محتوى القصة
الضبابة بين عينيه الي ولا لونهم مجغم بالدم من الگارو والبرد الي ضرب فيهم وهو حال نافذة السيارة بالاضافة للغضب والصعرة الي هو فيها دابا...حل الباب ونزل من السيارة ووقف كيشوف فالدار الي هي دار عصام فالدرب الي ماعتبش ليه من شهووور هادي الى مكانت عام...شوية تسمع فران وراه لدرجة ضار يشوف بالعرض البطيء وبنفس التخنزيرة الي كان كيشوف بيها حتى هز حاجبو وتوقف كيشوف فيه نازل من السيارة وجاي قاصدو...
يونس"وقف كيشوف فيه مزير وجهو مكيبشرش بالخير..كيسوط النفس من مناخرو...الوعي تقريبا معمي عليه" : زين الدين ؟ اش هادشي ؟
زين الدين : لااش تبعتي عدو ربي ؟؟؟
يونس : عارفك كتعمى ليك البصيرة فاش كتجعر...عارف فين نتا ؟"كيهضر معاه ومراقب النواحي فنفس الوقت عرف الدار من خلال نضرتو لزين الدين فاش وقف كيشوف فالدار تما عرفها...كيتسناه يجاوب وفنفس الوقت كيهز عينيه يشوف شراجم كانو مطرقين..."
زين الدين : بعد من كمارتي حسن ؟؟
يونس : لا...
زين الدين"خرج عينيه بتخنزيرة" : يوووونس !!
يونس"قرب وحط ايدو على كتف زين الدين لقاه سخوون" : المجية مامناسباش ازين الدين...عارف بلي معصب من داكشي الي سمعتي..انا مابغيتكش دخل معاها ولكن ملي كانت رغبة مريضة عندي..زين الدين شوف فيا وركز معايا...
زين الدين"هز فيه عينيه بشوفة من كثرة مامغوبش بحجبانو هبطو على عينيه"
يونس : ماشي دابا...واش بغيتي تزيد القدام لصالح ديالك وديال مرتك بالدرجة لولة ولا ترجع لور وتعاود من جديد او ممكن تخسر كلشي وتخسر معاها صحتك ؟!...
زين الدين"الصمت"
يونس : انا عرفتك علاش ناوي ملي سمعتي ...عينيك مابشروش بالخير..كنهضر معاك وجهك صفحة حامية من بعيد..كنعيط ليك مكتجاوبش وانا الي كنت نصوني ليك كنلقاك على القرص معايا...هادشي ماغريبش عليا ك طبيب نفسي كيعرف الحالة اغلبية من العينين والحركات وردات الفعل...ماغريبش عليا كصديق ليك معاشرك سنين...عارف مغاديش تصبر على هذاكشي وحنا رجال مانقدروش نتحكمو فالغيرة والغضب على عرضنا..عارف صعيب تصبر شي حد يمد ايدو على ختك مك مرتك الخ...ولكن فحالتك وفضروفكم واش فنضرك صحيح هادشي الي غادير ؟!
زين الدين"والو واش جاوبو العافية شاعلة فيه من لداخل"
يونس : زين الدين الوقت ماشي مناسب...فكر فيها هي بالدرجة لولة هادشي الي غادير ماشي فصالحك...هانتا غاضارب معاه...ولا باغي تفاهم معاه ؟ باش بهاد الحالة الي نتا فيها ؟...ثيق بيا واحد فيكم لقبر وثاني لحبس ولا بجوج لقبر وديك الساعة مكاينش الي يوقف مع مرتك فحالتها الي محتاجة ليكم بجوج لا نتا لا خوها وخا واقعين مشاكيل بيناتهم...حنا باغين نزيدو القدام...قطعنا اشواط كثيييرة معاها وغادين فتحسن...صبرتي بزاااف علاش غاتجي تالدابا وتكفسها على راسك وتندم حياتك كلها ازين الدين...فكر ان الغلط ماشي فخوها...الى بردتي غدايدك غاتولي نتا مول الغلط الكبييير ويرجع كلشي ضدك..."زير ليه على كتفو وقرب وجهو لوجه زين الدين عينيه فعينين زين الدين الي كيطلقو الشرار والعافية...كينهج كي الثور.." زين الدين انا تبعتك حيث صاحبك وعشيرك تبعتك حيث عارفك مزيان ولكن العصبية الي كتركبك مع الديابيت مكتبشرش بالخير...تبعتك حيث قلبي عليك اصاحبي كون جات عليا ك طبيب نفوت معاك الحصص تشكي ليا وساعتك ديال السيونس تسالي...سمع مني وضرب دورة رجع لطوموبيل خرج من هنا ويلاه نتحركو لشي كافي ولا ريسطو تاكل شي حاجة وعبر ديابيت وتنفس مع راسك حدا البحر كمي ماشي مشكيل وخا الگارو خاصك تحاول تنقص منو...ورجع لمرتك مهدن...
زين الدين"كهضر وسنانو مغززين" : نننقققتتتلهم...
يونس : بالعقل تهدن الوقت را مزال ترجع ليهم يتعاقبو واحد بواحد...ناس فديك البلاصة را خاصهم البوليس..ونتا بعقلك الى حضرتيه راك عارف كيفاش تصرف..عارفك ثقيييل باش مضلم حد...ياك ؟
زين الدين"كيغمض عينيه ويحلهم باش يتنفس ويونس كيصارع معاه باش مايبانش عصام وخا معارفوش فوجهو لكن مادام ماهضر حد ودنيا كالم هاد ساعة اذن را ماكاينش..."
يونس"بصوت منخفض كيحاول يخليه يسمعو غير زين" : دي كااااالم ازين الدين...جمع النفس مزيااان"كيهز ايدو...وزين كيغمض عينيه ويجمع النفس" وخرجهاااااا...عااود ثاني...مزياااان...فكر فمرتك مابغيتيش تشغل بالها مابغيتيش تخليها وحدها وراك ياك ؟
زين الدين"جمع تاني النفس هاد المرة كانت اكبر من السابقة..وخرجها بتنهدية تا هز راسو كيصوووط ويزفر عينيه فالسما ورجع شاف فيه"
يونس : مشينا ؟
زين الدين"حرك راسو"
يونس : عارف شي كافيي هنا ولا ترجع لدار ؟
زين الدين"سمع التيليفون كيصوني" : تحرك لكازا حسن...
يونس : وعليه"مشا لطوموبيلتو ووقف تسناه تا دخل وديمارا طوموبيل وخرج فالاتجاه لاخور عاد تبعو يونس خرجو من الدرب وخرجو لطريق شدو طريق كازا نيشان...مد زين الدين ايدو لتيليفون قلب شكون صونا عند بالو فرح لكن ماشي هي كان مراد الي عاود الاتصال بيه دوز ليه الخط"
زين الدين : شنو كاين ؟!
مراد : فرح تشطنات عليك فاش خرجتي كتعيط ليك مكتجاوبهاش وطلبتني نعيط ليك غير درت ليها الخاطر اما عارفك مابغيتيش الي يبرزطك...
زين الدين"دار صباعو بين عينيه كيمسد فيهم بتعب" : دابا نهضر معاها..."قطع معاه وزاد كسيرا تا ضربو طريق ووصلو لكازا فداك الليل لقاتو شاد طريق واحد الكافي كيشوف فالبحر وقف السيارة فالبارك ونزل عاد دوز الاتصال ليها لكن الى جاوباتك اسي زين الدين سير على كرشك تال عين الدياب..
نزل من السيارة والتيليفون فوذنيه كيدوز ليها الخط لكن بدون رد منها...مابغاش يتعصب وهو كاتم العصبية صحة...كيضطر يدير شي تصرفات وشي ردود الي كتكون مشكيل على صحتو..منها انه خاصو يصبر على شي حاجات مكانش كيصبر عليهم شي تصرفات مكيتصبرش عليهم فالعادي والشخص العادي لكن هو بمرضو ديابيت الي كيكون معصب بلا خاطر زيادة على انه هو شخص وخا كيسكت لكن لا فات حتى تعصب صعييييب يتهدن...تصرفات تافهة كتجيب العصبية خاصو يصبر عليها باااش ميتاذاش الطرف الاخر...لكن هادشي قاصح على صحتو قاصح عليه هو...
زين الدين"قطع وحط راسو على طوموبيل مغمض عينيه بنفاذ صبر...نفخ انفاس سخوووونة تنهد وعاود تنهد"
يونس : دخلنا ؟!
زين الدين"هز راسو خشا تيليفون فجيبو جبد من طوموبيل باكية دوا ديالو شرب منها حبة لاح القرعة والباكية بالنترة وبعصبية مادواش معاه يونس..زاد قدامو دخلو لواحد ريسطو مزال حال فديك الوقت حيث كانت العشرة ديال الليل...مشا يونس وصى النادل يوجد ليه صلاد خفيفة وعصير الحامض بدون سكر وتبعو لبلاصة فين جلس والي كانت الفوق فتيراس مقابلة مع البحر..حط تيليفونو وجلس بدون مايتكلم ويونس ماهضرش معاه خلاه يتخلوا مع راسو...واحد شوي صونا ليه التيليفون وكان ريان المتصل..فلول مابغاش يجاوبو بعد محاولة اتصال ثانية اضطر انه يجاوبو"
ريان : زين الدين موجود فالدار ؟
زين الدين"جمع حجبانو" : علاش ؟!
ريان : بغيت نجيب ليك شي وراق...
زين الدين"شاف فساعتو" : ولابد ؟!
ريان : حيث مسافر صباح شي ربعيام غانجلس ويلاه ساليت باش نجيبهم...
زين الدين : ديالاش ؟
ريان : احم...ديال عمتك...
زين الدين"غمض عينيه ونطق" : تيسر لدار كاين مراد تما عطيهم ليه يحطهم عندي فالمكتب ديال الحاج لتحت..انا بعيد وماعنديش الخاطر نهضر فشي حاجة...
ريان : وخا خويا...
قطع ريان مع زين الدين ماكثرش معاه حس من صوته انه مالخاطروش وزاد تاكد فاش قاليه خلي ليا الوراق حيث مسالة عمتو مهمة عندو..حط الملف جنبو فالسيارة من بعد ماسالا من اخر جلسة كانت عندو فالمحكمة هاد النهار وسط جلسات عديدة دوز من بينهم ديال هاد الملف الي حط حداه...كسيرا بالسيارة مسافة الطريق وصل الفيلا...اما زين الدين رجع حط التيليفون حداه شوي رجع هزو وهو يدوز الواتساب مشا ليها نيشان ورسل ليها ميساج...
زين الدين : تعشيتي ؟!"رسلو وبقى مخلي المحادثة كيشوف واش غاتقراه ديك الساعة ولا لا...بقى نييت كيتسنى مكانت مخدمة الويفي فالتيليفون مديزاكتيفياه كاع..حط التيليفون ورجع كيشوف قدامو وحداه يونس خاشي وجهو فالتيليفون..تحطات صالاد قدام زين الدين وعصير الحامض وقدام يونس طبق سباگيتي ب صوص الفريدو وكاس الماء معدني..مشا النادل ونطق زين الدين" ماعنديش شهية...
يونس"حط التيليفون وشاف فيه" : غير نقب على قبل الدوا اصحبي...
زين الدين : خاصني نرجع لدار...
يونس : سيغ ؟!
زين الدين : وشنو نبقى هنا ؟؟؟
يونس : وتدخل معصب لعند مرتك ؟!
زين الدين"هز تيليفون ودخل شاف تاني واش دخلت لقى زوج شرطات يعني حلت الويفي دخلت لكن بدون ماتجاوبو الشي الي خلاه مايزيدش باقي يصبر...وقف على طولتو هز عصير الحامض تكا عليه ونقب شوي من صالاد باش يوقف.." : مانصيبش نبقى مزال خاطري مهانيش عليها...
يونس : زين الدين !!
مجاوبوش حرك ليه راسو وضار خرج من ريسطو نزل لسيارة ركب وزاد نيشان الفيلا..دخل لقى مراد فالجردة جالس كيراجع الامتحانات فالماك ديالو وفنفس الوقت خدام...بلا ميسولو وصل وطلع نيشان كاع ماحس بيه مراد واش جا...مشا نيشان لبيتو ...ماقدرش واخا معصب ومالخاطروش مابغاش يخليها وحدها لكن كان مضطر انه يخرج يتنفس ولا يدير شي حاجة حسن مايبقى فالدار معصب ويصدق سايط فكلشي...حل الباب كيقلب عليها بعينيه عند بالو راها مقلقة ولا معصبة حتى بانت ليه ناااعسة فوق الناموسية بلا ماتغطى وناعسة نعسة مفشكلة شادة عرض الناموسية...قرب لعندها وجلس عند راسها كيشوف فيها ناعسة ووجها مزنگ يمكن كانت كتبكي حتى عيات ونعست ولا تعصبت..لكن الاغلب انها كانت حزينة...العشا الي وجدات بحب ماتعشاه حد...بغات تفرحو وتريحو صدقت بلا ماتحس مقلقاه ومعصب على حالتها والي جرا ليها...اول ليلة ليه وهي معاه فالبيت،،البيت الي طالما كان فيه وحدو عمر شي حد نعس حداه من غير الام ديالو الي كان كيبغي تجي حداه يحط راسو على حجرها ولا فحضنها يشم ريحتها البيولوجية باش يرتاح من هموم الدنيا..مد ايدو لغطا هزو مزيان وجرو عليها غطاها ماقدرش باقي يبقى حس براسو تخنق من جديد كل مكيتفكر اشنو كانت كتعاود كيرجعو جنون من جديد يركبو فراسو...بدا ينهج ثاني وهو ينوض خرج من البيت وفطريقو تلاقى بتوبا خارجة كتعقد فبينوارها حتى وقفت...
زين الدين : تبعيني المكتب لتحت..."قالها ليها ونزل نيشان قبل مايدخل عيط لمراد من بعيد سولو واش حط ليه الوراق حتى اكد ليه بالي فوق المكتب عاد دخل ليه وتبعاتو...شاف فيها" جلسي...
توبا : احم..واخا ولدي..."جلسات وهو يهز الملف وجلس كيقرا فيه ويعاود شي عشرة دقايق..
زين الدين"تگعد وهو يحطو ليها" : فكك الله...
وقف السيارة قدام الدار...صونا عليه بالتيليفون..زوج دقايق بالحساب تحل الباب وخرج لعندو لفوق عريان على دوك البادر وشورط قصير...
عصام : عاجبين اصل مك دوك مية غرام فكل جيه !!
صطوف : رزقي ممشاركني فيه حد
فوزي : ههههه
عصام : طمعو فيه نسا ورجال"ضحك بجنب مفكر الموقف مع اندري..حتى ضار لهيه"
صطوف : هاحنا غانخسرو الملاوي دابا...
فوزي : شي حاجة فاتني ؟
صطوف : ولدي فوزي داكشي ديال لكبار كبييير عليك ونتا صغير..ماشفتي ماتشوفتي...
فوزي : ياااك احياة ...
صطوف"حط ايدو على صدرو" : على گلبي اولدي "ضرب رقبتو بجهد" وعلى رگبتي الى من الخاطر كنگول ليك هاد الهضرة لا طحتي فستون مقود كبير ميكونش قد الستون الي طحت فيه قود منو مكاين..."شاف فعصام الي ضار لهيه كيضحك" تهجرو على القحبتمك القواد...
عصام"ضار لعندو حرك ليه راسو" : هاجرو غا برد"قالها من كل قلبو كانه عناها بصح"
صطوف : صافي ديتي ليا الشقفة الي زاحمتيني فيها
عصام : صباح راجع فالعشية...
صطوف : ومالكم غادين فهاد الوقت ؟!
عصام : مساليتش اليوم...
صطوف : يلاه تيسر تيسر...وصباح رد عليا الخبار...
عصام : واا مع تيسير الله...نوصل فوزي ونشوف واش نمشي عندهم ولا نتسنى تال صباح...
صطوف : توصل فوزي ولا تسنى تال صباح !! فين غاتبات مثلا
عصام"الصمت"
صطوف"شاف ففوزي الي حدر راسو مالقا مايقول ورجع شاف فيه" : العصامي بالرجولة لبد وعفط على نفسك ودير الما منين يدوز...
عصام"ضار عندو معصب" : صطوووف...
صطوف"خنزر فيه" : جمع كرك وهضر مع جدك...حتى لين ؟ ياكما كتسناه ابلقواد يجي عندك يگوليك سمح ليا ؟ و لاااااكااان هو الغالط وماتخليهش يجي يطلب منك السماحة..
فوزي"حادر راسو مسكين وساكت باغيه يمشي حتى فرح فاش قاليه غايمشي معاه لكن فجأة تراجع...علاش تراجع اش وقع ماعرفش والي قلقو هو انه غايوصلو يبات تما وهو فين غايمشي يبات الى مادخلش لدار جدو يبات فيها الي هي دارهم تانية...بغا غير يعرف علاش تراجع ومابقاش غايدخل لدار جدو شنو الي خلاه يتراجع..."
صطوف : سير اصحبي قطع حبل المشكيل ورجع المحبة راك عارف علاش هز منك اصحبي...جمع راسك وتيسر دير طريق وتا الى مابغاش ماشي مشكيل مهم درتي الي عليك...والى ردك عاود رجع عندو...القمعة ديال جدك تصرط بالحليب وبكل فرح...قمعة حلال..ماتخليهش غاضب عليك ثيق بيا حق الرب لا تيسرت ليك شي لعبة فحياتك وخا تمووت...سولني انا نهار سخطت عليا الواليدة مع ديك
عصام"تنهد" : صافي قود خليني نتحرك ديتي ليا شلا وقت الحبس...
صطوف : تيسر...
ديمارا طوموبيل وكسيرا مباشرة خذا طريق سيدي بنور...تاهو من بعد غياب طويل شوية عليها من نهار الي غضب عليه هاديك هي مشيتو من تما...طريق كلها وهو سايق وعقلو غايب من جديد..هاد المرة كان التفكير ماشي ناحية صفاء وشرطها...
صفاء"عينيها مغرغرين": مانقدرش ندخل لدار كنت مولفة نشوف فيها الخوت مجموعين..العلاقة الي كيتمناها اي خوت..مانقدرش ندخل ونعيش فدار مافيهاش حس فرح...
عصام"كيشوف قدامو عاقد حجبانو..كيسمع ليها لهضرتها الي كتدخل لعقلو"
صفاء : يقدر يجيك شرطي غريب ! ولكن را كيف انا كيف اي بنت كنتي غاتزوج بيها ماتبغيش تعيش مع راجل مخاصم مع خوتو وبيناتهم المشاكيل...
عصام "نطق بدون ميشوف فيها" : ياك الالة ؟
صفاء : بغيت ليك غير الخير..فكر فهضرتي و فشرطي..مابغيت منك لا صداق غالي لا والو..بغيت نعيش فبلاصة ودار فيها داخل والخارج كيف ولفت مابغيتش نعيش فدار مافيها حد...انا ولفت داركم بختي فرح خويا فوزي...وخا باك فيه صداع"تبسمت وسط دموعها الي نزلو على غفلة" تاهو ولفتو...علاش متشوفش فهضرتي من ناحية ايجابية...
عصام"حدر راسو فلارض شحااال قبل ماينوض" : الي عجبك ابنت الناس...ماگلتي عيب..."بان ليه البيس جاي" السلام عليكم..."مشا لموطور حيد ليه البيكي علاش كيتكيه ركب وديمارا وزاد مخليها كتشوف تا وقف عليها البيس...رجع لواقع ديالو بصوت فوزي"
فوزي : راك فتي الدورة اعصام...
عصام"هز راسو شاف فالمرايا لور خفض السرعة وضرب دورة رجع لدورة ديال دار جدو ودخل حتى وصل قدام الباب ديال جردة مع الصدفة لقى خالو عبد العالي فجردة الي غير شاف الطوموبيل وقفت وخرج لعندهم..."
عبد العالي : اه اه با عصام هذا..."خرج فوزي من طوموبيل سلم عليه وهو يشوف فعصام الي باقي فالسيارة"مناويش تنزل ؟!
عصام"كان كيشوف قدامو حتى ضار لعندو" : علاش ؟!
عبد العالي : على المشماش الي طاب وماحلاش...ولا تبدا ترهط تاني لاش جاي ملي ماباغيش دخل ؟ ايخ منو وعيني فيه ؟
عصام : وايلي وااايلي...
ع.العالي : نزل...
عصام : شكون كاين ؟
ع.العالي : كاين جدك الي خايف يجمعها مع والديك بطرشة لحناك"خلا عصام يرمش فيه وفوزي حابس الضحكة"...
بقى كيشوف متردد باش ينزل..كيشوف فيه فوزي بغاه ينزل وعبد العالي كيشوف فيه حتى وقفات سيارة لور طل من المراية وهو يبان ليه منير الي وقفها ونزل منها تا وقف عليه واحد من هنا ولاخور من لهيه بقا ليهم غايجروهومن طوموبيل صحة ..
منير : تا مال هذا كرم هنا ؟؛
ع.العالي : حاس برويسو شوي هذا ...
عصام"هز فيه حاجبو" : رجعتي لداركم نتا وليتي تنصح ؟؟
ع.العالي : رجعت لاصلي اخالي...
منير"طل عليه" : تا مناويش تنزل تشوف جدك ؟
عصام : سول عليا ؟
منير : وتسناه تايسول ؟!
هناء"خرجات من الدار وجات حدا فوزي" : اوووهاا عيصومي جا ؟
فوزي : را سايرين فالمفاوضات معاه...
هناء"كان البرد تكلكمت فالبينوار كتشوف فيهم كيهضرو معاه حتى تحل الباب وجا ياسين خوها تاهو كيطل عليهم قالت ليه اش واقع وتاهو بقى كيتسنى..." : كون غا خرج با...
نعيمة : اش واقع...
هناء : سيري اماما طلبي عصام يدخل...
نعيمة : هاويلي عصام جا ؟ حيدي من وجهي حيدي"دفعتها ومشات تاهي لعندو" وانزل اعصام اويلي ..
ع.العالي : يلاه ها وحدة اخرى تزادت غا لا مابغيتيش تمرگ اشوينت...
عصام"مالقى مايقول كيشوف فيهم كيطلبو فيه مكان عليه سوى ينزل من سيارة...ضار جيهة نعيمة وعنقها بجنب باس على راسها...داز من حدا هناء عنكش ليها شعرها وياسين ربت ليه على كتفو...غادي بخطى بطيييييييئة ماقادرش يدخل وفنفس الوقت شي حاجة فيه كتقول دخل وحيد هاد الخصام الي بينك وبين جدك وماتخليهش غضبان عليك...قبل مايدخل لداخل وقف كيشوف...حتى سمع صوته كيعيط وداك الصوت غادي وكيقرب
المحجوب"جاي ويعكز بعكازو" : وااا هنااء بنتي..تا هادو فين صدو ؟"جاي بشوي حتى حل الباب وهو يوقف..شاف فيه وبقى مكوانسي"
عصام : با ....
الكل كانو كيشوفو كيتسناو من المحجوب شي حاجة يقوليه شي حاجة يعاتب...المحجوب شاف فيه وهو يحرك راسو وضار عطاه بالضهر ودخل...
ع.العالي"نغز عصام" : سير دخل عندو هضر معاه...
عصام"ضار مغوبش فيه" : شفتي بعينيك لا ؟
منير : اتاي سير يا سير مالك تسنى فيه يگولكي طلبني سير عندو را ولا باغي الخاطر اصحبي...ماعليش عض فنفسك وهضر معاه را بغاك غاتهضر...
نعيمة"حطات ايدها على صدرو كيطبطب عليه" : سير اولدي الله يرضي عليك..را ديما يسول عليك واخا هكاك ثيق بيا انا وسير...الي وقع را من خوفو على ختك وخاف لا يطرا كيف طرا شحال هادي بلا ماندخل معاك فالتفاصيل...
عصام"فلول كان بغا يرجع ويمشي فحالو لكن فاش شافهم كيكلبو فيه وفاش شاف نضرة فوزي الي بغاه يمشي يتصالح معاه كيشوف ففوزي مقصح وابغي ترجع المياه لمجاريها وخايف منو...اكثر واحد هز ليه الهم ودار بوجهو هو فوزي...طلق من مرت خالو حنحن وهو يحدر راسو وتبع جدو لاخرين خرجو لجردة وخلاوه دخل وحدو...مشا لبيت ديالو دق عليه تا سمع صوته كيقول دخل حل الباب وطل عليه بان ليه جالس جنب الناموسية عاطي بالضهر...تمشى تا وقف عليه ..
عصام"نطق بصوت مشحرج" : با لباس ؟
المحجوب"شاف بجنب وحرك راسو" : من عند الرحمن بخير..
عصام : ومن عند العبد ؟
المحجوب : فهمك كافي وموفي..لاش كثرة الكلام ؟
عصام : القلب قصاح من جيهتي ؟
المحجوب : عمر البو يقسى على ولادو الا لا دار علاش...
عصام : والجد مع حفايدو ؟! ياك كتگول الكبدة المعاودة...
المحجوب : واحد منهم يضر ليا الكبدة العزيزة !! عارف معزتك گداش وعارف الجد ولابد يكون عندو واحد عزيز بزاف...علاش ضريتيه وانا حاسبك الامان وضاربك بيك المثال وهاز بيك راسي والي هضر نحلف بالله وندير مثال ونسكت الفام...
عصام : عارف بالي الانسان انسان ؟؟...ياك كتگوليا حنا ماشي ملايكة ؟
المحجوب : وماشي شياطين باش نآديو ونضرو الضعيف.."طولها وزاد فصوتو بحزن وقهرة كانت مكتومة" ضريييييييييييتي وعگرتي وعذبتي يااا الي كنا نگولو عليه الحنين...
عصام : الله الي عالم بالنفوس اش مخبية وعلاش ساكتة..شحال گد هاد عصام ؟
المحجوب : ساكتين گبل(قبل) منك...
عصام"عينيه ولاو حمرين" : وماتصيبش ترطب من جيهتي ؟
المحجوب"هز ايدو وحطها" : نرطب لا جات عليا ...حالي ساهل انا...حالي ساااهل..."تنهد" الله يدير تاويل...
عصام"ماصبرش وهو يمشي تال عندو وتحنى على ركابيه تقابل مع وجهو والمحجوب حادر عينيه" : نبقاو هاكا ؟
المحجوب"واحد زوج دمعات واقفين بين عينيه...مجاوبوش"...
عصام"شد ليه ايدو هزها وباسها وباس تكماش الي فيها باسها وجه وضهر...باسها وهو باغي يرتاح من حيهة جدو..باسها وقلبو باغي يرتاح من جيهة جدو...باسها وهو ناسي النهار الي غضب عليه فيه..." : سمح ليا ابا سمح لياا
"ماقدرش مزال يصبر وهو يتحنى اكثر تا هبط ليه عند رجليه كيبوس فيهم... المحجوب كيبعد وهو كيشد فيهم يبوس تا حط ايدو على شعرو"
المحجوب"نزلو دوك دميعات يجريييييو" : صافي اولدي صافي...
عصام"بقى حاط جبهتو على رجل المحجوب ماهزش راسو ابدا نطق وهو هكاك..نطق وماعرفش المحجوب اش عنى بيها" : .ضهري تقسم...توحشت عز ناسي ابا..
بقى محني ليه عند رجليه...المحجوب ماينكرش تقهر على حالتو تقهر على الحالة الي وصلو ليها هاد الخوت...الغضبة الي غضب عليه ماهي الا نتيجة قهرتو وحزنو الشديييد على فرح اثناء غيابها والايام الي مكانوش عارفين عليها والو...الوقت الي كان عند بالو انها ممكن تغبر كيف غبرات امهم والي ماعرفوهاش لحد الساعة فين صدت...
المحجوب"دور راسو لهيه بقهرة مالقى مايقول ولا يدير" : الله يهدي النفوس...
عصام"على نفس الوضعية"
المحجوب"رجع ضار عندو...هز ايدو وحطها على راسو" : نوض براكة عليك نوض...
عصام : طالب منك سماحة...
المحجوب"جمع حجبانو..متردد باااقي مقلق منو وخا هكاك" : دهشرتيني فيك ماضنيتك بهاد القصوحية...
عصام : الي غلب يعف ابا...
المحجوب : تگولها على راسك ؟!
عصام : على كلشي...
المحجوب"تنهد" : الله يسامح...
عصام"هز راسو هاد المرة..تگعد وشد ليه ايدو عاوتاني باسها وجه وضهر.." : غضبتك صعيبة عليا ابا...
المحجوب : كاين ما صعب..راني گلتها ونعاودها لا جات عليا انا حالي ساهل...حالي ساااهل...
عصام"حدر راسو وسكت مازاد تا كلمة"
المحجوب"مد ايدو شد العكاز" : نوض اعصام نووض..الله يرطب ويحنن والله يسامح ويجمع الشمل...هادشي طول وكثر وفات الحد...وانا مانصيب نشوف شتات...توگض على راسك اعصام توگض ونقص من جهد لا هو زين ليك مع العباد ولا هو زين لصحتك ولا لحبابك...
عصام : راضي عليا دابا ؟
المحجوب"سكت واحد الوهلة سكت وعصام ساكت كيتسناه ينطق..حد المحجوب راسو بتخمام طويييل...حتى هز راسو ونطق" : الله يرضي عليك وكان...الله يرضي عليك ويهرس الحجر الي فيك...لا ضهرك تقسم جبرو وتوگض براسك..."طبطب ليه على ايدو" نوض يضهر ليا ناويين يحطو العشا دابا..تعشيتي شي نتا وخوك ؟
عصام"تنهد وتبسم" : توحشت نتعشى معاك...
المحجوب : توحشت نتعشى معاكم...قصدي مفهوم وباغي منك تفهم بلا منشرح...نوض "ناض مسند عالعكاز...شد فيه عصام من جنب شوي مقنعاتوش وهو يعنقو بجنب وباس ليه راسو" الله يرضي عليك...
فين جلسو وخلاوه دخل عندو بقاو جالسين شي يهضر مع شي وفنفس الوقت كيتسناو...
ع.العالي : هادو تعطلو لا ؟
هناء : عنداك غايكون صمكو لراس بداك العكاز...
ياسين : ههههههههههه تخيلت عصام كيسلخ فيه با هههههههه
فوزي"متكي على ايدو كيتسنى كيطلب من الله يتصالحو...لانه الى نقصت حاجة خفافو الحوايج جايين وهاهما غادين درجة بدرجة...كيسمع ليهم وصافي شي كيهضر وشي كايلغي..حتى تحل الباب ديال الدار وخرجو بزوج معنقو عصام بجنب...ملي شاف هاد المنضر ما حسش براسو تا وقف كيشوف فيهم وهو يضحك" : هههههههه الله...
ع.العالي"شاف فيه وهو يدور وتاهو وقف وقف منير نعيمة تاهي كلهم وقفو" : هاااا المعقووول...
منير : عالسلامة ابا هههههه
المحجوب"بطنز" : مممم كنت فلاندوشين...
ع.العالي : واهي را كثر من لاندوشين لاكان غا مع هاد الجعواق...
عصام : الي معنى عليا يمعني على راسو..شابه وجايب من القريب مجايب من البراني...
نعيمة"قربات باست لمحجوب ايدو وجات حدا عصام الي عنقها تاهي بجنب" : صافي نساو الي فات دابا خاصنا"قاطعها المحجوب"
المحجوب : حطي يا العشا براكة من الهضرة...سدو علينا هادشي من بعد ابنتي من بعد...
نعيمة : ههه واخا با...هناء اجي بنتي سيري لفوق وجدي البيت ديال عصام وفوزي فين مولفين ينعسو الله يرضي عليك...انا نحط العشا..."مشات لداخل هي وهناء ورجع عصام قاد لجدو الكرسي جلس فيه وجلس هو رجعو جلسو رجال بيناتهم...كيهضرو ويسولو حتى نطق عصام لجدو"
عصام"باغي يهضر وخايف لا يقوليه لا..لانه كيف كنعرفو فاش يلاه كتصالح مع شي حد مكتكونش زاعم عليه من جديد فحال يلاه تعرفتي عليه..قرب ليه ونطق" : فيك مايتحرك معايا صباح لمدينة عند عمي مبارك ؟
المحجوب : خبار الخير ؟
عصام : صاحبي صطوف طالب ضيف الله باغي بنتو شيماء لجواج...
المحجوب : الله يكمل بالخير..وليني صطوف اعصام مدوز مشاكيل متابتش واخا عندي عزيز..وعمك مبارك ماانضنش يعطي بنتو...
عصام : نجريو فالخير ابا...الي علينا نديروه...
المحجوب"قرقب بالعكاز فلارض وحرك راسو بثقالة" : يكون خير يكون خير...ان شاء الله تا مبارك شحال ليا ماشفتو...
عصام : ماتصيبش تقنعو ؟
المحجوب"هز حاجبو" : قانع بصطوف صاحبك ؟
عصام"حط ايدو على صدرو" : تاع گلبي ابا..عارف الاصل السخاوة..
المحجوب : يكون تابت اعصام يكون تابت...الي نبغيه لبناتي نبغيه لبنات الناس...طريق الحلال والخير نجريو فيها وليني اش من بعد ؟ غذا ولا بعدو تصيب معاه المشاكيل..شكون سبابي ؟ سبابي فلااان وحنا ماااگادين على ذنب يتبعنا ليوم الدين...انا نمشي معاك ونحط ليه كلشي وديك ساعة نخرج تيساع لا انا لا انت...ولا دخلشاي راسك فالمشاكيل وتضمن..ضمنتي راسك اعصام كلك بقى غير الناس...
مزالها مصدومة من فرح..وباش تسول ماقدراتش تسول وباش تسنى مراد يعطيها الخبار مراد براسو ماقاليها والو حيث عارف زين الدين الي عندو الحق يقول ويشرح غير هادشي هو خارج السوق...
توبا"مافهماتش ديك فكك الله." : كيفاش ؟
زين الدين"رجع دار رجل فوق رجل مفرقهم شوي.شير ليها بعينيه" : شوفي...
توبا"هزات الملف الي عطاها...حلاتو كتقرا فالورقة الي فيه حسات بقلبها داز فيه شرار ديال الضو قسمو اشلاااء...تقريبا ثلاثين عام ديال الزواج تسالات فهاد اللحظة واكانهما ماعاشوش مع بعضياتهم..كانها مادوزتش معاه المرار اما الحلو تقريبا كان معاه شبه موجود....كانت عارفة وكانت كتسنى هاد اللحظة لانها هي الي رفعت دعوى وسمحات فحقوقها كاملين..سدات الملف وحطاتو" : الحمد لله"بصوت مذبذب"
زين الدين"كمش حجبانو كيشوف فيها وخا كتبان عادية لكن لداخل مازم بزاااف..عارف ماشي ساهل عشرة ثلاثين سنة تسالي فهاد اللحظة" : عندك ماتگولي ؟!
توبا"هزت فيه عينيها" : اش غانقول ؟!"هزات كتافها" صافي هذا الحد هادشي الي كان خاص يكون من شحال هادي...
زين الدين : بنتك ؟!
توبا : بنتي عارفة..بنتي ولات باغيا سلاك الي فيها كافيها والي جرا لينا كافي وموفي...ماعندها مابغاتو تبرى منها ومني...
زين الدين : سولتك بنتك فراسها ؟ تبغيه ماتبغيه داكشي راجع ليها هي ماشي ليك...حاولي تخرجي بنتك منك..خليها هي الي تفرض وتقرر مابقاتش صغيرة..من هنا لقدام هي الي تصرف وانا معاها..."خرج عينيه" فهمتي المعنى مني ؟
توبا"حركت راسها وعينيها فلارض"
زين الدين : هذا الي عندك ؟
توبا : هذا الي عندي...
زين الدين : تباتي فراحة الله..
كانت جملة كافية انها تخليها تفهم راسها وتنوض..هزات الملف الي فيه ورقة طلاقها والي قاليها تهزو حيث خاص تبقى معاها هي لانها كتخصها هي...خرجات من المكتب وخلاتو..بقى شوية حتى ناض تاهو خرج ومشا لجردة كمى سيجارة اخرى باش يزيد يتهدن لان البركان الي فلداخل ديالو باقي كيغلي ويبخ..وماعمرو يتهدن الا اذا خذا حق فرح من هادوك الي تجرؤو ومدو ايديهم عليها وهو الي مكانش تايهز فيها العين...كمل وخذا الكفاية ديالو من الاكسجين على برا تا تنفس شوي وهو يرجع دخل من بعد ما سد الباب الفاصل بين ديال جردة..غادي وكيحك فلحيتو بتفكير...طالع لعند تشتشونا ديالو لعند الفرحة الي فرحات حياتو ولكن هي دابا مقلقة وخاص يراضيها..وكيفاش غايشرح ليها بالي معصب وصاعر من هادوك الي مدو عليها ايديهم....حل الباب ديال البيت ودخل..كيشوف فيها كيف خلاها كيف بقات حط صندالتو ودخل حيث كاينة زربية..مشا تال حدا راسها وتحنى طاوي ركابيه كيشوف فيها ناااعسة..ناعسة ومقلقة الضاهر عليها من مناخرها الي حمرييين..فرحتها انها توجد العشا من ايديها ويذوقو طيابها الي طيبت اول مرة فدارها دار راجلها لراجلها...تكسرت...مالقى ليها جهد وهو براسو خاصو جهد لراسو باش يصبر على قبلها..
زين الدين"هز ايدو وحطها على حنكها لقاه سخون بقى يدوز عليه يستشعر ملمسو الرطب..ليونتو وطراوتو..لمسة دارت ليه اغراء انه يهبط لعندو اكثر ويحط عليه شفايفو من لمسة ليغرق في قبلة طويييييلة عليه..كيبغيها كيعشقها كايموت عليها وماعمر تاحد قلبو من غيرها هي..استولات عليه كلو ملكاتو بكل مافيه..العقل القلب الروح..باقي الجسد الي ماحدو كيتعمق معاها فحاجة جديدة كيزيد الجسد ديالو ورغبتو طالب بالمزيد وبما هو اكبر من ذلك...رجع شاف فيها وحط ايدو على شعرها كيدوز عليه..الشعر الاحمر الي خلاها مميزة فعينيه..الصهوبية الي فيها كتبان ليه جات معاها غير هي..جمالها مميز رطب ملفت الغلض الي فيها زوين وملفت حتى هو...بقات ناعسة عرض ماصابش كيفاش يدير ينعس حداها ومابغاش يقلق راحتها واصلا الى تكا حداها مغاينعسش غايصدق مبرزطها...اكتفى يقبل راسها وينزل جنب فمها يبوسها فيه حس براسو غايزيد تاني ويصدق مفيقها ناض بزربة مشا لفوطوي الي تما هز الماك ديالو شعلو وجبد نضاضر دشوف دارهم سمى الله وبدا فالخدمة ديالو لقى علي راسل ليه مجموعة من الايمايلات منهم تحاليل الي غادير ميثاء الي خلاها فالكلينيك وخرج بلا عقل باش يشوف الفرحة الي توحشاتو...حاول يدهي راسو وينشاغل كمل من الكلينيك وداز لحسابات المحلات ديالو كيحسب ويسجل فالسجل عندو وليكسيل..تالقى راسو غرق فالخدمة....
حلات عينيها على صوت الهاتف كيصوني ويقطع ويعاود يصوني ويقطع حتى ناضت..كتحك فعينيها باش تحيد الضبابة ديال النعاس ضارت تقلب بعينيها وهي دور جيهة الفوطويات حتى بان ليها متكي رجل مجبدة فطرف الفوطوي ورجل تانيها وموقفها...الماك محطوط فوق كرشو والوراق محطوطين حداه..وكالكيلاتريس باش كيحسب يدويا يتاكد...وكتوبا ديال مجال خدمتو الطبية...ناعس واحد نعسة معنكشة بجهد..
فرح"ناضت من فراشها كتمسح فوجهها باش تفيق مزيان..فاش شافت حالتو بقى فيها المفروض يكون ناعس فبلاصتو مرتاح لكن مشاكل الخدمة المحلات ومشكيلها حتى هي زادوه هم على هم وصابر ماعمرو شكى...بزاف الاسباب كيخليوها تحاول قد ماقدرت انها تعالج على قبلو وتزيد تريحو..قربات لعندو حيدات ليه الماك وحطاتو فبلاصتو وهي تحط ايدها على كتفو كتحرك فيه" : زين الدين...
زين الدين"نطق بلا مايتحرك" : الخير ديال هاد زين الديين...
بقى بنفس الوضعية كان يحساب ليها ناعس لكن هو كان ف لحظة قيلولة خفيفة فالوقت الي هي كانت ناعسة هو كان كيخدم باش ينقص عليه بزاااف باش يتفرغ للويكاند على قبلها...حل عينيه وحيد ايدو الي كانت على عينيه حاجب عليه الشعا الي داخل...شاف فيها...
زين الدين"قبط ليها ايدها وشابك صباعو بصباعها" : صباح الخير..
فرح"برد باارد" : صباح الخير..
زين الدين"جر ليها ايدها باسها وطول تا حسات بزغب مسطاجو تكها جاب ليها تبوريشة..تگعد تقاد فبلاصتو وحركها" : مال الفرحة ديالي ؟!
فرح : ماماليش..نوضتك حيث ناعس معنكش وتيليفونك كان كيصوني هو الي فيقني...
زين الدين : سمعتو...
فرح : علاش مابغيتيش تجاوب ؟
زين الدين : ماباغي حد يبرزطني وانا حدا مرتي"عاود باس كف ايدها" هاديك لالارم ديال وقت نعبر ديابيت بقات خدامة "شاف ساعة فالتيليفون" خاصني نعبر باش نحطو فالنوت...
فرح"حكات راسها" : نعبر ليك ؟
زين الدين : شنو تعبري بالضبط ؟"حط ايدو جيهة قلبو" هذا ولا "شير لعقلو" هذا ؟...ماعندك ماتعبري فيهم كلشي ديالك...
فرح"تبسمت بلهلا يطريه ليها" : نعبر ليك الديابيت...
زين الدين : بخاطرك ولا فشرد منمرضش ؟
فرح : بخاطري...
زين الدين"وقف وقرب لراسها باسهاةفجبهتها ونزل لحناكها كل حنك باسو بوسة تا كتسمع وتغمض هي عينيها..بقى قابط حناكها بين ايديه وعينيه فعينيها" : ماكانش عندي الخاطر البارح ..حالتي صعيبة ..النقشة مع ديابيت كطير ليا..عذريني ؟
فرح"غا فكرها بالبارح فحال رمى ليها البصلة على دوك العينين الي دغيا جغمو وقربو دموع ينقزو منهم" : وجدت العشا وانا فرحانا فلاخر مايتحطش ؟"نزلو يجريو وهي تمسحهم بزربة وشهقة فصدرها"
زين الدين : العشا شحال ماجلسنا ناكلوه من ايديك...البارح كان استثناء افرح راكي عارفة الحالة وانا ماكنتش بخاطري ماصبتش نبقى وانا بديك الحالة..فهميني فرح..نهار الي كنتعصب فيه ماكيبقى يبان ليا المزيان من الخايب كنجمع كلشي العينين كيتعماو ليا..اللهم نبدل ساعة باخرى..الى فات حتى ضرت فيك وانا بديك الحالة نقدر ندم حياتي كلها ونتي عشتي وبسباب ديك الحالة فين وصلنا لهادشي"خرج عينيه بتاكيد" فهمتيني بلا منزيد نوضح ؟
فرح"حركت راسها"
زين الدين"جرها عندو عنقها بجهد كيحك على ضهرها ويمسح اما هي كيف راسها على صدرو معنقها غمضات عينيها وقلبها زادو علاو دقاتو...باس ليها شعرها وعاود وهو يحط حنكو عليه متكي" : نبقاو مدوزين هاد البوسان معاك افرح ؟!
فرح"هزات راسها شافت فيه باستغراب" : مافهمتش...
زين الدين : عطلتينا عطلتييينا.."غفلها ببوسة لفمها بجهد تا تدفع راسها لور كانت شوي طيح جالسة فوق الفوطوي كون ماشدت فيه..تم غادي لدوش وهو كيهضر ويمسح فعينيه" جبدي لگليكوميتخ من المجر لهيه هاني جاي وعبري ليا جبدي..
خلاها كترمش دخل لدوش غسل وتوضى وخا صلى الفجر فوقتو...خرح كينشف طاوي رجلين سروال لفوق شوي تابان زغب رجليه الكثيف شوي...حط الفوطة وجلس حداها لقاها موجدة كتسنى غير فيه حناكها مزنگين غير بوسات خفاف بزاف وزنگوها العالم الله فما اكثر...عبرات ليه وهز المذكرة اليديوية قيد بالستيلو وهي مراقبة باش تحفض معاه جدول قياس السكري الي كيديه لاختصاصي ديالو كل كنطرول...جمعات داكشي وناضت لدوش توضات وخرجات لقاتو كيجبد فالحوايج ديال خروج...حدرت راسها وخرجت من البيت قالت ليه غاتصلي ومشات صلات الصبح ورجعات لبيت لقاتو دخل لدوش شافت فالساعة فالتيليفون ديالها لقاتها قريب السبعة ديال صباح جبدات بيجامة جديدة حطتها حتى خرج كيعقد فصدايف قميجة بيج خلا الفوقيين وقاد سمطة سروال دجين كحل مشى لمجر هز تقاشر كحلين وجلس فوق الفوطوي قبل مايلبس شاف فيها...
زين الدين : اجي گلسي حدايا نهضر معاك...
فرح"حركات راسها وهي تمشي جلسات حداه"
زين الدين"تحنى كيلبس فتقاشرو" : اليوم عندي عامر...مراد هاد صباح معاكم العشا ديال بارح خليه غذا اليوم...حقي منو عطيه لمراد يجيبو ليا لكلينيك"شافها تبسمت" بقات ليا فرحتي بخاطرها ؟
فرح"ضحكت" : هههه صافي..
زين الدين"تحنى باس ليها كتفها وشاف فيها" : غذايا وعشايا ديما من ايديك ماعاد لا كانت بعيد عليك فشي بلاصة من غير المغرب ديك ساعة كاين فرق"بغا يختابرها"
فرح"جمعت ضحكة" : علاه غاتسافر شي مرة خارج المغرب ؟
زين الدين : عارفة خدمتي كيدايرة فرح ولا لا ؟
فرح"حدرت راسها" : عاارفة...
زين الدين : شي مرات لا كان الوقت بعيد نوجد ليك وراقك قبل ونديك معايا شي مرات جات على غفلة عذريني..تفاهمنا ؟"حركات ليه راسها..هنا عرفت وبدات تحس ان المعقول غايبدا يدخل...سفريات غياب منو..."من هنا لويكاند ديري بحسابك مسافرين تبدلي جو شوية...
فرح"صرطت ريقها " : ف احم فين ؟..
زين الدين : تما وتعرفي..حاولي توجدي حوايجك من اليوم..محركين بعييد شوية على كازا...
هزات الحوايج ودخلات لدوش مخلياه كيهضر فالتيليفون مع علي...لبسات بيجامة جديدة بالكولون اسود وكيف العادة تسترات بكاب طويل تال تحت مشطات شعرها وجمعاتو بقراصة بشكل مهمل بدا الحال كيبرد شوية...خرجات من دوش من بعد ماحطت الحوايج مسخين فالسلة...لقاتو واقف لهيه لبس موكاسان بيج وخاشي ايدو فجيبو عاطي بضهرو العريض وكيهضر مع علي وباين فيه تعصب...
علي : وخليتيني معاها اصحبي وزدتي ؟
زين الدين : ماالخاطرييش الحاج...
علي : نتا اخرتك غاتخلينا نطلبو حدا جامع...
زين الدين"شم ريحة ترشت ضار لقاها كترش وتشم قرب ليها عنقها بجنب على غفلة تاتخلعت حك ليها دراعها زعما ماتخافيش" : من الخير...
علي : شنو غادير فسويسرا قطعتي فالطيارة ؟
زين الدين : مزاال..
علي : ماتنساش را سيمانة جايا فلول...
زين الدين : مناسيش الحاج...انا شوي ونشد طريق لكلينيك.."قطع معاه وضار شاف فيها بانت ليه بدلات وجمعت شعرها.." شنو ندير معاك نتي ؟
فرح"كترمش" : ماعرفتش...
زين الدين : شحاال ماجلستي تعرفي شحاال مااا جلستي الفرحة.."هبط عينيه لكولون بانو ليه رجليها الغلاض.. سيقان والفخاد جاب الله البيجامة مغطياهم..كمش حجبانو" هذا الي لابسة ماعجبنيش !!
فرح"شافت فالكولون" : علاش ؟
زين الدين : مالقيتي ماتلبسي ؟
فرح : حيث ديال بيجامة..انا لابسة كاب طويل وهذا را ماشي كولون را سروال عادي غير انا كيجيني كولون...اش بغيتي نلبس ؟"بدات ترجع فرح ديال نهار الي دخلات عند سيمو كتكركر مع الفرملي وتهاز هو وياها هههه"
زين الدين"هز حاجبو" : فحال لا سمعت فرح الي كنعرف ؟!
فرح : الي عجبك..
زين الدين : اهاه ؟!"عض لسانو كيضيق فيها عينيه هي شافت الفك ديالو كيتحرك قلبها بدا يضرب" نزلي تفطري نزلي..
فرح : احم..ش شربتي ADO...
حرك ليها راسو وهي تحردر راسها وسبقاتو هز شكارتو وتيليفونو والكونطاكت وخرج سد الباب لقاها سبقاتو نزلت لكوزينة ردات ل bouilloire(مقراج ديال ضو ههه) يطيب فيه الما عرفات بلاصتو نيشان ودارت الحليب يفيض وردات ليه كابسيل القهوة خلاتها فيها تاتكمل وتخدمها...حلات ثلاجة هزات الاحتياجات فرماج كونفيتيغ زيتون رتباتو فدوك طويجنات وزادت عليهم زين العود...تا دخل عندها لقاها كدور بحيوية بلا ماتحس هي بالي رجعات كتحرك بعادتها الطبييعية كيف كانت فدارهم مع خوتها...جلس فالكرسي الي عند بوطاجي الي وسط الكوزينة...واحد شوي حتى توقفت كتقلب دارت صبعها ففمها كتفكر فين قالت ليها ونسات...
زين الدين" مقابل تيليفون تا حس بيها وقفت هز عينيه لقاها كتشوف وتقلب بعينيها" : مالك ؟
فرح"شافت فيه" : تيرموسات ماعقلتش فين قالت ليا خالتي خديجة كاينين...
زين الدين"حط التيليفون وناض مشا حداها ووقف قدامها حتى بدا يقرب ليها تالصق معاها وتم غادي بيها غادي وهي راجعة بلور تا لصقها مع البوطاجي وهز ايدو حل بلاكار جبد تيرموس لولة وحطها ورجع هز ثانية وحطها هبط عينيه كيشوف فيها وجهها تزنگ" : شنو مزال خاصك ؟
فرح : و واالو..شكرا...
زين الدين"بعد ناعل شيطان" : مرحبا..."رجع لبلاصتو خلاها كتنهج ورجع ليها لون فوجهها..وجدات الفطور حتى سمع صوت الهضرة فالباب شوي حتى دخل مراد هاز فايدو بلاستيكة ديال مخبزة فيها كومير وباگيط وكرواصة وخبز لزين الدين"
مراد : صباح الخييييير..."حط ساشية" ختي فرح كدير الفطور ؟ فين خالتي خديجة...
فرح"بان ليها الباگيط بان ليها عقلها مشات تزرب هزاتو وقسمات منو بلا متحس" : الله باگيط..."خشات ففمها وهي دور لقات مراد كيرمش فيها وزين الدين كيشوف فيها ويرجع يخشي راسو فالتيليفون..مسحات جنب فمها" احم كيعجبني الباگيط"بخجل"
زين الدين"عينيه فالتيليفون" : بصحة كبيدتي...
فرح"خرجات عينيها من كلمة كبيدتي وهي دور كتهز وتحط ماعرفت حتى شنو تهز..بان ليها البراد وهي تجري هزاتو خلات مراد كيضحك تا خرج هو كاع ومشا يكمل ضحكو فالجردة...رجعات تكمل وجدات صواني فين تحط حتى دخلات توبا صبحات عليهم بصوت منخفض شافت فيها وهي تبسم وخا خافت منها حيث مزال ماشي على تواصل معاها فرد جديد تزاد خاص تعود عليه" : احم ص صباح الخخير...
توبا"حركت ليها راسها وضارت جيهة زين الدين" : بغيت ندير لضحى الفطور باش تشرب دوا..."يلاه غايجاوبها وهي تنطق فرح"
فرح : خ خالتي اشنو خاصها نديرو ليها ؟!
توبا : اا ؟ احم ل لا بنتي بلا منشقيك...
فرح : ماشي مشكيل اخالتي غير رتاحي كلشي درتو..عارفة الماكلة الي تحتاج ضحى داكشي علاش درت بحسابها..."زين الدين فهاد اللحظة ماكرهش يتلاح عليها ببوسة اما توبا بقات غير كتشوف لكن ماحملتش راسها يعني فرح عارفة بقضية ضحى والي واقع ليها ؟"...
زين الدين : عمتي"ضارت شافت فيه لقاتو كيشوف فالتيليفون وكيهضر"ماعندك لاش تهزي الهم بنت الناس ديالي قضات الغراض...
فرح"حشمها بديك بنت الناس ديالي كيخليها دور فعينيها وتصرط فالريق" : احم الفطور واجد...شوية نقادو ليها ف فالبلاطو ونعطيه ليك...ونسيت ماگلتش ليك الحمد لله على سلامتها والله يشافيها"مزادت مانقصت مايحتاجش زين الدين يوصي عارفها فالصواب قادة براسها ومغاتحشمهاش"
توبا : ا لله يسلمك..واخا بنتي"حركت راسها وضارت خرجت لصالون حدا مراد اما زين الدين بقا عاض فشنايفو وعينيه فالتيليفون تا خرجت وهو يهز فيها راسو وغمزها"...
حطو كلشي بقى غير بلاطو الي فيه فطور ضحى هزاتو وهي تلاقا بتوبا عطاتو ليها كان مراد جاي لاحظ نضرة توبا الي كانت فشكل مصدومة ومخلطة دعوة فديك النظرة...
توبا : ربي يخليك ابنتي...
زين الدين"وقفها بصوته" : تسناي..."ضارت عندو هي وفرح حتى جا عنق فرح جنبو وشاف فتوبا" انا غادي لكلينيك نهاري هاد النهار عامر بزاف مخلطة الدعوة عندي...ماعارفش الوقت الي راجع فيه اليوم هادشي علاش باش تحيدي عليا ديك الشوفة لاروب الي دايرة...فرح الي شفتي هنا معايشاش معايا هكاك...ماجاياش زيارة...الي فبالك هو هذاك...فرح مرتي ومولات داري امتى تزوجت بيها وكيفاش وقع ماعندك بيه غراض المهم هو حدايا وتحت جناحي..وخاطرها مانبغيهش يمرض ولا يتقلق ليا.."خرج عينيه" سمعتي ؟ ليااا...
توبا"بصوت مشحرج" : مبروك اولدي...
زين الدين"زير على كتف فرح باش تشوف فيه" : الي واقع معاك والي واقع لضحى هنا يبقى...ماااانلقااااش كلمة خرجت من هنا لشي حد كيما كان..."شاف فمراد" وليد مايعرفش...نتي بنتك ريان نتا ونتي فرح الله يرضي عليكم مايخرجش من الدار.. الحسين با ومايعرفش"زاد خرج عينيه" مانعاااودش هضرتي..
توبا"حدرت عينيها جاتها البكية كترجع تفكر المشكيل والي وقع لبنتها والي دازو منو كتقهر وتندم وتعاود..تا بداو دموعها ينزلو" : اهى اهى و وااخا ولدي وااخا...
زين الدين"جهد صوته تا قفزت فرح وتنخششت فيه" : ماااااهضرتش اعمتي باش تبداي تبكي عليا تما...هضرت باش يتحبس عليا هاد الزمر كامل ماعندي ماندير بالبكا وشكى فالدار...جمعي راسك ووگضي معايا راسك...مزال نسالي ونهضر مع بنتك نشوف شنو دير فحياتها...مانخليهاش تبعك وتبع هضرتك وشوارك...
توبا"حركات راسها"
زين الدين : راسك عليه ماتنزليهش...فاش نگوليك توگضي عانيها توگضي على راسك عمتي...
توبا"هزات فيه راسها شافت فيه وخطفات شوفات ففرح وهي تحرك راسها..نطقات كتنهد" : واخا ولدي واااخا كون هاني...
زين الدين : عطيها تفطر ونزلي فطري نتي..مابغيتش كل واحد يفطر هنا فجيه...
حركت ليه راسها وضارت دات البلاطو...ورجع هضر مع فرح من بعد ما مشا مراد لصالون...اكد عليها تاهي ماتهضرش حتى لصاحبتها صفاء...
زين الدين : يبقى المشكيل بيناتنا.."قبل ماتهضر غمض عينيه كياكد هضرته" عااارفك افرح عااارفك مافيكش هاد الخصايل..ماعليش ولابد نأكد عليك الله يرضي عليك تفاهمنا؟
فرح"بصوت منخفض" : وااخا...
دخلو لصالون لحقو على مراد...جلسات حدا زين الدين بقاو شي كيشوف شي وطبعا هنا القصد فرح ومراد حتى هز زين راسو شاف فيها...
زين الدين : شنو كتسناو ؟
مراد : وااختي فرح كبي لينا نتي مولات دار ههههه...
فرح"تبسمت بخجل" : هههه واخا...اشنو تبغي تشرب ؟
مراد : واحد قهوة وحليب ماتكتريش القهوة عافاك...
فرح : واخا"كبات ليه وعطاتو يدير سكار راسو اما زين الدين ناضت هزات بلاطو صغير فيه قهوة ديالو حطت ليه الاومليط الي طيبت ليه بزبدة قربت ليه الماكلة..ورجعت جلست وهو ينوض هز البراد وكب ليها اتاي حيث هي كتفطر باتاي حط ليها الكاس وهز الكومير قطع منو دار ليها زبدة والعسل...وحطو ليها قدامها..هادشي طبعا اما عينين مراد الي حس براسو كي ليتيم لا حنين لا رحيم لا مراة تهز بيه ولا صاحبة تقوم بيه..حس بدمعة بغات تنزل ليه هههه...جلس زين الدين وهو يدور عندو...
زين الدين : نصايب ليك تانتا ؟
مراد : هاا ؟ لا لا انا ناكل غير باگيط عجبني لهلا يخطيك خويا زين الدين...
رجع كيفطر شاف ساعة لقا الوقت تعطل بزاف وهو ينوض شاف ففرح الي ناضت تبعاتو تال لافابو الي فالطوالة لداخل حدا الباب غسل ايديه ونشف وخرج هز الشكارة ديال ماك ولوازم ديالو ووقف بانت ليه توبا نزلات ومشات لصالون...شاف ففرح...
زين الدين : ماتعاوديش تعصبيني ثاني فرح نصوني ليك جاوبي...
فرح : والى مكنتش ازين ؟ را مكنهزوش بزاااف..
زين الدين : حاولي تهزيه بزاف..ماساعداتكش الوقت مصبر عليك ساعة بين هاد ساعة رسلي ميساج ولا صوني ليا الوقت الي تسالي...الى ماجاوبتكش مابين 12 حتى لربعة عندي عملية ومابين 10 و 11 عندي اجتماع...ماعلينا ولابد ناكد عليك فميساج خلي تيليفون بين ايديك"قرب لعند وجهها بزاااف تا مابقى كيفصل وجااهم الا سنتمتر فقط...وبدا يهضر وانفاسو كتحرررق ليها فمها" نخليك توحشيني تاني !!"باش تجاوبو مكانش عندها هاد الخاصية لانه حط فمو على فمها حتى حست بالفراشات تهزو وتنشرووو فكرشها..زاد ضغط بفمو مزيااان قبل مايبدا يشلقمها وهو ولا على القرص...صبرو قرب يتقادا ليه معاها...رجع شاف فيها وشاف فجنابها لا يكون جاي مراد ولا شي حد..." تهلاي ليا فراسك واخا ؟
فرح"حدها حركت راسها تبكمت..ضار خرج من الباب مخليها كتشوف فيه وحناكها طاااايبين بقات حاضياه تا ديمارا طوموبيل وقبل ميخرج حل شرجم شير ليها من بعيد وزاد خرج مكسيييري لخدمتو...رجعات لداخل لقات مراد طالع" : غاتدي الغذا لزين الدين معاك ياك ؟"تيليفونها كيصوني"
مراد : اه را علمني غير اتينا بما عندك من شهيوات اختي ههن
فرح"تبسمات ليه وهو يطلع كيضحك عليها وعلى وجهها الي مزننننگ...حدرات عينيها لتيليفون ديال زين الي باقي خدامة بيه كانت نمرة كانها عرفتها وماعرفتها...وهي تجاوب" : الو ؟!
فوزي"غاا هو سمع صوتها وهو يوقف وايديه بداو يترعدو مكانش عارف هي الي غاتجاوبو..حرك فمو بغا يهضر كيدور يشوف ف عصام واقف بعيد مع خالو..قبل ماتقطع نطق..." : الهبيرة ختي...
اول ما سمع صوت ختو ويااااربي وشحال توحشو وتوحش هضرتها وكلامها معاه...وشحال توحش ضحكها وشكاها...وشحال توحش طنزو عليها وتجبادو لحنكاها وكيفاش كانت تعصب وتمشي تشكيه لعصام الي كيجي يبغي يملخو عصى ومايحطش ايدو عليها وخا بالضحك...وياربي وشحال توحش جمعتهم فديك الدار...لكن....
فوزي"كينطق ويصرط فريقو" : الهبيرة ختي"جملة خرجات بلا مايحس حيث مولف كيقولها ليها خرجات ليه بدون شعور تا كان بغا يرجعها لكن لقى راسو خرجها...كمش عينيه كيتسنى جوابها..مكانش عارف را هي الي غاتجاوب لانها نمرة زين الدين الخاصة..وهو كيقول فيها سمع طررن..شاف فتيليفونو لقاها قطعات..حس بريقو نشف وهو يحدر راسو مالقى مايقول الامر صعيييب..واخا ماعرف واش سمعاتو او ماسمعاتوش...ماقدرش يعاود يعيط...جلس فوق الكرسي ودار ايدو على جبهتو حادر راسو تا قشعو عصام من بعيد حيث كان واقف مع خالو كيتسناو ف جدو يخرج باش يتحرك معاه فين قاليه امس...خلاه خالو وجا لعندو"
عصام : مالك ياك لباس ؟
فوزي"هز راسو بزربة...عينيه مغرغرين" : هاا ؟ لا والو ماماليش...
عصام : وايلي ؟
فوزي : ماماليش"ناض من الكرسي ودخل خلاه كيشوف بعد فهم وقلق لان وجهو مبدل باين عليه الحزن...مالقاش وقت يمشي يتبعو يسولو لان جدو خرج فهاد اللحظة رامي عليه سلهام وجاي بخطوات بطيئة على خطواتو قبل مايمرض فغياب فرح.."
المحجوب : يلاه تيسر نقضيو الغراض الي بغيتي"بعدم رضى وخا هكاك الي غادي بيه يشوف مبارك ويصل الرحم والباقي يدير فيه الله خير..."
كيف قطعات شافت فالتيليفون لقاتو بغا يديشارجا رجعات جيهة دروج باش طلع لفوق ديرو فالبيت يتشارجا حتى تلاقات بتوبا نازلة هازة البلاطو الي طلعات لضحى فايدها شافت فيها وهي تبسم...
فرح : عطيتي نزلو عليك وسيري تفطري ...
توبا"دارت شبه ابتسامة" : لا لا بلاش ابنتي انا نزلو ماعليش...
فرح"حركت ليها راسها وهي نخليها نازلة وطلعت هي البيت ضارت كتقلب على الشاحن حتى لمحاتو فوق طابل دونوي عند راسها وحداه باور بانك الي كيحط عليها زين التيليفون...حطاتو فوقها يتشارجا وهي تهبط لتحت مشات لصالون لقات توبا جالسة هي ومراد كتفطر وكتهضر معاه تبسمات ليهم وهي ترجع مشات لكوزينة كتزرب ماحد باقي الوقت توجد الغذا باش تخصص منو لزين الدين يديه ليه مراد كيف قاليها...جبدات دجاج الي خلاتو فالثلاجة مشرمل ومعمر بالفيرميسيل والكبدة وزيتون مقطع وحامص مصير مقطع..دارتو فالطاوة وغطاتو بالاليمينيوم دخلاتو فالفران جات بغات تخدمو وهي تلف...دارت صبعها ففمها وبقات كتشوف بحكم الفران ماركة اخرى غير الي كتعرف ليها ضارت كتشوف واش تسولها ولا لا..ماقدرتش ومازاعماش عليها ومزال ماكتحكش بزاف معاهم غير مراد ولفاتو كيكون خدام كيجي فالوقيتة الي كيكون زين الدين معاها...بغات طلع تعيط لخديجة حيث وصاتها الى ماعرفتش تعيط ليها لكن خديجة والبنت عطاتهم عطلة باش يرتاحو مابغاتش تبرزطهم...شافت تا عيات وهي تخرج من الكوزينة مشات لعندهم صالون بقات واقفة عند الباب بتردد بغات تسول وحشمت تا نطق مراد...
مراد"عرفها بيها شي حاجة" : خاصاك شي حاجة ختي فرح ؟
فرح"بخجل" : احم..بغيت نخدم الفران ونسيت على ليزيطاپ الي قالت ليا خالتي خديجة..."بغا ينوض مراد وهي توقفو توبا"..
توبا : انا نوريك كيفاش غير رتاح اولدي.."ساست ايديها وناضت لكوزينة تبعاتها فرح باش تعقل كيفاش" شنو دايرة فيه بعدا ؟
فرح : دجاج باش يطيب ويتحمر...
توبا"ضارت بلا ماتشرح ليها بزربة لقاتها خدماتو وهي دور عندها" : هاهو خدم الى خصاتك شي حاجة انا نوريها ليك..
فرح"تبسمات" : واخا خالتي شكرا.."مشات توبا وهي درو رجعات كتكمل فتحضير الغذا وجدات شي لعيبات خصيصا لزين الدين...حتى دخل مراد هاز الفطور الي بقى فالطابلة وتبعاتو توبا تاهي هازا معاه...حطو الماعن فوق بوطاجي وهي تبدا كتحط فلافابو وشي فالثلاجة..دارت صابون فالبونجة ديال غسيل الماعن بغات تبدا تغسلهم يدويا حتى نطقات توبا
توبا : كاينة الماشين...
فرح"رمشات فيها" : ماغانعرفش نخدمها...
توبا : غير خليك انا نستفهم ونخدمها...
فرح"حركات راسها وحطات من ايديها" : احم..انا نجيب تيليفون ونجي"ماجاوبتهاش وهي تخرج طلعات لفوق البيت كتزرب لا يكون صونا ليها..لقات تيليفون تشارجا ما يكفي حيداتو وهي تلقاه متاصل بيها صونات ليه فالبلاصة"
زين الدين"بصوت اجش": نكب الما فالرملة دابا انا ياك ...
فرح : ههه وكان مديشارجي خليتو ونزلت لتحت نوجد الغذا..
زين الدين"هز حاجبو" : دغيا ؟!
فرح"دارت ايدها على جبهتها بتوثر فحال الى قدامها" : يلاه يوجد باش نرسل ليك غذاك...
زين الدين"توشاتو بهاد الجملة تا عض شنايفو" : الي بغا يصعر على ملتك مايلقاش كيفاش!!"سمعها ضحكت بشوي" دوزتي شي فوجه شي.."طالع فسانسور لبيرو ديالو..كان حداه واحد الطبيب مابغاش يكثر الغزل..حك لحيتو ونطق" هضر شي حد فنمرتك ملي مشيت"بغا يعرف شنو تقول"
فرح : اه"زين الدين كان غادي من بعد ماتحل المصعد وخرج وهو يوقف" ولكن ماعرفتش شكون قلت الو ملي مجاوبنيش قطعت..انا غادي نرسليك نمرة...
زين الدين"غمض عينيييييه باسف ورجع حلهم ونطق" : ماعليش.."شاف فساعتو" من دبا ساعة هكاك عندي réunion تهلاي ليا فراسك.."قطع معاها وبقى واقف شحال فلاخر رجع مشى لبيرو ديالو"...
دخل البيرو حط الكارطابل جبد منها الماك حطو فوق البيرو وخلاه يشعل حل صدافي كمايم القميجة طواهم تال مرفق..وهو يدور كيقلب على شي وراق حتى لمح ماشين جديدة ديال القهوة جمع حجبانو ومشا كيقلب فيها لقاها ديال dolce gusto باقي جديدة وحداها مجموعة متكونة من ثلاث قطع من اكبر الى الاصغر عندهم غطا ديال لعود وحدة عامرة ب الكابسيل ديال قهوة كحلة وثانية فيها ساشيات حلهم وقراهم لقاهم ديال ساكرين اي بديل السكر لاصحاب السكري..وثالثة فيها معالق صغار للاستخدام مرة واحدة..كيقلب وهو مافاهم والو شكون جاب هادشي وكيفاش محطوطة بانتظام..مشا لفيكس صونا ل امينة حيث هي الي فيها نوبة هاد سيمانة...دقت الباب ودخلت...
امينة : دكتور ؟
زين الدين : منين جا هادشي"شير ليها بايدو جيهة الماشين وداكشي"
امينة : ماعرفتش فاش دخلت صباح لقيتهم محطوطين...
زين الدين : كتسناي نعلمك شكون جابهم ؟؟
امينة"بارتباك" : لا ولكن سولت الفام دميناج قالت ليا تاهي جات ولقاتهم...يمكن دكتور زياني هو الي جابهم حيث هو الوحيد الي ممكن يدخل لهنا بلا ماتكون...
زين الدين"تسند عالطابل فين محطوطة الماشين..دور وجهو نصف دورة ونطق" : رجعي لخدمتك رجعي.."حدرت راسها وخرجت..اما هو بقى كيفكر فلاخر وقف وجبد تيليفون دوز ل علي" فالبيرو ديالك ؟
علي : يلاه دخلت.وغادي نازل لتحت نتلاقاو فالاجتماع....
زين الدين : بقى تما هاني جاي"قطع معاه خشا تيليفون فجيبو بقى كينقر فوق الطابل وهو يخرج من المكتب مشا لجناح علي دق الباب سمعو قال تفضل وهو يدخل"
علي : كي طرا وجرا استاذنتي...
زين الدين : وحلنا معاك الحاج...
على : جلس..
زين الدين"غمز بجنب بمعنى لا" : مكاين لاش محركين محركين..."شير بصبعو جيهة الباب بمعنى المكتب ديالو" نتا الي حطيتي ليا الماشين dolce gusto ؟
علي"جمع حجبانو" : كيفاش ؟! لا ماشي انا علاش ؟
زين الدين"هز حاجبو باستغراب" : وايلي الحاج !!
علي : تا مالي غانكذب اصحبي ؟ مافهمتش اشمن دولتشي گوسطو(هكا كتقرا حيث لامارك ايطالية)."زين الدين عض شنايفو بجهد" سول لاسيسطونت ديالك مالك على حالتك..
زين الدين"هز فيه عينيه": كاع هاكا نخليهم ونجي نسولك نيشان ؟ على بالك ممسولش وصلت وسولتك نتا ؟
علي : وليني راك عيشوري غا وحدك...سول اسلام ولا فام دميناج"شاف زين دين دار ليه واحد شوفة ديال سبحاان الله" اه ههههه سولتيهم...سول ليكيپ دميناج ديال بارح فاش مشيتي علم امينة تسولهم ورا هما يعرفو ولا الكاميرة توريك دخل لابليكاسيون عندك فالتيليفون ولا بلاتي"وقف كيفكر" يقدر يكون شي حد فدراري وليد ولا صلاح بغا يتصالح معاك..
زين الدين"مربع ايديه كيشوووف فيه" : صلاح الحاج عارف بلاصتو عندي مايحتاجش يحزرني بهادشي...عارفني ماعنديش مع لي كادو..."بغا يهضر علي وهو يوقفو بايديه" ماعليش دابا مابغيتش نخسر خاطري عندنا منقضيو يلاه تحرك من بعد ونشوف هادشي تحرك...
نزلو بزوج لاجتماع استغرقو فيه ما يقارب ساعتين وخرجو من بعد اتفاقيات كيف العادة وشافو المشاكيل الي كاينة فالكلينيك...وهما طالعين كان حديثهم كالتالي...
علي : غذا غايحطو انونص باش يزيدو ليزانفيغمييغ...
زين الدين : aussi خااصني نزيد..محتاج ل شي ربعة ف ليكيپ ديالي...
علي : الي غايخصوك خاصك طلب الاكسبيريونص..
زين الدين : سي ولابد.."دخلو المكتب ديالو وقف وهو يضور جينة الماشين دار ايديه على نصو كيشوف فيها مغوبش"
علي"ضار كيشوف لقاه كيشوف فالماشين بتخنزيرة" : هي هادي ؟"مشا كيقلب فيها بانو ليه خنيشات الي فيهم حبوب سكارين.." edulcorant le plus ancien(هو سكارين).وا هذا الي رسليك هاد الكادو باااينة عارفك مزيان هههه"شير ليه باستهزاء" علاه نتا كتشرب سكارين قبل مايجيك الديابيت واقلة وموحال كنتي تشرب سكر العادي بقا غا سكارين...
زين الدين"جبد تيليفون من جيبو داز لابليكاسيون ديال كاميرا فالمكتب ديالو نيشان بلا ميصرع راسو بقا كيشوف فالتسجيلات حتى توقف هز فعلي عينيه وحدرهم جا علي حداه كيشوف.."
علي : وايلي ؟ وشكون سمح ليه يدخل ؟
زين الدين"عض على سنانو تا بان الفك ديالو كيتحرك شاف فيه علي عرفو طلع ليه دم"
علي : ابلاتي ماضلموش...
زين الدين"خرج فيه عينيه ونطق بصوت مجهد" : شنوو زعما نضلم راسي ؟؟
علي"زاد خرج فيه عينيه تاهو هاد المرة بجدية باش يحشم منو زين الدين" : نتا عارف اسلام مايخلي حد يدخل الا اذا عيط ليك وخذا لوطوغيزاسيون(الاذن) منك عاد كيتحرك راه معرفة قديمة وخدم معانا لهيه...هاد المرة ازين الدين مغاديش نعاونك الى تسرعتي وجريتي عليه"هز فيه زين الدين عينيه كيشوف فيه" اه كنهضر معاك..رجع لخدمتك عادي ملي توصل الوقيتة ديك ساعة عارف شنو دير...
هزات الكوكوط الي دارت فيها الخضرة تصلق وهي تخويها فالشبكة فلافابو..طلقات عليها الما وخلاتها كتصفى منو..دازت لزلافة فين مخلطة صوص الي غاتخويها عليها فيها زوج معالق خل نفسهم زيت الزيتون على قبل زين الدين وابزار ومعيلقة مايونيز تربتهم مزيااان خلاتها ودازت لزلافة لاخرى فيها نفس المقادير غير هو فرق انها دارت زيت عادية بلاصة زيت العود...ضارت كتقلب على بول(زلافة ديال زاج او بديع) هزات زوج قسمت فيهم ديك الخضرة وهزات الخس الي خلاتو ينشف ف زيف نقي..فرشاتو فطبسيل ولاخور فرشاتو فطاسة ديال زاج..زاد على الخضرة الخيار وماييس وليپاط وطون وخيزو خضر محكوك وزيتون كحل دوائر...خلطاتهم وضافت عليهم الخلجة وزادت خلطتهم غطات طاسة حطتها فالثلاجة ولاخرين خواتهم فطبسيل حكت عليهم بيض مصلوق وضافت عليهم صوص مايونيز اما زين الدين حكات ليه البيض دارتهم فطويسات صغاار هو ومايونيز الى بغا يحطهم عليها..وهي كتقاد فهاد المراحل حسات بوجييعة فكرشها لتحت ونغيزات تا غمضت عينيها وهي توقف شدات كرشها...
فرح : ايييي..."كمشت عينيها وكتمنى ماتجيهاش حيث ماعندهاش دوا وحشمت تقولها لزين الدين...فهاد اللحظة دخلات توبا لقاتها واقفة وجهها تبدل فيه اللون"
توبا"كتشوف فيها باش تزعم تسولها مالك مازعمتش واصلا كتشوف فيها بواحد النضرة مامفهوماشواش مزال مصدومة او مزال مزاعماش من بعد الي وقع بينها وبين زين الدين اي القصد توبا...او شي حاجة اخرى او مابقاتش مرتاحة وخا رجعات ولا بوجود فرح...حنحنات وهي تسولها" : مالك ؟
فرح"شافت فيها" : ها ؟ ماماليش.."عاودت نغزتها كرشها وهي تعض فالنفس وتقادت فالوقفة" احم ماماليش غير كنفكر اش ندير...بغيتي شي حاجة خالتي ؟
توبا"كتشوف فيها وكتشير جيهة البوطاجي" : احم..بغيت غير ندير لضحى صوبا...
فرح : درتها ليها خليت شوي من الخضرة الي صلقت على قبل شلاضة راها زيدي عليها شنو بغيتي تزيدي وطحنيها...
توبا"مالقات ماتقول" : ها ؟ اه واخا شكرا ابنتي..
فرح"تبسمات ليها" : انا غانطلع لفوق نجييب شي حاجة ونجي نكمل عافاك قولي لمراد را الغذا واجد الى بغا يديه..ماقدرتش نعيط ليه يمكن فبيتو"بحرج.وتوثر بان فحناكها وطريقة باش هضرات"
توبا : اه واخا انا نعيط ليه...
حركات ليها راسها ومشات خلاتها واقفة كتشوف باستغراب...طلعات فرح لفوق دخلات لبيتها وجهها مبدل دخلات لدوش كتجرييي حيدات سروال والكيلوط حيث حست بشي حاجة سخونة هبطات لكن مالقات والو لقات غير الافرازات عاديين لكن الوجع مرة مرة كينغز...حيدات الكيلوط حطاتو وخرجات لماريو هزات واحد جديد ودخلات توضات ونضفات وطرفات حالتها ومشات لكيلوط لاخور صبناتو وهي تخرج هازاه فايدها ماعرفت فين تنشرو حيث فاش كانت فبيت ضحى كانت كتنشرهم غير فالدوش..والسطح كيتنشرو فيه الحوايج قلال الي خاصهم يحتاجو لشمس اما البقية كتخرجهم الماكينة ناشفين كيتنشرو شوية ويمشيو يتصلحو الي يحتاجو لصليح اغلبهم حوايج زين الدين قوامج وتيشرتات وسروال كيحرصو باش يكونو ليه مقادين ماتخصهم تاحاجة حيث هو دقيق فهادشي...بان ليها البالكون فيه نشار صغير مطوي كينشرو فيه فوطات ديالو نشراتو فيه ودخلات حسات تاني بالوجع شدها وهي تكمش عينيها تاني تا جلست جاتها ترويعة...بقات هكاك تا حست براسها تنفست وحبس الوجع وهي تنزل لتحت لقات توبا خرجات دجاج مشات كتزرب...
فرح"بحرج نطقات بوصت منخفض" : سمحي ليا خالتي..
توبا"شافت فيها" : ماشي مشكيل..صافي را تحمر..
فرح"كتجبد فورق الاليمنيوم مشات لدجاجة غلفتها فيه ودارتها فطاسة كتحافظ على الحرارة..شافت توبا كتشوف فيها" : لغذا الي غايدي مراد لزين الدين حيث مغايتغذاش هنا..
توبا : احم..ولكن زين الدين كيتغذا من شيف ديال مالين ديابيت فالكلينيك..مكانش كيبغيني نرسليه مانضنش يولف هادشي...
فرح"صرطت ريقها" : حيث هو گالها ليا هذا غير حيث وجدتو البارح فاش جيتو...وملي جيتو عيانين مادرتوش حتى ل ي ليوم خليتو لغذا..."حركت ليها توبا راسها...وهو ينزل مراد لابس مانتك ريحتو تعطي دخل عندهم"
مراد"كيحك فكفوف ايديه" : امضرا وجدتي"شم ريحة" الله على ريحة البنة وكيف عاطية..."ضارت شافت فيه توبا تا هزت حاجبها عمرو قاليها ريحة طيابك بنينة"..
فرح : ههه ياك..ممم را وجدت كلشي هاهو فالساشية را درت بحسابك حتى نتا معاه حيث گلتي ليا مغاتغذاش هنا....
مراد : لا عطيتو ليه بالرب مايعقل عليا والى حصلنا الحاح علي مشات على عينينا ضبابة...
فرح"بقات ترمش فيه وهي تنطق" : انا غانگوليه يتغذا معاك..
مراد : ممم تاثيرك عليه وداكشي...
فرح"حشمت تاتزنگو حناكها" : احم كحكح...
مراد : حناكك بغاو يطيرو من بلاصتهم بدمهم هههه..صااافي مانبسلش انا مسيت وصيه عايش ختي وقولي ليه تا وليد حيث لا ساق ليا الخبار ضارب هاد الخير..يهرب ليا الحقيقة..
فرح"ضحكها" : ههههه واخا صافي..."توبا فهاد اللحضة كتخوي فالصوبا لبنتها وكتسمع لهضرتهم..جمعات فرح داكشي وعطاتو قرعة ديال عصر الحامض بلا سكار صايباتو الامس بطريقتها..مداتهم ليه شكرها وضار خرج...ضارت كتقاد فالدجاج فالطبسيل وهي تبان ليها توبا غاديا حتى وقفتها بصوتها" خالتي...
توبا"ضارت شافت فيها"
فرح"مترددة وخايفة تقوليها لا..كتبغي تنطق وتحبس حتى هزات ايدها كتحك فيها قرفادتها بتوثر"
توبا : كاين شي مشكيل ؟
فرح : ب بغيت نسولك ..و اش نقدر نطلع عند ضحى نشوفها ؟
كل مرة كتبغي تاخذ الاذن وكتحشم فلول خافت تختالط بيها حيث معارفاهاش ومزال غالبة عليها النغزة ديال الخوف من تخالط مع الناس والبشر الجديد...فالتالي حشمت ماتبغيش نظرا لحالة ضحى والي طرا ليها...
توبا"وقفات كتشوف ماعرفت باش تجاوبها..من ناحيتها مترددة ومن ناحية ضحى خايفة ماتبغيش تاهي...فخاطرها الي فيهم كافيهم مناقصها حد..وفجيهة اخرى كتحط لوم...مالقات مادير سوى تقبل والي ليها ليها" : واخا ماشي مشكيل..
فرح : نطلع معاك؟"حركت ليها راسها..ضارت توبا طالعة وهي تبعها تالبيت فين كانت فلول دقات توبا الباب وهي دخل وفرخ وراها قلبها كيضرب بجججهدد كتحك فايديها وتدلك فيهم"
توبا : بنتي تغذاي ؟!
ضحى"اصلا مكتشوفش فتوبا بزاف اغلب نضراتها مشتتين من جيهتها..نطقات بصوت منخفض ب لا مبالاة" : شوية.."هزات راسها فور ماسمعت صوت فرح"
فرح : ختي ضحى كيف بقيتي ؟
ضحى"ضارت مصدومة كتشوف فيها.حركت راسها" : ش شوية الحمد لله شكرا...
فرح : واش درتي سوان اليوم ؟
ضحى"كتزيد تصدمها..حركات راسها بالسلب" : ل احم لا..
توبا"كتشوف فضحى وكتهضر موجهة لفرح" : على ما قاليا زين الدين الي غايديرو ليها...
ضحى"حدرت عينيها ونطقات بعصبية ل توبا" : مغاديش نخليه يديرو..."هضرت وهي تقاطعها" براكة الي داير معايا..حشومة اماما..
توبا : ولكن شكوون غايديرو ليك الى ماداروش هو ؟ نعيطو لفرملية ديرو ليك ؟
ضحى"الصمت"
فرح"نطقات بحرج" : انا نفدر نديرو ليها"هزات فيها ضحى عينيها" عندي خبرة فهادشي قريت عليه وكنت كنديرو لعمي فاش فتح كنت كنمشي عندو كندير ليه سوان...وانا بنت فحالي فحالها الى حشمات من زين الدين حيث راجل مغاتقدرش وخا يكون خوها...
ضحى"بقات كتشوووف فيها..لمحات امها بغات ترفض وهي تنقز" : احم واخا ديرو ليا فرح اماما..عافاك مابغيتش مزال نهضر خليني...
توبا"حطات البلاطو عينيها مغرغرين حركت ليها راسها وهي دور خرجات بقلب مكسور اصلا من جيهة بنتها الي مكتشوفش فيها بزاف...ومن جيهة الطلاق ومن جيهة الحال وصل بيها لهاد المواصل خذات مااا يكفي من انقلاب الدنيا عليها وناس.."
فرح"ضارت كتشوف ماعرفت مادير كيشدوها نغيزات وجع وصابرة ليهم...صرطات ريقها وسولتها" : فين..احم..فين لاتخوس الي كديري فيها دوا ديالك ؟
ضحى"نعتات ليها بعينيها" : راها فوق الكوافوز.."شافت فيها" عافاك ماتخلينيش نحط سروالي كلو...
فرح"ضحكتها" : هههه مايحتاجش تحطيه عارفة اش غاندير كوني هانيا..."حركات ضحى راسها..هزات لاتروس ديال دوا جبدات منو شنو تحتاج لسوان عرات ليها على كرشها وهي تهبط ليها سروال حيث كانت مطلعاه لفوق كرشها باش ميعگرهاش فالفتحة...كتصايب ليها ومكتهضرش عطاتها احتراام لحالتها مانطقات بوالو باش متحرجهاش وماتجرحهاش لانها عارفة بالضبط مناش مرات ضحى موضوعها حساس..هادشي لاحضاتو ضحى فيها ورتاحت ليها كتشوفيها كتسواني ومكتسولش...خوات ليها بيطادين على لصاقة تا رطابت باش ماتعگرهاش مسحات ليها جناب الفتحة والفتحة وشافت فيها" غادي نقلبها ليك عندك شي حاجة فاش تعضي باش تصبري ؟
ضحى"طالعة ليها دنيا فراسها مابقاتش كتسوق لشي الم" : ماشي مشكيل غانصبر...
فرح"حدرت راسها مالقات ماتقول..شوي بدات تقلبها ليها باش تشوف واش كاين قيح وهي تقفز ضحى هزات فيها عينيها لقاتها مغمضااهم ووجهها تبدل فيه لون اصلا صفر ولا بيض وكتنهج..رجعات نضفتها ومسحتها ليها دارت ليها سبارادرا ديال سيزاريان هزت ليها سروال لفوق كتهز فيه ومبعدة على جرحة غطات ليها بتيشرت وغطاتها وهي كتبسم" صافي سوانيتها..هاد المرة عيطي ليها نعاود نسوانيها...وخاصك تبقاي تمشي وتجي ماتنعسيش باش ماتبراش ليك الفتحة عوجة..
ضحى"شبح ابتسامة" : شكرا بزاااف..
فرح"دارت ايدها ورا قرفادتها بخجل" : ماشي مشكيل..بغيتك تغذاي معانا ولكن نتي باقي مكتاكليش ماكلة عادية..شربي هاد صوبا والعصير شي سيمانة ورجعي كولي عادي على ماقاليا زين الدين..."كمشت عينيها وحطات ايدها على كرشها شدتها وجعة ثاني"
ضحى : مالك ؟!
فرح"كتهضر ومبدلة فثانية تبدل ليها المود" : ماماليش..ففف
ضحى : واش ضاراك شي حاجة ؟
فرح"حركات راسها وهي كتعوج حيث كيقصاح عليها الوجع." : يمكن بغات تجيني ليغيگل وماعنديش دوا...
ضحى"بغات تنوض كالاتها ايدها المهرسة ونغزتها الفتحة" : ايي..شوفي عيطي لعساس را كيتقدا لينا الي خصنا ياخذو ليك من فارماسيان هنا...
فرح"بدا كيمشي عليها الوجع" : ففف صافي هاهو كيمشي.."ناضت وقفت" انا غانمشي نتغذا انا وخالتي حاولي تغذاي مزيان...احم..الله يشافيك"تبسمت ليها وضارت خرجت كتزرب حيث الوجع تجاهد عليها..نزلات لتحت باش تحط الغذا حطات ليها ولتوبا..عاضة فالنفس لدرجة العرق كيكب منها..حطات لعساس تاهو دخلات توبا..
توبا"استغربت" : واش خديجة مابقاتش فالدار ؟
فرح : لا كاينة غير عطيتها يومين ترتاح فيهم..هذا عطيه لعساس عافاك قولي ليه يجي ياخذو ماقدرتش نعيط ليه...واجي نتغذاو.."هزات طبسيل تديه لصالون وخلاتها كترمش مصدومة العساس هي براسها عمرها عيطات ليه كتعيط ليه خديجة ولا تورية كيديو ليه الغذا..."..
دخل لبلوك وخلا علي فجيهة اخرى كيجيو عندو الحالات الي متبعين عندو...جا مراد دخل ليه الغذا كانت الساعة قريبة لربعة ديال العشية لقاتو خرج من البلوك خلا البقية يكملو لمريض الخياطة وخرج...دخل الغرفة ديالو حتى بان ليه الغذا محطوط فالساشية...هز تيليفونو واول حاجة دار هي دوز ليها الخط نيشان مايرتاحش الا الى ماعيط ليها...وهاد المرة كيف صونا جاوباتو دغيا...
زين الدين : يهودي مات فالملاح...
فرح"بصوت عيان مخشية فالمانطة وكتحس بدوك نغيزات كيرجعو" : ههه جاوبت كاتصدم ماجاوبتش كتعصب...
زين الدين : عارفة راسك لشنو موصلاني ؟!
فرح"كتحك جبهتها مع المخدة باش يحبس الوجع الي رجع" : ممم...
زين الدين"جمع حجبانو" : مالك ؟
فرح : ماماليش...
زين الدين : كيفاش ماماليش..فرح ؟ ماشي عليا ماااشي عليا الله يهديك...
فرح"تنهدت بتعب وخجل ": فيا الوجع راك عاارف"صوتها عيان ومنخافض"...
زين الدين"ناض وقف حيث عارفها كتجيها كريز" : دواك ماشربتيهش ؟!
فرح : ماعنديش ماقدرتش نقولها لشي حد يجيبو ليا وبلا ماتغوت عااافاك را نسيييت حيث داك شهر ماكانش فيا الوجع داكشي باش...انا درت ليا الخزامة دابا يفوتني...
زين الدين"جهد صوته تا قفزات" : كيفاش مانغوتش فرح من نهار عرفتك ونتي عندك هاد المشكيل.."خرج عينيه" راني حضرت ليك وشفت وشهدت على حالتك..كيفاش منغوتش علاش فرح هادشي ماتعلمينيش بيه سالا ليك الدوا علميني ،نسيت فكريني...
فرح : مابغيتش نشطنك ونتا مامساليش باش تديها فيه...وانا ماديتهاش فيه براسي..."دعقها الوجع وزين الدين ههه" ففف عافاك صافي ماتغوتش خليني عليييك"الهرمونات تخربقو"
زين الدين"هز حاجبو " : نخليك ؟...ماعليش ما گلتي عيب تيسري "قطع معاها عرفاتو تقلق لكن باش تعيط ليه ماعندهاش الخاطر نفسيتها تخربقت...نسات تا باش توصيه على مراد ووليد ياكلو معاه...حط التيليفون ومشا لماريو جبد حوايجو بدل عليه ولبس دوك باش جا...يلاه كيسد فصدافي الفوق دق الباب حنحن عاطي الاذن بالدخول تا دخل علي وبقى واقف...
علي : يلاه تشوف ليزاناليز الي جابت السيدة بن حسين ..
زين الدين"زاد عقد غوباشتو" : دغيا ؟؟
علي : شي خرج ليها وشي مزال على سيمانة...راك عارف خاص تبقى دير فالبيلون و ليكزامان تاتعطي موعد نيشان...ونيت نشوفو خينا...
زين الدين"خشا تيليفون فجيبو تاتم جاي وهو يوقف شير ليه ناحية الغرفة" : تغذيتي؟!
علي : مزال كاين شي ولا عارض عليا ؟
زين الدين : مرتي رسلات ليا الغذا مع مراد...
علي"عينيه قرقشو بالقلوبة" : ارسول الله...ياكما شي دجاجة تاني را باقي ديال ديك المرة نحلف عليها لامينة مرتي ونعاود تاتفقصت ليا...
زين الدين : بحال علمك الله..."تم داخل علي تا حبسو" نهاك الله الحاج فين محرك ؟
علي : نعل بو بنت حسين ومجايب بوها حسين قدام دجاجة مرت صاحبي...
زين الدين"هز حاجبو" : كاتبان بعقلك الحاج ولا كذبت ؟ تحرك خلينا نقضيو ورجع تغذا مالك على حالتك ؟"دفعو بزز تا خرج..مشاو لمكتب علي دق وهو يدخل علي هو اللول لاح السلام وتبعو زين الدين تاهو رمى السلام بداك الصوت الغليض عندو...كانت هي جالسة هاد المرة جات بعباية فالبيج ضاير بيها الدونتيل فالاسود فيها رشيشات باحجار سوداء عاقدة ليها الحزام تحت منها سروال دجين سليم كحل وصباط طالون اسود كيبرييي ورامية عليها شال ديالها على شعرها بشكل مهمل..مجاتش دايرة ميكاب هاد المرة فقط شفايفها الي موردين دايرة ساعة ذهب معاها براسلي ديالها فيه خميسات وخاتم سامبل ومنخرها دايرة ليه بيرسينغ نجمة وهلال صغار فيهم حجر كيبري...ريحتها هاد المرة ديال العود كتعطيي...
ميثا : اهلا دكتور كيفكم كيف احوالكم ؟
علي : على سلامتك ابنتي...
ميثاء : ميثاء.الحمدلله انوري زينة من ربي وعبده "بابتسامة" مشكور شخبارك زين الدين عساك طيب
زين الدين"جلس فوق الفوطوي مقابل ليهم مفرق رجليه وحاط عليهم مرفقي ايديه شابك ايديه وحرك راسو" : اللهم لك الحمد..
طارق : شالاخبار ؟
زين الدين"نطق حادر عينيه" : مزيان...مزيان حتى جيت نسول فيك ونعرف شنو ولا شكون الي سمح ليك دخل لبيرو ديالي بلا موجب شرع ؟!
طارق : كيف ؟ مافهمت !
ميثاء"كتشوف فيهم" : اصبر..انت شفت الهدية صح ؟..ماهو بقاصد و،الله هادي مني وانا اللي قايلتله يدش فالوقت اللي رحت فيه كان يبي يستاذن وانا قلت له ادخل لكن كان لازم بصمة اليد واضطريت اطلب من مساعدك يفتح الباب .. تكفى طلبتك لاتسوي له شي انا اللي قلت له اني بنزلها واكلمك... والله كانت هدية زواجك لاتفهمني غلط (هو ماشي بقصده هادي مني وانا الي قلت ليه يدخل فالوقت الي مشيتي كان بغى يستاذن وانا قلت ليه دخل لكن كانت البصمة واضطرينا نطلبو من مساعدك يفتح لنا..مادير ليه والو انا الي قلت ليه بالي غانحطوها ونعيط ليك..)والله كانت هدية زواجك ماتفهم غلط...
زين الدين"هز ايدو موقفها..مشافش فيها ونطق هاز حاجبو" : باركي ودعي بالخير كافياني"لاحها ليها تفهم راسها ماتجيب ليه والو.."..
ميثاء : يعني مافهمت ؟
علي"نطق ليها بالانجليزية": He doesn't like gifts(مكيبغيش الكادويات)...
زين الدين : Without going beyond the limits"بدون ماتجاوز الحدود"
ميثاء"بحرج" : اوكي صوري...
عطاتهم التحاليل فالموعد الي عطاها علي...
علي : .عندك مشكيل فالجهاز التنفسي صحيح ؟
ميثاء : اعاني من ربو...
زين الدين : من هنا ل يومين رجعي باش ديري "ناض لمكتب علي هز ليه ورقة من وراق لوغدونونص وستيلو كتب ليها فيها كيكتب وهي كتشوف فيه حتى سالا عطا لعلي الطومبو باش يطبع ليها فيها اكيد بلا ميشوف حيث عارف شنو غايكتب ليها"
علي : ليريم هنا...خاصك تصبري معانا حيث لعملية صعيبة شوي عندك..ومزال من وراها غاتبقاي ففترة نقاهة دونك الى عندك انشاغلات حاولي تساليهم ورجعي...
ميثاء : اوكي دكتور"تبسمات وهي تنوض غاديا" استسمح على سوء الفهم والهدية الغير مرحب بها.."مجاوبهاش زين الدين حدرت راسها وزادت...ضار زين الدين عند علي وخرجو خصوصا علي غادي ويزرب ميت بالجوع وقعينيه الماكلة الي جايبة فرح...خشا زين الدين ايدو فجيبو جبد التيليفون ودخل كيقلب فالواتساب تا لقر ميساجها فيه يعيط لمراد ووليد
فرح : عاافاك عيط ليهم يتغذاو معاك... مراد ماتغذاش شوفو فين كاين وعيط ليه هو ووليد عافاك...
زين الدين"رسل ليها" : ونتي ماعافكش معايا انا..جاوبيني كيف بقيتي ماتخلينيش نجي عندك"رسلو وداز عيط لمراد علمو يطلع هو ووليد...ودخل لشومبر وهو يوقف مخرج عينيه لقى علي بدااا ياكل وينعل بو العالم وبوك اسي زين الدين هههه"
اما هي كيف رسلات ليه الميساج رجع الوجع تجاهد عليها لدرجة نااضت وبدات تمشي وتجي فالبيت...حسات هاد المرة بشي حاجة سخونة نزلات ومشات لماريو جبدات من المجر الي فجيهتها باكية فوطة صحية خذاتها معاها هي وكيلوط جديد تاني وغاديا وتنين حسات بسخانة وترويعة شداتها تا توقفت وتطوات كتبكييي
فرح : اهى اهى كرشيييي...فففف"كتهز ايدها تمسح العرق من جبهتها..دخلات لطواليط طلات لقات شوية الوسخ عاود حيدات كيلوط وجلسات فطواليط دارت فوطة فلاخور مدات ايدها لرشاشة طلقات ما دافية كتحس بيه كيدلك ليها وتسحلاااتو تا طوات عنقها مرخيييييااا...نشفات ورجعات صنات هذاك مستغلة الراحة من الوجع الي مشا وخرجات نشراتو حدا لاخور ويلاه بغات دخل تكا ففراشها دق الباب وهي تمشي مسخسخة باغا تقيا حلات وهي تلقاها توبا هازا فايدها ساشية...
توبا : كيف بقيتي شوية ؟
فرح"استغربت لكن نغيزات الوجع نساوها ودهاوها تسول" : شوية !!
توبا"مدات ليها ساشية" : قالتها ليا ضحى ورسلت محمد يجيب ليك دوا ولقيت زين الدين موصيه تاهو...هاهو شربيه والله يشافيك..
فرح : شكرا بزااف خالتي توبا...
توبا"حركت ليها راسها وضارت مشات"...
فرح"جاها دوا فحال رحمة ماتسوقاتش لتوبا ضارت مشات لقرعة شربات منو حبة وتخشات ففراشها تزاااد عليها الوجع وتزااااد وهي كتلوى وتعاود حتى بدا يحبس تدرييييجيا دار دوا مفعولو وهي تحس بواحد راااااحة رسلات لزين الدين ميساج قالت ليه ولات شوية وغاتنعس باش مايصونيش وماتجاوبوش ومافيهاش مايهضر...هاديك هي نعستها ماحساتش بالوقت تا بدات تحس بشي حاجة كتكها فحنكها وشفايف كيبوسو فيها غادين نازلين تالعنقها وهي تحل عينيها الي كانو منفوووخيييين حيث نعسات بزاااف...
فرح"بدات تفوه وهي دور شافت فيه وهي تنوض بزربة..نطقات بصوت نااعس مبحوح" : زين ؟"كتحك فعينيها باش تحيد منهم ضبابة ديال نعاس"...
زين الدين"باس ليها ايدها الي كتحك بيها عينيها وشحال كتبان ليه كي البنية صغيرة بهاد الحركة" : شوية ؟"شاف فساعتو" شلا مانعستي...
فرح : شحال ساعة ؟
زين الدين"وراها لقاتها تمنية ونص ديال عشية"
فرح"خرجات عينيها" : ناااري بزاااف...مادرتش الگوتي اوييلي..
زين الدين : ماعليش فرح الي بغا شي الكوزينة عندو يقضي غراض...هزي لهم ليك وليا"بحب" ماتوحشتينيش تاني ؟
فرح"حسات بحناكها نملو..بدلت ليه الهضرة" : كانت كضرني كرشي...
زين الدين"هز حاجبو": منعاتك توحشيني ياك ؟
فرح : لااا...
زين الدين : هي اش ؟!
فرح : فاش كيكون فيا الوجع مكنعقل على والو..
زين الدين"كينطق بصوت خااتر لكن كتحسي فيه طنز" : مااعليش ماعليش..نوضي كولي ليك شي حاجة على ماعلمتني عمتي ماكلتيش مزيان فالغذا...
فرح"حركت راسها" : دعقني الوجع..احم"حكت جبهتها" انا ندخل لدوش ونجي...
زين الدين"قرب ليها وجهها بجهد باسها وكحز من حداها وناض كيحل صدافي القميجة تال تحت خلاها عريانة من صدرو الي غير كيبين منو فرح كتولي تشتت نضر مكتقدرش تشوف فيه كيجيب ليها تمام وكمية الخجل كتسيطر عليها فاش كتشوفو اي كتشوف جزء جديد من جسمو وكتكتاشف حاجة جديدة منو.." : انا برا نكمي..مزال راجع لمحلات عندي خدمة تما...
فرح"صرطات ريقها وناضت بزربة جاب الله حطات باكية الفوطة صحية فالدوش باش متبقاش كل مرة تهز من حوايجها...دخلات لدوش بدلات الفوطة لقات هاديك عمرت حيث تسرحات عليها...بغات تبدل الكيلوط لقاتو نقي ممقيوس بوالو دارت هاديك وغسلات لتحت مزيان وهي تنوض تفكرات الكيلوطات الي نشرات فالبالكون وهي تخرج عينيها تا شهقت خرجات من دوش كتزرب لقاتو عند الباب تا خرجت ليه فصدرو كون ماشداتو بايدها" : اي...
زين الدين : بغيتي شي حاجة ؟
فرح : غير بغيت"شافتو هازهم فايدو"النمل سرح ليها فوجهها وريقها نشف"...
زين الدين : هاهما حيدتهم..محرك البرد شوي برا.."شافهم مقاس كبير وحرك راسو ببطئ هاز حاجبو ونطق بلعاني باش تحشم ههه" تبااارك الله وماعطاني ربي فرزقي...
كايعشق شي حاجة سميتها نحشم فرح باش يشوف دوك التفاصيل والتعابير الي كدير فوجهها كاتسالي معاه...وشي حاجة سميتها الجنز جارية ليه فالدم ديالو الى كان ناشط يطنز كان معصب ممكن يطنز طنز يخليك تبكي...ولا كيبان ليه وجهها تزير وعينيها تجغمو بالدموع حشمت...
زين الدين"ضيق فيها عينيه كاتبان ليه واحد النص فشفايفها كيترعد" : مااالك ؟!
فرح"كتشوف فيه بدون مترمش"
زين الدين"هز الكيلوطات كيوريهم ليها" : ماشي ديالك هادشي ؟"شافها بغات تهضر وهو يخرج عينيه" بغيتي تنكري ؟
فرح : علاش كادير هكا ؟
زين الدين"هز حاجبو" : شنو درت !؟
فرح"رجعات ضارت حيث مابقاتش قدرت تزيد تبقى واقفة قدامو ماحيلتها لصدرو المعري ماحيلتها لكيلوطات الي هاز فايدو...وطبيعي تحشم حيث تقريبا يلاه كتدي عليه فهاد المسائل كونها كانت كتشوفو كيهضر معاها باحترام عمرو مابين الجانب الشقي الي فيه والي عمرو مابينو لحد تا ولا يبان غا معاها هي...كتحس بيه شخصية جديدة هادي الي قدامها وهو را كيموووت ومستمتع ومتنغم بداك الخجل والتلفة الي شدتها...بغات تمشي هي كاع تخرج وهو يشدها من دراعها تا لصق ضهرها مع صدرو حط ذقنو فوق كتفها" : خليني نمشييي...
زين الدين : علاش تمشي مالك ؟
فرح : ماماليش بغيت نهبط صافي غير خليهم عندك...
زين الدين : عندي مولاتهم...ولا ماديالكش ؟
فرح"بغات تعضو وسط راس هههه" : مابقيتش بغيتهم...
زين الدين : مزيان خليهم ليا محتاجهم...
فرح"دورات وجهها نصف دورة" : لاش ؟
زين الدين : كاين الي باغيهم..."يلاه بغات دور بجهد وهو يحكمها مزياان تا مالقات كي دير تحرك" شش"قرب اكثر كيهضر والانفاس ديالو كتلفخ ليها فعنقها تا تبورشت زادها على خجلها.." شكون من غيري ؟!
فرح"باغيا تبعد تهرب واحلف لا خلاها هي تقول براكة وهو يقول هل من مزيد" : اش غادير بيهم..فففف صافي خليني نمشي عافاك"بغات تبكي"...
زين الدين : ماشي ساترين رزقي ؟
فرح"خرجات عينيها على جهدهم صافي سالا معاها هنا تا بدات تبعد ليه فايدو منضرها ماشي غا كيجيب ضحك را كيخلي الواحد كيتمرمغ بالضحك..كدفع وتنتش" : واا بعد بعد صافي حرام عليك والله تا حرام عليك..
زين الدين"عض شنايفو جابت ليه ضحك..مابغاش يقجر عليها وهو يحبسها تا وقفت عاد طلقها مابغاش يطلقها وهي كتنتر ليه تقدر تجيب الربحة غا طلقها سمحت ليه فكيلوطات ديهم ولا كولهم ولا لبسهم نتا كاع هههه ومشات خرجت من البيت وجهها حمرر..بقا واقف كيشوف فلاخر حرك راسو يمين شمال..تم غادي وهو يشوفهم فايدو مشا لماريو ديالها حل المجر فين كديرهم وحطهم ليها فيه معارفاش را عارف فين كتحط كل حاجة خاصة بيها...حيد باقي حوايجو ودخل لدوش دوش وتوضى وخرج لبس بوكسر شورط قصير وتيشرت بيض ديال تحت عاد لبس فوقية لونها گري ثوبها غليض يحكم محرك البرد برا لبس تقاشر فلونها نيت مشط شعرو وخشا رجليه فبلغة دياال الخروج وخرج مشا لبيت صلى المغرب الي اذن عليه وهو جاي لدار...عاد خرج رجع البيت رش شوية بارفان فايدو دوز بيه على لحيتو هز تيليفونو خشاه فجيبو هز الكونطاكت حك كفوف ايديه ودوز على لحيتو حنحن بداك الصوت المدعدع لعندو وهو يخرج من البيت بدل نضرته البشوشة الي كانت لفرح ولبس نضرة الجدية تحلفي عليه ماشي هو الي كان مسلگط دابا فالبيت معاها...كان غايهبط حتى وقف وضار جيهة بيت ضحى دق الباب تا سمع صوتها كاتقول دخل وهو يحلو طل عليها براسو...
ضحى"بعيون حزينة" : خويا زين الدين !
زين الدين"حل الباب تا دخل وسدو وراه..مقرب ليها" : شوية ليوم ؟!
ضحى : الحمد لله..مزال فيا صدااع...
زين الدين : فشنو بالضبط ؟
ضحى"حطت ايدها على الفتحة" : كتبقى تنغزني..لكن ايدي ورجلي شوية مع الكالمون الي عطاني مزيان..
زين الدين"بدا كيطوي فكمايم الفوقية" : خاصني نشوفها باش ندير ليك سوان..معول نديرو ليك غذا فالصباح ماعليش نديرو دابا ماعرفتش معاش نسالي الخدمة فالمحلات...
ضحى"شافتو بغا يقرب يعري على الفتحة وهي تحبسو بايدها حشمانة منو" : لا درتو قبيييلة مع الغذا...
زين الدين"جمع حجبانو بتساؤل" : شكون دارو ليك ؟
ضحى"بابتسامة كتشوف فيه وفحال الى فرحانة ليه عطاه ربي امرأة فحال فرح" : مراتك ههه..
زين الدين"هز حاجبو بصدمة" : فرح !!؟
ضحى"حركات راسها" : جات تشوفني كيف بقيت ودارت ليا الغذا صوبا على ماقالت ليا ماما وهي الي قالت ليا ندير ليك سوان حيث مانقدرش نخليك ديرو..."حدرت راسها" حشمت منك...
زين الدين"ماشدش ديك حشمت منك شد غالقسم الي فيه اش دارت فرح...حس بقلبو رفرف فاش سمع هاد الهضرة من ضحى الشخص الي ديما كتشوف الفوق بتعالي ومكتسمعش منها شكر لشي حاجة... هاهي قدامو كتشكر ففرح...الفرحة ديالو وسماها وعرف علاش سماها..شاف فيها وحرك ليها راسو قبل ميقرب يبوس راسها ويربت ليها على كتفها.." : خاصك تحركي شوية...
ضحى : غذا نحاول نوض..
زين الدين"غمز بجنب..ووقف" : لا دابا...
وقفات سيارة عصام من بعد مجيتو من عند عمو مبارك...الي كاين غير فسيدي بنور...دخل المحجوب وبقى هو كيتفكر الي وقع الصباح...ف من بعد ما مشاو عندو مابعدوش غير فوسط المدينة تم كانت الدار ديالو والي شحاااال مازارها عصام وفرح وفوزي من شحااال...وقف الطوموبيل وهو يدوز ليه الخط بلغو بالي وصل...نزل هو وجدو كيقاد فسلهام ديالو ويحنحن باش ينضف حلقو...شوية حتى تحل الباب ديال الدار وخرج عندهم كيضحك فرحااان بزاااف بمجية عصام والمحجوب فحالاش..من ديما مبارك هو عمهم الوحيييد الي معاهم فالشدة والفرح فاي حدث كتلقاه معاهم..حتى فحدث غياب فرح تاهو ماقصرش من جهدو وخلاص فالوقت الي مشاو يتعرفو على الجثة خوفا لا تكون فرح...
مبارك : واه واه على ناس الخير واه واه على الحاج المحجوب زارنا ونهار كبير مشحم هذا هههه"باس لمحجوب راسو"
المحجوب"سلم عليه" : ههههه الله يكبر بيك...
عصام"سلم عليه تاهو بدوره" : العم مبارك لباس...
مبارك : والحمد لله وخا مجياتك قلال لا ماقلت منعادمة وليني مابقى ليا مانگول هذا الله لا فهمتي راسك كنتي تجي ماتسنى تا نگولها ليك...
عصام"حط ايدو على صدرو وعينيه فلارض حشمان منو" : السموحات اعمي راك عارف المشاكيل ودهوة..
مبارك : الله يفرج هذا مانگول."شاف فالمحجوب" وتفضلو دخلو كتسناو نعرض عليكم فداركم ؟
المحجوب ؛ هههه لواه منصيبو ندخلو بلا شوار مول دار...
عصام"حرك راسو وضار جيهة الكوفر ديال طوموبيل هز ميكة ديال لحم جابها معاه الامس حطها فالثلاجة فدار جدو..ومياكي ديال ديسير هزهم وجاي محمل شاف عمو بغا يهضر وهو يلقمو" : ماعندك ماتگول مانصيبش اعمي نجي بايديا خاويين شوف ودوز...
مبارك : الله يهديك وصافي الله يهديك..."سبقهم وتبعوه تالطبقة الثانية فين كاينين صالونات دخلو وكيشمو فريحة البخور ديال العود دايرينو فمبيخرة ضو كتعطر المكان...سماو الله ودخلو وهي تجي مرات مبارك لابسة عباية وشال ساترة راسها باش تسلم على المحجوب وعصام"
رقية : مرحباا بالحاج نورتينا.."شافت فعصام وهي ضربو لكتفو" نتا ماعندي مانقوليك الحق من جيهتك كبييير ماعندك ماتخلص فيه...
عصام"عنقها بجنب وحاوط ليها راسها كيبوس فيه" : شحال ماخرج ليا نخلصو..عذريني راكي عارفة وقت الي تسگد(تقاد) ليا كانجي...
رقية : ممم مااابقيتي شاي ديرها...ايوى الله يفرج ويسگدها ليك...مرحبا بيك الحاج وخلاص را داركم هادي "شافت فعصام" ماتنساش مني نرحب بيك...
عصام"تبسم باس راسها تاني" : عاارف الي كاين.."مشات توجد ليهم اتاي والمرافقات ورجعو جلسو هما فالصالون كيهضرو حديث يفتح حديث حتى عصام غمز جدو الي حدر راسو ماحامل كاع يجري لصطوف كيفقصو...هنا عصام صونا لصطوف وطلق الخط باش يسمع اش كيتقال"
المحجوب : يضهر ليا هاضر معاك عصام لاش جينا من هادشي كامل ولا راني نكذب"كيضيق فعينيه حيث ماجابش نضاضرو"
مبارك"حرك راسو" : ايييه..مرحبااا الحاج الله اودي"صطوف حك على صدرو وبدا يفرنس"
المحجوب : هو مصطفى نعرفوو اسي مبارك ماناقصو خير ودارهم الله يعمر ليهم دار نعرف بوه الله يرحمو عز المعرفة..لا جيتي على نساب والاصل را نسب زيييين...ولا جيتي على راجل"صطوف جمع ضحكة وناض وقف بغا يغرق ليه ضواصا" را نجيك لصراحة هالي وقع"قاليه شنو طرا ليه وزهو ديالو" هذا عيبو...انا مانبغيش الي يكذب عليك وها عصام حدايا..
عصام"مرگ هههه" : حنا رجال عيبنا واحد وهادشي الي گال با ماكذبش اعمي وانا ماجيت نهضر بنيابة عليه تا عارف صاحبي شديد ونضمنو ليك..غاتجي عجب نشكرو اعمي حيث عارف المعدن ديالو...وهاهو نلاقيك بيه لا فات خرج منو گد هك مانعقلش عليه انا لول...ناحنا حطيناك بالصورة...
مبارك"كيسمع ليهم ويحك فلحيتو بتركيز..غير كمل عصام وهو يعم سكون واحد الوهلة..تا دخل الهضرة فراسو وجمع شنو بغا يقول.." : اش نگوليكم الحاج..بنتي واخا مابقات تقرا والخير هو دير دارها ملي مادارت والو فقرايتها..هو من ناحية النسب الي عاودتي ليا النسب زين وليني الي يخص السيد الي بغاها شوية صعيبة مانبغيش لبنتي راجل كيما كان باش تسمى مجوجة..راني نبغي ليها الدوام والي يرد ليها البال فحالي وعلاش لا حسن مني...مادام شكرو عصام وضمنو انا نسولها بغاتو هي ومقتانعة بيه ماعندي مانزيد كتبقى هي مولات ري وشوار...
عصام : ماكذبناش عليك وماتلقاش ماحسن منو...هادشي الي عطا الله فيه وهو من ناحية التهلو يتهلى فيها صطوف ونعرفو ومن زمااان باغي يستقر..والي دارو قبل را كان ديال راسو...
مبارك"سمع صوت رقية كتعيط بغات تعطيه الصينية داتاي وناض مستاذن منهم...فهاد اللحظة نطق المحجوب"
المحجوب : ممم وديال راسو را طبيعة كتربى فيه... شكون يضمن ليهم را مايرجعش لداك الحرام...
عصام : عيب ابا الى بغا يتوب ؟
المحجوب"ضار نصف دورة هاز فيه حاحبو" : تبتي نتا بهادشي الي طرا وجرا ليك ؟ تبتي من ورا خطبتك اللولة ؟
عصام"مبدل ليه الموضوع حيث يدور يدور يمشي ليه هههه" : با راني عاجن صطوف بايدي...
المحجوب : العجينة ماكتصدقش ديما ا عصام..راهم عجنو وخبزو وتحرگت ليهم...
صطوف"بغا ياكل جنابو مع المحجوب ولا يعض فطرف كفوف ايديه كون لقى يقتل عصام الي دا معاه المحجوب...جلس فالكرسي ونطق بينو وبين نفسو" : واخا نكون محملك المحجوب وهربت مادير ليا هادشي...
يلاه بغا يهضر عصام وهو يتم داخل مبارك هاز صينية كبيرة فيها كيسان وبراد اتاي خاوي ورجع شد من عندها صينية المجامع الي فيهم سكار اتاي حبوب نعناع حطهم...وجلس شاف فالمحجوب كحز ليه صينية...
مبارك : لا تحلفشااااي المباركة زرتينا من بعد ديك المرضة عطينا براكتك وعمر لينا براد من ايديك نحلفو بيه فالمجامع...
المحجوب"حشمو بالهضرة المصوابة ماخلا ليه مايقول" : هههه الله يكبر بيك وكان ماخليتي ليا مانگول ومانصيبش نردها فوجهك..."وقف كيعطيه فشنو يحتاج باش يعمر اتاي تا حنحنات مرتو ضار جاب من عندها مقراج طايب عمر اتاي بطريقة البلدية...رجع المقراج وجاب المرافقات اي حلوة فطبسيل طاوس كبير وطبسيل كبير ديال الفاكية ماكثروش حيث كيوجدو ليهم الغذا...كب فالكيسان وفرق عليهم ورجع جلس وعاودو فتحو الحديث...
المحجوب : را هادشي الي كاين"عاود عصام صونا ل صطوف"
مبارك : هو صطوف راني نعرفو شتو ديك المرة فالعقد لول ديال فرح"عصام عقد حجبانو وتزير" يبان ليا واقف وقفة رجال...سلم عليا وحادر راسو مكيهزش العين...
عصام ؛ لا مع الكبار ماهزش العين يسمع منك المعيور ميتحركش...
المحجوب"شاف فعصام بنص عين" : دابا يكون سمعني اش حطيت فيه ماخليت غالي نسيت ؟!"حشا لعصام الهضرة حيث عرفو طلق الخط يسمع صطوف اش كيقولو"
عصام"ماعرف باش تبلى حدر راسو وسكت"
المحجوب : ههههه.."شاف ف مبارك" وهذا ماكان...المعرفة ولاصل را زينين...المهيم نحطوك بالصورة اسي مبارك ونعلموك بالي كاين...بنتك را تعيش فالخير والراجل را هذا هو عيبو...
مبارك : هههه تانتا راني دوزت كتر منو...
المحجوب : ورا كلنا دوزنا وليني نصارحو مانكذبوش وكان...
عصام : المهيم كنتسنى كلمتك اعمي بغا يتيسر يجي الى ماكتابش نعلمو"صطوف قلبو ولا يضرب...بغات تحمقو شيماء ملي شافها وهي مدية ليه العقل حيث دايرة النقاب وملتازمة..وكانت حادرة راسها وحناكها مزنگين فاش كتدوز من حدا الرجال..."
مبارك : انا الي عليا نسولها راني كي علمتيني خبرتها البارح...خلي ليا هاد اليومين عطيني وقيت مافي باش مكان نعلمك والى فالمكتاب الله يسخر الى مافالمكتابش الله يجيب ليه التيسير وماحسن من بنتي...
المحجوب : ماگلتي عيب كلامك ذهب اسي مبارك...
مبارك"حرك راسو وناض فرق عليهم الفاكية والحلوة كيحط ليهم فالطبسيل المحجوب كيقول براكة وهو كيزيد كول كول عادة دكالة ماكتغيرش..الجود والكرم بزيادة...رجع جلس تاني كيهضرو ويسول على الاحوال حتى نطق مبارك نيشان تاهو مكيعقلش على عصام ...
مبارك : ماسولتيش ف ختك اهيا داك ؟
عصام"كايحشم منووو عمر مبارك هز فيه عصام العين حيث مبارك واحد الانسان حنين فيهم مكيخرجش العيب وديما مهلي فيهم من الصغر...غا سمعو قال على ختو وهو يحدر راسو وجمع حجبانو وتزيرررررر ماهضرررش"
مبارك"شاف فالمحجوب الي تاهو حدر راسو وغوبش" : الله يهديك اعصام الله يهديكم هذا مانگول...عيب هادشي الي جرا ليكم والله تا عيب...والله يگطع داك الي يگولو عليه خويا لا هو لا الكيادر ديال عمامك الي عطاهم وذنيه ...
المحجوب : الله يهديه على نفسو اما على ولادو فات الفوت...
مبارك : حارمهم من الفلوس...اش كايدير بيهم اش كااع را ساير يخسر فيهم على القصاير...ونامس صابتو الوقت ف سوق السبت مدوز الفيجطة مع واحد البغل ديال خويا الوسطاني كاع فلوس ورث بغاو يخسروهم ليه...ويامس كيقلب على من يسلفو بغا يخلص واحد الكريدي اش نگوليك را شي خمسين مليون الي واگفة(واقفة) ليه فواحد الكريدي...
عصام"هز فيه عينيه مغوبش" : اشمن كريدي ثاني !؟
مبارك : علاه ماشي تسلف شحال هادي ورا كينگرو عليه باغين رزقهم ناس !!
عصام : شكون هادو ؟
مبارك : وشكون عرف انا يعاود ليا غا ولد المجاطي بن عمي جا لعندي لقهوة فين كنجلس قاليك بغا يتسلف من عندو ويعطيه ضمان...
المحجوب : اش غايضمنو ؟!
مبارك : كان ناوي يشوف شيكات.. ماصابش كيفاش وراه كيقلب على الي يشري من عندو واحد لارض وليني بور ماتباعش ليه بثمن الي يبغي لما جابت ليه واحد ربعة ولا خمسة...
المحجوب : عمرو يربح يبقى ينبش تا يجيب ليه الله مصيبة...هاني مزال نعاود فيها مابغيت ندير مادرت مع حليمة بنتي وصلت وجوجتها ليه ماسولت لا على اصل لا على راجل مع جا عطيتها ليه...هادشي علاش بغيتك تعرف كلشي وتشاور...حيث را خوك مادوزش القليلة عليها وكل مرة تجي غضبانة نردها عالله وعسى يتگاد ويشد طريق وليني الي فيه شي طبيعة فيييه...
عصام" بغل كيتفكر الماضي معاه الماضي ايام كانت مو حاملة كرشها لفمها بفرح..كتغسل فالماعن وتنهج كتسند على بوطاجي الي مضروب ليه غير المرطوب تا كتاخذ نفس وترجع تكمل شقاها حتى تسمع صوت الباب تحل بجهد حيث مركب غا بين البريك مكاملش فتركاب...كان عصام متكي على كرسو كيحفض تا سمعو دخل وهو يهز راسو مكانوش متوقعين مجيتو حيث غايب لخدمة فالداخلة"
المخنتر"وقف عليها" : مال الباب ولا هك..."ضارت عندو تنهج وجهها صفررر..بغات تجاوبو وهو يقاطعها" ديري ليا الما يسخن نعوم ووجدي ليا الحوايج وبقاي تسنايني فالبيت بغيتك...
غمضات عينيها بغات تسخف وماحملااااتش يجي حيث مرييييضة وهو كايجي يفرغ فيها كاع دوك الشهور الي كيغيب كيكرفصها فيهم...كيجي ينعس معاها..كيجي عدد الايام الي كيعطيوه يا كيلقاها فيها ليغيگل يا كينعس معاها فوقيتة مكيوقعش فيها حمل هذاكشي علاش فرق السنين بين عصام وفوزي وبين فوزي وفرح...دارت ليه الما يطيب مشا حيد دوك الحوايج بقى غير بفوقية ريحة العرق تعطي منو وجدات ليه المقراج وداتو تا صايبت ليه سطل ودخل يدوش ورجعات دارت واحد اخور ثاني يطيب ماحتال يتقادا ليه الما يوجد ليه المقراج التالي حيث ماعندهمش شوفو...دات ليه تاني المقراج وعطاتو فوطة وحوايجو...خلاتو كيلبس وهي تمشي طلات على عصام.. حداه فوزي الي كان كيلعب تا نعس بقات كتشوف فيه تا هز فيها عينيه كيشوف فيها مافهمش ديك النظرة الي دارت ليه شنو معناها...باقي صغير معارفش معاني الشوفات مازال ماتحكش بالدنيا باش يفهم كحل راس فاش كيفكر ومن شوفة يعرف المعنى والمضهر...حدرت راسها ومشات لبيت حتى تم خارج لاوي فوطة على عنقو ماشافش جيهة ولادو وصل ودخل البيت وسد عليهم...هي كانت جالسة فوق الناموسية حادرة راسها...
المخنتر : وراني نجي ونصيبك موجدة ولا لا ؟فين وصلتي بديك الكرش ؟! "ماجاوباتوش"
المخنتر : راني معاك نهضر"كيهضر ويحل ليها فزيف ديال حياتي الي مغطيا بيه شعرها"
حليمة"ردات عليه بعصبية" : مرييييضة مريييضة رحمني شوية..يلاه كي جيتي تا ولادك ماشفتيهم ؟!
المخنتر"غوبش فيها وجهد صوته تا قفزت قلبها كيضرررب " : تي اش ليا بالولاد !؟ راهم واكلين شاربين لا صابو ماحسن يقضيو ؟
حليمة : وعطيتيهم واجبك ؟ مع سلام جاي باغي تقضي غراضك ؟ راني مريضة ماگادة تا نهز النفس بقى ليا غانعطيك كقك ؟
المخنتر"جهد صوته تا تسمع عند عصام ماتسوقش ليه" : والى ما درت معاك ندير معامن ؟ كتقلبي نخرج نفسد عليك ولا نجيبها ليك تال فراشك عند عينيك نقضي ؟
حليمة : مايخفاش عليك مابعيداش عليك درتيها وعندي خبارك...تجيب عليا ضرة رحم ليا من فعايلك...
المخنتر : الضرة مانگد عليها هاد ساعة..لاقي معلك المشكيل نزيدني عدوة الله فحالك ؟ دابا من لاخر خليني نقضي راني محن..."كيقيص فيها وكتبعد ماحاملاهش يقرب بزز باش شدها حكم القوي على ضعيف حالتها عيانة سخفانة وكرشها لفمها وهو كيمترس عليها..طبعا ماشي اي ممارسة كانت ممارسة اقوى على طاقتها ماعطاهاش تا حقها فانه يوجدها عمرو ماعطاها كاتعض فليزاار وتكممممش بايديها تا كتخرج عينيها فاش كيقوي عليها ويتجاهد طبعا ناعسة بجنب بحكم كريشتها كتحس بالجنين فكرشها كيتحرك بزاااف وكتشدها نغزة الوجع تا كيهبطو دموعها يجريو...كيف العادة قضى معاها الغراض وفدا فيها الشهور ديال الغياب ضار كينهج عروقاتو تكب وهي ضارت عاطياه بالضهر. وشادة تحت كرشها الي دعقها بالنغيز..شعرها تخربق وداتها كتزد جا بغا يدورها مابغاتش ليه حتى دورها بجهد وهي تغوت لربي الي خلقها تا ضار عصام وناض وقف...عرفو رجع كيضرب فيها لكن باش يعاون ضعيييف البنية لانه طفل ديك اللحظة...فاق فوزي كيبكي وهو يهزو وكمش عليه باش ميسمعش الغوات وضرب والقتلة الي كانت كتاكل من عند المخنتر حتى وهي حاملة مارحمهاش فقط حيث مابغاتش تكمل معاه حقو فالمعاشرة...كيسمع غواتها الي داير فحال الانين كيضرب ليه فوذنيه تا كيغمض عينيه...
المخنتر"بالغوات تاني وسمعو عصام" : عليا بليمييين تانجيبهم ليك ففراشك قحاااب ونخليك تشهدي على فسادي عليك...
عصام"غمض عينيه راجع للحاضر حتى سمع مبارك كيقول"
مبارك : المخنتر من صغرو عديم الرحمة داكشي الي خرج فيه با بالعصى خرجو فولادو وهاهو فراسو نيت...الله ياخذ الحق..
هبطات الكوزينة كدور حاسة بالعيا ديال الوجع ديال لغيكل وكثرة النعاس الي نعست..ماعرفت واش دير الكوتي ولا عشا...حتى جلست وبقات دايرة ايديها على حناكها وهي دخل توبا لقاتها كتخمم ووجهها حمرر...مشات خوات ليها كاس دياال الما شربات بيه دوا الطونسيون الي كتشرب وهي ترجع حطت القرعة فالثلاجة وهي دور لقاتها شادة حناكها...
توبا : بيك شي حاجة ؟
فرح"هزات فيها راسها" : هاا ؟ احم ل لا غير ماعرفتش واش ندير گوتي ولا عشا...
توبا : مابقى حال لگوتي دابا.."حدرت فرح عينيها..رجعت نطقت" كي بقيتي ؟!
فرح : شوية الحمد لله عتقني الدوا شكرا بزااف..
توبا"تبسمت بجنب وجمعت ضحكة" : اش درت انا غير تسخرت الله يشافيك..."حركت ليها راسها وخرجات حتى كتسمع صوت الهضرة وهي دور لقات زين الدين معنق ضحى من كتافها وايد شاد ليها بيها ايدها الي مكمشاها على العكاز هابطة وكتعگر وهو معااااون معاها بالخاااطر وواحد المنضر كيبان ليها فشكل فحال راجل وبنتو...حتى تنهدت هزت فرح عينيها لقاتها بعيد واقفة وكتشوف مبسمة واحد تبسيمة اول مرة تشوفها فيها...ناضت من الكرسي ومشات وقفت كتشوف فين كتشوف هي حتى بان ليها نازل هو وضحى وشاد فيها...ماشافش فيهم حيث كان مركز معاها...
ضحى : فين غانمشي ؟!
زين الدين : جلسي فالصالون برا بارد عليك...
ضحى"شافت ففرح واقفة" : فرح كيف بقيتي شوية ؟!
فرح"حاولت تشتت نضر متشوفش فزين الدين الي هز عينيه فيها وبقى مفيكسيهم فيها.." : الحمد لله ش شكرا بزاف حيث وصيتي عليا عمي محمد العساس...
ضحى : ماشي مشكيل كانت باينة من وجهك...الله يشافيك.."حدرت راسها وزادت تشبتت بزين الدين الي بقى غادي معاون معاها تا داز من حدا فرح وضار كيشوف فيها عض لسانو حتى ضارت هربت ليه ومشات الكوزينة وهو مشا فحال مادار والو هههه...دخلها لبيت صغير فيه LED فاش كيتفرجو كبيرة مفرش مزيان... وجلسها تا قادت ليها توبا السداري والمخاد تسرحت وقاد ليها هو مخيدات فين حط ليها رجليها وهادشي كامل تحت عينين ضحى الي كل مرة كتزيد تندم على انها ماسمعتش ليه لو بقات معاه كانت غاتعيش الاهتمام وتعوض فالنقص الي عانات منو...وقف كيسوس فايديه خشاهم فجيابو وتقابل معاها...
زين الدين : هاد المرة طلعي نتي راسك حاولي سي نو تعاونك عمتي ولا مراد ولا فرح...
توبا. : بلاش نعاونها غير انا ماعليش...
زين الدين"هز حاجبو" : الي كاين هنا خير وبركة عمتي كلشي يعاون.."حنحن" فامان الله..."ضار وخرج من البيت مشى نيشان لكوزينة لقاها كتجبد من ثلاجة شنو دير العشا حتى حنحن وهي تقفز وضارت عندو يلاه بغات طلب سلامة مايجبد تاني تا دخل مراد وهي تنهد تا هز فيها حاجبو" كاااع ؟
مراد : واحد سلام عليكم..."شاف فزين الدين" طالع لمدينة عند المحلات ؟
زين الدين : سي..
مراد ؛ هي الحسابات ليلة ؟!"حرك ليه راسو" انا نمشي معاك نعاونك باش تسالي دغيا..
زين الدين : لا ماكنتيش عيان مرحبا...
فرح : واش غاتجي معطل ؟!
زين الدين : على حسب...العشا ماديريش بحسابي معشي تما..
فرح : واخا..
زين الدين"شاف فمراد" : انا سبقت تا وكان وصل عليا"حرك مراد راسو ومشا طلع لفوق اما هو قرب ليها باسها فراسها" رخفي فيك النفس افرح رخفي...
فرح : زين الدييين ...
زين الدين : نعل ملت هاد زين الديين معاك...
فرح"شافت فيه" : ندير حسوة ديال السميدة تقدر تشربها ضحى...
زين الدين : سي تقدر.."شاف فساعتو" انا مشيت الي خصك عيطي ليا ورجعي شربي دواك ثاني وتغطاي مزيان..."رجع وقف" مزال ماجمعتيش حوايجك ؟
فرح : علاش ؟"تفكرت السفرة" ااه مزال واش غانطولو ؟
زين الدين : شي 4 jours ماشي بزاف...
فرح. : وباقي لويكاند يومين..صافي واخا مابغيتيش تگوليا فين ؟
زين الدين : تما وتعرفي.."تحنى باسها فحنكها بجهد على غفلة وضار خرج حيث تيليفونو ماسكتش من تعياط لانه خاص يسالي الحسابات ديال محلات...دارت الحسوة تسناتها تا .طابت عاونتها توبا وراتها سوبيرات خواتها فيها حطت تمر والبريوات تعشاو بيها وناضت ضحى معكزة على امها والعكاز خلاو فرح كتجمع كملات وطلعت تاهي دخلت بدلت عليها وغسلات وهي تخرج حسات بوجيعات خفاااف تاني بغاو يبداوها شربات الدوا..دخلات لواتساب لقاتو راسل ليها ميساج كيسول فيها ردات عليه وعلماتو بالي غاتكون ناعسة في حالة مجاوباتوش...كيبقى مصر انه يسول عليها لانها وخا ولات تهضر تجاوب الا انها باااقي مكسحة فنفسيتها ماشي ساهل تخرج منها دغيا...حطات تيليفون عند راسها وضارت كتشوف وتلعب بالسنسلة الي جاب ليها وتفكر فيه اش دار ليها قبيلة وكيفاش كيحشمها ماحستش براسها حتى تبسمت...حطات سنسلة على فمها وباستها ورجعت كتلعب بيها تا داتها عينها...راها ناااعسة وهي دور حطات رجليها تا حسات بيهم كيضربو رجلين اخرين تا بدات تشم فريحتو حلت عينيها لقاتو ناعس حداها حاطة راسها على دراعو ماقدرش يحيدهم حيث عاد دخل بشي ساعة من برا بدل حوايجو وتلاح نعس حداها...ورجل فوق رجلو هي الي كانت ضرب فيه...وهي تشرعهم تا شهقت وهو يحل عينيه ورجع غمضهم...
زين الدين"بصوت مبحوح بالنعاس": مالك اش كاين ؟
فرح"تلفت عارفاه غاينعس حداها طال زمان ولا قصار ههه..بغات تقوليه امتى جيتي تخربقو ليها الكلمات" : اويلي خلعتيني اش كدير هنا ؟! .."بغات تنوض من حداه"
زين الدين"هز حاجبو نطق وعينيه مزال مغمضين بصوت مبحوح خلعها" : تحركي من حدايا نقسم ملتك...
يتبع...
التعليقات
لا توجد تعليقات بعد، كن أول من يعلق.