محتوى القصة
صعييييب انك مديرش اي رد فعل خصوصا فحال زين الدين شخص شرقي دمو حااامي ومتشدد فحالو...مغايصبرش ولااابد ميدير رد فعل لمهدي فحال هادي خصوصا انه استفزو بهاد الهضرة القليلة الادب...حتى خرج ريان عينيه من الصدمة فاش سمع شنو تلفض بيه مهدي فحق ضحى...
مهدي"غوت بحر ما جاد بيه صوته فهاد اللحضة من حر الالم الي حس بيه فحال ذبحة ديال الضو ف معصم ايدو نتيجة الكسر الي تسبب فيه زين الدين" : اععععععععععععععععع...
زين الدين"ماهضرش بمجرد ما سمع شنو قال تصمك وتبكم فهاد اللحضة ولا كيبان ليه غير مهدي يبرد فيه الحر دورو بجهد كان مهدي حاس بالفشل...شنق عليه شنقة الغدايد وضربو براس تا طاح لارض..."
ريان"دار ايديه على راسو كيبان ليه زين الدين جهل عليه فمكان عليه الا يتدخل باش يبعدو عليه .." : زين الدين زين الديييييييين لا لا ...تهدن عافاك زين الدين"شافو كيقبس فيه ولاخور منخرو دايز بالد.م باش يدافع على راسو عندو غير ايد اما لاخرا طرطرقها ليه...مشا كيزرب لعندو كيجر فيه ووالو." واااا زين الدين عافاك ماديرش شي حاجة توصلك فالي مابغينا زين الدييين"غوت عليه باش يسمعو مكاين الي حس بيه تا بانو ليه شي عساسة جايين لعندو باش يشوفو اش كاين وهو يغوت عليهم" دغياااا حيدوه عليه...دغيااا اصحبي...
مشاو ليه بجوج وتزادهم ريان بزز باش جرو زين الدين من عليه تا تحماو عليه هما بثلاثة...
زين الدين"جناوح مناخرو كيفرفرو فحال شي ثور هايج فهاد اللحضة ...كايبغي يفلت منهم كيكبلوه ولكن را واحد من هنا ولاخور من لهيه عاد ريان قدامو شادو وخايف لا يغفلو وينطحو تاهو ههههن"
ريان"شد لزين الدين فكتافو وكيشوف فيه فعينيه الي كيشوفو جيهة مهدي تنشر تما" : ششش زين الدين خويا تهدن كلشي غايتحل كووولشي غايتحل ماديرش شي حاجة تصدق مضيعاك على والو...الي دار شي حاجة غاياخذ عقوبتها..تهدن اصحبي غاتجيبها غير فصحتك وشكون مسوق ليك ؟؟
هاد جملة شكون مسوق ليك هي الي خلاتو يفيق من الجهلة الي جهل ويمشي ليه عقلو مباشرة لضحى اه لضحى هي الشخص الي عطاوها كاملين ثقتهم وخصوصا هو لكن ماتسوقاتش ليه وهي الي شمتاتو هذا اذا جينا نشوفو هي الي مشات وراء رغباتها فالحرية هي الي بغات تعيش الحرية بمفهوم غالط جدا...ماحس براسو حتى تهز تا تهز وبعدهم عليه بجهد تا كانو غايتنشرو تاهما ولاو كيشدو فالخوا لا ييطيحو...وهو يدور جيهة طريق سيارة ...اما ريان شاف فدوك العساسة ..
ريان"وهو غادي تابعو" : عيطو ليه لومبيلونص وعلموه الى فاق الي فجهدو يديرو يمشي يجري على راسو فالمحاكيم تما نتشاوفو..."ضار مشا كيزرب لا يصظق مخليه زين الدين تا مشا كيجري سبقو يلاه غايحل الباب وهو يشدو تا خنزر فيه زين الدين بواحد التخنزيرة تقتل" غا خليني انا نسوگ عافاك ودير الي بغيتي...
زين الدين"كيهضر مغزز سنانو" : حيييددد من خنشوشي لا ندوز فخليقة مك تانتا...حاااايد ..
ريان"والو واش بغا يحيد عارفو مريض فهاد الحالة ممكن يطيح ليه سكر او يطلع...وتشجع واخا عارفو يقدر يدوز فيه تاهو" : وتقووول غا قتلني ومنخليكش تسوگ...انا نديك فينما بغيتي...
زين الدين"هز ايدو تا هزها وعطاها ليه بكروشي لحنك بالغدايد وضار جيهة الكرسي لاخور" : لداااااااااار داااابا....
ريان"معرف يشد حنكو الي خلاه كيوزوز بحر ضربة ولا يسمع ليه فلاخر سمح فحنكو وركب بزربة ديمارا الطوموبيل وكسيرا تاتحكو روايد فلارض مخلين الحموم..."
طول الطريق وهو ساكت عينيه كيشوفو القدام فحال القرطاس اما ريان بغا يجبد غير تيليفون يعلم مراد يعيط لتوبا تهز ضحى وتديها لشي قنت مالقا كيف يدير خافو يصوط فيه تاهو...ماتهنى تا سمعو قاليه وقف هنا ...طلق سينيال وخفف سرعة تا علم انه غايوقف عاد ركن جنب الطريق ونزل زين الدين من سيارة هاز باكية الكارو ومشا بعد لهيييييه ووقف...
ريان"فهاد اللحضة هز تيليفون بالدعقة تلفو عليه بلاصة النوامر تلف ..قلب على نمرة مراد طاح فمراد كيعرفو فالمحكمة عاود دوز لمراد اخور ماطاح فمراد الي باغي تا بغا يسخف...بقا شحال كيصوني عاد باش جاوبو" : وااا الخراااا فينك الحبس...
مراد : نعل اصل مك اش بغيتي ؟!
ريان : فينك نتا ياكما فالخدمة ؟!
مراد : عاد خرجت وغادي لدار...
ريان : اويلي على عاد خرجتي...وطير ينعل جد بوك الكلب طيييييير لدار ولا الى تعطلتي علم عمتك تهز بنتها ويخرجو من دار انا متاااااايب الله يرحم بيها الواليدين...
مراد ؛ ياك شي باس مكاين...
ريان"بان ليه زين الدين لاح الكارو كيعسف عليه" : ماكاينش وقت للتفسير دابا قوليها دابا تخرج ومتبانش را جاي لضحى اليوم يقتلها لا بغيتي عتق لا لقيتي ماتعتق را مشات ليا نمرة معنديش..."يلاه غايجاوب مراد قطع عليه ولاح تيليفون فجيبو غير ركب شير ليه براسو باش يتحرك وهو يكسيري وطالب سلامة ومتمني يدخل مايلقاهاش لانه فهاد اللحضة كتبان ليه غير هي..."
مسافة الطريق حتى وصل لعين الدياب وضار على دورة ديال الفيلا دخل مخلاهش تايبلاصي يلاه ناقص السرعة كيوقف فسيارة حل باب طوموبيل خلاها كتغوت من لداخل ونزل كيزرب فخطوايه غا دخل وعيط عليها ...
زين الدين : ضحااااااااااااااااااااااااا....
وصلات ل كلينيك وعقلها مرفوع فكلام خوها الي خلا كاع البيبان يتسدو فوجهها بخصوصا انهم يرجعو يسامحو زين الدين...طلعات لخدمتها كتخدم من فوق خاطرها بزز باش كتدوز ديك الخدمة ومحضرة عقلها وخا النص غايب مع خوتها خصوصا فوزي...يمكن هضرة فوزي صحيحة اي واحد يشوفك وسط حريق غايدخل يعتقك لكن الاحساس الي وصلها فلحضة فاش حضنها زين الدين وحاما عليها انها ماتقيصهاش نبشة من العافية ...حقها الي جاب ليها فاش كانت حنان...هضرتو عليها باحترام غير بمجرد مكتوقف قدامو كتحس بقلبها عند فمها من التوثر والخجل...فاش كيشوف فيها فاش كيهدن راسو باش ميخلعاش ...شي احاسيس الى كانو بصح من داك الشخص را كتوصلنا بالي حقيقية ..الحب الامان...واخا يعطيوه مية عذر وعذر مغاينفيش شنو كتحس فرح اتجاه زين الدين...للحضة فاش قاليها فوزي ديك الهضرة حسات بخنجر داز عليها حسات بالخلعة انها ممكن تفقد زين الدين وانهم عمرهم ميتفاهمو معاه وميتجمعو...هنا ادركت انها بصح واقعة فداك الشعور الي تكون فيها ملي عرفاتو مع مرور الايام قبل ميصارحها بالحقيقة الي كانت سبب الفراق...هنا ادركت انه بصح باغيها. وباغي يبدا معاها صفحة جديدة بدون كذب ...يعني شاريها وباغيها بصح ملي وقف قدام خوتها وطالب ومزال كيطلب السماح وتفاهم بدون ميستسلم...هادشي كامل كيدوز فعقلها وهي جالسة قدام طابلة وعشاها قدامها الي مكلات منو والو ...الشهية الي كانت ديما مفتوحة لفرح حتى فعز حزنها هاهي الان قدامها بدون ماتمد فيها ايديها...حتى وقفات عليها واحد الفرملية معاها فالمختبر...
دنيا. : حبيبة وخا نجلس حداك...
فرح"هزات فيها عينيها وهي تحرك راسها" : ايه خوذي راحتك..."تبسمات ليها البنت وهي تجلس لاحضات فرح انها مسكينة جايبة معاها روز وطون وحدو"
دنيا : ههههه هادشي علاش قديت مكاينيش دارنا ومعرفت مندير"بخجل"
فرح"تبسمات وخا فوق الخاطر وهي تحدر عينيها لداك طاكوس الي جايبة وفريت وهي تكحزو ليها" : احم ..غير خودي هذا ديالي جيت من دار معشية شبعانة غادي غير يبقى...
دنيا : اويييلي احبيبة لا كولي عشاك كاع الى جعت غادي ناخذ من عند مي تاجة وخا تسلخني ههههه
فرح : هههه لا لا تفرقي عليها هي مضاربة غير مع وجهها"كحزات ليها" كولي والله تاتاكليه غادي غير يبقى والله فحال انا فحال نتي مرة جايا الى جبتي شي حاجة ذوقيني معاك...
دنيا: الالة حلفتي منحنتكش لهلا يخطيك...."ردات ليها فرح الابتسامة وهي توقف مستاذنة منها...فطريقها جبدات تيليفونها من جيبها...دخلات لواتساب لقات عصام مخلي ليها ميساج جاوباتو ديك ساعة باش ميتشطنش عليها ودازت لعند زين الدين كتبغي تكتب وترجع تا كتكتب وتعاود ترجع تمسح تا فالاخير كتبات ليه رسالة.."
فرح : زين الدين الى كنتي مسالي خاصني نهضر معاك فشي حاجة..."رسلاتو طلعات ليها شرطة وحدة وقبل فاش شعلات تيليفون لقاتو مصوني ليها مع الوقيتة الي دخلات فيها لخدمة...
كيف وقف ريان السيارة ونزل كيجري تال عندو وفلداخل ديالو متمني يكون مراد وصل الرسالة ومتكونش مينكرش انها دارتها خااااايبة وبزاف لكن بقات فيه بجهد انها ضيعات راسها بهاد الطريقة ويمكن تجر وراها ناس منهم زين الدين الي كان غايقتل هذاك ويضيع راسو تاهو ....كيعيط ويعاود وتاحد مجاوبو فهاد اللحضة دخل ريان كيلهت حيث جاي يجري تابعو تاهو مسكين خدام معاه وخايف لا يوقع ليه شي حاجة فصحتو مع هاد الناس وكحل الراس الي مكيرحمش ...
زين الدين"دخل كيقلب بجهالة عليها والو مكاينش الحس...طلع الفوق كيجري فرع الباب ديال بيتها والو ونزل كيجري ويغوت بحر جهدو ويدور هنا وهنا كي التالف الجاهل الي عقلو بغا يخرج كل مكيتفكر كلام المهدي الي نزل عليه فحال سم قسم ليه الضهر فهاد اللحضة حس بواحد شمتة من جيهتها ما فسوقها ما يتعاود..."
ريان : يمكن مكاين حد ازين الدين ..
زين الدين"دار صباعو فنواضرو كيضرب فيهم" : فييييييييييييييييييييييين هيااااااااااا....."كااع دوك البيوت دخل ليهم جردة والو كلشي مالقاش ليهم الحس...فهاد اللحضة واقف ريان داير ايدو على جبهتو تالف حتى بان ليه مراد داخل كيجري يسول اش واقع..."
مراد : ياك لباس"بان ليه زين الدين جاي قاصدو منير...تا شنق عليه بحر جهدو" زز زين الدين ؟! ...
زين الدين"عينيه حمررريييين" : فين بنت زا*** فيييييييين ؟؟
مراد : ش شكون بعدا ماعرفتش علامن كتهضر"مجا فين يكمل تاهو جمعها معاه بنطحة للمرة ثانية تا صلى عالنبي كون ما ريان شدو يتشبح فلارض"
زين الدين"وضار جيهة الباب بغا يخرج وهو يعيط ليه ريان ضار عندو منير" : تقرب جيهة عدو ربي نطحن ملتك....تقااااااود علياااا...
ريان"بقا ماد ايديه ليه تا عوج ليه راسو زعما واخا كون هاني" : صاف صافي على خاطرك..."متسناش زين الدين تا خرج ركب فالسيارة وكسيرا..."
مراد"شد حنكو تاني وناض كيطل عليه" : ااااش واقع مالو معاها ؟!
ريان"بقا كيشوف فسيارتو الي خلات العجاجة تا سمع مراد وهو يدور عاقد غوباشتو" : مصيييبة كحلة. مع بنت عمك والله الى مصيبة كحلة...كتجيب غير لمشاكيل لراسها بتبرهيش الي فيها يخ...
مراد : مالها الحبس تانتا هضر ؟!
ريان"عاود ليه شنو وقع بالضبط" : يلاه قوليا فين تعطي راسك لا سمعتي هاد العجب ؟!
مراد : وليني نسمعو منها !! ولا لا را اي واحد يبغيها حسيفة فشي حد ساهل اريان تطعن فشرف شي حد ..خاصنا نتيقنو...
ريان : فنضرك كون لقاها غايخلينا نتيقنو ؟! حسن ملي مالقاهاش كون قتلها ومنتيقنو تالمشرحة..."زفر بتعب" فففففف ليلة كحلة هادي...جاب الله علمتك تعلم عمتك تخرجها...
مراد"هز فيه راسو" : اش نعلم اش على انا لقيتها ولا جاوبتني معرفتهم فين هما تا تيليفون الكلبة طافي...
ريان : نعاااام ؟!"شوي سمعو الباب تحل ودخلات توبا هي وضحى شادة ورا ضهرها وداخلين فحال ماخاصهم تا خير.." ياااااربي نكون كنحلم...
دخلو بزوجات مافاهمين والو تا لقاوهم واحد واقف مدهشر فيهم وثاني جالس فلارض كيرمش شاد حنكو...شافت فيهم توبا الي كانت جايا شادة فبنتها لابسين غير جلالب عاديين بزوجات...
توبا : مالكم "شافت فمراد" مراد مال وجهك ؟!
مراد"شاف فضحى" : مالك نتي ؟؟!
ضحى ؛ مم ماليش ...
مراد : فين كنتو ؟!
توبا : ضحى شدها صداع فضهرها وديتها لكلينيك"شافت فمراد الي وقف مخنزر فجيهة ضحى" مالك نتا بعدا اش وقع ليك...
ريان"ضار جيهة مراد الي بدورو ضار جيهتو وحدر راسو ب لا اله الا الله..."
مراد : عيطت ليك تا عيييت مال تيليفونكم طافي ؟! دابا بلا كثرة الهضرة اجي معايا لبارطما ديالي الي ف اناسي بقاو تما"
ضحى : علاش ؟؛ لا مبغيتش نمشي لديك اناسي مكنحملهاش.."قفزات من غوتة مراد الي اول مرة يغوت " وااااا مكنتشاورش معاك الخراااا مكنتشاورش بقا لملتك غا تعزلي وتخيري ليا ...لاكون لا نعطيك قصر فكاليفورنيا ولا دار بوعزة"خرج فيها عينيه " ااا ولا عاجباك دار بو خرااا ياااك...
ضحى"صرطات ريقها" : دابا مالك ؟!
مراد : تخراج العينين عشرة لضص...زيدي قدامي يلاه...
توبا"وقفاتو" : بلاتي فين تديها ؟! واش هاد الهضرة باش كتهضر معاها ؟! مراد ؟!
ريان : ميمتي حسن سيرو معاه لا يصدق جاي لاخور مانتوما فخير...
توبا : فين نمشي ؟! ومال لاخور شكون ؟! شي حد فيكم يفهمني ااااش كاين وااااش واقع ؟!
مراد"غوت" وااااااااا مرت عمي وااااااااااااااااا الرب العالي تحركو قدامي واااا تحركووووو.....هالعار الى ما سمعو ليا تالهيه ونعاود ليكم...
يلاه كيهصرو حتى سمعو صوت الفران تحك بجهد قظام لارض تا تهزات ضحى وتحطت وهي تمشي حدا مها مافاهمة والو...ريان ضار جيهة مراد الي بدورو هز ايديه وخبطهم مالقا كيف يدير فهاد اللحضة والحال فات وهو بصح الي دخل...تا تحل وقف عليهم كينهج عينيه منيرين غير شافتو ضحى وهي تولي تقفقف....
توبا"ضارت لعندو" : زين الدين ؟!
زين الدين"مشافش فيها مشا نيشان ل ضحى طار عليها شدها من شعرها تا غوتات وقرب ليها وجهها لعندو" : تحركي معايا ...
توبا : اويلي مالها ؟!؛
زين الدين"مداهاش فيها جرها من شعرها كتغوت وتشد فيه وطلب وضهرها كيوعتها ماحسش بيها وبالمها وغواتها وهي كتستنجد...تبعاتو توبا باش تهضر معاه والو جرها كي البرق داها لمكتب ودفعها تا جات لارض..."
توبا "تبعاتو كتزرب على شوي تعتر وطيح تا شدت فالحايط مشا ريان كيجري باش يشدها اما مراد ماتلا ليه فين يهضر عرفو مغزز عليها وبغاه يعطيها علاش تقلب يلاه تحشم وتركن لان الي يربيها مكاينش وبوها الي يسول مكاينش ليه ايام وهو غابر مسافر لشي قنت يعلم الله فين زاد..." : اولدي غا قوليا اش دارت ؟! الله يرضي عليييك "ماجات فين توصل عليه دفع الباب بجهد وسدو عليهم.." وااااااااا زين الدييييييييييين عافاك اولدي غا قوليا اش دارت...
ضحى"شافتو سد الباب حسات بقلبها نزل الموت قدامها لدرجة الام ضهرها ماحساتش بيهم...ولات تصرط فريقها وتعاود وهي كتشوفو فحالة مكتبشرش هكاك بقات طايحة فلارض ووجهها ولا صفر."
زين الدين"سد الباب وضار لعندها تحنى على ركابيه...وشدها من وجهها زير ليها على الفك ديالها تا خرجو شنايفها حسات بيه غايعوجو ليها من بلاصتو..." : علاااااش !!! ااااا...
ضحى : نننن اهى اهى...
زين الدين"زااااد زير عليها تا حسات بالقطيع خدام لدرجة ضهرها مابقاتش داتها فيه..حط صبعو على فمو وعينيه خارجين فيها " : جااااااااوبييييني والرب الي شانو عظيم وضحكي عليا مزااال حسبي هنا قبر الكلبة مك ...
ضحى"هزهزات ليه راسها بالخلعة ودقان على زين الدين من مها خصوصا فاش شافتو كيداير فوجهو..." : نننن اهى اهى...
زين الدين : مهدي البقالي هو مهدي برادة الي نعتي ليا ياااك ؟!!! عرفتي اش خرج من فمو ؟!
ضحى"يلاه غاتجاوبو تا سمعات صوت دقات بجهد الشي الي خلاه ضار منير ووقف توجه ناحية الباب وحلو بجهد صاعر"
زين الدين"شاف فعمتو الي عقلها خرج وعينيها حمرييين بدموع" : شنو كاين...
توبا"شافت بنتها طايحة فلارض وجهها ولاو فيه بقع حمراء نتيجة الضغط الي ضغط عليها بايديه..مشات لعندها كتزرب" : ضحى !!! ...
رجعات لخدمتها..ومرة مرة كتشوف لا يكون جا منو شي اتصال او ميساج لكن بدون جدوى ..سمعات صوت نداء باسمها وهي دور كانت نورة هازا شي ملفات..حطاتهم ليها ..
نورة : افين ساهية ابنتي هههه
فرح : ههههه تا فين هاني..
نورة : هادو الى بوسيبل طلعي لعند قسم جراحة العيون فطابق الثالث...عطيهم لدكتورة منال ولا غير ل بنت الي فلاكوي تما هي تكلف ...
فرح : واخا..."هزات دوك الملفات تقريبا كانو ثلاثة خرجات من قسم المختبر دخلات لاسونسور وركبات رقم المصعد وهي طلع نيشان لطابق ثالث...مشات لاكوي وقفات مالقات حد بقات كتسنى شكون يجي كانت دنيا صاقلة تما ...حتى بانت ليها حنان جايا هازا خنافرها لسما وعينيها مكيشوفوش فلارض تلقات ليها واحد الفرملية عطاتها شي ضواصا ...وتمات جايا تا بانت ليها فرح واقفة فلاكوي وزادت كانها مكتعرفهاش او اول مرة تشوفها وتا فرح بادلتها نفس الشيء...وهي تجي واحد البنت والي نفسها كان طاحو ليها دوك القراعي ديال تحاليل نهار الواقعة..."
هي : عاوتاني نتي ؟!!
فرح"ضارت شافت فيها وهي تصغر عينيها " : فحال عقلت عليك ؟! واش نتي الي تصاطحت معاك ...
هي : اااايه اناااا هههه اش جيتي ديري تاني ضربيني هههه..
فرح : اهههه لا حاشا على نضربك ..غير ديك المرة والله ماشفتك وبقيتي فيا غير مخليتينيش نعاونك...
هي : تانا طلع ليا دم كنت شوي نخرج على خدمتي غير ستر الله ..مهم انا سلمى و سمحي ليا على داك لو جيست الي درت ليك..
فرح"عوجات راسها" : الله اودي دنيا هانيا...غير انا وديك سيدة الي متفاهمناش وعلى اي طلبت منها سماحة ونسينا داكشي...
سلمى : اودييي هاديك غير كتسطاجي كتدخل مع بروفيسور لعمليات مزال كتقرا..."قربات ليها وهضرات بشوي" داخلة غير بالمعرفة من جيهة مول شي على ماعرفنا را كانت مخطوبة ليه ...
فرح"حسات بقلبها ضرب بجهد تا سرح ليها نمل فذاتها..بغات تسول خافت تفرش.." : وااه احم ششش شكون مول شي ؟! بروفيسور علي ؟؛
سلمى : هههههه لا لا لاخور مكيبانش بزاااف شفتو مرة وحدة واقف هو وياها وبروفيسور علي طوييل ومگضر وزويين عينيه خضرين...ماعرفتش اسميتو...
فرح"حسات بسطل ديال ما بارد تكب عليها فهاد اللحضة تا تزنگو حناكها وبانت فيها...جاب الله البنت الي فلاكوي عيطات لسلمى وجات عتقات الموقف سلمات عليها ومشات..مدات فرح الملفات لبنت واستاذنات منها وجهها مغير فيه اللون...حسات بواحد الاحساس فشكل حسات. بالي مابغاتش تسمع عليه يكون مع وحدة ...
~~~~~
مشات كتجري لبنتها الي غير شافتها فحال شافت منقذ ليها منو...لقات جيهة الفك ديالها كلو مطبع وكتوجع بضهرها...
توبا"عينيها خارجين " : ضحى !! مالك "شافت فزين الدين" اش واقع مالها علاش درتي ليها هاكا ؟!!
مراد"عصباتو" : ونتي مااالك خليه منو ليها هو الي عارف مالها خليه يهضر معاها لاش مدلخة ياك كتخليه بينو وبينها مالك ؟!
زين الدين"صعر عليها ملي شاف ضحى بغات تهرب عن طريق مها وهو يمشي ليها منير مابقا كاع تسوق لخصوصيات ...قرب تال عند وجهها مزياااان" : علميها مالك ؟! قوووووولي لمك اش وصلك لهادشي وشكون ضربك !!! مزال كنتسناااااك تجاوبي !!؟
توبا : علاش تجاوبك ؟!"شافت فيه و فمراد وريان الي واقف بعيد" علاش تجاوبكم اااا !؟
زين الدين"جهد صوته " : وااااااااااهاااااضرييييييييييي...
مراد"شاف مرت عمو حامية عليها" : هضري جاوبيييييه ابنت الاصل ...مقرب ليك هذاك خينا ولا لا ؟! هضري حسن منعرفو شغلنا...
توبا"خرجات عينيها" : اويلي اش هاد الهضرة امراد ؟؟ اااااش هاد الهضرة...
مراد",رد ليها تخنزيرة" : بنتك الالة ولاو ولاد الكلااااب ينعتو فيها...ولا البراني يمد عليها ايدو ويجي ينعتنا بالخايب بمسبتها...بنتك امرت عمي بغينا نعرفو منها واش بثح الهضرة الي تقالت فحقها ...بنتك امرت عمي نعتو فيها فشرفها...قاليك مابقاتش بنت بهاد المعنى..."هاد الكلمة الي سمع زين الدين رجعاتو لهضرة مهدي الي قاليه فحال عاود كب العافية فليصانص..دفع عمتو بجهد تا كان غاتجي لارض ومشا ليها جرها من ايدها وشدها عاوتاني من شعرها زييييير عليها بحر جهدو تا غوتت ونقزو دموعها... "وقربها ليه مزياااان" هضرتووو صحيحة !!! كذبيييييه ليا وقولي مقربش ليك كذبيييييييه اختي وماتخلينييييش ندير ليك سيرتيفيكا وتشمتي فيا العباد...كذبييييه وحنتيني ابنت عمتي "زاد خرج عينيه" هضريييييييي...انااا عااارف ختي صغيرة بنت ناس ...
ضحى"كترعععدد من شافت وجهو كيخلع عروق نواضرو بانو خضريييين...وعينيه حمرييين...ماقدراتش تهضر حدها حركات راسها هز ايدو ونزل عليها بتصرفيقة لوجه تا تسمعات فاركان المكان فهاد اللحضة غوتات توبا ومشات كتجري دفعاتو بحر جهدها تا بعداتها عليه ودارتها ورا ضهرها"
توبا : وااااااااا ماتمدش عليها ايدييييييييييك...ماتقيسهاااااااااش ...بزااااف عليك تا تشك فيها ...مالها شايطة ليك ...عطيها تيسااااع اسي بعد منها ماتقربش ليها انااا مها معاها اسي والى بغيتي تبدا تمن علينا معيشنا برزقك ا سي انا نعطيك تيساع هاحنا خارجين ليك منها...هاحنا عاطينك تيساع ..."لاحت ليه هاد الهضرة كي السم تا حل مراد فمو وحط ايدو عليه... الي عمرهم توقعو تهضر هاهي هضرات شدات بنتها وجرتها معاها وخرجات..."
"قد يجرحك كلام بعض الناس، لكن تذكر أنّ الصواعق لا تضرب إلّا القمم."...
الكلام الجارح فحال الى ضربتي مسمار فوق لوحة خشب و الاعتذار فحال فاش كتحيد داك المسمار ولكن كتبقى ديك الحفرة.ديالو...هذا من الشخص البعيد فمابالك باقرب شخص ليك خصوصا الي كتشوف فيه باك مك عائلتك كتشم فيه ريحة ماتبقى ليك من العائلة..كتحاول ما امكن تجمع معاه ومضيعش اخر شخص بقا ليك منهم...
ريان"ماعرف اش يدير دار ايدو على فمو وضار لهيه مشا مابقا قدر كاع يوقف تما ويزيد يسمع وشنو غايتقال بعد الذي قيل"
زين الدين"هز حاجبو" : ياك الالة ...
توبا"مزال مخرجة فيه عينيها" : ااااه اسي ...وااااايلي عيقتي كاااع زدتي فيه كاااع فهمنا بالي خايف عليها باغي تربيها كتصرف عليها باش تاهمها ليا فشرفها ؟"قربات تااال عندو" تال هنا وحبس..بنتي ماجبتهاش من زبل "ضربات فوق صدرها" راني خسرت عليها دم جوفي تا صدقت ليا وحدها وسط عشرين واحد طاحو والي تولد ومات...الى حيث كتصرف عليها يعطيك الحق تمد عليها ايديك وتشك فيها..والله اسيدي لا بقيت ليك هنا مالي على حالي مااااالنا...ضرب على جيهتنا الى كان غا هاد الدل يوصل لهاد المواصيل..."مخرجة فيه عينيها لواحد درجة وجهها وراسها كيترعدو بالغدايد ولون تبدل ليها فوجهها...
زين الدين"من صدمة الي تصدم تلجم ليه فمو فهاد اللحضة مالقا ميقول سوى انه هز ايديه بزوج وهبطهم بجهد حرك ليها راسو بثقاااالة..قلب دورة وخرج من المكتب ضرب فيهم وزاد..."
توبا"ضارت لعند بنتها ووقفتها" نوضي تكعدي يلاه..."وقفتها وجرتها خرجات بيها قدام مراد الي بقا غا حال فمو تاهو صدماتو بردة فعلها...طلعات هي وياها سابقاها ووراها بنتها دايرة ايدها على فمها وتبكي...تا وقفات عند بيتها وضارت عندها" : جمعي ماعندك وتسنايني...
ضحى : فين اهى غانمشيييو...
توبا : لجااايحة الكحلة..جمعي وسكتيني..."خلاتها كتشوف ومشات تاهي لبيتها..."
اما زين الدين من الي خرج من المكتب ماعقلش على راسو تال لقا راسو راكب فطوموبيل ومكسيري لوجهة فين يعلم الله...باقي هضرتها كتسمع فطبل وذنيه ماهضر ماتكلم مادار تا رد الفعل تقول داك الغضب الي كان جاي فيه وصعرة تطفات وولا بلاصتها واحد سكوون رهييييييب...الوجهة الي شاد ماعارفهاش غير غادي وصافي ومولاها ربي...
اما فالفيلا داز وقت نيت ومراد بقا جالس فوق الفوطوي الي لتحت عند الباب كيخمم فالي جرا من قبل بشوي...وصدمة تاهو باقي ماثرة عليه من ناحية مرات عمو الي متوقعش يخرج منها هاد الكلام...من ناحية تصرفها طبيعي كونها خافت على بنتها وكونها ماتقبلاتش بنتها تخرج على راسها بديك الهضرة الي سمعات عليها...لكن بعض الكلام او اذا ماقلنا اغلب الكلام الي خرجات من بعد كان قاااااسي جدا فحق زين الدين...جبد تيليفونو من جيبو ودوز ل ريان الخط...
مراد : تبعتيه ؟!
ريان"سايق سيارة مراد" : هاني تابع طوموبيل مبغيتش يعيق بيا ماناقصنا صعرة منو..."كيهضر معاه وكيشوف فطوموبيل تا شوي فلحضة غفلة مابقاتش بانت ليه" ناري هذا فين مشا ؟!
مراد "وقف": وردتيه الخرااا ؟؟
ريان : ماعرفتش عاد كان قدامي فرمشة طار اصحبي...
مراد : وتحرك دغيا قلب عليه ....ورد معاه البال وخا من بعيد لا يمشي يطيح ولا توقع ليه شي حاجة..."شاف ساعتو" ولوحدة ونص ديال ليل هادي ..."شاف عمتو نازلة هازا صاكها فايدها ومهبطة فاليزتها ووراها ضحى تاهي.."قطع قطع من بعد ونعيط ليك...سربي شوفو فين طار...
توبا"شافتو جا لعندها وشد من عندها ليفاليز" : وصلني لشي اوطيل ولا ديني لشي بلاصة تايصبح الحال ...
مراد : تحركي لداري جلسي فيها...تما بقاي معندك فين تمشي ولا بغيتي توخري عند راجلك ؟!
توبا : لا معندي منمشي ندير عندو ...بلا ماتديني لدارك تانتا على اخر يامي نولي ندور عند ديور عباد الله...
مراد : وفلوس لوطيل عندك ؟! هانتي كاع جامعة فلوس ؟؟
توبا"جبدات من صاكها بزطام حيدات منو كارط كيشي ديال كونط الي فاتح ليها زين الدين من نهار جابها من بيوت الكرا هي والغالي...وضارت عند ضحى نترات ليها صاكها وجبدات منو كارط كيشي ديالها تاهي حطتهم ليه فايدو" : عطيهم ليه وقوليه الله يرحم الواليدين على خيرك...
مراد : ولواه ماشي لهاد درجة عيقتي اميمتي عيقتي واه واخا يكون قاتلها ماتواصلي معاه لهادشي...
توبا"غوتات عليه" : مااااااا سوقكش اسي ماسوقكش...بغيتي توصلني لشي جايحة مرحبا مابغيتيش شد ليا طاكسي ولا عطيني تانتا بتيساع...
مراد"جر ليها الفاليز بجهد خنزر جيهة ضحى ورحع شاف فيها" : غاتحركي قدامي لبارطما ديالي بلا غوات عليا وبلا ديك الهضرة ديال عزة نفسي الي خرجت منك ...بلا منهضر ونقول شي هضرة الي تخليك تقطعي معايا تانا الهضرة...بلا مندخل معاك ف تفاصيل البرهوشة الي والدة عرفناك ماشفتيها تا شفتي نجوم ديك الهضرة عشناها معاك ماشي غاتجي وتعاوديها لينا...زيدي تحركي لداري هادشي الي كنديرو معاك اميمتي واجب علينا ماشي كنصدقو عليك...لا جينا نصدقو كبيرنا نعاونوك من شهر لشهر ماشي نحطو كاع رزقنا بين ايديك تصرفي فيه كي بغيتي"قالها وعينيه خارجين فيها لاح ليها هاد الهضرة تقبلها مرحبا متقبلهاش تضرب راسها مع الحايط" ..
وصل وقت متاخر من الليل وهي طبعا فدوام عملها...كانت الخدمة شوية خفيفة سالات من بعض نتائج التحليلات على الورق وجلسات فوق الكرسي ترتاح كتشوف فنقطة بعيييييدة مربعة ايديها وعقلها غاااايب وميمشي غييييير مع حنان الي كانت صدمة هو انها كانت خطيبة زين الدين فالسابق...علاش ماقالهاش ليها ؟! يمكن مزال مهضروش ومتحاوروش الحوار الي خاص يكون بين اي زوج كيتعرفو على بعضياتهم...هو شيء طبيييعي يكون عندو ماضي قبل ميعرفها كيف ماهي عندها ماضي قبل متعرفو...طبيعي يكون عارف نساء قبل منها لكن بمجرد مكتفكر فهاد القضية كتحس بقلبها كتشعل فيه العافية...شي حاجة كتخلي صدرها كيخنقها فاش كتعرف انه عرف شي حد قبلها...يمكن الاهتمام منو الي ولا منصب ليها بالكامل غير ليها هي وحدها خلاها تبغي تكون غير هي وحدها الاهتمام يبقى غير ليها...يشوف غير فيها ويعرفها غير هي صافي...بقات تفكر وتفكر وكل متفكر كتبغي تجنن تا فاقت قافزة من سهوتها غير على صوت شي حاجة طاحت كانت ايمان طيحات گرافوز من فوق المكتب ...
ايمان : ههههه خلعتك ...
فرح : كنت ساهية هذاكشي علاش ههه."بضحكة من فوق الخاطر غير صواب. وصافي"
ايمان : عيييتي شفتك ؟!
فرح : لا لا غير ماشي لخاطري وصافي ههه ساعة الله وصافي..
ايمان: كيبان ليا بيرمانونص دليل ماوافقاتكش ...
فرح : يمكن ولكن معندنا منديرو..."تبسمات ليها ورجعات استانفات العمل ديالها ومرة مرة كدخل لتيليفون كطل لا يكون جاوبها لكن كل مرة كتمشي طل كترجع بخيبة امل...بقات هكاك الي حتى عطاتهم نورة وقيت ساعة يرتاحو فيها ورجعو تاني لخدمتهم تا صبح الحال ووصل خروجهم ...حيدات طابلية وعلقاتها بلاصتها وحطات البادج فصاكها هزاتو وخرجات هي وايمان وهي فطريقها وكتدخل الواتساب ووالو مادخلش ..ف قررات هي تعيط ليه دوزات ليه اتصال عادي ماشي واتساب كتسنى يصوني لكن مع الاسف الخط مغلق...عاودات وعاودت ووالو....حتى لقات راسها خرجات حتى صونا ليها تيليفون جاوبات بلهفة يلاه شافت شكون ساعاك كان جدها الي عيط ليها...
فرح"بدون روح" : ابا فينك ؟
محجوب : هاني گدام باب على برا...
فرح : واخا انا نعلم شيفور الطوبيس الصغير ونجي .."قطعات معاه ومشات لعند شيفور ديال ميني بيس دقات عليه من شرجم" با ناجي غير بوانتي بالي ممشيتش معاك انا غانمشي مع جدي كيتسناني برا...
ناجي : واخا بنتي في امان الله...
سلمات على ايمان ورجعات ادراجها طلعات لفوق وخرجات من الباب رئيسي تال برا ضارت تشوف تا لقاتو واقف بسيارة ديالو نوع suzuki ديال مالين سلعة والفلاحة...حلات الباب ودخلات سلمات عليه...
فرح : توحشتك ابا بزااااف"عينيها غرغرو"
المحجوب : وهادي هي الوجيبة دوزي معاها هاد اليومين وحيدي وحشك هههه...اسيدي على بركة الله"ديمارا طوموبيل تا قاد نضاضرو وكسيرا مباشرة لمدينة سيدي بنور ...طول الطريق وهي كتدخل الواتساب وتشوف واش دخل والو من البارح ملي صونا ليها مع العشرة دليل وهو خارج وتا تيليفونو طافي وخا حداها جدها قالت تجرب الى صونا تقطع لكن مزال طافي وكل مكيزيد الوقت كتزيد تخلع عليه لا يكون وقع ليه شي حاجة ولا مرض ثاني ووالو....حطات راسها على شرجم كتشوف فالدنيا وطريق والاراضي حتى دخلو لجديدة وشدو طريق سيدي بنور وهي كتشوووف بدون متهضر ولا تكلم مزال وحتى جدها ما هضرش خلاها على خاطرها...ماحساتش حتى داتها عينها ونعساااات من فرط تعب ماحلاتهم الا على صوت خالها كيفيق فيها وجدها كيضحك...
خالها : وااا البگيرة تي نوضي هههه
محجوب : خمرت هههه
فرح"كمشات حجبانها من اشعة الشمس وعلى حركات ايدين خالها فاقت وحلات عينيها كتشوف فيه...تا بدات تفوه" : امممم خالي...
خالها : اصباح الخير الخمير...تي كاع هذا نعاس ولا...
فرح"خرجات من طوموبيل وسلمات عليه" : عييييت...مناعساش من بارح والله...فين خالتي نعيمة(مرات خالها)...
نعيمة"عند الباب" : ايوى را سايرين نتسناو فك تفوقي(تفيقي) هههه"جات عندها سلمات عليها"درتيها زينة وجيتي ...
فرح"تبسمات" : يااك بعدا هههه فين ياسين وهناء جاو من كازا ؟!
نعيمة : مجايينش هاد اخر سيمانة عندهم امتحانات سايرين يراجعو...
محجوب : اتي دخلي ليا بنتي من برا ونتي سايرة تحاتي معاها ظخليها لا يضربها ليا البرد تي شتك تهنيتي على ولادك واكلين شاربين دافيين وتجوعي وتبردي ليا بنتي ...
نعيمة : ههههه حاشا عمي حاشا"عنقتها ودخلو لداخل كاملين لقاتها موجدة فطور بلدي ياااا سلام...اشمنك يا خبز الخباز زبدة بلدية...برقان ( جمع بريق هو الابريق ديال اليمنيوم داك طويل ) واحد فيه قهوة كحلة معطرة وواحد فيه حليب فايض سخون...بيض بلدي مصلوق زيتون زيت العود...عسل حر وجبن ...وطرح ديال مسمن فوق الطبق وصينية اتاي وطبسيل حلوة ديال كوك وغريبة ...عاد الفاكية ...منضر كيشهي ويفتح نفس ...حيث هما قراب لاراضي الي على برا...دارهم وسط الفدان ديالهم...
فرح : الله ...
نعيمة : وشتي دابا ابا اش موجدة ليها...
محجوب : لا هنا زمتيني امرت ولدي "هز ايدو وخبشها" ههه معدي ميتسالك...
فرح: ههههه "صونا تيليفونها فهاد اللحضة بدون شعور جبداتو باش تجاوب لا يكون زين الدين ...لكن كان عصام ..."
وصلها مراد هاديك الليلة للشقة ديالو...كانت صغيرة شوي على قد جهدو من برطمات خمسة وعشرين مليون...فالطابق الاول حل ليها الباب تا دخلو مكانتش مفرشة كاملة كان فيها غير فراش بيت نعاس والبيت فين كيتفرج اما الصاالون باقي خاوي مافيه والو من غير شي كؤاطن لكن المطبخ كان مجهز وثلاجة الي كانت خاوية فيها غير شي دفيش لا غير...عطاها ساروت دخلات هي وضحى ومشا من بعد ما خلا ليها الفلوس باش تخرج تقدا فالصباح لفطور وشنو يخصهم...
صبح الصباح الي مجاهاش كاع نعاس تا صبح عليها وهي حدا شرجم كتفكر فحياتها الي غاتقلب راسا على عقب...كتفكر دابا منين غاتجيب فلوس باش تاكل وتشرب وتصرف على بنتها المفششة بشكل غير معقول...عارفة راسها دللاتها بزاف لدرجة كلشي كيجي عندها كان مخاصها حتى خير كتلبس الغالي تاكل بالغلا ديما كونطها فيه الفلوس على حساب قرايتها الي كان مخصصو ليها زين الدين اما لا تكلت على باها فكان كيعطيها من جيبو...قبل متفيق بنتها الي شااابعة نعاس...هزات تيليفون وتاصلات بيهحيث عارفاه انه كييفيق بكري...بقا شحاال كيصوني عاد جاوب...
الغالي : خبار الخير ؟!
توبا : بلا منكثر عليك الهضرة...انا خرجت من دار زين الدين انا فبرطما ديال مراد الي هنا فاناسي...
الغالي : وعلاش خرجتي ؟! ياكما ناوية ترجعي ليا ؟! لا بغيتي ترجعي راك عارفة شرطي سني ليا وميخصك خير...
توبا : غانسني ولكن غانسني وراق طلاق اسي ماعندي مابغيت نعيش معاك...عيطت ليك باش تبدا ترسليا فلوس مصروف بنتك انا مغاديش نقد على فلوسها راك عارفها باش كبرات وفاش عاشت...شوف اش يسلكك ودير ليها ولا ليا شهرية...مغاديش نبقى عايشة على فلوس ناس ...
الغالي. : ههههه الي هما ولد خوك ههه ولدك الي كنتي ضلي فارعة ليا مخي بيه ؟ ولدك الي كتقولي هو الي هازنا ههه ولدك الي عايشة من خيرو وخميرو وكتباهاي ليا بيه ولد خويا طبيب ولد خوسا ذهايبي...شفتي فين وصلك ؟ مادار فيك خير نتي الي عمتو مربياه ويدير فيا خير...منتعجبش والله العظيم منتعجب...وليني هذا هو اخرت الي يجري على راجل قد باه وينسا خيرو هذا هو الي يحط راجل هزو ملي كان برهوش وطوال وعراضو كتافو ولينا نبانو ليه حشرات...هذا هو سر الي وقف ضدي الحق نتوما مكتبغيوهش كتبغيو غالي يعطيكم ريالات تا طيحو براسكم وتشبعو دل ويجري عليكم عاد تقولو ان الله حق...مزاااال ربي غايصرف فيه داك ولد خوك مزاااال يطب فكلشي ويبقى الله الله...نهار درناه ولدنا ضربنا لحنكنا...نهار بنينا ليه الوتاد غرسهم فضهرنا....مخلا فيا غالي نسا فاسد رشايوي ...بنت الناس الي خطبنا وبغينا نعولو عليها تعطينا الولاد طمع لينا فيها...هاهو وصل ليك نتي وختم بيك...وهذا سرك ابنت البغدادي هذا سرك ومزال العاطي يعطي...
توبا : كملتي عليا هضرتك الناقصة ؟! على نتا ساهل الغالي ؟ على نتا قليل ففعايلك...يحساب ليك نسيت الخدامة الي لقاك با فالبيت دسال الخزين معاها على نسا الولد الي حملت بيه ومات وفينما نحمل انا طيحني من دروج ولا ضربني تايموتو ليا فكرشي...على انا لاش صبرت ليك ولدلك اولد لحرام لاش صبرت ؟! على قبل ديك البنت الي كتبها ليا ربي بزز باش صبرت ليا وهي وسط كرشي كتضرب ومكنززة ليا فكرشي تا كلعت لفوق كون ما ربي كون ماتت تاهي...انا بنتي ماشي خريتها انا بنتي شربت عليها المرار ...كون ماهي عمري نعرف شنو هي الام ..بغيتي دير الولاد من غذا نعيط ل ريان يحل ليا ملف طلاق وسييير ولد ولا خرا ...انا علمتك دير شهرية لبنتك بغيتي وكان عندك ضمير الابوة صرف عليها ...مكانش عندك ضمير خليتك منك لله.."قطعات معاه وتنهدات تا نزلو دموعها يجريو حتى دخلات ضحى كتحك فعينيها وتفوه"
ضحى : ماما مدرتيش الفطور ؟
توبا : مزال مخرجتش نتقداه من برا..شنو بغيتي تفطري ؟!
ضحى : بغيت اومليط بالفروماج و لاداند فيمي وبغيت موكاتشينو ديالي الي كتصايب ليا مي خديجة...
توبا"لقاتها عالقرص" : بغيتي البعر لا ؟؟ "وقفت" انا غاديا نجيب شي مسمن وملوي وفرماج والحليب ...والبيض تا العشية ونخرجو نتقداو من شي سويقة هنا...
ضحى : لا بلاش من سويقة سيري لكارفور وتقداي...وزايدون مابغيتش ملوي ممشهياهش..."جمعات شعرها لفوق اسفنجة" خاصني نمشي لكارفور تقادا ليا شامبوان ديالي وشي كريمات خاصني نكومونديهم ديال ordinary ...
توبا : نساااي عليا الكريمات ونساي عليا داك الفشوش الي ولفتي...غادي نجيب اش قسم الله قضي بيه...داكشي الي كنتي مولفة نسايه...الى ما دار ليك باك شهرية عدي باي شامبوان...هذا جهدي عليك...
ضحى"خرجات عينيها" : كيفاش نعدي بالي كاين ؟ اويلي اماما شعري مغايبغيش ليا اي شامبوان "جاتها البكية" وتقادا ليا ميمكنش ندير واحد اخور من غيرو هو الي خرجات ليا طبيية لشعري ...بغيتيه يخسر ماغايبغيش ليا اي شامبوان راني صابغاه اماما وفطوري هذا الي ولفت ...
توبا"جرتها من دراعها مزيرة عليها" : شووووفي عندي جوج كلمات يا تقبلي بالي وجد يا سيري عند باك وعيشي معاه وسط الخانزات الي كيجب..."عاودت زيرت عليها تا غمضت عينيها" يحساب ليك غاندوز الهضرة ؟ غذا ولا تنين زيدي قدامي عند طبيبة ندير ليك سيرتيفيكا ...
ضحى"خرجات عينيها" : علاااش اماما ؟!
توبا : باش نلوح ليهم فوجههم بالي راكي بنت ونوريهم الشك فبنات ناس كي داير.."طلقت منها" سيري غسلي وجهك انا شوي ونجي...
كان عصام الي ديما كيتشغل بالو عليها...غير حس بيها وصلات صونا ليها...كان عند بالها زين الدين لكن مع الاسف مزال مابانش حتى من ريان ضيع طريقو فديك الليلة تا صبح الحال وهو كيقلب عليه من بعد ما انضم ليه مراد وحتى وليد الي خلا خدمتو ومشا يقلب معاهم طول داك الليل ووالو...حتى زقفو فواحد السطاسيون ودخلو توضاو كان الفجر كياذن صلاو فجامع ديال القهوة وجلسو رتاحو ورجعو تاني يقلبو حتى صبح الحال....
ريان : نعيطو دابا لبا الحسين ؟!
مراد : تت كيفاش نسينا ؟ سير سير لمحلات لمحل القديم ديال جدو"ناضو ديك ساعة خلصو وخرجو ركب وليد فطوموبيلتو وركب ريان ومراد فطوموبيل...وانطالقو مباشرة لمدينة فين كاينين المحلات ...نزلو بثلاثة من بعد ما بلاصاو سيارات بعيد شوي على المحلات...وتمو غادين وكيهضرو..."
ريان : هذاك صلاح كون غا علمتوه ماحدو مزال مادخل من كونجي يقلب تاهو...
وليد : الااااا غا خليه حجارو يشدوه هذاك لا قلنا ليه يقلب يدوز من حداه يتلاقا بيه يسلم عليه ويمشي يقلب عليه...
مراد : خليه بلاش خليه مرتاح فدارهم زايدون مكاينش مشا لعروبية عندهم شي عرس ولا موت..."وصلو لقيصارية مشاو نيشان لعند المحل الكبير لقاو محماد تم..يلاه غايسولوه"
محماد : اش كاين اتا ؟ افين واحد ولد الحاج غبر علينا هادي ليام ...
مراد"ضار شاف فريان الي شاف فيه وشافو فوليد..." : مجاش زين الدين ؟!
محماد : لا ماجاشي نيت بغيتو ي قاد ليا شي مسائيل هنا ماااشفناهشي...
مراد : تت واخا با محماد دابا نعلموه"ربت ليه على كتفو وخرج هو ودراري مشاو نيشان عند محل با الحسين...لقاوه يلاه نازل من سدة هاز فايديه صينية القهوة يحساب ليهم معاه زين الدين " با الحسين صباح الخير...
الحسين"من تحت نضاضر" : اه اه عاش من شاف وجوهكم"كلهم باسو على ايديه وراسو" اش هاد مجايب الخير ااا؟!
وليد : احم با الحسين ماهضرش معاك زين الدين ؟!
الحسين"كمش حجبانو. وحيد نضاضرو" : لا !! ياك شي باس مكاين ؟!
ريان : والو غير بغيناه كنعيطو ليه مكيجاوبش...
الحسين : اش واقع حتى مكيجاوبش...
وليد : تا والو غا"قاطعو"
الحسين : وليد جيني نيشان اولدي وگوليا اش كاين داك دخول والخروج فالهضرة مجايش معاكم راني عارفكم ملي كنتو ديرو ليكوش ...مال ولدي اش وقع ليه ؟!
مراد"تنهد مخرج انفاس من اعماق خاطرو...قبل ميبدا ليه الهضرة حيث عرفو بالي عاق بيهم كاينة شي حاجة والا مغايجيوش كاملين يسولو عليه اذن غابر ولا شي حاجة طرات خلاتهم يخرجو يقلبو عليه فين زاد...عاود ليه شنو جرا بالضبط لكن مع حذف مشكيل الحقيقي ديال ضحى حيث هما بنفسهم مامتاكدينش ان هضرة مهدي صحيحة مغايجيوش ويتبلاو عليها وحتى زين الدين بنفسو مابغاش يجزم حتى يتاكد لان الاتهام فالشرف ساااهل ينزل ك باطل على الواحد وصعيييييب يتحيد اذا ما تبتات البراءة لكن كيبقاو الاثار ديالو على طول الزمن...حتى من وليد مقالوش ليه ولو ماحصرش ريان حتى هو مكانش غايعرف شنو وقع لضحى بالضبط...غالبا او ديما لازم نسترو شي حد مهما كانو اغلاطو ونطلبو الستر وسلامة لان الانسان ماحدو عايش فهاد دنيا ممكن يتبلى بمشاكيلها فهادشي علاش خاصنا منتشفاوش فالواحد ونطلبو ليه الهداية ..بقا كيعاود ليه حتى قاليه اخر ماخرج من فم توبا الشي الي خلا الحسين يتصدم وتبان ردة الفعل ديالو على محياه ..هز مراد ايديه وهبطهم " : هادشي الي كاين...
الحسين : اشاوا هادشي كنسمع ؟!
ريان : دابا الي عطا الله عطاه ابا ...بغينا غير نعرفو فين هو قبل منوصلو لعندك عيطنا لدكتور علي تاهو ماشافوش وخليناه تاهو كيعيط ويقلب بطريقتو...بغينا غير نتهناو عليه راه مريص والله ابا الحسين الى انا الي حضرت ليه فاش كنا جايين..
وليد : بلا هادشي هاد تواخير كتر عليه شلا ضغط كنضن واقيلة عاود ليك على مشكيل العافية الي شعلت ف ديبو ياك ؟!
الحسين : ايه عاود ليا...
مراد : بزاف ما وقع ابا بزاف ونتا عارفو نقشة عندو دغيا كدور ...
الحسين"حط داكشي الي كان شاد فايدو وضار عند المتعلم ديالو" : رد بالك اولدي لحانوت "رجع شاف فيهم" زيدو معايا نشوفو فين مشا..."مالقاو ميديرو سوى يستسلمو ولا هو ركب مع وليد ومراد وريان فسيارة مراد وانطالقو لكاع الوجهات الي ممكن يكون مشا ليها زين الدين لكن بدون جدوى حتى من الاماكن الي مكانش كيبغي يمشي ليهم قالو يسولو فيهم نهار كلو وهما يقلبو بدون نتيجة...حتى رجعو لفيلا ديال زين الدين يرتاحو وقالو عالله وعسى يكون تما لكن والو مكاينش ليه الاثر...حتى من عساس قال بانه ماجاش فاش مكانوش ..
الحسين"جلس فوق الفوطوي وراسو فلارض قلبو واكلو عليه" : وهادي جديدة عليه فين مشا هذا يا سيدي ياربي"بحزن"
مراد : جدييييدة عليه وسكتي ابا "عوج فمو"اوديييي...
وليد : كيفاش جديدة عليه ؟!
الحسين"هز عينيه فوليد" : زين الدين كترة المشاكيل قصحوه تاحاجة مبقات تاثر فيه...لا غبر هاد الغبرة عرف بالي تقاس فخاطرو وضروه الحباب زين الدين عندو عمة وحدة جمع فيها كلشي...الانسان الى تقلق وتقاس ليه الخاطر مكيلقا من غير واليديه ميمتو علامن يحط راس...زين الدين اولدي معندو حد فهاد الحالة يتيم الى ماجمع راسو براسو مكاين علامن يحط راس وطبع زين الدين ماشي اي واحد يحط عليه راس ومكاين علامن يحط الراس...
ريان : المعنى ؟!
الحسين"حرك راسو" : خليوه على خاطرو ولا تخافو شاي.. معروووف فالبلاد بولد البغدادي ..لا طاح عطا الله من يوصلها لينا..
هزات عينيها كتسقي فيهم بجمال الاراضي الزراعية وتريحهم من بعد تعب ليلة كاملة مابين كلام فوزي و خدمتها وسط التحاليل والاماكن البيضاء وراحة الادوية...هزات النفس كتعمر رئتيها بالهواء الطبيعي النقي دسال البلاد ...كانت الساعة تشير لرابعة مساءا...صوت الجرارات خدام وصوت خرير المياه من الساقية دايز...ووسط الفدان محطوطة صالامونحي بكراساها البيضين...محطوط قدامها صينية اتاي بالنعناع وطبسيل الفاكية...هازا الكاس فايديها وحداها جدها الي كان كيتسنى تبدا الهضرة...
المحجوب"حط عكازو فلارض" : اش مسهي تاغونجة ديالي جدها ؟!
فرح"حدرت راسها كتفكر منين تبدا ليه واش تاهو غايدير شي ردة فعل لان فوزي الي سكوتي وكان كيفهمها مع الاسف كانت ردة الفعل ديالو قاسية...هزات راسها ونطقات والي ليها ليها...ضارت لعندو " : الكلينيك !! الي خدامة فيه .."تنهدات وهي كتردد واش تقول ولا لا..للحضة سكتت وهي ترجع نطقات وعاودات ليه نفس الهضرة الي قالت لفوزي من لول تلاخر الفرق ان جدها عطاها وقتها تا تهضر...وعطاها حقها تعاود وتكمل للاخر حتى عطاتو الانطلاقة" شنو بان ليك ابا ؟!
المحجوب"رجع سلهام ورا ضهرو..وشاف قدامو كيتنهد من هضرتها والصدمة الي تلقى..رجع شاف فيها" : واش بان ليك نتي ؟!
فرح : ماعرفتش ابا ماعرفتش خايفة بزاااف من عصام...خايفة يعرف و..
المحجوب : ويمشي كلشي معاهم تا هو ياك ؟!
فرح : الى خرجني من خدمة را مغاديش نلقى خدمة فحالها...ماعرفتش شنو ندير ابا...
المحجوب "هز حجبانو" : اش غادي نقوليك ابنتي ...نتي كتعرفي عصام كيداير هذا طبع فيه لا جات عليا نقوليك جلسي فخدمتك راني فايت خدام ومتقاعد يعني عارف اخلاقيات المهن ...نهار كانت جداك حاملة ب خالتك رقية ( بنتو الي مشات لفرنسا مابقات رجعات ليومنا هذا) وصلها الوقت تولدها...كنت انا ديك الوقيتة وسط واحد الاجتماع حضر فيه وزير الفلاحة ديالنا..."ساس كمايمو وهو كيهضر.." ديك الوقت مكان تيليفون كي هاد الوقت...كنت ف رباط ديك الوقت...ايوى وصلاتني الخبار من السنطرال ديال الوزارة...انا وسط الاجتماع...منكذبش عليك تشطنت من جيهتها وليني صبرت راسي معندي ماندير ما بينت ما وووواااالي ا بقيت مكمدها ومشكيل كانت مريضة من نهار هزتها وهي طايحة بفقر دم...وكانت غير القابلة ديك الوقت سبيتار فسيدي بنور كان غا مستوصف شكون يولدك من غيرها..."حط ايدو على ايدها" الي بغيت نبين ليك هو الخدمة خدمة وحياتنا الخاصة ماعندها علاقة بالخدمة...هادشي ابنتي خاص يعرفو خوك...وهادشي ماشي انا الي نقولو ليه...هادشي"طبطب ليها على ايدها" خاص يعرفو منك نتي...لا عرف من شي حد غيرك تحسبي شمتيه وديك ساعة اش جا يفكك منو...هضري معاه والى وقف فطريقك نابي عليا"عيطي ليا" انا ليا كلام معاه..ياك هادشي الي كاين ولا كاين من غيرو...
فرح"هزات نفس وخرجاتها" : هاد ساعة باها هادشي الي كاين...
لمحجوب : ساعة اخرى !! ساعة اخرى ابنتي كاين الله...انا مانجيشاي من جيهتك ولا من جيهة عصام ...انا نجي مع الحق ابنتي...لا لقيت منك لافوت غادي نعطيك جوابك ولا كان من عصام لافوت تاهو يدي جوابو...رطبي شي فين يجي شي...
~~~
وصل لدار وحل الباب تا دخل الموطور سدو وحل باب الفصيل الثاني...كانت دار مضلمة بزاااف مع الليل استغرب لداك الضلام الي كان...جبد من جيبو تيليفون بغا يشعل البيل لقاه طافي...
عصام : يلاه اسي...فراااااح...فوزي..واش كاين شي حد هنا.."بقا كيتحسس تا وصل القرص باش يشعل ضو لكن مع الاسف مابغاش يشعل...مشا لكوزينة يقلب على بريكة ولا شي حاجة يشعل بيها والو مشا نيشان لبيت يقلب على شارجور كيتحسس وداك ضلام غير كيزيد...تا من شاريع طافي فيه ضو !!حس بالخنقة ونفسو دياقت عليه" فرااااااااح...اش هاد زمر مال هادشي طافي ؟! وليني مصيبة كحلة هادي...بقا كيقلب يقلب ووالو ...تا سمع صوت تخرشيش وضور وجهو يسمع صوت منين جاي ...وقف كيقلب على مصدر صوت منين جاي حدو كيسمع صوت تقرقيب شي حاجة فحال ماس ولا معايق مهم شي حاجة دياال لحديد" فرح !! ولا فوزي
مشا لمصدر الصوت الي تاكد انه جاي من الكوزينة بقا كيتحسس بايديه على الحايط تا وصل الكوزينة وهو يدخل داكشي حبس صمتتت سكوووون تام قاطع كانه مكاين والو فديك اللحضة...بقا كيتحسس حس براسو فشي بير ماشي كوزينة كيعيط ويتحسس والو فحال مكانش داك الصوت...قلب دورة وجا بغا يخرج عطا بضهرو حتى خرج عينيه على حر جهدهم حس بموس خنجر تغرس ليه فضهرو من حر الالم والضو الي حس بيه اختارقو من ضهرو نزلو دموع من عينيه سخاااان ...يلاه حط ايدو تحسس لقاه خنجر .. حتى تشعل ضو وشاف ايديه لقاهم عااامرين مطلييين بالدم يلاه غايدور وهو يحل عينيه غوت جا جالس كينهج وعروقاتو تكب تا فاق فوزي جا جالس تاهو...
فوزي : بسم الله رحمن الرحيم...ياك لباس مالك ؟!
~~فهاد اللحضة فاقت كتغوت وتقلب فبلاصتها تا ناضت كتنهج وعينيها خارجين وكتقلب فايديها وتبكي...
فرح : وااااا لا لا لا د .م"جات نعيمة تجري تال عندها"
نعيمة : بسم الله عليك ابنتي مالك ؟!
فرح"كتمسح فايديها بهيستيريا فالغطا ودور هنا وهنا وتمسح فحوايجها" : ددددد ممم دم ...اهى ...
اللهُ أكبرْ , اللهُ أكبرْ .
أشهد أن لا إلهَ إلا الله. أشهد أن لا إله إلا الله
أشهد أن محمداً رسولُ الله . أشهد أن محمداً رسول الله
حيِّ على الصلاة . حي على الصلاة,,حيِّ على الفلاح . حي على الفلاح
اللهُ أكبرْ . اللهُ أكبرْ,,لا إله إلا الله...
"الصلاة خير من النوم..الصلااة خير من النوم"
بعد نهاية اذان صلاة الفجر..الي كانت كتسمع ليه وهي جالسة فوق فراشها وعقلها مرفوووع من بعد ديك الحلمة الي معرفاتش تفسيرها او نقولو مزال تاثيرها عليها...سمعات صوت تقرقيب عرفاتهم ناضو حيث كلهم كينوضو فهاد الوقت يصليو حتى من ولاد خالها ولفوهم هاد القضية من الصغر...ناضت من فراشها وخرجات لقات مرات خالها كتعطي السطيلة دسال الماس سخون ل راجلها...
فرح : خالتي جدي مشا لجامع ؟!
نعيمة : وااه ابنتي بغيتي توضاي نعطيك الما ؟!
فرح : واخا حتى بخرج خالي..."حركات ليها راسها ومشات لكوزينة تسنات خالها تا خرج من طواليط ومشا خرج تبع باه لجامع اما هي عطاتها ما فسطيلة ومشات توضات بيه تاهي وخرجات لقاتها لابسة عباية صلاة عطاتها وحدة ديال هناء لبسوها وصلاو بزوجات..اخر حاجة ختمو بيها الدعاء الي كانت فرح كتدعي بحاجة غييييير وكل مكتنطق كل ماكتحس بقشعريرة كتسري فذاتها...كيرجع تفكيرها لديك الحلمة الي مفهماتش معناها...كملات دعاء وهي تنهد بصوت عالي تا ضارت عندها نعيمة الي لاحضات انها ماشي مزيان. من وجهها...
نعيمة : مالك افرح بنتي ليا ماشي تالهيه ملي فقتي كتغوتي ؟ شنو حلمتي ؟!
فرح : واخا خايبة نعاودها ؟!
نعيمة : عندنا حنا كنقولو حسن تعاودي حلمة الخايبة ...عاودي ليا على الله تحسي براسك شوية ...
فرح"مسحات على وجهها بايديها بتعب..عمرات رئتيها بكمية من الهواء قبل ماتنطق وتقول الحلمة الي مابغاتش تحيد من بالها ملي فاقت" : اشنو يكون معناها ؟!
نعيمة : خير وسلام ابنتي خير وسلام...على حساب مكنعرف د.م كيعني كذوب..كيعني غدر كيعني بزاف ديال المعاني الي كيديو لنفس المعنى بشحال من طريقة وكيختالف ليه المعنى حسب الانسان يعني لا حلمات بيه البنت عندو معنى حلمات بيه الحاملة عندو معنى حلمات بيه المزوجة عندو معنى المطلقة ولا راجل وهاهي غادية فهمتي"حركات فرح راسها" ...نتي ماديري فبالك والو الي كتبها الله هي الي كاينة صلي صلاتك كثري من دعاء وقراي القران الكريم تخفاف ضيقتك ويفرج ربي همك...
فرح : ونعم بالله..."ناضو بزوج حيدو العبايات وجمعو دوك صلايات..شافت فمرات خالها وقالت" غاتمشي تعجني ؟! عطيني انا نعجن ليك...
نعيمة : غير سيري رتاحي تال بلاتي ونفيقك...
فرح : غير خليني مرتاحة والله...توحشت نعجن ونرمي فالخباز..."تبسمات ليها وهي تخرج معاها من البيت توجهو لكوزينة عطاتها كمية الدقيق الكافية ديال اليوم...حاسة نوعا ما براحة من بعد ما هضرات معاها عطاتها كمية الطاقة الايجابية الي ساعدتها انها تنسا الحلمة وتكمل منين حبسات...رجعو رجال من جامع...مشا المحجوب لبيتو ربع رجليه وتقابل مع المصحف وباشر فتجويد بعض الايات من الذكر الحكيم. كيتسمع صوته من بيتو وداك صوت كيبورش حتى وصلات سبعة ونص ديال صباح كانت واقفة كتخبز فالمطلوع(بطبوط) ونعيمة كتحط فصنية القهوة واتاي تا رجعات لقاتها سالات اخر ملطوعة بقات..هزاتوو دارتو فطبسيل طاوس كبير تستيفة حطات فوقهم زبدة تا بدات تنزل دااايبة عليهم تقبات وسط البطبوط باش تدخل ليه وحطات جنابو زبدة هزاتو فرح وداتو لبيت فين جالسين...
المحجوب"من بعد ما سماو الله وبداو يفطرو..شاف فولدو.عيط ليا خوك فاش كنت جاي من جامع ..
منير : خبار الخير...
محجوب : ويضهر ليا لا ناوي يجي فهاد العطلة ...
فرح"بفرح" : بصح خالي تهامي جاي ؟!
منير : وكي طرا مولفاش ليه...
محجوب : توحش البلاد وكان...
فرح"ترددات تسول فالاول لكن تشجعات ونطقات" : با علاش خالي تهامي مكانش كيجي بزاف ؟!
محجوب"تبدلو الملامح ديالو من البشاشة لحزن ممزوج بغضب رجعاتو بسؤالها لمدة طويييييلة هو ماباغيش يتفكرها" : وااالي بنتي والي هو هكاك داير.."حنحن منضف حلقو وناض وقف" لا ساليتي هاني عند الخدامة فالفدان لا بغيتي تمشي معايا لدار الحليب...
فرح"هزات فيه راسها مفهمات والو" : واخا با جدي..."مشا وشوية تبعو منير تاهو بقاات غير هي ونعيمة راس فالراس.." مالو با جدي واش قلت شي حاجة ماشي هي هاديك ؟!
نعيمة : ماقلتي عيب ابنتي غا هو تفكر شي حاجة قديمة كان تخاصم هو وخالك وخرج ديك ساعة يلاه خدم فالتعليم ودار انتقال لداخلة فييين وفين كيجي الى ممشا عندو باك جدك...هو هكاك داير مكيبغيش يجي هنا بزاف راكي عارفاه نتي كلك شحال شفتيه ...
فرح : مرة وحدة فاش ماتت مي عيدة الله يرحمها...ومن بعد فاش كيجي مكنكونش هنا كيجي فنهار ويرجع ...كنقول لعصام نمشيو عندو مكيبغيش ماعرفتش علاش...
نعيمة"تنهدات" : العلم عند الله ابنتي كل وكيدار ليه الله..بلا متحكري عيشي نهار بنهارو تيفرج الله...
مالقات فرح ماتقول باقي بعد الذي قيل..من اولها وهي عارفة هاد خالها مجياتو قلال او شبه منعدمة لدارهم...وهي هكاك ولفاتو اما واحد خالتها عمرها شافتها ولا عرفتها غير فتصاور فاش كانت باقي صغيرة...تا من جدها دار فيزا سياحية غير باش يمشي يقلب عليها اثرها غابر لحد ساعة معارفينش فين اراضيها تماما كيف الام ديالها...
اليوم الثاني على التوالي ومزال مابانش ولا دار اتصال يطمنهم...ولحد الساعة مادام موصلاتهمش الخبار عليه بالخايب اذن را بصحة مزيانة يمكن بحاجة لراحة يمكن بحاجة انه يبقى مع راسو ويعاود ترتيب الاوراق ديالو...ممكن محتاج وقت بينو وبين راسو ينعازل على دنيا يمكن وصلات بيه درجة الجرح كبيييرة الي خلاتو يخلي المرضى الي متبعين عندو وميجيش !!!..زين الدين الي عمرو خلا مريض ومكانش عند الموعد ديييما هو الي كيجي قبل ميبداو يجيو هما...لاول مرة فحياتو كتوصل بيه المواصل انه يرمي كلشي وراه ويغبر هاد الغبرة الحارة ايعقل انه تقاس بمعنى الكلمة ايعقل انه تجرح جرح كبييييير.لهاد درجة الي خلاتو يغبر وهو عارف ومتاكد بالي كاين الي غايسول عليه عارف بالي مخلي عائلة مكونة من صحابو كبار وشبان...عارف انه غاتشوش عليه هي الي ملكات قلبه بكل ذرة فيه وكل نبض فيه كيضرب ليها...عارف انه كاع لما سول فيه حد عالاقل الخدمة يسولو عليه وعارف انه علي غايتشطن عليه وهادشي الي وقع دابا هاهو وسط المصحة جالس فالمكتب ديالو وقدامو كل من الحسين ودراري...
علي"كيهضر فالتيليفون" : ههه مم مرحبا مرحبا ميلغ"قطع معاه ولاح تيليفون فوق المكتب معصب" دابا اش غانديرو ؟!
مراد : تا سي نجيب اخر واحد نتوقعوه يكون معاه ماشافوش قاليك عامين هادي...كاع المعارف ديالو الي كنعرفو مكاينش معاهم...
الحسين : انا هضرت مع سلمان لهيه فالمدينة تاهو ماعندو عليه خبار...
ريان : زعما يكون طلع لسعودية ؟!
مراد : كان فينما يتوحش واليديه وديق بيه دنيا كيدفع لفيزا ويقطع يطلع يزورهم..."بحزن"
وليد"بقا كيدوز على لحيتو بتفكير تا هز عينيه شاف فمراد" : مراد !! زعما متكونش فراسها ؟!
مراد"كمش حجبانو" : شكون يا ؟!
وليد"كيخرج عينيه بشوية ويرجع يدخلهم باش يفهم راسو ووالو يا انسان واش فهمت" : ايا اصحبي...زعما قلنا والفاهم يفهم...
مراد : يا بالعما واش فهمتك ..
الحسين : اش تما ؟!
وليد : زعما ابا يكون ...
مراد : اش تتخربق عليا نتا ؟! تا هضر نيشان اصحبي ...
وليد"حشم يقوليه فرح" : تعقل نهار شعلت العافية ؟!
مراد : اينا عافية فيهم ؟؛
وليد "طرش حناكو وحط ايديه على راسو مهبطو لتحت.. وداك مراد حلف لا فهم...زعما مراد من النوع الي ذكي..." : الي تحتك "قالها بصوت منخفض بزاااف هز عينيه لقاهم كيشوفو فيه كاملين بدون ميرمشو حساب ليه سمعوه" هههه قاليك لا شافو فيك القواسة بدل البلاصة...
مراد : اش تتقول نتا يا ؟
مراد : هضر ازمر مامسالين لطنز ديالك شكون الي يكون عارفو فين كاين ؟!
وليد"هز راسو بجهد عاض شنايفو" : ختي فرح د الله يغبر لمك ساس...
الحسين"جابو ليه ضحك" : ههههه وقول فرح نيشان مالك خايف...
علي : وشكون فينا الي ميعرف قيمة فرح عند زين الدين ؟ زعما يكون عالمها فين هو ؟!"هز الفيكس" نعيطو ليها من المختبر ونسولوها..
مراد : مكايناش مكتخدمش سبت والحد فاش كتسالي سيمانة دياال الليل...تال تنين عاد تدخل فالصباح...
علي"غمض عينيه" : اااه بون...شكون فيكم عندو نمرتها ؟!
مراد"بتردد" : بغيتو نصيحتي ؟ بلا منعيطو ليها تزيد تشطن نديرو كيف قال با الحسين نخليوه على خاطرو ..
ريان"كان كيسمع ليهم" : نخليوه على خاطرو ماقلناش لا وليني را طول من ولبارح اصحبي لا بغا يكون على خاطرو را كيعلم كيقوليك انا مزيان بلا متعيطو ليا هاد اليومين..."شاف فوليد" وزنها اصحبي ...
مراد"هز ايدو وحطها بقلة حيلة"
الحسين"جبد تيليفونو ودار نضاضرو مد ل مراد تيليفون " : هاك قيد ليا نمرة فرح انا نهضر معاها ...
مراد : معنديش ولكن تسنى نهضرو مع RH هما يعطيونا نمرتها"ناض مراد مستاذن خذا الفيكس من عند علي ودوز ل موارد البشرية طلب منهم نمرتها الي عطاوها ليه فالبلاصة شد تيليفون الحسين وركب ليه نمرتها"
فهاد الاثناء كانت واقفة بعيييد كتشوف فالفلاحة شادين الدوا كيرشوه على شجر زيتون....وجدها واقف معاهم اما خالها مكانش...حتى ضار جدها وعيط ليها من بعيد...
فرح : هاني ابا ...
محجوب : واجي نمشيو لدار الحليب ها تراكتور جاي لحگي عليا هن ...
فرح : واخا"هزات تيليفونها من فوق طابلة فين كانت واقفة حداها وتمات غاديا لعندو حتى صونا ليها شافت رقم وخا معارفاتوش جاوبات.." الو ..
الحسين : بنتي فرح هادي ؟!
فرح : ايه شكون معايا ؟!
الحسين : معاك باك الحسين الى عقلتي عليا ههههه...
فرح"كمشات حجبانها كتفكر شكون هو" : صراحة ماعقلتش...
الحسين : ههه ماعليش ابنتي متشاوفناش بزاف ماعلينا انا الي كيقوليه زين الدين با الحسين ..
فرح"تفكراتو دابا بالي هو الي جا نهار الخطبة" : اااه عاد عرفتك اعمي ههههه سمح ليا معرفتكش فاللول .
الحسين : هههه ماعليش ماعليش ابنتي..."حنحن منضف حلقو باش يستانف الحديث ويمشي للنقطة المهمة والي هي" بنتي كنصوني على زين الدين تيليفون طافي..ماهضرش معاك ؟!
فرح"بخوف" : لا ماهضرش علاش مالو واقعة شي حاجة حتى طفا تيليفونو ؟!
الحسين : ماوقع والو بنتي غير شي ناس كيسولو عليه"مابغاوش يقولو ليها مالو" هنا فالمحلات سولت دراري قالو ليا يومين هادي ماجاش لكلينيك...ومالقيت تاحد من غيرك يقدر يعرف فين هو ...بلا متشطني عليه ابنتي..."ماعرف ميقول ولا غير يدخل ويخرج فالهضرة ولكن را اخر حل هو هذا"
قطع واحد الرجلة ديال البقري طراف وحيد منها اللحم دارو فالماكينة زاد عليه الشحمة وخدمها تا بدات تطحن ليه الكفتة وعاود دارها تا تطحنت مزيان قادها فكاغط ودارها فميكة ولاحها ليه وعاود جرها عندو ...
عصام : حط 80 درهم هي لولة...
صطوف : ياك احيااة ياك !!؟
عصام : والله يا مك لا تبعاتك ومحطيتي فلوسها...سستيني غا بقصاسرك الكلب...
صطوف : اش كاين ما حسن من زهو اصحبي...خليني نفرح بالحرية...
عصام : مابغيتيش توب ؟ فاش عينك...
صطوف : عيني فالحلال برجولة ومن لاخر ..
عصام : مممممم..
صطوف"جر ليه ايدو وخبط كفو على كف عصام" : وبالرب المعبود تا ناوي...وعيني فوحدة ...
عصام"هز حاجبو" : شكون بسلامة ؟!
صطوف : من بعد وتعرف"غمزو" اعشيري...مد مد ديك الميكة
عصام : وا والله لا تبعاتك ومحطيتي فلوسها...
صطوف : الله يتبع لبوك البلا كتر ماهو تابعو فين يتدها عليك...يا ولد القوادة غانعطي ملاويك شحال كتسالني...
عصام : الكناش فاض من جناب...خبط جنابك وسوس رزقك وعطيني رزقي راني واقف هاد ليام...
صطوف : شحاال بغيتي دابا ؟!
عصام : فلوس هاد العبرة الي فايدي والي يتسالك ديك ساعة نتا ووجهك ..."جبد صطوف مية درهم ومدها ليه...شدها وعطاه الميكة ديال كفتة" تيسر تقود فحالك...
صطوف : صرف القواد...
عصام : بغيت ندير بيه ليصانص.."شير ليه ناحية الميكة" نتسالك عشية شواية...
صطوف"دوز على لسانو بصبعو وحكو فالحايط ك اثر" : هانا هانتا لا شتيها لاكان غاليوم...يلاه دور تقود..."ضار كيسب ويلعن فعصام الي ضحك على هضرتو...حتى شوي جا فوزي لعندو..." فوزي !!!
فوزي"مبدل حوابجو" : كيفاش...
عصام : مالك لابس حوايجك !
فوزي"دور وجهو لهيه بعصبية ودفل لهيه" : نوضتها مع لشهب ينعل بو مو فهاد النهار..خليت ليه خراه يربح بيه...
عصام : دخل ريح وعاود ليا اش واقع مالكم ؟!"حرك فوزي راسو ونقز من فوق بوطاجي الحانوت دخل جلس تا كب ليه عصام كاس اتاي وليه وجلس مقابل ليه" ...
فوزي : قاليك بغيت نعطيك نص الي دخلتي بيه وسير ضبر على راسك...
عصام : الملاوي هذا كيتفلى ؟!
فوزي : ساهلة عندو القضية نعل بو مو...قلت ليه صبر عليا هاد العام بينما جمعت صريف ونحل محل ديالي كنتسنى غير سعيد يكمل كونطرا المحال الي شاد ويدوزو ليا والو قاليك اسيدي باغي نفك شركة...بدلت حوايجي وجيت حسن منبقى نتناطح انا وياه..."كينهج بالاعصاب" عصب مي فهاد النهار يخ تفو...
عصام : خرج من عند القواد وخلي فلوسك فالبنكة وتسنى سعيد يسالي من المحل وشدو نتا دير رزقك ديالك...
فوزي : اودي مابان لياش فهادشي والله اخويا...
عصام"هز حاجبو" : واش بان ليك بسلامة ؟! فين بغيتي تخدم ؟!
فوزي : ربعة المليون الي داخل بيها معاه نتسلف ونزيد عليها ونمشي عند الفيلالي من لاخر "هز عينيه فعصام كيتسنى ردة فعلو حيث عااارف شكون هو الفيلالي بالضبط واش كيدير"
عصام"ناض وقف مخنزر فيه " : بغيتي تحرگ القواد ؟؟!"قبل ميهضر فوزي" والله وعتبتي عندو تاندبح مك اقسم لك يمييييينا وفكرتي تعتب عندو نضرب على الكلبة مك الى يوم الدين...
خلات جدها كيعيط وشيرات ليه بايديها بالي يتسنى حتى تهضر حيث فهاد اللحضة قلبها بصح تشطن عليه...
فرح : عمي كيفاش منشطنش"وقفات بعيد قبل متوصل عند جدها" حتى انا يومين هادي وانا كنصوني ليه تيليقونو طافي..اش واقع غير قوليا واش مقلق من شي حاجة شي حد قاليه شي حاجة !!
الحسين"مالقا ميقول هز عينيه فيهم كانو كيتسناو منو خبر فاش يسالي معاها المكالمة وناض هو من حداهم غمزهم باش يهضر معاها براحتو وتاهما تفهموه شير ليه علي عاطيه الاذن باش يخرج براحتو" : والو بنتي غير شي مشاكيل مع دار...على كل ابنتي معندك لاش تشطني غير هو مرة مرة كيبغي يبقى مع راسو راكي عارفة كاين الي كيبغي يبعد شوية ويبقى مع راسو خصوصا فحالة ولدي زين الدين...مهما كان قاصح ابنتي كيبقى انسان مهما قسات عليه دنيا كتربيه وليني كيجي الوقت يبغي يكون مع راسو ...
فرح"بحزن عليه" : شنو قلقو لهاد درجة تا غبر ؟!
الحسين"تنهد" : اش غانقوليك ابنتي...تاحد مالقاها كيف بغاها..كاين الي عندو كلشي ومالاقي راحتو كاين الي معندوش وملاقي راحتو...كاين الي عندو كلشي وباغي فين يلقا راحتو ..بالاخص الي معندو واليدين صعيييب عليه الحال وهذا حال زين الدين...
فرح : انا كنعرفو قاصح وصعييب انك تقلقو واخا هو على نقشة ودغيا كيتعصب ...كيفاش حتى وصل لهاد الحالة"حطات ايدها فوق قلبها" ...
الحسين : بنتي الانسان كيبقى انسان القوي هو الله مهما قصاح لينا القلب ومتان لينا الطبع كنبقاو بنادم...ولابد ميجي الي يمسنا فخاطرنا ولو من بعيد فمابالك بالقريب !!!
فرح : الي فهمت من هضرتك هو تخاصم مع شي حد ؟!
الحسين : هادشي انا مااانصيب نقولو ليك واش تخاصم ولا لا الي عارف هو خرج مقلق وماعلمناش لا فين مشا ولا فين كاين...هادشي هو الي يقولو ليك...انا الي عليا هو نوصيك عليه الى هضر معاك كوني نتي الحايط علاش يتسند وكوني نتي الراحة فين يلوح همومو...عارف هادشي يجيك غريب وعجب انا نعلمك بيه وليني ثيقي بيا ابنتي زين الدين ولدي وتربية ايدي.ملي تزاد.وهاهو قرب يكمل ربعين عام عارفو اش كيضرو واش الي ميضرو...وعارف شكون الي يريحو...
فرح"كتسمع ليه وكتزيد تعرف على زين الدين من عند الناس اي من جيهة مختلفة وهادي بحد ذاتها حاجة مزيانة تعرف شكون هو زين الدين فنضر الناس"
الحسين : ولدي منشكروش ليك قد ماهو سخي معقول ونيشان...نوصيك الى هضر معاك عطيه الخاطر وسمعي ليه..
فرح : متاكد غادي يهضر معايا ويقوليا شنو ضارو ...
الحسين : ههههه ابنتي ماعارفاش قيمتك عندو قداااش هي..قيمتك ماتوزن لا بذهب لا بمال قيمتك غلى منهم وصعييب تقدر بثمان...على ماعشت وشفت وانا معاه...
فرح"عينيها غرغرو" : وعلاش دخلني فحسابات انا معندي ذنب فيها...
الحسين : غلطة عمرو ينساها. ابنتي غلطة وذنب كلفو بزاااف ومزاال كيعاني منو...ضارو بيه ولاد لحرام والفسايدية...نهار بغا يهضر معاكم ويشرح ليكم من ورا ماهضر معاك وعلمك بالي كاين وقعات ليه كسيدة ضرب وليد صغييير وبقا معاه تا ولا بيخير من وراها طاح كومة بسكار يومين وهو مغيب وسيمانة وهو فسبيطار ومن تم بغا يهضر عيط ليك وتما فين علمتيه مايجيش وحلفتيه بمعزتك عندو ميجيش باش ميجبدش ليك عندي صداع ياك هادشي الي قلتي.ولا راني نكذب ؟!
فرح"نزلو دموعها يجريو مسحتهم بزربة" : لااا حاشا ..اه بصح...
الحسين : وعرفتي معزتك شحال تقامت عليه ديك الوقت شهرين وهو مخلي مشروع ديالو ومشا لتارودانت شهرين وهو معالم حد من غيري انا والحاجة بزز باش جا معانا لو مهز الهم لدوك دراري الي تكرفصو فالمشروع...عرفتي شحال وهو ينعس بيك ويفيق بيك ذنبك مهزوز فرقبتو ليوم دين...ملي مابغاش يضلمك عرفك بنت ناس علمك بالي كاين ...من تما ونتي فبالو وعمرو ذكرك بكلمة خايبة...مكاين غير بنت الناس بنت الاصل تستاهل المخير وتستاهل ماحسن..."بقا كيهضر معاها عاود ليها كلشي حتى المخاصمة ديالو مع خوها وهضرة عن ام الخاصرة ورغم ذلك صبر ومزال ناوي يهضر ويتصالح"
فرح"الصمت"
الحسين: هذا الجهد عليه هازها من هنا ومن هنا وعاض فالنفس وجهد لا جهد الله...اليتيم كيبقى يتيم مهما كبر وبلغ ودار الولاد...
فرح"كلامو اثر فيها بجهد تا ضرها قلبها على زين الدين وتاججو فيها مشاعر اخرى عليه " : د دابا احم "مسحات دميعة من عينها" دابا شنو ندير ماعرفتش !!
الحسين : لا هضر معايا فضل وراحة ولا هضر معاك عطيه نتي الراحة وخليه يتسند عليك...لا خوا عليك همو فرحي وسمعي ليه...زين الدين تاواحد مكيرتاح ليه الا ليا وقليييل وليني فهاد الغبرة والي طرا ليه موحال يشكي ليا ولا شكا ليك عرفي راسك راكي النقطة البيضة فحياتو وهي الي علامن يتسند وماكاين من غيرك...لا كنتو مكتابين حطو راس على بعضياتكم وتسندو على بعضياتكم وشكيو همكم لبعضياتكم...
فرح"غمضات عينيها وحلاتهم" : كون هاني اعمي ...
حط المصحف بين ايديه هز ايديه كيدعي اثناء الاذان حتى كمل دوز على وجهو بايديه وضار جيهة الحايط لهييييه فين بان ليه متكي حاط دراعو على عينيه ماهو ناعس ماهو فايق وانما هو فلحضة صمت وراحة من التفكير والحزن والغضب الي كان فيه.. فضل انه يمشي لهاد جامع الي فيه واحد من اعز اصحابو والي شحااااال ماشافو من قبل ميمشي لدبي طيلة الخمس سنوات..والي كان كيقرا معاه فالليسي غير كل واحد فاش سالا دار التوجه ديالو منهم هاد الصديق الي اختار الدراسات الاسلامية وبعدها قرا تخصص الامامة فكلية الشريعة واصبح امام فهاد المسجد وايضا يمارس مهنة استاذ التربية الاسلامية في التعليم الثانوي الاعدادي...من الي كان كيقرا معاه وهو شخص الوحيد الي كان كيجلس حداه ويراجعو فاش كانو فالباك كانو متفوقين بزوج فدراستهم...مكانش كيهز عينيه فشي حد حاضي قرايتو والدار والمسجد وهادشي تربا فيه من عند باه الي كان تاهو استاذ فحالو وملتزم فحالو ...
عز الدين"طبطب ليه فوق دراعو" : شبعتي نعاس اصديقي ههه..
زين الدين"حل عين وحدة هاز حاجبو فيه وحرك ليه راسو بالنفي" : نمتع راسي بكلام الله فبيت الله...
عزالدين : نوض توضى فالمراحيض واجي صلي ركعتين تحية المسجد وهز ليك مصحف من المصاحف الي هنا بينما تقامت الصلاة نصليو ولينا هضرة وكلام من بعد...
زين الدين"حرك راسو وناض ديك الساعة خرج من المسجد جدد الوضوء ورجع كيطوي فكمايم تريكو ولبس تقاشرو سما الله ودخل صلى تحية المسجد ومشا ورا عز الدين ربع رجليه حل واحد المصحف الي محطوط مع المصاحف تما قرا ليه ما تيسر فوسط داك الجامع كتحس بيه دااااافي وفيه واحد السكون فشكل ميمكنش تدخل وميدفاش ليك قلبك وتنسا همومك فحال شي حد كيحط دماغو العامر عند الباب ويدخل بدماغ خاوي ويخرج عامر بذكر الله...كيحس بصدى ذكر الله كيتردد فارجاء اركان المسجد...صلاو العصر.
عز الدين : تقبل الله ...
زين الدين"حرك ليه راسو" : اللهم امييييين"سرح ؤجل وطوا لاخرا مسند عليها ايدو..كيشوف فنقطة معينة..."
عز الدين : مزيان دابا ؟!
زين الدين"بدون ميشوف فيه" : نقولو اللهم لك الحمد...
عز الدين : اللهم لك الحمد فوقت الفرح ووقت القرح...فوقت الشدة ووقت الفرج...خليك على بال اخويا ديما اللهم لك الحمد..كاع مصائبنا من مكاتيب الله وافراحنا من مكاتيب الله..حنا فالدنيا تحت اختبار الله سبحانه واش ايمانا قوي بيه ولا ضعيف...تاكد اصديقي ان بعد الشدائد ياتي الفرج...
زين الدين"تنهد واحد تنهيدة طوييييييلة" : ونعم بالله...
عز الدين : لا حسيتي براسك مزيان طمن عائلتك عليك...
زين الدين"شاف فيه" : شكون بقا ليا ؟"طاحت فبالو فرح فهاد اللحضة"
عز الدين"تبسم" : كااين الله كاين الله...الا بذكر الله تطمئن القلوب...شحال ماجلستي ورتاحيتي شحاال ما ذاقت بيك ومالقيتي لمن تشكي كاين الله ومكاين ما حسن منو..مزيان جيتي لهنا وشفنا وجهك الكريم لينا زمااان ماشفناك..
زين الدين : درت معاك الفالطة با عز الدين ...
عز الدين : هههه ماعليش كل وفين تدها وداتو دنيا وشغلاتو...كل ما ضاقت بيك تفكر ان المؤمن مصااب وانك عزيز عند الله...يقول الله تعالى في سورة آل عمران الآية 186 قال تعالى: “لَتُبْلَوُنَّ فِي أَمْوَالِكُمْ وَأَنْفُسِكُمْ وَلَتَسْمَعُنَّ مِنَ الَّذِينَ أُوتُوا الْكِتَابَ مِنْ قَبْلِكُمْ وَمِنَ الَّذِينَ أَشْرَكُوا أَذًى كَثِيرًا وَإِنْ تَصْبِرُوا وَتَتَّقُوا فَإِنَّ ذَلِكَ مِنْ عَزْمِ الْأُمُورِ”.صدق الله العظيم
زين الدين : صدق الله العظيم.."جبد تيليفون من جيبو ووقف مستاذن منو"
عز الدين"حرك ليه راسو" : تفضل خوذ راحتك...
.ركبات مع جدها ومشاو لدار الحليب الي كتمشي ليها ديما فاش كيدفع ليهم جدها الحليب...تسناتو يمشي يصلي العصر فجامع تما وبقات جالسة فواحد الضليلة فيها طابلة وكراسا تما لداخل فدار الحليب...كانت كتهضر مع فوزي وعصام يلاه كي حطات تيليفون تا صونا ليها عاوتاني غير شافت الرقم وهي تشهق وقلبها ولا كيضرب يضرب حسات بريق سخون فحلقها وهي تجاوب بسرعة...
فرح"بلهفة تا بانت فصوتها" : زين الديييييين...
زين الدين"غمض عينيه وطلع نفس فور ما سمع صوتها" : نعااام..
فرح : فين غبرتي علاش طافي تيليفونك
زين الدين: تشغل بالك عليا كااع !!
فرح"بحزن" : يومين ونتا غابر عييت نصوني ليك ونتسناك والو...اشنو وقع ليك ؟ واش مقلق من شي حاجة ولا ضراتك مني شيحاجة..مرضتي ؟!
زين الدين : ابدا واش تجيني المضرة منك. الحنينة فيا..
فرح: اش واقع ليك ...الى ثايق فيا عاود ليا وخا صغر منك ومنعرفش حسن منك هههه غير عاود ياك عطيتك ثيقتي عطيني ثقتك وقوليا مالك...ولا ماتقدرش ؟!
زين الدين"عض شنايفو بحب وهو كيسمع ليها ويحس فصوتها كمية الحنان الي افتاقد يسمع بهاد الاسئلة الي كيكونو خاصين ومكيسولهم غير الي بصح باغي يعرف همك ويريحك..ومكاين ماحسن من الحبيب والشريك ..كيف حس هو وقال " : مكاين ماحسن منك من بعد الواليدين نديرو وسادي و نحط عليه راسي...
فرح"حسات بقلبها زادو دقاتو..ونطقات بصوت حنييييين" : مالك؟ "اختاصرات ليه فيها كلشي"
زين الدين : تزوجي بيا ؟!
"تزوجي بيا" زوج كلمات كانو كااافييين باش يبينو قدااااااش محتاج لفرح تكملو...تكمل النص الباقي او يمكن هي كل شيء..هي الي محتاج باش يحس بالي عندو عائلة مسؤول عليها محتاج علامن يحط الراس ويرتاااح محتاج لحضن يحتويه يحسسو بالي هو مهم وبزااااف زين الدين محتاج لكل للاحتياج المعنوي الحب الحنان الاهتمام الي يتقلق عليه والي يفرح ليه ومعاه...محتاج النواقص او بعبارة اخرى محتاج ل "فرح" ...بهاد زوج كلمات الي قال بفمو ماهما الا ترجمة لشنو كيقول ليه قلبو وعقلو الي تافقو على شيء واحد هو ان زين الدين باغي فرح وكل ما يخص فرح ... ف عن اي عشق نتحدث ؟!...
فرح"نزلو عليها هاد الكلمات فحال الضو خلات عينيها يخرجو وقلبها يضرب كانه كان ساكت قبل قليل حتى حياه كلام زين الدين...محساتش بايدها امتا تهزت وتحطات على فمها اما الفم تلجم والكلام تسكن والفراشات يديرو مابغاو فذاتها..."
زين الدين : فرح !!!
فرح"بقات شحال وهي كتستوعب شنو قال اول مرة كايجيها بحال هاد العرض وتعيش هاد الاحاسيس الي كتحس بيها نقية بعقلها كتحس بشي واحد داير بزااف ومستعد يدير بزااف على قبلك المهم تكوني مزيانة وليه...والاهم محتارم كل ذرة فيك...حسات بحلقها تبلوكا باش تخرج ليه كلمة حساتها ثقيييلة" : نن نعااام...
زين الدين : مالك ؟!
فرح"هزات ايدها كترعد بغات تحك راسها بغات دوز على جبهتها تلفات.." : ممم"تشحرج ليها صوتها" ماماليش احم ماماليش هههه
زين الدين : سمعتي شنو قلت ؟؟
فرح"بصوت منخفض" : ااه سمعت...احم نتا عارف شنو كاين..عارف عطيتك ثيقتي عارف اش كاين مم ماعرفتش كيفاش نشرح ليك...خووتي...
زين الدين"غمض عينيه ونطق بصوت اجش" : عاااارف وحااسب حسابي...فرح سمعيني شنو غادي نعلمك باش تفهمي مزيان...لا بغيت نتصرف ونهضر مع خوتك الي عارف هازين من جيهتي وبزاف"هز ايدو ووقف صبعو ماكد الحديث" نگولها ونعاودها عطاهم الله الحق وجات عليهم...عطيني وذنيك وعقلك ا فرح..من لول الي عطينا فرصة لينا من لول وانا شايفك لحلاال ماشيفكش لتفلية وخاطيني هادشي ...و لا بغيت نهضر مع خوتك شنو نقوليهم خليوني نهبقا نهضر مع فرح ونخرج معاها ؟! "خرج عينيه" ماشي فعايلي وماشي عوايد رجال...لا بغيت المفاهمة والطريق تيسر نعرف ونتيقن من مولات الشان واش قابلة راضية ندخل عليهم بايديا عامرين بالحلال وراسي فيه مايتقال...ندخل بايديا عامرين جايب وقصدي شريف ماشي قصدي خاوي ومافيه مايتقال..نبانو براهش !! نهار گلت ليك راكي بنت الاصل عنيتها ونهار عرفتك بنت الاصل مابغيتش نضلمك بلا ماندخل معاك فشلا وهادشي هاضرين فيه وعارفة المقصود شنو فيه...مناقصينا مشاكيل بغينا نديرو شي فين يدوز شي...
فرح"كلامو حسسها بالاطمئنااان فهاد اللحظة" : فهمتك ..احم ماا ع مم "تلفت ليها الهضرة ولكن هو فهمها ومابغاش يحرجها
زين الدين : عطي لراسك الراحة وفكري.ورجايا منك ماتعطليش ديري بحسابي بالي معنديش مع تجلويق...عندي نيشان وبلا كثرة الهضرة..عندك فهاد ليام عطيني الكلمة وانا نتصرف
فرح"شافت جدها جاي" : .زين ..
زين الدين : نعااام...
فرح : رسلت ليك ميساج قلت ليك خاصني نهضر معاك خاصك تعرف شحال من حاجة...ضروري نهضرو...
زين الدين"كمش حجبانو" : شنو واقع ؟!
فرح"يلاه بغات تهضر حتى نطق جدها "
محجوب : ياكما عيتي ابنيتي..
فرح : لا با ماعيييتش خههههه...
المحجوب"شافها ضاحكة من بعد ماكانت حزينة وباينة فوجهها" : يا الحليلات بانت ضحكة تاغونجة كبيدتي ههه
فرح"خرجات عينيها" : اباااا ...
زين الدين"جمع حجبانو من سمع كلمة تاغونجة وخا قلبو فرفر فاش سمع جدها قال ضحكتي "
محجوب : سكتي نعل بوك الكلب غا مني شفناك ضاحكة هذا الرباح..وخا معرفناش الي ضحكك...
فرح"تزنگو حناكها حيث عارفو زين كيسمع هههه" : اهههه الا كنت ضاحكة ابا غا مرديتيش البال...
المحجوب : اوكيه عليا انا ؟! تي ملي جيتي وتي فحال ميت ليك الميت ...
فرح : وصافي ابااا "كترمش فيه يسكت"
المحجوب : ماعلينا هاني جاي نشد من عندهم شي حسابات ونمسيو...
فرح : واخا"ضورات راسها تا شافتو دخل وهي تنوص حيدات من تما وباش تهضر تلجم ليها الفم ثاني تا بدات تحنحن" احم..زين الدييين...
زين الدين : الله اودي...
فرح"حطات ايدها على حنكها كمشات عينيها بخجل" : شنو غانديرو فالهضرة ؟!
زين الدين : فينك نتي دابا ؟!
فرح : انا عند جدي ف سيدي بنور...
زين الدين"مكاينش كيفاش يدير يهضر معاها باش يشكي ليها الهضرة فالهاتف مكافياش وهو اصلا من النوع الي قليل الكلام فالتيليفون ...من هضرتو حسات بيه باغي يحط عليها الراس بصح ويشكي ليها الي ضارو لكن العين بصيرة والايد قصية ما باليد حيلة ...تنهد وقال" : صباح نعلمك...
فرح : صافي واخا...
زين الدين"شاف ساعتو وهز عينيه نيشان قدامو" : تهلاي ليا فراسك فرح تفاهمنا ؟؛
فرح"بابتسامة فرحة وسعادة" : واخا كون هاني ...
لهاد الدرجة قادر الحب يغير فينا بزاااف ؟ بين ليلة وضحاها كيتبدل حالنا وتيبدل مودنا وكيولي هو المسيطر او المتحكم فمزاجنا ممكن فدقيقة يبكينا وممكن فدقيقة ثانية يفرحنا ...ممكن يخلينا بلا نعاس يا بفرحة يا بحزن...من بعد ماكانت مشطونة مخلوعة حيث طافي تيليفونو وغابر...وحزينة عليه ملي عرفات من الحاج الحسين الي جاري ليه وحياتو كيفاش دايرة...باتصال منو قدر يغير مزاجها من حزن وخوف وقلق لفرحة وسعادة وابتسامة......ضحكتها مفارقاتش شفايفها وعينيها مفارقتهمش اللمعة والبريق وهي حاطة راسها على زاج النافذة كتشوف فالطريق ماحدها كتقرب ماحد قلبها كيعلاو دقاتو وكتبان فوجهها تا ضار خالها شافها كتبتاسم غا وحدها...
منير : اتي ضحكينا معاك هههه
فرح", نعل الي سمعو اش قال"
منير"نغزها وهي تقفز" : الله اكبر...
فرح : خلعتيني اخالي حرام عليك هههه
منير : اهيا ناري على باطل هههه تي فين غاطسة من صباح وانا نابي عليك (نعيط ليك)وضحكي غا وحدك...
فرح : ااا ؟ تا فين غير تفكرت شي حاجة وصافي هههه"حكات راسها بخجل"
منير : هاااكاك"هز صبعو وشير ليها" هو هذا الكلينيك ؟
فرح : هو هذا دخل من الباب الي لور "حلات صاك وجبدات البادج ديالها ركباتو باش كيف يوقف تنزل واجدة حيث اليوم يوم الاثنين وكتخدم فالصباح ف جابها منير من سيدي بنور نيشان لخدمتها حتى تسالي عاد تطلع لدار...وقف سيارة سلمات عليه وخرجات هازا صاكها فايدها وساشية فيها لانش بوكس الي صايبات ليها مرات خالها وساشية اخرى كانت تاهي هازاها ....طلعات لخدمتها ...لبسات طابلية وشرعات فالعمل ديالها فالصباح...
ايمان : فرح "عطاتها ساشية فيها اسم الكلينيك" هادو ديزاناليز طلعيهم لجناح ديال ماكسيلو فاسيال..."كتقرا فسمية" لبروفيسور علي ...
فرح"صرطات ريقها فاش سمعات سمية يعني قريبة ليه...حركات راسها وشدات من عندها ساشية تسناتها تا دخلات لداخل وهي تمشي بزربة هزات ديك الميكة الي جايبة وخرجات كتزرب طلعات فسانسور وماحدو كيطلع ماحد ضربات كيتزادو...ديما كتبغي تشوفو ولا تقرب ليه ولا غير ريحة من ريحتو كتوثر وتحشم...تحل باب سانسور نيشان على الجناح مشات لقات امينة فلاكوي ناضت معاها تا حلات ليها الباب بالبصمة ودخلات نيشان لجيهة جناح بروفيسور علي...دقات الباب حتى سمعت...
علي : دخل..
فرح"يحساب ليها بغاها زين الدين واختار مكتب علي باش ميتيرش شبوهات ف خاب املها حدرات عينيها على الميكة كي دير ليها فهاد اللحضة حشمت تدخل بيها فكرات تحطها عند الباب.مزال كتفكر تا تحل الباب وطل عليها" : دكتور...
علي"بابتسامة" : اهلاا لالة فرح زارتنا البركة...دخلي بنتي دخلي...
فرح"تبسمات ليه" : الله يكبر بيك.."دخلات وحشمانة من الميكا الي هازة خهه" سمح ليا دكتور جبت معايا هادي..
علي"كمش حجبانو" : شنو هاديك ؟ ماعليش ابنتي دنيا هانيا..
فرح"كانت جايباها لزين الدين لكن الواجب والاصول والاخلاق تصرفو فهاد اللحظة وحشمات منو فكان ردها" : هادي واحد البركة من البلاد عندنا ليك "بخجل" سمح ليا هادشي علاش قديت..حيث منسيتش لجيست الي درتي معايا ديك المرة "الكريز الي جاتها ولقاها فالباركينغ طايحة" شكرا بزاااف...
علي"حل فمو بدا يضحك متقاجئ" : اااه اهههههههه الله يكبر بيك..."شد من عندها الميكة" هادشي خير البلاد ولا ؟ الله ضربتي العرق ابنتي ضربتي العرق ..."حل الميكة وجبد منها ميكة ديال زبدة بلدية وميكة اخرى فيها السمن الحايل المعروفة بيه دكالة..وكل مكيهز كيحل فمو ميت بالفرحة حيث هو من نوع الي يموت على البلدي لسواق وشعبية ...وميكة عامرة بالبيض البلدي فوسط تبن باش ميتهرسش...وقرعة كبيرة ملككة بسولوفان ..
فرح : هذاك لبن ديال دار وقرعة ثانية رايب مسوس"باش ميعرفش را ديال زين الدين قالت" كنديروه مسوس فدار جدي قليل قين كنديرو الحلو احم....والقرعة ثالثة ديال الحليب ديال هاد صباح..
علي"بفرحة" : الله يرضي عليك ابنتي ويكبر بيك هههه هادشي الخير هذا..
فرح"بابتسامة" : بصحتك دكتور...
علي : غا عمي براكة ههه..
فرح : هههه واخا..مهم"حطات ليه الساشية الي فيها اضرفة التحاليل" هادو ليزاناليز الي طلبتي ...
علي"كيجمع فداكشي" : واخا بنتي merci beaucoup ..
فرح"حركات ليه راسها واستاذنات باش تمشي حتى تحل الباب ودخل بكااامل اناقتو قميجة كحلة فوق منها جيلي گري وسروال فلون الجيلي طاوي كمايم قميجتو وخاشي ايديه فجيابو على شوي ترجع بلور هزات فيه عينيها كترمش وقلبها بغا يسكت وشحاااال توحشاتو فهاد اللحظة "...
علي"هز فيه عينيه" : الله ينعل معرفتك اولدي ..فين غبرتي هاد الغبرة فييين...
زين الدين"شاف ففرح " : فرح ...
علي"هز ديك الميكة معنقها تقولي خايف يخطفها ليه شي حد فهاد اللحظة را عندو العيد تا جاب لفرح ضحكة" : ها امانتي غانديها ونتا هانتا مع امانتك .."جر لفرح راسها باسو " الله يرضي عليك ابنتي..."خرج مخليهم بزوج راس فراس كانت كتشوف فيه وشوي تشتت نضر بالخجل ...تا حنحن ونطق اسمها وتبعها جملة خلات القشعريرة تسرى فذاتها"
زين الدين"رجع تاني كيحضي تفاصيل حركات وجهها تعبيرية من الخجل الي كيعشقهم ونطق بصوت مبحوح بجهد " : الفرحة. ديالي..
حلات الباب من بعد ماتاكدات ان لاكارط وشنو غاتحتاج كاين...ضارت جيهة الدار وهي تعيط لامها ..صفاء : وماااااي..
فاطنة : يعطيك الغمة تي نقصي صوتك نعل والديك...
صفاء : وابغيت نسولك واش بغيتي شي حاجة ؟!
فاطنة : تكوني جايا جيبي معاك كيلو مطيشة ورابعة ديال الحامض ولا تعطليش...
صفاء. : ومااعرفت على حسب النوبة امي امتا توصلني...
فاطنة : مالك باغا تجيبي الفلوس ؟! منعرف لوالديك لاش داك العجب شارياه لداك الخنشوش لاش...
صفاء : مييي سلكي وخلي الملحة كافية وكثري سكار من جيهتي رفعي ليا العنويات وخليني نتيق راسي تي مالك مالك امي .."حلات الباب وخرجات شافت سااعة كانت العشرة ديال الصباح...بان ليها سيمو وهي تجري لااا ماشي كتجري كاتنقز. تا طارت بتنقيزة جات قدامو تهز وتحط ماعرفها امتى بعتت..
صفاء. : حووووووبي...
سيمو : ماحب حد ومغانقضي ليك والو. وماخارجش معاك ومعانديش فلوس ومكنعرفش مك ..اش كاين ؟!
صفاء : تكون فكانون تكون فيك زريعة فالمصاصط وينوض ليك الخز فركابي ويطلع ليك الما فراس ويفشلو ليك المسائيل...سير انا بغيتك فينما تنوي تفشل وفينما توقف طيح وفينما تحل فمك يتسد وفينما تنوي تاكل دير بناقص...بغيت ليك ساحق ولاحق ورصاص المتلاحق ..بغيت ليك شية وكية وعصية من حيث لا تحتسب...
سيمو : معاك بالله وبشرع وامين للمدعين...
صفاء"طلعاتو وهبطاتو" : شتك مسيكسي الحالة !! نتا غا كتمشي فالصباح مانتك كترجع واكل العصا...
سيمو : غادي عندي موعد مع شي ناس معارف بخصوص ضي خدمة ..
صفاء : موطوغيزي توصلني معاك لبوسطة ؟!
سيمو : فروقشوغيزي"غادي على رجليه زعما فراقشو ههه"
صفاء : انا بغيتك تولي غادي على كرشك وراجع على ضهرك..نهار دبحو مك الي انا كون عرفت ادير ليا هاكا كون قتلوك ..نهار سقت ليك الخبار هاديك جريتي من رباط لهنا ولدابا باقي مارجعت وليني الي معندو زهز مااعندو تا فخلا دار بوه...
سيمو : نتي غا غبرت عليك مو طحشة لحيمة فدجين تفربل لمك المخ..."شاف عصام جاي" اااه با عيصوم...
عصام : عاش من شاف وجاهكم نتوما !! شفت غاتغبر صاحبتكم يغبر ليكم ساس"شاف ف صفاء" نتي نهار تخدم يحلفو عليك ! مشاركين معاك سم...
صفاء : الاح.."ترعد راسها جاب الله سمعها غا سيمو الي خرج عينيه وضار لهيه كيتهز ويتحط زعما را كيقاد فسروالو"
سيمو : اروروروروروووووييييي الله..
صفاء : اهههه احم لااا حاشا ههههه غير تدهيت هاد ليام اخويا عصام وصافي...
سيمو"ضار بزربة" : خويا عصام لاحافضك وصلها لبوسطة لا قدرتي اخويا خاصها تجيب شي حاجة"ماداهاش فيها الي خرجت عينيها" ..
عصام"شاف فصفاء الي كتخرج فعينيها" : تحركي نوصلك..
صفاء : ااا ؟ هههه الا حشومة منعذبكش..
عصام"هز حاجبو ودار براسو مسمعهاش ودخل خرج الموطور ديماراه وركب ضار لعندها" : تحركي ركبي..
سيمو : صفاء تحركي براكة من البسالة وتبرهيش اختي اويلي ركبي يوصلك.."خلاها بغات تاكل جنابها وماقدراتش ههه" ركبيييي يركبو عليك الجنون...
صفاء"مالقات مادير سوى تركب وتستسلم تاني يلاه كي ركبت كسيرا منطالق بيها تا تهزت وتحطت ضارت عند سيمو كتحلف عليه بالحس" : لا بقات فمك نبقى بلا صحة المسلوت الكحل زرگ الكمارة اليهودي..."كمشات فصاكها وضارت راكبة ومكنززة فحال موصلها عزرين هههه مسافة طريق حتى كان موصلها قدام البوسطة ووقف نزلات وهي دور شكراتو" شكرا خويا عصام...
عصام : شنو عندك هنا ؟! تسحبي !!
صفاء : اا ؟ لا لا غير واحد الكوموند وصلاتني فالامانة...
عصام : نوبة ؟
صفاء : لا مكيكونوش ناس بزاف كيكونو فبلاصة سحب ولا شيكات ...
عصام"شاف ساعتو" : يلاه دخلي انا نتسناك هنا..
صفاء : اا بلاش اخويا والله..و"مزال مكملاتش تا قفزت من صوتو الي جهد "اسيحت الوعد..
عصام : تحركيييي خلاص عليا من العياقة ديال الحبس الي ولات فيك!! ياك شي باس مكاين مدي ليك الورث ؟!
صفاء"بالخلعة". : الااا ...
عصام : ومالنا اش كاين ؟! ولا فيك ردان الهضرة مرة جايا نجبدها مع ملتك "غمض عينيه بعصبية مشير ليها براسو تمشي"تحركي انا هنا..."دارت فرررت معاودتهاش معاه مشات وجهها صفر بالخلعة على شوي يخلطها تما هي وصاكها ..جر لموطور شوية وهو يوقف فواحد ضليلة جبد كارو من جيبو شعلو كيكمي ويشوف فالناس تما..حتى حس بشي حد وقف عليه ومن ريحتها الي كانت كدير ديما وولفها فيها حس بيها ولكن كذب راسو انها متكونش هي تا سمع سميتو بصوتها الي غالب عليه تغنغين بداية البكاء...غمض عينيه وعقد حجبانو بغضب كل مكيتفكرها كيتفكر النهار الي سمع فيه اكفس هضرة والي بسبابها تحرمات من انه يكون زوجها بعد علاقة حب دامت لسنة...
لمياء"بصوت غالب عليه البكا..حالتها ضعافت ووجهها ولا عياان " : عصاااام...
وقفات عليه كانت لابسة جلابة قهوية وشال فالبيج رامياه بشكل مهمل...ضور راسو ناحيتها بانت ليه حالتها ناقصة . باش تاذي الناس هما موصلوك بوالو فهنا كتربح النية الحسنة وكتخسر النية السيئة ...وعلى نياتكم ترزقون...
لمياء : عصااام !!"عينيها غرغرو" ل لباس عليك !
عصام"حرك راسو" : الحمد لله اختي يسول فيك الخير...
لمياء"قلبها تقسم فاش سمعات ختي" : ياااك !! لهاد درجة ؟!"نزلو دموعها يجريييييو"
عصام"غمض عينيه كيتنهد" : بدلي ساعة باخرى...هادشي هضرنا فيه مكاين لاش يتعاود وماتحكيش على الدبرة راك تسمعي تاني الي ميعجبك ابنت الناس...
لمياء"قربات ليه ضامة ايديها كترجاه" : غييير قوليا شنو درت اعصام اهى اشنو درت ليك وعلاش درتي ليا هاكاك واش اذيتك وانا معارفاش اهى غير قوليا نصلحو ولا نعتاذر عااافاك"عوجات راسها"
عصام"خنزر فيها" :.بدليييي ساعة باخرى حسن ليك...ولا ندير ليك الي ميعجبك هنا حدا الناس"خرج عينيه تا ولا يخلع"
صفاء"جايا هازا كرطونة عليها لصاق مكتوب فيه الامانة..بان ليها عصام عاطي بصهرو وهي تقرب تال عندو" : عصام ممم"دورات راسها بانت ليها لمياء حسات بقلبها كيضرببببب " احم س سمح ليا.انا .نتسناك لهيه...
عصام"ضار لعندها بزربة" : لا مكاين لاش يلاه نمشيو...
لمياء"دلات فمها بحزن كتسوف فصفاء وطلع فيها وتهبط" : يااااك اعصام ياااك اهى هادشي باش بدلتيني دغيااا نسيتيني ..اهى مكاين لا درت وصلت لا والو نتا من لول باغي تسوسني وتشوف وحدة اخرى...كنت حاسة بالي هاد خيتي عينها فيك..
صفاء"خرجات عينيها" : سيحت الوعد البااااطل را كيحرق ابنت الناس شدي لجامك وسرحي عودك اختي احاااي !!
عصام"جهد صوته" : اش كتخراي نتي اااااش دوري تقودي عليا من هنا يلاه..
لمياء"غوتات بالفقصة والسم الي فيها " : بدلتييييييني ياااك بدلتيني بوحدة زرگة موسخة ماتسواااااش يااااك واااااااااااااااااااااااواااااو"غوتات بحر جهدها" بدلتيييييييني بخانزة ديال الخلا موسخة خانزة وخاااااااااايبة...
يلاه بغا يمشي ليها عصام يجرها تا ماعرف باش تبلى تا سمع صوت الكرطونة الي تلاحت لهييييييييييييييييييه وصاك لهييييييه ضور راسو بانت ليه صفاء كتلوي فشعرها بسرعة البرق تلاحت طارت عليها بشنقة من الحوايج وعينيها خارجين...
صفاء : اااااااااا شوري هاااااا شوري شوري الباطل را ساااهل اختهم اما انا بزاف على مك تكوني ختي بزاااف عليك...رديتينا بينا وبينو شي حاجة سكتنا حالك ساهل وعادي طيحي هاد الباطل الله اودي..وليني خانزة موسخة وخايبة من الفوق...
عصام"شاف ناس ضارو وبداو يتجمعو وهو يمشي ليها بغا يجرها منها لقاها ماتت عليها"
صفاء"ضارت عندو عينيها خارجين منضر وجهها يخلع..." : طلااااااق مني ولا نجمع الحزاااق كامل هنا...طلااااق مني
لمياء"شداتها من ابديها الي سانقين عليها بغات دفعها وهي تزيد تزير عليها" : وطلقييييييي الموسخة ااااه موسخة"خرجات فيها عينيها الي بياضو بداك السم الي فيها والغدايد ولا راسها كيترعد" وخااااايبة ضعيفة ومافيك تاحاجة زوينة يللاااااااه..."كتجر باش دفع ووالو.."
صفاء : ابزااااااف على مك...موسخة وخايبة وضعيفة ودايرة النفس يا عديمة النفس والبوووووطة اصاحبتي البوووطة وفيها نفس عليك...وعشيرتي المدلولة ودارت النفس يا كبيرة المدلولات يالي تفرقي دل على مالين العز ويشيط الخير...ابزااااااف على مك خايبة ودايرة طيسة وشااااان...ضعيفة وقرات وسايرة تقرا تاتخرا لمك على الوجه الصفريطة...
عصام"صعراتو فهاد اللحضة ومشا لصفاء دور ايديه على كرشها تا تطوات ليه بين ايديه وجرها بجهد من عليها مزييررر عليها وهي كتفركل وتركل بين ايديه تا تحل لاستيك شعرها وطاح ولات تجدب ليه تما" : وتركني الحبس تراااكني"خنزر فلمياء الي تجرتلت ليها جلابة وشال طاح نصو" وسيري غبري وااا غبري..."قرب وهضر بشوي " هاا علاش ضربت عليك هاا علاش لجمي فمك وتعلمي تهضري ونتي باغة تحفري طيري خوووتي بالباطل يلاه غبري عليا وجهك ..
صفاء"كتركل وتجدب ليه تما" : وتااا طلق وااا طلاق..
عصام : ريحي لا نجبدها مع دينمك "غوت بحر جهدو تا قفزت لمياء وسكتت صفاء للحضة تا غفلاتو عضات ليه ايدو على حر جهدها كاع داكشي الي جامعاه من فقصة جيهة لمياء خرجات فالعضة فايد عصام تا خرج منها دم وطلقها بلهلا يطريه ليه"
ثفاء"مشات كتجري لكرطونة ودارتها ليها على وجهها تا تظفع راسها على شوي طيح لمياء" : هااا لالاك اش خاصرة على راسها هااا الماركة الي معندس مك الي كبيرها صابون الكبريت مسلمة عليك نهار الخطبة ماعرفت راسي مسلمة على بنادم ولا مولا يعقوب ...نهار لمك تزها عندك الوقت تشري ثابون الحمااارة من عند مالين خمسة دراهم...كون فيك الفرح الي بيضة وزينة كون وجهك كي ناس ونتي وجهك شافو الجن وهرب ييري خوي عليك الما ونتي سم رعدك...اااااااا تسسسسسسسسسسسسس تسسسسسس "كدير ليها صوت اللفعة" جمعي جمعيييي السم الي طاح منك ...وديري فبااالك واحد المتاااال زوييييييين ...سعد الكردة كي الوردة ومولات سالف سعدها تااااااالف....
عصام"جرها من دراعها بجهد بايدو دايزة بد.م ودفعها ناحية الموطور" : تحركي ينعل بو مك فهاد النهار..."بغات تهضر وهو يخنزر فيها واحد التخنزيرة تا ضارت تركب وشعرها مشعكك"
كيف ركبات انطالق بسرعة محيد من تما من وسط كم من الناس الي تجمعو والشوهة الي دارت او وقعات مداهاش فايدو كاع واش تعضت ولا لا قد ما كان همو يحيد من تما...صعر ولكن ماقدرش يمد ايدو عليها او بمعنى اصح ميعطيهاش قيمة ويمد عليها ايدو اولا وثانيا كتبقى بنت وقدام ناس...مسافة الطريق حتى لدرب وقف الموطور قدام دارهم ماحتال يدور يهضر معاها لقاها نقزات طارت كتجري لدارهم جاب الله كانت محلولة وواقفة امها عند الباب معامن يهضر وكيدير يهضر...
عصام"عز ايدو شاف العضة وحجبانو معقودين عصباتو لمياء كثر ما تعصب من تصرف صفاء.."
فاطنة"فاش شافتو هو الي وصلها" : الله يرضي عليك اوليدي.وصلتيها...
عصام"مزال بنفس تعابير الوجه حرك ليها راسو" : دنيا هانية ميمتي..."حدر راسو ودور الموطور ورجع خذا طريق المحل..اما هي كي دخلات مشات كتجري لبيت ديالها سدات عليها وتلاحت فوق ناموسية كتنهج "
صفاء : هاااااي هاي هاي على وجه خرية المريض هاااي..."جناوح منخرها كيفرفرو خهه" قالت ليك زرگة اسيري الله يزرگ لمك المصاصط...اخ.."نطقات مها من ورا الباب"
فاطنة : وتي فين مطيشة والحامض الي وصيتك تجيبي ؟!
صفاء : لقيتهم باعوها امي كلها...مالقيتهاش صبري تالعشية وخرجي لسويقة ديال لالة زهرة وتقداي مقدية مقادة مي لا تبقايش كل نهار تقطري ...
فاطنة : اويلي تغرگ فيه !!
صفاء.: هادشي الي عطا الله صبري نسالي ونخرج عندك ضربيني.."سمعتها تبرگم مداتهاش فيها حطات راسها على المخدة تسرحات كتشوف فالسقف وتفكيرها مشا كلو لهضرة لمياء والتنقيص منها..فواحد اللحظة كانت غاتاثر فيها هضرتها وترجع تاني صفاء القديمة الي كتقلب على اي حاجة تخليها زوينة تغلاض تبياض وخا هي نقية وزوينة ملامحها زوينين بزاف وهي كلها زوينة حتى من سمورية الي فيها غزالة حروفها كلشي فيها زوين لكن هي كانت فيها عقدة من بداية حبها لعصام وهي الضعف اما تا سمورية عندها عادي لان بشرتها نقية فلحضة كانت غاتبدا ترجع كيف كانت فاللول لكن رجعات فيقات راسها ورجعات لوعد الي عطات لراسها وهي ثيق فراسها وتزين راسها وتهلى فراسها لراسها فقط وليس لاي احد...وكل وهمو فهاد الحياة تا حد متزاد مرتاح كل ومشاغيلو ومشاكيلو وكل فين مدهي وهذا الحال في مدينة الدار البيضاء بالضبط امام احدى العيادات النسائية...وقف الطاكسي خلصاتو نسبة ماشي كثيرة لانها اختارت اقرب عيادة ليها من بعد ما سولات بطريقتها ومعارفها...هزات عينيها وقرات اسم البلاكة وهي تجبد تيليفون من صاكها وصونات ليها فالوقت الي عارفاها غاتخرج فيه...
توبا : فينك ؟!
ضحى : ماما انا عندي امتحان من دابا ساعة مكاينش كيفاش ندير حتى نلحق عليك...
توبا : كيفاش ؟ وعلاش ماعلمتينيش قبل مانجي ؟!
ضحى : مافراسناش حتى لدابا عاد علقوه اماما وزايدون را قلت ليك ممسالياش هاد الايام باش نمشي لعند شي طبيبة اماما عندي امتحانات فسونطر والمدرسة...
توبا : واااخا واخا تاتسالي على خاطرك ماعليش فات مني خرجت ...
ضحى : ماما ماشي وقت هاد الهضرة براكة عليا الي وقع ليا والي كيوقع ...بلا متسنايني العشا غانمشي عند بابا نبات عندو
توبا : غاتخليني نبات وحدي ؟!!
ضحى : اماما را باش صباح يدوز ليا فلوس فالكونت نتقدا شنو خاصني...كلشي تقادا ليا والشي لاخور مخليتينيش نهزو اش بغيتيني ندير ؟!
توبا : واخا بنتي سيري عند باك علاش لا مزيان نيت يعطيك مصروفك ويدير الواجب ديالو...سيري وقتما ساليتي نمشيو...
قطعات معاها بقات واقفة كتشوف فالدنيا ناس غاديا ناس جايا طوموبيلات فشاريع دايزة والي واقفة...توبا الي مكانتش كتاخذ طاكسي الا للضرورة القسوى توبا الي كانت تمشي وتجي وهي فالسيارة معززة مكرمة كتلبس اللباس تقليدي لا فدار لا فالزنقة وكانو هما يتقداو ليها...هاهي فهاد اللحضة غاتبدا تقوم كلشي لراسها وبراسها وتقدا راسها وطيب راسها وخا كانت كطيب فالدار تاهي لكن كان فرق بين قبل ودابا...مالقات مادير سوى تستسلم وتعاود ترجع لدار...اما ضحى كيف قطعات معاها تكات على لافابو ديال مرحاض المؤسسة مسندة عليه كتفكر فهاد الحريرة الي حطات راسها فيها وف مهدي الي مابقاش سول فيها لحد ساعة.حتى باش يقوليها اش وقع لحد ساعة مكان منو لا اتصال لا استفسار حتى...عند كل مشكيل كتغرق فيه كتزيد تلوم راسها على النهار الي فكرات تسلم ليه جسمها وتحط ثقتها وحبها بين ايديه يتصرف بيهم كيف بغا...نزلو دموعها على خدها كيترجمو مدى الندم الشديد الي واقع ليها بسباب شخص ضنات انه غايكمل ليها احلامها تبعات الشخص الغلط فالوقت الغلط حتى طاحت فاحد اكبر الاغلاط الي ممكن طيح فيهم الفتاة حتى ضيعات ثاني اعز ما تملك من بعد الواليدين...
ضحى"حسات بنغيزات وجع العادة شهرية مجهدين تا كمشات عينيها وحسات بسخفة..." : اممممم...فففف"حلات صاكها وجبدات منو بونستيل رمات حبة ففمها وشربات من قرعة سيدي حرازم صغيرة هازاها معاها فصاكها رشات على وجهها شوية الما ومسحات بكلينيكس هزات صاكها وخرجات..كانت عندها ساعتين وقت فراغ خرجات من المدرسة كتقلب بعينيها على صاحبتها منال هنا وهنا...حسات بسيارة وقفات دورات وجهها حتى بان ليها نازل منها وعينيه كيشوفو فيها....
ضحى : ريان !!!
ريان"وقف قدامها" : ضحى!!
ضحى : شنو جاي دير هنا ؟!
ريان : جيت نهضر معاك ..
ضحى"خنزرات فيه" : معندك فاش تهضر معايا وماشي شغلك فيا ياك عطيناكم تيساع لاش جاي تانتا تسول فيا ؟!
ريان"حيد نضاضر شمس وشاف فيها مزيااان وساكت شحااال تاتنوات" : علاش ضربك هذاك الكلب ؟! حنا تيقناك مدايرة والو عارفين بنت داركم ومربية "كتسمع هاد الهضرة وكتحس بقلبها كيضرب" بغينا نعرفو علاش ضربك او "هز صبعو" باش منكذبش بغيت نعرف علاش ضربك باش نتصرف معاه نتي خرجي سوق وحقك يرجع ليك...
ضحى : ونتا علاش كدير معايا هاكا ؟! فاش همك يرجع حقي ولا لا ؟!
ريان : نتي كبيرة وعقلك مزال واقف ف عقل بنت يلاه دخلات لسن المراهقة عاد بانو ليها المسلسلات والافلام عند بالها داكشي كاين "حك لحيتو" باش منكذبش عليك هو كاااين ولكن مكيصدقش مع كلشي كيصدق مع الي كتخدم"ضربها بخفة لراسها" عقلها ..كيوقع مع الي سبقات مستقبلها فوق كلشي ...والي معندهم عقل كيصدق مع وحدة وسط مية وحدة..."شاف ليها فعينيها" عندك فرصة وحدة الي بقاات قدامك باش توقفي على رجليك وتعاودي تكوني راسك من لول وتصلحي الي هرستيه وهي انا...عاودي ليا كلشي وخليني انا نتصرف مابغيتيش. وبغيتي تبقاي نافخة لسما شحاال ماجلستي تخبطي مع لارض ومغايخبطك حد من غير راسك...
ضحى"هزات حاجبها" : رسلك زين الدين ؟!
ريان"ضحك بجنب" : زين الدين غا نسايه وحيدي من بالك انه مزال باقي يعاونك...زين الدين دابا هالعار يتكافا غا مع راسو عساك يزيد عليه المشاكيل ..."جبد من كرطابل مذكرة حيد منها ستيلو وكتب فورقة منها نمرتو قطعها ومدها ليها" فكري مزيااان وعيطي ليا..."كمشها ليها فايدها"
ضحى : الي خلاك تجي على قبلي غايخليك تعاود تجي تاني وتسولني...
ريان"ضحك" : هههه لا عجبتني ثقة فالنفس الي عندك... غا سمحي ليا بغيت نفخ ليك ريش ساعاك الغالب الله...جيت لواحد الغراض هنا وبنتي ليا واقفة"حرك ليها راسو وزاد...
سمعات اسمها وكيفاش نطقو وعطاه معنى خاص بيه خلا قلبها يفرفر بجهد وتزيد تغرق فيه...وقدام وقفتو حسات بكرشها كتقلب..باش تطول فيه شوفة مكتقدرش كيطغى عليها الخجل والتوثر..لكن وهو معاها كتحس بالامان والحماية كتحس بانه تقدر دير اي حاجة بلا متخاف..كمية الانجذاب ليه قوية..كمية الحنان وهو كيشوف فيها بعينيه ويتفحص تفاصيل وجهها الخجول المحمر وفمها الي كيترعد وهي كتبغي تهضر معاه والكلام الي كيتعثر والحروف الي شي كيخرج وشي كتسمعو غير هي...
زين الدين : رتاحي...
فرح"ضارت شافت فالمكتب وفوطويات الي لهيه" : هنا ؟!
زين الدين : حسن لينا "حنحن" عند بالهم نتي عند بروفيسور زياني...
تبسمات وهي دور جلسات فالفوطوي جامعة رجليها وصباعها مشابكين حتى جلس مقابل ليها وريحتو دخلات مع نيوفها فلا داعي ان اقول بان قلبها اصبح سريع النبض لانه يدأ يتسارع بمجرد ما دخل وريحتو سابقاه واحد الريحة فيه مميزة بزاااف
فرح"حنحنات محيدة تشحريجة الي فحلقها.قبل متسولو" : كيف بقيتي"بصوت منخفض شوي"
زين الدين"داير رجل فوق فخدو وصبعو على لحيتو مسندها عليه..حرك ليها راسو" : اللهم لك الحمد..."تنهد هاز عينيه لسقف ورجع شاف فيها" الي دازت على راسك تعلمك...
فرح"كتفكر هضرة الحسين وكتزيد تحزن عليه بجهد" : اش وقع ليك علاش غبرتي..
زين الدين"بقا كيشوف فيها وهي كتهضر وكيفاش بانت لمعة الحزن فعينيها وهي كتسول فيه...وبهاد سؤال رجعات لديك الليلة الي تلقى فيها واحد الجرح خلا فيه اثر وتما عرف راسو انه معندو سوى الله ولكن بسؤالها هذا وقلقها عليه زاد غرق اكثر فيها وتاكد زيادة انها هي الي غاتكملو وتهز معاه الهموم وتشاركو فيها...من نهاشر طاحت عينو عليها حس بحنيتها الي خارجة ...تنهد وهو كيسوف فيها وفنفس الوقت كيفكر منين يبدا وشنو يبدا..." : وقعو ليا شي مشاكيل مع العمة ...
فرح"بدهشة" : شكون واش خالتي توبا الي جات ديك المرة ف"سكتت حيث تفكرت داك النهار الي بدا فيه الحساب وتصفية وكانت هي ضحية" احم...
زين الدين"طوا لسانو بغيض بدون ماتشوفو..تفكر تاهو داك النهار وفقصة الغالي الي وصلاتو لهاد المواصل..حرك ليها راسو بثقالة"
فرح"مقدراتش تقوليه علاش حسات بالي معندهاش الحق" : ااه ماشي مشكيل هادشي عادي حتى انا كنتخاصم مع خوتي وكنرجعو عادي حتى دار مخطاوها المشاكيل...
زين الدين : خوتك ماعليهم حرج نهار طيحي مايفوتوكش ونهار توقفي هما وراك ونهار تمرضي عند راسك ونهار تبكي يمسحو دموعك...فرح ماعمرك تحطي خوتك فمقارنة مع شي حد..خوتك ميتقارنو خوتك رجال يتشد بيهم ضهر ..."تنهد ورجع كمل هضرتو" العمة قصحات معايا هاد المرة .."كيهضر وعينيه فلارض ساااهي رافع حاجبو فحال كيخرج داكشي الي فقلبو بلا ميحس..." نهار تقلب على الكاس الي بقا من وسط زينة الكيسان الي مشاو ... كتشوف وتشم فيه ريحة واليديك والدم الي بقا ليك منهم هو نفس الكاس الي يهرسك وينحيك من ديك الزينة...عمتي ماشي غير عمة عمتي حاط عليها وفيها كلشي منها ريحة الواليدين ومنها ريحة ختي الصغيرة شامة...ريحة البغدادي الي بقات...
فرح"تبسمات وسط حزنها عليه ملي سمعات اسم ختو ونطقتها بشكل مطول وثقيل" : شااامة ههه اسم زويييين..
زين الدين"حرك راسو ببشاشة فاش تفكر ختو صغيرة" : طير الجنة...
فرح : ضراتك بزاااف لهاد درجة !!
زين الدين : فيضات الكاس وهو خاوي وصافي من جيهتها..جرحات وحطات الملح...
فرح : علاش ؟!
زين الدين"عاود ليها على ضحى ولكن بدون ميقول شنو وقع حيث كيبقى شرف البنت الي مزال هو مماكدش ان بصح هضرة مهدي صحيحة ميجيش ويعاود ليها على حاجة هو رافض يقولها لراسو..."...
فرح"تنهدات من بعد ما سمعات ليه حدرت عينيها واحد لحضة بقا فيها الحال انه معندهاش مها الي دافع عليها تاهي فاش كان كيضربها باها...عضاات شنايفها قبل متهز فيه عينيها " : ماتلومهاش هادشي عادي متبغي حتى ام تشوف بنتها"هرب ليها صوت فهاد اللقطة الحساسة عندها"... كتضرب... "صرطات ريقها كاتمة الغصة الي في حلقها" هادشي عادي...
زين الدين"حس بيها" : مالمتهاش ومنلومهاش من لول عارفين وعايشين هادشي معنديش الحق نحط عليها ايدي.،،، فرح مغانجيش ونمد ايدي بلا موجب شرع.ضحى ماشي بنت عمتي ضحى حاسبها بنتي ختي صغيرة مني وفيا حاسبها تحت جناحي "ضرب صدرو بصبعو" نهار نشوف عليها الغلط ولا نسمع عليها شي حاجة منرضاهاش لراسي انا لول..الساعة الله الواحد يعذر الانسان ماشي ملاك افرح مايضربك ولا يعايرك من غير الي ضرباتك عليه نفس وتحسبو راسك ..شنو لاحني حتى نخلق لراسي المشاكيل"خرج عينيه" راسي وما شاد ليه الخاطر افرح راسي وممكافي معاه...
فرح : يمكن فاش تعصبت ماقدراتش تحكم فهضرتها ..احم..كان كيقوليا جدي اللسان مافيه عظم ..فاش خويا عصام كطرا لشي حد فينا انا ولا فوزي بالخلعة علينا كيبقى يعاير فينا حنا غير جيب يا فم وقول ههه ماعرفتش هي باش حسات ولكن الي فهمت يمكن فاش خافت على بنتها قالت هاديك الهضرة...
زين الدين"بقا كيسمع ليها ويحرك فراسو بشكل ثقيل وصبعو كينقر فوق جنب الفوطوي..حدر عينيه لنقطة بعيدة وقال" : كلام العار كيهرس والي تهرس ماكيجبر...
كلام كان خارج من القلب من قلب مجروح مكسور من اعز ناس واقربهم...صعيب تنسى وتسمح وساهل تشكي لكن صعيب لمن تشكي وماتشكي غييير الي عارفو وقلبك على قلبو وخاطرك مرتاح ليه وباغيه وهمك على همو وعارف غايفهمك وحتى الى مافهمكش فراحتك معاه فالكلام كافي وموفي...
فرح"سكتات فهاد اللحظة مالقات ماتقوليه باقي"
زين الدين"دوز على وجهو بتعب حس براسو نوعا ما رتاح فالهضرة..حط دراع ايديه فوق ركابيه وشابك صباعو وشاف فيها" : شنو المشكيل الي بغيتي تعاوديه ليا ؟!
فرح"هزات فيه عينيها ورجعات حدرتهم" : هضرت مع خويا فوزي...
زين الدين : فاش ...
فرح"بقات كتلعب بصباعها بتوثر وخوف..قبل ماتهضر" : قلت ليه بالي خدامة هنا عندك...و"قاطعها"
زين الدين : خدامة حدايا.ماشي عندي فرح الكلينيك ماشي ديالي وحدي ونتي خدام فجيه وانا فجيه ولو تكوني عندي منبغيش نسمع كلمة خدامة عندي...
فرح"تبسمات فسرها ورجعات كملت هضرتها" : مهم عاودت ليه حيث هو كيفهمني من صغري كنعاود ليه كلشي حيث ماشي غير خويا كنحسبو اقرب صديق عندي.فحالو فحال صفاء وسيمو...عالاقل الى عرف هو ...
زين الدين : يخفاف عليك الحمل من جيهة عصام .."حركات ليه راسها.."من بعد ؟
فرح"بحزن..عاودات ليه شنو وقع مع فوزي وحتى مشيتها لعند جدها لهاد الغرض...هي كتعاود ليه وهو كيسمع وكيزيد يتاكد ان الامر مطول مع هاد الخوت الي عندها..ورغم ذلك مصر وغايبقى مصر عليها.."
زين الدين : هادشي عارفو فرح وماكد منو غايطرا..هادشي طبيعي ماشي غريب يوقع...ماهضرتش معاهم لدابا "هز صبعو" الى ماعرفت واش باغية زواج مني"رد ليها البال تزنگت فهاد اللقطة." الى ماهضرتي نتي مايمكن ليا نوصل ونهضر..."هز صبعو ثاني ورجع تقاد فالجلسة كيشوف فيها بنضرة جدية" فرح سمعي مني مزيااان ...الهضرة الي قال فوزي وجدك بلا شك ميحتاجش شي حد يتناقش فيها...سمعي منهم وديري بهضرتهم...
فرح"عينيها غرغرو" : عصام واااعر بزاااف...
زين الدين : وشحاال جهدو فهاد تاوعوريت "الوعورية" شحال ؟!"خرج فيها عينيه" غايمد عليك ايدو !! يقتلك كاع بسلامة ؟!...كسبي خوك وماتخسريه...تجي منك وماتجيش من البراني..."شافها كتهضر وفصوتها نبرة خوف" فرح شوفي فيا .
فرح"هزات فيه عينيها"
زين الدين : مايكون غير الخير ديري املك فالله...عصام الي كنعرف معاك نتي ديري الي درتي ميفوتكش...ونهار يشوفك فرحانة وباغية را معندو ميتسال ديك الساعة...تفاهمنا ؟!
فرح"حركات راسها ب الايجاب..وهزات فيه عينيها" : شنو غادير مع عمتك !!
زين الدين"بقا كيشوف فيها قبل ميرجع يتسند على الفوطوي" : مكاين مايدار...عندي مشاكيل ومشاغيل فوق هادشي...
فرح : غاتبقا وحدك فالدار"باسف عليه" ...
زين الدين : كاين الله...ماعليش معندي مندير هاد ساعة تايفرج الله...
فرح"تبسمات تا بدات ضحك" : هههههههه
زين الدين"هز حاجبو" : مالك ؟!
فرح"حطات ايدها على فمها كضحك" : ههههههه كنت جاايبة ليك معايا الغلة ديال بلاد جدي..بيض بلدي زبدة سمن حليب لبن رايب مسوس ههه ..
زين الدين : ايه ؟
فرح : ههههه لقيت بروفيسور علي هنا وحشمت هازاها فايدي وحيث دار معايا داك لجيست ديك مرة ...
زين الدين"شير ليها بايدو زعما مشات" : داها هو ؟!"شافها كتحرك فراسها وكتضحك" هادشي ماغريبش عليا من جيهة الحاج الله اودي...
فرح"ضحكت تا تهزو حناكها وغمضت عينيها " : ههههههههه مرة اخرى ان شاء الله...
زين الدين"بقا حاضي ضحكتها" : الضحكة ومعامن كتجي ...
فرح"حدرت راسها وضحكة مزال مرسومة على شفايفها مع اضافة رشات الخجل من غزلو ليها .." : شكرا..
زين الدين"بطنز" : هذا واجب...
من بعد جلسة اخذ ورد جلسة الي كان فيها راحة لكل واحد فيهم..هز فيها راسو كيحك فشنايفو بسنانو وعينيه مصغرين فيها...تا نطق بداك صوت المدعدع مقفزها لكن ماشي بصوته وانما بسؤالو الي نسااات واش يسولو ليها...
زين الدين"بمجرد مكيتفكر سيرته كيركبوه جنون ههه..رفع حاجبو" : شكون داك خينا نتي ؟!
فرح : شكون ؟!"تفكرات اسماعيل" اااه اسماعيل ؟! . "شافتو مغوبش وداير واحد صبع كيمضي فيه بسنانو...تاتفكرت تاهي حنان" وشكون هي حنان ؟؟؟
زين الدين"هز حاجبو" : غانبداو نترادو هنا ؟!
سؤال بسؤال ناتج عن نار غيرة حااارقة بيناتهم كل واحد والغيرة كيفاش كتلعب عليه وتاكل فيه من لداخل خصوصا فرح الي اول مرة يمكن تحس بهاد نوع من الغيرة ..
فرح"بقات كترمش فيه خلعها بديك الشوفة الي مكتبشرش بالخير وهي الي شايفة غير شوي من صعرة ديالو كيفاش دايرة...فما بالك لو حضرات لتجنديخ الي كيجندخ ليا العباد..استجمعات نفس وبادرت هي الاولى " : احم ...كنت كنعرفو فلافاك فاش كنت انا السنة الاولى وهو فالاجازة...كان كيقول غايخطبني فاش نسالي حتى لواحد نهار بات ماصبح مابقاش بان ..نهار الي بان خسر عليا زوج كلمات الله يجيب ليك ماحسن مني...وانا مالايقاش ليه حيث باغي يخدم وانا "ضحكت" كنجيب ليه غير النحس..."هي كتهضر ومراداش البال لزين الدين واحد الايد من كثر ما زير عليها تسقط منها دم ..هزات كتافها وشافت للناحية الاخرى " صافي كل شاف طريقو وقضية بغا يخطبني ماعرفتش علاش قالها وهو عارف انا سديت من جيهتو يعني هو دابا حالو حال اي واحد عادي...فقط معرفة عرفتها وصافي وراك شفتي وسمعتي كلشي قدامك ديك المرة..ماضي وداز وانا نسيييتو غير جابتها الوقت...
زين الدين"حاول ما امكن يكتم نار الغيرة انها تخرج على شكل غضب لانه ماكيتحكمش فغيرته ناحيتها..بقا كيسمع ليها وهو صابر وساكت مهم ليه يعرف عليها كلشي مهم ليه يهضر معاها ويستغل هاد الجلسة الي بزز باش تنسقات على ودهم...حتى كملات وخذا وقت كااافي باش يرتب كلامو وحتى هو يهضر فنوبته ويشرح ليها شكون حنان ؟." : كنت ناوي معاها الحلال..."هزات فيه عينيها بزربة" هادي شي 5 ans العام الي غانمشي فيه لدبي..كنا معاهدين من بعد عام نتزوجو وتبقى تجي عندي مرة مرة لدبي فالعطلة فاي وقت سهل عليها الله حتى توصل لعام الي تبغي دير تخصص..."فهاد اللقطة فرح قلبها شعلت فيه العافية مكرهاتش يقول معرف تاوحدة من غيرها..هز حاجبو وهبطو" نهار يكتاب الفراق نهار الي متكون داير بالحساب وربي كيكتب "هز فيها عينيه ورجع بيها ل خمس سنوات قبل"
فلاش باك..
زين الدين"دخل بسيارتو لفيلا ديال بنسودة ونزل لقاها جالسة عند طابلة مقابلة مع لابيسين كتلعب بتيليفون فايدها وايد لاخرى متكية عليها حنكها وسااااهية تا وقف عليها لابس تيشرت بيض وسروال سورفيت كحل داير كاسكيط كحلة ونضاضر شمس على عينيه حيدهم وحطهم فوق طابلة وبقا واقف" : هاني مالك ؟!
حنان"هزات فيه عينيها" : انا قررت ازين الدين غادي ندير تخصصUrgentiste : médecin spécialisé en médecine d'urgence)"طبييب المستعجلات..وهاد التخصص مولاه ديما فالسبيطار "...
زين الدين"هز فيها حاجبو" : عرفتي فين كيقراوه ناس ؟
حنان"حركات راسها" : غادي نمشي نقراه ف USA "وقفات وحطات ايدها على دراعو" يلاه نمشيو ليها نقرا تما ونعيشو تما عافاك...هاد spécialité (التخصص) هي الي كنت كنحلم بيها من صغري ونتا عارف هادشي ..
زين الدين"مغزز سنانو" : وماعارفاش ابنت ناس بالي بيها مغايبقى ليك وقت فين تحكي راسك بقا غير تقابلي دارك تاهي؟ نهار لول شنو علمتك !! ياك علمتك لا بغيتي نكملو اختاري الي يخليك تكوني حتى فدارك نهار لول موقفتش فوجهك وشرطت عليك هادشي ؟ بلا منكثر عليك فالهضرة "خرج فيها عينيه" ماكدة بنت الناس ؟!
حنان : وااا زين الدين ياك كتقوليا الي درتيه انا معاك فيه ياك نتا كنتي كتعاوني علاش مابغيتيش نديرو...
زين الدين"خبط طابلة تا قفزت" : معاااااك ابنت ناااس معاااك. مافيهاش نقاش...l'Urgentiste صباح وعشية وبيرمانونص فسبيطارات الخلق لا نتي مع راجلك لا نتي مع ولادك هذا لا درتي بيها الولاد ريشك منتوف ووتادك مگلوعين...ابنت الناس انا باغي مراة نحل عليها عيني ونمسي عليها عيني ماشي امراة نشوفها مرة فالشهر !!!"هز صبعو" بغيتي ديريها الله يسهل عليك منوقف فطريقك وندير ليك مسمار جحا..الله يسر ليك نهار تبغي ديري autre spécialités علميني ..."يلاه هز نضاضرو وتم غادي حتى غوتات بالفقصة"
حنان : نتاااا كتفكر غا فراسك مافكرتيش فيا... واخا تشوفني مرة فالشهر اااش فيها ؟ ياك كتبغيني والي كيبغي يضحي وخا تشوفني مرة فالشهر كون معايا وخليني نحقق حلمي ماشي تفكر غير فراسك...كتفكر فامراة الي تقابلك بمرضك..هذا الى لقيتي الي تقبل عليك بديابيت الي فيك مريض وناقص وهاز راسك للسما"ضور راسو بجهد جيهتها مخنزر لاقصى حد تا جناوح منخرو فرفرو كان على شوي يجمعها معاها لكن صبر راسو وحيد الخاتم من ايدو وشير بيه لهيييه تاتلاح فلابيسين عطاها بضهر وزاد هاديك مشيتو لدابا..."
~~~هادشي كيعاود فيه وعينيه فلارض حجبانو معقودين كيهضر وفرح كتسمع وعينيها غرغرو...حتى كمل..بقا ساكت هز فيها عينيه وسرح ايدو وجمعها بمعنى هادشي الي كاين..
فرح"مسحات دمعة فطرف عينها بزربة وشافت فيه" : علاش ديابيت عيب ؟!
زين الدين : شنو بان ليك ؟!
فرح"عوجات فمها" : كون شفتو عيب ماتلقانيش كنسولك شكون هي حنان"خرجت فيه عينيها..وبوادر الغيرة ضاهرة عليها"
زين الدين"عض صبعو بين سنانو هز حاجبو وحطو حمقاتو ردة فعلها ونطق بنبرة خااترة خارجة من القلب " : وكيتسناو نفرط فالحنينة ديالي..
يتبع...
التعليقات
لا توجد تعليقات بعد، كن أول من يعلق.