سكتي هاد سكتة الحارة..

عفراء : ما عنديش الخاطر امي...

لطوف: وصافي ياك هادوك لي تهجمو عليك تشدو فالحبس و خوتك لي لقاوهم وقتلوهم عصا حمدلله كان معاهم داك ولد ناس هو لي مخلاهمش يزيدو اما كانو يموتو في يديهم.. نسيت كاع اش سميت داك لولد...

دخلات عليهم مينة كضحك: سميتو امين اجدة..

لطوف: اييه امين الله يرضي عليه ولد مأدب و مرضي و تبارك الله قاري ...

مينة هبطات راسها كضحك غير وحدها و عفراء كتشوف فيها ..

-اري داك تليفون...

مينة تزيرات: ديالي اعمتي ..

عفراء من تحت سنانها: اري داك تليفون...

جمعات الوقفة كضرب رجلها مع الارض عطاتها تليفون وتمات طالعة كدردك فدروج معصبة...

-ميخلي ما يدير و عمرك تبدلي يخخخ..

عفراء : جمعي راسك قبل ما نطلع ليك ما تفقصينيش تا نتي...

لطوف ما فاهمة والو : اوا ها بنتي لي بغيت... جهنم كحلة وسط دار ماشي باردة حمدلله دابا عاد رتاحيت من رجعتي ليا...

شافت فيها : مي بغيت نخرج عيت من جلاس فدار ..

لطوف: يجيو خوتك و يخرجوك انا تبراو مني ما نخليك تخرجي تا يكونو هما معاك...

جمعات لوقفة كتسوط: ديرو ليا نتوما الحبس كاع و تهناو...

طلعات لبيتها.. شادة فيديها تليفون مينة.. قلبات على نمرة امين و عيطات عليه.... فور ما تصبل الاتصال تنطق صوتو..

-الو الحب ديالي مراتي لغزالة ...

بعدات تليفون بإستغراب و ملامحها مخسرين..

-عفراء: زيد تا عمارت داري و ام ولادي...

تقطع الحس.. سمعات بحال شي حاجة طاحت وبعد مدة رجع صوت ديال امين مخلوع..

-لالة عمت مينة...

عفراء : راني قلت ليك بغيتي البنت اجي لدارهم باركة من تفلية و البنت مزال عندنا من ايمتا درتي بيها العقد باش تقول ليها مراتي...

امين بتوتر: غير هضرة كتجيب هضرة و صافي...

عفراء ساطت يجهد: بغيت نهضر مع صاحبك كاين حداك...

حيد تليفون من ودنو وشاف فجعفر لي حادر راسو على لوراق...

امين مقدرش يعطيه تليفون وخا قدامو خاف يقول شي حاجة ويخسر نيت مع عفراء.. عارف جعفر عندو نيشن وبنادم لي مكيعجبوش كيسد معاه الهضرة ...

امين بنكرة: لا مكاينش معايا قولي ليا انا نقول ليه شنو بغيتي .

عفراء : عطيني نمرتو انا نهضر معاه...

امين : وخا نسولو و نرد عليك..

قطع عليها عاد تنفس بجهد.. هز جعفر راسو تبسم نصف ابتسامة..

-لالة..

امين: قدامها كيتسالو ليا اصاحبي راك شفتي كيف دايرة...

جعفر: ما فيها باس انك تحتارمها لانه واجب و لكن الخوف وتبغي ترضيها باي طريقة مصالحاش.. بقا بكرامتك تا دي ديك بنت ناس لي باغي ...

امين: متافق معاك اصاحبي ولكن والله ما عرفت من كنوقف قدامها كنتخلع و نتفتف غير وحدي.. "صاط بجهد"..ولكن اصاحبي رها مساهلاش كنت كنعرفها من كانت كتقرا هي و مينة فسنكيام عرفتي كلشي كيخاف منها فداك ليسي دايرة عصابة غير بوحدها و بنت لمرا تنوض تقول ليها شي حاجة كتجفف بها الارض...

جعفر كمش حجبانو معجبوش الحال..

-و والديها مكيقولو والو مخلينها دير ما بغات...

امين: الله و اعلم اخويا ولكن بانو لي مفششينها بزااف و مكيخسروش ليها الخاطر...

جعفر مركز مع وراقو و نطق بشوي : تفشاش بزاف كيخسر الواحد و كيخليه ميحتارمش..

امين : اودي كنت كنقول منين جابت هاد لقباحة و مينة غير ضريفة لكن من شفت خوتها فهمت كلشي لحاجة لي ما تشبه لمولاها حرام...

كتفى جعفر انه يحرك راسو بصمت متبع لوراق لي فيديه وامين بقا كيشوف فيه ساكت و بدون ما يهز عينو فيه قال..

جعفر: خاصك شي حاجة...

امين حك شعرو بإحراج: بغات نمرتك تهضر معاك...

جعفر : نمرتي انا؟؟...علاش..

امين: واقلة بغات تشكرك على داكشي لي درتي معاها ...

جعفر جمع ع الوقفة: ماشي مشكل اي واحد فبلاصتي ايدير داكشي.. "تم خارج"..بلا ما تعطيها نمرتي...

امين: فين غادي..

جعفر: لصبيطار...

خرج هاز محفضة ديالو ولابس طاقم عملي فالازرق ديال لخدمة و عاطي شخصية قوية كمحامي كيدافع عن قضايا الناس...

قبل ما يوصل لصبيطار توجه لفرمسيان هو الاول.. وقف من شاف الصيدلي كيجمع ثمن الادوية لي وخداهم البنت لي واقفة حادرة راسها و باين عليها الحشمة و الوقار لابسة خمار طويل و مستور و كلشي مغطي كيبان غير وجها و يديها...

تكلم الصيدلي لي حط ميكة ديال دوا قدامها..

600درهم الالة...

خرجات عنيها و الاحراح باين فملامحها..

-نقدر ناخد منك دابا وتقيد ليا الباقي عندي غير ميتن درهم...

-سمحي ليا الالة فرمسيان هدا ماشي حانوت مكنديروش لكريدي...

زادت تحرجات كتر وبزز باش قدرات تنطق

-وخا نقص ليا دوا خلي غير لي قيمتو متين درهم .

رجع الفرمسيان لميكة كيسوط وقبل ما يرجعها لبلاصتها تحطات تتمة ديال لفلوس و تسمع صوت رجولي..

-عطيها لي خاصها..

دورات راسها لصوت شاب محرجة..

-لا اخويا رجع فلوسك اناخد غير لي نحتاج...

جعفر: ماشي مشكل ديري بحالي خلصتيهم نتي...

لبنت رجع وجها حمر: خويا راني هضرت معاك ممحتاجاش لي يصدق عليا قادرة براسي غير لخر شهر هذا و فلوس تقداو لي ...

جعفر شاف فالبنت و بدون وعي تبسم ابتسامة صغيرة...

-انديروهم سلف حتا ترضي ليا فلوس نهار تخلصي مزيان هكذا...

هبطات راسها وحشمات ما عرفات ما تقول كانت مضغوطة بزااف و خاصها ضروري دوا لباها وخا مرضياش تمد يديها لأي كان ولكن على وديت الوالدين كنهبطو راس و نمدو ليدين ومن قال ليها سلف رخف عليها لحال وكتفات انها تنطق بخجل..

-الله يرحم ليك الوالدين اخويا فراس شهر نرجع ليك فلوسك..

حعفر: ماشي مشكل..

خدات لميكة لي فيها دوا و هزات راسها شافت فيه وعنيها كيبريو و الحجاب زاد زينها فعنيه بلا ما يحس..

-ما عمري نسا ليك اخويا هاد لخير .."بإحراج ضاهر فصوتها"..ممكن تعطيني نمرتك نهار يوجدو لفلوس نتاصل بيك..

قيد نمرة وعطاها ليها.. خداتها و خرجات مهبطة راسها ما كتهزو فتا حد وباين عليها الادب و بنت مخلقة غسر من لباسها...

خدا دوا لي خاصو وخرج توجه مباشرة لصبيطار توجه نيشن لغرفة لي فيها البنت.. شاف عمها و راجلها واقفين كيهضرو بيناتهم غير شافوه جمعو الوقفة وعمها مخنزر..

-ياك البنت فاقت امتا اندخلو نشوفوها..

جعفر: لبنت مزال مصدومة ومخصها تشوف تا حد..

دخل لغرفة سد لباب وراه وهز عينو فالانثى لي متكية فبلاصتها كتشوف فصقف و دموعها كينزلو بجناب كأنها جسد فارغ بدون روح...

عطا دوا لممرض و جلس حداها كيشوف فيها محصر على حالتها وهي مكتنطق ما كتحرك فقط دموع لي كيبينو انها حية و كتسمع و كتشوف..

حالتها كضر فلخاطر ماشي ساهل انك تغتاصب و حياتك ضيع وماشي ساهل انك تغتاصب من مجموعة من الوحوش البشرية لي قتلوها وهي حية ولكن ضربة القاضية هي تمزق الرحم ديالها بكثرة العنف لي تمارس عليها وخلاها مكسورة لدرجة مكتصورش حتى لولاد لي من حق كل مخلوق على وجه الارض هي تحرمات منهم وهي في بداية شبابها انثى لا يتجاوز عمرها 18 عاما فقط...

جلس صامت ما قادرش يسول على شكون دار فيك هاد لحالة.. حس بالبكية وما عرف فين يحط راسو من غير انه يهبطو ومسح طرف عنيه و رجع قوتو من جديد.. رغم انه انسان حنين واي حاجة كتاتر فيه ولكنه كذالك انسان قوي وتا حاجة ما توقف قدامو...

جوج خصايل تجمعات فيه و رجعاتو بهاد شكل اليوم.. ضعيف و حنين مع المظلوم و قوي و جبار مع الضالم ...

بعيي منهم فدار سي لعربي مجموعين كاملين على لغدا لي محطوط فطبلة ومشكل بكل ما شتهات نفوس فديك اللحظة فرحانين بولاد علال و عبد القادر لي رجعو من قرايتهم...

سليم لي كان ابن علال و شابه باه فالوجه و الافعال قبل ما يهضر او يدوي كيسبق يدو هي الاول.. اما اناس فهو زين لولاد ضريف بحال مينة ولكن كل مشكور مصعور.. نهار يطلع ليه دم ما كيعرف حد يولي كثر من سليم ..

تا هما بحال عفراء و مينة تولدو فعام واحد ونهار نجحو فشهادة رسلوهم والديهم لمراكش يكملو قرايتهم فمدرسة عسكرية وها هما ليوم فالباك جسمهم كبر من عمرهم قاصحين و واعرين ...

سليم كيسوط بجهد : وعلاش معيطتوش علينا نجيو نشوفو هاد لكلاب لي سخن عليهم راسهم يقربو لعمتي ما بانت ليهم غير هي...

عفراء مخنزرة: عيط ليا بسميتي شمن عمتي ونتا دراعك كبر مني...

سليم: وخا الحب ميكون غير خاطرك...

علال خنزر فولدو : قاد فمك..

قطع الحس ... سكت هو ناض تاني...

اناس: مزال دوك لكلااب حيين مالقاش رجال لي يهرس لوالديهم رجلين.. "ضرب يذو مع طبلة"..انا يقيصو ليا عمتي...

عبد القادر : جمع راسك قالك مكاين رجال حنا شكانديرو هنا...

سقل تا هو وتبع سليم فسكات وخا واعرين ولكن تال والديهم كتجيهم لقوة..

بقا سي غير كيضحك فرحان بولادو لي فجنبو و مسخنين ليه كتافو وهازين عليه تكاليف دار وحاطينه فوق راسهم كلمتو هي لي ذوز و من غيرها مكاينش..

كيشرب اتاي و مرة مرا يشوف فعفراء ليكضحك مع ولاد خوتها...بقى سلهي تا كيحل فمو و يرجع يسكت و يخمم مرة اخرى ما عارف اش يقول ولا منين نبدا...

جاها الملل و عيات من دار ساطت بجهد وشافت فباها عارفة خوتها ايرفضو ..

عفراء : با بغيت نخرج..

علال : مكاين خروج دابا عشية و نخرجك...

عفراء : انا بغيت نمشي لصالون نصاوب شعري .....

لعربي: سيري ابنتي... "شاف فولادو لي ايهضرو و هو يخنزر"..شنو اتمشيو معاها صالون بلاصت لعيالات هاديك ولبنت مغاديش نحبسوها خليها تمشي تنفس لهوا شوي...

عفراء كتفرنس عاجبها الحال جمعات لوقفة باست لباها راسو فرحانة..

-دور معايا ابا بغيت نصاوب تا ضفاري...

علال: بلاش ابا انا اندور معاها..

مشات عندهم كتنقز فرحانة..

علال: دابا عاد كضحكي...

جبدو خوتها بجوج من جيبهم 200 درهم عطاوها ليها ..خداتها وطلعات كطير لبسات احسن لبسة عندها سروال توب لاصق من جهة لخشر ومطلوق من جهة رجلين بالاسود مع تريكو لاصق على داتها فالبيج.. شافت راسها فالمراية عاجبها الحال وفورمتها كتحمق.. لبسات صباط طالو و هبطات كتجري بلا ميشوفوها خوتها.. لقات مينة كتسناها فالباب.. غير شافتها وهي تحل فمها..

مينة : ياك غير صالون علاش لابسة هاد لبسة كلك مزيرة...

عفراء : زيدي و سكتي...

جراتها غادين فطريق كتعوج فمشيتها.. والعنين كلهم عليها وهي نافخة.. وصلاة لصالون دخلات جلسات فلمكان المخصص يصاوبو ليها شعرها بينما مينة جلسات كتسناها...

وقف عليها دري كيمضغ المسكة وكلو كيتعوج كثر من لبنات..

-اهلا زين غبورات هادي...

عفراء : غير دار.. "طلقات شعرها"..صاوب ليا شي شدة لي ترجعني وااعرة وتجي مع لبسة ..

طلع فيها و هبط: هاي هاي شهاد تفركيسة هي غادة عند شي حبيب هاد ليلة...

عفراء : بغيت غير نصاوب راسي ونقاد حالتي مكاين والو ..

بدا كيصاوب ليها شعرها وشاد معاها نميمة...

-يا ختي شعرك زوين اش كديري ليه...

عفراء : والو هكذا داير رطب من عند ربي..

-فرحااتك هكدا باش كيعجبني نصاوب ليك ديما مهلية فحالتك ماشي بحال هاديك بنت جيرانكم لي عاد تزوجات جات عندي بشعرها مزيت عامر قشرة و ريحتو خانزة ما عرفت منين نبداه...

هزات راسها كضحك: من نهار تزوجات ما تسمعات خبارها...

هبط راسو لعندها كيهضر معاها بشوي : عرفتي هداك لي تزوجات بيه اضلا واحد مول لبنات متصوريش كل ليلة مع وحدة عزاز عليه لعيالات و كيبغي داكشي فالفراش بزااف علم الله مسكينة كيف حالتها معاه وهو مولف غير بنات زنقة..

عفراء : ونتا فين كتعرف هادشي...

-واحد لبنت كتجي تصاوب عندي شعرها وهي كليانة عندو كتبيع لحمها الله يستر كانت ديما تعاود ليا عليه ...

عفراء : الله يستر وخا معنديش معاها ولكن منبغيش ليها راجل بحال هذا...

- اوا اش انديرو لفول كيتعطى غير لي ما عندو دراس مخلياني انا لي ولد جيران و تزوجات بالبراني بو عيالات..

عفراء كضحك: اودي مكدبتيش لفول كيتعطى غير لي معندو دراس نييت...

-اودي مبقات تيقة فهاد الوقت كون شفتي واحد البنت مسكينة غتاصبها شحال من واحد لقاوها فالمجاري على شوي اتموت...

عفراء : الله يستر فين وقع هادشي..

- شي جوج سيمانات دابا القصة دايرة بوم اصاحبتي فالفيس ماشفتيهاش..

عفراء : فيس محيداه معنديش مع داكشي فيه غير ضياع الوقت و صداع و شوهة...

-اوا مزيان من محيداه كون تشوفي ديك شوهة تبكي الدم يا ختي و عمها و راجلها دايرين شوهة بصحافة كل نهار خارجين و راكي عارفة صحافة عزيز عليهم يشوهو عباد الله ..

عفراء :الله يستر ولقاوه لي دار ليها ديك الحالة..

-لبوليس كيقلبو ولبنت كيقولو مصدومة مكتهضرش وعمها داير شوهة كيقولك تستاهل بنت الحرام من كانت صغيرة وهي خارجة طريق الله يستر وخا تكون كيف ما كانت ولكن تغتاصب مسكينة خرجو عليها...

عفراء : بنادم جاهل ما عندك ما تفهمو انا بحال هدا ندخل والديه لحبس يتربا فيه مكاينش شي عم يرضى يقول على لبنت خوه هاد الهضرة...

- اصلا لمحامي ديالها رافع عليهم دعوة بتهمة تشويه السمعة.. غرق باباهم وهما عاد زايدين فيه ...

بقاو على لحديت مني منك حتى سلات شغلها كامل.. هزات عكر حمر دوزات على فمها ودورات شعرها لجنب.. وقفات كاملة امام المرأة كتفتن بزين ...

-هذا لي وجدتي ليه راسك ايشوفك ايدوخ على نهار لي ولداتو فيه مو..

تبسمات عاجبها راسها: وجدت لراسي...

-امم باينة..

خلصاتو و خرجات مع مينة لي كطلع و تهبط فيها ...

-انرجعو لدار بهاد لحالة..

عفراء : فين غادي نرجعو غادي نمشيو نتلقاو مع داك امين ديالك...

وقفات وعلامة تعحب واضح فملامحها..

-ومالكي مقادة الحالة وغادي تلقاي بأمين...

جراتها مخنزرة: معنديش لغرض بالبخوش ديالك انا باغية صاحبو...

مينة: صاحبو وعلاش..

عفراء : بغيت غير نشكرو.. دابا عيطي على ميخي ديالك يجي يدينا ولا يرسل ليك لعنوان ناخدو طاكسي..

عيطات على امين مكملاش عشرات دقايق وقفات سيارة حدا رجليهم ..خرح منها كيضحك و فرحان غير شاف عفراء وهو يسرط ضحكة...

امين: سلام..

امينة بخجل هبطات راسها : وعليكم سلام...

عفراء جراتها دخلو لسيارة جلسو لور ..

-وصلنا لبلاصة لي خدام فيها صاحبك...

امين ضربو ضو : صاحبي علاش...

عفراء : بغيت غير نشكرو على لي دار معايا..

امين: هانية انا انوصل ليه شكر ديالك هو شوي مشغول مع الخدمة مكيلقاش فين يحك راسو..

عفراء : ماشي مشكل غير خمس دقائق ما غاديش نعطلو بزااف...

ما عرف كيفاش يسلك ديمارة طونوبيل و توكل على الله ان جعفر ميكونش فالمكتب..

وصلو لوسط مدينة فين كيتواجد المحلات لكبار.. خرجو من سيارة وامين دار اشارة لفوق..

-لمكتب فطاج تاني...

عفراء دورات عنيها: موقع زوين تا نتا خدام هنا...

امين: انا غير كنعاونو بما كمل المكتب ديالي...

شافت فجنب بان ليها مخبزة ديال الحلويات..

-صبر واحد جوج دقايق هنا راجعة...

دخلات لمخبزة ختارت بعض لحلويات المشكلة دارتهم فكارطون و خرجات فرحانة…طلعو كاملين لفوق حلو لباب كان مكتب صغير و مكان ديال الاستراحة و بعيد كاين مكتب مسدود.. تسمع تخرشيش لداخل و تطلق صوت رجولي...

-امين جيب ليا الملف ديال الحاج مول لارض لي كان عندي لبارح..

امين كيف سمع صوت جعفر سرط ريقو بصعوبة.

تقدم دق فالباب وحلو شاف فجعفر لي جالس فالبيرو محيد لفيستا منو لقاميجة لي بسنات لعضلات ديالو و جسمو المنحوت بالرياضة... رافع الأكمام لدراعو وفاتح ازرار لفوقانية باين مشغول بزااف..

سمع قوت الحس وهو يهز راسو..

جعفر: جا معاك شي حد..

امين بتوتر: كيسول عليك..

جعفر حبس من تقلاب لوراق: كيسول عليا انا!!.. دخلو نشوف..

حل امين لباب مزيان و دخلات كتعوج..

سمع صوت طالون مع الارض دليل واضح انها مرأة.. زاد كمش حجبانو حتى تمات داخلة بلباسها المتير و رائحتها الجميلة لي سابقها و ابتسامتها الفاتنة و جسدها المغري لي كيتمايل مع كل خطوة..

هزات راسها وعينيها جات فعينو مباشرة.. وقفات فمكانها و صدمة واضحة فملامحها من عرفات انه لولد لي صدقات عليه عشرة دراهم..

نطقات بدون وعي : نتا..

عض فمو من لداخل بجهد و ريحتها لتفات بيه.. بزربة جمع الوقفة و ملامحو قاصحة..

- خاصك شي حاجة ...

عفراء تلفات : نتا لي عتقتيني...

بدون ما يرد عرفات الجواب غير من وجهو لي مزال فيه بعض ضربات لي كانو فنفس الولد لي عتقها.. سرطات ريقها بصعوبة معرفات تقدم ولا ترجع بحالها..

بقات فقط واقفة كتشوف فيه بينما هو شاف فيها و شار لباب..

جعفر: لمكان عندك والو ممكن تخرجي عندي ما نقضي...

عضات فمها بجهد.. بغات تخرج وهو يبان ليها لكرطون ديال لحلوة فيديها... تنهدات و تحكمات فراسها و بدل تخرج تقدمات ليه كتحاول تبتاسم اجمل ابتسامة ...

شافها جايا لإتجاهو ووهو يدور وجهو لجهة اخرى لان لبس لي لابسة مزير بزاف و جدب عينو .. كيحاول يتفداه بكل قوة ممخليش شيطان يوسوس ليه

..

وقفات قدامو حطات كارطون فوق البيرو و بإبتسامة جميلة قالت..

عفراء : شكرا حيت عتقتيني مكنتش متو...

قاطعها: اي واحد فبلاصتي ايدير ما درت الحمدلله على سلامتك..

عفراء رجعات شعر على ودنها و عضات طرف لسانها الحركة لي معجباتوش وهبط راسو لوراق مبقاش كيشوف فيها بينما هي مشافتش ردت فعلو...

عفراء: الله يسلمك.. "مدات يديها"..انا عــ....

سكتات في نصف قولها لإسمها من لحضات انه ما مدش يدو ..بدون فهم شافت فيه بينما هو بنفس تعبير...

-مكنسلمش على العيالات...

رجع وجها حمر و نفس تقطعات ليها.. الاحراج لي عمرها طاحت فيه مكرهاتش لارض تشق و تبلعها.. جرات يديها بسرعة و داتها تنملات عليها.. تمات خارجة وهي توقف من سمعات صوتو..

شار بصبعو لصندوق: ديه معاك مكناكلش الحلوى...

زيرات على سنانها بجهد.. هزات لحلوى بعصبية رماتها على وجهو بجهد و خرجات كتنفس من نيفها والفقصة اتقتلها مرضياش حسات بدل مكيتصورش...

خرجات كتركل فرجليها و صباط طالون كيضرب بجهد فالارض.. تنفسها حاد و ملامحها شرسة مرضاتش و ندمات تا هبطات من نفسها و جات لعندو.. ندمات حتى مبقاا قدات فين تزيد.. خرجات بسرعة كتمشى فزنقة بحال الحمقة و مينة تبعاها كتجري من وراها مافاهمة والو..

عيات ما تعيط ليها لكن لا حياة لمن تنادي ودنيها مسدودين على كلشي.. حسات برجليها ضروها حيدات صباط رماتو و تمشات حفيانة كلشي كيشوف فحالتها وهي ممسوقاش.. حطات يديها على شعرها كتخسر شدة لي صوباتها على ود تلاقا بيه.. غادة فزنقة وكتهضر تحت نفاسها المتسارعة..

-انا لي حماارة.. نستاهل ما قال عليا.. كلب حمااار ...

وصلات لدارهم دخلات كتنهج طلعات لبيتها سدات لباب بجهد و لطوف هي و عريساتها تبعوها مخلوعين من شافو حالتها..

لطوف كدق فالباب: عفراء بنتي اش وااقع..

عفراء بصراخ: ما واااقع وااالو بغيت نبقا بوووحدي...

حطات يديها فوق راسها مخلوعة : الله يا ربي اش واقع عاد صباح كانت ضاحكة.. "كتحاول معاها "...عاودي ليا ابنتي شنو داارك بغيتي نعيط على خوتك يجيو يشوفو مالك..

عفراء بغضب: قلت ليييك بغيييت نبقا بوووحدي واااش مكتفهمووووش...

بشرى: شفتو الفشوش ديالكم فين كيوصل ها هي دابا مبقات تحتارم تا حد..

لطوف: سكتيني تا نتي زيدي على ما بيا علم الله مالها عوتاني..

بشرى: اتكون دارت شي مصيبة وجايا كتغبن...

دخلات مينة هازة صباط عفراء فيديها جراتها لطوف مخلوعة..

-ياك كنتي معاها ابنتي مالها دايرة فراسها هاد لحالة...

مينة ما عرفات ما تقول منغير تكدب: غير مع لفاك تعصبات راكي عارفة كيف دايرة مع لقراية..

لطوف ساطت براحة: لقراية وكان ترخف على راسها شوي لقراية مكترجعش صحة...

لداخل فبيتها مخشية ففراشها خاشية وجها فالمخدة وعاضة عليها بجهد و نفسها محبوسة ورجع وجها حمر عاد بعدات كتسوط بجهد... رمات لمخاد بجهد وبدات تضرب فناموسية بكل قوتها حتى سخفات و جلسات عادي..

عندها نفسها عزيزة بزاااف ومتبغيش لي يهبط منها وداكشي لي دارو ليها جعفر قضا عليها و خلا قلبها يكحال عليه..

جمعات الوقفة كتجمع راسها و كتمسح جناب فمها و عنيها حمرين.. شافت راسها فالمرأة وبدات تقاد ملابسها و تشوف فجسمها الانثوي الجميل ورجعات عينها تشوف فوجها الملائكي الجميل بقات كتشوف فراسها حتى رجع لهدوء لقلبها و نطقات ما بين سنانها..

-غادي ندمك على نهار لي عرفتيني فيه.. انوريك المنحوسة ديال لقبيلة اش كتسوا مزياان...

دخل عليه امين غير شافو وهو يحل فمو مصدوم..

-اش وقع بيناتكم...

جعفر مزير على سنانو : اخر مرة تخليها دخل عندي هنا...

امين : هي بغات غير تشكرك مكنتش متوقع ادير ليك هاد لحالة...

حيد لقامجة مزير ..كلو عمر كريمة ديال لحلوى و باين عليه معصب... خرج امين من شاف شي ناس داخلين.. بقا كيهضر معاهم حتى تشكلات ليه لبسمة على ملامحو...

دخلهم لغرفة الانتظار و دخل عند جعفر فرحان..

-قدامها قدام ربح ...

جعفر كيلبس تريكو جديد و كيمشط شعرو بأصابعو شاف فيه بنص عين ..

-كفاش...

امين: ديك عمت مينة كيف دخلات دخلات زهر معاها جاو عندك شي كليان اصاحبي...

جعفر كمش حجبانو : شكون..

امين: واحد مول شركة كبييير بغاك تكون محامي ديالو وعرفتي شنو تكون محامي ديالو يعني نتا هو لمحامي بإسم شركة و مولاها اتولي دخل فشهر لملاااين اصاحبي..

هز راسو كيضحك فرحان لصاحبو بينما جعفر جعد حجبانو لوسط.. قاد حالتو وخرج عند ناس لي كيتسناوه.. جلس قدامهم بعد ما عرفو على حالهم و دخلو فالعمل ديريكت كان هناك شك من طرف جعفر لكن مباشرة ختافى شك من شاف لوراق لي مد ليه سيد.. بقا جامد لتواني و فلخر تبسم و قبل انه يكون محامي لهاد شركة بعد ما راجع جميع الوتائق...

توادع مع كليان ديالو و بقا واقف فمكانو و امين كيشوف فلوراق لي سيناو و كيفرنس غير وحدو...

-سبحان الله شكون قال قدامه قدام ربح ليه وهي عمرها خرجات معانا ودوزنا نهار لباس ديما المصائب نازلة على راسي... "شاف فصاحبو"..خاص دير لينا شي عراضة اصاحبي ...

هبط جعفر راسو كيفكر و قال فقط : ان شالله..

امين : اش وقع بيناتكم بعدا ...شفتها خرجات بحال تور معصبة...

جعفر هز كثافو: قلت ليها مكنسلمش على العيالات..

امين بدون فهم: تقلقات غير على هادشي..

جعفر : كاينة شي حاجة اخرا لي اتقلقها..

امين : لا مكاينش واقلة غير حسات بحالي قمعتيها و صافي ..

جعفر كيقاد لوراق و ضحك باستهزاء : تا دين ولا فيه لقميع...

امين سكت مرضش ..بقاو مقابلين لخدمة حتى ضلمات دنيا و رجع كل واحد لدارو..

خرج من دوش لابس شورت قصير فالاسود وعريان من لفوق هاز فوطة كيمسح بها شعرو.. دخل لكوزينة كيصاوب ما ياكل..

شاف فتلاجة و لكوزينة و دار لي خاوية وهو يتنهد بجهد.. صاوب لبيض مع مطيشة و حط كلشي فطبلة مع كاس لعصير بدا كياكل و كيطلع ويهبط فتليفون وخا لماكلة باسلة عارف راسو مكيعرفش يطيب ولكن ما لقا ما يدير باش يسكت جوع...

بقا كيقرا فالجرائد الالكترونية حتى طلع ليه ميساج فالوتساب.. كمش جحبانو و دخل لقا نمرة ممسجلاش عندو.. بدا كيقرا لميساج...

-سلام خويا انا هي البنت لي سلفتيها لفلوس فالفرمسيان عرفتني...

مسح فمو وتكا على لكرسي شد تليفون بجوج يدين و بدا كيكتب...

-وي عرفتك ياك لباس.

ردات عليه تم نيت: لباس اخويا بغيت غير نشكرك على داكشي لي درتي معايا عمري نسا خيرك ..

تبسم نصف ابستامة: ماشي مشكل المهم باك لباس...

-حمدالله عندو لقلب ضعيف و خاص ضروري من دوا كل شهر وخا القضية صعيبة ولكن حمدلله ربي كيرزقنا من عندو كيف رسلك ليا باش تعاوني داك نهار..

-ربي كبير و كيرزق مع عندو مهم تكوني قابلة بلي عاطيك..

-قابلة اخويا بلي كان و سمح ليا طولت عليك بغيت غير نقول ليك لفلوس بغيت نردهم ليك ومعرفتش فين نتلقاك...

حط يدو على لحيتو كيحكها بشوي : نقدرو نطلقاو فكافي حدا لفرمسيان لي تلاقينا فيه...

-وخا اخويا غدا نكون تما و سمح ليا صدعتك..

-مكاين مشكل مرحبا بيك...

شافها كتكتب و بقا كيتسنا بعد مدة رسلات ليه جوج كلمات..

-سميتي ملاك...

تبسم بجنب عرفها حشمات غير ممن لوقت لي خدات باش تكتب اسمها رد عليها ببساطة كيعض لسناو بجنب...

- مشرفين انا جعفر....

طفا تليفون و بقا كيضحك غير وحدو ..جمع لماعن حطهم فالكوزينة...طفا ضو وتوجه نيشن لبيت ديالو دخل فراشو وغمض عينو جبدها بنعسة ..

خرجات من بيتها مخلوعة ونعاس مزال شاد فيها بكترة لخلعة لبسات صندالة مقلوبة.. هبطات كتجري شافت مينة كتبكي...

عفراء : شوااقع شهاد لغوات مال علال كيغوت...

دارت عندها مينة معصبة : والديا ايطلقو بسبابك تفووو على منحووسة....

دفعاتها و طلعات لبيت تكمل بكاها و عفراء ما فاهمة والو شافت سليم و اناس كيف لعروضة خارجين من لكوزينة و خرجو كيتسلتو حتى غبرو.. قربات بشوي مدات ودنها كتسمع اش واقع...

لطوف : لعن شيطان اولدي راكم بعقلكم ماشي صغار..

علال كيهضر معصب : هضري معاها نتي امي وااش انا شكيت عليها قلت ليها ديري شي حاجة.. عمري دويت ليها على لبسها ع.. عجبااني كيف ما هي... علااش تخرج بديك الحالة كاع رجال عنيهم فييها....

بشرى كتبكي و المكياج تخلط ليها مع دموع ..

-سيير الكدااب كتخليني فدار غفلون و تبع دييك بنت جيراان لي عنيها فييك باغي تجييب عليا ضرة و ضحك فيا ناس...

علال كيترعد باغي غير منين يدوز ليها : ضحك هو لي انديرو فيك دابا لمدزتيش مسحتي ديك الحالة ...انا كون بغيت لمزوقات كنت ناخدهم نهار الاول مكنتش ناخدك كااع...

بشرى مخبية ورا لطوف كتحمي راسها من علال و خا كتخاف منو ولكن الغيرة و لكلام لي قالت ليها عفراء على بنت جيران لي تابعة علال عماو ليها العنين و صوت لي عمرها رفعاتو على علال ليوم رفعاتو..

-يااك الغداار ها نتا بنتي على حقيقتك عاجبينك لمزوقات و انا صافي مبقيتش كنعمر ليك عنيك حيت شرفت ما بقيت صالحة ليك...

علال تم غادي عندها و لطوف كدفع...

-عفاك اولدي دوزها ليها غير هاد لمرة وعمرها تعاود..

علال باغي يجرها بزز: خليني غير نهضر معاها مغادي ندير ليها والو.. "خنزر فيها كيخلع"..يا غتجمعي راسك و ترجعي عقلك و تمسحي عليا هاد زبل و لا اقسم بالله تا نرجعك لداار بااك ليووم قبل غدااا...

بشرى هزات يديها لسما كتندب فحناكها...

-قااالتها المنحووسة قااالتها و متيقتهااش ...قلت راجلي و عشرة زماان ميخووونييش ولكن ااانا لي فداار غفلوون نتا كتلعب ورايا بااغي تجيييب فبلااصتي وحدة صغر مني...

علال سااط بجهد و نطق اسمها كيف رعد..

-عفرااااااااء...

غير سمعات اسمها حيدات صندالتها من رجليها دارتهم فيديها و عطات رجليها ريح هربات من دار و بعدات من زنقتهم عاد حبسات كتنهج مخلوعة.. حطات صندالة لبساتها ومزال بالبيجامة ديال نعاس لاصقة عليها شوي..

-اففف شهاد نهاار ما درت والو و ايسميوها فيا عوتاني انا بغيت ندير فيها غير لخير ..واش ما بقا لي يدير لخير..

دخلات يديها فجيب كانت عندها عشرة دراهم هي لي كتكساب..بانت قهوة وهي دخل تاخد شي حاجة تفطر بيها وفور ما دخلات بان ليها جالس فطبلة وحداه بنت محجبة مهبطة راسها وباين عليها الحشمة..

زيرات على يديها بغات تخرج بحالها محاملاش تشوفو

حبسات فنص طريق و تبسمات كيف شيطان.. ضربات دورة و توجهات عندو كتفرنس ما حس بيها تا لقاها قدامو ..

تبسمات ونطقات بصوت رقيق : اهلا..

كمش حجبانو وبسرعة بعد عينو منها من شاف لبسها ماشي ديال زنقة.. هبط عينو لكاس لي بين ايديه حتى سمعها نطقات باستهزاء..

عفراء : غير شوف ولا شوفة فيا حرام وهادي لي معاك شوفة فيها حلال...

هز عينو فيها مزير على فكو بجهد ما رضش عليها فقط شاف فوجها بعصبية بينما هي ضحكات بجنب ونطقات بشوي..

عفراء : لعيالات مكتسلمش عليهم كتلاقا بيهم غير فلقهوا .."هزات حجبانها تستهزأ بيه"..باين عليك الدين...

زير على يدو بجهد و وجهو رجع حمر نطق مابين سنانو...

جعفر:سيري بحالك...

عفراء بتسمات عاجبها راسها : علاش خايفني نشوهك...

جعفر مردش بقا فقط كيشوف فيها وهي كتشوف فيه واحد حاقد على الاخر و باين لكره فعنيهم..

هي عمرها لتقاات بشي حد لي عاملها بهاد البرود و مشافش بها بإعجاب كيف كل رجال لي تلاقات فحياتها.. كل رجل شافها كيتبعها بعنيه من غير هذا لي قدامها لي كان غيرعن الكل شي لي خلاها تزعزع بالمعاملة لي تعرضات ليها من طرفو..

بينما هو كان الغضب هو لي كيتحكم فيه فكل مرة كتجي قدامو.. الوقاحة ديالها خلاتو يشمئز منها و عدم احترامها لي واضح فتصرفاتها خلاه يتعصب.. هو بالنسبة لسيه الانثى خاص تكون محافظة لها كرامة... واعية.. تصد اعجاب الرجال ..خجولة و محترمة...

كل هاد صفات مشافش وحدة منهم تجاه هادي لي قدامو.... لي فيها عكس كل صفات لي كيتمنى فالانثى..

بقات عنيهم على بعض لمدة حتى حسو براسهم وبسرعة بعدو عينيهم واحد محامل الاخر ضارت بشوي عند لبنت ..

عفراء : عرفني بهاد زين لي مصبح عليها .....

ركزات عنيها فالبنت لي وجها حمر ...فور ما عرفاتها ضحكات من نيتها...

عفراء: اهلا بي بنت لكسال اش كديري هنا...

دارت عند جعفر حابسة ضحكة..

-عرفتي ما تختار جيتو متواتين ...

لبنت واضح لخوف فعنيها : خخ ختي ل لباس عليك...

عفراء : لباس !!...راني لباس غير وجهك صبحت عليه مبان لي لباس هاد ساعة...

جعفر مخنزر شاف فملاك : كتعرفيها..

ملاك بتوتر: قق قرات معايا...

عفراء هبطات و طلعات فيها : جاا معاك لحجاب ..."ضحكات بجنب فمها "..غطيتي ديك صلعية لي خليت ليك...

ملاك هبطات راسها تقطع ليها نفس: انا كنت ديما كنديرو...

جعفر جمع لوقفة وشار لملاك : يلاه نمشيو...

عفراء جات قدامو: فين غادي مزال ما ساليت.. "رجعات كتشوف فملاك"... فين داك باك مزال عايش...

جعفر جعر هز صبعو فوجها ونضراتو قاصحين نطق كلمة وحدة...

-سكتييي حسن ليك ..

عفراء : ولا مسكتش اش غادي دير اضربني كما ضربني باها.. "قربات ليه و مدات وجها"..يالله ضربني ها هو وجهي ضرب نشوف...

جعفر رجع لور محتاقر تصرفاتها لكن كلمة.. " كما ضربني باها ".. ترسخات ليه فراس.. دور عينو تجاه ملاك ...

ملاك لي شافت جعفر كيشوف فيها رجع وجها حمر ...

-مممم مكنتش كنصحابو ديالك هو غير عاوني و..

قطاعاتها عفراء باستهزاء ..

-ديالي!!!.."ركزات عنيها فجعفر بكره "...بزاف عليك يكون ديالي انا مكنخدش شياطة ديال بنادم...

تلون وجهه بألف لون …أعصابه بدأت بالغليان ..عروقه.. تتمرد على جسده …صوته سيطلق قذيفة في وجهها ..امسك يدها بقوة ...وكلماته العالقة تهدد بالخروج...ليكتفي بان ينطق.. بين اسنانه التي تحتك ببعض..

جعفر:نـتـي...

حيدات يديها من بين يديه وملامحها شرسة ..

عفراء: متقييسنييش الحماار..

خطات خطوة لور محاملاهش...

-اخر مرة تحط عليا يديك تفوو..

خرجات بحالها خلات عاصفة وراها.. عاصفة كتقتل فجعفر لداخل لدرجة يدو بدات كترعد بالغضب و لفك ديالو تزير و دروسو كيطحنو فبعض بقوة...

خرج من لقهوا مكيشوفش وراه نسا اصلا شكون معاه.. بقا فقط كلامها كيدور فراسو.. وصل لمكتب ديالو دخل نيشن لحمام ليعندو تم بدا كيغسل وجهو كيبرد حر كلامها لي نطقات..

خرج كيمسح وجهو و كيرجع لهدوء لنفسو.. شاف فيه امين و مدا مجاب فحركاتو جاه عادي...

امين: صبيطار عيط عليك خاصك تمشي عندهم..

جعفر بصوت عادي :وخا..

خرج من لمكتب و توجه مباشرة لصبيطار كيف دخل توجه ليه عنمها كيغوت وهو ساكت مكيردش... لكن شحال قدو يبقا ساكت و ميردش.. صبر حتا عيا و زاد فصبرو بقا هكذاك تا دخل و اعصابو على الحافة..

وقف حدا لبنت لي مزال حالتها كما هي هضر مع طبيب..

-مزال ما قالت والو..

طبيب: مزال ولكن غير شافت راجلها بدات كتغوت بهيستيرية ...

جعفر بغضب :علاش خليتوه يدخل عندها...

طبيب هز يدو: هو رجلها و عندو حق يدخل يشوف مراتو...

خرح طبيب و بقا جعفر فبلاصتو كيسوط.. شاف فالبنت لي مزال كتشوف فسقف.. جلس حداها كيهضر معاها بشوي..

جعفر: اية.. انا هنا باش نعاونك.. باش نرد ليك حقك و ندخل كاع هدوك لي دارو فيك هادشي لحبس.. غادي نتبعهم تا ياخدو المؤبد و عمرهم يشوفو شمس....

شاف فيها على الله تكلم لكن حصل على نفس الجواب كما العادة.. زاد فصبر و حاول مرة اخرى...

-متبقايش ساكتة و متخافيش تا حاجة ما غادي توقع ليك.. غير هضري انا معاك...

نفس ردت الفعل ..

-الصمت...

فلحضة تجمع عليه كلشي و ما حس الا وغوت بجهد كاع داكشي لي صبر عليه من صباح لدابا خرج دقة وحدة مكيشوفش قدامو..

-راااني كنهضر معاااااك.. باااغي نعاااونك ترجعيييي حقك ولو شويييي.. سكاااتك مكيفيييدنيييش و القضية كتمشيييي من يدينا راااجلك و عمك كلهم ضدك.. شحاال اتبقااااي ساااكتة منقدرش ندااافع علييك و انا معاااارف تا قصتك... ما نقدرش ندااافع عليك و نتي متيقاااش فالمحاامي دياالك...

لغوات ديالو خلاها تهز من مكانها برعب.. حطات يديها على ودنها ورجعات كتغوت لربي لي خلقتها.. كتلوى فبلاصتها و كتغرص اصابعها فلمخدة كأن الوحوش كيختارقوها مرة تانية و كيكلوو فجسدها.. كأن سيناريو اغتصابها كيتكرر بين عينيها...

دخل طبيب يشوف مالها وهي مزال كتفوت ولاول مرة غواتها كان على شكل بكاء.. بكاها كيقطع فالقلب.. وكيمرض نفوس...

بنت صغيرة مزال كيف الوردة يالله نابتة.. ما شافت ولا تشوفات.. عاد بدات فدنيا.. شكون يتصور هادشي لي تعرضات ليه..

هرسوها و قتلوها وهي حية... خداو منها كل ما يلزمها للحياة.. رجعوها جسد بلا روح.. بكات و بكات ربما ساعة او ساعتين... تا حد ما عارف ..

لأن بكاها كان طوييل بزااف.. كتبكي فجنازتها وهي مزال حية.. كتبكي على حياتها لي ضاعت.. كتبكي على جسدها لي توسخ.. كتبكي على انكسارها....

جعفر لي مقدرش يتحمل ما شافت عنيه لدرجة دموعو هبطو بدون ما يحس و لا يوعى بيهم ..دوز يدو على وجهو كيطلب من الله الصبر و ان يقدره على مساعدتها...

بح صوتها و عنيها تنفخو بكثرة البكاء.. حدرات راسها سخفانة ...مخيم عليهم الصمت فقط انفاسها لي كيتسمعو اخيرا نطقات بهدوء ..

-انقول كلشي....

فدار سي لعربي.. دخلات جلسات حدا مرت خوها لي محزمة راسها و تمسح فدموعها غير شافتها كحلات بالعما..

بشرى:-متقربييييش ليا عطيني تيقاار و لا مغادي يعجبك حال يا المنحوسة...

عفراء : وصااافي راه غير كيبغيك و غار عليك شفتيه كيف دار من شافك مهلية فالحالة...

بشرى: سيري بحاالك كنتي غادي تخرجي عليا و طلقيني من راجل..

عفراء ضرباتها لكتفها: شمن طلاق تا نتي تصحابي راسك رخيصة علينا ..نجريو على علال و نخليوك نتي راكي معمرة دار و نتي ضو ديالنا نهار تخرجي يضربنا ضلام..

بشرى هزات راسها: اممم صبغيني ديريها قد راسك و تجي تبقاي تحايلي عليا بلكلام...

عفراء عنقاتها نصف تعنيقة : اوا شوفي شكون قال علال يغار عليك لهاد درجة.. شفتي الحب و ما يدير خلاه يخرج لي فقلبو قالك اصلا كنتي كتعجبيني قبل ما نتزوح بيك..

غطات بشرى فمها بزيف حابسة ضحك و دفعات عفراء حشمانة..

-نوضي من حدايا مابقيتي تحشمي...

عفراء : اوا هكذا نبغيك ديما ضاحكة وما فيها باس تصاوبي حالتك شوي لراجلك را لبنات لي فزنقة وااعرات و انا عارفة اش تحت راسهم و خويا زيد زوين و حرش منفخ و بنات ليوم كيموتو على هاد نوع و انا من قلت ليك تقادي غير حيت بغيت ليك لخير ...

بشرى كدور فراسها : احياني على رجال ما فيهم تيقة..

عفراء : اييه رجاال اختي ما فيهم تيقة و لكن سمحي ليا با وخوتي فيهم تيقة...

دخلات عليهم كلتوم هازة صينية ديال اتاي شافتهم كيتكلمو وهي تهز حجبانها..

-سبحان الله عادتكم هي هي مكتبدلوش.. صباح تخاصمو و فليل تحطو راس على راس...

عفراء هزات كاس اتاي: مرت خويا عزيزة عليا وخا ندابز انا وياها منخليش لي يجي قدامها ولا يهبط منها..

بشرى عاجبها الحال: صراحة ديال الله و خا منحوسة ولكن عزيزة عليا بزااف من نهار كنتي اتحرقي فديك العافية و الخلعة لي تخلعت عليك ما كنتش كاع نصحابك عزيزة عندي لديك درجة...

كلثوم: اوا الله يدومها محبة.. "شافت فعفراء" ..نتي اجهنم لكحلة فين كنتي هاد صباح قلبنا عليك تا عينا حسك مكيضورش...

عفراء خسرات ملامحها من تدكرت صباح لي دوزات..

-مشيت فطرت برا..

كلثوم: مزال مغادي تحيدي منك هاد لعادة ديال ماكلة زنقة.. دوزي دخلي لكوزينة تعلمي طياب لي ينفعك اش غادي ديري نهار تزوجي اتسناي مك تجي طيب ليك..

عفراء : اختي لي بغاني يبغيني كما انا ونهار لول نشرط عليه يخدم خدامة طيب ليا و ليه مالي انا يديني خدامة عندو...

بشرى: بااز اختي مكتحشميش ...

عفراء : لكان على هادشي حشمو غير نتوما انا باركة نتهلا فراسي اما نزيد شقا و تخمال و تمارة اهووو ما درتو تا فدار با... اختي على هاد لحساب نجلس فدار با خير ليا...

كلثوم: وفين اتلقاي هاد ولد ناس لي ايقبل شروطك ولا يكما كتسناي داك جعفر مسكين لي كان ديما يقول ليك غير اه...

بشرى : فكرتييني فجعفر مسكين علم الله فين يكون شادها...

عفراء ضحكات بشوي : فين غادي يكون.. ايكون ضاربها بشي تزويجة ودايرين بيه ولادو..

بشرى: لا لا ميكونش دارها وهو مسبق ليك صداق...

هزات راسها كضحك من نيتها : والله نتوما تا مسطيات.. شمن صداق وحنا كنا غير صغار محالاش يكون عاقل عليا اصلا و لا شافني محال نعحبو هو كان كيبغي بنت مادبة ماشي بحالي كنطير مع طيور اصلا انا و ياه منصلحوش...

كلثوم نطقات بداكشي لي فقلبها : بالعكس متبدلتيش بقيتي كما نتي عاجبك راسك و متسمحيش فحقك وهو كان غير يشوفك يهرب بالحشمة ... كنتي عندو عزيزة بزااف..

عفراء : ها نتي قلتيها عزيزة ماشي كيبغيني ...

بشرى كطلع و تهبط : صراحة تقال محالاش يعرفك تبدلتي بزااف تا من لون عنيك بدلتيهم مبقيتيش كاع بغيتي تحيدي داكشي من عنيك..

عفراء : كتهضري على ليلونتي عجبني لونهم هكدا جا معايا حسن من لون عنييا لحقيقي...

كلثوم : وليتي كتباني بحال شي كاورية ولكن ملامحك ديال لبلاد هادشي باش جيتي غزاالة كتحمقي...

بقاو فالهضرة و جميع مع بعض حتى وصل ليل.. مجموعين فوق طبلة ديال لعشا و علال مدواش مع ختو عرفها غير من لعنين انها فهمات قصدو...

هادشي باش كتعحبو ميجتاج لكلام معاها غير شوفة فيه تفهم اش باغي يقول ليها و كدير داكشي و متخسرش ليه خاطرو...

مجموعين كعائلة يهضرو و يضحكو و يعاودو نهارهم كيف داز ..حطو ديسير وجالسة حدا مها كتنقي لها تفاح حتى نطق سي لعربي بهدوء..

-عندي ما نقول ليكم...

كلشي دور راسو لعندو و علال اول ما نطق..

-الله يسمعنا خبار الخير ياك لباس..

لعربي: لباس حمدلله غير هو.. "شاف فبنتو عفراء "..جايين شي خطاب يدويو فعفراء..

تغيرو ملامحها من سمعات كلام الاب ديالها.. رجع وجها حمر و بون ما تنطق كلمة وقفات فمكانها وطلعات لبيتها بدون ما تلتف ليهم.. كان واضح ان لكلام ما عجبهاش ..

نطق سي لعربي لي تنهد من شاف حالة بنتو..

-نوضي هضري مع بنتك و فهميها..

لطوف: اش غادي نفهمها وهي مبغاش تزوج وراك عارف كيف دايرة عفراء...

لعربي: راها بنتي و انا عارفها قوليها سيد ولد عائلة كبيرة و معروفة فرباط و باها عندو شركة وهو لولد لوحيد لي عند باه بخيرو و خميرو اتسكن معاه ملكة غير لا مبغاتش...

دراري كمشو حجبانهم من سمعو كل هادشي..

عبدالقادر : وهاد الولد فين شاف عفراء...

لعربي: كان فالعرس ديال بنت الجيران هو صاحب لعريس...

علال : وهاد لولد سولتي عليه كيف داير مع الناس واش مأدب، مخلق ،عارف بينو وبين الله.. كيصلي، كيصدق، ما فايت فيه زواج، ما كان خاطب...

لعربي خنزر فيهم: و نتوما اش كديرو تبارك الله تسناو مني انا ندير هادشي كامل..

علال : حاشة الواليد، حنا نتكلفو..مهم يكون سيد معقول اما عفراء عارفينها اش باغية...

لطوف: سيد باين فيه المعقول من جا نيشن هضر مع باها...

علال: يكون خير.. مهم هضري معاها.. بغات يجيو ناس مرحبا.. مبغاتش الله يسهل عليه بشي بنت ناس اخرى...

وقفو لعيالات تبعو لطوف وخلاو رجال كيهضرو فأمورهم.. دخلو عندها لبيت لقاوها متكية هازة تليفون ودايرة ليزيات وكتعض فمها بجنب وتقشرو و رجليها كيتهزو ممرتحاش...

لطوف : مالكي تاني..

عفراء رمات تليفون من يديها : مبغاش نتزوج...

مينة بدون فهم : وعلاش.. من جاك ولد ناس كيبغيك علاش متقبليش بيه...

عفراء : الحب مكيوكلش و زيد كيموت مع الوقت ما عندي ما ندير بالحب...

بشرى: و شنو بغيتي الالة فهاد الراجل لكنتي كاع ممصوقة لحب..

عفراء : لكان غير على هدوك لي كيجيو يخطبوني بلاش منهم غير المزلوط على خوه.. انا ماشي مزلوطة وناخد مزلوط بحالي يحبسني فدار بين ربعة لحيوط و يتقلني بلولاد.. انا باغية نعيش باغية نشوف دنيا وشنو فيها.. باغية نتبرع بطونوبيلات و الفيلات و لبس ما بغيت وكل صيف ندوزو فدولة.. . اما لكانت العيشة مع مزلوط ونزيد نصبر معاها ونحرم راسي بلش غير خليني فدار با حسن ليا ...

كلثوم:لواه اعفراء زدتي فيه بزاف.. معيشاش نتي فالواقع بحال هاد رجال مكينينش كاع..

عفراء : نتي لي معيشاش فالواقع انا شفت ناس كيف عايشين ومبرعين راه غير حنا لي ولفنا زلط ...

لطوف جلسات حداها :سيد كيعاود عليه باك لباس عليه و يعيشك ملكة وغير هو لي عند باه وقال عندو شركة و الله و اعلم...

عفراء خرجات عنيها : وفين كيعرفني هاد سيد..

لطوف: شافك فعرس بنت لجيران و عجبتيه و مشا هضر مع باك.. تا دابا ما خاسرين والو يجي سيد تشوفو بعضكم عجبك و تفاهمتي معاه وشفتي فيه داكشي لي باغا مرحبا ما عجبكش الله يعاونو...

عفراء بقات سكاتة حاطة يديها تحت دقنها و هازة طرف عنيها كتفكر..

مينة: فاش اتفكري عاود خلي غير يجي و تشوفي كيف داير...

عفراء : اففف خفتو غير يكون شي شارف مع انا سعدي غير فشارف و خوه ...

كثوم هزات راسها كضحك: مزال ما نسيتي داك لكسال شارف لي كان بغا يتزوجك بزز...

عفراء صاطت بجهد: ما تفكرينيش غير صباح تلاقيت بي بنتو الله يستر ...

لطوف جمعات لوقفة : يكما رجع كيتبعك مرة خرا...

عفراء : بغيتيني نرسل والديه لحبس اصلا من نهار كلا قتلو ديال لعصى من خوتي ولا يشوفني يخوي طريق...

بشرى : اوا شوف ليك شارف ما بقات في فمو حتى سنة و طمع فبنت قد بنتو ...

لطوف: دابا واش نقولو ناس يجيو تشوفي سيد بعينيك...

كلثوم : وافقي ا عفراء سيد لباس عليه محال يجي شي واحد بحالو و نتي طامعة فلعيشة ديال ناس واعرين ...

عفراء هزات كتافها: يجي بعدا و نشوف...

فدار جعفر مجمع هو و امين على لوراق ديال قضايا لي عندهم..

امين: و البنت مزال ما قالت والو...

جعفر: مزال خليها ترتاح شي يومين بما نسالي هاد القضية لي عندي...

امين جمع الوقفة : انمشي نشوف داك طاجين واش وجد و نرجع..

دخل لكوزينة شاف طاجين لقاه واجد.. حطو فطبلة وحط معاه صلاد و ديسير مقطع مع كوكا و لخبز.. قاد كلشي فطبلة عاد عيط على جعفر..

دخل كيضحك من شاف طبلة موجودة : ما عندي ما نسالك اصاحبي...

امين: وخا نتا لي خاصك طيب حيت انا غير ضيف عندك ولكن هانية صدقت انا لي كنعرف نطيب...

جعفر هز يدو بجوج : لغالب الله معنديش مع طياب.. لبيض هو لي كنعرف ليه...

جلسو كياكلو دخل فطاجين طول و عرض ..شاف امين تليفون شعل وهو يهزو قرا لميساج لي وصلو وهو يصفّر و نطق بشوي...

امين: يا ربي تزوج و تحيدها من طريقي تهنيني منها...

جعفر بدون فهم: شكون..

امين: غير مينة سيفطات ليا ميساج كنت انا وياها معولين نتلاقاو غدا لكن غدا ايجيو شي ناس يخطبو ديك جهنم لكحلة...

جعفر هز حجبانو: عمتها...

امين : وييه .."هز حاجب و حط حاجب".. يكما كنتي باغيها...

جعفر خنزر فيه بدون ما يرد عليه خلا امين كيضحك...

امين : عارف اصاحبي وخا تبقى غير هي متشوفش فيها... اوا امتا غادي نخطبو ليك حتى نتا...

جعفر : تلاقيت واحد لينت ولكن مزال ما متأكد...

امين حل فمو بصدمة: نتا تلاقيتي بالبنت... "حرك ليه جعفر راسو"..كي درتي ليها اصاحبي و نتا عمرك جلستي تا حداهم بقا غير تلاقا بيهم ...

جعفر تكا على لكرسي كيمسح فمو: لوالدين الله يرحمهم ما عندي تا شي قريب لي يشوف ليا ....ما عندي كيف ندير كلشي خاصني نديرو لراسي...

امين : وفين خليتيني اصاحبي انا و الواليدة لي ديراك بحال ولدها...

جعفر: مكنبغيش نصدعها وزيد غير تعرفت بها مكاين حتا حاجة...

امين هز تليفون : انعيط على لواليدة دبا غدا نمشيو نخطبو ليك…

جعفر بإبتسامة: ماشي دابا خاص شوي ديال لوقت بما وجدت دار لي تعيش فيها المراة...

امين: وقت ما بغيتي انا و لواليدة موجودين.. نخطب لخويا لبنت لي بغا...

جعفر كتافا فقط يبتاسم وهبط نضراتو لكاس لي فيدو.. شفارو كحلين و غلاط كيغطيو لون عنيه الاخضر.. ما حسش براسو من عض شفاه تحتانية بجهد.. وماعرفش مالو من سمع ايجيو لخطاب لديك لبنت... قلبو تزير عليه محاسش براحة….

___بعيد عن المدينة و سكانها ..شاد طريق مسرح رجلو و مهبط راسو كيف العادة ..سمع صوت ديال دراري صغار وكانو نوعا ما عارفهم و معارفهمش ..بانت لحيرة فملامحو و تبع مكان الصوت ..بقا غادي حتى وصل حدا واحد شجرة كبيرة جالسة طفلة صغيرة حاطة رجليها فالماء .. و من وراها طفل كيضفر ليها شعرها ..كان طفل نسخة مصغرة منو او بالأحرى هو داك الطفل ..

شاف الابتسامة السعيدة لي مرسومة على وجهو الطفولي و طفلة امامو حاطة رجليها فالما و كتلعب بيهم وصوت ضحكتها مسموع ..

الطفلة لي مستحيل ينساها ..طفلة لي دوزات معاه طفولتو و لي ختارتها مو ليه فيوم زيادتها ...طفلة لي كان كيحشم يطول فيها شوفة ...

قرب لعندهم كثر وجلس تقريبا حداهم كيسمع اش كيقولو و ابتسامة ممفارقاش وجهو الوسيم و نضراته الحنينة ...سمع صوتها الطفولي لي شحال ما سمعو ..

عفراء : شفتي الخاتم لي جاب خالد لختي شحال زوين ...

نطق صوتو المراهق و يدو كتلعب فشعرها ..

-عجبك...

-شكون ما يعجبوش خاتم كبير و زوين ...

ليرد عليها بعد تواني من الصمت : غادي نجيب ليك ما حسن منو ...

دارت عندو وملامحها فيهم تسائل : كفاش ؟؟..

بحرج طفيف واضح في صوته : من انتزوجو انجيب ليك خاتم حسن من ديال ختك ...

تبسمات و عنيها لمعو ونطقات كلمة لي دخلات فأعماق جعفر الكبير و زلزلاتو من لداخل ...كلمة وحدة كان وزنها تقيل وكانت ديك العبارة من احرف بسيطة فقط ..نطقت بها ببرائة ...

-انــتــســنــاك...

تنفض جسدو وحل عينو بسرعة ..شاف سقف المعتاد و الضلام المعتاد ...جلس وحط يدو على وجهو و لكلمة مزال كيسمعها فأدنه ...كان حلم و لكن ماشي حلم كان عارف ان هاد الكلمات داز بينو و بين عفراء بعد خطوبة اختها ...

تزير عليه قلبو و معارفش علاش .. محاسش براحة بحال شي حاجة مهمة اتمشي ليه او غادي تسرق ليه ..جمع الوقفة توجه لدوش وتواجه مع المرأة ..حط يدو على القلادة لي فعنقو و لمس الحرف لي كيلمع فأخر السنسلة ...كانت سلسلة عفراء لي خلاتها ليه و مزال للأن حاطها فعنقو و مزولهاش مزال عندو امل انه يلقاها و تكون مزال عاقلة عليه ..وامل ضعيف انها تكون كتسناه وهاد الامل لي بدا كيستسلم منو ..

توضى ولبس فوقية ديال صلاة باردة ...دخل لبيت لأخر بان ليه امين ناعس خلاه و مشا هز سوارتو و خرج مع ادان الفجر متوجه لجامع ...

مع ادان الفجر تنهدات بشوي كطل من النافدة ديال الصالة لي كطل على شارع ..كتشوف رجال غادين لمسجد وتار انتباها شاب فمقتبل لعمر حادر راسو ومتوجه لجامع كما العادة ..تبسمات من شافتو رغم انها معرفاتوش لكن دائما كتشوفو غادي لمسجد فهاد الوقت ولي تار انتباها انه صغير فسن وتار اعجباها بلا ما تحس ...

جلسات حداها مينة لي ناضت تصلي لفجر و شافت فين كتشوف ...

مينة : شكون هداك ؟؟..

عفراء : معرفتوش ولكن كيبان ليا ديما غادي لجامع ...

مينة : ديما سهرانة اتخرجي على عنيك بتليفون...

عفراء حطات دقنها على يديها ساهية : ماشي تليفون لي مسهرني ...

مينة : ومالكي فايقة دابا ياك مكتصليش ...

عفراء هبطات نضراتها بحزن : حلمت بجعفر ...

مينة بدون فهم : جعفر ؟؟ ..واش هداك لي كان ساكن حدانا فلقبيلة ...

حركات راسها بالإيجاب بينما مينة جاتها ضحكة ..

-نوضي تنعسي اصاحبتي سيد ايكون عايش حياتو و والد ونتي مزال كتحلمي بيه ...

عفراء دورات اصابعها على شعرها مع تنهيدة طويلة ...

-معرفتش أصلا مكنحطوش فراسي بزااف غير هاد ليلة حلمت بيه من عتقني من العافية وفقت قلبي ممرتاحش ...

مينة جمعات الوقفة : داكشي ديال صغر اعفراء وضروري متنسايهش راكي كنتي غادي تموتي كون ما كان هو لي رما راسو لعافية و عتقك ...

جرات رجليها لعندها و عنقات راسها وخبات وجها بين يديها وبصوت مخنوق نطقات ...

-توحشتو بزاااف ...

معرفات مينة ما تقول ..وخا كانو صغار ولكن باش واحد يعرض راسو لموت باش يعتقك ..فهنا كينتهي كل معاني الحب و الوفاء ..لكن هنا كيبقى عامل العمر و الزمن انهم كانو صغار و تفرقو لسنوات عديدة تا حد ما عارف على لأخر فين هو ..

يتبع...