ولادة من رحم الفساد الجزء 36

كانت مفاجئة صادمة بالنسبة ليه...لاخر ساعة كان واضح جدا انها مغاديش تمشي معاه...لكن قرارها هذا الي ماعرفش كيفاش حتى قرراتو ولو يعرف شنو داز عليها فهاد الايام مع داك الحلم و الاضطرابات كان غايعذرها ويعرف انه غادي تقرر تمشي معاه تمشي...

زين الدين"ماحيلتو لمفاجئة ولا لزينها الي فتنو خصوصا بهاد القفطان الراقي على جسمها والي عطاها شاغم خاص بيها...ولا لريحتها الي كستلبو ولا البوسة الي ختمات وقالت لكلشي متجيوش قدامي ولا لكلامها فوذنيه الي خلاه يتبورش ويحس براسو فعاالم جديييييييد دااافي مع صوت الفرحة..."

فرح"بشجاعة تصرفات وتحدات راسها وحاولات ترمي كلشي وراها لعل وعسى تشفي راسها من عذابها مع هاد المشاكل النفسية الي هلكاتها.." : ولكن منتعطلوش بزاف عافاك ..

زين الدين"بقى مكوانسي...سمح لايدو تسلل من تحت لمونطو لجنبها حتى دورها ورا ضهرها وزدحها لعندو...حط جبهتو على جبهتها حتى بدا صدرها كيطلع وينزل وانفاسها تخربقو حيث كانت مزيرة راسها باش قدرات تشجع وتنزل عندو ودير معاه دوك الحركات.." : وشنو بان ليك نديرو بناقص!!"خطف بوسة خفيفة من شفايفها..ريحة لكلوص بمذاق لفخومبواز خلاه باغي يمصمصووو ليها وعلاش لا ميصرطوش" شنو گلتي ؟

فرح"دورات وجهها هنا وهنا" : احم دابا يشوفنا شي حد...

زين الدين"تنهد" : سولتك...

فرح : الحفلة مابقاتش مهمة وغادي تسني على الشراكة ؟

زين الدين : كاين اهم ليا منك ؟

فرح"تبسمت وجمعتها دغيا" : وادابا وجدت راسي وفلاخر منمشيوش...

زين الدين"بقى شاد ليها فايدها وبعد كيطلع فيها ويهبط خصوصا الوجه والمكياج" : هادشي لبستيه راسك ؟

فرح"سرحات جلابل القفطان" : هذا من داكشي الي جبتي ليا فالعقد الي درنا فتارودانتي...وهادي"الخلالة" الي عطيتيني..

زين الدين"وهي كتهضر وصلات لخميسة تحنى باسها ليها من فوق صدرها" : زيدي كملي شنو مزاال...

فرح : والصباط عطاتو ليا ضحى هو وصاك حيث ماعنديش...

زين الدين : ندير وقيت ونخرج معاك خوذي شنو كيعجبك فهادشي...سي نو الي عجباتك رسليها ليا نكوموندي ليك عليها ولا تكلف ليك صفاء...

فرح"خرجات سنسلة من صدرها" : وهادي الي عطيتيني...

زين الدين : سميتها الي خدمت ليك...

فرح"ابتسامة خفيفة حركات راسها" : الي خدمتي ليا وحدي هه

زين الدين"هز حاجبو وحطو" : زيدي شنو مزال...

فرح : وصافي...

زين الدين : وهادشي الي فوجهك !؟

فرح : مكياج !! حتى هو من الي خذيتي ليا فالعقد..اول مرة نديرو...

زين الدين"مابغاش يقوليها مسحيه...ولا خلاها براحتها المباااركة الي بغات تمشي معاه وموجدة راسها...باسها فجبهتها وعاود قال" : خلينا فرح نديرو بناقص..."ماكرهتش يطلعو لداك البيت ميساليوو تالفجر"

فرح : ودابا علاش مابقيتيش بغيتي تمشي !! ياك بغيتي نمشي معاك ودابا درتي بناقص...

زين الدين"عض شنايفو" : زينك فتني...

فرح"مالقات ماتقول ليه هزات ايدها كتقاد فخصلات شعرها بتوثر...اصلا متوثرة وزادت وكتخمم انه فالحفلة غايكونو ناس جداد واختلاطات..."

زين الدين"قبط ليها ايديها بزوج باسهم وعاود شابك صباع ايدو فايدها" : يلاه...

هادشي كااامل داز تحت عينين ضحى الي كانت مبسمة كتشوف فيهم زوينين فشكل خصوصا زين الدين الي تبدل كليا مع فرح شتان الفرق بين زين الدين فالماضي وزين الدين الحالي...خرجو برا كان الجو بااااارد حل سيارة بالكونطاكت من بعيد وتقد حتى حل الباب الامامي بكل جنتلمانية وشير ليها بايدو حتى ركبات...تحنى مدخل راسو حتى قاد ليها سانتيغ وقبل ميخرج غفلها ببوسة لدوك شنايف خلاها كترمش...وعلى هو بحالو شي حد دابا فالفرحة !! ابدااا...ضار جيهة بلاصتو كيحل فصدفة الفيستة باش يقدر يجلس مرتاح...كيف دخل قاد سانتيغ حتى هو ديمارا طوموبيل وهي تشعل شاشة لوسط...كونيكطا تيليفون معاها ودوز لخط ل علي تمو خارجين من الفيلا...

زين الدين : الحاج خرجتي ؟!

علي : ها المدام يلاه ركبات...

امينة : ولدي زين الدين ماتقولش ماجبتيش معاك فرح...

زين الدين"عض شنايفو وعسل عينيه" : نتي طلبي مني شي حاجة ونگول لا ؟! شنو بان ليك..."ضار جيهة فرح وغمزها"

امينة ؛ نسمع بوذني...

فرح"نطقات بصوت مشحرج حشماانة" : هاني احم خالتي هاني كاينة...

علي : امصلييييييي عليك ارسول الله...شتي غانتي بنتي فرح براكة علينا....

زين الدين : ياك !؟

علي : موقليق اصحبي موقلييييق...

امينة : ههههه ايوى صافي نتشاوفو فالحفلة

فرح"بابتسامة خجولة" : ان شاء الله خالتي...

كملو المكالمة وزاد كسيرا ميسرين فالطريق...مرة مرة كيدور عندها يشبع من جمالها...ودوك شنايف الي بقى شاد فيهم الغلوص وخا شلقمها تشلقيمة خفيفة فالسيارة...اما هي وثرها بشوفاتو وهي ترمي عينيها لشاشة شافها كتشوف فيها وهو يمد ايدو وطلق اول اغنية جات...والي كانت...

يا بنت السلطان انا خديم وانت صحبك بالشان

بيني وبينك بيبان

زهرة دفلة في الكون قايمة زينك شحال يبان

مراره عذب شبان مسارك كله فواح بالعطر ولباسك كله ألوان...

الاغنية بقد ماهي موزونة بقد ماهي راقية بصوت البنت الي كتغنيها كتحسي براسك وسط رياض فالف ليلة وليلة وفحضرة السلطان والفتاة الجميلة..فالزمن القديم الجميل...الزمن الي كان الحب فيه عندو الشان...والى بغاك السلطان راكي همة وشان...الحب الي كان وقتها صافي وكان العيب عيب والصح صح...ماشي فوقت اصبح العيب صح والصح هو العيب...

سايق ومخفف السرعة ماكرهش يبقى غادي غير هو وهي والطريق ماتقاداش...كيسمع لاغنية وحتى هي كتسمع ليها...حتى مد ايدو فوق فخدها وسرح كفو كيحرك فصباعو بمعنى عطيني ايدك...

فرح"جمعات فمها بخجل..حيدات سنسلة صاك من ايدها وحطت ايدها على ايدو خشات صباعو وسط صباعها وكمش عليهم كيدوز بصبع الابهام فوق ايدها...حسات بتبوريشة والفراشات تقلبو...يمكن اسبوع وزيادة كانت كافية انها تراجع راسها...كافية انها تفكر وتحط الحلم بين عينيها وانه تفسير لشنو قالت ليها هناء اذا هملات زين الدين...واسبوع وزيادة انها تنسى الواقعة الي وقعات وهي مجية "عصااام" لهاد درجة دغيا نساتو وكانه ماجاش...ولمها انصب على زين الدين وحدو وخا حتى صفاء وهنا ضارت فيهم خصوصا صفاء...لهاد الدرجة عصام تمحى بشكل كااامل كانه معاش ولا رباها !!!...بقات ساهية كتفكر حتى رجع تاني الحلم ومنضر زين الدين كيقبل ف ميثاء بين عينيها الشي الي خلا ملامح وجهها تتبدل وتنزاعج...كانه كابوس كيبقى يزورها كل مرة كيخلي العافية تشعل وتحرق فيها كتحس بقلبها كيخفق بشدة وكرشها كتقلب ورعب كيذب فعروقها...كتحس بالخنقة ودنيا توقفات عندها بمجرد مكيدوز شريط الحلم بين عينيها...."

زين الدين"هز ايدها وباسها ورك بصبعو على ايدها تا ضارت لعندو.." : شنو بزرطك ثاني !!!

فرح"بقات مفيكسيا شوفة فيه..وساكتة"

زين الدين : الى عجبتك نديرو بناقص ونرجعو.."غمزها غمزة خفيفة وقال"شنو بان ليك...

فرح"صرطات ريقها" : شديتي فهاد نرجعو ههه..."ضارت شافت طريق" شحاال باقي باش نوصلو !!

زين الدين"كمش حجبانو وشاف فساعتو" : نص ساعة هاكاك...خلينا مثقلين المشية باغي نبقى معاك شوية بيناتنا...

فرح"قلبها ضرب" : فين ساكنين !!

زين الدين. : الفيلات ديال دار بوعزة...

فرح : هاد البلاصة كنسمع بيها بزاف..كنشوف بزاف فانسطاغرام كيهضرو عليها...زوينة !!

زين الدين : سي..فيها فيلات و des appartements sécurisé..كيشوفو فالبحر...

فرح : فين جات !!

زين الدين : تابعة لنواصر...عرفتيه ؟!

فرح : اه الي فيه المطار...

زين الدين"وقف فواحد السطوب وقرب لعندها باس ليها كتفها حتى تبورشت" : هو هذاك...شي مرة نتحركو خارج البلاد وتشوفيه حتى هو...

فرح"تبسمات" : خارج البلاد !! عمري مامشيت برا المغرب...

زين الدين : ماعمرك فكرتي تمشي ؟!

فرح"حركات راسها ب لا" : حتى القرايا كنت باغيا نكمل غير هنا ونخدم هنا..."تنهدات وهي تبدل الموضوع باش ميدخلش معاها ف شنو كانت كدير ملي كانت كتقرا...وخا هكاك را مزاااال معارفش فرح ديال الجديدة...فرح اش كانت كدير...كيفاش كانت كتعامل مع العيالات الي كانت كتقري فمحاربة الامية الخ...فرح الخيالي بنت عصام بالنسبة ليه مزال مجهولة..." مغايكونوش بزاف ناس كيف گلتي ليا...

زين الدين"مزال ضو الاخضر ما شعلش..متكي راسو عالكوسان حاضيها حاضي اللوحة الجميلة الي قدامو...كتلة الحنااان جالس" : الي على حد علمي هو الي علمتك بيه..."هز ايديه لفوق" الى كان جديد بحالي بحالك...نتي بقاي حدايا وصافي...

فرح"هزات كتافها" : اصلا مغاديش نقدر نتحرك من حداك...ففف.

زين الدين"حس بيها نتوترة..شد ايدها وزير عليها" : انا معاااك...ماعمري نفكر نبعد عليك..نتي الي بقاي حدايا ومعايا وماتخافيش ميكون غير الخير..وخا فضل ليك تحركي بلا بيا..فهمتيني !!

فرح"حركات ليه راسها تفهمات شنو قصد لانه لمصلحتها لا غير"

رجع كسيرا طوموبيل وتمو غادين فالطريق حتى تطلقات اغنية او كوفر اغنية اخرى. والي كانت بعنوان..انا بعدا مقابلة البحر لا يرحل بصوت شامة...

هي هي جايا تصفار و تخضار....هي هي لايحا السالف عاليزار....هي هي و حيث معشوقة فالنوار...يمشي و يجي بحاجتو مقضية جلول...انا بعدا مقابلة البحر لا يرحل...اانا بعدا خايفة حبيبي لا يمشي....انا بعدا و خاصني جيلالا و نفيق...يمشي و يجي بحاجتو مقضية جلول..."صوت كان ذهبي وهو كيغني اغنية للفنانة الاصلية الحاجة الحمداوية...كانو كلمات اغنية كانهم كيحكيو على الوضعية الحاااالية مع فرح...الاغنية بصوت والالحان كيتسمعو داخل سيارة بواحد الشكل كيطرب...كان غير راديو مطلوق فقط وكانو على اذاعة برنامج اغاني مهداة...دور راسو ناحيتها لقاها متكية على زاج وكتردد بفمها الكلمات...لو مكان مركز مع طريق لو بقى واواقف وحاضيها....حاضي دوك شنيفات الي كيتمتمو مع كلمات الاغنية خصوصا فاش كتوصل لجملة "انا بعدا خايفة حبيبي لا يمشي" كترددها بشكل باااين حتى كيتوردو حناكها وكيبان عليها انها تزيرات بفعل الجملة...بقات كتردد حتى نطقاتها بصوت مجهد بدون متشعر...

فرح : يمشي ويجي حاجتو مقضية جلول ..

زين الدين"مسند مرفقو على شرجم وصباعو بين ذقنو وحنكو..غير سمعها" : الله اكبر...

فرح"خرجات عينيها وهي دور جينة شرجم مابقاتش ضارت جيهتو"...

مسافة طريق من الفيلا لدار بوعزة بالسرعة الي بغى يمشي بيها هو كانت طويييلة على انهم يوصلو...وبالرغم من ذلك ماقنعش غير لقى راسو دخل لبلاصة فين كاينة الفيلا والي كانت تقريبا هي من احد اكبر الفيلات الي تما فداك سيكتور...لقاو طوموبيلات مصافين ودنيا شاعلين فيها ضواو وعند باب الفيلا واقفين زوج بوديكارد قد السخط...وقف السيارة وضار عندها...

زين الدين.: نزلو ؟!

فرح"حدرت راسها كتشوف فالدنيا والطوموبيلات" : كاين بنادم بزااف"صرطت ريقها وتزنگت حتى بدات تفرك فايدها على صاك

زين الدين : ممرتاحاش فرح نرجعو"اكد ليها بعينيه ونطقها بصوت كيبعث ليها الامان"

فرح : م م لا احم لا غير خلينا ندخلو غير متبعدش عليا عافاك..

زين الدين"غمض عينيه وحلهم كيطمن فيها" : معااايا وبجنبي متخطاينيش كبيدة ديالي...

حركات ليه راسها وهو يدور لور هز المونطو ديالو حلوالسانتيغ حتى تحل عليه الباب كان واحد من الخدم الي جابو للاستقبال الي كيتكلفو بسيارات المدعوييين ويحلو ليهم البيبان لابسين جبادور فالكرونة وطربوش فنفس اللون بالكبالة كحلة...حرك ليه راسو ونزل بان ليه بغى يدور يحل على فرح وهو يحنحن حتى وقف...

زين الدين : انا نتكلف."حرك راسو ورجع فين كان لبس زين الدين مونطوه وقادو مزيان مقاد شعرو ناقصو من جناب ومشذب لحيتو كيبان خطييير مهيب...ضار جيهة الباب عندها وحلو عليها مد ليها ايدو شدات فيه وهي تنزل شادة فجلايلها حتى وقفات...قاد ليها المونطو وقفطانها طلع وهبط لا تكون شي لعبة مزيرة ساعاك مكاينش بغى يهضر على المكياج ولكن خلاها براحتها..مد ايدو ورا كتافها وعنقها جرها لجنبو مقرب ليها ونطق" ديري ايدك ورايا فرح...

فرح"بتوثر" : هممم ؟ اه واخا..

دارت كيف قاليها وتمو غادييين لاح الكونطاكت لولد الي طار بزربة دخل لسيارة باش يديها يبلاصيها...اما هما وصلو عند الباب وبعدو ليكاردكور حيث فالكيت بلوثوث وصلتهم الاخبار بالي هو مول شي...حدرو راسهم وفتحو ليهم المجال باش يدوزو...اول خطو ليهم لداخل كانو الضواو شاعلين على طووووول الممر الحجري المؤدي للفيلا ومزينين بالورود بين احمر وابيض...لقاو زوج رجاال لابسين جبادور وسلهام بيضين وطربوش حمر واحد هاز طبسيل عامر بالتمر الملكي عادي ممعمرش وثاني هاز بلاطو تمر معمر بعقدة البيسطاش ومزوق بصوص بيسطاشيو...وتمر معمر عقدة لوز. ومزوق بصوص كراميل وثالث معمر بالكركاع...والحليب منسم بالزهر محطوط فوق الطابلة...وبالاضافة الى زوج رجاال اخرين لابسين الدشداشة او الكندورة الي هي الفوقية عندنا حنا واطاء الراس المكون من القحفية والي هي الطاقية والعقال الي هو قطعة من الصوف كيديروه باش يتبتو العمامة الي هي داك الزيف البيض الي كيديروه فوق هادشي ويطويوه عاد الخيط الاسود باش يتنسو عليه القماش...هازين اباريق القهوة ديالهم ديال الفوالة او الضيافة بلغتنا مع فناجين صغيرة خاصة...

زين الدين"هز من طبسيل تمر معمر بالبيسطاش عارفو عزيز عليها ومدها ليها" : شوية الحليب ولا هذاك الي تما "شير ليها"

فرح : احم..شنو هذاك ؟

زين الدين : ضيافتهم ديال تما..قهوة بطريقتهم...

فرح"بتردد" : لا غير هاد تميرة صافي...

زين الدين"ضار عندهم وهز ايدو بمعنى صافي...تقدمو غير شوية حتى تم جاي شخص طويل شوية...لحيتو كثييفة وبيضاء فالملامح كيشبه لغالي...حجبانو غلاض وكحلين مواصلهمش شيب...لابس نفس لباس هادوك غير هو حوايجو ثوبهم باهض الثمن ماركة غالية...وزايد عليه لابس"البشت" الي هو سلهام شفاف لولنو اسود مخدوم بسفيفة من قدام مفروق(الي لبسوه لميسي فاش شد كاس العالم) من اجود وافخم الماركات وريحة عطرو واصلة مخلطة بريحة البخور المميز روايحو مزيج ريحة العود والعطور العربية الاصيلة..."

عبد الصمد : يا هلا يا هلا والله بالغالي"مد ليه ايدو سلم عليه"

زين الدين : الله يكبر بيك الحاج عبد الصمد...

ع.الصمد"حدر عينيه وضار لهيه شوية" : بنتي مرحبا بك...

زين الدين"حك على كتفها بلطف بطريقة مبانتش ليهم لكن حساات بيها هي" : الله يحفضك...

ع.الصمد : اتفضل..الحاج علي موجود اوهو وزوجته...

تمشى جنب زين الدين كيهضرو وفرح جنب زين ممفاوتاش عليه حاسة بتوثر شديييد عاضة فنفس ومزييييرة فينما كتفلت كيقربها زين الدين ليه ويزير عليها كيخليها تحس براحة وهي بجنبو...حتى مشى بيهم لداخل كانو شي ربعة طوابل كل طابلة فيها ستة ناس كل كادر وزوجته كل مختص كبير ومراته...حتى وصلو لطابلة رئيسية الي كاين فيها علي وامينة و هاد عبد الصمد ومرتو نارين الي كانت بعباية فخمة مزينة بليسطراس من حجر الزمرد كاملة بشالها لونها واحد من الوان درجة الوردي..عينيها رماديين لوزيتين...شبه ميثاء بنتها كبييير معاها...

ع.الصمد : اتفضل...

زين الدين"حل صديفات الفيستة وقرب جر ليها الكرسي عاونها حتى جلسات وجهها مزنگ فمها كيترعد كلها كترعد..حك ليها ورا ضهرها باش تهدن وجر كرسي وجلس حداها...قرب لعندها " : تهدني فرح هاني معاك وحداك...

فرح : دنيا عامرة بزاف..هادوك كيصورو...

زين الدين : c'est normal الصحافة هادوك...مي مغاديش يحطو تصاورك معايا مزيان !؟

فرح : لا يحطوني معاك...ياك انا مراتك...

زين الدين"هز راسو شاف هنا وهنا ونزل مقرب لوذنيها ونطق" : احلى تشيتشونا مرتي ديالي....

متكي فوق سداري ايد شاد بيها تيليفون كيبقشش فيه وايد مدخلها فوق كرشو كيحك فيها...جالس حداه فوزي مضارب مع الباندة الي دارو ليه من بعد ما حيد الجبيرة...جات هناء هازة قصرية شعرية ووراها ع.العالي هاز بلاطو فيه الما والمعاليق وطبسيل الهريسة....

الي شاف عصام يقول عاشق ولهان وهو را الي دخلو لعند صفاء يمشي لعند فرح يبقى حاضي داك الواتساب ديالها مافيه لا صورة لا والو بحكم..والو هو باغي غير يشوف ديك en ligne وصافي بحال الى قالت ليه السلام عليكم ولا خويا حبيبي فحال الى هضرات معاه...واحد شوي وصلاتو صورة من عند زين الدين..مشى كيزرب دخل وهو يلقاه راسل ليه صورة فرح بالقفطان فاش كانت جايا هي وياه داخلين لديك الفيلا...طلب من المصور يصورها وحدها ورسلها ليه...ماحسش براسو حتى ناض جلس بجهد...عينيه ولاو حمرييين كيزومي فالصورة ويعاود...كيشوف فيها واخا مزينة ولابسة مزيان مبتاسمة الا ان وجهها ماشي هو هذاك باين عليها القلق والتوثر...

فوزي. : مالك ؛!؟

عصام"دور ليه تيليفون" : فرح ...

فوزي"جات هناء حداه وعبد العالي كلهم تكبو على فوزي صدقو شايفين هما وهو لا تا بعدهم" : والعداااااو ماشفنا معاهم تا حبسة اصحبي...

هناء : واااعرة بالقفطان ههههه"مع عصام موريهم من تيليفونو بان ليهم ميساج صفاء مشاااااابح قدااااش وصلو فيه"

صفاء : هههه ايوى شوف نتا الي عطيتيني جوابي قلت ليك حتى تصالح مع ختك عاد نوافق على زواج...ماگلت حتى عيب..

هناء"صرطات شعرية طاااايبة"

فوزي"ناض بغى يعيط لجدو لقاه جالس كياكل واخا هكاك عيط" : وبا فينك اصحبي...

المحجوب"هز راسو مغوبش" : گرينك انا هاني حداك...

ع.العالي : سي عصام شد تيليفونك...

عصام"هز حاجبو" : كيفاش ؟؟ "دور تيليفونو بان ليه ميساج صفاء...شدو وطفاه خشاه فجيبو وهز معيلقة سمى الله بدا ياكل هز عينيه فيهم لقى هناء وفوزي خاشيين ففمهم وحابسين ضحكة" نعل بو مكم...كولو وهنيونا الحبس مالنا...

فهاد الاثناء زين الدين مدهي مع فرح وعلي وامينة حداها فرح جات بين زين وامينة حسات بالامان شوية ونقص ليها توثر الشديد...اما فنفس المكان فالفيلا لكن الفوووق فالبيت او الجناح ديال ميثاء بالضبط فالغرفة جالسة قدام الكوافوز ديالها وعند راسها وقف مصفف الشعر ديالها الي جا من دبي...و خبيرة الميكاب تاهي لكن من الدار البيضاء غير هي معروفة...بالنسبة للباس ف شريقة هي الي مكلفة ليها بيه....

ميثاء"حطات ايدها على سبارادرا الكبيرة الي فوق منخرها" : اييي تعورني والله...بتختلف اذا حطيتي ميكاب صارخ ؟!

ميكاب ارتيست : لا واخا تبان عينيك وشفايفك تبار الرحمن عاطيين للعين...بالاضافة ل جمال جسمك خطيييير...

ميثاء : ثانكيو حبيبتي تسلمي...

شريفة"خرجات من دريسينغ هازة اللباس فالغلاف الخاص بيه وحطاتو فوق ناموسية مسرحاه" : كاهو وصل...

ميثاء : والله تاخرنا...

شريفة : السندريلا دامن متاخرة والله عاااد ههههه

ميثاء : ترى بصدگتش (غادي نتيقك)

شريفة : والله ما كذبت...

حركات راسها ورجعات تا كملو ليها الميكاب الي كان سموكي برز لون عينيها بالعدسات كانو خوضر ومع كبار لوزيتين بانو فوق خطيييرييين صارخييين...خلات سبارادرا على منخرها حيث باقي مبراش...رش ليها برافان شعر على شعرها الي خلاتو على طولو بوكلاتو ونفخو ليها الفوليم ديالو جا مفخفخ...

ميثاء : حضرين لي عطري...وشوفي اذا كان حلو انتي تعرفين لاني تراني الحين ما اشم شي...ما ادري اذا كان عادي او لا...بس بسأل زين الدين "بابتسامة عذبة" تحت وبشوف اذا ها شي عادي...

شريفة : انتي من زمان عندك اضطرابات بالشم..ويمكن فسر لك انه بسبب مشكل انفك صار دا شي...انتي بس روحين البسي وبنشوف...

مدات ليها شريفة اللباس وهي تدخل كانت لابسة بيجامة وردية ديال ساتان ببينوارها دخلات لداخل من بعد ربع ساعة خرجات هازا جلاليها لانها اختارت تكشيطة ملكية فالبلومارين بالسفيفة ملكية فنفس اللون...بمضمة رقيييقة ديال ذهب جات حتى لوسط وتزينات ببروش صغير مرصع بحجر ازرق لون التكشيطة وابيض لامع...وصباط طالون مرصع بالحجر طالونو عااالي...شادة فجلايلها حتى وصلات عندها شريفة عطاتها العطر رشاتو عليها كامل غرقاتو تا خلات هادوك يكحبو...وهي تمد ليها البنت لاخرى مبيخرة تبخرات مزيااان بالعود القماري...عطاتها بواطة طقم الي غايكون مع تكشيطة حيدات سنسلة ديال الهلال ونجمة ولبسات داك طقم الماس رقيييق سامبل دارت حلاقاتها..

شريفة : شهييييق زفيييير...بسم الله ماشاء الله وتباااارك الله...الف الصلااااة والسلااام عليييييك سا حبيب الله محمد...

ميثاء"خذات شهييييييق وزفرات تا تزنگو حناكها" : عطيني البروش...

شريفة : امري حبيبتاي..."ضارت جيهة الماريو حلات الكوفر فور وهي تجبد ليها ساشية فيها اسم محلات البغدادي...جبدات منها بواطة وهي تجبد البروش حطاتو ليها قاداتو ليها مزيان"تمااام...

ميثاء"مهبطة عينيها لبروش كتشوف فيه دوزات عليه بصباع ايديها حمقها بجهههد...وضارت جيهة المرايا كتشوف فيه...بروووش "خلالة" الي كان نفس تصميم الخلالة الي اهدى زين الدين لفرح...والي كان تصميم خاص ديال باه هو الي عند فرح وهو نفسو الي عند حتى ميثااااء...بقات كتشوووف فيه فوق صدرها من جيهة ليمن...نفس الجيهة فين حاطاه حتى فرح

ميثاء : والله تصاميمه وتصاميم ابوه يخبلو(يحمقو)"عضات شنايفها بحب."

رجعات كتشوف فيه فالمرايا وتقيس فيه...بروش تقلييدي مخدووم بنفس الطريقة باش مخدوم البروش الي عند فرح...نفس التصميم بنفس الدقة تماااما...

شريفة : لازم تنزلين ماتتاخرين...

ميثاء : توك گلتاي سندريلا...ايش بدل راييتش الحين...

شريفة : ههههه بس سندريلا كان مقرر لها الساعة 12 منتصف ليل ترجع...انتَي بتنزلين الساعة تناش 12..

ميثاء"بصوت تهديد" : بتنسين نفسش انتي منو..ويش تسوين معي...عاد عن الغلط الكل لازم يعرف مكانه ومستواه...(نسيتي راسك شكون واش كديري معايا...زعما قصدات متنساش راسها بالي هي خدامتها)...

شريفة"جمعات الضحكة" : اسفة...

ميثاء : عطني شي احطه فوق اكتافي...الخارج في برد ...

شريفة غمزات البنت الي مشات كتزرب لواحد تستيفة ديال مونطويات منهم واحد كاب كيترمى فوق الكتاف خاص بتكاشط والقفاطن كيمون فيه فيرور ولا ريش...جبدات ليها الي كانو معلقين ديجا قبل متوصل التكشيطة من عند مولات القفاطن الي صمماتو ليها قبل اسبوع من الحفل وموصل حتى لاخر ساعة من بدء الحفل....عطاتو ليها وهي تقاد ميثاء الحزام ديال تكشيطة الي كانت لون واحد مافيهاش اضافات فقط سفيفة ملكية جاتها غااااية لان فورمتها خطيرة كتاف وصدر ومؤخرة بارزة وبطن منحوت...زيادة على الميكاب وشعر المخدومين تقريبا غطاااو على الانف الي مديورة ليه العملية وباقي منفوخ من جناب...وغطاو ليها تورم عينيها وزروقيتهم نتيجة العملية ولات كتبان كانها مدايراهاش لولا سبارادرا الي دايرة وتحت منها فاصمة صغيرة....

ميثاء"رمات عليها شريفة كاب ديال فيرور فوق كتافها حيث كاين البرد وضارت دارت فيه فيليل على شكل فراشة رقيييقة ديال ذهب مرصعة بحجيرات خفاف سداتو من وسط تغطات الخلالة" : اشوي وبشيله (شوي ونحيدو)اثناء توقيع او قبل وقت التصوير..لازم الليباس يبان بالكامل ..

شريفة : اي تمام...

فهاد اللحضة فين جالسين الطبلة مزينة بشكل يفتح النفس ب مقبلات من اغلب الاصناف الحلو والمالح وحتى الحامض..وبعض مقرمشات...

زين الدين"نزل ايدو تحت طابلة وقرب لفخدها حك عليه بلطف دار ليها قشعريرة حتى نغزها وهي تشوف فيه" : تشربي شي حاجة !!

فرح"متوثرة" : م ماعرفتش...

زين الدين"تحنى مقرب وجهو لعند وذنيها وفنفس الوقت عينيه فطابلة والمشروبات الي محطوطين تما" : كاين بزاف تما...شنو مشهية تما...

فرح"شافت فين كيشوف بان ليها واحد المشروب لونه احمر" : ديال فريز هذاك !!

زين الدين"شاف سمية المشروب فالكاس الكبير" : ميلونج بين رمان والحامض..شوفي سميات تما ونتي شنو تختاري...

فرح : احم..صافي غير هذاك...ونتا متشرب والو..."ضارت كتقرا فالسميات حتى بان ليها عصير الرمان طبيييعي بوحدو بدون اضافات" خوذ ليك هذاك الرمان زوين مغاديش يدير ليك مشكيل على حساب ديابيت...

زين الدين"حرك راسو وودور وجهو نصف دورة طرطق صباعو حتى جا السرباي وتحنى لعندو...عطاه الطلبية وتكلف السرباي الي مشى لعصائر قاد الكيسان قدامهم زوقو ب صوص الفريز لداخل وخوا فيه العصير الي بغات زوقو بفريز من جنب وحط فيه باي بريستيج وعطاه ليها جا بغى يكرر نفس العملية وهي تنطق بلا متشعر"

فرح : لا خليه ليه naturel عافاك..."خرجات عينيها وهي تكمش نسات راسها...حتى كمش ليها زين الدين فايدها بمعنى دنيا هانية..."

زين الدين"عطاه الكاس ديالو الي حيد منو الباي معندوش معاها...ورجع شاف ففرح" : خوذي شنو عجبك ماتحشميش...

فرح : هههه ماعرفتش كلشي بان ليا زوين وكيشهي...

زين الدين"مقرب كيهضر معاها بصوت تسمعو غير هي" : بيني وبينك...بحالي بحالك.."هز ايدو كيحك فلحيتو ويشوف بتفكير" عرفتي شنو ؟!...ختاري ليا ونختار ليك "غمزها شنو بان ليك"

فرح : والى ماعجبكش والى كان sucré !!!

زين الدين : ماعليش نجربو شنو خاسرين...

فرح : وتحمل مسؤليتك..."حرك ليها راسو بمعنى يا لالة غا قضي..الهدف الي باغي يوصل ليه هو تزيد تطلق ومتحسش براسها مكنززة مزيرة ويغلب عليها ستريس بشكل قوي...اختار هاد الطريقة باش تنسى وترتاح معاه..." هههه صافي..."عضاات شنايفها كتشوف اشنو تختار ليه بقات تشوف هنا وهنا كانو مقبلات محطوطين منضمين فحال لوحة تشكيلية...كان تريتور جايب زوج ديال لي شيف معروفين الشي الي خلاهم يحطو اصناف ممزوجة...ماتمشي عينها غير لواحد الكيسان فيهم طبقة لون بني طبقة رمان طبقة فيها داكشي خضر هما كيسان صغار وفيهم معيلقة صغييرة لوسط...هزات الكاس وهي تعطيه ليه" ماعرفتش اش هذا غير ذوق وگوليا واش زوين ناكلو حتى انا..

زين الدين : علاش لا...نجرب شنو خاسر انا "شدو من عندها" مابانش ليك فشكل هادشي ؟!

فرح"كترمش" : ماعرفتش فيه رمان وباقي بان ليا مالح..

زين الدين"خسر سيفتو بان ليه هادشي ماهكاكش..هز شوية بالمعيلقة كلا منو وكيتمذق حتى حرك ليها راسو" : مزيان...

فرح"شداتو من عندو" : ارا نذوق هههه"كلات منو تاهي وزادتها ثانية وثالثة" بنين ...

زين الدين : ميزتي شنو فيه !!

فرح"كتاكل وتقوليه" : هذا رمان..وهذا عدس ومقرونية وهذا خبز مقلي معرفتش اشمن خبز جاني فحال شيبس..معاهم ثومة والربيع مشحرين وبصلة مقلية وهذا ربيع خضر مزوقين بيه ساقيينهم بالحامض وهادشي الي حلو شي حاجة ديال رمان الى مخفت نكذب دبس رمان...

زين الدين"كمش حجبانو" : شنو هاد العجب !!!

فرح : انا عجبني بزااف ماعرفتش علاش..ميمكنش نسولهم اشنو هذا !! عافاك باش نديرو عجبني...

زين الدين"عيط لسرباي الي تحنى تاني لعندو وشير ليه ناحية الكاس" : شنو سميت هذا ؟؟!

السرباي : عطيني زوج دقايق نشوف MENU "هز الايباد وداز لموني مشى لتصاور الكاس.." موسيو هذي سلطة سورية الاسم "حراق اصبعو"

زين الدين"هز حاجبو مصدوم من سمية" : كيفاش !!"هز صباعو" صافي الله يجازيك..."ضار عند فرح وشاف فيها ديييك شوفة ديال ايوى لاااش"

فرح : ههههههههههه ماعرفتش واش غانعقل على سمية ولكن راه عجبني"حطات ايدها على فمها حاولت تحبس ضحكة خصوصا وجه زين الدين واحد الملامح دار كيضحكو"...

وقفات قدام بداية الدروج وهي تهز جلايلها وتمات نازلة بالقاااعدة وفايدها لاخرى الايفون مخدمة خاصية تصوير سطوري وهي نازلة كتشرح فين غادية بتفاصيل..ولتحت شريفة واقف هازا جلايل قفطانها الاسود المخدوم بسفيفة ملكية غير هي بالصم فضي ومضمة فضية وسطها بروش مرصع رقيق...شادة ايفون لاخور كتصورها وهي نازلة باش تعطيه ليها تدمجو مع فيديو اخور ودير ليه مونتاج وتحطو على شكل فيديو Reel...نزلات من دروج وضارت جيهة الباب ديال جردة الي كانو مغطيينها تقريبا باش ميكونوش فالهواء الطلق لانه كاين برد برا...اول ما دخلات وقف واحد الصحفي حتى صورها وهي كتحرك فراسها بشوية حتى تم جاي باها وصل عندها...

ع.الصمد. : والله ايش ها الكشخة (اش هاد الاناقة) بسم الله ماشاء الله يا بعد ابوتش...

ميثاء"تبسمات وهي تحنى باست ليه ايدو بروس شفايفها وحطات ايدها كتمسح فيها من روج شفايف" : والله ماا نييي جدام كشختك (منجيوش قدام اناقتك)...

ع.الصمد : هههههههه ترى والله بنغر...

ميثاء : عساها دوم ضحكتك وعساش دايما بخير وبالف صحة وبشنوف كشخااات وايد يوبا...(تفوو ديلمهم كلامهم فيه دفال..ماعلينا قالت ليه دوم ضحكتك وان شاء الله ديما تكون بيخير وبالف صحة ونشوفو اناقتك بزااف ا با)...

قرب باس ليها راسها حيث بنتو الوحيدة والمدللة مفششها فوق بزاااف عندو ولد اخور هو الكبير....لكن من المراة اللولة الي هي امارتية الاصل حيث مزوج زوجات وعندهم التعدد شيء طبيعي وعادي مادام راجل حقو الشرعي والطبيعي محللو ليه الله هادشي علاش ترباو...تابطات دراعو وتوجهات هي وياه لجابلة الي فيها علي ومراتو زين الدين وفرح ونارين ام ميثاء عاد هو وغاتكون ميثاء الي بقى كرسيها خاوي...

ميثاء. : السلام عليكم...

الكل رد عليكم سلام كاين الي شاف فيها وكاين الي مشافش وطبعا زين الدين مشافش لا هو لا علي حدهم ردو السلام وصافي...اما فرح غير شافتها وهي تجمع الضحكة وااااارا ليك لاعادة الحلم للمرة 1827272272772 (طبعا ماقريتوش رقم)...جلسات فالكرسي بين امها وبين باها...جا سرباي عندها

ميثاء :pineapple juce..Natural without sugar(عصير اناناص طبيعي بدون سكر...) "قالتو ليه حيث عارفة شنو كاين ف الموني ديال الاكل...ضارت جيهة علي" دكتور علي مرحبا بك.

علي"حط ايدو على صدرو" : ترحب بيك الجنة بنتي...

ع.الصمد : الحفلة صارت منورة بزيادة بوجودكم والله...

ميثاء : من احسن واشطر الدكاترة...عمل وفكرة وايد حلوة اننا فكرنا نضم شراكة ويا بعض...

فرح"الصمت..حدرات عينيها وجمعات حجبانها ماقدراتش تشوف فيها ماحملاتهااااش بهاد المعنى شي حاجة كتحس بيها فحال ماس كهربائي بينها وبين ميثاء..."

ع.الصمد : شراكتنا نسبتها وايد منخفضة بس ابشر...يمكن تفكير بنتي ميثاء صح...

فرح"خرجات عينيها"

ميثاء : انا من جيت لمغرب حسيت اني لازم انتمي لهاد البلد العظيم ناسه وشعبه كرماء..وضيافتهم غاية الكرم...صح دكتور زين الدين !!

زين الدين"هز عينيه وشاف قدامو ماشي فيها حرك راسو وقال" : ضيافة النبي ثلاث ايام على حد علمي !!

ميثاء : اههههههه اي صح..عشان شدي انا جددت اقامتي وبجلس هني بشكل مستمر... يعني لازم ينضاف مكتب جديد بالادارة بالمصحة وانا الي بجلس فيه بتابع امور الشغل...

زين الدين"ايد فرح كيحس بيها بغاات طرطق وسط ايدو...هبط ايدو لاخرى بالحس وحطها عليها كيدوز عليها بلطف باش تهدن وعينيه على عبد الصمد" : الحاج هادشي متافقناش عليه ؟؟؟

ع.الصمد"جمع ضحكة" : كيف !! في شي غلط اذا كلفت شخص ينوب عني !! يمكن انا مب طايع بنتي تشتغل مكاني..لكن الضروف المؤقتة محتمة علي تيتغل نيابة عني...

زين الدين"عض على سنانو وضار ماحاملش الوضع"

ع.الصمد : التفاصيل هادي بنحشي فيها بعدين...الحين خلنا نستمتع بالحفلة وضيافتها...

زين الدين : ماعليش نتفاهمو من دابا...عندي ساعتين ديال الوقت ونرجع فحالي...

ميثاء"بابتسامة" : خلص الي تبيه بنسويه...بس ما گلت شي بعدين...برحب بزوجتك معانا "عوجات فيها راسها وتبسمات ليها" مرحبا بيك احبيبة ديالي هههه "شافت فزين الدين" صح الي گلته !!!

امينة"ضحكات ودوزات على ضهر فرح" : هههه ايييه.."طلات على فرح" بنتي قالت ليك مرحبا بيك سمعتيها...

فرح"زير ليها زين الدين على ايدها وهي تحرك راسها" : احم ترحب بيك جنة شكرا"جملة فيها ربعة الكلمات حسات بيهم ربعة شضيات كيخرجو من فمها كيحرقو فحال الى جبل على قلبها كتهز فيه.. بالمعنى الحرفي ماحااااملاهااااااش وووجهها كيفكرها فداك الحلم وهضرتها معاها فالتيليفون بديك الطريقة وكيفاش كتهضر مع زين الدين كتشعل فيها بات مات العافية...الصبيب الي نازل من البركان كيتخوا عليها فاش كتهضر ميثاء مع زين الدين"

ميثاء : ههههه"شافت فزين الدين" زوجتك حلوة...عسولة..

زين الدين"حرك راسو وصافي"

نارين"قربات لبنتها وهضرات عند وذنيها" : شو صاير ليش الصبية هيك وجَّا!!(اش واقع علاش البنت هكاك داير وجهها"

ميثاء : والله مابعرف يا امي...شو بها معي...

نارين : لا تكون غايري منك..اسم الله حولك وحواليك يا بنتي جوهرة معلقة...

ميثاء : لا مو لهاد درجة....تدرين خلي لي مكانش اجلس فيه قريبة من زين الدين وهي...

نارين : تمام فرصة بحكي مع ابوكي اسالو شي...

حركات ليها راسها وهي تحنحن قادت عبايتها كحزات كرسي بشوية وهي تنوض ناضت ميثاء وجلسات فبلاصتها جات حدا زين الدين وهنا فرح بالفقصة نترات ايدها من وسط ايد زين...

زين الدين"مقرب ليها" : مالك !!؟

فرح : هاديك تما...

ميثاء"ردات شعرها لور وهي طل عليها" : شكلش مكسوفة (كتباني حشمانة)

فرح"شافت فزين الدين وهي تحدر عينيها" : مافهمتش !!

ميثاء : خجلانة يعني انتي خجولة...

زين الدين"شاف جيهة باها" : الحاج تيسر الى ممكن نكملو...

ع.الصمد : تگدر تتفضل وياي انت والحاج علي للمكتب تشوفون العقد وتقرونه بعدين بنحشي بباقي التفاصيل...باقي التفاصيل قابلة للتفاوض حتى لو تم الامضاء والشراكة...ببنود العقد مكتوب كل شي...بترتاحون...

ميثاء"قربات لفرح" : ماشاء الله وايد حلوة انتي...جمالش طبيعي يخبل...

فرح : شكرا..."حسات بالخنقة فحال كيهضر معاها القرطاس ماشي بنادمة...وميثاء حساات بيها ممرتاحاش ليها وبقات كتهضر...ماحساتش براسها حتى حطات ايدها فوق فخد زين الدين وزيرات عليه تا ضار عندها"

زين الدين"قرب نطق فوذنيها وايدو ورا كتفها" : مرتاحيتيش !؟

فرح"ضارت عندو" : براكة علينا بغيت نمشي...

زين الدين"حس بيها تقلقت" : تمشي معايا لمكتب فين غانشوفو الوراق !!

فرح : مابغيتش نبرزطكم...

زين الدين. : لا يلاه معايا فرح منخليكش...

فرح"وركات عليه بايدها فوق ايدو" : غير سير انا نتسناك هاني مع خالتي امينة...وعافاك ماتعطلش عليا...

زين الدين"متردد كانه حاس يخليها توقع ليها شي حاجة..تنهد" : واخا ماتهزيش الهم..."عقد الفيستة ديالو وناض شاف جيهة علي وعبد الصمد" يلاه الحاج...

ناضو بزوج وقفو معاه ضار بات ميثاء وصاها باش تعلم التريتور يتكلف بتجهيز العشاء...توجه عبد الصمد هو اللول وراه زين الدين الي كان عاقد غوباشتو شوفاتو كانو جدييين الشي الي خلا شريفة من بعييييييد تبقى حاضياه وحاضية الكاريزما ديالو كيفاش غادي على من طولو مگضر وكيمشي بكل جنتلمانية...اما فرح زادت كحازت حدا امينة كانت ميثاء فهاد اللحضة دارت شنو وصاها باها عيطات لطارق المساعد الي معاها هو الي تكلف...وهي تهز ايدها وشيرات لشريفة الي تمات جايا لعندها كتزرب شادة الايفون وشابعة سطوريات باش تحطهم ميثاء فانسا عندها طبعا 3 مليون متابع ماشي ساهلة...

ميثاء : الهدية وين !!

شريفة : الحييييين..."هزات جلايلها ومشات تا دخلات لداخل جابتها وخرجات كتمشى بشوية تا وصلات عندها وحطات ليها ساشية" كاهي...

ميثاء"هزات ساشية الي مكتوب فيها اسم اغلى العطور وضارت عند فرح" : فرح !! فرح صح اسمش ؟!

فرح"حركات راسها" : اه سميتي فرح...

ميثاء : بتمنى تقبلين الهدية المتواضعة مني...وبتمنى منش ماتخجليني...اخترتها مخصوص لش...حتى خالتي امينة عطيتها هديتها يعني لا تخافين مو بس انتي...

امينة : خوديها بنتي ماعليش الهدية مكترجعش حتى انا عطاتني بحالك يمكن ضيافة عندهم...

فرح"كتشوف فساشية بتردد...وفنفس الوقت كتشم الريحة الي دايرة ميثاء هي نفس الريحة الي عند فرح...maison francis paris kurkdjian...اش هاد الصدف الي غريبة وما غريباش...فلاخر شداتها من عندها وهي تبسم" : شكرا...

ميثاء : عليش بالعافية...

فرح"هزات ساشية وشافت اسم الريحة نييييت نفس الاسم..جمعات حجبانها ونسات راسها بقات تشوف فالساشية..حتى سمعات صوت ضحكة ميثاء"

ميثاء : يمكن ماركة العطر ال تستعملينها صح !!

فرح : احم..ماشي هي الي كندير ولكن هي الي خذاها ليا راجلي

ميثاء : ههههه ايه صح بعرف...ذوق زين الدين يخبل..."فرح هزات فيها عينيها بسرعة" ...حتى بالمجوهرات..انزين يرجع وبشكره على بعض التصاميم الي اخذتهم منه...

فرح : كيفاش تصاميم خذيتيهم منو"قلبها بدا يضرب"

ميثاء : ايه بعض التصاميم شفتها بالصفحة على الانستقرام وايد تينن (تجنن)...والبعض كان من ابداعاته الخاصة...

فرح"كتصرط فريقها..بركات على نفسها ونطقات بصوت مرعد" : احم ااه...

ميثاء"طلات على البروش الي لابسة فرح وحطات عليه ايدها حتى قفزات فرح " : يوووه معقول الصدفة !!

فرح : مافهمتش !!

ميثاء : هذا البروش البربري تقليدي صح !!؟

فرح"حدرات عينيها لبروش وحطات عليه ايدها" : هذا تصميم قديم...

ميثاء : ايييه صح...تصميم من ايدين والد زين الدين...حتى انا عندي مثله...."حلات الفيليل الي سادة بيه الفيرور وهي دور عندها مورياها جيهة صدرها ليمين" والله مثله...

فرح"عينيه خرجو تا هبطو حسات بضو ضربها وسط راسها ونزل الماص لقلبها الي حسات بيه خرج تا نزل عليها الما باااارد...نفس البروش نفس تصميم نفس الالوان والدقة باش مخدوم...ايدها ماحاساش بيها كتحك فجناب الكرسي..." : ولكن"مشى ليها صوت من كترة ما تزنگت والصهدة طلعات معاها" ه احم ها هذا عندي غير انا وح حدي هو الي بقى...

ميثاء. : لا حبيبتي عندي مثلك...تصدگين(تصدقين) اموووووت واعشق تصاميم زوجك زين الدين...والله مافي مثله خاصة البروش وحتى العقد مالتي (سنسلة ديالي) بعدين بوريش ياها او تگدرين تشوفينها بالانستقرام عندي..queen.meyth ben..سوين لي فولو...ههههه..احم باعتذر منك لازم گوم (نوض) سلم على بعض المدعوييين وبرجع للعشا...بنحتشي بعدين بباقي تفاصيل "شيرات ليها بربعة صباع ومشات خلات كلامها كيترد فوذنين فرح فحال الصدى"

ناضت بكل راااحة وكانها قالت شي حاجة الي عادية مافيها حتى عيب!!...ناضت وخلات وراها واحد القلب الي اصلا مكسور مجروح مدمر دايز عليه الويل من نهار خلق...وغايزيد يكمل لانه اصلا ضاغط على راسو فوق القياس...

البروووش !! البروش بقى منو ديزاين واحد الاصلي خدمة يد اب زين الدين الخدمة الاصلية من التراث الامازيغي متقونة تعطات لفرح...بشوفتها للبروش الي فصدر ميثاء كان نفس خدمة البروش الي عند فرح...كلامها على زين الدين بهاد الطريقة كانه معاه عادي....

فرح"عقلها زاااااد فهاد اللحظة..قربات ليها امينة بغات تشد معاها الحديث على احوالها واش مرتاحة فالحفلة حديث نسائي بيناتهم"

امينة : كتباني ليا ممرتاحاش هههه ياكما دهشرك هادشي تانتي فحالي...

فرح"الصمت"

امينة : فرح بنتي كتسمعيني"بان ليها وجه فرح ولا صفر..حطات ايدها على كتفها" بنتي مالك !!!

فرح"والو واش جاوبتها مغاتجاوبهاش لانه هي دابا فبداية ح..رب مع الغييييييرة القاااات..لة."

امينة : بنتي فرح جاوبيني واش بيك شي حاجة !!! فرح ؟

فرح"الصمت"

امينة"تخلعات عليها" : بنتي الله يرضي عليك جاوبيني(عارفة حالتها من الي مشاو عندهم لتارودانت) قولي ليا مالك ؟! نعيط لزين الدين !!!...

فرح"ضارت عندها ببطء" : علاش تعيطي ليه ؟!

امينة : حيث بنتي ليا ماشي هي هاديك...

فرح : ماعندو ميدير ليا...هاهو شوية وغادي يجي...

امينة بقات كتشوف فيها مافهمات والو من طريقة هضرتها الي كتعكس لون وجهها الي مبدل...فهاد اللحظة بالذات كانو جالسين فالمكتب كيتناقشو امور الشراكة وكان المشكيل من زين الدين الي كان متفاجئ بتغيير بعض الشروط...

زين الدين"كيقرا فالعقد..هاز حاجب ومركز..هز فيه عينيه" : النسبة 5٪ سي هادشي تفاهمنا عليه...

ع.الصمد : طيب ايش المشكلة ؟!

علي"شاف فزين الدين الي شاف فيه حتى هو ونطق" : فكرة ان البنت ديالك تنوب عليك ويكون مكتب خاص ليها مكانش ضمن الاتفاق..المصحة بالكاد فيها مكاتب تكفي لموضفين الي فيها دابا..يعني فكرة نوجدو مكتب خاص ميمكنش لينا وهادشي متافقناش عليه...

زين الدين : الاتفاق كان جيست شراكة...

ع.الصمد : اي لكن كيف يكون الشغل دام مافي مكتب ؟!

زين الدين : نسبة الارباح يتنقص منها النسبة وتوصلكم..

علي : اكيد غادي تبغي تاكد من الحسابات كلشي غايوصلكم عن وممكن تخصصو محاسب خاص بيكم هو يتكلف...

ع.الصمد"الصمت"

زين الدين : هذا كان شرط حتى نقدرو نوحدو المبلغ الي غادي دخل بيه كشريك وتسالي الشراكة"هز حاجبو ماكد بعينيه" ولا كذبت !!

ع.الصمد : لا ما شذبت (كذبت)..الاتفاق كان مدة ثلاث سنوات...مدة طويلة طال عمرك ماهو بعيب تجهزون مكتب للشريك ولو كان مؤقت !!

زين الدين"عض على سنانو بعصبية وضار لهيه زفر محاملش هضرته..حط الملف ديال العقد كحز الكرسي وناض" : من بعد ونهضرو فهادشي فاجتماع غذا صباح...

ع.الصمد"استغرب..مالقى ميقول وهو يستسلم لرغبتهم" : احم..اي اييي اكيد خذ راحتك...

علي : نقدرو نوهمو صحافة بالي تم التوقيع والتوقيع الرسمي نتافقو عليه غذا اذا تم الامر غذا نوقعو...

ع.الصمد : ان شالله...

حل صدفة الفيستة وناض ماحاملش الموقف الي تحط فيه...خرجو بثلاثة من المكتب وتوجهو ناحية الجردة فين مقام الحفلة غادي جيهة طابلة عينيه على فرح فنفس الوقت كيحرك فراسو لناس الي كيشيرو ليه يسلمو وهي تم جايا ميثاء وقفات عند باها ونطقات...

ميثاء : دكتور بعتذر بس ابي اسألك شي قبل ماتتعشَوْ..سؤال عن حالة انفي في مشكلة...

زين الدين"عينيه على طابلة وفرح الي بانت ليه حادرة راسها واحد الوضعية مكتعجبش..هز ايدو موقف ميثاء" : اي حاجة بخصوص مشكيلتك من بعد العملية تكون فوقت الكونطرول..."بغاات تهضر وهو يخليها ومشا فاتجاه الطابلة"

زين الدين"جر الكرسي وجلس حدا فرح طل عليها" : تعطلت على كبيدة ديالي..."حط ايدو فوق ايدها"

فرح"حيدات ايدها من تحت ايدو حتى جمع حجبانو من الحركة الي دارت...هزات راسها وشافت قداها الشي الي خلاه يلاحض تغيير فوجهها وان بيها شي حاجة"

زين الدين : مالك بيك شي حاجة ؟!؟

فرح"كتنهج بشوي" : بغيت نمشي من هنا...

زين الدين : علاش مالك شنو واقع !!"هز راسو شاف فامينة مرات علي وشير ليها بمعنى شنو واقع"

امينة"هزات كتافها حتى هي معرفاتش مالها..عوجات فمها معرفتش اش تقوليه"

زين الدين"تحنى لعند فرح وقرب لعند وجهها ونطق بصوت تسمعو غير هي" : قلقاتك شي حاجة ؟

فرح : بغييييييت نمشييييييي فحاااااالييييييي...

زين الدين"هز راسو كيشوف فالناس ونواحي ورجع هبط راسو عندها" : فرح تهدني...شنو واقع !!؟

فرح"هزات ايديها ودارت راسها بيناتهم مسندة بمرافقها على طابلة" : ففففففففففففف...فففففففففف بغيت نمشي واااااا بغيت نمشيييييييي"خبطات بايدها فوق الطابلة تا تزعزعو الكيسان وطباسل وضارو الناس الي جالسين معاهم كيشوفو منهم علي الي مفهم والو" وابغيت نمشيييييييييييييي...

زين الدين"غمض عينيه كيحاول يكتم العصبية نتيجة الخبطة الي دارت حتى ضارو ناس يشوفو..حل عينيه" : واخا نمشيو..."كحز الكرسي بجهد وهو يوقف" نوضي..."كحزات الكرسي وهي توقف هنا جات ميثاء هازا جلايلها"

ميثاء : على وين يا دكتورنا الغالي تو الناس(مزال الحال) شفيك رايح والعشا...والتصوير !!؟؟..

دافعة بصدرها لقدام وواقفة بكل ثقة بابتسامة ساحرة وفنفس الوقت متفاجئة.

ميثاء : والله تو الناس..."شافت جيهة طارق" طارق نادي ابوي يجي...

زين الدين"ضار جيهة فرح ونطق موجه كلامو لميثاء" : ماعليش الحاج علي يتكلف...

ميثاء : ليش يتكلف !!

فرح"غمضات عينيها وزيرات على سمطة صاكها وهي دور بغات تمشي شد فيها زين الدين وهي تنتر ليه ايدو بجهد" : بعد مني بعد منيييييي...

زين الدين"رجع شد ليها دراعها وهبط راسو عند وذنيها" : فرااح تركني لارض وخلينا نمشيو هانييين...يلاه زيدي تحركي...

فرح"بعدات ليه ايدو" : وااااا بعد مني بعد مني ماتقيصنييييييش....

ميثاء"خرجات عينيها...شريفة حلات فمها حيث كانت حدا ميثاء" : حبيبتي ليش رايحين !! انزعجتي من شي !؟.."هزات جلايلها ومشات عندها بغات تحط ايدها على كتفها"

فرح"بعدات ليها ايدها بجهد" : بعدي مني"غوتات" عطيييني تيساع واااا عطيني تيساااااااااع اش بغيتي مني ؟؟ مابغيتش نبقى وبعدي مني...بعدوووو مني الله ياخذ فيكم الحق بعدو مننييييييييي....

زين الدين"شد ليها دراعها وجرها بزز تم غادي بيها بغات تنتر وهو يزير عليها ونطق بصوت منخفض" : هاحنا غادين ميكون غير خاطرك...يلاه زيدي...

بعدات ليه ايدو بواحد طريقة تاني مخجلة قدام الناس الي بداو كيدورو ويشوفو مالهم...اضطر يصرط التصرف بزز منو ويمشي معاها بالخاااااطر ديال الخاطر...تمات غاديا سابقاه كتمشي بزربة حتى مشات ميثاء كتزرب وهي تجي قدام وجهها وبدات تدخل بوجه بشوش جامعة كفوف ايديها عندها وكطلب فيها...

ميثاء : ليش رايحة حبيبتي تو الناس شنو الي مزعلك يا بعد شبدي(بعد كبي قلبي فحال هاكا زعما كبيدتي) شنو الي مزعل الحبيبة ديالي الغزاااالة ديال دكتورنا الغالي زين الدين...صح كلامي بالمغربي ؟؟!...

فرح"ابحاال كترمي ليها رصاص على قلبها.. بداك الضغط ونار الغيرة الي فيها ماشعراتش براسها تا خبطات بايدها على صدر ميثاء فوق البروش وهي دفعها بجهد" : ععععععععععععع....بعدي مني....

تا غوتات ميثاء وطاحت....وهادشي داز فثواني ماعرف زين الدين باش تبلى كان عاطيها مسافة وداير ليها خاطرها باش متعصبش حتى تهدن ويعرف اش كاين لكن هادشي الي طرا قدام عينيه ماعرف باش تبلى...ميثاء فديك اللحضة فاش دفعتها بغات تكالي ومع طالون ماتضرب ايدها غير على قنت واحد البولة من دوك الي مستفين فجناب مضويين لزينة كانت مربعة حسات بالضو ضربها عضمها تقسم فديك اللحضة غوتات لربي الي خلقها....غوات ميثاء خلا شريفة طير لعندها وامها تنوض من الكرسي تاهي تجري...دنيا كلها وقفات كانت الموسيقى هادية خدامة حبسات وناضو ناس يشوفو اش واقع كلشي مشى يتجارى لعند ميثاء يشوفو مالها الا زين الدين وعلي وامينة الي مشات عند فرح....

فرح"كتغوت" : وابعديييي منيييي بعدييييي اهى اهى...الله ياخذ فيك الحق الله ياخذ فيكم الحق...

امينة"قربات ليها" : تهدني بنتي ويلاه نمشيو الله يرضي عليك..اش وقع ليك ابنتي...

ميثاء : يديييييييييييييييييييي اهى اهى...اععععععععععع يدي يديييييي.

شريفة : بسرعة نادو اسعااااف شتسووون هني الاسعاااف..."ضارت عند سربايا" شي واحد فيكم يعيط لومبيلووونص طلقونا لاش كتفرجوووو....يلاااه....

فرح"حدرات راسها كتبكي وهي تم غاديا خارجة وحدها كتغوت وتبكي وتعاير...شادة على صدرها باش تحيد دسك الحرقة ماشي اي حرقة عااااافية تاحد ماغايحس بيها حتى حد ناس كيشوفو فيها غاديا بهيستيريا وحدها كتزرب وزين الدين لور باقي مبلوكي مافهم والو...." : اننننن غدااار الله ياخذ فيك الحق.

زين الدين"توقف الزمن عندو هادشي الي كيشوف فيه ماعمرو ضن غايوصل ليه...عينيه مشاو غير لفرح الي كانت كتبكي وتغوت ووجهها مجيف وراسها كيترعددد بالاعصاب كيبان من السما كيترعد بواحد طريقة هيستيرية...تبلوكا مسكين ماعرف اش يدير ما وگضو غير علي"

علي"دفعو من كتفو بجهد" : زييين الديين توكض اصحبي وسير تبع مرتك...

زين الدين"خرج عينيه على جهد جهدهم باش توكض ضربو فحال ضو بين عينيه ماحس براسو حتى تم غادي بزربة كيدفع فدوك عباد الله وتابعها الي كانت تابعاها حتى امينة اما علي بقى يصلح الوضع الي طرا....هي كتزرب تا سخفات امينة اما هو طار طيرة وحدة حتى نقز نيشان شد ليها فدراعها ومزييير والو واش بغى يطلق منها عينيه منيرين غادي جيهة الباب وجارها وهي كتنتر حتى طاحت ليه لارض وتم جارها وهي كتغوت وتركل تا ولات مجرورة باش يتوگض ماموكضش رجع تاني دخل فعالم اخور...امينة كتشوف فيها كتمرمغ فلارض ومجرورة وتعيط ليه باش يفيق يعرف راسو را كيضرها وناس طل ووواحد الحالة"

امينة : زين الدييين اولدي وقف"ضارت جيهة علي" الحاااااااج...

علي"هز راسو بان ليه زين الدين جار فرح فلارض وهي كتمرمغ وتغوت"

فرح : ايدييييييييييييي اهى اهى واااايدييييي"واحد اللحضة ضرب ليها الفلاش بين عينيها وتفكرات اللقطة الي كانت كغوت لعصام فاش كان شاد ليها كتفها تا فصلو ليها رجعات لواقع مع غوتة لربي الي خلقها تا صمكات لزين الدين وذنيه وهو يفيق وضار لقا راسو جارها كي جرتيلة وهي كتغوت وتنخصص"

زين الدين"طلق منها كلها تمرمغات بربيع والما الي فيه وشعرها تشعكك المضمة تحلات...وحناكها حمرييين بالخبيط الي خبطتهم وهي كتغوت عليه يطلق منها"

فرح"كتشهق وحاطة ايدها كتنوض من لارض دموعها دايزين منضرها كيقطع القلب بجهد.." : حراااام عليكم عذبتوووني حرااام عليكم واخا نكون يهو..دية ماديرو ليا هادشي...

زين الدين ماعرفش شنو هادشي كيوقع ولكن منضر فرح كيف وعى على راسو هرس ليه خااااطر خاطرو وقلبو على زوج...هز ايديه دوز بيهم على شعرو....

امينة"تحنات عندها ومدات ليها ايدها" : عطيني بنتي ايدك ونوضي الله يرضي عليك...

علي : حيدو من هنا اش كيبان ليكم تفرجو ؟!"كانو شي سرباية وشي رجاال واقفين حيث خرجو من جردة وتوجهو لجيهة فين كتدي الباب ظيال الفيلا الامامي...حدرو راسهم وبعدو حيث نهض فيهم علي وزين الدين لان نصهم خدام عندو فكلينيك...كانت حتى صحافة ناضت بدات تصور قشعهم زين الدين واحد منهم بديك الجهلة الي مكتومة لداخل ناض بزربة نقز لعندو وطير ليه الكاميرا شير بيها لحايط تا تشخصخااااات تشخشيخ..."

زين الدين : نلقى عدو ربك كدور هنا نخرج عليك...تقود عليا من هنا يلاااه !!!"ضار جيهة فرح كينهج لقى امينة وقفاتها وهو يتم غادي عندها بزربة شد ليها فدراعها بغات تبدا تنتر ليه وتغوت وهو يدور محمر فيها" تتتحررررررركككييييييي قداااااااميييي...

ماخلاش ليها فين تنتر دغيا حكمها بكل ما فجهدو...حاس بضبابة بدات كتنزل عليه وعض فنفسو باش ميستسلمش خرجها وهي كتغوت رجل حفيانة ورجل فيها صباط وصاكها خلاتو طايح هزاتو ليها غير امينة هو والمضمة اما فردة صباط بقات مليوحة...جا العساس عطاه كونطاكت وهو يحل باب طوموبيل ودخلها ليها صحة كاع داك جهد دايرو معاها وهي كتغوت وطرش فحناكها...

فرح"كتشهق" : اهى اهى الله ياخذ فيك الحااااااااااااق...حسبي الله ونعم الوكيييييييييل....

زين الدين"ضار جيهة المقود وركب وهي طير عليه كضرب فيه وتغوت بهستيرية وهو مخليها تضرب دير مابغات ماجاوبهاااااش...خلاو الحفلة لداخل تقلبات سفاها على علاها فلحضة كلشي تخربق...جا عندو علي دق عليه فشرجم"

علي"عطاه صاكها ومضمتها" : خليني نسوگ ازين الدين...

زين الدين"شدهم من عندو عطاهم ليها...ماجاوبوش ورك عالبوبكون طلع زاج وهو يكسيري تا تهزت طوموبيل من بلاصتها...خلا علي داير ايدو على راسو"

امينة : ياربي سلامة واش نتبعوهم فطريق !!

علي : اه دابا منخليهش وجهو معجبنيش ديابيت داير خدمتو.."دغيا فالبلاصة ماتسوقش لشنو ممكن يكون بعد هاد المصيبة الي وقعات فالحفلة...لومبيلونص دغيا جات فالبلاصة ركبو فالسيارة وتبعو كيجري بزز باش لقاه فالطريق وتبعو..."

فرح"كتركل وتغوت وضرب فحناكها وضربو هو" : الكذاااب...نتا معاهااااا معااااها وكضحك عليا......

زين الدين"شد ليها ايدها وزييييييير عليهم" : وااااااااتبتييييي لااااااااااااارض...علاااااش هادشي علاااااااش ؟؟؟

فرح"بغات تنتر مزييير على ايدها تا حساات بالخنقة" : انننن اهى اهى طلق مني..."هزات راسها لفووق فحال كتقلب على الهواء" طلق مني واااطلق خنقتيييييييني اهى اهى وااا"عينيها كيتقلبو الشي الي خلاه يتخلع وهو يطلق من ايديها"

زين الدين"هز ايديه" : هاني هاني ميكون غير خاطرك..."شافها تخنقت وهو يحل الشراجم كلهم ديال طوموبيل بالخلعة خصوصا وجهها تجيف" صافي فرح هاني بعدت...اشنو بغيتي نديرو...

فرح"كتشهق...كتفكر ميثاء والبروش وسنسلة وترجع تغلي" : هيييييييي اهى اهى...بغ بغيييييييت نمشيييييي فحاااالي...

زين الدين : هاحنا غادين هاحنا صافي...رجع ديمارا طوموبيل جاب الله شانطي خاوي وزاد"

علي" كان وراه من بعيد وقف تاهو طوموبيل" : ياربي سلامة

امينة"كتبكي" : الله ياربي الله غا قوليا مالها واش لهاد درجة حالتها ماتعجبش ؟!

علي"شافو زاد وهو يزيد تاهو تابعو..تنهد" : حالتها عيانة...عيااانة الحاجة...النفسية مازمة بزاف وازمات معاها حتى راجلها...فنضرك وحدة طبيعية دير هاد شوهة !!

امينة : ماعرفتش حتى مالها كانت كتهضر عادي مع ديك البنت بنت الحاج الي بغيتو تشاركو معاه غير ناضت وهو يتبدل ليها اللون فوجهها...

علي"جمع حجبانو" : وايلي ! اش قالت ليها ؟؟"هزات امينة ايديها بمعنى ماعرفتش"

كيف زاد بطوموبيل مااااهضررررررش ماتكلم صقل صقلة وحدة خاف يهضر ترجع تنتر وتغوت وهي بزز باش سكتت واخا باقي كتشهق وتمتم وضرب شي شوية ماهضرش باش ميكفسهاش عليها...طريق كلها وهو مقاااتل مع ديك الضبابة وقلبو شاعلة فيه العافية الي ميعلم بيها غير الله اما هي را اضعااااف اضعافو...غير الله يحضر سلامة وحتى باش يعرف مالها ماعرفش...مسافة طريق حس بيها عامين وصلو لفيلا كسف دخلو حلات الباب وهي تم غاديا كتزرب وهو تابعها منضرها يقطع القلب كلها مجرتلة وتبكي وتنخصص وهو تابعها تا دخلات هكاك دازت من حدا مراد وضحى الي دهشرو مافهمو والو حتى بان ليهم زين الدين تابعها وطلعو بزوج دخلات البيت ماحتال تسدو دفعو عليها وسدو عليهم...

فرح"مشات لناموسية وجلسات جنبها كتمشي وتجي بضهرها وتبكي" : اهى اهى...كذااااب كذاااااب الله ياخذ فيكم الحق...

زين الدين"حيد المونطو والفيستة بقى غير بقميجة وسروال حتى حل صدافي القميجة لفوق على صدرو حس بالخنقة...هز فيها عينيه بانت ليه كتمشي وتجي غمض عينيه ضراتو فخاطرو وخا معرفش مزيان شنو طاري بالضبط...من خلال دفعها لميثاء استنتج ان الامر داخلة فيه ميثاء والغيرة لكن شنو وقع نيييت معرفش..بقات فيه ؟ بقات فيه بزااااااف..ماعندوش حتى حل من غير انه يسايرها ويمشي معاها بالخاطر...قرب بشوية وتحنى عند رجليها قفازي ونطق بصوت منخفض" : شنو درت ليك حتى الله ياخذ فيا الحق افرح ؟؟ شنو درت للروح ديالي حتى ضريتها !؟...

فرح"مغززة سنانها حادرة عينيها والحلم كيتعاود وهضرة ميثاء وديزاين كيروجو ليها فراسها...هزات ايدها وضربات ناضرها كتسوس دوك الوساويس الي قتلوووها قهرووها..هبطات عينها لبروش وهي تحلو وحطاتو ليه فايدو" : سيييير عندها...سييير عطيها حتى هذا...

زين الدين"شاف البروش ورجع شاف فيها" : لمن نعطيه !!؟

فرح"شهقات واحد شهقة وهي ترجع استانفات هضرتها" : علاش كذبتي عليا !!!

زين الدين : فاش ؟!

فرح : ملي نتا باغيها وعينك فيها علاش تزوجتي بيا ؟!

زين الدين"جمع حجبانو" : شكون هادي !؟ شنو گالت ليك فرح حتى تيقتيها ؟؟

فرح"شافت فيه" : هذا عندها بحالو ههههههه غاتگوليا مادرتوش ليها...

زين الدين"شاف فالبروش ورجع شاف فيها" : هذا ديالك وحدك ماكاينش كوپي عليه...هذا من خدمة الوليد الله يرحمو...

فرح : لااا عندها فحالو...وحتى جابت ليا ريحة الي كتاخذ ليا حيث عارفة ذوقك مزيااااان...وصايبتي ليها سنسلة ههههههه...

زين الدين"لداخل كيغليييي" : انا !!؟

فرح"سكتات تا سكتت وهي تبدا تعاود ليه كاع الحديث الي ضار بينها وبين ميثاء وهي كتهضر وهو كيغلي والعروق كيتنفخو ليه...حتى طاحت عليه ضبابة على غفلة شوي ميطيح كون ما شد فالقنت ديال ناموسية...وهي كتهضر" : الغدر ماشي شي حاجة جديدة عليك....

زين الدين"هز فيها عينيه بواحد النضرة فشكل" : تيقتيها عليا ؟...ماشفت فبنت المراة قبلك بقى غانشوف من وراك ؟ عارفاني انا ديال هادشي فرح !! عارفة هذا معمرو ضرب غير ليك وحدك...

فرح : انا كنت حااااسة بيك معاها...حاسة بيك غدار..واخا تحلف ليا من هنا حتى لصباح...ياك هادشي الي غادير ؟ هاني نقصت واختاصرت عليك....

زين الدين : فرح حضري عقلك الله يرضي عليك راكي كتعرفيني !!

فرح"هزات فيه عينيها بقات كتشووووف فيه عينيها فعينيه الي البؤبؤ ديالهم وساع ودياق.." : عمرني فحياتي ما تهنيت ولا عشت بيخير...عمري ما فرحت فحيااتي...وعمري مغادي نفرح...مكااااينش الي غادي يبغيني ويقبل عليا...مكاااينش الي يرضى بيا...الي من صلبهم معقلوووووووش عليا وبغيتي تعقل عليا نتا وسط هادشي كاااامل ؟!! هههههههههه...والله حتى انا هبيييييييلة نييييييت...

زين الدين : شنو هادشي كنسمع افرح !! علاش ؟"هز ايدو موقفها" شنو گالت ليك هاديك حتى تيقتيها وكذبتيني ؟ شنو درت ليك انا حتى نغدرك معاها ؟!...عارفاني نديرها بيك !؟

فرح"كتصغر فيه عينيها وتعاود تحلهم" : علاش كتشد معايا الخاطر ؟! حيث هبيلة ؟ ههههههه لااااا ماشي حيث هبيييلة...حيث عارف راسك اش داير...حيث داكشي الي حلمت بيه بصح واقع...نهاااااااار لول فاش خطبتيني الخطبة لولة قبل متجي حلمت ب لفعة ضايرة بيا "هزات صبعها وشيرات ليه لعينيه" عقلتي فاش كنت كنبقى نشوووف ليك فعينيك ؟!

زين الدين"كيصغر عينيه فيها جاتو فشكل"

فرح : كنشوف فلون عينيك كل عين فلون...هادي"شيرات ليه لعين يمنى" خضرة وهادي"لعين ليسرى" زرقة...فحااال ديك لفعة عينيها كل وحدة فلون...اللفعة كيگولو عليها شر...من وراها جيتي نتا ودرتي ليا ديك الحالة ضحكتي عليا وعلى خوتي درتينا ضحكة...باش تبرد غدايدك فهذاك الي كان بغى يتزوج بيا هههههه باش يديرني ضرة على عمتك....

زين الدين"عروق نواضرو خرجو خضرييييين وجهو ولا حمرررر" : فففرررح شنو وصلنا لهاد الهضرة"كيهضر مغزز"

فرح : طاااااااحت ونضت ومرضت وقابلوووني...ووقفو معايا...ولكن انااا صدقت نييييت بنت لحراااام بغيتك من ورااهم وانا الي ضحكت عليهم...هههههه...حتى ضحكتي عليا عاوتاني...

زين الدين"العرق نزل ليه من نواضرو وهو كيسمع فكلام السم الي كتحط ليه..نطق بصوت بدرجة صوتها فالانخفاض تاهو مبين انه مضروووووووور" : كضريني افرح بهضرتك..واعية عليا ولا لا ؟!

فرح"حطات ايدها على صدرها" : كثر من هادشي الي وصلتيني ليه ؟!

زين الدين"هز ايدو بشوي ودورها ناحيته" : انا وصلتك لهادشي يااك !!

بقى كيشوووف فيها هضرتها كانت نازلة عليه كي السم كتقطع فيه من لداخل اشلااااء...

فرح : وصلتيني لما كتاااااااااار....ضريتيني وبااااقي كضرني...

زين الدين"عوج راسو كيحل عينيه ويسدهم باغي يستوعب شنو هادشي كتقول ومقاتل مع ضبابة السكري..."

فرح : نتا تزوجتي بيا ضد...اما باش تبغيني بزاااااف عليا يبغيني شي حد...تزوجتي بيا ضد فخوووووياااا...ضريتيني فخويا وضريتي خويا فيا....

زين الدين"الصمت"

فرح : دابا حاجة وحدة بغيت منك هي خرج من البيت وخليني فهمي الله يرحم ليك الواليدين...خرج خليني نشوف اشنو ندير فحالتي...خرج ولا ندير شي حاجة فراسي...خرج را الموت هي الي بقات ليا فهاد الساعة....

زين الدين"صرط الجمر فريقو...قلبو بغى يخرج...اش غايدير كيفاش غايبرر ليها هاد الهضرة وخا شي فهمو وشي مفهموش..ناض وقف شحاال وهو كيشوف فيها وهو يدور وخرج من البيت..حس بالدوخة وهو هابط فالدروج حتى شد فالجناب مزييييرررررر عليهم بغى يتقاتل باش غير يهبط فهاد اللحضة كان جاي مراد طالع وهو يبان ليه باغي يطيح ماعقلش على راسو تا تقز الدروج طالع ماحتال يوصل ليه حتى كان طاح وجهدو تقادا بنزول السكري"....

حياتو كلها لا اب ينصحو لا ام ترضى عليه وتدعي معاه...عايش على الخير الي كيدير وعلى الصبر الي عاطيه الله مع فرح...بغاها !! كلمة بغاها شي حاجة خفيييفة...نقطة فبحر عشق زين الدين لفرح...فرح بالنسبة لزين الدين هي فرح الزين...

واحد شوية ماكاملاش ربع ساعة حتى بدا كيحل عينيه شوي بشوي...دورهم هنا وهنا وهزهم لسقف حتى قاد الرؤيا وهو يبان ليه مراد وضحى عند راسو كيعيطو ليه بواش سمعهم او لا...

مراد : شوية !!

زين الدين"دار صباعو بين عينيه وناض تگعد لقى راسو باقي فدروج...اصلا ثقيل مكاينش الي غايقدر يهزو حيث تبارك الله مگضر وصحيح...لكن امام الصحة فاش كتخون مكتبقاش الصحة..حرك ليهم راسو وهو يشد فالشبيك وناض.."

ضحى : فين غادي خويا !!

زين الدين"هز ايدو وتم غادي نزل لتحت وقبل ميمشي لبيت نطق بصوت باح" : ماتمشيش عند فرح خليها عليك هاد ساعة...

ضحى : ها !! واخا...

كيفاش غايبرر ليها انه ماعطاها حتى حاجة ما صمم ليها حتى حاجة...كيفاش غاينسى الهضرة الي قالت ليه...تيليفونو صونا كيشوف قدامو وايدو جبدات تيليفون شاف شكون لقاه علي...

زين الدين"حنحن باش ينطق ومع ذلك خانو الصوت" : الحاااااج ماتبرزطنييييييش خلييييني براحتي..

علي : الامور هانية بعدا ؛؟

زين الدين"باستهزاء تبسم" : فين عمرها هنات عندي ؟!..لااا مزيان انا فاموري النورمال ماتهزش همي..."قبل مايجاوب علي قطع عليه ولاح تيليفون فوق الناموسية.."

فرح"كيف خرج خلاها فالبلاصة فين بقات حتى نزلات لارض وهي تجمع رجليها عندها....كلشي كيتعاود ليها...الحلم..حياااتها. من نهار وعاات...ودور دورة وترجع لحلم ولهضرة ميثاء... حتى تعاود الحلم من جدييييد..هضرة ميثاء تاني من جديد"

فرح"هزات عينيها بجهد وهي دور هنا وهنا كتقلب على تيليفونها بان ليها صاك مليوح فلارض وهي تمشي بزربة طاحت عليه هزاتو جبدات منو تيليفون شعلاتو ومشات نيشان لانسطاغرام...كتبات اسمها وهو يطلع ليها الانسطا ديالها وصورتها...هبطات لتصاور بهيستيريا...ماتجي فالصورة ديالها شادة سنسلة بايدها...السنسلة السنسلة الي خرجات فيها عينيها على جهد جهدهم نفس السنسلة ديالها...وصورة اخرى كتبوس فيها سنسلة وكتشكر محلات البغدادي على تصميم...ومطاغيا زين الدين شخصيا....

فرح"ماشعراتش براسها حتى تاوهاات من الالم الي عصر ليها قلبها فاش شافت السنسلة نفسها." : اااااه اهى اهى...

ماحساتش بتيليفون حتى رماتو من ايدها...قلبها فاااااااق قدرة التحمل فااااق انها تغوت وتبكي وضرب وتقمش...ضارت جيهة الدوش وهي تم غاديا...كتعتر فجلايل القفطان الي تمرمد بالمعقووول...قلبها كتحس بيه بقات ليه نقطة ويتفرگع...غاديا وكتحك فصدرها والوساويس كتاكل ليها فدماغها...هضرة ميثاء كتروج ليها فراسها كيفاش كتهضر بكل ثقة بخلاصة عقلها بدا كيدي ويجيب بين الماضي والحاضر والماضي القديم...تخلط ليها تجلط داك العقل...ماضرب ليها فعقلها غير اول ذكرى الي هي قرار زين الدين دياال الفراق اول مرة فالمطعم...

زين الدين : نتيجة الحسيفة بيني وبين راجل العمة كنتي نتي ضحيتها... عيبي خايب مكنساهاش فالواحد ودخلتك معايا فوسط تخلويضهم ....ماجاتش ابنت الناس نكملو وسط هادشي الي من لول ماهواش ...مابغيتش نضلمك كل مزايد فيه كل مكنضلمك كثر وجدر..سمحي ليا هذا حدنا...

رجعات للواقع لقات راسها تسندات على لافابو...طلقات المار ةرجعات سداتو...عقلها كيلعب بيها لعب...قلبها كيضرب بجهد حساات بيه بغى يسكت...

عصام :ماضاربش عليك الكرفي وماعاطيش لحمو لدنيا تنهش فيه ماهزكش لحمة كانت غاتلاح فزبل ومايعقلو عليك...والله ابنيتي لاكان ليك لاكان غا من جيهتي...وضفري معايا شيب نتي كاااع...

"هي ذكرايات مع كوابيس...السينتا خدامة فعقلها كتمشي وترجع تمشي وترجع...."

فرح"بان ليها موس لازالة شعر الوجه مع مستحضرات ديالها...هزاتو وهي دور وجلسات حدا البوكس ديال الاستحمام الي ملاصق مع البانيو وجلسات فلارض...مابقاتش كتبكي مابقاتش كتحس بتاحاجة من غير انها باغية بشدة تهنى من العذاااااااااب الي عاشت فحياتها كلها من نهار خلقات..."

ميثاء : اموووووت واعشق تصاميم زين الدين....

عصام : كيف غدرك نهار اللول يديرها ليك نهار لول يديرها بيك...كيف غدرك يعاود يغدرك....

فوزي : دار فيك خير ورباك مالك بغيتي تنساي الخير !!...

المخنتر : حرايمية وتبقاي حرايمية..الملگطة ينعل جدر والديك...

يااااارب على هاد القلب اش قدو يتحمل...ياااارب حتى نصف الحياة الي اختارت باش ترتاح من العذاب الي مغاديش يحس بيه حتى حد من غيرها...هاهو مشى وهاهي حطات ليه حد...ماشعراااتش حتى ضربات المعصم ديال ايدها مع ضرباتو مع طوش د.مها الي كان سخووون.....

وهنا انتهى الصراع...العذاب النفسي الي ماقديتش يا سيدي ياربي نصبر ليه...الي شاف حالتي ميتيقني الي عاودت ليه على عذابي مايصدقني...الي كنهرب منو يتبعني...بقات ليا الخيانة الي ماعشتش هاني عشتها....حطات راسها فلارض وتوسدات ايدهاها المضروبة دموعها نازلين من خدها ود.مها نازل من ايدها...وهنا انتهت الرحلة في الحياة ؟....

فنفس اللحضة بالذاات الي ضربات فيها ايدها كان واقف فالبيت...

زين الدين"دار وجهو بين ايديه بتعب حتى بدا يمسح ويعاود...للحضة وقف دار ايديه على نصو وبقى واقف...لحضة تبلوكا فيها جمد...كيعاود فالهضرة الي قالت ليه ويعاود فالحفلة الي وقع فيها هادشي...كيعاود شنو ثالت ليه على ميثاء...عارفها كتغير عليه لدرجة الجنون هادشي كيعجب اي واحد فحالتو كيحكقا ويعشق حبيبتو وزوجتو لكن فضل هاد الضروف وحالة فرح كيضر فالخاطر...تذكر شنو قالت ليه على ميثاء ...ميثاااااء هاد الاسم الي تذكر وتعاود...يمكن من صدمتو نسى ميثاء وشنو دارت ليها والتصاميم الي قالت ليه فرح عندها....ماحسش براسو حتى طار هز تيليفون وسوارت وخرج من البيت عينيه حمرييييين وجهو كيخلع...خرج على برا حل طوموبيل من بعيد ماتسناش حتى يهضر مع علي فالتيليفون ماتسناش حتى يسد الباب ديال سيارة...ديمارا طوموبيل وكسيرا وهو مكسيري عاد سد الباب لان العقل ترفع وتحط بلاصتو الصعرة والغضب الي غادي يعمي ليه العينين...خرج من الفيلا وهو كيتفكر هضرة فرح الي سمماتو بيها...هضرتها على ميثاء وانه خانها معاها كتخلي العرووووق يتبخو ويغليو ليه فراسو....

زين الدين. : علاااااش فرح علاااااااااااااااااش..." بدا يخبط فالفولون ويغوت حتى بدا ينهج وطوموبيل كتعوج فالطريق كان على شوي يضرب واحد مول الموطور خلاه واقف كيغوت ويعرعر...ماتسوقش ليه وكون يضربو يخليه ويزيد من كترة ما جهل وهو عينيه منيرين غادييين غير لميثاء الي كتبان ليه ضلااام..."

باخر كلمة قالت فاش تفكر حس بصدرو تخوا عليه سطل ديال جمر والثلج...واحد اللحضة قلبة نقصو دقاتو...ماشعرش حتى ضرب واااااحد مولاتي الفران كانو العساسة ديال السيكتور تما ديال فيلات مجموعين على واحد القصرية ديال كسكسو فداك درب حتى ناضو كلهم يطلو على الي ضرب داك الفران...رجع مارش اغييغ ودار دومي تور فالبلاصة وبسرعة كسيرا راجع حتى تم جاي داخل وطلق كلاكسون مجهد لعساس باش يحل ليه قبل مايوصل...تعطل عليه غير شوية باش حل صعرو": كنتسنى فالقلاااااااااوي يحل عليا ؟؟ نتسنى سيادتكم القلاوي حتى تحل على خاطرك ؟؟؟"عينيه خارجين يخلعو"

العساس"صرط ريقو" : لا سي البغدادي كي سمعتك نضت ن...

مخلاهش حتى يكمل كسيرا بطوموبيل حتى تهزت ودخل فرانا بجهد وخرج من سيارة دخل لدار نيشان طلع لفوق بغى يحل الباب لقاه مسدود...

زين الدين"خبط الباب بايدو وزفر بعصبية اش غايدير دابا وكيفاش غايعرف كيفاش دايرة السنسلة باش يعرف اش يدير....عارفها متكذبش...كل مكيتفكر شنو دارت ليها وكل مكيزيد يصعر...باغي يمشي يقت...لها يطحنها..خرجات توبا من البيت كتعقد فبينوارها بغاات تنزل تجيب الما تشرب دواها حتى لقاتو متكي على الباب وحاط جبهتو"

توبا : ولدي ياك مكاين باس !!

زين الدين"هز راسو بسرعة ضار عندها مشربن" : الباس جاني من كحل الراااااس الباس شديتو من الي قراب ليا تلگات ليا معاكم...تحركي الى بغيتي تحركي وفوتي ملة مي فهاد الليل...

توبا"صرطات ريقها وهي ترجع لبيت هي كاع نسات واش كانت غاديا على قبل الما"....

اش غايصبر هاد زين الدين لاش غايصبر مزال على شي حد..وهي جاتو فواااحد اللحضة معمييين ليه عينيه ودابا باغي غير يسمع صوتها وخا تجري عليه تاني معندوش مشكيل غير يسمعها يعرف انها فايقة...

زين الدين : فرح حلي الباب متخليهش مسدود ونعطيك العاهد منهضرش معاك حتى تهدني... هاد القاعدة ديال تسدي الباب بساروت معنديش معاها...

"هز راسو لفوق كيسووووط حاس بالخنقة صدرو كيغلي..ضار جيهة الكوافوز الي تما مشا الفاز قلبو مالقاش فيه ساروت...هبط ايديه كيقلب فجيابو كانو عندو سوارت جبدهم لقاه وسطهم كان ديجا دايرو على قبل هاد السدان الي كتسد عليها كيطلع فالليل يطل عليها بالحس...حل الباب ديال البيت ودخل...باقي البيت كيف خلاه مجمووووع فيه واحد سكون رهييييييييب...واحد ريحة فشكل ميزها انها ريحة زفورية ولكن غريب كيفاش غاتجي لبيت...

زين الدين : فرح..."هز عينيه ناحية باب الدوش مشى ليه وقف واحد الشوية وريحة عاودت عطاتو تاني...حط راسو عالباب وهز ايدو دق بشوية" فرح...الله يرضي عليك جاوبيني واخا نعطيك تيساع خاطري ميعطينيش...فرح الي بغيتيه نديرو معاك كوني على خاطرك. حيدي من بالك نشوف فشي بنت المراة من غيرك هي الي عمرها تكون ليا...

بقلة حيلة مالقى جهد...واخا هدداتو خاطرو ماعطاهش يخليها...ماعطاااهش لقى راسو عاوتاني جا يطلبها من جديد وخا قالت ليه خليني ماقدرش...ماطاوعاتوش خاطرو يمشي ويخليها فهاديك الحالة لانها ماشي حالة طبيعية خليوني وحدي كانت حالة مجنونة العقل فيها فرفر بالمعقول...وهادشي ماغريبش عليه كونه دكتور ودايز من هاد المجال...صونا ليه التيليفون فجيبو..راسو على الباب ايدو تسللات لجيبو بقلة حيلة ماشافش شكون وصل وطلق الخط جاوب نيشان"

زين الدين : الحاااااج راسي مبرزط الحاج...كصبر راسي بالريييط باش نشد فراسي هاد ساعة على جال مرتي...

عصام"ناض على وقفتو فحال الى حس بشي حاجة" : مااال فرح ؟؟؟؟!....

غمض عينيه...يااااربي اش غايقووولييييييه اااااش...

زين الدين : مقلقة عاوتاني...

عصام : اشنو وقع ليها علاش ؟؟

زين الدين : كانت فرحاااااانا وهرسوها...كانت ناشطة معايا وكبروها فينا....باش نجيك نيشاااان..دخلو بيناتنا ولاد الكلاب...ختك مكملة وكملو عليها...على اخر يامي نخلي مرتي ونشوف فوحدة غيرها !!! مادرتها فشبابي نديرها فشيبي..."تنهد سايط انفاس كتحرقق بشدة" من بعد ونهضر معاك عصام...الخاطر شاد فشعرة هاد ساعة...

عصام : هادشي مابقاش عاجب ملتي من لاخر...

زين الدين"خرج عينيه" : لا عاجبني انا عااجبني اسي الله اودي.."تبسم باستهزاء" مخير هادشي الي انا فيه مرتااااح فيه...

عصام : طنز على عدو ربي تانتا طنز...

زين الدين : كري ممساليش هاد ساعة...مبرزط مع ختك ختك اعصام..الامانة ديالك بلا علمك...بغيت وقيت نشوف معاها وشنو غانوصلو ونهضر معاك...دير ليا خاطري وخا مكاين الي يعطيني الخاطر دييير....

عصام"عرف انه ماشي تالهيه وشي حاجة كاينة..مكرهش لو انه يهز طوموبيل وميوقف حتى لدار ختو وتشكي عليه تقوليه زين قلقني ويدور فيه على قبلها ويجيب ليها حقها...ماكرهش تجي تغضب عندو ختو من راجلها كيف كيديرو العيالات مع خوتهم ياخذو ليهم حقهم ولا يكون عندهم سند يتسندو عليه وميخافوش ويعرفو انه وقت يغضبو كاين عندمن يغضبو...هاكا بغى عصام وهاكا كيخليه يرجع يتفكر شنو دار وفين وصلها كيرجع ضميرو يعذبو عذاب شدييييد الي ماغايحس بيه حتى حد...العذاب الي هو فيه صعيب انه يتفسر هذاكشي علاش كيبقى كل نهار يسول كل ساعة يسول فزين الدين كيدارة اش كدير ياكما تقلقات...ماعالماش فرح بكمية الصور الي عندو من زين الدين وصفاء وفوزي...نفخ بجهد حتى تسمعات عند زين الدين الي حس بيه هاز وميهزش قد زين الدين فهاد اللحضة...مسد عينيه بصباعو ونطق بقلة حيلة" : واخا خوذ راحتك نشوف...ماتنساش تعطيني خبارها زين الدين...وخا خايب معاها وخا منسواش عذروني وعطيوني خبار بنتي....

زين الدين : متوصينيش عليها..."تنهد بحرقة" ماتوصينييييييييش"طولها"...

قطع معاه وضار جيهة الباب...مردش البال فاش كان كيهضر مع عصام انه الحس مقطوع ماتوگض حتى سالا المكالمة وهو يغوبش...حس بشي حاجة ماهياش الحس مقطوع فعلا...مد ايدو لبواني وهو يحل الباب.وطل براسو كاتبان ليه متكية عاطية بضهرها نعسة الي دايرة فحال شي وحدة ناعسة جابتها نعسة تما عيات ونعسات تما داكشي باش يحساب ليه راها عيات وتمات لقات راحتها....

زين الدين"جمع حجبانو بحزن على حالتها" : ضريييييتك كاع حتى تنعسي هنا !!..."زاد قرب وتحنى عندها بغى يفيقها باش تنوض او يهزها" فرح...

"دورها عندو مع ضارت عينيه مشاو نيشان لد.م الي سااااارح فلارض مكبد...عينيه خرجو حتى ضربو الضو بالصدمة طاح لارض جالس...ضار هنا وهنا وعاود طل على داكشي عاود لقاه نفسو...صرط ريقو قلبو ولا كيضرب يضرب يضرب يضرب لواحد ظرجة حتى طلعات ليه سخووونية مع راس عينيه ولاو حمريييييييييييييييييييييين وعروقو خرجو...بغى يهضر كيخرج ليه حرف ويبح ليه صوت...كيعاود يطل ويرجع يجلس...دور وجهو هنا وهنا حجبانو تكمشو بجهد" : ففف فرح !! فرح لا لا فرح لاااا ماشي هادشي الي عرفتك فيه..."كيحرك فيها" فرح علاش كضحكي معايا بهادشي !! علاش باغيا تعذبيييني عليك!! وااااااااااااااا فرح..."كيحرك فيها بجهد..باش يحضر عقلو العقل طار...دورها عندو كانت مغمضة بحال شي وحدة نااااعسة..." وااااااااااا كبيدة ديالي...وااااااااااالفرحة ديالي مسحي هادشي ونوضي براكة من ضحك. علاش كديري ليا هاكا !! هذا ماشي ضحك فرح براكة مقلقة مني ضحكي معايا بهادشي ؟هذا هو العقاب عندك تعذبيني بهاد الضحك...من نيتك الفرحة ديالي.....وااااااااااااااا فرح علامن كنمووووووت....

"هز راسو لفووووووق كيغمض عينيه ويعصرهم باش ينفض داكشي الي شاف وانه ماشي حقيقي...فرح ديالو ماديرش هادشي متوصلش بيها لهادشي....الفرحة ديالو حنيييييييييييييييينة ماكضر حد وماضرش راسها...فرح مؤمنة مكتقطعش صلاتها باش تفكر تنهي حياتها...كيحرك فراسو ب لا لا ماشي فرح ماااااشي فرح" لا لا ماشي الفرحة الحنينة ديال هاد زين الدين الي تقتل راسها وتخليني وحدي لا حنين لا رحيم...اااااااااافرح راني كامل بيك ومافيا والو بلا بيك...افرح علاش كتعذبي فيا وفيك بدوبل..."هبط راسو وحطو فوق جبهتها وايدو تحطات على حنكها الباااااارد وفمها الي بيااااض..." فرح راكي امانة خوتك..فرح راكي مرتي مني وفيا...واااافرح را ماعندي عليك فين غادي ومنشوفش فبنت المراة من غيرك...وااااافرح راني شربت عليك المرار باش وصلت ليك...راني ساكت وصابر لولاد لحراااام فشردك اما نطحن الزمر كامل وندخل عليه الحبس...والى دخلت لحبس لمن نخليك لمن افرح....علاااااااش فرح علاااااااااش...."عض سنانو تا عضهم كيخرج داكشي الي باغي يخرج من صدرو كيخرج زين الدين الي فااااق على شنو وقع....هز راسو الفوووووووق وطلق اكبر غوتة ممكن يخرج من فمو وصدرو غوتة خلات الصدى ديالها يضرب فداك الدوش....

واااااااااااااااااااااااااااااالاااااااااااااااااااا....والااااااااااااا...الفرحة ديااااااااااالي سخااااات بيا....

حط ليها راسها فلارض كيترعد ايديه ماشادين والو بالكشييفة.....مالقى غير يحيد قميجتو بجهد حتى قطعها بقى غير ببيل سماطي ورجع مشى لعندها شد ليها ايدها...ودورها ليها على المعصم مزيااان وشاد بسنانو وينهج...باش ينوض رجليه فشلو نسى واش عندو شاش ومستلزمات الاسعافات الاولية ....

زين الدين"كيعقد ويتمتم" : الفرحة ديالي مبقاااتش بغاات تفرحني..."دور وجهو ناحية الباب وبدا يعيط بالجهالة " مراد مراااااااااااااااااااااااااااد..."حتى بح ليه صوته...طبعا مراد مغاديش يسمعو...خشى ايدو فجيبو جبد تيليفون وقابل تيليفون مع عينيه كيحلهم باش يقلب على نمرة مراد واااالو مشاف تاحاجة مزيان...بزز بالكشيييييفة باش لقاها ودوز ليه الخط بقى يصوني يصوني يصوني حتى جاوبو كي جاوبو"

زين الدين"عينيه خارجين بهلع" : فرااااااااااااااااااااح مشاااات ليا....

مراد : اش واقع !! شكون !!! مال فرح...بلاتي حضر عقلك

زين الدين : واااااااااااا القلاوي مرتي مرتيييييييييي غاضيع ليا وااااااااااااااعدو ربكم حضرو معايا عقلكم.....واااالرب العااااالي غاتقتلوووو ليا مرتي....وااااااا القلاااااوي...خدم طوموبيل نديو مرتي..مرتي غاتمشيييي لياااااااااا....

مراد ماعرف باش تبلى حدو سمعو قاليه خدم طوموبيل ماتعطلش فالبلاصة طار ناض من بلاصتو هز كونطاكت وتيليفون وخرج من البيت بشورط وتيشرت فعز البرد ماعقلش على راسو ولكن را غوات زين الدين عمرو ما سمعو بديك الطريقة ديال الجهلة الي ركبااااتو...ملحح بجهد فغواتو بحرقة توصلك شنو كيحس توصلك....

زين الدين : واااااااااربي اناااا طبيب كنحضر عقلي ونتي فشلتيييييني افرح فشلتييييييييينييييييييييي....علاااااااااااش فرح..."كايعاود يحرك فيها ويغوت حتى دخل مراد وهو يلقاه حاط راسو على صدرها ويغوت... تحنى عندها دور ليها ايدها على عنقو وخشا ايدو تحت رجليها وبداك جهد ديال الخلعة هزها بين دراعو ماحاسش بتقلها...حط راسو على راسها وخرج من دوش والبيت قدامهم قدام ضحى الي عينيها محبسوش من البكا وقدام توبا تاهي الي عينيها غرغرو منضر ديالو هووو زين الدين كيضر ويهرس الخاطر كيشوفو فيه هازها معافر معاها غا باش يوصلها...كيزرب ويتمتم وعينيه دموع بغاو ينقزو منهم وهو كيردد " : مرتي مرتي مرتي مرتيييييييييييييي مشاااات ليا...

دخلها لور قادها ومراد من لهيه حال الباب عاونو حتى قادوها وركب زين الدين طبعا حداها ضار مراد بزربة كسيرا بطوموبيل خارج من الفيلا باقسى سرعة ممكنة لاقرب كلينيك....

زين الدين"حاط ليها راسها على صدرو عريان غير ببيل سماطي فقط ماحاسش بالبرد بالعكس العافية الي فيه دابا ميعلم بيها غير الله....وجهو قايسو دمها وصدرو وهي راسها على صدرو حتى قرب راسو وحطو على راسها ومزييير ليها على معصمها باش ميرجعش ينزف.." : فرح الفرحة ديالي...فرح كبيدة ديالي...فرح المفرحاني...فرح الحنينة ديالي..."شد ليها ايدها لاخرى وحط كفها على فمو باسها وبدا يهضر وفمو فيها" بغيتي تسخاي بيا ياك فرح !! سخيت عليك كااااع تخليني انا وخوتك...كاين شي حد يسخى بالفرحة ديالو !!..."باس ليها راسها وهبط لوذنيها ونطق بصوت هاااامس" : نتي ماشي ديال تخليني وتموتي...هضرتي منعاودهاااش معاك...شنو گلت ليك انا ااا ؟ ياك گلت ليك نمووووت معاك !! نموت معاك فرح نموت معاااااااك"هرب ليه صوته فلحضة"...

بسرعة الي مشى بيها مراد وصلو لاقرب كلينيك وقف سيارة وخرج كيجرييييي عيط ليهم جاو كيجريييو حلو الباب عليهم لور وتعاونو حتى خرجوها...خرجوها ليه من وسط حضنو...كانهم حيدو ليه روحو من وسط صدرو...حطوها فالنقالة وطارو بيها وتبعهم مراد يلاه وصل لنص وهو يحس بزين الدين مكاينش ضار يشوفو لقاه فطوموبيل مسرح ايديه كيف حيدوها ليه من حضنو كيف بقى عينيه خارجين...كيشوف فالجيهة فين داوها هكاك بقى مكوانسي...

مراد : زين الدين حضر اخويا عقلك الله يرحم ليك واليديك...زين الدين ماتخلعنيش عليك.."حط ايدو على كتافو كيحرك فيه" زين الدين خويا كتسمعني...زين الدين..."خضخضو بجهد حتى شهق وهو يحول الشوفة لمراد" زين الدين مرتك دخلوها حضر عقلك اخويا حضر عقلك....

زين الدين"بجهد الي فيه دفعو وهو يخرج من طوموبيل ومشى كيجري تابعهم خلا مراد سد الباب وتبعو تاهو...حتى لقاهم دخلوها لمستعجلات وسدو الباب وهو يجلس فلارض الي داز يشوفو فديك الحالة يتاسف مراد مالقاش ليه جهد خلاه على خاطرو حتى داز الوقت وحس بيه عااااام عااام على قدو وهي غير عشرة دقايق باش دخلوها وهو كيتسنى يلاه بغى ينوض يدخل بزز منهم وهو يخرج طبيب" : مرتي !!

طبيب : زمرة دمها شنو هي !!؟

زين الدين : A+...

طبيب"هبط راسو باسف" : ماعندناش الكفاية درنا ليها الكيس لول ولكن الباقي مايقدناش ...

فهاد اللحضة عصام جالس فالبيت الضو طافي كلشي ناااعس مجايب خبار الا هو شاعل تيليفون... النعاس طار والقلب مهانيش...الي دخلو الي خرجو فديك الكونفيرساسيون بينو وبين زين الدين كاع تصاورها فلاهم..كيتسنى بشوووق يتكونيكطا زين الدين...قلبو كيضرب بجهد ونفسو قلالت...حك صدرو وقرجوطتو باغي يتنفس ووالو...حتى صونا تيليفون باسم زين الدين فالبلاصة جاوبو وقال : مالكم !!!

زين الدين"بصوت بح بجهد..كينطق حرف ويرجع يصرط ريقو" : ختك بغات دمك..."هز عينيه لفوووق حتى نزلو دموعو يجرييييييييو" بنتك بغات دمك اخويا...

قدام باب المستعجلات الي تما...الخمسة ديال الصباح..فرمشة عين بين ساعة وساعة الثانية تقلب كلشي سفاه على علاه...من بعد ماكانت الابتسامة مرسومة على شفايفها وحمرة الخجل مزينة خدودها وهي نازلة فالدروج هازة جلايل قفطانة...متوثرة باش تنزل ويشوفها وتمشي معاه تساندو فاحدى اهم الحفلات الي كتخص خدمتو...فضرف ساعات قليلة كانت على وشك تنهي حياتها وتخلي وراها قلوووب محروقة عليها وقلب عاشق تقسم وتهرس لشقااااف بالحزن عليها...كيف دابا نيييييت...

زين الدين" واقف حدا داك الباب كيتسنى الفرج كيتسنى شي خبار عليها والانتظاااار حارقو انتظار وصول عائلتها عصام اول واحد فوزي جدها خالها...العقل والقلب راه معاها لداخل..حاط جبهتو على الحايط يمكن تما فين لقى الراحة فقط باش يصبر بينما يعرف شنو غايوصل بيها الحال...كيتسنى فاهم شخص فحياتها..حتى تحطات عليه ايد فوق كتفو زيرات عليه باش يدور عندو"

علي : هاك لبس حوايجك ماتبقاش عريان هاكا...

زين الدين"الصمت"

علي "طبطب عليه" الله يكون معاك عااارف الي كاين ومقدر وضعك..لبس غير باش تبغي دخل عندها..سمع مني اصحبي...

زين الدين"بدا يسوط بتعب عيااا بالمعقوول شاد فراسو غير بزز وكل شوي مراد حاضيه من الي هضر مع عصام....شد من عندو شنو جاب ليه قبية بزربة رماها عليه ورجع لنفس الوضعية الي لقى عليها راحتو.."

مراد"قرب لعلي وهضر بشوي" : شوف ليه ديابيت غير شوية كان غايطيح كون ما عطيتو الما فيه سكر...

علي"هز راسو كيشوف فالانحاء بانت ليه واحد فرملية هازا بلاجو فايدها غاديا وهو يوقفها" : بنتي...گليكوميتخ !!

هي : شكون بغى يعبر !!

علي"قرب لعندها وشرح ليها شنو كاين وشكون هو وهي تحرك راسها بتفهم دخلات لواحد الغرفة نيت تما جابت ليه شنو بغى ومشى لعندو ماهضر معاه ماتكلم...شد ليه صبعو ديال ايدو الي مدلية لتحت اما لاخرى مسندها على الحايط الي حاط عليه جبهتو...ضربو بشوكة حتى خرجو نقيطات د.م منو ماحاس بوالو لا بشوكة لا بووواااالو...عيااا من الهضرة عيا من الغوااات عيا من كلشي...الي فيه كافييييه فهاد اللحضة النار الي كتغلي فيه والحزن الي معشش فيه مايعلم بيه غير الله...عبرو فلاباراي لقاه طااايح كيفاش واقف الله اعلم عرف انه مواقفش غير لله فلله..الوقفة ديال شي واحد عاااض فالنفس كيتسنى غير نقطة ويطيح...ضار عند الفرملية عطاها لاباراي...ووصى مراد يجيب شنو غايحتاج...بسرعة مراد خرج جاب ليه شنو طلب قاد ليه كانيط دار فيها سكر ودار فيها باي وقرب لعندو طبطب عليه...

علي : ماعليش صبر معايا وشرب شوية من هادي ! غير باش تبقى واقف الى قالو ليك دخل عند مرتك تكون شاد فراسك !!"ماشي معاه بالخاطر"

زين الدين"نطق بصوت مبحووح مع الغوات تبح ليه الى هضر بشوي مكيتسمعش شنو قال الى عاود صرخ يتسمع" : مرتي سخاات بيا...

علي"قرب ليه ودنو" : كيفاش !! ماسمعتكش..واخا غير شرب شوية عافاك...داكشي الي قلت هو الي غايكون ان شاء الله..

زين الدين"صرط ريقو..هز ايدو بغى يشد من عندو وهي تشد فالخوا على شوي يطيح كون ما شدو مراد وعلي حتى قرب ليه كانيطة ودارها ليه فايدو بقى شاد ليه فايدو لا يفلتها وطلعها عند فمو عاونو باش دارها شوي بشوي حتى بدا يمص كوكا شرب علاش قد حيث غرقها ليه سكر باش يطلع ليه ويتقاد لانه عارفو مغايشربش بزاف داكشي لاش ضاعف ليه الكمية...بغى يرجعها وهو يدفعها تا تلاحت لهيه..مشى مراد هزها ومسح لارض"

مالقاو ليه جهد من غير يسايروه...انتظار فانتظار وترقب...وديك الطريق وشحاااااال كانت طوييييييلة عليهم...جاب الله ع.العالي الي سايق اما كانو كلهم بالدعقة والخوف كل وفين غايمشي...ما وصلو لكلينيك حتى حسو بعاااام من زمن داز عليهم...مع فرانا ع.العالي مزال حتى ما وقفات سيارة خرج عصام منها كيجري كان شوي يجي على فمو....غادي ويتمتم بسميتها....

عصام : فرح بنتي فرح بنتي بنتي بنتي واااختي واااختي طرف مني..."عينيه حمرييييين مغرغرين..دخل لكلينيك وتابعو فوزي كيعرج...كيقلب بعينيه بجهالة هنا وهنا حتى بان ليه زين الدين متكي عالحايط وهو يغوت بحر جهدو" واااااااااااااااااااااااااااااااااختيييييييييييييييييييييييييييييي"عينيه خرجو بالغوات عروق نواضرو تشكلو من كترة ماتورمو...ديك الغوتة الي خرجات منو فحال شي واحد كيغوت وكيقول را ماسمعونيش...المعنى الحقيقي ديال جهل بالغوات هي الي دار عصام حتى ضارو ناس تما كيشوفو وكاين الي خرج يطل وسيكريتي تاهو جاي باش يشوف اش كاين"

زين الدين"هز راسو بزربة وهو يدور ومشى كيزرب عندو عينيه خارجين" : عصااام "شنق عليه بلا عقل" ختك مرتي بغات دمك...ماعندناش وقت عصاااااام ختك "نزلت ليه واحد دمعة" ختك بغاات منك د.م ..اجي هاهي....

ماكيشعرش براسو شنو كيدير حتى انه مشافش شكون جا فوزي الي كينهج بالخلعة عينيه خارجين تاهو المحجوب الي شاداه غير هناء وعبد العالي ودموعو دايزين...

المحجوب"رجليه فشلو عليه" : سير اعصام سير حييي الد.م من جديد...سير وهاد المرة لا تعطل شااااااااااي...تقهرنا وتعذبنا وجهدنا تقااادا وجهد الى جهد الله....

الوقت مكانش للعتاب والقاء اللوم على شي حد...العقل خارج وبنادم جاهل خايف لا ضيع ليهم من بين ايديهم...جاب الله كانو اكياس باش عاونو بينما يوصل عصام حامل نفس الفصيلة...بسرعة دخلوه...

الطبيب : قبل منبداو ضروري من تحاليل rapide (سريعة)باش نتاكدو من نفس الفصيلة عاد باقي الامراض الي متكونش معدية..

بزربة دارو هاد الاجراءات كان هو جالس عقلو مرفوع كيدير غير الي قالو ليه وهو ماشي معاهم باش يعتق ختو...كان داكشي سريع دغيا حتى جات الفرملية علماتو باش يتبعها فين غايبداو يهزو ليه د.م..بزربة ناض وتبعها حتى دخلو لغرفة...

عصام"تكى فوق البياص الخاص بالتبرع...هز عينيه فالسقف...قلبو كيضرب بجهد..صدرو كيحرقو خاطرو مرض من جيهتها..عذاب الضمير الي هو فيه كيخليه ينسى شنو دار زين الدين الي باقي مفهمش مزيان شنو طرا بيناتهم لكن هادشي كامل كيخليه يعرف انه هو السبب الاول والاخير فالي وصلات ليه فرح والا شي حاجة بحال هادي بينها وبين زين الدين مغاديش تاثر عليها لهاد الدرجة انها توصل بيها تبغي تنهي حياتها بهاد البساطة...

جالس فلارض مسرح رجل ورجل موقف ركبتها الي حاط عليها ايدو الي حاط عليها جبهتو كيسمع فصوت المحجوب كيقرا فالقرآن الي مخليه مهدن وهو كيسمع تلاوة ديالو بصوته...مراد واقف لهيه كيهضر هو وعبد العالي وهناء كيعاود ليهم شنو طرا وكيفاش لقاها زين الدين...فوزي كيمشي ويجي يعرج برجلو ويحك فصدرو وعينيه حمريييين بالبكا على ختو الي قهرت راسها وقهرتهم...تكرفصات بمعنى الكلمة وكرفصتهم...علي جالس فالكراسا حدا زين الدين الي جالس فلارض حالتو تقطع فالقلب...حالة ترقب وانتضار دامت لوقت طوييييل حتى قرب القلب بتفگس وهما كيتسناو...

اما عصام كيف سالاو معاه جابت ليه الفرملية بلاجو فيه عصير وبيمو ودانون...خلاهم وناض حس بالدوخة حتى كان غايطيح لو ماشدات فيه الفرملية

فرملية : اسيدي خاصك تاكل شي حاجة سي نو مغاديش تقدر توقف راك عاد عاطي د.م ديالك...

عصام"دار صباعو بين عينيه كيحاول يوقف..حلهم وعاود سدهم وحلهم باش توضاح ليه رؤيا...حط ايدو على صدرو حاس بالحنقة والحرقة.." : بغيت نشوف ختي...

فرملية : ميمكنش اسيدي حتى تولي شوية ويدخل عندها طبيب والبسيكو...

عصام"شد ليها فكتافها وبعينين كيترجاو لاول مرة شي حد يترجاه عصام حتى بغا يبكي" : الله يرحم ليك ميمتك اختي خليني نشوفها راها بنتي ماشي ختي...شحاال هادي ماشفتها حسبيه عام ديال القطيعة وتجيني خبارها بغاات تقتل راسها كي غادي يكون بيا الحال ؟؟..نشوفها قبل ماتفيق..

فرملية"بقات كتشوف فيه بقى فيها وفنفس الوقت متقدرش تصرف منها لراسها" : عرفتي شنو ! بقى شرب هاد العصير باش تقدر توقف شوية انا نعلم دكتوغ ونجيب ليك الخبار...

حرك راسو بزربة مدعوق...بالفعل خلاتو ومشات عند طبييب تما علماتو...حتى تم جاي هو وياها لقاوه شرب الكاس ديال العصير

طبيب"خاشي ايديه فجيابو". : سي عصام مكملتيش ماكلتك.

عصام"بصوت مقجوج" : بغيت نشوف بنتي..

الطبيب : حتى تكمل داكشي الي حطو ليك تما...

عصام : باش نوقف !! الى تخليني نشوف بنتي بيها باش نوقف ادكتور...انا شاد فراسي غااا على قبلها الى ماتت ماعندي مندير فبوها هاد الحياة"هز فيه عينيه مغرغرين" خليني نشوفها ماحدها ناعسة الى فاقت منصيبش نشوفها...هازة مني وخاصني صبر ايوب باش تشوف فيا...هاني داير الخاطر...

طبيب"مافهم والو لكن الي فهمو انه بيناتهم مشاكيل ومحاولة انتح..ار هاد الاخت او بنتو الي كيهضر عليها خلاتو يستنتج..هز حجبانو باسف وضار شاف فالفرملية وحرك ليها راسو"

فرملية : تفضل معايا سيدي...

عصام"حرك راسو بزربة" : دابا دابا....

تم غادي وهو يربت ليه طبيب على كتفو باسف...تبع الفرملية حتى لواحد الممر مشاو فيه ووصلات لباب الانعاش الي تابع لمستعجلات دارت البصمة تحل الباب ودخلو حتى وقفاتو عطاتو لباس الخاص دارت ليه البافيط وهي تعطي تعليمات لفرملي الي مقابل الانعاش تما...حرك راسو وهضر معاه بالحس حيث المرضى ناعسبن تما حالاتهم غير مستقرة...تبعو حتى وقف وجر الستار غييييير جرو وهي تبان ليه مجبدة فوق السرير تما...ايد فوق كرشها ضارة عليها فاصمة فوق المعصم المعصم الي خلاه يكمش عينيه وحجبانوو تا نزلت ليه دمعة تجريييييي....وايد ممدودة مجبدة فيها تيو ديال مرو د.م لعرق...فمها بيضضضضضض وجهها شاحب وبيض فيه نقيطات نمش هما الي باينين...عينيها تقولي غير ناعسة شفارها صهبيييين...

عصام"حط ضهر ايدو على فمو حجبانو مكمشين بالقهرة عليها..قرب اكثر وتحنى شوي لعندها" : واش انا نسخى بيك حتى تسخاي بيا !! واش عارفاني نخليك وخا نخياب تانعيا...راني غا خايف عليك وخوفي خايب...وراني غا مكنعرفش نهضر ونوصليك اختي...دنيا عامرة ديااااااب وديابها الى ما كان عندك جناح يگول انا خايب ونتا بقى زين..نضربك ونطحن الي يضربك...بغاااااو يلوحوك ليا لزنقة ومخليتهمش..ونعاودها ليك ونعاودها...راني شديتك فيك بايدي وعضيت فيك بسناني من نهار تزدتي من قبل ماتدور علينا امنا وجهها وترميك انا شديت فيك بسناني ماشي حتى بغاو يرميوك عاد شديت فيك..."حط جبهتو على جبهتها" راكي كبدتي ونتي فكرش ميمتي...

حط راسو على جبهتها...هو حاس بالعافية والبراكين كتلوح ليه العافية...حزنو والعذاب الي هو فيه مايمكنش توصفو او تشرحو لشنو واصل من درجة...يكفي ان دموعو نزلو عليها هادي كافية انها تبين مدى الكسر الي تعرض ليه من جيهتها...بمجرد انه كيتفكر انها سخااات وبغات تمشي من هاد دنيا هادي را تجهل الي مايجهل...وقف عليه الفرملي...

فرملي : خاص تخرج دابا سيدي ميمكنش تبقى كثر من خمسة دقايق...

عصام"ضار حرك ليه راسو ورجع شاف فيها..باس ليها جبهتها وتحنى اكثر باس ليها ايدها المضروبة" : انا مشيت بقاي على خاطرك حتى ترطابي من جيهتي وبابي مفتوح ليك...دارك هاديك دارنا بثلاثة واخا نجري عليك داااركم هاديك...انا غا عبد وانسان والانسان كيغلط...

هز راسو وضار خرج من الانعاش مخلي قلبو معاها...حيد اللباس حلو ليه الباب وهو يخرج خرج من تما وضار وهو يخرج من الباب الكبير حتى خرج لعندهم غير شافوه وهما يتمو جاييين ماداهاش فيهم مايوقف غير قدام رجلين زين الدين وقال...

عصام : تحرك قدامي نشوف اش واقع لهادشي كامل...

زين الدين"حرك راسو بشوي حتى هزو وشاف فيه" : بغيتي تقتلني حيث ضريت ختك وانا مافراسيش !!

عصام"غوت بجهد تا قربو لاخرين" : واااااا تگلع عليا من تم نشوفو اش وااافع...كون بغيت نقتلك نقتلك ملي كانت ختي بعقلها حدااااايا...

فوزي : شفتيها !؟ كيدايرة ؟!

عصام"ماجاوبوش" : انوض اشريف تحرك...

علي : عصام ماشي وقت هاد الهضرة....خلي حتى تفيق ختك...

زين الدين"هز ايدو موقفو" : وقتها وقتهاااا...من بعد ماتفيق مايبقاش لينا الوقت...خاصنا الخاطر يتكب جيهتها..ماحدها ناعسة نفكو هادشي.."ناض بزربة وقف وحرك ليه راسو" تحرك معايا"ضار جيهة مراد" كونطاكت طوموبيل نتا...

مراد"رمى ليه ساروت" : هاهو خويا...

زين الدين"تم غادي وعصام تابعو وهو يدور عند علي" : شي ساعة ونكون هنا...

تاحد مازاد معاهم الهضرة خرجو بزوووج...ركب زين الدين فالسيارة وتبعو عصام ركب حداه...بزوج بيهم واقفين غير بالدعاء...شاف علي فمراد الي هز ليه كتافو بمعنى مكاين مانديرو...حرك راسو يمين شمال بقلة حيلة...ديمارا طوموبيل خرج من الكلينيك وهو يكسيري باقصى سرعة غاديييين فطريق وكل واحد كيفكر وعقلو غايب...

المحجوب"شاف فعلي" : واش هادو الي مشاو وحدهم فاش عينهم !؟ واش عينهم يقتلووووني ولا اش ؟! علاش ممشا حد تبعهم اعباد الله واش متحيلتي لهاديك الي لداخل هلكتني فصحتي وزادوني تا هادو !! واش حنا كنتهناوش من هاد العذااااب اسيدي ياربي ؟؟."غوت" واااااااااااااش مانتهنااااااااوش..."طاح ليه تسبيح من ايدو تخلخ كان شوي يطيح كون ما جرا عبد العالي وشدو هو وهناء الي كانت كتهضر مع صفاء وتسكت فيها من البكا...اما سيمو ماتسناش كي عرف هو ومو خرجو من الدار وركبو جاييين لعندهم..."

هناء : صفاء جدي مرض دابا نخليك...

صفاء : عااافاك بينما نخرج گولي ليا كيف بقات اهى اهر عاااافاك غايبقى بالي مغاديش نخدم بخاطري اهى...

هناء : واسكتي من البكا...ان شاء الله تولي بيخير غير تهناي.."مسحات دموعها وقطعات معاها ومشات لعند جدها جبدات الدوا من صاك وقرعة الما عطاتو دواه ديال طونسيون بزز باش شربو من عندهم وهو يمشي علي لاستقبال خذا ليه شومبغ وعطاهم حالتو خلص التسبيق وهما جيبو نقالة وهزوه فيها نيشان لشومبر تكلفو بيه..عطاوه مهدئ وخلاوه بالشومبر...

الساعة العاشرة صباحا...شومبر عااادية حولوها ليها...واقفة فرملية عند راسها كتحيد ليها فالكيس ديال الد.م الي تسالا ليها...حولاتو ليها لسيروم عادي...دورات راسها كتشوف فيها...بانت ليها كترمش فعينيها وهي تخرج من شومبر عيطات لطبيب الي جا من بعد خمسة دقايق كيزرب.حتى دخل لعندها لقاها كتحل فعينيها وكتسدهم...حتى حلتهم بشوي وبقات حابسة شوفة...

طبيب"قرب لعندها ونطق" : مادام كتسمعيني...

فرح"جمعت حجبانها وحركات راسها"

طبيب : شنو سميتك ؟

فرح"كتصرط فريقها حلقها ناااشف" : ف احم ففرح..

طبيب : عرفتي فين حنا ؟!

فرح"هزات فيه عينيها ودوراتهم هنا وهنا حسات بايدها كتكها ومتقلة هزتها وهي تبان ليها فاصمة ملوية عليها"

طبيب : سيي نتي فكلينيك جيتينا جارحة المعصم ديالك..والحمد لله خيطناه ليك كلشي مزيان دابا..اليوم الخميس...عائلتك جابوك عندنا الباارح وهما برا كاملين كيتسناوك...ولكن قبل غايدخل عندك واحد السيد واخا.."ماجاوباتوش...اطمان انها نوعا ما بيخير...خرج هو وشي خمسة دقايق دق الباب وتحل وهو يطل براسو مبسم..الخطوة ثانية من بعد تدخل الطبيب ولابد من طبيب نفسي عاد يسمحو لعائلتها باش دخل"

يونس : مادام فرح...صافا اليوم !!

فرح"الصمت"

يونس"حل الباب ودخل حتى وصل لعندها" :شنو وقع لفرح الي كنعرف !!

فرح"بقات سااااكتة ساكتة عينيه فنقطة فراااغ قبل ماتهزهم فيه وتنطق بصوت ضعييييف مبحوح" : علاش عتقوني !!؟.

عض يونس شنايفو خاشي ايديه فجياب سروالو...صونا ليه تيليفون جبدو شاف المتصل وقطع...قرب لعندها جر الكرسي وجلس...

يونس : الحل عندك هو هذا الي درتي ؟!

فرح : حتى من الموت ماخلاوني نموت !!...

يونس : كاين شي حد كيسخى بحبابو ا فرح !! انا ومابغيتكش تموتي حسب الله حبابك...هانتي متي عند بالك هذا حل باش ترتاحي !!..من امتى بديتي كتحسي براسك مابقيتيش باغيا تعيشي....

فرح"هبطات عينيها" : من نهار حليت عيني..من نهار نعتني با بالحرامية ولاحتني مي وانا الي كندير صداع لخوتي مع با...حتى بغيت ولقيت الي يتهلى فيا وكان حتى هو سباب الصداع...

يونس : امتى حسيتي براسك مرتاحة..وخا ساعة فحياتك امتى كانت !؟...

فرح"سكتت...تفكرات الساعة الي كانت مرتاحة فيها...كانو اياام سنيين !؟..."

يونس : الساعة الي كنتي مرتاحة فيها هي الي رجعي تفكريها هي الحل لباش تبداي من جديد...ديما حطي فبالك الايجابيات ونساي سلبيات...او بعض السلبيات الي ممكن ضرك انيليها فعقلك وفكري فالي تعلمك...كاين بعض المشاكيل كتخلينا نتعلمو من اخطائنا وكاين بعض المشاكيل متستحقش نفكرو فيها باش نتعلمو...فكرة انك تنهي حياتك ممكن تكون حل باش ترتاحي من مشاكيل ديالك ولكن هي مجرد ضعف الشخصية ضعف الايمان...الى بغيت نتهنى من مشاكيل نواجهها..او نتفادا بعضها..

فرح"الصمت"

يونس : على هاد الحساب خاصنا نشوفو شنو نديرو لهاد المشاكيل باش نواجهوها..

فرح : مابقاش عندي خاطر ولا سوفل باش نواجه شي حاجة...

يونس : وشكون قاليك غاتحتاجي خاطر ولا سوفل !؟

فرح : كتعاملو معايا فحال انا هبيلة كتبقاو ضغطو عليا حتى بقى ليا الموت هو الحل...ديك المرة مابقيتش بغيت نجي عندك وهانتا جيتي...

يونس : شي حاجة طبيعية نجي...فهاد الحالة ضروري يدخل عندك طبيب نفسي يعرف علاش بغيتي تنهي حياتك...ولكن حيث انا كنعرفك ديجا جيت انا لانني عارفك بعقلك مامحتاجاش لطبيب نفسي حيث هبيلة...كون كنتي هبيلة كيف مسمية راسك كنت غانخرج ليك دوا ديال ديبريسيون(اكتئاب) ونعطيك مهدئات تبقاي غير ناعسة فينما حسيتي براسك ماشي هي هاديك تشربيهم وتنعسي...كان ممكن نغرقك بدوايات و"سرح ايديه" وكنتي تبقاي هاكاك منفوتش معاك خدمة بسيكو...مي انا عارفك انسانة capable...على ماعاودتي ليا شنو دوزتي فانزگان لدابا وكيفاش واجهتي دوك المشاكيل بداك الحجم "بدا يفق بايدو" كنعطيك اكبر تحية...

فرح"دموعها بداو ينزلو...هزات عينيها لفوووق" : هذاكشي كاااااامل الي وقع ليا تما اهى اهى انا الي وصلت راسي ليييييييه...كنت عايشة بيخير حتى دخلت راسي لصداااع...سمحت لصداااع يدخل بيناتنا...عطيت فرصة لغدارة ودخلو بيناااتنا..انا وصلت راسي لهادشي...انا الي كنضر وتاحد ماضرني انا الي ضرييييتهم...من نهار حليت عيني وانا سباب المشاكيل اخى...مابقيتش قادرة نزيد نصبر مازال...

يونس"دار ايدو على حنكو" : نتي دابا كتشوفي راسك هادشي الي وصلتي ليه نتي سبابو !؟

فرح"حطات كمايم ايدها على عينيها وحركات راسها كتمسح دموعها"

يونس : تحطي حد لحياتك باش تهنيهم منك على حسب مافهمت..."سكتات ماجاوباتوش" ابدا واش هذا حل..."حرك راسو بشوية" بون..نتي دابا حاولي ترتاحي...وعشية نرجع عندك..ثيقي بيا مادام فرح لو تشوفي مشاكيل بعض الناس ممكن يبانو مشاكيل الي فحياتك مكيسواو والو..."ناض وقف" نتمنى تفكري فهضرتي...

فرح"شافتو غادي جيهة الباب وهي تعيط ليه كتمسح فدموعها" : مابغيت حتى واحد يدخل عندي دابا...

يونس"حرك راسو" : كوني هانية...

حل الباب وهو يخرج لقى زين الدين وعصام وكلهم واقفين حتى من صفاء جات هي وامها وسيمو ونجية...

زين الدين"بغى يمشي يدخل عندها وهو يشدو من دراعو موقفو تا هز حاجبو وشاف فيه" : علاش !؟

يونس : خليها اليوم من بعد ودخلو عندها...مابغات حتى حد يدخل عندها...

المحجوب"بصوت حزيييين يقسم الخاطر" : حتى انا !؟..

يونس"باسف" : ماعندكم ماديرو غير تصبرو...شفتي كثرة ضغط لشنو وصلاتنا..وقعو شي حوايج ماكانوش على بالنا ساهمو فكثرة الضغط...شيء طبيييعي يوقع هادشي...

عصام"حدر راسو قلبو حرقو..اذا كان جدها مابغاتش تشوفو مابغات تشوف حتى حد...وتبغي تشوفو هو ؟؟ فواحد اللحضة ضحك بجنب..زعما راني كنحلم ندخل عندها وتستقبلني بالاحضان..دور راسو بالحس وسط منهم مجموعين كااااملين تما عند باب الغرفة...وتسلت من وسط منهم وخرج مكسووور ماحسوش بيه امتى مشى...وكيف قاليهم خلاوها على خاطرها وبقاو هما بلا خاطر...رجعات الفرملية عطاتها مهدئ ورجعو هما كيتسناو حتى مشى مراد رجع لفيلا طمن ضحى وتوبا عليها...كاين الي بقى وكاين الي مشى والي ماتحركش ابدا...

وصل الليل...تحل الباب بشويا ودخل بالحس..تقدم ناحيتها بخطوات بطيييئة حتى وصل لعندها وتحنى كيشوف فيها..قهراااتو عليها..كان على شوي روحو تخرج بالخلعة كون وقعات ليها شي حاجة...ماعمرو ينسى المنضر الي شافها فيه وهي بين الحياة والموت...عمرو ماينسى دماياتها فالدوش..

زين الدين"باغي يقرب ليها يقيسها وخاف تفيق..باغي يعنقها يقوليها انا معاك لكن !! صعييييب صعيب فهاد اللحضة خصوصا فاس حلات عينيها وشافت فالسقف..هز راسو بزربة نطق بلا مايحس" : الفرحة ديالي!!...

فرح"ماجاوباتوش كتسمع ليه فحال كتسمع لهضرة بعييييدة..خلاتو كيهضر وهي دور لهيه وعطاتو بضهر خلاتو بلاكة"....

خلاتو كيهضر وهي ترجع لافكارها راسها بدا يدي ويجيب والاحداث بدات كتربط ليها...غمضات عينيها وماحساتش براسها حتى مشااات...

اصبح يوم جديد...حلات عينيها على صوت الحركة عند راسها وهي دور لقات الفرملية كتعبر ليها فطونسيون...كملات وقيدات وهو يدخل الطبيب من جديد بابتسامة صبح عليها...

طبيب : صباح الخير مادام فرح...صافا اليوم !!

فرح"الصمت"

طبيب : بون على حسب ماعندي هنا راكي غاديا مزيان...دابا نقدر نسولك لانه ماعنديش الحق باش ندير ليك تحاليل اضافية...امتى اخر دورة كانت عندك ؟

فرح : ماعقلتش..ماعقلتش...

طبيب : تبغي نديرو ليك..test de grossesse(احتبار الحمل)

فرح"خرجات فيه عينيها" : ماحاملاش انا...ماحاملااااااش..

طبيب : صافي صافي ماحاملاش غير باش نخرج ليك دوا خاصني نسول واش حاملة او فيك شي مرض... سي ميو الي بغيتي...

فرح : مابغيت حتى دوا...انا مزيانة..كتكترو عليا الهضرة بزااااف..

طبيب : واخا خوذي راحتك سمحي لينا الالة ههههه..."كتب شي حاجة..سولها على تحاليل لانه قانونيا طبيب معندوش الحق يدير تحاليل بلا رضى المريض الا فحالات خاصة راها معروفة طبعا..." بون من هنا ل 2 جوغ تقدري تخرجي بالشفاء ان شاء الله...تبسم وهو يخرج...

واحد الشوية جاو عندها خوها فوزي جدها صفاء نجية فاطنة سيمو خوالها بنت خالها مرات خالها كاملين تجمعو عندها كيضحكو ويصحكو معاها وهي ماهياش هنا غير كتسمع ليهم وصافي الابتسامة غابت على شفايفها...كيهضرو وعقلها غاااايب..حتى هزات المانطا جرتها عليها وهما يخرجو فهمو انها بغات ترتاح...موصينهم طبعا ميضغطوش عليها...سلمو عليها وخرجو....عاود رجع يونس هضر معاها شوية وخرج..نهار كامل وزين الدين خارج مادخلش عندها نهار كامل وهو غايب حتى كيطمنوه عليها فتيليفون وصافي...كانت ساعة ثامنة ونصف مساءا...جاي داخل لكلينيك داير فيستة على كتافو الكونطاكت فايدو كيلعب بيه دخل لسانسور وتكى على الحايط كيتسنى يوصل يتحل ويدخل...تحل الباب وهو يخرج مشى نيشان لشومبر دق الباب ودخل طل عليها براسو لقاها واقفة قدام شرجم كتشوف فالشارع...

زين الدين"قرب لعندها باس كتفها وهي تقفز بعدات مشمئزة منو حتى هز حاجبو" : شوية دابا ؟!

فرح"الصمت"

زين الدين"هبط عينيه لايدها وهو يدور حط فيستة فوق نانوسية ورجع لعندها قبط ليها ايدها" : تبرا ان شاء الله ونعطيك شنو ديري ليها باش مايبقاش سيكاتخيس تما.."باس كفها بالفاصمة الي فيه حيث مودرينها ليها تما باش شادة"

فرح"بعدتها" : ماباقيش تحط عليا فمك الله يرحم ليك واليديك..

زين الدين"صرطها" : كاااع !؟

فرح : كااااع..ماكتفهمش راسك ؟ راني وصلت الموت بسبابك ومزال جاي عندي بوجهك حمر ؟! غادي تگوليا عارفاني مانديرش هذاكشي ومانخونكش غانگوليك دييييرها وتفوتها راني هضرت وهضرتي منسيتهااااش..انا وياك مابقى جامعنا والو.."خرجات فيه عينيها على جهدهم" خوتي وماصبرو ليا وتصبر ليا نتا...كاع هذا حب ليا !؟ بهاد المشاكيل والنحس الي تابعني بغيتي تبقى تشوف فيا ؟!...

زين الدين : نتي نعمة دخلات لحياتي ونفرط فيها !!

فرح : انا عمري نكون ليك نعمة ...انا تابعيني المشاكيل غذا ولا بعدو تشوف وحدة غيري...عمري مانكون ليك امراة"كتنهج"...دخلتي بيناتنا كي السوسة دخلتي بصداع من نهار عرفتك وانا فالصداع مع خوتي شتتي لينا الشمل..عطيتك فرصة وماكنتيش قدها...عمري منسمح ليك...

زين الدين"غزز سنانو" : فرح راك كضريني...

فرح : ضرينا بعضياتنا بزااااااف.. منصلاحوش لبعضياتنا ماعمرنا كنا نصلاحو....خرج دابا وخليني فهمي الله يرحم ليك واليديك...

دورات وجهها جيهة شرجم كتشوف على برا وضواو الشارع سانيين فعينيها الي كانو حمريييين....باقي جنواح مناخرها كيفرفرو بقا كيشووووف فيها وحجبانو مخسرييين لو كانت راجل كان دخل فيه يجيبو منشور...ضرب دورة وخرج سد الباب بواحد الجهد تا غمضات عينيها وقفزات مكمشة بين كتافها دورات راسها شافت الباب لا يكون تگلع من بلاصتو....هاديك خرجتو من الكلينيك داز من حدا فوزي وصفاء كي الريح سخوونة...ركب فالجوموبيل وكسيرا بسرعة قصوى...

الحداش ونص ديال الليل...صوت السرسار...خرجات من البيت كتسد فحزام البينوار ماشية حفيانة على روس صباعها باش ميتوسخوش رجيلاتها وحدة مزينة بالخلخال وثانية فيها وشم صغير مؤقت tattoo semi permanent......

هي"صوتها رقيييوق رنان" : شكوون؟ "طلات من العين السحرية وهي تخرج عينيها تا بدات تضحك وقلبها كيضرررب.." : ميمكنش يكون هو !!!؟؟؟

حلات الباب لقاتو مسند بايدو على الحايط حادر راسو وحجبانو معقودين بجهههددد...شاد الفيستة بصبعو وراميها ورا ضهرو..."

هي : اهلااااااا ههههه...

هز فيها عينيه ورجع حدرهم شحااال هادي بينو وبينها وبين هادشي من ايااام الشباب نيييييت...تا كيبغي يدير بناقص ويتعود من شيطان رجيم ..."زفر تا بغى يرجع وهي تردو"

هي"شداتو من دراعو موقفاه..هبط عينو لايدها وهز حاجبو قلبو كيضرب" : نسالي وقت الي بغيتي "تنهدات بحب" توحشت الزين...

حيد الفيستة قادها بين ايدو والايد لاخرى تمدات نيشان لصدرها مع شدو بين ايدو دفعها لداخل...حتى تزحات مع اقرب حايط...

سحر : اااااي...اوفففف...ههههه"ضحكات بجهد" اااااااححياني عليك ادكتووووور باقي مجهد كيف عرفتك من سنييييييييييين هادي"عضات شنايفها" توحشتك بزااااااف....

من اصعب الاوقات الي ممكن يمر منها الانسان هي اوقات الضغوطات النفسية الي هي مرحلة خاصك تحدى فيها راسك ك شخص واش قادر تواجه المشاكيل وحدك او محتاج المساندة من الناس الي ممكن يساعدوك ينصحوك...او تعيشها وتعلم منها او تفشل فانك تواجهها...انك تصبر صبر الي خاص يكون صبر ايوب ولكن مع الاسف نتا ماشي ايوب...

قرب الفجر...توقفات السيارة امام كورنيش البحر حيد سانتيغ وبقى لدقائق مسهوت عقلو مرفوع عينيه حمريييييين..حط راسو على الفولون صدرو كيطلع ويهبط...الليل كلو وهو غير كيدور فشوارع مدينة الدار البيضاء وهضرتها كتنغل ليه فراسو وقلبو الي تهرس مية شقفة...الي كان كيعذبو بيه ضميرو هو الي قالتو ليه بالحرف...من ديما كيحمل راسو مسؤولية شتات هاد الاخوة...من ديما كيحاول يصلح حاجة كتخسر ليه حاجة...من ديما كيداوي جرح كيلقى جرح اخور جديد...حتى نسى راسو را انسان...صبر الصبر الي ماكانش هو براسو كيصبرو...ولو رجعنا لسنوات للوراء وقاليه شي حد انه غادي تصبر بزاااف كان غايضحك عليه ويقول نتا كتحلم...عيا بجهد عيا بالمعقول ولو يكون جبل حديد غادي يتشق ويتهرس...من ديما كيفكر انه يضحي بمقابل ترجع فرح لخوتها الاخوة الي خلاتو يندم علاش دار غلطة لولة ودخلهم فحساباتو بينو وبين راجل عمتو...

فوسط الحر..ب الي نايضة فراسو تدقت زاجة ديال النافذة هز راسو لقاه يونس عاد وقف حتى هو بسيارتو وصل عليه وكان باين على وجهو انه ماشي تالهيه....

زين الدين"حل الباب وخرج وزاد قدام طوموبيل ووقف مسند عليها حتى جا حداه يونس"

يونس : الفجر قرييب ياذن...

زين الدين"بغير نفس" : موضي نتحركو لجامع !!

يونس"هبط راسو جامع حجبانو متذكر ما وقع قبل سويعات قليلة...حرك راسو وضار تقابل مع البحر زين الدين حاط الكارو ففمو كيكمي ويسوط خاشي ايديه فجيابو...نطق" : الى بغيتي تمشي لجامع انا نتبعك حتى تصلي وخرج تلقاني برا...

زين الدين"هز حاجبو وضار عندو بالعرض البطيء" : قطعتي صلاتك !

يونس"غمز بحنكو" : تت...مموضيش...

زين الدين"جر تا جر من الكارو ولاحو عسف عليه وضار حط ايدو على كتفو" : الجامع فيه فين توضى...

يونس : زين الدين مموضيش.."غمض عينيه باسف ماحاملش راسو فهاد اللحضة.." متحكرش....

زين الدين : شنو درتي !! رجعتي ل شراب القلاوي"على نيتو..حيث يونس كان من نوع الي كيشرب ماشي ادمان وانما زهو وصافي..ماتقولوش طبيب نفسي را ميديرش هادشي المهنة شيء والحياة الخاصة شيء..."

يونس"هز نفس تا هزها وغمض عينيه كيزفر ماحاملش راسو...ضار لهيه مابغاش يشوف فيه" : كون رجعت نشرب هانية...مشاكيلي حليتها بمصيبة....

زين الدين : شنو درتي ؟؟...

يونس : الوقيتة الي كنت واخذ كونجي فاش جا عصام خو المدام ديالك...عارف فين كنت ياك ؟

زين الدين : مشيتي تخطب على حد علمي !!

يونس : درت لاكت كاع..."دوز بايدو على وجهو بتعب" ففففف..البنت الي تزوجت كنعرفها شي عامين هادي...وقعو بيناتنا شي مشاكيل فهاد الاونة لاخرة...فكرنا انه زواج الى تجمعنا نتقربو ونصلحو المشاكيل الي بيناتنا لان علاقتنا كانت اديسطونس هي ف وجدة وانا ف كازا...المشاكيل تفاقمت وكل مكتجي نتلاقاو كيوقعو مشاكيل كثر من الي كنا فيهم قبل زواج...حتى البارح كنهضرو فالعرس شنو نوجدو شنو منوجدوش...داكشي ديال تخربيق العيالات حيث هي ف وجدة دابا...بقينا مني منك مني منك..متفاهمناش كبر المشكيل بلا مندخل فتفاصيل....فاش هضرتي معايا حيث ماجيتش لحصة مع المدام ديالك...مكنتش مسالي...

زين الدين : عندمن كنتي !!"خرج عينيه" رجعتي ليها ؟!

يونس"حدر راسو وكمش حجبانو" : رجعنا كنهضرو بحكم تلاقيت بيها ف مؤتمر الرباط...حتى قبيلة لقيت راسي غادي عندها و "عض فمو ماحاملش يذكر انه نعس مع وحدة وخان مرتو"

زين الدين : neurologue الصواف !! يونس ؟ ..وحلتي فتخربيق العرس والعيالات مشيتي عند الصواف !!؟

يونس : سحر كانت وباقا كتنسيني همي واخا غلطت...كان عليا نكمل معاها هي ومنتزرفش فزواج الي مكانش عندو ساس ولا راس...من لاخر...

زين الدين"فعز همو وازمتو جاه الضحك" : بفففف...لا حول ولا قوة الا بالله...الي ماعندو هم ناض يديرو صحة..46 ans يونس...il te reste 4 باش توصل ل خمسين عام ا بروفيسور يونس...من لول عينك ف الصواف ماتزرفش معاك بنات ناس..."خرج فيه عينيه" ما هاز حتى مشاكيلك ونامنك تفك مشاكيلنا...

يونس"خنزر فيه" : زين الدين رد بالك لهضرتك...tu sais bien خدمتي ماعندها علاقة بحياتي الشخصية !!!

زين الدين"تا بغى يمشي ينطحو وهو يرجع لور وضار جيهة البحر...ويااااالاه اسي كان فهمو تا لقى راسو تايسب ف يونس الي ماسوقوش فيه هههه...لكن حيث كيعرفو وحيث كان كيعؤف انه كان على علاقة فالقدييييم علاقة سهر زهو ونشاط ب واحد الاختصاصية اسميتها سحر....فاش كان كيقرا كان زين الدين فبدايات دراستو ف كلية الطب...ضار شاف فيه لقاه حادر راسو وكيضرب فشي حجرات.." : عرفتي شنو !! انا مشيت لجامع يقدر نبقى فيه حتى لصباح ومن تم نتحرك نشوف شنو ندير فحريرتي...

يونس : صباح بيناتنا تيليفون...كسف وصيتك ماتحكرش...

زين الدين"حل الباب بغى يركب وضار شاف فيه" : جهدي تقادا يونس..جهدي "خرج عينيه" تقااااادااا...مانحكر مانقرب الي بغيتوه هاني دايرو...غذا عندي منقضي مع ولاد القحاب الي ضارو بيا...نشوف منين نبدا...سلام عليكم...

يتبع...

اختر رقم الجزء (45)

ولادة من رحم الفساد الجزء 36

محتوى القصة

التعليقات