ولادة من رحم الفساد الجزء 38

الرسالة كانت صادمة لدرجة توقف الوقت عندو...كايشوف فداك تقرير كيطلع يقرا سمية فرح الخيالي وكايرجع يقرا عمر البيبي...عينيه غرغرو،،دقات قلبو زادت طلعات على العادي..واحد الشعور غرييييييييب نزل عليه هو براسو مايمكنش يوصفو...دار ايدو على لحيتو دوز عليها وعلى وجهو كانه ممثيقش كانه كايحلم...فضل الراحة الي كان عايش فيها قبل قليل كايجيه خبر فحال هذا يفجر قنبلة احاسيس ومشاعر ملخبطة...الي كايخصها فترة ووقت حتى يستوعب عاد يبدا يرتب كل حاجة فبلاصتها...اول حاجة رسل هي

زين الدين : شكون معايا ؟...

ماعرفش نمرة ماعرفش شكون هذا الي رسليه هاد الرسالة قد ماهي زوينة بقد ما هي صدمة...كان خط واحد فالرسالة وهذا كايعني ان صاحب الرسالة مداخلش فديك اللحظة...تقامت الصلاة من جديد وماكان عليه الا يوقف يكمل معاهم...دامت صلاة التراويح حتى قرب الفجر تقريبا ب ساعة...مع سالاو بدا الدعاء...هز كفوفو كباقي المصلين...كل وشنو فخاطرو كل واش باغي فحيااتو...لا يمكن الجزم ان كل المصلين دعائهم بكسب الصحة او الشفاء من ضمن الادعية...الي باغي الذرية الصالحة والي شكر ربي عليها...فحالو هو نيييت فدعائو لقى راسو كايشكر الله على هاد النعمة الي رزقو بيها والي مكانتش طيح ليه على بالو من بعد هاد المشاكيل والمصاعب الي داز منها والي عاشها مع فرح...شعور مايمكنش يتوصف وهو كايشكر الله وقلبو كيخفق من هاد الخبر الي جاه فهاد الليلة المباركة...وخا نوصف حتى نعيا مشاعر ديالو فهاد اللحظة ماغاديش نوصل الاحساس...

زين الدين"غير كمل ماحسش راسو بالفرحة حتى سجد وقال" : ياااااااا الله"طولها بواحد شكل يبورش"...

وقفة عند شرجم كتشوف فالشارع برا...حتى سمعات صوت تصفاء المقراج وهي دور حيداتو من فوق البوطة خواتو فالبراد ورداتو يتشحر...سمعات دقان عرفاتهم جاو وشكون من غيرهم الجيران ديال بصح الي رافقوهم من اول ماحلو عينيهم لدابا عمرهم شافو منهم العيب وكانو اكبر سند ليهم ففترات جد صعبة من اول ماتخلات عليهم امهم وتسلط باهم عليهم...بدات كتوجد صينية حتى دخلات صفاء هازة طاسة فايدها...

صفاء : كي بقيتي دابا ؟!

فرح"غا مغوبشة" : كيفاش كي بقيت مالي ؟

صفاء : مامالكش غا وليتي مكترة التنفاخ والعصبية الي ماكتجيش مع فرح...رخفي فيك النفس افرح...شوفي وجهك كي ولا وشوفي راسك كي وليتي...واش متاكدة ما بيك والو !؟

فرح"زفرات بجهد": مابيا والو..ماتبقايش تسوليني ا صفاء..اشنو جبتي تما ؟

صفاء"بقات طلع فيها وتهبط بشك..وهي تحط ليها طاسة" : بريوات اللوز الي بغيتي صايبتهم ىيك خالتي زبيدة ام صطوف جابتهم لمي صباااح...

فرح : صافي مزيان..هادوك تقاداو جلس ليهم فوزي لارض..

صفاء : مممم"داخلها شك لحالتها" قولي ليا بعدا فين مشيتي ولبارح جيت لقيتك مشيتي مع فوزي وسيمو خرجو معاك...

فرح : مشينا نتقداو خضرة لكسكسو الي غانديرو غذا نديرو لجامع...ورجعت مشيت لحمام...

صفاء : ديال درب الي ورانا !؟

فرح"خرجات فيها عينيها" : علاش مكترة الاسئلة ؟ ملاحضتيش راك قويتي ا صفاء ؟....

صفاء : ياناري غا سولنا...

فرح : كاتبقاو تسولو فيا فحال الى غانعاود نهرب...غا تهناو را مكاينش الي يقبل عليا من غير خوتي هازيني وطاليني عليهم... هزي نتي سليلو...ويلاه..

"ضارت كتنهج هزات براد دارت فيه نعناع دارتو فصينية وهزاتها"خلاتها واقفة وزادت بقات صفاء كاتشوووف فيها حاسة بالي مغيرة فيها شي حاجة...تا من وجهها تبدل ولات عاطياها غي الغوات والعصبية والي دوا دور فيه...عاطينها بات مات الخاطر حتى انهم مابقاوش كيديرو شي حاجة ولا يهضرو بشي حاجة ولا يضحكو داك ضحك الي كانو مولفين وكانت هي اكثر وحدة قشابتها واسعة فيهم لكن الضروف الوقت المشاكيل وشلا مكتخلي الانسان يتغير وزادها حتى الحياة الي كتكبر فاحشائها..."

فاطنة : وسعدي ببنتي وشحاال زين اتايها (اتاي ديالها) ومن زيناتو ساقي يكب لينا(الساقي هو الي كيكب اتاي)..

نجية"شافت وجهها وهي تكمش عينيها" : بنيتي ياكما مريضة !؟

فرح : لا بيخير علاش !؟

نجية"شافت ف فاطنة ورجعت شافت فيها" : وجهك ماديال بيخير..شفتو يبان ليا ديال شهور الله...

فرح"صرطات ريقها" : شهور الله.. لا لا مكاين والو..كبي مي فاطنة اتاي..."جا فوزي" ها فوزي جا...شوف نتا تفرق على البريوات اللولانيين كملتيهم غير راسك نتا وسيمو فسيمانة...

فوزي"ولا يرمش" : ونتي ديك الهريسة الي ساليتيها فيومين عارها علامن !؟

فرح : هريسة را كل نهار كنديها فطياب والعمارات...

سيمو : كذااااابة نهار الفطور ديما كتحطي طبسيل صغير نهار ضراتك المعدة حيدها عليك عصام ومشيتي كثرتيها فخبزة شحمة ديالك الي درتي فالفران وماخليتي حد يذوق منها...

فرح"خرجات فيه عينيها تا رحع باللور زير على فوزي من تيشرت" : نتا الي دزتي ليا لطريف الي خليت ومالقيتوش !! ياااااك وكتگولو ليا راك كتاكلي وتنساي"عينيها غرغرو" ياااااك..

صفاء : عو عو...

سيمو"مكحاز ورا فوزي وكيشوف فيها بعينيه البيضين كيبلگ..وهو ينطق موجه هضرتو لفوزي بصوت منخفض" : حفضني الله في ثلاجة الموتى مع انقطاع التيار الكهربائي...

فوزي : هي هاديك عبااار على داك الفم...يالاه ياك كلتي وخريتيه سكت سكت...

سيمو : روح عزيزة عند الله...

ولاو غير مسلكين معاها وصافي معتابرين انها فايامها الصعبة وصافي..مضطرين يصبرو ماعندهم مايديرو...تاحد فيهم ماعارف بالحمل ديالها كاين الي شاك فحال فاطنة ونجية لانهم ولدو وعاودو عندهم خبرة الحياة والامومة...هاد النهار ليلة القدر عند المغرب يعني يوم جديد كانت الساعة الثانية بعد الضهر واقفة قدام البوطة وحاسة بالسخفة ديال الصيام والعيا ديال الحمل عاضة فالصبر...باش ماتحسش انها كتوحم هاد الخاصية بغات طفيها صحة...هزات سباتيل دياال عود كتحرك فالكفتة حتى طابت وحطاتها تبرد نفس الشيء بالنسبة لكروفيت وكالامار...كانت موجدة ورقة البسطيلة متوسطة...وموجدة عمارة البسطيلة ديال دجاج واللوز...هزات العمارات داتهم لطابلة فالبيت ورجعات هزات الورقة. وهي تجلس حطت داكشي قدامها وبدات اول حاجة بعمارة الدجاج ولوز عمرت بسطيلة متوسطة لفاتها مزياان وذهناتها من فوق غطاتها ودازت لديال الحوت بانت ليها الهريسة ريوگها دازو ومع صايمة جاتها البكية...لكن دغيا صرطاتها وهي تحول ملامحها لجدية....شوية شافتها وبقات سااااهية فيها شوي وهي تلعن الشيطان ونييت دخول عصام خلاها تنسى...

عصام : قربتي ؟

فرح : هاهي بقات غير هادي نعمرها وديها..غايبقاو ليا خبيزات الي بغا فوزي نعمرهم فاش نبغيو نمشيو...

عصام : يالاه هاني ندوش نتوضى نصلي ونتكا نرتاح شوية ملي يقرب لوقت فيقيني...ياكما خاصاك شي حاجة !؟

فرح"حركات راسها ب لا" : لا هاد ساعة كسكسو وداكشي عطيتو لمي فاطنة..هي تكلف بالباقي...

حرك ليها راسو وهو يمشي لدوش طلق لما فسطل يعمر وداز لبيت حيد حوايجو بقى غير بشورط وبيل سماطي داز لدوش يدوش...اما هي رشات فرماج حمر فوق العمارة حتى صونا سرسار هزات راسها عند بالها سيمو...مسحات ايديها وناضت مع وقفت حسات بالدوار حتى جلست لارض وهي تجيها ردة دارت ايدها على فمها مخرجة عينيها وحابسة الردة وسرسار كيسرسر...بقات شحال وهي جالسة بزز باش تنفست حتى سمعات عصام من دوش كيعيط تحل الباب...عاد ناضت سخفانة حلات الباب وهي تصدم..ماتوقعااااتش يجيو عندها حسات بزين الدين الي جا ريحتو فيهم...

فرح"مزال مصدومة" : خ خالتي توبا ضحى...

توبا"تبسمات وحيدات نضاضر شمس من عينيها" : بنتي فرح..لباس عليك...

فرح"حركات راسها ببطء" : الحمد لله..احم..

ضحى"دارت نضاضر شمس فوق شعرها وتبسمات" : فرح كي بقيتي حبيبتي شوية ؟!

فرح : الحمد لله.."استوعبات انهم عند الباب من صدمة تلفات" تت سمحو ليا تدعقت..دخلو..

توبا : ماغاديش نشدو منك وقت بزاف ابنتي جينا نشوفوك ونمشيو.."دخلو مورا فرح حتى دخلاتهم لصالون الكبير..وخاطبتها ضحى بمزاح"

ضحى : ماتعمريش اتاي احبيبة والله منشربوه الى كان غير دابا ههه(حيث اصلا صايمين)...

فرح"تبسمات" : ههه ياك..ولكن غاتفطرو معانا بطبيعة الحال..

توبا : الله يكبر بيك ابنتي..اجي جلسي حدانا..ماعندناش الوقت جينا نشوفوك ونتصيفطو معاك ابنتي...

فرح"جمعات ضحكة" : علاش فين غاديين !؟

ضحى"تنهدات فرحانة" : غادي نمشي لندن نشوف الجامعة تما ونكونفيرمي التسجيل..ونشوف السكن فين غانسكن انا وماما حتى نكمل...

فرح : بصااح حاوباتك الجامعة الي بغيتي..مزيان حسن ليك كوني مستقبلك كيف قررتي.."بابتسامة فوق الخاطر" فرحت ليك

ضحى"تبسمات ليها ومن فرحتها ماشعراتش حتى قربات ليها وهي تعنقها كطبطب ليها على ضهرها" : ربي يخليك شكرا بزاف..

توبا : نتمنى بنتي ماتكونيش مزال مقلقة مني..الدنيا وزمان مادازش عليا القليل...يمكن نكون ممزياناش ولا قلبي كحل ولكن ماعمري نسى وقفتك معايا انا وضحى ومنساش نهار الي مرضت فيه وقابلتيني..شي حوايج بساط كايدارو عندك حنا عندنا كثار وميتنساوش...الله يسر ليك ابنتي وتهلاي فراسك..الله يصلح الاحوال(ماقدراتش تقوليها نتي وزين رجعات الدعوة بشكل عام)...

فرح"صرطات ريقها" : امت احم اكتى غاديين !؟

توبا : نهار السبت بالليل يعني من ورا العيد ابنتي ان شاء الله...

ناضت ضحى هي وتوبا وقفو وهي توقف تاهي سلمات عليها توبا حتى عنقاتها وطبطبات عليها بقات شحال معنقاها....

توبا : تهلاي فراسك ابنتي تهلاي وتهلاي...(فحال الى طلبتها)

فرح"مافهمتهاش" : ان شاء الله...

ضحى"غمضات عينيها وحلتهم وهي تقرب عنقاتها" : ردي البال لراسك بيناتنا تيليفون..ماقدرتش ناخذ نمرتك جديدة...

فرح : غانگول ل صفاء تعطيها ليك وخا مكنخدمش تيليفوني بزاف كيبقى غير محطوط...

ضحى"حركات راسها وهي تحنحن حشمانة تقول" : احم مهم مراد كاين برا بغى يسلم عليك حيث غايمشي معانا...وحشم يدخل..فيك مايخرج عندو ولا متقدريش نخلي ليك غير سلامو..

فرح"بقات شحال كتشوف مترددة...اي حاجة من جيهة زين الدين مابغياهاش ولكن هاد ناس معندهم تا ذنب فالي وقع بيناتهم..تنهدات وهي تحرك راسها..توجهات معاهم عند الباب شيرات ضحى لمراد وهو ينزل من سيارة كان حداه وليد نيت" : مراد حتى نتا غاتمشي !؟

مراد : هعهه لا غانوصلهم ونبقى حتى يتقادو فدار ونرجع راني كنقرا وخدام منصيبش ههه جيت غانشوفك وصافي..ياك شوية..

فرح : شوية الحمد لله...

مراد : هادشي الي بغينا...

وليد : وشدي فراسك باش تحضري لخطبتي لا بغى الله...

فرح"تبسمات" : وايلي هي نويتي...

وليد : وقلنا هههه...

مراد : المهم تهلاي فراسك انا ندوز ديك عشرين يوم الكونجي ونجي..الى لاقاتنا فرصة تاني نشوك اختي ردي البال راسك بزاااف...

سلمات عليهم بزز باش واقفة شادة فراسها حاسة بديك الدوخة مرة مرة كاتجيها...خرج عندهم عصام سلم عليهم وعطاهم صوابهم حتى مشاو فحالهم...

فرح : .يلاه ندخلو نكمل داكشي الي بديت دغيا را قرب الحال...فففف مال فوزي تعطل تاهو...

عصام : فوزي نسايه عليك هاد نهار مدعوق مع الوراق ديال الكونطرا ديال الحانوت الي كيعمر فيه...مايجي تايقرب المغرب..زيدي دخلي..الى بقى فوجهك هادشي نديك لطبيب حالتك ماعاجبانيش...

فرح"غوبشات" : وايلي عصام واحد جوج نديك طبيب انا الي حاسة ماشي نتا..تيق بيا انا الي عارفة راسي مغاديش تعرفني نتا...

عصام"غوبش" : ياك شي باس مكاين ؟؟

فرح"دلات شنيفاتها" : مكاين والو...غير صيام الي سخفني

"خلاتو وهي تدخل البيت عاقدة حجبانها مخنزرة وتنفخ..بانت ليها الهريسة وهي تصرط ريقها هزاتها بزربة دارتها فالعمراة وسدات طاسة داتها لثلاجة حسن مادير شي ذنب وتاكلها وهي صايمة...رجع عصام لبيت تكى ماهضر مازاد هضرة هو براسو شاد فراسو الي بغى يطير بصداع مع القطعة وصيام..وحيث اليوم معروضين عند فاطنة جارتهم كانو البسيطلات مصاوبين ليهم...قرب الوقت بالفعل وهي تفيق عصام خرج يتوضى يبقى واجد لصلاة المغرب...اما هي مشات تلبس سورفيت فيها لوان على شكل خطوط عراااض بين اخضر گري وكحل..مشطات شعرها وخرجات ديك البسطيلة من ثلاجة طاوة فوق طاوة وهزاتهم...خرجات لقات فوزي دخل بالموطور...

فوزي : سيرو نتوما انا ندوش ونجي تما...

مجاوباتوش خرج عصام هز من عندها دوك طاوات وخرجو لقاو باب دار فاطنة محلول واقف سيمو وامين خو صفاء...

امين : هااا البساطل نعماس..دخلي نيشان لفران يلاه يلاه..

فرح : جات صفاء ؟

امين : راها كتشلض فالبصلة على گلبها..دخلي..

خلاتو كيسلم على عصام ودخلات نيشان لكوزينة لقات نجية جالسة فكرسي وقدامها بوطة صغيرة كتقلب فالبطبوط ريحتو عاطية وفاطنة كدور فالحريرة وصفاء كتشلض فالبصلة...

فاطنة : محنتي ليا راسك اكبيدتي..سيري را الفران ديال ضو خدميه وقضي غراض...

فرح"دارت البسطيلة ديال دجاج فالفران ديال ضو ولاخرى فالعادي حيث خاصهم يكونو بزوجات واجدات دقة وحدة..جبدات طاسة الي فيها بريوات مالحين دارتهم مع ديال حوت والحلويين ديجا واجدين عندهم باش تزوق..خلاتهم كايطيبو وهي تكى على بوطاجي وجبدات تيليفون..كتبقشش فيه وهي دور عند صفاء" : جات عندي خالتي توبا وضحى ومراد...

صفاء"هزات فيها وجهها الي مابقاش كيبان وجه كي ناس من كترة ما خسرات سيفتها بالبكا ديال بصلة" : هييي ؟ امتى..

فرح : مع العصر...غادي تمشي ضحى وامها لندن..

صفاء : ايه فراسي وافقت ليها اليونيفرسيتي..مسكينة...

فرح : غادين من ورا العيد..."تنهدات" كتنتسنى امتا يجي هاد العيد بحال العام...

صفاء"خبطات الموس بجهد تا قفزت فرح وشافت فيها" : قويتي افاطيمة...هضرتي مع خوك بعدا يمشي معاك عند المحامي ؟

فرح : غانكلف غير ريان...

صفاء"ضحكات بالفقصة" : عهههههههه محامي ريان را صاحبو قريب ليه يطلقك منو !؟ نتي مخلوضة فك"عضات لسانها حابسة الهضرة وهزات راسها لفوق" والله يا سيدي ياربي الى باغية نصوم ونتوب ولكن را عبدك اربي الي مخلانيش..واسيدي ربي كاتجي الاغنية نغنيها غير ملي تكون كتوذن ياربي سمح ليا وكاتحبسني الحزقة فالركعة الربعة...وكاتجيني فرح فليلة القدر طلع ليا الضغط..."ضارت عندها" سيري تركني فحالك تايجي هو براسو...

فرح"كتبقششش تيليفون" : انا مكنتشاورش معاك انا گلت ليك حيث صاحبتي مكنخبي عليك والو...

صفاء : متاكدة ممخبية عليا والو !؟

فرح : ماعندي منخبي الى خبيت را شي حاجة كتخصني انا متحتاجش نعاودها ليك...على كل"خشات تيليفون فجيبها..فجأة تغير مزاجها لعصبية" عطا الله المحامين فالبلاد..تانا نيت خليت حدايا وغاديا لديال كازا..."تگعدات من على بوطاجي ومشات لفران طل على البساطل خلات صفاء كترمش مابقاتش كتصدم..المشكيل هنا هو صفاء عااارفة فرح راسها قاصح الى حطات شي حاجة فراسها ف راهي متاكدة منها وماتحيديهاش ليها واخا تلصق سما مع لارض...كل مكيقرب الوقت كل مكتزيد تقلق عليهم بزوج مابغاتهمش يتفرقو ولكن القرار ديالهم وخا كتحاول دخل بخيط بيض..."

فنفس الوقت ولكن فبلاد اخرى وطبعا بلاد الحرمين الشريفين..كملو صلاة التراويح وخارج من الحرم داير السجادة على كتفو...شعرو باقي ماناضش مزيان كيف كان قوي...توجه لفندق طلع نيشان لغرقة ديالو طلعو ليه العشا بمعايير خاصة كونه مريض سكري...شرب دواه قبل مايتعشى وعبر باش يقيد فالنوت الي غايرسلو لاختصاصي الغدد ديالو على قبل السكري..دخل لدوش غسل ايدين فلافابو ووجهو خرج كينشف وجلس قدام طابلة الي حدا النافذة الي كاطل اطهر مكان اطلالة خلااابة..سمى الله وبدا ياكل حتى صونا ليه تيليفونو بنمرة علي.

زين الدين. : امضرا الحاج عرفتي شكون ؟!

علي : مكتجاوبش طافية...الواتساب مخدامش..شفت ف تروكولر مطلعاتش سمية...علاش بغيتي تعرفها ؟!

زين الدين : نتاكد من شي حاجة وصافي...

علي : قربتي تجي !؟..

زين الدين"هز مكعب الجبن بفرشيط رماه ففمو وتكى عالكرسي كياكل بشوااايا خلا علي كايتسنى..حك لحيتو وقال" : قريب نجي..غذا،،الليلة،، على حساب الگانة.."حط ايدو على كرشو كيحك فيها"نتا وجد ليا راسك عندنا شلا مانديرو وشلا باش نبداو..ماجاي غير الخير ان شاء الله..ريح ليا خاطرك ...عندي منگوليك اعمو علي فاش نجي...

الصدمة خلاتو ممثيقش انه قريب غايكون ليه ولد من صلبو...يعوضو على اليتم الي كان عايشو حتى لقى فرح الي تكملو...وبعد الضروف القاسية يرجع يتعوض من جديد...فرحتو مايمكنش توصف...

تحطات قصرية كسكسو من بعد ماجاو رجال من التراوح وداو قصاري كسكسو لمساجد الي حداهم...قصرية تجمعو عليها نساء ووحدة صغيرة شوي ديال رجال...وطبعا القصرية دكالية لا يعلى عليها مكترين فيها الگرعة الحمرة...

عصام"جالس حداه بات صفاء..ضار عندو وقال" : امضرا الحاج ماعطيتينيش الخبار...

جيلالي : هههه كتسنى نعطيك ونتا عارف معزتك عندي...الى عليا انا هذاك النهار الكبير وليني شوار شوارها هي..نهار العيد نهضر معاها...

عصام : ماقلتي عيب الحاج...

فرح"كتاكل فداك كسكسو مكحلة بالعمى محاملاهش مغلغل ليها على قلبها وصابرة بزز باش متبينش ليهم..حطات لقمة من ايدها وهي تنطق" : مكايناش الهريسة امي فاطنة !؟

صفاء : لاش بغيتيها را غاضرك تاني...

فرح"غوتات تا ضارو كلهم وعصام وقف كيطل" : سووووووقك وااااااش سووووقك ؟ ماسوقكش اصفاء واااااااكواك هلكتيييييني لاصقة ليا فعضامي دخلتي ليهم...وناكلها مناكلهاش اش مشى ليك ؟ فاش غاضرني مالي حاملة تا ضرني ؟

صفاء"صرطات ريقها جاتها البكية خصوصا غوتات عليها قدام عصام" : م حم لااش عرفتك محاملاش علاش كتغوتي عليا..

فرح"جناوح منخرها كيفرفرو" : واعيقتي دوري دورة ونفس الهضرة..مكضرني تاحاجة متبقاوش تسولوني مكيرني والو بغيت غير الهريسة باش ندوز بيها...

نجية : ماشي عيب ماشي عيب ابنتي غير تهدني الله يرضي عليك..

فرح"هزات ايديها فوق" : مهدنة امي مهدنة..."ناضت وخلات ليهم طابلة" انا مشيت لدار نجيب الهريسة ونجي...

عصام : خليك انا نجيبها ..

فرح : لا غير بقى بغيت نمشي نشرب الما ديالي نسيتو فالدار وعطشت.."ناضت خلاتهم شي كيشوف فشي عصام شاف جيهة صفاء بانت ليه مزيرة وحابسة البكية...ضار فين مشات فرح وخنزر ماعرف اش يدير مع حالتها الي غاديا وتكفس فحال الى باركة على شي حاجة خانقاها وماقدراش تقولها...شاف ففوزي وغمزو باش يتبعها لدار ناض فالبلاصة.."

جيلالي : ماعليش اعصام ماعليش الساعة لله..الله يشافيها ليكم

فاطنة : يضهر ليا فيها العجب معرفت مالها..الله يشوف من حالها هذا منگول.."تنهدات وشافت فصفاء" لا ديريشاي فخاطرك ابنتي راكي عارفاها ماشي فرح الي كنعرفو ساعفي...

صفاء"شافت فيها" : بنادم امي را عندو طاقة ماشي حجر..بزاف على باش نشدو الخاطر..شي مرات خاصنا نقصحو باش بنادم يفيق الى درنا الخاطر غانبقاو حنا بلا خاطر حياتنا كلها..."هزات كسكسو كالتو وسط غصة فحلقها باش متبينش ليهم راها تقلقات بزاف"...

اما فرح دخلات لدار كتنهج...دخلات الكوزينة نيشان لثلاجة عينيها معمييين مشات لطاسة وهزات معليقة بدات تاكل فالهريسة وتعاود مداقها المحمض وحروريتها كتحس بيهم كيرويو عطشها...فوزي دخل وهي تبان ليه كتغلف فيها بجهالة كمش حجبانو وهو يكحاز مبعد باش متشوفوش...اما هي بقات تاكل تاكل تاكل حتى تكات على الحايط وبدات تبكي...

فرح : اهى اهى"هبطات مع الحايط وجلسات فلارض بغات تموووت بالفقصة...رجعات كتاكل ودموعها هابطين...وهي تنوض لبيت ديالها جبدات تيليفون فوزي قديم هزاتو ليه وخدماتو...لاكارط سيم دارتها فيه وجلسات فوق الناموسية...طلقات الكونيكسيون فيه وهي دخل لواتساب بان ليها راسل ليها...

زين الدين : شكون معايا...

فرح"كانت هي الي رسلات ليه داك PDF من نمرة جديدة خذاتها ودارت ليها واتساب باش مايعرفش نمرتها جديدة...رسلات ليه ميساج تاهي فيه " : كنتسناك تجي وتهضر معايا بغيتك ضروري...

فالبلاصة طلعو شرطات زرقين حسات بقلبها ضرب فراسها...حتى صونا ليها فالبلاصة عينيها خرجو بدموعهم ومنخرها حمر بسخونية الحرور اما فمها حمرر مجلخ بالهريسة...ايديها بداو يترعدو كتشوف فيه كيصوني ويعاود باش تجاوب تجمدات...غمضات عينيها بجهد وهي تحلهم وجاوبت....

زين الدين"عااااااارفها هي الي راسلاه متخفاش عليه" : علاش باغياني نجي بسلامة ؟

فرح"شوفتها تبدلات من بكاء لجدية ونطقات ببرود" : محتاجاك تسني على شي وراق..

زين الدين : داك تخربيق ديالك ممساليش ليه...الي بغيتيه يقضيه ريان بلاصتي...شنو بغيتي مزال ؟ ماتفرعيش ليا راسي نتي...

فرح : مانفرع ليك راسك ماتفرعو ليا...انا الي رسلت ليك داك PDF ديال جينيكو...

زين الدين : فراسي...

فرح : كنضن عرفتي اشنو كاين !؟

زين الدين"عض شنايفو" : عرفت شنو كاين..ردي البال لراسك نسالي ونجي نشوف شنو نديرو..."قصدو يهضرو"

فرح : مزيان الي فهمتي.."تنهدات براحة" كنت هازة لهم ماتبغيش..مابغيتش نبدا نطلب فيك ونزاوك مابغيتش نبدا نعيش المشاكيل تاني باش تفهموني..مزيان فهمتيني...

زين الدين"هز حاجبو" : شنو باغية توصلي بهضرتك ؟؟؟؟

فرح : ففف..مهم راك عرفتي بالي انا فالشهر تاني تقريبا ياك ؟

زين الدين : على حسب اخر مرة واخر دورة ليك هذاك هو الحساب عبار...شنو المشكيل ؟..عرفتي شنو نسالي ملي نجي نعلم عصام يگوليك راني جيت..ونهضرو...

فرح : حاول تجي دغيا بغيتك باش تسني ليا يديرو ليا كورطاج(اجها..ض)..باش منتعطلش عليه كتر من شهرين...

قطعات عليه وطفات تيليفون...خلات سطل ديال ما طايب تكب عليه...اما فوزي الي كان كيسمع بالدعقة غوت...

فوزي : ااااااااا....

ماعرف فوزي باش تبلى...صدمة الحمل وزادتو صدمة انها بغات طيحو...وذنيه صفرو مسكين...ماعرف يمشي يرجع ولا يدخل عندها يستفسر منها شنو هادشي الي سمع...تخلطو عليه العرارم منين غايبدا الله واعلم...

فرح"سمعات الغوتة ديالو وهي تشهق وناضت كترعد خايفة تخرج تلقاه بصح كاين.." : شش شكون هنا ؟ ف فوزي !!!

فوزي"باقي مصدوم..داير ايدو على فمو"

فرح"ناضت بزربة خشات تيليفون فماريو وسط حوايجها وهي توقف..مسحات عينيها من تاثير الدموع الي كانت كاطيح فيهم فالكوزينة...حلات الباب وهي طل عليه لقاتو باقي مسمر قلبها تهز تالسما وتحط حتى صرطات ريقها وبقات كتشوف فيه" : علاش غوتي مال مالك ؟؟

فوزي"كان ضاير لهيه مصدوم...ضار عندها وهو يشوووف فيها" : ااا ؟ والو غير واحد المش نقز من شرجم كان بغى يدخل خلعني...

فرح"بعدم تصديق" : عل علاش جيتي هنا تبعتيني ؟ امتى دخلتي ؟ سمعتي شي حاجة ؟!...ياك گلت ليكم هاني جايا نجيب غير هريسة ياك ؟ ....

فوزي: دوزي دوزي نمشيو منخليوهمش يتسناو دابا يجي عصام يسول فيك....

فرح : فوزي سولتك واش سمعتي شي حاجة ؟!

فوزي"خرج فيها عينيه" : گلتي شي حاجة ماشي هي هاديك علاش كتسولي...

فرح : اشنو سمعتي !؟

فوزي : علاش كتسولي وتاكدي باغا تعرفي ؟"هز ايديه" ماسمعت والو...

فرح"قربات ليه كترعد بالعصبية" : اشنو سمعتي افوزي ؟ "دموعها نزلو يجريو" اش سمعتي افوزي ؟ سمعتي فاش قلت ليه على الطلاق ياااك ؟! انا بغيتو يجي باش نساليو افوزي..مابغيت تربطني بيه تاحاجة...مالايقينش لبعضياتنا ملايقييييينش افوزي"شدات ليه فدراعو مزيرة عليه وعينيها خارجين فمها مجلخ بالهريسة حمر وحالتها حالة" فينا المشاكيل بجووووج...فيه الغدر را غدرني مرة وجوج...ومايقدرش يصبر ليا افوزي..وانا فيا شك فيا شك اهى اهى...

فوزي"قرب ليها عند وجهها" : هااااادي هضرة خاااااوية..خاوية فرح...

فرح : علاش وليتو دابا كاتجيو من جيهتو ؟؟ علاش ملي شحال هادي كنت كنگوليك افوزي سمعني نشرح ليك عليه وماكنتيش كتعطيني فرصة وكتغوت عليا !؟ ياك كان عندكم الحق الي غدر مرة يغدر جوج...

فوزي : اسبابنا كانو كيقنعو..حيث كنا خايفين عليك..مكاينش حتى سبب كيقنع كثر من هذا اااااا ختي فرح...ياك درتي الي بغيتي وتاحد مغايبقى يگوليك ماديريش ماتفعليش من هنا لقدام نتي الي مسؤولة على اشنو ديري...وماحدك على ذمة راجل را بزز عليك تشاوري معاه "كيهضر وباقي مصدوم من الي سمع لكن الصدمة الكبرى الي خلات عقلو بغى يخرج هي فاش سمع انها باغا طيح البيبي" فمهتيني ؟

فرح : ماعندي مانتشاور معاااااااااه...مابغيتش نتشاور معاه ماشي سوقو فيا..هو تجوج بيا غير حيث كنت مريضة تزوج بيا حيث مكانش عندي فين نمشي..اهى اهى دابا مابقى عندو مايربطو بيا....غذا ولا بعدو غادي نتفرقو...

فوزي : الفراق نتي تعرفي نتي باغياه حنا كاااع ما بززناه عليك..."شد ليها فكتفها تا زير عليها حيث هو براسو جهل"..نعاود نسولك افرح عندك ما تگولي تاني ؟ باقي شي حاجة ماگلتيهاش خاصك تگوليها ؟؛

فرح : ماعندي والو واااالو...

فوزي : ماكدة !؟

فرح : ا اشنو سمعتي اهى اهى...

فوزي : الي سمعت هاني گلتو ليك...بغيت نسمع منك ماعندك والو مانعرفو...

فرح"كتشوف فيه وشفارها كيقطرو بالدموع..شوي حدرات راسها وهي طلق منو" : مكاينش مكاينش..انا نغسل وجهي ونمشيو قبل مايجي خوك الكبير.."مشات لدوش غسلات وجهها شربات من روبيني بداك العطش الشديد ديال هريسة الي كترت والبكا والغوات شحفات حتى باش تشرب من الما ديالها الي كتشري من حانوت فاش ضراتها المعدة من تم عصام ولا فوزي كياخذو ليها الما من برا....بالشحفة والدعقة نسات راسها وبدات تشرب من روبيني وهي اصلا ملي حملات والعطش قاتلها دور وتشرب فالمياهي..."

خرجات من طواليط كتمسح فوجهها لقاتو متكي على رخامات مهبط راسو وسااااهي فنقطة بعيييييدة...حنحنات وهو يهز فيها راسو وشاف جيهة الكوزينة فين محطوطة طاسة الهريسة بمعيلقتها مرمية فلارض...شير ليها براسو...

فوزي : كتاكلي هريسة بمعيلقة !!؟

فرح"صرطات ريقها" : هاا !؟ ل لا بغيت نهز منها وملي تفقصت بقيت كنبكي لحتها ومشيت عيط على هذاك...

فوزي"هز حاجبو" : هذاك...احم واخا يلاه زيدي زيدي... تفرقي على الهريسة مالكي على هادشي !! بغيتي ضرك المعدة ونديوك عند الطبيب الي مابغيتناش نديوك ليه ...

فرح : لا لا ماغانهزهاش صافي...

خرجو من دار ودازو لدار فاطنة تا لقاو عصام خارج جاي عندهم عاقد حجبانو طالع ليه د.م حيث تعطلو بزاف على باش يجيبو حاجة...

عصام : تعطلتو بزاف ياك شس باس مكاين...

فوزي"ضار شاف ففرح الي شافت فيه وقلبها بغا يسكت حسات بيه عرف وسمع..شاف فعصام" : انا دخلت لطواليط حاشاك گلت ليها تسناني تنخرج وتعطلت..."هز ايديه وحطهم" ضرتني كرشي...يلاه دخل دخل...

دخل هو وتبعاتو هي وعصام بقى كيشوف تاااهو حس بيهم شي حاجة...ولا تاهو دخل تبعهم...مشات هي جلسات فين كانت جالسة لقات صفاء حادرة راسها وكتاكل مهزاتووووش فيها فحال كاع ماجات...اما فوزي برك فبلاصتو لهيييييه فين جالسين رجال بيناتهم...تسنى عصام تا جلس وهو يقرب ليه...

فوزي : فاش نمشيو نصليو ثاني تما نهضر معاك...مادور ماتحرك دير براسك كتاكل وتهضر...

عصام : اش واقع الحبس !؟ عارف عااااااااارف وقعات شي زبلة فالدار...ماشي جديد علينا هاد الملاوي ماشي جديد..."بغى يسخف بالفقصة" مالها تاني !؟..

ناس فهاد الليلة كياكلو مجموعين فرحانين بهاد الليلة المباركة...ليلة القدر خير من الف شهر...وهما مجموعين واغلبهم فحال الى جالس على شوك وشي جالس على القنابل موقوتة تحتو...منهم فرح الي مرة مرة كتهز عينيها ففوزي وتشوف وتدرس ملامح ديالو واش عارف شي حاجة...حيث ببساطة ماباغياهمش يعرفو لانهم لو عرفو غادي يكتر عليها ضغط ومايبغيوهاش دير الي فبالها مع الاسف...صفاء الي حابسة البكية وسط صدرها حاسة بغصة خانقاها...اما فوزي مايعلم بيه غير الله فهاد اللحضة حيث تخلطات عليه الدعوة بين صدمة حملها وصدمة الكبيييييرة الي خلاتو يتشعط ويتشوكا هو انه بغاات طيحو...والمصيبة الاكبر انه مسكين ماقدرش يقوليها راه عرف ماعرفش مسكين يتصرف خاف لا يقوليها وهي مخبية عليهم لانه سمع انها حامل بشهرين امتى عرفات بحملها !! الله اعلم..خاف يقول وتجيها هيستيريا الي قدر يقيسها غير فاش بدات تسول فيه بديك الطريقة المجنونة...ماعارفش كيفاش يتصرف فكان عليه يخبر عصام لانه سوا اليوم سوا غذا غادي يعرف.عالاقل يشوفو شنو يديرو معاها واش يديرو فهاد الوضع...ماكمل داك العشا تا غفر ليه الله ذنوب كاملة...عاد ناضو غسلو وخرجو متوجهين لجامع يصليو ثاني...

عصام : بغيتي تبقاي هنا !؟

فرح"شافت ف صفاء الي ماضارتش جيهتها ورجعت شافت فيه" : نمشي لدار حسن...

عصام : تبقاي وحدك !؟...

نجية : هاني نمشي معاها نبقى معاها تاتجيو...

فاطنة : كاع نبركو معاها تا نصليو غير فالدار...

عصام : ماتنسايش تجمعي حوايجك غذا ان شاء الله غادي نتيسرو عند با (جدهم بغاو يعيدو معاهم ف سيدي بنور)

فرح"حركات راسها" : واخا انا نمشي نجمع دار والحلوة الي صايبت وحوايجي...

عصام : يلاه في امان الله...

خرجو رجال من دار تمو غادين باش سدوزو لجامع الي كانو كيصليو فيه قبل حتى وقف فوزي وقال...

فوزي : با جيلالي غير سيرو نتوما حنا نمشيو لكافيي الي هنا عصام بغى يشرب قهوة ويكمي وندوزو لجامع الي حداها...

جيلالي : على بركة الله...

مشى جيلالي وامين وسيمو وعصام وفوزي دازو من طريق اخرى...غادي فوزي وكيصوط ماعرف باش يبدا لعصام مابغاش يبدا حتى يبعدو من درب لا يصدق معرعر ولا يغوت تسمعو شوف اش قاليه راسو فهاد اللحضة هو براسو شد فراسو...

عصام : اش كاين !!؟

فوزي"ضار وراه وهو يوقف شاف فيه" : ماعندي مانخبي اعصام...دخلت تبعتها كيف گلتي ليا بعدا لقيتها ضاربة الهريسة بمعيلقة قشعتها غير من فمها هادي ماتكدبنيش فيها...

عصام : مالها على هاد جهلة ياك شي باس مكاين !؟ هاديك الهريسة شكون شراها ليها ؟ يلاه برات ليها المعدة ومصارنها الي تهلكو بسبابها....انا ماعرفتش بالرب مابقيت عارف شي حاجة فهاديك الدار...ماعرفتش مالها على هاد جهل...

فوزي : انا الي تقديتها ليها من سوق لالة زهرة بغاتها لبسطيلة ديال ليوم...الهريسة اسي كيوكلها ليها الوحم...

عصام"كمش عينيه" : اشنو هاد الوحم تاني ؟!

فوزي"جاه ضحك فوسط الفقصة" : هههههههههههههههههههههههههههههه واربي الحبييييييييييييييب هههههههههههههههههههههههههههههههه "شاف فيه لقاه مكوشر" ماعرفتيش الوحم !؟ واااااخويا باغي يدير المرا والولاد وماعارف الوحم...

عصام : اش كتخرا عليا تما...اشمن وحم كتوحم !؟ عرفناه وحم ديال الولاد هي اش جاب ليها الوحم فالهضرة....

فوزي : هعهههههههههههههههههههههههههههههههههههههههه..

عصام"صعرو بالضحك الي كيضحك هز ايدو" : بالرب الجليل وماتزم عليا فمك تانهرس ليك الضراص"جهد صوته تا جمع فوزي الضحكة" وهضر الملاااااوي هضر !؟

فوزي : واختك حااااااملة حااااملة اعصام...واحااااااااااااملة واسمعتها كتهضر مع زين الدين وقالت ليه حاااااملة بشهريييييييييييين اخالي عصام شهريييييييين وماگايلاها لحد...

عصام : حاملة ؟ كيفاش حاملة مافهمتش ؟

فوزي : هههههههههههه وبغاني منضحكش هههههههههه...

عصام"شنق عليه": غاتهضر ولا نقسم عدو ربك على ربعة هنا هضر الحبس يغرق لبوك الشقف فهاد النهار....وااااهضر الملاوي...

فوزي"وهو شانق عليه تنهد وبدا يعاود ليه من الي دخل لدار اشنو شاف واشنو سمع لااااااخر جملة الي خلات عصام يبرك ليه الما فركابي" : بغات تقت...ل رووووووح اعصام...

عصام : كيفاش كورطاج ؟! كيفاش حاملة !؟ امتى عرفت وشحاال وهي عارفة وصابرة !؟...اش هاد الخرااااا اش هاد الحبس طاري ؟؟...

فوزي : ماعرفتش وماقدرتش نگوليها والو خفت اعصام خفت...

عصام"طلق منو وهو يدور ماعرف باش تبلى ملي سمع هادشي ماعرف تاهو اش يدير...جبد كارو من جيبو شعلو نتر منو وعاود...جبد تيليفونو كيقلب"

فوزي : بغيتي تعيط ليه ؟

عصام : ماعيطش ليا فحال هادشي خاصو يعيط علاش ماهضر ؟...

فوزي : انا ودارت فيا سكار حسب الله هو..يكون غيب بالفقصة...

صونا ليه فالنمرة ديالو عالله يجاوبو حيث من الي مشى ماعيطش ليه....

فوزي : ماكايجاوبش ؟!

عصام"حيد تيليفون كيبقشش تاني" : نمرة طافية...

فوزي : يبان ليا هو الي خاص يهضر معاك !؟

عصام"رجع يصوني ليه تاني نمرة طااافية تا عيا وهو يعاود...مالقاو مايديرو سوى يرجعو لجامع ويصبرو حتى يشوفو شنو يديرو المعنيين بالامر الي هما زين الدين وفرح...كانت صدمتهم كبيييييرة بهاد الخبر الي نزل عليهم كي الصاعقة لو في ضروف عادية كانو غايفرحو بزااااف...

الايام دازت والشهر الفضيل انتهى...اليوم يوم العيد عيد الفطر...العائلات مجموعة من بعد صلاة العيد والفرحة عند الكبير والصغير الي فرحان بهاد اليوم باش يلبس اللبسة الجديدة الي تقدات ليه الام او الاب...كل كيتباهى بلبستو ويقول انا احسن واحد عندو لبسة...رجال راجعين من المصلى كيتسالمو الدروبة مزينة بيهم وبلباسهم التقليدي مع عيالاتهم....الي حالفو الحظ انه يعيد فبلادو والي ماحالفوش راه معيد فالغربة...والي جاه العيد فاليوم الي عندو فيه الطيارة والي وصلات وحطات رحالها فالديار المغربية بالضبط مطار محمد الخامس الدولي النواصر...

علي"هز عينيه فطابلو" : وصلات !؟

وليد"لابس جلابة شفافة مسكية تحت منها فوقية بيضة وبليغة صفرا وتقاشر بيضين موقف شعرو ريحة بارفانو واصلة تفتن...شاف فساعتو ونطق" : وصلات شي نص ساعة هادي هاهو دابا يخرج..."طلعو وهبطو تاهو الي كان فحال وليد غير هو ضارب جلابة سوسدي صفرة وتحت فوقية بيضة مرجع شعرو الكثيف الشايب لور ولحيتو مقادة..داير بارفان فيرساتشي...بلغة بيضة وتقاشر بيضين...هز فيه عينيه" هاي هاي هاي على سي الحاج الطايح كتر من نايض ونايض شداه رعدة..بخ بخ ماعرفتكش فاش جيت نهزك من دارك...زمتيني وانا عند بالي انا الاناقة...

علي"طلعو وهبطو" : اااااااايوا حدك تم...الحاج زياني هذا الاناقة فسبعينات وتمانينات وتسعينات بغات تزمتني الالفينات ؟

وليد : اااي عيني...

علي : وحضي لا نعطيك لراس...اطونسيون تغلط فيا..."ضار شاف فالباب ديال مطار وهو يبان ليه جاي..تگعد من فوق طوموبيل" ها صحيبي وصل...هااااااي هاي هاي هااااي...تا هذا زين الدين !؟...تا شوف كي ولا...بخ بخ بخ على ولد الحاج البغدادي....

وليد : ضار شاف فيه وهو يرجع باللور...ناري كحالت ....

علي : شد لجام فمك يقوليك سلام قول عليكم سلام وسكت....

تم جاي ووراه الي كيجر كرارس الامتعة ديال المسافرين...حتى زصل لعندهم مخنزررر...

علي"تسالم معاه بعناق طويييييل" : على سلامتك وعمرة مقبولة باذن الله....

زين الدين"حرك راسو وشاف قدامو" : اللهم امين...

وليد"تسالم معاه وعنقو تاهو" : على سلامتك اخويا...

زين الدين"حرك راسو وصافي هضرتو قلالت بزاااااااف"

خلص الي وصل ليه ليفاليز من بعد ما حطهم فالكوف بمساعدة وليد...ومشى...ضار ركب لور شاف فيه علي باش يركب القدام هز ايدو وشير ليه بلا غير خليني...ركب علي حدا وليد وخرج من المطار من بعد ما خلص الباركينغ وتيسرو....

علي"ضار عندو لقاه شاد ايباد كيبقشش فيها حجبانو معقوووديييييين...بغى يهضرو" : والله الى خليتي بلاصتك اخويا...بقيت كي راس المقطوع...

زين الدين"عينيه على الايباد خدام..حرك راسو" : هاني رجعت..

علي"شاف فوليد ورجع شاف فيه" : كتقيد فعبار ديابيت ولا ؟

زين الدين"غمز بحنكو" : تت..خدااام الحاج..."حك لحيتو" محركين لفيلا ياك ؟

علي : وايه را تما كيتسناوك العائلة...

زين الدين"هز فيه عينيه وهز حاجبو" : عائلة !! انا عندي شي عائلة الحاج ؟!

علي"مالقى ميقول فهاد اللحضة" : عندك حنا...انا كاينة عمتك كاينة ضحى موجدين...كاين مراد ماقدرش يجي حشم منك..كاين وليد كاين الحسين الحاجة مرتو...كاينة مرتي انا كاين الخير ازين الدين...

زين الدين"هبط عينيه لايباد" : يجيكم الخير الحاج..نتوما نعمة..

مسافة الطريق حتى كانو قدام الفيلا...نزل من السيارة وضار غادي حتى بانت ليه ام هاني واقفة وتوبا...وضحى هازة طبسيل تمر معمر وخا ماياكلوش مهم دارو صواب برجعتو من العمرة...وحداها خديجة هازا بلاطو حليب وما زهر فابريق زرق طاوس وفناجن ديالو وسط بلاطو ديال زاج مزين بالورد...وامينة تاهي ومراد الي مزال ماقادرش يشوف فيه على شنو دار...مع لابس فوقية بيضة وداير طاقية على راسو الي ناض فيه شعر واخا باقي قصير بزاف...سلم عليهم واولهم ام هاني...

ام هاني : لعقبة لحجة ان شاء الله...

زين الدين"باس راسها" : ان شاء الله فحياتك..."سلم على توبا وعلى ام هاني وضحى...شرب غير من حليب صافي اما تمر حط عليه ايدو وشكرهم...شاف فمراد حرك ليه راسو حتى جا سلم عليه ماهضر معاه ماتكلم ومراد ماحكرش عارفو خاصو وقت وصافي...سلم على مرات الحاج والبقية ودخل نيشان لصالون الكبير لقاهم موجدين الحلاوي ومملحات والمسمن ملوي زوج طوابل عامرين..وصينيات اتاي والمجامع كانت جلسة بلدية مغربية تفتح النفس وتبهر العين وتسر القلب...جلس معاهم شوي وهو يوقف"

علي : افين غادي بلاتي ورتاح اصحبي...

زين الدين : هاني جاي.."خرج من صالون تبعاتو توبا حتى لبرا وهو يدور عندها"

توبا : البيت تحتاني را واجد فيه كاع حوايجك كيف وصيتيني اولدي..."حرك ليها راسو ومشى"...

يا لالا ياااا لالا يا لالة....على انغام الطرب الغرناطي...كيف ولفنا كل صباح العيد...وفي جهة اخرى ونفس الطابلة مجهزة غير هي مختالفة كونها عامرة بالذ المأكولات ديال الفطور ديال العيد ديال البادية...الوسط طبسيييل كبييييير فيه المحمصة بالحليب وجنابها زليفات وبدة مدوبة وعسل الحر...وطابلة لاخرى فيها البغرير والمسمن والملوي..حلوة الي صايبات فرح والي وصات عليها مشكلة بين لوز وكاوكاو ودواز اتاي الي صايباتو بايدها مع الفقاص...جالسين مجموعين كيفرقو المعالق على بعضياتهم...وهي تم داخلة هناء هازة طبسيل ديال بان كيك صايباتو قالت ليك على طريقتها...

نعيمة : وسربي راسك اجيو تاكلو قبل مايبرد هادشي...

ع.العالي : فين هي فرح ؟!

هناء : هاهي جايا خليتها كتسقي فالمسمن مقلي بالعسل ...

فوزي"لابس الحطة الي شرا من زارا قاليك..تريكو گري مكتوبة فيه ZARA فجنب صغيرة...وسروال دجين كحل موقف شعرو وريحة بارفانو تعطي...جالس حداه عصام تاهو تريكو زرق ديال polo وسروال دجين زرق مرجع شعرو لور ومشءب لحيتو تاهو ريحتو واصلة لفييين...هز فوزي عينيه ف جدو" : والحاج كاين شي فلوس العيد !

المحجوب"شاف فيه بنص عين" : كاين العصى لمن يعصى.."قشقش جيبو وجبد بزطام بلا سنسلة حلو وجبد منو عشرة دراهم ورماها ليه" شد ولا عطيها لعصام يقسمها ليك كل سيمانة يعطيك خمس دراهم...

فوزي : ممممم ؟

ياسين"هذا لابس فوقية قاليك تالعشية ويضرب الحطة" : هتخهههههخخهخ يااااا شماااتة قبلة زازا فياااااااا...

المحجوب"جبد خمسة دراهم ورماها لنعيمة" : هادي قسميها ليه على ثلاثة وردي البال لا يرجع يشري داك العجب الي دار ليه الحناش ديك المرة....

فوزي : ههههههههههههههههههههههههههههههههههههههههههههههه وااااااااااا....

ياسين : ايوى ينعل حسي انا....

ع.العالي : والله اولدي يا ياسين لا عبر عليك...هذا سرك وسر الي مايدي البرامل لدار الوجاطي كون راني دافعت عليك...

ياسين : واخا نبقى انا وياهم...

واحد الشوية وهي تدخل هازة طبسيل طاوس فيه المسمن مقلي ساقياه بالعسل الحر وراشة فوق شوية لوز افيلي...لابسة بيجامة بيج دافية طوييلة جامعة شعرها بقراصة وجايا مغوبشة حطات طبسيل فوق طابلة لهيه وجات جلسات حدا جدها الي جرها نخششها فيه وهز معيلقة محمصة قربها ليها...

فرح"اشمئزات منها وكمشات ملامحها" : لا با مابغيتهاش...

نعيمة : ولواه ابنتي العيد هذا ماترديهاش فوجه جدك...

فوزي"جمع ضحكة وضار جيهة عصام الي كان حاضيها وحاضي تفاصيل وجهها كيفاش ولا شاحب وغير مغوبشة...غمض عينيه ولعن شيطان كايتسنى بفااااارغ الصبر يجي زين الدين ويفكو هاد المشكيل الي واقع لان طاقة الصبر غاتنفد وهما عاضين فالصبر معاها...

سماو الله وبداو ياكلو الا فرح مشات لواااحد الطاسة ديال مملحات حطتها فزق حجرها وبدات تاكل وتخشي ففمها...شافها عصام وضار جيهة فوزي قاليه بعينيه هضر معاها حرك ليه راسو ب لا خليها على خاطرها مناقصنا صداع...ضار جيهتنا وقال...

عصام : تخرجي معايا لمدينة هنا فسيدي بنور ؟

فرح"شافت فيه وفمها عامر" : علاش ؟!

عصام : نشوفو عمك مبارك كيسول عليك...بقاي معاه شوية تالعشية مع المغرب نجيبك...

محجوب : خليها تا تغذا...

عصام : خليها تغذا معاه ابا"غمزو بعينيه..وشاف فيها" عمك افرح شحال ماشفتيه ماتقلقيهش منك...

فرح"زفرات بعدم صبر" : فففف واخا نمشي...

فطرو الفطور ديال العيد وهي تنوض البيت بدلات حوايجها لبسات جلابة فالاورنج فيها وريدات معمرات بالحجر وسفيفتها بين ذهبي والاخضر...دخلات هناء مشطات ليها شعرها وضفراتو...دارت ليها ايكخون صوليغ فيها فوندايشن بلعاني باش ضرگ ليها وجهها الشاحب...رشات ليها من ريحتها انكوندينيسونس ديال افون...

فرح : مكانش عليك ديريها مابغيتهاش غانبان فحال دايرة شي حاجة...مسحيها...

هناء : واتي ديري وشوفي وجهك اصاحبتي تقولي حاملة ههههه

فرح"خرجات فيها عينيها تا بانو عروقها وهي تغوت عليها تا طارت هناء لسما ونزلات ماعرفات باش تبلات ولا اش قالت" : وماااااااااااااااحاملاااااااااااااااش الخرا ماحاملاااااااش...

هناء"صرطات ريقها" : فرح ماقلت والو مالك غا ضحكت...

فرح"دفعاتها بجهد وخرجات كتنهج بالاعصاب" : بعدي مني..مرة جايا وليو تشدو فامكم عندهم...حاملة حاملة...الخرااا الي حاملة..

خرجات من البيت لبسات صباط موكاسان هزات صاكها فيه تيليفونها وبزطامها الي فيهم اوراقها تبوتية وخرجات لقات عصام كيهضر فالتيليفون وكيكمي حداه فوزي الي شافها وهو ينغزو ضار شاف فيها قال بسلامة خشا تيليفون فجيبو...

فرح"قربات ليه" : معامن كنتي كتهضر ؟ معاه ؟ جا ولا مزال مابغاش يجي يفكني "كتنهج"...

عصام : كنهضر مع عمك علمتو بالي جاييين...شيماء كتسنا فيك بغات تشوفك...الي بغى يفكك ماعارف عليه والو افرح...رخفي فيك النفس راك غادي طرطگي غير نتي...مال وجهك مجيف ؟ علامن تعصبتي تاني...

فرح"خرجات فيه عينيها" : على الي كيبقى يحك عليا...تعصبت على الي مابغاش يدخل سوق راسو...وغانتعصب كتر الى ماجاش هذاك وفكني منو...يلاه نمشيو عند عمي بغيت نيت نتنفس عالاقل هو مغايسولني مايحكر عليا ولا يقجر....

سبقاتو وركبات فالطوموبيل...شاف ففوزي الي هز ايديه وضرب اخماس فاسداس...

فوزي : الخسران غادي ففرح احمادي(ماشي فرح غادة فالخسران)...."ودخل كيتمتم اش كيقول الله اعلم كيبان ليه غير كيدور يتفتف بالفقصة ههههههه"...

وقفو قدام الباب...سلمات على عمها الي خشاها تحت باطو وطلعو لدار الفوق فين كاييني صالونات تا نزلات شيماء هي وختها الصغيرة وخوها الي صغر منها سلمو عليهم وجلسات شيماء حدا فرح بنت بيضة البشرة دايرة الخمار فاللون مسكي واللبسة ديال محجبات فالوردي وجهها يشعشع بالنور عويناتها كبار وكحلين كتشبه لعصام حيث امها توحمات على عصام جابتو فشيماء ههههه وعزيزة على عصام بزاف هي صغر من فرح عندها عشرين سنة...

شيماء"ربعات رجليها وشافت ففرح" : توحشتك افرح بزاااف...غيبتي علينا...

فرح"تبسمات ليها" : حتى انا توحشتكم...كي درتي مع القرايا فين وصلتي ؟

شيماء"خبطاتها لطتفها بمزاح" : انا فالسنة تانية اقسام تحضيرية هههه...داكشي الي قلت ليك فاش كنت صغيرة غانديرو درتو...

فرح : احسن حاجة والله بقاي شادة فمستقبلك ماتفرطيش فيه كملي حتى توصلي لاخر نقطة...

شوية ناض عصام سلم عليهم وخرج خلاها معاهم بوعد انه يجي ليها مع المغرب او مورا العصر يديها...وغير تفاوت وهي تجي مرات عمها الي اسمها سعيدة...

سعيدة : بنتي كبيدتي حيدي جلابتك...

فرح : غير خليني اخالتي ملابساش تحت منها مزيان"حكات راسها بخجل"

سعيدة : واش تجي عندي فرح ومنوجد ليها بيجامة جديدة ووحدة تانية وايلي ههههه"ضارت بانت ليها شيماء داخلة هازة ساشية فايدها كتضحك عرات شعرها الاسود الطويل والقوي مبسمة تا بانت تقبة زين...عطات ساشية لامها وهي تبدا تجبد...حطت ليها بيجامة ديال بريمارك شيبية فيها نونوسات بيضين ديال قطن دافي مناسب لربيع...وكولون بيض...وتانية ديال بوتيك عادي فالاحمر وسروالها عادي فالاسود...وقميس ديال جوهرة مخيط بالبريد فالبيج وذهبي..." هادي جابتها بنت خويا من فرنسا لشيماء وانا خليتها ليك...وهادي انا شريتها ونااامس فاش علمني عصام را غايجيبك عندنا هاد ليام...وهذا ملي عرفتك تزوجتي خليتو ليك كادو لا جيتي زرتينا...

فرح"صرطات ريقها كانت على شوي طير عليها على ديك تزوجتي صرطات وعاودت تا نشف ريقها وهي تنطق بصوت مشحرج" : ربي يخليك اخالتي...

سعيدة"جلسات حداها ودوزات ليها على شعرها وشافت فيها بحنية" : الى طلبتك تبغي ومترديهاش فوجهي ؟

فرح : اشنو اخالتي !؟

سعيدة : شيماء بغات نقاشة تنقش ايديها وجايا ختي تاهي تنقش وتغذا معانا نقشو نقيش العيد راكي عارفة بنت عمك تموت عالحنة هاو بغينا نديرو جماعة ونضحكو فهاد العيد..نقشي وخا غير صبيعات والى مابغيتهاش منبززك وااالو بنتي...

فرح"بلا ماتشعر حركات راسها" : اه بغيتها..."تفكرات الوحم وهي تحركو ب لا" لا لا مابغيتهاش عافاك اخالتي بلاش..."قليها كيضرب بجهد" لا....

من دوش خرج كيقطر بالما لابس بينوار لحيتو تقطر...جر الفوطة من ورا عنقو ونشف بيها وجهو نشف حالتو ورش ديدورنت عليه...لبس بوكسر بيض وهز تيشرت بيض لبسو عاد هز فوقية بيضة لبسها ضار جيهة الجلابة بزيوية فالمسكي مصلوحة مقادة لبسها وضار جيهة الكوافوز حتى قادها خرج كول فوقية وقاد الكمايم...رش بارفان فايدو دوزو على لحيتو الي ولات كثيفة وعلى عنقو...جلس حتى لبس تقاشرو ووقف خشى رجليه فبلغة صفرة شاف فالمري دوز على شعرو بايدو عاد مشطو شوية باقي قصيييير نيت ولكن عطاه جاذبية خاصة وشكل جديد..لبس ساعتو هز تيليفونو وساروت سيارة وهو يخرج ركب فالطوموبيل من بعد ماتاكد من الفاليز الي دار فالكوف وهو يديماري كانت الساعة الخامسة بعد العصر...مسافة ديال الطريق ضرب تقريبا النصف جبد سيجارة شعلها نتر منها نترة حل زجاج نافدة حط عليه مرفقو سايق بزوج صباع كيحرك بيهم الفولون....وهو يصوني ليه التيليفون شاف النمرة وحيث نمرة ديال خدمة الي مخدم دابا...النمرة مكانتش مسجلة لكن فالتطبيق طلع اسم حنان بنسودة...فالبلاصة قطع عليها تاهي عاودت صونات وهو يقطع تا حبسات....

المغرب كاياذن نزلات من عند دار عمها سلمات عليهم وواعدتهم بزيارة جديدة...جايا وكتبتاسم حتى ضارت وركبات حدا خوها الي ضار وهبط عينيه لايديها ناقشة نقش خفيف باقي هكاك الحنة فيهم مسقية بالصقلة...جمع حجبانو...

عصام : نقشتي ؟!

فرح"جمعات ضحكة" : خالتي سعيدة بززاتني وتقلقت ومابغيتش نردها ليها فوجهها...

عصام"هز حاجبو مصدوم" : جشمتي منها ومابغيتيش ترديها فوجهها ؟ مزيان..."دور الكونطاكت وهو يديماري رجع باللور شير لعمو وزادو مع الطريق....خرجو من سيدي بنور المدينة وتوجهو غير تما قريب قاتو المحطة وهو يدور مع البيست ودخل نيشان لدار جدو مكاملاش عشرة دقايق حتى كانو قدام الدار نزلات هي وياه يلاه بغاو يدخلو.... مع ضارت طوموبيلتو شاعل ضواو حتى فرانا بجهد قدامهم...وهو ينزل ضار جهة الباب حداه حلو جبد منو ساشية كبيرة ديال كاتخ سوغيز...كتشوف فيه وكتحل عينيها وتغمضهم جاتها ضبابة ممتيقاش بالي هو الي جاي...حتى شقهات بالحس وهي طلع معاها صعرة فحال كحلت بالعمى...

عصام : زين الدين !!"زعما را متفاجئ"

زين الدين"توجه لعندهم سلم عليه" : با عصام...

فرح"خنزرات فيه" : اشنو جابك لهنا !؟؟؟؟..گلت ليك الى جيتي علمني فين نتلاقاو انا وياك ونتفاهمو...

زين الدين"ماشافش جيهتها شاف جيهة الباب كانه ماهضراتش هي كااع...وقال" : الحاج لداخل !؟

عصام : اييييه دخل..

زين الدين"حدر راسو" : دير ليا طريق الله يجازيك بيخير ندخلو نرتاح حيث راسي بغى يتفرع بالسفر وطريق..."عينيه خنزرو بجهد"..قبل ماطير لملتي النقشة ونفرگع لشي حد راسو...

أحياناً يكون التجاهل درساً مفيداً لتعليم بعض البشر آداب الحديث "فكتور هوغو"...

هاكا تصرف زين الدين...لان كلامها ليه فهاد اللحضة قلة ادب واخا فعز عصبيتها واخا يكون او وحم او اي سبب كان...ماجاوبها ما عبرها وكانها مكايناش كاع وماهضراتش من الاساس..

فرح"بقات كترمش فيه ممثيقاش تصرفو الي دار دابا فحال الى قمعها بالفن"

عصام"ماعارف مايقول لاول مرة كيتلجم ليه الفم والايدين..مايقدرش اصلا يدخل هذا طبعو لو تزوجات هي شحاااااال هادي بدون مشاكيل مكانش غايدخل بينها وبين راجلها وهادشي قالو ليها بالحرف فالسااابق ايام خطبها يونس قبل مايتوفى...يعني هو ك شخص عصبي ايديه سابقينو لكن فهاد المسائيل الخاصة مايتدخلش...واصلا مايقدر يدير والو باقي ففترة الي خاص هي ترجع كيكانت معاه وترجع تحس بالامان باش يكفر على الذنب الي دار فحقها والي يموت وماينساهش...دور وجهو لهيه حك لحيتو وغمض عينيه كيزفر باش يلعن شيطان وهو يدور جيهة الباب وشير ليه" : تفضل مرحبا...

فرح"خرجات عينيها تا غرغرو ليها وحلات فمها..كتشوف فيه مشى تبعو وهو يوقف عصام وضار شاف فيها"

عصام : فرح دخلي من البرد...

فرح"بقات مستوهة مصدومة لثوان...حتى هزات فيه عينيها وهي تنطق" : لا غير خليني هنا بلاتي وندخل...

عصام"خرج عينيه خنزر كان على شوي يدور فيها... عض لسانو وهو يتراجع استغفر الله وهو يدور بغى يهضر مع زين الدين لقاه دخل وكيسلم على منير خالهم..رجع مشى لعندها" : فرح لعني شيطان ماشي فعايلك هادو فرح...السيد جا حيث العيد هذا وحيث مزال راجلك...لعني شيطان را عيب وقلة اداب نجريو على ناس وخا راه ماشي براني...

فرح : دابا عاد ولا ماشي براني ياااك...

عصام : راه رااااجلك فرح...مزااااال راجلك هاد الساعة...راجلك ماشي براني..تحركي فرح دخلي من البرد خلي العيد يدوز هاني عليك...

فرح : دابا انا كندير المشاكيل ياك"نزلو دموعها يجريو." انا الي كنعصب..عطيتكم تيساع عصبتكم مرضتكم...جيت مرضتكم مشيت ممرضاكم..تجمعت معاه مرضتو..عجيتو تيساع مرضاه..

عصام : مامرضتي حد ماضريتي حد..الى تعصبنا غير مابغيناكش نتي تمرضي فصحتك اما حنا لهلا يقلب جد اصل منا مولفين را حنا رجاال وهازين مسؤولية ملي كنا سنان الحليب...دابا خلينا من هاد الهضرة من بعد..دخلي لدار بدلي حوايجك وسيري البيت الى مابغيتيش تشوفيه حتى يعيط ليك وهضرو ولا شوفو اش غاديرو...ماتوليش درية صغيرة افرح ماشي هادشي علاش كبرتي والي ربيتك عليه...ماشي هادي هي فرح الي تبسم فوجه الخايب والمزيان...وجه الضالم والمضلوم...وترحب بيه..

فرح"هبطات راسها وبدات كتبكي" : مابقيتش فرح الي كتعرف ومابغيتش نرجع ليها...واخا نعاود ليكم حتى لصباح مغاديش تفهموني..اصلا عمركم مافهمتوني علاش غانعيي راسي معاكم ؟.."تنهدات" غير سير انا غادي ندخل بلا ماتخاف مغاديش نهرب..مابقى عندي فين نهرب حتى حد ماغادي يقبل عليا...وانا اصلا عندي شي حاجة خاصها تحيد ونتفك باش نوقف على رجليا نهز مسؤلية راسي وميهزها ليا حد بالجميل ويمن عليا...

عصام : حشيتي ليا الهضرة حيث منيت عليك !؟

فرح : ماكنحشي حت هضرة انا جيت نيشان وكنجي نيشان يمكن صراحتي ماعاجباكمش كتجيكم قاصحة ولا ماعرفتش كيفاش نوصليكم اشنو بغيت...

عصام : الي بغيتيه ديريه حتى واحد ماغادي يبزز عليك شي حاجة...الغلط الي وقع نهار لول گلتها وعاودتها راني غير خايف عليك وخفت عليك..كيما كانت الفالطة(الغلطة) الي درتها فشردك غير خوف..حيث عارفك نية بزاف وماعارفاش دياب دنيا اش كيسواو...كبرتي وتربيتي تحت جناحي ماحتال تگولي اي تبراي..وماحتاال تگولي بغيت تلقايه قدامك...كبرتك تقراي وتكوني مرتاحة وتعيشي مرتاحة حيث بنتي ماشي ختي...الى غلطت الساعة الله حنا بشر انسان ماشي ملاك..عامرين اغلاط من ساسنا لراسنا..

فرح : الى بغيت ندير الي بغيت ماتوقفوش فوجهي ياك !؟

عصام : شغلك هذاك الي درتيه تحملي مسؤليتو انا غير شوفي فيا وضحكي ليا ورجعيني ايشام(كانت كتقولها فالصغر)..

فرح"تبسمت بلا متشعر وهي تجمعها بزربة ومسحات دموعها" : واخا وااااخا انا غانشوف...

عصام"حك ليها على ضهرها" : يلاه دخلي البرد هذا...

تنهدات وهي تدخل هي وياه...كتسمع فالهضرة ديال رجاال وسمعات صوته وهي تغوبش...توجهات نيشان البيت فين كاتبات هي وهناء...حيدات ديك الجلابة علقاتها وهزات البيجامة الي عطاتها مرات عمها الشيبية الي بكولونها لبساتهم جمعات شعرها وهي تخشا ف ففراشها وتغطات حتى دق الباب ودخلات هناء..

هناء"مزال مقلقة منها" : احم..تكلمي لبا قاليك گلسي حداهم...

فرح : مافياش بغيت نعس...

هناء"بلا متشعر الي فضولي فضولي ههه" : مابغيتيش تجلسي حدا راجلك ؟!

فرح"حيدات الغطا وهي طل عليها كتخنزر" : لا...

سدات عليها الباب ورجعات لعند امها لكوزينة كتحسبن...لقات نعيمة كتقلب على زيف باش تهز المقراج الي طاب باشش يعمر المحجوب اتاي ورادة الدجاج يطيب فالمرميطة باش تحمرو شافت فهناء...

نعيمة : فين هي فرح ؟

هناء : فالبيت مغطية بغات تكا...

نعيمة"خرجت عينيها بصدمة" : اويل الشيطان وراجلها الي فالصالون !؟

هناء"جاتها البكية" : كتعفر على النعمة...

نعيمة"دوزات على فمها بجهد" : سكتي دابا تسمعك ونبداو فشرح ليا نشرح ليك خليها هانية را هذا الله...سيري عيطي لفوزي يدخل ليهم المقراج..."مزال كيهضرو حتى دخل نيت"

فوزي : هاني بلا ماتصيفطيها...فين هي فرح نتي ؟

هناء : مابغاتش تكات وتغطات فالبيت...

فوزي"عض فمو وبدا يسب فهناء" : وليني خرا خرااا

هناء : طليه اويلي انا مالي اش درت...

فوزي : ماشي عليك ماشي عليك...ففففف مشطبة كحلة هادي..عطيني مي نعيمة المقراج نعطيه ليهم ونرسليها عصام يجيبها...

شد من عندها المقراج بزيف وتوجه لصالون الكبير فين كان جالس عصام منير وعبد العالي حدا زين الدين كيهضرو والمحجوب مفرشين ليه تفريشة ديالو مدورين بيه المخاد باش يعمر اتاي وحاطين قدامو صينية الفضة ببراردها وكيسانها ديال البلار كيتحطو فالعيد ولا الى جا شي حد فالضياف او او...وحداها المجامع فين كاين كل وحدة فيها اتاي سكار قالب مهرس و نعناع...حط ليه المقراج وتحنى عندو ونطق بشوية...

فوزي : با سير عند فرح جيبها راها فالبيت متكية...

المحجوب"كمش حجبانو" : واهيلي مالها ؟

فوزي : سير هضر معاها را نقشتي طارت راني غا معدي بنقشة سيمو حتى نردها ليه فساعة الخير...

المحجوب"ضحكو فعز الهم" : ههههه الله يمسخك...واخا صبر نعمر هاد البرارد ونوض نجيبها...عاوني ودي البرارد يشحروهم فالكوزينة وجيبهم هن...ومد الكيسان تلهى نتا وخالك عبد العالي ولاهيهم تنجيبها..."تنهد" لا حول ولا قوة الا بالله...

عمر دوك البرارد خلا فوزي داهم لكوزينة وهو يسمي الله وناض معاون بالعكاز ديال عود ديالو...توجه نيشان البيت ديالها دق زوج مرات وهو ينطق تا سمعها قالت دخل ابا عاد حل الباب ودخل لقاها جالسة خاشية ايديها فجياب بيجامة وحناكها مزنگييين ومنخرها خلاص...جلس حداها وحط العكاز...

محجوب. : نوضي بركي معايا فالصالون ف بليصتك (تصغير بلاصتك)لا تخليني نعمر البرارد ونكب اتاي وحدي...

فرح : غير عفيني اليوم"كتشمش فريحة دغميرة ديال دجاج عاطية"..

المحجوب : ولواه نوضي بركي ماتخليش راجلك يعيب عليك"غمزها" يگول مامربينهاش وعاطينها ليا ناقصة عقل وانا تال تاغونجة...وهادي ما ديالك تخلي ناس برا وتجلسي وحدك...

فرح"بترجي" : ماعنديش الخاطر ابا...ماعنديييش مابغيتش نجلس وهو كاين...غادي نبدا نتعصب ونصدق دايرة شي حاجة وترجعوني انا الي خايبة ؟ اللهم نبقى فالتيقار...

المحجوب : مكاين ماتعصبي...مكاين الي يعصبك ياك كل شاد تيقارو وطريقو فيكم ؟ اش غايخليك تعصبي وتگابحي من غير راسك !؟..نوضي بركي معايا وحدايا نهضرو انا وياك ونتحتتو وهو را بعييييييد واخا خاصكم تهضرو وليني صبري العشا ديال العيد هذا.

فرح : شكون عرض عليه ؟!

المحجوب"حط ايدو على صدرو" : انااا الي عرضت عليه..بغيتي ولا كرهتي مزال راجلك ومزالك على ذمتو ومزال يتسال فيك كثر منا...العيد هذا ولو كان تا هناء مجوجة نعيطو على راجلها...باش متگوليش باغين نجمعوكم حنا را دايرين غير صواب مع النساب وصلة الرحم واجبة علينا...ياك هادشي كنتي تقريه لناس الكبار ؟ ولا كلشي كذوب ؟!

فرح"الصمت"

المحجوب : الي قرر شي حاجة يگد بيها...نتي قررتي وتاحد مادخل فيك ؟ ياك تاحد ماگاليك لا وماديريش وماديريش ؟ ياك ماسمعتيها من فمنا ؟ "حركات راسها ب لا" ايوى نوضي وبركي وديري صواب الي تربيتي عليه...الي عشتي فيه وسط خوتك ووسطنا حنا وخوالك...نوضي الله يرضي عليك لا تقلقينيشاي منك لا فات تا دورت عليك وجهي راكي تعاني ا فرح...وخليني داير ليك الخاجر ولا تقلقيني منك...نوضي...

فرح"غمضات عينيها شحاال تا زفرات وهي تحلهم" : واخا يلاه..

حرك راسو مبسم ماخصراتش ليه خاطرو هز عكازو تعكز عليه وناض عطاها ايدو تابطات دراعو...حاسة بقلبها كيضرب فحلقها خرجو من البيت مشاو نيشان لصالون الكبير عند الباب دخلات كان كايهضر عبد العالي مع زين الدين غير شافها دخلات وهو يضحك...

ع.العالي : ها مرتك اسيدي دخلاات..تي فين كنتي...

فرح : بغيت نعس ولكن با بغاني نجلس حداه...

عصام"هز فيها راسو حتى خبط لحيتو بلا ميشعر كيتمتم اش تيقول الله اعلم"..

فوزي" بجق فمو وعطا لزين الدين كاس ديال اتاي وخا شاد كاسو" : خوذ اتاي ابا زين الدين كاع ماشربتي...

زين الدين"هز ليه الكاس عند عينيه" : حضر عقلك ابا فوزي.."حرك راسو ببطء مثقل...شرب من كاسو وتمذق" حتى حاجة متستاهل تلف..جلس شرب كاسك وتنغم ليا مع راسك...دنيا فانية تدي الذنوب فابور ؟...

تاهي ماتسوقاتش ليه...مشات جلسات حدا جدها تكات ليه على كتفو عطاها كاسها ديال اتاي ومد ليها شوية ديال فاكية حركات راسها ب لا وبقات شادة كاسها وعاقدة ديك الغوباشة...مع الحمل ماحساش براسها تلاح عليها السر بزايد وخا حناكها نقصو شربات من الكاس شوية حتى حسات بقلبها تروع عليها دارت ايدها على فمها حابسة ترويعة صحة حتى ولاو عينيها خارجين وحناكها حمريييييييين...مخشية ورا جدها وكتحرك باش متبينش حتى نغز زين الدين عصام الي شاف فيه كان ضاير كيهضر مع عبد العالي...

زين الدين : ماتسخاش ابا عبد العالي من داك المقام...ان شاء الله نرحعو ليه اجمعين...

عصام"بالحس" : اش واقع...

زين الدين"حرك صبعو ديال الابهام فاتجاه فرح ونطق بالالغاز" : كايولي شي مرات وجهك مزير بالخشوع كاتفكر الذنوب الي فايت داير وربي كايغفر ليك..گلبك يتروع اصحبي على راسك وفعايلك اتجاه الله سبحانه...ونتا ضاغط على راسك صحة...اللهم لك الحمد...فاش تزير بيك الوقت ديك ساعة شم التراب...قليل فين تلقاه حيث المكان كلو رخام مكاينش حس تراب..كاين زمزم راني جبت منو نيت ليكم شي بركة...ديك ساعة ترجع و كمل... قضي غراض يكون خير...

ع.العالي"تسوطى مافهم والو" : اييي ؟ ها اه وايه داكشي وليني الما ديال زمزم زين كي گلتي...

عصام"ناض فالبلاصة وقف وخرج من الصالون فايدو كونطاكت طوموبيلة زين الدين...حل الكوف وجبد بيدو ديال خمسة ايطرو ما زمزم كب منو فقرعة باش ماتعيقش..ودخل لكوزينة جاب كاس وهو يمشي لصالون وعيط ليها" : فرح...

فرح"طلات عليه بنص عين من تحت باط جدها" : نعام مالك ؟

عصام : اجي معايا بغيتك...

فرح"كانها طالبة عليها بزربة وقفات رمات عينيها جيهة زين الدين والو ماشاااااافش جيهتها عاطي بالضهر هو كاع شاد الحديث مع منير ولاخور...قادت بيجامتها وتبعات عصام حتى خرجو قدام دار عطاتها ريحة الهواء النقي تراب فازگ حسات بروحها رجعات...كب عصام كاس ديال الماء سمى الله وشرب منو وهي تنطق" : هاني علاش عيطتي ليا ؟

عصام"تنهد" : بغيت نسولك هضرات معايا صفاء گالت ليا بالي بغات تجي غذا هي وسيمو ومي نجية وفاطنة زيارة حيث علمتهم يجيو هاد ليام قبل منرجعو لجديدة...بغات تسولك واش تبغي تجيب ليك شي حاجة ؟

فرح : لا مابغيتش ولكن بغيت نرجعو دغيا...

عصام"كب كاس ديال الما وعطاه ليها" : شدي شربي ودخلي فين كنتي..عيطت ليك حيث هي خارجة دابا لمدينة وسولاتني..يلاه ماعليش شربي وكان شربي...

فرح"مافهمت والو وليني جاب الله تيسير شربات من داك الكاس من بعد ما سمات الله وخا ماعرفاتوش ما زمزم..تكات عليه كلو" : زيدني..عطشت..

عصام : ايه..."كب ليها عاودت شربات وبقاو واقفين شوية وهما يرجعو...حسات براسها شوية تنفسات واخا ديك ترويعة مزال شادة فيها...واحد اللحضة شدات فوق معدتها وهي تكمششش عينيها كتحس بالعافية شاعلة تما...من كترة الهريسة الي كالت وحسات بالوجع شوية لتحت مافكراتش زوج مرات انها تشد تما بايدها بالعكس فرحات بغات داك الوجع يجيها كتقول لعل وعسى يطيح راسو بلا ماتحتاج طيحو...

دخل عصام لصالون مخليها دخلات هي...جلس حدا زين الدين وعطاه كونطاكت فالبلاصة خشاه فجيبو...رجعو كيهضرو مجمعين هضرة رجاال طبعا كتكون وحدها واصواتهم كتسمع تال راس الدرب...العشا وجد نقى فوزي وياسين الطابلة وبداو يحطو..اول حاجة بداو بيها هي دجاج محمر مزوق بالكورنيشو فرماج وبيض سمان والوسط نصاص الحامض فيهم الهريسة بزاف...تحط الطبسيل الي فيه ربعة دجاجات...تجمعو رجاال على الطابلة الي كانت موجدة على حقها وطريقها...حتى جات نعيمة جلسات حدا راجلها وهناء حدا خوها اما فرح فكانت بلاصتها طبعا حدا جدها...على هي عقلات على شي حد ؟ بقات عقلت على زين الدين واش معصبها وجودو ؟ هي غير شافت الحامض ووسطو الهريسة بانت ليها جنة مفتوحة...العقل خرج ماتسناتهمش تا سماو الله وبداو ياكلو دغيا طارت على نص حامضة وعضت منها بهريستها تا كمش زين الدين حجبانو...

فوزي"قرب ليه ونطق بصوت فحيح" : غاتشوف عجائب وغرائب..كاين نباتيين وكاين المفترسين وكاين الهريسيين...هادو بقى فيهم واحد مانقارض هو هاد ختي الي هي مرتك...را مرضات بيها فالمعدة فرمضان بالكشيفة باش برات ليها..

زين الدين"حك لحيتو معصبببب...ونطق بنفس نبرة الصوت" : جابتها فراسها..الي ماهمو راسو وذاتو بغاو يهموه ناس ؟..ياكما شريتو ليها شي دوا !؟"خرج عينيه" واياك فوزي وياك تكونو شريتوه ...

فوزي : مابغاتش تمشي عند طبيب بقات تشرب غير فالما ديال حانوت حتى نقصات شوية...على حنا كنا عارفين ديك ساعة...

زفر زين الدين بقلة حيلة ورجع سما الله وبدا ياكل وفنفس الوقت كيشوف فيها كيفاش كتاكل بجهالة ديك الهريسة عرفها كتوحم عليها..واحد اللحضة قلبو فرفر بمجرد ماكيحس بان فاحشائها طرف منو ولدو من صلبو يقوليه بابا...يكبر ويولي راجل ولا امرأة ويكونو تحت جناحو وتولي عندو عائلة من دمو بصح را دنيا ومافيها شعور فشكل وحدو مميز...كمل العشا ووصل الوقت باش يمشي وقف خاشي ايديه فجيابو وناض...

زين الدين"نطق بصوت خشن تابعاه بحة" : سلام عليكم الحاج..

المحجوب : وايلي بات معانا...

زين الدين"حط ايدو على صدرو" : غا عفيني الحاج خاصني نمشي نرتاح غذا فايق بكري عندنا مانقضيو غذا..."نطق موجه كلامو ليها" اجي معايا نتي نهضر معاك...

شافت فجدها وهو يشير ليها بمعنى غير سيري...زفرات وهي تنوض اصلا باغيا تهضر معاه باش تعرف اشنو غايديرو امتى يمشيو قبل ميتعطل الوقت...لقاتو واقف فالطوالة حادر راسو وعاقد دوك الحجبان عينيه فلارض ونطق...

زين الدين : عندك ضوسي ديال جينيكو الي درتي هنا ؟

فرح"مغوبشة تاهي" : معايا هنا علاش بغيتيه...

زين الدين : جيبيه معاك وتبعيني نشوفو"ضار ومشى خرج خلاها واقفة...زفرات بعصبية ونفاذ صبر وهي تمشي لبيت هزات من صاكها ملف الي كانت هازاه معاها لا يطيح فالدار ويشوفو شي حد من خوتها...خرجاتو دارتو تحت كرشها وغطاتو بالبيجامة وهي تخرج لقاتو واقف كيكمي وشاد تيليفون فايدو كيبقشش فيه حتى رسل اوديو.."

زين الدين : صباح نتشاوفو ان شاء الله ونشوف le cas ديالك.."هز عينيه بزربة بانت ليه كتجبد فالملف من تحت كرشها هز حاجبو وهو يضربها ليها بوااااحد مولاتي تخنزيرة..قطع وشد من عندها الملف مهبط عينيه ومخنزرررر" علاش مخبياه ؟

فرح : باش مايشوفني حد...باقي مافراسهمش ومابغيتش نگولها ليهم وعافاك ماتگولهاش ليهم...

زين الدين"هز فيها عينيه مخنزر" : علاش ؟ جايباه من زنقة ولا كيفاش ؟؟

فرح"خرجات فيه عينيها" : مابغيتش نبدا نهضر تاني...ها الملف قراه وعلمني امتى نمشيو نساليو هادشي...

زين الدين"شاد الملف فايدو بقى مفيكسي فيها تخنزيرة لو هزااااااات اخوتي راسها كون رجعات باللور وماتشوف ديك الشوفة الي دار فيها..سد فمو مغزز على سنانو تا بان الفك ديالو كيتحرك...بقى يلعن يلعن فداك شيطان يلعن حتى دار الكارو نتر منو نترة طويييييلة ولاحو عسف عليه...وضار جيهة طوموبيل" تحركي ركبي حدايا نقراه ونهضرو تحركي...

مشات هي وياه حل ليها الباب وهي تركب وضار هو جيهتو فين كيسوگ شعل ضو الجوموبيل وحل المجر جبد نضاضر شوف ديالو قال بسم الله وحل الملف وياااا خوتي غير حلو بانو ليه دوك تصاور ديال الايكو وبانت ليه ديك النقطة كبيرة شويةالي من صلبو حس بواحد الرعشة وتبوريشة مخلطة شرات ليه مع عرووووق عرووووق ذاتو حتى عض شنايفو وحط صبعو فوقها كيدوز عليه قلبو كيضرب بواحد الوتيرة حتى حس بيه فراسو...اما هي مربعة ايديها وكتسناه يشوف ويقوليها شنو كاين...

زين الدين : امتى عرفتي راسك ؟

فرح : فاش رسلت ليك ل PDF...

زين الدين"هز حاجبو وعينيه على الايكو الي حمقو" : علاش ماعلمتيهمش ؟؟

فرح : مكاين لاش يعرفو حيث ماغاديش يبقى...

زين الدين"هز فيها راسو مخنزر ورجع شاف فالباقي كيقرا فالتقرير" : كلشي هنا مزيان...ماحسيتي بحتى حاجة كضرك لتحت فهاد اليومين ؟

فرح : فين ؟

زين الدين"حط الملف وبغفلة حط ايدو تحت كرشها فوق الفرج تا قفزات" : هنا"كايحك بايدو جاب ليها تبوريشة حيث اصلا حاسة بالوجع حتى حيدات ليه ايدو بزربة نترتها ليه تا غوبش هو باغي غير يقيس البلاصة الي فيها البيبي ديالو..." ششش مالنا ؟؟

فرح : قرا دغيا ودير معايا امتى نمشيييييييييو راني عيانة بغيت نعس...

زين الدين"هبط عينيه لحنة الي دايرة ورجع شاف فيها وجهها حمر بالعصبية...رجع كيشوف فدوك تصاور..." : شكون طبيب عندمن مشيتي ؟

فرح : فالجديدة فاش مشيت عندو نتاكد حيث عرفت راسي حاملة وماتيقتش مشيت نيشان عندو باش يتاكد گاليا عندك شهرين تقريبا باقي سيمانة ونكملها ولا قل...

زين الدين : هنا عاطيك فيتامينات خذيتيهم ؟

فرح : لا...

زين الدين"طوا لسانو وعضو على شوي ينطحها...زفر وهو يعاود نطق" : غادي تبدلي الطبيب...صباح ندوز عليك تبداي عند جينيكو الي عندي فالكلينيك...

فرح : كيفاش نبدا ؟ مافهمتش ؟

زين الدين : تبداي تبعي عندو حتى تولدي ان شاء الله...

فرح"ركبتها صعرة" : واش كتهضر من نيتك ؟ باغيه ؟

زين الدين"هز حاجبو" : كاين شي حد مايبغيش طرف منو ؟ معلوم باغيه مايحتاجش تسوليني ولدي هذا ولا بنتي...

فرح"جهدات صوتها تا بح" : واش مكااااااااااااتفهمش واااااش مكتسمعش اش گلت ليك ؟ كدير راسك مافاهمش ولا اشنو ؟ ماسمعتيش ياااك ؟ هاني نعاود ليك...بغيتك باش تسني ليا نطيحو ندير كورطاج نتا بغيتيه ديرو فجيهة اخرى اناااااااا مابغيتوووووش وااااا مابغيتوووووش...راني فيااااا مايدير شي حاجة طيحو ولكن اختاريت طريقة ساهلة في نص ساعة يقضيو معايا الغراض ونفضيو هادشي الي بيناتنا"كتهضر وجناوح منخرها كيفرفرو وجهها ولا زرق بالاعصاب وعينيها خرجو" ماباغياااااااش الولاد انا مابغيتوووووووش اهى اهى وراني طلبتك ماتخليييينيش نبقى نطلب فيك بزاف ونزاوگ وندير شي حاجة الي ماتعجبناش تاني..."كتغوت وتهز تالسما وهو حاضييييييها صاعرة وجاهلة ربع ايديه خلاها تا بكات وغوتات وندبات على خاااااطر خاطرها وهي تحبس كتنهج ودموعها دايزين وفمها كيترعد"

زين الدين : ساليتي البكا وشكى ؟"قرب ليها عينيه مخنزرييييين يقتل بالخلعة" هادشي الي فكرشك....ووووللللولدددي باغيه مكاين لا كورطاج لا خرااااا...

فرح"كتنهج"

زين الدين"شدها من معصم ايدها وجبدها لعندو بجهد تا غوتت مقربها ليه انفاسو كضرب طااااايبة وباين عليه التهدييد انه غايديرها": مابغيتيش تكلفي بيه....صبري معانا تاتولدي وعطيه ليا وتقاااودي من كمارتي...تجربي طيحيه ولا نسمع غييييير حاولتي..والرب العالي وبحلوفي باش يحلفو رجاال تبغيني لدوا تموتي ومانداويك وجيهتك ماتحلى ليا...."غوت بجهد تا تحرك الشعر من على وجهها" جربي رزيني فكبدتي...

بمجرد ماكاطيح فكرة انها غادي تاذي الجنين او تق..تل الحياة الي فاحشائها والي هي طرف منو من صلبو والي كان كيحلم بيها من الي عرف معنى العائلة وشنو كتسوى خصوصا فحالتو معندوش عائلة من غير توبا الشخص الوحيد الي بقى من عائلتو والي حتى هي فوقت من الاوقات دورات عليه وجهها...ماشعرش براسو حتى شنو قال وكيفاش ضار فيها وسيفتو الي تبدلات فوجهها هي براسها صدمها بهاد ردة الفعل....

زين الدين"عينيه خرجو مخنزرين" : تركني عليا من التنقاز والغوات حيث مغايفيدك معايا بوالو...مابغيتيهش انا گاد بيه وباغيه...ديري شنو گلت ليه وديك الساعة الله يعاونك ابنت الناس...

فرح"بقات مسمرة فيه دموعها نازلين وصدرها كايطلع ويهبط بجهد..صرطات ريقها وهي تغمض عينيها وحلتهم..نطقات" : مابغيتش نحلا ليك...مابغيت يجمعني بيك والو...هذا الي فكرشي غايطيح بيك وبلا بيك...

زين الدين"عينيه خرجو تاني....زير ليها على المعصم ديالها بلا مايحس حتى كمشات عينيها من حر الالم": ماتجربينيش افرح...ماديريهاش...ماضيعيش ليا النقطة الي مني وفيا...ماتريزينش وتعذبيني فاعز ماعندي هاد ساعة..."واحد اللحضة عينيه لمعو كانه كيترجاها مادير تاحاجة"...الي بغيتيه نديرو معاك بغيتي وجهي ماتشوفيهش غير صبري معايا هاد الشهور الي بقاو ولديه تطيه ليا ونعطيك العاهد الى مابغيتيهش حتى ديك الوقت نديه لعندي...فرح !!

فرح"حركات راسها بلا" : هادشي كيخصني حتى انا ماشي غير نتا..عندي الحق نبغيه ومنبغيهش...الحق الي كاين راني علمتك بيه اما كون يحساب ليا غادير هاكا مكنتش غادي نعلمك...

زين الدين"هز حاجبو وبنفس التخنزيرة عوج راسو ونطق" : حيث عارفاني مغاديش نبغي هادشي..ماعنديش فقاموسي..بلا فكرة راه ولدي ولا بنتي...الفكرة براسها ديال كورطاج خط حمر عندي الا للضرورة..مرض فيك يضرك فصحتك نضحي بيه فشردك...هو براسو مريض نضحي بيه فشردو هو مايتعذبش...الى طاح راسو قدر الله..."زاد زير على ايدها"مافيه والو نتي تحمدي الله وهو لحد ساعة بيخير ولله الحمد والله يجيبو ليا فالخلقة تامة...وضحي بيه بلا موجب شرع ؟... اقسم برب الكعبة وجربتي ديري شي حاجة ولا طرات ليه شي حاجة بسبابك...تيقني افرح غادي تقسمي ليا ضهري..وتهرسيني من جيهتك وعمري نتجبر بيك وبلا بيك...ماتخليش دنيا ضلام فوجهي تاني الله يرضي عليك افرح ماترزينيش فيه...وماتخليش بالي يبقى معاك وهاز لهم...انا عااارفك بعقلك عمري عرفتك ماعندكش...نهار بغيتك بغيتك بعقلك وبقلبك البيض وبالضحكة الي توحشتها فوجهك...ماشي فرح الي دير هاد الذنب..."باس ليها ايدها وهي تنترها بجهد تا كمش حجبانو..غمض عينيه وصرط ريقو او الغصة الي شاداه فقلبو..حلهم وقال"درتي هادشي باش نجي وتشوفيني معصب ؟....

فرح : ماعندي مابغيتك راني گلت ليك بغيت نطلق وهادشي الي فكرشي بان اما كون طلقت منك شحال هادي بلا حقوق...عنداك يحساب ليك راسك درت هاكا باش تجي دغيا...نتا معارفش بالي باغيا نتفك باي طريقة ولكن كتخرج ليا شي حاجة الي تخليني لاصقة فيك ولا نرجع خطاوي لور....غايبان ليك درتها بلعاني باش تجي واااخا ماشي مشكيل غير هنيني من هادشي وسير فحالك...

زين الدين"ناري كون دخلات لراسو كون تطحنات كفتة..لعن شيطان فسرو محاول يتكالما باي طريقة لان سيطرة ولجامها فقدهم" : غاندير راسي ماسمعتش هاد قلة الفهامة مخلطة بالفهامة لاروب...بقاي فداركم يومين ثلاثة وغادي نجي عندك ونديك لدارك...نعلي شيطان ورجعي ممرتاحاش معايا غير بقاي نتهلى فيك ونعطيك العاهد مانقيصك منقرب ليك حتى يتولد والي بغيتيه نديرو معاك...بوجه الخاطر والعشرة الي تشركت معاك ماتهرسينيش...ماتخلينيش نشوف فيك شوفة العمى"عينيه غرغرو خايف لا دير شي حاجة"..مابغيتيش بقاي فداركم و شنو ماتحتاجي يوصلك...ماشي على قبل كبدتي الي فكرشك..انما نتي محسوبة عليا وعلى ذمتي مزالة..واجب عليا نقوم بيكم ونقوم بعائلتي صغيرة والي عندي...

فرح"كايهضر فحال كيرمي عليها العافية حسات بالعيا وتروعت ليها خاطرها وهي تزمها بزز حتى الوحم ماحاملاش توحمو وتحس را عندها تاهي كبدة" : بغيت نهبط فحالي...

زين الدين"تنهد" : نزلي..صباح ان شاء الله ندوز عندك نتحركو ل كلينيك نشوفو حالتك نتي لولة بهاديك الهريسة الي عطيتي ملت مها صلية على بالك معارفش ؟..عاد حالتو ونديرو ليزاناليز الى تحتاجو وديك ساعة يكون خير...

مجاوباتوش او بالاحرى خلاتو كيهضر وهي تحل الباب ونزلات خلاتو بلاكة حتى دازت من حدا خوتها فوزي وعصام الي هضرو معاها وهي غادية وجناوح منخرها كيفرفرو بالعصبية اما واحد المعدة صداعها بدا يعطي والوجع فالمصارن خدام تاهو حطات ايدها على كرشها وهي توقف تحنات تا نزل زين الدين من طوموبيل شير لعصام الي ضار وسولها..

عصام : فرح مالك ؟

فرح"بزربة تگعدت وهي تنطق غاديا" : مماليش مماليش..يميل حالي..علاش گلتو ليه على الهريسة ؟ علاش تابعيني تا فماكلتي اش ناكل واش مناكلش ؟ علاش مكدخلوش سوق راسكم...

فوزي : شاااااا اولد الباشاااا...

ساس ايديه بنفاذ صبر وهو يمشي لعندو كان هو دخل لسيارة طل عليه من شرجم...

زين الدين : مزالين هنا نتوما ؟

عصام : ثالث عيد نرجعو ضروري نحل المحل نقضي شي غراض من بعد خاصني نمشي نخطب فين علمتك...

زين الدين"ببشاشة اصلا فرحتو دابا متعطيها لحد": هي خالي بغى يدير دارو...

عصام"ضحك بلهلا يطريه ليه من ديك كلمة خالي جاتو فشكل" : خالي !!"دوز على لحيتو" شديدة عليا هاد الكلمة...فشكل...

زين الدين : وشنو نگول انا مع بابا...

عصام : تريكة زينة !!..

زين الدين : كثير شي لا وصلاتك خبارها ونتا فداك المقام..شحال منعاود وشلا منوصل ونگول من غير..."خرج ايدو وخبط ليه على كتفو بجهد".. نتمناها ليك ابا عصام..."تنهد عينيه كيلمعو فشكل واحد شعور كيحس بيه دابا" وجد ليا راسك عندنا شلا صبر مع الوحم والغوات"حك على صدرو فشرد مرتي وولدي قابل"...

فوزي : انا غا حيدوني مابقيتش بغيت نصبر...يتولد عيط ليا نديه لحانوت يريش معايا بعض زغبات دجاج...

زين الدين"كيحك لحيتو..حرك راسو مثقل" : مرحبا الله اودي..خليه يترجل من صغر ماشي عيب..."ورك عالبوطون تحل الكوف ديال سيارة شافو من المراية وهو يدور عند عصام" واحد الفاليز فيها شي بركة ديال العمرة عطيها لحاج وخوالك وولادو الفاليز ديالكم حتى نجي تما ونجيبها"

فوزي : وفاليز ختي ؟

زين الدين : كاتسالني شي حاجة !"بمزاح"

فوزي : عبرتي على جدر والديها هههههههه....

بقاو كيتمازحو بيناتهم فرحانين باقتراب قدوم اصغر فرد واول حفيد فعائلة البغدادي والخيالي...شي حاجة ميمكنش توصف بالفرحة... تيسر هو شد الطريق غادي سايق مركز مع طريق وفنفس الوقت كيفكر فالكبيدة الي جاياه فطريق...كيحك فلحيتو منغم بالتفكير اول مرة من بعد تفكيرو بفرح الي عشق كيفكر بولدو الي تزرع فاحشائها...تنهد عاض على شنايفو بفرحة طول طريق حتى وصل لكازا ودخل لعين دياب الي حتى دخل قدام الدار...نزل من سيارة هاز فايدو الملف ودخل كان صقييييل توجه نيشان لبيتو حط داك الملف وحيد حوايجو لبس تيشرت گرونة وسروال قطن ديالو غسل وجهو وسنانو ورجع تخشا فالفراش دور وجهو جيهة الملف حلو..اول حاجة حط عليها عينو طبعا هي الايكو...ماسخاش يحيد صبعو تما...داير ايدو تحت راسو والايد تاني بيها الملف...شي عشرة دقايق وهو كيشوف غير فالايكو عاد داز لتقرير الي قرا حرف بحرف... تفكر كيفاش كانت كتاكل الهريسة بجهلة كيفاش متحكم فيها الوحم...تفكر اضرار الهريسة الي وخا الوحم كيخليك تاكل او تشهى العجب..نسى باش يوصي عصام او فوزي وهو يهز تيليفون رسل ليهم اوديو...

زين الدين : منعو عليها الهريسة واخا تبكي ليكم تما لاهيوها باش ماعطا الله...براكة عليها منها...الى ضرتها المعدة هاد الليلة عطيها تشرب الما بزاف وعطيها فرماجة تهدن عليها الحريق..شي دوا كيما كان ماتعطيهش ليها حتى تجي عند الجينيكو هو الي يخرج ليها شي حاجة ديال les femmes enceintes(النساء الحوامل)..ردو معاها البال...

صباح يوم جديد والساعة السادسة صباحا لقاتو لابس حوايج الخروج كومبلي اسود بقميجة بيضاء هز شكارة ديالو وخرج من البيت لقى طابلة الفطور ديالو محطوطة شرب من قهوته وفطر ليه شوية مصحصح ناشط...لقى توبا هابطة هي وضحى...

زين الدين : معاش غاديين ؟

ضحى : مع العشرة...

زين الدين"قبط ليها وجهها بايديه ونطق بجدية" : خليني نفرح بيك ا ضحى..تغافلنا ونسينا الي فات حسبي هادشي صفحة جديدة بيضة ماتوسخيهاش...

ضحى"قبطات ليه ايديه ونطقات بكل حماس": كون هاني عاد بديت ان شاء الله نزير راسي ونديها غير فقرايتي ومستقبلي...

زين الدين : شي مرة نضرب حتى لتما بلا ماتحسي تلقايني..ردي بالك مانبغيش ضثارة ومانبغيش قلة العقل ترجع...تسالمتي مع باك كيف وصيتك ؟

ضحى"جمعات حجبانها" : صونيت ليه مابغاش يجاوبني خليت ليه ميساج فواتساب اوديو سمعو ولكن بلوكاني...

زين الدين"غمض عينيه باسف وفقصة" : تت مشطبة كحلة مع هذا.."تنهد" ماعليش يدير الله خير مرة مرة سولي فيه.."حركات راسها وهي تعنقو...باس ليها راسها وقال" ديري بحساب فالعطلة ديال راس العام جي باش تحضري لسبوع...

ضحى"خرجات عينيها" : سبوع ديالاش...

زين الدين"غمزها" : حسبي راسك عمتي ضحى...

ضحى"حلات فمها" : فرح حاملة ؟؟؟ ماتقوووووولهاااااااااش ههههههههههه"ماشعراتش تا نقزات عليه معنقاه.. مشا وجا" اخهههههههه غاتولي بابا...

توبا : ههههههه "قربات ليه عينيها مغرغرين حيث عارفة حجم فرحتو دابا..واخيرا غايتزاد ولد من صلبو..حطات ايدها على كتفو" بغدادية صغيرة ولا بغدادي صغير هههههه...

زين الدين"باس ليها راسها" : الي عطاه الله خير وبركة اعمتي..

توبا : مبرووووك اولدي يتربى فعزك والله يعطيها وقفة ساهلة والله يجمع بيناتكم ويخليكم لبعضياتكم...

تسالم معاهم من جديد نزل مراد تاهو سلم عليه وخا سلام ناقص حيث باقي مقلق منو...خرج من الفيلا توجه نيشان لكلينيك باش يشوف حالة ضرورية ومن تم يتوجه لسيدي بنور عند فرح...غير وصل وهو يطلع نيشان لجناح ديالو بانت ليه امينة رجعات من بعد توقيف الي عطاها قبل فاش لقاها فداك الوضع المخل بالاداب...بغات تنوض وهو يوقفها بايدو تبقى تما وهو يدخل جلس فالمكتب...اول حاجة دار هي هز الفيكس...

زين الدين : من دابا 5 min دخلي عندي وعلمي معاك الحاج علي بالي جيت...

حيد الفيستة حل صدافي الكمايم طلعهم تال عند مرفقو...وجلس حل الماك شعلو وتكا عالكرسي كيدوز على لحيتو الي زادت كثافة بزاف على قبل كيلعب بيها بايدو وحاضي الماك...هز التيليفون دوز الخط لعصام يسول على حالة فرح...

زين الدين : فطرات ؟!

عصام : مابغاتش...وجهها صابح صفر والهضرة مابغاتش تهضر معانا هذا الله ماعرفتش اش هاد الحبس تاني...

زين الدين"جمع حجبانو" : علاش مابغاتش ؟ ماقدراتش تفطر ولا كيفاش ؟

عصام : ماعرفتش كيهضر معاها با دابا نشوفو اش غايدير...

زين الدين"غمض عينيه وزفر بتعب" : هاني فالكلينيك...نسالي شي حاجة ونعلم الجينيكو الي عندي هنا ونجي...

قطع معاه ومن بعد خمسة دقايق بالحساب دق الباب حنحن وهي تدخل امينة هازا الايباد فايدها ووقفات حادرة راسها...

زين الدين : شنو گاليك الحاج ؟

امينة : احم..هاهو جاي..."مزال كتقوليه فيها حل الباب ودخل بلباسو ديال البلوك و بطاقية..."

علي : عالسلامة ولد الحاج...

زين الدين"شابك ايديه قدامو..حرك راسو" : الله يسلمك.."نطق موجه كلامو لامينة" الاخت امينة"هزات فيه راسها"

امينة : وي دكتوغ...

زين الدين : حيدي داكشي من ايدك حطيه فالمكتب عندك...غادي تجي واحد الاخت تبدا الخدمة بلاصتك عندك 15 jours تكملي الشهر ديالك دوزي لعند سي البشير يعطيك خلاصك وتيسري الله يعاونك...

امينة"خرجات عينيها تا غرغرو" : علاش ادكتوغ ياك عطيتوني انذار والله ماباقي نعاود اهى اهى..

زين الدين : ماعطيتكش فرصة...علمتك اشريفة... apart شنو وقع قبل وقع ماكبر ابنت الناس ماعنديش الفضوليين وصحاب شريان المعرفة على ضهري وضهر تخريب بيوت ناس...تحركي خرجي من هنا"جهد صوته تا قفزت وعلي كمش حجبانو"

علي"حيث عارف شنو وقع" : تيسري بنتي حسن حتى داك اخر شهر ماتخلصي فيه تيسري..

امينة : بغيت نعرف غير اشنو درت اهى اهى...

علي : ختك عطاوها Golden residence(الاقامة الذهبية)..

امينة"افحال الى خويتي عليها الما طايب صرطات ريقها الي نشف فالبلاصة" : اااا ؟ مممم.عرفففتش..

زين الدين"عض لسانو قبل مينطق" : تحركي خرجي علمي السيدة دخل لاصال نشوفها تحركيييي...

فالبلاصة ضارت خرجات من المكتب كتغزل وكتولول وكتقول بصدمة هذا كيفاش عرف...سدات الباب وهو يزفر ورجع تقاد فالكرسي...

علي : مصيبة كحلة مع هاد كحل راس صافي...

زين الدين"دوز على وجهو بتعب وتفكير ففرح" : كيف دازت l'opération اعمو علي...

علي : مزيان مزيان صافا...من الفجر وحنا داخلين يلاه خرجت..شوي نبدل ونمشي لدار نرتاح...اجي نتا شتك قويتي عليا هاد عمو..من استاذك ل خوك الكبير لصاحبك لعمو..العام جاي تگوليا جدي...

زين الدين"متكي على صبع وصبع دايرو ففمو..ببشاشة وجه حرك حاجبو وقال" : علمتي عليها غير حشمت نرجعك جدي وصافي...

علي : ايوى ولد شي ولد ونديرو حفيدي على رقبتي تايقوليا غا جدي معنديش مع عمو علي...ههههه"هز فيه عينيه رمش فيه...بقى يرمش وزين الدين هاز حاجبو كيشوف فيه.." هاد عمو علي عندها معنى هي وجدي ؟

زين الدين : نتا وايمانك...

علي : واش نقول مبروك ولا اش تيقولو فهادشي را ولدي وصل وقاليا المراة حاملة...غاتولي جدو علي هههه ياك هادشي الي قصدتي ؟

زين الدين"سمع ليه تا سمع وهو ينطق" : الحاج زياني الفهامة الي قريتينا ف la faculté de médecine تقادات ليه ف اخر opération درتي دابا ؟..

علي : والله تا تشرح ليا بالخشيبات...

زين الدين : تت واااهليييييي تانتا."حرك راسو" تانا المراة حاملة

علي : اهيهيهههههههههههههههههههه تا حلف بالله وكان...

زين الدين : تشهيت نكذب عليك...الله اودي...

علي : هههه فعايلك على نتا تخفى عليا ؟...هههه"جمع ضحكة" واه واه واه واااااه وااااااه على بابا زين الدين واااااه..."ناض وقف وتم جاي عندو مسرح ايديه وكيضحك ويهضر" واه واه على ابي زين الدين واااااه..."تلاح عليه تنقو عناق رجولي حااااار خبط ليه على ضهرو بجهد فرحان فوق بزااااااف" مايمكنش اصحبي الى احسن خبار سمعت...حولك مقوي عليا عمو ما عمو...

زين الدين"طبطب ليه على دراعو وقربو ليه راسو هبطو عندو تا باسو" : انا براسي ماتيقت حتى مشيت وهضرت معاها البارح...

علي : درتي خييير...ايوى هي الشمل غايرجع ؟

زين الدين"قاس ليه الوتر الحساس..جمع حجبانو وهبط عينيه كيطرطق فصباعو مشابكم..." : ماعرفتش الحاج..هاني هاد ساعة غانشوف شنو كاين...شلا مشاكيل وقعو صعيب فيهم رجوع..."حرك راسو" هاني مساير تانشوف...بيني وبينك ماكرهتش ترجع لدارها نقابلها وخا عندنا خدمة كتيرة وفنفس الوقت بغيت تبقى مع خوتها كاين الي يرد ليها البال ونبقى نشوفها..."زفر" ففف مشربكة دعوة عندنا...

علي"مالقى ميقول" : الله يدير ليكم تاويل ديال الخير...ايوى سيدي نشوفو حنا دابا غير الجيهة الايجابية ههههه يتربى فعزكم ان شاء الله...

زين الدين"بدا يطابي شي لعيبات فالماك وناض كيحك فزغب ايدو.." : الحاج نسالي ونشوفك عشية...ولابد نشوف واحد le cas دابا ونرجع نجيبها تشوف جينيكو الصواف الي عندنا هنا...

علي. : ايييه صواف نوصيك بيها هي الي تبعات عندها مرت ولدي...اللهم يسر....

حرك راسو..ناضو بزوج كل توجه لاشغالو...كمل زين الدين اشنو بغى يقضي وهو يدخل البيرو هز لوازم ديالو دار فيستة على كتفو وخرج نيشان لمصعد نزل بيه لباركينغ ركب فسيارتو وخرج لطريق ديريكت لسيدي بنور...والتيليفون فوذنيه كايصوني ليها بدون اجابة...

زين الدين : الى جاوبتي نعرف يهو..دي مات فالملاح"قطع"...

فالجريدة ديال دار المحجوب جالسة كل من صفاء سيمو هناء ياسين وفوزي كيضحكو ولداخل جالسين العيالات نجية و فاطنة نعيمة...

فوزي"بانت ليه طوموبيلة زين الدين وقفات وهو يوقف" : ها زين الدين جا دخل اسيمو عيط لعصام يخرج وويشوف فرح..."مشى لعندو"

صفاء : نوضي دقي عليها ولا علمي با المحجوب يشوفها...ماتبقاوش تخليوها وحدها را مافيهاش ثقة الى دارت شي حاجة فراسها....

فوزي"سلم على زين الدين" : افين ابابات خالي"بات ولد ختي زعما" ماصبرتيش واحد اليومين !؟

زين الدين"نزل محيد الفيستة باقي طاوي كمايم القميجة من الي نزل من كلينيك..حط ايدو على صدرو" : مشهي نشوف ولدي ونسمع گلبو كيضرب..

فوزي : ههههه ايه من حقك...

زين الدين : علمها تخرج عندي نشوفو شنو نديرو تاني"حاس بغصة كاتمة ليه على صدرو الطريق كلها وهو كيحل فالقميجة يتهوى الا انه منسي راسو ب الفرحة ديال بيبي...."

فوزي : واااسيمو تا فين !!هاهو عصام خارج..."خرج عندو عصام سلم عليه لكن فهاد الاثناء خرجات نعيمة عند هناء"

نعيمة : هناء اشنو تبختي فديك الكسرونة ؟!

هناء : اشمن كسرونة اماما ؟ ماتبخت والو...

نعيمة : وايلي بغيت نصلق فيها اللوز باش نحمرو لحم بالبرقوق الي بغينا نديرو لغذا...ماعلينا دوزي ديريه وسيري عمري براد اتاي لراجل فرح هاهو جا ديريه يكون مسوس...

هناء : واخا ماما...

صفاء"ناضت" : انمشي نشوف فرح ماعاجبانيش السدة الي سادة على راسها منها نيت تخرج عند زين الدين...

دخل عصام وفوزي مع زين الدين تبعهم ياسين وسيمو دخلو لصالون الكبير...عمرات هناء صينية اتاي خاصة بزين الدين هزاتها شافت فباها شير ليها باش دخل..حتى نطق عصام...

عصام : هناء عيطي لفرح !!.."توجهات نيشان لعند صفاء لداخل لقاتها كدق عليها ولاخرى صاقلة"...

صفاء : وافرح جاوبي ماتخلعيناش اصحبتي...حلي تكلمي ليهم.

صفاء"شافت فهناء ونطقات وجهها تبدل ليه لون" : هناء عيطي لزين الدين هادي خالعاني والله...

هناء : اويلي مالها ؟!.."بزربة مشات لصالون تاهي وجهها صفر بالخلعة ماحسات كاع براسها اتا دخلات عليهم على شوي تعكل تا هز زين الدين راسو بلا مايحس ضار شاف فيها تقولي علم على شي حاجة." خويا فرح مكتجاوبش فالبيت كندقو عليها مابغاتش تت تحل...

ماحتال كاع تكملها ماعرفوووووش كيفاش طاااااار داك زين الدين من بلاصتو خرج من صالون وعينيه خارجين وجهو دغيا تبدل فيه اللون ولا بيييض مافيهش نقطة د.م بالخلعة...كيهضر ويقول...

زين الدين : ف فين هي فييييين اينا بيت ؟؟؟؟

صفاء : هاهي خويا فبيت با المحجوب...

تبعوه كلهم يتجاراو منهم عصام تاهو الي قلبو بغى يسكت مشى ليهم فبالهم راها غاتعاود تنتا_حر... كاين الي قاليه راسو را شنقات راسها فحبل كلهم كيتسناو يشوفو اش كاين فالبيت...زين الدين مادقش عليها انما بداك الجهد دياال الخلعة الي ركبات فيه دفع الباب ديال البيت وعاود وهو سااااكتةعينيه خارجين بقى يدفع تا تحل الباب وطاح كان غايجي لارض كون ماتحكم فراسو قلب عليها بعيني حتى لمحها جالسة فقنت ناموسية فلارض وشادة ومتكية راسها مشى لعندها بزربة عينيه خارجين...

زين الدين : ففف فرح !!"هبط عينيه لقاها شادة تحت كرشها وم

عااااااصرة عينيها وكاس فايديها مكمشة عليه..." شنو داكشي ؟ هااا..مادرتي والو ياك ؟ ماقستينيش ياك ؟ فرح جاوبيييني فرح !!فراااااااااااااااح"عينيه خرجو تا تنفخو ليه العروق الي فنواضرو..بسرعة تحنى شد ليها الكاس من ايديها وشمو" شنو هذا ؟ قرفة !!؟ فرح ماشربتيهاش ياك ؟

فرح : اهى اهى...اعععععععععععععع كرشيييييييييي....

زين الدين"لاح الكاس بجهد تا تشتت لهيه عصام دخل تاهو وقف كيتسنى تهضر" : فرح شربتي القرفة ؟؟"شدها من كتافها وبجهد الي عطاه ربي فديك اللحضة جرها لعنظو بجهد تا تزدحات معاه وعاود رجعها" شربتي القرفة حاجة باش طيحيه ليااااااااا ؟؟؟..ضريتيني فكبدتييييي ؟؟؟ "هز راسو لفوووق وغوت بحر جهدو" قت..لتييييييييييييييييييييه ليا قت.لتييييييييييييييييه...علااااااااااااااش افرح هرستي عليا فرحتي علاااااااااش"غوت تا نقزو دموع من عينيه وجهو ولا حمررررر بغى يطرطق بد.م...

الى عمرها شافتو صعر دبصح لدرجة الجنون هاهي شافتو...غير قرب ليه عصام دفعو تا كان غايجي لارض...

زين الدين"كيخبط بايدو بجهالة فوق الناموسية وكيتهز تالسما وينزل" : علااااااااااااااااش افرح علاااااااااااااااش...حلفت عليك الى ضريتيه عمري نسمح ليك ولا تحلااااااي ليا...طلبتك ماخليت مادرت معااا....وخا نكون ولد لحراااام ماديري ليا هادشي.."غوت بحر جهدو تا مشى ليه صوته لدرجة هناء وصفاء عينيهم نزلو بدموع" رزيتيني فيييييييه فكبدتي ا فرح رزيتيني فضلعي وكتفي....ضيعتيني فالعمود الي غانبني بيه عائلة من جديد...هرستيييييني افرح وقسمتي ليا گلبي.."جبدها لعندو تاني تا غوتات وهي تصقل وجهها وذاتها كلها كتقفقف وهي كتشوفو بديك الحالة معاها.."

فرح"جاتها فحال الطرشة ضرب ليها ضو بين عينيها فحال شي حد فيقها من شي حاجة...تا شهقات...": هيييييييييييييي....

زين الدين"عينيه ولاو فحال كيس د.م وسطو بقعة خضراء مشعشعة اي لون عينيه وبحر الالم الي هو فيه دابا قميجتو لصقات عليه... نطق" : الله ياخذ فيك الحق الله يااااااااااااااااااخذ فيك الحااااااااااااااااااااااااااااق....

"عندما يصرخ الرجال فاعلم ان الهموم قد فاقت الجبال"

كلشي بالخلعة تجمع قدام باب البيت صفاء دارت ايديها على حناكها مصدومة بالخلعة فوزي دار ايديه فوق راسو قلبو بغى يخرج لكن مايكونش ومااااايوصلووووش خرجان العقل والصعرة الي ركبات فزين الدين دابا شي حاجة الي صعيب توصف..كانه ممستوعبش الي دارتو....الكاس فايديها خاوي يعني انها شرباتو لا محالة....

نعيمة : الى يلاه شربتها طيرو بيها لسبيطار قبل ميفوت الفوت..عصام حيدوه من عليها وديوها...

زين الدين"كيشوف فيها كتبكي وشادة تحت كرشها...باش يرجع يهضر القدرة على الكلام خوات بدا كيحس بشي حاجة كتغير فيه "

فرح : اهى اهى ككككرشييييييييييي عتقوووني عتقوووووونيييييييييي اهى اهى...

عصام"رجليه فشلو عليه كيشوف قدامو واحد الانسانة غريييبة عليه ماشي فرح ختو والي ربى ماشي فرح ماشي فرح هادي ابدا...قرب ليها وتحنى تاهو كيسول فيها " : واش شربتي شي حاجة الحبس شربتي شي حااااجة...شربتي القرفة افرح ؟ هضري الحبس هضري جهلتي عدو ربنا...

فاطنة : واش شربتي القرفة ابنتي ؟ دوي باش يعرفو اش يديرو معاك ولا انا نعرف اش كاين...

فرح : مممم اهى اهى...اااااا...."كتحرك فراسها بشوية حتى غمضات عينيها"

فاطنة"دارت ايديها على فمها وبدات تولول تحنات بزربة وهي تسولها بشوية" : ياكما دايزة بد.م ؟؟

فرح"حركات راسها ب اه"

فاطنة"ضارت عند عصام" : ديها ولدي لسبيتار(سبيطار) لا تعطلوشاي وبراكة من الغوات اولدي هادشي من بعد..."عارفة انه القرفة خطيرة ومضرة للحامل...لكونها مضادة لتحتر الد.م وعندها اضرار اخرى غير انها سخونة الا انه فبعض الاحيان فحالة السيدة ما جه_ضات ومكملش كيعطيوها تشربها باش تسرع انقباضات الرحم وتساعد فنزول بقية الجنين..في حالة ما دارت اجه..اااض..)...يكون خير اولدي يكون خيييير"ربتات على طتف زين الدين لقاتو طااااب وفازگ دغيا قفزات ايدها ودارتها على فمها)...

الدعقة والصدمة الي هما فيها دابا حتى باش يهزوها يطيرو بيها لسبيطار كلشي فشل حتى من المحجووووب تكى على الحايط كون ما شدو ولدو...

زين الدين"مابقاش كيقشع شي حاجة قدامو قلبو ولا كيضرب بواحد الوتيرة سريعة حس بسخونية فصدرو كتحرق...كيحاول يحل عينيه باش توضاح ليه رؤيا ويسمع واخا غير امل انها ماشرباتوش...اش وقع من بعد مابقاش سمع حتى حاجة فقط الرؤيا ضلامت حتى طاح عند رجليها زدااااااف...مع تسمعات مع غوتات وغوتو كاملين جاو يتجاراو ليه وليها هي..."

فرح : ااااعععععععععع...

نعيمة"غوتات تاهي" : وتحركو ديوهم لسبيطاااار ياويلي توگضوو....

عصام : فوزي طيييييييييير حل طوموبيل واجي تعاون معايا نهزوه...سكار هذا الي دار ليه هادشي.."ضار لعندها وشدها من تحت باطها حتى كيوقفها وتعاود تفشل ليه حتى تحنى وهزها بكل قوتو وخا ثقيلة وغليضة تعافر وهزها بين دراعو حتى جا ياسين وشدها معاه غادي بيها ويغوت وهي بين دراعو تبكي وتنخصص وشادة تحتى كرشها...ضار جيهة فوزي الي رجع من برا من بعد ما حل طوموبيلة زين الدين" تعاون نتا وعبد العالي خالي ومنير نحطها ونجي لعندكم را ثقيل عليكم...

بزربة داها لطوموبيل واحد لحضة شدات ليه فعنقو وزيرات عليه هبط عينيه ليها لقاها عاضة فسنانها وايدها الي حاجة تحت كرشها ماحيدتهاش..شافت فيه بواحد شوفة فشكل فحال الى كترجاه وحشمااااات منو عوجات راسها هو فهمها بزربة حرك ليها راسو ومشى كيجري دخل لقاهم تعاونو عليه هازينو مشى ياسين كايجري حل الباب لاخور ودخل تعاون معاهم تا دخلو وسرحوه لور اما فرح فكانت فالمقعد الامامي..

فوزي : تحرك اعصام مكاينش الوقت طير لكلينيك الي فالمدينة..

فالبلاصة كسيرا بالطوموبيل خلاهم وراه كلشي مصدوم من اش وقع دابا فلحضة تبدل كلشي...كانت فرحة ودفء حتى تحولات لخوف وهلع...الطريق كلها وهي كتبكي وشادة تحت كرشها وكتحدر راسها تبغي تشوف بنص عين تا ديك الشوفة حشمات تشوفها لانها دابا فحالة صعييب شي حد يفهمها... هي براسها مافهماتش راسها...مزيرة على تحت كرشها والوجع كيحسك فيها...مسافة الطريق حتى كانو قدام واحد الكلينيك فالمدينة خرج فوزي كيجري علمهم باشنو كاين هما وصلو من هنا سيارة مينر خالو وصلات من هنا نزلو كاملين تبعوهم لداخل من بعد ما عرعر عليهم فوزي خرجو زوج نقالات وحدة تهز فيها زين الدين وتاني فرح وديك لايد وتقوووول واش تحيدات من تحت كرشها وهضرة زين الدين كدور ليها فراسها وصدرها كايتحرق بمعنى الكلمة ولهلا يعطي شي حد حالتها الي هي فيها دابا كل مكتمناه فهاد اللحضة هو تعرف وتفسر اش هادشي وقع ودارت...تمو غادين مدخلينها وعصام تابعها حتى حبسوه وهي تشد فيه بزربة..

فرح"نزلو دميعات جنب عينيها كي الحجر ونطقات بحرقة والم..الجملة عادية لكن عندها معنى اااخر خاص الي يدخل قلب فرح ويفهمو وموحال يعرف اش قصدت" : دعي معايا

عصام"بغى يجاوبها يفهم اش قصدات وهما يدخلوها وسدو الباب...تكى عالحايط بجهد عروقاتو تكب الي وقع فالدار وغوات زين الدين بديك الطريقة عليها وهي فلارض كتبكي عمرو يتنسى ليه لدرجة تبكم..عصام الي ممكن يحرق الخضر واليابس اصبح عاجز"...

مافهمش اشنو قصدات ب دعي معايا...هو اصلا مخلوع فاشلين ليه رجليه وزادت كملات عليه...بزوج بيهم دخلوهم واحد هنا وواحد هنا..حتى شوي تم المحجوب شاد فمنير وجاي تاهو فاشل...ومعاهم حتى صفاء تاهي جايا بلا عقل...لقات فوزي واقف لهيه وعصام لهيه وحالتهم حالة...

صفاء. : فين هما ؟؟

عصام"الصمت عقلو مبلوكي"

فوزي"زفر" : ففففف دخلوهم..بغيت ندخل نشوفها عصام علاش مدخلتيش معاها ؟؟

عصام"الصمت"

فوزي"قرب ليه وحركو" : عصام !! مالك ؟

عصام"هز عينيه غمضهم وحلهم" : كيفاش ؟..ناعرفتش ماعرفتش.."ضار جيهة الباب وهو يدق ماجاوبو حد اكيد عاود دق وهو يحلو راسو ودخل لقاهم دخلوها لهيييه وكيسولو فيها حتى وقف عليهم بغاو يخرجوه" مانخرجش خليني معاها..شربات شي حاجة داكشي علاش...

فرملية : عاودات لينا كلشي اسيدي..جينيكو هاهي نزلات باش تشوفها..."تمات جايا واحد طبية كبيرة فالسن شوية شعرها فيه شيب دايرة نضاصر دشوف.. كانت هي نيت يلاه نزلات ملي علموها وهي توقف" هاهي..دكتوغ نزهة تفضلي معانا..

عصام"بغات تخرجو وهو يوقفها" : عافاك خليني ندخل عندها...ختي هاديك...

نزهة"وقفات وهي دور شافت فيه وشيرات بايدها" : خليه ابنتي يدخل ماعليش..."وضارت فين كاينة فرح الي اصلا قبل فاش علموها علماتهم شنو يوجدو بينما نزلات...كانت فرح مسرحة فوق البياص ومزال شادة بايدها تحت كرشها حتى جرات كرسي وجلسات حداها هبطات نضاضر شوية وجرات تلفازة الايكو..عرات ليها كرشها بغات تحيد ليها ايدها وهي تزير عليها" حيدي بنتي ايدك ...

فرح"كنززات وحركات راسها" : غادي"شافت فعصام وكمشات حجيانها وغمضات عينيها " غادي يطيح ليا ؟!!

نزهة"على نيتها" : الى ماخليتينيش ندير خدمتي مغادي نفعك بوالو..تعاوني معايا...

عصام"عينيه عليها وكيفاش كتحرك تعابير وجهها مفسرهمش.." : فرح خليها دير خدمتها...حيدي ايدك !!!

حيدات ايدها كترعد حسات بوجيعات نيت لتحت حتى عضات فمها ودموعها محابسينش..هبطات ليها سروال شوية وهي تخشي بين سمطة ولحمها منديل مزيان وهبطاتو تاني شوي خوات البرودوي لزج تحت كرشها وهي تهز لاباراي وبدات تسرح بيها لبرودوي وتضغط مزيااان حتى كقول فرح اااا...وتعاود تاني وعينيها على الايكو وعصام قلبو بغى يخرج بالخلعة تقولي هو زين الدين..هاد الاخير الي ربي يعلم بحالتو فهاد اللحضة...بقات تورك وتعاود وفرح كتشوف فيها مكتشوفش جيهة شاشة الي حتى سالات وهي تحط لاباراي...

طبيبة : حالتو مزيانة دابا حاليا مستقر من بعد مانقدرش نعطيك شي خبار...اشنو شربتي بالضبط...

عصام"شافها صاقلة ماهضراتش" : شربات القرفة سخونة...من قبل كانت عاطياها لهريسة قتلة حتى ضراتها المعدة "شرح ليها كلشي وهي حادرة نضاصر وكتشوف فيه من فوقهم وكتحرك راسها وتسمع" بغات طيحو باش نجيك نيشان اختي...

طبيبة"ضارت شافت ففرح الي غمضات عينيها وصدرها كينهج بتنخصيص" : مممم...وشحال باش شربتيها ؟

عصام : شحاال باش كنتي شارباها نتي !؟

فرح"كتهضر وتشهق" : كيف دخلتو كنت مكملة الكاس ديك ساعة سكلت عليه دقة وحدة"تنهدات وسط شهقة"

طبيبة "حركات راسها" : منقدرش اولدي نعلمك بشنو كاين بالصبط...مي دابا الى سمحتي ولدي سير لهيه بغيت ندير ليها واحد الفحص خاص الى ممكن ...

عصام : ايه مرحبا...

تفاوت من حداها وهي تجر الستار دارت القفازات جداد فايديها...عيطات لفرملية جات عاونتها حطات رجلين فرح فوق رجلين البياص حتى تهزو...وهي تدفع بالكرسي وجات بين رجلين فرح...هبطات ليها سروالها حتى وصلاتو لنص وهي تغطيها فرملية من فوق...كتحس فرح بالوجع مرة مرة كيشدوها دوك الوجعات والمعدة تاهي كلشي تجمع عليها فهاد اللحضة...

طبيبة"خشات صبعها لتحت عند فتحة المهبل باش دير ليها toucher vaginal(لمسة مهبلية) حتى قفزات فرح وهي تشهق كتنخصص" : شش تهدني ابنتي..."بقات تقلب بصبعها لداخل باش تشوف واش الرحم تحل ليها او لا لان القرفة كيف ذكرت كدير انقباضات رحم...تاكدات انه مكاينش نزيف فقط نقيطات خفاف...حيدات صبعها كتحيد فليكانت" طلعي سروالك ابنتي...

بقات حتى طلعاتو وهبطات ليها رجليها وهي تعيط لعصام الي دخل بزربة...وقف عليهم عينيه مشاو نيشان لفرح لقاها باقي كتنخصص دايرة ايدها على فمها وتبكي شاف فطبيبة وهي تنطق...

طبيبة : منقدرش نعطيك خبار ماكدة...دونك اولدي غادي تبقى معانا هاد الليلة حتى نديرو واحد surveillance(مراقبة) نشوفو واش غادي دير ليها شي نزيف..حيث القرفة الي شربات عندها مخاطر على الحامل ماشي شي حاجة بالهينة...مابغيتش نتعمق ونقوليك لاش كتستعمل داكشي علاش قلبتها لحد ساعة مزيانة من بعد منقدرش ناكد ليك يعني كيف قلت ليك خاصها تبات انا الليلة شوية وغادي يطلعوها لشومبر لفوق...الفرملية غادي تعلمكم اش ديرو ديك ساعة.."ضارت عندها" نتمنى بنتي تراجعي راسك عالاقل هو متشبت بيك...وماشي ديال طيحيه الى ماعندك حتى مانع صحي الي يضرك...الى عندك عراقيل فحياتك حاولي تعالجيهم وفكري فيه وقبل من هادشي فكري راه حرام....على اي انا غادي نبقى مراقباك هاد الليلة وغادي تراقبك الفرملية حتى هي...حتى لغذا فالصباح ونعاود ليك الايكو...بالنسبة لمعدة شوي وغادي يجي اختصاصي الجهاز الهضمي يشوفها ليك هي والمصران ديالك.على حساب البواسير ويعطيك شي حاجة خاصة ب les femmes enceintes...

‏"لا شيء يُعذب الإنسان مِثل كِتمان حُزنه...‏أعان الله الصامتين ، على ضجيج قلوبهم ."

طلعوها لشومبر الفوق تحت المرااااقبة ...جلس قدامها مربع ايديه وكيشوف فيها مغطية وحاطة رجليها على مخدة تحت توصيات طبيبة باش يبقاو مهزوزين على جنازتها...الشومبر دافية وهي كتشوف فالسقف باش يهضر معاها خاف لا تعصب ودير شي حاجة ويضيع داك النقطة الي فاحشائها....هي فجيه وزين الدين فغرفة فجيه والعائلة حايرة بيناتهم فجيه ولا اله الا الله وصافي....

أيّها الصباح، ما أجمل فيك الأمل، ما أجمل أن نراك نقطة صفر للانطلاق من جديد،.. هل نطوي صفحات الماضي لنفتح بك صفحة جديدة..؟...

من بعد ليلة صعيب توصف وتفسر...فوق ديك الناموسية مجبد تحت مراقبة ليلية مستمرة لا من ناحيتو ولا من ناحية فرح كل واحد فيهم مجبد فسرير...كان جالس عد راسو علي وحداه المحجوب وفوزي...حتى بدا كيحل عينيه شاف فسقف شحاال غاااا هو تفكر شنو وقع الامس وهو ينوض على جهدو تا قفز فوزي وعلي تگعد...

علي : زين الدين كي صبحتي صافا ؟؟

زين الدين : شنو وقع ؟؟"ضار جيهة علي" مشى ؟؟ طيحاتو ياك ؟؟"عينيه دغيا تجغمو"

المحجوب : تهدن اولدي الله يرضي عليك كلشي مزيان ولله الحمد صيب غير السلامة تلگاها...ديها فصحتك هي لولة...

علي : تهدن ازين الدين ماوقع والو كلشي مزيان غير تهدن عاد فقتي اصحبي...

زين الدين"غوت بجهد" : واش طاااااح مشى ليا ولدي الحاج !؟

فوزي"وقف وقرب ليه" : لا موقع ليه والو زين الدين كلشي مزيان نتا الي واش مزيان...

زين الدين"خرج فيه عينيه" : مزياااااان !! ماعمري نكون مزيان صافي بلا ماتبقاو تسولو فيا وتمرضو ليا فصحتي بتسوال...فين هي ؟؟...ماتناقشوش معايا مغاتصورو مني والو...فييييين هي...

فوزي"شاف فعلي الي حرك ليه راسو حيث بصح مغايشدوهش عارفو علي وحافضو مزياان..." : مشى عندها عصام بغاو يهبطوها لتحت باش يعاودو ليها التلفازة يشوفو واش كلشي مزيان حيث طبيبة گالت تبات هنا ويبقاو مراقبينها هادشي الي كاين...

زين الدين"ناض من بلاصتو كيقلب على مايلبس لقى راسو ملبسينو قبية وسروالها ديال قطن حتى جاب ليه فوزي بانطوفة خشاها فرجليه" : تحرك ...

حاس براسو مزال عيان ومعافر..وجهو صفر حيث ملي قادو ليه الديابيت لقاوه طايح بزز باش تقاد وعطاوه مهدئ من وراها باش يبقى مستقر لانه غير يفيق يرجع لستريس تاني والعصبية. ويرجع يطيح ولا يطلع لانه ماشي سطابل ديك الساعة...نزلو نيشان لتحت هاد المرة لغرفة الفحص الخاصة بالجينيكو حتى دقو عليهم ودخلو هز عصام عينيه وهو يلقاه جاي عينيه مخنزرين حجبانو طالبين سلامة حتى وقف عليهم...

طبيبة"هزات فيه عينيها كمشتهم كتاكد واش هو" : دكتور البغدادي لا ؟

زين الدين"شاف فيها وحرك راسو..جيهة فرح ابدا واش شاف فيها الي كانت كتشوف فيه بواحد النضرة فشكل وفنفس الوقت كترعد..نطق بصوت مبحوح بالعيا" : جيت نشوف ولدي..

طبيبة : ايه مرحبا هي نتا الاب ديال هاد الجنين...تبارك الله مشرفين اولدي...

عصام"كيشوف فيه بتمعن ونطق بشوية" : زين الدين !!"هز فيه عينيه" شوية ؟!

زين الدين"تنهد وهو يزفر كيحرك راسو وغمزو مثقل بمعنى مزيان مسلك...عصام حرك راسو وهو يدور وخرج خلاهم بزوج بيهم مع طبيبة.."

فرح"حركات راسها وعينيها كيشوفو لتحت هزات رجليها حطاتهم فوق رجلين البياص المطنشين..هبطات ليها سروال تاني ودارت القفازات يلاه غاتجلس وهو يدور وعطاها بالضهر...هاد اللقطة خلات فرح تهز راسها فيه وعينيها خرجووووو حتى تهز ليها قلبها وتحط..كترمش فيه ترمش تا بداو يرمشو قطرات الدموع الي بداو ينزلو

طبيبة : اجي هنا تشوف معايا باش تفهم شنو غادي يكون واخا راك عارف ميحتاجش نشرح كثر...

زين الدين"قرب حدا الايكو من لهيه حدا طبيبة اما جيهة فرح مكيشوووووووفش فيها..كيشوف فالتلفازة وكينهج.." : vas-y..

كيف طريقة الي قبل نفس المراحل دارت خوات عليها برودي لزج وبدات تورك بايد وايد خدامة تحرك فبوطونات الايكو وتاكد...زين الدين يمكن هادي اول مرة غادي يشوف ويحضر لهاد الحصة ديال الايكو الي كان باغي يشوفها معاها البارح كتب ليه الله وشافها معاها اليوم وقلبو كيضرب بجهد..كينزف خايف يلقى مشكيل ولا خطر...طبيب جراح داز من الغرق ديال العمليات والحالات الي ولف عليهم واحاسيسو ولات عادية جدا...لكن فهاد اللحضة هو انسان اب مشاعر الابوة الي تحركات فهاد اللحضة خلات قلبو فثانية يرفرف ويرجع يضرب بجهد حتى حس بيه وسط راسو كيضرب لدرجة ماحسش تا حط ايدو على كتف الطبيبة وعينيه على الايكو...

طبيبة : شفتي ؟"حطات صبعها على الشاشة فواحد جيهة" مزيان...لحد ساعة مزال كلشي مستقر...

حرك ليها راسو وهي تستمر وهو عينيه على الايكو حاضي ديك النقيطة الكبيرة حتى عض شنايفو وهو كيضوف فيها..حس بالروح رجعات ليه من بعد ما مشات ووجهو رجع فيه الضو...

طبيبة : نسمعو القلب !!"هبطات عينيها كتحرك فلاباراي ضغطات مزيان وهي تمد ايدها وركات على واحد بوطونة حتى بدا يتسمع...دكدكدكدكدكدكدكدكدك"

فرح"دورات راسها بسرعة مخرجة عينيها كتسمع فدقات ديالو..غا هي سمعاتهم ريقها نشف وسطل ديال الما تكب عليها حتى غرغرو عينيها...اما زين الدين كان محني حاضي الايكو غير سمعهم وهو يغمض عينيه وهبط راسو وتحنى تحنى تحنى حتى هبط لارض وهو يسجد تا بدات الطبيبة كضحك"

زين الدين : اللهم لك الحمد اللهم لك الحمد...

دارت فرح صبعها على فمها عضات عليه كتشوف فيه كيفاش سجد ودقات القلب كيضربو ليها فوذنيها الي حتى كيوصلو لوسط الراس...فحال شي واحد كيشحطها ويشحط ليها قلبها...حالتها فهاد اللحضة مايعلم بيها غي الله...اش غادي تقول وكيفاش غاتفسر...كملات ليها الفحص عطاتها باش تمسح...وهي دور عند زين الدين...

الطبيبة : البارح عاودت درت ليها toucher vaginal وهي فشومبر باش نتاكد...وحتى دابا...

فرح.فمها بدا يترعدد وحناكها ولاو حمرييييييييييين...كتحك ايدها الي مغطية بالكمامة فوق كرشها وتعاود كتحس بذاتها كترعد ماكانش كيحساب ليها غاتوصل لهاد الشعور ديال زين الدين يدور عليها ضهرو...العافية الي فيها دابا كتاااكل فيها وتعاود..طلعات ايدها على صدرها كتحك عليه باش تهمد عليها ديك الحرقة الي كتحرق فيها لدرجة صبع طبيبة محساتش بيه امتى دخل....

هي : اجي معايا ولدي..."حرك راسو ومشى معاها بعدو شوية من حدا فرح" كلشي مزيان دابا...ولكن غادي تبقى تحت المراقبة لمدة 15 jours وتعاود ترجع باش نشوفها او ممكن تديها عندك لكلينيك كنضن فيه بروفيسورة صواف..مزيانة عندكم.."شافت فيه بتاكيد" حاولو تواجهو شنو عندكم الى بغيتي البيبي اولدي حاولو توصلو لحل مقنع انا الي عليا درتو حاولو تفكو شنو عندكم..ولكن نوصيك تبقى عليها المراقبة وتبعد من اي حاجة تخليها تنفر وتعاو الكرة من جديد..."طبطبات ليه على كتفو" الله يصلح الاحوال...

خلاتو وخرجات بقات هضرتها كاطير وتنزل فراسو لكن بمجرد ماتفكر دقات قلب الجنين كيرجع قلبو هو يرفرف..حتى رجعات ليه ذكرى الامس الي خلات ضو يضرب بين عينيه...هز راسو وهو يتوجه لباب حلو خرج بانو ليه واقفين شير لعصام يدخل وهو يمشي بان ليه علي شير ليه براسو.ومشى حتى تبعو خرج على برا وهو يدور عندو...

زين الدين : طوموبيل فين ؟

علي : راهي ياكما بايتي تمشي ؟

زين الدين : سي ديني لكلينيك...طوموبيل خليها مع عصام يحتاجها من بعد يجيبها ليا...

علي : كيفاش كلينيك !؟ سير لدارك رتاح ويصبح ويفتح !!

زين الدين"هز فيه عينيه حجبانو مكمشين بشمش والغضب" : لا ديني نرتاح تم شوية ونبدا خدمتي.."خرج لسانو دوز بيه على شفايفو بللهم ونطق داير ايديه على نصو" حتى حاجة ماتستاهل نخلي عليها خدمتي...

كيف خلاها ناضت بشوية وهو يدخل عصام وصفاء لقاوهاا شادة فطرف البياص وعينيها فلارض...

صفاء : كي بقيتي شوية ليوم ؟

فرح"الصمت"

صفاء"هزات عينيها فعصام ورجعات شدات فيها حتى وقفات شادة تحت كرشها وكتنهج وجهها شاحب.." : اجي بشوية عليك..

عصام"شدها من باطها وعنقها من كتفها تاهو حدر راسو لعند وجهها ونطق" : مالك دابا ؟؟؟

فرح"كتبغي تهضر وتسكت.." : اشنو غادي يفيد الى گلت ليك مالي ؟"هزات فيه عينيها حمريييين" الي فيا كافيني اعصام الى عندكم متزيدو غير زيدو من حقكم..غير هو رخفو عليا غير حتى نولد "نزلو دموعها يجريييييييو" اه حتى نولد وديرو مابغيتو..بلا متصدم هاني بغيتو ولا مابغيتو هو بغى الحياة الي انا مابغيتهاش ليه "خرجات فيه عينيها" مابغيتهاش ليه حيث خايبة خاااااايبة..."كتقول فهاد الهضرة واش عنات بيها راسها ولا عنات بيها حاجة اخرى ؟؟ لان طريقة هضرتها كانت غريبة وكان باين عليها انها مدمرة بكل ماتحمله الكلمة من معنى...خرجو من الكلينيك من بعد ما خلص علي كاع المصاريف لا ديال فرح لا ديال زين الدين بطلب من زين الدين ماعرفو هادشي حتى بغى يخلص عصام وهو يعلموه بالي كلشي تخلص..."

على طول الطريق وهو متكي على الكوسان مسرحو لوووور...صونا ليه التيليفون جبدو من جيبو قابلو مع وجهو لقاه عصام فالبلاصة جاوب...

عصام : شوية دابا ؟

زين الدين : فينكم دابا ؟

عصام : يلاه وقفنا قدام دار ودخلات البيت...

زين الدين : منوصيكش ترد معاك البال ميحتاجش."دوز على لحيتو الكثيفة بتعب وزفر قبل ماينطق" نرتاح شوية ولا سالي ودوز عندي نهضرو...

عصام : بالليل نتشاوفو ان شاء الله...

زين الدين : ماعليش تعلم صفاء تبقى معاها ؟ الى على الخدمة انا نتكلف خليها واحد سيمانة حتى نشوف شنو ندير...

عصام : كون هاني معاها حتى بنت خالي وفوزي وسيمو تاهو..

زين الدين : مزيان..."قطع معاها ورجع تكى مغمض عينيه وهو يتفكر دقات القلب حتى عض شنايفو بالفرحة ممثيقش روح مزروحة فكرشو من دمو ولحمو...بغى يتفاوت ليه العقل او يمكن كيتفكر باش يفرح وينسى الرعب الي عاش يوم امس...تنهد وهو يحط ايدو على صدرو ضار شاف فيه علي"

علي : هههه انعل يا شيطان ابابا...

زين الدين : الله ينعلو ويخزيييه"عض على سنانو تا بان الفك ديالو كيتقرقب...شوية وهو يدور شاف فيه" الحاج فيك ما يشري شي اسهم ؟!

علي"كمش حجبانو" : ديالمن ؟ وعلاش ؟

زين الدين"ربع ايديه وغمض عينيه ونطق بصوت خاااتر ثقيييل": ديالي

علي"طلق سينيال وهو يوقف جنب الطريق" : اش كتخربق ؟ اشمن اسهم ! فخبارك باقي عندنا المشكيل ديال الفلوس الي مابقينا درنا والو ماشفنا حتى شريك جديد يدخل معانا يسد لينا الشرخ الي وقع ؟...

زين الدين"نطق وعينيه مغاامضين ممسوق كاع" : غذا نكلف ريان يشوف ليا شي شاري لدوك الاسهم الى مابغيتيش تشري كاين من يشري...من هنا لشي شهور نهز كبدتي...هذا جهدي ماعطاتنيش وتقطع ليا رزقي فهاد البلاد...

‏" كل من اكتفى اختفى."

يتبع...