محتوى القصة
حلم....كلمة لي فيقاتها من حزنها وهزات راسها اخيرا كتشوف فكل ناس امامها لي مزال كيرددو كلمة "حلم" بين شفاهم ويدورو عندها يتسناو جوابها..
بينما هي كانت جامدة.. ميمكنش تقبل ان كل ما شافت كان مجرد حلم ..ميمكنش هادشي گاع ليوقع كان حلم فقط ...
هبطات راسها لجعفر لي حط راسو فحضنها ونطق بصوت مخنوق ..
"رحميني ا عفراء"
هنا عرفات راسها اش دارت ..تزير جسدها من بدات كتوعى بنفسها وتعرف اش داير بيها وان هذا لي قدامها مستحيل يخونها بل مستحيل حتى يفكر فيها فما ادراك انه يخونها ...
رجعات الهدوء لقلبها ونطقات بشوي ...
عفراء : كنت غير كنحلم ...
كلشي خرج عنيهم فيها وصدمة لعبات عليهم لدرجة سخط بان على ملامحهم وخوتها لي كانو ديما هزينها فوق راسهم وما يخسرو ليها خاطر دابا تعصبو بكلماتها والعصبية بان فكلامهم و افعالهم ...
علال بصراخ : واااش كضحكييي علينا ولا شنوووو ...
جعفر وقف من سمع صراخو امامها وهي رجع وجها صفر بغوات خوها ...
جعفر مزير على راسو : خليني انا انهضر معاها ..
عبد القادر ساخط كثر من خوه ..
-حيد اجعفر من قدامنا خلينا نتفاهمو معاها ..كفااش كتحلم وهي منوضة قربالة خلات قلبنا يوقف بالخلعة والصدمة وزدنا كنتقابحو معاك بحال البراهش وهي فلخر غير كتحلم ...
عفراء شدات فقامجة جعفر مزيرة مبغاتوش يمشي ويخليها مع خوتها وكتنطق بتلعتم تال لخوتها من كيتعصبو كتمشي منها گاع لفهامة وقصوحية راس ...
عفراء : ماكنتش معولة على هادشي...
علال غادي قاصدها مجنن..
-وعلاااش كنتي معولة الالة ونتي مشوهانة هاد شوهة مع نسيب فييين انهزو فيه راااس دابا ...
جعفر خطفها كيبعدها من خوتها ما مخلي تا واحد يقيصها ...
جعفر : لغلط كيوقع وهي مزال صغيرة ...
عبد القادر : شمن صغييرة وقدها والدين وهازين دار راه عمرها 22 ماشي 16 باش نقولو صغيييرة ..ناااعسة تال العصر وفايقة منوضة لينا شيااط فرااس لي يشوفها يقول شادها الموت ...
علال : راااه انا لي فيااا الموووت لي دااير رااسي فيييها .."نطق بين سنانو "..حيد اجعفر خليني مني ليها...
جعفر معاطيهمش فرصة فين يقربو ليها واقف كيف الحائط امامهم وهما كيف العروضة كينهجو بجهد وصدرهم تنفخ مراضينش بلي دارت ختهم وخا متاقوش وهما عارفين جعفر اش كيسوا لكن شكلها وكيف كانت كتغوت و تنتف شعرها خلاهم يتيقو وكيف كل خوت بغاو يرجعو حق ختهم لكن لالة عفراء اش دارت قالت ليهم انا غير كنحلم ..
حسو براسهم برااهش و صغاارو بزااف ...العنين مقادرينش يهزوهم فجعفر لي كيدابز معاهم باش ميدوزوش لعفراء...
جعفر كيدفع علال بيد ويد محاوط بيها عفراء لي كتبكي بغوات خوتها ..
جعفر: صافي لي وقع دابا وقع ماعندكم ما ديرو ليها ...
لطوف كتحلف على بنتها ..
-خليهم يربيوها اولدي بهاد تحشيمة لي دارت وخلاتنا بلا عقل ...
عفراء بحزن : ماكنتش واعية براااسي ...بين عيني كنشوف غير داكشي لي حلمت بيه..
علال حيد سمطة من سروال بغا يصلخها بيها وكيغوت ...
-مااالكي بگرة ما كتفرقي بين الواقع من الحلم ..."ضرب صدرو بجهد"..هادي هي تربيتي اعفراء ترجعيني ضحكة فاخر يامي ونتاهمو سيد فشرفو ...
لعيالات كلهم رجعو لور تخلعو من لغوات وكلهم عارفين علال وااعر ومكيرضااش وهادشي لي دارت عفراء حس براسو تشمت ومرغات ليه وجهو فالأرض مع جعفر وعبد القادر وخا صبار وكيدير طريق منين يدوز لما ولكن هادشي ما قدر يدوزو ليها .
بجوج معولين على خزيت معاها غير جعفر لي كيحميها ومعطاهمش فرصة يقربو لعندها فين ما كيدورو كيدورها هو لجهة اخرى وزاد تعصب كثر منهم ...
جعفر : رااني هضرت مغادييش تقييصوها...
عبد القادر : خااصها تربة على هاد لفعايل لي دارت ...
جعفر ساخط : راها مربية وبعقلها اي واحد بلاصتها حلم بهاد الحلمة ايدير بحالها شنو بغيتوها دير تسكت ...
علال : تعيط ليك ديك ساعة تسولك ماشي دير شوووهة ...
جعفر : عقلها ومقال ليها وهي بصدمة دارت لي دارت صافي صفحة و طويناها مغاديش نبقاو شادين فيها ..
عبدالقادر : البنت مبقات كتحتارم حد اجعفر ..
جعفر كيسوط : مغاديش توريوني عفراء شكون هي انا قاادر عليها وكيف قلت صفحة و طويناها منعادوش نبقاو نهضرو فيها..
سكت كلشي معرفو باش يرضو اما هو جرها من يديها خرجها معاه دخلها لسيارة وركب فمكان السائق وسد لباب بجهد حتا قفزات من بلاصتها وهو سايق طاير ماهضر ما تكلم فقط الصمت كيعض شفايفو بجهد ومزير على عجلة القيادة عرق يديه بداو كيبانو ليها ...
بقاو كيرمشو فلباب لي خرجو منو مصدومين فمكانهم من غير سي العربي لي طول الوقت وهو ساكت ...وقف كينفض سلهامو ودور يديها ورا ضهرو وكيهضر بشوي
سي العربي : لبنت براجلها ..
عبد القادر رما جسدو كامل فوق سداري كيصوط بجهد..
-ولكن هادشي لي دارت فيه ممزيانش...
سي لعربي : كون مكانتش كتبغيه مغاديش دير هادشي علم الله تا هي اش شافت فديك الحلمة لي خلاتها بلا عقل ...
علال : ولكن هادا ماشي عدر الواليد وخا دارت لي دارت بقا فصفها ومخلناش نقربو ليها وزيد كيدافع عليها بحالي حنا لي غالطين ...
سي لعربي تبسم بشوي عاحبو الحال ..
-راجلها ومن حقو يجي فصفها هي اولة عندو منا حنا كاملين ..وهو من قال ايهضر معاها كان عليكم تفهمو راسكم و تسكتو..
عبدالقادر : مقدرناش نسكتو الواليد وحنا خرجنا العيب مع جعفر ...
سي العربي : جعفر عارف اش كاين وهو مبغاش يهبط منها ولا يغوت عليها قدامنا ..سيد بعقلو وعارف اش كيدير داها لدارو يتفاهم معاها راس فراس تا لخرجو العيب ما يسمعهم حد وتبقا الهيبة ديال كل واحد....
علال: وهي علاش مديرش بحالو مالها دايرة هاد شوهة ..
سي لعربي : لعيالات ماشي بحال راجل راكم مزوجين زعمة وعارفين سوق نسا اش فيه ...
دراري حشمو ممولفينش يهضرو فـهادشي مع باهم وتا سي لعربي مزادش فشرح كثر ونطق فقط مبتاسم ابتسامة جميلة ...
- ربات الكبيرة وعرفات اش ربات صدق راجل ما منو جوج ...
فدار جعفر ..جالس فوق كرسي مفرق رجليه ومشبك اصابعو وسطهم ومتكي على ركابيه وحادر راسو كيشوف فالارض وهي قدامو جالسة حشمانة ومقدراش تهز فيه راس ولا تنطق كلمة...
بقا مدة وهو صامت عاد وقفة وهي قفازت فبلاصها شاف فيها مخنزر...
جعفر : كتخافي ...
حركات راسها بسرعة بمعنى لا..
زير على دروسو وحيد القميص رماه خلا لفوق عريان وعضلاتو باينين ليها.. توجه لبيت وهي تابعاه بعنيها..
شافت لقميش فضهرو لي كانت دارتو ليه من نعس معاها ومكاين تا قميش زائد من غير الخاص بيها..
زاد رتاح قلبها اكثر و تأكدات ان لي وقع مجرد حلم فقط...
خرج هاز كينة ديال راس توجه لكوزينة هز قرعة لما شرب دوا ورجع عندها جر كرسي قرب ليها كثر وهي حناكها حمرين عاضة على فمها حشمات وهو مراقب ملامحها..
جعفر هز حجبانو : حشمانة...
بصوت مخنوق قريب لهمس قالت..
-اه..
جعفر مكالمي وكيهضر معاها بهدوء ..
-عجبك هاد شوهة لي درتي ليا مع داركم ...
هبطات راسها غارقة فحوايجها بالحشمة و بزز باش كتهضر...
-ماعرفتش مالي داكشي لي شفت جاب ليا الله بحالي حقيقي ...
ضرب يدو مع طبلة حتى قفزات ..
جعفر: معرفتييش ديك ساعة تعيطي عليا ولا تسنايني تا نجي ولا ضروررري من شووهة ...
قنتات سداري كتهضر بشوي وهو شاعل...
-راني قلت ليك ما عرفتش مالي ...
جعفر تنهد بشوي كيكالمي راسو ...
- عفراء هادشي لي كديري فيه بزااااف و انا ماشي بو عيالات باش تخليني فخر يامي قدام عائلتك كلها كنخون وتابع لعيالات..عمر هادشي كان فيا ولا غادي يكووون وماشي جيتي نتي ترجعيه فيا وتنزلي عليا الباطل...
حدرات راسها صامتة خلاتو يهضر يشفي غليلو والاعصاب لي ركبات فيه ... والموقف لي تحط فيه قدام عائلتها محملووش ابدا ومتقبلوش لراسو ..
ديك الحنية لي كان يهضر معاها طارت ..
جعفر : عجبك الحال فالكلام لي سمعوني خوتك و شفتيهم كيف ولاو من عرفو اش واقع... شفتيهم كيف حدرو راس ماعاود هزوه بالحشمة وانا كثر منهم بغيت الارض تشق وتبلعني حيت لالة عفراء حلمات بيا كنخونها وناضت دايرة روينة ...
عفراء تخنقات : دابا ماالك معايا واش انا لخاطري كون شفتي باش حلمت كنتي تعدرني ....كون حلمتي بيا ناعسة مع راجل كيف غادي تصرف ...
زاد جعر بكلامها و وقف غادي ليها..
جعفر : هادشي لي بقا لمك غير نحلم بيك وسط رجااال...
هربات منو مخلوعة تخبات ورا طبلة ...
عفراء : وصااافي جلس نهضرو بالعقل ..
جعفر مخنزر : خليتي ليا نتي شي عقل لي ندوي بييه ...
عفراء بترجي : عااافك....
"دور يدو على وجهو صاط بجهد كيلعن شيطان "...
جعفر : اجي عندي...
عفراء قلبها كيضرب بجهد ..
-غير خليني هنا ...
جعفر : منعاودش الهضرة ...
عفراء دلات شفايفها ....
-غادي ضربني ...
جعفر غوت بجهد : قلت لييك اجي الله يلعن طوااسلك فيين عمري حطييت عليك يدي ...
عفراء : غير داك نهار ضربتيني وزرقتي ليا فخاضي...
كمش حجبانو : هادي الالة عقلتي عليها ودابا اجي نعاود نزرقهم ليك باش تقادي معايا فطريق...
عفراء تخلعات: وعلاش فكيتين من خوتي من تا نتا غادي ضربني ...
جعفر : شبغيتيني ندير نخليهم يضربرو مراتي قدام عيني وانا ساكت ....
عفراء : وهانتا باغي ضربنس تا نتا ...
جعفر صاط بجهد : اجي لهنا بلا كثرة الهضرة....
قربات عندو كترعد وقفات قدامو وهزات عيونها فيه كيلمعو وباين عليهم البراءة وكيدورو فجنابها خافتو يضربها فشي جهة وهو كيشوف فيها و وففعايلها ...
جعفر : عاد جاك الخوف دابا علاش مفكرتيش فهادشي من نضتي دايرة ديك روينة ومنزلة عليا باطل ...
عفراء عضات شفاه ديالها بحزن...
-مكانش خدام عقلي ديك ساعة ...
جعفر هز صبعو نقرها فجبهتها ...
-هاد لعقل كيخدم عندك غير فتحرميات اجهنم الكحلة...
حدرات راشها بحزن ونطقات بشوي...
-سمح ليا ...
جعفر : سماحة ليها ثمن اعفراء ...
عفراء بنضرات فيهم حزن ..
-كنبغيك وغرت عليك مابغيت تا وحدة نشاركني معاك بغييتك ليا بوحدي وماتشوف تا وحدة من غيري ...
جعفر حط يدو على خدها كيسمح ليها دمعة ...
-راني ديالك اعفراء واش هادشي كامل لي كندير على قبلك ومزال عندك شك...
غمضات عنيها وحطات خدها على يدو لي دافئة ولمساتو لي مملوؤة بالحب ...
عفراء : خاصني نقول ليك شي حاجة ...
حرك ليها راسو باش تكمل كلامها ...
عفراء شافت فعينو مباشرة ..
-نهار كنتي مريض وجات عائلتي لقاو شي حاجة مرشوشة فباب درا وماما قالت ليا شي واحد سحر ليكم باش تفارقو ...
جعفر تصدم : كفاااش...
عفراء : واليوم حلمتك نعستي مع فاطمة ....
جعفر خرج عينو ونطق احرف اسمها بتلعتم ..
-ف..ط..م..ة ...
شك واستغراب واضحين فملامحو وهي كتزيد تأكد ليه ..
عفراء: عقلتي من دابزنا شنو وقع بيناتنا..انا وخا صعيبة ولكن منوصلش معاك لهادشي والكلام كنت كنخرجو بلا ما نشعر وليت غير كنشوفك كنتعصب وكنبغي نوض معاك صداع على والو ...
جعفر كيحاول يفسر بدون ما يحط لوم على تا واحد..
-يمكن تكون حالة غضب ودازت ماشي بضرورة سحر ...
عفراء : واش كضحك عليا اجعفر گاع داكشي لي داز وكتقول ليا ماشي بضرورة سحر ...
جعفر برفض : فاطمة مديرهاش كنعرفها مزيان
..
بعصبية هزات صبع كتصبع...
عفراء : ها هو لي مديرهاش تال لعيالات وماتعرف اش تحت راسهم ...
شدها من صبع لي كتصبع مخنزر ..
جعفر: رجعتي لفعايلك المصيبة مزال گاع ما بردتي من صداع ...
عفراء : ونتا لي كتقول فاطمة مديرش ..هاديك كون صابت تقتلني باش تشد بلاصتي وتزوج بيك ...
جعفر : سي عبدالله كنعرفو مزيان وهو مربي ولادو وعارفين بينهم وبين الله مغاديش يخسرو دنيا باش يرجعو يسحرو لناس ...
عفراء : وداكشي لي لقاتو ماما فالباب شكون دارو انا...
جعفر دوز يدو على شعرو ...
-شكون غادي يسحر لينا وحنا ما أدينا حتا واحد...
هزات يديها لفوق ..
عفراء : هضر اخويا على راسك اما انا كلشي كارهني...
شدها من شفاه ديالها مخنزر...
جعفر : ديك خويا حيديها من فمك ونتي دايرة حالة فگاع عبادالله...
عفراء : لي دار بيا كنعطيه.. علاش بغيتيني نسكت ليهم وهما لي كيجبدوني ...
جعفر هز حجبانو ..
-غير نتي لي كاينة فهاد دنيا كيجبدوك ..بحال قبيلة دايرة مصيبة وشركتي معاها طسيلة كاملة وليت انا لي مكنسواش ...
عفراء مخزرة : حمدالله كنت غير كنحلم كون كان بصح متلقانيش قدامك ...
جرها من عنقها : وليني راكي مكتحشميش البرهوشة مزال هاد الفم مابغا يتوب بهاد المصايب كاملين لي دار ...
عفراء : وااحيد يديك اجعفر متخلينيش نبدا ندابز معاك عاود ...
جعفر مبغاش يطلقها...
-لا غير دابزي اصلا انا معول عليها هاد ليلة باش نيت نربيك مزيان بنتي ليا مزال معارفاش هاد جعفر لي قدامك ...
عفراء تقصحات من المسكة لي داير ليها فعنقها ...
عفراء: اش درت انا گاع ....
جعفر قصح شوفة وزير على الفك ديالو ..
-نسمح ليك على كلشي وندوزو تا لهادي اعفراء لااا .....تهبطي من قيمتي قدام خوتك اتشوفي جعفر اخر ..انا لي عندي كنجي نقولو ليك ومكنمشيش عند ناس نعاود ليهم ..كنجي ليك فاص وفوجهك كنقول لي كاين فماترجعينيش صغيير ومكنسواش فعنين ناس اعفراء ...
بعد منها خلاها تفهم كلامو ودخل دوش معصب ..توضى وخرج كيمسح وجهو ويديه داز من حداها وهي كتشوف فيه..
توجه لبيت كيلبس فوقية وهي تبعاتو بحزن ...
عفراء : جعفر واش غضبان مني ...
عاطيها ضهرو بدون ما يهضر معاها نطق ..
جعفر: كلام لي عندي قلتو....
عفراء:ماشي لخاطري اجعفر داكشي شفتو بين عيني بحالي حاضرة فيه..كنشوفك داخل لبيت وهي جراتك حطاتك فوق ناموسية وطلعت فوق كرشك كتحيد حوايجها ونتا عاجبك الحال و ...
حط يدو على فمها سكتها كيغلي من لداخل...
جعفر:واش من نيتك جالسة كتعاودي ليا ...
عفراء :وشنو بغيتي ندير باش تيق بيا ..
جعفر : عفراء فرزي لكلام راكي كتطيريها فسما زعمة ماشي اتجي ليا وضربك تلفة ....
نطقات ببراءة : وراه بصح كضربني تلفة من كنشوفك ...
كل الكلام لي كان موجد يقولو ليها تلف ليه ورا كلامها ما عرف باش يرد عليها وزادت كملات عليه من هزات يديه باستها ونطقات بحزن ..
عفراء : سمح ليا عمري نعاود ...
جعفر :شحال قدي نسمح وديما كتعاودي نفس الحوايج...
عفراء بترجي: اه تسرعت ولكن غير حيت الغيرة خلاتني ندير كل هادشي مقدرتش نتقبل انك مع وحدة اخرى ولو يكون حلم ...
جعفر:علاش متسنتيش تا نجي ونهضرو بلا ديك شوهة كاملة ...
عفراء :كنت تايقة ان داكشي لي شفت بصح.. وخفت من تجي تختارها حيت كان بان لي فالحلم عاجبك الحال معاها بزااف وانا درت داكشي ، قلت والله ما يقتلوك خوتي ونبكي عليك مرة وحدة فقبرك ولا تكون مع غيري ونتحرق انا فقلبي ونبكي عليك حياتي كاملة ....
هز حجبانو مبهوض...
جعفر:وليني راكي شيطانة ...
دورات يديها على عنقو وطلعات باستو في فمو ونطقات بعيون كيلمعو...
عفراء : الغيرة عمات ليا العنين وسدات ليا العقل باش نفكر ..من صغري وانا كنغير عليك ودبا زادت كثر من كنشوف نظرات الاعجاب فعنين لبنات كنبغي نعمي ليهم لعنين باش تا وحدة ما تشوفك ولا تحط عنيها عليك بقا غير تقيصك ولا تلمسك ...
جعفر عاجبو كلامها ونساه فلي واقع وهي كتعتارف بغيرتها الشديدة تجاهو ...حط جبهتو على جبهتها وكيستنشق انفاسها ...
جعفر:من حقك تغيري ولكن ماشي بهاد طريقة لي درتي ...
عفراء حطات يديها على لحيتو كتحركهم بشوي ومغمضة عنيها كتسمع لكلماتو الهادئة ...
-دوزها ليا اخر مرة .....
جعفر باسها فجبهتها وحيد ليها يديها من عنقو ...
-سيري توضاي وأجي تصلي معايا ...
عفراء حشمات : معنديش حوايح ديال صلاة ...
جعفر : عندي عباية جبتها معايا من سعودية لبسها واجي تصلي ...
عفراء : وتسمح ليا...
جعفر حرك راسو : مسامح كريم الالة ...
مشات لحمام كتجري وكضحك فرحانة خلاتو نتبع ليها العنين مبتاسم بينما كلامها كيدور ليه فراسو تلفاتو بالحلمة وبسحر لي قالت ليه ...
حل لماريو هز العباية مزال فميكتها جديدة بلون الأسود وفيها خطوط بالعقيق من جهة ليدين هي وزيفها ..حطهم فوق ناموسية باش تلبسهم وتوجه لباركو سد عليه لباب وهز تليفون دور نمرة وتسنا طرف الاخر يقبل الاتصال...
جعفر : الو شيخ عبدالله ...
عبدالله: اهلا ابني جعفر ..لباس....
جعفر : لباس حمدلله .."شد فلحديدة ديال لباركو مزير عليها "..بغيت نهضر معاك فموضوع مهم ...
عبدالله : تفضل اولدي مرحبا ..
جعفر : سي عبدالله بيني وبينك الاحترام وداكشي لي درتي على قبلي عمري نساه وهاني خدام كنرجعو ليك شوي بشوي وداير كل جهدي معاك وفالقضايا ديالك...
عبدالله بشك : اييه اولدي انا مقلتش العكس ياك لباس...
جعفر ببرود: غادي يكون لباس اسي عبدالله لو هضرتي مع بنتك تنساني عليها ...
عبدالله بسخط: كفاااش بنتي!!..
جعفر : نتا عارف وانا عارف منغطيوش شمس بالغربال..كنت كنعونها على وديتك نتا حيت طلبتيني وتعاملي معاه كان ككليان عندي معطيتهاش امل ابدا ومخليتهاش تفهم الأمور غالط وكلكم شفتو المرا لي ختاريت وسديت لباب كامل لي غادي يجي منو لبرد ولكن بنتك مفهماتش هادشي ومزال تبعاني ومبغاتش تفهم راسها وانا مبغيتش نجرحها بكلامي وعيطت عليك نتا لي باها تفهمها اني مزوج وكنبغي مراتي وممعولش نجيب عليها ضرة ...
عبدالله حشم وما عرف ما يقول من غير...
-هي كتبغيك من كانت صغيرة متقدرش تنساك...
جعفر : كنضن كلامي وصلتو وقلت لي عندي انا كنبغي مراتي وكنبغيها من كنت صغير وكنعرفها قبل بنتك ومنقدرش نسمح فيها ولا نفكر راسي بلا بيها..نهار دكرتي ليا زواج بي بنتك انا رفضت وقلت ليك كلشي ونتا فهمتيني وقلتي ليا انهضر معاها تنساك لكن بان ليا ما هضرتي معاها فوالو ومزال كتسنى مني شي حاجة عمرها غادي تكون ...
عبدالله كيسايس معاه: اش فيها اولدي لا تزوجتي مرة تانية جوج خير من وحدة ...
جعفر نفاعل فكلامو ..
-وحدة عندي بارك وقانع بيها ومباغيش غيرها وبنتك لحد الأن داير بوجهك وصابر وساكت ومبغيتش ندير شي حاجة لي نخلي صمعة ديالك تنزل ...
عبدالله جاه شك : شنو كتقصد...
جعفر : سول بنتك اش كنقصد واقسم بالله ونلقاها هي ورا هادشي لي واقع مغديش نرحمها ...
قطع تليفون مزير وحجبانو قارنهم لوسط كيعض فمو وكلام عفراء كيدور ليه فراس زاد عصبو ..
هو كان عارف فاطمة كتبغيه لكن من لول كان كان تعامل ديالو بارد معاها معطيهاش امل ولو قليل انه ايكون ليها ونهار باها بغا يزوجها ليه رفض ومبغاش وخا كون ما مكانتش عفراء مكانش اصلا ايوافق يتزوج بخليجية كان من لول باغي بنت لبلاد لي توالمو وتفهمو ...
سمع حس فالبيت وهو يدخل تكى على لباب كيشوف فيها كتلبس العباية وكتقاد زيف وهو مراقبها ...
جعفر : اجي نصاوب ليك زيف...
مشات عندو كتسوط ...
عفراء : ممولفاش ندير زيف ومعرفتش نصاوبو..
جعفر كيصاوبو ليها وكيهضر بشوي...
-غادي تولفيه احبيبة...
عفراء خرجات عنيها :بغيتي دير ليا الحجاب ...
جعفر شدها من يديها هز صلاية فرشها ورا صلايتو ...
-الهضرة من بعد نصليو هو الأول...
تقابلو مع القبلة وبدا كيقيم صلاة بصوت جميل وهي حادرة راسها حشمانة ومتبعة الاقامة فنفسها...
بدا كيقرا القرأن بصوت مسموع ويركع ويسجد لله تعالى وفكل سجدة كيطول سجودو ويدعي الله التوبة والمغفرة وحسن الخاتمة ويدعي معاها من كل قلبو ربي يهديها لطريق المستقيم ويغفر لها ويرحمها برحمته الواسعة...
سلا ودار عندها بقا جالس فوق صلايتو وهي كتشوف فيه مزال عليها الحشمة و منورة بحجابها وزادها جمال على جمالها ...
جعفر : باش كتحسي دابا ...
عفراء هبطات راسها بخجل...
-صراحة حشمت وماعرفتش علاش... مولفة كنصلي فرمضان ومن كيخرج كنقطعها ولكن دابا فشكل حشمت بزااف ...
جعفر تبسم : عادي كل توبة كتجي بخجل لتقصير لي كديري فصلاتك ومن كترجعي وتوبي كتحشمي من لي خلقك حيت تعطلتي بزااف وهو برحمتو كيتنساك ترجعي لطريق ...
حركات راسها ساكتة وقلبها كيضرب بجهد وهو حرك صبعو لبيرو ديالو ..
-سيري جيبي القرأن واجي نقرا انا وياك ...
دارت ما قال ليها مشات جابتو ورجعات عندو بحال لبنية صغيرة ..عطاتو ليه و جلسات قدامو كتشوف فيه وهو مبتاسم ..باس القرأن بإشتياق وحلو على سورة البقرة وحطو قدامها ...
جعفر : قراي...
عفراء هبطات راسها كتقرا وكتعكل فالكلمات وكتغلط فشَكْل وهو كيصحح من وراها
..زادت غرقات فحوايجها مقدراش تهز راس ..
جعفر : كيجيك الخط صعيب فالقراءة ولا العربية لي مشدهاش مزيان ...
عفراء : صراحة بجوج ....
جعفر كمش حجبانو : علاش مشداش العربية حنا باش كنهضرو وباش كنقراو ...
عفراء مقدراش تشوف ليه فعنيه ...
- ركزت غير على الفرنسة و الانجليزية حيت كنت باغية ندير اداب انجليزي...
جعفر : وشنو لي منعك من العربية كيف ما عاطية وقت لتعلم لغات اجنيبة علاش متعطيش العربية نفس الوقت وتعلمي ليها ..القرأن وخا تقرايه و تسمعيه مغاديش تحسي بيه هنا .."حط يدو على قلبو "... خاص اولا تفهمي الكلام وشنو القصد ديالو وهذا هو لي كيمسنا فقلوبنا وكيخلينا يا اما نخافو من العداب لي كيتسنانا او نفرحو برحمة الله وفضله علينا ...أما انك تقراي ونتي مفهماش الكلام عمرك غادي يجيك شعور انك تقراي وتولي تبكي فنفس الوقت وتعرفي أن هاذا كلام الله لي خلقني وخلقك وخلق كل ما هو موجود...
ساكتة بدون رد من طرفها ... فهادشي مكيبقاش نقاش ولا تبين قوة لسانها ..هذا القرأن لي لانقاش فيه ...
خلا القرأن فالجهة ديالها وقال..
جعفر : انا انقرى ونتي تبعي معايا و الاية لي مفهمتيهاش قوليها ليا نشرحها ليك ...
بدا كيتلي القرأن وهي متبعة معاه وبدا عقلها كيتفتح وفين ما وصلات لشي اية مفهماتش المعنى ديالها كتوقفو وهو كيشرح ليها وعاطيها وقت و الخاطر ...
نساو الوقت وبقاو جالسين فوق صلايتهم وبيناتهم القرأن وصوت تلاوة ديالو هي لي كتسمع فدار و كيقطعو صوت عفراء بعد المرات من كتبغي يشرح ليها ...
شرقات شمس بعد ليل طويل وناس كيدوزوه معارفين اش كاتب ليهم الله ....كاين لي ليوم تولد وكاين لي ليوم تسلات ساعتو هادي هي دنيا تا حاجة مدايمة .....
فالكوزينة كيصاوب القهوة وكيهضر فتليفون مع كمال ...
جعفر : متعدبش راسها بزااف تجي هنا وغادي ناخدو كلشي ...
كمال : اولدي راك عارف الحاجة مكتفاهمش وهي فرحانة كل نهار طيح عليها حاجة فراس ودابا راها كتقول ليا يجي يدير العرس فالقبيلة مبغاتش ديرو فالمدينة ...
جعفر بدا كيضحك : انا فهادشي معندي ما نقول كلشي ديال عفراء هاد ساعة ...
كمال: وصراحة مكرهناش تعرس هنا ناس لقبيلة كلهم كيسولو على العرس وفرحانين بيكم بزااف باغين يحضرو ليكم ...
جعفر : يكون خير ...
"حط القهوة فوق طبلة "..
-دوز ليا اية نهضر معاها ...
كمال : وخا اولدي ...
خرج كيقلب عليها لقاها مخشية فزريبة ديال لخرفان هازة خروف حديت الولادة كضحك معاه و كترضعو فرحانة وكمال من شافها بدا كيضحك ..
كمال: بنتي اية مع صباح جايا ترضعيه...
اية هزات راسها وعيونها كيبريو وحنيكاتها مطبزين رجعات صحتها من جات لقبيلة لي معارفينش قصتها وقبلوها بيناتهم وتهلاو فيها والحاجة لي دارتها في متابة بنتها وكمال لي ممقصرش من جهدو معاها فين ما سمعها بغات شي حاجة كيجيبها ليها وخا مطلبوش ..
دروها فعنيهم وزادت عزازت لأنها الأمانة لي خلا ليهم جعفر ...
خدا منها لخروف ومد ليها تليفون ..
-هاكي هضري مع جعفر ...
بفرحة طارت على تليفون ...
اية : خويا جعفر ...
جعفر كيحضك من سمع لكلام ..
-مخشية عوتانيك وسط لبهايم ...
كتحك راسها بحرج..
اية : كيعجبوني نتهلا فيهم ...
جعفر : ديري لي بغيتي مهم تهلاي فراسك..
شاف عفراء جلسات حداه هازة حجبانها فيه وهو مد ليها القهوة ودور يدو على كتفها وبقا كيضهر عادي ...
-ناقصك ش حاجة نجيبها ليك معايا ...
اية بدات كتقول اش بغات وهو قرب ليه مذكرة ديالو لاصق فيها ستيلو وبدا كيقيد گاع داكشي لي بغات...
جعفر كمش حجبانو : الحوايج خاصك تكوني معايا مغاديش نعرف قياسك ...
نطقات عفراء حداه : انا عارفة قياسها....
جعفر مد ليها تليفون : هاكي هضري معاها نتي لي كتفهمو فأمور العيالات ..
خدات منو تليفون كتشوف فيه بنص عين وهو هاز كاس قهوة مخلطة بالحليب كيفطر بهدوء وملامحو عادين ...
اية : الو ختي عفراء لباس عليك ...
عفراء: حمدلله ونتي كيف بقيتي شوي...
اية بإحراج: سمحي ليا عادي نصدعك ونتي مشغولة بعرسك غير بغيت نحمر وجه خويا جعفر فعرسو ...
عفراء تبسمات: مكاين باس ولا تقدري تجي لرباط وخودي حوايج على دوقك ...
اية شافت فكمال لي واقف حداها وهو هز كتافو ..
-بغيتي تمشي عندهم نديك بعد غدا ...
ردات على عفراء بفرح: صافي انجي عندكم...
عفراء : اوكي انتسناك...
قطعات وحطات تليفون ودورات راسها لجعفر وقالت بشوي ...
عفراء:كمال عارف قصتها..
جعفر:هو بوحدو لي عارف ...
عفراء :بانت لي حاطة عليك راس بزااف ..
هبط باسها فعنقها وطلع عضها فودنها وكيهضر بصوت تقيل ...
جعفر :كتغيري ...
عفراء دارت عندو عضاتو بجهد في فمو ورجعات كملات فطورها ..
عفراء بين سنانتا : نوو عادي هي بحال ختك ...
مدات ليه تليفون كضحك وخدات خروفها ورجعات بلاصتها هزات رضاعة كترضعو وكمال كيشوف فيها ويضحك غير وحدو...
كمال: باركة عليك دوزي تفطري غادي تعاودي تنساي ومتفطريش..
حطات لخروف ووقفات كتنفض حوايجها ودازت من قدامو مهبطة راسها ...غادي تجاوزو وهي تعكل وترمات كاملة فحضنو وزيف زلق ليها وخلا شعرها كامل ينزل عليها...
حس بجسم دافئ ترما فحضنو وانفاسها الساخنة كتضربو فلحيتو ..ورك على خسرها باش يوقفها ويبعدها عليه ومع لمسة حس بجسد رطب وهش خلا قلبو يضرب بجهد..
كانت لمسة امرأة بعد مدة طوييلة ...
المدة لي نسا فيها لمسة امرأة وعاش وحيد بحال شي رهبان ديما بعيد على لعيالات بعد المصيبة لي دار ...
وهي الأن فحضنو ورائحتها الجميلة لي دخلات مع نيفو زادت دوخاتو كثر وحياة فيه حوايج نساهم او كان كيتغافل عليهم ..
بعدات منو بزربة كتعكل فحوايحها وغارقة فالحشمة مقدراش تهضر هربات من قدامو خلاتو واقف فمكانو ومزال ملمس جسدها الدافئ كيحس بيه ...
هبط راسو مزير وضرب دورة من ورا الفيرمة مبغاش يشوفها وغادي كيطول فطريق و كيلعن شيطان فنفسو حتى بدا كيحس براحة عاد توجه لبيتو ..هز جلابة دارها على كتفو وخرج حادر راسو متوجه لجنان ديالو لي خدامين فيه مالين دورا يشوف فين وصلات الخدمة ....
بقا كيدور من جنان لجنان ومقابل داخلة والخارجة ومزال داكشي لي وقع صباح مقادرش ينساه وزاد راسو كيزدح بالحريق ...
شار لواحد من الخدامة لي عندو ..
كمال:سير اولدي جيب ليا كينة ديال راس وشي قرعة لما ..
توجه دري لحانوت لي عندهم فالقبيلة وفنص طريق تلاقا بواحد راكب فوق المطور باين عليه شرف وسنانو كحلين بالحشيش...حبس المطور كيشوف فدري..
-ياك ليوم كتكون خدام فجنان ديال كمال ولد الحاج مالك كدور ...
-سي كمال لي قال ليا نجيب ليه كينة ديال راس...
كمش حجبانو وبدا شيطان كيلعب ليه فراس وهو لي عارف كمال مزيان وفترة شبابهم لي دوزوه مع بعض غير كمال بين ليلة ونهار تاب ورجع لطريق وبعد منهم ...
جبد كينة من جيبو ومدها لدري وعلى ملامحو نضرة ديال لغدر ...
-ها هي كينة ديال راس ديها ليه وبلا متقول ليه انا لي عطيتها ليك حيت راك عارف انا وياه مدابزين ومكنتفاهموش...
دري كيشوف فالكينة بإستغراب وحيت مزال صغير مكيفرزش ..
-مالها صغيرة هكدا وحمرة ...
-ديرها ليه وسط لما تا دوب عاد عطيها ليه راه دغيا كتحيد شقيقة وحسن ليك زرب قبل ما تشدو شقيقة ديال بصح ويبدا يغوت عليكم ..
دري تم راجع لجنان : عندك صح سي كمال من كيتعصب كيجمعنا كاملين ..
طار لجنان هز كاس ديال لما وحط فيها ديك الكينة بقا كيحركها حتى دابت عاد داه لكمال لي شربو وماحس بوالو ...
وصل وقت ضهر وجسدو بدا كيسخن وبدات ضبابة على عنيه وعقلو كيغيب ..كيدور راسو ليمين و ليسار بجهد من كيحس براسو بحالي غادي يسخف ..
توجه لفيرمة ديالو وكيشوف الارض كتطلع وتهبط معارفش اش واقع ليه ..
دخل مع لباب وهو بتوقف من شاف خيالها ...هز راسو لي تقال عليه وعنيه حالهم نصف حلة كيشوفها اش كدير ومتبع عينو على جسدها الأنثوي وكيتفكر شعور لي حس بيه صباح وزاد جسدو سخن كثر ..
متبع نضراتو ليها وهي كتمشى امامو كتصخر وهازة لبجامة من جناب وخاشياها فحزام تزارة وسيقانها كيبانو من جناب ولحمها رطب وبيض كيشعل وحيت مزال صغيرة عاطيا العين بزااف ..
حنيكاتها حومر بشقا لي كدير وعاطية فيه الخاطر وحبيبات العرق كينزلو من جناب وكيخلي بعض شعيرات لي خارجين من درة تلصق على وجها لي زادها اغراء اكثر...
سرط ريقو بصعوبة وكيحاول يبعد عينو ويلعن شيطان لكن جسمو مقابلش يتحرك ..رجعات ليه شهوة لي طفاها سنين بعد موت لكبيرة ودنب لي هز حياتو كاملة ..
شهوة ورغبة تجاه النساء لي ماتت 15 سنة رجعات حيات بقوة وداتو كلها تنملات عليه وخلاتو يتنفس بصعوبة وعينو تسكرو عليها وهي كيف طفلة كتبتاسم وضحك وتشقا غير مدركة لنضراته وشهوته اتجاها..
قرب عندها ببطئ وهي من شافتو تلفات وبزربة بدات كتهبط البيجامة على سيقانها وتغطي شعرها حشمانة ...
كمال: غير خليك جالسة مالكي وقفتي..
اية هبطات راسها : مكنتش عارفاك اتجي فهاد الوقت مزال ما نصبت لغدا ...
كمال نار شاعلة فيه وكيحاول يهضر بشوي..
-فين هي الحاجة ...
اية : مشات لتعاونية تشوف العيالات...
كمال : خلاتك غير بوحدك..
اية حركات راسها وبقات صامتة وهو مد يدو حيد ليها زيف لي مغطية بيه شعرها وحيد لقراص لي شادة بيه شعرها ... خلا شعرها الاسود ينزل كامل على ضهرها وهي زادت تكمشات فبلاصتها مخلوعة ..
اية : سي كمال عطيني زيفي ..
كمال : عيطي ليا كمال بلا ديك سي زعمة راكي ولفتيني..
رجعو دموع فعنيها وحابساهم بزز وهو كيدور يدو على شعرها خلا انفاسها تحبس وداتها تجمد...
كمال عينو تعسلو ورجع وجهو حمر وشيطان لاعب ليه فعلقو ..
-نتي زوينة بزااف...
بغات تهرب منو وهو يشد ليها يديها جرها عندو وهبط راسو باغي يبوسها بزز وهي كتركل فحضنو وكتبكي بجهد ..
اية : بعاااااد مني..بعاااد ..."كضربو لصدرو "...انقووولها لخويا جعفر ..ايقتلااااك....حيااااد متقييصنييييش ..
كمال مكيشوف والو ومكايسمع والو ..قدر بسهولة يتغلب عليها ويحكمها بين يدو وغزا فمها كيقبلها بشراسة وكيتذوق حلاوة فمها وطراوة جسدها ومتمتع بأنينيها وسط فمو
هو فعمر الأربعين وهي في عمر 18 وعاشت ما لم يعشه احد في سنها...متصوقش ليها والمعاناتها بل كيفكر غير فشهوة ورغبة فين يطفيها وهي لي شعلاتها بعد ما كان طافيها ومعتازل لعيالات ...
هي لي جبداتو وهي لي حيات فيه ما قتل سنين ..تلوم راسها ومتلوموش على افعالو...
هدو هما الكلمات لي كيدورو ليه فراس ولي زينهم ليه شيطان ويخليه يكمل فأفعالو ممصوقش لصراخها وانينها المتألم ودموعها الحارقة لي حرقات كل امل عندها فهاد الحياة وجسدها كيتعرض لتعديب رجل للمرة التانية ...
قطع ليها لبيجامة من جهة صدر وبدا كيعض ويمص وفين ما حط فمو كيخلي بلاصة معمي البصيرة وناسي انها امانة ..
طيحها كاملة فالارض وطلع فوقها كيحك جسدو مع جسدها وهي فاشلة بكثرة الصراع وهو متغلب عليها فالقوة ...بغا يفرق ليها رجليها يدخل وسطهم وهي كتركل وتغوت بكل طاقة لير بقات عندها حتى دخل صوت زعزهم بجوج ...
تهزات هي بصوت لي دخل وسطهم وخلاها تعطي امل لنفسها وتنتاجد بيه عله يمد لها يد المساعدة اما هو بقا في افعاله مسمعش الصوت لأن عقلو غائب عن الوجود ومركز على الجسد لي كيفرس فيه ويتمتع بيه ويطفي نار الشهوة لي تملكاتو لدرجة لا تتصور ...
الحاجة لي واقفة امام الباب جامدة فمكانها ودنيا دارت بيها فهاد المشهد المفزع ..كتشوف الطفلة لي خلا ليها جعفر امانة تحت ولدها لي كيفرس فلحمها وهي بدموع فعينيها لي بتلو وجهها البريئ وصراخها طلبا لرحمة وكتشوف فيها بعيون حزينة وهزات يديها كتمدها لعندها وتنطق بصوت مجروح نتيجة صراخها المتواصل لي جرحو احبالها الصوتية ..
اية: عتقيييني ...بعديييه منييييي...
الحاجة مزال فمكانها بدون ردت فعل ورجليها فشلو عليها وضبابة ولات كتشوفها حتى فاقت بصرخة تانية لي نطقاتها اية كتنتاجد بيها...
اية : مااامااااا عتقيييني ..
كلمة ماما لي فيقاتها من افعال ولدها ...توجهات بزربة دفعاتو برجليها وجرات اية لحضنها كتقلبها واش قاصها من شافت سروال باقي فبلاصتو تنهدات براحة وبدات كتغطي صدر اية لي تعرا وباين فيه اماكن حمراء من المص و العض ...
اية فحضنها ساكتة كيف الموت فقط جسدها لي كيتهز بالرعب لي كانت فيه وعنيها خارجين والحاجة كتزيد تعنقها اكثر من شافت حالتها لي مكتبشرش بالخير ..
بغضب هزات راسها لولدها لي كيشوف فيهم وكينهج وعينو حمرين من وجهو عرفات اش واقع وكفاش متعرفش وهو ولدها وكان فشبابو ديما داخل عليها بهاد شكل ..
زاد قلبها ضرها والعضب قصحها من جيهتو ونطقات بصوت كي رعد من شدة استيائها...
الحاجة : صااااافي رجعتيييي لداااك المرض تااااني ..
عقلو مكيوصلوهش الكلمات باش يفسرهم كيشوف غير فأية وناض كيتعكل فمشيتو وراسو تقيل عليه غادي عندها بغا يخطفها من الحاجة والحاجة بصدمة بدات كتجر اية منو حطاتها ورا ضهرها وهزات عصا كتحلف عليه ....
الحاحة : هاديي هي توبة لي تبتي وكل نهااار تبكييي عليا وعلى عملتك ودابااا باااغي ديير كفس منهااااا ..واااش معندكش الوجه علاش تحشم...
بغ يعاود يشد اية وهي ضربو بعصى ليديه مرحماتوش وخا مو ولكن تال بنات ناس ممعاهمش لعب ومتسمحش لولدها يتعدا على لي كان... يكفي موت الكبيرة لي مزال على رقبتها حيت سكتات عليه وحمات ولدها ورجعاتو لطريق لكن فيين عمرها نواات ان كمال ايرجع لديك طريقة مرة تانية وايبغي يدير نفس الفعل ويغدر نفس الشخص ...
دنيا ضلامت فعنيها بأفعال ولدها وكتغوت كيف الحمقة..
الحاجة : واااش مكفااكش ما درتييي لكبيييرة وبغييتي ترجع لهاد لبنت تكرفص عليها اشمااااتة عييفت رجاال ...
فور ما سمع اسم الكبيرة جمد فمكانو وبدات الهلوسة كتزيد وتطغي على افعالو ..
بدا كيتخايل لكبيرة امامو وقلبو زاد فدقااتو وبان حبو ليها لي كان كابتو سنين فقلبو...
ولو انها ماتت مقدرش ينساها كان كيبغيها بطريقة مجنونة ...فقط فأيام شبابو وصل حبو بطريقة مقززة لأنه العقل لي يفكر بيه كيف ناس فداك الوقت كان دايخ بشراب والحشيش...
اما حبو تجاها كان مكيتصورش من نهار شافها بلباسها الابيض بغاها من قلبو من اول نضرة... حتى كيتصدم ان لباسها الابيض داك ما هو الى لباس ارملة مات زوجها وترك بدرة في بطنها..
بدرة التي انتجت جعفر اليوم ...
مكانش متوقع حبو ليها ايكون نتيجتو هو انها اتموت امامو ..ديك الصورة لي مبغاتش تمحا بين عينو وكل ليلة يجيه كابوس بصور كبيرة غارقة فدمياتها وجعفر حاطها فحضنو وروحها كتودع جسدها..
ديك ليلة لي اول مرة كياخد المهلوسات ومع شراب زاد داخ وكيف عادتو مع الفجر يتسلت يمشي يشوف لكبيرة لي كتمشي تشوف ارضها وتحصدها فهاد الوقت ...
كان معول غير يشوفها من لبعيد تا لقا راسو قدامها كيحاول يقيصها وهي كتهرب منو ومن قوا عليها وطيحها فالارض هزات منجل لي كتحصد بيه ضرباتو لرجلو خلاتو فدميات وهربات خايفة مكتشوفش قدامها وهو تابعها كيعرج حتى كيشوفها دايزة من طريق وسيارة جايا بسرعة دخلات فيها رماتها من مكانها وطيحاتها كلها دم وابنها الصغير لي كان جاي عندها يعاونها فحصد الارض كيشوف امو كتضربها سيارة وكطيح وهو بسرعة مشا عندها هزها فحضنو وهي كتركل وروحها خرجات وبقى جسدها فقط لي فحضن جعفر المصدوم ...
صورة طفل وابنها لي ما تمحاتش من بالو وكتزيد تأنبو كل ليلة وبالهلوسة لي هو فيها دابا رجعات ليه كل ذكرياتو حتى بداو دموع يهبطو ليه وجسدو كيترعد وفمو كيخرج منو مادة بيضاء بحال الكشكوشة وطاح كامل فالأرض مكيتحركش...
الحاجة بخوف توجهات عندو كضربو فخدو يفيق وهو مغيب مكيدير تا ردة فعل ...جرات اية دخلاتها لأحد الغرف وغطاتها كتهضر معاها..
-متحركيش من هنا تا نرجع...
اية بخوف : بغييت نمشي عند خويا جعفر..
باست ليها راسها كطلب فيها...
الحاجة: عافك ابنتي ياك انا ماماك و كتسمعي ليا بقاي هنا متمشي تال شي بلاصة ومن نجي نعيطو على جعفر صافي ...
تأكدات منها عاد خرجات كتجري عند ولدها بدات كتغوت على العساس لي كيعس لبهايم فليل ..
شاف كمال طايح تخلع...
-مال سي كماااال اش واقع لييه..
الحاحة : اجيي عاوني نديوه لصبيطار بزربة...
العساس : يا ربي سلامة هادي ما تكون غير شمس دارت فيه هاد الحالة عيت ما نقول ليه متمشيش لجنان وانا انتكلف ولكن والو عزيز عليه يدير شغل بيديه ....
الحاجة : بلا قوة الهضرة واجي عاوني لولد ايموت ...
عاونها هزو كمال دخلوه فسيارة وشدو طريق لصبيطار وهي مدخلة ليه راسو فحضنها عيات ما تقوي فراسها لكن ضعفها خلاها تبكي على ولدها وفحالتو وفالحوايج لي دار... تعدب وزاد عدبها معاه ...
وحرم ولد من امو ويتمو وهو صغير وخلاه يتعدب وسط الدياب ما فيها رحمة ولا شفقة ... وخا الاعمار بيد الله لكن الغلط وقع والمسؤول هو ولدها وهدا ما يغطيه غبرة ...
ما عمر المخدرات كان حل لنسيان المشاكل بل هي كتزيد فالمشاكل وكتخرب الذات وكتخليك تعصي الخالق ودير حوايج عمرك فكرتي ديرهم ..
شحال من واحد خرج على راسو بكثرة تعاطيه للمهلوسات يا اما حماق او غتاصب او قتل ..
حوايج كيديرهم شخص وهو بدون وعي ومن كيفيق كيلقى راسو داير موصيبة ماليها حل ...
الواحد يعمر راسو بكتاب الله ويبعد من لي يأديه وكيف معتازل لحم لحلوف وتقول عليه حرام ..عتازل حتى المخدرات والشراب وكل ما يؤدي الذات فتاهو حرام عند الله ماشي غير لحم الحلوف لي هو عندنا الوحيد لي حرام وما نكلوه اما شراب الله غفور رحيم..
نعم الله رحيم ولكنه كذالك شديد العقاب...
في الرباط وفنصف الليل ضرباتو الفيقة وقلبو كيضرب بجهد وجسدو عرقان ...
جلس فبلاصتو كيدلك جبهتو بألم من الحلم لي حلم او ربما ماشي حلم بل دكرى..
دكرى ديال موت امه بين يديه..
جمع الوقفة وكيتمشى تقيل هز تليفون ودوز نمرة لي يرتاح فيها بدا تليفون كيصوني بدون فائدة واضح انها ناعسة ..
قطع بدون ما يعاود يتاصل مبغاش يزعجها وسط نومها ..رما تليفون فوق صدراي وهز راسو لفوق كيتنهد بجهد وعاود دور راسو على دار لي خاوية ومضلمة ساكن فيها بوحدو ومع الحلمة لي حلم زاد فالوحدة لي هو فيها...
لعن شيطان و وكل امرو لله كيف عادتو ..توضى وفرش صلايتو وبدا كيصلي قيام الليل ويدعي لأمه برحمة ولنفسه بالتبات والرزق ولزوجته بالهداية ....
شرقات شمس وصبحات وضوات طريق لكل تالف ...دخلات الحاجة باين عليها التعب ونعاس ماشافتوش ...
توجهات لبيت لي خلات فيه اية بانت ليها ناعسة فوق ناموسية توجهات عندها غطاتها وبقات حداها كتشوف ليها فوجها وحطات يديها المجعدة لي باين عليهم زمان فوق يدين اية الجميلة والرطبة وهي في بداية شبابها ..
بقات كتلمس يديها وتهزهم تقبلهم وترجع تحطهم تلمسهم بدفئ حتى حلات عنيها بدون ما تنوض بقات فقط كتشوف فبلاصتها بصمت والحاجة كدور يديها الاخرى على شعرها ...
الحاجة : كيف بقيتي ابنتي شوي..
بقات صامتة لمدة عاد نطقات بهدوء..
اية : فين هو جعفر ...
الحاجة : عافك ابنتي ما خاصنا صداع ومشاكل انا انربيه وعمرك تعاودي تشوفي وجهو فهاد دار..."باست ليها يديها"... بلا متقوليها لجعفر ابنتي يرحم ليك الوالدين...
اية رجعات كتبكي مخنوقة والخوف متملكها ..
-بغييت نمشي عند جعفر ..ديييني لجعفر ..
الحاجة كطلب فيها : لا ابنتي واش جعفر تا ضحكات ليه دنيا وما بقا ليه والو لعرس ونوضو نصدعوه بمشاكل ديالنا ويدابز معانا وحنا لي عندو وانوقفو معاه فعرسو ..
سكتات ورا كلام الحاجة بقا فقط صوت بكاها لي كتسمع لكن معوداتش جبدات اسم جعفر ..رجعات كلشي لقلبها وبقات كتبكي بحال طفل صغير والحاجة كتعنق فيها وتبكي معاها..
الحاجة : عااارفة ابنتي هادشي لي كنديير فيه ممزياانش ولكن رااه ولدي منقدرش ندووزو ..ونهار لي تولدي تا نتي اتفهميني...
رجعات كتصرخ بأعلى ما فصوتها من سمعات اسم لولاد ..كتضرخ بحال لهبيلة وضرب يديها لكرشها وكتقول ...
اية : ماانقدرش ..مانقدرش نولااااد..لولاااد عمري غادي نحلم بيييهم حيييت مااا عندييييش...
الحاجة معارفاش قصتها ومفهاماش اش كتقول وضنات انها كتهضر نتيحة صدمة لإعتداء لي دار ليها كمال ..
حيدات ليها يديها لي كتضرب بيها كرشها وعنقاتها محكمة فيها باش متأديش راسها ...
-صاافي ابنتي متضربييش رااسك ..هاا انا معاااك وغادي نرجع لييك حقك يااك قااصك انا غاادي نزوووجك لييييه ...
تقطع صوت اية وهزات فيها عيونها بصدمة بينما الحاجة كتمسح ليها دموعها ...
-اه انزوجك ليه وغادي نخليه يكتب لييك كلشي فسميتك كل هاد الاراضي والفيرمة والخير لي كتشوفي ايرجع بسميتك ابنتي ..غادي توليي مرااتو وديالو وكل لي عندو ايولي دايالك ابنتي...
هادي هي الأم وطبيعتها ...دير اي حاج فسبيل ولدها ولو يكون هاد شيء ضار ليها الا انها اتمشي فيه لأن الام كتفكر فكلشي وتجي تال لولدها ويمشي تفكير العقل ويحضر تفكير القلب ...
بغات تغطي افعال ولدها وتزوج ليه اية وخا كبير عليها بزاااف لكن دارت فبالها ان اية اتبرع بكل الخير لي عند ولدها ومغاديش تحس بفارق السن ...
وهي ما عارفة قصة هاد البنت وشنو داز عليها وانها فايت ليها تزوجات و تغتصبات وتم ازالة الرحم ديالها نتيجة العداب لي داز عليها ومبقات قادرة تولد بحال البنات وانها فقط جسم بدون روح وهشيشة وقليلة الحيلة ...
وماعرفة ولدها انه فعلا تاب وعمرو مشا لديك طريق وان صحاب سوء لي رافقهم يوما ما مرضاوش انه يتوب وتحسن حالتو ويولي يتضرب ليه مثال فالقبيلة وناضو جسدا من عند انفسهم غدرو ورسل ليه لدروگ لي تلفات ليه العقل وخلاتو يدير حوايج تاب عليهم سنين ...
الحاجة لي معارفة تا حاجة من هادشي دارت كلشي بيديها ومنها لراسها ماخدات ادن من حد وعندها فبالها اتحمي ولدها واية فنفس الوقت لكن شكون يقبل على هادشي....
واش اية لي بالنسبة ليها دنيا ماتت فعنيها وكتسنى غير نهار لي تخرج روحها ...
ولا كمال لي الله يعلم كيف اتكون ردت فعلو من ايفيق وايعرف ما دار وقلبو فالاصل مزال ملكاه امرأة تحت التراب وميقدرش يبغي غيرها ...
اية حركات راسها برفض...
-لااا مبغييتش ..زواااج لااا...
الحاجة : وعلاش ابنتي قولي ليا ماالكي وأي حاجة بغيتيها تحضر ....
هزات فيها عنيها كتبكي بألم.
-رسليني لجعفر عااافك والله ما نقول ليه شي حاجة ...
الحاجة هبطات على رجليها كتبوسهم ليها واية تجمدات وبعدات رجليها مخرجة عنيها مصدومة والحاجة كطلب فيها..
-عاافك ابنتي تاال ولد لكبييرة لاااا..مااقاادرة نزييد كثر غيير وافقي تزوجي بيه وعمرك تعاودي تشوفيه ولا يجي وجهك مع وجهو ولا نخلييه يقيصك ...
اية تزيرات وحاضنة نفسها بألم والحاجة مزال كطلب فيها حتى تسمع صوت لباب تحل ونطق العساس..
-سي كمال فاق ...
جمعات الحاجة الوقفة كتشوف فأية بتوسل ..
-فكري ابنتي فهادشي وخلينا بعااد على جعفر منزيدوش عليه ....
خرجات خلات اية فمكانها كتبكي بصمت وقلبها مقبوض عليها...
في الرباط جالس فالمكتب ديالو خدام خدمتو حتى تمات داخلة عندو كتعوج ولباسها مزير ما تغير فيه والو ..
تكا على لكرسي هبط عينو وطلعهم فيها وبقا صامت كيشوف فيها وهي جلسات فوق البيرو مقابلة معاها كتفرنس ...
عفراء : مالك كتشوف فيا ...
جععر : بصحة لبسة ...
عفراء بفرح وقفات كدور امامو وتوريه تداريس جسمها عاجبها الحال...
عفراء : الله يعطيم صحة عاد خيطها لي صديق ديالي ولبستها دابا كيف جاتك ...
جعفر كمش حجبانو : زوينة ولكن سروال بزااف ...
عفراء كتشوف فراسها : هاد سراول هكذا كيتلبسو مزير من جهة لخسر واسع من لتحت واصلا فصالتي زوينة كيقول ليا مازن اي حاجة لبستيها كتجي معاه ...
جعفر زير على لفك ديالو : مازن!!..
عفراء :صديق ديالي من ايام التانوية هو لي كيخيط ليا حوايجي كاملين وخا كيتقامو عليا غالين لكن كيصاوب كلشي وااعر بزااف ..
جعفر كيضرب صبعو مع لبيرو وعينو عليها...
-صديق؟؟
هزات كتافها ورجعات جلسات امامو متكية على لبيرو وعنيها فعينو وكتهضر بهدوء وتقة واضحة فملامحها الجميلة..
عفراء : وي صديق ..عندك شي مشكل ؟؟...
جعفر : مشااكيل هما ماشي غير مشكل...
عفراء حطات يديها على عنقو كتقاد ليه گرافط...
عفراء : اووه مسيو جعفر عندو مشاكل معايا وانا معارفاش ...
جعفر قصح شوفة : كيجيك الكلاخ غير على هادشي ...
عفراء مبردة : اصلا الكلاخ كيجيني غير معاك ...
دور وجهو لجهة الاخرى مزير و كيتنفس من نيفو ..
جعفر : مكااينش شي حااجة سميتها صدييق ا عفراء بين الولد والبنت ...
عفراء كتحلون فكلامها ومزال فنفس هدوءها ...
-غير شوف وكان ،، ممكن تكون صداقة بين دري و البنت عادي ماشي بضرورة تكون علاقتهم مبنية على شيء اخر...مثلا يكونو بحال لخوت ...
جعفر برفض: رااني هضرت اعفراء بين دري والبنت مكاين تا ش حاجة سميتها صداقة او بحال خويا وشيطان كيحضر والوسواس كيكثر كل واحد ايولي يشوف فالاخر بطريقة خايبة ...
عفراء دورات يديها على كرافاط ديالو بهدوء حتى وصلات القمة ديالها وهي تشدها بجهد وجراتو عندها بقوة غفلاتو مكانش راد البال معاها ..
رجع وجهو حدا وجها والانفاس تقطعات بيناتهم وكيشم ريحتها لي كتزيد تغرية وانفاسها الملتهبة لي كيفلحو وجهو ..
تحولات من الهدوء لي كانت فيه لبركان هائج بعيون حمراء وصوت قوي ...
عفراء : من نتاااا اسيدي عااارف شيطااان كيحضر ومكاين تا شي علاقة صداقة بين المرا و راجل وكلمة بحال خويا مكااينااش ..اذاا علااش اسيدي لباارح جاالس كتهضر مع ديك خيتي قدامي و وااخد راااحتك معاها وزااايد كتقييد شنوو تشري ليهااا حسييتي بياا ديك ساااعة كفااش ايكون احساااسي ولا حراام علياا وحلاااال عليك اسي الفاهم ...
جعفر تصدم بكلامها بقا غير كيشوف ملقاش الجواب باش يرد عليها..
من ناحية عندها حق فكلامها ولكن معرفش كفاش يفسر انه فعلا كيشوف اية بحال ختو ..
حيد ليها يديها من كرفاط وشدهم ليها وهي كتشوف فيه مقلقة ...
جعفر : راكي عارفة قصتها اعفراء منعاودوش نهضرو فنفس الموضوع كل مرة ...
عفراء : اسيدي انا ماقلت ليك وااالو بغيتي تعاونها مغاديش نحبسك لكن داكشي لي شفت البارح معجبنيش داير ليها الخاطر وهي كطلب فيك بلا حشمة انا مراتك وعمري طلبت ليك داكشي كامل ..
جعفر جاتو ضحكة : مكنبغيش نخليها تحس بنقص وكنبغي نفرحها بلي كاين متصوريش شحال كتبقى فيا ...
عفراء : اففف اجعفر وهاد لقلب لي عندك شوف غير امين كنتي دايرو صاحبك وخوك وشوف كيف جزاك ..قصح قلبك مع بنادم ومتبقاش هاز حمل كل واحد...
جعفر لمسها فخدها ...
-لي درتو كنديرو لوجه الله ماشي لبنادم ..بنادم كيمشي ويجي ويتبدل اما الله ديما كاين وكل لي درتو كنقول في سبيل الله اما امين قضيتو بوحدها صدق غدار وانا رميتو من حياتي بحالي عمرو كان اما اية تضلمات بزااف وكنعاونها فسبيل الله ..
عفراء بقات ساكتة وهو كيلمس ليها فخدها وقرب قبلها فخدها وكيدوز شفاه ديالو على حناكها بلطف....
جعفر : متغيريش من اية اعفراء او من اية مرا حيت ما كنشوف تا حد من غيرك...
رخف عليها قلبها بعد كلامو وحدرات راسها كتلعب فأصابع يدو ..
عفراء : بغيتي تعاونها عاونها مغاديش نحبسك ولكن عطيها نمرتي وقوليها تبقا تاصل بيا لي بغاتو تقولها لي انا انشريه ليها بلا ما تحتاج تقول ليك كلشي ولا تاصل بيك ..دابا نتا وليتي راجلي ومغاديش نقبل يتاصلو بيك لعيالات وخا تكون اية .
تبسم عجباه الغيرة لي باينة فيها وكتاكل فنفسها وخا مكيديرش شي حاجة لي تخليها تغير لكن عندها حب تملك تجاهو مكيتصورش ...
جرها من فكها زير عليها وحط فمو على فمها قبلها بجهد وبعد منها كيضحك...
جعفر : وخا الالة وداك صديق ديالك..
عفراء ببراءة كترمش : شكون صديق...
جعفر قصح شوفة : كضحكي معايا دابا ..شكون هاد مازن لي صدعتي ليا راسي بيه ...
عفراء : تا نتا بغيتي تاخد نمرتو فين ما بغيت شي حاجة تقولها ليه نتا ...
جعفر بعصبية : لا هادشي لي بقا لطاسيلتي معاك هاد ساعة ...
هزات راسها كضحك ...
-غير برد مكاين والو الحوايج شريتهم من كنت فطنجة غير عمري لبستهم وجيت كنمثل عليك نوريك اش كتعني خويا وتحس بلي حسيتو ..
جعفر صغر عينو : يعني مكاينش هاد مازن ...
عفراء : صراحة كاين ولكن من نهار تزوجت ما بقيت كنهضر معاك و بلوكيت كل لي كان عندي وهما عارفين هادش حطيتو فالانستغرام ديالي حيت ما باغيا مشاكل وانا من عادتي الباب لي يجيب البرد كنسدو و نتهنا فراسي .. غير داكشي لي درتي البارح عصبني وقلت نخليك تجرب حتا نتا شوي ...
جعفر بقا ساكت ما عرف ما يقول من غير ..
-وهاد لبس خرجتي بيه هكدا فشارع..
بدات كتفرنس غير وحدها ...
خرجات من لبيرو ودخلات هازة صاك كانت مخليها فصالة الانتضار خرجات منو عباية وزيف كضحك.
عفراء : كنت لابسة عباية غير من دخلت حيدتها عاد دخلت عندك ..
بقا مصدوم فبلاصتها وكيرمش ففعايلها...
جعفر : وليني راكي جهنم كحلة غادي تحمقيني شي نهار ..
عفراء كتعوج فبلاصتها : اوا غير باش تعرف راسك بيمن مزوج وترد لباب لا يغرك شيطان ...
جعفر هز يدو بجوج : هاد ساعة شيطان لي كنعرف هو نتي...
في نصف ليل ودنيا ساكتة وكل واحد دخل لدارو يرتاح ويطيب نعاسو اما هي مزال سهرانة دايرة لبيسي قدامها وحاطة لزيات فودنها كتمسع وتقيد في مخها ماكتحتاج مدكرة باش تكتب لأن عقلها كيعقل على اي معلومة فور ما يسمعها ..كدخل ليها ومتبقاش تزول وكدير ليها حفظ فمخها..
خرجات من الموقع الانجليزي لي كانت كتقرا فيه وتحولات ليوتيوب بدات كتقلب حتى لقات فيديوات لي بغات ..
خدماتهم وتكات على لكرسي وكتسمع اش كيقولو وكتفسر بينها وبين داتها وتزيد تعرف على دينها وخا هي مسلمة لكن مشداش دين مزيان وكتعرف غير حوايج بساط "كصلاة و الصوم والزكاة "... اما الصح مكتعرف عليه والو ومن نهار هضر معاها جعفر على دين وكفاش شرح ليها سورة البقرة وبقا كيدوي ليها على سيرة النبوية خلاها تزيد تعلق وتبغي تعرف كثر وفين ما زادت عرفات معلومة كتزيد تصدم وداتها كترجف عليها ...
كتزيد تعرف شوي بشوية وجعفر عارف كيفاش يتعامل معاها كيرمي ليها الكورة وكيبقى بعيد كيشوف كفاش اتلعب بيها واش اترميها فشبكة ولا اضيع وما تفهم كلامو ...
لكن العقل لي عطاها ربي خلاها تفهم ما بين كلمات جعفر وزاد خلاها تعرف وتاجه لي سيرة النبوية كتسمع على افضل خير خلق الله رسول الله عليه افضل الصلاة و السلام ...
كتبقى تسمع حتى كيوليو عنيها حمرين ودموع كيبداو يهبطو وكفاش ميهبطوش وهي كتسمع عن سيدنا و حبيبنا رسول الله وشفيعنا يوم القيامة ...يوم القيامة لي كل خلق الله يقول نفسي نفسي الا هو رسولنا الحبيب يقول امتيي امتيي...
مسحات دموعها وطفات بيسي وتنهدات براحة وبقات جالسة فمكانها كتعاود تفكر فلي سمعات وبعد مدة تنهدات براحة وخرجات من بيتها توجهات لكوزينة هزات كاس لما كتشرب ...
سمعات الحس فباب دارهم وهي توگد وعلى اطراف اصابعها مشات كطل من شرجم ..بان ليها خيال شخص كيمشي ويجي فبلاصتو باين عليه سكران...
صغرات عنيها وركزات على ملامح الشخص فور ما عرفاتو تعصبات وبدات كتسوط بجهد..
طلعات لبيت لي حدا بيتها دخلات ليه وبدات كتنغز فحادة لي ناعسة قفزاتها..
حادة : افففف خلعتيني اعفراء مالكي اختي جايا مفيقاني فهاد الوقت ...
عفراء معصبة: نووضي شوفي راجلك راه لتحت جاي سكران بالحمار لخر ...
حادة تدهشرات و جمعات لوقفة كتقاد زيفها..
حادة دايخة : سيدي دريس جا...
عفراء : سيدك زبل ... واش كاين شي حد كيجي عند ناس فهاد الوقت وزيد عليها سكران واش عندو العقل ولا ميكسابوش...
حادة هبطات كتجر فجلايلها ..
-راه غير موحشني وصافي...
حلات لباب وهو واقف مشادش توازنو وكيهضر متقل بشراب وكيهز راسو بزز..
دريس: ياكي ا حادة تخليني بوحدي فالقبيلة وتجي لمدينة تمتعي..
حادة : لهلا يحوجك احبيبي اجي ديك ساعة لمدينة تمتع مع راسك...
دريس : نتي ممزياناش دغيا نسيتي العشرة ...
حادة : الله يا حبيبي وشدانا لهاد الهضرة كاملة ...
دريس بغا يهضر وهي توقف قدامو مخنزرة خلطات ليه شهيق مع زفير وفيقاتو من دوخة شراب ...
عفراء : يكما دارنا مكتوب عليا البار وحنا مفرسناش..شهاد الحالة جاي بيها لديور ناس ادريس...
حادة كتجر فيها : دار خويا هادي وهو راجلي اويري اعفراء مالكي تسيفتي ...
خرج سي العربي من سمع الغوات غير شاف راجل ختو جا سكران مابقا عاجبو حال...
سي العربي : دخليه احادة وسدي لباب باركة من شوهة مع جيران ..
حادة جراتو لصالون غرقانة فحوايجها بالحشمة ودريس كيدور راسو على دار مدوخ..
-با با با شهاد الخير العربي .. ورااااك مبقيتيش ساهل...
العربي بصرامة : حمدلله ربي لي كيعطي ...
جلس فوق صدراي منشور وهز رجلو فوق طبلة ...
دريس : وعندك داار كبييرة تبارك الله اش بان ليك احادة نجيو نسكنو معاهم باركة من القبيلة..
حادة حدرات راسها حشمانة من خوها بينما سي العربي قال...
-فرشي ليه فين ينعس والهضرة ماشي دابا تال غدا من يتوگض ويعرف راسو معامن ..
دخل لبيتو كيسوط وعفراء طلعات لبيتها معصبة ماعجبها حال اما حادة بقات مسكينة تالفة مع راجلها كتفرش ليه وتعاوني يمشي لحمام يقضي حاجتو ...
كيف عادتها دايرة هي راجل و المرا تحضيه هو من يجي عندها شارب ودايخ وتعاون مو لي مريضة ونسيان خلاها بحال تربية ...
وخا تمارة لي مدوزة ساكتة وراضية بالمكتوب ومكتشكي همها لحد وهادشي لي وقع ليوم زاد هبط ليها راس من شافت راجلها جاي لدار خوها سكران مداير بصواب و الأصل ولا حشم من راسو ..
دازت ليلة كيف العادة... ليام كيدوزو وبنادم كيتغير ودنيا غادة هكذا ..
فاقت على صوت رنين الهاتف ..جوبات بدون ما تشوف اسم المتصل وصوتها غالب عليه نعاس..
جعفر : فيقتك..
عفراء : امممم مالك فايق بكري...
جعفر : عندي ما يدار فالقبيلة انا شاد طريق دابا قربت نوصل...
عفراء كمشات حجبانها : علاش اش واقع ...
جعفر : كمال كان فسبيطار خاصني نمشي نعرف مالو ...
عفراء : يعني هاد نهار مغاديش نشوفك...
جعفر : معرفتش ولكن محالش نرجع هاد ليلة مهم ساروت دار راه عندك لي بغيتي سيري خوديه ...
عفراء : اوكي الله يعاونك...
قطعات عليه وجمعات الوقفة كتجمع شعرها..دخلات لحمام غسلات سنيناتها و وجها وهبطات لتحت بانو ليها عيالات خوتها كيشقاو وباين من وجهم معاجبهم حال وهي غير من ملامحهم عرفات اش كاين ونطقات معصبة ..
عفراء : مزال داك الكلب ما مشا بحالو...
لطوف حطات صبعها على فمها..
-سكتييي المسخوطة خلي هاد نهار يدوز بخير وعلى خير..
عفراء : باين الخير غير من وجهو ..
لطوف : وصاافي اعفراء ديري طريق منين يدوز لما وسكتي غير على وجه عمتك متصوريض شحال حشمات مقدات تهز فينا العين ...
عفراء : على تزويجة زينة لي تزوجات..ما عرفت جدي وجدة فين كانو عنيهم من زوجوها لهاد لكلب..
لطوف : الله يرحمهم ابنتي ..اذكرو موتاكم بالخير ودوزي تفطري خلينا هانين..
بشرى : خليها دير ما بغات واش كتسكتوها غير فالحوايج لي خاصها تهضر فيهم ...
كلثوم: هانتي تشوفي سيد مشبح ليا فداك صالون ريحة شراب والخنز متقدريش دخلي ليه...
عفراء : اوا صااافي كملااات من مو لي محمقانة ندوزو ليه هو عندنا صبطار الحماق على هاد الحساب..
لطوف ضربات جبهتها كطلب الله فنفسها ..
-باااركة راكم طبختو ليا راس...
دخلات الكوزينة ساكتة مبغاتش تزيد تعصب مها ..هزات لفطور لي اتحتاج ومشات لبيت لجلاس بعيد على صالون جلسات كتفطر وتلعب فتليفون ..
دخلات عندها حادة جلسات حداها وحطات راسها على كتفها وعفراء كتشوف فيها بنص عين شافت عيونها من لتحت حمرين باين منعساتش..
زادت تزيرات وكتحاول تكالمي راسها مبغاتش تنفاحر وكلامها يضر عمتها...
حادة كتشوف فتليفون ...
-ياااه شحال عندك هادشي زوين دابا يمكن ليك تهضري مع اي واحد من هنا ...
عفراء : وي خاصك غير تعرفي تخدمي بيه ..عشية نخرج نشري ليك تليفون ونعلمك ...
حادة : اودي ما عندي فلوس...
عفراء : كفاش معندك فلوس وديك تمارة لي كديريها فالقبيلة ...
حادة : اوا داكشي كيقدني غير مع علف لبهايم و دوا ديال الأرض...
عفراء تزيرات : وااش من نيتك كدوي فلووسك هادوك متعطييهمش لراااجلك الخرااا واش نتي هازة ليه دارو وهبال ديال مو و مرضها وشوهتها و تزيدي تعطيه فلوسك شهاد زبل عندك فهاد راس ...
حادة : نتي سكتي مالك شعلتي وزيد هداك راجلي من حقو ياخد فلوسي ...
عفراء تعصبات : زبل لي من حقو ...شوفي كيف وليتي حالتك حالة ويالاه عندك 36 عام توصلي لربعين يمشي يجيب عليك وحدة صغر منك وديك ساعة يفيدك فلوس لي كنتي تعطيهم ليه ....
حادة هزات كتافها : نتيااا غير كتهضري ولفتي كلام لمدينة ...
عفراء : راني كنهضر معاك اعمتي سمعي الهضرة وراجل من لول علميه و ربيه ماش هو نهار و مطال كيدور مع صحابو وكل موسم تلقايه فيه يتبورد مع راسو و نتي دوزي تمارة وتهلاي في مو لي محمقاك وهو ممصوقش ..دييري نفس اعمتي انا لي كنعرف عليك حارة ما تسمحيش فحقك ماشي مدلولة هضرة جوج يلعب عليك ...
حادة : واانتي فييين كتهضري ابنت خويا راه حنا غير بنات لقبيلة وهادشي ولفنااه ولا عندنا عادي ....
عفراء تجننات : نووووضي من حدايا قبل ما تعصبيييني تفوووو كنكره نوع ديالك اعمتي لي فمو ماضي ومع راجل كيولي خااوي ...
حادة تخلعات : ابسم الله عليك نتي مالك لي شافك يقول نتي لي كديري هادشي فبلاصتي...
عفراء زيرات على سنانها : كنكره نوع ديالك اعمتي لي راضية بدل لراااسها ..انا مكنقولش ليك متخدميش اه خدمي ولكن فلوووسك هدوووك دياااولك متعطييهمش ولي شريتيها كتبيها فسميتك ماشي تسمحي بيها لرااجلك وتبقاي نتي خدامة عليه ...شوفي شحال ديال لبهايم درتي وعمرتي زريبة تبارك الله وقاديتي لكوزينة و صاوبتي دار كلشي من فلووسك ولكن ناس اش كيقولو كيقولو رزق سيد هداك مكيجبدوش سميتك ولا عارفين تمارة ديالك وزايد عاطيك تمارة ديال هاد المصرفقة ديال مو ..ما حدو منفوخ بحال لفروج ينوض يدير نفس و يخدم على راسو ويجيب لمو ممرضة لي تقابلها....
حادة ندبات حناكها ..
-نتي هضري بشوي اناري سيد غير فالمرح ايسمعنا ويتقلق...
عفراء دفعاتها: نوووضي عليا يا المتروفة ما عندو باش يشري تا تليفون هو لخر وزايدة خدامة عليه وخايفاه يتقلق يا المدلولة معدرتو داير فيك ما بغا حاسبك خدامة عندو ماشي مراتو حيت كون حسبك مرتو كان يحطك فوق راسو ماشي بينات رجليه بالكلب لخر ...
حادة ولات كترعد : سكتتيييي المصيييبة اناا راضية بدل ..ماشي صوقك ...
وقفات كتنفس بجهد مكتحملش المرا لي دل راسها ولا تهبط من نفسها تكون هي راجل و المرا فنفس الوقت ... خنزرات فعمتها كتهضر بين سنانها..
عفراء: الله يلعن جدبوه زواج هذا لي دايراه نتي...
دازت من صالة بحال شي بركان اتنفاجر بان ليها ناعس فصالة مجبد وهي تمشي ليه مفقصوة وقفات عليه بحال جن كتهزو فكتفو بجهد...
عفراء : نوووض اسي را ضهر هذااا ولا معول تبدل ليل مع نهار..
حل عينو مكمشهم كيحك فموسطاجو الطويل وكيتفوه ...
ادريس: صبحنة على الله ..مالكي المنحوسة اش واقع مع هاد صباح ...
عفراء : لا زوينة هادي اش واااقع رااك فدار المنحوسة اسي لمفراسكش.. نووض شوف سيادك اش كيديرو ونتا خمرتي لينا هنا ...
ادريس دمو تقيل مبهلل : كاين شي فطور بعدا ..
دخلات حادة دفعات عفراء مغددة عليها ..
-سي دريس فقتي غير زيد كمل نعاسك مزال الحال...
ادريس : ما بقى نعاس شفتي بنت خوك اش سايرة تقول فيا...
حادة : صغيرة مديش عليها نوض دوش واجي راني موجدة ليك المسمن ديال شحمة كيف كتبغي ..
ادريس : درتي فيه الكفتة...
حادة : فييه امولاي بحالي كيعجبك..
عفراء جنون بداو كيشطحو فوق راسها ..
-كفتة كنتي كتشري فيييها ...بغيتي تفطر را القهاوي عطاهم الله ، يا تفيق مع ناس تفطر معاهم ولا جمع راسك ودير نفس شوي ولا مكتعرفش ليها تا هي ..
ادريس : شووفي احادة راني مكنجبدهاش ...
عفراء : يجدبو عليييك نشاء الله ناس يبغيو زين وهي باغية بغل يخخخخ ...
حادة كتطلب فيها تسكت تقهرات معاها وهي شاعلة مكتسرطش..
حادة : بزيزيلة اعفراء لماسكتينا...
عفراء : سكااات ليه قاانون اعمتي وهادشي لي كديري فيه رااه دل ماشي حب ولا زمر ...
خبطات فكتف عمتها وخرجات من دار كتسوط لابسة فقط بيجامة مبقات حاملة والو وبغات غير فين تبعد حيت لبقات اتقول شي كلام لي غاد تندم عليه من بعد ولا يقدر يفرق باها على ختو ..
خرجات مكتشوفش قدامها ومينة تابعاها بكاب طويلة دارتو عليها وكتنفس صخفانة ..
-لبسي حوايجك لشافك جعفر خارجة هكذا غادي يتقلق...
تفكرات جعفر وهي توقف فمكانها ونطقات بشوي...
-رجعي لدار انا انمشي لداري...
مينة : شمن دار..
عفراء كملات طريقها : دار راجلي..
خلات مينة واقفة فمكانها كترمش بينما هي توجهات لدارو ...
وصلات لدار حلات لباب دخلات ومن لباب شمات ريحة لي كتحماق عليها وكتخليها ترتاح..
دورات راسها كانت دار خاوية ومضلمة ..شعلات ضو وبقات كدور ولأول مرة كتحس بشعور جعفر من كيكون بوحدو... واش تا هو كيحس بنفس شعور لي حسات بيه دابا وهو الوحدة ....
دخلات لبيت نعاس رمات نفسها فوق سرير ودخلات راسها فالمخدة ستنشقات ريحة مطولا وتنهدات براحة و اشتيقها اتجاهو زادو ..
هزات تليفون دورات نمرة ديالو وفأول رنة تقبل الخط ونطق بصوتو الرجولي دو بحة مميزة ..
جعفر: عفراء..
عفراء غمضات عنيها ونطقات بشوي : وقتاش غادي تجي..
جعفر : معرفتش واقعة شي حاجة ..
عفراء بصوت عدب : توحشتك بزااف ..
تحل صمت طويل من طرف الأخر فقط كتحس بأنفاسو على الهاتف بينما الكلام تقطع..
بقات تا هي صامتة كتسمع لأنفاسو وبعد مدة نطق اخيرا...
جعفر : فينك نتي دابا...
عفراء : فدارك ...
رجع لصمت مرة اخرى لكن هاد المرة رجع صوت تنفسو متسارع ...
جعفر : تقدري تجي عندي انا انتلقى ليك فالمحطة ديال خميسات...
عفراء : علاش ما تجيش عندي نتا...
جعفر بصوت تقيل : منقدرش كمال فايق دايخ والحاجة جات عندي كطلب مني يد اية تلفت ماقيت عارف فين نحط راس..
عفراء بصدمة : كفااش!!.. كماال باغي يتزوج بأية وهي موافقة بعدا ...
جعفر تنهد بجهد وقال ..
-اه ..قابلة....
يتبع...
التعليقات
لا توجد تعليقات بعد، كن أول من يعلق.