ولادة من رحم الفساد الجزء 33

كيفاش حتى خذا هاد القرار انه يجي برجليه عند عصام ويخاجر براسو وبحياتو وانه يحط ليه سلاح قاتل الي يخليه مايفكرش زوج مرات انه يقتلو بيه...كيفاش غامر ووصل لهاد المواصل والي ممكن يكون فيها يا قاتل يا مقتول...ربما عارف انه مايديرهاش وانه يحط ليه سلاح اسهل من انه يتلاقاو فضروف غير مناسبة ويقدر هنا فين تكون الكارثة العظمى ويكون بصح يا قاتل يا مقتول.... .هادشي كااامل من بعد يومييين ديال التفكير واخذ الاحتياطات والمشاورات من يونس واشخاص كبر منو حتى زصل لهاد المجية...وهادشي علاش كيخصنا نرجعو لايام قبل عاد نشوفو التتمة ديال هاد اللقاء الي مكانش يطيح على البال انه يكزن بهاد الشكل وزين الدين براسو مكانش عارف انه غايوصل لهاد القرار ويوقف قدام عصام بهاد الطريقة ويحط ليه حياتو على طبق من ذهب....

سالا الجلسة مع يونس والي كان فيها اخذ ورد والاتفاق على حلول تقدر تعالج الطرفين والطرف المتضرر الي هو فرح...خرجو من الكافي وكل قصد فحالو...رجع فداك الليل دخل الدار كان صهييييط طبعا غايكون كلشي ناعس طلع نيشان لبيتو لقاها نااعسة...ماشعلش الضواو وصل وحيد الكبوط والقبية بقى غير بتيشرت حيد سروال ولبس ديال دار وتخشى حداها قاد الغطا عليه ودور ايدو على كرشها كحزها حداه يلاه غمض عينيه حتى سمع صوتها...

فرح : زين الدين ...

زين الدين"مغمض عينيه ونطق" : نعام...

فرح : واش واقعة ليك شي حاجة !؟

زين الدين"كمش حجبانو ومزاال عينيه مغمضين" : حسيتي بيا ؟

فرح"كتشوف فضو البولات الخااافت" : وعلاش غانسولك الى ماحسيتش ؟!

زين الدين"هز نفس تا هزها فحال بغا يقول شي حاجة وولا سكت" : شي مشاكيل فالخدمة كبيرة...

فرح : واشنو غادير !؟

زين الدين : ديار ديار الله فرح...نعسي يصبح ويفتح...

فرح"حتى بغات تهضر وهو يزيد يجرها وخشا وجهو بين كتفها وعنقها باسها تما بوسات متتابعة حتى غمضت عينيها" : تصبح على خير...

ماجاوبهاش مكانش فيه مزال الطاقة باش يعاود يهضر مكانش عندو الجرأة انه ينطق ب "ونتي من اهل الخير" خايف لا تسمعها منو وتحس بصوته انه بيه شي حاجة اكبر من انه كاين مشكيل فالكلينيك...خايف لا تحس بيه وتعرف وتفهم لان فرح تاحاجة مكدوز عليها...تقدر تفهمو من طيارة انه تقلق انها نكرات خوها ويزيد يكمل عليها تقدر تفهم بزاااف وتستنتج الاسوء بطبيعة الحال...حس بانفاسها تخربقات وممرتاحاش وهو يبدا يحك بايدو على كرشها حتى بدات تهدن وهي تنعس اما هو النعاس را مغايلقاش ليه طريق فهاد الوقت...التفكيييير المستمر والمرهق خلاه يفقد النوم...

الله اكبر الله اكبر...اذان الفجر نيشااان لمسامع اذنيها معطرهم ومنبها للاستعداد للصلاة خرا من النوم...كيف مولفة وكبرات على هادشي وطبع يبقى فيها غير كتسمعو وتفيق كتنوض وترمي عليها العگز ديال النعاس...شعلات الفيوز عند راسها وجلسات فطرف الناموسية حتى تستوعب وهي دور جيهة بلاصتو لقاتها خاوية حتى تحل الباب ديال دوش وخرج كيعقد فالسيور ديال سروال لحيتو تقطر بالما ديال الوضو وشعرو مخربق نص على عينيه...هز عينيه فيها...

فرح : تسناني نصلي وراك !!

زين الدين"غمض عينيه وحرك راسو" : كنتسناك لهيه...

حركات راسها وناضت لدوش اول حاجة بدلات عليها وتوضات وخرجات جارة فرجليها بانطوفتها دورات عليها بينوارها لا يكون مراد خارج تاهو يصلي...دخلات البيت لقاتو جالس كيقرا لبسات عباية تغطات كلها تا من رجليها ووقف هو حتى دخلات توبا لقاتهم بغاو يبداو جات موراه حدا فرح...صلا بيهم وكملو...وكل رجع لبيتو...

زين الدين"حيد تيشرت وبقى غير بسروال وحدو ضار جيهة الطابل دو نوي هز تيليفون تصفح بعض الايمايلات منهم ايمايل يونس قرا التقرير الي رسليه فالصباح ورجع ثاني لربط الاحداث وهضرة فرح وكيفاش جاوبات بداك الرد الباارد جدا كانه بصح مكتعرفش عصام...ديك "شكون هذا" زين الدين براسو وتشوكا من ردة فعلها...لدرجة مودو تقلب عليه وخلاتو يعيد حسابات من جديد ويفكر انه ينهي هادشي لانه تشتات الشمل بطريقة مباشرة او غير مباشرة راه صعيييب بزاااف...حطات ايدها بااردة على دراعو العاري وهو يدور عندها"

فرح : حاسة بيك ماجاكش نعاس ازين الدين...واش لهاد درجة مشاكيل كبيرة مخلياك بلا نعاس ! ولا باقي مريض ؟

زين الدين"تنهد وحط تيليفون بلاصتو..وضار عندها سرح ايديه" : اجي عندي...

فرح"تبسمات ابتسامة خفيفة وهي تقرب ليه حتى جرها وتكها على صدرو كيدوز على شعرها"

زين الدين :فالكلينيك تخربقت ليا الدعوة تما...مشاكيل على برا ولابد ليا نحط ليها حد حسن ماتبرد الوقت...(ماكذبش بصح كاين مشاكيل فالكلينيك ومشاكيل على برا قصد هي وعصام بشكل غير مباشر)...

فرح : كيفاش غادي تفك هادشي الي مخليك بلا نعاس حتى طاح ليك الديابيت...غاتبقى هاكا تفكر تفكر وتمرض فصحتك !!

زين الدين"حط فمو على جبهتها باسها وبقى مخلي شنايفو عليها وكيهضر" : نفكر قبل مانحط رجلي...نعرف شنو باغي ندير وشنو مانديرش..ماشي غير جي وحل المشكيل افرح.."هز راسو وحط كفو على حنكها وصبعو كيمرر عليه ويدوز لشفايفها...هز عينيه فالسقف وتنهد قبل مايقولها ليها بعد تفكير طوييل" : يمكن la semaine prochaine نسافر ....

فرح"ردها عادي حيث غاتولف على سفر ديالو" : على برا ثاني ؟

زين الدين : لا غير هنا فالبلاد...

فرح : يومين عاوثاني !؟

زين الدين"عض شنايفو لثواني قبل ماينطق" : 15 jours..

فرح"شهقات بلا ماتشعر تا هزات فيه راسها فرقات عناقهم" : شحااااال ؟!؟!"بالغوات"....

الجملة نزلات على وذنيها كي الصاعقة طرشتها من زوج حناك...ماشعراتش براسها حتى غوتات ممصدقاش شنو قال...كيفاش خمسطاش ليوم الي غايغيب عليها !! وهي غا يومين كتحس ببلاصتو وكتصبر راسها حتى يجي...كيفاش غادير فاسبوعين كااااملة !! وهو فاش قالها را حس بالعافية كتجتاح ليه صدرو...صعيييب عليه انه يخليها هاد المدة كاملة وخا ثايق وعارف انها مغاتكونش وحدها واكيد غايخليها فايادي امينة حتى ولو يخاف عليها من عمتو ولسانها الجارح...

فرح : علاش غاتغيب هاد المدة كاملة ؟؟ فين ؟

زين الدين : مزال ماعرفتش"كيمسح عينو" يمكن الرباط...

فرح : الرباط !!!"بقات ترمش فيه"شنو واقع ازين الدين لهادشي ؟!

زين الدين : ما واقع والو فرح...الخدمة هي هادي..واقع مشاكيل صعيب تفك فيومين...

فرح"بقات تشوف فيه بعدم تصديق حاسة بالي بيه شي حاجة"

زين الدين"هز حاجبو" : مالك ؟؟

فرح"بقات تشوف عينيها غرغرو ومابغاتش تبين..هبطات عينيها ورجعات لبلاصتها" : ما ماليش...

زين الدين : فرح !!

فرح : الكلينيك فنواحي ديال هنا اشنو غايديك بعيد عليه وحتى لرباط...

زين الدين"بدات طير ليه النقشة" : فرح ماشي كلشي كايتحل فنفس البلاصة...كاين مشاكيل فالوراق نهار طلعت البروجي طلعت حتى لرباط وسافرت على برا ماتيرييل وشلا وشوية ما داز باش وقفنا الكلينيك...الرباط عندنا تما des réunions...شحال باش نفهمك فرح ؟ وايلي راكي عارفة الضومين مايحتاجش نشرح ليك...گلت ليك فين غادي مايخليكش تشكي كاينة شي حاجة"خرج عينيه وجهد صوته" براهش حنا هنا فرح ؟؟؟

فرح"حسات بحلقها تقرجط ونشف..غصة وحلات ليها ومارضات تبين ليه انه خلعها...حيث مازال عمرها شافت منو الجانب القاصح الجدي دييييما شاد ليها خاطرها فوق خاطرو.." : صافي زين الدين نتا تعرف..."جرات الغطا وضارت عطاتو بالضهر تا غمض عينييييييييه بنفاااذ صبر واكره حاجة عندو هي هاد القضية يكون كيهضر وشي حد يعطيه بالضهر..عض على سنااانو مزيييير تا كمش ايدو على شكل قبضة خلا د.م يتسقط منها...بقى كيتنفس بجهد يتنفس يتنفس تا غمض عينيه وهو يلوح الغطا وناض بجهد تا كمشات عينيها عرفات بالي عصباتو...لبس عليه التيشرت والقبية من فوق هز باكية الكارو والبريكة وتيليفون وخرج من البيت هو كاااع مخليها...عينيه منييريييين وحجبانو معقودين بجهد...فطريقو تلاقى ب توبا بغات تنزل...

توبا : مانعستيش اولدي...

زين الدين"الصمت"

خلا ليها vu الي شبعاتها معاه هو وفرح تا تگهمت وباقي باغيا المزيد...نزل بزربة مدردرب مع دروج بردو ضرب فيها طايب عرفاتو معصب...ضارت جيهة باب بيتهم بقات كتشوف ورجعت شافت جيهة الدروج بان ليها ضار وهي تنزل تاهي..اما هو مشى نيشان خرج ركب فسيارتو وديمارا طوموبيل خارج من الفيلا وقبل مايزيد وقف وهبط الزاج وشير بصباعو لعساس"

زين الدين : اليوم قبل ماتيسر علم اليزيد يشد بلاصتك وتيسر الله يعاونك...

العساس"خرج عينيه وقلبو طاااح من بلاصتو" : علاش اولدي ؟!

زين الدين"عض لسانو بالغدايد كان باغي يخلطو غا حشم حيث كبير وحاول ما امكن يخليه تا يسالي ليه وهاهو داز فطريقو وهو معصب" : جوج كلمات اشريف ... ماباقيش نشوف وجهك عندي هنا...

العساس : واش غاندير فين غانمشي نخدم"عينيه غرغرو"

زين الدين : الحاج الوهراني مكفيك وموفيك "خرج فيه عينيه بغلللل" خلاص توصالك لشنو كايطرا هنا بالحرف..تحرك منشوفش وجهك مزاال...ومزال داير بوجه العشرة ومدرت ليك والو...ولا كان حسابي غايكون معاك خااايب..."جهد صوته تا قفز ووجهو ولا عرقان وصفر بالفرشة والخلعة" يلااااااه...."خنزر فيه تا طيرو من بلاصتو وكسيرا بجهد تا تهزات طوموبيل وزاد مخليه مصدووم وعروقاتو تكب...جا فطريقو وهو معصب لدرجة مابقاش قادر يتحمل يشوف الوجوه المخادعة المتاف..قة الغدارة...الوجوه الي ماكتديرش بحساب العشرة وماكاديرش بحساب الخير. الي مصرفو فيها...ناس خايبة غدارة ماشي بمبدأ التنوفيق باش توصل لاغراضها...ماشية بمبدأ الخبث باش توصل لشنو بغات...معارفاش ان السمطة كدور دور سوا ليوم سوا غذا والي ضريتيه غذا ولا بعدو يجي الي يضرك تانتا وتبغي الي يفهمك وتلقى راسك انك خاصك تراجع حساباتك وتفهم راسك براسك...الطريق كلها وهو ساهي عينيه مكيبشروش بالخير حجبانو طلبو شرع بكثر مابقى ملاقيهم بعصبية...السيجارة ماحيداتش من ايدو...صونا تيليفونو حدر عينيه لحجرو حيث حاطو تما بان ليه اسم cicionaتشيتشونا هز تيليفون قابلو مع وجهو كيشوف فيها كتتاصل بيه وشنو غايجاوبها شنو غايقول سوى الغضب الي غايخرج من فمو ويقدر يضرها بشي هضرة هي ف غنى عن انها تسمع كلام جارح منو هو الي ماعمرو جرحها فهاد الفترة والي كتشوف فيه هو البلسم الي داوى ليها جروحها...مالقى مايدير لاح التيليفون لبلاصتو وخلاه يوصني هكاك...طريق كلها وهو غاادي غادي ماعارف راسو فيييين يمشي ولا شنو يدير...ماشعرش براسو حتى لقى راسو قدااام دارها...عقلو قادو ليها بلا مايشعر واش كان مولف وبقى مولف...

زين الدين"سكت الطوموبيل ووقف شحااال مقابل مع الدار الساعة كانت السابعة ونصف ديال صباح...دنيا مزال شوية مضلمة حيث فصل الشتا وزخات مطرية كتنشنش...هز تيليفون وداز لنمرتها واش فايقة ولا مزال ناعسة المهم هو فحاجتها...بعد رنات تطلق الخط وقالت الو" : حلي الباب...

شادة التيليفون فايديها وجالسة ففراشها...ملي صونات ليه وماجاوبهاش بقى بالها مشغول عليه حتى ندمات لاش دارت هكاك معاه حسات بتانيب الضمير من جهتو الي دااايما عاطيها الخاطر فالمقابل مالقاش الي يعطيه الخاطر...شافت الساعة لقاتها السبعة ونص فاللحظة نيت الي وقف قدام الباب ديال ديك الدار هي كانت فهاد الوضعية...عاودات اتاصلات بيه عالله يجاوبها ويهني بالها عليه والمرة ثانية ماعطلهاش دغيا جاوبها...

فرح"وقفات" : زين الدييين...فينك ؟

زين الدين"كيشوف فالباب تحل" : خارج فرح نسالي ونجي..

فرح : بالي معاك ازين الدين علاش خرجتي...

زين الدين : ماديريش بالك معايا...خرجت ندير لامارش كيف مولف نسالي ونرجع...

فرح : لامارش ونتا عيان !! بزاف على كل مرة تگوليا شي حاجة باش نثيق ؟!

زين الدين"هز حجبانو" : رجعتيني كذاب فرح ؟..

فرح : لا ولكن كتخبي باش منتقلقش...

زين الدين : خرجت نفوج مع راسي...

فرح"سكتات كترمش"

زين الدين : رجعي نعسي نسالي ونجي...تهلاي ليا فراسك

"قطع معاها وشاف قدامو بانت ليه كتشير بايديها ضاحكة ضحكة فرحة حتى بانو حلاقمها...حيد الكونطاكت وسانتيغ وحل الباب مترجل من السيارة سدو..قاد حوايجو ودوز بايديه على لحيتو..تقدم لعندها وقبل راسها وايديها"

زين الدين : ميمتي...

ام هاني"دوزات بايدها على لحيتو" : تعجعج بالگارو يا ولدي ورا الصحة غدارة...

زين الدين : معدي بيه وصافي..."تنهد كيشوف فالانحاء حتى ضار عندها هبط عينيه كيشوف فيها" ندير بحساب القهوة المعطرة ؟!

ام هاني : معطرة من ايدين باك الحسين...وخبز الشعير مفند فالزرارع من ايديا مع زيت البلدية وگول ام هاني ماقالتش ليا ههههه...

زين الدين"حاوط راسها تحت باطو معنقها بجنب وغادين داخلين" : نعل ملت هاد زين الدين الي ياكل وينكر...

ام هاني"دخلو لصالون الطوييل القديم لداخل" : مالك ماجبتي معاك الحنينة ديالك...

زين الدين : مرة جايا ان شاء الله...

ام هاني"وقفات وضارت شافت فعينيه عوجات راسها" : همك جابك لهنا عندي انا وباك ؟

زين الدين : همي هازو على كتافي من نهار حليت عيني وعرفت معنى الهم...

ام هاني : ودابا شنو تزاد ؟

زين الدين : تزادني هم الذنب"خبط ايدو فوق قرفادتو بجهد" على هاد الرقبة وثقل عليا وصعيييييب نصبر ليه ووصلت لحد جهدي....

ام هاني"تنهدات" : واخا دوز رتاح نعيط لباك يجلس معاك بينما وجدت الفطور...

نفس الوقيتة هاد المرة فالجديدة...البررررد والشتا كتنقط خرج من الدار هو وهناء سابقين وتابعهم المحجوب وعبد العالي...

هناء : انا غانمشي نسبق نشد طاكسي تانسالي ونجي نوصل عليكم...

عصام : مكاين لاش عشية غايكون فالدار هو...

هناء : اواه !! ايوى مزيان ينقص عليا فلوس المركوب...

عصام : نتي عينك غا فالفلوس...هاكي نعطيك دوبل غبري غا وجهك...

هناء"خرجات عينيها" : حلاااااف بالله"وقفات ومدات ليه ايدها" ارا الى سميتك !!

عصام"خرج عينيه" : ولينا گران ؟!

هناء"صرطت ريقها" : لاااا ياعوذ بالله...

ع.العالي : اديك الفلايسية لاكون فوتيه عليك...

عصام"خشا ايدو فجيب سروال لور وجبد بزطام جبد منو مية درهم وحطها ليها فايدها" : غبري كمارتك....

مشات طتضحك كي الكلبة ههه خلات جدها كيضحك...اما هما ركبو فالسيارة جا عصام يدور بانت ليه صفاء جايا خاشية ايديها فجياب المونطو وكتمشي بشوية حيث لابسة بوط ديال طالون حتى وصلات عندو وهي تهز راسها لقاتو واقف كيشوف فيها جايا وماهناش مغوبشة وطالع ليها الخز....

عصام : صباح الخير...

صفاء"وقفات" : صباح الخير.."ضارت جيهة المحجوب وعبد العالي شيرات ليهم بايدها"

عصام : مال وجهك طالب الشرع ؟

صفاء : مماليش فيا نعاس وعيييت بالخدمة...

عصام : الي قلب على شي يگد بيه"حك لحيتو بساروت سيارة"

صفاء"عوجات فمها وتنهدات" : ايوى هاني قادة بيه..طرف الخبز صعيب..غذا ولا بعدو شكون غايعطيني مانصير على راسي...نبقى معولة على واليديا ؟ واليديا براسهم كبروني باش نهزهم شوية انا وخويا...

عصام : غذا ولا بعدو ديري دارك يبقاو معولين عليك...

صفاء"عاودت تنهدات تقولي كتمضي فيهم على قبلو عههه" : الي غايبغييني يبغيني بشروطي وبواليديا من فوق الي مابغاش واليديا مابغانيش تا انا...والي غايحط واليديا فسوم الكفة غاا يمشي يتقو.."بان ليها هز حاجبو وهي تصرط الهضرة" سيدي عصام صلي عالنبي راني فشكااااال خاصني نعس والى مانعستش يااا تقتلني يا تقتلني...

عصام : سيري غبري من خنشوشي يرحم باك ندمتيني لاش سولتك...

صفاء : سلام عليكم...ليشافي فوزي والله ينصر سيدنا..."حدرت راسها وزادت ماتلفتتش"...

دخلات لدارهم وركب هو كيقاد فالسانتيغ ديمارا طوموبيل وكسيرا نيشان لمدينة الدار البيضاء...

المحجوب : اش درتي معاها !؟

عصام"عقد حجبانو وضار شاف فيه" : شكون ؟

المحجوب : بنت الناس والفاهم يفهم...

عصام : مادرت والو...شرط مانصيبش عليه...

المحجوب : شاد فهضرتك وموقفك ؟

عصام : با بدل عليا الموضوع..گالت شرطها عطيت كلمتي...ماعندي ماندير ليها...داكشي كبير عليها...

المحجوب : هي عارف راه كبير !؟.."عبد العالي كيسمع فيهم وما فاهم تا حزقة"

عصام"الصمت"

المحجوب : نگوليك اخر الكلام وهادشي انا نسدو حيث"حط صبعو على نواضرو" هنا خيخ ليها تا فوق بلا قياس...راك قويتي وفوتي وكثرتي شلاااااا اولدي شلاااااا...مابغيتيش تهبط كواريك لهلا يجعلك تهبطهم...بقى تا شي نهار تهز فخاطرك من خاطرك وتخاصم مع راسك..."بغى يهضر وهو يجهد صوته" سااااااكت عليا هنا حدي...شوف فالطريگ وتيسر...

مابقى عاودهاش معاه...ضار تقابل مع طريق مخنزر ومغوبش...مسافة الطريق حتى كان فمدينة الدار البيضاء...نفس المدينة ولكن الوجهة مختلفة بالضبط فالمدينة القديمة...جالس مفرق رجليه وشابك ايديه كيسمع لهضرة وراسو هابط وعينيه كيشوفو فلارض مركز مع هضرتهم...

الحسين : دير اش يخلي خاطرك يتنفس اولدي...

ام هاني : نفس على راسك اولدي الى بقيتي بهاد الحال تولي الي شفتيها تحس بيها ذنب...غذا ولا بعدو ضرها غا ضرصة تقول ذنووبي وشوف فين وصلتها...

زين الدين"غمض عينيه وزفر" : نغطي الشمس بالغربال !! ندير سبارادرا فوق هرسة ماشي جرحة...كيبقى ذنب واحد سوى كنت انا ولا هما فالاصل شتتو راسهم "هز عينيه فباه" نقطة وحدة دارت هادشي كااامل"هز صبعو كيرسم دائرة" ندورو ونرجعو ونعاودو..."وقف صبعو" واااحد شتت الشمل وخا نحط ايدي عالما يجمد وخا تحلف ليا باش مابغيتي ابا..."ضرب بقبضة ايدو صدرو" انا الي شتت الشمل وانا الي ولابد نرجعو...

الحسين : الحل الي عندك ؟

ام هاني : الحل الي يريح خاطرك اما الحل الي عندك عندك بزاااف شوف الحل الي يوصلك لراحة الي نتا باغي اولدي...

زين الدين"رجع حدر عينيه وحرك راسو بشكل ثقيييل وخاتر" : مكاين حل من غير حل فك العقدة...

الحسين : عقدة دارت عقادي هما...

زين الدين : العقدة بدات من عندي وكملات من عندهم...

ام هاني : فكها وخليهم هما يحلو عقدتهم بيناتهم ورضي ضميرك وخرج من باب واسع...

زين الدين"هز فيها راسو" : والى مابغاوش يتسامحو !؟

ام هاني : تكون درتي الي عليك...

زين الدين : وخاطري يبقى مريض !؟"عينيه ولاو حمرين" صعييييب اميمتي صعيييييب...جهدي تقادا مابقيتش گاد نشوف ليها فوجهها من الوقت الي سمعتها نكرات خوها باها ميمتي باها الي عض فيها بسنانو حتى كبرات وجيت انا لقيتها واجدة وديتها ليه"سرح ايديه بمعنى را هادي الحقيقة" بغيت ولا كرهت هادشي الي كاين اميمتي...الشمتة الي شمتو لو كان شمتها لختي مانرحموووش...لو وقع لختي ما وقع لختو ندير فحالو ويمكن نفوت انا كااااع"كيهضر بواحد الفقصة والحزن مخلطين احساس واحد حاس بالذنب كبييييييير..." سمحت ليا على شمتة الي شمتها وماحسيتش بالراحة ابا...ماحسيتش باقي ذنب هو هو وزاد كبر بتشتات شملهم. اعباد الله...

ام هاني"حطات ايدها على كتفو بغات تهدنو" : الله يرضي عليك اولدي تهدن عااارفين ماديرهاش غا الله سلط عليك ولاد لحرام...

زين الدين"مزال كشاكشو خارجة" : وانا تسلطت عليهم اميمتي تسلطت عليهم وفرقت الخوت فرقت البو على بنتو...خرجتها على طوعها غبرتها لشهريييييين على شوي يموت جدها وخوها يضيع...رجعات ورجعات ناكرة وضاربة عليهم قاتلة جيهتهم...نهار ربي جاب التيسير تسامحت مع خوها گلنا لباااس مابقى والو وتشوف جيهة الكبير الي عليه العمدة...نهار سولها السيد عليه اش خسرت ؟ بهضرتها"كيعبر بايديه بجهلة الي شداتو" بصوتها اميمتي وتسمعيها تگولي عمرها عرفات هاد فلان الي كبرها ورباها عمرهااااااااا"جهد صوته تا بح ليه عينيه خرجو ونواضرو بانو عروقهم خضريييين وجهو تزيييير ولا حمر بغا يطوش منو د.م..."

الحسين : لعن الشيطان اولدي وتهدن الله يرضي عليك...

ام هاني"ناضت وتحنات عليه عنقاتو من كتافو كطبطب عليه" : الله يرضي عليك اولدي ما تهدن الله يرحم ليك واليديك وشامة ختك الى ماتهدن...

الحسين : كلشي ليه حل...سير هضر معاه كي گاليك يونس وفك العقدة والباقي يحلو الله...الى فكيتيها من جيه تفك من جيه...دير الي بقى ليك وفك المشكيل...

زين الدين"كينهج"

ام هاني"كتمسح ليه على ضهرو ومعنقة ليه راسو عندها" : الله يرضي عليك...دير اللازم...وشوف اللازم اش جاد عليك...

زين الدين"عض لسانو شحاال تا تهدن شوية باش يقدر يهضر": حل واحد الي كاين"حط صبعو فوق طابلة ورسم خط" نحط الحد لهادشي...الى غايقتلني يقتل ماعنديش مشكيل مكتاب عليا وهذاك اجلي تما وصل...

ام هاني"قلبها بغى يسكت" : اويلي الله يحفظ...

الحسين"وقفها بايدو وشاف فيه" : ويديرها...

زين الدين : عصام الي كنعرف مايديرهاش...والى مكنتش كنعرفو مايديرهاش..."هز فيه عينيه" شخصية عصام الي كنعرف والي درس يونس...مكيبغيش الي يفرض عليه هضرتو..."هز صبعو" نگوليه قتلني مايقتلش نگوليه خليني نعيش "سرح ايديه" مايعطلنيش...

الحسين"جاه ضحك فعز الازمة." : هههه عكسي فحاالك...

خرج من عندهم ركب فالسيارة وكسيرا نيشان راجع لفيلا...طلع نيشان البيت لقاها جالسة وشادة تيليفون فايديها غير شافتو وهي تحدر راسها تا قرب لعندها وتحنى عند ركابيها...

زين الدين"شد ليها ايديها وباسهم وبقى مكمش عليهم هز عينيه فيها لقاها حادرة عينيها" : الفرحة ديالي...

فرح"تبسمات باستهزاء" : موحاال الفرحة ديالك...

زين الدين"جمع حجبانو" : شنو وصلنا ل هاد الهضرة...

فرح : مابغيتش نكذب عليك وعلى راسي...انا ماشي ولا موحال غانبقى الفرحة ديالك الى بقيت على هاد الحال..ماشي ايجابية وديما كنفكر بالسلبية...يمكن هي الي خلاتني وصلت لهاد الحالة النفسية حتى وليت كنبان هبيلة وخاصني نتعاالج..."بغى يهضر وهي تحبسو" خليني عافاك نهضر ماتقطعش ليا هضرتي وخليني نكمل ليك...انا الى كنگوليك شي حاجة كاينة راني كنقصد هضرتي ديما كنحس وعمر احساسي مكذبني وهو الي كيوصلني حتى كنمرض فخاطري...عارفاك تقلقتي ومقلق مني وعليا...انا مابغيتكش تبقى مقلق مابغيتكش تهز فخاطرك وتمشي لبرا تنفس باش متعصبش عليا...وحيث كتفكر ليا خاصني تا انا نفكر ليك...الى عندك مشاكيل فالخدمة سيير فكهم وانا هنا كيف ديما غانتسناك...غاتجلس شهر شهرين ماشي مشكيل اخرتك غاترجع لعندي...

زين الدين"كيسمع ليها وعينيه على فمها وهضرتها الحلووووة الي كتنزل فالعادي كي البلسم ولكن فحالتو كتنزل عليه كي جمر كيحرق فيه ويزيييييييد يحفر فديك الحفرة المجروحة الي كتنزف حتى كايدياق ليه صدرو وتنغص عليه خاطرو ويزيد يمرض اكثر فاكثر...مالقى مايدير قرب ايديها لعندو وباسهم بشكر...شاف فيها" : لهلا يخطيك عليا...

فرح : امتى غاتسافر...

زين الدين : بداية هاد سيمانة...باش ماكان تعرفي...

فرح"عينيها غرغرو كانها حاسة بشي حاجة ومابغاتش تبين" : عافاك ماتعطلش عليا كثر من هكا...

زين الدين"ماهضرش عينيه تفيكساو عليها بقى كيشوف فيها ماعرف اش يقول واش يواعدها بالي غايرجع ولا غايرجع قبل ولا غايطول...اختار اطول مدة ممكن الواحد يثيق بيها مدة الي ممكن يكونو فيها مشاكل وغايحتاج وقت طويل مايكونش حداها باش ماتحسش...الوقت الي غايقدر يكفيه ويقدر لا....وهاكا دازت تقريبا يومين ووصل اليوم...سد الكوف ديال طوموبيل وضار لعندها....

زين الدين : ردي البال لراسك...الوقت الي نسالي نهضر معاك...

فرح : ودخل الواتساب وبقى تخلي ليا ميساج...

زين الدين : ضروري...

فرح"بغات تهضر وتحبساات الهضرة فحلقها بالبكا" : ع عا فاك ماتغيبش بزااااف اهى"هزات ايدها مسحات عينيها من دموع الي كل متزيد تهضر كينزلو كي شتا" اهى اهى...

زين الدين"شاف فمراد الي ضار لهيه هو وضحى مخلين ليهم مسافة بيناتهم...قرب ليها اكثر شد ليها حناكها بايديه" : ماعندي فين غايب عليك...نقضي غراضي وانا معاك...وقع شلا وشوية الي خلاني نغيب عليك...كون جات عليا منفوتكش ساعة...رتاحي من جيهتي باش نجي ونجيب فوزي تالعندك تشوفيه...."خرج عينيه بشوي" تفاهمنا ؟؟

فرح : اهى اهى

زين الدين"عصباتو" : فرح توگضي معايا الله يرضي عليك ماتمرضينيش عليك...

فرح"بدون ماتشعر حطات راسها على صدرو وعنقاتو" : نعاود نطلبك وخا دور فيا وتغوت...ماجولش عليا عافاك وكل شوية هضر معايا عااافاك...

زين الدين"هبط راسو باسها فشعرها" : ان شاء الله..."باسها وضار باش يمشي لانه لو زاد شوية غايدير بناقص....شاف فمراد" مرااد دير شنو وصيتك...

حرك راسو وشاف فيها مزياااان عينيها محابسينش من دموع ضراتو فخاطرو...ماقدرش مزال يشوف فيها دغيا ضااار لطوموبيل ركب بزربة وكسيرا خارج من الفيلا....وصل لواحد البلاصة ووقف طوموبيل حتى تسنى علي جا ركب حداه(هادشي را فلاش باااك كيفاش حتى فكر وضبط ووصل باش جا عند عصام...)مسافة طريق الي دازت عند علي فحال البرق وعند زين الدين عاااام لانه باغي يفك هاد المعماعة باش مكان...تفكر كلام يونس ليه قبل مايمشي....

يونس : خدم الخاااطر والى مانفعش الخاجر دير العكس...خرج خرج الهضرة..مانخافش عليك راك قاري من هاد الضومين وعارف كيفاش تسير القضية...ونوصيك تحكم فاعصابك ازين الدين تحكم عافاك....

طريق كلها وهضرة يونس كتروج ليه فدماغو وهضرة فرح تاهي معاها الهضرة الي خلاتو يوصل لهاد المواصل والي كان ماجل هاد القضية مدة وهو كيحاول بشتى طرق يفك المشكيل وميوصلش لهنا ولكن كدور الدائرة وكترجع لنفس النقطة والعقدة منين بدااات حتى وصل برجليه لعندو وهاهو قدامو...

عصام"وجهوو كيخلع فحال شي واحد كيشوف فالضلمة وديك الضلمة كتلوح عليه الجمر كيحررررق فييييه...هبط عينو لجنوي وهوووب هزها فحال هز ريشة طبعا الجزار متوريهش السلاح اش كيسوى...زين الدين عينيه على عينين عصام الي عليه...تجي وسطهم تحرقي...هز ديك جنوية ولاحها لهييييييه ونطق بصوت مقطع" : ت قووووود من وجهي...

زين الدين"دور راسو بالعرض البطييئ شاف فجنوية الي تلاحت لهييييه كانه قاليه عطيني تيساع مغاديش نفكها معاك وهكا غاتبقى...ورجع شاف فيه ونطق" : ماباغيش تفاسرها مع الي شمتك ودا ليك ختك "خرج عينيه بغل" ترجل اصحبي"غمزو وكانت الغمزة هي نقطة الاستفزاز الي فيقات وصعراااات المصعور حتى غوت لربي الي خلقو وضارو كاااع دوك الناس الي تما كيشوفو وكاين الي بالخلعة خرج من الحانوت يجري"....

جملة خرجات من فم زين الدين بمثابة نقطة فيضااات البركاان الي كان خامد ف قلب عصام...نقطة مستفزة لعبات على عصام بامتياز الشي الي خلاه يغووت بحر صوته حتى خلا الناس الي تما كلشي خرج يطل والي وقف والي طار ونزل بالخلعة...فهاد اللحظة مكانش علي خلاه زين الدين فالسيارة...

مع غوت الغوتة نيشااان نقز من فوق البوطاجي مشى ليه وعطاه براسو بجهد لصدرو حتى كان غايطيح كون ما شد فراسو...الجهلة الي بدات تشد فيه صعيب انك تفسرها فهاد اللحظة وزين الدين مكيدير حتى رد فعل سوى الاستفزاااز فطريقة كلامو لعصام....ماشي عطاه بونية ولا ضرب الي كنعرفو كانت نطحة براسو وحيث عارف زين انه غايدير رد فعل كان موجد انه يشد فراسو باش يقدر يهضر...

عصام : الله ينعل زا**** بووووك الزا**** " كل كلامو سبان فسبان كشاكشو دغيا خرجات يلاه غايمشي ليه يعاود ينطحو براسو جا معاد وواحد البائع حداه تما وشي دراري دغيا بسخرة الله طارو ليه تما دفعوه وشدوه وهو يتهز ليهم تال سما وتحط وهما شادينو كيدفعو فيه" وااااااطلقوووووووووو القحاااااااااااب....

زين الدين"غوت بحر جهدو تاهو" : خلييو القلااااوي نشوفو تراجلييت "خرج فيه عينيه باستفزاز" الرجلة ؟؟ "تبسم بغيييض وديك الابتساامة فحال شي ليصانص كيتخوا على العافية الي فعصام كااااايتهز ليهم تااااالسما ويغووووت بحر جهدو" ماشفتش مابانش ليا...الهضرة والبلا بلا عاطيهم عالجهد...

نقز واحد من دوك الي شادينو تم جاي ليه بغا يحيدو من تما

هو : حايد اصحبي من هنا عطينا تيساع اصحبي سير لبدها فشي قنت وقيل عليك سيد...

زين الدين"غااا حط ليه ايدو على صدرو داكشي الي مابغاش يديرو لعصام دارو ليه شد ليه ايدو بزربة وطواها ليه تا غوت على شوييي يطرطقها ليه وقربو ليه بجهد تا زدحو معاه عينيه حمرييييين مغلغل بالبيان" : والرب المعبود وماااتقوووود من ملت مي نقسم زا** الي جابك لعندي...

"دفعو بجهد تا تنشر لهيييييه...لاخرين غا شافوه دفعو ولا شي يشوف فشي عرفوووهم ناوييييين على مقاااتلة والمشكيل مكيفهموهمش تا اش كيقولو... ورا عباد الله كااااملة تجمعت تما وبداو ناس شي يجري وشي يعيط لفلان جي را عصام الجزار"

عصام"يا كيدفع فيهم ولا هما بغاو يتفرقو عليييه" : وااا قودو القلاااااااوي قودو عليااااا"كيتهز ويتحط جناوح مناخرو كيفرفرووو بحال شي ثور شاف زيف حمر وتطلق"....

زين الدين"مشى ليهم بزربة بعد زوج من تما غا باش يتفكو عليه ويقدر يغلب عليهم غير حيدهم دغيا لقا عصام الهوتة وتهز تال فوق وشتت الي بقى تما...طار على زين الدين بغا يقجو شد ليه زين الدين ايدو ولواها ليه دارها ورا ضهرو ودفعو لعندو ومستمر فسلسلة الاستفزااز ليه قرب ليه عند وذنيه" : ضحكت ليك على ختك..."اول حاجة" خليتها تبكي بالشهورة ومالقيتي ليا جهد ا رجلة ديال الكرطون !!؟ "دفعو من ضهرو" هضر القواد...باغي تقتلني ؟؟

هو كيهضر فلحضة غفلو براسو عطاه نطحة بلور نيشان جات لمنخر زين الدين تا طلق منو وضار ليه استغل الفرصة ومشى ليه عطاه برجلو...كيضرب ويغوت هنا فهاد اللحظة مابقاو قدرو يديرو ليهم والو حيث بداو يتگارعو...

عصام : الرجلة القواد بزااااف عليك الرجلة..."جرو بغى يعاود يعطيه عاود زين الدين غفلو وضار ليه بسرعة ماعرفوهش لاخرين تا كيدار مشا ليه من لور وشدو من بيطانو زير ليه على ايديه...منخرو طلووو دمايات وفوق حنكو دغيا بانت الورمة الي تورم...قميجتو تهيتكت صدرو كامل تقريبا كايبان مابقاش تسوق واش عريان ولا لا قد ماهو مركز على الي قدامو خاصو يفاريها باش ماعطا الله....

فهاد اللحظة كان جاي بموطور فوزي جايب من عندهم الغذا لعصام حيث مشا يشوف فوزي فالدار كيف بقى ويدير ليه زيارة خفيفة...حتى بان ليه جوقة من بعييد ناس كتجارا والترباني طالعة تما....تم جاي معاد وجهو صفر كيجرييي لعندو غا شافو وهو يطير لعندو...

معاد : خويا صطوف خويا صطوف"كينهج" واعتق...

صطوف"فرانا مع فرانا وقف فحال حس باش كاين" : اش كاين اتبي مالك ؟

معاد : خ خويا عصااام كيضارب م مع و واااحد....

صطوف"خرج عينيه" : اللهم ان هذا منكر..."لاح ليه الموطور والميكا ونقزر بجريتو كيعرعر مشا يجري تا بان ليه مزيرو زين الدين وكيتركل ليه كيبغي يعطيه براسو كيبعد زين وجهو وكيحاول يهضر معاه"

زين الدين"كينهج" : كرهتي ملتي ياك..."هز راسو للسما ورجع هضر" ماجيتش هضرت معاك وشرحت ليك علاش درت هاكا يااااك ؟ "خرج عينيه" على بالي نصرف فيكم العيب...شمتك اولد الخيالي شمتك..."ولكن هاد المرة غا قالها وهو يطلقو"

ماحتال يمشي ليه تا جا صطوف كيجريييي جرو بجهد ودفعو لهييييه شانق عليه...ضار عند الحاج الي حداه وواحد الولد وغمزهم يجيو عندو يعاونوه فيه حيث عارف يقدر يغفلو ويدفعو....

صطوف"عينيه فعينين عصام" : عصام عصام عصاااااااام روي ستون اصحبي ماشي ديالك هادشي...فتنااااه اصحبي وتبنا روي ستو"ونطق بشوييي باش يسمعو ويفهمو وميتشوهوش" سمعة اصحبي سمعة....

عصام"كيهضر مغزز واحد صوت كيخلع دليل انه مااااغايصبرش ويتهدن وكيخرجووو منو دوك الاعصاب" : وااا بالرب لا خليت مووو هناااا...واااتقود ولا ندوز فعدو ربك تانتا..."كيكملووو عليييه فاش كيشدوه يبلوكيييوه"...وااععععععععععععععععععععع....

زين الدين"مسح جنب فمو صدرو كيطلع ويهبط هز عينيه فيهم ونطق" : خلي الراجل يترجل نشوفو فين غايوصل...نشوفو شنو غايدير لهذا الي شمتو..."هز عينيه فعينين عصام" ياك شمتك !؟ ياك انا ممزيانش وخايب وماترجلتش باش نجي نهضر معاك..."سرح ليه ايديه" خوذ شنو بغيتي...

صطوف"ضار جيهة زين الدين شاف فيه مخنزر .. مشربن عندو" : اش جايب ملتك تانتا !؟ فاش عينك القلاوي...

صدق تا صطوف فاقصو بهضرتو فحال كيرمي ليه الملحة عالجرح...

صطوف : واااااتقاود اتبي تقاااود لا ندخل فعدو ربك انا الحبس..

زين الدين"ماداهاش فصطوف عينيه على عصام الي كيبان فيهم شرااا ياربي السلامة...ركز عينيه على عينين عصام" : ماكنتش راجل معاكم اولد الخيالي...ماجيت وهضرت معاك..."ضار جيهة ناس بغى يقول شي حاجة ولقى ناس واقفة مجموعة ورجع شاف فيه" الي فجهدك ديرو...بنت ليك شماتة هاني برجلي جيت عندك..."هز صبعو مخرج فيه عينيه بتاكيد" ويااااك ضلم ويااااك ضلم معاك الناس...وياك ضلم معاك العزاااز....

صطوف"طلق من عصام ومشا ليه بغى يدفعو ماعرف كيدار تا شدو زين الدين بحركة سريعة لوا ليه ايدو وصدق دافعو هو تا مشى لهيه على شوي يجي على فمو كون ما شدوه شي رجاال وهو براسو تحكم فراسو"

زين الدين"ضار هاد المرة مشربن هو عليه" : قرب هاد المرة جيهتي نطحن ملتك تانتا تق*** "بحر جهدو...هنا عصام بعد دوك الرجال ومشى كيجرييييييييي ويغوت ويعرعر مشا ليه صطوف دفعو هاد المرة جا طايح مشبح ومشى لزين الدين بحر جهدو دفعو تا تلاح لهيييييه فلارض حتى غوتو الناس ودنيا تجمعااات عليهم ما ناضش زين الدين ما والو تسناه تا تلاح عليه وبدا يعطيه فالبونيات ويغوت بحر جهدو وزين ماكيدير والو ....خلاه تا ضربو مزيان وهو يرجع ليه ضرب وهاد المرة دورو بزربة وجا فوقو تاهو كيعطيه فالبونيات.. المعركة اشتدت وناس تجمعات كيعطيه دقات كيبغي شي حد يمشي يفك كيجروهم حيث مابقاوش غايقدرو عليهم....عطيني نعطيك وسبان من سمطة لتحت و احد الحالة ميعلم بيها غالله..

زين الدين"خرج فيه عينيه بتخنزيرة ونطق" : ما ضحااااااااكتش عليكم القواااااد ماااا ضحااااااكتش...راكم ولاد نااس ماشفت منكم غالخير..."شانق على عصام وكيعطيه فالبونيات...قرب ليه مزيااان عند وجهو" ماشي نتوما الي نتفلاو عليكم...داروها بيا ولاد القحااااااااب الي وصلوني لعندكم....

عصام"خلاه كيهضر وهو يغفلو وعطاه بجبهتو لمنخو تا طوش دوم مع سخوووون فرفر ليه على وجهو...دفعو وقلبو جا هاد المرة هو الفوق وزين الدين لتحت." : وا تقااااود..."كايضرب فيه بالبونيات ويتحلف كاع السبان جبدو كاع ملة وطاسيلة زين الدين خرجات من فم عصام وتسبت...زين الدين مابقاش بغا يضربو مادام هضر خلاه يفرغ شنو عندو" مااااخلاااااتنيييييييش نقت ل زبور مك...كون خلااااتني كون واهليييييييييييي...دخلنا ولد القحبة لقاع دارنا وضحاااك عليا شمتني وبكااااها ليااااا...الي درناهم فوق راسنا خشاونا تحت الصباط...."هز راسو للسما وغوت بحر جهدو" هااااععععععععععععععععععععععع شمتييييييييييييييييني اولد القاااااااااحبااااا....

زين الدين"غفلو تاهو وعاود قلبو وجا فوق منو...قرب ليه وتشاش ديال دما...يات كيطير على عصام الي منخرو تاهو دايز وتحت عينيه دايز واحد الحالة ناس تما شي كيهرب وشي بغا يعيط لبوليس..." : شمتك شمتك وديت ذنب شهوووور وانا مريييييض ماشي فعااااايلي اعصاااام ماشي فعايلي نشمت رج ااااال..."خنز فيه وجهد صوته بغل باغي تاهو يقول شنو ماقدرش يقوووول" جيييييييييت ما مرة ما جوج اولد نااااس وبنت الناس ماخلاااتنييييش...."كيهبط ليه عند وجهو وكشاكشو خارجة كاع داكشي الي ماقدرش يقولو خرج ليه مسرسب فحال شي واحد كانو سادين ليه على الهضرة وحابسينها فيه" السباب ديال الله الي مخلانيييش جيت نهار اللول...ماعمري كان فنيتي نغدر حتى كتبها عليا الله...مااااااعمر كان فنيتي نضحك عليكم...جهد جهد الله والمكتااب كون كنت ولد القحبة القواااااااااد كون ماعطيتش وقت ليها ونعلمها بشنو وااااقع...كون كملت وضحكت عليكم "هبط ليه عند ودنييييه باش يسمع غا هو كيهضر وينهههههجججج" كون تزوجت بيها و رسلتها من ليلتها وهاديك هي شمتة....ولاد ناس وكتاف رجاا اال ماكيتشمتوووووش والى شمتو كيقت-.لوووووووووووو....

عصام"غوت بحر جهدو" : هاااااععععععع "هز عينيه فالجنوي مد ايديه ليه هزو حتى بان ليه تقبس لهيييييه هز عينيه وخنزر فيه" ينعل زبوووور مك اولد القحبة....هااااااعععععع....

صطوف : بغيتي تقتل !! تما فين غاتشمت بغيتي ضحك فيك العباد الزا*** "شاف فزين الدين" سااااخف ليا ولد القحبة...

زين الدين"صدمو مافهموش علاش قاليه هكاك فهاد اللحضة عصام استغل الفرصة وهز ركبتو عطااااها ليه لكرش تا تدفع لهييييه وطااار عليه جا فوقو وبقا يعطيه يعطيييييه بغا صطوف يمشي ليهم حتى شداتو ايد وجراتو..."

صطوف : اش كاااين...

علي : خليهم يفكو الزمر اللهم هاكا ولا يبقاو شي محلف على شي...

صطوف : را الملاوي عينو فالجنوي دابا يشلض ليه مصارنو هنا...فين غانصدقو ؟....

علي : الجنوي جابو زين الدين وجنوي تما غايبقى...

صطوف مافهم فيه والو كيبغي يمشي وكيجرو علي والحاج علال الي جا تاهو شاف القضية وشرحو ليه...بقى عصام يقبس ويضرب فزين الدين والاخير مامحركش...

جاو شي زوج كيجرييييو وقفو لقاو دنيا مشلضة والناس مجوقة وعباد الله تغاوت وكاين الي بالخلعة سد حانوتو...تا وقفو على ناس...

هو. : با عزوز اش واقع ؟!

عزوز : شي واحد جا هجم على عصام الگزار...شوف على حالة دار ليه...

هو : عصام الگزار !! "مشى كيحك فشناتف لحيتو وقرب لصاحبو" الگزار الي ضربك هو وداك القرع فاش مشينا لكوميسارية وتحلفتي عليه هو الي كايضارب ا اولد رويزة"

رويزة : حلف بالله...هي اش ؟

هو : هي لا لقيتي الهوتة دير شرع ايديك...هنا فين كيكونو الهوتات...

نزلات من البيت ووجها تقريبا عادي كاتحاول تنسى انه غايغيب عليها مدة طويلة وكتحاول تاخذها تحدي بينها وبين راسها انها تعول على راسها فغيابو وخصوصا الى كانو الغيابات طويلة....نزلات من بعد ما صلات الضهر...جامعة شعرها ومنخرها حمرررر...دخلات الكوزينة لقات خديجة كطل على الطاجين بالبصلة والزبيب واللحم...

فرح"نطقات بصوت مخنوق" : نعاونك فشلاضة ؟!

خديجة"شافت فيها" : درتها بنيتي...مالكي كنتي تبكي "حيث لاحضت منخرها حمر"

فرح"ضحكات" : لا ههههه اويلي على نبكي...يمكن ضربني البرد"جبدات كلينيكس كتمسح منخرها تا بدات تكحب" كحكح...عاود عطاني البرد تاني...

خديجة : تغذاي واجي نعطيك الحليب وهولص ومعيلقة العسل الحر غايفوتك ان شاء الله...

فرح : واخا..."ضارت جيهة الباب" ضحى فالبيت ؟

خديجة : ايه فالبيت وللا توبا خرجات هي ومراد عندها شي تحاليل خاص تخرجهم وتديخم لطبيب فالكلينيك....

فرح : اااه صافي..."خرجات من الكوزينة وتوجات لبيت التلفازة لقات ضحى شادة تيليفونها كتصفح فيه وحاطة رجلها فوق البوفة الي صايبات ليها..." ضحى غير وحدك...

ضحى"شافت فيها وتبسمات" : هانتي جيتي هههه

فرح"كحبت" : كحكح كنت الفوق صليت ومتنت حوايجي ضربني البرد...

ضحى : اااه..وشربي شي دوا...

فرح : حتى نتغذاو باش مضرنيش المعدة...احم.."تنهدات وسكتت مالقات ماتقول"

ضحى"هزات فيها عينيها..حطات تيليفون وقربات ليها" : مقلقة على زين الدين !!؟

فرح"شافت فيها" : احم..ماعرفتش علاش حاسة بهاد السفر ماشي تال لهيه...

ضحى : ماعرفتش ولكن خاصك تولفي حيث هاكا هو داير كيكون معاك اليوم حتى كيسافر من بعد ساعة...ماعمرو جلس سيمانة مقادة ديما مسافر وفاش مشى لدبي هي فين بقى بزاااف مدة طويلة...والمحلات كان غير باب"حبسات الهضرة" كان مكلف الي يقابلهم ليه...كان مراد كيمشي عندو بزاف يعطيه تقارير حتى لنهار الي بدا المشروع ديال الكلينيك عاد ولا كيجي ويمشي يجي يومين ويغبر سيمانة وهاكا...خاصك تولفي...

فرح : عاارفة وانا ما گلت والو وخا خاطري ممرتاحش يمكن حيث غايغيب بزااف...

ضحى"ضحكت" : ههههه توحشتيه ههههههه

فرح"شافت فيها وحدرت عينيها تزنگت" : هههههه احم شوية...

ضحى : هههه لا باينة شوية خاص يجي مراد ويقولينا واش شوية ههههههه هههههههههههههههههههههههه...

فرح : هههههه مالك ؟!

ضحى : ههههههه ماعرفتش ولكن حيث تاواحد فينا مكان كيقول توحشنا زين الدين حيث مكنعرفوش امتى كيجي كيصدمنا...كنقولو معرفنا مالو غبر ما هضرش حتى كانلقاوه الفوق دييييييييييما مراد مخرجها منو خلعة كيكون سالت من الخدمة كيلقاه فالبيت عهههههه تا مابقاش كيقدر يسلت ههههه

فرح : هو هاكا داير...حتى فاش كنت فالدا"خرجات عينيها حست بالنمل سرح ليها فوجهها وذاتها وقلبها بغى يسكت حتى حست بالسخفة ووجهها هرب من اللون الشي الي لاحضاتو ضحى وجمعت الضحكة...كانت غاتقول دارنا لهيه وماعرفاتش تا اش وقع ليها وحبسات الهضرة والنفس تقطعااات فيها...بقات تنهج تا شدات فايدين ضحى وكمشاااات عليهم"

ضحى : فرح مالك !!!؟فرح ؟؟ اويلي "غوتات" ختي توريااااااات جيبي الما عاافاك...فرح مالك اش وقع ليك...

"ناضت كتعرج كتقلب فيها وهي بمجرد ما ذكرت لهييييه القلب خفق بجهههد فحال بركتي على شي بوطونة ماخاصكش تبرك عليها...ماكملتش الكلمة ووقع ليها هادشي...ماعرفاتش تا اش وقع ليها سلك ديال ضو ضربها بين عينيها بمجرد ما قالت ديك الكلمة...المااااضي ولا ميييييت بالنسبة ليها لهاد درجة !!!؟"

جات توريا كتجري هازا كاس الما فايدها مداتو لضحى عطاتو ليها تشرب...

ضحى : شربي بشوية عليك....

فرح"شربات من الكاس ايديها كيترعدوو" : ففف فففف...

ضحى"كتحك ليها على كتفها" : شوية ؟!

فرح : ففف الحمد لله شوية..."حطات ايدها على صدرها" احم كحكح كحكح...

ضحى"جليات حداها تا تنفست" : وجهك تسقط منو الد.م...اه اه هي كان مخرجها منك زين الدين هههه...

فرح"تبسمات فوسط ازمتها" : شوية..هههه..."بغات تبدل الموضوع كيف ديما" اشنو غادي ديري ؟!

ضحى : فاش ؟!

فرح : غادي تكملي قرايتك ولا تبعي حاجة اخرى.. الى بغيتي نصيحتي مغاديش ينفعك هذاك المعهد...الى كتقراي مزيان تبعي ف الكلية احسن...ولا ديري مدارس ديال دولة...

ضحى"هبطات عينيها كتعض فشفايفها بتفكييير فشنو جرا ليها وكاااع الازمات الي مرات منهم والي قدرو يحكو وينجرو شخصيتها الي تكرفصات حتى بدات كتقاد والي حكها زمان والمشاكيل....نطقات بصوت بااااين هاز وهااااز" : مستقبلي ضاااع هنا...الى غانكمل غادي نكمل بعييييد...بعيييد على هاد البلاد...عالاقل الى خرجت من بلادي غادي نلقى الي يتفهمني "هزات فيها عينيها الي دغيا تغرغرو تقولي كان خاصها نقطة تفيض ليها الدموع وتلوح الملحة على الجرح" شكون غادي يقبل بوحدة عاشت علاقة فالحرام وكانت غاتولد بنت الحرام..."هزات كتافها ونزلو دموعها يجرييييو" وخا نخبي ونغطي الشمس بالغربال را هادي هي الحقيقة...دار الله خير ودا هاديك البنت عندو حسن ماتعقد ونتعقد حتى انا معاها "دارت ايدها على فمها حابسة البكية" اهى واخا بغييييييييتها والله تا بغيييتها....اهى...

فرح"كانت مسببة تاهي نزلو دموعها يجرييييو عنقاتها بلا ماتشعر" : وخا هكاك لقاتك بغييييتيها...كاين الي بشرع والقانون ولاااااااحهوووووم"طولتها بغصة وحزن دفيييييين"....

بقاو عطيني نعطيك حتى كل واحد فيهم استنفذ طاقتو عصام الجهد ديالو ماعياش....

جا واحد من دوك الدراري كيجريو تاهو بغا يبدا يفك من صحاب الي كيستغلو المضاربات...ولاخور مشى لمحل حيث خلاوه خاوي وبقاو حاضيين المضاربة والمقاتلة الي نايضة كاع سوق لالة زهرة تجمع عليهم....دخل ليه بالحس وحاضي لا يشوفو شي حد اما لاخور قاليك بغى يفك....

رويزة : تا لا خاي عصام لا بعدو...

صطوف"غوت عليه ومشا ليه بغا يبعدو تا ضار عصام ليييه لقاه قدامو وعطاه بزوية لكرشو جابتو مشبح حيث كي السكوليطة معضم مافيه والو غا عاطي جبهة"

عصام : تعاود تقرب ليا نشتف لمك على ريتك"تنخم تا تنخم مزيااان وجابها ليه الوجه....مارضاااااش قدام العادي والبادي وصاحبو يلاه غايدخل وهو يدور معاد ونقز سد الباب ديال المحل وجرا عليه....

زين الدين السكر بدا يلعب عليه فشلو ليه ايديه كيهز ايدو واخا هكاك حيث ماعطاش بزاف كي عطا عصام لانه خلاه يدير فيه مابغى باش عصام يخرج ماااعندو....

عصام"كينهج حوايجو كلهم تقطعو وتجرتلو وجهو مابقاش كيبان بدم...ايات عينيه تسدو...ناض بشوييييا تا دار ايدو فلارض وقفها باش يتسند وينوض...ريوگو كتنزل مخلطة بد.م..صدرو كيطلع ويهبط حتى كيخرج نفس بتشاش ديال د.م..ناض ومشى ليه لقاه تا هو ناض بزوج بيهم كيمشيو ويجيو...مشا ليه وشنقة الي بغا يشنق عليه مرخية...شدو مزياان بالكشيفة وجرو تا تقطعات القميجة الي عيات هي برااسها" : شووو فففف واااااااا بالرب المعبود ماكنت نحن فيك..

زين الدين"مقاتل مع ضبابة الي بين عينيه وكيحرك راسو بثقالة" : كان يكووووون عندك الحق"هز ايدو بشوويييية وضرب صدروو بجهد" وااااا بالرب المعبود مابغيت نضركم اكتف رجااال...والرب العالي مابغيت نشمتكم...انااا مشيييييت تال عندكم ومخلاااونييييش نهضر معاك...علااااش ؟ "كيحبط فصدرو" حيث بغيتي تقتلني...وكوووون قتلتيييييني ومنوصلو لهادشي ومااايتشتت شملكم...."جرو من الكول الي مقطع صدر عصام تا هو بان...كلشي مجلخ بد.م...بغا يشنق عليه غمضضض عينيه من حر الالم الي حس بيه فايدو...العرووقات كتكب منو..." ختتتكك اعصااام ناااقصة بلا بييييك....

بغا يكمل هضرتو وهو يبان ليه هذاك الي دفع عصام جاي هاز واااحد سيف قدااااش جاي قاصد عصام ....

هو : عصاااام *****

نسااااو را هما معامن ضاربو نهار مشى عصام يفك المشكيل ديال صطوف...كانت ناضت بيناتهم نييييت غا فكوها ولكن بقاو محلفين على صطوف واكثرية عصااام....

صطوف : عنداااااك القلاااااويييييييي عصااااام ....." مشا ليه بغا يدفعو حيث ماعرفوووهش منين جاااي اصلا اش جابو لعصااام اش بينو وبينو الي جاي ليه نيشان وعلاش بغا يفرقو...."

عصام"سمع وضار يشوفو"...

زين الدين"خرج عينيه وبالطاقة الي بقات ليه دور عصام بجهد ودورو بغا يدفعو لكن مع الاسف مع جرية هذاك مكانش الوقت باش يبعدو زين الدين....هز السيف تا لفوق ونزل عليه بشحطة منو بيه الضربة الي كانت غاتجي لعصام جات فزين الدين لضهرو فالكتف من لور...تا طااار د..مو لهيييييه..خرج عينيه واحد شوية وهو يطيح دغيااا مع السكر وضربة الحاااارة بقى شااانق على عصام فاش دورو يبعدو على هذاك الي بان ليه جاي قاصدو يضربو...."

عصام"للحضة خرج عييينييييه ماعرفش باش تبلى هز عينيه فهذاك الي ضرب الضربة وكان غادي يهرب تا نقز ليه عصام وعقلللل عليييييه من ديييك الليلة...فاش شافو مزيااان دابا عرفووو شكون هو حيث فاش دفعو كانو عينيه معمييين على زين الدين...كيشوف فيه كيتركل لصطوف وعليه دار ايديه على راااسو غوت بحر جهدو...اما عصام حس بالثقل على صدرو وحاس براسو نااازل تا حدر عينيه على اصعب مشهد ممكن يوشوفو...ضهر زين الدين كلوووو ترطب ليه بال.م والضربة هكاك بانت تا بانت ليه البيوضة...هبط زين الدين وهبط عصااام تا طاحو بزوج لارض...زين الدين مشااااا تكااا على عصام الي ماوعى وعرف اش طرا تالقى راسو شاد زين الدين فوق رجليه كيهبط عينيه ليه ويهزهم فالناس الي غوتو مافهموووووش تا اش واقع...الحركة ولات كتبان ليه ثقيييييلة والناس كتغوت بالعرض البطيييييء....اش وقع ؟؟ زين الدين نقد حياة عصام...."

علي : زز زيييين الدين"مشى كيجري ما وقف تا طاح على ركابيه عينيه خرجو مافهمش اش وقع ماثيقش ان زين الدين تضرب" زين الدييييييييييييييين و لا لا لاااااا...اش درتييييييييي فرااااااسك ااااااااش...

عصام"عينيه باقين خارجيين كيبغي يرمش وكيتبلوكا كيبغي يهضر كيحل فمو ويسدو...هبط عينيه لزين الدين الي بقى شاد ليه فالكول ديالو الي هبط مع ايديه وراسو الي فوق رجليه...ويرجع يشوف فصطوف الي لاح هذاك لرباعة شدوه تايجيو البوليس...كيبان ليه جاي بشوية كيهضر اش كيقول الله واعلم.. هبط عينيه لزين الدين الي مشاااا..." : زييين الدين !!!

"اول مرة غاينطق اسم زين الدين بعد نكرااان ديال ازيد من عام وصرف وشهور....اول مرة غايقول اسم زين الدين وبطريقة كتبين انه مامثيقش ان زين الدين تضرب فبلاصتو ...فعز المقاتلة ماشعرش براسو وبعدو لا يضربو..."

عصام "عينيه ولاو حمرييين وحجبانو كيهز راسو كيبان ليه علي كيغوت ويحرك فيه ويشوف فصطوف الي كيحرك ليه فكتافو يتوگض...جاتو فحال الصدمة وطرشة تعطاتو على مرات عديييدة...كيهبط راسو كيبان ليه زين الدين متوسد رجليه...منضر عمرهم ولا كانو غايطيحو فيه....."

منضر عمرهم ولا كانو غايطيحو فيه....بلاصة مايستوعب شنو طرا وكيوقع قدامو تصدم...ولاو كيبانو ليه ناس كيتجاراو فحال الى صوت تقطع مابقاش كيسمع كيشوف غير الحركة...وزين الدين متوسد رجليه منضر عمرو مكان يتصور يطيح فيه الشخص الي بقدر المعزة الي كانت ليه تحولات لحقد وغضب على الشمتة الي دار ليه...واحد اللحظة جاتو فحال الطرشة خلاتو يحل عينيه على جهدهم ويفييييق والصوت ديال الناس يرجع مع رجع بصوت علي كيغوت...

على. : زيييييين دييييييييييييين سمعني سمعني ماتغيبش اصحبي..."كيصرفق ليه فحناكو بشوية باش يتوگض عالاقل غا بينما تجي لومبيلونص باش يطيرو بيه"

صطوف"شاف عصام ماهواش تحنى عنو كيحرك فيه باش يهضر" : عصام مالك !! عصام توگض اصحبي...

عصام"هز فيه عينو شاف فيه واحد ثواني ورجع هبط عينو لزين الدين ومنضر ديك الشحطة الي جاتو بالسيف فضهرو الي كانت متابة جدار فاصل بينو وبين الموت بشعرة...لو ماتدخل وبعدو كان ممكن تجي فيه هو يا قاا..تلة يا بين الحياة والموت...هز ايدو كيبغي يحطها عليه ويرجع يعاود يبغي يحط ثاني ويرجع فحال خايف ولا متردد ولا ممثيقش...وصطوف حاضيه"

صطوف : عصام !!!

عصام"ماسمعوش عينيه على زين الدين كيحل عينيه على جهدهم ويرجع يغمضهم...عقلو كيتبخ يتبخ يتبخ فحال شي واحد كيعاود يرجع اش وقع ويرجع بزااااف الحوايج عاد باش يتاخذ القرار....من بعد جهد جهيييييد حط ايدو على كتفو وبدا يحرك فيه بشوية ويعيط بصوت منخفض" : زين الدين...ننوووض الحبس...وااااااااانوووووض الخرااااا نوووووض المونتيف الكحل..."كيحرك فيه بجهد ووالو فهاد اللحضة كان علي ماحداهش مشى يجري يعيط لومبيلونص بمعرفتو باش تجي دغيا تهزو...كيحرك فيه بجهد ويغوت...صطوف كيشوف فيه ولا فحال الهبيل كيغوت ويحرك فزين الدين الي كيف طاح طاح مغيب وجهو كلو مجلخ بالد.مايات وواحد العين تنفخات تا تسدت بالضرب اما حنكو خلااص هو ومنخرو الي تجلخ وتراب والغيس كلشي مخلط القميجة كلها تقطعات من قدام..."وااااانوووووض...

صطوف : عصاااام ماتحركووش را مضرووب...

عصام"هز فيه عينيه مشربن بالجهلة والهيستييريا" : وااااا ينوووووض ينووووض وماااابغييييييييتش نقتل..وووو... مابغيييييتش "كيغوت بحر جهدو" وراااااه مرييييييييض فيه سكار الحبس...وماخااااصوووووش يمووووووت ماخاصووووش يتضرب...

جهل جهل بمعنى الكلمة واحد الصورة ليهم بزوج واحد مغط ليه فوق رجليه ماجايبش الوعي مغط على رجلين الثاني الي كيغوت بهيستيييريا بكلام خااارج من القلب فلحضة خلاتو يخرج ما عندو ويغووت لربي الي خلقو لا صطوف قدر يهدنو ولا علال ولا تاحد الي قرب ليه كيدفعو ولا يضربو...

علي"جا كيجرييي تحنى على زين الدين ضار هنا وهنا" : شي حد يعطينا زيف نديروه على الضربة...دغياااااا..."رجع كيعاود يصرفق فيه بشوية باش يتوگض ووالو.." زين الدين الله يرضي عليك توگض زين الدين"هبط لوذنيه كيهضر باش يفيقو والو لا مجيب...خاطرو مرض بجهد وهو كيشوف فيه هكاك حالتو تقطع القلب وجهو مجلخ عينو منفوخة تا تسدت وتورمت...والضربة غير رجع شافها وهو يدير ايدو على فمو وعينيه ولاو حمريييين.."

عصام"ضار هنا وهنا تاحد ماجاب شنو طلب علي وهو يحيد داك التريكو الي تقطع بقى بتيشرت حيدو من عليه بسرعة بقى غير ب بيل سماطي فعز البرد والكز ماشعرش بيه دغيا لواه على الضربة"

علي"هز فيه عينيه تصدم من شنو دار كيبان ليه كينهج وحااضي مع زين الدين...تا بغا يقول شي حاجة وهو يرجع شاف فزين الدين ورجع شاف فيه وقال" : خليها تما متحركش باش ماتعفنش ليه بينما تجي لومبيلونص....

بقى جالس حداه وكيعيط بتيليفونو ويغوت عليهم...ناس مجموعة عليه شي كيشوف ويطلب سلامة والي كيقول عبر عليه وخا معارفينش سوى انه هجم عليه وصافي...وكاين الي كيواسي فحال علال وصطوف...وكاين الي تخلع وهرب...اما دوك زوج كي طلقهم صطوف بالدعقة دارو فررر طارو من تم وهربو ماعرفوهم كي دارو....

علي"غوت بلا مايشعر تاهو من فرط الاعصاب حيث كيعيط وتدعق ونسا انه عيط هز عينيه فالناس": لومبيييييبلوووونص مااا عيط ليها حد تانعيط تانعيط انااااا اش هادشي...

عصام"ماا شعرش براسو حتى هز فيهم عينيه حمريييييين وجهو كيخلع مافيه ما يتشاااف" : اش كتشوفو تما ؟؟ ااااااااش كتشوفو عليا تماااااااا....ينعل ليكم الجدوووود الحاااااااااابس..."بغى يحط عليه صطوف ايدو وضربها ليه براسو" وتقااااود من وجهي از***....

غوت بكل ما فجهدو تا مشى ليه الصوت واحد الللحظة وتشاش ديال دفالو كيطير مع العرق المخلط بكلشي...ماعاقلش على راسو اش كيقول الجهلة مخلطة بالصعرة فهاد اللحظة...عمرو مكان يحساب ليه غايجي النهار ويعيش هادشي الي كيشوف دابا.....

عصام : واااااااااهضروووو ينعل ز**** بووووكم الق**وي.... يغرق لبوكم الشقف...فالحين فالحضية اتبي....وعيطوووو ليهم الحااااااااااااااااابس....

حطو ليه ماسك الاوكسجين الانفي من بعد ما قادو ليه وجهو بجنب باش يبقى متبت افضل من ماسك الي شاد الانف والفم...مراقبين ليه دقات القلب والسكري كل شوية يعبروه ليه وهما فطريقهم لمستشفى الخاص الي وراهم علي طااايرين....

"بان ليه وجهو مزنك حمررر...حط ليه ايدو على جبهتو لقاها طااااايبة" : سخون بزاااف ؟؟؟؟؟..

عبرو ليه الحرارة بالفعل لقاوه طااايب دارو الاسعافات الاولية ضرورية بقاو مقاتلين معاه كيعبرو ليه سكر كيلقاوه مزال طايح...ضربو ليه شوكة بمقدار خفيف باش يطلعو ليه سكر شوية ريتما يوصل...مسافة طريق باقصى سرعة حتى كانو مدخلينو لكلينيك فين كانت خدامة فرح اللول فالجديدة نيشان لمستعجلات...شي شوية و علي تاهو وصل تبعهم كيجرييييي لقاهم دخلووه لمستعجلات بقا يدق عليهم حتى خرج عندو واحد الفرملي مع حل الباب الطبيب شاف علي وحيث كيعرفو عيط لفرملي باش يخليه يدخل...دخل كيجرييي شرح ليه اشنو وقع...

الطبيب : داااابا يحضر Endocrinologue دكتور مهابي (ديال الغدد الي اختصاصو ديابيت نيت)"طارو يجريييو علمو الطبيب الي نزل كيجري لحق عليهم...اول حاجة عبر ليه سكري لقاه مزال طايح...هز فيه عينيه وحرك ليه راسو...ضار جيهة علي الي بان ليه بدا كيفقد السيطرة على راسو.." سي علي كون هاني هاحنا معاه....خرج ترتاح حيث وجهك مابانش ليا هو هذاك والطونسيون يطلع ليك...

علي : لا لا غير خليوني هنا معاكم ا عبد العاطي ولدي...

عبد العاطي"ضار جيهة الطبيب لاخور وعلمهم يبداو دغيا ورجع ضار عند علي داه لهيه شوية" : استاذي راك عارف خدمتنا ونتا براسك وصيتينا الخدمة والانسانية قبل من العاطفة...الى بغيتي كلشي يدوز مزيان خلينا نديرو خدمتنا... كنخدم ومبرزط معاك وجهك كيبين الى بقيتي واقف وكتشوف غادي طيح بطونسيون...عارف الاهمية ديال زين الدين عندك وحاسبو خوك ماشي صاحيك را حنا دوزنا دي غيونيون كثيييرة هنا وشفنا طريقة هضرتكم وكيفاش نتوما قراب بزاف خلي عليك معرفتي بيكم..."حط ليه ايدو على كتفو وزير عليه" الحاج سير رتاح وكون هاني...

علي"عوج فيه راسو بترجي" : ديابيتييك اولدي راه ديابيتيك...المعاملة بحال الولد صغير الي معندو مناعة..

ع.العاطي : كتوصي فيا ؟ الحاج الله يهديك...راك جبتيه لكلينيك كلو بروفيسورات راك تعاملتي معانا...

حدر راسو بحزن وقهرة على صاحبو الي تمررررمد وعرف كيفاش تمرمد فهاد التواخير وفحياتو الى جينا ندققو...الواليدين ماتو وهو فعمر صغير بحاحة ليهم...هز راسو براسو وحاقض على ارثهم الي خلاو ليه وقرا وكبر ودمر تا وصل فين زصل دابا وملي لقى بنت الناس علامن يحط راس مالقى فيها خير تاهي...وملي لقى البنت الي ملكاتو من كلشي وبكلشي وقع الي وقع وتشابكت الخيوط وتخربقات حياتو من جديد الاستقرار بحياتو الزوجية مالقاهش...

جلس فالكراسا تما الكل واقف كيتسنى وحالة من الخوف وترقب....من بعد ازيد من ساعتين دياال الانتظار تحل باب البلوك وخرج عبد العاطي حيد البافيط وتنفس...غير شافو علي وناض بغا يجري على شوي يطيح كون ما شدو صطوف...

علي : امضرا ولدي...

ع.العاطي : Il y a une plaie tranchante dorsal de 15 cm un peu profond exactement au niveaux de muscle trapèze, elle atteint superficiellement le muscle infra épineux mais la scapula est intacte , on a suturé la plaie et on va le mettre sous surveillance de 24h parce que la fièvre attient 39.5 et jusqu'à là on va continuer notre examen , on espère que tout se passera bien demain sans aucun complication...

كان جرح عميق شوية وصل ل 15 cm على مستوى العضلة شبه منحرفة اثر شوية على العضلة شوكية ولكن الكتف مابيه والو مزيان...خيطناه ليه وغادي نخليوه تحت المراقبة 24 ساعة لان السخانة كتوصل تال 39,5 ومن هنا لداك الوقت غادي نبقاو كنفحصو فيه ونتمناو ميكونو حتى تعقيدات....

علي"صرط ريقو" : الديابيت !!

ع.العاطي : دابا مزيان ولكن غايبقى مراقب طلعناه لانعاش تما غادي يبقى حتى لغذا الى بقات الحالة مستقرة ينزل لشومبر عادية ولكن ضروري من المراقبة ديال الجرح باستمرار راك عارف هو ديابيت type 2 ممعاونش بلانسولين باش نتهناو عليه..مابغيناش الجرح يلتاهب ليه...دونك هادشي علاش غايبقى مراقب باستمرار..."طبطب عليه" الحمد لله على سلامة...

تنفس الصعداء...ارتاح الخاطر نوعا ما لكن الخوف مستمر انه فرح تعرف وخا كلشي كان مدروس وكانو عاطييين ابعد حد هو اسبوعين مكانوش كيضنو انه غاتوصل لهاد المواصل...مبدئيا مزيان انه يقدر يكون بيخير بنسبة كبيرة ومن هنا لغذا يحلها الف حلال...ماعمرنا نعطيو قرار مستقبلي فحال كي دار زين الدين مع فرح عطاو ابعد تقدير اسبوعين...وكون دابا مات ولا وقع ليه شي حاجة شنو كان غايدير ؟؟ اش غايقوليها وشنو غايتصرف الى عرفات انه عصام سبابو فهاد الحالة وهي هازة من عصام تا ماقدت لدرجة انها محاتو من حياتها بصفة نهائية...وحالتها النفسية كيفاش غاتكون واش غاتصبر ولا تدهور كثر ماهي متدهورة !!!...

يوم جديد داز...صبح الصباح ملي فاقت وهي كتسنا يدخل ويجاوبها...الشك بدا يتسلل ليها وقلبها بدا يتزير عليه...هبطات فطرات معاهم والعقل غايب كيتسنى...تسمع صوت الميساج وهي تشهق شدات على صدرها...

توبا : بسم الله عليك...

فرح"هزات تيليفون بزربة بان ليها ميساج من نمرتو ماشي واتساب...رسالة عادية"

زين الدين : فرح نسالي ونهضر معاك..ماتسنايش وديري بالك معايا...الوقت الي لقيت مسالي نهضر معاك..."هادي هي رسالتو حسات بيها ناشفة كانه ماشي زين الدين الي راسلها ليها...احساسها ربما يكون بصح ؟ "....

..بقات تقرا فالميساج وتعاود تقرا وتعاود حاسة بشي حاجة ممفهوماش شي حلقة مفقودة..حاسة بيه ماشي هو الي كاتب داك الميساج وخا نمرتو هاديك...كدخل الواتساب كاتلقاه ماداخلش وهي عارفة تيليفونو ممقطوعاش منو الكونيكسيون الا اذا كان مطفي...شافت تا عياات وباش تريح بالها صحة رسلات ليه تاهي بدورها...

فرح : هاد المرة هضر معايا مترسلش ليا ميساجات...كنتسناك ازين الدين..

"حطات تيليفون ورجعات كتهضر معاهم باش مينتابهوش وصافي اما القلب را مايعلم بيه غالله...واحد الشوية حتى صونا ليها تيليفون وهي تقفز ثاني بشهقة تا ضارو كيشوفو فبعضياتهم بسرعة جاوبت بدون ماتنتابه ل نمرة شكون معيط ليها"

فرح : زين الدين ...

فوزي : هاي هاي هاي ناس ولاو يعيطو بسميات رجالهم صافي لمك نسيتيني ابنت الكلبة...

فرح"غمضات عينيها وحطات ايدها على جبهتها" : احم فوزيي..ماشفتش نمرة"حركات ليهم راسها مستاذنة وناضت طالعة وكتهضر" حساب ليا زين الدين بقيت دايرة بالي معاه...

فوزي"صرط ريقو" : احم ااه ماهضرس معاك ؟!

فرح : لا...

فوزي : دابا يهضر معاك ماتبقايش كديري بالك افرح راني كنعرفك فاش كتهزي الهم كيبقى خاطرك مريض مكتهناي تا تسمعي صوت شي حد...

فرح"تبسمات من فوق خاطرها" : ههههه وا هادشي الي عطى الله...احم..كي بقات ليك رجلك !!

فوزي : شوية فالليل كتكرفصني بالصداع...

فرح : شرب ديفال الي قاليك زين الدين...

فوزي : مابقاش كينفع غانشوف كيفاش يزيدو ليا فلادوز...

فرح : شرب منو زوج حبات را لادوز ديالو نص...

فوزي : بغيت نجي عندك ومالقيتش كيفاش ندير...

فرح : غانطلب مراد يجيبك حتى زين الدين مزال مغادي يجي غايجلس 15 يوم هاهي دازت منها يومين...

فوزي : ههه وراك حاسبة ليه...وزين الدين يمكن يتعطل كثر من هك"عض لسااااانو واش داه يهضر"

فرح : كيفاش ؟؟ كيفاش غايتعطل كثر من هاكا ؟! فوزي اش كتگول ؟؟

فوزي : وتي غا ضحكنا معاك بغيت غانشوف اش غاديري لا گلتها ليك هههههه"جاتو البكية" ماتديس عليا ضحكي حامض عهههه"نزلت عليه تصرفيقة لكرفادة تا غوت" اوووو...

فرح : مالك ؟؟ فوزي اش كاين ؟!

فوزي : والو غا الكيدار ديال صطوف جا يشوفني فالدار ونزل عليا بالكلابي لاخور"خرج فيه عينيه" تعاود نعاود نهز ليك طوموبيل ونقلبها فشي جبل هاد المرة...

صطوف : اححح نعل ليه جدووود هرني وقصفني...

بقات تهضر معاه مرة يصحكها مرة يخلعها...حتى كمل معاها المكالمة يمكن نقولو رتاحت شوية حيث لو كانت شي حاجة كانت توصلها يمكن هادي هي الجملة الي قنعات بيها راسها وزادتها ثقة انها تحدا راسها وماتبقاش متعلقة بيه بزااااف لواحد درجة ممكن توصل بيعا لهوس لانها كتشوف غير زين الدين فهاد الوقت ومكاين من غيرو هو الحاميها هو الي هاز عليها بزاااف ماتوصلها تاحاجة عاطها الامان المفرط الي نقولو انه ماشي فالصالح ديالها ولا فصالح نفسيتها...يمكن وصل الوقت او نقولو تعطل على باش تعتامد على راسها...قنعات راسها وبقات مقتانعة وبقاو رسائل مستمرة من نمرة زين الدين لنمرتها كتحس بيه محترم معاها فهاد رسائل وفهمات انه ماشي لخاطرو لكن باش تسمع صوته ابدا واش سمعاتوو حتى مر يوم اخر وهاهي دخلات فثلاث ايام....

فداك النهار ديال الواقعة.دنيا تفرتكات فديك اللحضة كانه ما وقع والو فقط القيل والقال الي غايبقى مستمر حتى تنسى القصة فيومين وربما تعاود معركة اخرى فهادي هي حال المناطق الشعبية ديما المطايفات والمضاربات وخا غير بالكلام النابي...لا عصام بان ليه الحس ولا صطوف دنيا فلحظة تجمعات ورجعو ناس لمحلاتهم ورجع سوق كيروج وكان شيئا لم يكن....

وصل وقت الغذا وتحط واخا معطل الي كان عبارة عن طاجين باللحم وبصلة وزبيب ما يكفي لشخصين بحكم توبا غاتعطل وتغذا برا على حسب الطبيب...حطات توريا شلايض و فريت فطبيسلات. وصوص المرافقة وحطات شبكة ديال النحاس مزينة بورود مذهبة فيها فواكه تفاح وبنان وماندالين وكاكي...حطاتها فجنب وقرعة العصير ديال ليمون وخيزو والخيار...

فرح"شافت فتوريا" : فين غاديا ؟

توريا : نتغذا انا ومي خديجة...

فرح : عيطي ليها واجيو تغذاو معانا را حنا غير بجوجات اجيو ونسونا"شافت ف ضحى" ياك ؟!

ضحى"تبسمات ماعرفات ماتقول حركات ليها راسها وصافي"

فرح : عيطي لمي خديجة واجيو...هذا را طاجين كبير على جوج الناس...

مالقات توريا ماتقول تبسمات ومشات لعند خديجة علماتها وهي تم جايا بالفرحات عليها اصلا ماعمرهم كانو كيتميزو انهم خدامات كانو غير مساعدات وصافي كيديرو خدمتهم فالدار من طياب وشقى حيث الفيلا وخا هي بتي فيلا ودايرة فحال رياض بطراز عصري كانت صغيرة شوية الي تقدهم وصافي...جلسات حدا فرح وتوريا حدا ضحى... عطات فرح الخبز ل خديجة باش تقسمو عليهم سماو الله وبداو ياكلو بالجماعة الي خلقتها فرح نساو راسهم وهما كياكلو ويهضرو...

خديجة : ههههه اييييه على زين الدين نهار كان يجي مايقولها لحد كنحي فالصباح كيبان ليا كاس القهوة مغسول ولكن ما محطوطش فبلاصتو كنعرفو جا...كنولي ندوور ونوجد الغذا بحسابو حيث كنديرو الفطور والغذا الي ياكلو كلشي حيث مكيبغيش تعزل ليه الماكلة....

ضحى : ههههه واحد المرة انا ومراد تااااليل معطل مشينا لكوزينة وهزينا فنجان حيث الفناجن كيشرب فيهم غير زين الدين فالدار هههه هبطناه من بلاكار وحطيناه حدا شبكة الي فوق لافابو ديال ماعن ههههههه ومشينا نعسنا وصباح مع الفطور لقيناها دارت بحساب زين الدين هههههههههههههههه

فرح : هههههههههه اويلي...

خديجة : ويلي ويلي وكتقوليا للا توبا را زين الدين موحاال جا لاش درتي الزبدة مذوبة مع زعتر...كنقوليها را جا را لقيت الفنجان محطوط ماشي فبلاصتو...وماشفتش مراد وضحى حابسين ضحكة...

ضحى : بقينا شي نص ساعة وحنا كنتسناوه يهبط وحنا حابسين ضحكة تا طلعات ماما دق عليه ماجاوبها حد دخلات لبيت لقاتو خاوي مجموع كيف ديما وواااخا هكاك هبطات وفيها شكوقالت را غايكون فلامارش ورجعات تاني بقينا نص ساعة اخرى وحنا نتسناو وهنا مراد مابقاش صبر تشتت بالضحك هو يضحك وانا نضحك وماما دارت ايدها على فمها مافهمت والو. وواخا هكاك كتدور وتشوف جيهة الباب لا يكون جاي وبقات تسنى تاااا تفشينا ورتاحينا عاد قلنا ليهم اش كاين ههههههههههههههههههه عمرك شفتي ماما باغا تسب وحشمت ههههه...

فرح : ههههههههههههههه...

بقاو يضحكو نسات الهم شوية ونساات راسها وراسهم تالقاو راسهم مسحو طاجين غا بالجماعة ودازو لديسير نقاوه وهما مجمعين تا رجعو القشرة ديال ماندالين والتفاح والكاكي مربعات صغيرة غا بالمعاودة والمعلومات الي كيقولو ليها على زين الدين...كيفاش عزيز عليهم ومحتارمينو ومازارعش فيهم الخوف ابدا عاطي كل واحد وقتو ودايرين مابغاو فالدار حيث معتابرها دارهم ماشي دارو عمرهم قدرو يحسو بالتمييز ولا هما ساكنين عندو لدرجة هو مسافر مستقر فدبي وهما مستقرين فدارو هادي...تجمع الغذا وهي تنوض فرح...

فرح : انا غادي نطلع لفوق نجيب تيليفوني ونجي..."وقفات وضارت جيهة خديجة" واخا ديري لينا اتاي من ايديك اخالتي كيعجبني"تبسمات"

خديجة"ناضت بالفرحات" : الله اودي هي اللولة...

فرح"شافت فضحى" : هاني جايا نشوف غير زين الدين واش عيط ليا ونهبط ندير ليك بومادا لرجلك وايدك حيث وصاني نديرها ليك اليوم..."خلاتها وطلعات نيشان لبيت مشات لتيليفون بزربة قلباتو لا يكون هضر معاها كيف وصاتو وطلباتو...بان ليها اخر ميساج كان راسلو ليها ديالو فالواتساب اوديو مشات ليه وطلقاتو تسمع صوته فيه"

زين الدين : الفرحة ديالي مابقاش ليا بزاف ونوصل ديري بحساب نوصل ونعس ويقدر نعيا ولا منساليش...الوقت الي ساليت نهضر معاك ماتبرزطيش معايا....

هادو هما كلماتو ليها ومانساش توصياتو ليها...وكانت رسلات ليه ميساج ب واخا وردب البال لراسك وعبر ديابيت....بقات كتسمع ليه وتسنى لا يتكونيكطا ليه تيليفون لكن كانت غير شرطة وحدة هي الي بقات....حطات تيليفون ومشات لدوش حكات سنانها وغسلات وجهها بصابون مرطب وغسلات ايديها وذهناتهم بكريم باش تحيد ريحة المرقة ومينشفوش ليها...هزات تيليفون ونزلات لعندهم....

عيات تكابر وتقنع راسها ووالو خاطرها ماهانيش باغي يسمع صوت زين الدين عاد تنفس...الليل كلو وهي شادة تيليفون طيبات الواتساب بتقلاب وطيبات صباعها بالميساجات وهي كتسناه يجاوب..ماحساتش براسها حتى سمعات صوت اذان الفجر باش تريح راسها وخاطرها كيف ديما مكاينش ملجأ من غير الله وذكر الله ترتاح النفس والخاطر...فوق كل العباد رب العرش العظيم جل جلاله...توضات وهزات العباية لبساتها ولبسات تقاشر فرجليها فرشات صلاية غير تما فالبيت صلات صلاتها سالات ومدات كفوفها للرحمٰن تتضرع له...

فرح : يااااااربي متوريني فيه باااس يااااربي...يااااربي حفضو ليا يااااربي...يااااربي ريح ليا خاطري وهني ليا بالي ياااربي...

بقات تدعي حتى لقات راسها كترتاح وهي كتدعي ودعائها مخلط بفضفضة...حسات بخاطرها ارتاااح وتبوريييشة سرات معاها حتى تنهدات وحسات براسها بغات تنعس...جمعات صلايتها وتخشات ففراشها...بقات تشوف وديك راحة فشكل نزلات عليها حتى ماشعراتش وغمضااات عينيها نعساااات...كانها دقيقة مرات ماشي ربعة سوايع الي نعست فيهم الغمضة الي غمضات براااحة حلاتهم على صوت الهاتف ضارت بسرعة هزات تيليفون عينيها باقين معسلين بنعاس مشافتش نمرة حساب ليها فوزي ولا شي حد اخور غير قالت الو....

زين الدين"مقاااتل مع داك صوت باش يبان عادي" : الفرحة دياالي...

فرح"جاتها البكية علاش معرفتش حسات بقلبها تهز من بلاصتو " : ز زين الدين..زين الدييين...لباس عليك مزيان "تدعقت ههه"

زين الدين : مزيااان افرحتي مزيااان نتي الي ممزيانة على مابان ليا فدوك الميساجات...

فرح ؛ جاوني ناشفين...

زين الدين"كمش عينيه كيتقاد فبلاصتو..تنهد ونطق" : نرطبوهم !! ولفتي المسخ يضهر ليا...

فرح"خرجات عينيها وجمعت فمها حابسة ضحكة" : اهيا كون تحشم خنهنهه...

زين الدين : بلاتي نجي لمك ونشوفو كون تحشم بشحال كاتقام..."سمع ضحكتها غمضت عينيه مرتاااح كانها بلسم لجروحو..." شنو كديري دابا ؟!

فرح : فيقتيني من نعاس...

زين الدين"كمش حجبانو شاف فساعة" : ممولفاش ليك تعطلي...

فرح : حيث مجانيش نعاس منعست حتى صليت الفجر...احم زين الدين...

زين الدين : كبيدة ديال ملت هاد زين الدين...توحشتيني ؟

فرح : ههههه واشوية...

زين الدين : كاااع.."حنحن وتحنحينتو لاحضات انها مبحوحة عيااان حسات بيه" مالك...

فرح ؛ علاش حاسة بصوتك ماشي تالهيه...واش عيان طاح ليك سكر تاني...

زين الدين"لقى منين يهدنها" : سي شوية...ماتبرزطيش راسك بزاف هادشي مولف بيه ومعايا الحاج...

فرح : ولكن انا دابا معاك مابقيتيش بوحدك...

زين الدين : دابا بعيد عليك هاني طاح ليا شنو غاديري ؟ مابغيتش يبقى بالك مشطون بزاف عليا صحتك وخاطرك يمرض على حاجة مولف بيها...الله يرضي عليك تا خاطري كيمرض معاك...مابغيت والو وانا بعيد من غير تهلاي ليا فراسك فاش نكون حداك تهلاي فيا...

فرح : مانبقاش نسول فيك !!

زين الدين"تنهد" : ماتبقايش مرضة خاطرك بزاف عليا...مابغيتش نشوف دمعتك...الفرحة ديالي مفرحاني وهي تمرض !!..."ريح ليها خاطرها بعدا شوية بقى كيهضر معاها حتى حس براسو مغايقدرش يزيد عيا بالهضرة...قطع معاها وحط تيليفون حداه...شد الباندة الي مفيكسين ليه بيها ايدو..وجهو صفر لحيتو فهاد ثلاث ايام بانت فيها الغوفالة شوية حيث اصلا مشذبهاش وكبرت ودابا بدات تبان الغوفالة...وجهو مسقوط منو د.م...عينو باقي مغمضة بالنفاخ والتورم زراقت...سبارادرة تحت منها على حنكو من فوق..جنب فمو تورم تاهو...وجناب منخرو مزال حمرين...حيد الغطا من عليه لابس سروال سورفيت كري سخون وقبية باش يدفى حيث البلاصة الي كاين فيها بااردة كطل على البحر فواحد من شاليهات الي تما....شد فالباندة وضار حط رجلو فلارض يلاه بغى يوقف حتى تحل الباب ودخل هاز فايديه بلاطو فيه فطور من داكشي...

زين الدين"حك شنايفو بسنانو..وضار شاف فيه"

حط البلاطو فطابلة وضار هز الساشية ديال الدوا....

-الحاج طلع لكازا عشية يكون هنا...

زين الدين : كتب عليك الله تبقى معايا راس فالراس...

"عوج راسو وهز حاجبو" : ماعمرك عطيتي لجد مي تيساع...

زين الدين : مكتابك..."هز ايدو الي مافيهاش الباندة وحطها" عض فالنفس وصبر معايا...

"هز صباو بزوج" : جوج سيمانات جلس ليا فيهم على گلبي تا طرطق ملتو وتهنى...

زين الدين"حك صدرو بايدو" : منسخاش اخاي بالرب المعبود مانسخى والي جدتي عليا بيه قابل بيه...

"جبد الدوا من ساشية هز منو واحد باكية حبة حطها فطبيسيل صغير وكب ليه كاس ديال الما هز طبسيل الي فيه فنيدة والكاس وقرب ليه هز زين الحبة رماها ففمو وتبع ليها كاس الما"

زين الدين : دنيا فااانية اش درتي يا عبدي فيها...الله يرحم من رباك ابا عصام...‏

عصام"تاهو وجهو مضروب فوق حنكو وعينو تاهي منفوخة من ليمن شي شوي ماشي بحال زين حيث ماضربوش زين بزاف"...جنب فمو تاهو مورم فايتو زين الدين غا بالجرحة والعين المورمة" : رباتني الدنيا الفانية واش ديت!!"هز ايديه لفوق" معاك اولد العبد غالسيئات وحدة تابعة لاخرى..."رجع كحز ليه بلاطو فيه قهوة زلافة بيصارة بزيت زيتون والكمون باش يدفا ومتحاهدش عليه الكحبة وتعگرو فالجرحة"...

زين الدين : بجوج بينا مافرطناش..."هز فيه الشوفة" متجي قدامي فالذنوب الي ديت..."حرك راسو بشكل خااتر" الرجى فالله....

سبحان من يبيتها في شأن ويصبحها في شأن...سبحانك يا جليل يا مغير الاحوال من اسوء حال الى احسن حال...صحيح من بعد شدة وازمة ربي فاش كيجيب تيسير وكتبدا تصلح الامور كتحس انه تدريييجيا العقد بدات كتفك حتى والى ماتفكات كلها المهم انه يتنقص عليك واحد الحمل كبييييير كيكون على ضهرك وهذا الي وقع مع زين الدين...وما اشتدت الا لتفرج والحمد لله....

شرب الدوا الي عطاه الي كيسبق الفطور على ود الجرح باش مايتعفنش ويلتاهب لان حالتو هو لازم مرااااقبة جد دقيقة بهاد الخصوص...

زين الدين"بانت ليه زلافة بيصارة بالكمون وزيت بلدية..مقيلة ديال اومليط تاهو بالكمون وزيت بلدية داكشي الي كادير فرح يمكن نسى راسو انه تعلمو منها وشنو ولفاتهم فاش كيضربهم البرد دور عليهم وتعطي فالكمون وزيت البلدية...دانون مسوس وكاس عصير الحامض بلا سكر...كاس الحليب خبز الشعير صحي..هادشي كاااااامل وهاد دورارة كلهاااا ركز هو غا فالشيء الي حس بيه ناقصو والي خلاه يهز راسو ويوجه كلامو ليه بداك الصوت المبحوح بالعيا" : القهوة سمحمد !؟

عصام : كاين بلاصتها السم...

زين الدين : قصحو بشي كافي نواغ...

عصام : لا..."شير ليه بحاجبو" كول داكشي..اسي طبيب..زعما گااالو... وسمعنا راك طبيب..مابان ليا بو طبة فيك على هاد الحساب..

زين الدين : فهامتي قلالت ابا عصام تقاداو ليا...

عصام : الماكلة فيها افادة لصحتك...شافنا الله نقابلوك على السعد والوعد الله يرحم جدودنا عليها جملة...

زين الدين"هز حجابو وصبعو شير بيه ناحية صدرو" : طبيب ومانعرف الافادة فالماكلة !!

عصام"داير صبعو ففمو هز ليه حاجبو وحطو بمعنى هانتا فهمتي"

زين الدين"هبط عينيه لماكلة ورجع شاف فيه" : مايدوزش ليا بلا كافي نواغ"حط ايدو على صدرو بترجي" خوك... يتوب عليك..

عصام"دار واحد نضرة وتمطيميطة بفمو المعنى ديال و يااايلاه اسي مع هذا..رجع شاف فيه" : ضبر لمحاينك.."ناض وتم غادي قبل مايخرج تمتم" درناااهم خوتنا وعماونا فعينينا..

زين الدين"سمعو" : رجع وعطي لملتي لعيني....

حرك راسو يمين شمال على هضرة عصام وتغلغييلة الي كيحس بيها باقي تشاشها كيضرب فيه هههه منضر ديال عصام وهو مهبط كواريه ماشي صحة وانما حنيتو وقلبو البيض الي شافو غير زين الدين وحدو هو الي لاحظ انه رغم قساوة عصام الا ان لداخل ديالو طفل قلب بيض ورجوووولة فاكفس المواقف غير الضروف الي مساعداتوش وعزة نفسو الي خلات الناس ميفهموهش...سمى الله وجا يقسم الخبر لقاه مقسووم قطع غير مباينش باش يقدر ياكل زين الدين براااحة...تفاصيل دارهم عصام وبدا زين الدين كيكتاشفهم كيخليه يلعن راسو مية مرة وقلبو يتعصر د.م على انه كان السبب بقصد وبغير قصد فشتات شمل هاد الخوت...والكل يدور فعصام ويتهلاو ففرح وينساو اهم شخص الي هو عصام...بدا كياكل عرف انه بيض بلدي الي مطيب ليه ومخليه مطايبش مزيان كيف كيبغيه...كيدار عرف ليها الله اعلم...شوية وهو يدخل هاز بلاطو فيه فنجان ديال قهوة مقطررة ريحتها وصلات لنيف زين الدين الي حس براسو صحصح فاش شمها...

زين الدين : الله.."حط ليه الفنجان ورجع جلس...شاف ليه ضربة الي حدا عينو مورمة نيت" نسالي واجي نشوف ليك ديك الجيهة ديال عينك...

عصام : لا مكاين لاش...

زين الدين : ماسولتكش ابا عصام...

عصام. : لا مايحتاجش شوي وتحيد عطيها ايامها...

زين الدين"تنهد بنفاذ صبر" : عصااااام الضربة ولابد نشوفها ونعطيك شنو دير ليها..."حرك راسو مغمض عينيه" اييه ماعليش واخا طبيب مكلخ الي فوجهك ضومين ديالي سمع هضرتي كي سامع لهضرتك يتوب عليك...

عصام : بزز منك تسمع اش كنگوليك...ماجبتكش هنا طردگ ليا المرارة الي مفرگعة خلوق...

زين الدين"جاب ليه ضحك...رجعات بيه الذاكرة ل قبل اول يوم امس فاش حل عينو من بعد مراقبة مستمرة وهما كيتسناوه يفيق.."

زين الدين"حل عينيه كيبان ليه ضو ودنيا بيضة شعا ضارب شوية...جا يتحرك تعگر وهو يتاوه بصوت مسموع...منعسينو على كرشو على قبل ضربة حاس براسو فحال الى مربوط كلو شبه مخدر ....حتى تم جاي شخص ووقف ليه عند راسو حيث ضبابة ديال النعاس مزال غالبة شي شوية كيبان ليه بعيييد شوي كيقرب شوي كيبعد حتى توضحات ليه الرؤيا..مع كيشوف بجنب...حنحن باش يقدر ينطق وقال" : ع عصااام !!!

عصام"وجهو مورم تاهو بالضرب..جامع حجبانو ونطق" : ماتحركش بزاف...

زين الدين"كيشوف فيه" : شنو وقع !؟ شنو وقع ليك ؟!

عصام"هز عينيه بانت ليه فرملية داخلة ورجع شاف فيه" : ما وقع والو...تشرشم لمك الضهر..."تبسم بغيض" هذا حال الي يخشي كرو معايا تايجيب الله تيسير...يلا برد ليا الگلب جيهتك...

هز عصام راسو وبعد خلا زين الدين مقوس حجبانو...ماعرف يضحك ولا يسد فمو ولا اش يدير...فرقاتهم الفرملية الي دخلات حركات ليهم راسها ومشات لعند زين الدين كتعبر ليه السكري و السخانة والضغط المهم المراقبة المستمرة مع اسئلة واجوبة باش تكتب تقرير كل ساعة....رجع عصام جلس بلاصتو حتى دخل علي هاز فايديه شي ساشيات ديال سناك حطهم لعصام وجلس....

علي. : ولدي عصام هذا غذا جبتو ليك تغذا راك من البارح مواكل شي حاجة...

عصام"حط ايدو على صدرو" : يتوب عليك الحاج..عذبتي راسك مكاين لاش...

علي : وايلي اولدي من بارح..راني حاضيك تانتا واخا يحساب ليك خفت وتشطنت على زين الدين..."طبطب ليه على ركبتو" كول اولدي ومولاها ربي تلقى باش توقف وتهضر...كول وسمع من خوك الكبير....

عصام"شاف فيه وحرك ليه علي راسو بمعنى سمع ليا...حشم منو ماقدرش يقوليه لا...حرك راسو..حل الساشيات لقاه جايب ليه غذا من داكشي دجاجة محمرة معاها الفريت وخبز وقرعة ديال عصير وصلاد...شاف هادشي..وضار شاف فيه" : عذبتي راسك الحااج...

علي : مكاين بو عذاب مالي اش جبت...كول كول...غذا نتجمعو جميع ونشركو الطعام عندك...اش كاين ؟ ولا مانعتبش بابك !!هههههه

عصام"تبسم بجنب" : اعوذ بالله الحاج حاشا واش تجي مني..."جهد صوته بلا مايشعر ديك الفقصة الي فيه شوية لداخل مشات لفوليم وزادت فيه عههه" باب داري ديما مفتوح لناس الخير وخا شي مرات مكاين زهر مع البشري....

زين الدين"شاف بنص عين وخا ماشايفوش حيث جالس لهيه وهو عاطي وجهو لهيه...ورجع شاف فالحايط خلاه يهضر عااااااارفو ومتاكد بالي غايهضر هاد الهضرة ويعطيهم ليه كي الصوارخ وخاصو يتقبل ويسكت ويصبر..."

علي : ههههههه كاينة عطي اولدي عطي حتى ما تگد ههههه...

عصام"تنهد مافيه مايزيد باقي عياان وماناعسش الليل كلو وهو كان كيتسنى فالانعاش فاش كان داخل ليه زين الدين...سمى الله وبدا ياكل بلا ميشعر كياكل بواحد الزربة فيه جوع وماحاسش بيه..."

الفرملية"ضارت عندهم" : عافاكم تقدرو تخرجو شوية بينما نشوف ليه الجرح...

علي : غير تيسري ابنتي وخلي ليا انانشوفو ليه..."بغاها تمشي حيث مغايبغيش زين الدين تكشف ليه بنت على ضهرو العاري ولا صدرو وهو فايق فهاد اللحظات يعني مادام موگض كيبغي تحتارم خصوصياتو وعورتو كي كيسميها وعلى حااافضو وعارفو وداكشي علاش ماتفاوتش عليه ونسى انه يوصي الطبيب"....

فرملية : ولكن ادكتور...

زين الدين"نطق بعياء" : ديييري شنو گاليك...

فرملية"حركات راسها بتفهم" : دااكوغ دكتوغ بغدادي..."حطات داكشي الي جابت استاذنات منهم وخرجات."

علي"خلا عصام كياكل وناض لعندو حيد الفيستة وحل صدافي كمايم القميجة تا طواهم" : باش نبداو معاك باااش...بالخفة وطيران الي فيك اولد الحاج...

زين الدين"الصمت"

عصام"ساس ايديه وناض كيمسح بلانجيت قرب لحدا علي" : باش بغيتي تبدا ؟!

على"هز فيه راسو ورجع هبطو لضربة" : بغيت نمحنو شوية على حسابك وليني المصيبة مريض..."رطب الفاصمة الي على جرح طوييلة ب لالكول الي بقا داخل داخل تا وصل لجرح وحس زين الدين بضو تا ساط وكمش بايديه بلا مايحسو بيه عض فالنفس...حيد ليه الفاصمة وتعرا على الجرح قلبو مزيان قلب ليه جنابو مسحو ونضفو وداواه وهادشي تحت عينين عصام الي بقى مكمش حجبااانو فديك الجرحة الي كانت قدااااش...راسو اوطوماتيكمون فكر انه كان ممكن تجي لو ما دفعوش زين الدين وعتق ليه حياتو كان هو دابا يا بين حياة والموت يا ميت لا محالة...زين الدين جاتو فالضهر منطقة ماشي صعيبة ولكن كان ممكن يموت بسبب الديابيت.. لو جات ضربة لعصام الي كان عاطي بوجهو كان ممكن تجي لصدرو ولا قلبو وهي اخطر اصابة فمناطق رطبة وحساسة...بقى كيفكر وكيفاش جا عندو وكيفاش فكر انه يدفعو ب لا شعور فكر فحياة عصام قبل كل شيء...انك تشوف شخص مكتحملوش حاقد عليه...معاتبو ولايمو وهاااااز منو بزاف اضافة الى سوء فهم وانه بقد مكانت محبتو كبيييييرة عندك يشمتك المحبة كاتدفن وكينبت فوقها الحقد الي كيكون سااااهل انه يتزرع وينبت دغيااا سهل الخصوبة وسهل الزرع وسهل الانتاج....ماعمرو ينسى ديك الصحوة الي جاتو فديك اللحظة فحال شي واحد تصفع صفعة خلات كاع الصور تبان بين عينيه كاع الحاجات الي خاصها توضيح يجيه فضول انه يوضحها...فحال شي واحد كان مغيب بالحقد ومعمي وفاااق...ماحسش براسو حتى لقى علي كمل ليه"

علي : وعتك ؟!

زين الدين"كينهج عروقاتو تكب" : ماعليش...

عصام"كمش حجبانو وبلا مايشعر مد ايدو حطها ليه على جبهتو كيقلب فيه...زين الدين فلحضة خرج عينيه ورجعهم ممثيقش شنو كيدير عصام...عصام الي دار نفس الحركة فاش طلع معاه لومبيلونص وهو صاحب السؤال يوم امس للمسعف.."

عصام" راكب هكاك كيف بقى ببيل سماطي فعز البرد هو باش طلع ليه...بان ليه وجهو مزنك حمررر...حط ليه ايدو على جبهتو لقاها طااااايبة" : سخون بزاااف ؟؟؟؟؟..

المسعف"دغيا طار لاباراي وعبر ليه الحرارة...حرك ليه راسو حيث انتابه عصام وقاسو وعرف انه سخون وقالها ليه لانهم كانو مدهيين مع جرحة وديابيت فديك اللحظة...شاف فالمسعف الي معاه" : 38,5..."شاف فعصام" كتحس بشي حاجة حتى نتا ؟!"حيث شاف وجهو كلو مجلخ بد.م ومنفوخ من جنب عينو"

عصام"هز ايديه بزوج" : لا لا مزياان مزياان...شوف هو اللول..."سكت مابقاش هضر عينيه مشاو نيشان لزين الي كان مجبد ديك تجبيدة"....

بقى واقف تا كمل ليه علي...ورجع كل واحد فيهم لبلاصتو فين جالس...ضار علي عند عصام الي بان ليه وجهو ماشي تالهيه...

علي : خاصك تمشي ترتاح شوية وجهك عيان...

عصام"حرك راسو ب لا" : ماشي مشكيل مرتاح الحاج مرتاح..

زين الدين"الصداااع كيجدب ليه فديك جرحة ومكمدها..نطق بصوت عياااان" : سير رتاح هاني هنا ماعندي فين غادي...مسااامح ليك اعصام ماتهز هم من جيهتي...

عصام"هز حاجبو". : اش بغيت بسماحتك اشريف !!!

زين الدين"حرك راسو بشكل ثقييل" : عااارف...ماعليش دير اش گلنا ليك ورتاح...انا مزيان هاد ساعة"كمش عينيه" شوي ونرجع نعس...

علي : رتاح فهاد شومبر الي هنا ماحدها خاوية..انا نهضر مع الحاج يخليها لينا الى مابغيتيش تمشي...

عصام"حرك راسو اصلا عيا وخا يكابر را عيا كلشي تخلط عليه مضاربة صدمة الصفعة شلا ماتجمع عليه وسهير...ساس ركابيه وناض كيقاد فحوايجو الي جاب ليه صطوف يوم امس باش يلبسهم(را حنا ففلاش باك)خرج من الغرفة تبعو تا علي الي كان هاز تيليفون كيدوز الخط وتابعو تا حل ليه شومبر يدخل ليها"

علي : سليمان الله يرضي على ولدي طلع لينا واحد المانطة من تم...وفطريقك علم شي وحدة من فرامليات ديال الجناح +2 شومبر رقم 16 يعطيوه دي كالمون باغ سورانگ فالسيروم..."قطع معاه هز عينيه فعصام لقاه جالس على طرف ناموسية كيحك فشعرو بتعب وعينيه فلارض فحال شي واحد باااااقي مصدوم من صفعة...حالتو ماتعجبش باينة فيه هاااز نيييت...هز كرسي وقرب لعندو جلس مقابل ليه" ماشي براكة عليك من تخمام !! لاكون لا باقي صغير بغيتي تشرف قبل الوقت !!!

عصام "تبسم باستهزاء" : شرفاااتني الوقت بلا وقت الحاج يهديك الله....

علي : حتى واحد مالقاها كيف بغاها عصام..."حدر فيه عينيه بتاكيد" هادشي كان ضرووووري يوقع بيناتكم"سرح كفوف ايدو" ماشي بهاد المواصل وليني كان خاصكم تفاهمو كان خاصو يهضر معاك ويوصل ليك وخا ماتبغيش هو باااغي ومشدد فهضرتو...

عصام"نطقها بكل برودة ماشي كيف قبل كان كيقولها مغزز" : شمتنييي الحاج...شمتني على جوج مرات...هادشي الي بغيتي تسمع !؟

علي : ماعمرو كذب فالولة...كانت ذنب على رقبتو من نهار دارها وهو مريض فضميرو تا مرض فصحتو..دارها واعتارف بيها"بغا يهضر عصام" خليني نهضر اولدي الله يجعل شي براكة سمع سمع الله يرضي عليك انا راني غا حاضر وشايف اش وقع ليه خلي عليك شنو عاش !!...كيفاش وعلاش خليه هو يكمل ليك الحكاية الحلقة المفقودة ماتخليهاش مفقودة عصام راك غاتمرض كثااااار...كمل الحقلة باش توضاح ليك الصورة وديك ساعة دير ما بغيتي...

عصام"تبسم بغيض" : وشمتة ثانية ؟!

علي : ماعمرو دار شمتة ثانية...اللولة بقصدو وثانية لا فهمتيها نتا شمتة را بغير قصدو...هادشي كنقوليك فيه ماشي حيث صاحبي وخويا صغير...كنقوليك فيه حيث كلام الحق شهدت عليه ويشهد الله وتحرم عليا داري الى كذبت عليك...امن بالله

عصام"حرك راسو بشوايا" : امنا بالله...ااامنا بالله...

علي"طبطب ليه على كتافو" : عشنا معاه بعصام كتاف رجال بتنا معاه بعصام ضلع رجال...لازم عليكم تهضرو مزال عنظو مايقوليك والى فعلا حقاني كيف كنعرفوك راك غاتعطي وشنيك عاد تحكم...الى غاترجع راسك نتا حقاني بلا ماتعطي حق راك ضالم وماشي من شيم رجولة رجال الخيالي...

عصام"كمش فيه حجبانو" : رجاال الخيالي...

علي"ضحك وناض" : علمها لينا زين الدين...بالكلام والمعنى...وتبارك الله هادشي الي شفت فيك البارح واليوم جملة ماجاتش من فراغ...

عصام"جاتو فحال اللقوة بقى شحال ساكت تا تم غادي بغا يمشي غمض عينيه وصرط ريقو ونطق معلي صوته" : امتى گاليك طبيب يخرج ؟!

علي : من هنا لغذا الى صبح لباس يخرج...نشوف ديك ساعة فين نديه تا يبرا مانعيقوش حيث عالمين الي لهيه على خمسطاش ليوم عاد نرجعو...ماعولناش على هادشي الي جرا البارح...ماعليش كتب الله...

عصام"كل فمو بغا يهضر ورجع عض شنايفو عاود بغى يهضر حتى بان ليه علي قلب دورة غادي وهو يوقفو" : صباح كونو واجدين نتحركو ل سيدي بوزيد...

علي"غادي خاشي ايديه فجيابو وهو يدور عندو" : علاش ؟

عصام : عندي واحد شاليه مقابلو ديال ماليه مرة مرة كنتحرك ليه نجلس فيه شي وقيت..."سكت ورجع هضر" اليوم يكون واجد يبقى فيه تما تايولي شوية...

علي : وايلي !؟

عصام"هز فيه حاجبو" : الي علمك رجاال الخيالي ماعلمكش علاش جاتهم الرجلة ؟؟...ماشي رجاال الخيالي الي يكونو قلال الاصل...دنيا رباتهم على الخير وحكهم زمان باش يتهلاو فالغير لقى تلقى...

علي : كنت عارف"هز فيه عصام عينيه" الي علمنا جملة "رجاال الخيالي" علمنا نتسناو عصام الحنين المزيان القلب البيض...علمنا وخا يقصاح مايفرطش...علمنا الى تعطل يعطينا ماحسن...مسالة وقت اولدي وصافي عارفك غاتعلمنا بهادشي من الي شفت وجهك كي تبدل فاش تضرب زين الدين الي حتى لفاش شفتيني كيفاش كنسواني ليه الجرحة...

عصام : كيفاش...

علي : شوفاتك كيفاش كنسواني جرحة كيقولو بالي باغي تعلم باش تبدا تسواني ليه...راني فااااايتك فالزمان"جبد زغيبات شعر لحيتو البويض" هادو مجاوش من فراغ....

هادو هما الكلمات الاخيرة الي وصل ليهم عقل عصام فاش كان كيفكر فالوقت الي كان حتى زين الدين كيتفكر وكل فاش مشى عقلو....

هز باكية الكارو وتوجه لباالكون بخطى بطيئة...مقاتل مع المشية عاصر عينيه...باش يكمي حتى لقاه واااقف وكيكمي دخاخنو طاايرة..."

عصام"سمع الحس وهو يدور تالقاه وراه جمع حجبانو" : مال راسك حجرة الحبس !!

زين الدين"عاض فشنايفو كيمشي تا لحق عليه مجاوبوش خبط باكية الكارو بايدو هز سيجارة بفمو وضار عندو زعما شعل ليا"

عصام"غمض عينيه بنفاذ صبر..هز بريكة وشعل ليه الكارو ورجع ضار كيشوف فالبحر من البالكون كايكمي...تخالط دخان سيجارتو بدخان سيجارة زين الدين...واقفين حدا بعضياتهم واحد مبليسي من ضهرو ووجهو وعينو وثاني مبليسي من وجهو...بزوج واكلينها جسديا ونفسيا...بقاو ساهييين البرد وماحاسييينش بيه علاش ؟ حيث الحرارة الي فيهم لداخل والبراكين مزاال كتغلي فيهم وشنو يطفيها من غير الفضفضة."

زين الدين"كيكمي حتى نغزاتو الجرحة بجهد وهو يتاوه" : تت

عصام"ضار شاف فيه" : مالك ؟ الجرحة ؟؟!

زين الدين"تنهد وهو يحرك راسو بالسلب" : لا ...

عصام : واشنو ؟!

زين الدين"سكت تا سكت وهو ينطق نطق بشنو بغا ينطق...نطق ماباغييييش مزال ياجل الهضرة حيث طول طول بزاااااااااف...يزاااااف كيف قالها وخرجات من فمو فيها معنى واشمن معنى" : بزااااااااف ماضرني اعصام بزااااف...

عصام"رجع شاف قدامو" : اش عندك ماتگول ؟ مكاين ما تگول الي فات فاااات.. ماباغيش نسمع باقي شي حاجة...الله يسامح.

زين الدين : الله يسامح بغيتها تكون صافية...عااارف گلتيها بقلب صافي هادشي ماشي غريب عليك...الله يسامح تگال ف صفحة بيضة بخط بيض نشوفها ونميزها...ماشي بخط بيض وسط صفحة كحلة...هاهي بيضة وبالفرحات عليا من جيهتك...واش نديرو لديك الكحولية الطاغية فالصفحة ؟ كل مرة نشوف الجملة البيضة عينيا يمشيو لصفحة الكحلة الي ضايرة بيها...هكاك تبقى محفورة...بغيتي ولا كرهتي ولابد ليك ماتسمع مني...

عصام"تنهد مغمض عينيه بنفاذ صبر...حلهم وضار عندو مغوبش مخنزر عروق نواضرو بانو" : اشمن عيب صرفت فيك حتى تلحگني لهاد المواصل...باش ضريتك حتى ضحك عليا وتشمتني...وليتي د.م سناني..."خرج فيه عينيه بغل" كرهت خليقة ملتك وملة سميتك والسيرة الي كتجي فيها كرهتها..."كيحط صبعو فجناب البالكةن فحال كيحفر فيه" وعاااودتي شمتي ملتي وحفرتييييي حفرتي....

زين الدين"ساكت كيسمع"

عصام : اش كتسنى مني القلاوي ااااش كتسنى نگول الله يبارك فعمر سيدي !!"ضحك باستهزاء" كتسنى نفرش ليك الورد !! اش كتسنى..."خبط الحديد تا تسمعت زنننن"..

زين الدين : مكانتسنى والو عصام مكنتسناش شي حاجة من خو تشمت على ختو...من بو شمتوه فبنتو..."ضار شاف فالبحر كيتقلب بالمواج هاايج" كان عندي ختي فواحد الوقت...ربيتها على ايدي مشات فعمر صغيير بزاف...ماكتابش نعيش ماعشتي ولكن حااس بشنو كنتي حاس...

عصام"ضار شاف فيه ديك شوفة ديال يا رااجل"

زين الدين : جهد فاش كيجي فوق جهدك ماعندك مادير...عارف شنو طرا نختاصر عليك ونعلمك بشنو وقع معايا..ماكنش فنيتي نضحك عليكم خرجات من فمي ديك الكلمة مكانش على بالي ندخل لدار ناس الجود والخير...مكانتش عارف الدار الي كنت داخل ليها ماعندهم علم بفعايل الشياب(الشرف يعني راجل عمة زين وبات عصام)...من جيه كتشوف فكيتيها من مصيبة ومن حيه درت مصيبة..."حدر راسو وهزو" نسوبيتكم يتشد بيها الضهر وشرف كبييير..."ضار شاف فيه" نتناسب معاكم فالكذوب ؟ ندخل لداركم فالكذوب والحسايف !! "بغا يهضر عصام" عصااااااام مابغييييييييييتش نزيد نضحك عليكم مابغييييتش ضميري مابغاش ليا نتفلا على رجال الخيالي وبنت الناس...اللهم نكون كلب الكلاب ولا نضحك على ولاد ناس ولاد الخير.. باش نكونفيرمي ليك ! لو يرجع بيا زمان وتعاودت نعاود نفس القضية علاش ؟ حيث هي هي رجال الخيالي هما رجاال الخيالي ولاد الاصل دار الخير والقلب الكبير والحنين مانصيبش نضحك عليهم مزال اللهم نوقف عند الحد ولا نزيد نضحك عليكم مزال ؟!!

عصام"الصمت"

زين الدين : شحال من مرة جيت نهضر معاك...تعطلت !! درت الخاطر اعصام درت الخاطر وقريت فيها وجه الله خافت عليك دير فيا شي عجب وتصدق مضيع راسك...سبقاتك عليها..فمها مخاطيهش كلمة عصام خويا عصام خويا...دايرة ليك حساب فوق الحساب..."ضار عندو عصام شاف فيه عينيه فعينيه قالها ليه بكل صدق وامانة" كاتموووووت على شي حاجة سميتها عصام..."عينيه ولاو حمرين" رجاايا فيك سمعني وعطيني خو جوابي وسول وعرف والى بغيتي نعطيكم تيساع"جر ليه ايدو وحطها ليه ورا كتفو ورك على جرحة تا خرج عينيه " نعسف على خاطري كثر من هادشي "على الالم ديال جرحة" وماتفرطش فبنتك...ماعمرها شمتاتك ولا فكرت تشمتك.."عاود ورك على جرحة..تا نزل العرق من جبهتو نزل بحر الالم"..سمع باقي الحكاية تفهم....وحكم...

عصام"بدون شعور غوت فحال شي واحد لاح شي حجرة كانت واحلة ليه على غفلة" : وااااااااااااااامااااااعمري فرطت فيهاااااااااا مااااعمري وماااااعمري نفرط فيهااااا"ضرب كرشو جيهة الكبدة" راها هناااااااااا هناااااا...ورااااني توحشتها"نزلات واحد دمعة كتجرييييييي" توحشتهاااا..

"تغير ليه صوته فلحضة تا صدم زين الدين...ديييك الحاجة الي كانت كاتمة ليه على صدرو...ديك الحاجة الي مخرجات لحتى وااحد لحد الساعة الي بقات مكتومة والي كيبغيو اجابتو عليها من عندو كيلقاو حيط كحل وحاجز الصد وكان شيئا لم يكن..هاهي خرجات لشخص واحد وهو العدو الصديق"...

حل الباب لقى صفاء هازة بلاطو كبير فايدها وسيمو تاهو هاز بلاطو كبير فايديه... سلمو عليه ودخلو نيشان لبيت لقاو فوزي كيلبس فالجاكيط ديالو هز فيهم عينيه لقاهم محملين تا دخل نيشان حطو داكشي فوق طابلة....

فوزي : شداكشي !!

صفاء : هذا گوتي رسلاتو ليك مي...

ع.العالي : الله يعطيهم الخير...

سيمو : وهادشي رسلاتو ليك الواليدة...شافنا الله نتسخرو على فوزي..."شاف فوزي حمر فيه" حمر حمر تما تنوض ليا تقبسني ؟ بديك الرجل المعطوبة ولا صدر الي باقي مكسح...المعاااااق...

فوزي"كان بغا ينوض ليه غا حبساتو رجلو" : سيييييمو...ينعل ديلمك...

صفاء : وصافي هنيونا..."شافت ف ع.العالي ورجعت شافت ف فوزي" : فوزي داكشي الي وصلنا من سوق لالة زهرة بصح !!

فوزي"خرج عينيه" : اش وصلكم !!

صفاء"مشات جلست حداه" : افوزي مشات مي الخضرة وربيع من تما ودازت لمحل عصام اللول گاليها الحاج مول دجاج الي حدا خوك بالي وقع شي مشكيل تما هادي تلتيام..."خرجت عينيها" ماتكوووولش ليا مع زين الدين...

فوزي : وروي ستون الهضرة مخاصش توصل ل فرح..

سيمو : مي صيفطتني نسول واش كاين عصام تجي تشوفو وبا جيلالي"بات صفاء" وصلاتو الخبار تاهو بالي ناضت صمكة بين عصام وشي حد جاب الله مكيعرفوش زين الدين...

فوزي"خرج فيهم عينيه وحط صبعو على فمو" : ماتگولو ليهم والو على زين الدين...ااه ناضت بيناتهم ورا فرقوها هو دابا فسيدي بوزيد هاني غادي عندو...

صفاء : ياك ماوقع والو !! وعلاش كاين فسيدي بوزيد...

سيمو : فوزييي را ناضت صمكة نييت الخبار وصلتني بالحرف"خرج عينيه"

فوزي"خنزر فيه وحرك ليه عينيه بمعنى را صفاء غاتعرف"

صفاء"شافت فيه وضارت عند سيمو ورجعات شافت ف فوزي" : فوزي من لاخر اش واقع !! الى وقعات شي حاجة وخفتوني نوصلها ل فرح راكم تفربلتو فمخاخكم...من نيتكم عارفيني نوصلها ليها ؟؟

فوزي : ماشي هكاك مابغينا حد يعرف وصافي القضية كيما كانت سرية احسن حيث الوضع حساس راك عارفة مابغيناهاش تعرف باش ماتهزش من عصام بزاف...

صفاء : ودااابا طيحتي ليا نقطة...اش دار عصام"بخوف"...

فوزي"شاف فعبد العالي"

ع.العالي : دير اش گلت ليك ا فوزي.."حرك ليه راسو بمعنى قوليها"

فوزي"شاف ف صفاء وهو يقوليها شنو وقع بالضبط حيث هو براسو مكانش عارف بمجية زين الدين لعند عصام حتى عاود ليه غير صطوف ديطاي كاملة...وهو كيعاود ليها وهي كتشرع فعينيها بصدمة حتى دارت ايدها على فمها" : هذا مكان وبالرب وتعاودي ليها نهارك ماطلع فيه شمش...

سيمو : تا اش غاتعاود ليها !! هادشي اش فيه مايتعاود وخا يكون عقلها فبلاصتو ماشي مفربل ماتگولو ليها...وفين هما دابا ؟

صفاء : اوييييلي الى عرفات غايتعاود كلشي من زيرو...اويلي واخا تكون حياتها عادية ميتقال ليها هادشي ا فوزي من نيتك انا نگوليها وهي فهاد الوضع !!

فوزي : المهيم را لقيتيني غادي عندهم...

صفاء : واش بجوج بيهم فسيدي بوزيد ؟!

فوزي"وقف العكاز" : بجوج بيهم مقابلو عصام هاد جوج سيمانات الي گال زين الدين ...

سيمو : مزيان يقابلو تانا نمشي نشوفهم معاك..."فرانا الهضرة وضار عند فوزي شاف ف صفاء وصفاء شافت فيه وشافو ففوزي تا شهقو بجوج" تااا شكون هادو الي بجوج !!

صفاء : شكون مع شكون"كترمش فيه"

فوزي"رمش فيها وف سيمو ورجع رمش ف ع.العالي الي جاه ضحك..ضار شاف فيهم" : اااايه مع عصام زين الدين وعصام مع بعضياتهم ف سيدي بوزييييد وعصام مقابل زين الدين...

صفاء"بالصدمة ناضت بجهد تا قفز فوزي ورجعت جلست وعاودت ناضت بجهد وهي تمشي عند سيمو شنقت عليه داتو وجابتو "

سيمو"هكاك مشنوق ضار عند فوزي" : تا كيفاش ؛!!!

صفاء"طلقات من سيمو ورجعات جلسات حدا فوزي" : حلف بالله افوزي الي فبالي صحيح !!

فوزي : بلا منحلف لا بغيتي تمشي تاكدي زيدي قدامي..

صفاء : ايييه نمشي...لا لا منمشيش"صرطات ريقها" غا خليني دوك جوج كيخلعوني حدا بعضياتهم يجيب ليا الله ينوضوها يطحنوني انا وسبمو غا خليني...

سيمو : انا نمشي معاك نشوف زين الدين...

صفاء : بما انه فرح ماعارفاش غانمشي عندها واحد اليومين نبات معاها ماحدي ماخداماش هاد يومين...

فوزي"خنزر فيها هي وسيمو" : تااااا واحد فيكم ما يعطس ليها بكلمة راها كطيييير وكتشمها فالسما....

سيمو : هههههه تسولني عليها...ياك غانعطس تعرف الخبار من الالف الى الياء...

صفاء : لا كون هاني من جيهتي...اصلا غانرد لبال لفمي بزز مني حيث هادشي را ماخاصش تعرفو...ماخاصنا صداع تاني...

فوزي : هاااني نوصيك ديري راسك ماعارفة والو بغيتي غاتمشي تباتي معاها وصافي...انا نلقى وقيت ونطلع عندها نشوفها تما..."هز عينيه فخالو" خالي يلاه نتيسرو...

صفاء : وبلاتي"ناضت عرات على البلاطو..الي كان فيه طبسيل كبيير ديال ملوي وبطبوط باقي سخووون و زلافة ديال زيتون كحل مشرمل بالتومة ربيع تحميرة وهريسة وكمون.." دي هادو ليهم مايبقاوش هنا...

فوزي : وهناء !؟

صفاء : هناء خليها عليا انا عارفة اش ندير ليها...

فوزي"ناض وقف" : سيمو هز هادشي وتبعنا...ليزازيك اعضيمة فالدجين...

الساعة السادسة مساءا...ردات البويواغ يطيب فيه الما وضارت كاتقاد فالبغرير حتى دخلات ضحى كتعرج برجلها لقاتها كتوجد فيه وهادشي ضحى عمرها ماشافتو تا كيفاش كايطيب...يمكن حتى ديك القضية ديال كسكروط فالعشية مكانتش كتعيشها لانها النهار كلو وهي غابرة حتى الليل عاد كتجي...كاتحضر فحالة وحدة فاش كيكون زين الدين الي قاطعها فيها...

ضحى : كديري بغرير ههههه

فرح"شافت فيها وتبسمات" : غا شوية...گاليا مراد غايجي وليد معاه قبيلة وگلت ندير شوية البغرير ياكلو منو فاش يجيو...

ضحى : كون عيطتي ليا نعاونك...

فرح : اش كتعرفي ديري ؟!

ضحى : كانعرف نعمر اتاي والله...

فرح"شيرات ليها براسها" : يلاه دوزي وجديه بنما درت القهوة..

حركات راسها ومشات توجد اتاي على طريقتها هي...حتى تسمع صوت تحنحينة مراد قبل مايدخل...

مراد"عند الباب" : ختي فرح ندخل انا ووليد ؟!

فرح : اويلي كتشاور...دخل...

مراد"شير لوليد براسو يتبعو ودخل" : ههههه واختي تعليمات جوجك الي خاف نجا هعههه..

فرح"تزنگت" : احم..."شافت فوليد" مرحبا بيك خويا وليد...

وليد : ترحب بيك جنة مرت خويا"شاف ف ضحى لقاها كاتعمر فالبراد وشاف داكشي الي كتصايب ماهكاكش...نغز مراد الي شاف فيه وشير ليه بحجبانو جيهة ضحى...الي شدات البراد خوات فيه الما هو اللول...دارت النعناع ورداتو يتبخ فوق طابلة"

مراد"كمش عينيه ونطق بصوت منخفض ماسمعاتهمش فرح حيث ضارت كتجبد من ثلاجة وتقاد" : واش دارت اتاي ولا عينيا غيسو...

وليد"تاهو مكمش عينيه" : لاهما عرفت..."جهد صوته" ضحى واش درتي اتاي ؟

ضحى"بكل ثقة" : لا مزال بلاتي يتبخ نعناع...

مراد"خرج عينيه" : واش اتاي الي مولف نعمر ليك انا ياك هو الي كيعمرو المغاربة ؟!

وليد : نتا راك فنااان فاتاي على شكون ينسى ايام المشروع مكان يتبنى وكنتي توجدو وتعيط لمعلمية وتجمعنا على مقراج اتاي ماشي براد...

مراد"تنهد" : ايييه اليام..."رجع كمش عينيه ف ضحى الي جابت معيلقة وبدات تحرك فالبراد"

وليد : واش خاص نعيطو لختي فرح ولا ندخل سوق كري ؟

مراد : هادي ناوية تعرس على داك نعناع...قلبي تزريط اصحبي بغينا غا قهوة ولا تبعصيص ضحى..."شوي بانت ليهم ضارت كتقلب على قرعة الزاج الي فيها اتاي...ضارت هنا وهنا وهي تحط ايدها على جنبها" هانتا هاهي غاتقوليها فين اتاي وفؤح تشهق...

ضحى : فرح فين قرعة ديال اتاي !!؟

فرح"ضارت وهي تشهق" : علاش مادرتيش اتاي فالبراد ؟!

وليد : هاهي غاتقوليها لا مزال رديت غا نعناع...

ضحى : لا مزال رديت غانعناع يتبخ عاد نزيد اتاي...

مراد : فرح غاتولي فيها خمسة كيلو بالصدمة...

فرح"خرجات عينيها" : اويلي حي كيفاش درتي نعناع يتبخ فالبراد ؟!

ضحى : را هاكا كيعمر اتاي علاش مافهمتش...

فرح"بالصدمة ضحكت" : هههههههههه اويلي ف اينا بلاد كيعمر هاكا...

وليد"بالفقصة نقز" : ف بلاد اسميتها ضحى المكلبنة...

ضحى"خنزرت فيه" : دخل سوق راسك نتاا...

فرح"مشات لبراد لقاتو كيتبخ طفات عليه وهي تهزو من بوطة" : اويلي را نعناع غايكلق مرورة اش غايبقى فيه مايتشرب !! ضحى واش متاكدة عمرك عمرتي اتاي ؟؟!

ضحى"بدات ترمش صرطات ريقها وهي ظور عند مراد الي دار راسو ساهي زعما ماكاين مانعتق فيك شافت فوليد"

وليد"حط ايدو على صدرو" : ختي انا كاع معايش معاكم كنت فدبي عايش مع زين الدين الي هو الي كان كيعمر لينا اتاي...

فرح"غا كيذكرو ليها زين الدين قلبها كيبدا يضرب توحشاتو"

ضحى"شافت ففرح وهي تحدر عينيها" : داكشي الي كنت كنشوف ماما من بعيد فاش كنا فدارك ا مراد...

مراد : وا سولي اختي سولي الشوف ما يبرد الجوف"نزل عليه وليد لراس تا هبط" ينعل والديك نتا...

فرح"تنهدات وهي تطلق الما وخوات البراد حيدات نعناع رماتو فزبل وشللات البراد...ضارت لقراعي زاج الي فيهم قهوة وقهوة كابسيل سكار طوب وسنيدة واتاي هزت القرعة ديال اتاي وهزات منها دارتو فالبراد خوات عليه شوية الما شللاتو" : هانتي حضي معايا..."عاودت خوات عليه الما ورداتو يتبخ وقبل مايكمل تبخة دارت فيه سكار حيداتو من فوق البوطة عاد دارت فيه نعناع" هاكا باش نعناع مايطلقش المرورة يطلق لينا غاا ريحتو...فهمتي...

وليد"بكثرة ما عجباتو تعميرة تحمس وهو يخبط فوق بوطاجي حيث كانو جالسين فكراسا قدام بوطاجي الي جا وسط المطبخ" : علييييكي نووور اختي دكالية...

فرح : هههههه ربي يخليك...

مراد : مرة جايا ديري اتاي ونعناع وحطيه فوق البوطة بلا ماتزيدي الما وخليه يتگلى"كيدور ايدو ريكطو فيرسو" يتشوى وحطيه لينا نقرمشوه بسنانا....العقل فرفر وراس خااااوي...والطيراااان عشرة لضص...

بقاو كيضحكو على ضحى شادين فيها...نساو الهموم السابقة حسو بواحد الجو داااافي عاائلي مع فرح حضرو لتوجاد الكسكروط العائلي بالضحك ونشاط...حتى حطات طبسيل بغرير واجد عطاتو لوليد الي داه لصالون تلاقى بتوبا عاد هابطة من فوق مشات هي وياه...عطات لمراد بلاطو فيه الكونفيتير زيت عسل فرماج الخ...وهزات هي بلاطو القهوة واتاي خلات ضحى تابعاها مخلاتهاش تهز على قبل ايدها ورجلها...

اذان المغرب واصل فكاع فيلاج سيدي بوزيد.

زين الدين"سمع صوت الاذان كياذن وهو كيتمتم بالدعاء الي حتى سالا وهو ينفض فراشو بشوي وناض وخا كيحس بوخز الجرحة بكثرة ما ورك عليها قبيلة وهو كيهضر مع عصام..وقف وخرج لطواليط جلس فيها شي نص ساعة عاد خرج موضي بالكشيفة والمقاتلة..هاز فوطة كينشف راسو ووجهو تا لقى عصام خارج من كوزينة هاز فايدو بلاطو ديال قهوة واتاي والكارو مشعول ففمو" : نصلي ونجي...

عصام"حرك راسو..حط البلاطو ورجع جاب باقي الاكل حطو وهو يحلس كيكمي ضار شاف زين الدين كيصلي جالس..بقى حاضيييه كيشوف فيه كيفاش كيصلي بخشوووع بالخاااطر..كيفاش مواضب على صلاتو بالرغم من ضربة...بقى حاضيه وحاس بشي حاجة فخاطرو ناقصة..خاس براسو ناقصاه شي حاجة باش يعدل الكفة..طفى الكارو كب لزين الدين قهوة كحلة وليه هو اتاي..وربع ايديه كيشوف حتى كمل زين بقى شوية تا ردد الباقيات صالحات وهو ينوض معافر وجا جلس فالكرسي قدام طابلة" : تقبل الله.

زين الدين : منا و"حبس الهضرة وهز حاجبو" قاصح حسن من كذاب !؟

عصام : خاصني نصلي باش تگول منا ومنك...

زين الدين : مامعطلنيش فالفهامة..."تنهد" بصح قاصح حسن من كذاب...ماغاديش نگوليك ماشي شغلي فاش الامر كيتعلق بالدين الى نصحتك من الخير ليك..الصلاة عماد الدين..انسان فحالك مزيان ولد الناس كتاف الخير وتربية الخير..فاتح بابو الكبير وصغير تحيدها من فمك وتعطيها لناس تسبقهم على راسك...انسان فحالك مايحتاجش نعد ليه مزايا ديالو لا تعد ولا تحصى يكفي نگول رجولة...شنو خاص هاد الانسان الكامل والكمال لله ؟!...خاصو الراحة والراحة فتقربك من الله عصام...شنو الي خلاني صابر هاد المدة كاملة وفايتك !! نهار كديق بيا كنمشي لله..نقرا من الذكر الحكيم نصلي صلاتي فوقتها كنحس براسي حمل محيد على كتافي...

عصام"فهادي سااكت كيسمع ليه"...

زين الدين : مانكرش شملكم الي تشتت بسبابي حمل كبييييييير جبل صعييييب تهزو نتا براسك...ذنب كبييير ."هز صبعو" شنو الي خلاني صابر الوقت كااامل وشاد الخاطر فوق الخاطر ؟...تقربي من الله...نكون كنموووت ومنفوتش صلاتي وديني عصام...شنو ديت معايا فهاد دنيا...وهاني كنحاول ندي حسنات كثر من السيئات...ماعندنا مانديرو ماحدنا عايشيين مع كحل الراس يخليوك دير ذنوب صحة...

عصام"مربع ايديه وكيسمع ليه...حرك راسو وعينيه محدورين..حتى نطق" : كحل راس كيخليك تبلى صحة...مااانگوليك والو فهادي عندك الحق براسي مراضيش على راسي مهلي صلاتي ومدهي مع البلية وكحل راس الي مغاينفعني سوا يخليني نجمع ذنوب فابور...

زين الدين : الوقت خايبة والدنيا غدااارة...غذا ولا بعدو تجي الموت شكون غايهز عليا ذنوب !! شكون غايوقف معايا فقبري ويتحاسب بلاصتي ؟ تا واحد...نفعك كحل راس ديك الوقت ؟"حرك ليه راسو ب لا"...

عصام"تنهد" : كحل الراس لحح ليا بجهد بجاااااهد"هز فيه عينيه وشاف فيه بنضرة المعنى عليك"...

زين الدين : ارا ماعندك ؟!

عصام"حك شنايفو حتى عضهم وهو كيشوووف فيه قبل ماينطق ويقول" : نهار الي تودرات وتلقات علاش معلمتونيش !! فاش كان عينك ديك الوقت !؟

زين الدين : نهار تلقات لقيتها بالصدفة.."رجعات بيه الذاكرة نهار علماتو مريم..بدا كيعاود ليه كلشي بالحرف وحيث عصام ديجا عارف انها رجعات مريضة فاش علمو بيها ع.العالي ولكن فاش كيعاود ليه زين الدين حس براسو اول مرة يعرف...كيسمع ليه وقلبو من داخل كيتعصرررر حيث زين الدين عاود وحكى الحكاية بطريقة كانه عصام وسط الحدث" تخيل كون مامشيت لتارودانت "عينيه ولاو حمرين حيث غير كيتفكر انه لو مامشاش لتارودانت وجات هي ومريم" عمرنا ماكنا نلقاوها عصااام تخيل الفكرة فراسك..كون لدابا مزال نقلبو ولا يعيا جدك بجهد..."شير لصدرو" الى عليا عمري مانمل عصام عمري مانمل وانا نقلب عليها...

عصام"حك وجهو بدعقة وتعب ماعرفش اش يقول..جبد كارو جديد من باكية وشعلو تاني يكمي.." : ماخليتش من جهدي مشي...

زين الدين"قاطعو" : مشيتي لكوميسارية من ورانا هضرتي مع الكوميسير الي خرج عندك سميتو توفيق ؟؛

عصام"حرك راسو" : باش عرفتي ؟!

زين الدين"تبسم بجنب..وشاف فباكية الكارو ديال عصام سرح ايدو تا هزها هي والبريكة جبد كارو تاهو وشعلو..جر منو تا تنغم بيه ونطق كيشوف نقطة بعيييدة". : وصيت عليك كاع البلايص الي تعرفنا مشينا ليهم ولا ممكن نمشيو ليهم يتهلاو فيك من الكوميسارية حتى ل l'hôpital فين مشينا لامورگ...

عصام"مصدوم" : علاش هادشي ؟!

زين الدين : عصام الي كنعرف يوقع الي يوقع مايفوتش ختو.."سرح ايديه" ختك غابرة ماعرفناها حية ولا ميتة.."خرج فيه عينيه كياكد ليه" عصااام اصحبي يسمع بنتو واقع ليها هادشي ومايقلبش ؟!..."حرك راسو" من حقك تصدم..ما من حقكش ضلم من بعد ما تسمع باقي الحكاية...هادشي علاش لو سمعتي مني فلول مكناش نوصلو لهاد المواصل...ونعاودها ليك ثاني....ونلومك حيث مكتسمعش وباغي تكون على حق ؟! سيي على حق حقاني والحقاني كيخليها مشروعة...

عصام"خنزر فيه بعينين حمرييين" : ونتا حقاني الي درتي بيها العقد بلا منكون ؟!"هز فيه زين عينيه وهو يخنزر فيه" فين الحق عندك ؟

زين الدين : الي علمك كاليك تحضر حيث واجب عليك بغيتي ولا كرهتي...ماشي عرض عليك...يعطيك خاطرك دخل بنت الناس تعيش معاك بلا شرع ؟ ماهي ختك ماهي بنتك..بنت عمك ومحرمة عليك...خاطيني من الهضرة عصام راك فاهم...

بقى كيهضر معاه شرح ليه حالتها من اول كيفاش كانت...عصام فاش كيهضر زين الدين كيحس براسو اول مرة باغي يسمع وماحدو كيسمع والطريقة باش كيهضر معاه زين الدين خلاتو يبغي يسمع حيث عرف كيفاش يهضر معاه ويتواصل معاه بطريقة كيفهمها عصام...يمكن طبعهم المتشابه خلا واحد الكامستري تكون بيناتهم زوينة فطريقة التواصل...عصام ماحاش براسو را عاااطي وذنيه لزين الدين...يمكن حاس برغبة انه يسمع على فرح منو هو شخصيا هو الي قادر يوصليه شنو عاشت فرح...

زين الدين : كنا دايرين الخاطر فوق خاطرنا..الوضع حساس ماشي شوية بزااااف عصام"طولها بختوورية" بزاااااف حتى ما قد...

عصام"نفخ بفمو كيسمع وخاطرو كيمرض يلاه بغى يهضر وهو يسمع صونيت الباب طفى الكارو وناض حل الباب دخل علي تبعو صطوف تبعو سيمو هاز بلاطو تبعو فوزي كيعكز" : اش جايبك نتا ؟؟

فوزي : الله ماعجاتني خاطري مانجي نشوفكم فك فك فك..

عصام : دخل دخل...

علي"مشى لزين الدين وجلس نيشان جبد لاباراي وبدا يعبر ليه"

زين الدين"كمش فيه حجبانو" : الحاح تهدن...

علي : وتگول يا ولدي تانشوف ديابيت ونشوف ليك جرحة فين وصلت...

زين الدين : يلاه اسي...

صطوف : كي بقيتي شوية ؟!

زين الدين"حرك راسو" : الحمد لله شوية شوية...

عصام : الحاج.."ضار علي شاف فيه وشير ليه لكاس القهوة كحلة الي كيشرب" على عينيك...

علي"ضار مخنزر فزين الدين" : مال جد والديك عكسي ؟!

زين الدين"خرج عينيه" : الحاااج ياك لباس ؟

علي"شربن عليه" : وعليا بليمييييين لا باقي شربتيها..اسكت مكتين بو هضرة قطعها تا تبرا شوية...زعما راك طبيب اكبير الطبة...

عصام : لا مابان ليا الحاج...

زين الدين : گلت ليك مانجيش قدامك ابا عصام...

سيمو"دار ايدو على فمو مصدووووم يا خوتي من هاد التغيييير تا نسى راسو ونطق بصوت مسموع" : يااااا سبحاااانك يااا جلييييل الي رطب هاد النفوووس...

عصام ضار هاز فيه حاجبو وفوزي نغزو اما صطوف جاتو الضحكة...

زين الدين"حدر عينيه لاباراي لقى سكر عادي تقريبا..وناض هاز تيليفون" : هاني جاي..."حركو ليه راسهم وكل جلس فكرسي كيحطو فطباسل الي جابو...اما هو مشى لبيت سد الباب وراه جلس فطرف الناموسية ودوز الخط..ماتعطلتش بزااف وجاوبت" : يبان ليا تعلمتي تجاوبي بلا مانجهل معاك...

فرح"تبسمات" : ههههه حيث مسافر بعيد عليا...

زين الدين : علاش حاس بيك موحشاني بجهد...

فرح"تنهدات بلا ماتشعر" : بزاااااف...

زين الدين : الله"عض شنايفو" وشنو ندير معاك دابا نجي ؟!

فرح : ماكرهتش..احم.."سحتت بمنخرها"..

زين الدين"جمع حجبانو" : ضربك البرد تاني ؟؟! شنو درتي فرح تاني نقصتي الحوايج ؟!

فرح : لا غير دوشت وخرجت معرية شعري ولكن دغيا درت ليه زيف..كنشرب دوا والله بلا ماتبدا تغوت...

زين الدين : فرااااااح شحاال "تحرك بجهد تا توعت وغمض عينيه حس بالضو حسكو"بففففف...فراااح شحاال من مرة وصيتك تردي البال...البرد دغيا كيشد فيك افرح..علاش مكتسمعيش الهضرة ؟!

فرح : وراه گلت البيت دافي..

زين الدين"تنهد" : كانجمع ليك تانجي ونتفاهمو...شنو كديري دابا ؟!

فرح : يلاه كلينا كسكروط جا حتى وليد مسكين وگلت ليه يبقى ياكل معانا...

زين الدين : الله اكبر...زيدي شنو مزال...

فرح : ههههه ورا مسكين جا مع مراد وكاينة خالتي توبا وانا وضحى...

زين الدين : ماعليش ماعليش.."هز راسو لسمى كيحاول ينفض عذاب الصداع الي شدو دياال جرحة ويقاوم باش يبقى مستوى صوته مزيان" نسالي شي حاجة ونهضرو...سيري ل فارماسي لتحت خوذي فيتامين c حتى هو شربيه وعاوني ب jus d'orange naturel (عصير برتقال كبيعي) باش ماتكرفصيش ب لاگغيب...فرح الله يرضي عليك ديري شنو وصيتك بالحرف ماتجهلينيش نبقى كل مرة نفكرك شنو ديري...ولبسي مزياان وخا البيت دافي لبسي مزيان وتغطاي مزيان...سمعتيني ؟

فرح : واااخا سمعتك...

زين الدين : بيناتنا واتساب ديك ساعة صوري ليا شنو كديري وشنو لابسة نتاكد لا جيت على لوغال معاك منوصلو فين..

كيهضر معاها ويوصي فيها وماحاسش بالشخص الي جا باش يعيط ليه تا لقى راسو كيسمع توصياتو لفرح وكيفاش مهتم بادق تفاصيلها وخايف عليها...نسى راسو وبقى كيسمع ليه وكل مرة حاجة كتوضح ليه...وعلاش لا خاطرو كاترتاح...وهنا نتحدث عن "عصاام"

كملت معاه المكالمة كاتضحك على هضرتو واخا الوجه را مزننننگ...خشات تيليفون فجيبها وهي تمشي لكوزينة حطات الماعن فالماشين يتغسلو وهي تدخل عليها توبا...

توبا : العشا بلا ماديري بحسابي ماعنديش الشهية نتعشى

فرح"ضارت عندها حركات راسها بانت ليها فشكل عيانة" : واش عيانة ؟!

توبا"حركات راسها بشوي" : شوية وصافي..يلاه انا طالعة لفوق نصلي المغرب ونرتاح شوية...

فرح : وخا ولكن بلاتي"كانت غاديا وهي تحبس وضارت عندها هازة حاجبها"واش فيك سخانة ؟ حيث وجهك كيبان مزنگ شوية...

توبا"كحبات" : والله ماعرفت نطلع ونعبر ابنتي...شكرا على السؤال"حركات راسها وهي دور وخرجات مخلياها كتشوف..مالقات ماتقول سدات ثلاجة وخرجات عند ضحى ومراد الي كانو كيتفرجو حيث وليد مشى..."

فرح : تبغيو گراتان لعشا ؟!

مراد : الله اش قالت...

ضحى : الله...واش نتي نعمة ولا كنحلم...

مراد : نعمة حق الرب الى نعمة على غا جا خوك زين الدين وطاح...

فرح"تزنكات تا نملو حناكها وحطات ايدها على فمها" : اويلي"ولات دور فعينينا بغات دور تمات غاديا عندهم تلفت وهي ترجع ضارت وخرجت خلات مراد خاري بالضحك"...

ضحى : حشمتيها هههههه..

مشات كتزرب لكوزينة قلبها كيضرب بجهد...حلات ثلاجة جبدات الكفتة دارتها ف زلافة زاج وبدات تبل فيها خلاتها على جنب وبدات تفكر فين مديورين المعجنات الي كيستعملو...حتى لقات بلاكار جراتو تالعندها على طولتو قلبات فالقراعي بانت ليها طاسة زاج مستطيلة فيها غطا ديال عود مستفين فيها لازانيا...جبدتها حطتها فوق بوطاجي...وجدات كلشي وخلاتو تا يقرب وقت العشا عاد تردهم...جلسات حداهم كان مراد جالس من خدمة وقرايا هاد اليومين...حتى سمعو صوت لانتيرفون...بغات تنوض فرح وهو يوقفها مراد...

مراد : فين غاديا تحلي الباب مكاين رجاال هنا.."حط تيليكوموند وناض خرج من البيت وتوجه لباب دار الكبير هز لانتيرفون بان ليه العساس واقف فالكاميرا وحداه شي جوج بنات قدر يميز صفاء حيث كيعرفها...وجاوب" اليزيد خليهم يدخلو هاديك را اخت مرات زين الدين...

صفاء"سمعاتو وهي تعنگر.."

اليزيد"حيث عساس باقي جديد" : اااه سمح ليا ماعرفتش اخاي مراد..."قطع معاه وضار عند صفاء" سمحي ليا ختي مع باقي جديد مانصيبش ندخلك تانتاكد...

صفاء : مااشي مشكيل.."حل ليهم الباب صغير ودخلو منو لقاو ضواو الجوالة مشعولين الكبار حيث فاش كيصول نص الليل وكيطفيو مالين دار ضو لداخل كيتطفاو ضواو اوطوماتيكمون وكيتشعلو اضواء زرقاء خاافتة فطوالة..."

هناء : واعاااو فين سكنات الهبيرة...

صفاء : دابا دخلي لداخل وتشووفي تبارك الله...

هناء : تستاااهل صبارة تاهي وقلبها كبير وحنين..من بعد الي داز عليها يجيها راجل بوكووص رجولة خاتر بعقلو ولباس عليه را تستاهل...الله يكمل عليها...غا هو ماعرفت واش تبغيني نجي ولا لا...

صفاء : علاش ؟

هناء : راك شتي كانت كتجنب تهضر معانا...

صفاء : لا لا مابقاتش كي كانت..ياك ديما كتسول فيك..وياك تصالحت مع فوزي .

"يلاه وصلو لباب وهو يتحل بزربة تا خرجات لعندهم كتجرييي.."

فرح : صفاااء.. هههههه"لاحت صفاء صاك وسرحات ليها ايديها عنقاتها بجهد كتفرح فاش كتجي عندها كتعمر عليها..كملات معاها وشافت فهناء لقاتها مبسمة وخايفة" هناء مابغيتيش تسلمي عليا ؟

هناء"جاتها البكية" : الله ياربي على منسلمش عليك"شرعت ايديها" اجي عندي ااااجي هبيرة بنت خالها ااااجي حبيطة..."تلاحت عليها عنقاااتها بجهد فرحااات بزاف زارتها وجاو يباتو معاها يعمرو عليها...عنقتهم بجوجات من بعد ماهزات صفاء صاكها ودخلاتهم عرفت هناء على ضحى ومراد.." ودابا غانزيد لازانيا وندير داااك المول الكبييير.

صفاء"عينيها ولاو فيهم القلوبة" : واش كنتي غاديري لازانيا ؟"حركات راسها" وااااا بنت العاااااابد واش لازانيا وكتسولي اينا مووول ؟ واااااا بنت العاااابد واسولي شحال من موووول...اويلااااااااي...

جابت ليهم الضحك...مراد حشم لقى راسو وسط البنات وهو ينوض مستاذن منهم تا يطيب العشا وتعيط ليه واحتارماتو خلاتو طلع وهي تعلم صفاء...

فرح : طلعي نتي وهناء لبيتي بدلو واجيو عندي لكوزينة...

صفاء : لا لا خلينا فبيت تحتاني بيتك اصاحبتي فيه اشياء راجلك الخاصة شدخلنا...

فرح : فالمباتة غانبات بوحدي ؟ غاتباتو حدايا...

صفاء : وديك ساعة نتي كاينة...غانمشيو غاهنا لتحت...

فرح"شافت فضحى" : اجي معايا ماتبقايش بوحدك هنا.."حركات ليها راسها وناضت كتعرج تبعتها سمات الله وبدات فالتضحيرات ديال العشا حطات تيليفونها يتشارجا حداها كتهضر مع زين الدين فواتساب خلات ليه ميساج ورجعات تكمل كتعطي لضحى تعاونها.وفنفس الوقت كتعلمها طيب...دخلو البنات وجمعتهم حداها كل اش عطاتها دير...فلحضة التيليفون صونا صونا بنمرة غير معروفة...بقى يصوني يصوني حتى مدات ايدها وهي تطلق الخط وحدها قالت الو...تسمع سكاااات ضربات القلب ارتافعااات والعرق خرج فالجبيييين...يلاه بغات تطفي حتى سمعات صوته. باغنية كان كيقولها ليها فصغرها...

عصام"بصوت مذبذب بااين هااااز بلا مايقول تعرفيه حزييين فخاطرو يطيح عليك ضيم..." : عندي خووويا عندي عصاااام دييييما معااايا حتى فالنوووم...عندي عصااام عندي خووويا ديييييما معاايا دييما حداااايا...حتى فالنوووم"مشى ليه صوته فاخر كلمة...هز صبعو ومسح عينو"....

يتبع...