محتوى القصة
بغا يشد ليها ايديها غوتات ودارتهم على راسها يحساب ليها غايضربها تا شدهم ليها على غفلة بزوج زير عليهم وغوت بداك الصوت المدعدع المبحوح تا ولات تنين بالخلعة وايديها كيحس بيهم كيترعدو بين ايدو الي مزيرة عليهم...بدات تحبس من التنتار والغوات شوي بشوي كتجنب تشوف فيه...ماشي خافت منو وانما خافت من المصير شنو هو معاه فهاد اللحظة شنو غايدير ليها اش ناوي هادو الاسئلة الي كيتطرحو فراسها حتى كيخليوها تخاف لهاد الدرجة لان الي وقع ليها خلاها توصل لهاد المرحلة ديال الخوف من احد اكثر الاشخاص الي كانو كيموتو ومطرا ليها شي حاجة حتى خاب ضنها....
فرح"كتغوت" : وااااا بعد مني بعد مني ماكتفهمش واااااااااا بعد...مابقيتش بغيتك مابقيت بغيت تاواحد فيكم..بغيت نبقى وحدي نعيش وحديييييييييي بغيت التقااااار خليييييوني عليكم فالتقار مابغيت منكم والووو ااهى اهى..واعععععععع بعد بعد مني"كتبغي تنتر ليه ايديها باش ضرب راسها ووالو مخلات كي دارت كتغوت عينيها خارجين...
ع.العالي : وحدهم غايمشيو تم ؟!
يونس : لا كاين الي غايلقاهم لهيه...
المحجوب"شاف فعبد العالي" : ماعلينا ولدي غانمشيو بهضرة الدكتور...
يونس : عض فالصبر الحاج...هادشي الي كيوقع دابا ضروري منو باش تقدر تجي عندي وتقوليا شنو وقع ليها..حنا ماشيين مرحلة بمرحلة...
علي"شاف فالمحجوب" : كون هاني من جيهتها الحاج كنسمحو فشي فين يجي شي..لا مع زين الدين راها فالامان وهو را غايمشي بخدمتو...
المحجوب : لا كان غا دابا ولدي راني مأمن عليها معاه كثر من نفسي انا..."تنهد بقلة حيلة دارها ليه المرض اما كان غايمشي معاها هي وزين الدين لكن الصحة فاش كتخونك مكتبقى ليك حيلة سوى الدعاء"...
بمجرد ما كسيرا من قدام الدار غادي سايق وهي جنبو كتغوت وتبكي ومضاربة مع داك الباب باش يتحل..من ناحية الخوف والرهبة و الخلعة وعدم الثقة را حدث ولا حرج...اما هو خلاها تبكي وتركل ليه تما حتى خرج من الدرب وخرج لشارع شد الطريق تا خرج من تارودانت واحد المسافة ضرب لا بأس بها حتى طلق سينيال ووقف فجنب الطريق وهو يدور لعندها...
زين الدين : تهدني....
فرح"غير شافتو وقف السيارة بدات كتنتر ودور باش تحل الباب وغير كتقرب تقيسو بغفلة او بدون ارادة كتقفز وتبغي تلصق فالباب..." : مابغيتش اهى اهى مابغيتش بعد مني الله يرحم ايك الواليدين...
زين الدين"بقا مزير ليها على ايدها" : ماعندكش حل ابنت الناس تهدني وتركني ليا تم....
فرح"بقات تجنب تشوف فيه حتى حدرات عينيها مع دموعها الي نزلو" : حرام عليك خليني نمشي فحالي...
زين الدين : نديك فين بغيتي ؟
فرح"حركات راسها بلا متهز فيه عينيها"
زين الدين"حرك راسو بشوااايا مااشي معاها فالخط" : الله اودي...
فرح"كتبغي تبعد ايديها كيزيد يزير عليهم تا كتكمش عينيها" : كتكذب اهى اهى...
زين الدين"هز حاجبو كيشوف فيها مبين الصلابة وهو را تفاصيلها كلهم حاضيهم وردة فعلها كلها كيقيسها ويتيستيها" : براهش حنا ؟
فرح : ماشغليش فيك ماشغلي فحتى واحد فيكم...علاش مريم ممشاتش معايا حتى هي ؟
زين الدين : دابا توصل علينا...
فرح"كتحرك فراسها ب لا"
زين الدين : بغيتي فحالك تهناي طريقنا ليه...
فرح"بقات حادرة عينيها ماقالت والو كانها حسات بيه هاد المرة صادق فكلامو واصلا ديما معاها صادق فهضرتو عندو شن طن طابت طابت خضرة خضرة...من ديما هي ثايقة فيه لكن الي جرا فوق الارادة والنفس فاش كتازم والثقة كتهرس او تقاس او تنعادم ف كانلقاو مشاكل كبيييرة فالتواصل مع الطرف الثاني.."
زين الدين"حس بيها تهدنت نوعا ما وبدا يطلق ايديها شوي بشوي تا حطهم ليها فوق ركابيها وطبطب عليهم ورجع شاف فالمراية من جنب باش يشوف الطريق عاد كسيرا داخل لطريق...مابقاتش هضرت ولا تكلمت ولا دارت حتى اي رد فعل كان...وحتى هو مابقاش هضر معاها غير مرة مرة كيسرق نضرة بدون ماتحس كيشوفها ويتفحصها لا تكون كتبكي او خايفة وطبعا كيلمس منها الخوف غير من طريقة جلستها فالسيارة..كانت انطلاقتو من مدينة تارودانت نحو مدينة اكادير...مدة بسيطة حتى كان وصل لوطوروت...وقف عند البييج تا ورك على بوجونة تجبدات ليه بطاقة باش يخلص عند الانتهاء...مشا واحد الشوية حتى وصل لباحة الاستراحة خذا طريقها ودخل وقف السيارة دور وجهو لعندها بانت ليه متكية مدورة راسها لهيه كتشوف بعينيها وساااااكتة واحد السكوت فشكل..خرج من سيارة وسد بالكونطاكت البيبان باش متحلش غير تفاديا.لا يقوليها راسها هربي هههه..دخل الكافيتيريا خذا ليها سندويتش وقرعة الما ومونادا الي كتعجبها خلص ودخل لسوبر مارشي خذا ليها شيبس وشكولا وبيمو وبزاف داكشي الي بان ليه كيهز وصافي تا عمر زوج ميكات ومشا جيهة سيارة حل الباب ودخل حطهم ليها حداها ونطق بدون ميشوف فيها"
زين الدين : كولي ليك شي حاجة مزال طريق الله طويلة وشربي دوا"هز صبعو" من هنا ل توصلي. فين فارعة ليا راسي ديري شنو گلت ليك بالحرف..
الليل كلو وهضرة جميلة كتزنزن ليها فراسها بقات هكاك حالا عينيها وكتفكر تفكر حتى صبح الحال وهي مغمضاتش ليها عين...دورات راسها وهزات التيليفون شعلاتو لقات الساعة التمنية ديال الصباح.رجهاتو لبلاصتو دوزات على وجهها وناضت جلسات كتفكر عاوتاني شنو دير واش تهضر مع جميلة او تستسلم للقدر وتخلي الوقت الي تحل المشكيل والزمن يداوي ولا تشوف ليها حل هي نيت فين تغبر وماتبقاش تبان ولا تلجأ لمراد...حيرة فحيرة والعذاب النفسي اكبر وشحال قد هاد القلب يتحمل وهاد الحياة تعاش..نفخات بتعب وزفرات بقلة حيلة وولات ناضت لطواليط توضات وخرجات صلات زوج ركعات لانها اصلا ناضت لفجر صلاتو...مشات لبيت فين ناعسة ضحى طلات عليها كانت ناعسة وشعرها مسرح على المخدة نعستها الي شافها يقول بنت صغيييرة معارفة فالدنيا والو زينها برييئ وفنفس الوقت تخلي الواحد يسهى فيها بداك الجمال الي عطاها الله لكن قلة العقل وقلة الاهتمام من اكثر واقرب الاشخاص خلاتها ف فياقها تكون عكس نعاسها...
توبا : انووضي تگعدي ديري الفطور...
ضحى"غااارقة فالنوم ومجايبة خبار ولا سامعة شي حاجة"
توبا"جهدات صوتها" : واتگعدي"والو واش ناضت...مشات لعندها وهي تململها بايدها" نووضي...
ضحى"حلات عينيها شافت فالحايط بعينين شبه ناعسين" : ممم...
توبا : تگلعي نوضي...
ضحى"دورات راسها كتشوف فيها" : فين اماما تاني...
توبا : نوضي ديري الفطور انا غانمشي نشر دوك الحوايج الي عاودت من وراك تربية ناقصة ودراع حافي...
ضحى"ماجاوبتهاش ناضت جلسات تا جمعات شعرها لفوق وهي تنوض مشات لطواليط غسلات وجهها وهي تحس بوجيعات خفااااف وشي حاجة نزلات منها لتحت سخونة..مشات جيهة لاشاص وهي تحط سروالها والكيلوط لقاتو عامر بالدمايات...هزاتو بزربة وهي تخرج كتزرب عند مها" : م ماما ماما...
توبا : اشنو كاين ؟؟ مالك ؟
ضحى"عينيها مغرغرين" : د دم واقيلة بغا يطيح...
توبا"لاحت السلة من بين ايديها" : كيفاش بغا يطيح ؟!
ضحى : مم معرفتش اهى لقيت دم فالكليوط بزاااف...
توبا : دااااابا طيري لبسي نمشيو...
مشات كتجري عينيها كيدوزو بالدموع والخلعة طارت دغيا رمات عليها جلابة لقاتها معلقة تا من شعرها ماداتهاش فيه...لبسات هي وتوبا بزربة وخرجو من الدار ماتسناوش طوبيس لقات اول طاكسي حمر شيرات ليه وقف ليها عطاتو عنوان اقرب كلينيك هي من فرحتها انه غايطيح ماتسوقاتش لفلوس داكشي الي عندها هزاتو وطارت لكلينيك وبالفعل اول مصحة كانت قريبة ليهم وقفهم قدامها دخلات هي وياها كيزربو عند الاستقبال توبا وقفات كتسول وضحى شادة تحت كرشها مرة مرة كتحس بنغيزات...
توبا : الله يخليك ليرجونص بنتي جاها لوجع حاملة...
البنت : واخا امدام..دخلي من هاد الباب...
توبا"ضارت جيهة ضحى" : نوضي تعالي..."ناضت لعندها ودخلو فالاتجاه الي نعتات ليهم البنت تمات جايا عندهم واحد الفرملية شرحات ليها توبا شنو كاين وهي دخلها وسدات الباب تكات فوق البياص حتى طلعاتها عند جينيكو كاين تما نيت فسانسور ...تبعاتها توبا تادخلو لعندو.."
طبيب"دار ليها لاباراي على كرشها ثاني" : شنو طرا ليك بالضبط...
ضحى : دخلت نغسل وجهي حسيت بالوجع شوية فكرشي...
الطبيب : كان شي نزيف ؟
ضحى"حركات راسها بزربة" : اه كان بزاف...
توبا : ياكما بغا يطيح ؟!
الطبيب : دابا نشوف.."كيقلب ويعاود...ضغط ليها على كرشها بزااااف"
ضحى : ااييي...
طبيب"كيشوف ويكمش فحجبانو" : واش كنتي كتشربي شي دوا ولا شي عشوب ؟!
ضحى"صرطات ريقها" : م م احم..
توبا : اا ؟ اه اولدي حيث مكانتش عارفة راسها حاملة وكنت كنديرهم ليها باش تهبط عليها العادة ادكتور...
الطبيب : الحاجة هادشي الي كنشوف هنا ماشي تالهيه.كاين شك بالي داكشي الي شربت فايت الحد...
توبا"سكتت ولات تلولب فعينيها وضحى تصرط فريقها"
طبيب : ماشي مشكيل دابا...غادي نسالي ونعطيك شي تحاليل ضروري ديرهم باش نشوف ونتاكد من شي حاجة...
توبا : ياكما بغا يطيح(كتاكد باش يقوليها اه)...
طبيب : لا الحاجة الصحة ديالو مزيانة...هادشي عادي كيوقع ولكن عندي شك فشي حاجة من هادشي الي كانت كتشرب من بعد ليزاناليز نشوف...سي نو الى متبعة عند جينيكو عطيهم ليه وعلى ما بان ليا معمرك تبعتي عند شي جينيكو ؟"شافت جيهة ضحى"
ضحى"شافت ف مها ورجعات شافت فيه كتهضر. وتصرط فريقها" : لا مم متبعة..احم دكتور انا فلول فاش عرفت مابغيتوش كنت بغيت ندير الاجهاض حيث عندي مشاكيل منقدرش نولد هاد الوقت"عينيها غرغرو" ..
طبيب"حيد لاباراي من كرسها وعطاها باش تمسح لجيل..ربع ايديه وهو فبلاصتو وتقابل معاها" : هادشي فاش شكيت ومابغيتش ابنتي نتدخل كون هادشي كيبقى شخصي انك تعااني من مشاكيل يخليوك ديري fausse-couche...ولكن الي عندي فيه الحق نقولو هو دابا تخو طاغ(تعطل بزا) انك ديريه...وبالنسبة لشكي انه يقدر يكون عندو شي مشكيل من هنا لقدام...بلا متفكري تحيديه دابا بغاه الله يبقى ليك رغم شنو درتي ليه باش يطيح..."شاف جيهة الايكو الي خرجات التصاور حيدهم ومدهم ليها" نعمة عطاها ليك الله ابنتي متفرطيش فيها...
توبا : مكاينش كيفاش يطيح ياك..
الطبيب"عقد حجبانو فيها ومن هضرتها رغم الي قالو محرك فيها والو" : لا الا اذا بغيتي تخاطري بب بنتك و بنت بنتك...
ضحى : ك كيفاش ؟!
الطبيب : عندك بنية ابنتي حافضي عليها الله يرضي عليك" ربت ليها فوق ايدها وناض خرج مخليهم وحدة تشوف فلاخرى"
قاليها هاد الهضرة وخا فوق خاطرو لكن لو مادارس هاكا مكانتش غاتسكت او تاكل وغاتبقى هكاك خايفة...حل ليها الميكة الي فيها ساندويتش خذاه ليها غير باش تعتق حيث طريق طويلة شوي...وحط ليها قرعة الما والمونادة لا بغات تشرب وحدة فيهم عاو وصاها بالتهديد وخرج مخلي شرجم محلول شوي لفوق باش تنفس لكن بيبان مسدودين ومشا بالخف جاب ليه گوبلي ديال قهوة كحلة وخرج قشعها من بعيد كتاكل شوية بشوية فحال كتاكل بزز وصافي فضل يرجع يبقى تما باش تاكل وفنفس الوقت يبقى حاضيها جبد باكية الكارو ضربها تا خرج واحد شعلو وبدا يكمي ويتنغم بالهوة كحلة باش يرجع ليه راسو لبلاصتو...حتى صونا ليه تيليفونو وجاوب...
زين الدين : با يونس....
يونس : فين وصلتي ؟
زين الدين : ترتاح شوية تاكل "شاف فساعتو" وقت دوا ديال لانتيبيوتيك...
يونس : مزيان ..المهم انا دابا طالع لرباط عندي الخدمة نسالي باش مكان نتسامعو...حاول تيستي شنو قلت ليك راك عارف ميحتاجش نعطي المعلومات !!
زين الدين : تهنى من جيهتي"جر من الكارو ونفخ دخان كثير تا خرج ليه من منخرو وفنفس الوقت عينيه على روح روحو الي شافها حبسات ورجعات تكات راسها على الكوسان" تيسر نتا دابا في امان الله...ولابد نعلمك بالجديد...
يونس : داكوغ"قطع معاه ورجع زين الدين كمل كارو ديالو تا حس براسو زگا وتكالما...عاود صونا على طبيب ديال ديابيت ديالو رسل ليه التقرير ديال سيمانة الي كيعطيه ديال العبار ديال الاسبوع وطلب منو يعاود شي تحاليل باش يسوف واش السكري هاد الشهرين من نهار طاح فغيبوبة سكر واش رجع سطابل ولا عاود طاح باش منها يعطيه الدوا ب لادوز جديدة ولا يبقى فلادوز نفسها...ناض لاح الكارو فالپوبيل والگوبلي دالقهوة...كانت جالسة ساهية وصباع ايديها طيباااتهم بكثرة مكتشابكهم وتمسح عليهم وتلعب بيهم....زحمة زحمة زحمة برا وفعقلها واحد اللحضة طارت ونزلت تا غوتات وصرطات ريقها وهي تحط ايدها على صدرها كتنهج بالحلعة من صوت سيارة فاش تحلات حيث حلها زين بالكونطاكت وصوت الباب تحل حداها"
فرح"ايديها كيترعدو"
زين الدين : ششش "هز ايدو الي فيها الكونطاكت"موقع باس غير انا...
فرح"بقاات مخنزرة فيه وفنفس الوقت كتفيبري بالخلعة وريقها صرطاتو بزاف المرات...يمكن تجيه مجنونة لكن هي من التوثر ورهاب الي شدها والخلعة ومرة مرة كيتعاود ليها فعقلها سيناريو النقطة السوداء الي عاشت والي كانت سبب فهادشي الي وصلات ليه...مجاوباتوش ورجعات فالوضعية فين كانت مدورة عليه وجهها"
زين الدين : كااع ؟
فرح"كمشات حجبانها بدون جواب منها"
زين الدين"عض شنايفو مدة وهو حاضيها حتى رجع ديمارا طوموبيل وهو هكاك عاض فشنايفو...ريحتو تعطي مخلطة برائحة الكارو...رجع مارش اغييغ وكسيرا خرج لوطوروت شاد طريق ثاني...طول الطريق وهو حاضيها وحاضي ملامحها واش كيتغيرو ماحدها كتقرب ولا ساكتة ولا شنو كتحس...فواحد اللحضة بقا مركز مع الطريق وعقلو غااايب كيفكر فهادشي الي كيجرا من نهار تعرف عليها وطاحت عينيه عليها من نهار دخلت لقلبو وهي كل نهار وعلى نهار كيزيد يكبر فيه...ماعمرو ينسى اول نضرة ليها ليه...رجعو بيه الذكريات لاول نهار فاش جا يخطب حتى صدق خاطب ليه اول نهار زوين وفنفس الوقت خايب لو كان عرفها فضروف اخرى كان ممكن يكونو دابا عايشيين الحب ولما لا كيتسناو فاول مولود ليهم ضلع من زين الدين وفرح...الوريث ديال البغدادي ولا وريثة ولا ورثة...تمرة كتجمع دم فرح وزين الدين...كان اايكون بيناتهم مشاكل زوجية كيف الازواج...دور راسو يشوفها لقاها مشاااات غفات وراسها لوا لتحت بوضعية معنفجة وغير مريحة بالمرة...هز عينيه بانو ليه وراه سيارات كثيرة ولوطوروت مكاينش كيفاش يدير يقادها وفنفس الوقت خاف لا تفيق مخلوعة ويصدقو مقلوبين تما...بانت ليه واحد الجيهة على بعد امتار خاصة بالتوقف الللا ارادي ديال سيارات طلق سينيال وتم غادي كيكحاز بجنب شوي بشوي تا وصل ليها ووقف...بقا مخلي سيارة خدامة وضار عندها"
زين الدين : الفرحة ديالي"غمض عينيه نسى راسو مسكين..حنحن على الله تسمع وتفيق لكن والو" فرح فرح !!"ماسمعاتوش حتى جهد صوتو" فرااااح" غير هو جهد صوتو ناضت قافزة وشاهقة داكشي الي خاف منو هو الي وقع"
فرح : لا للااااااااااااااا ماضربنيش ماضربينيييييييييي اههى اهى..واعععععع ماضربنييييش "بدات تنتر وتكحز بايديها تاني رجعات ليها الهيستيريا من جديد عيا يحاول ووالو الي خاف منو طاح فيه...كيبغي غير يشدها وهي كتبعد فيه حتى عاود تاني بغفلة جمع ليها ايديها بزربة وزير عليهم"
زين الدين : شششش تهدني فراااااااااح تهااادني.."عينيه فعينيها الي خرجو بالخلعة يمكن كانت كتحلم" ششش ماعليش ماوقع والو غير انا...
فرح : ماتخليهمش يضربوني ..
زين الدين : شكون...
فرح"كتصرط فريقها" : هووو هماا...
زين الدين"بحنية غير باش ترتاح ليه" : شكون الفرحة ديالي..
فرح"بقات تشوف فيه وايديها كيترعدو بين ايديه حتى فاقت على راسها ورجعات بدات تنتر ليه وترجاه" : بعد مني عافاك..اهى..
زين الدين"هز نفس وخرجها بقلة حيلة حرك راسو وطلق ليها ايديها..ضار لور وهز مخيدة صغيرة كتدار على مدار العنق عطاها ليها" : ديريها سي نو گادي (قادي) راسك مزيان ورجعي رتاحي "شاف فساعتو" مابقاش بزاف ونوصلك فين بغيتي وديك ساعة وجهي ماعمرك تشوفيه...
شي اصوات ليه اكثر من شهر او شهرين مابقى سمعهم اصوات كان مولف عليها او بالاحرى كانو مولفين عليها لكن هاد المرة سمعهم غير وحدو....حل عينيه من بعد نومة كانت طويييييلة..هز التيليفون شعلو لقاه مطرطرق بالاتصالات شي ربعين اتصال من فوزي ومن صطوف ومن صفاء ومن خالو عبد العالي...ما حلش الكونيكسيون ابدا حلف مايدخل ليها ملي عرف بالخبر وهو منعازل حيث اصلا حس بيهم عزلوه ومعطاوه تا اعتبار وتاهو ما عطلهمش...شاف فالساعة لقاها العشرة ونص ديال صباح حط التيليفون وناض اول حاجة دور عينيه فالبيت بقا كيف ماخلاه فوزي وهو...حل الماريو وجبد منو حوايجو حيد هادوك الي لابس بقا غير بالبوكسر وحدو دخل لدوش طلق الما فالسطل يعمر تا سخن ودفاه بدا يخوي بالطاسة على جسمو كامل من راسو تال تحت عاد حس براسو بدا يفيق...جبد شامبوان كادوم خواه على شعرو الكثيف فركو بصباعو ومشط بالمشطة خواه عليه الما تا غسلو مزيان خوا باندوش فالليفة دوز على جسمو بالكامل حيد البوكسر بقا ربنا خلقتنا خوا عليه الما وعاود تا حس براسو نتاعش وتنقى لوا عليه فوطة لتحت وخرج كينشف فشعرو ويسوس فيه دخل البيت لبس تيشرت وسروال ديالو لبس تقاشر رجع شعرو لور وخرج برا لبس سبرديلا هز بزطامو خشاه فسروال ومشا لكوزينة وقف شحااال كيشوف كيتفكر كيفاش كان كيدخل ويلقى الفطور واجد...فاش كان فوزي كيدخل هاز الميكا ديال كومير ولا خبز وداخل يتفوه عينيه مبوقين وينگر...كيحاول يتفكرها لكن قلبو كيتكمش ويعصر ويحاول يتناساها عارف راسو شنو داير وعارفها هي شنو دايرة لكن فاش كيشوف كلشي نكرو وتاواحد فيهم مابغا يخبرو برجوعها ولاحوه فتوش او فالركنة بهاد المعنى كانه مكانش ولا عمرو كان كيخلي عقلو ينساها وينساهم وخا را ربي الي عالم ب ما في القلوب لكن فاش كنجيو نشوفو هادشي كنقولو عدم وجودنا فيه فايدة...حس بالتيليفون كيصوني طل لقاه فوزي كيصوني قطع عليه فالبلاصة وعاود عبد العالي موراه تاهو قطع عليه وخشاه فجيبو...مشا جبد القهوة باقي بعطورها دارها فالعصارة باش دغيا طيب...خواها فكاس دار فيه سكار حركو وجلس غير تما كيشرب ويكمي فنفس الوقت كان بارم ليه واحد جوان موجدو غير كماه حس براسو مريح ومركز ومرتاااح...كمل حط الكاس غسلو وغسل العصارة ورجع هز ساروت الموطور حل الباب وخرج ديمارا الموطور بزربة لا يوقفو شي واحد يبغي يهضر معاه خصوصا ملي خرج لقا كاع الناس تما كيشوفو فيه وشي باغي يجي يسلم عليه وشي باغي غير يدي تبركيكة والفضول...شدها طريق وحدة حتى وصل لحي لالة زهرة..بالضبط قدام الحانوت بالموطور نيت تا وقفو ونزل لقا معاد ومول الحانوت نبت...
عصام : واحد سلام عليكم...
علال"هز راسو وهو يتصدم" : ولدي عصام !!!
عصام : لا بغيتي...
علال : الله اولدي الله مالي الي منبغي تعالى دخل دخل..
عصام"شاف فمعاد" : تخرج تسلم عليا وتحضي الموطور ولا شنو ؟؟
معاد"تبسم بفرحة" : هههه الله اودي هههه "نقز من فوق بوطاجي الحانوت لعندو سلم عليه بعنااق شحااال باس ليه عصام راسو وربت عليه خلاه واقف عند الموطور ونقز عصام ديريكت عند علال لداخل تسالم معاه وجلس لقاه نيت معمر دكة ديال اتاي...كب ليه كاس وبقا هو وياه فالحانوت كيهضرو ويسول فيه حتى فتح معاه الحديث...
عصام : ماعلينا هاد اليومين ناوي ندخل سلعة لمحالي جديد
علال : على بركة الله...
عصام : ضروري نتحرك هنا ولهيه نخلي فيه واحد الولد جديد وهنا را معايا معاد...
علال : ماتجيكش قاصحة ؟
عصام"قبط ليه ايدو وباسها" : خيرك عليا كثيييير منصيبش نخلي ليك الحانوت الي كبرت فيه وربيت فيه لحم كتافي...
علال ؛ ههههه لا هادشي كافيه شك من ناحيتك ههه وعليه نتا تعرف...
عصام"دعقو تيليفون بتعياط الفيبرور خدام تا جبدو لقاه فوزي وقطع عليه عاود صونا وقطع عليه ورجع شاف ف علال" : غاندير واحد صدقة منها ديال حانوت ومنها صدقة على واحد الغراض وقع...
علال"فهمو شنو عنى بهضرتو والغرض الثاني" : الحمد لله على السلامة...
عصام : محتاج توقف معايا الله يحفضك الحاج..."يلاه غايكمل الهضرة عاود صونا ليه تا تبرزط وصعر وهو يجاوب" مخي فرعتيه لعدو ربي اش كاين ؟!
فوزي : محتاجينك تحرك معانا اعصام...فرح را بانت علاش مكاتجاوبش ؟
عصام"طلق واحد تخنزيرة وواحد صوت تا خلع علال الي حداه" : وعطي لعدو ربي تيساااااااااع النم الكحل وماسوقيش فيكم عومو بحركم اسي مابقيت نعرفكم ولا نعرفها لا رجعات لا تفرعوش ليا ك"حبس الهضرة" مخي انمي لا تفرعوهش...انا مابقيت خوك مابقيت نعرف دينمكم...تاااا گالها ليكم راسكم عاد تفكرتوني ؟..عطيو لملتي تيساع...
فوزي"عقد غوباشتو" : اش هاد الهضرة اعصام ؟ علاش نتا كتجاوب ؟ قلبتي معانا ؟
عصام"غوت تا بغا يوقفو علال" : ومااااااا قلبتش مابغيتش نقلب انا غا ولد لحراااام من فعايلي...انا ولد الكلاب خايب ومعمري كنت زين انا...انا غير كلب مكنسواش...ياك عطيتكم تيساع وخليت كل واحد فيكم يعيش كي بغا ؟
فوزي : اعصام را والله ماخبينا عليك غير تدعقنا وعاد راها رجعات حالتها تشفي العدو انا براسي مزال مشتفها...
عصام : داك الشغل خرجت سوقو...اخر مرة تعيط ليا على ود شي حبس...خليني فهمي..ترجع ولا تزمر مابقا عندي فيها غراض"قطع عليه التيليفون وطفاه كاع كيشوف فيه علال وجهو ولا بيض صدرو كيطلع ويهبط وعينيه مغرغرين بجهد"
قطع عليه خلاه مصدوم من هاد الهضرة الي كيقول تا خرجو عينيه من جراء الصدمة...التسجيل كامل ديال المكالمة بالحرف رسلو لدكتور يونس الي وصاه باش كيف يهضر معاه يسجل المكالمة باش يعرف هضرة عصام كيفاش غاتكون كان كيفضل لو انه تلاقا بيه مباشرة...غير رسل ليه المكالمة وقف بالطوموبيل شحاال وهو كيستوعب حتى هز ايديه وبدا يضرب فالفولون ويعاود يضرب ويعاود
فوزي : تفو تفو تفوووووووووووووووووو.."عض جنب ايدو تا بغا يطيرها من بلاصتها من فرط الاعصاب والغضب الي شدو فهاد اللحضة...بقا شحال وهو كيغوت ويخرج فاعصابو حتى حس براسو بغا يهبل ويجهل...عاود صونا ليه التيليفون كان خالو عبد العالي"
ع.العالي : امضرا جاوبك ؟!
فوزي"صرط ريقو مابغاش يبين الغضب" : ممم ااه..
ع.العالي : ومالو فين كان ميت ؟
فوزي : مم ماع عرفتش...
ع.العالي : مالك مال صوتك اشنو طاري ؟
فوزي : ها ؟ ماطاري والو غير كنسوگ اخالي نوصل ونهضر معاك"قطع عليه لاح تيليفون بالنترة ورجع شد الطريق..."
اما زين الدين بقا شاد الطريق وطول الطريق وهو ساكت وهي ساكتة لا هو ضار شاف جيهتها ولا هي تحركات او دارت شي حاجة حتى وصل لبييج عطا تذكرة خلص لوطوروت وزاد شاد طريق تا دخل لمدينة اكادير...
فرح"هزات عينيها كتشوف ودور فراسها كتشوف فين هي حتى قاطعها صوتو الخشن وهي توقف "
زين الدين : مابقاش بزاف ونوصلو فين بغيتي ابنت الناس..
فرح"بصوت جد منخفض بدون متشوف فيه" : ف فين مريم علاش مجاتش معايا ؟!
زين الدين"دخل لمدينة اكادير طلق سينيال ووقف فواحد البلاصة وقف الطوموبيل وضار عندها" : وكان ؟!
فرح"الصمت"
زين الدين : فين كنتي معاها ؟!
فرح"بنفس نبرة الصوت المنخفض" : تغازوت...
زين الدين : دار ؟
فرح : بيت...
زين الدين"هز حاجبو" : بيت افرح بيت !!! علاش عجباتك هاد الحالة فرح ! عجباتك العيشة فتمارة الكحلة فرح ! عجبك راسك وسط ناس بعاد عليك برانييين !؟
فرح : بغيت تيقار بغيت تبعدو مني مابغيت تاواحد منكم بغيت غير راحتي الي لقيت اهى اهى بغيت غير انا ومريم صافي عافاك ديني فحاالي منين جيت عافاك وماتبقاوش تجيو عندي ولا تسولو فيا مابغيت فيكم تاواحد اهى...غاتقولو هبيلة ؟ اه غير خليوني هبيلة وماترجعونيش فين كنت الى رجعتوني"هزات فيه عينيها الحمرييين بدموع والخوف" نقتل راسي والله تانقتل راسي اهى اهى...
زين الدين : لهاد درجة ابنت الناس ؟ لهاد الدرجة الفرحة ديالي وجهي ماحملتيهش ؟ شنو العيب الي صرفت من غير ذنب تهز على رقبتي ليوم الدين...
فرح : مساااااامحة ليك وسمحت ليك اهى مساامحة ليك غير خليني نعيش فالبلاصة الي لقيت فيها راحة وبعيدة عليهم..
زين الدين : شكون ؟"بغا يسلت ليها لسانها باش يعرف شنو بيها حسن مايدير الخطوة لاخرى..."
فرح"بدا صدرها كيطلع ويهبط وهي تسكت فمها كيبان ليه كيترعد"
زين الدين : رتاحيتي فتارودانت ؟ نعيشو فيها ؟
فرح : لا لا بغيت نمشي فين كنت عايشة منين جيت انا ومريم بغيت نبقى وحدي مابغيتكش مابغيتش تاواحد من غير با الى بغاني يجي يشوفني...
زين الدين"بغا ينطقها وقلبو منغص من لداخل كيحس بالعافية شاعلة فيه وهو باغي يقولها ويسولها هاد السؤال.." : مابقيتيش بغيتيني ؟!
فرح"حدرت راسها وحركاتو ب لا"
زين الدين : الى بعدت عليك تلقاي راحتك ؟
فرح : اه...
زين الدين"دور الكونطاكت وديمارا طوموبيل" : عطيتك لامان ابنت الخيالي خاطرك يجي فوق خاطري..."مابقا زاد تا كلمة رجع ديمارا السيارة وانطالق مكمل طريقو ماحدو كيقرب وهي كتشوف فالبلاصة حتى بان ليها ضرب دورة وشد طريق اخرى وخا هي معارفاهاش بزاف حيث كانت حدها تغازوت لبلاصة الي تحت اكادير اوفلا فقط انزكان مابقاتش وصلاتو من اخر كارثة ليها فيه...بقا غادي غادي وعينيه حمريييين مخنزر واحد تخنزيرة لا كنتي قدامو تحرقي وتعاودي وقلبك يبغي يسكت...بقا غادي حتى توقفات سيارة وحل الباب نزل خلاها كتشوف وهو يدور عندها وحل عليها الباب" تحركي نزلي...
فرح"هزات عينيها كتشوف وهي تخرجهم تا ولاو بغاو يخرجو من بلاصتهم يطيحو دارت وااااااحد شهقة تا كانت غاتخرج روحها" : فف فين فين هناااا ؟؟
زين الدين"جهد صوته تا قفزت" : تحركي نزلييييي...
فرح"جمعات ايديها كترجاه وعينيها خارجين مكيرمشوس بالخلعة الي دوبلات عليها تا ولات كلها كتغزل البولة بغات تهبط ليها كتشوف فنفس المكان وعينيها على زين الدين" : لا لااااااااا عاااافاك نمشي معاك فين بغيتي الله يرحم ليك الواليدين ماتخلينيش هنااااااا اهى اهى عااااافاك هنا لااااااااا واااااااعععع عافاك بغيتك بغيييييييييييييييتك بغيتك عمري نسيتك اهى اهى....
زين الدين"معارهاش انتباه لا ليها لا لهضرتها ولا لخوفها شدها من دراعها وخرجها بزز كتبكي وتغوت تا ضارو ناس كيشوفو تما حسات بالبول هااابط منها اما قلبها يمكن را سكت..جبد ليها صاكها وعطاه ليها وضار جيهة الباب فين كيسوق وقبل ميدخل شاف فيها" : تحركي فين بديتي ورجعي فين كنتي الله يعاونك ابنت الناس هذا حدي معاك"دخل مخليها كتغوت وتبكي وكسيرا طوموبيل وزاد مخليها وسط زحمة محطة انزگان...."
لاح التيليفون فوق الطابلة قدام علال خلاه غير كيشوف ماعرفو مالو حتى من وجهو تبدل فيه اللون وعينيه ولاو حمرييين...جمع ايديه على شكل قبضة وحطهم تحت ذقنو كيشوف فنقطة بعيدة بسهو جناوح منخرو كيفرفرو بالعصبية وصدرو كيطلع ويهبط...
شوي حتى ناض جابد من جيبو كارو وبريكة هزها من الحانوت شاف فعلال الي حرك ليه راسو بمعنى سير حتى تكالما ورجع...نقز من فوق البوطاجي وخرج شعل الكارو تا كماه وعقلو مرون طالع ليه الدم بالمعقول فديك اللحضة خلاه علال على خاااطر خاطرو تا كما وتهدن شوية عاد رجع لعندو...
علال : ياك لباس ثاني اولدي اش واقع ؟!
عصام"الصمت"
علال : شوف وجهك كي ولا اعصام هاد العصبية الله يرضي عليك غادي غير تمرتك فصحتك...الدنيا هي هادي مابغاتش نيشان ديما...
عصام : المعقول مابغاه حد ياك الحاج ؟!
علال"حط كاسو داتاي" : واش نكذب عليك اولدي فهاد الزمان المعقول عيب وتنوفيق حلال...را شوية هك وشوية هك خوذ وعطي وصبر لشي فين يجي شي لا بقيتي شاد فالحاحة هي الي صحيحة عندك تما بقيتي اعصام باش نجيك نيشان راك صعيييييب اولدي "هز ايدو موقفو" ايه معقول وخيرك كثيييير على الناس وليني عدل الكفة ماتبقاش حاط على كفة وحدة..شوف وجهك كي ولا وشوف صحتك كي ضعافيتي فين عصام اللول هاد شهور ؟!
عصام"الصمت"
علال : شتي ؟ هضرتي صحيحة وشتي ملي سكتي اش وفرتي عليك ؟ راحة نفسك تنتار والغوات والكشاكش الخارجة را دماغك غايتمرت ويمشي يطردگ (يطرطق) شي عرق فراسك شكون بغا يقوم بيك !؟ خوتك هانتا خوتك تاواحد مابقا معاك كل فين صد...
عصام : ماجريت على حد...
علال : وختك ؟
عصام"الصمت"
علال : علاش ممشيتيش شفتي ختك علاش ممشيتيش شفتي بنتك...بنتك الي كنتي تقب عينيك ومايقيسها ليك حد فين مشات ؟!
عصام : دابا شنو جاب هاد الهضرة الحاج دابا ؟ كل شد طريقو كل بغا فين لقا راحتو انا مانشد حد ماباقي نبزز حد راك سمعتي كلشي بوذنيك يعومو بحر بحرهم مابقيت بغيت فريع الراس لا من شي حد لا من خوتي بويا ومابقيت نعقل عليه...
علال : وهذاك بو تاهو يهضرو عليه ناس ويعطيو بيه المثال !!
عصام : جا فالهضرة وصافي"زفر بتعب" ماعلينا خليني من هادشي خاطري مابقا باغي يهز حد الي بغا يدير شي حاجة شغلو هذاك...لا جيت نهضر اللسان يعيا والهضرة واهليييي فين باقا..."ضرب نواضرو بشوي" راسي عمر الحاج وفوت...خليني الخايب وخلي بنادم مزيان وهاني مسلك الدعوة...
علال"عاود ليه السؤال للمرة الاخيرة حس بيها من نبرة صوته فاش سول" : ختك مناويش تشوفها ؟!
عصام"خرج عينيه" : علمني شي حد بالي جات ؟! ياك صدقت ممزيانش ؟!
علال : وكدبو (علال الشخص الوحيد الي كيحشم منو عصام حيث كان مربيه ملي كانت عندو 16 عام كبر عندو فالحانوت فاش بدا يخدم ومن تم وهو مكيهزش فيه العين وخا يسبو مايهضرش معاه ولا يقوليه لا)...
عصام"بقا كيشوف فيه من بعد نطق" : هادشي الي عطا الله فالطبع والسوق الحاج"سرح ليه ايديه ورجع نطق"الحاج خلينا فهضرتي علاش جيت لا جات على خاطرك...
علال : الله يصاوب "هز صبعو ليه بنوع من تهديد" مزال ماساليتش هضرتي مزال ليا معاك قريص الودنين يحساب ليك تگادو ليك الكتاف تغلبني..."سكت ورجع مستانف الحديث من نقطة اللولة فين حبسو.." امتا ناوي دير الصدقة ؟
عصام : هاد اليومين نتسنى فجيراني يجيو باش يعاونو فداكشي ديال طياب...ونشوف الباقي من الحباب..
علال"عز عليه فاش قال الباقي من الحباب" : لا حول ولا قوة الا بالله...وشتي كون بغيتي دير دارك كون قلبتي على بنت الناس حسن ليك ما تبقى وحداني هك كون واهلييي مدور بيك الولاد...
عصام : الولاد كاع دقة وحدة ؟
علال : واشنو ؟ وتالين اولدي هانتا ربعين بقا ليك غا شوي وتقفلها...
عصام"بقا شاد الكاس فايدو كيحرك فيه" : شكون تقبل عليا ؟!
علال : عطا الله الصبارات..وليني كي هضرت معاك نقص تانتا وهبط شوية الكواري...كي نتا بغيتي المعقول غيرك تاهو نفس شي ومتنساش المراة كتبقر مراة وحنا قوامون على النساء وربي مايبغي تكرفص بنات الناس كي مكنتيش باغي الي يتكرفص على بنتك...
عصام"عقد حجبانو ونطق مبدل الموضوع" : ان شاء الله ناوي ندير داري نزگي امور الحانوت ونكمل دويرة فالصليح الفوق..
علال : ولاش المصاريف خلي الدويرة الي لتحت مزيانة تادخل مصروفك ودور الحركة وتدخل البركة وكمل لاخرى...
عصام"بدون شعور تا خرجت ليه من فمو" : وخوتي !!...
"التراكمات تجعل الإنسان يقسو رغم لين قلبه."
كيف تحرك زين الدين بفرح فداك الصباح رجعو دخلو لدار كاملين ب المحجوب عبد العالي علي صفاء وليد ومراد اما ريان فكان مشااا...بقا المحجوب جالس وراسو فلارض بحزن وحداه علي...وقف يونس وخرج كيهضر فالتيليفون واحد المدة...حتى دخل لعندهم...
يونس : البنت الي كانت معاها مشات ؟
علي : سي مشات راجعة تاهي لاكادير...
يونس"حرك راسو حول عينيه لجيهة المحجوب تا مشا ليه وجلس حداه" : الحاج اش هضرنا ؟! التقليقة تحيد والتفكير زايد ينقص..محتاجين منك اينيرجي بوزيتيف طاقة ايجابية الي تعاون فالصحة نفسية وعليك نتا بالدرجة اللولة...
المحجوب : گلبي مهانيش عليها...
يونس : مامشاتش وحدها...محتاجين لهاد الخطوة الحاج الى مدرتش هادشي صعيب انها تجي عندي راسها وتعاود...باش نكون معاك واضح وتفهم المغزى..محتاج توگض وتخرج الي عندها...
المحجوب : والى رجعات تلفت ولا وقع ليها شي مشكيل من جديد ؟!
يونس : فاش تلفت فاللول ياك لقيتوها ؟!
ع.العالي : الزهر وولاد الناس الي طاحت فيهم...
يونس : لقات الخير فالبراني ومالقاتوش فالي ليها"هز فيه عبد العالي عينيه والمحجوب تاهو" باش تفهمو المعنى هي فاش مشات ووقع ليها الي وقع تمدات ليها ليد ديال المساعدة من البراني وفاش خرجت شكون خرجها ؟
المحجوب : خوها...
يونس : يعني القريب ليها...ثقتها تهرست فالقراب ورجعت فالبعاد الي مكتربطها بيهم تاحاجة...دابا مشات مع البراني وخا كتعرف زين الدين را ماكيجيها والو سوا كان خاطبها...فاش عرفت المشكيل وفاش هضرت معاكم كلكم استنتجت حاجة وحدة والي تاكدات ليا هي خايفة عليه وفنفس الوقت الوقت الي احتاجتو فيه لقات تيليفونو طافي هادشي الي عرفت من زين الدين ..
ع.العالي : ماعيطاتش لجدها وماعيطاتش ل فوزي ...
يونس : هي شافت المنقذ فخوها الكبير الي مع الاسف سد عليها تيليفون وهادي اكفس حاجة واكثر حاجة هرساتها من جيهتو وصعيب شوي خاصها وقت باش ترجع تشوف فيه كيف شافتو من قبل...زين الدين كان طافي يعني ديك الوقت ماشي لخاطرو وكتاب انه يكون تيليفونو طافي...
صفاء"كتسمع وكتشوف ف يونس وترسل لسيمو اوديو باش يسمع قاليك تاهو بغا يسمع هضرة دكتور باش يحلل نفسية الهبيرة...واحد شوي تا صورات يونس وهو كيهضر باش تقول لسيمو شوف تبوگيصة على اصولها تا دور عينيه شاف فيها وهي تخرج عينيها" : والله ما صورتك(وخا هو ماداهاش واش صورت او لا كانت شوفتو غير صدفة لا غير) هانتا ها شوف تيليفوني غا درت سكرين...
يونس : هههه لا لا ماقلت والو.."شير ليها" نتي صاحبتها ؟
صفاء : اه"صرطات ريقها قلبها كيضرررب بجهد حساب ليها غا حصلها تا ولا وجهها شهب وعينيها زرقين وحناكها مزنگين خههه"...
يونس"بابتسامة" : متشرفين.."رجع كيهضر مع المحجوب وعلي وخال فرح كيشرح ليهم الحالة بالضبط ولشنو بغا يوصل واستاعن بزين الدين كونو فرد مهم فهادشي ومسهل عليه كونو غايعطيه تقرير الجانب النفسي.."...
صفاء"رسلات لسيمو ميساج" : عن جد امك كان غايحصلني صورتو...
سيمو : بغيتها ليك يلاه تحشمي ابن زهوانية الي ولدات مك...
صفاء : كود...زين حبو مولانا امن رجعت ليا صحيبتي خليني نسقي عويناتي..لا تسنيت عصام نموت ناشفة ماشفت ماتشوفت!!!
بينما هما جالسين فالصالون كيهضرو كانت فاطنة فالكوزينة اصرت انها طيب ليهم الغذا حتى يشوفو حالة فرح عاد يمشيو هي ونجية وسيمو الي جايين فالطريق باش يشوفوها...كانو جالسين حداها وليد ومراد الي وصاهم زين الدين باش يشوفو شنو غايخصها والي بغاتها يجيبوها ليها بحكم هي الام ديال فرح بالتربية وبنت نجية الي جايا بالرضاعة...
وليد : خالتي خاصاك شي حاجة ؟
فاطنة"شافت فيه وتبسمات" : مخاصني والو هاد ساعة ولدي الله يرضي عليك...
مراد : لواه شوفي ميمتي الي خاصك ناخذوه والله...حسبينا ولادك ثانيين..
فاطنة : هههه ربي يحفضكم وراكم فحال ولادي وتانا فحال ميمتكم..راني نعقل على هاد الولد مراد نهار جينا عندهم الفيلا..كان هو وعمة زين الدين وبنتها ياك الحاجة توبا شتها مكايناش اولدي ؟!
مراد : احم مابقاتش ساكنة معانا تحولات هي وبنتها...
فاطنة"محكرتش فتسوال" : اه ايوى سلم عليها...
وليد : نتي ام فرح ؟
فاطنة : انا ربييتها كاينة امها الي مرضعاها هاهي جايا فالطريق.مع سيمو خو فرح فرضاعة را تعرفو يضهر ليا سميتو محمد رضى وتنگولو ليه كي شتي بسلامتك سيمو غا من صحابو سماوها عليه ههه...
وليد : العنطيزي المصدي صحيبي اووووو"زواه وليد من تحت طابلة" الشهيب الفنفون هههه العوينات زورق وشعر المسبسب صحيبي ولينا عشران وخا نزق....
فاطنة : هههههه الا تحشم شاي امصدي يا را مصدي والعقل مصدي والي بغيتيه مصدي...
وليد"خرج عينيه" : اش بغيت...
فاطنة : ههه زمعا(زعما) الي طاحت عليها عينك فسيمو مصدية هههه"تلفت ليها جرية ماعرفات ماتقول ماحدها كتزيد توضح وهي كتغرق ههعه"...
وليد"كمش عينيه" : وزعما كلشي مصدي اميمتي ؟
فاطنة : كلشي مصدي اوليدي من طرف تالطرف ونتا غادي...
وليد : طالعتي عليه ؟
فاطنة"على نيتها" : وراني ربيتو هو وفرح و صفاء...
وليد : ديك الوقت كان صغير اميمتي...
فاطنة : وراه تا دابا مزال صغير..
وليد"كمش عينيه فيها" : ميمتي نعلي شيطان !!
فاطنة : ويلي اش گلت ؟!
مراد"خبط طابلة تا قفزو وناض وقف" : انووووض نوووووووووض نوضو جملة لا تكحال جملة ونتصداو جملة والي داق الصدى يتزوغم ليه الفم والفم الى ماتلجم...
وليد : گعم بعم...
مراد"كيشير ليه بايديه باش يخرج تا ولاو يدورو فحال روايد تراكتو غا باش يفهم وليد " : تگعد جيب شي مونادا وشويبس طونيك تكااااعد...
وليد : اصبر غا تشرح"غوت مراد تا قفز وليد وفاطنة"
فاطنة : ويلي مالو ؟!
مراد : اسرااااااااااااط تكعد ابن عمي تكعد الله يكعد ليك علاش كاعد مانتا غادي مانتا واگف والفم فمك ؟ بغيت ليه الهرس وفراناتك تگطعو ؟ عگد مهم بقنب وشد لجام فمك بغيت لمك قدرة تقودرك..
أتعبتني نفسي فتركتها لك حبا و هياما
لعلك تخرجها من سواد قدرها و تهون عنها شدة الالاما
انا المعذبة بجراح حب اخوتي و المقيدة ببصيص امل هواك ...
فهل حان الموعد لألقاك
ام اني لازلت تائهة عن دروب هواك ... (القارئة fatiha adam)
نفس اللحضة ونفس السيناريو تعاود ليها كيف حل الباب خرجها من السيارة ماعقلش عليها وعلى غواتها وخوفها...سد الباب وكسيرا مخليها وسط زحمة محطة انزگان من جديد...بقات واقفة والبول نازل منها بالخلعة ودنيا عامرة ولات تفيبري فبلاصتها وتبكي...
فرح : اهى اهى ولااااااا ماتخلينييييييش اهى اهى عااافاك ماتخلينيش هنااا اهى اهى...
مكمشة فصاكها وتبكي وتدور وجهها برعب...جات عندها واحد السيدة حطات عليها ايدها وهي تقفز تا غوت وبعدات...
المراة : ابنتي مالك بيك شي حاجة...
فرح : اهى اهى....
المراة : واش مودرة ابنتي ولا شفرك شي حد ؟
فرح : بعدي مني اهى بعدي منييييي...
المراة : لا حول ولا قوة الا بالله..الله يسترنا دنيا واخرة...
فرح"هزات صاكها كمشات فيه ضارت بغات تهرب كتجري ودور فوجهها وقلبها بغا يسكت جات بغات تقطع ديك المساحة حتى تم جاي واحد الكار داااخل تا جرها واحد الكورتي بجهد بعدها من تما وهي تغوت" : وااااااااااااعععععع اهى اهى...
الكورتي : اسيري يا بسعي من حدا الكار اختي حيدي من هنا را كيدخلو الكيران...
قفزات منو مبعدة لاقصى مكمممشة معنقة الصاك بين ايديها وحاطاه فحضنها كانها كتستنجد بيه...الرعب الي عايشة فيه دابا خلا قلبها كيضرب بواحد الوتيرة لدرجة وجهها مشا منو اللون...دنيا عامرة غوات صداع الكيران الزحمة فزحمة وشكون الي معارفش مدينة انزكان والمحطة ديالها الكيران داخلة خارجة الطاكسيات حدا بعضياتهم السوق قريب المقاهي والناس غاديا مسافرة فالمحطة الي فيها الكيران من طنجة الكويرة...الغوات وصداع الكورتيات...نفس الصداع ديال ديك المرة نفس الهضرة نفس ريحة ديال الماكلة وريحة المازوط وريحة الزبل كلشي مخلط وريحة العطور من محلات العود والند...ريحة طواجن...الراس كيدور والقلب بغا يخرج من بلاصتو وهي كدور هنا وهنا...
فرح : ممممم اهى اهى زين الديييييين مريم اهى اهى...زين الدييييييييين ماتخلينيشش...
ماحد شي حد كيقرب ليها وهي كتقفز وتغوت وتكحز تا سمعات صوت الكلاكصون ديال الكار جاي جيهتها غوتات لربي الي خلقها حتى ضارو ناس كيشوفو جيهتها زادت عنقات الصاك وهي تحتيها بجرية هكاك عينيها كيقطرو بالدموع وفمها بيض بالخلعة والارتباك لواحد الدرجة تا خرجات من تما وتمات غاديا فالسواري ونفس السيناريو كيتعاود فراسها ملي تلقاو ليها الشماكرية وغابت عن الوعي تا حلات عينيها على وحدة..
فلاش باك
براهيم : اجي نهضرو قولي لينا مالك وحنا نواسيو الحيبان
فرح"ماهضرتش بغات تخليهم وتمشي حتى خرج من وراه واحد جنوي ودفعها لجيهة الحايط حطو على رقبتها..ورك عالجنوي فرقبتها تا حسات بيه بدا يقمش ليها رقبتها" طلقي راسك..."مابقا كيبان ليها والو سوى الضباااب والعينين تشقلبو لفوووق ولاو يبانو بيضيييين وهي طيح زداااااف...."
براهيم : اشاوا هادي واقيلة مسكونة !!" عقلهم دايخ بالسيليسيون وشراب شافو عينيها تقلبو بديك الطريقة برد ليهم الما فركابي يحساب ليهم مسكونة لاحو ليها كلشي وفرتحو عيط جبد مسابقين مع الريح...بقات هكاك تا بدات كتحس بشي حد كيحرك حلات عينيها تا بانت ليها وحدة..كتحرك فيها وتعاود كان الليل تقريبا الوحدة ونص بقات غايبة طول ديك المدة تاحد ماحركها والي داز من حداها كيحساب ليه هبيلة ولا شي سكرانة ناعسة...
هي : انوضي من هنا اياتا غايسرقك شي حد...
فرح"ناضت مفزوعة شافت فيها كتحرك راسها هنا وهنا بانت ليها دنيا تم صاقلة وخا بلاصة المحطة كتبقى عامرة 24/24..غير ديك البلاصة الي طاحت فيها كلشي ساد" : فين صاكي...
هي: هاهو مالكي اش واقع ليك ؟
فرح : الله يخليك اختي بغيت غير نمشي لوطيل حتى لصباح عندي الكار بغيت نرجع...
هي"كتشوف فيها وطلع وتهبط فديك الغلض الي عطاها الله زوين وهي زوينة ولون شعرها مميز وكلشي فيها سپيسيال" : لوطيل اختي ساد والي مفتوحين بعاد على هنا..اش وقع ليك بعدا...واش كنتي ناعسة...
فرح : ماعرفتش تعرضو ليا شي شماكرية "ناضت كتهضر وتسوس وتقلب على صاكها تا مداتو ليها شداتو بدات تقلب فيه لقات فيه كلشي ماهزو منو والو..رجعات شافت فيها بترجي" شنو ندير اختي...
هي : اجي معايا انا داري غير هنا ساكنة وحدي رتاحي وصباح سيري ركبي فحالك..الى بقيتي هنا را كلشي ساد مكاين فين تجلسي...وباقي بعيد الحال باش تركبي...اجي معايا معندك مناش تخافي انا غير ولية معايا مي وخويا وليني خويا راه خارج دابا فالبحر مكيجي على شهر يعني معندك مناش تخافي..
بقات كتشوف فيها بشك وخا المراة الي كاتهضر معاها طالي كان شافع ليها انها كتبان لابسة مزيان نقية شعرها مصبوغ بلون فحال لون شعر فرح قدها فالطول نيت غا هي غليضة شوي على فرح وجامعاة شعرها الفوق بقراصة ديال الريش..وجلابة ديال النمر...
هي : هانتي اختي الى ماتقتيش اجي معايا لمحطة نوصي عليك شي كورتي را كلهم كيعرفوني بسمية كنزة الي بغاوها كنعطيها ليهم خيري كبييير عليهم كلشي هنا عارفني تا مالين الكيران لا وقع ليهم شي مشكيل ولا تحنسرو كنصوفيهم اجي معايا وسمعي بوذنيك وكاع الى مارتاحيتيش نوصي واحد فيهم يخليك ترتاحي فشي كار تال صباح وسيري الله يعاونك..
فرح : يلاه معايا وصيهم نبقى فشي كار عافاك..عافاك اختي راني جيت لهنا بعيدة على دارنا نعست فالكار ولقيت راسي وصلت هنا...
كنزة : وخا يلاه"هزات فرح صاكها وساست حوايحها سبقاتها كنزة وتبعتها ..كدور تشوف فيها تاهي كيفاش خارجة فهاد الوقت..واحد شوي وهي توقف كان واحد الكار خرج من المحطة والكريسون شافها ونزل كبجري سلم عليها بقات تهضر معاه معرفاتش فؤح شنو كانت كتقوليه وهو يتم جاي عندها وهي تكمش فصاكها وكحزت شوي"
هو : ختي تبغي نوصلك تال بني ملال وتعاودي ترجعي ولا قلعة سراغنة وطلعي لجديدة..
فرح : لا لا بغيت نيسان لسيدي بنور...
هو : واختي هذا جهدي ونصيحتي سيري مع ختي كنزة ضريفة بقاي عندها وكان يصبح الحال وسيري فالكار ديال تمنية راهم كيكون بزاف طالعين لجديدة فداك الوقت..."كلاكصونا عليه الكار وهو يدور تم غادي نقز طلع فالدروج والكار غادي وكيغوت مراكش بني ملال بني ملال خنيفرة...حتى مشا الكار.."
كنزة : هانتي اختي سمعتي على وذنيك..
فرح"بغات تدوي معاها وهما يفشلو عليها ركابيها حسات بالدوخة تاني تا تكات على الحايط كون ما شدتها كنزة كانت غاطيح"
كنزة : واش مريضة اختي ؟! شوفي حالتك ووجهك !! واش ماكليتي والو ؟...
فرح"حركات راسها ب لا" : دوخة دوخة من صباح اهى...
كنزة : اجي معايا ماتبقايش وحدك اجي كيبان ليا مواكلة والو يمكن طاح ليك طونسيون اجي نعبرو ليك وكولي شي حاجة...اش نقوليك جاب الله كنت جايا من المستعجلات فهاد الوقت الله ينجيك اما كنتي طيحي بين ايدين ولاد لحرام.."تابطات فرح دراعها باش تقاوم عياات وسوفل مقادي وضغط طايح وقلة الاكل والمشاكيل كلشي تجمع فخطرة..مشات معاها مسافة مابعيداش تا وصلات لواحد دريبة ثالث دار كانت مبنية غير لتحت وبابها كتهبطي ليه بدروج خشات ساروت فالباب ودخلات معاها فرح الي وقفات فبلاصتها حسات بالامان مع هاد السيدة الي مدات ليها يد المساعدة...يلاه غاتشكرها تا خرجات من واحد البيت واحد الوحدة شعرها بيض مجموع الفوق كتبان كبيرة فالعمر وجهها شبه مجعد لابسة ضوني وبيرميدا على فخادها الغلاااض مضوبلين على فخاد فرح حيث كتبان هازة وغليضة وكرشها مضوبلة لكن الي خلعها فهادشي هو الوشام الي دايرة خط من تحت فمها تالاخر ذقنها ونفس الخط فجبهة من فوق تاوصل لبين الحجبان.والكارو شاعل شاداه بين صباعها..بغات ترجع باللور لگاتها كنزة دورات وجهها وهي تبان ليها حيدات جلابة وبقات بضوني حمر وبيرميدا حمرة...
كنزة : الزين رتاحي هادي غير مي باشا ههههه
فرح حولات عينيها ل كنزة شوي ضارت عند باشا شوي عند كنزة شوي حتى سمعات صوت الباب كيتحل وهي تدخل واااحد خيتي شعرها كحل حجبانها دايرة ليهم ميكروبليدينغ كحللل وفمها زرق مضروب من جنب سيكاتريس حتى لحنكها..دايرة ليلونتي زرقين لابسة كسوة كحلة فوق الفخد لاصقة وخا فورمتها ضعيفة بزاف..جايا وتخلخل ماحلات الباب تاكانت غاتفرعو...
فرح : سمحي ليا اختي انا غانمشي نخليكم.."جات بغات دور وهي تغوت ديك باشا ومع صوتها مدعدع كتر من الوعد قفزات فرح فبلاصتها قلبها على شوي يسكت..
واحد شوي تا تسمع صوت الكلاكصون مجهد ديال ربعة الكيران خارجين رجعوها الواقع وخرجوها من التفكير الاسود الي كانت هاربة منو ديال ديك الليلة عند هادوك مع كلاكصوناو ناس غوتو فوذنيها كلشي تجمع عليها... بقات تغوت تغوت تغوت تغوت تغوت تغوت...دايرة ايديها على راسها لاحت صاك وكلشي.. تمدات ليها ايدو هزات فيه عينيها وهي تشد فيها بزربة فحال لقات المنقذ كمش ليها فايدها وهي تشنق عليه وعينيها خارجين كتشوف فيه بخوف وترجي وفوزي واقف مخبي كيشوف فيها توحشها بزاااف لكن الامر صعييب عليه وفوق الطاقة حتى نزلو دموعو يجريييو عمرو كان يظن فرح توصل لهاد الحالة وتلوحها لوقت لهاد البلايص...
فرح : ماتخليونيييييييييش هناااااااااااا اععععععععع لا لا كاينة ديك المراة اهى اهى ماتخليونييييييش ماتخلينيش ازين الدين.
زين الدين : ماااانخليكش مانخليكش
فرح"كتحرك فراسها بزربة جاتها فحال هيستيرية كتخرج كاع الي وقع ليها تما " : .ماتخليهمش يديوني كيضربوووني اهى اهى كيضربووووني...هناااا هنااااا فين هزوني هنااااا هنا فين خليتوني هذاك رسلني حتى وصلت هنا... ماعقلت على تا نمرة من غير نمرتك ونمرتو نتا وطفيتي عليا تيليفون وهو قطع عليا ...فرط فياااااا.اااا حرااااااااام عليهم كون مت وميوقع ليا هادشي بغيت راحتي وحرموني منها اهى ماعمري نسمح ليهم ماعمرييييييييييييي . "كتغوت وتشهق حس بيها واحد اللحضة روحها بغات تخرج"
زين الدين"قبط ليها راسها بين ايديه وجرها باس ليها راسها وشاف فيها عينيه فعينيها المعمرين بدموع الخوف والرعب حس بحنيكاتها سخاان بالغوات والخلعة" : العقل خرج معاك والگلب ديتيه ونفرط فيك ؟
فرح"حدرات راسها فاشلة بمعنى الكلمة نطقات بصوت مبحوح بالكاد كيتسمع" : ديني من هنا معاااك اهى...
زين الدين : ديما معايا الحب ديالي...
السم بالسم هي التقنية الي اتاخذها يونس باش تقدر فرح تخرج شنو فقلبها وماتبقاش طامرة عليه الشي الي يخليها منحاصرة ف بلاصة وحدة كيف كديرو اليوم ديرو غذا وهي لاقية راحتها ماتزيدش القدام وماتنقصش..وهادشي ماشي فالصالح ديالها..وبما انها مغاتبغيش تمشي عندو دير حصص العلاج النفسي نظرا لردة الفعل الي شاف منها فهادي كانت انسب طريقة انهم يخليوها تواجه البلاصة الي كانت سبابها تا وصلات لهاد المرحلة من المرض النفسي وتبقى منغالقة على راسها فدائرة الوحدة ومعولة على المنقد ليها فديك الوقت والي هي "مريم"..المواجهة كانت اخر وافضل طريقة باش تقدر تقول او تخرج الي فقلبها وخا غير شوية وفنفس الوقت تعاود سيناريو اليوم الاسود ديال محطة انزگان وبالتالي تمد ليها يد زين الدين الشخص الوحيد القادر على انه يكمل معاها رحلة العلاج ليس فقط كونه اقل الاشخاص ضرر ليها والي تسببو ليها فالضرر ولكن كونه الشخص الوحيد الي غاتبقا معاه فبلاصة بعيدة على المكان الي ولا كيبان ليها ضلام والي عاشت فيه اضرار كثيييرة واكثرها واقساها وهي ما وقع مع عصام وحتى فوزي...هذا الاخير الي جا حتى هو كونه خوها باش متمشيش مع زين الدين وحدهم وفنفس الوقت تاهو يكون حاضر فهاد اللحظة من ورا زين الدين لكن وقع الي مابغاهش وهي كلامها فحق خوتها الشي الي خلاه يتراجع...
بقات واقفة قدامو حادرة عينيها وكتنخصص وخا غوتات وفرغات وخا تحطات وسط الزحمة لكن الخوف او الرهاب مزال حاضر لانه بكل بساطة مغايمشيش دقة وحدة كل حاجة كتمشي شوي بشوي مع مرور الوقت...
زين الدين : شوية دابا ؟!
فرح"شابكة صبيعاتها بتوتر مزال مقلقها المكان الي واقفة فيه وصوت الناس نبرزطينها وكلاكصونات الكيران والسيارات وطاكسيات" : د د دييني من هنا اهى...
زين الدين"بقا حاضيها وفنفس الوقت دور ايديه لور شير ل فوزي باش يتحرك من تما يسبقو تايقوليه فين غايتحركو من بعد..حدر عينيه بانت ليه جلابة من جلايل فازگة حيث لابسة تحت منها غير بيرميدا مع صيف والبول نزل بزاف واخا فرجليها تقاست جلابة من تحت...تما عرف حجم الرعب الي كانت فيه والرهاب فين وضلها والحالة النفسية الي وصلاتها..فهاد الحالة فاش كيوقع هاد نوع من رد الفعل "التبول لا ارادي القيء بعد المرات السخفة او فقدان الوعي او حتى البكاء" كياكد حجم الازمة بالترتيب... ضراتو بجهد فخاطرو تا دور وجهو لهيه وايدو تزيرت على شكل قبضة..غمض عينيه شحااال تاحس براسو تكالما وهو يدور عندها لقاها كتشابك فايديها وكتقفز..مد ايدو حل طوموبيل من بعيد" : نمشيو ؟"حركات ليه راسها..هز ايدو بشوية باش ماتخلعش وتقفز..حطها على كتفها ودورها غادي بيها تحنى بزربة هز ليها صاكها الي لاحت ومشاو لسيارة حل ليها الباب تا ركبت وفنفس الوقت كيطبطب ليها على كتفها بحركة تخليها تزيد تطمئن ليه تحس انه معاها بغات تركب وهي توقف كتحس براسها غارقة فحوايجها تا تزنگت"
زين الدين : مالك ؟ بيك شي حاجة ؟
فرح"كتبغي تهضر وفمها كيترعد هزات جلابة بشوي من عند صرتها فحال كتبعدها باش تنشف دغيا ولا شوف اش قاليها راسها وهي بهاد الحركة خلاتو يفهم انها تعنكشت وتبرزطت وحشمت تجلس ليه فطوموبيل واصلا ديجا عارف بالي بالت.."
زين الدين : ماعليش رتاحي تما كلشي ديالك...
فرح"كمشات فجلابتها وهي تدخل جلسات بجنب مقلقة فراحتها مامرتاحاش لجلسة دموعها نزلو يجرييييو فحال الى مارضاتش وفنفس الوقت مزال ماثر عليها الي وقع قبل قليل...بقات تبكي فصمت حتى ضار وركب حداها"
زين الدين"ضار شاف فيها لقاها جالسة وماجالسة ودموعها نازلين فصمت" : فرح رتاحي الله يرضي عليك ماديري فبالك والو...هادشي عاادي اليوم واقع ليك وغذا ليا حنا انسان دم ولحم وعبد ضعيف الكمال والقوة لله سبحانه وتعالى...
فرح"غير بدا ليها الهضرة فحال عاود طلق روبيني البكا غمضات عينيها وكمشات وجهها ببكاء تا دارت ليديها على وجهها مخبية" : اهى اهى..عذبوووني عذبوووووني اهى..
زين الدين : ماعاش ولا تخلق الي يعذب ليا الفرحة ديالي...
فرح : اهى اهى...تيليفونك طفيتيه فاش صونيت ليك"كتهضر بحسب السيناريو الي تعاود ليها وكتعاود شنو وقع ليها شوي بشوي كل ما قدرت ونفسيتها سمحات ليها تهضر.."
زين الدين : ماشي لخاطري فرح مكتاب ليا داك النهار "مابغاش يقوليها كنت مسافر وتراجعت حيث ماشي فالصالح ديالو دابا" ماشي ديالي نديرها وخا نعرف نمووت ومنديرها بايدي...
فرح : اهى اهى"مقلقها البول الي بالت وحالتها كلشي تجمع عليها فهاد اللحضة بقاات تبكي وتنخصص كتبغي تقوليه وتغلبها تنخصيصة هزات ايدها حطتها على صدرها حسات بالسخفة " خل خل خلاااا خلااااا وووو نييييييي اهى اهى خل اااااااااونييييييييييي واااااااااااااااا اهى اهى وااااااا خلي خليييتووو نيييي وو وحدييييييي اهى اهى مم ماااا اهى ااااااااااااااععععععع "حساات بالانهيار والسخفة ماقدراتش تجمع الكلمات باش توصل ليه جملة مفيدة غلبتها تنخصيصة وسخفة تا خلعاتو صبر راسو غييير بززز باش يخليها تخرج داكشي الي ضاغط عليها ومادارتوش ديرو قدامو خلاها تغوت وتبكي على راحتها تا بانت ليه بغات تسخف وهو يمد ايدو حيد ليها ايديها بزز من فوق وجهها الي بان كلو حمررررر تا ولاو حجبانها بيضين وفمها كيتررعدد "
زين الدين"جبد من حداها قرعة الما كلها ومدها ليها شربات منها بزز كتبغي تشرب كيترعد ليها فمها وايديها ممجمعينش كترعدو ليها كلها فاشلة تا عاونها شربت ورغم ذلك كيحس بيها كتقفز منو.." : ششش براكة عليك فرح براكة..هاني معاك المكتاب كتب عليا فداك النهار..هادشي كامل مكاتيب الله معمري كنت نخليك ....نتحركو من هنا ؟"حركات راسها مقادراش لا تشوف فيه لا تشوف برا مدعوقة".
..بمجرد ماشاف حالتها قدامو حس بقلبو تشقق لمية شقفة..تا ندم على النهار الي فكر يعارض رجوعها لزين الدين ويكره زين من الاساس...زين الدين الي قدر يقنعو برجولتو بالافعال وليس الشفوي وخلاه بزز منو يحتارمو ويقدرو لدرجة ولا فين ما يبان ليه او يشوفو يبتاسم ليه باحترام وتقدير اولا عاد يسلم عليه...زين الدين الي قدر يدير الي قليييل شي راجل يديرو على ختهم الي بغاها بصح بكل ما فيها...كان غايتوجه لعندها يسلم عليها وخا تغوت تبكي ضرب تشكي لكن غير سمع هضرتها عليه وعلى عصام تراجع وماقدرش يمشي لعندها خاف لا تنكس ولا تهرب فضل حتى تبرد وتعاود عاد يدوز او يبان هو فالمرحلة القادمة بحكم ماشين معاها دقة بدقة حتى ترجع فرح القديمة ولما لا ترحع احسن من الاول....
فوزي"شاف حركة زين الدين الي دار ليه بايدو وهو يحدر راسو ومشا لطوموبيل كيمسح فدموعو من قهرتو على ختو الحنينة...ركب وسد الباب حط حط ايديه فوق الفولون وخشا راسو بيناتهم مستسلم لدموعو الي مابغاوش يحبسو تقهر تكرفص تازم بمعنى الكلمة فهاد الاونة الاخيرة ضغط من كل الجوايه تخشا بين نارين بين فرح وعصام مالقا لخاطر لا لهذا ولا لذاك...ماعمرو شاف الراحة والنعاس من نهار غبرات حتى لدابا نهار بانت فرحتو ماتعطيها لحد حس براسو روحو رجعت ورجعتها ختو...من بعد ماكان غييير محرك وعايش وصافي لدرجة الدار مابقاش حمل يدخل ليها ومن نهار مرض جدو بقا معاه ديك الشهرين...هز راسو ومسح عينيه الي ولاو حمريييين..سمع صوت الميساج فتيليفونو دور عينيه يشوف ماحد تيليفون شعل مافيه مايهضر مع شي حد حتى بان ليه زين الدين طار بالخف هزو..لقاه راسل ليه الموقع فين غايتحركو كمش حجبانو مستغرب من الموقع الي كتب ليه " : فين محرك بيها لتم ؟! تت
كتب ليه ميساج ولاح تيليفون ديمارا طوموبيل وخرج من تما زاد نيشان لفين نعت ليه...
اما زين الدين وفرح من بعد ماتاكد بالي تنفست حل ليها زاج النافذة باش يدخل ليها الهواء طبيعي حسن من الكليمة باش تنفس وعطاها تشرب من العصير الي خذا ليها بزز وخا كتشد من عندو مزال شوي مكحازة عليه ومزال مازمة كيف قلت ماشي كلشي كيجي دقة وحدة...خرج من انزگان وغير خرج خرجات ليها واحد تنهيدة حتى تسمعات لعندو خلاتو يدور عندها بخورف يحساب ليه غير سخفت...
زين الدين : شوية دابا ؟"كيهضر معاها عين فالطريق وعين عليها"
فرح"عينيها كيشوفو فلارض شابكة صبيعاتها كتورك عليهم تا كيتقطع منهم دم..حدها حركات ليه راسها وصافي وتاهو ماحكرش خلاها على راحتها هو المباركة حنات فيه ولا ماشي معاها غير بالخاطر فحال شي بيضة مشقوقة خايفها تزيد تشق وتهرس على سبة...زاد فسرعة السيارة بقا غادي غادي تا وصل لاكادير شاد تيليفون فايدو من ليسر باس ماتشوفش..بقا كيقلب بلوكاليزاسيون ...حتى وصل العنوان الي عطاه واحد الفندق ف تالبرجت وقف السيارة وهي تهز راسها كدور فعينيها ماعرفتش المكان...
زين الدين : ماتبرزطيش رتاحي شوية لفوق وبدلي شنو بغيتي تبدلي انا هنا لتحت تغذاي ونعسي تا وكان ترتاحي ونتحركو نرجعو...
فرح"بخوف خرجات عينيها يحساب ليها غايرجعها لجديدة" : فين فين ؟ ماترجعنيش لهاديك البلاد اهى عافاك...
زين الدين : ششش مانرجعكش ليها فرح راجعين لتارودانت فين رتاحيتي و معايا... نزلي.."دور وجهو جيهة لوطيل بان ليه مكاالمي ماكبيرش وخا زوين مافيهش حس بنادم بزاف فالدخلة كيف لوطيلات الكبيرة..اختارو بناءا على حالتها باش متبرزطش" خاوي فرح باش ترتاحي ومتبرزطيش."اكد ليها بعينيه" مزيان ؟
فرح"بصح مبرزطاها حالتها وجاها على الكانة فاش قاليها خاوي ومكالمي داكشي الي بغات..حركات لبه راسها ورجعات حدرت عينيها"
زين الدين : يلاه تحركي.."حيد سانتيغ وحل الباب دار لعندها حل ليها الباب بينما تنزل دور راسو جيهة طوموبيلة فوزي شير ليه براسو دار بايدو خمسة بمعنى خمسة دقايق وتبعني...سد الباب موراها عطاها صاكها كمشات فيه وتمات غاديا بجنبو وهو غادي معاها بخطوايها هي كل حركة كيستقصدها تزيد تخليها تحس بالامان معاه تا دخلو لقاو واحد تما فالاستقبال..خذا ليها شومبر فين ترتاح وتدخل تعوم وتبدل حوايجها...نفس الشيء قالو لموضف الاستقبال بالي بغاها غير ليها فين ترتاح...كان مقدي ليها حويجات دارتهم ليها صفاء فالصاك ولوازم الاستحمام الي مكانوش حيث مكانش كيضن غاتكون هاد ردة الفعل تخليها تبول لا اراديا...داكشي علاش رسل ل فوزي ياخذهم ليها...عطاه الساروت وطلع الفوق معاها تالشومبر حل بالكارط تا دخلت لقات شومبر بسرير واحد ودوش مقابل ليها..."
زين الدين : مرتاحة هنا نخليك"مد ليها لاكارط ديال باب" سدي عليك هنا شوي ونجيب ليك شنو تغذاي...
فرح"بترجي" : عنداك تخليني "عينيها غرغرو بواحد نضرة قطعات ليه قلبو وهو كون لخاطرو ومزوج بيها ميخليهاش دقيقة لكن الضروف كتحكم ومابغاهاش تبقى مبرزطو ومقلقة وفنفس الوقت خاصها ترتاح ماتديش طريق وتجيبها وهي مريضة فتفسيتها وزادها غوات قبيلة..."
زين الدين : قبل ماتخرجي من دوش نكون هنا رتاحي من جيهتي نخليك هي الي عمرها مزال تكون.."حرك ليها راسو بثقالة ونطقها بشكل خااااتر فيه راااحة" تهنااااااي....
حركات راسها بشوي وحدراتو بقات كتسد فالباب بشوي بشوي وهو واقف تا سداتو وضارت جيهة دوش دخلت ليه بزربة تحيد عليها داكشي الي برزطها حساات بالحكة وتقليقة حسات براسها موسخة بزاااف مرضاتش وتقلقت وحاسة بالعيااا...حلات رشاشة تاحسات بيها دفات وهي تحبسها وبقات واقفة تا شوي سمعات دقات وهي تمشي بزربة حلات عليه الباب مد ليها شامبو وليفة وباندوش وصابونة غير باش تنقي حالتها داكشي الي عرف وصافي خذاهم ليها فوزي...طمنها بعينيه واكد ليها قبل ماتسالي يدخل ليها الغذا تالعندها وترتاح...عطاها داكشي الي خذا ليها فوزي وتسناها تا سدات الباب وهو ينزل مخلي قلبو معاها وعقلو...هبط ديريكت لعند فوزي لقاه واقف قدام الباب كيشوف برا وفنفس الوقت كان كيهضر فالتيليفون مع جدو كيطمنو عليها...
زين الدين"ربت ليه على كتفو تا ضار شاف فيه"..
فوزي : غير ترتاح ابا ونرجعو انا غادي نطلع لسيدي بنور وهما يرجعو عندكم لتارودانت تما...
المحجوب : اش عگبتو درتو فمراكش ؟
فوزي : تسنيت زين الدين حتى جا لمراكش وتبعتو حيث داز من جيهة تارگة باش داز لواحد الكلينيك ديال سنان تما على قبل ضرصتها تا شاف فين جا عاد تيسرنا لاكادير...
المحجوب : وعلاش يديها لتما تحيدها غير هنا...
فوزي : والله ماعرفت تانسولو ونشوف..."بقا يهضر معاه تا سالا وقطع ضار شاف فزين الدين لقاه بعد شوية كيكمي ويهضر فالتيليفون زوج دقايق وسالا الهضرة" شنو دارت ؟
زين الدين"حك لحيتو كيشوف فالشارع" : الدوش...
فوزي : مامقلقاش ؟
زين الدين : البلاصة الخاوية من البشري ترتاح فيها ماتهز هم
فوزي"هز تنهيدة وطلقها تا فرفرو شنايفو.." : ففففف
زين الدين"ضار عندو وحط ايدو على كتفو زير عليه" : كل حاجة بوقتها مزيانة اليوم معايا بعدو معاك وهي غاديا...ماشين دقة دقة فوزي مابغيناش تنكس وترجع حالتها تكفس من اول وجديد !! محتاجين ترجع فيا الثقة باش نعاونها بدينا بالقليل وهاحنا غادين تانوصلو لكثير...
فوزي"عينيه غرغرو" : گالت بفمها عمرها تسمح لينا راني سمعتها ازين الدين..مدمرة من جيهتنا بجهد ومن حقها ولكن اخويا راني مادرتهاش بايدي...واش انا نبغي نرسل ختي ل ديك البلاصة ؟ واش انا نبغي لختي الخايب ؟ ..
زين الدين : مافيهاش شك من جيهتك المكتاب تصرف وكلنا عندنا ايد فهادشي الي وقع ليها وهي براسها عندها ايد فهادشي الي طرا ليها الفرق هي تازمت ليها النفسية كثر منا...ولا واحد فينا بغا توصل لهاد الحالة الي ماتبغيها لعدوك !!
فوزي"دار صباعو بين عينيه كيمسدهم ويمسح فنفس الوقت دموعو الي بغاو ينزلو..." : كي ندير نرجع ختي كي ندير نرجعو لحالتنا اللولة انا رااااضي عليك باغيك تناسب معانا غير ترجع مستعد ندير الي بغات "هز ايديه ونزلهم بجهد بقلة حيلة" هذا الله حنا مابغينا ليها غير راحتها وشوف فين وصلنا...
زين الدين"لاح الكارو وعسف عليه وضار عندو مورك ليه على كتفو " : لو كانت عندي ختي ندير كثر منكم...شي مرات الخوف زايد كيجيب الضد...
فوزي"الصمت"
زين الدين : المشاكيل افوزي كتوگض وتعلمنا الدرس وتعطينا لوجه فين نفيقو على راسنا ونعرفو بالي دنيا گد ماهي مزيانة گد ماهي خايبة وغدارة...ماعليش الي فات داز على راس وعلمنا وخا خرجات منا مقبولة ماشي اي واحد فرح هادي..
فوزي"هز فيه عينيه بقا كيشوووف فيه ماشعرش براسو تا تلاح عليه وعنقو عناق طويييييل خلا زين الدين يبادلو نفس العناق ويضرب ليه على ضهرو بجهد بحركة رجولية كتاكد الشدة والصلابة ديال رجال..." : لهلا يخطيك اخويا زين الدين وسمح ليا بزااااف على الي درت ليك...
زين الدين"عقد حجبانو" : الله يرضي عليك نسا عليا داكشي الي فات حنا ولاد اليوم.."مزال كيهضر معاه تا وقف الديليفري قدامهم من Macdo "
هو : طلبية ديال رويال تشيز ؟!
زين الدين"حرك ليه راسو حيث فاش طلب قاليهم غايوقف قدام لوطيل..جبد ليه من صندوق زوج ساشيات كبار ديال كاغط مكتوب فيها العلامة ديال ماكدو..طلبية كاملة بكاع المرافقات الي معاها حيث طلب پاك..خلصو وتحرك فحالو ضار عند فوزي مد ليه ساشية" : الضروف لعبت ابا فوزي قضي بهادي وكان تيسر"هز ليه ايدو باستسلام"
فوزي"شدها من عندو مافهم والو وضار عندو" : ونتا ؟
زين الدين : تما عندك واحد صالاد هي الي بغيت وكان نجي نتغذا معاك.."حرك ليه راسو ومشا بزربة طلع لعندها جايب ليها الاكل الي كانت واحد المرة قالت ليه كيعجبها تاكل فماكدو..تفاصيلها عقل عليهم ووصل الوقت الجد مناسب فين يخدمهم...وصل لعندها ودق الباب" الفرحة ديالي...
بقا شوي كيتسنا حتى تحل الباب وطلات عليه لاوية على شعرها الفوطة لابسة واحد الجلابة نفس ستيل الي حيدات لقاتها فالصاك...
زين الدين"مد ليها ساشية" : تغذاي...
فرح"كمشات عينيها بترجي" : عافاك نمشيو من هنا...
زين الدين"هز حاجبو" : شنو واقع ؟ قلقاتك شي حاجة ؟
فرح"حركات راسها ب اه" : ممرتاحاش هنا بغيت نمشي ...
زين الدين"رجع ساشية" : واخا رجعي جيبي صاكك اجي نتحركو فحالنا ؟
فرح"حركات راسها ودخلات الوقيتة الي دخلات بزربة صونا لفوزي علمو يمشي لطوموبيل حيث غايمشيو يرجعو....هزات صاكها حتى من داكشي الي خذا ليها شامبو الخ...خلاتو كل همها تحيد من تما تبرزطت وراحتها مالقاتهاش..خرجات عندو ونزلو بزوج خلص الشومبر ومشاو لطوموبيل حل ليها الباب ورد صاك لور وهي عطاها ساشية باش تاكل حيث فات وقت الغذا وماكلات والو...صدق تاهو ماواكلش الصلاد الي خذا داها فوزي معاه هههه...غير ديمارا تمو غادين وهي تنطق بدون ماتشوف فيه" : ماعمرك تفكر ترجعني لديك البلاصة عااافاك
زين الدين"كمش حجبانو كيفكر شنو هي البلاصة يلاه غايسولها وهي دير ليه طن بالي ضربات على جديدة " : ترتاحي معايا ف كازا ؟!
فرح"نطقاتها بواحد طريقة فشكل" : ت تاروداااانت...
رشات الما فلارض مخلط بجافيل وتيد وتحنات كتحك فلارض وتعاود تا وقفات عليها جميلة هزات فيها عينيها وهي توقف عن الحركة خلات شطابة وناضت كتمسح فجناب حوايجها...
جميلة : قاليك حتى تجي ويشوفها وديك ساعة يگوليك شنو ديري...هو مامعروفش بزاااف بهادشي غير المعرفة وصافي ومعرفة كثيرة مع دوك الي شادين طريق الحرام كي شتي كيخلصوه بزبابل الفلوس غير باش يفكهم من المشكيل وصافي..."جبدات من جيبها واحد الورقة مكتوب فيها نمرة" هاهي نمرتو هو ينعت ليك فين تجي بالضبط بغيتي نمشي معاك انا باش متلفيش الحاجة انا موجودة وليني حركي جيبك...
توبا : ههههه ياك ا جويميلة ههه واخا...
جميلة : وسمحي ليا طرف الخبز صعيب...
توبا : شحال يدير معايا ؟ وواش يحيدو بلا ضرر را واخا دارتها قد راسها راها بنتي وعيني باش كنشوف غير مابغيتهاش تشوه وتولد فهاد العمر بغيتها تديها فقرايتها...كتاب علينا هاد المكتوب وهاد اللوحة فين تلاحينا تا ولاو الخدامات يتجملو علينا(حشات ليها الهضرة)...
جميلة : والحاجة غا سمحي ليا...مهم هو كيديرو ب ربعين الف قاليك تال ديك ساعة وتفاهمو..اه وماتعطليش لا فات كثر من هاد القدر باس حاملة را هو براسو ميصيبش يدير ليها الكييرطيج..(كورطاج)
توبا : واخا صباح بكري نلقاك حدا صيديلية هنا تمشي معانا وديك ساعة فاش يقضي نخلصك نتي وياه..الله اودي اجويميلة...
جميلة : نشاعلاه(ان شاء الله)..
رجعات توبا لعملها فالميناج ورجعات جميلة كذلك كتنقي معاها...وبينما هما منغامسين فخدمتهم من بعد اتفاق بيناتهم...كان زين الدين دخل لطريق مخلي لفوزي رسالة باش يتحرك لتارودانت وخا ميشوفها يبقى تما تايهضر معاه ويشوف جدو...هاد المرة رجعو شدو طريق تارودانت من الجهة القريبة اكادير تارودانت بحكم فلول زين الدين خذا الوجهة من مراكش لاكادير لغرض انه يتلاقا بفوزي باش يتبعو وفنفس الوقت داز قدام الكلينيك ديال جراحة الاسنان باش خذا نمرة وياخذ ليها موعد باش تحيد ضرصة الي عذبتها لازيد من اسبوع...
زين الدين"ضار عندها يشوفها لقاها معوجة راسها وغاااديا بيها عينيها بنعاس بداو يتسدو..حنحن تا حلاتهم وحولات البؤبؤ جيهتو بدون مادور عندو" : ترجعي لور ؟!
فرح"حركات راسها بلا"
زين الدين"كيسوف فالطريق مد ايدو بشوي باش متقفزش هز مخدة من لور عطاها ليها" : صايبي عنقك عليها باش ماتبرزطيش ورتاحي مع راسك...
فرح"نطقات بصوت منخفض عيااااان" : وااخا...
زين الدين"حك ليها على كتفها" : منتعطلوش بزاف ساعة وحنا فتارودانت...
مجاوباتوش كاع قادت المخدة ورجعات كتشوف فالشرجم فالطريق هكاك بقات كتشوف بعدا كلات شوية من داكشي الي خذا ليها...بقات كتشوف تا مشاااااو بيها عينيها..
خاشي ايديه فجيابو مقابل مع المحل كيشوف فالمعلمية محامين على ثلاجة كبييرة فيها ثلاثة البيبان كبااار تا دخلوها لحانوت وركبو ليها لانسطالاسيون باش يخدمها الغذ ليه...حدر عينيه لتيليفون وصلو ميساج منها...قراه كامل هز عينيه تا عطاهم التعليمات ورحع كتب ليها رسلو وخشاه فجيبو..تا مشا عندهم...
عصام : الماكينة ديال تگطاع فين هي عبدو ؟
عبدو : قالينا صطوف جايبها هو فالطوموبيل..
عصام : نتسنى صطوف تايجيبها ليا ؟ "خفض صوته" تقحبين صطوف جاري فالدم...
صطوف"وقف ليه عند راسو" : سمعتك ازا***
عصام"ضار عندو عاقد حجبانو" : نعل بو مك فهاد نهار نتا..
صطوف : قاضي غراض ماعليكش.."مزال كيهضرو حتى سمعو واحد صوت انثوي كيعيط باسم صطوف"
فاش تحركات طوموبيل سد هو الشراجم وطلق الكليما حسات براحة اكثر الجو نقي فالسيارة ومريح وبارد...طلق القرآن بصوت ياسر الدوسري ونقص الصوت حسات بواحد الكمية ديال راحة فشكل كتسمع القرآن وعينيها كيتغمضو اكثر حتى غطات فنوم عمييييق...ضار تا شافها وشحال حمقاتو وهي نااااعسة وهااااادية فنفس الوقت...صونا تيليفونو هزو بزربة وجاوب باش متفيقش مشافش كاااع النمرة يحساب ليه فوزي ولا يونس الي كان بزوج على تواصل معاهم...حتى سمع صوت بنت فوذنيه...
هي"بصوت باكي وحزييييييين نبرة كتسمع حنيييينة فيها انين وقهرة وندم وترجي فنفس الوقت" : خويا زين الديين ..عاااافاك اخويا ماتقطعش عافاك غير سمع اشنو بغيت نقوليك وعمرك باقي تسمع صوتي عاااافاك اهى...
زين الدين"هز حاجبو كانه عرف صوتها..نطق بصوته الخشن حتى حلات فرح عينيها ورجعات سدتهم" : شكون معايا ؟
ضحى : انا ضحى اهى الله يرحم ليك واليديك غير سمعني وقطع..."شافتو ماقطعش وهي تبدا الهضرة" عمررري ماكان عندي با ومي عمري مكان عندي خوتي..ولكن كان عندي نتا كان فيك كلشي با ومي وخويا الكبير معمرك خصصتيني وخا غير بنت عمتك درتيني بنتك البكرة كيف كتقوليا وانا حم..ارة برهوشة فرطت فيك.انا يتيمة فحالي فحالك غير فرق نتا ماتو راضيين عليك وانا عايشين كي كنت كي ماكنت عندهم...وساخطين عليا من فوق عارفة راسي كنقول هادشي معطل ولكن بغيتك تعرفو بغيتك تسمح ليا بزااااااااف"نزلو دموعها كيجريييو كي شلال" سمح ليا بزااااف وعمرك ماتنساني فينما تفكرني اخويا دعي معايا فينما نطيح فبالك دعي معايا نرتاااح..ماعرفتش ولكن حاسة براسي اخويا عمري باقي نشوفك...انا درت ذنب كبيييير عمرو ربي يسمح ليا ولكن بغيتك ديما تدعي معايا بالمغفرة باش نرتااااح سمح ليا بزااااف بزاف اخويا الكبير"غمضات عينيها تا نزلو دموعها وهي تقطع..
قالت كلامها الي كان نابع من قلبها من قلب فتاة فسن صغير يلاه انفاتحت على الحياة دخلات راسها فاصعب المشاكل والي غاتخليها تكبر بزز منها وتحمل مسؤولية كبر منها ..تواجه اصابع الاتهام ليها بالزنى الفساد الشوفة الناقصة فيها و فالجنين الي فكرشها والاقسى من هذا وهي انه غاد تكون الوحيدة الي غالطة والرجل را كيبقى راجل مع الاسف..كيف قالت ليه هاد الهضرة قطعات خلاتو كيشوف قابل تيليفون مع وجهو ورجع لاحو فالمجر قدامو...دور عينيه ناحية الفرحة لقاها غاااايبة ماهياش هنا والتعب باااين على وجهها...هز ايدو بشوي وقربها شوية تال جبهتها قاسها لقاها دافية كل مرة كيقلب ليها جبهتها لا تجيها سخانة لان الصحوة الي وقعت ليها فالمحطة ماشي ساهلة ضروري مكترجع بشي انعكاس على الشخص...
مسافة الطريق حتى كان داخل للمجال الحضري ديال تارودانت اذان العصر فات عليه فالطريق...وصل لمدينة عاد دخل لدرب ووقف قدام الباب دور عينيه لقاها مزال ناعسة عزات عليه يفيقها فهاد اللحضة حيث بقااات ناعسة مدورة لمخدة على عنقها...يلاه غايدور يفيقها حتى لمح جارتهم زاهية كانت جايا مقدية ووقفات شافتو فطوموبيل ليها شحاال كتبغي تهضر معاه مكتقدرش بحكم عندو ناس وكانو عندو رجال فالدار كانت كترسل غير ولدها الي يدي ليه شي طياب ولا يتسخر ليه صافي...وكانت هادي الفرصة الانسب باش تهضر معاه وجها لوجه...شيرات ليه بايدها باش يخرج عندها وبالفعل خلاه فرح ترتاح اكثر ونزل من سيارة مشا لعندها باش راسها وايدها...
زين الدين : ميمتي...
زاهية : اش خبارك اولدي لباس عليك ؟ بغيت غير نهضر معاك مالقيت وقت وحشمت ندق عليك عندك ناس...
زين الدين : ولله الحمد... ياك مكاين باس ميمتي شنو خاصك ؟
زاهية : هههه ماخاصني والو اوليدي راك مكفي وموفي..الله يرحم من رباك الله يرضي عليك...سيمانة الماجيا ان شاء الله كاين الختانة ديال ولد بنتي وكيف كتعرف بنتي راجلها ماعطاوهش ملي مشا لبرا سنين هادي مابقا جا ومناويش يجي..والولد كبر بزاف را عندو حداش العام..
زين الدين"جمع حجبانو" : وعلاش ميمتي خليتوش حتى لهاد العمر ؟
زاهية"حشمت" : اش نقوليك اوليدي الدار الي فيها غا العيالات هي هادي..قلة العقل وصافي كل مرة ناجلو تا وصلنا لهاد العمر..
زين الدين"دور وجهو حاضي فرح لقاها باااقيا بنفس الوضعية ناعسة ورجع شاف فزاهية" : علميني فالتيليفون ..
زاهية : وكنتي برا البلاد اولدي كي دير ليا !!
زين الدين : كاينين الدراري خويا صغير مراد..عطا الله ميمتي من يقوم بيك فغيابي...شكون تكلف ليك دابا ؟
زاهية : يلاه شفت الفرملي الي غايدير ليه طهارة وقلت بغيت ندير صدقة خفت لا تمشي بغيت نترجاك تبقى حتى تحضر ليه انا راضية عليك..غير بنية وحدة الي عندي بغيت نفرح بيها ومعاها..خوها الي يحضر الله يرحمو راك عارف وبقيت غير انا وياها ووليدها وبنياتها.وتاهي را بقات ساكنة فدارها فالبلاد غير ولدها حمزة الي بغيت نطهر هو الي عايش معايا وخوه الكبير الي كان معايا مشا لمراكش يقرا...
زين الدين"عنقها بجنب وربت ليها على دراعها" : الجمعة جايا لا طول الله سبحانه فالعمر نقضي معاه الغراض..ماديري تاحاجة خليني انا نتكلف...
زاهية : فاش تكلف ؟ لا لا ولدي ابدا واش دير شي حاجة انا بغيت غير حضورك صافي ولدي الله يرضي عليك...
زين الدين : ميمتي زگينا الهضرة مابغيت تعاود غالصلاة على النبي...
زاهية : اللهم صلي وسلم عليه..."بغات تهضر وهو يسكتها بمعنى صافي بلا ماتعاودي مورايا...هزات ايدها حطاتها على حنكو وعينيها فعينيه كتشوف فيه بافتخار.." ايييه ازين الدين من قال نوصلو لهاد النهار يكبرو كتافك اولدي وتقوم ليا بطهارة ولد بنتي وتوقف ليا على كلشي...زين الدين الي كان يلعب فداري ودارهم ولا قدام الباب..وشامة الله يرحمها تبكي باش تهزها وتلعب معاها ولا تلعب مع عبد الرزاق ولدي الله يرحمو...
زين الدين : ميت إزد أبدا غاماح مزيخ؟ (شنو نبقى صغير ؟)
زاهية : هههه أوهوي أوا ريغ أك زرخ تݣيت أسلي زرغ تامغارت نك دتاروانك ماناݣو رايي تسفرحت ؟!(هههه لواه بغيت نشوفك عريس بمرتك ووليداتك تانتا..امتى ناوي تفرحني ؟!)
زين الدين : قريب ان شاء الله"دور عينيه بانت ليه بدات كتحرك فراسها بغات تفيق"
زاهية"شافت فيها ورجعات شافت فيه" : ماتݣا تفروختاد إعزان (شكون هاد الغزالة)..
زين الدين : ختاد إليس نالحلال ريخ أديس كملخ تودرت إينو إيغيرا ربي (بنت الحلال الي ناوي معاها الحلاال...لا بغا الله)..
زاهية : الله غيكاد تعزا أدفلاون إساهل ربي إكمل فلاون سالخير تزرم تاروانون ياربي(الله ومن زينها بنت الله يكمل عليك بالخير والله يفرحكم بزوج وتشوف وليدات وليداتكم ياربي.)..
زين الدين"باس ليها ايدها" : غتودرت نم اميمتي(فحياتك اميمتي)..."قبل ماتفيق فرح تافق معاها على كلشي الي غايتكلف بيه من طهارة وصدقة وعشا على النفقة ديالو لان الزاهية ماشي غير جارة بالنسبة ليه وانما فحال الام الثانية ليه ملي حل عينيه وهو كيدخل عندها وفينما يجي هي الي كترسل ليه الماكلة وتجي عندو وتسول فيه..كايشم فيها ريحة واليديه ريحة عائلتو يمكن هي الي بقات ليه منهم كلهم وخا مكتجيهش...سلم عليها ورجع حل الباب لقا فرح حالا عينيها وكتحك فكتافها حاسا ببرد شديييد فعز الصيف"...
مزال كيهضرو حتى سمعو واحد صوت انثوي كيعيط باسم صطوف...دور صطوف راسو يشوف شكون كيعيط ليه بانت ليه وحدة واقفة دايرة ايديها على خصرها لابسة كسوة صيفية فالشيبي بلا كمايم لحمها كلو مبرونزي مادايراش نقطة الميكاب فوحهها لكن ممسغنياش على فوسيل (شفار) المؤقتين وشفايف الموردة عن طريق طاطو بالاضافة الى انها نافخاهم على شكل قلب شعرها المايل بين بني واشقر...بقا صطوف كيحقق فيها...هو را تزعط خصوصا وقفتها الانثوية المثيرة..وضحكتها لصطوف حتى زادت علات حيث جاب ليها الضحك وهو كيحقق فيها فحال الى عرفها وما عرفها...حتى قهقهات خلات عصام هاز حاجبو ضار شاف فيها ورجع شاف قدامو...
هي : اوييييلي يا صطوف ماعرفتينيش !؟
صطوف : لا وليني شاك كنعرفك...
هي : لهاد درجة تبدلت حتى دعقتك ؟
صطوف : ههههه وهو من ناحية دعقة راك دعقتي ملتي تال جدر...شكون نتي ؟!
هي : ايوى الله يمسخك...غبرت غير ثلث سنين ماشي ربعين عام...
صطوف : صااافي ثلث سنين صافي...شكون ؟ بلاتي بلاتي وحدة الي كانت كتقوليا الله يمسخك وكنسكت هي شيماء "خرج عينيه على جهدهم" ينعل جد بوك الكلبة شيماء ؟
شيماء"ضحكت تا رجع راسها باللور" : هههههههههنههههههه لا لا صطوف هو صطوف هههههه نعل جد بويا كاااع...
صطوف : يغرق لمك شقف هي وبوووك وا بنت الحرام تبدلتي.."نغز عصام" وتا دور اصحبي ماعرفتيهاش ؟
عصام"ضار شاف فيها وكمش حجبانو" : لا شكون ؟
صطوف : شيماء الي كنا كنتقداو من عندها فالقيصارية صاحبة نسرين مولات الشاليه ديال سيدي بوزيد...
عصام : اااااا وا ش الي مشات لامارات...
شيماء : خلاك الله عايش ابا عصام راني وليت فالسويد هههه
صطوف : يا رااااجل ؟!
شيماء : اااااايه ههههه ستوكهولم ا بب..شلل بيها فمك...
صطوف"سرح ايديه" : تعالي حدايا زيدي وعنگيني تعالي حدايا زيدي ومرمديني..."مشات كتجري تلاحت عليه عنقها بجهد شحاال..معرفتو بشيماء قديييييييمة من ايام قصاير زمااان دسال بصح الي كانو يبقاو بسيمانة وكثر اما دابا فيييين وفين كيزهاو وغير رجال بيناتهم صافي وتجي شي عاهرة يفرغو فيها وصافي كتمشي فحالها لغد ليه..." شديدة ابنت لحرام...
شيماء : ههههعع "شافت ف عصام" عصام ماتسلمش عليا ولا نسيتيني ؟!
عصام"ضحك بجنب" : الله اودي."مد ايدو وسلم عليها بلابيز" عاش من شافك ابنتي..
شيماء : لهلا يخطيك هههن ايوى اش درتو فين شادينها با عصام تزوجتي ولا باقي كتحلف هههن
عصام : مزال هاد ساعة ماكتاب...
شيماء"زوات صطوف لكرشو تا حسات بايدها بغات تقسم" : ااااححح قصاحت الكرش بزاااف...
صطوف"غمزها" : قصاح شلااا بب نوريك..
شيماء : ههههه نعل مك الماسخ ههههه مزال الحال مابغيتيش دير دارك الكلب ؟
صطوف : نديرها معاك وتديني لسويد نعيشو الحياة فالسما..
شيماء"عضات شنايفها" : ماكرهتش والله...
صطوف : نديرو باباها لهلا يحوج حبي تانخليها تقول ماكرهتش..الليلة نسبقو البيض فالكحل وصباح نكتبو الكواغط ههه الله اودي...
شيماء : الله يمسخك..ماعلينا راني جيت نشوفكم ونشوفك نتا اصطوف...يلاه جيت غير ولبارح قلت نرتاح ونجي نشوفكم..
صطوف : فراسك شي بلان ؟
شيماء : بلان ديال 3 ايام تگدو عليه ؟
صطوف : كنت غانتوب ابتلحراااام...
شيماء"ضحكت تا ضار عصام" : ههههههه ولا الهبيل...دايرة دخلة ديال پتي ڤيلا الي بنيت ف طريق سيدي بوزيد...نهار لول وثاني سهرة بين صحاب طبعا ضروري من وجودكم اعشرةني القدااام "ضارت جيهة عصام" ضروري حضورك العيصومي...
عصام : عصااام اختي شيما عصام المرة جايا نهرس ليك راسك...
شيماء "شافت فصطوف" : فحال الى تمجهد كثر من لول...
صطوف : تديش عليه يعجبك يعجبك ا بب كملي...
شيماء : ونهار ثالث عشا خفيف للختام حيث غادي نرجع ل سويد نجلس واحد 3 شهور ونرجع نطول هنا شوي...
صطوف"هز ايدو وخبشها وبقا شاد فيها" : سيري تهناي من هاد جيهة...
شيماء : ايوى بغيت نرجع نلقاك درتي نتا وياه دارك...
صطوف : سخيتي بينا الكيدارة ؟
شيماء : لا لا غا بغيت ليكم الخير هههههه..احم"شافت فالمحل" ديالمن هاد المحل الي واقفين قدامو ؟
صطوف : ديال عصام حن عليه الله ودار راسمالو...
شيماء : اوووووو على سلامتك اعصام هنية عليك الله يدخلو عليك بالرزق...
عصام : اللهم امييين...
شيماء : هي ناوي دير ليه شي زردة ؟
عصام : ضروري...
شيماء : مزيااان.."شافت ف صطوف" يلاه نخليكم...
صطوف : البلان امتا ؟
شيماء : سيمانة جايا باش مكان نعلمك...
صطوف : والقصارة اش فيها ؟!
شيماء : فيها غير الصحاب...ناقصة الحباب كيجيبو صداع الراس وليني وجد راسك السهرة صباحي قدام لابيسييييين يا سيدي وكاينين حتى شي گاوريات جاو معايا...وشي گور نيت صحابهم..
صطوف : اااااححححح زين السويدي ولا ؟
شيماء"دورات وجهها هنا وهنا وجراتو من الكول بشوية" : زين زينك هاهو قدامك مكاين بو گاوريات...راني منسيتش تبيديقة الي درتي ليا ومشيتي مع القحبة ديال ناهدة وخليتيني كنشوف تا هزيت راسي لبلادات الناس...
صطوف"عوج راسو فيها ونطق بشوي" : و بخيراتك ازين وذنوبك خرجو فيا تا ضربت الحبيبيس على گلبي...
شيماء: غزا فيك الله ههههه...
حل الباب على فرح ودخل حداها لقاها كتفيبري يحساب ليه خافت تاني ولا تبرزطت...
زين الدين : مالك ؟!
فرح"كتحك فكتافها" : ك كاين البرد...
زين الدين : نزلي واجي معايا..."حركات راسها حيدات سانتيغ ونزلات من بعد ما نزل تاهو وضار حل ليها الباب...كان موصيهم تاحد مايخرج حيث كانو لداخل نيت...نزلات معاه حل الباب بساروت ودخلو بزوج لقات جدها جالس حدا سقاية متمتع بالمنضر وزايداه فرحة رجوع فرح من جديد...هزات فيه عينيها وهي تمشي كتزرب لعندو تحنات عليه عنقاتو وحطات راسها على كتفو"
فرح : باااا اهى اهى..
المحجوب : براكة بنيتي من دموع طيبتي گلبي معاك براكة على عينيك الله يرضي عليك...
فرح : بغيت نبقى هنا اهى عافاك ماتديونيش لهيه خليوني هنا عافاك مترجعونيش لانزگان ولا ديك البلاصة...
المحجوب : مابغيتيش ترجعي معايا لسيدي بنور ؟
فرح ؛ لا لا لا اهى خليوني هنا عافاكم اهى...
علي : صافي بنتي غير تهدني مايكون غير خاطرك"هز عينيه فزين الدين وحرك ليه راسو بمعنى سلكو معاها"
زين الدين : فرح سيري لبيت رتاحي شوي ونجيب ليك اسبيجيك..
فاطنة"جات بشوية عينيها مغرغرين كتشوف فيها كيفاش ولات وخا مزال غليضة الا انها بانت فيها مهلوكة مكرفصة فوجهها..نطقات طالبة زهرها ماتشوفش منها شي ردة فعل ماهياش" : بنيتي كبيدتي فرح...
فرح"هزات راسها بزربة وشافت فيها" : مي مييي فاطنة اهى اهى"ناضت بزربة مشات لعندها تجري تلاحت عليها عنقاتها وخشات راسها فحضنها تا غمضات عينيها وتنهدااااات...حيث من ديما فاطنة ونجية الصدر الحنين" اهى اهى ميييييي...
فاطنة"تبكي وتمسح ليها على راسها" : هاااااني احنينتي هاااااني كبيدتي فرحتي هاني..هاني معاااك ماصبتش منجيش ونشوفك ملي رجعتي لينا...
فرح : انننن اهى اهى عذبووووونييييييييي اهى اهى...
فاطنة"على نيتها يحساب ليها على خوتها" : مالخاطرهمش ابنتي ماديري فبالك واااالي المهم رجعتي والحمدي الله عالسلامة...
فرح"بغات غير تنعس حاسة بعيا شدييييييد السخانة بغات دير خدمتها..وجهها ولا حمرررر"
زين الدين"شاف الدار غاتعمر وخافها تخاف تاني وتبدا تغوت وهادشي ماشي فصالحها دابا حيث مرضات" : فرح اجي لبيت ترتاحي..."مد ايدو شدها من دراعها بشوي تطلقات من فاطنة ومشات معاه حل ليها البيت فين كانت هاد الايام تا دخلات بقا واقف عند الباب تا بانت ليه جلسات فوق ناموسية" انا هنا فالدار الي احتاجيتيه علميني ولا علمي الي رتاحيتي ليه...
خلاها جالسة وسد الباب ورجع فين كانو واقفين...جر الكرسي وتلاح جلس فيه دار ايديه ورا راسو وهز راسو لسما ساط النفس بتعب تا غمض عينيه كيحمد الله ويشكرو انه نقزها ورتاحت ليه وترجات منو الحماية والامان...حل عينيه ودورهم لقا بزاف ناقصين...
زين الدين : با ؟!
علي : مشا كيف مشيتو..الحاجة عيات هاد صباح والمحلات ماصابش يخليهم كثر من هاكا...
زين الدين : تت..المحلااااااات"طولها بشكل خاااتر"
المحجوب : خليتي رزقك كلو اولدي سمح لينا...
زين الدين : الحاج خاطيني من هاد الهضرة...حيدها من بالك.."ضار شاف ففاطنة" صفاء ؟!
فاطنة : مشات هي وولدي امين ومراد ووليد يجبو نجية وسيمو من المحطة...
فهاد الاثناء نيت كانت واقفة صفاء وامين قدام طوموبيل بينما وليد ومراد كانو فيها لداخل...واقفين كيتسناو حتى دخل واحد الكار جاي من مراكش...
صفاء : هاهو الكار يمكن"قرات فالبلاكة مراكش تارودانت"...
امين"شافو ناس كينزلو بزاف وهما باقي مانزلو" : موحااال هو شت هادو كاع منزلو ؟...
صفاء"صونات على سيمو لقات تيليفونو طافي برد ليها الما فركابي اكفس سيناريو طاح ليها فبالها وهي يمكن دارو كسيدة وتبجغ تيليفون سيمو هههه" : اوييييييلي المصدي مشا
."شوي بانت ليهم نجية نازلة غير وحدها صاكها فدراعها لابسة جلابة بيضة وشال ذهبي..عاقدة غوباشتها تا بانت ليها صفاء واقفة هي وامين"
نجية"هزات ايديها بدات تشالي" : واااااااا صفياااااو...
وليد ومراد"ضارو جيهتها"
صفاء"وقفت وهزات ايدها بنفس طريقة نجية وشيرات" : وااااااا مي نجيااااااو..."وليد ومراد ضارو جيهة صفاء هاد المرة"
نجية"سلمات عليها بزربة" : وتي جري طلعي عند المصدي را غاتحركو روايد الكار و نعس حلف لاهو بغا يفيق دابا...جري...
صفاء : هاااااويلي على نعس.."طارت كتجري طلعات فالكار الي خوا كلو بقا غير الگريسون الي كيقلب تما وسيمو الي نعس مابغا يفيق لقاتو تسرح فوق الكوسان غا خوات مو البلاصة وجبد عليه.." اويييييييييييلي على الكلب...سييييييمو...
سيمو"الصمت"
صفاء"غوتات تا حل عينيه" : وااااااا كحيليش العزوة...
سيمو : ينعل بو امك فهاد النهار...اش بغيتي...
صفاء : ونوض الكلب نوض راك وصلتي لتارودانت...
سيمو : اللحيمة فدجين جات ؟
صفاء : مزال انا جيت كنتسناك هنا خليتها مزال مجات...
سيمو : فاش شفتيها كتهضر ولا هاربة كي سعدية ؟!
صفاء : وغااا شوية...ونوض احبي نوض القضية مزوهرة هنا..جات واحد جارة زين الدين هنا عرضت علينا لختانة زردة يا جد امك...و الدار ديال عريض الكتاف احبي رياض داكشي ديال الف ليلة وليلة...الهبيرة غا تگعد ليها سعد هرب ليها الفرخ...نوض را عندي بزاف منعاود ليك احبي ونوريك البوكوص يونس جاي تاهو غذا...الكيكس وسابيكس ابب..
سيمو : وصلنا لعند شلحات ؟
صفاء : الزين الي حبو مولانا حاضر هنا غا نوض...
سيمو : ااااااححححح..انووووض بلهلا يحزقو لملتي...
نزل سيمو من الكار سلم على دراري وركبو كاملين فسيارة وليد..مسافة الطريق حتى كانو قدام دار نزلو ودخلو لدار دخلات نجية حادرة راسها حشمانة بزاف ولكن الخاطر ومايدير ماقدراتش ماتجيش تشوف بنتها بالرضاعة الي رجعات من بعد غياب جد طوييييل وشهور شداد دازو عليهم بمسبتها...سلمات على الكل الا زين الدين الي لقاتو طلع الفوق يبدل ويتوضى باش يصلي الي فاتو...جلسات واحد شوي وهي تنوض مشات لبيت فرح دقات شوي وحلات الباب تا طلات عليها...
نجية"دخلات لقاتها متكية ومغطية عاطية بصهر..بقات غاديا تا جلسات بشوييييي هزات ايدها وحطاتها على شعرها ونطقات بصوت منخفض" : كبيييدتي...
فرح"حلات عينيها حمرييين معسلين بالعيا..دورات راسها شافت ف نجية بقات شحاال كتشوف فيها وتشوف حتى حدرات عينيها وخسرات ملامحها معلنة بداية البكاء من جديد" : اهى اهى...
نجية : لا بنيتي لااا ماتبكيش اكبيدتي...
فرح"كتبغي تهضر وتغلبها تنخصيصة من جديد...حتى دورات راسها لديك جيه ماقدراتش تشوف فنجية ثاني...كانها عاطية واحد الحاجز وخا مدارت تاحاجة لكن نجية حسات بيها بغات تبقى وحدها مزال هازا من ديك الجيه وخا نجية مداية ليها والو.." : اهى اهى...
نجية"بصوت حنين" : مقلقة مني ابنتي ؟
فرح"حركات راسها ب لا يعني ممقلقاش منها"
نجية"حطات ايدها على راسها لقاتو طايب" : عيانة بنتي ؟
فرح"حركات راسها ب اه"
نجية : نخليك ترتاحي جيت غي نشوفك توحشتك اكبيدتي وماهناني خاطري نخليك...رتاحي انا معاك هاد اليومين تاتولي شوية ونرجع...انا معاك ابنيتي راكي كبيدتي وخا مولدتكش..."تحنات باست ليها راسها بشوي وناضت خىجات مخلياها فالبيت مع حلات لقات زين الدين واقف لابس تيشرت بيض وسروال قطن ديالو سورفيت فالبيض تاهو مكتوبين بالكحل شعرو مخربق باقي فازگ شوي..باس راسها وايدها مسلم عليها.."
زين الدين : نعسات ؟
نجية : لا خليتها تبكي"تنهدات" مكرفصة بنيتي بزاااف..قلبت ليها راسها لقيتو طايب...
زين الدين"كان جاي شاد فايدو دوا..ضار عند صفاء طلب منها تجي بلاطو الما باش يعطيها تشرب دوا وتجي معاه نيت خلاتو نجية واقف ومشات جات صفاء جايبة ليه شنو طلب حل الباب تا طلات عليها صفاء قالت ليه ناعسة عطاها دوا ووصاها شنو تشربها حيث ميقدرش يدخل وهي ناعسة خصوصا ملابساش مزيان يمكن حيدات جلابة وبقات ببيرميدة وضوني..حركات ليه راسها ودخلات عندها"
صفاء"حنحنات ونطقات بشوي" : فرح ختي كي بقيتي شوية ؟
فرح"مجاوبتهاش غمضات عينيها"
صفاء"حطات البلاطو وتوجهات لعندها قلبها مقسوم على صاحبتها..حطات ايدها على كتفها بشوي حتى قفزات فرح وناضت شاهقة" : ششش ماتخافيش افرح غير انا ماتخافيش...
فرح"صرطات ريقها وغمضات عينيها التعب باين عليها بزااف"
صفاء"هزات دوا" : شربي هذا باش تنزل عليك سخانة وتفوتك..
فرح"حركات ليها راسها..هزات صفاء القرعة خوات منها فالكاس عطاتها تا شربات الما وعاودت شحفات بجهد...عاد خلطات ليها ساشية..وعطاتها تشربها..مدات ليها الكاس وهي كتشوف فصفاء بقات كتشوف فيها وتعاود حتى نطقات بصوت عيااااان بغا يبدا يبح ليها" : صفاااء توحشتك..."غا قالت ليها توحشتك لاحت صفاء زبل ساشية وهي تلاح عليها عنقاتها بجهددد كتبكيييييي فحال شي وحدة تحل عليها الباب على شي حد محبوس..."
صفاء : حتى انا اختي حتى انا اهى اهى..على سلاااامتك اختي رجعتي على سلامتك بنتي خليتيني غانحماق عليك مابقيت حملت نخدم ولا نخرج تا بلاصة اهى اهى...
فرح"حاطة راسها على كتاف صفاء.."
صفاء : رجعي نعسي ورتاحي بينما فاتك سخانة..انا معاك راني شادة كونجي من عند مول شي شخصيا هههه على قبلك هههه"كضحك ودموعها دايزين.."
فرح"حركات راسها ورجعات تكات حسات بالبررررد شديد غطاتها صفاء وزادتها مانطة تا حسات بيها تهدنات وبدات تغمض عينيها وهي تنوض حاسة بالفرحة وراحة نوعا ما..هزات زبل وخلات ليها بلاطو الما عند راسها لا تبغي تشرب وخرجات.."
مشا جيهة دراري سلم عليه سيمو وعيط لمراد تبعو لكوزينة" : شحال مزال ليك لكونجي ؟
مراد : سيمانة هكاك علاش ؟
زين الدين"عاقد حجبانو بتفكير...عض شنايفو شحال قبل ميشوف فيه وينطق" : كتسول فيهم ؟
مراد : شكون ؟
زين الدين"بدا يحك فلحيتو ويشوف فيه"
مراد : اااا الواليدة وضحى..شحال صراحة مابقيت سولت شي سيمانة هادي علاش ؟
زين الدين ؛ وعلاش ؟ شنو ليك معاهم ؟ بيناتكم شي مشكيل ؟
مراد : لل لا احم لا...
زين الدين : تحرك غذا شوف ميمتك سول فيها وفبنتها(نكر نسب عمتو وبنتها هو ولا كيقول غير من جيهة مراد)..ورجع محتاجكم معايا هاد سيمانة فشي غراض فسبيل الله...
مراد : علاش واقعة شي حاجة ؟!
زين الدين"خرج فيه عينيه بتخنزيرة تا رجع مراد لور" : علاش ؟ كتسنى تتوقع عاد تشوفهم ؟
مراد : لاااا لا صافي صباح نطلع لكازا...
زين الدين : تحرك ورد عليا الخبار"هز صبعو بتهديد" بييينااتنا تفاهمنا ؟
مراد : ايه تفاهمنا كون هاني
خرجات من عندها وخلاتها ترتاح مشات بيها عينها...سمعات صوت نجية وامها فالصالون جالسين كيهضرو...وهي تدخل عندهم جلسات حدا سيمو تاهو الي باقي مبقلل بالنعاس...حتى دخل امين تاهو جلس مقابل ليهم
نجية : اخرتنا نمشيو وليني فرح غاتبقى هنا ولا تجي معانا ؟
صفاء"بحزن" : مي نجية فرح ضربات على جديدة وسيدي بنور...
نجية : الله ياربي وعلاش ؟!
فاطنة"تنهدات" : راكي عارفة اش طرا...الخاطر مرض والخوت تفرقو..الله ياخذ الحق فالي حضاهم بعينيه...
نجية : وعصام فينهو علاش ماجا لا هو لا فوزي ؟!
صفاء : الطبيب الي قال مايجيوش دابا تاتعالج حيث الى جاو دابا تقدر تنكس ولا شي حاجة ماعرفتش ولكن هي غا كنذكرو ليها جديدة كتكحل بالعمى وخوتها سمياتهم مابغات تسميهم امي نجية...
نجية"دارت ايدها على حنكها كدور فراسها" : الله ياربي الله واش هاد العين ضربتهم ياربي...
زين الدين"حنحن عند الباب حادر راسو تا عيطات ليه فاطنة يدخل...دخل لعندهم ونطق بصوته الي كيطيح من صفاء النص ووقفتو الي كتجيب ليها الرعب هههه" : ميمتي بلا منرحب بيكم داركم هادي..
فاطنة : الله يرضي عليك اولدي خهههه لا انا خذيتها قلبي رتااح هنا راك شتي نضت نطيب بالفرحات هههه...
زين الدين"حط ايدو على صدرو" : هادشي الي بغيت اميمتي بلا شوار مني..الله اودي عمرو عليا وكلشي ديالكم...
نجية : الله يكبر بيك والله يرضي عليك والله يجيبنا فالصواب
طلع لبيتو جبد لاباراي عبر سكار لقاه مقاد...جبد سيجارة شعلها وتقابل مع الشرجم كيكمي ويتنغم بالقهوة كحلة وفنفس الوقت كيفكر فشنو يدير شنو هي الخطوة الي غايقدم عليها...حط ايدو على صدرو كيحك عليه...بقا شحال تا كمل الكارو وضار هز تيليفونو دار شحال من اتصال رصى الخدمة شوي...ونزل لتحت لقا علي والمحجوب وعبد العالي ووليد وامين جالسبن كيهضرو الدار الي كانت خاوية سنييييين هادي والفرحة غايبة عليها جات فرح وعمراتها بحبابها والخايفين عليها...وقف علي وجا لعندو...
علي: زين الدين انا صباح غادي نمشي ان شاء الله...هذا جهد خلينا الخدمة واقفة اولدي...
زين الدين"ربت ليه على كتفو" : سموحات الحاج...
علي : وايلي هههههه...
زين الدين : ترجع الويكاند دير معايا واحد الخير ؟!
علي : الي علمتيني بيه قبيلة !؟ ايه كون هاني...نجيب معايا المدام واسامة تاهو نرجعو تاني هههه
زين الدين : ماكرهتش تحضر عائلتك كلها...
. وصل وقت العشا وجداتو هاد المرة نجية بمساعدة صفاء وزين الدين يتقدا ويجيب ليهم...وجدو دجاج محمر بالدغميرة...وفريت وشليضات...خلات لفرح حقها طلعاتو ليها فاطنة هاد المرة بقات معاك تا كلات شوي وعطاتها دوا ورجعات تنعس..العيالات شدو بيت ورجال بيت والمحجوب نعس فبيت زين الدين...كل شد بلاصتو ونعسو تا صبح الصباح وجدات فاطنة لفطور بمساعدة نجية عطات لصفاء فطورها طلعو ليها يلاه غاطلعو تا وقفها زين الدين حرك ليها راسو باش تبعو...مشات لبيت دخلات لقاتها جالسة كتشوف..
فرح"صوتها بح" : فين زين الدين كحكح كحكح..
صفاء : ضربك البرد..هاهو عند الباب بغا يهضر معاك لبسي عليك باش يدخل.."عطاتها كاپ لبساتو فوق بيجامة بسروال طويلة لبساتها وناضت من فراشها كتكحب تا سمعها زين الدين..جمعات ليها شعرها..وقفات وتمات غاديا بشوي راسها كي البيضة الخاسرة..ضحكة غااايبة على وجهها البشوش..تا خرجات لعندو
زين الدين : شوية"هز ايدو قاس ليها جبينها وهي عينيها فلارض"اجي معايا لفوق ؟
فرح"حركات راسها..اما هو شاف فالمحجوب من بعيد حرك ليه راسو وهو يحنحن ليها باش تمشي معاه طلعو لفوق حل باب الصالون الكبير كانو لتحت هازين عينيهم لفوق كيشوفو فيه حل باب صالون حتى دخلو..جلسات بشوي..وتحنى هو مقابل ليها"
زين الدين : مرتاحة هنا فرح ؟
فرح"نطقات بصوت مبحوح" : اه..ماترجعنيش لتم عافاك ماتدينيش لهاديك البلاد..خليني هنا معاك..
زين الدين : منصيبش نخليك افرح...ومانصيبش تبقاي معايا وحدك..الحاج راجع لخدمتو جدك محتاج يرجع عندو كونطرول راكي شفتي الصحة خانت ولات على گد الحال...شكون يبقى هنا من غيري انا الي منصيبش نخليك وحدك...
فرح"دلات شنيفاتها حابسة البكية ونطقات تا شقات ليه قلبو بداك صوت الي مشا ليها" : عييتي مني حتى نتا اهى...
زين الدين : ابدا الفرحة ديالي...نجي لهاد المحنة ونعيا منك وانا دازو عليا محاين معاك وشربت المرار باش رجعتي ليا..لقيتي راحتك معايا ؟!
فرح"حركات راسها"
زين الدين : راحتك ديما معايا..مانصيبش نخليك ومانصيبش تبقاي معايا وحدنا بلا موجب شرع.."شاف فيها بعينيه كياكد" ضروري مانديرو رباط شرعي يخليك تبقاي معايا ونعطيك العاهد مكاينش الي يقلق راحتك ولا يقلقك...للمرة ثالثة افرح تزوجي بيا..
فرح"مع قالها مع شهقات كتبكييي حيث فهماتو وعرفات انها مغاتقدرش تبقى معاه وهما ماجامعهم تا رباط حلال" : اهى اهى...غادي نبغي نتجوج بيك وتموت حتى نتاااا اهى..
زين الدين"عرفها قصدت يونس الي مات نهار العقد" : الموت علينا حق العيب ماشي فيك داكشي مكاتيب الله...انا بغيتك..تعيشي معايا فينما رتاح خاطرك..ونعطيك العاهد منقرب ليك وكان تولي لباس وترجعي تشيتشونا ديالي من تما لداك الوقت ندير الصواب كما يجب (العرس) ونديك من وسط داركم بعرسك ...لا دابا ولا من بعد راكي فرحة گلبي وداري...
كلام زوين مقنع لضروفها ولحالتها و لموقفها فهاد الوقت الي هي رافضة فيه بتاتا انها ترجع لجديدة وحتى انها مكتسميهاش ومكتسميش الاشخاص الي عاشت معاهم عمرها اقرب الناس ليها..النصف اللول من حياتها سدات عليه بالمرة وقتلاتو بهاد المعنى...يمكن زين الدين الشخص الي بقا شاد معاها الخاطر فوق الجهد...ويمكن الضرر كان قليل منو ليها مقابل الضرر الي شافتو من اقرب الناس ليها والي ماعمرها شافت منهم الاذية فلحظة وبين ليلة وضحاها كانو هما المتسببين فالاذى الاكبر الي خلاها تدخل فمجموعة من المشاكل النفسية...المرض النفسي اصعب من المرض الجسدي بحيث كيحتاج وقت طويل ومواقف تتبث...
زين الدين"قال هاد الكلام وعينيه منزلوش من على وجهها وعينيها الي كانو كيشوفو فالارض.." : مايحتاجش فرح نگوليك شكون انا..ماتخليش فبالك لقيتها وجيبة ندير معاك الحلال(زعما ماتفكىيش انني استغليت ضروفك باش نتزوج بيك)..معرفتك بيا فوسط المشاكيل الي وقعات لينا كافية وموفية...
فرح"كتسمع ليه وعينيها كينزلو منهم دميعات بشواااايا بطريقة كااافية توصل الاحساس وتوصل المعنى بدون ماتتكلم"
زين الدين : عاطيين وعطينا ومزال نعطيو جهدنا كامل معاك..رتاحيتي هنا ؟ الله اودي فينما رتاح خاطرك بقاي..كلشي ديالك وكلشي معاك..."شير بايدو ناحيتو" حيديني من بالك انا ديما معاك وماگلتها الا وگاد بيها..جدك مايحتاجش واجب ديالو هذا يبقى معاك..وكان الصحة مامعاوناهش وهنا فتارودانت صعيب الحال ماشي بلادو فين كاين رزقو وفين يدير الكنطرول عندمن متبع...خالك ممطولش ويرجع فحالو...صاحبتك خوك محمد رضى "مزال كيهضر وهي تنطق"
فرح"كتبغي تهضر وترجع تسكت كتغلبها البكية" : عارفة عاارفة اهى...انا م مم ماا بغيتش نبقى وحدي اهى...
زين الدين : حالتك ماتبغيش تبقاي وحدك..مانصيبش انا برااسي افرح نخليك وحدك..ماشي لخاطري,, ماشي لخاطرنا شفنا الويل الكحل وحنا قالبين دنيا عليك باش لگيتك ونخليوك ؟
فرح : با ونتا كنتو كتقلبو عليا...
زين الدين : كلشي من الطرف تالطرف افرح كان يقلب عليك ماشي غير انا..."قصد ليها تا خوتها باش يتحلو عينيها عليهم وخا غير شوي".. العزيز البعيد القريب..قيمتك الفرحة ماتقدر لا بمال ولا بجاه...
فرح"تفكرات اول ايام خدمتها عندو فالكلينيك وكان كيقولها ليها"
زين الدين : شوفي شحاال من واحد جا لهنا عندي من بلاد بعيدة..على جال يشوفوك..
فرح"هزاتها واحد تنهيدة تا ساطت النفس حارقة حس بيها طااايبة وصلاتو..ماقالت والو حدها حركات راسها"
زين الدين : شوية بشوية حتى وكان ترجعي وعلاش لا الفرحة ديالي ترجعي حسن.."طبطب ليها على ايدها وناض وقف خاشي ايديه فجيابو كيشوف فيها وفنفس الوقت كيهضر" ماعليش فكري هاد اليومين وخاطرك فوق الخواطر...
لاح ليها هاد الهضرة منها تفكر ومنها ماتخافش حتى اذا موافقتش عندو بزاف الطرق ممكن يلجأ ليهم وخا صعاب يحاول باش ماعطا الله...لكن الطريقة الانسب والشبه الوحيدة هي هادي انها تكون معاه مادام رتاحت ليه وحاسة بالامان معاه ف خاصهم رباط شرعي باش تبقى معاه راس فالراس حلالا طيبا...
زين الدين"بدات تكحب ثاني" : يلاه رجعي نزلي فطري شربي دواك ورتاحي..
ناضت كتحك فجبهتها نفس الحركة الي كانت كدير شحال هادي وكيبقى يشوف فيها فاش كتوثر ولا كتحشم وماكتلقى ماتقول..حنحن باش توقف تقابل معاها جر ليها الكاب بشوي حيث كان طايح على كتافها وشير ليها براسو باش يتحركو نزلات رجعت لبيت لقات صفاء وفاطنة ونجي جالسين فيه تسناوها تا دخلات وكبات ليها فاطنة اتاي الي كيعجبها...اما هو مشا نيشان سول على مراد لقاه مشا شد طريق راجع لكازا باش يشوف توبا وضحى...هز عينيه فوليد...
زين الدين : وليييد.."قرب لعندو..جبد تيليفون كتب ليه فميساج و رسلو ليه فتليفونو" ماعليش تحرك ل فارماسي خوذ هذاك السيرو..
وليد"قرا لميساج ونطق اسم سيرو " : tplexil ( خطيييير هذا ل كحبة مكتكمليش سيمانو وكترطاب مذاقو فحال شكلاط ههه..الي فيه ديابيت ممنوع كاين سيرو اخور فقط قولوها لصيدلي هو يعطيكم واحد خاص بديابيتيك)..وخا دابا..."خرج وليد يجيب السيرو...جلس زين الدين فالصالون معاهم فين حاطين الفطور طبعا طابلة عامرة كتشهي النفس وتفتحها.."
زين الدين"شاف ف عبد العالي" : سي عبد العالي "هز فيه عبد العالي عينيه" محتاج نهضر معاك من بعد"غمزو باش يفهم بالي بيناتهم بغا يهضر معاه" ماعليش ؟
ع.العالي : ايه مرحبا...
سيمو"قرب لعندو ونطق بشوي" : خويا زين الدين...
زين الدين"شابك صباعو وجامع ايديه تحت ذقنو..سمع سيمو وقرب راسو عندو عاطيه وذنيه"..
سيمو"نسا راسو هههه" : مايمكنش نمشي نشوف الهبيرة ديالي ؟...
زين الدين"هز حاجبو" : شنو ؟؟؟
سيمو"تفافا" : ديالك...هاء تانا لحيمة فدجين...
زين الدين"جمع حجبانو وضار شاف فيه"
سيمو"قرقشو عينيه بالدعقة ههه" : فرح فرح الخيالي ختي...
زين الدين"حرك ليه راسو" : سير...
سيمو"غا قالها ماعرفو امتا طار من قدامو كي زواق مشا يجري..وقف عند الباب ديال البيت ودق حتى كيسمع صوت كحبتها مزعزع فحال شي راجل" : مشات فرح ورجع فريد...
دق الباب بشوي كيسمع الكحبة ديالها...واحد الشوي حتى تحل الباب وطلات عليه صفاء كتشوف فيه ويشوف فيها كترمش فيه ويرمش فيها...كيتسناها تقول شي حاجة.وهي كتسناه يقول شي حاجة بقاو شوف فيا نشوف فيك اطاجين الحوت...
سيمو : بب
صفاء : حوووبي...
سيمو : تخليني ا بب واقف هنا ؟
صفاء : تحصلني مي كنهضر معاك يزوجوني ليك..
سيمو : انا منصيبش نتزوج بيك...
صفاء : علااااش ؟
سيمو"كيهضر بشوااااااايا" : اباقي صغييير اباقي صغييير بغيت نكمل قرايتي...
صفاء. : كيفاش كتمشي...
سيمو : گوووود بلا زواق بلا ن فاق...خوك زوين فالمعاملة وعشرة فوق العمالة ماشي معاك بنيتي تغفلني نخلوض معاك نيتي...كنواطي ونقطع شانطي...سولي عليا من بغيتي يقوليك عند المعقول فين جيتي...وكي جيتك ؟ لا مثقتي سولي الي بغيتي ولا فرح هبيرتي تعطيك خبيرتي...وخليني ندخل عندها وتسمعي بوذينتك شنو بغيتي اكبيدتي ؟
صفاء"مطمطات فمها بشكل خاااتر طلعاتو وهبطاتو وهي تبعد على الباب وشيرات ليه" : مممم دخل دخل نشوف...
سيمو : يا بسم الله.."دخل كيطل بعينيه بغا يشوفها من الي جا ماقدرش يشوفها خصوصا كانت مريضة بالسخانة...حتى بانت ليه جالسة حادرة راسها بين ايديها كاس ديال اتاي شاداه وساهية فيه...وجهها بانت فيه التسخسيخة ديال كلشي نفسية المرض الجسدي كاع هادو عوامل خلاتها تكرفص بالمزيان..."ختي فرح !!
فرح"ماسمعاتوش بحكم كانت ساااهية كتفكر عقلها مرفوووع ماهياش هنا كاااع...حتى نغزتها فاطنةوهي تهز فيه راسها عينيها منفوخين وجهها مزنگ بكثرة الكحبة..بقاات كتشوف فيه تا غرغرو عينيها"
سيمو : وخا نسلم عليك اختي ؟
فرح"حدرت عينيها حطات الكاس بشوييي وهي تنوض وقفات..بدات كتشوف فيه وهو يشوف فيها وهي تحرك ليه راسها غااا هي حركاتو ماتسناااش كاااع بحركة منها مشا كيزرب لعندها حتاها عليها بتعنيييييقة حااااارة...نفس الطريقة باش تعاملت مع صفاء تاهو نفس الشيء كتحط راسها على كتفو وعينيها الي كيهضرو نازلين منهم الدموع الدموع الي مابغاوش يساليو الدموع الي هي كتكرهم ولكن ماعندهاش بديل من غير انها تنزلهم مهما كان كينفسو عليها..."
سيمو : توحشتك اختي...
فرح"الصمت"
سيمو ؛ خليتي بلاصتك كبييييرة خليتي كلشي الهبيرة...
نجية"كتمسح فدموعها الي نزلو" : خلاتنا مهولين عليها كي راس المگطوع ماعرفنا عشانا من غذانا ولا فطورنا...كلشي غبر وكلشي تشتت...
فاطنة ؛ عوينة وضربتهم يا"بغات تهضر وهي تسكتها صفاء"
صفاء : صااافي امي هاهي رجعااات...هذا هو المهم...
فرح"هزات راسها ومسحات دموعها ورجعات جلسات فين كانت جالسة.."
سيمو"ضار شاف فصفاء وهي تغمزو بمعنى خليها على خاطرها...مالقا ميقول خلاها كيف قالت ليه صفاء..بقا شوية وخرج رجع عند الرجال...حتى دخل وليد هاز فايدو ساشية ديال سيرو الي كتب ليه زين الدين..شدها من عندو وخرج دق عليهم الباب..مد لصفاء سيرو ووصاها تعطيه ليها وهادشي طبعا سمعاتو فرح.خصوصا فاش سمعات صوته فيقها من سهوتها...ورجع عند الرجال ثاني هز كاسو ديال القهوة مشا لبيتو بالخف جبد باكية الكارو الي حاط فوق طابل دونوي..جبد منها واحد وبريكة ونزل لقا عبد العالي جالس حدا السقاية كيهضر فالتيليفون وفنفس الوقت كيتسنى فيه...
زين الدين"جلس شعل الكارو بدا يكمي فيه حتى كمل عبد العالي المكالمة وضار عندو" : شلا مايتقضى واقف ولا ؟!
ع.العالي"ضحك" : هههههه شلا ماوقفت ماشي مشكيل المهم صحة الواليدين Je m'en fous...
زين الدين"هز حجبانو وحطهم شاد الكاس بيادو وايد فيها كارو شاعل..بقا شحال ساكت..حتى استانف الحدث وقالها ليه نيشان بلا زواق شن طن" : علمتها بالزواج...
ع.العالي : ايه وشنو گالت ؟
زين الدين"حط الكاس وحك لحيتو" : خليت ليها الوقت..سوى بغات ولا مابغاتش مكاينش الي يخليها وحدها...
ع.العالي : شكون يبقى معاك ؟ الواليد راك عارف..داك الولد محمد رضى ولا البنت صاحبتها ولا واحد فيهم ميقدرش يبقى هنا اصلا مامرتاحاش معاهم من غيرك...شنو الحل ؟
زين الدين : من هنا لداك الوقت ربي معانا.."شاف فيه"علاش ماديرش فبالك تبغي ؟...
ع.العالي"تبسم حادر عينيه" : ههه الى بغات مادى بينا اسي البغدادي..مانلقاوش ماحسن منك..الجهد جا فوق جهدنا..راك عارف انا كنهضر بناءا على اشنو شفت..حيث معرفتي ببنت ختي قصيرة..مغاديش نعرفها حسن من الوليد الي قابل وفوزي تاهو..
زين الدين"شرب جغمة من القهوة وحط الكاس وشاف فيه بنضرة جدية..وفنفس الوقت كااارهة بحكم الي غايهضر عليه هاز من جيهتو بزااااف...لكن كيبقاو الاصول اصول وللضرورة احكام..والمعقول معقول" : لا بغات !! متحاج منك شي حاجة..
ع.العالي : الي هي ؟
زين الدين : ولابد تعلم خوها الكبير..هضر معاه شرح ليه وعلمو بشنو كاين...سوى بغا ولا مابغاش ماعلينا غير نعلموه...نهار تولي لباس وعلاش لا مكرهناش يتصافاو الخواطر ديك الساعة نرجع نخطبها من جديد بالعادة والتقليد الي كبرنا عليهم...ويدار ليها عرس حالها حال البنات.."هز صبعو كياكد" علم حتى باها كيما كان الحال باها سوى خايب ولا زين..
كل مكيهضر زين الدين عبد العالي كيزيد يعزو ويحتارمو على هاد العقل الي عطاه الله والوقفة الرجولية الي وقفها معاهم ومع باه...وكيزيد يخليه يفكر انه يمدد الايام باش يبقى معاهم...طبعا كلام زين الدين صحيح عصام وخا يكونو المشاكيل تا يعياو ضروري ميكون عندو علم بالخطوة الي غاتقام وضروري مايعرف ويشرحو ليه سوى بغا او مابغاش كيبقى خوها الكبير ولي امرها ومسؤول عليها لا هو لا باها وخا يخياب تا يعيا كيبقى باها ومزال فالحياة....
ع.العالي : ماقلتي عيب..العشية نطلع لجديدة...
زين الدين"هز ايدو موقفو ونطق" : مادير والو..مزال ماعطاتنيش جوابها...باش مكان ولابد نعلمك...
عبد العالي : هو صراحة انا راجع راجع عندي منقضي..نجيب لبا حوايجو وشي دوا خلاه...
زين الدين : الباقي عندي هنا..لكونطرول مزال ليه 15 jours..مزال محتاجكم. لواحد الطهارة فسبيل الله.ولابد مانديرو ليه صدقة...
عبد العالي : اييه داك الولد الي عاودتي لينا عليه فالفطور..
زين الدين"حرك راسو": وليد راجع تحرك معاه ورجع مع مراد ولا وليد نيت...
بقا كيهضر معاه يمكن عبد العالي لقا راحتو مع زين الدين حيث طبع عبد العالي فشكل ماشي اي واحد كيشرك معاه الهضرة ومن خلال هضرتو مع زين الدين لمس فيه وجه التشابه بينو وبين عصام...وصل وقت الغذا كانت فرح ناعسة عيات مورا الفطور ونعسات حتى من الغذا مفاقتش ليه ملي شافوها مرتاحة والكحبة حابسة ماقدروش يفيقوها باش متجاهدش عليها...
في نفس الوقيتة هاد المرة ف كازا بالضبط اناسي..وقفات توبا كتلبس فحوايجها ضارت عند ضحى لقاتها جالسة لابسة سورفيت صيفية فالبيج شابكة ايديها وعينيها فلارض...
توبا : يلاه نوضي...
ضحى"وقفات بدون ماتكلم معاها..هزات توبا صاكها دارتو تحت باطها وجراتها تا زادت قدامها خرجو من الدار تا مشاو جيهة الشارع خذاو طاكسي كبيير تا وصلهم لمحطة ولاد زيان"
توبا"التيليفون فوذنيها كتهضر" : هاني فالمحطة فينك نتي ؟ صافي شفتك شفتك"تمات غاديا تا وقفها واحد الكورتي"
كورتي : ختي شماعية اسفي ؟!
توبا : لا مغاديا فين.."بقات كتبعد منهم وهما شي لصق شي باغي يديها صحة فين بغا شي ضارب مع واحد عليها وضحى هادشي كتسمع فيه وليني العقل مكاينش هنا...حتى لقات جميلة واقفة هازا صاك كبير شوي تحت منها دايرة شال على فمها وواقفة بعيييد..." ياكما تعطلنا ؟!
جميلة"ضارت عندها" : لا مزال هاوا شوي ويخرج زيدي خلصي باش نوصلو شوي بكري شوفي اش يگوليك.."كتهضر وطلع وتهبط ف ضحى"
توبا : واخا زيدي"ضارت عند بنتها" تحركي عليا نتي..
خرجو جيهة الكيران وقفات جميلة دايرة تيليفون فوذنيها كتهضر مع واحد الكورتي خمسة دقايق حتى جا عندها بقات تهضر معاه شاف جيهة ضحى وتوبا حرك ليها راسو وهي دور عندها جميلة شيرات ليها باش يجيو..وصلو عند واحد الكار حاشا واش يقولو عليه كار...كلو مكحكح من برا..خلصات توبا ثلاثة البلايص..وطلعات هي وضحى الي حبستها الردة من داك الكار البلايص مسخين بقاو غادين ويقلبو فين يجلسو حتى بانت ليها واحد البلاصة يلاه غاتجلس فيها تا لقاتها عامرة بالترجاع..حسات بالدنيا كدور بيها على شوي وترجع وهي دور عند جميلة...
توبا : الله يا جميلة واش هاد الكار فين جبتينا ؟!
جميلة : وهو الي دايز من تما دابا الحاجة وعاد هاد الولد كيعرفني مزيان كيوقفني فالطريق ديال دوار نيشان...
توبا : واش مكاينينش البلايص ؟ اويلي غانمشيو واقفين ؟"دايرة شال على فمها كتقلب فين تجلس البلايص كلشي عامر الا ديك البلاصة..كلشي موسخ معلك المساكي لاصقين فيه وطااااايب بالسخونية والصيف والحالة ماتبغيها لعدوك..." اشريف مكاينينش البلايص فين غانجلسو ؟!
الكريسون"مشا تال عندها" : غا صبري اميمتي راك عارفة صيف هذا الوقت عامرة...
توبا : را زعما خلصنا البلايص ويلي غانمشيو واقفين ؟
الكريسون : هادشي الي عطا الله نتي راك نازلة غير قريب هادو باقين طالعين تال خنيفرة ماعندي كي ندير ليك"طل على البلاصة" هاوحدة خاوية جلسي فيها...
توبا : شلا فين نجلس فالوسخ...رجع ليا نص الثمن باش خلصتك ولا خليني نزل...
الكريسون : ههههه اميمتي راك عطيتي غير 6 دراهم لبلاصة طامعة ف ثلاثة دراهم ترجع ليك ؟
توبا : راهم ثلاثة البلايص...
الكريسون : نعطيك انا زيادة ونزلي نتي كاع مالنا فهاد الحبس..ماعجبكش الحال نزلي كلشي عامر لا لقيتي ماحسن الله يعرضك السلامة...
توبا : عطيني فلوسي مابغيتش انا نمشي فهذا..
الكريسون : ماعندي مانعطيك قطعت ليك الورقة ميمكنش ترجع شوفي شكون تبيعيها ليه"ضار كيبرگم" ووحل نتا مع البشري على جوج ريالات..
خلاها غير كتشوف اما ضحى ماهضراااتش ولا قالت شي حاجة الدوخة حاسا بيها وردة وحابساها بزز...ضارت جميلة عند توبا..
جميلة : ماعندك ماديري كلشي عامر وهذا كنعرفو غير صبري الحاجة لا بغيتي غراضك..."شافت فضحى" اجي بنتي جلسي فهاد الدريجات اجي وجهك هرب منو اللون.."جراتها من ايدها وداتها جلساتها فالدروج منين كيطلعو الناس..الخنز كيعطي والحال طايب غوات واحد الوليد صغير كاسر دنيا حالة ماتبغيهاش لعدوك..ماكملت ليهم الباهية غير مع وحدة فالكار رشات واحد الريحة من دوك روايح ديال العطار...
يتبع...
التعليقات
لا توجد تعليقات بعد، كن أول من يعلق.