ولادة من رحم الفساد الجزء الثالث

صوت اذان الفجر ليوم الجمعة بمدينة الدار البيضاء ...حل عينيه على صوت الاذان مرة كيصليه فوقتو مرة لا مرة كيلقاه داخل لشي اوپيغاسيون(عملية) مرة كيكون عيان وينعس اليوم ضرباتو الفيقة ناض بقا جالس دوز على وجهو بايديه مشا لدوش توضى وخرج رما عليه فوقية وتقابل مع القبلة فرش صلاية بدا الدعاء عاد قام الصلاة بخشوع تام كمل وبقا شحاال كيسبح جمع صلاية وحيد الفوقية ورجع لبلاصته هز تيليفونو شاف شي ايمايلات دوز لخط لمساعد ديالو ف دبي مغريبي عندو باك +3 ف التمريض تخصص العلاجات الاستعجالية والعناية المركزة... مقيم تما خدمو معاه قبل ميمشي لدبي وكان كيعرف باه قبل ميكمل زين الدين قرايتو ف فرنسا ...اسميتو سعيد " : شنو كاين تما ؟

حط تيليفون وصلوه شي ايمايلات قراهم تقارير الحالات الي عندو وحتى تقرير المشروع ديالو من عند كاع الي كلفهم حيث مشروع ضخم دايرو وهو مولاه خلاهم بلاتي حتى يسالي ...جبد من المجر ديال طابل دونوي glucomètre (لاباراي باش كيعبر سكر ) جبد ريشة من ريشات الي كيدريها فلاباراي دار فصبعو واحد فحال ستيلو فيه شوكة صغيييرة تسمعت تتكك ضربات ليه صبعة وباقي حجبانو بنفس الوضعية مكمش عينيه موالو مولف واصلا قلبه قاصح ههه قطر فيها نقيطة د.م وخشاها فلاباراي تسنى تا عطاتو العبار كان عادي 1,10 مزيان ليه فهاديك الوقت حيث مزال مفاطرش ...جبد الايباد سجل فيها الساعة الي عبر وقدامها النتيجة ديما معاه هاد النوت كيكتبها فلايباد والمذكرة ديالو يعني يدويا تاهو ورجع حل لماك ديالو دار نضاضرو ودخل يقرا تقارير اليومية لحالات ديال مرضى ديالو شي ساعتين ولا قل وهو كيقرا حتى وصلات سبعة ونص وناض جبد من الماريو قميجة نص كم كحلة وسروال توب كحل سد السوال ودار سمطة ومع نقص من شعرو بزاف غير دوز عليه رش ريحتو ولبس تقاشرو ودار ساعتو قبل ملبس صباطو مشا لمجر جبد ado ..شرب حبة وشرب موراها قرعة كاملة ديال الما ومشا لمراية حل زوج صدفات حتى بانو شعيرات صدرو لفوق هز تيليفونو دارو فايدو جبد المذكرة لاصق فيها ستيلو وقيد العبار يدويا باش كل كنطرول كيجي اختصاصي ديابيت يشوفو ،،كيكتب فيه بايدو ليسرية حيث هو اعسر ... عاد خرج من البيت وتم هابط كتسمع صوت خطواتو ثقااااال غادي بشواااايا عليه خاااتر فالمشية تا نزل لقا توبا غاديا هي والخدامة كينحطو فالفطور برا "

توبا"باس ليها راسها " : صباح الخير .يلاه تفطر معايا ؟

زين الدين : فين هما ؟

توبا : الغالي مزال مافاق و مراد مشا بكريي هو ووليد لمشروع وضحى ماقاريا تال وحدة ...

زين الدين"عوج فمو بجنب كيستهزء " : مع 1 مزيان 12:30 تكون فاقت ياك ؟ الحاجة اش هادشي ؛؟ فين باها ؟

توبا"حدرت راسها بحزن" : اولدي راك عارفو مخليها براحتها و"قبل متكمل قاطعها بصوت مرتفع شوي"

زين الدين : اااا الحاجة الحرية زايدة لبنتو كتنوغش لواحد الحرية زايدة باغي يتهنى من صدااعها ...عارفها اش واكلة اش شاربة ؟ عارفها اش كتق"سكت مغمض عينيه بنفاذ صبر مستغفر الله" واااا شريفة بنتك عارفاها فين كتمشي ؟ ااا ؟ "يلاه بغاات تهضر وحبسها" بنتك انا الي ف اخر دنيا وعارفها اش كدير ...

توبا"بخوف وصدمة" : اش دارت ؟

زين الدين"تسم بجنب بغيض " : فبلاصة ما "غوت حيث فقصو بجهد تا ما حسش اش قال بلا ميشعر " القوااااااد ديال باها ناعس كي الولية يحضيها واااااااااااالد "كيشير لصدرو وصوته خلع الخدامة تا هربت هذا غييير مجهد صوته ماغوت ماوالو ولا وجهو يخلع خصوصا مخنزر وعينيه خضرييين مع سموريتو خلاتو يبان مجهد مبقاتش قدرت تهز وتمشي دوز من حداه ولا قلبها يضرب" اناااا الي معنديش الحق ندخل فيها دخلتها تحت جناحي تا وليت حاضيها ...

توبا : راها اختك اولدي...

زين الدين"هز ايديه" : ما نكرناش حيث بنتي راني حاضيها حيث بنتي نهار تبدا ففعايل سلاگط ماهي فخير معايا "خبط فوق واحد رخامة تا قفزات عمتو" ندفن عدو ربها تحت لارض ..."حس براسو ماهو تا دوز على جبهتو "

توبا : مالك ؟

زين الدين "هز ايديه ومشا معصب كيتمتم ويستغفر الله "

توبا : راك نتا الي الحاج فهاد الدار ماشي الغالي نتا مول العقل ..الله يالغالي بغيتي تقتلني...

مشا تلاح فوق الفوطوي "شاف ساعتو وصل وقت باش ياكل كب ليه قهوة كحلة وبدا ياكل فصلاد ديالو والخبز وزبدة مذوبة مع الزعتر كيف كيبغيها خاصة بيه معروف خاصو يفطر بيها ...حس براسو رتاح شوي حيث ضروري خاصو ياكل بنص ساعة من ورا دوا ...

واحد شوي تمات جايا توبة ووراها الغالي وصلو عليه لقاوه واقف كيهضر بعييييد ويشالي بايديه تا كمل وتم جاي ...

زين الدين : سوارت ؟

الغالي " مد ليه سوارت طوموبيل الي وصا عليها مراد ياخذها ليه مؤقتا ريثما استقر وياخذ وحدة الي تخدم ليه " : BMW كاتكات الي حدا طوموبيلتي ...

زين الدين "بعصبية" : عندك تانتا الحاج ؟

الغالي : وايلي اهههههه

زين الدين : مزيااان مزيااان ..."شاف فساعتو" تعطلتي لا ؟

الغالي : انا مول شي وقتما جيت ...

زين الدين"هز حجبانو وشاف فيه بواحد نضرة بعينيه كتضحك هههه " : وااااايلي ..اللهم بارك وزد في ذلك "شد من عندو سوارت ومشا عطاهم بالضهر خلا توبا حابسة ضحكة على طريقة زين والغالي الي كيضحك ماخاصو تا خير ههه " وااا الرب العالي بنادم دينمو طحنو وتدي لاجر ..."مشا مكرهش كون كان الغالي صغر منو يدگو ههههه "

ريحة سانيكروا كتفوح من الدار دنيا منقية وتشعل دار كلها تخملات من سفاها لاعلاها البيوتة تحكو وطلامط تصبنو ..وكل من هي شرويطة صبناتها في المكينة وتخمال تعاونات هي وصفاء يومين وهما فيه حتى من الماعن الاليمنيوم حكوهم فالسطح بيوت كوزينة دوش كلشي حكوه خلاو دار ريحتها النقية والمعطرة كتعطي وهادشي مغريبش عليهم بزوجات حاررات فالشقا ونقيات بزاف ...غير سالاو جمعو حوايجهم ودخلات فرح هي وصفاء لدوش دارو تبريمة خاصة مكونة من ( شبة مطحونة ديال حمص مطحون منيل و زيت فليو ونيلة والورد تاهو مطحون عكر الفاسي كلشي بعبار معيلقة الا عكر فاسي الي شوييي ف زلافة ديال حنة مطحونة فالفردو الي مهراز تاع العود مخلطة ب ما ورد دافي تا جراوها وطلاوها لحمهم بقاو بيها ولبسو عليها وشعرهم تاهو دارو ليه الحنة فيها روايح ...وخرجو مشاو هزو صيكانهم ومشاو لحمام برفقة نجية دخلو لحمام وهي تعطيها نجية ميكة فيها تخليطة كيديروها فالعادة للعروس...

نجية : هاكي بنتي سمي الله ورمي هاد لبسيسة (تخليطة فيها دقيق فيه سكر وزيت رومي ) لوحيها فالقنات و وصروبة الحمام(صروبة من صرب يعني قادوس).."خذاتها من عندها وطبقات شنو قالت وبسكات ودخلو والكسالة كتزغرت وتصلي عالنبي وفرح حشمانة وحادرة راسها.. فرشو الجلدة عمرو سطولة وبداو الاستحمام حكو راسهم مزيان وغسلو شعرهم وتشللو خصوصا فرح غير تشللات بباندوش دارت سطل ديال ما دافي خوات فيه ما ورد وتشللات بيه لبسات بينوارها ودارت فوطة على راسها وخرجات مزنننننننگة بالحمورية وسخوونة ...خرجو لقاو فوزي جايب طوموبيل من عند صطوف وتلقا ليهم ...

فوزي : ابصحة وراحة "باس راس نجية وضار خربقة صفاء وفرح جمعهم هههه " هاي هاي على لالة العروسة ليوم تسني على خلا عشتك مغانبقا لا انا لا عصام نخضرو معاك ...

فرح"غييير قالها ليها حسات بكرشها تهزت تالسما ونزلات وواحد العرق تكب عليها ودموعها دارو فررررر الوجه من كترت ماتزنگ تحطي عليه صبعك تبقا بلاصتو بيضة ويرجع بدم دارت ايديها على وجهها كيبان غير كتافها الي كيتهزو وصوت بكاها حنييين معرفتش علاش هو بجرد ماقال هكاك حسات غاتبعد على روحها "

صفاء : اويلي البغلة "جاتها البكية" لاش كتبكي ازمر مالك تانتا مكتسكت من بارح وهي تبكي...

فوزي"شاف فنجية ورجع شاف ف فرح وهو يمد ايدو حيد ليها ايد وباس ايدها" : والله اختي منفرقوك وخا تمشي لدارك كل نهار نجي عندك وديري ليا الغذا نديه ولا ش كوتي دايزو الكلام .. مريضة بالرب تا مريضة عمرنا منحاديوك ...

فرح"بتنخصيص" : اهى اهى ونصبن ليكم حوايجكم ...وشكون يسيق ليكم دار شكون الي يهز سروالك فيه ريحة زفورة وريش والعرق ...

فوزي : صافي هنينا

فرح : ولا سراول عصام الي فيهم صرف ونديه انا ولا صرفك انت ...

فوزي : قول نتي ابتلحرام الي سايساني فرزقي...

فرح : عصام كيحط سراولو متنيين نتا كتحطهم مقادين ...

صفاء"بالحس" : عصام خليه عليا مضربي حسابو..

فرح : سكتي انتي اهى اهى...شكون الي يجمع ليك تقاشرك الي كترميهم تحت ناموسية فردة تحتها وفردة تحت ناموسية عصام ...

فوزي : كنباتو نضاربو بالليل ههههه

نجية : وراكي خويتهم امهم الهازة همهم وراكي الحنانة ديال خوتك ورا يتسندو عليك وتسندي عليهم را عمرك تفوتيهم وخا ديري ولاد ولادك الخاوة حدها دنيا وجاتك ساهلة بنيتي حمدي الله راكي حداااهم فدربهم حمدي الله مامفرقينكم طرقان وممبعدينكم بحورا حمدي الله راكي عند قمونتهم ..

صفاء : الفرق غير غاتنعسي فدار من غير داركم ...

نجية.: خلي خوك يتهنى عليك ابنتي الجهد الي تجلسي را ديري دارك ...الله يكمل عليك بالخير...

فرح"مسحات دموعها وفوزي تاهو كيمسح فيهم تا حيد سانتيغ وقرب لعندها باس راسها وعنقاتو كتبوس فيه وتعاود " : خويا حبيبي .

فوزي : فروحة خوها الحنينة ديالنا ...صافي سكتي متخليش عصام يشوفك فهاد الحالة والله تايجري عليهم وبناقص من شي جواج ...

نجية : سوگ اولدي دغيا را فاطنة غا وحدها مع طيابة فالگراج...شكون جا ؟

فوزي"حرك السيارة" : كاين عمي مبارك وبا (جدو) وخالي الحسين ومرتو كاين داك صالح خو بوك "شاف ففرح حيث عمهم صالح مكيحملوهش كيعيطو ليه غير خو بوك ولا صويلح هههه هو حطب جهنم هو مزناد المخنتر..."

فرح : ولااااش جا لاش مجيتو ديال نحس يالاطييييف ومكيستكتش"شدتها البكية"

فوزي : عصام فالذمة وبا تاهو وعمي مبارك وانا غا سيمو لاخر جوج كلمات يخليه يشطح "بداو يضحكو حيث عارفين سيمو مرخرخ لا طلقهم كيطلقهم كي القرطاس هادشي باش كيعجبك هههه" وصلو لدار مع دخلو كانت لابسة بيجامة بيضة تيشرت وسروال قطن وبينوار ديالها مدور عليها دونتيل من الهدايا الي شرا ليها يونس ومو وشال على راسها بيض وبانطوفة جديدة كلشي جديد حيدات ليهم تيكيت ف الحمام ...غير وقفات وهي تسمع زغاريت وصلاة عالنبي من فاطنة وتا نجية والطيابة ومرات خالها نعيمة حسات باحساس فشكل الي كان خاص مها ديرو وتستقبلها دارتو ليها نعيمة ونجي وفاطنة لي حسسوها بنتهم من رحم مختلف ...

الاستقبال كان ليها بزغاريت وصلاة عالنبي حتى دخلات لبيتها من بعد ما سلمات عليهم كاملين ...رتاحت واحد الشوي وحطو الغذا تغذات تا شبعات عاد جات لالة ومالي مولات المؤخرة الي كتشالي المدام ناهدة الميكاب ارتست اييييه ميكاب ارتيست محترفة قرات الحلاقة وتخصصات فيها وتزوجات وجلسات غير ولدات تفرقات مع الراجل وجات خدمات فالجديدة عند واحد المركز ديال تجميل تعرفات على صوف تصاحبو لقات اش بغات وهي تجلس ...

ناهدة"جايا بجلابة فالحمر مقادة وجهها مزيان باحترافية بميكاب خفيف بارز ملامحها الجميلة ...سلمات عليهم وتمات جايا هازة العدة مخلية ريحتها فدار تعطي بعد ماكانت ريحة البخور وند ولا ريحة ناهدة incandescence parfum دقات الباب ودخلات بابتسامة" : لالة العروسة زينة البنات...

صفاء : اهلاان ناهدة زينة العيالات

فرح : اهلا ختي دخلي دخلي ...

ناهدة "سلمات عليهم ..حطات ايدها على وجه فرح وحناكها كتهضر وتقيص فيه " : وجهك باقي سخون ازين ...صبري "جبدات من الفاليز واحد سبراي رشاتو على وجهها مزيان كتحس بيه فرح كيبرد ..."دابا تكاي هنا وسلميني راسك احبيبة...

صفاء : كيداير حميزو كي بقيتي قالو ليا كنتي مريضة ...

ناهدة"تكات فرح غير على مخدة بقا جالسة بدات تقاد ليها المسائل الاولية وكتهضر" : شوية كان ضارني حاشاك تحتي ..

صفاء : اويلي طيبو ليك "خرجات عينيها تا نغزتها فرح جاب الله مسمعتهاش كانت كتقلب على برايمر باش تبدا " هء اواه ياكما ميكروب...

ناهدة "بدات على فرح" : لا حبيبة حرقتو ههههه كنت كنتوضى ومشفتش را الما طايب نسيت مبردتو ايييوى لبقت ليه ههه

فرح : الله احبيبة ودابا شوية ؟

ناهدة : لا صافا حبي ..."بقات فرح عاطياها وجهها كتخدم فيه وصفاء كتشوف ومرة تشد تيليفونها تبقشش فيه وتكونيكطا حتى كملات ليها وضارت لشعرها صاوباتو ليها مشطة خفيفة مخلياه مطلوق مي مصاوب ببابيليز ومفرود جا ممو" هانتي زين هكا حسن يبان شعرك قوي حيث ا بب شعرك ضعيف خاصك تهلاي فيه بزيوت ومتديريهم تاتقطعيه ماشي كلو مي ضروري حيدي ليبوانت وقطعي القصة عاد داويه ...من هنا لعرسك يبان مزيان ..تتسالي اليوم وعيطي ليا نعطيك الوصفات تبعيهم بالحرف ...

فرح"ناضت شافت راسها فالمراية شيء ثاااااني ركزات ليها على عويناتها تا بان اللون العسلي فيهم وشفايفها كبرو وميكاب ترابي خفيف بانت ولا اروع ...دارت لصفاء شي لعيبات خفاف ماشي بزاف غير رتوشات ...عاد مشات فرح لبسات قفطان جوهرة وجابت ليها نكافة لبسة الي كراتها تكشيطة بيضة وتاج ديالها وليزيكسيسوار والحزام طبعا ناهدة الي غاتلبسها حيث ياما خدمات مع نكافات فالعراسات الي كانت كتصاوب لماليهم.. "

ناهدة : معاش غايجيو ؟

فرح : قاليا يونس غير ياذن المغرب ان شاء الله ...

ناهدة : فين عصام "قلبها كيضرب" ..

صفاء : مع الرجال وصطوف ازين كيقادو فالبنية فين غايكونو طلبة مورا العشا ان شاء الله...

ناهدة : اوو دايرين طلبة ...مهم هاني انا هنا معاك تانلبسك عاد نلبس انا وصفاء ...

دار مولاي السلطان سيدي يونس الدار طتروج غيييير بيهم هما العائلة الخواتات ورجالهم وامهم رجال فالبيت كيهضرو وصينية اتاي والحلوى والفاكية محطوطة اما مولاي السلطان سي يونس را دخل لدوش كيدوش ...اذان العصر كيستمع فجوامع مدينة الجديدة...خرج من الدوش كينشف حالتو موضي لبس ملابسو التحتية عاد لبس فوقهم فوقية بيضة وفوق منها جلابة جوهرة رجالية فالاصفر ...رجع شعرو لور ولبس تقاشر بيضين واحد النور نازل عليه سبحاااانك يا جليل نور فشكل ...قاد صلاية قدام القبلة وصلى صلاة العصر وزاد زوج ركعات لله تعالى سلم وقرا دعاء بخشووووع تا حس بذاتو نملات عليه وقليه كيضرب بجهدددد تا نزلو ليه زوج دمعات فحال الالماس طوا الصلاة وكمل لباسو دار ساعتو حل المجر جبد ساشية الي فيها خدية لفرح من عند مول الذهب و رش ريحة ديالو لبس بلغة صفراء يلاه غايخرج وهي تشدو ترويعة مشا لدوش رجع غير المرار مكشكش قهوي تقوليه شارب القهوة غسل فمو وحك سنانو بالخف وغسل بالبانبوش باش نضف وعطر فمو عاد خرج خرج هاز تيليفونو رسل ليها ميساج ...

يونس : حسبي ساعة ونص نكونو عندكم ان شاء الله تهلاي ليا فراسك بزاااف والله يسهل عليك ويخفف عليك ما صعاب من عقايب الدنيا وكحل راس...ويجعل فرحتك قبل فرحتي يا فرحتي ...مبروك علينا مسبقا .."خشا تيليفون فجيبو وخرج عندهم غير شافوه كانو لابسين موجدين ناضو. يزغرتو سلمو عليه كان فشكل منور تقولي ملاك وسطهم سول على مو قالو ليه را فالبيت كتصلي ومشا لعندها لقاها جالسة فصلايتها جلس حداها ومد ليها ساشية ..." هانا ميمتي هاهو...

غيتة"هزات فيه عينيها وباستو فحنكو وشدات راسو تكاتو على صدرها" : الله يرض عليك اولدي ...صافي ولدي الحنين غايدير ولادو...اييييه غير ولبارح كنتي دور ليا بتسرويلتك وشاد جلدة تجر فيها تمضي سنانك هههههه

يونس"جاتو وااااحد الضحكة عجيييييييبة كيضحك من قلبو ويشوووووف قدامو يضحك يضحك يصحك تا دخل ليها العجب وهو يتكا عليها شد فصدرو جاتو فحال دوخة تا غمض عينيه مبسم مبقاش جاوبها"

غيتة : هههههه كضحك هههه يلاه نوض اولدي يلاه نوجدو دوك طيافر "كتحرك فيه" وااا ولدي شتك نعستي رجعتي لعادتك ديال صغر متنعس ليا غير فاش نكون كنصلي وااا ولدي ... يونس واا يونس !!!

كتحرك فيه وتفيق فيه بالضحك وهي را من صبااااح وهي قلبها مكمش عليها ودابا فاش كتعيط ليه حسات برفرفة فصدرها تا تكب عليها العرق وتعيط ليه وتعاود وهو مكيتحركش تا طلات عليه لقاتو مغمض عينيه ومبسم ....

غيتة : ولدي بسم الله عليك وااا ولدي ..."غوتات على بنتها " وااااا سهااااااام سهااااام واااا بنتي اجي الله يرض عليك ... واااالحاااج ...اويلي ولدي بسم الله عليك "تحل الباب"

سهام : مي مالك "شافت فيونس ناعس" اويلي خويا مالو

غيتة : عيطي لباك وراجلك "الفقيه" سربي وحضري عقلك لا تغوتي ما والو "خرجات فيها عينيها تا مشات كترعد عيطات ليهم وجاو لعندها لقاوه هكاك باقي مبسم باه عرفو غير من لون وجهو ...جا الفقيه كينوض فيه جا راجل ختو لاخرى تاهو هزوه بزوج سرحوه فوق الناموسية بلباسو عريييس مسطح ...قاس ليه باه لعرق لقاه واقف ما هضر ما والو جرا عالبنات الي بداو يتغاوتو ومشا يعيط لطبيب غير تما حداهم فدارو ...جلسات حداه مو شادة ليه فايدو وراجل اختو كيقرا عليه وجابو صوفة غطسوها فما زمزم كيقطرو ليه من فمو كيمشييييي واحد اللحضة الما مبقاش كيدخل ولا كيرجع حتى جا الطبيب ...

الطبيب : امتا طاح ؟ "كيقلب ومو كتشرح ليه حيث هي الي حضرات " كيقلب ويعبر طونسيون لقا Ereur عاود ثاني والو نفس الشيء عاود دار ليه سناطة كيتاكد وهو كيسول وهما كيجاوبو قلب ليه دماغو وكلشي مدة وهو كيقلب ..حتى حيد سماعة من ودنيه وحجبانو مكمشين حابس البكية مقادش تا يهضر حيث كيعرفو ...كيف غايقولها واش غاينطق ...شاف فباه .

الحاج توفيق : امضرا ولدي ...

دكتور : الحاج نتا عارف بينك وبين الله وعارف ربي كيبغي ناس المزيانة غانقولها ونعاودها سعدااااااتك بهاد الولد سعداااتك بهاد الراجل الي ربيتي الله يجعلو سباب من اسباب دخولك للجنة...

راجل بنتو "حس وعرف وتاكد " : انااا لله وان اليه راااجعون...

غيتة"حدرات راسها كتبكيييي وتشد فصدرها وتحك وتهضر بصوت حنييييين يهرس ليك خاطرك واخا تكون حجر " : ولدييي عارفااااه ماشي ولد الدنياااا اهى اهر ولدييي ماشي ولد الدنياااااا ولدي مرضي ومزيان والمزيان ماشي ولد الدنيا ...واااا ولدي وفين خليتيني يااا حنيني ياااا كبدتي يا وحيدي لمن خليتيني ...

الامام"راجل بنتهم" : الحاجة كوني مع الله يكون معاك ...ولد الجنة ان شاء الله "اما باه جلس حداه وهز ليه صبعو وشهد ليه وكيردد جملة وحدة "الله اكبر الله اكبر"

غيتة : واااربي الحنين وااا ولدي واا ولدي اهى "تكات ليه على جبهتو وباستو وعاودت كتشم فيه ريحة ديالو وهو باقي بنفس تغميضة والابتسامة ...وهي تغطيه وباه كمل ليه غطاه تاغطا ليه وجهو...وهي تنوض خرجات عندهم لقات راجل بنتها قالها ليهم وهما يبداو الغوات ممثيقينش كيتغاوتو وحدة تندب فحناكها ولاخرى تخبط فجنابها ووحدة تمرمغ بغاو يجهلو عقلهم بغا يخرج ممثيقينش ياربي ورا كيوجد لعقدو ...بغاو يدخلو كيرجعوهم رجال تا يتهدنو عاد يشوفوه وهي تغوت عليهم مهم غوتة وحدة وحبسو كيتنخصصو اما وحدة غيبات ولابسين تكاشطهم..."

غيتة : مااابغيتش دمعة وغوتة تنزل على ولدي مااا بغيتش تحرقو ليا كبدتي ... "هي كلها حابسة البكية بزز" ولدي بغاه الله بغاه ربي ولدي انا عارفاه من صغرو ماشي ولد الدنيا وكنكذب راسي "كتخبط صدرها كيتسمع زدو زدو...قادات نضاضرها وكتهضر ماحساش بدموعها راهم نازلين " ولدي مشا عريس ولدي مشا موضي مصلي ولدي مباااغيش الغوات ولدي باغي تزغرتو عليه وتصليو عالنبي "هزات ايدها وطلقتها بتزغريتة مخلطة بتنخصيصة " صلاااااااة وسلااااام اهى اه.ى عليك ارسول الله الاااااااااه جاه الى جاه سيدنا محمد اهى الله معاااااا الجاه العالي ...يويويوي يويوووووووووووووي واااا زغرتو وزغرتووووووو وصليو عالنبي ...هادي ساعة من ساعات الله يحضر فيها النبي رسول الله هااادي ساعة من ساعاات الله اهى "كتحك فصدرها وتعاود عالله تطفا ديك العافية الي شعلات" ولدي مات فصدري ولدي مات فالبلاصة فين كان ينعس فين نعس لعند مولاه ...ولدي مااااشي ولد الدنيا ولدي خلاني تا ولفتو وشواااااني يا ربي ورا شواااااااااااااني ....عيطو لالة البنات الي بغاتو بلا متردد عيطو لالة البنات الي مرداتوش وماقالتش ليه لا عيطو لمرتو الي ضحكات ليه فوجهو وعمرها عبسات عيطو الي معندها زهر عيطو الي حنات فيه وبغاتو عيطو لبنت الناس وقولو ليها كوني مع الله يكون معاك ...عيطو ليها وصبروها...انا غااا نصبر غا نصبر تا يلحقني ربي ليه ... وراه شوااااني ولدي شوااااني ياربي لا اعتراض على حكمك ياااربي بغيتيه عريييس هاهو جاك ياربي هديتو ليك ياربي "هزات كفوفها وطلقاتها بتزغريتة حااارة " قولو لطيابة طيابك جا فوقتو طيابك صدقيه لعزاية ...انااا لله وان اليه رااجعون...اللهم لك الحمد اللهم لك الحمد حتى ترضى"مشا ليها صوت واحد اللحضة" اللهم اجرني في مصيبتي ....

هاهي جاات حدانا يحفضها مولانا يعيشها فالخير..اراها جات داخلة جات داخلة بالغيطة والبندير...هاهي جات حدانا يحفضها مولانا ويعيشها فالخيييير...

تحت سماع هاد الاغنية الي طلقوها فور ما خرجو رجاال وجات النقاشة وخرجات عندها فرح سمات الله وبدات تنقش ليها صبيعات ايديها ...كيشطحو ليها خالقين جو العرس ريتما يجيو اهل العريس الي مع الاسف مزال معرفوش شنو طاري ....

نقاشة : ايديك غزااالين تبارك الله عامرين تبان فيهم الحنة شهوة منها ...

فرح"مقربة ليها باش تسمع حيث صوت الموسيقى مجهد" : ربي يخليك اختي هههه "شافت ف صفاء الي كتلووز "

هاهي جات قبالي هاد الزين الغاالي ضوا علينا المكاان..

لالة مولات الهمة ثقيلة ورزينة المشية بالميزان...

لاااااالة العرووووووساااا فيناهياااا شوفو معانا شوفو معانا باينة ها هييااااا ...تبارك الله عليها تبارك الله عليها ووووووووو لالة العروسة ...

ناضت لبيتها وجلسات بينما تجي ناهدة فاش يقربو على حد علمهم وتلبس اللبسة الي كرات من عند النگافة ....جلسات فوق سداري تا نشفو صبيعاتها وبدات حنتها كتحرتت ..هزات تيليفونها تشوف شحال الساعة حتى لمحات رسالة من يونس قراتها وهي تبسم على طيبة قلبه الي كل مرة كيحببها فيه بطيبتو واحترامو ليها ..جاوباتو فورا ...

فرح : اللهم امييين ليا وليك ان شاء الله ياربي ♥️..."فهاد اللحضة كان فوزي وعصام واقفين على الدراري السرباية الي كيقادو فطوابل فالخزانة فين جلس جدو وعمامو وباه وخالو قادو ليهم طابلة فين يجلسو باش يخليو العيالات براحتهم وتنقش فرح براحتها ...سيمو كيتقدا دراري ولاد الدرب قايمين بالواجب ...حتى صونا تيليفون عصام ...

عصام : اش اصطوف فينك ؟

صطوف"مالقا ميقول حس بغصة بقا فيه صاحبو باقي مصدوم كلو مافاهم والو اش غايقول وهو براسو مزال مثايقش." : عصام ...

عصام : مالك ؟ مال صوتك ؟ "ضار فوزي كيشوف فيه كيسمع ووجه عصام لونه تبدل ختى خرج عينيه طفا تيليفون وضار هز الموطور ومشا كيجريييي "

فوزي : واا عصام مالك ؟ وفين غادي ياك شي باس مكاين ؟

مبارك"ناض لعند فوزي حيث شاف عصام طار بديك الطريقة" : خبار الخير مالو ؟

فوزي : والله ماعرفت ...

.غاتبقاي تقولي غير االصباح فطر وضحكنا غير صباح دوش غير شوية هذا هضر معايا داز اليوم غاتقولي غير البارح كان كياكل معانا غير البارح لبس وخرج ...غير البارح هاد الوقيتة طاح ...دازت سيمانة غاتقولي غير الجمعة كلينا كسكسو ...هاد الجمعة جايا هو مافيها الي فاتت كان فيها ...تبقاي هاكا فينما ضرتي تشمي ريحتو وتبداي تبكي وتالمي فينما مشيتي يقولو ليك وكااان فلان ولا فلانة يدير ويدير والي خلاااها فلان الله يرحمو...اول جملة الله يرحمو فاش كتسمعيها على اعز ناس عندك كتجيك فحال شعطة فحال شحطة لراس كتحسي بهاد الجملة جديييييييدة غريييييبة عليك فيما يخص داااك الانسان هنا كتعرفي انك غاتبقاي تسمعيها وخا تجيك قاصحة وجديدة فلول ...

عودة من الفلاش باك ...

.حادرة راسها وعينيها فلارض وقلبها كيضرب وكتحاول تقول واش هذا القرار صحيح الي خذيت رغم انه سولوها وعاودو تاتاكدو انها راغبة وقابلة بكامل اراتها ...واحد الراس كيقول الي درتيه غلاط تتشوفي مستقبلك والحب را يجي يجي لا هو لا راجل وواحد راس كيقوليها ديري بوجه شي را العمر كيدوز نتي شابة ولكن هو را باغي يدير دارو وولادو وخا مزال ممفكرش فيهم كاع رحميه وخا مقالهاش ليك خليه يشوف حياتو ...وفالاخير را وقع غير الي مقسمو ليها ربي وهاهي جالسة ...دابا الي عطا الله عطاه ناس جايين والعقد غايتكتب وغاتبداي من جديد حياة جديدة ...حتى تحل الباب وهزات عينيها وهي تشوف قبالتها واحد الشخص ولكن فوجهو علامة الحزن حتى بغا يبكييييي....

فرح "قلبها تفزع من بلاصتو تا هبط معاها العرق من ضهرها " : امالك خبار الخير !!!

فوزي"مشا يزرب فخطواتو لعندها جرها حاضنها " : ربي معاك .....

فرح"مفهمات والو حسات بشي حاجة" : كيفاش ؟ اش واقع مال وجهك صفر افوزي؟ فوزي مالك ؟

صفاء"جات من وراه كتبكي حيث يلاه عرفات منو قالها ليه عصام "

فرح"شافت فيه " : وهضر مالك افوزي...

فوزي : يونس"وجهو مكمش بقا فيه بجهد وخا مكانش كيعرفو بزاف والي هرسو هي فرح الي فرحتها تهرسات وفنهار فرحها غاتعيش القرح..."يونس م "دار ايدو على منخرو وفمو مقدرش ينطقها" يونس م ما ...كوني مع الله يكون معاك اختي هذا جهدي ...

فرح"شافت ف صفاء الي كتبكي وفاطنة الي دارت ايدها على حنكها وتبكي ومرات خالها كتشوف فيهم وتعاود وفقلبها را علم بالي واقع ملي هاد الوجوه هاكا دايرين اذن " : ربي معايا ياك ؟ شوفو وجاهكم شوف وجهك وهضرتك اخويا ..."هزات تيليفون ووراتو الميساج ديال يونس " هذا اخويا شتيه!؟ هاد الهضرة كيقولها غيييير الي حاس براسو مغايكملش هاد الهضرة ديال واحد مغايكملش يا خلاني ومشا يا وقعات ليه شي حاجة هاد الهضرة ديال راجل الي معمرك تلقا فحالو "بدات تهضر والكلام كيهرب ليها حيث حسات وعرفات " انا عااااااارفة راسي نهار نفرح كنهجرو...هاد الوجوه الي كيشوفو فيا ديال يونس مااات "جمعات فمها الي بدا يترعد " مم مات ...وو واحد حنين بحالو غادي يبقا ؟ ...واااا الي بغيت مابغاني والي بغاني ديتييييه ياربييييييييي....

بقات كتهضر بواحد طريقة اشبه بالهيستيرية مع الصدمة الي تلقاتها خلاتها غير كتهضر وتخرج ما فقلبها واكثر حاجة كانت كتركز عليها هي واش انا فين عمىي نفرح انا زهري عارفااااه ..انا الى ضحكت يتبعوني علاش ضحكت ..ماااايتبعنيش البراني البراني كلقا فيه الخير على الي قريب ليا ...البراني نهار بغاني را خلاااني ....يااااااااااااربي حمدتك وشكرتك ياربي على ما بليتيني يااااااربي راني عارفة مخبي ليا ماحسن ياااااربي ياربي"كتحك فصدرها بحرقة كل مكيرجع لعقلها را يونس مات كل مكترجع لحقيقة ...جلسات فوق سداري وفوزي شاد فيها وترجع توقف ودموعها دايزين ومكياجها نازل ...

فاطنة : الله يصبرك ابنيتي معندك ماديري بغاه الله يعلم الله بحال ميمتو ...الله ياربي وحنين داك الولد حنيييين ...

فرح"حادرة راسها وتبكي" : حنيييين جابو ليا ربي نشوفو ويمشي جابو ليا نشوفو فحال الملاك ...يونس راجل الي قلبي رتاح ليه وخا مبغيتو معمري شفتو اهى اهى يونس ربي حطو فطريقي باش نعرف ان الناس المزيانين كاينين وليني مغايكملوش فالدنيا ربي وراني يونس باش نرتاح واحد شوية من فعايل با باش نرتاح واحد شوي بالي غايتهناااااو عليا خوتي ...ربي كتب عليا حت لفرحتي ونعيش قرحتي ...ربي مبغاهش ليا ...يونس ملي عرفتو وهو يوصي عليا و يوصي فيا عليا ...يونس كان كيدعي معايا باش نعيش من وراه ...يونس ولد الناس ممكتابينش لبعضياتنا اهى اهى ...واخا كنت كنتراجع كنقول لا مغالقاش حسن منو افرح خودي الي باغيك ماشي الي باغياه اهى اهى.."شافت ففوزي " خالتي غيتة خالتي غييييييتة اهى اهى

فاطنة : نجية سبقات كي عرفت مشات تجري ...

فوزي"كيمسح ليها دموعها وكحل الي ساح ليها" : تمشي يلاه نمشيو عندهم...

ناهدة : غسلي وجهك احبيبتي وسيرو .. الله يصبركم اختي الله يكون معاك ...

نعيمة"مرت خالها" : مكتاب ابنتي مكتاااب حنا ماغلينا غير بالدعاء ونواسيو الشوية را ميمتو الي تشوات عليه...

فرح : ديني نشوفو قبل ميدفنوه اهى اهى الى خلاوني "قالتها بصوت حنيييييييين وضعييييف بقلة حيلة وقهر على داك ولد الناس" نتسامح معاه حيث "قالتها بينها وبين راسها" حيث معطيتوش قلبي كلو ...ديني نتسامح معاه الله يصبرني يااااااااربي اهى اهى...

بالفعل ناضت بزز غسلات وجهها ووسط الما كتبكي وتنخصص قلبها كيحرقها بجهد عليه وكيفاش مات بهاد طريقة الي خلات القلوب تهرسات عليه والي خلات الكبير وصغير مصدوم ..خرجات وهي باقا كتبكي ودموعها محابسينش فرحتها تقلبات لقرح حفلة تقلبات لعزا ...لبسوها جلابة ورمات على راسها شال شدات فيها صفاء درعاتها وحداها فاطنة تاهي لبسو جلالبهم مشات لعزا خطيبها بحنتها ....حتى دخلات نيشان لصالون فين كانت جالسة مو شادة قرآن فايديها وتقرا حادرة راسها مهزاتوش كتعطر صدرها بذكر الله يخفف عليها حرقة كبدتها الي تشوااات فيها وحيدها الي عندها على ربعة البنات...نغزتها بنتها وهي تهز راسها...

غيتة : مرت ولدي الحنييييييييييينة واااااااااا بنتي واااا بنتي والحنين مشااااااا واااااا بنتي واعريسك تجبد تجبيييييييييييدة لاخرة وااااااااااا حنينة بنتي وااااا معندك زهر ابنيتي واااااااا الي ضحكات ليه فوجهو وااااااالي يجي يقوليا فرح نقوليها وتقوليا وااااخا وااااالحنينة الي يهضر بيك صباح وعشية يووجد ليك فين تنورىي دارو..."وقفات ومدات دراعها ليها" اجي بنتي اجي نصبرك اجي اجي نتي يلاه مديتي ايدك لحنة نصبرك اجي راني صااااااابرة وحامدة الله اجي ..."مشات لعندها تلاحت عليها كتعنق فيها خشات فيها رساها وبقات تعاود وتلالي وفرح تبكي بقات فيها مو بجهههدد تعيا تصبر تعيا تكابر را كبدتها تشوااات فيها وعرفت كي تشوات فلحضة طار ومشا عند الي خلقو بلا ميمرض ولا يتمحن بلا ميتقتل ولا يقتل ...مشا بسهووولة عند الي خلقو ورزقو ربي بديك الموتة ...

غيتة : انا فرحاااااانة لولدي فرحانة مات موتة زينة ربي رزقو ديك الخاتمة وماااحسنها بخاتمة يااااربي لينا ولجميع المسلمين "كدوز على راس فرح"

فرح"هزات فيها راسها وعينيها مجغمين بدم دموع الي درفت..نطقات بصوت ضعييييف" : بغيت نشوفو اهى اهى...

حركات ليها راسها وشدتها من ايدها وطلعتها لدار الفوقانية الي كان كيوجد فين تروح لعندو دار مصلوحة مزياااان تريح النفس ..حلات الباب لقات باه ورجال خوتاتو جالسين ومعاهم عصام وصطوف ..عصام الي غير شافها كان غاينوض جلس خلاها تا تدخلها وتخرج... حلات ليها الباب وهي تلقاه مغطينو فوق ناموسية الي فالبيت الي كان غايكون ديالهم بيت كبيييير وهو مجبد مغطينو بايزار بيض كيتسناو باش يوجدو ليه الحنوط والكفن ولوازم التغسال حيث غايغسلو باه وراجل ختو والقرآن مطلوق فتلفازة قدامو...

غيتة : باقي ب جلابتو باش كان جاي عندك ...

فرح"غمضات عينيها وعصراااتهم بالقهرة بقا فيها بجهددد غير عرات ليها على وجهو وهي تشوفو باقي بنفس تبسيمة وسعدااات قلبها الي صبر حتى باست ليه جبهتو " : سمح ليا سمح ليا بزااااف ..."تنهدات بحرقة" الله يلاقينا فالجنة ان شاء الله.

تنهدات بحرقة" الله يلاقينا فالجنة ان شاء الله..."غطاتو وناضت باست را غيتة وايدها وخرجو مع خرجت لقات عصام واقف مشات ليه ديريكت حل دراعو ليها وهي ترمى فحضنه وتنهدات بجهد غاطسة راسها فحضن باها ديال بصح الحضن الي ديما محتويها من وهي فاللفة لحيمة الحضن الي حنييييين عليها بجهد كثر من راسو ...قهراتو ختو بزاااف حتى ف فرحتها تقلبت عزا واشمن قلب يتحمل هادشي اشمن قلب يصبر لهادشي ..."

عصام : مكتاب الله تصرف لله ما اعطى ولله ما اخذ ...ماشي فالنصيب الله يصبر والله يرحمه...

فرح "بصوت شبه مسموع" : الله يصبر خالتي ..الله يصبرني..الله يصبرني "كتقولها وتعاود.. يونس معرفاتوش بزااف ولكن تصرفاتو افعالو رجولية معاها الموت ديالو بهاد طريقة قهراااتها ونهار عقد قرانهم شيء صعييييب مع الايام غاتولف ولكن شنو غايقول المجتمع الي وخا تقدمو ناس دازو سنين وباقي اغلبهم بنفس التفكير ويعياو تا يعياو غايخرجو هاد الكلمة من افواههم ...والي سمعاتها فاش نزلات تجلس مع العزاية فالصالون فاذا بها كتصادف مع مجموعة من العيالات فواحد القنت كيهضرو...

وحدة : ورا لابس عندو ضريب الصداق هاد النهار ومكتابش ياختي..

لاخرى : ياختي العروسة رجلها منحوسة ياربي السلامة قدام النحس عليهم بضربت لصقت "دخلات لمسامعهم عادي اما هي دخلات لمسامعها بحال السم شربوه عرقوها وكل عرق كيضخ سم لعرق لاخور ..."ساهل نسمعو الحكاية لكن صعيب نعيشوها كيف عاشو اصحابها ...ساهل نسمعو المعاناة لكن مستحيل نحسو بالم اصحابها ...صعيييييب علينا نراعيو لكن ساهل علينا نجرحو ....كلام العار الى خرج فحال الكاس الى تشتت وصعيب يتلملم ....

جاو الطلبة شي خمسة الرجال من ورا العشا جلسو فالصالون الي فالدار فين كاين فالبيت ...بداو يقراو فالقرآن ويفصلو فداك الكفن والقطن قدامهم كيقادو فيه ويقراو حتى جابو المغسل كبييير فيه بانيو التحت فين كينزل الما وجدو ليهم سطولة دالما سخون من دوش ودخل باه وراجل ختو وواحد السيد تاهو حيدو ليه حوايجو كلهم طواهم الراجل لاخور وحطهم حدا راسو وتحماو عليه هزوه فوق المغسل وبداو كيغسلو فيه ...تا جابو ليهم الكفن مقاد كفنوه وخلاو ليه وجهو عريان ...حطوه فوق الناموسية وغطاوه بالمانطة وكلشي هادشي باه الي دارو بمساعدة نسيبو ديك القوة والصبر الي نزلو على باه سبحانك يا جليل كيغسل ويقرا فالقران حيث قلبه عامر بالايمان وبقضاء الله عز وجل ...العصر صلاه وبعد اذان العشاء لقاه مكفن ...فاق فالصباح راح ميت بالليل واخر تمغيطة ليه هي هادي اخر ليلة ليه هي هادي والغذ ليه فصلاة الضهر غادي يتصلى عليه و غايتدفن ...بين العصر والغذ ليه داز كانه اسبوووع تاحد فيهم مانعس كلهم بقاو مع فرح الي بقات مع عائلة يونس ومتحركاتش من حدا غيتة الي بناتها كانو غايبات عن الدنيا باقين كيتشواو على خوهم الي كان سند ليهم وحنين فيهم ...فرح مالقاتش مشكيل مع عائلة يونس لكن لقات مشكيل مع العزاية سمعات وعاودت ما يكفي انها متصبرش لكن فكل مرة غيتة كتخليها تصبر غير بمجرد كتشوف عائلة يونس مؤمنة ومهضروش ملاموهاش كتصبر على قبلهم وتدير صوابها معاهم ...

فالصباح الباكر جدا قدام دار يونس كانت البنية مبنية والناس الي جاو كيجلسو والي يطلع يعزي ويمشي ...والناس دخلات العشا كسكسو والي دخلو الفطورات فهاد الصباح ...دار الوزاني مشعلاتش البوطة ومغاديش تشعلها حتى يتدار العشا...فوسط البنية فواحد الطابلة جالس المخنتر وخوتو بزوج شقاق صالح ومحمد وخوه مبارك الي من باهم كان جالس مع عصام. وفوزي وصطوف الي منعسوش ...

محمد : وشوف هاد الزهر عند بنتك المخنتر ...

لمخنتر"كان ينقي سنانو بواحد لعود" : زغبية صافي ...

صالح : منحوسة صافي ..."شاف فيه المخنتر" ماقلنا والو الي كاين ...كون تجوجت بيه ومات ماهي عروسة ماهي عزبة هجالة وصافي ...سوقها غايخوا المخنتر(زعما ميبقاوش يجيو يخطبو فيها "

مبارك"نقز من بعيد حيث سمعهم " : صويلح جوج بناتك الي بقاو ويكون خير ...

خلاه كيدور بجنابو ميقدرش يغوت عليه حيث جاو وسط البنية ودنيا بدات تعمر والفطورات كتحط ...تكمش فبلاصتو ولبدو...حتى ناض عصام وصطوف مشاو فوق الموطور يتقداو ويشوف عصام المحل بزربة ويرجع ...الدنيا عمرات عليهم جاو بقية الاهل من وزان حيث هما اصلهم من ثم والي جا من كازا وهالي جا من بلدان بعيدة ...دار عمرت من كاع طوابقها والبنية عمرت بالرجال ...

رحم الله تلك الرّوح التي تركت فينا أعظم ذكرى، رحم الله تلك الليالي والأيّام التي كُنَّا فيها على خير حال، فلا وجع ولا فراق، عوّض الله قلوبنا خيرًا وألهمنا الأجر.

لقد كان ألم الفراق أشبه بابتلاع سكّين، فلا هو يمضي إلى الأسفل ولا هو يخرج إلى الأعلى، لقد كان قصّة العُمر التي لا يُمكن لسنوات الأرض كلّها أن تُنسينا إيّاها.

قرب اذان الضهر جات سيارة نقل الموتى الي غاتهزو تسبقو ل مسجد فين غايتصلى عليه بعد اذان الضهر...تحمل الشاب يونس فالنعش تهز الشاب الخلوق الي غايخليه ذكراه محفورة فقلبنا ديييما...تحمل الشاب الي كان دوره قصييير فالحياة لكنه ربي بغاه يبقى كبير فقلوبنا ...تحمل الشاب الي سمعته طيبة وسيرته زوينة فكل لسان ...تحمل الشاب الي كانو يضربو بيه الامثال شوف فلان ولد فلان ...تحمل الشاب الي قصد باب بنت الناس بالحلال وهالعار غير ترضى وميتحاشمش مع عصام..تحمل ولد لاخرة الى مثواه الاخير ..يونس كان شخصية قصيرة جدا دورها صغيييييير لكن فقلبنا كبيييييير يونس شخصية دورها صغير ولكن عندها دور كبييييير ...

تهز فالنعش وهبطوه لسيارة نقل الموتى هبطات غيتة وخوتاتو وعائلتو بالبكا ونواح وفرح وصفاء والبقية وراهم بالبكا كل مغادين بيه كل ما فرح كتبكي وتودع فيه ...عز عليها بزاااااف وحرقها فقلبها كثر من راسها...حلو الباب على مو حتى طلات عليه اخر طلة ...

غيتة : انا رااااااااااااضية عليك اولدي دنيا واااخرة انا رااااااااضية عليك الحنين تسناني ولدي انا ندعي معاك بالرحمة وبالصبر ليا تانلحق عليك اكبدتي الي تشويت من جيهتها...الله يرحمك الله يرحمك عريس فالجنة يا كبيدتي عريس فالجنة ..."حكات صدرها كتبرد الحرقة باش تصبر وترضى بقضاء الله ...وهي محنية عليه عراتو تا سافت وجهو اخر نضرة باستو فجبهتو وغطاتو" ...الشوفة لاخرة فوجهك المنور الله يرحمك ....تطلقو زغارييت الي كتهرس الخاطر ...وعاودت نطقات " مولانا نسعاو رضاك

و على بابك واقفين من يرحمنا سواك يا أرحم الراحمين..تسد الباب وانطالقت السيارة ليودع اخر لحضاته قدام باب دارهم ودربهم مخلي وراه زغاريت وصوت رجال تابعين مرددين هادي ساعة من ساعات الله يحضر فيها النبي رسول الله ...مولانا و إحنا عبيدك لك دوماً خاضعين مولانا و إحنا عبيدك لك دوماً ساجدين...لاا اله الا الله محمد رسول الله ..

وداعا يالي علمتينا ان الانسان بقلب بيض ونقي فحالك صعيييييب يتعايش مع الدنيا علمتينا ان ربي كيبغي المومن وعلمتينا ان ربي كيصيب المؤمن وعلمتينا ان الدنيا مكتسوا والو فلحضة ممكن تغادرنا كانك عمرك عشتي فيها وخليتي لينا ذكرى طيفك الي غاتبقا تلاحقنا ....

وداااعا يونس ...

قبل اذان الضهر بدقائق لقاتو دخل للمدينة من بعد ساعة ديال طريق وربع حاط تيليفون قدامو مبرونشيه بشاشة كيقلب ف maps على فين جات المقاطعة فين غايتلاقا بيه ...اول ما قرب صونا ليه قطع عليه وعاود عيط ليه من رقمو الجديد الي دار فور ما وصل المغرب ...بلاصا السيارة جنب ...

زين الدين"داير نضاضر شمس كيهضر ويشوف قدامو فالشارع وسيارات وناس غاديا جايا " : فينك ؟

المحامي : عند الباب غير نقضي ساعة ونص الي غايخصني فيك مايجي عندي ولا تسناني شوف شنو يناسبك وديرو...

زين الدين"جبد من المجر باكية الكارو شعلو " : يحتاجوني تما ؟؛

المحامي : لا لا ساعة ونص تقدني نكمل الوراق كلهم ...مول الارض الي مقابلة مع البلاصا الي تعطل جا من فاس يلاه وصل اما كون قضييينا الغراض بكري.ا دكتور ..

زين الدين"نفخ دخان وشاف فساعتو سمع اذان الضهر " : بففف مشاكيل هاد المرض الكحل ... قضي الغراض الوقت الي ساليتي انا فالبلاصة لفوق...

المحامي : مازاگان ياك ؟ صافي وعليه نعماسيدي...

قطع معاه ديمارا طوموبيل وزاد غادي فالطريق كيقلب على شي جامع تما حتى بانت ليه سيارة نقل الاموات تابعينها الرجال بزاااااف الشي الي خلا السيارات يوقفو والبوليسي يعطي السلام (ضروري و اجب كلشي يوقف احتراما للميت) وقف السيارة حيث غايجي قدامو فك سانتيغ وحل الباب وخرج من الطوموبيل من بعد ما طفا الكارو ووقف حتى داز الميت الي كاع الناس فالقهاوي وقفو كلشي حبس تا داز ...

زين الدين : الله اكبر .."كانت وحدة راكبة فالسيارة رينج روفر واقفة مع سيارات بان ليها واقف مربع ايديه كيشوف بتغوبيشة باينة من حواجبو وخا نضاضر وديك الجولة الي فيه كتلفت وحروفو ولحيتو وهيبتو...

هي : يااا روح قلبي على زين نور البلاد "نغزت صاحبتها" يا شوفي ..

صاحبتها : ياااا دين جد امك هذا موحال مغريبي باسنة عراقي اصحبتي شوفي ..

هي : هاد البلاد عندنا بدات تگعد هههه مكاينش شي طريقة نلفتو جيهتي مكاين كي نديرو ياربي ...احح مي ركب مشا فحالو وتعالى غا نهضر معاك ...اربي الحبيب ...

غير مشات الجنازة ركب ومشا لاقرب مسجد تابع الخريطة فالتيليفون حتى وصلاتو لنفس المسجد الي حطات فيه سيارة نقل الاموات الي دازت قدامو ...بلاصا سيارة فالبارك حيد نضاضرو ومشا لمرفق الوضوء طوا سروالو وحيد صباطو وتقاشرو وتنا كمايم القميجة ودخل توضى وخرج كيقاد فحوايجو ويلبس تقاشرو ودخل الجامع صونا ليه تيليفونو وهو يرجعو سيلونص واقام صلاة اول ركعتين للمسجد كمل وجلس طاوي رجل وثاني وحدة موقف ركبتها لمح نعش الميت ... تجمعو الناس واعلن الامام ببداية الصلاة "ترااصو واعتدلو...تقادو الصفوف واقام الصلاة صلاة الضهر ...ملي سالاو اعلن على بداية صلاة الجنازة على الميت ...حتى كمل وهو يبان ليه الدراري كيهزو فالنعش شاف فساعتو لقا باقي الحال ومزال الحال على دوا ووجبة الاكل ..."

فوزي : خويا شد من هنا ..اجي عصام صطوف...

عصام : يا بسم الله ..الله اكبر الله اكبر ..."هزو النعش الي فيه يونس وتجمعو الرجال لور والشباب فالمقدمة كيعاونو فهزان النعش حتى دخل زين الدين وتقدم دار ايديه وهزو معاهم شاف فيه عصام وغمض عينيه ك شكر وامتنان واحترام لوقفتو. ...تهز النعش وفضل زين الدين يتطوع فسبيل الله هزو معاهم ...تا داوه لسيارة دخلوه ليها ...ومشا لسيارتو ركب فالسيارة وتبعهم شوي بشوي تا وصلو لمقبرة سيدي موسى بن عمران دخلات سيارة قريبة لقبور وخرجوه تبعهم حتى دخلوه غادين بيه لجيهة القبر الي وجدو ليه ...كانو واقفين العيالات عند الباب خواتاتو كاع حناكهم ندبوهم بالصدمة والهيستيرية وعينيهم كل عين قداش تشواو فخوهم بزاااف وجرحهم كيحفر ويحفر ممصدقينش ...معاهم مو الي شادة مصحافها وتسبيحها وتقرا وتدعي والعائلة منهم وشي بقا فالدار كيقومو بضيافة العزاية منهم اختو الكبيرة الي صبرات شوي بامر من امها باش تعاونها وتسند عليها...وكاين فرح وصفاء و نجية وفاطنة ومرات خال فرح الي معنقاها فاطنة وتبكي وتشير ليه بايديها كتودعو اخر شوفة ليه فالدنيا. ...خلاوهم عند الباب منعوهم باش يدخلو حتى يتدفن عاد يزوروه ...فهاد اللحضة هزات راسها حسات بترويعة فمعدتها بكثرة البكا وسخفة عطاتها فاطنة قرعة الما وبعدات كتقيا وتشرب فالما حتى حسات ب روحها بغاات تخرج دايرة شالها ودايرة نضاضر شمس مغطيين وجهها الي تنفخ بالبكا ...بعدات عليهم لتيسااااع فين تنفس ...

صفاء"من بعيد" : نجي عندك !

فرح"شيرات ليها ب لا غير خليني وتحدرات دايرة ايديها على ركابيها كتنفس بجهد ....

تمات جايا واحد خيتي مع الدنيا عامرة يمكن كتجيهم بحرا وصلات وهي طلق حلوقها كتغوت وتبكي وجايا تجري باش تعنق ام يونس حتى دازت حدا فرح وبايديها باش كتشالي ضربتها تا اختل توازنها كانت غاتجي طايحة كون ما شداتش فراسها حتى طاح تيليفونها لارض ساااط ...يلاه غاتهزو وهو يسبقها يمدو ليها ريحتو تدخل فالنيف ...

زين الدين"داير نضاضرو كيشوف فيها بتمعن مكمش حجبانو حيث هي دايرة نضاضر ولاوية عليها شال مكتبانش كيدايرة فوجهها حدو كيبان غير بياض ايديها وحناكها شوييي وفورمتها دبدوبة..."

فرح"حركات ليه راسها كشكر وكتنفس بجهد"

زين الدين"طبطب على كتفها بشوي " : يعوض الله المحبة بالصبر "ومشا لطوموبيلتو رجع مارش اغييغ ...كسيرا وزاد للوجهة ديالو.."

سبحان الله ربي كيكتب لينا صدف غرييييبة مع اشخاص راهم دازو فحيااتنا مكنردوش ليهم البال من بعد كنعرفوهم فالمستقبل ولا مغانتلاقاوش بيهم يعلم الله لكن ربي مكيلاقينا بيهم الا لحكمة لا يعلمها سواه ...زين الدين شخص براااني على المدينة ديال الجديدة يمكن اول مرة غايجي ليها ولا فايت جاي ليها من قبل يعلم الله ...

رجع فحالو او الوجهة الي كان غادي ليها ...شاف ساعتو وصل وقت باش يشرب دوا وياكل من وراه...ثالث وقفة بعد المقبرة كانت امام واحد الريسطو دخل ليه وطلب الغذا ...شرب دوا عاد بنصف ساعة كال ...لانه كان الاكل محطوط قبل ...تغذا وطلب قهوة بينما هو كيشرب فيها اتاصل بيه المحامي وخبرو فين كاين بلا ميطلع حتى لمازاگان ...ريسطو مقابل البحر والطابلة فبلاصة كتشوف نيشان فالبحر فيه موسيقى هااادئة كتريح النفس..كيشرب فقهوته وكيتنغم بيها على صوت امواج البحر ...محيد نضاضرو ونفس النضرة باقا...نضرة غامضة ممزوجة بجدية رجل فعمر الي على مشارف وغاتولي عندو 38 سنة ...بقرايته بشهاداتو بانجازاتو فالمجال الطبي ...بانجازاتو فمجال المجوهرات ..بمعرفته بناس من مختلف الاعمار والجنسيات والفئات الطبقية ...كونات منو رجل عارف بحق كل حاجة وكل حاجة كيعرفها كتعلمو ...جدي غامض خاتر صريح لدرجة تخليك تخافي منو ناهيك عن العصبية فاش كينفاعل ...تصرفاته مع الحاج الغالي ماجاتش من فراغ مايمكنش واحد قدو يقلل الاحترام لشخص اكبر منو ؟ صحيح ممكن يغلط ممكن يرتاكب بزاف الاغلاط حيث كيبقى انسان والانسان ماشي معصوم من الغلط ...مكن يرتاكب اسوءها ممكن يآدي ممكن يتاذى ...لكن شنو الحساب الي بين زين الدين والغالي علاش كيتصرف معاه بهاد الطريقة واش كيضلمو ؟ شنو الشي الغامض الي مخليه يتصرف هاكاك وخا لحد الساعة را موصلش لدرجة قلة الادب معاه لحد الساعة را شاد راسو عليه...وخا مكلفو بالمحلات ديال الذهب ولكن را كلشي بعلمو ادق تفصيلة فالتفاصيل كيعرفها هذا غير انه الغالي ميقدرش يديرها بزين الدين حيث عارف الى فااات تا دار نبشة ميرحموش وعارفو اش كيسوى وعارفو ان قصوحيتو تقدر توصل بيه لدرجات الي الغاالي ميديرش شي حاجة باس تخليه يوصل ليها...فهاد اللحضة كان عاقد حجبانو كيشوووف فالامواج حتى صونا تيليفونو كان المحامي كيعلمو بالوصول ديالو ...طلع لعندو فين كاين حتى وقف عليه شاب فعمر 34 سنة ملامح قريبة لزين عربية غير الفرق ان زين لون عينيه اخضر والمحامي عينيه لونهم اسود ..وهو محامي لزين الدين من نهار تخرج بدا كيخدم ليه امور المحلات القانونية حتى لهاد المشروع الي بدا المحلات تولاهم واحد الولد عاد بادي وهذا خدام معاه فالامور القانونية لهاد المشروع ...

المحامي : السلاام عليكم تعطلت عليك اخويا ...

زين الدين : عليكم السلام ..."حك لحيتو كيشوف قدامو فالبحر" التوخيرة بنتيجة ؟

ريان"المحامي" : ههههه وايلي اش تعرف عليا نبقا لابد(لاصق) ليهم تم هما يحلفو وانا نحلف...الامور لولة ناضية ...واحد جوج ورقات متسناو تا قاليك بغا يشطحني...كون ما هضرتي مع رئيس المجلس البلدي ...

زين الدين : الحاج المنصوري تكلف..

ريان"مد ليه الملف" : هادو كاملين مسائلهم القانونية كاملة بقاو دوك جوج ورقات حيث "شاف تيليفونو" اليوم الجمعة تنين يوجدو فالعادة وليني ملي تكلف سعادة الوكيل هنيتي من هاد جيه...قاليا را غايجيبهم ليك تالدار بلا متنزل لهنا...باقي المحافضة هادي الاثنين كلشي يوجد ...

زين الدين"شد الملف كيقرا ورقة بورقة" : شي وراق "كيسكت حتى يقرا ويرجع يهضر" غذا بالليل دوز لعندي نهضر معاك فيهم ...

ريان"وقف عليه سرباي" : واحد نيسبريسو صون سيكخ (بلا سكار) "شاف فزين " مشاكيل ؟

زين الدين"حك شفايفو بسنانو مركز" : تخلويض بغا يبدا ...

ريان : نساليو والديه قبل ميبدا ...اه فكرتيني هضر معايا حسام شاورني فشي وراق قاليك قاليه الحاج الغالي يصايبهم ليه...

زين الدين : ديييير ليه خاطرو...

ريان"بقا كيشووووف فزين الهضرة كي خاترة وثقييييييلة عارف اش غايدير وعارفو كيثقل مكيقولش اش غايدير كيجاوبك بكلمة جوج يدير الخاطر حتى كيحش ليك ركابي ويخلي رجليك مهزوزين يعني نيشان كي ح ****ك بلا دفال هههه حط النادل ل ريان القهوة وقرعة سيدي علي صغيرة جبد باكية الكارو قبل ميهز مد لزين باش يهز وحدة من باب الصواب رفض زين بلباقة حط ايدو على صدرو بمعنى لا وشكرا ...شعل الكارو واول نفخة من دخان تقابل مع البحر ونطق " : نديرو ليه خاطرو علاش لا ....

زين الدين : البروفيسور الزياني عطاك الوراق ؟

ريان : واجدين ...الارض الي مقابلة مع البروجي وراقها واجدين على قبل الباركينغ ...المساحة كاملة ...اجراءات النقل واجدين ...

زين الدين : جيب ليا خبار واحد السلگوط ...

ريان : سميتو وكنيتو ؟

زين الدين : ضحى الوهراني ...

ريان : سلگوطة هادي "شاف فزين الدين الي حبس تقلاب الوراق قبل ميهز فيه عينيه تفافا نسا راها بنت عمتو هههه " اااا الا سمح ليا اهههههه هادي بنت عمتك ...

زين الدين : بحال علمك الله

ريان : سلگوط معاها ؟ كون هاني غذا فاش نجيب ليك الوراق نجيب خبارو ...

زين الدين"بعصبية" : زيدك مع البراهش دخلهم فحسابك

ريان : البراهش حالهم ساهل ...

زين الدين : الحال ساهل يومين وبدل ليكوش ..."غزز سنانو " دابا واحلين مع صحاب زغبة البيضة ..."الناس الكبار الشايبين"

خلا ريان حابس الضحكة كيطلقهم ليهم خاااترين يخليهم كيضحكو ومع كيقولها متمر وسييير نتا كركر تايصبح الحال ...بقا زين الدين كيقرا فالاوراق وخا ريان واقف عليهم الا انه ضروري يشوف بنفسو ..

الحزن مخيم على دار الوزاني عائلة يونس ...حياتهم تقلبات رأسا على عقب وفاته كانت صدمة كبيييييييييرة لاقرب ناس ليه وحتى البعيد وراه تصدم ...حياتهم من بعد مكانت كلها افراح كلها حياة وتجمعات هاهما دابا كلشي حزيييييييين والعيون غالب عليها الدموع وقطرات الحزن كتنزل من القلب قبل العين ...قهرة والم على وفاة شاب مشا عريس خلا وراه قلوب منكسرة مجروحة مكلومة على فراقه ...الايام تمضي والسنين وكيبقى غير ولف وتعود ...ولا يسعنا سوى ان نقول لله ما اعطى ولله ما اخذ ولكل غمة فيها حكمة ...انا لله واناا اليه راجعون...

ترميشة تابعة لاخرى كتحس بحركات خفاف على شعرها ...حتى حلات عينيها على صوت الهضرة فالدار ملي جات وهي ناعسة كانه كيقول ليها راسها نعسي لا ربما مجرد حلم نعسي لا ربما تنساي نعسي باش ترتاحي نعسي باش قلبك يرتاح ...ولكن شحاال جهدها خاصها فترة عاد باش تنسا صعيب تنسا دغيا خصوصا وقع هادشي نهار فرحها ماشي قبل ماشي بعد لا اليوم الي كيكون مميز عند اي عروسة هي تقلب ليها عزا ...دورات راسها لقاتو هو الي كان كيدوز بحنان على شعرها...شافت فيه بعينيها الي ورمو بالبكا ...

فرح : عصااام ...

عصام : بنتي ..."باس راسها"

فرح"ناضت بشوي تا تقادت فالجلسة كتفوه وتشوف فلارض كتلتاقط انفاسها وتفيق مزيان "

عصام"وقف وجلس حداها مد ايدو ورا ضهرها كيطبطب عليها" : خمرتي بزاااف ...

فرح"شافت فيه بعين محلولة وعين شبه مسدودة " : شحاال فالساعة ؟

عصام : اذن العشا قبيلة...

فرح"ضحكت بجنب " : كنت فغيبوبة ..."شافت فيه" مشيتي لدار خالتي غيتة ؟

عصام"حرك راسو" : ضروري العزا مزال ما سالا...علمني الحاج بالي واحد اليومين ويطلعو لوزان عند عائلتهم تما دايرين العزا الثاني فدار جد يونس الله يرحمو..."سكت واحد الوهلة الي تنهدات فيها ...عاود استانف الحديث" ماهضرش معاك باك ...

فرح "حركات راسها بلا "

عصام"ضحك بجنب" : لاش غايسول لاش..."شاف فيها" فرح الي جرا ماهو الا مكتاب واختبار من عند الله ...مامقسمش ليك ..

فرح : عااارفة خويا عارفة...الي جرا كان مكتاب ميمكنش لينا نبدلو اقدار سيدي ربي ميمكنش ليا نتحكم فالمكتاب ميمكن ليا ندير والو ...انا مشيت بداكشي الي حطو الله فطريقي ..يونس كان فحال الملاك حطو ربي فطريقي يمكن ماشي هو الي فنصيبي ويمكن تاحاجة مغاتجيني ساهلة يمكن ربي غادي يعوضني بما احسن ...غير هو ماشي ساهل باش نسا ماشي ساهل باش نتعود دغيا الجرح قاااصح اخويا ...صدمة الموت ديالو ونهار عرسنا ؟ عاد هو ك انسان عمري نلقا فحالو ،،الطيبة الي فيه فعايلو تصرفاتو خلاتني نقبل بيه ...فلول كنت مترددة ولكن سلمت امري لله وقلت علاش منقبلش بيه ياك حنا البنات كنقلبو على هاد المواصفات،،راجل يبغيك قلب يهتم بيك ...يخاف فيك الله يحتارمك قبل بشروطي وقبلت بهضرتو حيث قنعاتني ...

عصام : ويمكن ربي عطاه القبول باش تقبلي بيه ...

فرح : باش نقبل بيه ونعيش هادشي الي عشت هاد الايام ...يونس وخا مات عايش فعقلي وقلبي بقا ذكرى عمرها تنسا...

عصام : خودي وقتك فحزنك منقوليك والو ا فرح بكي سدي عليك غير هو متكثريش عليك فوق القياس ...را كنعرفك ا فرح وخا كتخبي عليا كنعرف علاش حازنة بزاااف ...يحساب ليك غافل ؟

فرح"شافت فيه بتساؤل "

عصام : سمعتيهم كيلغيو ب العروسة قدام النحس ؟ زيدي عليها كتلومي راسك معندك زهر ...ونتي "كانت غاتهضر وحبسها بايدو" ونتيييييي سبابو دخلتي عليه بالمباركة مسعودة (هي عكس مباركة مسعودة كتقال باستهزاء زعما را بنحس) هادشي الي مصور ليك دماغك ...فرح نتي حنينة بعقلك قلبك بيض زوينة من كاع الجوايه وخايبة من كاع الجوايه كضربي المزايا الي فيك بهاد تفكير ديال اللوم...عند اول طريق كطيحي كواريك(كتستسلم) الي ضحك ليك تقول ي ااه غير باش ترضيه...

فرح : مكنبغي نقلق حد...

عصام : فرحي كلشي وقلقي باك جات عليه...لاش دخلك للبيت داك النهار اش بغا ؟ "خرج فيها عينيه"

فرح"بخوف " : والو ...

عصام : فففرررررااااح سولتك جاوبي متعصبينيش ...

فرح : والله م..."حبسها وشد ليها ايدها مزير حيث بهضرتها اكدت ليه را بغا شي حاجة" احم

عصام : تحركي هضري لا نوضوها هنا ...

فرح"باستسلام حدرات راسها" : بغا نعطيه شيك ديالي نسنيه ويعطيه ضمان لواحد السلف تسلفو باش يحفضو الارض ديال با جدي ...

عصام"خرج عينيه" : ياكما عطيتيه ليه ؟!! "جهد صوته تا بح" هااااضرييييييييييييي...

فرح"بنفي " : لا لا لا والله ماعطيتو مشيت البيت تا سنيتو وكنت غانعطيه ولكن صافي مبقيتش عطيتو ليه قطعتو ..

عصام : ماعطتيهيش ياك !؟

فرح : وحق الله قطعتو اصلا ومات يونس الله يرحمو باقي مسولنيش عليه ...

عصام : ماتعطيهش وهاد تفكير ديال كنتي غاتعطيه ليه غانتحاسبو عليه من بعد. ..

فرح : را جاني با حشمت و

عصام"ناض بعصبية دفالو كيرشرش" : وااااااا واخا يكون باك هاد باااك بوحدو متعتقيه بسنتيم واااااااااا عباد الله را باك هذا الى ماغرقك يقتلك ...وااابوك را ولدنا غا باش يدخلنا لحبس بوك ولدنا باش نضمنوه هو يعيش وحنا نغرقو الله يغرق لبويا الشقف ...

قيصاريات الذهب وطبعا على ذكر الذهب والقصارية وحدة منهم جميع محلاتها هي ملك الحاج البغدادي الذهايبي والي ماقبلهم الامين ديال الذهايبية الحاج الغاالي الوهراني...

فطريقو لمحل الكبيير الي جامع ثلاث محلات فواحد فيه زوج طبقات والفوق كاين المكتب ...خرج واحد السيد فعمر باه وصديق عزيييييز على باه وهو اقدم ذهايبي كاين تما سيد دقة قديييمة وكيدق الذهب الدقات لولين تصاميم عتيييقة ....

الحسين : زين الرجال...

زين الدين"ضار جيهتو حيث اصلا كان كيقلب عليه هو لول حتى عيط ليه ...ببشاشة وجه فك حجبانو ومشا لعندو قاصدو بسرعة حتى تحنى عليه مع قصيير نيت باس ايديه بجوج وراسو والحسين كيعنكش ليه فشعرو كيف ولف من صغرو حيث كان خدام عندو كيتعلم وحاضي رزق باه فنفس الوقت كيقرا حتى مشا لكلية الطب كمل ففرنسا وهو المراقب الاساسي لمحلاتوو ..." : با الحسين عاش من شاف وجهك وتبشر بنورك وتعطر بكلامك...

الحسين : هههههه مناسيش هاد الجملة ..

زين الدين : هضرة الحباب كتحفر هنا "ضرب جيهة قلبو"

الحسين : غيبة طويييييييلة اولدي ...جاب الله جامعنا تيليفون ولانترنيت ولا ش يقولو ليه ...والله يرضي عليك كل مرة شاري ليا تيليفون ...

زين الدين : نتا لول ا با نتا لول عاد انا "حنا راسو باحترام" بالرب الجليل ا با توحشتك وتوحشت هضرتك وتوحشت كلامك ...

الحسين"طبطب على كتفو وحدر نضاراتو ديال شوف الي فيهم اربع زجاجات خاصين ب صناع المجوهرات والحلي..." : هي مقصح ؟

زين الدين"حط صباعو على نواضرو وعقد حجبانو بتعب وقلة حيلة" : هذا بغاو يقسموه صحتي بغاو يهلكوها كلشي عوج

الحسين : سير كمل شغلك ودور على المحلات بخاااطرك واجي عندي ل سقيفة لفوق قهوتك ديال زيزوة دنحاس (فين كيطيبو قهوة كحلة تركية كتكون ديال نحاس) ...فرغ اولدي فرغ مرضتي فصحتك قبل وقتك ...رخف على راسك ااااولدي را كحل راس خايب ميعقل عليك ...مناويش دير مرتك ؟

زين الدين : نسالي الفساد الي خرج ليا من جنب وهادشي الي غارق فيه ونفرحك ابا ...

الحسين : وهادي هضرة ههههه تستاهلك ؟

زين الدين : تكون حسن مني

الحسين : سير انا نتسناك يلاه توجد ليك خامرة...

زين الدين"حك على صدرو" : الله ..."عض شنايفو" ضربتي فالعرق "جبتيها لاصقة" ...

الحسين"ضرب ليه على كتافو " : ههههه سير اولدي ونيت نعطيك شي معلومات وجد ليا من ايدياتك شي بنت الناس تسكت ليا الفام تاني ويقولو البغدادي ماماتش البغدادي خلف ...

زين الدين"وهو غادي " : عمرك تسمع مني كلمة لا ...تهنا عليا...

ضار دورة ومشا مكمل طريقو حتى وصل بمشقة الانفس لمحل الكبير حيث كلشي خرج كيسلم عليه وكيعطيهم الخاطر والاحترام ...دخل المحل جاو دوك الي مقابلين الفيترينات وكيستقبلو الزبائن سلمو عليه واحد واحد وطلع نيشان لمكتب ديالو لقاه خاوي وصل وجلس مسرح رجليه جبد تيليفونو كيبقشش فيه دار سحال من اتصال واكدو ليه مواعيد العمليات الي عندو الاسبوع جاي حتى تم جاي السيهم الحاج الغالي بجلابتو سوسدي فالاسود وتحت منها فوقية فالابيض وطربوس احمر ...

الغالي : اهلااااا وسهلا ولدي نورتي مكانك .

زين الدين : الله يعمر دارك الحاج "شاف فساعتو" كنتي فالجامع ؛؟

الغالي : وايه اولدي تقبل الله ....

زين الدين : اامييين ..."حنحن وفنفس الوقت كيحك لحيتو وكيشوف فالارجاء المكتب باقي هو هو ...تزادت فيه غير واحد الجيهة دارها فحال شكل بوفيه فين كاينة ماكينة القهوة والما وثلاجة صغيرة ودوش طواليط فين كيتوضى ولا يبدل ولا يدوش تما ...هاد دوش يلاه دارو...كمش حجبانو" : دوش ؟ "ناض وقف ومشا جيهتو دخل ليه لقاه مصايبو باجدد الاكسسوارات ديال المرحاض وبلاصة دوش صغير بالاليمنيوم..." تبااارك الله ...

الغالي : كنتوضى هنا ولا شي مرات كندوش هنا راك عارف النضافة من الايمان وصلاة ...كانت غير طواليط عادية صلحتها ...

زين الدين : ماعليش من الخير

الغالي : مرحبا وسط رزقك...

زين الدين : تانتا عندك الفضل موقف ليا المحلات وحاضي شغالك خيرك كبييير الحاج وانا ماشي ولد الكلاب باش نكر..."بغا يهضر" ماعلينا ...شنو بغيتي تهضر معايا و دخل نيسان بلا متبدا تداوخ عليا هنا راسي عااااامر بشلا مطارق ...خشي راسك فنيشان يتحل المشكيل تبدا تزكك عليا تما بقيتي تم ...

الغالي : قالتها ليك الحاجة ولا كيفاش ؟

زين الدين "عض شنايفو ورفع حاجبو " : من وجهك الحاج باين من وجهك وجهك الحاج كون كان يهضر كون حطك بوجهك ...

الغالي"تنهد وبدا يهضر قبل ميصدق معصب" : واخا ولدي ...عارفني كبرت وعندي غير بنت وحدة الحاجة كبرات وعيات ومرضت وتاحد ما صدق ليها ...

زين الدين : تاحد ماخليتييييه "خنزر فيه" يصدق ليها ..قلتها ليك شحااال هادي كثرة تنوغيش غاتجيبها ليك ...كمل ..

الغاالي : ايوى انا الحاجة را منفرطش فيها صبرت ليا كثر من راسها وفوق طاگتها(طاقتها) ..و

زين الدين : بغيتي تزيد الثانية ؟ ..

الغاالي : مزال يلاه كنفكر فيها الى هي وافقت تقلب ليا عليها راسها بموصفات الي بغات "حط ايدو على قلبه" راني مشوق فولد يهز سميتي اولدي "عينيه غرغرو" ماشي من حقي ؟

زين الدين"متكي حنكو على صبعو ومصغر فيه عينيه كيشوووووف فيه تا كمل ونطق بشوييييييا تنهد بصوت " : من حقك من حقك

الغالي : الله يرضي عليك

زين الدين : الى بغيت ليك الخير اشريف الله يبدا مني ...

..ماهي الا ساعة حتى كان كلشي واجد الدجاج دارتو فاليمنيوم كل دجاجة والمرقة تدغمرات مزيااان خلاتها فطنجرة دارت دجاج فطنجرة اخرى خاوية وخلاتو حدا طنجرة اللحم بالبرقوق وجاب ليها فوزي الخبز من فران الحومة طيباتو جهد ستة الخبزات كباارات...

فوزي : هانا الالة هاهما كيشهيو ...ماجاتش صفاء ؟

فرح"وجهها باقي فيه تعب الحزن" : مشات تقاد شي وراق لواحد الكونكور وقالت ليا تصايب ليا معاها...

فوزي : شكون غادي معاك ؟ "كمش عنيه" ااااه نسيت غاديا مي نجية ..صافي خاصك شي حاجة من غير هادشي ؟!

فرح : لا صافي ديسير جابو ليا عصام...

فوزي : يلاه وجدي باش نوصلكم نرجع طوموبيل لصطوف ونمشي لمحل خليت غير دري حاضي تم ..."حركات ليه راسها ومشات لبيتها جبدات جلابة فالاسود لبساتها ووشال فالمسكي رماتو عليها هزات صاكها فجنب خشات رجليها فصندالة وخرجات لعندو كتمسح فنضاشر شمس باش ديرهم حيث عينيها كيحرقوها وشمس كتكمل عليهم ...عاونها تا دخلو داكشي لطوموبيل وطبسيل ديال ديسير غسلاتوو مزيان ورتباتو فيه وغطاتو بسيليكون ...دقات على نجية تا خرجات عندها كتوصي فبناتها وتنگر على سيمو يفيق حيث فات العصر ومناضش ..ركبو معاه ومشا بيهم لعند دار عائلة يونس قبل ميمشيو لوزان بلادهم ...الصدمة باقيا مخيمة على العائلة جو الحزن مزال ومزاااال ليه مدة على ما يتعودو ...اليوم من بعد ما قررات فرح انها تدي ليهم الطياب فالزيارة ديال العزاء والي طيبات ووجدات من البارح ...وقف فوزي قبل عند مول الصاكا تا خذا كرطونة ديال سكار لواجب العزاء المغربي الاصيل...والطياب كذلك ...كل واش كيدي وعلاش قد المهم عندنا فالمغرب هو واجب العزاء... دخلو داكشي لداخل الكوزينة عاد خرج فوزي ومشا فحالو وهما طلعو لعند غيتة الي جالسة مع العيالات والي غير شافتها وعيطات ليها تجلس سلمات عليها شحاااال وهي معنقاها كتحس بيها فرح فحال الام ديالها كتحس بيها فيها حنااان فشكل...

فرح"دارت نضاضرها فوق راسها" : خالتي شوية ؟

غيتة"تنهدات" : من عند الله ابنيتي من عند الله لله ما اعطى ولله ما اخذ ربي بغاه هاني نبكي ونغوت تاحاجة مترجع ليا كبدتي...الحمد لله على كل حال..

نجية : الله يصبرك ضاع لينا ولدنا تاحنا.. يونس الله يرحمو راني هزيتو بين ايدي ملي كان لحيمة صغيرة ...الله يصبرك والله يرحمو ...

غيتة : اميين ياربي"دوزات على ضهر فرح وهي تدخل سهام عيطات ليها مع العيالات مجموعين بزااف فالصالون ...ناضت عندها هضرت معاها وهي تعيط لنجية " علاش عذبتو راسكم اللا نجية..

نجية : مادرت واالو فرح هي الي دارت...

غيتة : الله يرضي عليها ...اجي معانا وريني نحطو لعيالات نيت وتاكلو معاهم ..."نزلات معاهم نجية وبقات فرح جالسة حدا العيالات الي معرفوهاش كانو عيالات من بلايص بعييدة مكمشة ايديها وكتلعب فيهم بتوثر كتفكر يونس فين كان غايعيشها دار كبيرة مصلوحة مزيان مع قلب باغيها ومهتم بيها .. فوسط سرحانها فيقتها هضرة شي عيالات والمشكيل انها مقدراتش تجاوب ومتقدرش تهضر لانها فدار الناس ف فضلات تصقل وتكمدها فقلبها ...

جالسات حدا طابلة الي وجدوها ليهم مع تجمعو بزاف بغاو يدفعو ليهم الماكلة ...وبداو يهضرو بيناتهم على يونس والموت ديالو ...حتى نقزات وحدة منهم وقالت...

هي : راه مشا عرييييس مسيكين وكون تشووووفي اش كان موجد لدارو اش منك يا حوايج دهاز غير بيت نعاس هو الي بدا يخدمو بايدو ...ورا على مقالت ليا غيتة كان باغي العروسة شي عام وهو تابعها وهي معارفاش كل مرة يقول يخطبها وكيتراجع ..

هي : حشم ولا عرف عليها شي حاجة ولا مالو ؟ امي تاجة

تاجة : هي درويييشة وليني منحوسة يالعفو باها ديما ضاربها ديما يبغي يجري عليها صداع ديما عندهم ...خوها واعر بزاف ولاخور درويش خبز ربي فطبگو معندو سوق ...واحد الليلة يعاود ليا صلاح ولدي لقاها عند المحطة ديال كيران جالسة فنصاص الليل تبكي كانت غلى شوي تخرج لطريق بمسبة الكيدار ديال بوها "فرح تزرات ولات تصرط فريقها حيث بصح واحد ليلة خرجات حيث باها عيرها بامها لكن باقي تفاصيل الي عاودات هاد المراة كانو كذوب وتلفيق ..."

هي : ياربي سلامة

تاجة : ايوى يونس الله يرحمو خاف من عصام تراجع تا عگب خطبها غير هاد الشهرين الي فاتو ..

هي : كتعرفيهم مزيان هما عايلتها...

تاجة : غير من بعييد وليني الخبار را كديع ...الطفلة وخا درويشة كون ما خوتها كون بوها يعلم الله فين لاحها ديما معايرها ميحملها ميقبلها تقولي موالدهاش وهو را بمسبتو طجج المراة تا لاحتها لحمة حمرة ...رباها غير الكبير وكون ما هو كون خرجات لطريق كتفسد ...ساعاك كبرها وقراها راها تبارك الله قالت ليا حنان بنت سيحمد عندها لايزازة ولا شداكشي (الاجازة) ودابلون (ديبلوم) ...

هي : وامعندها زهر مسكينة الله يعفو وصافي. ...

تاجة : يابتي راها كملات كثير شي ضوركا (دابا) البنت كيكون سوقها عامر (يعني رجاال كيجيو يخطبو) كملت بفعايل باها ودابا را سوقها خوااا شكون يبغي ياخذها كلشي يخاف على راسو وزيد باها مكمل مجمل يا العفو منو ...الخبار داعت قدامها قدام االنحس ..."هاد الهضرة مشات لمسامع فرح للمرة الثانية وصبرات دابا محسات حتى وقفات على جهدها تا ضارو يشوفو فيها "

فرح : ايوى حاشاكم اخالتي حاشاكم .."شافت فتاجة " راكي والدة البناات هاهما حداك (حيث فاش كانو كيهضرو كانو يعيطو ليها اا مي مي عرفاتهم بناتها) قوليها غا زينة وطلبي الستر"نزلات دمعة كتجرييي من خدها هزات صاكها وخلاتهم كيشوفو ...

المجتمع ديالنا قاااصح فالحكم على البنت او المراة خصوصا المطلقة الي معندها اهل اليتيمة الارملة المهمشة هادو بالذات سهل الحكم عليهم وساااهل تلفيق الكذب عليهم ...مجتمع قاااس جدا..هبطات كتجرييي من دروج ومشات هاديك مشتيها شدات طاكسي فين مشات الله اعلم ... ...ديما حنا متهمين بشلا حوايج وعند بالنا را مكاين والو وهو الى جيتي تعرفي را غاتلقاي راسك نتي اكبر قحبة ولا قوادة ويمكن يرجعوك كتفسدي ونتي مدايرة والو داخلة سوق راسك...مجتمع صعييييب بزااااف ميرحمك ميخلي الي يرحمك ...

كمل معاه الهضرة جابو ليه دراري روجيسترات الي مقيدين فيهم وجا زصل عليه واحد السيد صاحب باه محاسب كبييييير وجا حتى مراد باش يشوف الامور المعلوماتية ...حتى دخلو على الغالي ولا يدور بجنابو ...

زين الدين"وقف تا سلم على المحاسب باس ايدو وراسو" : الحاج علي يعمر دارك ..

علي : عاش من شافك اولد الحاج ...على سلامتك هي مجية وحدة..

زين الدين"كيحك لحيتو " : المجية جايا ان شاء الله مزال عندي des opérations مع البروفيسور الزياني ...

علي : الله يسر اولدي..

زين الدين"شاف ساعتو" : قضيو الغراض شوي ونجي "شاف ف الغالي" بقا معاهم الحاج ...مراد وصل وقضي متشاورش "اكد عليه بعينيه وجهد صوته بشوي باش الغاالي يفهم راسو" و يااااااك تشاور ...دير خدمتك...

مراد : تهنى اخويا...

خلاهم وهز تيليفونو ومشا توجه نيشان لحانوت قدييم ديالو نيت وهو دياال باه الاول فيه سقيفة الفوق كبيرة فين كيخدم الحسين الي ربا زين الدين فالحرفة سلم على واحد الولد تما وطلع نيشان لعندو لقاه كيلحم فواحد البراصلي وينجر فيه ...ريحة القهوة كطيب فوق صينية فيها رملة فوق الجمر ديال مجمر (جربوها كتجي قهوة زوييينة طايبة بخااطرها) ...حنحن بصوته حتى توقف الحسين وشاف فيه وضحك ...

الحسين : المتين العكسي (شديد القوي كتعني ومكنيها عليه من صغرو حيث مكيعرفش الخوف والي فراسو كيديرو واكثر كلمة مطلوقة عليه هي العكسي دابا تعرفو علاش ههه )

زين الدين "جلس قدامو فكرسي خشا تيليفونو فجيبو من بعد مدار ليه صيلونص حتى يكمل هضرته معاه يعني خصص وقت باش يدخل مع الحسين فديك القوقعة ديال الاخذ والرد فالكلام فحال شي حد داخل عند طبيب نفسي غير هذا طبيب نفسي جايل وشايف ريوس ومعاشر فدنيا مااا يكفي باش يهضر مع زين وينصحو". : احلى با ...

الحسين"حط شنو فايديه وناض هز ديك زيزوة ديال قهوة نحاس وجبد زوج فناجن كب فيهم القهوة وحطهم فصينية ومد ليه فنجان ديالو فيه ركوة (رغوة) كثيييرة تسناه تا رشف جغمة منها تا سد عينيه شحااال كيتنغم فديك القهوة بمذاقها ريحتها خلات قلبو كيضرب ...ضحك الحسين" : صافي دابا واجد ...

زين الدين : من ايامك ابا عارفني ..."شاف فيه والسكووون كيتسمع غير صوت ناس على برا وماشي صوت مزعج " تربطت ابا ...

الحسين : عاوتاني هو ؟ اش عرفتي !؟

زين الدين : شلااا وشوية ...فاش نهضر ومعامن نهضر انا وحشمت ..ربطني ولد"عض لسانو كان غايسبو ولكن جاه كبر منو وراجل كبير " اعوذ بالله ...

الحسين"بقا كيشووف فيه فعلا تربط لانه عارف الغاالي كيفاش داير واش فايت داير عارف يمكن كثر من زين الدين عليه ..." : صابر فوجه عمتك اولدي كمل ...ياك رزقك حاضيه..

زين الدين"مسد عينيه بتعب " : عمتي عمتي كلشي فشرد عمتي ميمتي عمتي الي هزتني بسنانها عمتي الي عمرات عليا،، عمتي من ريحة الحاج ...يهو دي انا نفرط فيها ؟"جهد صوته بقهرة " والرب العالي عمتي عينيا ..."خرج عينيه بتخنزيرة ":بنتها دخلتها لمسؤليتي قايم بواجب باها وخوها الكبير ...باها الي معارفها واش قاريا شاربة واكلة باها جوج كلمات منها يجبد ليها الصرف ؟

الحسين : مسكتها بالفشوش ...

زين الدين : محسوبة بنتو بكلمة الوليد..."عوج راسو شوي " شنو من ورا الوليد ؟

الحسين"تنهد كيسمع ليه" : كلمة با خاص ذوقها بافعالها بمواقفها كلمة بّا باش تعيشها خاص تعيش دهر من الزمان ونتا تخرق تلعب تهز تحضر فالمرض تحضر فاول ايام المشي تعيش الغوتة لولة تعيش المرضة لولة بخوفك على ولدك وتديه فالليالي ..كلمة بابا كلمة معناها كبيييير ميعرف ليها غير الي عندو الكبدة...

زين الدين : لاا هو عارف غيرالشفرة والفساد رشاوي ...هاد عمتي شحال جهدها ؟

الحسين : الغالي جرا عليه باك وجدك شحااال هادي ...نتا الي جمعتيه من زنقة "هز زين ايدو موقفه"

زين الدين : جمعت عمتي ...ماشي ولد لحرااام نخليها فديور عباد الله جمعتو من زناقي على جالها هي "ضرب جيهة قلبو " هذا يتقسم ليك الى شفتي حالتها"ضرب فوق طابلة بجهد" ولد 14 عام مرضاش يشوف عمتو فزناقي ولد هاد العمر دار هادشي ؟ ...

الحسين : باش تعرف حجم القيمة الي عندو والو ...دخلتيهم من زنقة حيث نتا ولد الخير ولد الناس راجل من صغرك يعولو عليه ناس تعول عليه هي الى معندهاش راجل عندها ولد خوها من دمها حاميها ...لهلا يقلب ويشقلب من جيهتو الخير فيك نتا ..نهار عطيتيه يحضي الحوانت راك عطيه شان كثر ما تعطاتوو يكون امين ذهايبية ..نهار قلت ليك سير دير مستقبلك وكمل قرايتك فين بغيتي را ماشي وصيتي هادي وصية الحاج جدك قبل ميموت ..ووصية باك هي الحوانت رزقو عارفك گاد بيه (قاد بيه) عارفك راجل من ضهر رجال يتشد بيك الدراع..."لحضة من السكات كانهم كياخذو استراحة حتى رجع كيهضر " اش عرفتي تاني ؟؛

زين الدين : باغي يدير شرع الله .."عوج فمو باستهزاء" هذا ماعرفو الله فيه..

الحسين"ضحك باستهزاء" : حتى لدابا علاش جاتو ؟ هذا بلا فعايل الي فات "تنهد ونطق " اش غادير دابا ؟

زين الدين"هز فيه عينيه وغمزو " : ندير ليه خاااطر خاطرو...

الحسين"فاش كيقول زين هاد الكلمة كيعرفو غايديروشي حاجة الي تخلي الغاالي يبغي الموت وميلقاه..." : وصل الوقت الي الصغير يربي الكبير .."حدر راسو كيتفكر اكبر فعلة دار الغالي والي يموت ومينساها والى عرف زين الدين يجري عليه لزنقة ولا يقتلو"...

وصل الليل العشا كياذن وهي ماجاتش لدار اول مرة ليها ...جا عصام ودخل لقاهم جالسين كلهم فالبيت وصفاء كانت كتصوني عليها مكتجاوبش زاد انشغالهم عليها والي زاد الطين بلة هو دخول عصام و فوزي الي خرج يقلب مكاينش ...شاف نجية وفاطنة و صفاء ...

عصام : فين فرح ؟

فاطنة : هاهي جايا ولدي مشات مع فوزي ...

عصام : مييي فاطنة فين هي اختيييي فرح من لاخر ...مجموعين غا هكاك ؟؟؟

نجية"تنهدات عارفة بالي عااارف كاينة شي حاجة مكاين لاش يخبيو عليه وعاودات ليه اش طرا ولكن اش وقع مع فرح مغاوداتش حيث حدها طلعت قالو ليها مشات " : صفاء طتصوني مكتجاوبش ومشا فوزي يقلب عليها ...ا ولدي ها...

عصام : كتسنايني نجلس حداكم كي الولية تاتجي ياك ؟ اااااااش

عارفين فيا انا اااااش ..."ضار كي البرد خرج وسد الباب جهد تا نقزات صفاء من بلاصتها "

صفاء : سيحت سيكس "تا نزلت عليها فاطنة لقرفادة " وتي ريحي را تخلعت ...

فاطنة : سيمو مشا يقلب تاهو ؟

صفاء : مشا مع فوزي ...قلقتني عليها ماعرفتي والو امي نجية ؟ علاش خرجات ؟ ياكما سمعت تاني شي حاجة من دوك العيالات را بزاااف على قدرة تحمل امي بزاااف مالها معندها زهر مع تاحد مالقاتها من باها ولا من مها الي خلاتها را بزاف والله تا بزاف حسبي الله ونعم الوكيل نهار ضحكت ليها دنيا هجراتو وزاد كمل عليها كحل راس ...تا خدمتها ممشات ليها...

خلات كلشي يتحسر عليها ويحسبنو على الي اذاها بقصد وبدون قصد الدنيا كتضلمها بزاااف وجهد فوق جهدها ...عصام شدها طوالة وحدة غادي مكسييييري نيشان كيقلب هنا وهنا رامي عينيه على الزناقي وهو سايق ...فين غاتمشي ثاني اشمن هضرة سمعت ؟ علاش خرجت مرجعات رجعت ليها الحالة ثاني فينما كتوصل بيها كتخرج تعطي راسها لزنقة تنفس على راسها تخرج تنفس وتشكي وخا غير لبحر ترمي عليه همومها وعلى ذكر البحر دارت ليه طن وهو يقلب دورة وشد طريق الكورنيش واحد طوااااالة حتى ل واحد تجمع فين كاينين محلات الماركات منهم lc waikiki و كوسموس كيشوفو فالبحر ...كاينين شي صخور تما وتمنى من الله انه يلقاها تما وربي مخيبوش البلاصة فين كتمشي هي فين لقاها وملي لقاها تما اذن واصلة بيها لفين ...جاو فبالو كاع السيناريوهات واكبرهم انها سمعت كلمة من باها خلاتها طج ولكن باها مكاينش يكون هضر معاها فالتيليفون ملي رفضات تعطيه الشيك وعطاها شي كلمة جرحتها وزادت فعمق الجرح ...ماعرف والو سوى انه لقا فوزي تاهو جاي فين جالسة وتلاقاو بزوج عند راسها ضو الشارع كيسني فيهم وقف الموطور وشعل ضو ديالو وكذلك فوزي تا قبلو عليهم ضو ...

فرح"ضارت شافت فيهم بزوج فوزي وعصام وهما ينزلو دموعها كل مرة كتحمد الله على هاد زوج خوت الي عطاها الله ..حتى بدات كتبكييييييي وتنخصص خلات فوزي عينيه يغرغرو وعصام عينيه جغمو بدم بقات فيهم بجهد مالقاو ميديرو سوى انه يجيو يجلسو حداها متوسطاهم ...عم السكااات سوى امواج البحر الي كتكلم خفيفة ...اصوات البواخر من بعييييد وضواوها كيسنيو لمنارة كيعطيو اشارات لبعضياتهم ...للحضة من زمن حتى كسر عصام الصمت "

عصام : كاااع لهاد درجة ا فرح ؟ شكون ضرك ؟

فرح"الصمت مكتجاوبش غير كتبكي وتمسح دموعها"

فوزي : هضر معاك المخنتر ؟

فرح"بنفي براسها"

عصام : سمعتي شي حاجة من الناس ؟

فرح"بقات شحال ساكتة وهي تنطق " : ناس كتحكم عليك بالخايب بزااااااااااف ناس كتوقف ليك فسعدك ميخليوكش فالتيقار ...ناس كتقهر الواحد وتجرحو بلا متحس باش ترضي راسها وتبين راها عااارفة وواعرة ...

فوزي : باش حكمو ؟

عصام : فاش وصلوك ؟

فرح : منحوسة ممزياناش جرا عليها باها دخلات على العريس بالنحس قتلاتوو...

عصام : وبصحتك وراحتك اش عند العبد ميخشي ف راسو ف كرور عباد الله "سكت مستغر الله حيث تعصب محسش براسو"

فوزي : وانا بحال والو يقولو عليا مصاحب مع راجل ..ماشي بعيد يقولو على عصام مكيعرفش"نزل عليه عصام لقرفادة تا دار زدو"

فرح"ضحكت وسط بكاها " : ههههههه تفو عليك ...

عصام : لهلا يقلب شي قواد ...نرجع لدارنا لقا خويا وختي فيها ونعس هاني فضل ليا من قواد عايش حياتو خاشي راسو فقزازب عباد الله ...اش كتسناي ؛؟ بقاي تابعة ليا البشري بقاي تابعاه تلقاي راسك ديما هنا تبكي وتندبي وهما رااااهم كياكلو ويشربو ممسوقينش ليك ...عيييييشي لراسك ضربي دنيا بركلة ...الي بغا يهضر العام طويييل ...خيبو ليك سعدك ؟ مالكي معندك والي ولا تالي ؟ انا اش كندير هاد الكيدار اش كيصنع ؟ ملي هزيتك ستة وعشرين عام مغاديش يغلبوني لعوام جايا هزيتك فالوقت الي كان خاص يهزوك واليديك انا هزيتك ومشكتيش ...بغا يغلبني الي جاي ؟

فرح"تكات على كتفو وتنهدات بصوت مسموع نوعا ما ريحها ولكن الهضرة ديال سوقك خوا مغايبغي يتقدم لخطبتك تاحد باقا كدور فراسها...باستو فكتفو وباس راسها وضارت باست فوزي " عمري نخاف ...

فوزي : جينا جينا نطلعو لماكدو ؟ على حسابي الله ميخلص حد الفلوس موجودة مالها عشرين درهم تغلبني ؟ "شاف فيهم لقاهم كيرمشو فيه " خععههعه اتنضحك نزيدكم مية تريال لا غلا على مسكين ..

خرج من البيت كيقاد فساعتو تا بانت ليه عمتو واقفة مع ضحى قدام باب الجردة حنحن وهي دور مشات لعندو هي وضحى سلمو عليه ..

توبا "ببشاشة" : اش هاد الاناقة اولدي هههه تبارك الله ماشاء الله عريس منور ...

زين الدين"باس راسها" : فحياتك اميمتي فحياتك ...

توبا : هي ناوي دير مرتك ...

زين الدين : علاش لا ..."شاف ساعتو" ماشي دابا كل حاجة فوقتها ومكتابها نهار يكتاب نتي اللولة ..."شاف فضحى وشير ليها براسو وهي تمشي خلاتو منو لتوبا جرها معنقها بجنب" هضر معايا الحاج راجلك ...

توبا"تقلبو ملامحها من ضحكة لحزن وصدمة" : ماصبرش ياك ..

زين الدين : ماعليش شرع الله اميمتي تعاندي مع الله ؟

توبا : معندكش مشكيل ؟ ياااك ياااك "نزلت دمعة كتجرييي من عينها"

زين الدين"شد وجهها وقابلها معاه كيمسح بصبعو دمعتها" : شششش ويااااك هادو ينزلو ..."طلق تخنزيرتو وغوباشتو" ديري ليييه خاطرو سييييري معاه ومعايا وميكون غير الخير ...غذا بالليل عندي طيارة خلي الامور ماشيا كيف بغا سيمانة وراجع ..وعطيني وذنيك وتبعيني تعيشي. .

توبا : غييير متديرش شي حاجة غالطة...

زين الدين : نطلبو من الله يكون خير ..."طبطب على حناكها" نتي وبنتك تحت جناحي انا ،،ماشي جناحو هو لا تبعتيه را تا جناح معندو. ...تبعيني وذوقي هضرتي ..باس راسها ومشا خرج ركب فالسيارة وكسيرا نيشان مسافة نص ساعة وهو فالطريق فكازا حتى وصل للعنوان والي مع الاسف هو محل الكبيييير ديالهم ديال الذهب لقا المحلات سدو الا المحل ديالو الي شاعل فيه ضو من لداخل ...شعل الگارو وجر منو حتى زند ونفخ دخان ومشا طلع مع دروج خطوة بخطوة بثقاااااالة تا وصل المكتب ديالو مكتب بااااه ومكتب فين كان كيصلي ويذكر الله المكتب الي كان معطر بذكر الله كيتسمع منو صوت ضحك ...مشا لبيت فين كيحط باه الصندوق الكبيييير الكوفر وفين كيتكا الى بغا يرتاح ولا يصلي ولا يقرا القرآن ...سمع الصوت وعيا وهو يصبر فراسو ويثقل فراسو عند اول صوت ضربااااتو وااااحد مولاتي الصعر ما فسوقها ما يتعاود ... قرب يشيب غير بفعايل الغالي وما خفي اعضم ...مع حل الباب بان ليه متكي وحداه بنت فعمر ضحى تاهي كتشوف الغالي شوگر دادي بفلوس زين الدين ..." : تباااارك الله اللهم بارك ...

الغاالي"شهق وخرج عينيه تا بغا ينوض وهو يخنزر فيه زين بنضرة الى نضتي نطحن والديك ولا يقفقف تا حدر راسو"

هي"غطات عليها ليزار كتفيبري..."

زين الدين"حدر راسو تا حدرو وهو يهزو ومشا ليها لوا عليها ليزار و قفها من شعرها وعينيه كيتفاداو انه يشوفو فيها كيحاول يغض البصر وهو جارها من شعرها تا دفعها لاحها فالدروج تا تكركبت ماتسوق ليها لا واش ماتت ولا تهرست كتكركب وتغوت تا تضرب راسها مع الدرجة معقلش عليها صعر واااحد الصعرة كيشوف رزق باه كيفسدو فيه را خرجان العقل الصورة الي مخلي على دارهم مكتب باه حاول تا عيا يخلي بلاصة نقية ووالو ...باش يجي براني شارف يفسد ويوسخ المكان خلاتو يجهل ...هبط لعندها بان ليه نص ضهرها حيد الكارو من فمو وطفاه في ضهرها تا فاقت وغوتات لربي الي خلقها ...ورجع هز حوايجها ولاحهم عليها وهي كتلوااا ورجع ليه ...

زين الدين"هضر بصوت زعزع المكان تما " : غااااتنوووووووض تقااااااااود علياااااا من تم عرياااان بالرب الجليل وتحط شروييييطة عليك مانتا فخير ...بغيتي تفسد قاااااااود ازا"***** فسد برااا عليا "مشا ليه جرو من قرفادتو ونوضو لابس شورط وتيشرت وداه لحقو عليها نوضها ودفعها بركلة على جهدو تا نقزات لسما وتلاحت لهيه كان غايقتلها هي وياه كون ما جا الحسين وقفو حيث هو الي علمو باش كاين ..صدرو كيطلع وينزل كل مكيتفكر المنضر ف مكتب باه وجدو ؟ المكتب الطاهر الي كان فيه غير البخور والقرآن بصوت قدماء المقرئين باصوات عتيييقة ...ديما مطلوق والمسك وريحة العطرة وكلام الله حاط فيه وحدة قد اصغر بناتو كيفسد معاها ؛؟ كانت هادي هي النقطة الي جهلاتو وصعراتو حتى ولا واحد اخور وجهو تزييير تا زراااق وعينيه ولا لونهم خضر مشعشع حمرييين من جناب يخلعو نواضرو تورمو ليه بالعروق ...ولا غير يغوت ومع داك الصوت عندو شي وحدين باقين مسدوش خرجو و ديور الي تما كلشي خرج يطل ...البرهوشة مشات كتجري طيح وتنوض طيح وتنوض تا هربت تخبات فواحد بلاصة تما كترعد وبولها دايز وحرقة الگارو ماحاساش بيها قد ماحاسة بالرعدة ....

زين الدين"غوت " : واااااااعدو ربك اولد القحباااااااا خاشي فيك برهوشة ...ياك قلتي باغي دير مراة ثانية مقنعتيش اولد الزوادة ..."تزير تا طرطقات واحد الصدقة وعروقاتو ولات تكب ...جرو الغالي بعيد كيشوف كيتفتف حيث حصلو ومرضاش وميقدش يهضر معاه...هز فيه صبعو مغززز كيقرب ليه ولاخرين يشدو فيه " بغيتي زواج ؟ سيمانة نجي ونمشي معاك تخطب وخرج قود عليا كمارتك القواد منشوفهاش ..."هز ايديه تالسما معرف اش يدير وهو يضرب واحد زاجة ديال فيترينا بحر جهدو تا تشتات وعاودها وعاود غوت تا بح ليه صوته ..."

الحسين"شاف ف الغالي " : سير من هنا يا عدو الله وكلنا فيك الله ...

زين الدين "هز فيه عينيه منير " : تقاود عليا من هنا .. دي القحبة حوي دينمها فالخلا تحوي فيها السم "غوت تا مشا صوت" قاااااااااااواااااااد ..." كان غايطيح غير شدو الحسين وشي دراري نيت صحاح عساسة ديال قصارية مخدمهم وبززز باش شدوه "...

صعيب انك تصبر لفحال هاد المنضر قدامك ..غير خوك ومراتو ولا شي حد من عائلتك كنتي كتحتارمو وتشوفو غير مع مرتو فمنضر خاص وحميمي كتولي تبدل البلاصة الي فيها هو من الخجل ...فما بالك براجل كتشوف فيه الوقار كتشوف شيبته كتشوف انه وصل لسن الي خاصو يكون فيه كمية وقار وهيبة واحترام الي تخليك متهزش فيه الراس ...لكن باش تشوف واحد فحال الغالي جايب بنت قد بنتو ولا حفيدتو معاها فوضع مخل للادب فوضع عيب انك تشوف راجل فحالو فيه ...وخصوصا ف بلاصة نتا كتعتابرها مقدسة طاااهرة فيها ذكريات زويييينة بزاف نقية ويجي واحد شارف عقلو مشا هبييل وخضر كيف كنقولو فايت تازهوانييت لهيه فداك الوضع وفديك البلاصة ؟ اذا كان زين الدين براسو محتارم مكيديرش هاد الفعايل يزها ومن حقو حيث باقي عزري ديال راسو تا الى زها جات عليه ...

جروه شي دراري تما وداوه غبروه تا طوموبيلتو كمل لبسو مقادرش يهضر ولا يهز راس حس براسو وصل لمرحلة كلشي قلل من احترامو ليه هيبتو الي كان فارضها ديال بلعاني وماشي شي هيبة غير كيحشمو منو فشرد زين الدين ...اما زين الدين من حر الضربة على زاج الفيترينا جاب الله غير قمشات وغييير رضاة الواليدين ما ضربش ليه زاج شي عرق ولا شي بلاصة لان العينين فواحد ثواني معدودة تعماااو وهادي ميزة سيئة فيه ...جابو دراري كرسي وجلسو الحسين بعدا مكيقدرش يعاود معاه الهضرة كي يقوليه يدير مكيهزش فيه العين هو بوحدو...

الحسين : واش بغيتي دير فراسك مرض كثر من الي فيك ! فين عقلك اولدي فين ...فحال هذا مضيع معاه لا حجرة لا نجرة ياعوذ بالله ...نتا يمرضوك وهما يصحو ويدردكو ...

زين الدين"صدرو كينهج ونواضرو معرقين وجهو ولا زرق بكثرة الحمورية وقطرات العرق خارجين من جبهتو ولا راسو كبير هههه ...مانطق بوالو غير كينهج وجناوح منخرو كيفرفرو كي ثور دوزي من حداه ينفخ عليك يوصلك ريح سخون"

الحسين"حط ايدو على راسو لقاه سخون" : يلاطييييف طايب "غمز واحد الولد وطار مشا جاب قرعة الماء ديال باهية حيث هي الي كيشرب مكيشربش ديال روبيني ...حلها ومدها ليه " : شرب يلاه ...

زين الدين"بدون ميشوف فيه مد ايدو وشدها من عندو وخواها على وجهو وراسو وشرب منها ولاحها فلارض..بقا شحال كينهج تا بدا يتهدن صدرو وجبد كارو شعلو جلس حداه الحسين فكرسي اخور مخليه تا يكمي على خاااطرووو حتى قرب فيه النص ونطق الحسين"

الحسين : دنيا صعااابت ...

زين الدين"نطق بصوت غالب عليه البحة" : بكحل الراس بكحل الراس ...

الحسين : وشحاال جهدك تحا رب العباد ؟ شحال گدك (قدك) تهضر وتغوت ؟ صحتك الي كتمشي اما عباد ربي يطلقها ليك ويزيد اش ضرو ؟ مالو هو الي مجروح ؟ معايرينو مضرور ؟ لاااا العبد الغاية ديالو يضرك حيث كيشوفك حسن منو...لا يغروك اولدي وجوه زينة ولا يغرك المضهر الكامل ...كل مضهر كامل من لداخل غامل ...ديرها حلقة فوذنيك ...

زين الدين : بتعليمة بتعليمة "كيحك فشنايفو بسنانو بالفقصة الي باقا تاكل فيه "

الحسين : نفس على راسك "حط ايدو على كتفو كيطبطب عليه بحب الاب لابنو" فين باش كتعبر ؟

زين الدين : لباس لباس تهنى عليا "قبط ايدو وباسها ليه" نتا معايا ميخصني خير ..

الحسين : الله يرضي عليك راني منفوتك وخا يوقع الي يوقع ...مزية درتي مشروعك ورجعتي لبلادك ...

زين الدين : غبرت عليها باش ندير علاش نرجع ونزيد جوج خطاوي ماشي نجي ونرجع بالخطاوي...

الحسين : داكشي الي كاين ..."بقاو شحال ساكتين " راجع لدار ؟

زين الدين : لا...

الحسين : تمشي عندي لدار ؟ كاينة الحاجة ميمتك ..

زين الدين : ميمتي نمشي عندها هاني..."لاح الكارو عسف عليه وحدر راسو وايديه شابكهم فوق راسو بتعب " محرك لبلاصة راحتي وراحة بالي محتاج نشم ريحة حبابي ...فيك ميتحرك معايا ؟

الحسين : عندك طيارة غذا نسيتي ؟

زين الدين : عارف...

الحسين : واخا ولدي نمشي معاك نيت غذا الجمعة سادين ..محتاج نشوف تما شحال موصلتو من ايام بوك الله يرحمو ..."شير لواحد الولد يجيب ليه سوارتو وتيليفونو باش يعيط لمرتو ومرات ولدو يبلغهم بالي مع زين الدين وبالفعل داكشي الي دار عطاها هضرات مع زين بعدا نفساتو بالدعاء وكلام الله تا رتاح قلبه وواعدها يرجع ويمشي يتغذا عندهم ..."

الحسين : اش غادير معاه ؟

زين الدين : كون ربي حلل القتيلة كون صفيتها ليه ملي عرفتو..."كيكاكد بصبعو" ووخا هكاك منقربش ليه مكتفاني بنتو والعمة ..."تنهد " جاي نرتاح نشوف حبابي ونتجمع معاهم صدقت كنجمع فخنزهم ..."قبس ديك القرعة تا ضربت واحد الولد هز زين الدين راسو فيه يشوفو تا شير ليه بالي مكاين والو غير ضار عند الحسين وهو يبدا يحك فالبلاصة الي تشوا فيها هههه "

زين الدين : يلاه تحرك "باس راسو وناض هو وياه لسيارة منطلقين الى الوجهة الجديدة مع ذكريات غاتبدا حنيييييينة ودااافية ....

اصبح يوم جديييد على الكل ...كل وفين صبح عليه الحال وكل وكيفاش صبح هاد النهار ..كل نفس وكيفاش صبحات ..اليوم غير كل الايام ...حلات عينيها على صوت الهضرة برا اصوات مالين البيع وشرا ها مالين جاڤيل ها مالين الحوت الباعة المتجولين صوت دراري كيغوتو على نبوري غادين لقرايتهم ...هنا ادركت انها تعطلات شي شوية على الفياق...جلسات تا توگضت وناضت لدوش غسلات وجهها وطرفات حالتها بحيث بدلات الفوطة صحية لانها ثاني فوقت البيريود..خرجات لكوزينة ديريكت ردات الما يطيب تا سمعات تقرقيب عرفات خوتها ناضو وحتى صوت الباب ديال بيت باها اذن راه جا ثاني...طلات من شرجم بانو ليها ناس غاديا ناس جايا وشي ناس غادين مع الكراية كيوريوهم ديور بحكم الموسم ديال صيف الجديدة كتعمر بسياح داخليين وخارجيين. ..حتى سمعات اسمها من فم عصام...

فرح "بابتسامة الي بدات كترجع شيئا ف شيئا" : صباح الخيييير ...نفكرو هنا ولا فالبيت ؟

عصام : كاين داك المخنتر حطي فالبيت..خاص شي حاجة نتقداها ؟

فرح : الفرماج تقادا خاص غير الكومير والخبز لبا...

حرك راسو ومشا خرج يتقدا اما هي جبدات شنو غايخص الفطور بان ليها فوزي مشا لدوش هاز ماعنو ديال الاستحمام اذن غايدوش وهي تمشي لبيت بدات تمسح فالطابلة فين غايفطرو وتقاد تا دخل باها كيهضر فالتيليفون ...

المخنتر : وتا شكون يضمنا يا صالح ...وعليه ؟

صالح : تا را بارك(مبارك) ساير يسول فالبنكة گاليك را حاسبين طناعش المليون(12 مليون) بالفايدة...وسطاعش (16مليون) فالبنكة لاخرى وفلوس صحيحة ...عليا بلميييين تا لبودالي واگف(واقف) عليها...انا مانيش مسالي سير نتا والبودالي عند صاحبو راه في دار بيضا ...

المخنتر : واش يگولو ليه ؟ الحاج ذهايبي ...

صالح : وااايه هو لامين ديال ذهايبية تما ...سير معاه وميكون غير الخير ...

لمخنتر : وشو كي دير ويلاه معانا ...البودالي فيه العكس يالعياذو بالله ...

صالح : ودابا نشوف تا محمد ...مشكيلة هادي والله الى مشكيلة...وارض وجوج فيرمات الي بعنا مكملنا فلوسها .

المخنتر : راهم ارض البور هادوك ميجيبو ليك ريال مگاد ...لباس الي جاتنا طناعش ليمليون لواحد...ايوى وشي لاخور مبغينا نبيعوه بغينا نزيدو عليه هاديك ونكملو السور ديال ولاد التجاني الخيالي...

صالح : يكون خير ...

قطع معاه وهاد الهضرة طبعا سمعتها فرح وسمعات غيييير هضرة باها ماشي هضرة صالح...بقاات كتفكر اش كيصنع ثاني ولاش باغي الباقي من الفلوس الي مكفاوهش ؟ لاش مكفاوهش..؟ شاف فيها وعيط ليها ثاني...

لمخنتر : ديري ليا قهوة معطرة ...

فرح : تقاداو العطور نعيط لعصام يجيبهم ؟

لمخنتر"منفخ وينفخ كي الحنش" : بلاش ديريها بلاش ...

مجاوباتوش مشات نيسان لكوزينة كملات توجادها وجا فوزي مدوش لابس ريحتو تعطي الاناقة والنقا ميعطلكش فيه كلشي سبيد العدس الي خلاها هو هههه ...جا عصام دخل المشتريات حطات داكشي فبلاطو وبدات تحط وفوزي تاهو طلع عصام تا كما الكارو...ونزل لقاها كتكب فاتاي والقهوة لباها ...

عصام"ريح بعيد " : خاصك شي حاجة لغذا ؟!

فرح : لا مخاص والو...يقدر غانمشي انا وصفاء ندفعو لواحد الشركة فتحات جديدة ...

فوزي : واش ديال الفلاحة ؟ مابعيداش بزاف..

عصام : الله يسر..."فطرو فالسكاااات الا المخنتر الي كل مرة يصوني ليه واحد فخوتو ولا خوتاتو تا ناض عصام مشا المحل اما فوزي خرج وفالغالب غايطلع لعند جدو فسيدي بنور اما عصام حتى يمشي هو وفرح المرة جايا...بقا المخنتر كيهضر وعاود جاه اتصال خلاه يطلع ليه دم كثر ماهو طالع غير وحدة بغا فيمن يفش سمو بالفقصة الي فيه .... حتى ناض لبيتو لبس جلابتو ودار ترازتو (ترازة هي طربوش مخدوم بخيط القصب) خشا وراقو فقبو وهو يوقف عليها فالكوزينة...كتغسل فالماعن وتفرج فاليوتيب فالتيليفون..

لمخنتر : نتي مخداماش ؟

فرح : لا كاينة العطلة هاد سيمانة ...

لمخنتر : باقي كتمشي عند دار الميت ...

فرح"فقصتها كلمة الميت" : دار يونس الله يرحمو ...لا مشاو ل بلادهم فوزان ....

المخنتر : ويرجعو وترجعي عندهم ؟ جمعي رجليك الي كان غاياخذك را مشا عند مولاه اش بغيتي تعاودي ترجعي عندهم !؟ اش جامعك بيهم واش متليك معاهم ؟ شدري رجليك لارض صوابك راك درتيه ...شدي رجليك كثرت الهضرة وكثر عليك اللغا ...

فرح : ناس الله يعمرها دار ابا باش وصلوني...

المخنتر "غوت تا قفزت" : مااااتوصلي حد هي ماتوصلي حد ...تركني فداركم اش بغيتي مكتابش سيد طلع عند مولاه اش ليك بيهم ...وباقي نسمع والديك تحركتي عندهم...بركي فداركم ...لا نحلف على ديك الخدمة لا نتي توصليها وسيري شكي لداك خوك مانتي فخير معايا ...براكة غا سوقك خوا شكون باقي يبغيك لجواج شكون ...

فرح"هضرته نزلات عليها كي السم تا صرطات ريقها وشدات فبوطاجي كاتمة الكلام متقدرش تغوت عليه "

المخنتر : وصليها ليه يلاه وصليها...نخاف منكم والدكم ونخاف منكم ينعل جد والدين بوكم الكلب ...تريكة كي الويل ..."قرب ليها تا قرب مزيااان" الي نجيبو ليك تجوجي بيه وخا يكون عرج ...وعليا بلييميييين وترجعيه نهاركم مطلع فيه شمش. ..كلمة جوج وليتو ترادو معايا ينعل الكلبة مكم اتفووو..."خرج من كوزينة مخليها مكسورة مقهورة كلام باها ما هرسهاش حيث مولفة عليه ولكن الي كمل عليها هو هضرته تطابقت مع هضرة العيالات والمجتمع راه مكيرحمش حنا كنسمعو ونقولو ولكن معايشينش نفس معاناة فرح مع المجتمع..."

وخا نغيبو تا نعياو نرجعو لبلاصتنا وخا يكون اصلنا من فين ولين وخا نمشيو لبلادنا واصولنا راه كتبقى البلاصة فين كان مسقط راسك هي الي كتخليك ترتاح...تغيب قد ما تغيب را ترجع لبلاصة ولادتك فمابالك لو دوزتي فيها واحد العمر بسيييط وعشتي فيها ذكريات طفولة ....زين الدين تزاد فتارودانت وخا الاصل ديالو من الدار البيضاء وكبر فيها الباقي من عمرو الا ان تارودانت كيعتابرها اكثر مركز كيحس فيه بالراحة بالاصل ديالو البلاصة فين عاش طفولته ومرحلة مهمة من حياتو ...تزاد فيها هو وختو الصغيرة الي توفات فعمر صغييير وبقا غير هو ...عاش مع باه ومو الي تاهي من اصل كازاوي حر لكن عيشتهم فهاد البلاد كانت غير بحيث هي فين بدا الحاج البغدادي الكبير الحرفة ديالو حتى توارثات...

مع التسعود ديال الصباح لقاتهم وصلوو لمدينة تارودانت العريقة من بعد توقف للافطار فالطريق ...غير دخل ليها وهو يتنهد تا تسمعات عند الحسين الي تبسم عرفو بالي بدا يرتاح وهنا غايولي لباس ...عرفو بالي ذكرايات بدات تدخل ليه لراس ويتنغم بيها ...مع دخوله مشا نيشان لرياض فدرب الاميرة وهو داخل كيشوف فالحوانت الي كان كيتسخر لمو من عندهم والجامع الي فحي ديالهم ...الدنيا بدات تعمر فداك صباح وواحد النسيم بااارد كيريح نفس...حتى بلاصا قدام الرياض الي سالاو الاشغال ديالو مؤخرا وترمم وتقاد والاضافات والاصلاحات كانو غزااالين مع دور الساروت سمع بالشلحة صوت واحد الولد كيعيط الام ديالو عرف بالي جارتهم غاتسمعو جا وتجي ...حل الباب ودخل وماحدو دااخل وهو كيسمع صوت ضحكات ختو الصغيرة غادي فالطوالة وعند اعگمي(سقيفة) حتى وقف وعوج راسو غمض عينيه هز صبعو كايوري ل حسين ...

زين الدين : تنغم ليا بالنفس الي هنا ذوق ليا صوت شامة(اختو الصغيرة) ..

الحسين : شامة طير من طيور الجنة ...كانت دايرة الروح هنا...

مدينة الجديدة....

جاي كيهضر فالتيليفون وغادي بخطواته قاصد الدار عندها من بعد شحاااال ما جا لعندها مشاكيل شداتو موت يونس صاحبو الي كسر ليه خاطرو بجهد حتى خلاه كاره دنيا ومقهور عليه وحزين لدرجة من دار لمحل ومن المحل لدار ...خلاه يعيد شحاال من حساب ويفكر ان دنيا عمرها قصيييييير واس درتي يا عبدي فدنياك واش جمعتي يا عبدي لاخرتك...يونس مات وخلا صيته واصل لعند الكبير وصغير ...خلات كلشي يترحم عليه ويقول سعداااتو بهاد الموتة الي جاتو وحسن الخاتمة الي تعطاتو...

صطوف : ماعلينا شري الي يخص اصحبي وجيب ليا سلعة را واقفة الناس على شغلها..."هز عينيه وهو يلمح واحد من اقرب اصحابه عند باب دار ناهدة والي خارجة عندو ب بيرميدة طويلة حد ركبة وتيشرت قطن لاصق بزازلها كبار وفورمتها تلفت وشعرها مطلوق مصايبة وجهها وكضحك معاه وتضرب ليه فكتفو ودير صبعها على فمها ...وقف واحد شوي وجهو تقلبو ملامحو للغضب اش وصل صاحبو لعندها ؟ فين كيعرفها ؟ حتى لمحوه واقف وهو يتفافا صاحبو تا حنحن وهي تدخل نصها لدار عيطات لولدها يجيب ليها بينوار وقبل ميجي كانت لابساه بالخف تا وقف عليهم ...

صطوف : سمير اش كتقلون هنا ؟

سمير : تا ريح من تخصار الهضرة جيت نسول عليك من صباح وانا نقلب عليك !!!

صطوف : وجيتي هنا ؟ اش غاندير فدار القحاب...

ناهدة"خرجات عينيها" : صطوووف ؟؟ اش هاد الهضرة..

صطوف"ضار مخنزر فيها" : دخلي تقودي لداخل لا ندغمر لمك الرية "خنزر فيها تخنزيرة القت يلة وهي تدخل وسدات الباب وضار عند صاحبو " كتبيدقني الز***

سمير : صطوف ؟ اش هاد الهضرة ديال ز***

صطوف : اش موقفك ؟

سمير : من لاخر بغات تجي عند مرتي تصايب ليها جيت بصح نقلب عليك ملي حلات ليا علمتها على ود المدام ...اخويا راني مولا وليدات نبيدق صاحبي ...

صطوف : نشم ريحتك تقحبين جوج ضربات نصيفط دينمك عند مولاك...

سمير"كيضحك" : هههههه هوو و هو و راني عشيرك ...

صطوف : عشيري هو عصام سيد الرجال تاع گلبي (قلبي) يلاه عگب فحالك (رجع فحالك) "ضار حل الباب بساروت ودخل خلاه كيشوف ...صطوف شااام شي ريحة ماشي هي هاديك مع دخل مشا نيشان لكوزينة هز واحد الموس ومشا كيزرب لعندها كانت ضايرة وهو يجرها من شعرها وضورها لعندو حط الموس على عنقها بجهد تا جرحها من عنقها ...عاض لسانو" والله يا بنت القح*** ونشم ريحة ماهياش تنح*** زا*** بوكم ريكطو فيرسو...نهار نسالي من عدو ربك غادي لوحك ونخليك شياطة ليه ..."كرز على شعرها بجهد وهي كتنيييين ماقادراش تغوت لا يخرج ولدها يشوف اش واقع ويشوفها فداك الوضع..."سمعتيني ؟

ناهدة"دموعها دازو" : ممممم مممم صافي صافي ...اهى

صطوف"دورها بجهد وجمعها معاها بطرشة ودفعها بجهد تا خرج د م من فمها هذا غير الي فعنقها على شوي كان غاينحرها...خرج وسد الباب تا كان غايطيح ورغم ذلك ماهانيش شام شي لعبة تما وميمشي تايعرف اش كان..غادي ويسب ويدفل ووجهو مكيبشرش بالخير "...

تمشى وهو كيشوف فالرياض الي تصلح بذوق عمتو الي عرفها غاتخليه كيما هو ولكن غاتزينو باضافات الطواليط دوش تصلحو باجدد الاكسسوارات تدار ليهم رخام فالارض لكن زليج البيوت بقا هو هو وزليج عتيييييق ...ركزات على صباغة عاوداتها بتدلاكت والوان مريحة لنفس ...الفراش بقا الفراش القديم لكن تبدلو بعض الافرشة بجديدة منهم بيت الجلاس حيث كان خاوي اما بيت نعاس زين كان من طراز القديم ديال ناموسية فيها حديدات نحاس كتغطا بخوامي طراز الف ليلة وليلة ...دخل لصالون لقا راديو قديييم ديال باه النوع ديال خمسينات...و ساكسفون وفونوغراف الموسيقى (فين كيحطو CD كبيييرة كحلة كيدورو ديك اللعيبة وفيها شوكة باش كتخدم موسيقى ...باقي لدابا كيخدموها ناس المولوعين بالانتيك او الاشياء العتيقة ) صالون صاوباتو ليه بطريقة فراش بلدي عتيق كتحس براسك عايش ف 1950 بطريقة راقية وقديييمة بلدية ...حيث عارفاه عاشق للانتيكة كيبغي كل ماهي عتيقة عزيز عليه الدقة القديمة يعني شخص كلاسييكي بهاد المعنى ...دار CD فالفونوغراف ودور مزياان وحط شوكة عليها وهي تبدا نيسان اكثر اغنية كان كيسمعها باه اغنية سليم هلالي ابن مدينة عنابة الجزائرية "محني الزين" والي تغنات ف 1945 اغنية من الثراث الجزائري ...واغاني عبد الهادي بالخياط واغنية الالا يلالي من الثراث المغربي القديم ...ولكن الي تطلقات دابا جا فيها نيشان اكثر وحدة كتخليه يرجع لذكرياتو مع باه ...وهي

محني الزين العمر محني الزيييين محاااااني الزين امولات العينييييين ...اغنية رااائعة جدا كيسمع ليها ويغمض عينيه ويقوس حجبانو منغم مركز معاها كيرجع بذاكرته لذكرايات قدييييمة ملي كان فعمرو عشر سنوات ...

الحسين : الله ..."كينقر بصبعو وكيسمعو الاغنية بدرجة كيتسمع ترشريش ولكن عايشين معاها عاجباهم بداك صوت كتحس بانك رجعتي لسنوات الايام زينة ...وخا اغنية قديييمة ماشي فعمر زين الا انها كتفكرو بواليديه طفولته كان كيسمع ليها جدو وباه وهاهي وصلات ليه...عاشق للانتيكة والكلاسيكي "

زين الدين"تلاح على السداري كيسمع هو والحسين حتى سمع صوت الدقان وناض كيقاد فتيشرت ديالو ومشا نيشان حل الباب مع حل مع ملامحو بانت عليها البشاشة خصوصا ملي شاف جارتهم القديمة دايرة عليها حايك ومغطية وجهها مخلية غير عينيها تا شافتو وهي تعري وجهها وضحكات بصوت رقيييق فيه رنة وخا سيدة كبيرة فالعمر " : ميمتي فاضمة"باس راسها وايديها" يا ميمتي وعاش من شاف وجهك

فاضمة "بابتسامة" : فاضمة : أس مقورن أياد أيوي حنا تمطلتن فلاتي باهرا ( نهار كبيير هذا ياا حنيني غبرتيييي عليا بزاااف

زين الدين : لوقت أيمي أداغ ييوين لوقت دالدونيت دلاشغالنس ...كشم ..( الوقت اميمتي الوقت ودنيا ومشاغيلها ...دخلي ..)

فاضمة : أهوي أوشكيغد أك زرغ ياك راغيد تگاورت( لا لا جيت نشوفك ياك جالس هنا ؛ )

زين الدين : غاسا ...راد أوريغ أوساناد ديوشكان ...( اليوم ...راجع الايام جايا ...)

فاضمة : مرحبااا سيوي زين الدين ،، تبارك الله إوي إمقور إگا أركاز أرسيس تگالان إرگازن ( مرحبااا بولدي زين الدين ،، تبارك الله على ولدي كبر ولا راجل يحلفو بيه رجال .)

زين الدين : أييكميحفض ربي أيمي ( يحفضك ليا ميمتي

فاضمة : ياك أوك ياغ أومارگ نباداز( ياكما توحشتي نباداز اكلة امازيغية بحال كسكس)

زين الدين : تيويستيد نيشان أيمي ( ضربتي فالعرق اميمتي ...(زعما جبتيها لاصقة)

فاضمة : دار إمكلي ياوياكتين إوي محماد ( مع الغذا يجيبها ليك محماد ولدي ...

زين الدين : اكميحفظ ربي(يحفضك ربي

سالا معاها وتواعدو باش تجيب ليه الغذا كسكسو ...دخل زين الدين على الحسين فالكوزينة كيقلب على القهوة مطحونة حتى وراه فين كاينة حيث علماتو عمتو بالي تقدات ليه قبل ميجي الاساسيات فحال قهوة اتاي وسكر " : رجعتينا لايام زينة ههههه

زين الدين : احلى ايام ..."جبد لاباراي كيعبر باش يكتبها فالنوت حيث خاصو كي يمشي ل دبي يعطي الطبيب التقرير الي طلب منو فاش يرجع لدبي ..."

الحسين "حط لقهوة الصباحية المعطرة وافتاتح حديثو..." : علاش معلمتيش عمتك بالي كنتي عيان ديك النوبة...

زين الدين"شاف النتيجة كان طالع شوييي ماشي شي حاجة " : نزيدها هم على هموم ..

الحسين : ونتا شكون يهز همك ؟ هاز هموم الدنيا ودين ونتا !

زين الدين : يعوض ربي...

الحسين : ماشي وقت تشوف دارك ودير مرتك وولادك ؟

زين الدين : نهار يكتاب مشغول بزاف نوقف خدمتي ويكون خير ...

الحسين"كيحرك فالمعيلقة ويشووووووف فيه تا تبسم ببشاشة وصوت الاغنية خدام من صالون واحد الجو كلاسيكي وصوت هضرتهم المرييييح كتحس براسك فسنوات قداااام ..نطق بشويييي " : خبااارك نتا وبنت الناس الي خطبتي ...

زين الدين"هز فيه عينيه ورفع حاجبو تا عض شنايفو "....

الحسين : حنااان الزين ...(حنان تاع زين الدين حيث اسميتها حنان ) ...

محني الزين العمر محني الزين،، محني الزييين ااامولااات العينين...تحت انغام هاد الاغنية ف احدى الاسطونات الدائرية ذات الطراز العتييييق الي كتخدم فاحد الاجهزة الانتيك التي تسمى بالفونوغراف (ديرو تصاورو غايطلع ليكم ف غوغل) كتسمع صوت من صالون بصوت خااافت واغنية رائعة وجميلة كان ديييما كيطلقها الاب ديال زين الدين فاش كان صغير حيث اسميتو زين الدين والاغنية فيها زين كان زين كيقوليه سميتي ويبقا يضحك معاه باه ولا جدو ويقوليه هادي عليك وعلى البنت الي غاتولي مراتك ...كانو كيقولوها ليه ك نوع من المزاح ويبقا يضحك ويسمع ليها...ذكرياااات كتجمعو فهاد الرياض...ورائحة القهوة معطرة الجو الدااافي بكلامهم كلام رجل حكييييم وكلام شاب متييين...

الحسين. : فين وصلات حكايتكم ؟

زين الدين"بقا كيشوووف فيه بعينيه العينين الي تحرك البؤبؤ ديالهم بمجرد ما نطق بسؤالو ونطق اسمها...واش تحرك بمجرد نطق الاسم او السؤال بحد ذاته ..." : حكاااية كيف الحكايات ..

الحسين : سالات ولا اش وقع ؟ من داك العام الي نويتي الحلال معاها ...سافرتي ...

زين الدين"دوز على وجهو بتعب ومسد عينيه بريوس صباعو كانه كيقول عييييييييت ومحتاج استراحة دقائق..دار ايدو على حنكو كيشوووف فيه قبل مينطق " : المكاتيب ا با المكاتييييب كتصرف ...وراسي عمر بالمشاكيل المرض الخدمة البروجي الي قد سخط ولله الحمد على فضله ونعمه ....

الحسين : باقيا حنان الزين ؟

زين الدين"ببشاشة بانت على عينيه كانه كيستهزء " : سمعتيها من فمي ؟

الحسين"تقاد فالجلسة وبدا يضحك" : ههههه والحق يقال اولدي ما سمعتشااااي...

زين الدين"تنهد بتعب" : نسالي المشكيل ديال هذاك خينا ..

الحسين : اش ناوي معاه ؟ باغي تزوجو الثانية ؟

زين الدين : باغي نستر العيب ..

الحسين : وعمتك ؟

زين الدين : عمتي فوجه بنتها ...معمرة دار ماشي من نوع الي تشوف دنيا ...

الحسين : لو كانت تخرج وتشوف زنقة بزاف وتعرف ناس كانت تعرفو بوجهو ...

زين الدين : مخافيش عليها ...راهم عشرة طويلة...

الحسين : وكيفاش قبلتي يتزوج وتمسي تخطب ليه ؟ ايه شرع الله ماتقولش عليه لا وليني ؟

زين الدين"هز صبعو" : شرع الله الى كان يعدل "ركز فيه بعينيه بنضرة مستهزءة..." عادل بين راسو والخانزات بقا ليه غير الزوجات ؟

الحسين : غاتمشي تخطب ليه بنفسك ؟

زين الدين : ماشي عيب ندير الواجب ونتبع الغدار تال باب دار ...معايا عمتي برجليها "خبط فوق طابلة بتاكيد"

الحسين : علاش ناوي ؟

زين الدين : ناوي غير الخير ابا .."شير جيهة صدرو" عارف عليا فعايل تيهوديت ؟

الحسين : عارفك ولد ناس شديد وخا صعييييب وقاصح وقلب حجر لداخل ديالو قلب بيض كينبض بالحليب والمعقول عارفك جبل ميهزك ريح ولكن عااااارفك العكس كيمشي ليك فالدم الى فات تا صعرك شي حد بحلوفك وحلوف الرجال ماهو فخير معاك ..."تبسم بجنب" واش نتا شايفو جايب الخنز والفساد فاطهر بلاصة ديال الواليدين عندك وتنساها فيه ؟ اكثر واحد كيشد الحسيفة فالي كيضرو ويحفر فييييه هو انت ..

زين الدين"الصمت"

الحسين"حط ايدو على دراع زين" : ولدي شوف فيا ...ياك ناوي الخير ؟

زين الدين "هز فيه عينيه الخضرين وسط سمار لون بشرته" : عطيني الحل ؟

الحسين : يمشي يخطب هو راسو وخليه عليك اولدي...

زين الدين : الى تكلتي عليه مجايبو ديال الخنز...بغا ولد بغا الولاد من حقو ...بنتو محتاجة سند شقيق ..انا جهد جهدي نحضيها ؟ ماقلنا عيب على راسي"حط ايدو فوق راسو" شي حوايج وشي مسايل ماااعندي الحق نهضر فيهم ...

الحسين : المعنى من هضرتك ؟

زين الدين : نحضيها ونفوتها لهيه نهار دخلتهم من زنقة كنت صغير وصغير وحاضي رزقي وصواريا ..منكذبوش قام بالواجب معايا وقف ليا على رزقي...

الحسين : صراحة الله وخا تانتا صغير البق مزهق وليني قام بالواجب ...

زين الدين : خيرو هنا "ضرب كتفو بجهد " ميتنساش ...

الحسين : كمل ؟

زين الدين : بنتو خاص الي يحضيها بوها ا با ...مهما حضيت وضربت وخرجت عينيا كاينين حدود"رسم خطوط فوق الطابلة" منفوتوهمش ...اللبيب بالاشارة يفهم ...

الحسين"حرك راسو" : اااايييه عندك الحق يعني وخا تهضر تخاف منك وخا حاضيها ومربيها بلاصة باها متقدرش تحكم فيها كثر من القياس واليديها كاينين ...

زين الدين "سرح ايدو بمعنى تماااما"

الحسين : ك تسديد دين الخير الي دار تمشي تخطب ليه فنفس الوقت تستر عيبو وتبقر خليفة البغدادي وسمية البغدادي تاج فوق راس ...وفنفس الوقت ترد الضربة ضربتين على الفعلة الي دار ؟

زين الدين : اش عارف عليا ؟ نربي ونودي (يربي وينتاقم)

الحسين : عنداك تغلط اولدي وتضلم معاك ناس انا عارفك ثد ما انت مزيان قد ما الي حك عليك ولا حك ليك دبرة متنساهاش فيه...

زين الدين : نديرو ليه خاااطرو...خليه يفرح الله اودي...

الحسين"جمع ايديه تحت ذقنو وشاف فيه من فوق نضاضرو وقال" : نفرحوه ونضحكوه تا نهجروه ليه ...

زين الدين"وقف وباس راسو" : يرحم من ربااااك ...

مشاات لعند صفاء لدارهم الي لقاتها فالكوزينة كتعجن فالمسمن باش ديرو فالگوتي حيث جايين عندهم شي عيالات ...طلات عليها لقاتها كتغني وتهرنن غا وحدها ...

صفاء : اااااا انا الي معندي زهر دنيا غدراااتني والكلاب شواتني وحيباني كواتني وقتلاتني بالغدر ااااا وانا ومعندي زهر ...عنننن "كتمعس فديك العجينة كتقتل فيها والعجينة كتبان ليك كتبكي من بعيد ماشي كدلكها كااتقتل فيها بالريييط هههه تا غوتات فرح وهي طير وتنزل وضارت تقلب على كاس ولا مقدة ولا موس تشير عليها بيه تقتلها ودنيا هانيا " عن جد امك على جد ابوك على طواسل امك الغليصة يا المبجرة والمشتتة يالي فورمتها فورمة مخلويض يالاه فرحانة ليا بداك الزوك ودوك الفخاد عن جد امك على ابوك داك المصدي عدو الله يتبعو البلا"

فرح : اااهيا تهدني شتك دخلتي فطاسليتي كلها...

صفاء"هزات صبعها عامر عجينة" : فوتي غير حبحوبي حباي عصومي عصعص ...

فرح : مندوزش فوجه عصام زعما ؟ "جرات كرسي وجلسات حداها حطات بيسي فوق طابلة كتشعل فيه " باقي واصل ويفي ديالنا عندكم ؟

صفاء : لا قاديتو احبي ...

فرح : مزينك ...صافي واصل ...

صفاء : اش بغيتي تفرجي فشي حاجة ؟

فرح : تت لاااء بغيت غير نتكونيكطا فالفيس وانسطا شحال مدخلت ليهم من قبل موت يونس الله يرحمو...بغيت غير نخرج من دار قنطت "شافت فيها" نخرجو ؟

صفاء : فوتي غير اليوم جايين عندنا دوك زرقات الكمارة ديال البلاد ...يخخخخ تصبحي عالنبوري فايقة توجدي ليهم الفطور وكاينة فيه الي تجي دابا صباح تلقايها مشات مع الخمسة ديال صباح ...

فرح"عوجات فمها كتشوف ف رسائل الي فانسطا حتى جاها ميساج من واحد هزات عينيها وهي تقرا الاسم وياريتها ماقراتو...حتى شهقات ووجهها ولا مزنگ فهاد اللحضة دخل سيمو باقي مبوق لعندهم حيث دقات عليه وعلمات نجية تقوليه يوصل عليهم فاش يفيق "

سيمو : افيين"عينيه شفارهم لاصقين بالعمش ديال نعاس مكمش عينيه وجاي ويضهصص كي العما تالفة بيه لارض وشاداه دوخة " اعااو جلسوني ...

صفاء : تلفو عليك ديور نتا ؟ سير غسل وجهك الحيماري اويلي ..."جراتو تال طواليط يغسل وجهو ورجعات عند فرح لقاتها كتقرا ميساج وتعاود وملامح صدمة والحزن والغضب بادية على وجهها " مالك ؟

فرح"حطات ايدها على جبهتها كترعد وهزات عينيها فصفاء وشيرات ليها بمعنى قرااي"

صفاء"طلات على لابتوتب لقاتها فاتحة على الميساج من ismail وهي تخرج عينيها ...اش ذكرو ب فرح من بعد سنوات الفراق ...ملي كانو كيقراو فاولى سنواتهم فلافاك وهما بزوج حب صافي حتى مشا تخرج وخدم وغبر غبرة وحدة وكان جوابو ليها فاخر ميساج خلاها تقطع الياس من الحب الرسالة الي كتسميها صفاء رسالة الشمتة...وهاهو دابا راسل ميساج من بعد سنييييين ..." : فرح لباس عليك امورك هانيا كنتمنى تكوني بيخير وباقي عاقلة عليا ...هههههه عاقلة عليك القواد بو زوك ...

فرح"حبست ضحكة "

سيمو"دخل لقاهم بجوج كيشوفو ف بيسي وخشا راسو تاهو وهو يقرا الميساج حيث كان معاهم فلافاك غير سيمو مكملش " : هاي هاي هاي على راس تيمومة اش فكرو بن القواد بوه؟"خرج عينيه وخنزر فيهم " بالرب الجليل ويرجع تا نن تانن راكم عارفين ريكطو فيرسو ...

صفاء : معندو ميرجع الكلب لاخور الحامض اش فكرو فيها لاش كيسول ...

سيمو : الى جاوبتيه نعرفك مدلولة ...

صفاء : مغاتجاوبوش معارفش فرح والكرامة هههه لا جاوباتو نعرف ساحر ليها ...

فرح"خلاتهم كيتقاشحو وهي تمشي لميساج ودارت ليه طق مسحاتو فالبلاصة ودخلات لانسطا كدور فيه عادي " : نوووضي كملي مسمنك "شافت فسيمو" فقتي اختي ...

سيمو"شاف فصفاء وهي تغمزو زعما اش قلت ليك ههه حيث فرح بمجرد ما تفارق معاها بدون سبب وطمعها بزواج وخلاها بنات احلام معاه فلحضة هدم ليها كلشي ...بكات بقا فيها الحال كرضات لفترة لكن دغيا وقفات على رجليها وحسباتو كانه عمرو ماكان حيث ببساطة كيف قالت الي باعني والي ضحك عليا نحسبو مكاينش اهم حاجة عندي هي عصام وفوزي معايا مابغيت والو فحياتي ...وكملات حياتها عادي لانه لو عرف عصام غير شوي ولا ساق الخبار يطحنو فبلاصته وهي متسلمش منو .....

صفاء : سيمو حبي اجي سمن معايا ...

سيمو : كنعرف غير نبرم

فرح"شافت فسيمو" : اش درتي فداكشي ديال بريكول و صطوف الراجل الي لقا ليك ؟

سيمو"جلس وجبد رجليه وخبط فوق الطابلة" : خلييينا من راجل اصلا بريكول خاوي بغاني نصبغ ليه كابينة(طواليط) عن جد امو...وسمعي المفييييييذ واش عرفت ...

فرح وصفاء طلقو وذنيهم : هااا ؟

سيمو : صحيبتو مولات الطرف المطرف بو طرفة من هنا لطرفاية ...مادااام مجاهدة فسبيل السكاسيك السكسوكية مع الجبار صطوف ....

فرح : هههههه واهضر مالها ؟

سيمو : طايحة مع واحد خونا من ورا صطوف...

صفاء : هاااااويلي ويعرف صطوف يقتلها حق الرب الجليل..

فرح : و صطوف عارفها كيف دايرة اش غايقتل مالو مدلول

سيمو : تت "غمز" ريحي لارض حنا رجال منبغيوش الحاجة المشروكة هادي واحد و زيد لا بغيناها اش يوقع ؟ خاصها تكون لينا وحدنا نهار نساليو منها الي بغاها يديها سوقنااااش حنا...هي مزال مع صطوف وصطوف ميبغيش الي يتشرك معاه نهار يلوحها تقاااود فحالها...

فرح : فين شفتيها انت ؟

سيمو : سيمو هذا احبي سيمو...وخونا عشيييييير صطوف "قبل ميكمل هضرته طارو ونزلو بجوج هو وفرح على اثر المقلة الي طيحات صفاء تا نقز سيمو من بلاصتو " نعل تفوش مك الحبس ...ملاويا طارو ونزلو ...

فرح : كون تحشم ازمر "شافت فصفاء" الحمارة را خونا واحد اخور ماشي عصام ...

صفاء : اححح اسيمو ولي توضح الحبس طيحتي لي النقطة

سيمو : النقطة الي بقات جمعيها وجمعي كرك الحبس تبقايش تفكري ف عصام بزاف ولا تحركي اتبي يسوف فيك ونتي لاصقة فبلاصتك كي غايدير يعرف بيك ...صعرتي خليقة امي "هز ايدو" خنزري فيا دابا ندغمر مك

صفاء : اهى اهى فاااكيو ..

فرح : دابا شكون اصحبي ؟

سيمو : عشير صطوف سمير راجل منال مولات صيدلية ...ياخويا راني شفتو معاها فواحد البرطما سهرنا حداها مع شي عشران البارح ..سولت قالو ليا كاريها ليها شهر هذا ...مكاين غا ديس فيتاس ...ڤط ڤط ...شي قتيلة جايا بالرب وفهاد اليومين وماشي الخبار من عندي دابا تشوفي شكون يوصلها ليه سخونة بكوية بقتلة واحتراماتي وكيل الملك نعلن الجلسة الحكم على صطوف ...

باحدى المقاهي العائلية في الهواء الطلق ....بحكم انهم جاتهم خبار بان الحاج الغاالي معروف بالخير مع الناس كيسلفهم الفلوس بضمانات ولكن كايرجعوهم ليه بالمتيريس اي بالفائدة ...والفائدة على ثلاثة...كيمشيو ليه غير الناس الي ضعااااف ولا حصلو فامور مالية او ضائقة خلاتهم يمشيو لغالي بحكم هو الملجأ الوحيد وهذا مشكيل الي مزال معرفوووش زين الدين بجانب مشاكيل اخرى غاامضة ...

الوهابي : سي الغالي هذا المخنتر الخيالي من عندنا نيييت من دكالة ...ناس الجود والكرم ومرحبا وزيد القدام ...

الغالي : مرحبااا بناس دكالة ...زييينة ديك البلاد عندكم ..

المخنتر"بضحكة ديال لمصلحة ممكن يبوس ليك رجليك " : زينة بوجودك الحاج على رقبتي تاتجي عندنا نحطوك فوگ(فوق) راسنا والمخيرة عندنا ديالك ...

الغاالي : الله يكبر بيك ...

الوهابي : واسيدي هانتا تعامل معاه فحال الى كتعامل معايا را عاودت ليك اش كاين سولو اش بغيتي تسولو ودير المزيان الحاج را خيرك سااابق ...

الغالي : الله اودي مرحبااا كلشي ديالو تا ريال منشدو عليا باليمين ...اش خاصك اسي الخيالي...

المخنتر "شير لخوتو " : هذا كي شتي خويا محمد وهذا صالح مات الحاج الي هو بويا هادي ربع شهور هكاك ...خلا لينا شي بركة ديال الورث وشي اراضي واحلين فالمحافضة وواحد الفيرما بغينا نتجمعو فيها حنا بربعة الي فعلمي هي ديال ولد سيادتكم ؟

الغالي"حك لحيتو" : حسبها ديالي ...هو ولد خو المراة عندي وليني كلشي خلاه ليا ...

المخنتر : بعنا شي فدادن وجمعنا براكة الفيرما عندكم فيها غلة زييينة وجات فالبلاد قريبة حدا الفدادن الي بقاو لينا يعني الى شريناها ندخلوهم معاها ونحاوطو بالسور ...ناويين نزيدو على دوك البگيرات(البقر) ونديرو غلة ديال الحليب نوليو ندفعوه لدار الحليب وزيتون راه فوقتو وكي شتي دكالة معروفة بالگرعة زيييينة تاهي ...

الغالي : ايه وليني الفلوس مكاملين ونتوما مزال ليكم فلوس تحفيض البلدان الي قلتي قبيلة ...واش يضمن ليا تكملو الفلوس ؟

المخنتر : وصبر هاني جايك فالهضرة...يلاه جمعنا شي طناعش المليون والباقي الى صبتي كيفاش تسمح ليها فيه ...

الغاالي : خاصني ضمان هادي را فيرما مولاها صعييب كون كان هنا وليني هو بعيد دابا يلاه ناوي يرجع لبلادو...ولاش بغيتو تسلفو ؟

المخنتر : السلف بغيناه نكمل فلوس تحفيض...

الغالي : غايخصكم كثر انا فالسلف جهدي مبلغ محدود مخاصش نفوتو ...

المخنتر(بخيبة امل) : واش الحل ؟

الغالي : خاصك تعطيني ضمان بعدا لفيرما الى ماكد غاتخلص فالوقت الي تعطيني....

صالح : واشنو الضمان الي تبغي من ناحية الفيرما ؟ گول(قول) الفلوس كاملة خاص غير بعض البعضين(زعما شي شوية باش يكملو) نفكو غير مشكيل الارض فالتحفيض نبيعوها ونكملو ليك رزقك...

الغالي : خاصني شيك بالمبلغ الي باقي ...

المخنتر : انا معندي شيك وصالح ومحمد عاطينهم لجوايه اخرى وشي مشدود ليه ..

الغالي"حط ايدو على صدرو" : من جيهتي انا جيو وقت ما بغيتو عندي لبيرو نبداو فاجراءات السلف ديو الفلوس وفكو المشكيل ديال التحفيض وبيعو الاراضي وشريو فيرما من غيرها ...

المخنتر : وليني الفيرما ديالكم را هي الي بغينا را عاودنا ليك لاش ...الاراضي لاخرى كلها بور وهادو الي حداكم كانو من ايام جدي وهما غير خاويين وترابهم زيين ...

الوهابي : مكاين بو حل الغالي ميصيبوش يشوفو من غيرها را يلاه عرفوها كاينة حدا فيرمتكم...

الغالي : مولاها براسو عمرو شافها ..."حك لحيتو بتفكير" ضبرو فشيك ويكون خير ...را يلاه هضرت معاه على واحد شيك ديال شي ناس شراو فيرما الي ف الشاوية ديالو نيت كون ماجابو الفلوس فالوقت كون دخلني انا الحبس على من وعرو...مهم الكريدي تنين دوزو عندي...وديك ساعة يكون خير...

الوهابي"بمزاح كيضحك معاه ديما بهاد الهضرة" : قربتي دير المراة ثانية ولا الحاج ههههه

الغالي"ضربو بمزاح" : على رقبتي الى نويت ههههه

الوهابي : دخلنا عليك بالله هي درتيها بصح ؟

الغالي : شدينا الموافقة من عند مالين شي ...

الوهابي : ايوى مبارك ومسعود هي ناوي على دراري

الغالي"هز صبعو لسما" : ان شااااء الله بحوله ...هاحنا كنقلبو على شي بنت الناس تكون شباب تجيب ليا الخليفة الي مكتابوش ليا مع المراة اللولة لا فات ديك البنية وحدها واش عند العبد من غير يبغي درية تهز سميتو ...

الوهابي : وامتا ناوي تقلب ؟

الغالي"تنهد كيتفكر زين اليدن فاش حصلو وشوهة والهضرة الي قاليه واكد عليها وهي " : السيمانة الماجيا جاي ولد خو المراة راك عارف هو مول الشي وهي متصيبش تمشي معايا وحدها اودي مصاب غير بغاات ...بغينا نتوبو من العيالات ونديرو مراة ثانية صغير والله يجعل شي بركة...

الوهابي"ضرب على كتف المخنتر" : هاهي من عند ناس دكالة بناتهم زينات وحارات وگادات تبارك الله ...

المخنتر"بفخر" : هههه هي ناوي من عندنا !؟ بلا منشكر ها الوهابي كفا ووفا...

الغالي : لا سمعة زينة تبارك الله خير نساب ناس الرجال الحرار والكرم زايد "حك على صدرو" معندي منقول...

صالح"قرب لمخنتر هضر بشوي" : هاهي الوجيبة جيبو لبنتك گاد(قاد) ليها سعدها راجل كامل بفلوسو وخيره ونيييت بصداقها يفك لينا المشكيل ...ماتقولها لا لعصام لا غيره دخلها هي فالهضرة وتحلف عليها من ضصارة والفشوش را گدها دارو الحفايد وهي غملت ليك تم ...

محمد : سير بالمثال خطب لبنتك ماتخطب لولدك."نغزو" قولها ليه دابا بينك وبينو وسيمانة جايا مرحبا بيه...

يتبع....