ولادة من رحم الفساد الجزء الرابع

بعد ساعات طويييلة ديال الطيران حط رجليه بعد العودة الثانية ..مشا نيشان لبرطما ديالو فاحدى العمارات الشاهقة ف امارة دبي باحدى شوارعها...اول حاجة دارها هي الاستحمااام بالماء الدافئ ...ببنوار لحمام مشا نيشان لناموسية وتكا ماحسش براسو امتا غمض عينيه تا ضرباتو الفيقة فالوقت ديالو فين كيفيق هو الوقت بدون ميدير منبه لتيليفون ...حيد عليه البينوار ومشا لماريو جبد منو قميجة نص كم بيضة وسروال توب كحل لبس حوايجو وهو كيدير فالسمطة لسروال نطق مباشرة لتيليفون ...

زين الدين : call HP center..."صونا ليه نيشان على المساعد ديالو الي جاوبو فالحين علمو باش يطلع المرضى لجناح فين كيدير المعاينة الاولية قبل ميدخل واحد منهم على غرفة العمليات والي كيعاني من تشوهات فالجيهة اليمنى من وجهو جراء ا نفجار وقع ف طهران والي كان سبب باش يمشي زين الدين تال تما عند رأس الحدث بدون خوف باش يدخل مع الطاقم الطبي الي مشا بعثة لتما ...وهي حالة من الحالات الي كيبحث فيهم ويقرا عليهم...ركب فسيراتو chevrolet 4×4 سوداء قاد بيها نيشان لاكبر مصحة علاجية ...بلاصاها لور ودخل من مدخل خاص في مصعد خاص ذهبي اللون وطلع نيشان لجناح داز المكتب ديالو قرا التقارير الي قدامو الجديدة واضطالع على جميع ليزاناليز ديال ديك الحالة ...وناض دخل لواحد الغرفة Champ stérile ( هو منطقة لي تكون بلغطاء ازرق و فوقها معدات و منطقة لي مريض الي كيكون مكلس فيها) لقاهم مجلسينو تما وقدامو واحد الطبيب غيزيدون كيكون مع الجراح محدد ب ماركور وجه المريض حتى جا زين الدين لابس توني (بدلة الجراح زرقاء الي كتكون نص كم وسروالها خاصة و calot الي هي طاقية الخاصة بالطبيب من بعد مالبس sur chausseur الي هو فحال تقاشر بلاستيك طبيين كيتلبو فوق صابو...دار الباڤيط او الكمامة طبية عقدها ...ودخل بكل هيبة وجدية اصلا ملامحو جديين ... غير وصل لعند المريض الي كانو دايرين ليه les charlotte(طاقية طبية ديال المريض) فك الغوباشة باش يشوف فيه ببشاشة وميخلعوش ..طبطب ليه على كتفو وسولو عدة اسئلة باش يرتاح ..."

زين الدين"كيهضر معاه بالمغربية والمترجم حداه كيترجم ليه بالايرانية اي الفارسية " : كلشي مزيان ؟ الصحة عندك مزيانة "كيقرا فتقرير البيلون اي تحاليل الي قبل العملية" Pré op (Pré opératoire) مزيانين..."شاف الخطوط الي رسم الغيزيدون فوجهو عطاه الاوكي بالي مزيان من بعد ماقلبهم وشاف فالمساعد الي كان هندي الاصل ...واقف لابس اللباس الطبي ...تاكد انه قاعة العمليات واجدة وامرهم باش يديوه ليها بينما يوجد هو ...مشا نيشان لواحد الغرفة مخصصة ديال التعقيم ولبس Casaque( هي لبسة لي يلبسها كي يكون فسبيطار و يدخل للغرفة عمليات الي هي نيت بدلة زرقاء دخل تعقم مزيان وهاز ايديه باش مشا لافابو تما غسل ايديه بصابون معقم اكثر من مرة وخوا عليه بيطادين فايديه ودخل هاز ايديه وفرملية كتقاد ليه فاللبسة لقاهم دخلو المريض كيوجدو فيه

زين الدين : les injection et le prélèvement prêt ?(جرعات والحقن واش كلشي واجد)

المساعد : yes doctorكان معاه طبيب مساعد مختص مازال كيقرا فالتخصص ديالو ومعاه مساعد تخذير الي غايكون كل عشرين دقيقة يجي للتحقق والاطمئنان ولكن كيبقى جالس لفوق فين جالسين كيتفرجو بعض الطلبة من زاج الفوق فالجراحة حيث بقعة كاملة معقمة كتبغي التحذير والمراقبة باستمرار ميدخلش ليها تاحد الا للضرورة القسوى ...كاينين بعض الطلبة الي حاضرين منهم الي عندو العام سابع فقرايته فالطب طبيب داخلي interne ...فلداخل معاه ممرضين مختصين فغرف العمليات يعني قاريين هاد تخصص منهم الي كتعطيه لوازم بيطادين او قفازات جديدة او تسمح ليه العرق والي يراقب المريض ..."

زين الدين "مد ايدو " : give me "بسرعة عطاتو اول الاحتياجات باس بدا الجراحة زقبل هذا سما الله وقرا الدعاء وباشر فالعملية تحت مراقبة بروفيسور من فوق فايتو فدرجات وكبر منو فالعمر وشي طلبة كيف سبق الذكر...

كمل العملية من بعد ساعات والي استاعن بالجلد فالرقبة باش عوض ليه الجلد الي تحرق فانتظار الاستجابة ويفيق المريض قبل ...خلاهم يكملو ليه وخرج من الغرفة كيحيد فاللباس لاحو فالسلة ودوز بالبصمة صبعو تحل الباب ومشا نيشان لمكتب ديالو لقا اتصال من تيليفونو من الحسين رسل ليه نمرة بغاها هو من عندوو ....ومعاها ميساج

الحسين : صوني ولدي وتاكد را عندها شلا من رقم ستة معاود شوفش را الشوف على قد الحال "دار ليها كوبي واتاصل نيشان وهو كيشرب فدواه حيث وقت وصل باش ياكل وخاصو يشرب دواء سكري...ويعبر ...

زين الدين "كيصوني بدون ميجاوب تا قطع ورجع عاود حيث قاليه را مكتسمعوش حتى كدير سماعة فوذنها ...فهاد اللحضة كانت فرح جالسة مع صفاء وسيمو نييت فالكوزينة كيتناقشو ويتناگرو ويضحكو...

فرح"شافت تيليفونها" : معرفت ديالمن هاد نمرة ؟

صفاء"طلات" : مطالعاش ...جاوبي معرفتي يكون صحاب الشركة كيعيطو...

فرح : زعما !؟ "شافت فساعة مزال مدوا العصر يعني ممكن جدا يكونو هما وهي تفتح الخط مجاوبتش كتسنى تشوف شكون"

زين الدين"كيحك فعينيه بتعب باقي بلبستو طبية نفخ ب تعب وعياء وجاوب كي تفتح الخط " : راحة بالي ...

صدف بزااااف كتمر فحياتنا منها الي كتكون عادية جدا ومنها الي كتكون غريييبة ...صدف كتبقى مكاتيب كتبها علينا الله مع اشخاص تحطو فطريقنا او مرو فحياتنا...كاين بعض الصدف دازت علينا مع اشخاص مكناش عارفينهم حتى ولاو جزء مهم من حياتنا او جزء فينا ...ممكن تكون ليك صدفة مع شي حد نتا محسيتيش بيه واش تصادفتي معاه حتى كيصدق شخص مهم فحياتك. ..ممكن يصبح صديقك ..خطيبك حبيبك زوجك صديقتك ممكن تصبح جزء من عائلتك....الصدف كنعقلو عليها وصدف كنساوها وهناك صدف مكنردوش ليها البال وغير الله وحدو الي عالم بيها ....

صونا تيليفونها بنمرة خاصة مطالعاش وانما طلعات ب مجهول ...ولان فرح وصفاء دافعين لبزاااف ديال الخدمات هذا غير الكونكورات فضروري يجاوبو على اي نمرة ...

فرح"مع حلات الخط تسنات الاجابة حتى جاوبها صوت بنت اغلب كلامها كان بالفرنسية "

هي : بونسواغ مادموزيل فرح الخيالي ؟

فرح : وييي شكون معايا ؟

هي : بون..معاك RH ديال صوصييتي NBA agricole ..ف لا دموند د عندي دوموند دسطاج ديال la durée 3mois ..

فرح : وي اكزاكتومون ...

سيمو "شاف ف صفاء" : هاهي بدات طنز ...

صفاء : سكت لمك را سطاج الى كملات يشدوها مكاين غا العراضات. فصناكات ...

هي : الوغ الى بوسيبل ندير معاك لونتخوتيان اديسطونص "بدات كتهضر معاها وفرح كتسمع وتجاوب وتم الاتفاق على المقابلة الي كانت عن بعد ...وطبعا هادي كانت المكالمة الي جات لفرح والي بصح كيف قالت صفاء نمرة من ارقام الخدمات الي كانو كيدفعو ليهم ...شنو مضمون المقابلة كان وشنو توصلو...اما المكالمة الي دار زين الدين ف كانت رقم الي تاكد منو باش ميلقاهش غالط وهي انه دخل الرقم فواحد تطبيق وعطاه اسم صاحبه وتاكد انه رقم الي بغا نيت ...وهي زوجة الحسين الي فمقام الام ديالو ...الحسين عطاه نمرتها بشكل العادي العشوائي مرسلهاش ليه نيشان باسمها المسجل فالهاتف حيث هو من النوع الي كيسجل النماري ف مذكرة يدوية صغيرة...

زين الدين"كي تفتح الخط نطق " : راحة بالي ...

لالة ام هاني" (اسمها ام هاني) كتقاد فسماعة وذنها تا سمعات صوته وهي تبسم حيث شحااااال هادي مهضر معاها مدة طويييييلة بزاف شغلاتو مداهي الحياة وتشغل بالخدمة قرايا والمشروع بزز باش كان كيلقى وقت ينعس فيه " : واش هذا صوت ولدي زين الرجال...

زين الدين"ببشاشة وتعب بادي على محياه باغي غير ينعس ويرتاح ولكن كلام الكبار راحة نفس اولا" : شنو بان ليك ؟

ام هاني : واا ماكاين الي يرتاح بالو معايا قدك اوليدي تا علمتيها لدراري ههههه

زين الدين : خرجنا بفايدة ...

ام هاني : كلك فايدة ليهم راك خوهم الكبير...

زين الدين : جاتني شي خبار اميمتي ...فين صحة علاش هضرت معاك ؟

ام هاني : الصحة كتغدر يا حنيني الصحة غدرتني معلماتنيش..

زين الدين : تحاليل الي كتبت ليك شحال هادي علاش مدرتيهمش؟

ام هاني : شغلاتك عليا الوقت ؟

زين الدين"تنهد" : لاش باغا توصلي ...كي شغلتني شغلاتك ؟

ام هاني"ضحكات بصوت امرأة عجوز" : هههه وهانتا عرفتي وفهمتي...بنتي الصغيرة ولدات و عزيز ولدي تخرج ف زاگورة..

زين الدين : وصحتك حطيتيها فجنب وكان تسالي ياك ؟ شنو نجي نديك عندي هنا ؟

ام هاني : ههههه اوليدي راك ديرها وتفوتها...عطيتك العاهد تانديرهم ...وااالو ولدي غير سخانة والبرد عطاني جوابو ...

زين الدين : عطاك الي يكفي و يوفي..."بتحذير" بلااا هضرة ميمتي صباح ماتفطريش وديري شنو وصيتك...

ام هاني : و وليدي يضهر ليا الورقة تجلات ...

زين الدين"بثقااااالة " : نعاود ليك غيرها ...

ام هاني : مانسلك منك ههههه ...واخا ولدي نشاعلاه"ان شاء الله"

زين الدين : شوية اليوم ؟ ب شنو كتحسي مزيان باش نعرف

ام هاني : لا بيخير بيييخير غا العيا وكان صوت مشا ليا شي وقيتات ...

زين الدين : من بعد عطيني عزيز نعطيه شي دوا ياخذو ليك ..تبعيه فالوقت "شاف فتاريخ فساعتو" من هنا لشي يومين وراجع لهيه..نتي لولة نشوف معاك...

ام هاني : دابا ماني بسالكة منك هههه وااخا وليدي..ايوى ونتا صحتك ؟

زين الدين : من الحامدين لربي..

ام هاني : شكون مقابلك ؟

زين الدين : رب العالمين اميمتي ..شكون كان مقابلني هاد الفايت ؟

ام هاني : مافيها شك هو الحامي لينا اجمعين وليني اولدي راك عبد راك انسان والانسان يطير تا يعيا ضعيف قدام الله ...نهار تضعاف شكون يكون معاك ؟ عمتك توبا الله يخليها ليك انا باك الحسين ...وليني خاص الي يكون معاك فالي ماتگد (ماتقد) عليه لا توبا لا انا ...حوايج مكاين الي يديرهم من غير الي تشوف عيبك(عيبك هو عيبك داك عيبك والفاهم يفهم خلاه ياسين) ..

زين الدين : ياك ..

ام هاني : درتي علاش ترجع ودير الي تقوم بيك وتعطيك الي منگد نديرو لا انا لا عمتك...الي تصبر ليك ..

زين الدين : راسي وماصابر ليه ...عيبي خايب الى طلع دم فراس منصيبش نتحكم وكحل الراس خاااااايب...

ام هاني : كحل راس خايب العيب قريب لابد ليك من بنت الناس تخياب تاتعيا طوعك ...الله يعطيك ذهيبة الي تغطي عيبك..تخياب تاتعيا راك زين الدين وزين الفعل والقلب الكبير ...

زين الدين : الله يعلي مقدارك اميمتي "حك على صدرو بشكر" لهلا يخطيك عليا ...كلشي بالمكتاب ...

كتمر الايام ويمر معاها العمر كل وفين تدها واش من مشاغيل كيدير ...دازت الايام او يمكن نقولو شهر وزيادة ...فهاد الشهر كل واش دار وفين وصلات حكايته ...منهم زين الدين الي استغرق اسبوعين تا كمل جميع مشاغيله تما مرجعش بصفة نهائية وانما رجع لمغرب باش يوقف على اااخر لمسات ديال مشروعه قبل ميدير ليه الافتتاح فالاشهر الجايا...وهاهو جاي فالطريق وحده كيف وصل لمطار لقا السيارة فالباركينغ حطها ليه مراد تما ومشا ...غير وصل كمل اجراءات الدخول فالمطار والي كيف كنعرفو ضروري كتاخذ شي شوية ديال الوقت ...جاي غير بسورفيت كحلة نايك وكرطابل فيها لوازم ديالو ديالت الماكبوك وايباد ووراقو فقط وواحد فاليز صغيييرة فيها لوازم خاصة وفالكرطابل فيه اتخوس ديال لوازم طبية الي باش كيعبر سكار ولانسولين في حالة وقع مشكيل وطلع يلقاو باش يسعفوه ..ودوا ديالو ADO ...وصافي كمل ومشا لسيارة وكسيرا نيشان لدار كان الليل ديك ساعة ثلاثة صباح كي وصل بدل وتلاح نيسان يرتاح من تعب السفر الطوييييل...

في الصباح الباكر جدا بمجرد ما حل عينه كانت الساعة السادسة صباحا منعسش تقريبا بزاف ماهي الا ساعتين او اكثر ...خاصو فكل ميكون عندو فراغ يدير رياضة حيث مهم بالنسبة لديابيت الي عندو ومن كثر مكيمارسها فاي وقت فارغ خلاتو بنيتو الجسمانية قوية ولكن تقوا حتى تعيا فاش كتخونك صحتك مكاين لا بنية لا قوة والقوة لله وحده سبحانه...هز قرعة الما ولبس سورفيت وسبرديلا ايرماكس كتصبر لجري ...ومشا يجري على طول الكورنيش مدة ساعة ورجع دخل من الباب الصغير ...

توبا"واقفة مع الغالي فالمطبخ كيهضرو وهي حادرة راسها " : مامنعتكش مامنعتكش الغاالي غير هو ماشي زربتي ؟ وكتسناني انا نمشي نخطبها ليك "هزات فيه عينيها مدمعين"

الغاالي"قرب وحط ايديه على كتافها" : االحاجة اللهم نتي عارفاني وعارفة عيبي تمشي تشوفيها وتهضري وتشرطي راسك ...

توبا"باستهزاء ضحكت" : هههه نشرط ! غانتزوج بيها انا؟ علاش ماتمشيش تزوج بيها وتسكن معاها بعيد عليا وعلينا...كتقوليا زين الدين هو الي بغا يخطب ليك ؟ متاكد ؟

الغاالي : حيث عرف بالي قصدي شريف عارف بالي باغي الحلال باغي ولاد من غير ضحى بغيت الذرية ...شوفي شحال من عام وانا صابر "شير لصدرو" الحاجة واش ما من حقيش ؟ شرع ربي عطاه ليا ...ومن هادشي كلو واش مزال قادة تعطيني الولاد ؟

توبا"الصمت "

الغالي : مابيا والو من غير الولاد اما العشرة (الحب عند الناس الكبار) ديتيها نتي ...شكون الي صبر معايا فالحزة وشكون الي صبر ليا لفعايلي وشكون الي عطا ثيقتو فيا ...

توبا"هزات فيه عينيها بدموع القهرة ديال امراة صبرات وبغات وحتى وصلات لهاد العمر وكاع الي دارت ضربو ليها فعرض الحائط" : شكون الي مخلاش ليا الولاد ؟ وشكون الي صبر ليا ؟ تاحد تاحد شكون الي هزني انا وولدي اللول الي مات وهو لحيمة من زنقة وديور لااااا ياربي تسمح ليا بيوت الكرا بيت منو كوزينة منو بيت جلاس منو بيت نعاس وطواليييط اعباد الله مشروكة..شكون هزني بسنانو وعباد الله باقي غا ولد سنان الحليب وكان راجل غير ضرگو(تخباو اي ماتو) واليديا غير مات خويا هو الي لقيتو جناحي عمة تحت جناح ولد صغير ولد خوها .....بغيتك وبقيت باغياك ونتا اش درتي ؟ نتي ا الحاجة ملقتيش ليا نجيب بنت قد بنتك نديرها ضرتك ؟ الى بغا يمشي يخطب ليك غيييير حيث مباغيش شوهة ينعتو ناس ويقولو شوف اش دار راجل عمتو ...

الغالي : هو وصدق بعقله باغي يخطب ليا متاقي الله ماشي بالشرع ...

توبا"ضحكت نييييت " : امممم هههههه واخا ..سير انا منخطب ليك منقرب انا وياك شحااال هادي هجرنا الفراش بيناتنا غير العشرة.فشرد ديك البنت الي معارفها تا فاش كتقرا...

الغالي : راني علمت الحاج الي عطاوني خبار بنتو بنت الناس سولت عليها عمرها مناااسب ستة وعشرين عام ...ساكنة فالجديدة ..."باس راسها وعاود" الله يرضي عليك الحاجة يلاه معايا وشوفيها ها ولد خوك غادي ....حيث تاهو باغي غير الخير"يلاه كيهضرو تا تسمع صوته قفز الغالي بجلالة قدره من بلاصته ولا قلبه يضرب معرفوهش امتا جا والاكفس هو الغالي مبقاش شافو من ديك الليلة الغير الاخلاقية ديالو...تا حدر عينيه "

زين الدين "قرب تا قرب مزيااان باقي وجهو حمررر بالجري والعرق فجبهتو تحنى على البوطاجي الي وسط المطبخ مربع ايديه كيشووووف فيه ويطلع ويهبط فيه تا صغر عينيه فيه " : الى بغيت ليك الخير ؟ الله يبدا مني ..."شير لصدرو" واش نكذب عليك ولا نخدم تانوفقييت ديالك ؟

الغالي"ضحك زعما كتمازح معايا" : هههههه ياك

زين الدين"بقا كيشووووف فيه حك شنايفو بسنانو لحيتو كبراات على كيكانت شوي" : داير معاك المزيان "شير ليه بصبعو" نتا درتي معايا المزيان (حيث قابل ليه محلاتو) نكون ولد لحرام ؟ عيب ..."شاف في عمتو الحزينة المقهورة " ...ياك عندك فين تسكنها ؟

الغاالي : هااا ؟ اه اه ندير ليها دارها تاهي ...

زين الدين : من حقك ..."حنحن وتقاد فالوقفة داير ايديه على جابو بوقفة متصلبة " امتا ناوي ؟"عمتو حدرات راسها مقهووورة معندهاش حل سوى توافق " ..

الغالي"حنحن مقادرش يهز عينه ف زين الدين وميقدرش يقول شي كلمة فوق كلمتو حيث غايحطو بوجهو وعارفو كيدخل فالواحد طول وعرض ومن خيبه الى حط شي حد فراسو وهو طالب غير السلاااك مابقا باغي بنات وزهو باغي غير المراة ثانية الي تجيب ليه الوريث زعما ..." : هضرت مع باها حيث هو الي قاليا عندو بنتو وقعو ليها شي مشاكيل وكبرات شوي ...راك عارف عندهم فالعروبية الى كبرات البنت سوقها كيخوا ...

زين الدين "كيسمع ليه ومخنزر فيه محاملش فيه الشعرة فهاد اللحضة حتى كيقول نتراجع ويمشي يغبر عليا وجهو وكيتراجع ل سبب ما ..."

توبا"تنهدت " : ههههه لا حول ولا قوة الا بالله ...

زين الدين : ونتا بغيتي دير لاجر ...اللهم بارك ...

الغالي : سولت عليها ناس الله يعمر ليهم الدار خوتها رجال واحد جزار وثاني كيبيع دجاج ...

زين الدين : بنتك ؟

الغاالي : مالها ؟ "لقاه كيشوف فيه " وبنتي اش عندها ما تهضر الي يهمها الامر هاهي علمتها مكندير اولدي تا عيب ولا حرام "زين الدين هنا قوس فيه حجبانو تا ولا يدخل ويخرج فالهضرة" بغيت ب غيت غير الحلال والحلال الى بغيتو ...مهم الاثنين ديال هاد سيمانة الي داخلة الى مسالي نعلم بوها نجيو بعدا غير نهضرو وتشوفها الحاجة..

الحاجة : انا مغاديا فين ...

زين الدين : العمة "شافت فيه وضورت راسها لهيه مباغياش تمشي ..رجع شاف فيه وشير ليه بصبعو كيتحلف بعينيه الجاحدين العامرين بالعااافية وصوته غير بالهضرة العادية غليض كيخلع فمابالك بالغضب" ندير معاك الواجب فوجه الواجب تكمل هاد سوق الشياخ الي داير ليا و"شير جيهة الباب" غبر عليا من هنا مرتك وبنتك شوفهم فين ما بغيتي وقت الي بغيتي وفريع الراس ميدخلش ليا لداري..."خرج فيه عينيه" مزيان ؟

فهاد الوقت كانت كيف عادتها فايقة بكريي حيث غاتمشي باش تدفع لسطاج الي عيطو ليها باش تدوزو ..حطات اطباق الفطور وهي فطريقها لكوزينة تحل باب بيت باها وهو يخرج لابس جلابتو كي العادة ..صبحات عليه ودخلات تهز الصنية حتى التاحق عصام وفوزوي الي كان خارج مشا يجيب الشفنج...جلسو مجموعين وفنفس الوقت مستغربين ان المخنتر مهدن ماقايل تا شي لعبة ولا تعقيب تافه لشي حاجة..حتى نطق وهو يقول فوزي فنفسو كون مهضرتيش كون يهو دي مات فالملاح خههه ...

المخنتر "شاف فعصام" : عندك الخاطر نهضر معاك ؟

عصام "ضحك بجنب مستهزء" : والى خلاه لينا كحل الراس .."حك لحيتو مصغر فيه عينيه" اش حابس تما ا بويا...

المخنتر : محابس والو والى هضرت هضرتي مااا هي بعاجباكم الى دويت تواجبوني (تجاوبوني) باللغا الخايب ..

فوزي : وهضر مقاد نهضرو مزيان...كاين شي ولد ينهض فبوه ولا ينقص منو ؟

المخنتر "شاف ففرح وفعصام" : شي ناس جايين يهضرو معاك اعصام ...

عصام : مممم خبار الخير ...

المخنتر : جايين يهضرو معاك على ختك فرح "هزات فيه فرح عينيها مصدومة وشافت ففوزي و فعصام "

عصام"كمش حجبانو" : كيفاش ؟

المخنتر : واحد سيد كيعرفو الحاج الوهابي راك تعرفو بغا بنت الناس ونعت ليه ختك ...هما دابا غير جايين يهضرو اولدي ويشوفوها ...

فوزي : مالها سلعة ؟

المخنتر : ديها فراسك نتا "غوبش فيه تا ضور فوزي راسو بالفقصة" راك عارف الواجب والعادة ...انا مصبت شاااي نجري عليهم الي قالوها قلت مرحبا مجاتش ترجعهم ...

عصام : مجايبك نتا عايبة ا با عااايبة ...وخا"حك لحيتو" وسولتي هاديك بنت الناس الي رايها هو لول انا اش ليا ؟

المخنتر : وهما جايين يهضرو وديك ساع الهضرة لولة ولاخرة ليها...

عصام "شاف ففرح" : اش قلتي اختي ؟

فرح "شافت ف باها و فعصام وفوزي" : جاني فشكل عاد مات يونس شهرين هادي ...

عصام : هو من ناحية عيب شوي وليني قاليك ناس جايين ضياف اختي نجريو عليهم ؟ ما ديالنا ...

المخنتر : اشوفي انا قالو ليا جاييين (ناااري ويسيق ليه الخبار هو الي عرضها على الغاالي وهو دابا غييير كيرطب فالهضرة ويسلك و يطبق فالخطة اللولة الى مصدقاتش يدوز البديلة ولي صعب بزااااف من لولة) واش اولدي نجري على السعد ؟ عارف عيب تجري على ضياف الله يرجع علينا بالنحس !

فرح"كتعض فشنايفها" : واخا با مرحبا بيهم ...منجريوش عليهم"شافت فعصام" ياك اخويا ؟

عصام : لا والو ما ديالناش ...واخا جاني عجب مجايبك وليني ملي ذكرتي ليا الحاج الوهابي على راسي "عزيز عليه الحاج الوهابي كيعرفو راجل خاتر بعقله " مرحبا ...غير هو الى مبغاتش عطيها الحق اسي لمخنتر ...

المخنتر : وهو على ما گال ومكنعرف عليه را سيد بخيرو نيييييت بخميرو عندهم محلات ذهب فالداربيضا وواصل ...واش نبغي غير الخير لبنتي ؟

عصام : اممممم الله اودي...

فوزي : وحق ربي لا كل خير ابا ...

فرح : ماغرييييبش"حبسات ضحكة هي وفوزي"

عصام : امتا جاييين باش نديرو واجب ضياف ؟

المخنتر"بفرحة جبد تيليفون" : صبر نعيط ليه وناكد عليه كيتسنى غير نعلمو باش يجيو هاد تنين الوقت الي يعلمني بمجيتهم واش غذا ولا عشا نعلمك...

عصام وافق حيث كيعرف انه ضياف الى جاو مرحب بيهم هادي متخفاش عليه لا هو لا فوزي لا فرح الصواب عندهم معاه لكن باش يقوليه را موافقة على زواج هادي خاص فرح الي توافق عليها وهو مبدئيا مغايبغيش حتى ىتاكد انه ناس مزيانين ولاد الاصل يجيو بعدا يتضايفو...كتبقى تقاليد وعادات لا غير اما الى مبغاتش را ماحد عصام كاين مغايبزز عليها حد وخا يموت....

ولقا عصام فداك الصباح المود عندو مزياااان مطلع نهارو بيييخير ...وفنفس الوقت مافيه الي يتجاحد مع بوه وعاوتاني غير سمع الوهابي عرف انه غايكونو ناس مزيانين وخا مجايب المخنتر لانه ياما جاب ليها صحابو و ولاد عمامها وولاد عماتها وولاد البلاد كيرفضهم لان بزاااف منهم مفضيين ما ديال زواج وبزاااف منهم غير صفقات ديال المخنتر ...لكن هاد المرة المخنتر لاعبها مزيييااان مدخل الوهابي فالخط والوهابي براسو مفراسوش را المخنتر عرض فرح على الغاالي معالم تاحد بهاد الخيلوطة الي خلط المخنتر والله يحضر السلامة من الي جاي...ناضت فرح هزات صاكها ونضاضرها لبسات فرجليها وخرجات لقات صفاء تاهي لابسة وكتسناها ...

فرح : سمعي اخر الاخبار هههه

صفاء : اش تم ؛؟

فرح : ماشي با جاب ليا عريس خهههه

صفاء : اويل شيطان ؟ باينة عصام قاليه لا عارف مجايبو كي دايرة

فرح : لا قاليه مرحبا بيهم حيث قاليه جايين غير يهضرو معاك وجايبهم الحاج الوهابي عرفتيه داك راجل الكبيير الي عندو كاتكات كحلة كيجي بزاف وشحال من مرة عرض عليه عصام...عزيز عليا داك راجل ...

صفاء : اااه ايه عرفتو...ونتي موافقة !؟

فرح : اش غانوافق انا فين شفت ناس باش نوافق ؟ قاليه عصام نديرو الواجب صافي صلاة عالنبي را دازو غير فوجه عمي الوهابي...اما نوافق "ضحكت باستهزاء" هههه كنقول نوافق فالي جا "تفكرت هضرة باها...هضرة ناس حياتها وعصام ؟ يمكن هادي فرصة جديدة بالنسبة ليها ؟ يمكن يكونو ناس الله يعمر ليهم دار ؟ او بلاش ميكونوش مزيانين حيث الي مزيانين كيمشيو فكرة ترسخات ليها من كثرة تجارب الي مرات منها ...حتى تنهدااات بتعب وهي تنغزها صفاء "

صفاء : اش ناوية ؟

فرح : مناويا والو هاد ساعة ...بغيت نخدم بغيت الي يخليني نخدم بغيت نسا شي حاجة اسمها علاقات غرامية ولا نعرف شي حد ...الى جات فرصة كانت مزيانة غانوافق غير هو حاليا مزال عالاقل فوجه داك ولد الناس الله يرحمو يونس ميستاهلش واخا دازت شهرين واكثر عليه ...

صفاء : دارهم مشاو لبلادهم ونتي غاتبقاي على ذكراه ؟ ايه من حقك تحتارميه ولكن ؟ نتي غاتبقاي دايرة بهضرة ناس تا تمرضي راسك ثاني ...

فرح : صافي زيدي تالاثنين ونشوفو شكون هادو الي جايين ..ماعرفت راسي بنادم ولا سلعة عند عباد الله ...

مشات هي وياها كيهضرو حتى شدو طاكسي داهم لعنوان الشركة حيث حتى صفاء عيطو ليها ومشاو للمقابلة الثانية ...كملو ورجعو مشاو يدورو حتى دازت فرح عند عصام لمحل هي وصفاء الي جايا وتقاد فشعرها وتصاوب هههن

فرح : السلاااام عليكم هههه

عصام"كان حادر راسو فتيليفون تا هز فيها راسو " : اهلااان وسهلا..."شاف فصفاء" صفاء نهار كبير هذا ...

صفاء"بابتسامة خجل" : الله يكبر بيك ...

فرح : اش كاين شي غذا هههه

عصام : موجود"حط تيليفون وربع ايديه" اش كاين فيك جوع ؟

فرح : واا شوية ...غاتغذا فالدار ولا نمشيو انا زصفاء ناكلو فشي بلاصة ؟

عصام"جبد من جيبو لور بزطام حلو وجبد مية درهم لاحها ليها" : تغذاي برا الى مشهية بدلي الجو ...ممساليش انا وراجع معطل تالعشا مديريش بحسابي ...

فرح: فين غادي مسافر ولا غير هنا ؟

عصام : لا غير هنا الالة وفين غادي غادي نشوف راسي غادي لغراضي مع شي ناس "غمزها...هنا عرفات بلي غايمشي يتلاقا بشي وحدة واش عاد كيعرفها ولا عارفها من قبل هنا فهاد اللحضة صفاء قلبها حساتو تقج وطلعات معاها صهدة تا ولات تصرط فريقها وعينيها دمعو...صعيييييب هادشي الي كتعيشو كتموت عليه وفنفس الوقت كتحس بجدار قدامها ومقادراش تقوليه ولا تبين ليه ...فرح جمعات ضحكة وشافت بلا متعيق ولا يعيق عصام ف صفاء وضارت عندو "

فرح : ياك ...واخا...غير هو اخويا ولي ترد بالك لجنابك هههه رد بالك مزيااان .."جرات صفاء فطريقها وشيرات ليه وزادت مخلياه مكمش حاجبو كيتساءل ويحلل فهضرتها الي مفهم فيها تا خرية ..

مشات هي وياها لمدينة وصفاء مودها تقلب بقات كتفكر وتعاود حتى هضرات معاها فرح ...

فرح : غير تهناي غاتكون غير شي خانزة...عصام ما فقلبه تا وحدة والى بغيتي هضرتي بصح خاصك تحركي ديري شي حاجة هضري معاه ولا سيمو يقوليك اش كيعجب ويجذب رجاال وخا عديم المصاصط كيعجبو ويجذبو كلشي هههه

صفاء : فرح قد ما جلست غايعرف شي وحدة وزايدون كيفاش نبين ليه وهو كيشوف فيا فرح ختو ؟ اااا ؟

فرح : بدلي ليه النضرة ...

صفاء "تنهدات وحدرات راسها بقات شي شوية ورجعات كضحك عااادي مسلمة امرها لله وفعقلها تفكير باش تحرك دير شي حاجة

..كيف كل صباح فطرو وكل تيسر لرزقو الا هي جمعات دار وسيقاتها وردات الحوايج يتصبنو ونصبات الغذا حيث غايجي فوزي يتغذا ....فهاد اللحضة الدرب عامر بالناس ودنيا مرونة بالغادي والجاي واصوات البياعة وشراية ...فالجديدة كلها دنيا عامرة وقت الصيف والناس البراني جاي يصيف ويتبرد ليه مع راسو ...وفطريق الوطنية الرابطة بين الدار البيضاء والجديدة جايا سيارة من نوع BMW فالسكاااات مطالق لا اغنية لا والو جاي سايق داير نضاضرو وتورم حجبانو على اثر الغوباشة باين من فوق نضاضر ...حتى قرب يدخل لمدينة وجاه اتصال من الحسين ...

الحسين : وتا فينك اولدي ...

زين الدين : شاد طريق ...ياك لباس ا با ...

الحسين : متمني تديني معاك...

زين الدين : طلة خفيفة ..

الحسين : هي وصلتي لمشروعك ؟

زين الدين : زصلت لخلا دار عش البلا الكحل ...

الحسين : الله يرضي على ولدي هدن بالك وخاطرك لا تمرض .

زين الدين "هز صبعو وحطو على ناضرو كيحفر فيه بعصبية" : تبقى معلمة عليه..."غمض عينيه بنفاذ صبر وضار لجيهة لاخرا ورجع يشوف قدامو" مهدن ابا مهدن وكنسايس وداير الخاطر فوووق خاطري...مبرزطني الپروجي وصداع راس وشي وراق وشي شيكات شديتهم من عندو...

الحسين : ديالمن ؛؟

زين الدين : شلا تخلويض شيكات عامرين شي خاوي وشي فيه غير سنية وحدة ...كلشي لحتو لمحامي ...

الحسين : وشتي اش دير سير كمل طريقك ووسع خاطرك تترجع ودوز عندي العشا را كتسناك الحاجة الليلة ...

زين الدين : بوس ليا راسها وايدها وكان نسالي ونجي "قطع معاه وزاد كسيرا باقصى سرعة تا دخل المدينة وشد طريق فالماپس وتبعها تا دخل فين بغا ودخل وسط شي دروبة ووقف السيارة قدام واحد الدار الي تحل بابها وخرجات منها بجلابتها الحمراااء وبطرفها الملفت وجمالها الفتان ...هازة بزطام صغير فاسدها وجا وتمختر ...بانت ليها سيارة زين الدين وطلات عليه من بعيد تا بانت ليها تگضيرة وشوفاتو وهو كيقلب تما وهي تعض شناييفها ولا قلبها كيضررررببب بجهد مصابت كي دير ليه حتى شافتو كيقلب بعينيه على ديور ويقلب فالماپس وهي تلقاها فرصة ومشات ليه حتى دقات عليه كان حال زاج دور وجهو مخنزر لاقصى درجة ومطلع حاجبو ماهضرش شاف فيها ورجع شاف قدامو ...

ناهدة : خويا واش كتقلب على شي حد هنا ؟

زين الدين"الصمت"

ناهدة"بحرج..عاودات دقات وحادرة راسها كتبين فرقة بزازلها وشعرها رطب مقاد هابط وريحتها الي كتخلي الواحد يتلقت يشمها.." : خويا ؟

زين الدين"حرك راسو بلا بلا ميشوف جيهتها ...صونا ليه تيليفون وجاوب وفنفس الوقت طلع زاج ديال شرجم اوطوماتيكمون تسد على وجهها خلاها مخرجة عينيها وكتصرط فالقمعة وهي دور ومشات لحال سبيلها اما هو كان المحامي الي صونا ليه ودار معاه يتلاقاو فالبروجي الي باقي ليه شهر وشوي ويدير ليه الافتتاح ...حط التيليفون ورجع كيسوف ويحك فلحيتو وحاضي الغادي والجاي حتى حرك السيارة وتوجه بيها شوي القدام ...حتى بانت ليه بنت سمراء اللون خارجة كدق وتعيط باسمها"

صفاء : واااا فريحة واش مزال مخارجاش ؟ يلاه اصحبتي الى بغيتي تقداي اش خاصك لناس الي جايين ...حتى بان عصام وقف بموطورو وحل الباب وهي دخل صفاء معاه لعند فرح ...حتى تم جاي واحد الولد سميمر كيتلاوح مبلط بشراب وهو يوقف عليه ودق عليه...

سيمو : اخاااي خاصك شي حاجة ! ؟

زين الدين"كمش عينيه بريحة شراب الي عطات من سيمو " : لا

سيمو : واش موقفك هنا ؟ هنا را غيييير الخوت.. الشعب هنا هاد البلاصة مديالك اعشيري...

زين الدين"جبد من جيبو مية درهم ومدها ليه " : ياك بعدا ؟"شاف قدامو وعاود شاف ف سيمو" شكون نتا ؟

سيمو : معاك سيمو كبايلة "ضرب قرفادتو راجل معاك فالشدة تقيس ليا عشراني وحبابي راك عارف ريكطو فيرسو ...

زين الدين"هز حجبانو متعجب من هضرته ولا هز ايديه وضرب ليه كتافو بجهد حيث بان ليه شاب باقي صغير مرمد راسو كيعز عليه بحال هاد الدراري ...شاف فيه وقال" ونتا هاد الحالة ماشي ديالك ...

"طلقو وديمارا طوموبيل ...مشا لواحد ريسطو فيه موسيقى هااادئة كلاسييكية كتخدم غير اغاني قداااام وراها ليه وليد حيث عارفو عزيز عليه هاد ستيل ..دخل نيشان لفوطوي وجلس جا عندو سرباي طلب مشروب بدون كحول بارد ...حط تيليفونو و سوارتو قدامو وتكااااا راسو حل صدفة القميجة الكحلة لفوقانية وتبعها صدفة ثانية كانه كيتنفس وغماااض عينيه كيتفكر حتى جاب ليه سيرفور مشروب شعل ليه الكارو وبدا كيشرب فيه حتى صونا ليه تيليفون بنمرة جديدة طلعات ليه من تطبيق باسم hanou مفهمش سمية وجاوب ...تسمع صوت نسائي رطييييييطب ورقييييق فيه رنة وفنفس الوقت غالب عليه الحزن صوت الي شحاااااال هادي مسمعو ...صوت عنده معاه قصة ...

هي : زين الديييين هذا ...

زين الدين"عض لسانو ورخا فراسو النفس وجاوب بشوييي كانه مكيعرفش المتصل وتحلفي عليه بالي معرفكش رجع كيشرب فالعصير ويتذوق فيه وكيشوف قدامو " : شكون معايا ؟

هي : حنااان "تنهدات بالصوت الي سمعو .. " حنااان .."سكتات شحااال هزات عينيها لفوق كتنش فيهم باش متبكيش ورجعات كتهضر" توحشتك بزاااف زين الدين ..

""دييي قصة حب على شاطئ الهوى اجمل حكاية قلب ابطالها احنا سوى ...""

حنااان يا حنان...شكون نتي يا حنان واش قصتك مع زين الدين وشنو الي خلاه غير يسمع سميتك ميهضرش ميعطيك لا خيط لا مخيط !! ميقول لا طابت لا تحرقت ...علاش وهي حنان الزين على مقولة با الحسين...

حنان : زين الدين كتسمعني ؟

زين الدين"كيدوز بايدو على حنكو لاخور ويحك فلحيتو وكيسماااع ليها حتى سولاتو " : سييي كنسمع ...

حنان : انا حناان نسيتيني !؟

زين الدين : دنيا مافيهاش غير حنان وحدة ...شكون معايا "شاف فساعتو" ممساليش لتبرهيش ...

حنان"صرطات ريقها مصحوب بغصة حاولات تبلعها وقلبها شاعلة فيه العافية لان زين الدين بالنسبة ليها ماشي اي واحد زين الدين تعرفات عليه ففترة مهمة بزاااف قصتهم كانت قصة .." : حنان بنت الحاج البروفيسور بنسودة ...ياك ازين نسيتيني ؟

زين الدين "رفع صبعو بتحذير " اخر مرة نسمع زين وحدها ..."حط ايدو " سيي عرفتك ...امورك مزيانة الحاج شنو خبارو ؟

حنان : لباس عليه ..."حنحنات" عرفت بالي رجعتي لكازا مرة وحدة بصح ؟

زين الدين : داكشي الي كاين...

حنان : نتا ف كازا دابا ؟

زين الدين"شاف فساعتو" : سي فيها..بون تهلاي فراسك سلمي على الحاج نسالي شي مشاكيل ونشوفو ...خيره سابق ..."قطع عليها وحط تيليفون ورجع تكا هاز راسو كيشوووف فالسقف مرخييييي...كيبان ليك مهااادن ولكن لداخل ديالو براااكيييين صعييييب تعرفيها ولا تبان عليه كتقولي را جماااد ولكن مكتعرفيش اش تحت راسو .....رجع لمشروب ديالو عصيير طبيييعي بدون سكر تشهاه فديك اللحضة يبرد بيه من بعد ما دار زيارة خفيفة ل درب الي عرف عنوان ديالو من عند الغاالي الي مشا معاه بالاصوول ومشا معاه بالحق والشرع وداير ليه خاطر فوووق خاطرو وهادشي مكيعنيش انه مدايرش اعتبار لعمتو وهي اغلى من عينيه الشخص الوحيييد الي تبقى ليه من دارهم عائلتو...حتى من خوالو معندوش ومن عمامو معندوش كانت غير هي وباه الي خوت فقط...وزين الدين هو الوريث الوحيد والكبير المتبقي من عائلة البغدادي اشهر عائلة فعالم بيع الذهب فديك المنطقة حيث شادين بزاااف المحلات وتصاميم المجوهرات....كمل من مشروبه الي خلا فيه شوي والگارو ديالو عيط لسيرفور حط ليه الفاكتيغ ولاباري ديال لاكارط بونكيغ دوز الحساب من بعد ما دخل الكود وناض مشا حدا سيارة تكا عليها مربع ايديه وحاط راسو كيفكر ويخطط ويخمم وياااربي وداك الراس ربي الي عالم بيه اش فيه ؟ لاش ناوي وفين غادي بهاد السكات والثقالة والتباتة الي متبت شنو وراها ؟ هاد الهدوء الي واقع كيخلع كيخلي بزاااف ديال التساؤلات وبزاف ديال المخاوف وشلاااا ديال عدم الارتياح من الي جاي....

هز راسو كينقر فوق سقف سيارة حتى نقر نقرة بجهد وفتح الباب بالطونطاكت وضار جيهم بلاصتو ركب وديمارا نيشان لخذا طريق الرجعة بالضبط فاتجاه المشروع ديالو ...وصل لعندهم لقا ريان ومراد ووليد والخدامة كيديرو فخدمتهم ودنيا مرونة تما توجاد على قدم وساق خدااام ...حتى بان ليهم جاي وضرب دورة بجهد تا فرانا خلا الغبارية طايرة...

ريان : الله اكبر...

وليد : مطالع ليه لا دم لا والو انا الي كنعرفو هاداك هو الفران عندو ديال واحد عااادي مابيه والو...كون فىانيت هاكا كون خشا ليا راسي تحت رويدة حگااار اناني جباااار ..

مراد"حبس الضحكة" : صافي سكت ازمر هههه "جمع ضحكة" خويا زين الدين على سلامتك ...

زين الدين"خشا نضاضر وسط فرقة صديقات علقهم " : شنو درتو ؟

مراد "شاف جيهة لداخل" : مزاال خاصني نطلع قنيطرة عند واحد سيد نتقدا شي خيوط من شركة ديال كابلاج الي خدام فيها رضوان عطيتو"جبد ليه الورقة والبون " عطيتو هاد القياس وشحاال يخصنا وهذا البون مهم غذا فالصباح خاصني نكون تم هادشي الي خاص دابا ...

وليد"عطاه ملف فيه شلا بونات(جمع بون الي هي فاتورة): هادشي الي خاص نتقدا ...مسامر عبار الي هنا ..نفس خيوط الكابلاج غير هو خاصني دوبل وعبار كبر ...المگانات هنا بالنسبة لسانسور الكبير خاص جوج كبار لهاد الجيهة ...وشي لاخور كلشي غانتقداوه انا ومراد صباح من قنيطرة...خاصنا سطافيط كبيرة ورموك را تفاهمنا مع ماليهم صباح مع ستة نتحركو ...

ريان : تحرك معاهم ؟

زين الدين"حرك راسو ب لا" : عندي منقضي ..."هز عينيه كيشوف فالدنيا قدااااش رموكات كتحرك سطافيط شركات الي مقدين من عندهم السلعة طراكس فواحد الجيهة والمكان عااامر بالخدامة كلشي كيخدم وكلشي محضي وواقفين عليه باش يكون هو هذاك لان المشروع ضخم خاصو مراقبة على حقها...عطاهم الملفات وطبطب على كتافهم بشكر " الي خاصكم تيريوه (يجبدوه من الحساب) هاد اليومين عندي منقضي فالجديدة ..."شاف ف ريان " تحرك معايا ل فوق ؟ (على كازا)

ريان : لدار ولا فين ؟

زين الدين "دار نضاضرو" : معروض عند با الحسين والحاجة. العشا تريد ...لا فيك ميتحرك طلقني"وضار غادي عارفو كيموت على تريد وخصوصا وليد ومراد الي عينيهم حوالو بغاو يبكيو"

ريان"شاف فدراري ورجع شاف ف زين الدين وحط ايدو على صدرو " : الله ايييه شحاال ماكليتو عند شي حد يتوب عليييك اعشيري..

مراد : واش هذا كيقلي لينا سم ولا فيا جوع وتفقصت ؟

وليد : ياك ازين الدين ماحشوماش ؟

زين الدين"عض شنايفو ببشاشة ولكن را منضرهم كايجيب ضحك ههه وهو كيحل باب سيارة" : والي بغا يجي متحتاجوش عراضة من امتا كتعرضو نتوما ؟ عند دينمكم شي كرامة !!...

وليد ومراد " وتعالى تشا ريح هاني جاي باي باي الكرامة"ابحال حك عالدبرة لقاهم سبقوه وكسيراو لكازا بقا غير يدور فراسو ويحسبن "

حطات سطولة زوووج فاللون الوردي الي كيعجبها وحطات فيهم لاتروس ديال شبكة الي فيها ماعن الحمام كيس صابون شامبو الخ...هزات صاكها وهي تسمع صوت تلفازة ضنات ان فوزي الي خلاها ومشا لمحل ساعاك كتفاجئ ب باها الي متكي كيتفرج فالاخبار ديال الفلاحة وتيليفون نوكيا صغير مدور عليه لاستيك شمع ...يدور ردورة ويدوز فنماري ولا يصوني لعباد الله ...داير ايدو فوق جبهتو ومغوبش فتلفازة ومرة مرة يشعل تيليفون الي قرب يدير ايدين ويصرفق مو لجدارة الوذن.....

فرح : اه صافي يحساب ليا فوزي خلا تلفازة شاعلة...

المخنتر"شاف فيها" : فين دايعة بسلامة نتي ؟

فرح : غاديا غير لحمام خاصاك شي حاجة .؟

المخنتر"تقاد فالجلسة" : دوزي بركي لارض نهضر معاك اااحد(واحد) جوج كلمات دوزي بركي ..

فرح"حطات صاكها فوق سطولة شعرها ملصق بزيوت الي دايرة ليه...جلسات فطرف سداري " : هاني ابا ...

المخنتر"هز صبعو" : اشوووفي جوج كلمات ...الناس جايين غذا ديرو صواب راه نقرة صعييييب تصيبيها واصل نييت عندو الي يتم مايتحرگ ...شوفيه وهضرو واخا يجيك كبير شوي مايهمش العقل يكون شاربو ...

فرح : شحال فعمرو ؟

المخنتر : راه حاج العمر شكون عارف انا كلي عارف شحال عندي ؟ "خرجات فيه عينيها حسات بالي جايب ليها شي شارف "

فرح : ياكما ندخل ضرة على شي امراة ابا ؟

المخنتر"خنزر فيها" : دروك انا دويت ؟

فرح"بغات تبكي" : ابا حرام عليك واش بنت ليك كبيرة لهاد الدرجة تدخلني ضرة ؟ واش بنتك انا ولا ما بنتكش ؟

المخنتر"ناض وقف على جهدو ومشا ليها عند وجهها كيعرعر" : واش لجدر بوك انا كنهضر ؟! واش لوالدين الكلبة ديال مك انا جايب ليك النخوة جايب ليك راجل الي يعيشك لالة ومولاتي ؟ واش بغيتي تبقاي ليا هنا علگة (هي علقة) واحلة ليا مانتي مجوجة مانتي هجالة مانتي عزبة ؟ نهار ضحك ليك زهر مع حطيتي رجليك صيفطتي سيد لقبرو ؟ ياكما كتسناي عزري يحلفو بيه رجال يديك ؟ ياكما باغا تبقاي هنا تا ضفري ليا الشيب نتي وخوك ؟ "قرب ليها وشدها من قرجوطتها بثرصة بثا قارصها تا نزلو دموعها بغاات تغوت بغات دير حركة ليه مقدراتش كيبثا باها وصعييييب تنهضي فباك ولكن الحگرة خااايبة لو كان شي حد اخور تعرف شغلها معاه...بقا قارصها فقرجوطتها تا حسات بحر القرصة وهو عينيه فالتيييين لهيه فيها ولا كيفيبري بجنون كيشوف انه غاضيع ليه كاع الي وجد ليه والفلوس وحلم الي كيحلم بيه مع خوتو والفيرما الهوتة او الهمزة كيف سماها هو وخوتو غاتمشي بين ايديهم ...يعني تقولي عينيه تعماو فرصة فحال الغالي بين ايديه متكررش وماتعوضش وهو مشايفش را كيجري ورا ملذات الدنيا ومعايقش بعقايب لاخرة!!! مادارش يونس شاب الي توفى فلحضة غفلة داه ربي لعندو...اش دا معاه ؟ الگراجات ديال نجارة تسدو لواحد المدة تايشوفو عائلتو اش يديرو حيث هو الوحيد الي عندو حرفة النجارة...يشوف باه كلو الجد ديال فرح وعصام وفوزي الي كان عندو اراضي خذاها وورثها هاهو مات ولقاو اغلبهم مامحفضينش واغلبهم معندهمش الوراق الي يثبتو انهم ديالو فقط عاطين ليه اصحابهم لولين الوعد بالبيع غير شفهيا بفامهم كيف كيديرو ناس زمان فين كانت الكلمة وكانو كيوفيو بيها وخا يخيابو تايعياو مكانش الغدر كي كاين دابا ولا كلشي عايق وفايق وكيتبت حاجتو بالوراق وهاااا العار..."

فرح"كتحيد ليه ايدو الي تكنززات على حلقها" : وبااا اهى اهى راك قصحتييني حرام عليك "نزلو دموعها" عفاك ابا غير تهدن هاني نسمع ليك دابا يجي عصام ولا شي حد ماقادا على صداع ثاني حراام عليك ..."طلق منها بجهد بدات تحك فالقرصة وتمسح دموعها بطرف كمها .."

المخنتر"كينهج" : بغيتي تقتلييني ابنت لحرام من نهار تولدتي ماشفت ربح ...عصام ! وينعل جد بوك وبوووووه الكلبة ...سيييري وصليها ليه "رجع كيجري قرب ليها وعينيه خارجين واحد جهلة جاتو ما فسوقها ميتعاود" عليا بلييييميييين "دار صبعو فلسانو ومسحو فالحايط ك علامة" وتخسري ليا كلشي عند ضياف غذا بلييييمييييين تندخل هاد خوك لحبس ولا داك فوزي...

فرح"شافت فيه" : را حنا ولادك ابا علاش كدير هاكا"حدرت راسها كتبكييييي" حراام عليييك قهرتييييينا...

لمخنتر "هز راسو وايديه كيشالي ويغوت" : وااااااااا يگطعكم عليااااااا ...ولاكان غا بحالكم الله يرزيييني فيكم ...

فرح"الصمت كترعد خايفة لا يدخل خوها على غفلة وخا ماشي وقتو لكن ماتعرف كلشي ممكن "

المخنتر"طل عليها من تحت " : تركني وتسمعي وضربي طم خوووك ميسيقش الخبار شكون الي جاي و بحلوووفي وتحاااشميني مع ضياف غذا تاندير الي ماعمركم شفتوه.. يلاه غبري عليا من هنا ...

فرح"ناضت مكسورة الخاطر والجناح ناضت مهرسة من اقرب ناس فبلاصة متسمع الله يرضي عليك كتسمع الله يرزيني فيك !!! اس عدل هذا ؟ ...هزات صاكها وسطولتها ومشات تالدوش غسلات وجهها مزياان ومشات لكوزينة دارت ثلج لديك البلاصة وياااربي ماتورمش كثر ماهي تورمات دابا تاتحبس فيها دم وزراقت...ميمكنش متمشيش لحمام اولا خاصها توضا وثانيا غايسولها عصام وفوزي علاش ممشاتش وثالثا خاصها مبرر لزيف الي غادير باش تغطي ضربة وميعرفوش...ويااااربي دير تاويل ديال الخير هادو هما الكلمات الي كتمتم الى جانب ...

فرح "حابسة لبكية بسنانها عاضاهم ": حسبي الله ونعم الوكيييل..."هزات ماعنها وتسنات تا تنفسات شوي ومشات لحمام ...وعارفة باها الى ثال ندخل عصام الحبس يديرها ويفوتها ف كان عليها سوى تسلم امرها وتشوف غذا اش غايوقع وشكون هاد ناس الي جاييين "...

مشات لحمام دغيا زربات ماتعطلاتش فيه بزاااف مخلاش ليها الخاطر ليه قهرها بمعنى الكلمة ...رجعات لدار لقاتو مكاينش ودار مافيها حد...دخلات ووجدات اتاي وتوابع ديالو وحطاتهم فوق طابلة وغطاتهم ومشات لبيتها هزات بومادا ذهناتها عالله وعسى تحيد ديك الضربة الي تورمات ليها اكثر ...خذات واحد زوج فوندايشن واحد ليكيد اي سائل وثاني باودر دارتهم بزوج وجربات واش يتخباو بالفعل تخباو ليها وغطات بزيف باش تزيد تخبي ...تكات غير تما حتى داتها عينها ونعساااااات مافاقت غير على صوت عصام حلات عينيها لقات دنيا مضلمة والعشا كيوذن امتا نعسات هادشي كلو معقلاتش حتى سمعاتو كيعيط باسمها ...وهي تنوض بزربة تقادت وخرجات لعندو..

عصام"كمش حجبانو شاف عينيها مبوقين" : مالك ؟؟

فرح"تفوهات بلعاني" : جيت من الحمام ونعست بزاااف من قبل المغرب ...

عصام"كيطلع فيها ويهبط حاس فقلبه بالي ماهياش" : ياكما مريضة !؟

فرح : لا لا كان حمام سخون بزاااف وجدت اتاي ومشيت نرتاح تاتجيو ساعاك نعست ...دوخني ياخويا سخووون اليوم...

عصام : ها وا كان عليك متعطليش فيه "قرب ليها وباس راسها" بصحة بنتي يالالة عنقها بجنب وغادي بيها لصالون وهي فنفسها كاتحسرررر عليه معارف مسكين والو وشحاال جهدها تخبي فعيال باها وتهديده ليها بانه يدخلو الحبس والى قالها يثد بيها هو فالفساد ورشاوي را عاطيهم قتلة وتزوير وممكن جدا باي طريقة يهز لهيه شيك ويكحل ليه ضواصا عارفاااه فهادشي ديال شر يفوتو لهيه وهو كيقوليها الله يرزيني فيكم ؟ اش بقا ملي تسمع بو يقول على ولادو هاد الدعوى؟!!!...

فهاد اللحضة وفي الجهة الاخرى بالضبط الدار البيضاء فالمدينة القديمة...فاحدى ديور القدام الي فيها ...فصالون عتييق فدار شبيهة لرياض شي شوي بحكم الديور القدام هكا دايرين ...زليج ديالو قديييم وفراشو بموبرا لولة الي فيها صفر والكحل محفرة...فلاخر ديالو كاينة واحد دخيلة فالحايط محدودة فيها ديكورات بساااط ...وزربية تركية ...جالسين بخمسة بيهم والسادسة كانت الحاجة الي معنقها زين الدين كطبطب عليه ويبوس فايديها وراسها ...وعزيز كيتقدا عليهم بحكم مراتو الي واقفة فالكوزينة اما تريد او الرفيسة صايباتها الحاجة بنفسها ووليدات عزيز كيتفرجو فقاع الدار مغطيين مدايرينش صداع...

زين الدين"هز ليها وجهها وقلب ليها عينيها مزيان " : حلي فمك مزيااان اميمتي ...

وليد : ديري فحال بيتي تزغرتي لزين الدين فعرسو بلا عروسة .

مراد: ههههههههههههههههههههههههههههه"هز فيه زين الدين عينيه وهو يدور عند ريان" وحق الرب لا نتا واعر وفين مشات؟

ريان : شكون "رفع حاجبو"

مراد"عض لسانو" : ااااا وتا سير معايا فالخط

ريان : اشمن خط ؟

مراد : ريان !!علاش سماوك ريان ونتا قد هوك بهاد المقادير والختورية اصحبي ؟ ريان ؟ كنحس بيك عندك ست سنين وراه عندك ست سنين نيت ...سير معايا فالخط مال حبك مفروش "عصبو" ..

وليد"قرب ليه مع جالسين بثلاثة حدا بعضياتهم وزين الدين والحاجة مقابلين ليهم حط ايدو على فخد مراد" : معمرك تضحك مع هاد بني عقدة الي حداك براكة عليه غير المحاكيم "خمس ليه فوجهو" العفوووو

ريان : دابا لاش جيتو !!! عرض عليكم شي حد ؟

مراد : ونتا عرض عليك شي حد ؟ ااااااسكاااات راني حضيتك ملي كنتي واقف عارفو غادي معروض قلتي اااه حگا نوض نسولو باش يقوليا يلاه ...ديك تارهوطييت دياال محامين عااايقين بيها...

وليد : جينا عند مي لاااااااالة"هز عينيه لفوق كيفقص فيه زعما"

ريان"طلعو وهبطو" : بزعط ...

مراد"بقا داااير ايدو على حنكو كيشوووووف فريان كي متبت وخا ضحوكي عندو ضحك متبت كون مراد ووليد كون راهم كيتناقزو ولكن الغريييييب فالامر وصافي ...لقاه ريان كيشووووف فيه ووليد طل على مراد تاهو"

وليد : مراد مالك ؟

مراد"صغر عينيه فريان تا خلاه يتنوا" : وشو هانتا واا شووو. هاد خونا هذا تاهو قاليك خاااتر زعما فالضحك ...دابا اش تيقول علينا هذا ؟

وليد : امكيحملناش هذاك ...امنونخ مدندن ...

ريان : حاشاك ...

وليد : دابا هذا تدي عليه ؟

مراد"باقي بنفس الوضعية ونفس نبرة الهضرة ثقيييييلة " : ودابا انا را فيا ميختاااار ويثقاااال وشو خونا المحامي تاهو بغا يختار ؟ تاهو قاليك كيلوح كلمة زعما را بغا يقتلنا بضحوكات ؟

وليد : فاش كتقدا فؤاد رمسيس من جوميا خهخخخخ ...

مراد : شوووف اسي المحامي ...ااااطونسيو يتحط تريد طير الفخد نطير لوالديك المصااااصط...

ريان"قرب ليه كثر" : هاد دورة كاااملة عقت بيك عينك ففخد دجاج لا نتا لا هذاك

وليد : ايواااااا البطانة طيح ...

مراد : وحق الرب تايقولو مالهم وحطو ايديكم عليه بربي تنقلب طابلة ...(الناس فناس وهادو ففخد الي سمعهم يقول مضاربين على ورث صحيح )

فهاد اللحضة زين الدين بقشش الحاجة مزيااان هههه تا تهنى بالي ضاهريا راها لباس جبد من بوشيط دوا مذكرة ديالو فين كيسجل عبار سكري عندو وكتب فيها شي دوا وفيتامينات عاديين لحالة البرد الي عندها...ومدهم لوليد ..

زين الدين : اجي لهنا بغيتك "ناض عندو وعطاه الورقة وهضر ليه فوذنيه" تحرك خوذ هادو من لفارماسي دابا ..."جبد الفلوس عطاهم ليه مشا وليد بزربة يتقدا دوا الي كتب ليها حتى نطق الحسين الي جالس حداه ..."

الحسين : اش درتي فداكشي !؟

زين الدين"تقاد فالجلسة وجر سروالو شوي وحط مرافق ايديه فوق ركابيه جامع ايديه عند ذقنو وضار لعندو" : غذا محركين نشوفو هاد غناية حاشاك فين بغات تسالي ...

الفرحة عند الغالي اليوم مااتعطيها لحد مكايبان ليه تاحد فهاد اللحضة سوى يمشي يخطب وخصووووصا ملي شاف فرح من بعيد وراوها ليه وفين ساكنة خلات عينيه يلوبو ويحوالو خصوصا غليضة عامرة وزوينة عاطية لعين وهو داكشي الي بغا الغلض والتگضيرة والسمونية ...ودابا راه لابس مقاد بجلابتو البيضاء سوسدي والطاقية بيضة وريحة المسك تفوح منو وتسبيح فايدو جايبو جديييد عاد وصلو من السعودية هو ومسك وريحة ديال العود والعنبر من عند عبد الصمد القرشي الاصلية هي الي رش منها والبلغة صفراء بتقاشر فرجليه بيضين...واقف قدام سيارة كيتسنى فزين الدين وتوبا يخرجو حتى تمات جايا ضحى وعينيها كيدمعو ...وقفات عندو...

ضحى : فين غادين بابا ؟

الغالي"قرب لعندها وباس راسها" : عند شي ناس وراجعين ا بنتي ؟

ضحى : بابا !! صافي صافي "ضارت مشات بانت ليها مها وهي تضرب فيها وزادت بقات كتشوف فيها وتعيط ليها مجاوبتهاش مشات ..."

توبا : ضحى ضحاااااا اويلي مالها"يلاه غاتبعها حتى بان ليها زين الدين جاي عنقها وزاد كيورك عليها بايدو ورا ضهرها باش تبت "ماعرفتش لاش غاديا انا اولدي لاااش كون غييير خليتيني ...

زين الدين"وقف وضار عندها بعيد على هذاك الي خنزر فيه ورجع شاف فيها" : ديري المزيان معاه مرة والمرة لاخرة "قرب ليها مزياااان" ياكما عند بالك نخليك تمشي معاه ؟ "عاودات ليه بالي تا رابط مبقا كيربطهم فقط الورقة ديال زواج وبنتهم علاش صابرة حيث باقيا صغييرة ماشي ديال التفكك الاسري"العشرة الي بيناتكم سالات ؟ "شير لراسو" انا رجعت رجعة الدوام ...هاني معاك مكاين الي يوصلك بدارك الي حليتي عليها عينيك ديالك ..."ضرب صدرو" نتي مولات الشي ماشي انا "خرج عينيه" اش بغيتي مزال ؟!

حركات راسها ومشات معاه اما الغالي ابتاسم لزين الدين الي مشافش جيهتو جاع خلاه بلاكة ولكن متسوقش حيث فرحتو اليوم فشكل بغا يفرفر ليه العقل فسيارتو مقدي الهدايا شكلاط والريحة والورد وكراطن سكار والجنة لزوم الخطبة ...حل الباب على اساس تركب تا خلاتو بلاكة وركبات مع زين الدين الي جا معاه الحسين وتوبا ركبات لور والغالي مشا معاه الحاج الوهابي...مسافة الطريق بين كازا والجديدة مسافة ساعة وربع ..

جالسة فالبيت لابسة بيجامة عادية عايشة عكس اسمها الحزن ماباغاش تبين لعصام وفوزي اش كاين ...باها اليوم ماخلا ما تقدا فرحاااان تا بغا يبكي ...شرا اللحم وعطاها الفلوس تقدا شنو يخص وهي عطات غير ل نجية الي وصات ليها على بسطيلة خصوصا عرفتهم كزاوييين وناس لباس عليهم وعصام تاهو مقصرش قايم بواجب الضيف كيف العادة دنيا منقية والصالون مقاد والبلاطويات زوج ديال الحلوى محطوطين وصواني اتاي واجدين خاص غير الي يعمرهم...جالسة حداها صفاء الي كتسول فيها وهي كتجاوب على قد سؤال حيث الى فات تا عرفات صفاء غاتشكم بيها لعصام لان صفاء من النوع الي مكتصبرش ...

صفاء : واش عيانة ؛؟ كتباني ليا ماشي هي هاديك !

فرح"حركات راسها بنفي" : غير مافيا الي يقابلهم ..فين عصام !

صفاء : را مع فوزي وباك جالسين فالصالون كيتسناو فالضياف يجيو...معرفتيش شكون هذا ؟ ونتي موافقة ؟

فرح : هما جايين غيير يشوفو. ويهضرو اما الموافقة مزال عصام قاليك مدام الحاج الوهابي مبغاش يتحاشم معاه مرحبا بيهم والى فالنصيب را انا الي غانقول...

صفاء"بشك " : مممم واااخا...

فهاد اللحضة كانو جالسين حتى صونا ل مخنتر تيليفونو وهو يوقف كي العمود تا خلع فوزي وعصام بقاو يشوفو فبعصياتهم...

المخنتر"ترمتو كتصفق بالفرحة" : سي الوهابي فين ؟ ايييه ها ولدي عصام غايخرج عندكم اييييه مرحبااااا"قطع معاه وشاف فعصام الي وقف ومشا خرج يستقبل الوهابي الي كيعرفو"

عصام"تبسم ليه" : اهلاااااا با الحاج اهلا وسهلا داب غير الناس الي جابوك نتا متسول الحاج !!

الوهابي"كيضحك" : جيناك فساعة الخير اش بغيتي هههه

عصام : تفضلو مرحبا"شاف فالغالي وسلم عليه" تفضلو اسيدي..

الوهابي"ضار" : بلاتي ولد الحاج البغدادي يمكن ..اه هاهو تسنى ولدي معانا ولد خو مرات الحاج جا معانا .

عصام"مفهمش" : كيفاش ! اه ايه مرحبااا..."وقفات سيارة زين الدين سوداء وتحل الباب خرج منها الحسين وتوبا ...وهي توقف وضارت تا خرج زين الدين مغوبششش لابس كحل فكحل قميجة وسروال توب وصباط تا وقفو ناس كيسوفو فيه كيبان فشكل كما الكارو ولاحو عسف عليه تقدم ناحية عصام ...

الوهابي : هذا الدكتور زين الدين البغدادي وهو مول محلات الذهب فالقصارية الي فالمدينة فالدار البيضا...

عصام"حرك ليه راسو ومد ايدو سلم عليه" : مرحباااا بولد الحاج...

زين الدين "حرك ليه راسو وبادلو سلام" : الله يكبر بيك اسي عصام ..."سلم على البقية ودخلو كيرحبو بيهم وزين الدين محاملش الوضع داخل بزز. واحد اللحضة كان غايخليه ويرجع ...حتى دخلو وهو يهز راسو فلحضة وغفلة بانت ليه وحدة كطل حاطة وجهها على حافة الباب ..غييير نص وجهها الي بادي عليه الحزن كيبان من طيارة طبوزة بطبطوطة حنكها المطبز ليمني الي بان ليه وعينها ليمنى وغوباشتها وهي كتشوووف وشنيفاتها الي دلاو بطفولية بغاات تبكي ,,لقا راسو مقوس حجبانو فيها ومعوج راسو ههههه ..حتى ضربو لمخنتر لكتفو كيرحب بيه هي غير ضربة خفيفة مع كان ساهي ضار بسرعة خنزر فالمخنتر كان بلا شعور غايدخل فيه براس حيث لحضة ساهي فزعو جات فحال شي حد عطاه دقة" : ينعل ..."عض لسانو كان غايسبو ههههه".

مواقف صعبة تحطات فيهم فرح ...اصعب حاجة هو انك تعيش تحت التهديد في حالات عادية مككن تواجه ومتخافش بكن فحالة تهديد بخوتك ومن شكون من اقرب شخص ليك الي هو باك !! كتلقى راسك مربوط وخصوصا انك عارفو شخص وااااصل بفعايلو ممكن يعطي رشوة تزوير ويغرق حتى ولادو فاش تسمعي باك كيقول دعوة الله يرزيني فيكم !! هنا عرفيه را فات الشر لهيه فمقابل يتمتع بملذات الدنيا قادر يدير اي حاجة تعماو ليه عينيه على دوك جوج ريال حتى ولا باغي يضحي بولادو...امثال المخنتر بزاااااف فواقعنا هذا وكاين ما اكثر منو ...فرح مجرد اسم وحياتها عكس اسمها...

باحدى المدن المغربية الاتجاه للغرب هاد المرة مدينة القنيطرة واقفين بزوج بيهم حيث بزوج عندهم تقريبا نفس السلعة الي غايجيبو...وليد واقف حدا واحد الرموك كيهز فالسلعة داير كاسكيط ونضاضر دشمس كيقيد شنو خاص ويدير علامة على شنو تحط ويحسب بالكالكيلاتريس متكي على واحد الحيط قصير داير ستيلو كحل ورا وذنيه وستيلو زرق فايديه ...حتى تم جاي مراد تاهو لابس تيشرت بيض وسروال دجين تاهو داير كاسكيط وشاد واحد المذكرة تاهو كانو كيحسبو فالسلعة الي كيحملها رموك...تا وقف عليه...

مراد : جاني جوع اصحبي مزال مكملتي ؟

وليد"كينش على راسو شي ذبانات " : مزال واحد شوي شي سلعة كنتسناها تجي من نواحي هنا "شاف ساعتو"واحد خمسة دقايق وتوصل..نتا معامن كنتي كتهضر ؟!

مراد : مع ضحى ختي(بنت عمو حيث مراد ولد خو الغالي وهو الي ربات توبا قبل من ضحى) كتسول على باها وزين الدين والوليدة فين مشاو قالت ليا كلشي لابس عادي تال بابا لابس مقاد مالو..

وليد"ضحك" : هههه واش قلتي ليها غادي يعرس ...

مراد"جاه ضحك" : مقلت والو هههه تنشوف فين غايوصل بيه هادشي ...راه بوها هو يقول ليها هما سكتو معلموهاش اش غانقول انا ؟ علاه هو هادي لولة ليه مع العيالات وهي زعما مموصل ليها حد من الي كيقراو معاها الي نص فيهم تصاحب معاهم شوگر دادي ...

وليد"كمش فمو باسف" : بنت فعمرها خاصو يكون معاها حاضيها تحس ب باها معاها ...ها زين الدين حاضي وليني اش غايحضي ؟ شحاال جهدو وهو مية مطرقة ليه فداك راس"شير لرموكات" مشروع قد سخط هاهي غير هاد سلعة ربعة المليون غير هاد شوي ...غير خدمتو محلات ديالو الي نتا كون ما درتي داك سيستيم ل صوغتي ولونطخي وكلشي يتحسب ويتقيد را يحضي تا يعيا يخورو من شي جيه ..

مراد : هههه علاه يقد يخورو ؟ واخا عمي نجي من جيهة الحق زين الدين وخا صعيب واعر طبع قاصح را ضايرين بيه ولاد الناس الي مصرف فيهم خير بزااااف...

وليد : متافق معاك وليني زين الدين عندو سلبيات صعييب تقبلها ليه شي وحدة ولا شي حد غير عمتو را طالبة سلاكة ...هو براسو كيقوليك انا وما صابرش لراسي ...زاد كمل عليه ديابيت...نهار صعر طاح ليه سكار جاب الله كنت حداه نهار تستريسا ومكلاش مشربش دواه وتعصب هو الي طلع ليه هاد تواخير تا غيب يومين ...را بزاااف على راسو وزايدو فعايل عمك !! عرفتي اش عرف عليه غير الي عاود ليا وتا ريان ...سمح ليا وخا عمك ...

مراد : بغيتي توريني عمي ؟ عمي معاقلش على بنتو براسها معارفها اش كدير مزال لدابا عايشة لمراهقة انا تهديت معاها زين الدين يربي تايعيا را ميقدرش يفوت الحدود الي واليديها عندهم الحق فهاد الحدود...دابا راها تركنت ملي جا ...

وليد : ديك L ENCG مكملة فيها مزيان ؟

مراد : مزيانة قرايتها مزيانة كتقرا مزيان وليني صحاب وتصرفات باقين دياا مراهقين باغا تعيش باغا تخرج تسافر برا وحدها معاهم بغات تاهي دير تريپ هههه التريپ انا الي راجل منقدرش عليه ديال ماليه...

وليد : باغا تعيش حوايج فوق سنها وطاقتها...ماشي عيب تعيش الحرية ولكن تكون بحدود باصولها تعرف فين تحط رجليها ومعامن ...ماعليش فعمرها تبدا تعرف على ناس جداد ووجوه جديدة ...

مراد"دار ايديه على نصو مكمش ملامحو من شمس شاف لهيه ورجع شاف فيه " : اودي را دنيا هانيا ولكن ضحى را عقلها صغر من عمرها طايشة بزاااف تقوليها تلاحي ف بير باش تباني عايشة وواعرة والله متعطلك ...واش لا انا لا زين الدين الى شفناها بعقلها غانمنعوها ؟ بالعكس ولكن الدرية ناقصة بزاااف داكشي الي كان خاصها يتعطاها ماعطاهش ليها بوها كتشوف باها وامها اغلب وقاتهم مكيشوفوش بعضياتهم دايرين كي الخوت وغراب على بعضياتهم هي عايشة ضاحكة ناشطة وليني نهار كتقلق كيحير فيها شي حد ؟ انا وجهد جا فوق جهدي شاغلاني القراية والخدمة وزين الدين را حاضي ولكن را كان بعيد وتاهو را الله الي عالم راس عامر تا مقد يجي يربيها هاهو صدق كربي عمي ...

وليد"تنهد وهز حجبانو باسف " : الله يصاوب...يلاه راهم جاو كمل اش بقا نتحركو يلاه يلاه منتقلوش فالخدمة قرب الافتتاح ...

مراد : عيطات ليا حنان اصحبي مزلت كاع ماقلتها ليه...

وليد : اش بغات !؟

مراد : بغات تلاقا معايا ثالت ليا بغيت نهضر معاك ..تففف مبغيتش مشاكيل مزال غاتجبد ليا صداع مافيا ميسمع لشكاها ..

وليد : هي الي جابتها لراسها..يحساب ليها زين الدين عنيبة ولا يصبر لهبالها ولا فشوشها ؟!

مراد : ماسوقيش فيهم...ماعلينا غذا معروض عندهم لدارهم ونشوف اش كاين...مشاكيل وحق الرب...

المخنتر جا بغا يسلم عليه هو فلحضة كان ساهي فديك الفتاة الي شاف غير القليل من وجهها والي كان عقلها ساااهي مشافتوش هو الي كان طويل فيه وسط منهم حاضيها هي كان بالها غير فالغالي الي بان ليها رجل كبير شايب لحيتو بيضاء وتشوفيه ميجيش فبالك يكون راجلك اكثر من انه يبان ليك فمقام باك ...كتشوف راسها وخا مزال معطاتش الموافقة ولا قالت اش كاين فين وصل ب باها انه يسلمها لراجل كبييير فالعمر ماتعيش معاه مرحلة الشباب ولا اي حب صعييييب تشوفيه راجلها كتشوف راسها غاديا لهلاك...كتفكر تهديده ليها بخوتها وليها هي نيت ...مكان عليها غير تحني الراس عالاقل حتى يدوز هاد النهار الي قال عليه والي مبغاهش يخسر ويتحاشم مع الناس ...

المخنتر"هز راسو فزين الدين كيبان قدامو كي المحگور" : اهلا بسي البغدادي والله الى نهار كبيير هذا...

زين الدين"واقف مبند على طولته وكيشوووف فالمخنتر من فوق بنضرة فشكل مدخلش ليه لخاطرو خصوصا فيه تلحميس وتبحليس فالهضرة وقوة الصواب الي مبالغ فيه بقا ليه غير يفرش ليه الارض ذهب ولا يفرش راسو نيت ...مجاوبوش مخليه كيهضر"

عصام "حط ايدو على كتف زين الدين" : تفضل اشريف مرحبا بيك ..

زين الدين"تاهو رد ليه الحركة مطبطب عليه " : الله يكبر بيك اخاي..."سبق عصام والمخنتر وفوزي تا كمل معاهم سلام ودخلو بقا زين الدين لاخر كيحيد فصباطو شافهم مدهيين ودور راسو بلا ميحس ناحية داك الباب ساعاك لقاه تسد وهو يوقف ودخل جلس حدا الحسين "

المخنتر : اش كاين الحاج لوهابي ياكما عييتو من طريق ؟

الوهابي : انا مولفها شوف شي الحاج الغاالي...

الغالي : المقصود خير العذاب راحة الحاج...

المخنتر : مرحبااا وزيد لگدام...شحاال تكون بعيدة الجديدة علينا ماشي بزاف شي طناعش لمية كلم...

فوزي : با را غير ساعة وربع مية وزيادة ...الحساب الي ذكرتي توصل داخلة وحسابك مزال ميوصلو ليه...

الغالي والوهابي : ههههه

عصام"جمع فمو حابس ضحكة وضار لهيه هنا قشعو زين الدين " : لا حول الله ...

المخنتر"شاف فزين الدين" : تبارك الله هو هذا ولد الحاج البغدادي...كي داير اولدي الصحة مزيانة ...

زين الدين : من عند ربي الحمد لله ...

المختر : داكشي الي كاين اولدي...ولله الحمد الى من عند الله مرحبا بيها وربي الحامي ..

زين الدين : والى من عند العبد ؟!

المخنتر : اههههه العبد هو العبد بنادم مساهلش...

زين الدين : تبعو الله البلا .."فوزي وعصام باقو غير يشوفو اما فوزي را دموعو بغاو يدوزو على المخنتر بضحك عطاه الله صواب ولكن مفردگ هههه"

عصام"ناض وقف" : مرحبا بيكم نهار كبير هذا

الغالي : الله يبارك فيك اولدي...

عصام"شاف ف زين الدين" : خويا"حك على صدرو " نهار زين هذا سي البغدادي ومجيبة الحاج الوهابي وجوه زينة على راس والعين. دار داركم شي كويس اتاي تحلى الجلسة وصواب الضياف على راسنا...

زين الدين"حط ايدو على صدرو وحكو بشوي كترحيب بهضرة عصام وشكر ليه " : الله يكبر بيك اخاي ويرحم من رباك ..."حرك عصام راسو مبتاسم ومشا لعند فرح وصفاء ...

عصام : الما رديه يطيب ا فرح ...

فرح"وقفات" : مي نجية رجعات جات ياك ؛؟

عصام : كاينة يلاه تحركي ناس جالسين معاهم شي امراة تجلس معاها مي نجية ونتي وصفاء تحركو لكوزينة شوفو اش تقضيو...ديرو صواب وصافي ...

فرح : واخا غير سير انا نقوليها تمشي ونبقا انا وصفاء فالكوزينة..."حرك راسو ومشات هي وصفاء لكوزينة رسلات نجية لعندهم تجلس مع المراة حيث وحدها وسط رجاال وهي بقات فالكوزينة دارت الما فمقراج يطيب....فهاد الوقت فالصالون جالسين كيهضرو وباقي الحديث متفتحش حتى جات صفاء عطات فوزي المقراج ومشا لعند نجية الي كانت جالسة حدا توبا الي بدورها مبتاسمة عاطية صواب لناس وصافي...

الوهابي : ايوى سي المخنتر اش كاين مرحبا ولا مرحبا هههه

المخنتر : مرحبا وهلا وسهلا بالي جا وجاب ...ناس الجود والكرم...مجية الخير نشاااعلاه (ان شاء الله )

الغالي : الله يكبر بيك اسي الخيالي ...فين هي البنية ؟

عصام"هز حاجبو" : حليو جلستكم الحاج يلاه ترتاحو عاد جيتو ...

الغالي : اا ايييه اييه ...

عمرات اتاي بطريقة تقليدية ...وعطات لفوزي يفرق عليهم عطا لاغلبية وصل عند زين ...

زين الدين"حط ايدو على صدرو" : يكثر خيرك ...

الحسين : الى كان مسوس اولدي...

فوزي : موجووود هو اللول "شاف فزين الدين" سموحات اخاي ديالي دابا يكون عندك...

زين الدين"حرك راسو بشكر" : ماعليش ..

المخنتر : تشرب مسوس اولدي ياك !؟

الغالي : ايه يشربو مسوس ..

المخنتر"شاف ففوزي" : براد اتاي من داكشي لولدي زين الدين هو اللول ...

زين الدين"مفرق رجليه وحاط ايديه جامعهم تحت ذقنو ضاار عند الحسين مكمش ملامحو باشمئزاز" : صوابو يگهم ياااا خويااااا..."ضار مخنزر حاقد"

جالسة فوق كرسي صغير حدا البرمة ديال دجاج كتسنى فدغميرة تعقاد وتختار لان دجاج جبداتو وخلاتو فوق طاواة ستة دجاجات بالحساب على حسب زوج طابلات كل طابلة فيها ثلاثة طيور...وصفاء كتخوي فزيت الي وصاتها نجية ديرو يسخن جبدات الخميرة حمرة رماتها فزيت باش يتحمر مزيان ...شافت ففرح ماهياش وهي تسولها ..

صفاء : فرح جيني من لاخر اش كاين ؟

فرح"شافت فيها" : مماليش غير مجية هادو فهاد الوقت جاتني عيب ف حق يونس حيث ماشي مسالة انه كان بيناتنا شي حاجة ولكن جاتني عيب شوية باقي يلاه مات ونوض انا نتخطب ؟

صفاء : وبسلامة نتي وافقتي ؟

فرح : مزال مقلت والو مشفتش كيدايرين وشكون باش نوافق قاليا عصام جابهم الوهابي يكون خير ...

صفاء : عصام مغاديش يغصبك على شي حاجة هو باغيك غير تكوني فرحانا مقتانعة تاحاجة مكتحي بزز..ماعلينا شكون فيهم العريس ؟ حيث باينة داك زين المسرار الي بان ليا شفت غير ضهرو من لور كيحمق يا صاحبتي...

فرح : كيفاش داير ياك الي شايب ؟

صفاء : اويلي على شايب بغيتي ندب زكي ؟ اويلي تي مال شايب اش بغا يخطب فيك رجل فدنيا ورجل فلاخرة ....يلاه يديماري يسكت ليه رادياتور ...شكون قاليك شايب القح*** تي شوري ..

فرح : هاا الا حيث ماشفت تاحد من غيره ...

صفاء"بقات مخرجة فيها عينيها بشك " : اديك المقحوبة غاتقتليني ...تي مشتيش واحد جوج ميترو الى مخفت نكذب طول وعرض اصحبتي غير من ضهرو وجلستو تحمق قشعتو غير فاش بغيت نعطي ل فوزي المقراج ...عرفتي اشنو ؟ صبري اصحيبة ندير طليلة خفيفة ندي لمي نجية كاس من كيسان وخا مبغاتوش وخا تنزل عليا بيه لراس ماشي مشكيل فسبيل نشوف ليك داك بو الكتاف ...

فرح"كضحك" : ههههه وسيري الى ضرباتك مي نجية ماسوقيش ياربي تحشمك قدامهم ههههههه

صفاء : فاكيو لهلا يحاشمنا...سيري انا جايا "م

هزات كاس من كرطونة منين جبدو كيسان اتاي ودخلات نيشان لعند نجية تبسمات لتوبا الي شافت فيها وتبسمات تاهي جاها شك ممكن تكون هي العروس المنشودة الي غاتكون ضرتها...شافت نجية ف صفاء "

نجية : مال هاد الكاس ابنتي هههه"كضحك ضحكة صفرا بغاات تندب لصفاء حناكها لاش داخلة وصفاء ضورات وجهها جيهة رجاال من لهيه فراس صالون جالسين كيهضرو قبل ميتحط الغذا وهي تقشع زين الدين حلات فمها فيه كان كيهضر مع الحسين بيناتهم ويحك فلحيتو ويدوز على قرفادتو ويناقش بايديه ...سميمر البشرة حجبانو غلاض ملاقيين فاش كيتنيرفا فالهضرة...ماهزش عينيه باش تشوف لونهم يلاه غاتشوف وهي تنغزها نجية مع كانت واقفة حداها نيشان محسات غير بقرصة من ورا فخادها فجيهة مشايفها حد لا هادوك لا توبا ....حسات بضو طلع معاها وشحطها ريكطو فيرسو خلاها سيمو ....تا خرجات عينيها وطلعات معاها تزنيگة ولات غير تنين..."

صفاء : اعااووونممممممممم

نجية : ههههه سيري بنتي صافي هذا الي بغيت...

صفاء"دارت ليها واحد دمعة قيييييو شاف فيها عصام وهي تشوف فيه كانت شوي تقوليه احبك اجي عتقني هههه" : عمممنننمنممننن "بغات تحك القرصة متقدرش تحط ايدها بغات تبكي متصيبش الشوهة بغات تغوت تدفنها نجية تحت طابلة وتكمل تعمار اتاي فحال عمر صفاء متولدات ...بغات تعيط لمها تجيها فاطنة تعاود ليها القرصة من جيهة لاخرى ...يااااربيييي اش هاد المكتوب ...حدرات راسها غاديا وكترعد ...تا مشات لطواليط سدات عليها وبدات تركل وتغوت بدون صوت وتندب وطرش فراسها وطيح لارض تركل وتمرمغ ...بقات هكاك جهد عشرة دقايق تا سخفات وهي تحك القرصة وناضت جمعات شعرها وخرجات مشات عند فرح تقولي متقرصاتش"

فرح : مالك تعطلتي...

صفاء : شداتني مي نجية نجلس نشرب اتاي معاهم درت صواب وجيت اهى"كتسبقها البكية"

فرح : مال وجهك ؟"مكمشة فيها عينيها" اش وقع !؟ "شرعات فمها بضحكة" ههههههههههههه ضرباتك مي نجية ههههههههه هههههههههههه

صفاء"شافت فيها بنص عين" : دابا لاش كضحكي تهجريه تفوووو..

فرح : ههههههههههه"بضحكة من غصة فالقلب" راني هاجراه كثر من هكا ههههه ولله الحمد قلبتي عليها هههه

صفاء : مشينا نشوفو ليك العريس زعما ...بان ليا مباغا تعرفي والو انا الي الهة مي خاصني العصا ...

فرح : مممم وكيداير هاد العريس بسلامة .؟

صفاء"شافت فيها شحااال شافتها ممسوقاش ..." : مشتيييهش اصحيبة مشتييييييييييهش اربييييييييييييييي على زين اصحبتي...وعلى جلسة وعلى طريقة الهضرة ياربييييي معرفتش ماعرفتش تباااارك الله وصافي ...الزين ورجولة را باينة فيه على مشفت غير فهاد عشرة ثواني "حطات ايدها على قلبها" وتي را كثيير مگضر غير الجلسة جالس فشكل ريحتو عطاتني من راس الباب ...لابس يا جدك الكحل فالكحل عريض الكتاف هو هذا ....وخا كليت قرصة ففخدي ماعليش معاك حتى لموت اجمتي (صاحبتي)...

الوهابي"من بعد ما ضحكو وختمو ضحكمهم تنهد الوهابي وبدا الكلام" : ايوى سيادنا قبل متشركو طعام مع هاد الناس ...كنضن اسي عصام عارفنا لاش جايين ؟ باعتبارك خو البنت الكبير ونتا الي ربيتيها بشهادة المخنتر كيقوليا هو بوها... هاد ناس راهم جايين وقصدهم شريف طالبين ضيف الله الى قبلتو عليهم "شير الغالي" هاهو ميخصها تا خير معاه...

عصام"جمع حجبانو" : كيفاش"المخنتر طلقاتو العرقة ولا قلبه كيضرب وكيطلب ربي ميدير تا مشكيل عالاقل تيمشيو ...ضحك باستهزاء" ياكما الحاج الغاالي هو العريس ..."سمعو تحنحينة وهما يدورو جيهة زين الدين الي شاف فالوهابي وهز ايدو باش يهضر هو وشاف نيشان فوجه عصام "

زين الدين : هو العريس لا عندك ليه شي بنت الناس فات عليها الدهر ووحيدة ماتصيب ما حسن منو ..."هز فيه الغالي عينيه حس بالقجة فهاد اللحضة اش كيقول هذا "

عصام : موجودين بنات الناس وليني الحاج الغالي بمرته ماعادا لا كان شي مشكيل ولا سي البغدادي ؟

زين الدين"كمش حجبانو وتكا لور مسرح مثقل فهضرته وطلق سهام الطنز " : لا جيتي المعقول بلا زواق ولا تانوفقييت الحاج الغالي كلو مشاكيل براكة عليه العمة صابرة وجهد فوق جهدها يمرت معاه بنات الناس ؟

الوهابي"بدا يضحك غا هكاك مافهم تا خرية هههه " : هههههه اييييه هههههه

زين الدين : تبع كلامي وعطيني خو جوابي ابا عصام ..حلي الجماعة بالضحك ...

عصام : واهيلي !! سير عالله

توبا"دارت ايدها على فمها وضارت عند نجية كضحك نييت عرفاتو غايعطيه من اش ما عطا الله"

زين الدين"بنفس الوضعية مسرح ومتكي على الحايط مشتت بادرو تما...ساس فوق ركبتو بصباعو زوج وايد فيها كاس اتاي كيتنغم بيه " : الحاج الغالي صيته واااصل ولله الحمد امين ذهابية على ضهر الحاج البغدادي رحمة الله عليه ...راجل عمتي وعندو بنت الله يحفضها ليه تربى فعزو "شاف فعصام وشير بايدو كيرسم خط فالفراغ.." حفضها ليه الله من بعد شلا ولاد مشاو والي طاحو والي طيحهم هو نيت مسكين كيبغي يتمازح مع العمة كينسى راسو كيجيب ربي التيسير ويموت الدري...

فوزي : خههههههههههه اعوذ بالله ...

عصام : ماعليش ربي يجيب ليه درية والى مكتابش بنتو فيها الخير...

زين الدين"خرج عينيه بشوي " : لااا والو اخاي ديالي .. السيد "شير لغالي الي ولا وجهو حمرررر مطيشة قربو دموعو ينزلو وتقج تقج ولا باغي غير منين يتنفس" السيد كبر مبقاش يجيب الله ولى غير صلاة ودين ودارو ومرته وبنتو ...عايش معانا فداري مع العمة قايمة بالواجب جيهتو دايرة بحساب العشرة ...

عصام : الحمد لله ...

زين الدين : مابقا ديال زواج وعشرة جديدة مع بنت الناس غير يعذبها ماهي من المزوجين ماهي من المطلقين ماهي من المهجورات ...مايصلاح لزواج مايصلاح لولاد ...الله يخلي ليه بنتو

الكل : اللهم امييين "الا الغالي الي بدا يكحب تا نزلات ليه دمعة والعرق هبط ليه اما المخنتر ماااات تا زراق ليه الوجه"

عصام : اش كاين الحاج الغالي بصح هادشي ولا ؟"بضحك كيحساب ليهم زين الدين كيضحك"

الغالي"هضر بصوت مقجوج" : ا و اههههههه وشوف نتا ..."كيحك فصدرو بغا يطفي العافية"

الحسين"قرب لزين الدين" : براكة ولدي غاتقتلو..

زين الدين"كيشوف فالغالي بتخنزيرة ورجع دور وجهو جيهة الحسين بنفس النضرة" : شتي غير الموت ؟ بغيتها توخر ليه متنية متلتة بالرب المعبود ...

عصام : دابا الحاج الوهابي جيتو مرحبا بيكم ...

زين الدين."شاف فعصام وهو مزال على نفس الوضعية" الاخت ديالك سماها الله فرح ؟!"حرك ليه عصام راسو"

زين الدين : تبارك الله تبارك الله"حك لحيتو" الحاج الغالي بمتابة باها ...الحاج الغالي شرفنا وجا معايا لمقصود شريف."شير لجيهة الحسين" هذا با الحسين كبرت على ايدو ...الحاج الغالي راجل العمة .واش يكون هو العريس ؟ خايبة فتعاويدة اسي عصام ... منصيبوش نرزيو بنت الناس معاه "غمض عينيه وحلهم "هضرتي صحيحة ميليقش لختك ...

عصام"حك لحيتو" : ايييه مرحبا عارف الي كاين الله اودي. غير ضحكت...

زين الدين "رجع تقاد وشرب كاس اتاي بثقااااالة " : بالضحك وعيب عريسها يكون باها شايب ولد ربعينات يولد عشرة منها وكبر منها...ماشي بعيد يكون رافق جدها ايام الحرب ...الله يا خاي ديالي فين باغي تلوح ختك خاطرك يضرك اصاحبي.."حط ايدو على صدرو" نتا خاي ديالي وجهك وجه الخير .."طبطب على ضهر الحسين " اش كاين الوليد نشط ليا مع راسك ..

الحسين : طناااز يا ولدي "شاف فعصام" هذا ضحكو مع الحاج

فوزي : هههههههههه حق الله الى نشطتي الجو الله يعطيك صحة هذا ضحكي مع المخنتر "المخنتر مكرهش يضربو بداك طبسيل "

الغالي : اههههه "كيفك فصدايف جلابة بغا النفس" يلاه دخل فالجد اولدي الله يجعل شي بركة ههههه

زين الدين "خرج فيه عينيه الخضرين ".الله اودي ؟ بغيت ليك العز الحاج العز (اما دل راك فيه ههه) ندخلو فالصح ابا عصام ..."شاف ف عصام وحط ايدو على صدرو كيحك فيه بطلب " جابتنا الوقت والاصل الزين نطلبو ضيف الله ف كريمتكم ابا عصام ليا انا ولد البغدادي على سنة الله ورسوله .."ليا ليا ليا ليا بقات كتردد فمسامع فرح الي كانت كتسمع هي وصفاء حتى حلات فمها بشهقة اما زين الدين بالغدايد الي ركبوه ماشعرش براسو امتا قالها فهاد اللحضة حتى حس براسو السكر طلع ليه حيث معول يحط الغالي بوجهو ويخليه يعرق ويمسحو ...حتى خرجات توبا عينيها والغالي بدات الدنيا كدور بيه وصدرو كيحرق فيه ...

ف بحال هاد الجلسات كان ممكن يكون الكلام بالصواب والقاعدة كانت ممكن تكون هضرة او رشيم والي كنعنيو بيه ان الي غايخطب كيمشي يشوف البنت هو وعائلتو ويهضرو مع الناس بناءا على مقاييس الكلام والاصل كيتافقو من بعد كيسولو عليها او كيهضر معاها والى عجباتو وتفاهمو كيمشيو لمرحلة الخطبة رسمية...هادي هي العادة فزواج التقليدي...لكن زين الدين من حر الغدايد الي جمع لغالي والي عرف عليه شلااااا وشوية مؤخرا كانت كافية ويمكن مكفاهش الي دار دابا باش يشفي الغليل ديالو...كان ناوي على بلان حتى مع الاسف لقا راسو زالق فبلان مضاربش ليه حساب غير باش يشوف الغالي فاسوء حالاتو والي هي الطعن فالكرامة الدل والاهانة لابعد حدود...حالة الغالي وخا بالضحك ماتبغيهاش لعدوك ...كلام قاس ومهين يمكن يكون فالصميم يمكن مكانش خاصو يهينو كيبقى رجل كبر منو ولكن بعض الرجال الكبار كيخليوك تقلل من احترامهم لفعايلهم والغالي ضوصيه عااامر تا خنز غير شوية منو يخليك تشوفيه بنضرة اشمئزاز واكثر...

زين الدين"غير قال هضرته والجملة الاخيرة الي يمكن مكانش ضارب ليها حساب ؟! ولا ناوي عليها ولا شنو وقع بالضبط..تكا داير ايدو ورا الحسين وبجلسة شموخ رما سهامو والكرة الان عند كيف قال هو " : هذا مكان ابا عصام...

عصام"كيحك لحيتو بابتسامة خفيفة وجه بشوش مرحب بالناس" : واش ابا زين الدين نشطتي لينا الجلسة ..كاس ديال اتاي منغم ليا نعماس...

زين الدين"حدر راسو وهزو" : الله اودي..

الوهابي".حنحن محرج من الموقف حيث عرف زين الدين عطا لغالي اهانات عمرو ينساهم لانه كيعرف الغالي وفهاد اللحضة الغالي توبا الوهابي والمخنتر عارفين اش واقع ...كلشي ضرب طم فيهم لانهم عارفين زين الدين اش كيسوى الي طاح فالمقلة يتقلى" : اهههههه وا هههه "تلف معرف يضحك ولا يدخل فالجد" ايوى سيادنا اش نقولو ..والله معرفت منقول اودلي زين الدين هضر وكفا ووفا بالنسبة لمجيتنا ها اش كاين ولا اش بان ليك اسي الغاالي...

الغالي"الصمت الي حاس بيه فهاد اللحضة ربي الي عالم بيه مكرهش يتنخصص "

الحسين"نغز زين " : وتكلم الي بديتي..

زين الدين"شاف فعصام وحنحن مكمل على هضرته" : قصدنا شريف اسي عصام الحلال ميكرهو حد ...الي بان ليك ...

الحسين : شوف باها بعدا ...

المخنتر : ااا ؟ اه والي بان ليكم ولسي زين الدين الحاج "دار ايدو على حنكو زغاااب فتفكيرو تاني هههه " ..شوفو مع عصام هو الي رباها...

الوهابي : لعلمي سي عصام الي مول الكلمة ...

عصام"حرك راسو. وتقاد فالجلسة وشاف ف زين الدين عينه فعينه" : اش غانقوليك قصدكم شريف طالبين ضيف الله منردوهاش فوجهكم..صوابكم هو هذا ...نتغذاو بعدا ونكملو..

زين الدين : ماقلتي عيب ..

الوهابي : خوذ وقتك اولدي...

حرك عصام راسو وناض غامز نجية باش تنوض لكوزينة وتبعو فوزي باش يبداو يتسخرو على طوابل ناض تا المخنتر تاهو وفهاد اللحضة زين الدين شاف ف الغالي بتخنزيرة عااامرة بالشر والحقد والغل والناااار...الغالي ماهزش راسو مرة مرة كيحك صدرو يحاول يطفي ديك العافية اما الما را حدث ولا حرج بزااااف ما شرب منو كيهز راسو لفوق يسوووط ومقادرش يسوف فجيهة زين الدين بقاو نضراتو منحاصرين غير على راسو وتشوا نيييييييت ....

زين الدين"وتركيزو مخنزر فالغالي غير مبالي بالحسين الي كينغز فيه باش يتبت جبد تيليفونو ورسل ميساج لتوبا كتب فيه" : هضري مع السيدة بالصواب ديال الخطبة "رسلو ليها فالبلاصة قراتو مقالتش لا علاش لا لا كلمة وقالها صلاة عالنبي تمشي معاه تالموت هههه "

دخل عصام على فرح وصفاء الي باقي فرح لحد الان مبهووضة من هضرة زين الدين الي سمعات غير صوته باش تشوفو مزاال مشافتوش ومرداتش لبال ليه فاش كانت كطل وهو كان كيشوف فيها...كان كل همها تشوف الغالي الي عرفات انه هو الخطيب المنشود عند باها لكن الي وقع قبل قليل خلاها مبهوضة مصدومة ...حتى وقفو عليها خوتها...

عصام : واجد الغذا ؟

نجية : واجد اولدي واجد ...سيرو حيدو دوك الصينيات بينما حطيت فالطبسيل وعطي لناس يغسلو ايديهم..."حرك فوزي راسو ومشا بزربة يعطيهم طاس يغسلو ايديهم .."

عصام"شاف ففرح الي كانت مصدومة وكتحرك وجهها صفر" : اش كديري تما ؟!

فرح"لقات راسها كتدور غير بلاصتها هنا وهنا وتمشي طل من شرجم تلفات بيها لارض " : هااا ؟ والو بغيت نحط الدجاج..

صفاء : دجاج اختي يلاه يكتقلى دابا غايحطو البسطيلة هاهي مي نجية كتحط فيها سيري جيبي فرشيطات وماس وانا غانجيب طباسل...

عصام : مال وجهك صفر ؟ كاين شي مشكيل ؟

فرح : لاااا والو غير تدعقت ..."شافت فيه" ياكما بغيتي ندخل نتغذا معاكم ...عفاك نبقا غيير مع صفاء هنا

صفاء : لا غاندخل نتغذا مع مي نجية وديك السيدة وتانتي معانا"فرح عضات فمها فهاد اللحضة بغات تنطحها"

نجية : ها فاطنة جايا ودخلي معانا لبيت لاخور ..

عصام"شاف ففرح" : ناس دايرين صواب ماعليش نواجبوهم تاحد مغادي يبزز عليك شي حاجة هادي العادة وصافي..."دخل فوزي مدات ليه صفاء بلاطو فيه الطباسل وداكشي وداه الموناضة وعصام هز طباسل بسطيلة وحدة فطابلة رجال ووحدة فطابلة نجية الي التاحقات عليهم فاطنة وجلسو فالبيت لاخور مع الحاجة توبا حتى دخلات فرح لبيت هزات فيها توبا عينيها وهي تبسم ابتسامة بزز فيها حيث كتبقا اختيار زوجها وكانت مرشحة تكون ضرتها....

دخلات فرح ووجهها باقي صفر مبهوضة بالي جرا وفبالها بزااااف ديال التساؤلات اش واقع ؟ كيفاش هذاك الي هضر هو الي بغاها وهو الي قالت ليها صفاء عليه عريض الكتاف وباقي صغير ماشي شارف...زعما يكون هو الي قصد المخنتر باها ؟ اكيد لا حيث هو الي عارفة كبييير شارف وبزز منها تزوجو لدرجة هددها بيه ...ولا ربي شاف من حالها ونطق داك الشاب عتقها ولا اش واقع كلشي مبهم عندها ...لقات توبا جالسة مع نجية كيهضرو وهي تحنحن بخجل داخلة ببيجامتها فالغوز كتعكس لونها الاصهب ...جامعة شعرها بقراصة صغيرة كتبري لور ..بابتسامة ترحيب تحنات سلمات على توبا الي بادلاتها سلام عادي حيث كتبقى امراة كتاكلها نار الغيرة وماشي شي غيرة غير كتشوف بالي هادي هي الي غاتولي ضرتها وخا تقريبا قلبها بدا كيبرد من جيهة الغالي ...

فرح : سلام خالتي مرحبا بيك ...

توبا"غمضات عينيها وحلتهم كتبتاسم غاا شوي " : ترحب بيك الجنة ونعايمها بنتي ..

نجية"جلسات حداها فرح وحطات ايدها ورا ضهرها" : وهادي هي العروسة لا كتب ربي وكانت فالنصيب...

فرح"الصمت..جمعات ضحكتها وحدرات راسها"

توبا : ان شاء الله ..

نجية"شافت ففاطنة" : تبارك الله داك الشاب الي جا يخطب ففرح مافضلتو قدامك زين وسميتو زين وكلامو زين تبارك الله هضر عااامادا ضحكنا كينشط الوقت وخا خاتر كيبان تبارك الله شارب عقله ..

توبا"عرفت وتاكدت هنا بالي يحساب ليهم زين الي جا يخطب...المخنتر خربق لكلشي لفيزيبلات" : اهههه الله يكبر بيك الحاجة تانتوما ناس الخير والصواب "حطو البسطيلة والموناضا وهي تشوف ف صفاء " بنتي "جبدات من صاكها واحد بوشيط ديال زين الدين" هذا عطيه لسي عصام يعطيه لزين الدين يحتاجو..

صفاء : وااخا خالتي مرحباااا"شدات من عنها بوشيط ومشات لصالون طلات على فوزي ولا عصام لقاتهم واقفين عاطييين بالضهر كيسربيو فالطابلة وهي تلمح الحسين كيشوف فيها وفبوشيط وهي تفرنس ليه وهزات بوشيط شيرات لزين الدين..

الحسين : ولدي داك صويك صغير ديال دواك شدو من عند البنت..

زين الدين"كان كيبقشش فتيليفونو هز راسو فالحسين وشاف جيهة الباب وهز عينيه ف صفاء وهو ينوض بزربة باش متبقاش واقفة وهو يشدو من عندها وشافت فيه " : لهلا يخطيك اختي ..

صفاء"حلات فيه فمها وهزت فيه راسها حسات بعنقها ضرها " : اااا !"غمض عينيه وحلهم ك شكر وضار بزربة جلس حدا الحسين وهي باقا واقفة بلاصتها تا نغزتها القرصة الي باقا كضرها وهي تقفز تا ضار فوزي وهي تفرتح مشات لعندهم البيت وجلسات فوق حجر مها تا قفزت "

فاطنة"معرفتها منين بعتت" : اههه الهبيلة كبيدتي "خاشية ايديها لتحت كتقلب منين تقرص"

صفاء"كتحس بهر وبدات تضحك" : عهههههه امي زكاااي "عاد وعات را جالسة فوق حجر امها وهي تنوض ووقفات كتسخر عليهم فالطابلة ...كانت بسطيلة بالحوت الي تقداه المخنتر على حقو وطريقو صبح مع الخمسة صباح فالمرسى فسوق دلالة ديال الحوت وتقداه جديييد يتركل باش تعرفو را الواحد مع مصلاحتو يقدر يطيب ليك راسو تاكلو غا قدي معاه ..."

فرح : صفاء مال وجهك تزنگ ؟ اش دارت ليك مي قاطنة تاهي هههه قرصاتك ؟

صفاء"دايرة ايدها على حنكها وكتهضر معاها بشوي بيناتهم " : واااا مقرصني حد وقرصني قلباااااااااااي وقلباااااااي يا ساطة شوووووووفي ...يونس الله يرحمو اصلا مكتابش مكنتيش كتبغيه ..

فرح : ايه ولاش هاد الهضرة بسلامة؟

صفاء : خاصك تبغي هذا ولا نبغيه هو وعصام ..وديل ديماك مابغيتش نوصف را نوصف موصفت قلبي يتقسم ...بغيت غير نعطيه بوشيط هزيت راسي ضرني عنقي عينيه عطاوني لسيس ضوص حسيت بقلبي فرفر ...العرييييييييييييس زين اش قلنا ؟ العريييييس زيييييييييين واشمن زين ...توت الذي لا يموت ؟ جا لعندك ...

فرح : واش متاكدة ؟ مالك مصورتيه ازمر غير نشوفو ..

صفاء : زوج ثواني قضاو الغراض نصورو يصورني فوزي ولا عصام فالحايط يقولو ليهم غا ديكور جبناه من متحف ابو الهول...هانتي غادخلي عندهم وضروري متشوفيه ويشوفك مالو لاش جاي ...قاليك الوهابي نعتكم ليه ...على ماسمعت وعصام قاليه نهضرو بعد الغذا بعدا حبي هاز الهم لناس ميبقاوش بجوع...

فرح"عوجات فمها معرفات متقول خلات الامور تمشي كما هي عليه...سماو الله وبداو الاكل البلا لول سالاو وهزاات صفاء وفرح الطبسيل ومشات نجية قادات الدجاج وداوه تاهو ...عند الرجال كان زين الدين مكلاش بزاف من الاكل دار الصواب وصافي حيث محاملش دوك الجوج خصوصا الغاالي الي مكلا والو وعيا وهت يصبر حتى ناض على وقفتو وجهو مافيهش اللون ومحياه بادي عليه التعب وقف على طبسيل دجاج يلاه كيحط فيه عصام مزوق مقاد ثلاثة دجاج كبار محمرين وفوقهم لوز مقلي والحامض والكبادي ودغميرة معلكة وفوزي كيحط فالخبز"

الغالي"بصوت مقجوج" : سيادنا ساعة سعيدة هادي...

الوهابي : افين الحاج ياك شي باس مكاين

عصام"خرج عينيه بشوي" : الله الحاج ياك شي باس مكاين ؟ اش واقع ؟

الغالي"حط ايدو على صدرو" : الدار الكبيرة هي هادي..ماعليش سمحو ليا جاني شي غراض مالقيت جهد صوابي درتو ولد الحاج البغدادي فمقام ولدي ...والله كون ما خرج ليا مشكيل نبقا ...الله يتاوي بالخ"صرط ريقو بالغصة" بالخير ..

المخنتر : الله الحاج غا برك يكون خير ...

زين الدين"كيصغر فيه عينيه ويعاود وهو يقرب وجهو وهو بنفس النضرة لغالي والمخنتر " : شوف رهوط ..

الحسين : وجهو ماشي تال لهيه قوا عليه الشغل..

زين الدين: واحد زبل وثاني ذبان العفن "طوا لسانو كون شوي يطحنهم بجوج"

مالقا عصام ميقول سوا انه يسلم عليه ويطلب منو السماحة مواعدو باش يجي مرة اخرى فساعة الخير وحتى قاليه الوهابي بلعاني بالي واقع مشكيل عند الذهايبية وخاصو يمشي يفكو باش تفركت القضية بدون مشاكيل حيث عصام وفوزي والعيالات معندهم ذنب فهادشي ماكانو غير ناس مضيافين ومبتاسمين فوجهههم معندهم ذنب...مشا معاه عصام تالباب هو والمخنتر سلمو عليه ومشا فحالو بوجه ماشي تالهيه...ورجع عصام عندهم لصالون...

عصام : اسيادي مرحبا بيكم مرحبا بالحاج الحسين مرحبا بالحاج الوهابي ..وسي البغدادي ...

زين الدين : الله يكبر بيك

عصام "فرق فوزي الخبز وكب ليهم الموناضا الا زين الدين اكتفى بالماء المعدني" : يلاه بسم الله ..."سماو الله وشرعو فالاكل الدجاج كانت فرح بنفسها الي طيباتو ونجية صايبات البسطيلة بالحوت فدارها وداوها لفران الحومة ...المجمع فالصالون مهدن كلشي حاضر الا السيمو الي مكانش هاد النهار وطبعا التقرير غايكون عندو من عند صفصف وفرح كلشي اطابل يتحط ليه هههه سالاو الاكل وتحط ديسير الي موصلوش زين الدين حيث اغلبه كان ممنوع عليه وتا الى بغا يذوقو خاص يذوق كمية محددة و خاص يشرب دوا بنص ساعة قبل مياكل شي حاجة حلوة ...لحد الان عصام وفوزي معارفينوش ديابيتيك مي غالبا غايكونو فهمو هادشي...س

تسالا الاكل عند كلشي وتجمعات طابلة وترد اتاي يطيب بينما هضرو الرجال...

زين الدين"شاف فساعتو خاصو يتحرك لمواعيد ديالو الي اجل اغلبهم باش يجي لهاد النهار الي كان مخطط ليه والي خرج ليه حساب اخور ..حنحن وشاف جيهة عصام اما المخنتر مدازش جيهتو الي مكرهش يبوس رجليه شاف جيهة الحسين باش يهضر"

الحسين : سي عصام خاصنا نتحركو ولدي ...

عصام : مرحبا الحاج دابا تمشيو...جيتو بالخير كيف علمتكم منردهاش فوجهكم ...انا ماعليا والو هي مولات شي هي الي تقول رايها الى بغات نتفاهمو والى مبغاتش الله يجعل نصيبك اسي زين الدين حسن منها...

زين الدين : كلشي بالخاطر ...

الوهابي : خوذو وقتكم هادي غير رشمة الى تفاهمو بجوج غايكملو متفاهموش راهم ممكتابينش لا هي لا هو...

عصام : داكشي الي كاين...هي دابا عاد خرجات من واحد الخطبة مكتابتش خاصها شوية الوقت ...مزال بغاات تخدم ...

الحسين : كتقرا ؟

عصام : لا كملات عندها لاجازة وديبلوم ناوية تكمل الماستر لكن من بعد بغاات تخدم...

زين الدين"متكي ضهرو لحايط" : اللهم بارك ...

الحسين : تبارك الله مزيااان ...

المخنتر : راها صبارة ومصوابة ودرويشة الله يرضي عليها ...

الوهابي : عصام تبارك الله هو باها هو امها هو خوها وهانتوما قدامكم نتوما شهود"شير بمخنتر" هذا محطش فيها ايدو هانتا لا تقول كذبت ههههههه

المخنتر"صرطها بزز" : اخهخههههه ايييه ماكذبتيييش ههه

زين الدين"وقف شاد تيليفون حط ايدو على صدرو" : ماعليش نمشي لطوموبيل..

عصام : ايييه مرحبا"مشا معاه تا خرج مشا لسيارة ديالو حلها ودخل جبد لاباراي وعبر السكر لقاه طايح بشويي غمض عينيه كيفكر طووول ما الغاالي عايش غايبقى غير يفكر فيه خرج ليه من جنب وعرف كي خرج ولا هو مكانش مهتم بيه اصلا لهاتو القراية والخدمة ودبي على فعايلو ملي جا جلس ليه لارض وماحدو كيبحث كيخرج ليه عجب من عجايبو ولا اله الا الله ...جبد من مجر طريييف صغيير دشكلاط كلاه واحد شوي ودوز تيليفون لدراري سول على فين كاينين واش دارو وعطاوه تقرير ورسلو ليه فالايمايل ...حس براسو شوي تكالما وبكن اش الي يكالميه والغالي كيدير فالفعايل وعارفو ممشاش غير هكاك عارفو مشا لانه ماصبرش لاهانات كثر من هاكا...يلاه خرج حتى وقف عليه سيمو هاد المرة ساحي وسيمو يا عقل عليه يا ماعقلش لكن زين الدين عقل عليه "

سيمو : نتا خويا راني شايفك فشي بلاصة يا عقلت يا ما عقلت...تشاش ليا فراس اصحبي وليني "حط ايدو على دراع زين الدين الي حدر عينيه فين حط سيمو ايدو" عاقل عليك عطيتيني شي لعبة ليمونية ولا قهوية ؟ (100 درهم ههه) الله ماعقلت ...

زين الدين : محمد رضى ؟

سيمو"خرج عينيه" : نري ماكيعيط ليا شي حد بسميتي ديال الوراق من غير وكيل الملك فاش كيبغي يحكم وترمي عليه العار مي... المخزن ؟

زين الدين : المخزن عطاني خبارك...

سيمو : لاش مسول عليا ؟

زين الدين"شدو من قرفادتو وزير عليه مزيااان غير بايد وحدة سيمو تقج " : فاش هضرنا ؟

سيمو : حاس بيك باغيني نتوب ؟

زين الدين : باينة عليك ؟

سيمو : الله تانتوب تديش عليا راني مفربل فمخي يلاه ضربتني الفيقة ...يتوب عليك اعشيري...

زين الدين : شنو كيجيبك لهنا ؟

سيمو : مادام كتلقاني ونلقاك هنا فينما جيتي اذن حبيتي الدرب وطالع ليك فجوكير ..."ضار شاف فين موقف طوموبيل " ياكما نتا من الخطاب ديال لفردة!!

زين الدين"طلع حاجبو. وباقي قاجو تاتهزو رجليه" : نعام ؟

سيمو : الفردة ...فريحة ...فرح اخت عصام ختي فالرضاعة ..تا شمن رضاعة رضعات كلشي خلات ليا غا تخت هي بيضة وانا زرگ ماشي حگرة هادي!!

سيمو"طلقو كلو مجرتل وشاف فيه بنفس نضرة مطلع حاجب يقتلك غا بالخلعة..حل زين دين زوج صدفات على صدرو وطوا كمايم قميجتو يحساب ليه غايخلطو" : ارسووول الله ...نشرب غا هاد المرة عمري باقي نعاود...يااا الهي ..."بدا كيقرب ليه زين الدين وهو كيبعد هذاك يقرب ولاخور كيبعد حتى ضرب فيه وزاد دخل يحساب ليه مسالي ليه يخلطو"

سيمو"كيشير بايدو وغادي جيهة دارهم وقال" : لا تستخدم التلميحات معي أبدا.. أبهرني بجرأتك لكي لا أدهشك بغبائي ..ناااري كي الوحش ...

توبا : ياك عرفتينا لاش جايين دابا ...

فرح"حركات راسها وعلامات الخجل بدات تبان فوجهها "

توبا"شافتها كيفاش حشمانة كتبان عليها درويشة ماشي ديال تبغي واحد شارف والي اكد ليها هو باها كيفاش كان فرحان " : كنضن سمعتي شنو قال ولدي زين الدين الي هو ولد خويا وليني انا ربيتو ملي كان صغير هو وحيد عائلتو وهو وانا الي بقينا منهم ...تبارك الله ماشي غير محلات الذهب الي عندو راه قاري وواصل دكتور جراح قداش تبارك الله ...

نجية : اتبااااارك الله تا هو مصواب فهضرته وبعقلو...

توبا : بعقلوووو الى كنتي معاه مزيانة را تحطيه عالجرح يبرا...حنا دابا غير هضرنا ودوينا الى وافقتي هضري معاه والى تفاهمتو ميكون غير الخير...وتانتوما سولو علينا وعرفو الاصل ثبل من كلشي من حقكم. ..

فاطنة : ناس كتبغي غير الاصل هو معامن تناسب ...يكون خير الحاجة ملقاوش محسن منكم...

هضرة الخطبة عند العيالات كاع مكتسالي لكن عند رجاال كيهضرو فالحاجة مكتعاودش وهادشي الي وقع فور ما دخل زين الدين لقاهم موجدين فناجن القهوة ليه بحكم الوهابي الي علم عصام بالي كيشربها مسوسة ...حرك لفوزي راسو بشكر حيث هو الي حطها ليه وجلس حدا الحسين الي كانو كيهضرو حتى دخل فالهضرة نيشان ...

زين الدين"جبد من بزطامو كارت فيزيت ديالو ومدها لعصام" : جوابكم كيما كان...

الحسين : سولو على الاصل وعليه من حقكم الى كتاب والله يكمل بيخير...

عصام : الله اودي الاصل سابق وباين فالفعل...ان شاء الله نسول البنت هي لولة منصيبش نهضر ولا نحكم الى ماعطات جوابها ومادامكم مجايب الحاج الوهابي عارف اش كاين وهادشي علاش رحبنا بيكم مرحبا بسي زين الدين نورتينا..

زين الدين"كيجبد من جيبو باكية الكارو هز فيه عينيه " : يحفضك اخاي ديالي...

المخنتر : بغيتي تكمي ؟

زين الدين"دار راسو مسمعوش خلاه بلاكة تا سولو فوزي الى بغا يكمي يمشي لفوق يكمي بخاطرو وهو يهز راسو فيه وحط ايدو على صدرو" : الله ينورك ..."حرك ليه فوزي راسو وهو ينوض ومشا معاه تا طلعو لفوق سطح ممصلوحش غير بالبريك وراه فين شكرو وضار شعل الكارو وهز راسو كينفخ دخان ومتنغم دا معاه كاس القهوة لان عصام الي اقتارحها عليه بحكم كماي تاهو عرفو يبغي يتنغم بيها معاه وخا زين الدين مكمايش بزاف حدو ثلاثة السيجارات فنهار ...دوز الخط لريان الي جاوبو فالبلاصة ..." : المخنتر الخيالي ؟!

ريان : كي قلت ليك بثح مشربكة عندو دعوة فالورث باهم خلا ليهم كلشي مشبك تسلف من عند الحاج الغالي الفلوس وداير معاه يرجعهم ليه بالفايدة ...

زين الدين"غزز سنانو" :شوف هاد ولد القحبة هذا ...نهار نقتلو يتحسب عليا اجر بلاصة ذنب...

ريان"حبس الضحكة" : مهم مشاكيل كيف قلت ليك ديك المرة فاش مشيتي لعندهم لدرب هو مشكل مع ولادو بزاااف صابرين ليه فوق القياس حياتو كلها فالعسكر تقاعد وجلس لارض لدوك زوج ريال ديال الورث...

زين الدين : فعايل الفسايدية وصلونا لخزيت مع ولاد لاصل ...جهد جهدك غرق ليا القواد ...

زين الدين"بغا يسول على امهم وهو يسكت جات حشومة يسول وهو فدارهم ولا سالا معاه الاتصال ورجع كيكمي حتى صونا لعمتوو" : ديري صوابك ويلاه نتحركو ..ماتكثريش عليا الهضرة فالطريق"هز صبعو" نسالي شنو غانسالي ونهضرو...الي عطا الله عطاااه طاح الفاس فراس...يلاه.."قطع معاها وضار يكمل الكارو كيشوووف فالدنيا ريحة البحر كتعطي ...لاح الكارو عسف عليه تا طفا وهزو كيقلب فين يلوحو ميخليهش ليهم فالسطح جات عيب...بقا يقلب فين يحط حتى بان ليه واحد سطل تما نيت فيه الكارو لايحو عصام فين كيطلع يكمي ...حتى خرج من السطح ونزل لتحت نيشان بانت ليه غير طوموبيل حلها من بعيد تا وصل حل الباب ودارو فطفاية الي عندو تما ونيت كيجمع فيها زبل حتى كيلوحو ...ودخل لعندهم حنحن بصوته ولقا سلام ودخل باش يستاذن ويمشيو فحالهم...

زين الدين"لعصام": دير اللازم وسول والجواب كيما كان مرحب بيه ..والله يجيبنا فالصواب ...

فوزي : مرحبا بيكم اخويا شرفتونا"طبطب ليه زين الدين على ضهرو...بقا زين الدين كيشوف فايديه وكيقلب على بوشيطة ديالو باش يمسح بلانجيت معقم وهو يقشعو فوزي" خاصاك شي حاجة ؟

زين الدين : طواليط ؟! الله يحفضك ..."ناض فوزي مشا معاه تال طواليط شعل ليه ضو وتبسم ليه رد ليه زين الدين الشكر بحركة من راسو ودخل ليها ...فهاد الاثناء كانو جالسين العيالات بيناتهم توبا بدات كتطلق معاهم وتجاوب ويضحكو ..."

نجية : جيبي افرح كاس اتاي نقي من كوزينة

فرح : ايييه واخا .."تبسمات ليها توبا وهي تمشي خرجات من البيت سمعات صوت الرجال كيهضرو وهي توجه لكوزينة كتقلب على كرطونة الكيسان هزات الكاس وهي تخرج قشعات طواليط بابها محلول وعيب تبقا طواليط محلولة وناس كاينين وهي تمشي ليها مع جات بعيدة على صالون دخلات كتطل بغات تسدها حتى وقف عليها كيعقد ف صدافي القميجة باش يخرج ويمشيو فحالهم... هز عينيه الخضرين فيها شافت فيه وتلاقاااو العينين حتى شهقات كانت راجعة بلور شوي طيح خرج عينيه بزربة جرها لعندو قريبة ليه بزاااف يلاه غمضات بدات تغوت حبسها فيها وسد ليها فمها بايدو طاح الكاس من ايدها تهرس بيناتهم تشاااااخ "

فرح : نننن "حيد ايدو من فمها بغات تقوليه سمح ليا تخربقو ليها سلوكة " اويلي شكون نتا !! تانا سمح ليا ...

زين الدين"حسساتو لقات شفار فالدار خههه رفع حاجبو فيها ..خرج عينيه " : اسبحان الله اسمحمد....

صدفة كتجمعهم للمرة الثانية لكن المرة الاولى نقولو صدفة شفناها حنا الي كنقراو ونتمعنو بين الاسطر صدفة قدرها الله الي حسن مننا وكيشوف قبل منا...وهادي الثانية ممكن نعتابروها اول لقاء الي بصح اول لقاء غايجمعهم بزوج

فرح"تقادات فالوقفة باقي مبهوضة بيه" : سمح ليا مشفتكش..ههههه غير تخلعت ميحسابش ليا كاين شي حد هنا وتدعقت والله معرفت باش نجاوبك ....

زين الدين"شاف فيها شوي وبعد عينيه باش ميحضيش بزاف حدرهم وهو كيهضر " : موقع باس"كحاز شوي جاي خارج تا غمض عينيه شحاااال وهو يدور عندها " فرح ...

فرح"كتحرك فراسها بزربة" : ممم اه فرح ...امم نتا ...زين احم

زين الدين"حرك راسو " : زين الدين ...معرفتك خير ..مشرفين مشرفين ...

فرح"بابتسامة خجولة من الموقف الي طرا قبل قليل تاهي حادرة عينيها وريحتو كتدخل مع نيوفها فشكل ريحة دايرها كتفتن .." : شرف ليا ....مرحبا بيك وسمح ليا على شنو وقع دابا غير شفت طواليط باب محلول وسديتها ميحسابش ليا فيها سمح ليا مرة اخرى...

زين الدين : ماعليش كتوقع"شاف الزاج ديال الكاس" ردي بالك "شير ليها بصبعو ناحية الكاس الي تهرس" ...

فرح : واخا انا نجمعو ههههه تدعقت"هي را كتهضر وعينيها مقدرااتش تهزهم فيهم اما هو من الاحترام تاهو حشم يشوف فيها وخا اللحضة لولة فاش تلاقاو العينين را شافها نيت.."

زين الدين : ماعليش دا البلا والباس..حيديه بشي حاجة... بعدي ايديك وكان لا تجرحي...

فرح : واخا "تبسنات ليه وحدرت راسها ومشات كتزرب لكوزينة وجهها حمرررر بالدهشة تزنيگة الخجل الدعقة الخلعة كلشي تخلط عليها فلحضة لقات ملجأها الوحيد هي تسحب وتمشي الكوزينة مخلياه واقف ضار شاف الزاج ورجع مشا لصالون مع دخل مع نطق "

زين الدين : سي عصام ساعة سعيدة هادي ...

عصام وفوزي وقفو بزوج وقف الحسين والمخنتر والحاج الوهابي..صونا زين الدين من تيليفونو لعمتو الي غير شافت الاتصال وهي تدور عند العيالات تبسمات ليهم تاهي وناضت ..

توبا : للا نجية للا فاطنة هادي هي الوقيتة ..تشرفت بزاااف والله من قلبي بمعرفتكم الي كانت ذهب وكلامكم الصافي والقلب طيب ...والصواب الي قليل تلقا فحالو...

نجية : وايلي الحاجة جلسو شوية ونستينا ..

فاطنة : مجيتك غالية الحاجة توبا والنعم بزيارتك اختي ..

توبا"سلمات عليهم" : هههه ربي يخليك الحاجة لهلا يخطيكم ان شاء المجيات تكون ...الله يلاقينا فساعة ما حسن من هادي..."دخلات فرح من بعد مدة طويلة وهي فالكوزينة غسلات وجهها وعاودت ومشات لبيتها ورجعات وعاد دخلت باقي عليها تاثيرر الصدمة ودهشة من زين الدين الي وجهو ولقائهم عمرها متنساه وخا كان لدقائق معدودة" بنتي تهلاي فراسك ..باش مكان علمينا ويكون غير الخير .

فرح"تبسمات ليها من القلب تقولي مبتاسمة لميمتها حتى عنقاتها وباست ليها راسها وايدها" : مرحبااا بيك اخالتي وسمحي لينا الى قصرنا فصوابك ...

توبا"بقات كتشوووف للحضة فصوابها وهي تضحك بشوي بتاويل" : اهههه الله اودي ابنتي الخير والبركة ماقصرتوش من جهدكم لهلا يخطيك والله يكبر بيكم ...

سلام العيالات كيطول لكن سلام رجال زوج كلمات ماقل ودل قضاو الغراض والفاهم يفهم ديف كيقولو ...تسالم فوزي معاهم ومع زين الدين وعصام كذلك جا المخنتر مد ايدو لزين الدين من بعد ما سلم على لاخرين ...

المخنتر : ولد الحاج مرحبا بيك ان شاء الله يكون غير الخير ناس معروووفة فالبلاد ما فيها شك فاصلكم ...

زين الدين"كان غايخليه بلاكة غا حشم وماجاتش هما معارفينش بالي زين الدين جااايب خبارو حيث رفقة الغالي وبحث فبحث طاح فيه ...مد ليه غير روس صباعو دغيا وحيدهم وحرك ليه راسو ...شاف توبا وراها نجية وفاطنة وقلب بعينيه على البقية مخرجوش كانت غير توبا جايا هازا صاكها فايدها وكتقاد فشال الي مرمي على كتافها غير الي فراسها سابقاهم من بعد ماسلمات عليهم ...زين الدين سلم على عصام وفوزي " : تشرفنا بمعرفتك نتا والاخ فوزي يلاقينا ربي فساعة الخير ان شاء الله...طالبين سماحة لشنو جرا قبيلة كان ضحك منا وضحكنا هو هذا والحاج الغالي مشاكيلو كثييرة ممخليا ليه فين يحط راسو ويدير المراة الثانية...

فوزي : هههههههههههههههه

عصام : الله اودي...بيناتنا تيليفون ونتشاوفو ضروري "ضرب ليه على كتفو بجهد وتسالم معاه سلام رجولي...مشافش فرح قدامهم لحد ساعة لانه مادام جا وخطبها وعمتو شافتها غاتعطيه الخبار هادشي الي قالو وعصام ميجيبهاش وسط رجال تجلس ويشوفها حيث جاو ناس كبار هما الي كاينين ف كانت شوفة توبا كافية وكيف كنقولو الشوفة الاولى كتكون ديال العيالات...دخل الحسين ركب حداه وتوبا ركبات لور الا الوهابي الي استاذن حيث غايمشي مع المخنتر يخرجو ...

الحسين"تسنا زين حتى قاد سانتيغ وديمارا طوموبيل " : شوية نتا بعدا وجهك معجبنيش قبيلة ...

زين الدين"داى ايدو ورا لكوسان فين جالس الحسين ودور وجهو لور راجع مارش اغييغ تا خرج بسرعة من درب وفرانا قبل ميبدل فيتاس ونطق " : ربي داير تاويل ربييي شايف ...

الحسين : عبرتي ؟"حرك ليه راسو بمعنى نعم " راعي لصحتك شوي ...هانتا دخلتي فالي مكانش فالبال ولا فالحسبان...

توبا : هادشي كنتي ناويه ؟!

زين الدين "شاف فيها من مراية داير ابتسامة غيض وفقصة كان فشيء وولا فاشياء مكانش داير ليها حساب " : نوّاه ليا بيض الزغبة (على الغاالي حيث شعرو بيض ولحيتو بالشيب هههه )

غير تحركو مشاو ضار عصام وفوزي دخلو من بعد ما سلمو على الحاج الوهابي ...لقاو صفاء وفرح كيجمعو فطوابل ودنيا وجلسو بزوج حدا نجية وفاطنة تا دخل سيمو نيشان لطابلة لقاها باقي فيها اتاي والبلاطويات دالحلوة ....

سيمو : عطيني نقصي برجولة الفردة ...

صفاء : فين كنتي غاطس انت ؟

سيمو : كنت ناعس وفقت مشيت لواحد البريكول جاب الله تيسير...

فوزي : ي هودي مات فالملاح ...

سيمو : انا الي قتلتو"هز راسو ففرح " وفردة عتقي خوك...

ميقات فيه فرح وهي تمشي لكوزينة مخلياهم فالبيت حتى نطقات نجية فاتحة الحديث على الخطاب الي جاو وعلى توبا وصوابها وجلستها الهماوية وطريقتها فالكلام....

نجية : بانت ليا بنت الاصل ديك السيدة ماهيش من العيالات الگارحات كلشي بالصواب تبارك الله ...

فاطنة : لا الحق يتقال خااترة وتبسيمة بالقاعدة تبارك الله ..."شافت فعصام" اش بان ليك اولدي فهادشي ...كنعرف مجايب باك عوجة هههه

عصام"كان داير صبعو على حنكو مركز معاهم تا تبسم بجنب" : لا ناس مزيانين من الهضرة السيد شارب عقلو واااخا شي حاجة جاتني ماشي هي هاديك فالجلسة...

نجية : ولواه عاامادا طنز ليا على داك الحاج هههه اجي شتو ناض ياكما تقلق هههه

فوزي : ههههههههه. والله الى قتلني بالضحك ...

عصام : لا لا قاليك وقع شي مشكيل ماعليش اعتاذر وهادي غير مجية لولة مكاين باس...

فوزي"شاف فعصام" : اش بان ليك نتا فهادشي ؟ السيد الي جا كيبان ولد الناس دخل ليا لخاطري بعدا وخا كنشوف مزال الوقت بعدا على ماتهضر مع فرح وتشوف اش كاين ...

عصام : على ماعاود ليا الحاج الوهابي راهم ناس كبار نيت محلات ذهب وشلاا معندهم را كلشي ديال البغدادي داك زين الدين ...منصيبش نعطيهم جواب نسولو فرح ويجيو ثاني تهضر معاه ونسول عليه ...

فاطنة : رزق خويتك جا تالعندها تبارك الله ناس ديال الخير وختك را مغاديش تبقى الي جا ترجعو خايبة فسعدها وزيد عليها هضرة ناس كثيييرة ..

عصام : فاش كثيرة !؟ الي وقع ليونس مكتاب اميمتي...

نجية : فاطنة مكذباتش اولدي ...رزقها وجا لعندها عيط ليها هضر معاها بعدا هادي دارها المخنتر بوك زينة ...اييه الى مبغاتش مكاينش الي يبزز عليها وليني اولدي وجيبة فحال هادي راجل كامل مكمول عندهم الي يتم مايتحرگ ناس الخير وبعقلو ...مادام جا تال الدار را مقصوده خير فين تلقا فهاد زمان هادشي ؟! "شافت فرح داخلة." سمعتيني ابنتي ؟ الى كاين شي نصيب متفرطيش فيه فكري مزيان ولا جيتي عليا"حطات ايدها على صدرها" سمي الله وزيدي بعدا تفاهمو فالخطبة والى على يونس را ميمتو متوقفش ليك فسعدك قالتها ليك ديييك المرة غاتبقاي نقطة بيضة فحياة ولدها وهما ناس متاقيين الله عمرهم يعيبو عليك قد ماجلستي را ديري دارك...

فوزي : مشفتيهش نتي ؛؟

فرح"تفكرات طواليط واللقاء وهي تزنگ " : هااا احم اشوية

فوزي"رفع حاجبو" : تي كيفاش هادي شوية ...

صفاء : تي كيفاش هادي شوية 2

سيمو : تي كيفاش هادي شوية 3

فرح"صرطات ريقها لقاتهم كلهم كيشوفو فيها " : مالكم ؟

فوزي : مالك نتي

صفاء : مالك نتي 2

سيمو "ي لاه غايهضر نزل عليه فوزي لقرفادة تا خرجات ليه شركة ديال دجاج وكوكا من مناخرو " : يحرق تا"خنزر فيه فوزي" حگار نتا برب

فوزي : مخدم معايا نگافات هنا ؟

عصام : فين شفتيه نتي ؟!

فرح : تلاقيت بيه فاش مشيت لكوزينة نجيب لمي نجية كاس ساعاك تهرس ليا وتفرمات ليا زينة الكيسان ...

سيمو : دات الباس وليني فال زين حيث زينة جايبها بوك تفرمات عالله يتفرم هو نيت "حدر راسو كيخشي فوجهو مقدش يشوف فعصام لا يعطيه دقة يجيبو مصلي عالنبي..."

عصام"حك شنايفو بسنانو قبل مينطق" : اش بان ليك نتي فهادشي ؟! مرتاحة ولا ممرتاحاش شنو كاين ...

فرح"جلسات قريبة ليه وبدات تهضر وهي كتفكر تهديد المخنتر ليها وخوفها على خوتها " : ماعرفتش هادشي جاني فشكل غريييب...وخا ناس مزيانين مبدئيا ولكن جاني فحال هو عمرو مشافني ...

عصام : لاا على ماقال وراك ليه الحاج الوهابي وشكرك ليه ومن هادشي كامل من الناس الي باغين يتناسبو مع لاصل هو لول...

فاطنة : وبنيتي هاد زمان ولاو باغين الاصل قبل من زين ...فكري ابنيتي ولا تزربيشاي وسعدك بان ليا زين ونتي تعرفي...الوقت ديال دروك مبقاتش كي كانت دابا لا متفاهمتوش راكي بقرايتك وخوتك حداك ...سوق البنت الى عمر را كيعمر غيير مرة وحدة وزهرك الزين مكيجيش ديما ومكيجيش بزاف ...انا قلبي رتاح ليهم ...

عصام : خاطري محملش ليا داك الغالي ...

فوزي : فيه ريحة المخنتر ...

فرح"الصمت مهضراتش فقط شاغل بالها التفكير فالقرار شنو غادير مع باها الي مزال مواجهاتوش من ورا هادشي الي وقع "

صفاء"كتهضر مع سيمو بينها وبينو" : وبربي ورفضاتو تانگرضها ولوحها لجمايكا الكلب ديال صطوف...

سيمو : خلي مصاصطها تحتاجيهم ...

صفاء : هي بلقة الحماري نبان فحال فيا البرص...خلي تنساليو ونحوزوها بجوج بنتليهودي بغاات دير ليا فيها ناهد دوران تتجي شي هيام طيرو ليها...تا مرسوم داك سيد غا كتافو يبغي يضحك معاها ينشرها هههه

سيمو : بلاتي واش داك الطويل العريض الي سمر وعينيه خضرين "حركت ليه صفاء راسها وهو يتبند كي العمود تا تنشرت صفاء فوق السداري خلعها" الفردة ؟! الى سولك على الجواب قولي نيشان زوجتك نفسي ....

جالسين فمقهى شعبي....

الوهابي : تا كيفاش هادشي ؟ ياك الغالي الي كان ناوي يخطب..

المخنتر"حط كاس بزعاف من بعد ما شرب منو جغمة" : والله مبقيت فهمت والي ...فين هو الحاج ؟ هادشي الي عارف انا اش وقع ؟!

الوهابي"كيصوني ليه بدون جواب" : معرفت والله ماعرفت وتا داك ولد البغدادي مقصرش من حقو ...

المخنتر : كنا فوحلة صدقنا فوحلتين ...مصيبة كحلة يالعيادو بالله"شاف فيه" عنداك يمشي يغضب ونكحلها انا ...

الوهابي : الغاالي هذا متعرف اش تحت راسو ...

المخنتر"صونا ليه تيليفون " : الحاج الغالي هذا ...

الوهابي : وجاوب جاوب شوف هاد الحريرة فين بغات توصل ...

المخنتر"جاوب ديك الساعة" : واش الحاج تا فين زدتي ! اش واقع اسي الوهراني مفهمنا والي(والو) اش هادشي شفنا ؟!

الغالي"واقف قدام شرجم بيتو كيشوف فجردة طالع ليه بات مات دم كل مرة كيحس بالخنقة والحرقة فصدرو وشمتة كتاكل فيه نييييييت نطق بغيض وحقد وغضب عامي ليه العينين من جيهة زين الدين " : اشوف اداك نتا عليا بليمييييين وتقول بنتك قابلة ولا نسمعها بغاتو عليا بليميين تاندخلك نتا وخوتك الحبس وكلامي منعاودوش جوج شيكات الي عاطيني نعطيهم لبوليس وشي لاخور بلا منوصلو فيه الي ميعجب ...

المخنتر : يالاطيف اس وصلنا لهادشي ؟ اش ليا انا فهضرة ولد البغدادي ؟! مالي حرشتو ياك نتا جايبو معاك !؟ علمي راك جاي نتا والمراة وتقنعو عصام ولدي ويهضر الوهابي بالي مفراسي والو بالي باغي بنتي ضرة على مرتك ؟! ياك هادشي علاش تافقنا ؟!

الغاالي"حر شمتة كتدوي فيه" : هضرتي اشريييف منعاودهاش وشي لاخور ما شغلك فيه ...ماعليا بزيادة فالهضرة هضرت وصافي ...حسبها نصيحة مني والله ولحتي بنتك ليه تاتشوف الويل ...را خاااايب وبزاااف صعيب ويتكرفص ليك عليها ...والفيرما را ميسمحش ليك فالفلوس عندو شن طن وشوف غا انا فمقام باه ربيتو على ايدي وشو كيدار ليا وبغيتي بنتك يرحمها ؟! فكر فيها بالعقل بلا منهدد ولا نهضر "شير لصدرو" انا الي ممكن يفك ليك مشكيلك اما لا تكلتي على زين الدين البغدادي يغرقك كتر مانتا غارق...

المخنتر"تنهد" : دابا اشن "اشنو" الحل لهاد الوحلة ؟!

الغاالي : علم بنتك متوافقش بان ليا داك ولدك عاااجبو زين الدين ...وعلى علمي ولدك هو مول الكلمة الى قاليها اه تقول اه ...

المخنتر : ومن بعد ؟!

الغالي : من بعد خليه على مولانا وعليا"كمش عينيه باقي الحريق فصدرو" من بعد ونعلمك فين نشوفك علم الحاج الوهابي بالي انا بيخير واعتاذرت والي وقع وهضرنا فيه دابا يبقى بيناتنا ...

المخنتر : ايييه كون هاني ...الله المعين".كمل مع الوهابي ومشا نيشان لدار لقا عصام وفوزي مكاينينش وهي وصفاء كيغسلو فالي بقا من الماعن وفرح كتسيق فالدار خاوية الما وكتكرط حتى دخل وشاف فيها كتحك بتيد وجافيل الدوش وهو يعيط ليها" اجي لهنا نتي نهضر معاك...

فرح"كتشوف فيه داخل بصباطو وسخ ليها الدنيا" : وخا با غير نكمل ونجي معايا صفاء"خرجات فيه عينيها بشوي"

المخنتر : ونتي هاد صافا داخلة ليا الحالة لمدنية ولا شتها شركتني فداري...

صفاء"فالكوزينة كتسمع فيها وتجاوب بينها وبين نفسها" : اصبااااار على يماك نولي مرت ولدك ونزيدو يحطك فدار العجزة ديال الافارقة يباتو يكويو فيك ويصبحو يكويو فيك ..

فرح"وقفاتوو بايدها" : صافي صافي غا سكت هاني تابعاك..

تبعاتو تالبيت مخلية روينة تسياق والحالة حتى جلسات في نفس البلاصة وهو فالبلاصة نيت حداها

المخنتر : اش قلتي فهادو الي جاوك ؟!

فرح : مزال معرفتش ابا مكنعرفوش خاصني نهضر معاه ونشوف كيف داير ...

المخنتر : بلاش معندك لاش بغيتيه راني سولت عليه را ماشي الحاج الي كان باغيك را هو الي باغيك غير غلطت فهضرة الوهابي يحساب ليا الغالي الي بغاك(بلعاني زعما)

فرح"بشك رفعات فيه حاجبها " : مممم هااكاك...

المخنتر : الولد الي بغاك ما زينش سمعتهم ماتماش هو صعيب ايدو سابقاه فمو حار راك شتي اش دار لراجل عمتو ومرحمو بقا غا يرحمك نتي !!؟

فرح : ايه ودابا شنو كاين ؟!

المخنتر : ديري شي يومين وبلايهم بالي مبغيتيشاي وباغا تكمل قرايتك ولا خدمتك هضري بالهضرة الي ضلي تصرعي لينا بيها راسنا ...علمي خوك وخوك راه يتصرف ...

فرح"تقادت فالجلسة مزياااان وشافت فيه بكل ثقة رافعة واحد الحاجب الي صهب " : وانا لامتا غانبقا نرجع فالناس ابا ؟ ياك سوقي خوا ؟ ياك الى متزوجتش يهضرو فيا بالمنحوسة ؟! اش تبدل ابا عاد ونامس كنتي تهدد فيا وتشكر فيهم ؟! ياك قلتي ليا قبلي اش واقع دابا...

المخنتر "جهد صوته وخنزر فيها" : اش كاين دروك !؟ اش علمتك دابا ؟! شتك بغيتي تربيني ولا "وقف على جهدو وقرب ليها ثاني " ياكما بغيتيني نعاود ليك ديك الضربة "هادشي كتسمع فيه صفاء حيث انفاعل وجهد صوته مع الاسف"

فرح"شدات قرجوطتها الي مضرگة فيها القرصة ب فوندوتان بزز " : ابا تهدن را البنت كتسمع ...مابغيتش نربيك عمرك شتي الولاد يربيو الواليدين ؟! انا كنقوليك اش قلتي ليا ديك المرة ابا ...

المخنتر"غوت بجهد" : ومااااااااا تقبليش لا بغيتيه يحطك فجهنم سيري گولي قابلة ..."تم غادي ويبرگم بانت ليه دنيا عامرة ما ونص منقياه وهو يخبط صباطو بجهد ساس ليها التراب ودوز على لارض تا عمرها غيس وتنخم فالطوالة كطل عليه صفاء مشات تجري هزات برمة كانت غاتشير عليه بالفقصة والحماس الي تحمست بالغدايد خرج وسد الباب بحر جهدو"

صفاء : سير الله يغبر لمك ساس القواد اعوووو فقصني فقصني "مشات تجري لفرح لقاتها شادة راسها وكطل " مكتعرفيش تقتلي نتي ؟! دخلي ليوتيب ديري كيفية الطعن بدون ادلة والله تنشهد معاك ...

بالفقصة نسات اش سمعات تا بدات ترجع ليها الذاكرة غوبشات ففرح وهي تمشي ليها وجرتها مقربة ليها مزياااان كتحقق فيها وفالبلاصة الي شادة مع تهز طرف من تيشرت دسالها ومسحاتها ليها على غفلة بدات تبان زروقية تما وهي تخرج عينيها تا سلمو على الحايط ورجعو...

صفاء : اويلي شكون دار ليك هادشي...

فرح"دفعت ليها ايدها بجهد" : ما والو تاحد تاحد .."شافتها باقا بنفس الوضعية مخنزرة فيها " خراااا هو راك سمعتي كلشي مبقا منعاود صافي هنيني الي فيا كافيني..

صفاء : اويلي على القحبة هادشي كلو وساكتة ؟؟؟ اويلي واش كان جايب ليك داك الشارف الغيلوف وجهو كي زوك سيمو ؟ اويلي وكنتي عارفة وباغا تقبلي ؟؛

فرح"جهدات صوتها" : را هددني بعصام وفوزي والله تا يدير العجب ويدخلهم الحبس مالكي معارفاهش ؟ ماحضرتيش لشنو كان كيدير لينا !؟ اخر مرة مكانش غايغرق فوزي فواحد الكريدي وكيضحك مخاصو خير ؟! صبرنا ليه بزاااااف كلشي بسبابي ا صفاء را مكيحملش فيا الشعرة مكايحملنيش وانا عقدة فطريق خوتي الى ضرگت وجهي يعطيهم بتيساع نهار ضحك ليا زهر هاهو مات داه مولاه تا وليت نسمع الي معمري سمعت من ناس ومنو هو الي بويا مرحمنيش ...

صفاء : بلااا هاد دراما ديال الحبس جااااوبيني المقحوبة كنتي غاتقبلي بداك الشارف ؟ "خرجات فيها عينيها"

فرح"يلاه غاتجاوب من بعد ما سكتت وحدرت راسها يلاه غاتقوليها اش كانت غاتجاوب مالقات غير صفاء تهزات تا تهزات وتلاحت عليها تعض وتقمش وتخبط فيها فينما جات الدقة كاع الغدايد بردتهم فيها ديال عصام الي مشا يزهى مع شي وحدة وحسات بالخيانة وخا مابينها وبينو والو " : اااااااي اويلي مالك اح ولا راااسي وزمر وناري مالك "خرجات عينيها من حر واحد العضة عضاتها ليها فترمتها تا حولت عينيها"

صفاء"عاااضة فترمة فرح وتهضر وشي تفهمو وشي تصرط " : ععهننهععنننم دنمك هاد ترمة هتعثعثعغفف الي فرحانة بيها هاهي ...

فرح : واعوووووووووو لا لا اويلي مالك...

شداتها مطلقتها جرات ليها شعرها وجلسات فوقها تنتف وطرش وتعض وتنتف وتغوت وكان الباب خلاه داك المخنتر محلول دخل سيمو حيث مشا يدوش ويرجع عندهم لقاها كتنتف فيها مافهم والو مشا يجري بغا يفكهم وهي تعطيه صفاء دقة لحجرو تا تلوى تطوى على جوج ولا يعوگ كي الكلب ...

صفاء : ها متسوا يا شمكاااار السكايري ها متسوا يا عديم المصاصط ..

سميو : اعووووووووووووو"حول عينيه وطاح سخف تنشر ليهم تما جا يدير الخير يفك دا دقة "

صفاء"بقات تنتف فيها وتعض وطرش لحناك وهاديك تغوت وتبغي تفك منها غلبت عليها حتى طلقات منها وطاحت تاهي لارض منشورة سخفانة ميتة وفرح تاهي كتنهج شعرها تشعكك ووجهها ولا حمر خلاااص بطريش والعضان بثلاثة تنشرو فالصالون تقولي طايحين من كرمة" : اعننن امي على القوادة قالت ليك بغات شارف الله ينعل زبووووورزبابر مك القوادة...

سيمو"حال فمو وعينيه فالسقف"

صفاء"هزات صندالة وشيرات عليه بيها تا ضار جيهتها" : باقي تفك نفك لمك مصاصطك ...

فرح : الله ياخذ"كتنهج" فيك الحق

سيمو"بغا يدعي باقي كيعوگ" : قعووووووو...

صفاء"هزت راسها فيها وهضرات بتهديد" : وعليا بليمييييييييييييييييين وديري بهضرة بوك تا نوصل كلشي لعصام بالحرف ..وعليا بليمييييييييييييييين وماديريها ضد فبوك تانكري ليك ربعة شماكرية واحد منهم نقوليه بوس رجلي يبوسها...نزيدهم يغتاصبوك فدرب ميخرجش وزيدي على كلمة المنحوسة المغ تصبة ...

مسافة الطريق الي شدو نيشان وصلو لكازا وشدو طريق لعين الدياب دخل الفيلا حتى حط الحاجة توبا الي لقات ضحى يلاه جايا كانت الستة العشية دايرة الاير بودز فوذنيها شافت فزين الدين ومها والحسين وضورات وجهها تمات غاديا بلا سلام بلا كلام بواحد طريقة قليلة الادب لقات زين الدين صاعر نيت وهو يحل سانتيغ بجهد كان معول يوصل الحسين ..

الحسين. : ولدي ماشي دابا الله يرضي عليك

زين الدين"مسمعوش اصلا اش قال مشا ليها نيشان عيط بسميتها بصوته الي سمعاتو وخا طالقة الاغنية حتى ضارت لقاتو مخنزر بطريقة كتخلع ولا قلبها كيضرب " : اجي لهنا ...

ضحى"صرطات ريقها " : وو واخا "مشات لعندو عينيها كيتهربو يشوفو فيه بديك نضرة وتوبا مهضراتش حدرات راسها وزادت عارفاه هو الي غايعرف يربيها لانها فالصواب والادب زيرو " هاني ...

زين الدين"شير لحسين وامها الي مشات " : هادو حيوان كلاب ولا شنو ؟!"شير لراسو مخرج عينيه بعصبية كتبان قدامو قصيييييرة واصلة ليه لكرشو حيث هي اصلا قصيرة وهو طوييل نيت .." انا ؟! عمات ليك البصيرة ولا الاداب مكاينش ولا اش خاص عدو ربك تانتي اااا !؟

ضحى: سس سمح ليا والله غير معصبة من واحد الامتحان مدرتوش مزيان وو.

زين الدين : كون تديها فراسك وقرايتك كون طفرتيه...كون نقصتي "قرب ليها مزيان على شوي كانت غاتبول" من تقحبين فقرايتك كون وااهلييييييي.."ضرب ليها راسها ضربات خفاف كانت غاطيح غا شدت فيه وهي طلق بزربة" تكوني جايا سلمي صواااب فداري يكون حاضر ...سلمي نتي قولي غير سلام نعل جد مو هذا الي يهضر معاك وسيري قودي ...يلااااه

ضحى "طلق منها ومشات لعند الحسين سلمات عليه عينيها مغرغرين بالخلعة " : س سلام با الحسين سمح ليا ..

الحسين"غمض عينيه باش يطمنها متخافش حيث وجهها ولا صفر بالخلعة" : سيري بنتي متخافيش سيري را معصب مالخاطروش.."حركات ليه راسها وضارت شافت فزين الدين ومشات كتزرب ودموعها دايزين وقلبها بغا يسكت "

زين الدين"بقا حاضيها غاديا تزرب ونضراته ماشي غير كتخلع نضرات فشكل معصب بزاف داير ايديه على نصو صدرو كيطلع ويهبط كيفكر فالي جرا اليوم وفيها البنت الي طلات عليه بنص وجهها منساهاش والي هي فرح الي شاف فالطواليط وجهها كيفاش داير ضحكتها صوابها ديال بنت متستاهلش هادشي كامل وبين المعماعة الي دخل راسو فيها بمسبة الغالي وباها وحريرة نييييييييت تجر فيها ...هز ايديه حطهم على وجهو وتكا راسو كيشووووف فالسما دوز على وجهو وعاود تا هبط ايديه حل نص فصدايف خشا ايديه دوز على صدرو وتحنى على ركابييه كيشوف فالدنيا مضببة تا نزل الحسين جايب معاه قرعة الما ومشا ليه كيزرب...

الحسين : ولدي رخف على راسك واش ناوي طيح تاني"حل القرعة وخواها ليه على راسو نيسان بلا ميسولو وغسل ليه وجهو..."

زين الدين : glucomètre وطرف شكلاط من تما...

الحسين : اييه واخا...مشا يزرب جابهم ليه وعطاه شكلاط ذاق منو شوي حس براسو السكر كيطيح ليه وبالاعراض نيشان وصاه شنو يجيب ليه...يلاه غايعبر لراسو حل بوشيط الي فيها ريشات حتى سمع غوات توبا وضحى هز فالحسين عينيه ومشا كيزرب الحسين لعندهم اما زين الدين دخل لاباراي بالخااطر ومشا تبعو تا دخل تبع الصوت نيشان لصالون لقا توبا كتبكي وتفيق فالغالي وضحى كتبكي عند راسو والخدامة هازا الما ...

توبا : زين الدين الغالي الغالي معرفت مالو ...

زين الدين"نزل لعندو شاف وجهو وقبط ايدو قاس العرق وشاف فساعتو قلب ليه عينيه قاس عنقو ورك بصبعو كيقيس ضربات طق بينو وبين نفسو " : tachycardie(كتسمى فحالة ضربات القلب الى كانو كيضربو بقوة اكثر من العادي) non.. Normal "

توبا : نعيطو لومبيلونص "بخوف عينيها خارجين كتشوف فزين مجاوبهاش كيقلب ليه فوجهو ويقيس فالحرارة" ااا ؟

زين الدين"والله مجاوبهاش ولا قاليها اي حد قال لضحى " : تونسيوماتر tensiomètre(الي كتعبر الضغط...طارت مشات تجيبها حيث عندهم شي ثلاثة فالدار )

الحسين : ياك شي باس مكاين ؟!

زين الدين"رافع حاجبو ومخنزر حاااقد..شاف فتوبا" : شنو وقع ؟

توبا : معرفتش كان واقف دخلت ضار عندي وبغا يهضر حتى شد فصدرو كيحك فيه وعينيه خرجو فحال كيقلب عالنفس وكيقوليا تخنقت تخنقت...

الحسين : ياكما ازمة قلبية ؟

زين الدين"ملامحو خاسرين " : عند دينمو الݣلب بعدا...

الحسين : هادو اعراضها الى عرفت اولدي...

زين الدين"هز فيه عينيه ورجع شاف فالغالي تا جابت ليه الالة عبر ليه الضغط زشاف فساعتو هز تيليفون عيط لومبيلونص عطاهم سميتو باش يجيو على وجه السرعة وناض وقف شاف فالحسين و فتوبا " : crise cardiaque كتجي لناس مالين الهمة وشان جات عليهم ...الاعراض اميمتي الوجه لونه مبدل ضفار لايدين (كيكونو زرقين) .."شاف فالغالي وشير بصبعو ليه وشاف فالحسين " وجهو ابا وجهو "خرج عينيه لاقصى حد صاااعر " ...نقا من حياتي وتݣوليا crise cardiaque ؟! "تم غادي طالع فدروج باش يمشي يعالج راسو هو بعد ويسب فطريقو " البحوووووووط يا ز*** بي عشرة لضص...

"عض لسانو وقبس واحد الفاز معقلش على دينمو كيداير تا دازت ربع ساعة وجات سيارة الاسعاف من اقرب كلينيك "

يتبع...