محتوى القصة
قطعات على عمتها وبقات كتفكر وخا هكاك داكشي لي فراسها مايحدو ليها حد حاسة براسها مدارت والو وهو لي غالط ....
سمعاتو طالع فدروج وهي تخبي تليفونها بسرعة ورجعات نعسات وهو دخل حط صاشي ديال دوا فوق البيرو ديالو ديال دراسة. وحيد تجاكيط علقها وقرب عندها جلس على ركابيه وتكى على يديه فوق ناموسية كيشوف فيها وعيونها من لتحت حمرين نتيجة لبكا لي بكات..
زاد تأزم كثر و بقا فيه الحال ما عرف ما يدير من جهة مضرور حيت نطقات اسم جعفر و مرضاش و من جهة اخرا بقات فيه بزااف و مبغاش يشوفها بهاد الحالة ...
حرك اصابعو على وجها كيلمس حناكها و فمها بلطف وكيدور ليها شعرها ورا ادنها وهي كتحس بيه وكتحاول ما تبينش راسها فايقة ..حسات بانفاسو قرب ليها وشفاه دافئة تحطات فوق شفاه ديالها بقبلة حنية قبلها وبعد لسنتيمرات قليلة كيلمس نيفو مع نيفها بلطف و كيحاول يفيقها...
اناس : فاطمة نوضي دوشي وديري دوا باش ميبقاش يدرك جرحة...
حلات عنيها نصف حلة كتشوف فيه وهو تبسم بحنية وعاود قبلها في فمها...
-كيف بقيتي شوي ...
حسات بندم بدا كياكل فيها من شافت تعاملو معاه كتحاول ماتبكيش لكن عنيها خانوها وبداو كيقطرو بدموع ورجعات كلشي انها مقصحة من جرحة...
فاطمة: اننن كيضرني بزااف ...
هزها كاملة عندو حطها فوق حجرو وجمع ليها رجليها كيدير ليها مساج خفيف وكيراقب ردت فعلها ..
اناس : ودابا مزال كيضرك..
حسات براحة من المساج لي كيدير ليها فوق سرتها وجوانب حوضها..
فاطمة : غير شوي ولكن مزال كيضرني..
بقا كيدير ليها المساج تا بداو ملامحها كيتحولو لراحة ويدو عياو ورجعو حمرين لكن ما حبسش... ضامها لعندو كيقبلها فجبهتها وفوق عنيها وفنيفها وكل مرة يسرق قبلة فوق فمها وهي متكية عليه بحال لبنت صغيرة وعنيها بقاوو كيتلصقو بنعاس حسات براحة ودفئ...
هزها كاملة توجه لدوش كان موجد بانيو داير فيه ما سخون ومزايد تا اضافة حاط حداها فقط صابون طبيعي حسب داكشي لي قرا فالأنترنت باش يعرف كفاش يتعامل معاها و ميزيدش ياتر عليها...
حطها كاملة فبانيو مغلفها ماء سخون زاد ريحها اكثر وهو جلس وراها مكاليها برجلو باش ماطيحش من شافها بدات كتنعس..غسل ليها شعرها ودار ليها مساج لكتافها ولجناب ضهرها وتحت كرشها ،بدا كيسمع صوت شخيرها...
ضحك غير وحدو من شاف شكلها النائم ..شللها ودور فوطة على شعرها ودور فوطة اخرى على جسدها..خرجها حطاها فوق ناموسية ورجع لدوش نقاه مزيان مخلا تاحاجة كتدل انها كانت معاه عارف مو فيها تقلاب بزاف وغادي تكتر عليها بتسوال وهو هادشي ماباغي يعرفو تا حد...
رجع عندها عاود هزها حطها فوق صدراي وحيد ليزار لي فوق ناموسية فيه دم ديالها ودار يزار جديد ورجع هزها حطها فوق سرير و فرق ليها رجليها وهز بواطة عندها قمقوم طويل كدخلو فقط لمكان جرحة وتبرك كيخرج سائل شفاف بلا ما تحتاج دير يديك..
دار الخطوات لي يحتاج وغطاها بيزار جديد ما لبسها تا حاجة خلاها عريانة ..طفا ضو وخلا غير ضو خفيف حدا ناموسية ديالو وهز داك يزار لي فيه دمها ..قطع ديك جهة لي فيها غير دمها وداز لكوزينة هز بريكة وشعل لعافية فيه تحرق كامل امام عنيه ورما رمادو فلبابو وخوا عليه لما ..
تكا على البوطاجي وهز كارو شعلو وبدا كيكمي باغي ينسا داك اسم جعفر لي كيحفر ليه فراس من داك الوقت لي نطقاتها...باغي يعرف شنو فراسها وكفاش كتشوفو واش حسباه راجل ولا غير برهوش وماشي راجل حسب قولها... تضر فرجولتو وحس براسو ممرتاحش ونعاس طار ليه وصداع كتر عليه ...
صبح يوم جديد وشمس كدخل من شرجم وكتسنى على وجها الجميل لي كيحمل ملامح كلها انوثة وبراءة...
جلسات كترجع شعرها لور وكتدور راسها فلغرفة شافت حوايج جداد محطوطين فوق سرير و اناس مكاينش باين منعسش حداها ...
وقفات كتعرج مزال كيضرها تحتها لكن ماشي بدرجة ديال لبارح توجهات لدوش غسلات وجها ولقاتو حاط ليها شيتة ديال سنان جديدة بقات كتشوف وتبسم غير وحدها ...
رجعات لبسات حوايج لي لقاتو موجدهم ليها عبارة عن كسوة طويلة بي بلوزة بنفس لون كتدار فوق الكتاف وفرجلها لبسات صندالة ولوات على راسها زيف وهزات صاكها دارت فيه تليفونها وساروت طونوبيلتها وهبطات لتحت كتدور راسها وكتقلب عليه وهو خرج من لكوزينة هاز كاس ديال العاصير وشعرو كيقطر بالما وملوي على خسرو فوطة باين عاد دوش..
تبسم من شافها وقرب عندها باسها فوق فمها..
اناس : صافا..
حالة فمها فجسدو مبهوضة فيه و واضح تعب لي كيدير فلصال باش يخرج بهاد الجسد المعضل والمتراسي وشعرو لي هابط على جبهتو عطاه مضهر اكثر رجولة خلا قلبها يرجف نسات كل لي دازت منو لبارح وبزز باش ردات على كلامو..
فاطمة: شوي وصافي..
مد ليها كاس عصير ...
اناس: مع المدة غادي تولي لباس...
جرها معا لكوزينة جلسها فوق الكرسي مقابل طبلة لي موجدة بالفطور وهو واقف حداها كيكب ليها كاس ديال القهوة وهي مبهوضة..
فاطمة: نتا لي وجدتي هادشي...
حط ليها كاس امامها..
اناس : امممم علاش معجبكش...
فاطمة بفرح : نو عجبني بزاف غير فاجئتيني مكنتش كنضنك هكذا..
جلس امامها مبتاسم : مزال الأيام غادي يعرفوك عليا مزيان ...
بفرح بدات كتفطر وتبنن عاجبها الحال مولفين غير لخدمات لي يوجدو ليها لفطور اول مرة شي واحد قريب ليها كيدير هاد المبادة خلا قلبها ينبض بفرح ...
فاطمة كتبنن: اممم الله يعطيك صحة هادشي زوين بزاااف ...
قرصها فخدها. : بصحتك وراحتك كلشي ديالك...
فطرو فجو متناغم تا واحد ما هضر فلي وقع البارح بحالي تا واحد ما باغي يفكر فديك الليلة ..تعاملو مع بعضهم بحالي عمر ديك ليلة كانت..
وهوا مضغطتش ومكيتسنهاش تعتادر ولا تفهم راسها..
رجع لومة كلها لراسو وهو لي قرر يتبدل باش تشوف فيه داك راجل لي بغياه. تشوفو ماشي داك اناس لبرهوش لي محطوط فعقلها..باغيها تشوفو كيف قال ليها ..تشوفو راجلها واب ولادها لي ايكون مسؤول عليها ولي اتشارك معاه حياتها وتعتامد عليه وتيق بيه...
سالة لفطور وهز لماعن داهم لكوزينة غسلهم وخلاها هي مرتاحة فوق طبلة كتشوف فيه بإعين كيبريو ...تقدمات عندو عنقاتو من لور كضحك وهو كيشلل لماعن ..
دار فجنب كيشوف راسها لي داخل فضهرو ..
اناس: مالكي كضحكي...
دخلات راسها لجنب تحت من يدو وهزات عينيها فيه كتفرنس...
- ماعمري تصورت انك دخل لكوزينة ودير هادشي كامل...
هبط راسو باسها في فمها..
اناس: قلت ليك مع الوقت اتعرفي عليا شحال من حاجة ...
زيرات يديها على خسرو اكثر حضناتو بقوة..
- اوكي...
اناس : اترجعي لكازا ولا اطلعي لطنجة...
فاطمة بدون فهم : ونتا فين اتمشي ...
اناس كيمسح يدو : انرجع لمراكش خاصني نديها شوي فقرايتي بقات ليا واحد لعامين نتخرج ضابط صف انشالله ...
فاطمة تصدمات : وانا و عرسنا..
اناس دخلها فحضنو :غادي نرجع نهار سبت نديرو العقد هو الأول والعرس نخليوه تا تولدي نشالله كيف دارت عمتي ...
فاطمة مزال صدمة متحكمة فيها : و وقتاش انشوفك انا...
اناس : غادي نبقا نرجع سبت و الأحد انطلع عندك لطنجة ندوزهم معاك...
هبطات راسها مقلقة وهو كيهز ليها وجها لعندو...
اناس : صبري عليا غير هاد العامين ومن بعد كلشي ايمشي كيف بغا خاطرك و تمنا ...
بحزن حركات راسها وقالت..
فاطمة: سبت و الأحد دياولي بوحدي ...
اناس عنقها بقوة حاس براسو ايتوحشها...
-حياتي كلها ديالك ...
"بعد مرور خمس ايام"
جالسة فصالون للعناية بالجسم متكية عريانة وفوطة مغطية العورة ديالها و الخدامة دايرين بيها كيديرو ليها مساج بزيت طبيعي من ماركة لي كتنتج تعاونية ديال عفراء..
مغمضة عنيها كتحس براحة و جسمها برا ومبقاش كيضرها حاسة بنشاط ..حداها عمتها ناعسة فلبياص اخر وكيديرو ليها لخدمات نفس الشيء..
بعد ما كملو من المساج توجهو لصونا كيتعرقو وملوين عليهم غير فوطة وبشرتهم رطبة وموحد لون ديالها ..دورات راسها كتشوف عمتها لي وخا واصلة لسن الاربعين الا انها كتبان فأوائل التلاتينات مهلية فراسها و جمالها مبهر..
فاطمة : عمتي بغيت نسولك علاش ماعودتيش تزوجتي من طلقتي من راجلك الأول...
عمتها كمشات حجبانها ..
- علاش كتسولي...
فاطمة هزات كتفاها : غير كنسول وصافي بنتي لي ما مهتماش برجال ولي كيتقدم ليك كترفضيه وخا نتي زوينة و اي واحد يتمناك...
عمتها لي كان اسمها ابرار سهات كتشوف بعيد وفاطمة كتنغزها..
فاطمة: عمتي فين سهيتي...
ابرار رجعات لواقع وتنهدات بعمق ..
- والو غير كنفكر وصافي..
فاطمة: اوا مجاوبتينيش علاش معاودتيش تزوجتي...
ابرار هزات كتافها : مالقيتش راجل لي بغا قلبي...
فاطمة : علاش راجلك الأول مبغاهش قلبك...
ابرار تبسمات بسخرية : واش لي فمكانتنا افاطمة كيتزوج عن حب او اقتناع كاملين كنتزوجو غير على المصالح و المنفعة ..
فاطمة فهماتها : وعلاش قبلتي هاد زواج علاش مادرتيش بحالي ماتصوقت لتاواحد وتبعت قلبي...
ابرار بسخرية : نتي افاطمة معارفة والو وقصتي انا هي لي خلات باك يعطيك ضو لخضر مبغاكش تندمي وتعيشي مأزمة بحالي ...
فاطمة بدون فهم : شكتقصدي اعمتي...
ابرار : لي كنقصد ان باك بعقليتو لقديمة مستحيل يخليك تزوجي باناس وخا طيري و تنزلي مغاديش يوافق .. راكي عارفة حنا الخاليجيات شحال مهرنا غالي و كنطلبو كثر، كنخرجو بنادم من خيط لبرا ومايديها من دارنا تا يكبر بيها قدام كل العائلة....
فاطمة هزات كتافها : انا هادشي مكنتصوقش ليه يكفي نلقا واحد بغاني و مبغاش فلوسي وباغي يتبدل على ودي اما لفلوس ها هما عندي اش دارو ليا اه كنعيش مزيان حمدلله ولكن ديك العاطفة لي كتمناه كل مرأة ملقيتهاش كلشي طامع غير فيا ولا تزوج بيا شنو المنفعة لي نجيب ليه كرهت كلشي...
ابرار : هادشي علاش حنا معاك و مرفضناش طلبك .. مبغيناكش تندمي كيف ندمت انا وتقهرت ما تزوجت تزويجة زوينة ما خديت راجل لي كنبغي...
فاطمة خرجات عنيها مصدومة : كنتي كتبغي شي راجل اخر من غير راجلك اعمتي ..
ابرار تبسمات بقهرة : حييتي عليا جرح كنت كنخبيه و ما كنبغي نبينو لحد .."تنهدات بعمق "..اه الالة بغيت واحد من كل قلبي لكن نفخة ديالي خلاتني نخسرو ....
فاطمة قربات عندها : واش انا كنعرفو ...
ابرار بحزن ملئ عنيها حركات راسها..
- خالك هو لي كنت كنبغي...
فاطمة حلات فمها وبقات مخرجة عنيها فيها وابرار تبسمات بقهرة وبدات كتعاود ليها باغية لمن تخرج هادشي لي فقلبها...
ابرار: خالك ديك ساعة كان عاد بادي فخدمتو مكانش جنرال و بهاد المكانة لي هو فيها ليوم وانا كابرة فالعز وبنت ناس اكابر كيعرفهم غير شكوم و شكون منرضاش نهضر معااه ولا نشوف جيهتو وخا خويا تزوج بماماك مكناش راضيين بيها كنا بغيناه يتزوج بسعودية من مقامو ماشي مغربية ماكنعرفو اصلها ولا هي من مقام عائلتنا .. وخا هكاك كنت ماماك ضريفة بزاف كتخدم دارها بنفسها مكتسناش لخدمات يخدموها وكانت مهلية فباباك لي كان مزوج قبل منها شحال من تزويجة وكلهم طلقهم لكن مع ماماك تبت معاها ولقا راسو كيبغيها نيت ..كانت عقليتها متفتحة ماشي شي وحدة لي خبيتة وكتفرق بين العائلة بالعكس كانت كتزيد تحببنا فيها وفتعاملها الراقي ولباس ديالها كانت ديما كتلبس القفاطن وتزين راسها بمجوهرات مغربية بحال لويزة و لعقد الجوهر كتبان بحال شي ملكة ولي يشوفها يغير من خويا عليها كانت نهار طيب لينا كسكسو و البسطيلة تلقاينا كاملين كندابزو عليها باش ناخدو اكبر قطعة وهي ضحك وتهز اكبر قطعة تعطيها لبابا لي كان داك ساعة فالحياة وكان كيحماق عليها ويقول غير ولدي عبدالله لي عرف يتزوج ،كانت نعمة المرأة لزوجها ولعائلة زوجها ..عزازت عندنا كتر و مبقيناش كنشوفو فيها ديك لبنت لي على قد الحال و مكتنسبناش بالعكس ولات هي راي وشوار ورجعات عندي اعز صديقة كانت هي فعمر 20 وانا فعمر 15 سنة وخا هكاك كانت كتفهمني واي حاجة قلتها ليها كتبقا بيناتنا وهادشي زاد خلاني نتيق بيها كتر ...من كانت حاملة بيك بغات تمشي لمغرب تجلس مع والديها وخويا ديك ساعة كان يالله بادي مع المحامات معندوش وقت ورسلني معها ...عجبني الجو فالمغرب بزاف كانت كتسكن فحي شعبي وناسو ضريفين وحنان ..كنت ديما نضحك عليهم من كيعرضو عليا ويحاولو يهضرو معايا بالخليجية باش نفهمهم ..جو اخر وتقافة اخرى بعيد عن داكشي لي عشت فيه وكبرت فيه كانت تقافة لي كبرات فيها مك و واخد منهم الكرم و الضيافة وحسن التعامل .. كانو ناس بساط ولكن كرمهم فوق كلشي حتا من لحمام كانو يديوني معاهم ويعاملوني بحال الملكة تا من شعري كانو يغسلوه ليا وهادشي زاد عجبني كتر مبقيتش باغية نمشي من المغرب وزاد خالك سطاني بعقليتو وطريقة تفيكرو وكفاش كيهضر ويتصرف خلا قلبي يتعلق بيه بزااف...
قربت نتسطا وباش منبيش راني طايحة فيه كنت ديما كنقول ليه انا بنت شكون وشكون باش نبان متفوقة عليه وهو كنحس بيه كيتبدل من كنقول هاد الهضرة وكيجمع الوقفة و يخرج ...
بعد ما قربات ماماك تولدك رجعات لسعودية وتفارقت معاه كنت غادي نحماق وليت كل مرة نمشي عند ماماك نقوليها وقتاش نمشيو لمغرب حسيت براسي توحشتو بزاف و مقدراش على البعد ديالو وماماك كتقولي هما ايجيو نهار نولد..ولدات وجيتي نتي للدنيا فرحنا بيك وانا جالسة على جمر كنتسنا غير وقتاش نشوفو ..
وصل سبوعك وجا مع عائلتو فرحت بزاف كنتسناه غير فوقاش يشوف فيا لكن من دخل وهو مهبط راسو مكيهضرش وغير يدور راسو على لقصر لي كنا عايشين فيه وكنحس بيه مصدوم فور ما تسالة سبوع رجع بحالو لمغرب خلا قلبي كيتشوط وحسيت بحالي ممعبرنيش وبداك الحب لي تملكني اتجاهو حقدت عليه فنفس الوقت ..
دازت ثلت سنين كنمشي مع ماماك لمغرب فصيف وهو غير كيسمعني جايا كيهز حوايجو و يخرج من دار تاكنقرب نمشي عاد كيرجع ...انا هادشي مرضيتش بيه كفاش انا لي كلشي كيتمناني نبغي هدا لي ممصوقش ليا..زدت حقدت ورجعت لسعودية و اول واحد تقدم ليا قبلت بيه وباش نحس براسي ونغري تكبر ديالي و غروري بديت كنطلب فصداق غالي بزاااف.. فداك الوقت كلشي تصدم فصداق لي طلبتو ولكن راجل لي تقدم لي وافق عليهم كاملين عجبني الحال وقلت ها هو كيبغيني كثر من كلشي و وافق على كل شروطي شنو غادي يعطيني هاد لمغريبي لي بغيتو وهو مزال ما مرسم تا فخدمتو ..
نهار قبل عرسي كنوجد وحاسة براسي مخنوقة معرفاش علاش واش فرحانة ولا غادة لهاوية تا حد ما قدر يفهمني فداك الوقت وكلشي كان كيشكر راجل لي كبر بيا وجاب لي اغلى مكاين وايدير ليا عرس اسطوري عمر شي وحدة دارت بحالو فالخليج وكيديروه غير العائلات المالكة وانا من نسمع كلامهم نزيد نتكبر ونحس براسي حسن من كلشي تا شفتو قدامي حسيت بقلبي ايخرج من بلاصتو ومصارني تقلبو ودنيا كدور بيا.. فديك اللحضة لو طلب مني نمشي معاه لهاوية نقبل ونخلي كلشي ورايا ..لكن هو دخل عندي و عينيه حمرين وكيشوف فكل جوايه الا فيا مكيشوفش ...
بقات عينو محطوطة على هداية العرس لي كلها مجوهرات و ملابس غالية من الحرير كانت هداية لي ميقدرش ياخدها هو ..فديك اللحضة حسيت بيه تزير وكيهضر بزز قال ليا فقط " مبروك عليك و الله يسهل عليك"..وجبد بواطة صغيرة عطاها ليا كادو لعرسي..حليتها وشفت سنسلة دهبية مكتوب فيها اسمي...
"جبدات سنسلة لي فعنقها"...
- هاد سنسلة من نهار درتها فعنقي ماحيدتهاش حسيت بيها هي الخيط لي بيني وبينو وكل ما كنشوفها كندم على لقرار لي خديتو ولحد الأن نادمة بزااف...
فاطمة دموع كيهبطو وتمسحهم مقدراش تهضر وعمتها مزال كتعاود قصتها بيأس واضح فصوتها..
- تزوجت وجسد ديالي ولا ملك شخص اخر لكن قلبي لقا متعلق بيه ..حاولت وحاولت نساه لكن مقدرش فور ما نشوف سنسلة نتفكرو و حاولت نحيد سنسلة ونرميها لكن قلبي مبغاش وقت ما كنحيدها كنحس بقلبي كيصرخ وتا كنرجعها عاد كنرتاح ...هاد الحب لي كل مازادت سنين وهو كيكبر تا مبقيتش متحملة هاد العيشة وراجلي لي كبر بيا و وافق على كل شروطي بعد ست شهور زواج جا عندي قالي بغا يتزوج بالمرأة تانية كيعاملني بحالي شراني بداك صداق الغالي لي عطاني وكلامو هو كلشي وانا غير مشرية ماشي وحدة لي حابها باش تكمل معاه حياتو ... تم داك صبر لي كنت متحملة طول الوقت مبقاش رجعت لدارنا و بابا مبغاش قالي ماش نتي لمرا لولة ولا تانية لي ايتزوج عليك راجلك هدا شرع ديالو و من حقو لكن انا مقدرتش ولقيتها سبة باش نطلق ....
طلقت ورجعت جلست فدارنا كلشي كيبكي عليا بينما انا فرحانة كنتسنا نهار لي نعاود نشوف فيه خالك لكن دنيا مكتمشيش حسب متمنيات لواحد..نهار انا طلقت خالك تزوج وهو معارفش اصلا راني طلقت...
وخا هكاك زطمت على قلبي ومشيت نحضر لعرسو وعطيتو نفس الهدية عبارة عن سنسلة فيها اسمو "على"...وهو غير شافني تبسم وقبل الهدية ومن جلسنا فالعشا جلست معاهم فطبة و والديه سولو على راجلي وماماك قالت ليهم طلقت ..
كان هاز كاس فيدو كيشرب منو وفور ما سمع كلمة طلاق طيح لكاس من يدو وخرج عينو بصدمة وشاف فيا بعدم تصديق كيحل فمو يهضر ومكيخرج منو والو شكلو صدمني وخلا قلبي يحيا من جديد حسيت بيه تا هو باغيني لكن فور ما دار وشاف فمراتو لي جالسة حداه تبسم ليها ورجعو ملامحو كيف كانو فديك اللحضة عرفت انني عمري نكون مع خالك وحبي ليه ايبقى غير من جانب واحد...
قرب يمشي هو و العروسة وايولي ملك وحدة اخرا..اينعس معاها ويشرك معاها نفس الفراش ويلمسها و يقبلها وانا الغيرة عماتني ماكرهتش نغوت فديك اللحضة بشحال كنبغيه لكن كبريائي مسمحش بقيت شادة فراسي وانا ربي لي عالم بيا كنحس بالموت وباغية غير نرجع لسعودية نبكي ونغوت وتا حد ما يشوفني...
فديك اللحضة كانت العروسة كتودع عائلتها جا عندي دري صغير قالي شي واحد كيتسناك برا..خرجت نشوف شكون وهو يبان ليا علي واقف كيتسنا شافني وتقدم عندي مد ليا بواطة لي جبتها ليه كادو وفيها اسمو..اغلى اسم عندي فهاد الوجود...انا بصدمة قلت ليه...
- شنو كيعني هادشي..
"شافت في فاطمة بقهر "..
-عرفي باش جاوبني فديك اللحضة ..
فاطمة بحزن : باش جاوبك اعمتي ...
ابرار: مد ليا سنسلة وقالي..
"منقدرش نقبل هاد الهدية"..
بدون فهم جاوبتو ..
"علاش ونتا عطيتيني سنسلة فهدية زفافي"....
- قالي
"حطات يديها فوق فمها كتكتم شهقاتها لي فكروها فماضي اليم لي مزال ملاحقها لهادا اليوم وقالت وسط شهقاتها"...
- قالي " ديك الهدية وجدتها ليك قبل ما نعرف ان داك نهار هو عرسك لو عرفت ان داك نهار لي جيت فيه هو عرسك مكنتش غادي نجي "...
تصدمت وحسيت بدم جمد فعروقي وهو شد ليا يدي بدفئ و وضع البواطة فوق يدي وقال..
"تمنيت كون كنتي من عائلة عادية "...
-كلامو لي خلا دموعي يهبطو بحزن و قهرة بغيت نرمي نفسي فحضنو ومقدرتش.. بغيت نقوليه كنبغيه ولقيت لساني مربوط ..فقط دموعي هابطين مكسورة وهو تجاوزني ومشا لمراتو لي كتسناه خلاني بوحدي جسد بلا روح فارغ من اي حياة وكأن الحياة داها معاه وخلاني بحال لميتة ...
رحعت لسعودية وحدة اخرا مكتائبة وحالتي ما بقات كتعجب تا واحد وزدت بقيت فيهم بزاف ضنو هاد الحزن كامل حيت طلقت من راجلي لكن شكون يعرف مالي ويشوف من حالي وقلبي لي تهرس وما بقا حد يجمعو..مبقيتش حاملة نسمع اسمو ولا نعرف على حياتو ..قررت نمشي لبريطانيا نكمل دراستي الجامعية وتبعت عند طبيب نفسي باش نخرج من الحالة لي كنت فيها وكل ما كتجيني فرصة نخرج من طريق كان خيالو كيجي فالبال و يوقفني كنت كل نهار كندابز معاه علاش ميخلينيش ندير لي بغيت لكن نسيت ان هدا لي كندابز معاه مجرد خيال كنتخيلو ..
- وليت مجنونة بيه وكنكدب على راسي من نقول نسيتو ولكن فلداخل كنت كنتمنى يطلق مراتو ويرجع ليا لكن هادا تصرفات ماشي ديال علي لو كان دار هادش كنت غادي نحتاقرو لكن هو بقا مخلص لمراتو ولد معاها وبنا معاها حياتو ولا جنرال مشهور ودار لفلوس و الفيلات ..داك شخص لي كنت نقص منو ولا ليوم من اهم رجال لبلاد ...
سبحان الله كيف الأيام كدور تا حاجة مكتبقى على حالها ومزال ليومنا هدا مكيهزش فيا العين كأنه عمرو عرفني وانا مقدراش نهز فيه راس خايفة يشوف فعيني داك الحب لي مزال كنكنو اتجاهو مزال نفس الحب ونفس الشعور لي حسيت بيه اول مرة شفتو قبل 23 سنة من كنا شباب وها انا ليوم كبرت وانا فسن الأربعين لا ولاد ولا راجل قدر ينسيني فيه مزال كنعيش فذكريات القليلة لي دوزتها معاه ...
تنهدات بجهد وحطات يديها على قلبها لي بدا كيضرها ونطقات اسمو بعاطفة ماكتصورش...
ابرار: ااااه أعلي وشحااال ندمااانة عليك....
فاطمة مسحات دموعها ماعرفات ما تقول قصة عمتها ازماتها وماعرفات ما تقول ليها ..ماعمرها ضنات ان عمتها بهاد شخصية و القوة لي كتبان بيها يوميًا هي فالحقيقة بهاد الضعف وكتعاني فصمت من حب سنين ولمن لخالها لي بنا حياتو مع مراة اخرى و ود معاها وليدات ...
اخيرا فهمات علاش باها كان مساندها فحبها لجعفر وعمرو وقفها ..كيعطيا نصائح و يفهمها لكن عمرو وقف فطريقها تا فزواجها بأناس مقال والو من شاف حبها ليه..بقا بعيد و كيشوف من بعيد بدون ما يتدخل..
فهمات ان قصة عمتها كانت سبب باش باها ميحرمهاش من لي تحرمات منو ابرار بغاها تعيش بدون ندم وخا جعفر مايقبلش بيها لمهم دارت محاولة ولقات اخيرا لي قدر يملكها كاملة و تبغيه من قلبها...
شافت فعمتها لي كتلمس سنسلة فعنقها ساهية...
فاطمة: علاش مارجعتيش ليه اعمتي ياك مراتو ماتت خمس سنين هادي شنو لي منعك متعتارفيش ليه اخيراً...
ابرار بحزن: خفتو يفهمني غالط ويكرهني ..ما قدرتش نجازف ونستغل موت مراتو ونعتارف ليه .... هو مبقاش داك دري لي مكان عندو والو هو ولا لباس عليه واصبح شخص مهم و مكانتي ماكتسوا قدامو والو ...
فاطمة بقهر : نتي عارفة خالي مكيفكرش هكذا ...
ابرار حطات يديها فوق قلبها : مغاديش تفهي افاطمة انا و علي ممكتابينش لبعضنا ..
وقع صمت بيناتهم خرجو من صالون كل واحد فعالمو الخاص توجهو للفيلا و كل واحد توجه لغرفة ديالو وهي كتفكر فكلام عمتها و كتدور فغرفتها وبسرعة خدات قرارها وهزات تليفون صونات على خالها لي رد عليها مباشرة ...
علي: لعروسة ديالي صافا...
فاطمة تبسمات بسعادة : صافا ونتا فين غبرتي مبقيتيش كدور گاع فطنجة ياك لباس..
على بصوت غليض واضح نضج ديالو..
- غير عندي شي خدمة فأكادير هادشي علاش مابقيتش فطنجة...
فاطمة صغرات عنيها كتدور بيه بالكلام...
- امم قول هكذاك ضنيت اتكون هارب من شي وحدة ...
بقا صامت لتوني عاد ضحك وقال بقصد..
علي: نهرب من العالم كامل و منهربش منها...
تقدات فالجلسة كدور فعنيها..
فاطمة: شنو بغيتيني نفهم من كلامك اخالي...
علي بقهقة رجولية : انا غير كنهضر ما عندك علاش تفهمي....
فاطمة ممعاتقاش : وخا سيدي نمشي مع كلامك لو رجعات ليك هادي لي كتهضر عليها شنو ادير معاها....
علي بقا صامت لمدة طويلة وهي شكات ان الإتصال تقطع...حيدات تليفون من ودنها شافت الإتصال مزال متصل ..رجعات تليفون لودنها بإستغراب...
- خالي واش مزال معايا...
على فاق من ذكرياتو وقال بتردد ..
- شنو قلتي ؟؟؟...
فاطمة : قلت لو رجعات لبين يديك شنو ايكون رد فعلك ...
بحنية واضحة فصوتو وقال...
علي : مرحبا .. نفرش ليها طريق بالورد و ادخل من لباب لي عجبها....
فاطمة غمضات عنيهاوحسات بقلبها ايطير بالفرحة وشادة راسها بزز...
- فين بغيتيها ترجع اخالي ...
علي بتنهيدة خارجة من أعماقو رد عليها..
- ترجع لقلبي...
صبح يوم جديد يوم فرحها لي ايتقام فيه عقد زواجها ..كطل من النافدة على جردة ديال لفيلا و عفراء حداها مفاهمة والو..
عفراء : واش هادشي علاش معيطة عليا مع هاد صباح مخليا ولادي وراجلي ..
فاطمة حطات صبعها على فهمها : شششش صبري اصاحبتي بغيت غير نعرف واش ايجي خالي ولا نو...
عفراء بدون فهم: شواقع ...
فاطمة : بغيت نزوج عمتي بخالي وأنا عارفاه ايجي ليوم بغيت غير نشوف واش ايمشي ديركت عند عمتي لي جالسة فجردة ولا ايدر راسو مشاف والو...
عفراء بدات كتفهم بين لكلام..
- كان بيناتهم شي حاجة...
فاطمة : اممم كانو كيبغيو بعضياتهم ولكن قلة لعقل تا واحد ما عتارف لأخر...
عفراء هزات حجبانها : ونتي هي لي اترجعيهم و بهاد طريقة...
فاطمة : علاش شنو بغيتيني ندير...
عفراء : بحال هادشي خاص الواحد يدخل ليه نيشن ميبقاش يتخوا عيطي على خالك و قولي ليه عمتي كتسناك فجردة ..قاصح حسن من كداب...
فاطمة مزعماتش : هاكي اختي تليفون هضري معاه نتي...
عفراء : اودييي كتعجبيني غير فالهضرة اما تطبيق والو ما حدك باغية تعاونيهم جيهم نيشن وكل واحد وصلي ليه الهضرة باش يتجمعو اما لا خلينا بنادم يدير لخطوة بوحدو ماعمرو يتقدم بالأخص لكانو كيبغيو بعضهم...
كتبات ميساج و رسلاتو عادي وفاطمة بقات غير كتشوف فيها..
- اختي نتي ما يقد عليك تا حد ...
عفراء جراتها : دابا دوزي طلعي وجدي راسك مبقا والو وتجي العائلة كاملة مع العدول ...
فاطمة : وبابا ايجي معاهم...
عفراء : دابا باك غير نسايه عليك و حسبيه معانا مبقاش گاع كيفرق بابا و هاد خمس أيام دوزوهم فالقبيلة جا لبارح مقلقل مبغاش يجي كون ما قلنا ليه العقد ديال بنتك كان يلصق لينا تم...
فاطمة بصدمة : واش بابا هذا...
عفراء بقات كتفرنس: بيناتنا بان لي شي وحدة عجباتو فالقبيلة وخا ما بينش لكن حاسة بيه باغي يطير...
فاطمة حطات يديها على فمها وعفراء كضحك عليها ودخلاتها لبيت ..
- لبسي دابا بلا ما تبقاي تهرنني صافي كبرك خليه يقلب تاهو على راسو..
فاطمة بخوف : خايفة غير يجيب ليا شي وحدة ممزياناش...
عفراء بفهم : لكان غير من قبيلتنا فيهم ناس مزيانين متخافيش عليه....
جبدو ليها لخدمات لحوايج كيعاونوها فلبس و عفراء جالسة فالباركو دايرة رجل فوق رجل و عنيها حاطاهم على ابرار لي جالسة فجردة وشعرها الأسود كيطير مع ريح ..بجنب عنيها شافت سيارة سوداء كتلمع مع شمس من نوع دفع رباعي توقفات وخرج منها رجل بكل ما تعنيه الكلمة..
كامل مكمول تكون عندو ديك 46 سنة لابس قامجة بيضاء و سروال توب اسود ...بقا كيدور راسو فالمكان حتا بانت ليه ابرار و بخطوات دكورية تقدم عندها وعفراء حضياه من لبعيد و كتفرنس غير وحدها ..دخلات جرات فاطمة و وقفو فالباركو كيبرڭو اش ايوقع بين علي و ابرار ..
حالسة فجردة دايرة رجل فوق رجل وضهرها مستاقم وشعرها محطوط على كتفاها فكل جهة..هازة بين يديها كوب من القهوة السوداء كتشرب فيه بهدوء ومراقبة جوج عصافير كيطيرو فوق شجرة و كأنها كتمنى تكون عصفور وطير بحرية تنسا هاد الحياة والعداب لي عايشة ...
تنهدات بحسرة وهبطات اعينها تحط الكوب فوق طبلة ..هزات اعينها فالخيال لي وقف عليها وعنيها جات فأعينه ..تحولو ملامحها لصدمة وهو بإبتسامة كيشوف فيها..شار بصبعو لكرسي لي مقابل معاها..
علي : ممكن نجلس..
بتوتر دورات يديها على شعرها كترتبو..
ابرار: وي مرحبا جلس..
جلس امامها وهي كدور عنيها فكل مكان حشمانة تشوف فيه وهو جلس قدامها مفرق رجلو ومتكي ضهرو على الكرسي وفيدو كيلعب بساروت ديال سيارتو ...
بإصبعها شارت لصينية ديال القهوة..
ابرار: تبغي تشرب القهوة ....
مد يدو خوا لقهوة لراسو وكيشوف فيها بنص عين ...
علي: شحال بقيتي فطنجة...
ابرار حادرة عنيها كتشوف فأصابعها لي مشبكاهم وسط حجرها ..
- من خطوبة فاطمة وانا هنا...
خدا رشفة من لقهوة وحرك راسو بفهم وقال..
علي : ممولفاش ليك ديما كترجعي فنفس نهار عمرك بقيتي كثر من نهار فالمغرب من نهار ماتت ختي..
ابرار عضات شفاها بقوة..
- غير لخدمة مكنلقاش لي يقابل بلاصتي...
علي حرك راسو بفهم...
- كنت كنضن كتهربي مني و مبغياش تشوفيني ...
حسات بقلبها وقف ورجع كيضرب بجهد كتحاول تهضر و صوتها كيخرج مهزوز ..
ابرار : نو علاش غادي نهرب منك شنو درتي ليا ...
علي حط لكاس فوق طبلة وميل راسو كيشوف فيها ديريكت...
- من الالة ما درت ليك والو علاش ماكتهزيش راسك تشوفي فيا....
سرطات ريقها بصعوبة كتنفس بجهد و كتهرب راسها حاسة براسها بحالي عارية امامه وهو عارف كلشي..دوزات لسانها على شفاها لي نشفو كتبللهم بريقها ...
ابرار: انا...
قاطعها : هزي راسك وهضري معايا كيف انا كنهضر معاك نيشن ...
جمعات لوقفة كترعد خافت نضراتها يفضحوها..هربات من قدامو كيف عادتها دخلات لفيلا وطلعات لبيتها كتجري وهو تابعها من لور..دخلات لبيتها بغات تسد لباب وهو يدفعها ودخل ..سد لباب وتواجه معاها مباشرة...
علي كيشوف فيها بغضب...
- مزال غير كتهربي علاش مكتواجهينيش مباشرة ابرار واش مكفاكش هاد العداب لي عيشتيني فيه كثر من 25 عام...
ابرار بغات تخرج مقدراش تبقى معاه فغرفة وحدة وهو شدها من دراعها جرها عندو و واجها مباشرة فعنيها..
علي : كنهضر معاك واش مكتفهميش...
ابرار بغات تحيد يديها : انا ما عندي والو قلت ليك غير الخدمة...
علي : هادشي لي غادي تقولي ليا فهاد اللحضة ...
ابرار مهبطة راسها : ماعندي ما نقول ليك...
علي كيحاول معاها : وخا جيت قاصدك مباشرة ...
ابرار قلبها ايوقف و كتعكل فالهضرة ...
- علاش اتقصدني ما بيني وبينك والو...
علي بعصبية جر سنسلة لي فعنقها..
- من مابيني وبينك والو شنو هادي علاش محافظة عليها وعمرك حيدتيها طول هاد سنين...
ابرار جمدات فمكانها بغات تهرب ولكن يدو كانو مزيرين عليها..شافها ولات حمرة ونضراتها ممستقرينش فمكان واحد بحالي كتهرب مبغيهاش يشوفها ..
جرها بجهد دور يدو على خسرها عنقها بقوة ودخل راسو فعنقها وكينطق بي بحة غالبة فصوتو...
علي : علاش معدباني هاد سنين كاملة واش كنستاحق منك هاد العداب كامل ...
تحول صمتها الى شهقات ودموع بداو كيهبطو وهو زاد ضمها اكثر دخل ليها راسها فعنقو وكيقبلها فراسها وهي كتشكي ليه من كل قلبها....
ابرار: ما تصورش العداب لي عشتو بلا بيك و القهر لي تقهرت من تزوجتي ودرتي حياتك بعيد مني....
علي بحزن : صدمة لي صدمتيني نتي نهار جيت نشوفك ومعول نهضر معاك على لي فقلبي ..وداك نهار هو عرسك واتولي لواحد اخر..داخل وكنشوفك جالسة وسط الهداية وانا جايب معايا بواطة فيها سنسلة مدهبة ما كتسوا والو ..حسيت براسي كنت فحلم وفقت منو وعرفت انني مكنستاهلكش تمنيت لو كنتي بنت عائلة عادية لي نقدر نوصل ليها نطلب يديها بدون ما نحس بالإحتقار لي حسيت بيه من جيت لقصر ديالكم وشفت العيشة لي عايشاها بينما انا مزال تا لخدمة ما قبلوني فيها ....
"تنهد بجهد متألم"...
- عرفتي شناهو قهر عند رجال شنو كيساوي و نتي قهرتيني و غلبتيني وماعرفت ليك تا خيط اما طريق ليك لقيتو طويل وكل ما كنقرب كتزيدي تبعدي حتا تزوجتي ولقيت راسي فالهاوية معارف راسي من رجلي غير عايش بدون روح كندور فكل مكان ونسهر بلا نعاس..نتفكر اول مرة شفتك فدارنا وكفاش كتصرفي وكفاش عجباتك العيشة معانا وهضرتك و دلالك و شقاوتك و ضحكتك ...دارنا هي لخرا مابقيتش مرتاح فيها حيت كل ركن منها كيفكرني غير فيك...
"هز ليها راسها وحط يدو على خدها كيمسح ليها دموعها"..
- واش عارفة شنو كتعني ليا نتي ابرار.. 25 ماقادرش نساك وعايش بطيفك.. تزوجت و ولدت ومزال معششا ليا فالمخ وليت مكنقدرش نهز فيك العين بكترة انك سكنتي فالعقل ومابقيت عارف شنو ندير ..كل نهار كنقول تا هي اتزوج وادير حياتها وانساها ...لكن فكل مرة نبحت على اخبارك كنسمع انك رديتي شحال من واحد جا طلب يديك كنفرح وفنفس الوقت كنكره راسي كفاش انا عايش حياتي ومزوج وكنفرح حيت مغادي يشاركك تا راجل معايا رغم انني انا وياك مكان بيناتنا والو ...
"حط راسو فوق راسها كيستنشق انفاسها وكيشوف فعنيها"...
- خلينا نتزوجو ابرار ..مبقيتش قادر على هاد العيشة كل واحد هارب من تاني يكفي سنين لي ضاعت ماتزيديش تحرقيني كثر من هاد الحريق لي شاعل فيا كثر من 25 سنة....
بألم بكات من قلبها كل العداب لي هزات وخبات سنين و سنين خرجو فهاد اللحضة امامو تحولو لدموع و صراخ بدون كلمات حيت هو قال كلشي مابقا عندها ما تقول حيت فالأخير دارتها لراسها وعدبات نفسها اما كان ممكن من لول تحط نقط على الحروف ودير يدها فيديه وتنهي نفسها من هاد العداب لكن غرورها و تكبرها خلاها ضيع اهم انسان فحياتها...
هو لي عينو رجعو حمرين كيلمعو..وقلبو كيضرب بجهد وخا يقول لي قال لكن ميقدرش يترجم ليها بالكلمات عداب سنين لي عاش لقا راسو كيبغيها حب حقيقي ...
تزوج والله يشهد انه عامل مراتو بإخلاص وتفاني وعدل واحترام خدم ليل ونهار وحقق ليها كل لي تمنات و طلبات وكان ليها رجل لي بغاات وكان حامل حنية ورقة اتجاها فالاخير هي شريكت حياتو دوز معاها لحلوة و المرة وام ولادو كتبقا مكانتها بوحدها ...
لكن القلب كان ليه رأي اخر بقا مسكن ابرار بدون ما تزحزح ولا تخرج بقات متملكة بلاصتها فقلبو الى هذه اللحضة لي هي امامو الأن...
علي بإصرار واضح قال ..
- شنو قلتي تكملي معايا ما تبقى من حياتي..
ابرار صوتها مخنوق : و ولادك ..
علي : ولادي كبرو.. لبنت زوجتها والد خدام على راسو انا كندوي عليا وعليك ابرار حياتنا بزوج لي مغادي يدخل فيها تا حد اخر...
خشات راسها فصدرو وحركات راسها بالإيجاب موافقة انها تكون مراتو ...موافقتها خلاه يتنفس براحة بحال شي حد كان حاط قبضة على قلبو و موافقتها خلات قلبو يرتاح ولفرحة تغمرو ..
هزها كاملة كيزيد يضغط عليها تا ولات كتنين متألمة من صلابت دراعو وهو بسرعة طلقها خايف عليها وكيضحك فنفس الوقت وهي حشمانة وحناكها توردو مقادراش تهز فيه راس..
حط يدو فوق وجهو تنهد بجهد وقال..
علي: انهضر ليوم مع خوك ونطلب يديك منو..
حركات راسها بخجل وهو هز ليها يديها باسهم بجوج وخرج فرحان ...هبط لتحت وفجنب دروج خرجات كل من عفراء وفاطمة لي كضحك فرحان ..
دارت عند عفراء لي ساهية ممعاهاش...
فاطمة: تصاالحو تصاااااالحووو وايطلب يديها اخيييراااا ....
عفراء بدون استجابة وبدون رد فعل و فاطمة كتشوف فيها بدون فهم..
-هيهو فين مشيتي مالكي ساهية...
عفراء فاقت من افكارها وتنهدات بجهد..
- والو غير كنفكر...
فاطمة : فاش كتفكري...
عفراء تبعات نضراتها لعلي لي هابط فرحان ونطقات بداكشي لي جاها فراسها فهاد اللحضة...
- كنفكر لو انا طغيت فغروري ونرجسية وتكبر لي كان فيا ورفضت شخص الوحيد لي مد ليا يدو وبغاني من قلبو وتبعت لمال و المنصب لي كانو فعقليتي فداك الوقت ...كنتخيل لو جعفر ستسلم مني بسرعة وتزوج بوحدة اخرا شنو ايكون مصيري واش انكون تا انا بحال ابرار عايشة فذكرياتو محسرة بالندم و الحزن.... لو جعفر تخلا عليا من شافني انسانة منستاهلوش فكل مرة رفضتو وجرحتو فين انكون ليوم ونهايتي فين اتوصل...
"حركات راسها بعنف كتهرب الأفكار لي ختارقو عقلها وكتفات بالقول"...
-الحمدلله انه صبر عليا وبقا فجنبي ومتخلاش عليا..
عمرات لفيلا بناس من جهة كل عائلة فرحانين وناشطين دايرن حفلة كبيرة جامعة كل لحباب ..
شيخ عبدالله فرحان بي بنتو وعرض على كل ناس لي عرف وسي العربي هو و ولادو كبرو بفاطمة كثر من جهدهم واناس وسط رجال لابس جبادور بالاخضر مغلوق وساعة فالجلد فيدو كيبان متبت وناضج فحركاتو و افعالو كيجاوب على سؤال عائلة فاطمة لي دارت بيه و ولاد علي لي جاتهم عائلة اناس على ڭانتهم ولقاو راسهم كيديو ويجيبو معاهم فالهضرة...
بداو العدول فخدمتهم وسليم كيقرب لأناس كيهضر ليه حدا ودنو...
- مبروك عليك اصاحبي والله تا فرحت ليك وخا متستهلهاش..
اناس خنرر فيه وسليم بقا كيفرنس عارفو ماغادي يدير والو ولا كيعطيه غير من لتحت..
سليم: وصراحة تقال احبي شوف ولاد عائلتنا كيف دايرين شفتي ديك ساعة لي دايرها داك ولد عمها تشريك نتا وطاسيلتك...
اناس تزير وبدا كيحك فيدو باغي يضرب وشاد راسو وسليم كيشير بعينو..
- ونتا ضرب ليا على ولد خالها اصاحبي كيف داير راه قريب يولي بيلوط بشاااخ هادشي كامل عندها وختارتك نتا.. صراحة غرييييب هادشي...
اناس دور راسو لعندو كيشوف فيه وسليم شاد ضحكة وكيعطيه لقرطاس..
-شنو زعمة متكونش ساحر ليها ....
اناس حط صباعو بين حجبانو مزير وفكو كيترعد كيحاول ما يبان عليه والو و جعفر كيشوف فيهم حرك راسو بمعنى مالو وسليم حط يدو فوق ضهر اناس كيضربو راشقة ليه وقال ...
سليم: غير فرحان مسكين ليوم ايدخل لقفص الدهبي...
سي العربي : هادي هي سنة الحياة و الحلال زين و كيزين العشرة و كيلاقينا بناس حسن منا..
شيخ عبدالله سلم على يد سي العربي فرحان وراشقة ليه..
- بالعكس اسي العربي حنا لي لقينا ناس حسن منا عارفين فصواب و الأصول ومجموعين ومرتابطين ببعضياتكم بحال جسد واحد وكتهزو بولادكم هادشي ما لقيتو فتاشي عائلة من غير عائلتكم الله يدومها محبة بيناتكم ..انا غير الأيام لي دوزتها معاكم حسيت براسي وليت منكم ومابقيت قادر نفرق جماعتكم وهادشي فرحني بزاف حيت عارف بنتي اتعيش وسط ناس نقيين و متضامنين و كيبغيو الخير لبعضهم و واحد ما يسمح فتاني...
سي العربي عاجبو الحال ..
- هكذا تربينا وراك شفتي قبيلتنا وعرفتي اصلنا ومنين جينا وعرفتي عقلية كل واحد منا وبنتك اتكون وحدة من بناتنا ونهار ولدنا هبط ليها دمعة وحدة حنا ناخدو حقها من ولدنا ومنسمحوش ليه وخا يكون من دمنا ...
كلام سي العربي زاد عجب كل عائلة فاطمة وعلي لي طول وهو ساكت جالس حدا جعفر كيهضر هو وياه فمسائل ديال القانون مادخلش فالهضرة حيت نهار لي جات عندو فاطمة وقالت ليه على اناش بحت عليهم ولقا عائلتو ناس مزيانين ميخافش منهم ...
حطو كتاب قدام اناس لي تنهد بعمق وهز ستيلو سينا وكتب اسمو تحت مباركة كل عائلة وهزو كتاب داو لفاطمة لي جالسة بحال لعروس بزاغريت وصلاة على النبي سينات وكتبات اسمها قرب اسم اناس ...
فرحة عمت المكان وخلات قلوب تجتامع وماشي غير قلب اناس وفاطمة بل تا قلب علي و ابرار لي بعد عداب طويل كان يوم عقد قران فاطمة هو لي خلاهم يحطو نقط على الحروف ويعتارفو لبعض بكل الجروح لي كانو مخبينها...
طولات الحفلة وتا حد ما صاخي يمشي عجباتهم جماعة لي زادت قربات العائلتين من بعضهم ولقاو راسهم متفاهمين ...
وصل ليل تاودعو مع فاطمة وعائلتها وكل واحد ركب فسيارتو شدو طريق نحو رباط سيارة تابعة سيارة فاتو طنجة وقبل ما يدخلو لطريق سيار وقفهم اناس....
عبدالقادر: مالك نسيتي شي حاجة فدار نسابك...
كلثوم كتفرنس غير وحدها : الله يا ولدي ولا عندك تا نتا نساب ...
اناس كيترعد: قلت ليك الواليد وقف ولا انرمي راسي دابا...
وقفو فجنب وكل سيارات لي تابعينه من لور توقفو مافاهمين والو..
خرج كينهج كيحل صدايف لفوقانيية ديال جبادور تم غادي عندو نيشن وهو غير شافو عرفو ناويها معاه خرج كيطير هارب و اناس تبعو ممعاتقش والبلغة مامعاوناهش رماها من رجليه وتبعو بتقاشر بيضين ما بقا لا تباتة ولا رزانة ولا كيف تور معول يصفيها ليه
سليم كيغوت هارب واناس محلف عليه ممعاتقش خلاو كلشي كيشوفو فيهم مفاهمين والو...
سليم : ورااك عرييس اصااحبي حشوومة هادشي ليكديير فيه ....
اناس معصب: حشومة نتا كتعرفها . من جلست ونتا تزن عليا بحال شيطان بقا لي شوي وانوض نهرسك من شي قنت ...
سليم : واالخرااااااا راه غير كنضحك معاااك وحق ربييييي...
اناس هز لحجر كيشير عليه و يتحلف..
- مابان ليك هااد ضحك تااال هاد نهاااار اولد لحراام انا وليت منستاهلش اوجه لكلب..
سليم حط يدو على راسو وكيتخوا من لحجر ...
- وراااه غيير حيت عزييز عندي وشديت فييك...
اناس ممفاكش : وخا تبقا تطلب تال غدا ممفاكش معاك ليوم انعصر والديك مزيان ...
زليخة تابعاهم هازة قفطانها فالمحزم و كتحنا تهز لحجر و تمدو لأناس و سليم جعر...
سليم: بلاااتي على مك نتي تا توصل نوبتك...
زليخة عطاتو صبع مكتحشمش مقزدرة ..
- ها هو لي ايجي وقتي نهار توصل اتلقاني طرت...
سليم بغا يرجع ليها يڭددها وخاف من اناس يفلعصو من شي قنت حماها غير لغوات ...
- يطيرو بييك نشالله جنوون و يهنييوني منك من نهار بغيتك ما شفت نهار لبيض ...
زليخة بقا فيها الحال ولات هي لي كترمي عليه لحجر..
- وااش انا قلت لييك بغييني ولااا تسنااني ولاا زمر ليااا كاااع....
سليم مابقا حامل والو غلبوه بالحجر ...
- ورصااااو الله يعطيكم لهرس راكم قصحتوووني....
اناس جر زليخة كيعمرها على سليم...
- شفتي هداك ابنت لعميمة انا لي عارفو مزيان...راه خدام غير كيتبتك دابا بالهضرة نهار يوصل لزواج ايهرب و يخليك بوحدك ويمشي يختار وحدة حسن منك...
سليم تعصب : شكتخور عليها نتا تم ...
زليخة شافت فسليم بنضرات قاصحين ..
- فييين ايلقااا بحااالي اصلا....
اناس : اصلا راه لقا ودابا راه كيقلب على سبة باش يكركبك مع طريق ويمشي لهديك لي باغي..
تحولو عنيها لحمرين وعمرو بدموع ولات كتشهق وتبكي فنفس الوقت خلعاتهم...اناس تصدم مكانش معول اتبدا تبكي ليه وسليم طار عندهم جرها عنقها مخنزر فأناس ..
سليم : واش نتي حمقة دغيا تيقتي كلامو.. انا نخلي زين ديال العائلة و الحب لي كبرت معاها ونشوف جهة خرا واش باغياني نموت
جرو شي حد من كول القامجة وهو غير من شدة عرفو طلق زليخة وكحز لور حادر راسو وخالد جر بنتو وكيشوف فسليم بنضرات قاصحين و علال واقف حدا زليخة من جهة لأخرا كيشوف فيها و يخنزر فولدو...
علال: يكما قلقك هذا ابنتي غير قولي لخالك وماضربي حساب لتا حاجة..
زليخة بشهقات مكتومة شارت بصبعها لاناس لي تبدل فيه لون وقالت..
- هو مبقاش باغي يتزوج بيا ...
علال : على هو جدبوه فين يلقا بحالك وشكون هادي اصلا لي تقبل عليه...
جرها من باها و دخلها فحضنو كيضكطبط عليها بحنية ...
- اجي عندي وشكي عليا نجري على والديه يمشي يضربوه لحيوط اما داري ما دخل ليها غير بنت ختي...
سليم تفقص وقاطعو.....
- اصلا انا انسكنها بوحدها مغاديش نسكنها معاكم....
رجعات كتنخصص بجهد وكتهضر بزز ..
- سمعتي شنو كيقول اخالي....
سليم بغا ياكل راسو ...
- راااني كنهضر علييك الكارتة واش انااا تشوهت مع العائلة كاملة بسبابك و مزال انشوف جهة اخرا...
زليخة مرضاتش : انا اصلا مبقيتش بغيتك وصير تزوج بلي بغيتي ...
خالد كيهبط ويطلع فسليم : من وصلنا لهادشي كل واحد يمشي فطريقو...
سليم خواو ليه ركابي و وجهو رجع صفر..و دخل اناس كيفك لحريرة لي دار ...
- راه غير كنضحك معاك ونتي هاد دموع عندك غير على سبة اما سليم من نهار طاح فيك وهو مكيشوف غيرك واصلا الالة وخا يلقا وحدة خرا شكون ايخليه..غير طلبي الالة وحنا نكتفوه و نجيبوه تال عندك ...
سليم شداتو سخفة : كون غير بقيتي ساكت خير ليك وليا...
سي العربي دخل كيضحك جر سليم من جهة وزليخة من جهة وقال...
- اسيدي خيرنا ما يديه غيرنا وحنا ما باغين نفرطو لافولدنا ولا فبنتنا ...اوا الالة زليخة سليم كون مبغاكش مغاديش يشوه راسو قدامنا وهو راجل بكلمتو مغاديش يخوي بيك ولا يلقا حسن منك او لا...
زيلخة كتمسح دموعها وهازة خنافرها مراضياش بحالي ماشي هي لي كانت كتبكي عليه وقالت....
- اصلا انا حسن منو نجيب سيدو من غدا لا خلاني...
سي العربي هز راسو كيضحك : وهكذا نبغيك لي مابغاك صدقي بيه فباب سوق ابنتي وما تنزلي دموعك على حد...
سليم تفقص : جدييييي...
سي العربي ضربو لراسو مخنزر : ونتااا سكت ولاو عندك هاد ليدين شايطين ...
سليم حد راسو و سكت لقا راسو ماعندو كلام لي يقولو وغير كيجمع ليها نهار يولي هو وياها راس فراس ديك ساعة ايفدي فيها جديد و القديم ..
رجعو كاملين لقاو العائلة متكية على سيارتهم و كيتفرجو فيهم و يضحكو على شوهة لي دارو..كل واحد ركب فسيارتو وسليم هو وزليخة واناس ركبو مع جدهم شدوها ضحك طريق كاملة وسليم بدون ما يعيق شد يدين زليخة لي كتهرب يديها وهو كيزيد يضعط عليها ويشبك صباعو مع صباعها وكيهضر مع جدو عادي وهي مدورة وجها لجهة نافدة كتشوف فطريق وحناكها حمرين وقلبها كيضرب ...
حب مراهقة تملكها عليه وهو كذالك من نهار عرف الحب عرفو معاها ....
فسيارة لي تبعاهم فيها جعفر و وعفراء لي متكية عليه ومراقبة معاه طريق فصمت..يد كيسوق بيها ويد ضغط بيها على حنكها..
جعفر : مالكي ساكتة....
عفراء : والو غير توحشت ولادي...
جعفر : نهار كامل ونتي بعيدة عليهم...
عفراء : زعمة يكونو توحشوني....
جعفر تبسم وهبط راسو باسها فخدها...
-ضروري ايتوحشوك نتي هي امهم واغلا ما عندهم...
عفراء تنهدات : تا انا توحشتهم بزاااف ما بقيتش قادرة نبعد منهم...
جعفر : قربنا نوصلو لكازا وتشوفيهم ...
.
.
فطنجة واقفة ابرار فجردة دايرة فوق من كتافها شال مخملي كيحميها من لبرد وهازة راسها لقمر كتشوف فيه وضوء ديالو كيسني فوجها ويزيد فجمالها اكثر...
سمعات خطوات كيقربو ليها وهي دور راسها جات عنيها مباشرة فعلي لي وقف حداها وهز راسو فالقمر لي كانت كتشوف فيها ورجع شاف فيها بإبتسامة وقال...
علي : هضرت مع خوك وطلبت منو يديك وهو وافق...
بفرح رجعو عنيها كيلمعو ودموع السعادة بداو كيهبطو وهو شد ليها يديها بين يديه وجبد خاتم ركبو ليها فإصبعها وهزها قبلها بعاطفة كبيرة ودور يدو عليها ضمها لحضنو يحنان ونطق حدا ادنها ...
علي :من هنا لقدام بغيت نعيش غير ليك بوحدك وتعيشي غير ليا بوحدي...
كلامو خلاها تبكي بصمت واصوات زغاريت مباركة دارت بيها..هزات راسها بصدمة كتشوف فاطمة واخوها عبدالله و ولاد علي دايرين بيهم كيصفقو ويرميو عليهم لورد ويباركو ليهم ...
تحولو ملامحها من صدمة لفرح وعلي عنقها وكيشوف فأولادو لي فرحانين ليه وكيرميو عليه لورد وبنتو كتشير ليه بإشارة انه عرف يختار ...
بعد 25 سنة وبعد عداب سنين اخيرا تحدات قلوبهم وعمت الفرحة ملامحهم ...
حلات عنيها وضلام محيط بيها..هزات راسها كتجمع شعرها وكتقلب فالمكان لي حداها ملقاتش جعفر..هزات تليفون تشوف شحال فساعة بانت ليها تلاتة ديال ليل..
جمعات لوقفة لبسات بينوار وتوجهات لبيت ديال دراري لي ملاصق مع بيتها عرفاتو ايكون معاهم..حلات لباب بشوي وبقات واقفة كتسمع صوتو وهو كيجود القرأن..
تبسمات وحلات لباب اكثر شافتو جالس مربع وحاط ولادو قدامو بنات فجنب و دراري فجنب والقرأن متوسطهم كيقرا وصوتو فتجويد القران كيشبه للقارء عبد الرحمن مسعد كيحسسك براحة و طمأنينة وصوتو هادئ وكلمات الله كتزيد تحط على قلبك سكينة لا تتصور..
هزات فراش حطاتو فجنب ولادها وتكات حداهم كتشوف فيهم وتشوف فجعفر لي بقا منساجم مع قراءتو للقرأن مخشع وكأن تا حد ما داير بيه و وجهو منور وكيبان عليه الخصال الحميدة و الطيبة كتشع من وجهو...
غمضات عنيها ونعسات حدا ابنائها الاربعة بحال شي طفلة وسط منهم وصوت الوحيد لي داير بيهم في منتصف الليل هو صوت باهم وهو يقرأ القرأن....
انتهى من تلاوة القرأن وتوقف كيدعي دعاء فخاطرو وبعد ما نطق امين حل عينو وتبسم من شافها ناعسة ودايرين بيها ولادهم...جمع الوقفة باس القرأن وحطو في مكانه المخصص ..
رجع هز ولادو حط كل واحد فالفراش ديالو وغطاهم مزيان وخلا ضو خفيف حداهم وتوجه لعفراء هزها بين يدو وتوجه بيها لبيت نعاس وضهرو فقط لي كيبان تا ختافا فغرفة نومه وزوجة ديالو حاملها بين يدو وكانها اثمن ماعنده على وجه الارض ...
قال احدهم يوما ان وطن الفتاة زوجها فحين تختاري اختاري وطناً يليق بكِ...
اختاري من يحبك بطهارة وصدق ...
فإن أخرج الصدقة نواها لكِ...
وإن اعتمر جعلها عُمرتين لكِ ...
وإن رفع الكفين دعا لكِ ...
وإن قرأ القرآن نفث في صدركِ...
"بعد ست سنوات"
في دبي واحدة من اشهر المدن في العالم بجمالها وسحرها الفريد...فواحد من اشهر الشوراع في المنطقة شارع بن زايد كيتواجد اشهر محل في المنطقة حامل في الواجهة اسم " ATLASS" ماركة لي دخلات لسوق وفضرف ست سنوات دارت بلاصتها ورجعات رقم واحد في السوق العربي ...
كل كليان ومن عدت طبقات ومن جنسيات مختلفة كيتجولو فالمحل و كيتفرجو فصور ديال نساء لي جربو المنتوج ولقاو نتيجة مرضية..كل واحد باغي يشري وداير صف على المنتوج و وسط الكليان كانو جوج مغربيات كيهضرو مع بعضهم ..
- فراسك الالة مولات هادشي مغربية...
ردات عليها صاحبتها ..
- وييه فراسي اصاحبتي بدات من زيرو ودارت هداشي كامل واش معاونها شي حد...
- قالك واحدة من اكبر العائلات في الإمارات هي لي فتحات ليها السوق فالأول ومن بعد خدمات راسها وقدرات تفرض راسها قدام كلشي كيقولو عليها قاصحة وممعهاش لعب وزيد راجلها محامي كبير فالمغرب وعندو صحاب كبار هنا وفسعودية وهو لي كيحميها قانونياً ما كيخلي تا حد يقرب لخدمتها ولا يدير ليها المشاكل....
تنهدات صاحبتها بجهد : بغيت غير نعرف بحال هاد رجال فين كيلقاوهم حنا كنضلو نتخرطو فزناقي وعمر شي راجل مقاد تقدم لينا...
- واش شفتي بعدا هي كيف دايرة بزين ولا ما شفتيش راها كتحمق وشخصيتها قوية وهضرتها متولة ..ديك نهار جابوها فواحد البرنامج عربي ديال الموضة كلشي تبهض فيها كفاش كتصرف وكفاش كتكلم عندها كلشي بالعبار متقوليش مغربية گاع...
صاحبتها ممتفقاش معاها..
- نو سمحي ليا اصاحبتي المغربيات غزالات غير كيحقرو راسهم وكيهبطو من نفسهم اما المغربية بنفخة ديالها الالة وبتاويل و الحداكة وصواب و الكرم وبتاريخ و الحضارة ديال الملوك لي عاشت فيها معاشت فيها تا وحدة من غيرها.... المغربية هي الوحيدة لي واخدة تقافة الاندلس لي كان فداك الوقت يوصلو ليها غير الامير بن الامير وشكون وشكون وزيد تنفخ عليهم ومترضاش بيهم .. وكفاش كتعامل ولسان ديالها الحلو تدوبك ...غير الهم الكحل وقلة شي قضات علينا اما كون لقينا باش ايييه الالة ديك ساعة تولي هضرة اخرا...
صاحبتها تنهدات : اودي لبكا ورا الميت خسارة.. بقات فتاريخ شوفي فين عايشين دابا...
- تا دابا الحمدلله مزالين بنفخة وكيف قلتي شوفي غير هادي وشنو دارت فست سنين غلبات گاع هادو لي كيطناطحو سنين هادي هي جات غير البارح و خلاتهم لور شوفي غير المحل كلو عامر كليان وشوفي المحلات الأخرى كيف خاويين ...
صاحبتها نغزاتها : شوفي لهيه ها هي داخلة وسط الخدامة ديالها هي هاديك لي متوسطاهم لابسة جلابة ودايرة الحجاب ...
صاحبتها تصدمات : يا ختي وشحال كتحمق...
- و انا شنو كنقول ليك من صباح وتا راجلها بگوص شحال من مرة صوروهم ناس لي كيعرفوها ويحطوهم فصفحات انستغرام ...
هزو عنيهم كيشوفو فيها ولي كيعرفها تقدم سلم عليها وهي بإبتسامة كترد عليها سلام ...
اية قطعاتهم : اوا ليوم عيد زواجك نتي وجعفر وگاع العائلة كانت موجدة ليك حفلة ونتي خويتي بيهم و بقيتي هنا فالإمارات ...
عفراء ساطت بجهد : مالقيتش وقت نهار عيد زواجنا هو نهار لي فتحت فيه المحل اول مرة وكل عام كندير افتتاح لمحل وتخفيضات وكيكون ضغط ما عندي كيف ندير...
اية وفاطمة شافو فبعض وسكتو باين مخبين شي حاجة مبغينهاش تعرفها...
جمعو الوقفة ونوضو معاهم عفراء..
فاطمة: اجي معايا بغيت نشري شي حاجة ...
عفراء كتشوف ساعة : مشا الحال...
اية : وغير نوضي...
خرجو مشادين كيهضرو ويضحكو مع بعض..وصلو حدا برج خليفة وعفراء مفاهمة والو كدور راسها فالمكان ...
-ياك قلتي باغية تشري علاش جيبانا هنا...
فوسط كلامها تحل ضلام وشعل برج خليفة بالوان مختالفة ضوا كل المكان..
كل ناس توقفات كتشوف اش واقع وكل واحد هاز تليفون كيصور وهي كتشوف فالبرج بدون فهم ..
بدا الأرقام كيهبطو من 5...4...3...2...1... ضهرات صورة طفلة فالقماط بعد تواني ختفات صورة وضهرات صورة نفس طفلة فعمر عامين يالله كتمشى ويديها شاد فيهم طفل فعمر تمان سنوات ..ختفات صورة وضهرات مكانها طفلة جميلة في عمر ست سنوات جالسة وحاطة رجليها فالواد و قدامها طفل جالس على ركابيه فعمر 12 سنة..ختفات صورة مجددا و ضهرات مكانها صورتها بوحدها في عمر سبع سنوات...كل سنوات ضهرات فيهم مراحل عمرها وكانت صورة ديالها فقط حتى وصلات لصورة لي كتحمل عمرها 22 تم ضهر معاها جعفر فصورة مرة اخرى وهاد لمرة كانت صورة عقد قرانهم و الفرحة لي كانت كتشع فملامحهم...
كتشوف فتصاور بإبتسامة ودموع هابطين على طول خدها ..معرفاتش وقتاش لتاقطو هاد تصاور لكن كل صورة كتحمل دكرة ليها ...
صور لي كانت فيهم بوحدها كتعني فراقها مع جعفر وصورة لي رجع معاها هو من عاودو لتقاو من جديد...
وكأن حكاية قدر المنحوسة كترجم على شكل صور وكتحيي ليها دكريات الماضي... كل صورة كتحمل سنواتها الـ 28 سنة رفقة محبوبها و زوجها صاحب 34 سنة ...
فأخر صورة تعرضات كانت هي عاطياه بضهر بنفس الملابس لي لابسة دابا وهو واقف وراها لابس كوستيم اسود مرجع شعرو لور كيبان وسيم بشكل رائع كيخطف الأنفاس وحامل بوكي ديال ورد احمر بين يدو..
تبسمات بحب ودارت لعندو لقاتو واقف وراها كيف ضهرات الصورة تماما ...تقدم عندها ومد ليها بوكي ديال لورد بإبتسامة وهي خداتو كضحك فرحانة... وعلى برج خليفة ضهرات جملة ..
"انظر اليك و اتساءل اي عمل صالح لافوز بحياة معك "...
ختفات لجملة و ضهرات مكانها جملة اخر..
" شكرا لأنكِ اخترتني لأشارككِ هده الحياة"..
هبطو دموعها وهي كتشوف الجمل لي خلات قلبها يرجف ويدو لتفو عليها وحضنها بقوة و الالعاب النارية كتفرقع فسما وضوي عليهم اكثر وهما حاضنين بعض و نطق حدا ادنها بعشق...
- حياتي زينها وجودك معايا ..وقلبي حيا حيت نتي فيه ولعائلة لي تمنيت عطيتيها لي والوحدانية لي عشت فيها نتي خرجتيني منها ..كلامي كتير ولكن انختازلو فكلمة وحدة و هو اني كنبغيك ...
بعد كلماتو تنطقو عدت اصوات فساحة...
" عييد زوااج سعييد"...
هزات راسها كتشوف فعائلتها كلها لي حاضرة وابناءها التوائم..كلهم دايرين يد فيد وكيدورو عليهم ويباركو ليهم على 20 سنة من معرفتهم لبعضهم و 8 سنوات زواج لي زاد فالحب و العشق لبعضهم ..
وقفو وراهم كل اعضاء العائلة وحدا جعفر و عفراء وقفو ابنائهم الاربعة لإلتقاط صورة تدكارية ومن وراهم برج خليفة حامل كلمات بالوان مختلفة ..
"جعفر لعفراء وعفراء لجعفر "
- النهاية -
النهاية هنا وهاادي البارتات هدية مني ليكم نتمنا نكون كنت خفيفة على قلبكم
واقفة انسة جميلة المضهر لابسة طبلية و الهيئة ديالها واضح انها استاذة مخضرمة و كتحب تدريس و امامها كيتواجد تلاميدها من سلك اول ابتدائي..
ختارت ليوم موضوع مهم وهو حرية التعبير و الحرية شخصية لي كيتمتع بها الإنسان اليوم و ان الإنسان حر و غير مقيد من فكرتها كتحاول تعطي امل لتلاميدها و يفكر بتفكير حر لي يساعدها فالمستقبل..
واحد من تلاميدها جالس فالصف الاخير لأنه جا اطول قليلاً من اقرانو وختارت ليه اخر طاولة يجلس فيها باش ميضرقش صبورة على زملائو..
حاط كل الادوات ديالو وفاتح كتابو وبين اصابعه الصغيرة كيتواجد قلم و مذكرة لي مولف يكتب فيها كل ما كتشرحو الأستادة لكن فهاد اللحضة مكانش كيكتب كيف عادتو بل متبع كلام الاستادة و ضهرو بعض التجاعيد بين حجبانو كأنه في صراع فالداخل ديالو و كيحاول يفهم كلامها...
انتهت الأستادة من شرح بإبتسامة وحاولات تشجعهم يقولو رأي ديالهم..
- شنو ستافدتو من درس اليوم...
بقات كدور راسها على تلاميدها حتى شافت يد رتفعات ونطق صوت ذكوري لطفل...
- انا مفهمتش...
زادت تبسمات اكثر رغم ان الحيرة باينة فملامحها بعد ما عرفات ان شخص لي مفهمش هو اذكى تلميد عندها فالقسم ..قربات ليه ببطئ وقالت..
- شنو لي مفهتيش أ عبد الواحد...
عبدالواحد كيعاود كلامها لي حفضو من دقة لاولى وكيخدم يديه فالكلام واضح انه مولف نقاش مع اشخاص اخرين غيرها ..
- قلتي أ استادة اننا حنا تخلقنا احرار و يمكن لينا نديرو ما بغينا ونقول لي بغينا وتا حاجة ما كتمنعنا ...
الاستادة حركات راسها بإيجاب ...
- تماما حنا احرار وكلشي كنديروه تا كنقتانعو بيه حيت ربي خلقنا هكذا...
ميل راسو لجنب كيحاول يفهم كلامها وكذالك نطق سؤال لي كيدور ليه فراسو..
- ولكن من ربي خلقنا هكذا علاش نزل علينا القرأن و رسل لينا الأنبياء...
الأستادة كتحول تفسر ليه...
- ولكن القرأن ما كيفرض عليك والو بل كيخليك تقتانع بيه وطبقو بعد ذالك...
عبدالواحد بدا كيحك راسو كلام الأستادة خربق ليه عقلو بداكشي لي مولف يقريه ليه باه..كيحاول انه يفهم منها لكن كلشي كيحس بيه ضد داكشي لي غرسو فيه جعفر و حفضو ليه... حاول يعاود يفهم اكثر كلامها..
- ولكن القرأن فيه كلشي فرض مكاين تا حاجة كيقول لينا نديروه عن اقتناع بحال الصلاة و بحال الصوم و الزكاة وتا رسول الله قال "من يؤمن بالله و اليوم الأخر فليقل خيرا او ليصمت" يعني معندناش حرية التعبير ...
الاستادة بقات كتشوف فيه بحيرة ونضرات غير مفهومة وبقات ساكتة لتواني عاد قالت...
- شكون قراك هادشي أعبدالواحد...
عبدالواحد : بابا...
الأستادة : كتعني باباك المحامي جعفر بن طالب..
حرم عبدالواحد راسو و الأستادة تقدات فالجلسة ..
- ممكن تعاود تسول باباك على هادشي وغدا قول ليا الجواب ديالو...
عبدالواحد : وخا...
تبسمات ليه ورجعات لمكانها هزات كتاب كتكتب فصبورة وكل مرة توقف كتفكر كلام عبدالواحد وتبقا مدة وهي حابسة عاد تكمل..وخا صغير لكن كلامو ملقاتش ليه جواب واش بصح معندناش حرية تعبير فالدين.. واش الإسلام كيفرض على المؤمنين.. ام كيخليهم ياخدوه عن اقتناع كما قوله تعالى " لا اكراه في الدين" ...
اسئلة كثيرة كدور فراسها بدون جواب لقات راسها معارفة والو فالدين وفقط سؤال طفل خلاها ماتقدرش تجاوب عليه...
خرج من القسم داير شكارة ورا ضهرو كيتمشى اتجاه قسم اخر..
وقف فالباب كيتسنا وفلداخل كانو جالسين جوج بنات كيتشابهو زوعر وكيحمقو بزين ..لتفات عندهم طفلة كضحك وشارة اتجاه لباب..
- شمس ، قمر خوكم جا يديكم...
هزو شكايرهم ومشاو عند خوهم كيجريو كل وحدة باغية تزرب لتانية وصوت ضحكاتهم مسموع..
تلاحو عليه وهو مبتاسم ليهم برقة ..خدا ليهم شكايرهم كل وحدة دارها فكتف وشد خوتاتو من يديهم كل وحدة فجنب وخا هما فنفس السن وكلهم توام لكن كيبان الفرق بينو وبينهم هما متشابهين فطول واحد وهو جا طويل منهم شوي ومغير عليهم فالملامح واخد شوي من ملامح باه لكن اكثرية واخد من ملامح عائلة عفراء جا كيشبه لخوالو بزاف بالاخص علال فتخنزيرة و لون العنين ...
توجهو لخروج والبنات كينقزو فجنبو وكيعاودو ليه على نهارهم وهو فقط كيسمع محافظ على ابتسامة جميلة وعينو لونهم اسود وشعرو لي كان زعر بدا كيتبدل الى لون مغلوق...
دخلو لسيارة لي كانت متوقفة فجنب دخل خوتاتو لور وسد عليهم لباب عاد توجه لأمام قبل المرأة لي جالسة فمكان سائق فخدها وهي كضحك فرحان بيه وعندها اعز واحد فولادها كاملين ...
غير كتشفو كتحس براحة كل تعبها كيمشي وتا هو كيعرف كيفاش يرضيها وتصرفاتو معاها لطيفة بحال جعفر فصغرو ...
جلس فمكانو كيقاد سمطة وهي دارت عند بناتها لي لور مخنزرة فيهم...
عفراء : تعلمو من خوكم شوي شوف كيف سلم عليا و مأدب ماشي بحالكم...
البنات جاو معكسات بحالها جمعو يديهم على صدرهم وهزو راسهم منفخات وقالو دقة وحدة..
- حنا بغينا بابا لي يجي يدينا و نبوسوه ...
عفراء خسرات ملامحها : داك باكم بقا ليكم غير تاخدوه ليا و تخليوني بلا راجل...
شمس و قمر كيتكلمو دقة وحدة فيهم عادة بحال شخص واحد مفرق لجوج اجساد..
- هداك بابانا..
بدات كتسوق و تنهدات بجهد وقالت بينها وبين راسها..
- اوا كيقولو الحنش مايولد غير ما طول منو ..لعيالات يجيب عليهم راجل الضرة وانا صدقت والدة جوج ضرايرات ..
عبدالواحد كيلعب فساعة لي فيدو وقال..
- فين هو عبدالرحمان...
عفراء : احياني على داك جن الكحل مبقاش گاع مسوق ليا ولا تابع غير اية و كمال ...
عبدالواحد تبسم : غير خليه معاهم هو عزيز عليهم وزيد كبر وسطهم وهما حاسبينه بحال ولدهم...
عفراء قدات الحجاب ديالها من جهة صدر..
- هادشي لي مخليني صابرة عليه تا نشوف حريرتو فهاد القراية لي ممسوقش ليها ...
عبدالواحد تبسم فقط ودور راسو لتجاه لأخر كيشوف طريق و كيراقب الناس..
شخصيتو جات فشكل كلشي كيبغي يعرفو وأي حاجة تقالت قدامو وماكيفهماش كيضرو راسو وكيبغي يعرفها ضرووري وكيبقا يسول عليها باش يفهمها...
وصلو لفيلا خرجو من سيارة وتوجهو لداخل فين كاينة العائلة مولفين كل ما كيكون جعفر خارج لمدينة ولا عفراء سافرات على خدمتها كيجيو لفيلا يدوزو الوقت مع الدراري ...
خلات ولادها يطلعو يبدلو حوايجهم وهي جلسات وسط عائلتها حيدات صباط طالو وتكات على صدراي مصخصة...
عفراء: اففف عيت مولف جعفر لي كيجيب دراري و يهنيني من نهار سافر وانا حاصلة ...
لطوف مدات ليها كاس لعاصير : اوا قولي الحمدلله وقتكم جا فيه كلشي مرخوف ماشي بحال وقتنا...
عفراء : اوا خلاص اماما لي يسمع وقتكم يقول كنتو تصنعو صوارخ ...
كلثوم : اودي كلشي بحال بحال....
عفراء : اوا عرس سليم ما بقا ليه والو شفتو غير غابر لا اتصال لا والو هو وداك اناس تا هو غبر...
فاطمة متكية على ضهرها و كرشها منفوخة وغلاضت شوي باين فيها تهلو وحنيكاتها مطبزين طايح عليها السر وباينة فرحانة بحياتها...
- سافرو لجنوب عندهم شي خدمة تم ...
عفراء : واش لخدمة و العرس غدا واش باغي زليخة يطرطق ليها شي عرق كثر ما هما مطرطقين...
بشرى تا هي مفقوصة : ماتفكرينيش داك الولد عندي باغي يضحك فيا العديان ويحاشمني مع نساب شحال وهو تابع بغيت زليخة..زوجوني لزليخة..ودابا من غدا عرسو هو غابر باغي يسكت ليا القلب....
فاطمة حطات يديها على ضهرها بحنية كضبطب عليها..
- غير الخدمة متقلقيش راسك...
بشرى معصبة دارت فيها تا قفزات...
- بعدي مني يرحم ليك باك تا نتي بهاد دريجة المعكلة عندك نفهم فيها كلمة و يهربو ليا عشرة..
كلثوم خنزرات : نتي غير بشوي خلعتي ليا العروسة وهي كرشها لفمها مابقا ليها والو وتولد...
عفراء حطات كاس بجهد فوق طبلة : واش حنا كنقلبو على حل ولا كندابزو هنا ...
بشرى حيدات زيفها ورجعات كتدورو بعكاسة لراسها ..
- الحل الالة هو يجي هاد المتروف هاد ليلة ...ولا ديك المتروفة ديال زليخة ادير لينا جنازة ونوليو ضحكة قدام لي يسوا و لي ميسواش...
دخلات مينة لابسة جلابة دو بياص من لفوق بالأبيض ومن لتحت فلغوز مع صندالة عالية فيديها حاملة بنتها فعمر 5 سنوات عنيها ملونين بحال باباها و شعرها اسود بحال مامها وجمالها هادئ وفاتن كطفلة في مهد طفولتها لكن طبعها جا عكس مينة ضريفة و الحشومة هي طلعات لباها كتبان سكوتية ولكن من لداخل العافية الحمرة..
جلسات مينة بيناتهم وطفلة كدور راسها فصالون ومشات كتجري تلاحت على عفراء و كلامها غالب عليه حرف التاء ...
- خاثو فين هوما لبنات...
عفراء باستها فحناكها بجهد و كتعيبها : وينو على خاتو شحال غزالة منك ..
"شارت بصبعها لطاج لفوقاني"
-لبنات لفوق طلعي عندهم...
تمات طالو كتجري وهي توقفها مينة..
- نرجس مدابزيش معاهم كيف عادتك...
نرجس طالعة فدروج كتنقز وقالت..
- وخا ماما..
طلعات كدور فراسها فالبيوت ختارت لبيت لي ماشي ديال لبنات حلاتو كضحك..
- أبدووو هاني زيييت ...
كان كيبدل سروالو وهو يوقف جامد فمكانو وجهو رجع حمر ماعرف يرجع يلبسو ولا يبقا هكذاك...بحرج حرك راسو لجهة لاخرى..
عبدالواحد : نرجس لبيت لأخر هو ديال شمس و قمر هادا بيتي انا ..
نرجس دخلات غادة عندو كتنفرس وقالت..
- لا انا زيت عند ابدو ...
لبس سروالو بزربة محرج وتم خارج وكيشير ليها تخرج معاه..
عبدالواحد: اجي نهبطو لتحت...
نرجس ضربات رجليها فالأرض بغضب : انننن انا بغيت ابدو واحد...
شدها من يديها كيخرجها من بيتو وكيصلح ليها اسمو..
-سميتي عبد الواحد ماشي أبدو...
نرجس بتأكيد : أبدو ديالي..
عبدالواحد : انا ديال راسي....
نرجس برفض شارت بصبعها لوجهو ..
-نتا...
"رجعات صبعها شارت لنفسها و كملات لكلمة" ..
-ديالي ...
كمش حجبانو كيشوف فيها ورجع شد ليها صباعها شار ليها و كيفهمها..
-نتي ديال راسك بوحدو..
عاود شار بصبعها ليه..
- انا ديال راسي بوحدي ..
تجعدو ملامحها وعمرو عنيها بدموع اتر كلامه..بدات كتبكي بصراخ وصوتها مسموع خلعاتو وهي وسط دموعها و بكاءها كتأكد ليه...
نرجس : نتا ديالي ..دياالي...
عبدالواحد بقا كيشوف فيها وهي كتبكي بدل انه يواسيها و يكمل مع كلامها عطاها بضهر وتم هابط عندو نيشن مكايدر خاطر لحد من غير الام ديالو و وسط طريق قال..
- انا ماشي ديالك...
في القبيلة...امام شلال كيهبط لما ديالو على طول لواد وداير بيه اراضي خضراء من الطبيعة الجميلة لي كتميز القبيلة ...
حاط رجلو فالواد كيلعب مع ولاد لقبيلة وشعرو لأسود كيتهز مع ريح و اعينه بلونهم الأخضر كيبريو بشمس لي كيضرب فيهم ملامحو كيشبهو لباه جعفر وكأنه هو من كان صغير ...
صدرو كيتهز ويهبط وحناكو حمارو بالعب لي كيلعب وحوايجو كلهم فزگو وعامرين بالغيص...
هز راسو فشخص لي كيعيط بإسمو..غسل يدو وخرج من لواد هز ترازة"نوع من انواع طربوش"،، دارها فوق راسو ومشا عند الحاجة لي كتعيط عليهم وعنيها كيبريو دايراه حفيدها وأعز واحد عندها...
الحاجة : عبد الرحمن شهاد لحالة داير فراسك اولدي...
عبد الرحمن بإبتسامة باس ليها يديها وقال ...
- كنت غير كنلعب أنانا...
الحاجة جراتو معاها لفيرمة : نهار كامل ونتا كتعلب واش معيتيش تا الماكلة ما كليتيها...
تبعها كيضحك وهي كتنفض ليه حوايجو وتدرق عليه من شمس وهو كيهز ترازة ويضرق عليها تا هي شمس وهي كضحك عاجبها الحال...
الحاجة : راني كبرت اولدي شمس ما بقات عندها ما دير بيا غير غطي راسك باش ما تمرضش...
عبد الرحمن : مزال صغيرة أنانة..
الحاجة هزات راسها كضحك: ما حد قالها ليا ولدي مكاين لي يحيدها ليك مزااال صغيرة...
طلات عليه اية لي واقفة فالباب مبتاسمة ...
- اوا و أنا فين خليتيني ...
عبدالرحمان مشا عندها كيجري عنقها وهي هزاتو قبلاتو فحناكو بجوج وفور ما قاصت حناكو لقاتهم سخان تخلعات...
اية: مال وجهو سخون يكما فيه سخانة...
الحاجة تبدل ليها اللون : اناري ما رديتش لبال گاع ..
مشات عندو كتقيص ليه وجهو ..دارو بيه مخلوعين..
اية تعصبات وبدات كتهضر بجهد : كنقول ليك الحاجة متبقايش تخليه يلعب فشمس دري صغير ومناعة ديالو ضعيفة ودغيا كيمرض..
الحاجة بحزن : كنعيا ما نلهي فيه و والو كيهرب ليا ويمشي يلعب...
عبدالرحمن وسطهم راسو كيمشي بيناتهم : راني كنت غير فالواد كنلعب وكنجري هادشي علاش سخون ما فيا والو...
اية شافت فيه بغضب : ياك كنقول ليك لعب فضل وغير هنا فجنان متبقاش تمشي لواد ولا شلال وشكون قالك اسيدي اصلا ممريضش شوف وجهك شحال سخون و حناكك شحال حمرين .."بداو دموع كيهبطو ليها "... مكتبغيش تسمع لكلامي ياك وليت عندك زايدة ناقصة حيت انا ماشي ماماك لي ولداتك ..
عبدالرحمن دور يدو على عنقها كيرغب بصوتو الملائكي ..
- صافي مغاديش نبقى نخرج انبقا نلعب غير فجنان ....
بدا كيمسح ليها دموعها بكم تريكوه وهي مزال خايفة عليه كتحسبو ولدها و كأنها حملات بيه وسكن فكرشها وتوجعات عليه ورباتو بين يديها..دخل مع شرايين ديالها و جلس فقلبها ولا جزء منها ومن كيرجع عند والديه كتحس بقلبها داه معاها وفرحتها وسعادتها كيغيبو معاه و يرجعو معاه ...
الأمومة حسات بيها معاه من كان صغير مفارقش يديها وكل نهار دوزاتو قربو.. أول حرف خرج سمعاتو هي و اول مرة تمشا تمشى وهو شاد فيديها ..
ولا عندها اهم من حياتها وخدا كل وقتها ...بضعف هزات تليفون عيطات على كمال يجي يديوه لكلينيك ..
خرج من لإسطبل ديال الأحصنة كيتعكل فجلايلو و وجهو مخطوف منو لون...وقف حداها خداه منها كيترعد وكيهضر بعصبية...
- مال لولد شنو واقع ليه...
اية عنيها حمرين : كنضن ضرباتو شمس...
كمال بزعفة دار فيها : إوا الالة نتي اش كديري علاش تخليه يخرج فهاد شمس ويرجع بهاد الحالة...
هبطات راسها مقدراش تزيد معاه الهضرة وهو بسرعة مشا لجهة سيارة سوداء كتبري مع شمس من نوع دفع رباعي...جلس عبدالرحمان لور ودار عند اية كيغوت...
كمال : جيبي ليا تليفون والفلوس حاطهم فالماريو ..
حركات راسها بسرعة ومشات كتجري هزات تليفون والفلوس وهزات صاكها ودارت زيف غطات بيه شعرها وخرجت كتجري وصات الحاجة تحضي الشركة لي كتجي تدي الحليب وترصي معاهم شغل ومشات ركبات حدا كمال لي ديمارة سيارة ومشا كيطير ومزال نفس ديالو كتحس بيها كتخرج حارة وكيعض فمو من لتحت مغدد وكيدوي معاها مزير على فكو...
كمال: شهاد الإستهتار ولا فيك نتي ...
اية ضارت عندو عاقدة حجبانها : علاش مالي اش درت...
أية : لا ما درتي والو غير داخلة وخارجة بلا قانون ولا شوار ما بقيتي كديها فيا لا أنا لا فلولد بحالي غير زايدين عندك هنا ...
اية عضات فمها من لتحت وهبطات راسها وقالت بتردد..
- غير الخدمة مزيراني...
كمال ضرب يدو مع فلو طونوبيل : وهاد لخدمة مزال ما باغية تسالي عندك ..ست سنين ونتي كدوري من مدينة لمدينة ما قدك المغرب وليتي فالخليج ماكنشوفكش گاع وليتي كديري شي تصرفات مكنفهمهمش وغير لي قالها ليك راسك كديري اما تشاوري معايا ما بقاش وليت عندك زايد ناقص ...
يتبع...
حطو لينا جزء تاني ديال قصة