قدر المنحوسة الجزء الرابع (بداية الفصل الثاني)

لست كتلك ... ولا أشبه هذه ... وليس لي صله بهؤلاء النسوة.

لا أدعي الملائكيه ولا أنزه أنوثتي وأميزها عن غيري أنا ...

"مختلفه وحسب"...

أنا لست امرأه كباقي النساء ... أنا لست شهرزاد الخائفة ولا بثينة العاشقة أو ليلى الهادئة ... أنا لست طفلة أبصرت للتو ولا مراهقة تحاول إثبات نفسها أنا لست مثل أمي ولا أشبه صفات أختي ولم أرث الطبع من جدتي أنا لست كباقي النساء ...بداخلي روح مختلفة.

وقلبي لا يشبه أي قلب امرأة...

عنواني:

"لا أركع لأي انسان"

أنا لست جارية من جواريك ... تهواها ثم تهينها كما تريد.

أنا امرأة عزيزة النفس ... وكبرياؤها عنيد.

وإن كنت حبي قاصد ... فلأكن في قلبك الوحيدة.

....... وإلا .... دعني وشأني.

هكذا أنا دائما، أضحك بصدق ... وأحب بصدق ... وأحزن بصدق.

لا أجيد أبدا لعب الادوار ...

ولا أتقن لبس الاقنعة!!....

عندما أبكي فأنا فعلا اتألم....

وعندما أضحك فأنا فعلا سعيدة...

أحب مشاعري كما هي...

فلا تستفز ""أنوثتي""

..كي لا ابعثر ""رجولتك""

"عــفــراء جعفر"

"بعد مرور 16 سنة"...

في صخب المدينة و نشاطها بسكانها و عمالها و متاجرها المزدهرة...بين الاحياء النضيفة و جميلة المنضر يقبع منزل بثلات طوابق ..قدام لباب كتنضف امرأة متوسطة العمر بلباسها المنزلي لي مكون من بيجامة بسروالها مع زيف حياتي مدورة بيه راسها ...

عاطية لخاطر لتجفاف و تصياق قدام لباب ولي داز من ديك طريق كيبقى يشوف فيها بنضرات فشكل بينما هي ممصوقاش مبينا حداكتها و شطارتها...سمعات اسمها وهي تهز راسها فشخص لي كيعيط عليها...

كلثوم كتندب فحانكها: واش يماك حماقيتي دخلي لدار قبل ما يجي علال و يشوفك بهاد لحالة يدير ليك نهار ...

بشرى حطات يديها فوق راسها كتقاد فعكاستها : ومالي اختي شكندير گاع او ما بقى حد يجمع قدام بابا دارو ...

كلثوم: دخلي يا المسخوطة راه ناس لمدينة مكيشطبوش زنقة و نتي قرن و زمارة ساكنة هنا و مزال تحسابي راسك ساكنة فدوار ..

بشرى : سيري بحالك اكلثوم لقيتي لي يضحك عليك و انا مغديش ضحكي عليا بهاد لكلمات و منخليش ناس يعيبو عليا بلعفن ...

عوجات كلثوم فمها و دخلات مخنزرة بينما بشرى بقات كترش و تشطب تا شطبات زنقة كاملة و نقاتها عاد دخلات وسدات لباب وراها..طلعات كتمسد فضهرها ..دخلات لصالون حداهم وتكات فوق صداري سخفانة ...

لطوف: قلت ليك دوزي تجلسي راه مالين زبل كيديرو كلشي مع صباح ولكن يا بنتي مكتسمعيش قاعدتك هي قاعدتك ..

بشرى: اوا الله يخطيك اعكوزتي بلاصت تشكريني هازة عليك حمل دار جالسة تعايريني نتي وهاد مرت ولدك ...

كلثوم حاطة رجل فوق رجل لابسة بيجامة خفيفة كتبينها صغر من سنها و مصبغة شعرها و هزاه بقراص ..حاطة صباغة قدامها كتصبغ فضفارها و تخنزر فبشرى..

-حضيني انا لي بقيت ليك ياك كندخل نعاون فالكوزينة و نجمع دار شبغيتي مزال..ولا نتي يعجبك كل ثلت ايام نهزو صالونات نطلعوهم لصطح و نصبنو طلامط و نحكو زرابي عاد باش تهناي...

كلثوم: شكتعرفي نتي بعدا ..تمدنتي كثر من لقياس تا عبتي تواضعي شوي راه كلنا ولاد قبيلة وحدة ونتي بغيتي طيري ...

كلثوم: باااز اختي واش بغيتي تحشمي ناس يكبرو يديرو عقلهم و نتي عاد زايدة فيه معدرت عفراء ديما مدابزة معاك حيت كتعصبييي...

كلثوم بعصبية شافت فلطوف : شفتي اخالتي شكتقول هادي كتعايرني فوجهي بلا حشمة ...

لطوف : وباركة من شد قطع راكم كبرتو و ولادكم وصلو لزواج ديرو عقلكم شوي.."هزات صبعها فبشرى" ..ونتي نقصي من لحداگة بلا وقت راها كتجيب غير لعين ولا شافك علال بلا ماتجي تخباي عندي نخليك منك ليه و الله لافكيتك منو ....

كلثوم هزات كتافها مقلقة: انا ما درت والو وعلال غير كيزيد فيه و مغيار كتر من لقياس اي حاجة درتها يبدا ينگر...

كلثوم: قولي كتعصبيه اما الغيرة ليها حدود اختي ..او تهلاي فراسك شوي شوفي غير حالتك ... تقابلي مع علال تحشمي ، جات معاه لمدينة و كيبان على مزيناتو تلقاي شحال من وحدة حاطة لعين عليه..وبقاي نتي مع ديك لكوزينة تايجيب عليك درة باش عاد تهناي...

بشرى ولا وجها حمر تقرصات..

-صااافي هادش لي تعلمتي من ديك صگعة هي ضل تعايرني و نتي تعاودي عليا لهضرة كيف لغراب...

كلثوم: نتي كلشي عندك معيور معدرت ما كتفهمي تا زبلة ناس ينصحوك و يفهموك ونتي حاسبة كلشي معيوور و ديك لي قلتي صگعة بعدا صدقات لالة ومالي عارفة كلشي ومن صغرها قافزة وحارة ماشي بحالنا غير مكلخة على ختها...

لطوف تنهدات بجهد مولفاهم هكذا تا ولاعندها غناهم عادي ..

-شفت لبنات مزال مجاو ...

بشرى: مينة راكي عارفة كتشد طريق وحدة غير لمعطلتهاش عفراء كيف عادتها ...

كلثوم: لفاك بعيد خاص جبدا ديال طريق وزيد طوبيسات كيكونو عامرين محال يجيو فوقت لغدا ...

بشرى مفقوصة: غير تبعد ديك طير على بنتي و متبقاش تساري بيها زناقي كون راها دابا فدار...

كلثوم جمعات لوقفة معصبة مكتفاهمش مع بشرى..خرجات كتنگر...

- كون ما كانت عفراء لي كدي وتجيب ديك لمطرطرة ديال بنتك كون تلفات شحال هادي ...

كلثوم : شكتغبني نتي تم ...

كلثوم: لفاتك الهضرة قولي سمعت ...

لطوف حطات يديها فوق راسها كتسوط مالقات ليهم جهد وهما دايرين كيف ضريريات نهار و مطال مدابزين وحدة ما تفهم تانية ...

امام احد المقاهي المتواجدة في وسط المدينة..كتمشى انثى ساحرة للعيون و جميلة الملامح ونضراتها تجعل من يراهم يغيب عن محيطه مفتوناً بهم ..

تتمايل في مشيتها الانثوية لتبرز تداريس مفاتنها الناضجة و خصلاتها الذهبية المربوطة على شكل ديل حصان تهتز مع حركتها المغرية ...هازة تليفون فيديها كتقلب فالمساجات وكتقرا بهمس و شفتيها الممتلئتين كيتحركو بلطف مع برائة ملامحها لي كتميز بيه عن الكل ..

لابسة لباس عادي ولكن مع جمالها و تشكل جسدها عطاها رونق خاص بحال شي عارضة كتمشى فالمسرح و الضوء مسلط عليها بينما الحضور هم المتفرجون ..

مسكها شخص من دراعها برفق ونطق بصوت ذكوري غليض ..

-عفراء...

بعدات نضراتها من لهاتف و هزاتهم فشخص لي وقفها ..ركزات عنيها بلون الرمادي الفاتن فشخص و بصوتها العدب قالت...

عفراء: مازن..مالك؟؟؟...

تبسم ابتسامة جميلة زادتو وسامة اكثر ..

مازن: عيطت عليك صباح علاش مكتجاوبيش...

عفراء:سمح ليا من كنكون مع العائلة مكنجاوبش فتليفون ...

مازن كمش حجبانو : يكما درت ليك شي مشكل مع داركم ...

عفراء عضات طرف لسانها : نو عادي غير خوتي شوي صعاب معندهمش عادي بنت تهضر مع دري ...

بعيونه لي مخبئة تحت النضرات مراقب كل تحركاتها واضح انه ثفتون بيها لدرجة لا تتصور ولكن داير حدود لأنه من نهار تعرف عليها وهي دايرة حدود على نفسها ما كتخلي تا حد يتزاوجها..عض شفاهو السفلى بإعجاب وقال..

مازن: فكرتي فداكشي لي قلت ليك ...

زيرات فمها على شكل خط لتواني عاد نطقات..

عفراء: صراحة مزال خاصني وقت كثر ...

مازن بدون فهم : علاش واش خايفة اني نخوي بيك...

عفراء بيراءة حطات يديها على دراعو : نو ماشي هكذاك ولكن هادشي لي قلتي لي صعيب انا من عائلة محافضة وعائلتي ممتقبلاش اني نخدم فداك الميدان ...

مازن تزير : ولكن قلتي ايعاونك راجل ختك باش يوافقو والديك..

عفراء حركات راسها بشوي : حاليا راجل ختي مسافر وهو الوحيد لي يقدر يعاوني باش نقنع عائلتي خاصني مزال لوقت ...

مازن تنهد بجهد وحط يدو فوق يديها : عفراء نتي زوينة بزااف ومزال صغيرة وتبعاك لخدمة كتيرة وانا مشروع ديالي بغيت نبداه معاك كأول عارضة انطالق بيها فمسيرتي حاولي تزربي الامور لان الوقت كيضيع بين يدينا ...

عفراء تبسمات بهدوء : غادي نحاول لي عليا ..عطيني اسبوع نعطيك جوابي النهائي ...

مازن: مهم فكري مزيان راكي عارفة الخدمة ديالي واعرة وكتحتاج سفر وبزاف لحوايج ونتي الوحيدة لي لقيت فيها متطلبات ديال عارضة لي بغيتها تلبس تصاميمي و تشهر ديهم ...

عفراء نزلات راسها بإحباط.. اكيد من صغرها عندها هدف ولكن من كبرات لقات بزاف لحوايج حابسين ليها طريق و اولهم تفكير ديال عائلتها لي مزال محافضين على نفس القيم لي كانو عليها فالقبيلة...هزات راسها مرة اخرى نحو مازن لي كيشوف فيها بحب وكتفات فقط تحرك راسها ..

مازن شار بصبعة لسيارتو : طلعي نوصلك لداركم

عفراء برفض: نو بلا ما نعدبك كتسناني بنت خويا انمشي انا و ياها لدار ..

خلاها.على راحتها و بعد الوداع تفارقو وهي بقات واقفة متبعة ليه عنيها بصمت..

كان مازن من اب مغربي و ام صينية..عاش حياتو تقريباً فامريكا و فقط هاد سنوات الاخيرة دخل لمغرب بطلب من الاب ديالو وبدا بمشروعو لخاص لكن المغرب كان بحال شي حفرة مكتخرجش لان ناس هنا مكيهتموش بالموضة او الملابس المصممة خصيصاً ولقى موهبتو كتموت فهاد لبلد ...

واول ماشاف عفراء لقى الشخص لي يحتاج لأن جمالها فقط كافي يجبد كل الأنضار ..كان فعمرها انداك فقط 18 سنة و رغم رفضها بقى تابعها بدون ملل طول هاد سنوات حتى ولاو اصدقاء قراب جداً رغم اختلاف السن بيناتهم و من وصلات لسن 22 مبقاش قاد يتسنى لأن العمر مهم جدا فحياة العارضة و خاصها تبدى وهي صغيرة لدا ضغط عليها تعطيه جوابها النهائي باش يعرف شنو يدير الا رفضات عرضو المغري ...

شدات طريق بعد ما تفرقات مع مازن ومركزة مع هاتفها كتكتب ميساج ساهية حتى لقات راسها داخلة فجسد صلب ..

تأوهات بصوت مرتع مقصحة ..خرجات عنيها فشخص لقاتو حادر راسو كيجمع لوراق لي طاحو ليه من تساطح معها ..عضات جناب فمها وحدرات كتجمع معاه لوراق وهو مهزش فيها راس ..قربات يديها لعندو تهز ورقة كانت حداه ولكن هو سبقها وجات يديها فوق يديه ..فور ما شاف يدين انثى بعد يدو بسرعة وكمل كيجمع لوراق بشكل عادي خلا عفراء مصدومة فمكانها ...

عفراء : مبغيتش نشد ليك يديك كنت بغيت نعطيك غير لورقة ...

شخص بصوت رجولي خشن : ماشي مشكل انا انجمعهم ...

عفرا ء زادت كمشات حجبانها كتر : ولكن نتا لي دخلتي فيا خاصك طلب مني سماحة ..

سكت لتواني كيقاد لوراق فملف عاد نطق بهدوء..

_انا كنت واقف نتي لي دخلتي فيا ...

زاد عصبها كتر : واش والديك معلموكش الاحترام تشوف فناس لي كتهضر معاهم ...

تزيرات يديه على الملف و وجهو رجع حمر .. بسرعة جمع لوقفة كأنه ما وقع والو ..تجاوزها بدون ما تجي عينو فيها كأنها غير موجودة ..ولكن بديك نفس لي فيها وقفات قدامو هازة نيفها لسما ...

عفراء : طلب سماحة ولا غادي نجمع عليك امة ديال لبشر ونقول ليهم كتبسل عليا ...

هز راسو لعندها بعصبية وركز عينو فعنيها وفور ما تقابلو عنيهم تجمدو فمكانهم بحال شي حاجة مساتهم بجوج لداخل وخلاتهم يحسو بإرتباط عجيب ..تسارعات دقات قلبو بشكل جنوني وهي واقفة امامو بجمالها الصارخ و نضراتها الساحرة ..كان هو اكثر تأتيراً كأنه وجد روحو او حاجة اكبر من ذالك بكثير ..ولكن هي كانت اقل تاتيراً بسرعة رجعات هدوء لقلبها ونطقات بعصبية ...

عفراء : جمع عنيك قبل ما نتقبهم ليك ...

بدهشة فتح فمو لتواني ومن فهم كلامها هبط راسو ببعض الاحراج الظاهر على ملامحو وخطى خطوات بسرعة بدون ما ينطق ..من شافتو هارب جرات قامجة ديالو بجهد قطعاتها ليه من جنب خلاتو يخرج عينو فيها معصب ...

_ابنت ناس جمعي يديك شوي ..ماشي حتارمتك وما هزيتش عيني فيك ديري ما بغيتي ...

عفراء بكره نطقات ما بين سنانها : و الله لا تفارقت معاك تا طلب سماحة ولا ما غاديش نطلقك وخا يوقع لي وقع ...

خنزر فيها كتر وجر ليها يديها بقوة بعدها منو وكمل طريقو متسوقش ليها وهي بقات كتطبخ فبلاصتها محملاش راسها ...

بعد لخطوات بساط و قلبو كيضرب بجهد خلاه يوقف بلا ما يحس ..دور راسو فين كانت ما لقاهاش بقات عينو كتقلب عليها بين كل ناس ولكن بدون فائدة حسها مكاينش ...زير على يدو من حس براسو شنو كيدير وهو يكمل طريقو كيحاول يقمع هاد شعور لي خالج كيانو بحال العاصفة ...

تقدم لسيارة لي جالس فيها شاب فمقتبل العمر فور ما شافو خرج من سيارة مكمش حجبانو ...

-جعفر ياك لباس مال القامجة مقطعة ليك ...

جعفر بهدوء : والو ا امين غير تقابلت مع واحد لبنت ..

امين بصدمة : نتا أصلا من نهار عرفتك عمرك درتي جهة لبنات تا سلام مكتسلمش ..شكون هادي لي تلاقيتي بيها واش بنت من العائلة ...

جعفر دخل لطونبيل معصب : مكنعرفهاش ...

ركب حداه امين بنضرات شك ولكن عارف جعفر حدودي بزاف مع لبنات ومكيهزش فيهم العين وخا تصاحبو غير فلفاك ولكن كيعرفو بعضهم مزيان ..بسرعة بدل الموضوع من شاف الملف لي هاز فيدو ...

امين : اش درتي مع سيد قرر يكري ليك ولا مزال ..

جعفر حط راسو على لكرسي وساط بجهد بحال شي حاجة قابضة على قلبو و مزيرة على التنفس ديالو ..بقى صامت لمدة عاد نطق ...

-ساليت كلشي مع سيد وخا لبلاصة غالية ولكن جات فسونطر مزيانة لخدمة ..

امين : هي صافي اتبدا لخدمة نيشن...

جعفر : مزال شوي واحد شهرين ...

امين : وشنو كتسنى اصاحبي راه خاصك دغيا تفتح المكتب باش يالله تجبد لكليان بشوي تا تعرف فالمنطقة مزيان ..راه خدمة ديال المحاميين صعيبة و زيد نتا و العيالات مكتقابلوش يعني اتخدم غير مع رجال و القضايا ديالهم ...

جعفر: مكيهمش شكون الكليان المهم نخدم بالقيم ديالي كمحامي وربي يرزق من عندو ...

امين: الله يسهل اخويا تستاهل كل خير..." ديمارة سيارة"...الواليدة دايرة لغدا على حسابك نمشيو ...

جعفر حط صباعو على جبهتو كيدلكهم : مرة خرا هاد لعشية خاصني نسافر...

امين : فين بسلامة ...

جعفر : لخميسات ..انزور قبر والديا ....

وقفو سيارة فحي شعبي فالمدينة لقديمة ...نزل من سيارة و الملف فيدو و كيهضر مع امين ..

امين : تبغي نمشي معاك ولا نسلفك طونبيل...

جعفر : بلاش غادي نجلس واحد يومين تم...

توادع مع صاحبو و شد طريقو نحو دار قديمة متكونة من تلات طوابق..طلع فدروج حادر راسو من لبنات لي كيدوزو من حداه ..حل باب دار لي ساكن فيها وسدو بجهد من شاف بنت جار جايا كتعوج عندو ...

تنهد بجهد وتوجه لكوزينة هز قرعة ديال لما و رجع دخل لبيت نعاس..تكى فوق ناموسية باين عليه لعيا و تمارة و فور ما غمض عينو جات صورة لبنت لي دابز معاها بين عينو ..دغيا جمع لوقفة و وجهو رجع حمر..

لعن شيطان مبغيش يفكر فيها..بدا كيحيد حوايجو و كيبرز جسدو الأسمر وعضلاتو البارزة و شعر لخفيف لي مزين صدرو وهابط تال كرشو لي زاد فجمالو كتر..بأصابعو لمس سنسلة لي فعنقو لي سنين عمرها فرقات عنقو ...

بداو عنيه كيلمعو من تفكر ديك طفلة لي شاركات معاه طفولتو وتربط اسمو مع اسمها ...غمض عينو ونطق اسمها برجفة ضاهرة فصوتو ..

-عـــفــراء....

سهى و عقلو داه لزمان نسا فيه راسو و المحيط لي هو فيه بقى فقط كيتخيل تا ادن لعصر عاد فاق من سهوتو ...دخل لكوزينة دار لما يسخن وتوجه نيشن لدوش دفى لما فسطل وبدا كيدوش يحيد لعيا ديال نهار ...

عايش على قد لحال وراضي بلي عندو مكيحسد ما كيشكي ..خدم على راسو وهو مزال كيقرا جمع ريال على ريال باش يقدر يكمل قرايتو و ها هو ليوم تخرج محامي و بدا كيقلب على لمكان لي يبدا فيه خدمتو كيف كل ناس ..

لوا فوطة على خصرو وفوطة كيمسح بيها شعرو لي كحل بحال ضلام ليل و عيونو فلون الأخضر الصافي بحال شي غابة مزينة بشجر و شمس كتلمع فوراقها ..بلحية خفيفة مزينة وجهو رجولي لي زاد فنضج ديالو مختفي داك طفل لي كان عليه واصبح رجل كامل جمالاً و خلقاً...

لبس شورط قصير وعمر ساعة على لوقت لي ايسافر فيه ..تكى فوق ناموسية ناعس على كرشو تاني رجل و رجل مخليها طويلة ..خاشي راسو تحت لمخدة و ناموسية لي كانت كتبان كبيرة ولات كتبان صغيرة من نعس فوقها بعرضو و طولتو ..

ضرباتو لفيقة مع الوقت لي محقق عليه ساعة ..جمع الوقفة و مزال نعاس شاد فيه..دخل دوش توضة و خرج لبس فوقية و سرح صلاية..صلا صلاتو بكل خشوع كيف عادتو ومولف...

لبس حوايجو وهز صاك لي كان جامع فيه كلشي لسفر..خرج من دارو و شد طريقة مهبط راسو و داير ليزيات طالق القرأن و كيردد معاه فنفسو..وصل المحطة شاف عيالات كيتسناو وهو يوقف بقى بعيد تا وصل لكار تسنا تا طلع كلشي عاد طلع جلس حدا راجل كبير و دور عينو لجاج كيشوف طريق لي شحال ما مشا فيه..طريق نحو الخميسات فين تزاد وعاش مع ميمتو...لقبيلة لي تربا فيه و عاش فيها احسن لحظاتو مع ميمتو...

فلمدينة دخلات عفراء كلها كتسوط و تبعاها مينة وجها حمر كتشوف فعفراء غير بنص عين بزز باش قدرات تنطق..

مينة: عمتي..

عفراء دارت عندها بعصبية : يخويي ليك درااس اختي اش بيني و بينك باش تعيطي ليا عمتي...

مينة : ومالكي ماشي خت با...

عفراء : راني انا وياك بنات عام واحد ابنت الحرام عيطي عليا بسميتي و باركة ما تمسكني راني عارفاك من كتعيطي ليا خالتي اش باغية..

مينة : وصافي اعفراء راه والله مكنديرو شي حاجة ديال لعيب وهو كيبغيني

..

خنزرات عفراء معصبة: راكي نتي لي نية والواد لي جا يديك..انا قلت ليك من تخرجي من لفاك تسنايني تا نجي ماشي تجلسي مع هداك فالقهاوي ...

مينة :اش فيها لجلسنا فالقهاوي مدرنا حتا عيب كلشي كيجلس فيها...

عفراء: اييه ما فيها عيب لكن هداك لي جلستي معاه هو العيب براسو..واش ناس يشوفو فوق منهم ونتي تشوفي تحت منك ..ناس يقلبو على ما حسن ماشي على ما كفس...

مينة: ومال امين كيف جاك ولد ناس و ضريف وها هو تخرج و مابقى ليه والو يولي محامي و يجي يخطبني كيف مواعدني...

عفراء بإستهزاء : كضحكي على راسك امسكينة شفتي داك نوع نهار يخدم اول واحد ايقلب عليها هي نتي و يقول ليك الواليدة خطبات ليا بنت خالتي....

مينة عمرو عنيها بدموع: اصلا هو هضر مع مو عليا وهي باغياني وغادي تجي تخطبني ليه ماشي كاع ناس ولاد لحرام كاين ولاد لحلال و امين ولد لحلال و شفتي شحال عايرتي فيه وما خليتي ما قلتي ليه مسكين وهو ديما ضاحك عمرو قال الخايبة فوجهك... وعمرو يخليني وهانتي اتشوفي بعنيك نهار يوجد راسو ايجي يخطبني من دارنا ونتي موتي بهاد سم لي فيك...

دازت من حداها مخنزرة خلات عفراء غير كتشوف...

عفراء: اوا سري انا الالة لي ديما معاوناك و نخبي على خويا.. نتي تجمعي مع هاد راس طارو وانا نكدب على خويا و نقول ليه معايا ومن تبغي تلقايه نخرج معاك و نسترك

..

مينة: تا حد مقال ليك عاونيني اصلا...

عفراء : ايه نستاهل انا لي منسواش البقرة اوا هاني ساكتة تا نشوف هادشي فين ايوصلك...

مينة: غير بعدي منا ويكون خير..

عفراء بعصبية: اجي لهنا كفاش نبعد منك راني عمتك الحمارة و باغية ليك الخير كثر مني...

مينة تفقصات: الخير لي ديريه فيا هو عمرك تجبدي ليا امين انا كنبغيه وهو كيبغيني وعمري نقدر نعيش بلا بيه ....

عفراء جراتها من شعرها :مالو اوكسيجين متعيشيش بلا بيه.. الما و شطاب تال قاع البحر ونلقى مك تلاقيتي بيه ورا ضهري نقتل يماك.. مزيان ضحك عليك بجوج كلمات بديتي تابعاه كيف البقرة...

مينة كتبكي بنتفة لي دارت ليها عفراء..

-وصااافي طلقي راكي ضريتيني تفوووو...

عفراء مجننة دفعاتها بجهد وجرات صاك حلاتو خدات منو تليفون...

-لكان راجل يعيط عليك نسمعو خل ودنيه ...

مينة: تفوو على مسمومة كيف دايرة رجعي ليا تليفون ديالي وماشي سوقك معامن كنهضر...

عفراء:نسميك مرا اجي خوديه مني .."هزات صبعها كتحلف"...من اليوم مكاين خروج ولا هضرة كانت شي حاجة مهمة رجلي برحليك.. .نشوف هاد امين اش تحت راسو.. ربع سنين مصاحبين و مزال ما جمع راسو.. شنو يخليك بايرة يضحك عليك...

مينة : مكاين لبايرة قدك تا حد ما غادي يساومك بهاد سم...

عفراء : يساومني مالي وليت بطاطة.. سيري سولي لطوف شحال من واحد جا يخطب وانا لي كنردو.. دوزي قدامي دخلي وديري لعز راسك.. ناس يقلبو على لي لباس عليهم و نتي لاصقة ليا فمزلوط كيكساب طونبيل كلها مخرششة بحال وجهو...

دخلو لدار وحدة منفخة على لخرى توجهو نيشن لبيتهم خلاو مالين دار مفاهمين والو...

لطوف : مال هادو تاني...

كلثوم : ديما هما هكدا مديش عليهم شوي و تلقايهم مصالحين...

هبطات عفراء مبدلة حوايجها لبيجامة ديال دار و دايرة ماسك لوجها و لعنقها.. من صغرها كتبغي نقا و زين ومزال كيف ما هي مهلية فراسها و عاجبها راسها...جلسات حدا مها لي كتشوف فيها ودور راسها تشوف فعريساتها كتهضر معاهم غير بالعنين ..

لطوف : عفراء بنتي يغيت ندوي معاك...

عفراء ملهية مع ضفارها كتقادهم: ياك لباس يكما ختي عيشة مبقاتش غادي تجي...

لطوف : لا ابنيتي غادي تجي دوز معانا شي يامات وخا راجلها ولا خدام فطنجة و بعدو علينا مزال مسكين يجيبها كل شهر تشوفنا بقا بعدا وافي بكلمتو الله يعطيه صحة...

عفراء:اوا علاش باغية تهضري معايا..

لطوف قاصت شعر ديال بنتها كتلمسها بحزن : راكي شفتي ابنتي عرس بنت جارتنا ايكون غدا نشالله وحنا معروضين...

عفراء بدون فهم : و انا مالي...

لطوف : انا ابنتي عيانة شوي و مقدراش نمشي بغيتك تبقاي معايا تنوسيني مكاين نيت علاش تمشي و العرس ايكون غير فزنقة بقاي معايا حسن...

عفراء هزات راسها كتشوف فمها : علاش متقوليش ليا نتي منحوسة و مبغيتكش تمشي لعرس باش متنحسيش لعروسة و تخرجي على عرسها...

لطوف : لا ابنتي ماشي هادشي لي قلت...

عفرا وقفات معصبة : نتي امي ديما دايرة ليا هادشيي مزال فيك عقلية ديك لقبيلة لكحلة لي عشنا فيها ..كثر من عشر سنين ومزالين كتشوفو فيا ديك المنحوسة واي حاجة وقعات و كنت انا وسطكم كتقولو نحس عفراء وكلشي كتلصقوه فيا...

كلثوم: صافي اختي عفراء راه غير مبغيناش ناس يهضرو عليك ...

عفراء رجعات حمرة كتنفس بجهد : مسوقييش فناااس شوفو نتوما و شنو كتخرجو من فمكم لي قراب ليا اما البراني علم الله شنو كيقول...

خرجات بشرى من لكوزينة هازة مغرف فيديها كتشير بيها لعفراء ...

- مالكي كتغوتي تاني مك هضرات معاك بشوي جاوبيها يشوي ولا عزيز عليك شوهة...

عفراء : مهضرتش معاك نتي دخلي سووق راسك...

بشرى: ما حدي عايشة وسطكم ندخل فاش ما بغيت راه كلشي قدامك غير لا بغيتي تكوني عمية..ديما نحسك سابقك غير داك نهار جاو لخطاب يخطبو مينة سيد كيف جلس تبدل وحمار من خرج ما عاود رجع..

عفراء : سيري شوفي بنتك اش قالت ليه بلاصة طيحي الباطل عليا ...

بشرى : بقات ليك غير بنتي فلحساب من نهار تولدات ونتي خارجة عليها...

لطوف شافت فعروستها مخنزرة : بشرى ماشي وقت لكلام هذا...

عفراء: لا غير خليها تهضر اصلا واحلة ليها شحال هادي خليها تخرج داك الحقد لي عندها لداخل..من نهار سكنا هنا وهي تبعاني بسم ديالها كون ما هاد المنحوسة لي سميتوها فيها كون كاع ما تسكنو هنا ولا تفرحو بيها انا لي زوجت ختي وقلبت ليها على عريس يوزن ذهب ...

دخل راجل وسط لغوات لابس جلابة بيضة و وراه جوج رجال صحاح و قادين وعامرين عاطين لعين و زينهم بلدي ديال لبلاد حرشين وحواجهم كحل وغلاض مخنزرين كيشوفو فعيالاتهم نطق علال هو لول كيشوف فمراتو...

-مالكم على هادشي غواتكم واصل لزنقة...

بشرى: غير ختك مكتسكتش...

لطوف كتنغزهم يقطعو لحس: والو اولدي راه غير كلام لعيالات مكيساليش...

علال وخوه شافو فختهم صغيرة لي دايرينها بحال بنتهم و عزيزة عليهم بزااف شافو عنيها حمرين باين معصبة...

عبد القادر : عفراء مالكي...

علال شاف فيهم كاملين : قلقتوها تاني...

تقدم باهم لي مزال طيبة و الحنان واضحة كتشع منو...

العربي : مال بنتي ....

عفراء بنفخة : بغيت نمشي لعرس و مخلاونيش...

العربي : وشكون ميخليش بنتي رجلي برجلك تال لعرس تفرجي تا تشبعي مكاين لي يمنعك ابنتي ...

عفراء مهبطة راسها :ماعندي ما نلبس ...

علال: طلعي لبسي حوايجك نخرجو نشري ليك لي بغيتي...

بشرى :تا بنتك ما بقا عندها ما تلبس...

علال : انهبط نوجد طونوبيل وجدو راسكم وتبعوني ....

هبط علال و دخلو دراري صالون خلاو عفراء طلع لبيتها فرحانة..شاف عبد القادر فمراتو ..

-ونتي مخاصك والو...

كلثوم : لا عندي كلشي غير شوف خالتي اش خاصها...

لطوف: مخاصني والو .."سكتات كتشوف فراجلها"...

لعربي:مالكي الالة لطوف...

لطوف:ماشي هادشي لي تافقنا عليه اسي لعربي ...

عبد القادر : خليها الوالدية متزيريش عليها....

لطوف: انا خايفة يوليو ناس يتكلمو عليها ويوقع ليها ما وقع فالقبيلة راني غير كنخبي فيها خايفة من كلام الناس اولدي...

لعربي: داكشي ديال الله مكتبو عليها وحنا قابلين بيه و الحمدلله على كل حال..مغاديش نسجنو البنت و نضلو مخبينها ..٠

لطوف: اوا وهادوك لي داخلين خارجين طالبين يديها لزواج و انا غير كنسايس معاهم شغادي نقول ليهم...

لعربي: لبنت عنيها ماشي فزواح و باغية تقرا خليها على خاطرها واش تقلات علينا الالة لطوف...

لطوف: حاشة اسي لعربي ولكن راه عيت ما نرفض لي يشوفها يجيب والديه ونتا عارفها مكتحشمش و كتعطي لبنادم وزيد عويشة ختها تزوجات على 16 اوا عفراء كبرات وتا مينة ولات مراة تبارك الله مغاديش نديرو عقلنا فبنات صغار و نتبعوهم فلي بغاو خاص نفهموهم ان زواج سنة الحياة ولا بد منو ..زواج ماشي الحبس ولا تسالي قرايتها .. اطباء و اساتذة مزوجين وزواج ماشي عائق...

سكت كلشي ورا كلامها معرفو ما يقولو من غيرها هي لي هابطة لابسة كسيوة حد ركابي وسيقانها عريانين و كيشعو بالبيوضة و كتفرنس غير وحدها ..

لطوف : شداك لبس اعفراء..

عفراء : وصافي اماما تالبس اتهضري عليه خوتي و مقالو والو ...

لطوف : راه غير صابرين عليك متزيديش فيه بالفشوش...

عبد القادر: خليها تلبس لي بغات الوليدة راها مستورة ماشي عريانة...

تبسمات عاحبها الحال هبطات كتجري ركبات فطونبيل خوها لي ولا كيضحك من شافها راشقة ليها...

علال: اوا اعفراء فين باغية تمشي...

عفراء:كنعرف واحد سيد عندو لبس زوين غير شد طريق وانا انقول ليك منين دوز ...

بشرى ساكتة مخنزرة مقدراتش دوي بالاخص قدام علال لي راجلها و كتعرفو مزيان ...

وصلو لمحل ودخلو كيدورو فعنيهم من غيرها هي لي مجبدة و مشيتها مقادة وطالون ديالها كيتقرقب مع لأرض شافها مازن داخلة وهو يمشي عندها كيضحك...

مازن:عفراء شكاديري هنا ...

وقف علال حدا ختو مخنزر : فين كتعرف ختي...

عفراء شدات فدراع خوها : هو لي كنخيط عندو جلابات لي كنلبس اخويا...

مازن بإبتسامة: مرحبا بيك ها هو المحل ديالكم ختارو لي بغيتو ..

رجع عينو لعفراء وكمل طريقو خلاهم يختارو لي بغاو رغم انهم كيعرفو بعضهم مزيان الا انه عارف خوتها معندهمش لبنت دير صديق و تقرب من شاب اخر مكيجيهاش بدم...

سرحات بشرى عنيها : هادشي غالي بزااف مولفة نكري قفطان غير بي متين درهم ...

عفراء : هادشي ديال ناس لي كيعرفو يلبسو ولي باغين يبانو ولي عندو ضوق و يعرف يختار ...

بشرى مخنزرة : اوا حشاك الوستي...

عفراء مخسرة سيفتها: عيطي ليا بسميتي يرحم يماك وخلي ديك هضرة العروبية فدار معندي ما ندير بيها هنا ..

خلاتهم ومشات كتختار فالقفطات لي تلبس و تشوف حاجة بحاحة ممهتماش بثمن الغالي ولا دايراه فبالها ...عايشة كثر من مستواها و باغية كثر من حقها و زاد زينها خلاها مغرورة مكتقبلش بلي كاين...

هزات قفظان كتقيصو وكتشوف راسها فالمراية جاها لاصق على فورمتها و واسع من جهة رجلين ..بقات كدور فبلاصتها عاجبها بزاف بالاخص عندها فورمة مقادة و خسرها صغير و الوسط ديالها واسع...

تبسمات و مشات عند خوها فرحانة ...

عفراء: اناخد هذا عجبني بزااف..

هبط علال عينو وطلعهم فيها ما عرف ما يقول شاف ثمن لاصق فالقفطان لي غالي بزاف وهو يكحب غير بشوي و شار لقفطان ناقص شوي فثمن..

علال: تا هذا زوين غادي يجيي معاك حسن من هذا...

عفراء: نو معجبنيش انا بغيت هذا ...

مينة لي واقفة حداهم معرفت ما تقول بالاخص عارفة خالتها كتاخد اي حاجة بغاتها و مكضرب حساب لتا حاجة من غيرها ...تنهدات بحزن ..

مينة: غير خليها ابابا انا انخد داك لقفطان لي عجبك غادي يجي معايا ....

توجهو لمكان ديال لخلاص كيخلص خوها وهي حداه مبتاسمة كدور فراسها حتى بان ليها صباط طالون غادي يجي مع لقفطان لي شرات..بزربة لصقات فيه خلات خوها ياخدو ليها ...

خرجات فرحانة و خوها تابعها وخا خسر لفلوس بزااف مبينش بقى محافظ على نفس الابتسامة لحنينة معنق بنتو بيد و يد هاز بيها صاك لي فيه لحوايج..بقاو كيدورو تعشاو برا و توجهو لدار دخلات كتجري لبيتها مبغات توري تا واحد اش شرات ...

فنصاصات ليل خرجات من دوش لابسة بيجامة خفيفة ومدورة فوطة على شعرها ..دخلات لكوزينة هزات لحليب من تلاجة عمرات لقطن بالحليب و دارتو على عنيها و بقات جالسة هازة راسها لفوق..سمعات تقرقيب حداها وهي تنطق..

-شكون..

مينة: غير انا مزال منعستي...

عفراء: مزال اندير واحد لماسك لوجهي عاد نعس...

مينة: فرحاتك عندك مع هادشي انا دغيا كنمل و مقادرش نبقا ندير هادشي كل ليلة ...

عفراء : انا هادشي كيجيني عادي لواحد يتهلا فراسو بلي كان ....

مينة : عندك صح غير انا معنديش لخاطو و صافي...

سكتات بقات كتشوف فعفراء لي كدير مساج لوجها وكيف يديها بويض و ضفارها مقادين ..

مينة : عفراء ماعمرك فكرتي نرجعو لقبيلة...

حيدات لقطن من عنيها مخنزرة: كفاااش...

مينة: انا غير كنسول زعمة متوحشتيش دوك الاجواء وخا جينا صغار لمدينة لكن مزال عاقلين على كلشي وصراحة توحشت لبلاد بزااف ونتي متوحشتيهاش...

عفراء بعصبة : علاش غادي نتوحشها ..انتوحشها على لكلام زين لي كانو يقلوه ليا ولا على العافية لي كانو بغاو يقتلوني فيها....

مينة: غير غلط مكنوش ناويين لعافية تشعل..

عفراء : هما مكنوش ناويين ولكن كنت غادي نتحرق و نموت كون ما جعفر لي عتقني كنت كاع ما نكون معاك هنا....

مينة هزات حجبانها: مزال عاقلة على جعفر...

عضات شفاه ديالها بصمت بينما مينة تبسمات ابتسامة واسعة...

مينة: متقوليش ليا كنتي كتبغيه...

عفراء :كان عمري غير ست سنين شمن حب كدوي عليه....

مينة: ولكن صراحة كنتي عزيزة عليه بزااف وكان كيتهلا فيك وغير يشوفك يولي حمر بالحشمة....

تبسمات بدون ما تحس: كان ضريف معايا وهو الوحيد لي عمر قال عليا منحوسة ولي سمعو قالها كيدابز معاه مكانش يبغي دري لي يقرب ليا كان يقول ليا غير انا لي ديالك بوحدي ونهار شعلات لعافية هو الوحيد لي دخل يعتقني..

مينة: مسكين علم الله فين ايكون دابا وزعمة كنتي مرشومة ليه وعطا عليك تسبيق ديال صداق كيف كتقول جدة لطوف ...

عفراء:داكشي ديال صغر محال يكون عاقل عليا دابا وعلم الله شحال يكون عندو من ولد....

مينة: وباش عرفتيه تزوج ومايكونش كيتسناك...

حركات راسها برفض: ولاد لقبيلة كيتزوجو صغار وزيد كنت كنبقا فيه على داكشي لي كيوقع ليا اما دابا محال يعقل على شي وحدة سميتها عفراء...

جمعات لوقفة :تصبحي على خير...

طلعات لبيتها بثقل وعيونها كيلمعو ممعروفش المشاعر لي ضاهرين فيهم... دخلات ففراشها وحطات راسها على لمخدة غمضات عنيها وفالمخيلة ديالها كيتخيل ليها وجه طفل بعيون خضراء و شعر اسود ..رغم سنين ديال لفراق مقدراتش تمحي صورة ديالو من ذاكرة ديالها ..شخص لي خلا بصمتو عليها و تغلغل فـ أعماقها ماشي حب او اعجاب هي بنفسها معرفاش شنو كيوقع ليها من كتفكرو....

شرقات شمس ليوم جديد و بداية جديدة....وقف لكار فالفلاج نزل منو جعفر ..كمل طريق على رجليه هاز صاك على ضهرو و عيونو كيشوفو فالارض عادة عندو مكيهزش راسو ...

وصل لحانوت صغير وقف قدام سيد لي غير شافو تبسم ..

-ولدي جعفر نهار كبير هذا ...

جعفر بادل عناق قوي: غير لقراية و الخدمة مساليتش نجي نشوف لبلاد اسي محمد..

محمد فرحان : دخل اولدي دخل لدار اتكون زهور فرحانة بيك

..

جعفر: بلاش اسي محمد غادي نمشي نشوف دار شحال ما شفتها ...

محمد: ذخل شرب غير كاس اتاي بعدا ورتاح شوي ...

جعفر بإبتسامة : مرة خرا انشالله...

كمل طريقو ومالين دوار كيشوفو فيه معرفوهش بقاو متبعين ليه العين حتا وصل لدار ديال والديه لي كبر فيها و قضا فيها جزء من حياتو ...خرجو عنيهم بصدمة من عرفوه شكون كلشي تقدم عندو بفرحة كيعنقو فيه بإشتياق من نهار ماتت مو معاودو شافوه ولا سمعو عليه لخبار ...نزلو دموعهم ما قدروش يصبرو ..كانو يشوفوه دري صغير و دابا ها هو قدامهم راجل كامل متكامل...

كل واحد يعرض عليه من جهة وهو شاد لخاطر و الابتسامة طيبة مختفاتش من وجهو..من شافوه باغي يدخل لدار بعدو عليه عارفينه موحش دار ميمتو لي ما عرفو كيف بين ليلة ونهار فرقات هاد دنية...

دخل لدارو و عينو كدور فكل مكان فين ما كيحط عينو كيتخيل ميمتو لكبيرة ..جلس فقنت و ومسرح عينو فصورة ديال باه و مو لي مزينة لحيط كانت صورة زواجهم.. بقا كيشوف فيها تا بداو دموع يهبطو ليه بدون شعور.. كان الاشتياق غالب عليه ..كفاش ميبكيش وهو اليتيم لي من تزاد ملقاش باه حداه وفسنوات مراهقته كتموت الام ديالو امام عينو خلات فيه صدمة ديما مقادرش ينساها...

حط ساك لي جاب فيه لحوايج وهز قرعة ديال لما لي جابها معاه توضى و خرج تابع رجال دوار لي متوجهين لجامع وكل مرة يرد سلام على ناس لي يسلمو عليه و يباركو ليه رجوعو...

وقف فصف الاول مع الناس وبداو صلاة في خشوع... بمجرد ما سلم و قام بدعاء فخاطرو وقف حداه خيال رجل هز عينو وفور ما عرف شكون تبسم جمع الوقفة تبادل مع شخص عناق قوي بينما الشخص نطق بفرح..

-وقتاش جيتي علاش معيطتيش عليا تعلمني ...

جعفر: مبغيتش نصدعك اسي كمال...

كمال: الله اولدي عدابك راحة... زيد نخرجو بعدا داير على وديتك لغدا وبلا متقول ديك لا ديالك راني عارض كاع على ناس لقبيلة ...

جعفر: مالك مكلف راسك...

كمال: ما مكلف والو اولدي.. زيد طونوبيل كتسنا...

ركب حداه جعفر كيهضرو فعدة مواضيع حتا وصلو لفيرمة ..خرجو من سيارة و تمشاو امام جنان ديال الفواكه ..

جعفر: تبدلات لفيرمة بزااف...

كمال: اوا ضروري من نهار مات الواليد وخلا ليا هاد لورت بديت كنبدل شوي باش يلقاو ناس فين يخدمو شوي...

جعفر: مزالين كيخدمو عيالات ديال لقبيلة هنا..

كمال: لا ..درت ليهم تعاونية فسبيل الله كيعصرو زيت وربح كنقسموه بناتنا...

جعفر: فسبيل الله...

كمال: خليني مني انا و القبيلة وعاود ليا على راسك من نهار خرجتي من لقبيلة تقطعات خبارك فين كنتي واش كنتي كدير وفين وصلتي...

جعفر تنهد بشوي : من ماتت الواليدة داتني جدة دوزت معاها واحد لعام حتى وصل اجلها الله يرحمها و يوسع عليها من تم داوني لميتم بقيت فيه تا وصلت ل16 سنة و واحد سيد كنت كنخدم معاه فصيف هو لي عاوني عطاني واحد لبيت فين نسكن بقيت كنقرا و نخدم تا كتب ليا الله نمشي لإمارات مع داك سيد...

كمال: وعلاش اولدي هاد تمارة كاملة علاش معيطتيش عليا انا نتكفل بيك...

جعفر: مجبهاش الوقت اسي كمال و نيت الواحد يعتامد على راسو وخا صعيبة لكن ربي كيسهل الحمدلله ..

كمال: ربي كيسير الحمدلله اوا اش درتي من مشيتي الامارات. .

جعفر: دوزت تم عامين كنت كنخدم صباغ و تركاب الكبص وخا كانت الحرارة صبرت وانا لي بقيت تم فكاع دراري لي مشاو معايا كلشي رجع فالعام الاول مقدروش يصبرو كانو كيخدمونا برا ونهار شمس كتقتل و فليل البرد كيقطع ..كنخدم و كنجمع لفلوس باش نرجع نكمل قرايتي حيت من مشيت الامارات وقفت من لقراية.. بقيت هكذاك نهار على خوه تا ربي فرج عليا تلاقيت بواحد سعودي وعرف قصتي كاملة من دراري لي كانو معايا ..صاوب ليا لوراق و اقامة لمدة خمس سنين فالسعودية بالخدمة و دار وعاوني ندخل لجامعة ملك سعود نكمل فيها قرايتي .. وهكذا بقيت عايش تم نقرا و نخدم وكناخد كونجي غير فوقت الحج و العمرة كنمشي ليهم كل عام وحمدلله ربي فكل طريقي كان يجيب ليا ربي الخير وهاد لعام رجعت المغرب كملت لعام لخر ديالي و كريت واحد دار وها انا كنوجد فالمكتب ديالي نشالله من هنا شهر غادي نحلو...

كمال: تبارك الله هي صافي وليتي محامي...

جعفر: حمدلله...

كمال بإبتسامة: اوا دابا واش نعيط ليك محامي جعفر ولا الحاج جعفر...

جعفر بنفس الابتسامة : باش ما سخاك الله ...

وصلو لدار كبيرة على شكل فيلا كانت مليئة بالناس لقبيلة.. جلس جعفر وسط صالون مقابل مع كل رجال لقبيلة ليكيسولو على احوالو و فين وصل و هو كيجاوب على قد سؤال فرحان و سطهم كأنه مع عائلتو...

وصل ليل و الاضواء مضوية فالفيرمة.. فبيت كبير كتواجد فيه مرأة بلباسها الابيض و عيونها عليهم ضبابة باين مكتشوفش وعلى محيا وجها ابتسامة حنينة.. حاطة يديها على راس ولدها كتمشط ليه شعرو بأصابعها الحنينة و ونطقات بشوي...

-تبارك الله جعفر كبر و ولا راجل ...

كمال : كبر امي ولا طول مني وعرض مني يدير مني جوج...

الام بحزن: و امتا اولدي اتبقا مخبي هادشي فقلبك...

كمال تنفس بجهد: انموت بيه اميمتي نتي بوحدك لي عارفة سري ونتي لي كنشكي عليك همي عارفاك مغادي تخرجي سري ولا تغضريني.. عارف اميمتي ما درت والدنب لي عليا محال ربي يغفر ليا على داكشي لي كنت كندير...

الام: لواه اولدي ربي كيبغي العبد التائب ولي كيحسن اعمالو و يدير الخير متقنطش من رحمة ربي ....

كمال: ونعمة بالله ولكن امي مقدرش نسمح لراسي فين ما كنبغي نعس كتجي بين عيني بسبابي ماتت و تيتم ولدها وخا بغيت نتكلف بيه مبغاش وخا كان صغير نفسو عزيزة...

الام: نساها عليك اولدي الله يرحمها و يكون متواها الجنة...

كمال : مقدرتش امي كنت كنبغيها بزااف من نهار شفتها وانا تابعها وخا كانت ارملة وعندها ولد مكان عندي عقل وكنت كيف الحيوان كنتبعها نتبسل عليها وهي تجري عليا.. مكنتش كنضن داك نهار معقلتش على راسي سكرت بزااف وبقيت حاضيها كيف ديما تمشي تشوف الارض.. شديتها بحال الحيوان معاقلش على راسي.. دفعاتني و هربات وانا تابعها كتبان ليا غير هي لي قدامي حتى كنشوف طونوبيل دخلات فيها رماتها بين عيني كلها دميات ميتة وعنيها محلولين معمري نسمح لراسي اميمتي ولا نعيش مرتاح ..انا سباب تا ماتت انااا سباب...

حط راسو في حضن مو كيبكي بحال دري صغير داك دنب لي حامل فقلبو كينهش فيه فكل تانية ..فين ما كيشوف جعفر كيعاود يتفكر ما دار ولا عايش فخوف من كلشي...

ضرباتو لفيقة مع ادان لفجر ..جمع الوقفة كيسرح شعرو الاسود ..توجه لحمام غسل بما بارد ..نشف راسو ولبس ملابس نقية جمع كلشي فصاك لي جاب معاه دارو على ضهرو و وقف وسط دار كيدور عينو وفيدو هاز صورة ديال والديه ..تنهد بجهد وخرج سد لباب مزيان وشد طريق حادر راسو كيف العادة حتى لقا راسو قدام دار سي لعربي لي رجعات خاوية و مافيها حس.. وقف لمدة طويلة عاد كمل طريقو دخل لجامع صلا لفجر مع جماعة ...

خرج شد طريق نحو المقبرة

..وقف قدام جوج قبورة هز يدو كيدعي عليهم برحمة و المغفرة و قرا عليهم ما تيسر من القرأن ...

بقى مدة طويلة وهو فنفس الحال كيدعي و يقرا و شمس نهار كتضوي ملامحو الرجولية وعيونو بلونهم الاخضر كيبريو ..وجسدو الفولادي بطوله و عرضه داير خيال فالارض كيبين ان داك طفل اصبح رجل كامل متكامل ...

تحطات يد على كتافو وهو يهز راسو لشخص...

كمال: عرفتك اتكون هنا ..صافي سخيتي بينا دغيا ...

جعفر: مزال كتسناني لخدمة بزااف فرباط خليت غير صاحبي لي مقابل ...

كمال: زيد غير هاد نهار وغدا انا نوصلك ..

جعفر: مكرهتش ولكن معندي كيف ندير ...

كمال شاف تصويرة لي فيدو وهو يتزير...

-غادي ديها معاك...

جعفر هز صورة دوز عليها يدو بلطف..

-هي علاش رجعت ...

كمال تبسم بحزن...

-والارض لي خلا ليك باك اش فكرتي دير بيها ....

جعفر: انخليها تا يجي وقتها و نشوف شنو ندير اما لبيع مغديش نبيعها ...

كمال: هي معول ترجع تسكن هنا ...

جعفر: من هنا لقدام ربي لي عالم ...

كمال: الحمدلله راك خدام اوا وقتاش غادي تزوج ...

جعفر تبسم و وجهو رجع حمر ...

-مزال مكنفكرش فزواج ...

كمال: لا اولدي راك تبارك الله 26 عام خاصك مرا لي تونسك و تكمل معاها حياتك ..نتا ولد مخلق و متدين اي وحدة طلب يديها فالقبيلة متقولش ليك لا وانا نخطب ليك بيدي ...

جعفر كيضحك: لهاد درجة ...

كمال: و كثر كاع اولدي غير قول اه وانا نقلب ليك على لالة لبنات هنا ..ولا يكما باغيها من المدينة ...

جعفر : نشالله يكون خير ..."سكت شوي عاد كمل كلامو"... سي لعربي عمرو رجع لقبيلة ...

كمال كمش حجبانو: سي لعربي..اه كدوي على بات المنحوسة ..

جعفر خسر ملامحو: سميتها عفراء ...

كمال شد لسانو: اييه عفراء نسيت كاع سميتها تبارك الله كانت واحد لقبيحة لقبيلة كاملة دبزات معاها ولكن من نهار خرجو معاود سمعت عليهم خبار علم الله فين يكونو...

جعفر بقا ساكت و مسرح عينو و كمال كيشوف فيه بقاو مدة هكداك عاد نطق...

كمال: 16 سنة ماشي عام ولا جوج ..اتكون نسات لقبيلة وناسها وعلم الله اتكون مزوجة وعندها لولاد ...

جعفر عض فمو بشوي : الله يسهل عليها ...

توادع هو و كمال و شد طريق تجاه لفيلاج ..ركب فالكار لي متوجع لرباط..جلس حاط راسو على زجاج كيشوف طريق وداير ليزيات طالق فيهم لقرأن ..حس بشي حد كينغزو فجنب وهو يدور راسو شاف بنت جالسة حداه و رجليها كضرب رجليه..جمع رجلو بعدهم على لمراة و حدر راسو بقا طول طريق وهو مزير و راد لبال لتعاود تقيص رجلو لمرا...

وصل لرباط خرج من المحطة كيعرج ...شافو صاحبو لي كيتسناه بطونوبيل وهو يتبسم..

امين: باين جلسات حداك شي مراة ...

جعفر ركب حداه : خاصني نشري شي طنوبيل ...

امين: راني قلت ليك دي ديالي ...

جعفر: كنت غادي غير نوسخها وانا مكنحملش نرجع الامانة مخسرة من شي جهة ...

امين: اسيدي والله ما توسخ ولا تمشي طريق كامل مقجوج ..رخف على راسك اصاحبي شوي الله و شوي لعبدو ...

جعفر : امين لبغيتي تبقى معايا مزيان خليني فراحتي مغاديش نتناقش انا وياك فحوايج باينين و معروفين...

امين: وخا اخاي سمح ليا و دعي معايا ربي يهديني...

جعفر: صلي غير صلاتك و من بعد ربي غادي يهديك ...

امين ضحك من نيتو : سبحان الله شكون قال نتصاحبو وانا وياك مكنتشابهو فوالو ...

جعفر : نتا ولد ناس خاصك غير تصلح راسك شوي و صافي ..

امين : الله يكبر بيك اخاي... فين نديك لدار ولا لمكتب شوف لخدامة فين وصلو ...

جعفر: لمكتب هو الاول ...

اشعة شمس كضرب فعنيها كتحاول تغطي وجها لكن بدون فائدة..حلات عنيها مخسرة وزاد صداع ديال دراري صغار خسرو ليها نعاسها وصهد كمل عليها..

ناضت من بلاصتها دخلات لدوش نقات حالتها من لعرق ولبسات حوايج جداد ديال دار... هبطات كتجر فرجليها دخلات لصالون مخنزرة فدراري لي كيغوتو...

عفراء : واش نتوما مكتحشموش من نهار جيتو لغوات و صداع...

لطوف: خلي عليك ولاد ختك ودوزي تفطري..تبعي ختك راها مشات لحمام هي وعيالات خوتك ....

عفراء منفخة: عطيني نخرج نجيب فطور من برا ..

لطوف : سيري فوق لمجر خلا ليك باك عشرة دراهم..

عفراء : غير عشرة دراهم صافي...

لطوف : علاش ابنتي شحال باغية... رخفي شوي اعفراء خوتك و باك كلهم خدامين كيجمعو يكملو فلوس دار لمولاها ونتي طالبة كثر من عيشتك...

عفراء: مطالبة والو.. دخلات هزات ديك عشرة دراهم وتمات خارجة كتلوي فشعرها كتجمعو على شكل شفنجة..

لطوف : اجي لهنا فين خارجة بديك الحالة...

عفراء صاطت بجهد: راني خارجة غير لقهوة لي هنا حدا دار ..

لطوف: دوزي لبسي شي حاجة تسترك و نتي غادة بديك بيجامة مزيرة عليك كاتبين كلشي بقا غير تمشاي عريانة...

هزات كتافها ممسوقاش خرجات كتسرح فرجليها.. دخلات القهوة وعنيها فتيلفون حتى حسات براسها دخلات فشي حد...

عفراء:سمح ليا مكنتش كنشوف..

هزات راسها وهي تشوفو قدامها مخرجة عنيها..

-نتا عوتانيك واش تابعني ولا مالك...

جعفر كيشوف فحوايجو لي عمرو بالقهوة لي تزلعات عليه من دخلات فيه عفراء.. بعد القامجة من لحمو لأن القهوة كانت سخونة مخسر ملامحو حتى سمع صوتها وهو يهز عينو فيها...

جعفر: تبقاي تشوفي قدامك مرة اخرى..

عفراء معصبة: يكما كنبان ليك عورة مكنشوفش...

زير على راسو معندوش مع الهضرة وبالاخص لكانت مرا و قبيحة بحال هادي لي قدامو ...

سكت بدون ما يرد و كمل طريقو ساخط ما حس تا لقاها قدامو كتنفس من نيفها وعنيها حمرين ..حل فمو يهضر وهو يتصدم من جرات ليه يدو بجهد حطات ديك عشرة دراهم في يدو و نطقات بإستحقار..

عفراء: هاك باش تخلص المصبانة لي اتغسل ليك ديك القامجة باين غير هي لي عندك ونيت دايزة فيك صدقة...

ضحكات بجنب وخلاتو واقف فمكانو ومشات كتعوج فشميتها وهازة راسها لسما خلاتو كيشوف فديك عشرة دراهم لي فيدو و وجهو رجع حمر اول مرة كيتعصب لهاد درجة... زير على يدو بجهد مرضاش.. دار لعندها لقاها طارت مكيناش قدامو...عض فمو بجهد و كمل طريقو وصل عند امين لي كيتسناه قدام عمارة شافو ماشي تال لهيه...

امين: ياك لباس مالك ومال حوايجك مسخين...

جعفر : والو.. "كمل طريقو "..يالله نمشيو من هنا...

امين: ودار...

جعفر من تحت سنانو : مبقيتش غادي نشري...

امين: وعلاش ياك كانت عاجباك...

جعفر: مبقاتش عجباني وزيد جيران ممزيانينش...

امين بإستغراب: اواااه انا كتعاود لي مينة ان لبلاصة نقية وناس مزيانين وداخلين سوق راسهم...

جعفر كمش حجبانو: مينة؟؟؟!...

امين : لبنت لي انا معاها اصاحبي ساكنة هنا وهي لي شكرات ليا لبلاصة وقالت ليا زوينة ولكن ماشي مشكل اصلا حوتة كتخنز شواري وخا يكونو ناس مزيانين لكان واحد خايب فيه ايخيب فعنيك كلشي..

جعفر : يكون خير.. وهاد لبنت لي نتا معاها ممعولش تزوج بيها...

امين: عاد كنوجد راسي خاص شوي ديال الوقت باش نجمع راسي...

جعفر: وهي صابرة على هادشي...

امين: ديك لبنت ضريفة بزاااف وقابلة على لي كاين و مكتشرطش.. "تنهد بجهد"...من غير واحد عمتها جهنم لكحلة يا ربي سلامة مكتعتقش ... تا من تليفون خداتو منها لبغيت نهضر معاها خاص تا ناخد الادن منها عاد تشوف واش تقبل ولا تجرجرني عوتاني اما لخروج مكاينش ....نهار لكحل معاها هو نقول لخروج كتسمعني خل ودني ..كون ما كانت مينة كنبغيها كون شحال هادي ضربت دورة لجهة خرا غير من ديك عمتها..

جعفر: من حق عمتها دير هادشي بغيتي لبنت سير لدارهم طلب يديها...

امين : متافق معاك ولكن نخدم شوي نجمع فلوس وديك ساعة يكون خير ومينة فاهمة هادشي ديك جهنم لكحلة لي مكتعتقش ..

جعفر: مرا كبيرة وهي لي تبغي لخير لبنت خوها ..

امين ضحك مفقوص: اشمن كبيرة عمتها مزال برهوشة فعمرها 22 قدها قد مينة تولدو فعام واحد غير هو لا علاقة.. مينة مأدبة وهديك تسونامي كيتمشى على رجليه... عمرها خرجات معانا وموقعاتش لينا شي مصيبة ....

جعفر وقف مكمش حجبانو: شنو سميت عمتها...

امين: والله اخويا ما عقلت انا مسميها غير جهنم الكحلة ومن كنتلقاو بالخلعة كنقول ليها لالة....

جعفر هز راسو كيضحك : لهاد درجة واعرة...

امين: بزاااف اخويا راه مسميتهاش جهنم كحلة غير هكاك.. ونزيدك واقلة هادا لي عصبك ما تكون غير هي..

جعفر: باش عرفتهيا اصلا مرا...

امين: حيت تعصبتي بحالي من كنشوفها قدامي... "بدا كيوصفها"..هي زعرة و زوينة وعنيها خوضر..

جعفر هز حجبانو وامين كيشوف فيه..

-هي ولا ماشي هي...

جعفر ضحك من نيتو: هي...

امين: شتي شنو قلت ليك جهنم صافي.. غير صباح عجباتك دار و بغيتيها ودابا مبقيتيش كاع باغي تشري منحوسة يا ربي سلامة.. "سكت شوي"...اجي علاش كتسول على سميتها...

جعفر : كنت كنعرف واحد لبنت تزادت هي وبنت خوها فنفس لعام غير انا معقلتش على اسم بنت خوها لكن لبنت لي كنعرف لون عنيها قهوي ماشي خضر والبنت من عائلة محافظة مغاديش يخليو بنتهم تخرج بديك لحالة ....

امين: الله ينجيك اخويا تكون كتعرف بحال هاد الاشكال يكرهوك فحياتك...

جعفر : الله يهديها و يهدينا...

دخلات ما عجبها حال و لطوف كتشوف فيها من لكوزينة بنص عين.. دخلات هزات كاس اتاي و طرف ديال لخبز دارت فيه فرماجة و جلسات كتاكل معصبة...

لطوف: ياك خرجتي تفطري مالكي رجعتي يزربة....

عفراء : تلاقيت مع وحد لحمار ممأدبش عصبني...

لطوف: يكما قالك شي حاجة...

عفراء : وهو يقدر بغيتيني نشوه يماه...

لطوف تنهدات بجهد:اوا شفتي شنو قلت ليك تبقاي ابنتي لبسي شس حاجة مستورة متبقايش تلبسي لمزير خوتك مفششينك اوا ديري بوجهم قدام ناس...

عفراء: اماما راه لبسي عادي غير نتي كيبان ليك مزير ..كاع لبنات كيلبسو بحال لبسي...

لطوف: شوفي غير مينة مالها ديما مستورة و لبسها طويل ...

عفراء: مينة دايرة الحجاب و لباسها ديال المحجبات انا اماما ممحجباش باش نلبس داك لبس...

لطوف: و اش فيها لتحجبتي ابنتي هادشي امرنا بيه الله و رسوله الواحد يتستر فدنيا باش ربي يسترو فالاخرة ...

عفراء سكتات بدون ما ترد على مها بينما لطوف تنهدات وكتفات انها تقول ..

-الله يهديك ابنتي على نفسك..

عفراء: امين امي...مزال هادو مخرجو من لحمام وفين دوك لبزاقل شتهم سكتو...

لطوف: راني شعلت ليهم تلفازة خليتهم يتفرجو و الله يرضي علعليك ابنتي متبقايش تغوتي عليهم ختك عويشة كيبقى فيها الحال و مكتبغيش تخسر ليك حيت عندها عزيزة..

عفراء : وخا امي...

لطوف: الله يرضي عليك اوا نوضي تبعيهم لحمام واجي وجدي راسك لعرس....

عفراء : غير خليني امي اندوش غير فدار و زيد العرس لي فسطوحة تا هو يوجدو ليه ناس... كون كان غير فشي قاعة تا لا لبستي شي حاجة تبان عليك...

لطوف: اوا باااز ابنتي باااز.. لي يسمعك ميقولش نوضتي كاع داك صداع و لصقتي خوك يشري ليك قفطان بزبالة فلوس ...

عفراء: علاه بغيتيهم يضحكو عليا نمشي عندهم بنفس القفطان لي حضرت فيه فالخطبة ديالها و زيد انا و ديك العروسة مكنتحاملوش غادة غير نفقصها و نرجع...

لطوف: ومالكي ابنتي على هاد الحالة دوزي نجلس انا وياك مانقصنا صداع...

عفراء : لا اميمتي نمشي نشوف هاد نحس ديالي فين ايوصل هاد لعرس يا ربي غير ضربها بشي طيحة من فوق العمارية نشبع عليها غير ضحك...

لطوف هزات عصا ديال شطابة..

-اعوودو بالله نوضي من حدايا قبل ما ندير فيك شي مصيبة يا ربي سلامة جهنم كحلة والدة انا...

عفراء هربات كضحك : ونتي لي كتقولي عليا منحوسة اش بغيتيني ندير...

طلعات لبيتها هزات برودويات ديال لجسم و شعر و دخلات لدوش كتنقي فحالتها وعاطية لخاطر لداتها.. و مكتزربش.. عندها راسها عزيز وفوق كلشي ما كتحملش لي يهبط منها او ينقص من داتها.. ديك كلمة المنحوسة لي تقالت عليها وهي صغيرة بقات محفورو ليها فداتها و خلات نفسها مزعزة وديك نرجسية لي كابرة فيها خلاتها بهاد شكل لي هي عليه اليوم....

خرجات من دوش كتنشف شعرها.. جلسات فصالون حدا ختها لي غير شافتها تبسمات....

عفراء: على سلامتك هادشي كامل حمام...

عائشة: كان عامر شوي هادشي علشا تعطلنا وعلاش مجيتيش تسنينا فيك حتا عينا...

عفراء : عارفاني اختي معنديش مع لحمام.. "شافت فمرت خوها كدير سواك "...شكاديري نتي فداك لفم...

بشرى : مكتشوفيش كنسوك يبان فيا سر فالعرس...

عفراء : اديري ضحك فراسك ماشي سر.. خليك ترتاحي شوي و نوضو نمشيو لصالون نديرو مكياج...

بشرى : لا لا اختي بغيتي علال خوك يذبحني...

عفراء: علال خويا ايجيب عليك ضرة لبقيتي فهاد الحالة ..طوري اختي من راسك شوي ونتي ما تبدل فيك والو...

بشرى : تبدلي غير نتي انا عاجبني راسي ...

عفراء: اوا الالة لمفراسكش ديك بنت جيران لي قدامنا حاطة لعين على علال فين ما يخرج يلقاها برا كتعوج ...شمنك يا لبس و يا روايح و يا مكياج انا لي بنت و حليت فيها فمي اما رجال بلا منقول ليك....

بشرى رجع وجها حمر : بنت لحرااام معدرتها فين ما شافتني كتخنزر...

عفراء : هي لجمعتي الوقفة ومشيتي تصاوبي ديك الحالة...

جمعات الوقفة طلعات لبيتها كتجري و عفراء بقات فبلاصتها كتشرب اتاي بالمهل...

عائشة: حشومة عليك مكانش عليك تقولي ليها و خويا اصلا وخا تمشا قدامو عريانة ميخونش بشرى ولا يجيب عليها الضرة...

عفراء : خوديها مني نصيحة اختي كلشي تعرفي ليه الا فاش كيفكرو رجال متعطيهمش تيقة ديما كوني على بال ونيت باش ثقف راسها شوي سنين وحنا ساكنين هنا وهي بحال البقرة مبغات تبدل كتعصب...

عائشة: هضري بشوي راها غادي تسمعك و حتارمي مرت خوك ..شوفي غير خوك اش كيدير عليك...

عفراء: خليني عليك دابا و عاودي ليا على راسك اش درتي و فين وصلتي ومال خالد مجاش معاك...

عائشة: عندو خدمة مزيرة ملقاش وقت لي يجي رسلني غير انا و لولاد ...

عفراء : خسارة كنت بغيت نقول ليه يعاوني فشي حاجة...

عائشة : غادي يجي بعد غدا هضري معاه فاش ما بغيتي.. اجي بعدا شفتي لهدية لي جابو .....

عفراء: لا كنت فدوش ونتي شفتيها...

عائشة: يا ختي داكشي واااعر باين دات شي واحد لبااس عليه...

عفراء باستهزاء : بااين اختي لباس عليه غير من داك لعرس لي مقيوم فسطح...

عائشة: يا ختي واحد طونبيل جا فيها لعريس مدايرش بحالها وسايقها واحد كبر شوي من لعريس باين لبااس عليه واقلة كيجي لعريس شي حاجة...

عفراء جمعات لوقفة: نوضي بعدا نوجدو حالتنا قبل ما يجي با و خوتي...

طلعو هزو حوايجهم ديال لحضور و خرجو كاملين لصالون فين يصاوبو...

…وقف طاكسي وخرج جعفرلابس كوستيم اسود وداير لباس المحاماة في يدو و محفظة فيها الاوراق في اليد الاخرى... تمشى فزنقة خاوية باش يوصل لدارو وباين فيه العيا وباغي يختاصر طريق وخا ممولفش يدوز من هاد طريق مظلمة لي مكيدوز منها تا حد لكن بحكم لعيا مفكرش جوج مرات...

كمش حجبانو من سمع انين باهت فضلام كأن شي واحد كينين من الالم... بقى متبع صوت حتى وصل لواحد لبليصة فيها المجاري وريحة كريهة بعض الشيء...

حط صبعو على نيفو و شعل بيل ديال تليفونو وتقدم نحو الصوت حتى ترئ ليه مصدر الصوت قدام عنيه..

وقف مصدوم من شاف انثى مكتجاوزش عمرها 18 سنة مليحوة فالمجاري عريانة وكلها ضرب و جرح و دم كيسيل من الفرج ديالها واضح انها تعرضات للإغتصاب...

في وقت وجيز عمر المكان برجال الشرطة و الاسعاف.. هزو البنت لي مغيبة عن الواقع و جسدها لي كان عاري مغطي برداء المحامات ديال جعفر ساتر جسدها امام اعين الناس....

واقف جعفر بين رجال الشرطة وباين متاتر بداكشي لي شافت عينو و وجهو مخطوف منو اللون.. كيجاوب على اسألة الشرطة لكن عقلو غايب.. من شافوه هكذاك عطاوه وقت فين يرجع انفاسو و قررو انهم يديوه معاهم لمركز شرطة باش يعطي اقوالو كاملة....

في مكان اخر كان عكس الحزن والحادث لي اثر في كل نفس شافتو.. كانو ناس فرحانين وناشطين كيشطحو على انغام الموسيقى الشعبية لي كتزين كل الاعراس المغربية.... وقفة وسط ناس كتشطح فرحانة براسها وما همها تا حد.. مخنزرين فيها بنات جيران لي معندهمش معاها وهي عاد كتزيد تسممهم بأفعالها و رقصها لي خلا كل الاعين تاجه ليها.. واقفة حداها مينة لي شادة فيديها كأنها كتشطح معاها بينما كتهضر فودنيها....

مينة: قالت ليك جدة دوزي تجلسي كاع الرجال عنيهم عليك....

عفراء هزات كتافها: خليهم ممولفينش يشوفو الزين...

مينة: جدي و با و عمي ايدخلو و مغاديش يعجبهم الحال.. يالله نجلسو قبل ماينوض صداع...

ساطت بجهد : افف ما تخليو تا حد على خاطرو..

وقفات من شطيح و دازت قدام ناس هازة قفطان من لقدام كيبانو سيقانها بويض كيحمقو و شعرها مطلوق واصل لنص ضهرها.. محزمة بالحزام من الوسط شي لسي خلا القفطان يبين فصالتها و يخلي كل اعين الرجال عليها...

جلسات منفخة هازة زيف لي كانت محزمة بيه كتنش بيه على وجها و عيشة كتشوف فيها و ضحك...

عيشة: عفراء هي عفراء ما تبدل فيك والو من صغرك كتموتي على شطيح.. عقلتي فعرسي اش درتي خليتي كلشي مصدوم فيك...

عفراء : العرس دايرينه ناس باش ينشطو و يشطحو علاش انجي كاع لمكنتش نشطح نبدر جنوني و منمشيش مفقوصة...

لطوف: باك داخل اعفراء شدي لأرض ...

عفراء هزات كتافها وكدور راسها فالحضور جات عنيها فواحد كيشوف فيها فور ما جات عنيها فعينو تبسم ليها.. هزات حجبانها و دورات راسها لعند ختها...

-شوفي هداك لي جالس فطابلة قدامنا من دخلت وهو حاضيني...

عيشة بلا متعيق شافت فيه بنص عين ..

-هداك هو لي قلت ليك قبيلة باين لباس عليه و العريس جا فطنوبيلتو....

هزات حجبانها و رجعات شافت فيه لقاتو كيضحك عرفها كتهضر عليه.. بزربة جمعات عنيها و هزات خنافرها لسما...

جالس حدا لعريس وعينو على عفراء.. دار اشارة براسو..

-شكون هاديك زعرة لي جالسة قدامنا...

لعريس : عجباتك...

عض فمو من جنب وضحك نصف ضحكة...

-زوينة ونافخة مع راسها...

لعريس: شنو دابا باغي تعرف شكون هي ولا نجيب ليك نمرتها...

حرك راسو : جيب ليا غير سميتها و شكون هي...

هز لعريس حجبانو بجوج : ممولفاش ليك.. يكما طيحاتك...

هز كتافو كيضحك و عينو متحيداتش من عفراء باين من عينيه الاعجاب الشديد بيها..بقا غير كيعض في فمو و مراقبها ممخليش عينو تبعد عليها.. شافها وقفات مع لبنات من هزو لعروسة فالعمارية وهو يوقف غادي لجيهتها..

وقف حداها ونطق بشوي حدا ودنها: سلام زين...

خنزرات فيه كطلع و تهبط و بعدات منو خلاتو كيضحك غير وحدو.. بقات واقفة مع لبنات حتى تسمعات صرخة من لعروسة لي طاحت من فوق المعمارية كلشي تصدم الا هي بقات كضحك كيف الحمقة.. حولات تشد ضحكتها لكن بدون فائدة عاد ما كتزيد.. خلات كلشي يخنزر فيها محملهاش و العروسة كتبكي مرضاتش والجوق حبس من تطبال بقا غير صوت ضحكتها لي كيتسمع.. جراتها لطوف غارقة فالحشمة.. بزز باش حبسات من ضحك و شافت فالعروسة لي كيهزو فيها...

عفراء: ميبقاش فيك الحال تكبري و تنسايها....

سمعها دري لي كان تابعها وهو يجبدها بضحكة تا هو كثر منها وتبعوه تا صحابو و العريش بزز باش حابس خايف عروستو تقلق...

جروها جلسوها مفقوصين و حشمانين.. بشرى مخبية وجها اتموت بالحشمة...

- نا ري على المسخوطة اش هاد شوهة درتي لينا يعطيك موصيبة...

عفراء : الله ينجيني اختي اش درت كاع...

لطوف: نوضو نمشيو بحالنا ما بقات جلسة وسط ناس... حشمة هادي درتي ليا اعفراء مع جيران ولكن تا نمشيو لدار عاد انتحاسب معاك...

بشرى معصبة: ها لي كنا خايفين منو منحوسة الله يستر يخخخ تا من لفراجة حرمتيها منا...

كلثوم: صافي مغديش نبقاو نتغاوتو قدام ناس يالله نمشيو بحالنا اصلا دراري قبيلة وهما كيتسناو...

جمعو الوقفة خرجو و عفراء وسطهم كتعوج و مزال كضحك بحالي مدارت والو و ما مصوقة لتا حد ...

وصل صباح و سيارات قدام دار لعروسة.. جالس فسيارتو وهاز كارو كيكمي وحاط صبحو على لحيتو كيحكها بشوي وساهي كيتفكر فعفراء لي عجباتو بزااف وخلاتو غير ساهي.. وقف قدامو لعريس مبدل...

لعريس: مالك ساهي اخاي معاد...

معاد: امدرا سولتي....

لعريس: سولت ولكن اخاي غير نساها عليك لكنتي معول على داكشي متصلاحش...

معاد : علاش مالها...

لعريس: لمرا عندي مكتحملهاش غير جبدتها ليها بدات كتغوت قالت لك لبنت متكبرة بزااف ومكتحشمش ولي دار جيهتها كتجمع عليه بنادم ولا كتعيط على خوتها ...هادوك لي كانو جالسين حدانا فجنب شفتي كل واحد قد لعجل مكيتفاهموش...

معاد هز حجبانو: وفين المشكل...

لعريس: المشكل هو اني عارفك مزيان.. خلي هاد للايام يبردو اصاحبي ونتا ديما لبنات...

معاد: صافي هادشي لي قالت ليك مراتك...

لعريس: اش باغي كثر من هكدا.."حبس من تفكر"..اه وقالت انها معجبهاش هاد لعيشة سيدة كتشوف فوق منها وباغية تعيش لحياة ديال البورجوازية...

معاد ضحك بجنب: وهكذا عجبتيني...

لعريس: راني قلت ليك معندهاش مع تصاحيب...

معاد: وشكون قال ليك باغيها لتصاحيب.. "عض فمو بجنب"..لبنت عجباتني اتكون ليا قول لدراري ميدروش جيهتها هاديك ديال ...معاد نلقى شي ق*اد فيكم كيدور جيهتها منعقلش عليه وراك عارفني مزيان اش كندير لبنادم....

لعريس: صافي اصاحبي كون هاني تا واحد ما غادي يقرب ليها....

في نصف النهار وحرارة شمس دخل امين كيجري بان ليه جعفر جالس وحاط يدو على راسو كل مرة يتنهد بجهد.. شاف صاحبو جاي وهو يجمع الوقفة...

جعفر: شنو وقع...

امين: عتقوها ولكن حالتها خطيرة بزاااف حاطينها فالانعاش مزال مغيبة...

جعفر حط يدو على جبهتو : لطفك يا رب.. عرفوها بعدا شكون هي وعائلتها...

امين: لبنت يتيمة كانت عايشة مع عمهاا وشي شهرين باش تزوجات و تقريبا هادي سيمانة باش قدم راجلها بلاغ عند البوليس بتهمة الخيانة الزوجية ومن مشاو لبوليس عند عمها لقواها مكيناش من داك نهار وهي مختفية تا لقيتها نتا بديك الحالة ....

جعفر كمش حجبانو : راجلها فخبارو...

امين : شفتو واقف مع الاطباء جالس كيبكي وتا عمها كاين ..روينة نايضة تم...

جعفر: وطبيب شنو قال ...

امين دوز يدو على وجهو مقهور : لبنت حالتها حالة شي حيوان دار ليها ديك الحالة ..." عمروعينو بدموع بزز باش كمل " ..لبنت مغتاصبة من جوج جوايه ومغتاصبة من مجموعة من الناس لدرجة رحم ديالها تمزق ....

جعفر طاح على وقفتو مصدوم بقا غير كيسوط و صدرو داق عليه بزااف.. بقا على ديك الحالة حتى وقف عليه بوليسي..

-سي جعفر يمكن ليك تمشي وسمح لينا حيت شديناك كاع هاد الوقت و نتمنى من نكون محتاجينك فتحقيق تحضر... ولبس المحامات ديالك منقدروش نعطيوه ليك حيت داخل فتحقيقات...

كتفى فقط انه يحرك راسو و خرج هو وصاحبو مرفوعين شدو طاكسي و كل واحد رجع لدارو وخ امين بغا يبقى معاه حيت شاف حالتو ماشي تالهيه بالاخص انه هو لي لقا لبنت و باين عليه تأتر لكن جعفر كان منو رفض باغي بيقى بوحدو...

دخل لدارو البسيطة كبساطته وعينو حمرة...ترمى فوق ناموسية كيشوف فسقق و بقا مدة طويلة على ديك الحالة.. حاول ينعس لكن بدون فائدة لقا راسو محاصر فصورة ديال لبنت لي مزال كيتخيلها قدامو...

جمع الوقفة دخل توضا و خرج فرش صلاية و بدا كيصلي و يطلب الله ينزل عليه السكينة و راحت البال ..بقا صاجد مطولا كيطلب رحمة من الله... صلا صلاتو وهز القرأن بدا كيقرا بصوت عدب مرة مرة كيتزير و كيبقى حتا يترخف وييرجع يقرا بقا هكداك لعشية كاملة بدون اكل او شرب نسا كلشي و ركز فقط فالعبادة...صلى قيام الليل و الفجر...

توجه لبيت نعاس لبس حوايج ديال سبور و خرج مع صباح كيجري.. داتو رجلو لمكان لي كانت فيه الضحية ..وقف كيشوف فالمكان بصمت و عنيه كيدورو فكل مكان.. بقا مدة طويلة وهو جامد فمكانو حتى بدات شمس كتشرق و كتضوي وجهو و جسدو.. كتغسلو من ضلام الليل الى نور النهار .. رجع لنفسو و بدا كيتمشى ببطء شديد وصامت ....

رجع لدار دوش ولبس ملابسو عبارة عن كوستيم عملي بالاسود هز لوراق لي ايحتاج.. خرج بحلة جديدة وملامحو عليهم الجدية توجه مباشرة لمركز شرطة خدا وراق لي ايحتاج و من بعد لمحكمة قاد الملف كامل ...

توجه لمستشفى لي موجود فيه الضحية ..وقف امام المستشفى مكمش حجبانو من شاف الصحافة واقفين كيديرو استجواب مع رجل كبير باين من البادية و حداه شاب مقتبل العمر باين ولد المدينة... تم داخل و عينو على صحافة ممرتاحش.. سول على مكان ضحية بعدما عرف بنفسو عطاوه المعلومات ...

تم داخل حتى شاف امين قدامو وحداه شاب بلباس الممرض...

امين : جعفر...

جعفر: اش واقع...

امين شار لممرض لي حداه : عيط ليا ولد خالتي مع صباح.. غمزو من شاف عمها داخل" ..وراك...

دار جعفر كيشوف فجوج اشخاص لي كان شافهم مع صحافة زاد زير على حجبانو كثر ....

-شكون نتوما...

جعفر : انا لي لقيتها وعلمت لبوليس...

بغضب : كون غير خليتيها تموت ولا هاد شوهة لي تشوهنا قدام ناس...

جعفر: نتا هو عمها...

-ايه عمها وهذا راجلها...

تقدم الرجل مد يديه : شكراً حيت عتقتيها متصورش شحال كنا مخلوعين عليها و ما خلينا فين قلبنا ...

جعفر رد سلام هاز حجبانو و بقا شاد ليه في يديه : كنتي مخلوع عليها..

الرجل بحزن: اكيد هي مراتي ضروري نتخلع عليها...

جعفر: سمعت انك دعيتيها عند البوليس بالخيانة الزوجية ومن تم ما عرفتي عليها حتى خبار...

هبط الرجل راسو بينما عمها بدا كيغوت و والكشاكش خارحة ليه من فمو...

-هاديك واحد بنت الحرام من صغرها ورجليها خارجين لطريق وصخات ليا سميتي فالارض و زادت بهاد المصيبة لي دارت ما عندي فين نعطي وجهي...

جعفر: من خايف على وجهك و سمعة ديالك علاش عيطتو على الصحافة ...

العم بغضب: باش كلشي يعرف اش كتسوا هاد بنت الحرام كون غير ماتت و تهنيت من هاد لعار لي ايتبعني طول حياتي...

جعفر ضحك بجنب : كبرتو القضية و البنت مزال كاع ما فاقت و معارفين اش وقع ليها.. "شاف فيهم مزيان"... كيبان بحالي باغين تسترو شي حاجة...

الرجل تبسم ابتسامة موصلاش لعنيه : لو بغينا نسترو مكناش نعيطو لصحافة...

جعفر حرك راسو بشوي كإتفاق مع كلامو بينما نطق بهدوء..

- و كاين تا واحد المثل كيقول كبرها تصغار اولا اسي...

الرحل من تحت سنانو : كريم...

جعفر بنفس الابتسامة: اسي كريم...

العم كيشوف فجعفر ممرتاحش ليه...

-شكون سيادتكم لي من صباح و نتا كتسول فينا..

جعفر: محامي... المحامي جعفر بن طالب...

كريم: وشنو علاقة سيادتكم بمرتي..

جعفر كيراقب كل حركة منهم بجوج...

-انا لمحامي ديال مراتك...

خرجو عنيهم بجوج ونطق زوج بصدمة...

كريم: ميمكنش مراتي يكون عندها محامي...

جعفر: علاش ميمكنش ونتا شحال ما شفتيها ...شكون قال ليك مجاتش تشوف محامي...

كريم برفض : مستحيييل تكون مشات عندك مستحيييل نتا كداااب...

جعفر هز ميلف بين عنيهم : من اتفيق انعرفو شكون لكداب فينا...

شار لأمين وتم خارج تجاوزهم لخطوات بساط و دار عندهم هاز صبعو كتحدير...

-ما عند تا شي واحد فيكم الحق يدخل عند الموكلة ديالى الا بإدن من البوليس ولا الادن ديالي...

خرج امين لي ما فاهم والو بقا ساكت تا بعدو عاد نطق...

-واش شاك فيهم...

جعفر عض شفاه ديالو من لتحت كيقشرها و كيشوف بعيد..

-راجلها مخبي شي حاجة باين غير من وجهو وعمها عارف شي حاجة وساكت...

امين ساط بجهد: شنو انديرو دابا البوليس لا سمعو انك المحامي ديالها ايشدوك عوتانيك يقولو وقتاش تلاقيتي بيها وهي كانت مختفية فداك الوقت...

جعفر: عارف ولكن مغادي يقولو والو.. هضر مع ولد خالتك من تفيق البنت ما يشوفها تا حد نكون انا اول واحد لي ايهضر معاها من تفيق...

امين: كون هاني انوصيه... " شاف فيه بصمت "..

جعفر: مالك...

امين: علاش قررتي تاخد هاد القضية...

جعفر: مقدرتش نجلس وماندير والو.. صورتها بقات بين عيني..مغاديش نرتاح حتا ناخد حقها...

امين كتفى يحرك راسو فقط.. وكملو طريقهم مخلين اتار اقدامهم من ورائهم.. وخا بجوج لا علاقة فالشخصية لكن صداقتهم قوية و متينة واحد ما يدوز الاخر و بيناتهم معزة و احترام متبادل و كيفهمو بعض غير من لعنين...

في احد المطاعم المطلة على البحر جالسين تلاتة ديال ناس كيتفرجو فالاطفال لي كيلعبو قدامهم... جالس وسطهم راجل لي تنهد بشوي...

خالد: هادشي لي كتقولي اعفراء منقدرش نعاونك فيه...

عفراء :علاش اراجل ختي غير هضر مع با و خوتي و فهمهم هادشي ماشي حرام فقط عارضة ازياء كتلبس حوايج و كتمشى امام الناس...

خالد حرك راسو برفض: لا اعفراء بيني و بين باك و خوتك الاحترام منقدرش نجبد معاهم هاد الموضوع و اصلا ديك الخدمة مزويناش وفيها بزاف تخلويض...

عفراء : انا مغاديش ندخل فداكشي انا اصلا انلبس حوايج المصمم لي بيني و بينو صداقة وهو ولد ناس ماشي ولد لحرام.. نعيط ليه دابا تلاقا معاه و هضر نتا وياه والله تا غادي يعجبك.. "شدات ليه في يدو "..عااافك عاوني غير فهادي...

خالد: سمحي ليا اعفراء ما بغيتش نخسر مع عائلتك خليني فتيقار ..كون كانت شي حاجة ديال لقراية ولا مبغاش تزوجي نعاونك كيف العادة اما تا هاد الخدمة لي باغية دخلي فيها راسك ما نقدرش انا براسي مموافقش تخدمي فيها ...

عفراء : دابا مغاديش تعوني...

خالد : لا....

عضات فمها من لتحت بينما ختها حطات يديها على راسها..

عويشة: علاش باغية تخدمي و نتي مناقصك والو ومتبعة قرايتك علاش ادخلي راسك فالمشاكل و نتي عارفة با وخوتي مغاديش يبغيو ليك هادشي...

عفراء بعيون حمراء : انا اصلا كلشي ضدي...

عويشة: شكون قال لختي لحبيبة كلشي ضدها وحنا كاملين معاك مديريش فراسك هاد الحالة حنا باغين ليك غير لخير...

خالد: عفراء طلبي شي حاجة خرا نعاون بنتي فيها لكن تال هادشي مموافقش عليه...

عفراء مسحات دمعة لي هابطة ليها : ماشي مشكل عارفة لي كاين انا اصلا منحوسة لدخلت مع مازن فالخدمة غادي غير نخرج عليه حسن نبقا فتيقار... اصلا انا مصالحة لوالو...

عويشة : عفراء شهاد الهضرة...

جمعات الوقفة حابسة لبكية بزز ...

-مكاين والو اختي.. مهم نخليكم عندي لقراية دابا....

خرجات من المطعم خلاتهم جالسين كيشوفو فيعض كتافى خالد يهز يدو بإستسلام...

-ما عندي ما ندير راكي عارفة باك و خوتك و زيد تا انا مغاديش نقبل...

عويشة : عارفة هادشي و لكن بقات فيا.. افففق تا هي كطلب حوايج ماشي قدها...

عنقها خالد بمودة: مديش عليها دابا دير عقلها و تعرف هادشي لي كنقولو غير لمصلاحتها..

تحل ضلام خرجات من لفاك هي و مينة .

عفراء : سبقيني لدار انا انتعطل شوي...

مينة: نمشي معاك ليل هذا...

عفراء عنيها مزالين حمرين: غير سيري بغيت نبقا بوحدي...

مينة : وخا و متعطليش بزااف..

حركات راسها باين ماشي فحالتها الطبيعة مخيم عليها الحزن و دايقة بها الدنيا... بقات غادة فطريق بوحدها حادرة راسها كتشوف بين رجليها...

ممقلقاش حيت خالد رفض يعاونها او حيت والديها ضد فداكشي لي بغات... بل مقلقة لانها كتشوف حياتها ديما عكس.. اي حاجة تمناتها او بغاتها كتعكس ليها حتى ولات كتأمن انها فعلا منحوسة كيف قالو عليها ناس لقبيلة...

بقات غادة فحزنها و وكأبتها حتى حسات بصمت داير بيها وهمسات رجالية من وراها.. هزات راسها كتبان ليها زنقة خاوية و مضلمة بعض الشيء.. دورات راسها نصف دورة كيبانو ليها دراري كيشوفو فيها بنضرات مكيبشروش بلخير..

زيرات على يديها بجهد ورمات ساك من يدياا بالخلعة و قلبها كيضرب غادي يخرج من بلاصتو بخوف.. زادت فوتيرة مشيتها وكتحس بيهم مزال تابعينها فشلات بالخلعة و مكان منها الا انها تجري بالخوف لي تملكها.. نسات انها تغوت على وعسا يسمعها ش يحد و يعتقها.. فقط كتجري بأقصى سرعة و صوت دقات قلبها كيتسمع فودنها..

حسات بيهم قربو يوصلو ليها وهي تبان ليها زنقة فيها ضو شوية.. غمضات عنيها كطلب ربي يعتقها....

حلات عنيها وجا بين عنيها جسد رجل بعيد عليها لابس الاسود وكيتمشى حادر راسو...

تسمع صوت قريب ليها..

-شدوها بزربة غادي تهرب...

معطلاتش نفسها وتقدمات بأقصى سرعة عند شاب لي ما حس بنفسو الا و جسد ترمى فأحضانو بقوة..

رجع جسدو بضع خطوات لور و بسرعة مد يدو دورهم على خسر الجسم لي ترمى فحضنو باش يشد توازن ديالو... حس بأنفاس ساخنة كتضرب عنقو و صوت شبيه بالهمس نطق حدا ودنو..

-ع..ت..ق...ن...ي...عتقني....

يتبع...