ولادة من رحم الفساد الجزء الخامس

جات لومبيلونص بمجرد ماعطاهم الاسم ديالو جاو دغيا دخلو كيجريو هازين النقالة وكيعبرو ليه لانه عطاهم التقرير فالهاتف نيشان ...هما كيهزو فيه وهو فهاد اللحضة دخل لبيتو جلس حتى جلس على طرف الناموسية حاط ايديه وكيشوف فالفراغ ..كيدوز بلسانو حتى كيعضو بعصبية ويرجع ينفخ بتعب من كترة التفكير فالي وقع ...ماشغلوش الشاغل فالغالي كثر من تفكيرو ف فرح والزيارة ديال الخطبة يعني هنا هو مقبل على قرار جديييييد وخاص يتحمل مسؤليته ...

زين الدين"حل صدايفة القميجة الي بقاو وشرعها بالنترة تا بان صدرو بالكااامل صحيح بالرياضة الي كيمارس اغلب اوقات فراغه والي ضرورية ليه بحكم داء السكري كيخص سحرق السعرات الحرارية ...قوي مكتسي بالشعر ،كرش قاصحة مفيهاش ليزابدو باينين لكن من نوع الي منفوخة شيييي شوييي ومسطحة يعني بالعربية بطن مشدود...كيمارس لعب كرة القدم فور مكتاح ليه الفرصة هي ورياضة الباسكيط ك رياضات خارج لاصال الي كان كيتريني فيه ف دبي ...فينما كان وقت الفراغ ضروري كيخصص ليه وقت لممارسة رياضة لانها من تريتمون الي معطيا ليه على حسب السكري...كمل حلان صدايف الكمايم ونترها حيدها عليه ناض بالواقفية حيد سروال دارهم فوق دراعو ودخل لدوش حيد من سروال لوازم الي فيه ولاحهم فالسلة ...توجه لافابو غسل وجهو وحك سنانو من الاكل غرغر باندبوش ففمو لمدة بسيطة استغلها فيها وغسل ايدو بصابون معقم مزيياااان مكيديروش يوميا باش ميتضرروش ليه ايديه ولكن الاهتمام بنضافة وتعقيم اليدين عندو ولابد بلا خدمتو هو نقي بزاف حريص على هادشي يمكن ادق التفاصيل تبان مبالغ فيها لكن طبيعتو وخدمتو كتفرض عليه النضافة والحرص عليها بلا ذكر الاغتسال يوميا الى مدارش دوش كيغسل وجهو وايديه ضروري...كمل النضافة بدل البوكسر ومشا توضى وخرج سمع صوت اذان المغرب جبد شورط قصير لبسو ولبس عليه الفوقية هز صلاية دارها فوق كتافو ومشا لواحد البيت فالجنب دايرينو مخصص لصلاة فيه فين كيتحطو المصاحف كاين بالاحجام طويل على حسب وقفة فالصلاة باش كيصلي بايات قرآنية وهو فاتح المصحف او صغير فاش كيكون مربع فوق سجادة وكيقرا ...وفيترينا فيها كتب الاحاديث وكتب اخرى والمصاحف وبلاصة سجادات مطويين ومجورة فيهم تسابيح،،وفيها باب صغير فين كيتحطو عبايات صلاة بالنسبة لتوبا ولا ضحى الي بينها وبين صلاة غير من رمضان لرمضان مع الاسف... بيت مفتوح على شكل كوان كبييير مفيهش الباب وانا بابو على شكل تقاوس ..زربيتو حمراء رطبة ونقش السقف بعود العرعار الي مديرو غييير فهاد الكوان فقط وزليج بلدي.....سالا الاذان وتسنى واحد خمسة دقايق ووقف يلاه غايقيم الصلاة تا دخل الحسين عليه باش يصلي لقاه تما...

الحسين : تسنى نصليو جماعة !!

زين الدين"حرك راسو ومشا لسجادات جبد ليه وحدة فرشها قدامو فين مفرش شاف فيه الحسين ونطق هو" : صلي بينا...

الحسين : ايييه "تقدم هو لسجادة هزو كفوفهم كيدعيو قبل ميقيم الصلاة وقال " الله اكبر الله اكبر..."صلاو صلاة المغرب نيشان بلا ميسولو كيف بقا ولا اش دار عرف الى كان شي مشكيل غايقولو ليه الحسين ...كملو الصلاة وجلسو واحد الشوي ما يقارب خمسطاش دقيقة قرروها بزوج بدون ميتشاورو مع بعضياتهم بغاو تكون خمسطاش دقيقة راااحة نفسية يتحطو فيها الهموم ويرتاح القلب بذكر الله فمكان صغير مقدس وطاهر ....

الحسين"تنهد وشاف فيه الي كان جالس فوق سجادة ديالو طاوي رجل وموقف وحدة حاط مرفقو على ركبتو وايدو دايرها على فمو كيشوف فلارض وحجبانو مرفوعين " : شوية ولدي ؟!

زين الدين"حرك ليه راسو وغمض عينيه بمعنى هاني مسلك"

الحسين : تمشي توصل على عمتك ولا تبقى هنا...

زين الدين"بقا ساكت شحال جهد دقيقة قبل ميهز ايدو يشير بيها شوي فحال كيقول تت او بفف او خزيت "

الحسين : حالتو مزيانة دير غير الواجب مع عمتك وبنتها خصوصا ديك البنت حسسها را معاهم الي يعولو عليه جناح متين ميهزو ريح وخا ماشي دورك ولا مسؤليتك حسبها يتيمة الحيين ...

زين الدين "حك وجهو بتعب. وقهرة وخا هكاك ضحى كتعز عليه بزاااف كون لقات بو ولا ام قادين نيييت كون واهلييي ولكن الام بوحدها غلبتها..." : شوي ونمشيو...مابيه والو طاح ليه طونسيون ...علمتهم بشنو يعطيوه "شير لراسو" وليت انا نطلب عليه عبدو ربي يتهلاو فيه ...شتي فين وصلنا ؟

الحسين : الله يجعل شي براكة واخا هكاك را من عائلتك منك وفيك...

زين الدين"بنضرة استهزاء" : متايب الله معاه ..." شاف فساعتو" يلاه نوصلك معايا لمحل ولا دار !؟

الحسين"وقفو بزوج" : لا ديني معاك من بعد لدار ودير شي وقيت ودوز عندي نعطيك شنو خاص لموديل الجاي رجع لينا سوق اولدي لجيهتنا...

زين الدين"غادي الحسين سابقو طبطب ليه على كتفو وجا بجنبو معنقو باس ليه راسو " : الخاطر الي عطيتيني فوق خاطرك تستاهل ماكثر ...

الحسين"ضحك من قلبه " : هههههههه وسع ليا غانتا خاطرك وميكون غير خاطرك...وسالي صباح دوز نهضرو فشلااا ما درتي راك بنتي ليا غرقتي راسك...

زين الدين"حط ايدو على ودنيه" : فاتو فاتو "زعما قاتو الوذنين" بدينا نديو فذنوب ولاد وبنات الناس...

.واقف كهز فسگايط ديال الغنمي ونص كتف ديال واحد العجل كيدخل فيهم لثلاجة ...حتى دخل معاد نقز من فوق الحويط وتلاح لداخل...شاف فيه ورما الكارو فلارض عسف عليه وهزو لاحو فسطل زبل...

عصام : ساليتي شغلك نتا ؟

معاد"كيقاد فالطابلية ويقلب على سطل الي غايدير فيه تيد وجافيل باش يسيقو المحل قبل ميتسد حيث العشا على مقربة انه ياذن" : ساليت باقي ليا شي وراق ن إيگاليزيهم فالمقاطعة تال صباح حيث تعطلت مغاديش يصايبوهم ليا ديك ساعة..وطلعت تا ل شعيب دكالي (لافاك) خذيت غير لادريس ديال سيت...

عصام : شنو باغي دير نتا قلتي ؟!

معاد"بابتسامة" : فحال ختي فرح هههه

عصام"حرك ليه راسو بافتخار لختو حيث كانت كتحفضو وتراجع معاه تا نجح فالباك بنقطة زوينة" : لباس الي بان فيك الخير..."ضرب ليه على كتافو فرحان حيث وخا خدام عندو متعلم الا انه ديما كان كيحرص باش معاد يقرا وميهملش قرايته .."الله يرضي عليك والي خاصك علمني"شد ليه راسو بين ايديه " اش گلنا

معاد : يحفضك ليا اخويا كون هاني...

رجع كمل شغلو وعصام تاهو تا كمل خشا لحم فثلاجة جاو الكليان تقداو عطاهم اش بغاو وفايدو تيليفون كيصوني لصطوف الي ستة المرات وهو يصوني ليه ومكيجاوبش حتى جاب الله تيسير وفتح الخط...

عصام : تا مالك اصحبي فهاد الحبس ؟

صطوف "ماشي فخاطرو" : مبرزط ليا الكر اصحبي هاد اليومين قاشع شي تواشا ماتماش ...

عصام : شي باس مكاين ؟

صطوف : وشلا بلانات وتبصبيص اعشيري بالرب الجليل والي خلق لارض فستيام تايطيحو البطاين. ...

عصام : واش باقي معمر عقلك اتبي بداك رهوط ديال درهم ؟ بالرب المعبود اعشييري الى معطاوكش طلق الق*** لهلا يقلب ...الوسخ !؟ الوسخ اصحبي ندير فيه كري !؟ العقل مكاينش عندك وباغي دير عقلك فالوسخ ...

صطوف : سلعتي خدام فيها كنضرب تايبغي ليا راسي...نهار نسالي من التقبة نحس بيها وساعت على تبي لوح فالبركاصة تايجيو الكلاب يتمتعو بيها ...انا مزال شادها والكلاب عند باب داري منعقلش على الي يبيدقني من لاخر ...جات فالعشير اصحبي فالعشير

عصام : وبوك يغدرك كتسنا فالعشير يكون معاك ؟! اربي لماسير غا تقااود عليا كون بنتي ليا نطحن دينمك فهاد طحانة رجلة ديال ز*** ..."قطع عليه فالبلاصة ...كمل شنو كيدير ...اما فالناحية الاخرى او بالقرب منه فحي السعادة ردات العشا يطيب وجالسة معاها صفاء وسيمو كيتفرج مالقا فين يخرج ووصاه عصام يبقى حتى يجي باش يهضر معاه على شي بريكول يترزق فيه ...دخلات عليهم لقات صفاء شادة تيليفون كتبقشش فيه مكونيكطيا وفنفس الوقت كتدفع سيفيات لخدامي جديدة ...هزات فيها عينيها ...

صفاء : اجي لهنا اجي ...

فرح"بامتناع" : سيري بعدي مني الكلبة باقي العضة كتوزوز ليا فلحمي تفووو...

صفاء : تي غا تعالي را لا بغيت نعضك ميشدني عليك والو نهار نبغي نرفس دينمك متعرفي امتا ...خليييينا پيس اند لوڤ واجي نشوفو شي لعيبة الحبس...قصري شر وهنيني...

فرح"خرجات فيها عينيها وجايا عندها" : اهاااه شكون الي يقصر شر انا ولا نتي !؟"جلسات حداها"

صفاء : اكيد نتي بدون نقاش"تقادات فالجلسة وهي تدخل لانسطاغرام وشافت فيها" اسميت داك عريض الكتاف ...

فرح : لاش بغيتيه اختي ؛؟

صفاء"صغرات فيها عينيها" : واش بديتي تخافي على رزقك ولا وذنيا غيسو ؟

فرح : وا سوليك عليه نتي الي كتعرفيه كتر مني ...

صفاء"كتشوف فيها بنضرة فشكل" : اااممممم واااخا زين الدين اش ؟!

فرح : قالو ليا البغدادي...

سيمو : قالو ليها مسكينة هي غا كيقولو ليها صافي الي تقاليها تتقول لينا وحنا كنقولو والديه ...

صفاء : تبعصيص الي فهادي ما فحد واخا نديرو راسنا عرفناه من دوك الي قالو ليك ونكتبو zine eddin el baghdadi طلعش ليا تا لا لا ريح هاهي باج ديالو dc baghdadi تشا ريح وخا عاطي بضهر بلبسة ديال العمليات قشعتو اا من ضهرو يا دينمك ...شوفي شووووفي وعليا بليمين تا نتي كلبة الى قلتي لااااء ...

فرح : اري نشوف "وراتها جا سيمو تاهو لاح راسو كيطل بان ليهم غير غرف العمليات ووجوه ناس قبل وبعد العملية شي موري وجهو مشوه وشي مغطيه ...قلبو على تصاور وجهو والو بقاات صفاء تبقشش تا طاحت على سطوري لايحها ادمن الباج فيها فيديو لاحدى المؤتمرات الطبية "

صفاء : اجي اجي هذا مؤتمر واقيلة ..بلاتي هذا ف سويسرا اصحيبة "كتفرج فسطوري قرات عنوان المؤتمر بالفرنسية وفهماتو" مؤتمر ديال تشوهات الحروووب...مهم ناس الي وقع ليهم تشوه نتيجة الحر ب ...بلاتي بلاتي ...ها هاهواااااا "وقفات سطوري عليه كان واقف بكل شموخ داير نظاراته ديال شوف بقميجة بيضة وسروال توب گري لحيته الكثيفة السوداء وحجبانه الغلاض الي قربو يوليو مگرونين كيشرح الحالة الي كانت صورتها قدااش فداطاشو حالة من الحالات الي قدر انه ينجح فيها ويتوصل لعلاج وحل لتشوه الي فيها ..."

سيمو : نسيبي اش كيدير لفرونسي ديييييينمو دييييينمو شي حد يهضر معاه يملخ مو...

فرح"ضارت مغوبشة فيه" : تا امتا ولا نسيبك ؛؟

سيمو : لاما رجعتيهش نسيبي يبرك ليك الما فركابي ....

بقاو كيتفرجو فيه وخا كان بعيد شي شوي كان الي كيصورو مركز عليه وعلى هضرته الادمن ديال باج ديالو فالصفحة هو الي مكلف كيحط انجازاته فيها والحالات الي كيدوزو على ايديه ...اما هو عمرو قرب جيهة الانسطا حيث الوقت باش يديها فهادشي مكاينش ف كلف ناس مختصة هي الي تواكب الاعمال ديالو وتنشرها...شوي بقات تبقشش تا طلعت ليها پاج المجوهرات البغدادي....

صفاء : اجي تشوفي الذهب الي كيبيعو يااااا جدك هادشي كااايحمق ...

فرح"كتشوف فالمجوهرات باعجاب وصورته فبالها والاكثر غالب عليها وجهو فاش تلاقاو فطواليط ...مشعراتش براسها حتى لقات راسها كتبسم وحطات صباعها على فمها باش متبينش ليهم ضحكة ساعاك معااامن قشعها سيمو"

سيمو : فالدقيقة تسعين لمك دقيييقة تسعين ...احصلتييييي بدا يبلغك المقصود اعشيرتي...

فرح"جمعات ضحكة " : واا كي كتحضيييني حضي راسك غاادير لباااااس ...

صفاء"شافت فيها وشافت فسيمو" : هههههههههه دخلتها زعطة اساط ولا كفاش هههن

فرح : دخلني الخرا ..انشوف انشوف"شافت واحد سنسلة فيها علامة انفينيتي مرصعة بالاحجار وذهب خالص سنسلتها رقيقة سامپل وعمارة الانفينيتي رقيقة " وااااو كتحمق شوفي "شيرات ليها"

صفاء : عندهم هادشي مقود اصحيبتي ..شوفي لحبك هاد الگرميط فيه حجر بالالوان وااعر ...

سيمو : اش داكشي ديال العيالات ؟! مكاينش شي سنسلة مضفورة غليضة ديال رجال ؟!

صفاء : لاش بغيتيها ؟!

فرح : اش بغيتيها ياكما باغي ديرها فعنقك اويلي حاااي كملت

سيمو : مالها لمك داكشي را ستيل اعاديل سبيد العدسة اش تعرفو...

صفاء : اداك شمكار غانعاود لمك دقة ...عندك فلوسها بعدا ؟ عرفتي لا وزنتيها شحال تسوا مكاين غا جوج ثلاثة وذهب طالع تبيع نجية وخواتاتك يلاه يلاه...

فرح : لا هو معول الى تخطبنا يعطيها ليه فابور ما عقتيش بالقالب ؟!

سيمو : هااالي كيفهم...

صفاء : ينگر لمك العين هذاك ميعطيكش سنسلة ...ديرها تولي تغالط لينا مع جمايكا (كلب صطوف هههه )

فرح : هههههههههههههههههههه

سيمو : دابا ندغمر مك ....

رجعات صفاء كتقلب عليه وتبقشش فضلات الانسطا حيث عارفة نوع ديالو الى دار سوشل ميديا غايمشي لانسطا حيث فين كيديرو اغلب الباج الشخصيات المرموقة وفعلا نجحات ولقاتو وخا غير خطفة قضات الغراض ..بقششات هنا وهنا كتلقا غيير ضهرو ...

صفاء : هاد ضهرو غايطيح ليا النقطة حق ربي ...

فرح : داك سكرين الي درتي رسليه ليا ..."يلاه كتهضر نقز سيمو وصفاء دقة وحدة"

صفاء : لااااااااش اختي ...

سيمو : اشاااوا بغيتييييييييه ؟!

فرح : صافي مبقيتش بغيتو العفو العفووو..."سمعات دقان وهي تنوض حلات الباب لقات ناهدة وجهها هارب منو اللون شادة فايدها بزطام وتيليفونها مساكتش..." ختي ناهدة مرحبا ..

ناهدة"كتهضر وصوتها فيه شوية رعدة حاولات ما امكن تخفي الخلعة" : ر ربي يخليك...ختي واش عصام مكاينش ؟!

فرح : عصام !! لا مزاال مجاش من الحانوت علاش !؟

ناهدة"حطات ايديها على كتاف فرح وكتشوف فيها بترجي" : عاااافاك الى جا قولي ليه ضروووووور يهضر معايا مسألة حياة او موت عااافاك...

فرح : واخا ولكن خبار الخير اش واقع وجهك مخطوف منو اللون !؟

ناهدة : مماليش غير عيانة مهم قولي ليه القضية فيها صطوف محتاجك مهم هو غايفهم غير قولي ليه وسمحي ليا برزطتكم .."شيرات ليها وضارت مشات بسرعة مخلياها مفاهمة والو شنو جاري وشنو طرا ليها سدات الباب ورجعات عندهم لقاتهم سمعو شنو تقال"

صفاء : شراتها هادشي من عند صطوف ...

سيمو : عطات ريحتها والله تا عرفتها ...واخا كااع ماطيحش معاه هما يوصلو ليه را كيبيدقوك وتشريها معاه...

فرح : ولكن لاش بغات عصام !! بغاات تجبد ليه المشاكيل هادي...

صفاء : مال العيصومي كيرضع صبعو !! مكتعرفيهش !؟ والله مايعقل عليها وخا تمرمغ ليه تما يضرب فيها ويزيد...

سيمو : تي بالرب المعبود لا شراتها من عندو وخا طيح مع خونا ف القيهرة الكحلة الي ميعرف ليها جن زرگ طريق تا يشم ريحتها ...

فرح : طلب من الله يتفارق معاها حسن ليها من مشاكيل...يعطيها تيساع هو را قادر يتزوج ويدير دارو عاجباه شوهة فالدرب حتى من خالتي فوزية قربات تسخط عليه ...الله يستر .."طلات على صفاء لقاتها شادة لانسطا ديال زين الدين " عجبك ياك !!

صفاء"شافت فيها عينيها معسلين" : عيونه كيسان الالة فمو خاتم ايوايوا لونه قهوي..

فرح "خرجت فيها عينيها" : وصلتي الالوان!! نوضي نوووضي ....

خرج هو والحسين من الدار من بعد ما مشا زين جاب تيليفون الي كانو حاطو فوق پاور بانگ يتشارجا وكونطاكت سيارة نزل بفوقيتو فالبيج بكلاكيطة من ماركة Reef فيها الكحل والبيج فرجليه مخفف مافيه الي يبدل ويتقاد غير هاد اللبسة الي لابس عاطياه جاذبية وهيبة ...لقا الحسين كيتسناه ومعاه مراد الي عاد جا....

مراد"شاف جيهتو" : زين الدين خويا ياك شي باس مكاين ؟!

زين الدين"حل بالكونطاكت ..شاف فيه ورجع شاف فنواحي كيهضر بلا مبالاة" : مابيه والو شوية العيا وصافي...

مراد : نمشي معاك فطوموبيل ؟ مافيا الي يسوگ عييت ..."حرك ليه زين الدين راسو وركبو بثلاثة ديمارا طوموبيل وزاد فاتجاه واحد لاكلينيك حداهم فين علموه اصحاب سيارة الاسعاف بالي غايديوه ليه بناءا على طلبه نييت مسافة طريق حتى كان قدامو نزلو دخلو نيشان سولو عليه فالاستعلامات عطاوهم رقم الجناح والغرفة وطلعو لعندو كانت ضحى وتوبا جالسين قدام باب الغرفة فالكراسا ...

توبا"بان ليها مراد و الحسين وهي توقف كتقلب بعينيها على زين الدين تا بان ليها جاي من وراهم " : ولدي جيتو ...

مراد"باس راسها وسلم على ضحى " : مالو ؟!

توبا"تنهدات" : معرفناش قاليا زين الدين مابيه والو الضغط طاح ليه ..."دوزات على جبهتها بتعب وتوثر" هاحنا غانشوفو مالو "قلبات على زين " فين زين الدين !؟

ضحى"جلسات وشيرات ليها ناحية غرف الاسعافات" : دخل عندو عاد بان لي ...

من بعد ما دخل كان واحد الجناح فيه غرف طويلة فيهم اسرّة (ناموسيات) فين كيسعفو الناس ...دخل لعندو فين نعتو ليه حيث صاحب المصحة صاحبو كان كيقرا معاه ...لقا الطبيب واقف كيقلب فيه وفالضغط الي كتعبر ليه الفرملية ...كيقيد فبلاصة لوغدونونص ..حتى وقف عليه زين الدين كيشوف فالغالي مغمض عينيه ماشي فالوعي ديالو ..شافيه الطبيب ...

الطبيب : وي موسيو !!

الفرملية : دكتوغ البشيري .. دكتوغ البغدادي

الطبيب"غمض عينيه بحرج" : اووو دكتوغ باغدون والله هههه ...عاد هضر معايا لوديغيكتوغ الناصيري ..."مد ليه ايدو سلم عليه"

زين الدين"حرك ليه راسو " : ماعليش ماعليش"شاف جيهة الغالي " شنو الحالة ؟!

البشيري : على ما عرفت من المسعفين بالي عبرتي الضغط قبل ميجيو

زين الدين : سي"كيحك لحيتو ويشرح ليه " الطونسيون فاش طاح 10/8 ، pas de signe

de tachycardie pas des signes de coloration des extrémités , alors probablement pas de crise cardiaque , (مكايناش ازمة قلبية من لاخر وصافي)

الدكتور : وي الحمد الله ، مممم صافي"طلعو ليه تخطيط قلبي..مداتو ليه الفرملية شافو ووراه لزين الدين " ماكاين فيه والو ،الوغ , كيفما كتعرف غايكون غير جهد راسو وهو بغا يزير على راسو والقلب ديالو... هو كبير درنا ليه سيروم صالي(ملحي) غير rehydratation و رجع طونسيون طلع عادي اما الباقي تحاليل دم عادية و الكشف Rien a signaler ويحافظ على راسو و نتا تعرف تنصحهم فلباقي

بقاو معاه تا كملو خدمتهم واطمانو عليه خلاو معاه زين الدين حتى ضار لعندو قرب ليه لاخور بالفعل نيييت ماشي فالوعي نااعس ...قرب ليه نيييت تا وقف ليه عند راسو كيشوووف فالوجه وجه شخص مسن عمرو وملامحو والكسدة ديالو ديال راجل الي خاص يكون متاقي ربه فارض احترامه وهيبتو لناس لكن الحقيقة والواقع شيء اااخر ...واحد الشوي وهي تدخل توبا وضحى ومراد والحسين ...اطمانو عليه وخرج زين الدين هو والحسين على برا مسمعش مراد الي كان كيعيط ليه او بالاحرى دار راسو مسمعش مبغاش يهضر مع شي حد وصل لباركينغ الي قدام المصحة وقف شاد كونطاكت ساروت وكيشوف بعييييييييييد بالو ماهانيش وزادو تفكير ولا اله الا الله...

الحسين : رخيها عالله اولدي..يكون خير..

زين الدين"شاف فيه بنضرة فشكل" : شتي فين وصلنا معاه !؟ مخلي خدمتي وبلا دنيا ودين الي عندي وجاي مقابل فشوش تبرهيشو ؟! ماشي حشومة "مخرج عينيه بغيض حتى صونا ليه تيليفونو كان وليد " شنو كاااين فرعتي ليا ك*** ؟!"ضار يهضر لهيه ويلاه كيعاود ليه وهي تم جايا واحد البنت فعمر ثلاثينات بيضاء بزااف عاد نزلات من سيارتها هازا ملف فايدها وصاكها طالقة شعرها الاسود عويناتها وخا صغار زوينين لونهم ازرق غامق بزاف..قصيورة شوي ...وهي توقف على الحسين وزين الدين مكانش شايفها حيث كان عاطي بالضهر كيهضر وهي تبسم من قلبها باست ايدو وراسو "

الحسين : واش بنتي حنان هادي ولا ؟!

حنان : هي هادي ابا هي هادي ههههه

الحسين : اش جابك هنا ياك لباس ؟

حنان : والو قضيت واحد الغراض ف لوپيطال الشيخ زايد وجيت نشوف مراد قاليا هو هنا جيت نشوفو يلاه غانتاصل بيه نقوليه هاني قدام لاكلينيك باش نوصلو معايا مع قاليا طوموبيل خلاها فالدار حيث دايرين عشاء ديال ليزامي الدراسة ...شنو نتا الي ياك لباس ؟

الحسين"تنهد" : والي باس ابنتي جيت مع زين الدين... عم مراد عيا شوي

حنان : كيفاش ؟ "ضارت شافت فزين الدين من ضهرو قلبها ضرب بواحد الوتيرة خلات وجهها يتزنگ " نوووو"عيطات ليه " زيييين !؟

زين الدين"ضار بالعرض البطييييييييييئ عاقد حجبانو تا شاف فيها كملات ليه الباقي وكملات بزين وهو عدوه تقولي ليه زين وحدها بالفقصة والغدايد الي مغدد هاد النهار والي جامع مايكفي نطق " : زين الدين ....

حنان : هههه بغيت نتاكد ...

زين الدين"كمل من تيليفون وخشا ايديه فجياب فوقية تم جاي حتى لعندهم ووقف كيحك فشنايفو بسنانو وكيشووووووف فيها كيف ولات وتبدلات غير فمدة ماطويلاش " : نتي وايمانك اختي ...(زعما لا بغيتي ههههه)

حنان وزين الدين قصتهم اكيد مكانتش غير قصة عااابرة مكانتش غير علاقة عابرة لان ف طبع زين الدين معقول ماشي من النوع الي كيتفلى ويدوز الوقت بالبنات لان الوقت عمرو مكان عندو فارغ بزاااف لدرجة يبقى يمشي من هادي لهادي ...من الي وعا على الدنيا لقا راسو مسؤول بين قرايته ومحلات واليديه الي بزز منو مخاصش يفرط فيهم كان على وشك انه يتخلى على الحلم ديالو الي هو الطب ويقابلهم لكن بوجود الحسين وراجل عمتو الي هذا سبب كبييير الي خلاه داير معاه المزيان ساكن فدارو اما فيييه مياخذ دار يسكن فيها هو وتوبا وبنتو ...يعني الغالي كون ما هو كون زين الدين مشاو ليه المحلات او يا يفرط فيهم يااا يفرط فالمستقبل دراسي ديالو...زين الدين بالكاااد تا تعرف على حنان فضروف جعلاتها تكون عندها بلاصة فحياته ووممكن قلبه ... ..

حنان"صرطات كلمة ختي ب جغمة من ابتسامة الحرج الي بانت على محياها" : ههههه ياااك ...تبدلتي داكشي باش..

زين الدين"عوج راسو شوي" : بنادم هو هذا ..الزمان يبدل العجب...

حنان"قربات ليه ومدات ايدها تسلم عليه" : مدة طوييييلة هادي ا زين الدين...لباس عليك ؟

زين الدين"مبغاش يحرجها ومد ليها ايدو سلم عليها دغيا " : حامدين ربي ...

حنان : صافي جيتي هنا لمغرب بمرة ؟!

زين الدين : ضروري مرجوعنا لبلادنا ولحبابنا فلاخر...

حنان"تبسمات بحب" : حتى انا قررت نرجع نكمل غير هنا فكرت بزاااف ...

زين الدين : مزيااان بون كوغاج..

الحسين : مبقيتيش ناويا تكملي لهيه !؟

حنان"حركات راسها بالنفي" : لا "شافت فزين الدين" زين الدين عندو الحق صعيب نتاقلم مع تما وصعيب ندير داري وانا خدامة تما وصعيب نقابل راجلي وولادي الى كملت فداكشي ..

الحسين : من الخير ابنتي متمشي غير فين مكتبو ليك ربي .

حنان : هضرتك صحيحة "شافت فزين الدين" وحتى زين الدين قال المعقول غير انا الي تبرهشت شوية وتكبرت ههههه ياك ؟

زين الدين"رفع حجبانو ونزلهم " : فين حطيتي راسك تصيبيه...

حنان"حكات راسها مالقات متقول حيث عندو الحق " : اهههه نتمنى من الله يكون خير كيف كتقول..

زين الدين : شنو جابك لهنا شي باس مكاين ؟

حنان : والو غير جيت لعند مراد عندنا عشاء زملاء الدراسة ..كيف بقا عمي الغالي مزيان ؟!

زين الدين : مزيان العيا ديال الشرف وكان "شاف فساعته" الوليد مشينا !؟

الحسين : مشينا اولدي "حل باب سيارة وضار عند حنان" بنتي ساعة سعيدة هادي الله يوفقك ...

حنان : اللهم اميين ابا الحسين سلم ليا على الحاجة وقوليها غانجي نشوفها وخا غيبتي طولات بزاااف...

زين الدين : سلمي على الحاج "حرك ليها راسو وحل الباب دخل نيشان بلا ميعطيها فرصة تجي تسلم عليه ولا تهضر لقاتو دخل وسد الباب وديمارا طوموبيل مكسيري فالاتجاه فين غادي بقات واقفة كتشوووف فيه تبدل بزاااف على اخر مرة تفارقو فيها رجعو ليها ذكريااات كيفاش كانت معاه ...وكيفاش كان قدامها ...تفكرات لحضاتها معاه والحب الي كان ليه كبييييير وحتى هو..

حنان : توحشتك بزااااااف "حدرات عينيها كتشوف فرجليها كتحرك فيهم وصاكها فايدها حتى هبطات ليها نقيطة دمعتها تبعاتها اخرى واخرى حتى توالاو دموعها نازلين وحرقة فصدرها بدات كتشعل كل مكتفكر فالحب الي كان بيناتهم !!! كل ماكتفكر شنو وقع وكيفاش تفارقو فلحضة من الزمن دقيقة كانت كفيييييييلة تقطع رزق بيناتهم ويضيع منها شخص فشكل شخص فحالو ...بقات تبكي في صمت حتى تحطت ايد على كتفها وهي تدور " مراد ...

مراد "كمش حجبانو" : كتبكي !؟ تلاقيتي بيه ؟

حنان"كتمسح دموعها وحركات راسها ب نعم " : مممم

مراد : وعلاش كتبكي !؟ كنتي كتسنايه يعنقك ولا كيفاش ؟

حنان : لا ههههه"ضحكت وسط حزنها" ممتوقعاش والله عارفة شنو كيتسناني وعااارفة رد الفعل وعارفين زين الدين اش كيسوى ...ولكن "شافت فيه" ما من حقيش نبكي نحزن نتقلق ؟!

مراد : ما من حقكش تلومي ا حنان "شاف فيها بنضرة جدية" عندي الحق ولا لا ؟

حنان"كتحرك راسها وهي كتشوف فالارض"

مراد : دابا رجعتي ياك وندمتي ودابا كل شاف طريقو لاااا بغيتي الى بغيتي وسمعتي ليا خليها للوقت وكتبقايش تحكي على دبرة سمعتيني ماحدك كاتحكي على الدبرة غاتلقاي غيييير البرود وتبعديه عليك كثاااااااااار...

حنان : غا قوليا اش ندير اااااش وحط راسك بلاثدصتي امراد حط راسك بلاصتي اهى اهى والله حتى صعييييييييب نساه صعييييييب راك شفتي وحضرتي مدوزناش قليل ...ااااه عاااارفة راسي عااارفة مزياااان وراني بنادم ا مراد بنادم ...لا انا لا هو غلطنا ...

مراد : متافق معاك ولكن نصيحة مني ا حنان فاش تشوفي شي حد معاطيكش وقت ولا تشوفي شي حد كيما كان وخا يكون خوووك خالق حاجز بيناتكم "رسم خط رجوع بصبعو فالهواء" رجعي ضربي دروة صلاة عالنبي

حنان : دنيا فرص امراد اش فيها ؟!

مراد : دنيا فرص وزين الدين هو هذا ...كيف قلتي دنيا فرص !! ومتبقايش تحكي وتقجري احنان الى بغيتي تجربي فرصتك خلي فبالك ديما تكون عندك كرامة وعقل ماشي غير مع زين الدين مع كلشي ديريها حلقة فوذنك ماحدك كتحكي على شي حد وهو مكيبقاس حاملك ونافرك .. انا نصحتك ك صديييييق ليك وراني عشيرك قبل ميعرفك زين الدين ولا تعرفيه ...

حنان : وبصفتك خوه وقريب ليه ؟!

مراد"تقاد فالوقفة وتم غادي جيهة الطوموبيل ديالها باش يركب" : طلبي زهرك ..."سرح ايدو ورجعها" هذا جهدي عليك...

.لاحت الحوايج الي غاتلبس فوق سداري فين كتنعس وهزات صاكها دارت فيه لوازمها وهي تحيد حوايجها بقاات غير بدوبييس دارت ستيكة دوف لبيطانها ولبسات دوك الحوايج وفبالها بزااااف ديال الحوايج شاغلين تفكيرها ......بزاااف ديال التساؤلات والاشكالات بزاااف ديال الغموض وشحاال من حاجة مبهمة لازم الجواب عليها باش يتوضح كلشي...فخضم تفكيرها لقات راسها لبسااات وبقا غير شعرها تجمعو ولا تخليه مطلوق كاين شوية صهد ف جمعاتو لور المكياج حاليا مقادراش ديرو احتراما ل موت يونس مزال خاطرها مضرور من جهتو حتى من هاد الخطبة حشمات تقول را جاو فيا الخطاب وتوصل لناس ولعائلة يونس وخا هما مغاديش يوقفو حياتها ولا كيف كنقولو ف سعدها ونصيبها !!!

فرح"هزات تيليفونها ودوزات لخط ل صفاء " : انا خارجة نمشيو ..

صفاء"بصوت عيان مناخرها مزموطين" : مممم غا سيري والله مقادراش فيا سخانة ورواح مقدرتش نهز راسي

فرح"بقلق" : مريضة ؟! ضربك البرد ...

صفاء : ممم

فرح : واش خاصاك شي حاجة شربتي دواء !

صفاء"كتكحب وكحبتها خايبة" : كحكح بغات فاطنة تخليني بلاش ؟! بقا ليها غا الحنطل معطاتوش ليا حبي يخليها ليا هي وعصام...

فرح : ااا بعدا عصام ممفرطاش فيه ف عز مرضك ..

صفاء : هو دوايا الى مفهمش راسو...

فرح : ختي عيييت معاك فهميه ليه راسك بداي وانا نعاونك ...ماعلينا انا غانمشي غادي نقول ل RH راك مريضة نخرج وندوز عندك نيشان قولي لمي فاجنة الى دارت شي غذا تخلي ليا حيث مكاينش عصام وفوزي مكاين حد اللهم نتغذا عندكم

صفاء : جيبي ليا معاك حليب ودانون وبومس باااردة ...واجب زيارة المريض يلاه حيدي عليا "قطعات عليها فالبلاصة ماتسناتهاش تتجاوب عههه "

فرح : كاين الوجه صحيح وكاين نتي اصفاء ..."حطات تيليفونها فصاكها ولبسات فرجليها وخرجات لقات عصام باقي كيفطر عاد كما الكارو وفوزي واقف كيبقشش فتيليفون ..."صباح الخيييير "لاحت صاك وجلسات كب ليها عصام كاس اتاي " فين با ...

عصام : من عرف ...

فوزي : غابر هاد اليومين معرفت اش كيخرمز تاني ...اش دار فالمحافضة ؟

عصام "ضحك باستهزاء " : مشا تسلف بالمتيريس اصحبي...

فوزي : ارسول الله

فرح : نااااري عندمن !؟

عصام : على ما گال عند شي واحد مايش هنا فجديدة(ماشي هنا فالجديدة)

فوزي : معندوش باش يفك مشكيل الورث وعندو باش يخلص بالمتيريس ؟! وحق الرب اعصام حتى كيقلب عالحبس ...

عصام"جهد صوته" : لهلا يردو لهلا يردو من عندي انا غانعرف حسن منو !؟ خلييييييييييييه خليييييييه "كيشير بايدو" فيين حط وجهو يلقاه ...

فرح : ملي مبغيتش نعطيه شيك زاد حقد عليا كثر وجدر

عصام"شاف فيها بنضرة نارية" : ياكلك گلبك (قلبك) عليه وتفكري تفكرييي تحني فيه ماتلومي غيييير راسك"كيضرب فوذنو" ها وذني منك ونعاودها ونعااااودها بالرب الجليل ويمد عليك ايدو ومنعلمش بيها خرااااك معايا ميجمعوه شراوط راني ضريف وحنييييييين والعكس صحيح...

فرح"تنهدات" : عااارفة كون هااني والله ميشوفو من عندي واصلا كنفكر نمشي هاد الايام نحيد شيك نبقا خدامة غير بكارط گيشي الشيك كنت دايراه فاش كنت فالپارا (para pharmacie)

فوزي : حسن ...يلاه الى ساليتي نوصلك ؟!

عصام : تيسر نتا انا نوصلها ...

فوزي : هو هذا "ضار لعندهم" مقلتش ليك با جدي جاي هاد اليومين عندو شي غراض هنا جاي بطوموبيلتو وطالع لكازا قاليا قول لفرح الى بغات نديها معايا منها نيت تفوج شوي

فرح"بفرحة" : الله...اه نمشي نمشي توحشت نسافر مع با كيكون زويييين ...

عصام"رفع حاجبه" : ياااك الالة هي حنا خلات علينا ولا كفاش

فوزي : مسحات لينا سما بليگا اودا عصام هههههههه

عصام : من حقها...

فرح"قربات لعندو وتلاحت عليه عنقات راسو كتبوس فيه وتعاود " : تا لا هههههههه مكاينش فحالك نتا والله ...

عصام"مخشي راسو تحت باطها ورافع حاجبو مخليها على خاطرها دير ما بغات " : ممممم الله يجعلنا نثيقو ...

فرح "بقات معنقاه وحبست" : ثيق بيا وحق الله ...

عصام : امنا بالله الالة..."حيد راسو وشاف فيها" دوك الناس سولنا عليهم ...

فرح: اينا ناس !؟

عصام : زين الدين البغدادي...

فرح"طلعاتها واااااااحد مولاتي تزنيگة وضربها قلبها بجهد ...حتى بدات تحك فجبهتها" : اهههه ايه مالو احم..

فوزي"كيشوووووووف فيها وحابس ضحكة" : كخمهههه

عصام : وااا الهضرة عليه زينة ولد الناس على ما قالو صطوف الي يعطيني الغراض ممساليش وليني درت خدمتي تانا بغيتي الاصل وناس المزيانة والعيشة المخيرة را واخا يكون عندو مال قارون ويموت على ترابك ؟ ماتلقايش فحال معيشة داركم غا باش تعرفي اش كاين وقد ماجلستي ضروري دري دارك مابغيتش بالرب العالي مكاين الي يخليك مخصوصة من شي حاجة "شاف فيها مزيااان" جهدنا دايرينو معاك حيث بنتي قبل متكوني ختي نعطيك عينيا وليني"حط ايدو على صدرو" منعطيك ولاد مانعطيك راجل ... من عندي ؟! اش غانقوليك ا فرح ! نقول لا ! نوقف فرزقك وسعدك ؟ ماجاتش ناس مقالو عيب دخلو تاهما من الباب وقصدو الخير والحلال سولنا ناس مزيانين غير داك الحاج الي مجايب بوك ماشي تلهيه ...

فرح"فنفسها عندك الحق مجايب بويا نيييت " : اه هي مرتاح ليه ؟

عصام"هز فيها عينيه " : مالو خطب فيا انا ؟

فرح : ههههههه ومبغيتيش تخلينا نخطبو ليك ؟!

عصام"شرب من كاسه ديال اتاي وحرك راسو" : علاش لا...

هاكا مشات الايام تقريبا اسبوووع على اخر الاحداث بين خدمة سطاج وهضرة وروتين ...فهاد الاسبوع زاد شوي الضغط على زين الدين ...اما الحاج الغاالي الغذ ليه ديال داك اليوم سمحو ليه بالخروج وخرج مادازش ولا شاف جيهة زين الدين وهاد الاخير مشافوش معرفوش تا واش خرج رجع لدار عادي لكن زين الدين باش يتفاهم معاه راسو عمر بزاااف بتجيهزات دياال المشروع الماتريال والخدمة والمحلات الي تكلف بيهم بنفسو تايشوف شنو يدير

شاد الطريق لوجهة عند المحل القديم الي فيه الحسين من بعد ما غاب يومين خارج ارض الوطن والي كانت زيارة لواحد المؤتمر طبي ف تركيا بخصوص بعض الحالات ...واليوم كان الوصول ديالو من المطار نيشان لعند الحسين .. وصل لمحل ودخل من واحد دويرة صغيرة طلع فدرو ديقين كيطلعو لديك سقيفة فين كيخدم ويدق الذهب....حتى وقف عليه ريحتو سابقة بتحنحينة منو هز الحسين راسو فيه ابتاسم تلقائيا....

الحسين : واه واه واه عالسلامة ....

زين الدين"باس راسو ومشا جلس قدام المكتب الصغير" : الله يسلمك ..."دار ايدو على حنكو متكي"

الحسين : من المطار لهنا ولا "حرك ليه راسو بنعم" واكل شي شارب شي ولا مزال ؟

زين الدين : ورينا سخاوتك ابا الحسين ...

الحسين : وقيتة الغذا هادي ايوى ولد الحاج نوصيو على طاجين اللحم والبصلة دايزو الكلام ؟

زين الدين : بلا زبيب ويرحم من رباك ؟!

الحسين : الله الله عليها"ناض من بلاصتو طفا شاليمو الصغير ومشا لتيليفون حل المذكرة نقل واحد الرقم عيط عطا طلبيتو وحط تيليفون وجلس حداه..." على سلامتك اولدي بعدا الطريق مزيانة ؟!

زين الدين : ضروري من العيا ...عياني سهيير فديك البلاد ...ماعليش الي دازت تحيدات علينا...(زعما سهر بزاف والي دازت تحيدات علينا هي كان تابعو هاد المؤتمر ميمكنش يلغيه ومشا حيدو عليه)..

الحسين : حيدتي هم على كتافك !؟ ايه وهم الخطبة بان ليا حيدات من البال ولا كيفاش ؟

زين الدين"غمض عينيه وكمش ملامح ديالو" : بففف...مانسيتش مانسيتش دهوة وصافي شلا متبرزطت بيه هاد ليام...هما الي يجي منهم الجواب ...انا الي عليا درتو...

الحسين : ايه ومن بعد ؟؟

زين الدين : المعنى ؟

الحسين"حط ايدو فوق المكتب" : هاهما عطاوك الجواب لا كان الرفض هنيتي ولا كان القبول فين غادي توصل !؟

زين الدين : لاكان رفض هنييييت ولله الحمد لاكان القبول مكتاب عليا وكان ..."شاف قدامو شحااال ورجع شاف فالحسين " الي عليا درتو ...نهار سولت عليهم عرفت شلاااا عجب على داك بوها الدراري بدراعهم رجال متفضلهمش قدام شي حد وهادي شهادة مني هي بنت الناس عايشين فحي شعبي معندهمش ماخاصهمش ...داك النهار خرجات شي هضرة ماشي فوقتها وفمكان ماشي ديالها..."شاف فيه" يعجبك الحال تشوف راجل فعمرك ولا كبر منك يبغي بنت الناس مباغياش ؟ تبغيها لبنتك ؟

الحسين : ابدا واش نخليه يدخل لداري ..

زين الدين : تبيع وتشري وبنتك هي الخلاص عليهم بجوج ؟

الحسين : الاااا

زين الدين : خاطرك يرضا تفرض عليها الي متبغيهش لراسك ؟

الحسين : وتقول اولدي ...هي نتا فكيتيها من الغالي ولا كيفاش ؟!

زين الدين : كنت فشي صدقت فشي ...خاطري مهانيش ومبااغيش ومراضيش وعاجبو الحال جيت وسط العقدة وجلست...شمت الغاالي وحصلت انا ...بغيت نعاون صدقت مگدم "خبط فوق المكتب بجهد تا طاح واحد الديكور"

الحسين : وخا تخطبها ومتصدقش ليه را يقدر يمشي لوحدة غيرها...

زين الدين"هز ايدو" : الخيل المخير فقبيلتو يركب عليه ...الي بغيت نوصل ليه وصلت والي حك نحاسي مزال يلقا فعلو معايا...شمتة الي شمتو مزال مبرداتنيش من جيهتو ضوصيه خنااااز عندي ...لا بغا غيرها دابا عاطيه ضو الخضر "هز صبعو" ماشي فداري يدير ليها فين تسكن والله يطليه بيها ....

الحسين : اش غادير الى جا القبول !!تفكر بالي نتا انسان حقاني اولدي .. ...راسك مبرزط هانتا حتى نسيتي بالي خطبتي بنت الناس ...

زين الدين"تنهد بالصوت فهادي معرفش شنو يدير واش يكمل معاها ولا يخليها على الله ولا يخليها لايام الى تفاهمو ولا يجرب حضو " : انا وزهري واخا"ضور راسو لهيه منفاعل " ماباينش ليا وماباغيش نضلم والله ماباغي نضلم خاطري مزال مدمر من بنات الناس ومباغيش نضلم بنات الناس ...

الحسين : فكر فشي حل اولدي ومتغرقش راسك ...

زين الدين"ضرب جيهة قلبه وجيهة راسو" : هذا ابا هذا عاااااااااامر بشلااااا....وعااااااامر وفهمك كفاية وهذا عامر بالمطارق وزايد مطارق على مطارق ...مابغيتش نتحاشم ومبغيتش نحشم مابغيتش نتضلم ومااابغيتش نضلم....

الحسين : مزال بالك مع بنتي حنان (كيقول بنتي حنان من باب الاحترام)؟ الى مقبلوش دوك الناس ومكانش النصيب ...ماناويش تعطيها فرصة !! وتعطيو فرصة لبعضياتكم !! بلا متشوف فيا راني ماشي معاك دقة دقة شفت وعشت معاك ايام زمان اش كان وكي كنتي وكي وليتي ...

زين الدين : ثيق بيا الوليد "ضرب صدرو بجهد" الدنيا عذباااتني بمشاكيلها وكحل الراس الي فيها مابان ليا لا هي لا غيرها ....

الحسين : نعاود نسولك ...مزاال بالك معاها ؟

زين الدين"هز فيه عينيه بتخنزيرة ماشي ليه لكن لذكر سيرتها" : حكت عالدبرة لقات النفرة ...

الحسين"غمض عينيه ورجع حلهم " : والمهيم دير فبالك الى قبلو ناس هاد المرة عليك"هز فيه زين الدين عينيه بمعنى كيفاش" خاصك تعرض عليهم عندك لغذا ولا عشا حيث العادة كيجيو يشوفو بنتهم فين غاتعيش ويتشاركو طعام ..."هز ليه حجبانو" هادشي الي عطاك الله ....

.مزال كتوجد فالطنجية الي وصاها عصام تقادها ليه حتى دخل طل عليها لقاها هي وصفاء خدامين"

عصام"لصفاء " : الهلا يخطيك عليا وكان ...

صفاء"ترمتها تتصفق فهاد اللحضة هههه" : هااانيا"طلعتها تزنيگة الي قشعتها فرح "

فرح : هههههه ياك وانا "مزاال كيضحكو حتى سمعو صوت الباب غير من الكحبة ديالو عرفوه جا ...حتى دخل... شاف فيها عصام ووصاها باش تزرب يدي الطنجية طيب وهو يمشي لبيت ودخل جبد تيليفونو كيبقشش فيه تا دخل من البيت جلس حداه تاهو شاد ديك العضيمة ديال تيليفون كيعيط ويقطع على عباد الله باش يعيطو ليه وهو يحط تيليفون وعيط باسمها"

المخنتر : فرااااح اجي لهنا ..."شوي وهي تم جايا وقفات عليهم وعصام خاشي راسو فتيليفون " جلسي نهضر معاك..

فرح"جلسات" : هاني با ...

المخنتر"حط ايديه فوق فوق ركابيه وبدا يهضر" : دوك ناس الي جاو ياك علمتيهم بالي مبغيتيش"هز فيه عصام عينيه وشافففرح وشاف فيه"

عصام : كيفاش !!!

فرح : لا معلمتهمش...

المخنتر"خنزر فيها" : انا اش علمتك ؟ ياك گلت ليك راه ممزيانش وفعايلي ااااا اش قلت ليك اعدوة الله ..

عصام : اتهدن اسمحمد شي باس مكاين ؟ مالنا ؟

المخنتر"خنزر فيه" : راني علمتها بالي ممزيانينش ايه انا الي جايبو بسباب الحاج الوهابي هاد المجيبة ماهياش مصدقتش ها واحد جايها من داكشي حسن منو اش بغاتو ...وخا كبير شوي قاضي الغراض"غااااا قالها كان غايهصر عصام وهي تصبر تاااا صبرت مشعراتش براسها بالغدايد الي جمعات والسكتة الي سكتات عليه وصبر الي صبرت وضغط الي تضغطات وتكماد الي كمداتو فقلبها وصحيح كيقولو واحد نقطة كتجي كتفيض الكاس ....

فرح : وااااااااااااااااااااااااااا لاااااااا ولاااااااا واعطيني تيسااااااااااااااااااااع وكلت فيك الله وبعد مني الله ياخذ فيك الحق حسبي الله ونعم الوكيل فيك ومااااااااااااااابغيييييييتش مجايبك وقهرتييييييني قهرتييييييييني مابغيتش هذا الي جبتي دابا "خرجات فيه عينيها تا بغاو يطيحو واحد الجهلة جلهت ما فسوقها مايتعاود حتى وقف عصام مشا بغا يشدها وهي دفعو بحر جهدها " بعد مني نتا بعدو مني واااااااا بعد منااااااااااااااااااااااي ..."شافت فعصام كتنهج وهي تشير بصبعها لبوها" شتي هذاااا هذا عدو الله شتي هذا غير كتمشي كيشبع فيا عصااا ااااااااه غير قبل ميجيو هاد ناس بززني نتزوج واحد شارف قد با (مبغاتش تقول الغالي) الى مبغيتش يدخلك نتا ولا فوزي الحبس قاليا نغرقهم وندير الي فجهدي باش يغرقكم وحيييييييث عارفني منقدرش نفرط فيكم عرفكم نقطة ضعفي بغا يلوحني"شافت فيه " اش درت ليك ااا ؟ وخا تكون والدنا من زنقة مادير لينا هاكا وخا تكون مي خانزة ديال الخلا متعذبنيش الله ياخذ فيك الحق واااااا مبغيتش مابغيتش "عرات على قرجوطتها كان باقي واحد شوي من ضربة وراتها لعصام". شتي هادي را كانت حمرة زراقت وتنفخت راني غير ضرگتتا بفوندوتان بززز را هو الي ضربني تما بهاد لايدين"هزات ايدين المخنتر تا نترهم بغا يعاير وهو يخنزر فيه عصام وقاليه سد فمك" قجني كان غايقتلني قاليا الي غايجيو غاتقولي قابلة كان جايب شااارف قبل هءا ساعاك ربي بغاني جاب ليا الله هذاك ولد الناس وسيماهم على وجوههم...ملي ربي كيبغي يضحك ليا هذا بوووووك كيبغي يهجرو ليا ....بغيتي نقوليهم لا ونقبل بالي جايب باش يعطيك الفلوس تفك وحايلك ؛؟ انا بغيتك عمرك تفكهم وربي يغرقك لاحقاش"قربات لعندو وخرجات فيه عينيها على جهدهم" نتا ضااالم ديكتاتوري حگااااااااار ...."شافت فعصام" را هاد تواخر فينما تخرج يتحلف عليا "هزات صباعها وكتحسب" كيضربني يطرشني كينتفنيي كيسلخني بالسمطة كيهددني يغرقكم بالحبس وملي مبغيتش نعطيه شيك جاب ليا الشرف الي يولدوه هو من تبرهيشو ....وكيخليني تانجمع دار وانا كنسيق كيجي يبقا يحك فسباطو ويعمرها ليا غيس باش نافقص ...قهرني بالضرب والمعيور....قلتي ليا نعلمك ومنخبيش عليك ؟ وهاني جمعت تا جمعت وحطيتهم ليك مرة وحدة"ضحكت باستهزاء" ههههههه عيييييب عيب كل مرة نقوليك والله راسك تايضرك بشكا والبكا اللهم نجمع ونحط مرة وحدة ..."

عصام"سمع تا سمع وضار عندو بواحد تخنزيرة لا اله الا الله " : هادشي كاااامل !!!"عض شنايفو بصعرة تا طوش د م كان غادي ليه بغا يشنق عليه وهي توقف ليه فطريقو بحر جهدها حبساتو تا غوت فوجهها" واااااا حيدي من عدو ربي حسابي معاك هو لاخر نتي...

فرح : ههههه لااااا الشنيق الي غاتشنق عليه ميقضي واااااالو ارا نعطيك اش الي يقضي عليه "ضارت عندو تا شافت فيه وهي تمشي لبيتها جابت تيليفونها ومشات لفوق تلفازة فين حاط بزطام عصام على مرأى عينيه هزات قلبات على كارط فيزيت "

عصام : اش كاين"كينهج"

فرح : تسنى "ضارت كتشوف ف باها الي وجهو ولا بيض والعرق نازل واحد الشمتة متبغيها لعدوك" مزال الخير اولد رقية مزاااال"اول مرة تقولها ليه " بقات كتسنى مجاوبش وعاودات وقطع وعاودت تا تطلق الخط وهو ينزل عليها الصمك ههههه ولا قلبها كيضرب تا بدات ترعد فهصرتها" ب احم دكتور زين الدين "صوتها ولا رقيق "

صفاء : صوتها رقاق بلهلا يحزقو ليها هههههه هاديك احبي حبيتك...

زين الدين : سي شكون معايا"رافع حاجبو"

فرح "بابتسامة داااافية بينات حناكها الي تزنگو" معاك فرح بنت عصام الخيالي ختو الصغيرة ...

زين الدين : مرحباااا ...

فرح "تنهدات من بعد ماخذات نفس وسافت فعصام الي كيتسناها اش تقول" : انا قابلة اولد الناس....

سالات المكالمة و.عطات لعصام الكارط فيزيت الي هزات وهي كتشوف فيه وكتنهج بالاعصاب الي ركبو فيها وخا فرغات بزااااف كانت كاتماه فقلبها وعيات ماتصبر مابقا حتى حاجة الي تشدها النقطة الي كانت خاصة فالكاس باش يفيض قطرات فيه وفيضاتو ....

فرح"وجهها ولا مزنگ وسخووووون والعرق فجبهتها كتهضر وحاسا براسها بغات طيح تا شدات فدراع عصام" : بزاااااف اخويا على باش نصبر ليه بزااااف على الحگرة"عينيها غرغرو" واش انا بنتو ولا عدوتو !؟ واش حنا ولادو ولا والدنا مع اليه ود ......

عصام"باقي مخنزر وجنون راكبينو غا مصبر راسو بززز كيتسناها تكمل وحيث بانت ليه ماشي عادية ..قرب ليها مغزز سنانو " : نفر !! مناااااااش نفر !! منو ؟ راني نااااااااااااافر "ضار خنزر فيه الي كان جالس كيشوف ووجهو بيض بالشمتة الي تشمت مكانش كيضن راها غاتحطو بوجهو" فاش عينك ثاني !؟ "غوت تا نقزت صفاء بالخلعة و فرح غمضات عينيها وضورات وجهها لناحية لاخرى" وااااااالق لااااااااوي فاش عينك ؟! بغيتي نشنق عليك ولا نقت لك !!!! بغيتي تردني مسخوووط صحة مسخوووووووووط بزز من عدو ربي !؟ بالرب المعبود تارجعو مساخيط وحلاااااال معاك ...

المخنتر"ناض وقف باغي يدير فيها مخايفش" : اش عندك مادير اااااش ؟ هذا سري الي جايب ليها "مزال مكملهاش لقا راسو مشنوق من عصام وعينيه خااارجين عليه ماشعرش براسو تا تلاح عليه جرو بكل ما فجهدو شانق عليه .."

عصام"كيهضر ورعدة ليه فسنانو مغززيييييين وفرح كتبغي تشد فيه وهو ماهواش هنا " : وااااااااااا كنقسم ليك بالي خلق السما ولارض وبااااااقي تحط عليها ايدك غا صبعك لاخر ملقاك معايا ماهو فخير "حط جبهتو على جبهة باااه وفرح من لور كتفك حيث قاجو "

فرح : عصاااااااام عافاك خليه غاتقتلوووووو اهى اهى وااااا صفاااااء عتقيييييي

صفاء"جات كتجرييييي لقاتو شانق عليه وهذاك عينيه خارجين بالقجة ..شافت ففرح الي كتجر فعصام وطاقتها ضعيفة باش تقد عليه شداتو من لور كتجر وهو كيتحلف ويغوت ولاخور عينيه خارجين مشات كطييير خرجات تعيط لمها وباها الي وجات كتجري " : عصاااام عافاك الله يخليك ما طلقو الي عطا الله عطاااه ...

عصام"ضار منير شاف فيها الي اصلا مكتبانش ليه مكيشوف والو غير تابع صوت الي هضر وصافي اما دنيا فهاد اللحضة ضلااام " : تقااااااودي عليا ولا نطحن مك معاااااااه..

صفاء"كانت غاتبول بالخلعة و سط المعماعة والحالة وباه الي بين ايديه بغا يموت بالدعقة " : وعلاااااش ازين هاني غاناخذ منك موقف"بغات دير فيها مولات العقل وسط الصمكة حتة شدات فمها" سيحت المخنتر "طارت تجري تا لقات امها جايا تعقد فزيف راسها وباها جاي بضوني وشورط ناض من نعاسو مع كينعس بكري" بااااااا عتق ...

فاطنة : اولدي نعل الشيطان لا تديش السخط فشردو الله يرضي علر ولدي..."ضارت عند بات راجلها بات صفاء" هضر معاه اجيلالي ..

جيلالي"شدو من دراعو وكيطبطب عليه بشوييي غا باش يتهدن ويمشي معاه بالخاطر حيث المخنتر كيفك فراسو ومقدرش ومقجوج شوي مصاب كيف يدير" : عايش ولدي مايش ديالك هادي (مايش هي ماهيش او ماشي) ...

المخنتر"مقجوج وكيدفع بايديه حيث مكمش ليه على الكول دجلابة والقميجة الي كول ديالها كحل بالوسخ ديال الترباني والسواق والمحاكيم والعروقات": وكخخ واطلق المسخوووط طلگني (هي طلق مني)...وااعدو الله ..

جيلالي"كيطبطب على دراع عصام بشوييي وكيشوف فيه" : الله يرضي على ولدي ياك عمرك ما هزيتي فيا العين !؟ حسبني انا بوك كيف مولف تنابي عليا(تعيط عليا) وحسب قاطنة هي ميمتك كي ديما ..

عصام"ضارو عندو بالعرض البطيئ عينيه حمرييييين " : ن قتتتتتتلوووووووو ..."صدرو كيترعععدد اما فرح بالسخفة جلسات على جهدها نسااااات زين الدين ونسات راسها وندمااات لاش عاودات ليه ولات كتفييييبري "

فاطنة"شافتها طاحت على جهدها وهي تغوت على صفاء " : اجريييي جيبي كاس الما ..."مشات تجري جابت ليها كاس الما ووصاتها تقابلها تتشربو لكن شكووون يديها فشي كاس "

فرح"كترععد وطلب " : ععع عفااااك اخويا عااافاك اهى "دخل فوزي كيجري بان ليه باب محلول والمخنتر يغوت وعصام جاااهل " فوزيييييييي شدو عفااااك غايقتلووووو غاااايقتلوووووووووو ...اهى اهى

فوزي"شاف فيه وكيفاش داير وجه عصام الي مكيبشرش بالخير مشا طار عليه هو و جيلالي يفكو ويطلبو فيه حيث عصام كيبغي تمشي معاه بختطرو هو " : خويا عاااافاك الى ما لبدها غاتقتل الخرا ...

جيلالي : ولدي الله يرضي عليك "غمز فاطنة" كاس الما "طارت مداتو ليه خوا منو شوي فايديه ودارو فوجه عصام حتى سمع شهقة ديالو واخا ممسموعاش سمعوها فوزي وجيلالي" ششش تهدن الله يرضي عليك طلقو وخليه منو لله..

عصام"تقولي فاق من غيبوبة كان فيها ضار شاف فجيلالي وفوزي الي شادينو كيهدنو فيه بعينيهم وشاف فاطنة صفاء وفرح الي وجهها مشا منو دم وكتفيبري سخفانة بالخلعة عليه وضار شاف ف المخنتر عقد حجبانو فيه للحضة كان غاينطحو تا دفعو على حر جهدو" : غبر عليا من هنا "غوت تا بح صوته وغمضات صفاء عينيها بجهد صوته" تقاااااود عليا منشوفش وجهك هاد ليا غبر عليا بشهور باش ما كثرتي هنييييييي عدو ربي من خليييييقتاااااك "طاح المخنتر فوق سداري كيكحب روحو بغات تخرج...مشا مشاعرش كاع الي حداه شكون هما ..

كيف لاحو بقا هكاك كيكحب راسو تاحد فيهم مهضر معاه من غير جيلالي الي هضر بلوم ليه حيث المخنتر مكيقدرش يهضر مع جيلالي لانه شخص متقي الله كافي خيره شره ...وهو الشخص الوحيييد الي كيتهدن على ايديه عصام وخا يكون وسط وغرق الاعصاب غير كيهضر كير راسو ...

جيلالي"شاف ففوزي" : جلس اولدي خليه يخرج مزيان يبدل ساعة باخرى...

فوزي"ضار جيهة المخنتر معصب " : اربي لما نوض من خنشوشي يرحم بااااك ويرحم القبر ومخلا الى ما غبر

جيلالي"ضار جيهة المخنتر معصب منو تاهو لكن تعصيبة خاترة" : نوض المخنتر نوض بدل ساعة باخرى"شاف فساعة دياال الحايط لقاه وقت متاخر" سير دخل لبيتك سد عليك مع نبوري خرج ...

المخنتر"مزال كيسعل بالقجة" : كحكح شتي كح هاد المسخووووط ؟! ااا كحكح انا بغيت ندير الخير

فوزي"طار فيه" : وااااا سكتنا سكتنااااااااااا سكت الله يرحم ليك واليديك الى ما سكت ...

المخنتر"خنزر فيه" : تانتا وليتي تنقز عليا ا فلوس درهم !؟ تقادو الكتاف البرهوش ؟تانتا عليا بشانك وليتي دوي لا نتا لهاديك الخامزة ديال ختك !!! "خبط فخدو كيضحك بغيض" وههههههه واويلي يااااا ويلي...

فوزي"كان غايمشي ليه غا ورك عليه الجيلالي " : فاش عينك دابا ؟ الي دارو عصام نتبعو ليك انا "هز ايديه لفوق" سخط سخط لكان غا سخط ديناه ديناه وسخطك نتا مموخر ممقدم فينا لو دينا على سخطك كون راني كندور وبلا دنيا ودين مجموع فيا ...كون تبعت تربيتك كون راني كندور ونطلب ....كون خلاوك لينا كون ما عصاااااام بووويا كون راه الحباسات دايرهم دارو والكوميسارية عتبتو ....كون تكلت علييييييك ابويا "ضرب كتافو" كون هادو طايحيييين...

"ناض قرب ليه مزياااان وجهو لعند وجهو" كون ما سيييييييدك الي هو ولدك "ضحك" هههههه ولدك ولا هو سيدك شتي فين وصلتي رااااسك !؟ كون ما هو كون كتااااافي ودراعي حااافيييين ولكن ربي كبغيييينا عطانا ربي خو فيه بويا وخويا فيه مي وبا فيه كلشي خووويا ضربو الزمان هلكاتو دنيا طلعات منو رااااجل يحلفو بيه شلاغمية خلانا نقراو وتالي مقراش يتكل على راسو ويدير دراع يا بالقرايا "شير لختو فرح الي هزات فيه عينيها مصدومة من فوزي تاهو وفرحانة حيث بقا يعطي فيه "

جيلالي : فوزي تهدن اولدي الله يرضي عليك...

فوزي : خلييييه يسمع على ودنيه ويغبى علينا وجهو ..."رجع شاف فيه " كون ما هذاك المسخوط الي وقف فوجهك كون ما عض فسنانو تا شد من عندك هاد دويرة كون واهليييييييييييي كون حطيتينا فالخيرية ولا بنتك لحتيها لقواويد يتكرفسو عليها...جايب ليها شرف !! لهاد درجة باغي تلوحها لوحة الكلاب ؟ الحيواااان المشة المشة الي حيوااااااان اشريف الي قرب لولادها بالخوف عليهم كتاكلهم باش ميقيسهم ليها حد ...وتجي نتا يا الناقص يا الي ن فااااق جاري ليه فالدم بقات ف الصلاة والدين ههههه بقاات فبنتي سوقها خوا ولا عمر ولا خراااا !؟ الى عمرها را ربي حط ليها النصيب ورزقها هذاك والى خوا"ضرب صدرو بجهد تا تسمعو دقات خلات فرح توقف خافتو يهرس صدرو" هانا عصام خوتها نهزوها بسنانها "غوت بحر جهدو" وبالرب الجليل ماتجي شي امراة قدامها بالرب المعبود ماندير مراة وهي كاينة نعض فيها بسناااني ومنحتجهاش (منخليهاش تحتاج) ليك ولا لغيرك...فين عمري مديت ليك ايدي !!! فين عمرك شفتيني قلت ليك عطيني ولا خاصني ؟ فيييين عمري شكيت عليك ولا عرفتيني واش مرضت ولا طحت ؟ ياك الي خصاتك كنمدها ليك عمري قلت ليك لا ولا معنديش كنهزهم كريدي باش متحتاجش غير باش تحس را ولادك معاك حفينا تلاخر وحنا نطيحو ونوضو باش تحن فينا ووووواااااااالو ...نعطيوك عينينا اتقب دينمهم ومتحنش....

المخنتر"مخنزززززررررر فيه وساااكت كيسمع "

فوزي : سير لحگ لدوك خوتك نهار باقي نسمع شي قواد كيبيع ويشري فختي نطحن دينمهم "خرج عينيه على حر جهدهم" سمعتييييني ...عندهم جوج كلبات يديوها فيهم ويفوتو ختي ولا نصدق معاهم فالي ميطيحش على بالهم.. فوزي الساكت درويش حيث باغي غييييير راحة راسو وشاري راحتو ولكن نهار تقيس خوتي يخرج لقواااد بوكم فوزي الي معمركم شفتوه ..."قرب ليه مزياااان" وفوت عليك عصام الى وقعات ليه شي حاجة بمسبتك انا الي غانتفاهم معاك ماشي هو وانا كااااااافي فين يبان عصام والله ينجيك من ساكت الى دوا"شير ليه براسو" غبر من وجهنا وكلنا فيك الله ...

جيلالي : نوض را قلنا ليك نوض

المخنتر"شاف فجيلالي وففوزي وناض كيفتخ ويتمتم ويسخط قاليك حتى وقفاتو فرح بصوتها"

فرح : نهار توقع لفوزي ولا عصام شي حاجة بمسبتك غادي تشوف فرح الي معمرك شفتيها هادشي الي قلت لعصام والي وقع يوريك شكون هي فرح ...لا مي خليتيها تبقى ولا خليتيني نحس بيك با باغي غير تغرقنا وطارت معزة ...ماسوقيش شكون مي ولا شكون نتا الي شغلي هو عصام الى مرض ولا وقعات ليه شي حاجة "دموعها دايزين" غادي تقضي ليا على واليديا عرفتي علاش حيث عصام هو مي وبا هو المحنة الي ماشفتهاش لا منك لا من ديك الي ولدتني ...

فاطنة : جلسي بنتي ونعلو شيطان...

جيلالي : المخنتر مشا لبيتو وسد الباب تا تزعزعو الحيوط" : ياعوذ بالله من شيطان رجيم

فوزي"يلاه غايهضر حتى لقا فرح جات حداه عنقاتو وهي تنخشش فيه فحال شي مشة لقات امها وتنخششت فيها تا دور عليها ايدو وحط راسو فوق راسها فلوحة فنية كتخليك دمعي بزز منك"

ملي عطاتو داك اليوم الجواب الي كان متمني من الله انها متوافقش باش ميضلمهاش معاه حيث بنت الناس وماتستاهلش ماشي لانه مدمر من علاقة غرامية ولكن من بزاااااف الي يخليه ميتزوجش ولا يعيش علاقة حب لا معاها لا مع غيرها ...اولا طبعه الصعيب ثانيا المرض الي فيه اي داء السكري كيخليه منيرفي غير وحدو ثانيا الضروف الي خطبها فيها مزعلكة مرونة معقدة وكان باغيها الغاالي ...هو جا فلحضة باش يطفي الغضب ديالو صدق واحل ...

فاحدى الغرف الكبيرة فالمشروع الي مزاال ليه اشياء بسيطة على باش يكمل ويدير الافتتاح وفغرفة الي مزال مكملاتش فالاثاث دايرين غير مكتب سوكور فين يجلس ويقابل الامور تما ...حاط قدامو الماك ديالو كيخدم فيه داير نضاراته الطبية حتى دق الباب وحنحن سامح بدخول الي دق عليه ...وكان وليد الي داخل داير كاسك السيكيريتي على راسو والجيلي ...

وليد"حيد الكاسك حطو قدامو وجلس فوق الكرسي مقابل لزين الدين الي كان داير ايدو على فمو مركز فالخدمة " : مزال مخارجش اخويا ؟!

زين الدين"رافع حاجب كيشوف فلابتوب جاوبو بدون ميشوف فيه " : لا..

وليد"شاف فساعتو" : هادي تمنية ديال الليل رتاح ليك اخويا تعاود تستريسي وطيح ثاني ؟"شاف فزين الدين الي شاف فيه بواحد الشوفة وهو يتكمش " احم واخا انا غادي دابا ماجبتش طوموبيل مكاين الي يوصلني نبقا تاتمشي وتديني معاك ؟

زين الدين"حدر عينيه فالساعة الي فالماك وهو يطفيه سدو ودارو فشكارتو جبد الايباد قيد فيها شي تخربيقات وخشاها تاهي حيد نضاضرو دارهم فبوشيط ديالهم سد كلشي ووقف هادشي كامل بلا ميهضر ولا يعطيه راس الخايط "

وليد"وقف تاهو كيحك فراسو بتعب حتى تشبح وتفوه" : اممم استغفر الله العظيم...براكة خويا را غادين كلشي مزيان لحد الساعة...

زين الدين"كيقلب فتيليفونو وكيهضر " : بات عندنا فالدار باش ترجع معايا فالصباح"شير بصبعو وهو كيشوف فتيليفون" جمع ليا كااع لي تيكنسيان الي معاك عندي معاكم شي هضرة...علم مراد يجمع الي معاه تاهم ...هاد deux jours (اليومين) جهد فوق جهدكم فالخدمة مااانبغيييييييش الشكا منكم "شاف فيه " نعول عليكم سمعتي ؟!

وليد"حدر راسو" : واخا خويا كون هاني...

زين الدين"خشا تيليفون فجيبو وهز شكارة وخرجو بزوج من بعد ما طفا ضو نزلو فسانسور الي تصايب هو لول لقا سيكيريتي عند الباب واحد الراجل كبييير فالسن شوي دايرو هو شاف ديال ليسيكيريتي الي تما يعني جالس فبلاصتو وداير ليه بيت فيه كلشي وحاضي معاهم وهو الي مكلف بيهم حيث لقاه واحد النهار فالشانطي هاز لافتة كيقلب على خدمة وعيط ليه معطلوش " : با محمد كلشي مزيان ؟!

محمد"تبسم وقرب لعندو معنقو زين بجنب باس على راسو" : كلشي هو هذاك هاني شوي نتعشا ونمشي نشوف جيهة لاخرى ..

زين الدين : شنو يخصك علمني وقت ما ...

محمد : واخا ولدي كون هاني الله يرضي عليك ...

سلم عليه ومشا مكمل جيهة لبارك لتحت هو و ليد الي طبطب على ضهرو وكان غايضارب معاه بمزاح كيف موالفين وليد ومحمد كيبسطو ومعاه تا مراد تاهو...وتبع زين الدين لسانسور ونزلو لتحت فلاكاف قداااش دايرينو باركينغ حل سيارة بكونطاكت وركبو بزوج انطالق حتى طلع لفوق وخرج من تما وشدو طريق نيشان لكازا زصلو لدار ودخلو لداخل لقا وليد مراد فالجردة مكونيكطي ليه مع راسو شاد ليا ستون تاهو قاليك ...سلم وليد على توبا ونزلات ضحى كتجزرب باش تسلم من نهار تحلف عليها وهي غا تسمع تحنحينتو كتجي بلهلا يطريه ليها تسلم ...

ضحى "سلمات على زين الدين" : سلاام عليكم خويا زين الدين ...

زين الدين"عنكش ليها سعرها وتحنى تا باس راسها" : شنو درتي نتي ؟!

ضحى : مزاال مغانبداو تال نهار 15 فالشهر ف le mois 12 طالبين لينا سطاج ...

زين الدين : ليه حل ديك ساعة ...ديها فقرايتك كثر "خنزر بشوي بتهديد" سمعتيني ؟

ضخى : و واخا ك كون هاني "صرطات ريقها ...جراتو توبا من دراعو بشوي مشات بيه لبيت لاخور مفرش فراش رومي فوطويات اما هي بقات مع وليد " خويا ولييد مرحبااا ..

وليد : ترحب بيك جنة يالحبيبة ديالي مال وجهك ولا صفر هي مدرتي شاااي فالقراية ؟! ههههه الله يا مك تايعلقك من شفارك ..

ضحى : من زينك سير سير "دفعاتو ومشاو لحقو على مراد الي لقاوه كايتعنب بلهلا يحزقو ليه ههه ...اما زين الدين عرف عمتو شنو غاتقول ومشا جلس فوق الفوطوي منشور تما حل صديفات القميجة الفوقانيين يتنفس من التعب وخنقة التفكير وهز ايدو كيشوف فيها "

زين الدين"كيسمع ليها وكيحك فطرف لحيتو وعينيه فلارض عياااان من تعب الخدمة وجري ..تا كملت وهو يهز عيينينه مكمشين فيها " : شنو كاين ؟ دخلي نيشان متكثريش عليا ...

توبا"تنهدات" : الغالي مشا لدار لاخرى بغا يتقادا صداع معاك..

زين الدين"رفع حاجبو": بقا فيك ؟

توبا : تهنييييت غا هو ضحى مزال معارفا والو...

زين الدين"عوج راسو وقادو" : هو الي عندو الحق يعلمها شنو ليا انا !؟

توبا"ربعات ايديها" : جاوباتك البنت بالموافقة!! را خاصك تعيط ليهم فالعادة النوبة فينا حنا نعرضو عليهم ونديرو تعارف ...

زين الدين"عض شنايفو الي مكيبانوش باللحية الكثيفة وبقا يحك فيهم بسنانو قبل مينطق بجوج كلمات ميكثرش وميزيدش" : العتبة لينا والدار ليهم" زعما مرحبااا بيهم دار دارهم..قاليها هاد زوج كلمات وناض وقف تم غادي وصل عند الباب بلا ميدور" تكلفي نتي ومتقصريش من جيهة ضيافتهم

.رجع عصام عادي والوضع تهدن شوية من الي عطات الموافقة ديالها لزين الدين ماهضرش معاها ولا قاليهم شنو كاين حتى عيطات توبا عليها وعرضات عليهم بكل ترحيب ...اما زين الدين عيط لعصام وماحاملش هاد الوضع كل مكيزيد يغرق وعلى قولته ناس ميستاهلوش هادشي وخصوصا هي وخوتها وكل مرة كيزيد يكره الغالي وميجي منو هاد الاخير الي مبقاش بين ليه وجهو من داك النهار ....واقفة قدام الماريو كتشوف وتشوف فاللبسات الي حطات قدامها وصفاء كتعزل معاها وتهز تاهي وتحط ...

فرح : بففف شنو نلبس دابا !؟

صفاء : شوفي انا فاش شفت السيدة الي جات معاهم. وكيفاش كتهضر وعائلتهم باش معروفين...انا ف رأيي لبسي البلدي عرفتي نتي جلالب كتباني فيهم كاتغوتي (زعما زوينة بزاااف ههه )

فرح"عوجات فمها" : بلدي !! بلاتي عندي ديك جلابة الي خيطت ديك المرة ملبستاهاش راك عارفة "بحزن على يونس" مفرحتش بيها...

صفاء : جبديها نشوف تنسات عليا ...

فرح"ضارت لماريو وجبدات جلابة باقا فكاغط ديال صبان ملي حطاتها مبقاتش طلات عليها حطاتها ليها وحلات الكاغط جبداتها كانت فالبيج مخزانية مطروزة بطريزات خفاف فالكمايم ومن جناب فقط فالصم ذهبي وسفيفة فلون جلابة والعقاد فيهم حجيرات ذهبيين ..سرحاتها ليها" : هاهي

صفاء : اوووففف يا صاحبتي غزااالة نسيييت هاد ثوب كنتي حطيتيه نتي ومي ...ناااضية .. هانتي لبسي معاها ديك صنيديلة بلا ذهبية وصويك صغير وهانتي ناضية ..

فرح : مكرهتكش تمشي معايا ..

صفاء : ااااااربي ما سكتي هاني غانبدا نتنخصص..

فرح.: حتى فوزي مغاديش غادية غير انا ومي نجية وعصام خويا وبا جدي بزز باش جا تا قلنا ليه با مكاينش والي طرا...

صفاء : احسن حاجة والله ...ماعليش نصبر تاتجي وعاودي ليا على نسيبنا زين الكتاف"عينيها تعسلو"

فرح : هههههه واخا"تغيرو ملامحها" ماعرفتش اصفاء علاش حاسا بيه ماباغينيش !؟

صفاء"جمعات ضحكة" : ولاش خطبك !؟

فرح : ماعرفتش حسيت فحال الى كان عندو حساب مع هذاك الشارف ..

صفاء : ولكن نتي شارف قاليك باك بالي الوهابي الي يحساب ليه جايبو ساعاك را هذاك الولد الي بغا يخطب ...

فرح : الوهابي الحاج هو الي عندو الجواب ملي سولتو فاش تلاقيت بيه قاليا لا زين الدين الي بغا يخطبك ليه ...والمخنتر فهم غلاط...

صفاء : هادشي مفشكل والله...على اي نصيبك هاهو جا دابا تال من بعد وغاتهضري معاه وتفاهمو ونصيحة مني متفلتيهش بين ايديك ...يلاه نوضي لبسي دابا يجي عصام يبدا يكلاكصوني عليك ...

مشات لدوش دوشات مزيااان وخرجات تجري لبيت نشفات حالتها دارت حليب لجسمها ديال كوك ولوز رطباتو عاد لبسات حوايجها تحتانيين وفوق منهم بيرميدا و بودي فالابيض دارت ديدورانت عاد لبسات جلابة الي جاتها صدااااع حيدات الفوطة وجات صفاء صاوبات ليها شعرها نشفاتو عاد دارت ليه البلاك خلاتو مطلوق قهوي مايل لحمورية يعني اصهب ...رطبات ايديها ودارت ماسكارا باش تبين شفارها وشويي ايلاينر لبسات ما تبقى.ورشات بارفانها وخرجات كتقاد فصويكها دارت فيه تيليفونها وهو يوقف عصام بطوموبيل ودخل لدار قاد حالتو تاهو ولبس مزيان قميجة بيضة وسروال دجين وخرج عندهم كانو لابسين تاهما لبس تقاشرو وسبرديلتو ريحتو تعطعط شعرو موقفو بجيل...ووقف ضرب لارض بسبرديلتو وهز كونطاكت وشير ليهم ...

عصام"كيقاد فساعتو" : مشينا !؟

جدو"معنق فرح بجنبو..هبط راسو ليها" : اش كاين نمشيو نشوفو دوك الناس لاكانو فالنصيب ..

فرح"هزات عبنيها ف فوزي الي حابس ضحكة هو وصفاء تا دخلو فبعضياتهم وشافت فعصام الي مبسم ليها بشوييي وكيشوف فيها بنص عين وهي ضربها لقوة الكحلة ههه " : مم

جدها"ضحك من قلبه" : اش ممم ههههه "شافيهم وضرب فوزي وصفاء بعكازو تا غرنگ فوزي " بعد من البنت امسخوط

فوزي: اححح مادرت والو ابا هههه

عصام"مشا سبقهم " : يلاه وكان منتعطلوش...

تسلتات كتزرب تبعات عصام لا يشدو فيها هادوك وتبعهم جدها كيضحك ونجية ....مسافة طريق حتى كانو فالمجال الحضري الدار البيضاء صونا لمراد الي عطاه زين الدين نمرة عصام باش يتلقى ليه ...علمو بالي دخلو لعين الدياب ولقاه فالبلاصة فين نعت ليه ورسل ليه لوكاليزاسيون ف الواتساب ...حتى وقف سلم على عصام من الشرجم ديال طوموبيل كان غاينزل عصام

مراد : خليك خليك دنيا هانيا خويا..مرحبا بيكم نورتونا..

عصام : يعمر دارك نور بيك...

مراد : هانتا تبعني دغيا ماشي بزاف...

حرك ليه راسو ركب مراد فسيارته وتبعو عصام مسافة حتى دخلو لحي فين ساكنين جا قريب لبحر بزاااف الفيلا كتطل عليه وفرح كاضية من النافذة ديك الدنيا فشكل..غمضات عينيها حتى لقات راسها دخل بيهم لداخل جريدة كتريح النفس حتى وقفات السيارة ونزلو كدور بجنابها وتقلب بعينيها وقلبها كيضرب حتى حسات بايديها ولاو عرقانين ورعدة شداتها من صبعها الصغير ...سمعات صوت ترحيب نسوي وهي دور بانت ليها توبا ومعاها واحد البنت اية فالجماال لابسين لباس تقليدي توبا بقفطان بيض سامبل وشال تاهو بيض وضحى ب جلابة بلا قب فالاصفر لمحات فرح ...

ضحى : هخهخخخ غليضة هههههه "جمعت ضحكة بزز خافت لا يشوفها زين الدين يفگس ليها العينين"..

بابتسامة من توبا بترحيب منها وبتوصية من زين الدين يكون احسن استقبال ليهم واحسن ضيافة تدار ليهم كلشي يكون هماوي .. بصدر رحب يتلاقاو ليهم ويا ويييييييل الي ينقص منهم حيث عارف معدنهم هاد ناس ماشي ديال تنقصي منهم ...وحيث اصلا زين الدين واحد شخص الي مضياف بزااف وسخي ومصواب مع الناس الى كنتي معاه مزيان تاكليه بحوايجو...

توبا"وخا مسكينة معاجبهاش هادشي خايفة ميكملش وخايفة من بزاااف والوحلة الي وحل فيها زين الدين بسباب الغالي كتزيد تحقد عليه اكثر...تبسمات لنجية الي جايا تاهي لابسة مقادة مسكينة قايمة بواجبها مع فرح واكثر " : مرحبااااا مرحباااا نورتوونا "سلمات عليهم وعلى فرح تاهي" تبارك الله غزالة بنتي..."جاو زوج بنات خدامات هازين طبسيل تمر معمر باللوز وگرگاع وتمر ملبس بشكلاط بيض وكحل و صينية فيها ابريق البديع طاوس زرق وفناجن ديالو...فيهم حليب وما زهر ضايفوهم بيه " مرحباااا

نجية : ترحب بيك الجنة الحاجة لهلا يخطيك...

مراد : با عصام مرحبا تفضلو ...ياك علمك زين الدين بالي غايجي دابا ياك ؟

عصام"حرك راسو" : علمني عندو شي غراض ..ماعليش علمني واعتاذر

مراد : هاهو جاي فالطريق كان خاصو يمشي مع المحامي صاحبنا نيت واحد مشكيل وقع فشي شيكات داكشي باش هاهو قرب نيت...

فرح"قلبها قرب يسكت بالخجل وذكر سيرتو تا صرطات ريقها"

دخلات توبا مع نجية وفرح ومراد مع عصام وجدو كيهضرو حتى وصلو لصالون الكبييير تما مفرش باجود انواع الفراش البلدي موبرا الي دايرين ليه ديك اللولة المحفرة فالاصفر والاسود وزرابي والخوامي النوع اللول حيث هو من محبي الاثاث القديم خصص ليه صالون فالفيلا بذوق توبا ...كل مكدخل كتحل فمها منبهرة بداكشي الي فيها وريحة البخور فالمبيخرة تاع الضو ...جلسو كاملين كيرحبو ويعاودو وصينية اتاي وصينية المجامع محطوطة حدا تفريشة فلارض بالمخاد وهيضورات صوف ...

مراد"وقف وجمع ايديه مقابل مع جد فرح " : الحاج ماتشرفناش بشي تعميرة اتاي من داكشي "حط ايدو على صدرو" تكون ديال القلب وزينة فحال مقامكم ؟!

جد فرح وعصام"تبسم كيضحك" : هههه كترشيني بالكلام الزين ولا كيفاش..

مراد: ههههه تاحاجة ماتجي فمقامكم الحاج هههه غا قبل علينا"باس ليه راسو"

هو : اسيدي على راسي وعيني علاش لا"ناض معاه تا جلس فديك الجلسة اصلا كتعجبو مرتاااح وبداو يجيبو ليه المقراج هزات فرح كاس الما تشرب وهي تشرگ ليها بالتوثر تا تخوا عليها الما على صدرها وفرزگات جلابة من تما "

فرح"وقفات" : الله تتت"حدرت عينيها حشمات"

توبا : ماعليش ابنتي

نجية : بسم الله عليك...نشفيها..

فرح : بغيت فوطة ولا شي حاجة احم "صرطات ريقها بالحشمة من الموقف"سمحو ليا ..

توبا : ماعليش سيري معاها بنتي لدوش "غمزات الخدامة مشات لعندها وهي تبعها تا داتها لطواليط ديال ضياف كاينة تما حدا الباب الكبير ديال دار غير دخلة وكيدايرة...ابتاسمات ليها وهي تدخل كتلعن وتسب فراسها بقات حالا فمها فالدوش كيداير تا نسات راسها وهي تقلب على فوطة لقاتها مع الفاط مطوية بطريقة دائرية هزاتها بدات تنشف وتعاود والو فازگة جلابة مالقات مادير خرجات باش تسول الخدامة على سوشوار مشات فالممر تما كتقلب وتعاود ودور كتسمع صوت الهضرة ديالهم من صالون ...حتى شمات ريحتو وهي دور لقاتو عند راسها تا شهقات ...

فرح : هيييييييه ماماااا "شدات على صدرها" خلعتيني ناريييي "بانت تزنيگة فحناكها وهي تحدر عينيها"

زين الدين : شششش ..كااع ..

فرح"جاتها ضحكة " : ههههه

زين الدين "داخل تاهو لابس فوقية بيضة نعماس وكيجااااات عليه هاز فايدو ساشية مكتوب فيها اسم مجوهرات الحاج البغدادي ساشية بيج ومكتوبة بالذهبي ..وساشية اخرى كبيرة شوي ... قشع طبعة الما قداااش فصدرها تال عند كرشها وهو يكمش عينيه" ...مالك ؟!

فرح"مهزاتش عينيها فيه " : والو غير شرگات ليا وتخوا عليا الما و ...

زين الدين"رفع حاجبو" : ومالك على حالتك بغيتي تموتي ؟! شنو سبابها!!

فرح"باقي حادرة عينيها" : ماعرفتش غير حشمت وتدعقت كتوقع ليا ...

زين الدين"بصوته الخشن الي حاول ما امكن ينقص منو ويرققو على ودها الغالب الله " : حشمتي مني ؟!

فرح "عضات شنايفها وعوجتهم ماعرفات باش تلاهي راسها تكسر التوثر الشديييد." : لا احم فاش كنجي عند شي حد اول مرة نعرفو كتوقع ليا هههه"حكات راسها بعبط ودوزات ايدها على جبهتها بغاتو غير يمشي ولات تفتف غا وحدها ههه "

زين الدين"خاشي ايديه فجياب الفوقية وحاضيها وحاضي حركاتها تعبيرية " : مزيااان الحشمة زينة وخا قلالت فهاد الوقت بندرتها غلات(بندرتها زيانت هي زعما ولات نادرة وكيما ولات نادرة كتزيد تولي احسن وغالية ) "شاف قدامو ورجع شاف فيها " واخا تهدني بعدا ..ومرحبا بيك يالالة ..

فرح"بابتسامة دافية" : ترحب بيك الجنة ونعايمها "حدرت راسها ومشات سبقاتو"

زين الدين" بقا كيشوووف فيها حتى نطق بلا ميحس " : Ciciona (هي الدلع الي كيدلعو بيه الغليضة.وهي الغليضة بالايطالية وكتقرا تشيتشونا هههه )

كان لقاء الاول ليهم رسميا نقولو اول لقاء غادي يبداو فيه الاخذ والرد فالحوار ...بالخجل الي فيها من جيهتو حيث اول لقاء من اخر لقاء وقع ونضرتها ليه الي كانت خجولة طبعا شي حاجات لاحضهم وشي حاجاات مدققش فيهم اكثر ما ركز فكلامها ...

مشات سبقاتو مابقاتش كاع قلبات على الخدامة ولا شي حد يعطيها سوشوار تنشف هالعار غير تنشف هي من العرق الي تكب عليها من التوثر الي وقع فالصالون قدامهم ومن التوثر ديالو هو خلاااص...دخلات لقات جدها كايعمر فالبرارد ديال اتاي الي حطو ليه بالطريقة الصحراوية ...جلسات حدا نجية وجهها بغا يطرطق وغير كضحك تشوف فتوبا وتضحك تشوف فنجية وتضحك ...كضحك غا باش تخفي الستريس ورعدة الي شدتها في فمها هههه حتى زقف عند سواري صالون ونطق سلاام عليكم بصوته ...

زين الدين : مرحباا بالي نورونا "وقف عصام تسالم معاه" مرحبا سي عصام ..

عصام : الله ينورك...

زين الدين"تحنى على ركابيه سلم على جد فرح من ايديه وراسو رحب بيه عاد وقف مشا سلم على نجية كتوريه توبا بسميات حتى وصل لفرح ومد ايدو سلم عليها" : مرحبااا مرحبا

فرح"مدات ليه ايدها سلمات وعينيها فلارض مبتاسمة حسات بايدو داافية وسط ايدها " : ترحب بيك الجنة ...

زين الدين"مبغاش يكسر الخجل الي سيطر عليها حيث كيما كنعرفو كاااملين فاش كنتحطو فهاد الموقف را كنبغيو نتخشاو فلارض وخا تكون البنت قافزة تال السما الى مدارتش هكا را وجهها صحيح نيت هههه..حط دوك ساشيات فوق واحد الطبيلة صغيرة تما ضار دورة وجلس بالمقابل لعصام هز فوقية شوي وحط مرافقو على ركابيه مفرقهم جامع ايديه تحت ذقنو" : الطريق مزيانة !؟

عصام "حرك راسو" : شوية وصافي البراجات كثار هاد النهار..

زين الدين : كاين واحد الحملة هاد اليومين.. ماعليش مهم وصلتو مزيانين ...اسيدي مرحبا بيكم دار حسبوها داركم ...

جدهم"رد البراد يتشحر فواحد بوطة صغيرة ملبسينها " : الله يكبر بيك اولدي...كيداير مع العمل كاين شي تمارة..

زين الدين"حك قرفادتو" : ضروري الحاج ضروري ...

عصام : الخدمة ديما فيها تمارة...

زين الدين : ولابد تجري ورا رزقك "ساط بتعب...وفاتح الموضوع بسؤالو على المخنتر وخا عارفو ماشي تالهيه وحس بالي كاينة شي حاجة مدام ماجاش ولكن ضروري من الصواب " الوليد مجاش !؟

عصام"بملامح شوية غاضبة حاول ميبينش" : لا ماجاش "حك لحيتو" مشاكيل فالورث عندو والوليد عندنا شوي صعييب غا وحدو ومعايشش معانا بزاااف كنضن راك سولتي وعرفتي...

زين الدين"مشات عينو نيشان بنضرة مخطوفة لفرح الي تحولو ملامحها من خجل لحزن ممزوج بغضب فور مكيتذكر ياها وخصوصا هاد الايام...رجع شاف فعصام " : الله يهديه وكان...

الجلسة مع اتاي والهضرة فالمواضيع الاولية كتكون باسئلة روتيينية موضوع كيجر موضوع حتى كيدخلو بلا ميحسو فالمواضيع الجدية وضحك وشلااا...جات الخدامة هزات صينية حطات فيها كيسان اتاي الي عمرهم...

زين الدين"شاف ف ضحى وهو يشير ليها براسو تعاون الخدامة حيث وحدة فالكوزينة مراة كبيرة شوي دايرينها غير لطياب وهادي لشقا وتوبا معاهم وضحى ولفات الي يتسخر عليها هادشي هو مكيعجبوش حيث قلة احترام لهادوك العيالات من ضمنهم توبا" : ضحااااا"بصوت شبه مسموع سمعاتو غير هي طارت وقفت"

ضحى"هزات واحد ديكور على شكل قفص ذهبي فيه ربعة طبقات كلو غير فاكية الكاوكاو ملبس بالنكهات مالحة وحلوة عمرات ليهم فطبيسلات عاد مشات ل طبسيل طاوس كبير فيه الفاكية تقليدية الي كنعرفو غير هما زادو عليه حلوة المگانة ومسكة فلاش ...عمرات ليهم شويش فطبسلات كتقدا ومبتاسمة بزز منها معندهاش مع الضياف تركيبة خاصها تفكك وتعاود فترتبي من جديد...جاتها السخفة بكثرة مكتمشي وتجي غا باش تعمر طباسل حيث حاطين مبدئيا غير الفاكية باش ميتخموش ويتغذاو...قربات عند نجية وهي تحط ليها شوية الكاجو "

نجية"كتشوف ف ضحى حمقاتها" : تبااارك الله من زويناتها بنية ...بنتك ياك الحاجة !

توبا : واااه هههه بنتي وحيدتي..

نجية : الله يحفضها ليك"شافت ف ضحى" شحال فعمرك !

ضحى : قريب ندخل ف عشرين عام اخالتي...

نجية : تبارك الله وفاش تقراي ...

ضحى : ENCG اخالتي العام الثاني ...

نجية"كمشت عينيها وهي تشوف ففرح " : هههه اشني هادي جامعة فحال الي دارت فرح وصافا..وولدي محمد رضى ؟

ضحى : هههههه لا هادي معهد متعرفهيش و متعرفهاش فرح يمكن"شافت ففرح"

فرح"ضحكات بشوي تتغمضو عينيها عاطياها صوابها على نيتها" : école nationale de commerce et de gestion سي عرفتها كنت خرجات ليا على حساب لمونسيون الي خذيت فالباك بمنحة مي مبغيتهاش حيث قريت ماحسن باش نكمل الماستر الي بغيت "تبسمات ضحى بزز من حبها وهادشي امام النص فالي جالسين تما منهم زين الدين و مراد هاد الاخير الي عيا يحبس ضحكة تا نقز خرج مشا لجردة ضكك على خاطرو" ..

ضحى : اهههه ااه مزياان هههه"مشات تكمل سخرة "

كب الحاج جد فرح وعصام كاس اتاي من براد مسوس خاص بزين الدين بغاات تجيبو ليه الخدامة وقفها بايدو وناض وقف على وقفتو تحنى هز الكاس ورجع وقف شاف فعصام ....

زين الدين : سي عصام تحرك معايا جردة شوي !

عصام"حرك راسو" : ايييه "وقفت هز تاهو كاسو ديال اتاي ومشا تبعو خرجو على برا فجريدة الي بقا كيشوف فيها عصام كيفاش مصاوبة جنة مصغرة وخصوصا ديك النافورة الي خدامة كتخوي فالما الي كيتسمع الخرير ديالو مريح للاذن وريحة الگازون عاد مرشوش استقرات جلستهم فواحد طابلة ديال زاج ضايرين بيها الكراسا...

زين الدين"رافع حجبانو من تاثير السعا ديال شمس..دار رجل فوق فخدو مفرقة...مقابل مع النافورة والما." : واحد فوزي مزيان الصحة والعمل ..

عصام"تاهو بنفس الجلسة غا هو مغمض عينيه شوي " : ولله الحمد ماصابش كيفاش يجي هاد الشهر ديال لعراسات دنيا عامرة دجاج مطلوب بزاااف ...راك عارف كل حاجة بوقتها

زين الدين : سي نفس الشي عندنا فالمحلات الذهب طالع شوي وناس ماثقالت منو ...

عصام "ضار ساف فيه" : الحرفة كسبتيها قبل متقرا ؟!

زين الدين "شير بايدو لفوق زعما وااهلييي" : ملي بديت نلاقي الحروف ... الوليد الله يرحمو كنت كنتحرك معاه ...كاسبها من الصغر...جات القرايا كسبناها تاهي وهاني تليت معاهم بجوج .

عصام : صعيبة تقابل الخدمة والمحلات شكون كيقابلهم !؟

زين الدين : الحاج الغاالي امين ذهايبية "عوج فمو باستهزاء الشي الي فهمو عصام الي ضحك بشوي " كان كاان ..

عصام : مبقاش !

زين الدين : لا..رجعت لبلادي رزقي نقابلو راسي...خويا من دمي ولحمي يغدرني شنو بقا لبراني"ضار شاف فيه وعصام رد ليه نفس الشوفة"

عصام : كحل راس صعييييب اليوم معاك بوجه لغذ ليه بوجه بعدو بوجه...بنادم مع راسو معندوش الوجه ...

زين الدين : دنيا هي هي ..ماليها ماليييييها"قالها بشكل ثقييييييل وخاااتر وصلات لمعمى لعصام"

عصام"تنهد" : ماليها خيبوها ...

زين الدين : الي ليك يحفر ليك..

عصام : والي ماليك يصايب ليك ..

زين الدين : الوقت تعقدات ابا عصام ...دخلنا فشي الي معندو لا تالي لا متلي ...

عصام : ماعلينا غير نتعايشو ونصبرو ...

ساد الصمت واحد المدة بسييييطة حيث زين الدين اصلا طبعو مافيهش كثرة الهضرة ومكبغيش كثرة الهضرة وعصام تاهو ماشي شي واحد الي كيهضر بزاف لا خطاك الى تعصب مكاين غير سبان وتكشكيش وتا زين الدين لا يقل عنه القاسم المشترك بيناتهم وهو الكلام القلييييل فهاد اللحضة ...حتى كسر الصمت سؤال عصام ل زين ...

عصام : شنو الاختصاص ديالك !؟

زين الدين : جراح مختص في جراحة تجميل الوجه و الفك Chirurgien maxillo-faciale et plastique de la face

عصام : تت...فيه شلا قراية واقيلة ..

زين الدين"كيجاوبو بلغة الي يفهمها ويفهمها كلشي مكيجاوبش بلغة الاطباء كيف مولف فالخدمة" : سيي ومزال مساليتش ..القرايا والتكوين دا مني عمر ..ماعليش..

عصام : كتعالج تشوهات الخلقية. والحرو ق "حك لحيتو" شفت شفت واحد المرة هادشي عندك فواحد الصفحة ..

زين الدين"حرك ليه راسو بقاو شحااال كيهضرو كيسولو فبعضياتهم وقف مشا معاه وراه نواحي الفيلا وطبعا لداخل ...حتى جات الخدامة بلغاتهم بالي الغذا واجد يلاه يتقادو كاملين ...طبعا فصلات توبا الطوابل طابلة لعيالات وطابلة لرجال ..قبل ميحطوه مشا زين الدين لفوق لبيتو شرب الدواء الي قبل الاكل بنصف ساعة صونا ليه تيليفونو كان المحامي ريان ....

ريان : زين الدين ...

زين الدين : شنو واقع !!

ريان"حك راسو معرف ميقول ليه ولكن ضروري ميعرف " : الحاج الغاالي شاد على المخنتر الخيالي وخوتو شيكات فيهم فلوس صحييييحة ...

زين الدين : شحال !؟

ريان : اقل واحد اسي البغدادي عشرين مليون جوج بسميات ولاد خوتو ...وواحد دار ضمان...الدار معرفتش ايناهي حتى نتلاقا بالسيد الصباح يجيب ليا الخبار...بالنسبة ل شيكات ديالك نتا ماليهم عطاو الكلمة نهار الاثنين يعطيو الفلوس ...

زين الدين : ساعف معاهم ماعليش .."شاف ساعتو" من هنا لعشية ندوز ليك فحسابك شي بركة ...

ريان : الله يا خويا بيناتنا شي فلوس !! غادي نتقلق منك ا زين الدين خيرك سابق بزاااف راك خويا الكبير من نيتك ...

زين الدين : خويا الصغير ومنضلموش ...قوا عليك الجهد هاد ليام الله يسمح لينا من عرگك (عرقك)...

فهاد اللحضة كانت صفاء فدارهم جالسة كتفرج حتى وقفات عليها فاطنة كتسمح فالفوطة الما...حتى گرضفات ليها عند راسها هزات فيها صفاء عينيها ...

صفاء : امالك !!

فاطنة : نوضي جيبي الخبز من فران موحى ...

صفاء"عينيها خرجو" : ااااويلااااااي على فران موحى !! تالتما امي حرام عليك ولاش ديتيه تما وشكون داه ليك "شدتها البكية حيث الفران بعييد"

فاطنة"حطات ايدها على صدرها" : يااااربي وخاطري بغاه ليا داك الفران ...عشقت نعييي والديك "جهدات صوتها" نوضي المعقوبة دغاك را بوك يجي يبغي يتغذا تحركييي...

صفاء : واعنعنعن وامااااي را بعييييد بزاااااف اهى ...

فاطنة : وتحركي ليك شوية نهار وماطال ملي تجي من ديك شرييكة ونتي حاطة ليا زوكك على سداري ...

صفاء : زكي ...

فاطنة : خرجي تحركي يجري فيك دم نقصي من الغلض راك دوبزتي..

صفاء"حلات فمها تا بانو حلاقمها من هضرة مها " : غلض !! امي تي اينا غلض ! تي علامن داوية ؟؟ واش صافا بنتك ولا فرح !؟ مي حلي عينيك اويلي حي ...

فاطنة"بقات تشوف فيها" : شتي شتي فين وصلتيني ؟ شتي الي ميسمعش هضرتي اش كيوقع لميمتو شتي"جلست فوق سداري وبدات تبكي " شتي فين وصلتيني مابقيت نفرز مابقيت نشوف ولا نقشع !؟

صفاء"كترمش فيها مصدومة" : اش درت انا امي لهادشي كلو ؟

فاطنة"خرجات فيها عينيها" : اويلي وقالت ليك مدارتش اويلي طليتو خضر اااااربي اما تا يابس يتحرتت اويلي ضحكة وشرگة على المسخوطة بغات تقتلني....

صفاء"الصمت كتحاول تفهم مها مالها"

فاطنة : مابغيتيش تسخري ليا دروك ياك !"وقفت وهي تم غاديا" ونمشي نتسخر انا نمشي ولينا الواليدين الي يتسخرو على ولادهم ؟! ولينا گد القب گد السطل ...اييييه "كضرب فصدرها وغاديا هزات جلابيتها تا شدتها صفاء من ايدها"

صفاء : تي ريحي مالنا فهادشي صافي انا نمشي نجيبو غا اري الفلوس ...

فاطنة : بغيتي تتقتليني وتفقصيني ياك !؟ عينك تهناي مني ولاااابد تهلكيني فصحتي بالتقاشيح معاك ابنتلحرااام ...

صفاء : واخا سمحي ليا صافي"باست راسها" اري نجيبو خلاص..

فاطنة"جبدات من جيب الخمالة بزطام جلد صغيير عطاتها خمسة دراهم و مية درهم" : شدي وردي صرف الخمسة دراهم..

صفاء"بفرحة يحساب ليها عطاتها مية درهم هههه" : اودي هانية نرجع ليك صرفها ..دايرة ثلاثة الخبزات صافي ماعليش يستاهلو ...

فاطنة"حطات ايدها على مية درهم فايد صفاء " : وهادي راكي غاديا غاديا فطريگك دوزي من درب لالة العالية ديك العمارة الي قريبة ليها الي فيها الخياطة نوال عطيها هادي قولي ليها فلوس القرعة(دارت) وقوليها تسبقني انا هاد شهر را بغيت نخلص بيها شي كريدي ...

صفاء"صرطات ريقها لول على مية درهم وندوزو لريق ثاني " : مي ا مي ها ها دد هاد اماااي هاد الخخ خياطة نواال شي نوال غير الي كنعرف ياااك"تبسمات تا بانو حلاقمها"

فاطنة : لا نوال الي كتغرفي ابنتي راها غير حدا الفران اويلي..

صفاء : واههههع وامي الفران قرب ليا من هادي نوال الفران را غا تنضحك عماك هاهو غا هنا ونوال امي را خاصني ليها طاكسي ويلاه يلاه ...اري فلوس طاكسي

فاطنة"خنزرت تاني" : تي سيري على فرقشك امو زوك

صفاء : هاهي بدات تاني معرفتها واش عينيها غيسو ولا كتنمر عليا ..."شافت ف امها" مي نوال بعيدة وانا معنديش زوك امي عند فرح وفرح دابا را فدار ناسها المستقبلييين ...حضري عقلك معايا ...

فاطنة"بغات تطير ليها الفلوس وتغضب وهي تجمعهم صفاء " طلقييييي المسخوطة الي مكتحمل امها طلقي ابنتلحرام نمشي راسي اهى اهى اش فيها الى مشيتي ااااااش ! نوال هاهي غا هنا را مبعيداش قريبة لمحطة ديال تران ...وليني انا موالدة غالخلا...

صفاء : مي عطيني فلوس طاكسي من لاخر...

فاطنة : معنديش...

صفاء : شدي تيكونو عندك انا نمشي نجيب الخبز الي كلوو. خاصني ليه طاكسي

فاطنة"غوبشت فيها" : قويتي افاطيمة...

صفاء"صغرت فيها عينيها" : لاش امي تتشفري ليا مصطلحاتي !!

فاطنة : دابا شتك وليتي تعرفي حسن مني !؟

صفاء "تمات غادية" : نهار ا نبع الحنان نفهمك سميني صفاء قحبة ف ضوبااااي "محسات غير بصندالة جاتها لجدارة لوذن مشات كتلوى وتطوا ووذنها كتسمع فيها زننننن ههههه...خرجات من دار كتجري وتحك فوذنها الي بقات مصمكة ليها ومشات فاتجاه الفران حتى دخلات من شي زناقي الي غايوصلوها من طريق اقرب غاديا وتسب غا فراسها ههه حتى تلاقات ب صطوف دايز طاير بموطور عصام منين هزو وشكون عطاه ليه الله اعلم والي مهم هو السرعة باش غادي خلات كلشي ضار يشوف فيه "

نزل زين الدين نيشان لعندهم قصد الطابلة الي غايجلسو فيها رجال حتى تلاقا فطريقو فرح الي كانت خارجة تابعة نجية فين غايجلسو يتغذاو ...شافت فيه هي تبسم حدرات راسها وزادت خلاتو كيشوف منضرها كايجيب ضحك غا كتشوفو وتحدر راسها هههه ولكن هو هادشي الي كيشوف فيه وهاد الناس الي جاو وهضرتهم والضروف ديال الخطبة جاتو فشكل واش يمكن التسرع ديالو الي وصلو لهادشي لحضة الغضب ..او هو مقدر ومكتوب كتبو عليه ربي باش يتناسب معاهم ويخطب هاد بنت الناس ...كل مكيشوفها كيتفكر الغالي الي كان غايتزوج بيها ويتغصب شبابها معاه كتزيد تعز عليه وتبقا فيه وتزيد تاكد ليه شلااا قرارات فكر فيهم. ...هو لحد ساعة ماشي بالصواب والعادة والاحترام ناس كيف قال وجهم ومقامهم كبييير ...

زين الدين"جلس حدا الجد وقدامو عصام ومراد..حنحن بصوته مسمي الله " : بسم الله ...

عصام"..تبسم بجنب مرتاح البلاصة الي فبالو غاتعيش فيها ختو وقلبه كيزيد يهنى عليها .." : يا بسم الله ...

زين الدين"طبعا طبق ديالو كانت صلاد سيزار وطاجين صغير ديال دجاج وزيتون حيث مع الاسف ميقدرش ياكل الحلو وباش ياكلو خاص يزيد فلادوز ديال دواء...كلاو البسطيلة الي كان مذاقها بنين من ايدين بيضاوية باش مصاوبة ...تهز الطبسيل الي محطوط فطيفور جبدو سرابت فازگين مسحو بيهم ايديهم حتى جا طبق نص حولي منسم ومشوي وسط الحفرة ديال النار مزوق بالفرماج وكورنيشو وكروفيت غوياال..."

الجد"بابتسامة" : اتبارك الله اولدي الخير هذا لاش مكلفين راسكم ؟!

زين الدين : مكاينش الي يوفي مقامكم الحاج "حط ايدو على صدرو معوج راسو بصواب" قبلو علينا وكان ...

عصام : الله اودي "مبتاسم ليه" الخير هذا"شاف فالحولي" مدرتيش مزية ملي ماتقديتيش البهيمة من عندي ابا زين الدين

زين الدين : نخلص الحق !

عصام : ضروري ...

زين الدين : مانلقاوش ماحسن منك سمعتك زينة ابا عصام نشريو بلا معرفة ...

عصام : الله يكبر بيك ...

.كملو الغذا الي كان مضياف ومشبع للعين قبل المعدة ...تنقات دنيا وتغسلو الايدي وناضو الرجال والعيالات تلاقاو فالنصف وهي تدخل توبا ونحية الي عارفين بالعادات ..

توبا : سيري بنتي نتي وولدي زين الدين لجردة الى سمح ولدي عصام "شافت فيه وضحكات" صروري يتشاوفو ويهضرو ههه

عصام : ايييه مرحبا ...فرح سيري معاه هاحنا فالصالون "شاف فساعتو" شوي ونتحركو قبل العصر ...

فرح"حركات ليه راسها " : و احم واخا خويا "بصوت منخفض"

مشا زين الدين سبق وتبعاتو هي بشويييا حتى خرج من الباب لجردة نيشان لكن هاد المرة فديك الجليسة البلدية الي فالجيهة لاخرى ...ووقف ضار شاف فيها كانت كتشوف فالجوايه بعينيها منبهرة بالجردة بزااااف حتى غمضات عينيهت وهي تنهد بدون شعور تا صدرات صوت حلات عينيها وحطات ايدها على فمها وضارت شافت فيه مخرجة عينيها

زين الدين : كاااع "هز واحد الحاجب ههه"

فرح : ههههه عجبتني البلاصة...زوينة بزاااف هنا ...

زين الدين : مزيااان"شير ليها لفوطوي" رتاحي ..

فرح"حركات راسها وجلسات كتشوف وتشتت فالنظر وتحك فعنقها ودور هنا ولهيه حتى بانت ليها نافورة كتخوي فالما" : غزاااالة ...

زين الدين"جلس مفرق رجليه كيسوف فيها كيفاش منبهرة بالمكان ورتاحت ليه داير ايدو على حنكو حاضي حتى وقفات عليه الخدامة جايبة ليه ساشيات الي وصاها تجيب حرك ليها راسو وضار عند فرح حط ليها الساشيات " : ديالك ..

فرح"حدرات عبنيها فيهم وهي تبسم من قلب قلبها تا بانو سنيناتها" : ليا !!"شافت فيه حرك ليها راسو" شكرا بزاااف

زين الدين"حط صبعو على واحد ساشية" : شوفيه دابا الى عجبك مزيان معجبكش نشوفو شنو بغيتي ..

فرح : اي كادو كيعجبني براكة غير مولاه ولا مولاتو كلفو راسهم وفرحوني بيه مكيهمش عمر الهدية مكترد...

زين الدين : ياااك الالة...ماعليش شوفيه ...

فرح"جبدات من ساشية صغيرة واحد بواطة زرقة حلاتها وتحلو عينيها معاها كان گرميط ذهب بالحجر فيه زوج لوان الابض والوردي وحرف متوسطو سامپل F بكثرة ما حمقنا مشعراتش حتى قالت " اووو F

زين الدين"نطقها بلا ميحس" : فرح ...

فرح"شافت فيه" : الله يكبر بيك زوين بزاااف ..كتقلب منين تسدها جات مزيرة على ايدها حيث غلاض شافت فيه بخجل" : مقداتنيش هههه

زين الدين"هز البواطة وحيد ليها واحد توب الفوق تحلت وهو يجبد واحد الطرف ديال سنسلة ديال كورميط شد من عندها ولصقو حتى زاد فالطول وشد ايدها ركبو ليها " : مزيان دابا ؟!

فرح"حلات فمها" : غزال غزال والله خههه مزياان ..

زين الدين"بان ليه اكثر شخص مبغوض عندو داخل بكل راحة كان شيئا لم يقع ماشعرش براسو لايدو الي كتاخذ وضعية البونية زير عليها تا كان غايتقطع منها د.م مفيقاتو غير فرح بسؤالها حتى غمضت عينيه بنفاذ صبر كيحاول ما امكن ميتعصبش قدامها ولكن شكون خلاك ؟ كيف قالها هو وعصام كحل راس خيب منو مكاين..."

فرح : ذوقك ؟

زين الدين"بان ليه واقف بعيد باش يطمنها ومتوترش لانه غاينوض يمشي ليه نيشان يقصدو وقف وتحنى لعندها قرب وبكل اطمئنان منو ليها واستئذان منها غمض عينيه وحلهم " : خدمتي ...(زعما هو الي صممو) ...

فرح"بدهشة وحنيكات موردين" : صممتيه نتا !!

زين الدين"حرك راسو بالايجاب" كان تصميم خاص ليك..."نطقها من فمو وكان لهضرته معنى ااخر" تستاهلي ماحسن "عنكش شعرها بشوي" بصحتك وراحتك ....

بكل شكر وتقدير على الجيست الي دار معاها ابتاسمات ليه وحركات راسها بمعنى واخا ...اما هو غير ضرب دورة وهو يمشي عاقد تخنزيرة من بعد مكانت مفكوكة وهو جالس كيهضر معاها كانت جلسة فيها توثر خجل بالنسبة ليها و استكشاف وتساؤلات وتردد بالنسبة ليه ...مشا نيشان قاصدو ...اما هي بقات كتشوف داك الگورميط وداك تصميم الي كان سامپل ورقيق وناااعم واللون الوردي الي فالاحجار والبواطا الي كانت مقدمة بواطا عادية ديال ذهايبية ملبسة بالموبرة زرقية بحجم طولي ...هزات عينيها فالساشية لاخرى وهي تشوفو واقف بعيييييييد مع شي حد معرفاتو كيخاصم ولا كيهضر عادي ولا اش مغطي جسمو داك الشخص معامن كيهضر ...استغلات الفرصة وهي تحل الساشية قلباتها اول ما اثار انتباهها واحد الباك صغير مغلف ب باببيي بلون خشبي ومدورين عليه دونتيل تعقد على شكل بابيون ...وكرطونة صغيرة تاهي مزوقة بنفس الشكل ...ماقدراتش تحلهم فضلات ماتحلهم تال دار تشوف شنو فيهم مع صفاء ...جيست زويييين دارو زين الدين هادشي كيبين الصواب الي عرف ليه حيث فالخطبة مجابش ليها اللازم الي كنعرفو ...الخطبة ضروري ميجيب الهدايا سوا باغيها او ماباغيهاش سوى تفرض عليه هادشي او فلحضة غضب سوى بارادته الخطبة والعادات وتقاليد هما هما مكيتبدلوش ...وخا مباغيش هادشي را مكيعنيش انه ميديرش صواب وهي متستاهلش يكون الواحد ناشف معاها او شحيح فمابالك بزين الدين الي كيف كنقولو ماشي غير سخي ايدو متقوبة ههههه ....

اما هو غير وصل لعند الغاالي الي كان جاي بكل ثقة فالنفس وكان شيئا لم يكن ....فييييييييييين هو ضارب ليا دنيا ب مات ركلة وهو را يضرب من لتحت ...كنطرحو بزااااف التساؤلات كيفاش بغاتو توبا ؟! وكيفاش صبرات ليه !؟ واش هو كيعطي وجه وكيضرب من لتحت ولا وجهو الحقيقي باين وهي كتعاما عليه...ولا هي من العيالات الي صبارات على رجالهم الي ممكن يشوفوه كيقمر يفسد يسكر كاينة المراة الي كتشوف راجلها فسد مع واحدة اخرى غيرها وكتصبر فشرد الولاد وكتصبر فشرد كلام الناس الى فات حتى طلقات وكتصبر باش متسمعش الهضرة والقيل والقال وضلم المجتمع للمرأة ب صفة عاامة...

زين الدين"جايه وخاشي ايديه فجيابو كيشوووف فيه من تحت لتحت رافع حاجب " : افين اشريف !؟

الغالي"جاي بجلابة گرونة وبلغة كرونة وتقاشر بيضين لاكان غير فالاناقة البلدية سيكم الغالي يحنت عشرة." : جيت نهدي النفوس...

زين الدين"قوس حجبانو" : اهاااه ...

الغالي"حنحن منضف حلقه" : شوف اولدي ...

زين الدين : ولد الحاج البغدادي...

الغالي : واخا اولد الحاج البغدادي الله يرحمه ...جيت نهدي النفوس بغيت نشوف بنتي ومرتي نهضر مع ضحى مابغيتش نبقى بايت بعيد وهما بعاد عالاقل غير بنتي ماتشوفش باها هو فقنت وهي فقنت را ماجاتش اولدي هادشي ..

زين الدين"ربع ايديه كيسمع ليه " : ملي كنتي باغي دير شرع الله الي كتعرفو فالدين ديالك ...بسلامة كنتي ناوي تعيشهم فدار وحدة !؟

الغالي : مايبغيوش ليا خصوصا الحاجة توبا ...

زين الدين : كاين شي مراة تبغي على راسها ضرة !!!"غمض عينيه واحد الله لحد ساعة را عطاااه صوابه فوجه دوك الناس الي لداخل" هضرتي مع مرتك وبنتك !

الغاالي : في اش !؟

زين الدين"شاف فيه بواحد الشوفة الغالي بزز منو فهمها حيث باينة شنو قصد زين الدين والمعنى واضح واش افلان هضرتي مع مرتك وبنتك بالخصوص بانك كتفكر تزوج وكنتي باغي تزوج !؟ لحد الساعة معارفاش ضحى بالي كان باها باغي فرح وها واحد السبب كياكد خوف زين الدين من هاد الخطبة وخصوصا على هاديك بنت الناس الي عفويتها وبرائتها يخليوها متستاهلش هاد الاب والاعمام الي دارو ما امكن من فساد حتى بانت ليهم فرح طعم غني...واش افلان فاتحتي بنتك فموضوع زواجك بامراة ثانية وباغي معاها الولاد !؟ ...واش هضرتي معاها بالي غاتسكن فدار اخرى هذا بلا ميهضر لتوبا على البلاوي الي لقا عليه ....هادي كانت معنى نضرة زين الدين بلا ميهضر " ..

الغالي"حدر راسو كيلعب بصباع ايدو مالقا ميقول" : بغيت نصلح العلاقة ونطلب سماحة...

زين الدين"الصمت"

الغالي"حرك راسو" : ضروري نهضر معاها دابا جيت نشوفهم ونشوف الى بغاو يسكنو معايا فديك الدويرة ...يبغيو ؟

زين الدين : بيناتكم ...شنو ليا انا ! بين المراة وراجلها مايتحكم حد ...الي عليا العمة منشوفش دموعها مزال ...وديك البنت شوف من حالها ...هاني لداااااابا مكالمي طرح ومهاااااادن"قالها بصوت منخفض وخاااتر وهو لداخل را بركاااان كايغلي كاااايغلي " تحرك من هنا عندي ضياف الخير مايستاهلوش يبان وجهك ليهم ...سير وكان نعلمك وجي لعندهم ...

الغالي : ياك ؟ ماحشوماش هادشي الي كدير وانا قد باك..

زين الدين"عوج راسو لهيه فحال كيقول ليه عاود مسمعتش" : نعااام ؟!

الغالي"غمض عينيه وضار لهيه كيصرط فريقو ورجع شاف فيه" : دير بوجه شيبة الي فراسي...

زين الدين"شاف فيه بواحد الشوفة فحال كيقوليه يااا راااجل ههههههه " : كاين الصندالة وكاين وجهك... سبحااان من خلقك الوهراني ..."رجع خنزر فيه ونطق بلا ميمحن راسو بشي دقة غير نبرة صوته كااافية " تحرك من هنا تحرك...

مالقا ميقول ولا يرد عليه زادتو قمعة على قمعات اخرى فاتو ويمكن جاييين ولكن الوجه مزال صحيح الي خلاها زين الدين هاد الاخير الي حاول مااا امكن يكالمي الطرح لانه ناس كاينين ومابغاش يزيد طين بلة الى فات تا ناض الصداع يتعرف كلشي والضياف يصغار وجههم. وعيب فحقهم خصوصا فرح وعصام ...غاتخربق الوقت كثر ماهي مخربقة ويصدقو ف ما لا يحمد عقباه وهادشي كيزيد يضر زين الدين ومرض فتفكيره من ناحيتهم وناحية فرح ...رجع الغالي ادراجه غادي حتى سمع صوت طفولي رقييييوق وهو يدور ناحيتها ....

زين الدين"باقي مخسر ملامحو جيهة الغاالي تا سمع صوتها كتعيط عليه وهو يغمض عينيه وحلهم وقال بقلة صبر " : يالاه اسي...

ضحى"جايا كتضحك حيث شحال ماشافتو" : بابااااا

الغالي : اهلااا وسهلا ..."عنقاتو كتبوس فيه وتعاود وهو غير مبتاسم ويعنكش ليها فشعرها..."

زين الدين"شاف فيها وفيه وحنحن تاضارو عندو " : هاهي معاك"قالها ليه والفاهم يفهم ...ضرب الدورة رجع عند فرح وهي بقات مع باها "

ضحى : علاش مشيتي لبرطما ديال دار بوعزة ؟!

الغالي : حيث تما غادي نسكنو جميع انا وميمتك ...

ضحى"بصدمة خرجات عينيها" : اويلي علاش !؟ كيفاش غلنسكنو تما وهنا !!! ولا حيث زين الدين غايتزوج ؟

الغالي : حيث خاصنا نمشيو تما وعندي نيت معاك شي هضرة ...اجي معايا لطوموبيل نهضرو...

خشات ايدها فدراعو ومشات معاه لسيارة الي ركنها خارج الفيلا حدا فين داير العساس ديال درب تما داك البيت ومعاه الكلب الي حاضي تاهو ...ركب هو وياها فالسيارة بقاو فيها فاتح معاها الحديث الي كان خاصو يقولو بالي غايسكن فدار اخرى لان زين الدين مابقاش بغاه يسكن معاهم على فعايلو...

ضحى : ولكن علاش ؟ ياك كنا مزيانين ابابا !!!

الغالي : وابنتي ولد خالك جا لدارو بغا يسكن فيها هاهو غايدير المراة ...

ضحى : هو الي قاليك خرج من دار ؟

الغالي"بغا يوصل ليها باي طريقة را مضلوم" : وا شحاال ماجلس غاتخرج من فمو...

ضحى : خويا زين الدين يقصاح حتى يعيا وميديرهاش ...راك نتا الي حضيتي ليه محلاتوو هو فين كان ! كان كيقرا ويخردم برا شكون وقف دوك المحلات ؛!!!

الغالي : وصل الوقت ابنتي الي خاص ندير علاش ...منبقاش جالس فدار ماليهم ..راني كبرت وبغيت نتجمع مع وليداتي الى كتاب الله ...

ضحى"باستفهام" : كيفاش وليداتك ؟ قصدتي ماما وانا ياك ؟

الغالي : نتي وماماك الاصل ...ابنتي الي بغيت نفهمك بالي بغيت ندير امراة ثانية الى كتاب الله ...خطبت وحدة ومكتابتش جاو فيها ناس خرين ...

ضحى : تزوج على ماما !!؟؟؟ علاش ابابا اش دارت ليك فاش قصرات معاك ؟؟

الغالي : ميمتك هي الاصل انا لا بغيت امراة غير على جال وليدات ولا شي ولد يكون خوك وجناح ليك...وتوبا مبقاتش تقدر تجيب الولاد...

ضحى : ههههههه جناح ليا حتى كبرت ؟! راني عندي تسعطاش العام ابابا امتا غايكبر هاد الولد وامتا غاتشوفو نتا غايكبر ...ماما كرهات تولدهم ليك ؟ كرهات يكونو عندها وليدات من غيري ؟ حيث مبقاتش تقظر تنوض تزوج عليها ؟ وفين مشا صبرها معاك ابابا ؟ حرام عليك علاش باغي تزوج عليها ...هادشي علاش"عينيها دمعو" ملي مشيتي مبقاتش سولات عليك ؟ مخاصمين ؟

الغالي : جيت نطلب منها سماحة وليني عندكم شي ضياف على ماعرفت البنت الي خطب ولد خالك ؟

ضحى : خليني من الناس وقوليا ابابا راك غير كضحك ...بغيتي نعيشو معاك ابابا ومع مراة غير ماما ؟ واش من نيتك كتسناني نتقبل ؟؛

الغالي"غوبش فيها" : انا علمتك الى مبغيتيش شغلك هذاك هذا شرع عطاه ليا الله ماحرام ما عيب واسبابي واضحة وباينة ...الي عليا درتو علمتك وواجبي معاك راني قايم بيه ..اش خاصك مزال ؟!

ضحى"ضحكات من قلب قلبها " : هههههههههههههههههه واجبك معايا ابابا"نزلو دموعها كيجريييييو" اينا واجب ابابا ونتا حتى فاش كنقرا معارف ؟! اشمن واجب نهار خديت الباك ماحتافلتي بيا ماقلتي تا ديك مبروك لاخرة ههههه وحتى اش درت ماعرفتي ؟ اشمن واجب ابابا ؟!

الغالي : مالنا فهاد الهضرة ؟!

ضحى : بابا انا منوافقاش على زواجك من وحدة اخرى والى شغلك هذاك تا انا راييي وانا حرة فيه ...والدار مغاديش نسكن معاك فيها وحتى ماما منضنش باقا تمشي معاك لشي قنت ...وانا ولفت هنا صحابي اغلبهم ساكننين هنا ...الحياة الي حليت عليها عيني هنا مع زين الدين مهلي فيا ممخصصني من والو الواجب الي كان خاصك ديرو نتا قايم بيه هو ...قاليك حقو الشرعي "بالفقصة الي تفقصت مشعراتش براسها شنو قالت" نتوما كتعرفو فالدين غير حقي الشرعي ندير ربعة العيالات ...نتا قدرتي عليا انا وحدي بقا غير مراة وتولد معاها ...قول باغي تمتع مع راسك باغي تحلل فسادك مع العيالات مالي يحساب ليك معارفاش مشايفاش خبارك كاملة كنسمعها من عند ناس ...الفساد الفساد فكلشي الفسايدي وزايدها بالزواج بالعيالات هادشي الي كتفهم فدينك ... "ماحسات غير بواحد تصرفيقة لحنكها تا ضار وجهها لهيه حسات بحنكها طنطن ليها فوذنيها وعواج"

الغاالي : قراك ياك ؟ فين عمرك كنتي تهزي على بوك العين ؟ نوضي خرجي عليا من هنا كاع لا تبغي لا نتي لا مك "غوت تا طارت حلات الباب وخرجات وعينيها ناشفين من دموع من هول صدمة الصفعة الي تلقاتها من عندو"...

من بعد ما خلاهم بزوج اب وبنتو كيف قال يضيرو لمحاينهم رجع هو لعند فرح فين خلاها فين باقا وباقي كتشوف فالمكان وترجع تشوف فداك الكورميط الي خلاها عينها يلمعو من جماله ....حتى سمعات صوت تحنيحنة ديالو معلن على قدومه ..

زين الدين"جلس كيحك فجبهتو حتى دوز على شعرو ورجع فرق رجليه وحاط عليهم مرافق ايديه باش يبدا الحديث نيشان " : شنو داكشي لاخور عجبك ؟!

فرح"شافت جيهة الساشية لاخرى " : مزال مشفتوش ..حتى نمشي لدار ...

زين الدين "شاف فيها ورجع شاف قدامو بغا يبدا الهضرة الي خاص يبدا " : شنو لي ديپلوم الي عندك ؟!

فرح : ليصونص و ديبلوم المحاسبة ...

زين الدين : كتفكري تكملي ؟!

فرح : فصراحة فكرت فاللول حتى نخدم فالدولة ولا شي بلاصة باش نصرف على راسي فالماستر الي بغيت وعلاش لا حتى دكتوراه ولكن ضروف مساعداتنيش بزاف ديال لكونكورات دوزت مكنتهزش فيهم مكيكونوش فرص يعني لايفيكتيف (عدد) ديال لي كونديدا (المترشحين) قليل ...دابا انا حتى الخدمة الي فيها هاهما مزال معيطوش ليا ومزاال متجمعوش ليا تاني

زين الدين"كمش حجبانو" : شكون هادو...

فرح"تبسمات من قلبها" : هههه العيالات وحتى البنات الي مقارينش ..احم حيث كنقري فمحاربة الامية ...

زين الدين : خدمة كتبغي صبر فوق الصبر وخاطرهم فوق خاطرك...

فرح : بصح وتا انا كنصبر معاهم بالعكس كيفوجو عليا وخا كنتعافر معاهم ومكيتعلموش بزربة مي كوميم بعدا كيتقاتلو معايا ومعندنا منديرو كاين الي راسو عامر وكاين الي ثقيل وكاينة الي راسها خفيف مي اهم حاجة من هادشي كامل كندي دعواتهم ورضى ديالهم فوق كلشي ..وكندي لاجر معاهم انك تقري وتعلم امرأة باش تكتب اسمها ولا تحفضهم القرآن ماشي ساهل...

زين الدين : تبارك الله ...

فرح"بغات تسولو وحشمات تا كتبغي تحل فمها وترجع تسدو وهي تكحب وشافت قدامها" : كحكح احم ...

زين الدين"يمكن فهم شنو بغاات تقول التامس من تصرفها انها بغات تسولو وحشمات وهو معرفش السؤال غير قمر وصافي وهضر على راسو نيشان " : كل انسان عطاه الله حاجة فين يتدها فيها باش ماعطا الله ...خدمتي فيها صبر مع الناس بزاف لا فالصحة ولا فالبيع والشرا ...

فرح : ممم spécialité ديالك صعيبة ...

زين الدين"حرك راسو شوي" : ماشي بزاف مادام درتها نتحملها باش ماعطا الله ...

فرح : Chirurgien maxillo-faciale et plastique de la face

زين الدين"ضار شاف فيها بتساؤل" : تماما..كيفاش عرفتي..

فرح"ايوى هنااااااا خرات القايدة طامو وهما ماعلمو..لالا لالاي لاي اش غاتقوليه صفاء الي قالتها ليا وبقششات عليك تجلس عليها صفاء غا بعضامها تقتلها...وباش تجاوب طبزت لمها العين " : وراك معرووووف..

زين الدين"هز حجبانو" : وااااايلييييي ؟؟

فرح"صرطات ريقها وحصلة نييييت ههه " : ههههه م ماشي شنو فهمتي هههت

زين الدين : وشنو فهمت انا ؟!!

فرح : والو ...وصافي هانتا دابا فاش سول عليك عصام راك عارف كيسولو ضروري هادشي عادات"كتحك جبهتها وايدها دترعد خصوصا هو مقابل معاها وكيشوف فيها قاس ليها العرق القاتل فهاد اللحضة تا حسات بايدها كاتزبق بالعرق .." هو قالها ليا ...طبعا مغايقولش التخصص شنو غير قالها ولقيتك انا فباج انسطاغرام وصافي"ضحكات بعبط " هههن

زين الدين"عوج فمو محرك راسو" : ممم مزيان الالة ماعندي مايتسالك ...سي هو هذاك ...

"دور وجهو لنواحي كيشوف هنا وهنا حتى بدا يحك لحيتو معلن على الموضوع ثاني الي غايبداه والي ضروووري منو باش يحدد عالاقل ولا غير بسؤال يعرف اش يدير" شنو بان ليك فهادشي ؟!

فرح : ف شنو ؟

زين الدين"سرح ايديه زعما هاد الوضع" : شنو شروط ديالك شنو بغيتي وشنو كتفكري ..."حك لحيتو واحد شوي"

فرح : صراحة مفهمتش هههه

زين الدين : نديرو خطبة دابا ويكون خير من بعد ...

فرح"كانها حسات بيه متردد غير من كريقة هضرته مقادرش يقول وماباغيش يجرح لان الموقف الي فيه زين الدين صعييييب انك تفهمو الى متحطيتي فنفس الموقف ديالو ...مفهماتش مي نوعا ما هضرته مزيانة ..تبسمات تا تكمش منخرها وتغمضو عينيها وهي كتحك فشعر راسها "

زين الدين"شاف قدامو " : على بركة الله من بعد كل حاجة تجي فوقتها والي مقسمها الله تكون ...الي بغيتيه وتشرطي عليه يحضر هادشي مافيهش نقاش...شوفو نتوما االعيالات شنو كديرو فهادشي...من بعد "حك شفايفو بسنانو كيفكر للحضة ورجع شاف فيها " يدير الله الخير...

كيحك فعنقو مرة قرفادتو مرة لحيتو مرة يحك كفوف ايديه ويعبر معارفش يوصل الفكرة بالضبط وهادشي كيوقع فاش كنكونو وسط شي حاجة حنا براسنا معارفينش مصيرها ولا اش هادشي الي فيه حنا ..."

فرح : ان شاء الله ...

زين الدين"وقف " : ندخلو عندهم !؟

فرح"وقفات تاهي" : ندخلو وخا ..."تمات غاديا تا وقفها ضارت عندو عطاها ساشيات الي جاب ليها " اههههه نسيتهم ..

حرك ليها راسو وخشا ايديه فجياب الفوقية وهو يسبقها وهي تبعاتو من لور بانت ليه توبا واقفة كتهضر مع الخدامة باش تبدا من بعد ساعة توجد القهوة والحليب واتاي ويتقادو طباسل الحلوة دلوز والصابلي ...ضار لقا فرح دخلات عندهم وجهها حمر جلسات حدا نجية وهو توجه لعند توبا ....

توبا : اولدي هاني...

زين الدين"معصب" : داك راجلك شكون علمو يجي ؟؟

توبا"خرجات عينيها" : اويلي علاه جا ؟! اويلي لاش جاي باغي يجبد صداع ؟

زين الدين"بشك" : لله فسبيل الله جا ؟! معالمو حد بالناس الي جاو ؟!!!

توبا : والله مابقيت هضرت معاه اولدي ...عارفني نعيط ليه وانا حديتهم معاه ؟

زين الدين"قرب ليها مزيان وتحنى لعندها كيهصر بشوي وياربي غير ميسمعوش" : والرب العالي الي شانه عظيم ويعاود يجي بلا ميعلمني حسابي خااااااايب ..."خرج عينيه بتحذير" خااااايب...

توبا : واخا ولدي "صرطات ريقها" فين هي ضحى بعدا..

زين الدين"بانت ليه داخلة وجهها حمر حمر مغطية حنكها بشعرها وشاداه بايدها يعني باااينة من طيارة... بغاات تفوتهم ساعاك معامن " : اجي لهناااا

ضحى"غمضات عينيها وهي تمشي عندو حادرة راسها" : هاني

زين الدين"بلا مقدمات حيد ليها شعر الي على وجهها حتى خرجات توبا عينيها ودارت ايدها على فمها"

توبا : اااااوييييييل الشيطان شكون ضربك تما ؟؟؟

ضحى"حابسة البكية وخايفة من رد فعل زين"

زين الدين : باك ؟؟

ضحى"حركات راسها وجامعة فمها الي كيترعد"

توبا : اويلي علاش ضربك ؟ اويلي واش هذا هبل ولا مالو استغفر الله العلي العظيم لاش هادشي ؟ اش وقع بيناتكم ؟

زين الدين"ضار شاف فعمتو وشاف فيها كيقلب فحنكها ويدور ليها فوجهها" : شنو دارت هي ؟!

ضحى"هزات فيه عينيها الحمرين بدموع"

توبا : اش غادير لاش يضربها من هادشي كامل ؟!

زين الدين : راجلك مانتناقشوووش فيها عيبو سابق "شير ليها بصبعو" الخليفة خليفة اميمتي الي ولد ماماتش"شاف ف ضحى بنضرات نارية" قللتي االحيا على باك ؟ "خرج عينيه بتهديد" منعاودش هضرتي ..

ضحى"حدرات عينيها حيث بصح قللات الاحترام على باها عارفها ماساهلاش قليلة الادب فاش كتعصب وبصح قللات الادب مهما طرا مكانش عليها تقوليه دوك الكلمات فسايدي بو العيالات وخا هو معرفش اش قالت بالضبط مي عارف اش غايكون ملي ضربها وباين من شنو طرا فوجهها انها قالت شي كلمة ماهياش وضربها "

زين الدين"عض شنايفو" : تلاحي لبيتك "جهد صوته تا نسا راسو وتسمع فالارجاء" يلاااااه

توبا : شش بشويا ناس كيسمعو"شافت فيها" طلعي لبيتك مناقصين صداع وتحشيمة مع الناس "مشات ضحى كتزرب طلعات فالدروج بالخوف من زين الدين وصوته طارت كتنقز جوج درجات كانت شوي تجي على فمها غير شدات فالدربوز .."

زين الدين"شير بصبعو جيهة ضحى الي طلعات" : بنتك حياها قليل ...باها كيبقى باها الاحترام واجب من جيهتو كيما كان تحتاااااااارم باااهااااا ...

"هز ايديه وحطهم على وجهو كيحك فيه ويعاود ويحك بزربة تا هزهم الفوق بغا يقول شي حاجة ورجع ضار عندها " : جوج كلمات منعاوش عدو ربهم ...يحط رجليه بلا علمي وهاني عاودتها وخا هكاك ...يعاود يجي ولا تجرا شي حاجة بلا منعرف تاااا شي قواد منعقل عليه ..."ضار لهيه تا نفخ بنفاذ صبر ورجع شاف فيها" بغيتو تجهلو ملتي ياك ؛!؟

توبا : انا راضية عليك اولدي تهدن متعصبش دابا يطيح ليك سكار ولا يطلع تاني عافا ولدي ..واخا كون هاني كلشي يوصلك مشااات ايام نخبيو عليك غير تهنى ..سير عند الناس را معاهم غير مراد عيب اولدي خليتي البنت رجعات وحدها..

زين الدين"كيشير بصبعو ناحية الصالون فين دخلات فرح والقصد هنا انه يهضر عليها " : والله ماتستاهل هاديك بنت الناس والله ماتستاهل ..."غزز سنانو وضار معصب حاول بزز باش يرخي الملامح ديالو حيث غايدخل عند الناس"...

بسرعة يمكن اشبه بالقاتلة غادي فالطريق منير الي داز من حداه مكيعقلش عليه وناس كطلب غير سلامة. وسلاك والي شاف فيه الله را تكتاب ليه عمر جديييد ...اذان العصر فهاد اللحضة من بعد مكان الصباح طاير بنفس الطريقة والي شافتو حتى صفاء طلبات ليه سلامة ومشات تقدات لامها ورجعات لدارهم من بعد ساعة تقريبا حيث المشوار كان طويل ...عاود تاني داز هاد المرة بنفس طريقة وب موطور عصام الي خذاه من عند فوزي بلا ميقوليه اش كاين ...حاول فوزي يعيط لعصام ...

فوزي : را خذا الموطور اصحبي وجهو مكيتفسرش معرفتش مالو...

عصام : ماشي مشكيل عطيه ليه...لهلا يرد اصل مو الزا***"كيهضر فجردة بعيد عليهم" خليه يموت بيه القواد لاخور...

فوزي : اش ندير دابا ؟

عصام : معندك مادير ديها فخدمتك ورزقك والقواويد مع تقواديت ديالهم ..."قطع معاه وتيسر هو لاشغالو اما صطوف فهاد اللحضة مع وصل وقف ولاح الموطور لقاه واقف فين نعت ليه كان فواحد البلاصة فيها ديور مملاصقينش ...كان واقف قدام سيارته كيهضر ويشالي بايديه "

سمير : صافي حبيبة جيبي ادم من عند ماماك وعشية نسافرو ..ماتسديش صيدلية خلي امين هو الي يقابلها ماغانجلسوش بزاف واحد سيمانة كاع الى طولنا..داكوغ ما بيل...

صطوف: القواد

سمير"ضار شاف فيه " : اوكي صافي يلاه بيزو بب "قطع معاها ومشا عندو وهو كيخشي فتيليفون فجيبو " امالك اعشيري ههههه شي باس مكاين اصحبي ..."شاف المطور الي لاحو" او او مالنا ...

صطوف"كيضرب ليه فوذنيه" : انا ديال تبيديق ؟!

سمير : اش وصلنا لهادشي ؟

صطوف "غوت بجهل" : واااااااش اولد القحبااااااا انا ديال تبيدييييق ازااا*** من لاخر عطي لعدو ربي خو جوابي بلا تقحبين دز****

سمير : لا اعوذ بالله

صطوف : باغي تح*** حاجتي صبر نسالي منها باغي دير معايا plan 3 adistance (زعما يتكواو بثلاثة عن بعد صطوف وحدو وسمير وحدو ولكن مشاركين فيها بزوج وهما ثلاثة هههه ) ندوز فخليقة عدو ربك ..."جبد تيليفون وبدا يوريه فيديوات ديالو معاها خدااامين منين جابهم شكون صورهم الله اعلم والمصيبة هو سمير ويقوليها شكون متعك انا ولا هو " زعما نتا حو**** مقود ؟!

سمير : خلينا غير نتفاهمو من لاخر ا صطوف نعيشها حسن منك متعاتني حسن ما متعاتك ...اش ليك نتا فيها نح** ولا لا ياك مباغيهاش لزواج تقاود هي كلها منفوتش عشيري داكشي غير هضرة اما صح را منفوتكش بياسة مقيوسة محكوكة داخلين فيها ز***بة اش ليك بيها ...دابا من لاخر صافي ساليت منها عشنا وقيتات زويونين "حط ايدو على صدرو" يتوب عليك بياسات كطيح عليهم اصحبي ملااااح ...

ماشعرش سمير امتا عطاه صطوف براس حتى تلاح عالطوموبيل وشنق عليه عاودو بروسية ثاني تا طاح لارض وتلاح عليه كيعطيه فالدق وسمير تاهو ماشي ساهل بزوج قد سخط حتى تراب ولا يطير دنيا تما خااااوية شكون الي غايفكهم مكاااينش ....

سمير : والحبس "عض لسانو وعطا لصطوف بونية لفمو تا طوش دموووو ...وتلاح لهيييييه "

صطوف "مسح من فمو وناض ليه كيغوت ويعرعر" : وهاااااع بالرب تانقتلكم القحااااااااااااب بيدقتوني انا كلب وسط منكم رعواني ..."هز رجلو وقبسو لكرشو شد سمير كرشو وهز فيه راسو منييييييير مشا ليه كيجري دفعو وضرب ليه راسو مع طوموبيل ..بقاو بونية فيا بونية فيك زداف رداف دق فاللحم العضم الوجه جوج وحوش شرسة منوضة المقاتلة ."

في نفس البلاصة ماشي بعيد عليهم كانو عينين شي حد كيراقبهم ...

هي : لا خويا لااااا خويا صطوف ماشي ديالك الحباسات...

صطوف"راسو ولا كيترعد بالاعصاب تا خرج عينيه على جهدهم تا شنق عليه بالحر عطاه براس تا تسمعت زداااف فوق بانو ديال طموبيل " : بالرب المعبود لا بقات فيكم بجوووج

سمير"كيضحك عليه باستفزاز" : منتقلقش منك اصحبي راك عشيري ...حتى تزوج ههههه ومنوصلش مرتك " بغا يستفزو ساعاك فرشها بهاد الجملة لاخرة الي شعلات فصطوف العافية كان باغي غير يضربو ضرب مبرح هاهو صدق فارشها "

صطوف : وااا ينعل جد الهة مها صحبة معاااك ...

سمير : مقبوللة منك اصحبي"تسمعات تكككك كان صوت شكة الموس الي خشا فيه سمير ... خرج سمير عينيه وشاف فيه "

هي :"غير شافتو خشا فيه موس وطاح ...خرجات عينيها على جهدهم وحطات ايدها على فمها" اويييييييلي اهى اهى..."طاحت بالخلعة على طولها تا تضرب ليها راسها مع واحد القنت مشافتهاش "...

سمير "كيشوف فيه حتى طاح على ركابيه " : ياااك اصاحبي..

صطوف"عينيه باقين خارجين فيه بالصعرة مسح د.م من فمو ومنخرو الي تجلخ ليه الوجه بالتراب ودمااايات وعين تنفخات ليه بزاااف " : حو*** وسخي قلنا نقرصو ليك وذنيك تجبد مرتي الي مزال مبانت وعينك فيها نح*** ك انا"مسح الموس الي فيه د.م فحوايج سمير ودفعو برجليه وطار لموطور ديماراه وزاد بجهد تا نقز طاير "...

يتبع...