قدر المنحوسة الجزء 17

فمركز الشرطة واقفة فجهة هي ومينة لي وجها صفر بالخلعة ومزال دوخة ديال صخفة شداها وقدامهم امين مدور على راسو فاصمة سادين ليه الجرحة لي كينزل منها دم وكيشوف فعفراء شوفة ديال الموت وهي غير كدور فعنيها و البوليسي كيسولها..

-نتي لي ضربتي هاد سيد..

بزربة نكرات حركات راسها بـ "لا" ..ومنية لي من وراها بضوخة حركات راسها بـ" اه" ، تلفو لبوليسي لي كيسول وبعصبية ضرب يدو مع طبلة..

-وااش اااه او لااااا...

مينة كترعد: وو وواللله ما انا اشااف ووو حق الله تا هي..

شارت بصبعها لعفراء لي مخنزرة بغات تاكلها ونطقات بعصبية..

عفراء: انا علااش فلقت لييه راااسو غيير بااش نداافع علييك وداباا نتي لولة بعتييني..

مينة من عادتها خوافة وتال لبوليس والخلعة فشلاتها ولات كتسرسب بلا خاطر..

-انا ماقلتش ليك ضربيه نتي لي بغيتي تخرجي على راسك..

عفراء بوجها صحيح : عنداك اخويا انا مادرت والو هو لي تهجم عليا وبغا يضربني وزلق وطاح بوحدو انا مادرت ليه والو..

لبوليسي مخنزر: خوويا !! يكما جالس معااك فدااركم وكنتحجا انا وياك..

عفراء بخوف: وخا أسي انسبكتر ماديش عليا مزال دايخة..

لبوليسي شاف فأمين لي حاط يدو على راسو ..

-سي امين نتمنى تعاون معانا وتقول كل لي عندك ميمكنش لبنت تجي غير بوحدها وضربك..

امين بين سنانو معصب: هاديك سيدة كانت مراتي وانا..

قاطعااتو عفراء بكره: شكتخور نتا !!.. كفااش سيدة مرااتك وباش من حق تقول عليها مراتي سير اخويا تعالج شوي فداك المخ عندك بان لي تزعزع من بلاصتو..

لوليسي شيب بدا كينوض ليه : واااش نتي مغااديش تسكتييني دايرة بحال لحلاقم غير دو دو بلا حكام...

عفراء حسات بالحگرة : وراه هو لي كيجبدني....

لبوليسي مخنزر هز صبعو بتحدير: تعاودي تهضري نرسل مك فين ترباي..

رجع لأمين..

-كمل أسي امين كلامك...

امين: كيف قلت ديك سيدة كنت انا وياها فعلاقة كثر من ست سنين و وقعو بيناتنا شي مشاكل تفارقنا فيها وليوم بغيت نهضر معاه تا تسلطات عليا هاد خيتي هزات حجرة وضرباتني والكمالة راكم عارفينها..

لبوليسي هز حجبانو فعفراء : يديك شايطين عليك الالة وليتي بوصمة غير لي بان ليك تنزلي عليه بالحجر...

عفراء بدون رد كان من تجاهها الصمت والبوليسي كيتسناها ترد وهي الصمت..

البوليسي: راني كنتسنا جاوبك الأخت..

عفراء صاطت بجهد: دابا واش بغيتيني نهضر ولا نسكت ختار حاجة وحدة ماشي مرة تقول ليا سكتي مرا تقول ليا دوي راه انا بنادم ماشي ألة وهادشي لي داز عليا ماشي ساهل ..راه ربي لي عالم بيا ونتا زايد عليا سكتي هضري مالي على حالتي...

لبوليسي جمع الوقفة كيتحلف عليها...

-غادي تجمعي راسك وتهبطي دوك العنين لي مخرجاهم وتجاوبي على قد سؤال ولا ليوم اتباتي فعكاشة..

عفراء تزيرات ومزال ناكرة: وخا اسيدي انا مضربتوش ، سولو هو اش دار وعلاش تضرب..

امين هز كتافو باغي يغرقها: كنضن سيدة خاصها تربا مزيان حيت وخا كانت اتقتل روح مزال ما بغات تحشم..

مينة خافت على عفراء وبدات كتخرج الهضرة بدون تهديد ولا تسوال ..

-والله ما كانت باغية ضربو وهو لي ضربها لول وبدا كيهدد عاد ضرباتو هي ..

لبوليسي هز حجبانو: هي ضرباتو..

مينة:اه ضرباتو ولكن مقصداتش وحق الله ..

لبوليسي خنزر فعفراء: ومزال ناكرة..

عفراء شافت فمينة مزيااان مكرهاتش تريشها وغير لمكان لي هي فيه ممسعدهاش ورجعات كتشوف فالبوليسي لي حاط عليها..

عفراء: علاش كتسولني غير انا و علاش متسولوش هو والافعال لي دار ..

لبوليسي جر لكرس توجه عندها وقف قدامها بحال الغول..

-انا لي كنطرح الاسئلة هنا ونتي دور ديالك تجاوبي..واش ضربتيه..

عفراء ببرود كتشوف ليه فعنيه..

-مغاديش نهضر تا يحضر المحامي ديالي..

البوليسي : كتصحابي راسك في فيلم ميركاني هنا..

عفراء: من حق اي متهم يعلن الصمت تا يحضر الموكل ديالو لي هو المحامي وهذا حقي عاطيه ليا القانون..

زاد قرب من عفراء كثر وحط صبعو فصدرو : انا هو القانون وكلمتي هي لي كاينة ..

رجعات بخطوات لور مبعدة منو كتشوف فجنابها وفالبوليس لي كاينين كيقيدو المحضر وكل واحد كيغمز لخر ويضحكو بصمت وامين تكا على لكرسي وحط رجل فوق رجل عاجبو الحال وكيشوف فمينة ويفرنس غير بوحدو..

بعد تواني تحل لباب ودخل منو شخص لي ممعولينش عليه يكون فهاد الوقت ..لابس ملابس سوداء وسمطة ديال الفردي ملتفة على نص كتفو بالقهوي كتزيد تبين تفاصيل جسدو الرجولية ..محيد اللحية وشعرو مخربق مهبط راسو فالملف لي فيديه وكيهضر بهدوء..

- وجدو راسكم اتخرجو معايا دابا..

البوليسي لي كان كيتكلم مع عفراء بزربة تقاد فالوقفة مثلو مثل كل البوليس لي معاه ونطقو دقة وحدة..

-وخا الشاف..

حرك راسو وهزو بشوي ورجع هبطو مركز الشوفة وتم خارج حتى توقف جسدو وقلبو كيضرب بجهد وببطئ رجع راسو تجاه الانثى لي لونها مخطوف صفرة وكترعد ودموع هابطين من حناكها مبغاوش يحبسو وهو بصدمة بدون ما يحس بنفسو نطق اسمها..

جمال: مـيـنـة...

هزات راسها كتشوف فيه كترعد وفور ما تفكرات انه صاحب جعفر لي طلقاو بيه فجديدة مشات عندو كتجري تخبات ورا ضهرو خايفة ودموع رجعو كيهبطو بوحدهم مقدراش تحكم فيهم وجمال دار عندها بغا يسولها وهو يقوف من شاف جسدها ل كيترعد ودموع لي كيهبطو ..

رجع كيشوف فدراري جامع حجبانو حتى بانت ليه عفراء لي واقفة بوحدها ودايرين بيها لوليس ..

بزربة تقدم جر لبوليسي من كول ديال القامجة وخرج فيه عنيو مزيان ونطق يلهجة قاصحة..

جمال: شنووو كيديييرو لبنااات هنااااا..

بتلعتم: شاف شديناهم بتهمة محاولة القتل..

جمال كاره: بشمن حق ديرو ليهم استجواب وانا مكااينش وبدوون علم ديالي ..

لبوليسي : قضية صغيرة مبغيناش نعلموك الشاف..

جمال كيهضر مزير على ضروسو..

-القضية فيها القتل وكتقول صغيرة واش كضحك عليا هنااا..

هبطو راسهم كاملين مقدروش يزيدو يهضرو وهو دار عند عفراء كيهضر معاها بشوي..

جمال: متخافيش تا حاجة ماغادي توقع ليك..

"جر لكرسي ليها ولمينة لي رجعات لصقات فعفراء"..

-معندكم مناش تخافو عاودو ليا اش وقع بضبط..

تقطع كلامو بأمين لي قال بكره..

امين: معندكش الحق تقطع التحقيق فنصو اسي جمال..

جمال دار مكمش حجبانو وتحقق فيه مزيان وببطئ رسم ابتسامة بجنب فمو..

-وانا كنقول هاد ريحة ديالمن صدقان ريحة الكلاب داخلين عندي هنا لبيرو..

امين وقف معصب : جمع فمك ا امين متخلينيش ندير معاك تصرف مغاديش يعجبك..

جمال زاد تقدم عندو فايتو فطول و العرض كيتنفس بجهد...

-بان لي صلخة ديال جعفر مرباتكش وكتسنى شي صلخة من عندي الغدار...ماقدرتيش عليه وليتي دور بـمراتو اشماتة..

امين: وااش مكتشووفش أش داارت ليااا فراس كانت اترسلنيي لموووت..

جمال هز تليفون دور نمرة وحط تليفون على ودنو وكيشوف فأمين..

-ها حنا انشوفو علاش كتقلب اسي أمين..

تسمع بصوت رجولي بيناتهم ببحة خاصة بيه كيف عادتو وصوتو هادئ وغليض فنفس الوقت..

-أش واقع..

جمال: شمن طريق شاد..

جعفر: كازا..علاش كتسول؟؟

جمال جاه من لخر: مراتك مشدودة عندنا بتهمة القتل..

فور ما نها كلامو تسمع صوت مكابح بجهد وبعدها صوت اصطدام قوي خلا كل لي فالغرفة يخرجو عنيهم بقوث وبعدها تقطع الإتصال وخلا كلشي جامد فمكانو وعفراء طاحت كاملة فالارض كتردد اسم جعفر بصدمة..

فالمشفى ناعسة فوق البياص معلقين صيروم وهي وجها صفر صخفانة وجمال هو و مينة كيتسناو برة بخوف و كيدورو فكل جهة ...

حاول يكالمي راسو وقرب لعند مينة..

جمال: غير صخفات وطبيب قال ما عندها والو خاصها غير الراحة وشوي غاد تفيق متخلعيش..

مينة كتبكي بكل قوة: انا سباااب ..انا لي درت ليها صدااع دييما كتجي مني وكتحط راسها قدام العافية وانا كيف البقرة كنعاود نفس الغلط وخا كتنصح و تعاود مكنسمعش ليها وندير غير لي فراسي تا خرجت عليا وعليها ..

جمال : ششش لي وقع وقع وانا كاين تا حاجة مغادي توقع ليك صافي متبكيش..

حركات راسها بندم: مغااديش يعطييني تيقاار ودابا لقا سبة فين يندمها على كل الكلام لي قالت ليه ...

جمال زير على يدو بجهد: ياااك دااابز مع جعفر و تفااارقو علااش مزال كيدور بييكم وشنو بينكم وبينو باش يدير هادشي كامل..

مينة كتمسح دموعها وكيف عادتها لي عندها كتقولو مكتعرفش تخبي ولا تفرق بين لغريب وصديق كلشي عندها بحال بحال وهادشي لي خلاها متشوفوش الوجه لحقيقي ديال امين عكس عفراء لي مكانتش تحملو حيت عارفاه غدار وماشي ديال العشرة ولا زواج ..

لكن شكون كان يفهم كلامها ولا هضرتها ..شافوها متسرعة وراسها قاصح وفمها مبري منها كانو يضنوها غير كتهضر بدون ما تعرف ولا تفهم ولكن هي لي فراسها ما فراس غيرها ومن نضرة والكلام تعرف بنادم اش باغي منها وقبل ما يضحك عليها كتعطيه القرطاس وتسد عليه لبيبان وتسبق هي العيب..

ولي شاف معاملتها يقولو مامربياش و مكتحشمش لكن كون عرفو شمنو عندها فراس كون طلبو تسليم ومعاودو يزيدو فالهضرة ..

نطقات مينة لي عاد ضرباتها لفيقة وعرفات صديق من لعدو وقالت بجرح فقلبها بحال شي موس مغروسة فلقلب وكتدبحها ببطئ..

-كنت انا وياها فعلاقة ست سنين تقريبا وجا خطبني ونهار الخطبة وقع مشكل خلانا نتفارقو وهو مرضاش ودار ديك الفضيحة وجرنا معاه لحبس..

جمال تجمد ليه دم فالعروق وبقات غير كلماتها لولة لي كيدوورو ليه فراسو ونطق بسؤال كأنه كيأكد على نفسو..

-كنتو كتبغيو بعضياتكم؟؟؟...

حركات راسها بالإيجاب بدون ما تنطق..

جمال بنفس التعبير: ست سنين ونتوما مصاحبين !!..

مينة حطات يديها على وجها مخنوقة من سنوات لي ضيعات من عمرها وجوباتو بألم..

-اه..ست سنين ضيعت معاه وفلخر رماني بحال الكلبة مكنسواش...

جمال تزعزات كل داتو وقلبو تقسم على جوج هز راسو كيضحك بحال الهبيل مقادرش يتيق لبنت لي كان كيبغي وكيشوفها ديما بوحدها وحادرة راسها وراجل مكيدورش بها كانت فالحقيقة مصاحبة مع امين شماتة لي معاطيهش تا وجه ولا حاسبو بنادم ..

ودابا كيلقى راسو كيبغي من كل قلبو وحدة كانت فالأصل ديال امين...

بالم ديال قلبو بقا كيضحك بحال الهبيل وما سكت غير بصورة جعفر لي جاي عندهم كيجري محروض من جهة خدو وملابسو كلهم موصخين وعامرين غبرة وشعرو مخربق ودم ناشف لاصق ليه فجبهتو..

وقف قدام امين بحال الحمق كيدور فراسو..

جعفر بصراخ : فيين هي....فيين عفرااااء...

جمال شار بصبعو لجهة لغرفة ومقادرش يهضر ولا يتكلم بينما جعفر دفعو ودخل الغرفة بدون روح ..

جسدو كلو كيضرو وحالتو واضح عليها الكسيدة لي دار ورغم كل دالك مقدرش يصبر يمشي يداوي راسو وعاد يجي بل جا مباشرة لعندها يشوفها بعنيه و يتأكد عاد يرتاح و يطمأن قلبو..

فور ما شافها ناعسة فوق البياص وملامحها هادئة بحالي غير ناعسة عاد تنفس بجهد وزاح داك الخوف من قلبو وجلس على ركابيه قدام لبياص وحط جبهتوو على يديها كيتلمس لبرودة منهم وكيريح راسو لي ايتشقق بصداع..

بقى مدة طويلة وهو واقف فنفس المكان وبدات القوة كترجع لي بعد مافشل بإتصال جمال لي غيب ليه العقل و وقف ليه القلب ..

وقف وقرب حداها باسها فجبهتها وهبط على عويناتها بجوج كيقبل كل وحدة بحب وخاطر و انفاسو كيضربو شفارها ويدو كتلعب فأصابعها الصغيرة بحال شي طفلة بين يدو ونضراتو ليها كلهم حب و خوف ما قادرش يعيش بلا بيها ...

قبلها في فمها قبلة طويلة وشفاهم ملتاحمين مع بعض وفمو ناشف من بغا يبعد لصقو شفاه ديالها على ديالو وكل ما كيبعد كيتبعوه حتى تفارقو وتسمع صوت "باق"..

تبسم وهو كيشوفها وحاس براحة انها لباس وبخير قدامو مبقاش عندو القوة لي يستحمل حاجة توقع ليها ولا يشوفها مرة اخرى ناعسة فوق هاد البياص فهي الحياة وبدونها هو لا شيء..

فقد كان شيئاً قبل لقياها اما اليوم بعد ان اصبحت منه فيعترف مهزوماً انه جسد فارغ بدونها....

فهي الكل وعند قدميها ينتهي كل شيء ..

وتبقى في داخلي

شريان يمدني بالحياة

أنفاس ...وخفقات قلب

ونبض ...وإحساس

حتى تكاد أن تكون أنت لي الحياة

كيف أصبحت أقرب من نفسي لنفسي

فكنت قدري ....ومصيري

وسعادتي ....وهمي ....وكل حياتي

كيف اصبحت رفيق أحلامي

أصحو على أسمك

يتردد كالهمس على شفاهي

كيف اصبحت عالمي الأوحد

فلا أرى غيرك

ولا أفكر بغيرك

ولا أحب غيرك

كيف اصبحت امسي ...وغدي

وبك أحتمي

وبك يضئ عالمي

بدونك أنا صفحة حزن تأبى ان تبتسم

بدونك أنا عالم من النسيان

ولا اريد أن اصحو من النسيان

بدونك انا غيمة ترفض العطاء

بدونك انا لا شئ

فقد اصبحت في حياتي

كل شئ...

دخل طبيب بإبتسامة هو و الممرضة قلبو لوراق لي معلقين فالبياص وشاف فجعفر لي كيتسناهم ينطقو..

طبيب: مكاين والو عند المدام غير صدمة لعبات على داتها وعندها شوي ديال فقر دم خاصها تهتم براسها و بالأكل ديالها وتبع نظام غدائي فيه فيتامينات يساعدوها ...

جعفر تنهد بجهد: معندها تا شي مضاعفات اخرى ولا شي حاجة لي نقدر نعاونها بيها بالاخص فصدمة و الخوف لأنها تعرضات لمحاولة قتل.. "صاط بجهد وكيهضر بزز "..تعرضات لدبح فعنقها ورغم انها تعتقات و داز وقت لكن مزال كنحس بيها خايفة و أي حاجة ولو بسيطة كتخليها تصدم...

طبيب كمش حجبانو: هادشي ماشي ساهل لي نصحك بيه أولدي هو انك ديها لطبيب نفسي تبع معاه وتحاول تعالج من الصدمة لي هيا فيها وتحاول ديها لشي بلاصة فيها الطبيعة وبعيد من صداع والمشاكل وتخلق ليها جو دافئ مع العائلة و الصحاب تنسى كل لي وقع ليها وبالنسبة لي انا شخصيا وكنصيحة دفئ العائلة هو افضل علاج لمراتك وتكون قريب ليها ..

جعفر حرك راسو : شكرا دكتور..

تبسم ليه طبيب: كنضن اسي جعفر خاصك تا نتا تعالج حالتك مكتبشرش بالخير و الحادثة لي درتي شوي واعرة كنتي اتفقد فيها حياتك..

جعفر بقات عينو على عفراء : حمدلله ما وقع والو والعلاج انخليه من بعد بغيت نبقى حداها تا تفيق..

طبيب برفض: من الخير تعالج نفسك هو الاول باش متزيدش تصدم بحالتك من تفيق وتزيد فمشاكلها النفسية...

جعفر تنهد اخيرا وحرك راسو بالإيجاب و طبيب كلف الممرضة تعيط على ممرض هو لي يعالجو حيت عارف جعفر داير جدار مع النساء..

خرح ورا طبيب لقا جمال كيتسناه و مينة واقفة شافت فحالتو وزادت كتبكي وهو حدر راسو مزير ..

جعفر: خوك سليم كاين لتحت هبطي بقاي معاه..

تغير ليها لون فوجها من ذكر خوها بدون ما تسناه يكمل كلامو هبطات كتجري بحال الحمقة كتقلب عليه وقلبو ايخرج من بلاصتو ..

وخا مكيتحاملوش و ديما مدابزين ولكن فالأخير كيبقاو خوت وخرجو من كرش وحدة .. ميفوتوش بعضهم وتا حد ما يبغي الأدى لتاني..

كدور راسها فكل مكان وصوت تنفسها جهاد ..بان ليها خيال عاطيها بضهر و كيعرج بشوي وشكلو بحال سليم توجهات عندو كتجري وقفات قدامو مخرجة عنيها وهو جماد فمكانو بالخيال لي وقف عليه فور ما عرفها ساط بجهد و حط يدو على قلبو...

سليم بعصبية : سكتي ليا نتي هاد القلب گاع..

متصوقاتش لكلامو بدات كتدور عينها على الجسد ديالو و تقلب فيه بخوف ودموع مبغاوش يحبسو ليها..

مينة: ما واقع ليك واالوياا ياااك ..

سليم شعر جسمو وقف وبعد منها مستغرب..

-واش نتي ختي ولا شي جن داخل فيك وطاح حبو عليا هاد نهار..

تفقصات و بالخلعة ضرباتو بجهد ..

مينة: يدخل فيك نشالله المسخوط واش انا خايفة عليك و كنسول عليك ونتا كضحك عليا..

حط يدو فالمكان لي ضرباتو مقصح..

-وغا بشوي البقرة راكي قصحتيني عاد نجيت من الموت...

بزربة بعدات يديها متوترة..

مينة: سمح ليا ما شفتفت راني خايفة وكلشي مقلوب فوق راسي ومعارفة اش ندير ..

سليم : وصافي حبسي متزيديش تقصحيني راني كلي مقصح..

مينة: شنو وقع مفاش تادرتو كسيدة..

سليم بكره: واحد ولد الكلب سكران فنص نهار دخل فينا كان ايقتلنا انا بعدا نجيت ولكن جعفر كان فجهة ليجات فيها ضربة غير ربي لي حفضنا وصافي وما وقع والو وبقينا سالمين من غير هادشي لي كتشوفي دابا.

مينة حطات يديها على قلبها: حمدلله يا ربي ما ناقصنا مشاكل كثر من هكذا..

سليم: وعمتي كيف بقات..

مينة وجها صفر كتهضر بزز : مزال ما فاقت من سمعناكم درتو كسيدة صخفات وجبناها هنا ودابا كنتسناوها تفيق..

سليم: وامصيبة هادي عوتاني تا كتقاد من جهة وتخسر من جوايه خرين ...

تفكر الكلام لي سمعو فالهاتف و صغر عينو كيشوف فختو بنص عين وحل فمو يسولها وهو يوقف قدامهم جسد مكمش حجبانو وبتساؤل نطق..

اناس: شكاديرو نتوما هنا.."شاف فسليم"..نتا ماشي مشيتي مع راجل عمتي اش كدير هنا وشهاد الحالة داير فراسك..

سليم بسخرية : عجبني الحال اخويا وجيت ندير زيارة لسبيطار نحسب شحال من مريض و شحال من صحيح وشكون دخل و شكون خرج ..

اناس مخنزر: كضحك عليا..

سليم معصب: راك نتا لي كضحك عليا واش حالتي كتبان ليك ديال هاد الاسئلة ...

اناس هز عينو وطلعهم مزيان..

- بنتي ليا كي العرض تا حاجة ما فيك..

سليم هز صباعو: خمسة وخميس اخويا عطيني شبر ديال تيقار ...

اناس معندو خاطر: وطلق اصحبي قول اش جابك لهنا..

مينة: غير خلي داك جمل ناعس اخويا اناس..

اناس: لا الالة غادي نفيقوه اش وااقع مديرونيش وسطكم كي الحمار ما عارف والو ...

سليم: وفين عمرك كنتي عارف اصلا..

اناس دور يدو على عنقو ورجعو تحت يدو قاجو

-نتا كتقلب عليا نرسلك لقبر اولد لعميم...

سليم كيضربو لكرش باش يطلقو ..

-عاد نجيت من لقبر ونتا باغي ترسلني ليه خلي غير ندير حسانات ونتزوج بعدا..

وقف اناس مستغرب...

-كفاش نجيتي من لموت..

سليم :انا وجعفر درنا كسيدة...

اناس بصدمة قاطعو : شنهوااا؟؟؟..

سليم بحزن: اودي خلي غير نكمل ليك عمتي مسكينة طاحت كومة مزال ما فاقت..

اناس خواو بيه رجليه : كغاش كومة؟؟..

مينة ضربات سليم مفقوصة : نتا تقتل وتمشي فالجنازة عمرك تجيب الخبار مقادة ديما معوجها بحال وجهك ..

"دفعاتو يجلس وكتشرح لأناس"..

-غير سخفات وكنتسناوها تفيق وطبيب ما لقا عندها حتا شي مشكل طلع لفوق تشوفها ..

اناس دور يدو على وجهو تنهد بجهد و ورجع قلبو كيضرب بشوي بعد ما كان ايخرج من بلاصتو بكلام سليم..

توجه لسانسور طلع مباشرة لطابق لي فيه عفراء يشوفها و يطمأن عليها ..

فطابق التاني جالس كل من جعفر وحداه ممرض كينقي ليه ضربة لي فحناكو وفجبهتو بلنكول وكيدير ليه لفاصمة وجمال حداه كيهضر هو وياه..

جمال : هادشي لي وقع وهو لي رفع عليها دعوة قضائية وانا مزال ما بحت فالأمر باش نعرف شنو كاين ...

جعفر تحولو ملامحو لقسوة و صدرو بدا كيطلع و يهبط وكيتنفس تنفس ممنتضمش بالغضب لي كابتو لداخل ونطق مزير على دروسو..

جعفر: وصل تااا لمراااتي..

جمال هز يدو: انا خرجتهم حيت دعات ضرورو من صخفات مراتك ولكن القضية تابعاها وخاصها من تفيق ترجع معايا..

جعفر شاف فيه بغضب...

-مراتي مغااديش ترجع لديك لبلاصة..

جمال : راك محامي اصاحبي وعارف القانون اش فيه ماعندي ما نخبي عليك..

جعفر زير على يدو بجهد..

-عارف البلاصة فين تعرض ليها..

جمال: وي قدام لفاك ديالهم ..

جعفر: مغاديش نقدر نخرج وهي مزال ما فاقت تكلف نتا سير لديك بلاصة كيكونو فيه مقاهي كتيرة وشوف واش كاينة شي كاميرة كتسجل ..

جمال هز حجبانو: ولا كانت مراتك فعلا ضرباتو هادشي غايزيد غير يتبت عليها التهمة..

جعفر دوز يدو لي كيترعدو على شعرو رجعو لور وبعينو لي كيشوفو ببرود و ممعولش يدوزها لأمين و بالتقة لي كيتيق فعفراء نطق بدون شك..

جعفر: مراتي وكنعرفها مزيان هي ماكتجبد حد وماكتهز يديها على حد وما حدها ضرباتو الا وهو ايكون ضربها الأول ..

جمال تفقص: ولايني شمااتة هاد ولد لكلب..

جعفر هبط راسو وهضر بهدوء غير عادي..

-انا انتكلف بيه..

جمال دار راسو ما سمعش..

-قلتي شي حاجة..

جعفر تبسم بجنب فمو عارفو سمعو وعارفو شنو ايدير ورغم دالك تصرف كأنه ما سمع والو وتا جعفر حرك راسو يمين وشمال..

-ما قلت والو

حركو راسهم وكأنهم تافقو ضمنياً على شمو كيدور فراسهم ...

فهما صحاب و صحبتهم قديمة ودازو من محن بزااف وخلات علاقتهم تزيد تقوى وكل واحد ولا عارف الأخر مزيان بحال توام ..

جمال مغاديش يخفي عليه جعفر وكذالك جعفر مخافيش عليه جمال..

وقف جمال خرج يقلب فالقضية ويقلب على دليل ...داز على سليم يشوفو كيف بقا ولقا حداه مينة لي غير شافتو تبسمان ليه وهو تزير من لداخل وكيحاول ميبينش وكيهضر عادي مزال كلامها مأثر عليه وخربق ليه صورة لي كان بانيها ليها فعقلو ..

لو كان شاب اخر كان ممكن يزيد يفكر ولكن كانت مصاحبة مع امين وهاد الانسان عندو معاه عداو ومكيتحاملوش ومرضاش انه يبغي حاجة كانت فالاصل كتبغي العدو ديالو..

بقا كيهضر مع سليم بدون ما يهز عينو فيها ولايشوف جيهتها وهي كيف عادتها مكتفهمش تصرفات بنادم و واخدة كلشي بنية ومرداتش لبال لتغير ديالو ونضراتو لي كانو يشوفو فيها بحب و حنية تحولو لشك وعدم اليقين ...

بعد ما نها كلامو خرج بحالاتو وفنفس الوقت وصل اناس لطابق التاني وقف حدا جعفر وكيشوف فعفراء من لباب ما قدرش يدخل عندها وقلبو تزير كيشوف فيها وهي ناعسة وكيرجع عينو يشوف فجعفر لي باين عليه اثر ديال لكسيدة ..

تنهد بحهد ومشا جلس حداه حيد داك الحقد لي كان حاقد عليه وهضر بشوي..

اناس: على سلامتك..

جعفر : الله يسلمك..

"تبسم وهز يدو خربق ليه شعرو"..

-مزال مقلق..

اناس تزير وهبط راسو مشبك يدو لوسط وهضر بشوي..

-وخا معجبنيش الحال ولكن كلشي درتيه على مصلاحتنا ..

جعفر حرك راسو بشوي..

- مزيان من فهمتي ، انا مباغيش نضركم ولكن غير نفهمكم طريق ديال الحرام كتخرج على مولاها ..

اناس بفهم: انحاول نبعد من ديك جهة..

جعفر: الله يسهل ..

وقف دخل عند عفراء واناس تابعو حتى وقفو حداها بفرحة من شافوها فاقت..

نزل عندها قبلها فراسها وهي كتشوف فيه بعيون مدمعين وكينزلو على جناب عنيها ويختفيو فشعرها وهو كيسمح بأصابعو على خدها..

جعفر: صافا..

عفرء بحزن حطات يديها على وجهو فالأماكن لي مضروبة وقالت بصوت مخنوق حابسة لبكية..

-كيضروك..

حيد ليها يديها من وجهو وهبطهم حطهم فمكان قلبو..

جعفر: هذا لي كيضرني من كنشوفك بهاد الحالة ..

تبسمات ابتسامة صغيرة وسط دموعها..

-مقصدتش نضربو هو لي..

حط صبعو على فمها مقاطع كلامها..

جعفر: شش رتاحي نتي دابا وما تفكري فتا حاجة..

عفراء بعياء واضح: بغيت نمشي لدار عيت من صبيطار كيخنقني..

جعفر: قبلها في فمها بدون ما ينتابه لأناس لي مزال معاهم ..

-ايشوفك طبيب ونخرجك من هنا

حركات راسها وتقدم اناس مبتاسم قبلها فجبهتها كيضحك..

اناس: كنتي اتيتميني العميمة ماشي حشومة عليك ...

ضحكات فوسط حزنها وقرصات ليه خدو ..

- انا مزال قدامكم وغادي نعاود ليكم تربية وتشدو طريق مقادة ..

باسها فيديها وجمعهم وسط يدو..

اناس: غير بقاي معانا وسلخينا وربينا كيف بغيتي غير نتي امري وحنا نفدو ..

بدات كضحك بحال شي طفل صغيرة عاجبها الحال وجعفر بقا حداها كيلمس خدها بحب ..

دخل طبيب يشوف حالتها من ما لقا عندها تا شي مضاعفات خلاها تخرج ...

وقف حداها كيلبسها تجاكيط ديالو يدفيها من لبرد وهزها كاملة بين دراعة دخل ليها راسها فصدرو وخرجو مع بعض اناس وراهم هو و سليم ومينة..

وصلو لطاج الأول واناس حس بشي حاجة ناسيها وهو يتوقف من تفكر لبنت لي بسبابها بقا فصبيطار ..

حل فمو يهضر وهو يتسمع صوت انثى تنطق وخلا جسد جعفر بتوقف ..

-جعفر...

دور راسو بإستغراب من شافها امامو وبشك نطق اسمها..

جعفر: فاطمة؟؟..

فاطمة بفرح وعيونها كيبريو: نتا لي عتقتيني وجبتيني لسبيطار ياك..

"بدون وعي حطات يديها على دراعو مكتشوف تا حاجة من غيرو وقلبها كيضرب بجهد ايسكت و فرحة وجودو امامها خلاها تفقد الواقعية ديالها وتنطق بلي كيدور فقلبها"..

فاطمة: متصورش شحال تعدبت من خليتيني "نزلو دموعها بهستيريا"..كنبغيييك اجعفر كثر ما تقدر تصور..

وحده الله يعلم كم أحبك.

وحده الله يعلم كم أناجيه وأبكي بغية بقائك فيني ومعي إلى الأبد.

وحده يعلم كم عانيت من هذا الحب، وأن تمسّكي به لم يأتِ من فراغ ..

بل من رغبةٍ جامحة تعجز العقول كلها عن مقاومتها.

أحبك،

وربما لا يفهمني الكثير ..

لكنّ المهم أن تفهمني أنت؛

وتعي أن بإمكان هذا الحب أن يرميني إلى الخطر لكنني أتمسك به لأنه يقودني إليك ..

وليس هناك أدفى من طرقٍ تقودني إليك.

"حب فاطمة الى جعفر"

حبها كان جنوني ومقدراتش تغلب على قلبها ولو كل الكلام لي قال ليها مقدراتش تنساه او تحيدو من عقلها..

كان جعفر بالنسبة ليها بحال الأكسجين لي كتنفس وبلا بيه تدبال و تموت ..كانت فقط مكتافية تشوفو غير من بعيد و تريح قلبها ولو كتعدب قلبها لكن يكفي تشوفو وتريح نفسها ولكن من شافتو فالكلينيك طمع قلبها مرة اخرى ورجع كينبض بجنون لمن امتلكه وهي مراهقة فقط ..

مراهقة حلات عنيها على حب جعفر وكبرات على حبو وفكرة وحدة لي كدور فراسها هو جعفر يكون ليها.

لكن للأسف القدر كان له كتاب اخر وجعفر كانت فقلبو انسانة اخرى غيرها..انسانة لي خطفات ليها الشخص الوحيد ليبغات و تمنات فهاد دنيا ..

قربات عندو بخطوات متسارعة وعيون كيبريو اطير بالفرحة ضنات انه هو لي جابها لكلينيك و ستنتاج انه كيخاف عليها وبقا حداها وقربها...

عنيها مجاتش فالجسد لي كان هاز في يدو ، فقط كتشوف فجعفر لي هو العالم كامل بالنسبة ليها..

اما جعفر بصدمة كلمتها الاخيرة تجمد ليه دم فالعروق وزاد زير على عفراء بين يدو وبسرعة طلع يدو حطهم على ودنيها سدهم من كلام فاطمة لي مزال مابغات تفهم كلامو ولا قلبو .

وخا هو فهم قلبها وعارف عداب الحب شحال خايب وخايب بزاف فحتا هو جرب مع عفراء والفراق كان صعيب وفهمها وحاول وهضر معاها باش تا هي تفهمو لكن للأسف مفهماتوش ومزال زايدة فيه..

بعد بخطوات لور وملامحو جامدين ونطق بشوي..

جعفر: مراتي كانت فصيبطار ودابا انخرجها حيدي من قدامي..

من الفرحة لي كتلمع فعيونها تحولو ببطئ للحزن و دبلو كأنهم نضرات عجوز و ملامحها كان فيهم الصدمة والحزن عاد ركزات فجسد عفراء لي كانت ناعسة فحظن جغفر..

سرطات ريقها بصعوبة وجسدها بدا كيرجف حلات فمها تشرح لكن مالقات كلام لي يشرح موقفها ..بصعوبة حبسات دموعها وحولات تبتاسم مرغمة..

فاطمة: مايكون باس عندها ..

جعفر لي لاحظ كل التغيرات لي مرت فعينيها وملامحها خلاه يزفر بحزن وقال ..

-حمدلله و نتي صافا ..

زادت ابتسامتها اكثر وحركات راسها كطفلة صغيرة فقط بسؤالو خلاها تفرح من كل قلبها..

فاطمة: غير سخانة ماشي شي حاجة..

جعفر كمش حجبانو: معامن جيتي ؟؟...

فاطمة : بوحدي..

اناس هز حجبانو وهبطهم وبقا كيشوف فيها بصمت مباين فملامحو والو كيشوف فيها بحال شي غريب مكيعرفهاش..

جعفر من شاف الفرحة فعنيها زاد تزير عليه قلبو كثر وهبط راسو بدون ما يشوف فيها وقال..

-عيطي على شي حد من الخدامة دياولك يجي يقابلك متبقايش بوحدك..

بدون ما يتسنا جوابها خرج ودراري وراه واناس داز من حدا فاطمة هبط نضراتو ليه وضربها بشوي فكتفها خلاها تهز راسها لعندو وفور ما جات عيونها فوجهو تجمدات وخرجات عنيها بصدمة..

عرفاتو وهو بعد عينو منها وتبع دراري بدون ما يرجع يشوف فيها خلاها جامدة فمكانها..

تقدمو لسيارة وفور ما حل لباب ايدخل عفراء حلات عنيها لي ماباين فيهم تا اثر ديال نعاس ونطقات بهدوء كأنها مسمعات والو..

عفراء: بغيت نمشي لدارنا...

جعفر وافق بزربة كان اصلا غادي يديها لدارهم ..ركبات عادي وحطات راسها على لكرسي ودورات راسها تجاه النافدة كتشوف الشارع و الاضواء وملامحها هادئين ولكن لداخل فيها نار..نار الغيرة شاعلة كتحرق فيها...

وصلها لدارهم دخلات قدام عائلتها لي مصدومين وهي ما فيها لي يهضر ولا يشرح ليهم بغات غير تنعس وتكون بوحدها ترتاح ..

خلات كلشي لتحت وطلعات لبيتها بتعب رمات نفسها فوق الناموسية وجسدها كتحس بيه متغير و ممرتاحش ولات كتنفر من بزاف لحوايج لي كانو يعجبوها وتبغي حوايج مكانوش يعجبوها ...

فلتحت حعفر جالس مع عائلتها كيشرح ليهم كل لي وقع بدون ما يقول ليهم عفراء شدوها لبوليس.... عاود ليهم فقط على الحادثة ديالو هو وسليم وعفراء سخفات من سمعات لخبار ..

سي العربي: حمدلله اولدي على سلامتك من ماوقع ليك والو ورجعتي بصحيحتك..

سليم : و انا اجدي متدعيش معايا..

سي العربي تبسم: نتا اولدي فيك سبع رواح منخافش عليك..

لطوف: خاصنا نديرو شي صدقة ترد علينا العين ...

جعفر واضح فيه التعب وكيهضر بزز..

-هضرت مع طبيب عفراء وقررت نديها واحد شهرين تجلس فالقبيلة تبدل الجو ..

لطوف: الله اولدي راك عارفها مكتحملش لقبيلة وغادي غير تزيد تعصب...

جعفر كيدلك جبهتو بصداع ديال شقيقة..

-الجو ديال لقبيلة ايساعدها فالنفسية ديالها وكاينين ناس بزااف اتلقا فين تلف وقتها وزيد عمتها والحاجة ايردو ليها لبال..

لطوف بقات كتشوف فراجلها و ولاادها مصخياش بي بنتها..

لطوف: شغادي نقول ليك اولدي لبنت ولات مراتك ونتا مولاها ولكن انا مصخياش بيها و ولفتها حداية وكنبغي نشوفها كل نهار ، بعدا نتا من كتمشي لخدمة كتجيبها تجلس معانا شوي اما لمشات لقبيلة مغاديش نشوفها..

كلثوم قطعاتها : ساهل اعگوزتي نمشيو تا حنا معاها نتلفو الوقت ، اصلا مزال دارنا تما والفراش وكلشي ..

عبدالقادر: عندها الصح الوليدة وتا انا عندي هاد شهر كونجي انا وعلال نمشيو نتجمعو كاملين تم وزيد توحشت لقبيلة وناسها مكرهتش نمشي ليها..

سي لعربي: اوا من تافقتو انا ماعندي ما نقول وجدو راسكم ونشدو طريق غدا نشالله..

جعفر : انشالله...

بغا يشوفها وحشم يطلع قدام نسابو ودار ماشي ديالو باش يدير شرع يديه بقا واقف كيشوف فدروج وسي لعربي فهمو فالبلاصة وقال..

-طلع اولدي عند عفراء وبات عندنا هاد ليلة رتاح شوي ..

حرك راسو بدون ما يرفض وطلع مباشرة لعندها..

فالغرفة لاخرى فيها اناس كيبدل حوايجو ودخل عليه سليم مافاهم والو..

سليم: خارج؟؟

اناس: اممم عندي ما يدار..

سليم مخنزر: نص ليل هذا اصاحبي وزعمة هضرنا ديك طريق مبقاتش وعطينا لكلمة فخلينا رجال ومترجعناش شماتة ..

اناس ضحك بجنب ودار كسكيطة ديالو تم خارج ونطق بشوي..

-انا شحال هادي قلت ليك لكانت رجلة هكا عندك ادا ما تحسبنيش مع رجال..

خرج من دار بملامح ممفرزينش ..

حل لباب لغرفة ديالها ودخل لقاها ناعسة على جنبها ومخففة ضو وحالة فمها نصف حلة ومخلية شعرها هابط على نص وجها ومطلعة لكسوة مخلية سيقانها لبويض يبانو والحافة ديال سليب لي مطراسي كل مسائلها الانثوية وجامعة يديها على صدرها ومخلية لفرقة ديالهم تبان وتكون واضحة امام عنيه..

المشهد لي شاف فور ما دخل خلاه يسرط ريقو بصعوبة وبقا واقف مبهوض وفنفس الوقت كيمتع عويناتو مسخيش ..

قرب عندها جلس على ركابيه وقبلها فجبهتها والزفير ديالو كيضرب وجها ..تبسم من شاف ملامحها تكمشو وعضهافخدها نلاها تقفز منبلاصتها ..

جعفر هز حجبانو : علاش كتمتلي عليا نعاس...

حلات عنيها ونار الغضب شاعلة فيهم ومكتبينش و ومبغاتش تهضر لأن القوة باش تهضر مبقاتش عندها ومخليا كلشي تال صباح ..

دورات راسها منفخة..

عفراء: كنت كنوجد راسي لنعاس نتا لي داخل عندي فهاد لوقت علاش ما مشيتيش لدارك..

ضلامو نضراتو وقال: شوفي فيا اعفراء..

عفراء ببرود بقات كتشوف فجهة الاخرى وهو حط يدو على فكها ودورها عندو فيكسا وجها مع وجهو وعاود نطق نفس الكلام ...

جعفر: شوفي فيا...

عفراء تزيرات: هاني كنشوف فيك اش باغي...

جعفر قرب ليها كثر نيفو كيقيص نيفها وقال بصوت تقيل..

-شنو كيبان ليك..

بعدات راسها كتشوف فيه وببطئ بدات كتلاحض كل ضربات لي فوجهو ولفاصمة لي فخدو وفوق جبهتو والتعب لي واضح فيه وشعرو لي مخربق و وحوايجو لي مزال مغبرين كيوضحو كل ما داز عليه ليوم..

واضح انه سبقها على كلشي وكانت هي اولة ليه من نفسو ..

كل ديك نار الغيرة لي كانت تحرق قلبها خمدات وتحولات لحزن وخلات دموعها يتشكلو فعنيها ويهبطو على طول خدها وبسرعة حلات يديها ورمات نفسها لعندو عنقاتو بجهد وكتبكي بصوت خافت وهو بادلها لعناق بشوق وحط راسو على كتفها كياخد الراحة من عناقها لي كيرجع ليه الروح ..

بصوت باكي منخفظ قالت..

عفراء: كنت خايفة ..خايفة علييك بزاااف ..

"زادت زيرات عليه كثر ومشاعرها مخربقين وبالاخص معاه ولات ضعيفة بلا قياس "..

-منقدرش نعيش بلا بيك اجعفر عافك متخلااش عليا...

كمش حجبانو بسؤالها وهز ليها راسها لعندو كيتحقق من ملامحها كأنه مسمعهاش مزيان..

جعفر: شنو قلتي؟؟..

عفراء هبطات راسها كتمسح دموعها

- مابغيتكش تخلا عليا..

جعفر: شكون قال ليك هاد الهضرة ؟؟

عفرء بحزن مبغاتش دابز معاه..

-مديش عليا عقلي مخربق ومشوش وغير كنهضر بدون ما نشعر..

رجعات عنقاتو دخلات وجها فعنقو وهو مستغرب فيها وفأفعالها فين عمرها سكتات وهو مولفها جهنم كحلة مكتسكتش...

هزها كاملة بين يدو جلس فوق الناموسية ..فرق ليها رجليها جلسها فوق حجرو مقابلة معاه ..

جعفر مدور يدو ورا ضهرها كيطلعهم ويهبطهم ويدير ليها مساج فعنقها وتحت ودنها خلاتها تبورش فحضنو وقرب حدا ودنها كيهضر بشوي وصوتو مبحوح وغليض وتنفسو ساخن خلا داتها تنمل عليها وهو كيهضر فودنها....

جعفر: مال غزالي مقلقلة..

بعدات منو وقلبو كيزدح فصدرها وغطات ودنيها لي رجعو حمرين بيديها وكتشوف فيه حشمانة

عفراء: غزالك ليوم درتي ليه لگرون وليت بحال لحولي...

هز راسو كيضحك بدون ما يحس مكانش متوقع تجاوب هاد لجواب وهي متبعة عنيها فضحكة ديالو لي زادت زيناتو وخلات حرف زين يبان فخدو وسنانو بويض و مستفين زينو البسمة..

بدون وعي تبسمات كتشوف فيه وهو بزز باش حبس ودوز يدو على وجهو..

جعفر: لا حول ولا قوة الا لله نتي اتحمقيني شي نهار..

عفراء كتفرنس: غير حماق غادي نبقا معاك مهم متشوفش فيك شي وحدة غيري...

جعفر هز حجبانو كيحك لحيتو: كتغيري ..

عفراء هزات كتافها: كيف كتغير نتا كنغير انا بحال بحال مكاينش فرق..

جعفر فهم مغزا كلامها وقال..

-ما قلتي عيب ومن حقك تغيري ولكن داكشي لي فراسك غير حيديه حيت عيني معمراهم غير نتي وكيشوفو فيك غير نتي ومحماقهم غير نتي ..

بفرح زادت ابتسامتها كثر ولمعة واضحة فعنيها وهو كيدور يدو على شعرها وكيهضر بشوي..

جعفر: شنو وقع ليوم..

ختافات كل الابتسامة لي كانت فوجها وتحولات لبرود ونطقات بعصبية..

-داك الكلب ديال امين لحمار هز يدو عليا ضربني ..

جعفر جسدو كلو تزير وصدرو تنفخ وبدا تنفسو كيتسارع وهي بزربة حسات بيه وبدلات الهضرة..

عفراء: متخافش عليا اصلا كنت غادي نرسلو لقبر غير حفظو الله ومزال غادي ندم يماه كيصحاب قطع لواد ونشفو رجليه...

جعفر: متعاوديش تقربي لجيهتو خلينس انا انتفاهم معاه ..

عفراء: هو لي جا عندنا وباغي ياخد مينة بزز وزايد يقول ليها مراتي وهو اصلا تزوج ، واش هادا بعقلو ولا مزنز وزيد دوك لبوليس بانو لي اما صحابو ولا مدور معاهم حيت تجمعو عليا غير انا بغاو يحطو عليا تهمة بزز..

جعفر مكيبين والو فوجهو ومتبع مع كلامها..

-لوليس لي دخل عليهم جمال ...

عفراء: اممم وكانو كيقولو ليه شاف واقلة هو فايتهم فالمنصب..

جعفر عض لسانو من جنب وعينو كيدورو و كيفكر غير بوحدو... شافها كتشوف فيه جرها عندو عنقها وقبلها فراسها وكيهضر بشوي ما باين فيه والو..

-حاولي تنعسي غدا مسافرين..

عفراء تفاجأة: فين!!..

جعفر كيحك لحيتو على خدها : لقبيلة انجلسو شي أيام تم نحضرو لعرس كمال..

من جبد عرس كمال ما قدرات تقول والو وخا مكتحملش لقبيلة وافقات على وديت عرس كمال ..

كتفات تحرك راسها بالإيجاب وخلاتو يلعب فخدها ويدير ليها مساج فعنقها ونعاس بدا يغزيها حتى نعسات بحال شي طفل صغير فحضنو..

زرع قبلات عديدة على وجها ويديها وهزها كاملة حطها فالمكان لي حداه وغطاها مزيان وجمع الوقفة وتحولو نضراتوو لشكل اخر بعيد على كل الحنية لي كانت فيهم..

طفا عليها ضو وخرج من لبيت و مباشرة هبط خرج من دار وركب فسيارتو وشد طريق الى مكان لا يعلمه الا الله..

في مكان اخر وفوسط مدينة الرباط بجسدو الشاب متكي على سيارة وهز گارو بين صباعو كيكمي وكيسوط دخان من نيفو وكيتسنى بصبر حتى بان خيالها وهو يتقاد فالوقفة وتقدم عندها وهي فور ماشافتو وقفات فمكانها..

رما لكارو وعفط عليه وهز عينو مضببين ..

اناس: اهلا مدام فاطمة عقلتي عليا..

فاطمة بعدات بحدة لور من ريحة لكارو لي خنقاتها وبدون وعي حطات يديها على نيفها وهو هز حجبانو بالحركة ديالها...

فاطمة بصوت عادي: شكرا حيت ديتيني لصبيطار وسمح لي قبيلة متعرفتش عليك..

تبسم ابتسامة خالية من اي مرح..

-اكيد مغاديش تعرفي عليا ونتي تلفتي من شفتي راجل عمتي ومبقتيش كتشوفي غيرو..

فاطمة حسات بالإحراج : كنضن فهمتيني غلط انا كنعرف جعفر سنين هادي و ..

اناس هز صبعو مقاطعها وقرب عندها كثر كيهضر بهدوء وملامحو باردة ونضراتو قاصحين..

-انا مكيهمنيش تعرفيه ولا متعرفيهش ولكن لي كيهمني هو تعرفي انه راجل عمتي .."زير على سنانو"..وعمتي نقتل على وديتها ...

هز يدو حطهم على خدها وجسدها تصلب بخوف ويدو باردين امام بشرتها الساخنة وهو بنظرات كيف الدئب امام نظرات خايفين مثل الارنب ونطق كلامو بحال صوت التعبان في صمت الليل..

اناس: نلقاك مرة اخرى كدوري على راجل عمتي انصفيها ليك .."خنزر"..فهمتييي..

بخوف حركات راسها بسرعة كترعد..

فاطمة: ااا انن انا مابيني وبب وبينو وو والو...

اناس معصب نهض فيها : هضريي مقااد علااش كترعدي علياا هانااا بنت لييك كنااكل بنادم..

فاطمة تركب فيها بوصفير بالخلعة وضلام ودنيا خاويا زاد فشلها وخلا دموعها يهبطو بدون ما تحس وصوت شهقاتها واضح فصوتها ..

-ممم م ما ببين وبينو انننننهئ هئ هئ ..

بعيونو كيتحركو على طول جسدها وخمارها لي طويل و واسع مكيبانش تفاصيل جسدها وشعرها لي مغطي مكيبان منو والو ..

فقط وجها الاسمر وعيونها السوداء لي فيهم خوف ودموع كيتلئلئو وشفاها الحمراء كيرجفو وكتعضهم ببطئ كتحاول تحبس شهقاتها وارتجاف جسدها نتيجة الخوف من شخص الماثل امامها..

ركز كثر فملامح وجها ورجع بخطوة لور وشار بصبعو بدون ما يعاود يلمسها ونطق بهدوء..

اناس: فين داك الخمار لي كنتي مغطية بيه وجهك..

خرجات عنيها وبسرعة هزات يديها كتلمس وجها وهبطات لعنقها كتقلب ملقاتوش و رجع وجها حمر متوترة..

فاطمة: نن نسيتو ف ففف فسبيطار..

اناس بإستهزاء : الحب تلفك..

هبطات راسها مزيرة على صاك لي فيديها بدون ما تهضر وهو عاود هز گارو حطو في فمو شعلو وخدا نثرة طويلة وساط دخان فاالهوا وبصبعة الاكبر كيحك خدو باليد لي شاد بيها لكارو وراسم نفس الابتسامة على شفاه ديالو..

اناس: بغيتيه يديرك المرا تانية ويدخلك ضرة على عمتي..

فاطمة بخوف نكرات بسرعة كدور راسها يمين وشمال..

-لا مابغيتش ..

اناس جر دخان مزيان وصاطو على وجها لي تبدل ليه لون بالفعل ديالو وقال..

- اذا باغيا تحيدي عمتي وتكوني بوحدك..

ولات كتكحب بجهد وريحة لكارو تغلغلات مع الهواء لي كتنفس خنقها وعنيها رجعو حمرين...

فاطمة: انا ما بغيت نحيد تا واحد وماكنفكر فوالو غير نتا بوحدك لي ستنتجتي هادشي..

هز راسو كيضحك وغير صوت ديال ضحكتو لي كتسمع فهاد الضلام زاد فشلها بالخلعة وهو ميل راسو وقال...

اناس: علامن كتكدبي عليا ولا على راسك..

فاطمة بحرج: هو بحال خويا..

اناس هز حجبانو: نكثة جديدة هادي...

بقات ساكتة مبغاتش تعتارف ونسات انها قالت قدامهم شحاال كتبغي جعفر وزاد الخوف نساها فكلشي ..

وهو زاد معطاهاش فرصة فين تفهم باغي يخلعها ويركب فيها الخوف باش عمرها تدور براجل عمتو وهو عارف عمتو مزيان وعارفها سمعات داك الكلام وكانت غير دايرة راسها ناعسة ومابغيش عمتو تصدع راسها وتكلف هو بنفسو يربي هادي لي قدامو بدون ...

شار لسيارة لي واقفة فجنب ..

اناس: ديالك هادي..

حركات راسها بسرعة وهو مد يدو..

اناس: اري ساروت..

تزيرات وغطات صاك ديالها وهو مخنزر..

اناس: قلت ليك ارييي..

مدات ليه ساروت كتقفقف وهو كيشوف فيه جابت ليه ضحكة بكمية الخوف لي فيها..

اناس: گاع هدا خوف فيك ومشيتي تاال عند عمتي..

فاطمة بقات شادة فكلامها: انا ما مشيت لعند حد...

اناس : عندك وجه قاصح مع راسك...

هبطات راسها وعضات فمها بجهد وهو برك على بوطونة تحلات طونوبيل ..حل لباب ودخل راسو كيشوفها من لداخل وتحولو عينو لمفاجئة بالمنظر للداخل وحيت كان ضلام مشافش نوع ديال سيارة بقا عاقل غير على المكان لي سخفات فيه وجا وقف حدا سيارة الوحيدة لي بقات فشارع ..

ودابا من حلها وشعل ضو لداخل وبدا كيدور عينو تصدم وبزربة خرج وهز راسو فيها وهي غير شافت عينو خارجين رجعات لور مخلوعة من نضراتو...

فاطمة: ععع عططيتك سس ساروت عع علاش كتشوف فيا هكذاك...

اناس كيشوف فطونوبيل ويرجع يشوف فيها و بإستغراب نطق..

-فيرااري!!!!..

هزات راسها بسرعة : اه..

اناس: ديالك..

فاطمة بنفس الجواب: اه..

بقا مبهوض فيها وعقلو داه لبعيد ورجع فيه شك..

اناس: فاش خدامة؟؟..

فاطمة بالخوف لي مزال متملكها نطقات فقط كلمة وحدة...

-فالوطيل..

ضحك بجنب عقلو مشا بعيد ومولف يشوف هاد نوع ديال لبنات وبتحقير قال..

-اممم قولي نتي من هاد نوع وانا كنقول مال سيدة عندها لكنة خليجية فكلامها قولي شابعة تم ..

مفهماتش كلامو ومقدراتش تسولو يشرح ليها وهو دخل جلس وشار ليها تجلس حداه...

بقات واقفة فمكانها متحركاتش وهو طل عليها من نافدة..

اناس بإستهزاء : معنديش مع نوع ديالك غير اجي جلسي بغيت غير نضرب دورة نشوف سوقان ديال هاد فيراري كيف دايرة...

فاطمة بصوت ضعيف: مكنجلسش حدا رجال...

اناس : كتكدبي عليا ولا على راسك...

فاطمة شداتها البكية: والله ما كنجلس حدا رجال...

اناس : نتي بقا لمك غير تغتاصبي جعفر وكتقولي مكتقربيش لرجال..

كلامو هبط على لجرح لي مزال ما برا واعمالها لي غراهم ليها شيطان وخلاها تعصي الله..وخا موصلاتش لداكشي لي نوات ولكن نوات ودابا ندمات ندم كبير ومكيتصورش ..

بداو دموعها كينزلو بسرعة وهو خدم طونوبيل وبدا المحرك كيدور وكيعطي صوت قوي وديمارة شد طريق بسرعة خلاها واقفة فمكانها مصدومة وعنيها على سيارة لي كتختافي من امامها..

سايق بسرعة وعينو كيشوفو فالمرءاة ومتبع خيالها لي كيبعد وراسم ابتسامة ديال شر..

بقا غادي فطريق عاجبو الحال ومتمتع مع راسو بسياقة سيارة الاحلام وكيحسب دقايق بهدوء ..

دازت خمس دقائق وضدرب دورو رجع لمكان فين خلاها...

وقف حدا رجليها وهي لون مبقاش ليها فالوجه من خلاها بوحدها ودنيا خاوية ومعارفة فين تمشي ولا شكون طلب وتا تليفونها طافي من شارج..

خرج راسو من النافدة كيحقق فيها ومن شاف الخوف مزال فملامحها تبسم وغمزها بحرأة..

-دابا اطلعي ولا بغيتي غدا دوزي فالاخبار..

حدرات راسها ودازت ركبات حداه ودارت صمطة ولصقات فالباب مبعدة منو بأكثر طريقة ممكنة وهو بدا كيقرب تا وصل عندها وكيشوف فجسدها لي بانو تفاصيله من جلسات وبصوت هامس قال...

اناس: عمرك درتي داكشي هنا..

خافت من صوتو لي قريب حداها وبقات حادرة عنيها وقالت..

فاطمة: ششش شنو كتقصد؟؟..

اناس: نتي فاهمة و انا فاهم بلا منزيد نشرح..

عقلها مشا لجعفر وضنات كلامو موجه لجعفر واش عمرو ركب فسيارتها ..بزربة حركات راسها بنفي...

فاطمة: لا عمري...

اناس بدا كيفرنس: اش بان ليك نجربو ...

فاطمة :راك جربتي ..

اناس: هاد ساعة مزال مجربت معاك والو ..

قرب ليها شدها من فكها دورها عندو بغا يبوسها وهي تدفعو بجهد ورجع قلبها كيضرب من فهمات كلامو اخيرا..

بغا يرجع عندها وهي تهز يديها ضرباتو بطرشة بجهد خلات حنكو حمر وهو ما عقلش عليها ومعطلهاش بسرعة رد ليها ضربة صرفقها بجهد عوج ليها الحنك وخلا دم يهبط بجنب فمها...

بألم حطات يديها على خدها وبدات كتنفس بجهد ودموع مبغاوش يحبسو ليها وبدا صوت شهقاتها كيتسمعو كثر وهو زاد لغضب ديالو عماه ...

بغا يعاود يضربها وشد راسو بزر وهز صبعو كيتحلف عليها..

اناس: عمر شي بنت لمرا حطات يديها عليا بقيتي غير نتي الكلبة...

بعدات منو كثر مخشية فالباب ومغطية وجها خيفاه يضربها وباين الرعب فملامحها زاد مرضاتو بتصرفاتها..

اناس: من كتخافي علاش كتهزي يديك ولا كنتي كضني مغاديش نردها ليك..

فاطمة بصوت باكي: رجال مكيضربوش لعيالات..

اناس خرج ليها نيشن معصب...

-انا $امل تعاودي تهزي يديك انسلخ مك مزيان..

تحولو شهقاتها لبكاء صامت وهو مبقاش مصوق ليها و خسر عليها جوج كلمات..

اناس: فين ساكنة..

كتمسح دموعها وكتحاول تخرج هضرتها مقادة ودارجة عندها مخربقة فيها لكنة خليجية واضحة..

-فطانجة..

اناس كيشوف حنكو لي مصورين فيه صباعها فالمرءاة وبقاو مصورين صباعها فوجهو ..فور ما سمع جوابها هز حجبانو ورجع كيشوف فيها..

-طنجة!!.."كيتحقق فيها مزيان"..مبيناش فيك بنت شمال ماعندك لا هضرتهم ولا زينهم ...

فاطمة مزال حنكها كيضرها وكتجاوب على كل اسئلتو خايفاه يضربها..

-ماما شمالية من تطوان...

اناس هز كتافو مبقاش مصوق يزيد يسولها ..

-لخير لي اندير فيك نوصلك لطنجة وتكلفي نتي براسك مبقاش عندي ريال لي نزيد نشد ليك شي وطيل باركة غير لفلوس لي خسرت عليك فسبيطار ودوا.."ضحك بإستهزاء"..اصلا ايكون عندك كليان كثار لي كيدفعو فلوس صحيحة.."شاف فيها بنص عين "..او لا الالة فاطمة..

حركات راسها بالإيجاب لأنه فعلا لكليان كيحطو فلوس صحيحة باش ياخدو غرفة فالفندق ديالها..

هو كيهضر فجيه وهي كتفهم كلام فجيه مملاقينش وكل واحد سارح بعقلو فين بغا وبجوابها ديمارة سيارة وشد طريق سيار ..

فصمت طويل وهي بدا كيجيها نعاس وسخانة بدات كترجع ليها وكتحاول تنعس و خايفاه يدير بيها شي حاجة ورغم ذالك النعاس بحال لموت من كيجي لبنادم مكتقدرش تقاوم وبدات كتغيب ونعاس كيجرها وصوتو تغلغل الى عالم نوم ديالها من قال بصوت هادئ...

اناس: كتباني انسانة محترمة وبعيد من ديك طريق وماشي ديالها ..

"شاف فيها ورجع عينو لطريق مركز مع سياقة وقال"..

-شكون داك لهاد طريق...

فاطمة لي ضنات انه كيتكلم على سبب حبها لجعفر وعلاش مشات فطريق ديال حبها رغم انه صعب...

ردات عليه بصوت تقيل ..

-حيت هو الوحيد لي كنرتاح ليه..

اناس تزير جسدو : ولايني راكي مكتحشميش...

نعسات وهو سكت ورجع كيشوف فيها شوفات خايبين كتبان ليه بنت زنقة موسخة وندم علاش عاونها من لول وجا يشوفها...

في مكان بعيد وليل زاد فضلامو وناس ناعسة وفي ركن من اركان احد الأزقة الفارغة ... تخطف جسد محطوط على وجهو ماسك مغطي ليه رؤية باش ميشوفش ويد متحكمة فيه وكيهضر بخوف ورعدة طلعات معاه..

امين: شكوون نتووما ااا اش باااغين عععع عندي...

متسمعش صوت طرف الاخر وكاين فقط تنفس لا غير ..زادو فشلو ليه رجليه وكيحاول يهدد ويدو مكتفين..

امين: راكم معارفينش شكوون ااانا من غدا نرسلكم لحبس كااملين..

حس بضربة جاتو فدراع ليمنة خلاه يصرخ بأعلى ما فصوتو بحال شي حديدة نزلات عليه هرسات ليه عضم ديال دراعو..

مزال كيستعوب الالم ديال يدو تا بداو ضربات كيجيو من كل جيه فقط راسو لي متقاصش وهو حماها لغوات كيحس بعضام كيتهرسو وضرب قوا على رجليه تاطاح كامل كيضرخ برعب مبقاش كيحس بجسدو بكثر ضرب لي خدا ومقادرش يستحمل كثر وفألم جسدو فقد الوعي عن العالم..

ترمات الحديدة فوق جسدو لي كلو كينزل بدم وشخص لي كان كيضربو وقف عليه كامل بجسدو الضخم ونضراتو لي كيخلعو..

خلاه ملاوح وخرج من ديك زنقة وحيد لقب و وضاح وجهو كامل وعينو الخضراء كيلمعو وفالجوانب حمرين بحال دم وشعرو هابط على جبهتو وكيقطر بالعرق ...

كيحيد صباعيات السوداء من يدو وكيتمشى فوسط ظلام ما مخلي تا حد يشوفو..بعد من زنقة لزنقة اخرى بعيدة عاد وقفات قدامو سيارة ودخل ليها مباشرة ورجعات ديمارات بسرعة وقفات قدام مركز الشرطة وخرجو منها جوح اشخاص كيشوفو فبعضهم وكان واضح تفاهم بيناتهم..

دخلو لمركز شرطة ودخلو لبيرو لي بقاو فيه بجوج ونطق جمال بهدوء...

-دوز هاد ليلة هنا معايا باش ميلقاوش شهود عليك..

جعفر جلس كامل فوق الكرسي مسرح رجلو وهز راسو لفوق كيتنفس عادي وجمال حط ليه كاس ديال لما وقال..

جمال: غادي نقول ليهم كنا كنقلبو على دليل تبطل تهمة لي دارو لمراتك اما شكون ضربو انا معارفش ونتا معارفش..

جعفر حط لكاس لي شرب منو وتبسم نصف ابتسامة ودار رجل فوق رجل ومكالي راسو بيديه ويد لاخري كيضرب بصبعو طاولة لي قدامو وكتسمع طاق ..طاق ..طاق...

واخيرا نطق بصوت عادي.....

جعفر: لقيتي لفيديو لي قلت ليك...

جمال جلس فلكرسي مقابل معاه ومد ليه تليفون وخدم الفيديو لي واضح فيه كل شجار لي داز بين امين وعفراء بان هو لول لي ضربها و عفراء دفعات غير على نفسها...

بصمت ديالو جاب ليه شك ..

جمال: متقولش ليا قتلتيه...

جعفر حرك راسو بنفي: منوصلش لديك درجة...

جمال عارفو مزيان وزاد كيأكد عليه ..

-مضربتيهش شي ضرب خايب ؟؟..

جعفر تبسم نصف ابتسامة : اش بان ليك..

جمال: دوزت معاك الوقت كامل فالكلوب وعارف ضربتك تقيلة وخايبة وتوصل بنادم لإعاقة...

جعفر هز كتافو : من يفيق غادي تعرف...

اشرقت الشمس بنور ربها واصبح يوم جديد وبداية جديدة ولقاء جديد...

وقف سيارة حدا لبحر ديال طنجة وقدامو كاين طريق طالع فين كيكونو الفيلاة ودنيا كلها خضرة وزوينة كتفتح نفس وشباب فمقتبل العمر كيديرو رياضة قدام لبحر وكيستنشقو هواء نقي قبل بداية يومهم المعتاد..

فتح النافذة وخلا البرد يضربو يفيقو ويحيد ليه العياء ديال سياقة طول اليل وفمو بدا كيحرقو بغا يكمي وشاد راسو بزز مبغاتش تبقا فيه ريحة..

دار عندها لقاها متكية على لباب ناعسة وجامعة يديها على نفسها وضحك مفقوص..

اناس: نتي لي جات معاك الالة ناعسة طريق كاملة..

هزها من كتفها وبزربة فاقت مخلوعة كدور فبلاصتها تالفة ودوخة شداها..

فاطمة: ففف فين انا..

اناس:بسم الله عليك مالكي مخلوعة غير بوحدك..

بعيون فيهم نعاس كتشوف فجنابها وفطريق من شافت راسها فطنجة تنهدات براحة وبان الارتياح فوجها وهو بقا كيضحك غير وحدو..

اناس: خايفة ناكلك ولا مالكي...

فاطمة بحرج: نو ماشي هكذاك غير مولفة طنجة على المناطق الاخرى ديال المغرب حيت عمري زرتهم وأول مرة ليا فرباط هادشي علاش رتاحيت فطنجة..

تكا على لكرسي وهز حجبانو : مقلتش ليك عاودي ليا قصة حياتك..

زاد تحرجات كثر ورجع وجها حمر وهو زاد كمش حجبانو..

اناس : شحال فعمرك..

فاطمة: 26 سنة..

اناس بتاسم كيلعب بلسانو ويدوزو على دروسو ..

-راكي كبيرة بزااف...

فاطمة بغات غير ترجع لوطيل وخايفة تقوليه رجع ليا طونوبيل ويدور فيها ..بقات غير كتجاوب على اسئلتو بحال الببغاء..

-مكبيراش بزاف ...

اناس: بمقرانة بيا راكي كبييرة...

فاطمة بدون فهم: علاش شحال فعمرك..

اناس كدب عادي بدون ميرمش ولا يبان فيه اثر الكدب..

- فعمري 23 ...

حركات راسها وبقات صامتة مفهماتش علاش قال انها كبر منو بزاف وهي فيتاه غير بـ ثلات سنوات ..

خرج تليفونو مدو ليها..

اناس: عطيني نمرتك..

فاطمة برفض: تليفوني طافي ومحفظاش نمرتي..

رجع تليفون لجيبو وهز كتافو معاودش سولها وقال فقط..

اناس: طنجة هاني وصلتك ليها والله يعاونك هاد ساعة.."هز صباعو بتهديد"..نلقاك مرة أخرى كدوري براجل عمتي غادي ندفن والديك حية ..

قطعات نفس مخلوعة بكلامو وهو خرج من سيارة وشد طريق معاودش دار عندها ولا شاف جيهتها وهي براحة انه خرج وخلاها ، بزربة جلسات فمكان السائق وديمارات سيارة طايرة لوطيل ديالها خلاتو وراها كيبان شكلو من النافدة وهو هز عينو وبقا متبع لطونوبيل وكمل طريقو متوجه لفيلا ديال عمتو عائشة لي ساكنة فطنجة...

دخلات لوطيل مرهقة ومتبعة نفسياً وصحياً مقادرة تهضر مع تاواحد فالخدامة ديالها لي كيسول على غيابها ..

طلعات مباشرة لجناحها وتكلفو بها الخدامة عاونوها حيديو ليها الحوايج ودخلوها لدوش موجدين ليها الجاكوزي مليئ بالورود وزيت الخزامة عاطية ريحتو كيهدئ الاعصاب ..

غمرات نفسها فالماء الدافئ عاد حسات براحة وتكات على طرف الجاكوزي خلاتهم يتكلفو بشعرها وبمساج لرجليها ولكتافها كيحيد ستريس لي تعرضات ليه طوال الليل..

طول عمرها وهي محمية من طرف باها وكان بينها وبين رجال جدار مكيفوتوهش معاها واي واحد إلتقت به كان كيكن ليها اعجاب و احترام وعمرو فات الخط معاها اما اناس كان نوع اخر من الرجال عمرها شافت بحالو ...

نوع لي قلب ليها تفكيرها بحال شي اعصار هز تيقتها بنفسها وخلاها تخاف ومتقدرش تنطق حرف امامو..

ساطت بجهد وجمعات الوقفة والخدمات كيمسحو ليها جسدها ولبسوها ملابس النوم مافيها لي يخرج وباغية دوز نهارها غير فنعاس...

بإشارة من يديها ضلمو البيت وخرجو خلاوها بوحدها وهي تخشات في فراشها وحطات راسها على المخدة وتفيكرها مرة اخرى داها لعند جعفر وقلبها رجع كيضرب بجهد..

بعد تفكير مطول وحبها لي مزال مخمدش وزاد فالإشتعال نسات كل تهديدات اناس و هزات تليفونها وببطئ دورات لنمرة لي حفطاها عن ضهر قلب ...

عضات فمها من لتحت كتسنى طرف الأخر يقبل الخط وبعد مدة جا صوت لي هز قلبها ورجع جسدها كلو كيترعد وصوتو كان مبحوح وتقيل باين عاد فاق خلا قلبها يضرب بجهد ..

حولات تكالمي راسها وتنطق بصوت عادي ..

فاطمة: جعفر..

بقا طرف الاخرى هادئ وبعد مدة نطق بلا حول ولا قوة ليه..

جعفر:اممم..

فاطمة بعيون كيلمعو فرحانة انه مقطعش عليها وقالت ..

-كيف بقات مراتك!!..

جعفر: شوي حمدلله ونتي صافا وصلتي لطنجة.

فاطمة: وي وصلت حمدلله ...

بقا الخط متاصل كتسمع لأنفاسو وصوت الاوراق باين كيقلب الاوراق بيديه وبعد صمت نطق بهدوء..

جعفر: خاصك شي حاجة!!..

فاطمة بخجل: نو غير بغيت نسول على مراتك مسكينة...

جعفر بنفس النبرة: اوكي الله يعاونك ...

قطع الخط مباشرة خلاها معلقة وقلبها مقدرش يحبس من نبضاتو السريعة وخا كتبغي تنسا هاد الحب ولكن ما كيزيد عاد يتعمق فروحها ويخليها هايمة فشخص اسمو جعفر..

قطع الهاتف وتنهد بجهد وحط اصابعو بين حجبانو وجمال قدامو هاز حاحب ومهبط لأخر وفيديه كاس قهوة سوداء ومتبع ملامح صاحبو لي تغيرو ..

جمال: عرفتي هاد طيبة القلب لي فيك اجعفر غادي تخرح عليك شي نهار ..

جعفر بتعب واضح فملامحو نطق بهدوء.

-باها دار فيا الخير لي منقدرش نساه وفضلو عليا كبير بزااف وخا ندير لي درت مغاديش نرد ليه ولو جزء صغير من داك الخير لي دار فيا و وهي بوحدها لي عندو تكتفو ليا ليدين معاها..

جمال بشك: شنو زعمة غادي تزوج بيها ولا شنو؟؟..

جعفر خنزر: كضحك عليا ..

جمال: ونتا لي كتقول يديك تكتفو معاها ادن شنو كتقصد..

جعفر: مكنقصد والو ومرا وحدة لي عندي راك عارفها ومن غيرها مكيانش اما فاطمة كنعاملها بحال ختي غير هي خاصها وقت تنساني فيه وغادة تنساني...

جمال هز كتافو: هادشي عندك مخربق كلشي داير بيك اخويا بازلك انا كون كنت بلاصتك نرمي زمر كامل ورايا ونمشي شي بلاصة ميعرفني فيها حد..

جعفر تبسم وجمع الوقفة : كلشي كيتحل مع الوقت دنيا مسهلاش وحنا كنعيشوه كيف مكتاب لينا ولي جا من الله مرحبا بيه ..

جمال: الحمدلله على كل حال .. "شافو خارج وهو يجمع الوقفة"..فين غادي ..

جعفر: انمشي نشوف عفراء ونرجع..

جمال هز تجاكيط ديالو : انمشي معاك باش مانخليو ليهم فين يشكو..

جعفر ضحك من نيتو: دايرني طريق ..

جمال تلف :شنو كتقصد؟...

جعفر هز كتفو وكمل فطريقو مبغاش يفرش صاحبو وجمال تابعو عارف ان جعفر عايق بيه ولكن مبغاش يحطو بوجهو ..

خرجو من مركز شرطة وتوجهو مباشرة لدار سي لعربي..

جالسة فطبلة ديال لفطور هازة كاس قهوة بالحليب كتشرب منو بشوي وحنكها فيه شوي ديال زروقية من اثر الصفعة وفمها بجنب مجروح مقاداش تاكل ..

كتفات غير بكاس القهوة والعائلة كاملة كتمشي وتجي قدامها كيعمرو طونوبيلات لي واقفين قدام دار ..

لطوف :نوضي ابنتي هبطي حوايجك راه تابعانا طريق طويلة ..

عفراء: اففف غير سيرو انا انجي مع جعفر ..

دخل فهاد اللحظة مبتاسم وخلا جمال برا واقف مع علال وعبدالقادر ..باسها فراسها وجلس حداها مكمش حجبانو ومزير من شاف الاثر لي فحنكها وهي بزربة بعدات وجها..

عفراء: مكنحس بوالو معندك علاش تخلع..

جعفر قرب ليها باسها فخدها : كيف بقيتي..

عفراء: عادي غير نفس ديالي مزيرة ومعنديش شهية كنضن حيت تخلعت لبارح وتخربقات ليا الشهية ....

جعفر كيلعب ليها فشعرها وكيهضر معاها بصوت حنين ..

-بغيتي نجيب ليك دوا ...

عفراء برفض: بلاش.."شارت لمها ولعريسات"..شفتي كيف كيطيرو غير جبدتي ليهم حس لقبيلة ناضو بكري كيوجدو بغاو يديو معاهم دار كاملة..

جعفر : نتي مبغيتيش تمشي..

عفراء :انمشي انا وياك..

تنهد بجهد وحط يدو فوق يديها وزير عليها ..

جعفر:مغاديش نمشي اعفراء ، سبقيني نتي الاولى ومن بعد انا انتبعك..

عفراء تصلبو ملامحها: علاش!!!..

جعفر مزير: عندي لخدمة بزاف وخاصني ندوز شحال من جلسة ونتي سبقيني ديري بلاصتي والواجب مع كمال و أية ومن انسالي غادي نجي ..

عفراء بداو دموع كيتشكلو فعنيها ..

-خليني معاك انا اصلا مكنبغيش لقبيلة وغادي نمشي ليها غير حيت نتا غادي ..

جعفر جرها عندو عنقها : خاصك تمشي ضروري منقدرش نخليك هنا...

دورات يديها على عتقو مزيرو عليها وخسات راسها فعنقو كتبكي..

عفراء: من نهار تزوجنا وحنا مع بعض علاش باغي تفرقني عليك واش مبقيتش عجباك..

جعفر باسها فعنقها..

-نتي عارفة باش كنحس وقلبي خديتيه سنين هادي ومكيناش لمرا لي تجي فمقامك ولا توقف قدامك....

بعدات منو كتمسح دموعها وعنيها حمرين ..

عفراء: غادي تبعني ياك..

جعفر : اممم غادي نتبعك..

تنهدات براحة و وقفات على اصابع رجلها باستو في فمو وبعدات بسرعة كتشوف فجنبها ..

شدو فيدين بعض وخرجو لقاو كلشي كيتسناهم ركبات حدا خوها علال وجعفر كيوصيهم عليها مصاخيش بيها ولكن ما عندو جهد ومباغيش يخليها فهادشي لي واقع مع امين ..

جعفر : تهلاو فيها ومتضروش فيها ومتخليوش ناس لقبيلة يقولو عليها شي حاجة ومتبززوش عليها حوايج مبغاتهمش..

سي لعربي تبسم: راها بنتي اولدي وضروري مغاديش نخلي لي يأديها..

جعفر تنهد ودور يدو على شعرو ..

-ممولفهاش تبعد عليا ...

سي لعربي: عارف اولدي.."حط يدو على كتفو"..كمل شغلك وتبعنا واتلقا امانتك كيف خليتيها..

جعفر: انشالله..

خوا من طريق وخلاهم يدوزو كل واحد راكب فسيارة شدو طريق نحو القبيلة ونحو المكان لي تزادو فيه كاملين وكينتاميو ليه ..

فين تخلق اسم المنحوسة وفين ترشمات لجعفر وخداها وهي فقماطها..

بقا فبلاصتو متبع عينو لسيارة وقلبو مزير وجمال وراه نطق حدا ودنو..

-امين فاق وبلغ بيك انك نتا لي هجمتي عليه ودابا البوليس كيقلبو عليك خاصك تمشي معايا لمركز ضروري...

جعفر حرك راسو بهدوء وتوجهو لمركز شرطة فين اتنوض حرب بين اشخاص كانو صحاب ورجعو اعداء...

وصلو لمركز شرطة وقبل ما يدخل توجه لأصحاب الهواتف بدل النمرة ديالو وخرج وجمال كيشوف فيه..

جمال: بدلتي نمرة باش متعاودش تصدعك ديك خيتي..

جعفر: اممم...

جمال: وعلاش من لول متجوبهاش وتهني سوق كامل...

جعفر بدون رد خلا جمال مفاهموش وتا جعفر مكيبغيش يدوي فالقضية بزاف ومكيبغيش يهبط من تا واحد ..بدل من انه يكبر القضية ويزيد فالمشاكل وحريق راس رد على اتصالها بكل سهولة وبعد ذالك بدل النمرة بكل برود..

بلاصة انه يتكلم خلا افعالو لي يتحكمو فمجرا الأمور بدون ما يجرح ولا يهبط من قيمة احد...

دخلو لمركز اخيرا وجمال قرب كثر عند جعفر وقال..

-زعمة يكون شافك..

جعفر برفض: نو ولكن هو عارف اني انا الوحيد لي اندير ليه ديك الحالة...

جمال صاط بجهد: مسخوط الوالدين عارف اياخد قتلة وزاد فيه..

جعفر ببرود: هذا هو جزائك من كتصاحب مع شمايت وكتعطيهم فرصة باش يوليو رجال ساعة كيزيد يبين ليك شحال شماتة...

جمال سكت وكملو طريقهم فين يحلو القضية ديالهم...

في القبيلة لي جمالها لا مثيل له وجبالها كلهم اشجار والخضورية كتشع مع الشمس وكتخلي روحك ترتاح بمنضر طبيعي خلاب..

في فرحة ناسها وترحيب الكبير بناس عزازين وغالين عليهم ولي شاركو معاهم طعام وجورة ..

فالفيرة ديال كمال لي مبنية بحال شكل فيلا ودايرين بيها حقول من الورود و اشجار النخيل و الصنوبر..وفجهة الامامية كاين حقل ديال العنب داير بكوخ كيغطي من شمس وتحت منو كراسي وطوابل للجلوس وراحة ..

جالسة وسطهم مغمضة عنيها ومسرحة رجليها حطاهم فبانيو ديال لما بارد كتبرد بيه وتحيد منها دوخة ديال طريق مخلية عائلتها مع الحاجة وكمال فصالون وهي بقات برا تشم الهوا ..

جلسات خداها انثى جميلة دايرة عكاسة بزيف احمر وفودنيها حلقان دهبية وفعنقها عقيق ديال الجوهر ولابسة قفطان ابيض مخيط براندة كتبان غزالة وطايح عليها سر بحنيكاتها حمرين..

مدات كاس اتاي لعفراء وقربات ليها طبسيل ديال الحلوى..

اية: جبت ليك اتاي مسوس كيف كتبغي والحلوا محلواش بزاف غادي تعجبك..

تبسمات ليها عفراء وهزات كاس اتاي بنعناع كتشربو وتمتع عيونها فالفيلا وديكور الطبيعي لي داير بيها..

عفراء: عندكم هادشي زوين بزاااف ..

اية فرحانة بحضورها وكتعجبها عفراء بطريقة كلامها ولبسها وكفاش كتصرف وتكلم بطريقة ماشي بطيئة وماشي سريعة وكتخلي بنادم يمشي معاها فالهضرة وجمالها لي كيخطف نفس وتيقتها بنفسها لي كيخلي الواحد يحشم من راسو ...

-هادشي كلو ديال سي كمال وغير ترتاحي غادي نديك لجنان غادي يعجبك الجو تما بزااف...

عفرء حطات الكاس ودارت عندها هازة حجبانها..

-سي كمال!!! زعمة راه ايولي راجلك وخاصك تعيطي عليه كمال حرفية بدون زيادة ولا نقصان ...

اية بحرج وحناكها زادو حمارو بدات كتحك راسها وكضحك غير بوحدها..

-مزال ما مولفاش خاصني شوي ديال الوقت باش نولف عليه..

عفراء ركزات النظرة فيها ونطقات بصوت هادئ...

-وخا نهضر !! ..تقدري تقبلي مني كلشي..

اية تقدات فالجلسة : الله اختي عفراء بلاصتك من بلاصت خويا جعفر وهضرتك فوق راسي..

ماشي من عادتها تنصح ولا تضيع كلامها مع ناش خارج عائلتها ولكن اية وقصتها لي كتألم خلاتها تعز عندها فقلبها وتبغي تعاونها بلي قدات وبغات تفهمها بالكلام باش تعرف تصرف وتدير ما كيديرو ناس..

هزات رجليها من البانيو ديال لما وحطاتهم فوق الكرسي مقابلين مع شمس ينشفو و حطات راسها على يديها مرتاحة فالجلسة ومقابلة مع اية لي كتسناها تهضر..

عفراء كتطلع وتهبط بيها ونطقات بشوي..

-غلاضيتي !!..

اية كتشوف فراسها وحناكها لي زادو طبزو رجعو حمرين وقالت..

- غير راحة وتهلو ديال سي كمال ما كيخليني ندير والو وتا داكشي لي كنت نعاون بيه جاب الخدامة لي ديرو انا بقيت غير الماكلة وراحة مكندير والو ...

عفراء هزات حجبانها: يعني مرتاحة معاه ..

اية تجمدات ابتسامتها..

-شنو كتقصدي اختي عفراء...

عفراء: قصدي باين وكنضن فهمتيه ماعندي علاش نزيد نشرح...

اية هبطات راسها : وشنو كيبان ليك نتي..

عفراء هزات كتافها: كيبان ليا راكي مرتاحة بزااف وهو مهلي فيك ومكيخصرش ليك الخاطر..

اية تبسمات ابتسامة صفراء...

-عاد وصلتي كفاش عرفتي هادشي كلو....

عفراء هزات اصابعها كتعد ليها..

-نفسية دايالك لي تبدلات وراحة لي واضحة فملامحك والتهلو فحالتك من لبس وكلشي لي مكيبانش عليك وحدة كتدير تمارة ..كلامو معاك والعين لي مكيهزهاش فيك ومن وقفتو كتسنانونا نوصلو كان مقدمك نتي وهو وراك مبينك انك نتي مولات دار وعاطي تيقتو فيك..وصوتو لي كيتغير من كيوجه كلامو ليك كيبان فيه الحنية و الاحترام زايد وسميتك مزال مكيقدرش ينطقها مقادة..الخدامة لي دايرين بيك ومخليك مرتاحة وكلشي كيخدمك و كيوصلك تال بين يديك.."هزات حجبانها"...نزيدك ولابارك..

اية بحرج: هادشي كلو لاحضتيه..

عفراء: اي واحد ايلاحظ هادشي وباين كلشي ولكن لي مبينش..

"سكتات لمدة طويلو عاد قالت" ..

-ولكن لي مباينش هو نظراتك نتي ليه...

شافت فيها اية بصدمة وعفراء كملات كلامها"..

-علاش كتكرهيه اش دار ليك ..

اية عنيها رجعو عامرين بدموع وحركات راسها برفض..

-شكتفولي اختي عفراء علاش انكره سي كمال وهو دار فيا غير الخير ..

عفراء: هادشي علاش كنسولك ..لكنتي كتيقي فيا غادي تعاودي ليا اما لكنت كنبان ليك غريبة فمن حقك ما تقولي والو...

اية سكتات وعفراء بقات كتشرب اتاي ومعوداتش سولاتها بقات كتراقب المناضر الطبيعية متمتعة بالجو وصوت العصافير ورائحة طبيعة الجميلة ..

بعد تردد مطول تنفسات بعمق ورجعات كتشوف فعفراء وقالت..

اية: كنتيق فيك..

عفراء تبسمات : اذا اش واقع...

اية غارصة اصابعها فالحوايج ديالها ومقدراتش تقول ليها لي كاين وخا مكتبغيش كمال لكن جهة اخرا مبغاتش تخلي شخص اخر يشوف فيه شوفة خايبة...

- نتي عارفة قصتي كاملة وعارفة ما داز عليا.. وانا مكنكرهش سي كمال ولكن لي داز عليا خلاني نخاف من رجال بصفة عامة وكمال دار حاجة لي زادت خلاتني نخاف منو ولكن الحاجة بززات علينا هاد زواج وانا وياه مبغينش ودايرين الخاطر غير لأم ديالو ..

عفراء: يعني نتي مقبلاش هاد زواج..

اية بحزن: الحاجة باغية لولاد وانا منقدرش نولد وزيد سي كمال كبير وخاصو مرا تكون قريبة ليه اما انا مزال صغيرة وزيد مغتاصبة وخا غادي نتزوج بيه مغادي نقدر نعطيه والو ..لا ولاد لي يهزو سميتو ولا حقو ولا الحب ...

هزات يديها كتمسح دموعها وعفراء تنهدات بجهد ..

عفراء : وفنضرك كمال معارفش هادشي كامل ياك عارف قصتك وراضي بيها اذا مالكي هازة هاد لحمل كامل..

اية : و الحاجة لي باغية لولاد وكل نهار تفكرني فيهم وتوملني لعشوب باش غير نتزوج نحمل فشهري لول وانا مقادرة نقول ليها والو..

عفراء : الحاجة كبرات .."هزات حجبانها"..شحال گاع اتبقى معاكم ، عام عامين خمس سنين لطولنا ڭاع..وخا الاعمار بيد الله ولكن بنادم من كيكبر راه باين كلشي ونفترضو گاع مولدتيش اش ايوقع فالدنيا...

اية تزيرات: غادي نسمع لمعيور ويقدر سي كمال يعاود يتزوج وانا مقادرة على هاد تمارة كاملة يكفي دنيا تقلبات عليا ودات ليا كلشي ومقادرة تعاود تقلب عليا ونعاود لعداب من جديد ... وخايفة قلبي يتعلق بكمال وفلخر يبدلني ويخليني فطرف تا حد ما يساومني..

عفراء تعصبات: واش وليتي خضرة ولا لحم باش يساومك شهاد الجهل فيك..

اية: هدا هو الواقع اختي عفراء ..وخا نبغي نهرب من الواقع ايبقى تابعني حياتي كاملة ...

حولات تشرح ليها وتفهمها وتنصحها كأخت لكن فور ما شافت خيال ديال كمال ورا شجرة مكيبانش لأية و واضح سمع گاع الكلام ..

سكتات وشدات كلامها بين لسانها وخلات نصيحة لوقت اخر وبدلات لكلام كامل وقالت..

عفراء: شكون قال ليك كمال مكيبغيكش!!..

اية بألم تبسمات ونطقات بصوت مرتجف حابسة البكية وضلم كاملة لي تعرضات ليه..

-شكون ايقبل على وحدة بحالي اعفراء..

عفراء: زوينة ضريفة شكون لي مغاديش يبغيك..

اية بحزن: نتي عارفة شنو كنقصد اختي..

عفراء بدلات سؤال: ونتي واش كتكرهيه بصح!!..

دورات وجها لجهة الأخرى بدون رد على سؤال عفراء وبقات كتشوف بعيد وتا عفراء معوداتش سولاتها ..

تحل الصمت بيناتهم وهي كتشوف بنص عنيها جهة لي كان فيها كمال ولي مبقاش ... تبسمات نصف ابتسامة وكملات كتشرب اتاي عاجبها الحال ..

يتبع...