قدر المنحوسة الجزء التاسع

فبيت نعاس كيدور من جهة لجهة وملامحو قاسية وكيسوط بجهد داير يدو ورا ضهرو وكل مرة بشوف فلطوف لي واقفين حداها ولادها..

حشم يغوت علبها و ولادها تبارك الله ولا شيب ينوض ليهم..هز جلابتو من لتحت وجلس قدامها كيضرب فرجلو..

سي لعربي: عجبك هاادشي لي درتي ..

لطوف مخرجة عنيها : انا اش درت ڭاع..

لعربي كيحرك فراسو ..

- لااا مادرتي والو الالة غير قتلتي البنت بالعصى وزدتي بداك الكلام زين واش هاديك بنتك ولا عدوتك ..ناس يهزو بي بناتهم ونتي جالسة تهبطي منها قدام الراجل...

لطوف : علاش كدبت ... گاع لي قلتو فيها ، بنتي ونشهد فيها ..

لعربي ناض ليها كيغوت: نتيي شغلك الالة واش عاد اتوري عفراء لجعفر ..سيد باغيها كما هي دخلي سوق راسك وهضري مع بنتك بينك و بينها ما يسمع هضرتكم حد...

وقفو دراري ممخلينهش يدوز ليها كيبوسو ليه راسو ..

علال: صافي الواليد متعصبش مسحها فيا..

العربي: هضرو مع مكم هادشي لي دارت فيه ممزيانش ...

وقفات لطوف كتغوت كثر منو ..

-شنوو لي مزيان اسيدي نزوجوه لبنت قبيحة وكتشوف فسما مكافيها لأرض..باغية كثر من عيشتها وفمها ماضي ودراعها خاوين ما تعرف تقضي شغل ولا طيب بحال ناس..شغادي نزوج اسيدي نعطيه بنت خاوية ...

لعربي: ماااشي صوووقك ...

لطوف : صووقي قالك ماشي صوقي...جعفر بحال ولدي ونبغي ليه لخير ويعيش هاني باركة غير والديه لي خلاوه وهو صغير وعاش مكرفس و نزيد نعطيه بنتي يتكرفص وهو كبير... مع جهنم كحلة تعيشو المرار و تكرهو فحياتو ....اسيدي لكنتو نتوما راضين على هادشي انا مرضياش ..معشتش انا و الكبيرة وكلينا من طبسيل واحد باش نحرقها فكبدتها وهي فالقبر ..

العربي تهدن ورا كلامها ونطق بشوي..

-ليام كتبدل وعفراء راها قابلة وغادي تغيِّر مع الوقت...

لطوف نزلو ليها دموع بزز منها بحرقة فقلبها...

-راها بنتي واعز ما عندي فخوتها كاملين وخا نقول لي قلت راها عينيا لي كنشوف بيهم ..ولكن راني كنعرفها مزيان وشكون يعرف البنت من غير مها لي ولداتها ...واش انا كرهت نزوجها ونرتاح من جيهتها مع الولد لي يستاهلها ولكن عييت ما نهضر وما خليت ما قلت ولكن ما تبدل فيها والو مزال كما هي شايفة راسها فوق كلشي وباغية تعيش فطبقة عالية ...

"تنهدات بجهد كتمسح دموعها""

-عفراء عنيها كبيرة وخايفة نهار تزوج بجعفر ويدوز الوقت تندم وتعيشو معاها فالمرار وتكرفسو وانا منرضاش هادشي لولد لكبيرة ..

سكتو ورا كلامها حدرو راسهم وما قال حد فيهم حرف..اش ايقولو وهما لي عارفين عفراء كما عرفها لطوف ولكن قالو جعفر كيبغيها وايصبر عليها لكن نساو ان الصبر ليه حدود ونساو ان جعفر عاد بدا فطريق وقال بسم الله ما يقدر يحقق متطلبات عفراء المادية لي فوق قدرتهم هما لي عائلتها ...

اما لالة لطوف هي لي ضاربة حساب لهادشي وكانت تجاهل وتقول ما قال باها وخوتها "جعغر كيبغيها"..

لكن كلام عفراء اليوم خلاها تفهم ان بنتها عمرها تبدل شي لي خلاها ضربها ودارت سبة بالغيرة اما الضرب كان ليه اسباب اخرى ما تعرفهم غير لالة لطوف لي دات وجابت فدنيا وعارفة بنادم اش تحت راسو غير من شوفة فكيف ما تعرفش بنتها لي ربات بيديها و كبرات قدامها ..

الحاصول الﺠﺮﺡ ﻳﺒﺮﺍ ﻭﻳﺼﻴﺮ ﻣﻠﻤﻮﻡ ﻭﻛﻼﻡ ﺍﻟﻌﺎﺭ ﻓﻲ ﺍﻟﻘﻠﺐ ﻳﺒﻘﺎ ﻣﺮﺳﻮﻡ و لالة لطوف عارفة كلام العار ايجي من فم بنتها ويصيب قلب جعفر ويبقا مرسوم ...

وقف سيارة وخرجو مشادين فليدين وهي كتدور عنيها متعجبة ..

عفراء: واش كتسكن هنا..

كتفى انه يحرك راسو فقط بالايجاب..

عفراء: واو قريب لينا بزااف ولكن عمري شفتك فهاد لبلاصة ..

جعفر: مساكنتش بزاف.. تقريبا عام وزيد كنت مشغول كنجي ليها غير فليل نعس و صافي..

طلعو لشيقة حل لباب دخلات هي الاولى عاد دخل وراها ..دور يدو عليها معنقها من لور وهي كضحك...زير عليها ونطق حدا ودنيها...

جعفر: مرحبا بيك..

عفراء: شكرا.."دورات راسها على دار لي بسيطة وصغيرة "..دارك زوينة ...

جعفر تبسم بشوي : مغاديش نعيشو فيها ...

جرها جلسها فصالون ..

-تشربي شي حاجة ...

عفراء : شنو عندك ..

حك راسو : صراحة معرفتش كوزينة مكندخلش ليها ...

هزات راسها كضحك :تانتا بحالي معرفت شكون ايطيب لينا من انتزوجو..

جعفر هز حجبانو فيها: تعلمي..

حركات راسها برفض: اهووو داكشي ديال كوزينة غير نساه معنديش معاها بكل صراحة ...

هز يدو وتوجه الكوزينة :وخا الالة كوني غير على خاطرك ..

دخل لكوزينة وبقات هي جمعات لوقفة كدور راسها على دار ..توجهات لبيت نعاس والوراق لي مستفين فوق البيرو ..وخا دار على قد الحال لكن كانت مرتبة و مموسخاش مباينش انه عايش فيها زوفري ...

كمشات حجبانها وبقات كتقلب قنت بقات حتا دخل عندها مصغر عينو ..

حعفر: مالكي!!!..

عفراء: كان معاك شي حد ليوم ...

جعفر هز كتافو :نو علاش..

بقات كتشوف فيه بصمت وهو كاه شك من نضراتها ...

جعفر: بغيتي تقولي شي حاجة...

عفراء تزيرات : بيت نعاس ديالك فيه ريحة ديال مرا ...

تبهض فكلامها ما عرف باش يرد بقا غير كيشوف وهي مخنزرة ...

عفراء : كانت معاك ياك ..شكون!! لخليجية ولا ديك الحمارة ديال اية ..

جعفر تبسم من الغيرة لي فعنيها رغم انه كبحاول يخفيها لكن واضح ابتسامتو ...

تقدمات عندو دفعاتو بجهد : دايرني ضحكة ولا شنو ..

جرها عندو عنقها وهي كتلوى وسط منو..

عفراء : طلق ازبل هادشي مكيضحكش ...

جعفر : مكاين والو من داكشي لي فراسك ..

عفراء بعيون حمراء: وريحة لي شميت ..

جعفر: اتكون غير ديال الحاكة عاطيها ساروت كتجي تشوف دار اش خاصها واتكون جابت معاها اية ...

هزات ليه يديه عضاتها بجهد معصبة وهو خسر ملامحو نتيجة العضة لكن خلاها تعضو تا حبسات على خاطرها ...

عفراء: زبيلة ماشي اية شبينك وبين هادي باش دخل عندك لدارك...

جعفر : مابيني وبينها والو غير متكفل بيها وصافي ...

عفراء: وعلااش اسيدي تكفل بيها مالها معندهاش والديها ..

بقا ساكت فقط راسم ابتسامة خفيفة وهي مدتهاش فيه بقات كتنگر ..

عفراء: اخر مرة اجعفر نشوفك معاها .. انا هادشي معنديش معاه و البنت كتشوف فيك شي شوفات ماشي تال لهيه وباين كتعجبها وانا مغاديش نصبر ليها ...

جعفر حيد يدو لي كانو معنقينها وحرك راسو ببساطة..

-يكون خير ...

دورات يديها على عنقو حسات بيه مزير ...

عفراء: لا قول ليا عمرك تلقى بيها مزال..

بدون ما يكدب جاها نيشن لصراحة ..

جعفر: منقدرش نواعدك على هادشي و اية ماشي بحال لبنات غير نساي عليك الغيرة تجاها...

عفراء بعدات منو: وخا اسيدي تا نتا من تلقاني مع دراري متجيش تسولني شكون هما ...

هز حجبانو : مالنا على هاد الهضرة كاملة ...

عفراء: شوف نتا شنو كتقول...

حرك راسو مبغاش يزيد معاها فالهضرة..

جعفر: وخا الالة اية غادي نرسلها لقبيلة اتعيش تم ولكن انبقى متكفل بيها ما حدي فالحياة...

عفراء تزيرات: لهاز درجة عندك غالية ..تخسر ليا خاطري على ودها هي...

جعفر : ماشي قضية خاطر اعفراء ..اية دازت من حوايح خايبين وبالنسبة ليها انا شي حاجة زوينة فحياتها كنحاول نعوضها بلي قدرت وهي عارفة كلشي وعارفاني باغي نتزوج بيك ...

ساطت بجهد..

-صافي نسا عليا مبغيتش ندابز انا وياك عليها ...

حاوط حناكها بحنان قبلها فجبهتها وهبط عندها نطق بصوت دافئ..

-تيقي بيا مكاين تا مرا اخرى من غيرك وعمرها غادي تكون ...

غمضات عنيها بدفئ كلامو وكتبعد لوسواس لي تملكها فهاد اللحضة وترجع تيقتها بنفسها ..

لان كلمة المنحوس لي كبرات معاها خلاتها تخاف من الاشياء لي دايرة بيها وزرعات بدرة شك فكلشي لدرجة احيانا كتصدق انها فعلا منحوسة وخايفة نحسها يبعد عليها جعفر ...

لكن كلامو كان بحال دواء لشكوكها ورجعها لتقتها فنفسها...

تبسمات اخيرا ودورات يديها على خسرو ونطقات بصوت هامس....

عفراء: انا معجبة بيك بزااااف اجعفر..

"هزات عيونها فيه ودقنها محطوط على صدرو وكملات كلامها "

-معجبة بيك كثر ما تصور....

تبسم كيلعب فحناكها وعينون كيلمعو كان فاهم كلامها فقط من قالت "كثر ما تصور" عنات بيها انها كتبغيه ...

وهي بعيون متلئلية كتشوف فيه شكلو و وسامتو جدبوها وخلا قلبها يسرع دقاتو اكثر ..

كفاش كيشوف فيها و لمسات اصابعه على خدها و ابتسامة لي مزينة تفاصيل وجهو الرجولي و عيونو الخضراء لي كتسحر كل من رأهم ...

كلشي فيه سحرها لدرجة مكتصورش شي لي خلاها توقف على اصابعها و تقبلو بدون خجل ....

قبلة رقيقة وطويلة خلات شفاهم ملتاحمين مع بعض...

اعجباها بيه كان فشكل بالنسبة ليها لانه مكانش اعجاب عادي ...

كان مبني على الحب مخلط مع الرغبة ..معاه كتفقد سيطرة على قلبها ونفسها و تبغي دير معاه حوايج عمرها دارتهم..

تفارقو شفاهم على بعض بأنفاس كل منم كضرب فالاخر وعيونهم كيحملو مشاعر غريبة خلجات كيانهم مع بعض ...

اول مرة بجوح بيهم كيحسو بهاد شعور الغريب..شعور الغريزة لي كتحكم فيها الشهوة و السعادة فنفس الوقت ولكن كان جدار مانعهم ..جدار ما يقدروش يفوتوه ..

نطق وصوتو تقيل ...

جعفر: غدا نديرو العقد وخلي العرس من بعد ..

حركات راسها بالايجاب مقدراش تصبر مثلو تماماً...

فقط عيونهم لي كتكلم على مشاعرهم فهاد اللحضة الغريبة لي وصلو ليها...

لانهم بجوج كانو اول مرة لبعضهم فكان المشاعر و الأحاسيس اكثر من ان يصفها اللسان ...

أحبكِ برغبة...

أن أفني عمري...

سعياً إليكِ،...

و وصلت...

فشعرت حينئذ بالرغبة في ان ادخلك داخل قميصي اخبئك تحته...

ان احتضنك حتي تلامسين عظامي وتمتزجين مع اوردتي...

فـ تخبريني بأنكِ تريديني بصمت...

بدون إستخدام الكلِمات فقط بإستخدام..

"رحيق شفتيك"

في نصف الليل بعد ما رجعات لدارهم ومزال حناكها حمرين و عيونها كيلمعو كل مرة تبسم غير بوحدها ...

توجهات لمكتب ديالها جمعات لوراق لي خاصها حطاتهم فصاك ديالها وتوجهات لماريو هزات بيجامة وبرودويات لي تحتاج لدوش ترطب لحمها وتنقي داتها ...

اما لطوف من دخلات وهي حاطة عليها العين ..وقفات قدام باب بيتها كتشوف اش كدير مخنزرة وماعجبها حال...

لطوف: فين كنتي..

عفراء :كنت مع جعفر ..

هزات حوايج لي خاصها ودازت من قدامها متوجهة لدوش..

لطوف: فين غادة..

عفراء كتكلم بالعبار وببرود ..

-غادي ندخل ندوش...

لطوف: علاش ادوشي شنو درتي...

عفراء: كفاش اش درت؟؟؟..

لطوف: نسولك نتي الالة لي مشيتي مع راجل ...

عفراء بصدمة: واش حماقيتي امي..

لطوف: دوش الالة مايدخلو ليه غير لي دايرين علاش..

عفراء تعصبات : البارح ما قلتي والو عاجبك الحال وفرحانة بيه وتقولي نسيبي زين الرجال ودابا حيت دار فيك بديتي تلقاي سبة تفرقينا...

لطوف شداتها من دراعها مخرجة فيها عنيها...

-نقصي من طيارة والخروج بلا وقت ..جعفر بغاك ايجي لدار يشوفك كيف كيدير امين مع مينة ماشي تلقاي سيبة وتبعيه لدار وديري ما بغيتي تقلي شوي اعفراء جعفر متقل ورزين ايبغي مرا متقلة وبعقلها ماشي كطير من المقلة ..

عفراء نترات يديها : هو كيبغيني وقابل عليا ومقال والو نتي امي لي نقصتي مني قدامو ..كلشي كيشكر بناتو الا نتي لي ديما كتهبطي مني بحالي ماشي بنتك..

لطوف : الحب مدايمش اعفراء راكي اتندمي سيد عاطي لعين وخدام على راسو تبقاي نتي طيري وتجي وحدة بعقلها مرزنة طيرو ليك وعمرك تحلمي بيه..

عفراء تفقصات: مغااديش يخليني كيبغيييني امي واش كتفهميييي تا وحدة ما تجي فبلاصتي... كاين عفراء وحدة لي فقلب جعغر لي هي انا ومن غيري مكاينش ...

دخلات لدوش خلات لطوف كتغوت من وراها..

-رااجل يصبر تا يعيا ونهار يقضا صبرو ما يعرف حب ولا زمر ..بقاي طيري ونهار تجيبيها فراسك تفكري كلامي مزيان ....

رجعات خرجات من دوش مبردة سوق..

عفراء: عرفتي امي شنو ..نجيك من لخر انا وجعفر غدا انديرو العقد وانا قبلت ..من غدا مغاديش تبقاي تشوفي وجهي وتهناي من كمارتي ..

رجعات لدوش سدات لباب مجهد خلات لطوف واقفة فبلاصتها مصدومة وسي لعربي طل عليها من بيت نعاس ونطق بشكل عادي ...

لعربي: نسيت ما قلتش ليك قبيلة من خرجت مع جعفر قالي ايدير لعقد غدا بعفراء ..

رجع دخل لبيتو يكمل نعاسو خلاوها بحال تالف مصدومة..

في الصباح الباكر واقف امام المرءاة كيقاد ساعة في يدو وعلى ملامحو ابتسامة كتوضح الفرحة ديال هاد نهار لي تسناه بزااف..

رش شوية ريحة دوزها على لحيتو لي مقادة وشعرو مرجعو لور ...

دخل عليه امين كيضحك ..

امين: هاي هاي على سيدي لعريس وراك منور ليوم ...

جعفر : الله يحفظك ، وجدتي دوك لوراق لي قلت ليك ...

امين هز محفظة لي فيدو ..

-ها هما موجودين .."تكى على الحيط"..اوا دابا اسيدي انوليو نساب ...

حغفر: انشالله ...

امين : اودي سبحان الله شكون قال نتا لي ما كتهز عينك فالمرا غادي تزوج بعفزاء جهنم الكحلة شخصيا ...

خنزر فيه جغفر وهو يبدا يضحك ..

امين: دابا كتخنزر عقلتي من مكنتيش كتحملها وغير نجبدها ليك تعصب ...

جعفر ضحك بزز منو : مكنتش كنعرفها لكن حمدلله كنتي نتا سباب باش نتلاقا بيها ...

امين قرب ليه حط يدو على كتفو ونطق بحب اخوي واضح بيناتهم ..

امين: مبروك عليك اخويا تستاهلك و تستاهلها..

جعفر: الله يبارك فيك..

هبطو مع بعض ركبو فسيارة متوجهين لمكتب لعدول وجعفر من عينو باين عليه الفرحة ..

الفرحة ديال نهار لي تسناه شحال واليوم كيتحقق البنت لي بغا و خطفات قلبو ليوم اتولي ليه حلالو ومراتو ..

حط يدو فجيب سروال وجبد منو بواط احمر ..حلو وبان خاتم ذهبي كيلمع مركزة وسطو جوهرة كبيرة ومدورة عليها جواهر صغار كتبري مع الضوء..

كيف طلبات وقالت وهما صغار يجيب ليها احسن خاتم وها هو ليوم كيوفي بوعدو وجاب ليها خاتم مصنوع خصيص ليها ..

خاتم مكاين مثلو فهاد العالم و الوحيدة لي اتملكو هي عفراء ..اسم على مسمى...

عفراء لي تعفرات وتعلات على كلشي الا جعر لي كان ليها هو الامان و الراحة ...

حط يدو على قلبو لي كيدق بجهد فرحان كيتسنى غير امتا سميتها تكتب حدا سميتو ويوليو حلال بعض وديال بعض..

يارب ما تعمر قلوبنا غير بالحلال وخا يضيق بينا الحال راه حتى حاجة ما عندك محال...

وقفات سيارة امام مكتب لعدول ..خرجات شادة فيدين خوها لكبير طالقة شعرها ودايرة مكياج خفيف مخليا سر باين فيها و الفرحة لي كتبنا من عنيها ..

هو لي كان واقف كيهضر مع امين دور راسو من شاف سيارتهم وصلات وفور ما شافها تخبط قلبو بقوة ورجع كيدق بجهد كأنه اول مرة غادي يشوفها ..

تقدمات عندو بجلابتها البيضاء والحشمة مزنكة وجها ..حشمات وهبطات عنيها من نضراتو لي كيتفحصو كل انش منها ..

دخلو وهي مزال بعيدة منو داخلة بين خوتها لي كيهضرو معاه وهو كيجاوب معطل لأن عقلو غير معاها..

بقاو كيضحكو من شافوه مغيب وعينو عليها ما تهزات ...

جروها عندو جلسوها حداه وهي اتموت بالحشمة بغات تهرب ترجع لخوتها وهو يشدها جرها عندو جلسها حداه ...

جعفر: ما عندك فين تهربي..

العربي كيضحك فرحان: صافي ابنتي اتولي ديال راجل مابقيتي محسوبة علينا ...

جعفر زير على يديها : بنتكم اتبقا ديالكم انا مغاديش نبعدها ولا نخليها تعيش بوحدها..

لعربي حرك راسو جاتو البكية ودراري واقفين ورا ختهم حاطين يدهم على كتافها والفرحة مخلطة بدموع فعنيهم ...

وخا واعرين وقاصحين مع كلشي لكن معاها كان العكس من صغرها وكلشي ضدها وهما كيحاولو يعوضوها من كلام الناس لي سمم داتها...

وخا كيقولو فششوها لكن العكس هما كانو باغيين غير يحميو ختهم صغيرة لي كبرات بين عنيهن لدرجة كيحسبوها بنتهم اكثر ما هي اختهم...

ودابا ها هي قدامهم اتولي مرات راجل ..واتسكن فدار اخرى واتسند على شخص اخر غيرهم ..

دور علال راسو كيمسح دموعو وعبدالقادر مهبط راسو وهي لي وسط منهم حاسة بيهم غير من يديهم لي كترعد على كتفاها ..

عضات فمها بالغصة لي وحلات فحلقها كتهددها بنزول دموعها لي مبغاتش تنزلها فنهار ديالها في فرحها والراجل لي بغات حداها ..

تنفسات بشوي وتنهدات ببطئ وصوت هامس نطق حدا ودنها فقط هي لي كتسمعو ..

جعفر: مولاتي...

تبسمات بكلمة لي نطق ولي عنرها سمعاتها... كانت ديما تسمع غير منحوسة او جهنم الكحلة اول مرة يقول ليها شخص هاد الكلمة..

وما ادراك يقولها لي مثالك قلبك وبغاك بكل عيوبك وما تشكا من والو وزاد حطك فمكان ما يوصل ليه حد ونطقها بصوتو الرجولي لي فيه بحة مميزة "مولاتي"...

خلا قلبها فرحان وكأنها تولدات من جديد وتخلقات حياة جديدة ..حياة اتعيشها مع جعفر بكل ما فيها..

بعز ما وجدو العدول العقد شافو فعفراء ..

-شديتي ابنتي صداقك ..

تقدم العربي بغا يقول ليه صداق تعطا زمان وهي كانت مزال صغيرة لكن توقف مجم

عد حجبانو من شاف جعفر جبد وراق عطاهم لعدول لي بدا كيقرا بصوت مرتفع..

-بنتي صداقك هو ارض ودار في حي الرياض هنا فرباط واش موافقة على هاد صداق..

سي لعربي و ولادو وامين معاهم خرجو عنيهم بصدمة بينما هي بتسمات فرحانة وحركات راسها بسرعة ..

عفراء: اه قابلة ...

كلشي سكت بقا غير صوت العدول لي كيتكلم وجعفر كيجاوب حتى عطاهم ستيلو يسنيو على العقد..

سنا هو الاول ومد ليها ستيلو وقبل ما توقع شافت فيه مزيان وقالت ..

عفراء: قبل ما نسني بغيت نقول شي حاجة .....

العربي خرج عينو : عفراء شهاد الهضرة سني ناس كيتسناو ..

جعفر كيشوف فيها : تكلمي..

باها وخوتها و امين كلهم طالقين و دنيهم خايفينها تقول شي حاجة وحيت عارفين عفراء مزيان خايفين تقول شي كلام ماشي ديال هاد نهار ..

بقا علال كيشوف فعبدالقادر لي كيشوف فيه بدورو ...

تنطق صوتها بهدوء...

عفراء: اول حاجة حلف عمرك تخلى عليا ...

تبسم بعد سؤالها وعطاها جواب ديالها ..

-عمري انتخلى عليك..

عفراء: حلف عمرك تقلق مني ولا تقول عليا منحوسة وخا يوقع لي وقع ..

جعفر: عمري قلتها وعمري غادي نقولها ولي مكتبو لينا ربي انرضاو بيه ...

عفراء: عمرك تخوني ولا تجيب عليا ضرة..

جعفر جاتو ضحكة وحبسها بزز من شافها كتكلم من نيتها...

-كاينة غير نتي مولات قلبي...

تنهدات بعد كلامو فرحانة وباين من عنيها كلشي..

سرحات فشوفتها ليه فصمت وبعد مدة اخيرا نطقات وتكلمات كلام لي تا حد ما ضرب ليه حسبة انها تنطقو...

ما حشمات من باها ولا خوتها لأن الكلام خاصو يتنطق دابا باش تا حد ما يدير ليها كما لطوف ..

هي ماشي بنت البارح لي متفهمش اش كيعني زواج و مسؤوليات ديالو ..وماشي غبية باش تعيش فالخيال وتدمر راسها بيديها ...

هي بنت 22 سنة من صغرها وهي كبر من عقلها وتعرف تخمم وتفكر وتشوف طريق لي يناسبها وعمرها تلاحت لحاجة ماشي ديالها واي خطوة كضرب ليه الف حساب وحسبة ..

كيضنوها حمقة وتبعو كلام لطوف من شافوها ماكتسوق الحد ولكن نساو انها كدير ضد غير مع لي قال عليها منحوسة وهي تبغي تبين العكس وتعلى عليه وتكبر ما كتبقا الارض قادها..

كلشي خايف كفاش جعفر ايعيش معاها وهي لي عنيها كبيرة وطلب فوق طاقتها ...

ولكن عمرهم سولو راسهم علاش كانت كترفض رجال لي كانو يجيو يطلبوها بفلوسهم وبخيرهم ورغم كلشي كانت ترفضهم وتقول بكل تقة باغية حسن منهم ..

وهما عقلهم يمشي انها اتقبل غير لي عندو فلوس كثر بينما هي كلامها عنات بيه حاجة اخرى..

عنات بيه راجل لي يتقبلها بكلشي ليها وميعيرهاش بالكلمة لي عقداتها ومرضاتها فصحتها ..

نطقات كلماتها لي ما ضرب ليهم حد حساب واولهم جعفر...

عفراء : صبر عليا ولا غلطت نصحني ولا معجباتكش شي حاجة درتها قولها ليا وماتسكتش وتعاملني ببرود ..وخا راسي قاصح ولكن مكنفوتش الحد.. عطيني الخاطر وساعف معايا وعلمني غير بالمهل ماشي كلش كيجي دقة وحدة ولكن انحاول نتبدل باش تشوفني كيف باغي...انا مزال صغيرة واحلامي كتيرة وباغية نحققهم ونشوف الدنيا ونعرف ناس اشكال و انواع ...

ولكن فهادشي كلو نتا هو اكبر احلامي اجعفر بغيت كلشي نحققو معاك ..قريني و فهمني وماتقنطش مني عطيني الخاطر وماتعصبش عليا .. بغيني كما انا كما انا بغياك كما نتا ...

بعد كلامها وقع صمت تام ...تا حد ما نطق ولا قال حرف من بعدها ..جعفر بقا غير كيشوف فيها ونضراتو ليها فشكل ...

هزات ستيلو سنات ورجعات اخيراً مراة جعفر ، مولات قلبو ودارو ....

هي كضحك وهو كيشوف فيها ..وقف و وقفها معاه نسا راسو فين و معامن وشنو خاصو يدير ومعامن يتكلم كانت فقط هي وكلامها لي كيدورو ليه فراسو...

جرها خرجها ركبها معاه وشد طريق طويلة و بعيدة خارج رباط ويدو مشبكة مع يديها معتازلبن الكلام و مخلين الصمت بيناتهم ..

شيء الوحيد لي مشاركين فيه هو الفرحة لي باينة فعنيهم..

عمرها ضنات انها اتزوج بهاد طريقة وهي عفراء لي طلباتها ديما كبار ولكن معاه مقدراتش تصبر تا يخطبها ويطلب يديها كيف بغات وحلمات ...

معاه كتنسى راسها و كيتغلبو عليها مشاعرها ومكتقدرش تحكم فنفسها ..بغات تكون معاه وحداه وأي حاجة تأجل لأنه فقط جعفر ....

اسم لي رتابط معاها مند زيادتها ليضيف قدر جديد الى لقب لي خدات فور ولادتها كذالك فأصبح عنوان حياتها في داك اليوم والى هذا اليوم ..

بـ "قدر المنحوسة "..

وقف سيارة خرج ودار عندها حل ليها لباب شد ليها فيديها وخرجها وهي كتشوف فالعمارة لي قدامها وعلى ملامحها تسائل..

عفراء:علاش جينا هنا ...

جعفر:ندخلو و تعرفي ...

طلعو فسانسور لطابق الرابع وقف امام بابا شقة وخرج من جيبو ساروت مدهم ليها ...

جعفر:حلي لباب..

رجعو عنيها كيبريو :واش هادي هي دار لي عطيتيني فصداق..

حرك راسو بالايجاب وهي خدات منو ساروت فرحانة... حلات لباب و دخلات منداهشة وهو وراها مبتاسم لفرحة لي ضاهرة على ملامحها..

بدات كدور فالشقة لي كانت واسعة فيها جوج بيوت نعاس وصالون كبير مقابل مع صالون صغير وكوزينة مفتوحة على صال مونجي وباركو كبير وكلو جاج ...

دارت عندو فرحانة ...

عفراء:زوينة بزااف علاش عطيتيها ليا باين اتكون غالية ...

قرب عندها حط يدو على خدها لمسو ببطئ وقرب اصبعو حدا عيونها لي كيلمعو سرحان فيها وفجمالها ولون عيونها الطبيعي لي هو البني الفاتح شبيه بالعسل من كتضرب فيهم شمس ..

كانت عفراء لي كيعرف بدون ليلونتي لي غيرو ليها الملامح اما دابا فيوم عرسهم كانت كلها طبيعية حتى شخصيتها لي كانت مخبياها بالبرود و العصبية والانانية والغرور ليوم بيناتها ونطقات ما فقلبها ..

عارفة راسها شكتسوا لهذا سبقات ليه باش يصبر عليها لأن التغيير عمرو كيجي دقة وحدة المهم هو انها مستاعدة تغير لأجله فقط ..

تحرجات بنضراتو المتفحصة كأنه باغي يدخلها فعنيه..

عفراء:علاش كتشوف فيا...

جعفر بتنهيدة طويلة : زوينة بزااف ..

عفراء بفرحة: زيني يستاهل هاد دار لي عطيتيني ...

جعفر حرك راسو برفض...

لا ..تستاهلي اكثر منها ولكن اليد على قد الحال هذا ما قدرت عليه ولو كان بالإمكان نعطي كثر كون عطيت وما بخلت عليك ....

حدرات راسها بعد كلامو ما عرفات ما تقول ولا تزيد ...

دور ليها شعرها ورا ادنها بعد ما شاف خجلها ونطق بصوت واضح...

جعفر: تمشي معايا لدار ليوم ..

تزيرات من فهمات قصدو وزادت الحشمة من تفكرات اش كيتسناها ...

عفراء:ماما موجدة لعشا على حسابنا من بعد نهز حوايجي و نمشي معاك ...

حرك راسو بفهم :خاصك شي حاجة ..

عفراء: لا عندي كلشي ...

دخل يدو فجيبو جبد الخاتم وهز يديها لعندو ركبو ليها وعيونها كيمشيو بينو وبين الخاتم جاتها ضحكة ..

كمش حجبانو بدون فهم : مالكي ؟؟..معجبكش!!..

عفراء:نو زوين بزاف ولكن ماشي هادشي علاش ضحكت غير ..

سكتات عاضة شفاه ديالها ..

جعفر:كملي اعفراء ، غير شنو؟؟؟

عفراء هزات راسها كضحك من شافت التردد على ملامحو ....

-غير حيت ركبتي ليا الخاتم نيشن انا كنت نتسناك تهبط على ركابيك وطلب يدي بحال داكشي ديال الافلام ..

جرها عندو دور يدو على خسرها وهمس ليها حدا فمها ..

جعفر: وليتي ديالي شمن يد غادي نطلب ..

عفراء: بغيت غير نعيش اللحضة ...

تنهد وكيف بغات وخا معندوش مع هادشي ولكن دار ليها خاطرها ..كيبقى نهارها وبغا يفرحها ...

هبط على ركبتو امامها هاز خاتم وعينو فعنيها ...

جعفر: عفراء تقبلي تزوجي بيا ..

عفراء هزات حجبانها :خصني نفكر مزيان ميسيو جعفر بن طالب ...

جعفر :معندك فين تهربي ، ختاري يا انا يا انـــا...

مدات يديها كضحك ركب ليها الخاتم ونطقات بصوت هامس ...

عفراء: مكاينش اختيار من كتكون نتا ...

هبطات عندو وهو مزال على ركابيه قبلاتو فجبهتو قبلة حنينة وفيها شكر على كل الحوايج لي دار على قبلها..

خلات جسدو يشتد بقوة بالقبلة الحنينة لي تحطات على جبهتها ...بقا فبلاصتو ما عرف يوقف ولا يبقى جالس ..يتكلم ولا يبقى ساكت ..تلف كما عادتو من يكون معاها ..

مجموعبن كاملين فدار سي لعربي لي باين عليهم الفرحة بهاد نهار ..

جالسين رجال بوحدهم فصالون مجموعين كيضحكو وخالد جالس حدا جعفر كيديو و يجيبو فالهضرة ومزال خالد منداهش ومستغرب ...

سي العربي: نسيبي ياك لباس...

خالدشار بصبعو لجعفر ...

- صراحة مزال عاقل عليه من كان صغير ...من جيت نطلب يد عويشة وفين ما نبغي نهضر مع عفراء كنلقاه كيشوف فيا مخنزر وما عاجبو حال ودابا سبحان الله شكون قال سيد ايكبر وهو لي اياخدها ...

علال: اسيدي هي ديالو من كانو صغار غير لفراق لعب دور والحمدلله غير من رجعو تلقاو راهم مكتبين لبعضباتهم ...

جعفر مكتفي فقط بإبتسامة مزينة ملامحو هاز فيدو كاس ديال اتاي وكيسمع ليهم وكيدخل بكلمة ولا جوج و يرجع يسكت ماشي حيت مباغيش يهضر ولكن هادي عادة فيه كيهضر غير بالمفيد اما يدي ويجيب معاك الهضرة بحال ناس معندوش معاها...

هو من نوع لي مكيشبعش بنادم هضرة وهادشي لي خلا خالد يزيد يحتارمو حيت عرفو هو لي ايناسب عفراء وعقليتها...

عبدالقادر : دابا بقا لينا غير امين قريب نفرحو بيه نشاالله ...

امين لي معندو علاش يحشم قال ..

-انا واجد من دابا عطيوني غير مراتي عمر وجهي تشوفوه مزال ...

علال بالفرحة ضحك عن غير عادتو وبعد ديك تغوبيشة لي ديما حاطها بين حواجبو ..

-اسيدي الكلمة راني عطيتها ومنرجعش فيها ، دير غير العقد و البنت تولي ديالك...

امين بفرحة : الله يكبر بيك انسيبي ...

خالد: نتا سبقتي الكلمة قبل ما ينطقها جعفر لي سابقك ...

امين : لا اخويا خالد انا لي سابق هو غير جا معايا ضيف تا صدق هو مزوج وانا مزال ...

العربي فرحان بالعائلة لي تجمعات والقلوب لي تولمات فرحان تا ولاو دموع يتشكلو فعنيه من يتفكر بنتو صغيرة تزوجات ..

فوسط كلامهم دخلو جوج دراري من لباب كينهجو سخفانين وحبات عرق مشكلة على جبهتهم..

طوال وجسمهم عريض باين فيهم القوة ونضراتهم قاصحين ...لي حروفو كحلة كيشبه لعلال ولي حروفو زعرين كيشبه لعبدالقدر ...

شافو مزيان فالحضور وعنيهم مشات لجعرف نيشن ونطقو دقة وحدة ...

-نتا لي تزوجتي عمتنا ...

فور ما سلاو كلامهم تسمع صوتها من لفوق...

-لخرا لي عمتكم ....

طلعو عندها كيجريو دخلو لصالون مدرمين معندهمش مع هذا صالون رجال وهذا ديال نسا ..

عمتهم لي بين عنيهم وشي لخر ممصوقينش ليه..واحد تابع الاخر كيف توام مكيتفارقوش...

وحيت كبرو مع عفراء كانت هي لي تحضيهم وكبر حبهم ليها معاهم لانها هي لي رباتهم و شخصيتهم جات كتشبه ليها..

اناس: حبي صافي سخيتي بيا..

سليم دفعو مخنزر: قو* من قدامي بقا لمك غير الحب ..."جلس حدا عفراء"...شهاد زربة العميمة ...

عفراء معصبة : لعما نشالله راك طول مني وعرض مني فين كنبان عمتك اخويا ...

سليم تبع اناس فالكلام: وخا احبي مايكون غير خاطرك ...

جلس اناس فجهة الاخر مخنزر وعفراء وسطهم كيف الفلوس خنقوها...

عفراء: واش انا ما قلت تفكيت من علال و عبدالقادر جاو ليا كثر منهم ..

اناس: دابا جينا نيشن شكون هاد خينا وشهاد تزويجة ديال زربة ...

عفراء ساطت بجهد عارفاهم ما يتفكوش معاها حتا يعرفو كلشي..

-سيد كنعرفو قبل ومعولين انا وياه على زواج ومسبق ليا صداق..

سليم هز حجبانو ونضراتو قاصحين ..

-اييه قولي نتي وسيد شحال هادي وعاد بان ليه يجي يخطبك فين كان شحال هادي...

عفراء : نوضو من حدايا اتعصبو ملتي هاد ساعة ..با ومحكمش فيا بقيتو ليا غير نتوما ..

اناس : معاك رجال ميبغيوش لي يضحك عليك ..

سليم: ولي سخن على ديلمو راسو نقطع ليه زنطي*و ...

الحاجة ام امين لي كانت جالسة هي واية دورات زيف على فمها حشمات ودراري مداو مجابو عندهم كيف ضيف كيف مول الخيمة ممسوقينش...

لطوف بين سنانها مفقوصة ..

-هبطو شوفو جدكم اش باغيكم ..

دار عندها اناس: معيطش علينا ...

لطوف مفقوصة : قلت ليكم سيرو جدكم بغاكم ...

جمعو الوقفة من شافو الحاجة سلمو عليها بشكل عادي معندهم علاش يحشمو ضاربين دنيا بركلة ...

جرو عفراء هبطوها معاهم خلاو لطوف اتموت بالفقصة ..

هابطين و كل واحد شاد ليها فيد خلعوها ..

دخلو على رجال جلسو جارين معاهم عفراء حطوها وسط منهم وعنيهم على جعفر ...

-نتا هو نسيبنا ...

جعفر هز حجبانو وحرك راسو بهدوء ..

-اييه هو انا ...

سليم: دنيا عامرة عيالات بانت ليك غير عمتنا ...

جعفر بجدية: هي بوحدها عندي كتسوى كل العيالات فهاد الدنيا ...

كانو موجدين شلا كلام يقلوه ولكن جواب جعفر سد ليهم الفم وخلاهم كيف الاطرش ماعرفو باش يردو بعد ما جعفر قال ان عمتهم هي كل العيالات بالنسبة ليه ...

سليم لي فيه ما مهنيه: ولكن مالك زارب عليها...

جعفر بدون خجل شاف فعفراء ونطق بهدوء..

-حيت كانبغيها...

للمرة تانية جوابو صدمهم رجعو عنيهم لعفراء وهي عاضة فمها حابسة ضحكة ..

اناس: مهم اسيدي حنا لي كيهمنا هو عمتنا تبقى معانا تاديرو العرس وكلشي يعرفها مزوجة عاد ديها ديك ساعة ..

علال وعبدالقادر خنزرو فيهم وهما ماداوها فيهم عنيهم غير فجعفر لي على الفور قال كلمتو ...

جعفر: لا ..انديها معايا ليوم ...

سليم مخنزر: كتحلم بنهار واقيلة ...

علال : سليم جمع فمك وعرف اش كتقول ...

سليم: علاش اش قلت عمتنا هادي وحنا لي مسؤولين عليها ..

جعفر بنضرات حادين عاطيهم خو كلامهم..

-كنتو مسؤولين عليها واليوم ولات ديالي ومن مسؤوليتي ما من حق حد يدخل فيها ...

اناس : ماحدنا ما موافقينش على هاد زواج اتبقى عمتنا ديالنا ...

جعفر : وانا مكنتسناش موافقة ديالكم كما قلت هي ديالي قبل ما تخلاقو ...

قطعو الكلام ما عرفو اش يقولو وشكل جعفر طغا عليهم كيبان مرزن وبعقلو كلامو قاطع وكيقولو تم نيت ..شديد فلهجة وبارد فالنبرة وقاصح فشوفة...

حسو براسهم تغلبو ومابقا عندهم كلام لي يشدوه بيه ومبان لسليم غير يقول..

سليم: فين اخويا حنا كنعرفوك گاع غير جيتي البارح وبغيتي دي لبنت ..ما عرفينك فايت فيك زواج ولا عندك لولاد ولا سوابق ولا فايت داخل الحبس...

فوسط كلامو جاتو دقة لراس دوخاتنو ونطقات بعصبية ..

عفراء: الله ينجيه ويحفظو من ديك لبلاصة ...

تبسم جعفر كيشوف فيها وهي مخنزرة فولاد خوتها ..دفعاتهم وطلعات لفوق خلاتهم تابعين ليها العين ....

سليم شاد راسو مقصح من ضربة لي عطاتو..

- انا بغيت غير مصلاحتها واش انزوجوها براجل مكنعرفوهش...

اناس معصب: رجال لي يسولو عليه مكاينينش غير لي جا يعطيوها ليه عندنا بقرة هنا ...

وقف علال وعبدالقادر فنفس الوقت شارو براسهم ونطقو دقة وحدة...

-اجيو معانا...

خرجو وتبعوهم دراري مخنزرين فجعفر وخا عارفين راسهم ليوم اياكلوها غير من نضرات والديهم ...

اما سي العربي غلباتو ضحكة وما قدر يحبسها ومن عنيه مزال حامل الفرحة وقال فوسط قهقهاتو...

العربي: شفتي اولدي تربيتها فين كتوصل ..

جعفر هز حجبانو متفاجئ..

-عفراء لي رباتهم ..

العربي: اييه اولدي من نهار تزادو وبداو يعرفو شوي وهما لاصقين فيها تا خرجو بحالها فكلشي...

خالد : ها ولادك كيف ايخرجو اجعفر من دابا وجد راسك ليهم ...

جعفر تبسم وبقا ساكت بدون ماينطق فقط عيونو لي كيبريو وامين فهمو غير من نضراتو...

قرب عندو كيدوي بهمس كيسمعو غير جعفر ...

امين: نقول ليك مبروك من دابا... ولادك ايطلعو بحالهم ...

جعفر حك لحيتو بشوي وقال ..

-احسن تربية ..

امين هز حجبانو : كتهضر من نيتك ..

حط يدو على فخدو كيضرب بصبعو وساكت كيشوف تا دخل علال وعبد القادر بملامح جامدين ودراري لي وراهم طلعو مباشرة لفوق تبسم من شاف وجهم لي رجع حمر و كيخمم غير وحدو ...

بعد ما طلعات جلسات وسطهم فصالون وعيشة حداها كضحك..

عويشة: مديش عليهم راكي عارفاهم كيبغيوك ..

عفراء: عارفة اختي...

الحاجة لي من صباح وهي غير كتشوف فيها ..

-تبارك الله ابنتي غزالة عرف يختار جعفر ...

عفراء ضحكات عاجبها الحال : شكرا اخالتي عويناتك لي زوينين ..

الحاجة طلعات عنيها وهبطاتهم فيها مزيان ..عفراء لي لابسة قفطان بيض عقادي من لقدامي ومزير من جهة الخسر وهابط تا لتحت محلول من جهة سيقان لي مخرجاهم ومبيناهم بويض ونقين كيشعلو ..

دايرة رجل فوق رجل وطالقة شعرها لجنب وكل مرة كتهز حلوة بجوج صباع وكلامها وتصرفها فيهم نوع من شيكي لي ما عجب الحاجة وجاتها عفراء ماشي ديال جعفر ...

نطقات بصوت رخيم فيه معنى والفاهم يفهم ...

الحاجة : اييه ابنتي زينك ما يوقف حد قدامو ولكن ماجاتش فــزين .. جات ف تربيتك ابنت الناس اما زين بلا حشمة كيف الباب بلا قفل لي جا يدخل ...

عفراء لي عقلها فايت عمرها والكلام مايدوزش قدامها بلا ما تفهمو ...رجعو نضراتها حادين وزيرات على يديها بجهد ...

عفراء :الحمدلله تربيت على يد رجال علموني امتا نحشم ونسكت وامتا نخرج العنين ونرد على لي بحالك ....

لطوف وبشرى شهقو بجهد تصدمو من كلامها..

لطوف : عفراااء سكتي شهاد لكلام ...

عفراء ببرود: هي سولات على تربيتي وانا كنعطيها خو كلامها ونوريها تربيتي كيف دايرة ...حمدلله تربينا مانبيعوش لي يشرينا ومنكرهوش لي يبغينا ومنغدروش لي يتيق فينا ...

الحاجة رجع وجها حمر ما عجبها كلام لي قالت عفراء ..

-انا غير قلت كلامي ما عنيت بيه حد ...

عفراء :لكلام مكيخرجش غير هكاك الحاجة ..ما حدك نطقتيه الا وعنيتي بيه شي حاجة والقافز هو لي يفهم وانا تعاشرت مع هاد لكلام تا ولا مني مابقيت نحير فيه ولا يأتر فيا كنعطي بنادم خو كلامو باش عمرو يدور بساحتي ولا يفكر يطيح مني ويبين فهامتو عليا ...

لطوف جراتها من دراعها بغات تاكلها وكضحك بزز للحاجة ..

-مديش عليها راه مزالة صغيرة و مكتعرفش دوي ...

الحاجة ما عجبها حال جمعات الوقفة معصبة ..

-هاد لكلام كامل وما تعرفش دوي ولكن سري انا لي نصح فيك ونتي ما بوجه نصيح ..

عفراء معصبة كتر منها ومن كتعصب ماكتبقا تشوف تا حد كيرجع كلشي ضلام بين عنيها ...

شارت بصبعها للحاجة ونطقات كلمة بكلمة ...

عفراء: انا ماشي من عادتي ندي ونجيب فالهضرة حيت كديني غير لعيب وانا ما قادرة على لعيب فنهاري ولكن الفم لي يقول زمر يقول تمر ولكن نتي لي دقيتي عليا ومتسنايش مني نهبط راس وندوزها... انا ما من عادتي هادشي و لي عطاني كنعطيه وما نخليه يعاود يدور بيا ما نتسوق لصغير ولا لكبير ....

الحاجة ضربات فمها : هكا افمي انا لي درتها لراسي وبغيت ليك الخير ...

عفراء: الخير لي ديريه ديريه فراسك والكلمة قبل ما تخرجيها خممي فيها وعرفيها فين توصلك قبل ما تولي ليك فضيحة وتسمعك خل ودنيك ...

جرات اية وهبطات كدردك شافها امين وقف مفاهم والو ..

امين: الواليدة مالكي ..."شاف مينة لي هبطات كتبكي تخلع"....اش واقع ياك لباس....

الحاجة مشات عند ولدها شداتو من يدو ..

-لي كاين هو مبقات خطبة كل واحد يشد طريقو ...

امين بصدمة تلف: شكتقولي الواليدة ...

الحاجة: ماعندي ما ندير بناس ممربينش بناتهم ويردو الهضرة على ناس كبر منهم زيد قدامي ماحنا من سهم هاد ناس ...

عفراء هبطات كدردك شاعلة :لي قال الكلام يتسنا خوه ولي بغا الاحترام يعطيه باش ياخدو ماشي طلقي سمك وتسناي مني نحتارمك ...

الحاجة: تا دابا اسيادنا لي نطولوه نقصروه ما نتوما قدنا ما حنا قدكم كل واحد يشد طريقو ..

جعفر وقف مجعد حجبانو فعفراء لي الاعصاب لاعبين عليها وهي كتهضر كيف البركان لي قرب ينفاجر...

عفراء: الما وشطابة تالقاع البحر ها هو الباب وسع من كتفاك ولامقدك نزيد فيه ولكنتي ضني اتخلعيني وتهبطي ليا راس بهاد ولدك غير جمعيه وسيري نتي وياه من غدا نجيب ليها سيد سيدو ...

امين تزير مرضاش: جمعي فمك نتي...

وقف قدامو حعفر ليقاطع الكلام وملامحو مواضح فيهم تا مشاعر...

جعفر: دي الحاجة وبدلو ساعة بأخرى ...

الحاجة : لقيتي وجهك عزيز اولدي اما مكنتش نسكت ليها ...

بشرى دخلات بيناتهم وجها بيض ناشف ومخلوعة على بنتها لي كتبكي ومبغات تسكت ...

-الله اودي الحاجة زعمة عرفنا بعضياتنا مزيان وناض صداع مع عفراء علاش ادخلي دراري فهاد شي مينة مدارت معاك غير الخير عمر العين هزاتهم فيك...

الحاجة : الالة دوز على الواد الهرهوري ومادوز على الواد السكوتي ..ولي بداتو هادي اتكملو بنتك لي غير ساكتة. علم الله كيف دايرة واش موجدة ليا ...

جرات ولدها خرجاتو خلات كلشي واقف مصدوم من غير عفراء لي تبعات ليهم الكلام يديوه حلقة فودنيهم يتفكروها بيه ..

عفراء : جيتي الله يخليك مشيتي الله يهنيك تا حنا ما مولفينش بيك....

بقا صوت تنفسها مجهد وهو لي كيتردد فالصمت لي داير بيها وكل الاعين عليها ...

حطات يديها على وجها بغات ترجع لهدوء لأعصاب لي كياكلو فيها هو الوحيد لي قرب عندها حيد ليها يديها من وجها ودور شعرها ورا ادنها وحرك بلطف اصبعو على حناكها...

جعفر: صافا دابا ...

شافت فيه بإستغراب ونضراتو لي مكيحملو تا عتاب تجاها ومسولهاش اش وقع وعلاش هاد صداع ..

فقط سول على حالها مع ابتسامة ..سؤال بسيط لكن لقات صعوبة باش تجاوب عليه ..

رجعات بخطوه للوراء بعدات وجها من يدو وطلعات مباشرة لبيتها محاملة تشوف تا حد...

خلاتو واقف فمكانو ..نزل يدو دخلها فجيبو كيشوف فدروج لي طعات منهم ،بعد تواني دار وخرج تابع امين و الحاجة والحنية لي كانت فعينو تجاه عفراء تحولات لبرود فور ما خرج من لباب ...

دخل لسيارتو وعيط مباشرة لأمين..

جعفر: فينكم..

امين: شادين طريق لدار ...

جعفر: وقف وتسناني هاني جاي..

قطع بدون ما يتسنا يرد عليه ..ديمارة سيارة وتوجه لمكان ...

فداخل عند سي لعربي لي تحولات لفرحة لصدمة وحزن خيم على المكان ..بشرى لي كضرب فحناكها وتغوت ...

-داارتها المنحووسة كيف عواايدها خاارجة عليا وعلى طسييلتي ...المنحووسة خرجاات على بنتي وشواتني ...

علال تلف ما بقا عارف فين يعطي راس خنزر فمراتو...

-سكتي ماشي وقت لغوات هذا ...

مبقاش عندها الخاطر لي ديرو وتسمع ليه كيف عادتها... اليوم وصلات لنهاية طريق مع عفراء و نحسها وزبايلها ..

بشرى: سكتي سكتي سكتيي..دييييما سكتي و عفراء لااا.. نخليوها تهضر وتفشش كيف بغات وحنا نخدمو عليها حيت هي السلطانة ديال دار كلشي يوجد بين يديها ...هي المطورة وحنا لي مكلخين مكانفهمو كلام بحالها وهي بالمنحوسة لخرا من نهار تزادت وحنا غير فالمشاكل..

العربي حط يدو على قلبو ليبدا كيضرب بجهد...

-بنتي صافي..

قطعاتو كتمسح دموعها بجهد...

بشرى: الله يخليك اعمي متقاطعنيييش شوف بنتي حالتها كيف دايرة نهار قلت دنيا ضحكات ليها جات عمتها خرباتها بيديها... اش فيها كون سكتات وخلات لما منين يدوز ..اش فيها لهبطات راس واحد شوي غير على وجهي انا ومينة ..اش فيها لسمعات الهضرة وسكتات كيف كنسكتو حنا ...علاش ديما خاصنا نسامحو ليها دير ما بغات وحنا نهبطو راس على ودها ..شكووون هيا كااع فخلق الله باش نديرو عليها هادشي كااامل ...

كلشي سكت ما قدرو يزيدو فالهضرة ومينة جالسة فالارض كتبكي وعيشة كتعنق فيها تحاول تسكتها ولكن بدون فائدة تجرحات فقلبها بزااف و جرح كبير من جوج جوايه..

من جهة عمتها لي محطاتهاش فبالها قبل ما تخرج كلامها و فأمين لي تبع مو بدون ما يشوف فيها او يحاول يقنع مو وكأنه عمرو عرفها وهي لي تسناتو اعوام باش يوقف على رجليه ورفضات رجال يوزنو دهب غير على ودو حيت كانت كتبيغه ودابا فـأول مشكل تخلى عليها ...

مسحات دموعها بضهر بديها وجمعات لوقفة ..بغات تعاونها مها و عيشة لكن كان رفض تام منها ..

طلعات كتشد فالحيط و دموع مشوشين ليها الرؤية ...

دخلات لبيتها سخفانة ومتألمة و مجروحة رمات داتها فوق السرير محساش بشنو داير بيها..

دخلو عندها كاملين كيديرو ليها ريحة تشمها باش متسخفش ولطوف جالسة حداها كتمسد ليها رجليها وتبكي معاها كيشوفو فيها بحال الميتة بدون روح ..اما بشرى عطاتها غير لبكى ما بقات قادرة تسكت ...

دوزو ليلة.كحلة مافيها نعاس ولافرح كلها غم و حزن ...

صبح صباح جالسين فصالون ومجلسين حداهم مينة محزمين ليها راسها و دايرين ليها فجناب الحامض...

قدامهم طبلة ديال لفطور لي ماقدر يقيصها تا حد فيهم ...هبطات كتجر فرجليها و باين الهدوء على ملامحها ..جلسات حداهم و نطقات بكل بساطة ..

عفراء :صباح لخير ...

تا حد ما جاوبها ولا شاف جيهتها من غير عويشة لي بقا فيها الحال ..مدات ليها كاس اتاي بحزن ...

عائشة: نعستي..

عفراء بكل برود : وي الحمدلله ..

هزات مينة راسها شافت فيها مزيان ورجعات حدراتو وبشرى كتغلى معصبة ضربات يديها مع طبلة مجننة ..

-وااااش هداك وجهك ولا مسلفاه كاع داك صداع لي درتي البارح وجايا قدامي بوجهك حمر بلا حشمة ، خرجتي على لبنت وعلى سعدها ..

عفراء قدات الجلسة مزيان كتشوف فمرت خوها ...

-شمن سعد كدوي عليه ...

لطوف : محشمتيش ابنتي ديري داكشي شوفي بنت خوك فين وصلتيها واش عاجبك هادشي ...

عفراء ركزات نضراتها فمينة وقالت بكل بساطة ..

-مالها اش ناقصها عايشة بخير اش وقع ...

لطوف: گاع داكشي ليدرتي ومابان ليك والو خسرتي لينا وجهنا مع ناس وهبطتي من قيمتنا ..

هزات حجبانها ...

عفراء: شوفي أمي نجيك نيشن القيمة كيديرها لواحد راسو ومكيحتاجش بنادم لي يديرها ليه ..انا كون شفت فالحاجة القلب الصافي كنت نسكت ومانقول والو ونديرها نصيحة ونحطها حلقة فودني كيف كنت كنحط كلام خالتي الكبيرة الله يرحمها ومزال اليوم كنمشي على نصائحها ليا ...لكن امي الحاجة قلبها مصافيش وفمها سام وانا كون سكت ليها وحدرت راس و معطيتهاش جوابي كانت اتعلى ونهار تمشي عندها مينة اتحرت عليها وتندمها على نهار لي تزواجات فيه ومينة ضريفة بزاف ومكتهزش راس ...وانا نضت باش نحفظ كرامتي اولا ونحفظ بلاصت بنت خويا لي دمي من دمها وما نبغي حد يقيصها ...انا مارخيصاش عليا بنت خويا ولا منتصوقش ليها ونبغي نضرها ..عمري كنت هكدا ولا غادي نكون ديما كنبغيها تكون فوق كلشي وهي الوحيدة لي نبغيها تكون حسن مني ...رديت الكلام على الحاجة باش تعرف ان ورا مينة كاين عائلة لي متسكتش ليها ومتخليش لي يهبط من بنتهم ولو بنصف كلمة ..بينت ليها كيف تربينا وشحال عزيزة علينا نفسنا ما كنضلمو حد ولكن لي ضلمنا كنفرسوه و دقتنا خايبة ... مكنعطيوش بنتنا باش يتكرفص عليها البراني كنعطيوها باش يتهلاو فيهما و يحطوها فوق راس ماشي العكس ولي ما قبل هاد الكلام ميستاهلش يكون نسيبنا ويدخل وسط عائلتنا ...وكيف قلت قبل اميمتي ونعاود نقولها ليك لي جا الله يخليه و لي مشا الله يهنيه حنا ما مولفينش بحد وما كنعطيو بناتنا رخاصات لي قلب علينا لقانا ولي عطا الكلام يتسنا خوه ...

نهات كلامها وخلات كل لي سمع ليها يتبهض و يتصدم وتعلى الحيرة ملامحهم و يشوفو فيها بنضرات مختلفة و اولهم مينة لي توگدات من بلاصتها كتسمع ما قالت عمتها لي ماضرب ليه حد حسبة نساو ان هادي عفراء لي كانت تفهم الكلمة طايرة وهي بنت ست سنين فما ادراك اليوم وهي فعمر 22 سنة لي تفهم بنادم غير من شوفة وتعرفو اش تحت راسو وعلياش ناوي وقبل ما يتجرأ كتسوسو كيف الغبرة بحالي عمرو كان ....

مينة وقفات ومشات جلسات حداها حطات راسها على كتفها ونطقات بصوت تقيل..

-عمتييي...

دفعاتها من كتفها بجهد: لخرا لي عمتك غير لي زند عليه راسو يجي يقول ليا عمتي ...

مينة شدات راسها دايخة : واش ميمكنش ليك تبقاي زوينة غير شوي مالكي كتقلبي كيف زمان ..

عفراء: مكنتقلب والو نتوما لي كتبكاو بحالي عندكم جنازة ...

لطوف: اوا داكشي لي دزنا منو لبارح مساهلش ابنتي وحنا مافهمناش الحاجة اش ناوية..

عفراء: امي فتحي دماغك بنادم ماشي بحال ناس لقبيلة لي عندهم كيقولوه هادو ناس المدينة كيفرشو ليك كلام زين مدسوس بسم ويضحكو ليك فوجهك و يغضروك فضهرك وانا اصلا داك امين مادخلش ليا لراسي وماشي شي واحد لي مرجل البرد لي جا يديه ...

عائشة: نتي هادشي كلو عرفتيه وفهمتيه من غيرنا حنا ...

عفراء: شوفي غير من هبطات مو وكفاش جراتو وهو تبعها كيف البهيمة... اه نحتارم مي هادشي مافيه شك ولكن ولاد الاصل كيعرفو كفاش يتصرفو ماشي بحالو تا شوفة مدارها فمينة وها أنا فين قلتها ليكم ليوم ولا غدا نسمعوه مشا خطب فشي جيه ..

شهقات مينة بجهد : الله يا ختي ما تقوليها ..

عفراء مخنزرة: نوضي من قدامي المدلولة قبل ما نسمعك خل ودنيك تا نتي ..واش انا باغيا ليك الخير ونتي مزال باغية تلصقي فبوزبال ...

مينة رجعات عنقاتها بجهد ...

-عاد عرفت شحال كتبغيني وكتخافي عليا وخا مكتبينيش...

عفراء : بعدي مني انا كنبغي غير راسي ...

بشرى لي رجع ليها عقلها وبدات تفكر وتخمم..

- يا ختي واشمن عقل هذا عندك انا كيف البقرة جالسة نطلب فيهم ...

عفراء عوجات فمها: غير باش تعرفي راسك معامن ونتي ماخليتي ماقلتي عليا البارح ..

بشرى: غير حالة غضب و دازت ماديش عليا ...

عفراء: كون كنت ندي عليك كون شحال هادي تخاصمت انا وياك ...

كلثوم: وخا هكذاك بقا فيا الحال من مسمعتهمش تا انا ونقيت ليهم ودنيهم يصحابو بناتنا رخاصات لي يجا يمسح فيهم رجليهم...

لطوف : اودي فين خلات لينا هاد المسخوطة فين نزيدو انا و منتولش الكلام بحالها .."هزات راسها كضحك"...ولكن عجباتني رديتي ليا نفس دابا ابنتي...

عفراء: اوا دوزو تفطرو ونساو عليا هاد الغم الكحل...

مينة قربات هي الاول لطبلة وخا مجروحة ولكن كيقولو عزها تعزك وتا هي واخا ضربفة لكن كبرات مع عفراء وعندهم دم واحد مترضاش ومتبغبش لي يهبط منها ...

زطمات على قلبها وهزات كرواصة كتعمر لكريشة وعفراء كتشوف فصباعها...

عفراء: وداك الخاتم علاش مزال دايرها..

شافت فالخاتم ديال الخطوبة وهي تحيدو بزربة من يديها ...

مينة: ها هو شوفي نتي اش اديري بيه...

عفراء كتشوف فالخاتم: وخا نبيعوه مغاديش يجيب لينا شي ثمن مزيان باين بالزقرام لخر جايب داك خاتم ديال تلاتين الف ريال ...

لطوف قصحات شوفة: الامانة ترجع المولاها اعفراء مكاين بيع ...

عفراء: علاه ديك البسطيلة ديال الحوت و الخروف مشوي لي كلا والحلوى فالاشكال و العواصر جابهم معاه راه خوتي وبا لي خسرو زبالة فلوس كبرو بيهم ساعة مايستهلوش كابرين فجوع ولاد لحرام ماعرفت جعفر كيف دار تعرف عليهم عنداك غير يكون كيصرف عليهم وعايشين بفلوسو ...

دخلو دراري مجعدين حجبانهم ماعندهم خاطر ..سمعو صوت الهضرة وضحك وهما يهزو راسهم والحيرة كتعلي ملامحهم مافاهمين والو ..

غير البارح ناض صداع وهاد صباح خرجو خلاوهم في الحزن و الغم ودابا دار منورة وكيضحكو بحالي تا حاجة موقعات...

دخل علال كيشوف فبنتو معنقة عفراء ومتكية عليها وعفراء هازة كتاب بالانجليزية كتقرا فيه وكدون بعض الملاحظات فالمذكرة ديالهم ..رجع عينو لمراتو لي جالسة فالارض كطوي الحوايج ومبتاسمة هزات راسها لعندو ..

بشرى: مالكم جيتو بكري مزال الغدا مطاب ..

تابعو عبدالقادر مفاهم والو جاب ليه الله بحالي غير كانو كيحلمو ..

علال جلس حدا بنتو : مينة بنتي كيف بقيتي .....

مينة : حمدلله ابابا ..

عبدالقادر: ياك كلشي مزيان ماوقع والو ...

دخلات كلثوم كتمسح يديها : مواقع والو الحمدلله غير دراري مزال ناعسين مبغاو يفيقو طلعو ليهم نتوما لي تعرفو ليهم ...

هابطين فدروج كيدردكو..

سليم شعرو مخربق مدخل يدو فجيب سروالو ..

-ها حنا هابطين مابقا حد ينعس فدارو ...

بشرى: كاين شي نعاس تال لضهر ...

اناس: اودي عينا من لفياق بكري وجرا على صباح ...

جلسو حدا رجلين عفراء كيشوفو اش كتقرا وخا معندهمش مع الانجليزية كيحاولو يقراو وهي عاطية خاطرها مع الكتاب مداتهاش فيهم ...

علال تنهد بجهد : داكشي لي وقع البارح ...

قبل ما يجاوب تا حد نقز سليم مغدد...

سليم: داك زام* انا لي انعرف لوالديه ...

اناس: أنحيد لطاسيلتو قل*ويه...

ناض علال ايجمعهم بجوج وهما ينقزو جرو عفراء حطوها قدامهم مخبين من وراها ...

علال معصب: اجي لهنا شهاد لكلام تقولوه قدام مك ومرت خالك وختك وعمتك ...

سليم حدر راسو مزير على عفراء متخويش بيه ...

-انا غير دافعت على ختي وصافي ...

اناس: وانا كنجي من بنت عمي وصافي...

عفراء ساطت بجده: صافي اخويا راك عارف كيف دايرين ..

عبدالقادر معصب : هضري معاهم اعفراء يوزنو كلامهم شفتي اش دارو البارح قدام جعفر حشمونا مع سيد ..

سليم لسان عندو ماضي بحال عفراء..

-مالو مصلي على هيضورت سبع ...

دارت عندو معصبة جراتو من ودنو مخنزرة ..

عفراء: راه راجلي هداك ليكدوي عليه الحمار ..

سليم مقصح : وخا الالة مغاديش نعاود نهضر عليه...

علال : كون درتيها من البارح .."هز صبعو بتحدير"...اخر مرة نسمع منكم شي كلام مهواش نعلق والديكم فسطح ...

عبدالقادر مخنزر كثر من خوه ..

-خليكم دوزو هاد العطلة بخير نلقا شي حمار فيكم تابع شي بنت نقطع لي زنط.....

عض لسانو من عرف اش كان ايقول بزربة سكت وسليم هو واناس هزو فيه عنيهم وقالو دقة وحدة...

-اتقطع زنط*يطنا....

قشة صبر لي كانت عندهم حابسين راسهم عليهم تهرسات رجعو كينهجو كيف العروضة ودمهم كيغلي..

غير شافوهم بديك طريقة عرفو راسهم ليوم ايشوفو الموت مبان ليهم غير صنادلهم هزوها فيديهم وشدو عفراء لي مسكينة ماعرفات راسها باش تبلات كانت جالسة ملهية مع كتباها تا كتلقا راسها كتجري فزناقي كيف الحمقة و سليم لي شادها كيغوت مخلوع ...

سلييم: دوور شوف واش تباعينا..

اناس نفس تقطعات ليه ...

-دور نتا اخويا انا رجليا فشلو ...

عياو بجرا وحسو بوزن تقيل فيديهم ..دورو راسهم لعندها وهي طيح بسخفة كتلهت بجهد وهما بالخلعة معاقوش براسهم انهم جروها معاهم ..

بزربة جلسوها فالارض كينشو عليها ترجع روحها ...

سليم: والله احبي ما درتها بلعاني غير الخلعة من الواليد جريتك معايا بلا منحس...

عفراء كتنهج بجهد: الله يعطيكم مصيبة فهاد نهار شوهتوني فزناقي كاع لي كيعرفني شافني كنجري كيف الهبيلة ...

جلسو حداها تا هما سخفانين كيرجعو النفس ديالهم وكاع العنين عليهم بالاخص ان لبسهم كان خفيف وغير ديال دار ....

عفراء جمعات لوقفة كتنفض حوايجها من الغبرة ولابسة غير بيجامة ..

-تسنانوي هنا انمشي المخبزة نشري شي حاجة ونرجع...

سليم : قولي ليا انا نمشي نشري ليك..

عفراء برفض: لا مغاديش تعرف داكشي لي كيبغي جعفر ..

قطع الكلام وتبعوها بالعين تا دخلات عاد هبطو راسهم واناس كيحك فراسو قال...

اناس:لعميمة بانت ليا طايحة نيت فهاد جعفر...

سليم : غير طاحت وسكتي بانت لي كتبغيه نيت فين عمرها اصلا تسوقات لشي راجل ولا شرات ليهم شي حاجة ...

اناس:زعمة هاد جعفر يكون راجل مزيان..

سليم: ماحدو صاحب داك الكلب ديال امين باين ايكون بحالو ...

اناس: ولكن با وباك بانو لي راضين عليه وكيحتارموه...

سليم: تا نتا الوالدين شرفو مبقاو يفرقو بين الناس غير لي جا يعطيوه البنت بحالي عندنا حنا زريبة ...

اناس هز تليفونو : داك الوجه مخافيش عليا فايت شفتو فالفيس واقلة على شي قضية ...

واقفين فراس شارع كيتسناو عفراء تاخد لي بغات ..اناس مهبط راسو كيبقشش فتليفونو و سليم متكى على الحيط ... دازت قدامو بنت هازة سطولة ديال الحمام ولابسة جلابة مزيرة عليها ومخلية فصالتها تبان والوسط ديالها عامر وعاطي لعين ...

نغز اناس لي حداه ...

سليم: مولات الصدر جايا اصاحبي..

اناس هز راسو كيتحقق فجسم الانثى وهو يتوگد من شاف الخير دايز قدامو ..

اناس: احح اقلبي واش هداك صدر ولا سداري ولا مخدة لدراري...

شافت فيهم بنص عين وكملات طريقها ومؤخرتها كترعد مع المشية ..

سليم : اححح سعدات ديك الخرقة لي كدوز من ديك الفرقة ...

اناس: نتي عندك فين و انا عندي باش...

سليم : مانضوقو غريبة ما نفيضو حليبة هااح على الفورمة العريضة ...

سليم شافها هازة صابون البلدي وهو يتبعها معندو علاش يحشم و كيرمي ليها الهضرة ..

-صباح صابون البلدي تزلقي وتجي لعندي ...

وقفات عفراء قدامهم مخنزرة : شهاد قلة الأدب لي ولات فيكم ....

هزو يديهم ببراءة ونطقو دقة وحدة كيف توام ..

- معندنا كيف نديرو زين كيتلفنا ...

زيرات على الفك ديالها مزادتش معاهم الهضرة..عنقات الكرطونة لي فيها الحلوى لي خدات موجهة لدار جعفر وهما وراها ما مخلين تا حد يتبسل عليها وخا هما كيبتسلو على لبنات لكن بنات عائلتهم ما يتبسل عليهم حد.. متناقضين غير مع راسهم...

وصلات العمارة طلعات لطابق لي فيه شقة جعفر ودراري وراها كيدورو فعنيهم وساكتين ....دقات فالباب بدون رد ..

عاودات دقات بجهد ربما يكون ناعس لكن والو ..هزات تليفون بدات كتصوني عليه وهي تسمع صوت تليفون ديالو فدار لداخل ..زادت زيرات على حجبانها وقلبها رجع يدق بجهد تخلعات عليه ...

رجعات كدق بجهد وكتعيط عليه بصراخ حتى سمعات صوت تخرشيش من دار عاد وقفات من دقان كتسناه يحل ليها الباب تشوفو و طمأن عليه لكن داك شوق تبخر وتحل فبلاصتو صدمة ما عمرها كانت توقعها طول حياتها..

تحال الباب وبانت اية بلباس نومها الرقيق وعيونها الدامعة لي واضحين انها عاد فاقت من نعاس...

طاح كرطون ديال الحلوة من يديها بصدمة ودمعة هبطات سخونة على طول خدها وقلبها رجع كيدق بجهد حولات تنطق لكن لسانها رقد عليها بحال المشلولة بقات غير كتشوف ودموع كيهبطو وصوت جعفر لي سمعات زاد قتلها وهي حية ....

قلبها لي بدا كيرجف وانفاسها لي رجعات تقيلة ورجليها لي مبقات فيهم قوة ..احساس مر و رهيب متالك كل جزء منها ..

بغات فقط تهرب متبقاش هنا و ماتشوفش اية هي لي فتحات ليها لباب ...

تمنات لو انها مجاتش.. لو انه بقات فدراهم ومتشوفش هادشي لي قدامها ولي جا بحال الصاعقة هز قلبها المرتجف ورجع كيمزقو لأشلاء وزادو دموعها كيهطبو بغزارة ...

رتاجف كل جسدها باليد لي لتفات على خسرها بدفئ والجسد القوي و صلب لي حاوطها من ضهرها...

الجسد لي كانت تسناه يبان امام الباب حدا اية كان واقف وراها معنقها برفق وتكلم حدا ودنها بصوت تقيل ...

جعفر: صباح لخير وقتاش جيتي...

رتاجف جسدها وسط حضنو ودارت عندو بزربة وعلى ملامحها صدمة وتسائل ..شافت فملامحو الهادئة لي حاملين رقة اتجاها وملابسو نفسهم لي كان لابس البارح ...

جعد حجبانو وحط يدو على حناكها كيمسح ليها دموعها ...

جعفر: مالكي!!!..مزال مقلقة من البارح ..

بقات صامتة بدون ما ترد عليه وهو كيقراها غير من ملامحها ..بنص عين شاف فأية ورجع شاف فيها من فهم رد فعلها ...

هبط هز كرطون ديال الحلوة لي مرمي حدا رجليها و وقف عنقها بيد هزها خشاها فحضنو بحال طفل صغير ...

دخل حط كرطون فوق طبلة وتوجه لبيت نعاس ديالو وهي بين يدو وقبل ما يدخل نطق لثلاتي لي عنيهم عليه...

جعفر: تسناو فصالون ...

سد لباب بساروت ورجع لف كلتى يديه على خسرها مزير عليها بجهد حتى تأوهات بقوة ونطقات بصوت مخنوق...

عفراء: علاش خليتيها فدارك ..

قبلها تحت ادنها كيهمس ليها ويتبع ورا كل كلمة عدة قبلات متتالية ..

جعفر: خليتها فدار بوحدها انا دوزت ليل كامل فالبيرو ...

هزات راسها كتشوف فعنيه لي حمرين واضح مناعسش وقلبها بدا كيرتاح عرفاه مكيكدبش وديما كيقول صراحة وخا تكون كيف ما بغات تكون ....

عفراء: مابغيت تا شي وحدة دخل لدارك من غيري اجعفر ...

حرك راسو بفهم وكتفى فقط انه يقول ..

-سمحي ليا ...

عفراء : علاش جبتيها معاك ...

تنهد بجهد وحط راسو على كتفها ونطق بثقل..

جعفر: دابزت انا و امين ...

جلسها فوق ناموسية وجلس هو وراها رما داتو كاملة فوق ناموسية كيشوف فسقف باين فيه العيا ومعندوش الخاطر يهضر..

دارت عندو جالسة حداه كتشوف فيه بصمت ..ضحك وقرص ليها خدها ..

جعفر: ماشي بسبابك ..كانت اتنوض على سبة اصلا ...

عفراء هزات كتافها : وخا يكون بسبابي مغاديش يبقى فيا الحال حيت مكنحملوش ...

عاون نفسو بيدو وهز راسو لعندها ..

جعفر: علاش فايت دار ليك شي حاجة ..

رجع وجهو حمر بعد سؤال.. بالاخص انه عارفها كتره الا لأداها شي حد ...فور ما شافت نظراتو القاصحة حركات راسها بسرعة ..

عفراء: بزااف عليه يوصل ليا كان غير كيعصبني بتعامل لي كان كيعامل مينة كون ما كنت انا لي واقفة فطريقو كون لعب عليها كيف بغا ...

جرها عندو طلعها فوق صدرو ...

جعفر: نساي عليك هادشي كل حاجة اتصلح مع الوقت ..

ضحكات تابانو نيابها بحال الجنية ...

عفراء: هضرت مع دارنا صباح وصلحنا الامور بقا لينا غير داك الحمار نعمرو بيه راسنا وندابزو عليه مداروها تا لي حسن منو و رجال بلحيتهم ...

هز حاجب وهبط لأخر ...

جعفر: ياك الالة هي دابا دغينا اتسوسيني على هاد لحساب ...

عفراء حركات راسها برفض: لا انا غادي ناكلك..

بزربة دخلات راسها فعنقو عضاتو بجهد قسحاتو ومبغاش يبعدها ...

حسات بمداق الدم ديالو على لسانها وهي تبعد سنانها ومصات المنطقة بلطف وطلعات لأدن ديالو عضاتو عضة خفيفة وقالت...

عفراء: اخر مرة نشوفك مع شي وحدة ...

قلبها بسرعة رجعات لتحت وهو فوق منها وعنقو حمر بالعضة ..فرق ليها رجليها دخل وسطهم وشد ليها يديها هزهم فوق راسها وكيشوف فعنيها لي مركزين معاه...

جعفر ضحك بجنب: غرتي..

بدون ما تخجل خرجات عنيها فيه..

عفراء: نتا راجلي من حقي نغار ...

تبسم وهبط قبلها فحنكها وتوجه لفمها وهي دور راسها بسرعة مبعدة عن قبلاتو ...

عفراء: ولاد خوتي برا مافيا لي يتحاشم معاهم ...

حط راسو على صدرها صاط بجهد..

جعفر: نتي لي كتجبديني اعفراء.....

عفراء تبسمات بشر: مكاين والو تا ندير العرس عاد ندير دخلة ..

بعصبة نطق بدون شعور : لخرا لي ورا العرس...

بصدمة خرجات عنيها فيه وهو مبغاش يهز راسو فين ماكدور راسها تشوفو كيدور لجهة لأخرى جاب ليها ضحكة ...

عفراء: شكون قال سي جعفر كيعرف يعاير ...

جعفر وقف على ركابيه وهي ناعسة قدامو بكل انوتة وسروال طالع ليها على سيقانها لي كيبانو بويض كيشعلو ..حط يدو على سيقانها حس بطراوتهم ورطبين ..

سرط ريقو بصعوبة وقال بشكل قاطع ...

جعفر: غادي نخرج نجري عليهم ...

جمعات ضحكة من شافتو خارج ...بزربة طارت عندو تعلقات فضهرو ..

عفراء: وااش باغي تحشمني مع ولاد خوتي يبقاو يشوفو فيا شوفة ناقصة ...

خنزر فيها وهي كتشوف فيه ببرءة رجع نعس فوق السرير ..دخل راسو تحت المخدة معاودش هضر ..

توجهات نعسات حداه مبتاسمة وعينيها كيبريو باين الفرحة فيهم وهي معاه ...

خشات يديها تحل القامجة كتلمس ضهرو ...

عفراء:شنو وقع بينك وبين امين وعلاش متكفل بأية...

بقات كتنتاضر جوابو لكن كان الصمت هو الرد ..خسرات ملامحها وطلات عليه لقاتو مغمض عينو ناعس ...

باين فيه العيا وهي حداه حس براحة لي فور ما رجع لسرير نعس...

حطات راسها على ضهرو معنقاه من جهة الخسر وساهية فيدو لي حاطها فجنب ولي فيه خاتم نقرة ديال زواجهم ...

برا بقاو جالسين فصالون ...اناس وقف كيشوف فأية ...

اناس: فين جا لحمام الله يخليك ..

شارت بيديها لحمام توجه ليه مزير وبقات هي جالسة متوترة وجامعة يديها لوسط كتعض شفايفها و تجرحهم معيقاش براسها و محساش بنظرات لي متوجهين ليها..

جالس قدامها مباشرة متكي كامل على سداري وعينو عليها كيهبط ويطلع فجسدها وبيوضية لحمها وشعرها الاسود لي كيطيحو بعض الخصلات على وجها و بالحشمة كترجعهم ورا ادنها ...

عض فمو بجهد حس براسو تزير وكيف عادتو مكيخليش شي بنت عجباتو تفلت من بين يدو. .

وقف وتوجه عندها وقف قدامها وبجرأة حط اصبعو على فكها هز وجها لعندو كيتمنضر فعيونها السوداء لي دوخوه وحس بحلقو نشف وبدا شيطان كيلعب ليه فراسو كيف العادة..

سليم: شنو سميتك ...

جسدها جمد اتر الحركة المفاجئة لي دار ليها وعيونها عمرو دموع وبخوف قالت...

-سميتي أيــة....

سليم هاز ححبانو :مالكي كترعدي غير بوحدك ..

خلعوها نضراتو وزادت كترعد كتر عاضة على فمها بجهد خايفة وعيونها كيمشيو لباب لي دخل منو جعفر وهو متبع ليها نضرات ..

زاد زير على فكها بجهد ونطق بين سنانو ...

سليم: راجل عمتي هداك ابنت الكلب...

حركاتو رجعو لبها الكوابيس لي عاشت ..كوابيس الضرب و الإغتصاب لي تعرضات ليه ..تحول جسدها لكومة حاضنا نفسها بقوة وعيونها كتشوف فيه بخوف ودموعها نازلين ..

بإستغراب كيشوف تصرفاتها الغريبة قرب عندها بغا يعرف مالها وهي تغوت بكل قوتها..

صرخة لي خرجات من اعماقها كلها انكسار وخوف ورعب ..الصرخة لي فيقات جعفر وبسرعة لقاتو قدامها واقف كيف جبل بينها وبين سليم لي تصدم بالصراخ ديالها وزادت صدمة ديالو بنضرات القاتلة لي متوجهة ليه من طرف جعفر ...

يتبع...