قصة حمام الخلا الجزء الأول

🔱قصة حقييقية واقعية من صلب الواااقع🔱

مع شارع طويل ماكيحدو غير الشانطي من لتحث وطرام من لفوق، وسط حومة شعبية بامتياز الشراجم محلولين و وااسعين كيبانو منو غير ريوس العيالات وهوما كينشرو فالحوايج المصبنة ولا فوق السطح مادين الزرابي كتسمع خبط خبط الغبارية ناايضة نازلة كيف شتا على لرض كان طالع واحد راجل دافع كروسة النعنااع والشيبة قدامو غادي وكيرش عليها الما ويغوت بصوت عالي طالب رزقو ومعاشو من الناس اللي ناوين يتقداو منو، حتى توسط الشارع عاد وقف كيضور بالكروسة ويرش الما على النعناع خايفو يدبل، على جنبو كانو واقفين جوج طوارو دالزبل خضرين وكبااار قدامهم بنت في متوسط العمر هازة الطارو كتخوي وتسوس فيه حتى كملاات وهي تجبد كلينيكس مسحات ايديها مزيان ولاحتو عاد قربات لنعنااع تقلب وتشقلب فييه وتعزل وتخير احسن القبطااات وهو تابعها فينما مشات هي ترون وهو يقاد فنفس الوقت كيجاوب على كلامها..

_ماجبتيش اعمي عبد السلام الملقم ليوم ماموالفاش لييك

عبد السلام:هاكي خودي ليك شويبة على مزيناتها جاية من البلاااد

_والو ابا عبد السلام ماتبعني...واحد البنت عندي مفشة شي فشوش مكاين ماتحطش اتاي ففمها ايلا كان معمر بالشيبة عطيني غير شوية البروج ولا العبدي(انواع من النعناع) وايلا كان شوية فليو ماكرهتوش..

عبد السلام:هي لولة، قولي ليا ابنتي اسماء كيدايرا الحاجة ماماك و واحد السي عبد المتقي ياك كلشي لبااس

اسماء:الحمد الله يسول فيك الخييير

عبد السلام: باك كان صحبي من يامات الاستعماار كان ميدوزش اتاي مع حلقو لاماكان معمر بالشيبة اودي اليام هاهاهه سلمي علييه ابنتي هاكي(عطاها قبطة النعناع مخلطة)

اسماء عطاتو الفلوس: مبلغ اعمي عبد السلام ..بسلامة صباحك مبرووك..

هزات الطارو ومشات مع نفس الشاارع حادرة راسها وهازة بصبع ايديها جلابيتها الكحلة ايفازي عليها و صندالة خفيييفة مع صباغة غوز بيبي مزينة ضفيراتها جامعة شعرها بقراصة لور كحل كيف الليل مبين عنقها ووجها الكروي البيض كيلمع بليكخون مناسبة لبشرتها،طالعة وتميل وتضور فعينيها معمرين بالكحل الاسود وترمي سلام الله على جيرانها مبسمة فوجههم، واخا تسمع الهضرة موراها وكلمة المطلقة ديما تابعاها عاطياهم النخال ماتهز فيهم عين ماتحاديهم داخلة لسوق راسها وهازة راسها وبنتها ولكن اللي جبدها كيف لاجبد النحل من كبتو تلاح فيه كيف العقربة ماتطلقو تاتخليه يتمرغ فسمها،

دفعات باب العمارة وطلعات مع الدروج كان باين فيه عامر بالكراية لكثرة البيوت اللي فيه، كولوار طويييلة كلو مستف بالبيباان باب حدا باب محلولين وغير الخامية اللي نازلة عليهم صوت العيالات كيصبحو على بعضياتهم كان مسموع مزيان، وصوت المقارج كيطيبو وريحة تشحار اتاي عاطية من عتبة الباب

قصدات بيتها مباشرة حلاتو ودخلات لاحت السطل فلافابو وطلقات عليه الما لاحت عليه التيد وجافيل وخلاتو كيرطاب

اسماء:تسنييييم..نوضي ابنتي نوضي تفطري غيفووت عليك الحال نوضي..

ولا مجيب لكلامها، بخفة سلتات عليها الجلابة بقات بشورط وديباردو ديال ربعمية وستيين طلقات شعرها وعاودت جمعاتو وحطات الما يسخن... مشات للسطل حكااتو وفركاتو، شلاتو وحطاتو فبلاصتو سيقات لافابو ومسحات ايديها عاد جلسات على سرير تفيق فبنتها وتبووس وتحك على كرشها..

اسماء:تسنييم نوضي ابنتي نووضي غيمشي عليك الحال وتعطليني تانا نوضي الكبييدة..حبيبة ماماها مابغاتش تفطر معاياا ولا شنو..يلاه ابنتي نوضي...

على كلامها بدا كيرن تيليفوتها فوق التلفازة وهي توقف جبداتو تشوف شكون غير بان ليها المتصل طفاتو ورجعاتو لبلاصتو،فحين هي كتحارب الحياة بوحدها مضاربة مع الزمان والوقت اللي قصات عليها، محاولة تهز راسها وتهز بنتها باش ما قدرها الله صابرة على النكير والغوات ما خلات ميناجات تحك الكاوبن ما خلات قهاوي تغسل الماااعن ونهار تهرس الكاس يجريو عليها كيف الكلبة، فالوقت اللي هي كتمسح دموعها وترجع لشغلها دايرة عين ميكة كانت مها كتقلب على الراجل اللي يصون بنتها ويحميها من كلمة المطلقة اللي ديما تابعاها كل نهار صابحة على اتصالاتها تعلمها بالخطيب الجديد فحين اسماء رافضة كل الرفض تعاود الزواج بعد التجربة الفاشلة اللي عاشتها مع طليقها حلفات ماتعاود تعطي الراس لكحل الراس ولا تزوج ولا تحط ايديها فايد شي دكر اللي يتعدى على بنتها او كيف كتقول ليها "نوارة حياتي" وفعلا كانت كي شي نويويرة طلات على حياتها تفاجي همها وتنسيها فتمارتها كل ليلة تمسيها على خير وعند الصباح غير تحل فييها عينيها تقول "سعداتي بيها"

بصوت طفولي مدرجة ضارت لجيهة لاخرا كتهضر

تسنيم:المعلمة مرييضة ماغتجيش ليوم قالتليا خنيني ناعسة

اسماء:نوضي الكبيدة نوضي داك الجامع االي قريتي فيه انا اللي بنيتو ..مريضة قاليك بلحق سري انا اللي نعاود ليك على قصتي تاوليتي تنقليها وتطبقيها عليا وانوضي شوفي شنو جبت ليك من لبيسري..

بعين مغمضة ولاخرا محلولة طلات عليها تحث المخدة معمشة بزز باش كتهضر

تسنيم:حلوة دلااكريم

اسماء:هادبك تالعيد ميلادك ونشريها لييك جبت ليك حاجة اخرى

تسنيم:شنو هي ...حلوة دالكراميييل

اسماء:ايييه ههههه يلاه نوضي غسلي وجهك وحكي سنيناتك واجي تفطري يلاه اماما نوضي

بااست حنكها حتى عوجاتها ونااضت تقاد فصينية خلات تسنيم تهزات من بلاصتها كتفوه وتجبد بايدياتها صغييورين نزلات من الناموسية وخرجاات للطواليط المشروك بين الكراية كاملين فحين اسماء وجدات الصينية وعمرات البراد واقفة على الما تسناه يسخن حتى كتسمع صوت الغوااات، قلبها تفزززع وعينيها تحلوو بالخوف ما ان تفكرات بنتها خرجات وهي تلوح كلشي من ايديها وخرجات كتجري غير بشورط كتبان ليها جارتها تاهي خرجات شبه عريانة حيت كانو كاريين غير البنات والعيالات تما كيقيلو معرين من الصهد، مشات لجيهة الطواليط كانت تسنيم واقفة كترعد مزيرة وبنت جارتها واقفة عند البااب دالطواليط ساداه عليها وهي تجر تسنيم من دراعها مخلووعة كتقلب فيهاا...

اسماء:مااالكي علاش كتبكي شكون دوا معااك

تسنيم غير شادة تحتها كترعد ودموعها دايزيين: بيبيي..بيبي ماخلاتنيش ندخل

ضارت ليها اسماء مخرجة عينيها

اسماء:حيدي من تمااا نتي خليها تدخل علامن سااادة

البنية (هزات كتافها):تجي ليا ماما سروالي نلبس وغنخرج

اسماء:نتسناااو حنا مك تاتجييب ليك سرواالك خرجي حيديي يلااه

نطقات مراة موراهاا: مالكي ا اسماا اااش كاين

اسماء:شوفي اختي بنتك حبسات ليا الدرية ماتخدلش قالت ليك تاتجيبي ليها سرواال

_واصبرييي صبري نجيب ليها تلبس وتخرج مالكي اصحبتي كتسهلي فيها

اسماء:على مالها ماعندها فين تلبس من غير الطواليط ولاا شنو خرجي الله يرضي على بنتي خرجي خليها تدخل

غمزات بنتها :بقاي تماا فين غتخرج عريااانة صبري نجيب ليها ماتلبس وتخرج اويلي

شافت اسماء فتسنيم شادة فجلاليلها ولات حمرة ومعصورة مزيرة وهي تمد ايديها وجرات ديك البنت خرجاتها من طوااليط مكشكشة كتغووت

اسماء:خرجي دوووزي عند مك قالا منخرجش قتلي ليا انا بنتي باش بنتك تستر مالها باقة صغيييورة تلبسي فيها وهي قربات دير شعرة(دفعات تسنيم تدخل ودسك المراة دات بنتها ومشات) الله يخليها جووورة معااكم اللي ماتحنو فبنت قد بنتكم تفو قالوها الوجه المشرووك عمرو مايتغسل انا نصبر ليكم على حقي ولكن تضورو بساحة بنتي نخرج فييكم... بلحق بغيتو غاضد انا فييه ايلا ماصبحت كل نهار سادة عليكم هاد القرقارة رااني ق/حبة وماولدات فيا مي غالخلاا وتجي عندي شي خااانزة الركنة تحل عليا زك/ها نفرعو ليها زويينة هادي تاني تسناايني تاتلبسني ماما..مومو كّغاا مصغيراااتك البسالة دواالو

_ايوااصافي رااحنا سكتناااا

اسماء:الله يعميها لشي قمقوومة هاد صبااح نصبح عليها تاني

نطقات بنت اخرى: صافي اسماء صباح هذا اختي مكاين باس البنيات ماعارفيينش صافي

تسنيم دقات فباب الطواليط : ماما صافي صافي سالييت..

حلات عليها الباب وخرجاتها داتها لبيتها كتنكر طلعو ليها القردة فدقييقة، سدات عليها الباب وخلات تسنيم كتغسل فوجهها فوق واحد السطل وتغسل سنيناتها وهي حداها كتعمر فاتاي تاوجداتو وحطات الصينية والخبز وحلوة دبنتها طلقات تاتلفازة وجلسات مقردة قدام الطبلة وتسنيم حتى هي جلسات حداها مدات ليها حلوتها مع كاس داتاي وقطعات ليها هي طرف دالخبز دهنات فيه فرماجة بدات كتفطر حتى مدات ليها تسمينم طرف دالحلوة.

تسنيم:ماما ماعندكش نتي حلوة بحاالي هاكي دوقيها زويينة

كون تسنيم كانت فعمر بنت ناضحة وعاقلة مكانتش غتسول اسماء هاد السؤال وكانت غتعرف بلي ماعندهاش الجهد اللي تشري بيه كل نهار جوج دالحلواات بثمن اللي تقدى فيه خضرة سيمانة، تنهدااات مخرة التبسيمة من فمها بزز ..

اسماء:لا اماما فطري ليا نتي انا عندي خبزي و وماخاصنيش ناكلها حيت غضرني سنينة وتنوض ليا فيها سوسة..

تسنيم:تانا غتولي فيا سوسة..

اسماء: ممم اهاه داكشي ولكن نتي كتغسلي سنيناتك واخا كتاكلي هاد الحليوة كتحاربيها بالسينيال

تسنيم: ولكن تانتي كتغسليهم معايا

اسماء:ولكن انا كبيرة وسنيناتي حتى هوما كبار وضعاف وايلا جات ليهم السوسة غتقتلهم ليا ماشي بحالك باقين سنيناتك صحاح ولكن تاني الكبيدة واخا هكاك خاصك تنقصي من الحلاوة واعرة عليك

تسنيم:تانا غندير بحالك غدا اناكل غير فرماجة وخبييز

اسماء:ههه لا انجيب لبنتي لحلييب وكورني فليكس ولامعرفت اش كيقولو لييه ههههه

تسنيم : فليكس ههه لاواه غامبول

اسماء: ياااك ههههكضحكي عليااا لمك واخا فييك..

كملو فطورهم وتسنيم مرة مرة تسول اسماء من طبعها بنيتة نشييطة وضحوكية ومحبووبة كانت كتشبه لماماها نفس الشعر الاسود والبشرة البيضااء والعوينات كبار غير لونهم مختالف على ديال اسماء اللي كانو عندها عسلين وتسنيم خضرين كيف لون عينين باها،

لبساتها لباس المدرسة سروال دجين وتيشورت نص كم وطابلية بيضة مشطات ليها شعرها مشطية مريحة وزيناتو ليها بفيليلات (القراصات) لبسات حتى هي جلابيتها وجمعات شعرها غسلات الماعن وجمعات دنيا خلاتها كتشعل واخا كان غير بيت صغييير فيه كووينة والناموسية والتلفازة وجلسية بالمخاد والطبلة ، بيت مايكفييش حتى ليها بوحدها ولكن هذا كان جهد فلوسها وغير هاد البيت الصغير اللي قبل عليها هي وبنتها، خرجات وسدات البااب دغيا قبل ماتجي مولات الكرا تحصلها، دوزات تسنيم هي لولا للروض ماتزعزعات منو حتى شافتها دخلات مع البنات للمدرسة وهي تضور غتمشي حتى بانت ليها المعلمة داخلة للمدرسة وهي تلحق عليها كتجري..

اسماء: استااادة استااادة..

تلفتات عندها المعلمة مبسمة..

_اسمااء ..

اسماء:كيدايرا استادة لباس علييك

المعلمة:الحمدة الله ونتي بخيير لباس علييك

اسماء:هاد الساعة الحمد الله الله يبارك فييك..بغيت نسولك الله يجازيك بخير كيديرا تسنيم شوية كتحرك فالقسم ههه تانا حتى لخر دالعام عاد جاية نسول والله ماكنلقى الوقت اللي نجي فييه

المعلمة: تسنيم تبارك الله عليهاا من المميزات عندي فالقسم مشاء الله واخا اول عام ليها ولكن كنحس بيها عاطية جهدها وعندها الرغبة فالقراية ماشي متكاسلة غير هي فيها الهضرة مشاء الله ههه دودودو مكتسكتش ولكن قد فمها قد قرايتها

اسماء بفرحة :بصح ا استادة فرحتينيي....واخا انا مكملتش قرايتي وخرجت بكري بغييت بنتي تقرا وتوصل لفين بغيتها ياربي تكمل عليها وعلى وليدات المسلميين الله يجازيك بالخير ا استاادة

المعلمة:هذا واجبي ولكن ماشي غير قلت ليك هاد الهضرة يعني ترخي فيها بالعكس زيدي كثر وصيها على قرايتها وشجعيها انشاء الله مايكون غيير الخير وتسنيم مشاء الله تلميدة متابرة ومأدبة واللي قلتها ليها كتطبقها بالحرف مشاء الله عليها عقلها مفتوح وبسرعة كتحافظ على المعلومات اللي كنعطيها مكنلقاش معاها مشكل ابدا غير هي كيف قلت ليك ههه ملي تدخل للقسم وهي دودو دودو دودو دودو ولكن ماشي مشكل ملي قد فمها قد اجتهادها غير كيف قلت ليك زيدي شجعيها اكثر ماترخيش فيها غير حيت قلت ليك هاد الكلام

اسماء: لا لا والو ا استادة كوني هانية انا غير كتجي كنجلسها على طبلة تحفظ وتقرا شكراا بزاف ا استادة فرحتيني هاد الصبااح الله ينورك الله يخلي ليك ما عزييز علييك راه بنية وحيدة اللي عندي كنتمنى فيها كل خييير

استادة:مايكون غير الخير ربي عوينك ا اسماء

اسماء:الله يسااهل علييك.. خليتك على خير منعطلكش على شغلك الله يعاونك

ودعات المعلمة وتوجها لخدمتها غطير بالفرحة كون ما لرض شاداها تموت وتحيى على بنتها مضاربة معاها ومجاهدة معاها تكبرها وتقريها كيف بغاتها توصل اللي موصلاتش ليه هي، عينيها دمعو بالفرحة واحلامها فتسنيم غير مزادو كبرو كثر من لول..

واحد اللحضة كتحس بشي حركة موراها حيت كانت نازلة من المدرسة غير بوحدها والشارع خاوي مع الصبااح مكانش دواز حتى طوموليلة ما جاية، بلعات ريقها وجمعات الضحكة كتلفت بنص عين تطل شكون تابعها حتى كتبان ليها طوموبيل بيضة من نوع كليو موراها غادا بشوية غير عرفاتو شكوون وهي تضور قدامها وسرعات خطاويها بحالا كتجري هازة جلابيتها بصبيعاتها وكتزرب تزرب فالمشية وتعاود تلفت بنص عين كتلقاه مزال وراها وتزيد تاني تزرب فالمشية

مارتاحت حتى وصلات للصالون عاد تنفسات ودفعات الباب دخلاات وسداتو موراها بقات كتشوف من الزاج بانت ليها الطوموبيل مشات وهي تجلس فالكرسي كتنش على راسها سخفاانة كتنهج..

كانو جوج بنات فالصالون كيشوفو فيها مدات ليها وحدة كاس دلما شرباتو ولاخرا هازة الكراطة كتجفف فالارضية..

فاطمة الزهراء: امالكي واخا يكونو تابعينك الكلاااب المسخوطة

اسماء:والو تانتي غير جيت كنزرب راه عارفة سبت ليوم الصالون عامر خفت تكثر عليا الخدمة..حياة مزال م٠اتش(حياة الباطرونة)

فاطنة الزهراء:لا مزاال

حركات راسها ومشات كتسارا فالصالون كانت بنت عامرة شوية بكسوة سماطي قصيرة طالقة شعرها قصير شهب بليميش فحين البنت التانية رقييقة وقصيورية كتبان فيها مادية وقويفزة ماشي ساهلة..

هند:هزي رجليك هزي(هزاتهم اسماء وهي تدوز الجفاف تحتها) جات عندك واحد البنت كتسول عليك باغة تصاوب ضفارها ولا مانعرف قالت ليك واخدة معاك رونديفو ههه

اسماء:اينا بنت (كتفكر) ااااه غزلان وييه لبارح بليل جات عندي لقاتني خارجة قلت ليها تالصباح ورجعي..

هند:ايوا اختي ملي وليتي تاخدي رونديفوات تاحنا ناخدوهم ونقسمو الكليان اش بان لييك

اسماء:قسمييهم شكون حبسك انا راه اللي جات كنصاوب ليه مكنعزلش هادي من هااديك

فاطمة الزهراء: وا كل كليانة وعندمن كترتااح مهم ماكيفوتوش الصالون

هند كتجر بالكراطة وتخبط :حياة مغيعجبهاش هادشي ايلا كانت الكليانة تجي وتسول على اسما من لباب كاينة ولا مكاينااش تمشي حنى غير نجلسو نتشمشو ولا نشدو ليهم رونديفوات معاها..

وقفات اسمااء كتحيد فجلابيتها داخلة لداخل وكتهضر

اسماء:تانتي خدمي بحاالي وقادي ليهم بنيتك باش مايفوتوكش ويوليو يسولو علييك وعيب العيوب ايلا قلنا علاش (طلات عليها) مول نية احبي ديما كيربح وانا غادا غير بنيتي مانأدب ما نحادي الله ينجينا من شر الخلق(دخلات لداخل)

هند بفقصة بغات تبعها :سمعتي هاد خيتنا ااش كتقول

فاطمة الزهراء : وصافي تانتي عارفة لسانها قاطع بعدي منها تجي حياة وضبر راسها معاها ملي تلقا الكليان كلو واقف يتسنى فيها غير هي تصاوب ليهم را غتضور فيها وتقوليها قسمي معاهم الخدمة نتي غير سكتي ماتجيبش السبة علييك..

كان الصالون كبير و وااسع كلو مرايات وكراسة وريحة الشعر المحروق والصبايغ والدوليو من الباب تعطي، مقسوم على جوج لداخل فيه بلاصة لاسير والغسيل وطواليط وعلى برا فين كيجلسو الكليان يسرحو شعوراتهم، بقد ما كان كبير و واسع ونقي كان شعبي بحكم المطقة اللي فيه كانت شعبية بامتياز، دقائق حتى خرجات اسماء بنفس الديباردور اللي كانت فيه فالدار هو وبيل سماطي وصندالة الصبع جمعات شعرها لفوق بقراصة وتمشات كتمايل قدامها دافعة لور وهازة صدر كتدفع فيه يزيد يخرج حابسة الضحكة كتشوف ف فاطمة الزهراء وتغمز فيها على هند اللي جامعة حجبانها مغوبشة،

خدمات الباف وطلقات فيه اغنية خليجية كتدندن معاهاا يلاه كحزات الكرسي كتقاد فيه قدام المراية حتى تحل عليهم الباب ودخلات نفس البنت غزلان ضورات عينيها فالصالون تا بانت ليها وهي تضحك..

غزلان :صباح الخير

اسماء:اهلا زيين دخلي..

دخلات غزلان كتسلم عليهم وحدة وحدة حتى سلمات على اسماء وجلسات على الكرسي قدامها كتشوف فالمراية وتهضر معاها..

اسماء : ياكما تعطلت عليك غير حطيت بنتي فالمدرسة جيت للصالون كنجري خفتك تسبقيني وماتلقاينييش ههه

هند غمزات فاطمة الزهراء على اسماء اللي كانت ماعاقلاش كاع على الكليانة حتى فكروها فيها وهي كتقول ليها جيت كنجري على قبلك فحين ان اسماء هذا هو تعاملها مع الكليان ديالها الكلام الحلو وضحيكة الخفيفة حتى كسباتهم كامليين تحث مبدأ الكليان قدامها ملك..

غزلان:ماشي مشكل تانتي مامزروباش باقي الحال..

فكات ليها شعرها كتقلب فيه

اسماء:ليميش خفييف قلتي ليا لا ..

غزلان:ااه غير خفيف عاوديه ليا من لفوق شتي بدا كيهرب ليا لور وقاديه ليا بوكلي مزال باغة نصاوب ضفاري

اسماء:ايوا مادرناش على الضفار ازين جاية عندي واحد الكليانة مع ديك العشرة يلاه نكمل ليك شعر..

غزلان:اواااه ..تئ و ماكينش حياة تصاوبهم ليا..

اسماء: ماكيناش حياة ولكن كاينة هند تقادهم لييك..هند مااعندك تا حد يااك

هند (من لداخل جاوبات) : لا

اسماء:ايوا صافي هند تقادهم لييك على حسااابي..

غزلان:صاافي سخفت ياختي مزال بلا فطور غير حليت عيني جيت للصالون تاقالت ليا هند ماكيناش ومشيت ضيبانيت فالمحلبة قولي لياا كيدايرا ديك الفنكوووشة ديال تسنييم واشحال توحشتها غتجيبيها ليووم...

غير تدكر اسم بنتها ضحكات تلقائية وهي كتسرح فشعر غزلان..

اسماء:ااه الخوينزة عاد مشيت عند معلمتها شكراتها ليا ياختي فرحت على صبااح ليوم سبت عندها غير نص نهار دابا تنزل عندي وشوفيها ههه

غزلان: تبارك الله ماتبقايش تقولي هكا يضربوها بالعين خليها تقرا على راسها انشاء الله ربي يكمل عليها وتشوفيها كيف بغيتيي

اسماء؛امييييين ياربي امييين تقرا وتخدم وتهز راسها اما شي جواج ماعندها مادير بييه

غزلان:اللهم اميين ...لبارح تلاقيت فالمارشي مع سعاد لقيتها تجري تجري سخفانة ملي سولتها قالت ليا كتقلب على كادو لتسنيم حيت عيد ميلادها قرب هههههه ياختي ديك السيدة حلوة تاتحمااق عليها انا كاع اللي عزيزة عليه تسنيم كنموت علييه هههه واخا مكنتش كنحملها كدير شي شوفات فشكل ولكن ملي كتبغي تسنييم حبييتها هههه

ردات فاطمة الزهراء مربعة فوق الكرسي كتبرد فضفارها وتهضر..

_شحال زوينة تكون عندك شي صحيبتك هكا تزوجك لخوها وتفارقي معاه ورغم دلك تبقى معاشرة معاك قلييل بحالها..

اسماء:سعاد صاحبتي من اياام زمااان ماشي غير طلقت مع خوها غتقلب عليا هاديك ديال وحدة عرفتها غير لبارح اما سعاد ختي تشاركنا طعام بكينا بجوج وضحكنا بجوج مغيجيش بوركابي يفرقنا وزايدون لا هي لا فاميلتها ماشفت منهم غير الخير خيطا داك الشماتة دخوها الله ياخد فيه الحق

غزلان:ااه حقا شحال حكمو عليييه

اسناء:حكو عليه فلووس صحييحة عطاووه غير عامين حفظ اللن طلقتو عاد تشد كون شدوه وهو معايا فالدار يجرني تانا معاه يقوليهم كانت تبيع معايا ربي كبير وصافي..

فاطمة الزهراء:الله يدير اللي فيها الخير دعيومعاه بالهداية كيبقى بابات بنتك واخا ماعرفت اشنو يكون الله يهدييه على نفسو

اسماء:يعطيني شبر د الاتسااع والله يساهل عليه انا مانبغي ليه غير الخير بشرط يبعد عليا

على كلامهم تحل الباب وتلفتو فيه كامليين غير شافوها ضحكو وهي تدخل

اسماء:الحب جاات عاد كنا جابدينك

سعاد:اش قلتو فيا انمامات

اسماء:جبدنااك غير بالخيير ههه دخلي

دخلات سعاد كتنهج سخفانة جلسات فوق الكرسي وجرات جلايل جلابتها عندها كتنش عليها حتى بانو صيقانها السمرين كنفس جسم اسمااء غير اسما بيضة وسعاد سميمرة سمورية زوينة حجبانها معليين مقاداهم على شكل طيارة كحليين مصبغيين والكحل دايز وسط عينيها والعكر مسكسفة على الحالة

سعاد:الصالون ليوم غيعمر اللي تلاقيت معاها الله يستر تقوليا نازلة عند حياة الله ياربي وليوم ناوية نعاود البروتين لشعري

هند:حياة مكتبغيش البروتين بالسبت والحد تا لتنين يكون صالون مخفف راه قالتها ليك لبارح

سعاد:مممم عارفة دويت معاهاا تالنهار تنين نمشي للحمام عاد نجي نصاوبو جيت نسرح غير شعري خارجة عشية...ايوا ازيين بخيير ديتي تسنيم للمدرسة..

اسماء:ديتها عههه ودويت مع المعلمة ديالها شكرااتها ليااا وقالت ليا من المميزات عندي فالقسم ناري شحال فرحت جيت ناشطة كنجري للصالون

سعاد:دخلت علييك بالله

اسماء:والله مانكدب علييك هههه غير هي قالت ليا فيعا الهضرو ملي تدخل للقسم وهي دودودودو

سعاد:طلعت لعمتها الخوييينزة ههههه تبارك الله الله يحفضها ليا من عينين الحساااد...ناري على لغنية كطجج نقصو شوية وياختي وشحال يعجبوكم اغاني دالحوالا شكون يتصنت لهادو

ترفعات من الكرسي مشات كتنقص من البااف واسماء خدامة على شعر البنت حتى كتجي حداها سعاد واقفة عليها كتهضر بالحس غير بيناتهم..

سعاد:دخلت دابا وهو يبان ليا مول الدعوة واقف عند الباب شفتييه..

اسماء:باقي وااقف !!

سعاد:والله ايلا كاين هه ماشفتييهش

اسماء (قندشات):شفتو وصلت تسنيم للمدرسة وهو يتبعني بالطوموبيل مريض فرااسو والله ما بعقلو داك السيد شنو غتدير معاه دابا واش نخرح نفرعن على مو فهاد الصباح اش واقف كيديير

سعاد:جلسي لرض قردي فين غتخرجي عندو عاد غتكتر عليك الهضرة...كون غير شديتي نمرة ولا عطيتيها ليه هضري معاه ما تعرفي تكوني واخدة عليه نضرة خايبة كيبان ناوي المعقول وماعرفت تاني

اسماء : الله يهديك اسعاد انا ماقلت تا تفكيييت ونزيد تاني بواحد خر انا غسلت يدي على رجال عمرها باقي تعاود الله يخلي ليا بنيتي نكبرها بحال ختي حاالفة مانجيب تعيها ولد المراة اللي يتعدى ليا عليها

سعاد:ماتعرفي يكون ولد ناس قابل عليك وعلى بنتك عطيه فرصة ماتكونيش زكيرية اصحبتي تزوجي تزوجي حيدي من طريق تاحنا نبانو هههه ياك اغزلان

ضحكات غزلان واسماء هزات حجبانها

اسماء: مال اختي بنتي كيجاتو تا يقبل عليهاا ..اجي ياكما مسيفطك تهضري معااياا

سعاد : م من نيتك

اسماء:وهي هادي اصحبتي لصقتيني كثر منو قوليه يعطيني الاتساع قبل ماندير معاه شي شوهة تااني صبح الله

فاطمة الزهراء:اسما مالكي معامن

اسماء:والو مدي ليا ديك البوني عفااك

شافتها سعاد قندشات وهي تبعد منها ومشات جلسات شادة تيليفون فايديها واسماء خدامة فشعر البنت بايديها وعقلها غايب عن الوقع هوما كيهضرو معاها وهي ماشي معاهم تفكيرها فهاد الراجل اللي طاح عليها من السماء ماعرفاتو منين جا ولا فماماها اللي تاني غتصوني عليها تعلمها بالخطاب الجداد اللي جايين فيها..ماحساتش بالوقت حتى حياة مرداتش ليها اليال ملي دخلات كليانة مورا كليانة تا ضريات الوحدة ونص جات تسنيم للصالون طلات عليهم بالضحيكة رجعات الحياة فوجه اسماء تحنات كتعنق فرحانة بيها

اسماء : كيدوزتي نهارك شنو قريتو ليوما وشنو علماتك المعلمة عاودي ليا

تسنيم : حفضاتني الارقام بالفرنسية هانتي سمعي ..ان ..دو تخواا..كاتخ...سانك ..سيس..سات..ءء (سكتات كتدكر حتى فكراتها اسماء)

اسماء:ويت

تسنيم:ااااه اااااه ..و ويت ناف اي ديييس..

اسماء:براااافووووو

رفعو ايديه البنات كاملين كيصفقو عليها وهي كتضحك وتصفق لراسها واسماء كتبوس فيها باغة تاكلها هزاتها فايديها دخلات لداخل فين كانت حياة والبنات كيتغداو..

اسماء:على هاد الحساب تستاهلي مني واحد الحلوة بحااالك نجيبها بنتي..

تحنات على لبالاكار حلاتو تهز الحلوة اللي خازنة ليها ولكن مابان ليها واالوو قلبات البلاكار كامل مالقاتها فحتى بلاصة وهي تهز عينيها فهند

اسماء:مبانتش ليكم واحد الحلوة حطيتها قبيلة هنااا..

هند شافت ف فاطنة الزهراء اللي كتضور فعينيها وحدرات راسها واسماء فهماتها

اسماء:فاتي الزمرة كليتيها تااني

فاطمة الزهراء :والله ماحبسابتني دياالك

اسماء:فالمجر حدايا يعني دياالي اصحبتيي كنقوليك مانقيصيش حاجة بنتي مالك على هاد خراا باقا مابغيتيش تفهمي

فاتي:صافي دابا نخرج نجيبها ليها والله ماسحابتني دياالك..نمشي نجيبها ليهاا داباا

تسنيم:نمشي معااها..نمشي معاها اماما عفااك

اسماء:ماتعطلوش ها الحانوث غير حدانا

تسنيم:بغيييت حلوة كبيييرة حيت حفضت ارقام بزاااف من واحد اا لعشرة

هند قرصات خدودها :تمحنتي آمسيكينة هههه

اسماء:هههه تالعيد ميلادك وندير لبنتي حلوة قدها قد السطل تبقاي تاكلي فيها سيمانة

تسنيم:طاطا هند فخبارك نهار سبت عيد ميلادي

هند:فخباااري وانا اللي غنديرك ليك احسن مشيطة فالعالم بحال ديال باربي

تسنيم:غتجيبي معاك سلطان

هند:ممم بغيتي نيجبو لييك هههه

تسنيم:ااه وحتى خالتو زهرة تجي معاكم

اسماء:يلاه هابنتي بدات تعرض من دابا الالة مرحبا بيكم كاملين نهار سبت فعيد ميلاد بنتي واخا لبيت قد الحال موحال واش يهز ليا تا خمسة دناس

حياة:وعلاش ماديريهش هنا نيت الصالون كبير و وااسع

فاطمة الزهراء :ناااري غنتفيجطو

اسماء:لا اويلي نوقفو صالون نهار السبت اللي كيكون عامر وفيه مايدار على حساب عيد ميلاد

حياة:ماشي مشكل نهار فالعام مادا ما جاب على قبل تسنيم يهون البيت عندك كي صنيديق تدخلي ليه صحابات بنتك يشوفوه راه هي مسيكينة غتحشم يشوفو صحاباتها فين عايشة يبقاو ديما يضحكو عليها بيه ديريه ليها فالصالون تعرض على كاع صحاباتها كاملاات وجيبي شي حليوة زوينة وتفتفي عليها بنفيفيخات تفرح هي وصحاباتها بهاداك النهار وصافي..

فاطمة الوهراء : ايلا عرضات عليا تانا نجيب ليها الكادو

تسنبم:ااه جي ولكن مغتاكليش ليا الحلوة

هند: طلبي الله متلكلكش نتي وصحابااتك ههه المسخوطة نقصي من داك الفانيد وليتي تخلعي دراري الصغاار براكة راك تنفختي الترمة ربيتيها اش طالبة تاني

تقرصات فاطمة الزهراء بعدات عليهاا واسماء بامتناان شافت فحياة

اسماء:ااش غنقول ليك الله يخلف علييك والله يرفحك كيف غتفرحي بنتي الله يساهل علييك

حياة:مابيناتنااش ماتقوليش هكااك..يلاه باليو دخلو تغداو خلاص وخرجو كملو انا غنمشي نتقدا شي حاجة للمحل شكون غتشد العروسة ليوم علاين توصل يلاه عيطات ليا خرجات من الحمام

اشماء:انا عندي غير شعرها والماكياج

هند:وانا ضفار ولاسير عند فاتي

حياة:لاسير باقا مدارتهااش ..مصيبة هادي محال يكفاها الوقت..غير تجي زربو عليها لايير هي لولا والماكياج ديريه قد قد مع الضفران يبقى ليها غير الشعر خففو يديكم معاها

فاتي:نمشي نشري لتسنيم شي حاجة ونجي نتغدا تانا

جرات فاتي تسنيم وخرجو حتى بدا كيصوني تيليفون اسما جبدات طلات فيه وهي تنهد وطفاتو لاحتو راجعة لخدمتها كليانة مورا كليانة ماحساتش بالوقت كيفاش داز والصالون عامر ماكتجي فين تهز راسها للساعة تا كتجلس عندها وحدة... بدا كيطييح الضلاام والصالون كيخوى والبنات مهدودااات كيف سراق الزيت كل وحدة حاطة راس فجيهة بقاو غير كليانات خفاف واقفين عليهم بزز..كملات اسماء للبنت اللي عندها خلصاتها وناضت خرجات فالحلة اللي غتحل الباب دخلات وحدة موراها كتنهج وتسنيم تسلتات بين رجليهم وخرجات مرداتش ليها اسماء البال..

_اسماا باقا هنااا ناري ياختي جيت كنجري خفتك تكوني خرجتي الله يسااهل عليك شعري عتقيني

اسماء:والوو الحبيييبة دراعي طاحو تالغدا ورجعي

_انا مزاااوكة خارجة كيتسنى فيا لاخر تعطلت عليه هانتي راه طيحتو بالبريسا غير بوكليه لياا عفااك

اسماء:والله ماعندي الدراااع اللي نهز هند صاوبي للبنت

هند قدام المراية كتعز شفارها بالماسكارا :غنخرج داابا انا راك عارفة

شافت في فاطمة الزهراء كانت خدامة على واحد البنت وهي تنهد وجرات الكرسي

اسماء:زيدي زييدي اوجه تمارو جي بكري اصحيتي العشرة عارفاني كنسالي..

جلسات البنت قدامها كتفك فشعرها واسماء ضورات عينيها فالصالون كتشوف شكون بااقي عاد انتابهات لخيال بنتها ماكاينش حداهاا تخطفاات كتسول فالبناات

اسماء:فييين تسنييم..تسنييييم...حيااة معاك تسنيييم

حياة:لا ماحدايااش

البنت :راه شفتها غير دابا خرجات للحانوت اللي حداكم

اسماء:اويلي بوحدهاااا

البنت:مابان ليا معاها حد..

لاحت اللي فايديها وجرات واحد البينوار لقاتو قدامها لباستو عليها وخرجات كتجري للزنقة عرقاانة مع الصهد دالصالون...ماعقلاتش على راسها حتى خرجات كتقلب برا والشارع كان عامر دواز ناس غاديين جايين والقهوة جنب الصالون عامرة بالرجال كيتفرجو فالكورة و واحد الشاب قدام الصالون واقف على طوموبيلتو كيكمي شافها وهو يطلق الكارو كيطلع ويهبط فيها وهي كطل على الحانوث مبانتش ليها ولات كتررعد وقلبها فلت من داخلهاا عينيها كيضورو مخلوووعة

حياة:خرجوو شوفو معاها على بنتها

هند:دابا تلاقاها فين غتمشي كلشي كيعرفها راه هي خانقاها تا الحانوث متخرجش ليه اصحبتي..

اسمااء يلاه غتدخل للصالون تعلم البناات يقلبو معاها حتى كتجي عينيها على باب طوموبيل اللي كان يابها محلول وتسنيم واقفة علييه كيبانو غير رجليها من صبرديبتها عرفاتها وهي تمشي تجري وقفاات عليه وجرات بنتها عندها

اسماء:كنقووووليك ماتفرقينيييش علاش خرجتي واااش وقفك معااه..

كان جالس شاب داخل الطوموبيل غير شافها جات وهو يوقف بسيرفييت لاكوست وكوبرا كحلة كتشعل وتضوي مع ليل شعرو ممشوط لور ولحية خفييفة ماجا فين يتكلم حتى قاطعتو

اسماء:شوووف الله يجازييك بخييير بعد مني وبعد من بنتيي عطيني تيساع بلاما نوليو فشي طاب وفشي ماطاااب

_كانت غتمش

اسماء:خليهاا تمشي اسيدي ماتقيصهاش

_اسما

اسماء:شوووف الله يرحم بيها الواليدييين بنتي ماتقيييصهااش وماتشدهااش ليا زايدوون اش واقف كدير قدام صالون دالعيالااات خارجين داخلين لييه ونتا جالس عساس قدامو ماشي قلة ترابي هادي(جا يهضر قاطعتو) ماداخلة ختك عادنا ما عدنا مراتك ما عندنا صاحبتك اشنو موقفك هنااا

_الله يهديك ا اسما عارفاني علاش واقف من صبح الله وانا مآنسطالي هنا

اسماء:ماعرفني اخوياا فاشنو وقفك هنا راه عيب حشمت نخرج ليك مولات صالون هي تعرف لييك عيب العيوب تعسو على عيالات رجالة عند باب صاالون ..

جرات بنتها مخلاتش ليه فين يحط الحرف وسط كلامها ومشات وهو متبعها بعينييه واحلة ليه الهضرة فحلقو ماحلاتوش حتى يعبر فخاطرو، فحبن اسماء يلاه غتدخل مع باب الصالون وهو يبان ليها راجل واقف عند طوموبيلتو قدام الصالون تلفتات شافت فلاخر مزال كيشوف فيها وشافت فراجل قدامها حتى هو تعطيه كلام على قبل الوقفة قدام صالون مبينة لاخر انه الهضرة ماكتمشييش عليه غير هو..

اسماء:ياك لاباس اسيدي كتسنى فشي حد؟

داك الراجل غير شافها تكلمات كتشوف فيه وهو يتخطف بارتباك تعكلات ليه الهضرة..

_ماا ك دابا..ك... كنتسى هند

اسماء:هند ؟

_ااه اه عفاك كّولي ليها مهدي كيتسنااك

اسماء حركات رااسها :ممم واخا

تقلباات عطاتو بالضهر ودخلات للصالون كانت هي داخلة وهند خارجة كتسد فصاكها

اسماء:شي حد كيتسناك براا تكلمي ليه

هند ماردااتش عليها بحالا ماسمعاتهاش وحلات الباب خرجات لعنددو بتبسييمة عريييضة سلمات عليه من حنك للحنك كتهضر

هند:خليييتك كتسنى واقييلة هه

المهدي:لا هه ماشي مشكل كون ماخرجات عندي واحد البنت قلت ليها تكملك لياا ندخل عليك

هند : هه ااه اسمااء قالتها ليا

المهدي: جديدة لا ؟

هند:لا ولكن ماشي بزااف باش دخلااات دخلنا حنى قبل منها كنا محتاجين لبنت معانا فالصالون انا وفاتي وحياة ماقدرناش علييه والكليان كثاااار

المهدي:خدمة الصالونات موفيز افير صرااحة شنو ماعنيتها المراة تخدم نهار كامل فالصالون دار شكون غيبقابلها..(باستهزاء)رااجل هه !

هند:يااك اسيدي ههه

المهدي:واشنو ههه

هند:لا اسماء مطلقة..داكشي علاش معانا

المهدي بصدمة تلفت عندها : واااايلي

طلعات فيهه ونزلات عاقدة حجبانها وهو فهم ردة فعلو اللي كانت مفروشة قدامها

هند:مالك تصدمتي هه

المهدي:لا هه غ غير فشكل زعما بحال هاادييك

هند:كيفاش بحال هادييك ؟

المهدي: بروووجوولة الدرية نااااضية هههه كيفاش...كيفاش بلانها

هند : وعلى حساب ديك ناضية نييت تطلقات راجلها كان الله يعمرها داار علم الله اشنو شاف عليييها..

مهدي:هو اللي كانت منوضاها معاه كّبييلة

هند:معاامن ؟ راجلها اصلا مشدوود مااعلينااا ماقلتيش ليا فين غننمشييو

المهدي:اللي بان لييك..

هند:نضربو شي دورة فعين ديااب ونرجعو..

طلقات اغنية فالطوموبيل ونزلات زاجة قدامها كتقاد فشعرها فحين المهدي عقلو بقا مع اسمااء وفآخر شوفة شافها دوخااتو ولات كتبان ليه غير هي خاصة فاش عرف بلي مطلقة يعني حرة غاص فتفكيييرو وقرر بلي لازم يعاود يشووفها مرة مرة كيضور يتبسم فوجه هند فاش كتهضر معاه ويرجع تاني يغوس فافكارو...

اما اسمااء جلسات تسارااح وتسنيم جنبها شادة كتاب كتعاود فدوك الارقام طيبااتهم فراسهم بقوة التكراار حتى خرجو الكليانات بقاو غير هوما تعاونو على الصالون جمعووه وشطبوو وجففو تحث الكراسة من الزغب ...حياة خرجات مشات خلاتهم كيسدو فييه والينات نزلو على الحانوث الريدو وكل وحدة قصدات داارها..

تسنيم:ماما..ماماا انمشييو غدا عند با سيدي ماعنديش القرااية..

اسماء:ولكن انا خدامة انوارتي مانقدرش نخرج

تسنيم:كل نهاار الخدمة الخدمة الخدمة ففف

اسماء:اجي اسليعفانة علاش كتبقاي عاطياها للهضرة فالقسم الاستادة كتشكى منك قالت ليا ملي دخل وهي دودودو

تسنيم:لاا ماكنهضررررش والله هوما اللي كيسولووني

اسماء:ممم زيدي زيدي دخلي

دفعات الباب دالعمارة وطلعو مباشرة للبيت ديالها دخلات وسدات عليها هي وبنتها حطات الما يسخن و وجدات الروز اللي غتحطو يطيب عاد حيدات جلابيتها جلسات مسترخية فوق الناموسية هازة رجليها كتحك فيهم وهوما كينغلو بالوقفة دالنهار كااامل حتى حسات بتيليفونها كيتهز في صدرها جبداتو شافت المتصل تنهداات وجاوباات

اسماء:آلوو ماماا

_داك المشقوف لاش هازاه معااك اللي ماتجاوبي نهار كلو وانا نصوني خلعتينيي

اسماء:عارفااك اماما شنو غتقولي داك الموضوع غير حيديه منباالك كنتي تعييطي ليا تسولي فحالي وحال بنتي نجاوب على راس والعين كنتي غتبداي ليا فلان فرتلان الله يعاون

_مانجبد ليك حد على نتي شكون كّاد علييك ابنيتي اللي فراسك فراسك ما حنى ماكرههنا نشوفوك بدويييرتك وبزماانك فضهرك هازك وهاز بنتك.....وادووزي دوزي بعدا غدا تغداي معانا راه باك كيسول عليك

اسماء : فيناهو الوقت اماما عندي الخدمة وزيدي غنخطف واحد ساعتين نمشي الحماام ونرجع الخدمة راه راسي ومكنساليش نحكو مابقى ليا غير الخرووج

_غادية تاني مع ديك المصييبة مابغيتيش تفرقييها بقااي مك بقاااي تا توكلك شي راس حمار ولا فم ضبع تولي غا حالة فمك ودايعة كي الهبيييلة

اسماء:تخربييق اماما داكشي سعاد عرفتها غير الباارح الله يهيدييك راه صاحبتي من زماان

_صاحبك ابنيتي هي مك وجييبك ما البراني طيحي ينزل علييك ما يطيح جنبك بالخصووص هادييك جلفة الرمان هاديك الكاارمة البايرة ويااابنتي راه ماتحملك ما تقبلك ونتي غا حاالة فمك وتابعاها اسيري ايلاا مااضربااتك فالضهر ماخلات فيا مي وحنااك غاالخلا سيري ابنيتي الله يحفضك من شر الخلق سيري

اسماء:بسلاامة سلمي على بابا والبنات والدرااري سلمي عليهم كاملين..

صباح يوم جديد شميسة طالعة مصحصحة عالنة على بداية النهار واللي عندو شي شغل كيقصدو يقدييه، من باب الحمام خرجات اسماء لاوية زيف على حناكها حمرييين ومزكنة مع سخونية الحمام هازة سطولة حمرين فوق خسرها وشادة تسنيم فايديها حتى هي بجليليبية وزيييف داير على حنيكاتها كتفوه بالنعاس طلعات عينيها فسعاد قدامها بحالهم حتى هي هازة سطولة دنمر كتاكل فليمون وتهضر..

سعاد:الله ياختي تحمحيييمة هي ههههه حسييت بعضامي خفاافو عليا تحمييمة تبغييها لعدووك هههه

اسماء:سعداتك غتمشي تنعسي انا راه عاد غنمشي لتمارة وللعرق والصهد تقولي شي مادرتو

سعاد:طلعي اصحبتي تسنيم للمدرسة ونزلي تكاي ليك شوية عاد سيري

اسماء: عندي واحد البريكول ليوم فيه ما يداار واصلا تسنيم قارية نص نهار لخر نديها معايا لوحدة عاد نطلعها تقرا

سعاد: واسيري خدمتك هي لولا لا فليتها ماكين اللي يقبل عليك اصحبتي خلييتك سيري الله يعاونك

اسماء:يلاه معايا للدار مالك زربانة غير حكيتي ليا ضهري مابقى عليك وقتاش تخرجي

طلقات تبسييمة عاالية هازة راسها لفوق وضربات على كتف اسمااء وهي كتشوف فيها بشك حيت اكثر وحدة كتعرفها هي اسمااء وهاد الضحكة والهربة ديالها ماكتعني والو من غير انها مخبية شي حاجة ولا كتوحد لشي حاجة ..!

سعاد: اويليي هههه من نيتك علاش بغيت نزرب ههه ما تابعاني خدمة بحالك ماعندي دار ولا ولاد نتخلع عليهم انا غادا غير ننعس هه ااش بغا يزربني

اسماء بشك ضورات راسها: ممم ياكما شي واحد هذا ..مزربك علينا

سعاد:كون كان نخزنو علييك سيري سيري هههه (تحنات عند تسنيم) بوسي عميييتو ..(باستها) يخلي لي الكبيييدة يلاه بسلامة خليت لييك الراااحة..

شيرات ليها بايديها واسماء متبعاها بعينييها بشك حالها تغير هادي ايام طويييلة وهي غير زريانة ومابقاتش كتبغي تطول معاها الوقفة فالاخير تنهدات وشدات ايد بنتها قاصدة دارها مع شارع طويييلة طالعة منوو حتى كتبان ليها واحد الهدية غادين بيها بالدقايقية والدفووع والعيالاات كيشطحو ضحكات كتشوف فتسنيم اللي حلات عينيها كتفرج فييهم الدقايقية غاديين واسماء وبنتها تابعاااهم حالة فمها حتى قرباات لعماارة ديال داارها وهي توقف كتباان ليها واحد المراة جالسة عند عتبة العمارة معكزة راسها على ركابيها كتشوف فيها وتضور فرااسها تحركاات عندها مدهوووشة وتسنيم طلقات منها مشات كتجري لعندها

تسنيم:الميييمة

اسماء:ماماا !!!

الحاجة : البهلة بنت البهلة الدقايقية غادا وهي حالة فيها فمها وتفرنس يابنيتي اللي يشوف الطاي والوقفة يقول هنا نباات(ثطقاطعتها)

اسماء:عندك السااروت علاش بقيتي جالسة هناا كون طلعتي

الحاجة:فينو العقل را تاركبت فطاكسي عاد تفكرتوو..

حلات اسماء الباااب والحاجة هازة عندها تسنيم تبوس فيها وتقاد ليها فزيفها حتى وصلات للدروج ونزلااتها تطلع بوحدها ماعندهاش الصحة ليهاا..طلعو للبيت وكيف العادة اسماء طرقاتو علييهم حطات الما يطيب وجلسات فوق الناموسية حيدات التقاشر من رجليها وهزات مرطب دالعكر الفاسي والسكر وفازلين كتدهن فييهم وفايديها اما عينيها كانو على الحاجة اللي كتضور فالبيت وتسكاني فييه مالقات ماتعيب فييه واخا صغير منقي ومتول كيشعل..

اسماء:ااش جاك ياميمتي تا طيليتيي عليا

الحاجة:مابغيتيش نتي تجي جييت انا....مشيتي للحماام مع جلفة الرمان واخا وصيتك ماتمشييش

اسماء : واسنيين وانا كنمشي معاها نجي تاليوم ونقوليها لاا حشومة واصلا كنت باغة نمشي لاهوما تمشي معايا تحك ليا غير ضهري بعدا حسن ما نجيب شي كسالة تطير مني خمسيين درهم

الحاجة:حااضية معاها ولا والي جمعتي وسخك و شعرك شفتي بيين صبااعها لا تمشي تهز لييك شي مشااكّة بيناتهم

اسماء: ياماما الله يهديك راك حاجة زعما خوي راسك من داك الخرافات راه مامنهم والو ومايوقع غير المكتاب لييك هاهي كاع هزاتو وسحرات بييه علاش غتسحر ليا كااع عندي شي ديوور تحسدني عليهم بانت ليك شي طوموبيل رباعية واقفة عند لباب راني مكحطة... ياربي غير نكمل نهاري باللي عندي..(علات عينيها فتسنيم) تسنيييم بعدي من المقراااج رااه على سبة...

تسنيم:بغيت لعبااتي

اسماء:دابا نجبدها لييك اجي تجلسي

تسنيم ضربات رجليها فلرض ممغبنة :لااااء بغيتها دابا نوريها للمييمة داباا

الحاجة:نوضي جبدي ليها توري للمييمة ..اجي الممييمة اجي سعدي وفرحي ب بنتي

تخطفاات اسماء من بلاصتها كتنهد وتعلات جبداتهم ليها عاد رجعات جلساات

اسماء:قولي ليا كيدااير بابا لباس علييه والدرااري و واحد كنزة

الحاحة:فيناهي كنزة كاع نهار وهي ضور...الوجه ولا كحل من داك الكّراس

اسماء:المسخوطة غتبقى تقلب حتى تخرج على راسها داكشي راه ولا فييه ريسك انا مافهتمش باش زين ضوباي على المغرب راه اللي دار هنا غيدير لهييه تخربييق

الحاجة:سكتي قالااك على حياة باش دارت داك الصالون ماشي مشات لداك الساعودية قابلت واحد الشارفة تخرقها وتوكلها ودارت تاني سونطر دالحلاقة وراه فتحات ماحاالها داكشي فييه ابنيتي غير اللي ماعندو زهر مااعندووش

اسماء:ااش دارت دابا قريبة ولا والو

الحاجة:كانت قالت ليها واحد السيدة دير ليها كونطرا عطيني غير مليون ونص نديك للسعودية قلت ليها سيري ولكن كنزة قالت ليا امي ايلا مشييت تماا غتشد ليا البااسبور وماتبقى تطلقني غير الوقت اللي بغات هي قالت ليا تولي تحرت علياا وتبزز عليها الخداامة ونعار تقوليها المغريب تكّلع ليها البسبور والوراق وتكركبها..

ضورات على رجليها ميكة والتقاشر ونااضت كتعمر فاتياي فنفس الوقت كتجاوب على كلام الحااجة ماحسااتش بالوقت وهوما كيضهرو باشتاقها للمها ماخلات حتى كلمة ماقالتهاش ليها من طبعها كتعاود ليها كلشي وحتى الحاجة ماجبداتش ليها موضوع الزوااج خافتها تقندش على الصبااح فطروو فطورهم جمعات دنيا وجمعات الالعاب دتسنيم رداتهم لبلاصتهم خلاتها جدبات كتوبتها كتراجع وهي حلات التلاجة جبدات ميكة د دجاج صغيييرة حطاتها فالما تطلق حيت الحاجة غتجلس تغدا معااها

اسماء:ماما هانا درت ليك الدجاج يطبق غنمشي للصاالون تسنيم راها معاك ايلا خصاتك شي حاجة صوني لييا راه ديك طناش ونص نجي

الحاجة:سيري ولله يعااونك ابنيتي الله ينقي طريقك من شوك حضي رااسك وايلا عطاوك تاكلي شي حاجة شديها ولوحيها ماتاكليش من ايدييهم راه يديرو ليك شي حااجة ردي باالك

اسماء : ماتخافيش اماما يلااه بسلامة علييكم (تحنات باست تسنيم) نوارتي راجعي شنو قريتي لباارح ايلا ماعرفتيش شي حاجة سيري عند سارة انا غنوصيها علييك صافي اماما انا غنجي بكري نتغدا مع بنتي باش تمشي تقرااي

باستها مرة اخرى لبسات صابو فرجليها حيت كانت بتقاشر وخرجاات كتعيط من عند الباب حتى خرجات ليها واحد البنت بنضااضر طبية وسروال بيجامة وديباردور باينة فيها طالبة

اسماء:سارة الله يساهل عليك تسنيم ايلا وحلات فشي حاجة غتجي عندك عاونيها اختي

سارة:كوني هانية غير قوليها تجي عندي

اشماء:قلتها ليها الله يسر لييكم..

مشات اسماء والحاجة حيدات جلابيتها بقات ب بيجامة وطابلية طويلة محزومة عليها ناضت حلات التلاجة بانت ليها خضيرة قلييلة وشوية د الديسير سداتها ودازت للميكة د دجاج كتشوفها واش رطاابت وهي تنهد وشافت فتسنيم

الحاجة:تنسيم نوضي ابنيتي يلاه معايا للسوق نتقدااو خضيرة وشوية داللحم اوديي قلت ليها جلسي فدار باااك ااش بغيتي بصناادق الكرا وليني لي فراسها فراسها نفسها دايراها ليهاا وديك النفس مابغاها الزماان ابنيتيي ..

اسماء:شكون هاديك اللي مع فاتي

هن:ممم (هزات فيها راسها) شنو قلتي ؟!

اسماء:واحد المراة واقفة مع فاتي برا شكون هي ؟

هند بلا مبالاة : شي حرااكّة واقيلة من صباح وهي شاداها

اسماء:ففف الله يعفو عليها من داك التفكيير ماخلاو لدراري مايقولو ولاو تا البنات يقلبو يحركّو

هند:ومالها اختي ايلا لقات معامن تمشي وتكون شي مشية نقية بين ولاد دربها ولا شي عائلة علاش مانحركّ معاهم ااش غتبقى دير هنا..

اسماء:ومالها شادة خديمة زويينة جالسة معززة مكرمة فدارهم حتى يجي شي ولد ناس يديها

هند:وبيني وبيينك دابا كلشي كاان عارفها مع داك شماتة الشمكار اللي تشد داباا غيبقى شي حد يزعم عليهاا من عندي وجبد يكزن خويا باغي يتزوج ويبغيها زعما مانقبلش عليهاا نكدب علييك علم الله اشنوو(حركات راسها واسماء تنهدات)

اسماء:الله يدير ليها تاويل دالخير داك الشمكاار وسخ ليها صورتها واللي وقع وقع..حياة مزال ماجات

هند:مزااال

اسماء:وياك عندها ليوم بروتين لتلاتة دالبناات منهم سعاد نييت يلاه تبددا فييهم واش مشات تقدا ولا شنو

هند:مانعرف اختي ماقالت ليا واالو...

تحل باب الصالون وبداو كيجيو الكليانات ولو انه غير الاتنيين هاد النهار كان عامر غير هو ماشي بحال الويكااند اسماء كليانة مورا كلييااانة واقفة على رجل وحدة تا تعيا وتنزل رجل لاخراا كلها عامرة بالفيليات شادة السيشوار فايديها بحال الكابوس الكليانة اللي جات كتزرب عليها تسيفطها حتى ضريات طنااش ونص ماجاتش حياة وهي تخرج طلعات للدار عندها لقات الحاجة موحدة الغدا باللحم والبصلة والبرقووق طاحت فيه عمية شحال ماداقت ماكلة ماماهاا بقات غير كتشوف فيها غدات تسنيم حتى هي لباستها لباسها وخرجات سلمات على الحاجة سيفطاتها عاد دات تسنيم للمدرسة ونزلات هي للصالون..

حداش دالليل ضربااات و الصالون بدا كيخوى اسماء كانت جالسة فوق الكرسي شادة تيليفون فايديها كتلعب فييه وتفرج وفاطمة الزهراء كانت مزال كتقاد لواحد البنت ضفارها ...حتى بانت ليها هند جلسات قدام الكرسي كتماكي وهي تطل عليها

اسماء:علامن التسيقااق ليوم نتي ولا فاتي..

هند:لا انا لا هي..نووبتك نتي ليوم

اسماء بعياااء :حلفيي بالله ياك .ياك لبارح عاد سيقات فاتي وليوم نتي

هند:مزيناااتك نهار سبت شكون سيق

اسماء:الله ياربي ماعنديش العضم بااش نووض فففف(تدق البااب وهوما شافو جيهتو حتى تمات داخلة حياة واسماء نطقات كتضحك)

اسناء:سديينا اختي تا لغدا ورجعي

حياة:ههه ساالييتو

اسماء:انا ساليت هند سالات بقات غير فاتي وغنسدو ماجيتيش ليوم ياك لبااس

حياة:كنت خارجة مع داار

اسماء:جاو شي بنات على قبل البروتين قلت ليهم ماكيتش من غير سعاد محاتش من صباح

حياة:تلاقيت معاها قبييلة لقيتها غادا عند شي خالتها قالت ليا مغتجييش

اسماء:خالتهاا ؟ اشمن وحدة ماقالت ليا والو

حياة:واحد خالتها جيهت الجردة لقيتها طالعة من تما(علات اسماء عينيها بتعجب ماعرفاتها) اللي على هبطتها كاينة المقاطعة اويلي اصحبتيي عقلتي على داك الفقييه با صالح الي فيه كلشي ايلا صلوحية ههه

اسماء:ااااه داك اللي مات خلا ولدو فبلاصتو

حياة:ايييه هادااك لتحث منو شووية كاينة واحد الجردة صغيرة

اسماء :اااه اه عرفتها

حياة:ايوا تما تلاقيت معاها قالت ليا كاينة شي خالتها ولا مانعرف ماغتجييش عندي

اسماء:كتعرف عندها وحدة مكتسكنش هنا تكون تحولاات زعماا

حياة:ماعرفتش..فين تسنيم؟

اسماء:راه لداخل نعسات غنسيق ونمشي عيييت والله..

دخلات حياة لداخل حلات القابيطة كتحسب فالفلوس واسنطماء عمرات سطل وهزات الكراطة والجفااف وخرجات كتجفف تحث الكرااسة وتمسح المرايات وتسيق الارضية حتى كملات كتنهج حلات البااب برا باش تبع الما شادة الخامية مغطية عليها قدامها مخرجة غير ايديها وراسها كتدفع فييه مع غتهز رااسها وهو يبان ليها نفس الراجل ديال ديك النهار "المهدي" غير جات عينيها فعينيه وهو يحرك ليها بايديه مبسم فحين هي طولات فيه شوفة ودخلات خباتو كيشووف ..

اسماء:هند داك الولد كيتسنى فييك برا

هند:جاا !!!

اسماء : مم جا كيشالي على عودو يلاالة ههههه

فاتي: مامولفااش ليه من نهار سبت وهو كيجي نص ساعة قبل الموعد الغرااامي ههههه

اسماء:خاليهاا الله يساهل علييها كتبان فيه ولد ناس واخا هكاك

هند طلقات ضحكة :تانا بنت نااس هههه

فاتي:ممم هند كاعما تدعي معاها دابا تسوسو غير يبان ليها فيه مايتكاال والله ماتديها فييه...

حياة من لداخل: اسماااء..

هزات سطل ودخلات حطاتهم فالطواليط عاد مشات عندها وهي تمد ليها حياة ميتين درهم شداتها فايدها باستغراااب قالت ربما باغة تسخرها

اسماء:خاصك شي حاجة..

حياة:لا خليها عندك هاديك

اسماء باستغرااب : ع علاش يلاه تخلصنا ز زعما ياك كتجمعي لينا الفلوس من سيمانة لسيمانة

حياة:هاديك مااعطيتهاش ليك نتي ديال تسنيم كادو دعيد ميلادها ماعرفت مانجيب ليا خليها عندك تعرفي تشري ليها حسن مني...

تبسمات اسماء بامتنااان عيونها لمعو بديك الميتيين درهم

اسماء:الله يخلف عليييك اشنو غنقووول

حياة:بصحتها...اشنو درتي مع مولات الكرا

اسماء:باقا كتسالني واحد شهير غنعطييه ليها ونرتاح ماكتسالنييش بزاف كنحاول نعطيها شوية كل سيمانة...

حياة:غير بشويا بشويا ماشي ساهلة علييك تبداي من زيرو بلا حتى درهم راه مسااهلاش بشوية بشوية دابا كلشي يتصاااوب

اسماء:ياربي اميين الحمد الله ماعنديش وماخاصنييش الحمد الله..

لبسات جلابيتها طلقات شعرها وجمعاتو فيقات تسنيم مبوقة هزات شكارتها والكتوبة اللي خلاتهم مشتين تما هزات السقاطة اللي كتشري من الحانوث جنبها مزال ماكلاتهمش عاد سلمات على البنات حيت مزالين ماسالو وهي وقت خرجوها وصل حلات الباب وخرطات خلااتهم، مضاربة مع تسنيم مرة كتمشي مرة كتوقف مزال شاد فيها نعاس وشكار في ضهرها سنسلتها محلولة ماجات فين تخطي الخطوة حتى تفرعاات وطاحو منها الكتوبة وهي تنزل كتجمع فييهم فحين المهدي ماحس براسو حتى وقف عليها باغي يعااونها ساعة زربات على الكتوبة خشاتهم فالشكارة ووقفات بعيدة علييه وهو ظاايخ كيشوف فيها ويدقق فتفاصيلها وهي تهز فيه حجبانها مخنزرة هاد الشوفات مخافيينش عليها وكتشوفها مراااات عديدة فالنهار الف راجل وراجل كيدوز جنبها بنفس هاد الشوفات اللي كيدير فيها المهدي.. هاد الاخير اللي تبسم بارتباك وقال

المهدي: ب بغيت نعاونك بنتي ليا قضيتي الغراض هه

اسناء:الله يخلف عليك شكرا مامحتاجاش (بغات تمشي وهو يوقفها)

المهدي:بنتك؟

اسناء:اهااه علاش

المهدي:فنكوشة غزاالة مشاء الله كتشبه لييك

اسماء: هه لا بالعكس كيقولو ليا كتشبه لباباها...

حدرات راسها بتبسيمة صفرا ورمات الخطوة غادا وهو متبعها كيحك فصدرو ويتنهد

المهدي:بنادم مكيعرفش للنعمة برب تا ضايعة...!

ايام مشات وايام جات سيمانة في رمشة عين طااارت ماحساتش بيها اسمااء حتى وصل يوم السبت او اليوم المعروف بعيد ميلاد تسنيم، الصالون كيف آمرات حياة تسد وتعلقات فيه لوحة مقفل فوقما جات شي كليانة غير كتشوف ديك اللوحة كترجع من الباب مستغربة وتالفة اشمن صالون تقصد وفداك الدرب او ديك الحومة الصالون الوحيد اللي كاين والمعروف بخدمتو وبناتو المتقونات، ضربات التلاتة ديال العشية والبنيات الصغار بداو كيجيو مع امهاتهم اسماء اختارت دير ليها العيد ميلاد بنهار على حساب البنيات الصغار مغيقدروش يجيو بالليل فضلات يكون بنهار وفعلا كاملين جاو هازين فايديهم صاشيات صغيورين معمرين بهداية لتسنييم،

هاد الاخيرة اللي كانت بغوب حمرة طويلة حتى لتحث وصبيبيط كحل طالقة شعرها بمشيطة زوييينة بوكلي من لتحث ومنفوخ من لفوق على ايدين هند اللي واعدتها هي اللي تقاد ليها شعرها كانت مخشية وسط صحاباتها كيتمايلو ويشطحو على اغنية خليجية " تاخد العقل" حتى بانت ليها اسماء خارجة من لداخل هازة فايديه طريبشات طوال ومقمقمين ديال ليزانيفيغسيغ وماسكات ديال الاعين جاية لجيهتهم كتضحك غير بكسيوة عادية سماطي حيت كانو غير العيالات بيناتهم مبسمة بعكر حمررر مزين فمها جا واضح مع بيوضية بشرتها وكحل قوي مجرور تحث عينيها الكبار زاد كبرهم مع الماسكارا اللي هازة بيها شفارها تحنات عند البنيات كتركب ليهم ليماسك وطريبشاات عاد دخلات لداخل فين كانت حياة جالسة كتركب شفار لعيونها وهند فالقنت شادة تيلي كتشاطي وتضحك ..

اسماء:ناري ياختي فاتي تعطلات لا هي لا حلوة

حياة:عنداك غير تاكلها ليك في الطريق ههههه

اسماء:الله ياختي سكتي ماتخلعينييش

هند:طلي طلي من البااب لا جات غير هي لاباس ههه مع داك الغلض تقاالت مك ولاات غادا وتستارااح ههههه

اسماء:لا لاا اويلي واخا هكااك سخرتها صحييحة ديك نهار مسكينة سخرناها للفران ومشاات مسكيينة وديك ساعة جاات ليوم شتها تعطلت

هند : جات وجابت معاها لاطة بلا حلوة في الطريق دارت ليها هنا كانت

حياة:نوضي تبعيها امسخووطة ههه اتخلي ليك درية بلا حلوة ههه

تحل الباااب وهي تلفت اسماء دغياا

اشماء:هاهي جااات خلعتووني

حياة:اري نشووف كيدايرا

فاتي داخلة عندهم: سخففت مشيت عندو ولد الحرام قاليا تالعشية ورجعي كنقوليه العيد ميلاد دابا وهو كيقول ليا تا لعشية

اسماء:معكس هاداك الحمار كون كان خاليد مايعطلكش انشووف

حلاتهاا وهي تضحك كانت كيف وصاتهم عليهاا حطاتها فوق الطبلة والبنات كيطلو عليها

هند:درتي فيها تصويييرتها جاات غزااالة

حياة:علاش مدرتيش تصويرتك نتي وياها

اسماء:ماكينة حتى تصويرة تحمر الوجه وانا نديرها بوحدها قلت ليها يديرها ليا الوسط نييت مزيان جات بااينة ...تسنيييييم اجي تشوفي

هند:لا لااا ماتوريهاش ليها خليها مفاااجأة

غطاتها اسماء دغيا وهي تجي عندهم تسنيم غير شافت الحلوة دخلات كتجري

تسنيم:حلوااااتيييي

اسماء:يلاه جات تههه سيري تلعبي مع صحاباتك خليها ليك مفااجأة جااات واااعرة ...

سمعو الدقان فباب الصاالون ومشات فاتي تحل وهي تبان ليها الحاجة مامات اسمااء دخلاات والبنات خرجو كيسلمو ويرحبو بيهاا..بشوية بشوية يداو كيجييو المعروضات الغالبية كانو غير امهات البنيات وشي كليانات عزاااز فالصالون اللي كانت عندهم علاقة مع اسماااء وعزاز عليها هوما اللي حضرو منهم غزلاان اللي تحنات باست تسنيم متمنية ليها احلا الايام عطاتها الكاادو وتسنيم عطاتو لماماها تخزنو...لحضات حتى جات سعاد سلمات على الحاجة اللي عاطياها الضحكة الصفراء مامرتاحاش ليها واسماء رحبات بيهاا فحين سعاد غير باست تسنيم وجلسات فوق الكرسي كتشوف فيها مرة مرة وتضحك والبنات لداخل حياة وفاتي واسماء كقادو فلكيك ويوجدو الكيساان ..هضرتهم بالحس كيتخابرو واخا كانت الموسيقى عااالية..

فاتي:شوفي اناا قلتها لييك نسني عليها سعاد شي واحد هذا معمر ليها دمااغها ماكين ما ولكن

اسماء:لا لا موحااال كون كان تعاود ليا علييه هادي واقعة عندهم شي حاجة فالعائلة يكون غا شماتة باغي يخرج ومنوض فيهم العافية باش يشوفو ليه شي جا يا اما شي حاجة اخرى

حياة:اجي نقوليك هاداك اللي قالت كان خطبها ما بقى منو والو

اسماء:واالو مسكينة ماعندهاش الزهر ماكينش اللي تحط عليه الايد ويبقى معاها

فاتي:تبارك الله اختي كبرت مسكيينة تزيد شوية ماتبقاش تولد خاصها تزوج يلاه تخطف شي بنية ولا ولييد راه غادا فالربعيناات ياك

اسماء:ممم شوية

حياة:ونتي شحال عندك كتبااني صغر منها في الوجه ولكن طاي لا هي كتبان صغر

اسماء:يلااه كملت خمسة وعريشن راه ولدت بنتي على تسعطاش رعام

حياة:اييه قلتي ليا تزوجي صغييييرة..(شافتها غتقطع الحلوى وهي تحبسها)الاا هداي ماتقطعيهاش دابا تاتقعطعيها قداامك

اسماء:نخليها هكاا مجموعة

حياة:خليها يلاه نخرجو هزي نتي الحلوة ههه ...طفييو الضواااو

فاتي بحمااس :انا غنطفييييه

خرجات فاتي كتجري نزلاات ضو تا قفزاات سعاد كانت سااهية والحاجة ضارت بجناابها كتبسمل الله وهي تخرج اسماء هازة الحلوة فايديها مضورة عليها شميييعات والبنات وراها خارجين وكيغنيو سنة حييلوة يا جمييل وتسنيم كتصفق وتشوف فصحاباتها فرحاانة، حطات الكيك لوسط فوق طبيلة ضارو بيه كامليين كيغنيو والحاجة غير كتشوف فيهم وتصفق بايديها واسماء شادة عندها تسنيم قدامها كتغني ليها وتمايل هي وياها حتى قربات تسنيم لدوك شميعاات عيونها ببراائة كيلمعو فرحاانة نفخات علييهم ورجعات لوور كتضحك وهوما كيصفقو ليهااا والضو شعل عليهم...

اسماء:عييد ميلاد سعييد نواارتي الله يجعل ايامك كلهم خييير فخيييير (عينيها دمعو) ياربي يزين سعدك ويحلييه ويفرحك ونشوفك كيييف بغييت

نزلو دمووعها والبنات كيضحكو عليها وهي عنقات عندها تسنييم كتضحك وموعها كينزلوو والحاجة حظرات راسها شادة زيف على فمها كتبكي حتى مشات عندها حياة عنقاتها فحين سعاد غير كتشوف بينااتهم وتضور فعينيها وتبلع فرييقها غير كتشوف هند حاضياها كتبسم ليها بارتبااك..

غزلان:حشووومة اصحبتي علاش كتبكييو داابا غتبكيونا معاكن كاااع ضافي عكينا نشوفو ديك الحلوة كيف داايرة انا قطعي ليا من جيهة راس تسنمييش با ناكل ليها دمااغ ونولي تانا دكية بحاالها..

ضحكاات اسمااء وطلقات من تسنيم كتمسح تحت عينيها مشات هي وفاتي كيخرجو فالكيسان وقراعي دالموناضة وطبيسلات صغار وكبار عامرين بالفانيد والشكلاط والبسكوييت حطاتهم فوق الطبلة وبدات كتقطع فيهم وكل طبسيل كتحط فيه طرف كتهزو فاتي تفرق علييهم حتى كملااتهم كااملين خلاتهم كياكلو ويتحتو والبنيات كيشطحو وفاتي هزات طبسيلها وجلسات جنب سعاد واسماء حتى هي حدااهم..

فاطمة الزهراء: سويعيدة فيين غابرة هاد ليامات مابقيتيش كتنزلي للصالون

سعاد شادة طبسيل فايديها كتاكل:هه واحنا غير مع الوقت وصافي...

فاطمة الزهراء: عندك شي تعبئة تمااك

سعاد:لا مامشارجيااش لمن باغاها

فاطمة الزهراء: غيير واحد السيدة حياة يلاه ساليتها ليها ما هند والله ماتعطيني تا دقييقة..

تسنيم:ماماا شوفي شوفي شنو جابت ليا غزلاااان(سرحات ايديها وبان البراسلي)

اسماء:شحاال غزاااال قلتي ليها شكراا(حركات راسها) الله يخلف عليك اغزلان ماكانش عليك تعدبي راسك

غزلان:اشمن عداب بصحتها

تسنيم:وقالت ليا ملي غيدوزو جوج ديال عيد ميلادي غتجيب ليا تيليفون بحال ديالها..

اسماء:ياااك تيليفون نيشان

فاطمة الزهراء:غابلااتي نمشي للغربة نبرعك تيليفونات وبيكالااات نغرقك بالحوايج والالعااب غير بلاتي

تسنيم : فين كاينة الغربة

اسماء::يلاه ماجا ما يفكها معاl ليوم تا تنعتيها ليها

فاطمة الزهراء:لهيييه هههه مورا البحر شتي البحر غتبقااي غاداا غاداا غاداا تا غتوصلي للغربة

تسنيم: ولكن مورا البحر كتسالي الدنيا

فاطنة الزهراء:كيساالي الفقر والكحط وجوع شتي تخرجي من هاد البلااد السعيدة ماكين غير الدولاار تنطح دولاار

سعاد:بصح باغة تمشي حاركّة ولا وراق

فاطمة: فيناهوما الوراق تانتي غنشوفو شي حراكّ يتعامل معانا

سعاد:موجدة الفلوس راك عارفة جوج دالمليوون هي لقلييلة ايلا بغيتي تمشي

فاطمة:الفلوووس كااينيين ولكن اللي غيدييك فيناهو

سعاد:كااين واحد السيد نشوف لييك معاه ايلا بغيتي تمشي وجدي غير فلوسك و وحضي رااسك من غدا نهضر ليك معااه

اسماء رخات ودنيها كتصنت عليهم معاجبهااش لحال وهي تنغز سعاد فحين هاد الاخيرة دغيا فهماتها وقلبات الموضوع خلات فاتي مرفوعة كتخمم وناضت كتلعب مع تسنييم حتى قربات ليها هند..

هند:وهانا الكادو ديالي (حلات البواط قدامها كان براسلي مدرج وصغيور كيلمع ركباتو ليها فايديها)

تسنيم:شكراا

هند: يخليلي الصويت الحنيين بصحتك احبيبة ...وهذاا (جبدات بواط اخرى)كادو ديال عمك المهدي

سعاد:شكون المهدي ؟؟

هند:حب القلب هه

فاتي:وهاانتي مسكييين

اسماء:داك الولد اللي كيتسناك على برا ؟

هند:اه سيفط ليها كادو معايا يمكن شافها شي نهار خارجة للحانوث ملي مشيت لبارح ناخدو ليها حتى هو شرا ليها هاد سنسلة..

اسماء: مسكيين الله يخلف لييه

سعاد:وابلااتي جبت تانا كادو لبنت خوويا

هزاات واحد الكرطونة من تحث الكرسي طويلة ورقييقة ضاير عليها بلاصتيك شفااف وقاصح وسط منو مونيكة كتبان واقفة بغوب دالعرس رمادية وشعرها مطلوق طويل بحال ديال تسنيم وكحل..

تسنيم:كادو ديالييي !!!

سعاد:اييييه يلاه بوسي عمييتو

اسماء:انشووف (هزاتها فايديها والمنيكة قد تسنيم فالطول) غزااااالة ياختي

سعاد:هادي راه كتجي ديكور فالدار فنننة عنداك تخليها تهرسها ولا تلعب بيها غير علقيها الفوق ديكور زويينة

تسنيم:زويينة بزااااف وقدي غتولي صاحبتي (بغات تحلها وهي تخطفها سعاد)

سعاد:لااا متحليهااش خليها مقادة وزوينة حطيها غير ديكور فالدار تجي غزاالة

هند حطات راس على فاتي بالحس : كتخلع الله يستر شو عينيها كي خارجيين

فاتي:شششش

ولكن سعاد سمعاتها ودارت براسها ماسمعات والو وكملات فضحكها وكلامها مع تسنيم حتى قربات الحاجة جرات عندها اسماء وجبدات واحد الصاكادو صغييور كتجبد منو...

الحاجة:حسبي تما دابا نتلف هاكي هادي ديال خوك هشام سيفطها لتسنييم( 200 درهم) وهادي ديال صلاح(150 درهم) وهادي ديالتي انا وبوك(400 درهم) وكنزة ختك راه قالت دابا تدوز عندك بغات تجي ومامساليااش

اسماء:الله يخلف علييكم .. نردها ليهم فساعة الخيير

الحاجة:بصحتك بردي شوية بردي خلي الما منين يدوز وضربي شي ضويرة لداركم مايكونش قلبك حاقد راه كلشي يفوووت ابنيتي وباك ليوم ولا غدا تقولي هاندامتي اللي مامشيت عندو راه كل ساعة يسول فييك وكلهم يسولو علييك الحق ل الله

اسماء:با لابغى يشوفني راه كيعرف داري انا دوك الخانزلات راه مانرضاهمش ومانمشييييش ندق علييهم

الحاجة : وشحال تحقدي ابنيتي واخا ياكلوليك الورث وماديري عليهم هاد الحالة

اسماء ضربات فصدرها :مايحس بيا غير المجرب اماما تسنييت عائلتي اللي توقف جنبي وتهز ليا راسي ماشي نهار ندق باباهم هوما لولين يسمعوني كلامهم وليت تحث رجلين واللي جا يسمح فياا.... انا را مساهلة لتاحد وايلا تطلقت راني مرة ونص وماكين بنت المراة تدوز وتصبر على اللي داز عليا ومزال هازة راسي وخدااامة بكتافي وعاضة فالصبر وهازة بنتي ما مادة ايدي قدام جامع نطلب ولا ماداها نشفر الحمد الله كنجبيهم بعرق كتااافي حلالا طيباا ماشي بقيت عند الراجل مدلووولة كي الكلبة يقول ليا شا شا را را

الحاجة:صافي صاافي مامعاااك هضرة سيري العيالات كيتصنتو علينا...

خرجات عند البنات محاولة تضحك واخا قلبها كيبكي دم مناسيااش اللي فايت عليها واللي يشوف هاد تبسيمة والضحكة يقول اسعد منها ما كيين تخشات وسط بنتها اللي تنسيها فهمها كتضحك معاها وتعنق فيها وتبووس حتى ضلام الحاال شي بنيات بداو كيمشييو والحاجة حتى هي بغات تمشي خرجات معاها اسماء حتى لبرا سلمات عليها و ودعاتها مشات وهي رجعات دخلات..

ضلمة ليل طااحت والصالون بدا كيخوا بقاو غير البناات جالسين مجمعين حياة مع اسماء وفاتي شادة تيلي كتصوني وتقطع فحين هند كتلبس فحوايجهاا لداخل غير كملات وخرحات عندهم وهونا يعلو فيها عينيهم..

حياة:خارجة؟

هند:جاي عندي مهدي نضربو شي ضويرة ونرجعو ...تسنيييم اجي معايا

اسماء:فيين !!

هند:تخرج معايا عند الباب غير تقوليه شكراا حشومة مسيفط ليها كادو وميشووفهااش

اسماء:الله يخلف لييه راهي تمشي معااك..

هزات صاكها وسيفطات ليهم بوسة بايديها عاد شدات فتسنيم وخرجاتها معاهاا برا الصالون شوية حتى رجعاتها بوحدها واسماء علات فيها عينيها

اسماء:فيين تسنييم ؟؟

هند:امالكي مخلووعة راه معاااه نسييت ريحتييي مادرتهااااش

رشات عليها ريحة بالخف خشاتها فصاكها وخرجات دقائق معدودة حتى دخلات تسنيم بوحدها مكمشة على ايديها ورجعات جالسة كتلعب وتحل فالكادوات اللي جاوها واسماء وفاتي معاونات كيجمعو فالصالون وروينتو اللي بقات حتى طرفو دنيا عاد خرجو مجموعين نزلو ريدو وكل وحدة قصدات دارها منهم اسمااء اللي غير سدات الباب وغسلات رجليها وايديها كيف غسلات لبنتها وبدلات ليها حوايجها وهي تبان ليها مكمشة على ايديها وهي تهز فيها راسها..

اسماء:مالك احبييبة..طلقي ايديك..

رخات تسنيم ايديها وهي تطيح منها ورقة مطوية هزاتها اسمااء باستغراب كتقلب

اسماء:شنوو هادي ؟ منيين جاتك

تسنيم:عطاها ليا واحد الرااجل..

اسماء بنهضة خرجات فيها عينيها :اااشمن رااااجل؟؟؟

قفزات تسنييم بخزف كتبلع فريقها حادرة رااسها

اسماء: شكووون عطاهاا ليييك هضرييي

تسنيم بخوف : م ماما

حاولت تهدن من صوتها وبحنية هضرات

اسماء:غير هضري مغنقوليك واالو شكون عطاها ليييك

تسنيم:داك اىراجل اللي جاب ليا هاد سنلسة عطاها ليا وقاليا خبيها ماتعطيها لحتى واحد عطيها غير لماماك

اسماء:وعلاش خايفة اشنو غندير ليك دابا...(تنهدات)صافي يلاه سيري تنعسي فات الحااال

طلقات منها مشات تخشات ف فراشها واسماء وقفات كتشوف فديك الورقة مطوولة بدون فهم عمرها تحطات فهاد الموقف ولا تعطات ليعا نمرة مولف هي اللي كتطلب منها النمرة ماشي هي اللي كتاخدها يلاه كمشاتها غتلوحها وهي تفكر الكادو اللي جاب لبنتها تبسمات ورجعات فتحاتعا بتفكيير

اسماء:حشومة..نقوليه غير شكرا على الكادو ونبلوكيها..

لاحت الكارطة وطرفات البيت شعلات تلفازة وطفات ضو عاد تكات خاشية تحت صدرها تسنيم مخشية فيها كتفرج على تلفازة مكتقدرش تنعس على الضلام فحين اسماء ساهية كتمشط على شعرها دايخة كتخمم ماعرفات تصوني ليه ولا تكمشها وتلوحها حشماات وغلبها وجهها مابينو هو اللي تفكر بنتها ماتفكروهاش حتى عمامها ، تنهدااات ومدات ايديها للتيليفون تحت راسها وهزات لكارط بين صباعها ماجات فين تصوني ليه وهي تفكر هند اللي خارجة معاه وغتكون معاه لحد الان، دات وجابت فدماغها وهي تكتب نمرة وحطاتها على ودنيها مدة قصير حتى تفتح الخط وسمعات صوتو..

المهدي : آلوو !!

اسماء : آلووو..!!

المهدي:سلام علييكم ..شكون معايا !

بصوا هاادئ خايفة من صوتها لا يترفع ولا يتسمع عندو بجههد..فحين مهدي غير سمع صوتها اللي كتلحنو بدون شعوور دااخ

اسماء : ا اسماء...البنت اللي خدامة مع هند فالصالون

المهدي:نعاام !

اسماء بدون شعور كتلحن كلامها :واش سمعتيني !(حيت كانت كتسمع صوت صداع مع صوتو)

المهدي:وي وي سمعتك هه غير ماكنتش معول تصوني ..سمحي ليا واحد الدقيييقة(خرج برا)...صافا لباس علييك !

اسماء:الحمد الله ربي يخليك، اتاصلت بيك غير باش نشكرك على الهدية شكرا بزااف فرحات بيها تسنيم

المهدي:بصح !! ههه هادشي اللي بغيت بصحتها ياك عجبكم بعدا الحمد الله

اسماء:عجبهاا بزاف والله الله يخلف عليييك هند معااك ! سلم عليهاا

المهدي:ل ءء لا هند ماشي معايا مشات عاد دابا

اسماء : ااه ايوا صافي نخلييك شكرا مرة اخرى

المهدي : انا اللي خاصني نشكرك على هاد الاتصال الشرف ليا تسالي ليلتي على صوتك

اسماء: هه نخليك داباا بسلاامة

المهدي : صاافي مشيتي..ماشي مشكل تصبحي على خيير

اسماء:تصبح على خيير

سكتاات كيف سكت هو بدون ما تقطع كتسناه هو يقطع وهو كيستاناها تقطع ، مدة طويلة وهي كتسمع غير في صوت انفااسو الجهد باش غتقطع عليه ماعندهاش وايديها تقالو علييها حتى حسات على راسها شنو كدير وهي تحيد لفون من ودنها وقطعاات و خشاتو تحث المخدة باقي على فمها نفس التبسيييمة كلما تدكراات صوتو والطريقة باش هضر معاها حاسة براسها ماقادراش تبقى جالسة بغات تحرك وتوقف من بلاصها تنسى هاد التوتر والقشعريرة اللي هزاتها، تحركات من بلاصتها نااضت عمرات ليها الما شربااات حلات عليها شرجم وعودات سداتو عاد طفات تلفازة ملي تسنيم نعسات وتخشاات جنبها ...

ماشي غير بوحدها اللي كانت عايشة وسط هاد الاحسااس والتوتر كان حتى المهدي كيبادلها نفس الشعور وهو برا البواط اللي كان فييه خشى لفون فجيبو كيحك على جبهتو مبسم وعينييه لامعيين بالفرحة مسح على وجهو وتلفت رجع دخل قاصد هند اللي كانت جالسة وراس دشيشة ف فمها وسط مجموعة من البنات ودراري مخلطيين كيكمييو ويشيشو والموسيقى قالبة دنيا جلس حداها لايح ايديه موراها وهي تكات عندو كتهضر بجهد باش يسمعهاا..

هند:فييين كنتييي🎶

المهدي:نعاام ؟؟🎶

هند:فيين كنتي قلت لييك خرجتي بوجه ودخلتي بوجه لقيتي بزطاام عند الباب ولا شنو ههههه

المهدي: بحال داكشي ههه

تلاتة ديال الليل جرات اسماء الغطا عليها غتقلب لجيهة لاخرا حتى كتسمع شي وصوت جاي موراهاا قرنات حجبانها وفتحات نص عين ملفتة وراها نحو الصوت وهي تبان ليها تسنيم نفسها كتطلع وتهبط بهدوووء كتنييين بحالا كتهلوس ، دغياا مدات ايديها تحث المخدة جرات لفون ديالها شعلات البيل كتحرك فيها

اسماء:تسنيييم..بسم الله علييك تسنييم..

حيداات عليها الغطا وهي تخطططف من بلاصتها كتلمس فييها حسات بالعافية شاعلة فيها سخونة وعرقانة وحمرة بسييف باش كتطلع نفس وهي تقلبها على ضهرها

اسماء:تسنيييم بسم الله ابنتيي ماالكي حلي عينييك اماما ماالك مال بنتي..

بدون اجابة منها غير كتشوف فيها كتجر عليها الغطى بحالا فيها البرد كلها كترجف اسماء عرفاتها طلعاتها السخااانة بحال ديما مورا اي مناسبة ضروري وماكتخرج منها بشي مرضة، ناضت ديك الساعة من بلاصتها شعلات ضو وجبدات الكرسي تعلات فوق الماريو نزلات واحد الكرطونة وحلاتها كانو فيها حوايج البرد جرات من وسطها تريكو سخييخن وداتو كتلبس فيها وتسنيم مرخية كتنيين مكمشة ملامحها بانزعاج باغة غير ترجع تنعس واسماء محاولة معاها حتى لبساتها وناضت للتلاجة هزات واحد جوج حامضات والما زهر و واحد الخرقة كتمرمدها فالما بارد وكتحطها على جبهة تسنيم حتى كتقفز كلها كترجف كتخليها تاني تا تسخن ديك الخرجة وتعاود تخشيها فلما وتقطع فالحامض طرونش مستفااه فوق راسها والما زهر كلو خواتو عليها..

ليل كاامل وهي عند راسها مضاربة مع السخانة تنزل كلما قالت هاهي نزلات ماكتزييد غير تطلع حتى بدا كيطلع النهاار والشمس صحصحااات عاد بانت ليا تسنيم ارتااحت والسخانة شووووية نزلاات وهي تنوض خلاتها مرتاحة جمعات ديك الروينة عينيها كيتغمضو بالنعاس اللي طار منها ليل كامل وهي فايقة معاها، ماجات فين تحط راس تكى وهو يبدا تيليفونها يصوني مدات ايديها تشوف وهي تبات ليها حياة وجوباتها..

اسماء:الو حياة ختي !

حياة:صباح الخيير ازين كي صبحتي شوية شفتك تعطلتي على الصالون ياكما كاين باس

اسماء:لاا الحمد الله غير تسنيم مرضات ليا شوية طلعاتها السخانة مزال راني معاها خفتها تطلع ليها تاني

حياة:الله يااااربي ياختي ماغتكون غير شي عوينة مسيكينة لقاتها

اسماء:الحمد الله صبحات شوية وصافي مزال طالعة ليها موحال اختي غنجي هاد الصباح غير سمحي ليا حتى لعشية ونجي

حياة:ماشي مشكيييل غير حيت الكليان كيتسنى فيك جاو شي بنات صباح كيسولوو حتى تولي شوية وجي

اسماء:انشااء الله

حياة : صوني معاك عفاك ايلا كانت عندك شي مكالمة على سعاد انا مابغاتش كاع تجاوبني اصحبتي ديك السيمانة قالت ليك باغة البروتيين حتى تقديتو على حسابها فلخر قالت ليا تالسيمانة جايا على عينيك راك شفتييها دارت معايا ليووم وهاهي مجاتش واش انا غنبقى مرهونة فالصالون على حسابها وباش زايدااها طافيااه عليا

اسماء: البارح فالصالون قالت ليا راه غتجي ليووم..مهم انا فنصوني ليها وباش ما كان نرد علييك

حياة:صاافي يلااه الله يعاونك والله يجيب الشيفاء من عندو

اسماء:اللهم اميين بسلاامة عشية انشاء الله نجي..

قطعات معاها وضارت تحناات قفازة جالسة قدام تسنييم اللي مزال ناعسة والحامض ضااير براسها فكل جييهة تنهداات اسمااء كتشوف فيها وتدوز صباعها علىخصلات شعرها ماحسات على نفسها حتى انفاجرت بالدموع قدامها كتبكي وتمشط فشعرها

اسماء:الله يااربي ومرضتك شحال كتخلعني ابنيتيي عطاوها لييك مكممدة انوارتي عندااك تكوني مرضتي ليا حيت زعفت علييك لباارح والله غير من خوفي عليييك...

حركااتها بشويا محاولة تفيقها..

اسماء:تسنيييم..تسنيييم شوية اماما شوفي فيا شوية ! نشعلك لييك التلفاازة همم !

حركات ليها راسها بشويا وهي تنوض بخفة شعلات تلفازة على رسوم اللي كيعجبوها ورجعات كتقلب ليها فراسها بانت ليها سخانة مزال كيف كااانت والحامض ماقدا فيها واالو..

اسماء: امييمتي هادي غير ماغادا وكتطلع نمشي نجيب لييك شي خنييشات نمشي نجيب ليك الدواا لا لا الحامض ماغيقدي فيها...ماتخافيش تبقاي بوحدك نجييب ليك حلوة داكراامييل تاكلييها...هاا !!

حركات راسها بسلب وعينيها معسليين باغة غير تسدهم باش تنعس

اسماء:تاهي لا نجيب لييك دانوون تشربي غير مع الخنيييشة على مولانا تنزل لييك..

رجعات عليها الغطى وتحناات قفازي حلات السنسلة ديال الغلاف اللي على الناموسية تما كانت تاقبة واحد التقبة خازنة فيها فلووسها ولو مكانتش خازنة الكثر اللي كتربحو فسيمانة كتخسرو فيومين، جرات خمسين درهم وناضت لاحت عليها جلابتها ولبسات صندالة بالخف كيف طلقات شعرها وجمعاتو باهماال عاد خرجات رادة موراها الباب خايفة تسدو عليها وهي كتخاف تبقى تبكي لداخل، نزلان لفرماسيان ديريكت خدات خنيشات على عمرها ودازت للبيسري خدات ليها الحلوة اللي كتبغي عاد دازت للحانوث خدات ليها دانون ومشات للدار فطراتها بزز عليها وشرباتها الكينة ورجعاتها تنعس..

ماجات فين يتناص النهار حتى تكعدات تسنييم و ناضت كتلعب شوية وتفرج وتاكل فخاطرها بفعل ديك الخنيشة اللي نزلات ليها السخانة شوية، صونات على سعاد وعلماتها تدوزللمحل عند حياة وناضت هي جمعات دنيا وستفات الكادويات اللي جابو ليها صحاباتها الالعاب ستفااتهم فوق الماريو من بينهم المونيكة ديال سعاد اللي كانت طويلة وجات باينة فوق الماريو والاكسيسوارات خزناتهم مع حوايجها، فعز انشاغلااها لصقاات فيها تسنييم فضهرها كتنقز..

تسنيم:مامااا معنمشيوش عند خالتو حياة فصالون

اسماء:رااك مريضة انواارتي فين غنخرجك حتى تولي شوية(ناضت واقفة وتسنيم لاصقة فضهرها)

تسنيم:لا مامريضاااش مشات السخونية

اسماء:بغيتي تخرجي وكان ماديريش السبة بصالون ولفتك التلواااط

تسنييم:انخرجو عفاااك

اسماء:عندك المدرسة غدا كون غير تمشي تستاراحي يلاه تفيقي شوية غدا (نزلاتهاا فوق الناموسية وهي تسرح فيها مغبنة)

اسنيم:غنمشي للمدراسة وانا مزال نريضة

اسناء:العفرييتة مريضة غا على المدرسة الصاالون وليتي تنقزيي..

تسنيم:وعفااكي يلاه نخرجوو

اسماء:ههه لبسي تريكوك على البرد يلااه نمشيو ياربي غير مايتزادش علييك الحال الخنيشة نفعاتك شوية

مشات كتنقز بحالا عمرها مرضاات لبسات عليها تريكوها وهزات شكاراها فكتافها عارفة راسها غيبقاو فصالون تالنص لييل واسماء حتى هي لبسات عليها جلابيتها ودهنات ايكخون لوجهها دوزات الكحل تحت عينيها ومرطب شفايف على فمها وخرجت من الدااار مباشرة للصالون من الباب ديالو كيتسمع صوت شيشوار غير حلات البااب دخلااات وهو يتسمع صوت البناات " هاا اسمااء جااات " جاتهم عجب حيت علماتهم حياة باللي ماغتجييش...رمات عليهم السلام وشافت فسعاد اللي كانت جالسة على الكرسي وشعرها موراها مطلووق مسرح كي الخشبة مدهون بالبروتين وفاتي دايرة كرسي قدامها جالسة كيهضرو هي وياها بالحس، تسنييم جلسات عند وحدة من الكليانات كتلعب معاهم واسماء دخلات لدااخل كتحيد فحوايجها وتهضر مع حياة اللي كانت كتغسل لوحدة من البنات شعرها يلاه غتخرج وهي ترمي عينيها لفاتي وسعاد كيهضرو ورجعات شافت فحياة غامزاها..

اسماء:ااش كاين ؟

حياة دارت ايديها فوق راسها بانزعاج: شوفي ياختي تاني شطناتها بقضية الحريكّ حقا ما حقا كتعرف شي واحد راه كتاكل ليها فدماغها خلاتها بلا خدمة كون غير ماجاااتش...

حركات راسها وخرجات اسماء ماعندهاش الخاطر شدات كرسيها وبدات بالكليانة لولة كتمشط فشعرها فنفس الوقت رامية ودنيها عند سعاد وحياة كتصنت لييهم..

فاطمة الزهراء:عرفتي اختي ويسر الله فهاد لافيير مانسااكش والله

سعاد:نتي غير خليها بيناتنا حتى حد مايسيق الحبار انا غنعلم خويا يمكن ايلا كانت شي خرجة راه غتكون فشهر تمنية كيكون البحر هادي والوقت زوييينة وجدي نتي غير فلوسك ومايكون غير لخير

فاطمة الزهراء:حتى خوك غيمشي معانا وولا غير غيجمعنا

سعاد : لا انا خويا غير غيشوف ليك بلاصة وسطهم الفلوكة اصلا عاامرة راه خمسة وعشرين واحد اللي كيخرج فيها غيطلب عليك (وسط كلامها حسات بشي حد نغزها وهي تلفت لقات اسماء كتشوف فيها مخنزرة ) و و..وصافي يقوليهم غير بنت وديروها وسطم مغتباانش وهاكداا فهمتي خويا راه غير خير منو انا غنطلبو ونزاوك فيه يشوف ليك مايخسرش ليا

فاطمة الزهراء:الله يساهل علييك هضري معااه وقولي ليه يطلب علياا الله يحفضك عمري نسا خييير

يلاه غتجاوبها سعاد وهي تحس باسماء نغزاااتها تلفتات شافت فيها ورجعات شافت ف فاتي غتجاوبهة حتى سمعاات واحد الكليانة هضراات

_فاطمة الزهراء ختي صاوبي لياا والله حتى مزرووبة

حياة بزعفة: فاطمة الزهراااا واش غنبقاو هنا نتحتوو ولا شنو

فاتي:هاني اختي جااية هاني(ناضت عندها وحياة كانت خارجة كتمسح فايديها والكليانة شادة فوطة فراسها موراها غير شافتها اسماء خرجات وهي تغنز سعاد تبعها وطفات شيشوار ودخلات لداخل وسعاد حتى هي دفعات الكرسي ومشات تبعاتها دخلاات لداخل لقات اسماء شادة على خسرها وهازة فيها حجبانها

اسماء:اختيي انا مابقيت عارفااك صحبتي ولا سمسااارة ااش هاد الفعاايل

سعاد:امااالكي ا اسماا اشنو درت

اشناء:ومزال عاد كتسولي بوجهك حمررر كتسمسمري مع درية تسيفطيها للخاريج وخوك زعماا اللي غيطلب علييها وجهك هاداك ولا قفااك غير قولي ليا

سعاد:ومالها اشنو فيها قالت ليا بغات تحركّ وانا غنتوسط ليها مع خويا وهو غيطلب عليها حتى يلقى ليها شي بلاصة تمشي فيهاا

اسماء:ابراااكة من داك تنووعير خوك راك كتعرفيييه حسن منيي هادشي كاع فيه محبة للخير هزات ضبعها فيها)شوفي اسعاد كلمة وحدة غنقولها لييك كتجي للصالون مرحاباا والف مرحباا تبدااي اختي تسمسري ليا فالبناات هنا مانقبلهاش ليييك

سعاد:ونتي اااش دخلك اصحبتيي بيني وبيين البنات يااك مادخلنااك ما دوييناك

اسناء:راااك صااحبتيي ومعرووووفة صااحبت اسمااا ماتخسرييش ليا صورتي مع عبااد الله ماشي نهار ينصب عليهم خوك يونوضو صاحبت اسما ما صاحبت اسما انا اللي غنولي هازة دقة علييك انا منااقصانييش هضرة موراا ضهري براااكة معيورة المطلقة الهجالة تابعاني من نهار خرجت من دااركم ماتزيدينيش تانتي

سعاد:ونتي اصحبتي اللي باغة تدخلي بزز فيين عمرك شفتي خويا نصب على شي حد يااك اللي جا عندو مكيرضوش

اسماء:و ولد العربي اللي دا لييه مليووون هكااك صحيحة ديتها لييه انا ؟

سعاد:وشدااتهم البووليس وتا خويا خدم عليه وطلب عليييه حتى لقا ليه بلايصة وشد حلاوتو شدوهم البوليس وهو ماالو

اسناء:سبحااان الله هاد البوليس طاحو من سما ماعيط علييهم حد زعما ما بيعو بييهم ماشي خوك اللي كيخلي دراري تايطلعو مساكن للفلوكة ويعيط ليهم على البوليس باش يرجعو تاني يطلبو فيه يشوف ليهم شي بلاصة وهو خدام كينصب على عباد الله شوفي شوفي انا من هاد الهضرة كاااملة دخلي لسووق رااسك اسعاااد وبعدي من درية ماتدخلي ليها اختي ما تدخل ليييك تضبر رااسها نتي اااش دخل نيييفك فشغلها كتجي تقادي وتضوري براسك مرحبااا غتبدااي تخيطي ليا بين ناس غنخرج انا ونخلي ليكم هااد صالون بصصصحة

ماجات فين تكمل كلماها حتى تفرع عليهم الباب ودخلات فاتي كتعرعر وتغووت من البااب

فاطمة الزهرااء:المااا وشطاابة تالقاااع البححررر البااب وسع من كتااافك وخرجي وخرجي معاك العزييز علييك وحنى نقولو السم والحسد فييين هيا من كبييرة القلب كيتدفكّ ااش دخلك اختيي واشنو مشى ليك توسط ليا ولا ماتوسط نتيي مااالك

حياة:اااش كااين مااالكم اسمااء ؟؟

دخلات وسدات موراها الباب وهند جهدات التلفازة وشعلات الشيشوار باش مايسمعو حتى كلمة واخا كلشي بدا كيطل للداخل فاش شافو فاتي بدات كتصنت عند الباب شوية وهي تفرعو عليهم دخلات كتغووت..

اسماء:على مصلااحتك كندوي

فاتي:ميي ولاا باا اختي تدويي علياا دوي على رااااسك وفاسريها على راااسك مالكي ماكتبغييش الخير لعبااد الله ضرك الحااال غتشوف ليا ومماتشووفش لييك ماكرهتييش تديها فبلاصتي يااك

اسماء:كون بغييت نمشي راه من غظا نصبح تما ونتي اكثر وحدة عارفة هادشي راه خيير مني كنهضر علييك حيت انااا اللي عارفة اشنوو كاااين وضبري راااسك ماشي تايمشييو لييك فلوسك وتجي تبكي علينا

سعاد:صاافي ماوقع واالو داباا

فاتي:لا بلااتي بلاتي انا نجي نبكي عليييك نتيي جيتي غير البااارح باقا ماسخنتي تابلااصتك ونبكي عليك لهلاا يحيييك تحل ليك لفم كنتي غا درويييشة وضاربة طم باان عيييبك ادخلي لسووق راسك وفاسري على مخك اختي مماتدوي علياا ماندوي عليييك ماشي نتي ماطفرتييهش تا بنادم مغيطفرش دخلي سوووق رااسك

اسماء:الله يخلف عليييك سيري منك ليهم الله يطليكم ببعضياااتكم

فاتي:وااسيري ت*وديي شكون شاورك تنقزي غييير بوحدك انا وسيدة كنهضرو ونتي راخية ودنيييك ااش صورتي داباا غتعكسي ليا طريقي عما كاينة غييير هي

اسماء:جمعي فمممك جمعي فمك خليني محتاارمااك

حياة:اسماا صافي (تلفتات ف فاتي)صااافي نتي برااكة من الهضرة الخانزة ناس كيسمعو

اسماء:ايوا لاداااتك رااني بحالك نتي ماطفرتييه تاهنا بقا غييير لهييه غتمشي ضحكي فيه غا عبااد الله

فاتي:واديها فرااااسك نمشي تانا نضبر على شمكاار النهار لخر نولي نضور ب بنتي فديور الكراا

اشناء:واا الله يخلف علييك بقات ليك غير بنتي تعيريني بيها

حياة:اسماا صافي خرجيي..صاافي شوهتوونا تفوو

اسماء:هاهي خارجة ينعل بوو اللي هضر معاكم

جراات جلابيتها ودفعاات الباب خارجة وكتلبس فيها والكليانات غير كيشوفو مافاهميين والو وهي غير كملات طرات تسنييم من ايدييها ومشات خارجة وحياة وسعاد تابعينها كيغوتو حتى للباب ماقدروش يخرجو حيت ملابسينش حوياجهم بقاو غير كيشوفو فيها وهي غادا كتجر فرجلسها وتسنيم كتجري حيت كانت اسماء كتمشي بزربة...

فالدار لداخل او فبيت الكرا عند اسماء مزولة عليها جلابة وشادة تيليفون عند شرجم كتهضر وتحرك فايديها من طريقة كلامها وغوااتها كيبان شحال كانت معصبة..

اسماء:شوووفي شووفي حياااة انا هاد الهضرة ماعندي مانديير بيها انا اختي من لول ماااشي مكاان(سكتات شوية كتصنت لليها) ك كيفاش ..كيفاش سوء تفااهم وهي غير فرعات عليا الباب حطات ليا الصغير والكبييير من نهار عرفاتني وهي كتجمع وليوم تفركعاات لياااا هذاا شحال كنشوفها هي وهند هازين مني شوكة وباغين غير سبة فين يدكوووها ...م ما ماكين بااس دابا حتى انا ماقلت والوو والله يطيرني على بنتي لابقيت قلت شي كلمة عليها ولا دوييت معاهااا ..ل لاا موحال نجي غدا را تسنيم تزاد عليها الحال غير دخلاات طاحت اختي كتفوور بالسخانة والخنيشات مابقااو قادين واالو ..امييين امين بسلاامة و وااخا ماكين بااس ماكين بااس

قطعات عليها ولاحت تيليفون كانت نزلاات الضلمة شوية ومشات جلسات فوق ناموسية جنب تسنيم كتلمس فيهاا مخلوووعة وغير مهدنة رااسها ملي دخلات لادار وهي تهز ليها بالسخانة مابقاتش بغات تنزل رغم الادوية والتبريد اليدوي باقة كيف هي، فكرة تديه وفكرة تجيبها وغير السبيطار اللي فبالها ولكن مابغاتش تصرع وتخسر الفلووس فلكلينيك حيت تسنيم ماشي اول مرة ليها تمرض وبعد اي مناسبة ضروري ماطييح مورااهاا...

كيف العادة المهدي ضربات الستة ديال العشية وقف قدام باب الصاالون مقابل اللي دخلات واللي خرطات حاضي مع الباب لا تخرج اسمااء وتبان لييه ويشوفوها كيف العادة فاش كيجي وكتخرج مرة مرة تتودع شي كليانة ولا تعلق الفوطة فالنشار برا كيرمي عينو عليهاا،عشية هاد النهار مبانتش ليه ابدا ومالمحش طيفها لا فالصالون لداخل ولا على برا عيى يتسنى وعيى يطل بعينيه ماباان ليه حد ولكن ماستسلمش خدا قهوة دياالو وكارو جنبو وطلع زاج فيمي بقى داخل الطوموبيل مرة مرة كيلوح عينيه لجيهة الصالون..!

قدام العمارة واقفة سعاد وتيلي فودنييها وعينيها كيتسارااو على الدرب حتى رمات عينيها لفوق وهي تبان ليها اسماء كتطل عليها حتى هي بحالها دايرة تيليفون على ودنيها وكتشوف من لفوق

اسماء:طلعي عندي انا راه مغنخليش بنتي مريضة وننزل

سعاد:وغيير هبطي عندي عفاك مزرووبة والله راك عارفاني ماكنقدرش نشوف بنت خويا مرييضة قلبي كيضرني والله ماتخلينيش ليوم نبات نحلم بيها نزلي عندي

شافت الخط تقطع عليها وهي تحيدو من ودنيها كتقلب شفايفها بقلة صبر وتقلب فعينيها حتى بان ليها الباب تحل فوجهها وهي تبسم دغيا وتمات قاصدة اسماء تسلم عليها وهي توقف بايديها..

سعاد : ماالكي اختي درتي هاد الحاالة ماالكم

ماجاوباتهاش اسماء مرصية راسها معلية حجبانها فيها مكترمش الشي اللي خلا سعاد ترتابك والحروف يوحلو بين سنانها

سعاد: والله انا غير خير مني قلت زعما نهضر عليها مع خويا والله مابنيتي شي حاجة بغيت ربي يطيرني ليوم قبل غدا مانويت ليها ضر انا اختي مابقيتش كاع نتدخل ولا كااع غنرجع عندهم صاافي

اسماء:انا والله ما شغلي سيري ولا جلسي ضبري راسك معاها الله يقطع ليا لسان ايلا رجعت هضرت عليك ولا عليييها

سعاد:والله ماغنرجع صاافي بردي شوية بردي انا مزال غنرجع تما ونتي ماكيناش ونزييدك فاتي تاهي تهزي همهاا هاديك فيها غير الهضرة راه غير تشوف البحر دووخ اصحبتي غير شديت بخاطرها ومابغييتش نخسر ليها

اسماء:ضربتيها لعين العورة زعماا شادة بخاطرها ونتي عارفة البنت كتموووت على الغربة راه حشوومة تشدي بخاطرهها ليوم وغدا تكمديها و وضبري رااسك معاها انا والله مابقيت مزال ندوي على شي حد..يلاه بسلاامة خليت بنتي بوحدها مابغيتيش تطلعي

سعاد: زربااانة والله ومابغيتش نشوفها هكااك هاكي هاد دوينينات عطيهم ليها تاكلهم وشوية د الحليييب غدا نرجع نشووفها ولا نصوني ليييك انشااء الله

مدات ليها صاشية من الحجم الكبيرة كتبان تقيلة بالدانونات والحليب ولي بيسكوي شداتهم اسماء وحركوت ليها راسها بايجاب

سعاد:يلاه الله يعاون بسلاامة الله يجيب الشفاء

اسماء: اميين..

خلاتها مشات وطلعات لدارها لفوق حلات عليها للباب وسداتو موراها حلات التلاجة تحط داكشي حتى كتسمع تسنيم كتنيين وهاد المرة وهي ناعسة وكتهضر بحالا كتلهوس غير قربات ليها اسمااء وهي تقفز كتبكي مغمضة عينيهاا كتدخل وتخرج فالهضرة واسماء قلبها تخططف من صدرها ولات كلها كترجف وتحاول تقييص فيها وهي تلقااها سخونة كتفووور كلها حمررة والسخانة اللي فيها مكانتش عاادية ابدا قفزاات بسسسرعة حلاات الباب كتعييط على واحد جااارتها

اسناء:ربييييعة ربيييييعة (طلات عليهل سارة الطالبة من لبيت)

سارة:راه خرجات واقيلة ا اسماء خرجات هي و ولدها مالكي ياك لبااس

اسماء:بنتتي بنتي اختيي كتطييييب طلعات ليها للسخااانة(رجعات دخلات للبيت دايخة ماعرفات ماادير وهي تبعها سارة حتى هي مخلوعة)

سارة:ماتخااافيش راه عاادي هاادشي(مدات ايديها قاصت جبهتها وهي تخطفها دغياا

) ناااري سخوونة بزااف ا اسما

اسماء:جسنيااا حسنياا كااينة (خرجات لبرا) حسنيااااا حسنيااا

طلات عليها وحدة من لبااب مفزوعة

حسنية:مالكي ا اسما

اسماء:بنتي اختي عتقيني الله يرحم الوالييدييين بنتي

الحسنية تخطفات ديك الساعة ناضت لعندها وتكات عند تسنييم كتلمس فيها

جسينة:هادي شاربة شي دوااا اويلي البنت كطيييب اصحبتي فين سهتيني عليها

اسماء :شربت ليها هادي الخنيشة الرابعة وهاهي باقة كييف هي ياكما قوييت ليها مامولافاااش ليها اختي

حسنة:واخطفي البنت للكلينيك يدكو ليها برا غتبقاي تفرجي فيها البنت كتفووور ماعرفتيها سخانة ولا سااالمية ضرباتها...

اسماء: نم..نمش نمشيي نلقاهم دابا نمشي واخاا نجلس لييهم تما

هزاات الجلابة ورجعات حطاتها كتهز وتحط فليزار وفالكراص داايخة وتاالفة ودموع اللي نازلين شلال من عينيها عماو ليها النضر مابقاتش كتشوف والو قدامها وهي اصلا االشوف على قد الحال،والبنات كيشوفو فيها بشفقة قطعات فخااطرهم بزز باش حضرات عقلها ولبسات جلابة وحلات قدام عينيهم غلاف دالناموسية جبدات فلوسها كامليين لقاتهم لبسو تسنييم تريكو ودارو ليها الدجاكيط والقب دفاتها مزياان هاد هزاتها بين ايدييها

حسنية:هبطي نيشااان للشارع طاكسيات موجوديين كون ما كنتش خدامة ياختي دابا نمشيي نعاك

سارة:نمشي معاااك اناا !

اسماء:يلاه اختي تبعيني..

يتبع...