محتوى القصة
الساعة الثانية عشرة ونصف بعد منتصف الليل...الكل طلع نعس تقريبا الا هي وصفاء وسيمو الي بقاو داخلين الكوزينة وفرح كتقاد وصفاء كتعاونها وسبمو راه كينقب...
سيمو : توحشت جماعتنا مع با فوزي...
صفاء"كتقاد فالطاسة" : كون تشوف انا عندي شلا منقوليه على الغليضة ختو...
فرح"كانت كتقلب الگرصة ديال الشحمة مصايباها ليه حيث عزيزة عليه خبزة الشحمة الي كدير كيحماق عليها...هاد المرة دايراها بالكفتة..توقفت وشافت فيها" : اش تگولي ليه ؟
صفاء"ضارت شافت فيها لقاتها هازة حاجب ودايرة فيها واحد الشوفة كتعرفها صفاء بالي غاتگلس عليها تخرج ليها مصارنها...شدات كرشها وحسات بالخنقة ديال تبقيجة قبل متبقجها" : ههههيييييق اتنضحك اش بيت نقول نتقل فعضامي..هععهعع...
سيمو : الخوف نعمة والي نجى منو نعمة عاوثاني...
صفاء : اليوتيب زييييييين والي تفرج فالجرائم الي فيه يقول هل من مزيد...مانزيدكش فشي جريمة تم !؟
فرح"رجعات تقلب الخبزة حتى دارتهم فاليمنيوم ودارتهم فمانطة صغيرة وحطتهم فالقفة...ضارت لثلاجة هزات العصير الي صايبت ديال بنان وتفاح ولافوكا...ومشات جيهة المجر هزات واحد طاسة كانت موجداها فيها كرات الطاقة جمعاتهم بنوتيلا(كرات طاقة فيهم كركاع مطحون مع لوز مطحون مع طريفات زبيب وكاوكاو والكاجو هي زادتو مع بيسطاش وتمر الملكي وجمعاتهم بالنوتيلا ودارتهم فطاسة) خلات صفاء وسيمو مخرجين عينيهم ماعرفوها امتى صايبتهم تا حطاتهم فالقفة ومع كتحرك بزاف ولات تنهج" : فففف صافي...
سيمو : ينري نتي امتى صايبتي هادشي !!
صفاء : كرات الطاقة الي كنتي كتقادي لفوزي !! تما كاع ماكنتي كديري البيسطاش والكاجو...
سيمو : خيورات البغدادي ميعطلوكش ههههه
فرح"دارت ليه بابيي باش يمسح وخا را عندو ومعيلقات باش ياكل صلاد الي صايبت ليه..وكتهضر" : كنت عايشة فالخير ماشي عاد غانعيش فيه....
صفاء"عضاات شنايفها كتلولب فعينيها ماقدرتش تشوف فسيمو لا تنشر بالضحك وفنفس الوقت مصدومة من كلامها" : احم...
سيمو : هاي هاهاي...ها "تلفت ليه الجرية والهضرة"
فرح : ففف ساليت...انا غانمشي نجيب كبوطي ونجي شوي ويجي زين الدين...
خلاتهم فالكوزينة وطلعات لفوق دخلات البيت هزات مونطوها وهزات تيليفونها دارتهم فصويك دارت المونطو فدراعها وخرجات من البيت نزلات غاديا الكوزينة حتى صونا ليها تيليفون فايدها كان زين الدين...
زين الدين : تشيتشونا ديالي...واجدة !؟
فرح : اه غايجي معايا سيمو وصفاء...
زين الدين : يلاه تحركو هاني كنتسنى..
قطعات معاه وهي تلبس مونطو بلا كمام فحال جيلي فالكحلةبالقب كبير فوق كابيشو وسروالها فالكحل وسبرديلا...دخلات عليهم الكوزينة علماتهم بوصول زين الدين طارت صفاء لبسات عليها مونطو تاهي وسيمو كبوط هزات القفة وصاك دارتو فكتفها وخرجات سبقاتهم غير شافها زين الدين وهو يخرج من طوموبيل شدها من عندها...
زين الدين"باسها فعينها وعينيه على الباب بان ليه سيمو جاي" : شنو وجدات الفرحة ديالي !؟
فرح"بابتسامة خفيفة نطقات خاشية ايديها فجياب المونطو والدخان ديال سخونية كيخرج من فمها بحكم البرد قااارص ونقيطات الشتاء كيطيحو" : غير شي حاجة خفيفة وصافي حتى لتما وتشوف...احم...واش ماكد دنيا خاوية "بنضرة جدية"
زين الدين : مكاينش الي يدخل هاد ساعة وقت زيارة مسالي...نوصلو وندخلكم من الباب ديال الموضفين اللور...
فرح"تنهدات وحركات راسها وهي تركب حداه قادات سانتيغ وضار هو ركب بلاصتو تا جا سبمو وصفاء ركبو اللور..ديمارا طوموبيل ومباشرة كانت الانطلاقة لمستشفى الشيخ خليفة..."
كان شاد التيليفون فايديه كيبقشش فيه حتى رسل ليه عصام اوديو طلقو وهو يستمع صوتو....
عصام : شنو بغيتي نجيب ليك معايا غذا من دار ؟
فوزي : بغيت مانطا زايدة وبغيت تخلص ليا لابونمون را تسالات معدي غير بواحد شوي بقى ليا يلاه يگدني شي ساعة وتقادا...وجيب ليا سورفيت دافية...
كيف رسل ليه ميساج تسلات ليه الكونيكسيون تا غمض عينيه ماغايلقى باش يتلاهى....بقى يخندش بالملال مشى للتصاور مسح الي ماعندهم علاقة وضحى بشي عشرة تصاور غالييين غا باش يرتاح بالي تيليفونو خوا وتنقى وولا ناضي....حتى تحل الباب وهز عينيه مكمشهم يشوف شكون جا وهي طل عليه بانو ليه غا حناكها عرفها هي وشكون من غيرها حناك الطبل ماحسش براسو تا تنهد وهو يضحاااااك تا بانو ليه حلاقمو....
فوزي : اهاااااع...الهبيرة...
فرح"دخلات دايرة شبح ابتسامة...مقربة ليه وهي توقف شابكة ايديها لتحت" : كيف بقيتي !؟
فوزي"بانو ليه صفاء وسبمو داخلين هازين فايديهم وتبعهم زين الدين تاهو فحال سورفيت فرح غير هو فالگري وداير طاقية ديال الصوف على راسو مهبطها عند عينيه" : الحمد لله...جيتو فوقت ناضي حق الرب...
زين الدين"تحنى لعند الفاصمة الي فحاجبو قلب ليها جنابها بتمعن...شوي ربت ليه على كتفو وزير عليه" : مالك ؟
فوزي"كيشوف ففرح" : تسالات ليا لابونمون مالقيت فاش نتفرج ونتلاهى...
زين الدين : هذا ماكان ؟
فرح"مشات القفة جبدات منها طاسة ديال صلاد الخس والخيار ومكعبات فرماج حمر وبطاطا مصلوقة مكعبات والذرة معلبة...وقطع البيض مصلوق... وقطع لافوكا مع كركاع مهرمش حكات فوقها بارميزان ودارت فيه صوص الي فيها معيلقة كبيرة خل وزيت زيتون ومايونيز ترباتهم مزياان وسقات بيهم صلاد..." : الى جاك جوع تعشى بيها...
فوزي"تصدم"
فرح"جبدات ليه ميكة وحطتها ليه فوق صدرو تا غوت وزين الدين كمش حجبانو مربع ايديه وكيشوف فيها شنو كتجبد وفنفس الوقت عينيه على تفاصيل وجهها وتعبيراته...اما صفاء دارت ايدها على فمها كتشوف فيها كتسلخ فيه وخايفة عليه وهازة ليه الهم ومقلقة منو...سيمو كيقول دابا تجمعنا تجلس علينا جاب الله كاين زين الدين..." : خبزة الشحمة الي كتبغي غير انا درت ليك معاها كفتة....
سيمو : عههههه زاهية تكف...اوووو"زواتو صفاء لكرشو بمرفقها تا حس بضو حسكو حسيييييييك...كون ما سكتاتو كون تحمس وقاليهم زاهية تكفات..."
حطاتها ليه بجهد فوق صدرو تا توعت وغوت...وتاحد ما هضر معاها بقاو كيشوفو فيها بصدمة الا زين الدين الي مربع ايديه وايد كتدوز على لحيتو كيحك فيها وحاضيييييها شنو كدير وكيفاش كتصرف بردة الفعل ديالها....
فرح : غانحطها ليك فالثلاجة هنا صباح غادي تجي واحد الفرملية تديها ليك تسخن وتجيبها ليك..."شافت فزين الدين" ياك..."غمض عينيه وحرك ليها راسو"
فوزي : وعلاش كتقصحي فيا...
فرح"خرجات فيه عينيها تا بغاو يطرشوه ويرجعو تا كحز راسو لور وسيمو شد فصفاء ورجعو باللور وهادشي كيشوفو زين الدين عرفهم كيخافو منها فاش كتعصب جابت ليه ضحك تا حرك راسو يمين شمال" : غزييييييييت...
فوزي : هاا و واخا غزي احم صافي سمحي ليا....
فرح : ماعندي مندير بسماحة..."ضارت جيهة القفة جبدات ليه عصير لافوكا الي طحنات وهزات كاس ديال عضير بالغطا فيه الباي ديالو فيه خواتو ليه فيه ومداتو ليه" عصير لافوكا مزيانة ليك لهرس الي فرجلك...
سيمو : زاااهية لافوكا وداكشي...
صفاء"ضارت نغزاتو" : واش متحشمش نتا ؟ را غانجري عليك انا...
فوزي"بغا يتكعد وتوعت تا حطات الكاس بزربة ومشات عوناتو تا تقاد فالجلسة وعطاتو الكاس سما الله وبدا يشرب...فهاد اللحظة زين الدين بقشش فتيليفونو حتى تسمع صوت ميساج عند فوزي وضار شاف تيليفونو" : صفاء شوفي ليا شنو وصلني !!
صفاء"هزات تيليفونو" : وصلاتك روشارج انترنيت شهر !!
فوزي"عقد حجبانو باستغراب " : وايلي شكون رسلها...
زين الدين"خشى تيليفون فجيبو" : مزيانة دوز الوقت قتل القنط...
فوزي"مستغرب" : وايلي زعما لقاهم حالين !!
صفاء : لا هادي واصلاك روشارج ماشي ابونمون...
فوزي : زهري زعما تگعد هههه
بقاو معاه حتى كال شوية ومشى زين الدين لتحت فين كاين الطبيب المختص يسولو على حالة فوزي...طمن عليه ورجع لعندهم لقاها جالسة حداه كتعطيه يغسل ايديه ومسحات ليه ب لانجيت مزيان....
فرح : جبت ليك مانطة هادي مغاتدفيك والو...
فوزي"جاتو البكية تا بانت ليه فعينيه وضار سيمو كيشوف فصفاء الي حركات ليه حجبانها وتنهدات باسف وحزن" : والله الى كنت باغيها...
فرح"مكتضحكش مكتبتاسم تا الى تبسمات غيييير خفيييييفة بزز باش كتبان...دليل انها باقي هازة فخاطرها وخا هكاك وماشي ساهل تصالح معاه مزيااان ..غطاتو بيها وخشاتها ليه من جناب حتى شد ليها ايدها" : مالك ؟!
فوزي : عنقي خوك توحشك بزاااف...
زين الدين"حدر راسو تا هز حجبانو باسف"
فرح"بقات كتشوف فيه حتى دمعو عينيها وهي دور لهيه تا هزتهم باش متبكيش وهي ترجع وعنقاااتو حتى غمض عينيه وباسها فشعرها بقى يدوز عليها وماباغيش تحيد من حضنو...كيبوس ويعاود...وهي تهز راسها وشافت فيه" : احم...واحد طاسة درت ليك فيها كرات الطاقة الي كنت كندير ليك ولكن زدت ليك فيهم شحال من حاجة مزيانة ليك لعضم...صباح كول وحدة ولا جوج وعند الغذا وحدة فالعشا لا غايطيرو عليك نعاس...وقتاش غاتخرج !؟
زين الدين : مزال شي سيمانة هكاك...
فرح : صافي غانبقى نجي كل ليلة فحال هاد الوقت...ونزيدك الى تقاداو...غذا غانجيب ليك واحد صوبا مزيانة و الحريرة ديال ايلان على ود العضم يجبر ليك(ايلان مزيان الي مهرسين)..."نفخات باش تنفس حيث قوات الهضرة باش ماتستسلمش لدموع..وشافت فزين الدين" صافي نمشيو ؟!
زين الدين : يلاه راني تعطلت...
فوزي : وديري وقيت وجي جوج مرات فالنهار عافاك ..
فرح : انا معاك حتى تخرج وديك ساعة نشوف...يلاه نخليك..
سلمات عليه وزادت غطاتو مزيان تاكدات ان البرد مغايدخلش ليه لجناب..سلمو عليه وقبل ميخرج زين الدين توخر تا زير ليه على كتفو وغمزو بالي كلشي يتقاد شوي بشوي حرك ليه راسو وخرج....خرجو من المشفى زصلهم حتى لفيلا مشات صفاء وسبمو دخلو بقات غير هي وياه...
فرح : غاتبات معايا صفاء فالبيت....غاتجي فالصباح بكري !!
زين الدين : العشية ان شاء الله نطل عليك ونرجع...مزيرة الوقت عندي...
فرح"حركات راسها" : واخا...نرسليك الغذا مع مراد والفطور ؟
زين الدين : لا كاين غذا الفطور ديك الوقت منكونش مسالي نقضي باش ماكان"جبد الكارو من الباكية والبريكة وجدهم باش غير تدخل يشعلو يدوز بيه الطريق...قرب باسها ففمها وبقاااااا حاااابس تا تنغم بدوك شفايف خذا لادروگ منهم خذا المتنفس ديالو خذا الاطمئنان الراحة الحب الشهد قبل مايمصهم تا غمضات عينيها وطلق منهم باسها فجبهتها" تهلاي ليا فراسك تفاهمنا ؟
حركات ليه راسها ونزلات من سيارة غير دخلات سدات الباب وهو يكسيري خرج من الفيلا...دخلات لقات صفاء كتسناها...
فرح : دخل نعس فالبيت الي كان فيه با را فيه بلازما تفرج ورتاح ونتي اجي معايا الفوق باتي معايا مغايباتش زين الدين فالدار...
صبح الصباح وجاب معاه الضياف...والضياف هاد المرة ناس ممكن تكون مرغوب فيها وممكن تكون صادمة وغير مرغوووب بيها....وقفات سيارة من نوع Renault Mégane...
العساس : تفضل اسيدي...
هو : فرح الخيالي هنا السكنة ديالها ؟
العساس : ايييه...
هو : علمها تخرج عندنا...
العساس : اييه م مرحبا سيدي...ولكن هي مكتقد تخرج وحدها هنا...الزوج ديالها السي البغدادي الي نقدر نقوليه يخرج عندك مكاينش فالدار...و واخا نعلمو فالتيليفون ؟!
زهير"حرك ليه راسو" : ماكاين لاش...حنا بغينا الزوجة ديالو...دخل علمها تخرج عندنا...
العساس"صرط ريقو حيث من هضرتهم حس بيهم شكون" : ش شكوون نقوليها !؟
زهير : الكوميسير زهير....ولاية امن اكادير...
غير قالها ليه برد ليه الما فالركابي...تحاصر ماحيلتو لزين الدين الي ما كاينش ماحيلتو لكوميشير ولا لفرح الي عارفها مكتقدرش تخرج وحدها...ولا وجهو مخطوف منو اللون ط...حرك راسو بارتباك وضار دخل لدااخل تا وصل الباب الكبير الي كيبقى محلول...
العساس"ضاير لهيه وحادر راسو" : بنتي توريا...
توريا"خرجات عندو هازة زيف والقرعة ديال برودوي مسيح زاج" : نعام ابا محمد...
محمد : دخلي علمي مرات سي البغدادي بالي بغاوها شي ناس برا...
توريا"خرجات فيه عينيها" : واش كتفلى ابا محمد ؟ راك عارف مكتخرجش على برا الا الى كان معاها سي البغدادي...
محمد : جهد فوق جهدي ا بنتي ماعندي مندير...
توريا : شكون هادو ؟
محمد : والكوميسير من اكادير...
توريا"دارت ايديها على حناكها" : ااااويييلي ناس العادية ومانع تدخل بقى غير هادو الي يطيحو مني انا كلي النص وشوف نتا وجهك كي هرب منو اللون...
محمد : اش ندير دروك ؟
توريا : عيط لسي زين الدين. علمو هو يتصرف...
محمد : واخا واعلميها باش ماتعطلش عليهم انا نعلمو دابا ونمشي عندهم..."دخلت تعلم فرح وهو جبد التيليفون دوز ليه الخط بقى كيصوني يصوني بدون رد عاود تاني صونا ليه مامرة ما جوج ووالو...ومشى رجع لعندهم علمهم بالي قالها لخدامة تقولها ليها...."
توريا"طلعات البيت دقات عليها حتى حلت الباب" : ختي فرح...
فرح"بابتسامة" : اهلا ختي توريا...
توريا : احم.. شي ش شي ناس كيسسسولو عليك برا...
فرح"صرطات ريقها وجمعات الابتسامة خصوصا ملي شافت وجهها تبدل فيه اللون" : ش ششكون !!
صفاء"جات موراها" : مالك !!...
توريا : شي ناس اختي بغاو ختي فرح برا...
صفاء : شكون هاد ناس ؟..ا
توريا : كيقوليا با محمد بالي الكوميسير الي طلبها...
فرح"ولا وجهها صفررررررررررر والنمل سرح ليها فذاتها" : اش شش بغااني ؟
صفاء"خرجات عينيها" : كيفاش كوميسير ؟ ولاش بغاها ؟...
توريا : ماعرفتش اختي...
فرح كاتسمع وقلبها بغا يسكت رجعات دخلات البيت كتجرييي هزات التيليفون دوز ليه الخط شكون من غيرو الي كيكون الحامي ديالها والامان والي كيحيد عليها الشوك من الطريق ويفرش ليها الراحة ويغطيها بالامان...دوزات ليه الخط تاهي صونات وعاودت وصونات ووالو...
صفاء : جلسي انا غانمشي....توريا سيري علميهم هاني جايا...
توريا"حركات راسها" : واخا ختي...
رجعات صفاء هزات كاب رماتو عليها وتمات غاديا بغات تمشي عندهم حتى عياطات ليها فرح وهي دور عندها ..
فرح : صفااااء...انا غانمشي نشوفهم...
صفاء : اش غاتمشي افرح
فرح : ااش غاتگولي ليهم ؟؟
صفاء : ماتقدريش تخرجي...ونتي اااصلا ماكتعرفيش تهضري معاهم من ديما فحالي كتخافي من البوليس...
فرح : فحالك...نتي غاديا زاعمة دابا ؟
صفاء"بدات تلولب فعينيها"
فرح : خليني نمشي نشوفهم اش بغاو الى شي مشكيل را منتحركش حتى يجي زين الدين ولا المحامي ريان...اجي معايا..
صفاء"وقفتها وشافت فيها كتاكد" : واش قادرة تهضري معاهم ؟!
فرح"خرجات فيها عينيها" : علاش مالي فيا شي مشكيل ؟ هبيلة ؟...خليني نمشي الى خفتي بقاي...
صفاء : لا نمشي معاك زيدي...حتى سيمو مشا صباح بكري الي يوقف معانا...
ماجاوبتهاش فرح سدات الباب ديال البيت وخذات النفس باش تحيد التوثر والخوف الي راكبها..بقات مزييييرة على الكاب بايديها ونزلات لتحت فطريقها تلاقات ب توبا ماداتهاش فيها كان عقلها غايب كاع ماسمعتهاش تا اش قالت وتوبا كمشات حجبانها حساب ليها خلاتها بلاكة ثاني حتى خنزرات فيها ملي مشات وصفاء تبعتها تا خرجو برا...
فرح"وقفات وهي تشوفهم من بعيد واقفين بسيارة ديالهم...بقات كتشووووف قلبها كيضررررب تيليفون فايديها متمنية زين الدين يلقا اتصالاتها الكثييييرة باش يجاوبها لكن هو مع الاسف فهاد الوقت داااخل البلوك كيجري فعملية دقيييقة وصعبة...ضارت عند صفاء الي وقفات تاهي ورجعات شافت فيهم...حتى حطاات خطوة القدام..تبعتها ثانية بتردد كبييير...حتى تمات غاديا بخطى بطييييئة الي حتى وصلات عند الباب ملي علمهم العساس بالي هي الي جايا خرج الكوميسير من السيارة كيقاد فحوايجو معاه واحد العون وفايدو ملف...
فرح : س سلام عليكم..
العون : فرح الخياالي ؟
فرح"حركات راسها..متوثرة بزاف لدرجة صفاء حسات بيها وهي حداها" : اه احم هي انا...علاش ؟
العون : واخا تعطينا لاكارط ديالك نتاكدو الله يجازيك بيخير ..
فرح : واخا نعرف علاش بغيتوني عاد نعطيكم لاكارط ؟
العون : انا عون قضائي وهاد سيد الي معايا صديق وفنفس الوقت....كوميسير من ولاية امن اكادير بالضبط المديرية العامة لمنطقة امن انزگان...
فرح"صرطات ريقها وقلبها زادو دقاتو تا رجعات باللور كون ما صفاء حداها" : علاش بغيتوني"عينيها بانت فيهم لمعة الخوف"
العون"شافها خافت" : بنتي ماعندك مناش توثري...هادي استدعاء لحظور امام قاضي التحقيق فقضية المسماة قيد حياتها كنزة المعزوزي...
فرح"غييييير سمعات الاسم وهي دوووور بيها الدنياااا حتى تخلخلت بيها الوقفة كون ما شدتها صفاء.. شافت فيه بخوف ورعب وتوثر ايديها ولاو يترررعدو" : ك كك كيفاش !!...
العون"حل ليها الملف ووراها الاستدعاء" : العنوان راه تما...ولكن حتى تعطيني لاكارط وتسني انك خذيتي الاستدعاء...عافاك ابنتي انا كندير خدمتي...
زوهير : حيث جاك استدعاء قبل فعنوانك الي فهاد لاكارط ملي ماجيتيش اضطرينا نجيو عندك حتى لهنا باش نعطيوك استدعاء...التاريخ را مكتوب تما نهار 12 فهاد الشهر...
ضارت عند صفاء ...
فرح : ع احم"صرطات ريقها.. وحلت ليها الهضرة تا بدات تكحب" اكحكح كح جيبي ليا صاكي من البيت عافاك....
صفاء"بخوف عليها" : ماتعيطيش لزين الدين ؟
فرح : مكيجاوبش...عافاك دغيا...
صفاء : فرح!!!
فرح : صفااااء سيري جيبي ليا الصاك راهم بغاو يمشيو خليهم يديرو خدمتهم..غي غير سيري انا مزيااانة ما بيا والو....دغياا عافاك...
حركات صفاء راسها وطارت منقزة دخلات لدار وطلعات الفوق جابت ليها صاكها وهي تنزل كتجريييي وصلات عليها كتنهج عطاتها الصاك...
فرح"كتحل فالصاك وترررعد مابغاش يتحل ليها حتى شداتو من عندها صفاء وجبدات ليها لاكارط ديالها عطاتها ليه قرا الاسم ديالها وهو يعطيها فين تسني...سنات ليه بالكشيفة وهو يعطيها الاستدعاء حرك ليها راسو شكروها وضارو ركبو فالسيارة"
صفاء : يلاه دخلي وعاودي عيطي لزين الدين...
بقات كتشوف فالاستدعاء وصباعها كيترعدو...مخايفاش انها ترجع لاكادير لانها مطالبة بالشهادة فمحكمة الاستئناف بالضبط تما...فايدها الورقة وفلايد لاخرى التيليفون غاديا وساااهية ماكتسمعش شنو كتهضر صفاء ولا توبا الي عاودت سولاتها شنو واقع وخلاتها تاني بلاكة...تاحد ماحاس بيها يمكن فهاد اللحظة هادي...خلات صفاء كاتهضر وطلعات الفوق هي وصفاء تا دخلات البيت وهي تجلس فطرف الناموسية ومزال الاستدعاء فايديها عينيها كيشوووفو فنقطة بعيييييدة حتى جات صفاء وجلسات القرفصاء حطات ايدها على ركبتها وشافت فيها بقلق على حالتها"...
صفاء : فرح واش خايفة من شي حاجة ؟!
فرح"الصمت"
صفاء"حركتها" : فرح جاوبيني ماتخلعينيش...واش خايفة ولا كتفكري شي حاجة...
فرح"حولات الشوفة ليها" : علاش تاني غانمشي نشهد...علاش كيفكرووني وانا نسييييت هادشي علاش"نقزو دموعها يجرييييي"...
صفاء : ماتقدريش تمشي گوليها لزين الدين وهو يتصرف...
فرح"غمضات عينيها بقهرة" : وهاااااد زين الدين غايبقى غير يتصرف ويحيد ليها فهمومي...ماكثيرش عليه هادشي ؟ من نهار عرفني وهو هاز ليا همومي وااا بزااااف بزاااف راه مريض شحاال قدو يبقى يهز الهم"خرجات فيها عينيها كتبكييي" حتى يعيا مني وينفرني ؟؟؟...
صفاء : فراااح..زين الدين بغاك وسط المشاكيل ماشي بغاك ونتي بلا مشاكيل...الي يبغيك بمشاكيلك ماعمرو ينفرك..
فرح : شحاال ماجلس غايعيا...را بنااادم ا صفاء بناااادم اهى اهى...وا انااااا وعييييت بمشاكيلي بقى غير هو ؟ انا ومليت راسي بهادشي الي كل مرة تابعني من نهار حليت عيني وبغيتيه هو ما يعياش ؟؟!"دارت ايديها على راسها والورقة ديال الاستدعاء فايدها" انمممممم اهى اهى...اش بغاااوني نشهد علاااااش وانا نسيييييييت هادوك اهى اهى....
صفاء"كتحك ليها على كتافها" : شش..فرح تهدني باش الى عيط ليك عرفي اش تگولي ليه اصاحبتي الى لقاك كتبكي يتخلع عليك ويطيح ليه سكار ثاني...نوضي غسلي وجهك وتنفسي ويدير الله خير...راها غير شهادة ماشي تحقيق...
فرح"شافت فيها" : گاليك رسلو ليا الاستدعااء لعنوان ديالي!! علاش مافراسيش ؟!
صفاء : يمكن ماشافوهش ولا خذاه فوزي ومابغاش يگوليك باش ماتخافيش ؟ فففف والله ماعرفت افرح خلي تهضري مع زين الدين يعلم المحامي ريان ويگولو ليك اش كاين...نوضي عافاك غسلي وجهك..."صونا تيليفون فرح شافت فيه بزربة لقاتو زين الدين كيصوني"
فرح : اهى باش غانجاوب دابا وانا كنبكي را غايتخلع علياااا اهى اهى....
صفاء : اري انا نجاوبو نگوليه راك فدوش حتى تخرجي وهضري معاه....
فرح"حدرات راسها وعطاتها التيليفون"
صفاء"وقفات وهي تطلق الخط وقالت نيشان لا يقول شي هضرة مخصوصة لفرح" : الو خويا زين الدين ؟!
زين الدين"حيد البافيط من فمو وكمش حجبانو" : صفاء !! فين فرح ؟؟؟
صفاء : داخلة لدوش گالت ليا نجاوبك باش ماتخلعش تا تخرج من دوش وتعيط ليك...
زين الدين : ماعليش"قطع معاها وهو يجلس فوق كرسي المكتب ودخل كيقلب فالاتصالات لقى العساس معيط ليه فوق عشرة المرات...كمش حجبانو ودوز ليه الخط نيشان"
محمد : سي البغدادي...
زين الدين : خبار الخير ؟؟
محمد : عيطت ليك بغيت نعلمك بالي شي ناس جاو سولو على الزوجة ديالك...
زين الدين"كان كيدور بالكرسي حتى توقف وعقد حجبانو" : شكون هادو؟؟"تخلع حساب ليه عصام ولا شي حد اخور" شكوووون هضر ؟؟؟
محمد"كمل عليه الباقي غا اللقوة ضارباه بالبوليس الي جاو واللقوة كملها ليه زين الدين دابا" : البب بوليس...عون قضائي عطاها استدعاء على ماشفت حيث كنت واقف معاها راك عارف...
زين الدين"وقف بجهد تا دخل علي فهاد اللحظة" : كيفاش بوليس وعون ؟؟ اش كتخربق على ملتي تماااا"جهد صوته تا تخلع العساس وبرد ليه الما فركابي...خبط زين الدين فوق المكتب بجهد" واااااااا كنهضر معاااك كنهضر كيفاش بوليس وعون ؟"ماصبرش وهو يقطع عليه وعاود دوز ليها الخط كيمشي ويجي وعلي واقف مافهم والو كيبان ليه تاني بدا يصعر..." جاوبي فرااااااح جاوبي جااااااوبي....
فرح"شدات من عند صفاء تيليفون ملي عاود صونا عرفااتو باغي يهضر معاها باي طريقة..نطقات بصوت مغنغن" : الو زين الدين...
زين الدين"جلس بجهد فوق الكرسي" : فرح !! اش واقع شكون الي جا ؟؟
فرح"كتشوف فالاستدعاء" : عطاوني استدعاء اهى اهى بغاوني نشهد على شي حاجة.ولا يسولوني اهى ماعرفتش شنو هادشي.....اهى اهى وانا مادرت والو علاش نعاود نرجع اهى..."داكشي الي خافت منو مع الاسف ماقدراتش تحكم فراسها خافت ووقع الي كانت خايفة منو" مابغيتش نرجع نعاود ليهم على ديك البلاااصة مابغيييييتش اهى اهى....
خربقاتو وتلف تاهو ولا كيمشي ويجي حتى شاف فعلي الي غمض ليه عينيه وهز ليه ايديه كيقوليه يتكاااالما...
زين الدين : فرح الله يرضي عليك تهدني...وسيييري معايا بشوية"كينهج بالصعرة بزز باش مصبر راسو باش يفهم ويعرف شنو يدير." صوري ليا الاستدعاء نشوفو وطريق الي توصلني لعندك نلقاك مهدنة الله يرضي عليك فرح البكا مابغيتش نشوفو مزال فعينيك تفاهمنا ؟؟؟
فرح : مابغيتش نبكي والله مابغيت اهى اهى...غير "هزات ايديها كتحك جبهتها" مابغيييييييتش نرجع نعاود على هادوك اهى اخى مااالغيييتش ازين الدين....
زين الدين : مغااتعاوديش عليهم...سمعي ليا فراااااح"جهد صوته بلا ميشعر تا غمضات عينيها" سمعي ليا وديري شنو گلت ليك..."كيحل فالكاساك الي لابس دياال الجراحة وتم غادي لشومبر باش يبدل" رسليه ليا نشوفو ونجي عندك...
فرح"واخا تقوليه لا ماتجيش انا نزيانة مغاتصور والو الي فراسو فراسو" : واخا...
زين الدين"نقص صوته وهضر بحنية كيبعث ليها الامان وراحة" : تهدني كبيدة ديالي...كلشي غايكون مزيان ماعندك مناش تخافي وانا معاك...تفاهمنا ؟
فرح"بصوت مخنوق" : واخا...
قطع معاها ومشى لبس حوايجو بزربة حتى وصلو ميساج منها فواتساب بقا عريان من الفوق حتى دخل وشاف الاستدعاء نيشاااان بلا ميفكر دوز الخط لريان....
ريان : زين الدين هاني فالمحكمة خويا نسالي جلسة ونهضر معاك را غير خمسة دقايق عندي لقيتيني داخل دابا....
زين الدين : مكاااااااينش شي محكمة دابا وانا باغيك ريااان ريااااان...قضي معايا غراض انا لول...
ريان ؛ وخا غا تهدن مالك ؟
زين الدين"طلق سبيكر وهو كيرسل ليه فالاستدعاء" : نتهدن ؟ فاش نتهدن ؟ علاش شنو درنا على فرح باش ميستدعيوهاش ؟!
ريان : شهادة ديالها من عند يونس راني دفعتها وطرقنا القضية !!
زين الدين : طرقات نييييت اريان طرقااات...وشنو هذا الي رسلت ليك"كيشالي بايديه شعرو تخربق مع حيد الطاقية بنترة"دااااابا تحرك لعندي لدار نشوفو هاد الويل الكحل الي بان...
ريان"كيشوف فالناس داخلة" : واخا صبر معايا الله يخفضك را قضية عندي دابا منصيييبش اخويا كيفاش نخليها...غيييير تهدن كي نسالي دغيا اصلا بغاو ينطقو بالحكم كي ينطقو نخرج ونجير لعندك...ياك نتا فالكلينيك ؟ وماحتال توصل تلقاني جاي نتلاقاو تما...
زين الدين"غمض عينيه باش يتهدن حيث نسى راسو حتى ولا كيفكر غيييير ففرح وماتسوقش لريان وخدمتو الي غاضيع بسباب عصبية زين الدين وخوفو على محبوبتو...دوز على لحيتو بنفاذ صبر" : واخا واااخا قضي قضي..."قطع معاه وضار هز الكابيشو لبسو دوز بصباعو على شعرو تا قادو هز تيليفون وباكية الكارو لبس سبرديلتو وخرج لقى علي كيتسنى.."
علي : خبار الخير ياك لباس ؟
زين الدين : فيك مايتحرك معايا لدار.؟..محتاج تسوگ بيا...
علي"عرفو تعصب وسكار غايبدا يلعب" : لوح ليا كونطاكت..
جبد ساروت طوموبيل من جيبو رماه ليه شدو فالسما وخرجو بزوج زين الدين غادي وحجبانو كيخلعو مكيشووووفش فشي حد الي كيقوليه سلام خلاه بلاكة كاع ما سمعو...حتى دازو من حدا حنان الي عيطات ل علي...
حنان : عمي علي"عينيها مغرغرين"
علي"شاف فزين الدين الي مشااا كاع ماداها فيها" : بنتي نسالي ونجي نشوفك.."ربت ليها على كتافها" سمحي ليا الله يرضي عليك...
حنان"مسحات عينيها" : احم..واخا عمي واخا...
ابتاسم ليها ومشى تبع زين الدين حتى لسانسور لحق عليه ونزلو لتحت الباركينغ ركبو فالسيارة قاد سانتيغ وتلاح على الكوسان متكيييييي راسو حتى حط الكارو على فمو وشعلو ومد ايديه لبوطون تا تحل الشرجم...وبدا يكميييي باش يتهدنن..ماهضرش معاه علي ابدااا طول الطرييق وسااااكتييين باش ميبرزطووش مخليه يخمم ويفكر براحتو ويتنغم بداك الكارو باش نييييييت يتهدن...
زين الدين : شلاااااا وشوية على الجهد الحاج شلاااااا...
علي"ضار شاف فيه ورجع شاف فطريق" : جهدك تقادا ؟
زين الدين"عوج فمو باستهزاء" : خاطري ضيق بجهد...جهدي من جيهة مرتي كبر من جهد الي خاطرو واااسع...
علي : اش وقع ليها ثاني ؟
زين الدين"هز صبعو" : شفتييي ؟ نتا براااسك گلتي عاوتاني...الى نتااا وعيييتي شنو تگول هي ؟! "كدور فضبعو" مشكيل تابع لاخور بلاااا مشكيل خوتها...واحد نگولو تصالحت معاه جاب الله تيسير...
علي : والثاني ؟
زين الدين"هز راسو كيشوف فسقف طوموبيل ختى خرج دخان من فمو ونيفو" : دقتو قاااصحة ودقتها عليه قاصحة...العقدة تعقدت مني...وتشربكت على ايديهم...واكلين الشحط "هز صبعو ثاني" وتاواحد ماباغي يشوف فالثاني...الدقة كبييييرة ونزيدوها بهادشي الي طرا ثاني...ومشكيل"خرج عينيه" تابع لاخور تابع لاخور...ماتهناش هاد بنت الناس ؟! ماتهنااااااااش ؟؟؟
علي : يدير الله خير...راكم غادين شوي بشوي حتى تفكو المشاكيل الي بيناتكم...داز الكثير مابقى والو...
زين الدين"غمض عينيه وتنهد" : مشكيل كبر وتعقد...ومابغيييتش نوصل لشي مواصل الي تخليني نعطي گلبي والروح باش عايش...على جال نرد الخواطر ونصفيها...
علي : مافهمتش...
زين الدين"مجاوبوش...جبد التيليفون من جيبو ودوز ليها الخط فاش شاف بالي وصلو لعين الدياب وبغا يدخل لحي ديالهم" : فرح...لفووق لفوق هاني حدا الدار...."زعما طلعي البيت هاني جاي باش تفهم وطلع باش يهضر معاها بيناتهم..الى بغا يواسيها بقربو منها يقدر يبوسها ولا شي حاجة اللهم بيناتهم"...
وصل لحي دياال الفيلات وضار الدورة حتى دخل الفيلا من بعد ما تحل ليهم الباب من طرف العساس...خرج هو وعلي وسبق هو تا خوا الدار وشير ليه باش يدخل مشى معاه حتى لصالون خلاه و.طلع فالدروج كل درجة كيدير فيها ثلاثة حتى وصل حل الباب
فرح : زين الدييين اهى..."مشات تزرب تلاحت عليه عنقاااتو دورات ايديها ورا ضهرو..."...مابغيتش نمشي نعاود ثاني داكشي مابغييييتش مانقدرش نعاود نتفكر اهى...
زين الدين"هبط راسو باسها فشعرها وايدو كتدوز على ضهرها" : ماغاديش ديري شي حاجة نتي ماگاداش عليها...عطيتك الكلمة فرح...
فرح : خرجت عندهم راااسي وخا خفت تشجعت وخرجت...
زين الدين : قبل ماتخرجي صونيتي ليا على هادشي ياك ؟
فرح"حركات راسها" : ولكن ماجاوبتيش عرفتك غاتكون فشي عملية ولا اجتماع...وهذاكشي علاش خرجت راسي..."هزات فيه عينيها كتشوف فيه تا هبط عينيه كيشوف فيها" مابغيتش تبقى دير كلشي عليا زين الدين...خرجت وهضرت معاهم وقضيت شغلي راااسي...
زين الدين"حط كفو على حنكها وصبعو كيمسح ليها دمعتها" : شكيت عليك ثقلتي عليا ؟
فرح : ماشكيتيش..ولكن شي حاجات انا الي خاصني نديرهم ميمكنش يديرهم عليا شي حد...هانتا كنتي هنا قريب ليا فكازا...كون كنتي فشي بلاد بعيييدة اشنو غادير ديك ساعة ؟
زين الدين : عطا الله مايدار...راني محزم برجال يفكو عليا الازمة فينما كنت...ماكنتي تحسي بوالو هما يقضيو بعيد ونتي تفكي من جيه..."باسها فمنخرها" مابغيتش مزال نشوفك كتبكي...عينيك تعذبو تقهرو بالبكا..."صونا ليه التيليفون...بقى معنقها وهو يجبدو لقاه ريان"...رتاااحي فرح ونعسي على جنب الراحة مغاديش نخليك تحركي لهيه ونتي ممرتاحاش وماباغياش...فين صفاء ؟
فرح : گلت ليها تمشي حيث تعطلات على خدمتها...طلبت مراد وصلها معاه حيث جا يقضي شي حاجة هنا ومشى...براكة عليها تخليها خدمتها ودارهم وتقابلني را بزاااف عليها وعليكم...
زين الدين"حط شنايفو على شفايفها باسها وعاود وعاود حتى غمضات عينيها" : معايا انا واجب عليا...مابغيتش مزال نسمع هضرة فحال هادي عليا...الله يرضي عليك..."ربت ليها على كتافها" هاني نشوف شنو كاين ونهضرو...
عطاتو الاستدعاء وخلاها فالبيت وخرج هو نزل نيشان لعند علي عيط ليه يتبعو لمكتب حتى دخلو بزوج لقاو ريان سلمو عليه وجلسو....مد ليه الاستدعاء"
ريان"شدو من عندو طواه وخشاه فالشكارة ديالو" : شهادة بخصوص كنزة المعزوزي...طبعا الطب الشرعي ديجا اكد انها توفات وفاة طبيعية ما تقتلاتش...
زين الدين : وشنو المشكيل دابا ؟!
ريان : الحي *** رقم الدار *** بانزگان توصلات عناصر الشرطة ببلاغ عن وجود خلية مختصة فالدعارة احم...وهاد الخلية ملي تشدات تذكر اسم كنزة فالتحقيق...وبما ان كنزة كانت بحوزتها وراق الاخت فرح...فهي مطالبة بالشهادة...وباش يعرفو واش كان شي اختطاف واش شافت شي حاجة خصوصا ان المتهم الكبييير الي كيقلبو عليه كيقولو ليه الحاج والمشتبه الكبيييير فواحد البرلماني معروف تما....
زين الدين : وشنو ؟ ضروري تحضر وتشهد ؟ رياااان مابغيتش فرح توصل تما بلا ارادتها...فين الشواهد ديالها الي دفعتي ؟
ريان : كون هاني غانعاود ندفعهم والى اضطر الامر نشوف كيفاش ويسولوها عن طريق الهاتف نظرا لحالتها ماتسمحش تجي لتما...طبعا خاص يونس يعاود يكتب ليا تقرير بهاد الخصوص باش ندفعو...
علي : والمسألة ديال انهم جاو هنا !! نورمالمون الاستدعاء كيجي نيشان فالعنوان عن طريق العون...علاش جا معاه الكوميسير ؟
ريان : جاتها استدعاء فالعنوان شي 15 جوغ وماجاتش فالموعد...هذاكشي علاش عاود جا لهنا هو والكوميسير من انزگان...
زين الدين"جمع حجبانو" : العنوان ديال لاكارط ديالها فجديدة وباقي...منضنش يكون جا تما والا فوزي يعلمني ....
ريان"الصمت...حنحن وسكت ماقدرش يهضر" : احم...سي وصل تما وتستالم...
زين الدين"هز حاجبو" : كيفاش ؟؟ ريان !!! شنو واقع ؟!
ريان : البيعة الي جات بالي خذينا وراقها بدون علمها ماشي من شي حد غريييب حيث ميمكنش توفيق يبلغ على راسو...ونتا مايمكنش تعلم بالي تافقتي معاه ومعرفتك بيه هي الرشوة... جاني اتصال من بعد ما بحثت باش نعرف شكون ورا هادشي...الي دار هادشي هو الي خلق المشكيل ديال وراقها حتى ضمصنا القضية بزز...
علي : هذا الي دار هاد الفعايل بغى ينوض صداع لشي حد معين !؟
ريان"حرك راسو" : لزين الدين شخصيا...
علي. : ورا هادشي لاش وصل...كون ما السي سباعي تدخل فين كان غايوصل لا هو لا زين الدين...اما فوزي ماعليه والو حيث عطاوهم ليه كونه خوها....
ريان : وفاش مكتجيش لشهادة او التحقيق نورمال غايجيو براسهم باش يسلمو لان هذا تحقيق وشهادة. فقضية فحال هادي وعاد وراقها كانو مع السيدة وحوايجها...
علي : زعما يكون كان غراضهم يجيوها تالدار...
ريان : منضنش حيث مايمكنش يديرها ولكن فاش عرفت بالي هو الي استالم الاستدعاء وماقال والو را تفكيرك يمشي لهادشي الي قلتي..
زين الدين : شكووون ورا هادشي ؟...من لاخر...
ريان : هو نفسو الي خذا استدعاء بحسب ماقاليا العون الي جاب ليها الاستدعاء فالعنوان الي فالجديدة...وماعلمش بالي خذاه وماسلمهاش لمولاها لمن جات...حتى جاو بنفسهم كيقلبو عليها....مابغيتش نقول را هو ولكن مع الاسف حتى الي وصل البيعة كان هو......"هز عينيه وشاف فزين الدين" عصاام الخياالي...
"يحسب المرء نفسه عزيزاً في قلوب أحبته، ثم يأتي موقف يُنهي كل هذا الظن."(مقتبس)
بمجرد ما عطاه الاسم خرج عينيه...حيث طبيييعي جدا مغايتوقعش ان عصام يدير هادشي !!!...شاف ف علي الي كان داير صبعو على حنكو متكي عليه كيسمع ف ريان ويستنتج تاهو...ورجع شاف فريان الي شاف فيه وحدر عينيه حيث ماكانش باغي يقولها ليه كاع...كان غايسكت ويضمص القضية ولكن وصل لمرحلة انه خاص يعلمو بيها....
زين الدين"عوج راسو وعينيه خضريين خارجين كيتاكد شنو سمع" : كتهضر ولا داوي !؟
ريان"حدر راسو" : هادشي مافيهش التفلية خويا زين الدين...
زين الدين"كيخرج فعينيه بطريقة فحال شي واحد طاحت عليه الضبابة وكيتقاتل باش توضاح ليه الرؤيا.." : شكون تاكد ليك من هادشي ؟!
ريان : فاش سولت على الي وصل انك تعاملتي مع توفيق باش عطاك صاك ديالي ختي فرح الي فيه وراقها وعطيتيهم لفوزي مع حوايجها...جا كوميسير بلاصة فوزي الي هو الاخ زوهير لان توفيق مشى لداخلة...الكوميسير زوهير مكانش غراضو يجي لهنا غير لاستدعاء لان الاستدعاء العون الي كيجيبو كوميسير او الضابط هم فقط الى كان جريمة وكان المشتبه به او المتهم عاد كيجيو...
علي : باغي يتاكد من شي حاجة ؟
ريان : كان الغراض يثبت انه توفيق عطاكم الوراق بلا قانون غير باش يبين ان توفيق فسايدي... ويبان نزيه لانه باقي جديد فضومين...هادشي من شحال هادي ملي بدات تروج الهضرة وتقدم توفيق هي فين سافرت باش يتكلف الحاج سباعي وبهضرة منو ومن خوه الكبير الحاج فؤاد قدرو يضمصو القضية...حيث واخا هكاك را غايبان انه فساد فالقانون واللعب بيه...
زين الدين"كيسمع ليه باغي يتاكد باغي شي حاجة تبين ان عصام ماتوصلش بيه الحقارة لهاد المواصل"...
علي : وهو علاش باغي يتاكد لهاد الدرجة الا اذا شي حد ما وصل ليه انه المعلومة صحيحة وان توفيق خدم معانا كيف بغينا حنا ومامشاش بالقانون...
ريان : الضابط الي مع الكوميسير زوهير كان فالبيرو نهار جا الشخص الي عطاهم هاد المعلومة وهو ضابط الي كان مع توفيق والي اكد ليهم هو عصام....
علي"خرج عينيه" : وهو عارف عصام وشكلو حتى تاكد ؟
ريان : اناس المختاري ضابط فمنطقة امن انزگان وسابقا فمنطقة امن البرنوصي هنا فكازا...ديك الوقت را كان فاش مشينا لاكادير...
زين الدين : مكانش معانا عصام فاش مشينا ريان.."اكد ليه بعينيه" حضر عقلك...
ريان : مامشاش معانا ولكن عندو سمية خوتها الي جاو كيقلبو حيث جا من ورانا لكوميسارية مع صاحبو كوميسير نيت تما...هو الي جبد ليا الاسم نهار جا وهو الي عطاني الاسم فاش عطا المعلومة...يمكن ماشافوش ولكن سمية را عرفها...
زين الدين"هبط عينيه كيشوف فنقطة بعييييدة حتى بداو نواضرو يتورمو وبدا كيطلع نفس ويهبطها"
علي : والاستدعاء علاش ماعلم بيه حد ؟ علاش شدو وسكت يعلم غير خوه ؟! اش هاد تخربيق !!!
زين الدين : شكون علمك بالاستدعاء !!!
ريان : فاش هضرتي معايا قبيلة وشفت الاستدعاء قبل مندخل لقاعة هضرت مع المكلف بالاستدعاءات وعطيتو تاريخ الاستدعاء امتى وصل ملي خرجت لقيتو راسل ليا نمرة العون الي جابو والعون عندي بيه معرفة سابقة ماشي بزاف...هو الي اكد ليا انه عصام الي خذا الاستدعاء منو دق الباب وخرج ليه هو "هز تيليفون وطلق ليه الاوديو ديال العون"...
هو : انا عطيت فالعنوان الي عندي ديال صاحب الاستدعاء فرح الخيالي ها روجيستر قدامي...و الي خذا من عندي الاستدعاء عصام الخياالي...
زين الدين"كيبغي يهضر وسنانو مغزززين فحال تلفت ليه الهضر" : دد ب دداااابا..."خبط فوق المكتب بواحد الخبطة تا تقاد علي فالجلسة وكمش حجبانو"
علي : شششش زييين الديييين كااالما...
زين الدين"دوز على وجهو بنفاذ صبر ضار هنا وهنا وهو يلوح ليه ريان الباكية ديال كارو كانت محطوطة قدامو ديال زين نيت...شدها وجبد منها سيجارة شعلها بقاو ساااكتين تا كما منها وعاود وصرط دخاان باش يتكاالما وهو يبدا ينقر ينقر بصباعو فوق المكتب وعينيه كيشوفو بعيييييد...حتى نقر اخر نقرة وهز عينيه ف ريان" : سميييت العون ؟!
ريان : عبد العاطي الخراز...
زين الدين : الضابط ؟
ريان : هو اناس المختاري...
زين الدين"حك شنايفو بسنانو وهو يهز ستيلو وورقة صغيرة...كتب فيها اناس المختاري،، عبد العاطي الخراز،،يلاه كتب زوهير وهو يشوف ف ريان" : الكوميسير جديد ؟!
ريان : زوهير العوماري...
رجع زين الدين كتب الاسماء...وهو ينوض كيقاد فحوايجو وحجبانو ملاقييين مع واحد التخنزيييرة جابت لعلي الخوف انه يكون ناوي شي حاجة ....
زين الدين : مابغيييتش فرح تمشي تشهد وهي فهاد الوقت..
ريان : كون هاني غادي ندفع شهادة من عند البروف يونس وغادي ندير ملتمس لقاضي التحقيق انه يعفيها من الشهادة ونضرا لحالتها النفسية صعييب باش تشهد ولا يحققو معاها...الى كانت شهادة ماشي مهمة بزاف را غادي يعفيها...غالبا غايكون غير هادشي المهم نتا تهنى وبالنسبة لوراقها غادي نعطي شواهد حتى نبين انه اوراقها استالمتهم انا نضرا لحالتها النفسية بوكالة منها ليا...
زين الدين : ثايق ومعول عليك....
ريان : بالنسبة ل"شير ليه لورقة الي كيطوي فيها بصباعو" شنو بغيتي ندير ؟!
زين الدين"هز ايدو" : خرج هاد سوق الباقي عليا...
ريان"بترجي خايف عليه لا يمشي يدير فيه ايديه" : زين الدييين خويا عافاك ماتصرفش شي...
زين الدين"قاطعو مجهد صوته" : رياااان خرج سوق قاد بشغالي لوقت الي نحتاجك فهادشي نعلمك...
حرك ليه راسو وهو ينوض تاهو وخرجو بثلاثة من المكتب وصل ريان عند الباب هو وعلي حتى سمع صوت فرح كتعيط من بعيد...
زين الدين : هاني جاي.."خلاهم كيهضرو بزوج ومشى لعندها وخا من لداخل را العافية شاعلة وباااااينة ليه فوجهو لكن محاول ما امكن مايوصلش ليها انه معصب" الفرحة ديالي...
فرح"عينيها مغرغرين بالخوف" : اش درتي ؟ اشنو غاندير ؟ ياكما غانمشي ازين الدين"شدات ليه فدراعو بخوف مزيرة عليه" عافاك مابغيتش نمشي نعاود ليهم تما عااافاك مابغيت والو مادارو ليا والو راك سمعتي كلشي ياااك...
زين الدين : ششش تهدني..."حط ايدو فوق ايدها كيحك عليها بلطف" ماكاين والو من هادشي...حتى حاجة ماديريها عطيتك الكلمة هي عطيتك الكلمة ماكنجيش ونعطيها غير هكاك..."خرج عينيه بثقة وتاكيد" نعسي على جنب الراحة...
فرح"حسات براحة من هضرتو" : گاليا جاني استدعاء قبل فعنواني الي فلاكارط وماجيتش علاش خذاوه وماعلمونيش ؟
زين الدين : غلطو فالدار.."صرط ريقو محاول ميبينش انه عرف شكون مورا هادشي" كتوقع داكشي باش...المهم نتي رتاحي من هادشي ونساايه عليك..."قرب وجهو شوي عندها ونطق بصوت تسمعو غير هي صوت منخفض مطمئن مريييييح وعينيه فعينيها" رتااااحي وضحكي ونشطي...
فرح"عينيها فعينيه حتى عوجات راسها" : وعلاش كنشوفك نتا ممرتاحش ومعصب ؟!
زين الدين : تخلعت عليك الفرحة ديالي...خاطري مكانش هاني من جيهتك وانا جاي لعندك وعارفك كتخافي وانا بعيد عليك...حسبي الديابيت لعب عليا..."شد ليها ايدها بين كفوفو طبطب عليها" رجعي كيف كنتي تمشاي فدارك طلعي عند ضحى ديري شي حاجة شغلي بيها راسك حتى نجي عندك..."باس ايدها" ماتصونيش ليا حتى نعيط ليك انا...
فرح : فين غادي...
زين الدين. : لشغالي نگادهم ونتاكد منهم باش نبدا نصفي الحسابات...كثر عندي شلا وشوية من تخلويض....مابغيتش مزال ندير عين ميكا...
فرح"مافهماتش شنو معنى" : فالكلينيك ؟
زين الدين : بين هنا وهنا...يمكن منجيش الليلة ومنشوفك حتى لغذا ويمكن نتعطل على هادشي..."كيحك ليها على ايدها" تهلاي ليا فراسك وحاولي توحشيني "عض شنايفو وغمزها تا ضحكت...جر ليها منخرها بصباعو بمزاح باش يريحها فخاطرها اما هو را الله وحده وهو الي عالميييين شنو فيه من لداخل...صعيييييييب بزاف انك تكون انسان معصب بزاااف ومضطر تكتم ديك العصبية باش متبينهاش لطرف الاخر الي بدورو غايتازم ونتا ديك الازمة الى طاح فيها نتا غاتزيد تعصب كثر مانتا معصب والمشكيل هنا انه غالبة عليه الصدمة ديال حقارة عصام الي وصلات بيه لهاد المواصل.."
فرح : وجلسو غير تتغذاو حرام عليك مخليهم بلا ميتغذاو !!
زين الدين : معندناش الوقت كل عندو مشاغيل صعيب يبقاو...
"باسها فراسها وضار وصل لعندهم وخرجو بثلاثة...مشا هو وعلي تا وصلو لكلينيك دخلو لباركينغ حتى نزل وهو يطل عليه من شرجم"
علي : ماطالعش ولا كيفاش ؟
زين الدين"حرك راسو ب لا بدون ماينطق..عينيه مركزين القدااام وديك النضرة كيشوفها علي ولا ريان فاش كان غادي كيعرفو شنو معناها..."
علي : زين الديييين !!
زين الدين"عقد حجبانو وضار عندو مخنزر" : الحااااج تيسر..."بدا يطلع الزاج على علي حتى تسد ومابقاش كسبان ليه زين الدين لان زاج لونه كحل حتى رجع يجهد تا تسمعو روايد تحكو مع لارض ملي فرانا...وطلع من الباركينغ طااااااااير خلا علي واقف"
علي : يااااااربي تلطف ياربي...زين الديييين هاد التسرع را غايوصلك لماصل ماتعجبش..."جبد التيليفون بسرعة دوز الخط" الحاج الحسين !!
الحسين : اهلا وسهلا ولدي عاش من سمع صوتك...
علي : الله يكبر بيك الحاج...وليني الهضرة ماشي وقتها...دااااابا دير اتصال لزين الدين وجيبو لعندك....
الحسين"حط نضاضرو فوق المكتب وعقد حجبانو" : خبار الخير ياك مكاين باس ؟!
علي : الدعوة ماتعجبش الروح حسب طيح الى ماصونيتيش ليه...
الحسين : والى ماسمعش ليا ؟!
علي : نطلبو زهرنا بقى تصوني حتى يجاوب...مشكيلة هادي هاهو غايخليني بلا خاطر والبال مشغول والخدمة منديرها مقادة..."حط ايدو على جبهتو بتوثر" مشكييييييلة هادي ...
الحسين :. واقطع انا نهضر معاه وباش مكان نكون معاك على تواصل....
قطع معاه ورجع علي طلع لجناح ديال بيرو ديالو بلا خاطر وعقلو وبالو مع زين الدين....حط فيستة ديالو وبغى يبدا يلبس حتى صونا ليه الحسين نقز نيشان جاوب....
الحسين : طفى التيليفون !!!
علي"غمض عينيه" : مشكيييييييييلة كحلة هادي...
الحسين : اش واقع بعدا ؟!
علي : من لاخر مشى ناوي مع خو المراة ديالو...
الحسين : عصااام ؟ اش غايوصلو ليه ؟ ماشي وقت الهضرة معاه دابا...مزال ماهضرناش ومادرناش شنو يتگال والحروف الي يتحطو عليهم النفط...ماشي فاالصالح ديالو وغايرجع عليه وعلى مرتو هي اللولة....الله يهديييييييه الله يهدييييه...
علي"هز الفيستة وخرج من المكتب هو كاع" : الحاج انا غانتبعو ونشوف...فين كيكون عصام دابا ؟!
الحسين : على ماهضرت مع فوزي ملي دار الكسيدة قاليا را كيجي عندو خوه كيبقى معاه هاد نص نهار فالصباح فالسبيطار ديال شيخ خليفة...
على"حل سانسور وتيليفون فوذنيه" : دابا نكون تما..."قطع معاه ورجع صونا ليه غيييير باش يشوف لقاه طافي فعلا عاود.وعاود بدون مجيب" غادي تخرج على راسك وعلى مرتك وعلينا معااااااااك ازين الدين هلكتيني من نهار جيت لهاد المغريب....
غير مشى ديك الوقت مابقاش عندها الخاطر وخا قاليها عيشي وضحكي ونشطي لكن خاطرها مكانش هاني حاسة بشي حاجة شاغلة زين الدين ومخلياه معصب...بقات كدور فالدار وتدخل لكوزينة تحط الغذا واعتاذرات لان الشهية مسدودة وهي تطلع الفوق فطريقها تلاقات ب ضحى جايبها مرا الي جا على قبلها....ومعاها توبا لابسة جلابة وشال على راسها....
ضحى : فرح ماتغذيتيش ؟
فرح : مافياش..."شافتها لابسة حوايج الخروج" غادي تمشي ؟!
ضحى : غادي نمشي لكلينيك عند طبيب الي دار ليا جبيرة وعند طبيبة باش ندير كونطرول على الفتحة....
فرح"حركات راسها وتبسمات بغير خاطر" : مزيان...الله يشافيك..
مراد : ماجاش زين الدين !؟
فرح : جا قبيلة فالصباح ومشى...
مراد : اااه صافي"سلمو عليها وتم هابط مراد مع ضحى حتى توخرات توبا كانت غاديا فرح تا عيطات ليها"
توبا : بنتي شكون هادوك الي جاو ؟!
فرح : شي ناس من اكادير فين كنت...
توبا : كنتي عايشة فاكادير ؟! ولكن توريا قالت ليا جابو ليك استدعاء ديال شهادة...
فرح : ماشي شي حاجة...مراد كيعيط ليك اخالتي"قبل ماتجاوب ضارت وعطاتها بضهر وطلعات خلاتها كتبرق ثاني...ماداتها فيها ودخلات البيت حيدات الكاب وهي تجلس فناموسية...عقلها مشغول على زين الدين وبما انه قاليها ماتصونيش ليا تنصوني ليك فماكان عليها الا تدخل الواتساب وترسل ليه ميساج باش مكان را غايجاوبها...."
"زين الدين وصلتي لكلينيك !! عافاك جاوبني واش شوية راني خايفة عليك لا ينزل ليك ديابيت تاني ولا يطلع مشيتي وبالي مشغول عليك ووجهك ماعجبنيش عافاك جاوبني"
بقات شادة التيليفون كتلعب بيه وعقلها ساااااهي ما بين الاحداث الي وقعات الصباح ووجه زين الدين...حتى تسمع ليها صوت الميساج هزاتو بزربة كان غايطيح ليها من ايديها وهي تدخل كتجري حساب ليها زين لكن لسوء الحظ كانت صفاء الي راسلة ليها اوديو....
صفاء : فرح كي بقيتي شوية ؟! مشيت وبالي مشطون عليك امضرا شنو درتي !!؟
فرح"مابغاتش تخليها مشطونة رسلات ليها اوديو علماتها بشنو قاليها زين الدين وخرجات من الواتساب...مالقات مادير فهاد اللحظة...الشهية مسدودة والخاطر مكاينش...تخشات ففراشها وتغطات شادة تيليفون فايديها كتبقشش فيه باش تلاهي راسها...كتبغي تعيط ليه مكتقدرش بقات هاكاك حتى نعسااات..
قادات ليه هناء المخدة وع.العالي عاونو باش قدر يتقاد ففراشو بوضعية قريبة لجلوس...جابت ليه الماكلة ف طابلة كحزاتها ليه حتى لعندو خاصة بالمرضى وحلات ليه الطاسة الي فيها الغذا الي صايبت ليه نعيمة بحكم بقات فالجديدة كتعاونهم تما...سمى الله وبدا ياكل حتى دخل جدو....
المحجوب : واحد عصام فين زاد ؟
فوزي"شاف فيه" : ملي جاه تيليفةن حدايا شفتو تبدل فيه اللون وصعر وهو يطير خلانا كنعيطو ليه....
هناء : انا خلعني بديك الشوفة...
ع.العالي : عاود صوني ليه...
المحجوب"شاف فوزي بغا يحبس الماكلة ويصوني ليه وهو يوقفو" : زگا زگا انا نعيط ليه..."جبد تيليفون ودوز ليه الخط" طافي هو كاااع...ياك شي باس مكاين ؟!
فوزي : وايلي علاش طفاه ؟ عاود صوني ياكما ريزو...
المحجوب"بقى يعاود ويعاود" : والو طافي...خزييييييت على هاد الولد خزيييييييت...ياعوذ بالله...
ع.العالي : بغيتيه ابا فشي حاجة ؟
المحجوب : نمشيو نشوفو طوموبيلة صطوف فين وصل بيها الحال نخرجوها بعدا من فوريان ونفكو سيد حريرتو..."عاود صونا ليه والو طااافي...هو طاااافي وهذاك طااافي حتى صونا لمحجوب تيليفون فايدو " الو ...
علي : الحاج انا علي صاحب زين الدين...
المحجوب : اه اه سب علي عاش من سمع صوتك...
علي : الله يكبر بيك...احم وكي بقى فوزي شوية ؟!
المحجوب : والحمد لله نگولو نقزها...
علي : هي يتسالني زيارة ومعيورة نجبد ليه الوذنين هههه
المحجوب : ومرحبا نتسالوك جملة ههههه
علي : دنيا خاوية تما ؟"باغي غير يطقس واش كاين عصام" راك عارف لا بغيت ندير زيارة مابغينا صداعات...
المحجوب : وهاد ساعة خاوية وليني فالشك...عصام كنوصنيو ليه خاص يكون هنا وليني تيليفونو طافي...
علي"كمل عليييييييه تاهو تا صرط ريقو" : وايلي...ايوى تا وكان يمشي ونجي نضرب طليلة تما...سلم ليا على فوزي ونتشاوفو ان شاء الله...
المحجوب : في امان الله....
رجع جلس حدا فوزي...وكل مرة يصوني ليه يلقاه طافي...هو كيصوني وعلي كيصوني من جيه برااات عليهم لارض...وفرح من جيه كتسناه يدخل الواتساب والو واش تكونيكطا...زاد خوفها وقلقها عليه لدرجة خافت تسول عليه علي ويتقلق زين الدين...كترجع تفكر شنو وصاها كترتاح شوية انه غايكون مدهي مع خدمتو لدرجة ميقدرش يخدم تيليفونو وكتواسي راسها انها خاصها تولف وتدي على هادشي من هنا لقدااام...مالقات باش تلاهي وهي تنوض وخرجات من البيت نزلات لتحت تلاهى فالفراجة ولا تهضر مع خديجة حتى وصلات وقيتها الستة العشية ومشات فحالها ومراد مزال ماجاش هو وضحى وتوبا وبقات وحدها فالدار...حسات بسكون غرييييييييب وخوف وهي تمشي لباب ديال دار سداتو وطلعات لفوق البيت ودخلات سداتو عليها وشعلات تلفازة دارت فيلم تلاهى بيه وتيليفون فايدها ماحابساش من الطلان على زين الدين...مرة تدخل الكروب تشد الهضرة مع سيمو وصفاء مرة مع صفاء ومرة تدخل لعند زين الدين ووالو...القلق كاااين وزاااااايد وعلاااا هاد المرة عند علي الي العشية كاملة وهو يدور ويعيط ليه وهو طافي تيليفونو حتى بقى ليه غير ريان يسولو ....
ماخذا من ريان والو ولكن وصاه يتدخل ويسول عليه...عيا علي يقلب عليه حتى عيا ومشى لدارو متمني متكون وقعات تا حاجة....لانه لا هو غايتحمل ولا فرح غاتحمل وكلشي غايتشتت وغاتوقع كااااررثة بالمعقوووول....العشرة ديال الليل وقف السيارة قدام الكورنيش ونزل منها تقابل مع البحر دنيا الموووووت دياال البرد خاشي ايدو فجيب السروال والايد لاخرا شادة الكارو كيكمي...كيكمي ويعاود يكمي تا كمى ازيد من اربع سيجارات فديك اللحظة...عينيه مخنزرييييييييين لاقصى جهد وحجبانو خلااااص...عقلو سهى ومشاااا بيييه...
ريان : عبد العاطي الخراز "عبد العاطي الخراز اسم ماخافييييش عليه...وذاكرة زين الدين شي حاجة الي فيه معاوناه ومكتخلي تاحاجة تفلت ليه...مكاينساش وكيبقى عااااقل دقيق الملاحظة وكيفهم ويعرف الناس من وجاااهم...مكتمشي عليه ويفهمها طاااايرة...من بعيد ولا من قرييييب تاحاجة متفلت ليه ومكيخليهاااش تفلت ليه...حتى الى فلتاات را غير كيدير عين ميكة وصااافي....واحد شوي جبد تيليفون وشعلو بدون مايخدم الكونيكسيون الي طفااها...ودوز النمرة لمراد...
زين الدين : تگعد من تما خرج لجردة وعطيني وذنيك...لا واحد ولا زوج يعرفو معامن تهضر...
مراد : انا اصلا فالبيرو فالكلينيك...
زين الدين : الولد الي كان مربي عمك الي مات ولد المراة ديالو الي بقى فتاونات كيقرا تما شنو سميتو !!
مراد : اااه عبد العاطي ...
زين الدين : مزيااان..."ضار جيهة طوموبيل ركب فيها وديمارا راجع باللور تا شد الطريق.."الكنية ؟! واشنو دار من بعد !!
مراد : والله ماعقلت اخويا ولكن الي عارف هو يمكن خدم من بعد ما خذا ليصونص شحااال هادي وخدم عون قضائي...
زين الدين : تيسر "مخلاهش تا يكمل دار طرااق قطع تيليفون وطفاااه ثاني هو كاااع...زاد كسيييييرا الطوموبيييل غاديا بسرعة كبيييييرة...عينيه على طرييييق وعقلو مع حااااجة وحدة...الي حتى وصل ل دار بوعزة ودخل تا وصل لتجمع سكني ووقف الطوموبيل تما ونزل قاد القبية ووقف هز عينيه فالعمارة حرك راسو يمين شمال تا تسمعات طرطييقة...وهو يمشي حرك راسو لعساس خلاه كيسول فيه وطلع خلاه بلاكة مشى لدروج نيشان طلع فيهم بزربة تا وصل الطابق لولاني لقى باب الدار محلول وناس داخلة خارجة سرباية خدامين والموسيقى خدامة...
زين الدين"عينيه حمريييييييييين ما تسوقش لشكون كاين تما وشنو كااااين...دخل وناس كتشوف فيه والبنات عضو شنايفهم تزعطو فيه خصوصا داخل بديك الشوفة المخنزرة طيحات ليهم قلبهم فركابيهم...كانو قلال ماشي بزاف ولكن باين شنو كاين وهو اصلا جاي وعارف شنو كاين...حتى خرج ليه لابس جلابة سوسدي بيض وتحتو فوقية وبلغة صفرا فرجلين شعرو البيض القوي مرجعو لور ولحيتو الكثيفة تقادت وريحة المسك يعطي منو...حتى وقف عليه وجهو ولا صفرررر.." : بيض زغبة بغا يكمل ربع دينو...
الغالي : ز زين الدين"صرط ريقو وهو يغوبش زعما راني ماخايفش" نبقى عزابي مانديرش داري...
زين الدين : الله اودي...زيدك قصر من عندي...المراة سنان الحليب "عرفو خطب بنت فعمرها سطاش العام" ربيها مزياان لا تربيك وتجلوق دنيا عليك...
الغالي : الله اودي ك كون هاني...
زين الدين"وقف كيطرطرق فصباع ايديه" : واحد عبد العاطي فين وصل ؟
الغالي"خرج عينيه تا ولا وجهو مزننننكككك تقولي سطل الما تخوا عليه" : م ماعررفتتش...
زين الدين"ظور وجهو هنا وهنا وحك نيفو" : تبارك الله كبر ولا عون قضائي خدام غا مع خو راجل مو الله يواليه برحمة الله...
الغالي"ولا يرمش والريق نشف ليه فقرجوطتو"
زين الدين : اناس المختاري...ضابط منطقة امن انزگان...سابقا البرنوصي..."كيحك لحيتو وكيقرب ليه ولاخور راجع باللور" رباعة الفسايدية محزمين قواد فسايدي ديال الله يحسن العوان...الفساد فالدم والح**وا عاطيه الشحط محنت ليا عشرة...الصغير يسكت ليه الگلب وبيض الزغبة هل من مزيد...
الغالي : اش كتخربق...ناس كتشوف"ولا كيفيييبري حيث شافو بديك شوفة الي دخل بيها عااارفو اش كيسوى."
زين الدين"عض على سنااانو ونطق بحرووف مغززة" : بغيتي تشربك سلوكة بيني وبين نسيبي ومجايب لدنيا خبار....بغيتي تلگيها ليا ؟! "كان راجع الغالي باللور تا نقز عليه شدو من معصم ايدو وزيييير عليه وقرب ليه مزيااان تال عند وذنيه" : تحرك من هنا نقسم عدو ربك...
الغالي : نعل شيطان ازين الديين...
زين الدين : هاني غادي نعلو داااابا..."وررررررك ليه على معصم ايدو ومع الموسيقى حبسات تسمعااات غتو عندهم تا ضارو كيشوفو فيه والعروسة الي كانت ناشطة جمعات ضحكة ووقفات كتشوووف فيه...وجه زين الدين ولا حمرررررر وعينيه خرجوووو خضريييييين مشعشع ونواااضرو تورمووو ونطق مغززز العافية خرجااات منو"...والرب المعبوووود والي شانو عظييييم...ونعاااااود نعرف ولا نسمع"زيييير ليه على معصم ايدو" درتي ولا دزتي جيهة رجااال الخيالي..(عصام وفوزي) درتيييهم طرييق ولا قستيييهم بنبشة ...
الغالي"تسمعات طرررراااااق هرس ليه معصم ايدو...تا غوت لربي الي خلقو وهما يبداو يتجاراو العيالات والعروسة غوتات وامها جرتها..."
زين الدين"قبل مايطلقو شدو من حناكو تا حس بالفك غايطرطق ليه ثاني وخا را العافية شعلات ليه فايدو" : ديك الوقت ندير طريق الفساد طريقي ونمحي ملة مك من دنيا..
"دفعو بجهد تا تلاح فلارض دفل عليه وضار خرج منييير..خلا السرباية شي واقف مدهشر مافهم والو وشي مشى لغالي الي طاااح بسخفتو مغيب ومااعقلش عليه...والعروسة فخطبتها تبكي وتجذب ماخيلتها لغالي الي طاح قدامها مهرس من ايدو وسخفان ولا لخطبتها الي خسرات....نزل من دروج الخاجر معندوش مابقاش الي يتسنى السانسور تا يتحل....وصل عند سيارة وركب...عينيه مزاال بنفس الشوفة ديال الغل والغدايد والصعرة الي ركبها فيه الغالي...كسرا خارج من تما وفطريقو...جبد تيليفون شعلو وهو يدوز لعلي"
علي : الله يا ولدي فييييينك...
زين الدين : قضيت غراضي بخاطري الحاج...
علي : ماااطفيش داك شقف اصحبي ماطفييييش...مخرجنا بلا عقل وراك !! ماعندكش السوق ؟!
زين الدين"هز حاجبو" : دري صغير انا الحاج ؟؟
علي : اش يضمن ليا تحضر عقلك ؟...خاطرك ضيق على خاطر دراري صغار...نقولو هما عندهم الي يشد بيهم ويتبعهم يشدهم من ايديهم ونتا الي بعقلك !!!
زين الدين : رحمة الله عليهم...
علي : خلي تيليفونك شاعل ونهضر معاك جاوبني...الله يرحمهم ولكن را عندك باك الحسين شطنتيه عليك...عندك مرتك تخلعها عليك...كاين انا نشد بايديك وطريق التهلكة مانخليك تسلكها...راك ولدي قبل ماتكون صاحبي...خليتيني بلا خدمة بلا عقل تابعك ونقلب ضربت تال جديدة ونسول فسواق !!
زين الدين"دوز بايدو على وجهو ولحيتو بتعب" : الحاج تهدن...
علي : تهدن نتا نتهدن فقصتيني..
زين الدين"الصمت"
علي : ياكما مشيتي لعصام...
زين الدين : لا...
علي : وفين مشيتي ؟...
زين الدين : طرقت مسمار...
علي : كيفاش !!..."كان جالس فالبيت كيتفرج حتى هز الكونطاكت كيقلب على مايلبس وتيليفون فوذنيه كيهضر فنفس الوقت" فينك نتا دابا ؟!
زين الدين"شاف البلاكة والضو ديال شارع سنى ليه فعينيه" : راجع لدار...يمكن ندي المراة تشوف خوها فوزي...
علي : قلب دورة ودوز نتلاقاو فالكافي فين مولفين نجلسو ايام كنتي كتقرا....
زين الدين"قلب دورة وشد طريق فين غايتلاقاو..اول حاجة شعل الكارو حتى دخن منو ما يكفيه الي يخليه يتكالما باش قدر يدوز ليها الخط لقاها عالقرص" : منعستيش !؟
فرح : مازال عليا الحال...نتا فين كنتي من الي مشيتي وانا كنتسناك تهضر معايا والواتساب مادخلتيش ليه كاع...
زين الدين : توحشتيني !!
فرح"تبسمات شوية" : مشيتي وبالي مشطون عليك...وجهك ماعاجبنيش واش عرفتي شي حاجة ولا فراسك شي حاجة...
زين الدين : الي فراسي فراسك...والي ضرني هو خليتك مشطونة عليا.."ساط دخان ومعاه انفاااس التنهيدة الي خرج"تبرزطت مع الخدمة...
فرح : احم..واش غاتجي...
زين الدين"مشات عينو لساعة فالتيليفون لقاها قريبة لحداش ديال ليل" : على جال فوزي ؟
فرح : اه..نسيتي ؟
زين الدين : لا مانسيتش كنشوف معاك نتي...وجدي شنو بغيتي توجدي ليه وحسبي حساب شي ساعتين هكاك نكون عندك ولا قل..مزيان !؟
فرح : واخا...
قطع معاها...وصل الكافي فين داير معاه علي الي كانت قريبة لمسكن علي نيت...بلاصا السيارة ودخل كيقلب عليه بعينيه حتى بان ليه جالس كيبقشش فالتيليفون حادر راسو تا تحط التيليفون وكونطاكت وباكية الكارو فوق طابلة...
علي"هز فيه راسو تا جلس فالكرسي" : تفرگعتي على شي حد!
زين الدين"كيحك فلحيتو" : ماشي ولاد الناس وكتاف رجال الي يتبرهشو معانا...
علي : بمعنى ؟!...
زين الدين : ماشي ولد الخيالي...
علي : والعون الي عطاه الاستدعاء ؟
زين الدين : ثقتي بالعون الي براني !!
علي : ديت على هضرة ريان واش عرف...
زين الدين : ريان وصلاتو هضرة...والهضرة كتبقى هضرة..من غذا نعلم الحاجة بالي راك مابايتش فالكلينيك وماشفتك ماشفتيني...
علي : بغيتي تلاقي ليا سلوكة مابيني وبين المراة !! هههه"جمع الضحكة وشاف فيه" شي حد بغى يشري صداع بينك وبين خو مرتك عصام ويلاقي ليكم سلوكة ؟."حرك زين راسو ببطء وثقل" والي دار هادشي غايكون عارف الصداع الي بيناتكم وبغا يستغلو !! ولكن علاش يدوز لفرح !؟
زين الدين"شعلات فيه العافية فاش قال فرح حيث نيشان غليتفكر ان الغالي فكر يرد ليه ضربة ديال انه خطب فرح عليه هو...بانت ليه فوجهو الي تزير تا عض شنااايفو حتى خبط ايدو على الباكية ديال كارو وكمش فيها خرج سيجارة بالعصبية وشعلها خاشي وجهو بين كفوف ايديه وسط دخان الكارو وهز فيه عينيه ونطق مغير الهضرة" : يضرني بيها...
علي"نسااا راه الغالي كان غايخطب فرح..تلف ماعرف مايقول وهو يتحول لسؤال اخور" : وشكون الي بيع بالوراق ديال فرح الي تعطاوك بلا قانون ؟!
زين الدين"بصوت مدعدع بالدخان" : الضابط المختاري...المعرفة ديالو ..
علي"ضرب فوق الطابلة" : ينعل ليه الجدود نسيتو يالاطيف وانا مشى بالي را عصام...
زين الدين : من لول ماثايقش يديرها... يقصح حتى يعيا يغلبو اصلو...عندو نيشان ولا بلاش...و الي دراها دا ميعاود دابا...
بقى كيهضر معاه حتى تفش شوية وحس براسو تكالما وخا را عصبيتو فرغها فالغالي...وصل الوقت الي خاص كل واحد فيهم يرجع لدارو...مسافة الطريق حتى كان داخل الفيلا وتيليفون فوذنيه غير وقف وهو ينزل...
زين الدين : هبطي...
فرح"خرجات من كوزينة هازة ديك القفيفة ثاني...لابسة مونطوها..حتى خرجات لعندو مبتاسمة قرب لعندها..حط ايدو على طتفها تا باسها فراسها وتحنى شد من عندها القفة" : جيتي بكري على ساعتين...
زين الدين : كنت مع الحاج علي فالكافي هضرنا شوي وجيت..
فرح"حلات الباب ودخلات وهي كدير سانتيغ ضارت عندو" : زيين...
زين الدين"ديمارا طوموبيل خارج" : كبيدة ديال هاد زين الدين
فرح"كيحمقها فاش كيقوليها هاد الجملة" : واش غاترجع الكلينيك فاش نرجع من عند فوزي ؟
زين الدين : سي عندي opération a 6h...شنو محتاجة ؟!
فرح"دارت صبعها ففمها" : بغيتك تكون غذا فالعشية احم...
زين الدين"كمش حجبانو وضار عندها" : شنو موجدة ليا فالبيت...
فرح : هههه اويلي علاش كيمشي بالك لبيت علاش متگولش ان شاء الله...
زين الدين"حرك راسو" : سي ان شاء الله ماختالفناش...mais البيت خاطري مايل ليه معاك...."هز ايدو" شنو مناوياش تگولي ؟
فرح : حتى تجي...
زين الدين : مرحبا...نحاول نجي مع الغذا..."حركات راسها مبتاسمة وضارت كتشوف فالطريق دنيا شبه خاوية واخا كاينة سيركيلاسيون...وفنفس اللحظة كيف العادة متكي فالسرير ديالو كيصوني لعصام ونفس الشيء تيليفونو طافي..."
فوزي : والعفوو لله معاك اعصام..."مزال كيهضر معصب تا تحل الباب ودخل عندو.." عصاام !!
عصام"هاز صاك فايدو وساشية جايب فيها ماكلة من سناك حطها ليه عند راسو وحط ليه صاك" : هاني بلا متصوني فرعتي البواط فوكال بتعياط...مالنا ؟!
فوزي : وخويا خرجتي صاعر والنهار كلو ونتا غابر با كيعيط خوالي هناء..انا خلاص...مالك اش وقع ؟!
عصام"جلس فالكرسي كيحك لحيتو" : واحد خينا خربها مع صطوف كان شوي يقتلو ونعاودو مع صطوف من جديد نعل بو مو شوهني...
فوزي : فين خربها ؟ اش طرا ليه...
عصام : تقاشح مع شي كليان فالحانوت تشادو ضربة مني منك صيفطو مغرز...بزز باش فكيناها فالكوميسارية مع السيد...
فوزي : صطوووف يااا صطوووف عمرك توب...تنازل السيد !
عصام : تم تم مادارش محضر تفكت قبل ميديرو...دغيا ضمصنا..."بصعبية جناوح منخرو كيفرفرو" حلفت على مو ماباقي نفكو...
فوزي : خاص يجمع راسو من لاخر...هذا الي بغى يتجوج هذا ؟! ترررر...
عصام : حول با فيه...
فوزي"ضار جيهة الساشية" : اش جبتي ليا العشا ههه اووو سناك عبد الهادي وبوكاديو والله الى توحشتو بالرب...
عصام : هذاك راه ليا....
فوزي : وانا ؟
عصام : متاكلش داكشي...حتى تولي شوية ماكلة زنقة مكاين لاش دابا...غانتعشى معاك ونتحرك فحالي راني غير طالب سفيان ودخلت لهنا فهاد"هز كمايمو شاف فساعة" الوقت...
فوزي"خرج عينيه..تفكر را فرح كاتجي فهاد الوقيتة" : اجييي دخلتي فهاد الوقت !! جيتي من جديدة لهنا !؟
عصام : اش بان ليك ؟!
فوزي : فاش جيتي ؟
عصام : كريت طوموبيل باش تحركنا هاد النهار مع القواد ديال صطوف...
فوزي : كي كيفاش واش غاتبقى تا تعشى معايا ؟!
عصام"ناض وقف وهز ديك الساشية" : نونسك تا وكان تعشى ونتحرك...شربتي دواك ؟
فوزي"برد ليه الما فالركابي" : شربتو يلاه خرجات الفرملية من عندي...غذا فالصباح غايضربو ليا شي شوكة مانعرف ديال اش..."شافو كيحل فالساشية ويحط" وليني انا مزال ماعيني فماكلة"
عصام : الوحدة هادي اشريف.. ناوسي تسحر ؟!
فوزي"بغا يسكت ليه القلب" : امافياش والله غا ندبق الى جعت...
فوزي : وشكون يعطيك تاكل الى ماكنت انا ؟
فوزي : غانمد ايدي لهاد الطاسة الي حدايا...
عصام"جلس فالكرسي وسمى الله بدا ياكل كاع ماتسوق ليه وكول ولا كاع لا تاكل..كياكل بالخاطر وفوزي ستين حجرة حامية ولات تحت منو...مالقى مايدير وهو يدور جيهة التيليفون شعلو ورسل لزين الدين ميساج علمو ب شنو كاين...عصام هز فيه عينيه جمع حجبانو عقدهم بقى مخنزر فيه تا هز فيه فوزي عينيه صرط ريقو وهو يحط تيليفون وبدا يفرنس...عصام كياكل ندغة وفوزي عندو ديك الندغة عاااام وعينيه على الباب ومتمنيييييييي ما يدخلش زين الدين وفرح...كيرجع يشوف فعصام الي حلف مابغى يسالي داك البوكاديوس...حطو وهز الفريت ومسح ايديه حساب ليه غاينوض يخرج ويمشي ساعاك هز غير تيليفون حطو قدامو فوق طابل الي عند راس فوزي وداز ليوتيب كيتفرج...فوزي بغى يخرا تحتو وخراه ميجمعو شراوط...عين على عصام وعين على الباب والعين الثالثة على تيليفون. الي مد ايدو هزو شعلو ودخل تاني الميساجات عاود رسل ميساج وبالحس صونى لزين الدين تا سمعو طلق الخط كيقول الو وهو يقطع عليه باش يشوف شنو رسل ليه...
عصام"غوبش فيه" : مالك الحبس ؟
فوزي : م ماليش علاش ؟"يلاه غايهضر تا تسمع صوت البوااني وهو يتحل الباب مع تحل غوت فوزي بالخلعة"...
قربو يوصلو لمستشفى حتى قلب الدورة وخذا طريق جديدة وحيث فرح معارفاش كازا مادات ماجابت حدها شافتو ضار وهي دور عندو...
فرح : واش رجعتي من طريق ؟!
زين الدين : ماعندي ميتسالك حاضية معايا...
فرح : فين غادي ؟
زين الدين : نحط ملتك فشي خلا ونخليك...
فرح"وجهها ولا صفر وريقها كيتصرط ويعاود غير الفكرة وخا عارفاها مزاح رعبتها..."
زين الدين"ضار عندها ملي لاحظ صمتها بانت ليه اللون هرب من وجهها تا عض شنايفو وغمض عينيه نسى راسو فلحظة وخلعها...شد ليها ايدها وباسها" : عارفاني نديرها ؟!
فرح : حتى حاجة ما بعيدة..."كتحك فشفايفها بسنانها باش تفادا تبكي"
زين الدين : ياااك !!!
فرح"حنحناات ونطقات مبدلة الموضوع" : احم ع علاش رجعتي ؟!
زين الدين"كيسني ليه ضو فعينيه ديال شارع" : فوزي بغا مني شي حاجة نرجع نجيبها ليه ونمشيو...
فرح"حركات راسها ببطء...رجعات شافت قدامها سهاااات كتفكر وكتشوف فالدنيا خاوية تقريبا هاااادئة ديك البلاصة منين دايزين رتاااحت فيها ووعات ان الخوف من برا كينقص منها...واحد شوي وهي دور عندو" : نتا وفوزي وليتو قراب بزاف !!!
زين الدين"حرك راسو وضار تا شاف فيها ورجع تقابل مع طريق مركز" : الانسان المزيان شرف كبير تكون قريب ليه...الى كانت المحبة متبادلة علاش لا !! فوزي درويش كافي خيرو شرو..نهار وقع الغيار عادي شي حاجة كتوقع. بين العزاز ومايتقلق ويهز منك غير الي عندك مكانة وقيمة كبيرة ومعزة فخاطرو...سي نو الباقي تنوفيق وقلة النية...
فرح"ضارت جيهة شرجم وسكتات"
زين الدين"ضار شاف فيها ورجع شاف قدامو هاد المرة وقف السيارة قدام واحد المحل لقاه باقي حال...ديال العصير"
فرح : اشنو غادي تشري من هنا ؟
زين الدين : بغى شي حاجة من هاد المحل...
فرح : ديال العصير هذا"حرك ليها راسو" بلاش راني درت ليه عصير ديال لافوكا ولفخوي سيك وتمر وبنان...
زين الدين : نزيدوه شي واحد ثاني..ماعليش.."قبل ماتهضر ترجل من طوموبيل...بقات حاضياه كيفاش قاد القبية الي لابس ومشط شعرو القوي بصباعو حتى وقف حرك راسو لمول المحل وبدا ينعت ليه غير بفمو شنو يوجد ليه...طوولة وتگديرة وزين وجدية واي مواصفات تبغيها بنت فرجل متواجدة فيه...حاضياه وكتفكر شنو داز عليهم وشنو دوزو ومزااال...كتشوف فيه وقلبها كيمووت بالعشق ليه من نهار طاحت عينها على عينيه دخل لقلبها بدون استئذان...كاتفكر لو مكانش هو شنو كانت دير...بقات كتشوف فيه وهاايمة بلا ماتحس حتى تسمع دقان فالزاج وهي تقفز وضارت عندو وركات عالبوطون وهبط زاج شافت فيه"
زين الدين : عجبتك ولا صدمتك ؟
فرح"رمشات فيه تزنگو حناكها" : مافهمتش...
زين الدين"مد ليها كاس كبيير ديال عصير المونگ والليمون والكاكي مزوق بكريم شونتيي وفواكه جافة وشوكولا وكراميل بالباي ديالو" : داكشي الي عندك معاه(زعما الي كيعجبك)...
فرح"دغيا تبسمات" : اهههه شكرااا...
زين الدين : واجب.."ضار جيهة بلاصتو وركب كيتسناها تا تشرب وهو شاد تيليفون دخل يبقشش فيه...حتى صونا ليه وهو يجمع حجبانو..."
فرح"كانت كتشرب وهي تشوف فيه لقاتو عاقد حجبانو وعينيه على تيليفون ماباغيش يجاوب" : جاوب ...
زين الدين"هز راسو وضار عندها" : تت لا..."قطع" ماشي وقت الهضرة ورا الستة العشية كتولي قلة اداب...
فرح : الى كانت خدمة !؟
زين الدين : الخدمة بنهار فرح ماشي فهاد الوقت..والي كيهضر معايا على الخدمة فهاد الوقت معروف شكون...يا الحاج علي يا ليزاسيسطونت ديالي...
فرح : وشكون صونا ليك دابا....
زين الدين : المراة الثانية..."شاف قدامو ونطق بجدية مصطنعة.." واحد السيدة كنعرفها ماعرفتش علاش نسيت ماعطيتها نمرتي البيرسونيل..."خرجاات عينيها تا شهقت وهي تشرگ ليها مع العصير...بدات تكحب تكحب تكحب...ووجهها تجيف حتى طار لمحل كيزرب وجهو بياااض ندم لاش تمازح معاها كااع...عمر ليه الكاس وجاي كيترعد ليه فايدو بالدعقة دق عليها تا غمض عينيه ورجع ضار جيهة فين كيجلس كانت حطات الكاس فالبلاصة فين كيحط كيسان قهوة الي كيشرب قالطوموبيل..."
زين الدين : شدي شربي..."شداتو من عندو تكات على الكاس تا شربات وهي تعطيه ليه بقات تكحب وتعاود تا دازو دموعها بالشرگة الي شدتها" صافي تهدني...نعل بو ملتي الي باقي نضحك مع ملتك..
فرح : كحكح كح كتفلى عليا !!!
زين الدين : شنو بان ليك ؟
فرح"غوبشت فيه" : علاش تعطيها نمرتك البيرسونيل (شخصية)...
زين الدين : عندي شي نمرة بيرسونيل ؟ ياك هي الي مزال عندك هي والتيليفون !!
فرح : بغيتي نرجع ليك تيليفونك ونمرتك !!
زين الدين"خرج عينيه...وهو يدور كيضرب اخماس فاسداس.." : يلااه اسي...
بقات تنهج وتشرب فالما تا تنفست حتى طيحات منو النص بالخلعة فاش تجيفات ندم لاش تمازح معاها...جاب ليه الولد الطلبية مقادة وعطاه الكاس ديالها خلصو وشكرو وبقى حتى كما الكارو عاد جاه ميساج من فوزي بالي الدنيا امان هاد الساعة....
ديمارا الطومويبل ورجع قلب الدورة خذا طريق المشفى...طول الطريق ماهضراتش بقات فيها غير الكحبة الي كتكحب والشرگة باقي فيها حتى خذا ليها قرعة الما باش تبقى تشرب منها...وصلو المشفى طلع هو وياها من المصعد الي كيطلعو منو الموضفين...متكي على الحايط خاشي ايدو فجيبو والايد لاخرى هازة القفة الي دار فيها قرعة العصير...اما هي وااقفة ماهازة والو خاااوية مضاربة غ مع الكحبة الي باقي كتشدها وكاتزيد تندم مو علاش ضحك عااوثاني...ماينكرش واحد اللحظة عجبووو الحال كيشوف غيرتها المصعورة على طريقتها وشي مرات كتجيب الضحك...تحل المصعد على الطابق فين كاين شومبر فوزي...
فرح"دقات وهي تدخل نيشان بلا ماتستاذن" : كي بقيتي شوية ؟!
فوزي"رجع ليه اللون لوجهو." : عيااان شوية "بلعاني باش يحضى باهتمامها"...
فرح"بخوف" : اش ضارك ؟"حطات ايدها على راسو" سخوون ؟"هبطات حنكها حطاتو على حنكو كتقيس بحنكها باش تاكد نفس الحركات الي كدير مع عصام مع فوزي وحتى زين الدين ملي شافها كدير هكاك تفكر فاش دارتها ليه وهنا تاكد ان فرح كاتموت عليه غير من هاد الحركات الي كديرهم لزوج ناس عندها هما عصام وفوزي وزادت زين الدين..." نعيط لشي فرملية تعبر ليك ؟
فوزي"عاااجبو الحال زاد ترخرخ باش يبان مريض مزياان...نطق بصوت عيااان مصطنع" : ا بلاش شوية وتنقص عليا..."دار ايدو على راسو" فففف صداااع..
فرح"شافت فزين الدين" : زين الدين دير ليه شي حاجة عافاك.
زين الدين"صغر فيه عينيه وعض شنايفو مراااكز معاه" : مالو ؟
فرح : اويلي كيفاش مالو ؟ را ضرو راسو ويمكن سخانة ازين الدين عنداك يكون inflammation(التهاب)
زين الدين : ديالاش ؟
فوزي : اشنو هاد فاسيون...
فرح"شافت ففوزي" : انفلاماسيون..التهاب بسباب صدرو...
زين الدين : وليتي تعرفي خدمتك ماعندي مايتسالك...
فوزي"تگعد شوية" : واش كطنز ازين الدين !!
زين الدين"خرج فيه عينيه" : مريض وكطنز معايا ياك ؟
فرح. : زين الدين ؛!!
زين الدين : كبيدة ديالو...
فرح"خرجات عينيها وهي تصرط ريقها ماقدرتش تشوف ففوزي حناكها نملوووو" : ننممنممم
فوزي : ها ضصارة...اش كتخربق نتا ؟!
زين الدين: مرتي هادي...
فوزي : وراه ختي هادي...
زين الدين"هز فيه حاجبو" : يااك اسي ؟"شاف ففرح" هاني جاي...
خرج وخلاهم كيشوفو فوزي تگعد شوي كيطل عليه وفرح كتشوف ما فاهمة والو حتى شوية شي عشرة دقايق تم جاي وفايدو باكية فيها سورانگ وقريعة صغيرة...و محرار لقياس درجة الحرارة...حتى وقف ليه عند راسو...
فرح : اشنو هادي ؟
زين الدين"ماجاوبهاش...حل لومبالاج ديال سورانگ بسنانو قادها وخشاها فقريعة تا خذا القياس الي غايحتاج.."
فوزي"صرط ريقو" : اش داكشي ؟!
زين الدين"حط ايدو على جبهة فوزي.ورجع شاف فيه" : دير هذا تما "شير ليه لطابگو"
فوزي : لاش اسي زين الدين ههههه تا غاتنضحكو اصحبي..
زين الدين : سي عارف... ماعليش دير شنو گلت ليك...
شد من عندو فوزي المحرار وعينيه على شوكة الي هاز زين الدين والي غطاها بغطاها حتى يعبر ليه الحرارة...دارها فين قاليه وفرح كتشوف ففوزي الي خشا المحرار وهي تهز عينيها فزين الدين الي شاف فيها وغمزها تا تزنگت وهي تحدر راسها عند فوزي...
فوزي : منين جبتي هادشي ؟!
زين الدين : الي طلب يلقى والي احتاج يشد والي بفمو ما يتلف...
فرح"سمعات المحرار صونا" : عطيه ليه را عبر...
فوزي"جبد المحرار كيترعد ندمووو علاش تفشش على ختو...ماعطاه ليه تا غفر ليه الله..." : هاهو ديك الشوكة الي هاز قدام عيني هبطات ليا سخانة بالخلعة...
زين الدين"شد المحرار وشافو" : 38,5...
فرح"شهقات" : طالعة ليه...شفتييي اش گلت ليك را انفلاماسيون باااينة انا كنضربو لصدرو تا مرضتو دابا...
فوزي"خرج عينيه" : الاااا را غير كيكذب"كيهضر وعينيه خارجين فالشوكة بغات تسكت ليه القلب"
فرح : ضرب ليه شوكة ازين الدين...
فوزي : لا...
فرح : علاش لا ؟!
فوزي : عطيني اللوا...
زين الدين : ترجل معانا صحبي !!
فوزي : مابغيتش...انا غا ولد لحرااام تايطير من بلاصتو...
زين الدين : نعيط لختك ضربها ليك حسن !!
فوزي : ماختيش مرتك نتا انا مابيا والو...
فرح : ياااك ؟
فوزي : عطيني گرحة عطيني ساااالمة ينعل بو مي انا...
زين الدين"طوا لسانو وعضو وقرب ليه مصغر عينيه من بعد ما شير لفرح براسو تحيد من حداه...ومشى ليه تحدر عندو مزيااان تقابل مع وجهو" : هبط سروال شوية...
فوزي"خرج فيه عينيه" : كون تحشم !!
زين الدين"خنزر فيه" : فوزيييي...
فوزي : انا الي غانحشم غا لبدها اصحبي بغيت غا ختي ترد بالها عليا شوية توحشتها...
زين الدين"تگعد وضار عندها" : شوفي شنو بغى وعاودي عبري ليه ثاني...شوية وتنزل...
كي سالا من عندو نزل من المشفى كيحك فايديه باش يسخنو حيث كان البررررد شددييييد فكازا....صونا ليه التيليفون من شخص الي بقى بالو معاه نهار كلو ونسى ماعيطش ليه...
عصام : با..والله ابا الى تدهييييت مع واحد المشكيل وقع مع واحد سيد صاحبي"ماقدرش يقوليه صطوف"
المحجوب : وغير علم ونتا طفيتي التيليفون...عمرك لا باقي ديرها الله يرضي عليك...
عصام : تخلعتي عليا اسي المحجوب ولا نحلم !!
المحجوب : ايوى لا كون لا بغيتيني نهضر ونسمعهم ليك ثاني
عصام : معيط مشارجي عليا..."غمض عينيه" تت وايلييييييي ژكا زگا با...
المحجوب : مكاين باس ؟
عصام : نسيييت ماعطيت لفوزي شي حاجة"طلق السينيال وضرب الدورة راجع"
فهاد الاثناء عطاتو الطاسة الي جابت ليه فيها كرات طاقة زادتهم ليه...وجبدات ليه مول صغير فيه لازانيا الي غير شافها وهما يحوالو ليه عينيه وخرجو منهم القلوبة...
فوزي : واش عرفتي اش درتي فحياتك الهبيرة ختي !!
زين الدين : كيفاش هبيرة ؟!
فوزي"هبط راس ختو عندو وباسها فحنكها وجبدو ليها تا غوتات" : هبيرة كنگولها ليها...
زين الدين : نقص من داك تجباد ديال الحناك الي درتي ليها سي فوزي..."غمض عينيه بتهديد ونطق بصوت مثاااااقل" نقص الله يرضي عليك...ماعندو لاش...
فوزي"شاف فختو الي حبست ضحكة ودارت راسها ماسمعاتوش...ورجع شاف فيه" : كتهضر بصح !!
فرح"صرطات ريقها وبدلات ليهم الهضرة...مدات ليه فرشيط" : كول باش نجمع المول ونخلي ليك الماكلة عند البنت...
سما الله وشرع فالاكل...خلاتو كياكل وجبدات طاسة ديال صلاد وفرشيط وقرعة صغيرة فيها عصير الحامض وهي تقرب لعند زين الدين شافت فيه بحب واهتمام وهو بدوره بادلها نفس النضرة لكن بدون ميفهم شنو بغات...
فرح"حطات ليه طاسة بين ايديه والفرشيط" : تعشى راك ماكليتي والو ازين الدين...شربتي ADO ؟
زين الدين"حرك راسو شاف جيهة فوزي لقاه كياكل وحابس ضحكة وشاف فيها قرب ليها تا قبل جبهتها بحب وشكر لهاد الاهتمام الي كتعطيه والاحترام الي مبادلاه بزاااف على الحب والعشق..." : لهلا يخطيك عليا...
تبسمات ليه...جر الكرسي وجلس حدا فوزي سما الله تاهو وبدا ياكل فصلاد ديالو الي كيبفضل يتعشا بيها...اما هي بقات تنقب مع فوزي شوية ضارت كتجمع ليه فالشومبر وتقاد ليه فحوايجو عزلات ليه المسخين فصاك وطوات ليه النقييين فصاك...
فرح : كومونديت ليك واحد جوج سورفيتات سخان غذا غايوصلو عندنا فالدار ونجيبهم ليك بدل بيهم...
فوزي"ماقاداه فرحة بهاد الاهتمام" : الله يحفضك نييييت بغيت نشري حوايج جداد...
زين الدين"قرب ليها ونطق" : باشمن كارط كومونديتي ؟
فرح"شافت فيه" : الي عطيتيني...
زين الدين"حك ليها على كتفها..فرح حيث استخدمات لاكارط وخا ماشي ديالتها الي كانت عندها لكن كوميم قضات الغراض راسها وهذا بحد ذاتو تطور...رجع زين الدين كياكل ومجمع مع فوزي وهي رجعات كتجمع وتحيد الماعن الي بقاو من ديك المرة قادت ليه كلشي حتى لقاتو كمل بقات معاه شوية تا ناض زين الدين مستاذن لانه خاص يرجع لكلينيك عمرو عليه شوية الوقت ونشط معاهم وكل مرة كيتاكد ان زين الدين الشخص المناااسب لختهم راجل يعول عليه...كتبقى فقط خوف على ختهم عينيهم...كيبقى الشيطان حضر والمشاكيل كتوقع بين الناس العزاز والي تهزي منهم وتقلقي منهم وتبقاي شادة فتقلقيتك منهم...ماغاتنساش ليك شكتتهم لان المحبة الي كتهضر...اما البراني ولا الي ماعندك بيه غراض ولا عارفاه ولد لحرام من الاساس را غادي يتحط سطل بلا تقرقيب كي كان كي ماكان بحالو بحال الناس الي عايشة وصافي...
دخل هو وياها لمصعد ركب رقم الطاج التحتاني...وهو يصوني ليه تيليفونو...
زين الدين"طلق مكبر صوت باش تسمع لا يحساب ليها شي حاجة هههه" : با رضوان..
رضوان : واش خرجتي ولا باقي فطاج الثاني ؟
زين الدين : يلاه نازل ..شنو كاين !!
رضوان : بالرجووولة. صحبي جابك الله دوز عندي نعطيك شي وراق ديهم عند الحاج الله يرحم ليك الواليدين...وادير معايا المزيان كي دايرو معاك...
زين الدين : شونطاج !!؟
رضوان : اعوذ بالله...هاني فطاج فين كاين شومبر ديال نسيبك...البيرو ديال لايطا ماجور.الي تم...باش نشرح ليك..
قطع معاه لقى راسو خرج من المصعد عاود رجع هو وياها ودخلو ركبو رقم الطابق ثاني خرجو من المصعد مشا حتى لعند باب المكتب...
فرح. : غير دخل انا غانمشي نجلس فالكراسا الي حدا السانسور...
زين الدين : ماكدة ؟
فرح : اه"حرك ليها راسو وتسناها تا ضارت مشات خاشية ايديها فجيابها وغاديا بشوية تا بغات دور عاد حل المكتب ودخل..اما هي كي ضارت مشات جلسات فوق الكراسا الي تم..شابكت ايديها وجلسات تسنى...ضارت حداها لقات واحد الساشية محطوطة تما شافت فيها وتبسمات فيها اسم ماركة كيتقدا منها فوزي بزااف...صونا ليها تيليفون بنمرة زين الدين وهي تنوض جاوباتو وتمات غاديا حادرة راسها دارت القب على راسها حدراتو ومغنوسة ضارت هي ضار هو سمعات شي حد جاي حسات بالارتباك وهي تكحاز مخلية ليه طريق...
عصام"خارج من طواليط كينشف ايديه بكلينيكس وحادر راسو مغوبش حس بشي حد جاي ودار ليه طريق...هي غاديا وهو جاي كل مدهي ساهي وحادر راسو لدرجة دراعو قاس دراعها تا هز راسو وهي هزات ايديها خايفة....كنوع من الاعتذار بدون ماتكلم وزادت مع الطريق....
الهذه الدرجة وصلنا ؟ نلتقي غرباء وفي قلبك حديث لي ؟ وفي قلبي حديث لك وعتاب....ثم نمضي كالغرباء وكاني يوما ما كنت "بنت گلبك"...وكانك يوما ما كنت "اخي الاب"...
مشاات زادت مع الطريق مغطية راسها بالقب بحكم جامعة شعرها اسفنجة حسات بالبرد تما وغطات راسها بالقب...وتفاديا للتصادم مع شي حد "غرييييب" وضارت لحقات على زين الدين....
زين الدين"عنقها بجنب ودخلو لمصعد الي غير تسد ضار عندها حنا راسو لوجهها وهو يهز ليها القب..." : مالك ؟!
فرح"هزات فيه عينيها وجهها مزنگ" : ما ماليش !! علاش ؟
زين الدين : وجهك ماعجبنيش...خفتي ونتي وحدك ؟
فرح"حركات راسها ب لا" : لا ماخفتش..."كاتنهد وتهضر" غير احم ضرني البرد وغطيت راسي وصافي..احم...
زين الدين"جرها لجنبو اكثر وعنقها كيحك ليها على دراعها باش تدفا" : شوي نوصلو لطوموبيل وتدفاي فيها...
حركات راسها ما دوات ماتكلمت حتى وصلو لسيارة غير ركبات تطلقات الكليما دافية فيها..
تحنى على ديك الساشية هزها ووقف شحاال وهو ساهي حتى ضار جيهة الممر بقى كيشوف ورجع ضار جيهة ممر الي فيه شومبر ديال فوزي...حل الباب اتا دخل عليه ماعرف فوزي باش تبلى تا قفز...
فوزي : عصاام !!
عصام"عقد حجبانو" : مالك الحبس فينما ندخل طير لسما وتنزل"جهد صوته بواحد الطريقة خلع فوزي كثر ما خلعو بدخوله" ياااااااك شي باس مكاين الخرااااا !!؟؟؟
فوزي"صرط ريقو" : مكاين باس اخويا غا خلعتيني فاش رجعتي..ماالك ؟
عصام"بنفس نبرة الصوت" : ما ماليش مااا ماليش رجعت نسيت ماعطيتك علاش وصيتيني وصافي ندمتي جد مي لاش جيت كاااع"لاح الميكة فوق الكرسي" هالخرا الي بغيتي...
فوزي"بدا يتگعد ويتوجع" : ففف...مالك دابا علاش معصب...ماگلت تا عيب !!!
عصام : صافي روي عليا ستون بلا حبس...
فوزي"بغى يلبدها..بدل ليه الموضوع باش يتهدن" : لقيتي عزووز باش دخلتي لهنا !؟
عصام "مجاوبوش...مشى الباب وقبل مايخرج ضار عندو ووجهو كينهج بالاعصاب" : نعس تالصباح ونجي نشوف يمكن غاتخرج غذا الى شافك طبيب...
فوزي"مالقى مايقوليه ماعرفو مالو لان رد الفعل ديالو ماشي طبيعي ومافهمش اش بيه...يمكن عاق بيه عصام انه كيتفادا يجي فهاد الوقت باش مايتلاقاش بفرح لان هادشي باين وواضح على فوزي وتسبب فازعاج لعصام..كايحس براسو انه شخص غير مرغوب فيه فحضور فرح...وانه شخص غايمرض فرح ويضر فرح..
ضار وحل الباب وخرج ما زادو تا كلمة من فوق داكشي الي قال...نزل سانسور وخرج لبرا ضرب مسافة شوية على رجليه تا وصل لطومبيل كسيرا وزاد مع الطريق...وصل الجديدة حتى كان قدام الدار طلع لدار مع دخل لقى صهييييييييييط...جدو ناعس فالبيت ديالو هو وفوزي و وهناء ناعسة فبيت فرح...مشى لبيت ديالو بالحس هز مايلبس وهو يخرج تا بان ليه ضو التيليفون شاعل فبيت التلفازة...جمع حجبانو وهو يدخل شعل الضو...
ع.العالي"هز ايدو حجب بيها عينيه من شعا ديال الضو" : طفي اعصام...
عصام"طفى الضو وشعل ديال تيليفون ومشى جلس حداه حط الحوايج الي بغى يلبس ونطق" : اش مفيقك فهاد الوقت ثاني...
ع.العالي : باش عرفتيه ثاني ؟
عصام"تبسم باستهزاء" : مالي معاش كندخل ديما لدار من عند فوزي ؟! عند بالك مشايفك ماعايق بيك ؟...
ع.العالي"الصمت"
عصام : ورجع لسيدي بنور اش مخليك باقي هنا ؟ لا نعاس شايفو لا راحة لاگيها !!!...كيصبح الصباح تخرج ماتجي تال ليل !!...
ع.العالي : خاصني نولف..."هز عينيه وخا غالبة الضمة...فقط انارة الهواتف..والي عطات جو كيوصف داخل كل واحد فيهم وشنو بيه وشنو واقع ليه وباش كيحس...كتحسي بهضرتهم خااارجة من القلب...صحيحة مافيها لا غلط ولا كذب.." وحتى لامتا انا نبقى هك ؟..علاش منضغطش على راسي ونولف ونعيش ونتعايش كانه ماوقع والو...
عصام"جمع حجبانو" : شنو وقع هنا خالي ؟ من نهار عقلت عمرك جيتي لهنا ملي مشات ختك...
ع.العالي : ماشي مك ؟
عصام"هز حاجبو" : ونتا ماشي ختك ؟
ع.العالي : ههههه ضربتي العرق...ههه ايييه ماعليش..."هز تنهيدة ورجعت بيه الذكرى لاول واكفس نهار غايعرف فيه بالي ختو الكبيرة الي خرجاات من قرايتها ورباتهم وهما صغار حتى تزوجات ب المخنتر..."
ع.العالي"كايغووووت لربي الي خلقو فوسط وجبهتو تقطررر بالعرق...هيستيييرية عجيييييب وقعات ليه..حيث حليمة ماشي اي وحدة بالنسبة ليه حليمة علاقتو بيها هي الي كيشوفها فعصام وفرح فاش عاود ليه باه عليها ." : وااااااااااا فيييييييييييين مشاااااااااات فيييييييييييييييييين...."مشى شنق على منير" ماسولتوش ماريا ؟!
منير : اش غايوصلها ل ماريا ؟...ماعندها تاحد الي يديها لتما...
ع.العالي : المغرييبب كاااامل حفيناااه بتقلااااب اعباد الله...المغريييب كاااامل...الي نعرفوه والي منعرفوووه...جهدييي تقادا ثلث شهووور وانا دااايع نقلب ونعاود...
منير"تاهو كثر منو حيث غير داز عرسو بنعيمة بشهر وقعات الكارثة" : مشى لتولوز يسول عالله وصافي..عيطنا ليها فالنمرة الي كانت هضرات معانا بيها داااك العام قالو لينا هذا غير سنطرال ديال تما...
ع.العالي"تكا عالحايط بجهددد وبقا هاااابط هااابط حتى جلس لارض وعينيه مغرغرين بدموع منضر وجهو يطيح عليك الضيم...عوج راسو ونطق بصوت عيااااان بكثرة جهد ديال الغوات التقلاااب قلة النوووم وهو كيقلب جاااهل عليها..." : الى مابانتش الحنينة ختي ماعندي ماندير فهاد البلاد الي ندور وندور ونشم ريحتها فيها...
غمضض عينيه وعصرهم حتى كيحس بشي حد كيحرك فيه غير وسنى ضو التيليفون عليه...
عصام : خالي !!!
ع.العالي"شاف فيه" : نوصيك وصية...قبلتي بيها ولا رفضتي تقلقتي مني ولا ماديتي ماجبتي !!"كمش عصام حجبانو" وياااك تفرط فالي ربيتي عليها كبدتك...شوف جيهتها وعرف مالها..ولا طولش الخصام بيناتكم لا يبرد دمكم...
مافهمش هضرتو مزيااان وخا عرفو كيقصد فرح...لكن بمجرد ما تفكرها شعلات فيه العافية حتى ناض على وقفتو وهو يشعل الضو...
عصام : الى بغيتي حاول تنعس تبقى هاكا تمرض فصحتك...
ع.العالي : بديت كنولف ضغطت على راسي وهبطت كواريا..باش نكسب صحتي...نسولك المسولني اش خبارك اما المجاوب را عطاك خبارو...
عصام"حيد القبية طواها ولبس تريكو بالكمايم دافي" : ماعندك ماتسول فيا..قاد براسي وبشغالي وصحتي من نهار حليت عيني...
ع.العالي : التاريخ عندو الصلاحية ويتقادا..."رجع تكا وجر عليه الغطى" حاول على راسك اعصام راك فوتي...
عصام"هز سروال فايدو وتم غادي لدوش باش يبدل ويغسل رجليه" : ممم واخا"لاح ليه هاد الكلمة ومشى خلاه كيحرك راسو يمين شمال ومشى لدوش...حيد السروال وبقى غير بالبوكسر حتى غسل رجليه ونشفهم عاد لبس سروال قطن..تحنى على لافابو كيغسل وجهو وفمو...كيما تحنااات هي فهاد اللحظة غسلات وجهها وحكات سنانها نشفات حالتها وخرجات من دوش تخشات ففراشها وهزات ريمونت تطفاو ضواو وشعلو غير الاضواء الخااافتة ونزلات ستارة ديال النافذة والبالكون...حاسة بخنقة فصدرها كاتمة ليها عليه...من بعد ما حطها زين الدين ومشى طلعات نييييشان بلا عقل حتى من ضحى الي كانت غاطل عليها وتشوف واش حيدات جبيرة وخا عارفة غاتلقاها ناعسة مامشات ليها...
فرح"حطات تيليفون فوق كرشها ومدات ايدها لريمونت شعلات تلفازة..اختارت فيلم من الي كاينين وصافي غير باش يبقى مطلوق تا يجيها النعاس الي مووحااال حاسة بيه غايجيها...ماشافتش حتى العنوان ديالو...بقات غير كتشوف..تسمع صوت ميساج هزات تيليفون لقاتها صفاء الي رسلات ليها صورة ودخلات تشوف لقاتها مصورة حدا واحد الجناح ديال الرضع الي عاد زايدين واوديو"
صفاء : ويااااااخلااااشي انا على الغوووز...عرفتي على صدفة هاد الليلة تزادو فيها غير البنات هههه...ديت غير شي تحاليل لجينيكو الي هنا ودزت من حداهم وانا نصورهم قلت والله تانرسلهم لصاحيبة...
فرح : زوييينين ههههه....
صفاء : عالله تكوني حاملة هههه وتجيبي لينا بنوتة تكون ليمونية وعينيها خضورية نسيبي...ولا شي حرش كرد...
فرح"جمعات الضحكة وهي تبدل ليها الموضوع" : عندك الليل !
صفاء : ااا ؟ "حسات بيها قمعتها" اه ستة غانخرج...
فرح : يلاه شوية هذا باش جينا من عند فوزي...
صفاء : يلاه دويت معاه فالواتساب بلوكاني ولد الهم...
فرح : علاش !؟
صفاء : صونيت ليه وهو كيتفرج فواحد اللقطة فالفيلم...رسليا اوديو عرعر عليا وسب ليا الملة وطاسيلة حق ربي لا حسيت بدفالو وصل لعندي....
فرح : ويقطع عليك ؟
صفاء : اباااينة كان كيكفت عليها وقطعت عليه اللحظة...
فرح : ههههه الله يمسخك الباسلة هههههه...
صفاء : املي ضحكتي احبي عنديش مشكيل يبلوكيني تا سيمو...اااححح لا الا سيمو را تانتازم فاش تالقى صورتو ولات بيضة...
فرح"بقات كتهضر معاها مرة تضحك مرة تعطل صفاء عاد تجاوب ترجع تفرج فالفيلم...وترجع دخل لتيليفون حتى صونا ليها زين الدين وهي تجاوب بالخف فحال تقولي كانت كتسناه يعيط ليها يخفف عليها..." : وصلتي...
زين الدين"راكب فسانسور طالع" : وصلت الفرحة ديال راجلها...شنو كديري ؟!مزال مناوياش تنعسي...
فرح : مافياش نعاس...
زين الدين : حاولي فرح حاولي...وجهك مارتاحيتش ليه فاش خرجت من البيرو ديال رضوان..."تحل المصعد نيشان على حنان خاشية ايديها فجياب المونطو دايرة قب على راسها ضاير بيه ريش...كتلعب بفمها حتى تحل المصعد نيشاان على حب حيااتها...ماشافش كااع واش هي حيث كان حادر راسو وكيهضر"
فرح"تنهدات" : يمكن حيث بقيت وحدي جاتني دنيا خاوية وباااردة وتخلعت...
زين الدين"خلاه كتقوليه سلام وزاد ماسمعهاش" : نتي مازال عندك خوف من بنادم...ترتاحي لا كنتي وحدك وخا ماشي مزيان تبقاي ديما وحدك...
فرح : ماعرفت"بدلات الموضوع كيف ديما"غذا ماتعطلش ياك ؟
زين الدين : ماگلتيش ليا شنو كاين"دخل البيرو وبقى واقف كيهضر معاها" توحشتي نعطي لملتك شي ضربات يعجبوك !!
فرح"تزنگو ليها حناكها تا حطات ايدها على فمها" : باااسل...
زين الدين"خرج عينيه وجهد صوته" : نعااام !!
فرح : واصافي سكت من ديك الهضرة عافاك"قلبها كيضرببب"
زين الدين : درتي شنو وصيتك ؟
فرح : اش ؟
زين الدين : فرح !!
فرح : احم بومادا اه درتها وخا مابقى كيضرني والو وليت لباس..
زين الدين : هي نتيسرو فاش نجي...
فرح"خرجاات عينيها" : والله حتى نقطع...
زين الدين : نقطع لملتك رجليييييك...
فرح"حكات جبهتها بتوثر...كيفقصها كان مسكينة يحساب ليها الى تزوجو غاتبقى تسمع غير الكلام الخاتر صااافي هو باش تحمل يمكن..." : ففف..غذا باش نمشي عند ي يونس...
زين الدين"جهد صوته" : كيفاااش يونس !!؟"خنزر" كتعرفيه مزيان اشريفة ولا شنو ؟
فرح"خلعها" : ا لا بروف ي ونس...دكتور العلوي...
زين الدين : هذا علاش ؟ "كان يحساب ليه دايرة ليه مفاجئة ولا شي حاجة حيث الي سمع اصرارها غايقول مفاجآه بشي حاجة..."
فرح"حبست ضحكة" : واش يحساب ليك غاندير ؟!
زين الدين : دارت ليا..."غمض عينيه عاض على سنانو كاتم فقصتو وعصبيتو بذكرها لاسم يونس حاااف" فرح تباتي فراحة الله...
فرح"حسات بيه تقلق" : مالك ازين الدين...
زين الدين"دوز على لحيتو " : ما ماليش...نسالي ونعاود نهضر معاك..."حط التيليفون قدامو وحيد القبية" حسن ليا رتاحي ونعسي...صباح نكون حداك ان شاء الله...
قطع معاها معصب وهي قطعات معاه وكضحك قدر انه يضحكها بدون قصد منو نساااها فالخنقة...
كيف العادة راه خدمتو كيديرها وعمليتو دوزها...كمل ووصل الوقت باش يخرج من الكلينيك...تلاقا بعلي عاد جاي مع العشرة ديال صباح داخل سلم عليه وتافقو على بعض الاشغال...وكل مشى فين غادي....مسافة الطريييق لقاتو دخل لدارو باش يرتاح وسط حبابو الي ملخصين ففرح الي هي ولات كلشي بالنسبة ليه...فيها الام الاب الاخت الزوجة الحبيبة...كل ماعندو وكيف كيسميها ديما الغالية ديالي...دخل لقى توبا شادة ف ضحى الي حيدات جبيرة كتمشى بباندة وخا مزال كتعرج...
زين الدين"باس لضحى راسها وكذلك توبا..جاااي مييييت بالعيا ونعاس" : شوية نتي !؟
ضحى : الحمد لله...حسن من قبل...
زين الدين"نطق موجه هضرتو لعمتو" : ساليتي شنو عطيتك ؟
توبا : درتهم اولدي...ومشيت عند طبيب نيت فالكلينيك قاليا كلشي مزيان غير دوا طونسيون بدلو ليا...
زين الدين"حرك راسو" : مزيان...
ضحى : فرح راها فالكوزينة...
زين الدين"حرك راسو بثقل...خلاها ومشى حدا الكوزينة حدر راسو وعيط باسمها بداك الصوت الخشن خلا توريا تقفز" فرح تبعيني لفوق...
فرح"قفزها" : ها ! واخا..."ضارت عند خديجة" خالتي صافي غير هادو والباقي فالعشية عليا انا...
خديجة : كوني هانية بنتي...
خلاتها وطلعات تبعاتو دخلات عليه لقاتو كيحط فاللوازم ديالو...مع ضار طار لعندها جرها بجهد زدحها معاه حتى شهقت...قبل ماتهضر تلاح على شفايفها بقبلة قوييييية ماخلات ليها حتى فين تاخذ الانفاس باش تستعد ليها...قبلة حساات بيها جد عنيييي..فة...ما طلقها حتى جر ليها فمها بعضة غوتات على اثرها خلاتو كينهج وعاقد حجبانو مخنزززر فيها...
فرح : اييي.."كتقيص ففمها وتقلب" حرام عليك...
زين الدين"حيد ليها ايدها وهاد المرة عوج راسو وحناه حساب ليها غايبوسها يقصحها لكن كانت المفاجئة انه هاد المرة القبلة هااااادية حنيييييييييييييييينة كانه كيقوليها توحشتك...كان القبلة الاولى عتاااب لشي حاجة برد فيها جنونو...وثانية قبلة حب...ماحتال تستوعب حتى نساااها وغمضااات عينيها ومشااات معاه...كيبوووس ومتنغم بمذااق شفايفها...ماكمل البوسة حتى حس براسو غاايزند بزاااف عليها وهو يتراجع وفصل القبلة وقبل ماتحل عينيها طلع لجبهتها وباسها وبقى مقربها ليه..." : شنو كنتي كديري ؟!
فرح"بصوت مقجوج بالبوسة" : كنوجد فالغذا...
زين الدين : ونتي تبقاي غير فهاد الكوزينة وتوجاد الي فيها...
فرح : واشنو ندير...
زين الدين : شغلي راسك بما حسن..."تشجع وسولها" تبغي تجي معايا لكلينيك ؟!
فرح"قليها ضررررببب حتى نشف ليها ريقها" : ل لا لا ماببغيتش لا...
زين الدين : علاش ؟! مابغيتيش تكوني حدا راجلك تعاونيه ؟
فرح.: ضومين ديالي ماشي ديالك...
زين الدين : la même chose فرح...
فرح.: غير خليني هنا عافاك...احم...واش غانمشيو عند الطبيب !؟
زين الدين"حدر راسو ومسد عينيه" : سي نمشيو دابا..عطيني وقت ندوش ونمشيو...
فرح : ولكن حتى ترتاح ازين الدين شوف وجهك عياان بزاااف ....
زين الدين : ماعليش حتى نرجع ونرتاح مزيان....وجدي راسك"باسها فحنكها وطبطب عليها وزاد دخل لدوش...خلاها كتشوف فالاخير جبدات ماتلبس ماحتال يخرج لقاها لبساات وحطات ليه مايلبس...غير خرج نشف راسو وحالتو ولبسهم...
خرجو من الفيلا وشدو طريق البروف يونس...كيف العادة غير وصلو لامام المقر ديال العيادة طلعو فالمصعد ولقاوه كيتسناهم عند الباب"
يونس : سي البغدادي هذا !! عاش من شافك اصحبي.."تسالم معاه..وشاف ففرح باحترام" بنتي فرح هاد المرة صافا !؟
فرح"حركات راسها" : الحمد لله...
يونس"شير لداخل" : تفضلي مرحبا...
هزات النفس وتابطات دراع زين الدين وهي تدخل وطبعا بطلب منها مابغاتش تبعد من زين الدين...جلسات فالفوطوي مقابلة ل يونس وزين الدين جالس لهيه كيشوف وحاضي معاها وفنفس الوقت كيفكر فقراراتو....
يونس : هاد المرة المجية برغبة منك كنشوف هههه
فرح"تبسمات شوي" : علاش ديك المرة جيت بزز مني !؟...
يونس"ضحك" : هههه...الي كيجي عندي كيجي بخاطرو..."شاف الملف عندو..كيقرا تقارير زين الدين الي كيرسل ليه..حنحن من بعد ما سد الملف..دار نضاضرو وشاف فيها"غاديا مزيان !!؟
فرح"حركات راسها" : شوية...
يونس : غبتي بزااف على باش تجي الحصة ديالك...
فرح : كانو عندي ضروف...احم..خ و خويا دار كسيدة...
يونس : ياك ماوقع ليه باس !؟
فرح"حكات قرفادتها بتوثر وحركات راسها ب لا" : تهرس فرجلو وتقصح فصدرو شوية...
يونس : الحمد لله على سلامتو...ماوقعش ماكثر !!!
زين الدين"حاااضي معاها"
فرح : الحمد لله موقعش ليه ما كثر...ولا ما كنتش غانصبر...
يونس : علاش !! حاسة بالذنب من جيهتو ؟!"حركات ليه راسها وعينيها فلارض" تصفى خاطرك من جيهتو !!!...
فرح : عمر خاطري ما تخلوض من جيهتو...
يونس : ماعمرك ذكرتيه ليا...ماكتبغيش تجبديه فاش سولتك واش عندك خوتك....
فرح : مكانتش الوقت مناسبة نذكرو ليك...
يونس : دابا وقت مناسب ؟!
فرح : ماعرفتش..
يونس : كنعرف الي مابغيتش نجبدو كيكون واصلني وضرني بشي حاجة...طبعا هادشي على حسب طبع الشخص وكيفاش كيتصرف...
فرح : ماعمرو ضرني ما وصلني بوالو...غير انا ماكنتش كنبغي نهضر فشي حاجة كنحس مزاال عليها الحال....
يونس : خوك الكبير ؟
فرح : انا وراه...
يونس : سميتو !؟
فرح : فوزي....
يونس"هزات فيه عينيها...وهو يحدر عينيه وعاود حل الملف من جديد بقى شحااااال ساكت حتى هز عينيه وشاف فيها" : و عصام !؟
فرح"هزات فيه عينيها ونطقات ببروووودة تاااامة هزات كتافها" : ماكنعرفوش...شكون هذا ؟
جوابها ربما كان قاصح...وربما كان متوقع او عادي بالنسبة لحالتها لا النفسية ولا الطبع الي عندها بحكم هي شخص عندها طبع الي غلط معاها كتسد عليه...زين الدين بمجرد ما سمع جوابها تكوانسا تا خرج عينيه مكااانش متوقع هاد الاجابة تكون بهاد البرووود باش نطقات...شي ثواني معدودة وهو مكوانسي كان الزمان توقع عندو...ملي وعى حس بالقلب عندو خفق بشدة لانه مكااانش ولا عمرو باغي توضل مع خوتها لهاد المواصل وعصااااام الي رابها تربية خلات زين الدين يعشقها بيها كاول صفة...ماحملش مابغاش ابدا مابغى هادشي ومابغاااش يسمع منها هاد الجواااب الي حس بخاطرو مرررررض وتزير عليه...
يونس"مادار حتى ردة فعل..جمع ايديه وتكى ذقنو عليهم...كيشوووف فيها وهي شافت فيه ملي عطاتو الجواب ورجعات هبطات عينيها...ماهضر ماتكلم بقى بنفس الوضعية...والصمت سيد الموقف....يمكن عطاها استراحة تراجع جوابها واستراحة لزين الدين يستوعب لانه قشعو كيفاش تبدل ليه لون ديال وجهو وبانت عليه تزييرة...شي خمسة دقايق والصمت حاااضر..حتى نطق" : دااكوغ..."حيد ايدو وهز ستيلو كيقيد..ورجع ثاني سولها" ماعمرك جربتي تعطي لراسك تحدي جديد ؟ فحال تحدي ديال مجيتك لهنا برغبة منك..لانه لاحظت بالي فرق كبييير بين كيف كنتي قبل ودابا...تغيير للاحسن...باغية تكملي فهاد تغييير وتكملي حياتك للافضل !!
فرح"حركات راسها" : كنحاول نتعرف على ناس جديدة ونرجع نكون اجتماعية...ولكن نبعد من شي حاجة تقدر تجيب ليا صداع.."كتحك فضباع ايديها بتوثر" بديت حياتي من جديد..كنحاول نحيد اي حاجة تبكيني وخا مكنقظرش نتحكم فالبكى...حيث وخا نبكي نبكي حتى حد مغايفهمني...حتى حد مغايعطيني العذر انني بصح عيييييييت من نهار حليت عيني وانا البنت الي كانت غادي تلاح لزنقة !!
يونس : وماترميتيش فزنقة ؟
فرح : كان ممكن...
يونس : ماوقعاتش اذن حاجة مزيانة...علاش كتقلبي على النص الثاني من الكاس..علاش كتفكري فالسلبيات بزااف...مادام عطيتي فرصة لحياتك تفكري فالافضل وتبعدي من الي يضرك اذن خاصك تحيدي حتى تفكير السلبي وتعاوني راسك...
فرح : مكنبغيش نفكر فالسلبيات ولكن هما كيفكروني فيها...
يونس : شكون هما ؟
فرح"سكتات كتنهج وعينيها فلارض بدات تحك فشفايفها" : من نهار خليت عيني وانا الحرامية بنت لحرام...
يونس : من عندمن سمعتي هاد الهضرة...
فرح : من عند الي گالو عليه والدني...ولفت من عندو ولفت حيث عارفة راسي هو غير والدني..."هزات فيه عينيها تا نزلو دموعها يجريييييييو" ولكن علااااش ؟؟...
يونس"جمع حجبانو" : كيفاش علاش ؟
فرح"تا حلت فمها بغات تقوليه شي حاجة وهي ترجع حدرت راسها وتنهداات بشهقة تا تگعد زين الدين حاضيها.." : بغيت نمشي براكة عليا"هزات ايدها حطاتها على صدرها كتحك وتعاود فحال حاسة بشي جمرة كبيييييييرة محطوطة ليها تما والمطارق كيضربو ليها فصدرها.."
يونس : ماتغيبيش بزاف الحصة الماجية...
حركات راسها كحز ليها باكية المشاور خذات منها واحد وناضت كتمسح عينيها حتى حسات بزين الدين واقف بجنبها عنقها....
يونس"شاف فزين الدين" : محتاج تجي عندي غذا فالصباح الى كنتي مسالي...
زين الدين : نحاول"شاف فيه يونس واكد ليه بعينيه بمعنى را ضروري تجي عندي.."
هبطو من عندو كل واحد واش كيفكر...تفكر فرح حتى تعيا ماتوصلش لتفكييير زين الدين...دخل فشكل وخرج فشكل اااخور...مالقى ميقول وماعندو مايزيد...كيحس براسو هادشي زاااد بزاااف وخاصو يتعالج مابغاهاش تبقى غير مكونة وحدها مبعدة على بنادم بزاااف وخا راها ولات احسن بزاااااف من قبل...لكن الي باقي فيها كايحس بيه انه عندو علاقة ومترابط مع عصاااام "عصااام" هو الحل الوحييييد باش فرح ترجع كيف كانت ويمكن احسن...وكل مكيطوال هادشي كيكون على يقييييين انه خاص يحط حد كيما كان...هادشي كااامل وهو ساااهي وكيفكر فيه طول الطريق حتى حطات ايدها على دراعو فيقاتو من شرودو...
فرح : مالك !!
زين الدين"شاف فيها ورجع شاف فالطريق عاقد حجبانو وحالتو بااااينة مازمة بجهد.." : ماماليش ...
فرح : كاتبان ليا ماشي هو هذاك...واش مقلق مني !؟
زين الدين"غمض عينيه بتعب هز ليها ايدها حطها على فمو كيبوس يبوس بوسات متتالية وحطها مكمش فيها فوق فخدو..حنحن" : عياان شوية...
فرح : راك مانعستيش من الخدمة لهنا...يومين ونتا مناعسش بالسيف ..
زين الدين : ماشي مشكيل نوصل ونرتاح...
فرح : واخا"ما كثرش الهضرة كلام قليييل والقلب عااامر والعقل مخربق ومرييييض...مابقاش هضر زاد كسيرا ومسافة طريق حتى كانو فالدرا كيف دخل طلع نيشان البيت...العيااا وقلة النوم والقلق والخاطر مرض بجهههد...."...
غير حط راسو على المخدة ماسمعش تا شنو قالت ليه كيسمع صوتها بعيييييييييييد ...الضبابة لعبااات عليه وغشات ليه عينيه حتى مابقاش عقل على راسو شنو وقع وشنو طرا....
بداو عينيه كيتحلو ويتسدو...كيحس بايدو مشدودة وشي حد عند راسو واقف والهضرة...
فرح"كترعد..قابطة ليه ايدو دگات ليه الشوكة تا خرج الد.م كتبغي تديرها ف لاباراي وكتمشي ليها لهيه" : مم مبغاتش تدخل...
ضحى : عطيني انا نعبر ليه راني كنت كنعبر ليه فاش كان كيجي لهنا من دبي...
فرح"مدات ليها تعبر" : هاهي عاقاك دغيا اضحى اهرى...
زين الدين"باغي مسكين ينطق وكيحس براسو ثقييييل..حدو كمش لفرح على ايدها تا هزات فيه عينيها"
فرح : زين الدين كتسمعني...
ضحى"كتعبر" : مغايجاوبكش حتى نعطيوه شي حاجة...
فرح" شادة ليه ايدو وعينيها عليه.."
ضحى : نازل "وراتها العبار"
فرح"ناضت بزربة مشات لمجر جبدات منو ساشية ديال سكر دارتها ليه فكانيط كوكا الي تبعتها ليها توريا خلطتها بديك الرعدة الي فايدها تكب نصها...دارت فيها الباي ودراتها ليه ففمو" : زين الدين شرب من هادي عافاك...
حرك فمو حتى بان ليها بدا كيمص ويرتاح يمص ويرتاح...ضحى واقفة عند راسو مسكينة شادة تحت كرشها وكتشوف نسات راسها بقات واقفة وحاضية معاه وفنفس الوقت حاضية خوف فرح الشديييد كيفاش كترعد وتقفقف وهي كتشوفو طايح...كيفاش غوتااات بحر جهدها حتى سمعتها وخرجات تشوف مالها...كيفاش مشات كتجري تجبد الكليكوميتخ تعبر ليه...هادشي شوية من بزاف يخيليها تاكد ان فرح لزين الدين وان زين الدين مكملاه فرح...مارتاحت حتى حل عينيه ونطق...
زين الدين"بصوت عياان" : مزياان مزيان. دابا...
فرح : عاود زيدك شوية عافاك حتى يطلع را طايح بزاف..."رجع دار ليها خاطرها زادو شوية وهو يوقف ايدو بمعنى براكة.."
ضحى"حطات ايدها على كتفو" : شوية دابا ؟!
زين الدين"حرك راسو وحط ايدو فوق ايدها طبطب عليها"
ضحى"عطاتها الكليكوميتخ" : عاودي عبري ليه تا تاكدي واش تقاد ليه...
شافت انه خاصها تخليهم وحدهم...استاذنات منهم ومشات بشويا عليها كتعرج تا ناضت فرح عاونتها خرجات من البيت ورجعات سدات الباب ومشات لعندو...عاودت عبرت ليه من جديد لقاتو تقاد...جمعات داكشي نقاات دنيا وجات جلسات حداه...
فرح : شوية !؟
زين الدين"هز ايدو دوز على وجهو ولحيتو بتعب ورجع حطها على جبهتو مغمض عينيه..ماباغيش يهضر...باغي يرتااااح يرتاااح بمعنى الكلمة لانه بصح عيااا وجهدو تقادا انه يزيد يتحمل...محتاج يرتااااح ويقاد الامور...هز ليها ايدها وباسها" : محتاج نرتاح شوية...
فرح : رتاح هاني معاك...
زين الدين : ماتبرزطيش معايا فرح...مولف ونتي خاصك تكوني ولفتي عليا...عادي يرجع يتقاد وهاني مزيان...
فرح : مانقدرش نخليك"قالتها بحزن"
زين الدين : مزيااان افرح مزيااان..."جر عليه الغطا" سمعي مني فرح الله يرضي عليك...ماديريش بالك معايا...
فرح"حدرات راسها وهي تنوض" : وخا خليك رتاح..."حرك ليها راسو وهي دور وتمات غاديا حلات الباب باش تخرج رجعات ضارت عندو لقاتو باقي متكي بنفس الوضعية...تنهدات ورجعات خرجاات من البيت..."
اما هو كيف سمع الباب تسد بقى مدة وهو متكي حس بالكااالم فالبيت ولكن العقل والكالم كثييييير فيه الضجيج والغضب والحزن...شي ساعة وهو ناااعس حتى حل عينيه وضار جيهة طابل دونوي...رسل ليها ميساج طمنها عليه باش ماطلعش عندو ودوز الخط نيشان ليونس...
زين الدين : شنو بان ليك ؟!
يونس : الحالة صعيبة...صعييبة بزاف...
زين الدين : الحل ؟
يونس : الحل هو الصباح تجي عندي ولا اقرب وقت تكون مسالي فيه...باش نعلمك بالتيليفون ماغاديش نوصل معاك لوالو...
زين الدين : شنو المعنى من هضرتك ؟
يونس : مزال ماهضرتش معاك نتا براسك...مزال ماعارفش الحكاية الكاملة...كيفاش وقع وشنو طرا...نتا شنو حسيتي وشنو كتفكر...محتاج جلسة معاك باش نعرف شنو كاااين...بغيت نشوف وجهة نظرك نتا...بغيت نعرف الحكاية من منظورك...
زين الدين : اليوم بالليل ؟
يونس : سي ميو...
زين الدين : تكون فالكافي ديالنا ؟
يونس : وعليه..."قطع معاه حط التيليفون عند راسو ورجع تكى حتى غفات بيه عينو ونعس"
حطات فوق الطابلة وسط الصالون الي كانت مزينة ببعض المأكولات اللذيذة من تحضير ايديها...وقفات كتشوف فداكشي حتى سمعات صوت الحسين جاي هو ومراد ووليد كيطنزو عليه ويضحكو...قادت حوايجها وتاكدات انها مستورة وهي دور لعندهم ...
فرح"باست ايد الحسين" : مرحبا با الحسين...فرحتيني فاش جيتي...
الحسين : الله يرضي عليك..ونجي بنتي مالي الي منجي هههه وهذا نهار عمرنا حضرنا ليه علاش منجيوش...
فرح"تبسمات وهي تشوف فوليد" : مرحبا بيك خويا وليد...
وليد : ترحب بيك جنة مرت خويا..."شاف جيهة طابلة" : تا را زردة اصحبي"
مراد : كانت كطرا مرة فخمس سنين وفهاد الفيلا عمرها وقعات يمكن...مباركة مسعودة هاد ختي فرح...
فرح : هههه ياك...دخلو انا نمشي نشوف ضحى هي وخالتي توبا...
مراد : واحد زين الدين !!
فرح"غاديا وكتهضر" : ناعس غانمشي نشوفو الى يفيق وينزل..."حركو ليها راسهم ودخلو وهي تمات طالعة تا لقات ضحى هابطة هي وتوبا تبسمات ليهم هضرات معاهم وطلعات البيت يلاه بغات تحلو تا تحل الباب وهو يخرج" زين الدين...
زين الدين : نعاام...
فرح : شوية دابا ؟!"عينيها مغرغرين بالخوف عليه"
زين الدين"سكت كيشوف فيها شحال قبل مايقربها ليه ويبوس ليها جبهتها...وينزل لشفايفها بقبلة خفيييفة هزات ليها قلبها ونشىرات ليها الفراشات فكرشها...وزادتها خجل" : عندي الفرحة ديالي ومانوليش شوية ؟..
فرح : احم...غاتنزل ؛؟!
زين الدين"كيسمع ضحك والهضرة" : كاين شي حد لتحت ؟!
فرح : حتى تنزل..
زين الدين : ياك بعدا..."مالقى مايقول عنقها من كتافها جنبو ونزلو لتحت غير دخل بان ليه الحسين ومراد ووليد وضحى وتوبا مجموعين وطابلة عامرة مافهم والو" شي باس مكاين ؟!
الحسين"هز ايدو وحطها" : هذا كيجري علينا بالفن يضهر ليا...
مراد : ههههههه انا فدارنا ا با الحسين...
وليد : ها لاخور جرا عليك تاهو...
فرح : اويلي زين الدين !! " تسمع صوت السرسار"
فرح : تسنى هاني جايا...
زين الدين"طلق منها ووقف كيسوف فيها غاديا حتى لباب حلاتو تا سمع هضرة علي داخل حتى وقف عليهم"
علي : واحد سلاام عليكم...
زين الدين : عليكم سلام...
فرح"دخل علي وجلس حداهم وهي تشوف فيه لقاتو باقي واقف كيحاول يفهم.." : دخل جلس
علي : واش مناويش دخل ؟ "ضار عند الدراري والحسين وتوبا وضحى" زيدو بسم الله دار داركم...
وليد : لا تحشموش مرحبا بيكم...
فرح : ههههههههه...
زين الدين"ربع ايديه حاضيهم كيتقاسمو الماكلة زيد علي الحسين يكب اتاي وعطا لوليد يكب العصير...حتى حس بايدها تحطات على دراعو وضار عندها"
فرح : اجي بغيت نهضر معاك..."حرك ليها راسو وخرجو من الصالون باش تهضر براحتها معاه وماتحشمش منهم"
زين الدين : شنو واقع !!!
فرح : انا الي طلبت مراد يعيط ليهم الي كان مسالي يجي...كنت بغيت نعيط ل با ولكن گاليا مع فوزي مايقدرش يجي..."ضارت جيهة الصالون ورجعات شافت فيه وحركات ليه راسها جيهتهم" جاو على قبلك...على قبل يفرحو معاك بهاد النهار ديالك..."كمش حجبانو" ويفرحو معايا حيث انا فرحااانا فرحانا بزااااف"عينيها غرغرو" درت شي حاجة بوحدي وجمعتهم على قبلك باش حتى نتا تفرح وخا بغيتك تكون مرتاح فنهارك حتى مرضتي قبيلة"مسحات عينيها ورجعات شافت فيه" وليتي كبييير هههه...عيد ميلاد سعيد...
نسى هو انه هاد اليوم هو عيد المولد ديالو...يمكن نساه او يمكن كااع ماكيديها فيه ولا انشغالاتو مكتخليهش يحتافل بيه او او...هي كانت بادرة زوييينة منها وبحب وجدات ليه مأكولات شهية على ايديها كلشي صايباتو على ايديها يومين وهي كتوجد وتخبي فالثلاجة باش تقدر توجد ديك الكمية الي كانت محطوطة بالتاويل وكتشهي..
زين الدين : باش عرفتيه !!
فرح : تشك منعرفوش ؟
زين الدين"عض شنايفو تا ضار لهيه دوز على وجهو بايديه قبل مايقرب ليها ويبوس راسها بحب وشكر وحنية وعشقققق.." : لهلا يخطيك عليا...
فرح : يلاه ندخلو مانخليوهمش وحدهم...
حرك راسو عاود باسها فراسها ودخلو لصالون مع دخلو كلشي بارك ليه وخا ماعندوش مع هادشي ولكن غير انها كلفات على راسها ووجدات ليه مايعطيهش خاطرو يكسر ليها فرحتها وهي كتفرحو الفرحة ديالو...جلس حدا الحسين وهي جلسات حدا ضحى هاد الاخيرة الي كانت كضحك مع دراري حاسة بدفئ موووجود هاد المرة...حاسة بالعائلة وقيمتها...قلبها مرتاااح فرحااان اول مرة تجرب تقارب العائلي واللمة...واول مرة زين الدين يشوف ضحكتها بهاد شكل فرق كبيييير بينها وبين الماضي...
زين الدين"لاحظ فالاكل انه مكااينش ابدا حلوة لاكريم كاين غير المملحات وشي حليوات الى بغاوهم لاخرين...قرب ليه علي"
علي : مكايناش حلوة لاكريم اصحبي...مضامنين معاك زعما !!
زين الدين : شنو بان ليك ؟
علي : كي والو. ملي مداروش طاغط كبييرة"شاف ففرح" وابنتي فرح علاش مدرتيش طاغط عيد ميلاد ؟ زين الدين ميقدرش ياكلها ايوى وحنا ؟!
فرح"شافت فزين الدين الي حرك ليها حجبانو بمعنى جاوبيه" : حيث عيد ميلادو هو مايمكنش نديرها ليه..هادشي كافي وموفي اعمي...وحضوركم ليه وجمعتكم معانا هو الحلوة...
علي : وا ديريها وديري صورتي انا ومراد ووليد والحسين...
فرح : ههههه صافي المرة الجايا نديرها على قبلكم..احم"حكات جبهتها بتوثر وخجل لانه ماحيلتها لكشي كيسمع ليها ووثرها ماحيلتها لزين الدين الي منزلش عينيه عليها وديك الشوفة الي كان كيدير ليها فشكل..."
علي : ماقلتي عيب...قنعتيني...
رجعو كيضحكو وياكلو ناضت وجدات ليه طبسيل ديالو جمعت ليه فيه شنو عارفة كياكل وغاياكلو...حتى وقفات عليه حطاتو ليه قدامو وعطاتو كاس اتاي مسوس...
زين الدين : لهلا يخطيك عليا..."غمض عينيه وحلهم بشكل وحب وامتنان...تبسمات ليه وحناكها مزنگين ورجعات جلسات حدا ضحى باش تفادا شوفاتو ليها تدهات مع ضحى فالهضرة. وتوبا الي كترمي كلمة مرة مرة...اما هو سمى الله وبدا ياكل بشوي وخا فرحاتو بهاد الجيست لكن الي فقلبو را فقلبو والي فخاطرو را صعيييييب انك ترجمو...كياكل دغمة ويبقى شااارد الذهن حتى نغزو الحسين...
الحسين : وجهك معاجبني ازين الدين...شي باس مكاين ؟
زين الدين"تنهد كيفكر حتى جمع حجبانو" : خاطري مكسح ابا..
الحسين : باغي تشاور ولا تخوي همك ؟
زين الدين : بجوج...
الحسين"طبطب عليه" : دير ودوز عندي باش ماكان...
زين الدين : ان شاء الله...
رجع كياكل ومرة مرة كيهز عينيه لفرح كيشوف فيها كيفاش كتهضر مع ضحى وتضحك...وجهها كيبان فرحان ولكن عينيها !! علاش كيبقى يشوف فعينيها كيلقى اللمعة فيهم...لمعة الحزن كيحس بيها نااااقصة وخا تفرح تاتعيا وخا تنازل وخا تناسى وتلهي راسها...غير كتبغي دور تشوف فيه كيدور راسو ويجمع مع الحسين ولا واحد فالدراري...العشية كاملة وهما مجموعين ضاحكين ختى وصل الوقت وناض كل واحد فيهم استاذن ماقدروش يجيبو ليه الكادو حيث عارفينو معندوش مع هادشي..
توبا : انا غادي نطلع نصلي العشا ضحى تبقاي هنا ؟!
ضحى"شافت فرح ناضت بغات تجمع" : انا مع فرح غير سيري"حركات راسها وخرجات طلعات لفوق...وبقات فرح وضحى الي ناضت بغات تعاونها"
فرح : لا غير سيري رتاحي دغيا غانجمع هادشي...
ضحى : غيير خليني نعاونك وهاد الماعن ديريهم فالماشين حسن...
فرح : داكشي الي غاندير...لا غير جلسي ماديري معايا والو راكي باقي كتعرجي برجلك وضاراك الفتحة..من بعد اضحى.."تسمع صوته عند الباب"
زين الدين : ضحى عطي راحة لراسك شوية...
ضحى : ولكن تجمع غير هي راسها ؟!
زين الدين"قرب حدا فرح وجرها عنقها قدامها تا خرجت عينيها" : هاني معاها...
ضحكات ضحى وهي تحرك ليه راسها بتفهم..مشات وخلاتهم بزوج عاونها تا جمعات دنيا ودات داكشي لكوزينة بقى معاها تا دارت الماعن فالماشين...غير خدمتها ومسحات الكوزينة...
زين الدين"شاف تيليفونو وخشاه فجيبو" : ماخاصك والو ؟
فرح : علاش خارج ؟ ولكن ازين الدين راك باقي عيان فين غادي !!
زين الدين : عندي منقضي فرح...ما عيان والو مولف هادشي.."باسها فشفايفها...وضار خرج...ركب فالطوموبيل وكسيرا نيشان لكافي فين داير مع يونس لقاه كيتسناه شاد قهوة معصرة وكيقرا فواحد نوت عندو سلم عليه وجلس هضرو شوية حتى فتحو الحديث الجدي"
يونس : ايوى سيدي joyeux anniversaire الشارف...
زين الدين"ساط دخان الكارو وعينيه على البحر...ماجاوبوش"
يونس : ماعندك سوق ولا ماشي لخاطرك !!!
زين الدين"ضار شاف فيه ونطق بجدية" : خاطري مرض ايونس...هادشي حفر ليا هنا"شير لقلبو" من جيهتها وعليها...حالتها ماعجبتنيش..هضرتها مرضتني "سرح ايديه وخرج عينيه" شنو ندير ايونس ؟؟؟!
يونس : نحاولو ونحاولو...
زين الدين : الى طول هادشي را غايبرد والى كان الرجوع ماشي كيف قبل... شنو الحل...
كيهضر وحالتو كتبان عليه انه مرض من جيهتها..كل مرة كيبغي يدير معاها شي حاجة حاجز الذنب كيوقف ليه فطريقو...ماجاوبوش يونس خلاه يتكوانا وحدو واحد الشوية...كما ازيد من ثلاث سيجارات حتى بغا يمشي لرابعة وهو يوقفو يونس حيد ليه الباكية وجرها...
يونس : يكمل عليك مغاديش يكالميك...
زين الدين"الصمت"
يونس : معامن بدا المشكيل فاللول ؟!
زين الدين : معاها هي !!
يونس : اصل المشكيل زين الدين...العقدة فين بدات وكيفاش تشكلات !!...تشكلات بالتكتلات...شي فوق شي..شي كستزاد عليه شي حتى كتكون عندنا عقدة صعيييييب تفك...فاش كالقاو العقدة صعيييبة تفك شنو كنديرو !!!
زين الدين : على حسب...لشنو بغيتي توصل...
يونس"هز واحد الكيت جابو معاه وعقدو وعاود عقدو وعاودو عقدو تا تكونات عقدة كبيييرة..." : هنا الى بغيت نفكها كنمشي كل عقدة ونحلها ونتبعها ثانية ثالثة حتى كنوصل لولة كانلقاوها مااتت...شنو خاص باش نحيييها !؟
زين الدين"بقى كيشوووف فالعقدة عينيه مگرونييين عليها كيخمم كيفاش يفكها...عض شنايفو بشواااايا بثقل...هز عينيه ف يونس الي عوج ليه راسو وحط ليه الكيت ورجع هبط عينيه لعقدة...بدا يفهم شنو قصد بدا يفهم بالضبط شنو خاص يدير...والي نفسو فكر فيه شحااااال هادي وكل مرة كيقرر انه خاص يدير هاد الخطوة...والي فيها يااا قاااتل يااا مقتووول...وهادشي غايخلينا نتحرركووو جيهة المستقبل شويا قبل مانرجعو ل فلاش باك كيف وعلاش وكيفاااش...شنو وقع حتى وصل لهنا وشنو الاحتياطاات الي خذا باش يوصل لهاد اليوم والي اقرب من قرييييييييييب....
وقف سيارة بالجنب شاف فساعتو وهز عينيه حتى بان ليه جاي...شاف قدامو وديمارا طوموبيل تحل الباب وجلس دار السانتيغ...ماهضر مادار والو...وجهو مكانش كيبشر بالخير...وباين عليه القلق..اما هو مابغاش يشوف فيه هو بدوره...غير دار سانتيغ وهو يكسيري وانطالق مباشرة شد الطريق والطريق كلها وهو كيحاول يهضر معاه كيسد عليه...
هو : شعل تيليفون طمنها عليك...
كانت الاجابة منو هي "لا" كلمة كاااافية انه يسكت الطرف الي سول ويرجع يشوف قدامو مستسلم وخا مرة كرة كيدور يشوف فيه كيلقاه مركز مع طريق وحجبانو معقوديييييين بجهد ونضرته مكتبشرش بالخير...مسافة الطريق حتى كانو داخلين لمدينة الجديدة...
جبد التيليفون وشعلو بغا يدوز ليه الخط وهي تصوني ليه غمض عينيه مابغاهاش تصوني ليه وتخليه يرجع عن قرارو...لكن ميصيبش يقطع عليها ويزيد يشغل بالها عليه...
فرح : زين الدين...
زين الدين : مالك ؛!
فرح : كنهضر معاك وتيليفونك طافي...باقي موصلتي !؟
زين الدين : مزال فالطريق مزال ليا طريق طويلة ونوصل...الوقت الي وصلت نخلي ليك ميساج...من بعد ونهضر معاك واخا ؟!
فرح : واخا..."قطع معاها ورجع كسيرا حتى وصل لعند واحد رومبوان وهو يدور وخذا اتجاه لالة زهرة السوق الي موصلوش من ديك النهار الي كان معاه فيه الحسين...وهاهو هاد النهار فيه بشخص الي نيتو مخلوضة من جيهتو وقلبو كحل عليه والشمتة خلاتو كيرهو كره العمى....قرااار الي كان مدة طوييييلة وهو كيفكر فيه وها الوقت وصل وخذاه...
زاد بالطوموبيل شوية ووقف بعيد...سكت طوموبيل وبقى فيها لداخل كيشوف قدامو وعقلو سااااهي وكيفكر فشنو الخطوة الي غايدير....ضار شاف فيه ونطق...
علي : زين الدين الى خايف على مرتك بلاش مادير هادشي !! خاطري ماهانيش من هاد المجية...
زين الدين"ضار عندو وباقي بنفس الشوفة المخنزرة" : وامتى الوقت !!؟...على جال مرتي جيت...
علي : حتى لمن بعد...قد ما جلس ينسى...
زين الدين : عمرو ما ينسى..ماحد الوقت مطول ماحد الخاطر يتخلوض والگلب يكحال واللوم يزيد..."شير لراسو" انا الي بديت المشكيل ؟ انا الي نحل المشكيل...سبقوووك وماخلاونيش نهضر ونفك ونشرح....ونوضح الي وقع "شير بايديه لتحت" وهاحنا فين وصلنا...
علي : اش غادي دير راك ما قلتي ليا والو...
زين الدين : باش مابغى خاطرو انا معاه فيه..."بدا يحل صدافي القميجة الفوق...حل باب الطوموبيل وترجل منها خلاه كيشوف وقلبو ففمو عليه...ضار دورة وهز واحد الميكة من الكوف ورك عالبوطون وضار جيهة علي دق عليه الشرجم حل الباب وهبط...هز ديك الميكة فايدو وتم غادي عينيه نيشان على الهدف الي قدامو والي فيه يا قاااتل يا مقتول يا مفاهمين يا باقين شادين فبعضياتهم...ولا توصل مواصل اكفس او تحل...النهار الي ولابد ليه منو...والي فيه يفك هاد العقدة يا يحييها ولا تبقى ميتة ويدوز عليها دهر ودهووور...
كان واقف كيقطع فشي طروفة ديال اللحم ويلوح لميزان يعبر ليه...
عصام : معاد تحرك جيب باكية الميكة من عند سالم...
عماد ؛ واخا خويا دابا"نقز من فوق البوطاجي ومشى...ورجع عصام كيقطع والكارو محطوط مشعول فوق طبسيل كيدور تا يكميه ويشرب من اتاي ويرجع يكمل...حتى حس بشي حد وقف وراه وهو يدور خرج عينيه على جهدهم وقبل مايهزهم ضرب واااااحد مولاتي تخنزيرة تا جناوح منخرو فرفروو...عض سناانو حتى تقرقب ليه الفك ديالو...عقد حجبانو تا تلاقااو وهز عينيه بنضرة مخنزززرة تحولات لجغمة الدم تا بدا ينهج...
زين الدين"مايقلش عليه فالنظرة...باش فايتو هي الثقة انه مابقاش مسوق يفك العقدة وخا غلى حساب حياتو" : الى كان موتي على ايدك يخليك تبرد دير جهدك...وتشوف جيهة ختك "كمل حلان صدافي القميجة تا شرعها بجهد على صدرو وحط حط جنوييي قد السخط فوق الخشبة بجهد " ماتقصرش فحقك من جيهتي...
يتبع...
التعليقات
لا توجد تعليقات بعد، كن أول من يعلق.