محتوى القصة
امام مركز الشرطة خارج جعفر و صرامة واضحة فحركاتو و نضراتو ..و وراه كل من اناس و فاطمة لي مكرهاتش الأرض تشق و تبلعها..
معمرها تبرهشات ونهار دارت فيها عزة نفسي وتبرهيش الخاوي هزوها لبوليس دقة وحدة ..بغات تعيط لباها و المساعدين ديالها حشمات ..شنو غادي تقول ليهم و لا فين اتعطي وجها ما بان ليهم غير جعفر يجي يعتق هاد المصيبة لي وقعو فيها...
اناس غادي حداها كيشوف فيها بنص عين وهي مكرهاتش تقتلو ...هو يقرب ليها وهي كتبعد مقدراش على شوهة جديدة توقع ليها معاه..
وقف جعفر ودار مخنزر كيشوف فأناس بينما عينو مجاتش في فاطمة ولكن كلامو كان موجه ليها..
جغفر : المساعد ديالك كيتسناك فطونوبيل ...
حدرات راسها بدون ما تهضر ولا تكلم لسان معقود ليها قدامو ..دازت من حداه توجهات لسيارة حل ليها المساعد لباب دخلات توجهو مباشرة لطنجة ...
بقا اناس و جعفر واحد مقابل الاخر و جعفر بلهجة قاصحة قال...
جعفر : عوتاني لبوليس ...
اناس كيحك راسو : مادرت والو كنت بغيت غير نتفاهم معاها مكنتش كنضن انطيح فيهم...
بقا جعفر ساكت مدة طويلة عاد قال..
- اخر مرة تعيط عليا فبحال هاد الحوايج مرة اخرا مغاديش نعقل عليك...
اناس بفهم : مغاديش نعاود...
جعفر بصرامة : مزيان من فهمتي...
ركبو فسيارة وصلو هو لاول لدارهم عاد توجه لبيرو ديالو كان عندو كليان خاص يتلاقا بيه..
جلس فالكرسي المخصص ليه كيقرا بعض الوثائق وكيقيد فالمذكرة ديالو ...
دخل عليه السكرتير لي كياخد المواعيد يخبرو ان الكليان وصل ..تقاد فالجلسة و دخلات عليه انثى صغيرة فالسن لابسة جلابة و حاملة فيديها طفل عمرو تقريبا اربع سنوات..جلسات امامو معنقة ابنها كأن شي واحد اياخدو ليها...
جعفر من شاف دعر فعنيها قال..
- معندك علاش تخافي هذا مكتب ديال المحامات مغادي يشكل عليك تا تهديد...
لبنت رتاحت نوعاً ما وبعد تردد قالت...
- كنسمع عليك بزااف انك كتعاون ناس و مكتفرضش عليهم التمن ديالك و كتقبل على الجيب ديال كل شخص...
جعفر جعد حجبانو ورغم دالك بقا محافظ على الهدوء ديالو ..
- ممكن نعرف القضية ديالك...
قبل ما تجاوب على سؤالو ..خدات رزمة صغيرة من صاكها حلاتها وحطاتها قدامو وهو هبط عينو كيشوف قرزمة لي كان فيها اوراق نقدية من فئة 50 درهم مكمشة وبالية باين حتافضات بيها لمدة طويلة كأنها كانت كتجمع فيهم باش تجي عندو ..
هز عينو شاف فالبنت مزيان لي كانت لابسة ملابس بالية وملامحها وخا باين فيهم صغر لكن واضح فيهم تمارة و العيا ديال الخدمة ...
هبط عينو لطفل لي ناعس فحجرها لي كان مغطي ولابس حوايج نقيين وباين عليه تهلو ...
بقا صامت لمدة طويلة وهي قالت بحرج واضح فصوتها...
- هادشي لي كنكساب دابا وهو لي نقدر نعطيه ليك لكن كنواعدك انعطيك كثر غير صبر عليا يرحم ليك الوالدين ..
جعفر خدا 20 درهم كانت من بين الاوراق لي من فئة خمسين درهم دخلها فجيبو وجمع ديك رزمة ورجعها ليها و بإبتسامة قال ...
- خلصتي كل لي عليك ودابا شنو القضية ديالك باش نقدر ندافع عليك...
ممولفش ياخد القضية بدون ما يعرف القصة ولكن احساسو مكيخيبش و عرف ان هاد البنت محتاجة لي يعاونها ...
بقات كترمش فمكانها والحيرة عترات ملامحها بشكل فاضح كتشوف رزمة بين يديها وعشرين درهم لي دخل فجيبو ...
رجعو عينيها حمرين و صوتها تخنق نتيجة بكائها وهي كتعاود ليه بألم..
- انا اسيدي من لعروبية وتزوجت هادي خمس سنين ولعام لول ديال زواجنا طلقني راجلي و تزوج بوحدة خرا كان كيبغيها ..طلقني وعطاني حضانة ديال لولد وهاد ربع سنين كلها عمرو جا يشوفو ولا يتكفل بإحتيجاتو انا لي كنت نخدم فديور ونهزو فضهري و ناخد ليه كل مايحتاج..تعدبت هاد ربع سنين كاملة و مقبلتش نعاود نتزوج و سمحت فكلشي على قبل ولدي لكن راجلي عاود رجع هاد الأيام باغي ياخد ليا الولد بحجة انني معنديش فين نسكن و منقدرش على مصروف الولد وخاصو يدخل يقرا بحال گاع دراري و انا مفحاليش..
فلول فرحت قلت بعدا وخا طلقني مزال عاقل على ولدو ...وخا تفارقنا لكن ولدي ايلقا دار فين يعيش و يقرا بحال دراري و يلعب..
منقدرش نخليه معايا نعدبو وانا ما عندي تا عشا ديال ليلة ومقرياش وغير جاهلة ..تافقت انا وياه نعطيه ولدي ونجي نشوفو مرة فسيمانة باش يعرفني الام ديالو ويبقا عاقل عليا ...
"سكتات وسط كلامها وزادت دخلات ولدها فحضنها اكثر "..
- كانت معاه مراتو لاحضت معجبهاش الحال لكن مقالت والو و طليقي وافق على شرط ديالي... هاد الايام كنت كنشري حوايج لولدي باش يمشي عندهم بحوايج جداد نكون انا لي شرياهم ليه بغيت نبين ليه انني كنت مهلية فولدو وخا انا على قد الحال لكن ما سمحتش فولدي و لأجلو قلت لكلب سيدي غير باش نخدم و نجيب لولدي لي يحتاج كنت باغية نخليه يحس بتأنيب ضمير من خلا ولدو كل هاد ربع سنين هو لي لباس عليه وكان قادر يعطي نفقة ويعيش ولدو احسن عيشة لكن لا خلاني بوحدي كنتقاتل وعمرو جا يشوفو ...
"بدات كتمسح دموعها و تنخسس بصوت مسموع واضح الالم لي عاشتو و كتخرج كل كلمة حاملة جرح ما يبراش "..
- كيف عادتي كنوض نصلي لفجر كيف ديما وبعد ما صليت حسيت بحال شي واحد كيدوي حدا ودني ويقول ليا نوضي سولي على راجلك و مراتو وشنو باغين يديرو بلولد...حسيت بقلبي تزير و راحة لي مولفة نحس بيها مبقاتش ..كيف شرقات شمس هزيت ولدي ومشيت لبلاصة لي كان كيسكن فيها كنت خدامة عند واحد سيدة كندير ليها الميناج وكانت كتهلا فيا..مشيت عندها وسولتها عليه حتا كيصدمني جوابها قالت ليا المرا عندو مكتولدش وهادشي علاش باغيين ياخدو ولدي يدخلوه فالحالة المدنية و يولي ولدهم وانا نكب على كرشي لما و عمري نعاود نحلم بيه..
فلول متيقتش قلت سيدة غير كتخرف كون بصح لمرا مكتولدش كان راجلي طلقها كيف طلقني لكن كنلقى راسى كنتفلى على نفسي كيف ديما..
مراتو اصلا من عائلة لباس عليها و ميقدرش يتفارق عليها حيت كلشي مكتوب فسميتها وهي لي دايرة ليه الهمة وشان ولا طلقها ايلقا راسو منو لضس وهادشي علاشا وافق ياخدو ولدي ويحطوه فسمياتهم و يديوه معاهم لبرا وعمري نعاود نحلم بيه...ودابا من واجهتو بالحقيقة وقلت ليه ما عمرك تحلم بولدي ناض دعاني باغي ياخد مني الولد حيت انا منقدرش على مسؤولية تربية..
"بحرقة كملات جملتها الأخيرة لي زلزلات اعماق جعفر".
-باغي يرجعني حمقة ويرسلني لصبيطار ديال لحماق وياخد مني ولدي....
داخلة لكوزينة كتقاد صلاد فخوي وطالقة اغنية كتدندن ثعاها ..لابسة بيجامة سخونة و مخلية شعرها مطلوق مستمتعة بالهدوء لي هي فيه...
مع دورة جات فجعفر لي كان متكى على باب الكوزينة مربع يدو على صدرو وعينو مركزهم فكرشها وساهي عقلو غايب...
قربات ليه بإبتسامة...
عفراء : وقتاش جيتي....
هز عينو شاف فيها وقال بصوت واضح فيه التعب...
- قبيلة...
عفراء رجعات كتقاد طباسل : گاع ما سمعتك منين دخلتي..سير دوش و اجي تعشا...
بقا واقف فمكانو متحركش وهي بعدم فهم شافت فيه..
عفراء : واقعة شي حاجة...
بقا ساهي و قال ببطئ: كاين شي اب يقدر ينسا ولدو لي طرف منو...
عفراء هزات كتافها : ماشي كلشي بحال بحال..كاين الاب لي يبيع قدمو و وراه على ولادو ..وكاين لي يبيع ولادو على حاجة تافهة ..
غمض عينو وساط بجهد ..ربما حيت عاش يتيم وكان مشتاق لحب الأبوي لهذا عمرو شاف نوع ديال الأب لي يرمي ولادو على وديت حوايج ماديين مكيسواو والو..
حس براسو مخنوق و قلبو طايب القصة لي سمعها خربقات ليه لمزاج و اترات فيه بزااف و خلات دمو يغلي...
قرب عندها عنقها من لور ودخل راسو فعنقها وهي مستمتعة بعناقو كل مرة دور تقبلو فشفاه ديالو وتهز طرف من لفراولة تولكها ليه من فمها لفمو ..
بحركات بساط حيدات ليه داك ستريس لي دخل بيه و بدلات ليه لمزاج و خلاتو يتبسم بدفئ و قرص ليها نيفها بحب..
جعفر : كولي تا نتي متوكلينيش غير انا...
حطات لييه مورسو في فمو وقالت بصوت دلع...
عفراء : وكلني...
رجعو عنيه كيلمعو هبط عندها دفع ليها لفراولة في فمها بلسانو ودخل شفاه ديالها مصهم بجوج وقبلها بعمق خلاها تجاوب معاه بإشتياق... كانو موحشين بعض لكن الحمل منعهم يديرو اي علاقة جنسية ...
منساجمين مع بعض و متفاهمين مبقاتش هي نفسها ديك لي كتدير قوة الفهامات ولكلام لي ما فيه نفع..بدات كتوزن كلامها وتصرفاتها معاه ....
تعشاو فجو عائلي و دافئ خلقينه مع بعض .. هز لماعن دخلهم لكوزينة غسلهم حيت هي لي دارت لعشا متافقين بهدوء وكل واحد عارف اش خاصو يدير ...
دخلات تحت مانطة كتفرج في فيلم كوري وداخلة فأجواء الأحدات ...
جلس حداها دور يدو على عنقها دخلها فحضنو ومد ليها كاس ديال لحليب دافئ ..بانو لي دفار ديال رجليها طوالو وهو ينوض مشا جاب مقص وجلس حدا رجليها هزهم و حطهم فوق فخاضو وبدا كيحيد ليا ضفار وهي كضحك من كيهرها فرجليها...
جعفر بإبتسامة : غدا مخدامش فالعشية نخرجو نشريو حوايج لدراري..
حطات يديها فوق كرشها كتلمسها : ولكن شريت حوايج بزاف وتا مالين دار شاريين ...عندي لبيت عامر ...
جعفر بحنية : مكنتش معاك من كنتي كتشري بغيت هاد لمرا نكون انا لي نختار ليهم لحوايج مابغيت نكون مقصر معاهم فوالو...
عفراء : كنتي خدام ومزير ماشي مشكل...
جعفر حدر راسو كيلمس اصابع رجلها وقلبو مقبوض عليه وقال..
- لا فيها مشكل مبغيتش الخدمة تشغلني عليهم...
عفراء حسات بيه ماشي تال لهيه قربات كتلمس ليه لحيتو...
- واقعة شي حاجة بنتي ليا كتسها بزاف...
جعفر تبسم مبغاش يأتر عليها : والو غير كنفكر فحياتي انا وياك و ولادنا ...
صبح يوم جديد حامل الكتير من الأشياء لي ربي لي عالم بيها ...
دخلو لمول ديال حوايج دراري صغار خلاتو هو يختار من شافتو فرحان وهو كيهز لباس ويقيصهم بدفئ وفرحة مكتصورش فنضراتو...
دار عندها كيضحك من سمع كلامها...
جعفر : هي جمال ايجي يخطب مينة ليوم...
عفراء : وييه مسكين ما عندو زهر نهار لي ايجي فيه يطلب يدين مينة لقا مازن سابقو ليوم ايدير عندنا العقد بعمتي ...
جعفر هز حجبانو : هاد جمال ما عندو زهر تا هو ...
عفراء كتفرنس : كنت نقول انا لي منحوسة ساعة عاد شفت نحس ديال بصح ...
جعفر : اوا ما فيها باس الفرحة تولي جوج مرات.. من جهة جمال و مينة و من جهة مازن و عمتك...
عفراء كدور فراسها بانت ليها بلاصة ديال الملابس داخلية خلاتو هو فجهة ديال دراري صغار و توجهات تشري لي خاصها ..
ختارت شنو بغات وخلصات و رجعات لمكان جعفر كانو جوج بنات قدامها عاطينها بضهر وعينهم محطوطة على جعفر ...
نطقات وحدة منهم ...
- زعمة يكون مزوج...
نطقات صاحبتها : من نيتك اصاحبتي كون كان مزوج كان اتكون معاه مراتو ..كاين شي راجل يجي يشري حوايح دراري صغار بلا عيالاتهم اتكون غير شي وحدة من عائلتو ولدات وجا ياخد شي كادو...
- نااري اصاحبتي شحاال زييين كيحمق شوفي عنيه خضريين و شعروو كحل كيشبه لخليجين .. مكرهتش نمشي ندوي معاه ...
صاحبتها زعماتها : غير سيري ديري راسك كتسولي على شي حاجة ودخلي معاه فالهضرة ....
عفراء من وراهم بدا شياطن كيشطحو فوق راسها ..دفعات لبنت بجهد دخلاهم فيهم بحال تور مخنزرة وتمشات وقفات حدا جعفر ودارت عندهم بديك الغيرة هزت يديها كتصبع فيهم بدون خجل ...
المرأة بقات مخنزرة فعفراء لي وقفات حدا جعفر..
تقدمات لمرا عند جعفر لي ساهي فلبس ديال دراري صغار حس بشي حد دفعو وهو يدور مكمش حجبانو..
شاف مرأة قدامو وهو يرجع خطوة لور ضناً منه انه كان ساد ليها طريق وخوا ليها باش دوز لكن هي زادت تقدمات عندو كتسرح فشعرها و بإبتسامة قالت...
-خويا دوي مع ختك....
جعفر بدون فهم : ختي؟؟؟ ..
شارت بصبعها لعفراء : دفعااتني بلا ماطلب مني سماحة ..
شاف فعفراء لي بقات كطلع و تهبط فيه ..شدها من يديها قربها عندو ونطق بهدوء...
جعفر : يمكن مراتي مشافتكش....
المراة تفقسات : مراتك؟؟؟ ...
عفراء هزات حجبانها كتقلي ليها سم وجعفر كيتكلم عادي..
جعفر : اه مراتي كاين شي مشكل...
المراة بحسد قالت : عندك هاد المرأة ضاسرة بزااف...
جعفر ببرود : اه أنا لي مضسرها و من بعد....
مكانتش متوقعة لجواب ديالو وخلاها مقدراش ترد عليه.. مسكات فيد صاحبتها بحرج وخرجات كتجري خلات جعفر كيشوف فعفراء لي بقات كضحك غير بوحدها..
دور يدو عنقها وجرها لبلاصة ديال لخلاص هاز حوايج ديال دراري لي ختار و كيشوف فيها بنص عين وهي كتحبس ضحكة و غير بوحدها كتعاود طلقها...
جعفر : ودابا غير طلقيها مالكي معدبة راسك...
هزات راسها كضحك بحال لهبيلة مبغاتش تسكت ليه وكل ناس كيشوفو فيهم وهو باش يحسبها زاد معاها كيضحك ...
بعد ما خلص توجهو لسيارة وكلشي كيشوف فيهم..
جعفر : تشوهت انا وياك ليوم ...
عفراء هزات كتافها : مبقاش لي يضحك و يفرح براسو...
جعفر غادي معاها فطريق : لا ضحكي غير هو ضحك ليه قانون...
عفراء كتفرنس طارت عليه بتعنيقة وباستو بجهد فخدو ..
-على داك رد لي رديتي بيه على ديك خيتي و بردتي ليا القلب و فرحتيني علاش منضحكش ...
جعفر كيشوف فيها بنص عين : زعمة نتي ساهلة متقدريش تردي عليها...
عفراء : راك عارف لو رديت عليها كنت اندخلها فغيبوبة هادشي علاش حبيبي وتاج راسي رد فبلاصتي ....
قرصها من خدها : احياني عليك اجهنم لكحلة وخا تقاليتي وهازة ربعة مزال لسانك طول منك...
خنزرات فيه : واش باغي تقلقني...
جرها دخلها لسيارة ودور عليها سمطة وداير معاها لخاطر : يتقلق لعالم كامل و شبر بلاصة ديالي ميتقلقش...
عفراء معصبة : بزااف عليك راه فيا ميترو وستين ..
جعفر شاد فيها : شفتي شنو قلت ليك لسانك طول منك فيه جوج ميترو ...
هزات يديها صبعاتو : سير تخرا نتا وطول ديالك لي عاجبك ...
جعفر شد ليها صباعها وغادي معاها فالهضرة جات ڭانتو عليها ...
- دابا مالنا على هاد صباع واش شاطو عليك ...
"حط يدو بين فخاضها خلاها مزيرة "..
- ولا باغية حاجة خرا...
عفراء تزيرات : فيين حاط يديك ازبل و شكتخور تما ..
جعفر بشوفات ديال لغضر قرب ليها و انفاسو كيضربو وجها خلا الحمورية طلع لحناكها بخجل ...
عفراء بتلعتم : ششش شنو باغي دير...
جعفر بصوت هامس : ياك عاجبك طولي ...
عفراء غرقات بصوتو رجولي و البحة لي كتميز صوتو وكتخليها دوب وسط كلماتو ..
بزز باش قدات كلماتها وقالت ...
- وانا شغادي نعمل بطولك...
جعفر حط فمو حدا ودنها وهمس ليها بكلمات خلات انفاسها يتحبسو..
- عندي ماطول وكتعرفي شنو ديري بيه ...
دفعاتو و سخونية طلعات مع داتها كلها كتهرب نضراتها منو ...
عفراء : نتا مابقيتيش كتحشم...
جعفر باسها في فمها : من امتا كنحشم من رزقي الكارتة ديالي ....
عفراء كتهر منو : ديني اخويا المحل لبقيت معاك هنا اتولدني بلا وقت...
جلس فبلاصتو داير عندها ومتكي على جاج كيشوف فيها وهي كدور فراسها ضحكاتو و ولا كيعجبو يشد فيها وهذ تحشم قدامو ...
جعفر : بعد ما تولدي ندير انا وياك شي تسافيرة...
هزات خنافرها لسما : دير ليا اولا لعرس نهار سبوع ولادي وفرح بيا كيف اتفرح بيهم ونكون انا أولا من كلشي...
جعفر صغر عينو : الله يهديك ولادك هادو...
عفراء مخنزرة : واش انا قلت ليك العكس ولكن العرس هو العرس نبغي نفرح وندير عرسي مع سبوع ولادي وديني عروسة لفيلا جديدة لي فكازا راه تصاوبات و خاص غير لفراش قرب يوجد ...
جعفر بدا كيحك لحيتو :هادشي كلو بغياه الالة...
عفراء : ونزيدك غاديني لـشهر العسل بغيت نمشي لباريس و لا لندن ...
جعفر بدا كيضحك : منايضش منايضش احبي غير زيدي اشباغية اخر...
عفراء هبطات عنيها وطلعاتهم فيه : وبغيتك تبرز حدايا ...
جعفر مد ليها ودنو : عاودي اش قلتي...
عفراء بنرفزة : قلت ليك اتبرز معايا....
جعفر لي فهم قصدها : والعرس بغيتيه يكون مخلط ياك..
حركات راسها بالإيجاب و باش ميرفضش بسرعة قالت...
عفراء : غادي تكون غير العائلة تا حد ما غريب...
جعفر بجواب نهائي : لا...
ساطت بجهد : عـافك اجعفر متكونش متشدد هكذا مافيها باس نتجمعو عيالات و رجال...
جعفر خنزر فيها : عفراء هضرتي راني قلتها رجال بوحدهم و العيالات بوحدهم ماشي عرس گاع عبادالله مكنمشيش ليه ولا كنبقا جالس بوحدي و منتخالطش وسط لعيالات وفلخر نجي انا نديرها فعرسي و سبوع ولادي.. هادشي ماشي ديالي وموقفي فهادشي مكيتبدلش..عرس كمال وكانو غير ناس لقبيلة وخا هكاك راك شفتيني بقيت برا من دخلو رجال عند لعيالات.. عارف حدودي ومكنفوتهمش ومغاديش نتجرأ على الله ونولي منافق ونديرها في فرحي ونخلط نسا و رجال...
عفراء هبطات راسها مزادتش معاه الهضرة وهو معاودش هضرتو مغاديش يدير حوايج غير حيت كيبغيها..
حدود لي تربا عليها و تشبع بعقيدة ديال دين وغادي فخط نيشن مغاديش يبقا ينقز هنا ولهيه وينافق راسو ..
هو كيخاف الله و ميقدرش يدير حوايج لي منفين للدين وكيحاول ميغلطش وخا دنيا كلها فتن و الإنسان ولا بد ما يغلط لكن من كيحس براسو غلط كيستغفر الله ويطلب التوبة وهادشي علاش كيدير لخير و صدقة فناس المحتاجة ..
كلشي لوجه الله وشنو يلقا فأخرتو..شخص مؤمن و ايمانو قوي مغاديش يتزحزح بكلمات ان كل لي حاضر غير بنات العائلة..
بقا ساكت لمدة وعاود هضر فموضوع لي سكت عليه شحال غير حيت حاملة و مبغاش يعاود يهضر و ينبهها ...
جعفر : عفراء هضرت معاك شحال هادي و شرحت ليك وفين ما نلقى فرصة نعاود نفهمك غير بالمهل ومن حملتي و تقلتي و تبعتي خدمتك سكت وقلت مع المدة غادي تفهم لكن مزال ما درتي من كلامي والو...
عفراء كمشات حجبانها : شنو كتقصد..
جعفر شاف فيها مزيان : كندوي على لحجاب و صلاة اعفراء لي مزال ما بغيتيش تديريهم...
عفراء تزيرات وحولات تشرح : صلاة راه غير تقلت وبقيتش قادة والحجاب خليني شوي باش نهار نديرو نكون مستعدة ومقتانعة من قلبي...
جعفر دار عندها كيشوف فيها فاص ..
- سمعي اعفراء هادشي ديال نكون مستعدة و مقتنعة كنديروهم مع لبنات صغارات لي مزال ما وصلوش لسن البلوغ ونهار لي يبلغو راه كتولي تخدم معاهم لعصا نيشن ..اما نتي فعمرك 24 سنة شمن اقتناع مزال خاصك ..وليتي عارفة تقراي القرأن و تبحتي و تقراي و تفهمي واش هادشي كامل و مزال ما مقتانعة ..علاش متقوليش شيطان كيلعب عليا و انا عاجبني الحال وغادة فصفو ...
هبطات راسها مقدراتش تجاوبو لقات لسانها معقود ورا كلماتو وهو مزال كيهضر ربما تفهم..
جعفر : انا هادشي كنديرو لراسي و ليك و لولادنا ..ولادي بغيتهم يشفونا بجوج كنصليو و تولي عندهم صلاة امر عادي و يتشبعو بالرؤية عاد ندوزو لتطبيق من يوليو فاهمين شوي ..وإذا ربي رزقني بنات من توام لي حاملة راه خاصهم يشوفوك محجبة باش نهار نبغي انا نتكلم ليهم على دين و الحجاب يلقاو امهم دايراه باش يتقبلوه اما لكنتي العكس راه ولادك ايكونو بحالك ..تا حاجة مكتجي من فراغ و الولاد كيتعلمو من والديهم..تعلمي قدامهم تهزي كتاب و متهزيش تليفون وهما من مشاهدتهم ليك غادي يهزو لكتوبا بلاصت تليفونات لي تبلاو بيها گاع اطفال اليوم حيت هادشي لي كيشوفوه من والديهم لكن الوالدين معايقينش انهم سبب فساد ولادهم و تعلقهم بهاد الألات الإلكترونية لي كتخرج على الطفل و المراهق ... حاولي تقراي سيرة النبي وكل نهار قراي على الولاد صفحة و شرحيها ليهم باش يكبرو على محبة الرسول وطاعة الله و ميتضللوش بكلام ديال الإعلام لي لفقو اسم الإر++هاب في الإسلام... حاولي تنافسي معاهم كل نهار حفضي معاهم نص صفحة فالقرأن الكريم باش تزرعي فيهم حب التنافس فحفظ القرأن...
"كيشوف فيها ويشرح وغادي معاها دقة دقة "..
- اتقولي ونتا راجل مول دار فين اتكون من تخلي تربية لولاد كلها عليا .. لي معافراش اعفراء هو ان لولاد كتكون مهم هي العالم ديالهم فخمس سنين لولة اما باهم كيشوفوه فقط شخص كيهزهم و يضحكو معاه اما الأهم هي امهم وديك خمس سنين هي لي اساس باش تكوني مدرسة لطفلك وهادا هو دورك ديري ساس لولادك باش دار طلع شادة و صحيحة ماشي مايلة وضعيفة ...
" هز ليها وجها لعندو وقال ليها ما فخاطرو وكيتمناه "..
- انا بغيت نشوف ولادي من حفظة القرأن وياريت يكون واحد فيهم شي عالم من علماء هاد الأمة ويكون ليه دور كبيير ..انا مابغيتش نولد غير باش ندير عائلة و نكبرها بل بغيت ولادي يكون ليهم اثر ويكون من عباد الله الصالحين ...
حركات راسها بفهم وهو مزادش ضغط عليها كيعرف وقتاش يزير و الوقت لي خاص يرخف فيه...
وصلو لدارهم هزو لحوايج لي شراو دخلوهم حطوهم فبيت نعاس..خلاها ترتاح و دخل هو لحمام يدوش..
بعد ما رتاحت توجهات لماريو ختارت لحوايج دسالو لي خاص يلبس حطاتهم ليه و بقات كتختار گرفاط لي يجي مع لكوستيم ...
دخل عندها كيمسح شعرو و ملوي عليه فوطة من جهة خسرو...بدا كيلبس حوايجو وهي حداه كتصاوب ليه كول القامجة ....
عفراء : غادي تجي مع جمال...
جعفر هز راسو مخليها تقاد ليه على خاطرها ..
- ما عندي ماندير طلبني نكون معاه ..."باسها فجبهتها" ...ونتي اتمشي لدار دابا نوصلك معايا...
عفراء بتسمات ليه بحب : نو بلاش غير سير نتا عند جمال انا انتسنى اية اتجي عندي وكمال ايجي من وراها هو ايوصلنا لدار...
حرك راسو و لبس لفيستة : خاصك شي حاجة...
عفراء هزات ريحة رشاتها فيديها ودوزاتها على لحيتو ..
-لا مخاصني والو كلشي عندي...
مشط شعرو قادو ورجع باسها وخرج مزروب تعطل على جمال لي صدعو بالميساجات ركب فسيارتو وتوجه لفيلا ديال جمال ديركت ...
بقات بوحدها فدار كتجمع لبيت و تقاد لحوايج ديال دراري لي شراو و كيتعاود كلام جعفر فراسها ..
بدات كتفهم و كتخمم شنو خاصها دير ..
هزات بيسي كتقرا بعض الوتائق لي وصلوها فالإميل على ناس لي سجلو فالبرنامج ديالهم لي متكفل بيه المحل ديالها ..
سمعات دقات وهي تنوض حلات لباب لقات اية هازة صاك باين متقلة..
دخلات رمات كلشي فلارض وطاحت فوق سداري سخفانة ...
اية : اففف مال هاد سانسور عندكم ديما خاسر ما طلعت تا غفر ليا ربي گاع دنوب ...
عفراء : عيت مت نهضر مع مولات العيمارة ولكن والو واش بغات تجيب لي يصاوبو ...
"هزات صاكها مكمشة حجبانها""...
-شنو هادشي ..
اية وقفات حداها بدات كتحيد فلحوايج : عندي ليك واحد لقفطان عاد خديتو لبارح ايجي معاك وااعر...
عفراء : زعمة يجي قدي...
اية : غادي يجي حيت درت ليه خياطة ديال قفاطن لقدام اصلا هما لي رجعو موضة و كيتلبسو مع غليضة ولا رقيقة عندهم قياس واحد...
عفراء خنزرات فيها ودازت من حداها خلاتها و توجهات لكوزينة واية تابعها ..
اية : دابا مال زين مقلقل واش حيت قلت ليك غليضة...
عفراء : غير صبري نولد ونرجع فورمتي كيف كانت وديك ساعة انشوفو شكون فينا لي غليضة...
اية عنقاتها : غير كنضحك معاك احبي راكي زوينة و كتحمقي كيف غليضة كيف رقيقة ماشفتيش خويا جعفر غير كيشوفك كيتلف مسكين ...
عفراء : اممم كتبتي فيا دابا ...
اية عنقاتها بمعزة : ربي لي عالم معزتك عندي اختي عفراء.....
دخلو بجوج لكوزينة كيوجدو عاصير ديال كيوي و الأناناس ويقادو حلوة ناقصة من سكر فطباسل وشادين لهضرة مع بعض ..
ولاو عزاز على بعضياتهم و كيحسو براسهم قراب و كيتشابهو بالأفكار و دغيا كيفهمو بعضياتهم ..
لقات فيها عفراء داكشي لي كتبغي و اية عقلها خفيف دغيا كتعلم و الهظرة كتحفضها و طبقها عكس مينة لي وخا تعاشرات مع عفراء لكن طبع ماشي بحال بحال..
هادشي علاش عمرهم تفاهمو اما أية من لقات تهلو و لفلوس ولات شخصيتها كتشبه لعفراء ولات تعطي لبنادم لقاصح فوجهو وخا يكون لي كان ..
مبقاتش ديك لي كتهبط راس حيت تغتصبات والماضي الأليم لي عاشتو و هرسها و تخلي بنادم يدير فيها ما بغا ..بل العكس طورات شخصيتها ولات موس ماضي من جوج جوايه لي عطاها تعطيه ولي شكرها تحطو فوق راسها وتسارة بيه....
حطو كلشي فوق طبلة وكل وحدة توجهات لدوش غسلات و ريحات راسها بالبرودويات ديال لورد و الياسمين ..خرجو بجوح بويض كيشعلو وزينهم فاتن كيحمق وريحتهم سابقاهم..
اية : ناااري لمك منين جبتي هاد لبرودوي ديال لحم كيخلي لبشرة رطبة وكتلمع ...
عفراء شافت البرودي لي هازة اية ..
-هداك كيجيني من كوريا كيجيبو مازن من كيسافر ...
اية : طلبيه يجيب ليا معاه و نخلصو...
عفراء : كاين بزااف لبرودويات خلي تا نكونو مسالين و نوريهم ليك كاملين جربيهم ولي جات معاك نقوليه يجيب منهم ضوبل ليا وليك ...
جلسو كل وحدة متكية على صداري ماقبلين مع بعض و واخدين راحتهم ..لابسين بينوار ديال الحمام و سيقانهم خارجين من جنب كيبانو بيضين كيشعلو وضفار رجليهم مصبغين ..عفراء بالأسود و اية بالأحمر ..
عفراء بدات كتهبط وطلع فيها وركزات عينها فخلخال دهبي فرجل اية ...
عفراء : شنو داكشي...
اية غمزاتها كتفرنس : شراه ليا كمال..
عفراء هزات حجبانها : وصلتو تال لخلخال...
أية بإغراء فحركاتها قالت : عجبو شطيحي...
عفراء خرجات عنيها : شطحتي لييه !!!...
اية : مالكي مصدومة علاش نتي عمرك شطحتي لجعفر...
عفراء حركات راسها بسرعة : نوو عمري...
اية حطات لكاس فوق طبلة وهزات تليفون خدمات موسيقى الرقص الشرقي ودورات زيف على مؤخرتها كتعوج فبلاصتها وغادة مع انغام الموسيقى بقات عفراء مخرجة عنيها فحركاتها و اية كتلوى بحال الحنش و تلعب بصدرها وتهز خسرها بشكل مثير وبقات غادة مع الموسيقى حتى توقفات...
عفراء بصدمة : منيين تعلمتي هادشي نااااري كتعرفي تشطحي ابنت احراااام...
اية هزات لما كتشرب وكحات بشطيح و كتنفس بصعوبة...
- اودي الخايبة غير البدية اما شطيح دغيا تعلمي ليه ...
عفراء صغرات عنيها : هي دوختي كمال بزينك و زدتي دوختيه بشطيح...
اية بدات كضحك : اودي راه وخا كمال داخل سوق راسو وعندو طريق وحدة ولكن اصاحبتي رجال كلهم متشابهين عزير عليهم داكشي وكيبغيو شطيح و بالاخص هزان ز*ك....
كان من طرف عفراء الصدمة مخرجة عنيها وحالة فمها ...
- اختي مبقيتيش كتحمشي هادشي كلو فيك ونتي فلول كنتي كتباني غير خبز الله فوق طبقو كتر من ديك مينة...
اية كتفرنس : وغير صبري نعاود ليك اصاحبتي راني بصح كيف قلتي غير خبز الله فوق طبقوو لكن ربي عطاني لعقل كنفهم بلا ما نسول...
عفراء تقدات فالجلسة وحطات مخدة فوق كرشها و عاطية ودنيها لأية..
- اييه عاودي ليا اش طرا و جرا تا وليتي هكذا ...
اية : اوا الالة فلول كنت كنحشم من كمال تا فنعاس كنت نطلبو يطفي ضو عاد ينعس معايا وهو وخا مكيبغيش لكن كيدير ليا خاطري ...
عفراء خسرات ملامحها : من نيتك اصاحبتي راه راجلك علاش اتحشمي منو...
اية : تانتي فين هو العقل لي يحيد الحشمة ..كان هو يدوز عليا ليل كامل يرجعني حالتي حالة و مو تصبح عليا مع صباح تمرضني عوتاتي بالولاد.... و انا غير ساكتة و صابرة تا بديتي نتي كتخدمي فتعاونية و شفتك حارة وكتوقفي فوجه بنادم ولي عطاك تعطيه..رجال بشلاغمهم و هبطتي ليهم راس. ....
عفراء عاجبها الحال : ياك بعدا تعلمتي مني شوي...
اية : صراحة تقال كنت غير حاضياك كنتي كتعجبيني بهضرتك و لسانك كتعطي بنادم علاش يدور وكلامك موزون ماكيعرف بنادم كيف يرد عليك و كانو عيالات دوار يخافو منك غير يسمعوك جايا يوليو يخدمو من نيتهم غير باش متغوتيش عليهم اما انا من كنهضر معاهم مكيتسوق ليا تا حد تا كنجبد سميتك عاد يبداو يخدمو.... تم عرفت المشكل كاين فيا و ماشي فبنادم ...انا دغيا كنحشم ونهبط راس و نسكت و منقدرش نتخاصم مع بنادم وهما كيبقاو يلعبو عليا العشرة ..
عفراء : شفتي بنادم كيف داير خاصك ضروري تحكي والديه مزيان باش يعرف راسو معامن اما لطلقتي لوالديهم لعب يرجعوك وسطهم قرد ويديرو بيك الحلقة يجمعو على ضهرك صرف..
اية حركات راسها بالإيجاب ..
- والله اصاحبتي تا عندك صح وهادشي علاش بديت بالتعاونية هي لولة من مكتجيشيش ومكيبقاوش يبغيو يخدمو كنخرج فيهم عيني ونسمع ليهم ما يديوه معاهم .. كنقي ليهم ودنيهم تا كيتصدمو فيا ويقولو واش هادي اية ولا غلطنا فيها ...
عفراء : اييه كملي و كيف درتي مع كمال ...
اية : اودي راك عارفة الحاجة مع سيرة لولاد كل نهار تسولني واش حاملة .. صدعاتني و نتي تقولي ليا اجي لرباط جاتني من الجنة وناس نضت وجدت راسي وتحزمت خليت كمال تا دخل اوا بدت عليه بشطيح و لكلام لحلو وديك الحشمة طارت.. كنشوف سيد عجبو الحال و ستحلاها وغير لي قلتها يقولي واخا... من تم فين ما بغيت شي حاجة نوض نتحزم و نتعوج عليه وهو بالفرحات عليه غير يشوف داكشي كيتلف...
عفراء شداتها ضحكة : هي قولي ليا سي كمال زهواني وكيعجبو هزان لبوط...
اية : اصاحبتي انا وتصدمت فيه كيبان سيد شاد طريق وحدة و معزيزش عليه داكشي ولكن كنت غالطة سيد صدق بخبيزتو ولدابا كنقول كفاش بقا شاد راسو و ماتزوج ما والو وهو مكيشبعش من داكشي ...
عفراء : اوا ربي بغاه يشد طريق ودار كلشي فالحلال بعدا مداروش فالحرام...
اية خسرات سيفتها و رجعو عنيها حمرين ..
- تا انا كنت كنقول هضرتك ولكن دابا عاد فهمت وعرفت علاش عمرو تزوج...
عفراء بدون فهم : شكتقصدي..
اية ساهية ودموع تشكلو فعنيها ..
- كمال كان كيبغي وحدة وهادشي علاش عمرو تزوج ومزال الأن كيبغيها و مقدرش ينساها...
عفراء كمشات حجبانها : من نيتك كتهضري...
اية تنهدات بجهد : غير خلي داك جمل راگد اختي غير كنتفكر شي وحدة فقلبو قلبي كيتقبض و دنيا كدور بيا و كنتخنق..شحال من مرة حصلتو كيدعي معاها و فين ما دار شي صدقة كيديرها ليها عاطيها واحد لقيمة فقلبو مكتصورش ...
"كتمسح دموعها لي مبغاوش يتحبسو "...
-وانا هادشي مرضني فصحتي ومبغيتش نوضها معاه حيت تا انا قابل عليا بالماضي ديالي وخا مغاديش نرزقو لولاد ولكن عطاني فرصة وتزوج بيا ...
وقفات عفراء مشات جلسات حداها ..دورات يديها عنقاتها وقالت بهدوء...
- متكونيش هبيلة و ريح لي جات تديك ..يمكن كمال فعلا كان كيبغيها او كانت سبابو باش تاب هادشي علاش كيدعي معاها و يصدق عليها ربما حيت فضلها عليه كبير ولو انه كان كيبغيها فعلا ولكن هادشي فالماضي و ماشي فالحاضر وخا انا معرفاش شكون هادي لكن كوني متأكدة نتي هي الحاضر ديالو ..لو مكانش كيبغيك و الله ما يتزوج بيك راه ولاد قبيلة وحدة و عقليتنا متشابهة و مستحيل كمال يتزوج بيك وهو مكيبغيكش ولا تكون مزال شي وحدة فحياتو ..وبلا ما نزيد نقول ليك راه غير من عينو باين كيبغيك بزااف غير نتي الغيرة خلاتك عمية ...
اية ساطة بجهد ومسحات دموعها : اختي تلفت ما بقيت فاهمة والو....
عفراء : معندك ما تعرفي بنادم هو لي يشوف لقدام ماشي لور ونصيحة عمرك تقلبي فحياة رجل حيت اتجبدي على راسك غير المشاكل و تفقصي..كوني دكية و متغامريش ..ومافيها باس تبيني ديك الغيرة لي كتكون حلوة و مكتجبدش المشاكل وبعدي على الغيرة ديال الحماق لي تكرهيه فحياتو و يكرهك معاها...
اية بدون فهم : وشنو بغيتيني ندير ..
عفراء : نوضي غسلي هاد الحالة وقادي الحالة و لبسي شي قفطان واعر خليه يشوف زين لي واخد ويحس بنعمة لي عايش فيها ...
"صغرات عنيها شداتها ضحكة بالفكرة لي عندها فراس"...
- من يجي و يوصلنا لدار دخلي معايا متبقايش شادة معاه الهضرة و جلسي حدايا ...انا انجلس مع سليم و اناس قراب ليك فلاج هضري معاهم و ضحكي خليه يحس بالغيرة و يعرف اش واخد راكي مزال صغيرة وعاد عندك غير 19 سنة كون تزوج كان يولد قدك ...
ضلامت دنيا وشعلو اضواء شوراع ...وقف سيارتو من نوع رونج روفر سوداء كتلمع وضو ديال شوارع كيضرب فيها..
خرج لابس كوستيم ازرق مغلوق مرجع شعرو لور و مقاد لحية كيبان صغير و زين و فصالتو مقادة و معضلة ..
فإصبعو خاتم ديال زواجو وفيدو ساعة ديال الجلد و ريحتو سابقاه تقولهو لي عريس..هاز تليفون فيدو كيكتب مساح لأية وجوباتو انها نازلة دابا هي وعفراء..
تكا على سيارة مربع يدو كيتسناهم يخرجو تا بانو ليه خارجين كيف الوردات زينات وكيحمقو و يتلفو كل لي شاف فيهم...
وحدة زعرة وحروفها غربية و لاخرى حروفها ديال لبلاد وزينها بلدي ..
تبسم وقرب عندهم مبتاسم...
كمال : لي شوفكم يقول ليكم نتوما هما لي عروسات هاد ليلة..
عفراء : علاه منستهلوش اسي كمال...
كمال ضحك تا بانت ليه حفرة زين و عينو على اية ...قال بصوت عميق..
- لا ابنتي تستاهلي ...
ركبو فسيارة و اية ركبات مع عفراء لور كتهضر معاها وعاطية كمال نخال كيف وصاتها عفراء ...
كيشوف و مراقبها من المرءة الأمامية مجعد حجبانو مافاهم فيها والو ..حاس بشي حاجة ماشي تال لهيه فيها لكن ما عرفش شنو واقع ..
اية قلبها داب بنضراتو وقربات حدا ودن عفراء..
- ناااري دبت اناا دبت شوف على شوفات كيدير فيا..
عفراء كتقاد زيفها لي كيتلمص ليها من لقدام عصبها..غير سمعات اية وهي تقرصها بردات فيها العصبية لي دار ليها زيف...
- نتي مال مك دوزتي معاه ست شهور زواج ومزال كدوبي قدامووو...
اية كتحك بلاصة ديال لقرصة : وشنووو بغيتيني نديير اصاحبيتي راني طاايحة فيه تا غرقت ومكاين لي يخرجني ...
"شافت فيه بنص عين وهو يغمزها خلاها تحمار و تخضار غير بوحدها "...
- نااري والله تا غمزني ..
عفراء خنزرات فيها مكرهاتش تركلها وحابسة راسها بزز..
- شفتي ليماك نتي مايصلاحو فيك لا نصائح لا زبل.. غير مضيعة معاك وقتي واناخد غير دنوب..
اية جمعات راسها : صافي اختي متقلقيش هاني ساكتة ليوم نربيه...
عفراء قلبات عنيها : بان لي هو لي ايعاود ليك تربية..نااري اعباد الله واش دنبي تا يدورو بيا غير المكلخ و خوه ...
وصلو لدار لقاو جيران خارجين كيطلو من شراجم وحيت مناسبة خاصة وغير خطوبة موجود غير العائلة و معرضوش على جيران..
كلشي كيتحقق اش كاين و شنو واقع ومركزين عنيهم فجعفر لي واقف حدا سيارتو كيهضر مع خالد ..بانت ليه سيارة كمال توقفات حداهم وخرجات بلباسها الأنيق و القفطان لي كيحضر فكل المناسبان بأناقتو و فخامتو...
عينيه لمعو من شاف زيف لي مغطية بيه شعرها و الفرحة بانت فملامحو..توجه عندها مبتاسم شدها من يديها وهي دارت فرحانة براسها..
جعفر : شهاد زين امراتي لغزالة...
عفراء كتفرنس بحال شي بنيتة صغيرة..
- شفتي باش تعرف راسك راك واخد زين...
جعفر كيقاد ليها زيف من لقدام ...
- راني طايح فيك كامل ماعندي كيف ندير.. زينك خرج عليا وخلاني بلا عقل..
بدات كضحك : وليتي عنيبة مع راسك...
قرصها من نيفها : ياك لمك وليت ليك عنيبة دابا ...
عفراء دورات يديها على دراعو ..
- غير نضحك معاك.. مهم تكون عنيبة غير ليا بوحدي...
خالد سمعهم بدا كيكحب ضحكوه ..قرب عند عفراء لي عندو عزيزو وغالية من كانت صغيرة....
خالد : زيانيتي العفرية بالحجاب...
عفراء عينها كيلمعو : بصح جا معايا ...
خالد : جا معاك حسن من شعرك...
جعفر فرحان بيها : شفتي ستر شحال كيزين مولاه...
بالفرحة بغات ترد عليه وهي دخل بيناتهم اية لي هربات من كمال لي بغا يقنتها يدوي معاها باش يعرف مالها منخلاه..
شدات فيها كيف العمة فضلمة سلمات على جعفر و خالد وجراتها معاه دخلو لدار واية معصبة...
اية: من صباح ونتي عليا بنصائح ديري هادي فعلي هادي و تبتي ومتهضريش و متبينيش راكي طايحة فيه وزيد وزيد ونتي غير شفتي جعفر نسيتين و مشيتي كتفرنسي عندو لي يشوفك ما يقولش غير طايحة رايك غاااارقة نيييت...
عفراء دفعاتها مخنزرة : اوا اختي انا لغرقت راني عارفة فين غرقت بعدا جعفر كيعرفني غير انا من نهار تزاديت وفقلبو كاينة غير عفراء ..الماضي و الحاضر فيهم غير انا ماشي كان يبغي وحدة قبلي باش نتسنا نصائح ...
"ساطت بحدة"..
- ونتي اختي من فيك هاد الفهامات كاملة مالكي اختي جالسة تخرجي عليا خنونتك ....
اية : ناااري مالكي كتقلبي غير وحدك راني غير دويت...
عفراء : اختي فوتي ليا غير جعفر وهضري فاش ما بغيتي تال جعفر مانعقلش عليك...
اية :ها فمي سداه دابا قولي ليا اش اندير مع كمال شفتو غير تابعني...
عفراء : ندخلو بعدا و يكون خير ...
دخلو عند مينة وحادة لي واجدات ولابسات ومقادين الحالة والفرحة واضحة من عيونهم..
حادة عاجبها الحال وغير كضحك ولات عارفة مازن مزيان ولقات راحتها معاه وعرفاتو راجل ديال زمان لي تعول عليه ...
اما مينة كان من طرفها بعض الخوف و الترقب و الفرح ..وهادي حالة ديال كل وحدة كيجيوها لخطاب ..ضروري ما تمر من هاد المشاعر لي كيقلبو المزاج و ينسيوك فراسك و يرفعو ليك العقل ...
وخا كتعرف جمال لكن معرفتها كانت بيه غير من بعيد عمرها جلسات هي وياه وهضرات معاه باش تعرف عقليتو وكفاش دايرة شخصيتو..
كانت كتشوفو غير من البعيد ومن عرفاتو معجب بيها بداو مشاعرها كيمليو ليه ولقات راسها ولات كتحس بالإنجداب اتجاهو..
وليوم من سمعات انه ايجي يخطبها قلبها قفز من بلاصتو وتخلطات ليها الفرحة مع الخلعة...
بقات كدور فبلاصتها وكتفكر غير بوحدها.. غير بانت ليها عفراء وهي طير عليها ...
مقنة : حشووومة عليك اعمتي وخا نكون عدوتك مديريش ليا هكذا جايا تال دابا وانا لي من صباح وانا نتسنا فيك وشحال عيطت عليك و تليفونك طافي ماتسوقتيش ليا گاع ولا جيتي تقابليني ...
عفراء دفعاتها معصبة : واش كضحكي على لوقت ولا مالكي واش مكتشوفيش كرشي فين واصلة شكون لي خاص يقابل الاخر انا ولا نتي...
مينة : وخا هكاك مافيها باس دوزي معايا نهار و تقولي ليا شنو نلبس وشنو ندير ماشي تخليني بوحدي بحالي ما عندي تا حد...
عفراء هزات حجبانها : يااااك اختي دابا عاد بديتي كتفهمي و تعرفي ونهار كنت نقول ليك لبسي و تقادي كنتي تغوتي عليا نتي وديك مك و تجريو عليا وانا منخلي ما نقول حلقي ينشف ونتوما ما مسوقينش وليوم من شديت تيقاري جيتي كتشكي عليا بوجهك حمر...
مينة مبغاتش تزيد معاها فالهضرة عارفة فتطوال لسان مغاديش تفوت عفراء..
وقفات قدامها كدور وتوريها لقفطان لي لابسة ..
- قولي ليا كيف جيتك بهاد القفطان ختراتو ليا ماما...
عفراء جلسات كتحك جبهتها : غير قولي ليا مالكي مضروبة على لون مذهب هكذا ..قفطان عامر خيوط مدهبة وزايدة معمرة يديك بدبالج دهب و سناسل فعنقك ديال شراف واش من نيتك دايرة هاد لحال كتباني بحال شي شارفة ..
مينة بدون فهم كتشوف فراسها وفدهب لي لابسة ..
- ولكن ماما لي عطاتني هادشي نلبسو قالت ليا باش نبان بنت لخير و والديا مهليين فيا...
عفراء خنزرات : هاد مك غادي طرطق ليا المرارة شي نهار بهاد العقلية لي عندها..اعباد الله تهلو كيبان بالمعاملة ماشي باللبس و جمال اصلا راه جلس وسطنا وعرفنا و عرفناه وشاف معزتك و غلاوتك عند والديك ومغاديش تبينيها بدهب ...سيري حيدي هاد ضحك لي دايرة فراسك واجي تلبسي هادشي لي جبت ليك...
مينة بفرحة طارت عليها باستها فخدها...
- كنت عارفاك اعمتي وخا تعايريني متفوتينيش...
عفراء : اممم كتعرفوني غير فحاجتكم ...
بشرى كطل من لباب مكمشة حجبانها : خلي لبنتي دهبها تكبر فعنين ناسها...
عفراء : مرت خويا هادي غير خطوبة وناس كيديرو داكشي سامبل و بسيط و لبنت فعمر مينة كدير داكشي رقيق لي يناسب سنها ماشي تلبس سناسل غلاض و كبار ديال شرفات...
بشرى خسرات ملامحها: اش كتعرفني نتي داك دهب لي تقولي ديال شرفات راه خاسرة فيه زبابل ديال لفلوس حاطة فيهم مليون تنطح مليون الالة ...
عفراء شادة معاها الخط : هانتي قلتي حاطة فيهم فلوسك يعني ديال دواير زمان ..دهب كيبقا ثمنو هو هو وناس كيخبيو فلوسهم فدهب هادشي علاش كيشريو هاد نوع لي كلو دهب والوزن ديالو تقيل و غليض راه ماشي ديال الأكسيسورات ابشرى..حاولي تفرقي شوي الله يرحم ليك الوالدين ..
جبدات بوطات من صاكها فيهم دهب ديالها وكتهز سنسلة و توريها لبشرى.
- بحال هاد شكل هو لي كيلبسوه ناس كيعيطي لعين و كيجيو مع لبنات لي فعمري و فعمر مينة... ومن دوق ما تعمريش راسك بدهب ..ديري حلقات فودنيك من هادو لي خرجو جداد كيشبهو لويزة و كيجيو زوينين ولكن فعنك ديري غير هاد سنسلة رقيقة كتحدد ليك غير عنقك و يعطيك مضهر شبابي ...واصلا حنا القفاطن ديالنا كيكونو عامرين وكيعطيو الهيبة لمرأة فلبس منحتاجوش گاع هاد دهوبات كاملين...
كتشرح ليهم بالمهل و كتلبش مينة وتقاد ليها شدة ديال شعرها رجعاتو لور باش وجها يبان كامل وشداتو بنسلة دوراتها من جبهتها و دخلاتها فشعرها وزينات ودنيها بحلقات فيهم دمعة بالاخضرة كيبينو ليو وجها صغير وكيحدد ليها الفك ديال وجها بشكل جميل..
ضافت سنسلة رقيقة متوسطاها جوهرة بالاخضر بينات عضم تروقة ديال مينة و كملات لمسة ببتكشيطة فخمة من لتحت لون بنفسجي و من لفوق اخضر رجعها وحدة اخرى خلات كل لي شافها يحل فمو حتى من بشرى بقات غير كترمش فعنيها مصدومة فشكل بنتها لي تغير 180 درجة ...
اية مخرجة عنيها : ناااري جييييتي وااااعرة كتحمقي...
مينة عجبها راسها : عويناتك ل زوينات اختي...
حادة دفعات مينة وجلسات قدام عفراء :صوبي ليا تا انا نجي بحالها...
عفراء شادة ليهم لخاطر وخا متقلة لكن كتصاوب كل وحدة بستيل لي يناسبها..عودات لعمتها لمكباج كاملة وجمعات ليها سعرها على شكل شفنجة ...
-نتي اعمتي قصيرة مغاديش يجي معاك لقفطان ، لبسي شي جوهرة واندير ليك هاد لمضمة تجمعها من جهة لخسر ولبسي شي صباط طالون يكون مقمقم من لقدام غادي يجيك واعر...
حادة : هادشي مكنفهمش ليه شوفي نتي لي يجي معايا و لبسيه ليا ...
بدات كتخدم ليها بداكشي لي يزيد جمال عمتها ويخلي سر باين عليها .
بشرة جلسات حدا بنتها كترش من جوانبها لملحة ..
-اه يا بنتي وعلى مزيناتك ليوم يضربوك ليا بالعين...
كلثوم عصباتها : نتي حيدي هد لمحل و طلقي لقرأن باركة من هاد شوهة ..
بشرى : خليني مع بنتي يرحم باك نتي ماشي صوقك ...
كلثوم هزات كتفاها و مشات عند عفراء كتفرنس ليها...
-خت راجلي لعزيز صاوبي ليا تا انا..
عفراء : كتهضري من نيتك اكلثوم واش انا بزز باش واقفة ونتي كتزيدي عليا فالخدمة ...
بشرى مخنزرة : ماديش عليها هاد شارفة تا هي تا كبرات وهترات عاد جاتها المراهقة وبغات تعاند مع بنات قد ولدها...
كلثوم تعصبات : شارفة هي مك المتروفة بزااف عليك توصلي ليا يا لقرعة ...
بشرى حيدات عصا من شطابة غادة ليها محلفة عليها و كلثوم غير شافتها وهي تهرب خلات غير لبرد وراها..
بشرى: شهدو عليها البنات راني مكنجبدهاش ...
دخلات عليهم لطوف بغات تندب حناكها : سكتووو يااا الحلاااقم اتشوهوووني واش تا كيجيو ناس عاد تبداو فهبالكم ..
كلثوم تخبات وراها : وهادي اعكوزتي لي مبغاتش طور گاع ، شوفي غير لعصا لي هازة بحال شي سراح...
بشرى بدات كتشير عليها : هاد لعصا هي لي انفض بيها جنابك ياشارفة كبرتي وهباليتي...
كلثوم كاتعوج فمها : بعدا مزاال زييينة ولي يشوفني ميعطينيش عمري ماشي بحاالك يا الخيبوعة كتباني قد جدة ...
بشرى جنون بداو يشطحو فوق راسها ...كيف العودة دارت عليها بعصا و عائشة لي دخلات شافت هد الحالة ..دخلات بيناتهم تفك وهي تجيها ضربة لراس داخت فالبلاصة ...
لطوف جرات حناكها بغات تاكلها : اميييمتيي على شووووهتييييي هاد نهااار...
بشرى عنقات عيشة لي شادة راسها : والله أحبيبتي ما شفتك بغيت نضرب غير هاد المصيبة ...
خالد لتحت كيعيط على عائشة تهبط عندو وهي مزال دايخة و الخلعة شداتهم خافو يتحاشمو معاه...
كلثوم طلات عليه : خويا خالد عائشة كتعاون عفراء بلاتي و تنزل ليك...
خالد كمش حجبانو : وشهاد صداع لي عندكم لفوق...
بشرى معنقة عائشة ومخبية جهة لي ضرباتها
-واالو اخويا غير كنا كنشطحو...
بالخلعة لي فيهم جروها دخلوها لبيت وبداو كيقطرو ليها لما وسكر باش تفوتها الدوخة ...
حادة : وخا تكونو هبيلات ماديروش هاد المصائب...
بشرى: راه غير من كنتعصب مكنبقى نعقل على والو ولي فيدي كنضرب بيه ...
عفراء ساطت بجهد : ها علاش نهار كامل و انا غايبة غير باش منسمعش لهاد المصايب ساعة خليتوني تا جيت عاد بديتو فهبالكم...
لطوف باست ليها راسها : صافي ابنتي تهدني راكي حاملة و مخاصكش تعصبي..
عفراء : واش هادشي اميمتي مكيعصبش نهار لي نفرحو فيه جالسين كيدابزو هاد شراف لي عندنا...
كلثوم و بشرى لي فيهم ما هناهم : شارفة هي نتي..
عفراء بغات تاكلهم : راكم كدورو بيا وباغين تسمعو مني شي كلام لي ينقي ودنيكم مزيان..
مينة كتحاول تهدن لوضع : وصااافي واش فرحي وغادي دابزو فيه و تقلقوني ...
كلشي سكت مزادوش الهضرة..فيقو عائشة بعد ما رتاحت و مبقاتش شداها دوخة هبطات عند راجلها بلا ما دابز ولا تغوت عليهم ..
عارفاهم كيف دايرين وقلبها جا بيض بزااف تسنح فحقها وتسكت على لي فيها عكس عفراء لي تشعل لعافية فلي يمسها...
خرجات عفراء لباركو تبدل الجو لي خنقها واية حداها مستغربة..
اية: واش هادو من نيتهم كيديرو هادشي ...
عفراء : مديش عليهم من نهار عرفتهم وهما هكدا بحال ضرايرات لكن وخا هكاك مكيفتوش بعض قدام لبراني هادشي لي كيعجبني فيهم ...
لتحت مجموعين رجال كيدورو فعنيها يبانو ليهم عيالاتهم لكن تا وحدة ما بانت بقا غير شي كيشوف فشي...
اناس وسليم واقفين برا متكين على لحيط ديال دارهم ولابسين ملابس رسمية ومقادين الحالة وعنين بنات جيران عليهم ...شكلهم رجولي و وسامتهم كتجدب العين وشخصيتهم كتزيد طيح لبنات كتر....
سليم مدور راسو لجهة الاخرى مراقب زليخة لي جالسة حدا باها من نهار هضر معاه خالد وهي وياه عاطين تيقار لبعضهم كيبقى يشوف فيها غير من لبعيد وخا توحشها ومكرهش يقنتها و يفدي شوقو ليها كيف مولف ولكن حيت عطا عهد الخالد خاص يوفي بيه....
دورات راسها جات مع عينو نيشن..بالفرحة لي جاتو غمزها وهي بسرعة هزات صبع صبعاتو ورجعات تكمشات حدا باها منخلاه..
اناس بقا كيضحك حداه : عطاتك اخويا علاش دور ...
سليم تزير : شوف ليك بنت الحرام تا تفارقنا عاد بدات تزيان و توجاد كتخلي القلب يتبورش عليها...
اناس بنضرات تسلية : شكون منعك خلي خالد يخوي وسير شدها...
سليم برفض: لا اصاحبي عطيت كلمة رجال مغاديش نخدم معاه خدمة شمايت...
اناس بفهم : اوا صبر عل خبيزتك تا طيب...
سليم شاف فيه شوفة قاصحة : نتا أولد لكلب كيف درتي ليها ...
اناس غمزو : الحب احبي يخلي لقلب ميتشاورش مع مولاه..غير شافها وهو يطيح فيها عما...
سليم شاف فسيارة لي توقفات فراس درب..
- ها مولات دعوتك جات احبي..
دور راسو شافها خارجة من سيارة بأبهة حلة لابسة جلابة مغربية بالأبيض و مخيطة باخضر فاتح و دايرة زيف ابيض هازة كادو فيديها وتمشات حدا باها لي عنق جعفر وتسالم معاه سلام عزيز....
تقدم عندهم كيفرنس وقف قدام عبدالله لي ما عرف راسو باش تبلى غير شافو وهو يتغير وجهو وحيت اناس وجهو قاسح جاه من لخر...
اناس : نسيبي لعزيز نهار كبير هذا لي شرفتينا بحضورك ..
جعفر جعد حجبانو فيه وعبدالله تبسم بزز ...
عبدالله : ولدي اناس لباس عليك...
اناس كيضحك فرحان : حمدلله بييخييير...
"حول عينو لفاطمة لي منزلة راسها لارض" ..
-فاطمة لباس عليك
فاطمة كتفات فقط تحرك راسها بدون ما تكلم وهو منو لراسو شار لدار لفوق ..
- طلعي لفوق كاينين لبنات وخلي نسيبي معايا نتوالف انا وياه....
طلعات ديريكت بديك نسيب لي كينطقها جابت ليه تمام وقضا عليها...
بقا عبدالله كيشوف فيه ويهبط و يطلع فيه واناس كيقاد لكول ديال القامجة..
اناس: كيف جيتك انسيبي ياك والمت زوينة ديال بنتك...
عبدالله غوبش : بنتي عندها سمية وياريت تعيط عليها بسميتها..
اناس دافع جبهة ..دخل يدو فدراع عبدالله وجرو شاد نعاه لحديت مكاين حشمة فوجهو..
- تا نتا انسيبي راك جيتي تال دارنا وشفتي كلشي بعنيك وعارفني كنبغيها وناوي معاها الحلال و مابقا والو تكون ليا علاش انعيط عليها بسميتها ونخلي حبيبة و زوينة و لغزالة لي تستاهلهم ...
عبدالله تقلقل : بنتي لي اولدي مزال صغير وماكتفهم والو فصواب و الإحترام ...
اناس مشا معاه فالخط : شغادي نقول ليك لحد الأن داير معاك صواب و محتارمك وعندي عزيز حيت كنبغي بنتك وغادي تولي مراتي انشالله وما فيها باس نكون معاك صريح و شخصيتي منخبيهاش ونافقك باغيك تعرفني كيف داير من ديبار باش تعرف بنتك معامن اتخليها ...
عبدالله بدا كيرطاب : ولكن خاصك تبدل منبغيش راجل بنتي يكون بحال هكذا الله يخليك...
اناس ضحك من نيتو : علاش كنبان ليك بحال شي زهواني ..اسيدي كون هاني بنتك لي داخلة فعيني و ساكنة فقلبي مكنشوفش غيرها..
بقاو بجوج داخلين فالهضرة نساو راسهم وكل واحد كيغرف حاجة على تاني..عبدالله لي مكانش عاحبو الحال ولا يضكح بهضور اناس لي ضارب دنيا بركلة ولكن وخا هكاك باين عليه ولد الوقت و مطور وعارف اش كيدير والاهم انه كيبغي فاطمة و حبو ليها حب حقيقي ..
جلسو كاملين فصالون كيهضرو و يزيدو يتعرفو ببعض حتى بدا صداع برا كيوضح الخطاب جاو ..جمعو لوقفة وتوجهو لباب يرحبو بناس و العيالات لي كانو لفوق هبطو كيزغرتو و يصليو على نبي و يرحبو بلي زار دارهم طالب فالحلال و باغي بناتهم...
دخل كل من جمال و مازن لابسين جبادور مغريبي ..جمال بالابيض و الاصفر و مازن بالأخضر و الاسود وناس من وراهم مدخلين الكادو و ام جمال واقفة وسطهم دايرة هي ام مازن لي معندوش مو و عيطو عليه يجي معاهم و يديرهم عائلتو لي يجيو معاه..
جلسو ناس فرحانين يرحبو و يعاودو وام جمال تعرف بناس لي سمعات خبارهم غير من ولدها..كتشوف بعينها و تقاد الميزان وبدات راحة تغزي قلبها من عرفاتهم ناس ملاح وقلبهم صافي..بدات ضحك و الفرحة بانت فيها وعجبها الحال وكل مرة تزغرت على ولدها لي ليوم ايخطب لبنت لي بغا و تمنا سنين هادي...
هبطو لعريسات لي الاناقة و الجمال كانت هي افضل وصف ليهم ..وحدة تنسيك فتانية وزاد الخجل و الحشمة طيحات عليهم سر وخلاتهم يدخلو لخاطر من عند الله...
جلسو قدام مازن وجمال لي كل واحد خاضي لبنت لي باغي و متنياها حلالو و مشتاق لشوفة منها يروي عشقو اتجاها...
تقدم لعدول لي جابهم مازن جلسو فوق طبلة لي بين مازن و حادة ..حلو لكتاب و خداو بطاقة الوطنية للعريسان ..بداو يسجلو ويسولو الأسئلة المعتادة لي كيمر منها كل لي نوا الحلال و تمناه...
نحن واحد من لعدول وهز راسو فالوالي على حادة..
- سي العربي واش مواقف على سي مازن يكون راجل لأختك حادة...
سي العربي بدا كيضحك : اسي لعدول راه هي لي جابتو اش بقا عندي انا نوافق ولا منوافقش كلشي ديالها هاد ساعة ...
بداو الحضور كيضحكو و حادة زادت فالحشمة وهو هز راسو كيشوف فيها وهي تبسمات ليه برقة.. من نهار شافها اول مرة وهو باغيها لكن مضنش ان هاد نهار ايوصل و اليوم هي وياه راجل و امرأة...
سينة تحت اسمو وسينات هي تحت اسمها وبدات زغاريت الافراح و المباركة من كل جهة.. بدون ما يحشم هاد لمرة مشا جلس حداها وشد ليها فيديها قدام لحضور لي دارو راسهم مشافو والو..
لكن معامن هما ، هز يديهم لي متشابكة مع بعض وراها لسي العربي و ولادو وقال ليهم بوجه قاصح..
مازن : دابا صااافي ولااات مرااتي ديك تخنزير لي كنتو تخنزرو فيا وقت نا نجي نشوفها مغاديش تبقا .....
ناس حشمو وحدرو راس وهو كيفرنس مانقصو خير وفرحان براسو معول على ليلة طويلة كان مشتاق ليها وليوم طاحت بين يديه...
حادة بهمس قالت : كون تحشم شوي...
مازن هبط راسو لعندها : والله ما نعقل عليهم وليتي حلالي مكاينش حشومة هاد ساعة...
حادة شداتها ضحكة : غادي تشوهني المسخوط...
مازن هز حجبانو : شوهة احبي ماشي هنا غادي نديروها فدارنا مكاين غير لحلوة...
حادة دفعاتو : نااري وجهك قاصح ...
مازن : ومالكي معولة تدوزيها راه ليوم مكاين لي يفكني منك...
حادة : سير تخرا هادشي علاش مزوج بيا...
مازن : لا حاشة مزوج بيك حيت كنبغيك و باغي ناكل ليك الحلوة...
حادة خبات وجها جاب ليها تمام وهو كيفرنس و يلعب ليها فيديها و كيتسنا غير وقتاش يسالي هادشي ينوض يديها معاه..
غمز جمال باش يبدا و جمال حشمان مقادر يبدا الهضرة..قرب عند جعفر لي قرب ليه ودنو يسمع شنو بغا يقول...
جمال : قول شي حاجة...
جعفر : راك نتا هو لي خاصك دوي ...
جمال بحرج : غير بدا نتا اصاحبي و انا انكمل وراك...
جعفر تقاد فالجلسة ودور راسو كيهضر مع سي العربي لي كيحرك رساو كانو كلهم عارفين علاش جمال جا وهادشي ما يحتاج هضرة ولا شرح ..
هما شافو جمال و عرفوه ولد ناس و الأصل و شاد تيقارو ومكانوش معولين يرفضوه لكن لكلمة لخرة كانت لمينة لي جالسة بخجل حادرة راسها..
سولوها و تسناو جوابها وهي زادت فخجلها و صمتها وكيف قبل منها نطق كل لي حاضر ..
" السكوت من علامة الرضا "...
الفرحة بانت فملامحو وقلبو رجع كيدق بجهد..جابوها جلسوها حداه باش يركب ليها الخاتم و يشربو الحليب وهو بيد كترعد حشم ياخد يديها وهي كتر منو خلاو كلشي يضحك عليهم ويزعموهم يشدو يد بعض ...
عفراء بقات لور كتشوف مبتسامة وحداها جعفر... بالجو لي تخلق قالت ساهية..
- مكرهتش كون درت تا انا بحال هكذا..
دار كيشوف فيها وشاف لمحة من لحزن دازت بين عنيها ..ختفات الإبتسامة من ملامحو وتفكر كفاش تقدم ليها وداها نيشن لعدول مجاش خطبها بحال هكذا ..
تا ضرب بيها العقد عاد ركب ليها الخاتم وكانو غير بجوج ماشي بحال هاد الجو العائلي لي كيفرح ..
حس بدنب اتجاها..دار عندها عنقها بلطف وهي بقات مستغربة بعناقو ...حط فمو حدا ودنها ونطق بلطف...
جعفر : انعاود نخطبك وندير ليك لعرس كيف تمنيتي و بغيتي ...
عضات فمها لتحت فرحانة وحداهم كانت اية لي شافت فيهم بغيرة ودارت كتشوف فكمال لي من صباح وعينو عليها..
بغضب هزات صاكها و خرجات برا بدون ما تقول ليهم انها اتمشي بحالها...
غادة بقفطانها كيتجرجر مع الأرض و الحزن مخيم عليها متوجهة لشارع لكبير تاخد طاكسي ..حسات بيد لتفات على خسرها وجرها معاه بدون ما يتكلم ركبها فسيارة ديالو وجلس فبلاصتو ديمارة مباشرة لدار ديالها..
بقات ساكتة مدورة راسها لشرجم وهو مسولهاش ولا هضر معاها ...حبس سيارة تحت الشقة ديالها ..خرجات هي الاولى وهو تابعها من لور..حلات لباب خلاتو محلول وهو سدو من وراها وبقا متبع ليها العين وهي بدات كتحيد لقفطان امامو و ترميه فالارض و بدات كتحيد ملابسها الداخلية ممصوقاش ليه ..
دخلات نيشن لحمام تخشات تحت رشاشة وخلات الماء دافئ يهبط على داتها و يدفى قلبها لي برد و حس بالفراغ..
مكيناش شي مرة لي تقبل ان راجلها عندو مراة وحدة اخرى ساكنة فقلبو من غيرها....مرضاتش و الغيرة قتلاتها وسلات معاها وخلاتها تصرف بطفولية ...
بقا واقف امام باب لحمام كيشوفها من جاج كدوش عرية الجسد و مفاتنها الانثوية باينين امام عينيه المشتاقة...
حيد ساعة حطها فوق طبلة و بدا كيحيد حوايجو بقا منو لشورط...
حل لباب ودخل وقف وراها وهي عاطياه بضهر حسات بيه ولكن مدارتش تشوف جيهتو ...
دور يدو عليها وحط راسو على كتفها حاس بيها وعارف بشنو كيدور ليها فراسها وبدون ما يدخل هو وياها فشجار ويطولو فالهضرة و الخصام حدر راسو مستسلم ليها ونطق بصوت هادئ حامل كل اللهفة اتجاها ...
كمال : أيــة ...
"قبلها تحت من ادنها ونطق معترفاً"...
-كنت كنضن ان حبي ليها كان فايت كل الحدود ولكن معاك فهمت معنى الحب من نسيتيني فيها وخليتي قلبي غير تابعك..وليت مهووس بيك أ اية وملكتي كل قلبي و عقلي ما بقا كيفكر فتا وحدة من غيرك...
"دورها عندو وهز ليها وجها فيكساه مع وجهو"...
- الحاضر ديالي هو نتي وقلبي فيه غير نتي ..
"قبلها في فمها وانفاسو الساخنة كتحس بيهم حدا فمها" ...
- كنبغيييك أ اية كثر ما تصوري...
انتِ لست كباقي النساء فـالشوق يناديني اليكِ وعيوني تبحث عنكِ والذي لا يوصف هو حنيني إليكِ وقلبي ينبض بحبك وروحي تسافر الى مدنك...
ضرباتو لفيقة بأشعة شمس لي كضرب فوجهو..تقاد فالجلسة متكى على راس ناموسية ومغطي جسدو سفلي بيزار و كيدور راسو فالبيت يقلب على خيالها لي مكاينش...
جمع الوقفة لبس سروال كيطمة وخرج كيقلب عليها ، شاف طبلة محطوط فوقها لفطور وهي خارجة من لكوزينة لابسة بينوار قصير واصل لفخاضها وسيقانها كيبريو بالبيوضية ومزال لخلخال لي علقو ليها فرجليها..
اية : فقتي.."حطات كرواصة فوق طبلة"..اجي تفطر...
عنقها من لور وقبلها فعنقها : علاش معدبة راسك ...
دارت عندو كضحك و حنيكاتها حمرين وصدرها فيه بقع حمراء موضحة ليلة الحميمية لي قضاو مع بعض..دورات أصابعها على شعرو كتمشطو ليه ...
اية: الأيام لي جايا عندنا فيها الخدمة كتيرة فالمحل مغاديش نقدر نجي لقبيلة باش نشوفك...
كمال حك لحيتو مع خدها : ماشي مشكل غادي نجي انا نشوفك ...
اية بإحراج : و لحاجة مغاديش تبغي نغيب بزاف من دار...
كمال حس بيها : لواليدة خليها عليا انا انهضر معاها..."قبلها فشفاه ديالها"...مهم تبقاي على خاطرك و ديري لي بغيتي غادي نبقا ديما وراك ماعندك مناش تخافي...
بفرح وعنيها كيلمعو جراتو لطبلة جلس و جلسات فوق فخاضو كتوكلو بيديها وكل مرة تسرق منو قبلات ..كتبان بحال شي طفلة فتصرفاتها وملامحها الجميلة و كيزيد يغرق بصبيانيتها و تصرفاتها...
خرجو يد فيد ركبو سيارة وصلها لمحل وخرجات عاجبها الحال...طلات عليه من شرجم من سمعاتو عيط عليها..
اية بدون فهم : مالك..
مد ليها برا بيضاء و ملامحو ممفرزينش وقال بصوت تقيل..
-خلي عندك هادي تا نبغيها وعطيها ليا ..
خدات لبرا لي مكتوبة فيه اسم سبيطار..كمشات حجبانها كتشوف فيه بإستغرب...
اية: شنو هادشي اكمال...
كمال بعد نضراتو منها و رجع كيشوف بعيد و نطق كأنه ساهي...
-من بعد و نقول ليك ، مهم خليها عندك دابا تا نبغيها...
حركات راسها بفهم وخا باغية تعرف شنو واقع لكن مزادتش فالأسئلة. تودعات معاه و دخلات المحل لي عامر بالكليان كيف لعادة...
شد هو طريق مباشرة لقبيلة ..وصل لفيرمة دخل فرحان وراشقة ليه بليلة لي دوز معاها و الخواطر لي تصفاو بيناتهم و الإعتراف لي عتارف ليها وقال ليها ما فقلبو اتجاها ..
حاس براحة وداخل لفيرمة ديالو هاز تليفون كيهضر هو وياها ميساجات وفين ما ترسل ميساج و يقراه كيتبسم بحال شي مراهق كيدوق الحب اول مرة ...
علاقتو بيها زادت قواة وخلاتو متعلق بيها لدرجة مكتصورش ولات حياتو كتركز غير على اية و مابقا كيفكر فتا حد من غيرها...
الحب لي كيكن اتجاها والغيرة لي بانت فعنيها اتجاهو خلاه ياخد القرار لي كان حاطو فراسو ولكن بعد هاد ليلة لي دوزوها راس فراس زاد زعم كثر...
دخل لدار بانت ليه لحاجة جالسة كتقاد لورد لي قطعاتو من جردة...جلس حداها وهز ليها يديها بجوح باسهم..
كمال: ميمتي كيف صبحتي..
الحاجة : حمدلله اولدي .."شافت جهة ديال لباب "..فين أية واش مجاتش معاك...
كمال : مزال فرباط الواليدة خاصها تقابل خدمتها....
لحاجة معجبهاش الحال : واش نتا مقصر من شي حاجة جيهتها ياك لي حلات عليها فمها كتحضرو ليها وما نقصها خير اش داها لديك الخدمة...
كمال : لواليدة راه هضرنا فهاد الموضوع البنت مزال صغيرة خليها دير ما بغات و تشوف دنيا ماشي غير تزوجات بيا غادي نحكمها ...
لحاجة تقرصات: انا مقلتش ليك حبسها انا بغيتها غير تجي تبع هاد لعشوب لي شريت ليها على الله يحيد ليها البرد من الوالدة ديالها وتجيب ليا شي حفيد نفرح بيه ....
كمال تبدلو ملامحو وعض لسانو من لداخل بجهد ...
- ميمتي متبقايش تهضري مع أية فالولاد...
لحاجة بدون فهم: وعلاش اولدي كلنا كنبغيو لولاد ومكرهتيش تا نتا تعمر عليك دار بلي يقول ليك بابا...
حط يدو فوق جبهتو كيدير مساج بعصبية وبقا كيسوط بجهد خلا الحاجة مستغربة من ردة فعلو...
الحاجة : ولدي ياك لباس واش قلت شي حاجة قلقاتك...
كمال بعد صمت طويل هز راسو فالأم ديالو بقا كيشوف فيها بألم واضح فعينو ...فتح فمو وبقا مدة عاد قال كلمتو....
- لواليدة هادشي عمري قلتو ولا سمعو شي حد تا من أية معارفاش هادشي لي غادي نقول ليك ...
لحاجة قربات عندو مخلوعة حطات يديها الدافئين على خدو و عينها حاملين قلق اتجاه ولدها...
- كمال شنو واقع ليك اولدي مالك تبدل فيك لون و صفاريتي...
كمال بألم واضح فصوتو قال..
- ميمتي انا عاقر مكنولدش ....
طاحت عليها الكلمة بحال شي صاعقة زلزلات ليها اعماقها وخلاتها جامدة فمكانها وكلمة " عاقر" كتعاود فودنيها ودموع بداو يهبطو ليها بقوة وصوت بكاها جهاد كأن شي حد مات ليها فهاد اللحضة...
بكل قوتها عنقات ولدها كتغوت بصوت مرتفع مقدراش تنطق ولا تكلم كان رد فعلها هو الصراخ بحال طفل صغير...
وهو بألم عنقها بقات فيه وتمنى انه ميقولش هاد الكلام ولكن كان ولا بد من هاد الحل باش يحمي مراتو وميزيدش يقوا صداع و الكلام على لولاد...
اية مستحيل ليها تحمل وعارف ميمتو لعرفات هادشي غادي تبزز عليه يتزوج غيرها وهو مستحيل يتزوج على مراتو ولا يجيب ضرة عليها...
رجع المشكل فيه باش الأم ديالو تسد موضوع لولاد و اية تعيش فطمأنينة معاه من اتعرف انه عاقر و ماتبقاش ديما خايفة انه شي نهار ايبغي لولاد أيتزوج ويتخلا عليها...
ناضت غسلات وجها و ستغفرات الله وتوضات و توجهات لقبلة صلاة جوج ركعات تجبر خاطرها وتوب لله و ترضى بالقدر خيره و شره..
بعد ما قلبها رتاح شوي مشات جلسات حداه ساكتة وهو حط راسو على فخضها متكي عليها وهي بيد حطاتها على شعرو كدوز عليه بلطف و اليد لأخرى هازة تسبيح ...
بعد صمت طويل قوات نفسها وخرجات كلامها...
لحاجة: وديك بنت ناس أش غادي دير معاها دابا....
كمش حجبانو بدون فهم...
كمال : شكتقصدي الواليدة...
لحاجة: لي كنقصد اولدي أية مزال صغيرة ودنيا قدامها و أي واحد يتمناها...
كمال تخطف ليه لون من وجهو من فهم قصدها ونطق بتحدير..
- لواليدة لحد هنا وحبسي ..
لحاجة بنضرات قاصحين..
- شوف اولدي اش غادي نقول ليك نتا عارفني مزيان ومغاديش نضلم معايا لبنت ، يكفي سكات لي سكت على موت لكبيرة ويا ربي يسمح ليا عليها..ومغاديش نزيد معاك تا فـأية ونضيعها فرزقها راك شفتي كيف تقلت عليها بالكلام و قصحتها من كنت ندكر ليها كل مرة لولاد وهي ساكتة و متحملة وخا عرفت راسي عيقت لكن شوقي نشوف ولادك خلاني بلا عقل ولكن دابا من عرفت اش واقع أولدي ونتا لي صدقتي مكتولدش لي نقول ليك خلي لبنت تمشي بحالها تقلب على شي ولد ناس دير معاه لولاد متحرمهاش من رزقها....
بعصبية جمع لوقفة ونطق بغضب. ..
كمال: واش فيين ما نقادها من قنت تخسر ليا من جهة خرا شهاد زهر عند ديلمي...
لحاجة بحزن : ولدي واش ترضا لراسك هادشي...
بأعصاب لي شداتو نطق بدون شعور...
- راني راااضي اميمتي رااااضي....
لحاحة بدون فهم : كفاش...
كمال ورك على سنانو بشدة ..
-شوفي الواليدة غادي نجيك من لخر انا مغاديش نفرط فيها ويدي مغاديش تفارق يديها ماشي صوووقي فلولاد ..بااركة عليا غير هيا مزاال خاصني نربي فيها ماناقصني ولاد...
لحاجة وقفات مخرجة عنيها ...
- واش حماقيتي ولا مالك لبنت عاد قالت بسم الله فالدنيا ومزال لعمر قدامها واش باغي تخليها حداك تفرط فرزقها باش ترضا عليها نتا...
هز تجاكيط ديالو وخشا رجلو فلاكيط وتم خارج كيسوط بجهد خلاها كتغوت بإسمو من وراه..قبل ما يفوت لباب دار عندها وقال كلمتو...
كمال: هي عارفة كلشي وقابلة عليا وباغية تبقا معايا وهاد الهضرة الواليدة متعاوديش تقوليها حيت مستحيل نخلي أية لشي واحد غيري وخا تسخطي عليا مغاديش نفرقها ...
خرح ساخط كان كيضن ايسد هاد لموضوع نهائياً لكن لقا مو واقفة ليه فنص طريق...جلس فجردة مخلي لبرد يضرب فيه يبرد شوي من كلام أمو وكيفكر فأية وكفاش ايكون رد فعلها من تسمع هادشي ...
دار كلشي منو لراسو ..تافق مع طبيب صاحبو خدام فكلينيك يخرج ليه تحاليل غالطين يبينو انه عقيم وهادشي لي كان فالبرا لي عطا لأية فيها الفحص لي كيوضح العقم ديالو غير باش يريحها و ميبقاش ديما يشوف الخوف لي فعنيها ويسكت تا مو لي كتفيق بلولاد و تنعس بلولاد كرهات اية فحياتها ..
بغا يحميها و يخليها حداه تعيش حياتها كيف بغات لكن دابا من شاف مو قالت كلام لي مضربش ليه حساب هز تليفون دور نمرة ديالها لي بسرعة ردات وصوتها المدلل دخل من المسمع ديالو وتوجه مباشرة لقلبو وزرع دفئ وراحة فشكل خلاه يرتاح بدون شعور...
اية : عاد تفارقنا ولا دغيا توحشيتيني..
كمال: انا ديما موحشك مكرهتش كون كنت حداك دابا...
"سمع صوت ضحك وهو يجعد حجبانو"..
-معاك شي حد...
اية : معايا غير عفراء...
كمال : لكنتي مشغولة نهضرو من بعد...
اية غمزات عفراء وتوجهات لباركو تاخد راحتها فالهضرة معاه..
- نو غير بقا معايا اصلا معندي ما يدار وعفراء اتمشي دابا كيتسناها جعفر لتحت ...
كمال بقا هادئ كيسمع لأنفاسها من الهاتف وهي كذالك بقات ساكتة عاضة فمها من لتحت وحاسة بفرحة فشكل..
كمال بصوت هامس : بغيت نشوفك...
اية بغنج واضح فصوتها : نتا ليبغيتي تمشي اما كون راك معايا نسهر انا وياك هاد ليلة...
بدا كيضحك : اتشطحي ليا عوتاني ...
اية : ياك كيعجبك شطيحي...
كمال تكا كامل على لكرسي حط يدو تحت من راسو وكيشوف فنجوم لي فسما كيتخليها من كانت تشطح وتمايل امامو و تخلي حلقو ينشف ورغبتو بيها تزاد...
قرب تليفون حدا فمو وقال ..
- كلك كتعجبيني من راسك لساسك...
اية صهدة طلعات معايا بكلماتو ..حولات تمالم راسها من شافت عفراء كتودعها ..تبعاتها سدات لباب وتوجهات لبيت نعاس نعسات فوق ناموسية كتلعب فشعرها وريحتو مزال كدور فبيت كتخلي قلبها يرجف ..مقداش دوي ولا ترد عليه كتفات بـ الصمت ...
بصوت تقيل فيه بحة خاصة قال..
كمال: اية بغيت ندوي معاك فأمر مهم...
اية : امم كنسمعك...
كمال بهدوء : لبرا لي عطيتك صباح فيهم نتيجة ديال تحاليل لي درت...
اية تقدات فالجلسة مخلوعة : يااك لباس شمن تحاليل وعلاش ما قلتي ليا والو..شنو لي كيضرك ..
"بصوت مرتجف والخوف متملكها"..
- كمال متخلعنييش علييك الله يرحم ليك لوالدين شنووو عندك و مخبيه عليا..
وقفات خدات صاكها خواتو كامل فوق ناموسية هزات برا كتحلها وكلها كترجف..هزات لورقة كتقرا وتليفون مزال فودنها..
فور ما وصلات لنقطة لمهمة ديال نتيجة تحاليل تنطق صوت ديالو فالهاتف...
كمال : انا عاقر مكنولدش أ اية...
يتبع...
التعليقات
لا توجد تعليقات بعد، كن أول من يعلق.