محتوى القصة
سي لعربي جلس وجر خالد جلس حداها كيتفاهم معاه بكلام معقول ..طولات الهضرة والعصبية ديال خالد بدات كتلاشى وتبخر ورجع مكانها ملامح حادة كيدور لكلام فراسو واخيرا بعد مدة تنهد وقال ...
خالد: لي جات منك اسي لعربي سمن على عسل...
عبدالقادر مخنزر فولد خوه : سمعتي جدك اش قال..
سليم حادر راسو ومدور يدو ورا ضهرو وحرك راسو ببطئ...
-سمعت ...
علال ببرود: غادي ديها فقرايتك ومن اتخْرْج اديها فخدمتك وزليخة اتنساها عليك تا تكوُن راسك وتوصل لمقامها وديك ساعة غادي تكون لهضرة...
كمل عبد القادر كلام خوه...
-زليخة بنتنا وديالنا مغاديش نعطيوها لواحد ماخدام ماردام ماعندو مستقبل ومعندنا باش نواعدوه ..لي بغا بنتنا خاصو يستاهلها ويبين لينا انه راجل ماشي شماتة واش فهمتي..
سليم بقا حادر راسو وكيرد ورا كلامها ...
-فهمت..
سي لعربي: واعدني زليخة مغاديش دور بيها ولا نلقاك كدوي معاها من ليوم لبلاصة لي تكون فيها نتا خويها وطريق لي تمشي فيه نتا بدلو ..
سليم شداتو لبكية ورغم ذالك حرك راسو وقال..
-وخا...
خالد بعد ما سمع كلشي تنهد وقال ...
-عائلتك كلها شاهدة فيك وانا عطيت كلمتي لجدك بينتي ليا راك راجل وتستاهل بنت رجال ديك ساعة انا غادي نعطيها ليك اما كنتي شماتة عمرك تحلم بي بنتي ولا تفكر تزوج بيها...
وقف علال جر سليم خرج هو وياها باين عندو كلام طويل ايقولو لولدو ..بقات زليخة مخبية فجنب متبعة ليه لعين وهو بنص عين شاف جيهتها وبسرعة رجع هبط راسو محافظ على الوعد...
ليوم دار حيط كبير بينو وبين زليخة كأنها ولات غريبة عليه وماعمرو عرفها....
رغم انها عارفة انه داير هادشي باش يحافظ على الوعد لكن قلبها ضرها وخلا الحزن يخيم عليها ...
تفرقات العائلة بعد ما حلو المشكل وكل واحد لقا شغل لي يتشغل بيه..
بعد ما تسلا عرس كمال بداو كيوحدو لعرس جديد وهو عرس مازن وحادة لي قررو فيه يديرو خطبة وعرس دقة وحدة.....
خلاتهم كيتفاهمو وبقات بوحدها جالسة فصالون ماعندها خاطر توجد معاهم...
دخل لقاها بوحدها تكا على باب صالون مربع يدو وهاز حجبانو..
جعفر: فين ساهية....
عفراء صاطت بجهد: بغيت ندير مشروع وماعرفت منين نبدا وهادشي لي كيدور ليا فراسي خاصو لفلوس بزاااف...
جعفر صغر عنيه : اش بان ليك تفكري فمشروع اخر كيهمنا بجوج ...
عفراء: شكتقصد...
جعفر بصوت هادئ : لولاد...
كمشات حجباها: شفتك كدوي على لولاد بزاف هاد ليومين واش باغيني نحمل...
جعفر: مكنضنش هادشي حرام ومن حقي او لا ...
تنهدات بجهد وبدات كتمسكن عليه..
-نتا عارفني مزال صغيرة ودابا انبدا مشروع مهم وباغية نخدم فيه ولو حملت غادي نتزير ومغاديش يبقا ليا الوقت وانا عارفاك نهار نحمل ونولد اتبقا تقولي ولدي عوتاني ترجعني بحال قنية وانا مقادرة على تمارة ديال لحمالة ولا لولاد هاد ساعة ..
جعفر بنضرات غير مفهومة: ماعرفتي اش مخبي لينا سيدي ربي وشمن رزق ايجيبوه ليك لولاد...
بقات كتشوف فيه مطولا من شافت ملامحو باردين قالت...
-خليني نفكر شوي لولاد مساهلينش وخاص نكون مستعدة...
قرب جلس حداها كيشوف فعنيها ..
جعفر: مغايش نبزز عليك حاجة كثر من طاقة ديالك حملي ومن تولدي ديري لي بغيتي ماغاديش نبزز عليك تعاودي تولدي ولاكنتي خايفة باركة علينا غير ولد ولا بنت وحدة والله يجعل لباركة ...
عفراء بشك: مرة وحدة...
جعفر كيأكد ليها: وي مرة وحدة ...
بقات ساكتة كدور فراسها وهو حداها كيقرا ملامحها باغيها غير توافق يديها مباشرة لطبيب ولكن جوابها كان عكس كل لي كان يدور ليه فراسو..
عفراء: خليني نسالي لمشروع عاد نتفرغ لولادة....
خنزر فيها وجمع الوقفة طلع لبيت خلاها حالة فمها فيه....
جلس حداها اناس هز رجلو فوق طبلة و داير تليفون فودنو مركز مع طرف الاخر ...
-سيدي عندنا بزاف لي اسمهم فاطمة ممكن تعطيني اسم العائلي باش نعرف...
اناس صاط بجهد مكمش حجبانو : معارفش كنيتها ولكن هي مهرسة من يديها ودايرة فاصمة ...
موضفة الاستقباب صغرات عنيها كتفكر فهاد المواصفات لي عطاها لكن بدون فائدة معندهم تا شي نزلاء فالوطيل بهاد الوصف..
ردات على الهاتف بكل احترام : نو اسيدي مكاين تا شي حد بهاد المواصفات ...
صاط بجهد وقرب عند عفراء كيهضر معاها فودنيها..
-ديك فاطمة لي كتبغي راجلك شنو كنيتها...
عفراء خنزرات فيه : فين كتعرف نتا هاد نوع رخيص...
اناس معصب: تكون رخيصة ولاغالية انا مالي كنسول غير على كنيتها...
عفراء بقات كتشوف فيه : البنت ماشي ديال لعب أ اناس وماشي فمستواك ولا قدك...
اناس: واش انا غادي نمشي نخطبها اعمتي الله يهديك ...
عفراء ببرود: مكنعرفهاش..
اناس: كضحكي عليا راه قلت ليك ما بيني وبينها والو غير نهار لي تلاقينا فصبيطار كنت انا ليجبتها وخلصت عليها ودابا بغيتها ترجع ليا فلوسي هادشي علاش باغي كنيتها..
عفراء تعصبات: داكشي لي خسرتي عليها غادي نعطيه ليك منعاودش نسمعك جبدتي بنت الشيخ عبدالله مرة اخرى...
جمعات لوقفة مشات وخلاتو كيفرنس ..تبعها دور يدو على كتافها باسها بجهد فحنكها..
اناس: نمووووت عليك أحبي...
مسحات حنكها وكتهبط وطلع فيه : انا ماقلت والو..
اناس حط خمسة على فمو ...خلاها تمشي و هز تليفون عاود صونا على لوطيل وردات عليه نفس موضفة الإستقبال...
-وطيل شهرزاد فالخدمة..
اناس: مزال ماعرفتي شكون فاطمة...
ساطت بجهد من عرفاتو نفس الشخص من قبل .
-لا اسيدي معرفناش ممكن تعطيني المعلومات الكافية باش نقدر نعرف بضبط الشخص لي كتقلب عليه..
اناس بإبتسامة: فاطمة بنت شيخ عبدالله..
موضفة بإستغراب شافت فالهاتف وبدون ما ترد غلقات عليه خلاتو مبلوكي فبلاصتو ما فاهم والو ..
موضفة الاستقبال لي قطعات تبسمات بسخرية وشافت فصاحبتها لي حداها..
-واحد خينا ضربو حمار ليل من صباح وهو مصدعني كيسول على فاطمة ومن قلت ليه مكاين تا حد بهاد سمية مشا نيشن قال سمية ديال مولات لوطيل شوفي تفليا فين وصلات بقات ليه غير مولات شي يسولو عليها...
صاحبتها بإستغراب قالت: ممكن يكون كيعرفها بصح ..
- واش لي كيعرف مولات شي ايصوني عليها عندنا ..لي كيعرفها راه عندو نمرة ديال المساعد ديالها ونمرتها الشخصية هذا باين غير شي مزلوط باغي فين يلصق وبانت ليه هي ...
صاحبتها هزات راسها كضحك : زعمة هي لي دايرة هاد لوطيل وكتناطح مع ريوس الكبار ومكتهبطش راس وديما كتشوف غير لفوق ومتكبرة غادي ديها فشي مزلوط اصاحبتي باين غير كيحلم وصافي باغي غير يلصق فيها...
- على ما سمعت من الخدامة لي كيخدموها انها كانت كتبغي شي واحد على قد الحال ودارت المستحيل باش تاخدو ساعة فلخر خلاها وتزوج بمغربية هادشي علاش مكتحملش فالمغربيات شعرة...
صاحبتها: باين غير هضرة خاوية اصلا مها مغربية وكتبغي المغرب ..
-انا غير سمعت وصافي حيت نهار تزوج بقات كتغوت وجرات على گاع الخدامة دارت حالة غير باها لي هدنها اما كانت اتقتل راسها مسكينة الحب واعر وكيحمق مولاه..
صاحبتها : وهاد خينا لي سول عليها معرفتيش شكون..
-افففف واحد المعفر باين من هضرتو شي برهوش باغي يلصق فيها..
توقف جسد امامهم بلباس محتشم عملي وانيق بلون الابيض دايرة زيف فوق شعرها ومرخفاه مخلية بعض من شعرها الأسود كيبان ومزينة عيونها بكحل عربي خلاهم يبانو كبار ويزيدو يفتنو كل شخص شاف فيهم وعلى شفاها احمر شفاه غامق رسم شكل فمها وزاد فجمالية شكلهم..
شافت فيهم بنظرات باردة وقالت..
فاطمة: كنضن اني كنخلصكم باش تخدمو ماشي تشدو الهضرة مع بعضكم وتاخدو راحتكم ..
هبطو راس حشمانين وقبل ما يردو صونا الهاتف ديال الأستقبال...هزات الهاتف من سمعات صوت نفس شخص تنهدات بجهد وشافت في فاطمة...
-لالة هدا من صباح كيسول على شي وحدة اسمها فاطمة مهرسة من يديها من قلت ليه مكاينش عطاني اسمك...
تبدل اللون ديال فاطمة ورجع تنفسها متسارع بسرعة خدات الهاتف حطاتو على ودنها كتسمع لتنفس شخص الأخر لي على الهاتف وهو بسرعة تبسم عرفها غير من صوت تنفسها الحاد..
تكا كامل على كرسي ونطق بإستهزاء..
اناس: مشغولة مع لكليان...
فاطمة من صوتو عرفاتو ورغم ذالك بغات تأكد وقالت : اناس..
اناس: واااو شرف كبير هدا لالة فاطمة تعقل عليا...
حدرات راسها من عيون الموضفين لي كيشوفو فيها بإستغراب..
فاطمة: شنو باغي!!!
اناس هز حجبانو: ضروري خاصني شي حاجة باش ندوي معاك...
فاطمة زيرات على يديها وقالت..
- الهاتف ديال الموضفين ماشي شخصي باش تاصل وتسول عليا...
اناس بهدوء: معنديش نمرة ديالك او بغيتي .."بسخرية"...ناخدها من راجل عمتي...
فاطمة: قلت ليك الف مرة انا وجعفر مابيني وبينو والو...
اناس تكى على لكرشي ودار رجل فوق رجل وقال ببرود..
-اكيد مغادي يكون بينك وبينو والو فالأخير مغاديش يخلي الغالي باش ياخد رخيص...
فاطمة بدون فهم : سمحي ليا !!! شنو قلتي دابا ؟؟؟ انا رخيصة!!...
اناس حرك راسو تأكيد لكلامها ..
-رخيصة ولكن ليك ثمن...
ضربات تليفون مع الارض بغضب وعنيها رجعو حمرين خلات كل موضفينها يشوفو فيها بصدمة...بتنفسها القوي ولهجتها الشرسة قالت...
-اخر مرة توصلني هاد المكالمة ومن هاد شخص..
فور ما نهات كلامها طلعات لجناحها بغضب ...دخلات لبيت رمات صاكها وبدون شعور ضربات يديها لي مهرسة منها خلاتها تصرخ متألمة ...
جلسات فوق سرير كتشوف يديها والهاتف ديالها كيصوني ..شافت الاسم وقبلات الاتصال بعدم رضا...
فاطمة: وي...
عبدالله بدون مقدمات دخل فالموضوع مباشرة ...
- الكلام لي كيقول صلاح صحيح..
فاطمة بصبر: بابا...
عبدالله: جوبيني اه او لا...
فاطمة تنهدات بصوت مسموع ونطقات بتعب..
-سيد مابيني وبينو والو كان عاوني فقط من مشيت لصبيطار وبصدفة عاودت تلاقيتو وصلاح كان حاضر..
عبدالله: ولكن صلاح قال بيناتكم علاقة..
فاطمة بسخرية: غاادي تيق فبنتك ولا اتيق فالبراني...
عبدالله بقسوة: لبنت لي كتسحر لراجل اخر مزوج باش تفرقو على مراتو متستاهلش تيقة ديالي...
عضات شفاها لي كيترعدو ورجعو عيونها عامرين بدموع وكيهبطو قطرة بقطرة وبصوت كيترعد قالت....
فاطمة: غلط غلطتو ودفعت ثمن ديالو وجعفر سمح ليا علاش نتا ابابا مزال كضربني فنفس لبلاصة وكتجرحني فكل فرصة..
عبدالله: حيت البنت لي ضيعت معاها عمري باش نربيها خانت تيقتي لي عاطي ليها....
فاطمة بحزن: ماما لي رباتني نتا طول حياتك ونتا مهتم غير بخدمتك وانا هي اخر حاجة فكرتي فيها...
عبدالله بعصبية: فاطمة الحياة لي عطيت ليك كيحلم بيها أي واحد ونتي عندك كلشي بين يديك..
فاطمة بكره: مطلبتكش تعطيني هادشي ....
عبدالله تنهد بجهد : رجعي لإمارات عرسك نتي وصلاح ايتقام هاد شهر...
فاطمة بغضب صرخات فالهاتف: مموفقااااااش....
عبدالله ببرود: بغيتي او كرهتي زواج اتزوجيه وصلاح ايكون راجلك...بغيتي تفهمي فهمي مبغيتيش غادي نفهمها ليك بزز ..
قطع عليها خلاها كترعد وتصرخ بأعلى مافصوتها ...قلبها لي مجروح بحب جعفر وزاد تجرح بأفعالها وغضب ابوها تجاها ومعاملتو الباردة وزواج لي باغي يزوجها بزز..
ترمات فوق ناموسية مدخلة راسها فوق المخدة كتكتم صراخها فالمخدة ودموعها تحررو على طول خدها...
في المساء والدنيا ضلامت وبأضواء الشارع خلات منضر مبهر ...اعلى طابق فالوطيل جالسة امام النافدة لي ممتدة من الارض حتى السقف..
كتشوف اجواء طنجة وجماليتها وفوسط طبلة لي جالسة فيها كتواجد شمعة شاعلة كتضوي وجها لي حامل حزن وجروح ورغم ذالك خلاها ساحرة وبعيدة المنال على كل الأعين لي كتاجه ليها...
على ادنها كيتعاود كلام ابوها لي باغي يزوجها بزز ولكن هي عمرها شافت صلاح كرجل او كزوج مستقبلي ومعندها تا مشاعر اتجاهو بل الشخص الوحيد لي بغات وتمنات هو جعفر لكن شاء الله ان لا يكون من نصيبها...
تكات على الكرسي وهزات كاس لما كدوزو على شفاها ببطئ وكتفكر فالحل لي يخليها تهرب من هاد زواج حيت عارفة باها مغاديش يرحمها ولاقال ايزوجها ففعلا ايزوجها ومغاديش يرحمها ..
فوسط افكارها سمعات اصوات من طاولة لي وراها لي جالسين فيهم جوح إنات اجانب كيتكلمو بالانجليزية والحوار لي كيدور بيناتهم...
نطقات لبنت لي كانت قريبة لفاطمة: وكفاش درتي باش رفضتيه وخليتيه يبعد عليك. ..
نطقات لبنت التانية: كان عندي واحد صديق فالخدمة طلبت منو يدير راسو انه خطيبي باش يبعد مني...
-وبهاد سهولة بعد منك وهو ليكان كيبغيك ودارالمستحيل على ودك..
- مبغيتش نعطيه امل زائف حيت عارفة راسي مغاديش نبغيه ورغم اني رفضتو اكثر من مرة بقا كيتبعني ومبغاش يتفارق مني.. تافقت انا وداك صديق انه يمثل انه خطيبي ورغم ذالك مبغاش يتيق وزاد كثر فتصرفاتو شي ليعصبني وخلاني نعس مع داك صديق وصافي من شافني نعست معاه عطاني تيقار...
فاطمة لي كل الحوار داز على ودنها جرات الكرسي لجهة الاخرى بعيدة من تنائي باش متزيدش تسمع امور شخصية ديالهم...
رجعات ساهية كتشوف بعيد وكل مرة تفكر فكلام لبنت تا كيبدا شيطان يوسوس ليها وترجع ترفض الفكرة بخوف...
في الرباط توقفات سيارة امام احد العيادات..خرج جعفر مبتاسم نصف ابتسامة لابس قامجة زرقة وسروال اسود مرجع شعرو لور ..دار لجهة الأخرى شد يدين عفراء لي كتشوف فيه بإستغراب واحساس غريب متملكها..
توقفات فنصف طريق وشداتو من القامجة كتشوف ليه فعنيه...
-شنو كاين اجعفر...
جعفر زير ليها على يديها: كنضن راكي عارفة....
عضات فمها متوترة وببطئ هبطات راسها لجهة كرشها..انكدب لو انها محساتش براسها ولكن مقدراتش تيق او تقبل ديك الفكرة ..
جرها وهي تابعاه بدون ما يتسناو فصالة الانتضار دخلو مباشرة لعند طبيبة لي كانت كتسنا فيهم..
تبسمات لجعفر وشافت اتجاه عفراء وقالت..
-مراتك...
جعفر حرك راسو وشاف فعفراء..
- طبيبة تورية زوجة ديال استاذ ديالي ...
عفراء قلبها ميكيضرب بجهد كتفات فقط انها تحرك راسها بدون ما تنطق..
جلسو فالمكتب و طبيبة كتسول وجعفر كيجاوب اما عفراء مرفوع عليها القلم كتدير لي كتقول ليها طبيبة لكن العقل باش تركز ممعاهاش...
جلسات فوق البياص عارية من لتحت وطبيبة كتهضر معاها باش تبعد توتر لكن الله لي عالم بيها وبإحساسها....
طبيبة لي جاتها ضحكة بتصرفها اول مرة كتشوف مرءة مخلوعة ومصدومة معندهاش لسان باش تهضر..عيطات على جعفر يدخل معاهم باش ينقص توتر ديالها ..
جر كرسي جلس حدا راسها كيداعبهاا فحنكها ...
جعفر: مالكي مخلوعة...
عفراء كتشوف فيها و لون مخطوف من وجها وقالت...
-حاملة...انا حاملة ياك....
تبسم وحرك راسو ببطئ : وي....
تنهدات بضعف وقلبها رجع كيضرب بجهد و ودنها كيعطيوها صفير تخلعات كثر من اللازم وهو كيحاول معاها باش متخلعش..
جعفر: ششش علاش مخلوعة..لحمل ماشي شي حاجة لي خاصك تخافي منها ..
عفراء : انموووت...
قبلها فراسها: الموت بيد الله اعفراء متقوليش هادشي...
عفراء دموع بدو كيتجمعو فعنيها وقالت..
- خايفة ....
جعفر كيهضر معاها بهدوء: الخوف حاجة عادية ونتي حاملة بروح وغادي تكوني مسؤولة عليه وحياة كتكون فكرشك فأكيد اتخافي ولكن ربي رزقنا وخاصنا نفرحو....
عفراء شافت ليه فعنيه: ونتا فرحان...
حط جبهتو على جبهتها وتنهد ببطئ....
-علاش كتسولي ونتي عارفة الجواب وعارفة فرحتي قداش....
بقات كتشوف فيه مطولا واخيرا تبسمات وقالت...
عفراء: لكانت بنت مغاديش نسميها لكبيرة على اسم امك....
هز راسو كيضحك وقرص خدها : سميها كيف بغيتي معنديش مشكل...
بقات طبيبة بعيدة كتشوف فيهم وتبتاسم...
بعد ما تهدنات جلسات حداها وجرات شاشة امامهم وبدات كتشوف فشاشة ..
جعفر لي كيشوف فالجهاز لي قدامو بدون فهم وطبيبة بإبتسامة كتشوف فتنائي لي قدامها مخلياهم يشوفو على خاطرهم..
جعفر تلف وقلبو كيضرب تخلط عليه كلشي : مكيبان والو..
طبيبة شارت لاجزاء من صورة : هادي هي صورة الجنين...
عفراء حطات يديها على كرشها ورجعات كتنفس بصعوبة و الخلعة فشلاتها وخلات دموع يتشكلو فعيونها..
-وو واش عندو إ إعاقة !!!
طبيبة بدون فهم : لا الجنين بكامل صحة ديالو.."رجعات كتشير لصورة "... مكاين تا شي مشكل وهما بصحة جيدة وفعمر 10 اسابيع...
عفراء : ولكن علا....
قاطعها جعفر كيشوف فطبيبة بصدمة : هما ؟؟؟
طبيبة تشوشات برد فعلهم: واش اول مرة غادي تفحصي الحمل ديالك...
عفراء حركات راسها بضعف تصدمات بالحمل و شكل ديال الجنين لي مكيبانش مزيان خايفة يكون عندها مشكل و كل سيناريوهات الخايبة تصوراتها زادت فخوفها ..
وركات على يدين جعفر لي مزال عقلو غير مع كلمة "هما" لي نطقات بيها طبيبة..
طبيبة تبسمات اكثر من لاحضات رد فعلهم : واش هذا اول حمل...
عفراء بسرعة حركات راسها: اه...
طبيبة : اوا مبروم عليك الالة راكي حاملة بتوام..
صدمة الكلمة نزلات عليهم بجوج خلاتهم ينطقو دقة وحدة ..
-تواااام..
عفراء بخوف: حاملة بجوووج..
طبيبة حركات راسها برفض وقالت..
- لا حاملة بربعة....
دخلو لدار بصمت واحد ما كيكلم الأخر كلشي هز عينو فيهم مستغربين لصمتهم وملامحهم..
لطوف : ياك لباس اش واقع...
جعفر كيحل فمو يهضر ويرجع يسدو صدمة مزال لاعبة ليه ولا كثر من عفراء وهي جلسات فالارض وجها صفر كتشوف فيهم ويشوفو فيها..
سي العربي: عفراء مالكي ابنتي....
خرح سليم واناس من لبيت لابسين ملابس عسكرية وهازين فاليز كيوجدو يرجعو لمراكش وتوقفو بصدمة من حالت عفراء وجعفر لي واقف ساهي...
سليم: شنو واقع...
كلثوم: معرفتش دخلو مصدومين هكذا...
اناس : عمتي مالكي...
عفراء شارت لنفسها: كتهضر معايا انا...
لطوف: نتوما مالكم ساكتين ااااش واقع...
جعفر لي رجع لعقلو هبط عند عفراء هزها من لارض وقال بصوت مرتجف...
-عفراء حاملة...
كلشي خرج عينو وتحل صمت لدقيقة كاملة حتى تسمعات شهقة وتبعوها عدت شهقات وكلهم وجهو عنيهم لكرش عفراء...
اناس: انولي خااال..
مينة بفرحة دفعاتو: شمن خال راك اتكون ولد الخال...
طارو عنقو عفراء لي كتمشي وتحي فبلاصتها وهما فرحانين كيزغرتو حتى توقفو كاملين بصوت عفراء لي رجعات كتبكي بحال طفل صغير ..
عنقات امها كتبكي من نيتها ..
عفراء: انتفرقع اماما ..ايفرقعو ليا كلشي...
لطوف بدون فهم : شكتخربقي نتي...
سي العربي: حشوما ابنتي تقولي هاد الهضرة راه ولدك هذا خاصك تفرحي بيه...
عفراء حركات راسها : ماشي ولد ابابا راااه ولاااااااد....
كلشي دور راسو لجعفر لي شداتو ضحكة و الفرحة و الخلعة تخلطو عليه ..حك راسو وبعد نضراتو من عفراء لي مخنزرة فيه وقال..
جعفر: عفراء حاملة بتوام..
عفراء صاطت بجهد: ربعات لولاد توام و توام....
شي بقا كيشوف فشي ورجعو سكتو من شافوها معصبة... وخا فرحانين وكيفرنسو كثر من جعفر لكن خافو تنوض دير شي حالة بقاو ساكتين كيهدنو فيها وهي كتشوف فجعفر شوفات ديال لقتيلة وكتقول..
-ربعة...ربعة اجعفر...وليت قنية...
جعفر شداتو ضحكة وزيرها بزز وقال..
-مكتاب ورزق من عند الله ...
دخلات لبيتها بدلات حوايحها وتوقفات امام المرأة كتشوف كرشها لي مافيها تا اثر من الحمل..حطات يديها ولمسات لمسات خفاف ش يلي خلاها تبتاسم ورجعو عيونها كيلمعو وببطئ ختفات الابتسامة ورجع بدلها خوف...
خوف يقدر يتملك اي واحد لي كتجيه الحمالة بالفرحة والخوف كذالك..خوف من لي جاي وخوف من المسؤولية... ومسؤولية طفل ماشي ساهلة وفيها تعب وجهد اكبر من ما يتصوره بشر فما ادراك بأربع اطفال كفاش اتهزهم وكفاش اتولدهم وكفاش اتربيهم..
سؤال مور سؤال خلا نفسها تهدم وتعب يغزيها..رجعات نعسات فوق ناموسية كتفكر حتى نعسات بحال شي طفل صغير...
ضرباتها لفيقة بعد ما ضو ديال شمس كيضرب فوجها... حسات بضهرها دافئ وأنفاس ساخنة حدا ادنها ويد مدورة على خسرها ومحطوطة على كرشها..
هزات يديها حطاتهم فوق يديه وبدون ما دور تعرف واش فايق قالت...
عفراء : خاصك تزيد تخدم بزاااف ...
زاد جرها عندو كثر مدخل وجهو فشعرها ونطق بصوت مبحوح وتقيل...
جعفر: وخا...
عفراء: خاصك دير ربعة ديال لبيوت كل واحد والبيت ديالو....
جعفر تبسم ونطق نفس الكلمة : وخا ....
عفراء: مخاصكش تفرق بيناتهم وخاصك تبغيهم كاملين دقة وحدة وتهزهم كاملين بين يديك...
جعفر سكت وحرك راسو فقط بالإيجاب..
دورات راسها لعندو كتشوف فيه وهو كيشوف فيها وهو بصوت حنين قال..
-گاع لحوايج لي تحرمت منهم مغاديش نحرم ولادي عليهم ..غادي نعطيهم كل لي قدرت عليه وانربيهم كيف تربيت ومغادي نفضل واحد على الاخر ايكونو كاملين متساويين ...
عفراء : وانا...
جعفر خطف قبلات على خدها وجبهتها وهمس ليها فودنها...
-ونتي أمهم واغلى حاجة عندي "...ورك على كرشها"...وغادي تكوني اغلا حاجة عندهم ......
دورات جسدها كامل عندو ودورات يديها على خسرو عنقاتو بجهد وتنهدات براحة وهو كيسرح ليها شعرها كيعاونها ترجع تنعس وعقلو كيفكر ويحسب اش عندو وشنو ناقصو...
"بعد تلات اشهر"...
واقفة امام لعيالات ديال دوار وملامحها حاملين غضب وقسوة..لابسة طبلية بيضاء ومغطية شعرها ببلاستيك ولابسة طبلية مكتوب فجنب ديالها "زيوت الأطلس"..
قدامها لوز حار كتشوف فيه وترجع تشوف فزهور بغضب...
عفراء: شهادشي ازهور..
زهور : هادشي لي كاين ابنتي عفراء...
رمات لوراق من يديها وكتنفس بجهد..
-واش كضحكو علياااااا...
اية كتحاول تصلح بيناتهم...
-بشوي عليك اعفراء راكي حاملة...
عفراء بعصبية: وااش كتبان ليك هاد الحالة مكتعصبش ..مليووون لي خاسرة على سلعة باش تجيني وفلخر جات كلها غاملة شمن زيت انخرج بهاد لوز وناس كيتسناو لكومند ديالهم...
فاتحة: مولاهم جابو حطو ودا فلوسو معرفناش انه غامل...
عفراااء بصرااخ: معندكمش لعنيين باااش تقلبو سلعة قبل ما تخلصو مولااااها واااش مخليا ورايا لحميييير نعيا نفهمهم ونقريهم وهما كيديرو نفس الغلط وكل مرة مشكل جديد وعيطو على عفراء تحلو ليكم ...
حدرو راسهم مزادوش معاها الهضرة وهي كتنفس بصعوبة حطات يديها فوق كرهشا لي بانت ودارت لبلاصة وكتشوف فيهم واحد بواحد. ...
عفراء: الهضرة ماشي دابا تانسالي هاد المصيبة لي درتو ليا...
خرجات كتضرب فرجليها واية تباعها ..
عفراء : عيطي على حمد يجمع سلعة يردها لمولاها ويرجع ليا فلوسي دااابا...
اية تنهدات بصعوبة: مغاديش يبغي يرجع لفلوس ايقول شديتوها ونتوما بدلتوها...
عفراء : وخا انا لي غادي نديها ليه...
تسنات لخدامة يرجعو سلعة لكاميو وركبات حدا حمد لي مولف يدي سلعة لصحاب المحلات...توجهو لقبيلة لي حداهم ولي من عندهم شراو لوز غامل. .
بعد ما وصلو هبطات كدور فراسها تا بان ليها مول لفيرة ومشات عندو قصداه ودخلات فالموضوع نيشن...
عفراء: سلعتك ها هي رجعات ليك ..بغيت فلوسي دابا...
مول الفيرة : سلعة خديتوها مكاين ردان بيناتنا الالة عفراء...
عفراء هزات صبعها فوجهو: يا غادي ترجع فلوسي ولا عطيني سلعة مزيانة ولا راك عارف شنو ايوقع...
مول الفيرة لي فهم الكلام: اشدانا الالة لهادشي راه مولفين البيع وشرا وكتاخدي مني ديما...
عفراء: اه كناخد منك لكن تغشني منعقلش عليك... سلعة لي راسل ليا ديال عام لي فات وغاملة مغاديش نعصرها ونبيعها لكليان ديالي ...
بغا يقاطعها وهي تخرج عنيها وقالت..
-فلوسي ولا بيناتنا المحكمة...
مول الفيرمة عارف راجلها محامي ومغاديش يربحها وغادي يخرج غير على راسو ..حاول معاها بلاتي هي احسن ...
غادي نبدل ليك سلعة بسلعة جديدة...
عفراء مدات يديها : فلوسي...
رجعات لتعاونية ديالها وفيديها شيك فيه لفلوس ديالها...
اية : امضرا ...
بينات ليها شيك وجلسات كتسوط بجهد ....
عفراء: هضرت مع كمال هو ايضبر ليا على لوز يكون مزيان.."هزات لوراق كتقراهم"...وصلات زريعة ديال ارگان...
اية: مزال عاد اتخرج من اگادير...
حيدات طبلية وهزات صاك ديالها...
-كيف يوصل لكانيو عيطي على بنات دوار ينقيو زيرعة مزيان وزيدي ليهم 100 درهم على الخلصة لي مولفين ياخدوها...
اية: اوكي.."هزات حجبانها"...فين غادة ...
عفراء: غادي نرجع لرباط نشوف المحل ومزال عندي طريق لكازا نشوف ديكور ديال لفيلا فين وصل...
اية تبسمات: نسيت مقلتش ليك مبروك الفيلا شفتها فتصاور كتحمق...
عفراء : الله يعطيك صحة اختي والعقوبة ليك نشالله ...
اية : امين...
خرجات من تعاونية ركبات فسيارة ديالها مزال جديدة فلون رمادي...شدات طريق لرباط وقفات امام المحل ديالها لي كيتباع فيه زيوت طبيعية لي كتصنع التعاونية ديالها....
دخلات كتضحك فحادة لي واقفة مع الكليان لابسة كسوة فالأبيض ومقادة شعرها كتبات صغر من سنها والجمال ديالها باين..جلسات كترتاح وكتسنى عمتها تسالي مع الكليان لي كيسولو على فوائد زيوت لي كيبيعو...
بعد ما غادرو الكليان مشات جلسات حدا عفراء دارت رجل فوق رجل وعفراء هزات حاجب وهبطات لخر...
عفراء: شهاد الأنوثة اعمتي زيانيتي مع راسك...
حادة دورات يديها على شعرها: مالكي كيف جيتك ماشي غير نتي لي تزياني..
عفراء: الالة معندي ما نسالك انا غادة وكنتنفخ ونتي غادة وكضعافي..."ركزات ليها فوجها"...حيدتي المسطاج...
حادة عوجات سيفتها: فين كان عندي شي مسطاج بعدا..
عفراء: لواه اعمتي راكي مني وكنعرفك مزيان كانت عندك زغبة طويلة قد ديال راجل كنت نضل ندابز معاك تحيديه ساعة بان لي مازن داير دور...
حادة تقلقلات: اصلا هو باغيني بموسطاجي
هزات راسها كضحك بكلام عمتها حتى غوتات بجهد وحطات يديها على كرشها متألمة....
عفراء: ضحكت تا دراتني كرش اعمتي اش بغيتي عندي....
حادة: غير بشوي عليك راكي تقلتي مبقيتيش خفيفة ردي لبال لراسك...
عفراء: اودي وحلت گاع ديك الخفة لي كانت فيا تحدات ليا مع هاد الحمالة....
حادة: شحال عندك دابا...
عفراء: تقريبا خمس اشهر...
حادة : سمعت كيقولو توام كيتولدو قبل الوقت...
عفراء ساطت بجهد: عارفة ، هادشي علاش من ست شهور خاص ديما نكون رادة لبال...
حادة حركات راسها: اوا اش جابك لهنا...
عفراء: لمحل ديالي او لا...
حادة: الالة مقلتش لعكس غير مولفة كتباني فلخر ديال شهر ماشي فوسطو...
عفراء: جيت نشوف شنو خاص باش نقول لأية توصل ليك...
حادة كتشوف فالمحل: صراحة مكنتش كنضن ناس كيشريو زيت بحال هكذا ...
عفراء كتقلب فصاكها: زيت اعمتي راه دوا وكيعرفو ليه ناس ديال اختصاص وضروري ما يتباع بالاخص ديال تجميل..
حادة : بعدا داك زيت الورد غير كيجي كيطيرو بيه خاصك ترسليه ليا حيت بقات غير نص الكمية..
عفراء: حيت مولفين كيبعوه مزور ماشي بحالنا كلشي أصلي وناس شافو خدمتنا وعارفينها ومجربينها...
حادة : اختي تبارك الله عليك كنت كنقول اتكوني استادة معمري فكرت دخلي تشري وتبيعي بحال هكذا..
عفراء: علاش عيب ، تجارة اعمتي كتربح لفلوس خاصك غير تعرف تعامل وتكون فايق وعايق وعندك جبهة دخل مع ناس تبيع و تشري ...
حادة بدات كضحك: مسكين جعفر من نهار بغيتي تخدمي فهادشي ناض عطاك المكتب ديالو ديري فيه هاد المحل وهو نتاقل لكازا ودار مكتب جديد ايعاود من لول ...
عفراء رجعو عيونها كيبريو: اصلا ناس لي كان خدام معاهم كلهم من كازا ودغيا جبد الكليان وزيد من هنا لقدام غادي نسكن تما ...
حادة: اوا وهاد المحل شنو غادي ديري فيه...
عفراء: المحل غادي يبقا ، عندي ليه شلا افكار وغادي نخدم عليه درجة بدرجة نوسعو ونبدا نحط لبرودوي فكل مدينة خاصني غير شي وجه اعلاني لي يجبد ليا الناس...
حادة هزات عنيها وهبطاتهم فيها: متلقايش حسن من راسك...
عفراء برفض : لا عمتي انا منصلاحش حاملة ونخاف نجرب زيوت الطبيعة لدات ديالي ...
حادة : حنا غادي نديرو غير اشهار ماشي ضروري تطبقي كلشي....
عفرء صغرات عنيها: راني قلت ليك بغيت نوسع المحل وندير بلاصتي هي والماركة ديالي وداكشي خاص يكون واقعي ومجرب مثلا تكون شي وحدة كتعناي من لحبوب نصورو ليها العلاج بزيوت طبيعية ونبينو الفرق من وجها يتحسن او وحدة شعرها خفيف وتجرب الماركة ديالنا ونشوفو النتيجة مع المدة ..نصنعو فيديو فيه كل تطور العلاج ونطلبو شي قناة فاليوتيوب تكون مشهورة وعندها متابعين بزاف تحطو فقناتها ...
حادة: نتي تعرفي لهادشي انا خليني غير نبيع ونشري هادشي لي نعرف ليه...
عفراء حلات المجر هزات لفلوس كتحسب شحال دخل هاد نهار ودورات راسها على المحل...
عفراء: بان لي قليل لي كياخد زيت الخزامة...
حادة: حيت حارة وناس كيخافو يديروها ومكيزعموش عليها...
عفراء: راني عطيتك الورقة شنو المميزات ديالها ولكن حداري تخلي شي وحدة بشرتها حساسة ولا فيها صدفية تشريها ...
حادة هزات لوراق كتقرا : راه كلشي مكتوب فالقرعة وهما يعرفو..
عفراء: وخا هكاك مافيها باس توضحي ليهم كثر ...
حادة تكات على لكرسي : كون غير لقيتي ليا شي دوا ديال زهايمر يعاون ديك شارفة ليعندي غادي تقتلني شي نهار...
عفراء كمشات حجبانها: مزال مخلاتك تزوجي...
حادة: مزال من نهار قلت ليها انتزوج وهي دايرة ليا مصيبة ضل تبكي مافهمت فيها والو ودابا مازن معصب مبقاش يرد على تليفون...
عفراء ساطت بجهد: حياتك اعمتي هادي وهاديك غير ام راجلك لول الله يرحمو ماشي مسؤولة عليها كون انا منك نرسلها لواحد من ولادها ونكمل حياتي عادي..
حادة بحزن: كتبقا فيا بزاف وزيد ولفتها تزوجت صغيرة وهي لي كانت فجنبي وزيد معاقلاش على ولادها كتعرفني غير انا وخايفة تعطيها لشي واحد من ولادها ميتهلاوش فيها ويضربوها عيالاتهم...
عفراء بلطف شافت فعمتها ...
- ولكن حياتك هي لولة ومازن مغاديش يتسنا حياتو كاملة متنسايش ان اي وحدة تمناه وهو باغيك نتي ونهار يغضب وميبقاش حداك غادي تندمي عليه..
حادة عمرو عنيها بدمواع : وشنو غادي ندير ...
عفراء: رسليها عند لطوف وتبقاي تزوريها مرة مرة اصلا ماما وبابا ايتهلاو فيها ...
حادة : زعمة يوافقو...
عفراء هزات كتافها : جربي مغادي تخسري والو...
دخلات لفلوس لصاكها وجمعات الوقفة كتلمس كرشها..
-تهلاي ليا فالمحل وفراسك ومتقلقيش ليا مازن اعمتي ...
حادة قلبات عنيها : سيري بحالك.
خرجات كضحك ركبات فسيارتها شدات طريق سيار نحو كازا....
فمكان هادئ كيسكنو فيه غير ناس الاغنياء واصحاب مناصب عليا فواحدة من افخم الفيلات المتواجدة فالمنطقة ... واقف امام الخدامة لي كيرممو اجزاء الفيلا لي خاصها اعادة تصميم حسب متطلبات مالك الفيلة....
دور راسو نحو سيارة لي داخلة وتوقفات فباركينغ ديال سيارات لي متواجد فجنب لفيلا..هز حجبانو وتوجه عندها كيضحك خدا منها صاك وشد ليها فيديها كيداعبها..
جعفر: عيتي...
عفراء : شوي وصافي .."دورات راسها لخدامة لي كيقادو لابسين فجردة "...شجر لي قلت ليهم زرعوه فين هو ..
جعفر كيشوف فين شارت..
-مزال ايوصل تال غدا .."جرها لداخل "... كيف جاك هادشي...
دورات راسها على طابق سفلي لي مصمم بطريقة لي بغات..عجبها الگبص البلدي و جليج المغربي لي معروف غير فبلادنا ..
ختارت تصميم قديم محافظ على لمسة المغربية بشكل كبير .. بقات كدور فرحانة وكتشير لصالونات كبار ومفتوحين على بعض..
هنا غادي ندير صالون مغريبي بالعود المنقوش ولفوق اندير ترية كبيرة تشد وسط صالون كامل وطوابل تاهما يكونو منقوشين...
تابعها من لور هاز صاكها وكيسمع لإقتراحاتها ويحفضهم ...دخلات لكوزينة لي مفتحوة على جردة ..
جعفر: تا هنا باغية ديري لعود...
عفراء : وي ضروري غير هو لفوق يكون لعود ولوسط يكون زجاج فين يتحطو لكيسان وطباسل ديال طوس ...
جعفر كمش حجبانو: كيبان ليا هاد شكل مبقاش وقدام بزاف ...
عفراء هزات كتافها : داكشي قديم هو لي كيبقا زوين وليه تمن وكيجبد لعين.. عندو الهيبة ماشي بحال هادشي ديال دابا غير تخربيق ...
خرجات لجردة...
-وهنا اندير فران كبير وقدامو انبني كوخ بالخشب وتحت منو ايجونو صداد فالقهوي غادي نبقاو نشويوي هنا ونتجمعو غادي يكون منضر واعر...
تنهد وبقا متبع رأيهها ماعرف ما يقول من شافها فرحانة وتكلفات بتصيميم ديال لفيلا من ساسها لراسها خلاها تكون على ضوقها ...
جعفر : وطابق لفوقاني شنو اديري فيه...
عفراء: من غير المكتب ديالك غادي نخلي كلشي كيف مل هو غير لفراش ايكون عصري اصلا طلبت كلشي من ايكيا بقا غير نخلص ويجيبو ليا كلشي....
بدا كيضحك ودور يدو على عنقها جرها عندو هاز حاجب ومهبط لخر..
جعفر: ايكيا ابنتي باغة تخرجي عليا....
ضرباتو لكرشو : متخافش غادي نعاونك...
جعفر : اييه لالة عفراء دارت مشروعها وغادي تولي تصرف معايا ...
عفراء : علاش مباغيش...
جعفر زير عليها : شكيت عليك...
دخلات فصدرو دورات يديها على خسرو وقربات وجها لوجهو...
عفراء: مافيها تا عيب نشارك انا وياك لمصروف اصلا فلوسك كاملة حطيتيها فهاد الفيلا ومبغيتكش تزير وانا معاك وقادرة نعاون ...
جعفر برفض: شكون قال ليك انا اصلا مزير...
عضاتو فعنقو كضحك: ناري شحال مكترضاش و مكتقاضاش...
جعفر دور يدو على شعرها وبنضرات غير مفهونة قال..
-من عارفة هادشي تبقاي تسدي فمك...
حطات اصبعها على فمها : وخا اسيدي ها انا سداه..
رجعو لرباط دخلو لمرجان يتقداو شنو خاصهم لدار..هي قدامو وهو تابعها بصمت وعينو عليها متفرقاتش كيشوفها تغيرات فهاد الحمالة وبعد ماكان كيتصور انه ايلقا مشكل معاها في فترة الحمل لقا العكس تماما كان وحمها ساهل ومن غير ديك الكارتة لي دارت على دغميرة مبقاتش كتشهى ولا كترفض ..
داز وحمها عادي كأنها محملاش من غير ردان ديال صباح ودوخة لي كيبين حملها ...
جاها لوحم على طياب وبدات كتعلم وتشقى وتول دارها كيف بغات ..
تنهد ماعرف واش يفرح بهادشي ولا يبقا فيه الحال من كيشوف انها كتعي راسها بتمارة ديال دار والخدمة وطريق لي كضرب وزيد الحمل..
.
قرب عندها شدها من يديها وخدا ليها لورقة لي مقيدة فيها داكشي لي خاصها ..
جعفر: سيري رتاحي فشي مطعم انا غادي ناخد لي خاص..
عفراء برفض : غير خليني اصلا معيتش وشحال من حاجة ممقيداهاش...
رجعات كتختار لي بغات وهو تبعها بصمت بعد ما سلاو وخلصو توجهو لباركينغ فين مخلين سيارة ..خلات جعفر كيدخل تدقية وبقات هي متكية على لباب كتدور فراسها تا بانت ليها بنت دايزة قدامها...بسرعة وقفاتها ..
عفراء: سمحي ليا اختي نسولك..
دارت عندها لبنت بإستغراب : وي ختي اش حب لخاطر...
عفراء بحرج: نسولك ومديهاش مني قلة صواب.."شارت بصبعها لوجها"...هاد لحبوب منين جاك...
حطات لبنت يديها على وجها تحرجات بسؤال عفراء ولكن من شافت تا عفراء محرجة انها طرح عليها سؤال جوباتها بكل بساطة...
لبنت: ختي معرفتش عمري 24 عام ومزال مبغا يمشي مني...
عفراء بدات كتفرنس: نتي خدامة ولا كتقراي..
لبنت: لا قراية لا خدمة هاد ساعة علاش كتسولي اختي...
عفراء : عندي ليك خدمة ولخلصة ديالها مزيان اش بان ليك...
لبنت بعدات بشوي كطلع وتهبط فعفرااء ...
-بنتي ليا اختي مشيتي غالطة فيا راني ماشي ديال داك نوع...
عفراء حركات راسها بسرعة: نننن ماشي داكشي لي فبالك.."جبدات كارط ديال العمل ديالها"..انا خدامة فواحد الماركة مختصة بتجميل وبغيت لي تجرب المنتجات ديالي ونصور ليها فيديو كإشهار اش بان ليك...
لبنت بقات ساكتة ودورات راسها ببطئ : اختي هادشي مكنفهمش فيه و....
عفراء قطعاتها: شنو اسمك بعدا...
-اسمي خديجة...
-خديحة كوني هانية ومغاديش نستغلك ايكون بيناتنا عقد من محامي فيه ثمن لي اتاخدي بعد هاد الاشهار ولا نجح وزادت المبيعات ديالنا نقدرو تخليوك نتي هي الوجه الاعلاني ديال الماركة ديالي وهكدا كل واحد ايخرج رابح من هاد صفقة ومعنديش مشكل نهضر مع والديك ونعطيهم كل الوتائق ديال الشركة لي باديين فيها ومعندك مناش تخافي...
خديجة عضات فمها بشوي: تقدري تعطيني شوي لوقت نفكر ونرد عليك...
عفراء : اكيد ها هي نمرة ديالي و وقت ما فكرتي ردي عليا غير هو عفاك متعطليش عليا اكثر من تلات ايام وكوني هانية حيت مغاديش نجرب فيك كل لي كاين نتي ماشي ادات لتجربة وقبل ما نديرو اي برودوي ليك غادي ندوزوك من طبيب اولا نشوفو هاد الحبوب منين جاك و شنو الاسباب ديالو ونحاولو نعالجوه طبيعيا ..
خديجة : وخا اختي غدا نرد ليك .."عضات فمها "..ممكن نعرف شحال اتخلصوني...
عفراء تنهدات بجهد: منكدبش عليك اختي انا عاد بادية لي نقدر نعطيك هو 2000 درهم شهريا ولكان الاشهار لي اديريه يتلقا رواج وزادت المبيعات ديالنا فغادي نعطيك 2% من الارباح على كل برودوي ..
خديجة : نفكر ونرد عليك...
تفرقات مع البنت ورجعات ركبات فسيارة حدا جعفر لي كيشوف فيها...
جعفر: غادي تخدميها عندك ونتي مكتعرفي عليها والو...
عفراء غمضات عنيها بتعب وقالت..
-كنعرفها ..كانت مها كتبيع لحرشة قدام ليسي ديالنا وهاد لبنت كانت كدور علينا باش نشريو الحرشة من الأم ديالها...
جعفر حرك راسو فقط وديمارة سيارة توجهو لدارهم ..
خرج من دوش لابس سروال كيطمة ومن لفوق عريان هاز فوطة كيمسح بيها شعرو ..وقف قدام لكوزينة كيشوفها كتقاد تقدية فتلاجة .. لابسة بيجامة واسعة و خفيفة ديال صيف جامعة شعرها لفوق وبعض خصيلات نازلين على وجها كتبان صغيرة وزوينة بزاف ..
تقدم عندها عنقها من لور وحط فمو على كتفها ودور يدو على كرشها لي باينة... كيستنشق ريحتها براحة...
جعفر: باركة عليك عطي راحة لنفسك شوي ..
عفراء تبسمات: بقا ليا غير هادشي نقادو وهاني ساليت...
جعفر : نعاونك...
عفراء: وخا غسل ليا الفواكه وديرهم فديك شبكة وصاوب ليا عصير ديال ليمون و لبنان و الكيوي ومديرش فيه سكر ...
جعفر : وخا ...
مشا كيدير داكشي لي طلبات منو وخدام من نيتو وهي من وراه مركزة فضهرو وعضلاتو لي باينة وعاطية لعين وفعتقو مزال سنسلة ديالها لي خلات ليه فطفولتهم ومعلق فيها حرف "A"..
تبسمات بحنية لماضي فالوقت لي كانو فيه صغار ودابا ها هما كبار ناضجين ومزوجين وقريب يكونو اسرة صغيرة بيناتهم ...
كملات شغل لي فيديها ومشات جلسات ترتاح شوي وهو بقا خدام صاوب ليها العصير حطو قدامها مع حلوة كوك لي كتبغي ورجع نقى لبوطاجي وغسل لماعن وشطب لكوزينة ودار لحوايج ديال لوسخ فالمكينة يتصبنو ..
مسح يدو بعد ما سالة كلشي خرج عندها لقاها نعسات فوق صداري حالة فمها نصف حلة وصوت شخيرها واضح ...
هزها داها لبيت نعاس حطها فوق ناموسية حيد ليها تقاشر من رجليها وخفف ليها شدة لي دايرة لشعرها ..غطاها وحط حداها ريحة ديال لكوم لي كتعجبها وطفا ضو خلاها ترتاح ...
جمع طبلة وغسل لكاس و طبسيل وجمع لبيت ديال لجلاس كيخدم بشوي مكيديرش صداع ...
بعد ما سلات المكينة من تصبين لبس تريكوه وكلاكيطة فرجلو وخرج لباركو نشر الحوايج كلشي كيديرو عادي ممسوقش يشوفو شي حد او يتكلمو عليه ...
سد باب لباركو و وجد ليه كاس ديال القهوة و فنفس الوقت وجد اتاي بلويزة دارو فطيرموس خلاه لعفراء من تفيق وهو هز القهوة ديالو وهز المحفظة لي فيها الملفات جلس فبيت ديال لجلاش كيقرا الملفات بهدوء ...
فاقت من نعاس عرقانة و متقلة.. دخلات لدوش غسلات وجها وجمعات شعرها وهبطات راسها لكرشها المنفوخة..
بقات ساهية كتفكر مع راسها ممتيقاش انها حاملة بأربعة اولاد و اتولي امهم.. من نهار عرفات راسها حاملة وهي تغيرات وتبدلات بشكل ملحوظ ولات ملتزمة و مسؤولة...
فهمات معنى تكون ام و زوجة كذالك و اكبر من هدا انها دير طريق لنفسها و تخدم على داتها وطورها لشيئ إيجابي...
خرجات من دوش هزات تليفونها وخرجات كتقلب على جعفر ملقاتوش عرفاتو ايكون مشا لجامع يصلي لمغرب...
دخلات لكوزينة هزات كاس اتاي ديال لويزة لي كان مصاوب ليها جلسات فطبلة وخدمات لبيسي ختارت قناة انجليزية صاحبها صيني خبير فالأعشاب وكيعطي كل عشبة مميزاتها و اضرارها ولياش كتفيد و الأشخاص لي كيعانيو من المرض او حساسية و مخاصهمش يتعطاو لهاد لعشبة وكل اضرارها...
حداها حاطة مذكرة كتكتب فيها كل الأشياء الأساسية وكتحفضهم من قراءة واحدة...
ربي عطاها قوة حفظ كبيرة و عرفات تستغلها لمصلحتها.. بعد مانهات لفيديو تاصلات بأية مباشرة...
اية : اهلا زين صافا وصلتي لدار..
عفراء: وي وصلت فين نتي دابا مزال فتعاونية...
اية صوتها باين مخنوق : نو انا دابا فالفيرمة...
عفراء كمشات حجبانها : واش كتبكي؟؟؟
اية مزيرة : لا غير ضربني البرد و صافي...
عفراء صاطت بجهد : واش لحاجة عوتاني هضرات ليك على لولاد...
اية كتمسح دموعها : ماعرفت ماندير اختي ديما جابدة ليا حس لولاد كرهت كلشي....
عفراء بعصبيه : واش هادي حمقة ولا مالها تلات اشهر باش عاد تزوجتي وبغات دغيا لولاد...
اية بحرقة : المشكل ماشي فهادشي نتي راكي عارفة اش واقع وحالتي شنو فيا ومن كذكر ليا لولاد كنحس بروحي كتقطع....
عفراء تنهدات بحزن : راكي مزال صغيرة وعطا الله ليتامة لي يتمناو وحدة بحالك تكفل بيهم ويديروها قماتبة الأم.. حاولي متسوقيش ليها ولا عرفتي اجي سكني هنا ياك عندك ابرطمو كاتبها ليك كمال اجي سكني هنا وقابلي المحل وتما غادي نقري ديك لهيشة ديال فاتحة تقابل لخدامة بعدا هي عندها جبهة مكتحشمش و مكتخافش ماشي بحالك الخوافة...
اية بدات كضحك وسط دموعها : اختي نتي كتخرجي لعنين فبنادم انا غير كنوقف قدامهم كنحشم...
عفراء : اودي خليت ليك الحشمة اما انا لموقفتش على الحاجة بيدي ياكلوني و أنا حية...
اية : الله يسهل ، مهم انهضر مع كمال ونشوف واش يوافق او لا....
عفراء حطات يديها على جبهتها : نسيتيني فشنو بغيت نقول ليك مهم ضبري ليا على شي فلاح تم كيبيع لقمح يكون زوين وبثمن رخيص انخرجو منو تا هو زيت....
اية صاطت بجهد : واش باغية تخرجي كلشي منو زيت بقا ليك غير قور الهندية معصرتيهش...
عفراء هزات حجبانها : شكون قال ليك اختي مغاديش نعصرو تا هو جاي وقتو انديرو نشالله كريم لشعر..
اية هزات يديها : تسليييم اختي...
قطعات الاتصال بصوت ساروت لي كيحل لباب... دخل جعفر هاز فيدو لقفطان لي رسلاتو لمصبانة حطو وجلس حداها...
جعفر : فقتي...
عفراء : اممم...
" هزات لقفطان ديال لجوهرة بالأخضر وفيه خيوط دهبية وهابط كامل عقادي" ...
_كنت غادية نعيط على مينة تجيبو ليا مزيان من تفكرتيه...
جعفر كيلعب ليها فشعرها : اتصاوبي هنا ولا نديك لصالون....
عفراء : وصلني غير لدارنا مازن ايرسل لي ايقادو لينا..."صاطت بجهد"... صراحة مافيا لي يمشي غير حيت جات تال عندي غادي نمشي بزز...
جعفر : متمشيش رسلي ليها غير كادو...
عفراء : حشمت وهي كبرات بيا جات حشومة منمشيش عندها... "عضات فمها من لتحت"... كنت بغيت نجيب أية تغير لجو شوي فهاد العراسية وخفت تفكر فداكشي لي داز عليها وخا مسكينة هاد لعروسة ماعندها تا دنب...
جعفر بدون فهم : كفاش؟؟؟؟...
عفراء : هادي لي عندها عرس ليوم هي ديك لعروسة مسكينة لي تزوجات بداك شماتة لي غتاصب أية...
جعفر غمض عينو وبدا كيدلك جبهتو وساط بجهد.. شافت فيه بحزن عارفاه مكيبغيش يتفكر فهاد القضية لي كانت اول قضية بداها وكانت مأسات وخلات ضرر نفسي و اثر كبير فحياتو...
حاول يرجع لجو لي كان قبل باش ميأترش عليها وهي حاملة...
تبسم وحط يدو على كرشها : كبرات...
عفراء شافت فكرشها : كتبان عندي تمان اشهر ماشي خمسة...
تبسم بفرحة باينة فنضراتو : ولادي....
.
امام بيت سي العربي مبنية قاعة ديال العرس فحي شعبي وناسها شعبيين... كل جيران و الأحباب والصحاب لابسين ومقاديين ليوم عرس بنت جيرانهم لي ضحكات ليها دنيا مرة اخرى...
قدام دار سي لعربس واقفين جوذ شباب لابسين سروال توب اشود وقامجة بيضاء ملتفة على جسمهم لي فطور البلوغ ووسامتهم واضحة وباينة وكيف ميكونوش زينين وهما ولاد الأطلس لي معروفين بزينهم وضخامة اجسامهم لي كتبان كبر من سنهم...
مدخلين يديهم فجيب سرواى وكيشوفو لينات لابسين لقفطان وطالقين شعورات وكل مرة دوز وحدة قدامهم...
اناس حط يدو على قلبو متبع لبنات بعينو : زييين اخويا زييين و أنا كنموووت على زيين...
سليم ناسي راسو وتبع اناس لي خارج ليه فعودو..
-شوف ديك زعرة شحال هازة اصاحبي...
اناس ركز فيها : بشاااخ ماشي هادي بنت ديك نعيمة جارتنا... "طلع وهبط"... وهاد بنات 2006 طالعين مجهدين الخوادري...
سليم سها : اححح اربي وشهاد لحلاوة فحومتنا وانا كنقول مال لواليد رسلنا لداخلية قول نايض لورد هنا وحنا مجيبين خبار...
اناس دار عندو هاز حجبانو : أشريف بنتي ليا نسيتي راسك.. فيين داك الكلام لي قلتي لعمي خالد ولجدي صافي دغيا بينتي جلدك ونسيتي زليخة...
سليم خنزر فيه :اخويا زين حبو مولانا واش تا شوفان اتحرموه عليا...
اناس : ولايني راك ميكروب...
سليم تعصب: واش شفتيني محيد ليها حوايحها ومقنتها ولا مال طسيلتك معايا تانتا...
تنطق صوت من وراهم : لكنتي قادر عليه غير سير...
سليم رجع وجهو صفر وحاول يتلف الهضرة : شفتي اجدي شنو كيدير هاد المسخوط كيديني للهلاك وفلخر ينكر ويخرج راسو بحال شعرة من لعجينة..
سي العربي بدا كيطلع و يهبط فيه وبصوت واضح قال...
-شي ناس بحال البلوطة كتهرس عليها سنانك فاالخر كيصدقو حارين هادشي الا ما لقيتيش فيه دودة....
اناس هز راسو كيضحك بحال الحمق : دوووود اجدي والله تا فيه دووودة ....
جلسات العائلة كاملة فطبلة كيتفرجو فأجواء العرس و العروسة لي مزينها القفطان و جمالها اكثر ...
لطوف معمرة يديها بسرطلة ديال دهب و محزمة بمضمة فرحانة براسها ..شافت فبنتها وقالت...
-فين هو نسيبي...
عفراء جالسة بهدوء وراسمة إبتسامة صغيرة على ملامحها ..دايرة مكياج خفيف ولابسة قفطان جوهرة فالاخضر ومخليا شعرها مطلوق مرجعاه لور..سمعات سؤال مها ودارت عندها...
-مبغاش يجي حيت العرس مخلط...
بشرى : تانتي نهار واحد مافيه باس مالو شاد راسو بحال هكذا...
مينة : قولي حنا لي مالنا اما هو لي عارف مكرهتش غير شي راجل بحالو والله..
خنزرات فيها عفراء ومينة قلبات عنيها ...
-راه قلت بحالو مالكي تا نتي على نغزة والله ما بحالو ولا بحال هاد تريكة لي قدامنا مكيحشموووش يخخخ...
اناس و سليم لي جالسين قدامها شافو فيها بغضب..
سليم : مالنا اختي كيف جيناك...
اناس : يكما بنا ليك ماشي رجال...
مينة تعصبات: يخخخ على خوت عطاهم ليا ربي ..
اناس تايق فراسو : بگوص.. زين ..كيحمق.. واعر .. احسن ما كاين عندك اش باغية كثر ...
سليم نغز اناس: لا هي بغات بحال جعفر اصاحبي....
اناس عض لسانو من لداخل..
-على هاد لحساب خاصك تصلي قيام ليل وتصومي تنين و لخميس وشوف تشوف واش يجيك...
سليم : اش ايجيها اصاحبي وحدة قد الغوريلا و مسطاجة شكون ايشوف فيها ...
اناس غمزو : عندك صح فهادي گاع زين العائلة ديناه حنا هي جات خيبوعة لي شوفها ميقولش من تريكتنا ...
تجمعو عليها كل واحد يعيطها من جيه مرضاتش وجابو ليها لبكية...
مينة: شفتي أجدة شكايقولو هاد جوج...
لطوف عنقاتها: وصافي ابنتي نمش لدار ونتفاهم معاهم...
مينة بقا فيها لحال : مغاديش نبقا نهضر معاهم ..
سليم نغز اناس: ناري شدني اصاحبي انموت لمبقاتش كتهضر معايا...
اناس صغر عينو : بلاتي الأكسجين وقف .."شاف فمينة بترجي ".. ..لا عفاك هضري معايا ولا غادي يتحبس عليا لهوا...
عمرو عنيها بدموع ومقدراتش تصبر عليهم ، جمعات لوقفة مفقوصة..
مينة: الله يعطيني شي تزويجة نتفك من وجوهكم يا ربي...
اناس و سليم ردو عليها دقة وحدة ...
-من فمك لربي...
خنزرات فيهم ومشات جلسات فطبلة لي جالس فيها جدها وباها وعمها عطاتهم تيقار خلاتهم كيفرنسو وقربو حدا عفراء واحد فليسر ولأخر فليمن وسكتو كيتفرجو فالعرس..
بغاو ينوضو يشطحو لكن من شافو عفراء متقلة ومعندها خاطر لشطيح بقاو جالسين حداها كيشوفو فلعروسة لي فرحانة بنهارها..
عفراء لي ساهية كمشات حجبانها من شافت لعريس جر الأم ديالو كيبوس ليها راسها ورجليها ويعنقها ومخلي العروسة مزال فبرزتها..
كلشي كيصفق ليه و فرحان من غيرها هي لي بقات مخنزرة وبشرى حداها كتنغز فولدها سليم...
-شفتي لولاد المرضيين شنو كيديرو على والديهم نهار عرسو جر مو وكبر بيها..
كلثوم خنزرات فأناس : هادو نهار عرسهم اينساو شي حاجة سميتها والديهم ايبقاو يتسناو غير وقتاش ياكلو الحلوى...
خرجو عنيهم فيها..
اناس: الوليدة تا نتي عارفة الحلوة...
كلثوم خرجات عنيها : اوااا كوون تحشم...
لطوف وسط منهم كضحك وتشوف فالعريس : صدق ولد ناس ومرضي تبارك الله عليه...
عفراء بإستهزاء : شمن مرضي اميمتي هذا كيتسمى قلة احترام و انعدام الرجولة و الاخلاق بحال هاد نوع ڭاع مايفرح ليه الواحد...
بشرى : وعلاش اختي مالو اش دار من غير كبر بالأم ديالو...
عفراء بعنيها شارت لعروسة : وديك لعروسة لي خلاها تما بوحدها وهو جر عائلتو كاملة دارت بيه كيمتل علينا رضات الوالدين ...
كلثوم : تانتي اعفراء شحال فيك ..حاجة عادية مافيها عيب...
عفراء برفض : بالعكس اختي كلو عيب.. هاد نهار ديال العروسة وهي لي خاص يكبرو بيها من عائلتو وعائلتها وهو براسو يجلس حدا عروستو ويتبت ...عرفناه باغي يبين ان الأم هي الاولى وبغا يوصل رسالة لعروسة لكن هاد رسالة وقتها ماشي هنا..وقتها نهار تمشي العروسة عندك لدارك وتشوف كفاش كتعامل مع مك وتكبر بيها وتحتارمها وتبر بيها ديك ساعة هي عينيها ميزانها اما دابا فعرسها وهي بارزة وفرحانة وخاسرة فلوس عليها ونتا معاطيهاش محل ولا اعتبار وتجر فعائلتك قدامها هادا ماهو من فعايل رجال وبلاصت بنادم يمشي يفهمو ويفقهو زايدين ليه نغزة و يطلقو عليه سيد رجال ..بنادم خاصو يعرف ان اليوم ديال لعرسة هذا نهارها ومخاص تا حد ينافسها فيه لا امها ولا امو ولكن بنادم مكلخ وعزيز عليه يمثل وينقص من مراتو فعرسها وفرحها باش يبان مرضي...
كلثوم : ماشي كلشي هكذا اعفراء ماعرفتي يكون مرضي وعزيزة عليه الام ديالو...
عفراء : انا مقلتش لعكس ومكاينش شي مخلوق معزيزاش عليه الام ديالو ولكن لكل دي حق حقه وكل حاجة و وقتها..راجل لي كيحتارم الام ديالو مغاديش يخلي مراتو بارزة بوحدها على الأقل من بغا يدير هادشي كامل يجرها معاه و يوالم القلوب بين عروستو ومو ماشي تجاهل تام كيف داير ليها ..."شارت لعرسة"...شوفو وجها كيف ولاا مسكينة وخا كضحك باين عليها انها تقلقات...
جمعات الوقفة مشات جلسات فمكان العريس وتقابلات مع العروسة لي تبسمات من شافتها..
من كانو كيقراو فليسي مكانوش كيتحاملو ولكن شاءت الاقدار ان راجلها الاول دخل الحبس وكان جعفر هو لي دخلو ونجاها من كارتة ..
بعد هاد الحادثة عزازت عليها عفراء وتبدلات نضرتها ليها.....
عفراء مدات ليها بواط بالأسود...
-مبروك عليك اختي والله يكمل عليك بالخير..
العرسة خدات بواط فرحانة: مالكي عدبتي راسك اختي.
"حلاتها شافت سنسلة دهبية ديال العنق بفرح عنقات عفراء"...
-نردها ليك اختي فساعة الخير...
عفراء تبسمات: مابيناتناش.."وقفات حاطة يديها على كرشها"..مهم اختي الله يكمل عليك بالخير وتكون ايامك كلها فرح و سعادة ..
لعروسة : غادي تمشي مزال گاع ما تحط لعشا..
عفراء بتعب : مكنقدرش على سهير وراكي عارفة مع الحمل كنعيا دغيا..
لعروسة : وخا هكاك اختي حشومة تمشي بيديك خاويين ونتي جيتي وفرحتي بيا ..
عيطات على الام ديالها جات عندها وقالت..
- ماما صاوبي لعشا لعفراء ديه معاها...
بغات عفراء ترفض وهي تجرها العرسة وخلات مها تمشي توجد ما طلبات...
لعروسة كتشوف فكرشها فرحانة: شحال بقا ليك لولادة..
عفراء : ربع شهور نشالله ولكن طبيبة قالت ليا انولد قبل..
لعروسة: كيقولو توام كيتولدو قبل الوقت مهم ديها فراسك ومتخرجيش بوحدك ..
عفراء هزات حجبانها : منين هاد الحب كامل طاح ليك عليا .. عقلتي شحال كنا كندابزو فليسي ...
لعرسة ضحكات من نيتها : كنا صغار وبلا عقل كون كنت نعرفك بنت ناس هكذا وبعقلك مكنتش گاع ندابز معاك من لول ولكن قلة العقل كديرها...
عفراء : تادابا مرحبا بيك فاي وقت بغيتيني اجي عندي لمحل ...
لعروسة : نشالله..
فهاد اللحضة جا لعريس ..عفراء بعدات منو ودعات لعرسو وخدات صاك لي جابت ليها ام لعروسة...شافت فمساج لي جاها فتليفون عرفات جعفر كيتسناها برا..
تودعات مع عائلتها وخرجات واناس خدا ليها الماكلة وخرج معاها بانت ليهم سيارة ديال جعفر موقفة حدا دارهم..
خرج من شافها تكا على لبابا وعينو عليها مبتسام ..غير كيشوف كرشها منفوخة كيتبسم بدون شعور..
اناس قرب حدا ودنها : لعميمة بغيت نطلبك واحد طليبة...
عفراء توقفات كتشوف فيه : مالك..
اناس : بغيت طونوبيل ديالك محتاجها ضروري...
عفراء هزات حجبانها : علاش؟؟؟
اناس حك شعرو : بغيتها وصافي...
عفراء خنزرات: باش تهز فيها لبنات...
اناس : راكي عارفة داكشي ماشي ديالي..
عفراء بسخرية: كضحك عليا !!!...
اناس : وصافي ديري معانا الخاطر العميمة ...
تنهدات وخرجات ساروت من صاكها مداتو ليه مخنزرة..
عفراء: توقع ليها شي حاجة بلا ما ترجع تبان قدامي..
خدا ساروت كيفرنس : نموت عليك العمر...
وقفو حدا جعفر لي حل لباب لعفراء ركبات وخدا صاك من اناس لي كيفرنس بقا جعفر كيشوف فيه بدون ما يتكلم غير من عينو عطا تحدير لأناس لي جمع ضحكة ...
غابت سيارة من بين عينو ومباشرة طلع لدارهم لبس جاكيط وهز بزطامو وخرج ركب فسيارة ديال عفراء شد طريق مباشرة لطنجة...
مع صباح توجهات المحل متألقة كيف عادتها لابسة جلابة مخزنية بلون ترابي مع زيف على عنقها من لتحت كيبانو سيقانها بويض لابسة صندلة مشبكة بالابيض ...
كتشع بكل تقة وجمال وباين من ملامحها اصرار وعزيمة..وقفات فباب المحل مبتاسمة فشخص لي حل يدو وتوجه عندها عنقها...
اية : سبرااايز كيف جاتك المفاجئة...
عفراء جاتها ضحكة : كيف درتي ليها المسخوطة عاد لبارح هضرت معاك ودغيا هضرتي مع كمال و وافق ...
اية دورات يديها على يدين عفراء ودخلو لمحل مع بعض وقالت..
-غير هضرت معاه دغيا وافق وجابني نسكن هنا...
عفراء بدهشة : دغيا وافق...
اية تبسمات و وجها رجع حمر وعفراء دغيا طيراتها هزات راسها كضحك..
عفراء: اممم هي تهليتي فيه...
اية بخجل : مكتحشميش اختي...
عفراء بقات شادة فيها وبقاو مجموعين كيهضرو فأمور المحل وشنو خاص يزيدو وحادة بيناتهم مكتفهمش الهضرة فين غادة كتعرف غير تبيع و توصي لكليان على سلعة لي ياخدو اما داكشي المهم مكتفهمش فيه وكتكلف بيه اية و عفراء..
بعد مدة جات البنت لي هضرات معاها عفراء وافقات انها تكون وجه اعلاني وتبان فالفيديو و فالمنتجات لي اتستعمل ....
سناو عقد لي كانت موجداه عفراء وفيه كل شروط لي خاص تحتارم ولي أيتجاوزها خاصو يدفع مبلغ مالي لي كيوصل لملايين كثيرة..
عفراء من لول دخلاات مجهدة ودارت عمل ديال شركات لكبار تايقة فنفسها وعارفة انها تقدر تنجح بأفكارها وقدرتها وهادشي لي خلاها تزعم وتبدا خطوة بخطوة..
بعد ما عرفات لبنات بخديجة لي اتكون الوجه ديال شركتهم المستقبلية رحبو بيها كواحدة منهم و بسرعة توجهو لطبيبة جلد لي سناو معاها كذالك عقد وغادي تكون جزء من الفريق الطبي ديال شركتهم فالمقابل عطاتها عفراء 5% من ارباح الشركة...
دارو فحوصات لخديجة و الأسباب لي كتعاني منها البشرة ديالها ويحاولو يعالجوه بمواد طبيعية من تغدية و مساج ورياضة وريجيم و اقنعة طبيعية..
من نهار لول بدات لخدمة بدون راحة بل نسات اكلها من غير لما لي كتشربو وترجع تخدم و تسمع كلام طبيبة وتفهمو وتحلل شنو المواد الطبيعية لي خاصها تستسعمل باش تبان نتيجية فخاديجة وتكون ماركة ديالهم تيقة لعملاءها..
كانت فكرة عفراء ساهلة وهي تشهر لماركة ديالها وتعاون نساء لي كيعانيو من مشاكل البشرة و زيادة الوزن وتساقط شعر وتقصف ديالو وخشونة الجلد..كل لي بغات تعالج خاصها تقيد نفسها كعضوة دائمة فشركة ديالهم مع دفع مبلغ مالي طول مدة العلاج وبعدها ايبداو العلاج ببطئ ويعالجو المشكل دقة بدقة ...
بعد يوم متعب جلسات وسط المحل كتشرح لبنات الخطة ديالها لشركة وكان منهم السمع بصمت مكان عندهم تا رأي فكلامها لأن افكارها كانت مرتبة و ناجحة ...
بعد ما نتهات من شرح حطات يديها على جبهتها بشقيقة لي شداتها وراسها بدا كيعطيها صداع ...
عفراء : مزال حاجة اخرى...
حادة بصدمة: هادشي كامل ومزال باغية تزيدي ...
عفراء : شركة ديالنا غادي يكونو زبنائها كلهم نساء و اكثرهم ايكونو امهات او ربات بيوت وهاد نوع كيكون عندو زيادة فالوزن وانا متأكدة بعد ما انشرو الإشهار على مواقع التواصل غادي يجيو بزاف ناس يبغيو يخسرو الوزن وزيد تا لحبوب بعد المرات كيكون بسبب الهرومنات وهادشي خاصو رياضة ورجيم...
اية: اذا شنو باغية ديري..
عفراء : خاصنا نديرو صالة رياضية فيها مدربين يكونو مختصين ويكونو اجهزة متطورة وخاص نديرو تا حمام صونا و لابيسين تا هو ...
حادة خرجات عنيها : واش عارفة هادشي شحال فيه ديال لفلوس...
عفراء بحزن : هادشي لي مخليني واحلة غادي نبيع دار لي عطاها ليا جعفر فصداق ولكن فلوسها مغادي يشريو ليا تا المحل لي اندير فيه لصال ...
اية : اش بان ليك تهضري مع كمال وتشاركي نتي وياه...
عفراء بقات ساهية : خليني نفكر شوي ...
وخا قالت تفكر لكن كانت عارفة راسها مابغات تاحد يدخل معاها شريك فهادشي لي بغات دير..
فكرات تاخد قرض من البنكة لكن عارفة جعفر ايرفض ومغاديش يقبل حيت البنكة كتخدم بالريبة وهو رافض هادشي ولاقالتها ليه ايتخاصم معاها...
بعد يوم طويل و متعب رجعات لدارها فور ما دخلات رمات نفسها فوق سرير بدون ما تبدل حوايجها نعسات بحال شي طفل صغير...
رجع جعفر من كازا دخل لقاها ناعسة قبل ما يبدل حوايجو او يرتاح دخل لكوزينة دار روز يطيب وبيضة تصلق..خلاهم وتوجه لدوش توضى وصلا ورجع الكوزينة لقا روز طاب خلطو مع الحليب وقشر البيضة وهز طبسيل دار فيه تمر و لوز وبيسطاج والڭرگاع.. اكل متكامل و صحي وفيه كل المواد الغدائية لي كتحتاجها المرأة الحامل ...
دار كلشي فبلاطو ودخل عندها فيقها بزز باش كلات تحت اصرارو وهي اتموت بنعاس... خدا منها لبلاطو بعد ما سلات رجعو الكوزينة ورجع عندها هزها كاملة دخلها لدوش حطها فالبنيو لي فيه ماء دافي...
جلس وراها مكاليها بين رجلو باش ميغلبهاش نعاس ..غسل ليها شعرها وداتها ونضف ليها وجها من المكياج شللها ولوا عليها فوطة خرجها لبسها ملابس داخلية ..
نعسها على ضهرها وهز زيت ديال vergetures دار ليها مساج على كرشها وصدرها وجنابها وفخاضها باش ميتمزقش ليها لحم بالحمالة ...
ركز فالعناية لي مولفة دير يومياً بعد ما سالة تنهد براحة غطاها وخرج مشا يتعشا...
في طنجة قرب وطيل شهرزاد متكى على سيارة وفيديو هاز گارو كيكمي بهدوء وعينو محطوطين على لباب كيتسناها تخرج ..
بعد انتضار طويل بانت ليه سيارة حمراء فيراري اخر ماكاين وقفات امام لوطيل وخرجات منها صاحبة دعوتو لي كان يتسنا حضورها من صباح..
قرب عندها وهي عاطيها بضهر داخلة لوطيل ...حسات بخيال قربها دورات راسها وجات عنيها مباشرة فعينو خلات روحها تخرج من بلاصتها وهو غمزها بجرأة...
اناس: تلاقينا الالة فاطمة...
فاطمة بصدمة : اناس..
جرها عندو دور يدو على خسرها وبعينو شار لوطيل ..
-ندخلو هو لول ومن بعد نهضرو..
امام كل العملاء و النزلاء و الموضفين.. الرئيسة لي عمرها وقفات مع رجل او عطات فرصة لرجل يتقرب منها.. فهاد اللحضة دخلات مع شاب لي مدور يدو على خسرها موضح العلاقة الحميمية لي كتجمعهم..
بخطوات تقدمو نحو سانسور تحت اعين كل المتواجدين لي على ملامحهم كتشكل صدمة وعدم تصديق ما تراه عيناهم ..
فاطمة واحدة من اشهر رائدة اعمال فشرق الأوسط داخلة فعلاقة مع شاب اصغر منها..كانت صدمة أكبر من تصورهم كاملين ...
.
دخلو لجناح بغا يدخل معاهم المساعد لي صدمة مزال مخيمة على ملامحو لكن اناس وقفو هاز حجبانو..
اناس: بغيت نكون معاها .."تبسم نصف ابتسامة وكمل كلامو "....بوحدي...
شاف المساعد في فاطمة لي حركات راسها ..
فاطمة: سير ترتاح ..
بعد ما وافقات سد اناس لباب وتقدم كيدور راسو على الجناح الملكي مدخل يدو فتجاكيط ..بقات هي واقفة كتشوف فيه وهو بقا ساكت كيدورو فكل مكان بعد مدة جلس فوق كرسي وهز راسو لعندها بقا كيشوف فيها مدة طويلة و فنضراتو كان هناك شك...
اناس: جناح خاص فوطيل.. ليلة وحدة فيه كتخلص نص مليون و سيارة من نوع فيراري .."طلع وهبط فجسدها "..ولبس كلو ماركات عالمية وأخر ما كاين ..." ركز فعنيها"...هادشي كلو من خدمتك..
فاطمة بدون فهم : شنو كتقصد..
هز كتافو : غير كنسول وصافي حيت هادشي بان لي بزااف...
فاطمة لي مقدراتش تفهم كلامو وكتسول باش تمشي فخط تفكيرو..
-شنو لي بزااف...
اناس ركز عينو فيها وببطئ قال ..
- شنو لي خلاك ديري هاد نوع ديال الخدمة...
فاطمة تنهدات بعصبية : الخدمة هي الخدمة كل واحد كيخدم على مستقبلو...
اناس بصوت هادئ : بالنسبة ليك بهاد الخدمة ديالك اديري شي مستقبل ؟؟؟..
فاطمة ختفات العصبية من ملامحها بقات ساكتة لمدة وسؤالو خلاها تحس بشعور غريب وبدون وعي خرجات كلمة من بين شفاها...
فاطمة: علاش كتسول على مستقبلي....
اناس : نقدر نكون ولد الحرام مقطر وهادشي مفيهش شك ولكن عندي واحد ضمير ديلمو كيفيق وقت ما بغا وفاق معاك هاد ساعة وكنسول واش اتبقاي فهاد الخدمة وتخسري حياتك معاها...
فاطمة بسخرية : حياتي كلها خسارة مبقا عندي تا شي فرق دابا...
اناس بدون اكثرات لكلامها بقا كيلمس لورد لي محطوط فوق طبلة وبصوت عادي قال...
- الخسارة ضرورية فهاد الحياة وباركة خسرتي شحال من حاجة مكتفكريش تغيري او...
"دور راسو على لجناح وركز فيها وفلبسها ونطق ببطي "..
-ولا ولفتي لفلوس وكل نهار مع واحد...
تحولو ملامحها لجليد ونضراتها قصاحو وشافت فيه ببردو ..حلات فمها ترد عليها وهي تراجع ...
سدات فمها وختفى البرود من ملامحها وببطئ رسمات ابتسامة صغيرة من فهمات اخيراً شنو كان كيدور ليه فراسو وعلاش كان كيتصرف هكذا...
جلسات اخيرا فوق كرسي قدامو دارت رجل فوق رجل وحطات يديها فوق فخضها و بإبتسامة غير طبيعة قالت...
فاطمة :لكليان عندي كيحطو فلوس صحيحة ...
اناس تكا وحط رجلو فوق طبلة كيهضر ولكن كيبان ممصوقش...
-كلشي على لفلوس لدرجة تبيعي لحمك وترخصي راسك هكذا ...
تعصبات وجاتها ضحكة فنفس الوقت ماعمرها تصورات ان ممكن شي شخص يفكر فيها هكذا بغات غير تعرف شنو دارت قدامو باش يحكم عليها هكدا لكن سلوكها معاه طول لقائها بيه مبيناتش انها *اهرة..
هزات حجبانها حابسة ضحكة وقال..
فاطمة:ميمكنش ناس يعيشو بلا فلوس و مكنتش نوصل لهاد لبلاصة بلا فلوس..فلوس خلاوني نتلاقا بناس لي ميقدرش واحد بحالك يطلاقا بيهم..
اناس ضحك بإستهزاء مبرد راسو معاها وكيعطيها كلام قاصح ..
-بنادم يقد يعيش بلا فلوس حيت لو خدم غادي يجيبهم لكن تعيشي بلا شرف ..
"خسر ملامحو مستهزء بنضراتها الفخورة "..
- فشرف لمشا مكيرجعش...
فاطمة بإستغراب : حنا فالقرن 21 ماشي فالجاهلية لو مشينا مع كلامك غادي نلقاو كل ناس لي فهاد العالم بدون شرف ..
اناس عض لسانو من لداخل وقال بدون خجل معندوش علاش يحشم..
-انا مكندويش على جلدة لي بين رجليك حيت هاديك غير جلدة كاين لي متزادش بيها ومعندها تا علاقة بشرف ..
"دوز لسانو على شفاه ديالو وكمل كلامو بهدوء"..
-الشرف هو نتي كإنسانة على وديت لفلوس بعتي لحمك .."شاف فيها مزيان"...باش تعيشي فهاد رفاهية وليتي موسخة بدون شرف ولا حق ..
وقفات بسرعة بعصبية هزات يديها غادي تصرفقو وهو يشد ليها يديها بهدوء..بغات تجر يديها من بين يدو وهو يزير عليها كتر زاد عصبها...
فاطمة : طلاااق حيد يديك من يدي ياااك انا غييير موسخة علاااش شاد فيا...
اناس ببرود: تعاوديها غادي نهرسك من اليد لخرا...
جرات يديها بجهد مقصحة وعنيها تيلمعو بدموع ..تنهد ورجع شد ليها فيديها...
اناس: خليني نشوف..
"شاف صبعها لي مزال عليه جبيرة "..
-شنو قال ليك طبيب...
فاطمة تعصبات : ماشي صوقك...
اناس هز حاجب وهبط لاخر : مبقيتيش كتخافي...
فاطمة بكره: صافي طلق بعد مني ومتبقاش تهضر معايا ديرتي غرييبة ..من ليوم ما نعرفك ما تعرفني ...
دخلو فهضرة مكانوش ضاربين ليها لحساب لقات راسها بدون شعور كترد عليه بطفولية وهو كذالك بدون شعور بين اهتمامو إتجاها وشاد لخاطر لي معندوش اصلاً...
جرها كثر جلسها حداه وبقا شاد فيديها كيشوف لبلاصة لي كان شدها منها ولات حمرة ...
اناس : فين هو دوا لي كديري ليديك...
فاطمة: غادي نديرو لراسي غير حيد يديك انا غير موسخة...
اناس خنزر فيها : واش اتبقاي شادة فهاد الكلمة ولا مال طسيلتك...
فاطمة ساطت من نيفها بغضب جابت ليه ضحكة...
اناس : بقاي تسوطي عليا هنا بحال ثور...
فاطمة: ينطحك نشالله ...
اناس ضحكاتو : وخا الالة دابا فين هو دوا..
فاطمة شارت بيديها الاخرى لحمام..وقف توجه لحمام هز دوا لي كان محطوط حدا لفابو ..رجع جلس حداها وبدا كيطبق ليها دوا وهي مقصحة...
فهاد اللحضة وقف المساعد ديالها مع الخدامات لي كيجيبو لعشا ليها وكيعاونوها فتدواش قبل ما يهزو يديهم يدقو فالباب تسمعات صرخة من لداخل وصوت ديال فاطمة باين و واضح ..
فاطمة: غير بشوي قصحتيني...
اناس بعصبية شاف فلحمها: نتي عندك هادشي رطب غير كنقيسو كيبدا يحمار ...
فاطمة مخنزرة : علاش كتصحابو قاصح بحال ديالك..
"شارت ليديه وليديها"...
-شوف ديالك شحال كبير وديالي شحال صغير ..
مساعد و الخدامات حشمو ، هبطو راسهم وتفرقو ..بقاو هما لداخل مجايبين خبار..
كيدير ليها دوا وكيشوف فيديها و قال ببطئ..
اناس : غدا انديك لطبيب..
فاطمة معصبة: بلااش انمشي بوحدي عارفة طريق...
اناس زير عليها: لو كنتي عارفة طريق كنتي تمشي ليه قبل ما نجي انا...
بغات تقول ليه انه عندها طبيب اختصاصي كيجي تال عندها كل نهار لكن حيت عارفة نضرة لي داير عليها بقات ساكتة وهو بقا صامت وملامحو ممفرزينش وبعد مدة نطق ..
اناس: شنو قلتي..
فاطمة بدون فهم : فاش؟؟ ..
اناس كيدور لفاصمة عليها ..
-فهاد الهضرة لي قلت ليك كاملة..."ركز فعنيها"..شنو جوابك...
بانت الخيرة على ملامحها و كأن سهم ضربها وخلا عقلها يفهم الكلام لي كان بين كلماتو....
الفهم لي ضربها بحال ضو وخلاها تصدم و بعدم تصديق قالت...
فاطمة: واش معجب بيا !!!!...
توقفات يدو لتواني ورا كلامها وكمل دور لفاصمة بصمت خشا يديها وسط يدو حطها فوق فخضو ودور راسو لجهة الاخرى بدون ما يرد على كلامها ولكن صمت و تصرفاتو وضحو ليها جوابو...
قلبها تهز وتخبط ورجع كيدق بسرعة وانفاسها تحبسو وصدرها رجع كيطلع و يهبط ممتيقاش انه فعلا معجب بيها قربات ليه كتر مدات وجها باغية تشوف وجهو وهو بقا جامد فمكانو وهي كطل عليه باينة صدمة خربقاتها..
فاطمة: لكلام لي قلتي من قبل واش حيت كنعجبك و مبغيتينيش نبقى فديك طريق.."خرجات عنيها"..كتغيير عليا...
دار عندها كيشوف فعنيها مباشرة ..
اناس: جوابك...
فاطمة تخربقات : بلااتي فهمني حيت ضخت ..
" بدات كضرب صدرها وكتشير لنفسها" ..
-كتبغيني ..اناااا...
كتسنا جوابو وهو بقا ساكت مرفضش و مامعترفش رجع دور راسو لجهة لأخرى كأنه كيهرب من نضراتها المتفحصة وهي بصدمة شداتها ضحكة بدات كضحك بحال الحمقة ممتيقاش هادشي...
بدون ما تحيد يديها من بين يدو وقفات دارت لجهة لاخرى جلسات قبالتو و عينها مع عنيه وبتوقع فعنيها هي محساش بيه كتسولو..
-وقتاش وليتي كتبغيني.."هزات صباعها كتحسب ليه "..تلاقينا غير تلاتة ديال لمرات وصافي ميمكنش تبغيني وحنا متلاقيناش بزااف...
بعد صمت من طرفو خرجات عنيها كتسول و تجاوب راسها..
فاطمة: متقولش ليا بغيتيني من اول نضرة.."كتفكر اول مرة".. ولكن كنت دايرة الخمار وكانو كيبانو غير عيتي واش عجبوك عيني ولا حيت صخفت وديتيني لصبيطار...
كتسول وهو صامت كيشوف فيها وفصدمة لي فملامحها ...ونضرة توقع لي ممخفياش فنضراتها خلاه ينطق بشوي..
اناس: من اول مرة..
تجمدات فمكانها بجوابو بقات كترمش وكتبتاسم و ترجع تجمع الابتسامة... ماعمرها تحطات فهاد الموقف او شي حد عتارف ليها كانت ديما وسط رجال اعمال لي دايرن بالهم معاها ومكيتزاوجوش حدودهم وشخص الوحيد لي بغاتو مابدلهاش شعور..فهاد اللحضة نسات جعفر ونسات كلشي ،كتشوف اناس لي قدامها بمشاعر مخربقين فيهم صدمة وعدم تصديق وشعور اخر وهو الفرح لكن ممتقبلاش هاد شعور وبدلاتو بشعور الشك...
كتحاول تجمع كلامها وقالت بتلعتم..
فاطمة: ولكن انا كبر منك ...
اناس لي كان هادئ فور ما دكرات ليه السن تغيرو ملامحو شي لي خلاها تشك وقلبها تقبظ عليها وبدون شعور بانت بعض من الخسارة فصوتها..
فاطمة: يعني نسيتي اني كبر منك...
اناس غمض عينو وتنهد بجهد : لا ..
"دور لسانو على دروسو وقال مباشرة"...
-باش نجيك نيشن ومنكدبش عليك عمري ماشي 23 سنة ....
فاطمة بدات كترمش : شحال عندك...
اناس دور يدو على شعرو وتهرب من نضراتها بان عليه إحراج شديد انه يقول سنو الحقيقي تمنا من كل قلبو لو كان كبر منها وحيد هاد الفرق العمري بيناتهم ولكن حيت بغا يبدا معاها بدون كدب جاها فاص...
-عمري 19...
بحال شي سطل عامر بالما بارد تخوا عليها كلها وفيقها من داك الخيال لي عاشتو لتواني معدودة ..
ختفات الابتسامة من ملامحها وبسرعة حيدات يديها من بين يديه وهزات حجبانها..
فاطمة: عندك 19 ..."ضحكات بإستهزاء"...كضحك عليا...
اناس بهدوء: عتدك مشكل نكون صغر منك...
فاطمة ببرود : نو معنديش مشكل و لكن مكتشوفش راسك شحال صغير عليا...
اناس زير على دروسو : من اينا ناحية كتشوفيني صغير ...
فاطمة بغطرسة : من ناحية كلشي ..الوقت لي كنضيع معاك دابا كيحلم بيه اي واحد فهاد اللحضة ...
اناس ببردو : مع الكليان ديالك...
فاطمة بغرور : كنضن لي فعمرك مغاديش يفهم خدمتي.."ضحكات بإستهزاء"..كنسول راسي كفاش قدر يبغيني وهو عارف اني *اهرة ولكن دابا فهمت ..واحد برهوش باغي يدير فيها فارس الاحلام ومن يشبع يخليني كيف شي سلعة رخيصة ...
اناس بملامح باردة : ساليتي ...
وقفات بملامح صارمة : معنديش وقت لي نضيعو معاك خدمتي كتسنا...
تخطاتو بخطوات وفتواني حسات بجسد وراها شدها من يديها دورها عندو وضربها مع الحيط بحهد خلا ريقها يتزلع متألمة ..
بغات تصرخ وهي تجمد بنضرات الغيرة لي شاعلة فعينو ...
فلحضة غضب سها فملامحها الرائعة وعيونها لي مزينين بكحل عربي خلاهم يبانو كبار وكيلمعو كأن دموع مشكلين فيهم وبشرتها النظيفة لي متميزة بلون حنطي رائع وفمها لي مجموع ومرسوم كشكل قلب والهالة النبيلة لي كتشع منها كتبان متعجرفة ولها كبرياء و شموخ بعيد عن الانثى لي كانت قبل ولي كلها خوف وبكاء...
فلحضة تحركات رغبتو الرجولية اتجاها بعنف رغم ان ملامحو ما بينو تا مشاعر لكن عينو لي كيشوفو فيها بحرارة وبجوع كانو واضحين وفوسط افتتانو قال.....
- شحال خاصني نعطيك باش تكوني ديالي...
يتبع...
التعليقات
لا توجد تعليقات بعد، كن أول من يعلق.