ولادة من رحم الفساد الجزء التاسع

نتيجة كانت متوقعة من طرف عصام الاخ الي ماتصرطش ليه الشمتة ديال ختو من طرف زين الدين والشمتة الي تشمت هو ثانيا...انك تضحك وتعرض وتستقبل ناس الي فالاساس كانو جايين غير ضد فشخص وخطبو ضد فيه بدون اردتهم فقط باش يشفيو الغليل والطعم كان هو عصام وعائلتو وفرح بالدرجة الاولى....حتى واحد ميبغيها لراسو..هذا من حيهة عصام ...اما من جيهة زين الدين عارف راسو غالط ومعتارف بغلطو مية فالمية وندم ندم شديد انه انساق وراء الغضب الي عماه من جيهة الغالي و المخنتر الشي الي خلاه ضلم معاه بنت الناس حتى فاق لقا راسو مشاااا فالخطبة وامورها ولانه ميبغيش الضلم الي لقا راسو تسبب فيه لناس متستاهلش فضل انه يوضع حد لهاد الوضع الي وصل ليه مع ناس وصفهم بناس الاصل والصواب...لكن الضروف والوقت والزمان والمكان يمكن مكانوش مناسبين...بالرغم من محاولات فرح انها تبعدو باش ما يجبدش صداع لكن مبغاش ومرضاش على راسو انه ميجيش ويشرح راجل لراجل مع عصام ويفهمو حتى لو رفض الاعتذار المهم يعرف سبب الغياب...وهادشي علاش قلنا الضروف مساعداتوش.. فضل يخلي الوقت تبرد ويدير لفرح خاطرها. حتى وصل هاد النهار واستمر انه يدير الخاطر لكن باش يسمع كلمة شماتة رعواني وجميع الصفات الي قللات من رجولته را تاحد ميصبر ليها فما بالك هو بشخصيتو ورغم ذلك مكانش غايضربو لو ما عصام الي قام بالمبادرة الاول...وبهذا وبخلاصة الكلام عصام وزين الدين اصبحا شخصين بنفس الطبع لكن بعكس الاتجاه....

بقا جهد نص ساعة وهو كينهج فالطوموبيل وعقله ماهواش هنا تكا راسو عالكوسان وسكت مابقاش هضر وحتى الحسين خلاه على خاطر خاطرو...حتى حس براسو شوي تهدن وهو يتگعد قاد سانتيغ لا يصدق موقفو شي بوليسي وهو كاعي يصدق خاري عليه وهو فغنى على شي صداع مازال...كسيرا والوجهة نيشان لدار الحسين وقف عند الباب ونزل طل عليه من نافذة السيارة...

الحسين : رخف على راسك شوي اولدي الله يرضي عليك...

زين الدين"هز باكية الكارو من حداه جبد سيجارة تا شعلها " : الساعة الله"نطقها بصوت مبحوح بالصعرة الي ركباتو" ...

الحسين : في امان الله

"حرك ليه راسو وزاد فحالو مسافة الطريق لقاتو دخل الفيلا ودخل لدار حتى لقا توبا ...."

توبا : ولدي تعشا ل"حققات فيه تحت عينو مضروب وجيهة فمو مورمة" ولدي ياك لباس مالك فوجهك ؟

زين الدين"ماجاوبهاش مشا نيشان طلع لفوق دخل لبيتو كيحيد فصدافي القميجة تا فرعها وحيدها لاحها فالسلة ديال الدوش حيد كلشي...طلق الما تا دفا ودخل تحت منو دوش وخرج لوا عليه غير فوطة لتحت مشا لمراية جبد من البلاكار عدة الاسعافات الي عندو ...قلب عمق الجرح كان غير سطحي بسيط مسحو ب بيطادين مزيان كيوررررك عالجرحة مزيااان ويمسح وينقي فيها حتى تنقات عاد دار عليها سبارادرا ومسح جيهة فمو جمع داكشي تما خرج لبس بوكسر،شورط ..رما عليه فوقية بيضة وخرج الكوان ديال الصلاة الي تما صلى المغرب الي فاتو جلس شوية ربع حل المصحف وشرع فقراءة الذكر الحكيم الي وخا العبادة لكن كانلتجاؤ لصلاة والقران باش ترتاح نفسيتنا ويتمتص الغضب او الحزن الي فينا وكيخفف علينا ويعطينا طمأنينة...غير كمل ناض رجع البيت تا صونا تيليفونو..كان البروفيسور علي...

علي : فين اولدي يلاه منتعطلوش...

زين الدين"تفكر انه معروض لعشا عند احمد بن سودة اب حنان..طالع ليه الخز وميقدرش ميمشيش ومصيبة كحلاااااا" : فينك ؟

علي : هاني لتحت كنشرب واحد نص نص بينما شرفتينا...

زين الدين : شوي ونكون عندك..."قطع معاه ولاح تيليفون فوق ناموسية ..بقا.واقف شحال كيفكر اش يدير واش يمشي فعلا ولا يبقى وفالاخير قرر يمشي لانه السيد او البروفيسور بن سودة من اكبر الاساتذة الي قراوه والي خيرو عليه كثيييير وكان كيوقف معاه فايام الشدة...واخا كان غايكون هو وياه واحد الوقت نساب لكن المكتاب تصرف ورغم ذلك ماهزش منو ولا تقلق حيث الي وقع كان بسباب بنتو والي غانعرفو فالاحداث القادمة شنو وقع بالضبط...مشا لبلاصة فين معلقين قوامجو كان الاختيار سهل جدا جبد وحدة كحلة وسروال دجين لبسهم طوا كمايم القميجة لفوق لبس ساعتو ورش بارفانو من بعد ما مشط شعرو ...عاد جبد لاباراي عبر السكر لقا شوييييي ماشي بزاف طالع ...هز جاكيط الكوير دارها فايدو ...ونزل نيشان عندو لقاه كيهضر غير شافو وهو يقطع ديك ساعة...

علي.: اتا شواقع اودااا...

زين الدين"هز ايدو" : يرحم باااااك الحاج ميك هاد ساعة ...

علي : تفاهمتو نييييت ياك ..

زين الدين"عض شنايفو "

علي : لا تعض شاي عليا تم ...صافي الفاهم يفهم...هانتا مشيتي وحيدتيها عليك...

زين الدين"ساط بنفاذ صبر وشاف فيه" : نتحركو نحيدو علينا هاد غناية حاشاك ؟

علي : تت ..يلاه يلاه...لاحول ولا قوة الا بالله..."هز تاهو جاكيط ديالو وخرج هو وياه ...اما فهاد الاثناء بالضبط اما احدى الاقامات المتواجدة بدار بوعزة وقفات سيارة humer H3 ...ونزلات منها شادة صاكها مكمشة عليه وجامعة شعره جمعة مهملة ضارت شافت فيه غمزها وطمنها بعينيه ورجعات دخلات لباب ديال العمارة لقات العساس تما ...

ضحى : احم عمي عطيني ساروت ديال دار الغالي..

العساس : نتي ضحى بنتو ياك ؟

ضحى : اه...

العساس"ضار شاف فالطوموبيل الي كسيرات عاد مشا جبد ساروت عطاه ليها" : هاكي بنتي...شكون هذا الي وصلك ؟

ضحى"هزات فيه عينيها الذابلين وضارت شافت فين مشا مهدي وشافت فيه واحد اللحضة وهي تعقد حجبانها" : ونتا مالك ؟ ديها فخدمتك ماشي شغلك فالي يوصلني ولا ميوصلنيش..."شدات ساروت بالنترة وهي دخل لسانسور وطلعات نيشان لدارهم سدات الباب وهي تمشي كتزرب لدوش وتنتر فحوايجها تا بداو دموعها كينزلو واحد تلوى الاخرى...كيف حيدات الكيلوط لقاتو مطليييييي بالد_م كااامل وسروال تاهو هبطات عينيها لقات خطوط متفرقة على شكل عروق من د.م نازلين مع فخدها تا بدات ترعد تمسح وترعد تمسح وترعد وتبكي مشات بزربة جابت بابييي جينيك نتفاتو كتمسح وتعاود تا قاست لتحت وهي تحس بضو ضربها فحال قستي جرحة مكنتيش عالمة بيها"

ضحى : اممممممممم اهى اهى ايييييي "جلسات لارض مفرقة رجليها كتندب فوجهها وطرش وتنتف فراسها وتبكي لربي الي خلقها ...كتفكر وخا واعدها واخا طمنها الا انه الي دارتو ضيعها نقص منها خفتها جابتها ليها...رجعات كتفكر كلام زين ليها لو كانت تحت رعايتو كانت لقات الاهتمام الي كان ناقصها...لكن هاهي جات عاشت مع باها غير ايام قليييلة وشوف فين وصلات وباها فين هو دابا ؟ لا عاش ولا كان باش يحس بيها ولا يعقل عليها...ناضت بشوية كتعكز حتى دخلات دوشات وعاودت وخرجات وهزات الحوايج المسخين رماتهم فالمكينة بغات تخدمها ماعرفاتش ليها وعمرها ماعرفت لانها عمرها مادارت شغل البيت ولا حطت ايديها فالما...حتى انها غير دارية بالي خاصها تصبن الملابس داخلية بايديها ولا ديرهم فماشين ديالهم الخاصة بيهم...وطبعا هادشي شكون غايوريه ليها فغياب الواليدين وبحضور الام الي كانت كدير كلشي ولا تزيد الخدامة ديرو وهذا احد اكبر الاخطاء فحق تربية الولاد....جمعات دوك الحوايج ف ساشية وخرجات لبسات بيجامة خلات فوطة على راسها وتكات فوق شداري تكلكمت على شكل جنين فالكرش ودموعها دايزين...هزات تيليفون كتشوف عالله يكون مسول عليها مالقات والو حتى صونا ليها فايديها وهي تقفز مخرجة عينيها كان الاتصال من MAMI يعني توبا ...

ضحى"ماقدراتش تجاوبها جا فبالها غاتحس وتعيق بيها حتى قطعات لكن قلب الام ديما كيحس وخا يكون الي كان وعاودات الكرة ثاني وثالث تا شافت انه مغاديش تسكت وهي تضطر تجاوبها ودارت راسها زعما ناعسة جاوبات بصوت ضعيييف " : ا ا ال الووو...

توبا"حطات ايدها على قلبها بخوف" : الله يا بنتي شنو واقع ليك خلعتيني عليك...

طول الطريق وهو غادي سايق وتفيكرو عااامر ساكت مكيهضرش ماعاطيش لعلي حقو فالكلام معاه خلاه علي بخاااطرو واحد شوية حتى كسر الصمت بكلامو او نقولو بسؤالو ليه....

علي : علاش هادشي كامل ؟!

زين الدين : ساعة الله...

علي : مابغاش يتفاهم ؟!

زين الدين : كلام العيب ساهل يتقال وصعيب يتصرط..."حك جبهتو وهبط دوز على لحيتو بتعب وقلة حيلة ونفاذ صبر ..عيا مابقاش قادر يهضر فهاد الموضوع خاصو مدة يبقا يفكر فيه عاد يرسى على بر..." بدل عليا الهضرة انا متايب مولانا...ماشي دابا...

علي : واخا ولدي من بعد...نوصيك بعدا حاول متبينش راك مقلق لا تقلقش لينا سي حمد ...

زين الدين"حرك راسو وغمزو بثقالة بدون كلام كيعني بالي كون هاني حيث الگانة باش يهضر مكايناش كيفضل ديما يسكت باش يبقى يفكر وياويلك تصعرو من بعد الصعرة هي اخيب حاجة كاينة فحال الى كتقجر عليه ولا كتحك الملحة عالجرح...زاد فالكسيراتور حتى وصل لفيلا ديال بن سودة الي سنيييين مابقا جا ليها من اخر نهار ليه تما وهو يوم الخطبة ديالو ب حنان...سكت طوموبيل ونزلو بزوج "

احمد"بابتسامة تم جاي لعندهم " : اه اه اه مرحبااا مرحببااااا بناس ماكسيلو فاسيال...

علي"تسالم معاه" : الله يكبر بيك الحاج ...من لاخر كاين شي مناكلو ولا تقتلنا بالهضرة كي ديما...

احمد : الخبز والما لا قبلتي علينا...

علي : لباس بعدا نرطبو حلقنا...

زين الدين : الحاج"قرب باس راسو وايدو"

احمد"بقا قابط ليه ايدو وكيشوف فيه" : زين الدييييييييين"طولها" عاش من شافك اولدي...على سلامتك نوتي الدار عندي...شحااال هذا ما جيتي لهنا...غبرتي على داركم بزااااف...

زين الدين"طبطب ليه على ايدو" : الضروف الحاج ومشاغيل دنيا ودين ...ماعليش...

احمد"شاف سباردرا تحت عينو" : ياك لباس ؟!

زين الدين : كل خير كل خير"عاود طبطب ليه وغمزو بمعنى ماتشغلش بالك..."

مالقا ميقول سوى يرجع يرحب بيهم حتى دخلو لداخل لصالون الي كان باثاث بلدي فخم...حطو صبابطهم سماو الله ودخلو جلسو لقاو طابلة محطوط فيها بلاطويات ديال مملحات صغار والعصير منو الحلو ومنو المسوس طبيعي على حساب زين الدين وعلي نيت...

زين الدين"حتى تكا على المخدة بضهرو وتسرح حط رجل فوق فخدو..ضار هنا وهنا بان ليه الما لهيه وهو ينوض كب ليه كاس الما تكا عليه وفهاد اللحضة كانت دايزة حنان بقفطان جوهرة ساااامپل فالغوز بيبي...طالقة شعرها الذهبي بميكاب خفيف...كانت غادية لكوزينة وهي دور على غفلة تا لقاتو واقف لهييه فالصالون عند طابلة الي فيها قراعي الما...وهي توقف كتشوووف فيه بحب نسااات اخر كلام قاليها ونسااات كلشي ولا كيبان ليها غير هو وهي فهاد اللحضة قلبها بدا يضرب يضرب ...ومع قميجة كحلة الي لابس حمقها اكثر غير الحب من جيهتو الي فقلبها الي ممحاتوش سنين ...ماحساتش براسها بالي را شرب ومهزش فيها العين هو لمحها واقفة بعيد كتشوف فيه لكن باش يعيرها اي اهتمام مهزش عينيه شرب وهز ديك القرعة والكاس ومشا جلس حطهم حداه...

فهاد اللحضة وهو واقف قدامها فالمكان الي رجعها لسنيييين هادي ملي كان عندها امتحان والضغط كان عليها كثييييييييييييير كان هو فديك اللحضة فالمغرب باقي مامشاش لدبي...

حنان"كتحفظ وتعاود تمشي تخرج وماتخرجش ليها ديك النتيجة وتعاود تقطع الورقة عاودت وعاودت حتى طلع ليها الدم بغات تبكي " : تفووووووو اهى اهى.."حطات راسها على الطابلة بتعب" اوففففففففف..."تخبط شي حاجة عند راسها تا قفزات على جهدها مخلوعة" هيييييييييي ماما "شافت فيه" زين الدين...

زين الدين : تحركي عاودي ماعنديش نعاس هنا...

حنان : مابغاتش مابغااااتش تحفض ليا والو ماعرفتش علاش ضغط ضغط ضغط اهئ...

زين الدين"عض لسانو ورك ليها على راسها راسها بصبعو وعاود" : دماغك ماحاضرش .."خنزر فيها" حضري عقلك معايا"جهد صوته تا قفزت"

حنان : حشومة عليك ما تخلعنيش والله حتى كنتلف ..غانعاود نعاود غير رخف عليا عافااك"عينيها دمعو بطريقة طيح الضيم"

زين الدين"عزات عليه واحد اللحضة وهو يقرب قبط راسها وباسها فجبهتها" : هادشي ولابد ليك منو..الي صبر ينول...ديريني مثال ليك "طرش ليها حناكها بشوي" توگضي معايا الله يرضي عليك ...صباح هادشي يكون كامل هنا"حط صبعو على دماغها" ماتحنتيش كلمتي...

حنان : فين غادي ؟!

زين الدين"رفع حاجبو" : عينك نبات معاك ولا شنو ؟

حنان"تزنگات" : الا ههههه ...

زين الدين"غمزها" : كل وقت بوقته يكون خير...

رجعات للوقت الحالي وخرجات من تفكيرها بالماضي على اثر نغزات امها ليها ....

زبيدة"ام حنان ..بانت ليها واقفة كتشوف جيهة صالون" : شش ماما مالك ؟!

حنان"قفزت بشوي وهي دور عندها" : اماما حبيبة ...مماليش ..بغيتي شي حاجة ؟!

زبيدة : عيطي لبديعة تدي لبلاطويات الي بقاو فالكوزينة...

حنان : غير خليها مدهية مع العشا سيري عندها وانا نديهم بغيت نيت نسلم على عمي علي ونجلس معاهم شوية...شحال ما شفت عمي..."ماقالت ليها والو حيث علي معرفة قديمة كيجي عندهم بزاف شحال هادي...وعاد غايجي يقريهم فكلية الطب ... مطمطات شفايفها مزياان قادت حالتها هزات البلاطويات الي بقاو فوق رخامة وهي تمشي بخطى سريعة وقلبها عند فمها رغم الهضرة الي قاليها الا انه باش تنسا حب حياتها صعيييب يتنسى بسهولة...قالت سلام ودخلات حطاتهم وهي تمشي لعند علي سلمات عليه" عميييي ليك وحشة ...

علي : اه اه دكتورة المستقبل شرفاتنا ...عاش من شافك ابنتي..

حنان"بابتسامة" : هههه عاش من شافك نتا عمو غيابك طال...

علي : وهاني رجعت غبنا لمشاغيل ..قريب نتشاوفو ف الفاكيلتي (الكلية)...

حنان : ان شاء الله..احم"ضارت جيهة زين الدين لقاتو خاشي راسو فتيليفون كيبقشس فيه وهي تحنحن ونطقات اسمو" زين الدين ؟! "مدات ايدها تسلم عليه" : لباس عليك ؟!

زين الدين"هز عينيه لكن بدون ميشوف فيها مد ايدو سلم عليها بالخف" : ولله الحمد..

حنان : مرحبا بيك عندنا...

زين الدين"غمض عينيه وحلهم" : الله يكبر بيك ..

علي"بغا يكسر الموقف" : جلسي جلسي وقولي ليا اش درتي بعدا ؟!

حنان "شافت ف زين الدين وف باها" : Spécialité chirurgie oculaire"جراحة العيون"...

علي : très bien بنتي ...فين مشا Urgentiste

(médecin spécialisé en médecine d'urgence)

حنان : مانقدرش نديرو خاصني نمشي لامريكا باش نكمل فيه واخا نكمل فيه مغاديش يبقا عندي وقت لحياتي شخصية"تفكرات فاش نصحها زين الدين مديروش حيث غاتهمل دارها من بعد فاش يتزوجو "

علي : وهادشي عاد عرفتيه ابنتي...

حنان""شافت جيهة زين الدين ورجعت شافت فيه" : الخفة الي فراسي جابتها ليا هههه"حدرت راسها وبنص عين خطفات نضرة لزين الدين وتفكرات الكلام الي قالت ليه ديك الفترة والي كان سباب فراقهم".....

زين الدين"هز راسو وشاف جيهة احمد بدون ميتسوق لشنو قالت اصلا مزال زاعف غا عاقد دوك الحجبان ومسلك الجلسة بزز منو " : الحاج على بال من هنا ليومين ؟(زعما واجد من هنا ليومين على بال هي غاتجي )..

احمد"كان داير رجل على رجل حطها وتقاد فالجلسة" : وايلي فيها شك ؟ اسيدي الكومبلي واجد وقفطان الحاجة واجد خاص غايوصل الوقت ان شاء الله...

علي : هههههههههه

زين الدين : يتوب علييك ...

من بعد الي وقع كل مشا فحالو وكل خذا وقت باش قدر ينسى الواقعة الي جرات ومن داك الوقت وعصام كيدخل فالليل يتعشا ويمشي ينعس بلا ميهضر وحتى فوزي ماحكرش عليه خصوصا فاش عرف اش وقع مابغاوش يحكرو عليه الدعوة ...الاجواء كانت مشحونة فهاديك الوقت...

في الصباح الباكر...لبسات حوايجها باش تخرج تيسر لخدمتها ..هزات صاكها ولوازمها...وهي تخرج من البيت من بعد ما طوات فراشها وقادات البلاصة.. لقا فوزي فالكوزينة كيعمر فاتاي فايق بكرييي على الوقت...

فرح. : ياااه كي طرا اليوم ؟؛

فوزي : فايق نحضي والديك..."دوز على وجهو" عندي مشية لواحد دوار هنا نجيبو شي دجاج من تم...

فرح : جابك الله بغيت فلوس مابقاش عندي ...

فوزي"تفوه" : اووو شحال خاصك خمسة دراهم ؟ تبكي على مها...

فرح : وايه نخرج ونرد ليك صرف...

فوزي"كيجبد من جيبو" : دابا عجبتيني"مد ليها مية درهم" عقلي عالخير تخلصي دوزيها ليا فحسابي تانسالي ونعطيك مون نيميغووو...

فرح"شداتها وباستها" : يقوي الخيييير..."ضارت هنا وهنا" عصام مازال مافاقش ؟!

عصام"حنحن من وراها تا طارت ونزلت" : اش بغيتيه ؟!

فرح"ضارت كتصرط ريقها" : و والو..تفطر ؟!

عصام"الصمت...دخل كب ليه القهوة ومشا خرج من تما مجاوبهمش اذن باقي كاعي"

فوزي"بعصبية من جيهة زين دين" : ملي ماقتلش عدو ربو يحمد الله...اجي تفطري اجي..."حط صينية غير تما فالكوزينة جابو كراسا صغار وجلسو يفطرو حتى ناضت طلات على الخبز لقاتو باقي ماخمر غطاتو ورجعات تفطر تا قرب الوقت وهي تنوض مع فوزي هزات الوصلة وخرجو وصل معاها تالفران ومشا معاها تا شد هو طاكسي وهي خلا ليها الموطور مشات بيه نيشان لكلينيك...دخلات كيف العادة بوانتات...وجلسات مقابلة خدمتها ولكن فبالها يومين هادي وهي باغا تجمع مع اعز اصحابها تعاود ليهم ولا يطرطق ليها شي عرق ...استغلات واحد وقيتة فارغة جالسة غير وحدها تما وكلشي مشغول لداخل حيث عطاوها طابي فالبيسي تحاليل باش يخرجوهم .....حتى وصلات وقت البوز وهي تستاذن من تما حيدات البلوزة وهي تهبط لتحت خرجات من لاكلينيك حتى سمعات اسمها وهي تغوبش بجهد..."

فرح"خنزرات فيه" : نعااام ؟!

اسماعيل : لباس عليك ؟ "هز ايديه موقفها" شش ما بغيت والو بغيتك غير فواحد الهضرة متعلقة بالخدمة...

فرح : واش غانبقا نشوفك ديما ؟ ياكما بغيتي نمشي من هنا ونخلي ليك هادشي كلو ؟

اسماعيل : لا لا اش وصلنا لهادشي...مابغيت والو راني عندي خدمة هنا هاد الايام ويمكن شهر غير صبري ليا ...فرح مابغيتش تبقاي كل مرة تهزي مني رخي فيك النفس مغاندير ليك والو ونساي اش وقع ديري فحال اول مرة عرفتيني...

فرح : وماشي كل مرة تعيط وتوقفني ؟!!

اسماعيل : منبقاش نعيط بزاف الالة ونوقفك..بغيت غير نسولك الله يخليك حداكم واحد ناس كيقولو ليهم المنتصير ؟

فرح"بقاات كتشوف فيه وهي تجاوب" : اه حدانا ..

اسماعيل : غانجي هاد الايام عندهم بداعي الخدمة تعاوني معايا مادام كتعرفيهم هنا غاتعاوني مع شرطة ماشي معايا غير نجي وريني دارهم وقولي ليا شكون هما محتاج معلومات عليهم ولابد..."فهاد اللحضة الي هما واقفين فيها وقفات السيارة قرييب ليهم... "

فرح : فاش غاتجي غير با سالم غايعطيك معلومات كتر من مالين دار بنفسهم..نخليك دابا"ضارت بغات تمشي وهو يشدها ثاني وهي تنتر ايدها بجهد" واااااكوااااك..

اسماعيل : اححح وشحال توحشت الغدايد الي كيركبوك فاش كنعصبك هههه"هز ايديه " هاني صافي صافي ههههههه..

فهاد اللحضة دازت سيارة من حداهم وكسيرات بجهد تا ضارو شي ناس تما دخلات ونزلت لباركينغ لتحت ...نزلو منها وطلع فسانسور نيشان وصلو لطابق ديال الاجتماعات لقاو فاستقبالهم المدير وبروفيسور عبد الحفيض..وشي اطباء تما..

ع.الحفيض : فالوقت كيف ديما هههه

علي : فهادشي دكتور البغدادي ميخطاهش...

نوري : مرحبا اسي ههه"حلو ليهم باب القاعة ودخلو كاملين عطاهم علي الاستدعاءات لحضور حف الافتتاح الي باقي ليه ثلاث ايام...شكروه وواعدوه بالحضور...كانو حاطين القراعي دالما والعصير وشي مملحات وحلويات ..

زين الدين"ملي وصل وهو على غوباشة حااارة مفهموش علي علاش غوبش تا بانت فيه نيت...كب ليه كاس الما وبقاا شاد داك الكاس وكيتفكر شنو شاف قبل قليل...هز عينيه كيشوف فيهم بادييين الهضرة"

علي : داكوغ هادي مزيانة..."بدا كيهضر ويشرح وهما كيجاوبو على اسئلتو..." ومع..... "مزال كيهضر حتى تسمع تشاااااخ ضورو وجوههم لقاو كاس ديال زاج الي محطوط تما ديال ماء معدني فايد زين الدين تشخشخ فرتيت ...بغا يوقف علي من بلاصتو " زين الدين ؟ ياك لباس ؟

زين الدين"الفك ديالو كيبان من بعيد كيتقرقب ...ماهضر ماتكلم..وخا تجرح ساس ايديه بشوااايا وجبد لانجيت من قدامو مسح بيها زاج...ومسح د.م الي خرج .."

نوري"طل عليه" : ولدي ياكما تجرحتي بزاف نعيط ليهم يجيو من تحت ؟

زين الدين"واحد العرق فناضرو كيضرب تا هز عينيه فيهم وهز ايديه وحرك راسو بالنفي بمعنى مكاين والو ومكاين لاش حل صدافي الفوقانيين باش يتنفس من الخنقة ...حنحن منضف حلقو وتوجه بكلامو ل نوري." : محتاج لموضفين من عندك "غمزو" بحلاوتك...

علي"خرج عينيه" : اااا ؟ واش لباس بعدا ؟

زين الدين"شاف فيه" : كون معايا يكون معاك الرحمٰن...

اغلب الاحيان هذا اذا ماقلناش ديما هو فاش كتمشي علينا الحاجة عاد كنعرفو ب قيمتها...وهذا الي وقع مع اسماعيل وحنان زوج دناس مختلفين مكيعرفوش بعضياتهم لكن عايشين نفس التجربة وهي انهم فقدو ناش كانو معاهم ومكانوش حاسين بقيمتهم حتى فقدوهم...واش القدر غايعطيهم فرصة مرة ثانية اما الحياة عندهم غير فرصة وحدة ام الناس الي فقدوهم معندهمش فرصة ثانية فقاموسهم...شنو مخبي ليهم القدر فالمستقبل معاهم ؟!!

فرح"خنزرات فيه" : ماعندي باش نفيدك انا كيف قلت ليك با سالم الحانوت الي تما هو الي غايعطيك المعلومات الي بغيتي ممكن يقوليك شكون نتا كااع...

اسماعيل : ههههه ياك...واخا لالة ..

فرح"بغات تمشي وهو يوقفها تاني" : واش مبغيتيش تعطيني بتيساع ؟

اسماعيل : تي تسناي اتاسانو..."كان كيقولها ليها"

فرح"غوتات بجهد" : واااااااااااااا عطيني تيساااااع وااااااااااعووووو..وا مكتفهمش يا ويلي...خليني بغيت نمشي نتغذا البوز شوي وغاتسالي ...ماعندي باش نفيدك المعلومات وريتك فين تلقاهم...

اسماعيل : ههههه صافي صافي سمحي ليا..."مزاال كيهضر تا جا عندو واحد الشرطي ضرب ليه تحية "

شرطي : مون كوميسير كيتسناك فالسيارة نعماس...

اسماعيل"شاف فرح خلاتهم ومشات كتخطوي بزربة تا رجليها تفاوتو جابت ليه ضحك" : هههه واخا "حك نيفو وشير ليه بمعنى يلاه"

من بعد ما تغذات رجعات لكلينيك وباشرت فخدمتها الي خلات حتى دازو الساعات ووصلات وقيتة الخروج حيدات الطابلية وهزات صاكها بوانتات الخروج وخرجات ركبات فالموطور شداتها طوالة وحدة لدار...مع دخلات بدلات حوايجها ..توضات وصلات الي فاتها ومشات تكات ترتاح كيف العادة حتى وصل الكوتي عمرات ليها كويس اتاي من داكشي وسخنات شي مسيمنات حيث غير وحدها وحطات زيتون زيت فرماج وزبدة وجلسات كتقلب فالبراد حتى تسمع صوت الساروت فالباب والمغرب كياذن حتى دخل هزات عينيها فيه...

فرح : اححح شكون جااا..

فوزي : مي راضية عليا ريحة نعناع الي درتي تشق الراس..

فرح : جيتي بكري ؟!

فوزي : حطينا سلعة عييينا ليوم دبصح"مشا لدوش غسل رجليه وحالتو وتوضى مشا تا صلى الي فاتو تاهو وجا تلاح مقابل ليها"خليت ولد ضاوية مقابل لمحل ممشاش معانا داكشي باش..."مدات ليه كاس ديالو"

فرح : فوزووو

فوزي. : امك ..

فرح : خههه ...بغيت ناخذ موطور على حساب تحراك لخدمة كرفصني طاكسي بالفلوس...

فوزي : بقاي خدامة بموطوري تانشوف شي واحد انا...

فرح"هزات ايدها" : لااااا بغيت واحد جديد اصلا مجبتوش ليا كادو ديال نجاح فليصونص ...

فوزي"هز واحد زيتونة شي عليها بيها" : لموك وداك تيليفون الي بقيت نخلص فكريديه عام ؟! سيري لمك بموطوري ولا بالرب لجليل لا تبعك تا ديالي ماتشديه وسيري على رجليك نيت نقصي هاد ستمية كيلو الي هازا ...

فرح"خسرات فيه وجهها" : سلااامة..."وهما كيهضرو حتى تحل الباب ودخل تاهو لكن هاد المرة بوجه عادي ممعصب ما والو...مشا نيسان لدوش غسل ودخل بدل عليه بقا غير بتيشرت وشورط خشا رجليه فكلاكيط ومشا لعندهم كيتفوه بالعيا ونعاس...لقا السلام "

عصام : سلام عليكم"حط صندالة ودخل ريح حدا فوزي كيحك فدراعو هز عينيه ففرح" واحد الكاس معاك ...

فرح : هي لولة"كبات ليه كاس مكشكش من داكشي هي بالفرحة باش تطلق مبقاش معصب وهضر معاها دارت ليه كويس حسن من ديالها وديال فوزي خلات فوزي كيحسبن هههه"هاهو...

عصام"شرب شوي منو سما الله هز الخبز بدا ياكل فالزيت واتاي الاكلة البسيطة لكن مفضلة عندو بالجهد وخلاص فرح الي كتاخذ فرماجة ودير فوق منها زيت وتاكل وفوزي الي كضروب على العسل...الي لاحض فيه عصام هاد القضية تاني وديما منبهو عليها تا ضار رافع حاجبو" : تهدن اصحبي !!

فوزي"ندغة دار فيها جوج معالق العسل..شاف فيه وندغة ففمو ههه " : هننن ؟!

عصام : لبدها اصحبي العسل بزايد ؟ الحناش ينبتو ليك تم..

فرح"حبست ضحكة واتاي وسط فمها" : كخخم..

فوزي"خرج عينيه بصدمة" : فين شتي الحناش ؟!

عصام"ضحك بجنب مستهزء" : بقا غانشوفهم بقا غانشوفهم...بلا حناش من سعد السكار يطلع لمك ؟ شور على راسك ..ماضرنيش العسل لا تقادا نجيب ليك ستين قرعة وليني صحتك شور شور...قرعة فندغة ؟

فوزي : غااا بغيتي تهضر عليا وصافي...عزيز عليا العسل خليني ...

عصام"حرك راسو يمين وشمال بلا حول " : بففف

فرح : ههههههههههههههههههه"كان غايشير عليها بزيتونة" اععع عصام بغا يضربني شوف...

فوزي"هز ايديه" : تا را الباطل عندها يحرق اصحبي ..

ماحبست فرح من الضحك تا كان غاينوض يعطيها قتلة فوق طابلة...وليني راه الندغة الى ما رغدنها على قولته اي الى ما عمرات كلها عسل وبشياطة مكيقنعش فالصباح وفالكوتي وفينما تاحت ليه الفرصة ..وما قاليه عصام الحناش الا بصح عارفو كيجيوه لانه كان كيشكي منهم فايام كان باقي صغير شوي...حتى كيجهلوه غير فاطنة الي دارت ليه الدوا ديال العرب عاد تنفس...هههه

عصام"شرب اخر جغمة من كاس اتاي وهو يتكا عالمخدة ونطق..." : لمخنتر بوكم جاي صباح...

فرح وفوزي"حبسو الماكلة وتقلب مودهم"

فرح : علاش ؟

ماعرفو باش تبلاو فاش سمعوه قال بالي باهم غايجي الغذ ليه...يمكن تصدمو من عصام بنفسو كيقول باه غايجي عادي الي هو بنفسو مابقاش بغا باه يجي عندهم لكن باش يقولها جاتو غريبة واخا باهم...والاهم هو علاش غايجي...واخا جاي ولا غايشوفوه فكلا الاحوال....

فوزي : ياك لباس ؟

فرح : علاش ؟

عصام"تگعد مفرق رجليه" : عارفين بالي غانخطب غذا ؟!

فرح : اه عارفين...

فوزي : ضروري مايحضر ؟!

عصام : ماعندي مندير كيبقا بويا حضورو واجب واخا غايبان ميهضر ميدير والو ماجاتش نمشي نخطب وبويا فالحياة وميجيش ؟ عيب فحقي هو اللول وفحق بنت الناس الي ناوي تكون مرتي...هضرت مع با (جدهم المحجوب) صباح تاهو جاي وهو الي علمني ب المخنتر لازم يحضر ..ماعليش عضو فالصبر تادوز هاد الخطبة بيخير ويدير الله تاويل ..لا جات عليا كون بقا غابر ولا وضر علينا راسو منعرفو ليه تالي من المتلي(زعما ميعرفوش ليه طريق)...

فوزي : صراحة عندك الحق...اودي صبر ...

فرح : فكرتيني خاصك تجيب كراطن السكار صباح ..

عصام : غذا غاندي طوموبيلة صطوف نهز فيها كلشي..."سكت شحاال وهو ينطق" صفاء ماجاياش ؟!

فرح"خرجات عينيها بشوي شافت ف فوزي وشافت فيه " : هاا ؟ لا لاش ؟!

عصام : خطبتي هادي ويمكن يكون العقد قريب ضروري ندير شي حاجة وهي متحضرش !! را فحالك فحالها ...فين مشات هي..

فوزي : احم كحكح احم...مشات لرباط كتوجد لماستر معندهاش كيفاش دير هادي فرصتها عصام...

عصام"رفع حاجبو" : ممم الله يوفق اسيدي..."شاف ففرح" نتي ماعليكش من جيهة الماستر ؟!

فرح"حركات راسها بالايجاب" : عليا عليا...لكن حتى لعام جاي بغيت تانشد فهاد الخدمة عاد نشوفو ميمكنش مبرزطة مع سطاج الي مهم خاصني نبين فيه كفاءة ديالي راك عارف من اخر مشكيل مابغيتش نتبرزط...

كملو حديثهم شوية ومن بعد ناضت دات الماعن غسلتهم زقبل ميوصل وقت العشا خرجات لعند فاطنة تاكدات من شنو غايخصهم لغذ ليه فين غايمشيو عند عائلة لمياء باش يهضرو فيها ويتعرفوو على عائلتها...طبعا السكر والحنة والشكلاط الي وصاو عليه محل من تما بالكوموند ...رجعات لدار طيبات العشا تعشاو كيف العادة وجلسو شوية حتى وصل وقت النعاس وكل قصد بلاصتو ...حتى صبح الصباح ويوم جديد...حلات عينيها على صوت تقرقيب كتسمع فباب بيت باها الي ماوصلو حد من الي مشا عرفاتو بالي جا...

فرح"حطات دراعها على عينيها" : فففففففف هاهو جا ثاني ...

عصام"دق عليها الباب" : فرااااح..

فرح"هزات عينيها" : اه هاني نايضة...

عصام : يلاه خلاص..

فرح : علاه غانمشيو دابا ؟!

عصام : ناس دايرين بحساب الغذا..يلاه توجدي اش غايخص طلقي راسك من تسوال...

فرح : واخا"ناضت على وعدها فلداخل ديالها محاملش هاد الخطبة واخا تحاول تفرح راسها على قبل خوها لكن عيات وهي تقول وتكذب فراسها لانه لا هي مرتاحة ولا قلبها غايرتاح وصاحبتها مكسورة الخاطر والقلب وبسباب كسرة الخاطر والحب خوات المدينة والولاية كلها...مالقات وماعندها مادير سوى تسلم الامر لله وتفرح لخوها او باها الي عطا عينيه وعمرو كلو على قبلها...خرجات من البيت نيشان لدوش دوشات بالخف وخا البرررد لبسات تما وخرجات تا لقات بوها قدامها " : با...

المخنتر"بدون ميشوف فيها..حرك راسو وغوباشتو معقودة" : اممم بحرا فايقة تي ؟

فرح"قبطات ايدو باستها ليه" : لا كنت كندوش...

المخنتر : وتحركي خلاص ديري الفطور ضهر هذا ضهر ليا ..شلا عليا من فشوش"قالها ليها ودخل البيت خلاها كتشوف...مالقات ماتقول دخلات لكوزينة باش توجد الفطور لقات عصام طيب اتاي وكيحط فيه "

فرح : غير سير انا نحط ...

عصام : لا غا سيري وجدي اش باغا توجدي نحط ونابي عليك(نعيط ليك) سلمتي عليه ؟"كيشوف فيها ماهياش"

فرح : سلمت عليه "عوجات فمها"

عصام"هز حاجبو" : قاليك شي حاجة ماهياش ؟؟؟

فرح : لا لا هههههه قاليك لاش فايقة تال دابا عهههه ..

عصام : تت "نفخ بقلة صبر"

مزال كيهضرو حتى تدق الباب مشا فوزي حلو لثاه جدو سلم عليه وهي غا سمعات صوته وهي تنقز بالفرحة مشات كتجرييي كانت على شوي طيح كون ما فوزي شدها كان تاهو غايجي مصلي عالنبي وهاز رجليه...

فوزي : امصلي عليك ارسول الله...

المحجوب : الحااافض الله...

فرح : ايييي ههههه"تلاحت عليه عنقاتو" بااااااااااااااا..."وهنا نرى الفرق بين سلام الاب وسلام الجد واحد سلام الواجب والثاني سلام الحب والحنان"

المحجوب : اخهخهههه اتي تبتي يا هاد البنت...

فوزي : واش نتي شوية لباس ؟! تي تهدني شوية الخفة را مكتجيش عليك ونتي بهاد المقادير ديال كيكة ستة البيضات ....

كيف الاستعدادات خدامة على قدم وساق فدار الخيالي (عصام فرح فوزي) حتى الاستعدادات خدامة على قدم وساق فدار البغدادي ...ولما لا والمشروع اليوم غايكون الافتتاح ديالو والي الحفلة الكبيرة مقامة فيه بالضبط...يومين هادي وهو مكينعسش غير ساعة لان المشروع بهاد الحجم كيخص يوقف عليه خصوصا مزال ماتلونصاتش سميتو لانه مزال متلاحش فاعلانات التلفاز والسوشل ميديا وغير معروف ديالمن الي عارفين هو مشروع غايتعلن عليه فيوم الافتتاح فقط الاسم وشنو هو هاد المشروع اصر يكون توجاد ديالو فالسر غير المقربيييين الاقرب الي عارفين ...

مع السبعة الصباح دخل لفيلا بسيارة حتى توقف غير فالساحة تما وخرج كان جاي من واحد من الحمامات الي تما فعين الدياب...جبد صاك من حداه سد الباب وتم داخل لاوي على عنقو الفوطة لابس قبية بيضة بالقب وسروالها ديال قطن ...وصاك فكتفو شاف فساعتو لقاها سبعة وربع...مع دخل لقا الحاجة توبا واقفة كتسناه فاش سمعات صوت سيارة توقفات...باس راسها وصبح عليها...

توبا : بالصحة وراحة الحمام اولدي...

زين الدين : عطاك الله الصحة ميمتي ..."دخل جاب قرعة الما من ثلاجة جلس غير تما تا شربها وحطها حداه...هز فيها عينيه" لا وجدتي راسك مع جوج علمي مراد يجي يديك...انا شوي وخارج مكاينش الوقت عندي باش نديك معايا ماعليش ؟

توبا : ماعليش مراد يقضي الغراض...

زين الدين : بنتك ؟!

توبا : غاتجي ضروري...

زين الدين"حرك راسو وناض كيسوس فحوايجو" : شي قهوة كحلة مع الفطور بلا ميطلعوهم تا وكان نزل...

حركات ليه راسها وطلع هو مباشرة لبيتو حط صاك فالدوش ومشا جبد الكومپلي ديالو. فالبلاستيكة وصباطو حط كلشي فواحد الصاك سدو وهز لوازم الي غايحتاج كاملة...عاد خرج نزلهم لتحت لقا توبا وجدات الفطور فالصالون...عيط لبنت الي تما عطاها كونطاكت طوموبيل تدي ليه داكشي ومشا لصالون قبل ميفطر بنص ساعة كان شرب دواه عاد نزل فطر...كمل واستاذن منها كياكد باش ميتعطلوش...ديمارا طوموبيل والوجهة نيشان لطريق مدينة الجديدة وعلى بعد عشرة كلمتر منها كاين المشروع ديالو الي جا الوسط بين كازا وجديدة...هز عينيه بانو ليه دراري كيوجدو ف البلاكة الي صاوبوها بطريقة احترافية قد السخط فيها اسم المشروع...كلاكسونا حل ليه العساس سلم عليه ودخل لقا علي واقف مع دراري وليد و مراد وحتى صلاح تاهو واقف ....

علي"شافو وقف طوموبيل ونزل" : ها الشاف جا...

وليد"شاف ف سعد" : سير قضي اش قلنا ليك وحضر عقلك...

صلاح : اش قلتي ليا ؟!

وليد"طرش وجهو" : وراني انا الي مكتووووووبش مكنتوووبش...

مراد : سير اخويا بدل ساعة باخرى ونتا تكوليختك كتجيبها غا عليا انا ووليد وماااااكنتوبوش رغم ذلك...

زين الدين"وقف عليهم" : فين وصلو هادو ؟!

مراد : كملو كلشي تقريبا

زين الدين"ضار كيشوف بعينيه جيهة الكراسا منضمين والطوابل على شكل طول يعني غايكونو ناس شي واقف شي جالس كل يختار فين غايرتاح...بحضور الشخصيات وقطاع الصحة ولابد ..شاف جيهة واحد داتاشو دايرينو قد سخط كبيييييييير شاد واحد المساحة الي يشوفو كلشي..." : مزيان..."جبد باكية الكارو وشاف ف صلاح" الوراق الي عطيتك واجدين نتا ؟!

صلاح"اتا جبد واحد الملف معرفوه فين كان مخبيه "

وليد : نري هذا فين كان خاشيه ؟!!

مراد"دار ايدو على فمو وقرب ليه ناقص صوته" : ا مابان ليا عندو تا بلاصة من غير خرزتو هي الي يمكن كان خاشيه فيها...

صلاح : هاهو كلشي ناضي ...

زين الدين : طلعو فين علمتك عطيه ليهم...

مشاو دراري كل توزع لمهامو باش يتاكدو من كل حاجة وعلي بقا هو وزين الدين واقفين كيشوفو فالاشغال ديال الافتتاح خدامة...

علي : اشمن موضفين بغيتي نتا من كلينيك نوري ؟؛

زين الدين : محتاج ناس بروفيسيونيل ف quelques spécialités "شافو بغا يبدا يهضر" الحاج متحكرش "غمزو" ذوق هضرتي وعيش معايا ...

علي : غاتقتلني لا عشت معاك وذقت هضرتك غاناكل السم..."شاف فيه بجدية " زين الدين ولدي بلا كثرة الهضرة...هادشي الي كيوقع ليك فات الحد ووصل الحد المعلوم...

زين الدين : كيفاش ؟

علي"ضحك" : ههههه بزاف على باش دخل لعقلك اولدي بزاااااف"شاف فيه زين الدين" بلا متشوف فيا...الضمير فاش كيعذبنا فجوج الحاجات اذا ضلمنا ولا اذا ضلمنا شي حد كيهمنا...ضميرك فات العذاب لهيه...وتفكيرك فنفس الحاجة بكثرة... ماكيدلش على دخوله لعقلك ...مكيدخل لعقلنا غير الي قاسنا فقلبنا...التفكير زايد والانفعال زايد على نفس الحاجة كيوصل لحاجة وهاد الحاجة اولديهي الي مجهلاك وجهلة الي فيك واااعرة الله يحضر فيها السلامة....

زين الدين"كمش حجبانو" : ياك اشريف ...

علي : اش غانقوليك الله يستر..."حط ايدو على كتفو" بصحة الحمام الحاج البغدادي...

زين الدين"حط ايدو على صدرو " : الله يعطييك صحة..فحياتك الحاج الزياني...

.وقف وقاد حالتوو كان بكامل اناقتو فيستة كحلة وقميجة تحت منها بيضة وسروال كحل... خرجات فاطنة ونجية لابسين جلالبهم ووراهم فرح تاهي بجلابة طالقة شعرها وجامعة خصلاتو لور ريحتها تعطعط بالحق كاملين حيث رشاتوليهم من ريحتها وصاكها فايدها بكامل اناقتها تاهي...خرج فوزي تاهو ضارب ليا الحطة نعماس كلاس تاهو وتبعو المحجوب بسلهامو ووراه المخنتر...

سيمو"تا نغز فرح" : غاديا الخائنة ؟!

فرح"شافت فيه" : هييييي جيييتي ههه غاسكت منقدرش نقول لا معجبنيش الحال وليني اش غاندير ؟!

سيمو : صراحة صعيبة ...بيني وبينك خوك وصل وقت يدير دارو ووليداتو را هذا جهد موطورو غايتحرق وهو مزال مدار الولاد...

فرح"ضرباتو لكتفو" : وليني راك باسل مكتحشمش ههههه

عصام"صفق بايدو" : يلاه نتي تحركي"شاف فسيمو" كي كرا وجرا تا فايق نتا ؟!؛

سيمو"هز ايدو وحطها على صدرو" : جيت نبارك لخويا عصام مبارك ومسعود والله تا فرحت ليك"خرجات فيه فرح عينيها حيث عاد كان يقول عليها خائنة هههه"

عصام : يحفضاااك...يلاه تحركو...

دخلات فاطنة ونجية وحداها فرح دكو تما عاد جا فوزي والمخنتر ساعاك طوموبيل متهزش شاف فوزي تا عيا وهو يخرج هز موطورو ...

فوزي : المخنتر تركب ورايا ؟!

المخنتر : بابت اش ؟ مالي منركب انا حدا ولدي وبات موك يركب معاك...

عصام : المخنتر لبدها معانا وسميه صابر...

المحجوب"غوبش فيه وجهد صوته" : وعلاش جاتك ؟

فرح : انا نركب وراك"قاطعها عصام مجهد صوته" مكاين بو تركبي وراه لابسة جلابة تمشي تلوى ليك على سنسلة لموطور فين بغينا نوصلو "خنزر فيها" دخلي تركني لداخل...

المحجوب"جر المخنتر" : دوز ركب حداه وانا نمشي فطوموبيلتي مع فوزي...

فوزي : ايييه نسينا طوموبيلتك...مد ليا كونطاكت انا نسوگ"لاح ليه ساروت ودخل المحجوب ركب حدا فوزي"

عصام"خنزر فبوه" : يلاه دخل سربيني ...

فاطنة"من لداخل" : غا دري صغير وگلعو ليه سكاتة لعفووو...

فرح : ضروووري ينكدها عليك ضروووري...

ركب عصام قاد سانتيغ وقادها لبوه الي مزاحم عالوقت وميعرف يديرها ديمارا وكسيرا تبعو فوزي غادي ناشط مع جدو طلق ليه الشعبي ولد الحوات ومشاو عليها ضحك ونشاط خلاو فرح بغات تبكي مكرهتش تركب معاهم غا عصام حمر فيها بغاها تكون معاه...مسافة طريق وهما كيقليو ليها فالسم حتى وصلو لحي فين كاينة دار لمياء...ووقفو نزلو كاملين لقاو الباب مفتوح تا خرج باها رجل كبييير بلحية بيضاء وامها دايرة الخمار وجهها بشووووش والابتسامة على وجهها تخليك تفرحي بالاستقبال...سلمو عليهم ورحبو بيهم بالتمر والحليب ..

ام لمياء : مرحبااا بيكم اولاد الخير مرحبااا بيكم ...

نجية : ترحب بيك الجنة الحاجة...

فوزي"قرب لفرح" : ياااا جد امك هاديك ختها تيتيزة اصحبي ..باين ليا غانتناسب تانا معاهم...

فرح : مغاتزوجش نتا غاتبقى باير فحالي ...

فوزي : سيري فحالك اويلي...

فرح"كمشات حجبانها بغات تفقص" : ولاااااا واش غاتزوجو وتخليوني ؟؛ مغاتزوجش ولا حفاتها ليك تزوج ...

فوزي : واش معيطة لاص ؟ اويلي منديرش ولاداااااي !!سيري بسعي مني هبلتي نتي...

فرح : وجرب جرب...

فوزي"بعد وجهو مكمش كلو مصدوم منها" : و و ت و الله يستر الله يستر...

اب لمياء : مرحبا اسي المخنتر ...

المخنتر : بارك الله فيك الحاج بوشعيب...

بوشعيب : كاين شي صردي هاد ليام ؟!

بوشعيب : واش نگوليك صردي موجود ولا خطاك عند سراغنة ناااضي...

بوشعيب : هههه وخلاص هاديك بلاصتو...

المحجوب : سول مول الحرفة هاهو"خبط ورا كتف عصام بجهد" لا تسول المتطفل عليها اش يعرف السي المخنتر براكة عليه غا الحصاد والفدادن والورث بغاو يديو ليه عمرو هههههه"طرطقو كاملين بالضحك اما فوزي وفرح تخشاو ف بعضياتهم مسكتووووش وخصوصا كيشوفو فالمخنتر بغا ياكل المحجوب"

نجية"شافت ف ام لمياء " : فين هي عروستنا نشوفوها ؟!

ام لمياء : اجيو نجلسو فالصالون لاخور نخليو رجال بيناتهم...

نجية : ايييه "ناضو كاملين العيالات وبقاو رجال بيناتهم...جلسو فالصالون الي حداهم واحد شوي وهي تخرج ام لمياء عيطات ليها وهي تخرج تبعتها فهاد اللحضة كانت دايزة وهي تمشي عينيها نيسان لعصام الي كان جالس بديك التگضيرة والحروشية الي فيه تهبل هز عينيه فعينيها وهو يغمزها بالخف خلا حناكها بغاو يطرطقو...دخلات عندهم حادرة راسها رامية شال على شعرها الحريري الي كانت طالقاه هابط تالمؤخرتها...سلمات عليهم بخجل بغات تموت بالحسمة..جلسات بين فرح ونجية...

فاطنة : وتبااااارك الله عليك ابنيتي...من زويناتك ياربي...

لمياء : ربي يخليك اخالتي...

فرح : ماشاء الله...

ام لمياء"شافت ففرح" : نتي اخت عصام صغيرة ؟!

فرح"بابتسامة" : هي انا هههه

نجية : وقولي بنتو را مربيها ملي كانت لحيمة هههه معمرنا قلنا عليها ختو ..

ام لمياء : سبحان الله زوينة تبارك الله "بقات كتشوف فيها"

لمياء"ماحساتش براسها تا نطقات كتشوف ف امها بغير قصد" : ياك شتفيها اماما هههه كاع مكتشبه ليهم ...فشكل هههه"قالت هاد الهضرة كتضحك خلات نجية وفاطنة وفرح جمعو الضحكة"

.بدون شعور منها وبغير قصد قالت هاد الجملة وضحكات...لكن معرفاتش بالي هاد الجملة شوية حساسة عند فرح وخوتها وحتى نجية وفاطنة كان رد الفعل ديالهم نفس ديال فرح...

ام لمياء : وايه غزالة تبارك الله يحفضها الرحمن...

فرح"تبسمات بحرج من بعد ما شافت ف نجية الي غمزتها وطمنتها بعينيها باش تميك ومتخسرش المجمع" : ااههههه ربي يخليك...وي مكنشبهش ليهم حيث صهيبة شوي...

لمياء : ماشي شوي بزاف زوينة تبارك الله وكدخلي لخاااطر ..

فرح : ربي يخليك احبيبتي ..

فاطنة : تانتي بنيتي زوينة تبارك الله ...كتقراي ياك على ما گاليا عصام...

لمياء : اه مزال كنقرا ف شعيب الدكالي...

نجية : فحال فرح ؟ ...

لمياء"شافت ففرح" : لا على ماعارفة فرح بيولوجيست ياك ؟

فرح"حركات راسها بالايجاب" : اه.."شافت ف نجية" لمياء امي كتقرا الاقتصاد فحال سيمو خويا ...

نجية : اييييه ..وهي ضهر ليا تبارك الله ماتقارن ليا بداك الكيدار ديال خوك علاه هو بغا يكمل شمكار الي ولدو ؟

ام لمياء : عندك خوك من غير عصام وفوزي ؟

فرح : اه سيمو خويا برضاعة...

ام لمياء"مقدراتش تسولها على امهم عارفة بالي خلاتهم صغار لكن تفاصيل لا هي لا لمياء عارفينهم" : وااه الله يخليكم لبعضياتكم...

فحالة لمياء وكيف كنعرفو فالخطبة لازم تتحلى بالحشمة والهضرة بالقياس والتاويل من نهار وعينا وجدودنا كينبهونا باش نكونو ثقال ومتبتات فاش كيجي شي حد يخطب حتى ولو غايكون الرفض من بعد المهم مايديوش عليك انطباع سيء...ويقولو خفيفة والخفيفة كتكون ثقيلة عالقلب...ومتكونيش خف من رزقك ...كوني متولة والهضرة بالقياس باش ياخذو عليك انطباع مزيان حتى ف سعدك يكون زين ...

من بعد ما تقدم العصير والحلوة ك ضيافة اولية وصل وقت الغذا الي كان دجاج محمر وتابعو اللحم بالبرقوق ومن وراه الديسير...

نجية : الله يعطيكم الصحة كلشي زين تبارك الله...

ام لمياء : بصحتكم وراحتكم الحاجة هادشي وقليل فحقكم ...

فاطنة : لوااه الخير والبركة وطياب زيين هذا...

فرح"تبسمات وهي دور جيهة لمياء" : غايكون طيابك واقيلة ياك ؟

لمياء"حركات راسها بالايجاب"

نجية : وتبارك الله هنية على عصام دا الحداگة هههه

لمياء"بصوت خفيف" : ربي يخليك اخالتي منبانش قدامكم...

عند الرجال من بعد ما تسالى الغذا بداو يقدمو الشاي مع الحلوة ك تحلية بلدية...وجا وقت التفاهم فامر الخطبة بين الطرفين وشنو غايكون...وكان بداية الكلام لعند المحجوب الي استانف الهضرة ...

المحجوب : الوليدات لاكانو مفاهمين الحاج متسالونا غا مبارك ومسعود ...هاهو عصام حدايا وها بوه تاهو...انا راني جدو وليني بحضور باه منصيبشاي...

المخنتر"صدمهم بصواب ههه" : لوااه يا الحاج نتا مول الخير والبراكة ..

فوزي"بينو وبين نفسو" : ي هودي مات فالملاح...

بوشعيب"اب لمياء" : واش نقوليكم الي جا من الباب قاصد الحلال منردو والبنت الى موافقة متسالني غالله يكمل بخير ...غا هو رجايا فيك ا سي عصام لا تجلسها شاي من القراية را هي فرحتي لولة عمرها خيبتني..ومرادي ولادي يقراو ليا وخا يديرو ديورهم والي طلب العلم ربي يجازيه...

عصام"غمض عينيه وحلهم كيطمنو" : بنتك فالهنا الحاج كي بغيت ختي تقرا ونشوفها فاعلى المراتب تا هي نفس شي الي نبغيه لختي نبغيه لبنات الناس...

بوشعيب : الله يسهل عليك...

المحجوب : واش قلتي اولدي اش ناوين ؟!

عصام"حك لجيتو للحضة كيتفكر شنو تفاهم مع لمياء" : على حساب مامفاهم معاها هو الخطبة الكبيرة شي خمسطاعش ليوم(15 يوم) بشي شهر هكاك نديرو العقد وكان تسالي القراية فالصيف نتيسرو فالعرس وتجي عندي...وصداقها ديك الساعة والي يخصها"ضرب على صدرو " مايخصها تا خير وبدوبل...والي شرتي عليه اسي الحاج انا قابل غا رضى علينا ..

بوشعيب : ماقلتي عيب ومدام تفاعمتو منوقفش فطريقكم الله يكمل بالخير"شاف فالمخنتر" اش بان ليك اسي الخيالي...

المخنتر" : هههه واش بان ليك بان ليا الله يكمل بخير الحاج ميتسالونا غا نحضرو لزردة ههه(ميقولش نكمل ليه من عندي لا خصاتو شي حاجة ابدا) ....

عصام"ضحك بجنب محرك راسو لهيه بلا حول ولا قوة ورجع شاف فيه " : جاتك اسي المخنتر سميه غا صابر...

بوشعيب : وتانا ماعطيتها لسي عصام تا سولت وعرفت المعدن ديالو..رجلة ماشي ساهل تكسب الى محكك زمان و ولدي عصام ولد الوقت وولد الناس ودراع ماضي...سوق لالة زهرة يشهد بيه ويشكرو فيه(حيث قبل ميجي عصام كان قاليه عطينا وقت ومشا حتى سول عليه حيث ميمكنش يعطي بنتو من سلام عليكم ولابد تسولو وتعرفو معدن الواحد وخا المعدن كيبان مع زمان وعند شدائد)...هاني على بنتي معاه..

عصام : الله يكبر بيك الحاج ..

بوشعيب : غا هو رجايا فيك صبر ليها شوية عندي هشيشة بلا منقوليك راك عارف الكبدة صعيبة...

عصام"حرك راسو زعما عااارف " : عالم الحاج عالم راني مربي بنت وخا ختي ربيتها بنتي وكبدتها عندي صعيية...بلا منعاود ليك الي نبغيه لختي نبغيه لبنات الناس...غا هو لا جات على خاطرك تعلمها نهضرو بيناتنا باش نرسيو الامور كما يجب ؟

المحجوب : اييه ولابد من الرؤية الشرعية الحاج لا وافقتي...

بوشعيب"بكل ترحيب منو حيث وخا ملتزم ماشي من النوع المتزمت ومضاغطش على ولادو " : اييه مرحبا عاين اولدي نعلمها تستر راسها وتهضر معاك...

ناض مستاذن منهم ببشاشة فالوجه وصل لعند الطوالة الي فيها البيت فين جالسين العيالات حيث تفرقو باش ياخذو العيالات راحتهم ويشوفو العروسة ويكون لقاء معاها الاول...وصل لعند الباب من بعيد شوي ما دخلش وهو يحنحن معيط لمراتو ام لمياء...

بوشعيب : الحاجة هنية ...

هنية"ام لمياء." : الحاج ؟

بوشعيب : علمي لمياء تستر راسها وتجي معاك باش تهضر مع عصام...

هنية : اييه واخا الحاج..."ضارت لعندها" لمياء نوضي بنيتي تهضري مع عصام ...

لمياء"وقفات كترعد" : فين ؟

هنية : سيرو لبيت ديال تلفازة ...

هزات واحد الشال الي كانت رامياه على شعرها رجعاتو ليه..صايبت صديفات ديال القميص جوهرة النيود الي كان مخدوم براندة بالعقيق وعريض شوي عليها. واخا هكاك مبين فورمتها الزوينة صايبات شال وحدرات راسها تبعات ماماها حتى وصلو لبيت التلفازة وهي تحل ليها الباب ودخلات لقاتو جالس داير ايدو على ذقنو كيلعب فيه بتوثر وتفكير حتى شم ريحتها وحس بيها وقفات هز راسو فيها وتبسم ابتسامة خفييييييفة...

عصام : مرحبااا...

لمياء"حناكها بغاو يطرطقو" : ربي يخليك..احم"جلسات مقابل ليه وعينيها فلارض...

عصام"داير صبعو بين سنانو كيحك فيه وعينيه عليها بديك القميص الي جاها كيحمق وشال المغطي شعرها الحريري وريحتها الي كتسلب..." : شنو غاتبقاي بعينيك فلارض ؟

لمياء : هههه وشنو بغيتيني ندير ؟

عصام : واخا لالة ماديري والو...تا لمن بعد ونعلمك شنو ديري..ما كاين تا مشكيل الي تسنيناه عام شهور قليلة كي والو..

لمياء : كيفاش شهور قليلة ؟

عصام : شهور قليلة وتجي عندي شنو كيحساب ليك نتسنا عام خور ؟ لمياء ياك تفاهمنا على هادشي ؟

لمياء"حركات راسها" : وااه تفاهمنا...مي راك عارف عندي البحث فشهر ستة مبغيتش نتبرزط..

عصام : مكاين الي يبرزط كملي برااحتك ...

لمياء"تبسمات ليه بحب"

عصام"حنحن مبدل ملامحو لجدية" : لمياء ياك عارفة هضرنا فين غاتسكني بالضبط ياك ؟

لمياء : عاقلة وعارفة ..

عصام : هضرت مع باك وعلمتو بالي من هنا خمسطاعش ليوم الخطبة الكبيرة وضريب الصداق العقد من هنا لشهر ...بغيت نعرف شحاال بغيتي فصداقك وشنو شروطك من لول تالاخر...وصبري معايا غير بينما درت محالي الي قريب ندور الحركة ونجمع البركة ونصلح دويرة الفوق مزياان يسكنو فيها خوتي ونهبطو لتحت...وديري فبالك را معانا الوليد...

لمياء"حركات راسها" : عارفة...وشروطي ماشي شي حاجة بغيت غير تهلى فيا وتبغيني ومتهملنيش وتحسبني بنتك قبل منكون مرتك...والصداق هضر فيه مع بابا انا منقدرش نقوليك فحضورو...وبالنسبة لشرط لاخور هو الى بغيت نخدم تخليني...

عصام"بتردد" : كملي قرايتك الي باغا توصلي ليها وبلان الخدمة نهضرو فيه من بعد...مابغيتش مشاكيل فالدار...الى تقلقتي من شي حاجة قوليها ليا اما لا جات عليا عاطيك العاهد تاحد فيهم مينقص منك ولا يقلقك حاسبينك ختهم قبل متكوني مرات خوهم ..مابغيتش نشكرهم ليك حيث خوتي وليني عارف راسي اش مربي واش مخرج من تحت ايدي وعلى عيني...

لمياء : وحتى انا مغاديش يلقاو معايا مشاكيل ان شاء الله ...وها...

عصام"هي كتهضر تا وقف وغفلها باسها وسط جبهتها بحب تا غمض عينيه ورجع شاف فيها لقاها مخرجة عينيها وحناكها بغاو يطرطقو" : موقع باس كملي...

لمياء : اويلي اش درتي دابا يشوفني بابا ...

عصام : عارف اش كاين ابنت الحاج حاسب حسابي"غمزها"

لمياء : حرام عليك خليني غير نكمل هضرتي...

عصام ؛ كملي يالالة..

لمياء"دارت ايديها على حناكها" : اوفففف "حشمت"

عصام"بقا داير ايدو على فمو حاضي تفاصيلها وحشمتها.." : يضهر ليا لاقي معاك مشاكييييييل ابنت بوشعيب من بعد !!

لمياء"هزات فيه عينيها" : شمن مشاكيل ؟

عصام : وشلاااا...بوسة فراس بغات تصفي ليك العمر ..."غمزها" شلا على حشمة...

لمياء"ضحكت" : عصااام ههههه صافي ..

عصام : هاهو مصفي..."اكد عليها ثاني" ماكدة هادو شروطك ؟! ابنت الناس مابغيت نضلمك والى على التهلية راكي تحت جناحي غاتولي مسؤولة مني وام ولادي لا كتب الله نتهلا فيك ونفوتك لهيه مني وفيا وشريكتي ونصي الثاني ...علاش غانتعدى عليك...لا درتي علاش را سهمك من سهم فرح وفوزي باش نكونو واضحين ابنت الناس"شاف فيها بجدية صارمة" عدو خليقتي التبيديق والكذوب وتبهليل...

لمياء : عااارفة "حنحنات شوي "احم عصام واخا نسولك ؟!

عصام : الي بغيتي سوليه ميحتاجش تشاوري...

لمياء : ب على احم غير سؤال والله...ف فين هي "شافتو رفع حاجبو بتخنزيرة بغات تسولو على مو وحيث فايت قايل ليها معارفش ومتبقاش تسول سكتات ولكن بقات فيها حرقة الفضول تعرف ملي شافتو خنزر بدلت سؤال" احم غير بنت جيرانكم الي قلتي ليا بحال فرح معقلتش سميتها...

عصام : صفاء ؟ مشات تكمل ماستر فالرباط الله يسهل عليها...

دازت الخطبة بسلااام عاطيهم موعد باش يجيو بعد ايام يتغذاو عندهم ويشوفو الدار فين غاتسكن لمياء بينما يصلحها يديرو العقد والي غايبدا في اصلاح البيت الفوق ودوش حتى تيسر امورو ويكمل الدويرة كلها بالبيوت ...تسالمو معاهم ومشاو عائلة عصام رجعو فحالهم متمنيين ليه الكمال بالخير واليسر...

لاح عليه القميجة الي كانت فاللون الاسود القااتم من بعد ما لبس بيل سماطي داخلي فالابيض قطن..عقد الصدافي كاملين حتى لفوق وعقد ديال الكمايم خشا القميجة فسروال رمادي غامق وعقد سنسلتو وصدفتو هز سمطة من تما دورها على سروال وعقدها...هز واحد الباكية طويييلة حلها وجبد منها الكرافاط رمادية فلون السروال ضورها على عنقو وربطها ..طوا عنق القميجة عليها وفكها شوية ضار لهيه هز فيستة الي فلون السروال والكرافاط لبسها مد ايدو هز واحد البواط ديال باه فيها صداقف القميجة مكتوب فيهم حروف "BG" بطريقة زخرفية ركبهم فالكمايم ...تقابل مع المري وبنضرات صارمة بدوك العينين الخضرين الي فيهم واحد الميزة غير شكون وشكون كيقدر يميزها حيث بكل بساطة مكيطولش الشوفة فالواحد واغلب هضرتو كيشوف لتحت خصوصا مع العيالات الا اذا صعر كيخرجهم يضربو فيك لهيه... فوق منهم غوباشة الحجبان مشط شعرو ورش الجيل حتى تفيكسا...هز بارفانو رشو من بعييد عليه وقاد لحيتو مزيان عاد مشا جلس لبس تقاشر كحلين وصباطو الي جاي ملمع مزيان وقف وقاد الكمايم وتاكد انه مخاصو تاحاجة حتى صونا تيليفونو وتطلق الابيل مباشرة كاين داير الايربودز....

علي : فينك اولدي ؟

زين الدين : المكتب عندي...

علي : انا جاي ..."قطع عليه وماهي الا خمس دقائق ديال سانسور حتى كان وصل لجناح الي فيه غير مكتب ديالو ومكتب علي كلهم كبار وبالقاعات ديال اجتماعات ديالهم وفين يرتاحو الى اضطرو يباتو...دق الباب وحلو دخل لقاه محني كيقاد فشي وراق فوق المكتب " يلاه را بداو الناس يجيو ..

زين الدين"وقف هاز داك الملف وضار عندو لقاه بلباس بلدي جلابة سوسدي بيضة وتحت منها جبادور وبلغة صفرة" : ماعليش العريس جات عليه يتعطل..

علي"كمش عينيه" : شكون العريس ؟

زين الدين"دار تيليفون فوذنيه وطلعو وهبطو بمعنى نتا"

علي : اخههه الله يمسخك اولدي ..فحياتي نشوفوك نتا عريس..

زين الدين : بلااان..."جاوب فالتيليفون" العمة جات ؟ شوي ونكون تم.."خشا تيليفون فجيبو عنق علي بجنب وتيسرو لسانسور نزلو لتحت فواحد الساحة قد الخلا كبييييييييرة تما خلاها خاوية حتى يدوز الافتتاح ويرجعها باركينغ خاص...مع نزلو من لور لقاو السرباية كيمشيو ويجيو وتريتور واقف عليهم بنفسو صاحب شركة التنضيم مع احد اكبر لي شيف الي عندو جايب شي ستة باش يخدمو...سلم عليه هو وعلي ووقفو معاه تا شافو تقديم البلاطويات مملحات حلويات بييس مونطي...عصائر ...وحتى حلويات البلدية وعاد بيفي كبيييييييير فيه مؤكولات بحرية ومؤكولات مغربية بلدية كان اصرارو الكبير على اكل المغربي وخا جايين عندو ناس من دبي ومن بعض الدول حيث صحابو...اضطر يضيف الاكل البحري...وبعض المقبلات بخلاصة كان بيفي غني وحتى الضيوف مكانوش بالكم الهااائل كانو غير اصحابه والمقربين وصحاب الاختصاص والموضفين واصحاب بعض المصحات واحد حتى من الصحافة منعها تحضر للافتتاح لان الاعلان غايتلاح بالشروط الي حط هو...

سمع صوت عمتو كتعيط ليه كانت واقفة بجلابة موبرا گرونة مطروزة بالصم الذهبي دايرة فحال قفطان الحضور بلا قب..وكيف عادتها الاناقة متخطاهاش مع شال ذهبي مكتافية بكحل العينين يبرز لوننهم الاخضر...قرب لعندها باس راسها..."

توبا : تبارك الله هادشي غزاال كيحمق..

زين الدين"حرك راسو وسولها" : ضحى ؟!

توبا"جمعات ضحكة" : احم مريضة ولدي خليتها بسخانتها ومقدراتش تجي نيت على ود شنو وقع بيناتكم حشمات ..

زين الدين"مكثرش معاها الهضرة زوج كلمات وسد" : الله يشافي..."واحد شوي حتى جا مراد ووليد وريان بثلاثة بحلة كلاس غير هما لابسين مونطو عليهم حيث الكزز دسال البرد حتى توبا رمات كاب سخون على ضهرها..."

وليد : اوفف على سلامتنا درنا علاش نرجعو..

زين الدين : الميمة فين ؟

ريان"شاف فيه" : الوليدة راك عارف مزال عيانة شوي تا وكان ترتاح ودوز عندك لدار تبارك ليك...

زين الدين : عذرها مقبول الله يشافي ويطول فالعمر...

وليد"شير ليه فين واقفة مو وحداها خوه الصغير اما باه متوفي" : راا هي مع سليعفان..

زين الدين"حرك راسو يلاه بغا يهضر حتى سمع سميتو لقا علي واقف مع واحد من اكبر بروفيسورات طب القلب وشرايين فالمغرب..مشا وخلاهم واقفين وتوجه بكل ثبات وثقالة وهيبة حتى وصل لعندهم وسلم عليهم...عطاهم وقتهم وعاود مشا عند اخرين كل عطاه حقو ووقتو يلاه غايمشي يوقف بعيد يبقشش فالتيليفون حتى حس بخطوات واقفو قدامو ماهزش عينيه شم غير ريحة بارفان العود ديال عبد الصمد القرشي المجهدة...بانو ليه رجليه وهو يقلب الغوباشة وعض فسنانو .."

الغالي : مبروك اولدي...

زين الدين"عوج راسو لهيه ورجع هزو شاف فيه بنضرات القرطاس لو كان بصح يتقبوه قرب ليه مزياان حك نيفو " : ضوصيك توسخ عندي بزاااااااف الوهراني..."نطق بصوت خاااافت" بلاااااا منطول تخرج تقود عليا من هنا" هز ايدو ضرب ليه كتفو بشوي..وضار غمز لعساس شير ليه براسو تا قرب لعندو" وصلو عند الباب وفهمك كفاية...

غير رجعو لدار دخلات فرح وفوزي وعصام والمخنتر والمحجوب ...اما فاطنة ونجية كل مشات لدارها ..بدلات فرح حوايجها ولبسات ديال الدار كان المغرب علاين ياذن...حتى سمعات اسمها من البيت ديال المخنتر وهي توقف ...

فرح : نعاام ؟

المخنتر : سي صوبي ليا الما فالسطيلة لوضو ...

فرح"عوجات فمها" : وااخا"خشات رجليها فبانطوفة ومشات دارت ليه الما دافي وحطات ليه صندالة ديال الميكا...غير خرج المحجوب من دوش مشا لبيت هز سلهامو واستاذن منهم يمشي لجامع اما المخنتر عاد خرج كيگفض فكمايم تريكو دالخايط وسروال قندريسي عاقد ديك الغوباشة المصدية عندو ومسطاجو الي خلاها سيمو يعمر بيه مخاد صالون نجية وفاطنة وشوي من مخاد بيت فرح. كل زغبة عندو كي العمود...اما عصام دخل بدل عليه وخرج بقبية كحلة وسروالها وقف عليها هي وفوزي الي تاهو وقف بغا يتحرك يخرج عندو ميقضي...

عصام : اش خاصك لعشا ؟!

فرح : با بغا الروز بالحليب كلا مزيان فالغذا وصراحة تا انا..الى فيكم جوع بزاف ندير ليكم شي طاجين بيض ومطيشة ؟!

عصام : بحال هكاك..متنسايش ليا براد اتاي..انا خارج ممعطلش بزاف نقرب ونعلمك فالواتساب..

فرح : واخا..."خرج هو وفوزي وخا طريقهم مختلف هز فوزي موطورو وعصام تحرك غير على رجليه اييييييوى بقات هي والمخنتر الي مبغاش يخرج يصلي فضل يصلي غا فالدار...مزال هو فالدوش تا دق السيمو حلات ليه الباب.."ايااااي الخاوة شرف...

سيمو : فين حقي فالدجاج ؟؛

فرح : مالك ماجيتي معانا ؟؛

سيمو"تلاح هاز مخدة فوق رجليه موسدها" : قاليا عصام غاديين غير الكبار دراري صغار تالعرس.."حك شعرو كيتفوه " بوك فينهووووو هوهو وووو "هز عينيه لقاه واقف مگردف ليه ومخنزر فيه ههه طلبها موجودة معطلوش" ااخههههه اهههع امسا الخير ابا المخنتر لباس ؟ والي باس ؟ ...

المخنتر : نتا معندك شغل مگابل ليا غا الخباير اش دار اش فعل اش ترك ؟ معندك خدمة ولا ردمة ا بن سكايري لاخور الي گالها ليك ؟!

سيمو : تشا ريح المخنتر مالنا ؟!

المخنتر"طلع فيه الغوباشة وتخنزيرة وغادي مقرب ليه " : گرين بوك انا ؟!

فرح : ابا اش دار ليك ؟ خليه عليك سير تصلي اويلي ...

المخمتر"طار فيها تاهي" : الكلب بوك تانتي معاه اش قضيتو اش طفرتو ؟ شمكار ديال الخلا مقابل صرط مرط عليا هنا ونتي مقابلاه ليا المفلس على خوه ليا هنا ؟ وشوفي فيا تماك ..

سيمو"وقف لايح المخدة" : تا مالنا فهاد الهضرة نتفلس ولا نعاودها لعدو ربي مالي فهاد النم الكحل ؟ اش مشا ليك ونتا مالك فيا ؟! ناكل ولا نخرا هنا اش ليك ؟

المخنتر"قرب ليه عينو فعينو" : خرج گود عليا من هنا بالكيدار الي ولدك خرج...

سيمو : ماخارجش يلاه تا تكون ليك وخرجني ..هادي دار خوتي وهنا فين تربيت فين كنتي نتا وشكون عقل على عدو ربك فهاد النهار"مشات ليه فرح شداتو"

فرح"عارفاه الى مكماش كيجمع الخرا كامل ممكن المخنتر يجمعها معاه" : سيمو عافا خويا تهدن سير بدل ساعة باخرى واجي"غمزاتو" سير غانوجد ليك شنو بغيتي "خفضات صوتها" غايخرج من هنا ورجع غير باش مينوضش صداع"ضارت عند بوها" سير تصلي نتا مالنا فهاد صداع ؟

سيمو"بقا شحال كيشوف فيه " : مخليهاش ليك بالمصدي الي قالها ليك...وشوف ليك هاد حديد ربعة وستين...

فرح"جاها ضحك " : هههههههههههههههه

المخنتر : كتواجبني فداري اشمكار ؟!

سيمو : مممم شمكار كرهتي تشمكر اخنيتيرة ااا ؟ اجيش نعطيك واحد تسطيرة الى ماا تهزو رجليك بجوج وانا لله اودا حماد ...

المخنتر"بغا ياكل جنابو" : ياويلي يا ويلي ..وهانتي ليك على هاد سلگوط "هز واحد صندالة بغا يشير عليه بيها"

سيمو : اهيااا اطونسيون فييييت اطونسيون ا بب خنتورة تضربني بيها لا نتعصب ؟ واش ندير "ضار عند فرح "

فرح : ينوض ليك ابا را واعر سيمو حق الله فاش كيشربن را كيحط الفيستة

سيمو"غا قالتها وهو يوقف وحيد تيشرت تا بان صدرو عضيماتو محسوبين وكرشو لاصقة ورا ضهرو" : بالرب العالي والجليل تانعربط هنا اداك خنتور...

المخنتر"طلع فيهم وهبط" : شوفي هاد سلگوط هذا ...

سيمو : سيدك محمد رضى الملقب بسيمو روفيكس قاهر الفتيات..تبغيش ليك شي وحدة من المعرفة عندي ؟ نجوجها ليك ؟ اجي نسولك اخنتور واش عمرك فكرتي تجوج ولا مقصر مع شي شيخة حلبت منك صدا ؟"فرح حبست ضحكة وهي تهرب لكوزينة كتولول"

المخنتر"كيقلب على باش يشير عليه وصعرة ركباتو ولا يدور وينقز وسيمو حلف تيقتلو بالغدايد اما فرح فالكوزينة تنشرت بالضحك تا سخفت" : اويلي على الكلب اويلي ...

سيمو : تعالى ها صندالة علاش كتقلب خليتيها هنا واجي ا بب خنتورة نقوليك على وحدة شاركت انا وياها الاح شديييدة "مع عريان دار فحال غايمشي ليه و وزوز بفمو" ماااح ازين اجي ..لقيتي المورال طاااالع بواحد جوان كتروفان كانز ...

المخنتر"هز صندالة وشير عليه بيها جاتو لناضر " : الله ينعل جدر والديك الكلب...

سيمو"خرج عينيه" : نري ضربني ونااااااري ضربني وااااعنعنعنع"كيضرب فصدرو فحال طرزان وهو يمشي عندو كيقرب ليه ولاخور مفهم والو دوروه بيناتهم حتى بغا يدخل فيه وهو يدخل فوزي هاز شي ميكة رسلها معاه عصام"

فوزي : ياك لباس"طلع فسيمو وهبط لقاه عريان كي سلوگي" امالك ؟

سيمو : كنت تنشرح لباك درس فالحياة سيكسولوجية سكسوكية...

المحنتر : سير الله ينعل جد بوك الكلب الكيدار ..تفو يخليها سلعة"مشا لبيتو كيبرگم ...

خلا المخنتر بغا ياكل جنابو وخا يصربو سيمو ميتقلقش الا فحالات نااادرة كيتقلق يمكن مرة فحياتو او زوج الي تقلق فيهم وماشي شي تقليقة...وجد العشا والطاجين لخوتها جا المحجوب تعشاو كاملين الا المخنتر الي دخل لداك البيت مابقا خرج...

فهاد الاثناء يدا الحفل وناس تقريبا كلها حضرات حتى من البروفيسور بن سودة هو ومرتو وحنان تاهي الي كانت بكامل اناقتها مع امها بزوج لابسين تكشيطات وهي كانت فالاحمر وطالقة شعرها الذهبي ...ميكاب خفييييف بالكاد كيبان فقط ركزات على كحل العينين تاهي الي برز لون عينيها الازرق...كدور وتسلم على الي كيقريوها وقراوها وعينيها كيقلبو عليه مكاينش كان كل من وليد ريان الاقرب ليه وعلي الاقرب ووالو مكاينش ليه اثر مشات عند علي الي كان كيقلب عليه...

حنان : عمي فين زين الدين ؟

علي : ماعرفتش ابنتي لقيتيني كنقلب عليه ...

حنان : يكون فمكتب ديالو لفوق ؟!

علي : ممكن"بغا يمشي وهي توقفو"

حنان"هزات جلايلها" : انا نشوفو اصلا بغيت نهضر معاه نعطيه كادو الافتتاح... قلب نتا هنا وانا نطلع...ياك خدامين ناس لداخل ؟!

علي : لا كلشي خدام بدات الخدمة يومين هادي..."حركات ليه راسها ومشات هازا جلايلها بكامل اناقتها الملفتة وجمالها الاخاذ كاع الاعين كانت عليها بزينها الي كيفتن...متبسمة فعيون الناس كتحرك راسها بسلام ليهم ..حتى دخلات من جيهة الاستقبال وهي تمشي لسانسور رقم عشرة دخلات ليه وهي تركب رقم الطابق ما قبل الاخير كيف علمها علي تحل باب سانسور على الجناح مشات رقم الجناح الي فيه مكاتب زين الدين وهي تدخل لفين نعت ليها دقات الباب من بعد ما رشات بارفانها ...مجاوبها حد وهي تحلو وطلات هنا وهنا كان المكان فارغ...مشات لبيت فين دايرو لصلاة ودوش دخلات مكاين حد وهي تخرج تا مشاو عينيها لگورميط فيه حجيرات غوز كيلمع تا لمعو عينيها وهي تهزو كتقلب فيه في حين هو اللحضة الي تحل عليها سانسور هو تسد عليه وهبط نيشان عندهم يعني تخالفو ...نزل لقا الدراري كيتسناو فيه باش يشعلو البلاكة ديال المشروع ويتعطا اسمو الي غايكون هو البروجي الي تما قد الخلا فيه عدة طوابق بعدة اجنحة ومراكز...

علي"بان ليه جاي خاشي جيابو وعينيه فيهم نضرة ماهياش يعني ناوي على شي حاجة خاشي ايديه فجيابو " : افين كنتي ..كنتسناو فيك باس يتطلق هادشي ونبداو...

زين الدين"حرك ليه راسو وضار هنا وهنا كيعض فشنايفو " : يطلقوني خلاص مالهم فهاد تفشكيل ديال والو..."طلع ليه الخز"

علي : مالك نتا ماشي نورمال واقعة شي حاجة ؟

زين الدين"ساط بنفاذ صبر كيدوز على صدرو حل الكرافاط يتنفس" : ففففف والو والو...ماشي تالهيه محتاج يطلقو هادشي عندي منقضي...

علي : افين غادي امولاي علي الشريف ؟

زين الدين"هز ايدو وغمزو بمعنى ماتشغلش بالك"

يلاه غايهضر حتى جاو سرباية بلباس موحد هازين صينية بين ايديهم ديال نحاس وسط منها الورد الابيض وورد قلعة مگونة وتوليپ...ووسط منها واحد ريمونت صغيرة ومقص مذهب كبير...وقف وزير الصحة جنب زين الدين وعلي ...وعطاوه المقص قطع الشريط الي عند باب الاستقبال الاول حيث داير بيبان اخرى مع كبيير المشروع...صفقو الناس...وعطاو لزين الدين ريمونت لكن تمنع لانه الفضل كيرجع لعلي الي وقف معاه والي شريك معاه بنسبة فالمشروع والي خاص يكون هو الاساس حيث بروفيسور كون زين الدين مساعد ديالو مزال موصلش لمرحلة لبوفيسور...يعني راس المال ديال زين الدين وصاحب اكبر نسبة وعلي ب ماتبقى من الاسهم...

علي : وايلي ههههه

زين الدين : منتفضلش قدامك"باس راسو وايدو" خيرك كبير عليا اصاحبي وخويا الكبير ..ماشي مون بروف...

علي"عينيه غرغرو" : الله يرضي عليك"سمع تصفيقات ولادو الي حضرو مع امهم وتصفار" هههه الله يمسخكم نتوما .."شد ريمونت وهو يبرك وتطلقو شرارات مدة حتى تشعل ضو وتطفا وتشعل وهو يتشعل بالكااامل فالپانو قدااااش "La grande clinique BG "تكتبات قداااش "المصحة الكبرى BG...

علي"هز عينيه" : اسيدي مبارك ومسعود علينا درنا علاش رجعنا...

زين الدين"عينيه على السمية الي ياما حلم يكتبها فحياة واليديه وفرحتهم بيه فاش كان كيقرى وكيقول ندير وندير عارفينو قدها وقدود...كملو تصفيقات وتبريكات وكل مشا يهز مياكل من البيفي...على كان واقف حتى بانت ليه حنان جايا وكتقلب بعينيها بغا يقوليها را فين ملي ضار لقاه طار فين هو الله واعلم..."

علي: والله ابنتي الى كان غا هنا معرفتو مالو ماهواش ومعرفتش فين مشا..."حركات ليه راسها وهي تبقى غير حداه تا جا باها"

طول الطريق وهو ساكت غادي والوجهة الي فبالو بغا يمشي ليها وسلام فعقلو وفقلبو باغي يمشي يدير الي بغا باغي يشوف وسلام باغي يعمر عينيه...باغي يحقق المستحيل...مسافة عشر كيلمترات حتى لقاتو دخل الجديدة فضرف ربع ساعة غادي طاااير...كانت ساعة الحادية عشر ليلا...حتى لقا راسو دخل لدرب وبالضبط قريب لشرجم ديال الكوزينة الي وقف وخرجات عندو صفاء وهي...هز عينيه لشرجم لاخور الي شاعل فيه ضو ديالو "

زين الدين"عينيه فالشرجم ممسوقش لواش غايكون عصام ولا يشوفو مهازش الهم ولا عارف لخوف ولا الفضيحة...الصلابة الي عندو فداك القلب خطيرة...لكن فور ما نطق بكلماته خلات قلبه يرطاب ..بداك الصوت المدعدع الخشن الي كيخلع خصوصا لا هدد او حلف..و بنبرة تهديد " : والله يا زينة الغوالي لافديك..."عض شنايفو بجهد"

وسط كل الحاضرين ووسط كل تجهيزات الي ليه اكثر من شهر وهو كيجري ويتجارا باش تكون فالمستوى ويمكن كانت فوق المستوى....غير الاستقبال عند الباب كان بطباسل طاوس ديال تمر معمر ومنو الملبس بشوكولا بنوعيها...وكل واحد يختار بالاضافة الى كيسان الحليب بالزهر...عاد البيفي كيف شرحناه وشنو فيه...قبل ميدخلو كيسلمو الكونفوكاسيون عند الباب وليگارد واقفين تكراو على ود هاد الليلة والباقي را على العساسة الي مكونة من فريق والرئيس ديالهم هو با محمد الشخص الي تلاقاه زين الدين عند سطوب هاز لافتة فيها نمرتو كيقلب على خدمة....وبحضور ابرز الشخصيات الي اغلبهم كانو فقطاع الصحة..بروفيسورات ممرضين مندوبي الصحة شوي شوي من كل جهة...حتى بحضور الوزير الي طبعا كان احد اصدقاء الحاج الزياني البروفيسور الي على معرفة بيه شخصية...وسط اكبر حلم بالنسبة ليه والي قرا ودمر وتكلف وتسلف باش قدر يبنيه من بعد سنوات ديال دراسة وتخطيط ليه وسنوات استغرقات ف بنائه...وخذا وقت من وقتو توجه لمدينة الجديدة باش يوقف قدام باب دارهم عالله وعسى تبان ليه ولا يسقي عويناتو بشوفة منها...وهذا ان دل فانه يدل على صدق كلامه انها "تستااهل" وشنو ترجمة هاد الكلمة من بعد ؟ شنو هاد الاحساس الي خلاه يقولها حتى يطبقها قولا وفعلا ويخلي هادشي كامل ويمشي غير مبال بشنو غايوقع مع عصام الى شافو ولا حتى فوزي...

فيه هاد الاثناء حطاات ليهم الطاجين الي بغا عصام وفوزي الي ضروري ياكلو وخا يكونو مزرودين القص ميحيدوش ليهم الطبيب...

عصام : سيري نعسي لا عيييتي نتي ...

فرح : لا مزال مافياش وغذا غا الاحد مخداماش...

فوزي : السبت ياك كتخدمي فيه ؟

فرح : كنخدم حدي الصباح واليوم طلبت منهم رخصة باش مشينا عند الناس...

المحجوب"نعس مع دجاج غير تعشا حط راس مبقا هزو"

عصام : نقصو صوت شوية با (على جدو) ناعس...

فوزي"بصوت منخفض" : هذاك بوك ناوي يبقى هنا شي ؟

عصام"رما ندغة ففمو..تا ندغ وصرط عاد جاوبو" : مناويش يومين ويغبر فين كيغبر...على ماعلمني عمي مبارك بالي تقسيمة لاخرة على دار الي فالبلاد نهار تنين يمشيو يفكو التركة...وهو طالع لديك الفيرما سايرين يصوبو شي تخربيق تما"ضحك بجنب" دار الحليب گالك ...

فوزي : ههه دار الحليب ؟ اش غايحلبو محمد ولا المخنتر بوك ههه

فرح ؛ هههههههه ماقلتش ليك عصام قبيلة اش دار لسيمو نهننن..

عصام"ضار مغوبش" : ياكما جرا عليه ؟

فرح : ههههه وسيمو يمشي ؟ ههههههه "عاودات ليهم وحتى فوزي تاهو"

عصام"ضحك بجنب" : ميتخافش عليه معندي ميتسالو...

فوزي : لا سيمو شديد غالله يهديه على راسو يمشي يشوف خدمة ولا يرجع يكمل قرايتو وبراكة من البريكولات كل بريكول يخسرو فالجوانات وشراب!!! ماهنا حالة..

عصام"هز فيه عينيه وهز ايدو" : اش غادير ليه ؟ تنوض تصادع معاه ضربو ؟ كبر عليهم ولا گد المشحاط تحشم تحط فيه ايدك...ماعلينا نسالي صليح الفوق ونشوف فين نخشيه ولا نلوحو عندي فالحانوت يتعلم ليه صنعة...

فرح : امتا غايجيو المعلمية ؟ بعدا خاص الي يحضيهم انا مغانكونش !!

عصام : هنا يتسد والفوق يخدمو بروبيني ديال سطح والغذا وصيت مي فاطنة ولا مي نجية صباح نتقدا ليهم اش يخص والي خصهم ها ساروت هنا عندهم...ماتهزي هم ديها غا فخدمتك الله يرضي عليك...

فرح : فكرتيني وصلني ايمايل من كلينيك دايرين اعلان لواحد كلينيك كبيير تحل معقلتش اسميتو طالبين الموضفين من تما يمكن كلينيك الي فيه انا داير معاهم شراكة ..وغذا غايحطو لائحة ديال المرشحين غايديرو معاهم مقابلة...

عصام : وزعما كلينيك ديالكم سخاو عليه الموضفين عندهم ؟

فرح : على ما سمعت بغاو ينقصو عليهم موضفين مدخلين حتى سطاجيير الي قدام تما غير انا رسلوه ليا معرفتش حيث باقي مكملتش شهر عندهم...

فوزي : الى كان زوين وصالير طالع على هذا توكلي عالله هانتي قلتيها بفمك هما باغين يضحيو وينقصو عليهم...

فرح"وقفات" : تسنى نجيب تيليفوني ونوريك..."تمات غاديا"

عصام : اش غانعرف فديك الفرونسي ديالكم نهاك الله الي شفتيه مناسب وفمصلاحتك قضي الغراض متساليني غا الله يسر...

فرح" : مداتهاش فيه مشات لبيتها لقات ضو شاعل نسات مطفاتوش.هزات تيليفون من شارج حدا شرجم...وهي تحلو نيت باش طل حيث كانت ساداه على البرد ...مع حلاتو كتشوف هنا وهنا مع هبطات عينيها مع نعماس بانت ليها ل BMW واقفة مبندة ماخاصها تااا خير نعماس...خرجات عينيها وكتقول لاااااا ماشي هو " : اويلي على هو ؟ اويلي وليت نحلم بيه ولا اش ؟ لااا ميمكنش....

زين الدين"مع حال زاج كيكمي تا سمع تقرقيب شرجم حد راسو و هز عينيه بانت ليه كطل وهو يحل الباب ووقف شاف فيها مسند عالباب..."

فرح"عينيها من كثرة ما خرجتهم قربو يديرو بيييق سدات شرجم بجهد مع ديال اليمنيوم بالسكة تسمعات زددففف وسدات ريدو من فوق وكون لقات البريك ضربو لشرجم" : اويلي اويلي اوييييلي حي واش هذا مرييييض ؟ اويلي انا معامن "حطات ايديها على حناكها"

عصام : فراااااح مال داك شرجم ؟؟؟

فرح"نقزت من بلاصتها بالخلعة" : ااااا ؟ ممماالووووش احم..

فوزي : اتي مالك مشيتي سكنتي تما ...

فرح : ه هاني جااايااا..."ضارت تاكد من شرجم لا يكون تحل وحدو ههه وهي ترجع هضرات" انا نهضر مع صفاء ونجي..."اش غادير فهاد الحالة من غير انها تهضر مع اعز صاحبتها رغم البعد رغم الشحنات الي بيناتهم وتزثر العلاقة فالاونة الاخيرة الا ان صداقتها وعشرتها واخوتها ب صفاء هي فطرة اكتاسباتها ملي كانو اضافرهم ناعمة والكلمات مكيتجمعوش ليهم والمشي مكيتقادش ليهم...لقات راسها كدوز ليها الخط يا ناعسة فايقة باكية فالطواليط فينما بغات تكون تكون..."

صفاء : فرح !!

فرح : فرح الله يرحمهاااااا

صفاء : اسلااامة وشكون قتلها ؟ كانت غليييضة ليرحمهااا ...

فرح : ماشي وقت الطنز...

صفاء : ونتي ميتة وكتفكري فالطنز ! اش واقع مالك ؟!

فنفس اللحضة من شافها سدات شرجم هز حجبانو متوقع ردات الفعل ك هكذا يعني عارف وواعي لشنو غايواجه وعارف قدامو طريق طويييييييلة...بقا كينقر بصباعو فوق الطوموبيل وشاف هنا وهنا مهم شافها وشافتو باش ميازمش الوضع ويحطها فموقف محرج مع خوها فضل يمشي...يلاه غايركب حتى وقف عليه مخلخل شوي بشراب هاد الليلة مشاربش بزاف لحسن الحظ غير ذايق...

سيمو"غمض عين وحل عين" : سي طبيب ولا غيست ؟

زين الدين"طلعو وهبطو" : نتا وايمانك ..

سيمو : نهنننههه ايماني فهاد اللحضة ذايق الحرام...هبط ينعس لتحت...تا واش من نيتك جاي هنا مخايف محاس بوالو وااالو ؟ تا را عصام الكبير وصغير كيدير بحسابو عارفينو لا فات تا ناض كيح** الحزاق كامل ريكطو فيرسو نخهههه

زين الدين"رفع حاجبو ورد ببرودة" : الله يزيدو اسي..

سيمو"كان يحساب ليه غا سكرة طلعات ليه وولا يشوف المستحيل فهاد الدرب ساعاك بصح خرج عينيه على جهدهم وهو ينقز طار لباب لجيهة ثانية من سيارة بغا يحل الباب لقاه مسدود خلا زين الدين مفهم والو ههه " : تا حل اصحبي حل وطير من هنا حل ...

زين الدين"عقد حجبانو" : كيفاش ؟

سيمو : حل مكاينش وقت للتفسير اصحبي فطريق ونشرح ليك ...وتا حل يااااا عنعنعن حل اش داني نشرب pastis (نوع من الخمر) اش داااااانييييييو ...

زين الدين"ورك عالكونطاكت تسمعات طررق وكيشوف فيه مكمش حجبانو مفهم تا خرية والمشكيل انه دار ليه خاطرو وحل الباب

سيمو"حلو فالبلاصة ودخل قاد سانتيغ وشاف قدامو ..مزال زين الدين كاع مركب باش يسوق " : سير عالله ...

زين الدين"طل عليه ملامحو ممفسراش كيشوف فيه كينقز غا وحدو..."

سيمو"هز كلينيكس من قدامو سرحو وحطو فوق راسو باش ميشوفو تاحد شكون هو زعما...لقا راسو باقي حدا الدار" : دابا مال دار عصام تابعانا -_-...

زين الدين"حرك راسو يمين شمال بلا حول ولا قوة الا بالله ...هز عينيه للمرة الاخيرة فالنافذة ديال بيت فرح ورجع ركب فالسيارة ضار جيهة سيمو لقاه مضارب مع كلينيكس كيغطي فراسو ...ديمارا سيارة وكسيرا الوجهة فين الله واعلم بعدا يشوف شنو يدير مع هاد سيمو فالاخير لقا راسو فاتجاه شي ريسكو فين يدخلو يتعشا ولا يشوف اش يدير معاه ...دعقوه الاتصالات شاف فالتيليفون لقا علي كيصوني وجاوبو مبغاش يخليه مشطون "

علي : افينك اصحبي مالك على هاد الفعايل ؟

زين الدين : هذا الله...مالك ؟

علي : اهههه ؟ مماليش غا توحشتك قلت نسول فيك...فينك فين زرتي ؟ اش غاندير مع ناس كيسولو فيك وبغاو يهضرو معاك ؟

زين الدين : عدي عدي بينما جيت ممعطلش"شاف فسيمو لقاه كيدندن ويشطح بكتافو بلا موسيقى ..قوس حجبانو فيه " تت..قضي قضي شوي ونجي..."قطع معاك وورك زايد فالسرعة تا وصل حدا واحد سيارة كيبيعو فيها قهوة عند الكورنيش تما نزل مدة خمس دقائق تاتم جاي جايب معاه گوبلي ديال قهوة كحلو حل زاج" تحرك نزل من هنا...

سيمو : اخليني فيا نعاس طوموبيل عندك دافية "ضار شاف فيه كيشوف بواحد نضرة ديال لا حول ...حدر راسو بسكااات وحل الباب بسكااات ونزل بسكااات معاودش الهضرة ..مد ليه زين الدين القهوة شربها بلا سكار بزز منو سكل عليها واحد شوي عاد بداو عينيه يتحلو"

زين الدين"طلعو وهبطو" : هادي حياة عندك ؟

سيمو : حياة خليتها فالبرتوش علاش ؟ "لقاه خرج لسانو بغا يعضو وهو يتكمش" ااا...اهادشي الي عطا الله وصاف..ونتا اش جيتي دير قدام دار عصام ؟ شوف الخاوة انصحك ااا فسبيل الله انا واحد الانسان غااا مسلك فهاد الحياة ماعرفت نصيحتي واش تنفعك ولا ضرك ولا تخليك كيف ما انت...

زين الدين"تكا عالطوموبيل وربع ايديه كيسمع ليه اش غايقول"

سيمو : ديك العائلة والله ما يستاهلو. ومعندهمش زهر مع بنادم خصوصا ديك البنت ..بلا مندخل ليك فتفاصيل ماشي من حقي نقولها ومااا من حقك تعرفها...لا عينك فالصداع دير غير بوجه ديك البنت..ياك ساليتو المرمة وفضيتو الي بيناتكم ؟ الله يعاون العونات...اش بغيتيها واش بغيتي خوها منكذبش عليك العيصومي را واعر يقتلك بلا ميهز الهم...كلشي على جال ختو...

زين الدين"حك شنايفو وهو كيسمع ليه..قبل مينطق" : مزيان ..شكون هذا الي ميخافش على خوتو ؟

سيمو"قلب فجيبو جبد بريكة وقلب فجيب لاخور بغا يجبد الكارو مالقاهش وزين الدين فهمو حيث هاد الحركة معروفة...جبد من جيب الفيستة باكية الكارو ومدها ليه كلها.." : يحفضااك"شعل الكارو تا جر منو وساط " اش غانقوليك انا الي عليا قلتو مانگد لا عليك لا عليه...مابغيناش الصداع والمشاكيل مابغينا نيتمو حد...حنا براسنا غا مسلكين فعدو ربها هاد الحياة...

زين الدين : ياك بعدا ..."خلاه كيهضر وتحنى جبد من حداه فواحد بواط شي صرف حاطو معاه 500 درهم كمشها ودارها ليه فجيب سروال شد ليه ايدو وهو يحمر فيه " : ششش تركن لارض...

سيمو"هز ايدو وحطها وبقاو شحااال ساكتين وامواج البحر الي كتهضر فداك نص الليل والبرررد " : علاش نتا حرنتي عليها هاد الحرنة ؟

زين الدين"تنهد بتعب ونفاذ صبر شاف قدامو فالصخر الي كيضربو فيه امواج البحر" : شنو بان ليك ؟

سيمو"ضار شاف فيه وبقا شحااال كيشوووف فيه ولاخور عينيه فالبحر..حيد من على طوموبيل وطبطب ليه على دراعو" : الي عليا قلتو والي بغا شي حاجة يتقاتل عليها..."حدر راسو وزاد مخليه كيشوووف فيه خشا باكية الكارو فجيبو هز الكارو كما وضار لهيه ساط الدخان..وهو كيبعد وهادشي تحت عينين زين الدين الي تسناه تا مشاا...عارفو ميتخافش عليه ولد المنطقة....ركب فطوموبيل كسيرا نيشان لطريق الكلينيك خيث مقام الحفل الي على مشارف الانتهاء....

قبل ميمشي سيمو وزين الدين كانت المكالمة ديال فرح مع صفاء ...

صفاء : ودابا مالك فهاد تقفقيف ؟ الى حصلو داك خوك غايضاربو ويفكوهم ثاني...مالو غايضربك ؟

فرح : صفاء ؟

صفاء : صف صف اتنضحك...سيري هضري معاه ولا شيري ليه يمشي...نريييي ياختي حطك فراسو باينة دخلتي ليه لنخشيشة القلب وضربي الاسهم ديال بصح ماشي فحالي ضربت سهمي على اساس يمشي لقلب خوك خشاه ليا فكري...سيري بعدي مني لاش كتعيطي ليا انا باغا نساكم ونتي دملتي ليا فعضامي...

فرح : ياااك ...

صفاء : وايليييييي هاد دراما كويييين ...انا راني فرباط مكاين كي ندير باش نخرج عندو ونتدخل شخصيا ...شوفي سيمو نائب ديالي...

فرح"سمعات صوت عصام" : ارا كنهضر مع صفاء ا عصام...واخا..احم سلم عليك..

صفاء : لا مرحبا ولا سهلا بسلامو قوليه بعد مني واااكواك راني مكسورة مهرسة يحساب ليكم تنضحك لاش تيسول عليا...

فرح : سمحي ليه اختي ..

صفاء : ماعلينا سيري طلي شوفي واش باقي عالله يمشي ملي يشوفك سديتي شرجم...

فرح : زعما"قلبها كيضرب عند فمها ضارت هنا ولهيه لا يكون جاي فوزي..حتى وقف عليها عند الباب وتم داخل خرجات عينيها" فوزي !!

صفاء : اعاااو...

فوزي : مالك ؟ "شافها حاطة ايدها على شرجم وشرجم مسدود ليه تا ريدو" مال هذا مسدود ؟

فرح : اا القيتيني بغيت نحلو..و

فوزي : ايوى حليه مالك ؟

فرح : كنهضر مع صفاء.."هانتا"

فوزي"شاف تيليفون مطفي قطعات عليها فالبلاصة بنت الهم هههه" : صفاء مشات...

فرح"شافت فتيليفون" : ااا ؟ اويلي بنت لحرام...

فوزي : تصالحتو نتوما ؟ "كيهضر ومقرب"

فرح : اااا شوية ...

فوزي : ممم غرييييب..."حط ايدو على سكة حل الباب وحل ريدو وهو يطل "

فرح"غمضات عينيها ووجهها ولا صفررر" : مممممن

فوزي : الاطيف مالك على حالتك نفسي عليك دنيا...

فرح "حلات عينيها" : انعااام ؟ "مشات كتجري طلات لقات غالريح" والله الى هههههه هههههه وحق الله....

فوزي : الله يستر ..دوزي دوزي لبيت..."حرك راسو يمين شمال ومشا خرج تبعاتو تاهي والحمد لله دازت سالمة غانمة ولكن...يعلم الله اش مخبي المستقبل...هكا دازت الليلة وداز الافتتاح كما يجب رغم غيبا زين الدين بعض الوقت الا انه رجع تدارك الموقف سلم على الناس الي جاو لقا الحسين والحاجة جااااو ومالقاوهش كان مدهي مع صدور اسم الكلينيك ومن تما زاد مشافهمش ...لكن بقاو حتى جا سلم عليهم وشكرهم داز كلشي مزيان تعطات انطلاقة للاشغال فيه رسميا...كل طاقم بشاف ديالو مسؤلين على اشغالهم ...كل شد بوسط ديالو وتيسر فيه رسميا...مجهز بالكامل وباحدث الاجهزة...حتى انه دار فيه طابق لارضي خاص غير بالمستعجلات...

كل تيسر فحالو يرتاحو من تعب الحفل مخلين المكلفين هما الي يخدمو ويبقاو تما...وهكا دازت الليلة زصبح يوم جديد من بعدو يوم اخر حتى وصل يوم الاثنين وكيف عادتها فاقت بكريييي عجنات الخبز بزايد حيث المعلمية غايجيو باش يبداو صليح الفوق باش تديه لفاطنة الي غاطيبو وتطيب ليهم الغذا...حطات الفطور وفطرات كان المخنتر وجدها مشاو يوم امس كل فين صد وخوات عليهم الدار...فطرات وهي لابسة حوايج الخروج الحال غير كملات وهي تنوض هزات صاكها ولبسات سبرديلا بيضة مع سروال دجين وتريكو الخايط عريض حد ركبة بيض رامات عليها مونطو وخرجات قبل هزات الفلوس الي خلا ليها عصام ديال سيمانة وهزات ساشية فيها لانش بوكس ديال غذاها ركبات فالموطور غير حركاتو فاق عصام عرفها هي الي مشات...مسافة الطريق حتى كانت فالكلينيك طلعات لطابق فين خدامة صبحات عليهم ولبسات بلوزتها فرحانة حيث اليوم غاتدخل مع طبيب لداخل ...جلسات شوي رتبات شنو بقا ليها وهو يعيط ليها وقفات وتبعاتو دخلو بقاو ازيد من ساعتين حتى دق عليه الباب وخرج...

احمد : سي توفيق لباس ..

توفيق : الحمد لله دكتوغ.. سي بوسيبل تعلم سطاجيير الي عندك وحتى ليزانفيغمييغ الي معاك باش يكونو ف la salle des réunions دابا ...

احمد : خبار الخير ؟

توفيق : كل خير راك عارف على قبل لانونص الي علمنا بيها سي نوري ...

احمد : ااااه بون ويييي عقلت..."شاف فيه" يعني الهضرة صحيحة ديال ينقصو لي صالااغيي من لا كلينيك هنا ؟

توفيق : وييي...مي دارو شراكة مع الكلينيك جديد ديال بروفيسور زياني مشاو نسبة من المرضى لتما ورسلو ليهم دي صالاايي واضطرو رديرو انونص غايشوفو شكون يبغي يمشي تما حتى الفرصة تحلات فوجه سطاجيير ...

احمد : مزياان..."ضار عند البنات عيط ليهم ومنهم فرح وواحد الولد تاهو ..حدرو راسهم وخرجو ماشي غير هما حتى شي وحدين تاهما يعني توفيق مشا عند المترشحين وكانت ضمنهم فرح...دخلو لاصال ديال اجتماعات وكان نوري و RH ديالو ونائب وواحد البروفيسور فواحد المكتب مسدود كيطلحدا القاعة...حاطين قدامهم ملفات فيهم سيفيات المترشحين وحتى لي دموند وتقارير عليهم...هز ملف كل واحد كينادي عليه و يهضر معاه شرح ليه عرض الكلينيك لاخور وكل كيجاوب ويفكر واش ينتاقل ليه كاين الي لقاها فرصة لا تعوض كون هو غير متدرب جاب ليه الله خدمة...وصل نوبة فرح دخلات...

نوري : فرح الخيالي "هز فيها عينيه"

فرح : وي انا موسيو...

بقا كيقرا ف السيفي ديالها الي معمرو قراه حيث هادي اغلبها مهم الموارد البشرية...من ناحية عجبو سيفي كونه عامر ببزاف ديال التداريب وشهاداتها يعني محفز...حط الملف وتقابل معاها كيشوف بتركيز ربع ايديه وبدا كلامه...

نوري.: بنتي كنضن توصلتي بالايمايل وعرفتي اش كاين ؟

فرح : وي موسيو ...

نوري : انا مزالني عند هضرتي صالير الي غانعطيوك راكي عارفاه ك بداية 2000 درهم نضرا للحالة شوية ضعيفة لكن من بعد غايطع ولابد مع الاقدمية...وهاد لاكلينيك جديد عطاك فرصة باش تبداي معاهم بكونطرا نيشان فيها عامين ماشي 6 mois وصالير شوي طالع علينا وتما 3000 درهم ك بداية...وعندك بريم فكل عيد و طرونسبور عندهم لناس الي ساكنين بعاد حيث جا بين جديدة وكازا قريب من جديدة بعشرة كلمتر...قراي هادشي قدامك والى وافقتي غاتحبسي الخدمة عندنا ومن بعد يومين توجهي لعندهم باش يبداو معاك الاجراءات...

فرح"سمعات ليه شنو قال وهبطات عينيها كتقرا فالورقة وكتفكر حيث فالصراحة هنا شافو ليها جدها بزز باش ممكن تلقا سطاج فمختبر حيث صعيب شوي يلقاو سطاج فيه...فقرارة نفسها كاين تردد كون مابغاتش تخلا على حاجة شافها ليها جدها ..هزات فيه عينيها "

نوري : شنو ترفضي ؟!

فرح : شحاال الوقت عندنا ؟

نوري : مكاينش وقت واقفين على لي صالاغيي...يعني يا ترفضي دابا يا تعطينا لاكسيبطاسيون...

وكيف العادة واقف فالمحل ديالو كيشوقر فواحد الحولي كيفصل فيه جابو ليه شي حد عاد ذابحو...وحداه معاد مخدم المكينة كيقطع فالعضومة...وعصام كيگرض ...

هو : دير ليا بحساب طباسل لحم بالبرقوق اولدي غير عراضة خفيفة...

عصام"بطنز" : كيفاش ا استاذ تهامي خفتي تگول ثقيلة تصدق عارض عليا ؟!

التهامي : ههههه شتي الي كيفهم راسو...

عصام : ماعطاوكش ابا التهامي....

التهامي : وتگول نعرض على كلشي ونفوت با عصام...

عصام : نجي بزز مني ...

التهامي : الدار الكبيرة ههههه ..اودي هادي عراضة دايراها مولات دار لاستاذات معاها دايرين دارت بيناتهم كل شهر عند وحدة ايوى النوبة فينا...

عصام : من الخير من الخير غا هو وكان شريتي البگري فضل ليك...

التهامي : بغاو ليها الغنمي اسيدي كيتشرطو ليك ..

عصام"ضحك بجنب" : ماعليش خليهم على خاطرهم..."جمع ليه داكشي وقادو حتى وقف عليه واحد شاف فيه ورجع قاد لتهامي شنو بغا وجمعهم ليه فكواغط كل كيلو ونص فميكة " هانا با تهامي ..."خلصو وشكرو ومشا تيسر فحالو عاد شاف فالي وقف " اش حب الخاطر اشريف ...

هو : سي عصام الخياالي ياك ؟

عصام : بشحمه ولحمه..خبار الخير...

هو : جيت ومقصودي شريييف ..نتمنى تسمعني ومتردنيش وانا مناوي غير الخير...

عصام : مرحبا بمقصود الخير..."هز حاجبو باستفسار" مزال مفهمتش ...

هو : واخا نهضرو فشي قهوة هنا ولا شي بلاصة قريبة الى ممكن...

عصام"ضار شاف معاد الي كان كيبدل بغا يمشي لافاك وضار شاف ف السيد " : فيك ميدخل هنا ؟ ماعليش سمح ليا مانصيبش كي نخلي الحانوت"حط ايدو على صدرو" عذرني منك سموحات ...

هو : لا هانية مرحبا ندخل علاش لا..."خرج معاد مشا ودخل هو جلس " ايييه ...

عصام : مرحبا...

هو"حنحن منضف حلقو" : اسيدي كي قلت ليك قصدي شريف..وباش نوضح ليك اسي جاي طالب ضيف الله...

عصام"غير سمع شنو قال حك لحيتو بثقالة وحدر راسو هزو" : مرحبا...فيمن بعدا ؟

هو"بابتسامة " : طبعا فالاخت الكريمة ديالك...لى كان ممكن ديرو لينا شي وقيت انا والوليدة غير نخضرو والي جدتو عليه على الراس والعين فكرو وعجيو وقت ليكم ونتمنى يكون الرد بالخير..والى كان بالرفض على راس والعين ماكتابش...باش نقربك كثر ليا شرف نتناسب معاكم ناس الخير وتربية زينة...وانا تا بنيت راسي وخدمت وكونت راسي عاد نويت الزواج ومالقاش ماحسن من الاخت ديالك فرح ...

عصام"رفع حاجبو" : كتعرفها ؟

هو"حرك راسو" : منكذبشاااي هههه كنعرفها من لافاك كنت كنشوفها بزاف فين قريت وخا ماشي نفس الاختصاص وسولت عليها وليني ديك ساعة كنت كنقرا ماجاتش نخطبها وانا ما فجيبي تا ريال ..عندي ختي ومنبغيش ليها التكرفيص اكيد منبغيهش على بنات الناس ...

عصام : ماقلتي عيب وليني منعطيك خبار شوار شوارها وراي ديالها...الى بغات معندي منزيدك غا هو شي ضروف دازت منها موحال نضن تبغي...على كل نحاول ومنعطيكش امال ...اش سماك الله بعدا ؟

هو"حرك راسو وتبسم" : اسماعيل...اسماعيل عابيد...

كمل كلامو معاه وهو واثق بالي ماخذا هاد الخطوة الا وعارف را غايكون رد الفعل ديالها سلبي لكن فنفسو كانه باغي يجرب حضو او عندو حساب فراسو او قاليه راسو را غادي تبغي وتقبل مادام دخلتي من الباب بقصد الحلاال....

اسماعيل"وقف مد ليه ايدو" : ساعة سعيدة خويا عصام...نتمنى يكون الخير...

عصام"رد ليه سلام" : باش منافقكش مانعطيكش جواب غادي تحاول تصبر واحد الوقت..

اسماعيل"كمش حجبانو" : علاش ؟

عصام : كيف ما علمتك هي دازت من شي ضروف ما فبالهاش زواج وليني ملي جيتي قاصد الخير منردكش عطينا وقت وكان نعرف را مناسب باش نعلمها...هي دابا عاد شدات فواحد الخديمة جاب ليها الله تيسير..ونسالي شي صليح عندي فالدويرة مبرزطين هاد ليام...

اسماعيل"حط ايدو على كتف عصام ونطق بكلمات الي يريحو عصام ويخليوه يبان فعينيه كبيير ويكسبو جيهتو" : خوذ راحة راحتك اسي عصام...خليها على خاطرها وكان تلقى الوقت مقادة سلك..الله يجعلك تجلس شهور اسي ماعنديش غرام ديال المشكيل ابا عصام بغينا غا خاطركم"حط ايدو على صدرو" مكرهتش نسوبيتكم والله الى ليا بات الشرف...

عصام"تبسم مطبطب ليه على كتفو" : يعمر دارك اسي اسماعيل...يكون خير ...

اسماعيل"بدا يقلب فجيابو هنا وهنا وجياب سروال شاف ف عصام" : الله يخليك شي ورقة وستيلو نكتب ليك نمرتي ؟

عصام"حرك راسو" : ايه "قطع ورقة من دفتر الكبير عندو ديال كريديات ومد ليه ستيلو لاصق فواحد لاستيك"

اسماعيل"قيد ليه نمرتو باسمو فقط بدون كنية" : هاهي ..خوذ راحتك ووقتكم وعلمني...

عصام : مرحبا...الله يجيب تيسير...

سالا معاه سلم عليه ومشا تيسر فحالو وهو رجع لخدمتو كيما العادة تا داز اليوم كل واش هاز فجعبته معاه...توذن العشا سد الحانوت وهز موطور كسيرا نيشان لدار لقاها موجدة العشا كيف عادتها وجالسة كترامك مع فوزي وسيمو تاهو جات نجية جايبة معاها قصرية ديال تريد عيطات لفاطنة وتجمعو عليها كاملين لكن بعض منهم حاسين بنقص عنصر مهم والي اول مرة يغيب عليهم وهي صفاء لكن ماعندهم مايديرو من الاحسن ليها انها تشوف حياتها وتسافر بعيد باش تقدر تنسى حب حياتها الي ملي حلات عينيها وهي بانية عليه امال...سالاو ماكلتهم وقصرتيهم وكل مشا قصد بابو حتى صبح الصباح وكل تيسر لاشغالو حتى وصلات ربعة العشية وجات لدار لقات عصام فالبيت معمر براد اتاي منعنع كما يجب ...

فرح : الله شحال زوينة نجي لقاك معمر برااد.."تحنات باستو فحنكو"

عصام : ياك الحاجة...

فرح"مشات حطات صاكها فالبيت وجابت شارج دارت تيليفونها يتشارجا وجلسات حداه لقاتو حاط دفيش الي دوز مع اتاي" : نبقا بحوايجي...

عصام : حسن كولي ويلاه نتحركو ...

فرح : غادي تكون لمياء وحدها ولا معاها خالتي ؟

عصام : لا معاها مها"دق الباب ودخلات فاطنة " عالسلامة..

فاطنة. : عذرني وليدي كنت نهضر مع امين قاليك جاي هاد ليام خطيفة يشوفنا ويرجع...

فرح : هلكاتو لامارين هذاك مغايديرش دارو ...

عصام : موحال يضهر ليا هذاك الكلب...

فاطنة : معامن تهضري معامن"كب ليها كاس اتاي شربات منو" الله على كويس من داكشي...

فرح : عصام الي عمرو هههه

فاطنة"شافت فيه بنص عين" : الفرحة ومادير...

عصام : شتي على حال وصلت ليه...

فاطنة : قتلك قتلك ههههه ويلاه نوضو يلاه تلحگو شغاالكم...

وقفات فرح جابت زيف غطات بيه الطابلة لا يجي فوزي يبغي مياكل ومشات حيدات تيليفون من شارج وهزات صاكها اما عصام طلع عند المعلمية الي كانو بداو يريبو تما شي بلايص باش يقادو ضالة...طلع ليهم صينية اتاي موجدها ليهم وصينية فيها الزيت والخبز وكوفيتير وفرماج وزيتون ...ونزل سد الدار وموصي فوزي يجي يطل عليهم باش يمشيو ويسد الباب ديال دار...جاب طوموبيل صطوف الي بقات عندو...

فرح"من بعد ما ركبو وكسيرا" : صطوف اش دار اعصام ؟

عصام"شاف فيها من مراية" : تنين جاي يخرج ان شاء الله...

فاطنة : ايوى على سلامتو والله يهديه يوصلح الاحوال...

عصام : امييين"زاد مكسيري لا يتعطل على لاخرين وصلو قدام دارهم دوز تيليفون ماتعطلش خمسة دقايق كان الباب تحل وخرجات الام ديالها هي لولة بجلابيتها وعليها خمار وعاد تبعاتها هي سروال دجين دروا وتريكو الخيط فوق منو مونطو فالموطارد وشال مارون مبتاسمة بخجل..

هنية : مسا الخير اوليدي ..

عصام"خرج من سيارة باس راسها" : اهلا ميمتي ركبي "حل ليها لور ركبات حدا فرح خلاهم كيتسالمو وشاف ف لمياء" ركبي ..

لمياء"شافت لقدام لقات فاطنة راكبة " : واخا "عوجات فمها وهي تحنى وركبات حداهم ورجع هو لبلاصتو وزادو مع الطريق لقيصاريات فين كاينين التواب وشنو بغاو يتقداو على حساب الخطبة والي فضل وباستشارة من العيالات الكبار فهاد الامور الي قالو ليه خاص تكون حاضرة باش تقيس وتختار الي عجبها عاد الى بغا يضيف شي حاجة كادو من عندو فاش يجيب ليها لخطبة الي غاتكون فيها حفلة رسمية...

وصلو القيصاريات بلاصا طوموبيل فالباركينغ وخرجو هما تمات غاديا فرح كتشوف فالدنيا هنا وهنا حتى حساات بايدين تخشاو فدراعها هزات راسها وهي تلقاها كتشوف فيها وتبسم مالقات مادير من غير انها ترجع ليها الابتسامة...

لمياء : ففف البرد بزاااف..

فرح : ممم بزاف ياك ما مالابساش مزيان ؟

لمياء : شي شوية هههه

فرح : ولا لبسي مزيان دابا يضربك البرد...

عصام"تابعهم من اللور كيهضر فالتيليفون وحاضيهم...لقا راسو كيتبسم غير وحدو عجبو المنضر ديال حبيبتو وخطيبتو متابطة دراع اكثر وحدة عندو معزة وعينيه باش كيشوف..." : يلاه تلاح دابا لا تفرعش لدينمي الكر فهاد النهار..

سبقات هنية وفاطنة وفرح ولمياء تالداخل القيصارية عند مول تواب جلالب وتكاشط...سماو الله ودخلو كيقلبو فالتواب كاع اللوان جبدهم ليهم ولمياء تاحاجة محملتها...

فرح : شنو كتميلي نتي باش نعرفو عندمن نمشيو ؟

لمياء"عوحات فمها وهي تقرب هضرات ليها فوذنها "

عصام"مربع ايديه وحاضيهم طلع ليه زعاف" : اش كاين تم ؟

هنية : لا تهضريش فوذنيها را عيب ابنتي "خرجات فيها عينيها"

لمياء : وا غير قلت ليها بيناتنا حنا بنات باش تفهمني عادي راها ختي...

فرح : هههه ربي يخليك.."حكات ورا وذنيها" هانتا عصام "قربات ليه كان واقف بعيد وهضرات بيها وبينو" دير ليها خاطرها ولا تشريش ليها ثوب جلالب خلي تانجيبوه حنا غير بروطوكول را مكتحملش تلبس جلالب غير دايرة ليك خاطرك..

عصام"قندش" : واش دينمها تلبس ليا المقزب ولا رومي ؟ لا ماعندها مادير عاودي تخيري معاها ...

فرح"نغزاتو من دراعو" : وغير سمعني دير غير بوجها واحد شوي حرام عليك را انا ومعجبنيش هادشي هانتا التكاشط زوييينين و عمي عمر ماكاين ماحسن منو هنا ...

عمر : و سلك اسي عصام ...

عصام"شاف فلمياء" : اش عجبك من غير تواب الخرا"حبس الهضرة مغمض عينيه بنفاذ صبر" من غير تواب جلالب ؟ شوفي تكاشط !!

لمياء"بغير خاطر " : عجبتني وحدة وريتها لماما ...

هنية : صافي شفنا هادي كلشي عجباتو ..

فاطنة : لا تديشاي علينا لا عجبت مولات شي هي المهيم ..لا معجبتهاش نشوفو غيرها والحاج عمر را ديالنا مايگول وااالي..

عمر : الله اودي لما عجبكمش الي عندي نصيفطكم عند الحانوت ديالي ثاني ولا نرسلكم عند واحد تاهو حسبوه بحاالي مكاين غرام المشكيل...

عصام : الله يكبر بيك الدار الكبيرة...

فرح : عجباتك هادي ولا نشوفو وحدة اخرى !؟ وجلالب الى مبغيتيش شوفي غير شي لون عجبك ونديوه ضروري ميكون لا مبغيتيهش جلابة ديريه الي عجبك وتصرفي فيه كيف بغيتي...

لمياء"بقات شحال كتشوف وتفكر وتقلب فتواب هزات عينيها فعصام لقاتو كيبقشش فتيليفون عاقد دوك الحجبان ..وهي تحط ايدها على واحد توب ديال تليجة فيه بيض وريدات لوانهم مابين برتقالي وخضر وذهبي..." : احم هادي...

هنية : عاجباك ولا تمشي تالدار وتقولي مابقيتش حملتها راني نعرفك...

لمياء : مامااا "كتخرج فعينيها وتشوف جيهة عصام وفاطنة وفرح" حشومة عليك...

هنية : مالي كذبت هههه

فرح : اهانية ديما كنديرها معروفة هاد القضية هههههه...ماعرفتش حتى انا عجبني هاد توب وغايجيها. زوين مع هي غزالة تبارك الله...

هنية : ربي يخليك ابنيتي وتانتي تحمقي ماشاء الله...

فرح : ربي يخليك اخالتي...

لمياء : صافي بغيتو...

فاطنة : وشوفي تفصيلة من بين هادو اينا لون...

لمياء"هزات شي لوان كتقلب فيهم وهي تهز توب وحطاتو على صدر فرح بغفلة منها مافهمات فرح والو وكذلك فاطنة وعصام الي هز عينيه نشان فالمنضر كمشهم مافهم والو تاهو ...بقات تشوووف فيها وهي دور عند امها : هذا غزااال جا مع فرح حيث بيضة بزاف دونك يجي معايا تا انا...

هنية : وقيسيه عليك ديك ساعة لاش ضهشرتي البنت احاي..

لمياء : ههههه لا را نشوفو فالمراية وليني منقنع حتى نشوفو على شي حد فحالي باش نعرف كيف غايبان...ماعلينا هذا الي بغيت...

كملو من عند مول التواب تا غفر ليهم الله ما عجبها اش كاين تا شابو معاها وفاطنة كاع الي صبارة كان شوي ويطلع ليها الخز وتشنقها بواحد من دوك الثواب. اما عصام خلاص صعر وهو يبان ليه واحد دايز بمقراج القهوة متنقلة وقفو خذا ليه كاس قهوة وخلصو خرج برا القيصارية شعل كارو وكما مع القهوة تا حس براسو تكالما عاد بانو ليه جايين لاح الكارو عسف عليه والكاس فواحد زبل تما وصلو عليه ...

فرح"قربات شدات ليه فدراعو كانو هما عند شي محل كيسولو على شي لعيبات ديال تحت" : خاص تاخذ ليها شي بارفان وداكشي دلمكياج...

عصام : سوليها شنو بغات اش غايعرفني فديك تدلاكت ؟

فرح : هههههه تدلاكت...لا غانمشي غير انا وياك ناخذوهم عرفتها اش كتبغي هضرت معاها بالفن وحنا بنات را نعرفها اش غاتبغي ...

عصام : نساليو وندير وقيت نديك تاخذيهم ولا نعطيك الفلوس وتقداي راسك ؟

فرح : واخااا صافي تا هذا بلان...

عصام : وخوذي ليك تانتي اش يعجبك ضروري..

فرح"تنخششات فيه" : ااااااي يخليلي الي منسانيش انااا ههه

عصام : وينعل جد بوه الكلب هذا الي ينسيني فبنتي"باس شعرها وحنكها " تبكي على مها هادي الي تنسيني فكبدتي "وصلو عليهم فاطنة وهنية ولمياء شافوهم بهذاك المنضر "

هنية : الله يخليكم لبعضياتكم...

عصام : امييين اميمتي..."شاف فلمياء" ساليتو ؟

لمياء"حنحنات" : احم اه سالينا صافي نمشيو لدار...

فاطنة : الا مزال شغل حوايج ابنتي فين تمشي لدار عاد جينا..

لمياء : لا غير نمشيو حنا والباقي ماشي مشكيل الي جبتوه قابلة بيه المهم هو تواب را اختاريناهم...

ماداهاش فهضرتها عنق فرح بجنب وضار لعندها ..شاف هنا وهنا وهو يدور ناحية واحد المحل ديال واحد الولد كان كيقرا معاه فالاعدادي ..كيبيع الملابس داخلية نسائية...

عصام : شفتي داك الحانوت الي لهيه ؟

لمياء"ضارت شافت فين نعت ليها " : اه مالو ؟

فرح : ديال سمحمد صاحبك ؟

عصام : اييييه نتي را كيعرفك ختي سيرو عندو امي فاطنة هو يقضي معاكم والخلاص انا نهضر معاه يطلقكم تساليو ولحقو عليا لقهوة ديال *** عرفتيها نتي ؟

فرح : اه عرفتها...

خلاهم ومشا هو خرج من القيصارية باش يبقاو على خاطرهم وهو ميتعصبش بكثرة الانتظار وخاطرو بات مات ديق...ولات لمياء حدرات راسها من بعد ما نغزتها امها وجراتها فرح بجنبها عطاتها الحماس وفرحات دخلو عند الولد الي وصاهم عليه عصام وبالفعل عرف فرح ...قالو ليه شنو بغاو وبدا يجبد ليهم كاع المحل عندو ...

سمحمد : هاني هنا تخيرو براحتكم والي بغيتوها حطيها هنا ا فرح تساليو وعلميني...

فرح : واخااا"خرج هو ومشات فاطنة هزات واحد لونسومبل بيض كيلوط وسوتيان ديال قطن وراتهم ليها "

فاطنة : هانتي بنيتي هذا بيض العروسة خاصها لبيض سعدك يكون زين ابنتي دخلي بالبيض وجديد ...

لمياء"هزاتهم كتقلب فيهم " : ههههه اويلي اخالتي هادو ديال جدة الله يرحمها هههههه

فاطنة : ااا ؟ وسمحي ليا ابنيتي منعرف لهادشي ديالكم...

لمياء : علاش مكتلبسيش سوتيان ؟!

فاطنة : اشن هادو ؟

فرح : سوتيامات امي فاطنة"ضارت عند لمياء" ههههه لا مي فاطنة تبارك الله صدرها ميحتاجش سوتيان باش يوقف ويبان داكشي من عند الله زين"نغزت فاطنة فصدرها كيف كانت كدير هي وصفاء وتغوت عليهم "

فاطنة"كيشدها هر" : اويلي نعل قحبة مك "دارت ايدها على فمها" ويلي استغفر الله العضيم...

لمياء"خرجات عينيها تا عضات فمها" : ويليييي

هنية"دارت طرف خمارها على فمها وهي تكحز لهيه " اويلي الحاجة نهاك الله ههههههه

فرح : ههههههههههه اويلي حشمي امي هههه

فاطنة"تصعبت" : نعل والديك الكلبة ياك تنقوليك نتي وصافا لا تقربو شاي ليا...

فرح : هههههههه "هزات واحد دوبييس فالابيض نيت مشبك وكيلوط رقيق قريب لسترينغ قالت را غايعجبها وراتو ليها" هذا زوييين يعجبك ؟

لمياء"عوجات فمها" : ممم لا شوي "هزات واحد فايدها كان شكل غييير سوتيان شبكة كلهم لاصق مع سترينغ ولونهم اسود" هذاااا الي بغيييييت حمقنيييي...

فرح : اويلي كحل المياء...

هنية : كحل ابنيتي مالك على حالتك...

فاطنة : لواه ابنيتي لون ما زين ...

لمياء"هزات كتافها" : اهء بغيتو حمقني ديما كنشوفو فالانسطا ومكنقدرش نشريه حيث معندي لمن لبسو هههههه

هنية : الله يمسخك يا بنيتي هذا منقول...لا تديهش دي واحد خور داك اللون لا"حمرات فيها"

لمياء"لاحتو بزعاف وهي تخرج عند باب الحانوت ووقفات"

فرح"هزاتو" : صافي خالتي خليه ليها را هي العروسة تلبس الي عجبها...خوديه وزيدي واحد بيض وخليها على خاطرها...

فاطنة : صافي خليها لا تهرسيش ليها خاطرها شهوتها فيه كتبقى عروسة خليها تفرح براسها...

سمحمد"بانت ليه لمياء واقفة يحساب ليه كيتسناو فيه مشا لعندهم" : امضرا ختي ...

فرح"هزات باكية دوبييس الي اختارت لمياء عطاتها ليه وواحدين بيضين وهزات بيرميدات الي عزلات ودوني وشي اخور جمعهم ليها فبلاستيكات " : شكرااا..

سمحمد : واش عصام نوا يتزوج ولا كفاش هههه

فرح : وااايه اخيرا شاف راسو اسيدي ..

سمحمد : وتي هنية عليه املي نوا الله يكمل بيخير...ايوى امتا نفرحو بيك نتي شحاال كان يگول ليا نجوج ختي عاد نتجوج انا...شتو كاع مابقى صبر هههه

فرح : وماكتابش ههههه

حركات ليه راسها وهي تمشي عند لمياء الي كانت واقفة بعيييد مقلقة وهي تجرها وحلات ليها بلاستيكة وراتو ليها شافت فيها وهي تغمزها بمعنى بقاي غير على خاطرك بالفرحة عنقاتها بجهد...

هنية : الله يرضي عليك ابنتي ويفرحك ...

فرح : امييين اخالتي..."خرجو من القيصارية من بعد ما كملو شنو بغاو هازين ومحملين فايديهم الا لمياء الي مهزات والو فايديها قاليك هي عروسة متهز والو هادشي علاش مخلاوهاش تهز معاهم..."

هنية"تسنات فرح تمشي تعيط لعصام وفاطنة صونا ليها تيليفون كانت صفاء وهي تقرب لبنتها ": خاصك الصبر ابنيتي صبر هاد الفگعة ملايقاش ليك فدارك كتبقاي بنت الناس وهما ولاد ناس ماشي فداركم نصبرو ليك ونهزو ليك الخاطر ...راك غاتعيشي مع ربعة النفوس منهم شيخك ...ردي بالك لهضرتك ولتاويلك الله يرضي عليك ...

لمياء : فرح دابا تزوج طال زمان ولا قصار وباهم مكيعمرش فالدار ممعاهمش تالهيه وفوزي على معاود ليا عصام نفسو لفوووق ميرضاش يتزاحم مع خوه لابد ميدير دارو ..."ضحكات" هههههه تانتي مع الوقت تاحد فيهم مغايبقا فديك الدار من غيري انا وعصام هههه...

.واقف قدام المكتب لابس casaque médical (اي لباس المشفى كيكون لفوق وسروال ديالو زرقين او خضرين) وفرجليه لابس صابو ميديكال ابيض...بحيث كان صباح حاضر لواحد العملية صغيييرة تدارت تما فضومين ديالو والي خدم عليها واحد الجراح معاهم....كيقرا فواحد الملف طبي قبل ميطلب من لانفيغمييغ يدخل ليه واحد الحالة دق الباب ودخل علي بلباسو العادي...

علي : ايهاااي ناس بداو هاد صباح ...

زين الدين : تعطلت على les cas ديالي بزاااف ...

علي"هز سروالو شوي وجلس فالفوطوي الي مقابل مع المكتب ديال زين.." : حضرتي l'opération ديال جاليل ؟

زين الدين"حرك راسو" : كلشي مزيان...

علي : مزيان..."ضار هنا وهنا ورجع شاف فيه بغا يجبد معاه الموضوع حيث هو علاش جاي اصلا قبل ميبدا تاهو خدمتو مع الحالات الي عند زين دين هما عندو حيث ولابد من الاشراف ديالو..." عطيني وذنك اولدي نهضر معاك...

زين الدين"هز فيه عينيه...حط الملف وجلس فجنب المكتب" : خبار الرباح ...

علي : حنان اولدي غادي تسطاجي هنا ...

زين الدين"حك شنايفو كيشوف فيه مالقا اش يقول من ناحية مباغيش ومن ناحية من حق علي انه يتصرف كيف بغا لان تاهو عندو نسبة فالمشروع..." : وشنو المطلوب مني ؟

علي : غير بغيت نعلمك..."ركز فيه شوفة مزيان بنضرة جدية" الامور هانية سالكة بخاطرك اولدي ولا لا ...

زين الدين : كوفيرميتي مع المعنية ؟

علي : نكذب عليك ؟ مزال منصيبش ندير شي حاجة لاما علمتك...البنت عزيزة عندي وهادشي غير عملي غاتقرا عندي سومسيتر جايا وباش نجيك لصراحة ماطلبات مني والو الحاج احمد باها الي هضر معايا باش تبدا عندنا حيث البروفيسور ديال العينين المخير كاين عندنا وهادشي فالصالح ديالها...مدة سطاج ماطويلاش بزاف...

زين الدين"وقف ومشا لعندو تحنى على ركابيه كيشوف فيه " : الحاج علي الكلينيك ديالك الي عجبك ديرو الي فيه مصلاحة قضيه الي سلك الدعوة يسر فيه...مادام الخدمة خدمة ماعندي اشكال ولا اعتراض...سوا بعيدة عليا ولا قريبة ماضرتني ما نفعتني هي فحالها وانا فحالي...الله يسر الامور الضو الخضر عندك"باس ليه راسو" منصيبش نردها فوجهك..

علي"تبسم": هههه الله يرضي عليك"وقف ساس حوايجو" صلاة عالنبي نمشي نبدل ونجي عندك ...

زين الدين : في امان الله..."خرج علي من المكتب وزين دخل لاول حالة كانت لواحد الطفل فعمر خمس سنوات كيعاني من مشكيل شفة الارنب خلقي...جالس فوق البياص وحداه مو شادة فيه...تحنى لعندو كيشوف فيه بكل حب وطيب خاطر فمو كامل مشوه بداك التشوه الخلقي....حط ايدو على رجليه ..

زين الدين : شنو البطل خايفين ليوم ؟

هو"حرك راسو ب لا"

زين الدين : وشنو هاد الغوباشة الي هنا"فك ليه حجبانو بصبعو" الابطال كيفكو هاد الغوباشة الي هنا...

هو"هز صبعو وحطو بين حجبان زين الدين ودار ليه نفس الحركة زعما تانتا فكها"

زين الدين"هز عينيه ف الام ديالو الي ضحكات ورجع شاف فيه وفك الغوباشة تاهو واستقبلو ببشاشة دوز ليه على شعرو وقف مد ليه الفرملي ليگانت اي القفازات الطبية.....بدا معاه فالفحوصات كمل وطلب من الام ديالو تجي توصل عليه المكتب اما هو حيد ليگانت ودخل المكتب ديالو من الباب الخاص بيه جلس فالكرسي كيدور بيه هنا وهنا حيث عندو روايد ومن الكراسا الي مصممين لكثرة الحركة بيهم.. جبد من المجر مذكرة لوغدنونص باقا جديدة تا دخلات عليه الام وابنها من الباب رئيسي " : رتاحي ميمتي...

هي : امضرا دكتور ؟

زين الدين : كل خير ان شاء الله...ولابد ليا من هاد تحاليل (كيهصر بدارجة مبسطة جدا حيث السيدة امية مغاديش تفهمو)

هي : نديرهم اولدي فاي مختابار(مختبر)..

زين الدين : فينما حب خاطرك اميمتي يمكن ليك ديريهم هنا الى معندكش عطيهم ورقة الاحتياج ديريهم بلاش...

هي : عندييي اوليدي..واخا

ناضت هي وولدها ومشات اما هو قبل ميدخلو ليه الفراملية الي معاه الحالة ثانية خلاهم كيوجدو و.دخل البيت فين كيصلي ولا باش يتكا يرتاح فيه مجهز ...مشا لواحد ماريو صغير حاط فمجر من مجورة ديالو الدوا...وجبدو منو باش يشربو تا مشات ليه عينيو لبواطة الي فيها الكرميط محطوطة من بارح نساها هزها باش يحطها فالمجر حلها يشوف لقاها خاوية تصفر..هز حاجبو كيقلب هنا وهنا مالقاهش قلب لهيه والو هبط هز كاع داكشي الي تما ووالو خاوية وعاقل على راسو مزياااان حطو فيه والبواطة ميمكنش يحيد منها الا اذا ما هزو شي حد وشكون من غيرو هو او المساعد ديالو الخاص او مولات الميناج...نادا عليه بجهد " : اسلاااااااام..."نسا راسو را فالبيت الداخل خرج من تما هز الفيكس كيف جاوبو" تحرك عندي هنا"غوت عليه تا قفز جا كيجري مفاهم والو"

اسلام : وي دكتوغ...

زين الدين"عينيه خارجين ب تخنزيرة " : ددخلتي لشومبر لدداااخل هاد النهار ؟ "

اسلام : لا لا مدخلتش كاع اليوم وحتى البارح اصلا يلاه بديت غير اليوم دكتور يمكن مولات الميناج حيث ضروري كل صباح كدخل تميناجي هنا..."

زين الدين"دار صباعو بين عينيه بنفاذ صبر هز ايدو وشير ليه باش يخرج..خرج اسلام ودخل علي لابس لبسة طبية ديالو تاهو لقا اسلام خارج وجهو صفر "

علي : ششش اش كاين ؟

زين الدين"تلاح فوق الفوطوي بعصبية تقولي جبل على كتافو تا غمض عينيه"

علي : اللهم صلي عليك ارسول الله...كاااع...

زين الدين"شكت تا سكت وخبط فوق طابلة قدامو " : ماتحكرش ماتحكرش مااااتحكرش...فين طار فيييييييييين..شكون القوااااااد الي دخل هناااااااااا ...

علي : تهدن اولدي دابا يتلقى...

زين الدين "شاف فيه بشرار فعينيه" : فين فيييييين ؟ شكون كيدخل من غيري هنا نتا ؟ نتا اش ليك بيه تاتهزو ؟ اااا لاااااااااااش كسدوزو لحاجة ماليها...

علي : الى توضر عاود فحالو اولدي رخي النفس...

زين الدين"تبسم باستهزاء" الله نعاودو علاش لا ..."وقف وقرب لعندو" نعاود ريحة مولاتو فيه ؟ نعاود حجايتي معاها ولا تبسيمتها ملي شافتو ولا اش نعاود اااااااااااااش"تا بح ليه صوته..ماقدرش يهضى علي مرة اخرى...خلاه زين ومشا لمكتب هز الفيكس من حداه عيط لاسلام"... مولات الميناج دابا عندي..."حط الفيكس ورجع تلاح فوق الفوطوي وفايدو البواطة.."...

علي "حس بالي حنان تقدر تكون شافتو لكن استبعد انها تهزو حيث اولا متقدرش وثانيا مافيهاش هادشي ...مقدرش يقوليه را انا رسلتها البارح تقلب عليك حيث لا عرف يطحنها وهو عارف قيمة داك الكورميط عندو مقدس...ان ليه تيليفون زين شاعل ضو كيصوني حداه" : تيليفونك اولدي انا مشيت سبقتك...

زين الدين "ضار جيهة تيليفون قشع النمرة هزو بزربة وجاوب " خبار الرباح ؟ "رفع حاجبو كيسمع حتى حك على صدرو وغمض عينيه بنوع من الراحة غير شوية وخا حرقة الكورميط فقلبه"... الله....

يتبع...