حمام الخلا الجزء 38

وسط المول الكبيير بكازا مابيين لي بوتيك ديالو غادا هازة صاك صغيير فايديها ونضاضر فوق شعرها بعفوية كتدوي مع هند جنبها وتقلب فالحوايج وتعزل ليها وتختار وهند عينيها كيضورو العافية شعلات فييها بطبعها كتبغي تكون هي الملفتة للانتباه غير كتشوف الغادي وجاي كيتبع كنزة بعينيه كتحس السخونية طلعةت لرااسها محاملاش المنضر ومارضاتش والغيرة كتاكل فقلبها...

كنزة : اجي تشوفي هند...شوفي هذا زويين ياك ؟

كان واحد القفطان معلق من الباب كيبان بجوج دلوينات لاعبيين فيه بين البنفسحي والبرتقالي عاطي العين كيشعل ويبري بالحجر لي منبت فييه ولكت تخلات علييه وشافت فواحد اخر بيض وكلو متبت كيضوي ويلمع بالاحجاار لي منبتيين فييه كيبان هماوي وعاطي للعين...

كنزة :هذا زويين..هذا حسن..نتي راك عرسو خاصك تلبسي البيض ماتلبسيش الالوان...

هند : ااه زويين..

كنزة : حتى تمنو زويين هههه الفين درهم تبارك الله ههه تكرييه ولا تشريه ؟

هند : لا غير نكرييه اويلي غالي..كيكرييو زعما..

كنزة : واخا مكيكونوش يكرييو نكروييه..(شيرات بايديها لواحد البنت) سلاام احبيبة عفاك دقيقة...

جات عندها السيدة اللي كتعاون الكليان تما واقفة قدامها جبدات القفطان عطاتو لهند تقيصو وبقات عي كدوي معاها طاحت شهوتها على واحد القفطاان ووحلات فيه عينيها باعجاب ودييك ساعة دفعات فيه وخلاتو حتى رجع لييه لحضتها خرجات هند بالقفطان البيض وكنزة حطات صاك دغيا ناضت عندها كتقاد ليها المضمة من الخلف وهي كشتوف فالمراية وتعوج قدامها...

كنزة : شفتي زوين...انا عجبني...مرتاحة فيه كيف جااك..

هند : لا زويين صافي هو هادااك...شنو قالت ليك غتكريه لينا ؟

كنزة : دويت معاها صافي غتكرييه لييك على حسابي..قلت ليها على حساب السبت ياك ؟

هند : ااه صافي...

قداو مهمة اللبااس ومشاو تاني كيضورو تما....

كنزة : خاصك الورد والثمر والحنة و..بلااتي نتفكر شنو دارت ليا ماما...الورد والثمر والحنة واللويزة حتى هي وداكشي دالحلااوة والشكلااط..لا الشكلاط العريس لي غيجيبو..شنو غديري فالمااكلة طيبو نتوما ولا غتاخدو شي تريتور..

هند بلعات ريقها مارضاتش تقول ماما لي غتطيب : لاا .. م ماعرفتش يلاه غنشوفو...

كنزة : انا فخطبتي طيبات ليهم ماما وعمتي ههه غير شي حاجة قليلة لي خدينا فيها تريتور..شلاضة دفواكه البحر صاوبتها ختي واللحم دارتو ماما وسبطيلة واقيلا هي لي جبنا من تريتور...

هند زعمات : ااه واقيلا غنقول لماما تطيب حسن ياك...

كنزة : ايلا كانت كتصرعو حسن كاع تريتور يزيد عليك غير بالفلوس...

سواايع وهوما كيضورو وسط المول فالاخر سلاو خارجيين منو بليساشي فايديهم محملين ومقدين ودخلو لواحد الريسطو تما جلسو فييه يتغداو حتى صونى تيليفون وناضت بهدوء مشات كتدوي فييه وكنزة متبعاها كضحك وجبدات تيليفونها حتى كتنهد مبسمة مرتاحة وعاجبها الحال كتفرح فاش كتعاون هكا شي حد ويحتاجها ويلقاها...ساهية فتيليفونها طالعة نازلة فالكونط حتى كتحس بشي خيال وقف عليها وهزات رااسها وهو يبان ليها واحد الراجل بالكوستيم كيبان بعقلو ونقي وهمة وشان حتى بهدوء وبايتسامة جنتلمانية قال...

_مادموزيل..ممكن دقيقة من وقتك...

كنزة : مرحبا اسيدي ياك لباس ؟

_ممكن نجلس..

كنزة فهماتو : وي مرحبا تفضل ...

حرك راسو بابتسامة وجر الكرسي جلس وهي دارت ضارت ناحيتو شوية بلاما تعيق بينات ليه كرشها وهو كيشوف غير قشع كرشها لي باينة قدامها كانت مخبية بالطبلة جمع الضحكة وكحح كيشوف مع جنابو مزيير وهي شدات الضحكة..

كنزة : مرحبا اسيدي اشنو حب الخاطر...

ضحك وشاف جيهت كرشها : م مارديتيش البال...سمحي ليا على الازعاج كنعتادر مرة اخرى نخليك...

كنزة : ماشي مشكل كتوقع...

حدرات راسها كضحك وهو ناض مشى غارق فحوايجو ملي شافها حاملة حيت فاش بانت ليه كانت جالسة وكرشها مكتبانش بخطررة بقات غيير كضحك حتى جات هند جلسات جنبها وقاالت..

هند : مالكي ههه ضحكينا معااك...

كتزة : والوو هههه غير كنضحك..اودي هه..

حركات راسها حتى هي مبسمة كانت اصلا شافت البلان كاامل وكيفاش هادااك راجل وقف عليها وكيفاش باينة فعينيه عحبااتو بلعلت ريقها مارضااتش كتطلع وتنزل فييها ماعرفاتو اش عجبو فيها..كتقول فخاطرها علاش هي وماشي انا...اما كنزة نسات الموضوع موللفة وكتشدها الضحكة على هاد الناس لي مزالين هكا كيوقفو على البنات وعليها هي بالضبط بحالا غتعطيهم وقت...وهي عارفة كيف وقف عليها هي غيوقف على وحدة اخرى علم الله بشحال كيخرج من نمرة فالنهار...لي كيضل يجمع فيهم..جاب ليكهم السبرفور الغدا وبداو كيتغدااو وهند دايرة بالها مع الخلاص حتى وصلها ميساج وحدرات عينيها قراتو وهي تضحك كنزة...

كنزة : سلمي ليا على العريس شفتو مصدعك لينا هههه..

تبسمات هند وطفاتو : هانتي تشوفي هههه

كنزة : صافي دابا قلت ليك بقات غير الحلوة ياك...على حسابي نهار توجد نجيبها ليك حتى للدار..

هند : شي حد كيصاوبها زوينة....

كنزة مابغاتش تقول اسماء : ويي كنعرف واحد السيدة كتصرعها كتحمق خاصني غير نلقاها مسالية...الله يكمل بالخير ماتخافيش كلشي غيدوز مزياان...

هند : انشااء الله يارب كلشي يدوز مزياان وتبعد علينا العين ياربي...

تبمسات ليها كنزة وتغداو بجوج بيهم حتى كملو وهي تحل كنزة صاكها حطات الحساب ليهم بحوج وخرجو من تما وصلاتها لدارهم عاد رجعات للدار...ويلاه ضورات الساروتو غتدخل وهي تسمع صوت الهضرة كثييرة وضحك خفييف لدااخل....عقدات حجبانها باستغرااب ومع بسمات الباب غير شافت عكوزتها ام عماد قلبها ضررب بجههههد حاسة بالسخانة طلعات ليها للرااس زايدة كتحل فالباب وتشوف شكون غتشوف جاي معاها ماعرفاتش علاش هاد اللحضة بالضبط جا فبالها عماد هو اللي يكون جا...

لكن خاب ضنها ملي شافت غير سلوى اللي معاها جالسة فالجنب....اصطنعت الابتسامة بارتياك ودخلاات...

الحاجة : عمرك طوييل ابنتي..يلاه كيف جبدنااك..

كنزة : يااك هههه (دخلات) اهلا خالتي فوزية كيف دايرة لباس علييك....

تحنات كتسلم عليها وفوزية عنقاتها بحراارة ضاحكة...

فوزية : تربح بيك الحنة يابنيتي جلسي حدايا جلسي نشووفك تبدلتي عليا

كنزة سلمات على سلوى كضحك : هاني جاية نجلس حداك..الزين صافاا لباس علييك....

سلوى : صافا الحمد الله ونتي..(قاصت كرشها) عميتو كبرات تباارك الله...

فوزية: كيف دايرة ابنتي وكي غادة مع الحمالة علاش عاطية الجهد لرااسك مابقى ليك قد ما فات ارتاحي شوية باش تسهال عليك الولادة..

كنزة : بالعكس اخالتي عاد مشيت شفت الطبيبة قالت ليا بقاي تحركي بزاف...مزيان ليا..كي دايرة حسناء و دراري كامليين لباس عليهم...

فوزية : راهم بخير الحمد الله تشوفي تقولي بعقلهم غيير يتجمعو عندي كيحمقوني مانعرف نشد بخاطرهم هوما ولا لولادهم..

الحاجة : الله يطول فعمرك الالة فوزية راك نتي لي باقية شاداهم وجامعاهم...

كنزة : كيبقى عمي شوية لباس علييه ؟

فوزية تنهداات : فةمان الله ابنتي باقي كيف هو الله يجيب ليه الشفاء ويخليه لوليداتو...

قالو كلهم اميين بالقلب الخالص والحاجة مجهزة ليهم الطلبة وفرحانة بيهم..داويين بيناتهم هضرة تجبد هضرة وكنزة كل حاجة كيقولو كتخاف يجبدو عماد وسط كلامهم ويبان ارتباكها وتورتها ليهم ساعة طيلة جلوسهم ماجبدوهش ابدا على فمهم والاغلبية كلامهم على للولادة..

كنزة : بصح بغيتي تمشي يلاه كتبان هههه غير شوية هه نشوف ممشي جمعة ولا سبت صباح !

سلوى : نوو سبت مشغولة شوية ههه ياك اماما...مشغولين والله نمشيو جمعة عفاك واخا ؟

كنزة : صافي انشااء الله نمشيو...حتى نتي اخالتي غتمشي...

فوزبة : وعلاش لا نمشي نشوف بنت ولدي( دوزات ايديها على شعر مبسمة بحسرة عزيزة عليها) خسارة لي خسرك ابنيتي قلبك بيض وباين على وجهك فين نلقى بحالك...كاع عيالات ولادي الحاجة على مندروشاتهم وحتان فياا ومايخسروش خاطري وحتى كمزة غير شفتها قلت هادي ليبغى قلبي لولدي..ساعة مكتاب الله كيتصرف مكرهناش...

سكتات كتزة بارتبااك مارجعات قالت حتى كلمة مكتحملش هاد السيرة وفنفس الوقت كتبغي تسمعهاا...قلبات الموضوع رجعاتو ضحك وشدات معاهم الحديت حتى مشااو...وهي تنوض ليها الحاجة تاني..شفتي عكوزتك اش دايرة عليك شفتي فين غتلقاي بحالها...وشوفي هادي وشوفي هاديك حتى هربت لبيتها كتنفخ...

يوم بعد يوم وكنزة مرة تمشي لدارها تطل عليها وتدي ليها شي رحيل كتنقل غير بشويا بشويا...مرة تطل على الحانوث..حتى ليوم السبب كانت اسماء فالكوزينة محنية كتقاد فالسولوفان على البلاطوات دالحلوة غير سالااتهم خرجات عرقاانة كتنش على راسها عيات وجلسات فالصالة كترتاح وكنزة دايزة قدامها مصيفة شبه عريانة كضور فالدار...

اسماء : سخفت والله العضيم ندييو معاها غير الاجر واخا مكتستاهلش..

كنزة :حشومة علييك والله العضييم..واخا هكااك ضريفة..غير الانسان لي مكيكونش منافق وصاحب حاجبتو سبحان الله حتى حد مكيبغييه..

اسماء : ممم شتي عادشي كاع لي قلتي مجموع فيها غير مزال ماعرفتيها...عطيها ديك الحلوة وجمعي وطوي راه انا لي خدمت معاها سنيين متعرفها اش كتسوا..

كنزة : واصافي تانتي صافي شكون لاقي الراحة فالخدمة..ضروري بنادم خاصو يخرج عينيه فالخدمة يلاه يدير بلاصتو نتي غا كنتي دروييشة لعبو عليك العشرة...

لبسات عليها عبياتها وهزات النضاضر وتيليفون وقالت كتشوف فساعة..

كنزة : اويلي تعطلت على البنت تئ...

اسماء :صبري صبري وصليني معااك بلاما نجيب محمد حتى لهنا...

كنزة : راك بعييدة علياا غنطول عليا الطرييق اصحبتي..

اسماء : ياااك اختي...ياك طريق وحدة يلاه حطي ليها حلوتها ورجعي وصليني لداري يلاه....تعرفي غير تسخستيني ونسخسخ راجلي حتى هو مسكين حتى لهنا على قبل هند...على فعايلها زينيين..

ناضت كتقاد فشالها وكنزة تنهدات ونزلت سبقتها وهي سلمات على الحاجة وعطاتها شي حاجة فايديها ومشات خلاتها كدعي معاها ديما فينما تجي كضور معاها وتصاوب الحلوة بالزيادة تخلي ليها باش تقدي عاد كتمشي ورضى الحاجة ديما تابعها...طلعات جنب كنزة وهي كسيراات مباااشرة لدار هند غادة وكتشوف فالسااعة وتولوب كانت التلاتة ونص تعطلت عليها...

اسماء : شكون هذا شفتيه ؟ كيداير مايكون غير شي شمكار طاحت علييه...

كنزة : الله اعلم قالت ليا لباس علييه وضريف معاها وديك نهار هي معايا كل مرة يدوي معاها ويقوليها اش خاصك ويسيفط ليها فالفلوس...

اسماء : ايوا هانتي بعدا صامت وغتفطر عليه برزقو....

كنزة : حتى نتي غير الرااحة اشمن برزقو تكون عندو غير بيكالة ونرتاح معاه حسن من الف طوموبييل وفيلا..

اسماء : والله العضيم...طلعي زاج طلعي مابغيت نتلاقى مع حد...كرهت هاد الشارع كيفكرني غير فالويل لوتمارة لي ضربت...

ضحكات عليها كنزة وطلعات ليها الزاج وطلقات موسيقى خفييفة غادة وكدندن معاها بعد مدة طويلة علد طلعات مع الشاارع لي فيه دار هند وهي كتقرب كيباانو ليها جوج طوموبيلات واقفيين قدام باب داارهم وحدة مسدوظة وتانية عاد كينزلو منها شي ناس...

وقفات بعييد كتوجد فالبلاطوات وقالت....

كنزة : ويليي ويليي على شوووهة الناس وصلو وانا عاد جبت ليها الحلوة

اسماء منزل جاجة قدامها متقاد شال مامسوقاش : عيطي عليها تنزل عندك ولا تسيفط مها خلينا نمشييو...

كنزة : صبري اصبحتي بلاتي...

قادات البلاطواات وتأكدات منهم عاد جبدات تيليفون غتصوني ليها وعينيها مرة مرة كيشوفو فالناس لي دااخلن عندها...حتى لواحد اللحضة وبعفوية هزاات عينيها ورجعت شافت فتيليفون وبسرررعة عااودت هزااتو كتشوف قداامها مخررجة عينيها وتيليفون طاح من ايدييها وقلبها ضرررب بجهههد تلاتة الضرباات ورجع كيضرب بجههد غيسكت...تهههز قلبهاا من بلاصتو وحسات بيه من صدرها غيخرج....وعلى حرقة تحرقااات ماتحس بيها غير لي جربات وعاشتو وزوجات راجلها بايديها وعطاات حبيبها بايديها...وخضرات لخطبة الانسان اللي بغاتو وحلات عليه عينيها برجليها...تلجم ليها اللسااان وفشلو عليها عضاامها مابقاتش حتى كيفاش تحرك وهي تلفت عندها اسماء...

اسماء :عيطي ليها....وا كنزة..مالكي كننزة

حكراتها كتزعزع فييه كتشوفها مصدومة حالة فمها وهي تلفت مستغربة شافت فين سااهية غير بان ليها عمااد وهي تخررج عينيها وهو داخل للدار كيحضحك بالكوستييم والكرافاط والصباط كيشعل هاز واحد البواط كبييرة شوية فايدييه...اللون هرب من وجهها وضارت عندها مخلوعة باغة تبكي كتررعد...

اسماء :كنننزة اختي هااني شوفي فيا شووفي...حضري عقلك اختيي ...ماشي عمااد غير كيشبه لييه ماشي هو آ كننزة

تلفتات فيها كنزة عينيها حمريين ودموع نازليين كيجرييو يلاه حلات فمها بياض عليهااا بزز غتدوي وهوما يدوزو جنبهم جوج بناات وكلامهم نيشاان طاح على ودنييها...

_اويلي على شكون هند اللي عاد جات من ساعودية راه خطبها واحد لباااس علييه اويلييي ضريب الصداق قالت ليك عندها هاد السيمانة نتي فين عايشة اويلي مافخباركش ؟...

_شي ساعودي هذاا واقيلاا

_الله اعلم مهم راه تعارفو تما علم الله منين ضبرات عليه بوكو حبة را تاهو مطلق علاما قالو...

طرطقات عينيها فاسماء وزلزاال واشمن زلزاال من العافية هز قلبها ودمووع دايزيين كيجرييو قد حبة الرمان مع خدودها بحررقة شاعلة فصدرها...ماقدرات تنطق ختى حرف متشوف ففيه داهل واسماء مضاربة معاها تقلب عينيها منو كتبكي حاسة بيها...

حتى لواحد اللحضةوهي تهز ضفاارها ونزلاات بيهم خدوودها بجووج بييهم حتى خلات كابليات ححمرين مصوريين فيهم مصدوومة حالها فمها وعينيها وايديها كيححلو البااب باغة تنزل فاااشلة كتبلع فرييقها على خلق نااشف وهي تشدها اسماء..

اسماء :مااشي هو وللع ماهوو اكنزة بشويا علييك شوفي فياا رااك حاملة فكري فبنتك بشوياا علييك... اويليي اختي غيحقمك الله يعطييه المووت الله يعطييهم شي حرقة تحرقهم هاد نهار ولد الحرااام اكنزة بشويا علييك عار الميمة اختيي....

كنزة بدون شعوور بحالا كتهلوس : عماد غيخطب...

اسماء ميتة بالخلعة عليها : كنزة ..كنزة اختي بشويا علييك ماشي هو ماشي هو شوفي فيا ( كتللفت تشوف غير كيباان ليها كيضحك ناشط حاددر راسو ميقاد فالكوستيين كتزيد تعصر عينيها من دموع) شوفي فيا اختي يلااه نمشيو ماشي هو والله ماهو شوفي فيا كنزة عاار المييمة حضري عقلك...

شداات ليها ايديها دغيا قبل ماتعااود بييهم الندبة كتنننهج شاعلة فيها العافية حتى عرقات مزييرة وعي تعنقها كتبكي وكنزة غير دمووع نااازليين بلا صوت حالة فمها كتشوف فييه مبااشرة مقابل مع وجهها وضحكتو وفرحتو بين عينيها مامشااتش...

وسط طوموبييل عينيها خارجين فييهم وايديها كيترعدو نزلات بيهم على حناكها ندباتهم بجوج حتى كتخلي كابليات حمرين نازلين معاهم واسماء شداتها كتبكي)

كنزة : اويليي اويلي مع رااجلي...اويليي مع صاحبتي

اسماء : الله يهدييك مااشي هو والله ماهو اكنزة بشويا علييك شوفي فيا راك حاملة فكري فبنتك بشويا علييك(بالبكى مخلوعة) اختي غيحقمك الله يعطييه الموت ولد الحرااام اكنزة بشويا علييك عار الميمة....

كنزة : اويليي بايدي دهزتها لييه...اويلي بايدي دهزت عروسة راجلي ولبستها وطيبت ليها وساريتها ووصيتها وجدتها ليه(كتشوف فالبااب كترعد باغة تنزل) غيير طلقي مني طلقي ندي ليها بااش تسربي الناااس عدوزتي كتعجبها حلوتك غير طلقيم ما ماتخافييش

اسماء خرحات عينيها كتشوف عقلها غيخرج :مكينااااش عدوزتك وماكينااش غير هو ولد الحرااام واش خالتي فوزية تجي تخطب لييه ديك المسخة وااش تسيطيتيي تنويها فيها...

كنزة : طلفي نتيي غير طلقي ن نشوف...طلقي ايي ط...طلقي(كتبكي وضحك فنفس الوقت) غير نشوفهم طلقي ا اسماء ماتخافيش...

نتراات منها ايديها بجههد حتى مشات معاها اسماء وجاات شوية وماطيح وحلات الباب كترعد نزلات ضايرة لور وهي تنزل اسماء دغيا تبعاتها..

كتزة : حيدي من قدااام واااحيدي ماتخاافييش غير نوصل ليها شغلها...

اسماء : اشمممن شغلها الله يعطيها المووت بنت الحرااام (ضربات دوك البلاطواات حتى طاحو فلرض ولكن ماتشتوش شادهم سولوفان وهي تنزل كنزة كتجمع فيها دايخة ) يلاه فحااالك شوفي رااك حاملة واش باغة تقتلي بنتتتك فطرييق مسخة ديال الخلا ماخلات لمن عطااتو تقتلي بننتك على قبلهم الله يعطيهم الغراق بجوج يلاه اختي نمشيو...

كنزة ترفعاات وعقلها مابقاش معاها مابقاتش حاسة باش كيوقع بجناااابها هزات البلاطوات فايديها ومشات بناحية الباب مخلية باب الطوموبيل محلول حتى سداتو اسماء وتبعاتها مخلوعة كتنهج شادة كرشها....

غادا ناحية الباب عينيها على الشرجم الفوق لي خارج منو صوت التزغريت..ظفكل مرة يترفع فيها صوت التغزريييتة كتشهههق حتى ك ينزلو دموعها كيجرييو وهي تحل الباب ديال الموبل وطلعات كتقلب على الدار حتى بانت ليها واحد الباب محلول والفراشة حمرة مفرشة قدامو وصوت الضحك والتزغرييت خارج منو وهي تمشي ليها بدون شعور ماحاسة بحتى حاجة كديرها...

ومع الطلعة تلاقات وئام خارجة من باب دار والقفطان جوهرة كيلمع لاابسااه غير شافتها جمعات الضحكة وخرجت عينيها حالة فمهاا كتشوف فيها حالتها حاالة بالدمووع كلها كترعد ماقاادراش حتى تطلع مقاادة..

وئام : كنزة ؟؟؟...(قربات عندها ) ماالكي اختي ؟

عبنيهاا تاقبين ورا وئام كطل دااخل الدار واش تبان ليها شي حاجة ولكن واالو مكتبان حتى حاجة دااخلهم...وئام كتدوي وهي كتطل لداخل وغير بانت ليها هند دايزة كتسلم رجعات لورد دغيا كتنهج فااشلة حاسة براسها ماشي هي هادييك وهي تلوح لوئام البلاطوات ورجعت خطوة لور...

كنزة : ه..ها ه هاكي عطيني..ع عطييهم عطييهم لعما...(دايخة كترجف)عطيهم لختك عطييهم ليهاا..

وئام : مالكيي اختي نجيب ليك تشربي ؟؟ ياك لباس (شافت فاسماء)مالها اختي...

اسماء : يلاااه صافي..يلاه نمشييو....

جراتها اسماء من دراعها وماتزعزهاش مزال عينيها على دار لداخل باغة تشوف ماكرهاتش تغبر ماتبقاش تبان وتدخل تشوف اش وااقع عندهم اش كيقولو وشنو لي مفرحهم ومخليهم كيضحكو هكاك...

غير سمعات شي حد كيعيط لوئان وجاي خارج وهي ترحع لور دغيا ونزلاات كتزرب فالدروج شادة كرشها واسماء تبعاتها بشويا حاسة بالسخفة دمووعها دايزيين ماابغاوش يحسبو من عينيهاا خلاو وئام ممصدومة كتشووف فييهم حتى خرجت عندها هند كضور فعينيها بواحد الايلاينر مجببد وليلونتي رماديين فعينيها منهم كتبان قويييفزة وحارة...

هند : سدي الباب ودخلي ...ااش داكشي ؟

وئام : جابتهم ديك البنت كنزة...ناري حالتها حالة ماعرفت ماالها كلها كترعظ اصكعة بحال شي واحد مسكون وكتبكي ااه ومعاها ديك البنت لي عندها بنية صغيرة كانت خدامة معاك فالصالون...

هند : اهيا ناري على فال علاش جاية تبكي عليا الله يستر...واقيلا شافت راجلها لول وتفكراتو هههه...يلاه ندخلو خليها نمشيو الله يستر على فال تبكي على كّنسها....

وئام : خطييبك كيحمق كيبان ضحوكي هههه

هند : ضحكي تانتي راه عندو خوه...دوزي الحلوة من لهييه مادوزيهاش قدامهم يشوفوها زوينة ياك..

وئام : فننة حسن من لي جابت ماما غير منظرها كيشهي...

دخلو بجوج كيضحكو وخرجات اسماء وكنزة كيبكيو من باب العمارة راجعين للطوموبيل امتى السعد يضحك ليهم ولا مكتاب عليهم غير البكى عمر وجوههم يضحكو زعما...ركبات فطوموبيلتها محطمة ومضمرة ووااحد العافية شاعلة فصدرها غصتها قاصحة وصعييب تبلع ليهاا فشلات على الفولون كتبكي فاااشلة مدمرة ماقدراتش تنساه ماعندها مادير بغاتو ماشي حب عادي حتى ولا كيبان ليها كيخون وثقة فيه عمرها تكون...ايلا مادواش معاها يعني كيدوي مع غير ها وايلا ماباتش معاها يعني بايت مع غيرها مرضات بالشك والوسوااس..

اسماء : قلت ليك ياك قلتها ليك راه بنت الحرام راني اناا لي كنعرفها بعدي منها اكنزة ونتي حالة فمك تابعااهة واش صاحبتك فيين كنتي تعرفيها وانا لي خدمت معاها وعمر خاطري رتاح ليها وعمري حليت ليها باب دااري رااه تدي رزقك وتدي ولادك وماتحنش فيك... وهي مها وماحناتش فيها خلاتها وراها تسيق فدروجات عباد الله ومشات للاماراات وغتحن فيك نتي...

صاقت كنزة عينيها ضبابة بالدموع كلها كتررعد باغا غير تهرب من تما...حتى عنقاتها اسماء كتبكي كثر منها محروقة معاها...

اسماء : مايستاهلكش شلا باش بدلك بشمكارة ديال الخلا ماتبكيش عليه الله يغرقهم فبعضياتهم صافي ماتبكييش اكنزة والله مايستاهل...

طريق كلها وهي تسكت فيها مرة تعايرو مرة تعيرها مرة تجمعهم بجوج ودموعها داايزيين كتشهق وتنخصص حاسة بقلبها غيخرج من صدرها بالغصة لي حراقتو فبلاصة ختها...وكنزة مارجعاتش قالت كلمة غير سايقة متبعة الطريق كل مرة تمسح عينيها من الضبابة لي كتنزل عليهم وايد تانية شادة بيها جنب كرشها تزيراااات حاسة بمغص قوي كيضور بيها بين ضهرها وكرشها حتى خنق فيها النفس كلها كتلوى معاه شادة نفسها بزز ماتغوتش بيه حدرات عينيها شافت فكرشها وهزااتو مزننكة عرقانة كتنهج شادة كرشها كتحس بالبيبيي كلو تجمع ليها الفوق كرشها باغي يخرج من فمها....

تخنقااات حتى مابقات قادة تطللع النففس وهي توقف طوموبييل دغيا وسط طريق جاب الله خاوية وجات هي فالجنب وهي تطلق الكرسي دغياا وتلااحت بضهرها علييه كتننههج وتغوت بكرشها...صافي هنا سالات مع اسمااء ولاات سخفاانة كثر منها احتمال تولد قبل منهاا بالخوف...

اسماء : مالكي ماالكيي كننزة بااش كتحسي فييك الوجع شوفي فيااا (غوتات كنزو وهي تقفز كتبكي) وماالكي اكنزة غتقلينيي ماالكي(جبدات قرعو دلما خواتها فايديها كتمسح ليها وجها)

كنزة : عيطي لبابا غنموت عيطي لباب(غوتاات لربي اللي خلقهاا) ااايي غنمووت عيطي لبابا يجي عندي غنمووت غنموووت

ولات اسماء كلهاا كترررعد حدراات عينيها مخلوعة لكرشها وهي تبان ليها العباية الشيبية طبعات مابين رجليها...

اسماء :غتولدي وااقيلا كنزة طرطقات الصقية مااتخاافييش...

كنزة غوتاات مخلووعة عينيها خارجييين: اشننو ا اشنو اشنو طرررطق فيا اشنو طرطرق فيا(كتبكي) اااش طرطقق فيااا غنمووت غنمووت صااافي

اسماء : غير الصقية طرطقات ما ماتخافيش وااش شهرك ماشاداش الوقت واش شهرك هاذاا غ ..غ ن غ غنعيط لماما....لل لبابا مااتخافيش

كنزة :اشنو طرطق فيااا غنموت صافي غنموت غنطرطق من لداااخل...شنوو طرطق فيااا (قااصت تحتها كتحس بشي حاجة نازلة معاها) صاافي طرطقت غنمووت ااااييي

نزلات اسماء دغيا من جيهتها هازة تيلييفون كترعد وتقلب على نمرة محمد حتى بانت ليها واحد طوموبيل دايزة من جنهبم وهزات ايديها كتشير ليها توقف وفعلاا وقفو ليهم واحد البنت وباها...

اسماء : آلوو..الو محمد(كتبكي تالفة) ختي طرطقات

محمد : نعام ؟ آلوو اسماء ااش كاين ماالك ؟ كيفاش طرطقات..

اسماء : ءءء ..هاديك الصقية..الصقية طرطقات ليها غتولد لينا فالطريييق سيفط شي حد عفااك غتموت بالحريييق و وكتبكي...

محمد : فيين نتوما....فينك دوي معايا آلوو

طلقات اسماء تيلييفون محنية عند كننزة غتسطى بالغوااات ودك الراجل شد منها تيليفون مسكيين كبير حتى هو خلعوه دوا مع محمد ونعت ليه فين كاينين وهو يعطيهم محمد عنوان الكلينييك حيت قال غيديها...وفعلا عاون كنزة هو وبنتو هزوها للطوموبيل ديالهم نيشان واسماء سدات باب طوموبيلتها بعدما هزات الصااك واخا هكاك تبتت وحضرت عقلها سورتات طوموبيل عاد تبعاتهم ركبات ونيشان مشاو للكلينيك..لقاو محمد مع الفرمليات والكرسي المتحرك كيتسناوها بييه...كيف نزلو من الطوموبيل دخلوها وهي كسرات الكلينيك بالغوات والبكى مخلية كلشي كيشوف فيها مصدوم واسماء تابعهم داوها نيشان للبلوك وخلاو اسماء غادة جاي شادة على كرشها كلها كترعد بالخلعة باغة تبكي ودموع نشفو من عينيها حتى تم جاي محمد وهوما ينزلو كيجريييو ومشات تخشات تحت دراعو كتبكي وهو كيطبطب عليها مشطون...

اسماء : غيقتل لياا ختي غيسطيها الله يعطييه الموت ولد الحرااام كان غيقتلها...

محمد : شكون هذا ؟ ششش شكون دوي معايا...

اسماء :عماد خطب واحد الشمكااارة قدام كنزة وهي كتشوف تفقصات شوية وماتمووت ليها البنت فالطرييق طرطقات ليها الصقية والوجع قتلها وماشي شهرها هذا كان غيتقل بنتو ولد الحرااام..

محمد استغرب كيشوف فيها ويحلل : كيفاش ؟ و واخا...واخا جلسي هناا جلسي هناا نشوفوهم لداخل ونجي...(جلسها وهي تنوض حتى زعف عليهاا) جلس ماتحركيش يلاه جلسي..(شاف فرانيا)شي قرعة دالماا بالخف...صافا باش كتحسي ضاراك شي حاجة دوي معايا براكة من البكى ختك معاهم لداخل ماعندو مايوقع ليها...

اسماء حركات راسها بلا دغيا : لا لاا ماضارني والو غير شوفها هي..

عطاها القرعة دالمااء شرباات منها شوية وسداتها كترعد وهو غممز رانياا تبقى معاها ودخل عندهم للبلوك واسماء مفزووعة كتصنت لكنزة لداخل كتغوت وتبكي لحضات شوية وهو يوقف البكى وتقطع حسها بخطرة...

اسماء :م ما مالها سكتااات (بغات تنوض) س سمعتيها ماالها سكتاات

رانيا : ماتخافيش...غيكونو عطاوها شي كالمون غير تهدني ماتخافيش راه معاها اطباء مختصيين ودكتور الشيباتي راجل ديالك متتخافييش ختك فامان...ختك يااك ؟

اسماء :ااه ختي...

رانيا : ماتخافيش عليها هادشي راه عادي واقيلا مسكينة اول مرة... اه غيرا لوجع ديال الولادة كاين لي مسكينة كتجي وراس ديال البيبي خاارج كيبقى مسكين هكاك حتى كيتخنق ويموت...

اسماء : الله يستتر حرااام علييك بعدي مني اختي الله يحفضهاا ليها مسكييينة حشومة علييك

رانيا قفزات شادة فمها : س سمحي ليا..والله ماقصدت..غ غير خرجات..

سكتات رانيا كتضور فعينيها حتى كتبغي تواسيها زعما وكترجع لسانها عندها خايفة تعورها تاني...واسماء كتزعز فرجلييها بتوتر كلها كترجف وعينيها منفوخيين حمرين بالدموع كل مرة كتهز ايديها تمسح دمعة وتصنت وتسمع شوية تعاود توقف تمشي وتجي وترجع تجلس تقول هي لي شاداها الزحمة ماشي كنزة...رجعات جلسات تاني فااشلة حتى لواحد اللحضة وهو يتحل الباب وخرج منو محمد وهي تبغي توقف حتى هز ايديها حبسها..

محمد :حلسي جلسي تما هانا غنجي عندك (بغات رانيا تبعو حبسها حتى هي ومشى كيقول) خليك ديري بالك معاهاا...

بقات اسماء تما مزيير كتررعد كلها وتبلع فرييقها وتطل من النوافد مكيبان والو وفينما تحل الباب تطل من شقق لاتسمع شي حاجة حتى رجع محمد وجا عندها دوز ايديه على كتافها وضمها عندو بجنب كيدوي بهدوء مريحها...

محمد : ماتخافيش عادي كيوقع هادشي ختك فاسبوعها ستة وتلاتين ياك عارفة شي حاجة...

اسماء :ااه قالت ليا يلاه دخلت بشي جوج سيمانات فشرها تامن راه باقة ماتولدش قال ليها طبييب حتى لنهاهشرين فشهر ستة عاد غتولد باقي ليها شهر قل شي حاجة...

غير كملات كلامها حا يهضرو وهو يتحل الباب وخرجت الطبيبة اللي فحصات كنزة...

_السلام علييكم الالة..اخت مدام كنزة كنضن ؟

حركات اسماء راسها وهي كملات..

_باش نشرح ليه باختصار ءء مدام كنزة جوبونص تقدر من هنا لغدا انشاء الله تولد ايلا كان ممكن اتاصلي بالطبية اللي متبعة الحالة دياالها...

اسماء : وااش غتولد داباا ؟ ولكن باقي وقتها راه قالت ليها حتى لسطاش فشهر ستة يلاه فشرها تاامن

_عفاك تواصلي مع الطبيبة ديالها تحضر او تواصل معانا حيت نوغمالومون خاصها تولد داباا الجنيين الماء لي داير بييه كينشف وماميكنش نخلييوه عندها ولكن الوالدة مزال ماتفتحات...(شافت فمحمد) تجي عدنا الطبيبة ديالها ناخدو التقريير الخاص بيها ونكملو االاجراءات الخاصة الوجع وقف والوالدة مزال ماتفتحاتش امبوييبل تولد دابا..غنقدر نخليها من دابا لخمسة دالسوايع جاها وجع نوغمال دخل تولد ماجاش غنديرو ليها اصطناعي باش تحل الوالدة مايمكنش نخلي عندها الجنين كثر من هاد الوقت سينو غتولد سيزاغيان..عفاك تواصلي مع الطبيبة ديالها...

حركات ليهم راسها مبسمة ومشات واسماء كلات لداخل بانت ليها كنزة متكية على البياص هازة راسها لفوق كتنهج وشي فرمليات ضايريين بيها..

محمد : صوني للطبيبة عندك الرقم ديالها ؟

اسماء : لاا ماعندييش عند ماما...نصوني لماماا...

محمد حرك راسو : صوني ليها حضري عقلك ماتخلعيهاش...عادي مكااين والو يلاه نشوف..

بلعات ريقها كتقلب على نمرة الحاجة غير جبدات صونات ليها ديك السااعة وهي حتى جوبات بالخف تقول كانت كتسنى...

الحاجة : آلووو

اسماء : الوو ماما..عندك نمرة الطبيبة دياال كنزة

الحاجة : مااالهاا ااش كاين مااال ختك

اسماء : و و واالو..والو غتولد طرطقاات ليها الصقية فالطرييق

الحاجة : وهي صاااايقة ؟؟ فالطرييق ياكما وقت ليها شي حاجة اويليي ادويي ااش كااين

اسماء : واالو اماما تئ والو ماتخافيش راه غير طرقت ليها السقية واقيلا غتولد راه حنا فالكلنييك عطيني نمرة طبيبة واجي الكلينيك...

ملات عليها النمرة دايا كترعد تااهي غير عطاتها ليها خداها محمد وصونى للطبيبة دوا معاها شوية وقطع خلاها جاية عندهم فالطريق مدهوشة حيت ماشي الوقت ديال ولادتها ابداا وهي حاسبة ليها بدقيقة وبتانية...

اسماء : ندخل عندها بغيت ندخل عندها عفاك؟؟

محمد : يخرجو من عندها ودخلي واش متقيق فياا..ماعندك مناش تخافي ختك فامان...اجي معايا...

عنقهاا تحت دراعو ومشى بيها بشويا للبيرو ديالو حل ليها الباب دخلات وهي تبان ليها تسنيم جالسة فالكرسي ظيالو كتلعب بالكرسي وتزعلل وضور بييه غير شافت اسماء ضحكات وجات عندهاا ولكن غير لمحااتها كتبكي وهي توقف بلااصتها وغبنت ملامحها...

اسماء : جات معاك...اجي عندي...

قربات عندها تسنيم منزلة شفايفها باغة تبكي شدات فايدياتها وقالت بصوت باكي..

تسنيم : ماما فيك دموع ديال البكي..

تنهدات اسماء وهزاتها عندها جلساتها فوق رجليها كتمشط على شعرها وتبوس على جبينها وايدياتها ورجعت ضمتها عندها...

اسماء :غير ضاراتني عويناتي مكنبكيش اماما...

تسنيم : انبوسهم...

اسماء :نبسوهم اناا(باست ليها عويناتها بجوج ختى قكرو من همد دموع وهي تبسم) ششش لا لاا ماتبكييش نتخاصم معاك ماكنبكييش اماما..شوفي والله مكنبكي غير ضراتني عيني ..ماماك مخلوعة شوية على خالتو كنزة حيت غتولد لينا بنية زويينة وغزيولة بحالك صاافي...

تسنيم قاصت كرشها :بحال خويا لي هنا..

اسماء : ااه بحالو...حبييبة دياليي حنيينة فيا مكنبكييش اماما هاناا كنضحكك شفتي ههههه

عنقااتها كتضحك وتشوف فمحمد مبسم بعينييه خلاهم حتى رتاحو عاد قرب للبيرو وشبك ايديه وقال...

محمد : اش واقع بشويا علييك عاودي ليا شنو كاين ؟

اسماء : قلت ليك غنمشي نقاد عند ماما شي حلوة بغاتها كنزة لصاحبتها ياك...وصلتيني عند ماما ورجعتي نتا وتسنيم...(حرك راسو وهي كملات كتهزهز تسنيم بركابيها ولاخرا كتبقلل فيها خاشية واحد صبع ف فمها)

عاودت ليه كلشي من الدقيقة اللي خرجو فيها من الدار حتى للحضة اللي شافو فيها عماد وهو داخل لدار هند...دمعو عينيها وحدرا رااسها بالعة غصتها ملي كتكفر كيف حالة كنزة وصدمتها باقة بين عينييها..ومحمد مستغرب كيصتنت..

محمد : عماد ؟ متأكدة شفتييه...

اسماء : ااه هو كان غادي داخل م معاه واحد الراجل كبيير هاز فايديه الورد واقيلا وداخل...تخايل شافتو ختي هكاك عرفتي كيف ولات كنقولك غتحماق مسكينة...

محمد: كنضن وقع بيناتهم طلاق ؟ علاش ختك تصدمات شنو كانت كتسنى شي حاجة عادية ضروري شي نهار داك السيد غيكمل حياتو وحتى هي بحالو..

اسماء : ااه ولكن..واخا هكااك راه صعييبة ماشي ساهلة وهي حاملة ب بنتو عندهم شي حاجة كتجمع بيناتهم على الاقل غير يتسناها حتى تولد وهو مزروب غير طلقها مشى يتزوج...

حرك رااسو وهي كملات كلاامها كيتصنت ليها باستغرااب مد ايديه هز تيليفونو كيقلب على نمرة عماد وكيشوف فيها صونى لييه بالخف طلع لييه طافي ورجع حطو حتى يعاود يتاصل بييه...خربقاتو بهضرتها جاتو فشكل وشي حاجة تما ماشي عادية...

محمد : اخر مرة دويت مع عماد...شي اسبوع دابا..وهو من نهار وقع طلاق مع كنزة خارج البلااد..نوغنالومون ليوم كان جتي على حد علمي...فربعة سوايع وصل المغرب تعرف على البنت دوا مع واليديها شافهم تفاهمو وجدوو للخطبة ومشاو خطبوها...شي حاجة لوجيك هنا ؟

اسماء داخت : ءءء و ولكن راه راه هي دوات مع ختي راه تعرفات علييه فالامارات حيت هي كانت مشات للامارات...

محمد : فالامارات كان مع ختك ؟ تعرف على هادي ومشى لعندها وختك فين كانت ؟

حكاات اسماء راسها دااخت كتبقلل وهو تننهد تلفاتو حتى هو مافهمش السيد من نهار طلق كنزة وهو خارج ارض المغرب ويلاه ليوم السبت غيدخل حتى ولا كيخطب...غير وقف وقفات ورااه وشدات تسنيم فايديها..

اسماء : نمشي نشوفها..

محمد : خليك تغداي وجهك شاحب كولي شي حاجة وندييك عندها....

خلاها ومشة جاب ليها ماتاكل وهي على اعصابها جالسة باغة تخرج وماقدراتش حتى كلات شوية غير كتلمق الشهية مسدوودة بالسوارت عندها عاد حيد داكشي وداهاا عند كنزة ...يلاه كانو غادين بناحية البلوك وهي تباان ليها الحاجة وعبد المتقي جايين سلمو مخلوعين ومشاو كاملين للبلوك...

من بعيد بانت ليها كنزة متكية راسها على البياص دخلات عندها قدام الفرمليات كتشوف فيها مرتاحة كترمش عينيها بتتاااقل شادة كرشها...

اسماء : كيي بقيتي باش كتحسي شوية دابا اشنو قالو ليك...

كنزة : غنولد قالت ليا غنخليك ربعة دسوايع ايلا تفتحات الوالدة غنولد عادي ماتحلاتش غندير عملية...

اسماء : صاافي..صافي ماتخاافيش عادي دغيا غدوز بالعكس زويينة والله ماغتحسي براسك حتى يعطيوها ليك

كنزة : خلعيتيني قلتي ليا طرطقات ليا شي حاجة توقع لبنتي شي حاجة بسباابو نقتلو ونقتلها(دمعو عينيها) الله يعطيهم العداب بجوجهم

اسماء : م مايغوقع والو طبيبة ديالك حتى هي جات راه عادي واخا غتودلي قبل الوقت هوما عارفين خدمتهم...ماما جات عندك نعيط ليها تدخل عندك ؟

كنزة : غيير خليني ماتقولي ليها واالو ماقادراش نسمع لكلامها ماقلتي ليها واالو يااك...

اسماء : لاا لا..خليتها كتدوي مع مو باش تجي راه عيطيت ليهم واقيلا جايين فالطرييق...

كنزة حركات راسها سخفانة بالكالمون: بقاي معايا...

الوقت كيدوز وكنزة كل لحضة داخل عندها شي واحد..مرة الحاجة مرة الطبيبات مرة اسمااء مرة تسنيم تضور بيها وهي كضحك سخفاانة شادة كرشها وراخية راسها والحاجة كطبطب عليهاا وتمسد على كرشها مرة يدخل محمد يشوفهم ويرجع يخرج حتى و مشطون مع المرضى لي عندو ومشطون معااهم...داز الوقت وعلى ساعتين ونص بالضبط جاو عائلة عماد منهم فوزية وسلوى وخو عماد وحسناء...

بلا دقان دخلو عليها وفوزية وجهها شاحب لاحت صاكها لبنتها ومشات عند الحاجة...

فوزية مخلطة عليها فرحة وخلعة : يااك لباس مالكي امالكي اكنزة بااقي الحال ياك لباارح قالت لك قداامي تالعشريين فالشهر ااش واقع ؟؟

اسماء بهمس قلبات عينيها : سولي الشم*اتة ديال ولدك اش واقع...

سلوى : دخل عندها الطبيب ولا الطبيبة شنو قال ليكم اشنو كاين واش غتولد ؟

طلعات فيها اسماء ونزلات كتشوفها كتشعل من شعرها لرجلييها بحالا كانت فشي عراضة...زادت حقدات عليه كلهم جاو وهو مجااش معاهم لهاد درجة مامسوقش..واخا سلوى فالحقيقة ديما انييقة ايلا نفسها ولباسها مستحييل تبدلهم ومن نهار عرفاتها ولباسها انييق فيه لمسة من اللباس الخليجي فخم وحركاتها ثقاال ومرزنيين...

الحاجة تنهدات : والو ابنتي هاحنا كنتسناو يجيها الوجع ديال الولادة..بقات لييها ساعتين(قاطعتها)

اسماء : ساعة ونص..

الحاجة : ساعة ونص اييه بقات ساعة ونص جاها الوجع داك الطبيعي وتحلت الوالدة غتولد ماجاهاش غيديرو ليك داك ديال بلعاني دياب البراوات وغيفتحو ليها بالعملية...

فوزية : الله يااربي الله اري نسارحها عليك الحاجة (ضمات كنزة عندها) اجي ابنتي كتعدبي اجي راني مجربة وحاسة بيك....

حبسات كنزة البكية وعينيها دمعو وهي متدكرها القبيلة وكتخايل كيفاش كانت فرحتها وهي كتخطب لولدها ةاها مشافتهاش بعينيها معاه لا هي لا سلوى..ولكن قالت ملي عماد تما يعني حتى هوما معاه...ودابا جاية لعندها ماعرفت هاد الخوف واش بصح من قلبها ولا مصطنعاه من عندهاا...تزيرات وسط حضن فةزية وبغات وهي ترجعها فوزية عندها ضماتها بزز عليها حتى دمعو عينيها...

فوزية : رااكي بنتي رصاي بحالك بحال هادوك لي تما ماتفرقك عليهم حتى حاجة وربي شااهد عليا (كدوز ايديها على شعر كنزة) يسحابليك هاني ومرتاح بالو ربي اللي عالم بيه ابنيتي ماينعس مايشوفو...

شافو فبعضيااتهم متحسرين وكنزة حدرات راسها مارضااتش يبانو دموعها قدامهم واخا خانوها فلحضة ماشي مناسبة ابدا..

فوزية : صبري غيير صبري مابقى فد مافات غير تشوفي عويناتها تنسااي عدااابها ...

سلوى متوترة : داباا يااك دابا هي موجودة زعما تقدر تولد البيبي ماغيوقع ليه والو..و واجد حتى هو نوغمالمون يكون واجد للولادة...بلاتي طرطقات السقية....وااش طرطقات السقية ؟؟؟؟

سفيان(اخ عماد) شاف فيها مكمش ملامحو : اشنو غيطرطق شنو طرطق ؟؟اشمن ساقية بنادم ولا روبيني هي شكتروني نتي ؟

سلوى : ماما واش انا دويت معاه دابا شوفي اشنو كيقول..

خنزرات فييهم فوزية يسكتو كتغمز وتعض فشفايفها فضحوها قدام النسااب واسماء غير كتبقلل فيهم حاوها فشكل..

حسناء : شنو قالو لييك البيبي تقلب على راسو واجد للولادة قالو ليك شي حاجة....

سلوى : البيبي نزل للحوض...وصل ليه

سفيان : ايييه شد طاكسي راه نازل غيطل علييك...راه غيطل عليك تلكّاي ليه...واش هادي جهلت ؟

سلوى نترات درااعها منو معصبة : ماما دوي آ ماما...

كنزة : ااااي فففف

فوزية : ماالكي ص صبري ابنتي شددك الوجع كيجييك صبري غي صبري (خايفة وفرحانة فنفس الوقت) غير صبري صبري مابقى قد مافاات

كنزة : مااقدرتش اااي (بغات تبكي) الحرييييق الحريييق اربي مابقييتش قادرة مابغيتش نولد ماقاادرااش نولد اااي وقفوو هاادشي صافي مابقيتش بااغة نولد..

سلوى : ديري تسجيل الخروج ولا مودافيون حبسي لينوتيكاسيون ديال الوجع هههه

حسناء : كيتي الكرووب حسن ليك هههه ولا بلوكييه ماينزلش ديري لييه ازعاج ههههه (ضحكات كنزة فعز وجعها سلوى قربت عند كنزة ) دغيا غدوز غي صبري ههه

حسناء بهمس لخوها : عيط على عماد..فيين بقى ياك طيارتو نزلات باقة شي طيارة اخرى...

سفيان وراها تيليفون : ميكجاوبش شوفي...(غير بان ليه واحد الميساج وهو ينغزها كيضحك بفقصة) هه حسناء..

حسناء : ممممم

سفيان : الواليد جاي..

حسناء : نعاااام؟؟؟ فيين غيجي...(طلات معاه فتيليفون وهزات راسها بلعات ريقها) ماما...حاملة اخرى جاياك فالطريق...بابا جاي...نولدو كنزة بالوجع ولا نولدوه هو بالخلعة...

السوليع كيدوزو فوق راسهم بالعرض البطيئ..خرجو برا مستفيين واحد حدا وااحد كيتسناو وكنزة لداخل مع الطبيبة قتلوها غير بكثرة الفحوصات والتقلاب اللي كيديرو ليها..مرة يجيها الوجع مرة يمشي بخطىة حتى مكتبقى تحس بواالو والوالدة ماتفتحاتش ليها ولا بغات تحل...

واسماء برا كتوجع كثر منها مرة تمشي عند محمد تلقى داخل عندو شي حد حتى كيخرجو وكيدخلها عندو تنسى معاه شوية وكيرجعها عند الحاجة ويرجع تاني يكمل شغلو مشطون معاهم وفوزية دايرة راسها على ايديها والعاائلة ديالها تبارك الله كبيرة كلشي كيصوني وكيسوول وهي حابساهم حتى حد مايجي كلهم باغين يجيو يحضرو للولادة ويشوفو البنية ديال عماد لولى...

دازت ربعة دسوايع بوجعها غواتها وخوفها وصدااعها ولا الوالدة تحلت ولا عنق الرحم توسع..ديك الساعة هزوها للبلوك تفتح حيت الماء لي كيكون ضاير بالجنين بدا كينشف وخاصو يخرج باي طريقة...شدات فايد اسماء عند الباب ميتة بالخلعة...

كنزة : غنولد غيولدوني غنمووت صاافي ماماااا

الحاجة : مااتخافيش غمضي عينييك حليها هانتي ولدتيي بشويا علييك...

كنزة كتبكي شدات فاسماء : يلااه معايااا..

الحاجة : هااحنا معاااك هاحنا جايين...(خرجات عينيها فاسماء )سيري رجعي لهيه اونتي غتولدي قبل منها يخليكم بالخلاا تقول عمرك جربتي....

مشات كنزة وتبعاتها الحاجة كتجري وراها...

فوزية بالحس تفقصات: عيطي لخوك يجي شوهني مع الناس فيناهو هذا ياك قلتي طيارتو نازلة ليوم...فيين بقى ؟؟

سلوى :مكيجاوش طافييه عيطت على الشيفور ديالو

قالييا مكاينش معااه الله اعلم...ففف..

فوزية : داخل لبلادو شهر قبل ماتزاد يحضر ليها كتولد هو عاد جاه اكتئاب وسد تيليفون...لاا حل ولا وقوة ايلا بالله...هاد الولاد غيحمقوني اربي...

حسناء : قال ليك جاي ليوم ياك متأكدة اماما ؟

فوزية : من فمو لودني وعلاش حنا ملي حلينا عينينا وحنا نجريو ونوجدو ونطيبو ليه ونوصي ونعاودو على بيتو يتخمل باش ايلا جا لدار مايمشيش ليا تاني للوطيل داير السبة بالبييت ويقول ليا خنقني...سيمانة وانا فرحانة وليدي غيدخل لبلادو يوم سبت...

سولى كتصوني وحسناء كتصوني كلهم مشعلين تيليفونات كيصونيو لييه والجو عندهم صقل كلهم كيتسناو شي حد يخرج ويقول ليهم اش وقع واسماء غادا جااية عند محمد...حتى لواحد اللحضة وهي تجي بززربة كتحري عنندهم ضااااحكة بتوتر مخلوعة طلات عليهم من الكولواار...

اسمااء :كتولد راه بنجوها كيولدوها....غتولد دابااا بابا شنو غتلبسها ماجبنا والو....شنو غتلبس...

شافو فبعضياتهم كيتساطحو فالاخر خرج خو عماد سفيان وحسناء يجيبو شي حاجة كلشي كاين فدار الحاجة ولكن عبد المتقي سابقة ليه غير جالس كيشوف ماعرف مايدير...

ماولدات كنزة حتى تغفرو ليهم جميع الدنوب...وهي كثر منهم قلبات البلوك لدااخل بالغوااات بغاو غير يبنجوها ماخلاتهم كتشوف ديك البرا عقلها كيبغي يخرج...حتى لاهاتها الطبيبة بالضهرة وهي تبنجها باللخف وتكاتها وبداو فشغلهم...وهي شادة عينيها سخفانة كترمش بزز دارو ليها غير بنج نصفي باش تشوف بنتها ملي تزاد وفعلا بعد لحضات كانت متكية على البياص مكتسحش بنفسها السفلي كاامل دموع دايزيين والعرق كيصب منهاا وصوتها بالغواات والبكى لي بكاات قبيلة وغير عطاوها بنيتها هكاك مكلكمة فدرة بييضة باقة مغمضة عويناتها مكمشة فلحمها حمر ومغطية بقشرة بييضة باقة صغييورة قد الكميشة طلقات دموعها حاطينها ليها على صدرها وهي كتبوس فيها وتبكي معنقها بايد وحدة ماسخاتش يحيدوها ليها...وغير حيدوها ليها حطوها وسط واحد القرعة معقمة مزيااان حتى يكمل نموها وكنزة تكات كتسمع فالفرمليات كيقولو..

_وشحاال غزيييولة فننة تباارك الله دكتوورة اجي تشوفيها....

_غزااالة غزاالة وينووو ماتبكييش احبييبة غتبكي..

تبسمات كنزة بعياء وتكات برااسها على جنب مابقات حاسة بحتى حاجة...لحضات قليلة وهي تغفى وواحد نعسة حللوة جاتها بعد الوجع داوها لغرفة عادية وخلاوها تماا ترتاح مانعين حتى حد مايدخل عندها....

ضلمة الليل طاحت بشويا بشويا كتحل فعينيها وترمش فالصقف البنج بدا كيمشي وبدات كتحس بالالم اسفل بطنهاا مغمضة عينيها كتنفس بزز حتى حلااتهم مزيان وهي تبان ليهة واحد الفرملية واقفة ليها..

كنزة : بنتي...ع عطيني نشوفها

فرملية : حبيبة فقتي على سلاامتك...بنتك كترتاح غير تجي طبيبة وتجيها ليك تشوفيها ماتخافيش لافامي ديالك كلها معاها...

كنزة: عطيني نشرب عفاك...

عاوناتها حتى شربات وقاداتها فبلاصتها عاد خرجات تعلم الطبييبة تجي تشوفها وهي رجعات تكااات حاسة بالطش مزاال كتشوف القرعة فوق الطبيلة وماقادرااش تكعد تهزو غير كتحرك كتحس بوااحد الحريق قاااصح حاابسها...تكات كتنهط سخفاانة حاسة براسها سخنات وعرقات وفمها شحف بغات غيير تشررب وتاحد مامعاها فالشومبر....وغير بان ليا الباب تحل وهي تضور عينيهاا حييهتو وقالت بسرعة..

كنزة : فيينك..اختي عطيني نشرب...

حطات عينيها فالباب كتسنى تشوفها تدخل لكن غير لمحاتو حلاات ملامح وجهها بدهشة وصدمة حالة فيه فمها وصبعها باقي منيش جييهت الباب وهي كتشوف فيه دخل بهدووء وسد الباب ورااه جاي قصدها...بلعو ريقها وقلبها ضررب بجههد ومعدتها حسات بيها خوات كتلوى داخلها حتى بدات كتسخن وتزنك وتلون غير بوحدها...

خلاص ملي وقف عليها وغطى عليها السرير بطولتو حتى ضلم عليها الضو لي كان ضارب فيها...وهي متبعاه بعينيها كتبلع فريقها بتوتر وارتباك باقة سخفانة حاسة بعضامها كلهم كيعطيوها الحريق مضاربة مع نفسها تهز عينيها ورموشها حاسة بيهم متقلين عليهم مقدراتش تا تشوف فيه...حتى تحل الباب وراه وهو يتلفت بعيون دافية مبسمين شاف شكون دخل وهي عاد لقاتها فرصة وهزاات فيه عينييها حققات فوجهو المبشر والفرحة باينة عليه طلعات ونزلات فحوايجو لي مبدلين عكس لي كان بييهم فالخطبة الصباح هاد المرة دخل عليها بسروال دجين وكويرة كحلة والكاسكيط على راسو ورحيتو ضارت بيها كيف الغمامة فارض وجودو بلا جههد...عاد رمشات عينيها وقفات فالطبيبة مع الفرلمية داخلين بجوج بيهم و واحد الكرسي متحرك جاراه معاها...

الطبيبة : مدام كنزة...على سلامتك حاسة براسك مزيان صافا ؟

قبل ماتجاوبها هزات فيه عينيها متبتة فيه الشوفة وكل داك التوتر والارتباك لي كان من ناحيتو مشى وجا فبلاصت حققد قوي وحرقة سيطرت على قلبها حتى دمعو عينيها حمرين كيف شي جمرة وصوت التزغريت اللي كان فدار هند كيتردد فودنيها و ليزار بين صباعها كتزيير عليه وتطلقو حتى حسات براسها غتنفاجر قداامهم كيبان ليها غير فم الطبيبة كيتحرك وهي مخرجة عينيها فييه مابقاتش نزلااتهم حتى سمعات صوت الحاجة دااخلة كتدوي وهي تطلللق النفس بقوة بحال شي حد كان مخنوق وفجأة تعطاات كمية كبييرة من الاوكسيجيين هوما شافو عندها وهي تلفتت مسحاات وجهها ومسحات نيفها عايفة تشم ريحتو لي ضارت بيها ..

الحاجة : عماد !! جيتي اولدي...

تبسم والفرحة باينة فعينيه ملي سمع بزيادة بنتو اصلا وهو ضاحك والضحكة مابغاتش تهرب من وجهو سلم على الحاجة وباس على رااسها وهي ضاحكة رضات عليه ومشات عند كنزة..

الحاجة : هانا جبت لييك بينوارك وحبت ليك زيف حياتي حزمي بييه راسك البرد دنفاس واااعر عليك تاالغدا ونخلط بيك حنيينة ديريها لايدييك(فرحانة) وبنيتك واتزادت ياابنيتي تزااد وكون تشوفيها تحممق تحمممقك غير باها محطوط منصووب

رمشات عينيها وشافت فييه لقاتو كيشوف فيها وهي تبعدهم دغيا ورجعاتهم للطبيبة محركة راسها بعياء كبييير وجهها شاحب وكلامها كيخرج بزز مفرق حاسة براسها كتدوي من مصارنها...

كنزة : بغيت نشوفها..ج جيبيها ليا عفاك...

الطبيبة :مزيان جينا نيت باش ناخدوك تشوفيها عرفتك غتبغي تشوفيها فاش تفيقي..

كنزة : جيب..جيبيها ليا هناا...

الطبيبة : شوفي مدام كنزة نقوليك واحد النصيحة من عندي...حاسة بيك...عارفة بلي عندك الحريييق ومكتحسييش براسك مزيان ولكن ايلا زعمتي من اللحضة الاولى و حاولتي توقفي رااك غتنوضي مزيان وماتحتاجي لحتى حد يعاونك لا دابا ولا فاي ولادة جاية....

كنزة : ماقادراش نتحرك حاسة بلحمي كلو مقطع ماغاديش نقدر...

الحاجة : ايوا راه خاصك توقفي على رجليك راه دكتورة عندها الصح(شافت فيها كنزة بدات كتعصب ملي كيفرضو عليها شي حاجة حاسة بتاحد ماحاس بالحرييق لي شادها)

الفرملية : غير حاولي اختي نعاونوك

كنزة تعصباات : جييبي ليا غير بنتي نشوفها ماابغييتش نوض...اجي جربي فبلاصتي نصك كلو مقطع وكتقولي ليا نوضي...مبرعة بكلوة راني واالدة...

بعدات الطبيبة لور وجا فبلاصتها عماد وهي هزات معاه رااسها كتنههج مراضياش ومحاملاش تشوفو واخا راه من اللحضة لي دخل فيها وترها خلاها كتلون غير مع جنابها وهو يقرب عندها ملي شاف الطبيبة هكاك كتدوي معاها بلطافة والفرملية كتحاول معاها والحاجة حتى هي عرفها غتعصب وتطرطق فوجههم وتطلع للسماء حيت هي ما ديال الخاطر ما ديال الطليب ورغييب....

مرة تشوف فالحاجة مرة تنزل عينيها ليه وهو محني عندها حاط ايديه فوق النامووسية ومنزل راسو ليها عندو شي حاجة عادية ولو انهم مابقى كيجمع بيناتهم والو...حتى حشمها وحشم حتى الحاجة معاها ولات دايرة زيف على فمها وكتشوف من بعييد..

عماد : ماشي كيقولو ليك نوضي يعني بغاوك تعدبي اكنزة كيف باغة تشوفي بنتك حتى ديك الطبيبة عارفاك غتبغي تشوفيها وجات تعاونك...على شحال باقي وقت الولاادة ؟

كنزة شافت فيهم ورجعت شافت فيه : بااقي...مزال مادخل شهري...

عماد : شحال باقي حاسبة ياك عارفة شحال باقي عندك ؟

كنزة : تلاتة دالسيمانة و شي حاجة واقيلا...

عماد : تلاتة دالسيمانات ويومين بالضبط كنتي غتولدي نهار الجمعة(حركات راسها وهو حتى هو حركو بحالها متبع معاهاا المواعد وعمرها ردات البال) يعني شنو بنتك تزادت قبل الوقت ديالها..لباس عليها وماعندك مناش تخافي كلشي معاها ولكن باش تهزيها وترجعي لدارك بحالك...خاصها تكمل وقتها ويخلقو ليها واحد الجو تحس براسها مزال عندك مزال عايشة فكرشك فهميتني...

كنزة لمعو عينييها بالدموع شفايفها كيترعدو حكماتها الخلعة : وااش مريضة ؟

عماد باقناع هز براسو معارف كيفاش حالتها : لبااس عليها وكلشي معاها ناس كيعرفو حسن مني ومنك غتخافي عليها وهي معاهم ولكن عوونيهم حتى نتي... بغيتي تشوفيها دابا عارف صعيبة عليك وحاسين بالحريق اللي فيكى كلهم هوما اللي خرجوها منك وعارفيين الطريق لي دازو منها صعييبة علييه هوما براسهم عاد تجيك نتي ساهلة ؟...وايلا كنتي قادرة تصبري حسن كااع حتى لغدا وشوفيها...

كنزة : جيبوها ليا هنا علاش كنشوف الناس كيولدو وكيجيبو ليهم ولادهم عندهم علاش انا لا....علاش عطاوها ليا فاش يلاه ولدتها كانت لباس عليها مالها دابا...(شدات دراعو باغة تنوض مخلوعة) شنو دارو ليهاا ...

عماد : عاد شرحت ليك لباس عليها مزيااانة ناعسة مزيان مرتاحة غير خاصها الوقت شوية تحس براسها مزاال عنندك حتى تكمل وقتها الطبيعي وغنهزوها ونديوها معانا لاا غير...دابا شنو تعاونيني تمشي يتشوفيها ولا ترتاحي حتى لغدا ديجا داز الوقت نعسي ارتاحي وغير تفيقي نمشيو عندها...

كنزة بلعات ريقها كتقلب على الساعة : شحال الساعة...

نزل عينيه ف ايديه وقال : الوحدة ونص...دلييل..

كنزة : بغيت نشوفها....(حرك راسو بايجاب ورجع لور باش يعاونها تنوض وهي تشوف فالحاجة) ماما اجي عاونيني نوض...

الحاجة تلفات كتمحشم من نسابها : اء ااه ااه واخاا بسم الله...

كنزة :عطيني نشرب عفااك..

مرة اخرى عاونتها الفرملية حتى شرباات ورجعات تكات كتشوف فالصقف مابغاتش تشوف عندو غير كتسمعو كيدوي مع الطبيبة عليها وعلى البنت... فحصووها وضارو بيها من هنا ولهييه موجدينها باش تنوض والحاجة عند راسها كتوجدة فزيف حياتي ديرو ليها حتى حيداتو كننزة مخنوقة...

الحاجة :هدااااي راه وااعر علييك برد النفاس حتى تحسي بيه وتولي دوري تقولي ليا راسي مفوكوك عليا ونتي على سبة...

كنزة : خنقني مابغتيش فياا الصهد غير حيدييه...

الحاجة : ويليي على الصصههد والبينوااار(قاصت لبيسة دالكلينيك) هاد الشرويطة لي غدفيك...

كنزة : غتبقاي تلوي فيا كي ميلفاي ميتة بالصهد اشمن بينوااار..

الحاجة : ايوا

كنزة : خزنيه تاتولد اسماء ولبسيه ليها...

الحاجة تفقصاات بدون شعور خرجت فيها عينيها : لبسيي ...لبسي ماتفقصينيييش

بغات تلبسو ليها تاني وهي تحيدو معصبة غير بوحدها كتنتر وتنفخ وتففش والحاجة كتعض ففمها وتخرج فعينيها ولبساتو ليها بزز عليها واخا غلباتها بعكسها مكتلقى ليها جهد ماشي بحال اسماء دغيا كتغلب عليها... كنزة صعيييبة والتعامل مع عناادها صعب من عناد المعزة...اسم على مسمى...حيدو ليها السيرو وتيرو لي دايز تحتها خلاوها حتى ارتاحت ورجعت نفس مستعدة عاد عاونتها الفرملية والحاجة بجوج بيهم باش تكعد شوية اما طبيية غير كتعطيهم الاوامير كيفاش يديرو عماد كيشوف من وراهم حتى كيبغي يقرب وكيرجع لور متوتر هي كتوجع ناعسة وهو كيتوجع وااقف بحال غينوض فبلااصتها...وغير حركاتها الحاجة مضورة ايديها ورا خسرها جايين بيها مكعدين وهي تفلت ليها ادييها وزلقت بيها على كرشها قريب للفتحة حتى زيرااات كنزة على عينييهاا معصورة كتنين مقادراش حتى تغوت وتطلق صوتهاا من الااالم نزلو دمووعها كيحرقوو على خددها...

كنزة : لا لا لاااا لا....

الطبيبة : طلقيها الحاجة بشويا غير طلقيها...مزيان صافي خليها ترتاح...(شفات فعماد وحرك راسها ) مايمكنش...

كنزة : ماغنقدرش صافي...

الحاجة متأسفة :قصحتها نزلت عليها بايدي قصحتك ابنيتي سمحي ليا فففف..

الطبيبة : صافي ماوقع والو ماشي مشكل...بلاتي نشوف ماوقع واالو ماشي مشكل...شنو بان ليك نخليوك ترتاحي وغدا كنواعدك غير تحلي عينيك تمشي تشوفي بننتك وااخا...

كنزة ضورات رااسها كتمسح دموعها والحريق كيزير عليها : بغيت نشوف بنتي...قولو ليا غير مااالها واش مريضة مالها...

عماد : مااامريييضااش غتمرضيها غير نتي وديري عقلك الله يرض يعليك قلت ليك مامريضاش كدبتي هاد الناس كامليين..واش باغة تشوفيها تعاونيني نزلك عنندها ممم..

كنزة قلبت وجهها : بعد مني...ماتقيصنيش نتا...

عماد : غمعاونك غير بشويا عاونيني ماديري حتى مجهود حطي ايديك وخليها انا غنهززك..

كنزة بلعات ريقها كترمش بهدوء : كفاش !

عماد هز ليها ايديها بجوج بشوية ضورهم على عنقو وهي قلبت وجهها فاش حسات بشعر لحيتو تشاب مع شعرها حاني راسو عندها ...نفسها تزيرات عليها وقلبها كيضررب بجههد...هرب الحرييق وهرب الوجع وهي كتلمس فيه وفكتافو العراض..تخلطو عليها الاحاسيس والقلب غيخرج من بلاصتو حتى ولاو ايديها كيترعدو عليها مزيرة على كتافو..

عماد : زيري ايدك تما مزيان...صافي شديتي(حركات راسها قالبة وجهها وهو حط ايد على ضهرها وايد تحت خسرها تحكم فيها مزيان) ماتحركييش معايا...ترخاااي انا غنهزك بقاي عاادية هكا بحالا جاالسة ماديري حتى فورص ترخاي بين ايدي...خلييك مرخيية...مزيان..

حركات راسها بايجاب ودارت كيف قال ليها بقات مرخية بحالا مكتحركش بخطرة قالبة وجهها عليه حاسة بيه كيحركها بشويا ولحيتو كلات خدودها وعنقها حتى تزنكاات كتبلع فرييقها وعينيها فرقبتو وعلى لحيتو وشعرو الكحل وريحتو اللي كتسارا دااخلها واخدة رااحتها وفارضة وجهدودها عليها بزز منهاا...ماحساات بيه حتى كعدها كااملة غيير حساات بيه حرك نصفها السفليي سداات عينيها باالم وزيراات بضفارها حتى عضاات على كتفو مزيرااه بين سنانها بااالم حااسة بالماس كيضربو فكشرها و واحد العرق كيضرررب تماا بجههد جاب ليها السخفة...كانت الناموسية نازلة لمستوى الكرسي حسات بيه وهو منزلها وهي لاصقة فيه خايفة تطلق وترجع بلور تقصح....كان وجهو باقي جيهت عنقها و بحركة مقصودة منو حك شعر لحيتو مع حنكهاا وقال بنبرة خااافتة ثقيييلة وخاااترة متحرش بيها...

عماد : عنقيني مزيان...

تهزاتت مع كلمتو ماحسات براسها حتى جلسات وسط الكرسي وهو يتبسم وسلت ايديه بشويا وهي دفعو من صدرو عاقدة حجباانها معصبة...

كنزة : بععدد مني...(قلبت وجهها ) باسل...

عماد ساس ايدي ضاحك راشقة ليه : فضحتينا هانتي نزلتيي الفشوش ديال والو....اش هاد الترابي الحاجة...

قلبت الحاجة وجهها حشماانة كتشوف مع جنابها طلعو ليها السخانة بحركاتهم اما طبيبة والفرملية عندهم عاادي كيشوفو كثر من هادشي...

خلاوها حتى ارتاحت شووية والفرملية كتقاد ليها جلستها رجعت ليها السيروم لايديها بعد لحضات عاد دفعت بيها وهو يجي عماد حيدها من ايديها ودفع بكنزة ماشين فالكولوار بشوياا دقة دقة باش مايتعكلش الكرسي ويتزعزع بيها وهو كيدوي مع الطبيبة وكنزة شافت فالحاجة كتنهج بعياء...

كنزة : اسماء معاها...مع بنتي

الحاجة : داها راجلها تعشى من صباح وهي واقفة على رجل وحدة...

كنزة : وخالتي فوزية...

الحاجة : ملي جا عماد سيفطهم للدار قبيلة مشاو حتى لغدا وغيرجعو قاليهم انا غنبقى معاها سيرو غير خرجتي من البلوك جا هو وانا راه عاد جيت من الدار جبت ليك ماتلبسي ساعة مابغيتي تلبسي...

تحلات قدام وجههم واحد الشومبر كبيييرة ابوابها من الجااج ودخلو كانو القارورات دالوليدات الصغار مستيفين وحدة وحدة كلهم خييوط وماكينات كيشعول ويطفااو مغطينهم بواحد الغطاء صغيير والفرمليات ضايريين بيهم كيقلبوهم ويتأكدو علييهم فكل لحضة مكيغفاوش عليهم....

اما كنزة عينيها كانت ملهوفة باغة غير توصل تشوف ديك طريف داللحم اللي خرجت منها غير خطوات قليلة وجاوها بعاد مارتاحت حتى وقفوها قدام القرعة اللي فيها بنتها والطليبة هزت عليها الغطاء وهي تبسسم دغيااا وعينيها لمعوو بواحد اللمعة فشكل زويينة ودغيا مدات ايديها خشاتها فواحد الدائرة وسط القارورة وشدات ادياتها صغيورين وحمريين ورطبييين بحال شي طريف ديال الحرير خايفة تخدشها بلمسات ايديها...تحرك داخلها احساس الامومة كثر من قبل كتلمس فايديها وتعااود خاايفة تجرحها غير بصبعاانها كتشوف فقلبها وكبدتها وطرف منها محطوط تما...

الحاجة قربت عند عماد : انا غنشوف اسماء اولدي تبقى معاها يااك حتى نجي..

عماد طبطب على كتفها : سري ترتاحي الحاجة انا غنبقى معاها حتى لغدا واجيو...

حركات راسها كترضي معاه ومشات وتلفت شاف فبنتو ومد ايديه حتى هو شد اليد لي شادة منها كنزة وهي عينيها محلولين فبها ماحسات بايديه لي ضمو ايديها وايد بنتو بجوج بيهم مابقات حاسة بحتى حاجة بين عينيها غير هي...كان شافها قبل منو ومناللحضة اللي عطاوها ليه بزز هظها فحضنو باس على رااسها حتى دمعو عينييه ولا غير كيشمر بنييفو وشعور الابوة والمسؤولية وطرف منو كيخاصو يتحمى ويترعى ويكبر نهار على نهار بشويا بشويا حتى يجي النهار اللي غتولي حتى هي تجري بين رجلييه وتقلب وتبكي علييه...

كنزة : بنتيي حبييبة ديالي...ديالي بوحدي بنوتي ديالي عيني نعطيها لييك نعطيك كلشي اماما ديالي شحال صغيورة..انا ولدت هادشي انا...

ضحكات الطبيبة كيف ضحكو كامليين مبسميين فيها..

كنزة بفرحة شافت فالطبيية كلامها ثقييل بعياء : ياك دابا لباس عليها مانخافش بنتي غنديها معايا للدار ياك انا نديها لدارهم تعيش معايا بنتي..ياك لباس ادكتورة ماعندي مناش نخاف...

حركات راسها الطبيبة كتشرح ليها وتوضح ليها امر الولادة المبكرة بشوياا وبلااتي حتى فهمات وماخلعاتهاش بالعكس جاتها حاجة عادية غير فعوض ما يكمل نموها وهي فكرشها غيكمل وهي خارجة من كرشها هكا فهمات الامر...مشات طبيبة مع الفرملية وبقات هي وااقفة كتقييص فايدياتها مبسمة واحد التبسييمة زويينة وسط الصمت نساتو ونساها بحوح بيهم ولات كتبان ليهم غير ديك طريف داللحم...حتى لواحد الشوية وهي تهز رااسها فيه وخرجت عينيها كتشوف مع جنابها وهو رد ليها البال ماحس بيها حتى شنقات على كتافو وقالت..

كنزة : ب بن بنتتك رد ليهاا الباال حضييها اعماد راه..راه كيبدلو الدراري الصغار راه كيخلطوهم هادي بنتيي شوف انا معلماها راه عقل عليها مزيان...شوف شفارها طوااال شوف شحاال زويينة كتحممق وشوف شعرها كححل عقل شعرها كحل ورجليها بحال رجلي ياك كتعرف رجلي بحاالهم شوف...حضيها مزياان راه كيبدلوهم اعمااد والله...

عماد باستغراب خلعاتو : ااش كتروني ؟

كنزو : الروينة هي لي غندير ايلا وقعت ليها شي حاجة شوف عقل عليا والله حتى كيبدلوهم شفتها فواحد الفيلم دابا بحال نتا والد فبلاصة اخرى وولديتي ولد ونتا باغي بنت غيعطيوه هادي ويحطو لينا حنا الولد... راه كيشدو زبالة فلوس...رد البااال...

عماد : بررب حتى نفرع زا (قاطعتو دغيا قبل مايكمل)

كنزة : هكاك...هادوك الرجال لي كنتي داير ليا فالايمارات قدام الباب ديرهم حتى هنا وايلا خرجت شي وحدة يشوفو واش هزات بنتي يقولوها لك جي فرعها...

حرك راسو بايجاب عاقدهم كيفكر ويتحلف غير بوحدو سااهي فبنتو شوية بشوية وهو يتبسم وقلب عينيه عنها ضاحك...

عماد : كتشبه ليا...بنت باها...

كنزة مارضاتش : شنو ههه ؟ بالعكس مادات فيك والو شوف شفارها غير شفاري ...

عماد : اشمن شفار هادو ولا داك جناح الحمام لي كتركبي...(خنزرات فيه وسكتات وهو كنل فرحان ) كتشبه ليا اشمن شفار...حلا ديالي...بنت عماد حلا...

فالبيرو عند محمد فين كانت اسماء جالسة فوق الفوطوي والعشاء قدامها...جامعة رجليها قدامها وراخفة الشال عليها غير حاطاه طالقاه على عنقها وايديها فصدر تسنيم ناعسة قدامها كتطبطب عليها وتحك ليها علييه حتى يطيب نعاسها...فينما تضور عينيها كتلقاه ساهي كيشوف فيها و واحد ستيلو فايديه كيضور فوق واحد الورقة...عرفاتو فاش كيفكر وحدرات راسها تنهدات وتحزات باستها..

اسماء : تسنييم كبيدة دياالي نعستي ماما...

بغات تحيد ايديها وهي تنيين تسنييم وشدات ايديها حاطاهاا فوق صدرها بمعنى تحك ليها حتى نعسات عاد بااستها وباست عنقهاا كتحمقها ريحتها ونااضت عندو...

اسماء :محمد نمشي نشوف ختي غتكون فاقت و وعماد جا مغتبغيش تشوفو نمشي عندها...

ماردش عليها تكعد من على الكرسي وتنهد بصوت قوي خارج من اعماق صدرو شد صبييعاتها وحدرها عندو باس على رااسها وخلاها جلست قدامو مبسمة بحنية...

اسماء :علاش كتفكر اللي فيها الخير هي اللي غتكون ياك نتا طبييب ولدني بايديك وهني راسك هههه...

محمد بعد صمت تننهد : يا رييت...

اسماء :انا ولدت تسنيم ضروري من الحريق ولكن غير دوك السوايع وانا كنولد عادي مكنفتحش ماشي بحال كنزة ومن نهاري كنوض...عرفتي ملي ولدتها وعطاوها ليا شديتها نسيت داك الحرييق كاامل والله العضيييم ايلا نسييتو بخطرة....

محمد : ماشي هذا هو المشكل...مغيكون غير الخير غتولدي انشاء الله وكلشي غيدوز هو هاداك.. ولكن فين هو هاذ الجهد...من عندي كنفضل تولدي بحال ختك الله يجعلك تنعسي حتى شهر حتى ترتاحي وترجعي فيه صحتك و وقفي...

اسماء : الزحيم كيبغي الجهد ديال دنيا ودين ههه..انا غير الطلعة ديال الدروج ولات كتسخفني...

شااف فيها شحاااال كان كيشوف شي عيالات حاملين داخلين يولدو بداك الوجع والزحييم والحريييق اللي كيقتلهم واخا ماشي بزاف حيت ليطاج لي خدام فيها بعيييدة على ليطاج لي خاص بالتولييد والكلينييك كبييير بزاااف كلو طوابق شي مكيشوف شي والاكثرية ماعارفينش بعضياتهم...ملي شاف كنزة بالفتييح وكيفاش كتحرق علم الله كيفاش غتكون هادي اللي كتزحم واخا عندها غير ديك اللحضة اللي كتعطي فيها جهدها وكتطلق مولودها وكترتاح من بعد....عكس الفاتح اللي الحرييق كيبدا مورا الفتحة...ولكن فين هو هاد الجهد اللي غتولد ولا تزحم بيه..متخوف من هاد الامر اللي رونو هاد النهار ولا غير كيشوف فيها ويتخايل ديك اللحضة كيفاش غادي دوز....

مسح على وجهو وحط ستييلو محاول يخوي راسو و وقف...

محمد : نمشيو ..

اسماء : نشوف ختي هي لولى...

محمد : يلاه تحركي شوفيها ونمشيو....

وقغات كتشوف فيه حتى حيد طابيلة وهز دجاكيت دياالو لبسها سد البيسي وقاد المكتب رجعو كيف كان مرتب وخاوي انييق وفخم فنفس الوقت ماعليهش ديكورات شارجي بالعكس داكشي قلييل...

دوز ايديه على كتافها خاشيها تحت درااعو هي شافت فيه كضحك....

اسماء : نعاود لييكم شي مقلب يحال اللي درت ليكم هههه كنتفكرو كنسطى بالضحك

محمد زيرها تحت ايديه وهي شادة خسرو كضحك : تعاودييه غنعصيك...

اسماء : واحد القناة فيها ربعينة الف ديال المشتركين وعرفتو شنو كدير فيها مولاتها غير كتقولب راجلها هكااك وملي قريت تعاليق لقييتهم كيقولو بلي راه غير متافقين...

محمد : ضسارة والبسالة هي هادي نضحكو مرحبا ضحكي معايا ونضحك ونعصي واالدييك بيني وبيينك مع ولادك...تضحكي فينا واحد خور نهجروه لحسو...ديري فبالك واحد القضية الرجال اللي رجال ديال بصح غير دييك اليد اللي باغة تصوري ليا لواحد ااخر مغتصوريهاش حيت ملي كتحطي الفيديو ديالك انا ماعرفتش شكون هذا لي كيتفرج ليا فمراتي واخا يطلع ليه الفيديو صدفة وانا اللي عارف الرجال كيفاش كيفكرو...

اسماء بتخوف شافت فيه دغيا : قلت ليك غنلبس ليكات امحمد علاش رجعتي فهضرتك ...

محمد : ماقلنا دابا والو حتى نشوفوك فين غتوصلي..قلتي المحل غتقسميه نتي وختك هاهو كيتصلح شوفي ليك شي جوج وتلاتة يخدمو معاك برا يسيرفيو ولا شوفي شنو خاصك ونتي راك لداخل نلقاك برا كضحكي لياا ولا كتسربي بايديك ولا شادة الجماعة مع شي حد الفتنة نتفاهم معاك ياك...

طلات علييه ورحعت حدرت عينيها غير كتجبد هاد المزضوع كيقلب عليها سيفتو...باينة ليها قابل غير بزز...

اسماء : عادي حتى نسالي وغنمشي عند ختي غادي دير لبيسات ديال البنات وغنبقى نجلس معاها(باست خدو بجههد وهو يبشر ملامحو ) شحاال كتعصب على نقشة كتقلب بحال الزمان...

يلاه هز تسنيم فايدييه غيخرجو وهي تلقاهم الحاجة فالطريق مشى محمد للطوموبيل واسماء جلسات فواحد الكرسي سخفانة غير بوحدها...

اسماء :كنزة فااقت...

الحاجة : فااقت وراه مع عماد نزلت تشوف بنتها مسكينة بزز بااش نزللت فييها الحريييق ماكتقدر حتى تحرك تعدبت بنيتي تعددبت...غادة عندها ؟

اسماء : اه بغيت نشوفها قبل مانمشي راه تعطل الحال ومحمد غادي يسحابليه باقة ناعسة

الحاحة : غير سيري لدارك ابنتي دابا ويطلعوها تنعس ترتاح تاهي شوية يصبح ويفتح انشاء الله غتشوفك ماتبغييش تنعس وتخلييك جالسة بوحدك.. سيري حتى نتي ارتاحي وخليها ترتاح

اسماء : ويلاه نوصلك...

الحاجة غمزتها : طلبت الطبييب غنبات معاها ليوم باك راه مشى قبااايلة للدار غير سيرو تالغدا و اجيو...

اسماء : حتى انا عييت وايلا مشيت معاها ماغتنعس لا هي لاانا... ملي غتبقاي معاها صافي انا غنمشي غدا فالصباح نجي مع محمد...يلاه بسلامة علييكم ردي معاها البال اماما...

سلمات عليها وخرجات عندو لقاتو وجد الطوموييل غير ركبات جنبو كسيرا مشى من تما وهي تكات راسها على الشرجم مغمضة عينيها بتعب لهاد النهار وشحال داز طويل وتقيييل باحداثو عامر واجمل حدث هو هو زياادة الفنكوشة الصغيرة ديال العائلة..

___________

عماد : اشمن شفار هادو ولا داك جناح الحمام لي كتركبي...(خنزرات فيه وسكتات وهو كنل فرحان ) كتشبه ليا اشمن شفار...حلا ديالي...بنت عماد حلا...

كنزة : شكون حلاا..شكون هاد حلاا تاااني ؟

عماد تلمس ايد بنتو : حلا بنتي...

كنزة : بنتي سمييتها أيور ماكين لا حلا لا هلا سير حتى تولد وسميها(حيدات ليه ايديها وشدات ايديها مسكينة طيبوها) حلا قالك حلا...سير عند مرتك ولا مانعرف خطيبتك ولدوها وسميوها حلا زمر حلا....

عماد : نعاام...فين فيين غنمشي ؟؟

كنزة عوجات ملامحها معيباه : سيير عند مرتك مالك ماسمعتيهاش سير عندها ولدوها وسمييوها وبعد من بنتيي...حلا الزمر...بنتي سميتها ايور ..ايور ماما ديالي قلبي بنتي...بنوتة دياليي

شااف فيها شحااال كيرمش فيها باستغراب وهي حادرة راسها مرة مرة كتشوف فيه حتى بانو ليها ملاحو تغيرو وهي تعقد حجبانها ملي سمعاتو ضحك.....طلق الضحكة لولى ورجع جمعها باستغراب كيشوف فيها وايديه على دقنو بحالا سمع شي نكتة غريييبة وفشكل فنفس الوقت...شوية وهو يتحدر عندها طل عليها وهي كترنش فييه ورجع هز رااسو كيضححك واحد الضحكة بحال ديال الفقصة ولا دياال الضحك نيت ولا ديال التبوهيل ماعرفات فين تصنفها....حبسها مرة اخرى مخبي فمو بلكمة ايديه ورجع هزز رااسو كيضحك من نيتو وهي تفقصات شدتها البكيية وقلبات منو وجهها ماكرهاتش تشنق عليه تبرد فبيه جنونها وماعندها جههد...

كنزة : ضحك نتا اللي سنانك بيضين (دمعو عينيها وضورات وجهها لهيه حبساتهم وهو كيضحك) الله ياخد فيك الحق الشم*اتة السلكوط..بو البنااات....

نزل لمستواها بسرعة وضور الكرسي عندو حتى طلعات فيه عينيها حمريين مدمعين ورجعت حدرااتهم دغيا مراضياش تبينهم قدامو...

هماد : اش كتروني هاد النهار ااش كتروني راك ولدتي بنتك ماولدتيش عقلك...

كنزة : ماتعصبنييش ماقدراش نهضر بعد مني...

عماد بدا كيتعصب : ااش كتروني...

كنزة بعصبيية زيرات قبضة ايديها : متعصبنيييش ماتعصنيبيش غنموت بسبابك غنموت ونخلي بنتي لشمكارة مسخة ديال الخلا تربيها بعد مني...

عماد : اش كتروني اكنزة تاني اش كتروني غتجهليني(تحنى قدامها فالكرسي كيشوف فيها بقلة حيلة ماعرف مايقول وهي قالبة وجهها ساكتة) تطوورت تا عييت قبااحيت تا عييت خلعت بنادم تاعييت وجيت عندك حدييتيهم ليااا منيين كتجيبي هاد الخبار شكون هاد الشيطان اللي وسوس ليك تاني...واش من بعيد كتبان ليك فيا قبل مانوصل عندك كيوصلو ليك خباري ولا كيفاش شي شيطان هذا عاس عليا ؟

كنزة : الشطيان هو بنادم...الشيطان غير كضلموه كون نعلتوه وخزيتوه مانلقاش هكا واقف قدامي غارق فالندامة...

عماد : فحياتي كلها اكنزة...اقسم برب الكعبة فحياتي كلها اكبر غلط درتو فيها كنجي نواجه بلا دليل....(محني كيشوف فيها وهي قالبة وجهها) نسيت ان المراة كيف المحكمة واخا تعيى تعيى تحلف عليها بالدنيا والديين ايلا مكانش الدليل برب لا رحماتك ولا تاقت فيك...وهذا هو الغلط الوحيد ديالي...كنواجه بالهضرة...

حادرة راسها عندو بعصبيية...

كنزة : اشمن دليييل ؟ شفتك بعيني نكرها داك اللي شفتو حتى هو نكرو مامنو حتى حاجة يااك كلشي كيكدب عليك نتا اللي عندك الحق نكرو حتى هو ؟؟ (شافتو سكت وكملات) نقول لك واحد الحاجة اعماد...شفتي كون فديك الساعة جيتي عندي وقلتيها ليا...نحس بييك نااادم وكاره رااسك وماحاملوش فديك اللحضة وبزز عليك وماعاقلش على راسك....تعطيني سبب...غير واحد غير وااحد..خلاك دير ليا ديك الحالة كنقسم بالله اللي خلقني مايوقع هادشي كامل...(بغصة) غير قولها ليا نحس بيك نادم اعمااد ماشي يوصلوني تصاااورك وانا كرشي هااازة روح كااااملة....ملي كنتي جالس معاها ماجيتش فبالك ماقلتيش ديك فلانة نهار تعرف اش غيوقع فيها واش سحابلك غتبقى مخبية فيين عايش فيين ...عمر خبارك توصلني ؟؟؟

جا يدوي وهي تحبسو هاازة ايديها وقليات وجهها جبساتو دغيا رجع لي كان غيقولو...

كنزة : شوف شوف دابا هادي غير هضرة خاوية حتى هاد الوقفة راه مخصهاش تكون بيناتنا بقات هاد البنت اللي غتجمعني بيني وبينك...انا غندير اللي عليا غنربييهاا غنعطيها فوق جهدي ايلاا خاصها روحي نعطيها ليها وغير نشوفها ضاحكة وحتى نتا غتقد بيها وتهز مسؤوليتك سول ولا قلب ولا تشاور شغلك هادااك مسؤوليتك تقد بيها عمري نخيبك قدامها وعمرك تخيبني قدامها خليها تشوفني انا وياك صحاب ماشي عداوة ماتكبريش ليا بنتي معقدة من جيهتك ولا من جيهتي...

حرك رااسو بايجاب وقلبها لعندو كيف كاانت بتأكييد وبعيوون دافية فيها...

عماد : هادشي اللي بغيت غير نشوفكم بخير...نشوف بنت عماد بخيير نسمع صوتها وضحكتهاا ونشوفك حتى نتي معاها بخيير لبااس عليك واكلة شاربة لابسة ايلاا دازت وحدة من قدامي نشوفك نتي حسن منها وايلا ضحكت نتفكر ضحكتك زوينة على ضحكتها ماخاصااك حتى خير كلشي يكون عندك وكلشي موفر لييكك نتي وبنتي هادي هي راحتي واقسم بهاد النعمة اللي عندي(قاصد بنتو) ايلا هادشي اللي باغي...

كنزة مقصحة داخلها : مرتاحة الحمد الله ايلا وفيتي بكلامك...

عماد : وافي بييه...جيت نشوف بنتي ماشي من حقي ؟ مانشوفهاش على شنو اتافقنا....غتبقى معاك ولكن الوقت اللي حسيت براسي باغيها غنجي ليها فينما كاانت هادشي علاش تافقنا كوني قد كلمتك...

قلبات وجهها عاقدة حجبانها محاملتش رااسها علاش لي داخلها كيقول حاجة وفمها كيقول حاجة اخرى بااااغة تقول بزاااف بااغة تحرقو بغيرتها وتدوقو من نفس الغصة اللي حس بيها واخا غير بكلامها تعدبو علاش كتخرج من فمها ععكس من اللي باغة تقولها لهاد درجة نفسها وكرامتها متحكمين فيها وفكلامها...زيرات على شفايفها وقلبت وجهها لديك جيهة فاش حسات بايديه مسحو خدودها من الدموع...

عماد : خليهم ينزلو مابقيتش داك بنادم اللي خاصك تباني قدامو قوية وقاااصحة وحتى حاجة مااتهزك عارفك كابايل تاحاجة ماكتغلبك هادشي عرفتو...ماشي لبارح ولا ليوم توريه ليا...(شد راسها بلطف بيين ايديه وجها ليها نيشان وقال وهو واقف وراها) شوفي القدام ونساي اللي فات....

كنزة حيدات ليه ايديه بنترة :نسااه حتى نتااا ماشي تفكرني فيه وتقول ليا نسايه...

عماد :انا ماشي هو نتي...ويااارب تبقاي على صباغتك وماتزهك حتى حاجة ونعرف كنزة اللي عرفتها و(بأسى ) و خسرتها...تبقى كنزة اللي غتربي بنتي وبنتها...خلي قلبك صافي بررب ايلا دخلت عليه شي ندامة لارجع كيف كان....شوفي قدامك نساي اللي فات ماتعشيش فيه...شوفي هاد الهبييرة هه اللي ولات عندك شفتي البوتيك اللي غتحلي عمريها تقاتليي عليها حتى توصليها فين حلمتي...تقاتلي دبا ومن بعد رجعي لور تفرجي فيها وخليها تصرف عليك...

وقف كيتننهد مددمر هو الاكثر عندو بزاااف مايقول...ولكن فهاد الاوقات السكات كيكون حسن...

عماد : ديري فباالك تاا بنت المراة ماغتكون فمكانك (شاف فبنتو وعينيه مبسميين بحسرة) واخا جات اللي تشاركك فييه...

حيدات ليه ايديه من على كتافها وحدرت رااسها ودموعها كيقطرو قداامها شاادة شهقتها بزز ماااتخرجش مارجعاتش شاافت فييه كتحس غير بايديه فايد بنتو كيتملس فيها ويلعب بصبيعاتها وسط ضخامة ايدييه...فهاد اللحضة بالضبط كثر من لحضة طلاقهم وكثر من لحضة خطبتو اللي شافت قدام عينيها حساات بالمعنى الاصح ان عمااد اللي كان مسمى راجلها مشى وعمرو غيرجع ولا يتقرن اسمها باسمو مرة اخرى...

احساس حرق قلبهااا بحاال الخيانة اللي حرقاتها وبحاال الكلام اللي قال عاد دابا بقد ماألمهاا وحسات بفرااقو بقدر ما زاادت تبتت علييه تهمة الخيانة اللي تمنات تكون كدوب وهي كتشوف فيه كيدوي عليها ناسي خطبيتو اللي عاد شوية دابا خطبها...

مكانش قل منها عينيه عليها وصدرو من الداخل كيتزه ويتتتحط العافية شاعلة فيه وكون لقى كيفاش وكون قدر يحط اللي قدامو واللي وراه ويرجع الزمن بلور ويصحح اللي غلط فيه...

فلاش باك...

_ صباح الخيير الحب ههه نمشيو لدار عندي ولا لدارك..

بارتباك جا يشد تيليفون طاح قداامو تحت الكوسان بقى كيبان لكنزة غير ضباب والشاشة كتقلب وتشقلب مع الطيحة وصوت ديك البنت كيتعاود...

_عندااك غير بشوية علييك...خليني نجبدو ليك؟

خرج فيها عينييه تسكت عقلو غيخرج كيتمنى يهز تيليفون ويلقاه تقطع قلبو كيضرب بسرررعة فشششل حتى مابقاش قاادر يتحرك تزير عليه راسو مخرج عينيه فلاخرا تسكت حتى هز تيليفون وهو يلقاه مزال شاعل على وجهها يلاه غيدوي وهي تبان ليه قطعات عليه دغيا...بلكمة ايديه باش ضاير صرفق هاديك اللي جلست جنبو حتى خرجات فييه عينيها مصدومة وهو كيترعد دغيا جبد تيليفونو كيعاود يصوني ليها حاطو على ودنييه وضاير ل لااخراا مخرج فيها عينييه مكشكش..

_واااش حماقيتي ولاا ماااالك ؟؟؟

عماد : سديي فمممك غنضررب زام*ل بوك ابنت الق*حبة الله ينعععل....جاااوبي...(بغات تدوي وهو يهز ايديه كيغليي) سكتي تق*ودي..

_ااش هااد الفعايل اعماد جيتي عندي باش تهز عليا ايديك وااش تخالطت ليك مع مراتك ولاا كيقاش ؟؟

عماد :مرتي شرييفة على زام*ل بوك نزلي تق*ودي الله ينعل (لااح تيليفون بعصبيية ملس مجوباتوش ونزل عندها ضار من جيهة تانيو كان قدام واحد البار جا فالخلا لا ماشي لا جاي حل عليها الباب وجرها من دراعها ) نزل ت*ودي علياااا فرعتي ليا ك*ي اجي ما اجي بقييت بوحدي غيتعداو علياا نزلي تق*ودي ولا انا غنديك ليهم ابنت الق*بة....

_عمااد وااش حماقيتي شنو درت لييك انا دابا (بغات تبكي ) اشنو درت غير وصلني ودير للي بغيتي غتخليني هنا...شنو درت ليك داباا...واش سمعاتني عطيني ندوي نعاها نشرح ليها نقوليها خدامة معاك ماتخلينيش هنا...

بغى يمشي وهو تشدو..

_غتخليني هنا اعماد حشومة علييك قربني غير للطريييق...

عماد : طلقيي غنضرب (دفعها ) سيري تق*دي ضربيها على ك*ك طريق ضربي على نمرتي...تعيطي ليااا مرة اخرى نفرع زام*ل بوك هاا ودني مننك ونعاود نسمع حسسك .يحررق(دفل عليها عايف ومشى ركب فرمشة عين طار من قدامها خلاها وقفات كتمسح فحوايجها وغينيها محرجيين فيها دموع مارضاتش باهانتو ولو كاع لي قال فيها صحييح حيت كانت عاهرة من الاعماق..جبدات تيليفونها دمعتها نازلة وبدات كتصوني)

_آلوو...اجي وصلني ااش غندير ليه راه جا وم وماعرفتش اشنو قلت ليك...ماقلت والو...طلعت بغييت زعما نضاسر عليه شوية نسهلو الطريق وسمعاتني مرتو ناض كيحيح عليا...اااشمن زعااامة حتى نتا واش تسيطيتي ماقلت ليه حتى حاجة انا ملي عيطت ليه قلت ليه اجي وصلني راه بقيت فالخلا وبديت كنبكي عليه مابغاش فلول قلبو قاصح مايكحنش الله يستر بزز باش جا وخلاني منشورة ساعتين فالطريق عاد جا...جاي بزز علييه...

شافت مع الطريق باغة دير غير اوكوسطوب ماكين حتى حد...

_لا لا صااافي شوف عفااك انا ايلا كان شي واحد بوليسي...شي مدير شي محاسبي شي مغني شي ممثل شي كادر سيااسي شاارف ولاوي ارا ماعندي نطيحو ليوم قبل غدا والله داك المنصب لا بقى فيه ايلا مافضحتو وشوهتو....اما يحال هادو اخويا خطيني منهم جلللدة مكيتقشروش...ك كيفاش كيفاش قح*بة بزاف عليك الحماااار قح*بة ودايرة بلاصتي كيتك اللي باغي طيح واحد خور وتهز فبلااصتو شتي مع هذاا عمرك تحلم بييها الشيبة العاصية الله يعطييك العدااااب....ساليتي منيي بديتي كتخسسر فالهضررة النصاااب...

قطعات علييه مجنة مييتة بالفقصة كضور وتشوف مع جنابها وسط هاد الخلا والبار مع الصباح بدا كيخوا وبنادن فيه قليل وماكينش اللي غيحن فيها ويوصلها ايلا ماخلصاتوش بجسمها...

تخايلاات حتى عيات وعمرها ضنات ولادتها دوز بهاد الشكل تحرقات كثر مكانت كتخايل وتعدبت كثر ملي عاودو ليها ولا تخايل ليها...ولكن غير كتقيص فايدياتها وتشووفها واخا غير من بعيد كتنسى بحالا عمرها عانات من شي حريق...رجعوها للشومبر دياالها وغير عرفتتو غيبقى ديك ليلة تما دغياا غمضات عينيها مضاربة مع النعااس وفعلا لحضات حتى غفااات ونفس الخكاية كتعاود معاها صبااح يوم الغد ملي علموها لي خاصها تننفس وهي تصدمهم وقالت لييهم بلي راه تنفيات البارح فلييل ضحكاات الحاجة وديك ساعة عيكت لعبد المتق يحااب ليها ماتااكل وغير شاف عماد فتلكلينييك دارك رسي وجلس حداهاا زعما الحمااية واخا عياات فييه الحاجة يمشي ولا غير يتساراح ويخليها بوحدها و واالو مابغى يتحرك من حداها...جابو ليها الماكلة كلات شووية واللي بقى خلاتو غير كتلقم ماكتقدرش تكمل سخقفاانة واخا جهد فمها مجههد نييت ولكن غير كتشوف مرخية متكية راسها وكترمش بهدوووء وايلا جات تهضر كتدوي بشوياا مكتغوتش...

بانت عليها الولاادة وتنوراات واخا عصبية ومعكسة ودغيا كتزنك وتعرق وتفقص على سبة... لبساتها الحاجة البينواار جدييد فالفوز بيبي كيشعل وزيف حياتي فوق شعرها اسود كيف الليل طايحت على كتاففها وهي تابعاها نجمع فيه على العين زعما وغير كتمشي كطلقو قداامها وجهها منور وعينيها بدون مكياج حيت مانعاها الطبييبة منو باش ايلا جات تراقبها تشوف حالة وجها نيشان ماشي مخبي بالمكياج...واسماء واقفة معاها وخلااص ملي شافت الطبيبة والفرمليات غير كيضحكو ليها وعاطينها وقت ملي عرفوها مرت الدكتور الشيباتي حتى هي تزادت فيها نغزة...

زينو ليها ديك الشومبر بالورد فالغوز بيبي والخدادي ديال كنزة وليزار حتى هو فالغوز وهي ملوية فبنيوار فنفس اللون...بنيوار مشبك من جيهت لييدين بدونتيل بيض وعماتها ضايرين بيععا كل نهار تجي وحدة وتجيب حاجة فايديها وعائلة عمااد ماكينش اللي ماجااش عمرو ليها الشومبر بالكادواات ديال الولاادة والحاجة كل نهار تنقل من تما للدار حتى عياات وسخفاات...

ونفس الحاجة مع عبد المتقي مكخيوييش ليهم الشومبر ايلا ادا جات الطبيبة كيخرح ويعاود يرجع داير راسو هبيل مكيتسوق لا لنكييز الحاجة ولا لتهامس بناتو داير راسو صمك عمى ملي كيسمع عماد جا خلاااص... مكيتحكرش من داك ليطاج....زيرتها الطواليط و ولات كترعد برجليها بااغاه يمشي و وعبد النتقي داير كرسي حداها اما عماد ملي جا وهو عند بنتو لتحت ماكتشوفوش اياا طلع كيطلع مرة ولا جوج يطل عليها...فرحااان وغيحماق بالفرحة بزيادة بنتو...

اسماء :نجي بليل تشربي...غطي شعرك البرد عليك... البرد ديال النفاس وااعر...

كنزة : بغيت نمشي لطاليط تزيرت بابا غيبقى جالس هنا..

اسماء : راه شاف عماد حتى هو قالك...طلقتوصاافي مايبقاش يطلع ويجي عندك...

كنزة : دوات معاه ماما حتى هب دوي معاه نتي سخرييه ولا ديري شي حاجة يمشي راه مكيقولش ليك لا...

اسماء : كيغاندير ليه انا...تئ واخا...ب..ب ب باابا...

عبد المتقي حل فيها عينيه كان ساهي : ممم مالك المرضية...

اسماء قربات كتحك على كتفو : كنزة برد عليها البينوار شوف ولات كترعد ولاخر اللي عندها بقى فالدار(باست على راسو) سير ابا ارتاح لييك شوية وجيبو معااك..

عبد المتقي : عيني نصوني لحاجة تجيبو...

اسماء : لا ماما راه مشات مع خالتي فوزية باغين يتقداو شي حاجة يلااه كيف خرجو...

شاف فكنزة وهو كتمسكن وتقلب فعينيها وترعد بلعاني زعما راه فيا البرد بغاات غير ضور تاهي بحالتها وترتاح فالهضرة حيت قدامو كتولي ضور فعينيها حاضية مع لساانها لا تمشي تغووت بدون شعوور ولا تقول شي كلمة يندمها عليها الى يوم الدين...

عبد المتقي تنهد : واخا يلاه..خلي تيليفونك شاعل نصوني ليك نعتي ليا فاين هو...فين تسنييم بنتك تمشي معايا تبدل الجوو..

اسماء : مع محمد شوية ونمشي نجيبها ماكتخليهش حتى يخدم فخاطرو..غير سير غتبرزطك

عبد المتقي :هانا مشيت....خليك مع ختك ماتخرجييش...ت تولي تحتاجك ولات تبغيك....(مشى خارج) ماتخلي حتى حد يدخل عند ختك مريضة وعياانة مافيها اللي يهضر ويشارك الكلاام..

اسماء عرفاتو كيدوي عليهر : كون هاني ابابا تاحد مايدخل عندها غير تهنى...

حرك رااسو وخرج مشى وهي تلوح النفس وتكعدات شوية من بلااصتها بزز كتأللم حتى جات اسماء قادات ليها المخدات...

كنزة : آربييي....الله على راااحة اويليي اختي تزيييرت بغيت غير ندخل لطواليط غنوض قدامو مفروشة رجلي مكنجمعهاش مزيان...

اسماء :نعاونك نوضي لييه...ولا بلاتي نقولها لشي ممرضة تعاوني خفت نقيصك فالفتحة...

حركات رااسها بااه وشدات فجنابها بجوج كتحاول تنووض فحين اسماء قادات شالها على خدودها غادا خاارجة حتى تحلاات عليهم باب الشومبر وهي تهز فرااسها كتشوف فهذا اللي دااخل وغير عرفاتو تبسمات وتلفتات فكنزة اللي مبسمة بحالها كتشوف فيه..

كنزة : السي جلاال اهلاا ههه مرحبا بييك...

كان رجل تلاتيني تقريبا نفسو المحامي ديال الطلاق... مبششر وملاموحو ضاحكة بالكوستييم انييق و واحد البوكي دالورد حمر فايدييه كبير وباكيط دالشكلاط كيبان سااوي فالايد تانية..من وجهو كيبان فيه المعقول والوقار...حرك راسو لاسماء بلاما يمد ايديه حيت فايت بغى يسلم عليها وماعطاتهاش ليه وحفض درسو عاد مد ايديه لكنزة سلم عليها وحط البوكي..

كنزة ضاحكة : مرحبا بييك ...

هادي هي كنزة واللي تعوض على حاجة عمرها تحيد منو...رغم النفسية المحطة وتتحدى اي واحد يطبطب عليهاا وعير يعنقها ويسكت ويخليها تخوي الي عندهااا غيبكي معاها الدم...كرهات هاد الشخصية اللي كتمتل اللا مبالاة والصحة الجيدة اللي كتبان ليهم ...ياريت لوكان يعلمو على حالتها من لداخل...بعد المرات كينزل الماسك وكتنسى حتى كيدمعو عينيها وفلحضة كضحك ليهم وتكدب وتقول غير عيني دخلات ليها شي حاجة...

جلال: الله يبارك فييك ..بخيير ؟ على سلامتك نتمنى انشاء الله تكوني فحالة جيدة..

كنزة : الحمد الله لهلا يخطييك ههه (شافت غالبوكي) علاش عدبتي رااسك...

جلال حرك راسو مبسم : عدابك راحة الالة..

اسماء بغات تخليهم بوحدهم تبسمات كتشوف.. : انا غنشوف محمد..مرحبا بيك اجلال مرة اخرى..

جلال : الله يبارك فييك ...شكرا...(شاف فكنزة) ايوا فين الصغيورة ديالنا مانشوفهاش ههه

كنزة : لتحت بنتي مريضة شوية (حدرات راسها ضاحكة بزز) حيت ولدتها قبل وقتها وخاصها مزال الرعااية...ولادة مبكرة ايلا كنتي عارفها

جلال : بصح ؟ وشنو قالو ليك واش شي مشكل عندها....

كنزة : لا لا الحمد الله بخيير قالوها ليا وحتى راجل ختي طبيب كل مرة كيجيب ليا خبارها كنتيق فيه كون كانت شي حاجة خايبة غنعرفها...

جلال : مةيكون عندها بااس..انشاء الله قوية بحال ماماها ماتخافيش عليها..

كنزة : اللهم اميين شكرااا...مرحبا بييك زيارتك زوينة والله العضييم...ههه شكون قال ليك ولدت

جلال : ديجا بارطاحيتي شي فوطو فكونط انستا ديالك علمتي فيها بلي ولدتي من تما عرفت...

كنزة تفكرات الصورة اي لاحت ماشي صورتها غير صوة من جووجل ديال شي بيبي وحطاتها فالسطوري: اااه هههه نسيت...ههه نسيتها..مرحبا بيك..جلس ماتبقاش واقف...

حرك راسو وجلس باحترام فكل مرة حاول يرفع فيها عينيه كتلاحظ نضراتو المعجبة بيها اللي كتحس بيها غاديين وكيتزادو كثر من اول نهار تلاقاو فيه...كانت مزيرة بالطوالييط وغير جلس معاها نساتها كيدوييو ويشاركو الكلام فعدة مواضيع لكن هو كان قليل الكلام الاغلبية كتقولو غير هي...لحضات حتى وقف شابك ايديه مع بعضهم...

جلال : خليتك فالراحة انشاء الله نشوفك فحال احسن...

كنزة : اللهم امين لهلا يخطيك ماتغبرش عاودها...

جلال : ضروري انشاء الله وحتى نتي ماتغبريش الرقم ديالي عندك فتي حاجة او مشكل احتاحيتيني ماتردديش تاصلي بيا كلي ادان ساغية ليك....نتمنى مايكون شي مشكل مزال مع طليقك..

كنزة تزنكات والضخكة كتخرج بزز : لا هه كيف تافقنا باقين عليه الطلاق ماشي ضروري يسالي بعلاقة خايبة بيني وبينو بالعكس هو بنى حياتو غيتزوج وحتى انا غنبنيها مع بنتي...

جلال تهزو حجباانو براحة بانت فوجهو : احسن حاجة...

ضخكات كنزة قالبة وجهها كتشوف فيه بنص عين وهو عاد حس براسو ااش قال وحك خلف رقبتو متدارك الموقف..

جلال : على اي حال ههه نخليك..شكرا على الاستقبال بوسي ليا البنوتة...

تبسماات لييه ودعاتو وخرج وهي تمد ايديها جرات واحد الوردة من دااك البوكي دالورد كتشم فريحتها فننة عجباتها...مارداتش للباب اللي بقى محلول ونيشان غير خرج جلاال داز موراه عمااد تلفت شاف فيها كتشتشم فالوورد ضااحكة وهو يقلب سيفتو وتبعو كيحك فدقنو وجهوو حاس بالعافية شعلت فيه بعدما كان داخال عندها سواايع وهو كيتسنى فعبد المتقي يخرج باش يدخل حتى كيسمع حوار شي راجل عندها للبييت وقف جامد قدام الباب كيتصنت على كلامهم...

غير تحرك جلال خرج من عندها مدات ايدها بشويا كتحرك على حساب الفتحة مكايسة....حلات البواط ديال الشكلاط وهزات منها وحيدة دهبية حلاتها لاجتها على لساانها مستمتعة بيها....ورجعات تكات براسها ضاااحكة كتفكر كيفاش كان غير دابا شوية جلال معاها....عارفة حاليا مستحيل تفكر فشي زواج خاصة وأيور بنتها شخص جديد تزاد فحياتها محتاج ليها... محتاج لكل اهتمااامها ومن ناحية اخرى خايفة من عماد شي نهار يثور عليه راسو فحال ما اختارت تكمل حياتها... ويبغي يديرها سبة وياخد ليها البنت...تعتارف كتبغيييه ولكن الثقة مكينااش فييه ابداا ولحد الان مكيبانش ليها ورقة مفتوحة بالعكس بحال شي ورقة مكمشة على بعضها فكل تنية كتكتاشف حاجة جديدة...عجبها اهتمام جلال فهاد اللحضة بالضبط والسبب مجهول ماعرفاتش علاش شبهاتو شوية من محمد....كلامو مأدب ومعقول وفحدود معاها...كيبان مسؤول ومن نهار طاحت فيايده قضية الطلاق كان معاها يوم بعد يوم لحضة بلحضة حتى تطلقات...فكرها غير فمحمد وكيفاش كان كيتعامل مع اسماء وفكل عتبة كتلقاه واقف قدامها ماد ليها ايديه...زعما تقدر شي نهار تعاود تعيش نفس قصة اسماء مع محمد اللي رغم عيوب اللي كيقهر ولكن محاسنو غطات عيوبو...

تنهداات بحسرة وقالت فخاطرها "خسارة كون غير كان بحالو" كانت قاصداه هو عماد...علاش لا ميكونش بحال محمد...بحال جلال...باغاه هو ولكن ماشي بديك الشخصية..

ماردااتش ليه البال فاش داز من قدامها عينييه حمريين مكيشوفش قدامو كيف الثوور شعلاات فييه العاافية وضحكها مع جلال كيضرب لييه فعرق راسو غادي تابعو وهو قدامو خلاص ملي شافو نازل مع دروج بقى غادي وكيسب تحت فمو بكلااام كيحشم...تابعو وماعارفش علاش تابعو غيوقف عليه وغيتزاادف معاه ومعارفش علاش ...على واحد السيدة اللي مابقات كتجمعو بيها حتى ورقة لا قانونية لا شرعية من غير واحد الطرف اللي جمع دمهم بجوج ثمرة بعد صراعات بقد مكانت بسيطة وصغييرة بقد ما تكاترت وخدات كبر من حجمها...

كملو نهاية الدروج ومشى جلال خارج هاز رااسو متااجه للباب وعماد ورااه عااقدهم ضور رااسو كيطرطق فيه وايديه واكلينو باغي يشنق عليه...حتى لوااحد اللحضة وهو يوضر وجهو حتى جات عينيه فعين محمد نيشات...كان واقف مع شي حد كيدوي معاه...هز محمد ايدييه بحركة هادئة شير لييه وهو يتننهد و وقف فبلاصتو يدون حركة كيحك خلف رقبتو ودقنو وشعرو كيغلي وعينيه فجلال غادي حمريين....فالاخر حدر راسو حك وسط عينييه وخلااه وتلفت مشى عند محمد محمد اللي غر شافو سلم على الطبيب لي كان واقف معاه وقرب عندو سلم عليه بسلام رجولي وقال طانز عليه...

محمد : تلفتي لبنتك..اجي نوصلك...

بان ليه ماشي هو هادااك وهو يغمزو بتسأل..

محمد : مالك...فين ؟

عماد : واحد صلة الرحييم بغينا نحيوها منعتينا...

محمد شاف فجلاال غادي : شكون شي معرفة..

عماد : ناويين...عاد نوينا نتعرفو...

محمد : اجي معايا ناقصني مريض انا تزيدني بيه...

ضحك عماد كيحررك رااسو بايجاب ومحمد طبطب على كتفوو ومشى جنبو حتى دخلو للبيرو ديالو مع الدخلة لقى اسماء محنية كتقاد لتسنيم لباسها غير حل عليها الباب هزات فيهم راسها شافت فمحمد وفعماد لي وراه وقلبت وجهها منو وهو داخل عينيه خطفو فيها الشوفة وقلبها بوقار رمى عليها السلام بلاما يمد ايديه وهي رجعاتها عليه تحت نيفها موحال اصلا واش سمعها وشدات ايد بنتها وخرجت ومحمد خرج وراها كيحقق ويسكاني فيها من لفوق لتحت...

محمد : نتغداو فالدار ليوم شوية ونزلي عندي نتحركو...

اسماء باغة تبقى مع كنزة : واخا ولكن ماما مكيناش وكنزة بوحدها...

محمد : تغداي معايا ونرجعك(جات تدوي تاني وهو يحبسها) نتغدا بوحدي و لا كيفاش(جرها لعندو وهي تبسمت )

اسماء : واخا(درعها تحت ايديه كيف ديما ومشى بيها وهي هازة فيه راسها كتدوي معاه والايد تانية تسنيم بلبيسة على قد سنها كسيوة مفرفرة من لتحت صيفية والقريناات فشعرها شهب والعوينات خضرين كيف الربييع كتلعب بيهم هنا ولهييه مادات فاسماء واالو من غير الملامح شوية تسنيم شهبة بحال ناصر اما اسماء ييضة وحروفها كحليين زايداهم عباية فاللون البوردو فخممة مكروزة من الايدين والصدر ولكن كان مخبيه الشال الطويل لي واصل تالضهرها من لتحت...

مبسمة والكريشة قدامها باينة عاطية منضر غير كتبان كيوت وصغيورة مع الضعف...وصلها حتى لنهاية الكولوار وخلاها مشات كضحك ورجع هو عند عماد جلس فالبيرو لقاه جالس واخد راحتو شاد تيليفونو غير دخل محمد سدو وحطو بهدوووء وهز فيه راسو ضاحك فعز عصبيتو...

عماد : هو هذا اخويا محمد تا را هلكني هاد الكلينيك شي خنقة مكيناش ريحة المرض اصحبي مع الباب كضرب فيك وريحة دواء وبزاف ديال الفرونسي الفرونسي...

محمد جلس كيقاد عنق الشوميز : و المحامي جلال...

عماد : جلاال ولد الق(رجعها لسانو) كتعرفو...

حرك راسو بايجاب بهدوء هز لانطيرفون طلب كافي ليهم بجوج...

عماد : جاي يخطب ولد الق(رجعهاا) الله يحرق زاا...هاز الورد وداخل عليها نخشيه لاصل مو ففف(حتى كيبغي يخرجها وكيرجعهاا تالف فهضرتو ميمكنش يهضر ايلا مالاح شي كلمة ماهياش) ...مرتي اصحبي(تنهد لكلمة مرتي لي خرجت من فمي بدون شعوورو هز ايديه متحسر) ...اشمن مراة

محمد : وفين المشكل عندك..

عماد مغلغل بحالا مخاطب جلال قدامو : ام بنتي الشريييف باشمن صفة تجييب ليها الورد تالشومبر وداوي معاها واخد راحتك...السييد مرتااح باشمن صفة بصفتك شكوون شكوون نتاااا ؟؟

محمد بهدوء : و شكون نتا ؟

يتبع...