محتوى القصة
بدات ترمش فيه بعدم فهم.خصوصا فاش قالها ليها وغمزها... قالها بواحد الجدية تحلفي عليه...جرات عليها الفراش بشوية وكمشات فيه بايدها كتصرط فريقها حتى بدات كتفتف وهادشي كاااامل حضاه فيها بادق تفصيلة...كتشوف فيه واقف مسند على الكوافوز...حك شنايفو بسنانو كيشوووف ويتيستي ردة فعلها الي بانت ليه انها تصدمت من هضرتو...
زين الدين : شنو بان ليك ؟!
فرح"بقات كتشوف فيه كتبغي تحل فمها تهضر وترجع تسدو..حتى نطقات" : مابقيتش..احم..مابقيتش غادي نتصدم..
زين الدين"عوج فمو مستهزء ضار شاف فيها من المري" : لا باينة معندي ميتسالك...
فرح"حسات بنوع من القلق" : صافي نزل انا لتحت ونتا رجع لبيتك..
زين الدين"هز حاجبو" : وايلي كااع ؟!
فرح : عافاك ازين الدين انا ممستعدة لوالو دابا خليني بخاطري عافاك ماتخلينيش نفقد الثقة فيك من جديد...انا رتاحيت ليك حيث داير ليا خاطري وحيث عطيتيني الكلمة ياك ؟ ياك قلتي ليا مغادير والو ياااك ؟"عينيها غرغرو"
زين الدين : شنو ندير ؟!
فرح"صقلت"
زين الدين"كمش عينيه وعاود السؤال بطريقة اخرى" : فين مشا بالك نتي ؟!
فرح : هاا ؟!
زين الدين : من نيتك افرح ؟ دري صغير انا ولا فعايلي فعايل ؟
فرح"تنهدات براحة" : فين غاتنعس ؟!
زين الدين : حدااك..."شافها خرجت عينيها ثاني" تهدني تهدني..ماتخافيش خليها تجي منك ماشي مني كلمتي عطيتها مكاين لاش نعاود فالهضرة وهاد المدة الي عرفتيني فيها والمشاكيل الي وقعو يخليوك تعرفيني مزيان..."سكت شحال كيشوف فيها وعاود استانف الحديث" دار عاامرة فرح ماكاين فين نبات.."شاف جيهة السداري محطوط تما حيث فبيوتة نعاس ديال رياضات القدااام ضروري ميديرو سداري فين يجلسو.." متكي تما...ماعليش صبري معايا هاد الليلة...صباح يتقضى الغراض ديال واحد الولد غادي يتختن وكل يصد باب دارو. وبلادو..."عاود اكد عليها بعينيه وقال" ماعليش تصبري هاد الليلة ؟؟
فرح"حدرت عينيها ونطقات" : و واخا...
زين الدين"هز لاباراي وتم غادي عاااااااض فنفسو بجهههد لواحد درجة على بونت يقدر يصعر عليها يخلطها تاهي غير مصبر راسو بزز فوق طاقة...نطق وهو غادي" : ماعندك مناش تخافي عاهد الله عطيتو ليك..ماعنديش كثرة الهضرة ونعاود الهضرة جوج مرات "جلس فوق السداري من بعد ما شعل الضو مادام فاقت..كتشوف فيه ضرب صبعو بستيلو باش خرج نقطة دم ويعبر سكار..ماهزش فيها عينيه بقا تا عبر لقاه مزال طايح..هز لاباراي وجمع داكشي..لبس كلاكيط فرجليه وتم خارج وقبل نطق"
زين الدين : ديري بحسابك شوي ونجي.."خرج من البيت ونزل نيشان لكوزينة متسحب لا يفيق الناس حيث كلشي عيا ونعس..حل ثلاجة جبد منها كانيط كوكا وداز لطاسة ديال سنيدة الي كيحطو مع بلاطو دالقهوة هزها بمعيلقتها وكاس خاوي وخرج طلع البيت حل الباب بشوي لقاها كيف خلاها.." نعسي فرح ونسايني...
فرح"كتشوف فيه حط كوكا والطاسة قدامو" : علاش غاتشرب كوكا ؟!
زين الدين : سي...
فرح : مالك ؟!
زين الدين "غمز بجنب حنكو" : ديابيت طايح شوية.."خوا شوية سنيدة فالكاس وخوا عليه كوكا خلطهم مزيان وتكا عليه حيد داكشي من تم حطو فوق كوافوز صغير حداه وناض مشا جيهة واحد الكوان كيحطو فيه المانطات وليزور ومخاد ديال البيت هز منو مخدة وايزار ومشا جيهة سداري وهادشي كااامل قدام عينيها..قاد بلاصتو وبقا واقف خشا ايديه تحت تيشرت كيدوز على كرشو حتى دور عنقو يمين وشمال بطرطيقة تسمعات لعندها..حيد كلاكيط من رجليه هز ليزار وتخشا فبلاصتو قاد المخدة باش يبقى متكي وشعل تيليفون حتى حول عينيه لعندها"
زين الدين : مناوياش تنعسي ؟
فرح : ونتا علاش مابغيتيش تنعس ؟!
زين الدين : نعاود نعبر ..ماديريش فبالك رتاحي مزال مافياش نعاس ومزال عندي شي خدمة نساليها..."شافها باقي كتشوف فيه ههه..حط تيليفون" فرح نعسي ورتاحي مع راسك راكي مزال عيانة من داكشي الي وقع گبيلة..ريحي راسك وخوييي راسك من الحاجة الي تخليك تفكري ولا ضرك فراسك...انا هنا معاك كلشي بخااطرك وبراااحتك والي بغيتيها تكون عندك وليك..حتى يحن مولانا..."رجع هز تيليفونو كيبقشش فيه"
فرح"حسات براااحة من هضرتو..شوية شافت رجليه ثاني وحدة موقف ركبتو ولاخرى طاويها باينة من طيارة سداري مقدوش حيث طويل عليه..." : سداري قصير عليك...
زين الدين"طل على رجليه ورجع شاف فيها" : ماعليش...
فرح : مغاديش ترتاح فيه...
زين الدين : الى مارتاحيتش نبدل البلاصة ماعليش...
فرح : فين غاتمشي ؟
زين الدين : نفرش عند باب دار...
فهاد اللحضة بالذات عرفاتو كيطنز عليها ومااا احلاها هاد المشاكل الي كيخرج منها هاد النوع من المزاح الي يخلي طعم الحياة الزوجية حلو بهاد الشكل وخا فهاد الضروف الي هما فيها زواج على ورق...شافت تا عياات مجاوباتوش بقا حاضيها تا رجعات لفراشها وحطات راسها على المخدة كتقاد فغطاها باش تستر راسها حسات بكمية رهييييبة من الخجل وهي ناعسة وهو لهيه حداها جامعهم سقف واحد لاول مرة غادي تبات هي وياه فبيت واحد الشي الي مخليها تحس بنوع من الدهشة خليي عليك الخوف وعدم الراحة الي هي فيها...دورات راسها جيهة الشرجم كتشوف فالضو الي ساني على عينيها حتى سمعاتو ناض وهي دور عينيها كتشوف فيه عاود ثاني العبار كيفاش كيتك صبعو باش يعاود العبار حتى سالا وجمع ديك لاباري من بعد مالقاه تقاد وواخا هكاك خلا كوكا وسنيدة حداه لا يعاود يطيح ثاني من يدري...قبل ميهز راسو يشوفها غمضاات عينيها باش ميلاحضش راها باقا فايقة...بقات هكاك حتى بصح داتها عينها واستسلمات للنوم...ماجات تحل عيينيها تالقاتو الصباااح وصوت الحركة جايا من برا من شرجم الي بقا مفتوح بقات شحااال كتستوعب حتى تذكرات ليلة امس وهي تنوض قافزة كتقلب عليه بعينيها لقات بلاصتو مجموعة مافيها وااالو تقولي ماباتش حداها...حتى سمعات دقان فالبباب...
صفاء : فرح انا صفاء.."حلات الباب ودخلات هازا بلاطو الفطور فايدها" اتي صباح الخير هههه كي صبحتي..
فرح : الحمد لله"كتقلب بعينيها وراها" زين الدييين ؟
صفاء : مشاو يجيبو الفرملي الي غايطهر داك الولد..گاليا باش ندي ليك الفطور را مغاديش يتعطل اصلا خاص يطهروه دغيا فالحال بارد...
فرح"حركات ليها راسها وهي تنوض خرجات من البيت مشات نيسان لدوش توضات حيث كانت غيها العادة شهرية داكشي علاش مكانتش كتصلي حتى لامس فاش عامت عاد توضات منها...رجعات لبيت لقاتها كتكب ليها فاتاي.." : بغيت عباية
صفاء : بغيتي تصلي؟..واخا تسناي نجيبها ليك اصلا باقي ماحولتش ليك حوايجك هنا...
فرح : غير خليهم فالبيت غادي نرجع ليه...
صفاء : غاتوليو تنعسو لتحت ؟"على نيتها"
فرح : شكون حنا ؟!
صفاء"كترمش" : نتي وزين الدين !!!
فرح : احم ا لا غايرجع لبيتو وانا غانبقى فبيتي لتحت...
صفاء : اوييييييييييل شيطاااااااان"غوتات تا قفزت فرح..نسات راسها وبدات تولول عهعع" يا تي اش سايرة تگولي يا هاد الباااانت ؟! شتي نتي عاد دابا هبلتي اوفيسييلمون..تا را التفربيل جاري فالدم اصحبي...ياويلي..
فرح"صرطات ريقها وهي تشد ف بيجامتها كمشت فيها بايدها ووجها تزنگ"
صفاء"ضربتها الفيقة ل اش قالت" : هاااء اربي اش تنقول انا اااش اويلي ههههه ااااه ايوى صافي خليهم تما ولا بقاي هنا حسن مكااالمي وزوين ورتاحيتي فيه ياك ؟! ايوى صافي انا غانهبط نجيب ليك عباية باش تصلي ومن بعد تفطري..."ماخلاتها تاتجاوب دغيا طارت خرجت من البيت غاديا وتولول هههههه.."
فهاد الاثناء وصلات سيارة زين الدين الي كان برفقتو علي والحسين الي كان لور مع واحد زوج رجال فراملية وقف قدام الباب ونزلو جميع..منهم زين الدين الي كان بفوقية گري وبلغة فنفس اللون ديال فوقية...شاف جيهة علي وقال...
زين الدين : ماعليش تدخل معاهم لدار الحاجة (زاهية حيث مابغاتش يطهروه فدارو فضلات يطهر فدارها ويبقى فيها باش ميديرش صداع وتبرزيط ليهم وفنفس الوقت يرتاح فدارهم)..غير دخل كاينين دراري تما الحاجة وبنتها هنا فالدار.
علي : يلاه اسيادي مرحبا تفضلو معايا.."حدرو راسهم وتبعو علي لدار الزاهية اما زين الدين بقا شوي كيهضر مع الحسين حتى دخل الحسين لدار لداخل وهو مشا بعد كيهضر فالتيليفون فامور الخدمة الي خلاها مدة طويلة.وفنفس الوقت خذا برهة باش يكمي الكارو على خاطرو...
علي : مرحبا الحاج احمد مرحباا تفضل..
احمد : الى كان ممكن توجد لينا الوليد حيث مزال تابعانا واحد الطهارة را قلتها لزين الدين...
علي : ايه انا نقولها لدراري يجيبو ياك هنا مزيان ؟!
احمد : مزياان الى كان كبير كيف قلتو ليا خاصني شي واحد يعاوني يشدو معايا راك عارف يتحرك هكا ولا هكا نصدق ضارب ليه العرق...
علي : كون هاني"خلاهم فالصالون ومشا وصل على دراري الي كانو جالسين كيفطرو على واحد القصرية ديال بركوكش"
علي : باقي شي ولا صطتو فديك القصرية كي ديما..
مراد : فلتي ابا علي واحد بركوكش بزيت اركان والعسل الحر تبقى تاكل تايهزوك مرابعة...
علي : نعل ولديك تشهي فيا هكاك...نوضو شي واحد فيكم يعيط لولد يجيبو ونتا اسيمو دي لفراملية واحد صينية اتاي والحلوة بينما يوجد دري...تحرك نتا ووليد الله يرضي عليكم...
سيمو : هي الي متعاود.."ناض على وقفتو مشا هو ووليد دخلو لدار زين الدين نيشان لعند مو نجية لقاها موجدة بلاطو اتاي وطبسيل الحلوة مشكلة...هز وليد بلاجو وسيمو طبسيل حيث كبير ديال طاوس...غادي وليد ويكشط فرجليه مع لابس غير كلاكيط حيث لابس تيشرت وسروال وسيمو كيكره ديك كشط كشط ديال رجلين هههه"
سيمو : اصحبي قاد مشيتك ونتا من صباااح وانا نسمع كشط كشط المنغيغة فربلتيها...وقاد مشيتك اصحبي تا مالك تقول فاطر بالتبن فازگ را كتعصبني هاد القضية...
وليد : واش مكاميش نتا ؟! بغيتي طلع بيا نهارك ولا مالك ؟!
سيمو : حبس من كشط..
وليد : سير سبقني معندي مندير ليك فراقشي كبار والدنيا هنا حجر منصيبش...
سيمو"سبقو كيبرگم" : يلاطيف كشط كشط كشط كشط كشط
وليد ؛ شكون تايكشط دابا ؟!
سيمو : يخ راسو كي المقلمة...
دخلو الصينية لرجال الي جاو لقاوهم كيوجدو فالعدة باش غايطهرو الولد..قالو السلام ودخلو حطو الطبسيل والصينية وقف وليد تا كب ليهم اتاي مدو ليهم...
وليد : بسم الله الحاج..
احمد : بسم الله...فين زين الدين ؟!
وليد ؛ هاهو شوي ويجي كيهضر فالتيليفون عندو شي خدمة..
احمد"شاف ف سيمو ورجع شاف فوليد" : قاليا الولد كبير تعطل فالطهارة ياك ؟
وليد : وايييه راه كاين"شافو كيشوف ف سيمو"
احمد : هو هذا ؟!
وليد"ضار عند سيمو الي حط طبسيل الحلوة فطابلة لهيه من بعد ما فرقها..تبسم بجنب بحركة شيطااانية من شحاال هادي مابقا دار هاد الفعايل وحيث هو وسيمو توغلو فصداقتهم تا تعاشرو مزيان فما فيها بااااس يذوقو من فعايلو...ضار عند احمد" اش بان ليك..
احمد"على نيتو ضار عند صاحبو" : اش بان ليك اتجاني ؟! كبر بزااف
تجاني : وايه معرت مالو تعطل ؟!
وليد : النقص المادي والخوف..امو عندها غير هو غير كتبغي تديه يطهر كيبدا يبكي وترجعو هو عينيها الحاج منقوليكش اش دايرة عليه ومعاه..."بان ليه سيمو بغا يخرج" بلاتي سيمو تعالى...ايوى هذا الحال وبقا هكاك كل مرة يقول نطهر نطهر تا بقا لهاد الوقت ههههه...
احمد : واخا قوليه يمشي يلبس شي فوقية ويحيد سروال وعيط لزين الدين يحضر...
وليد : الى حضر غايخاف الحاج"هبط لوذنين الفرملي وهضر ليه فيهم بقا كيهضر وسيمو مافاهم والو"
احمد : هههههه اش نقوليك اولدي الله يعطيك عقل ههه واخا عيط لشي حد يعاونك واجي نقضيو ليه الغراض...
وليد : سيمو عيط لمراد ولا ريان دابا..."مشا سيمو لبيت لاخور لقى غير ريان عيط ليه تا تمو جاييين بزوج"
ريان : هاني اش حب الخاطر الحاج...
احمد : شد معاه هاد الولد نقضيو الغراض"ضار عند تجاني" يلاه اسيدي بسم الله ؟!
تجاني : يلاه توكل
سيمو : كوفاش ؟!
وليد : اجي عاوني "غمزو وشير ليه لجيهة سيمو"
ريان"شاف فوليد وضار شاف فسيمو ورجع شاف فوليد الي غمزو وشير ليه جيهة سيمو وهو يبدا يفرنس" : اهاااااا اااااااهااااا شي قافية من قوافيك الحريمي ؟!
وليد : لبدها معايا وخلييييينا نعيشو النشاط نديو منعاودو..
ريان : ايييه علاش لا.."حك نيفو وتم غادي بشوي ووليد كذلك وسيمو كيشوف فيهم جايين ليه مافهم والو كيشوف فيهم كيقربو ليه ويشوف فالفراملية كيوجدو فالعدة تا ناض احمد كيمسح فشي حاجة بالمعقم"
سيمو : اش كاين ؟ لاش جايين ليا ؟
وليد : الحاج سمي الله غير جبد ها الولد هو هذا..."ماحتال يهضر سيمو ولا يفرتح مالقا فين يديرها بزربة نقز ريان شدو من دراعو ووليد كذلك بغا ينقز مالقا كيف يدير بجهد وليد وريان حتاو عليه هزوه مرااابعة"
سيمو : وتااا لاااا وريح اصحبي من الضحك الباسل ولاااا ريح اش كدير الحبس تا ريح...مال دينمكم تفربل ليكم المخ...وماشي انا اصحبي ماشي انااا ولااا..."بدا يغوت عليهم وينقز"
احمد : حطو اولدي فوق الطابلة ونتا شدو من لور ونتا فرق ليه رجليه...
سيمو"خرج عينيه" : يا لااااش اخوييي"كيبغي يبعدهم ووالو حاكمينة ريان حابس ضحكة بزز خايف لا يفشل ويصدق طالقو اما وليد خلاااص الس شاف وجهو يقول را بصح غايطهروه والفرملي لقاه تاهو طالقها تسرح" وااا صحبي راني مطهر والله تا مطهر كاع ماعاقل وطهروني...
احمد : ماعاقلش وعرفتيهم طهروك ؟!
وليد : تا را غير خايف الحاج غير قضي...
سيمو"كيبغي يتركل مالقا كيف يدير ولا وجهو بيض ههه...هز راسو ف وليد" : فين كنتي تعرف مي فيييييين اولد الحرام فين المصلگط ؟ معرفتك غا ونامس بغيتي تخرج فيا الشيب الي مخرجوهش فيا عشراني ديال درب...وااااااااععععع وزين الداااااااااااااااااين وماشي انا مااااشي انا احجر العافية را البرهوش الي غابر انا راني مفوت را طهرت وقضيت بيه الغراضات اولاد لحراااام..
ريان"غا سمع قضيت بيه الغراضات وهو يتفرشخ بالضحك" : ههههههههههههههههههههههههههههههههههههههههههههه
وليد : سكت الله يمسخ مك خهههههه...
سيمو : وعقعقعقعقعقتقت على رقبتي لا مطهر...
احمد : هاحنا غانشوفو..
سيمو"كااااايتهز تايتهز ويهز معاه وليد وريان ويتحط كايبغي ينقز ليهم مكيلقا كيف يدير ولا يهتهت ماعرف اش كيقول ولا غير كيهضر وصافي خصوصا شافهم كيشوفو فيه بنضرة جدية وتجاني هاز واحد المقص غا شافو وهما يحوالو ليه العينين" : اتهننتنننتههنتتهنننهتتهنعتن. ؟؟
ريان : باش هضر هذا ؟
وليد : كيدير روديماري ههههههههههههههههههههه اربي الحبيب..
احمد : جيب ليه شي فوقية...
سيمو : عيط لزين الدين را لابسها قضي معاه الغراض...
احمد : وزين الدين راني طهرتو فاش كان صغير وكنت مع واحد الفرملي يلاه بادي معاه انا الي شديتو لباه تا طهرو سي الفاطمي الله يرحمو...
سيمو : اش بان ليك تمشي عند الفاطمي نديك عندو بايدي...اااا ؟! واااااااااعووووووووك عوك اولاد لحرااااام بغاو يقتلوني...
تجاني : عيط لشي حد يجيب ليه فوقية وسربي حيد السروال اولدي ماتخافش كون راجل وخلينا نكملو ليك السنة ولدي الله يرضي عليك...
سيمو : انا سميتي سميرة...
احمد : حيد ليه اولدي سروال"حابس ضحكة" هههه حيد
سيمو"خرج عينيه تا خرجهم ورجع ردهم ورجع خرجهم ورجع ردهم.." : نتا باغي تشوف العجب الحاج ياك ؟ باغي تشوف الي ميعجبك وهادي ماهكاكش ..والفوقية من فوق ؟...بلا متشوف فيا راني كنتقيا عليك فالحقيقة هادشي ماهكاكش...
ماتفك مسكين تا ولا يقول را صافي هادي بصح وغايطهروني وجهو تبدلو فيه اللوان مابقاش غسر بيض...مع طلقوه طارو يجريو فرتحو قبل لا يبدا يعصي فينما جات يعطي خلاوه يبرگم خرج من الصالون خلاه الفراملية ميتين بالضحك وحتى خرج عاد بدا يسب من سمطة لتحت مكاين غالله يعطيك صحيحتك هههه
سيمو : الله ينعل القحبة يمكاكم باني قوادون...تفوووو..طيرونا مني خلعة."مشا لدوش الي تما سد عليه وحط سروالو طل على المعلم ديالو" اححح اميمتي كانو غايرزيوك فيا يا مشعللني...
كمل زين الدين الهضرة فالتيليفون ومشا دخل لدار لقا زاهية واقفة هي وبنتها الي شافتو وحدرات راسها حشمانة من الجيست الي دار معاهم...
زين الدين : واجد ؟!
زاهية : واجد اولدي غير ديه...
زين الدين"شاف فالولد" : شنو عمران تاراجلييت ؟!
عمران"قاتلو الخوف" : غايضروني ؟!
زين الدين"تحنى لمستواه" : شنو هضرت معاك البارح"دوز ليه على حنكو ومسح ليه واحد شوية الماكلة بقا ليه فجنب"
عمران : رجال مكيخافوش كيصبرو ويعضو فالصبر...
زين الدين"جر ليه نيفو" : كون راجل ودير بكلامي تفاهمنا ؟!؟
عمران"تبسم ليه وحرك راسو...وقف زين الدين بان ليه مراد وعيط ليه يديه ليهم..جا مراد خذاه معاه ورجع زين الدين حدر راسو تمشى باش يطلع لفوق داز من حدا صالون سمع صوت الناس الي كانو حاضرين منهم نعيمة وبنتها ومنير وعبد العالي والمحجوب وام هاني اما مرات علي ومرات ولدها مشاو صباح بكري خذاهم اسامة وخوه ولاد علي...بانت ليه صفاء نازلة هازة فايدها بلاطو...
زين الدين : فرح مزيانة ؟!
صفاء : مزياانة فاقت قبيييلة فطرات سولاتني عليك قلت ليها خرجتي تجيب الفرملي...
زين الدين"حرك راسو وطلع لبيت دق الباب تا سمع صوتها وحل الباب بشوي طل عليها لقاها كتهز فشي حوايج " : صباح الخير الفرحة ديالي...
فرح"بقات كتشوف فيه بديك الفوقية كي جا فيها فشكل" : احم صباح الخيير.."بجنية" كي صبحتي شوية ؟!
زين الدين"سد الباب وراه وتقدم ناحيتها..حط ايديه على كتافها بحركة خلاتها ماتقفزش.." : تشطنتي عليا ؟"كيحك ليها على دراعها"...
فرح"تزنگت من هضرتو وحركتو على كتفها" : بقا بالي معاك البارح قلتي ليا طاح ليك سكر...
زين الدين : ولله الحمد..هادشي عادي عندي ماديريش فبالك..رتاحي ليا نتي وديها فصحتك نتي مايخصني خير..."صونا ليه تيليفونو جبدو من جيبو وكان لابد مايجاوب" الحاج البشير ؟!!
البشير"رئيس الموارد البشرية" : دكتور البغدادي سمح ليا عاودت الاتصال ولكن ضروري خاصك تحضر لاسومين بخوشين لاجتماع نتا والحاج زياني...عندنا شي مشاكيل هنا..
زين الدين : الحاج علي يحضر مايحتاجش انا...
البشير : ماعليش ولكن شي صلاحيات خاصك نتا تسني عليهم ميمكنش سي نو غانوقعو فشي مشاكيل..
زين الدين"زفر بتعب..دار صباعو بين عينيه كيمسد فيهم" : شوف مع اسلام ولا البنت شنو عندي ونشوف كيفاش نحضر معاكم...من بعد ونهضر معاك الحاج...
البشير : وخا دكتور سمح لينا على الازعاج...
زين الدين : الله اودي"قطع معاه وخشا تيليفون فجيب الفوقية كيشوف فلارض بتفكييير قبل مايدور راسو لعندها"
فرح : عندك الخدمة ياااك ؟!"عينيها غرغرو"
زين الدين : نقضي الغراض من هنا ماعليش...
فرح"كتحرك فراسها ب لا" : لا لا مايمكنش تخلي خدمتك وتبقى هنا وانا هنا ومتقدرش تخليني..وانا شاداك هنا خليتك تبقى وتخلي كلشي وراك وتبقى معايا هنا وانا ماقادراش نمشي لشي بلاصة من غير هنا اهى اهى ...عاااافاك سمح ليا ازين الدين سمح ليا بزااااف كرفصتك معايا
زين الدين"عقد حجبانو" : شش فرح !! علاش البكا دابا "بغا يشدها وهي تبعد ايديها"
فرح : انا ديييييما فيا المشاكيل ديما كنعذب معايا عباد الله دييييما اهى اهى"هزات فيه عينيها" والله مالخاطري والله مالخاطري خايفة نمشي معاك ونتفكر الي ضرني خايفة نمشي ونعاود نرجع البلاصة فين تضريت ماعرفتش علاش ماعرفتش كنخاف يتعاود ليا كلشي من جديد اهى اهى كنخاااااف ازين كنخاف حتى من الوجوه الي ضروني نشوفهم ومنصبرش ماعرفتش اشنو هادشي ماعرفتش..خايفة يتعاود كلشي ويرجع ليا كلشي خايفة نتيق ونتصدم تاني اهى اهر خاااايفة خااااايفةةةة ممممم"ماحسات حتى لقاتو جرها لعندو معنقها تا حط راسها على صدرو كيهدن فيها ويبوس فشعرها وخا حس بيها كترعد ليه بين ايديه ماقدرش يطلقها وهي كتبكي"
زين الدين : ششش تهدني براكة عليك من البكا..الي واقع ليك ماشي لخاطرك وماعمرك وقفتي ليا فطريقي..ماعليش هادشي مامطولش عطي لراسك راحة وحطي ثقتك فيا..انا معاك فينما كنتي..ديري فبالك البلاصة الي ماتبغيهاش بخاطرك مكاين الي يوصلك ليها..الى ماجيتي نتي وبغيتي نديك ليها..
فرح"كتهضر وترعد" : ب بغيييت بغيييت يحيد مني هادشي اهى اهى .."خرجات راسها من صدرو كتمسح فعينيها" انا قابلة نهضر مع هذاك الطبيب الي جا عندي ديك المرة...
حلات عويناتها البرييئين العسليين وخا كيبانو قهويين بحكم صغر سنها...دورات راسها كترمش فيهم وتشوف مزال النعاس طاغي عليها حيث يلاه فاقت من بعد نومة عمييييقة فحضن خوها عصام...هزات ايديها كتلعب بيهم وتغرغر ولا تبرگم بشي هضرة غير مفهومة بقات كتلعب وتراري حتى توگضات وهي دور راسها بانت ليها طابلة فيها صينية اتاي والكيسان وطبعا كاي طفل صغير كيبغي يمشي ليهم نيشان يهزهم ويستكشف...تقلباات على كرشها ووقفات ركابيها باش توقف وتمشي تجريييي لصينية وبالفعل داكشي الي دارت وقفات تا وقفت مادة ايديها وتسرح فصبيعاتها وتمد شنيفاتها غاديا وتخطوي برجليها ...
فرح : ايااااا ايااااا ههههههه...تي تي (اتاي) مماما صااام.."مدات ايدها وهي تهز كاس خاوي كتشوف فيه وضحك وتعضو بفمها وتهزو تلعب بيه بايدها وتيشر بيه...لاحتو فلارض تا تهرس تشتت كضحاااااك عجبها الحال...مكفاهاش الكاس وهي تمشي لصينية جراتها لعندها وهي تجرها مزيان تلاحتها فلارض كاااملة تشتات بدات كتنقز فبلاصتها وتضحك"
فرح : ههههههههههه اغغغ عههههههههه...
حتى تم جاي كيجري...طل عليها لقاها كتشطح وتصفق بايديها وصينية مشتتة البراد تحل وتخوا والكيسان الي كان فيهم شوية اتاي تشتتو وكاين الي تهرس...غابان ليه داكشي وبانت ليه فرح كحل بالعما المعمي وهي علاش كان يقلب...
المخنتر : ااااش درتي امسخوطة الواليدين ؟
فرح"ضارت عندو ومدات ليه ايديها" : اهههههههه بب ببباا...
المحنتر : يبويك عليا االملگطة"غوت تا قفزات وجمعت الضحكة" يعطيك مصيبة طيرك عليا المسخوطة الملگطة ابنت لحرام اش درتي اش درتي "مشا ليها جمعها معاها بشحطة لايديها تصورو ليها ايديه فيهم تا تسمرت كترمش فيه والبكية طالعة طالعة طالعة يلاه بغات تبكي وهو يغوت وعاود ضربها وهي تسرط البكية وجهها ولا صفررر خافت لواحد درجة الدموع ماقدرتش تنزلهم وهي فهاد السن ديال ثلا سنوات...
فرح : ممممم مم "نزلو دموع يجرييييييو راسهم وهي تحدر عينيها كتحل فمها وتعاود تسدو" همم ماماااا..
المخنتر : الله يجليك عليا كي تجلات مك الله يغبر ليكم الشقف"دفل ليها فوجهها" اتفووو على تريكة دخلت عليا بالخساير يخ..."يلاه بغا يدور وهو يخرج فعصام الي دخل مخرج عينيه كيشوف فيها كيفاش واقفة وهو كيفاش دفل عليها" دوز حيد عليا هاد المصيبة ولا خرجو قودو عليا من الدار...
عصام"عينيه خارجين فيه" : واش دفلتي عليها ؟؟؟ واااااااااش دفلتي عليها ولا جاب ليا الله"هي غا سمعات صوت عصام فحال الى لقات الحماية دير مابغات وماتخااااافش طلقات حلوقها الي كانت حابسة تا زعزعات ليه قلبو من لداخل ماشعرش براسو امتا طاااار عليها هزها بين دراعو كتبكييييي وتشد فيه كاع داكشي الي حبيت طلقاتو عليه يلاه بغا يسكتها وهو يلمح اثار شحطة ديال ليدين على دراعها حمرييييين ضار عندو مكحل بالعما حطها ومشا ليه يجري شنق عليه كان ديك ساعة كبر دار سبعطاش لعام وطوال وبان كبر من عمرو" علااااااش ضربتيييييها ؟؟
المخنتر"جمع ليه ايديه ودفعو" : حيد عليا ابلقواد لا نعاود ليك ترابي..ولا خرج غبر عليا نتا وياها الله يگطع سلعتكم اتفووو.."عاود شنق عليه ماحاسش براسو اش كيدير كيشوف فيه شوفة العما"
عصام : وماااااااااتحطش عليها ايدك ماتحطهاااااااااااااش "غوت تا سكتات فرح بالخلعة كترمش وعويناتها يقطرو بدموع شدات فكسوتها كمشت فيها...
بغواتو الي بقا كيتفكر حتى سمع صوت الباب تحل كان جالس كيكمي فالكارو داير صبعو على لحيتو كيدوز عليها حتى سمع صوت الباب دور راسو عاقد حجبانو قال فخاطرو يكون فوزي الي جا ماينكرش بالي حس بشي حاجة فرفراات ليه فقلبو فرح ولكن مابغاش يبين الفرحة...دار راسو ماردش البال ومتسوقش حتى وقف عليه عند الباب وجهو من جيهة حنكو تورم جاي معصب ومراضيش لاقصى درجة...
المخنتر : شفتي الحالة فين وصلنا مع الخانزة ديال ختك ؟!
عصام"هز راسو.وعقد حجبانو بحال الى كان خاصو نيييت المخنتر تا دور وجهو عندو مغوبش" : اش جابك نتا لهنا ؟؟؟
المخنتر"لاح ترازة والميكا الي كان جايب" : جابتني الكلبة ديال ختك جابتني بنت القوادة الي ولدات القحبة ديال مك الي ماعرفت اصلها منين جابتها... مالقاتكش راجل اما تحبس والديها فالدار وعطيها منين ناعطا الله وليني انا والد الكلاب ورعاويييييين فداري"نفس طريقة الماضي تكررات فهاد اللحضة فحال الى جاه مع الوقت المناسب غير ذكر اسمها ونعتو ليها ناض على جهدو ووقفتو دفع الكاس ديال القهوة وطابلة وطار شنق عليه بكل قوته"
عصام"قرب ليه وجهو عند وجهو" : شكون گلتي ؟ ااااا ؟ باشمن فم كتهضر الرعوااااني هو ؟ باشمن صفة كتهضر ولا نهضر انا ونعلمك بفعايلك ؟ يحساب ليك انا كنت مامديها فوالو فداكشي الي درتي لهاد مها ؟ لهاد الام الي هزت راسها وغبرت وجهها عليك ؟ علاش غاتبقى علاااااااااااااااااش مع "كيغوت لربي الي خلقو" وااااااحد مدخل عليها صحابو يتعداو عليها مع القواد الي دخلتيه لبيتكم وهي ناعسة ناااافسة بنتها حداها وزيدتيه يحط ليها حوايجها حيث مبلط مجايب خبار لدنيا باش طلع سكرتك وتزها مع راسك ؟"دفعو بجهد تا جا لارض وبدا يخبط فصدرو بضربات كيتسمعو لمخنتر" كون ما ضربتو وضربتك كون تكرفص عليها"عينيه جغمو بالدم خلا المخنتر مخرج عينيه" الله ياخذ فيك الحق خرج قود عليا خرااااااااااااااج...
حمل ثقيييييييل مهزوز على الكتاف يهزوه الجبال والرجال...العقل نضج قبل الوقت طفولة تمحات..بلاصتها المسؤولية تهزات...الشخصية قوات والقلب قصاح والكبدة تربات على زوج الناس رضيعة فعمر شهرين فحجر طفل تحطات وطفل الخمس سنين على ضهرو ركب...من طفل فعمر 13 بين ليلة وضحاها لقا راسو اب وام واخ كبير ومسؤول على جوج لحمات عض فالصبر ورفض ان شي حد يشاركهم فتربيتهم حتى من جدو الي كان ممكن يعاونو فيهم ومايخصو حتى خير مارضاش يشاركو فتربيتهم...هز همومهم ومشاكيلهم وصرف عليهم..شراب المرار والعذاب باش ميخصهم تاحاجة..حتى كبرو واصبحو على ماهم عليييه...عصام...
عصام : يلاه تگلع لاعندك شي هزو من داك البيت وخرج تقود عليا من هنا العتبة تعتبها نهارك كحل والسخط نديه من عندك نديه حسب خطاويك ودردب عليا من هنا"غوت تا مشا ليه صوت" يلاااااه....
ماعاودش رد عليه بحتى كلمة بقاو عينيه خارجين حتى ناض بلهلا يطريه ليه ومشا لبيت كيخطوي مصدوم من ردة فعل عصام...هاد الاخير الي وجهو مابقاش كيتفسر من فرط الاعصاب الي دارهم فيه حتى خلاه كينهج وجناوح منخرو كيفرفرو...دخل ليه بقا فيه جهد نص ساعة وهو فيه حتى تم خارج هاز صاك فايديه اشنو فيه وشنو هاز يعلم الله...ماضارش جيهة عصام الي كان واقف ليه ضارب تخنزيرة مع عينين مجغمين بالدم...خرج مخلي الباب محلول غادي ويعتر لا يشدو عصام ولا يقول شي حاجة..داعقاه الصدمة والدهشة وخا كان عارف ان عصام عرف المشكيل وشنو واقع لكن ماتصورش لهاد الدرجة يكون عارف التفصيل الكامل وهو فسن صغيرة...
مع خرج تبعو عصام سد الباب بجهد ورجع دخل تلاح فوق السدار داير راسو بين ايديه حس بيه كيزدح يزدح من فرط الاعصاب الي خرجهم فباه...رجع كيدوز على جبهتو ونواضرو بماساج عالله ينقص عليه داك الصداع رهيب الي جاه لكن ماقضى فيه والو...اول حاجة بانت ليه هي جوان الي يقدر ينفعو لانه يزيد شوي ممكن يدير فراسو شي عجب من كثرة العصبية الي فيه...هز سوارتو وخرج ركب فالموطور وزاد نيشان...فالطريق كيدوز فلابيل لصطوف...
صطوف : كفاش الخو هانية...
عصام : دويرة ديال ازمور خاوية ولا باقين فيها دار ؟!
صطوف : لا خوات يلاه جات الميمة صباح علاش ؟
عصام : انا دايز عندك عطيني ساروت محتاج نتكوانا تما مع راسي...
صطوف : صافي دوز نتحرك معاك تانا تم...
عصام"هلل عليه صاعر" : ااالقلااااوي محتاج نتكوانا مع راسي ماشي معاك ينعل بو مك الحبس...
صطوف"عرفو ماشي تالهيه ": القواد سمح لينا...صافي دوز عند الحاجة لدار غاتعطيك هي الساروت انا مريح حاضي رزقي...قطع انا غانهضر معاها تهبطهم ليك..
زاد فسرعة الموطور وقلب دورة لدرب لاخور وصل باب دار صطوف دق وهي تخرج ليه اخت صطوف خذا من عندها ساروت ورجع كسيرا نيشان لازمور وصل لدار او البارطما ديال صطوف خلا الموطور عند العساس وطلع لدار دخل والتيليفون فوذنيه كايهضر لاح ساروت ومشا تلاح فوق السداري من بعد ما سالا المكالمة حط راسو على المخدة وهز راسو الي بغا يتشق...هز تيليفون مشا نيشان لميساجات الواتس الي خلاهم معلقين...منهم ديال صفاء...
صفاء : عصام كيف بقيتي ؟! انا غذا غادي نرجع لجديدة مع مي وخويا...قلت لمي غادير صدقة على قبل الحانوت قالت ليا حتى نجي وتشوف..تهلى فراسك..
عصام"بقا كيشوووف فالميساج كيقرا ويعاود..فلاخر رسل ليها" : ان شاء الله.."رجع كيقرا ميساجات بان ليه ديال فوزي مافكرش يدخل ليه كاع خلاه معلق...بقا يبقشش يبقشش حتى صونا ليه فايدو". فينك ! هاني جاي..."لاح التيليفون وناض خرج من الدار نزل لتحت عند باب العمارة لقى واحد الولد واقف هاز فيايده واحد ساشية ديال الكاغط ووحدة اخرى غير شافو جا لعندو يجري...
هو"مدهم ليه" : الخلاص من بعد اخاي عصام مابيناتناش..."حرك ليه راسو شد من عندو دوك الساشيات ورجع لدار حطهم مشا نيشان لفيترينا جبد كاس وجبد من ثلاجة مكعبات ثلج...خرج من ساشية قرعة ديال الشراب كبيرة...وقرعة ديال كوكا...وباكية شيبس وباكية ريگليز وخمسة دراهم ديال زريعة بيضة...حط كلشي فوق طابلة قادو هز التيليفون شعل اغنية درجة درجة ديال شاب بلال نقص منها مشا لجيبو جبد واحد الجوان موجدو رجع لطابلة وجلس قبل مايشعل كب ليه كاس مزجو بكوكا من بعد ما دار فيه الثلج...شرب منو جغمة وجر من السيجارة الي شعل جرة وحدة وهااااااز راسو حس بداكشي كيسرح ليه طالع حس بواحد نغمة فشكااااال...قبل ميخرج دخان من فمو تسمع صوت الدقان فالباب دور راسو عاقد حجبانو مستغرب شكون يجي زعما صطوف ؟ مايديرهاش حيث عارفو باغي يريح مع راسو لكن شكون الي جا...طفا الجوان فطفاية ساط الدخان الي بقا يلگلگ ليه لداخل ههه...حل الباب وهو يهز حاجبو...
عصام : مرحبا !!!
ليرد عليه الصوت بالاهلا وسهلا وبالمرحبا والاهلا بمن زارنا ونورنا وييييين هالغيبة الطويلة..لنا مدة طوييييييلة لم نرى بعضنا...وهل هو الوقت المناسب لنسترجع الايام الي مرت بيننا..ونسم علينا الهوى هههه
عصام"شير براسو عاطي الاوكي بالدخول"....
الغوات ديالو كان كاسر دنيا شادو وليد من لور و مراد معاون من لهيه...وحتى ريان تاهو معاون مفيكسييينو وخا دار ليه البنج...بقاو معاه حتى كمل ليه الفرملي...عاد رسل زين الدين سيمو باش يعلمهم بالي سالاو ليه بالفرحة ديال مو وجداه ماحسوش براسهم امتا زغرتو ومع شرجم ديال البيت فين كاينة فرح محلول غا سمعت تزغريتة وهي دور كانت معاها صفاء نيت...
تسلات طهارة وتحط الغذا الي هو قصرية الحجام كاين الي كيدير كسكسو بالتفاية على حقها وطريقها كيف دارو فالدار وتبعوها لحم بالبرقوق..هزو شي قصاري داوهم لجامع وشي داوه لشي عائلات وراتهم زاهية لزين الدين الي هز القصريات فطوموبيل لور بمساعدة الدراري وعلي تا وصلوهم لناس وهادي كانت الصدقة الثانية واهم صدقة خاصها تدار...وبهاكا زين الدين وفا بكلمتو لزاهية وتكلف ليها بكلشي كيخص طهارة...تغذاو الناس وتجمعات الدار من بعد ما خصص نساء الي جاو دارو لدار الميناج لتحت بلا ميوصلو الفوق على قبل فرح...من ديك الساعة ما طل عليها حيث تشغل لكن كل مرة كيوصي صفاء ماتبعدش من عليها تبقى معاها فقط فاش كتحس بالانزعاج كتهبط تقضي شي حاجة وتخليها وتا فرح كتحاول جاهدة تأقلم وتولف على هاد الحياة جديدة الي اختارت او الي حتمات عليها ضروفها ونفسيتها تختارها...وصل الوقت الي الكل خاصو يمشي فحالو طلعات نجية وفاطنة سلمو على فرح ودعاو معاها بالشفاء وصلح الاحوال...
المحجوب"شد ايدياتها" : تهلاي فراسك اكبيدتي تهلاي ورجعي ليا فرح القديمة...عافا بنيتي سمحي ليا...
فرح"تحدرات وحطات راسها على ايديه تا هز ايدو دوز بيها على شعرها بدون ماتكلم كانت الحركة كافية ترجم المعنى.."
المحجوب : ماكرهتش ترجعي معايا وليني خاطرك ابنتي وفين رتاح ديريه..الله يرضي عليك لا باقيشاي تقلقي وتمشي انا راضي عليك لا تحرگنيش فگليبي...ماتمرضينيش عليك ابنتي..
فرح"دورات راسها تا باستو فايديه"
المحجوب : تهلاي فراسك راني غير نصيب الوجيبة ونرجع لعندك هنا..لگيتي الصحة عيااات اما مانحيد من هنا تاتولي لباس..."رجعات باستو وناضت وقفات شافت جيهة خالها بنص عين"
ع.العالي : تهلاي فراسك ابنتي..دابا نرجعو نتشاوفو ونتعرف عليك كثر.."هز ايدو بشوي ربت ليها على كتفها بزربة وهي تبعد خلاتو يشوف..ماالقا ميقول سوى ينزل راسو ويدور الكرسي ديال باه الي بقا كيشوف فيها تا ضار خرج ودخلت مرات خالها سلمات عليها حابسة البكية على حالها..وكذلك هناء..
بقات صفاء وسيمو.كيتوادعو معاها قبل مينزلو باش كلشي يمشي...
صفاء"عنقاتها ودموع فعينيها" : عافاك شوفي كيفاش ديري وخليني نتواصل معاك...ماتغيبيش عليا اختي الله يخليك..
فرح"هزات راسها فارقة العناق وبلا متشوف فيها حدرات عينيها" : ماعرفتش ماحاساش براسي باغية تيليفون...مم "هزات فيها عينيها وهزات كتفها بمعنى هذا جهدي وماشي لخاطري..."
صفاء"نزلو دموعها يجرييو مسحتهم بزربة وحركات ليها راسها" : وخا الي بغا خاطرك ديريه..انا غانشوف كيفاش نهضر مع خويا زين الدين ونسول عليك من عندو...
سيمو"عنقها" : ختي تهلاي فراسك الى لقينا وقت نجيو نشوفوك ضروري..."بقا شحااال معنقها مساخيش بيها مساخينش يفرقوها الثلاثي المقرب الاصدقاء الحقيقيين...ماكرهوش ترجع فرح ويرجعو لايامهم الخوالي...بقاو شحال وهما كيتوادعو حتى خرجو ونزلو لتحت لقاو نجية واقفة مع زين الدين...
نجية : الله يرضي على ولدي الى ما صبر معاها عارفااااك تفوتها وعارفا مانهز هم وليني خاطري مايصيبش مايوصي عليها...لا ديرهاشاي مني قلة الصواب وليني حاول تخليها تجمع شمل را هذا الله عوينة وضربتهم...
زين الدين : من جيهتي تهنااي...ماشين معاها درجة درجة بالخاطر والقاعدة تايحن الله...
فاطنة : شوف كي دير وديها لهيه تانتا لا تفرطشاي فخدمتك..
زين الدين : يكون خير ان شاء الله...
المحجوب"هز عينيه فزين الدين" : الله يرضي عليك اولدي تهلى فيها خليتها عندك امانة وخا عاارف اش كاين بلا منوصي..."باس ليه ايدو وراسو وطمنو بعينيه"
جاو دراري سلمو عليه كاملين ربت عليهم وباس راسهم ك شكر ليهم على وقفتهم معاه...فالاخير توخر مراد مخليهم بداو يركبو باش يتيسرو...
مراد : المهم انا غذا فالصباح غانمشي عند الوليدة نشوفها...
زين الدين : تحرك ل فارماسي الي گلتي ليا هو لول من بعد تحرك لعندها...جيب ليا سمية مولاه وسمية الفارماسي من بعد نعلمك شنو تصرف...
مراد : وعمي ؟!
زين الدين : عاطي تيساع ؟"جاوب مراد ب اه" ماعندنا بيه غراض..تيسر قضي شنو وصيتك وبيناتنا الهضرة من بعد...
مراد : واخا ان شاء الله..
تسالم معاه وبقا واااقف خاشي ايديه فجياب الفوقية تا ركبو وتانسطالاو فبلايصهم حيث وصى الدراري يوصلوهم حتى لجديدة...ديماراو سيارات رجع ريان هو لول تا خرج من درب تبعو علي وتبعو وليد ومراد...حتى غبرو الطوموببلات وهو يدور دخل لدار غير سد الباب مشا جيهة السقاية والحوض الوسط ووقف هز عينيه فالفوق جيهة البيت ديالها...تنهد وهو ييضرب الدورة ومشا طلع لعندها دق الباب تا سمع صوتها وهو يدخل...
زين الدين"طل عليها لقاها لابسة بيجامة ساتان وواقفة قدام شرجم" : شنو غاتبقاي فالبيت ؟"شافت فيه بعدم فهم"الدنيا خوات تحركي فدارك براحتك...
حسات بهضرتو بهاد طريقة فشكل حسات بيه كيقوليها دنيا امااان وخرجي تحركي فدارك يعني ولات دارها حتى هي حسات براسها بالي ولات عندها شي حاجة وهي تحت الامان شي حاجة ديالتها دير فيها مابغات...وخا النفسية مريضة الا انها كتلاحظ خصوصا عندها مشكيل ازمة الثقة وانكسار الخاطر كيخليها تلاحظ بزاااف كل واحد لان الي داز عليها ماشي ساهل...بقات كتشوف فيه واقف كيشوف فيها بعينين عامرين حب من جيهتها وخوف عليها...
فرح : داااريييي"نطقاتها بصوت منخفض مطولاها"...
زين الدين : دااارك الفرحة ديالي..."شير ليها جيهة الباب" شنو تحركي معايا نوريك الدار ؟!
فرح"بقات كدلك فايديها بتوتر باغا تمشي معاه وفنفس الوقت مترددة حسات بالرهبة كتجي وتمشي..بدات تصرط فريقها بغات تغلب على الخوف وتوتر..جمعات نفس تاجمعتها وهي طلقها ورجعات شافت فيه" : احم واخا...
زين الدين : اجي..."مسحات ايديها من العرق فبيجامتها ومشات تالبسات بانطوفتها ...خرج من البيت ضار شعل ضو ديال الطوالة الي عاليسر وليمن وبدا ليها باول صالون الي كان حدا البيت دخل ليه وشعل الضو مع كان المغرب وبدا الحال يضلام..." هذا فحالة كانت شي مناسبة ولا ضياف الله الى جاو...مزال كيما هو..مافكرتش نبدل فيه...خليت الاصل نشم فيه ريحة الواليدين...
فرح"كتشوف فيه صالون طويييل مافيهش العرض بزاف مفرش فراش بلدي بالموبرا لولة الي كانو دايرينها فالاصفر والاسود بقات احتافض بيها...فيه مخاد كثار وشراجم كانو فحال دخيلات شبيك ديالهم بلدي...باقين بيبانهم ديال عود صغير...وزربية بخدمة ليد مفرشة على طوله..."
زين الدين"شافها كتشوف فزربية يمكن عجباتها" : الزربية خدمة الميمة..
فرح"هزات فيه عينيها وحركات راسها " : جداك ؟...
زين الدين : تت الوليدة كنعيط ليها الميمة...
فرح : زويينة...
زين الدين"هز ايدو بشوي وهي تقفز وهاد الحركة كتزيد تقلقو من انها عاشت شي حاجة خلاتها تخاف وخا نقصات منها لكن مرة مرة كترجع ليها" : شش ماتخافيش"حط ايدو على دراعها دوز عليه...خرجو من صالون ودوزها لبيت صغير اول مرة يحلو من بعد مدة طوييييلة..دفع الباب ديال العود وحلو طل عليه هو لول فيه زوج سدادر وماريو فالحايط..." فين كنت كنبات انا وختي صغيرة ...
فرح"شافت فيه" : شامة..
زين الدين"حرك راسو ورجع شاف فالبيت" : ماتت فعمر 7 ans ..."عوج فمو"...ماطولناش بزاف وتحركنا لكازا...دار الوليد مشروع لهيه ورجع الاصل.بطبيعة الحال الاصل كازا وخا تولدت هنا وكبرت هنا...
فرح : اشنو احم..شامة "هزات ايدها كتحك فجبهتها بحرج"
زين الدين"شاف فيها ورجع شاف قدامو بالضبط جيهة السري ديال ختو...ضيق عينيه بتفكييير الي رجعو لماااضي ايام الطفولة واليوم الحزيييين..."
زين الدين : با بااا..."كيدق فالباب ديال البيت كانو ناعسين كانت الساعة ثالثة بعد منتصف الليل...بقا يدق حتى تحل الباب وخرج باه كيدير فنضاضرو..."
ع.الله : اش كاين اولدي مالك ؟!
زين الدين : با ختي شامة كترجع...
ع.الله : ياك لباس مالها ؟! "ضار جيهة مرتو" فاطيمة...
فاطمة"ناضت" : ياك لباس الحاج اش واقع ؟!
ع.الله : نوضي شوفي شامة قاليك كترجع شوفي مالها..
فاطمة"ناضت على وقفتها تا تحل شعرها ونزل سالفها على طولتو فايت خصرها كحلللل مشات كتجري خشات رجليها فصندالة وخرجات لقات زين الدين و عبد الله سبقو وطلعو الفوق...دخلات عليهم لقاتها متكية وكترجع فالكشاكش..." : اويلي بسم الله عليك ابنتي مالك...
شامة"كتبكي شادة كرشها" : اهى اهى اينا كرشيييي...
فاطمة : اش ضرك ابنتي فيها ؟!
زين الدين : كالت دلاع عند با عزوز بزااف...
ع.الله : عزوز الي كيبيع الدلاع ؟ ولاش تاكلوه عندو...
زين الدين : لصقات عليه ابا مابغيتش نخسر ليها خاطرها...
فاطمة"ضارت عندو" : اويلي يا ولدي زعما راك بعقلك ترد ليها البال من هادشي ودلاع سخون را صعيب عليها...
ع.الله : ماوقع والو افاطيمة راكي عارفاه معاها كيداير ميبغيش يخصر ليها خاطرها وهي الي شافتها تلصق عليها...نزلي شوفي ماتصايبي ليها دابا يفوتها الحال...
فاطيمة: وخا اجي بقا معاها انا نازلة نوجد ليها شوية العشوب على الله يفوتها الحال..."ماتسناهاش تاتقولها لقات طار لعندها وجلس حداها وهي شادة كرشها تا حط ايدو على ايديها..اما فاطيمة نزلات تجرييي لكوزينة هزات البصلة شلضاتها فكسرونة صغيرة زادت عليها شوية زعتر والما خلااهم يتبخو تا بقا غير شوييية الما طفات عليه وزادت عليه شوية زيت العود وهزات الخليط طلعاتو تجري عطاتها تشرب منو قاست ليها جبهتها لقاتها طااااااايبة...
فاطيمة : ياربيييي سخووونة...
زين الدين : عطيها شي حاجة ليها..."وصاتو شنو يجيب ونزل يجرييييي جبد من ثلاجة الما بااارد خواه فبانيو هز واحد زيف من زيوفة الي تم غطسو فالبانيو باش كي يطلع يكون زيف برد ويستغل الوقت...وطلع يجرييييي لبيت عطاها البانيو فيه زيف عصراتو شوييي وحطاتو ليها على جبهتها وهي تقفز
شامة : زين الدييييين اهى اهى"مدات ليه ايديها" اجي حداياااا...
زين الدين : هاني.."مشا جلس حداها وهي سخاين تقلب وتشقلب فيها..حتى كتعض على سنانها وتقفقف...شدات ليه فايدو وهي تزيررر عليه حس بايديها فحال جمر بين ايدو....شاف فباه" با شنو نديرو ليها ؟!
عبد الله : ماتخافش اولدي هاهي شوي وتنعس عادي ماتخافش غير هو مرة اخرى لا باقيش تديها تاكل داكشي الله يرضي عليك...
عاودات تقيات تاني من جديد وعاودات شرباتها ثاني دوك العشوب وهي تحس براسها تهدنات والسخانة هبطات ليها...بقا زين الدين شاد ليها فايدها وهي مكمشة فيه ومرة مرة كتهز فيه راسها الى تحرك ماكتخليهش يتململ من حداها...من نهار وعات وزين الدين هو عقلها كيلعب معاها كيدير ليها خاطر خاطرها غير ماتقلقش ليه ولا تبكي لدرجة ديييييما كيسمح فحقو فشردها هي...مكاينش الي مكيعرفش زين الدين وشامة وخا صغر منو ب سبع سنوات ديما هي وياه خارجين...
فاطمة : باقي فيك الوجع ابنتي ؟!
شامة"حركات راسها ب لا"
ع.الله : نزلات ليها سخانة"قلبها بايديه" لواه الحمد لله...
فاطمة : الحمد لله..."هبطات راسها باستهاةفجبهتها" نعسي ابنتي صباح ندير ليك العشوب تاني وماتبقايش مزال تاكلي شي حاجة ماهياش وخا ؟!
شامة"حركات راسها وشافت فزين الدين" : حابيبي"كتقوليه حابيبي" نعس حدايا عافاك...
زين الدين : هاني معاك...
فاطمة : صافي نتا رد ليها البال الله يرضي عليك الى رجعات تاني عطيها الما تشرب والى طلعت ليها سخانة عيط ليا نعاود نشوفها.."هزات البانيو وكسرونة" يلاه رجعي نعسي وتانتا كبيدتي ...تصبحو على خير...
خرجات هي وعبد الله من بعد ما اطمأنو عليها وتاكدو ان الحرارة نزلات...خرجو من البيت وخلاوه حداها...رجع تقاد فالفراش بجنبها...جر الغطا عليها هز ليها راسها وحطو فوق صدرو"
شامة"تبسمات وهي متكية" : غذا غانمشيو لموسم هههه
زين الدين : لا عيانة حتى تبراي...
شامة"بتذمر" : لاااا علااااش اهى اهى ياك قلتي ليا نمشيييو تقولها لبا وتديييني علاش اهى...
زين الدين : راكي عيانة بزاف وبا غادي يعاير مايبيغيش نمشيو كون كان با جدي نمشيو معاه...شوفي شنو دار ليا فاش عرفني خليتك كليتي دلاع !!!
شامة : اهى اهى حرام علييييك كذبتي عليا كذبتي عليااا اهى اهى عاافاك ديني نشوف الموسم عافاك والله مناكل شي حاجة...
زين الدين : وخا رتاحي وصباح نشوفو..."بقا معاها تانسعات ليه فحضنو مابغاش ينعس بقا كيقيثها كيلقاها دافية ويرجع يتكا حاضي سقف وهي وسط حضنو حتى الحال بدا يصبح يلاه بغات دوز بيه عينيه مع ديك ستة صباح حتى ناضت
شامة "عصرات عينيها": اعععععععععععععع اييييييييييي "شوي تا خرجتهم وهما يتقلبو تا ولاو بيضييييين"
زين الدين"الما برد ليه فركابي من منضرها بديك الطريقة الي تقلبو بيها. عينيها " : شامة !!!..."غمضات عينيها تاني كيحس بيها كتنخض بين ايديه...حتى بدات تهدن رويدا رويدا" عافاك اش ضارك ثاني...
شامة"رجعو عينيها عاديين وبدات تبكي" : ااااييييي اهى اهى كرشييي..."شوي حتى رجعات كتقيا مالقا كي يدير مد ليها تريكوه تقيات فيه تا شبعت داكشي مرااار فمرار حتى بدات كتقيا فحال القهوة وذاتها بدات ترجففففف تا شك واش شي كريز هاديك الي شدتها.."
زين الدين : شامة مالك...
شامة"بقات تقيا تقيا حتى حطات راسها عليه كترعددد ايد فكرشها وايد مزيرة على ايدو وراسها على صدرو..." : مابقاتش كضرني كرشيييي...
زين الدين : بصح ؟!"حط ايدو على جبهتها لقاها مگلااااااصياااا بزاااف وهو على نيتو فرح" هههههههه مابقاتش فيك سخانة بردتي...
شامة"عينيها بداو يتسدو" : مممم مافياااش...هههه...
بقات هكاك كتسد فعينيها وتحلهم حتى سدتهم وزيراات على ايدو الي حس بيها كترعد ترعد ترعد تا حبسااااااات...رجع قاد ليها راسها بغا تايشد فيها نعاس ..
زين الدين : نعسي باش صباح نشوف با الى بغا نديك الموسم وخا مريضة ندي ختي ولكن مانشري ليك والو...باش نرجعو ونلقاو ميمة موجدة لينا مسمن بالبصلة وزعتر...واتاي الي كيعجبك وانا قهوة معطرة ياك..."حط ايدو على حنكها كيقيس الحرارة الي وصاتو مو عليها لقاها باردة مثلجة...تبسم بفرحة ان الحرارة نزلات لكن لا يدري مالذي حدث بالضبط...الحمام الي كان فوق سطح الدار مبيت حتى طااار تشتت فالسما...كانت واقفة فاطمة فالكوزينة كتوجد الفطور ليها باش تخليه وطلع تشوفها كي بقات حتى طاح الكاس بين ايديها لارض وهي تهز تال سما وتحطت...
فاطمة : ياربي الحبيييب خلعني..فففف"هزات دوك الشقوفة نقات دنيا وهي طلع لعندهم باش تشوفها مع حلت الباب لقاتهم معانقين هي فحضنو مخشية وهو مدور عليها ايدو...غا تحل الباب وحل عينيه" نعستوو هههه..كي بقات "مشات ليها كتقلبها لقاتها باردة لواحد درجة تخلع" ويلي بردات بزاااف ؟..شامة كبيدة ديالي فيقي ابنتي نعطيك دوا..شامة..شااامة..
زين الدين"هبط راسو لعندها" : ماسخيتيش بيا ؟ واخا فيقي تفطري...شامة..
فاطمة"جمعات ضحكة" : ويلي بسم الله عليك ابنتي فيقي.."كتفيق فيها وتقيس وتبغي تبعدها لاصقة ليه فحضنو...كتفيق فيها ووالو" شاااامة..اويلي بسم الله عليك شاااامة...شااامة"تسقط الدم من وجهها شافت فزين الدين" حيدها من عليك نشوفها بنتيييي شامة شااامة...
زين الدين"كيسوف فمو الي وجهها ولا بيض وفختو الي بقات مخشية فيه...بعدها عليه وايديها مدورة على ايديه كيحرك فيها ويعيط تا طلع باه لعندهم لقاهم كيفيقو فيها فاطمة عينيها خارجين وزين الدين يفيق"
ع.الله : امالكم ياك لباس.."مشا لعندها قاس ليها راسها لقاها باردة هبط بايديه لحناكها كلشي بارد فحال بارة الثلج تا قلب ليها الوريد لقا كلشي متوقف" الله اكبر الله اكبر...
زين الدين"هز عينيه حمرييين ف فرح الي عينيها غرغرو تا نزلو دموعها" : دااااها ليا ربي بين ايديا...
حل الباب يشوف شكون الي جا مدارش فبالو ان شي حد غايجي لعندو هو حيث الدار ماشي ديالو يحساب ليه بالي شي حد جا يشوف شكون جا حيث صطوف موصي بزاف الي يحضي ليه الدار...مع حل الباب هز حاجبو كيشوف فيها دايرة ايديها على جنابها وكضحك عادتها هي عادتها كتعطيها غالضحك من ايام قصايرها معاهم وهي هي ماتبدلتش تا فاش كيحلو عليها الباب كيلقاوها بنفس الوضعية باش لقاها عصام دابا...غا هو تبدلات على كي كانت قطعات شعرها قصييير بزاف ولابسة ضراعية فحال جلابة من دوك ديال 250 درهم فالشيبي فيها رسمة الوسط وجه امراة سمراء...
هي : وااااا العيصووومي هاااو هههههههه
عصام"حدر راسو مبسم بجنب..هي هي عمرها تبدل" : فتيحة..حسبي هادي دازت...
فتيحة"هزات جلابة تال عند خصرها وعوجات وقفتها وغمزاتو" : هاااااهاااو المرة جايا تقسم ليا راس ولاااو...تا غا تحلف على الي جا تعطيه منين ماعطاك الله ماهداكش الله تنقص شوية من جهد ؟! شوف شعر راسك كي شاب ونتا باقي هوك ؟!
عصام : ونتي تبتي ؟!
فتيحة"خبطات صدرها" : حق ربي لا شراب حبستو سنين هادي وليني باقي كناكل القطعة هههههههههههههههههههههههههه
عصام"دور راسو لهيه ملاقي ميقول ليها عارفها هبيلة هارب الفرخ وحزق من وراه" : مشاكيل...
فتيحة : رخف النفس وينقصو المشاكيل
عصام"ضار عندها مطلع حاجبو مخنزر" : اش بغيتي ؟
فتيحة : هبط حاجبك وفش عينيك ونقوليك اش جابني تجيني فراس انا الي شفتك داخل وعقلت على c90 الي يحلف ونتا تحلف ولا بغيتي تبدلو...
عصام : ونتي اش مشا ليك ...
فتيحة"بحزن مصطنع" : مشا عليا راجل الخامس..
عصام : فاش عينك الحبس ؟
فتيحة : الراجل السادس ههههههههههههههههههه"تلاحت عليه عنقاتو" تا طلقها تسرح ونتا ديما مقرب دير بق...واش ديما اخويي عاقد دوك الحجبان ومشكيل غلاض كون كانو قتبان كون خيطو لينا شي تريكو فالكحل لبسو فاش نتفرق على راجل السادس...
عصام"ماكرهش ينطح ملتها تاتلصق وليني مكيعرفوووووش كيفاش كدير ليهم تا كيحشمو يلصقوها مع اقرب حايط وغير عصام اما صطوف كان ديما كيعيط ليها طلع ليه السكرة ويزها معاها.." : واش دينمك غبرتي تا غبرتي وجيتي تفرعي ليا الكر ؟
فتيحة"دفعاتو ودخلات كتعيوج بداك الزوك الي ماتبدلش" : علاه نتا عندك الاكرور "ضارت عندو وهي تم راجعة بزربة موقفة ايديها" هعععههعهههههههه صافي صافي استشمح ههههه تانا استسمح..وشتييييي تبقى تخلع فيا كيطيح ليا حرف من الكلافيي ففمي...
عصام : فتيييييحة خرجي تقودي على عدو ربي...
فتيحة : هادي هي توحشتك ؟
عصام : لاش نتوحشك ؟!
فتيحة : باش نقوليك حتى انا توحشتك وهو صراحة توحشت نسكر معاك وليني عفا الله"هبطات عينيها لقطعة الي كان موجد والكاس الي ميلونجاه بكوكا هزاتو كتشمشم" تا را شحااااال هادي بيني وبين هاد العبق المزهر...ايهاي هاااااي القطعة ديال الله يحسن العوان...
عصام"زفر بنفاذ صبر" : ياااربي الصبر...
فتيحة : عنداك دير بق ...
عصام : فتيحة تقودي...
فتيحة : لمن نقود ؟ لقيت تقواد لدوا ندخل فلوس مع راسي كون راني دايرة لباس ومزلگة ذهوبات فايدي وكاريا ستة ديور ونهضر مع الكراي على الفلوس وايديا يزغرتو بذهوبات وسايگة واحد كاتكات ونطلع لتركيا واحد سيمانة نفوج مع كري..ولا ضوباااي...كوراني وصلت لراجل العاشر وولد خمسة وعشرين عام يصدق ليا لدوام...
عصام"هز ايديه وحطهم فوق راسو كيمشط فيه بعدم صبر ويسوط يسوط" : ففففففففففففف....
فتيحة : كون عرفتك باقي تسوط كون جبت معايا واحد المجمر من صباح وانا معاه زندت انا وهو حلف...
عصام"خرج عينيه بعصبية" : سيري الحبس من هنا لا نسوط فعدو ربك مالخاطريش هاد نهار لضحك الباسل ديالك...
فتيحة : يااااك احياااة...
عصام"عض لسانو وتم غادي ماد ايديه ليها بغا يجمع ليها الوجه يخلطو وهي تكحاز " : وفوتي ملتي فوووووتي الحبس سيري خرجي تانتكالما ورجعي...
فتيحة : صافي صافي هاني نسكت..."جلسات فوق الكرسي وجرات زلافة شيبس هزات وحدة قرمشتها ففمها" ممممم مذاق الملحة كلشي مالح فحالك المويلح خهخخخخ هههه صافي جلس جلس والله تانهضر مقاد را غير توحشت نصعرك
عصام : توحشتي نلصق دينمك مع الحايط...ماعنديش الخاطر نتمازح معاك هاد ساعة غير فوتي ملتي...
فتيحة : وقوووليا كيداير ومالك وليتي فشكل. واخا عارفاك صعيب وواعر ونفسك هننن"حطات صبعها كتهز فمنخرها" وليني هاد المرة جيتيني فشكوووول اعشيري والله...وجهك مبدل ضعافيتي على كيف كنت كنعرفك هادي سنوات...وهادشي من ضمن خبرتي فالسكرة معاك نتا ومزغب الزوك ديال صطوف"خرج فيها عصام عينيه" مالك لا دهشرش هادشي عااادي كنت نقولو ليكم ديك ساعة كتعقلش كنتي مبلط وكاااو نقول ليكم عطيوني باش نركب فطاكسي يرش عليا صطوف الفين مشي ومجي ههههه...ماعلينا..."جمعات ضحكة ونطقات بجدية" مالك اعصام ؟!
عصام : ماماليش الوقت تبدلات وصافي..نوضي تگلعي تالصباح وجي نشوفك...
فتيحة : لا الصباح الى جيت نفيقك تشتف على ريتي..لا ثيقة فولد عتيقة...
مالقا مايدير عارفها تموت عالعصا لحمها رطاب مابقا يصلاح للضرب واصلا عزييييزة عليهم بزاااف لا هو لا صطوف وقت الي يحتاجوها فوقت الحزة ديال بصح كانت كتقضي ليهم الغراضات بحكم هي قااااافزة كلشي تعرفو وعندها المعارف كيقضيو ليها فيساع اي ورقة اي مشكيل كتعيط فواحد تيليفون دايراه لغراضات نوكيا بيل تعيط فالبلاصة يقطعو عليها ويعيطو هما يااا لالة...الى بغا شي ورقة من مقاطعة مكاين غير الو فتيحة محتاج الغذ ليه يلقاو طلبهم موجود الا اذا كان يحتاج وقت فسيمانة يتقضا اما واحد مولا الباسبور الى كان يخرج فسيمانة هي فربعيام تخرجو ليهم...شي مشكيل فالكوميسارية تقضيه مشكيل فالمحكمة تقضيه...وبزاااااف...
عصام : وخا تريحي بسكات واحد نص ساعة عارف اصل مك ضرهك رطاب...
فتيحة : هعهههههه عارف واخا ناكل العصا نجمع عضامي ونوض نهضر معاك كي الكلبة ههههههههههههههه...
عصام"جلس وجر الكاس عندو تكا عليه دقة وحدة"
فتيحة : تررررر نق نق عداااك...
عصام"جر القرعة ديال شراب وكب منها بلا ميميلونجي وبلا مايجاوبها"
فتيحة : هاد الكاس تاني باش يصماكو ليك الوذنين من جيهتي ياك ههههههههههه..."بدات تكحب" اكحكحكح اربي الحبيييب قتلتيني بالضحك ونتا معصب بلا ماندخل راسك كيبان ليا من هنا لحتيني قدام تران طحني وهزيتي الكفتة ديالي شويتيها ولحتيها الكلاب...
عصام"تكا على الكاس ثاني تا بدا راسو كيطنطن شوية وخا موگض" : ندمت الي حليت لاصل مك من لاخر...
فتيحة"شافت جيهة الجوان الي كان بادي نصو" : تا مادير ليا وااالو راك ضارب فهاد جوان النص مكالميك من جيهتي نقول كتاب ليا عمر جديد ملي لقيتك كاميه كون جيت بدقيقة قبل كون دابا كتقول لصطوف فالخزانة جر جر لفت ابا صطوف "طرطقات بالضحك" هههههههههههههههههههههههههه
عصام"دار ايديه على وجهو بخبطة ونطق بصوت مجهد باين معصب غير شراب وجوان متبتينو فحال المخدر" : وااااااااااالرب العالي ضريتيني فكري حق الرب...
فتيحة : نعاود نقوليك الاكرور فين هو الي نضرك فيه"جمعات الضحكة هاد المرة بجدية دبصح" اوديييي هههه ماعلينا..ماقلتيش ليا كيداير اش درتي فين غبرتي مابقيتي تعيط...مابقيتي بغيتي غراض يتقضى ليك وريني غا وجهك سمعني غا صوتك نعرفك لباس والله حتى عزيز اخويا عصام بالله الى ديما كنشوفيك خويا السافل هههههنن
عصام"هز حاجبو " : ياك ؟...
فتيحة : هههه لا بصح مالك ؟!
عصام"كب ليه كاس اخور رما ففمو حبة كاوكاو وشرب من كاسو" : ماماليش الوقت تبدلت را گلتها ليك نبقا نعاود...
فتيحة : كيدايرين خوتك وداك الكيدار تاع بوك مابغيتيش تاني تهددو بشي تغريقة يكتب ليك شي حاجة اخرى "خبطات على صدرها" على رقبتي لا انا فالذمة ثاني...واحد خينا تصاحبت معاه فالمحافضة واااااصل بالرجولة تانبصبصك...
عصام"هز فيها عينيه كيلعب بلحيتو بتفكييير حتى ضيق عينيه كانه بغا يقوليها شي حاجة وتراجع...عاود تكا على كاسو تا حمارو ليه عينيه" : تت لا مامحتاجش..."دوز على لحيتو بتعب" فتيحة بالرجولة تحركي من هنا بالرب مالخاطري راني على بونت ندير فمك شي عجب خليني محتارمك...
فتيحة"ناضت وقفت" : اعاااااو يا ياكما بغيتي تكويني بلاتي غا تندير ترقيع البكرة ودخل عليا كانك لقيتيني عزبزب تانا عزبة ونقوليك سترني"شافتو مخنزر ودعوة بصح ماتعجبش وهي تهز تيليفونها وتمات غاديا" صافي انا مشيتي صباح نحيب ليك تفطر على حسابي...بااااي"خرجات من الدار وهو يصوني تيليفونها جبداتو من صدرها" اش كاين اسعيد...
سعيد : فينك احبي ؟!
فتيحة : عند واحد عشيري...
سعيد : بغيت نشوفك توحشتك احبي...
فتيحة : اش توحشتي القواد ؟ نخشي لمك صبعي باش ديماري ؟ ...
سعيد : ياك اطياحة الباطل ؟! شحال تعطي نعاود نطلق فيك واحد العشرين سانتيم نخلي مك تزينطي (تغوتي)...
فتيحة"خرجات عينيها" : عشرين سانتيم ؟! ههههههههههههههههههههههههههااااااايو...العشرين سانتيم"تعبير مجازي" خليه للدكالي "ضارت جيهة باب دار فين كاين عصام وعضات شنايفها" ولا الكزاوي الفحولة طلقها فوسط الرجولة الي بحر والكبدة حجر...سكت الشينوي سكت لا كانت جوج سانتيم ماتقولها لحد...عشرين ياكما عبرتي بمسطرة ممحيين ليها نوامر..قاليك عشرين سانتيم...
سعيد : ياااااك افتيحة ياك ؟ هادي هي حبي سعيد بغيت شهادة سكنى ديال الفنيدق بغيت ندير بيها سيجور نخل بيها لسبتة نتقدا ياااك...
فتيحة : اححح ضربتي فالعرق...صافي حبي العشرة نكون عندك وجد المحتووات وشواوات وطفي ضو ديال الباب...محتاجاك فواحد المهمة ديرها ليا ....
.مايمكنش ماتاثرش بالحكاية الي عاود ليها على اختو بالعكس تاثرات بشكل كبييير لدرجة دموعها مابغاوش يحبسو وهي كتسمع كيفاش عاش مع اختو ديك الليلة الحزينة بالنسبة ليه...ملي سالا الحكاية هز عينيه فيها لقاها كتشوف فيه بحزن ودموع نازلين...
زين الدين"كمش حجبانو" : فرح !!!
فرح"مسحات دموعها بطرف ايدها وشافت فيه" : ماتت صغيرة بزااااف اهى اهى....وعلاش ماديتوهاش لسبيطار عتقوها وعلاش ماجاتش طل عليها ماماها ولا تشوفكم..
زين الدين"قرب بشوي مد صباعو مسح ليها دميعات الي كيطيحو كي شتا من عينيها" : الدموع عندك على سبة فرح...ديك الوقت بزاف معديين بالعشوب...التسمم كان يتعالج بالي عندك فالدار...دارت ليها شنو كنا مولفين لا مرضنا وديك الوقت كان l'hôpital بعيد الى مشيتي ليه لاكانت الضرورة...بقات معانا تا وكان دفات وتهنات عليها معايا مكانتش كتهز ليها الهم وهي معايا...وماكناش دايرين فبالنا الموت..
فرح : ماكنتيش عارف بالي ماتت بين ايديك وماحسيتيش بيها وهي ميتة حداك..كيفاش صبرتي فاش عرفتي كيفاش اهى اهى...
زين الدين "دور وجهو ناحية السرير" : مايمكنش نصبر كنت ديك الوقت صغير...لمت راسي بجهد من جيهتها..علاش منلومش وانا الي ديتها بايدي"شير ناحية صدرو" كلات من داكشي...شنو نگوليك افرح يمكن عام وانا غير فالدار الهضرة قليلة لدرجة القراية سمحت فيها داك العام لو جات عليا دابا راني فالوقت الاصلي من الرتبة ديال خدمتي..
فرح"بصوت مغنغن وياربي دوك دموع يدورو دورة وينزلو" : ا احم اشنو دارو واليديك كيفاش صبرو معاك كيفاش صبرو حتى هما...
زين الدين : كاين الايمان...الايمان بقضاء الله وقدره الايمان ب لله ما اعطى ولله ما اخذ.."حرك راسو بتاكيد" سي قاصحة علينا ويكذب عليك الكذاب نگوليك صبرنا صبرت ولابد من الايام لولة ماتقبلش تلوم راسك تصدم تمرض فخاطرك..تغوت تعذب شلااا وشلااا.."شاف فيها وسرح ايديه" هذا الله...
فرح"شافت فيه كيفاش كيشوف فيها ويرجع يدور وعينيه حمرين...لمسات الحزن العميييق الدفين الي فخاطرو كانت هضرتو وحكايتو كااافية انها تعرف شنو عاش...يمكن مزال المزيييد من حياتو ماعارفاهش ويمكن هادي خطوة بيناتهم متقدمة تخليهم يزيدو يتعرفو على بعضياتهم وحياة بعضياتهم اكثر...ماكان عليها سوى انها تحرك راسها بحركة فهم انها حسات بالحزن ديالو وباغيا تواسيه..."
زين الدين : نكملو ؟!"حركات ليه راسها شاف فالبيت وضار مخليه محلول باش يتهوا وقف حتى جات حداه وتمو غاديين كيوربها البيوت او الصالون المقابل كان اصغر من لاخور لكن كان مصلوح مزيان بالنقش والصباغة الخياال (نوع من الصباغة ديال الحايط) فالمسكي مخلياه مفوج والفراش جديد هو كيوربها وهي تابعاه وتشوف وغاا كتشوف وصافي بالها كامل مشا مع ختو والطريقة باش ماتت الي اثرات فيها بجهد..حطات ايدها على شباك الدربوز ديال الدروج مكمشة فيه ونازلة كتشوف فالضواو كاملين شعلهم فالدار...الدار الي خوات من بنادم وخا مزال ماكتختالطش ببنادم لكن كانت حاسا بالدفء حاسة بشي حاجة هي افتاقدتها بناس جاو على قبلها وواساوها ناس بصح خافو عليها...كل مكيزيد نهار كتزيد العقدة الي فيها كتفك وخا كيبقاو الاثار النفسية عليها...تبعاتو بخطى بطييئة حتى توقف لتحت مباشرة اما السقاية الي كانت حدا الحوض الي فيها شجرات الوسط..حتى بان ليها جبد تيليفون من جيبو تا طفاه ورجعو فين كان وضار عندها كيشوف فيها"
زين الدين : البيت فين كنتي فلول...
فرح : ديال واليديك !!
زين الدين"حرك راسو وتمشى تا وراها الصالون تاهو كيشبه لفوقاني فالطول غير هو مصلوح حتى هو فحال البيت وبفراش جديد مواكب للعصر الحديث دخلو ليه وهو كيوريها حتى شافت علبة الموسيقى الي فيها البووق كبييير الي فيها الاسطونات الدائرية ذات الطراز العتييييق الي كتخدم فاحد الاجهزة الانتيك التي تسمى بالفونوغراف...وقفات حداه وبفات كتشوف فيه حتى جا عندها ووقف حداها تاهو كيشوف فيه" : شي حاجة من الي عندي معاها..."حط ايدو عليه كيدوز عليه" الفونوغراف...
فرح : ديالك ؟!
زين الدين : خذاه ليا جدي الحاج البغدادي الكبير ديك الوقت كانت عندي 10 ans...فواحد الموسم..عارفني عندي مع هادشي البلية ديال الانتيك من الصغر..."شاف فيها وغمزها" القديم "هز صبعو كياكد" وماشي اي انتيك..فحال هذا فحال شي حاجة عندي معاها حكاية ذكرى...شلا..."شير ليها بعينيه ناحية المذياع المربع القديييم" فحال هذاك..كان عندي مع با الحاج الكبير خارج معاه داخل معاه محرك معاه فالحانوت كان حاطو عندو تما كيسمع ليه حتى جبتو معايا لهنا وبقا...
فرح"دخلات لهاد الصالون حسات براسها فشي بيت او دار ديال الزمن القديييييم الجميل...غير مسهوتة وتشوف..خرج وهي تبعو وفنفس الوقت كتستكشف بعينيها هنا وهنا تا تبعاتو لجيهة الحوض الي فيه شجيرات ووقفات"
زين الدين"هز عينيه فالشجرات" : شامة وزين الدين.."هبط عينيه لعندها"
فرح : غرستيهم نتا وياها ؟!
زين الدين"حرك راسو" : شنو بان ليك فالثالثة ؟
فرح"بعدم فهم" : ماافهمتش...
زين الدين"قطع واحد زهرة تما وقرب ليها هز ايدو بشوي تا بغات تبعد" : ششش تهدني"حط ليها الزهرة ورا وذنها مع حطها هبط بصبعو بحركة بطييييئة" ديري ايديك معانا نكملو ثلاثة...انا, شامة, الفرحة ديالنا..."عض شنايفو وعينيه عليها بكل حب وعشق"....
بقات كتشوف فيه كيفاش كيهصر معاها بحب وبالخاااااطر الي فوق خاطرو عاطيه ليها وهادشي ميمكنش ماتلاحظوش وماديروش بعين الاعتبار...بالعكس هادشي غير مكيزيد يخليها تامن ليه ويرجعو مشاعرها يحياو من جديد والاهم كيزيدو يكبرو ويتاججو من جيهتو...اصلا الاعجاب كان قديييم ناحيته الحب بان من جيهتو والعشق ليه فطريقو...تعيا تمرض نفسيتها وتنغالق على راسها لكن فاش كتلقى الحاجة الي تريحها تبغيها وتنجارف ليها بلا ماتشعر...
فرح" نطقات بصوت مشحرج منخفض" : اش غاندير هنا ؟!
زين الدين : الي عجبك..شنو تبغي ناخذو ليك غرسيه هنا...
فرح"حدرات عينيها فالحوض وايد هزاتها فوق الزهرة الي دار ليها" : ماعرفتش.."عوجات راسها" ضروري ؟!
زين الدين : لاا بخاطرك ماشي دابا من بعد الوقت الي بغات خاطرك نقضيو غراض..."تنهد كيشوف فيها" مرتاحة غذا تشوفي البروفيسور ؟
فرح"حركات راسها" : مرتاحة...غادي يجي هنا ياك ؟!
زين الدين"حرك راسو" : سي غايجي هنا...
فرح : فين عندو العيادة ؟
زين الدين : كازا...
فرح"سكتات كتصرط فريقها ورجعات سهاات بتفكير...شابكات ايديها وبدات تحك فيهم على بعضياتهم بتوتر...لاحظ زين الدين السهو الي دخلات فيه وهو يحنحن تا ضارت عندو قافزة"
زين الدين : اجي معايا..."حركات راسها وتبعاتو تا دخلها لبيت لاخور والطوالة الي كتدي الباب اللوراني...هاد رجعو ودخلها لكوزينة الي كانت متوسطة عاود صلحها من جديد دارو فيها اونسومبل ديال بلاكارات والمجورة اليمينيوم ورخام فالبوطاجي ضاير عليها كامل بقاو غير فجوات دارو فيهم ثلاجة وفريگو صغير..." شنو ماتحتاجي لا جاك جوع ولا شنو مابغيتي كلشي ديالك مايحتاجش نگولها ليك...
فرح"كتمسح ايدها فالبيجامة وتكمش فيها..كتشوف فالكوزينة الي عجبتها كترجع تفكر كوزينتهم وتغمض عينيها باش طفي ديك الذكرى وتمسحها...شافت فيه"
زين الدين : فيك جوع ؟!
فرح : ونتا ؟!
زين الدين"شاف فساعتو" : مزال شوية"تسمع صوت اذان العشاء" شنو تبغي تعشاي ؟!
فرح : وااالو...
زين الدين"هز حاجبو" : مايمكن...
فرح : ب احم بغيت تبقى تعاود ليا على هنا كيفاش عشتي الصغر...بغيت تعاود ليا على شامة..عافاك عاود ليا عليها...
زين الدين"استغرب" : شامة !!
فرح"حركات راسها" : ها اه..عافاك..
زين الدين : بشرط"شافها كتساءل" تعشاي معايا رتاحي هنا"شير ليها جيهة الطابلة"...نصلي العشا ونجي نشوفو شنو نديرو لعشا سي نو نشوف شنو ناخذ ليك من برا...
فرح"بخوف" : غاتخليني وحدي ؟؟!
زين الدين : لا معاك معندي فين محرك..تهناي كلشي يجي لعندك..
فرح"حركات راسها ب لا" : شوف غير من هنا فالدار...كول غير نتا انا مامشهياش والله...وحتى انا بغيت نصلي...
زين الدين : موضية ؟"حركات ليه راسها بالايجاب" اجي معايا.."مد ليها ايدو وهي تم جايا تا جات حداه مشا بيها البيت ديال واليديه فين كانت فاللول حل الباب ديال ماريو جبد منو واحد الملحفة فالغوز...مدها ليها" لبسي هادي...
فرح"شداتها من عندو ولبساتها ماعرفتش ليها فلول حتى عاونها كانت مغطياها كلها حتى لرجليها غطاتهم دورات على راسها وشافت فيه لقاتو ساااهي فيها تا نسا راسو حمقاااااااتو بجهد بديك الملحفة تحلفي عليها امراة ديال الزمان ومعاه سنييين هادي...ماعرفات مادير كتشوف فيه ساهي فيها وهي كتشتت عينيها هنا وهنا وتحدرهم تعاود تقادها وهو ولا بغا يحيد عينيه من عليها تا تزنگو حناكها وقشعهم خصوصا فمها الي بدا يترعد..." : اا احم ا صافي ياك ؟ ديالمن هادي...
زين الدين : شنو بان ليك ؟!
فرح : ماعرفتش..
زين الدين : واااايليي...
فرح"بقات ترمش فيه" : شريتيها لشي وحدة؟
زين الدين"عوج فمو باستهزاء" : وحدات هما"شافها صرطت ريقها"واشنو على بالك مانديرهاش ؟!
فرح : ها ا واه احم اه فهمت...
زين الدين"ضيق عينيه" : شنو فهمتي ؟!
فرح"وجهها ولا حمررر ..تزيرت" : لشي وحدة...
زين الدين : فايتة طايحة على راسك افرح ؟! شنو غادير عندي حاجة وحدة ولا جوج فدار الواليدين ولا داري كلها...هزي عينيك وشوفي فين كاينة نهاك الله افرح...
فرح : بيت واليديك هذا.."حدرات عينيها"اااه ديال الواليدة...
زين الدين : نتي وايمانك نتي وايمانك..."هز الصلاية فرشها ليها وصلاية اخرى فرشها ليه قدامها باش يبدا صلاة وهي موراه"
كانو جالسين قدام الطابلة عصام وفرح فعمر عشر سنوات وفوزي فعمر الخمسة عشر سنة...
فوزي"هز خبيز دار فيه زبدة والعسل" : هاكي
فرح : اتااي ؟
فوزي :وتسناي تانبرد ليك اتاي"هز الكاس كيخويه فكاس اخور باش برد ليها اتاي تا عطاه ليها عاد كب ليه هو..لقا عصام وجد ليه خبزو فيه غالعسل"..
عصام : شد وشور على العسل اصحبي من سعد الحناش ثاني.
فرح : ههههههه حنيشااااات عهععهههههه..
فوزي"صرط ريقو بخجل" : وصافي اخويا...
عصام"كيسوف فيه بنص عين" : ممممم مرگتي...
فوزي"هبط عينيه لقا فرح كضحك عليه" : نتي غا سمعي الحناش وضحكي.."جر ليها حناكها بقجهم وصرفقهم" حناك الطبل
فرح"كتبعد فيه" : واعووو بعد منييييي اهى اععع بابااااااا."على عصام" ..
مزالين كيهضرو ويضحكو حتى تحل الباب على جهو ديال الدار وهي تقفز فرح تخشات فعصام وفوزي دور عليها ايديه...دور عصام عينيه عاقد غوباشتو تا دخل عندهم واقف مناخرو كيفرفرو بالعصبية ووجهو ولا كحل مجيف حالتو...
عصام : ياك شي باس مكاين اشريف ؟!"حس بفرح كتفيييبري تحت منو وكطل بعويناتها..."
المخنتر : اش مشا ليك ؟
عصام : ريح من رهوط اش كاين ؟
المخنتر : كبرو الكتاف وتگادو الكيدار...
عصام"بغا يوقف وهي تكمش فيه فرح تا هبط عينيه ليها" : ششش.."رجع شاف فيه بعصبية" تگادو الكتاف غايباليو بيك نتا اللول...ياك شي باس مكاين ؟؟
المخنتر"تم جاي ليه كيزرب يحساب ليه غايخاف منو ساعاك تقاد عصام فالوقفة تا وصل عندو ولا يبان قدامو كي الكمشة..هز فيه راسو" : حساب لكلبة مك تخلعني ؟
عصام"خبط ليه كتفو بشويي" : مانخلعك ماتخلعني نهار دخل دخل كي ناس راك خلعتي البنت المرة جايا مانعلمش عليك شكون نتا ولا نحسب حساب راك بويا...تهدن ورزن الوقت البنت كتخلع وانا مانبغيهاش تحس بشقفة تمرضها ليا منعقلش على اصل مو هذا الي يمرضها...تفاهمنا اولد عيشة ؟!
خنزر فيه وهو يضرب دورة مشا لبيتو جلس فيه شي نص ساعة وهو تما...ناضت فرح هزات صينية بمساعدة فوزي مخلين عصام هز الكارو وغادي طالع لسطح الي باقي مكاملش كلو كان غير بريك مكاملش..ريح فواحد الكوان وبدا يكمي فكارو عادي ماشي جوان حيث جوان مكيكميه الا اذا كان صاااعر معصب لواحد درجة متصورش باش ميديرش شي رد فعل الي خايب...بدا فوزي الي كيغسل فالماعن حيث فرح كان لافابو بعيد عليها شوي كتعطيه وهو كيغسل ويقاد حتى خرج المخنتر جاااعر وصدرو كيطلع ويهبط تا دخل عليهم الكوزينة
المخنتر"نطق بجهد تا قفزات فرح لاحت البراد" : شكووون القواد ااي دخل لبيتي ؟؟
فوزي : مادخل تاحد اصلا البيت مسدود"صوتو بدا يتبدل حيث بدا يبلغ" كيغانديرو ندخلو...
المخنتر"شاف ففرح" : دخلتي ليه ابنت الكلبة ؟!
فرح : لا مم مدد نن ففف..
المخنتر"مشا ليها كيجري جرها من دراعها" : دخلتي البيت الكلبة ؟؟ "غوت تا صقلت بالخلعة مخرجة عينيها وفوزي كيبعد فيه باغي يشدها" واش دخلك يا بنت ليهودي ااااش شكون هز ليا شيكات الي كانو فوگ الطابلة عند راسي يااا ؟ شكووون...
فوزي : بعد منهااااا"كايدفع فيه والمخنتر لاقيه صغير دغيا حگر عليه دفعو بجهد تا تلاح فالضص وضص ديال سيما حيث دار اصلا ممصلوحاش تا تسمعات زداااااف مع شرجم ديال كوزينة فوقو سطح فن جالس عصام تسمعات عندو وغواتهم...ناض على وقفتو لايح الكارو وطار يجري نازل عندهم"
المخنتر : فين درتي الكلبة شيكاااات فين درتي بغيتي تخرجي عليا يا بنت لحراااااااام بغيتي تخرجي عليا الله ياخذ فيك الحق نتي ومك...
فرح : اهى اهر ماشفتووووش ابا ماشفتوووش اهى اهر عافاك عصااااااام...
المخنتر : انا ما بوك مابو حد "هز ايديه تالسما جاب ليها طرشة لحنك تا بان ليها الضو كيضرب وعاودها لحنك لاخور جا معاها عصام نيشاااان ماعرفتش امتا بديك القوة الي فيه نقز عليه واحد تنقيزة بعدها من عليه ودفعو بكل جهدو تا جابو مشبح عند باب الكوزينة"
عصام : وااااااااااااااالرب المعبود تفرق عليها ومااااتحطش عليهم ايدييييييييييييييييييك...."ناض كيجري هز واحد جنوي صورة فرح وهو كيصرفق فيها بديك طريقة جهلاتو المخنتر غير بان ليه هز جنوي وهو ينوض مشا كيجري خرج من الدار لا يصدق قاتلو وعارفو يديرها مادام هز الجنوي...بغا يلحقو لقاه طار وهو يلوح جنوي ومشا لفرح نوضها هي وفوزي هز فرح الي تخشات فيه كتبكييي وفوزي تخشا ليه تحت باطو كيبكي شاد ضهرو...بغا يحطها والو لصقات فيه كي العلكة كتفيبري بالخلعة والبكا " : ماتخافيش اكبيدتي هاني معاك..
فرح : مم ماتخلينيييش اهى اهى.."لدرجة صهد وهي مخشية فيه.فعنقو حاسا بواحد الامان رهيييييب تما وديك الحركة هي الي عمرها تنسى ليه...فجأة رجع عصام لوقت الحالي من تفكيرو فالماضي تا شاف زوج نقيطات ديال دموع قطرو فوق الطابلة...دار راسو بين ايديه بنفس الوضعية حادرو وعينيه لتحت كيحرك فراسو شوية هز اسدو كيحك فصدرو فديك العاااافية الي شعلاااات وشعلاااات ولا بغات طفااا عياااا يكابر عياااا يصبر..عيا يقصح عيا يصلب فالقلب والنفس...ماشعرش براسو حتى...
عصام "عينيه حمرييييييين جنابهم نازلين دوك دمعات نطق بصوت مقهووووور يهرس الحجر يهد الجبال " : واااااااااختي كبيييدتي هرستييييني وقسمتي ليا ضهرييييييي....
كملو صلاة العشاء وكمل الدعاء بقا واحد شوية مريح فوق السجادة كيسبح غير بصباعو..حتى وقفات كتجمع فالصلاية وبقات كتشوف فيه عاطيها بضهر كيسبح مايمكنش مايثيرش الانتباه ديالها بهاد الجلسة فوق سجادة ديال الصلاة وهو كيسبح من بعد ماكان كيصلي بيها وتلاوتو للقرآن الكريم بخشوع تااام خلا احساس الدفء والامان يسري فعروقها بلهلا يطريه ليها وكل مرة كتزيد تقرب ليه وتحس من جيهتو بكمية الامان الي كتزاد عندها من جيهتو...بقاات مشابكة ايديها حتى لاحظ وقوفها وهو يدور عندها كيتمتم بين شفايفو الباقيات الصالحات وفنفس الوقت شير ليها براسو مالك...
فرح : غادي نخرج نجلس فالطابلة ...
زين الدين"حرك ليها راسو ب واخا وهي تحيد ديك الملحفة طواتها وحطتها فوق الناموسية وخرجات كتستكشف هاد المرة بوحدها كاع ضواو شاعلهم فالدار باش ماتحسش بالدار خاوية وباش تزيدها كمية الامان فالرياض...وقفات حدا شجرات كتقلب فيهم بايديها وتهز راسها فيهم تشوف العلو ديالهم فين وصل...شوي حتى ضارت جيهة المطبخ رجعت ضارت جيهة البيت فين كاين زين بقات كتشووف واش تدير هاد الخطوة ولا ماديرهاش باغا تقدم وفنفس الوقت كتراجع حيث ببساطة مزال كلشي جديد عليها فهاد الدار...حياة جديدة خاصها تعود عليها بالاضافة للنفسية الي مزال مدمرة وكلشي ناقص واخا زين الدين مكفيها وموفيها وعاطيها الحماية والامان الي كيوصلها بلا شعور...وصبرو الكبييييير والقوي معاها وعليها...وكاااع الي دايرو عليها من نهار بغاها...فالاخير ضارت جيهة الكوزينة وهي تدخل كان الضو فيها شاعل فالاصل...وقفات كتشوف فيها وفنفس الوقت كتقلب شنو دير...بقات واقفة حتىى سمعات تحنحينتو معلن القدوم ديالو وهي دور بسرعة...
فرح"بخجل وتوثر" : احم بغيت ندير العشا...ب باش تاكل..
زين الدين"خلات قلبه يرفرف من هاد الهضرة وكيفاش فكرات فيه فهاد الوضع..وخا فرح بجهد مابغاش يبين" : ونتي ؟!
فرح"هزات كتافها" : مافياش...
زين الدين : مايمكن نتعشا وحدي...شنو بان فشي حاجة خفيفة نوجدها انا...
فرح : اشنو هي...
زين الدين"مشا جاب كرسي دخلو الكوزينة وحطو" : رتاحي هنا من بعد نشوفو شنو نديرو. اجي.."مافهمت والو وماكان عليها غير تلبي..جلسات فالكرسي الي كان مقابل البوطاجي..عنكشاتو الفوقية وهو يخرج عند الباب عاطيها بالضهر اتا هزها نعاماااس وحيدها هاز ايديه باش قدر يحيدها ومع لابس شورط قصير بيل سماطي بانو الحفرات الي بين كتافو مع تورمات وهي تحدر عينيها بزربة ولا قلبها كيضررررب تا تزنگو حناكها...ماضارش كاع جيهتها مشا نيشان لواحد البيت تما داير فيه ماكينة صابون مانسطااليا تما...محطوط حداها سلة الصابون جبد منها واحد تيشرت سروال قطن بالخف حيد شورط ولبسو هو وتيشرت ولاح لاخرين مع حوايج مسخين والفوقية فايدو حتى يخويها من المستلزمات الي دايرهم فالجيب..دخل عليها الكوزينة لمح وجهها الي تزنك رغم انها حادرة راسها عوج فمو ومشا حل ثلاجة جبد منها مطيشة حطها فالبانيو مشا جاب البصلة صغيرة من شبكة وزوج فصوص ثوم..هي غير كتشوف فيه مافهمت والو ويمكن اول مرة غاتكتاشفو !!..قبل مايبدا مشا لكسرونة دار فيها زوج مطيشات من بعد ما غسلها وعمر عليها كاس ديال الما ردها فوق البوطة تصلق..وداز لگميلة صغيرة تاهي عمرها بالما ودار فيها شوية زيت والملح وردها فوق البوطة مشا لبلاكار الفوق جبد منو طاسة طويلة فيها سباگيتي وضار تقابل معاها..
زين الدين : شنو بان ليك ؟
فرح"بدون شعور مشا عقلها لذكريات" : كاتعجبنااا.."هز حاجبو وهي تدارك الموقف" احم اه واخا...
عرف بالي تفكرات شي حاجة على خوتها وكيف خاصو يدير مايبينش باش ماتراجعش...جبد مقلة دار فيها زيت جبد طحانةة التوم دار فبها دوك الفصوص طحنهم فوق زيت بلا ميشعل البوطة وقشر ديك البصلة ضار هنا وهنا وهو يلمح الحكاكة جبدها وبدا يحك فالبصلة وكل مايحك الريحة كطلع لعينين وهاد اللعبة كتكرهو فحياة ملة طاسيلتو كلها تا كطير ليه النقشة...ولا غير يسوط وهي تشوف فيه لقاتو مغوبششش ومضيق عينيه وهي تفكر نهار هضر معاها ابيل فيديو فاش وراتو طاجين وبدا يحك البصلة ودار نفس القضية تبسمات بزربة وجمعت تبسيمة وهي توقف تا حبس ضاير عندها يشوف مالها...
فرح : عطيني انا نكمل...
زين الدين : لا قاضي الغراض رتاحي نتي..
فرح"شافت نقشة طايرة ليه وصابر معاها هي وهي تراجع" : احم..الى مابغيتيش ريحة ضرك فعينيك قسم البصلة على جوج وغسلها بالما..والى كانت كثيرة طحنها فالروبو...كمل وغسل وجهك بالما..."حكات قرفادتها بتوثر ومشا جلسات فين كانت"
زين الدين"رجع كيكمل فوق المقلة بلا ميشعل البوطة..بانت ليه الكسرونة بدات تغلي وهو يجبد سباكيتي حطها فيها ورجع غطا كسرونة مطيشة باش تغلا مزيان..ضار عندها لقاها كتشوف باستفهام" : شنو مالك ؟
فرح : كنت كناخذ واحد صوص من مرجان زويينة ماكندير كاع هادشي الا الى مابقاتش عندي...
زين الدين"حرك راسو" : سي كانت غير مساليتش باش ناخذها سي نو مزال خاص نكوموندي على شحال من حاجة خاصة فالدار...علميني شنو محتاجة نزيدوه...
فرح"حركات ليه راسها ورجعات كتشوف فيه كيفاش كيطيب بطريقة نقية والاهم انها تفاجأت بالي كيعرف يطيب...شافتو جبد المطيشة وحيد ليها القشرة بسهولة دارها فمولينيكس ودار فيها مطيشة الحك وطحنها مزيااان وقبل ميطحن كان شعل على المقلة تا شحر ديك البصلة الي حك يمكن جاتها طريقتو فشكل دار البصلة بديك الطريقة خلاتو براحتو حتى تشوف شنو غايخرج وهي طريقة جديدة تعرفها...ملي ولات البصلة عاطية لون ذهبي زاد عليها كفتة ممتبلاش تا طابت عاد زاد مطيشة مطحونة وزاد التوابل ابزار ملح شوية تحميرة مشا لواحد شبكة معلقة جبد منها شوية اوريگانو وزعتر رماهم فصوص خلاهم يتبخو ورجع لسبتكيتي الي طابت صفاها فالشبكة تا تصفات ومشا لما الي بقا من مطيشة الي تصلقت هز مغرفة منو زادها فصوص الي رد طيب وزاد عليها سباكيتي بقا يقلب فيها يقلب حتى شربات ديك صوص وتخلطات بالكفتة...عاد قبل ميطيب هادشي كان هز الدوا ديالو شربو باش يجي مع نص ساعة على الماكلة نيشان...
جبد زوج طباسل من بلاكار الفوق غارقين هز الملقط هز بيه سباگيتي من بعد ما دورو باش ضارت عليه وحطها فالطبسيل على شكل كتلة مشا لثلاجة بان ليه غير فرماج حمر...
زين الدين"شاف فيها" : عندك مع هذا"هز الكورة ديال فرماج"
فرح"حركات راسها" : هو الي كنديرو معاها...
زين الدين : سي... مي سي ميو ديري Parmesan (جبن بارميزان)..وكان نطلعو لكازا موجود عندي تم"كمش عينيه تا غمضهم نساااا راسو وقاليها كازا ماعرفش شنو غاتكون ردة فعلها تا تكا بايدو على ثلاجة حدر راسو ورجع شاف فيها"
فرح"هزات ايدها حكات شعرها وهي متوترة لواحد درجة حسات بشي حاجة فحال الى تقلقت وماشي من هضرتو لكن من شي حاجة ليها يومين وهي كتفكر فيها لكن غالبها التردد..بدات كتكحب وهي تشوف فيه" : ب بغيت احم نشرب..
زين الدين"باغي يبدل الموضوع باش ماكان" : الله اودي"جبد قرعة الما وديك الكورة حطها فوق بوطاجي ومشا جاب ليها كاس خوا فيه الما وعطاها تشرب خلاها ومشا قطع من فرماج حكو فوق كل طبسيل شوي جبد ورق ريحان طري حط فكل صحن ورقة كا زواق..حط طباسل فوق بلاطو وخرج حطهم فالطابلة الي حدا سقاية الي خدامة كطلق فالما ومع الصهد عاطية غربي زوييين والحوض المسقي مخلي جو شاعري رااائع. خصوصا طابلة ديال الفسيفساء بكراساها ديال حديد مبطنين بالبونج...رجع حل ثلاجة بانت ليه قرعة ديال هواي اناناس وصا عليها على قبلها اما هو فاكيد مايشربهاش...جبدها حطها فبلاطو مع كاس طويل ديال مونادا وكاس ديال الما وقرعة الما وفراشط كيهز ويحط بواحد طاقة وحب فشكل وعلاش لا ومعاه العشق والفرحة ديالو وهما مجموعين تحت سقف واحد وطبعا هادشي را تحت عينيها كيدوز...
زين الدين : يلاه...
فرح"كانت دايرة ايدها على حنكها كتسوف حتى هزات فيه عينيها وهي تحرك راسها وناضت كتقاد فبيجامة الي كطلع ليها من لور...جلسات فوق الكرسي كتشوف فطبسيلها كيفاش محطوط بطريقة زوينة فوق منو الفرماج الي بذا يذوب مع سخونية..وريحة يا سلام خصوصا مع الاعشاب الي ضاف..والاهم الموناضة الي كتحمقها كاينة لكن غير شافتها وهي تغوبش الشي الي لاحضو زين الي كان كيشرب فالما..ماهضرش حتى بانت ليه كحزتها وجرت كاس الما فقط..شابكات ايديها كتلعب بالخاتم ديال زواج وكتشوف فالطبسيل"
زين الدين : بسم الله ؟
فرح"شافت فيه وهي ترجع هزات فرشيط دوراتها تا هزات وكلات منها بدات تاكل وتذوق وماتنكرش ان طعم والبنة كانو حااااضرين بقوة..حتى تبسمات بجنب بالكاد كتبان وهادشي لاحضو زين بطبيعة الحال تفاصيلها هما العشق ديالو..هزات فيه عينيها وقالت" : زوينة بزاااف...
زين الدين"حط الكاس وسما الله تاهو بدا ياكل" : وايلي..
فرح"حركات راسها كتاكل ولكن متوترة حيث هي وياه راس فالراس واول مرة قدامو من بعد مدة طوييلة..كتاكل وتصرط بالصوت حسات صوت قرجوطتها سمعو..حنحنات وهي تنطق" : كاتعرف طيب...
زين الدين : حياة الزوفري عاش وحدو تعلم العجب...ماعنديش بزاف مع ماكلة زنقة مي فاش بديت الخدمة مزيان مكانش عندي الوقت ديك الساعة كنعدي بماكلة l'hôpital فاش كتزير عندي الوقت سي نو كنوصي...فاش رجعت لبلادي راكي كلشي شفتيه وشفتي كلشي فالخدمة...
فرح"دايرة ايدها على حنكها وايد كتلعب بالفرشيط فطبسيل" : تعلمتي هادي راسك ؟ احم ح حيث طيبتيها ب احم...
زين الدين : بشكل احترافي !؟"حركات راسها." دوزت 2 ans ف l'Italie كان عندي واحد لفورماسيون تما...المعاشرة مع الناس عراضة من هنا من لهيه.."شير ليها ناحية سباغيتي" la Recette من واحد سيد صاحبي تما ف ناپولي..
فرح"رجعات كتاكل حمقتها بزاف" : عجبااتني...
زين الدين : داكشي الي بغيت الفرحة ديالي...
تبسمات شوية وجمعاتها رجعات كتاكل وخا عجباتها طغا عليها الخجل والتوثر...رجعو كيتعشاو هاد المرة ف صمت وتوتر بالنسبة لفرح اما هو كان عندو عااادي جدا الفرحة ميوصفهاش فهاد اللحضة وهي قدامو كتاكل وبدات كتطلق تدريييجيا...تكسر الصمت بسؤالها ليه...
فرح : واخا نسولك"بصوت منخفض"
زين الدين"هز فيها عينيه وحرك راسو" : سولي...
فرح : احم ش شامة شكون سماها هاد سمية...
زين الدين"حط الفرشيط وهو وعقد حجبانو ماباغيش يجبدها لكن مايصيبش يكذب ولا يلغي الاجابة" : عمتي...
فرح"تفكرات نهار عاود ليها على المشكيل الي وقع ليه معاها وهي تحرج ولات غير تحنحن" : كحكح اااه...
زين الدين"حك شنايفو بسنانو وعينيه كيسوفو فنقطة قدامو تا بدا يهضر" : ديك الوقت كانت مزال ماتزوجات مزال عند الحاج البغدادي فكازا فالدار القديمة...مزال الواليد هنا خدام مع مول الذهب فالصنعة...ديك الوقت جات عندنا فالعطلة كانت الميمة حاملة بيها بقات معانا حتى ولدات الميمة كانت مريضة بجهد مكانتش تگد تقابلها..."عض فمو راجع بالزمن لداك النهار الي ولدات فيه...
فاطمة"موقفة رجليها مغطياهم بايزار والقابلة خاشية راسها تحت فاطمة الي دموعها دايزين كتعصصصصررر" : مممممممممممععععععتتتننن ااااااااااااااربييييييييييييي واربيييييييييي صبر من عند اربييييييييي
القابلة : دفعي ابنتي مزيان دفعي الله يرضي عليك...
فاطمة : مااااقدرتش مااااقداااااااااارتش اهى...
توبا : فاطمة ختي عافاك الى ماصبري غير عضي فالنفس.ودفعي مابقا والو ...هانتي"هزات كمايمها وعطاتها جنب كفها" عضي هنا مزيان باش تبردي الحر ودفعي ...
فاطمة"عضات ليها فجنب كفها بكل قوتها" : اااععععععععععععععععتننععععع اااااااااااعععععع"خرجاات عينيها على حر جهدهم"
ع.الله"على برا هاز كتاب الله كيقرا القرآن كانت الربعة ديال صباح وزين الدين بالجوار مكمش حداه ووذنيه غايبين مع بيت مو وباه فين كتولد قلبه كيضرب بجهد ولد فعمر صغير عقلو مع مو والي فكرشها والي كل نهار كيصبح عليه ومتمني يكون بنت الي يكون سندها ورفيقها ويلعب معاها مكانتش عارفة ديك االساعة شنو عندها مكانوش الامكانيات باش يعرفو ماشي فالفلوس وانما المشفى او عيادة عندمن تبع حيث البلاصة كانت مفتاقرة لهادشي...كانو بزااف كيولدوهم القابلات كيف دايرة دابا...
زين الدين"سمع غوتتها وهو يكمش فدراع باه"
ع.الله : صدق الله العظيم"شاف ف زين وطبطب عليه" ماتخافش اولدي دير يقينك فالله كيف كنوصيك انا وجدك الله يرضي عليك والحسين باك...
زين الدين : اه عارف ابا ان شاء الله تولد ليا ختي حبيبتي...
ع.الله"ضحك" : ههههه واش يخليك ماكد اولدي ههههه
زين الدين"هز كتافو" : حيث بغيت...
ع.الله : ايهااي هي الي بغيتيها تكون..."حرك ليه زين راسو وضحك عبد الله من هضرتو..."
توبا"قابطة ليها ايدها من جيهة ولايد لاخرى كتعض فيها كلها كالتها..باست ليها ايدها" : زيدي غا شوية زيييدي...
فاطمة : ماااااقادراااااااش ماقادرااااش عذبتنييييييي عذبتنننننمممممممممممننتععععععععععععااااااااااااااا"هزات راسها تا خرجو عينيها وهي تحبااااااااس."
توبا"ضارت جيهة القابلة الي خرجات راسها هازا فايدها البنية" : امضرا اشنو ؟!
القابلة"هزات من رجليها وقلباتها راسها لتحت صرفقاتها لترمتها كتهزهز فيها تا بدات تغوت وهي تقلبها العادي ولواتها فايزار" : بنت اللا توبا...
توبا"تبسمات بفرحة تا دمعو عينيها" : ههههه الله ياربي زين الدين غايفرح هههههه اريها نعطيها لمها..."شداتها من عندها ملوية فايزار صغيييييورة بغات تحطها ليها وهي تبعدها بايدها
فاطمة : من بعد من بعد...
توبا"بخوف" : مالك اش بيك ؟!
فاطمة : عيااانة عيااانة عيااانة مانقدرش..ديها لعبد الله هو يوذن ليها ويسميها"حطات راسها ومشاااات حتى تخلعات توبا وهي دور عند القابلة"
القابلة : ماتخافيش غير العيا ديال الوجع ابنتي..هاهي غاترجع توجع ثاني..."مافهمت توبا والو وهي تبان ليها فاقت وخرجات عينيها تاني رجعات كتوجع من جديد بقات تغوت وتعصر وتوبا تراري بالبنت مافهماتش مالها بقات تعصر تعصر حتى لاحت البواقي ديال الكرش الي هما الخواتات وعروقاتها تكب...عاودت البنية طلقاتها بزگية تغوت لربي الي خلقها تا وصل صوتها لوذنين زين الدين الي حرك ليه قلبو"
زين الدين"وقف كينقز ويصفق" : ولدااات ولداااااات ختي ختيييي...
عبد الله"وقف كيضحك" : اللهم لك الحمد هههه باش عرفتيها ختك وماشي خوك ااا ؟ هههههه..."بقا ينقز ويتسنى فيها تايعطيوهم خبار حتى شوي جهد ربع ساعة تحل الباب ودخلات توبا كضحك هازا فايدها البنية...كتبكي وتسكت حتى عطاتها ليه مبتاسم وفرحااان..." تبارك الله تبااارك الله...هههه
توبا"تحنات لعند زين الدين" : اش تافقنا كبيدتي ؟
زين الدين : ختيييييييي"حركات ليه راسها كضحك حيث عارفاه باغيها بنت..تا بدا ينقز ويمد ايديه" عطيني ختي عطييينييي.."جلساتو وشدتها من عند خوها حطتها لزين بين ايديه كتنغش بايدياتها وتبكي بليييقة بزاااف لكن ملامحها حرشين فحال زين الدين...بغا يشد ليها ايدها وهي تزير ليه على صبعو ودلات شنيفاتها بغات تبدا تبكي..هبط عبد الله لمستواهم وقرب لوذنيها بدا ياذن ليها حتى كمل"
توبا : عطيني نديها نلبسها...
زين الدين : ديني معاك لبسوها انا وياك عمتي عافااك.."شداتها من عندو وداوها لبيت عند مو لقاوها متكية غااايبة ماهياش هنا والقابلة كتجمع وتنقي...بدات تلبسها فحويجاتها دارت ليها لكوشة هي لولة اي تسرويلة البلدية داوات ليها البوط بدوا الحمر وزين الدين داير ليها صبعها بين ايديها مكمشة فيه وكاسرة دنيا بالغوات..حتى سمع صوت مو كتهضر بيه عياااان بجهد.."
فاطمة : ديها من البيت اتوبا صدعتنييي....
لبساتها ولواتها فالگماط وايزار وخشاتها فمانطة وهزتها بين ايديها...
توبا : وخا حبيبتي رتاحي هاهي معايا فالبيت وليني افاطمة خاصك ترضعيها...
فاطمة ؛ من بعد من بعد ونرضتها ضرني راسي ماقادراش اتوبا عافاك اهى اهى...
توبا : وخا صافي واحد شوية ونشوف اش نعطيها باش تسكت.."ماجاوبتاهاش رجعات تنعس وتوبا هزات البنية خرجات وبجنبها زين الدين طلعات لفوق البيت الي مخلينو لباها وامها قبل ماتوفى كانو كينعسو فيه الى جاو عندهم زيارة ولا توبا نيت...حطاتها فوق الناموسية تا طلع زين الدين حداها وديك الايد لا هي بغات تطلق منو كترجع تزير ليه على صبعو فوق ما شدها...هبط راسو لجبهتها اليةكان كاسيها الزغب..بقات تبكي وتسكت وهو شاد فيها وتوبا كانت كتجمع فشي حوايج وفنفس الوقت مقلقة من حيهة فاطمة الي ماعرفت مالها...بقات دور هنا وهنا مخليا معاها زين حتى ضارت لقاتها نعسااات...تبسمات وهي تجلس بجنبهم حطات ايدها على شعر زين الدين...
توبا : هههه عجباتك...
زين الدين : بزااااف..زوينة...
توبا : على بالك تسميها شي سمية ؟
زين الدين"هز كتافو" : ماعرفتش.."رجع كيشوف فيها بعويناتو الخوضر حاضي تفاصيلها الصغيرة عينيه عليها حتى رجع للواقع والحاضر وشاف ففرح الي كانت ساهية فيه وهو كيعاود وعينيه فنقطة بعيدة"
زين الدين : شي سيمانة هكاك وهي مريضة جا الحاج البغدادي جاو المعارف كان ولابد نديرو العقيقة ودبيحة ولابد تسمى.."سرح ايديه ورجع جمهم" عطات الحق لعمتي تسميها يمكن كانو هاضرين متافقين بيناتهم الي عارف هو العمة الي سمات شامة ومانكذبش عليك سمية طرباتني.ونغماتني..."سكت وتنهد كيشوف فيها"
فرح : زوينة شامة..."بدات كتفوه"
زين الدين"شاف فساعتو" : شنو عييتي من دابا ؟!
فرح : شوية..
زين الدين : كملي ماكلتك وطلعي..."حركات راسها رجعات تاكل هي وياه تا كملو وناض جمع دوك الطباسل كانت بغات تعاونو مخلاهاش باس ليها راسها وطلعات مخلياه كيجمع وكل مرة كيزيد يامنها عليه ويعلقها ويريحها من جيهتو...كمل وطلع حتى هو البيت ديالو هو وختو والي قريب لبيت نعاس فين ناعسة دخل حتى اطمان عليها بالي تكات وعلمها بالي ناعس غير حداها فالبيت وخرج..."
اصبح يوم جدييد الساعة العاشرة صباحا...حل الباب بالساروت راسو مطنطن بالبيان حاس بيه ثقيييييييييل فوق جهد...كي دخل لاح ساروت وكلشي ومشا دخل لدوش تسنى الما تا سخن حيد حوايجو لاحهم فالسلة...ودخل يدوش كيخوي عليه فالما دااااااافي كيحس براسو كيتوگض..دوش مزيان وصحصح وخرج لاوي عليه فوطة مشا البيت نشف حالتو لبس تيشرت وسروال سورفيت مشط شعرو عاد خرج الكوزينة رد القهوة تبخ وجد ليه فطور خفيف داكشي الي فثلاجة...دور راسو لنواحي بانت ليه دار بدات توسخ وهادشي لاحضو نيشان حيث دار عمرها كانت مسخة ديما نقية كلشي مصبن الحوايج مصلوحين مطويين ليهم الكاس لاخر مكتخليهش موسخ يبقى الى ماجمعات الكوزينة نقاتها وعطراتها ماتنعسش...متولة فكلشي كلشي توجدو ليهم ماتخليهش تا يحل فمو يقول بغيت..تكا عالبوطاجي كيتسنى القهوة وفنفس الوقت ساااهي..فالماااضي...
عصام"هز صينية فيها غراف الحليب بسيرو حمر الي كيعجبها وكوميرة صغيرة فيها بيضة مصلوقة وفرماجة و واحد كوكيز..مشا لبيتها حلو بشوي لقاها ناشرة الوراق فالبيت كلو ومربعة رجليها هازا ستيلو وكتخطط فايدها جامعة شعرها بواحد القلام...كتحفض لباك...حط البلاطو وضار لقاها راسمة فدراعها" : اش داكشي ؟!
فرح"هزات فيه راسها" : ميمكنش اخويا منرسمش ولا مغانحفضش هاكا...
عصام : هذاكشي سحور ماشي حفاضة..دوزي تاكلي ونعسي براكة عليك الستة ديال صباح هادي...
فرح"هزات راسها فشرجم عاد ردات البال را صبح الحال وهي تشوف فيه" : ونتا مانعستيش؟"ناضت"
عصام : لا بقيت مريح كنتفرج وحاضي لا تبغي شي حاجة.."تلاحت عليه عنقات تبسو فحنكو ووجهو تا بعد وجهو" نعل جدر والديك مالك مقجرة مالك دوزي تاكلي وسير صهطي.
فرح : ههههههههععهع واخاااو...
حط الفطور فوق الطابلة وفنفس الوقت كيهضر بالاير بودز فوذنيه...
زين الدين : الحاج حاول تصرف الله يحفضك معنديش كيفاس ندير نتحرك تما منصيبش نخليها وحدها ولا نديها معايا وهي مابغياش...عذرني الحاج هذا جهدي..ماعليش في امان الله من بعد عطيني خبار..."قطع وهو يسمع صوت تقرقيب فوق راسو فالدربوز ديال فوق هز راسو بان ليه غير ريح...حط فالطابلة مسح ايديه ومشا طلع كيعيط باسمها" الفرحة ديالي ؟؟"دخل البيت طل لقاه خاوي مشا الباب بغا يخرج وهو يتحل الباب تا دخلات كتشوف فيه وعينيها مغرغرين باغية تهضر وخايفة مترددة ." مالك ؟
فرح"كتبغي تهضر وترجع تسكت تهضر وترجع تسكت حتى نطقات بعد جهد جهييد" : غييير خلينا نمشيو اليةم لكازا..."كمش حجبانو مضيق فيها عينيه بتساؤل." ماشي انا الي نخرج على خدمتك ولا حاجتك ولا نضرك وانا ماشفت منك غير الخير. والله ماهبيلة اهى والله مامعقدة..والله ما"مخلاهاش تكمل جرها بايدو من ورا راسها ملصقها مع صدرو كيحك على قرفادتها.وعنقها بحنااان"اهى...
زين الدين : نتي حاجتي وحاجتي نمووت عليها
مدة وهو حاضن راسها عندو متفاجئ من هضرتها ولكن الي فاجئو اكثر هو انها مابقاتش كترعد وهو معنقها وخا كيحس بيها كتبرزط شوية لكن كل يوم كتزيد تحسسو انها حاسة بالامان معاه وانه غادي معاها فالطريق الصحيح درجة درجة كيف كيقول هو وكيف اتافق مع يونس الي غايجي هاد النهار بطلب خااص من زين الدين انه يجي عندها ويحاول يبدا معاها على امل اللقاء عندو فالعيادة...
زين الدين"خرج ليها وجهها من حضنو وتقابل معاها كيمسح ليها دميعاتها" : ششش مابغيتش مزال تبكي ماتقاديش جهدك فيهم...
فرح"هزات فيه عينيها ونطقات بصوت غالب عليه البكا" : خلينا نمشيو لكازا عافاك مابغيتش تخلي خدمتك على قبلي.."بغا يهضر وهي توقفو" عااارفة مغاديش تخليني وشايفة كلشي وحاسا بكلشي كيف ما نتا معاونيي حتى انا نعاونك...اصلا بغيت"سكتت..ايديها كيلعبو بتوب البيجامة من فرط التوثر والتردد والخوف كلشي مجموع فهاد اللحظة زايد عليه حتى محاولة التشجع باش تهضر فالخطوة المقبلة لانها هي براسها عياات من هاد الوضع وبغات تزيد القدام...عاوتاني يلاه بغا يهضر وهي تنطق" اص اصلا بغيت نجرب بلاصة جديدة ولكن معااك ياك تما مكاين حتى واحد ياك ؟!
زين الدين : عايش معايا مراد..مراد ماشي من نوع الي كيبرزط
فرح"حركات راسها" : عارفة عارفة ومراد مدار ليا والو علاش منبغيهش"شافت فيه بترجي" انا بغيت غيير نرتاح بغيت نكون معاك حيث ثقت فيك..وعارفاك مغاديش تديني لشي بلاصة انا مابغيتهاش"حسات بغصة فحلقها وقلبها بمجرد منطقات هاد الجملة والمعنى انه كيرجع بالها لاكثر مدينة عاشت فيها الالم وهي الجديدة..ومع خوتها الي كسرو بخاجرها يمكن اكثر خصوصا عصام الي تكسر كلشي من جيهتو !!" ياك "كتشوف فيه بترجي وتاكيد بانه مغايديهاش لتما ولا يفكر يجيب ليها شي حد منهم او تعيش بعض المخاوف الي هي عاشتها..." يااك ؟
زين الدين : مابغيتش تكوني فوگ خاطرك معايا..مابغيتش ديري شي حاجة فوق طاقتك على جالي انا..."هز ايدو وهي تهز ايدها كانت بغات طاكي وهو يغوبش حتى قال را ولفات وهي ترجع وخا ماشي كيف لول كانت تغوت وتخاف..غمض عينيه تا غمضهم ورجع حلهم متبت راسو ميتعصبش من هاد الحركة الي دارت ماشي منها وانما كيزيد يتاكد ان شي حد ضربها وهادشي كيخلي الجنون يركبوه...رجع مستانف الحديث" رتاحي نتي وكوني بخاطرك نتي وماديريش بالك معايا هاد ساعة محتاج تبقاي نتي مرتاحة...
فرح"حركات راسها وفنفس الوقت كتمسح دموعها" : مرتاااحة مرتاحة غير خلينا نمشيو محتاجة نولف بلاصة اخرى..محتاجة نبدل من راسي هادشي كيعذبني والله حتى كيعذبني.."كتكابر وهي كتاخذ هاد القرارات"...
زين الدين"هز حاجبو" : مأكدة ؟...
فرح"كتحرك راسها بزربة باش متراجعش" : هى ااااه..نمشيو ليوم عاافاك..
زين الدين"حرك ليها راسو وهو كيشوووف فيها لشحاااال مركز فيها شوفة وفدوك العوينات الي قهراتهم ليه بالبكا فحال الى كتبكي ليه فقلبو...هز ايدو شاف فساعة" : واخا ماعليش فطري شوي ويكون هنا البروفيسور يونس...
فرح"سمعات اسم يونس وهو يتهز قلبها على جهدو فدقيقة كاااع ذكرياات يونس الي مات " : شكوون ؟؟"حتى رجعات بلور كون ما تحرك زين الدين وشدها"...
زين الدين : ششش مالك ؟؟.."عرفها بالي سمعات سميتو وتاثرات..وهادشي حرك فيه شي حاجة معجباتوش وخا يكابر تايعيا بانت ليه فوجهو.."
فرح"هزات ايدها كترعد...كتحك فجبهتها" : احم م ماماليش..
زين الدين"ماحكرش ك ليها على كتفها بلطف" : اجي تفطري.."حدرات راسها ونزلات هي وياه لتحت لنفس الطابلة فين تعشاو..مشا بوجه مغوبش ماشي تال لهيه كحز ليها الكرسي وشير ليها براسو باش تجلس..غير جلسات ضار جيهة بلاطو تا كب ليها اتاي بالنعناع الي كتفطر بيه وكحز ليها كاس الحليب هو لول" بداي بهذا وتيسري باتاي...
فرح : مكنحملش الحليب..
زين الدين : ماعليش عضي فالنفس وشربيه واحد المدة يرجع ليك سوفل لوجهك..هاد ليام معاجبانيش حالتك من نهار جيتي مزال نمشيو لهيه وندير ليك ليزاناليز"شافها فحال تصدمت" شش كلشي فالدار...من بعد ناخذ ليك رونديڤو عند دونتيست وحدك حيدي عليك Dent de sagesse(ضرصة العقل)مكاين لاش تتعاود تمرضك...
فرح"بقلق" : غايكون عامر بناس ياك ؟
زين الدين"جلس فكرسيه داير ايديه تحت ذقنو..عوج فمو بزربة بمعنى لا" : لا نعلمو يخليك نتي لاخرة ولا تا وكان يكونو ناس قلاال وهااادشي افرح تاهو حاولي تولفي عليه كيف درتي فانزگان شنو وقع ليك داك نهار فاش كنت معاك ؟"سرح ايديه" والو وباش نريحك ديك المحطة ناس براسهم كتبرزطهم..وبقاي يالالة ليا على خاطرك...مرتاحة دابا ؟
فرح"براحة مسبقة..حركات راسها" : اه...
زين الدين : يلاه فطري وطلعي لبسي عليك شي حاجة طويلة فوق داكشي الي لابسة..ولا بدليه حسن..
حدرات راسها كتشوف فالفطور الي كان زوييين..مقلة اومليط ليها ووحدة ليه...غير هي دار ليها فيها فرماج حمر عكسو هو الي خلاه سادة لكن طايب بطريقة خاصة بحيث مخلاش صفر يطيب يعني دار بيض عيون..رش عليه ملحة وابزار فقط..وخبز شعير باقي سخون جابتو ليه زاهية زيت زيتون ومرافقات والحلوة ديال لوز فطبسيل الى بغات منها وقهوة كحلة بدون سكر ليه...فطرات هي وياه يلاه كملات كاسها دياال اتاي اما لحليب بزز باش تكات عليه..تدق الباب ديال دار وصونا ليه تيليفونو فنفس الوقت طل عليه لقاه يونس...
زين الدين : ماعليش تشيتشونا تحركي لفوق ؟!
من داك النهار يعني ثلاث ايام وهي سادة عليها البيت ديال النعاس..كاتفيق فالصباح بكريييي تمشي لصيدلية تسيقها وتنقيها حيث مخليا ليها الطبيبة ساروت وماحتال تجي طبيبة كتكون كملاتها باش ترجع...هاد النهار من بعد ما سالات من شغل الفرماسيان...يلاه كتلبس فحوايجها وهي دور جيهة الباكيات الكبار لفوق فين كتمسح حتى لمحات واحد سمطة ديال لاگين كتسد من لوسط خاص بمالين سياتيك او الام الضهر من نوع اخر...ضارت عند طبيبة الي حطات صاكها باش تلبس طابلية وهي تسولها...
توبا : بنتي غزلان خاي الله بشحال دايرة ثمن دهادي ؟
غزلان"ضارت فين شيرت ليها" : علاش شنو خاصك ضارك ضهرك محتاجاها ؟
توبا : بنتي الي بغاتها هههه اههه كي شتي عندها الكرش وبغاتها على حساب لاصال...
غزلان"طلات براسها على الكراطن وهزات صبعها شيرات ليها على وحدة بيج بستريتش" : خوذي هاديك حسن..الثمن 150 درهم...
توبا : 150 درهم ؟!
غزلان : را كدير 300 درهم غير نقصت ليك النص..سي نو خوذي لاخرا غير عادية ب 70 درهم مغاديش تعاونها باش دخل الكرش..
توبا"بقات كتشوف بتفكير كانت لابسة جلابتها وشالها باغا تخرج حيث سالات.." : احم وخا ناخذ ليها ديال 150...
غزلان : جيبي من تم نديرها ليك فساشية.."مشات توبا تعلات فالسلوم تا جبدتها وجبدات بزطامها كانت فيه مية درهم"
توبا : وخا تبقى خمسين درهم صباح نجيبها ليك.؟ ماجبتش معايا فلوس بزايد...
غزلان : وخا ماشي مشكيل"عطاتها مية درهم دارت ليها باكية فساشية هزاتها وشكراتها وخرجات من الفرمسيان...على طول الطريق وطوموبيل تابعاها بدون ماتحس بقات غاديا تا وصلات عند مول صاكا خذات الحليب وباكية نيسكافي وشي كوميرات من عند المخبزة..عاد طلعات لعمارة لفوق...حلات الباب ودخلات على غير كيف دخلات..دخلت مكونة وعاقدة ديك الغوباشة الي لا اله الا الله...حيدات جلابة بالنترة علقاتها هي وشال وهي تم غاديا لبيت التلفازة لقاتها مزال ناعسة حاطة ايدها فوق كريشتها الي مزال مبانتش رغم تقدم الحمل..حتى لاحت عليها الكرطونة بجهد قرقبات ليها ناضر...
ضحى"ناضت مفزوعة شدات على ناضرها" : هييييييي ماما...
توبا : يوميك الخانزة يوميييك عليا."شافت ساعة فالحايط" مزال الحال ابنتي مزااااال على القحوب فاليالي الي كنتي مولفة تهزي فيه رجليك مزال الحال...
ضحى"من بعد ما رتاحت منها هاد اليومين الي كانت قاطعة فيها الهضرة معاها بتاتا تا اي ماسمعاتها منها اليوم حتى هضرات ودارت ليها هاكا." : اماما اشنو ثاني ااااش اهى ياك قلت ليك خليني نمشي نغبر عليك وجهي اش بغيتي عاود اااش اهى اهى...
توبا : ههههههه ايهاااي تغبري عليا وجهك !! داكشي الي بغيت وليني غير صبري عليا غير شوية ونوريك فين تغبريه غا سميه صابر...نوضي تگلعي حيدي تريكوك نشوف ديك كرش الحرام قداش...
ضحى : مافهمتش علاش بغيتي نحيد تريكو ؟؟
توبا"جهدات صوتها تا قفزات ضحى" : واااااااا تگلعييي عليا نشوف كرشك واش كبرات تگلعي...
ضحى"ناضت بلا ماتعاود الهضرة اصلا الخاطر زيييرو النفس جد ضيق والسعة ديال النقاش منعادمة فما كان عليها الا طبق شنو قالت ليها..هزات تريكو وهي تبان كرشها شادة العرض باين فيها الانتفاخ شوي يعني الي مختص او الي فايتة والدة ومعاودة ولا فحال توبا دايزين عليها الحمالات غايبان ليها الفرق..." : هاني...
توبا : هبطي الخرا هبطي الله يلگيها ليك نتي والي فكرشك عليا..الله ياخذ فيك الحق كي طيحتي ليا راسي فتراب ومرمدتيني لا قرايا شديتيها لا عقل درتيه لا طيسة درتيها خليتيني نتمرمد ونعرف كي نتمرمد"نزلو دموعها يجريو" بغيت نعرف غير اااش درت ليك ااااش تا درتي ليا هاد الحالة من ااااش خصصتك من ااااش الله يعطيك مصيبة اهى اهى الله ياخذ فيك الحق...
ضحى"شافتها بدات تعاير وتدعي وتبكي خصوصا بكاها كينزل لضحى كي سم على ذاتها..دارت صباعها فوذنيها كاتمة صوت توبا وبكاها ومعيورها وتشحات" : اهى اهى صااافي عذبتيييني عذبتيييييني الموت رحم ليا من هادشي الي درتي والي درت فيك اهى اهى خليني نمشي نغبر عليك وجهي وتهناي مني خليني نمشي ولا نمووت رحم ليا من هاد العذااااب اهى اهى..
توبا : اتفووو. القحبة"طرشات حناكها وراسها جراتو بجهد تا شنتفاتو"...تفوووو.."بدات تنهج حتى تسمع صوت الباب كيدق ضارت بزربة مصدومة كتنهج وهي دور لبنتها بزربة" نوضي تكعدي دخلي لبيت نوضي وديري هاديك الي فالكرطونة لكرشك باش ماتبانش نوضي ابنت القحبة نوووضي...
ضحى"بدموعها ناضت هزات الكرطونة ومشات تزرب دخلات البيت اما توبا قادات شعرها وهي كتنهج يلاه غاتمشي حتى حسات بصبابة بين عينيها تا ولات ترمش فيهم...تكات على الحايط وشدات على صدرها كتحس بالحريييق فيه فحال الى شربات العافية تا ولات تكحب" كح كح احكحكح..امم..
عاود صونا السرسار حتى بانت ليها ساقطة كدور عرفاتو مراد حيث ملي تعطلات اضطر يحل بساروت..حتى حل الباب وطل بانت ليه متكية عالباب...
مراد : الوليدة !!!
توبا"هزات فيه عينيها بشوااايا مع رمشات قطرو دمووع من عينيها" : ممممم
حل ليه الباب تسالم هو وياه سلام رجولي ضرب ليه على كفو تا خبشو ولوا ايدو وعنقو كيخبط ليه على كتافو..جاي باناقة كلاااس كيف العادة شعرو كثييييف مرجعو لور ولحية كثيفة وخا ناقص منها ومقادها...ضارب قميجة فالابيض وسروال فصالة كحل ريحتو واصلة لاخر درب خفيييفة رجالية بامتياز..
يونس : واش انا مالاقي شغل نضرب عليك طرقان ؟
زين الدين"هز حاجبو" : شنو كيتسالك دابا ؟
يونس : زيدني عراضة نتا والحاج علي راني ماشبعتش...
زين الدين : الله اودي مرحباا...وسمح لينا ابا يونس مرتناك معانا...
يونس : عاودها لراسك...مالي انا نسا خيرك معايا ؟ نسا ايامات لافاك عندمن كنت نبات فالوقيتة الي مكنتش لاقي فين نبات وخا كبر منك درتيني صاحبك وخوك..."تنهد" اودييي خير كبيييير درتي معايا بلا منرجعو الماضي...
زين الدين"ربت ليه على كتفو" : خيرك وخيري مابيناتناش الحسابات اولد الناس...مرحبا رتاح مع راسك...
يونس"ضار شاف فيه وهو كيجلس" : امضرا شي تطورات هاد صباح ؟"حيث كل نهار كيعطيه تقرير"
زين الدين : بغات تمشي معايا لهيه لداري...
يونس"هز حاجبو" : وايلي تطور ملحوض وزوين..عاد كازا معندهاش هي فيها شي مشكيل ويمكن موقعش ليها فيها شي مشكيل...
زين الدين : المعنى ؟
يونس : البلايص الي طراو فيهم المشاكيل بالنسبة ليها مصدر عدم الراحة وكيف كنقولو ماشافتش فيهم رباح والراحة دونك خطوة فحال هادي متوقعة انها تبغي تمشي معاك وخا قالت ليه قبل مابغاتش غير ديك الساعة كانت فالمرحلة اللولة من المرض النفسي...
زين الدين : فطرتي ؟!
يونس : سييي فطرت اسيدي فواحد ريسطو خطيير هنا فتارودانت فطور ديال شلوح من داكشي...مابغيتش نجي ونفلت فطورهم خصوصا املو وزيت ارگان...ولكن بغيت واحد الكاس ديال قهوة معصور على خااااطر خاطرو ماكرهتش يكون نيسبريسو صون سيكخ(بدون سكر)...وعلمها باش تجي نبداو التعارف هو لول...
خرج زين الدين مشا لكوزينة هو اللول دار الكابسيل فنيسبريسو كحز ليها الكاس وخلاها تقطر فيه على خاطرها عاد مشا طلع لبيت دق عليها ودخل لقاها مبدلة وجالسة كتشوف جينة شرجم وهو يحنحن تا ضارت..
زين الدين : الفرحة هبطي واجدة ؟!
فرح"حركات راسها وناضت تقدمات ناحيتو وفنفس الوقت هو كيدقق شنو لابسة تا تاكد انها لابسة بيجامة قطن خضرة وسروالها ديال كارويات لفوقي طويل شوية مي لابسة فوقها بينوارها رطب طويييل سداتو وخشات ايديها فجيابو كحاز تا جات قدامو حضا لور واش مغطي ساعاك طويل مستور ووخا هكاك غلضها ملفت...تسناتو تا جا قدامها وتبعاتو تا نزلو لتحت وقفها تا مشا جاب الكاس دارو فبلاطو وهز قرعة الما وكاس دارهم فبلاطو مع طبسيل الحلوى وشير ليها باش تبعو حنحن ودخل حاط البلاطو وهي وراها مكمشة فحوايجها تا ولاو ايديها مسقوط منهم دم. بداك التوثر وخا حادرة عينيها فلارض
زين الدين : فرح دخلي رتاحي هنا...
يونس"بابتسامة" : بونجوغ مادام فرح...
فرح"سمعات مدام وهي تهز راسها نيشان ف زين الدين تا تزنگو حناكها وصرطات ريقها الشي الي خلا زين الدين يعوج فمو ببشاشة عجبااااتوو ديك كلمة مادام..
..حركات راسها ونطقات بصوت شبه مسموع كتحسي فيه ذبذبة ديال توتر والخوف والاصرار على شي حاجة" : ه سلام...
يونس : جلسي افرح رتاحي ماتخافيش غادي غير نهضر معاك بالخاطر الي بغا خاطرك نتي الله يجعلو يكون كلمة منك براااكة...
فرح"شافت فزين الي حرك ليها راسو وهي تقدم وجلسات فين وراها زين الدين مقابلة ليونس الي كان فالسداري لاخور"
يونس"شاف فزين الدين" : تقدر تخلينا وحدنا
فرح"هزات راسها بزربة مخلوعة" : فين فين ؟ فين غايمشي ؟ لا لا غير خليه معايا عافاك
زين الدين"قرب لعندها وتحنى لمستواها كيشوف فيها" : شش معندي فين مخليك انا معاك هنا"شير ليها حدا الباب برا" عند الباب موجود وقت الي احتاجيتيني.."حط ايديه فوق ايدها كيدوز عليها بحنان وطمأنينة" معااااك معندي فين غادي...حاولي ياك بغيتي تحاولي باش تحيدي منك هادشي ؟"بقا حتى حركات ليه راسها باس ايدها وناض من حداها غمز يونس الي بدورو ردها ليه وبقا غادي بشوي بشوي تا حل الباب وسدو بشوي حسات بيه واقف حداه عاطي بالضهر..
يونس"جبد تيليفون وطلق تسجيل حداه بدون ماتشوف" : شنو اسمك الكامل ؟!
فرح : فرح فرح الخ خياالي..
يونس : شنو المستوى ديالك ف القرايا ؟
فرح : ليصونص فبيولوجي..وديبلوم فكونطابيليتي...
يونس. : تبارك الله وماعمرك فكرتي تكملي فالبيولوجي ؟
فرح : ااه فكرت نكمل ماستر العام جاي ولكن"صرطات ريقها وسكتات"
يونس : ماعليش مادام عندك لا نوط طالعة ياك ؟
فرح"حركات راسها" : مونسيون بيان..
يونس : bravo..شحال فعمرك ؟
فرح : قربت ندير سبعة وعشرين هاد شهر...
يونس : مزياان.."سكت كيشوف فيها وهاود نطق"نتي الصغيرة ولا الكبيرة فداركم ؟!
فرح"حركات راسها": الصغيرة...
يونس"ضيق عينيه كيشوف فيها" : ف شنو كتفكري دابا ؟
فرح : واالو..
يونس : اذن علاش كليتي ايديك بديك طريقة شوفي كيفاش دايرين ؟ على بالك هادشي كيجي من ستريس بزاااف الي سبابو التفكير زايد فشي حاجة ماثرة فينا ومزال زايدة فالتاثير...
فرح : ماكنفكرش مابغيتش نفكر مابغيتش مابغيتش...
يونس : تعاملي معاه كانه شيء عادي "شافت فيه.وعوج فمو" علاش نخليوه ياثر فينا ؟ الى بغيتي يحيد ومايثرش فيك ديريه فحال الى روتين داز فحياتك هذا اذا كان شي حدث الي خلاك توصلي لهاد الحالة...تخافي تقلقي توثري بزاااف...فحياتنا اليومية كنمترسو بزاااف الروتينيات الى جينا نصنفوها غالقاو نسبة كبيرة فالمية خطر علينا وشي مرات كيكون شي حدث تافه وقع خلا تاثير فنفوسنا...ف كيف كنتعاملو معاه قبل بتفاهة نعاودو نتعاملو بنفس القضية...
فرح : مابغيتش نكون بهاد الحالة مابغيتش نبقى نخاف من ناس بزاااف انا ماكنتش هاكا ماعمري كنت نقول غانوصل لهادشي"بداو دموعها ينزلو" ماعمري بغيت اهى اهى ولكن هما سبابي هما الي وصلوني لهاد الحالة تضريييت بزاااااف مرضت بزاااااف..
يونس : شكون هما ؟
فرح"غمضات عينيها حتى رجعات لذكريات ديك الايام سوداء او اليوم الاسود..حتى تسد الباب بجهد وهي تنطق باشا"
باشا : زيدي لبيت نعسي وصباح نشوفو اش نديرو...
فرح : لا لا بغيت نمشي صباح عندي الكار بكري اخالتي خليني نمشي فحالي شكرا اختي كنزة بغيت نمشي...
كنزة : هههه ياحبيبتي دابا تمشي راني قلت ليك ماتخافيش دابا تمشي وليني ضيافة نبي ثلتيام والله لا عتبتي وما جلسيتيها معانا حشومة تكوني فضيافتنا وماتباتيش عندنا والكار وقتما احبيبتي يكون والى مكانش"ضربات على صدرها" انا نديك راسي...
فرح : لا لا شكرا غير خليني نمشي لهلا يخطيك"قفزات تا غمضات عينيها ووجها هرب منو لون على اثر صوت باشا الي كان مجهد بزاف مدعدع فاش تسمعيه يحساب ليك راجل الي هضر"
باشا : راني هضااااارت دوزي دخلي تنعسي راسي مصدع معنديش مع كترة الفهامات...كنزة شدي من عندها صاك دخليها البيت واجي..
كنزة"قربات ليها وهضرات بشوية": عطيني صاك حسن ماتعصب راها خايبة غير عطيني وكوني تسمعي "حيدات ليها صاك بزز ودفعاتها بشوي هي ولاخرى تا دخلاتها لواحد البيت تلاحت فريحة هكاك فوق سداري سكرانة بصباطها نعسات وهي جلسات فوق سداري مكمشة وتشوف والرعدة شداها من صبعها تا ولا فمها وكلشي كيرجف..كتصرط فريقها وداك الريق كيمشي فقرجوطتها كيفيبري...بقات هكاك جالسة وترعد تا صبح الحال غا بان ليها ضو وهي تنوض كدق الباب وتعاود وتغوت يحلو ليها"
فرح : حلوو الباب بغيت نمشيييي كنزة ختي عافاك عطيني صاكي نمشييي...
فريحة"ناضت معصبببة بلا قياس" : اش كاين مع عدو ربك فهاد النهار ينعل بو مك اش كاين القحبة ماتخليناش نعسو ؟
فرح : بغيت نمشي حلو عليا علاش سادين عليا الباب اهى.."بقات تخبط تا تحل الباب على جهدو وهي ترجع لور بالخلعة تا دخلات ديك باشا شعرها واقف بيض نزلات ليها الما فركابي"
باشا : اش كاين على صباح ماناوياش تهنينا ؟!
فرح : ب بغيت كنزة تعطيني صاكي نمشي اهى عافاك...
فريحة. : كنزة فهاد الوقت كتمشي لعند صحيبها كايجي من البحر بكري...تسالي وتجي وليني بركي لارض هنينا لا "جبدات جنوي صغير من المخدة" نزلع لقحبة مك مصارنك فلارض حق الرب المعبود"كتجمع فريوگها الي سالو من جناب فمها المضروب فالاصل...غا بانت ليها وسنا ضو شعا فيها وهي تقفز الشي الي خلاها تفيق تا بدات ترعد وهي توقف كتحك فايديها"
فرح : كانت بغات تقتلني تقتلني اهى كانت بغات تخرج ليا مصارني هادشي الي قالت اهى اهى ووو ممم اهى كانت هي وكنزة هزات ليا حوايجي ووراقيا...ووو..
يونس : شكون هادو ااي كنتي معاهم فاكادير ولا انزگان"شافها متوترة بزاااف" صافي ماعليش رتاحي دابا ماتقولي والو غا هو فراسي غاتجي لكازا مع زين الدين ؟
فرح : ه ه ها اه...
يونس : تقدري تجي عندي لا سومين بخوشين نكملو سي ميو ياك ؟
فرح"حركات راسها"
يونس : براافو خطوة مزيانة منك..تقدري تخرجي.."ماتسناتوش تا كملها دغيا ضارت وهي تخرج غا بان ليها زين الدين وهي تمشي كتزرب لعندو كتنهج شدات ليه فدراعو..."
دخل مراد كيف العادة مقدي وهاز مياكي فايديه وكاع الي فكر غايكون خصها من بعد ما رسل لزين الدين ميساح فيه الصيدلية فين جات والاسم ديالها ومعاش كتخرج ليها باش يتاكد من شكوكو...بانت ليه مبدلة ووجهها تبدل فيه اللون لاح الميكات وطار لعندها شدها وداها الكوزينة تا جلسات عطاها تشرب ومشا لدوش جاب الة ضغط من صيدلية دوش عبر ليها طونسيون لقاه طالع...مشا بزربة وراتو فين كاين دوا طونسيون عطاه ليها شرباتو بقات تا رتاحت شادة على صدرها وتنهج...
مراد : شوية دابا ؟!
توبا : ممم
مراد : فين ضحى باقي مافاقتش ؟!
توبا. : يمكن باقا ناعسة عيط ليها شوفها...
مراد : ضحى ضحاااا انوضي براكة من نعاس..."شاف فيها" هاد صباح مكنتيش خارجة ؟
توبا"بصريح العبارة نيشان لاحتها ليه فوجهو كانها مابقاتش غاتسوق" : اه كنت خدامة...
مراد"صعقاتو" : كيفاش ؟ فين كنتي خدامة وعلاش تخدمي مالك اش خاصك ؟!
توبا : خدامة بدراعي امراد بغيت نخدم منعول على حد راني قلتها وخاصني نكون قادة بيها...الغالي مابقا لازمني بوالو تا بنتو مابقاش بغا يصرف عليها قاليك تبرا منا..اييوى نشمر على دراعي باش ناكلو..يمكن نبدلو المدينة"
مراد"بالصدمة وحدة من ورا لاخرى مالقا ميقول" : هااا
توبا : كي سمعتي بلا ماتناقش معايا فهادشي الي عندي هو الي قلتو....
توبا : ضحى بغات تقرا يمكن فوجدة ولا سطات فين كاينة ديك المدرسة وتما كاينة خدمة كثيرة...وهادشي كنقولو ليك باش تعرف ماشي باش ناخذ رايك...بغيتي هي هاديك مابغيتيش ضبر لمحاينك اولدي..
مراد : ياك اميمتي يااااك ؟"مجاوباتوش " وخا علاش لا كاع هادشي كلو منك امي يااك ؟ ماغانقول والو دابا انا خلي هاد الهضرة من بعد..
توبا : لا من بعد لا من قبل..انا علمتك باش تعرف وماتبرزطنيش امراد راني قلت ليك مابغيت منكم والو هااااا حجر العافية مابغيت والو مااااابغيت والوووو ولا دابا نخرج ونخليو ليكم هاد داااااااار"شافها مراد بدات تنفاعل وطونسيون طالع ليها"وهو ينوض"
مراد : واخا صافي صافي براحتك"خبط فوق طابلة ومشا صاعر من هضرتها تا سد الباب بجهد...اما هي بقاات كتشوف ودموعها نازلين شلااااال شحال وهي تبكي وتنخصص جهد ساعة وهي فالكوزينة الصمت فالدار حتى تسمع باب البيت تحل وهي توقف عليها"
ضحى : ماماا..
توبا"هزات فيها تينيها لقاتها لابسة" : اش كاين ؟
ضحى : خليني نمشي دابا هضرت مع صاحبتي كاينة فوجدة نمشي عندها حتى نولد ونبقى نقرا تما عمرك ماتشوفي وجهي الى بغيتي باش ترتاحي مني..عمري مافكرت نوصل لهادشي نطيح ليك راسك عااارفة راسي كنت خايبة معاك...
توبا : بغيتي تمشي خرجي يلاه خرجي سيري تقحبي عند صاجبتك سيري باغا تمشي تولدي الحرامية وتقراي ؟ هادشي ديريه قبل ماتهزي رجليك وتعطيه يدير فيك مابغا..سيري سيري..
ضحى"بقات كتشووو ووف فيها واحد شوفة فشكااااال عتاب لوم شي حاجة فحال هاكا وهادشي طبعا توبا ملمحاتوش مناخرها كيفرفو وصدرها كيطلع ويهبط..شافت تاعيات وهي دور وتمات غاديا وقبل ماتخرج ضارت عندها" : انا بغيت بنتي هي بغاتني ماخلينا كي درنا ليها مابغاتش طيح حيث بغاتني نعتقها نكون ليها ام الي مالقيتهاش فجنبي نكون ليها اب الي ماحاسش بيها واش كاينة...
تخطات دوك ساشيات الي حط مراد وحلات الباب ضارت تشوف مها واش تاباعاها ساعا والو قلبها كيضرب بجهد..يلاه غاتهبط وهي تسمعها جايا وتهلل بالفرحة يحساب ليها غاتقوليها رجعي وخا غير تقول رجعي اديك القحبة لدرجة تبسمات ساعاك..."
توبا"طارت عليها شداتها بديك الصعرة الي فيها زيرات عليها" : كيفاش تولديها وتربيها ؟ ااا ؟ ام عازبة يا القحبة عاااجبااااك...
ضحى : ماعرفتي تكون حسن مني...انا مغاديش نبقى دقيقة مزال هنا اماما حيث عيييت بزاااف وعيييتك معايا وعذبتك وكرفصتك حتى وليتي تخدمي فالميناج بسبابي وتخاصمتي مع زين الدين بسبابي وبابا تبرا مني اشمن حياة بقات ليا اللهم نمشي مع وحدة الي بغاتني وشدات فيا هي بنتي..حيث نتي اماما الي ماعمرك تقربتي مني ولا عرفتي شنو بغيت عمرك... الوحيد الي مد ليا ايدو ورديتها ليه هو زين الدين خوويا"دموعها كايقطرووو فلارض كي الحجر...
توبا : وطوااال ليك اللسان ووليتي تعرفي تهضري..بنتك خهههه ايااااه بااانتك الحرامية اممم ؟؟؟
ضحى"ضارت بغات تنزل فالدرجة شداتها توبا جرتها بغات تعايرها وهي تنتر بغات تبعد ايدها طلقاتها بجهد مع الخطوة الي كانت غاتحط فالدرجة لاحتها فالخوا تتنات ليها رجلها وهي طيح بغوتتها" : ومااااااااااااااااماااااااااااااااااا...
بقات تكركب تكركب تكركب تكركب قدام عينين توبا تكركب مع دروج العمارة تكركب تا تقرقب راسها تا وصلات لارض زداااااف...حلات عينيها على جهدهم وداكشي الي فكرشها كيتهز ويتحط كتحس بيه كيتشقلب ليها فكرشها مع تقريبا دخل فالشهر الخامس...حتى فيبرااات وهو يحبس...
يتبع...
التعليقات
لا توجد تعليقات بعد، كن أول من يعلق.