رواية ولادة من رحم الفساد

ولادة من رحم الفساد

ولادة من رحم الفساد الجزء السابع

من تأليف سناء بوعبيد

94 دقيقة للقراءة 1 تعليق

    محتوى القصة

    100%
    المحاذاة
    تباعد السطور
    الهوامش
    رواية ولادة من رحم الفساد

    اش بقا مايتقال بعد الذي قييل ؟! ليس هناك سوى لحظات صمت هاد المرة سيطرات عليهم فالطريق من بعد ماقال داك الكلام الي حس بيه الحسين نابع من زين الدين بصدق قالو وهو خارج من قلبه ...يعني هذا الشيء فات عذاب الضمير يعني انها سيطرات على تفكيرو ...وهادي ماهي الا بداية لشيء ما ...شنو هو ؟! هو والله بوحدو الي عالمين او ممكن يكون معالمش زين الدين بنفسو شنو تفسير لهاد كثرة التفكير بيها حتى ولا يحلم بيها زوج مرات على التوالي ...داكشي علاش غايخليها للايام تثبت ليه شنو هو ...وعلى الله فليتوكل المتوكلون...

    مسافة الطريق نيييت حتى كانو داخلين للمجال الحضري لمدينة الدار البيضاء كان الليل سياقة بدون توقف وبسرعة خلاتهم يوصلو مع العشاء خمسة سوايع وهما شادين الطريق...وصل الحسين والحاجة ام هاني لدارهم على موعد اللقاء الغذ ليه مع الحسين ...عاد شد الوجهة نيشان لفيلا الصغيرة ديالو ف عين الدياب...مع الدخلة لقا العساس ديال درب واقف مع واحد الكلب مالينوا ديال الحراسة تما ...

    العساس : خويا زين الدين على سلامتك ...غيبة طويلة ..

    زين الدين"قاد طاقية الي على راسو وبين صباعو سيجارة شاعلة.." : الله يسلمك ...كلشي مزيان هنا ؟!

    العساس : كلشي هو هذاك ..الحاج الغالي كان البارح هنا الى فعلمك اخويا..

    زين الدين"ساط دخان كيشوف جيهة دارو كيحرك راسو بمعنى ااه" : فعلمي فعلمي ..."بقا كيحك فلحيتو ويشوف فنقطة بعييييدة...حتى ضار ورك على مجر جبد منو واحد ضرف صفر صغير فيه مبلغ مالي ومدو لعساس"

    العساس : مزال وقت خلاص شهر ادكتور..(كيخلصو ساكنة الدرب شهر العساس دايرين ليه شهرية كل شهر كيحطو قدر مالي ويعطيوه ليه)

    زين الدين"غمز بجنب" : فلوس العيد ابا علي.."حيث قرب العيد الكبير .."

    العساس : الله يرحم بيها الواليدين ادكتور ويكثر خيرك والله يعوضك..."شير ليه بصباعو وزاد دخل الفيلا دخل الطوموبيل لبلاصتها ونزل كيشوف فالانحاء كان واحد جردينيي كيقاد فجردة ... دحل لداخل كيسمع فالهضرة ديال توبا مع بنتها فالتيليفون ...

    توبا : وجي متعطليش اويلي كاع هذا تعطال دابا يجي زين الدين ولا يدخل باك يسول على غفلة ؟!

    ضحى : بابا كاااع مغايسولك عليا هههه زين الدين ماشي شغلو فيا عندي واليدين ...

    توبا"شافت فيه واقف مربع ايديه ومبند تما كيسماااع وهي تفافا تا خرجات عينيها ولات تصرط" : هاهو جا نيت هههه

    ضحى"بالخلعة" : انا جايا دابا...

    توبا"قطعات معاها وهي تمشي نيشان لعندو مادا ايديها تعنقو" : الله يا وليدي الله ونورتيني ...

    زين الدين"تحنى مدور ايديه عليها معنقها" : كااع...هي كانت مضلمة عليك

    توبا"باقي معنقاه وكطبطب ليه على ضهرو" : ريحة الغاليين (كتقولها عليه بزاف فحال اللقب)...ديما منور عليا راك ولدي قبل متكون ولد خويا ...كيف بقيتي شوية ؟!

    زين الدين"باس جبهتها" : اللهم لك الحمد..."مشاو جلسو غير تما.."

    توبا : تعشيتي ولا مزال ؟!

    زين الدين : مزال اميمتي..."شاف ساعتو"علميهم من هنا يوجد دغيا (حيث ضروري خاصو ياكل على قبل دوا) ورتاحي نهضر معاك...

    توبا"علمات البنت يوجدو ليه عشا خفيف ورجعات جلسات حداه" : خبار الخير !!

    زين الدين"داير ايدو على حنكو" : شنو ناوية مع راجلك "وقفها بايدو" عطيني لكلمة لاخرة ...ناويا ترجعي ليه "ضرب بصبعو فوق طويبلة تما" وقت الي بغيتي تجي هنا دارك ...لا كان هو ميعتبهاش عندي ...انا معاك فالي بغيتي..."حط ايدو على صدرو" مناوي غير الخير ...لا جيتي عليا عيشتك معاه ممسلكاش وهو الي فراسو فراسو...

    توبا"ضحكات باستهزاء" : ههههه هو العشرة الي بيناتنا مدارش بيها جا تا شاب ورجل فالدنيا ورجل فلاخرة عاد بان ليه زواج بغا الولاد هههه...كون ما تدخلتي نتا وضد فيه كان غايتزوج بهاديك البنت فرح...

    زين الدين"دور وجهو لهيه غمض عينيه" : العمة نساي عليا دوك الناس..تگدمو بفعايل راجلك ..نسايهم عليك...

    توبا"كتلعب بواحد الخيوط ديال مخدة مركزة فيهم وكتهضر" : اودي صعييب نسا صعيب راني كنبقى امراة ولدي ..منساش واحد الوقت بغاها ضرة عليا ...

    زين الدين"خبط فوق الطابلة تا قفزت" : ساااااليييييينا سالينا راني هضرت جوج كلمات نساي عليا الناس موصلونا بتاحاجة...الي وقع وقع جبتها لراسي والي عطا الله عطاه ..دعي الله يسمح لينا من جيهتهم ..."خنزر فيها بجدية" مباقيش يعتب هنا ماااباقيش يعتب هنا الى بغا يشوف بنتو تمشي عندو ..بغات تعيش معاه مكاينش الي يشدها تما دارهم وهنا دارهم ...مبقا بينك وبينو رزق هادي دارك معايا حدايا تايدي ربي واحد فينا"قالها وعينيه الخضرين خارجين يخلعو" علميه بهادشي اخر مجية ليه كانت البارح ...

    توبا : واخا ولدي غير تهدن ميكون غير خاطرك ...

    زين الدين"حيد طاقية على شعرو وخربقو بايديه بتنفس بقا شحال عاد نطق وهو كيشوف فيها بتركيز وتحذير كيشير بصبعو" : ولاد الاصل وبنت الاصل نسايهم عليك "على فروحة وخوتها" سالينا معاهم خليهم عليك فالتيقار كل شد طريقو ...ماتجبديهم لا فهضرة لا فمجمع ...

    توبا"شافت فيه بنضرة من نيتك" : وعارفني نديرها اولدي ..

    زين الدين"وقف وتم غادي" : انا علمتك وكااان ...

    في هاد الاثناء قدام واحد المركز ديال اللغة الامريكيةAmerican Language Center (ALC)...خرجات من تما هازا صاك ديال لابتوب فكتفها وشادة تيليفون فايدها كتكتب فيه داخلة الواتساب كتهضر مع الكروب ديالها بنفخة وعجرفة خصوصا من الي عرفات باها غايحل سلسلة محلات المجهوهرات وهي ما قادها ارض وماهزها ريح ...وغاتعرف ببنت الوهراني ماشي من تريكة البغدادي المعروفة عندهم تما....كتهضر وتعوج ففمها ...

    ضحى"دارت اوديو" : نووو مغاديش نمشي معاكم الليلة غير سيرو...جا ولد عمتي غادي نتعاو كاملين..."جاوبتها وحدة من الكروب اسمها عايدة جاتها لبريفؤ وهضرات "

    عايدة : قولي سيييييدي زين الدين ...متعرضيش علينا نتعشا معاكم اصحيبتي غير نشوفو..

    ضحى : وتنشوفو انا انا وكيخلعني بقا غير نتي ..

    عايدة : ههههه لا حبيبة هاذيك را الكاريزما الختورية ..كمية تقولية الي فيه ميمكنش وخا كيبان واعر وصعيب ...

    ضحى : خهههه غا واعر وصعيب وسكتي ؟ اربي مسكتي هاهو جا ومنصيبش نبقا معاكم مافيا ميسمع لغواتو ...

    عايدة. : اححح حمش حمش ....

    ضحى : هههه مممم اوغوفواااغ بايبيييي... ها مهدي جا نتشاوفو غذا..."خشات تيليفون فصاكها وطلعات فواحد الهامر humer h3 موديل السنة الي فاتت...شافت فيه وتبسمات سلمات عليه بلابيز " صافا صافا !!

    مهدي"شاب فعمر 25 سنة ذو ملامح عربية ممزوجة بجمال اوروبي مع اللحية المقادة ونضراته الجذابة والجسم الجذاب وجولته خلاتو يكون اوسم واحد كتقابلو ...بحكم الام ديالو كندية من اب مغربي كيقرا ف كندا جا عطلة طويلة الامد لمغرب على قبل شي مشروع ديال باه ف كازا " : تعطلتي لا ؟

    ضحى : غييير سكت واحد البروف الي شدنا كيشرح لينا واحد الاكسبوزي خاصنا نوجدوه من دابا شهر مي ماشي اي اكسبوزي فييه نييييت ميدار ...

    مهدي"قرب لعندها كيشمشم فشعرها" : عصبوك ليا بب

    ضحى"تبسمات بخجل وقلبها بدا يضرب" : مممم هههه

    مهدي"دوز على شعرها بصبعو عاض فشنايفو كيشوف فجمالها الرباني الي عطاها الله" : بزااااف بزاااف والله ..."تقاد فالجلسة وحرك السيارة" شنو فين نتحركو دابا ؟!

    ضحى : غير وصلني لحدا طاكسيات احم جا خويا الكبير مجموعين فالدار وماما كتعيط باش نحضر ..."هزات عينيها لفوق" افففف الصواب ديال والو ..

    مهدي : تقدري تقولي ليهم بالي عندك ميدار وصافي ...شنو هاد القضية ديال تحضري حيث جا خوك الكبير ؟!

    ضحى"يلاه بغات تهضر وهي تصوني ماماها ووراتو تيليفون" : شفتي..."ضرب الفولون بشوي " وي ماما ؟ عاد سالينا انا جايا ..احم صافي ماما بلا قوة الهضرة ..."قطعات معاها وشافت فيه لقاتو معصب بغات تحط ايدها عليه ورجعتها شوي بغات تحطها وهي ترجعها تا ضار لعندها كيطلع ويهبط فيها بمعنى شنو "

    مهدي : راجعة ؟؛ "حركات ليه راسها وهو يدور كيدوز على لحيتو بعصبية وما عاجبو حال" نتي كل مرة خاصك دخلي بكري ؟! بزااف ا ضحى ..ميمكنش ليا نتلاقا بيك فالنهار ...نتي يا عندك دي كوغ فالنهار يا دي كوغ فالليل وانا مامساليش ليك كل نهار نحاول لقا ليك وقت ؟! را عندي خدمتي خاصني نكمل لوليد البروجي ونرجع فحالي ل موريال ...

    ضحى : انا يلاه عرفتك مكاملاش شهر هذا خاصك تصبر ليا وعارف بالي مزيرة ف القرايا وف هاد سونتر ...اما دار غير مسالة انه انا مزال ما استقريتش مع بابا ...واليوم جا خويا الكبير يعني ولد عمتي راك عارف خاص كلشي يكون حاضر...وتا انا بابا مضغوطة معاه ف المشاريع ديالو (كذبتها باش تبان بالي تاهما ناس ديال مشاريع الكبيرة )

    مهدي"شاد فالفولون وكيضرب بصباعو" : دابا ديري معايا حل !!

    ضحى"عضات شنايفها كتفكر" : jeudi نتلاقاو مع 19:00

    مهدي : غادي نتعطلو ...

    ضحى : فين غانمشيو ؟!

    مهدي : عندي واحد لانيف ديال بنت الفوغنيسوغ الي شاد من عندها السلعة الكبيرة ...

    ضحى : فين دايراه ؟!

    مهدي : فواحد الفيلا ف دار بوعزة ...مي ماشي ساعتين حتى للصباح ..."وقفها بايدو" سي سي معنديش مع سهير ولكن البيزنس ايز بيزنس...داكوغ ؟!

    ضحى"بتفكير" : واخا داكوغ"تبسمات ليه ورجعات تشوف حتى لقاتو حط ايدو على ايدها وجرها باسها وعاود حسات بالفراشات كيلعبو فكرشها خصوصا فاش قرب بزعامة اكثر وخشا راسو فعنقها وباسها فيه وعاود تا كحزات وجهها كتصرط فريقها" مهدييييي...

    مهدي : شششش متحركيييش ..."طلع ببوساتو الخفيفة حتى لتحت وذنها وهو كيبوس وهي كترخاااااا ..هز شعرات من شعرها ودارهم ورا وذنها وبقا كيبوس حتى وصل جنب فمها وخطف بوسة وعاود وريحتو كدخل مع نيفها لعروقها كتخلي قلبها كيضرب بجهد تا تزنگو حناكها واستسلمات لشعور الحب الاول الي بداها من اول ما شافتو العام الفايت وهي كتكراشي عليه من الي جا ك ضيف شرف ل واحد الحفلة داروها ف المعهد..." ففف صافي دابا يجي شي بوليسي ...

    مهدي : مغايهدرش معايا كنعرفهم كاملين ...ودابا انا منبوسش حبيبتي ؟؛

    ضحى"قادت شعرها بحرج وقلبها بغا يخرج من فمها " : احم ههههه ..وصافي ماشي دابا ..

    مهدي"هز ايديه" : d'accord d'accord ma belle..."بقا كيشوف فيها حتى عض شنايفو مكرهش يتكيها تم...ساط النفس من فمو وكسيرا "....

    وصلها نيشان لعند طاكسيات وتسنى حتى زاد بيها طاكسي وهو يقلب الدورة وفايدو تيليفون كيدوز لخط لشي وحدة تجي دوز عندو الليلة حيث الى ما قداش يتفرگع تما هههه ...اما هي مسافة الطريق حتى كانت قدام الفيلا خلصاتو ودخلات كتزرب وتقيس فحناكهاا لا يحصلها زين الدين منهم دخلات تجري لقات مها جالسة كتفرج وتسنى فيها اما مراد مكاينش سافر يفوج شوية ويرتاح من تعب المرهق ديال الخدمة ...

    توبا"بعصبية وكتهضر بالحس" : فين تعطلتي تال دابا ؟!!!

    ضحى : تا فين اماما را مزال الحال اويلي يلاه الحداش ؟!

    توبا"خرجات عينيها وضربات حناكها" : اويلي كنتي ناوية ماتجي تايصبح الحال ولا ؟

    ضحى : وماما را كازا هادي كلشي فايق...

    توبا : ياك قلت ليك غير تخرجي جي ؟!

    ضحى : ماماااا را مكنسالي حتى ل تسعود ونص..

    توبا : ماشي ديما ماشي ديما ...ياكما باغا تولفيها ليا هادي كل نهار ماتجي تا اش من وقت بمسبة را كتقراي بالليل ؟!!

    ضحى : واش انا فالحبس اماما !! اويلي باقي شي بنت فهاد الزمان هذا كتسوق لوقت ؟! دنيا عمرااات اماما مبقاتش كتسد كلشي ولا خارج صباح ليل عشية ...واااه اماما بزاااف على ضغط...

    توبا"مشات كتزرب ليها حطات ايدها على فمها باش تسكت" : ششش ابنت لهم سكتي داابا يكون جايا ويسمعك ...جاب الله طلع نعس بكري وقلت ليه را عندك قراية بالليل...

    ضحى"حيدات ليها ايدها" : باش من حق يتحكم فيا هو !!!

    توبا"غززات سنانها" : سكتي سكتيييييي بغيتي خلا عشتك ياك ؟!الى مابغيتيش يتحكم فيك سيري عند بوك سكني معاه وتحملي مسؤليتك ...

    ضحى"خبطات رجليها بغيض" : كوني هانيا دابا نهنيك مني ...يخ"طلعات تزرب لبيتها لفوق مخليا توبا دايرة ايديها فوق راسها وخايفة لا يفيق لاخور وماهي فخير معاه "

    شروق شمس يوم جدييييد بطبيعة الحال بعد ايام قبل دازت ممطرة هاهي اليوم كتشرق في مدينة الجديدة...من بعد ما خرجو ل محلاتهم يترزقو الله قبل عصام مشا نيشان لعند المحامي باش يعرف مستجدات قضية صطوف ...الي بعد اسبوع غاتكون المحكمة فالقضية ديالو فشرد اعز صحابو كيحاول جااهد باش يخرجو باقل الاضرار ...كمل وداز لمحل ديالو باشر الخدمة غير وحدو حيث معاد عندو امتحانات ف لافاك هاد الايام هذاكشي علاش غايبقى فالحانوت نهار كامل ويتغذا فيه وبالفعل داكشي الي كاين حتى اذن العشا سد الحانوت وهز معاه واحد الكيلو ديال الكفتة دارها فميكة ومشا تقدا الخضرة من تما الي غايخص وراجع طالع ليه دم حيث خاص تاني يقاد العشا ويجمع الدار وهو عيااان باغي يموت بالعيا ...جاي ويخمم حتى وصل لدار تلاقا بفوزي داخل هو وسيمو جايبين من عند نجية الحريرة مخليا ليهم حقهم ...حتى دخلو ...بداو يشمشمو ريحة طاجين فوق الفاخر وريحة تسياق باينة عاد مسيقة...

    فوزي : المخنتر بوك سيق دار ؟!

    عصام"طالع ليه الخز من العيا وتدهشر" : اش غايجي يقلون هنا...دخل الحبس تانتا...

    سيمو : تا المخنتر يسيق ليك دويرة ؟! هههههههههه سخيفة تاب خههههههههه

    تخطاهم عصام ودخل كيشمشم وفوزي تاهو وسيمو هاز كسرونتو تاهو يشمشم تا حلو الباب مع دخلو ريحة النقا وسانيكروا ...ودنيا مجموعة وكلشي فبلاصتو...الحيوط نقييين دخلو البيت لقاوه مسيوس ومجموع مزياااان وممسوحة البلازما من الغبرة ...دخل فوزي وسيمو وعصام لكوزينة لقاوها تشعلللللل كلشي فبلاصتو فوق لافابو يصفرر الماعن فبلايصهم ...مشا عصام لبيت يقلب حيث حس بيها بالي هي الي جات وفوزي كيقول را فاطنة الي جمعات دنيا مع مقالتش ليهم را غاتجي عند بالهم مزال اقل من شهر وترجع بينما كملت سطاج ...

    عصام"لقا البيت مجموووع كامل ومستفة الحوايج فالماريو...هنا تاكد بالي هي حيث تاحد مكيوصل حوايجهم فالجيران وهي وحدها الي كتقرب لحوايجو الخاصين وتطويهم ..ماحسش براسو تا تبسم " : فرح ..."خرج كيزرب طل على خوه وسيمو لقاهم جالسين يلاه غايقولها ليهم تا سمعو صوت رجلين هابطين تا دخلات عليهم دايرة زيف حياتي وحناكها كي طبل هعههه ودايرة طابيلة شقا هازا شبكة صابون وتلهت تا وقفات عليهم."

    فرح : فففف سخفت "ضارت لقاتهم واقفين بثلاثة مستفين كيشوفو فيها عصام مبسم وفوزي كيرمش وسيمو كيحك فعينيه يتاكد" امالكم !!!

    عصام : الله

    فوزي : اااااااحححخ الله شكون جا..."جاتو البكية" وراني يتيييييييم اخويتي يتيييييييم"

    سيمو : اللحيمة فدجين هادي ولا غيست اخوتي ...

    عصام"سرح ايديه كيشير ليها باش تجي عندو" : اجي ابنت الهم اااجي...نعل بو مك ...

    فرح"جابو ليها ضحكة مشات كتزرب تلاحت عنقت عصام الي حاوطها بايديه معنقها تا خشاها فيه كيبوس راسها وحناكها وجبهتها بغا ياكلها بالبوسان توحشها بزاااف"ههههههه اصافي كليتيني ههههه اويلي كاااع ...

    فوزي"جرها هو وسيمو تاهما مخلاوش فيها حقهم ما طلقوها تا ولات تنهج " : اسيدي ياااااربي ربي شاف فينا ...

    عصام : لا باقيش طولي رحم بااااااك ...

    فرح : صافي كونو هانييين هههه ...

    سيمو : اش دايرة ا شميشة لعشا ؟

    فرح : طاجين ديال دجاج وزيتون ...ياكما جعتوو !؟

    عصام : شكون جابك ؟!

    فرح : جيت مع با مشا يصلي شوي ويجي وصباح غايمشي بكري..."مشا عصام يبدل وفوزي دخل لدوش بقات غير هي وسيمو حتى جراتو بينو وبينها" احم ص صفاء مجاتش ؟!

    سيمو : مزال قالت ليا بعد غذا تجي وغاترجع لقات شي سطاج فازمور فواحد لابوراطوار تما...

    فرح : مسولاتكش عليا ؟!

    سيمو : فرح من خوك سمعي مني لبديها تاتجي راسها لا تبحرتيش عليها وميكون غير الخير علاه نتي قلتيها زينة ؟! لبدي طرح...

    اليوم مع الصباح بكرييييي فايق كيلبس فحوايجو....تقاد وهز اللوازم والاوراق ...نزل لقا ضحى تاهي نازلة لابسة مستور هاد المرة وعلاش وزين الدين كاين ....

    ضحى : صباح الخير خويا"مشات سلمات عليه حيث مشافتوش فاش جات وخرج بكري ومارجع تال اش من وقت"

    زين الدين : عالسلامة !!! فين كنتي غابرة نتي "رافع واحد الحاجب..."

    ضحى"بدات تصرط فريقها جاب ليها الله را حصلها مع مهدي وهو را يعرااااف اش كدير واش مكديرش غير هو توقف على البحث من وراها وخلا الامر لباها او لواليديها من لاخر وهادشي الي هضر معاه فيه الحسين يعني مادام عندها واليديها هما الي يدخلو فيها وخا تكون عايشة على مصروفو .." : و والو غير كنجي حتى لعشرة مع كنخرج مع تسعود من سونطخ اميغيكان حيث درتو هاد العام و راك عارف من تما لهنا خاصني شحاال عاد نوصل...

    زين الدين"بقا كيشوف فيها تا حدرت عينيها بالخوف وهو مطلع حجبانو فيها حاضيها كيفاش كتصرف وطريقة هضرتها تا هز عينيه فوجهها" : اجي تبعيني "قالها بداك صوت خلاها ترعد تابعاه وتحسب فالخطاوي الي جاوها طول من حياتها...حتى وصل تما عند الباب فوق واحد الماريو صغير جبد من مجر ورقة وستيلو وكتب لفيها وعطاها ليها " غذا فالصباح قبل متفطري ديري هاد تحاليل فهاد لابوراطوار وسيري بلاش انا نجيبهم معايا...

    ضحى : اش درت "بالخلعة يحساب ليها شك فيها حاملة وهي مدايرة والو هههه" والله مادرت شي حاجة اخويا..

    زين الدين"رفع حاجبو" : ششش مالنا ؟! علاه نتي شاكة فشي حاجة ؟"حركات ليه راسها ب لا وحابساها البكية فين هي ضحى الي كانت البارح تخرج عينيها" يلاه تحركي دخلي "دخلت تجري وهو مشا نيشان لسيارته ديمارا وخرج نيشان شد طريق المدينة بالضبط عند واحد الشركة كبييييرة ديال التنضيم ديال الحفلات تريتور ...مع دخل لقا السكريتيرة تما عطا الاسم ديالو ودخلاتو فورا عند المكتب ديال المدير العام لشركة ...لقا غير واحد السيد تما نايب عليه ..

    هو : دكتور البغدادي مرحبا ولدي مرحبااا"تسالم معاه"تفضل جلس...

    زين الدين"جلس فواحد الكرسي من كراسا تما ديال طاولة الاجتماعات طويييلة حط الكارطابل ديال ماك و ورجع بالكرسي شوي تا حط رجل فوق رجل نفرقهم شوي بطريقة رجولية ...حك نيفو قبل ميدخل فالهضرة" : سعادة المدير ماجاش ؟!

    هو : مزال ماهضرش معاك ؟! قاليا غادي يعلمك ...

    زين الدين "كيحك فلحيتو وكيهضر" : سي سي فعلمي..دهوة المشاغيل وشي مشاكيل لوقت فين نجي ماكتبش مولانا ..

    هو : داكشي يمكن باش مافخباركش ..مشا ل سويسرا كاين واحد المؤتمر تما غذا بالليل يوصل لهنا...مي الى ماشي مشكيل حتى يجي ولا نتعامل معاك مبدئيا انا الى قبلتي علينا دكتور ههه..

    زين الدين : الله اودي فحال فحال الحاج منصور...على بركة الله ..

    منصور : بون Voulez-vous boire queqlue chose"تشرب شي حاجة بعدا ".. après نعيط على ليكيپ باش نهضرو مبدئيا ؟!

    زين الدين"فطر قبل فواحد الكافي عاد جا عندهم" : نيسبريسو .."حرك ليه منصور راسو ومشا خرج يعيط على الي غايهضر معاهم كون الشركة هي شركة من احدى مجموعات شركات اشهر تريتور فكازا او ممون الحفلات وهي شركة تنضيم الحفلات هي الي دخل ليها دابا...حتى تحل الباب ودخل ريان جاي كيلهت حيث تعطل عليه..."

    ريان : ففف على طريق شحاال عامرة يا خويا ...سموحات تعطلت..

    زين الدين"كيكتب فتيليفونو وكيهضر معاه" : الوليدة مزيانة ليوم ؟!

    ريان : لا الحمد لله مزيانة لقيتيني كنهضر مع واحد صاحبي يشوف ليا شي فرملية تجي دير ليها سوان فاش تخرج غذا ...

    زين الدين : غذا تكون عندك ...ماتهز ليها هم وعشية نجي نشوفها...منها نسواني ليها راسي ...

    ريان : ايه واخا الله يحفضك ليا خاي..."تحل الباب ودخلو ليكيب لقاعة الاجتماعات منهم بنات ودراري مدخلين البيسيات معاهم وخلاص داطاشو را عندهم تم .. دخلو لزين الدين قهوته .."

    منصور : نبداو سي البغدادي ياك ؟! "حرك ليه راسو"بون "بدا كيهصر الحاج منصور على المشروع الي غايكون الافتتاح ديالو بعد شهر تقريبا وخاص يكون بطريقة الي بغاها زين الدين بكونه هو مول المشروع ...صونا ليه تيليفون وسط الاجتماع وقف وخرج نعتو ليه البيرو فين يدخل الى بغا يهصر بخاطرو ..كونه وقف واحد اللحضة تا علمهم بالي عندو اجتماع صغير هاتفيا ضروري ...دخل لبيرو وجلس كيهضر براحتو "

    زين الدين"بعصبية" : كثرتي عليا اللغى البلا البلا بلا فايدة ممدوزاش ليا ...لارض كاينة تما قضي الغراض "شاف فساعتو التاريخ" قبل رمضان وجد ليا كلشي ...با الحسين يعلمك بالي خاصك ..."قطع تيليفون" ينعل ..."عض لسانو مشا دخل ناعل شيطان ... لحق عليهم مالقاش منصور بداو كيوريوه الافكار فداطاشو وهو مربع ايديه عاض شنايفو مركز مع داكشي حتى دخل ووقف ليه عند راسو حط ايدو على كتفو "

    منصور : دكتور هذا ديالكم نعماس ؟! قالت ليا فام دميناج يمكن طاح ليك شافتك فاش كنتي كتهضر وطاح.... الى ماشي ديالك مي ضروري نسول سي نو نحطوه فالاستعلامات...

    زين الدين"حدر عينيه بان ليه كورميط فيه حجيرات غوز ذهب ..طاح ليه ديالها الي جاب ليها فالخطبة ورداتو ليه حطو فاللوازم الخاصة ديالو .. حرك ليه راسو بثقالة شد الكورمييط شحاال كيدوز عليه بصباعو ويتلمس فيه نساه فجيب الفيستة ...هز فيه عينيه " : يرحم من ربااك"حاط ايدو على صدرو وبشكر ليه غمض عينيه وحلهم" ديال مالين دار (هنا القصد يا اختو او مو او مرااااته بمعنى الاحترام الي كيساوي احترام عرضه) ...

    على صوت المنبه الي حققات يوم امس ..حلات عينيها شحاال وعاود رجع صونا تا هزاتو طفات الغيفيي شافت الساعة كانت سبعة صباح ناضت بالخف لدوش باقي شوي الحال...غسلات مزيان وخرجت البيت جبدات ماتلبس حيث شوي وغايجي جدها باش تخرج معاه لعند سيد الي تدخل ليها باش تبدا سطاج ...لكن فين وعندمن هي عارفة شكون لكن المكان عاد غاتمشي باش دير اول مقابلة ليها ...بكل حماس وخا حاسة بالنقص كون اعز واقرب وحدة ليها مكايناش معاها...فراق مؤقت بيناتهم حاسا براسها ناقصة وخا الحماس مافيهش شغف فرحتها ناقصة بلا بيها بلا تنمرها بلا ضحكها وضصارتها بلا هبالها ...ملي حلات عينيها وهي وياها عمرهم عرفو شنو هو نتخاصمو ...لكن الضروف كانت اقوى ان هاد رابط الي بيناتهم ميتقاسش...

    فرح"تنهدات وهي كتفكرها كيقوليها واحد راس سيري هضري واعتاذري وصحبتكم اكبر من انها ترجعها فوجهك وخا تقولي الي قلتي ميستاهلش ضيع وعقل كيقول خليها لايام وراسها الي تحل بيناتهم...هزات سروال دجين وتريكو صوف فلون الكراميل عريض قريب لركابيها..لبساتهم ومشطات شعرها خلاتو مطلوق ..تقابلت مع المري معلقاه فباب ماريو ودارت فوندوتان خفيف وماسكارا برزات رموشها الي مكيبانو حتى كديرها بحكم صهبين (صهباء الفتاة الي شعرها احمر وغالبة عليها شهوبية فشفار كيكونو مباينيش الا اذا حققتي فيهم) وگلوص مات خفيف قريب لون الفم...حاولات تقاد وجهها بدون ماتكتر ميكاب بحكم عندها مقابلة خاصها تكون مقادة وانيقة عاد رشات بارفان ديالها وهزات واحد تريكو الخايط طويل مفتوح بصدافي دارتو فدراعها وهزات شكارة الي فيها مستلزماتها من اوراق وشنو غاتحتاج عاد صويك فدراعها ...لبسات تقاشر وخشات رجليها فبانطوفة مشات وجدات ليهم الفطور وهي فالكوزينة تدق الباب ومشات حلات لقاتو جدها ..

    المحجوب : صباح الخير تاغونجا هههه

    فرح"باست ايدو " : صباح الورد ابا جدي..دخل دخل لقيتيني غانحط لفطور خههه "مزال كتهضر معاه تا خرج عصام كيتفوه ويحك فعينيه لابس غير شورط وبيل سماطي.."

    عصام"بصوت مدعدع بنعاس" : صباح الخير "سلم على جدو" مبكرين لا ؟!

    محجوب : نفطرو عاد نتيسرو ان شاء الله ...

    عصام : اممم"كيحك فراسو ويتفوه..شاف ففرح وسولها عين مسدودة وعين محلولة" شنو درتي نتي ف محو الامية ؟!

    فرح : ماتجمع ليا تاواحد يلاه زوجات ودوك ديال داك العام مكملوش وحدة داوها ولادها لبرا ووحدة تاهي ووحدة تزوجات مخلاهاش راجلها وشي مبغاش يرجع ولاخرين يلاه شي خمسة الي بغاو يجيو ...مسلكونيش غادي نقدم استقالتي الى جاب الله من بعد ندخل مع شي جمعية...

    محجوب : مكاين لاش غا هاد الخديمة زينة ليك تا توفقي فالدولة لا دفعتي لتعليم ولا شي خدمة من غيرو...

    عصام"حرك راسو ومشا لدوش غسل حالتو وصحصح ورجع بدل حوايجو تا ناض فوزي تاهو ...تجمعو على الفطور كيف العادة تا وصل الوقت وهي تمشي لبيتها جابت باقي حوايجها وخرجات لبسات بوتيو حد الكعبة حتى وقفات ووقف عصام مد ليها شي فلوس الي تحتاج تا حلف عليه جدو ميعطيها" : وايلي ا با ؟!

    محجوب : عليا بليمين متعطيها ريال هاني معاها ودابا نعطيها مالي انا اش كندير ؟! راني باها تانا...

    عصام"هز ايديه" : ماگلنا والو دابا سمح لينا اسي...

    سلمات على خوتها وخرجات برفقة جدها كان جايب طوموبيل نيت ركبات حداه وزاد بيها لوجهة بعيدة شوي واخا فالمدينة حتى وقفو قدام واحد البناية تما ونزلو بزوج هز تيليفون دوز الخط لسيد الي داير معاه ...

    فرح : معاهم هنا ياك ؟!

    المحجوب : وااايه ...ياك وريقاتك هما هادوك ابنتي ؟!

    فرح : ممم هما هادوك ...غير دوموند و سيفي وفوطوكوبي د لاكارط الي قاليا و ورقة التامين فيها عام ...

    محجوب"شافو خارج " : هاهو ...اعالسلامة سي البشير اه اه اه غيبة هادي هههه"تعانقو" ياك بخير دار بخير خوتك بخير هاني ...

    البشير : ولله الحمد ..اش كاين هادي هي البنية "شاف ففرح" وريقات الي عطيتك تجيبي واجدين ياك ؟!

    فرح : وي واجدين ...

    البشير : غاتسنى هنا شوي سي المحجوب فشي قهيوة هنا بينما طلعتها لادارة..

    المحجوب مشا لواحد القهوة تما مقابلة مع البناية وهي تبعات السيد الي كان داير واحد البادج ولابس لباس اليونفورم ...تبعاتو حتى ضارو جيهة مدخل فين كيدخلو الموضفين ديال الادارة هزات عينيها وهي تقرا اسم المصحة الي جات بعيدة على دارهم بشوي يعني خاصها مركوب او وسيلة نقل عندها ...طلعات فسانسور معاه وريحة الدويان والنضافة ديال ديك المصحة تفوح...تحل المصعد وهي تمشي معاه دخلات دير المقابلة عطاتهم الاوراق...

    الموارد البشرية(بنت) : دونك هادو لي پييس كاملين..."قرات سيفي ديالها وليزيكبيريونص كانو عندها مهميين خصوصا ف لابوراطوار عجبها سيفي ...ربعات ايديها وشافت فيها" بون غادي دوزي معانا سطاج ديال la durée de trois mois après غادي نشوفو واش مؤهلة تكملي معانا ب contrat de travail المدة ديالها ستة اشهر

    فرح"فنفسها اللهم هاكا ولا غير سطاج بدون مقابل " : d'accord مزيان...

    هي : الوغ شنو اليوم vendredi دونك تبداي lundi ان شاء الله 8:30 حتى ل 4:30"جبدات واحد الورقة كتقرا فيها وتبحث ..غاتبداي فلابوراطوار لتحت مع دكتوغ مديحة ودكتوغ محمد..."كملات معاها خرجات لقات سيد سلمات عليه وشكراتو ونزلات لتحت غاديا خارج حتى سمعات صوت اسمها وهي دور تشوف حتى خرجات عينيها....

    اما فالجهة الاخرى ف مدينة الدار البيضاء...كان قدام المطار محمد الخامس الدولي النواصر...واقف متكي على طوموبيلتو متنغم بالكارو كان الجو مشتي وقطرات الشتاء كتنقط عليه ... خاشي ايد فجيب وايد كيكمي بيها وحاط كوبلي اومبوغطي ديال قهوة كحلة بلا سكار ...شاف ساعتو يلاه غايهز عينيه حتى سمع صوت خروج ركاب الطائرة القادمة من دبي...طفا الكارو ف واحد جغمة ديال قهوة بقات ولاحو ف پوبيل وتمشا شوية تالعند الباب حتى بداو يخرجو المسافرين وهو واقف كيقلب عليه بعينيه...واقف خاشي ايديه فجيابو داير نضاضر شمس حتى بان ليه جاي جار وراه فاليز كبيرة وشكارة ديال لابتوب فكتافو رجل ستيني بلحية بيضاء هو الاستاذ الي قرا عندو زين الدين والي كان المساعد ديالو وتحت اشرافو...كيقلب بعينيه تاهو حيث عارف زين الدين الي غايتلقى ليه ماشي عائلتو...حتى قشعو شاف فيه من تحت نضاضر شوف وتبسم ....

    هو : اهلاااان وسهلااا...

    زين الدين"باس راسو" : عالسلامة بروفيسور زياني ...

    هو : ماشي هنا ولدي ههه

    زين الدين : شرفتينا الحاج علي...

    علي : الله يسلمك اولدي..."كيدور بجنابو ويشوف النواحي ويشم ريحة الهواء " وووه ريحة البلاد والله مكاين بحالها...

    زين الدين : بلاد ماليها لماليها وبلادك ليك وسط ناسك الحاج...هذا الجهد الله يجعل شي بركة ؟!

    علي : الله الى الله يجعل البركة نرجع لداري ووليداتي...نتقاعد فبلادي...

    زين الدين : كاملين الحاج" من بعد ما حط ليه فاليزتو فالكوف وضار ركب قاد سانتيغ وديمارا وصلو لمدينة القديمة دخل تما وقف سيارة فواحد الباركينغ وجر معاه الفاليز ودخلو فدوك الدروبة هما فين ساكن فوحدة من دوك الديور القدام دايرين فحال رياض من لداخل ...وخا بروفيسور كبير الا انه مباغيش يتفرق على البلاصة فين تزاد وكبر ...بقا ليه داك المنزل من ريحة الواليدين وراب وليداتو فيه كلهم قمة التواضع وكلهم قراو ليه عندو ثلاثة الولاد الكبير كيقرا فالهندسة السنة السادسة والثاني كيقرا فالميدسين والثالث خذا اتجاه غييير عندو السنة الاخيرة سلك الاجازة فالاقتصاد ...حتى وقفة قدام الباب حل بالساروت حتى سمع صوت ولدو كيقول شكون مكانوش عارفينو راه جاي حتى دخل عليهم بالفرحة ولدو الكبير طار نقز تا تلاح عليه كان غايجيبو لارض كون ما شد فزين الدين...سلم عليه وباس راسو وايديه فرحان بيه حيث شحااال ماجا لمغرب كانو كيمشيو عندو تما...دخل يسلم على مراته وولادو لداخل وزين الدين استغل الفرصة كسهضر مع ولدو الكبير بينما ياخذ علي راحته فالسلام...."

    زين الدين : با اسامة ؟

    اسامة"عنقو بفرحة" : با زين الدين هههه عالسلامة خويا دخل دخل

    زين الدين"حط ايدو على صدرو" : يرحم من رباك ...عندي منقضي ..امانتكم هاهي "على باه" في امان الله الحاج"جهد صوته باس يسمعو علي تا خرج عندو"

    علي : كيفاش في امان الله !!! والله اسي مانتا غادي تتغذا معايا "رفع حاجبو وخرج فيه عينيه" هضرتي متعاودش..."خرجات مراته سيدة محجبة فحال شكل توبا عمتو فالاناقة ...تبسمات ليه "

    زبيدة : ولدي "مكتعرفوش بزااف" مرحبا بيك تغذا معانا ...

    زين الدين"حشم وحدر راسو" : الحاجة ..

    علي : ادخل يا براكة من الهضرة دخل كول الي قسم الله رتاح شوية وسير ديك الساعة مالك عندك وقيتة الغذا دوزها معانا وسير الله يعاونك..."مالقا زين الدين ميقول حشم يردها فوجهو ووجه سيدة حيث مكيعرفهاش بزااااف كيعرف غير دراري وصافي ...حرك راسو وتبعو دخلو لداخل حيث دار مع تصميم قديم فيها دخيلات نزل من شي دريجات وضار لواحد دخيلة مواصلاهاش شمس لواحد صالون صغير وريحو تما ...صاوباات ليهم اتاي على حقو وطريقو مسوس حيث تا علي فيه السكر ...كب الكاس وحطو طبسيل فاكية ...مد ليه الكاس" : هانا سيدي من داكشي والله الى الكبة ديال اتاي فبلادي وحدها...

    زين الدين : كاااع ...

    انور(الولد الي كيقرا فالميدسين) : عمي زين الدين امتا الافتتاح ؟!

    زين الدين"شاف ف علي ونطق بطنز" : باك اسي ممساليش لينا

    علي : والو اولدي ممساليش باغي نجلس مع مرتي ووليداتي ..

    زين الدين"شاف ف انور وبداو رحلة الطنز" : البهيمة و باك عندهم الخليفة (هي زعما غا هو والكلبة الي والدين هههه)

    اسامة : اخم هههههههه كاينااااا ههههه"نزل عليه باه لراس تا زغرت" تشا ريح يلاه جيتي الوليد بديتي تعصي ...

    علي : قد القب قد السطل ...

    اسامة : قولها لخويا زين الدين حاگر علينا غا حنااو ...

    زين الدين"هز حجبانو وضار لهيه كيعض فشنايفو ..منضرهم كيضحك ميقولش واحد مهندس ولاخور بروفيسور هههه"

    انور : احم خويا زين الدين مبروك قالو ليا خطبتي..."علي خرج فيه عينيه وهز ايديه فحال بغا يشير عليه حيث عرف من زين الدين القصة الكاملة" احم ...

    زين الدين"غير قالها وهو يجمع الغوباشة ورجع ليه الحريق ف صدره وقلبه بدا يضرب يضرب ورجع بيه التفكير ليها نيشان وجهها فاش كانت كتهضر معاه من اول لقاء ووجهها فاش قاليها على القصة والفراق ...حركاتها تعبيرية وحزنها الي خباتو ورا قناع القوة...حنحن بصوته المدعدع نطق" : النصيب وكاان مكتابش...

    علي"بغا يكسر الحرج ونطق بسؤاله" : mardi ان شاء الله نتلاقاو ف كلينيك عند دكتور عبد الحفيض فالجديدة ؟! عنداك تنسى l réunion معاه باش تكون على بال ههه وخا عارفك دقة فالمواعيد بالدقيقة ...

    زين الدين"غمز بعينو بمعنى تت " : ندوز عليك ونمشيو جميع نيشان ..

    سمعات صوت النداء باسمها وهي دور فاتجاه الصوت كتشوف شكون كان صوت واحد الولد كتعرفو بقاات تاكد وبالفعل كان هو نيييت تا خرجات عينيها وبدات تضحك وعلاش الي متعرفوش وهو زميل دراسة فلافاك من الي بداو حتى خذاو ليصونص وصفاء تاهي كانو شلة فكروب يعني كروب فيه هما بثلاثة كانو كيحفضو ويتبادلو الدروس بوليكوب و كلشي ...

    فرح : ااااميييييييييييين هههههه وااااكوااااك الحق هههه

    امين"سميمر عزييييي نيت طويل وضعيف شوي كان خارج ب لباس الفراملية حيث هو من بعد لصونص دار فراملية بالفلوس فحال صفاء غير هو دار فيها ثلاث سنوات" : الهبييييييرة النبيرة الغبيييرة عشيرتااااي .."خبشها ف كفها كيف مولفين شحااال هادي" تا كفاش العجل...

    فرح : العجل هو بوك ههههه افين صافا "طلعاتو وهبطاتو " وليتي طبيب ؟!

    امين : لا مني لموتى ...

    فرح : اويلي ...

    امين : سكتي راني خدام فلامورغ نبات نشهد ونصبح نشهد ما ولفت تا وليت بيض بلق شهب ...

    فرح : ومالك على لامورگ ؟ تخصص الي درتي ومشيتي ليهم !!

    امين : اربي ما سكتي راني غير كنقيد المعلومات ونعاون طبيب ونزلهم لتحت الله يرحم الله يرحم ماشتيش ملي كنزلهم وحدي فالليل وديك البلاصة خاااوية سيكيريتي كيكون تما ومن عند الله كالقاه مشا يخرا ولا يبول ولا يحرزق ولا يتعشا زهري ملوز كي ديما...اللهم هاكا ولا نبقى بلاش بغيت غير باش نعاون نكمل ماستر ...تايجيب الله ماحسن ...

    فرح : هي غانوليو زمايل شغل ههههه

    امين : وقولي وحق الله "بفرحة" وااايلي خدمتي هنا ؟!

    فرح : سطاج ثلث شهور من وراها نسني كونطرا ستة شهور وتانا فحالك باش ندفع لماستر ونكمل...

    امين.: ما تزوجتيش ؟!

    فرح"قلبها بدا يضرب بجهد كاع ذكرايات رجعو ليها ومايركز فكرها غير على زين الدين والشمتة ديالو والي جرا تا بانت ليها فحناكها وعينيها لمعو بدموع...بانت ليه كتصرط فريقها ووجهها تبدل". : احم مم مكتابش وصافي ههه

    امين"حس بيها حيث بانت عليها نيشان" : اوديي مزال معرفتي الخير فين كاين...واحد العزوة ديال صفصف لباس ؟!

    فرح"بحزن مبيناتوش" : لباس عليها راها فازمور كتسطاجي قريب تجي ...

    امين : مزياان ...اه بغيت نقوليك واحد الحاجة شحال هادي مي مع الخدمة مبقيتش كندخل لا لفيس لا انسطا باش نهضر معاك وعاد مشات ليا نمرتك اصاحيبة باش نهضرو فواتساب...

    فرح : قبل متقوليا هاك نمرة دابا ...

    امين : لا ختي هاضرين فيا مانصيبش نعطيك نمرتي ...

    فرح : هههه الله يمسخك ..."عطاتو نمرتها صونا عليها تا طلعات نمرتو " هممم واشمن هضرة بغيتي تقوليا ؟!

    امين "حك شنايفو بغا يقول وخاف منها لا تجلس عليه تقتلو هههه " : ا س سم

    فرح : اتا هضر مالك ؟!

    امين : س سولني عليك واحد سيد ورسليا معاك رسالة ..

    فرح"فحال حست حيث اكيييد اسماعيل لان امين واسماعيل كانو اصحاب وخا اسماعيل اكبر منهم ب ثلاث سنوات " : ممم هضر ا امين ...

    امين : شوفي بوجه الله تا تسمعي انا غيييير مرسول الحب

    فرح"جهدات صوتها" : نعاااام ؟!!!

    امين : هاء تانا غير مرسول اختي تهدني ...

    فرح : قول اش كاين ؟!

    امين : مهم سولني عليك اسماعيل ...

    فرح : ايييه واش ليا انا ...

    امين : را سولني عليك قلت ماشي سولك عليا ...تي ربطي وريحي وعطيني وذنيك ويلي !!

    فرح : ايه ومن بعد !!! اش بغيتي نقوليك ؟! يسول فيه الخير ورباح ...

    امين : شو هاد الدبة القطبية شوووو...

    فرح : را غانتفقص"خرجات فيه عينيها"

    امين"عارفها تجلس عليه تقتلو هههه" : اااا امالنا او ...مهم خليني نكمل ..هو را تخرج ولا اسنبيكتور ياا لالة ...وقاليا سلم على فرح وقوليها را بغيت نشوفها نهضر معاها ضروري قوليها ضرووووري نهضر معاها ولا نجي لعندها حدا الدار...

    فرح : كيفاش حدا دار ؟! هههه قوليه يجي قووول والله الى غير فوزي وحدوووو يعطيه العصا ...

    امين : را بوليسي اش غايعطي...

    فرح : واخا بوليسي را جاي لعندنا اش بغا بيا ؟! ياك عطينا تيساع لبعضياتنا ؟ ياك هو مشا يشوف راسو وحياتو ياك انا كنت العائق فحياتو ؟! ياك انا من نهار عرفني ماشاف الربح ياك غير تفارق عليا وخدم ؟ "كضحك بغيض" ههههه ياك خطب بنت الكوميسير الي كان كيعرفها وهو معايا ؟! ياك هي شاف معاها الربح وانا لا ؟! اسيدي اش باغي عندي وااااكواك مابقيتش بغيتو وعمري مغانبغيه "قلبها كيضرب"

    امين : ششش صافي صافي ...

    فرح"شافت جدها جاي وهي تحبس كتحك فجبهتها وايدها كترعد" : مابغيتش نهضر ا امين صافي سالينا شحاااال هادي را خمس سنين باش تفارقنا ...نسيتو فالنهار الثاني قوليه ...

    امين : واخا صافي ...

    فرح : فففف جدي جاي مهم نتشاوفو من بعد انا غانبدا الاثنين تهلى بيناتنا الواتساب..."حرك ليها راسو ومشات عنقات جدها من دراعو وقطعو شانطي وزادو اما هو كيف مشات صونا ليه

    امين : عرفتي شكون تلاقيت ؟!

    اسماعيل : شكون ؟

    امين : حب قلبك اصحيبي وكي زيانت العشييير هههه

    اسماعيل"عض شنايفو مبسم" : وايلي ههه مسولاتكش عليا ؟

    امين : هههه من نيتك افاتي ههه تسولني عليك ؟! واكل شي حاجة من غير الخبز ليوم ؟!

    اسماعيل : كاطنز الكلب ؟! اش قالت ليك ؟!

    امين : وصلت رسالة وليني اخويا مدمرة من جيهتك غا قلب طريق ...

    اسماعيل : مممم ماعلينا نسالي شي خدمة وندوز عندك نتشاوفو فالقهوة ونهضرو ...شوية بشوية تاحاجة ماصعيبة تانا را كبتها معاها نستاهل ...

    ..خرج ضارب موعد اللقاء مع علي باللقاء يوم الثلاثاء...وصل البارك هز طوموبيل وزاد نيشان لمختبر عطاهم الروسي الي عطاتو ضحى وخذا التحاليل من بعد ما خلصهم ومشا حتى قضا اشغالو ماسالا حتى الليل تا صافي عيا بالمعقول وماخاصوش يفورصي باش مياثرش عليه السكر ويطلع...دخل لدار لقا توبا و ضحى جالسين توبا كتفرج وضحى شادة ايفونها وكتبقشش فيه وتهضر ...مربعة رجليها فوق فوطوي ...حتى زقف عليهم طفات تيليفون وتقادت فالجلسة ...

    زين الدين : سلام عليكم ...

    توبا : عليكم السلام ورحمة الله

    ضحى : عليكم السلام ورحمة الله...

    زين الدين : مراد ماجاش ؟!

    توبا : جاي فالطريق باقي موصلش...

    زين الدين"حرك راسو ودوك الحجبان تقول. واش نفكوكين شاف جيهة ضحى" : ورا العشا ليا هضرة معاك ...

    ضحى"صرطات ريقها" : واخ واخا ان شاء الله ...

    زين الدين"بقا كيشوف فيها وهي حادرة راسها حتى شاف فعمتو " : اليوم شوية ؟!

    توبا"بابتسامة" : الحمد لله عاودت عبرت ولقيتو مزيان كيف قلتي ليا خاص يكون ..

    زين الدين : رجعي عند cardiologue(اخصائي القلب) ديالك ولابد"شير بصبعو كياكد عليها" صحتك ماشي ديال تهاوني

    توبا : تنين نمشي عندو ان شاء الله ...

    حرك ليها راسو ومشا هو ناضت هي باش تحط العشا اما هو طلع نيشان دخل لبيتو حيد حوايجو ودخل يدوش ...كيدوز على شعرو شامبو والما هابط وعقلو ثاني رجع لتفكير تفكير تفكير الي غايهلكو وهو كيفكر وهي كتجيه فبالو وتفكير فدوك الاحلام الي شاف زوج مرات خلاو فنفسيتو امارة عمرو ينساهم تا حس بجهة صدرو كتحرقو عليها وقلبو كيضرب كيحس بالحزن الشديييييد انه هرسها وكسر بخاطرها ....كمل وخرج نشف حالتو لبس بوكسر وسروال قطن بيض وتيشرت تاهو بيض نشف شعرو ومشطو لور نشف لحيتو من الما ....شرب دوا حط تيليفونو يتشارجا وهز دوك التحاليل ونزل لقاها جالسة حداها ضحى ومراد الي عاد وصل من الحسيمة مشا يدور تما فالريف...سلم عليه بعناق رجول خبط ليه على ضهرو" : طولتي لا نتا !!

    مراد : والله ما سخيت كون ما الخدمة هههه

    زين الدين"جالس متكي عالكرسي ريحة باندوش تعطي منو ونقا...كبحك ف وذنو وكيهضر " : قرايتك هي لولة مراد الخدمة مرومبلاصيينك ناس ...

    مراد : سي نخدم هاد اليومين وناخذ سيمانة تاني ضروري نحفض عندي امتحانات فاخر شهر...

    زين الدين : الله يسر الامور ..."ضرب ليه على كتافو بشكر واحترام وتقدير لمجهودو الجبار فالمشروع حيث مسكين لا هو لا وليد لا باقي الطاقم مكانوش كينعسو باش يخدمو ...وفنفس الوقت كيقرا مسكين وعاد الوحيد الي معاه هو وعمتو نيشان واقفين معاه واخا الغالي عمو الا انه لا يشبهه في شيء فقط عمو لا غير .." الله يرضي عليك ...

    مراد : الله اودي..."طبطب ليه فوق فخدو" خويا الكبير ابا زين الدين...

    سماو الله وبداو العشا نيت كانت فاتت نص ساعة تيسر وبدا ياكل اكتفى غير بشلاضة ديال خضرة الي خالية من سكريات ...اما هما تعشاو سباگيتي كاملين كل وطبسيلو لكن فاش تيكون غذا بلدي او مرقة كياكلو فطبسيل واحد مكاينش ديك كل وطبسيلو...تجمعات طابلة ووصاات توبا على براد اتاي صغير مسوس وواحد عادي...

    ضحى"كتسنى اش يقول ليها ههه " : خو خويا زين الدين شنو بغيتيني ؟ حيث ههه بغيت نطلع نراجع عندي امتحان هاد اليومين وكنوجد لواحد اكسبوزي...

    زين الدين"كان جامع ايديه لاقي صباعهم عند فمو ..شاف فيها ونزل ايديه حك دراعو ورجع جبد من جيبو تحاليل وحطهم ليها بحطة فحال خبطة تا قفزت " : شنو هادشي ؟!

    ضحى : شش شنو مفهمتش !!

    توبا : خبار الخير مالها ؟!

    زين الدين"رفع حاجبو" : علاش معلمتيش مك بالي كتسخفي بزاااف

    ضحى : ش شكون قالها ليك"شاف فيها بمعنى من نيتك " ا ماشي بب بزاف غير زوج مرات فالمعهد ...ماديتهاش فيها حيث مكنفطرش قلت هادشي الي دار هاكا...

    زين الدين"غمز ليها بمعنى لا "

    توبا "اما مراد كيشوووف عارفو غايشطحها " : مالها ولدي عندها شي حاجة ؟!

    زين الدين"بقا سااااااكت ومراد حابس ضحكة بصباعو ...شاف فعمتو ورجع شاف فضحى وخرج عينيه " : حاااملة

    توبا"غوتات" : ااااااا

    ضحى"حلات فمها بالخلعة بدات تحلف" : والله مكنخليهم مم

    زين الدين : مكتخليش شكون ؟"رفع حاجبو"

    ضحى"كانت شوي تقوليهم مكنخليش مهدي ينعس معايا على شوي تقول غير بيسات خفاف ههههه " : اويلي اخويا والله ومدرت شي حاجة اهى اهى رام عليك اهى اويلي على حاملة..

    توبا"شدات على قلبها بغات تسخف ههههه " : ولدي الله يرضي عليك اش كاين غا قول غانموت هنا ..

    زين الدين"وقف ساس سروالو شاف فمراد الي مقدرش يصبر بغا يمووت بالضحك تا تنشر...مشا لعمتو باسها فراسها وعنقها بجنب حداه كي الكمشة بغات تموت ليه تم هههه " : مكاين لاش الخوف "ضرب ضحى لراسها بشوي " Anémie(فقر دم)ماشي ديال اللعب هادشي نتي "بصوت تحذير ومع صوته غير يهضر بشوي يخلعك فما بالك ...وكيهضر ومتااااااابت هما را بغاو يموتو وهو كانه مقال والو هههههه..."

    ضحى : خلعتيني اهى ...

    مراد : هههههه الله ياربي الله غانموووت اخوتي ...

    زين الدين"شير بصبعو ليها و ل توبا " : نتي وياها lundi عند spécialistes بلا منعاودو الهضرة ..."باس راس توبا وعاود وباس ايدها وطبطب ليها على ضهرها" مكاين لاش تخلعي بنتك مربية "شاف ف ضحى" مربيااااا ميمتي"لاح هاد الهضرة وزاد طلع لبيتو مخلي ضحى قلبها بغا يسكت على شوي تقول حملت ببوسة ....

    رجعاات هي وجدها ديك ساعة فاش تفارقات مع امين ركبو فالسيارة وانطالقو عند بالها را غايشد الوجهة لدار نيشان حتى كيفاجئها انه غير الطريق لوجهة اخرى ماهضراتش مسولاتش كتشوف فين غادين وعقلها مرفوووع ...من سيرة اسماعيل وذكريات الي رجعو والمشكيل مع زين الدين كلشي سيطر عليها ...كتشوف فالطريق من الزاج وبالها ماهواش هنا...شي فشي دخل فراسها وعينيها فالطريق وحجبانها معقودين ...تا تنهدات وسمعها جدها...

    محجوب : الله يا بنيتي الله ...

    فرح"ضارت شافت فيه " : دنيا غداااارة جدي ...

    محجوب : ويلاه قلتي بسم الله ؟!

    فرح : علاش مزال مشفت والو ؟!

    محجوب : مزال تشوفي باش تعلمي وعقلك يكبر كثر وكثر باش نهار تنصحي وليداتك تعرفي اش تنصحي واش تگولي ...نهار تشدي كبدتك بين ايديك ونتي ماكدة راكي جناحهم...نهار يكبرو تهزي همهم ونهار تكبري نتي تقنعي ...

    فرح : موحاال باين ليا غاندير شي ولاد"دلات شنايفها بحزن ورجعات كتشوف فطريق"

    لمحجوب : الرزق والمكتاب والنصيب عند رب العباد ولااابد الي جرا ليك فيه حكمة اتاغونجة ...

    فرح : ونعم بالله...احم فين غادين ابا ؟!

    محجوب"ضحك بصوته الخاتر المسن" : هههه وضاهر ليا وقيتة غذا نمشيو نضربو كسكسو عند خالك ف سيدي بنور ونرجعك بنيتي ..."حركات ليه راسها وهي كضحك ...بالفعل ضربو طريق مسافة ساعة او اقل حتى ل سيدي بنور تغذات عندهم كسكسو ورجعات فحالها حتى الليل لان عصام وفوزي معطلين هاد النهار عندهم انشغالات كثيرة... غير وصلها سلمات عليه ومشا رجع هو حيث عندو ميقضي ...تلاقات ب سيمو واقف كيكمي فداك الليل ...سلمات عليه وبدات ضحك معاه حتى خرجات صفاء من دارهم جايا عند سيمو تا وقفت بغات ترجع ولا تزيد معرفات مادير...

    فرح : ص صفاء !! لباس عليك...

    صفاء : لباس الحمد لله اختي..

    فرح : ختي ؟؟ احم ر رجعتي بمرة ولا راجعة لهيه ؟! س سولت عليك سيمو ...

    سيمو : ديما كتسولني عليك والله "بغا يلطف بيناتهم"

    صفاء : يسول فيك الخييير .."تمات غاديا راجعة وهي توقفها"

    فرح : صفاااء حتى لامتا غاتبقاي مقلقة مني "جايا مريضة فخاطرها اصلا" براكة اختي عافاك سمحي ليا والله مقصدت انا بغيتك غييير تفيقي على راسك مابغيتكش تبقاي معلقة حتى تصدمي او تمرضي مابغيتكش تبقاي غير كتسناي فيه بلا مديري اي حركة ...اااه "كتحك فجبهتها بتوثر زايد" قلتها ليك بطريقة خايبة ولكن عذريني را الي دزت منو والله ماساهل معقلتش على راسي والله سمحي ليا عافاك ماقدرتش نكمل بلا بيك بغيت نهضر معاك نعاود ليك نشكي عليك سيمو مغايقضي ليا والو وحدو الى مشكتيش عليكم بثلاثة مغانحسش براسي هي هاديك غانحس براسي وحدي...

    صفاء : فرح هضرتك قاااصحة وخوك هذاكشي كبر معايا كان صعيب عليا نتقبل وهضرتك مرمدتني بالمعقول ...ماشي نتي الي كنت متوقعة منها تقوليا هاكاك ...تقولي ليا معمرو تا شايف فيك ولا يشوف فيك ؟! مالي كي جيتك و اش ناقصني ؟! واش عرفتي كيفاش خرجات منك ؟!

    فرح : عااارفة وليني را تاهو متسنايش منو يجي راسو ...وخصوصا كيعرف دابا وحدة اخرى ومواعدها بالزواج يعني كيبغيها...كون تحكتي نعاونك متجيش غير مني ...

    صفاء : طرييييقة باش قلتيها ..."ضارت شافت لهيه وهي غير كل مكتجبد ليها كيبغي وحدة اخرى العافية كتهبط ليها..." واخا باش تفهمي..."بقات شحال ساكتة كتفكر بغات طريقة باش توصل ليها را جرحاتها"

    فرح : صفاء القضية ممستاهلاش هاد تقليقة كلها والله ماقصدت سمحي ليا بزاااف اصفاء ...

    سيمو : وصافي اصحبتي تانتي ...

    صفاء"شافت ف فرح " : نتي خاصني نعذرك ؟! علاش نعذرك وعلاش اصلا نسمح ليك ؟! مالي انا شكون فهاد البلاد ؟ هو صعيب نسا حيث هضرة حفراتني هناااا ضراتني وميضرني غييير الي قريب ليا هو الي يضرني غيرو نحطو سطل بلا تقرقيب وليني نتي ؟؟ نتي اختي عايشة معاك كابرة معاك مشاركين نفس التربية وعارفاني وعاجناني مضنيييييتش منك هادشي...اصلا نتي حولك ما يكون عندك زهر حولك مايكون عندك زهر حتى مع رجال معندكش زهر واحد خلاك وزاد تبعتيه بالنحس وواحد مسكين قنفج مشا عند مولااااه غييييير عرفك ومسكين مشاااا وثالث هههههه دارك لعبة وسط الحسابات ...اش غانتسنى منك اااااش ؟! ساااهلة عندك تجرحي...باااك ومكيعقلش عليك .."كتقول فهاد الهضرة وهي ماحساش اش كتخرج من فمها بغات غير توريها حجم كسر الخواطر بالكلام الجارح كيفاش داير ونسات راسها انها ماشي غير هرستها قسماتها على زوج وهضرة كون غير حبسات عند هنا سيمو دار ايديه فوق راسو وعينيه خرجو وهو كيسمع صقاء الي جهلت غير باش توريها صدقت مقفراها ووصلات ليها لابشع كلااام ؟؟ " مك

    سيمو"عرفها غاتجبد مها ونسات راسها وهو ينقز عليها دفعها وسد ليها فمها" : ااااااا الغادي لعلوة تعالى نوصيك بعدا...

    صفاء"عاد فاقت وهي تخرج عينيها" : ممممم"ساد ليها فمها"

    فرح"بقات كتسمع وحالا فمها شوي تا رمشت وهما ينزلو زوج دمعات كيجريييييييييييييو " : صراحة عندك الحق"حطات ايدها على صدرها" الله يرحم ليك الواليدين اختي فكرتييييني نيت..."حدرات راسها ودخلات لدارهم سدات الباب تا قفز سيمو وصفاء دارت راسها بين ايديها"

    ‏“ قُل الحمدلله حتىٰ وإن باتت أيامك مُمتلِئة بِالخيبات، فلا شيء يُساوي العافية ...قل الحمد لله فقد سمع الله لمن حمده"

    نقولو فرح بكلامها السابق فحق صفاء وخا كان كلام الي لو كان فحالة عادية نعتابروه نصحية من فرح لصفاء...لكن نفس الكلام خرج من فم بطريقة ماشي صحيحة وبصيغة خاطئة وفضروف ليست بالجيدة ف صدق كلام جارح ل صفاء خلا فنفسها اثر بالاضافة الى الم الحب ..خصوصا فاش عرفات صفاء ان عصام بغا بنت اخرى وهي حبها ليه من الصغر ف كلام فرح غايبان ليها جارح بدرجات ...انك تشوف واحد الانسان كتموت عليه بنيتي عليه احلامك كتشوفو غير هو فيها حتى يصدق بصح حلم والي حلمتي بيه غاتحققو وحدة اخرى ف هاد الاحساس بالضبط والعافية الي كتشعل مغادي يحس بيها غير الي طاح فنفس الموقف او عانى من الم الحب بعدة طرق...فالكلام الي خرج من فم صفاء كان بالحرقة على عصام والالم الي كياكل فيها بالاضافة الى انها بغات ترد الصاع ل فرح غير باش تحس بكمية الالم الي حسات بيه معارفاش ان كلام فرح الي قالتو ليها كان كلام جارح لكن ماشي بالكمية القاااسية الي جرحات بيها فرح...وكون ما تدخل سيمو كانت حرقتها خلاتها تهضر بكلام الي مخاصش حتى تفكر فيه فما بالك تقوله !!

    صفاء"بقا شاد ليها سيمو فمها وسيمو بنفسه تصدم ونسا يحيد ايدو ..بقات مخرجة عينيها لواحد درجة حتى تكوانساو وصدرها كيطلع ويهبط ...حتى نزلو دموعها كيجرييييييو وعصرات عينيها تسمع صوت منها على شكل انييييين كيختاصر المعنى من بعد الصحوة والي هو اااااااش درت ...دفعات ايد سيمو من عليها " : اويييييييييييييييييييلييييييييييييييييي اهى اهى...

    سيمو : مالك فهاد الهضرة الحبس !!!

    صفاء"دارت ايديها فوق راسها وعينيها محابسينش من البكا واحد الشعور حسات بيه فهاد اللحضة تا. واحد فينا مغايحس بيه ...خناجر حااادة كيتغرسو ف صدرها...لهيب العافية كيلفح في ديك المنطقة الخاصة بالصدر والقلب.. اعضاء الاحاسيس والمشاعر الرهيييييفة الي كيسيطر عليها الالم الحزن الفرح الحب وما ادراك مالحب وتوابع الحب سواء السلبية او الايجابية كلها تؤثر ولو كانت عادية ...فهاد اللحظة صفاء وقف الزمن عندها والي خدام هو العقل الي كيصور ليها اللقطة الي طرات وشنو قالت ولسانها اش خرج ...واش بصح فلحضة الغضب كنقولو الحقيقة واش بصح فهاد اللحظة كيخرج الي فقلبنا بصح !!! صفاء مكان فنيتها غير انها تحط فرح فنفس موقفها غير باش تحس بكمية الجرح الي وقع ليها بسبابها ...لان صفاء ماشي غير تجرحات حبها لعصام ومعرفتها انه بغا وحدة غيرها خلاها تجنن او تجهل بالمعنى ديالنا ...وهاحنا وصلنا لما قلناه سابقا الم الحب وما ادراك ما الم الحب ..."

    سيمو : سيري سيري فحالك سيري النم سيري...

    صفاء"باقا شادة راسها وكدور تشوف هنا وهنا وتبكي ..فحال الى فاقت لشنو قالت وياريتها ما فاقت " : واااااااااااااامييييييييييمتييييييي اهى اهى ...وااااااميييييييمتييييييي اش درت ااااااش اهى وياااااااااااربي كون غير مت ولا نوصل لهاد الهضرة يااااربي...

    سيمو : وسيري الحبس دخلي دابا يجي عصام ولا فوزي مايعرف تاواحد فيهم عگبي فحالك يلاه...مال ديلمك خضرة هروية مالك ؟!

    صفاء"الله الي عالم فهاد اللحضة مكتجاوبوش لانه بصح ترفعات بالصدمة...مشافت فيه وهي دور ومشات لدارهم دفعات الباب ودخلات وهي كتنخصص" : اهى اهى ..

    سيمو"ساس ايديه" : تفووو كلشي خضر هاد الخرا المخرنن يخ ..."ضار تاهو وزاد مالقا ميدير ومعندو مايدير اصلا خاصو يخليهم كل وحدة فيهم محتاجة وقت نييييييت تا تستوعب شنو وقع عاد يجيو الاحداث بتسلسل عاااد كل وحدة فيهم تراجع راسها وعاد الزمان هو الي غايبين شنو غايوصل مصيرهم ليهم...

    فوزي"جا بموطورو حتى وقف حيث قبل كان جاي وقلب دورة لعند واحد دري صاحبو هضر معاه وبان ليه سيمو من بعيد كان يدفع ف صفاء تدخل " : اهيا نتا مالك ؟ مال صفاء تاني ؟!

    سيمو : مالهاش غا دخلتها...

    فوزي : هضرات معاها فرح ؟!

    سيمو : تلاقاو وليني متفاهموش ...

    فوزي : وايلي مالهم ؟

    سيمو : والو لولة (صفاء) عطات لثانية (فرح) وثانية غبرات لولة شقف وسلام عليكم ورحمة الله تعالى وبركاته.....

    مشات لبيتها بدلات حوايجها لبسات ديال دار دخلات لكوزينة كتحل ثلاجة. وتعاود تسدها وتمشي لافابو تغسل ايديها وتعاود تحل ثلاجة وكتبقى واااااقفة تشوف فيها معارفاش تا اش كدير...عاود سدتها وبقات كدور تا تلفات وهي تكا على بوطاجي مع لافابو وبوطاجي عند شرجم هزات عينيها كتشوف فالزنقة شحااااال وهي ساهية وتحت دقة فالباب قفزات بجهد وهي دور شادة على صدرها تا شهقت...

    فرح : هييييييي فففف خلعتيني...

    عصام"هز حاجبو" : وايلي !!! وفين عقلك ؟!

    فرح : و والو غير بقيت ساهية كنفكر "قلبها كيضرب"

    عصام : فاش كتفكري وخلاك تسهاي نتي كاع !!؟ واقعة شي حاجة ؟!

    فرح: ل ل لا لا مواقع والو غير كنفكر شنو ندير لعشا ...اهههه"من فوق خاطرها" تلفت ...

    عصام : مممم ...خربقي الي كان ولا ديري بيتزا شحال مدرتيها لينا...

    فرح : خاصني طون...ولا تبغيها بالكفتة ؟!

    عصام : الي عجبك ديريه ..."تسمع صوت رنة ميساج من تيليفونو جبدو وشافو تغيرو ملامح ديالو لبشاشة تا عض شنايفو هنا لمحاات فرح تعابير وجهو وعرفات انه رسالة من محبوبته..قلبها تعصر فهاد اللحضة وخا سمعات الي معمرها سمعات من اعز اصحابها واقربهم الا انه شي حاجة فيك فطرية را كتبقى مكتغيرها تاحاجة وهي حبك لداك شخص الي حليتي عليه عينيك والمك من المه وحزنك من حزنه وكبرتي عليه...ضرها قلبها ...هز فيها عصام عينيه لقا عينيها مغيرين ..." ششش بغيتي تبكي ؟؟؟؟

    فرح"فاقت من التفكير وهي تحرك راسها ب لا ومشات لعندو عنقاتو وحطات راسها على صدرو" : غير فاش كنغبر كنتوحشك بزاااف ..

    عصام"حدر راسو لعندها رافع حاجبو مفاهمش مالها وحاس انه بيها شي حاجة قلبه مهانيش عليها..." : نفكرك بواحد شهرين ونص ونتي غابرة ؟!!

    فرح"جاتها ضحكة وخا مبيناتش " : منعاودش ...

    عصام"حط ايدو على شعرها كيديوز عليه بحنان وحب" : لا عاوديها نيت...

    فرح"هزات راسها وهي مخليا فوق صدرو نيت فقط حطات ذقنها باش تشوف فيه " : نسولك ومتعصبش ؟!

    عصام : عارفاني عارفاني قضي غراض دابا مكاين لاش ديري بناقص خرجات من فمك والي عطا الله عطاه...

    فرح : اربيييييي كون مكنتيش نتا وفوزي فين نعطي راسي ؟

    عصام"هو تعصب ماشي متعصبش ولكن كتم العصبية بزز حتى زير على ايدو لاخرى تاتقطع منها د.م بدون متحس فرح..جمع نفس وطلقها مدور وجهو لهيه لا تحس بيها سخونة وتعرفو صعر...وليني تبت راسو وقال " : حيث ربي عارفك مغاتعرفي فين تعطي هاد"ضرب ليها راسها بخفة" السطل الي كيبان فهاد الوقيتة سلطنا عليك...الى خاصك طون صوني لفوزي ياخذو ليك معاه...وقفها بايديه ودورها جيهة الكوزينة" تحركي ديري لينا مايتكال..."خلاها ومشا هو شاد تيليفون وعينيه معسلين على داك الميساج ويحك فصدرو " ...

    دخلات دايرة زيف حياتي عاقداه لقدام وتزارة عاقداها هازا شبكة فين كدير صابون او الوسخ...تا بدات تهز فالمخاد تحيد ليهم فالغلاف ديالهم وتسوس وتلوح فالسلة ...

    فوزي"شاف عصام الي كان متكي تا هز راسو كيشوف فيها وشاف ففوزي مفهمو والو" : مال هادوك المخاد ؟!

    فرح : بغيت نصبن طلامط والمخاد باش غذا نخمل البيت رمضان قرب مبقا ليه والو...

    عصام : را حنا جالسين فالبيت اشريفة

    فرح : غير نتعشاو ونطلع نديرهم يتصبنو ونشرهم ونزل نعس

    فوزي"قوس حجبانو" : فنص الليل ؟!

    فرح : عادي ...واصلا خاصني نخمل قبل منبدا الخدمة نهار تنين...دار موسخة كلشي موسخ ..العواشر جايا...

    عصام"شاف ففوزي الي مفهم تا لعبة ورجعو شافو فسها ناضت مشات لسداري لهيه حيدات ليه طلميطو تا وقفاتو كتحل في العقدة ..." : دوزي دوزي ريحي لارض تايصبح ويفتح دوزي الليل هذا ...

    فرح : غا خليني الي حيدات تنقص عليا...

    عصام : وادوزي ريحي دابا يضرب دينمك شي جن فهاد الليل دوزي تركني فحالك نعل بو مك ...

    فرح"الصمت"

    عصام" جهد صوته تا قفزت ولاحت تليق" : وقلت لبوك دوزي تركني لارض ...تگلعي يلاه ...

    فوزي : سيري سيري شوفي واش طاب العشا سيري ونتي ناض فيك جن من غير وقت سيري ..

    عصام"تگعد جالس" : نتي ليوم ماشي على برجك شي حاجة واقعة ليك...اش كاين بلا قوة الهضرة عليا من لاخر...

    فرح : مواقع والو اش غايوقع تاني ...كل مرة نقوليك واقع واقع واقع ...كل مرة تسولني اش واقع ؟! انا ديما واقع معايا ؟ سول فوزي اش واقع معاه ولا اجي قولينا نتا كلك اش واقع معاك ؟

    عصام : اش كتخربقي عليا تم نتي ؟ اجي جلسي هنا بعدا اجي..

    فرح"شافت دعوة معاه ما تسلكش خصوصا وجهو تغيرو تعابيرو ل عصبية ولذلك مشات جلسات كيف قاليها" : هاني ..

    عصام : جرات شي حاجة ؟؟؟؛

    فرح : لا ماجرا والو غير بغيت نبدا يلاه نسالي حيث الاثنين نبدا الخدمة ومغانخىج تاااااال ربعة العشية ...وسبت حتى هو خدامة فيه وممكن تكون عندي بيرمانونص ...

    عصام : متاكدة ؟!

    فرح : اه متاكدة...

    عصام"بقا كيحك لحيتو وكيشوف فيها بتخنزيرة كانه ممثيقش وفعلا كذلك..." : ونتي مسلكك هاد التوقيت الي عندك ؟

    فرح : مسلكني اللهم هاكا ولا مكاين والو نبقى غير جالسة !!

    عصام "حرك راسو" : الي سلكك ديريه ...واخا هكاك تالصباح وديري الي عجبك نوضي حطي لينا مناكلو ورجعي هاد شي فين كان ولا خليه تايصبح ويفتح..."شافها مناضتش وهو يخنزر مخرج عينيه يلاه بغا يهضر وهي تنوض "

    حالة صفاء منقولوش فحال فرح وانما حالتها اضعاف من فرح صعيييييييب تجرح الواحد بدون قصد وتدوزها عادي صعيييب انك مادير حتى ردة فعل خصوصا انه كيف كيقولو ان الي كيكون غاضب وخرج كلام كيكون بصح صادق وهو الي فقلبه...

    فاطنة"حلات الباب ديال البيت وشعلات ضو وهي تكمش عينيها " : هاويلي تي شتك ناعسة گبل(قبل) الوقت "ماجاوبتهاش" والبنت نوضي ديري لينا العشا ولا شوفي اش تخربقي عطي لبوك مياكل بغا ينعس...نوضي راني عيانة ...واتي نوضي...

    صفاء"بزز بززززز باش قدرت تحكم ف صوتها والي وخا هكاك مقدراتش تبين انها مكتبكيش" : غي اهى غيييي خليني امي نعس عافاك مريضة اهى...

    فاطنة : اويلي تغرگ فيه هادي مالها ؟"مشات ليها وهي تعري عليها المانطة على غفلة تا ضارت صفاء بجهد بغات ترجع المانطة باش متشوفهاش لكن دغيا لمحات وجهها الي كان حمر حمر حمر تا بغا يزراق بالبكا والمنخر والعينين منفوخييييين وشعرها لاصق بالعرق ديال البكا وشي مشنتف بنتيف...خرجات فاطنة عينيها على جهدها وشهقت" اااااااويلي مالك ؟!

    صفاء : ممالييييييش اهى سيري خليني امي فهمي اهى ...

    فاطنة : اويلي على خليني فهمي ؟ اويلي اشمن هم عندك ؟؟ اااا ادوي لا طيحشاي مني النص اهضريييي"جهدت صوتها" واتي هضري اش واقع ليك لهادشي كلو ؟

    صفاء : اهى اهى وااااااخليييييني امي خلييييني فهمي واااامي خليني غالي جاري ليا را كافيييييني بلا ويل اهى ...

    فاطنة"خبطات جنابها" : اويلي اشمن هم والي فيك كافيك ؟ واتي هضري لا طيحي ليا النقطة الي بقات عندي ...وتي هضري ينعل جد بوك الطلب هضري ..ياكما تكرفص عليك شي حد"بغاات تبكي" اويلي اويلي "كتهضر وتخبط جنابها يحساب ليها تعدا عليها شي حد"

    صفاء : وااااالا ولا موصلني حد وانا الي تعديت على راسي انااا"كتخبط جيهة قلبها ودوك الخبطات كيتسمعو زدف زدف"

    فاطنة"كتشوف فيها كتضرب فصدرها بقاات فيها وقلبها ضرها عليها وخا توعار تاتعيا كيبقى قلب الام رهيييف على كبدتها.." : وخا بنيتي قولي ليا اش طاري ليك لهلا يرد الي يضر ليا كبدتي..هاني ميمتي عاودي ليا..."مشات جلسات حداها وجرات ليها راسها حطاتو فوق فخدها" اش طرا ليك ؟

    صفاء"هزات نفس من قلب قلب صماصيم كرشها وخرجاتها طوييييييلة تا خرخرات تقولي الموت هادي..ورجعات بيها الذاكرة كتفكر اش طرا واش تقال والواقعة وهي كتنخصص حتى بدات كتعاود ليها ماشي على حبها لعصام وانما حاولات تقول بدون ذكر عصام حتى وصلات لشنو قالت لفرح "

    فاطنة"غير سمعات اخر جزء وتقولي قالتها ليها وجرحات فاطنة ماشي فرح تا غوتات وهي طير صفاء لسما ونزلات " : اويلي على بنت لحرام الكلبة اويلي "عينيها خرجو على جهدهم" اويلي على ليهو دية اويلي على ترابي الخلا وما ولدت..هادي هضرة تگال اااا ..."دارت ايدها على جبهتها كتحرك فراسها وتفكر الماضي " الله ياربي الله مالگاتها مع البراني ولگاتها مع حبابها...

    .والايام كفيلة بانها داوي الجراح او تنسي او تلهمنا الصبر...

    خرجات من طواليط موضية كتنشف فوجهها وايديها حتى لقات باب البيت محلول طلات بان ليها عصام جاي خارج حرك ليها راسو من بعد ما صبحات عليه ومشات لبسات عبايتها وفرشات صلاة صلات ودعات عاد ناضت الماريو وبما انه اليوم هو اول يوم عمل ليها والي غاتحاول تنسي فيه كاع همومها وتشغل راسها من بعد يومين الي دازت بكل احداث فيها...ف رغم الكسر رغم الحزن رغم الي جرا كامل رغم انها خسرات اعز صحابها اقرب وحدة والوحيدة الي عندها اليوم هاهي قدام المرايا بكل ثقة فالنفس كتحاول تخبي انها مكسورة وناقصها شخص...بزز منها خاصها تمضي لقدام والا غاتبقى فنفس البلاصة...جبدات كسوة ديال صوف طوييلة فالمسكي فيها حزام ديال صوف رقيق وفيها ضفيرات من الصوف مخدومة بالقتبان ...لبسات ليبة كحلة عاد لبستها هي وهزات مونطو كحل طويل حطاتو فوق صاكها ..تا مشطات شعرها وجمعاتو من لور قادات حالتها مزيان عاد مشات جلسات فطرات وخلات ليهم تايفطرو... لقات قريب الحال بزاف وناضت كتزرب كطير من هنا وهنا ... خرجات كتلبس فمونطو وخارجة بان ليها باب دار صفاء محلول وهي تزرب باش متلاقاش بيها وخرجات لشارع شيرات لطاكسي بالخف ركبات فيه وداها لكلينيك ...كيف وصلات دخلات نيشان بكامل اناقتها وعلاش لا وهي فرحانا انه اليوم اول عمل ليها فضومين كتفهم فيه وغاتعطي فيه كاع طاقتها وتعلم ...مشات نيشان ل قسم مختبر تحليلات ديال الكلينيك عطاتهم اسمها وكان قبل موارد البشرية عالمينهم بانها غاتبدا...

    فرح"لقات طبيبة تما" : بونجوغ انا فرح سطاجيير جديدة...

    هي : صباح الخير حبيبة وييي عرفت ديجا قالتها ليا حياة...بون اليوم لول غادي تكوني معايا وكاينة واحد البنت ديجا شهرين وهي معانا هي غاتفهمك شنو ديري فلول et après.. étape par étape تعلمي...بون كوغاج..اه وبالنسبة لدكتور محمد مكاينش هاد الصباح حتى لعشية عاد غايجي وانا سميتي مديحة ..

    فرح "بابتسامة" : مشرفين دكتور مديحة

    مديحة : كريمة حبيبة عطيها تلبس واجي معايا نعطيك شنو ديري معاها ..."اول نهار كيكون عادي ديال تفهمي وتشوفي عاد كيجي تطبيق شوي بشوية...السطاج او الخدمة من احسن البلايص الي ممكن ينسا فيها الواحد حياتو فالدار ومشاكيلو الشخصية فاش كتلهى وتدها بالخدمة كتولي عندك المشاكيل ماشي ديما فراسك خصوصا الى عمرتيه بالمفيد كلشي مع الوقت كيتقاد(نصيحة مجربة)...."

    هي تدهات مع اول نهار فسطاج ليها وهو مدهي مع اول يوم الي غايشوف فيه الاعلان عن افتتاح مشروعه الضخم ...والي استغرق ليه اكثر من ثلاث سنوات ديال البني والخدمة والماترييل الي تقداه موصي عليه من المانيا و فرنسا باس قدر يجيبو ......

    زين الدين"دخل لقاعة كبيرة ديال اجتماعات فداك الجناح الخاص بالاطقم ديالو..حتى دخلو التقنيين ديال لانفوغرافي قادو المسائل وبرونشاو كلشي مع داتاشو...جبد من بواطة نضاضر شوف تقاد تا حيد الفيستة دارها ورا الكرسي.. بقا غير بقميجة فالبلوغوا وكيجات عليه مع سروال توب گري بانت فيه واحد الكاريزما وجاذبية تلفت الانضار حيث كان ماشي غير هو كاع المدراء الي غايكونو فهاد المشروع ومحاسبين وموضفين غيرهم منهم بنات...وهو بصفتو رئيس مجلس الادارة ومعاه البروفيسور علي الزياني ..."

    علي"تاهو داير نضاضر شوف وكيتسنى مرة يقرا الملف قدامو مرة يهز عينيه يشوف فين وصلو..حتى ضار شاف فزين الدين" : الجهة لاخرى شاركها مع هنا ؟!

    زين الدين"داير مرفقو فوق طابلة وصباعو زوج على فمو مركز مع الماك وشنو كيديرو التقنيين .." : ضروري..."هز واحد ريمونت هبط كاع ريدويات الي تما "

    بعد لحضات او نقولو نصف ساعة ديال تجهيز ...تطفات الاضاءة وبقا غير داطاشو حتى تطلق الاعلان الي كان ساااامبل بلا قوة الاضافات والالوان كان فقط كيف وصفو اللون الابيض والاخضر الباعث للحياة والاسم ديال المشروع واللوغو بنفس الالوان..الكلام كان اغلبه بالدارجة والي ركز انه يكون بيها حيث الفئة الي كتهمو اغلبها مقارينش وكبار ...حتى كمل وكان بالفعل كيف بغاه ووصفو غير التقنيين الي اختار يخدمو ليه كانو من الفئة الشابة الي اتاخذات هاد المهنة مهنة ديالهم قبل مايدخلو ويقراوها ...شباب الي اغلبهم قراو وبحثو ولكن كانو غير كيديرو بريكول بهاد الموهبة وهادشي علاش اختارهم باش تعطاهم فرصة وحيث بصح كتكون خدمتهم محترفة من طراز الرفيع...

    زين الدين"بقا مركز وكيشوف وساكت واحد شوية وهما دراري كيتسناو شنو غايقول وفنفس الوقت كيقادو ...حتى تقاد فالجلسة حيث كان متكي وداير رجل على رجل" : جهد جهد والخدمة خدمة.."ضار شاف ف علي وشير ليه نيت" هاد السيد نهار بديت عطاني جملة مازاد عليها مانقص .."ماحدك كتخدم خدم وتعلم وفيد" ..المعنى ماحدك كتخدم كمل فخدمتك...نهار وقفت عليكم عرفتكم خدامين بهذا"شير لدماغو وهو كيهضر بواحد ثقالة ورزانة خلا الي تما كيشوفو ويسمعو ليه ويتمعنو فهضرته حتى وقف وسد الماك ديالو هز فايدو" تبارك الله عليكم...

    من بعد ما عطا الموافقة على ان الاعلان يتلاح خرج من القاعة وتبعوه علي...حتى دخل المكتب ديالو الي تقريبا كمل كامل فالاتاث وكلشي ...كان مكتب نيت كبيير وقدامو طاولة كبيرة ديال الاجتماعات مجهزة بكلشي وبلاصة ديال الصلاة بالاضافة الى دوش صغير وطواليط وبلاصة القهوة وفين ياكل هما بعاد فالجهة الثانية مباينينش حيث خصوصيات ...تحل الباب ودخل علي ..كيهضر فالتيليفون وجلس مقابل المكتب ديال زين ...حتى كمل وحط التيليفون قدامو....

    علي : اش كاين امتا الحفلة اسي البغدادي ..

    زين الدين"جاي هاز فايديه بلاطو كيسان القهوة حط ليه قهوته وجلس مقابل مع علي" : مزال واحد 15 jours...

    علي : وايلي راك عارف علاش داوي ...

    زين الدين"رشف من قهوته وحط الكاس وتكااا عالكرسي مربع ايديه" : فقهنا من فهامتك ابا علي ...ولدك على قد الحال فهادشي...

    علي : والطنز يا ولدي عشرة لضص...كنهضر على الحفلة فالدار عندك ...اسيدي الطلبة الي غاتجيب وصدقة ياك ولابد ؟! توحشت الطلبة والتجويد ديالهم...

    زين الدين : ضروري ضروي...وكان نساليو هادشي "شاف فالتيليفون تاريخ"

    علي : وخا سيدي"ضرب فوق البيرو ووقف" يلاه نمشيو "شاف فساعتو" هضر معايا دكتور بنسودة(اب حنان) نمشيو عندو ..غذا عندو عملية مستعجلة هادشي علاش كنت كنهضر معاه دابا...يلاه محدك مسالي دابا ولدي نقضيو الغراض باش ترجع غذا نكونفيرميو مع عبد الحفيض...

    كانت الساعة الواحدة ضهرا وصل وقيتة الغذا عندهم بوز غير تما ميقدروش يخرجو حيث الخدمة ليوم كثييييرة...كاين المطبخ ديال الكلينيك الي اصلا كيطيب لمرضى والاطقم الي تما والاطباء...جاتهم الماكلة حتى لعندهم وسياسة هاد الكلينيك كيخلصو الموضفين واحد المبلغ كل شهر لمطبخ باش كيتغذاو ولا يتعشاو ولا تاتشري شنو بغيتي...

    فرح"قبل متخرج مديحة استاذنات منها" : واخا نخرج ناخذ ليا شي حاجة من برا ؟!

    مديحة : بغيتي تغذاي ؟ خودي من هنا نيت هبطي لكافيتيريا لتحت خوذي شنو بغيتي ...

    فرح : واخا مي معرفتش فين ؟

    مديحة : وخا تبعيني..."خرجات وتبعاتها حتى نزلو بسانسور لتحت قبل من لاكاف كاين تما كافيتيريا كياخذو شنو بغاو يا فطور غذا او عشاء...وكاين الي كيجيبوه ليه تالعندو...وقفات كتشوف مالقاتش شنو بغات كاين غير داكشي ديال لي شيف بزيقة من كل حاجة ماعجبهاش وهي تطلب منها تخرج وحيث عندها بوز هي حرة ف طلعات لفوق وخرجات لشارع مشات نيشان عند واحد سناك تما خذات ليها شنو بغات تغذات ورجعات كملات خدمتها ووصل وقت الخروج حطات الطابلية والبادج الي صايبو ليها باسمها وصورتها ...استاذنات منهم وخرجات من الكلينيك تمشات شوي وصلات لشارع كتسنى شي طاكسي يدوز حتى وقفات واحد سيارة من بعيد ونزل قاطع شانطي كيهضر فالتيليفون ويضحك غادي داخل الكوميسارية الي تما قريبة نيت لكلينيك...لابس لباس عادي مدني...حتى هز عينيه وهي تبان ليه ومااا احلاها كيف بانت فعينيه فديك اللحضة لكسيوة ديال صوف تحت من مونطو دان طويل هازا صاكها وكتحك فايديها جاها البرد شوي تا خشاتهم وعينيها كيقلبو على طاكسي يدوز ...حتى وصل لعندها تاهو قميجة بيضة وسروال توب كحل ومونطو كحل تروا كار فوقهم ....عينيه كحلين وشعرو كحل كيحسن اللحية لكن اليوم بانت مربية شيي شوية ماشي بزاف عندو يمكن هو ف عطلة من الخدمة ...حتى عطاتها ريحة وسمعات صوت اسمها من فمو وصوته ماغريبش عليها وعلاش يكون غريب وهما كانو فعلاقة حب واول حب عندها ؟..

    اسماعيل : فرح !!!

    فرح"ضارت شافت فيه طلعاتو وهبطاتو بعينيها بزربة" : وي "بكل برود"

    اسماعيل"مد ايدو يسلم عليها" : عقلتي عليا ولا نستيني ؟!

    فرح"سلمات بالخف فحال غير قاست صباعو" : اه عرفتك اسماعيل ..لباس عليك ؟!

    اسماعيل"قلبه تنغز من هاد رد الفعل الي دارت" : لباس عاقلة على سميتي...الحمد لله ونتي ؟!

    فرح"حركات ليه راسها" : ممم لباس الحمد لله...ففف

    اسماعيل : مالك كتسناي شي حد ؟!

    فرح : لا غير بغيت ناخذ طاكسي...مكاينيش هنا بزاف ..

    اسماعيل"شاف فساعتو" : واخا اجي نوصلك الى ماشي مشكيل...

    فرح : لا شكرا ماعليش الى تعطلت نعيط لعصام خويا ولا فوزي يجي شي واحد يجيبني ...

    اسماعيل"دور وجهو لهيه مزال خاصو طريق طوييييلة على باش ترجع تشوفيه عاد طريق باش ترجع تسمح ليه عاد طريق باش يرجعو كيف كانو او احسن وهادشي حسب اعتقاده هو" : فرح كوني تسمعي وخليني نوصلك هنا صعيب تلقايهم خاصك ديري مع شي مول طاكسي يبقا يجي عندك سي نو خاصك وسيلة نقل ديالك باش تمشي وتجي...ولا شي حد يوصلك خليني نوصلك ليوم عارف مقلقة مني وبزاف نساي اسماعيل الي كنتي كتعرفي وخا غير اليوم...

    فرح"ضارت شافت فيه عاقدة غوباشتها" : انا العشا باش تعشيت البارح ونسيتو...اش درتي حتى نتقلق منك ..سمح ليا خليني نمشي "كحزات شوي من حداه وهي تمشي حتى بان ليها طاكسي وهي تمشي كتزرب شيرات ليه "

    اسماعيل"بقا كيشووووف فيها" : الى ما ضربت مع والديك الكحل فالبيض (زواج) ماخلاو فيا شلاغمية غالي نساو..الهبيرة ديالي...

    شنو الي يخليه لهاد الدرجة انه يتاكد بالي غايرجع معاها والاكثر من هذا وهو الزواج بيها !! واش القدر ممكن يجمعهم مرة اخرى وربي مكتبهم لبعضياتهم ولا ماهو الا سبب لعدة اسباب واحداث جايا ....

    وصل الطاكسي حدا الدرب خلصاتو وخرجات خاطرها ماهواش زاد غير نفسيتها فاش تلاقات بيه والنفسية اصلا عندها مدمرة وتوالات عليها الاحداث الشي الي مخليها ماشي فرح اللولة الي فيها الحيوية...يلاه وصلات عند الباب بغات تحل تا عيطات ليها فاطنة وهي دور عندها...

    فرح"سلمات عليها" : مي فاطنة غبرتي مابقيتيش دزتي عندنا..

    فاطنة : احياني شكون غابر انا ولا تي

    فرح"حكات شعرها بخجل" : هههه وصراحة انااا ...

    فاطنة : اش درتي بنيتي فالخدمة...

    فرح : هاني يلاه جيت منها اول نهار ليوم...غانكمل معاهم ثلاثة شهور وديك ساعة نسني معاهم كونطرا ويكون خير ...

    فاطنة : الله يسهل عليك اكبيدتي ويرضي عليك...واجي دخلي اجي راني مصايبة واحد طرح ديال بغرير بزبدة وعسل الحر عاد جابو باك جيلالي من تيزنيت..

    فرح"شحاال وهي تهرب وخا دار فاطنة ونجية هادو ديور الوحيدة الي ميمكنش متدخلش ليهم اكثر المنازل الي كبرات فيهم خصوصا دار فاطنة يعني فحال شكل الي غضبتي على داركم وجا باك ولا مك وقاليك دخلي ونتي متقدريش حيث ختك هرسات الي بيناتكم وكطيحي فهاد الموقف...وموقف لا يحسد عليه..." : احم بغيت ندخل وليني عاد جيت بغيت نبدل ونوجد كسكروط لخوتي ...

    فاطنة : وااالي (والو) تا دخلي والى عليهم راني نخلي ليهم كولي وسيري دي معاك صنينة ليهم ..

    فرح : واخا حتى نبدل حوايجي ونصلي العصر فاتني ونجي...

    فاطنة : مكاين بو تبدال زيدي دخلي وكان جايا نجية تاهي ..ولا ماباغاش دخلي عندنا ؟ ضربتي علينا ابنتي"قالتها بواحد طريقة تبقا فيك"

    فرح"صرطات ريقها وعاودت موقف صعيب ومتقدرش تقوليها لا وفنفس الوقت متهربة من صفاء " : احم ..و واخا يلاه...

    سبقات فاطنة وتبعتها هي خطوة لقدام وزوج خطاوي لور...مترددة وقليها كيضرب وشاعلة العافية فصدرها...عمرها مكانت كا ظن انها طيح فهاد الموقف عمرو طاح ولا كان يطيح على بالها...حتى كتبو ربي عليها...لقاتها حاطة فالطابلة شهيوات تشهاها النفس وتفتحها...استغربات لهادشي واش تكون وجداتهم على ودها وكانت كتسناها لانه هادشي الي باين ...اشمنك بغرير وشي ملويات وزبدة وعسل وقهوة بالحليب واتاي وكومير ومطلوع وفرماج وزيتون ...الى مكانش فيك جوع يجيك بهاد الطابلة البسيطة...يلاه غاتسولها حتى دخلات نجية سلمات عليها ...

    فاطنة"شافتها باقي.واقفة فحال شي وحدة اول مرة دخل عندهم لدار " : وجلسي بنتي شتك فحال البرانية داخلة ؟

    نجية : دوزي جلسي بنتي"ضارت عند فاطنة" ونابي (هي عيطي) على صافا (صفاء) تجي تجلس معانا...

    فرح"الصمت"

    فاطنة : ايييه ايه..وااا صافا وتي تعالي ابنتي ...نوضي بنتي تنفسي شوي نوضي ..

    نجية : كي بقات نزلات ليها شوي!!

    فاطنة : وشوي شوي وصافي مخليت ماعطيتها ..اليوم هيلي صبحت شوي بعدا...

    فرح"كتسمع والكاس ديال اتاي فايدها"

    نجية : وديري ليها سلاوية طحنيها والما عطيها تشربو والحشلف ديالها ديريه مع ما البصلة وطليه ليها راسها...

    فاطنة : درتهااا ليها وهي علاش شوي توگضت....واااا صافااا وتي نوضي..

    فرح : احم م واش مريضة !!

    فاطنة"هزات فيها عينيها بفرحة حيث سولات عليها" : هااا وايه وايه بنيتي يومين وهي سخانة طيح فيها وتنوض...دخلي عندها تشوفيها ولا تسنايها تجي...

    فرح : الا لا غير خليها ترتاح ..الله يشافيها امي ...

    فاطنة"بخيبة امل" : هاا و الي بغيتي ابنتي ..."صاوبات ليها بغرير الي كيعجبها بزبدة وعسل وحطات ليها فطبيسيل" كولي بنتي...

    فرح"يلاه غاتهز البغريرة حتى تحل باب البيت وخرجات صفاء لاوية عليها بينوار موڤ سخون وحازمة راسها بزيف فيه خضورية المخينزة وداكشي الي طلات ليها مها والوجه تنفخ والعينين خلاااص...واحد المنضر يقطع ليك قلبك وجايا وتجر فرجليها وتكحب واحد الكحبة صوتها فحال عواية ...كتحب لفاطنة ف قلبها....اما فرح هزات فيها عينيها وحدراتهم على الكاس كتشرب ووجهها تزنگ...اول مرة فحياتهم كيتخاصمو..."

    نجية : بنيتي كي بقيتي ليوم شوية "طبطبات خداها ونيت حدا فرح " اجي جلسي حدايا ميمتي...

    صفاء"شافت جيهة فرح ونزلت واحد دميعة خفييييييفة مبانتش ليهم...جلسات حدا نجية وحطات راسها على كتفها" : ش شوية...

    نجية"قاست راسها". : احح راسك سخون شوية...ولابد تمشي لسبيتار(المستشفى) هادشي ماا مسلك ابنتي...

    فاطنة : ايييه ؟ ولابيدة (ولابد)"شافت ففرح" نديوها سبيطار ؟

    فرح"هزات فيها عينيها" : هااا ..احم اه الى ب بقات هاكا...عاودي عبري بالميزان وشوفي ...

    صفاء : تت لااا مكاين لاش حسيت براسي شوية ليوم على قبل والله...عطيني غير دوليبران ولا اكلاف صافي...

    فاطنة : ومعرت ابنيتي حالتك خالعاني...

    صفاء"شافت ففرح وحدرات عينيها وعاودت شافت فيها بغات تسولها وخافت بغات تهضر وتشوف اش غاتقول ماعرفات اش دير كل مكتهز فيها عينيها كتفكر شنو طرا وهي تهضر" : فرح لباس عليك ؟!

    فرح"هزات راسها بجهد تا كان غايطيح الكاس وهي تحطو" : احم ل لباس الحمد لله اختي..."ناضت وقفت" انا نخليكم مي فاطنة الصينية الى وجدتيها عيطي ليا نشدها من عندكم..."ضارت جيهة صفاء لكن بدون ماتشوف فيها" الله يشافي اختي صفاء"تقالت بواحد الطريقة الي رسمية كانها كتزور غير جارتهم ولا معرفة...هزات صاكها ومشات تزرب خرجات من دار وعينيها مغرغرين وقلبها كيحرقها على هادشي الي وصلو ليه...اما صفاء غييير سدات فرح الباب ودموعها نزلو مكملين على دمعة سابقة حتى دارت ايديها على وجهها وخشات راسها فصدر نجية مخليا فاطنة كتنهد بحسرة تا دمعو عينيها والخطة لولة فشلات باش تهضرهم ..."

    نجية : بنتي لا بغيتي تسمعي ليا صبري الحاجة لا قويتي عليها وعاودتي وحكرتي وهي جديدة غادي غيييير دبري جرحة وتفتحيها...صبري وكان جرحة تشافا وتجمع ...الله يداوي قلوبكم "شافت ففاطنة" لواه هادشي خاصو تبخيرة اويلي شلا وشوية مجاري...

    رجعات دخلات لدار كيف العادة خاوية ...مشات البيت حيدات حوايجها بالنترة وصدرها كيطلع ويهبط ...بقات تحيد وتلوح طواتهم لبسات بيجامة وخرجات كتجمع فشعرها وتلهت حيث حابسة البكية تا دخلات لطواليط غسلات وتوضات وخرجات صلات الضهر والعصر الي فاتوها بحكم الخدمة تما مكتلقاش وقت فين تصلي حدها البوز الغذا ..

    اما عند عصام الي كان فالمحل من بعد ما تخلص من عند زبون فلوس اللحم الي تقدا...تسمع صوت الميساج من تيليفونو جبدو من شارج تما وقرا محتواه الي كان من عندها وكان فيه نوع من العتاب حتى دخل وقف عليه صاحبو وهو نيت صاحب صطوف ...

    هي : مغاديش نبقاو نتلاقاو ؟ علاش شنو واقع ؟

    عصام"جاوبها فالبلاصة" : بنت الناس نهار تبغي الحلال معايا علميني انا ماشي شماتة ورعواني ندور بيك فزناقي...ربعين عام بقا ليا عليها قل من عامين مالنا على اخر يامي نشيب ونعيب ؟ هادي هضرتي لا تكتري شاااي عليا نهار تبغي علميني والباقي عليا نهار تبغي تكوني مرتي جناحي ليك اما دابا لا تبرزطينيش ممساليش السلام عليكم"رسلو وسد تيليفون حطو يتشارجا وضار عند صاحبو" اش كاين شي ؟

    عزيز : كاين غالخير سمير صدق رجولة اصحبي...

    عصام : من نهار رجولة غا شيطان وكان عارفو ميرجعهاش...

    عزيز : المحكمة على ما علمني المحامي الى حكمات شهر جاي تحكم ليه سورسي مع غرامة داكشي الي وصيتي سمير هو الي غايقول وقالو لمحامي فتسجيل باش يثيق بالي ميغدرش...ديك ساعة يقوليهم كانو كيتفلاو ووقع الي وقع ...شوي من هنا وشوي من لهيه وهاهي تفكات ..والى خىج القواد زمط لمو التب يجمع كرو شوية سخسخ زا*** بونا يغبر لبوه شقف...

    عصام"عوج فمو" : كثر من هاد الغبرة ...

    عزيز : وعليه انا مشيت تهلا..."تحرك عزيز من عندو من بعد ما عطاه اخبار صطوف..اما هو جلس تا وذن العشا وكيف العادة جمع دنيا وسد الحانوت ركب فالموطور وزاد نيشان لدار لقا فوزي تاهو عاد دخل وريحة العشا كيطيب كانت بيصارة شحال مطيبتها واليوم عاطية ريحتها عزيزة عليهم كلهم خصوصا فرح تموت عليها...دخل غسل حالتو ومشا بدل حوايجو تا دخل لقاها فالبيت كتبقشش فتيليفونها جلس حداها تاهو كيبقشش فتيليفونو...

    فرح : كااع ماسولتيني كي داز نهاري فالخدمة !!

    عصام"شاف فيها بنص عين" : ياك مولفة تجي تعاودي ليا راسك ؟ تبدلتي عليا ابنتي تبدلتيييي...

    فرح"حلات فمها وهي تنوض وطلعات فوق السداري وضارت ليه ورا ضهرو وتعلگت تا كان غايجي لارض " : حشووومة علييييك انا وليت هاكا ؟!

    عصام : ونوضي الحبس ضهري غاتقسميه...

    فرح"شافت ففوزي" : نااااري عصام شرف"حطات ايدها على فمها"

    عصام"دفعها تا جات لارض مصلية عالنبي" : باقي ندك وندردك على مك ...

    فوزي : كتجيبيها غا لراسك...

    فرح : اي ضهري اعووووو غا ضحكنا معاك...ونتا كتقوليا تبدلتي ماحشوماش عليك ؟ اش بدلني وانا باقا غير انا ...وهو صراااحة تبدلت نييييت وليني النفسية مرضات شلا مداز اوه منمرضوش فخاطرنااا...

    عصام : واش مرضك داكشي الي داز داز ...

    فرح"تنهدات" : اوديييييي موت يونس الله يرحمو...

    عصام : الله يرحمو ...

    فوزي : واش داز عليك اش "خربق ليها شعرها على وجهها وهي كتبعد وهو كيخربق ويطرش فدوك الحناك ويجبد فيهم رجع لعادتو القديمة معاها" غلاضيتي لوالديك تاني من هاد الحناك ديال طبل سر "طرش" ديلمهم "عاود طرش ههه" غا طريييييييييش تاااايبان الحق ..تتت ريحي اهيا زكاااااااااي....

    فرح : واعوووو وتفرااااااااق مني ازمر وااااااااا بعد مني ...مالي الي مداز اي هههههه ازمر زكااا...داز شلا وشوية غا شمتة بااااك الي جايب ليا شارف تا صدق جاني واحد اسمو زين الدين. و"يلاااه بغات تكمل تا تسمعت زدااااااااف واحد مولاتي الخبطة فوق الطابلة ضارو بزوج شهقو بالخلعة لقاو عصام وجهو لا يبشر بالخير ابدا غوت بحر جهدو تا قالو را شاف شي حاجة وهو غير سمع سيرة زين الدين فحال لحتي ليه السم والملح فوق شي جرحة وخليتيه كيتركل وكشاكشو خارجة"

    عصام : واااااا ينعل القوااااااد بووووك ينعل القوااااد بوووووك وبوه "مشا ليها كيجرييييييي تالعندها ولاول مرة كيشنق عليها من الكول ديال بيجامة تا دهضر فوزي الي كحاز حيث عرف بالي مجرد ذكر سيرة زين الدين كتنرفزو هو فما بالك عصام !!! ...عينيه فعينيها الي وساع البؤبؤ ديالهم بالخلعة " نهار باقي عدو ربك قهاد النهار تجبدي ريحتو ماشي غير سميتو ندفن القواد بوك حية "خرج عينيه على جهدهم" حياااااااا...

    فرح"كتحرك راسها بجهد...حتى طلقها" : وو واخا واخا...

    عصام"وقف وضار لعندهم بزوج" : عصبو عدو ربي عصبو ملتي ينعل ديل حبايب حبكم فهاد النهار ..الق لاوي باقي تجبدو سميتو سمعتي سميتو نصفيها لوالدين بوك سمعتيني "قرب اكثر" وحمدي الله سمعت ليك وما دخلت فدينمو شتت ليه المصارن.."عض لسانو حيث الشمتة ديال زين الدين باقي فيه لدابا كل مكيتفكر ان زين الدين استعمل فرح طعم لتصفية حساباتو مع راجل عمتو ماشي تا من باها كون باها لباس يقول بغا ينتاقم منو عن طريق ينتو لكن تصفيات حسابات بيناتهم ودخلو برانية طعم هادي كيبغي ياكل راسو عليها وغييير جدو الي هضر معاه وحلف عليه اما كان يا قاتل يا متقول ..هز تيليفونو وتلاح بلاصتو كينهج اصلا صاعر مع البنت وزادو سيرة زين الدين وهنا كيبان لينا انه زين الدين وعصام اعداااء"...

    من بعد ليلة دازت مشحووونة...قدر عصام يتنفس شوية حيث فالاصل كان خاصو يهضر ويعبر على الغضب جاي معصب جاي معصب من كاع جوايه...تعشاو فسكاااات تاحد مابقى هضر كيف ديما فاش كيتعصب عصام كيلبدوها تا كيهضر راسو وكلا مشا ينعس فبلاصتو حتى صبح الصباح فاقت بكريييي باش متعطلش وتختار لبسها وتلبس براحتها كيف حلات الماريو كتفكر شنو تلبس حتى هزات كولون مبطن ديال برد وتريكو صوف فالزرق ملكي طويل حد الركبة وعريض كيف العادة حجم وطاي كبيرة باش يجيها مستور لبساتهم بالخف هما وتقاشر على حسب البوط الي عندها كحل...هزات مونطو ديال البارح نفسو شارياه من البال صدق ليها زوين وكينفعها فالبرد...تاكدات من فلوس عندها وقادات مسائلها متوضاتش حيث مع الفجر بغات تصلي لقات فيها العادة شهرية ومشات تا وجدات الفطور عاد جات تجري تقلب عالفنيد ديرو فصاكها ساعاك لقاتو تقادا...

    فرح"بحزن" : اويييلي تقادا ليا "جاتها البكية هههه حيث هاد الفنيد هو الي كيفكها من الوجع باش متجيهاش كريز كيف شفنها فاولى بارتات القصة وحكينا حكياتها مع الم دورة الشهرية والي كيعانيو منو اغلب الفتيات هذا اذا ما قلنا كلشي وهي ماشي من النوع الي كينفعو العشوب وخا معرفت اش تشرب الى شداتها يا الفنيد يخفف يا تمشي لمستعجلات تضرب ليبرا...شافت راسها غاتعطل وقالت را الكلينيك فين خدامة يعالجوها في حالة وقوع كريز...خشات لوازمها ومشات تا فطرات خلات عصام كيقرقب هو وفوزي باش ينوضو لبسات بوتيو ديالها ورمات مونطو عليها ومشات عندهم البيت عند الباب دقات" هاني مشيت صافي ؟!

    عصام"حجبانو معقودين نايض مدمر " : خاصك شي حاجة ؟!

    فرح : لا مخاصني والو ...

    فوزي"كيتفوه" : خاصينك فلوس باش تركبي وتغذاي تما ؟!

    فرح : لا عندي مزال ...

    عصام : تيسري ..."هزات صاكها وشغلها وخرجات من دار مشات اتجاه الشارع ومن حسن الحظ لقات طاكسي جاي شيرات ليه ومشات نيشان لكلينيك لثاني يوم ولكن الم العادة بدا كيتحرك فيها وينغز...كيف وصلات طلعات نيشان لبسات طابلية ولقات دكتور محمد كاين رجل فالخمسينات من عمره ومديحة لداخل والبنت كريمة الي معاهم شهرين دسطاج نفس اجازة فرح...لقات سلام وجلسات كتخدم ثاني هاد المرة عيطات ليها مديحة باش تدخل لابو لدااخل وتحضر معاها باش تفهم..."

    مديحة"جمعات شي اضرفة ديال ليزاناليز" : فرح اجي ..

    فرح"مشات عندها كتشوف فيها كتقاد فيهم " : وي دكتور مديحة..

    مديحة"جمعاتهم فواحد ملف كيتسد وعطااهم ليها" : هادو غادي تعطيهم لاستقبال الخاص بينا هنا ياك عرفتيه "حركات ليها فرح راسها وهزات ثاني واحد الضرف خاااص مكتوب فيه ومداتو ليها" وهذا غادي طلعي لطاج ثاني عند دكتورة الهام المنصوري غير توصلي لطاج تما ف réception ديالهم ينعتو ليك فين وردي بالك عافا حبيبة را انفلوب خاااص وحساس ..

    فرح"خاصها تسول حيث كتعلم وموصياها تسول على اي حاجة باش تعلم الخدمة" : بون وخا نسولك ؟ شنو المشكيل هنا فهذا علاش كتبتي ليه خاص ؟!

    مديحة : حيث هذا ديال واحد الولد من عائلة دكتور الهام ...دونك حالة خاصة وهي عندها الحق تشوفو حنا منقدرو نديرو والو كون الموضوع سونسيبل وعافاك ردي البال

    فرح : شنو الحاجة حساسة فهاد ليزاناليز عندنا ؟

    مديحة : نورمالمون مرض السرطان هو اكثر حاجة حساسة الى جانب مرض الايدز هادو كيكونو مرتابطيين بنفسية المريض ف عند الحق الطبيب ديال المريض هو الي يشخص الحالة... حتى من بعد ونوريك ...

    فرح : واخا صافي "هزات داك الملف والضرف الخاص وخرجات من الجناح ديال المختبر هبطات لتحت عطاتهم الملف ديال التحاليل وطلعات لطاج فين وراتها سولات على طبيبة لقاتها داخلة لعند شي مريض وجلسات كتسناها لكن الفضول الي فيها خصوصا انه ذكرات ليها مرض الايدز وفرح من النوع فقرايتها كتبغي تعرف كلشي تبغي تستفسر اي حاجة تسول عليها تبحث عليها .. وهاد الضرف الخاص اثار فضولها بزااااف...ناضت من تما ومشات لواحد التيراس مقابل مع الباب وخرجات جلسات فواحد الكرسي تما مترددة واش تحل او لا واش دير وبما ان الضرف الى تحل يتسد واحد نوع من الاضرفة خاص حلاتو وهي تبدا تقرا لقات ان صاحب داك التحليل كيعاني من لوكيميا وهناك شك يكون فالمراحل المتاخرة ...جمعاتو بزربة وسداتو ومرداتش البال لواحد الورقة فيها تقرير بطابع ديال دكتورة ديال المختبر طاحت فلارض وناضت مشات بزربة لا تجي طبيبة تسول وبالفعل لقاتها يلاه دخلات عطاتو ليها ومشات...حتى بدات كتكوانسا بالوجع ....

    الدار البيضاء...

    هبط كمايم تريكو دالخايط الي كان فاللون الخزي من بعد ماكان كيصايب فواحد الماترييل خدمو باش يشوف اول تجربة ...رجع المكتب وهز جاكيط الدان نفسها ديال البارح فالمارون ...هز واحد الملفات خشاهم فالشكارة الي فيها لابتوب وجمع شنو غايخصو يلاه هز تيليفون باش يعيط ليه حتى دخل عليه ...

    علي : يلاه مشينا ؟

    زين الدين"كيحك لحيتو ويقلب بعينيه"

    علي : واااا سي البغدادي واا ولد الحاج...

    زين الدين"باقي بنفس الوضعية حدو هز عبنيه بشواااايا والي بغا يربح العام طويييل"

    علي : انا الي دري صغير وهو شايب شوف على ثقالة يا صحبي...

    زين الدين"هز شغلو ولبس عليه جاكيط خرج سبقو وتبعو هبطو لاكاف ديال باركينغ الجناح الاول ديال موضفين...ركبو فسيارة زين الدين طبعا هاد الايام هي باش كيتحركو ...حتى ضار عندو عاوتاني غايرجع لهاد المدينة وقلبه مقبوط عليه من اخر مرة زارها وكان وقع الي وقع ..."

    علي : دير سانتيغ اولدي راك نسيتيها...

    زين الدين"كان سايق تا تهز دورها عليه ورجع تقاد شاف فالساعة" : شكون معاه ؟!

    علي : حاليا غير هو ومول الكلينيك ...

    زين الدين : فضل لينا...كثرة بنادم مكاين لاش ...غراضنا بيهم ومعاهم حسن ..نتمناو من الله خير..."هز ايدو عاقد غوباشتو" لا يشدش معانا ضد مخيرة لينا وليه ...

    علي : لا لا الى كان غا سي عبد الحفيض ونوري تهنيتي من هاد جيهة ...كلينيك كبييير تما وهما ولاد ناس راك عارف ولاد الخير كيبغيو الخير ماجيتش واختاريتهم هما وعاد تانتا را غاتعاون وتعطيهم كوميسيون...

    زين الدين"حرك راسو وكيبان على وجهو الي تبدل علامات الحزن والقلق الي لاحضها فيه علي" : لا لا من جيهتي هنيتي الله اودي...

    علي : مال وجهك تبدل ؟! "ضار شاف اللافتة بانت ليه باقي لجديدة ربعين كيلمتر" ااااه شحاال ماجيتي ياك ؟"حرك ليه راسو بشوية" وماعليش ماعليش اولدي مدبرها حكيم ...

    زين الدين"دوز بايدو على لحيتو وعاود حتى نفخ بفمو ورجعو ليه ثاني ذكرايات الحلم الي عمرو مينساه"

    كانت الساعة الواحدة ونصف ضهرا...جالسة قدام البيسي كتقيد فالملفات الي قدامها الي كانت واحد ضمصة نيييييت...الوجع ماحدو كيتزايد وهي عقلها كيغيب حسات بالترجاع والالم كيتزاد حتى حطات راسها على المكتب كتحك فكرشها وتعاود حسات بيها كتنزل سخووووونة والوجع كيحسك...تا هزات راسها لقات مديحة مشات خذات اذن عندها شي غراض ومحمد فلابوراطوار لداخل ميقدرش يخرج خدام والبنت الي معاها سطاجييير خرجات تغذا ...مالقات كيف دير وهي تمشي دخلات على طبيب استاذنات منو تمشي تغذا وتشوف شي كسنة تما ولا عندهم فالمستعجلات لتحت يديرو ليها شي حاجة...سمح ليها تخرج ومشات كتزرب هزات صاكها فيه الويز نيت باش تبدل مشات نيشان لتحت دخلات طواليط كتبدل والوجع كيحسك فيها تا حسات بتبويعة...

    فرح"مطوية على كرشها ودموعها دايزييييين" : امممممم ععععع وااااكوااااك غير صبري تاناخذ فنييييييد اهى واااااكوااااك الموت المووووت اهى...اععووووء "نفخات حناكها ومشات طارت نيشان لطواليط كترجع وتعاود كاع الي فطرات حطاتو وتبعاتو الكشاكش " اوفقففف "لحمها كلو فيبرا ليها بترجاع والوجع فحال الى شدها الضو كانت غاتسخف حسات شوية بدا كيحبس وجاتها واحد رااااحة وفرحة تقولي شدات الباك من جديد... ...خرجات من طواليط نيشان ومشات لاسانسور بالدعقة وركات على البوطونات تخربقات دعوة وهبطها لتاااااحت عند الباركينغ ....تحل سانسور وخرجات كتزرب حتى كيبان ليها الطوموبيلات قدامها مفهمات والو ...يلاه غادور حسات بصاعقة ضربات تحتها تا تكوانسات وطاحت لارض شادة فكرشها وتبكي وتلوى فلارض كلها ....

    فرح : واااااااااااااعععع اهى اهى امممممم واااااااااااااااااعععع لا لا ياربيييييييي غانموووووت اخئ ...

    فهاد الاثناء وصلات سيارة زين الدين الي هبط من جيهة باب الباركينغ الي فلاكاف وهبط لتحت تا وصل كان كيهصر ..هز صاك ديال الماك والاوراق وسد الباب وتيليفون فوذنيه وكذلك علي تاهو كيهصر خصوصا هاد الايام عندهم دنيا مبرزطة والحالة...غادين وكيهضرو ...

    علي : معندناش الوقت باقي جوج سيمانات على"دور وجهو ورجع كيهضر وهو يدور وجهو بزربة بانت ليه وحدة فلارض مطوية متاخذة وضعية الجنين في بطن امه وراسها كيضرب فلارض مشا كيزرب مخلي زين الدين كيهضر تا تحنى عندها وحط ايدو على كتفها " : ششش بنتي ياك لباس ؟!

    فرح"هزات فيه راسها وجهها كلو حمررررر ودموعها محابسينش كتعصررررررر فعينيها وتبكييييي ومرة تبغي تشقلبهم بالالم فحال داخلاها الموت" اننننممنن

    علي : حاولي تهدني غيير شوية وعطيني بشنو كتحسي ؟

    فرح"اش غاتجاوب مسكينة مابقاش كيبان ليها شكون هو ضبابة نزلات على عينيها وحطات راسها فلارض وتنخصيصة فصدرها تا وقف عليه زين الدين خلاه كيقلب عليه ماعرفو فين طار كان على شوي يمشي يطلع لا يكون سبقو حتى بان ليه محني على شي حد كيسول فيه "

    زين الدين : شنو واقع ؟!"

    علي : كنت كنهضر حتى بانت ليا هاد البنيتة ... جو بونص Les douleurs de règle

    زين الدين" كيطل غير تحرك علي وهي تبان ليه غير من ضهرها عرفها حس بالضو ضرب ليه فالقلب خرج عينيه على جهدهم تا لاح تيليفون على قدو جا فلارض وتضربات ليه لافيشور "

    علي : اسلامة سلامة اش واقع مالك ؟!

    زين الدين"تحنى لعندها كيقلب فيها بعينيه " : ف فرح ؟؟ ششش ...شنو مالك ؟! "كيفحصها بعينيه وهي غايبة على الواقع الالم لا يطاق فهاد اللحضة كتضرب بايدها فلارض وماحساش شكون كيهضر معاها"

    فرح.: وااااااااااااااااااا وجع وجع وجع وااااا اهى اهى وااااالاااااااا "عينيها كيخرجو فاش كيشتد الالم عليها كتحس بالماس كيضربو فكرشها لتحت وفخادها وضرها وغير كتقيس البرودة كتغوت " اعععععع ...مانقدرش منقدرش ...اففففففف ...

    علي : بنتي عطينا فين كيضرك بالضبط ...بففف انا نعيط ليهم فليرجونص ...كتعرفها لا ؟! "شافو مجاوبوش " زين الدين ؟!!!

    زين الدين"فين بقا داها فيه هو اللقاء بيها صدمو وخصوصا بهاد الطريقة يلقاها مسكينة طايحة حدا طوموبييلات كتوجع ومادايها فيها حد فحال اليتيمة ..." : ف فرح شنو كتحسي ااا ؟ "كيهضر بواحد صوت حنيييييين حاول يرققو على قبلها" علي : ميمكنش تجاوب كيما قلت ليك دونك لازم نعيط لشي حد يطلعها ليرجونص ..."مجاوبوش تاني خلاه بلاكة وشاف تاعيا وناض كيزرب يعيط ليرجونص "

    فرح : اهى اهى"كتمسد فكرشها وتعصر فيها بايدها عالله وعسى يحبس الوجع ..."

    زين الدين"طوا ركابيه وتحنى عندها كيطل عليها لقا وجهها حمررر ودموعها ملاقيين عند منخرها ...هز ايدو ومسحهم ليها وطلع لشعرها كيددوز عليه استعمل تقنية تخفيف النفسي باش تهدن حيث النفسية كتلعب دور كبيييير " : شششش "كيهضر بصوت فحال فحيح قريب لوذنها" تهدنييييييي بقاي حاطا ايديك تماااا عضيييي فالصبر ...

    فرح.: اهى بعد علياااا اهى خليييينييييييي اش جابك

    زين الدين"داير ليها الخاطر " : ولد لحرام انا من فعايلي ...واااخا فرح دابا نبعد عليك دابااا نبعد مايكون غير خاطرك الالة ..."هز راسو جيهة الباب بانو ليه تعطلو ...غوت بحر جهدو وعدوه تعطال فهاد الحالات " : واش غانبقاو هناااااااااااااااا....."بح ليه صوته".... Allez dépêchez-vous..."ماقدرش يهزها تا يشوف حالتها ماعرفهاش اش بالضبط شنو مصاحب لهاد الالم ...عاد بانو ليه جايين كيجريو خرجو من سانسور جارين البياص...حدر راسو لعند وذنيها وهضر معاها حيث غابت مبقاتش كتبكي ولا تجاوب" ششش لا لا حلي عينيك ...

    سبحان الله لقاء جمعهم وفكان مايطيحش على البال ...ربي كتب ليهم اللقاء فهاد البلاصة وهاد الحدث وبهاد الوضعية الي هي فيها ديال الم الدورة الشهرية...بقا محني عندها كيحاول يخفف وكقدرش يهزها لانه فهاد الحالات سواء ازمة سواء حادث او اي وضعية كانت ميمكنش يهزوهم بحركة عشوائية حيث لان مزاال معرفش نوع الازمة الي فيها وشنو مصاحب لهاد الالم وهو غير قدر وخاذ احتياطاتو بسرعة البديهة كونه مولف يفكر بسرعة فحالات الحوادث كيما كانت...هبطو البياص عاد دورها بشويييي وحسب من واحد حتى لثلاثة وتهزات عاد رفعو البياص كيجريو بيها وهو تابعها ...

    علي"قشع تيليفون ديالو تحنى هزو هكاك مشقوق كامل " : سلامة على سيد ..."خشاه فجيبو وتبعو فين مشاو...طلعو بيها غير طاج الي تما المستعجلات ودخلوها كتوجع حتى جات الفرملية كتسول فيها بزز باش قدرات تجاوبها شنو عندها عاد شافت فالطبيب الي حضر دغيا حيث شاف زين الدين زميل دراسة ديالو....اما زين الدين بقا واقف مربع ايديه كيمشي ويجي ويشوف فساعتو ويدور جيهة الباب حتى نطق علي...

    علي : شكون هاد البنت كتعرفها ؟!

    زين الدين"حرك ليه راسو"

    علي : وشنو نديرو دابا ؟ السي عبد الحفيض والمدير كيتسناو ؟

    زين الدين"كيشوف جيهة الباب وكيهضر" : سير عندهم نتا نسالي وانا معاك...

    علي : وا ولدي اش غاتبقا دير هنا هاهما دخلوها وصي عليها دكتور لداخل ويلاه ل réunion الي عندنا والوقت مكاينش ...

    زين الدين"كان مربع ايديه ومتكي عالحايط ووجهو مكيتفسرش...هز ايدو وعينيه فلارض " : الحاج ماعليش سير نتا وكان نسالي وهاني معاكم...غراضهم بينا كثر من غراضنا بيهم..ماعليش يصبرو شوية ...

    علي"بقا كيشوف فيه وفملامح.وجهو المبدلة وكيفاش واقف وكيتسنى وخايف خصوصا انهم على موعد مع اجتماع مهم بزاف ...هنا عرف ان الي لداخل اهم وزين الدين كاااع ماحاس براسو " : اييييه لهاد درجة !! ماقلتي عيب...باش مكان علمني فاش توصل عليا اش دارت البنية...والله يشافيها...

    زين الدين"من قلبه" : اميييين امين امين...

    علي"جبد من جيبه تيليفون زين الدين ومدو ليه" : امني هرستي تيليفون فاش شفتيها اودي خليييك خليك..

    زين الدين"هز عينيه فالتيليفون وشاف فعلي وهو يشدو من عندو كيحرك ليه فراسو " : الساعة الله...

    مشا علي بعد لحظات مخليه واقف تما كيتسنى ماقدرش يدخل كونه ماخدامش تما يعني ماشي من الطاقم الي مكلف ب تما...بقا كيمشي ويجي ويشوف فساعته ماشي بزاااف غير شي ربع ساعة ماكثيراش حتى خرج عندو الطبيب اول حاجة سلم عليه كونه معرفة ....

    زين الدين : les douleurs des règles ؟

    الطبيب : وييي دكتوغ..."بدا يشرح ليه...بالي كريز ديال العادة الشهرية الي تسببات ليها فهادشي بحيث داك السوفل باش تشد وتصبر كيستنفذ ليها الطاقة بالاضافة الى القيء والغثيان تاهو كيساهم ف اتنفاذ الطاقة الكاملة..." عادي هاد الحالات يوميا كتجينا ...

    زين الدين : et alors ?

    طبيب : On a lui donné une injection just pour calmer les douleurs des règles juste demi heure et elle peut rentrée chez elle (عطاوها شوكة باش تهدن ليها الالم واحد النصف ساعة ويمكن ليها تمشي فحالها عادي)...

    زين الدين"دوز على لحيته" : بون بوسيبل ندخل عندها ؟

    طيبيب : وي وي بوسيبل دخل غير من هنا سير نيشان كاين واحد الغرفة مقابلة معاك تما فين كاينة..."حرك ليه راسو بشكر.وتقدير ومشا ديريكت بدون اي تردد منو غادي باغي غير يشوفها من بعد المنضر الي شافها فيه قبيلة يقطع القلب وسط الباركينغ حدا طوموبيلات...وصل فين نعت ليه وحط ايديه عالبواني وتشك حل الباب بلا ميتردد طل براسو لقاها ناااعسة وحداها تيليفونها الي عطاه ليهم علي وصاكها ....وجهها ولا بيض بالوجع والعيا ديالو...وشعرها الاحمر مجموع لور حاطا ايدها على كرشها وواحد راحة نازلة عليها تبغي غير تنعس وينعل بو العلام....

    زين الدين"دخل بالحس باش متفيقش وتكسر راحتها الي لقات...براكة غير الكسر الي دار ليها والي خاصو بزااااااااف على ميتنسى ...جر كرسي بشوييييي مكمش عينيه لا تسمع وتفيق لانه شي حاجة فيه لداخل مباغيهاش تفيق باش يبقى حداها وقت اطول بلا متحل عينيها وتستوعب را كاين وتبدا الهضرة والعتاب واللوم الي هو في غنى عنه براكة عليه غير الندم الي كياكل فيه انه استغلها وخا بغير قصد منو وفلحضة غضب وزلة لسان حتى تسبب فكسر انثى ويتيمة ما دارتها لا بايديها ولا برجليها هكاك جرها مسكينة فحساباتو مع الغالي حتى هرسها وحطمها وكسر خاطرها وهادشي هو الي مرضو غير انه ندم بجهد لكن احاسيس اخرى تحركات مع هادشي وخلاها ماتحيدش من بالو ابدا...بقا مقابل ليها كيشوف فهاد البنت الجميلة الطبوزة الكيوت الصهباء ...ايديها فوق كرشها شاداها تقولي خايفة تحيدهم ويرجع الوجع من جديد...تفكر معصمها ورجعات بيه ذاكرة فاش عطاها الكورميط الي كان ضمن الهدايا ديال الخطبة الي كان واجب عليه يحضرهم سواء كان باغي او رافض وخا الي عطا الله عطاه وواخا كان داير فبالو ممكن يحد الخطبة والكذوب الي دخلات فيه الا ان دوك الهدايا كانو ولابد باش يكبر بيها لانها رغم كل شيء كتستاهل فنظرو...."

    فرح"يلاه ترخااات ومشات حتى صونا تيليفونها فيقها من عز غفوتها وراحتها تا حلات عينيها وهي دور جيهة الصوت مشافتش زين الدين الي جالس حداها داير رجل على رجل كيشوف فيها حتى جاوبت بصوت عياان وهي دور حتى بان ليها وهي تشهق تا تسمعات فالتيليفون كان عصام"

    فرح : اش كدير "بغات تنوض حتى وقفها صوت عصام"

    عصام : فرح !!! ...

    اما فهاد الاثناء والفوق فالطابق ديال مختبر التحليلات...العمل كان عادي حتى دخلات الدكتورة مديحة بغير سابق انذار كتزرب لاحت الصاك ومشات لداخل عند الطبيب الي لي معاها حتى دخلات كتقلب هنا وهنا وعقلها مرفوع...

    محمد : ياك لباس !!

    مديحة"بغات تبكي" : واحد تقرير انا درتو مع ليزاناليز ديال الدكتورة الهام المنصوري عقلتي ؟!

    محمد : كنضن را مع ليزاناليز ف لونفلوب ؟

    مديحة : وواااالو عيطات ليا والو مكاينش وانا متاكدة حطيتو ودابا جيت غا باش نشوف واش طاح ليا وانا متاكدة حطيتو مع تحليلة وسديتو..."حطات ايديها فوق راسها" مشكييييييلة مشكيلة...

    محمد : ديتيه ليها نتي ؟!

    مديحة"شافت فيه " : لا رسلتو مع فرح سطاجيير جديدة...

    محمد : عيطي ليها وسوليها...

    مديحة : كريييمة

    كريمة : وي دكتور...

    مديحة : عيطي لفرح عافاك فينهيا دخلت مبانتش ليا ؟

    كريمة : جيت لقيتها مشات تغذا وباقي مجاتش ...

    مديحة : كيفاش مجاتش"شافت فساعتها" فاتت وقيتة البوز بزاف فين مشات ؟! جيبي ليا نمرتها من وراقها دابا..."مشات بزربة جبدات من سيفي ديال فرح نمرتها وعطاتها ليها صونات ليها لقاتو مشغول وبالفعل مشغول لانها فهاد اللحضة كتهضر مع عصام فوذنيها و زين الدين قدام عينيها وياااا له من موقف"

    فرح : اا ؟ م مسمعتوش انا كنت لداخل...

    عصام : مال صوتك عيان ؟!

    فرح"شافت جيهة زين الدين غير من تحت مكتهزش فيه شوفة ابدا وقلبها را ممكن يكون كيتسمع معرت فين...لكن باش تخبي على خوها مابغتش تخبي عليه وتحطو فالصورة" : انا كنت فالمستعجلات...بلا متخاف غير مشكيل الوجع ثاني ..

    عصام : كيفاش !!! ثاني ؟ ودابا فينك ؟ انا شوي ونجي عندك..

    فرح : لا بلاش عطاوني شوكة ووليت شوية هاني عندهم دابا غاد نخرج نخلصهم ونطلع نطلب من طبيبة تخليني نمشي نرتاح ونجي والله متخافش عليا...

    عصام"هز حاجبو" : عندك فلوس كافييين ؟ را مستعجلات الكلينيك هادو اشريفة ..بلا قوة الهضرة عليا شوية ونكون عندك...

    فرح"حطات ايدها على حنكها" : وااا عصام و "قطع عليها فالبلاصة"

    زين الدين"كيشوووف فيها السيد حاضي تفاصيل هضرتها مع خوها وكيفاش هضرت وخافت...حتى نطق بداك صوت " : شوية دابا ؟!

    فرح"جمعات غوباشتها ونزلات عينيها فالتيليفون" : شوية خويا شكرا غير سير عافاك شوي وغايجي خويا مبغيتش مشاكيل ...

    زين الدين"عاد حلات ليه الجلسة هههه" : مزيان...

    فرح"شافت هنا وهنا وهي تنوض شادة فكرشها باقي فيها شي نغيزات كيتهدنو مع الدواء" : ففففففف

    زين الدين : شششش فين غاديا ؟!

    فرح"كتحاول تشتت النضر متشوفش فيه" : فحالي غاديا غايجي خويا ونصدثو فالمشاكيل كنقوليك را جاي مكتسمعش ؟!

    زين الدين"تكا على الكرسي مربع ايديه" : الي جا مرحبا الله اودي زمان ما شفنا با عصام مزية نهضر معاه جابتها الوجيبة ...

    فرح "خرجات عينيها " : واش كتهضر من نيتك اخويا ؟!

    زين الدين"رفع حاجبو" : شنو المشكيل ؟!

    فرح : والو وااالو مكاين تا مشكيل "يلاه بغات تنوض حتى صونا تيليفونها جاوبات فالحين "

    مديحة : فرح !!

    فرح : وي شكون معايا ؟!

    مديحة : دكتور مديحة هادي الي معاك فينك ؟!

    فرح : ااا ؟ ديزولي دكتور تعطلت انا جايا دابا عندك ونشرح ليك انا فالمستعجلات غير نخلصهم ونجي ...

    مديحة : قبل ماتجي ليزاناليز الي عطيتك تعطي لدكتور الهام واش حليتيهم ؟!

    فرح"تفكرات بالي الفضول كالها ومشات حلاتهم وهي تصرط ريقها" : ااا ب م

    مديحة"دايرة ايدها على راسها بقلة صبر " : فراااااح التحاليل الي ديتي مافيهمش التقرير كنت خارجة حتى صونات ليا الدكتور الهام علماتني بالي مكاينش وهو مهم ضروري ميمكنش انا نساه ورجعت من كونجي ديالي باش نقلب عليه مالقيتوش وانا سيغ اي سيغتان درتو ميمكنش منديروش راني خمسطاش العام وانا فهاد الضومين ميمكنش نسا شي حاجة..رجعت بالكاميرا نشوف لقيت فعلا درتو واخى وحدة خذاتو هي نتي ..دونك واش حليتيه وفين تقرير ..

    فرح"قلبها بدا يضرب جاتها البكية حيث على مشارف انها طيح فمشكيل كبيييييييييير " : غ غير بغيت نشوف ماعرفتش والله ماعرفت"بدات كترعد" غير قريت ورجعت ليزاناليز لبلاصتهم"هادشي كيسمع فيه زين الدين*

    مديحة : دابا طلعي عندي نشوفو هاد المشكيل الي طيحتيني فيه ...Vous êtes irresponsable ..."قطعات عليها فالبلاصة تا غمضت عينيها ووجها ولا حمر هادشي كامل لاحضو زين الدين حتى وقفات واخا عيانة الخلعة عطاتها واحد الجهد تا بدات تجمع فحوايجها...وهزات صاكها بغات تمشي تا وقفها بايدو " حيد خليني عافاك نمشي حيد ...

    زين الدين : شنو واقع ؟!

    فرح : والو والو خليني علييييييك واااخليني عليك الله يرحم ليك الواليدين غايجي خويا ونصدقو فالمشاكيل خليني نفك مشكيلي عافاك ...وشكرااا على شنو درتي ..."ماقدرش يهضر ظزال احتارم رغبتها حيث شاف وجهها تبدل فاخر مكالمة كثر من عصام وقدر يلمس حجم المشكيل خلاها على راحتها خرجات كتزرب مشات لاستقبال باش تخلص حتى لقاتو مخلص ماقدراتش تزيد تسول خصوصا تيليفونها ماحبسش من الاتصال ديال مديحة دغيا دخلات لسانسور ومشات لطابق ديالها....اما هو شاف ساعتو لقا بالي الاجتماع ضروري خاص يكون فيه مايحطش علي فموقف محرج وهو كون بقات تهضر معاه را الله ينعل جد بو شي علي هههه

    طلع حتى هو للطابق فين كاين الاجتماع دق الباب ودخل لقاهم كيهضرو اعتاذر منهم وجلس مستانف معاهم الاجتماع ولكن بالو ماهواش هنا بالو مع الي مشات ووجهها مغير ...

    علي. : بون بما ان الدكتور البغدادي جا ف نهضرو نيشان كيف شفتي اسي نوري هضرنا قبل ودابا بغينا نكونفيرميو ...طبعا ضروري من كوميسيون هادي حاجة باينة مغاديش نضيعوكم فحقكم هههه ...

    نوري"تبسم" : الله اودي مافيها شك من جيهتكم ...

    زين الدين"كان مريح رجل فوق فخدو مفرقين وايديه مشابكين كيدور فالكرسي يمين شمال مركز وا غاا كيحاول يركز اما عقله ما هناش ...حتى حنحن ونطق بسؤاله ل بروفيسور المسؤول تما " : عندكم زيادة ف les salariés ?

    ع.الحفيض"كيحك فذقنو بتفكير " : كنضن سي كاين هاد الايام نشوفو معاهم حل ...

    زين الدين"تقاد فالجلسة" : la semaine prochaine (السيمانة جايا) شرفني بوجهك الكريم نتا والحاج نوري عندي فالدار ولابد ...

    ع.الحفيض : الله يكبر بيك ايه مرحبا...

    زين الدين"كيشير بايدو بتعبير" : زيارتكم واجبة عندي.."شاف جيهة علي" بحضور الحاج البروفيسور الزياني ...باش مكان نعلمكم بالنهار "حك لحيتو بخفة" ولابد نعرف الوقت الي مسالين فيه اما زيارة ضرورية الحاج ...

    نوري : هههههه ياك اسي ههه وحنا نقولو لا ل ولد البغدادي عيب اولدي...

    زين الدين"حدر راسو باحترام" : الله يكبر بيكم ...

    يلاه كيهضرو حتى صونا تيليفون المدير فالمكتب هو فالعادة الى كان اجتماع راه مكيجاوبش لكن للصدفة جاوب فوسط الاجتماع...

    نوري"تبسم ليهم باستاذان باش يجاوب تا حركو ليه ريوسهم " : وييي ..شنو المشكيل ؟! وي وي !! سطاجيير جديدة ؟! جو بونص نتي الي مكلفة ا مريم n'est-ce pas ? داكوغ عطيني سميتها ...فرح الخياالي...

    زين الدين"غير سمع اسمها وهو يتقاد رافع حاجبو مخلي علي كيهضر معاه "

    نوري : نسالي هاد réunion نزلو بزوج تسناو حتى نساليو..."قطع معاهم وضار عندهم باش يهضر " مشاكيل فهاد لاكلينيك ...

    زين الدين"بلا ميحس" : شي مشكيل ؟!

    نوري"هز فيه عينيه " : ااا ؟ وي واحد سطاجيير دارت واحد المشكيل ضروري ندخل كون المشكيل كبير شوي ...

    زين الدين : اكد ليا على الاسم ؟!

    نوري"باستغراب وما هكاك شاف فالورقة الي قيد فيها سميتها" : فرح الخيالي...نورمالمون مديرة الموارد البشرية الي كتصرف ...

    علي"كمش حجبانو وضار عند زين الدين" : ماشي البنت الي لقينا فالباركينغ ؟!

    زين الدين"عقد حجبانو وحرك ليه راسو بمعنى هي ورجع شاف فالمدير " : المشكيل كبير ؟!!!

    نوري : سي شوية وغادي دخل ...

    علي "ناض وقف " : بون كنضن تفاهمنا دابا بالنسبة لباقي التفاصيل مزال نهضرو و كونفوكاسيون ديال افتتاح من هنا لواحد سيمانة وتوصلكم وحضوركم يشرفنا ...

    ع.الحفيض : الله يحفضك ...ضروري منحضرو وايلي هههه زين الدين رخيص عندنا ..

    علي : اممم هي انا صافي صديت وكان هههههه ...اسيدي مقبولة منك"سلم عليه وهز لوازمه باش يمشي حتى ضار لقا زين الدين باقي لاصق هههه " اولدي واااشريف "هز فيه زين الدين عينيه بشوااااااايا بغا يقتلو بهاد الحركات" هاحنا تاني بدينا...واتحرك اولدي نمشيو...

    زين الدين"غمز ليه بشوي" : تحرك نتا وكان نسالي شي امور ونوصل عليك..."شاف فيهم "

    علي : نبقى نتسناك ؟!

    زين الدين : تحرك بطوموبيل "جبد ساروت من جيبو" شوي ونوصل عليك..."شافو كيشوف فيه" الحاااج دير ليا خاطري وكان ...

    علي"بغا يتفقص هههه تحدر عندو وهضر ليه فوذنيه" : هاد فرح الي خلاتك تنسى راسك ومشاغيلك مزال لينا هضرة وكلام عليها...انا غانتحرك غير فهاد جوايه تسالي عيط ليا "ورك ليه على كتفو مزيااان وشاف فيهم تبسم وخرج "

    زين الدين"تقاد فالجلسة وشاف فيهم حتى بدا يهضر معاهم "

    فهاد الوقيتة كان جاي بموطورو وتيليفونو مساكتش من الاتصال حتى تبرزط بالمعقول ووقف الموطور صاعر كثرات عليه الاتصالات تا وقف بجنب وجاوب مكشكش ...

    عصام : لميااااااء برزطتي ليا رااااااسي الحبس راااسي ...اش كاين ممساليش لعدو ربك تانتي ...

    لمياء"ردات بصوت غالب عليه البكا" : علاش مبغيتيش تجاوبني فالواتساب اهى خليني غير نهضر ونفهمك...

    عصام"كيضرب فناضر " : وااااا هضرت معاك الق"عض لسانو حبس الهضرة الخاسر" هضرت مع دينمك جوج كلمات مافتهمش معاك ابنت الناس باغي الحلال راسي شاااب ما ديال تبرهيش ودوران فزناقي ...بغيتي مرحبا مبغيتيش مباقيش تبرزطي ليا كري يلاه...هاد المرة تقوي عليا نبلوكي جد مك ...

    لمياء : لا لا بغيت غير نقوليك اهى اهى صافي موافقة غير جي انا خفت غير نتبرزط بالخطبة وعندي امتحانات هادشي باش اهى اما بغيتك والله تا بغيتك "كتمسح دموعها وينزلو"

    عصام"حك وجهو وزفر بتعب وقلة حيلة" : مال والدين مك فهاد التخضخيض الي درتي ليا ؟!

    لمياء : هههههه اهى وغا سمح ليا ...

    عصام : سمح ليا اممم واخا ...سيري ماشي دايا تتسالي امتحانات ونهضرو فهادشي سيري دابا مبرزط مع ختي...

    لمياء : عاوتاني ؟ مالها !!

    عصام : مريضة ماعلينا سيري دابا نسالي ونهضر معاك ومرة جايا تعاوديها منعقلش عليك ...

    لمياء : لا لا صافي صافي سمح ليا "كتمسح دموعها بطرف كمايمها وتسحت وتنخصيصة كتسمع ليها" هاني...حتى نهضرو وديك ساعة نعلم بابا ...

    عصام : سالي الامتحانات وديك ساعة يكون خير انا نمشي عندو ونهضر معاه ركزي ليا غير فقرايتك الله يرضي عليك...

    لمياء : واااخااا ان شاء الله ....

    واقفة قدام الدكتورة الهام ومديحة فمكتب الدكتورة الهام من بعد ما شافو تسجيلات بالكاميرة بالي مشات لتيراس تما وحلاتو وقراتهم حتى مشاو لتما كيقلبو ومن حسن الحظ لقاو الورقة كيلوح فيها البرد تما...

    صونا ليهم المدير ومديرة الموارد البشرية باش ينزلو عندهم ....بقاات غادية كتفرك فايديها ونسات زين الدين هي كاااع حتى دقو الباب وسمح ليهم بالدخول دخلو بثلاثة وهي لاخرة حادرة راسها...شرحو ليه شنو وقع ...طلب منهم يمشيو حتى يعلمهم بشنو كاين ومنهم مريم RH بقات غير هي وياه...

    نوري : جلسي بنتي جلسي...

    فرح"صرطات ريقها وهي تجلس حادرة عينيها"

    نوري : شنو الدافع الي خلاك تقلبي ليزاناليز privé ؟!

    فرح"بصوت رقيييق مع العيا شوية والخوف والحزن " : منكذبش عليك موسيو فاش كنت كنقرا كنت كنبغي نعرف كلشي نتعلم ونعرف منين جات الحاجة وعلاش..يمكن فضول فيا خايب فاش قالت ليا بالي التحاليل الحساسة كتكون يا كونصيغ او ايدز جاني الفضول نشوف كيفاش كيطلعو ب لي مو كلي وشحاال النسب كيطلعو...

    نوري : كان ممكن تشوفيهم من بعد عطا الله فين تشوفيهم..

    فرح "خركات راسها" : غلطت سمح ليا موسيو...

    نوري : لو مالقاوهمش كنتي غاتسببي فمشكيل كبير لدكتورة عشر سنين وهي معانا بلا مشاكيل ...لو مكنعرفوهاش كانت حتى هي غاتمشي ...ميمكنش نضحيو بوحدة بروفيسيونيل واكسبيريونص لسنوات فحالها وعاد فاش عطاتهم ليك تديهم لدكتور الهام هادشي مسموح كونه داخل فاطار العمل ديالك ... عندك ما ضيفي ؟!

    فرح"بنفي " : لا مع الاسف معنديش واي كلام موسيو لو ديغيكتوغ قلتيه صحيح و سي جيست الغلط مني ماعندي مانضيف كلشي شفتوه بعينيكم ...وخا نقول جوسوي ديزولي بزاااف مغايمحيش الغلط الي درت...ولكن حاجة وحدة وخا عارفة معاديش تفيذ لكن ماعليش نقولها...من الغلط كنتعلمو يمكن هذا غلط فمجال العمل ديالي وفادح كنترجاك تسمح ليا وتعطيوني فرصة وخا عارفة حضي قليييل ماعليش نجرب"هزات فيه عينيها بترجي"

    نوري : شنو التخصص ديال ليصونص ديالك !؟

    فرح : لصونص فالبيولوجي تخصص فيزيولوجي فارماكولوجي....

    نوري"بقا كيسمع ليها ويشوف ويفكر" : جيتيني توصية العزاز ووجهك ابنتي ماشي ديال هادشي ..وخا مكينفيش الغلط ديالك...دكتور مديحة مغاديش تبقى تقدر مزال ثيق فيك ابنتي...غانشوف كيفاش باش متمشيش وكملي معانا دونك غادي تبقاي 3 mois عندنا من بعد ديك ساعة نعطيك واحد الورقة فين تمشي مي الى ثبتي الكفاءة ديالك عندك نسبة كبيييرة تخدمي معانا وهادشي راجع ليك...

    فرح"بلمعة من عينيها" : يعني نبقى !!

    نوري"حرك ليها راسو وناض كيقاد فكمايمو" : بقاي هنا واحد شوي حتى نجي ومن بعد سيري ..نيشان لداركم ترتاحي على ماعرفت كنتي فليرجونص ؟ غذا فصباح رجعي ونشوف مع دكتور مديحة سي نو نشوفو فين نحطوك...."حركات ليه راسها وهو يخرج قبل ميسد الباب دق فيه وسدو وهي بقات جالسة فرحانة تا صونا ليها عصام "

    فرح : وصلتي ؟! انا واحد شوي ونزل عندك كاينة عند المدير ديال لا كلينيك...خلاني نمشي نرتاح ...

    عصام : واش شوية نتي بعدا ؟ ماعلينا انا فالقهوة الي مقابلة مع الكلينيك...

    فرح : واخا"بقات جالسة كتسنى وتشوف فالبيرو حتى تسمع صوت تقرقيب وهي دور جينة واحد الباب تما تا تحل هزات عينيها كتشوف وكالعة طالعة طالعة تا استقرو عليه بداك الوقفة تريكو الخايط فداك اللون خزي الي جا معاه وبعرض كتافو للحضة تفكرات صفاء مكنية عليه عريض الكتاف.. خاشي ايديه فجيابو تا هزات فيه عينيها بخطفة شافتو كيعض ويحك فشنايفو بسنانو كيشوف فيها...بغاات تنوص تمشي وصاها المدير متحركش وهي دير ايدها على جبهتها وحدرات راسها بنفااذ صبر "

    زين الدين"بقا عاض شنايفو..صغر عينيه فيها وعوج راسو شوي ونطق بشوييي " : شوية دابا ؟!

    فرح"كضرب فجبهتها " : واااااكواااك اسيدي ياربي اش كيدير هنا ياربي ...

    زين الدين"رفع حاجبو" : كااااع ؟؟...

    فرح : ااااه كاااع...وعلاش جيتي هنا ؟! ياك قلت ليك شكرا واعتاذرت منك اس باقي مزال ؟! را غايجي عصام يرحم ليك الواليدين مديرش ليا صداع"هزات فيه عينيها شافت فعينيه نيشان الي كانو عليها كيتفحصوها باقي منضرها وهي طايحة مأزمو بقات فيه" ...

    زين الدين"تاهو معندو سوق حيد ايديه من جيابة ومشا تلاح فوق الفوطوي تما تنشر ليها حط رجل فوق فخدو مفرقهم كيف العادة.. ساس فوق ركبتو بحركة سريعة هو مثقل وهي بغاات تجذب ههه " : ماعليش"حط ايدو على صدره كيحك فيه" با عصام ديالنا جات عليه يهز من جيهتي ..مادرتهاش قليلة فحقو نستاهل....

    فرح"خرجات عينيها" : ياويلي ...والله حتى غاتجبد ليا المشاكيل"مبقاتش تسوقات لمدير ولات تفتفت تا ناضت وخرجات سدات الباب ومشات اما هو حط رجلو وفرق رجليه حاط مرافقو فوق ركابيه داير ايدو فلحيتو غارس صباعو فيها كيدوز عليها ويعاود ويشوف فين وصل راسو تا لقا راسو جالس على ودها...وزادت عزات عليه اكثر المشكيل الي وقع ليها وخا فضولها وصلها لهادشي وكون ماهو طلب من المدير كون جراو عليها فالبلاصة...جبد تيليفونو بغا يعيط ل علي لقاه طافي مهرس غمض عينيه تفكر فاش لاحو تا تهرس " : حنا ساهلين مع تشيتشونا.... " وقف كيسوس فحوايجو باش يمشي حتى دخل المدير..."

    نوري : صافي ولدي تهنى من جيهتها نحسبها فحال بنتي هنا...

    زين الدين"مشا ليه باس راسو" : يتوووب عليييك ويعلي مقدارك الحاج ...

    يتبع...

    التعليقات 1

    • U
      uiaw

      9issa wa3raaaaaa