حمام الخلا الجزء 43

تسنيم خرجات عندهم : ماما تيليفون..

بان ليه رقم غريب يلاه غتجاوب وقطع...ديك ساعة عاودت الاتصال بييه تسنى رد حتى كتفجأ ملي لقاتها لميااء...كتدوي معاها بهدووء ورنة صوتهاا كلها اعتدارو واها منطقاتوش باينة فيها كتأسف...قالت ليها بلي اليوم غيجيو يشوفو المحل ويدوي باش يعطييو للمكلف بلبني كاع المصاارف اللي غيحتااج باش يعاود يبنييه ويفرشو من جديد...مارضفاتش اسماء وقالت ليها بلي غتسناهم حتى يجيو وغير قطعات معاها وهي تبلع رييقها حاسة براسها غير مكتزيد تغرقوو لا مع محمد ولا الحاج الي قال ليها تخرج من هادشي وهي غير مكتزيد تدخل ليه...

خرجات جلسات معاهم شوية مجموعين على اتاي لقهوة والحلوى ديالها اللي كلشي كيشكر فيهاا ويعاااود مكيشبوعوش منها..خدات منهم شلا اخبار منهم سميرة اللي جاوها الخطاب والمحامي اللي طلب ايديها من الحاج ...تصدمت الحاجة فالحاج ومحمد براسو اللي عارفين بالخطبة وناقالو ليهاا والو اما اسماء عندها عادي اصلا عارفااه مغيجيش يقول ليها سميرة غتخطب عندو ما اهم يعاود ليها...

صقلات الدار وكلشي غرق فالقيلولة فهدوء...وصات اسماء خديجة وخرجات شدات طاكسي نيشاان للمحل عندهم خلصاتو ونزلاات طلات عليهم لقات دوك الملعمية غير جالسين مكيديرو واالو وهي تخليهم عاد طلعات عند كنزة الحاجة الفوق...

جلسات معااهم غتنفاجر مارتاحت حتى عودت ليهم كلشي من بالنقطة والفاصلة خلات كنزة كتتررعد كلها حتى وجهها هرب منو اللون بالفقصة وايور فايديها كتبككي وصوتها كتحس بيه كيضررب فراسها كتراري بيها مضاربة معاها تسكت وهي حلفت لا سكتاات حتى عطااتها للحاجة بعصبيية عقلها غيخرج من بلاصتو...

كنزة : ايواا شنو داباا حنا نشدو ديك جوج دراهم منها وتدوزو بجغيمة دالمااء هاد القردة الشارفة مااتبعش بنتها ولاا شنو ؟؟

اسماء :شنو قلت ليك انا دابااا بنتها قالت ليا غتجي هي وباها غيخلصو اللي دكدكووه اما ملي غيجي محمد راه منو ليهم قصة اخر تما والله مايتفااك معاهم...

كنزة : مرييضة هادي اقسم بالله ا اسمااء ديري حل راااسك هادشي راه ماشي عادي..واش حياتك كلها غدوزيها فالمحاكم مع هاد الحيواان شحال قدك نتي هادشي علاش تزوجتي غير تهنيتي من ناصر والشمكار طحتي فعائلة ستة وتلااتين..والله واخا يكون هاد الرااجل كيعطيني الهوااء مانصبر ليه على هاد العييشة المزمرة تفو..

اسماء : شنو بغيتي ندير ؟ واش هو عارف هادشي راه بحالو بحالي حتى هو يلااه عرفهم على حقيقتهم ...

كنزة : ونتي مالك يعرفهم ولا يجلس نتي تزوجتي ترتاحي ماشي تبدااي تكتااشفي فالحماق ايلا عندو مشاكل معاهم يمشي يفكهم فالتيساع ويجي عندك...

اسماء : صافي اكنزة من هاد الهضرة الخاوية...مالو كيعلم الغيب باش عرفهم غيطلعو عائلة ولاد الحرام...

كنزة :عيقتي ولالله العضيم راه كلناا جربناا نبغييو ولكن ماشي ندلو راسنا ونوليو فشد ليا نقطع ليك مع طليقة الراجل البارح الحانوث المرة جاية فيك ولا فبتك ولا فولدك والله ماغيفرقوك تايديرو فيك شي مصييبة....ديري حل لراااسك...اطوونسيون...

قلبات اسماء وجهها ماجوبتهاش واخا بقى فيها الحال على كلمة الدل اللي قالت ليها وكنزة مشات للبيت كتفوور وتنفخ وتفش مخلية الحاجة كتنكر وراهاا..فحين اسماء خلاتهم مناكرين وخرجت كتعيط على باباها يجي ...هاد الاخير اللي ملي جا ماقبلش ابداا يدوي معاهم ملي عاودت له اش قال ليها الحاج والرفضة اللي رفض...وهي كتحاول معااه عينيها تحطو على الشيك وبغاتهم يخلصو باي طريقة على الاقل نص خساارة واخا غيتقلق عليها محمد لكن من بعد غيبرد وغيعرف اللي دارتو على حق...

اما عبد المتقي كان مصر ومارتاح حتى عيط للحاج وعلمو وقال ليه غيجي عاد ارتااح...لكز ماجا فين يجي الحاج حتى سبقو عبد الكريم ولمياء اللي جاو قدام المحل نزلت عندهم اسماء وعبد المتقي ودخلو للمحل اللي كان تطرف وتجمع مابقاش كيف كان...اسماء وقفات بعيد غير كتشوف تاالفة غير معحبابها ودايخة ماعارفة وااش اللي كدير فيه صحيح ولا غير مدرمة...وفعلا كيف واعدها عبد الكريم تكلف بكاع المصارييف وقيد ليها الشيك عطاه ليها بشرط كاع الفيديوهات ديال كاميرة المراقبة مايبقى عندهم حتى فيديو لرقية لا عندهم لا فالكاميرات...عطاه عبد المتقي الكلمة فوق خاطرو ماحاملش نفسو من هاد الموقف اللي حطاتو فيه اسماء ولا غير كينخنزر فيها حتى خرج عبد الكريم ولميااء عاد شدها ...

اسماء : اباباا الله يهدييك هاهو عطاني غير الشيك واش عارف الشيك راه غير ورقة داباا...ماغنصرفوهش حتى نشوفو شنو غندير غير تهنى..

عبد المتقي : هاد لعب ادراري الصغار اللي دخلتيني ليه مادخلش ليا رااسي..مادخلش لياا لراسي انا نقوليك..اري ديك الورقة حتى جيي الحاج ونتفااهمو..غترديني ضحكة قبالتو...

اسماء : راه عيطت ليا هي ابابا حشمت ماعرفت مانقول انا اللي ماشية كنقلب عليهم يجيو يخلصو هادشي لي دارو وملي يعيطو علياا نقوليهم لا مابقيتش باغة...ماقدرتش ابابا عيطت ليا قلت ليها واخا اجي...وشكون قال اصلا هاد ابشيك ميكونش مزور ولا فيه شي مشكل انا مغنتيقش بيهم حتى يجي محمد يشوف شنو داكشي...

عبد المتقي غير كيشوف فيها فالاخر تنهد وطلع يصلي العصر خلاها فالمحل جالسة كتشوف فيه وضور بجناابو وتننهد وتفكر غااارقة فتخماامها...واحد اللحضة وهي تسمع الدقاان ضناتو غير شي حد من البناية وتلفتاات غتخرج باش تخليهم يدخلو...مع غتلفت وهي تبان لييها رقية جاية داخلة عندها...

تدهشات اسماء توقع اي حاجة ايلا تشوفها فهاد اللحضة...يلاه كانت غتدوي حتى بانت ليها حسناء داخلة موراها اللي حتى هي مابايناش فيها البشارة على وجهها....بدون شعور حطات ايديها على كرشها كترمش والفزع بان عليها...

رقية : فين الشيك اللي عطاك راجلي ؟؟ اري لهنا (خرجات فيها عينيها بصوت عليها) جبديه ليا قبل مانوليو فشي حاجة ماغتعجبكش...

اسماء بهدوء كترمش فيهم : ماعندي ماانعطيك سيري عندو هو اللي عطاه ليا...

رقية بصراخ : جبدي الشييك لهنااا..

اسماء كتقتلهم بهدوئها : ماعندي مانعطييك (شافت فحسناء) هزي مك وخرجو برا قبل مانعيط ليكم على البوليس تخرجو بزز منكم باقة عندك الكمارة تجي عندي نسيتي شي حاجة مادكدكتيهاش جيتي تهرسيها بايدييك...اش بقى ليك اشنو نسيتي ؟

رقية باتدفاع حتى رجعت اسماء لور : جبدي شييك ولاا هاد المرة ركابيه اللي غيتهرسو باش تعلمي تهزيهم وتجي لداري....بيني وبين راجلك اش جابك عندي نتي ؟...علاش كتقلبي ؟؟ باغة غا صداع على راسك ؟ بيني وبيين راجلك اش جابك لداري ؟

اسماء : ااش بينك وبين راجلي الالة يااك سليتو وااش نتي حمقة و لا مالك اش عندك معاه ؟ مابغيتيهش يطلق بنتك ؟ ياك هي لي بغات طلاق ملي كاع مشواقة فيه هاد الشوقة كاملة...تبتي بنتك تجلس فدارها ماشي العافية شاعلة ونتي كتزيدي تزدني فيها....طلقتيها منو شديها عندك ماشي تسرحيها على ناس تطلق عليهم حماقها...

رقية : بزااف علييه حتى نرجع ليه بنتي هو اللي ضيعهاا واللي ماعرفها خسرها....مزاال تجييب سيييد سيدو ودابا تشوفي على عينييك(شداتها حسناء)

حسناء : صافي ماما ماعندنا مانديرو بهاد الهضرة عطيها الشيك ا اسماء خلينا نمشييو عفااك...

اسماء :واش نتي حمقة ؟ مك تخرب الدنيا ونزيدو نخلصوها...حمدو الله اللي مادعيناش حتى هاد المرة....حمدي الله وسيري تكمشي فداارك باقة غيير زايدة فيه ؟

اسماء كتقندش وترجع تبرد فنفس الوقت بغاتها غير تخرج فحالها ورقية كتغلي وتنفخ وتفش غطرطق وخلاص ملي كتشوف اسماء كترجع خطوة لور شادة كرشها و الخوف والفزع فعينيها غير ماكتزيد تطلع وتغوت خالعاها حسات بيها خايفة منهم وداكشي اللي بغات....لكن كان العكس ملي دخلات كنزة من الباب سمعت صوت رقية وعرفاتو...مع الباب دخلات عينيها حمرة فيهااا يلااه غتدوي اسماء حتى بانت ليها كنزة بلا كلمة بلا جوج طارت على رقية من لور جراتها على وقفتها حتى غوتات لربي اللي خلقها ماعرفات باش تبلات...مغطية وجهها بايديها وايدين كنزة فشعرها كينتفو وفوجهها كيتقمش حتى كيبقى الدم فضفارها بحال شي مشة ولصقت على الحصيرة...لصقت عليها لصقة وحدة عيات حسناء ماتجر وتغوت واسماء شادة كرشها وكتجر فكنزة والبناية كيطلو من الباب والجيران تجوقت فالشارع حتى حد مادخل غير كيشوفو من بعيد وشي كيسول شي....بهدلات بيها المحل قننت بقننت ايديها لصقو غير فرقية ماحاسة لا باسماء اللي كتجرها لا بحسناء اللي حتى هي بدات كضرب فكنزة وتقمش فيهاا ساعة جمعاتهم كنزة بجوج خرجت فيهم القديم والجدييد وكاع العافية اللي جامعة فقلبها برداتها فيها...واحد اللحضة تغلبات فيها كنزة ملي ضرباتهاا رقية بايديها نيشاان للفتحة بحرر الحرريييق اللي هزهاا وقفاات واللي شد فيها كدفعو ماارداتش الباال اللي لاسماء بغات تجرها وهي تدفعها بحرر جهدها....طااحت اسماء على وقفتها حتى غوتات شادة كرشها حساات بالارض كضور بيها و قلبها غيخرج من بلاصتو مزييرة على جناابها و واحد الوجع بحال المسامر كيضرو فكرشها قطع فيها الننفس...مابقااش عندها الجههد حتى توقف تفك كنزة اللي كتشوفها تغلبت وسط منهم بجوجات ملي ضربتها رقية للفتحة مابقاتش قادة حتى توقف مقادة...فدييك اللحضة دخلت عليهم الحااجة وعبد المتقي عاد زعمو علييهم بعض من الناس ودخلو كيفكو مجموعين بزز باش طلقو كنزة منهم...وعبد المتقي عرف رقية نوضها من تما حالتها حالة مبهدلة وملابسها تقطعو عليها ووجهو نازل بالدم جرا عليها كلها كتررعد مخلوعة وحسناء كثر منها...وهو كيحلف حتى يدعيها للبوليس وهي خرجات مبدهدلة مشااات عاد دخل عند الحاجة اللي محنية عند اسماء معصورة وعرقانة كتنهج مزيرة على كرشها...

الحاجة : ارا ليا داك القرعة عطيني الماء (مد ليها القرعة وهي حلاتها كتخوي لاسماء على وجهها) بشويا عليك شدي شربي..شربي ميهة وااش طحتي قولي ليا واش ضراتك ولا طحتي ؟

كنزة غير واقفة شادة على فمها وعينيها كيضورو بخوف متررعد عاد حسات براسها ملي دفعاتها...

اسماء مزيرة على جنبها بألم :ماعرفتش ماحسييت براسي حتى طحت....المسامر كيتدقو فياا اماماا واقيلا غنولد...

الحاحة : غيير تقصحتي من قفااك غيير اجبي و ولدي باقي ليك شهر وزيادة ماتخافيش غير تقصحتي...

عبد المتقي : وااش تقصحتي ابنيتي شوفي فيا نديك للطبيب يشوفك...تقصحتي تديك ؟؟

الحاجة : واشنو....لازم نديوها راه طاحت على وقفتها وكرشها لفمها ..نوض نديوها دابا...فرق ديك الجقلة على براا (ناضت ليهم) فرقو عليا هاد الجقلة الله يقل حياكم.. جيران دالوييل الله ياخد فيكم الحق تتفرجو من بعيد ماقدرتو تفكو لقيتو الفرااجة الله يخليم بالخلا..

عبد المتقي شاف طوموبيل دالحاج وقفات على برا : هاهو الحاج جا...نوضي ابنتي(شاف فكنزة) عاونييني على ختك نوضي ندييك...

دخل الحاج اللي ملي سمع الخبار تصدم وضارت بيه الدنيا عمرو طاح فهاد الموااقف ولا دازت عليه فحيااتو كاملة...كان عايش كاالم وهاني حتى نهار تبع الحاجة فتفكيرها ومشى على خطاها...اسماء ماقدراتش تنوض حتى كيبغيو يوقفوها وكترجع تجلس عرقاانة كتتتنهج شوية شوية عاد مشى منها الوجع ونوضوها مباشرة للطوموبيل دالحاج وهي عطاتو رقم الطبيبة ديالها صونى ليها علمها بلي جايين عاد كسيرا نيشان لعندها...

اما كنزة بقات مع بنتها الفوق سدات عليها الدار ودخلت كترعد خايفة على اسماء يوقع معاها كيف وقع ليهاا...هزات بنتها كترعد ايديها مقموشين ولباسها كاع مرون عينيها غير كيضورو بخوف حتى بداات كتبكي ليها ايور...

كنزة : شش هانا اماما هانا غنرضع بنتي بلااتي نشوف خااالتك واش وصلاات ...

جبدات تيليفون دغيا صونات لاسماء جاوبتها الحاجة قالت ليها مزال ماوصولو قطعت عليها وهي غير

ماكتزيد تحسسها بتأنيب الضميير بطريقتها فالكلاام والقطغة اللي قطعت عليها فوجهها...شداتها البكية ونزلوو دموعها ندماات كاع اللي قاصت فيه شي رقية واخا تستااهل بقات فيها اسماء...

كنزة : واصاافي ابنتي برااكة من البكى علاش كتبكي حتى نتي ماالك...

قلباتها للجيهة تانية وجبدات صدرها بغات عطيها ليها مابغاتش تشدو غير كتبكي وهي وكتهزهز بيها...

يلاه غتسد تيليفون وهي تشوف عماد اللي مصوني ليها كثر من خمسة دالمرات ومخلي ليها فوكال فالواتسااب..ودخلات ليها طلقاتو كيتسمع وهو كيقول ليها..

عماد : السلام عليكم كنزة حيت عندك البارح مكنتيش فالدار..مكتجوبيش على الاتصال ديالي واقعة شي حاجة نتوما صافا ؟ بغيت نشوف حلا وندوي معااك ايلا كنتي ديسبو....

طفى الفوكال وعاودت طلقاتو كتسمع مرة اخرى...مادراتش البال لكلامو كثر ما ردات البال لايور اللي غير غير طاح فوديناتها صوت عماد صقلات وحلات عينيها كترمش وتبقلل بحالا كتقلب علييه بعوييناتهاا...طفات الفوكال مراقبها شوية وهي تبدا تنبين تاني كتوجد البكية وهي تطلقو ليها وهي تسكت تاني كتصنت ليه وترمش بعويناتها...حتى طقلات كنزة دموعها كثر وتحنات باستها مخلايها كتصنت ليه...

كنزة : حتى نتي توحشتي باباك اكبييدة..(تنهدات بخنقة) هو اللي دارها بايدييه اش غندير ليه انا....خليه يعرف بحق اللي ضيع...عجبك صوتو(كتبوس وتستنشق عطرها) ممم ااش عجبك فيه هو بحال الغول...

ضماتها عندها وخلاتها ساكتة كتصنت للفوكال دياالو وترااري بيهاا والساعة قدامها كتحس بيها مكتزيدش الدقيقة كدوز بساعة...حتى دازت نص ساعة وهي تصوني ليهم جاوبتها اسماء هاد المرة قالت ليها بلي ولات شوية وماعندها حتى حاجة عاد ارتااحت كنزة وقطعت معاها...

الحاجة : علاش ماقلتيش ليها اش وصاتك طبييبة..قالت ليك ماعندك والو علاش تكدبي عليها ؟

اسماء فااشلة كتدوي : مابغيتش نخلعها وصوتها كيترعد واصلا ماقالت ليا والو اماما صافي...

الحاجة : روينة هادي..روينة ياربي...يلاه نمشيو .. غتمشي لداركم حتى يفكو روينتهم معااهم هاد غترجعي واش انا باقة غنولد وحدة اخرى ؟...البارح دكدكت المحل ودرنا عين ميكة ليوم طيحاتك وكون جابتك على شي حديدة ولا شي عود فكرشك باقة عاد غتفرحي بولدك ؟

عبد المتقي دخل عليهم : مالكم اش واقع ؟

الحاجة : دويتي مع الحاج بنتي غتمشي معايا قلتيها لييه ؟

عبد المتقي : راه قلتها لييه كيعيط لولدو باقي كاع ماجاوبو مانعرف اش عندو تما...بغيتيها تمشي معاك غتمشي معاك غير هنينا...

الحاجة : لا الحاج لا الحاجة لا السي محمد...على الراس والعين اسي عبد المتقي...وليني عاجبك هادشي..عاجباك هاد الروينة وديك الحمقة غير شافت السيد سافر خوا ليها الطريق جهلت جهلت...ماخلعها مخزن ماخلعها بوليس اش باقة باغة...

عبد المتقي : ماشي بعقلها والله القساام...شي عرق ماشي هو هاداك فراسها...

الحاجة بهمس كتقاد شال على راسها معصبة كتغلييي : واش انا بنتي عاد باقة غنولدها...ماناكريش خير الحاج و ولدو علينااا كبييير وفايت الحدود...راه على ايديهم بعد الله سبحانه عاد وقفت على رجليها..وليني ملي السيد باقي ماصافيش مع تريكة مرتو لولى وملي ولاو عينيهم فبنتي لا بنتها لا الام مولات العقل هاجمين عليها تا المحل لا..مانقبلهاااش ليهم...يدير حل معاهم يفرقو بنتي يا بالشرع يا بالقانون...

عبد المتقي تنهد وقرب عند راسها : شحال باقي ليك على الولادة شحال قالت ليك الطبيبة...

اسماء : هاد السيمانة غيدخل شهري ابابا...

الحاجة : راك شفتي على عينييك ااش وقع وسمعتي الظكتورة اش كتقوول..قالت ليها ماتحركيش وماديري تاجهههد راه طاحت على قفاها والتيلاد تحرك من بلاصتو شوية ومكان غيموت فكرشها...هي اصلا ناوية تولد عندي...مابقى ليها قد مافات راه ناخصااها تشقى ماخاصهاش تنوض من بلاصتها حتى يزكى ليها التيلاد فمضوعو تاني...

اسماء : صافي اماما..وصافي من الغوات فف ..

الحاجة : بزاف علينا هادشي بزاف من نهار عطيناها لييهم وهاد البنت ماشافت الراحة مع نرتو لولى...كون رجعها مايوقعوش هاظ الشمااكل والله مايوقعو...يلقاو الحل بيناتهم وراه يجي يديها ماحيدناهاش ليه واصلا ناوية تولد عندي خليها تساراح منهم شوية....خليها تستارااح نشوفو هاد رقية اللي خرجت فعودنا هاد العام...تهنينا من بنتها زادتنا مها واش بنتي لي كانت مجوجة ب بنتها السيبة هادي حكروها ولا شنو...

عبد المتقي : تمشي معانا للدار ابنتي تستاراحي شوية ؟ حتى يجي راجلك ونشوفو اش نديرو...راه دويت مع شيخك غيسدو المخوختى يجي محمد هو يعرف شغلو ممعاهم ونتي يلاه معانا حتى نديرو حل اهاد الروينة..

باندفاع تدخلت الحاجة باغة تديها معاها خلعاتها الطبيبة بكلاامها وهي عارفة اسماء ايلا مشات للدار ماغتنعسش وتعطي الراحة لرااسها وتخلي الحاجة بوحدها...

الحاجة : غتمشي معانا...ايلا مشات لدارها راه خاصها تنوض وتشقى وتطيب والطبيبة قالت ليها ماتحرركش...خليها تمشي معايا غير حتى تولد ويديرو حل مع ديك المسطية...

اسماء : واخا ابابا اللي بغيتي...

صونى تيليفونها طلات عليه وهي تلقاه محمد شافت فيهم بجوج كيشوفو فيها حشمات تدوي قدامهم فالاخر تنهدات وردات عليه قدامهم كتعاود ليه كلشي وكاع اللي وقع وغير كتصنت ليه وهو مععصب كتسمع فيه بصراامة كيدوي مع شي حد باغي يطير ويرجع وماعندو كيف يديير ندم على شي سفر ومايجي منو...

فحين كنزة غير نعسات ايور ارتاحت وارتاحو وودينها من البكى...عاد هزات تيليفونها وسجلات فوكال لعماد..

كنزة : سلام عماد صافا....انا مكيناش فالدار دابا حتى العشية وغنقول لبابا يديها ليك... ايلا كنتي كتسول على المحل راه صافي غنصلحوه ماوقع فيه والو واللي هرسو غيخلص...قال ليا زياد جيتي عندي هنا وقلتي للبناية شي حاجة قالوها لبابا وراك عارفو...ماعجبوش الحاال..عارفاك بغيتي تعاوني شكراا بزااف ولكن مابغيتش المشاكل يكبرو بينك وبين بابا كثر هو عارف اش كيدير ماغيبغيش شي حد اخر يتدخل..شكرا على كلشي..

قطعات الفوكال بحالا قطعاتو من قلبهاا ولكن كيبان ليها هذا هو القرار الامثل من الاحسن ترسم حدود بينها وبينو...بدلات لبنتها وهي وسط نعاسها وداتها لبلاصتها...طلات من الشرجم وهي تلقى البناية سدو الباب ديال المحل وسورتوه و واحد مشى عند الباب صونى علبيها وهي تنزل عندو خدات منو الساروت وطلعات سدات عليها باب الدار كتعيط لاسماء مارتاحت حتى جاوبتها وعلماتها بلي من تما غيمشيو للدار ديال واليديها...

ناضت حتى هي لبسات حوايجها وجلسات كتدهن واحد الكريم على القماشي اللي فايديها وغير لقطة المضاارب اللي كتجي بين عينيها واخا ديك الفرسة كاملة اللي فرست رقية وبنتها مزال مابردااتش ملي كتفكرهم سنانها كيتشابكو بحقد حتى كملات ايديها ودهنات عنقها فيه واحد القمشة وغطاتهاا علد هزات سوارت كوموبيل والدار وخرجاات ركبات بنتها لور وصاقت مبااشرة للدار عندهم لقاتخم مزال جاو غير دخلت هي بربع ساعة جاو هوماا...ودخلت الحاجة كتوجد الليت لاسماء ومرت صلاح يلاه فايقة من النعاس ضهشروها بمجيتهم كاامليين...

ارتاحت اسماء فدارهم شوية وماجات فين تكمل العشية حتى جات الحاجة وعائلة محمد شافوها والصدمة باينة على وجههم اما هي ماجلساتش معاهم غير طلو عليها فلبيت ومشاو للصالة وهي دارت راسها ناعسة ماباغة تشوف حتى حد كتسنع فالحاجة ام محمد كتدوي على براا وهي كتغلي خلاص ملي قالت ليها ام الحاحة بلي راه اسماء غتبقى عندها حتى تولد...ضارت بيها الارض وماجا فلالها غير الطلااق خافت اسماء ختى هي تنوض تطلب الطلاق وتبغي تبعد على المشاكل...حتى فهماتها الحاجة وكنزة بشوياا وقالت ليها بلي حتى محمد قال ليها تبقى فدارهم عاد ارتاحت شوية واخا كانت باغة اسماء تولد عندها فالدار...اول ولادة والو مرت الولد لقى فيها الحال وبينات لييهم....

وغير خرجو هوما جا عبد الكرييم وبنتو لمياء وواحد الراحل كيعتادر وييعاود حشمااان من مرتو وعبد المتقي ماخلا فبين حط لييه كاع غليلو طلقو فيه..خلاه حشمان من جنابو من رقية مرتو وقرار واحد اللي كيضور فبالو ...ولا كيحس بيها كتخرج من طوعو ومابقاتش تحت ايديه والطلاق اللي كيبان ليه حل ببنو وبينها...ماعطاهش عبد المتقي الشيك وحتى و شد الضد مع رقية كيقول ملي باغة شيك وباغة تفلت منها..هي اللي متكونش ليها...

عمرات الدار على اسماء مالقااتش الراحة غير كتقلب فبلاصتها والوجع كل ممرة يضور من كرشها لضهرها عدبهاا...حتى دخلت عند كنزة جلسات حدا رااسها ةالدموع فعينيها قلبها طاايب حتى هي...قالت وصوتها كيترعد بالدموع...

كنزة : سمحي لياا انا اللي دفعتك والله نارديت لييك الباال ضرباتني للفتحة حسيت بقلبي غيخرج من بلاصتو..

خرجات فيها اسماء عينيها تسكت خايفة تسمعها الحاجة..وايلا مشات حتى عرفات كنزة اللي دفعاتها هاديك هي المصيبة عمرها تحيدها من فمها وهي ديجا هازة شوكة من كنزة باغة ليها غير السبة...

اسماء : سولني بابا قلت ليه طحت بوحدي صاافي سكتي ماتبقايش تقوليها راك غير جيتي فيا مالي عارفاك غدفعني بصح ؟

كنزة دموغها نزلو حاسة بتأنيب الضمير : سمحي ليا...

اسماء عنقاتها : علاش كتبكي دابا صافي وليتي على سبة غير نقيصوك تبكي ههه ماولفتكش هكاا ههه

كنزة : غوت عليك قبيلة و وقلت ليك واحد الكلمة مخاصنيش نقولها نتي ماشي مدلولة بالعكس تتي كتوفقي مع راجلك ماخلتيهش بوحدو ومازدتييش عليه بمشاكلك حتى نتي كون كنت انا فبلاصتك مانصبرش هكا...سمعتهم قبيلة كيدوييو عمري سمعت الحاجة كدوي عليك هكاك...

نزلو دموعها ومسحاتهم بحرقة...كتحس بالغيرة ملي كتشوف واليديها كيموتو على اسماء لدرجة ماعقلو لا على الحاج لا محمد المهم عندهم هي تكون بخير...كتقول مع راسها علاش حتى انا ماشفت منهم هادشي رغم انها كانت فأمس الحاجة ليهم وقت الطلاق.....كتحس بالغيرة وماحاملاش راسها تحس هكا...

كنزة : هي كتدوي عليك وبابا كتشوف فيه عينيه كيلمعو مفتاخر لييك لواحد درجة مسكيين كتحس بيه غيبكي..كيقولو عليك بنت النااس وصابرة معااه و واخا داكشي كاما اللي داز عنرهم شافو متك كلمة دالعيب ولا شي شوفة ناقصة....حتى من الحاجة كتقول لبابا اسماء بنتي وعمرها تخرج من داري قالت ليه هه بعد الخطرات تنتعصب عليها كتخليني داوية ماكتحوبنيش ..كون كانت شي وحدة اخرى كون راه كلمة بكلمة معايا هههه

اسماء : سمعتها ههه

كنزة : وقالت ليه تاني جامعة ولدي وجامعة ليه وراقو وجامعة ليه شغلو....قلات لبه ملي كيكون معاها كاعما نتشطن علييه عارفاها كادة بيه ههههه

اسماء : راك حتى نتي ماشي غير انا...غير كتنقص من راسك شوفي غير خالتي فوزية ملي كانت عكززتك ولحد الان كتحماق علييك وصلتي معاهم للمحااكم وعمرك نقصتي منهاا لا هي لا بناتها شفتي اش كيديرو عليك...هادشي مكنديروهش حيت بغينا هكاك ترببنا علييه....كنا كنشوفو ماما اش كدير مع عمتي وعائلة بابا وجدة الله يرحمها من وحنا صغار وهكاك تعلمنا منها نحتارمو الكبير واخا مانعرف اش يقول كيبقى كبير...والعكوزة فمقام الام كيفنا بغات تكون...نحتارموها وضبر رااسها هي تحتارمني ولا تجلس...

كنزة بضيق كتبكي : وعلاش انا ماما مكديرش عليا اللي كدير عليك وبابا كيدير فيا شي شوفات بحالا جايبة ليه الحرام...خاضيني وديما تابعتي فحناابي بحالا غتحيب ليه شي لعنة..

ملعرفت ماتقول اسماء حيت حتى هي فاش طلقت نفس التعامل شافت معاهم حتى قطعت العلاقة معاهم عاد بداو كيرومو لجيهتها شوية بشوية....

اسماء : راه ماكينة حتى ام ماتبغي لبنتها الطلاق واخا كيفما بغى يكون راجلها دابا تبرد واتسى حتى عي غير صبري شوية ماتديش عليها اما باباا راه ماشي خايف منك راه خاف بلي كيضور لييك..عارف عماد لحد الان كيضور بيك كيخافو يلعب ليك لعقلك وطيحو فالغلط ....غير صبري اختي...

كتزة : تخنقت منهم قلت غنمشي للدار نرتاح شوية تبعوني بجوج هه تخايلي ههه....(هزات نفس كتمحس عينيها وتضحك) ماعلينا صافي نساي هاد السيرة اختي والله مكنبغي نتفكر شي طلاق ولا شي زمر كيعصبني هاد الموضوع...حتى الحانوث غنحيدو من لالي صافي مامكتابش تابعو النحس الله يستر...نديرو السبوع بعدا نسيو فييه شوية ومن بعد يكون خير...

اسماء :ديرييه اختي ديريه مانقولش ليك لا...محتاجين لشي عراسية ولا شي سبووع غانتفسو شوية واللع العضيم ايلا عينا بالهم والغم...ديري شي سبوع زويت القاعة على حسابي..ناخدو ديال صوفيا...

كتزة: الله اختي هاديك اللي كتبدا من جوج دالمليون مالي حمقة.. .

اسماء : لا ماتوصلش ههه وتوصل كاع...كادو من عندي غير قولي بسم الله...القاعة على حساابي ديري لينا شي سبوع كبيير(كضحك باغة تلين الجو) ناري ماعرفتش قبيلة هه كليتبهاا امسخوطة جمعتيها هي وبتتها...

كتزة : ومارتاحينش ايدي باقين كيااكلوني..

اسماء : ياك ما الفتحة مزال ضارااك ؟ هاد القمشة دارتها لييك الشارفة بنت الحراام..

كتزة : غير خبشة صغيرة ماشي شي حاجة اما هي لكن مها ومزال نعاودها ليها..

تسنيم دخلات عليهم مغبنة : وماماا ماغنمشيوش لدارنا...

اسماء :علاش عادي ماشي دارنا...

تسنيم : نمشي لدارنا لهيها عند خالتي الحاجة وخالتو خديجة هنا مازوينش مابقيتش بوحدي..كاينين هادووك(ولا دصلاح) مكيعرفوش يلعبو كيغوتو واع واع وديك المراة كتقول ليهم واجلسو(ماماهم) وهوما واع واع وهي كتقول ليهم واحلسو ..وهي تنوض وهي تضرب بنتها حتى غوتات وهي تخرج فيها عبنيها هاااكااا وهي تسكت..

باستها كنزة حتى خنقااتها كتحمقها هضرتهاا وتعاوويدها واسماء توكدات فيها مخنزرة...

اسماء : ياك قلت ليك ماتلعبيش معااهم ..

تسنيم :ونبقى بوحديتي هنايا...

اسماء تعصباات : راه اقسم بالله مرة اخرى نلقااك معاهم حتى نضربك اتسنيم ماتعصبنيش..نوضي تلعبي بوحدك نلقاك معااهم نتفاهم معاك..

تسنيم كتهرنن: ونبقى بوحديتي...خالتو عطيتي بنتك نلعب ليها...

كنزة : بنتي انا ولات مونيكة لمك قالك تلعبي بيها..( شداتها كتهر وتبوس فيها وتسنيم غتسطى بالضحك) دوي لمك هانتي على نلعب ليها مونيكة هي...بوسيني شهاد الزيين ياربي الشهبة دياالي...شوفي اسماء بدا شعرها كيميل للقهوي مغيبقاش شهب....

مرت عليهم اربع ايام فرمشة عين...هاد الايام كلها قضاتهم اسماء فدار واليديها اما كنزة كانت كتمشي دارهاا وترجع عندهم لكن الاغلبية كتبات فدارها مخلية اسماء مرتاحة فبيتها مكتبغيش تزاحمها فيه....هاد الاخيرة اللي عيات ماتخبي وترسم الضحكة على فمها لكن فالاااخر حسات بنفسيتها مرضاات..بقوة التفكيير والتخمام ليل ونهاار وهي جالسة غير بوحظها مع تيليفون مرة كتجلس مع الحاجة تدوي معاها حتى كتبان ليها نعساات ملاات ووعيات من الجلسة ووقت الفرااغ كتلقى غير اتفكير تبقى تفكر فالقدييم والجديد حتى مرضاات نفسيتها وتفكرات الماضي وطاح عليها الضيم منو وسوس ليها الشيطان ولات كتشوف راسها ماعندها زهر وحتى محمد ماقدرتش ترتاح فعيشتها معاه وديما المشااكل فحيااتهم عمرها غتلقى الراحة معاه...ولات كتشوفو مل منهاا وعيى حتى مابقاش مهتم بيها واخا راه كيعيط ليها كل نهاار كيسول فيهاا ويدوي معاها شحاال كتضحك وتنسى معااه كتولي بحال شي مرااهقة عايشة فالاحلاام وغبر كتقطع معاه كترجع لتخماامها وتنهيدات حاريين كتهرجعم من دصرها تقول هازة جبل فوق منو...

كانت الحاجة كتعيط ليها كل نهاار لا هي لا الحاج ياخو خبارها ويسولها ليها مكيجدبوش اسراء وعائلتها بهخطرة وحتى اسماء ماسولاتش عليهم ..مارضاتش تعاود تسول وحتى حد ماعاود ليها شي حاجة...

كملو تحهيزاتت السبةع والحاجة تعرض وكنزة تابعاها حاضية معاها حيت ايلا ماحضاتش المغرب كامل غتحضرو ليها...كتمشي تعرض فالدار وتقول ليهم مرحبا بيكم مجموعين وتعطيهم الدعوة لي عاطياها كنزة فيها ممنووع الاطفال الصغار...كتشدها المعروضة كتلف واش تبع الحاجة وتدي ولادها ولا تبع الدعوة وتمشي بوحدها وتخلي ولادها...حلفات كنزة حتى ظير لبنتها سبوع ولا فالخيال وفعلا مابخلااتش عليها فحتى درهم كاع رزقها حطاتو عليها كتحاول تكابس شويى ولادكن ضروري من الخسراان...واخا معاونينها واليديها وحتى اسماء وقتما لقات ميفاش كتعطي معاها نص بنص هي وياها مابغاتش تخليها بوحدها...

تلاهاو مع السبوع ونساو حرقة المحل اللي تسد حتى يجي محمد ويدير ليه قرار...واحد الصباح حتى دخل عليهم عبد النتقي قال للحاجة توجد الغداء محمد وعائلتو جايين يتغداو..سمعاتو اسماء تههز عليها قلبها بدوت شعور حسات براسها فرحااات حشمات وضحكات على راسها عمرها تخايلت شي نهار تبغي شي حد لهاد درجة...لدرجة تفرح بمجيتو وتحزن لمشيتو واخا لقى فيها الحال حيت ماعجبهاش وتقلقات...لكن ماخلاهاش تعيش قلقها فخاطرها حتى صونى ليها وعلمها بلي جاي عاد ارتااحت وناضت بحيوية وشعوور جدييد وفرحة جديدة لشوفتو..

عيطات على كنزة تجي عندهم وجدات حوايجها تخرج تدوش يلاه حلات الباب وهي تلقى مرت خوها كتجر بالكرااطة غير شافتها وقفات مبسمة واسماء مكتشوفش فوجهها رمات رجليها بغات تخرج وهي تغوت الحاجة من الكوزينة حبسااتها...

الحاجة :فيين غاداا ؟؟؟ رجعي رجعيي لرض فاازكة كتزلق رجعيي تاتنشف

اسماء : بغيت تدوش...

الحاجة : تاتنشف دنيا فين غتدوشي غتزلقي تولي طاايحة رجعي غير رجعي غنوجد ليك الدوش حتى تنشف الارض وخرجي سيري...

رجعات للليت جلساات فييه بملل ولا كيخقنها حتى نشفات الدنيا وخرجات لقات دوش واحد لكن هزات داكشي كامل خواتو وعاوداتو من لول مكتيييقش فحتى حاجة حيت مرت صلاح معاهم فالدارح تى الماكلة ايلا ما طابتش قدامها ماكديرهاش ف فمها واخا تبقى بجوع...

جات كنزة وحتى هي بحال الحاجة تصدمات من شوفة اسماء هكااك بكثرة ماكتشوفها هاد ليام ماعندهاش الخاطر ودابا كتشوفها ناشطة وضايرة بالحالو وكلها نشاط وحيوية...دخلات هي وتسنيم حيت كتديها معاها ولاحت ليها الفاليز صغييرة ديالي ليب خدوي والعناية كضحك..

كنزة : هاي هااي هاي ناس د دالحيوية وهادشي كاع كيديرو فيك ولد الفقييه..

اسماء : لا ماشي هكاك هه غير بغيت نبدل الجو شوية تخقنت فالبيت...

كنزة : ممم حتى انا تقت بيك ههه اجي نصاوب ليك شعرك...

اسماء : لا بلاش ماغنصوبوش بغيت حتى نمشي ندير ليه سوان وندير ليه شي بروتين...واخا راه خفاف شوية...

كنزة : حتى انا غنديرو..بغيت نجرب كلاصاح زويين؟

اسماء : غنعاودو راه مشى...تعقلي نهار درتو...ودرت الكديرة ناري عمري نسى داك نهار هههههه

كنزة : نسييتهاا هههههه باقة شادة لييك وقفي نشوف

اسماء :مشات راه درت غير حصة وحدة مكتبانش منها واصلا ضعافيت عرفتي شحال من كيلو طيحت ايلا قلت ليك تخلعي مشات كااملة...

كنزة : البنة فالغضم ملتقلقييش هههه اجي ماعاق بوالوو ماقالش كيفاش هادشي...

اسماء : مكيدي ماكيجييب ..

كنزة : غا كيتلممس ههههه قولي لياا ولد الفقيه كيعجبو الغض كيعجبو اللحم ولاا العضم قولي قولي كيباان معقد العار اش كيقول لييك ههه...

اسماء : مابقاتش فداك شيئ مكيقول ليا والو عليه هه..محمد ماشي من النوع اللي كيبقى يشكر ف فالفورمة ولا الشكل ولا شي حاجة غير ولكن من شوفاتو كنفهمو اما باش يقولها بفمو بقيتي تما....

واسماء سمعاتهم على برا داخلين وصوت محمد مسموع حتى لعندها وصوت باها كيرحب بيه...خرجات عندهم كضحك الفرحة بانت فعينيها...تسناتو حتى حط تسنيم عاد قربات عندو ملي شافتو ضاحك بعينيه كيدير فيها شي شوفات ويحرك راسو بحالا كيتحلف عليها شدااتها الضحكة وسلمات عليه من الخد للخد حاسة بواحد دراعو ضامين كتافها بجوج حاني راسو كيدوي معاها بدون احتكاك محتارم راسو ومحتارمها قدامهم...ولاخرين دخلو خلاوهم بجوج...

محمد : كي وليتي شوية ؟ عندك شي وجع باقي كيزورك..

باهتمام كيحقق فيها ركن بركن وهي غير مكتزيد تفشش وتلحن صوتها بدون شعور...

اسماء : ماشي بزااف قالت ليا الطبيبة غير ماتحركيش على الاقل حتى تولدي...

محمد : ارتاحيتي شوية درتي بكلامها...

حركات راسها بايجاب مبسمة كان توقعها فشكل....ضناتو يقلب وجهو ويخاصم عليها ولا كاع متيسلمش عليها كأسوء توقع لكن كان العكس خلاص ملي بااس على رااسها حسسها بحالا كيطلب منها السمااحة قلبها بغى يخرج من بلااصتو ..وهو يحك ايديه على خسرها وزيدهاا قدامو كيسمع لبااها كيقول داخلين للصالة كيضحكو هو والحاج...

الحاج كيضحك طانز عليها : لا لا ماعندنا مانديرو...اسماء غتكلف وتمشي برجليها تفاهم لينا معاهم...

عبد المتقي ضار ليها مخنزر ماتقولش كيصحك : سمعتي..(شاف فمحمد * انا عطيتها ليك تفاهم معاها...منك ليها هاهي..

اسماء حشماات قدامهم : ماكةنتش فنيتي يوقع هادشي ابابا...

ضار ليها لغفلة منها حتى رجعات ورا محمد حابسة الضحكة وهو مغوبش تحلف عليها ايلا داوي من نيتو عارفة باها حال وعقل ويقدر يقلب عليها قدامهم ومحمد ضحك وضورها ورااه حاميها بايديه...

محمد : غير خليها الله يسامح (طل عليها بنص عينيه) كديريها كّد راسك وتخباي فيا..اش داك عندهم ؟

بفات غير كترمش فيهم حتى بداو كيضحكو عاد ضحكات واخا هكاك مكتيقش فباها ينقلب عليها فاي لحضة... وكنزة غير كتشوف فيهم مبسسمة فهاد اللحضة بالضبط عجبها محمد بزااف كتعيى تعاير فضهرو فلخر غير كتشوفو كتندم على كلامها. .اي واحد فللاصتو وفموقو طبعا غيتقلق على مرتو وكاين لي غيلومها ويرجع كلشي على راسها لكن هو كان العكس كتشوفو داير ليها كيف شي بنت صغييرة مجلسها حداه وكيسول فيهاا وكيدوي مع عبد المتقي وباينة فكلامو ماحاملش داكشي اللي وقع وماراضيش على العائلة اللي كان مناسب معاها...

الراحة بانت فوجه اسمااء وقلبها فرح نسات كلشي تكون مرتاحة معاه مابيناتهم مشاكل مابيناتهم صداع هاديك هي الدنيا عندهاا...تغداو مجموعيين كيف عادتهم متناقشين فمواضع مختلفة وكيحاولو مايجدبوش الموضوع قدام العيالات خاصة القضية غيتلقى ليها حل مابين محمد وباه وعبد المتقي لا غير...مشات اسماء لبيتها تصلي العصر باش ترجع عندهم لكن ماجات فين تخرج حتى لحق عليها محمد سد الباب وراه ودخل عندها عاد قدر ينفاردبيها ويعنقهاا ويزيل شوقوو منهاا وحتى هي جاها على الكانة ضورت ايديها على ضهروو وعنقااتوو قلبهاا كيضرررب فرحاانة وكرشها فارقة بيناتهم كبراات وبانت بدات كتنزل لتحت...حتى باس على راسها وبعد شوية بقى معنقها بدراعو وحاني راسو عندها كيتلمس بايديه كرشها وياخد اخبارها عن قرب...

اسماء : مايسحابش ليا هادشي غيوقع انا مانمشيش عندهم يسحابلي ليا غندوي مع شي حد بعقلو كيبانو ليا كلهم حمقين..انا ماكنتش متأكدة هي..مشيت زعما نقولها ليها ايلا رجعو عندي يعني راه هي بصح وفعلا جاو عندي اما راه ماباينة لا فكاميرة لا والو وحتى البوليس قالو بلي راه مزال كيقلبو على دراري..انا عرفتها هي وبغيتها تخلص داكشي لي هرساتو اللهم نص الخسارة ولا الخسارة كاملة...

محمد : ولكن شوية وغنوليو فخسارة كاملة...خليها تهرسو وتفوت كلشي يتعوض ايلا الصحة كون وقعات ليك شي حاجة ولا لولدي فين غنوليو...ردي البال غير لصحتك و ولادك...خسارتي فيكم..الباقي يتعوض...

شاف فيها شحال وهي حادرة رااسها مابغاش يحسسها،بتأنيب الضمير ورجع قاال..

محمد : ماوقع والو ماشي مشكل..قال ليا السي عبد المتقي عندك شي شيك جبديه ليا...

حركات راسها ومشات جبداتو عطاتو لييه مخبياه على كلشي حتى يجي زعما بحالا غيمشي يصرفو...

محمد : مزياان...عندكم شي حفلة من هنا بسميانة يمكن لا ؟...

اسماء : ااه سبوع بنت كنزة مورا عشرة اياام دايراه هنا...

محمد : تبقاي حتى دوزيه ولا تمشي معاياا..

اسماء كيعجبها جموع العائلة وتوجاد للحفلاات وايلا مشات غتولي تخرج بالوقت واخا باغة تمشي لدارها : اللي بغيتي..ختي ماكتعرف دير حتى حاجة وبوحدهاا وكتبغي تشاور معايا...

محمد حرك راسو : دوزيه وارتاحي شوية ونجي نجييبك...راضية ؟

حركات راسها باه وهو يتحنى باس شفايفها معنقها عندو بشووق باين فحركااتو وهي اكثر ناسي باه ونسابو اللي على برا كيتسنااوه وهو عاطيها الخاطر يموت اللي بغى يموت ...دوا مع باها وبطريقة غير مباشرة طلب منو عبد المتقي يلقى حل مع رقية وتريكتها عاد يرجع اسماء بيدما ولدات ..كان عارفها غتبقى ولكن واخا هكاك كيسولها واش تمشي نعاه باش يحسسها بلي عندها كلمة على حياتها ماشي غير حيت هوما بغاوها تجلس غتجلس بزز عليها...

وصل السبوع عرضو على القريب والبعيد والحاجة اللي مكلفة بالعراضة عيات معاها كنزة فالاخر هزات ايديها فوق راسها خلاتها دير اللي بغات...ولكن الحق يتقال كلهم عاونوها باها ومها تكلفو بالجوق واسماء بالقاعة....اما النكافة جات فابور بغات تنكفها هي وبنتها مقابل دير ليها شي اشهار مطرطق فالكونط ديالها..وكنوة اختارت ارفع القفاطن اللي عندها هوما اللي غتلبسهم....والتريتور مخلصاه بنص الثمن حتى هو نفس الشيئ باغي اشهار فالكونط ديالها..وكنزة هادشي اللي باغة كديرها بلعاني كتمشي للكونط ديالها تكتب ليهم تما محتاجو لتريتور فأرقب وقت عفاكم اللي كتعرف شي واحد زوين فكازا..كيجيوها كاملين ينقزو عندها ديري لينا اشهارو نديرو ليك ثمن فلان فلااني..ماخلات شكون فتخات ها المصور ها التريتور بالحق حتى هي كدير ليهم اشهار مطرطرررق وعندها جودة التصوير خطييرة...

هند كانت كتشوف حتى هي ليسطوري واحد النهار وهي تسيفط ليها ميساج كاتبة فيه.."مبروك عليك الله يحفضها ليك من العين" قرات الميسااج غير من الفوق وماشي هاداك اول واحد ما مرة ماجوج كتسيفط ليها والو واش كتحشم وجهها قاصح وكتزيدها كتبارطاجي داكشي ديالها وتطاكيها فيه وكان واجب على كنزة تجازبها عليهم...شافت تاعيات وكتبت ليها ميساج عرضات عليها هي و وئام ومها...

عرضات حتى على عائلة عماد كاملين لكن حضرات غير سلوى وسارة وحسنااء...تكسرات فرحتها من جيهة فوزية اللي مغتحضرش واللي عرفات من خلال بناتها انها فالكلنيك مع راجلها تزاد عليه الحال وكلهم خايفين عليه جاو عندها غير باش مايحسسوهاش بلي مابغاوش يجيو..حسات كنزة بتأنيب الضميير فواحد اللحضة وندمت كاع لي دارتو ماكانتش عارفاه مريض لهاد الدرجة...

تجمعو عماتها كلهم فالدار باش يخرجو كاملبين للقاعة وكنزة غادية جاية ناقشة ايديها ورجليها حنة خفييفة كانت هازة واحد القفطان غادا بيه للبيت ماداه لاسماء كتقول..

كنزة : عطي لسارة هذا عجبها هاد لون..شوفي واش يجي قدها...

اسماء : عجباتها جابادور ديال باباا ههههه غنموت بالضحك منين جابو هادي هههه واحد الهضرة عندها قربنا ندويو انا وياها بالاشارات...

كنزة : شتي حلوة زويينة كتعجبني ههه غير شدي بخاطرها راه ضريفة هي هكاك عقليتها فشكل...

سدات عليهم باب البيت ورجعات كترااقب وقافزة مع جنابها كلشي كيدوز تحت ايديها...حتى تلاقات واحد عمتها كضحك وتصلي على النبي على النور للي ضارب فكهزة بخال شي عرووسة طلعاات فليلة سبوع بنتها.....

العمة : رشي عليك مليحة مانخرحييش تباارك الله مشاء الله...الله يحفضك من العين ...ماتخرحيش قدامهم هكااك فيين بنتك ؟ ندمعامن خليتيها ؟

كهزة :مع اسماء فاللبيت راه مقابلاهاا ...يلاه قولي ليهم اعمتي يمشيو للقاعة تلاتة هادي...

العمة : يلاه صاافي...هاهوما غيخرجو دابا..

مشات عمتها وهي بقات واقفة كتشوف فعماتها وبنات عماتها معمرين الدار غير بوحدهم شي يقيص شي حد شي يمااكي تعصبااات باغة تمشي تشوف القاعة وهوما شادين الدار حتى حسات بشي حد كيجر فجلايلها....وهي تحني عينيها حتى بانت ليها ابتسام بنت عابيدين...شافت فيها شحال واخا كرهات باها وماعرضاتوش للسبوع جات غير مو وبنت لكن هاديك كتبقى بنية صغيرة وماعارفة والو...

تبسمان وتحنات عندها بغات تبوسها عطاتها حنكها تبوسوو لكن ابتساام باستها من ففمها وبعدا كضحك حتى تدهشاات كنزة وضحكات بزز وباستها من خدها قالت غير تساطحت معاها....

كنزة : جيتي عندي ازويينة..لبااس؟

حركات راسها بااه كضحك...

كنزة : مرحبا بيك احبيبة ههه فين تسنيم سيري لعبي معاهاا خلاتك بوحدك وهرباتك عليك الهراابة صافي بانت ليها فشي حد خور...

باستها مرة اخرى ووقفات خلاتها مشات كتنقز تلعب وهي مشات عند الحاجة....فحين ابتسام مشات كتقلب على تسنييم فالزنقة لقاتها تابعة سلطان كي الهبيلة هو كيجري وهي تابعاه حتى شداتها وقالت بطفولية عاد بدات كتعلم دارجة شوية..

ابتسام : درت بيزو لعلوسة هنايا(حطات فمها على شفايفها وتسنيم كترمش فيها) درت ليها بيزو هنا بحال بابا ههه...

تسنيم : ءءء شكون عروسة...

ابتسام : علوسة كنسة...درت بيها بيزو هنايا بحال بابا..

تسنيم : خالتو كنزة ماشي عروسة...ايور هي لي عروسة نتي مكتعرفيش...انا انمشي نبوس العروسة حتى انا...سلطان اجي نبوسو العروسة..

جرات سلطان من ايديه وسمحات فابتساام حتى مشاو قدامها حتى هي تبعاتهم وتسنيم طلعات كتقلب على كنزة مشات نيشاان للبيت لقات غير سارة واسماء وهي تمشي عندهاا كتحر فحلاايلها وشادة سلطان بايديها خايفاه يهرب...

تسنيم : فيين خالتو...ماما خالتو كنزة فيناهي..

اسماء : ماعرفتش علاش بغيتيها مالك...

تسنيم : ايور هي لي عروسة ياكي..قالت ليا ابتسام باست العروسة من هنايا بحال باباهاا...

اسماء شافت فيها : ممم شكون.. ؟

تسنيم : ابتسام قالت ليا باست خالتو كنزة العروسة من هنايا بحال باباها..

حكات اسماء داكشي من ايديها وتحنات عندهاا شداتها بشوية عاقدة حجبانها ملي شافت ابتسام وتفكرات عابديين اللي كتعرفو مزيان اش كيسوا...

اسماء : كيفاش بحال باباها....(جرات ابتسام عندها) اجي ابتسام شنو قلتي ابنتي ؟ بستي خالتو كنزة ؟ممم ؟

ابتسام حركات راسها وحطات ايديها على شفايفها كضحك : ممم بستها من هنا بحال كيفما باس بابا ههه

بقات غير كترمش فيها مافهمت والو والبنية كتدوي بعفوية وتضحك بحالا حققات شي حااجة..فهاد اللحضة زادت حقدات على عابيدين هي اصلا ماعندهاش معاه كيجيها عينيه فااالتين وماصاافييش..مطاحش فبالها فخطرة تكون عندو شي حاجة مع كنزة قالت يمكن يكونو كيشوف العيالات ولا كيدير علاقات قدام بنتو حتى شافتو وبغات تقلدو... تنهدات وطبطبات على ابتسام...

اسماء : شوفي فنكوشة ديالي الزويينة مكنبوسوش احبيبة ديالي من هنا اي واحد..من هنا كنبوسو غير ماما ديالنا صافي حشومة نبوسو واحد اخرى من هنا...يااك ..

تسنيم : حتى بابا ديالنا لا...من هنا خايب وفيه ميكخوب...

سلطان قاص فمو : لا ماعندانش ميكوخب هنا..

تسنيم : ماما قالتها وماما كلشي كتقولو صحييح..

اسماء : شفتي تسنيم عارفة...حتى نتي خاصك تعرفي ايلا قال لينا شي حد نبوسوه كنبوسوه هكاا (باست خدها) مكنبوسوهش من هنا...وايلا قال ليك بوسيني هنا قولي ليه لاا..صافي حبييبة ؟ يلاه سيرو تلعبو بشويا على الدروج...

خلاتهم مشاو وناضت كتشوف فسارة بنص عين كتبان ليها مضاربة غير مع قفطانها مادات ماجابت هي هضرة بنادم كبير وبزز باش كتفهمهاا عساك تعاويد الوليدات الصغار شي كيقولوه شي كيسرطوه...عقدات حجباانها وتزيراات شبعات فعابيدين سبان غير فنفسها كتكره الواليدين اللي كيهملو وليداتهم ومكيحتارموش راسهم قدامهم وهوما اي حاجة كيشوفوها كيحاولو يطبقوها سوا فالدار سوا فالزنقة بحال ابتسام دابا لي باست كنزة هكاك علم الله شحال من واحد بااستو بنفس الطريقة وشحال من مكبوت تلاقات بيه...هي ب براءة كتبوس وهو علم الله اش كيضور فباالو...

فعز تفكيرها مكتطيح فبالها غير كنزة اللي شافتها القلبة لي قلبت على عابدين حتى مابقاتش كتستحمل تسمع سميتو...بسرعة قارنت الاحدااث والكلام سااهية وشيتة دفاراجو فايديها...شوية وهي تحط ديك شيتة من ايدييها هنا تأكدت شي حاجة وقعات بيناتهم وعلاش لا نيت هادشي اللي قالت ابتسام...كملات كتوجد راسها وعقلها مامعاهااش مارتاحت حتى خلات كلشي خرج شدات كنزة فالكوزينة سدات الباب ودخلات عندها وكنزة باستغراب كترمش فيها...

كنزة : مالكي خاصك شي حاجة..

اسماء : بغيت ندوي معاك بلااتي..

كنزة : اش وااقع مالكي ؟ شكون بقى مع ايور بقات بوحدها ؟

اسماء : معاها سارة وسلوى غير تهناي ماطلقوهاش ليا حتى انا....(شدات فايديها بهمس كتدوي وحاضية مع الباب) اجي قولي ليا مالكي مع عابيدين ؟

كنزة شافت فيها شحاال سااكتة كتفكر ورجعت قالت بضيق : م مالي معااه ؟

اسماء : ماعرضيتش عليه للسبوع مالخيتيش ماما تعرض علييه ؟ كنتي معاه صحة سلاام و كتقولب ولد عمي وعزيز عليا مالكم دابا ؟ قلبتي عليه فخطرة...دار ليك شي حاجة؟

تزيراات كنزة ولات غير كترمش وتبعد شعر على وجهها بتوترر...نترتت ايديها من اسمااء ملي حيات بيهم غيبداو يرجفز ويفضحوهاا وشافت جنبهاا بكدب ..

كنزة : م ماعندي معاه والوو...غير طلع ليا فراسي مارتاحييتش معااه..

اسماء بشك : مادار لييك والوو ؟

كنزة : شنو بغى يدير ههه مالكي ا اسماء ااش فكرك فييه هه

اسماء شكاات فيها : والو...جات عندي بنتو كتقول ايلا بست كنزة من هناا بحال كيفما باسها بابا...انا عارفااه مسخ وحماار يديرها ويفوتها لهييه...ياك مادار ليك حتى حااجة...

كنزة : امتى قالتها ليك غير دابا ؟ ( حركات راسها باه كتشوف فيها بشك حيت كنزة ارتابكت وبان فيها توترر حدراات راسها كتدوي بزز ) م م ماشي ب باسني ..بغيت نسلم علييه واحد نهار فاش خرجت معاه عقلتي قال ليا يلاه معايا لشي عرض ديال بنتو وملي رحعنا بغيت نسلم علييه وهو يجي فيا هنا(قاصت فمها*....انا قلت غير جا فياوماجيت فين نبعد منو وهو يعاودهاا الحمار عرفتو دارها بلعااني

اسماء بصدممة خرجات عينيها وشدات حناكها : اويليي...امتى هادشي غير مؤخرا ...مؤخراا ؟؟ كان عمااد هنا ؟ عليها تخاصمتو ؟

كنزة حادرة رااسها اللون تخطف من وجهها فاش كتفكر اش وقع : عماد راه كان داير واحد ورايا وصل ليه غير فاش نزلت وصرفقتو ماشافش شنو وقع فالطوموبيل كون شافو هاديك هي المصييبة...

اسماءو : مصييبة ؟ غير مصيبة وسكتي ؟ حنا نلومو غي ولاد الناس اكنزة ؟ نلومو غير عماد ؟ على شنو الفرق بينك وبنيو داباا ؟؟ غير هو اللي خاين نتي ملاااك ؟

كنزة كلها كتررعد و عينيها دمعو مخنووقة : انا ماكنتش ناوية داكشي هو اللي دارها والله ماكنت نااوية...ماكناش كيسحابلي هكااك صدمني فيه ...

اسماء : وشكون هذا اللي كينوي الخيانة ؟ ياك كاع اللي خان كيقول ماناويش ..ماعقلتش...ماحسيتش براسي...كاين ش حد كيقول درتها بخاطري ؟

كنزة باندفااع شداتها البكية : انا ماخنتوش راه داك الحمار اللي تلاح عليا ومشى كيقول ليه مرتك تلااحت عليا..انا ماكنتش نااوية والله...

اسماء عقلها كيبغي يخرج فاش كتخايل المنضر : حتى عماد كيقولك ماكنتش ناوي...

كنزة : عماد راه مشى عندها برجلييه ماشي جات عندو هو مشى كيقلب عليها فالبيران..

اسماء بصراامة جراتها :حتى نتي طلعتي معاه لطوموبيل بخاطرك عابديين ماجركش بزز عليك...ماخطفكش اكنزة الله يهديك...

كنزة بحررقة دمعو عينيها : هو بخاطرو باسها وعاجبو الحال معاها نوريك تصاورهم هو اللي معنقها انا راه غير اكسيدون ماضنيتوش يديرها ليا...انا مكنخونش ياك... (برجفة فصوتها) يااك هادشي اللي كضني فيا...

اسماء : شكون هذا ل غيسجع هاد الهضرة وبقوليك مضلومة اكنزة راك كنتي مزوجة بغيتي ولا كرهتي مزوجة وطلعتي مع واحد خور وخرجتي معاه ومن الفوق بايسك وحاملة كرشك عند فنك وماحتاارمكش يعني خنتي.... تخالي كون شافك عماد ديك ساعة عرفتي فين غتولي هو عينيه خارجيين بلا والو باغي غا معاامن اش غيدير فيه ؟ اش غيدير فيك نتي برااسك ؟...

كنزة تفكراات العنق لي عنفها فالطوموبيل : راه داار باقي عاد غيدير...

اسماء : وا جمعي راسك اكنزة رااك مطلللقة دابا

كنزة نزلو دمووعها بملل من هاد الكلمة : مطلقة واصافي...ندمت تا تزوجت وتا طلللقت كرهت شي طلاااق هضرة بناادم قصح منو انا تسيتو ونتوما مانسيتوهش..

اسماء : هذاا هو الواقع شنو بغيتيني نزوقو ليك.. ماشي انا لي عيبت طلاق ولا نتي راه بنادم هو اللي كيكرهم فيه..مطلقة ماشي غيب اهااه ولكن واحد خور راه كيشوفك باب محلووول كلهم كتباني ليهم نفس الحاجة...ماعندك ماديري ربعين مليون واحد بنفس العقلية...راجلي محمد تقولي مبدل عليهم ؟ لا حتى هو نهار وراه المهدي الميساجات مجاش سولني نيشان مشى بالو راني ممطلقة واي حاجة ممكن نديرها...كلهم بعقلية وحدة...مطلقة بابها محلول كيحط عينيه علييك حتى يلقى ديك الفرصة ويدخل علييك...ونتي لي حلاه ليهم وايلا ماسديتيهش اكنزة عمرك تلقاي الراحة انا طلقت قبل منك واناا سمعت الهضرة قبل منك وانا لي سديت عليهم الباب وتهنييت...داكشي علاش كنوصيك جمعي راااسك وجمعي الضحك مع بني ادم راه والله مايقيلوك ماتغركش الضحكة الصفرة ماكينش شي رااجل فالدنياا من غير باك غيشوف فيك شوفة صالحة...راه اللي وقفتي حداه كيعريك غير بعينيه...

حدرات كنزة راسها كتسمع واسمح تحت عينيها ...

اسماء :جمعي راسك هذا هو الواقع تقبليه ولا جلسي...راك مغتبدليش عقلية ربعيين مليون واحد...نتي سدي الباب على رااسك وديري حدودك مع الناس عرفي معامن كتدوي ومعامن كضحكي ماشي كلشي كينوي فيك نية حسنة...عابدين كون ماحليتيش ليه الباب وضسرتيه مايقربش ليك...

كنزة : ماكنتش ناوية والله ماضنيتو يدير ليا هكااك....(بخوف وفزع كترعد ) غيفضحني كلشي غيقول ليهم انا اللي تلاحييت علييه غيقولو عماد طلقني حيت لقااني معااه بااينة..

اسماء : شنو قال لعمااد هو ؟قال ليه تلاحت علياا ..داك نهار فاش مشات ماما عمدو لسيبطار مكانت لا كسيدة لا والو عماد اللي ضربو ؟ ونتي ااش دار ليك ملي هو دار ليه ديك الحالة ؟

كنزة : حتى انا ضربني ماتاقش بيه واخا قال ليه تلاحت عليا...عارفني ماشي ديال داكشي انا ماغنديرهاش...

اسماء : ماغادييرهش راه بصح حيت كون كنتي بعقلك مااغتعطيهش لحمار ديال لخلاا فرصة حتى يقرب ليك شياطة دالكاورياات حتى هو يبسل علييك ..نتي كنتي غير كتنقزي باغة تفقصي عمااد وتعيشي الحياااة ضد فيييه حتى ولبتي خاينة رضاي بيها ولا جلسي نتي ماباسكش بخاطرك وحتى هو ماباسش ديك خيتي بخاطرو حتى واحد فيكم متزوين..غا نتي باغة تفقصييه وهو تفقص نييت ومشى برد راسو فديك المسخة...دابا اللي وقع وقع صاافي..بنت عابدين راه دويت معاها ايلا كانت كتسمع الهضرة راه ماغتقولها لحتى حد ونتي جمعي راسك ورسمي حدودك مع النااس وايلا هادشي غتولي تعيشيه كل نهاار...

كنزة : فيناهي بنو مشاات مع جداها داباا ؟

اسماء :مشات معاها حتى للقاعة ودوي معاها يلاه نمشييو...صافي مسحي دموعك ماعندك البكى باش ينفعك هادي تعلمك على مرة اخرى على ولد عمتك واش دار فيك عاساك البراني...يلاه...

خرجو من تما واسماء مارجعاتش قالت كلمة اخرى واخا شافت كنزة تبدل عليها الجو شوية ولات غير كتفكر لكن كان خاصها تقصح معاها الهضرة وتحل ليها عينيها واخا ماشي الوقت المناسب...حيت كنزة مزال عايشة على طبيعتها قبل الزواج..كتشوفها واخا تزوجت باقي عايشة على انها سيليباطير وحتى طلقت باقة بنفس العقيلة ماعارفاش ان نضرة المجتمع كتبدل عليها مرة غتسمع كلمة زويينة مرة تسمعهاا خايبة مرة تبغي راسها وبعد المرات غيكرهووها فيه واي حاجة كديرها غيجيبو ليها الشك فيها غير حيت مطلقة...هذا هو الواقع مايمكنش تبدل عقلية مجتمع على قدو تختار الطريق السهلة وتبدل عقلتيها هي لولى...توجد راسها لاي كلمة تقالت وماتخليهاش تأثر فيها حيت ماشي كلشي غيقولها زوينة وماشي كلشي غيقولها خايبة... ترسم حدودها مع البشر وهي تفرض عليهم احترامها وماتعطيهمش فرصة فين يطيحو بيها وينزلو من قيمتهاا..عارفاها ماصبراش بحالها..اسماء واخا حساسة صباارة كتسمع الهضرة وكدير راسها صمكة وتزيد مع طريق حتى تزرعت فيها نفسية باردة من جيهة الناس ولو ان بعد اللحضات كتنهار فيهم ...اما كنزة ماغتسكتش ومن حدها وهي كتعافر معاهم ونفسيتها كتمرض...

مشاو القاعة مجموعين..دخلات كنزة من الباب اللون كانت معاها غير اسماء والحاجة وسلوى وسارة وحتى حسناء حيت مكيعرفو حتى حد كيبقاو غير مع كنزة وحتى هي ماخلااتهمش عارفاهم برانيين وصات عليهم اسماء وتهناات..بالها بقى مع هضرتهم دقبييلة..النكافة كتلبسها وهي ساااهية والسيناروهاات كيكتكونو فباالها لاتكون ابتسام قالتها لعماتها وغير كيحضكو فوجهها الضحكة الصفرة وهوما عارفين اش وقع بينها وبين عابيديين...تلفتها هضرة اسماء خافت راسها تسمى حتى هي خاينة دابا ؟حتى هي خانتو واخا مكانتش ناوية ؟ ولكن راه حتى هو كيقول ليها ماناويش ؟ لو كان وصلاتو الخبار باللي وقع وقالت ليه مكانتش ناوية يتيق بيها ؟ ولا يكدبها كيف كدبااتو ؟

خرجو من عندها اسماء والبنات كيضحكو لابسين قفااطنهم غيرا لالواان والرفييع وحدة تنسي فالتانية اما سارة القفطان اللي جابت معاها خلاتو فالدار لصقات على واحد ديال كنزة عجبها عطاتو ليها تلبسو..واسماء حتى هي بالقفطان بيج كيتلبس بحال لونسومبل والبوردو بارد من لتحت لايحة عليها شالها من الفوق و واحد الخيط رقييق دهبي دايز من جبينهاا مع مكيااج قوي بين ملاامحها وبينها مغييرة على العادة طلعاات بحال العروسة حيت شحال مادارتو...وتسنيم حتى هي بنفس قفطاانها فنفس اللون والمضيمة صغيييورة وشربيل فرجليها ملصقاه بلاستيك لور باش ميطيحش ليها...

وحتى كتزة بتفس الشكل غير هي قطفان اخضر ملكي وخيط الرييح وشعرها بوكلي زادت فييه طوييل حتى لتحت خصرهاا مع مكيااج صااارخ والرواايح والثااج بحال العرووسة..لبسو لأيور حتى هي قفطان اخضر والشربييل صغييور بحال البورطكلي فرجليها..غير شافتها هكاك ضحكاات بغات تلكلها ونساات كاع اش واقع شداتها كتبوس فيها وتصور فيها خلاتهم كيوجدو فالعمارية وجلسات صوراتها وحطات قلب على وجهها هي وياها ولاحتها فالسطوري عارفة عماد كيشوف سطورياات ديالها...حتى وجدو العمارية ودخلوها بيها هي وبنتها على صوت الموسيقى وكلشي واقفين كيصورو وهي كتشير ليهم من الفوق متوترة كلشي كبشات ليها صغيير شادة بنتها فحضنها حالة عويناتها كترمش خلعوها...ضورها حتى عيات عاد نزلوها وجات عندها اسماء كضحك هي واخوات عمااد باغين يشوفو ايور بالقفطان غير شافوها بداك الشربييل كيتنصل ليهااد سخفو عليها بالضحك وهو كيصورو ويعاودو فرحانيين بيها...

اسماء تحنات عندها على الصداع : انا غنخرج عند الحاجة راه عيطت ليا وصلاات...

كنزة : صافي..ايور غتبقى عندي ؟

اسماء :غير خليها....قلتي ليا عرضتي على هند بوحدها شفتها جات هي ومها وختها..جاية كتبري بدهبها تقول عمرنا شفناااه هاديك تاهي يعرضو عليها الناس باقة مابغيتيش تعلمي...

خلاتها ومشات نيشان للحمام جبدات كلينيكس وبدات كتنقص شوية من وجهها ومن العكر والكحل عاد خرحات عند محمد على برا فين كيستسى جاب الحاجة وخديجة...فحين هند سلمات هند كنزة ومشات جلسات هي ومها وختها فواحد الجيهة من بعييد كتشوف فسلوى وتحقق فيهاا مخرجة عينيها بحالا كتأكد منها...

فحين اسماء خرجات عند محمد..من بعيد بانت ليها الطوموبيل ديالو لقات معاه الخاجة وخديحة سلمات علييهم وسلامات عليه وهي كتشوف فيه كيطلع وينزل فييه نيشان ويعبر فيها خلاتو يشوف فخاطرو وضارت عند الحاجة كدوي معاها على القاعة والحفل حتى قادت عليها شالها عاد نزلاتهم دخلاتهم للقاعة ورحعت عندو حيت بقى كيتسناها طلعات حداه وسداات البااب...

اسماء : يلاه دخل كاين بابا لداخل..

محمد : اش هاد الحالة فوجهك ؟ (قاص عينيها عامرربن بالكحل نقطة دعفو دالك القلم لي كدوزو تما كتسالي معاه)

اسماء : مجاش زوين ماعجبكش...

محمد مد ليها كلينيكس: نقصي شوية خليك طبيعية حسن بلاش هادشي...ماتحتاجيش...

اسماء شداتو منو دايرة ليه خاطرو ختى هي حيت غتدخل وتعاودو : غير شفتي الكحل ماعرفتش مالك معااه غير كتشوفو كتكحل بالغمى مالو زويين راه كيوقولو دواء للعينين..

محمد مسايرها : واخا مسحي من هنا شوية...

اسماء : عقلتي شنو وقع هنا ههه فعرس ختي قلتي ليا تزوجي بيا ههه وفسبوع بنت ختي هانا حاملة ههه سبحان الله العضييم..

محمد متكي ايديه على الفولون كيشوف فيها كتمسح : شكون قال ليك تزوجي بيا ؟

اسماء : نتا بليمارة كنتي جالس مع بنتي وقلتبديها ليا...نكرتيني امحمد ؟

محمد رد عليها : قلت ليك نكون مسؤول على بناك شون دكر شي زواج....

اسماء : ايوا مسؤول على بنتي على اساس غتكون نسيبي وراه باينة تزوجي بيا بطريقة غير مباشرة وانا فهمتها...علاش مكترضاش تعتارف بيها واخا مابغيتيش تقول ليا تزوجي بيا انا راه فهااامتك...كنتي كتبغبني تخايل كون قلت ليك لا ههه

محمد : انا قلت ليك نكون مسؤول على بنتك نتي فهمتيها زواج وغتجاوبيني ب لا...مانضنش...

اسماء ضحكاات وتلفتات عندو كتلعب برمموشها توحشاتو :واش نتا حمق نقول ليك لا وانا كنبغيك كنت باغة غير فوقاش نكون معاك(باست خدو بثقااالة طيحاات فيه النص خاصة انه مابقاش كيشوفها بزااف والشوق لااعب دورو وهي كتزيد فيه) كاين شي واحد كيقول لحبيبو لا وحتى نتاا كنشوفك وليتي كتحناق علياا كون قلت لي لا ... تحماق ههه يااك ...تحماق ولا لاا...

حط عينيه عليها مابقاش هزهاا مضور ايديه على خسرها ومقربها ليه مخليها كتعلق فيه وتبووس على خاطرها وعينيه ناعسيين فيها بشووق باس شفايفهاا وقال...

محمد : يلاه تمشي معايا ليووم ارتاحيتي شوية براكة عليك...

اسماء : دخل شهري بسيمانة مابقى ليا واالو قالتها لييك طبيبة كتقول ليك كلشي يلاه نوحد فبن غنولد..

محمد : كلشي واجظ غير ارتاحي غتولدي عندي طبيبة ديال واحدة مسائلك هوما هادوك كنتسناو غير الوقت المنااسبة...(باي شفابفها مرة اخرى) يلاه معايا..

اسماء عارفة مها ماغتخليهاش غير كضحك عاجبها الحاال يتوحشها هكاك : حتى نشاور ماما ههه

زير على خسرها وهي كضحك وتلوى علييه نسات رااسها وبقات معااه....فحين الداخل هند اللي فيها مامهنيها وضروري شوكتها وسمها ماتدكو فشي حد عاد تبرد وتجلس...

سلوى كانت جالسة هانية فبلاصتها حدا حسنااء اللي عينيها حتى هي غير كيضورو...من بعيد بانت ليها هند حااضية سلوى ماهزاتش عينيها عليها حيت كانت جالسة مقابلة معاهم نيشان وحتى هند جلستها مفروشة مضور الكرسي جيهتهم دايرة ايد على ايد ومقابلاها...قربات حسناء عند سلوى اللي شادة تيليفون كتخربق فيه توتراات من نضرات الناس وخاصة مع عائلة كنزة لي كيشوفو لجيهتهم بزااف جاتهم غريبة كيفاش كنزة طلقت خوهم وباقين كيجوي عندها وتعرض عليهم ويعضرو عليها عاادي مولفتش بعد الطلاق العلاقة كتقطع وشي كيكره شي وشي يهز شوكة من شي..جاتهم غرييبة علاقتهم بكنزة...

حسناء : سلوى..كتعرفي هاديك البنت كتشوف لجيهتك قلت يمكن تكون معرفة ديالك..

سلوى :شكون ؟(هزات راسها شافت فين كتنعت ليها ورجعت حدراتو ) ماعرفتهاش...

حسناء : ماحدراتش عينيها عيقاات...هاهي جاية عندك اري نشوفو حتى هي مالها...

سلوى : ءء علاش جاية ؟ (هزات راسها كتشوف فيها جتية وقالت بهمس) شكون هادي...؟

حسناء : غتكون كتعرفك من الامارات انا متأكدة...غير من شكلها باين..

تمات جاية هند لجيهتهم بقفطان همااوي فالاحمر كلو منبت بالحجر مركبة واحد السنسلة دهبية نازلة حتى لخسرها ولخواتم فايديها وشي سناسل لاصقيين فعنقها ونفس السلسلة الدهبية لي عندها شاداها فايديها كتشالي بيه باغة توربيه لكلشي...مكيااج صاارخ دخلات معاها ثقافة الخليج الخاطئة...جات بالضحييكة جلسات حداها وعينيها كيضورو كيف النمسة بداك الابلاينزر...

هند : سلاام...

حسناء : السلاام...

سلوى هزات راسها : سلام ...

هند : لبااس عليك من عائلة كنزة واقيلا ههه ؟

سلوى : وي اخت طليقها انا و (قاطعتها)

هند : نتي سلوى (حركات راسها سلوى بهدووء كترمش فحركااتها ونضرات هند وهي بلا حشمة وبجرأة فاايتة القياس كطلع وتنزل فيهاا)

سلوى : كتعرفيني هههه

هند : اه ههه نتي كنعرفك ولكن البنات اللي معاك لا ههه..انا هند...

سلوى : متشرفين اهند...ولكن سمحي ليا ماا..ناعرفتش..

هند : انا هند هه مرت سلطان... سلطاان (جبدااتها هازة ححبانها ) ويلي ههه سلطان...طلييقك ....

سلوى بصدممة حطات تيليفون وحمعات ضحكتهاا حسات بقلبهاا غيخرج من صدرهاا كيضررب بجههد : نعام ؟

حسناء باندفاع ماحملااتش حركاتها واستفزازها : ومن بعد ؟ اشنو خاصك...

هند : لا والو غبر بغيت نتعرف عليها ههه....شفتك من بعيد قلت موحال واش نتي حيت ملي مشيت لداري القديمة...(مطمكات شفايفها هازة راسها) بغيت غير ناخد خوايج راجلب وانا نلقى شي تصاور قدام واقيلا ديال عرسو وهو كان ناسيهم وخلاهم تما ههه ...وشفتك ههه ملي سولتو قال ليا طليقتي وملي شفتك هنا تصدمت ههه كنقول غير تشابهتي لياا ساعة صدقتي بصح نتي...

وطبعا هند كتكدب حيت مكاين لا دار لا جوج...هي فقط شافت صورة سلطان مع سلوى خدات اسمها ومشات كتقلب عليها فمواقع التوصال حتى طاحت على كونطها وبقات مراقباها فييه كتشوف شكلها وتحاول تقلدها...حتى لواحد النهار هي تصادف معاها حاطة تعليق لكنزة وكنزة مجاوبها علييه من تما عرفااتها مية فالمية غتكون فالسبوع وجات موجدة على داك الحساب لابسة ومقادة باش تفقصها...

سلوى : من امتى هادشي ؟

هند : شحال هذاا...تقريبا نقول ليك شي ست شهر..علاش احبيبة شفتك تبدلتي انا غير بغيت نتعرف عليك سمحي لياا ايلا حسيتي بيا فت حدودي..

حسناء هزات حجبانها : مكتبانيش ليا جاية تعرفي اشنو معنى هذا ؟ انا مرات طليقك ومن بعد الله ينل عليك بالخير..هانتي قلتيها طلييقها مابقى بيناتهم والو اعواام هادي..الله يهنييكم...

سلوى عاد حققات الشوفة فهند وتفكرااتها مزيان حيت شكلها تبدل مية درجة عقلاتها غير من ملاماحها هي صاحبت كنزة اللي وقع ليها داك المشكل فالامارات وهي نفسها لي كانت عندها علاقة مع شعيب وتبعها لتما...

هند : مالكي اختي كتنفخي عليا غير بشويا عليك ( لاحت شعرها ورا كتافها كتلعب برموشها وحجباانها وسلوى حدرات راسها مابقاتش هزاتو) الغلط مني ههه انا اللي بغيت نجي نتعرف عليكم سمحو لياا..( بدات تيليفونها كيصوني وناضت ) اويلي باغين غير سبة الله ينجيني منكم...آلو حبييبي (مشات)

حسناء :واش هاادي حمقة ولاا ماالها ؟ سلطان اللي كنعرف مايشوفش فيها حتى الشوفة هه !! فين كتعرفك هااظي...

سلوى بخنقة حاسة براسها دااخت : ماعرفتش..ولكن مدام جات عندي يعني شافت شي صورة ليا معاه...

حسناء : اشمن صوورة هادي غتبقى عندو سنين دابا...

سلوى : مااعرفتش..

حسناء :مريضة هادي ومن بعد تزوجت بيه الله يهنيهاا..هذا حمق حتى هو كتبان ليه غير فالمغربيات يشوف لجيهت بنات بلادو شوية...

تلفتات كتفرج عادي وتشير لكنزة بايديهاا ماضارتش كاع جيهت سلوى وماتوقعاتش اصلا يبقى فيها الحال حيت طلقو اعوام هادي وعاودت سلوى تزوجات وطلقت للمرة التانية ضناتها حيداتو من بالها...اما سلوى حالها ماعالم بيه غير الله توقع اي حاجة ايلا تسمع زواج سلطان للمرة التانية وبعد سنيين وهي مطلقة معاه مارجعش تزوج مرة اخرى...

تخنقاات والنفس تقطعت فييهاا حتى ولاو ايديها كيترعدوو ودمووعها بغاو ينزلوو ماقدراتش تقبل ابدااا تسمع خبر زوااجو ماعارفاش واش باقة كتبغييه ولارالعكس ولا شنو واقع معاهاا ولكن اللي عارفة قهرهاا خبر زواجوو وخنقهاا..حسات بدموعها غينزلو وماغتقدرش تحبسهم وهي تنوض دغياا هزات تيليفونها وخرحات بلاما ديبر الحس وهند مراقباهاا...بانت ليها خرجن كتبكي وتلفتات ب برودة كتفرج...

فحين سلوى خرجات كتبكي على براا شادة على فمهاا بصدددمة بعدما كونات امل ولو صغيير ولو البعد علييه ولو عماد لي حااضيها مكتقدرش حتى تصوني ليه ويصيق ليها عماد الخباار نهارها كحل..ولو هادشي كامل كونات امل عندها ممكن شي نهار يكون رجوع علاش لا...حتى صدمها بزواحو يعني نساهاا ولقائهم بعد سنوات ماقدى فيه والوو وماحرك فيه واالو...بدون شعوور جبدات تيليفون كتصووني علييه وكتبكي ورا القااعة بغات تحماق بالبكى لحضات وهو يجاوبها ماخلاتو فين يدوي حتى تفركعت علييه..

سلوى : اشنو بييني وبنييك حتى تهضر فياا مع مراااتك وتسيفطها لياا تزوحتي الله يساهل عليك شنو باقي باغي عندي..

سلطان : شو صار معك مافهمت عليك ؟ بسطي لهجك عشان افهم عليك شنو حصل...

سلوى : سلطان سمعني ...انا ونتا ساليناا سنين دابا انا مانسييتكش وعلييك سميت ولدي حيت خليتي فقلبي صورة زويينة علييك ملي تزوجتي البه يعاونك من حقك ولكن انا علاش كتدوي عليا علاش كتجبدني مع مراتك حتى جات عندي ظاباا كتقول ليا كنعرفك ما كنعرفك علاش توريها تصاااوري شنو بيني وبيينك ؟؟

سلكان : مينىجا عندك هند ؟؟ كيف ؟ وابش علاقة هند معك .. ؟

سلوى : شووف اخر مرة تجدبني معاها ساليناا بنياتناا ماتبقاش تدوي عليا معاها...ايلا شي صورة عندي معاك قطعها ولاا حرقهاا شغلك هادااك انا نسااني...وقول لمرتك تبعد عليا اخر مرة تخرج فطريقي...(قطعات عليه كتبكي والصدمة باقة غالبة عليها وهو كيعاود يصوني وهي كتقطع وهو كيصوني ماوقفش)

بقات برا حتى بردات شوية وحسات براسها ااس دارت وندماات شافتو كبثوني تاتي وهي تجاوبو هاد المرة بهدووء وحتى هو كيهدن فيها ويحالو معتها تعاود ليه بشويا مكانتش سلوى عكسية...بالعكس عاودت ليه لشويا شنو وقع حتى سالات معاه وقطعات ودخلات للداخل قلبها ضرهاا وبقى فيها الحاال باقة غير توحد بكنزة وتسولها اش عارفة حيت ايلا كانت بصح عارفة بزواجهم وماعودتش ليها ديك الساعة عاد غيبقى فيها الخال يدال بصح...قادات وحهها ودخلات للقاعة بوجع حدييد كضحك بزز بلا خااطر..

تحط العشاء وكلشي ضاحك ونااشط وكلشي دااز مزياان الخير موجود والانوع لا علك ترضى كلشي هو هاداك..تدبح الحولي على حسب أيور وكنزة وكلشي كيصور..تصوراات فالعمارية وصوراات بنتهاا وخدات فيديوها ديال الدخلة بلبيسات اخرين بحال العروسة....

حتى سالااو الحفلة وبداو الناس كيمشيو عاد حلسات فواحد الطبلة مع بنات عماتها وبدات كنقاد فالفيديوهات باش تلوحهم فالكونط ديالها حتى جات عندها هند عطاتها الكادو قدامهم وسلمات عليها ومشات يلاه خرجات مع الباب كتشالي بسوارت الطوموبيل ديالها ايلا ما قالو لفعة حتى لفعة ديال بصح فتخات سلطان فتخة ديال القلب...

على دكرو يلاه طلعات مها لور وختها القدام وهو يصوني تيليفونها باسمو وجوباتو مع الدخلة..

هند : آلو ياس حبيبيي..شو مارديت ؟ امتى صونياي مان تيليفوني عند ماما..علاش معصب دابا هانا حاوبتك...كيفااش ؟؟ شكون سلوى ؟

تصدمات هند ماضناتهاش تمشي تعاود لييه كلشي خرجات عينيها كتصنت لييه وهو مععصب وكيزرب فالهضرة شي كتفهمو شي لاا...حتى كمل كلاامو وسالة معاها فاش قال ليها..

سلطان : خلااص كلشي شيى انتهى..

هند : شنوو كيفاش..كيفاش انهتى ؟شنو هذا اللي نتهى ؟

سلطان : انتهى ماعاد بيناتنا اي شيئ..

هند : انتهى ؟ صاافي انتهى ؟ (بصراخ) ينتهي عمرك انشااء الله الحمار غير اجي وانتهى (قطع عليها) الله يلكّيها ليك انا غنوريك...الحويلي لي قالها ليك(دوزات رقم المهدي دغيا شاداها البكية ) آلو مهدي فيينك نتاا ؟

رجعو للدار مجموعين وسلوى ماهنات حتى انفاردت مع كنزة عاودت ليها كلشي وكنزة تصدماات ونكراات كاع واش عارفة شي زواج ولا شي حاجة وسولاتها سلوى واش عماد عارف حتى هو نكراتو وقالت ليها ماعارفة حتى حاجة وكون كان عارف غيقولها ليا...فكاتو وفكات راسها وزادت حقداات على هند تاكدت من كلام اسماء لي قالت ليها...البلاصة لي مشات ليها ضروري ماتخلي فيها سمها...

جلسات اسماء جنبها على الطبلة وهي متبعة بعينيها سلوى اللي غادا خارجة تابعة ولدها وقالت...

اسماء : مال سلوى ؟

مارداتش عليها كنزة ملاهية مع تيليفونها حتى حطات الفيدييو عاد طفاتو وشافت فيها...

كنزة : ما مالها والو انا اللي مالي...مال جدي على هاد الزهر ضروري ماتخرج ليا شي مصيبة من الجنب...عرضت على هند ياك جات هي ومها مابانت ليها غير فسلوى مشات عندها قالت ليا انا مرت طلييقك...

اسماء بعد فهم : شنو ؟ اشمن طلقيك تاني فين كتعرف هند سلوى شنو بيناتهم ؟

عاودت ليها كنزة كلشب وشرحات ليها علاقة سلطان صاحب عماد بسلوى وعلاقتو بهند..

اسماء : بنت الحرااام قلتها لييك..ولكن شوفي من حدك مزال كتعرضي عليها وكتدوي معاها رااك غير فالخسارة قلت ليك بعدي منهاا راه انا اللي كنعرفها اش كتسوا...سبحان الله على صدفة من بين كاع الرجاال ماتلاقات غا مع هاد سلطان راجل سلوى لول..ولكن سمحي ليا ياك مطلقين علاش سلوى بقى فيها الحال علاش هو مغيعاودش يتزوج زعما ؟

كنزة : عادي غير هي كتجي شوية فشكل..

اسماء : شفتها تبدلاات وجهها مزير تقلبات مية درجة على كي كانت الصباح...واخا هند نقولو مسمومة ولكن راه بصح يتزوج ولا يجلس علاش هي دايرة هاد الحالة فراسها مالها حلال عليها غير هي تعاود التزوييجة ؟

كنزة : ماتقوليش هكاالك مسكينة راه ولدها ومسيمياه علييه..لهلا يطح حيك على حجرة..

اسماء : بعد المرات العيالات حتى هوما كيحماقو شكون هذا لي غيجلس سنيين بلا زواج وبلا مراة فالداار..ايلا صبر غير شهر ماتقوليها لحد واخا يكون كيموت عليها... يسحابلك الراجل هو المراة تصبر بالاعواام...غير توجد راسها مزال تسمعو تزوج وعاود غتبقى غير هي فالفقصة...(تنهدات كتمسد فبطنها بضيق) دويتي مع بنت عابيدين ؟

كنزة كحاات بهدوء تالفة : دويت معاها...مسكينة زيرتها حتى خافت...

اسماء : ايوا على الله...

تزيرات كنزة من كلام اسماء وتوترااات ولكن مابيناتش يلاه طااح فتفكييرها وهو يبدا يصوني تيليفونها..كانت متوقعة اتصاالو حيت يلاه حطات فيديو ليها هي وبنتها فالعمارية طبعا غيعطي عليه تعليقو..ناضت من حداهم مشات خارجة من القاعة كتفضل تدوي معاه على انفراد بدون شعور كتلقى راسها كتقلب على عصبيتو وردود فعلو كيجدبو انتباهها بحالا يلاه كتعرف عليه كتحاول تعرف ردة فعلو فجميع الوضعيات...

كنزة : ألوو..

عماد : كنزة صافا ؟ كلشي مزيان بغيت نشوف حلا غدا غندوز عندك ..

كنزة : علاش غدا ؟ ياك كتجي عندها فالويكاند...

عماد : بغيت نشوفها غدل....فين كاين المشكل..

كنزة : ولكن انا مشغولة ومكيناش فداري...

عماد : غنجي عندك فيين نتي سيفطيها مع شي حد من الدار باغي نشوفها...

كنزة : انشاء الله...

قطعات عليه كتررعد بعصبيية وتوتر كتشوف مع جنابها وهضرة اسماء كي الوسواس دخلت معاها وهي تهز كتاافها كتقول ماشي شغلي فيه يدير اللي بغى انا غنحيدو من بالي...يلاه غتدخل وهو يبان ليها زياد وقف بطوموبلتو....تبسمات وقربات عندو وهو نازل...

كنزة : اش كاين اسيدي ساليناا الحفلة اللي عندي شي دار يمشي ليها..

زياد : كتجري عليا ههه

كنزة سلماات عليه وهو كيضخك: علاش مكتستااهلش..عرضت عليك مع العشرة دليل انا ؟ كاين شي سبوع فنصاصات الليل ..باك ازياد هادي هي كوني هانية غنجي...

زياد : ماكنتش فكازا والله العضيم يلاه دخلت واحد السيد من العائلة اب صاحبي عيان ومشيت شفتو..

كنزة : غير كنضحك معاه الله يجيب ليه الشفاء مسكيين مايكون عندو باس...

قال لبها اللهم امين وبقى واقف خداها كيسولهة على السبوع وكيف دااز وهو مسخس بالطرييق اللي ضرب من اكادير لكازا ونيشان جا عندها عاد غيمشي للدار..كيدوي ويطرطق فعنقو بعياء ماغتجي عينيه غير على سلوى واقفة بعييد على سلطان وتسنيم كيلعبو..رصى فيها الشوفة المرة لولى شحاال كيحقق فيها عاقد حجبانو جدبوه ملمس ايديها اللي كيبان لبه كدوزهم على دراعها من البرد وشعرها مدابز مع الريح من جيهة لجيهة وهي كتقاد فيه وتنههد سااهية قدامها...شحال وهو كيشوف وكنزة كتدوي وهو يرجع قلب عينيه بهدووء كيكمل كلامو معاها...

الغد ليه مشاو البنات وبقات هي فدارهم وروينة السبوع مكتسالييش وكيف العادة كتسلت كنزة متخلي مها واخلة اما حتى اسماء مريضة تاحد مكيخليها تحرك من عماتها غير هوما قاضين الغراض...

داز اسبوع بعد السبوع وكنزة هاد الاسبوع كان عندها بحال الجنة مع الكونط ديالها للي كيبان ليها طلع طلعة وحححدة...خاصة مع فيديوهات العمارية والسبوع وصور القفاطن الحراقية ناضت عندها فالتعالؤق من العرب كلهم تعجبو بتقااليد السبوع وطريقة اللباس والاكل والاحتفاال...البارطاج كثر والكونط قرب يوصل المليون وهي غتموت بالفرحة والاشهاراات ولات كتخبر وتعزل بيناتهم واثمنة منااسبة ارتاحت بيها...

واحد النهار جالسة حتى جاها شوتينك فطنجة بثمن خياالي غير سمعاتو عينيها دمعو بالفرحة نةضت كتجري عند الحاجة ضور بيها من هنا ولهيه وتطلبها تشد ليها بنتها غير نهار ساعة الحاجة شدات معاها العكس حلفات عليها ل مشات معاها....

الحاحة : والله مانمشي معااك..سيري ولا جلسي نتي حمقة نتي ؟ بقات ليك غير طنجة بغيتي باك يعلقك..

كنزة برغبة كتطلب فيها : غير نهار ا ماما غير نهار انا مزااوكة فيك ونجيب ليك اللي بغبتي...شفتي حلابة اللي عطاوني درت بيها اشهار وعطيتها ليك هاد المرة نشري لييك ديك العمارة ديال الكيسان اللي عجباتك والله حتى ناخدها ليك...

الحاجة ملاهية مع شغلها فالكوزينة: واش نتي حمقة ولا مالكي ختك علااين تولد انا مضاربة غير مع توجاد ليها ماحينتي للرفيسة ماحينتي ل لباسها ماحينتي فنموت بالخلعة عليهاا والولادة كي غدوز وهي ناعندها صحة بقات ليا غير طنجة..

كنزة : وا بتمنالاااف درهم اماما...مية وستيين الف مغنضيعهاش عفااك...

عياات تطلب وترغب و والو واش الحاجة لانت ليها فالاخر مشات عند اسماء شاداها البكية جلسات تشكي عليها حتى عيات واسماء بالها ولا غي مع الولادة...بدات كتدخل معاها الخلعة والوجع لي كيزورها خلاص الطبيبة ملي قالت ليها تقدري تولدي طبيعي زادت كملت عليها...زادت فشوشها وشكواهاا كتغوت غير برجليها الللي تنفخو وقصعة شعرها كتعطيها الحريق ومع كثرة الاهتمام اللي لاقية من محمد والحاجة وعائلتها غير مكتزيد ف فشوشها..

مشات كنزة لدارها والبكية فطرف عينيها..ضحاب الشوتينك كيعطيو عليها وهي مكتجاوبهمش لحد الان ماعرافش باش غتجاوبهم ش تمشي ولا لا....تلقات زياد فالطلعة ديال الدروج سلمات عليه وهو

شافها ماشي تالهييه وعينيها حمرين بالدموع...عقد حجباانو وسولها باهتماام وحتى هي كانت على سبة عاودت ليه كلشي حتى كيبغيو ينزلو دموعها وكتحبسهم...

زياد : صعيبة عندك القضية شوية..مايمكنش تخليها عند شي حد وهي صغيرة...

كنزة حركات راسها بضيق : لاا مانقدرش صغييرة مسكينة كل مرة خاصني نكون حداها كتجوع دغيا....قلت لماما تمشي معايا غير تشدها ليا مانقدرش نعطيها لاي واحد يشدها مكنعرفوهش ولكن مامساليااش مابغاتش تمشي..

زياد :هاد اي واحد داخل فيها ختى انا هه ؟

كنزة : لا حاشة ماشي نتا زعما غير البراني ماكنقدرش نعطيها لاي وااحد نتا راه كنعرفك هه

زياد : امتى عندك هادشي ؟

كنزة : بعد غدا علاش ؟

زياد : حتى انا مسافر عندي واحد تخوا جوغ فتطوان شحال عنظك نتي تما ؟

كنزة : انا غير غنمشي صباح ونجي عشية...غنمشي فالبراق ماغنديش طوموبيل مابغيتش نتعطل ومابغتيش نصوق ونتلهى عليها..

زياد : فهمتك دابا بغيتي غير اللي يشدها ليك تما لداخل ..

كنزة : ااه كتكون دنيا مخلطة وشي داخل شي خارج انا غنتلهى مع الكاميرة ولا معاها هي....مانقدرش نخليها بوحدهاا ولا مع شي حد...

تنهدات كنزة بضييق مابغاتش تضيع هاد العرض اللي جانها من الجنة والناس بثمن زويين بزااف...كتحاول تخظم فاي حاجة ودير اي حاجة تدخل منهاا شي راس مال ولا شي مصروف وتخدم فاي حاجة لانو السبوع خدا منها بزااف دبال الفلوس كتحاول ترجع لي كانت جامعة على حسابها وحساب بنتها غير باش تصرف عليها وتهزها وكنزة ماشي من النوع اللي كتعول على فلوس النفقة كتبان ليها قليلة وديما كتبغي بالزاايد...باغة تبين لواليديها باي طريقة انها قادرة ب بنتها ماشي الطلاق اللي غيهرس ضهرها ويخلييها محتاجة حيت هي من للاول مكانتش معولة على عماد يعيشها ويحقق احلامها...

زياد :نديرو واحد البلان انا حيت خاصني نمشي غدا...نمشي تما ونتي حتى تجي عيطي ليا نجي عندك لطنجة ياك دوزي داكشي ديالك فراحتك ونرجعو بجوج...

كنزة حلات عينيها بعدن تصدييق : واش بصح ؟؟ غادي نغدبك معايا....

زياد :ماكين حتى عداب غنكون تما ديجا شي ساعة ديال طريق عندك...

كنزة برااحة : ماعرفت مانقول لييك شكرا بزاااف. .شكراا والله...

فرحاات حتى بانت فعينيها عيات تشكر فيه حتى حشماتو بقى غير كيضحك وطلع لدارو مكان لا مسافر لا والو غير حتى شافها غادا ...وهي مشات لدارها وكلام اسماء ماجاش كاع فبالها وتوصيتها مشات فخبر كان...بانت ليها فتمتالاف درهم مامسوقة لا لزياد يضسار عليها لا باشمن صفة غيمشي معاعا...المهم داك الفلوس تشدهم ولاباس...ضربات الطم وماقالت لمها والوو حتى جا موعد السفر وهنا تزاد عليها هم ااخر...كيف تافقت هي وعماد فالمحكمة البنت غيشوفها من ويكاند لويكاند ولكن ايلا كانت غتسافر بيها خاصها تعلمو سواء داخل البلاد او خارجو...

جلسات فالصالة شادة تيليفون كتدرب كيفاش غتدوي معاه حتى شجعات راسها عاد صونات ليه...لحضات وهو يقطع عليها بحال ديما وعاود صونى من عندو...

عماد : وي كنزة اش خبارك بخير...

كتزة : الحمد الله نتا لخير كيف بقى عمي الحاج شوية ؟

تنههد من عممق صدروو حتى تسمعت لعندها وهي فهماتو نيشان كيف بقى بلاما يقةلها غير من صوتو الخاافت ونبرتو اللي مكانتش هي هاديك...

عماد : شوية الحمد الله..

كنزة : الله يشافيه ويكون معااه ماتتشائموش خليوكم قويين حداه ماغيبغيش يشوفكم هكاك الله يجيب ليه الشفااء ...(تنهدات فصمت وكملت ) بغيت غير نعلمك انا غادي نسافر غدا انشاء الله وغندي معايا حل(سدات عينيها كلنت غتقول ليه حلا كيف كيقول ليها هو)...أيور...غادين غير لطنجة...

عماد بصراامة : معامن ؟

كتزة : كيفاش معامن ؟ اللي كيهمك هاني قلتو ليك غنمشي وغندي معايا بنتي معامن علاش باغي تعرف...

عماد : من حقي تعرف بنتي نسول معامن كتجي ومعامن كتمشي...سينو كنتي مشغولة ضروري تمشي نجي ناخدها حتى ترجعي...

كنزة :علاش كتغوت عليا مافهمتش ؟ اشمن مشكل عنندك معامن غنمشي...

عماد : ماكين حتى مشكل...معامن غتمشي...

كنزة : صافي حتى نشوف ايلا كنت غنمشي راه غنصوني ليك...بسلامة..

قطعات معاه ولاحت تيليفوون معصببة وتاالفة ودايخة غير بوحدها ندمات كاع اللي علماتو وهي غادا غير نهار وااحد كون غير سكتات ومشات فصمت ورجعات...

علمات ناس ديال الشوتينك فالايمايل بلي راه غتجي واخا ماعارفاش كيفاش مهم تضمن ديك تمنالاف درهم وناضت كتكمل شغلهاا وفاش كتفكر المحل كتسهى وتنننهد عليه باقي مسدود من داك النهار ماعارفاش اشنو غيوقع فيه...تلاهاو على السبوع لا محمد لا الحاج لا باها قالو شي حاجة عليه ولا على رقية...فعز سهوتها صونى تيليفونها وردات عليه لقاتها اسماء وهي تجاوبها...

اسماء : يلاه كنتسناوك للغدا ماغتجبيش...

كنزة : هانا جاية غير نفيق بنتي ونجي..

اسماء : ويلاه خلاص..راه دويت مع ماما غدا غتمشي معاك جيبي حوايجك اللي غتدي معاك هنا...

كنزة : دخللت عليك بالله قالت ليك ااه قالتها هكا...

اسماء : صافي راه دويت معاها غير اجي...راه كنقول ليك غير كتخربقي بنتك صغييرة ماشي ديال سفر خليها غير حتى تشد راسها شوية...مهم غير اجي داباا..

كنزة : ونتي شكون غيلقى معااك ؟

اسماء :انا غادا مع محمد للطبيبة كونطرول وغنبقى معاه حتى تجيو...راك غير كتعكسي معاها....ماما عارفاني غنمشي معاه وغتبقى غير جالسة فالدار بوحدها كنقول ليك شحال من مرة خليهت حتى تكون ترونكيل ودوي معاها و نتي كتشوفيها مععصبة وكتبقاي لاصقة فيها..

كنزة : صافي هانا جااية ههه

كيف كانت مخططة هي وزياد مشى لتطوان قبل منها بنهاار وهي مشات لدارهم حتى للغد ليه...تسناو حتى جا محمد دا اسماء معاه هي وتسنيم عاد شدو الطريق للبراق....ماعودتش اتااصلت بعماد ولا علمااتو دارتها فايد الله ومشاات وهي كلها متوترة ومرتاابكة وعينيها على تيليفونهاا خايفة الخبار تصولو ولا يصوني ليها ويلاها شادة الطرييق وهوما على اتفااق ان أيور ماتحرك مع شي حد فيهم حتى تكون فخباار الثااني....ساعة دالوقت حتى كانو فطنجة ماحسشو كاع بالطرييق...مشاو للدار اللي غيصورو فيها الشوتينك كانت بحال الريااض وحيت كنزة وصلت قبل الوقت لقاتهم مزال ماوجدو حتى حاجة يلاه بداو كيجيو طقم التحصضرات..عطاوها واحد البيت خلات الحاجة كتستاراح فيه شادة بنتها وخرجات كتصوني على زيااد...علماتو باللي وصلات وبلي معاها الحاجة بلاما يجي لعندها وشكرااتو عاد رجعت دخلاات...

ساعات طوييلة وهي معااهم قادوها وزينزها بلبااس بلدي كيف بغاو يشزفوها.. حيت هاد الاشهار جاها بعدما لاحت فيديوهات وصور السبووع فوق العمارية وبلبيسات متنوعيين حتى هوما بغاوها دير ليهم اشهار للقفاطن ديالهم...تصوراات وعاودت فجمبيع الوضعيات كل مرة كتمشي تشوف بنتها تطمن عليها مع الحاجة حتى كملاات عاد لبسات حوايجها باش تمشي ودخلات عند الحاجة لقاتها كتبدل لأيور والغداء باغي محطوط فوق الطبلة عبارة عن سوندويتشات...

كنزة : ماما ناكليتي واالو ..ماتغديتيش ؟

الحاجة كالع ليها الدم : ساليتي يلااه نمشيو فحالنا..حتيبين ليا انا هاد الكومير هكاك لاوي اش فيه مايتكال..خانز بالحار ياربي تسمح ليا حاشة نعمة الله...

كنزة : كان عليك تقوليها ليا نجيب ليك شي حاجة اخرى...شنو بغيتي نمشي نجيب ليك تغداي عاد نمشيوو...

الحاجة : اللي كان من غير هادشي...

كنزة : أيور ساكتة ليك انا نمشي نوصي ولا نجيب ليك شي حاجة دغيا مالكي مقلقة...

باستها وعنقاتها كتنهد عارفاها جاية غير بزز وناضت هي دغيا خرجات كتجبد فبزطامها كانو ليريسطو مستفيين قدام داك الرياض البلدي شافتهم فالدخلة ملي يلاه جاو..قصدات واحد مبااشرة وصااتو يوجد ليها طاجين وداكشي اللي كيكون معاه ومشات كتقلب فين تجلس تسنى حتى لواحد اللحظة وهي تحس بشي حد جر دراعها من لوور تلفتاات مفزووعة عاقدة حجبانها غير شافتو قفزز قلبهاا حتى شهقات مخرجة فيه عينيها...

كنزة : عماد !! (بصدمة كترمش فييه ماعرفات ماتقول حسات براسها كتحلم ) ا ااش كدير هناا ؟؟

عماد عاقد حجبانو : فين بنتك ؟

كنزة رمشات فيه بتووتر صدمها بسؤالو : بنتي ...ر ر راه مع ماما ف لهيه قلت ليك غنسافر بيها خليتها غير مع ماما(قاطعها)

عماد : علاش اتافقنا ؟ قلتي لياا غتسافري بيها شنو قلت ليك ؟

كنزة : جيت مع ماماا ماشي البرااني راه معاها غير ليه ف فديك الدار.... واصلا ماشي مسافرين غير عندي غراض هنا وغنرجعو ليوم راه ماشي مسافرة بيها و واصلا قلتها ليك ماجييتش بلا خبارك...

عماد : قلتي ليا غنعاود نصوني ليك ايلا كنت غنمشي !!

كنزة :راه كنت معولة نسافر ولكن دابا لا .غير غنقضي غراضي وغنرجع واصلا معايا ياك تافقنا ايلا مكانتش غتكون معايا تكون مع ماما وماما...وهي جات معاياا شنو فيها ؟

عماد باغي غير يشدها : كيفاش ماماك انا هو ماماك ؟ عندك غرااض خليها ليا هادشي لي كنعرف ...

كنزة : راه غير نهار اعماد..

عماد : ماشي من حقك تديها بلا خبااري واخا تكون تا ساعة (جبد تيليفونو بغى يشعلو وهي تخطفو لييه بخوف ماعرفاتو لمن باغي يعيط شدتها البكية)

كنزة : راه بنتي وعلمتك ماخطفتهااش و واصلا ماشي من حقك تتبعني..علاش تابعني حتى لهناا صوني ليا... ولا باغي تحصلني تابعني لحد الدنيااا باغي غير السبة...

عماد خدا تيليفونوو كيشوف فعينيها كيضورو بخوف وهو يجرها : اجي جلسي..جلسي تماا..

جراات الكرسي جلساات تالف كتشوف مع جناابهاا وقلبهاا غيخرج من صدرهاا طيح ليها الايد مع الرجل بشوفااتو وكلامو عارفاه باغي غير منين يشدها...شي افكار وشي سيناريوهات دالقصص لي كتصادف كيضورو فباالها كيبغييو يحمقوها...خلاص ملي بان ليها جبد تيليفون كيدوي مع شي حد وكيقول ليه دخل عندي شدااتها البكية جاب ليها بالها بحالا غيدخل شي حد ويشهدو عليها بأنها خدات البنت بلا خباارو ويقدرو كاع ياخدوها ليها بخطرة ويحمقهاا ويخليها تابعاه كترغبو.....حتى بانت ليها من الدخلة ديال داك الريسطو داخلة واحد البنت شهبة بسروال وشوميز قصييرة وصاك فايديها طالقة شعرها ونضاضر شادين نص فوجهها وطالون من بعيد كيتسمع..

وكنزة كطلع وتهبط فيها وهي تقرب عندو كتبلع فريقها مفزووعة....

كنزة : شكون هاادي ؟ راه قلت ليك غير مع ماما يلاه ندييك عندهااا..شكون هادي علاش جبتيها...

سكت ماردش عليهاا حتى وصلت عندهم ديك البنت حرك ليها راسو جلسات قداامهم وحيدت النضااضر وكنزة كتشوف فيه وفيها واحد اللحضة وهي تزكي فيها الشوفة وغير عرقاتها البنت لي شافت فالصور وهي تدفع الكرسي ونااضت مخطوووفة وهو يوقف معاها حبسها...

كنزة : طللق مني ماااتقصينيش ااش بااغي عندي تااني تابعني تاالهنا وجاايب ليا هاد المسسخة( ضارت ليها مغددة شيراات عليهاا بالبزطام باغة تاكلها وهو شدها) الكلللبة بوجهك حمر جاالسة قدامي (غوتات فوجهو حتى طرطق وجهها بالحمورية) طلق منيييي..

عماد : جلسي جوج دقااق غير ندوي معااك وسيري.. جلسي

كنزة قمشااتو بضفاارها كتغلي : طللق منيي صاافي داكشي لي بقى تجمعني بيها على طبلة وحداا طلق منيي والاا والله حتى نديير ليك الشوهة قدام عبااد الله

عماد غووت كثر منها حتى كلشي تلفت فيهم : واااشوهني... نتشوه اناا وياااك جلسي...جلسي تمااا وحق الرب لامشتييي تااندويو جلسي...

جمعاات اللكمة فايديها ودفعااتو من صدرو بجهههد مغددة كتلغي مالااقية لييه جهد وجرات الكرسي بنترة جلسات قلبها كيترعد والبكية واحلة فحلقها...

كنزة : حرام علييك راك عدبتينيتي فخاااطري علاش مجلسينيي قدامها اش باغيها تسمع ليا غتقول ليا ماخنتيتنييش صافي تقت بيك اللي فات ماات نتا حر دير اللي بغيتي..

شد ليها ايديها كيترعدو ولاخرا كتشوف فيه حاني راسو عندهاا بهمس كيدوي فودنييها وهي كتنتر منوو ...

عماد : سمعيها اش غتقول غير سمعيها وسيري برب العالي مااترجعي تشوفي وجهي مزاال غير سمعي

كنزة : ااش غتقول شنو واش انا مساالية نسمع لهااد الحمارة مخلية بنتي بوحدها خليني نمشي...

عماد : واسمعي خليها تدوي وغتمشي سمعيها..

ناراات منو ايديها وهو وقلبت وجها مسحت جفن عيونها من الدمعة لي نزلات ورجعات شافت فديك البنت هازة حجباانها باشمئزاااز ماحاملاش حتى الشوفة فيها...

_شوفي احبيبة عارفة عماد قال ليك شي حاجة تيقي بيا ديك الهضرة هي اللي كاينة..

كنزة باستهزااء ضحكات مفقوصة : يعني مضلومين بجوجكم...مسااكن طحتو فالغلط...

بتأكيد حرك راسها: فعلا هو غلط ولكن ماشي بأرادتو... بصح ولكن انا كنت قاصدة..انا من لول كانت نيتي نطيح فداك الغلط...

هزات فيها كنزة حجباانها وهي تنهدداات وحلات صاكها جبدات منو تيليفونها كتخربق فييه شوية هي تطلق واحد الفوكال ومداتو لكنزة مابغاتش تشدو من عندها وحطاتو ليها قدامهاا كتسمع للمكالمة الصوتية اللي دازت بين البنت وبين صوت الراجل...كانت مكالمة متوترة بيناتهم وكلامهم مواضحش بسبب صوت الموسيقى اللي فخلفية المكالمة بحالا كانو فشي حفلة ولا وسط شي صدااع كيتسمع غير الضحك وصوت المزسيقى مجههد توقعاتو يكون فالبار نييت اللي كانو فيه...تدهشاات ومابينااتش وهي كتسمع فيه كيقول ليها بكل جرأة و وقاااحة باش تقرب لعمااد ودير شي حركة يصورووه بيها وديك البنت كتطلب منو يخليها تلقى الوقت المنااسب وخاصة الوقت اللي يشرب فيه باش تعرف كيفاش تقرب...كانت المكالمة طويلة سمعوها كاملة من اولها تا لأخرها حتى طفات البنت تيليفون وشافت فيها...

_جاني من الاحسن تسمعي المكالمة بودنييك باش تعرفي شنو وقع..الهضرة ماكتقنعش راني بنت بحالي بحاالك حاسة بيك...

كنزة شافت فعماد بدون مبالااة بيها : مافهمتش...مافهمتش هادي اااش كتقوول...اللي فهمتو هي مسخة دياال الخلااا قليلة الحيى تلاحت عليك ونتا تلاقيتيها بالاحضاان لقاتك واجد على سبة...واخا علاش غتلاح عليك اشنو عندك ماعندش واحد خور ؟

_واش عرفتي هذا اللي كنت كندوي معاه عاد دابا فلابيل ؟

كنزة : لا...

شافت ليها ديك البنت مطرطقة غينيها باستغراااب وقالت كضحك وتشوف فيه بحالا قالت شي شخصية معروفة...

_ههه واش من نيتك ماعرفتيهش ؟

كنزة بعدات شعرها لوور هازة فيها حجباانها مقندشة.. : شوفي انا ماشي بحاالك ماكندويش وماكنخدمش مع هاد الاشكااال ..بلاما ديري فيها مصدومة راه باينة ماشي بحالك...

جمعت ديك البنت الضحكة محروجة...

_هذاا **** مشهور وكلشي كيعرفو...هو اللي كان دار البوز داك العام كان جنب الوزير فالقنصلية الافريقية اللي تفتحت فالعيون...وهو نيت مساعد ديال السي البرناوي هو اللي مول هاد الروينة كاملة....حيت بكل بساطة ايلا بغى يطلع كرااد فلوبوسط ديالو خاص السي البرناوي ينزل وباش ينزل ماشي ساهلة...البوسط ديالو فالدولة حساس حيت هو المراية ديال المغرب فالدول التانية اي غلط واي فضيحة غينزل منها وهو غيطلع فبلاصتو باش يرومبلاصيه....

كنزة :كيفاش هو المراية ديال المغرب...(شافت فعمااد مدهووشة اخر واحد توقع منو يكون كيمثل البلاد) هذا ؟؟؟

شااف فيها وديك البنت كحاات وكملاات شادة ضخكة جاها عماد فشكل قدامها كيفاش كيكون عادة وكيفاش دابا قدام مرتو...ماكدبش اللي قال الحب كيمرمد فعلاا شافتو قدامها مرمد...

_دوك ليفوطو كاملين لي شفتي بصح حتى حاجة مامزورة ولا غالطة..عماد كتعرفو سنيين هادي واش ربعة سنيين ولا خمسة ولا كثر كنا حتى كليكة...كنتجمعو كنشطحو كنضحكو مع بعضيااتنا هذا هو سبب بداك الصور اللي شفتي فالطوموبيل هاديك يمكن فألفين وسبعطاش ماعقلتش...مهن من بعد تفارقنا كل واحد واشنو داار مابقيناش كنتلاقاو ..وكيف قلت ليك عماد خدمتو ماشي ديال واحد غيتجمجع معانا فالبلايص اللي كنا كنتطمعو فيهم..دونك ملي هو مشى صافي حتى مابقيناش كنتجمعو...حتى لداك النهار كنا تلاقينا نهار قبل منو تلاقيتو غير فالقنصلية هو مكاانش كاع فبالو ممكن يتلاقاني تماا حيت عارف انا ماعنديش علااقة بيها...ولكن انا كيف قلت ليك كنت قاصدة..وكنت عارفاه غيكون تما....سولني على دراري وشنو ةخباارنا وتافقت معاه باس نعاودو نسهرو شي نهار غير نتفكرو الايام لي دوزنا مجموعيين...و..وهادشي اللي وقع...

تنهداات كتشوف فنضرات كنزة الهاادئين جاتها بحالا كتصنا لشي قصة حسساتها بالارتباك..

_انا مابيني وبين عماد واالو...ماكنقولش هادشي حيت قدامو هو ولكن بصح هادشي اللي كاين... را ماشي سنيين وهو مدكيعرفني وغيخلي حتى يتزوج بيك ويخونك معايا ماشي لوجيك. .باش نقرب ليه كاانت صعييبة علياا ماشي من النوع لي تتوقعي ردة فعلو كنفكر وماعارفاش كيفاش غيرد علياا كنت كنتسنى الفرصة المنااسبة فاش شفتو شرب ومابقااش عاقل على رااسو اش كيوقع وانا عارفااه خاصة بعدما خدم مستحييل يشرب فمكان عمومي بحال ديك البلاصة عرفتو بصح ماعاقلش على رااسو..و..وفاش طليت عليه ولقيتو كيشوف صورتك كنت متأخدة عندو شي مشكل كبييير...قلت هادي هي الفرصة...سمحي ليا ايلا خلقت ليكم شي مشكل..ولكن تيقي بيااا فبعض المراات راه حتى الخوت كيبيعو خوتهم فسبييل الفلوس...شحال من وااحد غدر صاحبو وخوه غير بسبب الفلوس..الانسان ملب كيكون محتاج ماكيشوفش لي قدامو ولي ورااه كتبان ليه غير فديك الفلوس خاصو ياخدهم يا دبحة ياا ربحة...وانا واخا خدييتهم طحت نيت فدبحة...

سكتات كتررمش فكنزة كتشوف فيها بهدووء بحالا مزال ماتنقعاات ماعرفااتش شنو تزييد تقول وهادشي اللي كاين ماعندها ماتزييد من فوقو وهو يغمزها عمااد باش تنوض تمشي..

كهزة : واخا اختي وملي نتوندنا دايرين عاد الحاال على المنصب ديالوو ياااك وغدرتي (شافت فييه غتحمتق بالغييرة والفقصة) صااحبك ديال المعررفة دسنييين...ياك هاد التصاور غتفصحوه فخدمتو انا لاش مسيفطااهم لياا..ياك غير صدييقك ماشي شي حاجة اخرى ؟

_ماشي انا اللي سيفطتهم ليك... هه تيقي ولا لاا المساعد ديالو اللي سيفطهم ليك وعندي باش نتيت لييك...

ربعات كنزة ايديها بدههشة كتشوف فيه وفييها وسكتاات وديك البنت فهماتها بلي بغاتها تبت ليها...

_واحد النهار وصلك ميساج ديال واحد لاماغك دلي بيبي..باش ديري معاهم بيب وقلتي ليهم كو مزال ماولدتي وتقدري من بعد تصوريهم معاهم..تصوريه ب بالبيبي ديالك ؟

كتزة :ماعقلتش كندوي مع بزاااف..ماعقلتش عليهم...

عماد : كنتي عاد رجعتي لكونط دياالك وبديتي كتروجي فيه...

كنزة : وحدة اللي كنعرف سميتها ماعقلتش بيبي شي حاجة...وبدا كيطلب مني شي معلومات فشكل جاب ليا الشك(قاكعتها)

_عطيتيهم نمرتك واخا عارفة فالبدية ديال بيب ماكتعامليش بالنمرة والمعلومات الشخصية دياك الخدمة كتكون فليمايل لا غير...

كنزة : بصح...وكيفاش عرفني انا مرااتو بالضبط وانا عمري ماشفتو اصلا ولا شفت خدمتهم...

_كتسوليني على واحد كون مارك على قدها غيير باش يجيب ليزانفو ديالك والرقم ديالك ومغيعرفكش شكون...

سكتات كنزة كضور فعينيهاا مارجعت قالت واالو وديك البنت شافت فعمااد وهو يغمزها باش تمشي...وغير ناضت وهي ضور عندو كنزة مربعة ايديها..

كتزة : من بععد ؟ وااش درتي هادي محامية عليك...هاد الهضرة كفهاا اللي قاالت اناا ماشي شغلي فيها هي..انا كنشوفك نتا اللي خنتيني هي تنوي ولا تجلس انا كنشوفك نتا اعماد ...

عماد قرب عندها شد ايديها وهي تنترهاا : غللطت وندمت شووف حالتي كيديرا ندمت على دييك اللليلة لوكان قدرت نعطي لي قدامي ولي ورايا غير نرجع ليهاا...

كنزة : ماغتقدر ترجع ليها واللي وقع وقع....خليني نشمي دابا( وقفات)

عماد شدهاا وقفهاا : ونتي دوزتي عليا القليييل صافي نسيتي كلشي (جرها برفق رجعت جلسات)

كنزة : شنو درت ليك اناا ؟ واش تاني غتمن عليا بالاماراات ...

عماد : شنو معناها واحد كيقول ليا مرتك تلااحت عليا ؟ دوزت العدااب فديك البلااد ورااجع عندك باش نلقااك مصرفقة واحد قدام دااركم ونتي كتبكي وهو باغي يشدك وملي ندوي معاه كيقول لياا تلاحت علياا وملي ندوي معاك نتي تقولي لياا ماشي شغلك...

كنزة بارتبااك جرات منو ايديها : ونتا اللي ضربتيني بسبابو...

عناد : شكون جبد ؟؟ شكون باغي صداع انا ولا نتي ؟ شكون اللي رجعتها لدارهم ترتاح حتى نجي عندهاا خلات راحتها وخرجات ليا مع ولدت عمتها..خارجة كتسارااي معاه عايشة العزوبة مع رااسك ضربتي عليا انا بخطرة بحالا مكااينش معاك ؟

كنزة : مكانتش فنيتي حتى حاجة انا قلت ولد عمتي عاادي ندوي انا ويااه مكانش كيسحاابني البنت ايلا تزوجت خاصها تضرب على الرحال بخطرة...

عماد : خاصها تضرب عليهم حيت اللي مزوجة بيه ماشي شمااتة ماشي كتشوفني بالغووز كترااشقي وضحكي مع ولد عمتك ويصفق ليك ويقوليك براافو...كنعرف ايلا خدييتك مراة ليا كيبقاو جوج دالرطاال فحياتك من غير خوك وباك لاا غير...ماالكي معااه ؟

كنزة بعدات شعرها كتلعب برموشها : واالو ماتفاهناش انا ويااه بظا كيقول ليا شي هضرة ماعجباتنييش حسيت بيه ظاصافي معايا ومنا غنداابزو وانا نزل ونخلييه وتبعني بغى يدوي معايا بزز ماحسيت براسي حتى صرفقتو هادشي اللي كاين..

عماد : ماغيكونش صافي معاك هادشي فيها الشكل..واش انا مطلق ووحدة مزوجة وخارجة كتساراا وكضحك معاياا وكتجلس معاياا حتى لنص ليل علاش كتقلب ؟ ايلا عطيتي الفرصة لشي حد ماتلوميهش من بعد..نتي اللي عشتي الحرية ديالك بطريقة غاالطة...

كنزة : نتا اصلا من لول ماكنتيذ كتيق بياا باش داير ليا واحد تابعني...

عماد : را غنفوت فيك شي ضربة واش اللي عشناه فبلاد العرب مزال يخليني نتيق فالبراني يضور بيك...درتو على مصلاحتك ماشي لياا...

كنزة زفراات بقووة وتعب عياات وملات من هاد الصداع: شنو بغيتي داباا اعمااد رااك محنتيني فخااطري والله العضيم مابقيت قادرة على هادشي عييت بغبيت غير الراااحة كنقلب عليها بالرييق النااشف ومالقيتهااش اشنو بغيتيي عندي علاش تابعني حتى لهنا

عماد :حيت هناا ماكينش لا السي عبد المتقي لاا غيرو...(شد ايديهاا بأسى) سمحي ليااا عمرهاا تعاود تيقي بيا غلطت وي كنعتاارف بيها غلطت معااك وندددمت اقسم بالرب العضييم ماتعاااود تيقي بياا اكنزة...اللي بغيتيها نديرها معااك باش نبقااو هكاا مانقبلهاااش...واخا نعرف نبقى عمري كلو تابعك الله يجعلني مانبقى ساوي حتى بصلة فسوق الرجااال....(قرب عندهاا بلههفة) انا باغييك...

يتبع...