ولادة من رحم الفساد الجزء العاشر

وصل لمياء وامها لدارهم والهدايا بقاو معاه حيث غايجيبهم معاه نهار الخطبة...ورجع هو لدار حط فرح وفاطنة وهو تيسر يحط طوموبيل فدار صطوف باش يهز موطورو ويرجع لمحل يبقى فيه شوي بينما وذن العشا ويسدو....وهاكا داز العشية عادي عندهم الا عند زين الدين ...

زين الدين"واقف مربع ايديه وعينيه فلارض كيسمع فالسيدة الي كتهضر ديال الميناج"

هي : مالقيت والو اسيدي لو لقيت غانحطو فوق المكتب ولا نعلم سي اسلام ...

علي : صافي ماشي مشكيل تيسري ابنتي لخدمتك"حدرات راسها وخرجات يلاه ضار يشوف ف زين لقاه مشا سبق البيت لداخل كاينين كاميرات المراقبة" بففففف "تبعو كيزرب حيث عارفو غايلقا حنان دخلات تما وفهاد اللحضة مابغاهش يشوفها وهو مزال مالقاش الگورميط بغا حتى يهضر معاها يسولها واش هزاتو ولا طاح ليها فشي بلاصة حيث متاكد انها مغاديش دير خطوة خطيرة فحال هادي تهز حاجة ماديالهاش وخصوصا ديال زين الدين بلا شوارو ولا خبارو عارفها مغاديش تبرهش فهاد الخطوة ولكن ضروري يسولها وينقص المشكيل ..."

زين الدين : الساعة فين خرجت ...

علي"حط ايدو على تيليفون زين الدين الي كان داخل لابليكاسيون كاميرات المراقبة الي مانسطالية عندو " : مكاين الي يدخل من غيرك بلا مدير البلبالة وتهدن وعطيني فين كان بالضبط ...شكون غايطمع يهزو اولدي شكون...عارفين كاين سيكيريتي ودنيا مامنة هنا...

زين الدين"شاف فيه"

علي : سمع مني وعطيني المعلومات انا نقلب راسي الله يرضي عليك را معندو فين يمشي الا اذ تجلى هنا...

زين الدين"بقا كيشوووف فيه ويهبط عينيه لايدو الي فوق تيليفون طبطبات عليه وعاود هز فيه عينيه كانه حاس بشي حاجة او شك فهضرة علي ...نعل الشيطان فشردو وتهدن ولا طفا تيليفون وحطو..هز صبعو وشير ليه ناحية الماريو الصغيور الي فيه المجورة ضرب بصبعو فوقو بمعنى هنا " : هنا مااااازاد ما نقص ...بقات البواط خاوية وهو فين ؟؟!

علي : سااااهلة غير رتاح بقا نتا هنا انا نقلب...

زين الدين"دار ايدو مسند عليها حنكو وليد لاخرى شير ليه بمعنى ورينا " : هانا اسي ...

علي"تحنى شاعل البيل ديال تيليفون قلب تحت الفوطوي الي حدا الميريو وجنابو بقا تحت الماريو نفسو وخا لاصق فلارض هزو...غير كحزو بغا يشوف حتى تسمعت شي حاجة رقيقة طاحت قلب جنب من لور بين ماريو والحايط وهو يلقاه طاح فلارض كحزو مزيان وتحنى هزو وجابو ليه قدام عينيه " : تهنيتي ؟!

زين الدين"طيرو ليه بزربة كمش عليه وغمض عينيه ساط كيتنفس الصعداء"

علي : ça va دابا ؟ مرتاح ؟ "شاف فزين الدين شاف فيه بنص عين" ممممم ايهاي هاي هااااي...مخلي ناس تسنى وحالف متخدم الى مالقيتيه ؟ خدمنا بكرييييييييي...

زين الدين"خشا الكورميط فبواطة ومشا دارو فالكوفخ فور سد عليه ودار البصمة والكود وضار لعندو قرب ليه وقبط راسو باسو وباس ليه ايدو" : بلا بيك مشيت خلااا الحاج علي..."خرج وصل عند الباب بلا مايتلفت ليه" ندير عين ميكة ماعليش مهم تصاب...

علي : كيفاش ؟

زين الدين"غادي" : بروف تبعني وكان نشوفو خدمتنا..."مشا دخل لقاعة الفحص وخلاه كيحنزز"

علي "عاااد طلعات معاه بالي ماتمشيييييش على زين الدين وشي حد دخل من غيرو تا طاح وتوضر...حاول يدير عين ميكة فشردو هو اما كون جات عليه يقلب ديك الكلينيك سفاها على علاها لان حاجتو حااااجتو وياويل الي يقرب ليها الصعرة الي طتركبو ما فسوقها ما يتعاود...ضرب كفوف ايديه وعاود وحرك راسو يمين شمال " : لا حول ولا قوة الا بالله..."جبد تيليفونو بغا يعيط لحنان ولا رجعو لانه حالات كيتسناوه خاص هو شخصيا يشوفهم..."

واخا مشكيل الكورميط تحل من ناحية علي الي تنفس من جيهة حنان ماشي حبا فيها ولا مفضلها على زين الدين وليني خوفا عليها منو حيث الى فات تاهزاتو او قربات ليه نهارها شمسو ماطلعش ليلتها كحلة ممكن يطحنها وميحنش...لكن من ناحية زين الدين حس بالي علي عارف شي حاجة ودار عين ميكة مبغاش يخسر نهار مادام لقاه لبدها حتى يكملو خدمتهم ويشوفو اخر حالة لليوم....بالفعل غير كملو معاهم وصلات الستة ونص تقريبا حيد casaque الي لابس اي لباس الخدمة هز تيليفونو والكونطاكت والشكارة المرافقة ليه دائما ديال الماك فيها حتى حاجياتو الخاصة من دوا لاباراي ديال سكر الخ...تاكد انه ماخاصو والو عاد مشا الكوفر فور حلو هز البواطة ديال عمرو لا تمشي تجلى تاني يجهل،،خرج عطا تعليماتو لاسلام المساعد بخصوص المواعيد ومشا كان علي خرج سبق ركب فسيارتو وزاد اما هو نزل من سانسور ديال البروفيسورات كيكون خاص بيهم عاد باقي المصاعد خاصين بالناس ومصاعد خاصة بالمرضى والفراملية كيكون طويل بحسب البياصات...

زين الدين"قبل مينزل لاكاف ديال باركينغ وقف المصعد عند الطابق الي فيه الموارد البشرية خرج مركز غير قدامو بديك التغوبيشة المعتادة..اغلب الموضفين مزال معارفينوش را هو مول الشي باقين جداد حتى وصل لمكتب RH الي فيه ثلاثة المسؤلين دق الباب باحترام ونطق بصوت خاااتر" : السلام عليكم...

م.البشرية"وقف هو ولاخور كانو غير زوج الي تما ثالث مكاينش فالغاالب كيدير دورة فالمكان على الموضفين ولا كيحل مشاكل" : دكتور البغدادي ..

زين الدين"شير ليه باش يجلس" : شش مكاين لاش رتاح .."مد ليه واحد الورقة ساني فيها بالكاشي ديالو " تصرف بهادي...

هو"هزها قراها وشاف فيه" : ايه مرحبا دكتور...

تاكد من شنو بغا من بعد ما قاليه زوج كلمات ماكثرش معاه الهضرة يعني ما قل ودل واصلا شنو بغا را موجود فديك الورقة بالكاشي بدون نقاش غايتصرف...ولكن شنو فهاد الورقة الي عطاه ؟! واش ورقة عادية كتخص المشفى او شي حاجة الي هي خاصة وبغاه يتصرف على اساسها ؟! ...شدها من عندو قراها وهز فيه عينيه ...

هو : كون هاني دكتور...

زين الدين"حرك راسو وضار خرج نزل لباركينغ كان حتط سيارته فواحد القنت فمكان خاص...ديماراها وزاد لدار الي غير دخل لقا الهضرة فالدار صوت العيالات وضحك من بعيد فالصالون الكبير ...حدر راسو وتم غادي طالع حتى سمع اسمو من عمتو"

توبا : ولدي الحبيب على سلامتك نوجد ليك متاكل ؟...

زين الدين : لا ماعلى باليش دابا طالع نبدل وخارج عندي ميتقضى برا"ضار جيهة الصالون ورجع شاف فيها"

توبا : غير شي عيالات كنعرفهم جاو يباركو الافتتاح... ياك ما صدعوك اولدي ؟! سمح ليا ...

زين الدين"هز حجبانو ب عصبية " : لاش نسمح ليك ؟ دارك هادي جيبي الي بغيتي اش ليا انا ؟ بغيتي تبداي تعصبي فيا دابا بهاد الهضرة الي معندها لا فايدة لا شغل ؟!

توبا : لا لا غير خفتك تبرزط عارفاك كتبغي الدنيا تكون مهدنة...

زين الدين"هز ايدو وهضر بنوع من الانزعاج من هضرتها عينيه فلارض" : مساكنش غير وحدي هنا عايشة معايا فدار خوك وولدو الي هي دارك مكاين لاش نتحاسبو بهاد الهضرة لا بغيت نتكالما كافيني بيتي مكاين الي يبرزط ملتي..."بغات تهضر وهو يحبسها بصبعو على فمو" صافي بلا كثرة الهضرة المرة جايا نهز من جيهتك "زعما نتقلق منك"...

توبا : صافي ولدي صافي.."شافتو بغا يمشي وهي توقفو" الصدقة الي بغيتي دير امتا باش نبدا نوجد ؟

زين الدين : نسالي شي مشاغيل هاد اليومين وحسبي حساب الجمعة ان شاء الله ..."خلاها وطلع لفوق دخل دوش وخرج لبس قبية وسروالها ديال قطن سخان لبس طاقية صوفية كحلة على راسو هبطها تا لعند حجبانو ولا كيبانو عينيه كي النسر كيلبس بخااااطر خاطرو كانه فرحان كان نفسو مرتااااحة وخاطرو هاااني ...لبس تقاشرو هز تيليفونو وساروت طوموبيل دارهم فجيبو رش بارفان غير رشة خفيفة لبس سبرديلة ونزل خرج من الفيلا واخذ اتجاه المدينة فين كاينين المحلات ديالو...

‏"ستبقى يتيمًا في غياب من تحب حتى وإن عانقكَ العالم بأسره."

حلات عينيها على صوت المنبه الي فتيليفونها مدات ايدها بعشوائية تشوف الساعة غمضات عيني وحلات لاخرى بانت ليها سبعة وشي حاجة ناضت تا توگضت مشات لدوش توضات ورجعات صلات الصبح قبل متصايب الفطور لبسات تريكو دالصوف غوز فيه ضفيرات الوسط عندو الكول طويل وعريض طواتو جبدات من المجر كولون كحل فيه تبطينة لداخل ديال البرد لبساتو ولبسات تقاشرها مشطات شعرها وهي كتشوف فالمراية فرحانة بالقرار الي خذات عرض مغري وخا ترددات فلول وخافت جدها لا يتقلق لكن من بعد ماهضرات معاه واستاشرات عصام وفوزي ساندوها وفرحو ليها...واليوم غاتخطي اول خطوة ليها من بعد هاد القرار...ضفرات شعرها لور دارت لاستيك ذهنات وجهها بايكخون la roche posay teinte...على لون وجهها والوحيدة الي وافقات بشرتها الحساسة وكتخبي ليها النمش الي فوجهها...اجلات تدير گلوص ماط خفيف فالفم وماسكارا و ترش بارفان حتى تسالي الفطور ...خرجات وجدات الفطور حطاتو فالبيت وحطات صينية لاخرى ديال المعلمية الي غايجيو مع تسعود اما الغذا والخبز مكلفة بيه فاطنة...

عصام"خرج من البيت مطلع شوكتو عاد فايق من نعاس طل عليها لقاها كتفطر ونطق بصوت مدعدع بنعاس" : صباح الخير...خاصك لفلوس ؟

فرح : لا مزال عندي اصلا طرونسبور غايوقف عند شارع...

عصام : نوقف معاك ولا بلاش ؟

فرح : لا بلاش..."حرك ليها راسو وزاد لدوش اما هي سالات ومشات لبيت دارت الميكاب والبارفان ايسكادا ديال العبار...الي اجلات هزات صاك طويل دارتو على دراعها طلات على برا لقات شمس وخا الحال بارد يعني ماتحتاجش لمونطو هزات غير شال ديال الخيط كبير رماتو مزوق بالبيض وكحل. رماتو عليها لبسات سبرديلا كحلة هي الي مناسبة ليها وعندها الاختيار قليل باش تفنن فاللوان يعني كانت غاتختارها هي...يلاه خرجات عند الباب حتى وصلها ميساج من ايمايل فيه مصلحة الموارد البشرية كيطلبو منها فاش توصل توجه لعندهم مباشرة...

فرح"وقفات كتسنى فالميني بيس الي غايوصلها لقات باقي الحال على مايوصل حتى قشعات سيمو جاي خاشي ايديه فجيابو وضارب حطة ناضية غا هو مغوبش كاره يفيق فداك الصبيح" : اااييي خويا العشير فاااايق !! كي طرا وجرا ؟

سيمو"شاف فيها" : تت ناري تي هنا مالك فايقة فهاد الليل ؟!

فرح"حلت فمها" : اااا ؟

سيمو : تحكريش..."تفوه" ايمااا بغيت غانتلاح نعس منفيق على يومين..."ضار شاف فيها طلع وهبط طلع وهبط عاد ضرباتو الفيقة وشاف اناقتها ويالالة كيف كتبان فداك اللبسة " : هايهاي على مارشميلو ديال خمسة دراهم هاي هاي هاي..تي صافي رسميا ضصرتي مادموزيل panda pop

فرح"شدات طرف ضفيرتها وهبطات راسها بدات كتمايل" : ههههم ياك بعدا...

سيمو : ناس الخدمة وداكشي...ااااربي والعگوبة لصفصف ..تفو خلات علينا بلاصتها...قلبي قطعة منو تشوات عليها كبدتي تشمعات فغيابها...

فرح"غوبشات فيه " : ياااك وانا معجبتكش ؟

سيمو : تي را تي وهي را هي لا غبرتي تي يضرني داكشي الي غبرات عليه هي وقلتو عليها ...

فرح"خربق ليها دماغ" : هااا ؟

سيمو : ناري خربقت ليك شبكة...

فرح : فين غادي ؟

سيمو : واحد شركة بغاو سيكيريتي مابين ربعة العشية تال تمنية الليل هي ديك الوقيتة فين كنفيق مناااسبة بجدول اعمالي...

فرح : اااه بووون مع نتا مكتساليش كي تفيق تمشي تجرب ليك جوج جغمات وتجي تبكي علينا اااا ضحكو علييااااو"كتعوج تعيب فيه مع ديك الضفيرة الي فراسها كتبان فحال سنفورة "

سيمو : سيري سيررري هااكي"صبع ليها" سراب را فن خاص تكون خاااتر فيه..."عاود شاف فيها" الخدمة جديدة ؟

فرح : واياااااه العقبة ليك ....

سيمو : انا حاس براسي غانموت ههههه مابان ليا بو خدمة شي نهار نقنفج غا وحدي...

فرح"شافت البيس وقف وهي دور عندو" : الله يحفضك ماحنا على فالك سير سير انا مشيت..."صيفطات ليه بوسة فالهواء وركبات بقا هو واقف كيشوف فيها غاديا حتى مشا البيس مبقاش بان ...مسافة الطريق ديا ربع ساعة حتى كان داخل حل ليه العساس الباب من لور ووقف بيهم كانو هما عشرة ناس منهم دراري وبنات بداو ينزلو وهي معاهم كتشوف فالدنيا والبناية كبيييييرة هزات عينيها لفوق كيبانو ليها لوغو ديال الكلينيك فينما ضارت وهي تقراه " : BG اووففف شحاال كبييير..."هزات راسها فداك العلو هبطات راسها وضارت تقلب مشات مع البنات والدراري الي جابوهم جداد دخلو لفين نعثو ليهم طلعو فالسانسور لطابق ديال الموارد البشرية الي جا نيت فالادارة ديال المشفى..لقاو زوج فاستقبالهم منهم رئيس الموارد البشرية...كان فالبادج ديالو اسم البشير رجل كبير شوي باينة فيه الوقار وهو شاف ديال الموارد البشرية...

البشير : سطاجيير الي جاو من كلينيك النوري ؟ "جاوبوه ب نعم" Emm c bon ! Donc je vois qu'on a quatre infirmières polyvalents et deux infirmières de bloc opératoire et les deux autres de laboratoire des analyses et aussi deux techniciens spécialisés en comptabilité ....(مزيان دونك هنا كاين ربعة ديالles infirmières polyvalents و جوج من قسم laboratoire des analyses جوج من قسم المحاسبة و les deux autres infirmières de bloc opératoire.)......ربعة الي ذكرت لولين غايمشيو مع السي منصف والي من قسم المحاسبة غايبقاو هنا وزوج الي من وراهم غايمشيو اوسي مع منصف هو غايديكم لجناح فين غاتكونو ك مساعدين بيغيود دسطاج حتى نعيط ليكم باش نكمل باقي الاجراءات ملفاتكم عندنا مبدئيا والي من قسم laboratoire des analyses شكون ؟ "هزات فرح ايدها ومعاها واحد البنت" شكون فرح الخيالي ؟

فرح : انا موسيو ...

البشير"هز فيها عينيه من فوق نضاضر" : داكوغ نتوما تبعوني ...

سبقهم القدام وتبعوه كيف قاليهم بالضبط لاخرين مشاو مع لاخور حيث اختصاصهم وحدو وكل وفين غايتحط فالاختصاص ديالو بحكم الكلينيك فيه عدة تخصصات وطالبين عدد مهم باش يخدمو عندهم ولكن الي عندهم تجارب وخبرات ماشي غير من ماكان والي عندهم شهادات عالية فالتخصصات المطلوبة...ماشي غير جي وخدم فيه الا اذا مكنتي مدوز فسطاجات وخبرات في حالة وحدة هي الى كان غايدير سطاج عندهم فقط....

فرح"تابعة البشير وكتشوف فالمكان ممرات طويلة غرف المكاتب فالطابق ديال الادارة...حتى خرجو من الباب الكبير ديال الجناح ودخلهم لمصعد الخاص بالموضفين كلو مرايات ثواني حتى تسمع طننن تحل المصعد اما جناح فيه غير سكااااااات صهييييط ضار لعندهم وهضر بصوت منخفض ريحة النقا والمعطر والمعقم كتفوح فالمكان الي كان بااارد وريحة الادوية تاهي ..."

البشير : نتوما دابا فجناح المختبر الخاص بالمشفى فيه حتى خاصية ليزناليز الي منهم كيمشيو لبرا هنا كاينة امكانية كيف قلت البعض ماشي كلشي..."تم غادي وهما تابعينو كلشي صااقل الموضفين خدامين شي داير بافيط وشي لا "

البنت"الي مع فرح نغزتها" : نريييي على كلينيك كي داير..

فرح : زوييين باقي جديد يلاه تحل ماعرفتيش شكون مولاه ؟!

هي : قالو بروفيسور اسميتو زياني جو بونص...مهم مع الخدمة نعرفو...

البشير"خربق شي حاجة فالتيليفون دقيقة مكاملاش تحل واحد الباب كبير تما وخرجات واحد السيدة فعمر الاربعين جامعة شعرها الاشقر الفوق دايرة البافيط خاشية ايديها فطابلية الخدمة غمضات عينيها بابتسامة" : دكتور نورة لباس ابنتي..

نورة : سي البشير لباس الحمد لله لهلا يخطيك..."شافت فالبنات" اه البنات جداد n'est-ce pas ?

البشير : ويي ..هادي ايمان وهادي هي فرح ...

نورة "حركات ليهم راسها بابتسامة بشوشة" : بونجوغ مرحبا بيكم "شافت فالبشير" داكوغ موسيو كون هاني غير خليهم ...

البشير : بون انا مشيت اي بوكوغاج البنات...

خلاهم دخلو معاها لداخل ومشا هو حتى وصل لسانسور ركب رقم الطابق الما قبل الاخير تحل الباب ودخل كان فالاستقبال تما اسلام الي كيتشونجا هو واحد الولد اخور...

البشير : سي البغدادي كاين ؟!

اسلام : كاين فلاصال لداخل انا نعلمو ..."ناض بالخف دخل من جيهة الباب رئيسي ديال قاعة الفحص هز الفيكس حيث ممنوع عليه يدخل لديك القاعة لدااخل فين كيقلب هو بنفسو الحالات ما بعد العملية...جاوباتو الفرملية.. كان مع دكتور علي الي كان كيكنطرولي واحد الحالة ذات تشوه فالوجه نتيجة حادث حريق...علماتو بالي البشير كيتسناه حيد ليگانت بالخف وعلمهم يقولو ليه يدخل المكتب...حيد البافيط ودخل المكتب دخل البشير...

زين الدين : الحاج البشير رتاح...

البشير"هز ايدو باحترام" : لهلا يخطيك اولدي...احم جيت غير نعلمك الامانة في الامان كلشي مزيان...

زين الدين : الكونطرا ؟

البشير : انا نزل دابا ونعلمهم يهبطو باش يكملو باقي الامضاءات بقا غير يعطيونا الكونط بونكيغ ديالهم باش يبقى يدوز صالير اوطوماتيكمون....

زين الدين : الله يرحم من رباك...الى شي مشكيل علمني الله يجازيك ...

البشير : كون هاني يلاه انا مشيت مزال عندي منقضي مع لاخرين نتاكد منهم..."حرك ليه راسو وتم غادي يلاه غايخرج حتى وقفو بصوته"

زين الدين : تهلا "غمزو"

البشير : تهنى من هاد ناحية ولدي ..

الثانية عشر ضهرا..كان جاي من جيهة المسرح الكبير ديال المدينة هاز ميلف فايدو وايد كيكمي بيها...

سيمو : دينمو البشري قواد من لاخر...كمل ليصونص ومن نكمل ليصونص يقوليك ماستر وزيدك ماستر لا عند خبرة ديال خمسين عام بغاوك تكون قربتي لتقاعد ولا بغيتي تخدم بالكونكور تكون خارج من سادس ...تا كي دير مع هاد بني قحبي كي دير...اااااااا صافا واااااااا فريحة ..."داز من حدا الكانتينة اي بلاصة فين كيشربو شراب جات تما نيت فين داز تا بانت ليه جوج فيدورات دفعو واحد زوج دراري تقريبا فعمر سيمو كمش عينيه فيهم جاوه معرفة محدو كيقرب حتى كيعرفهم نيييت صحابو...

سيمو"وصل عليهم" : شباندي ؟ مالكم اتبي تاني ؟!

شاباندي"كشاكشو خارجة كيهضر وكيتخلخل متمل بالمعقول" : وتااا برب بررررررررب تانح***يييه ...

سيمو"شاف فلاخور الي محنى على ركابيه" : ابوتريكة مال خليقة مك تانتا ؟ شوهة اصحبي فالصباح مال دينمكم فهاد العبث العبوثي ؟!

ابو تريكة"كيهصر ثقييييييييل وريوگو دايزة مخلا باش مسحهم" : وينعل عدو ربو بهاد الصباح دا لينا رزقنا ولد القواد...

سيمو : معامن نتوما فهاد زبي كامل ؟! بن ستيوة ياك ؟! اش قربكم ليه ينعل عدو ربكم نتوما وياه ياك كنقوليكم لا تسلفوش ولا تعطيوش لقواد بوه را غير نصاب...رزقكم مشا عالصباح ؟

شباندي: وو ويييييييويوووو نملخ مو انااا.."مسح فمو الي كان دايز"

سيمو : سكرة لاروب حق الرب...صافي روي ستون...تفو على حبس كيدايرين زيدو قدامي ل خياميكم..."جر كل واحد فيهم قدامو دفعهم كيتخلخلو شاف جيهة الفيدورات حط ايدو على صدرو" سمحو لينا الخاوا"هزو راسهم وحطوه ..خشا داك الملف فجيب سروالو اللور..حتى خرج ستيوة من البار كيغوت ويعرعر تلاح على هادوك بدا يجندخ فيهم وينطح وهما كيطيحو وينوضو يعطيوه ...جا سيمو دخل وسطهم دفع ستيوة" تا ريح القلاوي جمع كرك اصحبي...

ستيوة. : سيمو خليني كنعزك خلييييني وحيد من قلاويا بعد من كري فهاد صباح...

سيمو : لبدها اصحبي غاتخىج على راسك وعليهم.."شادو بزز اما تنقاز قرب ينقزو ويطير على هادوك"

ستيوة : بااااعااااد بالرب لا بقات فدينمهم....اعععععع...

سيمو" بغا يهضر دفعو سيتوة بحر جهدو مشا لهيه حتى.طاحت ليه باكية الكارو الي عطاه زين الدين كان كيتسقرم عليها لا تسالا ليه...يلاه غايهزها تا جاه شي حد من لور هز ليه راسو ودوز ليه على عنقو بموس تا شرشرو دماياتو حس بالضو سنا ليه فعينيه " قخغغ قخخخهغغ..."شد عنقو بايدو ماعرف مسكين باش تبلا ضربة جاتو من حيث لا يحتسب وماااا حسب حسابها.... بالدعقة والخلعة طاح لارض بجهد وحر طيحة محسش بيه يكفي قلبو الي ضرب على جهد ...

"متبكيش يا ميمتي دموعك غاليين عليا دابا يفاجيها ربي وتهزي راسك بيا انا العاطل مشات حياتي باطل انا ديما حاصل حتى في جيبي واحل انا"

هل هي ضربة غدر ام ضربة خطأ ام ثأر وتخاذ فهاد اللحضة الي مكانش عالم بيها وكان كل همو انه يلقا خدمة تحاول تخرجو من روتين الفاسد الي عايش فيه لا ربما يحاول يحسن من راسو وعيشتو الي عايشها لا هو كمل قرايته الي كان مزيان فيها ولا هو عايش كي ناس الي قدو مقارينش ودمرو وتقاتلو باش يجيبو لقمة حياة بالدراع الحلاال....مادار تاحاجة فقط الشراب والجوانات ونعاس وتسركيل...

ستيوة"خرج عينيه" : سيمو !!"هز عينيه فالي ضربو ماثيقش را هو الي غايذبحو بديك طريقة وستيوة هو الي كان موگض فيهم الى جانب الفيدورات الي تما..." وااا ينعل عدو ربك اولد القوااادة اش درتي يحرق زا*** بوووووك"غوت تا بح ليه صوته" سيمو"تحنى لعندو الي كان مسكين شاد قرجوطتو كيخرخر وعينيه فالسما " سيمو توگض معايا ...

سيمو"بغا يهضر ماعرف مسكين اش يدير ماعرف باش تبلى كيشوف غيى فالسما حس بروحو بغات تخرج بين عينيه النهاية هادي نهاية حياتو ...جاو بين عينيه كاع الي عزاز عليه اولهم امو نجية خواتاتو التوأم صغارات...باه الي عند الرحمن ...فرح صفاء فاطنة عصام فوزي ناس القراب ...واش هادي هي حياتي هنا حدها واش الروح الي خلقها الله قبل تمنية وعشرين عام غادس تسلم الى بارئها...هادي هي نهاية السيمو الولد الي عرفناه من بداية القصة الضحكة الي مكتفارقش وجهو نويطاتو الخالدة الانسانية رغم الفساد الي معيش فيه راسو...القلب الكبير العقل فبلاصتو فوقت الجدية...سيمو الاخ بالرضاعة لفرح وصديقها الصدوق والفردة ديال صفاء...ثلاثي الي صداقتهم تقريبا شبه نادرة...واش وصل الوقت ان هاد الثلاثي ينقص فرد مهم منهم ويغادرنا الى دار البقاء...الشخص الي تقاتلت على قبله نجية باش يكبر ويقرا ويخدم وتعول عليه يهزها هي وخوتاتو ؟! ...

كل هادشي داز بين عينيه وهو كيشوف فالسما واصوات الناس الي تجمعو عليه كيتسمعو بعااااااااااد وهو عينيه غير فالسما ..

ستيوة"الشخص الي قال عليه سيمو ماثيقوش بيه را نصاب صدق هو الي كيغوت باش يعتقوه والي ضن انهم صحابو هما الي غدروه ومن هنا ومن بزااااف الحالات المشابهة نتعلمو..." : واااااا جر الخرااااا واااااااااااااااااااااااا شي حد يعتقوووو وعتقوووووووووووو لاش كتفرجو فينا يغرق لبوكم الشقااااااااااااااااااف..."حيد تيشرت الي كان لابس ودارو على قرجوطة سيمو وورك عليها هز عينيه فالسيكيريتي الي تما " عيطتي لابيلانص (الاسعاف..لومبيلونص) ؟

هو : عيطت عيطت... اصحبي غايتعطلو راك عارف لا سعفتيني ديوه فطوموبيل ...

نقز واحد من الي كيتفرجو : ديه فطوموبيل لا تعولشاي على لومبيلونص...

ستيوة : جري عيط ل نجيب يجيب ساروت ديال طوموبيل نتحركو بيه من هنا "حرك ليه راسو ودخل كيجري علم صاحبو اما هو شاف ف الي غدر سيمو وهو يتنخم عليه" خخخخخ تفووو على دينمك القواد ...

شاباندي"باقي ثقيييل واخا طرشو واحد البوديكارد وشادو لا يزهق اما لاخور فرتح كيطيح وينوض يكمل جرية..." : وا فففف فاش شفتوش انا واتااا حسااب ليا تا واهاااااااععععع طلاق خليني نشوف صاحباااااااااي...

ستيوة"مكرهش ينطحو وليني شاد تريكو لسيمو " : سد كابينتك الله يفرع لموك سوة اولد القحبة بلاتي على عدو ربك باغي تشريها ليا ...."بان ليه صاحبو جاب ليه سوارت " جيب شقفة راهي واجي هزو معايا نتحركو بيه لسبيطار الكبير تحرك...

صاحبو : سلااامة سلامة..."طار لطوموبيل يحركها حيث لا بقاو يتسناو سيارة الاسعاف بقا تما...اما هو هبط عينيه لسيمو لقاه باقي كيشوف الفوق وعينيه غادين وكيتغمضو تا هز ايدو وهو يحطها على ايد ستيوة الي مزيرة على قرجوطتو وضغط عليها بداك الجهد المتبقي ليه قرب لعندو " سيمو شد فراسك وحاول را عصام لاااا مشيتي مانا فخير معاه...سيمو حضر عقلك معايا ..."هز راسو كيغوت " وزبوووووووور مو لا بقات فيه ولد القحبة واااااااااااااااالد القحبااااااا يغا يصفيها ليه...سيمو سيييييييييمو فشرد ميمة ...

فشرد الميمة الي واقفة قدام البوطاجي كتقلي فالحوت وقلبها منغوص عليها من صباح الي مشا وهي بالها ماهواش مرتاح...جات تقلب الحوتة طرطش عليها زيت تا قفزات...

نجية : اااربي سلامة..."مشات تجري لروبيني خوات الما على صبعها الي طار عليه زيت " احححح فففف "حسات بيه برد شوي وهي ترجع حطات الحوت الي تقلا هزات عينيها فالساعة لقاتها فاتت الوحدة" هاويلي هذا شتو غطس برا ..

هزات الغذا حطاتو فوق الطابلة الوقت قريب على البنات عطاتهم ياكلو تغذاو وغسلات ليهم هزو شكايرهم وزادو لمردستهم خلات الغذا محطوط غطات ب ناپ صغير جلسات تفرج فالتلفازة تسنى وصلات جوج ونص وماجاش وصلات ثلاثة ومزال ماجا !!! حتى سمعات الدقان هو دقان عادي لكن هي حسات بديك الدقة ضربات ليها فقلبها تا شدات على صدرها وهي تقفز واقفة مشات حلات الباب لقاتو فوزي عينيه حمرييين ووجهو ماشي تالهيه...

نجية : فوزي مالك ؟

فوزي : سيري ميمتي لبسي جلابيتك واجي معايا ...

نجية : فين ؟ ياك مكاين باس اولدي وجهك ما مريحني اش كاين ...

فوزي : وتي غير لبسي انا حدا دار بغاك عصام فشي حاجة ..

نجية"قلبها بدا يضرب من ناحية ومن ناحية كتشوف ففوزي مقادرش يركز فيها الشوفة خاف يشوف فيها يبكي...تالقات راسها شادة فالباب بكل قوتها لا طيح...وكلامها الي خرج من فمها مصحوب بنبرة بكاء واحساس بالي شي حاجة واقعة لكبدتها" : واااااااااااا فوزي غاااا قوليا محمد رضى اش وقع ليه واااااااااااااا فوزي غا قوليا كبدتي اش طاري ليها واااااااا فوزي راني بايتة نحلم وقلبي مهانيش من صبح ربي وااااااااا ولدي لا تكذبشاااااااااي علياااااا"حطات ايدها فوق قلبها" هذا لا تكويهشاااااي ليا من جيهة بكري ووحيدي...

واخا مزال ماعرفاتش شنو كاين لكن قلبها حالو حال اي قلب ام حاسس بكبدتها والي مجربة الكبدة غاتعرف المعنى...كانو غايخواو بيها رجليها كون ما فوزي دخل وشدها وبلا ميقوليها شنو كاين هي من راسها حسات وعرفات بالي ولدها بيه شي حاجة وهي اصلا عايشة من نهار تبلى وهي كتقول شي نهار يجيبو ليا خيارو بكثرة ما مرافق مع رفقاء السوء المكفسين فحياتهم والعايشين على مفاسد الدنيا...عاونها تا لبسات جلابيتها الي ماعرفات كي دارت رماتها عليها وشالها لاحتو مخربق وقف الموطور ركبات وراه زقبل مايزيد...

نجية : ولدي اش طرا ليه غا قوليا ...

فوزي : مزال ماعرفتش اميمتي علمني غير عصام نجيبك شي حد قاليه را ضارب مع شي براهش...

نجية : واش انا عالماه ومبرية منو ؟ واش انا تبريييييييت منو يفرق عليه السلاگط والحترف واش ماگايلاهاش ليه ؟! واش بغا يقتلني ...

مجاوبهاش فوزي كسيرا نيشان بالمطور والوجهة المستشفى الكبير باش يلحق على عصام تما الي وصلاتو لخبار من واحد من الدراري الي كانو تما اغلبهم كيعرفو عصام وسيمو وعارفين قيمة سيمو عند عصام والعلاقة الي كتربطهم...اما فاطنة كي عرفات لقات نجية داها فوزي ولحقات عليهم فطاكسي من بعد ما بلغات صفاء اما فرح ف تيليفونها كان خارج تغطية...غير وصل سيمو مع وقف الموطور بانت ليها فاطنة واقفة عند الباب وعصام كيمشي ويجي بغا غير يدخل مالقا كيفاش يدير...

نجية"غا بانو ليها واقفين ومعاهم تا راجل فاطنة جيلالي حادر راسو هنا طاحت ليها النقطة وبان ليها ولدها فعداد الاموات...دارت ايديها فوق راسها وهي توقف وبدات تلالي بصوت شبه مسموع وواحد صوت فاش كتسمعو الى قربتي كتسمع رنة ولحن الحزن كيضرب فالقلب " : وااااااااا وليدي وليدي وليدي وااااه واااا بكري بكري بكري وااااه...وااااااااا كس طرا ليك يا وليدي واش دارو ليك واااااااا وليدي وليدي واااااا ربي لا تشويني فيه وااااه...واااااربي واربي واربي ولاش مجموعين تما واااا ربي لا ديتيه عندك عطيني صبر وااااه"دموعها دايزين ضارت فاطنة شافتها بانت ليها هازا ايديها وكتلالي وتمايل "

فاطنة"نغزات راجلها وعيطات لعصام ومشات لعندها عرفتها غا تنوا وتقول راه مات" : نجية سمي الله وصلي عالنبي ونويها زينة ربي يرجعو ليك اااا نجية يرضي عليك اخويتي حضري عقلك...

نجية : واااااا كبدتي اش جرا ليها اخويتي واااا قولو ليا وبردو العافية في گليبي وااااه...

فاطنة : را كنتسناو غايدخلونا العساس مكاينش باش نعلموه يدخلنا لمشتعجلات(مستعجلات)...

عصام"قرب لعندها وجرها لعندو خشاها فصدرو كيبوس فراسها ويعاود" : ميمتي مكاين باس شدي فراسك حنا براسنا معالمينش...

نجية"هزات فيه راسها" : اش گالو ليك ؟ اشمن خبار وصلات عليه ؟!

عصام"مابغاش يقوليها را تذبح باش ميكملش عليها " : جا بغا يفك شي صحابو جات فيه دقة داه نيت صاحبو فطوموبيل

جيلالي"عيط ليه من عند الباب" : ويلاه دخلو خلاص هاهو حل الباب"غا سمعوه ومشاو يجريو فوزي شد ف نجية ومشا بيها لان القوة مسكينة مبقاتش عندها دخلو كاملين لمستعجلات سولو عليه تما...لقاو ستيوة واقف هو وصاحبو بقا ب بيل سماطي حيث تيشرت دسالو كان حاطو على قرجوطة سيمو...شافو عصام وعيط ليه " : نور الدين ؟!

ستيوة"حيث اسميتو نور الدين وكنيتو ستيوة كيعيطو ليه بكنيتو...شاف عصام وناض بزربة لعندو" : عصام ...

عصام"جرو بعيد لا تسمعو نجية الي جلسات فلارض كتلالي " : اش وقع ؟!

ستيوة : غدرو شاباندي معرفت لدينمو اش قاليه راسو دوز عليه وليني على ما بان ليا موحال ضرب ليه العرق شحطة فركابي (هي جاتو ضربة ماشي خطيرة بزاف) والله يعلم تاني جبتو مغيب ولا وجهو صفر...

نجية : واااااااااا فينهو ولسدي وااااعطيوني خبيرة على محمد رضى وااااااا فينهوا اش طرا ليه وياااااااااربي لا ترزيني شاي فيه انا راضية بيه لا مافيه مايتلبق غا خليوه ليا اهى اهى وااااا بغيتو مسالي سكايري غا خليوه ليااااا"كتحك فصدرها"ولا كان ميت غا علموني ولا تخليوني نتحرگ ونتشوا وانا معارفة واااالي (والو)

فاطنة : وااا نجية وتي صلي عالنبي وذكري الله را لا كانت شي حاجة خايبة يعلموك دك ساعات وذكريها زينة تجيك زينة ...

فوزي"قرب لعصام" : سول الحبس اش كاين مالهم تعطلو ؟!

ستيوة : دخلوه لداخل تا مشيت قرقبت على مهم لقيت طبيب كيقصي قاليك تناكل ونجي نشوفو ..

عصام"تعصب ونسا وهو يجهد صوته" : ومات هو ديك ساعات مااااات ينعل دينمهم فهاد النهار...

نجية"سمعات مات وهي تغوت لربي الي خلقها" : وييييييييييييييييييويويويويويويو وااااااااااااا تشووييييييييييييييت واااااااا وليدي مشااااااااااا اهى اهى..."طاحت لارض كتمرمغ ليهم ودموعها شاقين طريقهم من جنب عينيها لوذنيها لعنقها شال تحيد وشدادة دراس تفكات وشعرها خرج جات فاطنة تشدها ما قدرات تا طلو ناس الي تما كانو جالسين فالمستعجلات "

فاطنة : وا فوزي اجي شد معايا عصام...

جيلالي : الحاجة صلي عالنبي را مكاين والو..."جا عصام شدها بزز هو وفوزي تا قالو ليها را مكاين والو غير تعصب عاد بدات تهدن بقات فلارض تكاتها فاطنة على كتفها مشا فوزي كيجري جاب ليها الما جا سيكيريتي كان غايجري عليهم "

عصام : صافي را تهدنت غا تيسر نتا رحم شوية رحم "حمر فيه" رحم ولهلا يطيحك فين طاحو..

ستيوة : صافي اخا ناجي لبدها ميمتو مشوية تيسر اخا"هضرو عاد مشا تا بانو ليه وجههم كيخلع خاف يقسموه على ربعة خصوصا ستيوة كلو واشم وحنكو فيه ضربة كبيييرة قديمة وجنب شنايفو ضربات قدام"...

نجية "هزات عينيها فالسقف" : يااااااااربي ياااااربي راني بغيتو كيما هو قايلة بيه يااااربي لا ترزيني فيه وعمرني باقي ندعي عليه يااااربي تسمح ليا

بدات لعمل ديالها الي بدات هي والبنت والي توافقت هي وياها وخا يلاه تعرفو غير هاد صباح تفاهمو ....وصل وقت الخروج...

نورة : يلاه البنات تقدرو تمشيو حبيباتي...

ايمان : دكتور نورة غادي نبقاو هاكا بنفس توقيت ولا كاين شونجمون ؟

نورة : سي هاد première semaine بنهار و سيمانة الماجية غايتقلب توليو بالليل مع عشرة ليل تكونو هنا تمنية صباح تخرجو كل سيمانة بنوبتها ...

فرح : داكوغ دكتور..."هزات صاكها هي وايمان وخرجو نيت مع واحد الفرملي معاهم حفض طريق حيث بدا بشهر قبل ميديرو الافتتاح دخلو معاه لسانسور"

ايمان : كلينيك زوييين ..."شافت فالفرملي" خويا عادل شكون مولاه ؟!

عادل : على ماعارف البروفيسور زياني هو الشاف ولكن معاه شي حد الي عرفت هو مول شي هنا...مي مزال ماشي بروفيسور غير مساعد"تحل سانسور" هانتي من هنا وخرجو من هاد الكولوار كيدي نيشان لباب ديال موضفين متخرجوش من البيبان الكبار...

فرح : شكراااا ..."خشات ايدها فصاكها تجبد تيليفون لقاتو طافي" هيييييييي اوييييييلي طافي ؟!

ايمان : هانتي خرجتي تالدار وشارجيه...

فرح : غايكون خويا قلب عليا فمختفون هههه

ايمان : ياك عارفك خدامة منضنش يتقلق عليك ...

فرح : وايه ولكن لا يبغي يسول عليا ولا شي حاجة..."وصلو لعند الباب وجلسو فواحد الكراسا خاصين بيهم باش يتسناو الميني بيس الي غايجيهم حتى وقف عليهم شاف سيكيريتي "

سيكيريتي : غاتسناو واحد نص ساعة بينما يجي من جديدة وقع واحد العطب ف روايد هبطو لكافيتيريا بينما علمتكم ...

فرح : نص ساعة ؟ بففف واخا صافي.."هزات صاكها وهبطات هي وايمان لتحت فين كاين كافيتيريا فين كياكلو الموضفين..جلسو فواحد طابلة بعيدة شوي وهي توقف" انا غانمشي نشوف واش عندهم شارجور نشارجيه غير شوي تشربي شي حاجة ؟

ايمان : لا مفياش دابا ..

فرح"هزات تيليفونها ومشات لعند الي مقابلين تما دايرين فحال كانتينة فين كياكلو الموضفين والي غايجيب ماكلتو والي غاياكل من تما ناقصين ليهم ثمن بزاااف تقريبا نص..لقات واحد المراة كبيرة شوي هازة مخنزرة غا وحدها " : خالتي مانلقاش عندك شارج ديال هذا ؟

هي : هادي كافيتيريا ماشي مول تيليفونات بغيتي تاكلي تشربي شي حاجة مابغيتيش مكاينش من غير هادشي...

فرح : ااا ؟ واخا سمحي ليا.."ضارت مصدومة من القمعة الي تعطاتها تمات غاديا تا وقفها واحد الولد كان واقف وسمع اش قالت"

هو : ختي شنو تيليفون الي عندك ؟!

فرح"شافت فيه " : نعام ؟ احم ريدمي نوت ...

هو : عندي اختي اجي نعطيه ليه وديه فين جالسة شارجي بيه تاتسالي وعطيه ليا...بلا متمشي عندها هازة شوكتها غير مع راسها ومنصيبوش نهضرو معاها كتبقى مراة كبيرة ومول شي موصي عليها. مايقلقها حد دونك ماعليك غا ديريها فحال ميمتك وصبري لسها..

فرح : ااه هههه لا هانية غير صدمتني داكشي باش"شدات من عندو شارج" شكرا بزاااف خويا انا غير يشعل ونعطيه ليك .."حرك ليها راسو بابتسامة حطات تيليفونها يتشارجا حدا ايمان بقاو كيتسناو حتى دخل بخطاويه كيقلب بعينيه مشا نيشان لعندها ووقف...

مراد : مي تاجة شي جوان ثاني هاد المرة ولا تنزلي عليا بصندالة ؟

تاجة"غوبشات فيه " : تمشي تغبر عليا ولا نعطيك علاش تقلب ؟ اش بغيتي ؟

مراد"شاف تخنزيرة وهو يرجع راسو باللور" : اششششش تهدن اسمحمد...بغيت غا قهيوة كحلة وواحد كرويصيصة صااافي...

تاجة : شني هادي كرويصيصة تاني ؟

مراد : كرواصة كرواصون ...

تاجة : سير تگلع لهيه تاتوجد وجي ليها "مغوبشة الي شافها يقول حاقدة "

مراد : شحاال خمسة دقايق "شافها مخنزرة" صافي اتعيطي ليا ونجي سمحي لينا اختي"حدر راسو وتم غادي مشا نيشان لطابلة واينا طابلااااااا ؟؟ ااااييييييييه المجاورة لطابلة فرح..تلاح على الكرسي وجبد تيليفون كيبقشش حتى صونا ليه وجاوب" وااا وليد اش كاين ؟؛ وتا لا راني نزلت نشرب قهوة يلاه دخلت نخدم عندي الليل ليوم مخليها ليل عندي القراية منصيبش ...تا عرفتي مي تاجة اش دارت ليا ؟ ههههه على شوي يا دينمك وتسلخني...اييييييه بغيتي خويا يجري عليا قاليك هي البركة تما صبر ليها معندك مادير هههه قربات تجبد سمطة وتشحط مك بالبزيم..."قاليه شي حاجة وضحك تا تكا على كرسي فرح " هههههههههههههههههه

فرح"كمشات حجبانها وهي دور نغزاتو من ضهرو" : خويا بشوية راك كتكا عليا ...

مراد"دار نصف دورة هز ايدو بمعنى تسناي ورجع يكمل" : وتا توريقة يا صحبي سعداتك عاد غادي ترتاح انا بادية عندي سهرة خههههه زاهية فرمليات وفراجة وداكشي "عاود ضحك تقولي واش كيهرو تا كيتكا ميت بالضحك" هههههههههههههههههه

فرح"غوبات نيييت ونغزاتو" : اااااا شريف كحاز لهيه شوي اويلي...

مراد : بلاتي قطع ونعيط ليك واحد شوي نشوف اش كاين"قطع وضار عندها" : اااااش كاين امالنا ؟! مايضحك حد"شاف فيها وشافت فيه خرج عينيه وهي كتشوف فيه هو عرفها وهي عرفاتو خرجو عينيهم بجهد فبعضياتهم تا شهقات وشهق هو كتر منها بواحد سرعة بواحد سرعة ياخوتي ماعرفاتو كيدار نقز تنقيزة وحدة واقف "

فرح : نتا ؟ نتا كنعرفك !! نتا ؟ نتا اش ؟

مراد : والله اختي الى غير انا...

اما هما فالمشفى ساعتين ديال الانتظار وهما كيتسناو شي خبار على سيمو ...حتى خرج عندهم طبيب...

عصام : امضرا خويا ؟!

طبيب : محمد رضى الوكيلي ؟

نجية"قربات ليه وعينينا منفوخين بالبكا ونواح" : هواااا كبيدتي اولدي هوااا هنيني عليه اسي طبيب !!

طبيب : دبحة الي تدبح خطيرة شوي باش نعلمكم سترو الله ماتقاسش ليه الوريد و شراييين سليمين الحاجة هادي وحدة مزيانة درنا ليه سيروم قبل نضفنا الجرح دابا راه مزيان غايتحول و من بعد ستة سوايع ممنوع دخلو عندو دابا حتى لغذا صباح ومن الاحسن باش ميهضرش ومايحاولش الله يخليكم حنا فغنى على شي مشاكيل اخرى غايعدي بسيروم حتى الماكلة ممنوعة لا بغيتو ليه سلامة خليوه يرتاح من بعد دخلو عندو....

نجية"بفرحة خلات زوج دميعات ينزلو ليها" : وليدي بيخير ؟!

طبيب : هاد ساعة شوية الجرح ماساهلش اميمتي غير سلك منها بحال شعرة...من بعد غايبقى تحت المراقبة يومين الى مزيان يقدر يخرج مع تعليمات الي غادي نعطيكم...

عصام : لهلا يخطيك ادكتور صباح ندخلو عندو مزيان ؟

طبيب : مخيرة كيما بقا مرتاح بلا هضرة حسن...الله يشافي اميمتي"حدر راسو وزاد"

عصام : الحمد لله الحمد لله ...

فاطنة : الحمد لله عالسلامة...

عصام"طبطب على كتف ستيوة" : ماعليكش ابا ستيوة شديد "شد ليه راسو بين ايديه وباسو ليه "

ستيوة : خويا عصام راك عارفني منفوتوش وخصوصا من جيهتك كون هاني...تاهو جا الله من جيهتو دوز عليه سكران دينمو ميعرف تايذبح كي ناس...

فوزي"جاب ليه ضحك" : عهههه

عصام : يعمر دارك...

ستيوة : نمشي نرتاح تالصباح ونشوفو...

عصام : سير...

نجية"بان ليها غادي وهي توقفو " : انا راضية عليك اوليدي دنيا واخرة ..."قبطات ليه ايدو كانت غاتبوسها وهو يخطفها"

ستيوة : اميمتي ماتحشمينيش دنيا هانية وكان "باس راسها" على سلامتو...

نجية"مسحات دموعها بطرف كمايمها وبضحكة فرحة خارجة من القلب" : الله يرضي عليك...

المصحة...

مزال كتهضر مع مراد كان تيليفونها شعل وسيكيرتي جاي باش يخبرهم يخرجو لان الميني بيس جاي صونا تيليفونها فالبلاصة...طلات عليه ايمان ...

ايمان : تيليفونك ا فرح واقلة خوك ؟

فرح"ضارت تشوف لقاتو فوزي الي كيتاصل هزاتو بسرعة" : الو فوزي..."شافت فمراد الي شير ايدو باش يقوليها بسلامة حتى طاحت على الكرسي فجنب لو ما شدها مراد كان غايخوي بيها وطيح" ااااا ؟ فوزيييييييييييي اويلي اش كتقوووول "عينيها غرغرو" فوزيييييي سيمو لااا الا سييييييييييمو ووووو اهى اهى واااا واااخا واااخا هانا جايااااا اهى اهى "قطعات عليه " اهى اهى اويلي لاااا "حطات ايدها على فمها وعصرااات عينيها" اممممن. اهى اهى خويااااااا...

ايمان : فرح ياك لباس "وقفات قربات لعندها "

سيكيريتي : ختي طلعو را جاي الميني بيس ...

مراد"شاف فيه" : مكتشوفش فيها كيدايرة ؟ سير نتا قول ل شيفور قاليك مراد تسنا متحركش تيجيو يلاه...

ايمان : واغير تهدني ونوضي باش نمشيو ..

فرح : اهى اهى واااخوياااااا اهى اهى واااا خويااااا

مراد : جيبي ليها تشرب ولا شي حاجة...ختي فرح نوضي باش تمشي وتشوفيه ...واش عصام ؟!

فرح"حركات راسها ب لا" : واااخويا وصاحبي وكلشي اهى اهى...

مالقاوو كيف يديرو كيشوفو فيها فلحضة ولات منهارة جابت ليها ايمان الما مبغاتش وهي تنوض على وقفتها نترات تيليفون من شارجور وحطاتو مبقاتش تسوقت لمولاه واش تعطيه ليه او لا...غمز مراد ايمان باش تبعها هزات صاكها وتبعتها..اما هي ماعرفات فين مشات تا خرجات فواحد الباب ودخلات منو مدعوقة تالفة بيها لارض كتزرب ودموعها على خدها دخلات من واحد الممر بان ليها سانسور وهي دخل ليه لقات فيه الناس كانو الفراملية كتبكي بالحس ماعرفاتش اشمن رقم دارو كتسنا غير امتا تخرج باش تمشي حتى من صاكها سمحات فيه...تحل الباب وهي تخرج كتمشي هنا وهنا لقات راسها فطابق اخور ...

فرح : اهى اهى فين انا فييييييييييين "وقفات كتنهج كتمسح دنوعها بكمايمها وكدور هنا وهنا...بانت ليها واحد الفرملية غاديا وهي تجري لعندها" ختيييي عافاك وريني فين نخرج اهى ختييييي"ماسمعتهاش وهي توقف باش تهدن وتعرف فين هي وتخرج ضارت هنا وهنا وهي تمشي لواحد المصعد مشافت بالي مكتوب فيه (خاص بالاطباء) دخلات وركبات رقم من بعد ما حاولات تحضر عقلها توقف المصعد وهو يتحل كانت حادرة راسها وعينيها فلارض وجهها حمرر بالبكا ضفيرتها الحمراء فجنب...بانو ليها رجلين جايين ناحيتها لابسين صابو ميديكال سروال خضر ديال casaque اي اللبسة الطبية... قلبها كيضرب يضرب يضرررب ماكلاتش وزادتها الخبار.. الصدمة.. مداتهاش فشكون دخل يلاه غاتهز عينيها غلبت عليها دوخة ديال الخلعة وبين عينيها را سيمو مات وجوع فشلو عليها رجليها مابقاتش قدرت توقف ومحساتش كاع اش وقع حتى كتحس غير بايدين طاحت بيناتهم واحتاضنوها ...

واحد الثانية او زوج من الزمن مشعراتش فيهم شنو وقع بالدوخة الي ركبتها حتى لقات راسها بين ايدين محتاضنينها الي كيف تحل الباب بانت ليها حادرة راسها بطريقة ماهياش كمشات عينيها وحدرات راسها ناحيتها كتبان ليها كترمش و هزات ايدها فوق جبهتها بغات تشد فالمقبض الي فسانسور فشلو عليها رجليها هنا تدخلات على وجه السرعة وشداتها بين ايديها لا طيح...

هي : ششش دوموزيل صافا ؟!

فرح"كمشات عينيها" : دوخة دوخة اهى...

هي : حاولي دوري اييديك ورا كتافي وقبطي فيا مزيان ابنتي..

فرح"حركات راسها بشوي ودارت شنو طلبات منها تا تحل سانسور واقرب بلاصة بانت ليها كيف تحل هي شي مقاعد تما ديال الانتظار حدا المصعد بالضبط...بقاات شادة فيها تا وصلاتها ليهم وجلستها"

هي : تسناي هنا غالبا طونسيون طاح ليك..."ضارت لعند وحدة فالاستقبال صغير تما ديال داك الجناح" عطيني tensiomètre "بزربة طارت لبنت لواحد الغرفة غير حداهم محطوط فيها لوازم الي غايحتاجوهم الات قياس ضغط الگليكوميتخ...بيطادين قطن الخ...جابتها ليها"

فرح"هزات فيها عينيها كتشوف ف سيدة فعمر الخمسين سنة لابسة لبسة طبية وطاقية طبية وعلى وجهها تعب فالغاالب كانت عاد خارجة من عملية جراحية...لكن فرح رغم الدوخة الي فيها ممهنيها على سيمو" : غير خليني نمشي عافاك راني تلفت على الميني بيس وضروري نمشي عافاك"نزلو دموعها"

هي : نتي انفيغمييغ هنا ؟!

فرح : laboratoire des analyses

هي : تسناي نعبر ليك ونشوفو فين كتسكني ؟

فرح : فالجديدة...

هي : داكوغ"كتهضر وكتعبر ليها..تسنات حتى تنفخات عليها السمطة زيرات ليها ايديها تا حسات بيها بغات تقطع عاد تنفسات وهي تعطي نتيجة" بففف طايح بزاف.."ضارت عند البنت" سيروم صالي (سيروم مالح) تودوسويت...

فرح : لا بلاش عافاك بغيت نمشي خويا دار اكسيدون عافاك اهى اهى....

هي : ميمكنش ليك تحركي ونتي طايح ليك بزاف !! "حطات ليها رجل فوق رجل " خليهم هاكا انفوا يسالي سيروم يمكن ليك تمشي ابنتي...

فرح :"صونا تيليفونها كانت ايمان الي من حسن الصدف عطاتها نمرتها فهاد صباح "

ايمان : فرح فينك خليتيني تابعاك حتى تلفتي ليا فينك ؟!

فرح"هزات عينيها كتشوف هنا وهنا" : ماعرفتش فين.."شافت فالطبيبة" عافاك شحاال رقم الطاج ديال لاكاڤ ؟!

هي"جابت ليها الفرملية سيروم وعلاقة ديالو" : قوليها تجي لعندك هنا الى كانت اوسي خدامة...لان هاد طاج ديال هنا ممنوع على ناس يدخلو ليه دونك تبقى معاك تسالي سيروم ويمكن ليك تمشي ..."خشات ليها ابرة سيروم تا غمضات عينيها وقاداتو وصات الفرملية الي مقابلة تما " تسناي ميم پا عشرين دقيقة عاودي عبريه ليها الى تقاد حيديه ليها تقدر تمشي...

فرح"مالقات مادير سوى انها تستسلم لان باش تحرك بصح مقدراتش دوخة حاكماها بجهد ومادارت ليها سيروم صوديوم حتى بصح الضغط منخفض بزاف..." : Merci beaucoup docteur...

هي"بابتسامة" : ماعليش خدمتنا هادي مفروضة علينا..bon rétablissement ...والله يسمعك خبار الخير ابنتي..."خشات ايديها فجياب لبسة وزادت اما هي بقات على وعدها وسعدها كتسنى فالسيروم وقلبها كيبكي على سيمو...حتى هزات تيليفون وصونات ل فوزي " فوزي امضرا ؟!

فوزي : فينك نتي تعطلتي ...

فرح : غير قوليا اش كاين عافاك اهى اهى...

فوزي : ششش صافي غير تهدني راه مزيان نجا منها قولي سلكو ربي وصافي...

فرح : اربي ؟ حلف ؟ كتكذب كتكذب ياك اهى اهى...

فوزي : كون نكذب كاع منعيط ونقولها ليك نيشان نخليك تاتوصلي...را مزيان كاين فبيت الخطار (الانعاش)...

فرح : اويلي ياك مزيان ؟

فوزي : القراية الي قريتي شديتي منها غا زبدة والكوفيتير ؟ علاه ملي كيكون الواحد عاد خارج من عملية بحال شعرة حياتو كانت على بونت وتمشي اش غايديرو ليه ؟

فرح"حطات ايدها على صدرها تا غمضات عينيها شحاااال ودموعها دايزين كتسوط بفمها بمعنى انها تنفست صعداء ورتاحت مبدئيا لكن القلب باقي كيبكي ماتهنى تتمشي تشوفو ..هضرات معاه وصوتها مخنوق" ياااااربي يولي لباس يااااربي ياربي منقدرش بلا بيه والله منقدر...

فوزي : اناري كاااع هههه غير تهناي غايبقى تما قاليك باش يرتاح وضهر ليا العجب الي مهليين فيه...

فرح : را سيمو هذاك واجرك عالله ههه"كتمسح دموعها بطرف كمايمها" يستاهل انا شوي ونجي..."قطعات معاه وهي توقف عليها ايمان"

ايمان"شافتها معلقين ليها سيروم" : اويلي مالك ؟

فرح : طاح ليا طونسيون ودارو ليا هاذ سيروم شي شوي عشرين دقيقة هكاك وتشوف ليا وتحيدو...موحال يتسنانا الميني بيس...

ايمان : را مشا قال تايرجع لينا حيث ناس بغاو يمشي فحالهم...

فرح"قبطات ايدها" : شكرا بزاااف وسمحي ليا شطنتك معايا ...

ايمان"جلسات حداها" : وخلعتيني وداك الولد قاليا تبعيه وصاني عليك...

بقات معاها تا كمل وصل الوقت عبرات ليها لفرملية لقاتو تقاد عاد حيداتو ليها دارت ليها قطن وسبارادرا فوق تكة الابرة ..

الفرملية : ضروري خاص تاكلي شي حاجة خبز فيه فرماج بحال هاكا السيروم مزال مكملش ليك غير حالة خاصة اضطرينا نحيدوه ليك مي ضروري ديري شنو قلت ليك...من بعد ساعة حاولي تعبريه او رجعي لمستعجلات...

فرح : واخاا شكرا بزااف "تبسمات ليها وهزات ليها صاكها ومشاو ركبو رقم لاكاف الي وراتهم البنت ونزلو ...

المشفى الكبير الجديدة...

واقفين كاملين قدام الباب برا عصام من بعيد كيكمي واذان المغرب خذام...اما نجية بالعيا جلسات رامية عليها شال وكتهضر فالتيليفون وصات جارتهم تما تحضي ليها البنات...لا فوزي رجع لمحل ديالو ولا عصام الكل خافو عليه بجهد لان سيمو واخا البلية تشمكير وبزاف الا انه عزيز بزاف كبر على ايديهم حالو حال صفاء وفرح...

عصام"مشا عند فوزي" : مال فرح تعطلات كاع هادشي كلو ؟

فوزي : هاهي جايا تعطل عليهم الطوبيس فاش كيجيو ...

عصام : غايبقى يتعطل ديما ؟"مزال كيهضر معاه تا بانت ل فوزي خرجات من طاكسي وجايا طاوية ايدها وكتجري عينيها حمرين تا وقفات عليهم كتنهج"

فرح"عينيها فالتين بالخلعة" : سيمو ؟ مالو ؟ علاش واقفين هنا!!

عصام : مابيه والو غا هناي عليه..مالك نتي على هاد تعطيلة ديال الحبس ؟!

فرح"بحزن" : مكنتش واكلة والخلعة دخت وطاح ليا طونسيون دوني تا دارو ليا سيروم هانتا "عرات ليه ايدها"

عصام"خرج عينيه بخوف" : كيفاش ؟ طحتي ؟! ومالك ما كلتي مالك على حالتك فهادشي ؟!

فوزي : شوية بعدا ؟ علاش ماتغذيتيش مالك ؟!

فرح : كان ضغط فالخدمة بزاف مع يلاه باديين مقدرتش ندير بوز بغيت تنسالي وفاش بغيت نهبط ناكل عيطتي ليا نتا ...

عصام"مالقا مايقول كيشوف فوجهها صفر" : تت مشكيلة معاك والله الى مشكيلة معاك قتليني بالخلعة وتهناي نتي كاع...

فرح : سيمو سيمو ؟!

عصام : مات..

فرح : اويلي اهى اهى"كانت غاطيح كون ما شدها وفوزي كيضحك"

فوزي : تا ريح اصحبي غاتقتلها گبلو (قبلو) ههههههههههههه

عصام : والى مات ؟ تعاندي مع الله ؟ ومزال مكلتي والو نتي ! "حركات ليه راسها بالنفي" زيدي تاكلي نعل بو مك فهاد النهار قتلي عدو ربي وبداي تهرنني ..

فرح ؛ نشوف سيمو بعدا ...

عصام : وازيدي كوني تسمعي... سيمو مو ومخلاوهاش دخل تشوفو"دفعها بزز تا حمر فيها عاد مشات هي وياه لواحد السناك تما خذات ليها خبز فيه فرماج وحليب تا حسات براسها روح تردات ليها شوي وهو شرب قهوة كحلة قاد بيها راسو الي تهرس...بقاو تما شحاال وعصام كيعيط فتيليفونات بزز باش واحد صاحبو هضر ليهم مع واحد فالادارة تما الي سمح لمو وفرح باش يدخلو يشوفوه من بعيد فالانعاش وغير خمسة دقايق "

فرح"قابطة فايد نجية تا وصلو فين نعتو ليهم وطلو عليه من بعيد" : فينهو ؟ هييييييي راااهو سيمووووووووووو "حطات ايدها على فمها كتشوف فيه مدد فوق البياص معلقين ليه سيروم وقرجوطتو فيها فاصمة عينيه مسدودين "

نجية : واااا الله ياربي على وليدي ياربي هاااه ..

فرح : علاش ناعس ؟!

الفرملية : غير مرتاح وصافي ..عافاكم اختي خرجو را صعيب تبقاو هنا صباح غايتحول الغرفة ديالو وديك ساعة تقدرو تشوفوه...

شدات فايد نجية ومشات هي وياها من بعد ما اطمانو عليه ونزلو لقاو عصام وفوزي كيتسناوهم وفاطنة تاهي الي مشات طلات على البنات وراجلها عطاتو مياكل باش ينعس ...قبط ليهم طاكسي وهو وفوزي تبعوهم بالموطور وها النهار داز باحداث مشحونة بطلها السيمو الشاب الي كان على بونت يضيع حياتو وشبابو وسط ملذات الفساد...واش هادي بداية ليه وولادة جديدة ليه من وسط الفساد ؟ ام غايرجع سيمو تابع البلية وكيما كان ؟....

...اما فالكلينيك كان جالس قدامو كيعاود وهو على تركيز معاه بكل التفاصيل الي ذكرهم ليه...

مراد : مشات وجهها مكيتفسرش مقدرتش نتصرف صراحة خويا خفتها تغوت ولا تقلق وصيت عليها البنت الي معاها و وصيت الميني بيس يتسناهم فاش تعطلات بزاااف قلت ياكما تلفات لكن تعطلت بزاف مشا البيس ورجع ولقاهم باقي مجاوش وصيتو يهز لاخرين ويرجع على قبلهم...

زين الدين"وخا الليل مزال مسالاش حيث مشا خرج ورجع على ود عملية عندو بالليل..جالس فوق الكرسي مفرق رجليه بطريقة رجولية ومرفق ايدو فوق المكتب هاز ستيلو وكيسمع ليه حتى وصل لانها تعطلات وهو يكمش حجبانو" : شنو عطلها ؟

مراد : علمي علمك...

زين الدين"بقا رافع حجبانو حك شنايفو بسنانو وقبل ميهضر بقا شاد فلحيتو كيفكر حتى لاح ستيلو ونقر بصبعو فوق المكتب" : دير شنو وصيتك "شاف فساعتو" معنديش الوقت دابا خاصني نكون فالبلوك نسالي وكون عندي هنا ...

مراد : واخا كون هاني...

زين الدين : رد بالك معاها وليها "شير ليه بصعو كياكد" الخاطر فوق الخاطر الله يرضي عليك..

مراد : الله اودي ههههه

ناض زين الدين دخل القاعة ديال الفحص لبس casaque ديالو لبس كاسكيط ميديكال وسد البافيط لور وتوجه لمصعد ركب رقم طابق البلوك غير تحل دار البصمة ديال الكف ديالو تاتحل الباب ودخل عاود البصمة تاني تحل ليه واحد الباب فين دخل طلق روبيني غسل ايديه بواحد صابون معقم من الكفوف حتى لمرفق مزيااان وسد الروبيني بمرفقو ...لقا زوج فرمليات هز ايديه تا ركبو ليه casaque chirurgicale بحال بلوزة كتسد من لور خاصة بالعمليات الجراحية...بقا غادي هاز ايديه تا دخل البلوك لقاهم موجدين ليه المريض الي غايبدا ليه فالعملية ...

حلات عينيها مع النبوري حتى ناضت قافزة يحساب ليها سيمو بصح مات عاد استوعبات انه مجرد حلم وان عمره طويل باذن الله...دارت روتين المعتاد عاد توضات وصلات صلاتها وبقات شحاال كتحمد الله وتشكرو ان السيمو بيخير وكتاب ليه عمر جديد...لبسات حوايجها كان الحال بدا يدفا شوي اكتفات غير بقبية كحلة بالقب طاي كبيرة يلاه كتجيها هي هاديك وطويلة مع سروال دجين تقاشر سبرديلا ديال بارح نيت جمعات شعرها بنفس ضفيرة نيت غير الميكاب مدارتوش خلات نمش هكاك يبان فوجهها الخاطر باش دير ميكاب مكاينش...خرجات باش دير الفطور لقاات عصام فايق ولابس وفوزي كذلك حاطين صينية الفطور وحدة طلعوها لمعلمية...

فرح : صباح الخير ...فقتو بكري ؟!

فوزي : طالعين لسبيطار نوصلو مي نجية ونشوفوه كيبقى ونرجعو لمحلات ..

فرح : بغيت نمشي وليني مكاينش كيفاش ندير ؟! الطوبيس غايجي من دابا نص ساعة اش ندير ؟!

عصام : دوزي تفطري ودي معاك متاكلي ولا شري شي حاجة تغذاي بيها تمشي طيحي تاني ؟"بتخنزيرة" والمشي عند سيمو وكان تسالي خدمتك روحي لعندو نيشان من تم ...سيمو را لباس غير تهناي عليه...راك شتيه البارح خليتك دخلي مع مو وتركني لارض وكوني تسمعي جاي ليام ارا متشوفيه فيها...

مالقات متقول سوى دير شنو قاليها وبالفعل بقا معاها تا فطرت مزيان وعطاها الفلوس باش تاخذ الغذا من تما حيث باش توجد ليها البارح مع دقعة سيمو مطيباتش ليها متاكل للغذ ليه...خرج معاها تال عند شارع جا البيس ركبات فيه ومشات بقلب مضيوم من جيهة عشيرها او فردتها على قولها...كيف وصلو طلعو لطاج الي خدامين فيه لبسو لباسهم وتيسرو فخدمتهم ...اما فالمشفى غير وصلهم عصام لقاوهم هبطوه لغرفة عادية فيها غير هو ...

نجية : يمكن هنا ؟

عصام: بلاتي نشوف"دق الباب وحل البواني طل بنص راسو بان ليه متكي جابد عليه" هو هذا...

نجية"غير حل ليها الباب وطلات عليه حطات ايدها على صدرها وبدات تميل فراسها وتلالي " : ياهاااا على كبيدتي هاااا يا وليدي لا تغمضشاي عليا عينيييييييييك اويليدي هاد الغمضة راهي تخلعني اهى اهى...

عصام : ااامي نجية نهاك الله اش وصيناك ؟

فاطنة : ماتصيبش اوليدي ماتصيبش حر الكبدة هو هذا دابا تجرب الكبدة وتعرف بحقها...

نجية"قربات ليه وباست ليه جبهتو" : وليدي واااا حنيني ...

سيمو"بدا يرمش فعينيه لحضات حتى حلهم ودورهم عندها..ماقدرش يهضر حدو حرك ايديه تا وصل لاديها وكمش عليها"

نجية"شدات ليه ايدو وباستها وعاودت" : اوليدي خلعتييييييييني عليك اوليدي ااااااوليدي لا باقيشااااي تدخل بين الناس اااااااااوليدي بعد ليا من السلاگط وشماكرية اوليدي اهى اويليد على شوي وكانو يخرجوك ليا مكفن"كتبوس وتبكي" قتلتيييييييني قتلتيييييييين اهى ...

فاطنة"شافت فعصام وهزات ايدها بمعنى ساعف معندك مادير" : وااا محمد رييضا وتا سلكتي منها يا سلگوط...

سيمو"هز ايدو باسها وجه وضهر كيشوف فالسقف بمعنى الحمد لله"

عصام : عالسلامة الكيدار عالسلامة"كيدوز على لحيتو بتهديد" ماعليش وكان سلكتي منها بحال شعرة وليني تبرا ونعجبك ابا سيمو...

سيمو"جاتو ضحكة عارف كتسناه سلخة من داكشي من عند عصام ههههه"

فاطنة : فينو فوزي ياك عاد كان معانا ؟

عصام : شتو جاه تيليفون ورجع دابا يجي...

مزال كيهضرو عليه نييييييت عمرو طويل حتى حل الباب وهو يطل عليهم براسو كيشوف فيهم مجموعين عليه...

فوزي : اشكا ابا سيمو مات ولا باقي ؟ بغيت نبيع دجاج لمي نجية فالعشا ؟

نجية"هزات صندالتها" : حيد اعصام من تم

عصام : هانا ميمتي ..."غير كحز وهي تسير على فوزي لراس ومشات صندالة لهيه لبرا"

فوزي : اااااحاااح تي هنينا زعما كنت ناوي نبيعو ليك براس المال...

فاطنة : فين كنتي نتا ؟!

فوزي : قوليش فين امي فاطنة ؟

فاطنة : ش خوينزة من خوينزاتك ؟!

فوزي"خرج عينيه" : نهاك الله صلي عالنبي ؟!

فاطنة : وانا عرفت ؟ راك سويكت وسويكت على خزيت رويگد...اش تما وكان ؟!

فوزي"ضار وراه وشير براسو حتى تظفع مسكين كان غايجي على فمو كون ما شدو عصام " : الحافض الله...

صفاء"مشات كتجري دفعات فوزي وعصام وفاطنة مها نييييييت بالدعقة والخلعة جلسات فوق حجر نجية كتلالي وتغوت" : واهاااااااااا عشيري وكان غايموت ليا هااااا يا هااااااااااا فردتي وكان غايتمني هاااا يا هاااااااااا وخويا دبحوه ليا ماهو دبحة حولي ماهو دبحة عتروس يا هااااا وراه دبحوه ليا دبحة فروج وميت هاااااا.."قربات تااالعند وجهو" فين درتي فلوس ذهب ام حياة الي باعتو وعطاتو ليك ؟

نجية"غوتت تا قفز سيمو" : اويلي

صفاء : ربعة المليون قاليك بغا يزيد عليها جوج باش يحرگ من داخلة...

نجية"دارت صبعها فوذنها وبدات تغوت" : وييييييويويويويو على لمسخوط بغا يقتل راسو صحااااااااو...

سيمو"خرج عينيه وشاف ففوزي وبدا يشير بايديه ويضرب كيقوليهم خرجوها باطل طيحاتو عليه هاكاك"

صفاء"خشات شعرها ورا وذنها وقاداتو وهي كتنهج حطات رجل على رجل" : باش دنمك تخلعني عليك..."هزات عينيها فنجية الي جالية فوقها" مي سابيكسا وزني الطرح غا ضاحكة..."هزات عينيها فامها الي بقات حالا فمها فيها هادي امتا جات هههه" عاد حطني الكار من القامرة الرباط الى الجديدة دكالة ...تالدار وسلخيني مافيش وقت التفسير دابا...

دوزات يومها العملي عااادي جدا حتى صونا ليها فوزي طمنها على سيمو وكذلك عصام وخبروها بقدوم صفاء عاد رتاحت من ناحية سيمو وخدمات بخاطرها وهاد النهار مكانش فيه زين الدين كاع حيث خرج يرتاح ومنها يخليها على خاطرها هاد النهار....غير وصل وقت الغذا مشات تغذات ورجعات كملات تا وصل وقت الخروج ثاني هزات صاكها بزربة وتبعات الفرملي الي وصلو معاه تال تحت لاكاف تسناو البيس تا جا وداهم طلبات منو يحطها قدام المشفى وبالفعل غير وصلات قدام المشفى نزلات بسرعة كتزرب كان وقت الدخول نيييت عيطات لعصام الي عطاها رقم شومبر وفين تمشي بالضبط...

فهاد اللحضة كانت جالسة نجية وصفاء اما فاطنة مشات فالصباح باش تعطي لخدامة الي كيخدمو فالدار عند عصام لفوق فالاصلاحات....

صفاء : مي نجية غير سيري رتاحي من صباح ونتي هنا ؟!

نجية : منصيبشاي ابنيتي شكون يبقى معاه ؟!

صفاء"طلات عليه لقاتو كيشوف فيهم" : شتي هذا غالفشوش قاتلو...

فرح"حلات الباب وهي دخل عليهم بان ليها سيمو وحداه صفاء" : سيمووووو"قربات ليه وشدات على صدرها" اححح فاصمة فقرجوطتك !!!"عضات فمها بالم وغمضات عينيها"

صفاء : شتيه كاع مايقدر يزغرت خععهههه"زغرتات ليهم تا قفزو" دير فحالي اسيمو ؟

سيمو"كون لقا حجرة يشير عليها بيها"

فرح"شافت فصفاء" : ميقدرش يصرط الكرشة ؟!

صفاء : اااااااييييييييه تقلية كيموت عليها"شافت فيه" تاكلها دي ليك عمرك اما انا وفرح ونعاودو"

سيمو"بغا يبكي تا ولا كيتعصر فالهضرة" : ففففف سسيي ي عن "غمض عينيه" فففف

صفاء : تالهضرة ولا زيزون

فرح : غانوليو نسمعو ابا ابابابابا هههههههههه

نجية : الله يمسخكم هههههه

فرح"قربات ليه تحنات لعندو وهي تبوسو فحناكو وعاودت وعاودت تا بعدها مخسر سيفتو" : اححح خويا فردة وحشتو انا ...

بقاو معاه كيتفلاو عليه مرة يضحكوه مرة يشدو فيه حتى وصل وقت انتهاء زيارة وخرجو بزز خرجو نجية تا قالو ليهم را غايتهلاو فيه بقاو واقفين قدام باب المشفى كيتسناو فطاكسي وهي دور فرح عند صفاء...

فرح : امتا وصلتي ؟!

صفاء : الصباح مقدرتش نصبر غير سمعت جيت نجري اويلي كنت غانموت بالخلعة...

فرح ؛ وكون شتي انا عرفتي اش وقع ليا طاح ليا طونسيون ودارت ليا واحد طبيبة رسلها ليا الله بحال الملاك دارت ليا سيروم واكدات على البنت تقابلني كانت معايا البنت الي خدامة معايا ...تاهي الله يعمر ليها الدار...

صفاء : تصاحبتي مع شي بنت ؟!

فرح"على نيتها" : اه ايمان ههه ضريفة بزاااف حبيتها..

صفاء"عوجت فمها" : مزيان ترد ليك البال وعاودي ليها وتعاود ليك..والى جحتي تهز بيك وترد ليك البال نفسي عليها مرة مرة نتي را كتبغي تلقاي لمن تعاودي انا مابقيتش دونك مغاتلقايش للهم هي .."عوجات فمها حابسة البكية"شفت طاكسي مزال مبان يخ...

فرح"حطات ايدها على كتف صفاء طلات عليها" : صقاء مالكي ؟!

صفاء : اماماليش اهياتا ..."ضارت لهيه"

فرح"ضارت لعندها لقات دمعة دازت ليها" : علاش كتبكي ؟!

صفاء : مك مكن بكيش اهى مكنبكييييش اهى اهى وصافي متبقايش تشوفي فيا لاش كتهصري معايا لاااااااش اهى ...

فرح : اويلي مالك ؟

نجية : صافا ويلي مالك ابنيتي...

صفاء : وماماليش اهى اهى انا بعدت خليقتي منكم وعليكم باش منبقاش مقلقة ولا نقلقكم ونتي افرح تهناي مني تهناي من وحدة عايراتك وجرحاتك اهى اهى مزيان دىتي صاحبة تعوضك بما حسن مزيان لاحقاش انا غاااااا وحدة ممزياناش وعايراتك وجرحات بزااااف وخا مقصدتش والله مقصدت بغيت غير تجربي اش درتي فيا ولساني ومخي سبقونس والله مافيهم عضم انا حما رة وكلبة ومنسواش وربي عاقبني اهى اهى تستاهلي صحبة حسن مني تستاهلي "ماحسات تالقات راسها تجرات وتخشات وسط حضن فرح مزيرة عليها عيات وهي تكابر عيات وهي تخبي وتجرب بلا بيها هي وبلا سيمو صعيب تاقلم خصوصا حلات عليهم عينيها وكبرو بثلاثة..." والله ماقصدت ماشي انا الي تعايرك والله غير شيطان ولد لحرام دخل بيناتنا سمحي ليا بزاااااااف...

فرح : تانا مقصرتش من جيهتك صافي دازت الوقت ونسيت عادي هادشي مكذبتيش فيه را بصح طرا ليا غير الهضرة قاصحة عليا ...كان خاصني نسمعها من القريب ليا باش نجمع راسي كلمة جوج يبقا فيا الحال ...صافي نساي..

صفاء : اهى اهى...

فرح ؛ وصافي سكتي...

نجية"ماعرفت ماتقول حيث مفهماتش" : الغيار ولابد منو ماعليش هانتوما دوزتوها "طبطبات عليهم" يلاه خلاص ندير لسيمو صويبة (صوبا) مايتعسا بيها الليلة يلاه ونعلو الشيطان...

صفاء"بقاات كتنخصص واحد شوي تا عطاتها تشرب عاد شوي تنفسات " : اشوفي المقحوبة جمعي الازكوك ديالك وفوتي صحابات ..."مجاوبتهاش فرح اكتفات بالضحك حتى لقاو طاكسي واقف ركبو فيه وزادو"

وصلات العشية قريب ياذن العشا خرجات من الكوزينة هازا طاسة مغطية فميكا وقرعة العصير حطاتهم فوق الطابلة ومشات لبيت رمات عليها كاب طويل شتوي لبسات تقاشرها وخشات رجليها فبانطوفة...مشات البيت لقات عصام عاد دخل...

عصام : واجدين !

فرح : واجدين غاندخلهم ليه غير انا صفاء مكاينش كيفاش حيث تلاقيت قبيلة بواحد الفرملي كان كيقرا معايا قاليا غير توصلي عيطي ليا وندخلك تتعشيه وخرجي ميهضروش معاك...

عصام : الى ساليتي علميني نجي نديك حيث عندي ميتقضى بالليل...

فرح : غير يتعشا ونعيط ليك...

عصام : غاتمشي بهادو !؟ كاين البرد ...

فرح : هذا دافي مكاينش الوقت فين نبدل..."حرك ليها راسو وخرج خلات فوزي يتكلف بالعشا هزات داكشي دارتو فسلة وخرجو دازت عند صاكا خذات ليه الپاي باش يشرب العصير وؤكبات مع عصام فالطوموبيل ديال صطوف الي زاهي بيها بينما خرج هههه"

في هاد الاثناء كان المشفى شبه خاوي فيه غير الممرضين المناوبين والاطباء فقط حتى دخلو خطوات بكل ثبات وثقالة كان المشفى ديالو اختار الوقت المناسب الي يكون فيه الكالم ويجي فور ماعرف ...بقا غادي حتى وقف على اثر صوت نداء باسمو المهني...دكتور البغدادي...

زين الدين"ضار عندو حدر راسو وهزو باحترام وسلام ليه"

هو : سي البغدادي اهلا وسهلا...

زين الدين : سي يوسف الله يكبر بيك ...

يوسف : عند الولد محمد رضى ياك ؟"حرك ليه راسو" كون هاني من جيهتو كلشي موفر ليه وشموبر كلينيك الي عندنا راه فيها ...كيجيك شي حاجة دكتور ؟

زين الدين : العائلة ...

يوسف : ميكون عندو باس يومين ويخرج ان شاء الله موصيهم يسوانيو ليه ويراقبو حالتو...

زين الدين"ربت ليه على كتفو" : يعمر دارك ..."حرك ليه راسو ومشا اما هو تمشى بنفس المشية حيد الفيستة الي كان لابس حطها فوق دراعو وبقا غير بقميجة حل ليها صدايف ثلاثة لفوقانيين ...وصل الشومبر دق الباب وحلو دخل لقاه كيشوف فالسقف...

سيمو"دور عينيه يحساب ليه فرح تا بان ليه هو ماعرف يخرج عينيه ولا يزغرت خلاتها صفاء ولا اش يدير"

زين الدين"قرب لعندو وتحنى باس ليه جبهتو كانه كيبوس ولدو بهاد المعنى..شاف فيه " : مزيان ؟!

سيمو"غمض عينيه وحلهم"

زين الدين"حط الفيستة ورا الكرسي وجلس فيه مقرب لعندو..دار ايديه عند ذقنو ومرافقو فوق ركابيه الي مفرقهم بطريقة رجولية" : يضهر ليا من الحامدين ولا شنو ؟

سيمو"بصوت شبه مسموع فحال فحيح" : ش ش ويااااه..

زين الدين"غمض عينيه وحلهم" : اللهم لك الحمد...

غير وصلها عصام عند الباب تاكد تا دخلات وتاصلات بيه بالي تلاقات مع الولد ودخلها عاد تيسر هو ...هازا فايديها الطاسة والولد هاز معاها قرعة العصير ...

فرح : شحاال زوين ا توفيق تكون عندك المعرفة فسبيطارات هههه

توفيق : نتسالك عراضة فكلينيك جديد ههههه

فرح : اش بغيتيه ..حل بواني حل ايدي عامرة...

توفيق"حل الباب ودخل مشافش زين الدين وشير ليها باش دخل" : دخلي الالة مولاتي

فرح"هزات راسها" : يخليييييك ليلي كبيدة ديااااالي ههههه

فهاد اللحضة زين الدين كي تحل الباب ضار وشافهم داخلين كيكركرو رفع حاجبو وزاد كمل عليه طريقة باش قاليها دخل وكملات ليه كبيدة...ابحال قاليها كنحبك...عض سنانو من داخل وطلق ديك التخنزيرة لكن دغيا جمعها بزز باش ميبينش اما ايديه را صباعو بغاو يتگرضو من كترة مامزير عليهم تحت ذقنو...

فرح"يلاه غاتهضر هزات عينيها وهي تلقاه جالس تا شهقت"

توفيق : امالك هههه دخلي هاكي قرعتك ...

فرح"خنزرت" : اش كدير هنا ؟!!!

زين الدين"الصمت"

فرح : اشريف اش كدير هنا ؟ واش من نيتك ؟ فاش عينك اويلي واش عينيك يقتلك ولا تقتلو !؟

زين الدين"الصمت"

فرح : ياويلي اش بغيتي لاش جااااااي اويلي...واش باغي تجبد ليا صداع ؟ ياك عطيتك تيساع وكل شاف طريقو ؟ ماعرفتش لاش جاي عند سيمو فين كتعرفو...

توفيق : ماشي من لافامي ؟ نعيط لسيكيريتي يخرجو ؟ "ماعرفاتو كي دار لا هي لا سيمو ولا الولد توفيق تا طار على وقفتو وتم غادي مقرب ليها وهي كتبعد وعينيها عليه كيفاش داير بواحد سرعة تقلب وجهو لتخنزيرة الي كان جمعها ماقدرش ورجعها بالخف.."

فرح "راجعة باللور وجهو خلعها" : اش بغيتي ؟

توفيق : اشريف حد صداع ولبدها ممنوع الهضرة هنا ناس مريضة...

زين الدين"ضار لعندو خطف ليه القرعة من ايدو على شوي طير ايدو والقرعة تا غوتات فرح..ونطق بكلمات مغددة" : دور تگلع عليا نتا من هنا ..."جهد صوته" تگلاااااااااااع..

فرح : اش بغيتي فيه هو مالك نتا سوقك فيه ؟"شدها من كتافها هازا طاستها بين ايديها ودفعها جيهة الحايط حاصرها تما "

سيمو"زكو كيشطح بالخلعة وفخاطرو كيقول" : اليووووم يكملو ليا دبيحة االي مكملتش ...

زين الدين" خبط الحايط بجهد تا قفزات غمضت عينيها وتوفيق ضرب دورة وفرتح سيمو كيقلب منين يهرب" : لاااااا بغيت نجي نشوفو ولاااا بغيييت نشوفك مكاين مخلوق يحبسني"تحنى مزيااان مقرب ليها تا ولاو انفاسو كيسوطو فيها سخان" تهزي وتحطي على ملتي تم..."طلعها وهبطها بالكاب الي لابسة محلول عالبيجامة" سدي المرض الي لابسة

فرح"خنزرات فيه معنقة طاستها مامفاكاش والخلعة بغات تقتلها غا دافعة جبهة" : ونتا مالك ؟

زين الدين" عينيه فعينيها ...هز صبعو مشير ليها" : على بووونت على بووووونت طيري لدينمي نقشة الي بقات نقسم خليقتك على جوج...

بقا هكاك محاصرها بينو وبين الحايط بملامح وجهه الي كتخلع وهادشي غير شوية الي شعلات فيه نار العصبية...صدرو كيطلع ويهبط وعينيه مخنزرين فيها وصبعو بقا موجه ليها بطريقة كانه كياكد عليها التهديد....

فرح"شافت هنا وهنا لقاتو محاصرها وريحتو كتضرب فيها ممزوجة بانفاس نار الغضب الي كتلفح فوجهها وطولتو الملفتة ووقفتو وضخامتو وهو قدامها وخا حتى هي طولها معقول ...شافت فيه ورجعات هربات عينيها تا نزلتهم " : حيد من قدامي...

زين الدين"عينيه فحال قرطاس عليها...الفك كيبان كيتحرك من برا...حرك راسو ببطئ ...ماهضرش مزادش كلمة فوق كلامو...فلحضة شاف وجهها عزات عليه ومبغاش يخلعها لقا راسو نسا وخلا عصبيتو الي تحكم ...هز ايديه وكحاز تا دار ليها طريق"

فرح"مشات لعند سيمو بلا مدور عندو ولا تهضر ولا دير ردة فعل..حطات الطاسة فطابلة الي حداه خاصة بسرير المرضى..يلاه غاتمشي تهز القرعة لقاتو تبعها وحطها ليها فوق طابلة.."

زين الدين"شاف ف سيمو" : وكان تكون وحدك بيناتنا هضرة.

سيمو"حرك ليه راسو بزربة بمعنى واخا غا يمشي لا يصدق جاي تا عصام ويضاربو عند راسو يصدقو مطيرينو ليه هههه"

فرح"غوبشات وهي تهضر" : ماتبقاش تجي لا دابا لا من بعد ...

سيمو"خرج فيها عينيه باش تسكت لا ينوض يخلطها"

فرح"خنزرات فيه عينيها" : دخل عينيك نتا لا نوض نكمل عليك...

سيمو"حل فمو كيهضر بزز" : افففف سسسكتتييي يسسسسسسكتتتت لممممك ريييييييح...

زين الدين"مجاوبهاااش...مشا هز الفيستة ديالو وقرب لسيمو حدا فين واقفة هي تحنى عاود ليه نفس القبلة فالجبين وضرب ليه حناكو بشوي" : الله يشافي...

سيمو"شد ليه معصم ايدو وزير عليه ...بغا يهضر وهو يحبسو زين"

زين الدين : ششش حاول متفورصيش فالهضرة لا بغيتي تعجل بالشيفا...من بعد نجي عندك ...

فرح"مدورة وجهها ومطلعة حجبانها بتنخنزيرة" : مكاين لاش غذا غايخرج فالعشية غير سير شكرا على زيارة ....

زين الدين"دور وجهو نصف دورة مطلع حاجبو وعينيه فلارض يلاه غايجاوبها وهو ينعل شيطاان غمض عينيه بنفاذ صبر ورجع شاف فسيمو" : مزال لينا هضرة وكلام. فينما كنتي ومعامن ما كنتي غادي نعرف الوقت الي نبغي نشوفك نعلمك"غمزو"

سيمو"حرك ليه راسو"

ضرب دورة لكن قبل ضار تا شاف فيها وعمر وسقى عويناتو بديك التشيتشونا الي قدامو ضايرة لهيه وهازا خنافرها لسما وكي جات معاها نفخة يا لالة...واخا مسداتش البوليرو دوزها بجغيمة خههههه...خرج وسد الباب وراه وغير سدو وهو يمد سيمو ايديه وجر ليها بوليرو تا كان غايقطعو وهي تنزل عندو بزربة كتهتهت عارفاه غاياكلها بلا ملحة....

فرح : لمييييييييييمة ما سكت صافي غا سكت دابا تعگر راسك...

سيمو"مغززز كيهضر بزز" : عطييييييييييك مصييييييييييييبة ..."هز راسو لسما جاتو سخفة"

فرح : صافي هاني غانسكت....

سيمو"ضار شاف فيها بواحد شوفة ديال يااااك تال دابا"

فرح : كون تا شافو عصام ؟ عاد نوضوها ديك المرة كون مافرقوهم ناس...كون تا قتلو ولا مشا عليه الحبس...لاش جاي عندك ؟

سيمو : كا ي ي كايبغيني "ربع ايديه وكمش فمو وجناوح منخرو كيفرفو"...

فرح"ميقات فيه" : اباباباباباا مزينك...زيد زيد تاكل..."بقا ينفخ عليها تم ويتفشفش عليها تا بدات طلب فيه وتعنق عاد باش تفش عليها وعطاتو يتعشا وشرباتو العصير بقات حتى حسات بيه عيا بغا ينعس وهي تعيط لعصام الي من بعد نصف ساعة صونا ليها باش تخرج لعندو....

اما زين الدين فور ما خرج من المشفى ركب فسيارتو واتاجه مباشرة لدار البيضاء لدارو الي غير دخل لقا الصقيييييل بان ليه بيت ضحى بالصدفة شاعل مدا ماجاب دخل لبيتو كيحيد صباطو بالنترة تقابل مع الناموسية واقف كيحل فصدافي القميجة بنفس تخنزيرة تا حلها وحيدها كاملة لاحها فوق ناموسية بقا عريان من الفوق داير ايد على نصو وايد كيدوز بيها على لحيتو بتفكير...كيمشي ويجي يمشي ويجي وصورتها فبالو مكتحيدش ابدا وبمجرد ماكيفكر فيها قلبه كيبدا يضرب بجهد كيحس باحساس فشكل واش جديد عليه رغم انه عاش الحب سابقا ولا شنو هاد الاحساس الي كيحس بيه كانه اول مرة يعيشو مع شي بنت الناس على مقولته...فلاخر زفر بتعب ..مشا لمجر جبد glucomètre وريشات هز وحدة وضرب صبعو بستيلو شوكة جديدة خذا نقيطة الد.م تا عبر قيد العبار وهز دواه شربو عاد مشا دخل كمل تحياد دوش بالخف وخرج كينشف فشعرو قلب ساعة لقاها قريبة نص ليل...دار خاوية حيث توبا كتنعس شوية بكري والخدامات كيخرجو بكري مكيديروش العشا ...لبس تيشرت وبوكسر وشورط حد ركبة وكلاكيك فرجليه خرج من البيت هبط نيشان لكوزينة حل ثلاجة جبد طبسيل ديال سالاد خفيفة وعصير الحامض بدون سكر...حطهم فوق بوطاجي الوسط...

زين الدين : بسم الله...

يلاه بدا كياكل حتى دخلات ضحى على غفلة كتمسح عينيها بكمايمها مشافتش ومانتابهاتش لشكون فكوزينة حيث شعل غير ضو الي فوق بوطاجي كان خافت باش ميبرزطهمش...

ضحى"هزات عينيها وهي تغوت" : هيييييي...

زين الدين"كان كيشرب فالعصير تا كمل منو على خاطرو هي طارت ونزلت وهو فحال مادخل تاحد " ." : ششش شنو كاين ؟! ...

ضحى : وو والو غير عطشت...

زين الدين"مابغاش يقوليها علاش جيتي حيث مادام امها عايشة معاه تجي وقت الي بغات...لكن كمش عينيه فور مالمح احمرار عينيها." : كتبكي ؟"هز حاجبو"...

ماعرفات باش تبلات مكانتش كضن غادي تلقاه فهاد الوقت او يمكن من الدعقة وبالها مشغول مرداتش البال انه غايجي حيث اغلب اوقاتو فالكلينيك كيجي يرتاح شوي ويمشي...او يمكن مضناتش غايديها فيها واش تبكي ولا لا حيث ولفات تاحد مكيرد ليها البال...ماعرفت شنو دير قلبها بدا يضرب وسط راسها عند بالها را عرف شنو بيها وحصلات حتى بانت ليها فوجهها الي هرب منو اللون وفمها الي بدا يترعد وايديها الي ولاو عرقانين بالخلعة والتوثر...خايفة لا تحصل وزين الدسن قدامها لو تعرف امها وباها ارحم من انه يعرف زين الدين...

ضحى : لا لا غيير عيانة شوي...

زين الدين : واخا ماعليش اجي لهنا نشوفو العيا وبشنو كتحسي...

ضحى"راسها بدا كيترعد خايفاه لا يكشف من عينيها را ديفيرجات هذا ماقالسها راسها حيث عارفينو نزق البق ما يزهق معاه.."

زين الدين"هز صبعو وشير ليها تجي" : راني هضرت...

ضحى"بغات تنسيه" : مقلق مني ؟!

زين الدين"هز حاجبو" : مناش ؟

ضحى : من اخر مرة واشنو قلت ليك...

زين الدين : ذكرتي العيب ؟

ضحى"الصمت"

زين الدين : ماعليش اجي لهنا ونشوفو اش كاين"هز ريمونت صغيرة وكليكا تا شعل ضو الثاني ووضاحت الرؤية..شاف فيها وحمر عينيه" ضحااااا"قالها بشوي ثقيييييلة بنبرة تهديد"

ضحى"مالقات مادير سوى تستسلم لا مهرب..حدرات راسها وايديها كيكمشو فكمايم بيجامة ساتان الي لابسة فالغوز تا قربات لعندو.."

زين الدين"كحز ليها كرسي وشير بايديه باش تجلس وعينيه عليها " : رتاحي..."تحنى مزيااان تال مستواها وخا مقابلة ليه ومع هي اصلا قصيورة." ماشي عيب تبكي ماشي عيب تخبي كل راس وباش عامر العيب هو تخبي الحاجة الكبيرة على طاگتك(طاقتك)...الحاجة الي فوق سنك وتجربتك..."حرك راسو" رتاحي وميكون غالخير...

ضحى"حركات راسها وجلسات فالكرسي الي جر ليها وراسها فلارض مقادراش تشوف فيه خايفة ومرعوبة غير بمجرد الجلسة حداه كتجيب ليها الرهبة وفنفس الوقت كتحس بيه فشكل معاها شي حاجات الي كان خاص يديروهم واليديها كيديرهم هو الادوار ديال واليديها كان قايم بيهم هو...لكن خفتها وطيرانها هما الي جابوها ليها..."

زين الدين"تاهو جر كرسي طويل كيتحدر ويطلع بحسب الرغبة..وجلس فيه هبطو بالمقبض لتحت تا تقاد معاها شوي حط مرفقو فوق بوطاجي وصبع ايدو على حنكو كيشوف فيها شحااال لحضة صمت اختارها باش تهدن شوي وتقدر عالاقل تهضر معاه او تعطيه جواب..ما يزيد على خمسة دقايق ديال صمت عاد نطق" : شنو المشكيل الي عندك ؟!

ضحى"هزات كتفها وعينيها فلارض اش غاتقوليه ؟! اش غاتهضر واش تشكي ؟ بالي فقدت اعز ما املك ؟ " : و وااالو غير مشاكيل مع القرايا وبابا ...

زين الدين"رفع حاجبو" : باك مالو ؟

ضحى "عوجات فمها ودموعها شاقين طريقهم" : ما احم "كتمسح وتهضر ومناخرها مزموطين ...اختارت طريق الاسهل باش تعبر وتخرج دموعها بلا ميعرف السبب الحقيقي..." ملي مشيت لعندو قلت غايدير ليا بيت مابغاش كل مرة كيتحجج بحاجة..وانا عيييت ضرني ضهري بالنعاس فالصالون...

زين الدين : كان اختيارك لا ؟ نهار بغيتي تخرجي من هنا ضربك شي حد على ايدك ؟ "بغات تهضر" ششش ضحاااا"خرج فيها عينيه" نتي الي بغيتي تعيشي معاه باش ميضغط عليك حد هنا...شنو كنتي كتسناي نمنعك ولا نسد عليك باشمن حق ؟

ضحى : عيييت من ضغط ودخول فالوقت وخروج فالوقت"هزات فيه عينيها حمريين مجغمين" تخنقت بغيت نعيش بحرية بحالي بحال البنات...

زين الدين: نخليك تعيشي بالحرية الي بغيتي ؟

ضحى : ماشي عيشة هادي الي بغيت ماقدرتش...

زين الدين : ماقلتي عيييب الالة..."كمش حجبانو" شنو مفهوم الحرية عندك ؟"هز ايدو موقفها" جاوبيني بقدر مفهومك نتي نمشيو مع هضرتك وتفكيرك نتي الالة..."هز صبعو" وياك تنافقي ولا تكذبي...جيني نيشان...

ضحى"شافت فيه" : عارف شحال فعمري ولا بحال بابا معارفش امتا تزاديت ؟!

زين الدين"قوس حجبانو" : عشرين عام وشهرين"حك شنايفو وسرح ايدو تا صدمها"

ضحى : هااا !!!"عاودت حدرت راسها" بابا معارفش ماما كيوصل عيد ميلاد كتقوليا سنة سعيدة وصافي...

زين الدين"حيد ايدو وحدر راسو باسف عليها كتبقى فيه فوق بزاااف عايشة تهميش من نوع اخر..دوز على عينيه بتعب قبل ميشوف فيها بجدية" : نهار ولداتك ميمتك تحطيتي بين ايدي لحمة حمرة معارفة فدنيا سوى لغوات والرضاعة...هاديك ساعة عرفت بالي جات معاك تشربي النية الصافية والقلب البيض...من داك نهار حسبتك بنتي البكرة و فحضور باك وميمتك...ختي صغيرة مني وفيا...لا جينا نرتبو الناس حطي راسك بنت عمتي بيناتنا سلام وصلة الرحم ومبارك العواشر...

ضحى"عصرات عينيها وانهارت بالبكاء" : اهى اهى اهى اهى....

زين الدين : ولو يكون باك ميسواش كيبقا باك ديري بوجه ميمتك لا شفتيها صابرة وغايبة(ميكة عليها زعما) راها مكمدة وعاطياك ضو لخضر مباغاش تزير عليك ..."نزل من كرسي ومشا لعندها حط ايدو فوق كتفها مربت عليها" يكون الي كان حطيني مثاال بين عينيك مادام عندك واليديك مهما كانو مزال عندك الحق تعيطي با ومي. كافية وموفية ...بغيتي الحرية عيشيها كيف بغيتي نتي غير قراي وحضي راسك ...نهار طيحي ونهار تخصك شي حاجة علميني وخرجي تيساع..."باس ليها راسها"... حسبيني باك قبل منكون خوك والي ضرك ضرني...غير ماتشمتينيش فيك..."ضرب لسها على كتفها ومشا مخليها ميتة بالبكا "...

حلات عينيها على صوت الدقان صاط ماط صاااط...ناضت جالسة مغوبشة خاسرة...شحال عاد استوعبات بالي المعلمية الي جايين يمكن فوقت ابكر لكن هي يحساب ليها واش تعطلات تا خرجت عينيها وشهقات طارت لتيليفون كتقلب فالساعة لقاتها الستة ونص...خرجات كتزرب لقات عصام مخرج بلاطو الفطور عاوتاني...

فرح : ناااريي يحساب ليا تعطلت اووففف..مالهم جاو بكري ؟

عصام : انا الي وصيتهم باش يساليو عليا الروينة دغيا...

فرح : فوزي فاق ؟!

فوزي : هاني فالبيت اش بغيتيني ؟

فرح : غاتدي مي نجية وصفاء لعند سيمو ؟!

فوزي : سوقك ؟

فرح : مزينك..."ضربات فعصام ومشات لدوش توضات ورجعت لبيت صلات وناضت كتقلب ماتلبس بزربة جبدات شنو غاتلبس لبساتهم بالخف طلقات شعرها لور عاوتاني مدارتش لا ميكاب لا ايكخون ديال شمس...هزات صاكها وتيليفونها وشارج وبزطامها دارتو فصاكها من بعد ما تاكدات من فلوس وخرجات فطرات بزربة كتنقز هنا وهنا ..

عصام"كمش فيها عينيه" : تهدني مالك ؟

فوزي"حل فمو ضربات ليه طبسيل العسل بلا متحس لحساتو" : اويلي العسل مشا..

عصام : يلاه تركن لارض من داك العسل نتا..

فرح"ضارت لقاتهم كيشوفو فيها شي مكمش عينيه شي حال فمو مصدوم والخبز في فمها" : افتفوقنتثتو ماكم..

فوزي : شني ؟؟

عصام : صرطي صرطي من فمك وهضري الحبس ...

فرح"صرطات تبعاتو الي بقا من اتاي وناضت" : قلت ليكم مالكم كتشوفو فيا...ماعلينا سلم على سيمو تنجي ونشوفو هنا الى خرج...يلاه انا مشيييت..."لبسات سبرديلتها وخرجات عند الباب لقات صفاء واقفة قدام دارهم هازا سلة فايدها كتسنى امها وعينيها مغمضين بالنعاس." اصباح الخير ...

صفاء"حركات راسها مافيها ميهضر"

فرح : شي جوان الخو ؟

صفاء"هزات راسها وحطات ايدها على صدرها زعما لاحااافضك"

فرح : عند سيمو...

صفاء : مممم غانكمل نعاسي حداه "غوتات تا طارت فرح ونزلات" واااااااا فاطنااااااو تي تحركي خلاص..

فاطنة"من لداخل" : وااا يگطعك عليااااو....

صفاء : هاهي جايا"طلعتها وهبطتها" الخدمة ؟!

فرح : وايييه راني تعطلت ..

صفاء : تاتجي وكملي ليا اش طرا البارح...

فرح"خرجات عينيها وضارت جيهة الدار": سكتي لا يسمعك شي حد منهم...

صفاء : ماسمعني حد غاسيري...

شيرات ليها ومشات كتزرب حتى وصلات لشارع ماتسناتش بزاف تا جا طوبيس ركبات فيه وزاد بيهم حتى وصلو لكلينيك هبط لاكاف ووقف تسنى تا نزلو كاملين...

ايمان : غا كندخل هنا كنحس براااحة هههه اول خدمة كنرتاح فيها...

فرح : تا انا رتاحيت هنا كلشي موفر والي بغيت كاين هنا...

ايمان : واش صالير غايدوز اول منكملو شهر ولا كيفاش ؟!

فرح : قالينا سي البشير نهار خمسطاش غايدوز...

تابطات ايمان دراع فرح وطلعو فالمصعد لطابق ديالهم...

اما فالدار غير تيسرات كملو هما فطورهم وخرج فوزي عطاه عصام كونطاكت طوموبيل باش يوصلهم ويبقا معاهم تيرجعهم اما هو كي خرج فوزي دا دوك الماعن غسلهم ورتب دنيا عاد هو طلع عند المعلمية اكد عليهم وعطاهم شي بركة باش يتقداو شنو قالو ليه خاصهم...ونزل قبل ميديماري الموطور صونا ليها ...

عصام : فلافاك ؟

لمياء : لا فالدار مريضة...

عصام"بخوف" : شنو ضارك ؟؟؟

لمياء : معرفتش يمكن ضربني البرد مقدرتش نهز راسي كاع..

عصام : عندك شي دوا شي حاجة ؟!

لمياء : عندي دوا عندي...ماهضرتيش معايا هاد اليومين غبرتي ؟

عصام : وقع واحد المشكيل ل سيمو تضرب وكنا معاه فالسبيطار"مسد عينيه بتعب" اودييي سلك منها وصافي ..

لمياء"جمعت حجبانها" : سيمو ؟ شكون سيمو..

عصام"كيشوف قدامو بجدية" : محمد رضى ولد جيران الي هضرت ليك عليه مربيه هو وفرح وصفاء...

لمياء : مممم وكاع يخليك تهملني يومين متهضر متسول فيا ياك...

عصام : ماعليش ...دوزها منا خلعة راس مابقاش بلاصتو شلا غبينة دازت وخلعة...تاهو ماساهلش عندي...

لمياء : كيفاش مساهلش كنضن غير ولد جيرانكم وعاد على معاودتي ليا عليه باينة غايكون هو الي جابها فراسو...ماعرفتش انا كيديروها قد راسهم ويجيبوها فراسهم كتجي غير فالواليدين...

عصام : سيمو ماشي اي واحد ا لمياء سيمو حسبيه ولدي حسبيه خويا صغير خير ميمتو وخيرو سااابق لا شفتيه باقي ولد صغير يعجبك فوقت الشدة...البلية دارتها ليه ولو شفتو مفضي لو صباح نعطيه سلخة وبالليل نعطيه سلخة...

لمياء : لهاد درجة ؟!

عصام : وكثر حاط عليه العينين وموصي عليه ودايرو بين عينيا...والي خصر ليه خاطرو ولا نقص منو نهارو كحل...

لمياء : حتى انا هههه "بمزاح بغات تيستيه اي تجربو"

عصام : كل وبلاصتو وليني الي فبلاصتو يبقا بلاصتو ولا يخسرهاش عندي...والي حكر يقلب على من ينقي شوكو(الشوك)...

لمياء"حسات بالقمعة الفنفونية الي دار ليها وهي تصرط ريقها" : اهههن ياك ...حم..انا غادي نخليك ماما كتعيط...صباحك مبروك وميكون باس عندو...

عصام : لهلا يوريك باس ازين ديالي.."قطع عليها وتيسر"...

الكلينيك...

وصل بسيارتو حتى لاكاف حتى تلاقا عند الباب علي تاهو جاي بسيارتو..شير ليه براسو ودخلو بزوج نزلو لاكاف بلاصاو طوموبيلاتهم فبلايصهم..خرج زين الدين هاز شكارة الماك فايدو سد طوموبيل بالكونطاكت وعينيه على علي تاهو الي نزل وجاي لعندو...

علي : صباح الخير...تا جيتي مبكر تاني ماناويش ترتاح ؟!

زين الدين : عندي شي حالات ولابد ليهم من كونطرول...مبكر ليوم لا ؟

علي : ايه جايا"مزال كيحك فراسو تا بانت ليهم سيارة Audi كاتكات فالابيض داخلة بلاصات حداهم نيييت" هاهي جات "ضار عندو كيشوف فيه ومحرج نوعا ما...

حنان"خرجات بكامل اناقتها طالقة شعرها والفرحة على وجهها وصلات لعندهم بابتسامة عريييضة" : بونجوووغ ...

علي : صباح نور...

حنان"تابطات دراع علي وشافت فزين الدين بحب" : صباح الخير زين الدين...

زين الدين"حرك ليها راسو" : عليكم سلام ورحمة الله..."شاف فعلي" بون انا طلعت لينا شوفات من بعد" مازادش الهضرة قلب الدورة وزاد مخليهم بزوج وحنان جمعات ابتسامتها حدرات عينيها تا طبطب عليها علي شافت فيه وشير ليها باش يمشيو..اما زين الدين طلع نيشان لطاج ديالو دخل لمكتب غير زيارة خفيفة يكونطرولي شي حالتين عندو ويمشي لدار يرتاح لانه ليه اكثر من يومين وهو مشايفش نعاس مزيان وضروري يرتاح...شاف الحالات عطاهم بعض التحاليل يديروهم عندو فالكلينيك نيت ووصا عليهم...هز شغلو قبل ميمشي تاكد وطمن على فرح من بعييد عاد دوز اتصالو...

زين الدين : امضرا ؟! "حرك راسو" يعمر دارك بروفيسور جلال..."قطع معاه وتيسر خرج يلاه غايمشي كانت حنان واقفة مع شي اطباء وعلي معاهم فنفس الجناح نيت هزات فيه عينيها بان ليها غادي فاتجاه المصعد دخل ليه ممحاشيها لا ليها لا لتاحد...نزل لاكاف لقا وليد واقف بسيارتو ...غير شافو وهو يخرج منها مشا لعندو ..

وليد : نمشيو بطوموبيلتي حسن ؟

زين الدين"حرك ليه راسو" : من الخير.. عيان نيت..

وليد : صافي خليها تاترجع وهزها..."ركب معاه فسيارتو شاف فالساعة كانت جوج ديال النهار...كسيرا نيشان فالوجهة الي دار معاه يمشيو ليها والي كانت مدينة الجديدة وعلى مسافة بسيطة حتى كانو داخلين ليها خءا الاتجاه الي نعت ليه حتى وصلو اما المستشفى الكبير بالضبط...ركن السيارة لداخل ونزلو...دخلو لعند واحد تما لقاه واقف كيتسناه ...تبعو وتبعو تا وليد...حتى وصلو لواحد الشومبر ديال الفحص خاص غسر بالاطباء فقط ممنوع شي حد يدخل ليه...كان فيه سيمو مغط فوق واحد البياص...حتى وقف عليه...

زين الدين"ضرب ليه على كتفو" : مزيان ليوم ؟

سيمو"حرك راسو" : مم حممد لله...

زين الدين : داكشي الي بغينا..."هز عينيه فالطبيب غمزو جاب ليه ليگانت دارهم وتحنى لعندو" ماعليش صبر...

سيمو"كمش عينيه مفهم والو" : شش شنووو كاين ؟

زين الدين"مجاوبوش حيد اللصاقة والفاصمو من بعد ماخوا عليها بيطادين عينيه مركزييين مع الجرحة الي تعرات قلبها مزيااان وعاود سواناها ليه ودار ليه فاصمة ولصاقة جديدة..عاد وقف وتقابل مع طبيب" : حالتو مزيانة ؟

طبيب : اخر فحص درناه صباح كلشي مزيان يقدر يخرج ليوم فالعشية ...

زين الدين"حرك ليه راسو عاد تحنى عند سيمو كيهضر معاه" : هاد اليومين خوذهم راحة ليك ...من بعد 4 jours غادي تجي عندي "شافو بغا يهضر " لا تهز هم عارف شنو كاين وشنو كندير والحاجة الي تجيب ليك صداع محيدينها..."شاف جيهة وليد" غادي يتاصل بيك تلاقا بيه يجيبك لعندي تاحد ماعارفو باش تهنا من جيهة المشاكيل..."طرش ليه حنكو بشوي" ترجل معايا شوي مالنا رعاوين اصحبي ؟!

سيمو : هههههه لا ...

زين الدين : الله يعجل بالشيفا..."شاف وليد" تحرك...

وليد"شاف ف سيمو" : الله يشافي اخا سيمو ههه

سيمو"كمش حجبانو" : منين كت"حبسو"

وليد : نعرفك بزز من حبي الله اودي ههه"شير ليه وضار تبع زين الدين...ركبو فالسيارة وقبل ميمشيو" نوصلك لكازا ؟

زين الدين"شاف ايمايل فتيليفونو هز ايدو موقفو للحضة" : تت لكلينيك نهز شي حاجة من تم...

وليد : وجهك كيبان ليا ماشي تال لهيه ؟؟!

زين الدين"حرك راسو بالنفي " : مكاين والو عادي عاادي..تيسر طلقني.."كسيرا وليد نيشان لكلينيك غير وصل طلع بزربة تا حس بدوخة واحد لحضة وولا شد فراسو دخل لمكتب دوز لخط " : دابا يكونو عندي..."مزال كيهضر تا دخل علي عندو"

علي : تا ممشيتيش ترتاح ؟

زين الدين : شي اناليز وصلو من فرنسا ولابد نشوفهم...

علي : ياودي انا نرسلهم ليك ولا نجيبهم ليك ريح راسك شوي ..

زين الدين"جلس فوق الكرسي وهز ايدو بمعنى تانتا..."

علي : اودييييي عكسي والله الى عكسي...هاني شوي ونجي "خرج من عندو توجه لمكتب ديالو اما هو بقا شي نص ساعة وهو كيتسنى تا صعر "

زين الدين"رفع صوته تا قفزات البنت الي فالمختبر" : واش نتسناو خمسين عااااااام هنا ولا كيفاش ؟ الخدمة لاروب ماعنديش هنا...

هي : را غاتوصل عندك دابا دكتور سمح لينا على

زين الدين"قطع عليها فوجهها حط الفيكس بزعاف...حل صدافي القميجة حس بالخنقة ودوخة دوخة والعرق كيتكب منو...كيشوف باب مكتب ديالو بعييييييد وشي وحدة دخلات مافرزهاش غمض عينيه وريحتها طلعات مع نيوفو تا كمش حجبانو وحط راسو على الكرسي قبل مايغيب اخر كلمة قالها بصوت شبه مسموع " : تيشتشوونا ديالي...

فجأة الرؤية تضببات بين عينيه هاد الشيء مغاديش يحس بيه الا الي كيعاني من داء السكري او عندو شي حد مريض بيه سواء اخ اب ام او ابن واكثرية فهاد العصر الي ولا كيجي لشباب والاطفال بشكل كبير ومنتاشر بيناتهم...انك تكون مريض بيه فهذا يعني انك خاص تخلى على شحاال من حاجة فالاكل ديالك وتلتازم سواء بالحمية الغذائية الصحية وتراقب باستمرار وترد لبال وتمارس الرياضة بشكل يومي وهذا الي كايدير زين الدين لكن فهاد الاونة الاخيرة تشغل بزاااف بالمشروع ديالو همل شي حاجة اسميتها رياضة مرة فشحال كيمشي لانه باش وقف وقاد مسائل واجراءات مشروع بهاد الضخامة مساهلاش وخا محاط بيه بزاااف ديال المساعدين وغير المحامي ريان من احد اكبر المحامين فالمنطقة كان مكلف ليه بالامور القانونية لكن الي فراسو فراسو خاصو يطالع على ابسط الامور بنفسو ويوقف عليها زيادة على اخر المشاكيل الي وقعات ليه فالاونة الاخيرة بمسبة راجل عمتو الغالي وزيد الاحساس الجديد الي دخل لحياتو بزاف الامور والحاجات خلاتو يفورصي على راسو ويخرق النظام الي كان ماشي عليه قبل...وهذا مكيعنيش انه شي حد ناقص بالعكس مريض السكري انسان عادي فقط لازم الحيطة والحذر والاكل الصحي الي لازم اي شخص يتناوله ليس فقط الشخص المريض...

زين الدين"حط راسو على لكرسي وهزو الفوق مغمض عينيه من ديك الضبابة اخر حاجة شم وقال قبل ميغيب هي ريحة الي متخفاش عليه او يمكن توهمات ليه من كثرة ما كيفكر غير فيها وشاغلة ليه البال..وبصوت شبه مسموع" : تشيتشونا ديالييي...

اما الي دخل فعلا كانت بنت هازا فايدها ملف مكتوب عليه..Dr Al-Baghdadi كان من قسم المختبر الخاص فين كيرسلو تحاليل للخارج فرع مخصصو لتحاليل الي كيمشيو لعند طبيب نيشان مكيدخلش الناس العادية يعني مختبر خاص جا نيت فنفس الطابق الي فيه فرح غير هو فرع وحدو...

هي : دكتوغ جوسوي ديزول على ل"كمشات عينيها" دكتور ؟

زين الدين"الصمت ماهواش هنا كيحرك غير فمو بشوييي"

هي : دكتوغ ؟ "فجأة تحل الباب ودخل علي لقاها غادية بغات طل عليه تا طل عليه لقاه من وجهو باين العربون طار لعندو باقصى سرعة تا وقف عليه"

علي"ضار لعندها" : شنو وقع ؟

هي : ماعرفتش دكتور يلاه دخلت لقيتو هاكا..

علي : صافي غير سيري نتي..."حدرات راسها ومشات ومرة مرة كطل عليه بان ليها علي كيقلب ليه فعينيه وخرجات اما علي كي شاف عينيه مشا بزربة لشكارة زين الدين حلها بجهد تا زلع داكشي الي فيها جبد لاتخوس ديال دواه والي كيعبر بيها هزها نيت دار ريشة وستيلو طررق فصبعو خرج نقيطة من د.م وعبر ليه لقاه نازل ..." فففففف اولدي مفورصي على جهد طاقتك بزاااااف بزااااف مالك على حالتك..."قرب عند وذنو" زين الدين ؟ ولدي كتسمعني ؟

زين الدين"الصمت...بقا بنفس الوضعية كيسمع انين ضعييف"

علي"ضار لمجر الي كيعرفو حاط فيه الشكلاط والحلوة لهاد الضرورة...ولكن لانه طايح نيت طار لثلاجة جبد منها كانيط كوكة طل على ماشين القهوة حداها قرعة عامرة بساشيات سكر هز وحدة ..خوا كوكا فالكاس وخوا فيها سكر خلطهم" : زين الدين "گعد ليه راسو" حاول تشرب شوي من هادي حاول توگض معايا ولدي...

زين الدين"سمعو ومسمعو مقادرش يهضر..حل ليه فمو"

علي : مزيااان"عطاه يشرب شوييي بشوييي تا شرب نيت...خلاه متكي جلس مقابل ليه فوق المكتب مربع ايديه شي شوية هكاك وعاود شربو تاني تا حس بيه بدا شوي كيتوگض عاود ليه العبار لقاه بدا كيطلع على كي كان... عاد تنفس الصعداء وجلس كيسوط ويحمد الله..."

بقا حداه تا حس بيه بدا يحل فعينيه ويشوف لفوق يحركهم هنا وهنا حتى استقرو...

علي : زين الدين ؟"بصوت منخفض"شوية ؟

زين الدين"هز ايدو بشوي بمعنى مزيان مزيان"

علي : فيك مينوض ؟ من الاحسن رتاح غير لداخل كول ليك شي حاجة وسير نعس غير هنا فشومبر ديالك...بلا ماتعاند وسمع مني انا رااااضي عليك اولدي دير غير شي مرة بهضرتي ..

زين الدين"مقاليه والو حرك راسو بالايجاب"

علي : نعاونك ؟

زين الدين"بصوت تعب" : لا لا..."بقا جهد شي عشرة دقايق واكثر عاد قدر ينوض وجهو مكشر تكا ايديه عالمكتب لحضة تا تنفس شوي عاد توجه لشومبر ديالو الي تما من بعد ما خرج من المكتب تبعو علي جمع داكشي الي طاح وتبع ليه شغلو...حيد الفيستة وصباط وتقاشر حل صدافي الكمايم ديال قميجة طواهم تالفوق وطوا سروال ودخل لدوش تما غسل وجهو وايديه ورجليه نشف حالتو وخرج اول حاجة دار تلاح فوق ناموسية مجبد حط دراع ايدو على عينيه..كيتصنط لراسو وانفاسو حتى لواحد اللحضة دازت ريحتها بين نيوفو تاني وهو يدور عند علي..."

زين الدين : شكون دخل لعندي ؟!

علي : شكون ؟

زين الدين"هز ايديو كيدور فيها " : شي حد دخل عندي ؟! فرح ؟؟

علي : صلي عالنبي اينا فرح ؟ مادخلاتش !! "تفكر البنت الي لقا داخلة" ااااا بون واحد البنت يمكن جابت ليك شي حاجة جو بونص هي الي لقاتك مغيب...

زين الدين"تگعد نصو" : فرح !!!

علي : اااااا لا مال فرح خافية عليا ؟

زين الدين : ريحتها رييحتها الحاج ...

علي : تشابه العطور اولدي شي حاجة عادية متنساش...

زين الدين : الحاجة لا كتميز كتميز الحاج"رجع لنفس الوضعية ايدو على عينيه" من وسط عشرين بنفس ريحة نميزها بينهم...

علي.: وهدا عليا هادشي شتو كبيييير هههه

زين الدين : لا اله الا الله...

علي : شوية دابا ؟

زين الدين : الحمد لله...

علي : شوي وغايطلعو ليك الماكلة كول ورخف على راسك اولدي نقص من جهد الي فوق جهدك كتبقى انسانك والانسان ضعيف...ماديرش شي حاجة فوق طاقتك كتجيبها غير فصحتك والي بغيتيها توصلك توصلك والي مكتابة ليك را تجيك...سميه صابر ...

زين الدين : ماعليش...

علي : هاهي خدمات عندك وامتا ناوي تعلمها را خدامة عندك ؟ ويااااك تقول لا متعرفش اخرتها تعرف ولازم تعرف منك من الاحسن...خليها تقبلك هو اللول عاد كمل شي لاخور طريقك طويلة اولدي ونهار لول عرفتي هادشي وعارف لازم عليك تصبر"خرج فيهي عينيه" بفمك قلتي خاطرها فوق خاطرك ياك ؟

زين الدين"تنهد" : وشنو عندي هاد ساعة من غير خاطرها...

خرجات من المدرسة الوطنية الي كتقرا فيها من بعد غياب يومين...صاكها فكتفها وكلاسور الاوراق بين ايديها شافت ساعة فتيليفونها كانت الثلاثة ونص ديال العشية الجو مشتي ...تمشات شوية وعينيها فلارض مبقات كتهضر مع تاحد من صحابها تقريبا انعازلات شوي...حتى صونا تيليفونها لقاتها ماماها الي كتعيط...

ضحى : الو ماما...

توبا : غادي تعطلي ليوم ابنتي ؟!

ضحى : معرفتش علاش ؟

توبا : بغيت نخرج شوي المدينة بغيتك تمشي معايا ...

ضحى : ماعرفتش والله غير سيري نتي ماعلا باليش نمشي لشي بلاصة...

توبا"باسف" : وخا بنتي الي بغيتي...

قطعات معاها وكملات فطريقها عادي كتمشى حتى حسات بشي سيارة وقفات مابغاتش تهز راسها لانها ماضناتش غاتوقف على قبلها...وما ضنتش را غايكون هو لانه ليه من داك النهار وهو مكيجاوبش ومرسلش ليها حتى ميساج الي يخليها ترتاح انه ماتفلاش عليها...بقات كتمشي تا حسات بسيارة كتحرك معاها بحسب خطواتها هزات عينيها وهي تلقا سيارة ديالو نيييت ..

مهدي"حل زاج نافذة المقعد الي جنبو" : ضحى طلعي...

ضحى"وقفات كتشوف فيه بنضرة حزن خيبة امل من جيهتو..مكمشة فصاكها وكلاسور "

مهدي : ضحى غير طلعي ونشرح ليك كلشي عارف اش درت وعارف كبتها معاك الوغ طلعي باش نتفاهمو..ڤازي ڤازي"شاف نواحي" طلقي راسك...

ضحى"ضارت هنا وهنا وهي تمشي لعندو حلات الباب وركبات..كان غايبوسها وهي توقفو بايدها" : لا...

مهدي"حرك راسو" : واخا ماشي مشكيل من حقك...

ضحى : هضر انا كنسمع ليك...

مهدي : نن غادي نتحركو لاباغطومون ديالي...

ضحى : لا نهضرو هنا نفهم شنو كاين ديك الهضرة ديال لاباغطومون ولا شاليه ؟ شنو تعاود نفس الحاجة تاخذ شنو بغيتي وتعاود تغيب ؟

مهدي : ضحى ردي لبال لهضرتك ؟ انا ماشي من نوع الي ناخذ حاجتي ونهرب عندي نيشان وكنجيك نيشان ومصارحك بكلشي منافقتك ماكذبت عليك معندي علاش نخاف ولا نهرب...بغيتي تسمعي مزيان مابغيتيش خوذي راحة راحتك نهار تبغي نشرح ليك...

ضحى"بقاات كتجمع ففمها وتجمع باش متبينش انها غاتبكي لكن كان الشيء فوق طاقتها واستسلمات لدموعها مرة اخرى لعينين طابو بالبكا الوجه ولا ذابل زينها بدا يفقد البريق ديالو..." : ننننن اهى اهى...

مهدي"عقد حجبانو" : شششش ma belle ؟ علاش البكا دابا ؟

ضحى : اهى اهى"هزات ايدها بغات تشرح ماقدراتش" اهى اهر م مماشي ساهل مهدي ماشي ساهل عرفتي شنو وقع ؟ ساهل عندك نفقد شرفي ونخبي على دارنا ؟ اهى عرفتي شنو وقع ليا فاش مبقيتيش كتجاوب ومسولتيش فيا ملي حطيتيني قدام الباب مابقيت عرفت عليك والو ؟! ساهل هادشي اهى اهى...

مهدى"قبط وجهها بين ايديه وقربها لعندو باس جبهتها" : نتحركو من هنا لا يجي شي حد كيعرفك ويوصلها لداركم نوصلو لدار ونشرح ليك.."شافها سكتت عاود باسها ورجع كسيرا والوجهة كانت احد الشقق فاحدى العمارات المتواجدة ب دار بوعزة...وكانت اول مرة غاتمشي لعندو تما ..وقف سيارة وضار تا حل ليها الباب بكل جنتلمانية منو عنكش ليها شعرها وباس راسها باش يعطيها نوع من الاطمئنان وماتحيش بانها تغدرات...سد الباب وقبط ايدها مكمش فيها سلم على الكونسييرج دخلو لمصعد وطلع لفوق لشقة ديالو الي غير دخلات ليها كانت شقة فخمة ولا في الاحلام كبيرة نص فراشها بلدي ونص رومي اتاجه بيها لجهة المفرشة بالفوطويات جلد" : جلسي...شنو تشربي ؟! واكلة شي حاجة ولا نكوموندي ليك على شي حاجة ؟!

ضحى : بغيت غير شريبة صافي مابغيت ناكل والو ..كنتسنى فيك تهضر..

مهدي : d'accord.."حيد المونطو الي كان لابس وقميجة بقا عريان من فوق ديك الفورمة الصدرية الي كطيح منها نص مشا لثلاجة جبد منها قرعة ما جديدة وكاس خوا ليها فالكاس وحطهم قدامها وجلس حداها نيت جنبو بجنبها سرح ايديه وايد وراها بقا حاضيها تاشربات وحطات الكاس عاد حط صبعو على عنقها وطلع لحنكها كيمرر عليه..قبل مينطق" : طلعت لفاس..الميمة"جداه" دخلات لانعاش كيف عرفت ديك ساعة فاش حطيتك طلعت لتما كانت على شوي وتموت مابقيتش حسيت جهلت فديك اليومين حيث ماشي غير ميمة را هي الي رباتني هنا قريت هنا قبل منوصل على دار لموريال...نتي ملي يوقع لمك هادشي غادي تعقلي على شي حد ؟!

ضحى"الصمت"

مهدي"جرها لعندو اكثر محاوطها وايدو فحنكها كدوز عليه" : نهار لول جيتك نيشان شنو كاين ماشي باغي نتفلر نلعب بيك نضحك عليك...هادشي مشا ف 2008 ولتحت حنا دابا فوقت كلشي واضح وباين مكاينش الي يضحك عليك من غير راسك...الى بغيت ندوز الوقت موجودات الي بغيت ومعامن بغيت والمخيرة فيهم تبغي دوز معايا ليلة..."باسها فحنكها بشويي وهضر وفمو فحنكها اما هي عينيها تغمضو السحر الي طلق عليها بهضرتو وحركاتو كافي باش يشعل فيها الحب من جيهتو.وتنسا شنو وقع قدر يقنعها بهضرته والمبرر الي عطاها...ومع الاسف استسلمات ليه للمرة ثانية حتى لقات راسها غاتعرا تحت منو من بعد ما مددها فوق الفوطوي وطلع فوقها لايح قبلاتو سحرية عليها وايديها معنقينو ورا ضهرو العاري زسط قبلات بين صدرها من بعد ما خلا غير سوتيان حبس وهز راسو" نو غادي نحبس...

ضحى"كمشات حجبانها بتساؤل"

مهدي"تگعد وجلس كيحك فحجرو الي انتصب..حل صدفة السروال باش يتنفس شوي وهز راسو لفوق كيسوط" : ماغنديرو والو حتى تمشي عند spécialiste

ضحى : كيفاش ؟

مهدي : وي باش تعطيك La pilule (حبوب منع الحمل)

هزات الديباردور والتريكو الي كانت لابسة لبستهم بزربة وتقادت فالجلسة طتشوف فيه وتستوعب شنو قال قبل قليل حبوب منع الحمل !! ...يمكن نسات هاد القضية انها فاي لحضة غاتحمل من ناحية مزيانة ولكن من ناحية خربقت ليها التفكير يعني مباغيش الولاد او مباغيش يوحل الى حملات وباغي يكمل فعلاقة تكون مدة طويلة يعني بعيييييد انه غايجي يخطبها !!!

ضحى : كيفاش !!

مهدي"ضار شاف فيها" : كيف سمعتي..ياكما ناوية تحملي ؟!

ضحى"بغات تختابرو" : علاش مابغيتيش ؟

مهدي"رفع حاجبو" : مسالي كري لبراهش دابا ؟ عاد بادين كنتعرفو على بعضياتنا...هادشي بعيييييد كيجي بعد علاقة زواج ماشي وسط relation عاد بادية...مزال معشناش بزاف ماسافرناش ...مازال موصلناش لواحد niveau ديال نفكرو فشي قرارات كبار مزال مدرناش خطوات ومراحل باش ندوزو لهادشي والولاد اااخر حاجة ممكن نفكر فيها وحتى نتي...دونك غادي نديك عند وحدة بعيدة على كازا باش متوصلش لهذاك ولد خالتك ولا طون فخيخ ولا معرفتش بلا متخافي ...

ضحى"بقات شحال ساكتة وهي توقف" : بغيت نمشي خرج قبط ليا طاكسي ولا شي قربني لعين دياب ناخذ طاكسي عافاك مابغيتش مزال نتناقش معاك ..

مهدي : ضحى calme toi ma belle ...

ضحى.: مابغيتش حسن نمشي لا نصدقو فشي حاجات انا مابغيتهاش...خليني براحتي من بعد ونهضرو...مزال عيانة اصلا من اخر relation وقعات بيناتنا...

مهدي"وقف" : شنو ضارك مزال ؟!

ضحى : كلشي حتى النفسية عندي ماشي تالهيه...من بعد ونهضرو...

مهدي : واخا مايكون غير خاطرك...يومين ونعيط ليك مزيان ؟

ضحى"تنهدات بصوت وحركات راسها ب اه ...هزات صاكها وكلشي كملات لباسها جمعات شعرها وحتى هو لبس وخرجو وصلها لاقرب نقطة لدارهم بعيد شي شوي ركبات فطاكسي ودخلات كتزرب لقات مها خارجة دغيا طلعات لبيت كتجري لدوش باش دوش.."

اما زين الدين خذا ليه الوقت الكافي باش رتاح جابو ليه الاكل المخصص ليه من شيف خاص فالمطبخ كيطيب لمرضى السكري الي فالمصحة ووصاو ليه پلا ديالو تاهو حالو حال اي مريض...كلا مزيان حس براسو بدا كيرجع طاقتو لكن خاصو راحة اخرى باش يكمل وهي يخوي دماغو للحضة ويريحو من كثرة التفكير وطبعا هادشي صعيب والحل الوحيد هو النوم...تكا فوق ناموسية وجبد عليه ماحسش براسو من فرط التعب ديال يومين بلا نوم حتى لقا راسو غرق فالنوم لساعات مافاق غير على دقان وصوت شي حد كيعيط بسميتو وطبعا مكاينش من غير علي او مراد او وليد او ريان ولا الحسين فحالة جا يعني اقرب ناس ليه ...لكن شكون الي بقا بالو مشغول من غير الي حضر ليه وهو علي....

علي : زين الدين...

زين الدين"نطق بصوت مدعدع بالنعاس وثقيييل" : الحاج..

علي"غير سمع الحاج وهو يدخل" : تبارك الله شلا مانعستي...

زين الدين"حك عينيه" : بزاف ؟

علي"ساف فساعتو" : تمنية ونص هادي ؟!

زين الدين"ضار بزربة" : وايلي ؟

علي : من الخير...الى رتاحيتي سير لدارك دوش كول شي حاجة وريح مع راسك...

زين الدين"زفر بتعب" : ولابد ليا من مشية لمحلات...

علي : اش كاين تم ؟

زين الدين : شريت شي عقار جنبنا خاصني نشوف با الحسين وصباح عندي اجتماع معاهم...

علي : ضروري ؟

زين الدين : حرفة الواليدين وورثهم وريحتهم منصيبش نفرط فيها...حرفتي اللولة الحاج...

علي : فكرتييني..هاد ليام ذكرى زواجي بالحاجة على قولة الولاد قاليك عارضين علينا لريسطو دايرين لينا حفلة هههه ايوى بغيت شي حاجة من عندك بغيتها unique والفاهم يفهم...

زين الدين"حك لحيتو كيفكر ونطق" : دير شي وقيت ودوز تلقاها عند با الحسين ولا محماد...وتهنى من ديك ناحية...

علي : بالمقابل الله يرضي عليك وياك تمتانع بغيتها من حر مالي باش تكون عندها القيمة...

زين الدين : الي بغا خاطرك الحاج حنا معاه...والله يدومها محبة بيناتكم ..."ناض جمع الوقفة لبس فيستة وتقاشرو وصباطو وخرج هو وعلي الي تاهو كان غادي نزلو كل واحد فيهم ركب فسيارتو وتيسر فحالو وداز النهار عاوتاني وجا نهار جديد الي غايحمل فطياته العديييد من الاحداث....

اليوم كان يوم الخميس نهار جديد احداث جديدة وصباح كان فيه الجو بارد ومشتي وقطرات الندى على السيارات والنوافذ الزجاجية ...ريحة اتاي بالنعناع فايحة فالدار...لبسات نفس الكسوة ديال اول مرة جات بيها لكلينيك السابق ديال الخيط بيضاء فيها حزام من وسط طاي كبيرة طويلة تال تحت لبسات تحتها ليبة كحلة ورمات عليها بوليرو سخون طويل فالگري ضفرات شعرها الاحمر جنب عاوتاني بدون مكياج خلات النمش فمنخرها لفوق شوي وحناكها الي مخليه مميز اطتفت ببارفانها الي كدير incandescence من اڤون كملات وهزات لوازمها غير شمت ريحة اتاي عرفات عصام وجد الفطور وهاهي زاهية ماحد الخدامة مستافدة من العرض ديال عصام الي يطيب ههه لكن المفاجأة كانت هي فاش دخلات ولقات شخص تزاد عليهم والي خلا ابتسامتها توساع...

فرح.: هيييييي عمي مبارك !! هههههه "مشات كتزرب تلاحت عليه عنقاتو" توحشتك بزااااف بزااف والله...

مبارك : عليها لكلب بوك تعيطي وتسولو ولا طلي"صرفقها بشوي" عن جد والديك ...

فوزي : هههههههههه

مبارك : تانتا يا الكيدار بالكيدار فحالها لا تضحكشاي ...

فرح ؛ ههههههههههههههه

فوزي : تهجريه عندلمك...

عصام"مدخل صينية" : تسال الحق من جيهتهم ياك ؟

مبارك : اوكيه..

فرح : امتا جيتي ؟!

مبارك : مع الفجر طليت عليك لقيتك باركة تشخري هههه

فرح"شافت فساعتها" : خاصني نمشي تعطلت...غاتبقا معانا ياك؟

مبارك : هاد الليلة معاكم وصباح لفجر مروح(غادي)..

فرح ؛ مزيااان نجي وندير لعمي دجاج مدغمر الي كيعجبو...

مبارك"خبطها لضهرها تا غوتت ههه" : يرضي عليك المرضية..

عصام : تسالني شي موناضة ولا اتاي دايزو الكلام...

فوزي"خبط فوق طابلة تا قفز مبارك وفرح وعصام خنزر فيه" : حق الي ليه الحق الى تسالوني ناكل ونشرب معاكم ونقتلكم بضحوكات...

عصام"رفسو برجلو": خرج خرج شي غبر غا وجهك يعطي لدينمك الحبس..مقفز عباد الله شي باس مكاين ؟ "وهءا حالهم هاد الصباح تحت جو ممطر ورائحة الشاي في الساعة السابعة ونصف صباحا...اما تحت الجو الماطر نفس الشيء لكن الفرق رائحة القهوة ...عمرات ماشين نيسبريسو الكاس كانت غاتهزو تا سبقات ايدو وهزو هو خاشي ايدو فجيب سروال الفصالة اسود وقميجة سوداء حال ليها صدايف لفوقانيين وفايدو مونطو وشكارة...شرب رشفة من الكاس وحطو ضار عند البنت مد ليها كونطاكت وعطاها مونطوه وشكارتو داتهم ليه لطوموبيل اما هو جلس تما فالمطبخ حدا المراة الي كطيب...حطات ليه فطورو حداها..اومليط وصلاد خفيفة وقهوته وبطبوط ديال القمح مع زبدة مدوبة...سما الله وبدا ياكل الي قد عليه كمل بكاسو ديال القهوة...

زين الدين"شاف فالمراة" : مي نعيمة "جبد من جيبو واحد الورقة ومدها ليها" صباح جي عندي بلا فطور باش ديري تحاليل هادو...قبل مطلعي لعندي دوزي عندهم عندهم سميتك وكلشي هما يتكلفو بيك ...والباقي من بعد نرسلك عند الاختصاصي هو يدير خدمتو..."هز صبعو بنضرات جدية وتاكيد وتهديد من فوق" منعاودش هضرتي...

نعيمة"ضحكات" : ههههه واخا كون هاني منخصرش ليك خاطرك لا طير ليك نقشة ثاني هههه

زين الدين"تنهد" : عشرة يعرفو فحالك راني بات المزيان.."وقف وباس راسها" صباحك مبروك..."خرج لبرا عطاتو البنت الكونطاكت وتيسر ركب فطوموبيلتو وزاد نيشان لكلينيك من بعد ما خذا راحة كااافية الليلة الماضية...

ليلة ماضية كانت كافية لراحة دماغو كافية لانه ياخذ قرار ويتقدم لمرحلة جديدة واش غاتكون فصالح ديالو او غاتكون ضدو لكن كيما اتاخذها فاسرع وقت احسن ليه وخا عارف شنو تبعيات هاد المرحلة لكن مادام فقلبه وعقله انه لازم يكمل بدون شعور باغي يتقاتل ويوصل لمرادو عن طيب خاطر ومحبة...الاحساس الي كيحس بيه فشكل رغم الصعوبات والمطبات الا انه احساس حلو ...بين عقلو بين عينيه ريحتها الفواحة فنيفو مابغتش تحيد...وصل المكتب ديالو من بعد ما ضرب مسافة كافية ديال الطريق ...حط المونطو ورا الكرسي...طوا كمايم قميجتو عند مرفقو ...جلس فوق الكرسي ودوز الخط لاسلام...

زين الدين : دوز ليا نمرة دابا...

اسلام : تو دسويت دكتوغ...

زين الدين"تحول ليه الخط بعد ثواني ديال رنات تطلق الخط وجاوبات البنت الي فلاكوي"

هي : واخا دكتوغ داابا...

زين الدين"رجع تكا عالكرسي هز راسو الفوق ساط الانفاس قبل ميبدا يعض فشنايفو المغطيهم زغب لحيتو الكثيفة...وعينيه الخضرين الي فيهم ميزة قدرات هي تميزهم دون الناس واخا الي قراب ليه كيعرفو هاد القضية...وحتى حنان لكن هي شعرات بيهم وشافتهم وميزاتهم...عاود صونا ليه الفيكس تگعد جاوب فالبلاصة"

نورة : دكتور البغدادي ...

زين الدين : مدام اليزيدي...

نورة : دوموزيل فرح الخيالي راها طلعات لعندك خمسة دقايق وتكون عندك الى متلفاتش ثاني ههه ...

زين الدين : C'est pas grave راد معاها البال كاين من يوصلها لعندي..."قطع معاها وتقابل مع الباب طرطق صباعو وحرك عنقو تا طرطقو من هنا وهنا قبل مينوض ..زاد حل صدفة ثالثة...وعينيه على الباب ربع ايديه وجلس فوق المكتب " خرجان العقل هو الي غايبدا معاك "هز التيليفون دخل لابليكاسيون نيشان لكاميرا المراقبة فالممر تا بانت ليه جايا شادة ضفيرة بايدها كتلعب بيها ودور وجهها هنا وهنا كتكتاشف المكان الي بهرها بديك اللبسة والضفيرة كي بانت فيها ...جاه تانيب الضمير ندم لاش عيط ليها بهاد الجمال الي بانت فعينيه حشم ينكدها عليها ههههه..عض لسانو وهو كيشوف فيها عجباتو بجهد....ونطق" : تاكل دينمها فندغة...

وفي انتظار ان تاتي خذا وقتو الكافي باش يمتع عينيه فيها وهي جايا بديك اللبيسة وحركات وجهها التعبيرية دليل على انبهارها بالجناح او الجابق الي طلعات ليه...كان ولابد عليه ياخذ هاد الخطوة وتعرف فين هي ومعامن خدامة ولابد ميهضر معاها او يواجهها ويحاول باش يقربها منو او يكسر داك الحاجز الي تبنى بينو وبينها حاجز الكره والشمتة الي شمتها وخلاها تكره شي حاجة اسميتها حب خطوبة زواج او رجل لان كل الي بغاتهم خلاوها وفقداث شي حاجة اسميتها الثقة فالرجال....وباش يرجع الثقة ويكسبها او عالاقل يخليها تصرف معاه عادي كاي شخص لازم يكسر هاد الحاجز....

فرح"تمشات مسافة فداك الممر وهي كدور هنا وهنا كتقرا فالبلاكات الي تما حتى بانت ليها الاستقبال الي نعتات ليها الطبيبة نورة وهي تمشي لقات واحد الولد.." : بونجوغ..احم عافاك عيطو ليا انا جيت من قسم لابو..

اسلام : دموزيل فرح !!

فرح : وي انا ...

اسلام"بابتسامة ولكن حدر عينيه مشافش فيها..وقف وتمشا شوي قدامها حل الباب الكبير " : تفضلي ختي من هنا غاتلقاي باب الي على ايدك ليمن تما فين دخلي...

فرح : شكرا..."دخلات فين نعت ليها بالضبط ..هزات راسها كتقرا اسم على باب المكتب(ali azziani)..الاسم طبعا مغاتعرفوش لكن لو شافت مولاه غاتعرفو طبعا تلاقاو باش يعرفو الاسماء هي مكتعرفش اسمو لكن هو عارف اسمها طبعا وعلاش الي ميعرفوش واسمها على طول فلسان زين الدين الي اصبح كيتلذذ ويتنغم فور مكيذكرو على فمو...وتعمد زين انه يتلاقاها فمكتب علي لانه لو قرات اسمو على الباب غادي تعرفو وتقدر ترفض او تصرف اي تصرف..دقات الباب تا سمعت تحنحينة وهي تحل البواني ودخلت اول ما طاح عينيها عليه هو اضاءة المكتب الي كانت مريييحة بزاف العين جو هاااادئ ريحة نقا عالجهد والتعقيم ..المكتب خاوي فوطويات جلد بيض كبار قدام المكتب وطابلة زاج قدامهم ...جاها نوع من الخوف كون المكان خاوي وسكااااااات...يلاه غادور تقلب بعينيها تا تسد الباب من وراها قفزت.."

فرح : احم .."عينيها كيدورو حتى قشعات كرسي المكتب كيتحرك يتحرك قبل ماتهضر كان ضار بالكامل وتقابل معاها نيشااان هو بشحمه ولحمه يجاذبيتو وهيتو بنضراتو الجدية الصارمة الي اول مرة غاتشوفها بهاد طريقة..مرفقو فجنب الكرسي ومرفقو لاخور فجنب لاخور شابك قبضات ايديه..لابس كحل فكحل كلاس رجل فوق رجل ..عينيه عليها الي غير استوعبات وشافتو فحال تقولي ضربها ضو لعينين بقات مخرجاهم ومفيكسياهم عليه كانها ممثيقاش واحد اللحضة وهي فحالة صدمة حتى تنهدات وحدرات راسها بغات تبكي ههه" : يااااااربي نكون كنحلم ياااااربي ...

زين الدين : كاااع ؟

فرح : وااااااربي اش درت فحياتي ياربي اااااربي مالي فهاد العذاب اش درت غا قولو ليا اش درت يا سيدي ياربي..

زين الدين"كيسمع ليها عارف ومتاكد وموجد راسو لكلشييي"

فرح"دارت ايديها على وجهها مغطياه..هنا لاحظ حتى ايدياتها مبيطبطين..تاهما ما كرهش ياكلهم(لعنداكم هادي غا انا فيا جوع 0.0).." : عااااافاك ما قوليا اش كدير هنا حيث هاد سؤال عييييت وانا نسول فيه وحشمت باقي نسولك غا قوليا اش بغيتي عندي واش بغيتي مافهمتش ماااااافهمتش...

زين الدين : رتاحي وتفهمي...

فرح : مابغيتش مابغيتش نرتاح بغيت نفهم اااش بغيتي واش تابعني تا فين كنخدم ؟

زين الدين"بثقااالة" : رتااااحيييي وتفهمي وميكون غير خاطرك..

فرح"زفرات بحنق"

زين الدين"باقي فبلاصتو كيما ضار بقا" : فرح لمؤة وحدة سمعي بلا ديك بلابلا عارف اش كاين عارف الحق معاك ماتكثريش لا بغيتي تعؤفي اش كاين رتاحي وسمعي ...

فرح"حيدات ايديها بزعاف وشافت فيه " : واااخا واااخا الى كان يخليك تعطيني تيساع هاني هاااني"جلسات فوق الفوطوي بجهد"

زين الدين"دور وجهو لهيه لحضة كيكحك لحيتو بصبعو ويفكر...قبل ميهضر ويوجه كلامو ضار لقاها كتحرك رجليها بعصبية..." : حنا ف كلينيك لا انا لا نتي وهنا انا بصفتي Chirurgien maxillo-faciale et plastique de la face

فرح"مخرجة عينيها" : شنوو يعني خدام هنا ؟

زين الدين"هز حاجبو وحطو" : لا قبلتي علينا...

فرح : ماقابلاش ماقابلاش انا وياك ميمكنش نتلاقاو ولا نكونو فبلاصة وحدة ميمكنش ماعرفتش انا فاش كتفكر واش هادشي عندك عادي ؟ مغاديش نعاود نقوليك غاتجبد ليا صداع حيث بصح غايتحبد صداع انا ف غنى عليه منقدرش خويا واعر صعيب راكم تلاقيتو اخر مرة سلك فيها الله...

زين الدين : معنديش مشكيل نتلاقا بيه ثاني..

فرح"حطات ايدها على جبهتها كتحك فيها بتوثر لاحض ايدها كترعد"

زين الدين"غمض عينيه وحلهم" : ماعليش تهدني الحاجة الي تجبد ليك صداع نبعدو منها الحاجة الي ضرك نحيدوها من جدر...

فرح"جاها ضحك." : ههههههه ايه...الى قلتها ليك ديرها ؟

زين الدين : المعنى ؟

فرح : الى قلت ليك المشكيل وشنو كيضرني تحيدو ؟

زين الدين"حرك راسو ونطق بثقوووولية عرفها شنو عنات" : الله اودي الي جدتي عليه نديروه "قبل متهضر هز صبعو" فوتيني غير انا والباقي تفششي عليه الالة ....

وعلى قول المثل انا ندگ وندادي وهو يگلع فوتادي هههه عضات حناكها من لداخل وجهها ولا مكيتفسرش تخلطت ليها البكية مع الفقصة مكرهاتش تنوض تشتف عليه وليني الغالب الله قدام داك الطول والعرض والضخامة ماتصيبش واخا غليضة الغالب الله تا باش تنقز تنتفو مكاين كي دير عهههه...

فرح : ملي عارف... علاش نفوتك نتا ؟ اه نتا الي ضريتيني نتا الي مشكيل قدامي...شوف باش نهضر معاك بجدية انا منقدرش نبقا نتلاقا بيك...مانقدرش حتى نهضر معاك عادي...مابغيتش نجبد المشاكيل ويعرف عصام ويوقعو مشاكيل كبيرة خويا انا الي عارفاه خايب بزاااف الى عرف راني خدامة معاك فنفس البلاصة مغاديش يخليني وانا مغانخليش راسي فيها قبل ميعرف هو اصلا ...اي بلاصة غاتجمعني بيييييك مابغيتهااااش"هاد الجملة الاخيرة ضربات ليه فخاطرو فحال سهم الضو خلاتو ينزف من لداخل..كرز ايدو بزز باش يتحكم فاعصابو وميديرش شي رد فعل الي يضرها ولاول مرة كيدير هاد القضية انه يتحكم فراسو على جال شي حد..."

زين الدين : ياك ؟

فرح : ااه...خدام هنا ؟

زين الدين : رسمي وبصفة دائمة بحول الله...

فرح : الله يسر الامور ليك..

زين الدين : وليك كثر مني ...

فرح : هذا ماعندك ؟!

زين الدين : حزمتي عامرة بشلا وشوية منين نبدا والحيط كاين كيفاش يريب باش نبدا ؟

فرح : بعد عليه وبدل العتبة حسن ليك...ماتبقاش فنفس البلاصة وتحك وتحفر را كضر غير فراسك اما لاخرين شربو وذاقو ودوزو ونفروووو"عاوتاني الكلمة الاخيرة حكاات ليه على جرح سهم الكلمة اللولة"

زين الدين : نصبر ماعندي من غير هاد الحاجة...

فرح "ضربات فخادها بشوي معلنة على وقوفها" : مغاديش نضيع الحجرة..ماعرفتش انا علاش هادشي كامل لاش باغي تلاقا بيا تخدم فين كنخدم تشوفني تشوف القراب ليا تصاحب مع خويا سيمو...فينما ضرت نلقاك مغاديش نقدر ونتا عارف وبفمك قلتي بيناتنا حايط !! انا غانزيدك حايط اخور...حيث مابغيتش صداع خوتي خايبين واعرين ونتا كذلك مابغيتش توقع شي كارثة ونتا لاصق توقع الكارثة...

زين الدين"حك شنايفو وهو كيسمع لكل جملة قالتها كيحطها فراسو ويديرها بين عينيه ..هز صبعو ودورو زوج دورات" : كلشي الي هضرتي فيه مغاديش نكذبك فيه عندك فيه كامل الحق ...

فرح. : الي بغيت نفهم حاجة وحدة هي نتا بفمك قلتي نتفارقو ؟! نتا بفمك قلتي مصالحش نكملو وعطيتي سبب يااك "عينيها فيه"

زين الدين : ولو يرجع زمان وعاودت نفس المشكيل نعاود نفس الحاجة ابنت الناس والاصل"حرك صبعو" عقلتي على هاد جوج كلمات ؟

فرح : بنت الناس والاصل بيك وبلا بيك ...

زين الدين : نهار جيت لقيتك بنت الناس والاصل بلا بيا متستاهلش ندخلها فحسابات الفسايدية بنت الناس والاصل تكون بشانها ومرشانها وقيمتها من مقامها العالي...كان فيا نكمل ابنت ناس ونديرو الحلال ونهار تعرفي ويوقع الفاس فراس ؟ تسماي تبززتي عليا بحسابات بيني وبين ولاد لحرام ؟"خرج عينيه الخضرين"

فرح"الصمت"

زين الدين"حط ايدو على صدرو" : كنت معاك ولد لحرام منكرش.."سرح ايديه" هادشي الي عطا الله باش غادي نسلك الجرة ونعطي تبريرات ؟ نبقا معاك تال فجر النهار تاني مايوفيش حقك تاحاجة ماتشفع...هادشي علاش البدية من جديد حسن لينا...

فرح : مابغيتش نبدا ومابغيتش نسمع لوالو والي عطا الله عطاه كل شد طريقو ...مادامك خدام هنا انا غادي نديمسيوني (تقدم استقالتها) مغاديش نكمل هنا مابغيتش نتلاقا بيك ومابغيتش شي حاجة الي تخلي صداع ينوض ولو تكون على حساب مستقبلي...

زين الدين : Vous avez tout le droit ! Si vous souhaitez présenter votre démission, OK! Pas de problème même si vous avez un CD( contrat de travail ) "من حقك بغيتي تقدمي استقالتك مرحبا "عوج فمو" مكاينش الي يمنعك... بالرغم من انه عندك معاهم عقد عمل "...

فرح : هادشي خاص بيا معاهم..."زفرات ثاني بنفاذ صبر" كنضن وضحتي وهضرتي وسمعتي مني نتمنى متبقاش تخرج ليا فطريقي...والى حاس بذنب من شنو درتي ليا انا مسامحة ليك غير بعد مني ومن عائلتي عااااافاك الله يرحم ليك الواليدين...

الله يرحم ليك الواليدين الله يرحم ليك الواليدين الله يرحم ليك الواليدين...بقات هاد الجملة كتسمع فوذنيه وتعاود وتعاود تا غمض عينيه فهاد اللحضة فاش كتذكر ليك اعز حاجة ميمكنش متقولش لا ولكن جا بين انه خاص اي طريقة ميضيعهاش...ويتاجه للكارط الموالي...

زين الدين : اللهم اميين..."تگعد وتقاد فالجلسة هاز ستيلو" دابا المشكيل باش تخدمي منكونش حداك ومعاك ؟ مزيان...ماعليش تاهذا نضر ماقلتي عيب..."تنهد محاول يخرج الانفاس الساخنة من بركان الغضب الي فلداخل ديالو مكرهش يسد عليها هو كاع يبقى يشوفها صباح وعيشة ضهر عصر مغرب فاي وقت متاح ليه...لكن الضروف والواقع اقوى..."فحياتنا المهنية ابنت الناس كنبعدو المشاكل الشخصية وكنتصرفو بشكل بروفيسيونيل ..."هز ايدو موقفها قبل متهضر" لو تحطيت بلاصتك ابنت الاصل وشان نكمل فخدمتي ...انا فمكان وطاج ديالي ونتي فمكان وطاج فين خدامة...الوقت خيابت وصعابت ضومين ديالك ماشي جي ولقا فيه خدمة...نهار نتحط بلاصتك نشد فخدمتي بايدي وسناني وخا يكون الشاف ديالي داير معايا فعايل ولاد لحرام...

فرح : شنو بغيتي تقصد...

زين الدين"تلاح عالكرسي من جديد وشير بصبعو ليه" : حسبيني ولد لحرام من فعايلي الالة"لاح ستيلو بجهد"...

كي حلات عينيها وفطرات غسلات الماعن وسيقات دار جمعاتها ودات الخبز لفران وتاكدات ان فاطنة ماخصها والو ...

صفاء : ماااي خاصك شي حاجة ؟

فاطنة : لا فين دالحة ؟

صفاء : بغيت نمشي عند سيمو نشوفو ونجي..

فاطنة : ايييه الى غادية صبري نعطيك شي عشوب بغاتهم نجية ديهم ليها...ولا تعطليش الغذا يصيبك هن..

صفاء : واخا اري اش بغيتي نعطيها...

مشات لكوزينة جبدات واحد القرعة فيها شي عشوب غسلتهم نشرتهم ونشفو نقاتهم وطحنتهم ودارتهم فيها مداتها ليها وخرجات نيشان غاديا لدار عند سيمو حتى بان ليها عصام وقف بالموطور هاز فيه زوج خناشي دسيما وواحد الميكا ...

عصام"هز عينيه بانت ليه غاديا مدورة وجهها واستغرب لانه للمرة ثانية الاولى مسلماتش عليه حدها قالت ليه لباس بدون متشوف فيه.." : صفاااء...

صفاء"تنهدت ووقفت وهي دور نصف دورة مكمشة فيه حجبانها" : نعااام ...

عصام : اجي لهنا نتي...

صفاء"ضارت وقلبها كيضرب كتحاول وواخذة قرار وعاهد انها متبقاش تعمر بيه راسها واول مرحلة تبدا بيها هي تحاول تفاداه وتحاول متلاقاش بيه حتى تنقص من شوقها ليه ويبدا ينقص اي احساس تدريجيا ومع المدة والولف تعود حتى تنساه بمرة لكن شكون خلاك..." : وي هاني ...

عصام : مالك ؟

صفاء : مماليش علاش ؟

عصام"رفع حاجبو" : مممم زعما ؟

صفاء : مافهمتش ؟

عصام : مخاصمين ولا مقاتلين عالورث...

صفاء"تحمست" : اوديييي شلاااا...

عصام"خرج عينيه" : ياك اختي...

صفاء"عاد داركت شنو قالت ههه" : الا يا اتا را غير تنبسط اخووويا...م ما ذاك صافي والو غير مبرزطة وصافي بغيتيني فشي حاجة ؟!

عصام"رافع حاجبو ومد ليها الميكا" : شدي شدي هادي وطلعي معايا الفوق...

صفاء"خرجات عينيها" : الاش اخويي ؟ صلي عالنبي اش نديرو الفوق ؟؟

عصام : نعطي لدينمك بعض سلخات ديال العصا يلاه يتگاد ليك داك المخ الي عندك فيه الزبدة..."جهد صوته تا قفزت" طلعي معايا الخرا كثر فيك شلا ...

صفاء : اهيا متغوتش عليا "هزات صبعها" اطونسيون ترفع عليا صوتك...

عصام"خنزر فيها بديك النضرة فاش كانت هي وفرح فصغرهم فاش كيزبلوها خايبة... كيديرها من كيبغي يعطيهم عصية الكلاب " : عاودي اش گمگمتي عليا تم ؟!

صفاء : عاود صلي عالنبي وقرا المعوذتين ودعاء واية الكرسي الى كنتي حافضهم والى تنساو عليك اجي نسمعوهم تانا نسيتهم فهاد اللحضة ولا غني غير طلع البدر علينا را تنفس لاهيلا..تا واش تدي على هبيلة !؟ شوف المقادير ديالك ومقادير ديالي ؟ انا كيكة نص بيضة كثيرة فيا غالخميرة كنفيض غافالخوا الخاوي ...

عصام"بقا كيشوف فيها" : اش كتخربقي عليا تم ؟

صفاء : منين نطلع ؟

عصام : سيري عند با سالم مول صاكا وطلعي من عندو را تلحگي عليا"خنزر فيها"

صفاء : وا غا جمع عينيك را نديرها بصح لاش تتخنزر فيا لا نتا لا داك زينهم"كمشت فمها وسنانها صرطتهم هما وفمها وصرطت راسها بغات تهرب بغات تقلب على فاس وبالة تحفر وتدفن راسها اش دير...جاب الله مافرزش الكلمهم لاخرة اما كان غايفهم زين الدين يطلعها عند المعلمية يرميو عليها الضالة تم هههه"

عصام : غاطلعي ولا بناقص من شي خرا...

مزال مكملش هضرتو شدات من عندو الميكا وطارت كتحسب فالدروج تا طلعات لعند المعلمية حطاتها ليه ونزلات لقاتو جاي هاز خنشة السيما فوق كتافو مطلعها...شاف فيها وشافت فيه...

صفاء : ياكما نهز خنشة سيما الي بقات لتحت تاهي ؟

عصام : وليتي معايا كلمة مني كلمة منك ؟ گرينك انا ؟

صفاء : دابا سولناك رديتينا براهش ؟

عصام : توحشتي العصا ؟

صفاء : وغا هكاك باغي تعطيها ليا صحة ماحشوماش عليك ؟

عصام : شوفي فيا عيني فعينيك ...

صفاء : معنديش العينين "غمضت عينيها متجنبة تشوف فيه ولكن شكون عقل عليها ولا رحمها هههه"

عصام : سيري سيري وكان على نقشة نرمي على دينمك الضالة ...هبطي فين غادية هبطي ..."طلع كيبرگم مخليها كاتشوف عاد استوعبت انه قاليها عينيك مغمضين من عند الله ههههه "

هبطات مغمضة عينيها تلاقات بفوزي جاي تاهو جايب السخرة لقاها مكمشة عينيها ...

فوزي : مالك ؟!

صفاء : ماليش

فوزي"طلعها وهبطها" : مالك مكمشة عينيك ؟!

صفاء : بغيت سوقك ؟

فوزي : وخا غا حليهم مكاين تا فرق سوى حليتيهم ولا سديتيهم مغمضين من عند الله ..."عاود طلعها وهبطها وطلع تاهو" تررر ههههه الله يستر...

صفاء"حلات فمها" : اااا ؟ "نزلات كتافها وتمشات باسف تادخلات لدار سيمو سلمات على نجية لقات سيمو متكي فالمراح تلاحت حداه تا قفز"

سيمو"بصوت مبحشش" : خراا مالنا ؟!

صفاء"ضارت شافت فيه وقالت" : ااااه يا دنيا ليه رشيتي على قلبي كولونيا ..اااه ليه طفيتي شمعتي...

سيمو"كيرمش فيها"

صفاء : ماتحكرش تانتا..ماعلينا امتا تموت ؟ "ماحسات حتى ركلها برجلو جات فلارض مصلية عالنبي هي نيت" امصلي عليك ارسول الله...

بقات واقفة كتشوف فيه وكتسمع فالهضرة الي قاليها ...انها تصرف فالخدمة بعملية تنسى اي خلاف في حضور الخدمة واخا بيناتهم خلاف الخدمة معندهاش علاقة بهادشي...

فرح : بغيتي تقنعني نخدم انا وياك فنفس البلاصة فحال مابيناتنا والو ؟ ههههه

زين الدين"عقد حجبانو" : علاش شنو ؟ بيناتنا شي حاجة ؟

فرح : اكيد لا ...

زين الدين : et alors ? "كمش عينيه كيتحرك بالكرسي"

فرح : اذن ماشي شغلك فيا نخرج من هنا او نبقى تكون خدمتي بروفيسيونيل ولا ندخل العاطفة او المشاكيل هادشي راجع ليا مادام كاين هنا نتا ومادام غانتلاقا بيك هنا اولد ناس غادي نحيد كلمة "بروفيسيونيل" من قاموسي هنا وغانخلي ليك الكلينيك كلو ربح بيه اي حاجة تخليني نقلق خويا الي ضرب عليا تمارة من صغري والي رباني وتعصبو مانبغيهاش ونتا اولد ناس نهار اللول كل شد طريقو الله يعاونك...

زين الدين : ماكدة ؟

فرح"تحنات شوي وسرحات ايديها وبابتسامة غيض" : باينة لعما من هضرتي دكتور البغدادي...

زين الدين"عض شنايفو بعصبية قبل ميخبط المكتب بايدو تا قفزت" : الله اودي الله اودي "وقف وخشا ايديه فجيابو وتوجه لعندها مقابل معاها...تحنى لعندها كامل عاطي وذنيه وايديه فجيابو" عاودي شنو بغيتي ديري ؟!

فرح : كيف سمعتي ؟ تت ففففف انا اش باقي موقفني مافهمتش.."ضارت تمات غاديا بغات تحل الباب لقاتو مسدود" اويلي علاش سديتيه ؟ واش من نيتك ؟!

زين الدين : واقلة سولتك ؟!"خنزر"

فرح : مااااااااشي شغلك نقدم استقالة ولا لا هذا شغلي وبيني وبين صحاب لاكلينيك غادي نمشي عند موسيو البشير ونعطيها ليه وابتداء من غذا البلاصة الي غاتجمعني بيك غانخليها ليك ربح بيها ...واااااااكوااااك حل البااااااااب...

زين الدين : مع صحاب لاكلينيك ياك ؟

فرح"خرجات فيه عينيها " : ااااااه...

زين الدين"حك لحيتو بسنانو" : علاش لا علاش لا...تگلعي من تم تركني هنا نعطيك شنو بغيتي وطيري فين بغيتي...

فرح : اش غاتعطيني ؟؛! واش مكتفهمش ؟ مابغيتش نبقى هنا حل ليا هاد زمر اويلي "غوتات بجهد" وااااااا حل ليا زمر مابغيتش نبقى هنا معاااااااك"تا بح صوتها"

زين الدين"غوت كثر منها لااا غير جهد صوته قفزات من بلاصتها تا غمضات عينيها" : تگاااااااااالعي تركني تما نعطيك اش بغيتي هضرتي منعاااااااااودش عدو ربهااا فهاد النهار...يلااااااااااه..."عينيه خرجو فيها بواحد نضرة تا صرطات ريقها"

فرح : غادي تحاسب على هادشي عقل عقل...

زين الدين : بادي فيا الحساب من زمان ابنت الناس ...طيري فين گلت ليك بلا خرا عليا...

فرح"جمعات فمها بغيض وربعات ايديها" : مابغيتش خليني غير هنا نشوف اش كاين...

زين الدين"كان غايجمعها معاها ينسا واش بنت الي قدامو وصاحبو ولا شي راجل ...بقا كيطلع فيها ويهبط تا غمض عينيها كيكالمي فراسو بزز..ضار جيهة المكتب وهز واحد الملف فيه اسم المصحة ورماه ليها فوق طابلة" : تركني لارض قرايه وديك ساعة سيري ديمسيوني ولا لوحي راسك من سطح...

فرح"حدرات عينيها لملف وهي تهزو حلاتو وقرات العقد الي سنات عليه شافت فيه" : هادي CDI الي سنيت ؟

زين الدين : شنو بان ليك فيها ؟ شنو كتعرفي عليها ؟

فرح : غادي ناخذها ونمشي عند موس"قاطعها"

زين الدين : Contrat de travail à durée indéterminée

(عقد عمل غير محدد المدة) normalement المدة "هز صباعو بستة كيوريها" ستة من شهور الله قابلة لتجديد ... بغيتي تديميسيوناي فوسط 6 mois ممنوع فحالة وحدة مسموح ليك ابنت الناس الى درتي تعويض لصحاب لاكلينيك...

فرح : هادشي عارفاه ..

زين الدين : شحال عندك فصالير ؟! 3500dh مبقاش بزاف و تكملي سيمانة...ستة شهور ضربيها ف صالير شهر الي دايرين معاك فيك ميحطو تيسري مافيك ميحطو كملي مدة ديالك والله يعاونك..."هز ايديه" سمحي ليا جهد فوق جهدي ...

فرح : يعني اش ؟ منقدرش نخرج من هنا ؟ "دلات شنايفها" علاش كدير ليا هاكا حرام عليك "عينيها غرغرو خصوصا سمعات المبلغ يتضرب فستة شهور"

زين الدين : حسبيها مدة تدريب واستافدي من الخلصة...

فرح.: مابغيتش مابغيتش بغيت نمشي حرام عليك ..الى كتعرف مول الكلينيك خليني نهضر معاه يسمح ليا...عافاك الى عندي معزة عندك غييير شوية خليني نشوفو ونطلبو الله يخليك اهى اهى...

زين الدين"هرساتو هنا فهاد اللحضة قلبو نزف من جيهتها عزات عليه بجهد ندم لاش قاليها هاكا وخا كانت هي الورقة الاخيرة الي بقات ليه" : علاش هادشي كامل ؟! لهاد درجة من جيهتي ؟!

فرح : مابغيتش صداع مابغيتش بغيت غير نتهنى ومابغيتش نقلق خويا وصافي هذا الحد انا وياك حتى بالخدمة منتلاقاوش اهى اهى...

زين الدين : بغيتي تشوفي مول الشي ؟!

فرح"حركات راسها ومسحات دموعها بطرف كمايمها..ضراتو فخاطرو بهاد الحركة"

زين الدين "قرب ليها" : BG c'est l'abréviation ديال baghdadi ...

فرح"هزات فيه عينيها بشهقة" : كيفاش ؟! هو نتا ؟

زين الدين "هز ايديه وخبطهم" : حاجة الي تجبد ليك المشاكيل نحيدها ليك ...

فرح"غمضات عينيها ودموعها نزلو كيجريييو وراسها فلارض" : نتا هو الي ضريتيني ونتا هو المشاكيل...

زين الدين"دور وجهو لهيه جملتها قضات عليه..تنهد بحسرة عليها..قبل مينطق شاف فيها شحااال" : خليك ابنت الناس فخدمتك مرتاحة كملي المدة الي عندك "هز صبعو" عاطيك العاهد من هاد النهار وجهي ماتشوفيه...."هز ايديه باستسلام مجهد صوته الباح" الالة الحاجة الي ضرك نحيد ملة مها من جدر....

يتبع...